བདག་ཆེན་བློ་གྲོས་པ་ལ་བསྟོད་པ།
ན་མོ་གུ་ར་ཝེ། ཟབ་ཡངས་བློ་གྲོས་རྒྱ་མཚོའི་དབུས་གནས་ཤིང་། །རིམ་གཉིས་རྒྱལ་མཚན་གདེངས་ཀས་མངོན་པར་བརྗིད། །དཔལ་འབྱོར་བཟང་པོའི་ནོར་བུ་གཙུག་ན་མཛེས། །ཡོངས་འཛིན་ཀླུ་ཡི་དབང་པོ་ལ་ཕྱག་འཚལ། །ཕུལ་བྱུང་རིགས་ཀྱི་གངས་རི་མཐོ་བའི་ངོས། །ལྷག་བསམ་དཀར་པོའི་ཟླ་ཟེར་དང་ལྡན་ཞིང་། །དམ་པའི་སྤྱོད་ཚུལ་ཆུ་གཙང་འབྱུང་བའི་གཞི། །འདྲེན་པ་རི་དབང་ཆེ་ལ་མགོས་ཕྱག་འཚལ། །རྣམ་མང་ཐོས་པའི་རྩ་བ་རབ་བརྟན་ཞིང་། །བསམ་བྱུང་རིགས་པའི་ཡལ་ག་ཕུན་ཚོགས་ལྡན། །ཟབ་དོན་བསྒོམས་པའི་འབྲས་བཟང་སྩོལ་བ་ཅན། །བླ་ཆེན་དཔག་བསམ་ལྗོན་པ་ལ་ཕྱག་འཚལ། །དཔག་ཡས་ཐུགས་རྗེའི་སྤྱན་ཟུར་དྲི་མེད་ཀྱིས། །སྲིད་གསུམ་འགྲོ་བའི་སྡུག་བསྔལ་མ་བཟོད་ནས། །བླ་མེད་བྱང་ཆུབ་བསྒྲུབ་ལ་བརྩོན་མཛད་པ། །མཚན་ནས་བརྗོད་པར་དཀའ་བ་ཁྱོད་ཕྱག་འཚལ། །བློ་གྲོས་སྤྱི་བོར་བླ་མའི་ཅོད་པཎ་འཛིན། །ཕྲིན་ལས་རྒྱལ་མཚན་མཁའ་འགྲོས་ཕྱོགས་བཅུར་སྤེལ། །སྙན་གྲགས་དཔལ་འབྱོར་སྲུང་མས་སྒྲུབ་མཛད་པ། །དགེ་མཚན་བཟང་པོའི་གཏེར་ལ་མགོས་ཕྱག་འཚལ། །འགྲོ་མགོན་བླ་མའི་ཡོན་ཏན་རྗེས་བསྔགས་པའི། །བསོད་ནམས་གང་དེས་ཁམས་གསུམ་འགྲོ་བ་ཀུན། །སྡུག་བསྔལ་རྒྱ་མཚོ་ཆེ་ལས་རབ་བསྒྲལ་ནས། །བདེ་ཆེན་ཐར་པའི་གནས་ལ་འཇོག་པར་ཤོག །ཁྱད་པར་མཁྱེན་རབ་དབང་ཕྱུག་ས་སྐྱ་པའི། །བསྟན་པ་དྲི་མེད་གདུལ་བྱའི་པདྨོ་ལ། །རྒྱུན་དུ་ཁྱབ་ཅིང་ལམ་མཆོག་གསལ་བ་དང་། །ཕན་བདེའི་ལོ་ཐོག་རྒྱས་པའི་རྒྱུར་གྱུར་ཅིག །འགྲོ་བའི་བླ་མ་བློ་གྲོས་རྒྱལ་མཚན་དཔལ་བཟང་པོ་ལ་བསྟོད་པ་ཡོན་ཏན་གསལ་བའི་ཉི་འོད་ཅེས་བྱ་བ་འདི་ནི་དད་ལྡན་གྱི་སློབ་མ་རྣམས་ཀྱིས་བསྐུལ་བའི་ངོར། ཤཱཀྱའི་དགེ་སློང་བསོད་ནམས་སེང་གེས་དཔལ་ལྡན་ས་སྐྱ་ཡོན་ཏན་རིན་པོ་ཆེའི་འབྱུང་གནས་སུ་སྦྱར་བའི་ཡི་གེ་པ་ནི་དབུས་པ་གྲགས་བཟང་ངོ་།། །།