རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་ཆུ་རྒྱུན་ཅེས་བྱ་བ།
རྒྱལ་བ་རྡོ་རྗེ་འཆང་ལ་ཕྱག་འཚལ་ལོ། །དཀོན་མཆོག་མཁྱེན་པའི་གཏེར་ཆེན་འཇམ་པའི་དབྱངས། །རྒྱལ་བའི་ཐུགས་རྗེ་གཅིག་བསྡུས་སྤྱན་རས་གཟིགས། །མཚན་མཆོག་ལྟ་བས་མི་ངོམ་རྡོ་རྗེ་འཛིན། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །སྐྱེས་ཆེན་དམ་པའི་རྣམ་ཐར་རྒྱ་མཚོ་ལས། །ཆ་ཙམ་དད་པའི་སྙིམ་པས་ལེགས་བཅུས་ནས། །བདག་བློ་ཚིམ་ཞིང་དད་ལྡན་གཞན་ལ་ཡང་། །དད་པའི་ཆུ་རྒྱུན་སྤེལ་ཕྱིར་སྦྱིན་པར་བྱ། །རྒྱ་ཆེན་སྨོན་ལམ་དག་པའི་དྲི་བཞོན་གྱིས། །དཔག་ཡས་ཚོགས་གཉིས་ཆུ་གཏེར་བསྲུབས་པ་ལས། །བསྟན་པ་གསེར་རིའི་དབུས་སུ་དར་འབྱོར་གྱི། །ས་འཛིན་དཀར་པོ་བརྙེས་པ་དེ་ལ་འདུད། །གཞོན་ནུ་ཉིད་ནས་སྲིད་པའི་ཕུན་ཚོགས་ལ། །ཞེན་པ་སྤངས་ཤིང་སྔོན་སྦྱངས་བག་ཆགས་ཀྱིས། །གཏན་གྱི་བདེ་བ་ཐོབ་བྱེད་དམ་པའི་ཆོས། །རྒྱུན་ཆད་མེད་པར་བསྒྲུབ་པར་བཞེད་ལ་འདུད། །བསྟན་ལ་འཇུག་ཚེ་དབང་འོད་བཟང་པོ་ཡིས། །རྣམ་དག་ཚུལ་ཁྲིམས་བསླབ་པའི་ཁང་བཟང་དུ། །ཐབས་ཤེས་དབྱེར་མེད་ཀྱེ་ཡི་རྡོ་རྗེ་ཡི། །སྨིན་བྱེད་ནོར་གྱིས་གཏམས་པར་མཛད་ལ་འདུད། །ཐོས་པ་རྒྱ་མཚོའི་གླིང་དུ་འཇུག་པའི་ཚེ། །སངས་རྒྱས་བློ་གྲོས་ཐུགས་རྗེ་དཔལ་སོགས་ལས། །ལུང་དང་རིགས་པའི་གཞུང་ལུགས་ལེགས་སྦྱངས་ནས། །བློ་གསལ་འདུས་པའི་རྒྱན་དུ་གྱུར་ལ་འདུད། །འཛམ་གླིང་མཁས་པའི་དབང་པོ་སངས་རྒྱས་དཔལ། །དེ་སྲས་ཐུ་བོ་རོང་སྟོན་ཆོས་རྗེ་སོགས། །མཚུངས་བྲལ་ཡོངས་འཛིན་མང་པོ་ཉེར་བསྟེན་ནས། །ཐོས་པ་རྒྱ་མཚོའི་ཕ་རོལ་སོན་ལ་འདུད། །གཞོན་ནུའི་སར་གནས་རྒྱལ་སྲས་མཆོག་གྱུར་ལས། །དབུ་ཚད་རིགས་པའི་རྣམ་བཞག་མ་ལུས་དང་། །བྱམས་ཆོས་འདུལ་མངོན་ལ་སོགས་ཐུགས་ཆུད་ནས། །སྡེ་སྣོད་ཀུན་གྱི་གཏེར་དུ་གྱུར་ལ་འདུད། །དཔལ་ལྡན་ཨ་ཏི་ཤ་ཡི་གདམས་པའི་བཅུད། །བྱང་ཆུབ་སེམས་གཉིས་སྦྱོང་བའི་མན་ངག་གི །བཀའ་བབས་ཇི་སྙེད་ཀུན་ལ་དབང་འབྱོར་བས། །བྱང་ཆུབ་ཐུགས་ཀྱི་བདག་པོར་གྱུར་ལ་འདུད། །མཉམ་མེད་ནམ་མཁའི་རྣལ་འབྱོར་ཞབས་དྲུང་དུ། །ཡེ་ཤེས་མཁའ་འགྲོ་ནེ་གུའི་གདམས་པ་དང་། །ནཱ་རོ་ཆོས་དྲུག་ཕྱག་ཆེན་གཅོད་ལ་སོགས། །གདམས་པ་བདུད་རྩིས་ཚིམ་པར་མཛད་ལ་འདུད། །ཐེག་ཆེན་ཆོས་རྗེ་བརྩེ་ལྡན་བཀའ་ལྔ་པ། །ཀུན་དགའ་བླ་མ་ཡོན་ཏན་དཔལ་ལ་སོགས། །བཅུ་ཕྲག་བཞི་ཡི་བླ་མ་ཉེར་བསྟེན་ནས། །གསུང་རབ་ཀུན་གྱི་མཛོད་དུ་གྱུར་ལ་འདུད། །རབ་འབྱམས་སྨྲ་བའི་དབང་པོ་ཀུན་དགའ་དཔལ། །སེམས་དཔའ་དོན་རིན་དར་མ་རིན་ཆེན་ལས། །བསྙེན་པར་རྫོགས་པའི་སྡོམ་པ་ལེགས་མནོས་ནས། །ངུར་སྨྲིག་འཛིན་པའི་མཆོག་ཏུ་གྱུར་ལ་འདུད། །གསང་ཆེན་རྒྱུད་སྡེའི་གདམས་པ་དོན་གཉེར་ཚེ། །འཇམ་དབྱངས་བླ་མ་ཀུན་དགའ་བཟང་པོ་ཡི། །ངོ་མཚར་རྣམ་ཐར་ཐོས་པས་ཡིད་གཡོས་ཏེ། །གཡོ་བ་མེད་པར་དེ་དྲུང་བསྙེན་ལ་འདུད། །བླ་མ་མཆོག་ལས་རྣམ་དག་དབང་ནོས་ནས། །ཀྱཻ་རྡོར་རྒྱུད་གསུམ་དཔལ་ལྡན་འདུས་པ་དང་། །ཁྱད་པར་འཁོར་ལོ་བདེ་མཆོག་གསང་མཐའ་ཡི། །རྒྱུད་ལུང་མན་ངག་རྫོགས་པར་མནོས་ལ་འདུད། །གང་ཚེ་གསང་མཐའི་གདམས་པས་ཡིད་ཚིམ་ནས། །སྒྲུབ་ལ་གཞོལ་ཚེ་འདྲེན་མཆོག་བཟང་པོ་ཡིས། །མ་འོངས་སྐྱེ་རྒུའི་མགོན་དུ་གཟིགས་གྱུར་ནས། །གསུང་ངག་སྣོད་དུ་ནན་གྱིས་བསྐུལ་ལ་འདུད། །ཁྱོད་བློ་དག་པའི་རིན་ཆེན་བུམ་བཟང་དུ། །གདམས་པའི་ཆུ་རྒྱུན་རྫོགས་པར་མ་གཏམས་པ། །དེ་སྲིད་བསྟན་པའི་བྱ་བ་མ་རྫོགས་ཞེས། །མགོན་དེས་བརྩོན་པས་སྐྱོང་བ་ཁྱོད་ལ་འདུད། །དེ་ཚེ་གཞིར་གནས་དཀྱིལ་འཁོར་རྣམ་བཞི་ལ། །དབང་བཞི་ཐོབ་ཅིང་ལམ་བཟང་བཞི་བསྒོམས་པས། །ལྟ་བ་བཞི་དང་གྲུབ་མཐའ་བཞི་འདྲེན་པའི། །སྙན་བརྒྱུད་བཞི་ཡི་གདམས་པ་ཐེབས་ལ་འདུད། །རིང་བརྒྱུད་ཚད་མ་བཞི་ལ་དྲུག་ཕྲག་བཅུ། །མན་ངག་ཕྲན་ཚེགས་བཅས་དང་ཉེ་བརྒྱུད་གཉིས། །རྣམ་འགྲེལ་རྒྱས་སོགས་རྣལ་འབྱོར་དབང་ཕྱུག་གི །གདམས་པ་རྒྱ་མཚོས་ཁྱོད་ཐུགས་གང་ལ་འདུད། །གཞན་ཡང་རྒྱུད་སྡེ་རྣམ་བཞིའི་དབང་དང་ལུང་། །རྗེས་གནང་རིག་གཏད་མན་ངག་ལག་ལེན་བཅས། །རྒྱ་བོད་མཁས་པའི་ལེགས་བཤད་རྣམས་ལ་སོགས། །དཔག་ཡས་ཆོས་ཀྱི་བཀའ་དྲིན་མནོས་ལ་འདུད། །རྒྱ་ཆེན་ཐོས་པས་སྒྲོ་འདོགས་ལེགས་ཆོད་ཅིང་། །དབང་ལུང་མན་ངག་ནོར་གྱིས་རྒྱུད་ཕྱུག་ནས། །སྣ་ཚོགས་སྤྲོས་པའི་བྱ་བ་ཀུན་སྤངས་ཏེ། །དབེན་པའི་གནས་སུ་རྩེ་ཅིག་བསྒྲུབས་ལ་འདུད། །དབེན་གནས་དངུལ་ཆུར་མཐའ་བྲལ་དོན་བསྒོམ་ཚེ། །སྣོད་བཅུད་དངུལ་ཆུའི་རྒྱ་མཚོ་ཇི་བཞིན་དུ། །རྣམ་པར་གཡོ་ཞིང་ཐོགས་མེད་འཇུག་པ་ཡི། །ཉམས་མྱོང་མངོན་དུ་མཛད་པ་དེ་ལ་འདུད། །རྒྱུན་ཆད་མེད་པར་སྙིང་རྗེའི་ཆུ་རྒྱུན་གྱིས། །གྲངས་མེད་འགྲོ་བའི་སྡུག་བསྔལ་རྟག་བསལ་ཞིང་། །བདེ་དགེའི་སྤྲིན་ཚོགས་ནམ་མཁའ་ཀུན་བཀང་ནས། །མ་རྣམས་ཀུན་ལ་སྦྱིན་པར་མཛད་ལ་འདུད། །བྱམས་དང་སྙིང་རྗེ་བྱང་ཆུབ་སེམས་བསྒོམ་ཚེ། །མགོན་མེད་སྐྲག་པའི་ཡིད་ལྡན་རི་དྭགས་ཚོགས། །མ་ལ་བུ་བཞིན་ཁྱོད་སྐུར་གུས་བཏུད་ནས། །རིག་རིག་མིག་གིས་ཁྱོད་ཞལ་བལྟ་ལ་འདུད། །ལས་ཀྱིས་དགྲ་ཟླར་གྱུར་པའི་གནའ་ཁྱི་ཡང་། །མགོན་པོ་གང་གི་ཞབས་དྲུང་བསྟེན་པའི་མཐུས། །འབྲལ་མི་ཕོད་པའི་བྱམས་སེམས་ལྡན་པ་སོགས། །རྨད་བྱུང་ངོ་མཚར་བསམ་ལས་འདས་ལ་འདུད། །དེ་སླད་ཐེག་ཆེན་དགེ་བའི་བཤེས་གཉེན་གྱིས། །བྱང་ཆུབ་སེམས་ཀྱི་བདག་པོར་དབང་བསྐུར་ནས། །རྒྱུན་ཆད་མེད་པར་འགྲོ་ལ་སྤེལ་ཞེས་པའི། །ལུང་བསྟན་དབུགས་དབྱུང་མཛད་པ་ཁྱོད་ལ་འདུད། །དབང་གིས་མཚོན་པའི་ཡང་དག་ལྟ་བའི་དོན། །གསལ་སྟོང་ཟུང་འཇུག་བརྗོད་བྲལ་ལྷན་ཅིག་སྐྱེས། །ཉམས་ལེན་ཀུན་ལ་ཁྱབ་པར་ལེགས་བསྒོམས་པས། །འཁྲུལ་སྣང་ཡེ་ཤེས་ཆེན་པོར་ཤར་ལ་འདུད། །ཆོ་ག་གསུམ་དང་ས་བོན་སྒྲ་ཚུལ་དང་། །མཉམ་དང་མི་མཉམ་སྦྱོར་བའི་མངོན་བྱང་ལྔས། །ཐ་མལ་སྣང་བ་ཡེ་ཤེས་ལྔར་བསྒོམས་པས། །ཅིར་སྣང་ལྷ་ཡི་འཁོར་ལོར་ཤར་ལ་འདུད། །འཁོར་ལོ་ལྔ་དང་ཉི་ཤུ་རྩ་བཞིའི་གནས། །ཚིགས་ཆེན་རྣམས་དང་དབང་པོའི་རྩ་ཐིག་རྣམས། །གདན་གསུམ་ཚང་བའི་ལྷ་རུ་ལེགས་བསྒོམས་པས། །རླུང་སེམས་མཁའ་འགྲོས་བྱིན་གྱིས་བརླབས་ལ་འདུད། །རྩ་རླུང་ཐིག་ལེའི་རྣལ་འབྱོར་དམ་པ་དང་། །རྡོ་རྗེ་ལུས་ཀྱི་འཁྲུལ་འཁོར་ལ་སོགས་ཀྱིས། །གཟུང་འཛིན་རླུང་སེམས་དབུ་མར་རབ་བཅུག་ནས། །བདེ་སྟོང་མཆོག་གི་ཡེ་ཤེས་བརྙེས་ལ་འདུད། །བསྒོམ་པའི་སྟོབས་ཀྱིས་ལུས་ལ་བདེ་དྲོད་འབར། །སེམས་ལ་སྣ་ཚོགས་ཉམས་ཀྱི་སྣང་བ་ཤར། །གཞན་སེམས་མངོན་དུ་གྱུར་པའི་མཚན་མ་སོགས། །དད་ལྡན་སློབ་མས་ངེས་པར་གྱུར་ལ་འདུད། །འཁོར་ལོ་བདེ་མཆོག་འཇམ་དབྱངས་གཤིན་རྗེའི་གཤེད། །མ་ཧཱ་ཀཱ་ལ་སྤྱན་རས་གཟིགས་སོགས་ཀྱི། །གསང་སྔགས་བྱེ་བ་དུ་མ་རབ་བཟླས་པས། །དངོས་གྲུབ་རྣམ་གཉིས་ལྷུན་གྱིས་གྲུབ་ལ་འདུད། །ཁྱད་པར་བདེ་སྟོང་དབྱེར་མེད་ཀྱེ་རྡོ་རྗེའི། །རྩ་སྔགས་འབུམ་ཕྲག་བཅུ་གསུམ་བཟླས་པའི་ཚེ། །དམ་པ་བརྒྱུད་པའི་དབང་གི་ཆུ་བོ་རྣམས། །བདག་ཉིད་དབང་གི་མཚན་མ་མཐོང་ལ་འདུད། །ཐུན་མཚམས་ཀུན་ཏུ་མཆོད་གཏོར་རྣལ་འབྱོར་དང་། །མདོ་རྒྱུད་ཀློག་དང་སྦྱིན་སྲེག་མཆོད་རྟེན་ལས། །སྐལ་ལྡན་འགའ་ལ་ཟབ་ལམ་འཆད་པ་སོགས། །རྣམ་དཀར་དགེ་བས་འདའ་བར་མཛད་ལ་འདུད། །བཟའ་བ་བདུད་རྩིས་རང་ལུས་ཡི་དམ་མཆོད། །མནལ་ཚེ་འོད་གསལ་སྟོང་པའི་ངང་ལ་འཇོག །ལྡང་ཚེ་ཟུང་འཇུག་གཟུགས་ཀྱི་སྐུར་བཞེངས་ནས། །སྣོད་བཅུད་དག་པའི་སྣང་བར་བལྟས་ལ་འདུད། །ཏིང་གྲོལ་གནས་སུ་རྣལ་འབྱོར་མ་ཞིག་གིས། །གསེར་ལས་བྱས་པའི་རྫོགས་སངས་རྒྱས་ཀྱི་གཟུགས། །རྣམ་པར་གཏད་ནས་ས་སྐྱ་པཎྜི་ཏའི། །བསྟན་པ་སྤེལ་ཞེས་ལུང་བསྟན་བརྙེས་ལ་འདུད། །མཚུངས་པ་དང་བྲལ་འཇིག་རྟེན་མགོན་པོའི་གཟུགས། །དངོས་སུ་གཟིགས་ནས་སྐལ་ལྡན་འགའ་ཞིག་གིས། །ཁྱོད་ཉིད་འཇིག་རྟེན་མགོན་པོར་གནས་པ་ལ། །དེ་ཉིད་དུ་མས་བཏུད་པ་མཐོང་ལ་འདུད། །དབེན་གནས་མཆོག་ཏུ་བསམ་གཏན་བསྒྲུབས་པའི་ཚེ། །རྣལ་འབྱོར་དབང་ཕྱུག་རྗེ་བཙུན་ས་སྐྱ་པས། །བྱིན་གྱིས་བརླབས་ཤིང་དཔག་མེད་འགྲོ་བ་ཡི། །དོན་མཆོག་བསྒྲུབ་པའི་རྟེན་འབྲེལ་བསྒྲིགས་ལ་འདུད། །འདྲེན་པ་མཆོག་གིས་སྐལ་ལྡན་ཁྱོད་ཉིད་ལ། །བསྟན་པ་རྒྱ་མཚོ་མ་གཏད་དེ་སྲིད་དུ། །བརྟན་པར་བཞུགས་ནས་ནམ་ཞིག་མངོན་གྱུར་ཚེ། །རྒྱལ་ཚབ་ཆེན་པོར་དབང་བསྐུར་མཛད་ལ་འདུད། །བླ་མ་ཉིད་ཀྱིས་ངུར་སྨྲིག་རྒྱལ་མཚན་དང་། །དམ་ཚིག་མཆོག་གི་རྡོ་རྗེ་དྲིལ་བུ་དང་། །དཔལ་ལྡན་བརྩེ་བ་ཆེན་པོའི་བྲིས་སྐུ་རྣམས། །བསྟན་པའི་རྒྱུན་དང་མཉམ་དུ་གཏད་ལ་འདུད། །དམ་ཚིག་སྡོམ་ལ་ཉེས་པ་མེད་སླད་དང་། །ལྷག་པའི་ལྷ་དང་དབྱེར་མེད་འདུ་ཤེས་ཀྱིས། །སླར་ཡང་བློ་ཆེན་དེ་ཡི་ཐུགས་དགོངས་རྣམས། །ལེགས་བསྒྲུབས་ལྷུན་གྱིས་གྲུབ་པ་དེ་ལ་འདུད། །བླ་མ་ཉིད་དང་ཤཱཀྱ་སེང་གེའི་སྐུ། །དམ་པ་བརྒྱུད་པའི་གསུང་རབ་རྒྱ་མཚོའི་ཚོགས། །རྒྱལ་མཚན་ལྟར་གྲགས་ཆོས་སྐུའི་རྟེན་མཆོག་རྣམས། །སྐུ་གསུང་ཐུགས་ཀྱི་རྟེན་དུ་བསྒྲུབས་ལ་འདུད། །འཇམ་དབྱངས་བླ་མའི་སྐུ་གདུང་རིང་བསྲེལ་རྣམས། །གསེར་སོགས་རིན་ཆེན་གྱིས་སྤྲས་མཆོད་རྟེན་ནི། །སྟོང་ཕྲག་བདུན་ཅུར་བསྒྲུབས་ནས་ཕྱོགས་བཅུ་ཡི། །དད་ལྡན་མཆོད་པའི་རྟེན་དུ་སྦྱིན་ལ་འདུད། །བླ་མ་མཆོག་གི་བཞེད་པ་བསྒྲུབ་སླད་དང་། །གྲངས་མེད་འགྲོ་ལ་ཕན་བདེ་སྐྲུན་པའི་ཕྱིར། །དམ་ཆོས་བདུད་རྩིའི་ཆར་གྱིས་དུས་ཀུན་ཏུ། །ཕན་བདེའི་ལོ་ཐོག་སྐྲུན་པར་མཛད་ལ་འདུད། །ལེགས་གསུང་འདུལ་བའི་བསླབ་པ་དོན་གཉེར་རྣམས། །དགེ་བསྙེན་དགེ་ཚུལ་དགེ་སློང་སྡོམ་པ་ལ། །སྐལ་བཞིན་དྲི་མེད་ཆོ་གས་ལེགས་བཀོད་པས། །ཀུན་གྱི་གནས་བརྟན་ཆེན་པོར་གྱུར་ལ་འདུད། །ཨ་ཏི་ཤ་ཡི་གདམས་པའི་ཉི་འོད་ཀྱིས། །བྱམས་དང་སྙིང་རྗེའི་པད་མོ་ཁ་འབྱེད་ཅིང་། །བྱང་སེམས་བསླབ་པ་སྦྲང་རྩིའི་བཅུད་གཏམས་ནས། །སྐལ་བཟང་བུང་བའི་དགའ་སྟོན་སྤེལ་ལ་འདུད། །ཐུན་མོང་ལམ་གྱིས་སྦྱངས་པའི་སློབ་མ་རྣམས། །གདན་གསུམ་ཚང་བའི་དཀྱིལ་འཁོར་ཆེན་པོ་རུ། །བརྒྱུད་པར་ལྡན་པའི་ཆོ་གས་དབང་བསྐུར་བས། །སྐུ་བཞིའི་ས་བོན་ཐེབས་པར་མཛད་ལ་འདུད། །རྒྱུད་སྡེ་རྒྱ་མཚོར་རྣམ་དཔྱོད་གྲུ་གཟིངས་བཅས། །མཐའ་དྲུག་ཚུལ་བཞིའི་རླུང་དར་རབ་བསྐྱོད་ནས། །ཟབ་དོན་ཡིད་བཞིན་ནོར་བུ་ལེགས་བླངས་ཏེ། །བློ་ལྡན་བློ་ཡི་བང་མཛོད་འགེངས་ལ་འདུད། །རིམ་པ་དང་པོའི་རྣལ་འབྱོར་འཆད་པའི་ཚེ། །རྟོག་གེ་འཁྲུལ་བའི་དྲྭ་བ་ཀུན་བསལ་ནས། །མ་དག་འཁོར་བའི་ཕུང་ཁམས་སྐྱེ་མཆེད་རྣམས། །དག་པ་ལྷ་ཡི་འཁོར་ལོར་སྟོན་ལ་འདུད། །རིམ་བཞི་རིམ་ལྔ་ཤིན་ཏུ་སྤྲོས་མེད་དང་། །སྦྱོར་བ་ཡན་ལག་དྲུག་སོགས་རྫོགས་རིམ་གྱིས། །སྐལ་ལྡན་སློབ་མའི་ལྷར་ཞེན་རྣམ་རྟོག་རྣམས། །བདེ་ཆེན་ཡེ་ཤེས་མཆོག་ཏུ་བསྒྱུར་ལ་འདུད། །ཁྱད་པར་སྙན་བརྒྱུད་ཚད་མ་བཞི་ལྡན་གྱིས། །གངས་རིའི་ཁྲོད་ཀྱི་རྣམ་གྲོལ་དོན་གཉེར་རྣམས། །ཐུན་བཞིའི་རྣལ་འབྱོར་མཆོག་ལ་ལེགས་བཀོད་ནས། །གསང་ཆེན་བསྟན་པ་རྒྱས་པར་མཛད་ལ་འདུད། །འབུམ་ཕྲག་རྒྱུད་དང་གྲུབ་པའི་གཞུང་བཟང་དང་། །རྩ་བརྒྱུད་བླ་མའི་ལེགས་བཤད་རྒྱ་མཚོའི་ཚོགས། །སྡེ་སྣོད་དགོངས་འགྲེལ་བཅས་པའི་ལུང་རྣམས་ཀྱིས། །ཐུབ་བསྟན་རྒྱུན་མི་ཆད་པར་མཛད་ལ་འདུད། །དེ་ལྟར་དྲི་མེད་བསྟན་པ་སྤེལ་བའི་མཐུས། །འཁོན་གྱི་གདུང་བརྒྱུད་སྐྱེས་ཆེན་རྣམས་ལ་སོགས། །རིགས་རུས་ཆོ་འབྲང་དཔལ་གྱིས་མངོན་མཐོ་བའི། །གངས་ཅན་ཆེ་རྒུས་ཁྱོད་ཞབས་བསྟེན་ལ་འདུད། །གཞན་ཡང་དཔག་ཡས་ལུང་དང་རིགས་པ་ལ། །དབང་བསྒྱུར་མཁས་པའི་དབང་པོ་མཆོག་རྣམས་ཀྱིས། །ཁྱོད་གསུང་ཐུབ་པའི་གསུང་ལྟར་གུས་བསྟེན་ནས། །བརྩོན་པས་བསྒྲུབ་ཅིང་ཕྱོགས་བཅུར་སྤེལ་ལ་འདུད། །རིས་བསྒྱུར་ཕྱོགས་ནི་ཐུབ་པར་བཅས་པའི་ཚེ། །གྲངས་མེད་མཁའ་འགྲོ་འདུ་བའི་གཞིར་གྱུར་པའི། །བཟའ་བའི་དམ་ཚིག་བདུད་རྩི་རིལ་བུ་མཆོག །ཚུལ་བཞིན་བསྒྲུབ་པ་མཐའ་རུ་ཕྱིན་ལ་འདུད། །སླར་ཡང་དབེན་པའི་གནས་དེར་ཟབ་མོའི་ལམ། །རྩེ་གཅིག་བསྒྲུབ་པ་མཛད་ཚེ་མནལ་ལམ་དུ། །རྗེ་བཙུན་བླ་མ་མཐུ་སྟོབས་དབང་ཕྱུག་གིས། །ཞལ་མཆོག་གཟིགས་ཤིང་བྱིན་གྱིས་བརླབས་ལ་འདུད། །འཆད་རྩོད་རྩོམ་ལ་འགྲན་གྱི་ཟླ་མེད་ཅིང་། །ཆོས་བརྒྱད་སྙོམས་པས་འཛིན་ལ་ཀུན་དང་བྲལ། །སྙན་པའི་གྲགས་པས་རྒྱ་མཚོའི་གོས་ཅན་ཁྱབ། །རྣམ་ཐར་བསམ་མི་ཁྱབ་པ་དེ་ལ་འདུད། །སྲིད་ན་ཁྱེད་འདྲའི་སྐྱབས་གཞན་འབྱུང་བ་དཀོན། །རྣམ་དག་ཐུགས་ནི་ཆོས་བརྒྱད་དྲི་མ་མེད། །ཉོན་མོངས་ཡེ་ཤེས་བསྒྱུར་བའི་མཐུ་ལྡན་པ། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །མཁྱེན་པའི་བ་དན་འཇིག་རྟེན་ཀུན་གྱི་རྒྱན། །སྙིང་རྗེའི་གདུགས་དཀར་གདུང་བ་སྐྱོབ་པའི་མཆོག །ཕྲིན་ལས་གསེར་བཟང་རྐྱེན་གྱིས་འགྱུར་བ་མེད། །རྗེ་བཙུན་བླ་མའི་ཞབས་ལ་ཕྱགས་འཚལ་ལོ། །རྒྱལ་བ་ཀུན་གྱི་ཡབ་གཅིག་རྡོ་རྗེ་འཆང་། །རྒྱལ་བའི་ཡུམ་མཆོག་ཤེས་རབ་ཕ་རོལ་ཕྱིན། །རྒྱལ་སྲས་ཐུ་བོ་བྱམས་མགོན་ཐུགས་རྗེ་ཅན། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །མཚན་གྱིས་སྤྲས་ཤིང་དཔེ་བྱད་འབར་བའི་སྐུ། །མཚན་རྟོག་ཀུན་འཇོམས་སྔགས་ཀྱི་རང་བཞིན་གསུང་། །མཚན་འཛིན་རྣམ་སྤངས་རྡོ་རྗེའི་ཐུགས་མངའ་བ། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །ཞིང་འདིར་དཀོན་པའི་མཆོད་པའི་རྫས་མཆོག་རྣམས། །རྒྱལ་སྲས་ཀུན་ཏུ་བཟང་པོའི་རྣམ་འཕྲུལ་ལྟར། །མཚན་མེད་ཏིང་འཛིན་ངང་ནས་རབ་སྤྲུལ་ཏེ། །རྗེ་བཙུན་བླ་མ་མཉེས་ཕྱིར་དབུལ་བར་བགྱི། །བསྐྱེད་པར་དཀོན་པའི་སེམས་མཆོག་ཉམས་པ་སོགས། །རྒྱལ་བས་བཀག་པའི་ཉེས་ལྟུང་ཅི་མཆིས་རྣམས། །མཚན་དང་ཉིན་དུ་གནོང་ཞིང་འགྱོད་པ་ཡིས། །རྗེ་བཙུན་བླ་མའི་སྤྱན་སྔར་སོ་སོར་བཤགས། །བསྒྲུབ་པར་དཀོན་ཀྱང་མཆོག་ཏུ་བདེ་བའི་རྒྱུ། །རྒྱལ་དང་དེ་སྲས་རང་རྒྱལ་ལ་སོགས་ཀྱིས། །མཚན་བཅས་མཚན་མེད་དགེ་བ་མཛད་རྣམས་ལ། །དད་པས་བདག་ནི་རྗེས་སུ་ཡི་རང་ངོ་། །རྙེད་པར་དཀོན་པའི་ཐེག་མཆོག་རྡོ་རྗེའི་ཐེག །རྒྱལ་བ་ཀུན་གྱི་གསང་ཆེན་བླ་ན་མེད། །མཚན་རྟོག་ལས་སྐྱོབ་རིམ་གཉིས་ཟབ་མོའི་ལམ། །རྒྱུན་ཆད་མེད་པར་འགྲོ་ལ་བསྟན་དུ་གསོལ། །ཐོས་པར་དཀོན་པའི་ཞིང་མཆོག་ཆོས་ཀྱི་རྗེ། །རྒྱལ་བ་སྲས་བཅས་དགོངས་པ་བསྒྲུབ་སླད་དུ། །མཚན་མོའི་མགོན་དང་ཉིན་བྱེད་གནས་ཀྱི་བར། །མྱ་ངན་མི་འདའ་བཞུགས་པར་གསོལ་བ་འདེབས། །བསགས་པར་དཀོན་པའི་དགེ་མཆོག་ཅི་མཆིས་རྣམས། །རྒྱལ་སྲས་དཔའ་བོ་རྣམས་ཀྱིས་བསྔོ་བ་ལྟར། །མཚན་མེད་རྣམ་པར་མི་རྟོག་ཤེས་རབ་ཀྱིས། །བླ་མེད་བྱང་ཆུབ་མཆོག་ཏུ་བསྔོ་བར་བགྱི། །དེང་ནས་བཟུང་སྟེ་ཚེ་རབས་ཐམས་ཅད་དུ། །དཀོན་མཆོག་གསུམ་དངོས་བླ་མ་ཡིད་བཞིན་ནོར། །འབྲལ་མེད་དད་པའི་རྒྱལ་མཚན་རྩེར་མཆོད་ནས། །ཡང་དག་གདམས་པའི་དཔལ་ལ་སྤྱོད་པར་ཤོག །དོན་མེད་ཚེ་འདིའི་བྱ་བས་མི་གཡེང་བར། །དོན་ཆེན་སྒྲུབ་བྱེད་བྱང་ཆུབ་སེམས་མཆོག་དང་། །དོན་དམ་རྟོགས་པའི་ཤེས་རབ་ཕུན་ཚོགས་རྣམས། །དོན་གཞན་སྤངས་ནས་རྩེར་གཅིག་བསྒོམ་པར་ཤོག །དམ་ཚིག་སྡོམ་པ་རྣམ་དག་ངང་ལྡན་ཞིང་། །དམ་ཆོས་སྙིང་པོ་རིམ་གཉིས་ཟབ་མོའི་ལམ། །དམ་པས་བསྔགས་པའི་གནས་སུ་ལེགས་བསྒོམས་པས། །དམ་པའི་དོན་མཆོག་ཟུང་འཇུག་རྟོགས་པར་ཤོག །དགེ་བ་འདི་ཡིས་བདག་གཞན་འགྲོ་བ་ཀུན། །བསོད་ནམས་ཡེ་ཤེས་ཚོགས་གཉིས་མྱུར་རྫོགས་ནས། །ཤཱཀྱ་སེང་གེའི་གོ་འཕང་མངོན་གྱུར་ཏེ། །མཐའ་ཡས་འགྲོ་བ་འདྲེན་པའི་དཔལ་དུ་ཤོག །རྗེ་བཙུན་བླ་མ་མུས་པ་ཆེན་པོའི་རྣམ་པར་ཐར་པ་ངོ་མཚར་ཆུ་རྒྱུན་ཅེས་བྱ་བ་ཚིགས་སུ་བཅད་པ་དྲུག་ཅུ་རྩ་བཞི་པ་འདི་ནི། རྗེ་དེ་ཉིད་ཀྱི་ཞབས་རྡུལ་སྤྱི་བོས་བླངས་པ་ཕྱོགས་མེད་རྒྱལ་ཁམས་ཀྱི་བྱ་བྲལ་བ་བསོད་ནམས་སེང་གེས་ཆུ་ཕོ་རྟའི་ལོ་སྣྲོན་གྱི་ཟླ་བའི་ཡར་ཚེས་གཅིག་ལ་འབྲས་ཡུལ་རྫོང་དཀར་གྱི་སྐྱེད་མོས་ཚལ་དུ་སྦྱར་བ་ལས། སླར་ཡང་ཤིང་མོ་བྱའི་ལོར་ཚིགས་སུ་བཅད་པ་དྲུག་ཅིག་བསྣན་པའོ།། །།ཤུ་བྷཾ།། །།