དཔལ་འཁོར་ལོ་བདེ་མཆོག་ལཱུ་ཧི་པའི་རྣམ་བཤད་དཔག་བསམ་ལྗོན་པ།

དཔལ་འཁོར་ལོ་བདེ་མཆོག་ལཱུ་ཧི་པའི་རྣམ་བཤད་དཔག་བསམ་ལྗོན་པ་བཞུགས་སོ།། དཔལ་འཁོར་ལོ་བདེ་མཆོག་ལཱུ་ཧི་པའི་ལུགས་ཀྱི་བསྐྱེད་པའི་རིམ་པའི་རྣམ་པར་བཤད་པ་འདོད་དགུ་སྦྱིན་པའི་དཔག་བསམ་ལྗོན་པ་ཞེས་བྱ་བ། བླ་མ་དང་ལྷག་པའི་ལྷ་མཆོག་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །སྨྲ་བ་ཀུན་གྱི་གཙུག་གི་རྒྱན་གྱུར་ཅིང་། །འགྲོ་ལ་དགའ་བདེའི་དཔལ་འབྱོར་འབྱུང་བའི་གཞི། །དགོས་འདོད་བཟང་པོ་འབད་མེད་སྩོལ་མཛད་པ། །འདྲེན་མཆོག་དབང་གི་རྒྱལ་པོ་ལ་ཕྱག་འཚལ། །རྒྱུད་སྡེ་དྲུག་པའི་རྩ་བཤད་གཞུང་འགྲེལ་བཅས། །ཕ་ན་ཕིམ་གུའི་མན་ངག་ལས་བྱུང་བའི། །སྨིན་ལམ་བཟང་པོ་གཏམས་མཛད་དྲིན་ཅན་རྗེ། །སེམས་དཔའ་ཆེན་པོར་གྲགས་ལ་མགོས་ཕྱག་འཚལ། །ཆུ་ཀླུང་སྟོང་གི་མདངས་འོད་ཆགས་པའི་སྐུ་མཆོག་ཡོན་ཏན་རིན་ཆེན་བྱེ་བས་གཏམས། །ཐུགས་རྗེའི་རླུང་གིས་བསྐུལ་བས་ཟེགས་མ་འཐོར་བའི་རུས་ཕྲེང་དཀར་པོའི་ཆལ་ཆིལ་ཅན། །རྦ་རླབས་དུ་མ་ཕྱོགས་སུ་འཁྲིགས་པའི་ཕྱག་དང་ཞབས་ཀྱིས་རྣམ་འགྱུར་ཅི་ཡང་སྟོན། །དྲེགས་ལྡན་ཕོ་མོའི་དབང་ཆེན་ལས་བྱུང་དངོས་གྲུབ་རྒྱ་མཚོ་ཧེ་རུ་ཀས་སྐྱོངས་ཤིག །བདུད་དཔུང་བྱེ་བས་ལྟ་བར་མི་བཟོད་པའི། །ཡེ་ཤེས་མེ་དཔུང་མཆོག་གི་ས་བརྙེས་ནས། །ས་བདག་དཔུང་བཅས་རེངས་པའི་ལྟ་སྟངས་ཀྱིས། །རྗེས་སུ་འཛིན་མཛད་གྲུབ་པའི་དབང་ཕྱུག་རྒྱལ། །གང་ཞིག་རྡོ་རྗེ་རྣལ་འབྱོར་མས་བཟུང་བས། །གསང་ཆེན་བསྟན་པ་རྒྱས་མཛད་ནཱ་རོ་པ། །སློབ་བཤད་འཛིན་པའི་སློབ་མའི་ཚོགས་བཅས་ལ། །སྙིང་པོ་མཆོག་གི་བར་དུ་བདག་སྐྱབས་མཆི། །འཛམ་བུ་ལྗོན་པའི་ངོས་ལ་འཕྱངས་བ་ཡི། །འབྲས་བུའི་མཆོག་ལྟར་དམ་ཆོས་མངར་བའི་རོས། །སྙིགས་དུས་སྐལ་ལྡན་འགྲོ་རྣམས་ཚིམ་མཛད་པ། །ས་སྐྱའི་རྗེ་བཙུན་མཆོག་རྣམས་སྤྱི་བོས་མཆོད། །རྒྱུད་སྡེའི་རྩ་བ་རབ་བརྟན་དཔལ་ལྡན་མངོན་པར་རྟོགས་པའི་རིན་ཆེན་ལྗོན། །ཡང་དག་བརྒྱུད་པའི་མན་ངག་པད་དཀར་ཕྲེང་བས་ལེགས་མཛེས་གཞུང་འགྲེལ་གྱི། །སྣ་ཚོགས་ཡལ་ག་ལམ་བཟང་འབྲས་བུས་སྤུད་པའི་རྣམ་རོལ་དུ་མ་ཡི། །ཐུན་མོང་མཆོག་གི་འདོད་དགུ་སྦྱིན་པའི་དཔག་བསམ་ལྗོན་པ་བྲི་བར་བྱ། ༈ །འདིར་དཔྱོད་པ་དང་ལྡན་པའི་སྐྱེས་བུ་གང་དག་བྱ་བ་གང་ཞིག་ལ་འཇུག་པ་ན། ཐོག་མར་བྱ་བའི་འབྲས་བུ་ངེས་པར་བྱས་ནས་འཇུག་པ་ཡིན་པའི་ཕྱིར་ན་འདིར་ཡང་བྱ་བའི་འབྲས་བུ་གང་ཞེ་ན། ཨ་བྷི་དྷ་ན་ལས། རྡོ་རྗེའི་ས་ནི་བཅུ་གསུམ་པ། །ཞེས་གསུངས་པ་ལྟར། ས་བཅུ་གསུམ་པས་བསྡུས་པའི་ཕྱག་ཆེན་མཆོག་གི་དངོས་གྲུབ་ནི་མཐར་ཐུག་གི་འབྲས་བུ་ཡིན་ཞིང་། འདི་སྒྲུབ་པར་བྱེད་པའི་ཐབས། རྣལ་འབྱོར་ཆེན་པོའི་རྒྱུད་སྡེ་རྣམས་ལས། དབང་བཞི་དང་རིམ་པ་གཉིས་སུ་གསུངས་པར་འདྲ་ཡང་ནང་སེལ་གྱི་དབྱེ་བ། གདུལ་བྱ་སོ་སོའི་བློ་ལ་ལྟོས་ནས། རྒྱུད་སྡེ་སོ་སོའི་དགོངས་པ་མི་འདྲ་བ་བསམ་གྱིས་མི་ཁྱབ་པ་ཞིག་འབྱུང་བ་ལས། འདིར་བདེ་མཆོག་གསང་མཐའི་ལུགས་ཀྱི་རིམ་པ་གཉིས་ཡན་ལག་དང་བཅས་པ་སྟོན་པ། རྣལ་འབྱོར་དབང་ཕྱུག་ལཱུ་ཧི་པས་མཛད་པའི་དཔལ་མངོན་པར་རྟོགས་པ་ཞེས་བྱ་བ་ནི་གང་བཤད་པར་བྱ་བའི་ཆོས་སོ། །འདི་ལ་བཤད་པའི་སྔོན་དུ་འགྲོ་བ་རྣམ་པ་དྲུག་དགོས་པ་ནི་འཁོར་ལོ་བདེ་མཆོག་གི་ཆོས་འབྱུང་དུ་རྒྱས་པར་བཤད་ཟིན་པས་དེར་བལྟ་བར་བྱ་ཞིང་། འདིར་ཉེ་བར་མཁོ་བའི་སྔོན་འགྲོ་དང་བཅས་པ་ནི། དོན་ཚན་བཞིས་རྟོགས་པར་བྱ་སྟེ། མཛད་པ་པོ་སློབ་དཔོན་གྱི་ཆེ་བ་བརྒྱུད་པ་དང་བཅས་པ། དེས་མངོན་རྟོགས་ཇི་ལྟར་མཛད་པའི་ཚུལ་ཞར་བྱུང་དང་བཅས་པ། བརྩམ་བྱའི་བསྟན་བཅོས་འཕྲོས་དོན་དང་བཅས་པ། བསྟན་བཅོས་ཀྱི་བརྗོད་བྱ་མངོན་རྟོགས་ཉིད་བཤད་པའོ། །དང་པོ་ནི། ཡང་དག་པར་རྫོགས་པའི་སངས་རྒྱས་ཀྱིས། དྲང་དོན་དུ་དབང་བསྐུར་ཞིང་། གསང་སྔགས་ཀྱི་ཐེག་པ་རྣམས་ཇི་ལྟ་བ་བཞིན་དུ་རྗེས་སུ་གཏད་པ་ཕྱག་ན་རྡོ་རྗེ་ཡིན་ལ། དེས་དབང་བསྐུར་ཞིང་རྒྱུད་བྱིན་གྱིས་བརླབ་ཏེ། ཡང་དག་པའི་གདམས་ངག་གནང་བ་ནི་སློབ་དཔོན་བྲམ་ཟེ་ཆེན་པོ་ས་ར་ཧ་པ་ཞེས་བྱ་བ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པ། འཛམ་བུའི་གླིང་དུ་ལོ་བརྒྱ་ཕྲག་བཅོ་བརྒྱད་དུ་བཞུགས་པར་གྲགས་པ་དེ་ཉིད་ཡིན་ནོ། །དེས་དེ་བཞིན་དུ་བྱིན་གྱིས་བརླབས་ཤིང་གདམས་པ་ནི། སློབ་དཔོན་འཕགས་པ་ཀླུ་སྒྲུབ་ཅེས་བྱ་བ། ས་དང་པོ་ཆོས་ཉིད་བདེན་པ་མཐོང་བ། མདོ་སྡེ་དུ་མ་ནས་ལུང་བསྟན་པ། སྟོང་ཉིད་སྨྲ་བའི་སེང་གེར་གྲགས་པ་དེ་ཉིད་ཡིན་ལ། དེས་སློབ་དཔོན་བྲམ་ཟེ་ས་ར་ཧ་པ་ཆུང་ངུ་ཞེས་བྱ་བ་ལུས་དེ་ཉིད་ཀྱིས་མཆོག་གི་དངོས་གྲུབ་ཐོབ་པར་གྲགས་པ་དེ་ལ་གདམས་ཏེ། དེ་གྲོང་དང་གྲོང་ཁྱེར་རྣམས་སུ་བསོད་སྙོམས་ལ་གཤེགས་པའི་དུས་སུ། མཐར་གྱིས་འཛམ་བུའི་གླིང་ན་རྒྱལ་པོ་ཆེ་བར་གྲགས་པ། ཤྲཱི་དྷརྨཱ་ཕཱ་ལ་ཞེས་བྱ་བའི་གྲོང་ཁྱེར་དུ་བསོད་སྙོམས་ལ་གཤེགས་པའི་ཚེ། དེ་ན་རྒྱལ་པོའི་ཡི་གེ་པ་ཞེས་བྱ་བ། རྒྱལ་པོ་གཞན་ལ་ཕར་ཕྲིན་བསྐུར་བ། ཡི་གེ་རེ་རེའི་ནང་དུ་ཚིགས་སུ་བཅད་པ་རེ་རེའི་དོན་འདུས་པ་དང་། གཉིས་གཉིས་ཀྱི་དོན་འདུས་པ་བསྐུར་བ་ལ་སོགས་པ་དང་། སླར་ཚུར་ཡང་དེ་ལྟ་བུ་བསྐུར་བ་རྣམས་ཀློག་པའི་མི་གཅིག་དེ་ལྟ་བུ་ལ་ཡིད་རྩེ་གཅིག་ཏུ་བྱེད་པ་གཅིག་གཟིགས་ཏེ། དེ་ཡང་དག་པའི་གདམས་ངག་གི་སྣོད་དུ་རུང་བར་གཟིགས་ནས། སློབ་དཔོན་གྱིས་ཁྱོད་ཡང་དག་པའི་གདམས་ངག་འདོད་དམ་གསུངས་པས། ཁོ་བོ་ཅི་སྟེ་མི་འདོད་དེ་འདོད་ཅེས་བརྗོད་དོ། །འོ་ན་ཁྱོད་ལ་དབང་བསྐུར་དགོས་པས་དེའི་ཡོ་བྱད་ཚོལ་ཅིག་ཅེས་གསུངས་ཏེ། བཙལ་ནས་དབང་བསྐུར་ཏེ་ཡང་དག་པའི་གདམས་ངག་བྱིན་ཏེ། གང་ལ་ཞེན་པ་བྱུང་ན་དེ་ཡང་ཐོང་། །རྟོག་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་ཞིག་སུས་ཀྱང་བསྟན་དུ་མེད། །གསུངས་ནས་མི་སྣང་བར་གྱུར་ཏོ། །དེ་ནས་དེས་བསམས་པ། བདག་གིས་རྒྱལ་པོའི་བྱ་བ་བྱས་ན། སྒྲུབ་པ་སྙིང་པོའི་བྱ་བ་མི་འོང་། མ་བྱས་ན་བདག་གི་འཚོ་བ་གཞན་ཤིང་ཐོག་ལ་སོགས་པས་བྱས་ན་དབྱར་དང་། སྟོན་འབྱུང་ཡང་། དགུན་དང་དཔྱིད་མི་འབྱུང་། སློབ་དཔོན་བཞིན་བསོད་སྙོམས་བྱས་ན། བདག་ལྟ་བུ་ལས་དང་པོ་པ་བྱིན་པ་ལ་རྗེས་སུ་ཆགས་པ་སྐྱེ་ལ། མ་བྱིན་པ་ལ་ཁོང་ཁྲོ་སྐྱེ་བས་ཇི་ལྟར་བྱ་བསམ་ཞིང་ཕྱིན་པས། མཐར་གྱིས་བྷ་ལེན་ཏྲ་ཞེས་བྱ་བ། གངྒཱའི་འགྲམ་ན་ཉ་པའི་གྲོང་ཁྱེར་ཡོད་པ་དེ་བས་ཉ་མང་པོ་བསད་པ། དེའི་རྒྱུ་ལྟོ་རྣམས་སྤུངས་པ་མཐོང་ནས། ཁོ་བོས་འདི་བཟློག་པའི་ནུས་པ་ནི་མེད་སྙམ་སྟེ། བཟའ་བར་ཚད་པས་མི་འཇུ་བར་བྱུང་ནས་ས་ར་ཧ་པའི་གདམས་པ། ཐ་མལ་པའི་གཏུམ་མོ་དང་། འོད་ཀྱི་གཏུམ་མོ་ཁ་སྦྱར་བ་བསྒོམས་ཏེ། མེའི་ནུས་པ་བསྐྱེད་ནས། ངས་ནི་མཚན་མ་དང་རྣམ་པར་རྟོག་པའང་འཇུ་ནུས་ན། འདི་ལྟ་བུ་ཅིའི་ཕྱིར་འཇུ་མི་ནུས་སྙམ་ནས། ཁྲོས་པའི་བསམས་པ་དང་བཅས་པས་ཟོས་པས་ཞུའོ། །དེ་ནས་ཡུལ་དེ་བཏང་སྟེ། ཡུལ་གཞན་ཞིག་ཏུ་ཕྱིན་ནས་འཚོ་བ་ཉའི་རྒྱུ་ལྟོ་ལ་བརྟེན་ཏེ། སྒྲུབ་པ་སྙིང་པོར་བྱས་པས། ཟག་པ་མེད་པའི་ཡེ་ཤེས་རྒྱུད་ལ་སྐྱེས་པས་ཡུལ་ཀུན་དུ། སྔར་གྱི་ཡི་གེ་པ་དེ་ལཱུ་ཧི་པ་ཞེས་བྱ་བའི་རྣལ་འབྱོར་པ་དངོས་གྲུབ་ཐོབ་བོ་ཞེས་གྲགས་ཏེ། རྒྱལ་པོས་ཀྱང་ཐོས་ཏེ། ཡུལ་ཁམས་ཐམས་ཅད་དུ་བཙལ་བས་ཀྱང་མ་རྙེད་དོ། །དེ་ནས་སློབ་དཔོན་གྱིས་སྔར་གྱི་རྒྱལ་པོ་དེ་འདུལ་བའི་དུས་ལ་བབ་པར་གཟིགས་ནས། དེ་ཆོས་ལ་གཟུད་པར་དགོངས་ནས། རྒྱལ་པོའི་གྲོང་དུ་གཤེགས་སོ། །དེའི་དུས་སུ་རྒྱལ་པོ་དེ་ལ་རྒྱལ་ཕྲན་ཞིག་ཕྱག་འབུལ་དུ་འོངས་པས་སྲང་ཐམས་ཅད་ཕྱག་དར་བྱས། དར་གྱི་ལྡ་ལྡིས་བརྒྱན། སྤོས་ཁང་དང་བཅས། གདུགས་དང་བླ་རེས་བརྒྱན་ཅིང་། སྐྱེད་མོས་ཚལ་དུ་རྒྱལ་པོའི་ཁྲི་བཤམས་པ་མཐོང་སྟེ། སློབ་དཔོན་གྱིས་རྒྱལ་པོའི་ཁྲིའི་སྟེང་དུ་གཟིམས་ཏེ་བཞུགས་སོ། །དེར་རྒྱལ་པོ་འོངས་པའི་དུས་སུ་སྔོན་ལ་བྲམ་ཟེ་མདུན་ན་འདོན་བྱ་བ་ཤིས་པ་བརྗོད་པའི་ཚིགས་སུ་བཅད་པ་བརྗོད་ཅིང་། ཀུ་ཤ་རྣ་ལྟག་ཏུ་གཟེར། རིལ་བ་སྤྱི་བླུགས་དང་ཚངས་སྐུད་དང་བཅས་པ་འོངས་ཏེ། སྲང་ལ་སོགས་པ་ན་མི་གཙང་བ་ལ་སོགས་པ་རྣམས་དག་པར་བྱེད་པ་དེ་སྔོན་ལ་འོངས་པས། མི་མདོག་སྔོ་བ་ཉི་ལྷགས་ཀྱིས་ཁྱེར་བ་སྐྲ་འཛིངས་པ་གོས་མེད་པ། ཉའི་རྒྱུ་མ་ཟ་བ་ཞིག རྒྱལ་པོའི་ཁྲི་ཁ་ན་འདུག་པ་མཐོང་ནས་སླར་ལོག་སྟེ་རྒྱལ་པོ་ལ་བསྙད་པས། དེ་ཐོན་ཅིག་ཟེར་ནས་བཏོན་པས་བྲམ་ཟེས་མ་ཐོན། མི་གཞན་མང་པོས་ཀྱང་གྲོགས་བྱས་ཏེ་བཏོན་པས་ཀྱང་རི་ཆེན་པོ་ལ་འཇུས་པ་དང་འདྲ་བར་འདུག་སྟེ་མ་ཐོན། སླར་བྲམ་ཟེ་ལ་སྡང་མིག་བལྟ་ཞིང་གླུ་བླངས་པ། འཇིག་རྟེན་གསུམ་འདི་རྒྱ་ཁྱོན་ཇི་ཙམ་ཡིན། །ཞི་བ་མ་ལུས་པ་འདི་ཇི་ཙམ་ཡིན། །རྒྱལ་པོ་དེ་ཉིད་གཅིག་གཅིག་མི་བདག་ཡིན། །མི་བདག་གཞན་ནི་དེ་ཡི་གཡོག་ཡིན་ན། །བློ་བཟང་དམ་པ་གཞན་གྱི་སྤྱོད་པ་ལ། །བཞད་གད་དག་ཏུ་བྱེད་པ་ངོ་མཚར་ཆེ། །ཨེ་མ་འཁོར་བ་ངོ་མཚར་རེ་ཆེ་ཨང་། །མང་དུ་སྨྲས་པ་གཞན་གྱིས་ཅི་ཞིག་བྱ། །ཞེས་གླུ་བླངས་སོ། །དེ་ནས་བྲམ་ཟེ་དེ་དག་གིས་རྒྱལ་པོ་ལ་བསྙད་དེ་མ་ཐོན་བྱས་པས། རྒྱལ་པོ་ན་རེ། དེ་ཉིད་བལྟ་བའི་ཕྱིར་འདོང་ངོ་ཞེས་ཟེར་ཏེ། དཔུང་དང་བཅས་པས་ཕྱིན་པས། སློབ་དཔོན་གྱིས་སྡང་མིག་བལྟས་པས་ཐམས་ཅད་རེངས་སོ། །དེར་བློན་པོ་རིགས་པ་ཅན་ཞིག་གིས་དངོས་གྲུབ་ཐོབ་པར་ཤེས་ནས་གུས་པར་བྱས་པས་གྲོལ་ལོ། །དེས་རྒྱལ་པོ་ལ་གུས་པ་གྱིས་ཤིག་ཅེས་བྱས་པས། དེ་བཞིན་དུ་བྱས་པས་རྒྱལ་པོ་གྲོལ་ལོ། །གཞན་ཐམས་ཅད་ཀྱིས་ཀྱང་དེ་བཞིན་དུ་བྱས་པས། ལུས་ངག་རེངས་པ་དང་སེམས་མྱོས་པ་ལས་གྲོལ་ལོ། །དེ་ནས་རྒྱལ་པོས་ཁྱོད་སུ་ཡིན་བྱས་པས། སློབ་དཔོན་ན་རེ། ཁྱོད་ཀྱང་སུ་ཡིན་གསུངས་སོ། །རྒྱལ་པོས་ང་རྒྱལ་པོ་ཡིན་བྱས་པས། སློབ་དཔོན་ན་རེ་ངའང་རྒྱལ་པོ་ཡིན་གསུངས་སོ། །རྒྱལ་པོ་ན་རེ་ཁྱོད་ལ་རྒྱལ་པོའི་ལོངས་སྤྱོད་མལ་སྟན་དང་། ཆུང་མ་དང་། བསིལ་ཡབ་དང་། སྒྲོན་མ་ལ་སོགས་པ་མི་འདུག་པ་བྱས་པས། སློབ་དཔོན་གྱིས་གླུ་བླངས་པ། ས་གཞི་མལ་སྟན་ཆེན་པོ་ལག་ངར་སྔས་ནི་འབོལ་ལ་འཁྲིལ། །ཉི་ཟླའི་སྒྲོན་མ་བསིལ་ཡབ་རྗེས་སུ་མཐུན་པའི་རླུང་། །ནམ་མཁའི་བླ་རེ་ཆགས་པ་ལས་གྲོལ་སྟོང་པའི་བུད་མེད་ལ་སྤྱོད་དེ། །ཨེ་མ་རྒྱལ་ལྟར་སྲིད་ལ་མི་འཇིགས་རྣལ་འབྱོར་བདེ་གནས་རྒྱལ་པོ་ཡིན། །ཞེས་གསུངས་པས་རྒྱལ་བློན་གཉིས་དད་ནས་ཞབས་ལ་འཇུས་ཏེ། ཡང་དག་པའི་གདམས་ངག་ཞུ་བྱས་པས། ཁྱེད་ནི་རིགས་སྙེམས་པའི་གང་ཟག་ཡིན་པས་ཁྱེད་སྣོད་དུ་མི་རུང་ངོ་གསུངས་པས། རྒྱལ་བློན་གཉིས་ཀྱིས་རྒྱལ་སྲིད་ཀྱི་བྱ་བ་བཏང་སྟེ། ཞབས་ལ་འཇུས་པས། དཀྱིལ་འཁོར་དུ་བཅུག་ནས་དབང་བསྐུར་ཏེ། ཡང་དག་པའི་གདམས་ངག་གནང་སྟེ། རྒྱལ་པོ་ལ་ཁྱོད་ཟས་ཀྱི་བྱ་བ་ཅི་ལ་དགའ་གསུངས་པ་ལ། བྱ་བ་རྣམས་ནི་བློན་པོས་བྱེད་པས། ཁོ་བོ་ནི་རྟག་ཏུ་ཆང་འཐུང་བས་ཆང་ལ་དགའ་འོ་ཞེས་བྱས་པས། འོ་ན་ཤར་ལྷོ་ན་ཨོ་ཊི་བི་ཤ་ཞེས་བྱ་བ་དེའི་བྱེ་བྲག་ཙ་རི་ཊ་པ་ཏ་ཞེས་བྱ་བ་ན་ཤིན་ཏུ་ཆང་མང་བས་དེར་སོང་ལ་འབྲས་བརྡུང་གྱིས་ཤིག་ཅེས་གསུངས་ཏེ་བཏང་ངོ་། །དེས་ན་འབྲས་བརྡུང་བ་ལ་ཌེམ་གི་ཞེས་ཟེར་བས་ཌེམ་གི་པར་གྲགས་སོ། །བློན་པོ་ལ་ཁྱོད་ཅི་ལ་དགའ་བྱས་པས། ཁོ་བོ་ནི་རྟག་ཏུ་རྒྱལ་པོའི་བྱ་བ་བྱེད་དགོས་པས་དེ་ལ་ཆང་འཐུངས་ན་བྱ་བ་མི་འགྲུབ་པས། གོ་ལ་ལ་དགའ་འོ་བྱས་པས། འོ་ན་ལྷོ་ཕྱོགས་ཌཱ་ཀི་ནཱི་པཱ་ཏ་ཞེས་བྱ་བའི་བྱེ་བྲག་ཀཉྩི་ན་གར་ཞེས་བྱ་བར་སོང་ལ། སྨད་འཚོང་མའི་གཡོག་གྱིས་ཤིག་གསུང་སྟེ་བཏང་། དེས་ན་སྨད་འཚོང་མ་ལ་དཱ་རི་ཟེར་བས་དེའི་གཡོག་བྱས་པས་དཱ་རི་ཀ་པར་གྲགས་སོ། །དེའི་ཚེ་རྒྱལ་བློན་གཉིས་ཀྱི་དོན་དུ་དཔལ་མངོན་པར་རྟོགས་པ་མཛད་དོ། །རྒྱལ་པོ་ཨོ་ཊི་བི་ཤ་བ་དང་བཅས་པ་མཁའ་སྤྱོད་དུ་གཤེགས་པས་དེའི་བརྒྱུད་པ་མེད། བློན་པོ་དཱ་རི་ཀ་པ་ནས། རྡོ་རྗེ་དྲིལ་བུ་པ། རུས་སྦལ་ཞབས་ཅན། ཛ་ལེན་དྷ་རི་པ། ནག་པོ་སྤྱོད་པ་བ། གུ་ཧེ་པ། རྣམ་པར་རྒྱལ་བའི་ཞབས་ཅན། ཏཻ་ལོ་པ་རྣམས་ལ་རིམ་པ་བཞིན་དུ་བརྒྱུད་པ་ཡིན་ལ། ལཱུ་ཧི་པ་འདི་ནི་ཉེ་བརྒྱུད་དཱ་རི་ཀ་པ་ནས། ཨནྟར་པ་སྟེ་བར་མའི་སློབ་དཔོན། དེ་ནས་ཏཻ་ལོ་པ་ལ་བརྒྱུད་པ་ཡིན་ནོ། །དེའི་སློབ་མ་ནཱ་རོ་པ། དེ་ལ་སློབ་མ་བསམ་གྱིས་མི་ཁྱབ་པའི་ནང་ནས་གཙོ་བོར་གྱུར་པ་གཉིས་སྐྱེས་མཆོག་གསུམ་སྟེ་བཞིར་གྲགས་སོ། །གཉིས་སྐྱེས་ནི་རིགས་བྲམ་ཟེ་ཡིན་པས་གཉིས་སྐྱེས་ཞེས་བྱ་ལ། རྟེན་དགེ་སློང་ཡིན་ནོ། །མཆོག་གསུམ་ནི་མཱ་ན་ཀ་ཤྲཱི་ཛྙཱ་ན་དང་། པྲཛྙཱ་རཀྵི་ཏ་དང་། བལ་པོ་ཕམ་འཐིང་པ་དང་གསུམ་ཡིན་པར་བཤད་ཅིང་། དང་པོ་གཉིས་ཀྱི་སློབ་མ་ནི་ཀ་ན་ཀ་ཤྲཱི་ཛྙཱ་ནའོ། །ཀ་ན་ཀ་ཤྲཱི་དང་། ཕམ་འཐིང་པ་གཉིས་ཀའི་སློབ་མ། ཇོ་བོ་བྷ་ཌཎ་ཏ་ཡིན། འདིའི་ཡུལ་བལ་པོ། མཚན་དངོས་ནི་སུ་མཱ་ཏི་ཀིརྟི་ཞེས་བྱ་སྟེ། སྒྲ་ཚད་ལ་ཤིན་ཏུ་མཁས། ཕྱིས་རྒྱ་ནག་ཏུ་བྱོན་ནས་དེར་སྐུ་གཤེགས། འདིའི་སློབ་མ་རྔོག་ལོ་ཙྪ་བ། ཟངས་དཀར་ལོ་ཙྪ་བ། ཀློག་སྐྱ། མལ་གྱོ། མར་པ་དོ་པ། རྗེ་བཙུན་པུ་ཧྲངས་ལོ་ཆུང་རྣམས་ཡིན་པ་ལས། ཕྱི་མ་གཉིས་ཀྱི་སློབ་མ་དངོས་གྲུབ་ཤེས་རབ། དེ་ནས་རིམ་བཞིན་བྲོག་ར་བ་ཤེར་རྒྱལ། ཞིང་རིངས་པ། བླ་མ་ལྷ་རྗེ། གློ་བོ་ལོ་ཙྪ་བ་ཤེས་རབ་རིན་ཆེན་གྱི་བར་དུ་བརྒྱུད་དེ། དེ་ལ་ཡང་དམར་ཆོས་ཀྱི་རྒྱལ་པོས་གསན་ནོ། །ཡང་རྗེ་བཙུན་པུ་ཧྲངས་ལོ་ཆུང་གྲགས་མཆོག་ཤེས་རབ་ལ། རྗེ་ས་ཆེན་དང་། དམར་བརྩོན་འགྲུས་རྒྱལ་མཚན་གྱིས་གསན། དམར་ཆེན་པོ་འདིས་ལ་སྟོད་ཀྱི་ཤྲཱིའི་དགོན་པ་མཁན་དམར་ཞེས་བྱ་བར་གད་ལོགས་ལ་ཕུག་པ་སུམ་བརྩེགས་བྲུས་ནས་གོང་མར་རྗེ་བཙུན་པུ་ཧྲངས་པ་བཞུགས། བར་མར་དམར་ཆེན་པོ་བཞུགས། འོག་མར་གཡོས་ཁང་བྱས་ནས་རྗེ་བཙུན་པུ་ཧྲངས་པ་མཁའ་སྤྱོད་དུ་གཤེགས་པའི་ཚེ་འདིས་སློབ་མ་རྣམས་ལ་ཁྲིད་བསྐྱངས། ལཱུ་ནག་དྲིལ་གསུམ་གྱི་བསྐྱེད་རྫོགས་ལ་མན་ངག་ཡི་གེར་བྲིས་པའི་ཡིག་ཆ་ཡང་མང་དུ་མཛད་དོ། །དེའི་དབོན་པོ་དམར་བརྩོན་འགྲུས་རྡོ་རྗེ། དེའི་དབོན་པོ་དམར་ཆོས་ཀྱི་རྒྱལ་པོ་སྟེ། འདིས་རང་གི་བླ་མ་བརྩོན་འགྲུས་རྡོ་རྗེ་དང་། རྗེ་བཙུན་དང་། ནུབ་པ་རིགས་འཛིན་གྲགས་དང་། ས་སྐྱ་པཎྜི་ཏ་ཡུན་རིང་དུ་བསྟེན་ཏེ། བདེ་དགྱེས་ཀྱི་མན་ངག་ཐམས་ཅད་ཀྱི་བདག་པོ་ལྟ་བུར་བཞུགས་སོ། །ཡང་ཕམ་འཐིང་པ་སྐུ་མཆེད་བཞི་ལས། གཅེན་ཆོས་ཀྱི་བློ་གྲོས་ཀྱིས་ནཱ་རོ་པ་ལོ་བཅུ་གཉིས་བསྟེན། དེ་གདན་འདྲེན་པ་ལ་གཅེན་འཇིགས་མེད་གྲགས་པ་བྱོན། ཆོས་ཀྱི་བློ་གྲོས་ཀྱི་ཞལ་ནས། ཁྱོད་ཀྱིས་ངའི་བླ་མའི་ཞབས་ཐོག་གྱིས། ང་རྒྱ་ནག་རི་བོ་རྩེ་ལྔར་འགྲོ་ཟེར་ནས་གར་སོང་ཆ་མེད་དུ་གཤེགས། འཇིགས་མེད་གྲགས་པས་ནཱ་རོ་པ་ལོ་དགུ་བསྟེན། འདི་ལ་བལ་ཡུལ་ན་ཨ་དེས་པར་གྲགས། བོད་དུ་ཕམ་འཐིང་པ་ཆེན་པོར་གྲགས། དེ་གདན་འདྲེན་པ་ལ་གཅུང་དུས་འཁོར་བ་བྱོན། དེས་ནཱ་རོ་པ་ལོ་ལྔ་བསྟེན། འདི་ལ་བལ་པོ་མཻ་ཏྲི་པ་ཡང་ཟེར། དེ་གདན་འདྲེན་པ་ལ་ཐང་ཆུང་བས་བྱོན། དེས་ཀྱང་ནཱ་རོ་པ་ལས་དབང་བསྐུར་ཐོབ། ངག་གི་དབང་ཕྱུག་ཆུང་ངུ་གྲུབ་པས། བལ་པོ་ངག་གི་དབང་ཕྱུག་ཏུ་ཡང་གྲགས་སོ། །ཕམ་འཐིང་པ་སྐུ་མཆེད་ཀྱི་དྲུང་དུ་ཀློག་སྐྱ་ཤེས་རབ་བརྩེགས་ཀྱིས་ལོ་མང་དུ་བཞུགས་ནས་གདམས་པ་ཞུས། དེ་ལ་ཐོག་མར་མལ་གྱོ་ལོ་ཙྪ་བས་ཞུས། ཕྱིས་མལ་གྱོ་ཉིད་ཀྱིས་ཕམ་འཐིང་པ་ཆེན་པོ་ལ། དབང་དང་གདམས་པ་ཅུང་ཟད་ཐོབ་ཅིང་། དུས་འཁོར་བ་དང་། ཐང་ཆུང་བ་དང་། སུ་མཱ་ཏི་ཀིརྟིའི་དྲུང་དུ་ལེགས་པར་སྦྱངས་སོ། །དེའི་དྲུང་དུ་མཚན་བརྗོད་པར་དཀའ་བ་རྗེ་ས་སྐྱ་པ་ཆེན་པོས་བྱོན་ནས་དབང་དང་གདམས་པ་མ་ལུས་པར་གསན་ཏེ། དེ་ནས་རིམ་པ་བཞིན། རྗེ་བཙུན་དམ་པ་མུས་ཆེན་དཀོན་མཆོག་རྒྱལ་མཚན་དཔལ་བཟང་པོའི་བར་དུ་བརྒྱུད་དེ། དེའི་དྲུང་དུ་བདག་གིས། གསང་མཐའི་རྩ་བཤད་ཀྱི་རྒྱུད་དང་། གཞུང་ཕྲན་རྣམས་ཀྱི་བཤད་པ་དང་ལུང་། ལཱུ་ནག་དྲིལ་གསུམ་གྱི་སྨིན་བྱེད་ཀྱི་དབང་། བསྐྱེད་རྫོགས་ཀྱི་མན་ངག་རྣམས་ཚང་བར་ཞུས་སོ། །གཉིས་པ་ལ་གསུམ་སྟེ། རྩ་བཤད་ཀྱི་རྒྱུད་གང་ལ་བརྟེན་པ། དེ་ལ་བརྟེན་པའི་མངོན་རྟོགས་ཀྱི་སྐོར་ཇི་ཙམ་བྱུང་བ། དེ་དག་གི་བརྗོད་བྱ་ལམ་མངོན་པར་རྟོགས་པའི་རྣམ་པར་གཞག་པའོ། །དང་པོ་ནི། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། ཇི་སྲིད་མདོ་བྱ་སྤྱོད་པ་དང་། །རྣལ་འབྱོར་གསང་མཐའི་དབྱེ་བ་ཡིས། །སེམས་ཅན་མོས་པ་སྣ་ཚོགས་པ། །དེ་དང་དེ་ལ་དགའ་བ་ཡིན། །ཞེས་དང་། ཀུན་སྤྱོད་ལེའུ་བཅུ་དྲུག་པ་ལས་ཀྱང་། མདོ་དང་བྱ་བ་སྤྱོད་པ་རྣམས། །རྣལ་འབྱོར་གསང་སོགས་དབྱེ་བ་ཉིད། །ཅེས་གསུངས་པའི་དོན་རྗེ་བཙུན་རྩེ་མོས། མདོ་སྡེ་རྟོག་པའི་རྒྱུད། བྱ་བའི་རྒྱུད་ཅེས་བྱ་རྒྱུད་ལ་གཉིས་སུ་བྱས་ནས་སྤྱོད་པའི་རྒྱུད་དང་། རྣལ་འབྱོར་གྱི་རྒྱུད་དང་། རྣལ་འབྱོར་ཆེན་པོ་གསང་བའི་རྒྱུད་དང་། གསང་བའི་མཐའི་རྒྱུད་དེ་རྒྱུད་སྡེ་དྲུག་ཏུ་མཛད་ལ། གཉན་ཕུལ་བྱུང་བ་དང་། རྗེ་བཙུན་གྱིས་མདོ་ཞེས་པས། ཕ་རོལ་ཏུ་ཕྱིན་པའི་སྡེ་སྣོད་ལོགས་སུ་བསྟན་པས། རིག་པ་འཛིན་པའི་སྡེ་སྣོད་ལ་བྱ་བ་དང་། སྤྱོད་པ་དང་། རྣལ་འབྱོར་དང་། རྣལ་འབྱོར་ཆེན་པོ་དང་། གསང་བ་དང་། གསང་བའི་མཐའ་དང་དྲུག་ཏུ་མཛད་དེ་གང་ལྟར་ཡང་དྲུག་པ་གསང་བའི་མཐའ་ལ། རྩ་བའི་རྒྱུད་དང་། བཤད་པའི་རྒྱུད་གཉིས་ལས། དང་པོ་ལ་རྒྱུད་རྒྱས་པ་ལེའུ་འབུམ་པ། དེ་རྩོད་དུས་སུ་བཤད་ཉན་མ་ནུས་པས། དེ་ལས་བསྡུས་པ་ཤླཽ་ཀ་འབུམ་པ། དེ་ཡང་རྩོད་དུས་སུ་མི་འགྲུབ་པས། དེ་ལས་བསྡུས་པ་ཡི་གེ་འབུམ་པ་ལེའུ་ལྔ་བཅུ་རྩ་གཅིག་པ་འདི་གསུངས་ཞེས་རྗེ་བཙུན་གྱིས་ཧེ་རུ་ཀའི་བྱུང་ཚུལ་ལས་བཤད་ཅིང་། ཀུན་སྤྱོད་ཀྱི་ཊཱི་ཀ་དང་། གཉན་ཕུལ་བྱུང་བས་རྒྱུད་རྒྱས་པ་ནམ་མཁའ་དང་མཉམ་པ་འབུམ་ཕྲག་གསུམ་པ་བསྡུས་པ་ལེའུ་ལྔ་བཅུ་རྩ་གཅིག་པ་འདི་ཉིད་ཡིན་པར་གསུངས་ལ། ཀུན་སྤྱོད་ལས། ནམ་མཁའ་དང་ནི་མཉམ་པའི་རྒྱུད། །འབུམ་གཅིག་ན་ཡང་འདི་བཤད་དེ། །ཞེས་དང་། ཕྱག་རྡོར་བསྟོད་འགྲེལ་ལས་ཀྱང་། རྒྱུད་རྒྱས་པ་ནམ་མཁའ་དང་མཉམ་པ་འབུམ་ཕྲག་གཅིག་ཡིན་པར་བཤད་དེ། གདུལ་བྱའི་བློའི་བྱེ་བྲག་གིས་རྒྱས་བསྡུས་སྣ་ཚོགས་སུ་སྣང་བ་མི་འགལ་བར་སེམས་སོ། །དེ་ལྟར་ན་བཤད་བྱ་རྩ་བའི་རྒྱུད་བསྡུས་པ་ལེའུ་ལྔ་བཅུ་རྩ་གཅིག་པ་འདི་ཉིད་ལ། འཆད་བྱེད་བཤད་རྒྱུད་ཀྱི་ཚུལ་རྣམ་པ་བཞི་ཡོད་དེ། མ་རྒྱུད་སྤྱི་དང་མཐུན་པར་བཤད་པ། གསང་འདུས་འཕགས་ལུགས་དང་མཐུན་པར་བཤད་པ། དུས་ཀྱི་འཁོར་ལོ་དང་མཐུན་པར་བཤད་པ། གསང་མཐའ་ལྟར་བཤད་པའོ། །དང་པོ་ནི་བདེ་མཆོག་སངས་རྒྱས་མཉམ་སྦྱོར་ལྟ་བུ་སྟེ། མ་རྒྱུད་སྤྱི་དང་མཐུན་པའི་སྨིན་གྲོལ་སྟོན་པའོ། །གཉིས་པ་ནི་སྡོམ་འབྱུང་སྟེ། འདི་ཉིད་ཀྱི་ལེའུ་གཉིས་པར། སྲིད་པ་སྐྱེ་བའི་རིམ་པ་རྒྱས་པར་བཤད་ནས། དེ་ཉིད་ལ་བསྐྱེད་རིམ་ཞེས་པའི་ཐ་སྙད་མཛད་ཅིང་། རྣམ་གཞག་རིམ་པའི་སྦྱང་གཞི་སྦྱོང་ཚུལ་གྱི་རྣམ་གཞག་འདི་ཁོ་ན་ལྟར་སྣང་བའི་ཕྱིར་དང་། དཀྱིལ་འཁོར་གྱི་གཙོ་བོ་ཞལ་གསུམ་ཕྱག་དྲུག་པའི་རྣམ་གཞག་ཀྱང་འཕགས་ལུགས་དང་མཐུན་པར་སྣང་བའི་ཕྱིར་དང་། རྫོགས་རིམ་ལ་ཡང་དབེན་གསུམ་དང་། འོད་གསལ་དང་། ཟུང་འཇུག་གི་རྣམ་གཞག་མཛད་པའི་ཕྱིར་རོ། །གསུམ་པ་ནི་བཤད་རྒྱུད་མཁའ་འགྲོ་རྒྱ་མཚོ་སྟེ། བསྐྱེད་པའི་རིམ་པ་ལ་ས་དུམ་བུ་བཅུ་གཉིས་དང་བསྟུན་ནས། འཁོར་ལོ་བཅུ་གཉིས་ཀྱི་རྣམ་གཞག་མཛད་པ་དང་། རྫོགས་རིམ་ལ་སྦྱོར་བ་ཡན་ལག་དྲུག་གི་རྣམ་གཞག་མཛད་པའི་ཕྱིར་རོ། །བཞི་པ་ནི་སློབ་དཔོན་སྐར་རྒྱལ་ཟླ་བས། རྩ་རྒྱུད་ཀྱི་འགྲེལ་པ་རིན་པོ་ཆེའི་ཚོགས་ལས། འབྱུང་དང་མཁའ་འགྲོ་ཀུན་སྤྱོད་དང་། །ཁ་སྦྱོར་རྒྱུད་དང་བླ་མ་སྟེ། །བཤད་རྒྱུད་རྣམ་པ་ལྔ་རུ་འདོད། །ཅེས་གསུངས་པ་ལྟར། བཤད་རྒྱུད་རྣམ་པ་ལྔའི་སྒོ་ནས་རྩ་རྒྱུད་འཆད་པ་སྟེ། དེ་ཡང་རྩ་བའི་རྒྱུད་ཀྱི་ལེའུ་དང་པོ་ལས། གསང་བ་མཆོག་གི་དགྱེས་པ་ན། །ཞེས་བྱ་བ་ལ་སོགས་པས་བསྐྱེད་པའི་རིམ་པ་མདོར་བསྟན། ལེའུ་བཞི་པར་བསྐྱེད་པའི་རིམ་པའི་དེ་ཁོ་ན་ཉིད་