(༡)དཔལ་ཡེ་ཤེས་ཀྱི་མགོན་པོ་བེར་ནག་ཅན་གྱི་དགྲ་ཆོས་ཀྱི་མན་ངག་བག་ལེན་དུ་དྲིལ་བ་བཞུགས་སོ། །
(༢)། ན་མོ་མ་ཧཱ་ཀཱ་ལ་ཡ། ཡེ་ཤེས་དང་ལས་དང་འཇིག་རྟེན་ལས་གྲུབ་པའི་ཆོས་སྐྱོང་བའི་སྲུང་མ་རྣམས་ལ་གུས་པས་ཕྱག་འཚལ་ལོ། འདིར་རྣལ་འབྱོར་བ་གང་ཞིག་གློ་བུར་གྱི་བར་ཆད་ལྡངས་པར་གྱུར་བ་དེའི་ཚེ་ཆོས་སྐྱོང་རྣམས་དྲག་པོའི་ལས་ལ་བསྐུལ་བར་བྱ་བ་ནི་ཆོས་ཀྱི་རྗེ་རང་བྱུང་བའི་ཞལ་སྔ་ནས་རིམ་པར་རིན་པོ་ཆེ་མཚུར་ཕུ་བ་ལ་བརྒྱུད་པའི་ཇག་པ་རྟ་ཐོག་གི་དགྲ་ཆོས་ཞེས་བྱ་བའི་ལག་ལེན་གྱི་རིམ་པ་འདི་ལྟར་བྱ་སྟེ། གནམས་གྲུ་གསུམ་ལ་སོགས་པ་དྲག་པོའི་གནས་སུ་སྟེགས་ཀྱི་ཁར་ཇི་ལྟར་འོས་པའི་བང་རིམ་སུམ་བརྩེགས། དེའི་སྟེང་དུ་གཏོར་ཞལ་རྔམས་ཤིང་བརྗིད་པ་བཤམ། མཐར་དམར་གཏོར་ཟུར་གསུམ་བཅུ་ས་བསྐོར། དེའི་མཐར་ཟན་ནག་གི་གཡག་ལུག་ར་གསུམ། སྟག གཟིག གུང་། དོམ།
(༣)དྲེད། ཅེ་སྤྱང་། ཤ་བ། རྟ། རྔ་མོ། དྲེའུ། སེང་གེ། གླང་ཆེན། བྱ་ནག ཁྱི་ནག །ནམ་མཁའ་ལྡིང་སོགས་པར་སྣང་དུ་རྒྱུས་དང་། ས་ལ་གནས་པའི་གཟུགས་བརྙན་གང་འབྱོར་བཙུགས། དེའི་མཐར་རྩང་ཕུར་དམང་ནག་དྲག་པོའི་ཤིང་ལ་བཅོས་པ། ཕྱག་ལེན་ལྟར་སྲིན་མོ་འགྲོས་སུ་བཙུགས། གཏོར་ཞལ་ལ་ལེགས་ལྡན་གྱི་སྐུ་དང་དར་ནག་གི་གདུགས། ཙིཏྟ་ཐུགས་ཀྱི་ནམ་མཁའ་འམ་ཀུན་ཁྱབ་ཀྱི་ནམ་མཁའ་ནག་པོས་མཛེས་པར་བརྒྱན། གཏོར་མ་བཅུ་ལ་སྲས་མཆོག་བཅུའི་སྐུ་དང་། ནམ་མཁའ་ནག་པོ་གཟུག །སྤྲོན་འཁོར་རྣམས་ཀྱི་ཙཀ་ལི་ཡང་ཕོ་བྲང་བཞིན་མཐོང་བ་བརྒྱུད་པ་ལྟར་བཤམ། རིན་པོ་ཆེ་དང་དར་ཟབ་སྟག་རས་སོགས་ཀྱིས་བརྒྱན། མཚོན་ཆ་སྣ་ཚོགས་དང་མདའ་བཀྲ་འཕང་བཀྲ་སོགས་སྤྱི་དང་མཐུན་པར་
(༤)བཙུགས། རྩང་ཕུར་གྱི་འདབས་སུ་སྣལ་མ་འབྱུང་དགོ་ཟློག་ཏུ་དགོད་དེ། ཞབས་ནས་རིམ་བཞིན་སེར་པོ་དཀར་པོ་དམར་པོ་ནག་པོ་ལྗང་གུ་རྣམས་རིམ་པས་བརྩེགས་ལ་ཟེ། དེའི་མཐར་ཤ་ཁྲག་དང་ལིངྒ་ལ་སོགས་པ་དུར་ཁྲོད་ཀྱི་བཀོད་པ་ཇི་ལྟ་བས་འཇིགས་འཇིགས་ལྟར་བརྒྱན། གོང་དུ་བླ་མ་ཡི་དམ་གྱི་མཆོད་གཏོར་དང་། མདུན་དུ་ལས་གཏོར་རྣམས་ཆོག་རྒྱས་བསྡུས་དང་བསྟུན་ནས་གཞུང་བཞིན་བཤམ། དེ་ནི་བཅའ་ཐབས་སོ། །དེ་ལྟར་གྲུབ་ནས་ཡི་དམ་གྱི་བདག་སྐྱེད་དང་། གཏོར་མ་ལ་དམིགས་པའི་ཆོས་སྐྱེང་གི་མདུན་སྐྱེད་སྤྱན་འདྲེན་བཞུགས་གསོལ་དམ་བཞག་ཕྱག་འཚལ་མཆོད་འབུལ་གཏོར་བ་སྔོ་བསྟོད་པ་བསྐང་བ་རྣམས་སྔོན་དུ་སོང་བས། བསྙེན་པ་ལེགས་པར་བྱས་ནས། ཞི་བའི་མདོས་འབུལ་བར་འདོད་ན། བྱིན་གྱིས་བརླབ་པ་ནི། བསངས་སྤྱངས། སྟོང་པའི་ངང་ལས་རླུང་གི་དཀྱིལ་འཁོར་རྡོ་རྗེ་རྒྱ་གྲམ། མེ་ཡི་དཀྱིལ་འཁོར་གྲུ་གསུམ་འབར་བ། མཐའ་དབུས་མེད་པ་ཁྲག་གི་རྒྱ་མཚོ། ཀུན་ལ་ཁྱབ་པ་ཞིང་གི་ས་གཞི། དེའི་སྟེང་དུ་མདོས་གཞི་རིན་པོ་ཆེ་སྣ་ཚོགས་ལས་གྲུབ་པ། དེའི་དབུས་སུ་རིའི་རྒྱལ་པོ་རི་རབ། ཤར་ཤེལ། ལྷོ་བཻཌཱུརྱ། ནུ་བ་པདྨ་རཱ་ག །བྱང་གསེར་ལས་གྲུབ་པ། དེའི་མཐར་གསེར་གྱི་རི་བདུན། རོལ་པའི་མཚོ་བདུན། གླིང་ཆེན་པོ་བདུན། དེའི་ཕྱི་རོལ་དུ་གླིང་བཞི་གླིང་ཕྲན་བརྒྱད། གླིང་གཡོག་བསམ་གྱིས་མི་ཁྱབ་པས་བསྐོར་བ། རི་རབ་ཀྱི་རྩེ་མོར་
(༥)སུམ་ཅུ་རྩ་གསུམ་གྱི་ལྷའི་ལོངས་སྤྱོད་ཀྱི་བཀོད་པ་བསམ་གྱིས་མི་ཁྱབ་པ་དང་ལྡན་ཞིང་ཕྱོགས་བཞིར་དྲི་ཟ་དང་གཤིན་རྗེ་དང་ལྟོང་ཕྱེ་དང་གནོད་སྦྱིན་རྣམས་ཀྱང་རང་རང་གི་གཟུགས་དང་ལོངས་སྤྱོད་འབྱོར་བ་ཕུན་སུམ་ཚོགས་པ་རང་རང་གིས་བསྟེན་དུ་འོས་པར་གྱུར། དེ་ལྟ་བུའི་རི་རབ་ཀྱི་བྱང་ཕྱོགས་འོག་མིན་གྱི་བྱང་ཤར་དབང་ཕྱུག་ཆེན་པོའི་གནས་དུར་ཁྲོད་ཆེན་པོ་བརྒྱད་ཀྱི་དབུས་སུ། དཔལ་ཆེན་ཡབ་ཡུམ་གྱི་ཕོ་བྲང་རྒྱུ་རིན་པོ་ཆེ་བྱེ་བ་འབུམ་ལས་གྲུབ་པ། རྨང་རྡོ་རྗེ་ཕ་ལམ་ལས་བྱས་པ། དེའི་ཕྱི་རོལ་དུ་ཐོད་པ་སྣ་ཚོགས་བརྩེགས་པའི་སྐུ་མཁར་གྲུ་བཞི་སྒོ་བཞི་རྟ་བབས་བཞི་དང་ལྡན་པ། དུར་ཁྲོད་ཀྱི་རྒྱན་སྣ་ཚོགས་ཀྱིས་བརྒྱན་པ། དེའི་མཐར་མཐིང་ནག་ལྕགས་རི་ནག་པོས་གྲུ་གསུམ་དུ་བསྐོར་བ་ལ་མཚོན་ཆ་སྣ་ཚོགས་པས་རབ་ཏུ་གཟིངས་བ། རོ་དང་རོ་ལངས་ཀེང་རུས་འབར་བ་ལ་སོགས་དུར་ཁྲོད་ཀྱི་བཀོད་པ་བསམ་གྱིས་མི་ཁྱབ་པ། སྟེང་དུ་མཐིང་ནག་དར་གྱི་གདུགས་ཕུབ་ཅིང་། ཀུན་ཁྱབ་ཀྱི་ནམ་མཁའ་འོད་དུ་འབར་བ། དེའི་ཕྱོགས་མཚམས་ཐམས་ཅད་དུ་ཕྱི་ནང་གསང་བའི་མཆོད་རྫས། བསྒྲུབ་རྫས། བརྟེན་རྫས། བསྐང་རྫས། སྤྱན་གཟིགས་དཀོར་ཆ་བསམ་གྱིས་མི་ཁྱབ་པ་སྤྲིན་གྱི་ཕུང་པོ་
(༦)གཏིབས་བལྟ་བུར་གྱུར། ཨོཾ་ཨཱཧཱུྃ། ཞེས་བྱིན་གྱིས་བརླབ་པོ། །དེ་ནས་འབུལ་བ་ནི། ཧཱུྃ། དཔལ་ཆེན་མ་ཧཱ་ཀཱ་ལ་དང་། །ཡུམ་གཅིག་ལྷ་མོ་མི་ཕམ་མ། །འཁོར་ནི་དམ་ཅན་རྒྱ་མཚེའི་ཚོགས། །དེ་རིང་སྲིད་པའི་མདོས་ལ་བྱོན། །ཞེས་པ་ནས། བླ་མེད་བདེ་ཆེན་ཐོབ་པར་མཛོད། །ཅེས་པའི་བར་དང་། ཨོཾ་མ་ཧཱ་ཀཱ་ལ་རུ་རུ་སོགས་ནས། ཀི༚་ནི་རི་ཨཱཧཱྃ། ཞེས་པའི་བར་གྱིས་འབུལ། རོལ་མོ་དང་བཅས་པས་ཞི་བའི་ཕྲིན་ལས་གཞོལ་བར་བྱའོ། །དེ་ནས་དྲག་པོའི་མདོས་ལ་མཆོད་རྫས་རྣམས་དྲག་པོའི་རྫས་སུ་བྱིན་གྱིས་བརླབ་པ་ནི། བསངས་སྦྱངས་སྔོན་དུ་འགྲོ་བས། སྟོང་པའི་ངང་ལས་མཆོད་པའི་རྫས། བརྟེན་པའི་རྫས། བསྒྲུབ་པའི་རྫས། བསྐང་བའི་རྫས། བཀྲ་ཤིས་རིན་པོ་ཆེ་རྟགས་བརྒྱད། རྒྱལ་སྲིད་སྣ་བདུན། འདོད་ཡོན་རྣམ་པ་ལྔ། གཞན་ཡང་སྤྱན་གཟིགས་འདོད་པའི་ལོངས་སྤྱོད་བསམ་གྱིས་མི་ཁྱབ་པ་རྣམས་དང་། ཁྱད་པར་བདག་ཅག་ལ་གནོད་ཅིང་འཚེ་བར་བྱེད་པའི་དགྲ་བོ་མ་ལུས་པ་བསྒྲལ་བ་ལས་བྱུང་བའི་བཟའ་བ་ཤའི་རི་བོ། བཏུང་བ་ཁྲག་གི་རྒྱ་མཚོ། རུས་པའི་གྲམ་ཁྲོད། མི་ལྤགས་ཀྱི་གཡང་གཞི། ཀེང་རུས་ཀྱི་དྲྭ་ཕྱེད། རྒྱུ་རློན་གྱི་ལྡ་ལྡི། ཞུན་ཆེན་གྱི་སྣང་གསལ། ཚིལ་ཆེན་གྱི་དུད་པ། མདོར་ན་དྲག་པོའི་དགྲ་བགེགས་པ་སྒྲལ་བ་ལས་བྱུང་བའི་མཆོད་པའི་
(༧)བྱེ་དྲག་བསམ་གྱིས་མི་ཁྱབ་པར་གྱུར། ཅེས་བྱིན་གྱིས་བརླབས། དེ་ནས་ལྷ་རྣམས་དྲག་པོའི་ལས་ལ་བསྐུལ་བ་ནི། རང་གི་ཐུགས་ཀ་ནས་འོད་ཟེར་འཕྲོས། མདུན་བསྐྱོད་ཀྱི་ལྷ་ཚོགས་ལ་ཕོག །ལྷ་རྣམས་དྲག་པོའི་ཕྲིན་ལས་ལ་བསྐུལ་བས་གཙོ་འཁོར་ཐམས་ཅད་ཤིན་ཏུ་ཁྲོས་ཤིང་རྔམས་པའི་ཆ་ལུགས་དང་ལྡན་པ། མཐའ་སྐོར་དུ་བདུད་ཀྱི་རྒྱལ་པོ་བདུད་དམག་འབུམ་དང་བཅས་པ། བཙན་གྱི་རྒྱལ་པོ་བཙན་དམག་འབུམ་དང་བཅས་པ། གཤིན་རྗེའི་རྒྱལ་པོ་གཤིན་རྗེ་འབུམ་དང་བཅས་པ། མ་མོའི་རྒྱལ་པོ་མ་མོ་འབུམ་དང་བཅས་པ། དྲི་ཟིའི་རྒྱལ་པོ་དྲི་ཟ་འབུམ་དང་བཅས་པ། སྲིན་པོའི་རྒྱལ་པོ་སྲིན་པོ་འབུམ་དང་བཅས་པ། ས་བདག་གི་རྒྱལ་པོ་ས་བདག་འབུམ་དང་བཅས་པ། ཡམ་ཤུད་དམར་པོ་འགོང་བོ་འབུམ་དང་བཅས་པ། དགེ་བསྙེན་ཆེན་པོ་གནོད་སྦྱིན་འབུམ་དང་བཅས་པ། གཞན་ཡང་སྣང་སྲིད་ཀྱི་ལྷ་འདྲེ་ལྷ་སྲིན་སྡེ་བརྒྱད་མ་ལུས་པ་ཐམས་ཅད་ཀྱང་དྲག་པོའི་རྫུ་འཕྲུལ་དང་ལྡན་པ། མགྱོགས་པའི་འོག་རྟ་ཞོན། རྣོ་བའི་མཚོན་ཆ་ཐོགས། འཇིགས་པའི་བ་དན་ཕྱར། གདུག་པའི་ངར་སྐད་སྒྲོགས་པས་དགྲ་བོ་གནོད་བྱེད་བྱད་མ་རྦད་འདྲེ་ལྷ་སྲུང་དང་བཅས་པ་ཐམས་ཅད་རྡུལ་དུ་རློག་ཅིང་དགྲ་བོའི་ཤ་ཁྲག་རུས་གསུམ་མ་ལུས་པ་ཟ་བཞིན་
(༨)པར་གྱུར། ལས་འགྲིག་དང་སྦྲེལ་ན་ཉེས་པ་བསྒོ་བ་ནས་དགུག་གཞུག་གི་བར་སྐབས་འདིར་བྱ། བསྐྱེད་རིམ་གསལ་བས་དགུག་གཞུག་བྱ་བ་ནི། ཡ་དུ་ཧཱུྃ གསུམ་གྱི་མན་ངག་སྟེ། བདག་མདུན་གྱི་ཐུགས་ཀ་ནས་ལ་ལས་གཤིན་རྗེ། ཧཱུྃ་དང་མ་ལས་མགོན་པོ་དང་མ་མོ། དུ་ལས་བདུད་ཀྱི་དམག་ཚོགས་དཔག་ཏུ་མེད་པ་འཕྲོས་ཏེ་དགྲ་བོ་ཐམས་ཅད་གར་གནས་གང་དུ་འདུག་ཀྱང་རང་དབང་མེད་པར་བཀུག་པར་གྱུར། དེ་ནས་བདེན་པའི་སྟོབས་བརྗོད་པ་ནི་འདི་སྐད་དུ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི༴ ཆོས་ཀྱི༴ དགེ་འདུན་གྱི༴ གསང་སྔགས་དང་རིགས་སྔགས་ཀྱི་རྒྱལ་པོ་ཁྲོ་བོ་རྣམས་ཀྱི༴ གཟུངས་སྔགས་དང་རིག་སྔགས་ཀྱི་རྒྱལ་མོ་ཁྲོ་མོ་རྣམས་ཀྱི༴ ཡི་དམ་རྒྱུད་སྡེ་བཞིའི་ལྷ་ཚོགས་གསང་སྔགས་ཞི་ཁྲོ་རབ་འབྱམས་ཀྱི་རྣམས༴ དམ་པ་ཆོས་སྐྱོང་བའི་སྲུང་མ་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུས་ཡིད་ལ་བརྣག་པའི་དགྲ་བོ་མིང་དང་རུས་སུ་བྲིས་པ། རུས་དང་མཚན་མར་བཅུག་པ། དམིགས་པའི་དགྲ་བོ་འདི་ཉིད། མཐོ་བ་ནམ་མཁའི་དབྱིངས་དང་། དམའ་བརྒྱ་མཚོའི་གཏིང་ཁུང་། གསལ་བ་ཉི་ཟླའི་ཐེམ་པར།
(༩)ཁུང་། གསལ་བ་ཉི་ཟླའི་ཐེམ་པར། འཐིབས་པ་སྤྲིན་གྱི་གོ་བར། རི་རབ་ཆེན་པོའི་ངོས། བྲག་གི་གཅོང་རོང་ཟབ་མོ། རྒྱ་མཚོ་ཆེན་པོའི་གླིང་རུམ། ཆུ་བོ་ཆེན་པོའི་འགྲམ་ཤེད། ས་འོག་ས་སྟེང་ས་བླ། འཛམ་གླིང་ས་ཆ་ཡུལ་གྲུ། ཁྱིམ་གྱི་སྟེང་ཤོད་པར་གསུམ། སྒོའི་ཕྱི་ནང་མཚམས་གསུམ། གར་གནས་གང་དུ་འདུག་ཀྱང་རང་དབང་མེད་པར་ལིངྒ་དང་འབྲེལ་ན། གཟུགས་བརྙན་ལིངྒ་འདི་ལ་ཅེས་དང་། མ་འབྲེལ་ན། དམར་གྱི་གཏོར་མ་འདི་ལ་ཅེས་བརྗོད་དེ། ཁུག་ཅིག །དགུག་གཞུག་བཅིང་མཉེས་བྱ། དེ་རྗེས། ཆོས་སྐྱོང་ལས་མཁན་སྣང་སྲིད་ལྷ་འདྲེའི་ཚོགས། །ཅེས་པའམ་རིན་པོ་ཆེ་དོན་ལྡན་ཞབས་ཀྱི་ལས་འགྲིག་གི་མན་ངག་ནས་ཇི་ལྟར་འབྱུང་བ་ལྟར་ཉེས་པ་བསྒོ་བ་དང་། ཉེས་པ་བསྒྲགས་པ་དང་། ཞུ་བ་དང་། བདེན་དཔང་གསོལ་བ་རྣམས་བྱ། དེ་ནས་སྤྲོ་ན་ལིངྒ་དང་འབྲེལ་ན་ཕུར་པའི་ཆོ་གའང་བྱ། །མ་གྲུབ་ན། བསྐལ་པ་མེ་ལྟར་འབར་བའི་དུར་ཁྲོད་ནས། །སོགས་རྟགས་ཀྱི་བསྟོད་པ་གཉིས་དང་། རྒྱ་མཚོ་གླིང་གི་སོགས་འཁོར་གྱི་བསྟོད་བསྐུལ་རྣམས་དང་། །ལས་བྱང་ཆེན་མོ་ནས་དྲག་པོ་ཐུན་གྱི་སྐུལ་ལ་སོགས་པ་བྱས་ཏེ། །དེ་ནས་དྲག་པོའི་མདོས་འབུལ་བ་ནི། །ཧཱུྃ། རིན་ཆེན་ལྔ་ལྡན་མདོས་གཞི་ལ། །འདོད་ཡོན་སྣ་ཚོགས་གཅལ་དུ་བཀྲམ། །ཤ་ཁྲག་དམར་གྱི་གཏོར་ཆེན་བཤམས། །
(༡༠)ཞབས་སུ་དགྲ་བགེགས་ལིངྒ་བཅུག །མཐའ་མར་ལྕགས་རི་ནག་པོས་བསྐོར། །གདུག་པ་དྲག་པོའི་རྩང་རྣམས་བཙུགས། །མཐིང་ནག་ནམ་མཁའི་གུར་གདུགས་ཕུབ། །དཔལ་ལྡན་མགོན་པོ་བེར་ནག་ཅན། །འཁོར་བཅས་ཀུན་གྱི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་ འཚེར་རྩུབ 
་བཟློག་ཏུ་གསོལ། །ཧཱུྃ། །ཕོ་བྲང་མཛེས་པའི་གཞལ་ཡས་ཁང་། །དུར་ཁྲོད་ཆེན་པོའི་གནས་མཆོག་འདིར། །ཁྲག་གི་རྒྱ་མཚོ་མེ་རེ་རེ། །རུས་པའི་ཕུང་པོ་རྫ་ལྟར་ལྟགས། །ཤ་ཡི་ཚོགས་ནི་རི་ལྟར་སྤུངས། །མི་རོ་རྟ་རོ་གཅལ་དུ་བཀྲམ། །དུར་བྱ་ཀང་ཀ་བཞད་དང་ཁྲ། །རྒོད་གླག་བྱ་རོག་འུག་པའི་ཚོགས། །སེང་གེ་སྟག་གཟིག་དོམ་དང་དྲེད། །ཅེ་སྦྱང་ཁྱི་དང་ཝ་ལ་སོགས། །ཤ་ཟ་རོ་ལངས་སྲིན་པོ་དང་། །ཤ་ཟན་ཁྲག་འཐུང་ཚོགས་དང་བཅས། །དུར་ཁྲོད་ཆེན་པོར་བྱིན་བརླབས་ནས། །དཔལ་ལྡན་མགོན་པོ་བེར་ནག་ཅན། །འཁོར་བཅས་རྣམས་ཀྱི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་
འཚེར་རྩུབ ་བཟློག་ཏུ་གསོལ། །ཧཱུྃ། དཔལ་ལྡན་མགོན་པོ་ནག་པོ་ལ། །ཕྱི་ནང་གསང་བའི་མཆོད་པ་ནི། །ཡོན་ཆབ་མེ་ཏོག་བདུག་སྤོས་དང་། །མར་མེ་དྲི་ཆབ་ལྷ་བཤོས་དང་། །མཁར་
(༡༡)རྔ་རྫ་རྔ་རྔ་ཆེན་དང་། །དུད་ཆེན་སྒྲ་སྙན་རོལ་མོའི་ཚོགས། །གཟུགས་སྒྲ་དྲི་རོ་རེག་བྱ་སོགས། །འདོད་ཡོན་ཕྱི་ཡི་མཆོད་པ་འབུལ། །ཧཱུྃ། བྷནྡྷ་རློན་པའི་སྣོད་ཆེན་དུ། །དམར་ཆེན་ཁྲག་གི་ཨརྒྷཾ་དང་། །གསུར་ཆེན་དུད་པའི་བདུག་སྤོས་དང་། །གདུག་པ་དུག་གི་མེ་ཏོག་དང་། །ཚིལ་ཆེན་ཞུན་གྱི་མར་མེ་དང་། །ཁྲག་དང་དུག་གི་དྲི་ཆབ་དང་། །འབྲུ་ནག་དྲག་པོའི་ལྷ་བཤོས་དང་། །བྷནྡྷ་ཆ་ལང་སྒྲ་སྙན་རྣམས། །དྲག་པོ་ནང་གི་མཆོད་པ་འདིས། །མགོན་པོ་འཁོར་བཅས་ཐུགས་དམ་བསྐང་། །བསྟན་པ་བསྲུང་ཕྱིར་བཞེས་སུ་གསོལ། །ཧཱུྃ། ཤ་སྣ་ཁྲག་སྣ་སྙིང་སྣ་དང་། །བདུད་རྩི་སྨན་དང་རཀྟ་དང་། །ཤ་ཆེན་གཏོར་མ་ཚིལ་ཆེན་གསུར། །ཛ་གད་ཕུད་སྣ་མང་པོ་དང་། །སོ་སོའི་མཐུན་རྫས་སྣ་ཚོགས་དང་། །ཤིང་ཐོག་མེ་ཏོག་སྣ་ཚོགས་དང་། །སྣ་ཚོགས་འབྲུ་སྣ་མང་པོ་དང་། །གསང་བ་བླ་མེད་མཆོད་པ་འདིས། །དཔལ་ལྡན་མགོན་པོ་བེར་ནག་ཅན། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བ་ལ་སོགས་པ། །འཁོར་དང་བཅས་པའི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་ འཚེར་རྩུབ ་བཟློག་ཏུ་གསོལ། །ཧཱུྃ། དཔལ་ལྡན་མགོན་པོ་འཁོར་བཅས་ལ། །ནམ་
(༡༢)མཁའ་ནག་པོའི་གུར་གདུགས་ཀྱིས། །ཐུགས་དམ་བསྐང་ངོ་མཆོད་པ་འབུལ། །བླ་གབ་མཐིང་ནག་དར་གྱི་གདུགས། །སྟེང་དུ་འཁོར་ཞིང་ཀྱི་ལི་ལི། །ཙིཏྟ་ཐུགས་ཀྱི་ནམ་མཁའ་དང་། །ཉི་ཟླ་རིན་ཆེན་འོད་དུ་འབར། །དར་སྣ་བལ་ཚོན་ཚོགས་ཀྱིས་བརྒྱན། །འཕན་གདུགས་རྒྱལ་མཚན་ཐིབས་སེ་ཐིབ། །དྲག་པོའི་བཟློག་བྱང་བརྒྱ་རྩ་བརྒྱད། །ཐུགས་དམ་བསྐང་ངོ་མཆོད་པ་འབུལ། །དགྲ་བགེགས་མ་ལུས་བཞེས་སུ་གསོལ། །དགྲ་ལ་བྷྱོ་ཞིང་བགེགས་ལ་བྷྱོ། །ཕུར་ཁ་ཟོར་ཁ་རྣམས་ལ་བྷྱོ། །རྨི་ལྟས་མཚན་ལྟས་ངན་པ་ཟློག །ཧཱུྃ། དཔལ་ལྡན་མགོན་པོ་འཁོར་བཅས་ལ། །རྩིས་ཀྱི་ཁྲམ་ཤིང་སྣ་ཚོགས་ཀྱིས། །ཐུགས་དམ་བསྐང་ངོ་མཆོད་པ་འབུལ། །དགྲ་བགེགས་སྒྲོལ་ཕྱིར་བཞེས་སུ་གསོལ། །ཁྲམ་ཁ་ཕྱེས་ལ་བདུད་ཁ་བསྒྱུར། །ཤོ་ཁ་གཏོར་ལ་བཙན་ཁ་ཟློག །བདག་དང་རྒྱུ་སྦྱོར་ཡོན་བདག་གི། །བར་ཆད་འཆོར་རྩུབ་བཟློག་ཏུ་གསོལ། །ཧཱུྃ། ནམ་མཁའ་རིན་ཆེན་གཞལ་ཡས་ཁང་། །བཞུགས་པའི་ཚེ་ན་ཡུལ་དུ་འབུལ། །གཤེགས་པའི་ཚེ་ན་རྫོངས་སུ་འབུལ། །ལོངས་སྤྱོད་ཟད་མེད་གཏེར་དུ་འབུལ། །རྩིབས་བརྒྱད་ལྟེ་བ་དཀྱིལ་འཁོར་རིས། །ཙིཏྟ་ཐུགས་ཀྱི་ནམ་མཁའ་ལ། །ཉི་ཟླ་རིན་ཆེན་འོད་དང་ལྡན། །
(༡༣)ཁོང་བ་སྟོང་བར་བཞག་པ་ནི། །ཆོས་ཉིད་སྐྱེ་འགག་མེད་པའི་ངང་། །ཚངས་པ་ལྷ་ཡི་བྱ་སྤུ་དང་། །རིན་ཆེན་དང་ཟབ་མཛེས་པས་བརྒྱན། །སྔགས་དང་ཕྱག་རྒྱས་བྱིན་བརླབས་ནས། །ཆོས་ཉིད་ནམ་མཁའ་སྐྱེ་འགག་བྲལ། །དབྱིངས་ཉིད་ནམ་མཁའ་བསམ་ལས་འདས། །ཡངས་པའི་ནམ་མཁར་ཀུན་ཀྱང་ཤོང་། །དོན་དམ་ནམ་མཁའ་བརྗོད་དང་བྲལ། །ཀུན་རྫོབ་ནམ་མཁའ་གསལ་ལ་དྭངས། །ནམ་ནི་ཕྱི་ཡི་ཡུལ་ཡིན་ཏེ། །མཁའ་ནི་ནང་གི་སེམས་ཡིན་ནོ། །ཡུལ་སེམས་གཉིས་སུ་མེད་པ་ནི། །དོན་གྱི་ནམ་མཁའ་ཡིན་པར་བཤད། །ནམ་ནི་གཟུང་དང་འཛིན་པ་སྟེ། །མཁའ་ནི་གཉིས་སུ་མེད་པ་ཡིན། །གཟུང་འཛིན་གཉིས་མེད་དག་པ་ཡི། །རྟོགས་པ་དོན་གྱི་ནམ་མཁའ་འདིས། དཔལ་ལྡན་མགོན་པོ་བེར་ནག་ཅན། །ནག་པོ་སྟོང་དང་ཤ་ཟ་འབུམ། །མ་མོ་བྱེ་བ་ལ་སོགས་པ། །འཁོར་དང་བཅས་པའི་ཐུགས་དམ་བསྐང་། །སྐུ་ཡི་རྒྱན་དུ་ནམ་མཁའ་འབུལ། །གསུང་གི་རྒྱན་དུ་ནམ་མཁའ་འབུལ། །ཐུགས་ཀྱི་རྒྱན་དུ་ནམ་མཁའ་འབུལ། །འཁོར་བཅས་ཀུན་གྱི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་ འཚེར་རྩུབ ་བཟློག་ཏུ་གསོལ། །ཧཱུྃ། དཔལ་ལྡན་མགོན་པོ་ནག་
(༡༤)པོ་ཡི། །དྲག་པོ་དཔལ་གྱི་གཏོར་ཆེན་ལ། །ཚེ་དང་ཡུངས་ཀར་ཡུངས་ནག་དང་། །བཤོས་བུ་ཁྲག་གིས་བྱུགས་པ་དང་། །ཤ་ཁྲག་ཚིལ་ཆེན་མར་མེ་དང་། །ཁྲག་གི་ཞལ་བུ་ཟུར་གསུམ་དང་། །སྟག་རས་གཟིག་རས་དར་ཚོན་རྣམས། །གཏོར་མའི་རྒྱན་དུ་བཙུགས་པ་ཡི། །འདོད་ཡོན་ལྔ་ལྡན་གཏོར་ཆེན་འདི། །བལྟས་ན་གཟུགས་སྡུག་གཟི་བརྗིད་ཆེ། །སྙན་པ་ཡན་ལག་དྲུག་ཅུའི་སྒྲ། །བསྣམས་པས་དྲི་ཞིམ་སངས་སེ་སང་། །མྱངས་པས་རོ་བརྒྱ་ལྡན་པའི་བཅུད། །རེག་པས་ནད་ཀུན་སེལ་བའི་གོས། །རྒྱལ་སྲིད་བདུན་དང་བཀྲ་ཤིས་བརྒྱད། །གཏེར་གྱི་བུམ་པ་འདོད་ཡོན་ལྔས། །མགོན་པོ་འཁོར་བཅས་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་ འཚེར་རྩུབ ་བཟློག་ཏུ་གསོལ། །ཧཱུྃ། སྤྲུལ་པའི་ལས་མཁན་ནག་པོ་ལ། །མཐུན་པའི་རྫས་སྣ་མང་པོ་དང་། །ཤིང་ཐོག་མེ་ཏོག་སྣ་ཚོགས་དང་། །གསེར་དངུལ་རིན་ཆེན་སྣ་ཚོགས་དང་། །ཤ་ཁྲག་གཏོར་མའི་མཆོད་པ་འབུལ། །དར་སྣ་མང་པོའི་མཆོད་པ་འབུལ། །ཤ་སྣ་ཁྲག་སྣ་སྙིང་སྣ་དང་། །རིན་ཆེན་འབྲུ་སྣ་སྨན་སྣ་དང་། །རྐང་མར་ཚིལ་སྣའི་མཆོད་པ་འབུལ། །ཕྱི་ནང་མཆོད་པས་ཐུགས་དམ་བསྐང་། །མགོན་པོ་འཁོར་བཅས་ཐུགས་དམ་བསྐང་། །བདག་དང་རྒྱུ་སྦྱོར་
(༡༥)ཡོན་བདག་གི། །བར་ཆད་ འཚེར་རྩུབ ་བཟློག་ཏུ་གསོལ། །དགྲ་བགེགས་བྱད་མ་རྡུལ་དུ་རློག །བན་བྱད་བོན་བྱད་ཐམས་ཅད་ཟློག །རིག་སྔགས་བྱད་སྟེམས་ཐམས་ཅད་ཟློག །ཟློག་ཅིག་རྦོད་གཏོང་ཐམས་ཅད་ཟློག །ས་མ་ཡ་བྷྱོ་ཟློག །ཅེས་འབུལ། དེ་ནས་དྲག་ཏུ་བསྐུལ་བ་ནི། ཧཱུྃ། མ་གཡེལ་མ་གཡེལ་སྲུང་མའི་ཚོགས། །མ་དལ་མ་དལ་མྱུར་དུ་ཆོས། །མ་དལ་དྲག་པོ་མྱུར་དུ་རྒྱུགས། །བསྟན་པ་གཉེན་ལ་དགྲ་ཕྱུང་བས། །ལྷ་དང་སྲུང་མའི་དམག་ཚོགས་འདུས། །དཀོན་མཆོག་གསུམ་ལ་སྡང་བྱེད་དང་། །སངས་རྒྱས་ཆོས་ཀྱི་སྐུ་དགྲ་ལ། །དཔལ་ལྡན་མགོན་པོ་ནག་པོ་དང་། །དཔལ་ལྡན་ལྷ་མོ་ནག་མོ་གཉིས། །འཁོར་དང་བཅས་པ་ཐམས་ཅད་དང་། །དྲག་ཤུལ་ཅན་གྱི་དམག་ཚོགས་ཆོས། །ཞེ་སྡང་ཅན་གྱི་སྐུ་ཤུགས་ཕྱུང་། །ཆོས་སྐྱོང་སྲུང་མ་ཐམས་ཅད་ཆོས། །མཐུ་ཅན་སྲུང་མ་ཆས་ཙ་མན། །ལྷ་དམག་མང་པོ་སྤུངས་སེ་སྤུང་། །ལྷ་སྲིན་མང་པོ་སྐར་ལྟར་འཁྲུགས། །བདུད་བཙན་སྡང་བའི་དགྲ་ལ་རྔམས། །རྒྱུགས་ཤིག་སྡང་བའི་དགྲ་ཤ་ཟོ། །རིངས་པར་ཆོས་ལ་དགྲ་ཁྲག་འཐུངས། །མ་གཡེལ་སྲུང་མ་ཐུགས་དམ་ཅན། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་རིངས་པར་
(༡༦)ལུག །མགྱོགས་པ་སྟོད་ལ་བཙན་པོ་གྱོན། །རྣོན་པོ་ཐོགས་ལ་མཐུ་རྩལ་ཕྱུང་། །མྱུར་བར་མྱུར་བར་རིངས་སོ་རིངས། །སྡང་བའི་དགྲ་ལ་དམག་སྣ་དྲོངས། །མཐུ་ཆེན་སྲུང་མ་གཉན་པོ་རྣམས། །མྱུར་བར་སྡང་བའི་དགྲ་ལ་རྒྱུགས། །མཐུ་ཆེན་དགྲ་ལྷ་གཉན་པོ་རྣམས། །དགྲ་ཁམས་མ་ལུས་ཆམ་ལ་ཕོབ། །སྡང་བའི་དགྲ་པོ་ལས་ངན་གྱི། །སོ་པ་སོད་ལ་རྒྱུས་པ་ཆིངས། །དཔའ་བོ་སོད་ལ་མགྱོགས་པ་ཁྱིགས། །གོ་ཁྲབ་ཤུས་ལ་རྣོ་མཚོན་ཕྲོགས། །རིངས་པར་ཁུག་ལ་མྱུར་བར་སོད། །སྡང་བའི་དགྲ་ཡི་ལས་སྒོ་ཕྱེས། །ཚད་གསུམ་ནོར་གྱི་ནང་དབྱེན་གྱིས། མི་ཕྱུགས་ནང་ནོར་གནངས་སུ་ཆོད། །དགྲ་ལ་ཆོད་ལ་བདག་ལ་བྱིན། །མ་གཡེལ་སྲུང་མམ་ཐུ་རྩལ་ཅན། །འགྲོན་པོ་བྱེས་སུ་འགྲོ་བའི་ཚེ། །སྐྱེས་པུ་དོན་འདོད་འགའ་ཞིག་གིས། །སྲུང་མ་གཉན་པོ་མཆོད་པའི་ཚེ། །སྡུན་ནས་སུས་ལ་རྒྱབ་ནས་སྐྱོར། །རྒྱ་ཡི་དཀོར་ནོར་གྲངས་སུ་བསྔོས། །བོད་ཀྱི་ཟས་ནོར་གཡང་དུ་བྱིན། །སྐྱེས་བུ་དོན་གྲུབ་ཡུལ་དུ་སྐྱོལ། །ཡུལ་བྱེས་གཉིས་ཀྱི་དགྲ་སྣ་ཟློག། དངོས་གྲུབ་བར་དུ་གཅོད་པ་ཡི། །གནོད་པར་བྱེད་པའི་འབྱུང་པོ་ཐུལ། །མ་གཡེལ་སྲུང་མ་གཉེན་པོ་རྣམས། །རྡོ་རྗེ་འཆང་གི་བཀའ་བྱུང་གི། །མ་དལ་
(༡༧)རིངས་པར་རྟ་ཕོ་སྟོད། །རང་བྱུང་ཡེ་ཤེས་མཚོན་ཆ་ཕྱོར། །མ་གཡེལ་སྲུང་མ་མཐུ་རྩལ་ཅན། །དཔལ་ལྡན་མགོན་པོ་རྣམ་ཐོས་སྲས། །སེང་གེ་རྩལ་ཆེན་མྱུར་བར་ཆིབས། །ཕྱག་མཚན་མཆོད་རྟེན་དཀར་པོ་བསྣམས། །བ་དན་དཀར་པོ་གནམ་ལ་གཡུགས། །ལྷོ་ཕྱོགས་ལྷ་དམག་མྱུར་བར་སྐུལ། །མཐུ་ཆེན་མགོན་པོའི་དམག་ཚོགས་རྣམས། །ཧཱུྃ་དང་ཕཊ་སྒྲ་ཏི་དི་རི། །བ་དན་རུ་མཚོན་ཐིབས་སེ་ཐིབ། །གོ་གྱོན་མཚོན་ཐོགས་སི་ལི་ལི། །མགྱོགས་པའི་རྟ་རྒྱུགས་སྤྲིངས་སེ་སྤྲིང་། །མཐུ་ཆེན་ལྷ་དམག་གཉན་ལོ་རྣམས། །སྡང་བྱེད་དགྲ་ཡི་ཤ་ཁྲག་ཟོ། །དགྲ་ལ་ཉེས་པའི་གཡུལ་ཉེས་ཕྱུང་། །མྱུར་བར་མྱུར་བར་རིངས་སོ་རིངས། །མ་གཡེལ་ཆོས་སྐྱོང་སྲུང་མ་རྣམས། །དམ་ཚི་གཉན་པོའི་ལྕག་རྒྱོབ་ཅིག །སྡང་བའི་དགྲ་ཡི་རྒྱུས་པ་ཆིངས། །དཔལ་རབ་འཆང་བའི་མགོན་པོ་སྟེ། །རང་སེར་ཉི་མའི་མདོག་འདྲ་ཆིབས། །ཕྱག་ན་ཉི་མའི་ཞགས་པ་བསྣམས། །དར་དཀར་བ་དན་གནམ་ལ་གཡུགས། །ཤང་ཕྱོགས་རྣལ་འབྱོར་བོ་ལྷ་རྣམས། །རིངས་པར་བསྐུལ་ལོ་མྱུར་བར་ཆོས། །མ་གཡེལ་སྡང་བའི་དགྲ་ལ་རྒྱུགས། །གཏོར་མ་འདི་དང་དགྲ་བོ་གཉིས། །མྱུར་བར་
(༡༨)བཞེས་ལ་རིངས་བར་ཁུག །དགྲ་བོ་མི་དཔའ་རྟ་མགྱོགས་ཀྱི། །དཔུང་པ་ཆོག་ལ་རྒྱུས་པ་ཆིངས། །མ་གཡེལ་སྲུང་མ་མཐུ་རྩལ་ཅན། །མཐུ་ཆེན་མགོན་པོ་ལེགས་ལྡན་གྱིས། །མཚལ་བུ་རྟིང་དཀར་ལེགས་པར་སྟོད། །ཙནྡན་བིང་ཆེན་ལེགས་པར་ཕྱོར། །དར་དཀར་བ་དན་གནམ་དུ་གཡུགས། །ལྷོ་ཕྱོགས་རྣལ་འབྱོར་ཕོ་ལྷ་རྣམས། །རིངས་པར་བསྐུལ་ལོ་མྱུར་བར་ཆོས། །མ་གཡེལ་སྡང་བའི་དགྲ་ལ་རྒྱུགས། །གཏོར་མ་འདི་དང་དགྲ་བོ་གཉིས། །མྱུར་བར་བཞེས་ལ་རིངས་པར་ཁུག །དགྲ་བོ་མི་དཔའ་རྟ་མགྱོགས་ཀྱི། །དཔུང་བ་ཆོག་ལ་རྒྱུས་པ་ཆིངས། །མྱུར་བར་མྱུར་བར་རིངས་སོ་རིངས། །མ་གཡེལ་སྲུང་མ་མཐུ་རྩལ་ཅན། །མཐུ་ཆེན་བྲག་ལྷ་མགོན་པོ་ནི། །མཚལ་བུ་རྩིང་དཀར་ལེགས་པར་སྟོད། །ཙནྡན་གྲུ་ཚལ་ཕྱག་མཚན་ཕྱོར། དར་དཀར་བ་དན་གནམ་ལ་གཡུགས། །ནུབ་ཀྱི་ཕྱོགས་ནས་ལྷ་དམག་སྐུལ། །མྱུར་བར་བཞེངས་ལ་རིངས་པར་རྒྱུགས། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མྱུར་དུ་ཁུག །དགྲ་བོ་མི་དཔའ་རྟ་མགྱོགས་ཀྱི། །དཔུང་བ་ཆོག་ལ་རྒྱུས་པ་ཆིངས། །མ་གཡེལ་སྲུང་མ་མཐུ་རྩལ་ཅན། །དཔལ་ལྡན་མགོན་པོ་རྣམ་ཐོས་སྲས། །སེང་གེ་རྩལ་ཆེན་མྱུར་
(༡༩)བར་སྟོད། །ཕྱག་མཚན་ཤེས་རབ་རལ་གྲི་ཕྱོར། །བ་དན་དཀར་བོ་གནམ་དུ་གཡུགས། །བྱང་ནས་ལྷ་དམག་མྱུར་བར་སྐུལ། །མཐུ་ཆེན་མགོན་པོའི་དམག་ཚོགས་ཀྱི། །ཀུ་བསོྭ་ཆ་སྒྲ་དི་རི་རི། །བ་དན་རུ་མཚོན་ཐིབས་སེ་ཐིབ། །གོ་གྱོན་མཚོན་ཐོགས་སི་ལི་ལི། །མགྱོགས་པའི་རྟ་རྒྱུགས་སྤྲིངས་སེ་སྤྲིང་། །མྱུར་བར་མྱུར་བར་རིངས་སོ་རིངས། །མ་གཡེལ་ཆོས་ཀྱི་དགྲ་ལྷ་རྣམས། །རྒྱུགས་ཤིག་ཆོས་ཀྱི་ཕོ་ལྷ་རྣམས། །སངས་རྒྱས་ཆོས་ལ་དགྲ་བྱུང་གི། །ལྷ་གྲོང་བྱང་ཆུབ་གླིང་རྣམས་བཤིག །སངས་རྒྱས་བསྟན་པ་ནུབ་པར་བྱས། །དཀོན་མཆོག་གསུམ་གྱི་དཀོར་ནོར་ཕྲོགས། །སངས་རྒྱས་བསྟན་ལ་དགོངས་སུ་གསོལ། །བསྟན་པ་གཉན་པོ་མྱུར་བར་སྐྱོངས། །སངས་རྒྱས་བསྟན་པ་ནུབ་ལ་ཁང་། །ཀུན་ཏུ་བཟང་པོའི་ཆོ་འཕྲུལ་ཤར། །འཕགས་པ་འཇམ་དབྱངས་ང་རྒྱལ་བསྐྱེད། །ཐུགས་རྗེ་ཆེན་པོ་ཞེ་སྡང་ཁྲོས། །ཕྱག་ན་རྡོ་རྗེའི་ཁྲོ་གཏུམ་ལས། །ཁྱོད་ནི་དགྲ་གསོད་སྲུང་མར་བསྐོས། །མྱུར་བར་རྒྱུགས་ཤིག་མཐུ་རྩལ་ཅན། །གཏོར་མ་འདི་དང་དགྲ་བོ་གཉིས། །མྱུར་བར་བཞེས་ལ་རིངས་པར་ཁུག །མྱུར་བར་མྱུར་བར་རིངས་སོ་རིངས། །མྱུར་
(༢༠)བར་བཞེས་ལ་རིངས་པར་ཆོས། །དགྲ་བོ་མི་དཔའ་རྟ་མགྱོགས་ཀྱི། །དཔུང་བ་ཆོག་ལ་རྒྱུས་པ་ཆིངས། །རིངས་པར་ཁུག་ལ་མྱུར་པར་སོད། །མ་གཡེལ་སྲུང་མ་མྱུར་བར་རྒྱུགས། །ལྷ་ཆེན་ཚངས་པ་ཆེན་པོ་ཡིས། །ནམ་མཁའ་འོད་ཀྱི་རྟ་ཕོ་སྟོད། །རྫུ་འཕྲུལ་མཆོག་གི་རྟ་ལ་ཞོན། །སྨིག་གི་རྟ་ཕོ་རོལ་དུ་ཁྲིད། །རྫི་ཡི་རྟ་ཕོ་རོལ་དུ་ཁྲིད། །མུ་ཁ་མཐའ་འབྱམས་དམག་བསྡུས་ལ། །སྡང་བའི་དགྲ་ལ་རིངས་པར་རྒྱུགས། །སྡང་བའི་དགྲ་ཡི་དཔུང་པ་ཆོག །དགྲ་མཁར་སྒྱེལ་ལ་དགྲ་དཔུང་ཤིག །ཉེས་བྱས་དགྲ་བོ་ཆམ་ལ་ཕོབ། །སྡང་བྱེད་དགྲ་བོའི་དོན་སྙིང་ཕྱུང་། །མ་གཡེལ་སྲུང་མ་མྱུར་བར་རྒྱུགས། །མཐུ་ཅན་ལྷ་ཡི་དབང་པོ་ཡིས། །གླང་པོ་མགོ་ལྔ་མྱུར་བར་སྟོད། །མཐུ་ཆེན་གྱད་ཀྱི་རྒྱལ་པོ་ཞོན། །འདོད་ཁམས་ལྷ་ལ་ར་མདར་སློག །དགྲ་ཤ་ཟོ་ལ་དགྲ་ཁྲག་འཐུངས། །དགྲ་ཡི་བླ་རི་རྩེ་ནས་སྒྱེལ། །རྩལ་མཁན་ཚོགས་བདག་མགོན་པོ་ཆོས། །མདའ་སྐྱེན་སྤུ་ར་སྨུག་པོ་ཆོས། །འཐབ་སྐྱེན་མ་ཧཱ་ཀཱ་ལ་ཆོས། །ལམ་མཁན་ཨརྱ་རེ་མན་ཆོས། །སོ་པ་དཔལ་རབ་མགོན་པོ་ཆོས། །འཛེག་མཁན་བྲག་ལྷ་མགོན་པོ་ཆོས། །ཡང་ཟོར་ཧ་ནུ་མནྠ་ཆོས། །སྒྱོགས་མཁན་ཁྱབ་འཇུག་ནག་པོ་ཆོས།
(༢༡)། རྐྱལ་མཁན་བ་ལི་སྨུག་པོ་ཆོས། །མདའ་ར་ཏེ་དབང་སུམ་ཅུ་ཆོས། །གཅོད་མཁན་ལྷ་སྲིན་སྡེ་བརྒྱད་ཆོས། །བརྟུལ་ཞུགས་གླང་ཆེན་སྨྱོན་པ་ཆོས། །དྲང་སྲོང་སྟག་གཡག་རྔམ་པ་ཆོས། །རེ་འབྱམས་བྱ་རྒྱལ་ཁྱུང་ཆེན་ཆོས། །ཁྲོ་གཏུམ་གཡུ་འབྲུག་སྔོན་པོ་ཆོས། །མཁའ་ལྡིང་མཐུ་རྩལ་མྱུར་མགྱོགས་ཆོས། །དཔའ་རྩལ་སེང་གེ་རྔམ་པ་ཆོས། །ཉིན་གྱི་དྲོ་གསལ་ཉི་མ་ཆོས། །མཚན་གྱི་སྒྲོན་གསལ་ཟླ་བ་ཆོས། །ཕྱི་དཔུང་ལྷ་ཀླུ་གཉན་དམག་ཆོས། །སྣ་ཁྲིད་རྡོ་རྗེ་ལེགས་པ་ཆོས། །གསོད་མཁན་སྲོག་བདག་སྐྱེས་བུ་ཆོས། །བཤའ་མཁན་དྲང་སྲོང་ཤེ་ལེ་ཆོས། །ཤ་ཟན་ཕྲ་མེན་ཁྲ་སྤྱང་ཆོས། །ཁྲག་འཐུང་འབར་བ་དྲེད་མགོ་ཆོས། །མཐུ་ཆེན་འཇིག་རྟེན་སྲུང་མ་ཆོས། །གོ་གྲི་གཟུར་ལ་རྣོ་མཚོན་རྡོར། །མགྱོགས་པ་སྟོད་ལ་རིངས་པར་རྒྱུགས། །ཞེ་སྡང་སྐྱེད་ལ་ང་རྒྱལ་ཕྱུང་། །མྱུར་བར་ཆོས་ལ་རིངས་པར་རྒྱུགས། །སངས་རྒྱས་ཆོས་ལ་དགྲ་བྱུང་གིས། །དཀོན་མཆོག་གསུམ་གྱི་དཀོར་ནོར་ཁྱེར། །དམ་ཚིག་ཅན་གྱི་ཐུགས་ཡིད་དཀྲུགས། །བསྟན་པ་གཉན་པོར་དགོངས་སུ་གསོལ། །མྱུར་བར་མྱུར་བར་རིངས་སོ་རིངས། །དགྲ་བོ་མི་དཔའ་རྟ་མགྱོགས་ཀྱི། །དཔུང་བ་ཆིངས་ལ་རྒྱུས་
(༢༢)པ་ཆོད། །དགྲ་བོ་ཕ་དཔའ་བུ་དཔའ་ཡི། །དོན་སྙིང་ཕྱུང་ལ་མགོ་བོ་ཆོད། །དགྲ་བོ་གོ་གྱོན་མཚོན་ཐོགས་ཀྱི། །གོ་ཁྲབ་ཤུས་ལ་རྣོ་མཚོན་ཕྲོགས། །དགྲ་བོ་ཕོ་འཕྱོར་མོ་སྒེག་གི། །རྩ་དཀར་ཕྲོགས་ལ་སྐྱེ་རྒྱུད་ཆོད། །དགྲ་བོ་ཇག་བྱེད་རྐུན་ཤོམ་གྱི། །བསམ་ངན་སྒྲུབ་བྱེད་དགྲ་བོ་ཡི། །དགྲ་ལ་གཡུལ་ཉེས་གྲི་རྒོད་ཕོབ། །སྒྲོལ་བྱེད་ལས་ཀྱི་གཤིན་རྗེ་ཡིས། །སྡིག་ཅན་དགྲ་བོ་ཉེས་བྱེད་འདི། །ཞག་དང་ཟ་མར་མ་འགོར་བར། །ད་ལྟ་ཉིད་དུ་མྱུར་དུ་སོད། །རེམས་ཤིག་མ་གཡེལ་སྲུང་མ་རྣམས། །གཏོར་མ་འདི་དང་དགྲ་བོ་གཉིས། །མྱུར་བར་སོད་ལ་མཉམ་པོར་བཞེས། །རིངས་པར་ཁུག་ལ་མྱུར་དུ་སོད། །མ་གཡེལ་འཇིག་རྟེན་མྱུར་མགྱོགས་ལྷ། །སྡིག་ཅན་སྡང་བའི་དགྲ་བོ་འདིས། །སྲུང་མ་གཉན་པོ་མ་བརྩིས་པས། །ཁྱོད་ཀྱིས་ཀོ་ལོང་དྲག་པོ་མཛོད། །མ་གཡེལ་སྲུང་མ་མྱུར་བར་ཆོས། །དགྲ་བོ་ཕ་རྩ་བུ་རྒྱུད་རྣམས། །ཚེ་སྟུངས་སྲོག་ཆོད་སྙིང་ཁྲག་འཇོངས། །བདུན་རྒྱུད་རིགས་ནས་ཐལ་བར་རློག །སྲོག་ཆོད་སྙིང་ཕྱུང་ཤ་རུས་གཏུབས། །མཐུ་ཆེན་སྲུང་མ་ཡུལ་འཁོར་སྲུང་། །མགྱོགས་པའི་དུང་རྟ་དཀར་བོ་སྟོད། །དུང་ཁྲབ་གྱོན་ལ་རྣོ་མཚོན་རྡོར། །འཁོར་ནི་དྲི་ཟའི་དམག་ཚོགས་སྐུལ། །སྡང་བའི་
(༢༣)། དགྲ་ལ་མྱུར་དུ་རྒྱུགས། །དགྲ་སྙིང་ཕྱུང་ལ་དགྲ་སྲོག་ཆོད། །དགྲ་ཤ་ཟོ་ལ་དགྲ་ཁྲག་འཐུངས། །དགྲ་བོ་མི་དཔའ་རྟ་མགྱོགས་ཀྱི། །རྒྱུས་པ་ཆིངས་ལ་དཔུང་པ་ཆོག །རིངས་པར་ཁུག་ལ་མྱུར་བར་སྒྲོལ། །ཆོས་སྐྱོང་སྲུང་མ་འཕགས་སྐྱེས་པོ། །མགྱོགས་པ་ངད་དཀར་ཡང་ཞུར་སྟོད། །གོ་གྱོན་མཚོན་ཐོགས་མྱུར་བར་ཞོན། །མ་གཡེལ་སྡང་བའི་དགྲ་ལ་རྒྱུགས། །དགྲ་བོ་དཔའ་བའི་དོན་སྙིང་ཕྱུང་། །དགྲ་བོ་མགྱོགས་པའི་རྒྱུས་པ་ཆིངས། །མ་གཡེལ་སྲུང་མ་མཐུ་ཆེན་རྣམས། །ཆོས་སྐྱོང་སྲུང་མ་སྤྱན་མི་བཟང་། །མགྱོགས་ཀྱི་དམར་ཞུར་མྱུར་བར་སྟོད། །གོ་མཚོན་ཐོགས་ལ་རིངས་པར་ཞོན། །སྡང་བའི་དགྲ་ལ་མྱུར་དུ་རྒྱུགས། མ་གཡེལ་སྲུང་མ་མྱུར་དུ་ཆོས། །མཐུ་ཆེན་རྒྱལ་བོ་རྣམ་ཐོས་སྲས། །མགྱོགས་པའི་རྟ་ཕོ་སྔོ་ཁྲ་སྟོད། །བཙན་པོ་གྱོན་ལ་རྣོན་པོ་ཐོགས། །མགྱོགས་པ་ཞོན་ལ་རིངས་པར་རྒྱུག །མྱུར་བར་མྱུར་བར་རིངས་སོ་རིངས། །སྡང་བའི་དགྲ་ལ་མྱུར་དུ༴ །ཕྱོགས་བཞིའི་དམག་དཔོན་རྒྱལ་ཆེན་བཞིས། །འཁོར་ནི་སྲུང་མའི་དམག་ཚོགས་སྐུལ། །དྲི་ཟ་རྣམས་ཀྱིས་རྟ་ཡར་སྟོད། །གྲུལ་བུམ་རྣམས་ཀྱིས་རྟ༴ །ཀླུ་རྣམས་ཀུན་གྱིས་རྟ༴ །གནོད་སྦྱིན་རྣམས་ཀྱིས་རྟ་བཙན་པོ་གྱོན་ལ་རྣོན་པོ༴ །མྱུར་བར་ཞོན་ལ་དིངས་པར༴ །སྡང་བྱེད་དགྲ་བོའི་ཚེ་སྲོག་ཆོད། །རྣམ་ཤེས་ལོངས་ལ་ཤ་ཁྲག་ཟོ། །སྙིང་ཁྲག་འཐུངས་ལ་ཁོང་ཁྲག་འཇིབས། །སེམས་ཉིད་བླ་མེད་གནས་སུ་སྤོར། །
(༢༤)མ་གཡེལ་མ་གཡེལ་དགྲ་ལ་རྒྱུགས། །བདག་ལ་སྡང་བའི་དགྲ་བྱུང་ན། །བསྟན་པ་གཉན་ལ་སྲུང་མ་རེམས། །མྱུར་བར་མྱུར་བར་རིངས་སོ་རིངས། །མ་གཡེལ་སྲུང་མ་ཐུགས་དམ་ཅན། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་རིངས་པར་ཁུག །མཐུ་རྩལ་ཅན་གྱི་སྲུང་མ་རྣམས། །མགྱོགས་པ་སྟོད་ལ་རྣོན་པོ་ཐོགས། །མྱུར་བར་ཞོན་ལ་རིངས་པར་རྒྱུགས། །སྡང་བའི་དགྲ་བོའི་ཚེ་སྲོག་ཆོད། །དཔའ་རྩལ་ཅན་གྱིས་རྟ་རྣམས་སྟོད། །ཡང་ཟོར་ཅན་གྱིས་རྟ་ཡར་སྟོད། །མྱུར་མགྱོགས་ཅན་གྱིས་རྟ་ཡར་སྟོད། །རེམས་ཤིག་མ་གཡེལ་སྲུང་མ་རྣམས། །མགྱོགས་པ་ཞོན་ལ་རིངས་པར་རྒྱུགས། །བཙན་པོ་གྱོན་ལ་རྣོན་པོ་ཐོགས། །སྡང་བའི་དགྲ་ལ་མྱུར་དུ་རྒྱུགས། །དགྲ་བོ་མི་དཔའ་རྟ་མགྱོགས་ཀྱི། །རྒྱུས་པ་ཆོད་ལ་དོན་སྙིང་ཕྱུང་། །དགྲ་མཁར་ཤིག་ལ་དགྲ་དཔུང་ཟློག །སྡང་བའི་དགྲ་བོ་ཆམ་ལ་ཕོབ། །མ་གཡེལ་སྲུང་མ་མྱུར་དུ་ཆོས། །ཁྲོ་གཏུམ་སྨྲ་བའི་སྲུང་མ་ཆོས། །རྣོན་པོས་གསོད་པའི་སྲུང་མ་ཆོས། །འོག་རྟ་མགྱོགས་པའི་སྲུང་མ་ཆོས། །འཐབ་ན་དཔའ་བའི་སྲུང་མ་ཆོས། །མ་གཡེལ་སྲུང་མ་གཉན་པོ་རྣམས། །ཐུབ་པའི་དཔུང་དང་དགྲ་ལ་ཆོས། །ཆོད་པའི་ངར་དང་དགྲ་ལ་ཆོས། །རྒྱུགས་
(༢༥)ཤིག་སྡང་བའི་དགྲ་ལ་རྒྱུགས། །དགྲ་ལ་གཡུལ་ཉེས་གྲི་ལིངས་ཕྱུང་། །དགྲ་ལ་གློ་བུར་ཡེ་འདྲོགས་ཐོང་། །དགྲ་ལ་མི་ཤི་རྟ་འགྱེལ་ཐོང་། །དགྲ་ཡི་མི་ནོར་རྡུལ་དུ་རློག །དགྲ་བོ་མི་དཔའ་རྟ་མགྱོགས་ཀྱི། །རྒྱུས་པ་ཆོད་ལ་དོན་སྙིང་ཕྱུང་། །དགྲ་མཁར་ཤིག་ལ་དགྲ་དཔུང་ཟློག །དགྲ་སྡང་མ་ལུས་ཆམ་ལ་ཕོབ། །བཅོལ་བའི་ཕྲིན་ལས་འགྲུབ་པར་མཛོད། །མ་གཡེལ་འཇིག་རྟེན་མྱུར་མགྱོགས་ལྷ། །མ་གཡེལ་ལྷ་ཡི་རྒྱལ་པོ་ཡིས། །གླང་པོ་ཞོན་ལ་རྡོ་རྗེ་ཕྱོར། །འཁོར་ནི་དྲི་ཟའི་དམག་རྣམས་སྡུས། །མགྱོགས་པ་ཞོན་ལ་རྣོ་མཚོན་རྡོར། །སྡང་བའི་དགྲ་ལ་མྱུར་དུ་ཆོས། །དགྲ་སྲོག་ཆོད་ལ་དོན་སྙིང་ཕྱུང་། །མེ་ལྷའི་རྒྱལ་བོ་ར་ལ་ཞོན། །འཁོར་ནི་མེ་ལྷའི་དམག་རྣམས་སྡུས། །མགྱོགས་པ་ཞོན་ལ་རྣོ་མཚོན་རྡོལ། །དགྲ་ལ་ཚ་བའི་ནད་ཡམས་ཐོང་། །མགྱོགས་པ་ཞོན་ལ་དགྲ་ལ་རྒྱུགས། །སྡང་བའི་དགྲ་བོའི་ཚ་སྲོག་ཆོད། །གཤིན་རྗེའི་རྒྱལ་བོ་མ་ཉེ་ཆིབས། །འཁོར་ནི་གཤིན་རྗེའི་རྟ་རྣམས་སྟོད། །མ་གཡེལ་སྲུང་མ་དགྲ་ལ་རྒྱུགས། །སྡང་བའི་དགྲ་ཡི་ཡུལ་འཁོར་དཀྲུགས། །ཚེ་སྲོག་ཆོད་ལ་དུས་མཐའ་སྡུས། །ལས་ཀྱི་གཤིན་རྗེ་འཁོར་བཅས་ཀྱིས། །སྡང་བྱེད་དགྲ་བོའི་ཚེ་སྲོག་ཆོད། །སྙིང་
(༢༦)ཁྲག་དམར་པོ་འཐུངས་ལ་སོད། །དགྲ་བོ་མ་ལུས་ཁྲམ་ལ་ཐོབ། །ལྷོ་ནུབ་སྲིན་པོའི་རྒྱལ་པོ་ཡིས། །ཀུན་ཏུ་རྒྱལ་བའི་མི་ལ་ཞོན། །སྲིན་པོའི་འཁོར་རྣམས་རྟ་ཡར་སྟོད། །མྱུར་བར་ཞོན་ལ་རིངས་པར་རྒྱུགས། །སྡང་བའི་དགྲ་ཡི་ཚེ་སྲོག་ཆོད། །མ་གཡེལ་འཇིག་རྟེན་སྲུང་མ་རྣམས། །རྡོ་རྗེ་འཆང་གི་བཀའ་བྱུང་གི། །དམ་ཚིག་གཉན་ལམ་འདའ་བར། །རྣལ་འབྱོར་པ་ལ་དགྲ་བྱུང་གི། །ཕྲིན་ལས་མཛད་པའི་སྲུང་མར་བསྐོས། །མ་གཡེལ་འཇིག་རྟེན་སྲུང་མ་རྣམས། །དགྲ་སྲོག་ཆོད་ལ་དོན་སྙིང་ཕྱུང་། །དགྲ་མཁར་སྒྱེལ་ལ་དགྲ་དཔུང་ཟློག །སྡང་བྱེད་དགྲ་པོ་ཆམ་ལ་ཕོབ། །ཆུ་ལྷའི་རྒྱལ་བོ་ཆུ་སྲིན་ཆིབས། །འཁོར་ནི་ཆུ་ལྷའི་རྟ་ཡར་སྟོད། །མྱུར་བར་ཞོན་ལ་དགྲ་ལ་རྒྱུགས། །སྡང་བའི་དགྲ་ལ་མཛེ་ནད་ཐོང་། །དགྲ་ཡི་ཡུལ་ཁམས་ཆུ་ཡིས་ཤིག །རླུང་ལྷའི་རྒྱལ་བོ་ཤ་བ་ཞོན། །འཁོར་ནི་རླུང་ལྷའི་རྟ་རྣམས་སྟོད། །སྡང་བའི་དགྲ་ལ་མྱུར་དུ་རྒྱུགས། །དགྲ་བོའི་སེམས་ཀྱི་མར་མེ་སོད། །གནོད་སྦྱིན་རྒྱལ་བོ་སེང་གེ་ཆིབས། །འཁོར་ནི་གནོད་སྦྱིན་རྟ་ཡར་སྟོད། །སྡང་བའི་དགྲ་བོའི་ཐོག་ཏུ་རྒྱུགས། །དགྲ་བོའི་མིག་གི་གསལ་བྱེད་སྣུབས། །དབང་ལྡན་རྒྱལ་པོ་གླང་པོ་ཆིབས། །འཁོར་ནི་དབང་
(༢༧)། ལྡན་རྟ་རྣམས་སྟོད། །སྡང་བའི་དགྲ་བོའི་ཚེ་སྲོག་ཆོད། །ཚངས་པའི་རྒྱལ་བོ་རྟ་ལ་ཞོན། །འཁོར་ནི་ཚངས་པའི་རྟ་རྣམས་སྟོད། །དགྲ་ལ་རྒྱུགས་ལ་རྟེན་ཕུར་ཕུད། །ས་བདག་རྒྱལ་བོ་ཕག་ལ་ཞོན། །འཁོར་ནི་ས་བདག་ཚངས་པ་རྣམས། །མགྱོགས་པ་ཞོན་ལ་གོམ་པ་སྐྱེད། །བཙན་པོ་གྱོན་ལ་རྣོན་པོ་རྡོར། །སོད་ཅིག་རྒྱོབ་ཅིག་དགྲ་དང་བགེགས། །སྡང་བའི་དགྲ་ཡི་ཡུལ་དུ་རྒྱུགས། །དགྲ་བོ་མི་ནོར་འཁོར་དང་བཅས། །ས་གཞི་རྡུལ་དང་བཅས་པ་རྣམས། །རླུང་ལ་ཕྱོར་ལ་ཆུ་ལ་ཐོབ། །མིང་ཡང་མེད་པར་རྡུལ་དུ་རློག །འཇིག་རྟེན་ཕྱོགས་རྣམས་སྐྱོང་བར་བྱེད། །ལྷ་མིན་གཡུལ་ལས་རྒྱལ་བར་བྱེད། །མ་གཡེལ་སྡང་བའི་དགྲ་ལ་རྒྱུགས། །སྡང་བའི་དགྲ་བོ་ལས་ངན་གྱི། །རྒྱུས་པ་ཆིངས་ལ་ཁོང་བ་དཀྲུགས། །མ་གཡེལ་སྲུང་མ་མཐུ་རྩལ་ཅན། །ཐུབ་པའི་བསྟན་སྲུང་གཉེན་པོ་རྣམས། །མ་གཡེལ་དགྲ་བོའི་ཐོག་ཏུ་ཆོས། །རྒྱ་གར་ཡུལ་གྱི་སྲུང་མ་རྣམས། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མྱུར་དུ་སྒྲོལ། །སྡང་བའི་དགྲ་ཡི་རྒྱུས་ང་ཆོད། །གནོད་པའི་བགེགས་རྣམས་རྡུལ་དུ་རློག །མ་གཡེལ་སྲུང་མ་མྱུར་བར་སྐུལ། །མ་གཡེལ་སྡང་བའི་དགྲ་ལ་རྒྱུགས།
(༢༨)སྡང་བྱེད་དགྲ་བོའི་རྒྱུས་པ་ཆིངས། །དགྲ་མཁར་སྒྱེལ་ལ་དགྲ་དཔུང་ཟློག །སྡང་བྱེད་དགྲ་པོ་ཆམ་ལ་ཕོབ། །གནོད་བྱེད་བགེགས་ཀྱི་དོན་སྙིང་ཕྱུང་། །མ་གཡེལ་སྲུང་མ་མྱུར་དུ་ཆོས། །རྒྱ་གར་ཡུལ་གྱི་མཁའ་འགྲོ་མ། །བོད་ཀྱི་ཡུལ་གྱི་བསྟན་སྲུང་མ། །རྒྱལ་མོ་རྗེ་ཡི་མགུར་ལྷ་མོ། །འཇིག་རྟེན་ཁམས་ཀྱི་ལག་ལེན་མཁན། །སྟོང་གསུམ་དམོད་མོ་བྱེད་མཁན་མོ། །བོད་ཀྱི་ཡུལ་གྱི་དུག་ལྷ་མོ། །དྲེལ་རྟ་རྒྱ་བོད་མགོ་དགུ་ཆིབས། །རིངས་པར་ཆོས་ལ་མྱུར་དུ་རྒྱུགས། །གཏོར་མ་འདི་དང་དགྲ་བོ་གཉིས། །མཉམ་པོར་བཞེས་ལ་མྱུར་དུ་སྒྲོལ། །བདག་ལ་སྡང་བའི་དགྲ་བོ་འདི། །ཞག་དང་ཟ་མར་མ་འགོར་བར། །ད་ལྟ་ཉིད་དུ་མྱུར་དུ་སོད། །མྱུར་བར་མྱུར་བར་རིངས་སོ་རིངས། །རེམས་ཤིག་མ་གཡེལ་སྲུང་མ་རྣམས། །འཇིག་རྟེན་ཁམས་ཀྱི་སྲུང་མ་རྣམས། །འོག་རྟ་སྟོད་ལ་དམག་མི་སྐུལ། །བཙན་པོ་གྱོན་ལ་རྣོན་པོ་ཐོགས། །སངས་རྒྱས་ཆོས་ལ་ཕྱོགས་པའི་ལྷ། །མཆོད་ན་མགྲོན་ལ་བྱམས་པའི་ལྷ། །མདག་ན་ཇག་ལ་མྱུར་མཛད་ལྷ། །བོད་ཀྱི་ཐར་ལྷ་ཡར་ཞུར་གྱིས། །རྟ་ནི་དམར་ཞུར་ཟག་དམར་སྟོད། །སྐུ་ལ་གསེར་ཁྲབ་སེར་པོ་མནབས། །ཤེལ་གྱི་རྡོ་རྗེའི་ཆ་ག་བཏབ། །གཉན་པོ་ཁྱོད་ཀྱི་དཔུང་གཡས་སུ་།
(༢༩)བཀྲ་ཤིས་གསེར་ཉ་དང་པོ་ལ། །ཤེས་རབ་ལྷ་མདའ་སྐར་ལྟར་འཁྲུགས། །གཡོན་གྱི་དཔའ་བོ་ཆས་པ་ལ། །ཐབས་ཀྱི་ལྷ་གཞུ་གློག་ལྟར་འཁྱུག །དབུ་ཡི་དུང་རྨོག་གཙུག་ཏོར་ལ། །ཤེས་རབ་བྱང་ཕོད་ཉི་ལྟར་འབར། །རྒྱབ་ཏུ་འབྲུག་དང་སེང་གེ་འགྲོལ། །སྔོན་དུ་ཁྱུང་དང་སེང་གེ་འཕུར། །འཁོར་དུ་གཉན་ཕྲན་བསམ་མི་ཁྱབ། །ཀུན་ཀྱང་མི་དཀར་རྟ་དཀར་ཅན། །བ་དན་དཀར་བོ་གནམ་ལ་གཡུགས། །ཀུ་བསྭོོྭ་ཆ་སྒྲ་དི་རི་རི། །མྱུར་བར་མྱུར་བར་རིངས་སོ་རིངས། །མ་གཡེལ་སྡང་བའི་དགྲ་ལ་རྒྱུགས། །དགྲ་བོ་མི་དཔའ་རྟ་མགྱོགས་ཀྱི། །དཔུང་པ་ཆོག་ལ་རྒྱུས་པ་ཆིངས། །དགྲ་མཁར་སྒྱེལ་ལ་དགྲ་དཔུང་ཟློག །སྡང་བྱེད་དགྲ་བོ་ཆམ་ལ་ཕོབ། །མ་གཡེལ་སྲུང་མ་བོད་ཀྱི་ལྷ། །གཉན་པོ་རྨ་གཉན་སྤོམ་ར་ཡིས། །མགྱོགས་པ་དང་དཀར་ཡང་ཞུར་ལ། །དར་སྟན་བསེ་སྒ་ཁྲ་བོ་སྟོད། །སྐུ་ལ་གསེར་ཁྲབ་སེར་པོ་མནབས། །དཔའ་རྟགས་སྟག་གི་ཤམ་ཐབས་ཅན། །དབུ་ལ་དུད་རྨོག་ཟུར་གསུམ་ལ། །སྟག་འཕྲུ་ཁྱུང་གི་ལྡེམ་འཕྲུ་བཙུགས། །གཡས་ཀྱི་སྟག་དོང་ཁྲ་བོ་ལ། །ལྷ་མདའ་མིེ་འབར་སྐར་ལྟར་འཁྲུགས། །གཡོན་གྱི་གཟིག་ཤུབ་ཐིག་ལེ་ལ། །ལྷ་གཞུ་གློག་འོད་ཁྱུགས་སེ་ཁྱུག
(༣༠)རྐེང་ཀྱི་དངུལ་ཤུབ་ཟལ་དཀར་ལ། །ཤེས་རབ་རལ་གྲི་གློག་ལྟར་འགྱུ། །དབུ་ཡི་བསེ་རྨོག་ཟུར་གསུམ་ལ། །རྒོད་འཕྲུ་ལྡེམ་དར་ཉི་ལྟར་ཤར། །སྔོན་དུ་ཁྱུང་དང་རྒོད་གཉིས་ཀྱིས། །ལ་ཉེ་རྩེད་མོ་སྤྲུལ་པ་མང་། །རྒྱབ་ཏུ་སྟག་གཡག་སེང་གེ་རོལ། །གཡས་ན་ལྷ་དམག་སྤུངས་སེ་སྤུང་། །གཡོན་ན་གཉན་དམག་ཤ་ར་ར། །བོད་ཡུལ་གཉན་དང་ས་བདག་དང་། །དེ་རིང་འདུས་པའི་ས་བདག་དང་། །འདི་ན་གནས་པའི་མཐུ་རྩལ་ཅན། །ཁྱད་པར་དགོངས་པའི་སྲུང་མ་རྣམས། །མ་གཡེལ་མགྱོགས་པའི་རྟ་རྣམས་སྟོད། །སྡང་བའི་དགྲ་ལ་ཞེ་སྡང་སྐྱེད། །མགྱོགས་པ་ཞོན་ལ་རྣོ་མཚོན་ཐོགས། །རྡོ་རྗེ་འཆང་གི་བཀའ་བྱུང་གི། །བསྟན་པ་གཉན་པོ་བསྲུང་དུ་གསོལ། །ཁྱུང་དང་སེང་གེ་གཡུ་འབྲུག་དང་། །གྱི་ལིང་ཤང་ཤང་རྨ་བྱ་དང་། །སྟག་གཟིག་ཝ་དབྱི་དཀར་བོ་དང་། །གཡག་ལུག་བྱ་ཡི་གཟུགས་འགྲོས་འདི། །སྔགས་དང་ཕྱག་རྒྱའི་བྱིན་རླབས་ཀྱིས། །འདོད་པའི་ཡོན་ཏན་ལྔ་དང་ལྡན། །བསམ་གཏན་ལྷ་ཡི་དཀོར་བས་ལྷག །སྲུང་མ་གཉན་པོའི་སྐུ་ལ་འབུལ། །སྡང་བའི་དགྲ་ཡི་རྒྱུས་པ་ཆིངས། །སྡང་བའི་དགྲ་ཡི་ཟས་ནོར་ཆོད། །ཟུན་ལ་དབང་ཐང་མངོན་དུ་ཆོད། །སྡང་བའི་དགྲ་ཡི་སྒོ་མོ་ཕྱེས། །ཚང་གསུམ་ནོང་གྱི་ནང་
(༣༡)། དབྱེན་གྱིས། །དགྲ་ནོར་ཟུན་ལ་གནངས་སུ་བྱིན། །མགོན་པོ་ལྷ་དམག་འཁོར་བཅས་ཀྱི། །བདག་དང་རྒྱུ་སྦྱོར་ཡོན་བདག་གིས། །སྡང་བའི་དགྲ་ལ་དམག་འདྲེན་ན། །དམག་མི་རྣམས་ཀྱིས་དམག་དཔུང་མཛོད། །ནམ་མཁའི་ཁམས་ནས་ལྷ་དམག་དྲོངས། །བར་སྣང་ཁམས་ནས་གཉན་དམག་དྲོངས། །ས་གཞིའི་ཁམས་ནས་ཀླུ་དམག་དྲོངས། །སྡང་བའི་དགྲ་ལ་གཏོར་ཟོར་རྒྱོབ། །དཀོན་མཆོག་གསུམ་གྱི་སྤྱི་དགྲ་དང་། །རྣལ་འབྱོར་བདག་གི་སྒོས་དགྲ་རྣམས། །སོད་ཅིག་རྒྱོབ་ཅིག་ས་མ་ཡ། །བཅོལ་པའི་ཕྲིན་ལས་འགྲུབ་པར་མཛོད། །མ་གཡེལ་སྲུང་མ་མཐུ་རྩལ་ཅན། །རྒྱུ་སྦྱོར་ཡོན་གྱི་བདག་པོ་འདི། །འགྲོན་ལ་འགྲོ་ན་འགྲོན་དཔོན་མཛོད། །ཕྱོགས་བཞི་བྱེས་ལ་གར་འགྲོ་ཡང་། །སྔོན་ནས་བསུས་ལ་རྒྱབ་ནས་སྐྱོལ། །འགྲོན་པོ་ཤུལ་དུ་ཞུགས་པའི་ཚེ། །འཇིགས་པ་བརྒྱད་ལས་སྐྱོབ་པར་མཛོད། །མཐོ་ལ་བབས་ན་ལམ་སྒྲོལ་ཅིག །དམའ་ལ་བབས་ན་ལམ་སོལ་ཅིག །ཆུ་ལ་འགྲོ་ན་གྲུ་སྒྲོལ་ཅིག །ཉམས་པའི་ཡུལ་དུ་མཛོ་རྟ་རྟེན། །མཐོ་སར་སྐྱོངས་ལ་བྱ་ར་གྱིས། །དམའ་སར་མ་མཐོང་འཚོ་རྫི་མཛོད། །འགྲོན་པོ་སྔོན་གྱི་ལམ་སྣ་དྲོངས། །འགྲོན་པོ་རྒྱབ་ི་ཤུལ་མ་གྱིས། །ཁལ་མ་རྣམས་ནི་བདེ་
