འཇམ་པའི་རྡོ་རྗེའི་གཏོར་ཆོག་ཕྲིན་ལས་རྣམ་རོལ།

འཇམ་པའི་རྡོ་རྗེའི་གཏོར་ཆོག་ཕྲིན་ལས་རྣམ་རོལ་བཞུགས་སོ།། ༈ །དཔལ་གསང་བ་འདུས་པ་འཇམ་པའི་རྡོ་རྗེའི་གཏོར་མའི་ཆོ་ག་ཕྲིན་ལས་རྣམ་རོལ་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །གང་གི་རྣམ་འཕྲུལ་བྱེ་བའི་ཆ་ཙམ་གྱིས། །བགེགས་འཇོམས་དོན་ཀུན་འགྲུབ་བྱེད་ཕྱོགས་སྐྱོང་སྐུར། །སྟོན་མཛད་འཁོར་ལོའི་གཙོ་ལ་ཕྱག་བྱས་ནས། །གཏོར་མའི་ཆོ་ག་གཞུང་བཞིན་བཤད་པར་བྱ། །འདི་ལ་མདུན་བསྐྱེད་དང་འབྲེལ་བའི་ཚུལ་དང་། མདུན་བསྐྱེད་དང་མ་འབྲེལ་བར་ཐུན་མོང་དུ་གཏོང་བའི་ཚུལ་དང་། ཕྱི་རོལ་པ་སོགས་འཇིག་རྟེན་པ་ཁོ་ན་ལ་གཏོང་བའི་ཚུལ་གསུམ་ལས། དང་པོ་ནི། མདུན་བསྐྱེད་ཀྱི་བྱང་ཤར་དུ་འདས་པའི་གཏོར་མ། ཤར་ལྷོར་འཇིག་རྟེན་པའི་གཏོར་མ། དེ་དག་གི་བར་དུ་སྒོས་ཀྱི་ཆོས་སྐྱོང་གང་བྱེད་ཀྱི་གཏོར་མ་རྣམས་རིམ་པ་བཞིན་བཤམ། ནང་མཆོད་ཆུ་ཆང་གིས་བྲན་ནས། བྱིན་རླབས་སྒྲུབ་ཐབས་ལྟར་དུས་གཅིག་ལ་བྱ། དེ་ནས་མདུན་བསྐྱེད་ཀྱི་ལྷ་རྣམས་ཀྱི་ལྗགས་ཧཱུྃ་ལས་བྱུང་བའི་རྡོ་རྗེ་རྩེ་ལྔ་པར་བསམས་ལ། དེ་ལས་བྱུང་བའི་འོད་ཀྱི་སྦུ་གུས་གཏོར་མ་གསོལ་བར་བསམ་ཞིང་། པད་སྐོར་སྔོན་དུ་འགྲོ་བས་རྡོ་རྗེ་ཐལ་མོ་ཁ་ཕྱེ་སྟེ། ཨོཾ་ཨཱཿམཱཾ། བྷྲཱུྃ། ཨཱཾ། ཛྲཱིཾ། ཁཾ། ལཾ་མཱཾ་པྲཱཾ་ཏཱཾ། ཛཿཧཱུྃ་བྃ་ཧོཿཁཾ་རཾ་ཧཱུྃ་ཧཱུྃ་ཧཱུྃ་ཧཱུྃ་པཉྩ་ཨ་མྲྀ་ཏ་ཧཱུྃ་ཞེས་གསུམ་མམ། ལྔའམ་བདུན་གྱིས་ཕུལ། ཆུ་གསུམ་ལ་གཙོ་བོའི་སྔགས་དང་། ཉེར་སྤྱོད་ཀྱིས་མཆོད་ལ། སྔར་གྱི་སྔགས་ཀྱིས་བདུད་རྩི་གཏོར། དེ་ཉིད་ལྔ་པས་བསྟོད་ནས། རྡོ་རྗེ་གསུམ་དངོས་མི་ཕྱེད་སྐུ། །ཡེ་ཤེས་ལྔ་ལྡན་བདེ་བ་ཆེ། །འདུས་པའི་དཀྱིལ་འཁོར་ལྷ་ཚོགས་རྣམས། །མཆོད་སྦྱིན་གཏོར་མ་འདི་བཞེས་ལ། །ཞེས་པ་ནས་ཡིད་ལ་འདོད་པ་ཀུན་འགྲུབ་ཤོག་གི་བར་བརྗོད། དེ་ནས་ཆོས་སྐྱོང་གི་གཏོར་མ་རྣམས་རིམ་པ་བཞིན་དུ་བསྔོས་ནས་འཇིག་རྟེན་པའི་གཏོར་མགྲོན་སྤྱན་དྲངས་པ་ནི། རང་སྐད་ཅིག་གིས་འཇམ་པའི་རྡོ་རྗེར་གསལ་བའི་ཐུགས་ཀའི་ཏིང་ངེ་འཛིན་སེམས་དཔའི་འོད་ཟེར་གྱིས་འཇིག་རྟེན་སྐྱོང་བ་རྣམས་བཀུག་སྟེ། རང་རང་གི་གཟུགས་ཀྱིས་རང་རང་གི་ཕྱོགས་མཚམས་རྣམས་སུ་འཁོད་པར་བསམས་ལ་རང་གི་སྙིང་གའི་འོད་ཟེར་ལས་བྱུང་བའི་རྡོ་རྗེ་ཕུར་བུ་བཅུ། སྟོད་རང་རང་གི་ཕྱོགས་ཀྱི་སྲུང་འཁོར་གྱི་ཁྲོ་བོའི་དབྱིབས་སུ་གནས་པ། ལྟེ་བ་མན་ཆད་རྡོ་རྗེ་རྩེ་གཅིག་པ་ལྟ་བུས་ཤེས་རབ་དམ་པ་ལ་འཁྱུད་པ་སྤྲོས་ནས་རང་གི་ཐུགས་ཀ་ནས་རང་འདྲའི་ཁྲོ་བོ་སྤྲོས་ཏེ། གཡོན་པས་ཕུར་བུའི་མགུལ་པ་ནས་བཟུང་། གཡས་པས་རྡོ་རྗེ་ཐོ་བས་སྤྱི་བོ་ནས་བརྡུངས་ཤིང་སྔགས་འདི་བརྗོད་པར་བྱ་སྟེ། ཨོཾ་ཨཱཿཡ་མཱནྟ་ཀྲིཏ། སརྦ་དུཥྚ། ཨིནྟྲ་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཔྲཛྙཱནྟ་ཀྲིཏ། སརྦ་དུཥྚ། ཡ་མཱན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱ་ཿཔདྨཱནྟ་ཀྲིཏ། སརྦ་དུཥྚ་ནཱ་གན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿབིགྷནྟ་ཀྲིཏ་སརྦ་དུཥྚ། ག་ན་པ་ཏི་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཊཱ་ཀི་རཱ་ཛ་སརྦ་དུཥྚ་ཨཱཀ་ནཱི་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿནཱི་ལ་དནྟྲ་སརྦ་དུཥྚ། ནི་རི་ཏི་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿམ་ཧཱ་བཱ་ལ་སརྦ་དུཥྚ། ཝ་ཡུ་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཨ་ཙཱ་ལ་སརྦ་དུཥྚ་ཨི་ཤྭ་ར་ན། ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿཙཀྲ་ཝརྟི་སརྦ་དུཥྚ་པཉྩི་ཊ། ཨརྐ་ལི་ཏ། མ་ཧཱ་ན་ས་པ་རི་ཝ་ར་ཀཱི་ལ་ཡ་ཧཱུྃ་ཕཊ། ཨོཾ་ཨཱཿསུམྦྷ་རཱ་ཛ་སརྦ་དུཥྚ་བི་མ་ཙི་ཏྲི། པྲྀ་ཐཱི་ཝཱི། དེ་ཝ་ན་ས་པ་རི་ཝཱ་ར་ཀཱི་ལ་ཡ་ཧཱུྃ་ཕཊ། ཞེས་བརྗོད་ཅིང་རྐང་པའི་མཐར་ཐུག་པའི་བར་དུ་ཕུར་བུས་བཏབ་པས་ཐམས་ཅད་ཀྱང་གསང་བ་འདུས་པའི་སྐུར་གྱུར་པ་ནི་ཤར་དུ་རྡོ་རྗེ་མཚོན་ཆ་སེར་པོ་མི་བསྐྱོད་པའི་ཅོད་པཎ་ཅན། སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྡོ་རྗེ་དང་རལ་གྲི། གཡོན་གཉིས་ན་རིན་པོ་ཆེ་དང་པདྨ་ཐོགས་པ། དེའི་གཡོན་ཕྱོགས་སུ་རྡོ་རྗེ་སྒྱུ་མ་སྔོན་པོ་མི་བསྐྱོད་པའི་ཅོད་པཎ་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་འཁོར་ལོ་དང་རལ་གྲི། གཡོན་གཉིས་ན་དུང་དང་པདྨ། ཤར་ལྷོར་རྡོ་རྗེ་མེ་དམར་པོ་མི་བསྐྱོད་པའི་ཅོད་པཎ་ཅན། དམར་སྔོ་དཀར་བའི་ཞལ་གསུམ་ཕྱག་དྲུག་གི་གཡས་པ་གཉིས་ན་བགྲང་ཕྲེང་དང་མི་འཇིགས་པ་སྟེར་བ། གཡོན་གཉིས་ན་དབྱུག་པ་དང་གནྡྷེ། ལྷོར་རྡོ་རྗེ་དུས་ནག་པོ་མི་བསྐྱོད་པའི་ཅོད་པཎ་ཅན། ནག་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་དབྱུག་པ་དང་རལ་གྲི། གཡོན་གཉིས་ན་པདྨ་དང་རིན་པོ་ཆེ། ལྷོ་ནུབ་ཏུ་རྡོ་རྗེ་གཏུན་ཤིང་ནག་པོ་ཅོད་པཎ་འདྲ། གཡས་གཉིས་ན་གྲི་གུག་དང་རལ་གྲི། གཡོན་གཉིས་ན་རིན་པོ་ཆེ་དང་ཁྲག་གིས་གང་བའི་ཐོད་པ། ནུབ་ཏུ་རྡོ་རྗེ་ཀླུ་དཀར་པོ་འོད་དཔག་མེད་ཀྱི་ཅོད་པཎ་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་པ་གཉིས་ན་སྦྲུལ་ཞགས་དང་རལ་གྲི། གཡོན་གཉིས་ན་པདྨ་དང་རིན་པོ་ཆེ། ནུབ་བྱང་དུ་རྡོ་རྗེ་རླུང་ལྷ་ལྗང་གུ་དོན་གྲུབ་ཀྱི་ཅོད་པཎ་ཅན། ལྗང་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་གོས་དང་རལ་གྲི། གཡོན་གཉིས་ན་པདྨ་དང་རིན་པོ་ཆེ། དེའི་གཡོན་ཕྱོགས་ན་རྡོ་རྗེ་སྣ་རིང་དཀར་པོ་མི་བསྐྱོད་པའི་ཅོད་པཎ་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་དུང་དང་རལ་གྲི། གཡོན་གཉིས་ན་རིན་པོ་ཆེ་དང་ཆང་གི་བཀང་བའི་ཁམ་ཕོར། བྱང་དུ་རྡོ་རྗེ་འཇིགས་བྱེད་སེར་པོ་མི་བསྐྱོད་པའི་ཅོད་པཎ་ཅན། སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་བི་ཙ་པུ་ར་དང་རལ་གྲི། གཡོན་གཉིས་ན་པདྨ་དང་ནེའུ་ལེ་ཐོགས་པ། བྱང་ཤར་དུ་རྡོ་རྗེ་ཁྲོ་བོ་དཀར་པོ་འོད་དཔག་མེད་ཀྱི་ཅོད་པཎ་ཅན། དཀར་ནག་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྩེ་གསུམ་དང་རལ་གྲི། གཡོན་གཉིས་ན་རིན་པོ་ཆེ་དང་པདྨ། སྟེང་གི་ཕྱོགས་ཀྱི་ཆ་ལ་རྡོ་རྗེ་འོད་དཀར་པོ་མི་བསྐྱོད་པའི་ཅོད་པཎ་ཅན། དཀར་སྔོ་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་དཀར་པོ་དང་རལ་གྲི། གཡོན་གཉིས་ན་རིན་པོ་ཆེ་དང་འཁོར་ལོ། དེའི་གཡས་སུ་རྡོ་རྗེ་འཁྱིལ་པ་ནག་པོ་རིན་འབྱུང་གི་ཅོད་པཎ་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་དམར་པོ་དང་རལ་གྲི། གཡོན་གཉིས་སྔ་མ་དང་འདྲ། གཡོན་དུ་རྡོ་རྗེ་མི་སྨྲ་སེར་པོ་རྣམ་སྣང་གི་ཅོད་པཎ་ཅན། སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་སེར་པོ་དང་རལ་གྲི། གཡོན་གཉིས་སྔ་མ་དང་འདྲ། འོག་ཏུ་ཐགས་བཟངས་རིས་སྔོན་པོ་མི་བསྐྱོད་པའི་ཅོན་པཎ་ཅན། སྔོ་དཀར་དམར་བའི་ཞལ་གསུམ་ཕྱག་དྲུག་གི་གཡས་གཉིས་ན་རྡོ་རྗེ་དང་འཁོར་ལོ། གཡོན་གཉིས་ན་རིན་པོ་ཆེ་དང་པདྨ། དེའི་གཡོན་དུ་སའི་ལྷ་མོ་སེར་མོ་རྣམ་སྣང་གི་ཅོད་པཎ་ཅན། སེར་ནག་དཀར་བའི་ཞལ་གསུམ་ཕྱག་དྲུག་གི་གཡས་གཉིས་ན་པདྨ་སེར་པོ་དང་རལ་གྲི། གཡོན་གཉིས་ན་རིན་པོ་ཆེ་དང་འཁོར་ལོ་ཐོགས་པ། ཐམས་ཅད་ཀྱང་སྣ་ཚོགས་པདྨའི་སྟེང་དུ་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་དང་པོ་གཉིས་ཀྱིས་རང་སྣང་གི་ཤེས་རབ་མ་ལ་འཁྱུད་པ། རིན་པོ་ཆེའི་ཅོད་པཎ་དང་། རྒྱན་ཐམས་ཅད་ཀྱིས་བརྒྱན་པ། ལྷའི་གོས་དང་། ཕྲེང་བ་དང་། བྱུག་པ་དང་ལྡན་པ། མཚན་དང་དཔེ་བྱད་ཉེ་བར་འབར་བ་གསལ་གདབ་བོ། །བསྡུས་པར་འདོད་ན་རང་རང་གི་ཕྱོགས་སུ་རང་རང་གི་མིང་དང་ཁ་དོག་ཙམ་བརྗོད་ནས་འདི་དག་ཐམས་ཅད་ཀྱང་ཞལ་གསུམ་ཕྱག་དྲུག་སྣ་ཚོགས་པདྨའི་སྟེང་ན་ཞེས་སོགས་ཀྱིས་གསལ་བ་ཡང་རུང་ངོ་། །དེ་ནས་རྡོ་རྗེ་མ་ལྔ་དང་། ཉེར་སྤྱོད་ཀྱིས་མཆོད་ནས་རྡོ་རྗེ་ཐལ་མོ་ཁ་ཕྱེ་སྟེ། ཨོཾ་ཨཱཿསརྦ་ཏྲྱ་དྷྭ་ཛ། ད་ཤ་དིཀ ལོ་ཀ་དྷཱ་ཏུ། ཨ་ནནྟ། ག་ག་ན། ས་མུ་ཏྲ། མེ་གྷ། བྱཱུ་ཧ་པྲ་ས་ར། པ་ར་མཱ་བྱུ་ཛོ། མཎྜ་ལ་པ་རཾ་པ་ར། ཨནྟརྒ་ག་ཏ། ས་མ་པཏྟི། ཨཱ་བསྡྱི་ཏཱ། དྷརྨཱ་དྷཱ་ཏུ། ས་མ་བ་ས་རཱ་ཎཱ། ཨཱ་ཀཱ་ཤ དྷཱ་ཏུ། སདྱ་བ་སཱ་ན་མཿསརྦ་ཏྲྱ་དྷྭ་ཛ། ད་ཤ་དིཀ་ལོ་ཀ་དྷ་ཏུ། ཨ་ནནྟ། མེ་གྷ་བྱུ་ཧ། པྲ་ས་ར། ག་ག་ན། ས་མཱཿསརྦ་ལོ་ཀཱ་པཱ་ལ། སརྦ་སཏྟྭ་ཥ་ཙ་ཏདྱ་ཐཱ། བཛྲ་ཡུ་དྷ། མཱ་ཡཱ་བཛྲ། བཛྲ་ཨ་ན་ལ། བཛྲ་ཀཱ་ལ། བཛྲ་མུ་ཥ་ལ། ནཱ་ག་བཛྲ། བཛྲ་ཨ་ནི་ལ་བཛྲ་ཤོཎྜ། བཛྲ་བྷཻ་ར་ཝ། བཛྲ་ཀྲོ་དྷ། བཛྲ་ཀུཎྜ་ལི། བཛྲ་པྲ་བྷ། མོ་ན་བཛྲ། བེ་མ་ཙི་ཏྲི། པྲི་ཐཱི་ཝཱི། དེ་ཝ་ཏཱཿས་པ་རི་ཝཱ་ར། ཨི་མཾ། པུཥྤེ། དྷུཥྤེ། དཱི་པ། གན་དྷ། ནཻ་ཝིདྷྱེ། ཨཱ་དཱི་པཾ་ཡུ་ཏཾ་བ་ལི། ཨུ་པ་ཧཱ་རཾ། པྲ་ཏཱིཙྪ། ཨུ་པ་བྷུ་ཛཱ། མ་མ། ཧི་ར་ཎྱ་སུ་ཝརྞ་དྷ་ན་དྷཱ་ནྱ། ཨཱ་ཡུ། ཡཽ་བ་ན། ཨཱ་རོ་ཀྱ་སད་སུ་ཁཾ། ཨ་པ་ཧཱ་ར་ཀཱ སརྦ་བི་གྷྣན་བི་ན་ཡ་ཀྵན། སརྦ་དུཥྚན། པྲ་དུཥྚན། མ་ནུ་ཥྱན། ཨ་མ་ནུ་ཥྱན། ཛམྦྷ་ཡ་ཏ། ཏམྦྷ་ཡ་ཏ། བྷ་ན་དྷ་ཡ་ཏ། བི་དྷྭཾ་ས་ཡ་ཏ། མ་མ་ཧི་ར་ཎྱེ། སུ་ཝརྞ། དྷ་ན། དྷ་ནྱ། ཨཱ་ཡུར་ཡཽ་པ་ན། ཨཱ་རོ་ཀྱ་སཏ་སུ་ཁ་ནི། མ་ཧཱ་སུ་ཁ་པྲ་པྲིད་དྷ་ཡེ། ཡཱ་བ་ད་ཨཱ་བོ་དྷི་མཎྜ་པཱརྻ་ན་ཏཾ། ཌྷོ་ཀ་ཡ་ཏ། ས་ཏ་ས་ཧ་ཡ་ཏཾ། ཤཱནྟིཾ་རཀྵ་ཙ། ཀུ་རུ་ཧཱུྃ། ཞེས་ལན་གསུམ་གྱི་འབུལ། ཨོཾ་ད་ཤ་དིཀ་ལོ་ཀ་པཱ་ལ། ཨོཾ་ཨཱཿཧཱུྃ་ཞེས་པས་ནང་མཆོད་གཏོར་ནས་ཐམས་ཅད་ཀྱང་རིགས་ལྔའི་ངོ་བོར་མོས་པར་བྱ་སྟེ། རྡོ་རྗེ་དྲིལ་བུ་འཛིན་པས། མི་བསྐྱོད་པ་ནི་ཡེ་ཤེས་ཆེ། །ཞེས་སོགས་དེ་ཉིད་ལྔ་པ་དང་། ཨོཾ་ཨཱཿདུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་རྟེན་ཁམས་རྣམས་ནམ་མཁའི་མཐའ་ཀླས་པ། །རྒྱ་མཚོའི་སྤྲིན་གྱིས་བཀོད་པ་