རབ་འབྱམས་པ་ཤེས་རབ་དཔལ་བཟང་པོ་ལ་བསྟོད་པ།
ན་མོ་གུ་ར་ཝེ། རྒྱལ་ཆེན་ཤེས་བྱའི་ནམ་མཁའ་ཡངས་པ་ལ། །ཟབ་དོན་རབ་གསལ་མཁྱེན་པའི་དཀྱིལ་འཁོར་རྒྱས། །དཔལ་འབྱོར་བཟང་པོའི་འོད་ཟེར་སྟོང་འཕྲོ་བ། །ཐུབ་བསྟན་ཉིན་མོར་བྱེད་པ་དེ་ལ་འདུད། །བྱིན་རླབས་རྒྱ་མཚོ་བླ་མའི་ཚོགས་རྣམས་ལ། །དད་པ་རྒྱ་མཚོའི་ཡིད་ཀྱིས་ལེགས་བསྟེན་པས། །གསུང་རབ་རྒྱ་མཚོའི་ཚོགས་ལ་དབང་འབྱོར་པ། །འཛམ་གླིང་མཁས་པའི་དབང་པོ་དེ་ལ་འདུད། །རྣམ་མང་རྒྱུད་སྡེའི་ཆུ་གཙང་ལས་འཁྲུངས་པའི། །སྨིན་བྱེད་འདབ་སྟོང་རིམ་གཉིས་ཟེའུ་འབྲུས་སྤྲས། །དངོས་གྲུབ་རྣམ་གཉིས་སྦྲང་རྩི་འབྱུང་བའི་གནས། །གསང་ཆེན་ཐེག་པའི་ཆུ་སྐྱེས་དེ་ལ་འདུད། །ལྷག་པའི་ལྷ་ཡིས་བྱིན་བརླབས་སྒོ་འབྱེད་ཅིང་། །དཔའ་བོ་མཁའ་འགྲོས་དགོས་འདོད་ཆར་ལྟར་འབེབས། །བསྟན་སྲུང་རྒྱ་མཚོའི་ཚོགས་ཀྱིས་བཀའ་བཞིན་སྒྲུབ། །མཚུངས་བྲལ་གྲུབ་པའི་དབང་པོ་དེ་ལ་འདུད། །པདྨ་འབྱུང་གནས་ཐུགས་ཀྱི་ཕྲིན་ལས་ལས། །མིའུ་ཐུང་མགོན་པོའི་གཟུགས་སུ་རྣམ་སྤྲུལ་ཏེ། །སྙིགས་དུས་གདུག་ཅན་དྲག་པོ་འདུལ་མཛད་པ། །སྤྲུལ་སྐུ་འགྲོ་བའི་དོན་མཛད་དེ་ལ་འདུད། །དེ་ལྟར་བསྟོད་ཅིང་གསོལ་བ་བཏབ་པའི་མཐུས། །གང་ཞིག་ཁྱོད་འདྲའི་སྐྱེས་ཆེན་དམ་པ་ལ། །མཆོད་དང་བརྙས་པ་བྱས་པའི་སྐྱེ་བོ་ཀུན། །མཚུངས་པ་ཉིད་དུ་རྣམ་གྲོལ་བདེ་ཐོབ་ཤོག །ལྷག་པར་གསོལ་བ་འདེབས་པའི་སློབ་མ་ཀུན། །ཚེ་འདི་ཉིད་ལ་འགལ་རྐྱེན་ཀུན་སྤངས་ནས། །བསམ་པའི་དོན་རྣམས་ཡིད་བཞིན་འགྲུབ་འགྱུར་ཏེ། །འགྲོ་བའི་དོན་དུ་སངས་རྒྱས་མྱུར་འགྲུབ་ཤོག །མཁས་ཤིང་གྲུབ་པ་བརྙེས་པའི་སྐྱེས་བུ་ཆེན་པོ་རབ་འབྱམས་ཆོས་རྗེ་ཤེས་རབ་དཔལ་བཟང་པོ་ལ་བསྟོད་པ་ཕྲིན་ལས་ཆར་འབེབས་ཞེས་བྱ་འདི་ནི། དབོན་པོ་འཇམ་དབྱངས་དཔལ་གྱིས་བསྐུལ་ནས་རྗེ་དེ་ཉིད་ཀྱི་སློབ་མ་བྱ་བྲལ་བ་བསོད་ནམས་སེང་གེས་མདོ་མཁར་ཆོས་རྫོང་དུ་སྦྱར་བའོ།། །།ཤུ་བྷཾ།། །།