རྟགས་འཇུག་གི་ཊཱིཀ་བཞུགས་སོ།།

གསལ་བྱེད་ལ་རྟགས་ཀྱི་དབྱེ་བ་སྤྱིར་བསྟན་པ།

མགོན་པོ་འཇམ་པའི་དབྱངས་ལ་ཕྱག་འཚལ་ལོ། །བྱཱ་ཀ་ར་ཎ་རྟགས་ཀྱི་འཇུག་པ་འདི་ལ་དོན་གསུམ་སྟེ། གསལ་བྱེད་ལ་རྟགས་ཀྱི་དབྱེ་བ་སྤྱིར་བསྟན་པ། སྔོན་འཇུག་ལ་རྟགས་བཞིར་དབྱེ་བ། རྗེས་འཇུག་ལ་རྟགས་གསུམ་དུ་དབྱེ་བའོ། །དང་པོ་ལ་གཉིས་ཏེ། དབྱེ་བ་དངོས་དང་། དེ་ལས་འཇུག་པའི་ཡི་གེ་བཅུ་བྱུང་བའོ། །དང་པོ་ནི། ཕོ་ཡི་ཡི་གེ་ཞེས་སོགས་ཚིགས་བཅད་གསུམ་སྟེ། སྡེ་ཚན་ལྔ་ནི་ཕོ་དང་། མ་ནིང་དང་། མོ་དང་། ཤིན་ཏུ་མོ་དང་། མོ་གཤམ་མོ། །དང་པོ་ནི་ཀ་སོགས་ལྔའོ། །གཉིས་པ་ནི་ཁ་སོགས་ལྔའོ། །གསུམ་པ་ནི་ག་སོགས་ལྔ་དང་། ཝ་དང་། ལྷག་མ་ཞ་ཟ་འ་ཡ་ཤ་ས་སྟེ་བཅུ་གཉིས་སོ། །བཞི་པ་ནི་ང་སོགས་བཞིའོ། །ལྔ་པ་ནི་ར་ལ་ཧ་གསུམ་མོ། །རྟགས་ལྔ་པོ་དེ་དག་ཀྱང་ཕོ་དང་མ་ནིང་མོ་གསུམ་དུ་བསྡུ་བའི་ཚེ། ཤིན་ཏུ་མོ་དང་མོ་གཤམ་གྱི་ཡི་གེ་རྣམས་མོ་ཡིག་ཏུ་བསྡུ་དགོས་ཏེ། འཇུག་པའི་ཡི་གེ་བཅུ་ཆར་མོ་ཡིག་ལས་འབྱུང་བར་བཤད་པའི་ཕྱིར་རོ། །གཉིས་པ་ནི། མོ་ཡི་ཡི་གེའི་ཞེས་སོགས་ཚིགས་བཅད་གཅིག་སྟེ། དབྱུང་བའི་ཚུལ་སུམ་ཅུ་པ་ལྟར་ཤེས་པར་བྱའོ། །གཉིས་པ་ལ་གཉིས་ཏེ། སྤྱིར་བསྟན་པ་དང་། འཇུག་ཚུལ་བྱེ་བྲག་ཏུ་བཤད་པའོ། །དང་པོ་ནི། སྔོན་འཇུག་ཅེས་སོགས་ཚིགས་བཅད་ཕྱེད་དང་གཉིས་ཏེ། སྔོན་འཇུག་ལྔ་ལས་བ་ནི་ཕོ་ཡིག་གོ །ག་ད་གཉིས་ནི་མ་ནིང་ངོ་། །འ་ནི་མོ་ཡིག་གོ །མ་ནི་ཤིན་ཏུ་མོ་སྟེ། བཞི་པོ་དེ་དག་རེ་རེའང་བཞི་བཞི་བྱེད་ཅེས་པའོ། །

སྔོན་འཇུག་ལ་རྟགས་བཞིར་དབྱེ་བ།

གཉིས་པ་ལ་བཞི་སྟེ། གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པར་བྱེད་པའོ། །དང་པོ་གཉིས་ཕྱོགས་གཅིག་ཏུ་འཆད་པ་ནི། ཕོ་ནི་ཞེས་སོགས་ཚིགས་བཅད་གསུམ་སྟེ། ཕོ་ཡི་ཡི་གེ་བ་ནི་ཕོ་ཡིག་ཀ་ཅ་ཏ་ཙ་བཞི་དང་། མོ་ཡིག་ག་ད་ཞ་ཟ་ཤ་ས་དྲུག་དང་། ཤིན་ཏུ་མོའི་ན་དང་། མོ་གཤམ་གྱི་ཡི་གེ་ར་ལ་གཉིས་ལ་སྔོན་དུ་འཇུག་གོ །དེ་ལ་ར་ལ་གཉིས་ནི་བརྩེགས་པ་ཁོ་ན། ཀ་ག་ས་གསུམ་ནི་བརྩེགས་པ་དང་རྐྱང་པ་གཉིས་ཀ གཞན་རྣམས་ནི་རྐྱང་པ་ཁོ་ན་ལ་འཇུག་གོ །མོ་ཡི་ཡི་གེ་འ་ནི་མོ་ཡིག་ག་ཇ་ད་བ་ཛ་ལྔ་དང་། མ་ནིང་ཁ་ཆ་ཐ་ཚ་སྟེ་རྐྱང་པ་བཅུའི་སྔོན་དུ་འཇུག་གོ །མ་ནིང་གི་ཡི་གེ་ལས་ག་ནི་ཕོ་ཡིག་ཅ་ཏ་ཙ་དང་། མོ་ཡིག་ད་ཞ་ཟ་ཡ་ཤ་ས་དང་། ཤིན་ཏུ་མོ་ཉ་ན་སྟེ་རྐྱང་པ་བཅུ་གཅིག་གི་སྔོན་དུ་འཇུག་གོ །ད་ནི་ཕོ་ཡིག་ཀ་པ་དང་། མོ་ཡིག་ག་བ་དང་། ཤིན་ཏུ་མོ་ང་མ་སྟེ་རྐྱང་པ་དྲུག་གི་སྔོན་དུ་འཇུག་གོ །ཤིན་ཏུ་མོའི་ཡི་གེ་མ་ནི་མ་ནིང་ཁ་ཆ་ཐ་ཚ་དང་། མོ་ཡིག་ག་ཇ་ད་ཛ་དང་། ཤིན་ཏུ་མོ་ང་ཉ་ན་སྟེ་རྐྱང་པ་བཅུ་གཅིག་གི་སྔོན་དུ་འཇུག་གོ །མི་འཇུག་པ་ནི་བ་ཡིག་ནི་མ་ནིང་ཁ་ཆ་ཐ་ཕ་ཚ་ལ་མི་འཇུག་གོ །མ་དང་འ་ནི་ཕོ་ཀ་ཅ་ཏ་པ་ཙའི་སྔོན་དུ་མི་འཇུག་གོ །ག་ད་གཉིས་ནི་མ་ནིང་གི་ཡི་གེ་ཁ་ཆ་ཐ་ཕ་ཚ་ལ་མི་འཇུག་གོ །ག་དའི་ཡི་གེ་ག་དའི་སྔོན་དུ་ཞུགས་པ་ནི་མོའི་སྔོན་དུ་མ་ནིང་ཞུགས་པ་ཡིན་གྱི། མ་ནིང་རང་ལ་རང་ཞུགས་པ་མ་ཡིན་ཏེ། མིང་གཞིའི་སྔོན་རྟགས་ནི་སྡེ་ཚན་ལྔ་རུ་དྲིལ་བའི་རྟགས་ལས་རྟགས་སོ་སོར་བཞག་པའི་ཕྱིར་རོ། །འཇུག་པ་རྣམས་ལས་དམིགས་བསལ་ནི། བ་ཡིག་ནི་རང་གི་སྡེ་བའི་མོ་ཡིག་དང་ཤིན་ཏུ་མོ་མའི་སྔོན་དུ་མི་འཇུག་གོ །མ་ནིང་ག་ད་གཉིས་ནི་རང་གི་སྡེ་དང་ཕྲད་པ་ན་མོའི་སྔོན་དུ་མི་འཇུག་གོ །མོ་ཡིག་མ་དང་འ་གཉིས་ཀྱང་རང་གི་སྡེ་པའི་མ་ནིང་གི་སྔོན་དུ་མི་འཇུག་གོ །གསུམ་པ་ནི། ཇི་ལྟར་ཞེས་སོགས་ཚིགས་རྐང་ལྔ་སྟེ། སྔོན་འཇུག་གི་རྟགས་བཞི་ནི་རིམ་པ་ལྟར་མིང་གཞིའི་སྒྲ་ལས་རང་གི་སྒྲ་ཆེས་གསལ་བ་དང་། དེ་དང་འཚམས་པ་དང་། དེ་ལས་ཞན་པ་དང་། དེ་དང་མཉམ་པར་ཀློག་པར་བྱའོ་ཞེས་པའི་དོན་ཏོ། །བཞི་པ་ནི། ཅིའི་ཕྱིར་ཞེས་སོགས་ཚིག་རྐང་ལྔ་སྟེ། ཕོ་ཡི་ཡི་གེ་བ་ནི་འདས་པ་ལ་འཇུག་པ་དང་། གཞན་པ་ལ་འཇུག་པ་དང་། བྱ་བ་བསྒྲུབ་པ་ལ་འཇུག་པ་གསུམ་ལས། དང་པོ་ནི་གསོལ་བ་བཏབ། ཕྲེང་བ་བཏགས་ཞེས་པ་ལྟ་བུའོ། །གཉིས་པ་ནི་གཏོར་མ་བཞེས་ཏེ་བཞེངས་ཞེས་པ་ལྟ་བུའོ། །གསུམ་པ་ནི་སྨོན་ལམ་བཏབ། སེམས་བསྐྱེད་ཅེས་པ་ལྟ་བུའོ། །མ་ནིང་ལ་ག་ད་གཉིས་ལས། ག་ཡིག་བདག་གཞན་གཉིས་ཀ་ལ་འཇུག་པ་ནི་སེམས་བསྐྱེད་དུ་གཞུག་ཅེས་པ་ལྟ་བུའོ། །ད་ལྟར་བ་ལ་འཇུག་པ་ནི་བགེགས་གཞོམ། ཕྲེང་བ་གཏད་ཅེས་པ་ལྟ་བུའོ། །ད་ཡིག་རང་གཞན་གཉིས་ཀ་ལ་འཇུག་པ་ནི་དཔའ། དབྱངས། དབང་པོ་ཞེས་པ་ལྟ་བུ། ད་ལྟར་བ་ལ་འཇུག་པ་ནི་མེ་ཏོག་དགོད། དྲིལ་བུ་དཀྲོལ་ཞེས་པ་ལྟ་བུའོ། །མོ་ཡིག་འ་ནི་བདག་ལ་འཇུག་པ་ནི་བདག་འཚལ་ལོ་ཞེས་པ་ལྟ་བུའོ། །མ་འོངས་པ་ལ་འཇུག་པ་ནི་བདེ་བ་ལ་འགོད། བགེགས་འཇོམས་ཞེས་པ་ལྟ་བུའོ། །ཤིན་ཏུ་མོ་མ་ཡིག་ནི་མཉམ་པ་སྟེ་བདག་དང་། གཞན་དང་། བདག་གཞན་གཉིས་ཀ་དང་། དུས་གསུམ་ག་ལ་འཇུག་པ་བཞི་ལས། དང་པོ་ནི་བདག་སྐྱབས་སུ་མཆི་ཞེས་པ་ལྟ་བུ། གཉིས་པ་ནི་རྡོ་རྗེ་སེམས་དཔའ་བདག་གྲུབ་མཛོད་ཅེས་པ་ལྟ་བུ། གསུམ་པ་ནི་མཁས། མཛེས། མཆོག་ཅེས་པ་ལྟ་བུའོ། །བཞི་པ་ལ། འདས་པ་ལ་འཇུག་པ་ནི་མཛད་པ་མཛད་ཅེས་པ་ལྟ་བུ། ད་ལྟར་བ་ལ་འཇུག་པ་ནི་སྤྱོད་ལམ་མཛེས་ཞེས་པ་ལྟ་བུ། མ་འོངས་པ་ལ་འཇུག་པ་ནི་མཇལ་ཀ་ཞུ་ཞེས་པ་ལྟ་བུའོ། །སྔོན་འཇུག་བཤད་ཟིན་ཏོ། །

རྗེས་འཇུག་ལ་རྟགས་གསུམ་དུ་དབྱེ་བ།

གསུམ་པ་ལ་གཉིས་ཏེ། དབྱེ་བ་སྤྱིར་བསྟན། འཇུག་ཚུལ་བྱེ་བྲག་ཏུ་བཤད་པའོ། །དང་པོ་ནི། རྗེས་འཇུག་ཡི་གེ་ཞེས་སོགས་ཚིགས་བཅད་ཕྱེད་དང་གཉིས་ཏེ། རྗེས་འཇུག་བཅུ་ལ་གསུམ་དུ་དབྱེ་བའི་ཕོ་ནི་ག་ད་བ་ས་བཞིའོ། །མོ་ནི་ང་ན་མ་ར་ལ་ལྔའོ། །མ་ནིང་ནི་འ་འོ། །ཕོ་ལ་སྐྱེས་བུ་རབ་འབྲིང་གསུམ་དུ་དབྱེ་སྟེ། ས་ནི་སྐྱེས་བུ་རབ་བོ། །བ་ནི་འབྲིང་ངོ་། །ག་ད་གཉིས་ནི་ཐ་མའོ། །མོ་ལ་མོ་དང་ཤིན་ཏུ་མོ་གཉིས་སུ་དབྱེ་སྟེ། མོ་ནི་ར་ལ་གཉིས་སོ། །ཤིན་ཏུ་མོ་ནི་ང་ན་མ་གསུམ་མོ། །མ་ནིང་ལ་གྲོགས་ཀྱིས་གསུམ་དུ་དབྱེ་སྟེ། དེ་ལྟར་ན་ཡན་ལག་གི་དབྱེ་བ་བརྒྱད་དོ། །གཉིས་པ་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། དེ་ཡང་ཞེས་སོགས་ཚིག་རྐང་གསུམ་མོ། །གཉིས་པ་ལ་བཞི་སྟེ། གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅིའི་ཕྱིར་འཇུག་པར་བྱེད་པའོ། །དང་པོ་ནི། གང་ལ་ཡི་གེ་ཐམས་ཅད་ལ། །ཞེས་པ་སྟེ་ཡི་གེ་སུམ་ཅུ་པོ་ཐམས་ཅད་ལ་འཇུག་གོ །གཉིས་པ་ནི། གང་གིས་བཅུ་པོ་དེ་དག་གིས། །ཞེས་པའོ། །གསུམ་པ་ནི། ཇི་ལྟར་རྣམ་པ་གཉིས་ཡིན་ཏེ། །སྒྲ་ཡི་འཇུག་ཚུལ་དོན་གྱི་ཚུལ། །ཞེས་པས་མདོར་བསྟན་ནས། དང་པོ་སྒྲའི་འཇུག་ཚུལ་ནི། ཕོ་གསུམ་ཞེས་སོགས་ཚིགས་བཅད་བཞི་སྟེ། སྔར་བཤད་པའི་ཕོ་གསུམ་དང་། མོ་གཉིས་དང་། གྲོགས་ཀྱིས་ཕྱེ་བའི་མ་ནིང་གསུམ་ནི་ཀློག་འདོན་པའི་དུས་སུ་རིམ་པ་ལྟར། མིང་གཞིའི་སྒྲའི་གདངས་ལས་རང་གི་གདངས་ཆེས་གསལ་བ་དང་། དེ་ལས་ཞན་པ་དང་། དེ་དང་འཚམས་པར་འདོན་པར་བྱའོ། །གལ་ཏེ་ཚེག་བར་གཅིག་གི་བར་དུ་ཕོའི་སྐྱེས་བུ་རབ་འབྲིང་གསུམ་མམ། གཉིས་ཕྲད་པའམ། མོའི་སྐྱེས་བུ་གཉིས་ནང་ཕྲད་ན་ནང་སེལ་གྱིས་དྲག་ཞན་དུ་དབྱེ་སྟེ། རབ་ཏུ་ནི་ཤིན་ཏུ་དྲག་པོ་དང་། འབྲིང་ནི་དྲག་པོའི་འབྲིང་པོ་དང་། ཐ་མ་ནི་དྲག་པོའི་ཆུང་ངུར་འདོན་ནོ། །མོ་ནི་ཞན་པར་འདོན། ཤིན་ཏུ་མོ་ནི་མཉམ་པར་འདོན། དེ་ལ་གསུམ་ཕྲད་པ་ནི་གོ་ཆ་བགོས། ཐུགས་དགེས་ཞེས་པ་ལྟ་བུའོ། །གཉིས་ཕྲད་པ་ནི་གབ་ཡིག