(༣༢)བར་སྐྱོངས། །འགྲོན་པོ་མི་རྟ་ཁལ་མཛོ་རྣམས། །བཤུལ་རིང་ལམ་དུ་ཞུགས་པའི་ཚེ། །ཆད་ཅིང་ངལ་བ་མ་གཏོང་ཞིག །ན་ཞིང་ཚ་བ་མ་གཏོང་ཞིག །འགྲོན་པོ་གཞི་བྱེས་ལམ་གསུམ་དུ། །ཉིན་ལ་བབས་ན་འཚོ་རྫི་གྱིས། །ནུབ་ལ་བབས་ན་མེལ་ཚེ་གྱིས། །ཕྱི་རྐུན་ནང་དུ་མ་ཤོར་ཅིག །ནང་རྐུན་བྲན་ལ་མ་འགྱེད་ཅིག །འགྲོན་པོ་ཐུགས་ཡིད་མ་དཀྲུགས་ཤིག །བུང་ཁ་ནང་འཁོན་མ་ཕྱུང་ཞིག །གྲོ་ལ་རྐུ་སྣོག་མ་བྱེད་ཅིག །ནོར་དང་ཐུགས་ལ་མ་འགལ་ཅིག །ཡེ་འདྲོྭགས་ཞོག་འུར་མ་གཏོད་ཞིག །ཚོང་དུས་གནས་སུ་ཕྱིན་པའི་ཚེ། །ཁ་ནི་ཟས་འདོད་ཟས་དང་སྤྲོད། །ལག་པ་ནོར་འདོད་ནོར་དང་སྤྲོད། །བྱེས་པ་རྣམས་ཀྱི་ཆངས་པ་ཕྲོལ། །གནས་པོ་རྣམས་ཀྱི་སེམས་ཁ་སྲོང་། །ཅི་འདོད་ནོར་གྱི་དངོས་གྲུབ་བྱིན། །རྒྱ་ཡི་ཟས་ནོར་པོད་ལ་བྱིན། །ཕོད་ཀྱི་ཟས་ནོར་གཡང་དུ་ཁུག །འགྲོན་པོ་རྣམས་ཀྱིས་དོན་གཉེར་ན། །དཀོན་མཆོག་གསུམ་གྱི་བདེན་པ་ཡིས། །ཕྲེང་བ་མགོ་ལ་བླུགས་པ་ལྟར། །ལག་པ་གཡས་ན་དཔལ་ཡོད་ཤོག །གཡོན་ན་དཔལ་ནི་གནས་གྱུར་ཅིག །འགྲོན་པོ་དག་ནི་དོན་གཉེར་ན། །རྙེད་པ་དག་ནི་རྙེད་གྱུར་ཅིག །འགྲོན་པོ་ནོར་རྣམས་གྲུབ་པ་ཡིས། །སྲུང་མ་གཉན་ལ་གཏང་རག་གཏོང་། །ཕྱིས་ཀྱང་བྱེད་པའི་ཞུ་དོན་
(༣༣)། འབུལ། །བཀའ་ཡི་གཏོར་མ་རྒྱ་ཆེན་འདི། །ཉིད་ཀྱི་མཐུན་རྫས་གཡག་ལུག་དང་། །རིན་ཆེན་གསེར་གཡུའི་ཕྱེ་མ་དང་། །ཇ་ཆང་ཟས་སྐོམ་ཕུད་ཀྱིས་མཆོད། །ལེགས་ལྡན་མགོན་པོས་བྱེས་དཔོན་མཛོད། །དཔལ་རབ་འཆང་གིས་ལམ་ལྷ་གྱིས། །ཉི་མའི་སྲས་པོས་སོ་པ་གྱིས། །ཤ་ཝ་རི་ཡིས་དཀོར་ནོར་སྐྱོངས། །རེ་མནྟ་ཡིས་རྟ་རྣམས་འཚོས། །བྲག་ལྷ་མགོན་པོས་འགྲོན་ལམ་ཕྱེས། །ཛམ་བྷ་ལ་ཡིས་ནོར་ལྷ་མཛོད། །རྣམ་ཐོས་སྲས་ཀྱིས་གསེར་དངུལ་སྡུས། །སྲུང་མ་རྣམས་ཀྱིས་དགྲ་སྡང་ཐུལ། །འཇིགས་པ་བརྒྱད་ལ་ཐུགས་རྗེས་སྐྱོབས། །ཡུལ་ལྷ་གཉན་གྱིས་མཐུ་རོགས་མཛོད། །ལྷ་ཀླུ་རྣམས་ཀྱིས་རྒྱབ་རྟེན་མཛོད། །རྡོ་རྗེ་ལེགས་པས་དམག་སྣ་དྲོངས། །མི་ལ་ཆོད་ལ་བདག་ལ་བྱིན། །མ་གཡེལ་སྲུང་མ་བོད་ཀྱི་ལྷ། །རེམས་ཤིག་བདག་གི་དོན་རྣམས་སྒྲུབས། །ལམ་དགྲ་བྱེས་ཀྱི་འགོང་པོ་ཡི། །རྒྱུས་པ་ཆིངས་ལ་རྡུལ་དུ་རློག །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། །མ་གཡེལ་སྲུང་མ་མཐུ་རྩལ་ཅན། །མ་གཡེལ་བགེགས་དང་འབྱུང་པོ་ཐུལ། །བཀའ་ཡི་གཏོར་མ་རྒྱ་ཆེན་དང་། །མཐུན་པའི་དམ་རྫས་འདི་བཞེས་ལ། །ནད་པ་ཡོད་ན་སོས་པར་མཛོད། །རིམས་དང་ཡམས་ཀྱི་ཁ་ལོ་སྒྱུར། །གློ་
(༣༤)བུར་ནད་ཀྱི་གདུག་པ་ཟློག །དམ་ཉམས་དགྲ་བོ་ལས་ངན་གྱིས། །དམག་དང་ཇག་རྐུན་ཤོམ་པའི་ཚེ། །སྲུང་མ་རྣམས་ཀྱིས་དམག་སྣ་སྒྱུར། །ཕོ་ཉ་རྣམས་ཀྱིས་དགྲ་དཔུང་ཟློག །དྲེགས་བྱེད་རྣམས་ཀྱིས་དགྲ་ཁྲག་འཐུངས། །མྱུར་བར་མྱུར་བར་རིངས་སོ་རིངས། །མ་གཡེལ་སྲུང་མ་མཐུ་རྩལ་ཅན། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། མ་གཡེལ་མགོན་པོ་མཐུ་རྩལ་ཅན། །བཀའ་ཡི་གཏོར་མ་རྒྱ་ཆེན་དང་། །མཐུན་པའི་དམ་རྫས་འདི་བཞེས་ལ། །བྱད་ཁ་སྒྱུར་ལ་དལ་ཁ་ཟློག ཕོ་ཉ་ཟློག་ལ་བྱད་མ་སོད། །ཕུར་ཁ་བསྒྱུར་བའི་དུས་ལ་བབ། །དལ་ཁ་བཟློག་པའི་དུས་ལ་བབ། །ཡམས་ཁ་བསྒྱུར་བའི་དུས་ལ་བབ། །དུས་ལ་བབ་པོ་ཕྲིན་ལས་མཛོད། །ཧཱུྃ། །མ་གཡེལ་སྲུང་མ་མཐུ་རྩལ་ཅན། །བཀའ་ཡི་གཏོར་མ་རྒྱ་ཆེན་འདི། །སྡང་བའི་དགྲ་དང་མཉམ་དུ་བཞེས། །སངས་རྒྱས་བསྟན་པ་གཉན་པོ་སྲུངས། །དཀོན་མཆོག་གསུམ་གྱི་དབུ་འཕང་སྟོད། །རྒྱུ་སྦྱོར་ཡོན་གྱི་བདག་པོ་ཡི། །བྱེས་སུ་འགྲོ་བའི་དགྲ་ལྷ་མཛོད། །ཡུལ་དུ་འདུག་ན་ཡུལ་དཔོན་མཛོད། །དམག་ལ་འགྲོ་ན་དམག་དཔོན་མཛོད། །ཇག་ལ་འགྲོ་ན་ཇག་དཔོན་མཛོད། །ཚོང་ལ་འགྲོ་ན་ཚོང་དཔོན་མཛོད། །ཉེས་བྱེད་དགྲ་བོ་ཆམ་ལ་ཕོབ། །བཅོལ་བའི་
(༣༥)། ཕྲིན་ལས་འགྲུབ་པར་མཛོད། །ཕྱོགས་བཅུའི་རྡོ་རྗེ་སློབ་དཔོན་དང་། །བདག་ཅག་མཆེད་དང་ལྕམ་དྲལ་དང་། །འཁོར་དང་བཅས་པའི་ཡོན་བདག་ལ། །སྡང་བའི་དགྲ་བོ་ལས་ངན་འདི། །རིངས་པར་ཁུག་ལ་མྱུར་དུ་སྒྲོལ། །བཀའ་ཡི་གཏོར་མ་འདི་བཞེས་ལ། །བཅོལ་བའི་ཕྲིན་ལས་འགྲུབ་པར་མཛོད། །ཅེས་བསྐུལ་ལོ། ༈ །དཔལ་མགོན་པོའི་དགྲ་ཆོས་རྩང་གྱེར་གྱི་ཟློག་པ་བྱ་བ་ནི། །ཧཱུྃ། དཔལ་ལྡན་མགོན་པོ་ནག་པོ་ཆེན་པོ་ཡི། །དྲག་པོ་དཔལ་གྱི་གཏོར་ཆེན་ལྕགས་རི་ལ། །སྤྲུལ་པའི་ལས་མཁན་ཕོ་ཉ་འགྱེད་པའི་རྟེན། །དམར་ནག་རྩང་ཕུར་སྲིན་མོ་འགྲོས་སུ་བཙུགས། །ཉོན་མོངས་གདུག་པ་མ་ལུས་བསྒྲལ་བའི་ཕྱིར། །སྤྲུལ་པའི་ཕྱག་བརྙན་རྟགས་ཀྱི་ཕྱག་རྒྱར་གསལ། །རྩང་ཕུར་ཟུར་གསུམ་རྩེ་མོ་གཉིས་དང་ལྡན། །ཡར་གྱི་རྩེ་མོ་ཆོས་ཉིད་དབྱིངས་སུ་སླེབ། །མར་གྱི་རྩེ་མོས་རྒྱུད་དྲུག་སྙིང་པོ་གཟེར། །སྐེད་པ་རྒྱ་མདུད་མཚོན་ཆའི་གུར་གདུགས་ཕུབ། །ཡར་གྱི་རྩེ་ལ་རམ་གྱི་ཐོག་སེར་འབེབས། །མར་གྱི་རྩེ་མོར་མཚོན་ཆའི་བུ་ཡུག་འཚུབ། །སྐེད་པ་རྒྱ་མདུད་ལྷ་ཡི་ཕོ་བྲང་གནས། །དམར་ནག་རྩང་ཕུར་སྲིན་མོ་འགྲོས་སུ་བཙུགས། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་ཤ་ཟ་ལྗིབས་སེ་ལྗིབ། །
(༣༦)རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །བསྐད་ངོ་ཕོ་ཉའི་ཐུགས་དམ་བསྐང་། །བར་ཆད་སོལ་ལ་རྐྱེན་རྣམས་ཟློག །ཟློག་ཅིག་དགྲ་བགེགས་དམག་དཔུང་ཟློག །ཟློག་ཅིག་དགྲ་བགེགས་བྱང་སྟེམས་ཟློག །ཤར། ཧཱུྃ། དཔལ་ལྡན་མགོན་པོ་འཁོར་བཅས་ཀྱིས། །འཇིག་རྟེན་ཁམས་ནི་ཐམས་ཅད་ཀུན། །སྐད་ཅིག་ཉིད་ལ་ཞི་མཛད་དེ། །ཐུགས་རྗེ་ཞི་བའི་ཕྲིན་ལས་ཀྱིས། །གནོད་བྱེད་དགྲ་བགེགས་བྱད་མ་ཡི། །རིག་སྔགས་རྦོད་གཏོང་ཞི་བར་མཛོད། །ཞི་བར་མ་གྱུར་གང་ཡང་མེད། །དངུལ་ལམ་དཀར་པོའི་ཤིང་རྣམས་ལ། །ཞི་བའི་རྩད་ཕུར་རྩེ་མོ་གཉིས། །རྐེད་པ་རྒྱ་མདུད་ཟླུམ་པོ་ལ། །ཆོས་སྐྱོང་ཞི་བའི་གཞལ་ཡས་ཁང་། །མགོན་པོའི་ཚོགས་ཀྱི་སྐུར་བསྒོམས་ནས། །དགྲ་བགེགས་བྱད་མའི་ཤ་ཟ་བ། །ཤར་ཕྱོགས་གཏོར་ཆེན་ལྕགས་རི་ལ། །བཙུགས་པས་ཐམས་ཅད་ཞི་བར་གྱུར། །ཞི་བར་མ་གྱུར་གད་ཡང་མེད། །གནོད་བྱེད་དགྲ་བགེགས་བར་ཆད་དང་། །རིག་སྔགས་རྦོད་གཏོང་བྱད་སྟེམས་རྣམས། །ཞི་མཛད་མགོན་པོས་ཞི་བར་མཛོད། །ཨོཾ་མ་ཧཱ་ཀཱ་ལ་ཧཱུྃ་ཕཊ། བར་ཆད་ཐམས་ཅད་ཤཱནྟི༚་ཀུ་རུ་སྭཱ་ཧཱ། ཞི་མཛད་རྣོ་དབལ་རྩང་ཕུར་ཟླུམ་པོ་ཡི། །ཡར་གྱི་རྩེ་ལ་དུང་གི་སེང་གེ་འགྱིང་། །
(༣༧)། སྤྲུལ་པའི་སེང་གེ་ཁྲོས་པས་ནམ་མཁའ་གང་། །གཡུ་ཡི་རལ་པ་སྔོན་པོ་སྤྲིན་ལྟར་གཏིབས། །དྲག་པོ་སེང་གེའི་ངར་སྐད་ལྷངས་སེ་ལྷང་། །མར་གྱི་རྩེ་ལ་ཆུ་སྲིན་མཆེ་བ་གཙིགས། །སྤྲུལ་པའི་ཆུ་སྲིན་གདུག་པ་བསམ་མི་ཁྱབ། །ཞལ་གདངས་མཆེ་གཙིགས་དྲག་པོའི་རྐན་སྒྲ་རྡེབ། །སྐེད་པ་རྒྱ་མདུད་མེ་འབྲུག་རླུང་འབྲུག་འཁྱུག །སྤྲུལ་པའི་འབྲུག་ཆེན་བར་སྣང་ཁྱབ་པར་གང་། །འབྲུག་སྐད་ཆེམ་ཆེམ་གློག་འོད་ཁྱུགས་སེ་ཁྱུག །ཞི་བྱེད་རྩང་ཕུར་སྲིན་མོ་འགྲོས་སུ་བཙུགས། །རྩང་ཕུར་རྡམ་སྟབས་ཁྲབས་སེ་ཁྲབ། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་ཤ་ཟ་ལྗིབས་སེ་ལྗིབ། །རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །བསྐང་ངོ་ཕོ་ཉའི་ཐུགས་དམ་བཀང་། བར་ཆད་སོལ་ལ་རྐྱེན་རྣམས་ཟློག །དགྲ་བགེགས་བྱད་མ་རྡུལ་དུ་རློག །ཟློག་ཅིག་དགྲ་བགེགས་དམག་དཔུང་ཟློག །སོད་ཅིག་དགྲ་བགེགས་བྱད་མ་སོད། །ཟློག་ཅིག་རིག་སྔགས་བྱད་སྟེམས་ཟློག །ས་མ་ཡ་བྷྱོ་བྷྱོ་ཟློག་ཟློག །ལྷོ། ཧཱུྃ། དཔལ་ལྡན་མགོན་པོ་འཁོར་བཅས་ཀྱིས། །འཇིག་རྟེན་ཁམས་ནི་ཐམས་ཅད་ཀུན། །སྐད་ཅིག་ཉིད་ལ་རྒྱས་པར་མཛད། །ཚེ་དབང་རྒྱས་པའི་ཕྲིན་ལས་ཀྱིས། །བདག་
(༣༨)དང་རྒྱུ་སྦྱོར་ཡོན་བདག་གི། །ཚེ་དང་བསོད་ནམས་རྒྱས་པར་མཛོད། །རྒྱས་པར་མ་གྱུར་གང་ཡང་མེད། །གསེར་རམ་སེར་པོའི་ཤིང་རྣམས་ལ། །རྒྱས་པའི་རྩང་ཕུར་རྩེ་མོ་གཉིས། །སྐེད་པ་རྒྱ་མདུད་གྲུ་བཞི་ལ། །ཆོས་སྐྱོང་རྒྱས་པའི་གཞལ་ཡས་ཁང་། །མགོན་པོའི་ཚོགས་ཀྱི་སྐུར་བསྒོམས་ནས། །དགྲ་བགེགས་བྱད་མའི་ཤ་ཟ་བ། །ལྷོ་ཕྱོགས་གཏོར་ཆེན་ལྕགས་རི་ལ། །བཙུགས་པས་ཐམས་ཅད་རྒྱས་པར་གྱུར། །རྒྱས་པར་མ་གྱུར་གང་ཡང་མེད། །བདག་དང་རྒྱུ་སྦྱོར་ཡོན་བདག་གི། །ཚེ་དང་བསོད་ནམས་ལོངས་སྤྱོད་རྣམས། །རྒྱས་མཛད་མགོན་པོས་རྒྱས་པར་མཛོད། །ཨོཾ་མ་ཧཱ་ཀཱ་ལ་ཧཱུྃ་ཕཊ། །ཚེ་དང་བསོད་ནམས་ཐམས་ཅད་པུཥྚི༚་ཀུ་རུ་སྭཱ་ཧཱ། རྒྱས་མཛད་རྣོ་དཔལ་རྩང་ཕུར་གྲུ་བཞི་ཡི། །ཡར་གྱི་རྩེ་ལ་མཚལ་སྟག་དམར་པོ་མཆོངས། །རྒྱ་སྟག་བཀྲ་བའི་འཛུམ་དྲུག་ཤིགས་སེ་ཤིག །མར་གྱི་རྩེ་ལ་ཕག་རྒོད་མཆེ་བ་གཙིགས། །གདུག་པའི་ཕག་རྒོད་མཆེ་གཙིགས་ཐམས་སེ་ཐམ། །སྐེད་པ་རྒྱ་མདུད་དྲེད་མོ་རལ་པ་གསིགས། །དྲེད་མོ་མི་ཟན་རལ་གསིགས་གཡེངས་སེ་གཡེང་། །རྒྱས་མཛད་རྩང་ཕུར་སྲིན་མོ་འགྲོས་སུ་བཙུགས། །རྩང་ཕུར་རྔམ་སྟབས་ཁྲབ་སེ་ཁྲབ། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་
