རྒྱལ་ཚབ་བྱམས་པའི་བསྟོད་པ་བཞུགས།
ན་མ་ཨཱརྻ་མཻ་ཏྲི་ནཱ་ཐཱ་ཡ། བྱམས་པའི་དཀྱིལ་འཁོར་ཆོས་དབྱིངས་མཁའ་ལ་འཆར། །མཁྱེན་པའི་ཉི་འོད་གདུལ་བྱ་པད་མོའི་གཉེན། །སྲིད་ཞིའི་མུན་པ་སྟོང་གིས་མ་ཕམ་པ། །རྒྱལ་ཚབ་ཆོས་ཀྱི་ཉི་མ་དེ་ལ་འདུད། །ཆགས་པའི་སྐྱོན་བྲལ་པད་མོའི་ལྟེ་བར་ནི། །ཐུགས་རྗེའི་ཆ་ཤས་ཡོངས་རྫོགས་ཟླ་གདན་ལ། །སེམས་ཅན་དོན་ལ་དགྱེས་པའི་སྐུ་མཆོག་ནི། །གསེར་བཟང་མདོག་ཅན་རྣམ་པར་འགྱིང་ལ་འདུད། །ཞལ་གཅིག་ཕྱག་གཉིས་གཡས་པ་ཐུགས་ཁར་ནི། །གྲངས་མེད་ཆོས་ཀྱི་སྒོ་རྣམས་འབྱེད་པའི་ཚུལ། །ཕྱག་གཡོན་ཏིང་འཛིན་བྱེ་བ་རྒྱས་མཛད་པའི། །མཉམ་བཞག་ཕྱག་རྒྱས་བཞུགས་པ་དེ་ལ་འདུད། །རབ་མཛེས་པད་མོའི་ལྟེ་བར་སྤྱི་བླུགས་ཀྱི། །ཟེའུ་འབྲུ་རྣམ་པར་རྒྱས་པའི་རྩེ་མོར་ནི། །ཟུར་ཕུད་ལྔ་ལྡན་ལྕང་ལོ་འཁྱིལ་བ་ཡི། །བུང་བ་གཞོན་ནུ་རོལ་པ་དེ་ལ་འདུད། །བིལ་བ་ལྟར་དམར་མཆུ་སྒྲོས་ཡིད་འོང་ཞིང་། །ཁ་བ་ལྟར་དཀར་མཛོད་སྤུ་གཡས་སུ་འཁྱིལ། །མིག་སྨན་ལྟར་གནག་རལ་པའི་ཐོར་ཅོག་ནི། །ཆོས་སྐུའི་རྟེན་གྱིས་མཛེས་པར་བྱས་ལ་འདུད། །ལང་ཚོའི་དཔལ་ཡོན་རྒྱས་པའི་ལྗོན་པ་ལ། །མཚན་གྱི་མེ་ཏོག་དཔེ་བྱད་ཟེའུ་འབྲུས་སྤྲས། །རིན་ཆེན་མཆོག་གི་འབྲས་བུའི་ཆུན་འཕྱང་ཅན། །སྣ་ཚོགས་དར་གྱི་ན་བཟས་མཛེས་ལ་འདུད། །ཉི་མ་འབུམ་གྱི་མདངས་ལས་གསལ་བ་ཡི། །རྣམ་བཀྲ་འོད་ཀྱི་འཕྲོ་འདུའི་སྐད་ཅིག་ལ། །འགྲོ་བའི་ལས་ཉོན་ཚང་ཚིང་ཀུན་བསལ་ནས། །ཡེ་ཤེས་སྣང་བ་རྒྱས་པར་མཛད་ལ་འདུད། །ཉེ་རིང་ཀུན་ལ་སྙོམས་པ་ཚངས་པའི་དབྱངས། །ཐར་ལམ་སྟོན་པ་ལྷ་ཡི་རྔ་བོ་ཆེ། །སྐྱེ་མེད་འགག་པ་མེད་པ་བྲག་ཆའི་གསུང་། །ཡན་ལག་དྲུག་ཅུའི་དབྱངས་ལྡན་དེ་ལ་འདུད། །ཆོས་ཉིད་དག་པ་གཉིས་ལྡན་མངོན་དུ་གྱུར། །ཆོས་ཅན་ཇི་སྙེད་དབྱེ་བ་སོ་སོར་གཟིགས། །ཆོས་རྣམས་རྣམ་ཀུན་མངོན་རྫོགས་བྱང་ཆུབ་པ། །སྒྲིབ་བྲལ་རྣམ་པར་དག་པའི་ཐུགས་ལ་འདུད། །སྟོབས་ཉིད་རྡོ་རྗེ་མི་འཇིགས་སེང་གེ་བཞིན། །མ་འདྲེས་མཁའ་དག་ཐུབ་བསྟན་ཆུ་ཟླ་ལྟར། །བྲལ་དང་རྣམ་པར་སྨིན་པའི་འབྲས་བུ་ཡི། །ཡོན་ཏན་དྲུག་ཅུ་བཞིས་བརྒྱན་དེ་ལ་འདུད། །བརྒྱ་བྱིན་རྔ་སྤྲིན་ཚངས་ཉི་ཡིད་བཞིན་ནོར། །སྒྲ་བརྙན་ནམ་མཁའ་ས་བཞིན་སྲིད་མཐའི་བར། །འབད་མེད་ལྷུན་གྱིས་གྲུབ་པའི་མཛད་པ་ནི། །རྒྱུན་མི་ཆད་པར་འཇུག་པ་དེ་ལ་འདུད། །གུས་པས་ཕྱག་འཚལ་ཀུན་བཟང་མཆོད་སྤྲིན་འབུལ། །སྡིག་པ་ཀུན་བཤགས་དགེ་ལ་རྗེས་ཡི་རང་། །ཆོས་འཁོར་བསྐོར་ཞིང་བརྟན་པར་བཞུགས་སུ་གསོལ། །རབ་དཀར་དགེ་ཚོགས་བྱང་ཆུབ་ཆེན་པོར་བསྔོ། །དཔག་མེད་ཡོན་ཏན་གཏེར་མངའ་མགོན་ཁྱོད་ལ། །མཐའ་མེད་འགྲོ་བ་སྲིད་ལས་བསྒྲལ་བའི་ཕྱིར། །ཡེངས་མེད་རྩེ་གཅིག་ཡིད་ཀྱིས་གསོལ་འདེབས་ཀྱི། །དམིགས་མེད་བྱམས་པའི་ཐུགས་ཀྱིས་དགོངས་སུ་གསོལ། །ཁམས་གསུམ་འཁོར་བའི་སྡུག་བསྔལ་རྒྱུ་བཅས་ཀུན། །དུས་གསུམ་རྟག་ཏུ་བདག་ལ་བླངས་བྱས་ནས། །སྒོ་གསུམ་འབད་པས་བསགས་པའི་བདེ་དགེ་རྣམས། །ཁམས་གསུམ་འགྲོ་ལ་སྨིན་པར་བྱིན་གྱིས་རློབས། །ཕ་རོལ་ཕྱིན་དྲུག་སྤྱོད་པའི་གོ་བགོས་ནས། །ཡང་དག་ལྟ་བའི་ཉམས་མྱོང་གསལ་བ་ཡི། །རང་བཞིན་དག་པའི་གནས་ལུགས་མངོན་གྱུར་ཏེ། །བག་ཆགས་སྤང་ཕྱིར་བསྒོམ་པར་བྱིན་གྱིས་རློབས། །སྒྲིབ་གཉིས་སྤྲིན་བྲལ་ཆོས་དབྱིངས་ནམ་མཁའ་ལ། །སྐུ་གསུམ་ཉིན་བྱེད་དཀྱིལ་འཁོར་རབ་རྒྱས་ཏེ། །ཕྲིན་ལས་ཚ་ཟེར་ཕྱོགས་བཅུར་འཕྲོ་བ་ཡིས། །འགྲོ་ལ་ལམ་བཟང་སྟོན་པར་བྱིན་གྱིས་རློབས། །གནས་སྐབས་ཀུན་ཏུ་མགོན་པོ་ཁྱོད་ཉིད་ཀྱི། །གསུང་གི་དགོངས་པ་འཁྲུལ་མེད་ལེགས་རྟོགས་ནས། །ལྷག་བསམ་དག་པས་ཕྱོགས་བཅུར་སྤེལ་བ་ཡིས། །ཐེག་མཆོག་བསྟན་པ་རྒྱས་པར་བྱིན་གྱིས་རློབས། །ཚེ་འདིའི་སྣང་བ་ནུབ་པར་གྱུར་མ་ཐག །དགའ་ལྡན་གནས་སུ་ཐུགས་རྗེའི་ཕྱག་གིས་དྲོངས། །ཇི་སྲིད་ས་རབ་དགའ་བ་ཐོབ་བར་དུ། །དམ་ཆོས་བདུད་རྩིས་ཚིམ་པར་བྱིན་གྱིས་རློབས། །མདོར་ན་སྲས་བཅས་སངས་རྒྱས་ཐམས་ཅད་ཀྱི། །ཐུགས་ཀྱི་དགོངས་པ་ལེགས་ཚོགས་ཇི་རྙེད་ཀུན། །བདག་དང་མཁའ་མཉམ་འགྲོ་བ་མ་ལུས་ལ། །མྱུར་དུ་འགྲུབ་པར་བྱིན་གྱིས་བརླབ་ཏུ་གསོལ། །རྒྱལ་བ་མི་ཕམ་མགོན་པོ་ལ་བསྟོད་པ་ཐེག་མཆོག་གནད་ཀྱི་སྒོ་འབྱེད་ཅེས་བྱ་བ་འདི་ནི་ཁྲོ་ཕུའི་བྱམས་ཆེན་ལ་གསོལ་བ་འདེབས་པའི་དོན་དུ་བྱ་བྲལ་བ་བསོད་ནམས་སེང་གེས་སྦྱར་བའོ། །དགེའོ།། །།