བཞི་བསྟན། ལེའུ་སུམ་ཅུ་རྩ་གཉིས་པར་རྟེན་འབྱུང་བ་རིམ་བརྩེགས་བསྒོམ་པ་བརྡའི་སྐད་ཀྱིས་བཤད་པ་དང་། བརྟེན་པ་ལྷ་གཙོ་བོ་ཧེ་རུ་ཀ་ཕྱག་བཞི་པ་ནས་ཕྱག་འབུམ་པའི་བར་དུ་བསྒོམ་པ་བསྟན། ལེའུ་བཞི་བཅུ་རྩ་བརྒྱད་པར་བསྐྱེད་པའི་རིམ་པ་བསྒོམ་པའི་གནས་དང་། དཀྱིལ་འཁོར་གྱི་ལྷ་རྫོགས་པར་བསྒོམ་པ་བསྟན། ལེའུ་ལྔ་བཅུ་པའི་ཞབས་སུ་གནས་ལ་སོགས་པའི་སྒོ་ནས་རྟེན་དང་བརྟེན་པའི་དཀྱིལ་འཁོར་བསྒོམ་པ་བསྟན། ལེའུ་ལྔ་བཅུ་རྩ་གཅིག་པ་ནས། རི་སྟེང་སྣ་ཚོགས་པདྨ་ཡི། །ཞེས་པ་ལ་སོགས་པ་ལྷ་སུམ་ཅུ་རྩ་བདུན་བསྐྱེད་པའི་ཆོ་ག་དང་བཅས་པ་གསུངས་ཀྱང་བསྐྱེད་པའི་རིམ་པ་གསལ་བར་མ་གསུངས་པས་བཤད་པའི་རྒྱུད་རྣམས་ཀྱི་ཐོག་མ་ཁོ་ནར། གཙོ་བོར་བསྐྱེད་པའི་རིམ་པ་གསལ་བར་སྟོན་པའི་རྒྱུད་མངོན་པར་རྟོགས་པའི་རྒྱུད་བླ་མ་གསུངས་པས། དེ་ལ་ཐོག་མར་གླེང་གཞི་བསྟན་པ་ཡིན་ནོ། །ཡང་རྩ་བའི་རྒྱུད་ཀྱི་ལེའུ་དང་པོའི་ཞབས་སུ། རི་བོ་ཚང་ཚིང་རི་སུལ་ལམ། །ཞེས་པ་ལ་སོགས་པས་དཀྱིལ་འཁོར་བྲི་བའི་གནས་གསུངས། ལེའུ་གཉིས་པར་དཀྱིལ་འཁོར་བསྟན། ལེའུ་གསུམ་པར་དཀྱིལ་འཁོར་དུ་འཇུག་པ་དང་། དབང་བསྐུར་བའི་ཆོ་ག་གསུངས་ཀྱང་། སློབ་དཔོན་གྱི་ལས་ལ་སོགས་པ་གསལ་བར་མ་གསུངས་པས། སློབ་དཔོན་གྱི་ལས་ལ་སོགས་པ་གསལ་བར་སྟོན་པ་ཧེ་རུ་ཀ་མངོན་པར་འབྱུང་བའི་རྒྱུད་གསུངས། ཡང་རྩ་བའི་རྒྱུད་ལས། ལས་དང་པོ་པའི་ཆོ་གའི་ཡན་ལག་ལེའུ་སུམ་ཅུ་རྩ་གཅིག་པ་ལས་ལག་པའི་མཆོད་པ་བསྟན། ལེའུ་ཉི་ཤུ་རྩ་བདུན་པ་ལས་གཏོར་མའི་མཆོད་པ་བསྟན་ཀྱང་། ལག་པའི་མཆོད་པ་དང་། ཕྱིའི་མཆོད་པ་དང་། གཏོར་མའི་མཆོད་པ་ལ་སོགས་པ་གསལ་བར་མ་གསུངས་པས། རྩ་བའི་རྒྱུད་ཀྱི་ཆོ་གའི་ཡན་ལག་གསལ་བར་སྟོན་པའི་བཤད་པའི་རྒྱུད་མཁའ་འགྲོ་མ་ཀུན་ཏུ་སྤྱོད་པ་རྟོག་པ་དྲུག་ཅུ་རྩ་བཞི་པ་གསུངས། ཡང་རྩ་བའི་རྒྱུད་ཀྱི་ལེའུ་བཞི་བཅུ་རྩ་གཅིག་པ་ལས། ལས་ཆེན་བཅུ་གཉིས་འདི་དག་ནི། །ཞེས་གསུངས་པས་ཞལ་བཞི་པའི་སྔགས་ལ་བརྟེན་ནས། ལས་བཅུ་གཉིས་བསྒྲུབ་པ་ཙམ་གསུངས་ཀྱང་ལས་བཅུ་གཉིས་པོ་བསྒྲུབ་པ་གསལ་བར་མ་གསུངས་པས་དེ་གསལ་བར་བྱ་བའི་ཕྱིར། རྩ་བའི་རྒྱུད་ཀྱི་ལས་ཚོགས་གསལ་བར་སྟོན་པའི་བཤད་པའི་རྒྱུད་རྡོ་རྗེ་མཁའ་འགྲོ་གསུངས། ཡང་རྩ་བའི་རྒྱུད་ཀྱི་ལེའུ་དང་པོར། གསང་བ་མཆོག་གི་དགྱེས་པ་ན། །ལ་སོགས་པ་དང་། མཆོད་གཞི་དཔའ་བོ་ཆེན་པོ་ནི། །ཞེས་པ་ལ་སོགས་པས་རྫོགས་པའི་རིམ་པ་མདོར་བསྟན། ལེའུ་བཞི་པ་དང་། སུམ་ཅུ་རྩ་བཞི་པ། རྩ་ལྔ་པ། རྩ་དྲུག་པ། སུམ་ཅུ་རྩ་བདུན་པ་རྣམས་ཀྱིས། ཕྱག་རྒྱ་བཞིའི་རྫོགས་པའི་རིམ་པ་ལ་སོགས་རྒྱས་པར་བཤད་པ་བྱས་ནས་གསུངས་ཀྱང་། རྫོགས་པའི་རིམ་པ་གསལ་བར་མ་གསུངས་པས་རྫོགས་པའི་རིམ་པ་གསལ་བར་སྟོན་པའི་བཤད་པའི་རྒྱུད་ཀུན་ཏུ་ཁ་སྦྱོར་གསུངས་ཏེ། འདི་ནི་ཐུན་མོང་གི་བཤད་པའི་རྒྱུད་ཡིན་པས་འདི་ལ་གླེང་གཞི་བསྟན་པ་ཡིན་ཞེས་གསུངས་སོ། །བླ་མ་ཕམ་འཐིང་པ་ལ་སོགས་པ་རྣམས་ནི་འཁོར་ལོ་བདེ་མཆོག་གི་བཤད་པའི་རྒྱུད་ལྔ་པོ་དེ་ལ་བཞེད། ནཱ་རོ་པའི་སློབ་མ་རྒྱ་གར་དཱ་རི་ཀ་པ་ནི་ལྔ་པོ་དེའི་སྟེང་དུ། རྣལ་འབྱོར་མ་བཞི་ཁ་སྦྱོར་གྱི་རྒྱུད་ཅེས་བྱ་བ་དང་། མཁའ་འགྲོ་རྒྱ་མཚོ་དང་བདུན་དུ་བཞེད་ཅིང་། བདེ་མཆོག་སྡོམ་འབྱུང་ནི་བཤད་རྒྱུད་ཡིན་ཀྱང་། ནཱ་རོ་པ་ལ་བཤད་བཀའ་མི་བཞུགས་པ་ཡིན་ནོ་ཞེས་བཞེད་དོ། །གཉིས་པ་ནི་རྗེ་བཙུན་གྱིས་མངོན་པར་རྟོགས་པའི་དབང་དུ་བྱས་ན་སྐོར་བཞི་ཞེས་གྲགས་ཏེ། ལཱུ་ཧི་པའི་སྐོར། དྲིལ་བུ་པའི་སྐོར། ནག་པོ་པའི་སྐོར། རི་ཁྲོད་མགོན་པོའི་བསྐོར་རོ་ཞེས་གསུངས་ཤིང་གཞན་དག