(༣༩)།ཤ་ཟ་ལྗིབས་སེ་ལྗིབ། །རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །བསྐང་ངོ་ཕོ་ཉའི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་སོལ་ལ་རྐྱེན་རྣམས་ཟློག །དགྲ་བགེགས་བྱད་མ་རྡུལ་དུ་རློག །ཟློག་ཅིག་དགྲ་བགེགས་དམག་དཔུང་ཟློག །སོད་ཅིག་དགྲ་བགེགས་བྱད་མ་སོད། །ཟློག་ཅིག་རིག་སྔགས་བྱད་སྟེམས་ཟློག །ས་མ་ཡ་བྷྱོ་བྷྱོ་ཟློག་ཟློག །ནུབ། ཧཱུྃ། དཔལ་ལྡན་མགོན་པོ་འཁོར་བཅས་ཀྱིས། །འཇིག་རྟེན་ཁམས་ནི་ཐམས་ཅད་ཀུན། །སྐད་ཅིག་ཉིད་ལ་དབང་དུ་སྡུད། །དབང་སྡུད་ཆེན་པོའི་ཕྲིན་ལས་ཀྱིས། །བདག་དང་རྒྱུ་སྦྱོར་ཡོན་བདག་གི། །འཁོར་དང་ལོངས་སྤྱོད་དབང་དུ་སྡུས། །དབང་དུ་མ་འདུས་གང་ཡང་མེད། །ཟངས་སམ་དམར་པོའི་ཤིང་རྣམས་ལ། །དབང་གི་རྩང་ཕུར་རྩེ་མོ་གཉིས། །སྐེད་པ་རྒྱ་མདུད་ཟླ་གམ་ལ། །ཆོས་སྐྱོང་དབང་གི་གཞལ་ཡས་ཁང་། །མགོན་པོའི་ཚོགས་ཀྱི་སྐུར་བསྒོམས་ནས། །དགྲ་བགེགས་བྱད་མའི་ཤ་ཟ་བ། །ནུབ་ཕྱོགས་གཏོར་ཆེན་ལྕགས་རི་ལ། །བཙུགས་པས་ཐམས་ཅད་དབང་དུ་འདུས། །དབང་དུ་མ་གྱུར་གང་ཡང་མེད། །རྒྱལ་བློན་རྗེ་འབངས་འབྲུ་བཅུད་དང་། །ཚེ་དབང་ལོངས་སྤྱོད་བསོད་ནམས་རྣམས། །དབང་
(༤༠)། མཛད་མགོན་པོས་དབང་དུ་སྡུས། །ཨོཾ་མ་ཧཱ་ཀཱ་ལ་ཧཱུྃ་ཕཊ། །ཁམས་གསུམ་ཐམས་ཅད་བ་ཤངྐུ་རུ་སྭཱ་ཧཱ། དབང་མཛད་རྣོ་དཔལ་རྩང་ཕུར་ཟླ་གམ་གྱི། །ཡར་གྱི་རྩེ་ལ་གསེར་གྱི་གཟིག་མོ་འགྱིང་། །གཟིག་མོ་ངར་བའི་སྒྲ་སྐད་འུ་རུ་རུ། །མར་གྱི་རྩེ་ལ་དོམ་ནག་མཆེ་བ་གཙིགས། །དོམ་ནག་སྙིང་དཀར་མཆེ་གཙིགས་ཐམས་སེ་ཐམ། །སྐེད་པ་རྒྱ་མདུད་གཡུ་ཡི་སྤྱང་མོ་ངུ། །གཡུ་ཡི་སྤྱང་ཀིའི་ངུ་འབོད་ལྷངས་སེ་ལྷང་། །དབང་གི་རྩད་ཕུར་སྲིན་མོ་འགྲོས་སུ་བཙུགས། །རྩང་ཕུར་རྔམ་སྟབས་ཁྲབས་སེ་ཁྲབ། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་ཤ་ཟ་ལྗིབས་སེ་ལྗིབ། །རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །བསྐང་ངོ་ཕོ་ཉའི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་སོལ་ལ་རྐྱེན་རྣམས་ཟློག །དགྲ་བགེགས་བྱད་མའི་དམག་དཔུང་ཟློག །ཟློག་ཅིག་དགྲ་བགེགས་བྱད་མ་ཟློག །སོད་ཅིག་དགྲ་བགེགས་བྱད་མ་སོད། །ཟློག་ཅིག་རིག་སྔགས་བྱད་སྟེམས་ཟློག །ས་མ་ཡ་བྷྱོ་བྷྱོ་ཟློག་ཟློག །བྱང་། ཧཱུྃ། དཔལ་ལྡན་མགོན་པོ་འཁོར་བཅས་ཀྱིས། །འཇིག་རྟེན་ཁམས་ནི་ཐམས་ཅད་ཀུན། །སྐད་ཅིག་ཉིད་ལ་བརླག་པར་མཛད། །སྡིག་ཅན་དགྲ་བགེགས་བྱད་མ་
(༤༡)རྣམས། །མངོན་སྤྱོད་དྲག་པོའི་ཕྲིན་ལས་ཀྱིས། །ཐམས་ཅད་མ་ལུས་རླག་པར་བྱེད། །བརླག་པར་མ་གྱུར་གང་ཡང་མེད། །ལྕགས་སམ་དྲག་པོའི་ཤིང་རྣམས་ལ། །དྲག་པོའི་རྩང་ཕུར་རྩེ་མོ་གཉིས། །སྐེད་པ་རྒྱ་མདུད་ཟུར་གསུམ་ལ། །ཆོས་སྐྱོང་དྲག་པོའི་གཞལ་ཡས་ཁང་། །མགོན་པོའི་ཚོགས་ཀྱི་སྐུར་བསྒོམས་ནས། །དགྲ་བགེགས་ཐམས་ཅད་རྡུལ་དུ་རློག །བྱད་ཕྱོགས་གཏོར་ཆེན་ལྕགས་རི་ལ། །བཙུགས་པས་དགྲ་བགེགས་རླག་པར་བྱེད། །བརླག་པར་མ་གྱུར་གང་ཡང་མེད། །རླག་མཛད་མགོན་པོས་དགྲ་བགེགས་ཐུལ། །ཨོཾ་མ་ཧཱ་ཀཱ་ལ་ཧཱུྃ་ཕཊ། །དགྲ་བགེགས་ཐམས་ཅད་མཱ་ར་ཡ་ཧཱུྃ་ཕཊ། །དྲག་པོ་རྣོ་དཔལ་རྩང་ཕུར་ཟུར་གསུམ་གྱི། །ཡར་གྱི་རྩེ་ལ་བྱ་གླག་མང་པོ་ལྡིང་། །སྤྲུལ་བའི་བྱ་གླག་གཤོག་འཇུམ་ཆུམས་སེ་ཆུམ། །མར་གྱི་རྩེ་ལ་ལྕགས་ཀྱི་ཕོ་རོག་འགྱེད། །ཕོ་རོག་ནག་པོའི་འགྱེད་སྒྲ་ཁྲོངས་སེ་ཁྲོང་། །སྐེད་པ་རྒྱ་མདུད་གསེར་གྱི་འུག་པ་འཁུན། །འུག་པ་འཁུན་པའི་ཧཱུྃ་སྒྲ་ཏི་རི་རི། །གསེར་མིག་འཁྱིལ་པ་འོད་འབར་ཀྱི་ལི་ལི། །གདུག་པ་དྲག་པོའི་རྩང་ཕུར་འདི། །དམར་ནག་སྲིན་མོ་འགྲོས་སུ་བཙུགས། །གསོད་བྱེད་རྔམ་སྟབས་ཁྲབས་སེ་ཁྲབ། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་ཤ་ཟ་
(༤༢)ལྗིབས་སེ་ལྗིབ། །རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །རྩང་ཕུར་རྣོ་དཔལ་ཟངས་སེ་ཟང་། །ལས་མཁན་ཕོ་ཉའི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་སོལ་ལ་རྐྱེན་རྣམས་ཟློག །དགྲ་བགེགས་བྱད་མ་རྡུལ་དུ་རློག །ཟློག་ཅིག་དགྲ་བགེགས་དམག་དཔུང་ཟློག །སོད་ཅིག་དགྲ་བགེགས་བྱད་མ་སོད། །ཟློག་ཅིག་རིག་སྔགས་བྱད་སྟེམས་ཟློག །ས་མ་ཡ་བྷྱོ་བྷྱོ་ཟློག་ཟློག །ཧཱུྃ། སྔོན་གྱི་བསྐལ་པ་དང་པོ་ལ། །བཛྲ་མུ་ནིའི་ཕུག་ནང་དུ། །རྒྱ་གར་ཤེས་རབ་གྲགས་པ་ཡིས། །གདུག་རྩུབ་དྲག་པོའི་རྩང་ཕུར་བརྡུངས། །ལྕགས་སྣ་གསུམ་ལ་མགར་ཞིག་བགྱིས། །རབས་ཆད་ནག་མོའི་གྲི་ལིང་དང་། །གནམ་ལྕགས་འབར་བའི་ཐོག་ལྕགས་དང་། །གྲི་རྒོད་བསད་པའི་གྲི་ལྕགས་གསུམ། །སྲིན་པོ་མགར་བའི་སོལ་མལ་དུ། །དུར་ཁྲོད་སོལ་བ་རི་ལྟར་སྤུངས། །ཞིང་ཆེན་ཁོལ་མོ་མཚོ་ལྟར་རླབས། །ཁོལ་མོའི་འབྲུག་སྐད་འུ་རུ་རུ། །སོལ་བའི་མཚོ་འཁྱིལ་མེ་རེ་རེ། །གཡུ་ཡི་ངུད་འཐུལ་ཕྱུ་རུ་རུ། །ཟངས་ཀྱི་མེ་འབར་ཡ་ལ་ལ། །ལྕགས་ཀྱི་ཚ་ཚ་སྐར་ལྟར་འཁྲུགས། །ཚ་ཚ་སྐར་འཁྲུགས་ཀྱི་ལི་ལི། །ཟངས་ཀྱི་ཚ་ཚ་མེ་ལྟར་འབར། །མེ་འོད་གློག་འགྱུ་ལམས་སེ་ལམ། །མཆོད་གི་ཚ་ཚ་གློག་
(༤༣)། ལྟར་འཁྱུག །ཡེ་ཤེས་ཐོ་བ་ཐོག་ལྟར་འབེབས། །ཤེས་རབ་སྐམ་པ་ཁྲ་ལྟར་འཇུམ། །ཁྲོ་རྒྱལ་སག་དར་སྐར་ལྟར་འཁྲུགས། །མགར་སྒྲ་ཆེམ་ཆེམ་འབྲུག་ལྟར་ལྡིར། །ལྕགས་ཀྱི་ཚ་ཚ་སྤྲུལ་པ་འགྱེད། །གདུག་རྩུབ་དྲག་པོའི་རྩང་ཕུར་བརྡུངས། །ཡར་གྱི་རྩེ་མོ་གདུག་ལ་རྩུབ། །མར་གྱི་རྩེ་མོ་དཔལ་དང་ལྡན། །སྐེད་པ་རྒྱ་མདུད་བྷྲཱུྃ་ལས་གྲུབ། །ཟུར་གསུམ་སྐུ་གསུང་ཐུགས་སུ་བརྡུངས། །ངོས་གསུམ་རིགས་གསུམ་ངོ་བོར་བརྡུངས། །རྒྱ་མདུད་གཞལ་ཡས་ཁང་དུ་བརྡུངས། །ཡར་གྱི་རྩེ་མོ་ངར་དང་ལྡན། །མར་གྱི་རྩེ་མོ་དཔལ་དང་ལྡན། །གདུག་རྩུབ་དྲག་པོའི་རྩང་ཕུར་འདི། །དགྲ་བགེགས་གསོད་པའི་མཚོན་ཆར་བརྡུངས། །བྱད་མ་བཟློག་པའི་མཚོན་ཆར་བརྡུངས། །དབང་དྲག་རྩང་ཕུར་ཡར་རྩེ་ལ། །ལྕགས་ཀྱི་སེར་བ་ཁྲ་ལ་ལ། །དབང་དྲག་རྩང་ཕུར་མར་རྩེ་ལ། །མཚལ་གྱི་ཆུ་འབབ་ཤ་ར་ར། །སྐེད་པ་རྒྱ་མདུད་ཟུར་གསུམ་ལ། །ཁྲག་གི་ཆར་པ་མི་ལི་ལི། །རྣོ་དཔལ་ཟུར་གསུམ་ཡར་རྩེ་ལ། །གཡུ་ཡི་དུད་འཐུལ་ཕྱུ་རུ་རུ། །རྣོ་དཔལ་ཟུར་གསུམ་མར་རྩེ་ལ། །སོལ་མཚོ་འཁྱིལ་བ་མེ་རེ་རེ། །སྐེད་པ་རྒྱ་མདུད་ཟུར་གསུམ་ལ། །ཟངས་ཀྱི་མེ་འབར་ཟ་ལ་ལ། །དབང་དྲག་ལས་ཀྱི་རྩང་ཕུར་འདི། །དགྲ་བགེགས་བྱད་མའི་སྙིང་ལ་གདབ། །ཆོས་
(༤༤)སྤྱོང་ཕོ་ཉའི་རྟེན་དུ་བཙུགས། །རྩང་ཕུར་ཡར་གྱི་རྩེ་མོ་ན། །མ་ཧཱ་ཀཱ་ལ་སྤྲིན་ལྟར་གཏིབས། །རྩང་ཕུར་མར་གྱི་རྩེ་མོ་ན། །ཕོ་ཉ་སྤྲུལ་པས་ས་གཞི་གང་། །རྩད་ཕུར་རྒྱ་མདུད་ཟུར་གསུམ་ལ། །ཧཱུྃ་ཕཊ་འབྲུག་སྒྲས་བར་སྣང་གང་། །དམར་ནག་འཇིགས་པའི་རྩང་ཕུར་འདི། །གདུག་པ་སྲིན་མོ་འགྲོས་སུ་བཙུགས། །རྩང་ཕུར་རྔམ་སྟབས་ཁྲབས་སེ་ཁྲབ། །རྩང་ཕུར་གར་སྟབས་ཁྲིགས་སེ་ཁྲིག །རྩང་ཕུར་ཤ་ཟ་ལྗིབས་སེ་ལྗིབ། །རྩང་ཕུར་ཁྲག་འཐུང་ཀྱུ་རུ་རུ། །རྩང་ཕུར་རུས་འཆའ་ཆེམས་སེ་ཆེམ། །རྩང་ཕུར་རྣོ་དཔལ་ཟངས་སེ་ཟང་། །ལས་མཁན་ཕོ་ཉའི་ཐུགས་དམ་བསྐང་། །བདག་དང་རྒྱུ་སྦྱོར་ཡོན་བདག་གི། །བར་ཆད་སོལ་ལ་རྐྱེན་རྣམས་ཟློག །དགྲ་བགེགས་བྱད་མ་རྡུལ་དུ་རློག །ཟློག་ཅིག་དགྲ་བགེགས་དམག་དཔུང་ཟློག །སོད་ཅིག་དགྲ་བགེགས་བྱད་མ་སོད། །ཟློག་ཅིག་རིག་སྔགས་བྱད་སྟེམས་ཟློག །ཟློག་ཅིག་སྒྱུར་ཅིག་ས་མ་ཡ། །ས་མ་ཡ་བྷྱོ་བྷྱོ་ཟློག་ཟློག །ཅེས་རྩད་གྱེར་རྫོགས་སོ།། །།དེ་ནས་དཔལ་མགོན་པོ་ལེགས་ལྡན་གྱི་ཟློག་པ་ནི། །ཧཱུྃ། མགོན་པོ་མ་ཧཱ་ཀཱ་ལ་མཐུ་ཆེན་ནག་པོ་ནི། །དྲག་པོར་མཚན་གསོལ་ལེགས་ལྡན་ནག་པོ་སྟེ། །ལྷ་མིན་གྲོང་ཁྱེར་སུམ་བརྩེགས་འཇིག་པར་བྱེད། །སྲིན་པོའི་གྲོང་ཁྱེར་བདུན་འབུམ་གཏན་
(༤༥)། ནས་བརླག །ལྷ་ཡི་དམག་དཔོན་གཡུལ་ལས་རྣམ་པར་རྒྱལ། །ཁྱོད་ཀྱི་ཐུགས་དམ་གཉན་པོ་སྐུལ་བའི་ཚེ། །དཀར་པོ་ལྷ་དམག་བྱེ་བ་དུང་ཕྱུར་བཅས། །ཉོན་མོངས་ལྷ་མིན་དམག་ཚོགས་ཟློག་པར་བྱེད། །ཕྱོགས་ལས་རྣམ་རྒྱལ་ལྷ་ཡི་སྡེ་དཔོན་ཁྱོད། །ནག་པོའི་རྩ་ལག་འཇོམས་པའི་སྟོབས་དང་ལྡན། །བདུད་དང་འཆི་བདག་ཟློག་པའི་མཐུ་བོ་ཆེ། །ལྷ་མིན་དམག་སྣ་ཟློག་པའི་རྫུ་འཕྲུལ་ཅན། །དོ་ནུབ་ཟློག་སྒྱུར་བྱེད་པའི་དུས་ལ་བབ། །དོ་ནུབ་སྲིད་པའི་ཁྲམ་ཁ་དགྲ་ལ་སྒྱུར། །དོ་ནུབ་ལྷ་ཡི་དམག་སྣ་དགྲ་ལ་སྒྱུར། །དོ་ནུབ་རྦོད་གཏོང་བཟློག་པའི་དུས་ལ་བབ། །ཡེ་ཤེས་ལྷ་ཡི་བཀའ་ཆད་ཉི་ལྟར་ཤར། །དེ་ཡང་བཟློག་པའི་ཕྲིན་ལས་མཛོད། །དྲང་སྲོང་དམོད་པ་ཐོག་ལྟར་འཕེན། །དེ་ཡང་བཟློག་པའི་ཕྲིན་ལས་མཛོད། །གཤིན་རྗེའི་འཁྲུལ་འཁོར་བྲག་ལྟར་རློམ། །དེ་ཡང་བཟློག་པའི༴ །སྲིན་པོའི་གདུག་རྩུབ་མུན་ལྟར་འཐིབས། །དེ་ཡང་བཟློག་པའི༴ །ཀླུ་ཡི་དུག་རླངས་སྤྲིན་ལྟར་གཡོ། །དེ་ཡང་བཟློག་པའི༴ །རླུང་ལྷའི་སྦྱོར་བ་འཚུབ་མ་འཁྲུགས། །དེ་ཡང་བཟློག་པའི༴ །གནོད་སྦྱིན་གདུག་པ་རླུང་ལྟར་འཕྱོ། །དེ་ཡང་བཟློག་པའི་ཕྲིན་ལས་མཛོད། །འབྱུང་པོའི་དལ་ཁ་ཆུ་ལྟར་ཁོལ། །དེ་ཡང་བཟློག་
(༤༦)པའི༴། གཟའ་ཡི་ཀི༚་ཀང་མེ་ལྟར་འབར། །དེ་ཡང་བཟློག་པའི་ཕྲིན་ལས་མཛོད། །མ་མོའི་དལ་ཡམས་མཚོ་ལྟར་རླབས། །དེ་ཡང་བཟློག་པའི༴ །མཁའ་འགྲོའི་ཆོ་འཕྲུལ་གློག་ལྟར་འཁྱུག །དེ་ཡང་བཟློག་པའི༴ །གནོད་སྦྱིན་མ་མོས་སྡང་མིག་བྱེད། །དེ་ཡང་བཟློག་པའི༴ །བདུད་མོས་ཁྲག་གི་ཁ་ཕྲུ་གཏོར། །དེ་ཡང་བཟློག་པའི༴ །གཤིན་རྗེ་མ་མོས་ལྕེ་དམར་རྐྱོང་། །དེ་ཡང་བཟློག་པའི༴ །སྲིན་མོ་ཁྲོས་པས་མཆེ་བ་གཙིགས། །དེ་ཡང་བཟློག་པའི༴ །མོན་མོས་བརྡ་གར་བརྡ་འབོད་བྱེད། །དེ་ཡང་བཟློག་པའི༴ །མ་མོའི་ངན་སྔགས་སྒྱོགས་ལྟར་འཕེན། །དེ་ཡང་བཟློག་པའི༴ །ཀླུ་མོའི་ཁ་རླངས་ཟེར་ལྟར་འཕྲོ། །དེ་ཡང་བཟློག་པའི༴ །འདྲེ་མོས་འཇབ་ཅིང་ལག་པ་རྐྱོང་། །དེ་ཡང་བཟློག་པའི༴ །ལྷ་མིན་གནོད་པ་སྐར་ལྟར་འཁྲུགས། །དེ་ཡང་བཟློག་པའི༴ །ཞང་བློན་ཚོན་གྱི་གྲུ་གུ་རྐྱོང་། །དེ་ཡང་བཟློག་པའི༴ །མོན་པ་ནག་པོས་སྤུ་གྲི་རྡོར། །དེ་ཡང་བཟློག་པའི༴ །དམུ་ཡི་རྡོ་ཟོར་ཆར་ལྟར་འབེབས། །དེ་ཡང་བཟློག་པའི༴ །མཁའ་ལྡིང་གནོད་པ་གློག་ལྟར་འགྱུ། །དེ་ཡང་བཟློག་པའི༴ །གྲུལ་བུམ་གནོད་པ་གདས་ལྟར་ཞིག །དེ་ཡང་བཟློག་པའི༴ །དྲི་ཟའི་སྤྲུལ་པ་འཇའ་ལྟར་འཁྱིལ། །དེ་ཡང་བཟློག་པའི༴