རབ་འབྱམས་ཀྱི། །ཤིན་ཏུ་ཕྲ་བའི་རྡུལ་སྐྱེས་དཀྱིལ་འཁོར་ནི། །ཕན་ཚུན་གཅིག་གི་ནང་དུ་གཅིག་སོན་པ། །སྙོམས་པར་འཇུག་ལ་ཀུན་ཏུ་གནས་པ་ཡི། །ཆོས་ཀྱི་དབྱིངས་སུ་ཡང་དག་པར་འདུ་ཞིང་། །ནམ་མཁའི་ཁམས་ཀྱི་ཡོངས་སུ་མཐར་ཐུག་པའི། །དུས་གསུམ་སྐྱེས་པ་ཀུན་དང་ཕྱོགས་བཅུ་ཡི། །འཇིག་རྟེན་ཁམས་རྣམས་མཐའ་ཡས་སྤྲིན་བཀོད་པ། །ནམ་མཁའ་རབ་འབྱམས་མཉམ་དང་འཇིག་རྟེན་སྐྱོང་། །ཀུན་དང་སེམས་ཅན་ཀུན་ཡང་འདི་ལྟ་སྟེ། །རྡོ་རྗེ་མཚོན་ཆ་སྒྱུ་མ་རྡོ་རྗེ་དང་། །རྡོ་རྗེ་མེ་དང་རྡོ་རྗེ་དུས་དང་ནི། །རྡོ་རྗེ་གཏུན་ཤིང་རྡོ་རྗེ་ཀླུ་དག་དང་། །རྡོ་རྗེ་རླུང་དང་རྡོ་རྗེ་སྣ་རིངས་དང་། རྡོ་རྗེ་འཇིགས་བྱེད་རྡོ་རྗེ་ཁྲོ་བོ་དང་། །རྡོ་རྗེ་འཁྱིལ་པ་རྡོ་རྗེ་འོད་དང་ནི། །མི་སྨྲ་རྡོ་རྗེ་དང་ནི་ཐགས་བཟངས་རིས། །ས་ཡི་ལྷ་མོ་འཁོར་དང་བཅས་པ་ལ། །མེ་ཏོག་དག་དང་བདུག་པ་མར་མེ་དང་། །དྲི་དང་ལྷ་བཤོས་ལ་སོགས་ཡང་དག་ལྡན། །ཉེ་བར་སྤྱོད་པ་དང་ནི་གཏོར་མ་འདི། །སོ་སོར་བཞེས་ཤིང་ཉེ་བར་ལོངས་སྤྱོད་ནས། །བདག་གི་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་རྣམས། །འཕྲོག་པར་བྱེད་པའི་བགེགས་དང་ལོག་འདྲེན་ཀུན། །སྡང་དང་རབ་ཏུ་སྡང་བ་ཐམས་ཅད་དང་། །མི་དང་མི་མ་ཡིན་རྣམས་རྨུགས་པར་མཛོད། །རེངས་དང་ཅིངས་དང་རྣམ་པར་འཇིགས་པར་མཛོད། །བདག་ལ་དབྱིག་གསེར་ནོར་འབྲུ་ལང་ཚོ་ཚེ། །ནད་མེད་པ་དང་བདེ་བ་དམ་པ་དང་། །བདེ་བ་ཆེན་པོ་རབ་ཏུ་འཕེལ་བ་རྣམས། །ཇི་སྲིད་བྱང་ཆུབ་སྙིང་པོའི་མཐར་ཐུག་བར། །གནང་བར་མཛད་ཅིང་རྟག་ཏུ་སྟོང་གྲོགས་དང་། །ཞི་བ་དང་ནི་བསྲུང་བར་མཛད་དུ་གསོལ། །ཧཱུྃ་ཞེས་པས་དངོས་གྲུབ་སྟེར་པ་ཉིད་དུ་གསོལ་བ་བཏབ་ནས་ཡི་གེ་བརྒྱ་པ་ལན་གསུམ་གྱིས་བཟོད་པར་གསོལ་ཏེ། ཨོཾ་ཨཱཿཨ་ཀཱ་རོ་མུ་ཁཾ། སརྦ་དྷརྨཱ་ནཱཾ། ཨཱ་དྱ་ནུད་པན་ན་ཏྭཱད་ཧཱུྃ་མུ་ཿཞེས་པས་གཤེགས་སུ་གསོལ་ལོ། །གཉིས་པ་མདུན་བསྐྱེད་དང་མ་འབྲེལ་བར་དཀྱིལ་འཁོར་དང་ཐུན་མོང་དུ་འབུལ་བའི་ཚུལ་ནི། མཎྜལ་དྲིས་བྱུགས་པར་དབུས་སུ་ལྷ་བཅུ་དགུའི་ཚོམ་བུ་དགོད། མཐའ་སྐོར་དུ་ཕྱོགས་སྐྱོང་བཅུ་པོ་རང་རང་གི་གནས་གཞན་དང་སྟེང་གི་གསུམ་ཤར་གྱི་ཤར་དང་། འོག་གི་གཉིས་ནུབ་ཀྱི་ནུབ་ཏུ་དགོད། དེའི་མཐར་གཏོར་མ་གཉིས་སམ་གཅིག་ཀྱང་རུང་མཆོད་པ་དང་བཅས་པ་བཤམས་ནས་སྒྲུབ་ཐབས་ལྟར་མཆོད་གཏོར་བྱིན་གྱིས་བརླབ། དེ་ནས་མདུན་གྱི་མཎྜལ་གྱི་དབུས་སུ་གཞལ་ཡས་ཁང་པའི་ནང་དུ་ལྷ་བཅུ་དགུ་སྐད་ཅིག་གིས་བསྐྱེད། ཕྱོགས་སྐྱོང་སྤྱན་དྲངས་པ་ནས་གསལ་གདབ་པའི་བར་སྔ་མ་བཞིན་བྱས་ལ་རྡོ་རྗེ་མ་ལྔ་དང་། ཉེར་སྤྱོད་ཀྱིས་མཆོད་ནས་འདས་པའི་གཏོར་སྔགས་དང་། ཕྱོགས་སྐྱོང་གི་གཏོར་སྔགས་སྦྲེལ་བ་ལན་གསུམ་གྱིས་གཏོར་མ་འབུལ། དེ་ཉིད་ལྔ་པ་སོགས་ཀྱིས་གསོལ་གདབ་དང་། ནོངས་པ་བཟོད་པར་གསོལ་བ་བྱས་ནས་དཀྱིལ་འཁོར་གྱི་ལྷ་རྣམས་རང་ལ་བསྡུ། སྔར་གྱི་སྔགས་ཀྱིས་ཕྱོགས་སྐྱོང་རྣམས་གཤེགས་སུ་གསོལ་ལོ། །གསུམ་པ་ཕྱི་རོལ་པ་སོགས་ཕྱོགས་སྐྱོང་ཁོ་ན་ལ་འབུལ་བའི་ཚུལ་ནི་མཎྜལ་ལ་དབུས་སུ་སྟེང་གི་ཚོམ་བུ་གསུམ་འགོད། གཞན་རྣམས་སྔ་མ་དང་འདྲ་བར་བྱས་ནས་གཏོར་མགྲོན་སྤྱན་དྲང་བ་ནས་གཤེགས་སུ་གསོལ་བའི་བར་སྔར་གྱི་ཕྱོགས་སྐྱོང་གི་གཏོར་མ་དང་འདྲའོ། །མཁས་པ་གཞན་དག་གཏོར་མའི་ཆོ་ག་འདི། །འཕགས་ལུགས་ཉིད་ལ་སྦྱར་བ་མི་མཛེས་པར། །མཐོང་ཞེས་བདག་གི་བླ་མ་གསུང་བས་ན། །ལུགས་འདི་ཡེ་ཤེས་ཞབས་ཀྱི་ཁྱད་ཆོས་ཡིན། །འདི་སྦྱར་དགེ་བ་དྲི་མེད་དེས། །འདི་སྒྲུབ་བྱེད་པའི་སྐལ་ལྡན་ལ། །འདི་དང་ཕྱི་མར་ཕྲིན་ལས་བཞི། །འདི་ནས་བཤད་བཞིན་འགྲུབ་པར་ཤོག །གཏོར་མའི་ཆོ་ག་ཕྲིན་ལས་རྣམ་གྲོལ་ཞེས་བྱ་བ་འདི་ནི་སློབ་དཔོན་ངག་གི་དབང་ཕྱུག་གྲགས་པའི་གཞུང་བཞིན་དུ་མང་ཐོས་བསོད་ནམས་སེང་གེས་རང་གི་གཞུང་གཉིས་ཀྱི་ཆ་ལག་ཏུ་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།དགེའོ།། །།