བདག་ཆེན་ཆུ་མིག་པ་ལ་བསྟོད་པ།
ན་མོ་གུ་ར་ཝེ། ཟབ་ཡངས་བློ་གྲོས་དབང་ལུང་ནོར་གྱིས་ཕྱུག །དགེ་ལེགས་ཐར་པའི་འབྱུང་གནས་རིན་པོ་ཆེ། །བདེ་གཤེགས་བསྟན་པའི་རྒྱལ་མཚན་རྩེར་མཆོད་པ། །དཔལ་འབྱོར་བཟང་པོའི་ཞབས་ལ་ཕྱག་འཚལ་ལོ། །ཡོན་ཏན་གཞིར་གྱུར་ས་བཅུའི་རྟོགས་པ་མཆོག །ཁ་བ་དུང་དང་ཀུ་མུད་ལྟར་སྐྱ་བ། །གང་གིས་བརྙེས་ནས་མ་རིག་ལས་འཁོན་པའི། །ཆོ་འབྲང་མཆོག་ཏུ་འཁྲུངས་ལ་ཕྱག་འཚལ་ལོ། །མཐའ་དག་འགྲོ་ལ་བརྩེ་བའི་ཐུགས་རྗེ་དང་། །གནས་ལུགས་འཁྲུལ་མེད་རྟོགས་པའི་བློ་གྲོས་ཀྱིས། །མཐའ་ཡས་གསུང་རབ་དོན་ལ་དབང་འབྱོར་ཞིང་། །སྙན་བརྒྱུད་གདམས་པས་ཕྱུག་ལ་ཕྱག་འཚལ་ལོ། །ཐུབ་བསྟན་རྣམ་པར་རྒྱལ་བའི་ཁང་བཟང་ན། །ལེགས་པར་བཤད་པའི་རྔ་སྒྲ་ཆེར་འབྱུང་ཞིང་། །བློ་གསལ་ཉེ་དབང་བསྟི་བའི་གནས་གྱུར་པ། །མཁས་མཆོག་ལྷ་ཡི་དབང་པོ་ལ་ཕྱག་འཚལ། །ངུར་སྨྲིག་རྒྱལ་མཚན་འཛིན་པ་ཀུན་གྱི་གཙོ། །ཐེག་ཆེན་བསླབ་པའི་དཔལ་གྱིས་རབ་ཏུ་བརྗིད། །དངོས་གྲུབ་བཟང་པོའི་གཏེར་གྱུར་རིམ་གཉིས་ཀྱི། །རྣལ་འབྱོར་མཐར་ཕྱིན་དེ་ལ་ཕྱག་འཚལ་ལོ། །བྱིན་རླབས་རྒྱ་མཚོའི་དབུས་ན་གནས་བཅས་ཤིང་། །སྡེ་སྣོད་རྒྱུད་སྡེའི་གདེངས་ཀ་བདུན་དང་ལྡན། །ལྷག་བསམ་སྤྱི་བོ་ཡོངས་འཛིན་ནོར་བུས་སྤྲས། །འདྲེན་མཆོག་ཀླུ་ཡི་དབང་པོ་ལ་ཕྱག་འཚལ། །སྲིད་པ་གསུམ་གྱི་སེམས་ཅན་དོན་སླད་དུ། །དཀོན་མཆོག་གསུམ་གྱི་མཁྱེན་བརྩེ་གཅིག་བསྡུས་ནས། །ཁམས་གསུམ་འགྲོ་ལ་སྐྱེ་བོའི་སྐུར་སྟོན་པ། །འཇམ་དབྱངས་བླ་མའི་ཞབས་ལ་ཕྱག་འཚལ་ལོ། །དེ་ལྟར་བསྟོད་པའི་རྣམ་དཀར་དགེ་ཚོགས་ཀྱིས། །དཔལ་ལྡན་བླ་མ་སྐུ་ཚེ་རབ་བརྟན་ཅིང་། །ཕྲིན་ལས་འགྲོ་བ་ཀུན་ལ་ཁྱབ་པ་དང་། །གདུལ་བྱའི་རྒྱུད་ལ་བྱིན་རླབས་འཇུག་པར་ཤོག །བདག་ཀྱང་གསོལ་བ་འདེབས་པའི་དོན་སླད་དང་། །གྲགས་པ་རྒྱལ་མཚན་ངག་གིས་བསྐུལ་བའི་ངོར། །བསྟོད་ཚིག་འདི་ནི་བསོད་ནམས་སེང་གེ་ཡིས། །དཔལ་ལྡན་ཨུ་རྒྱན་ཆོས་རྫོང་དགོན་པར་སྦྱར། །ཤུ་བྷཾ།། །།