བག་ཡངས་ཞེས་པ་ལྟ་བུའོ། །མོ་དང་ཤིན་ཏུ་མོ་ཕྲད་པ་ནི་རང་། ངན་ཞེས་པ་ལྟ་བུའོ། །མ་ནིང་གསུམ་དུ་གྲོགས་ཀྱིས་ཇི་ལྟར་དབྱེ། སྒྲའི་གདངས་ཇི་ལྟར་འདོན་ཞེ་ན། གྲོགས་ཀྱིས་དབྱེ་བས་གསུམ་དུ་གང་གཏོགས་པའི་འ་ནི་ཕོ་ཡིག་དང་ཚེག་བར་གཅིག་གི་བར་དུ་ཕྲད་ན་རང་གི་གདངས་དྲག་པོར་འདོན་ནོ། །ཞན་པ་སྟེ་མོ་ཡིག་དང་ཕྲད་ན་རང་གི་གདངས་ཞན་པར་འདོན་ནོ། །ཕོ་མོ་གཉིས་ཀ་དང་ཚེག་བར་གཅིག་གི་ནང་དུ་ཕྲད་ན་དྲག་ཞན་གཉིས་ཀ་སྟེ་གང་རུང་དུ་འདོན་ནོ། །ཕོ་མོ་གཉིས་ཀ་དང་མ་ཕྲད་པར་མ་ནིང་དང་ཕྲད་ན་མཉམ་པའི་གདངས་སུ་འགྱུར་གྱི། དྲག་ཞན་གང་དུའང་མི་འགྱུར་རོ། །འདིར་ཕོ་ཡིག་ནི་ཀ་སོགས་མི་འཇུག་པ་ལྔ་དང་། ག་སོགས་འཇུག་པ་བཞི་སྟེ་དགུའོ། །དེའང་དཔེར་ན་བཀའ་བཅའ་སོགས་དང་། དགའ་གདའ་ཞེས་སོགས་ལྟ་བུའོ། །མོ་ཡིག་ནི་བརྗོད་ཟིན་པའི་མོ་ཡིག་དགུ་དང་། མ་ནིང་གི་ཡི་གེ་ལྔ་མ་གཏོགས་པའི་ཡི་གེ་བཅུ་དྲུག་དབྱངས་དང་བཅས་པ་རྣམས་ཏེ། མངའ། འཇའ་ཞེས་སོགས་ལྟ་བུའོ། །མ་ནིང་གི་ཡི་གེ་ནི་ཁ་སོགས་ལྔ་སྟེ། མཁའ། འཆའ་ཞེས་སོགས་ལྟ་བུའོ། །དེས་ན་མ་ནིང་གི་ཡི་གེ་འ་ནི་གྲོགས་ཀྱི་བྱེ་བྲག་གིས་འགྱུར་དང་། མཚན་གཉིས། མཚན་མེད་གསུམ་དུ་འདོད་དེ། ཕོ་མོ་གང་རུང་དང་ཕྲད་ན་དྲག་ཞན་དུ་འགྱུར་བའི་ཕྱིར་དང་། གཉིས་ཀ་དང་ཕྲད་ན་གཉིས་ཀ་ཅན་དུ་འགྱུར་བའི་ཕྱིར་དང་། མ་ནིང་ཁོ་ན་དང་ཕྲད་ན་གང་དུའང་མི་འགྱུར་བའི་ཕྱིར་རོ། །གཉིས་པ་དོན་གྱི་འཇུག་ཚུལ་ལ་ནི། དོན་ནི་རྣམ་པ་གཉིས་ཡིན་ཏེ། །སྔ་མ་གང་ལྟར་གྱུར་པ་དང་། །ཕྱི་མ་གང་ལྟར་འགྱུར་བའོ། །ཞེས་པས་མདོར་བསྟན་ནས། དང་པོ་ནི། སྔ་མ་སྔོན་འཇུག་ལྔ་བཞིན་སྦྱར། །ཞེས་པ་སྟེ། སྔོན་འཇུག་གི་སྐབས་སུ། ཕོ་ནི་འདས་དང་གཞན་བསྒྲུབ་ཕྱིར། །ཞེས་སོགས་གསུངས་པ་ལྟར། ག་ད་བ་ས་རྣམས་ཀྱིས་འདས་པ་དང་། གཞན་དང་། བྱ་བ་བསྒྲུབ་པ་རྣམས་སྟོན་ཏེ། བཞག