(༤༧)། མིའམ་གནོད་པ་ཟླ་ལྟར་ཤར། །དེ་ཡང་བཟློག་པའི༴ །ལྟོ་འཕྱེའི་ཆོ་འཕྲུལ་ས་ལྷར་གཡོ། །དེ་ཡང་བཟློག་པའི༴ །བདུད་ཀྱི་ཁྲམ་ཁ་རི་ལྟར་སྙིལ། །དེ་ཡང་བཟློག་པའི༴ །ལྟས་ངན་སྤྲུལ་པ་མགོ་བརྙན་རྒྱུ། །དེ་ཡང་བཟློག་པའི༴ །རྒྱལ་པོའི་ཆོ་འཕྲུལ་འོད་ལྟར་ཤར། །དེ་ཡང་བཟློག་པའི༴ །ས་བདག་གདུག་པ་བྱི་ལྟར་འཛུལ། །དེ་ཡང་བཟློག་པའི་ཕྲིན་ལས་མཛོད། །ཐམས་ཅད་དགྲ་བགེགས་སྟེང་དུ་ཟློག །བན་དེ་བྱད་མའི་སྙིང་ལ་བྷྱོ། །བོན་པོ་བྱད་མའི་སྙིང་ལ་བྷྱོ། །བྱད་མ་བཟློག་པའི་ཕྲིན་ལས་མཛོད། །དགྲ་བགེགས་བརླག་པའི་ཕྲིན་ལས་མཛོད། །བཅོལ་བའི་ཕྲིན་ལས་འགྲུབ་བར་མཛོད། །ཅེས་ཐན་དང་འཕྲད་པའམ། བྱད་ཀ་བཟློག་པའམ། །དམག་སྣ་ཆེན་པོ་བཟློག་པའམ། མ་མོ་འཁྲུགས་པའམ། །ལྟས་ངན་མི་བཟད་པ་དྲག་པོ་བྱུང་བ་ཐམས་ཅད་ལ་ཟློག་པ་འདི་བསྒྲག་སྟེ། །ལན་བདུན་ནམ་ལྔ་འམ་གསུམ་ལ་སོགས་པ་དྲག་ཏུ་གྱེར་བར་བྱའོ། །གནམ་ལྕགས་ཀྱི་ཐོག་ཡིན་ཟེར་ཡང་འདིས་བཟློག་པར་ཐེ་ཚོམ་མི་འཚལ། སློབ་དཔོན་པདྨས་མཛད་པའོ། །བྷྱོ ཟློག་བྱེད་མ་མོ་ཆེན་མོ་ནི། །བལ་བྷ་དྲའི་སྲིང་མོ་མཆོག །རྡོ་རྗེ་མ་སྨན་ཆེན་མོ་ནི། །ནག་མོ་ཕག་གི་གདོང་པ་ཅན། །ཡ་རྐན་གནམ་ལ་མ་རྐན་ས། །ལྗགས་ནི་བར་སྣང་གློག་ལྟར་འཁྱུག །དམར་གྱི་ཨ་རྒྷཾ་འདི་བཞེས་ལ། །
(༤༨)སྔོན་གྱི་དམ་ཚིག་རྗེས་དྲན་ནས། །བདག་ཅག་འཁོར་དང་བཅས་པ་ལ། །རིག་སྔགས་རྦོད་གཏོང་བྱེད་པ་རྣམས། །ཟློག་ཅིག་བསྒྱུར་བའི་ཕྲིན་ལས་མཛོད། །བྷྱོ གསོད་བྱེད་མ་མོ་བཅུ་གཉིས་དང་། །ཕྱི་ནང་དཔལ་གྱི་སྲུང་མ་རྣམས། །བཀའ་ཡི་གཏོར་མ་དམ་པ་དང་། །བརྒྱན་གྱི་གཏོར་མ་འདི་བཞེས་ལ། །རྣལ་འབྱོར་བདག་ཅག་འཁོར་བཅས་ཀྱི། །ནད་དང་རྦོད་གཏོང་བཟློག་པར་མཛོད། །ཤ་བ་རྭ་འཛིངས་དྲི་ཟའི་ཐན། །དྲི་ཟའི་བརྡ་ཐན་གཏོར་མས་ཟློག །ཐོ་རངས་ཁྱི་དུ་གཤིན་རྗེའི་ཐན། །གཤིན་རྗེའི་བརྡ་ཐན་གཏོར་མས་ཟློག །སྦྲུལ་ནག་བྱི་ནན་ཀླུ་ཡི་ཐན། །ཀླུ་ཡི་བརྡ་ཐན་གཏོར་མས་ཟློག །ནམ་ཕྱེད་མཛོ་དུར་གནོད་སྦྱིན་ཐན། །གནོད་སྦྱིན་བརྡ་ཐན༴ །ནག་བེའུ་གློ་དཀར་བདུད་ཀྱི་ཐན། །བདུད་ཀྱི་བརྡ་ཐན༴ །སྲོད་འཁོར་བྱ་གྲགས་དམུ་ཡི་ཐན། །དམུ་ཡི་བརྡ༴ །རྟ་ཕོ་རྟིང་རྡབ་གྲུལ་བུམ་ཐན། །གྲུལ་བུམ་བརྡ༴ །གླ་ནག་མཆུ་དཀར་བཙན་གྱི་ཐན། །བཙན་གྱི་བརྡ༴ །ཉིན་པར་ཝ་བརྒྱལ་གཉན་གྱི་ཐན། །གཉན་གྱི་བརྡ༴ །བྱི་བ་འཁུན་པ་ས་བདག་ཐན། །ས་བདག་བརྡ༴ །ཁང་པ་ཚག་པ་འགོང་པོའི་ཐན། །འགོང་པོའི་བརྡ༴ །འུག་པ་ཉིན་གྲགས་སྲིན་པོའི་ཐན། །སྲིན་པོའི་བརྡ༴ །ཡས་
(༤༩)། ཀྱི་བདུད་གཡོས་གཏོར་མས་ཟློག །མས་ཀྱི་སྲི་ལངས་གཏོར་མས་ཟློག །ཐང་ཀྱི་བཙན་ཁྲོས༴ །ཕ་ཚན་རྒྱབ་འདྲེ༴ །ཕུ་ནུའི་སྟོང་འདྲེ༴ །བྱོལ་སོང་ལོ་ཀག༴ །ལོ་ཀག་ཟླ་ཀག༴ །ཞག་ཀག་ཟ་ཀག༴ །རྨི་ལྟས་ངན་པ༴ །ལྟས་ངན་སྡིགས་པ༴ །བན་དེའི་ཆོས་ཟོར༴ །བོན་གྱི་བོན་ཟོར༴ །རྒྱ་གར་ངན་སྔགས༴ །མུ་སྟེགས་ངན་སྔགས༴ །དམར་གྱི་ཕྲ་མེན༴ །སུམ་པའི་གླང་ཟོར༴ །ཞང་ཞུང་ཛོ་ཟོར༴ །གིང་གི་མདའ་ཟོར༴ །གཤིན་རྗེའི་ཁྲམ་ཁ༴ །བདུད་ཀྱི་བྱོལ་ཀ༴ །ཕུར་པའི་དབལ་ཟོར། །འབངས་ཀྱི་རྨི་ངན༴ །རྒྱལ་པོའི་བཀའ་ཆད༴ །མོ་སོག་ངན་པ་གཏོར་མས་ཟློག །ཕ་རོལ་དམ་ཉམས་གང་ཞིག་གིས། །གཏོར་ཟོར་འཕེན་པ་གཏོར་མས་ཟློག །དམར་ཟོར་འཕེན་པ༴ །དམོད་ཟོར་འཕེན་པ༴ །ཐོད་ཟོར་འཕེན༴ །མདའ་ཟོར་འཕེན་པ༴ །དུག་ཟོར་འཕེན་པ༴ །རྡོ་ཟོར་འཕེན་པ༴ །ཁྲག་ཟོར་འཕེན་པ༴ །ཚེ་ཟོར་འཕེན་པ༴ ཡུངས་ཟོར་འཕེན་པ༴ །ཕུར་ཟོར་འཕེན་པ༴ །ཡས་ཀྱི་ལྷ་ཁ་ངན་པ༴ །ཉེ་བའི་ཡོལ་ཁ་ངན་པ་ཟློག །ལྷ་འདྲེས་རྦོད་གཏོང་བྱེད་པ་ཟློག །ཐམས་ཅད་སྡང་བའི་དགྲ་ལ་སྒྱུར། །ཐམས་ཅད་གནོད་པའི་བགེགས་ལ་སྒྱུར། །བྷྱོ་བྷྱོ། བསྟན་དགྲ་སྡིག་ཅན་སྟེང་དུ་བྷྱོ། །
(༥༠)བན་དེ་བྱད་མའི་སྟེང་དུ་བྷྱོ། །བོན་པོ་བྱད་མའི་སྟེང་དུ་བྷྱོ། །བྷྱོ་བྷྱོ། ཧཱུྃ་ཧཱུྃ། བནྡྷ་ཤ་ཡ། ལོ་ཀ་བྷ་ཤ་ཡ། ཧཱུྃ་ཧཱུྃ་སརྦ་ཟློག ཨེ་ཀ་ངུ་ན་བྷྱོ་ཟློག མ་ཧཱ་ངུ་ན་བྷྱོ་ཟློག ས་ག་ངུ་ན་བྷྱོ་ཟློག ཙ་ཏུར་སྙིང་ལ་བྷྱོ་ཟློག ནཱ་ག་ངུ་ན་བྷྱོ་ཟློག རཱ་ཛ་ངུ་ན་བྷྱོ་ཟློག ཏ་ཀོར་ངུ་ན་བྷྱོ་ཟློག །སློབ་དཔོན་ཆེན་པོ་པདྨ་འབྱུང་གནས་ཀྱིས་མཛད་པ་རྫོགས་སོ།། །།དེ་ནས་གཏོར་རྫོང་གི་རྟིང་ལ་བྱ་བའི་བཟློག་པའི་རིམ་པ་ནི། བྷྱོ། རྡོ་རྗེ་གར་གྱི་དབང་ཕྱུག་མ། །མིང་པོ་དྲི་ཟའི་བཀའ་སྒྱུར་མ། །རྣལ་འབྱོར་བདག་ཅག་འཁོར་བཅས་ལ། །དྲི་ཟའི་ཡེ་འགྲོགས་ཤོར་ལ་རེ། །བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་ཐམས་ཅད་སྒྱུར། །རཏྣ་གར་གྱི་དབང་ཕྱུག་མ། །མིང་པོ་གཤིན་རྗེའི་བཀའ་སྒྱུར་མ། །རྣལ་འབྱོར་བདག་ཅག་འཁོར་བཅས་རྣམས། །གཤིན་རྗེའི་ཁྲམ་ལ་བཏབ་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །པདྨ་གར་གྱི་དབང་ཕྱུག་མ། །མིང་པོ་ཀླུ་ཡི་བཀའ་སྒྱུར་མ། །རྣལ་འབྱོར་བདག་ཅག་འཁོར་བཅས་ལ། །ཀླུ་ཡི་དལ་ཁ་བབས་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །ལས་རབ་གར་གྱི་དབང་ཕྱུག་མ། །མིང་པོ་གནོད་སྦྱིན་བཀའ་སྒྱུར་མ། །རྣལ་འབྱོར་བདག་ཅག་འཁོར་བཅས་ལ། །གནོད་སྦྱིན་དལ་ཁ་བབས་ལ་རེ།
(༥༡)། བཟློག་གོ་དམར་ཆེན་གཏོར་མས་ཟློག །བསྒྱུར་རོ་ལྟས་ངན་ཐམས་ཅད་སྒྱུར། །བར་སྣང་ཁམས་ཀྱི་དབང་ཕྱུག་མ། །རེ་ཏི་མགོ་ཉག་བཀའ་སྒྱུར་མ། །རྣལ་འབྱོར་བདག་ཅག་འཁོར་བཅས་ལ། །བདུད་ཀྱི་ཁྲམ་ལ་བཏབ་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །ནམ་མཁའི་དབྱིངས་ཀྱི་གློག་མ་སྤྲིན། །གནམ་ཐེའུ་དཀར་བོའི་བཀའ་སྒྱུར་མ། །རྣལ་འབྱོར་བདག་ཅག༴ །རྒྱལ་བོའི་དབང་དུ་བཅད་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །བཙན་ལ་ད་རེ་སྨན་གཅིག་མ། །མིང་པོ་བཙན་སྲིན་བཀའ་སྒྱུར་མ། །རྣལ་འབྱོར་བདག་ཅག༴ །བཙན་གྱི་ཁ་ཡོན་བྱུང་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །དཔལ་ལྡན་ནག་མོ་རེ་མ་ཏི། །ནམ་གྲུའི་ཆོ་འཕྲུལ་བཀའ་སྒྱུར་མ། །རྣལ་འབྱོར་བདག་ཅག །སྔོ་དམར་བྱད་དུ་བཅུག་ལ་རེ། །བཟློག་གོ་དམར་ཆེན༴ །བསྒྱུར་རོ་ལྟས་ངན༴ །བདག་ཅག་རྣལ་འབྱོར་འཁོར་བཅས་ལ། །ཡས་ཀྱི་བདུད་གཡོས་གཏོར་མས་ཟློག །མས་ཀྱི་སྲི་ལངས་གཏོར་མས་ཟློག །ལོ་ཀག་ཟླ་ཀག་གཏོར་མས༴ །བདུན་ཟུར་ཐུག་པ༴ །སྐྱ་མདའ་ཐུག་པ༴ །བྱང་བུ་ལྷ་རྒྱབ༴ །ཤོ་རྡེལ་དཀར་ནག༴ །མོ་ངན་རྨི་ངན༴། བཟློག་གོ་
(༥༢)དམར་ཆེན་གཏོར་མས་ཟློག །བསྒྱུར་རོ་ལྟས་ངན་དགྲ་ལ་སྒྱུར། །ནད་རིགས་བཞི་བརྒྱ་རྩ་བཞི་ཟློག །དགེགས་རིགས་སྟོང་ཕྲག་བརྒྱད་ཅུ་ཟློག །ཡེ་འདྲོགས་སུམ་བརྒྱ་དྲུག་ཅུ༴ །གློ་བུར་དགུ་བཅུ་རྩ་གཅིག་ཟློག །བྱིས་པའི་གདོན་ཆེན་བཅོ་ལྔ༴ །ལྷ་འདྲེའི་རྦོད་གཏོང་ཕུར་ཁ༴ །རྨི་ལམ་མཚན་མ་ངན་པ༴ །ཟ་ཁ་སྲི་ཁ་ཟུག་པར༴། ཕ་མེས་བྱུར་འདྲེ་ལངས་པ༴ །ཁྱིམ་ན་ཁྱིམ་ཆག་ཆེ་བ༴ །སྒོ་ན་སྒོ་ཆག་ཆེ་བ༴། གྲོང་ན་གྲོང་ཆག་ཆེ་བ༴ །ཡུལ་ན་ཡུལ་ཆག་ཆེ་བ༴ །མོ་ངན་དཔྱད་ངན་ཐམས་ཅད༴ །སྲིན་བྱ་སྒོ་ལ་འགྲིམ་པ༴ །འུག་པས་ཧ་ཧ་ཟེར་བ༴ །དུར་སར་ཝ་མོ་བརྒྱལ་བ༴ །དུར་ཁྲོད་སྤྱང་ཀི་ངུ་བ༴ །ཕུ་ཡི་ཤ་ཕོ་རུ་འཛིངས༴ །མདའ་ཡི་ཉ་མོ་རྡ་འཛིངས༴ །བར་དུ་ཕོ་རོག་གཤོག་འཛིངས༴ །གྲོང་དུ་ནག་མོ་སྦར་འཛིངས༴ །སྲོང་ལ་བྱ་ཕོ་འཚེར་བ༴ །ནམ་ཕྱེད་འོག་རྟ་འཚེར་བ༴ །ཐོ་རངས་སྒོ་ཁྱི་ངུ་བ༴ །གནམ་ལ་བྱ་རྒོད་གཤོག་འཛིངས༴ །ལོ་ནི་རྒྱལ་པོའི་ཀག་ཀྱང་༴ །ཟླ་བ་བློན་པོའི་ཀག་ཀྱང་༴ །ཞག་ནི་དམག་མའི་ཀག་ཀྱང་༴ །དུས་ཚེད་མཚོན་ཆའི་ཀག་ཀྱང་༴ །ཕོ་བརྒྱས་མདའ་ལྟར་གསོར་བ༴ །མོ་བརྒྱས་བལ་ལྟར་གཡེང་བ༴ །གདོན་བགེགས་ཉི་ཤུ་རྩ་གཅིག༴ །རྒྱལ་ཁམས་མི་ཁ་གླེང་བ༴ །མི་ཁ་དྲ་མཆུ་ཐ་མས༴བདག་ལ་བསམ་
(༥༣)།ངན་བྱེད་པ༴ སྦྱོར་བརྩུབ་པ་ཐམས་ཅད༴ །ཆགས་ཆེ་ཉམས་ང་ཐམས་ཅད༴ །རྐྱེན་ངན་བར་ཆད་ཐམས་ཅད༴ །བསྒྱུར་རོ་ལྟས་ངན་དགྲ་ལ་སྒྱུར། །བསྒྱུར་རོ་གནོད་པའི་བགེགས་ལ་སྒྱུར། ༈ །ཞེས་ཚར་བརྒྱད་ཀྱི་རྗེས་ལ་གཏོར་ཞལ་དགྲ་ཕྱོགས་སུ་བསྒྱུར། །ཙ་ཀ་ལི་རྣམས་ཞལ་ཕྱིར་བསྒྱུར། །དྲག་པོའི་གཏོར་མ་རྣམས་དང་དཀར་གཏོར་རྣམས་རིམ་པར་བཤམ། །ཏིང་ངེ་འཛིན་དང་ལྡན་པས་སླར་ཚར་གཅིག་གྱེར་བར་བྱའོ། །འདི་ཤིན་ཏུ་གཉན་བས་ཚར་དགུ་ལས་མང་དུ་མེ་རུང་ངོ། ༈ དེ་ནས་གསེར་སྐྱེམས་འབུལ་བ་ནི། །རིན་པོ་ཆའི་སྣོང་དུ་བརྡན་ཆ་དང་ཆང་པུད་སྤྲེངས་ལ་རིམ་པས་འབུལ་ཞིང་། །འདི་སྐད་དུ། ཧཱུྃ། རི་རབ་རི་ཡི་རྩེ་མོ་ནས། །ཡེ་ཤེས་མགོན་པོ་མཐུ་རྩལ་ཅན། །སྐུ་ལ་དབང་ཆེན་བེར་ནག་གསོལ། །ཕྱག་ན་ཙནྡན་བདེ་ཆེན་བསྣམས། །ལྷ་དམག་འབུམ་བཅས་གཤེགས་སུ་གསོལ། །བདུད་རྩི་གསེར་སྐྱེམས་འདི་བཞེས་ལ། །དགྲ་བགེགས་འདུལ་བའི་དུས་ལ་བབ། །ཕུར་ཁ་བསྒྱུར་བའི་དུས་ལ་བབ། །བྱད་ཁ་བཟློག་པའི་དུས་ལ་བབ། །དགྲ་དང་ཇག་པ་ཆོམ་རྐུན་གྱི། །ཡན་ལག་ཆིངས་ལ་དོན་སྙིང་ཕྱུང་། །མ་གཡེལ་སྲུང་མ་མཐུ་རྩལ་ཅན། །ཧཱུྃ། མེ་རླུང་འཚུབ་མའི་ཕོ་བྲང་ནས། །ལེགས་ལྡན་མགོན་པོ་ལས་ལ་བཞེངས། །བདུད་རྟ་ནག་པོ་ཆིབས་སུ་
