ཆོས་སྐྱོང་གི་བསྟོད་པ།
དཔལ་ས་སྐྱའི་བཀའ་སྲུང་རྣམས་ལ་བསྟོད་པ་རྣམ་པར་རྒྱལ་བའི་རྔ་ཆེན་ཞེས་བྱ་བ། བླ་མ་དང་དཔལ་རྡོ་རྗེ་མཁའ་འགྲོ་ལ་ཕྱག་འཚལ་ལོ། །རབ་འབར་བསྐལ་པའི་མེ་དཔུང་ཀློང་དཀྱིལ་ན། །རབ་འཇིགས་གཟུགས་ཐུང་མདོག་ནག་ཆེར་འབར་ཞིང་། །རབ་གསལ་སྤྱན་གསུམ་མེ་སྟག་ལྟ་བུར་འཕྲོས། །རབ་གདངས་ཞལ་དམར་རྣམ་པར་གཡོ་ལ་འདུད། །ཤིན་ཏུ་རྒྱས་པའི་ཕྱག་གཉིས་ཐུགས་ཁར་ནི། །གྲི་གུག་ཐོད་པ་རྣམ་འཕྲུལ་གཎྜི་བསྣམས། །ཟླུམ་པོའི་སྟབས་ཀྱིས་ཞབས་གཉིས་དགྲ་བགེགས་ཀྱི། །སྙིང་ཁར་བརྡབས་པས་ས་གསུམ་གཡོ་ལ་འདུད། །རབ་མཛེས་རིན་ཆེན་དར་གྱི་ཅོད་པཎ་བཀླུབས། །མི་སྡུག་སྦྲུལ་དང་རུས་པའི་རྒྱན་ཆ་འཁྲོལ། །འཇིགས་རུང་ཁྲག་འཛག་མགོ་བོའི་དོ་ཤལ་བྱས། །དཔའ་བོ་སྟག་གི་ཤམ་ཐབས་ཅན་ལ་བསྟོད། །རིགས་ལྔའི་ངོ་བོ་ཁྱུང་ཆེན་ནམ་མཁར་སྤྲོ། །བྱ་ནག་གཤོག་བསྐོར་ཁྱི་ནག་འཁང་ཞིང་ཟུག །ལྕེ་སྤྱང་འབྲོས་འདེད་མི་ནག་བཤུགས་གླུ་ལེན། །སྤྲུལ་པའི་ཕོ་ཉས་དགྲ་བགེགས་སྒྲོལ་ལ་འདུད། །ཧ་ཧ་འདོད་ཁྲོ་རྨོངས་པའི་གྲོང་ཁྱེར་བསྒྱེལ། །ཧཱུྃ་ཧཱུྃ་གཟུང་འཛིན་རྟོག་པའི་བྲག་རི་བཤིག །ཕཊ་ཕཊ་བདུད་དང་ལོག་འདྲེན་སྙིང་རབ་འགས། །སྲིད་གསུམ་སྐྲག་མཛད་དྲག་པོའི་གསུང་ལ་འདུད། །སྤྲོས་ཀུན་ཉེར་ཞི་ཆོས་སྐུ་མངོན་གྱུར་ཀྱང་། །གདུག་ཅན་ཞི་བས་འདུལ་བར་མི་ནུས་པ། །རྣམ་འཕྲུལ་དྲག་པོས་འདུལ་བའི་ཐབས་མཁྱེན་ནས། །ཚར་གཅོད་རྗེས་འཛིན་མངའ་བའི་ཐུགས་ལ་འདུད། །དུས་གསུམ་རྒྱལ་བའི་ཡུམ་གཅིག་དཔལ་ལྡན་མ། །སྤྱན་གསུམ་ལྡན་པའི་ཞལ་གཅིག་མཆེ་བ་གཙིགས། །ཁམས་གསུམ་ཟིལ་གནོན་རལ་གཅིག་གཡོན་དུ་འཕྱང་། །སྲིད་གསུམ་གསོ་མཛད་ཡུམ་ཆེན་མ་ལ་འདུད། །འདོད་ཁམས་ཟིལ་གནོན་འདོད་ཁམས་དབང་ཕྱུག་མ། །མཁའ་འགྲོའི་གཙོ་མོ་མཁའ་འགྲོ་འབུམ་གྱིས་བསྐོར། །ཁྲག་གི་མཚོར་གནས་ཁྲག་གི་ཐིག་ལེས་བརྒྱན། །འཇིགས་པའི་མཚོན་ཆས་འཇིགས་རུང་མ་ལ་འདུད། །ཞལ་བཞི་ཕྲིན་ལས་བཞི་ཡིས་འགྲོ་བ་སྐྱོང་། །མཆེ་བ་བཞི་ཡིས་བདུད་བཞི་རྣམ་པར་འཇོམས། །ཕྱག་བཞི་སྣ་ཚོགས་མཚོན་ཆས་རྒྱུད་བཞི་བསྲུང་། །སྲིང་མོ་བཞི་ལྡན་གདོང་བཞི་པ་ལ་འདུད། །གནོད་སྦྱིན་ཡབ་ཡུམ་བདུད་ཀྱི་མགོ་བོ་གཅོད། །བཀའ་སྡོད་པུ་ཏྲ་དགྲ་བོའི་ཀླད་ཁྲག་འདྲེན། །འཇིགས་བྱེད་བྷ་ཊ་དགྲ་སྙིང་སྦར་གྱིས་འདེབས། །བསྟན་དགྲ་སྲེག་བྱེད་ཁ་འབར་མ་ལ་འདུད། །མགོན་པོའི་བཀའ་ཉན་ལས་མཁན་མ་རུངས་པ། །བུད་མེད་སྐྱེས་པ་དགེ་སློང་སྔགས་པའི་ཚུལ། །བརྒྱ་ཕྲག་བཞི་ཡིས་ཕྱོགས་བཞིའི་རུ་འདྲེན་པ། །སྤྲུལ་པའི་དམག་ཚོགས་རྣམས་ལ་བསྟོད་པར་བགྱི། །རྡོ་རྗེ་འཆང་དབང་ཐུགས་ཀྱི་ཡེ་ཤེས་ལས། །བཀའ་བསྟོད་སྲུང་མའི་ཚུལ་དུ་རྣམ་སྤྲུལ་ནས། །བསྟན་པ་རིན་ཆེན་བང་མཛོད་བསྲུང་མཛད་པ། །དམ་ཅན་རྒྱ་མཚོ་འཁོར་དང་བཅས་པ་རྣམས། །ཏིང་འཛིན་སྔགས་རྒྱས་སྤེལ་བའི་གཏོར་མ་དང་། །དམ་རྫས་སྤྱན་གཟིགས་མཆོད་པ་འདི་བཞེས་ལ། །བླ་མ་རྡོ་རྗེ་འཛིན་པས་བཀའ་བསྒོས་ལྟར། །རྣལ་འབྱོར་བདག་ཅག་དཔོན་སློབ་འཁོར་བཅས་ཀྱི། །ནད་དང་གདོན་དང་གཞན་གྱི་བྱད་ཁ་སོགས། །དམ་ཆོས་བསྒྲུབ་པའི་འགལ་རྐྱེན་ཀུན་ཞི་ནས། །ཚེ་དང་བསོད་ནམས་འཁོར་དང་ལོངས་སྤྱོད་སོགས། །མཐུན་རྐྱེན་མ་ལུས་ཕུན་སུམ་ཚོགས་པར་མཛོད། །བསྟན་འཛིན་ཐམས་ཅད་སྐུ་ཚེ་བརྟན་པ་དང་། །བསྟན་པ་རིན་ཆེན་ཕྱོགས་བཅུར་རྒྱས་པ་དང་། །བསྟན་ལ་གནོད་བྱེད་དགྲ་བགེགས་འདུལ་བ་དང་། །བསྟན་པས་ཁྱབ་པའི་འགྲོ་རྣམས་བདེ་བར་མཛོད། །དཔལ་ས་སྐྱ་པའི་བཀའ་སྲུང་རྣམས་ལ་བསྟོད་པ་རྣམ་པར་རྒྱལ་བའི་རྔ་ཆེན་ཞེས་བྱ་བ་འདི་ནི། རྗེ་བཙུན་དམ་པ་ཀུན་དགའ་བཟང་པོ་ཡབ་སྲས་ཀྱི་ཞབས་ཀྱི་པད་མོ་ལ་ཡན་ལག་མཆོག་གིས་རེག་པ་ཤཱཀྱའི་དགེ་སློང་བསོད་ནམས་སེང་གེས་རྟ་ནག་གསེར་གླིང་གི་དགོན་པར་སྦྱར་བའོ།། ༈ །།འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག། །།དགེའོ།། །།