བཞེད། བཀབ། མཁས་ཞེས་པ་ལྟ་བུའོ། །ང་ན་མ་ར་ལ་རྣམས་ཀྱིས་ད་ལྟར་བ་དང་། བདག་གཞན་གཉིས་ཀ་སྟོན་ཏེ། གཟུང་། འཛིན། སྡོམ། འདིར། འཚལ་ཞེས་པ་ལྟ་བུའོ། །འ་ཡིག་གིས་བདག་དང་མ་འོངས་པ་སྟོན་ཏེ། མྱ་ངན་ལས་འདའ། དུས་ལས་འདའ་བར་འགྱུར་ཞེས་པ་ལྟ་བུའོ། །གཉིས་པ་ཕྱི་མ་གང་ལྟར་འགྱུར་བ་ལ་གཉིས་ཏེ། འདྲེན་ཚུལ་དངོས་དང་། ཞར་ལ་སྒྲ་སྒྱུར་གྱི་གདམས་པ་བཤད་པའོ། །དང་པོ་ནི། ཕྱི་མ་དག་གི་ཞེས་སོགས་ཚིགས་རྐང་བཅུ་གསུམ་སྟེ། ཕོ་ཡིས་ཕོ་ཡི་མིང་མཐའ་དྲང་བ་ནི། ག་སོགས་བཞིའི་མཐར་རིམ་པ་ལྟར། རིག་པ། བྱེད་པ། གྲུབ་པ། སྤངས་པ། ཞེས་པ་ལྟ་བུ་པ་འདྲེན་པ་དང་། ག་ད་བའི་མཐར་ཅེ་ན། ཅིང་། ཅེས་ཞེས་པ་ལྟ་བུ་ཅ་འདྲེན་པ་དང་། ད་བ་སའི་མཐར་ཀྱི་ཀྱང་ཀ་རྣམས་འདྲེན་པ་སྟེ། དེ་བཞིན་དུ་གཞན་ཡང་ཤེས་པར་བྱའོ། །རྣམ་དབྱེ་གཉིས་པ་དང་། བཞི་པ་དང་། བདུན་པ་རྣམས་ནི་ག་དང་བའི་མཐར་ཏུ་ཡིག་སྦྱར་ཏེ། མཆོག་ཏུ། བྱང་ཆུབ་ཏུ་ཞེས་པ་ལྟ་བུའོ། །སུམ་ཅུ་པར་བདག་པོའི་ས་ཞེས་པས་བསྟན་པའི་མཁྱེན་པ། རོལ་པ། ནོར་པ་ཞེས་སོགས་རྣམས་ནི་མོ་ཡིག་གི་མཐའ་ཅན་ཡིན་ཀྱང་ཕོའི་རྟགས་ཡིག་གིས་མིང་མཐའ་དྲང་བར་བྱའོ། །སྔོན་གྱི་མཁས་པ་སྐ་ཅོག་ལ་སོགས་པ་རྣམས་ཀྱིས་འདི་རྣམས་ཕོ་ཡིས་ཕོ་ཡི་མིང་མཐའ་དྲང་བར་བྱ་བ་ཡིན་ལ། མོ་ཡིས་མོ་ཡི་མིང་མཐའ་དྲངས་སུ་དོགས་ནས་ད་དྲག་སྦྱར་བར་མཛད་དོ། །ཇི་ལྟར་ཞེ་ན། མཁྱེན་ཀྱང་། མཁྱེན་ཅིང་། མཁྱེན་ཏོ། །མཁྱེན་པ་ཞེས་པ་ལྟ་བུ་ན་མཐར་ད་དྲག་ཅན་དང་། སོ་ཐར་ཀྱི་སྡོམ་པ། རྣམ་ཐར་ཅི་བཞིན། ཐར་ཏོ། །ཐར་པ་ཞེས་པ་ལྟ་བུར་མཐར་དྲག་ཅན་དང་། དོན་འགྲེལ་ཀྱིས་བཤད། བཀའ་འགྲེལ་ཇི་བཞིན། འགྲེལ་ཏོ། །འགྲེལ་པ་ཞེས་པ་ལྟ་བུ་ལ་མཐར་དྲག་ཅན་རྣམས་ཤེས་པར་བྱའོ། །མདོར་ན་ཀ་ཅ་ཏ་པ་ཙ་རྣམས་ཀྱིས་ན་ར་ལ་གསུམ་གྱི་མིང་མཐའ་དྲང་བས་ཚེ་ད་དྲག་སྦྱར་བར་བྱའི། ན་ར་ལ་གསུམ་གཞན་རྣམས་ལ་སྦྱར་བར་མི་བྱའོ། །ཕྱིས་ཀྱི་མཁས་པ་ཁ་ཅིག དོན་དམ་ཀྱང་ཞེས་པ་ལྟ་བུ་མ་མཐར་དྲག་ཅན་དང་། རྐང་པ་ཞེས་པ་ལྟ་བུ་ང་མཐར་དྲག་ཅན་ཡང་བཞེད་དོ། །མོ་ཡིས་མོ་ཡི་མིང་མཐའ་དྲང་བ་ནི། ཐུང་བ། རིང་བ་ཞེས་དང་། ཚེ་དང་ལྡན་པ། དམན་པ་ཞེས་དང་། བསམ་པ། སྒོམ་པ་ཞེས་དང་། ཚོར་བ། དོར་བ་ཞེས་དང་། ཉལ་བ། གྲོལ་བ་ཞེས་པ་སྟེ། འདི་དག་ནི་མོ་ཡིག་བ་ཡིག་གིས་ང་ན་མ་ར་ལའི་མིང་མཐའ་དྲང་བའོ། །དེ་བཞིན་དུ་དེ་དག་གི་མཐར། དུ་དང་། གི་དང་། གྱི་དང་། ཞེ་ན་དང་། ཞིང་དང་། ཡང་རྣམས་སྦྱར་བར་བྱའི། རུ་དང་། ཏོ་དང་། ཀྱི་དང་། ཅེ་ན་དང་