(༥༤)ཆིབས། །ཙནྡན་བདེ་ཆེན་ཀླད་ལ་སྐོར། །ལྷ་དམག་འབུམ་དང་བཅས་པ་བྱོན། །བདུད་རྩི་གསེར་སྐྱེམས་འདི་བཞེས་ལ། །དགྲ་བགེགས་འདུལ་བའི་དུས་ལ་བབ། །ཕུར་ཁ་བསྒྱུར་བའི་དུས་ལ་བབ། །བྱད་ཁ་བཟློག་པའི་དུས་ལ་བབ། །དགྲ་དང་ཇག་པ་ཆོམ་རྐུན་གྱི། །ཡན་ལག་ཆིངས་ལ་དོན་སྙིང་ཕྱུང་། །ཧཱུྃ། །རྡོ་རྗེ་བྲག་གི་གདན་སྟེང་ནས། །བྲག་ལྷ་མགོན་པོ་ལས་ལ་བཞེངས། །ཆིབས་སུ་རྒྱ་སྟག་དམར་པོ་ཆིབས། །སྐུ་ལ་ཟངས་ཁྲབ་འོད་འབར་གསོལ། །གསེར་གྱི་རལ་གྲི་ཀླད་ལ་སྐོར། །འཁོར་ནི་ལྷ་དམག་འབུམ་གྱིས་སྐོར། །འདིར་གཤེགས་གསེར་སྐྱེམས་དམ་པ་བཞེས། །དགྲ་བགེགས་འདུལ་བའི་དུས་ལ་བབ། །ཕུར་ཁ་བསྒྱུར་བའི་དུས་ལ་བབ། །བྱད་ཁ་བཟློག་པའི་དུས་ལ་བབ། །དགྲ་དང་ཇག་པ་ཆོམ་ཀུན་གྱི། ཡན་ལག་ཆིངས་ལ་དོན་སྙིང་ཕྱུང་། །ཧཱུྃ། རི་རབ་བང་རིམ་གཡས་ཟུར་ནས། །དགྲ་ལྷ་མཐུ་ཆེན་ལས་ལ་བཞེངས། །དགྲ་ལྷའི་དམག་དཔུང་བཅས་པ་རྣམས། །འདིར་གཤེགས་གསེར་སྐྱེམས་མཆོད་པ་བཞེས། །དགྲ་བགེགས་འདུལ་བའི་དུས་ལ་བབ། །ཕུར་ཁ་བསྒྱུར་བའི་དུས་ལ་བབ། །བྱད་ཀ་བཟློག་པའི་དུས་ལ་བབ། །དགྲ་དང་ཇག་
(༥༥)། པ་ཆོམ་རྐུན་གྱི། །ཡན་ལག་ཆིངས་ལ་དོན་སྙིང་ཕྱུང་། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། རི་རབ་ཆེན་པོའི་ཕྱོག་ས་བཞིན། །འཛམ་གླིང་འཇིག་རྟེན་གཞལ་ཡས་ནས། །རྒྱལ་ཆེན་བཞི་དང་ཕྱོགས་སྐྱོང་བཅུ། །འཛམ་གླིང་བརྟན་པའི་བརྟན་མ་དང་། །བོད་ཁམས་སྐྱོང་བའི་སྐྱོང་མ་རྣམས། །འདིར་གཤེགས་གསེར་སྐྱེམས་མཆོད་པ་བཞེས། །དགྲ་བགེགས་འདུལ་བའི་དུས་ལ་བབ། །ཕུར་ཁ་བསྒྱུར་བའི་དུས་ལ་བབ། །བྱད་ཁ་བཟློག་པའི་དུས་ལ་བབ། །དགྲ་དང་ཇག་པ་ཆོམ་རྐུན་གྱི། །ཡན་ལག་ཆིངས་ལ་དོན་སྙིང་ཕྱུང་། །བཅོལ་བའི་ཕྲིན་ལས་འགྲུབ་པར་མཛོད། ཧཱུྃ། གཞན་ཡང་ཡུམ་ཕྱོགས་འདིར་གནས་པའི། །རི་དབང་རྒྱལ་བོ་འཁོར་དང་བཅས། །གཞི་བདག་ལྷ་ཀླུ་སྡེ་བརྒྱང་དང་། །བཙན་བདུད་དགེ་བསྙེན་འཁོར་དང་བཅས། །གསེར་སྐྱེམས་མཆོད་པ་དམ་པ་བཞེས། །ཡས་ལམ་ཕྱེས་ལ་ཟོར་ལམ་སོལ། །བཅོལ་བའི་ཕྲིན་ལས་འགྲུབ་པར་མཛོད། །ཧཱུྃ། །ཕྱོགས་བཅུའི་འཇིག་རྟེན་གཞལ་ཡས་ནས། །མགོན་པོའི་ལྷ་ཚོགས་འཁོར་དང་བཅས། །འཇིག་རྟེན་དྲེགས་བྱེད་མཐུ་རྩལ་ཅན། །སྲས་དང་
(༥༦)། བཙུན་མོ་ཕོ་ཉར་བཅས། །ཐམས་ཅད་མ་ལུས་འདིར་བྱོན་ལ། །བཀའ་ཡི་གཏོར་མ་འདི་ཉིད་དང་། །གསེར་སྐྱེམས་མཆོད་པ་འདི་བཞེས་ལ། །དགྲ་སྡང་ཐུལ་ལ་གདོན་བགེགས་སོད། །ཕུར་ཁ་སྒྱུར་ལ་དལ་ཁ་ཟློག །ཕོ་ཉ་ཟློག་ལ་བྱད་མ་སོང་། །ཆོས་ཤིག་དགྲ་ཡི་ཡུལ་དུ་ཆོས། །ཆོས་ཤིག་ལྷ་དམག་དགྲ་ལ་ཆོས། །དམ་ཉམས་དགྲ་ཡུལ་དམག་གིས་ཁོང་། །དགྲ་ཡི་ཡུལ་མཁར་རྨིང་ནས་སྒྱེལ། །དགྲ་ཡི་སྐྱེ་རྒྱུད་རྩད་ནས་ཆོད། །དགྲ་ལ་གྲི་ཤི་གྲི་ལིངས་ཐོང་། །བྷྱོ ཆོས་ཤིག་དགྲ་བོའི་སྟེང་དུ་ཆོས། །ཞེས་རོལ་མོ་དང་བཅས་པས་འབུལ། དེ་ནས་གཏོར་མ་ཕྱི་རོལ་དུ་བཏེག་ལ། ཟོར་འཕེན་པ་དང་དྲག་པོའི་སྐུལ་རྣམས་གཞུང་བཞིན་བྱ། གཏོར་མ་མེར་བསྲེག་པའམ། ཕྱོགས་དང་བསྟུན་པའམ། །དགྲ་ཕྱོགས་སུ་འབངས། དགེ་འདུན་གྱི་མདོ་ཟློག །སྔགས་པའི་ཕུར་ཟོར། སྐྱེས་པའི་གྲི་ཟོར་མདའ་ཟོར། བུད་མེད་ཀྱིས་གཡབ་མོ་དང་། །དམོད་པ་རྣམས་ཀྱིས་གཏོར་རྒྱབ་མནན། དྲག་པོའི་ཕྲིན་ལས་བཅོལ། གཏོར་པྲོ་བརྡུངས། སླར་ནང་དུ་ལོག་ནས་རྒྱལ་དབྱངས་དང་། །ཚོགས་ཀྱི་འཁོར་ལོ། །བཀྲ་ཤིས། བསྔོ་བ་སྨོན་ལམ་གཞུང་བཞིན་བྱ། ༈ །འདི་ནི་ཇག་པ་རྟ་ཐོག་གི་དགྲ་ཆོས་ཞེས་བྱ་བ་ཤིན་ཏུ་གཉན་པས་གང་ཐོད་ཐོད་དུ་མི་བྱ། །བླ་མ་དང་
(༥༧)།བསྟན་པའི་དོན་དུ་བྱའོ། །འདིའི་ཡིག་ཆ་རྙིང་བ་རྣམས་ཞལ་མི་གསལ་ཞིང་འཐོར་བུར་འདུག་པས། ལག་ལེན་འཇུག་པ་བདེ་བའི་ཕྱིར་བསྐང་བ་དང་། བཟློག་པ་གཉིས་ཅར་དང་སྦྲེལ་ཏེ། རྗེ་དོན་ལྡན་ཞབས་ཀྱི་ལས་འགྲིག་གི་མན་ངག་དང་སྦྱར། མཚུར་ཕུ་པའི་ལུགས་ཀྱིས་ཀྱང་ཁ་བརྒྱན་ཏེ་ལེགས་པར་བསྒྲིགས་པ་འདིས་བསྟན་པ་ལ་ཕན་ཐོགས་ཤིང་། །བསྟན་དགྲ་ཐམས་ཅད་ཚར་ཆོད་པ་དང་། ཡེ་ཤེས་ཀྱི་མགོན་པོས་རྗེས་སུ་འཛིན་ཅིང་སེམས་ཅན་ཐམས་ཅད་ཀྱང་དེའི་གོ་འཕང་ལ་འགོད་ནུས་བར་གྱུར་ཅིག །ཅེས་རིགས་སྔགས་འཆང་བའི་རྣལ་འབྱོར་པ་གྲགས་པ་དཔལ་འབྱོར་རྒྱས་པའི་སྙིང་པོ་ཞེས་བགྱི་བས་བསྒྲིགས་པའོ། །བཀྲ་ཤིས་དཔལ་འབར་མི་མཐུན་བདུད་དགྲའི་གཡུལ་ལས་རྒྱལ་ཞིང་བདེ་ལེགས་ཕུན་སུམ་ཚོགས་པ་བསྟན་འགྲོའི་དཔལ་དུ་འབར་བར་ཤོག། ༈ །།མགོན་པོའི་དགྲ་ཆོས་རྒྱས་པ་མ་གྲུབ་ན་བྱ་རྒྱུའི་དགྲ་ཆོས་བསྡུས་པའམ། །རྒྱས་པ་བྱེད་ནའང་གཏོར་མ་འདེགས་པའི་ཚེ་བྱ་དགོས་པའི་མ་ཧཱ་ཀཱ་ལའི་དམག་འགྱེད་ནི། ཧཱུྃ། མ་གཅིག་གཉན་དང་ཐབས་གཅིག་པའི། །ནག་པོ་དགྲ་ལ་ཆས་ཙམ་ན། །སྟོང་གི་འཇིག་རྟེན་ཤིགས་སེ་ཤིག །སྟོང་གཉིས་པར་མ་སི་ལི་ལི། །སྟོང་གསུམ་སྟོང་ཆེན་མེ་རེ་རེ། །བསྐལ་པའི་མུན་ནག་ཁྲུགས་
(༥༨)སེ་ཁྲུག །མེ་རི་དྲྭ་གུར་ཀྱི་ལི་ལི། །དྲག་པོའི་གློག་འོད་སྐེམས་སེ་སྐེམ། །རྡོ་རྗེའི་སེར་དྲག་ཤ་ར་ར། །འཐོར་རླུང་བུ་ཡུག་ཚུབས་སེ་ཚུག །ཁྲག་གི་མཚོ་ཆེན་ཀྱི་ལི་ལི། །རྦ་རླབས་མཁའ་ལ་ཐོ་ལོ་ལོ། །ཀེང་རུས་ས་གཞི་ཁྲ་ལ་ལ། །རོ་ལངས་འབོད་པ་ལྷངས་སེ་ལྷང་། །ཡེ་ཤེས་ལས་དང་འཇིག་རྟེན་གྱི། །དྲེགས་བྱེད་ཕོ་མོ་ཤིགས་སེ་ཤིག །མི་ནག་བྱེ་བ་དུང་ཕྱུར་ཡང་། །དཔའ་བའི་གད་རྒྱངས་དི་རི་རི། །མ་མོ་བྱེ་བ་དུང་ཕྱུར་ཡང་། །འཁྲུགས་པའི་བཤུག་གླུ་ལྷངས་སེ་ལྷང་། །བྱ་ནག་བྱེ་བ་དུང་ཕྱུར་ཡང་། །ཉམས་པའི་སྙིང་ལ་བཅུམས་སེ་བཅུམ། །རྟ་ནག་བྱེ་བ་དུང་ཕྱུར་ཡང་། །མགྱོགས་པའི་བང་ཁ་ཤ་ར་ར། །དྲེལ་ནག་བྱེ་བ་དུང་ཕྱུར་ཡང་། །རྔམ་པའི་འདུར་དབྱངས་སི་ལི་ལི། །གཡག་ནག་བྱེ་བ་དུང་ཕྱུར་ཡང་། །དུར་སྒྲ་ཧར་སྒྲ་ལྷབས་སེ་ལྷབ། །དོམ་ནག་བྱེ་བ་དུང་ཕྱུར་ཡང་། །འཇིགས་པའི་ངར་སྐད་འུ་རུ་རུ། །ལུག་ནག་བྱེ་བ་དུང་ཕྱུར་ཡང་། །རྔམ་པའི་འབའ་སྒྲ་དི་རི་རི། །གཅན་གཟན་བྱེ་བ་དུང་ཕྱུར་ཡང་། །འཇིགས་པའི་ངར་སྒྲ་ཆི་ལི་ལི། །ཤན་
(༥༩)པ་བྱེ་བ་དུང་ཕྱུར་ཡང་། །ལག་ན་གྲི་དམར་ཟངས་སེ་ཟང་། །མོན་པ་བྱེ་བ་དུང་ཕྱུར་ཡང་། །འཇིགས་པའི་གར་སྟབས་ལིངས་སེ་ལིང་། །ཤ་ཟ་བྱེ་བ་དུང་ཕྱུར་ཡང་། །རྔམ་པའི་ཧབ་རྒྱངས་དི་རི་རི། །དཔལ་ལྡན་མ་ཧཱ་ཀཱ་ལ་ཡི། །ཞལ་ནས་མེ་འབར་ལྷབས་སེ་ལྷབ། །བདུད་བེར་ནག་པོའི་སུལ་རྣམས་ནས། །ནད་མཚོན་བུ་ཡུག་ཐིབས་སེ་ཐིབ། །གྲི་གུག་མེ་འབར་ལམས་སེ་ལམ། །བྷནྡ་ཁྲག་འཛག་ཟུ་ལུ་ལུ། །སྡགས་ཀྱི་འབྲུག་སྒྲ་དི་རི་རི། །མ་ཧཱ་ཀཱ་ལ་ཟ་བྱེད་ཚོགས། །ཁྲོས་པའི་སྡང་མིག་ཀྱི་ལི་ལི། །རྐན་རྡེབ་དགྲ་བོ་བརྒྱལ་དུ་ཆུག །མཚོན་གྱི་དྲག་ཆར་སི་ལི་ལི། །དམ་ཉམས་དགྲ་བོའི་སྙིང་ལ་རྒྱོབ། །ནག་པོ་སྟོང་དང་ཤ་ཟ་འབུམ། །སྤྲུལ་པས་སྟོང་གསུམ་མེ་རེ་རེ། །དཔལ་ལྡན་མགོན་པོའི་དམག་གི་ཚེགས། །ཕྱོགས་བཅུར་རྒྱུགས་པས་དགྲ་བགེགས་བརླག །དྲི་ཟ་བྱེ་བ་དུང་ཕྱུར་ཡང་། །ཤར་ནས་དམག་འདྲན་འུ་རུ་རུ། །གཤིན་རྗེ་བྱེ་བ་དུང་ཕྱུར་ཡང་། །ལྷོ་ནས་དམག་འདྲེན་ཤིགས་སེ་ཤིག །ཀླུ་བདུད་བྱེ་བ་དུང་ཕྱུར་
(༦༠)ཡང་། །ནུབ་ནས་དམག་འདྲེན་ཉེ་རེ་རེ། །གནོད་སྦྱིན་བྱེ་བ་དུང་ཕྱུར་ཡང་། །བྱང་ནས་དམག་འདྲེན་ཁྲིགས་སེ་ཁྲིག །མེ་རླུང་སྲིན་པོ་དབང་ལྡན་ཡང་། །མཚམས་ནས་དམག་འདྲེན་ཆི་ལི་ལི། །ལྷ་དམག་བྱེ་བ་དུང་ཕྱུར་ཡང་། །སྟེང་ནས་དམག་འདྲེན་ཐིབས་སེ་ཐིབ། །གཉན་དམག་བྱེ་བ་དུང་ཕྱུར་ཡང་། །བར་ནས་དམག་འདྲེན་ཏ་ལ་ལ། །ས་བདག་བྱེ་བ་དུང་ཕྱུར་ཡང་། །འོག་ནས་དམག་འདྲེན་མེ་རེ་རེ། །རུ་དར་ནག་པོ་ཟངས་སེ་ཟང་། །དེ་ལ་མེ་འབར་ལྷབས་སེ་ལྷབ། །མཚོན་གྱི་གློག་འོད་ཁྱུགས་སེ་ཁྱུག །དེ་ལ་འབྲུག་སྒྲ་དི་རི་རི། །རྔམས་པའི་གར་སྟབས་ལིངས་སེ་ལིང་། །དེ་ཡིས་ས་གཡོས་ཤིགས་སེ་ཤིག །དཔལ་གྱི་དམག་ཚོགས་བསྡུས་བསྡུས་ནས། །གང་ལ་དམིགས་པ་རྡུལ་དུ་རློག །འདུས་པ་ཙམ་གྱིས་བགེགས་དཔུང་འཐོར། །ཆས་པ་ཙམ་གྱིས་དགྲ་བོ་བརླག །ཆོས་སྐྱོང་དམག་གི་དཔུང་དང་བཅས། །དེ་རིང་དགྲ་ལ་དམག་ཏུ་ཆོས། །དགྲ་བོ་ཕོ་རྒྱུད་མོ་རྒྱུད་སོད། །དགྲ་བོ་བུ་རྒྱུད་རྩད་ནས་ཆོད། །ཅེས་བསྐུལ་བར་བྱའོ།། །།ཡེ་ཤེས་མགོན་
(༦༡)། །པོ་བེར་གྱི་དགྲ་ཆོས་ཀྱི་རིམ་པ་འདིའང་ཡིག་རྙིང་སོར་བཞག་ལ་འདྲ་མིན་ཅུང་ཟད་སྣང་བར་དོན་ལ་ལེགས་པར་བརྟགས་ནས་དག་པར་བྱེད་པ་པོ་ནི་གཙུག་ལག་ཆོས་ཀྱི་སྣང་བའོ། །ཨོཾ་སྭ་སྟི། ལྟར་སྣང་ཆོས་སུ་འཛིན་པའི་རྨོང་སྤྲུལ་ལས། ལོག་ཤེས་དུལ་གྱིས་གཟུགས་གྲུབ་མ་རུང་ཚོགས། །འདུལ་ཕྱིར་སྙིང་རྗེའི་སྐུར་སྟོན་ཡེ་ཤེས་དང་། །ལས་མགོན་ཁྲོ་བོའི་ཚོགས་ཀྱི་བདེན་བསྐུལ་འདི། །རྨད་བྱུང་སྲིད་པའི་དཔལ་ཀུན་གནས་གཅིག་ཏུ། །འདུས་པའི་ངོ་མཚར་འཆང་བ་འབྲས་མོ་ལྗོངས། །དེ་ཡི་བྱེ་བྲག་ཕྱག་ན་པདྨོའི་ཞིང་། །གདན་ས་ཆེན་པོ་བཤད་སྒྲུབ་ཆོས་གླིང་དུ། སླར་ཡང་སྤར་བསྐྲུན་གསར་དུ་བཞད་པ་ཡི། །རྣམ་དཀར་མཛད་བཟང་ཡར་ངོའི་དགའ་སྟོན་གྱིས། །བཤད་དང་སྒྲུབ་པའི་ཆ་ཤས་ཡོང་རྫོགས་ནས། །གྲགས་པའི་འོད་དཀར་ཕྱོགས་མཐར་ཁྱབ་གྱུར་ཅིག །ཅེས་པའང་། གདན་ས་འདི་ཉིད་ཀྱི་གསུང་རབ་ཉམས་གསོའི་སྤར་ཁང་གི་འགོ་བྱེད་ནས་ལྷ་རྫས་དྲི་མེད་བཅས་བསྐུལ་བ་བཞིན་འཕགས་མཆོག་སྤྱན་རས་གཟིགས་དངོས་༧རྒྱལ་མཆོག་བཅུ་དྲུག་པ་ཆེན་པོ་མཆོག་གི་ཞབས་འབངས་སུ་གཏོགས་པ་ཞྭ་དམར་མི་ཕམ་ཆོས་ཀྱི་བློ་གྲོས་པས། སྤར་བྱར་སྨོན་ཚིག་ཏུ་སྦྱར་བའོ། །དགེའོ། །