བདེ་མཆོག་བརྒྱུད་པའི་གསོལ་འདེབས་ཁ་སྐོང་།
བདུད་དང་མུ་སྟེགས་འཆི་བདག་སོགས། །རྒོལ་བ་ཀུན་གྱི་ང་རྒྱལ་འཇོམས། །ལྷ་དང་དགེ་སྦྱོང་བྲམ་ཟེ་སོགས། །བསྟན་ལ་དགའ་བ་ཀུན་དགའ་མཛད། །མཚུངས་པ་མེད་པའི་རྒྱལ་མཚན་ཅན། །རྨད་དུ་བྱུང་བའི་དཔལ་མངའ་བ། །བཟང་པོ་ཁྱོད་ཀྱི་ཞབས་རྡུལ་ལ། །རྟག་ཏུ་ཕྱག་འཚལ་གསོལ་བ་འདེབས། །ཟབ་ཅིང་རྒྱ་ཆེའི་བློ་གྲོས་ཅན། །ཐུགས་རྗེའི་རྒྱལ་མཚན་དྲི་མ་མེད། །ཕྲིན་ལས་དཔལ་འབྱོར་བཟང་པོ་ལ། །རྟག་ཏུ་ཕྱག་འཚལ་གསོལ་བ་འདེབས། །རྙེད་པར་དཀོན་པའི་བདེ་གཤེགས་གསུང་། །གདམས་པ་མཆོག་ཏུ་ཤར་བ་ཡི། །སྐྱེ་རྒུའི་དཔལ་དུ་གྱུར་པ་ལ། །རྟག་ཏུ་ཕྱག་འཚལ་གསོལ་བ་འདེབས། །སྙན་བརྒྱུད་གདམས་པའི་མཛོད་འཛིན་ཅིང་། །རིམ་གཉིས་རྣལ་འབྱོར་མཐར་ཕྱིན་པ། །རྗེ་བཙུན་བྲག་ཕུག་པ་ཡི་ཞབས། །རྟག་ཏུ་ཕྱག་འཚལ་གསོལ་བ་འདེབས། །བློ་གྲོས་རྒྱ་མཚོའི་དབུས་ན་གནས། །བསླབ་གསུམ་བང་རིམ་རབ་ཏུ་བརྟན། །བསྡུ་བཞིའི་ཅོག་གིས་མཛེས་པ་ལ། །རྟག་ཏུ་ཕྱག་འཚལ་གསོལ་བ་འདེབས། །མན་ངག་རྒྱ་མཚོའི་དཔལ་དང་ལྡན། །བརྩེ་བས་འགྲོ་ལ་ལེགས་འདོམས་ཤིང་། །སྡོམ་གསུམ་ཚུལ་ཁྲིམས་ལྡན་པ་ལ། །རྟག་ཏུ་ཕྱག་འཚལ་གསོལ་བ་འདེབས། །ཡེ་ཤེས་ཆེན་པོའི་རྒྱལ་མཚན་འཛིན། །དཔལ་འབྱོར་བཟང་པོས་འགྲོ་ཀུན་སྐྱོང་། །རྗེ་བཙུན་རྟོག་མེད་ཞབས་པད་ལ། །རྟག་ཏུ་ཕྱག་འཚལ་གསོལ་བ་འདེབས། །ཤེས་བྱ་ཀུན་སྦྱངས་བློ་གྲོས་ཅན། །འགྲོ་ཀུན་དགའ་མཛད་ཐུགས་རྗེ་ཅན། །དྲི་མེད་བརྟུལ་ཞུགས་བཟང་པོ་ལ། །རྟག་ཏུ་ཕྱག་འཚལ་གསོལ་བ་འདེབས། །གང་གི་མཚན་ཙམ་དྲན་པས་ཀྱང་། །སྲིད་ཞིའི་རྒུད་པ་ཀུན་སེལ་བ། །འདྲེན་མཆོག་རྩ་བའི་བླ་མ་ལ། །རྟག་ཏུ་ཕྱག་འཚལ་གསོལ་བ་འདེབས། །ཞེས་པ་འདིའི་ཚིགས་བཅད་དང་པོ་གཉིས་ནི། །གླིང་ཀ་བདེ་བ་ཅན་གྱི་ཕྱག་དཔེ་རྙིང་པ་ཞིག་གི་དཀྱུས་ན་འདུག་པ་བྲིས་པ་ཡིན་ལ་ལྷག་མ་རྣམས་ནི། དཔལ་ལྡན་ས་སྐྱ་པཎྜི་ཏས་མཛད་པའི་འཁོར་ལོ་བདེ་མཆོག་གི་བླ་མ་བརྒྱུད་པའི་གསོལ་འདེབས་ཀྱི་ཁ་སྐོང་དུ་དགེ་སློང་བསོད་ནམས་སེང་གེས་བྲིས་པའོ། །དགེའོ།། །།