འཆུམ་སྡེ་ཆེན་གྱི་མཁན་པོ་ནམ་མཁའ་དཔལ་སྐྱོང་གི་བསྟོད་པ།
ན་མོ་གུ་ར་ཝེ། ལྷག་བསམ་ནམ་མཁར་ཐུགས་རྗེའི་སྤྲིན་བསྡུས་ནས། །དམ་ཆོས་བདུད་རྩིའི་དཔལ་གྱི་ཆར་རྒྱུན་གྱིས། །རྣམ་གྲོལ་དགེ་བའི་ལོ་ཐོག་སྐྱོང་མཛད་པ། །མཁན་ཆེན་རིན་པོ་ཆེ་ལ་གུས་ཕྱག་འཚལ། །རླབས་ཆེན་སྨོན་ལམ་རྣམ་པར་དག་པའི་མཐུས། །རྒྱལ་བའི་རིང་ལུགས་འཛིན་པའི་རིགས་འཁྲུངས་ཏེ། །གཞོན་ནུ་ཉིད་ནས་ཐུབ་བསྟན་རྒྱལ་སྲིད་ཀྱི། །ཁུར་ཆེན་འཛིན་པར་མཛད་ལ་གུས་ཕྱག་འཚལ། །དཀྱིལ་འཁོར་རྒྱ་མཚོའི་རིགས་བདག་རྡོ་རྗེ་འཆང་། །སྲས་ཀྱི་ཐུ་བོར་བཅས་པའི་ལེགས་བཤད་ཀྱི། །བདུད་རྩིའི་རྒྱུན་བཟང་ངོམས་པར་ལེགས་གསོལ་ནས། །མན་ངག་གཏེར་དུ་གྱུར་ལ་གུས་ཕྱག་འཚལ། །རྣམ་དག་བསླབ་གསུམ་རིན་ཆེན་གྱིས་གཏམས་པའི། །ལེགས་གསུང་འདུལ་བའི་རླབས་ཕྲེང་གཡོ་བ་ཅན། །བྱང་ཆུབ་མཆོག་གི་གདེངས་ཅན་བསྟི་བའི་གནས། །གནས་བརྟན་ཆེན་པོའི་ཞབས་ལ་གུས་ཕྱག་འཚལ། །བྱམས་དང་སྙིང་རྗེའི་རྩ་བ་རབ་བརྟན་པའི། །བྱང་ཆུབ་སེམས་ཀྱི་ལྗོན་པའི་ལོ་འདབ་ཀྱིས། །སྲིད་དང་ཞི་བའི་གདུང་བ་ཀུན་སྐྱོབ་པ། །སེམས་དཔའ་ཆེན་པོའི་ཞབས་ལ་མགོས་ཕྱག་འཚལ། །རྨད་བྱུང་གདམས་པས་རང་རྒྱུད་རྣམ་གྲོལ་ནས། །གསང་ཆེན་བསྟན་པ་ཉི་མའི་འོད་ཟེར་གྱིས། །སྐལ་ལྡན་འགྲོ་ལ་ལམ་མཆོག་སྣང་མཛད་པ། །རྡོ་རྗེ་འཛིན་པའི་ཞབས་ལ་གུས་ཕྱག་འཚལ། །གཅིག་ཏུ་འགྲོ་ལ་བརྩེ་བའི་ཐུགས་རྗེ་ཡིས། །བསྟན་ལ་ཕན་བདེ་འབྱུང་བར་ལེགས་གཟིགས་ནས། །རྒྱལ་བའི་བསྟན་ལ་མཆོག་ཏུ་གཅེས་འཛིན་པ། །འགྲོ་བ་ཀུན་གྱི་འདྲེན་པ་ལ་ཕྱག་འཚལ། །དངོས་འབྱོར་ཡིད་སྤྲུལ་མཆོད་སྤྲིན་རྒྱ་ཆེན་དབུལ། །སྡིག་པ་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་མྱ་ངན་མི་འདའ་བར། །འགྲོ་བའི་དོན་དུ་རྟག་པར་བཞུགས་སུ་གསོལ། །དེ་ལྟར་བསྟོད་ཅིང་གསོལ་བ་བཏབ་པ་ལས། །བྱུང་བའི་དགེ་ཚོགས་ཉི་ལྟར་གསལ་བ་ཡིས། །མཁའ་མཉམ་འགྲོ་བའི་སྙིང་མུན་ཀུན་བསལ་ནས། །བླ་མེད་བྱང་ཆུབ་མཆོག་ལ་འགོད་པར་ཤོག །ཉེ་བར་བསྟེན་པའི་གནས་མཆོག་སྡེ་ཆེན་འདི། །སྲིད་ཞིའི་དཔལ་འབྱོར་ཀུན་གྱིས་ལེགས་གང་ནས། །ཐུབ་བསྟན་དྲི་མེད་རྒྱུན་དུ་སྐྱོང་བ་དང་། །དམ་ཆོས་སྒྲ་ཆེན་སྒྲོགས་པའི་གཞིར་གྱུར་ཅིག །ཅེས་པ་འདི་ཡང་གནས་མཆོག་དེའི། །སློབ་ཚོགས་ཀུན་གྱིས་རབ་བསྐུལ་ནས། །བློ་ལྡན་བསོད་ནམས་སེང་གེ་ཡིས། །གཞན་ལ་ཕན་པའི་ཆེད་དུ་སྦྱར། །དགེའོ།། །།