། ཅིང་དང་། ཀྱང་རྣམས་སྦྱར་བར་མི་བྱའོ། །མ་ནིང་གིས་མ་ནིང་གི་མིང་མཐའ་དྲང་པ་ནི། བྱང་ཆུབ་སེམས་དཔའ་རུ་འགྱུར། དགའ་རུ་སོང་ན་ཞེས་པ་ལྟ་བུའོ། །ཕོ་མོ་མ་ནིང་གི་མིང་མཐའ་དེ་དག་ཉིད་ཀྱིས་རང་རང་གི་རྟགས་དང་མཐུན་པར་རྣམ་དབྱེ་བདུན་བོད་པ་དང་བཅས་པ་དྲངས་ཏེ། ཆོས་དངོས་ནི་རྣམ་དབྱེ་དང་པོའོ། །ལས་ནི་གཉིས་པའོ། །བྱེད་པ་ནི་གསུམ་པའོ། །དགོས་ཆེད་ནི་བཞི་པའོ། །འབྱུང་ཁུངས་ནི་ལྔ་པའོ། །འབྲེལ་པ་ནི་དྲུག་པའོ། །གནས་ནི་བདུན་པའོ། །བོད་པ་ནི་དང་པོའི་ཆ་ཤས་སོ། །དེ་ལ་རྣམ་དབྱེ་དང་པོ་ལ་མིང་མཐའ་དང་མཐུན་པའི་འདྲེན་ཚུལ་མེད་ལ། གཉིས་པ་དང་། བཞི་པ་དང་། བདུན་པ་རྣམས་ཀྱི་འདྲེན་ཚུལ་ནི། སའི་མཐར་སུའོ། །རའི་མཐར་རུའོ། །དའི་མཐར་དུའོ། །དེ་དག་ཀྱང་སུམ་ཅུ་པར། རྗེས་འཇུག་ཡི་གེ་བཅུ་པོ་ལ། །གང་མིང་མཐའ་ན་བཅུ་པ་གནས། །ཞེས་སོགས་ཚིག་རྐང་བཅུས་སྟོན་ནོ། །རྣམ་དབྱེ་གསུམ་པའི་འདྲེན་ཚུལ་ནི། ནས་དང་། ལས་ཞེས་སྦྱར་རོ། །དྲུག་པའི་འདྲེན་ཚུལ་ནི། ག་ངའི་མཐར་གིའོ། །ད་བ་སའི་མཐར་ཀྱིའོ། །འའི་མཐར་འིའོ། །ན་མ་ར་ལའི་མཐར་གྱིའོ། །བདུན་པའི་འདྲེན་ཚུལ་ནི། གའི་མཐར་རུ་ལ་སྦྱར་བ་སོགས་སོ། །བོད་པའི་འདྲེན་ཚུལ་ནི། མིང་གང་ཡིན་གྱི་ཐོག་མར་ཀྱེ་ཞེས་སྦྱར་རོ། །གཞན་ཡང་རྟགས་གསུམ་པོ་དེ་དག་གིས་རང་རང་གི་རྟགས་དང་མཐུན་པར་སླར་བསྡུ་སོགས་དགུ་འདྲེན་ཏེ། དེ་ལ་སླར་བསྡུ་ནི་རྗེས་འཇུག་བཅུའི་མཐར་ཨོ་སྦྱར་བ་སྟེ། གཞག་གོ་ཞེས་སོགས་ལྟ་བུའོ། །ལྷག་བཅས་ནི་དངོས་སུ་བསྟན་པའི་སྟེ་དང་། ཤུགས་ལ་བསྟན་པའི་དེ་དང་། ནས་དང་། ཅིང་ལ་སོགས་པའོ། །འབྱེད་སྡུད་ནི་རྗེས་འཇུག་བཅུ་ལ་མ་སྦྱར་བ་སྟེ། འཛེག་གམ། འོང་ངམ་ཞེས་སོགས་ལྟ་བུའོ། །བསྣན་པ་ནི་ངེས་གཟུང་སྟེ། དངོས་སུ་བསྟན་པའི་ནི་དང་། ཤུགས་ལ་བསྟན་པའི་ཁོ་ན་ཉིད་དང་། ན་ཞེས་པ་རྣམས་སོ། །ན་མཐའ་ཡིན་ན། ངེས་གཟུང་ནི་ཞེས་སྦྱར་ཏེ། ཐ་དད་པ་ཡིན་ན་ནི་ཞེས་པ་ལྟ་བུའོ། །བདག་པོ་ནི། མཁྱེན་པ་ཞེས་པ་ལྟ་བུ་ཕོའི་རྟགས་ཡིན་པས་ཕོའི་ཡི་གེ་སྦྱར་བ་དང་། གསུམ་པ་ཞེས་པ་ལྟ་བུ་མོའི་རྟགས་ཡིན་ཀྱང་ཕོའི་ཡི་གེ་སྦྱར་བ་གཉིས་སོ། །དགག་པ་ནི། མིང་མཐར་ཕོ་ཡིག་ཐོབ་པ་ལ་མོ་ཡིག་སྦྱར་བ་ནི་མ་རིག་པ་མེད་ཅེས་པ་ལྟ་བུའོ། །མོ་ཡིག་ཁོ་ན་ཐོབ་པ་ནི་རེག་བྱ་ཞེས་སོགས་ལྟ་བུའོ། །སྒྲུབ་པ་ནི། འགྱུར། ཡིན། ཡོད་ཅེས་མིང་མཐའ་དང་མཐུན་པར་སྦྱར་བའོ། །ཚིག་རྒྱན་ནི། ས་རི་ཞེས་པ་ཡོངས་སུ་དང་། ཨ་ནུ་ཞེས་རྗེས་སུ་ལ་འཇུག་པ་ལྟ་བུའོ། །དུས་ལ་འཇུག་པ་འདྲེན་པ་ནི། དེའི་ཚེ་ཞེས་པ་ལྟ་བུ་སྟེ། དུས་འདས་པ་དང་མ་འོངས་པ་གཉིས་ལ་འཇུག་གོ །དེ་དག་ཀྱང་སྔ་ཤུགས་འདྲེན་པས་འབྱུང་ཞེས་པ་ནི། རྣམ་དབྱེ་བདུན་བོད་པ་དང་བཅས་པ་དང་། སླར་བསྡུ་སོགས་དགུ་པོ་དེ་དག་རང་རང་གི་ཡི་གེ་སྔ་མའི་ཤུགས་ཀྱིས་སྦྱོར་ཚུལ་ཇི་ལྟར་ཡིན་པ་འདྲེན་པས་རང་གི་ངོ་བོ་གང་ཡིན་པ་དེ་འབྱུང་བ་ཡིན་ནོ། །གཉིས་པ་ནི། དེ་དག་ནང་སེལ་གང་འཇུག་པ། །ཞེས་སོགས་ཚིགས་ཅད་ཕྱེད་དང་ལྔ་སྟེ། ལོ་ཙྭ་བ་རྣམས་ཀྱིས་འགྱུར་བྱེད་པའི་ཚེ་གོང་དུ་བཤད་པ་དེ་དག་ནང་ཚན་གྱི་བྱེ་བྲག་གང་ལ་འཇུག་པ་བརྟག་སྟེ། སཾ་སྐྲྀ་ཏའི་སྐད་དུ་ཁྱད་གཞི་ཕལ་ཆེ་བ་ཅིག་ཁྱད་པར་གྱི་ཆོས་ཀྱི་མཐར་སྦྱར་ཡོད་པ་རྣམས། འོག་མ་ཁྱད་པར་གྱི་གཞི་གང་ཡིན་པ་དེའི་མིང་དོན་ལས་བསྒྲུབ་པར་བྱ་ཞེས་སྦྲེལ་ལོ། །གང་བསྒྲུབ་ཅེ་ན། སྤྱིར་འཇུག་སོགས་བསྒྲུབ་པར་བྱའོ། །དེ་ལ་སྤྱིར་འཇུག་ནི་གང་ཞེས་པ་ལྟ་བུ། བྱེད་པ་ནི་རྣམ་དབྱེ་གསུམ་པ། ཆེད་བྱེད་ནི་བཞི་པ། རྟེན་བྱེད་ནི་བདུན་པ། ལས་བྱ་ནི་གཉིས་པ། བླང་བྱ་ནི་ལྔ་པ་སྟེ། དེ་དག་གི་ཤུགས་ལ་དྲུག་པ་དང་། དང་པོའང་གཟུང་ངོ་། །བོད་སྐད་དུ་ཁྱད་ཆོས་ཀྱི་སྔོན་དུ་སྦྱོར་བར་འོས་པའི་ཁྱད་གཞི་རྣམས་སཾ་སྐྲྀ་ཏའི་སྐད་ལའང་དེ་ལྟར་དུ་གནས་པ་རྣམས་ནི་དེ་བཞིན་དུ་སྒྱུར་ཅིག་ཅེས་གདམས་པའོ། །གཞན་ཡང་ཚིག་དོན་ཞེས་སོགས་གསུམ་གྱི་དོན་ནི། གར་ཡང་དྲང་དུ་རུང་བའི་ཚིག་བྱུང་ན་ཕྱོགས་གཅིག་ཏུ་མ་ཆད་པར་སྤྱིར་སྙེགས་སུ་རུང་བར་གྱིས་ཤིག་ཅེས་པའོ། །རྣམ་གྲངས་སུ་གཏོགས་པའི་ཚིག་རྣམས་ནི་བསྐྱར་བ་ཡོད་པས་ཏེ་མ་འདོམས་ན་ཚིག་གར་བདེ་བར་སྤྱིར་ཐོགས་ཤིག འདོམས་ན་སོ་སོར་བཏགས་པ་བཞིན་དུ་ཐོགས་ཤིག ཕོ་སྒྲ་ཞེས་སོགས་ཀྱི་དོན་ནི། སཾ་སྐྲྀ་ཏའི་སྐད་ལ་དོན་དུ་མ་ལ་འཇུག་ཏུ་རུང་བའི་ཚིག་དོན་གང་ལ་འཇུག་པ་མི་ཤེས་པ་དེ་དག་ལ་མིང་མཐར་ཕོ་མོ་མ་ནིང་གི་རྟགས་ཡོད་མེད་བརྟགས་ནས་དོན་གང་ལ་འཇུག་པ་ཤེས་པར་བྱའོ། །ཚིག་རྒྱན་ལ་དོན་ལ་སྙེགས་པ་ཡོད་པ་རྣམས་ནི་བསྒྱུར་བར་བྱའི། མེད་པ་རྣམས་ནི་བསྒྱུར་བར་མི་བྱའོ། །སཾ་སྐྲྀ་ཏའི་སྐད་ལ་བསྟན་བྱ་ལྷག་མ་ཡོད་པ་རྣམས་ལ་ནི་ཏེ་སོགས་སྦྱོར་ཞིང་། མེད་ན་སྦྱར་མི་དགོས་སོ། །སཾ་སྐྲྀ་ཏའི་སྐད་ལ་ཚིག་དོན་རྫོགས་ན་བོད་སྐད་ལའང་ཚིག་དོན་རྫོགས་པར་བྱ་ལ། མེད་ན་མི་བྱའོ། །དེ་དག་ནི་ལོ་ཙཱ་བ་རྣམས་ལ་སྒྲ་སྒྱུར་གྱི་གདམས་པ་གནང་བའོ། །བཞི་པ་ནི། ཅིའི་ཕྱིར་ཞེས་སོགས་ཚིགས་སུ་བཅད་པ་དྲུག་སྟེ། རྗེས་འཇུག་དེ་དག་དགོས་པ་ཅིའི་ཕྱིར་འཇུག་པར་བྱེད་ཅེ་ན། ཡི་གེའི་ཁོང་ནས་ཞེས་སོགས་ཚིག་རྐང་གསུམ་གྱིས་བསྟན་ཏེ། དེའི་ཆེད་དུ་འཇུག་པར་བྱེད་ཅེས་པའོ། །མོའི་ཡི་གེ་དབྱངས་ཡིག་བཞི་མེད་ན་ཕོ་ཡིག་བརྗོད་མི་ཤེས་ཏེ། དྲི་མེད་འོད་དུ་ཀ་ཡིག་གསལ་བྱེད་བརྗོད་དུ་མེད་པ་ཞེས་བཤད་པའི་ཕྱིར། མོ་ཡིག་སྲོག་ཏུ་ཞུགས་པའི་ཕོ་ཡིག་རྣམས་ལའང་འཇུག་པའི་ཡི་གེ་བཅུ་སྔོན་རྗེས་གང་རུང་དུ་འཇུག་པ་མེད་ན་མིང་ཚིག་གསལ་མི་ནུས་ཤིང་། དེ་མེད་ན་དོན་རྣམས་བརྗོད་པར་མི་འགྱུར་རོ། །དེ་ལྟར་གྱུར་ན་འཇིག་རྟེན་གྱི་དོན་མཚོན་པའི་བརྗོད་པ་སྟེ། ལུགས་ཀྱི་བསྟན་བཅོས་དང་། རིག་བྱེད་སྨྲ་བ་སྟེ་ཕྱི་རོལ་པའི་བསྟན་བཅོས་དང་། ནང་པའི་ཐེག་པ་གསུམ་སྟོན་པའི་བཀའ་དང་དགོངས་འགྲེལ་རྣམས་ཀྱང་མེད་པར་འགྱུར་ཏེ། མིང་ཚིག་གིས་དོན་བརྗོད་པ་མེད་པའི་ཕྱིར་རོ། །དེ་དག་མེད་ཀྱང་རང་རང་གིས་དེ་དག་གི་དོན་རྟོགས་སོ་ཞེ་ན། མ་ཡིན་ཏེ། འཇིག་རྟེན་ན་སེམས་ཅན་རྣམས་རང་ལ་ཡོད་པའི་ཕུང་ཁམས་སྐྱེ་མཆེད་དང་། རང་ལ་མེད་པའི་གྲུབ་མཐའ་རྣམས་སྟོན་པ་པོ་མེད་ན་རང་ཉིད་ཀྱིས་མི་ཤེས་པ་བཞིན་དུ། ཡི་གེ་སྔོན་འཇུག་དང་རྗེས་འཇུག་གི་ཚུལ་སྨྲ་བ་ཀུན་ལ་གནས་པར་གྱུར་ཀྱང་། བརྗོད་བྱའི་དོན་གྱི་རང་གི་ཚུལ་གྱིས་དེ་ཁོ་ན་ཉིད་མི་ཤེས་པས། དོན་ལ་བརྟགས་ནས་དེ་དང་མཐུན་པར་སྦྱོར་བ་ག་ལ་ཤེས་ཏེ། མི་ཤེས་སོ། །དེས་ན་གོང་གི་ཉེས་པ་དེར་མ་གྱུར་ཅིག་སྙམ་དུ་བསམས་ནས། དེའི་ཕྱིར་སྨྲ་བའི་དབང་ཕྱུག་གིས། །རྗེས་སྨྲས་འདི་ཀུན་རྟོགས་གྱུར་ཅིག །ཅེས་སྨྲས་པའོ། །བྱཱ་ཀ་ར་ཎའི་རྟགས་ཀྱི་འཇུག་པའི་རྣམ་འགྲེལ་ཚིག་ཉུང་ཞིང་དོན་གསལ་བར་སྟོན་པ་འདི་ནི། བློ་ལྡན་བསོད་ནམས་སེང་གེས་མཁས་པ་སྔ་མའི་ལེགས་བཤད་ལ་བརྟེན་ནས་རང་གཞན་ལ་ཕན་པའི་ཕྱིར་བྲིས་པའོ།། །།འདི་བསྒྲུབས་པ་ལས་བྱུང་བ་ཡི། །དགེ་བ་གང་དང་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །འཇམ་དབྱངས་ཡེ་ཤེས་ཐོབ་པར་ཤོག །དགེའོ། །དགེའོ། །དགེའོ།། །།