དང་པོ་གསུམ་གྱི་སྟེང་དུ་ཀོང་ཀ་ན་རྒྱལ་བ་བཟང་པོའི་སྐོར་དང་བཞིར་བྱས་པ་ཡང་ཡོད་དོ། །དང་པོ་ནི་སློབ་དཔོན་ལཱུ་ཧི་པས་དཔལ་མངོན་པར་རྟོགས་པ་མཛད་པ་ནི་མ་ལྟ་བུ་ཡིན་ལ། པྲཛྙཱ་རཀྵི་ཏས། དེའི་འགྲེལ་པ་དང་། ཕྱི་རོལ་མཆོད་པའི་ཆོ་ག་དང་། ལག་མཆོད་དང་། གཏོར་མའི་ཆོ་ག་སྟེ་བཞི་མཛད་པ་ནི་བུ་ལྟ་བུ་སྟེ། ལཱུ་ཧི་པ་སྨད་ལྔར་གྲགས་སོ། །གཉིས་པ་ནི་གྲུབ་ཆེན་དྲིལ་བུ་པས། ལུས་དཀྱིལ་ལ་བརྟེན་པའི་གཞུང་གསུམ་མཛད་དེ། འདི་ལ་སྨིན་པར་བྱེད་པ་དང་། གྲོལ་བར་བྱེད་པ་གཉིས། དང་པོ་ནི། གདུལ་བྱ་དབང་རྟུལ་དང་། དབང་འབྲིང་ལ་ཕྱིའི་དཀྱིལ་འཁོར་དུ་རྒྱུད་སྨིན་ནས་ལུས་དཀྱིལ་བསྒོམ་རུང་གི་དབང་བསྐུར་བ་དང་། དབང་རྣོན་ལ་དང་པོ་ཉིད་ནས་སྨིན་བྱེད་དུ་རུང་བའི་དབང་དུ་བྱས་ནས་དཀྱིལ་འཁོར་གྱི་ཆོ་ག་མཛད། གཉིས་པ་ལ། ཕྱི་རོལ་གྱི་རྣམ་རྟོག་སྤངས་ནས་ལུས་དཀྱིལ་འབའ་ཞིག་བསྒོམ་པའི་བསྐྱེད་པའི་རིམ་པའི་གཞུང་དང་། རྫོགས་རིམ་རིམ་པ་ལྔ་པའི་གཞུང་གཉིས་མཛད་དོ། །གསུམ་པ་ནི། ནག་པོ་སྤྱོད་པ་བས་ཧེ་རུ་ཀའི་བཀའ་ལ་བརྟེན་ནས་བསྐྱེད་རྫོགས་ཀྱི་གཞུང་དྲུག་མཛད་དེ། འདི་ལའང་སྨིན་པར་བྱེད་པ་དང་། གྲོལ་བར་བྱེད་པ་གཉིས་ལས། དང་པོ་ནི་རྩ་རྒྱུད་དང་། རྡོ་རྗེ་མཁའ་འགྲོ་དང་། ཧེ་རུ་ཀ་མངོན་འབྱུང་ལ་བརྟེན་ནས་དཀྱིལ་འཁོར་གྱི་ཆོ་ག་མཛད་དོ། །གཉིས་པ་ལ་བསྐྱེད་རྫོགས་གཉིས་ལས། དང་པོ་ལའང་ལྷ་མ་གྲུབ་པ་གྲུབ་པར་བྱེད་པ་དང་། སྔགས་མ་གྲུབ་པ་གྲུབ་པར་བྱེད་པ་དང་། ཐུན་མོང་གི་དངོས་གྲུབ་སྒྲུབ་པ་དང་གསུམ་ལས། དང་པོ་ནི་བསྐྱེད་པའི་རིམ་པའི་སྒྲུབ་ཐབས་ཏེ། འདི་ཏིང་ངེ་འཛིན་གསུམ་གྱིས་འཆིང་ཞིང་། རྩ་རྒྱུད་དང་། རྡོ་རྗེ་མཁའ་འགྲོ་དང་། ཨ་བྷི་དྷ་ན་ལ་བརྟེན་པའོ། །གཉིས་པ་ནི་མཆོག་སྒྲུབ་པ་རིན་ཆེན་བཞི་དང་། བར་ཆད་ཞི་བར་བྱེད་པ་ཞལ་བཞི་པའི་སྔགས་ཏེ། འདི་ལ་གཞུང་ལོགས་སུ་མེད་དོ། །གསུམ་པ་ནི་རྩ་བའི་རྒྱུད་དང་། སཾ་བུ་ཊི་དང་། མངོན་བརྗོད་བླ་མ་སོགས་ལ་བརྟེན་ནས་སྦྱིན་སྲེག་གི་གཞུང་མཛད་དེ། འདི་མར་དོས་སློབ་དཔོན་གྱི་གཞུང་མ་ཡིན་པར་འདོད་ཀྱང་། མལ་གྱོས་སློབ་དཔོན་གྱིས་མཛད་པར་བཞེད་པ་ཉིད་ལེགས་ཏེ། གཞན་དུ་ན། འདི་རུ་མཆོག་མིན་དངོས་གྲུབ་གཞན་འགྲུབ་གཞུང་དྲུག་རྩོམས་ཤིག་བར་དོར་སངས་རྒྱས་འགྲུབ། །ཅེས་གསུངས་པའི་གཞུང་དྲུག་མ་ཚང་བར་ཐལ་བའི་ཕྱིར་རོ། །གཉིས་པ་རྫོགས་པའི་རིམ་པ་ལ་ཐབས་རྒྱུད་དང་། ཤེས་རབ་ཀྱི་རྒྱུད་གཉིས། རྗོད་བྱེད་གླེང་གཞིའི་ཡི་གེ་ཐ་དད་དུ་ཡོད་ཀྱང་། བརྗོད་བྱ་རིམ་པ་བཞི་ལས་མ་འདས་པར་བསྟན་པའི་ཕྱིར་དུ་གསང་བའི་དེ་ཁོ་ན་ཉིད་རབ་ཏུ་གསལ་བ་མཛད། ཤེས་རབ་ཀྱི་རྒྱུད་ལའང་ཀྱེ་རྡོ་རྗེ་དང་། འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་དུ་ཡོད་ཀྱང་། བརྗོད་བྱ་རིམ་པ་བཞི་ལས་མ་འདས་པར་བསྟན་པའི་ཕྱིར་དུ་ཨོ་ལ་པ་ཏི་མཛད། འཁོར་ལོ་བདེ་མཆོག་ཉིད་ཀྱི་བརྗོད་བྱ་རིམ་པ་བཞིར་འདུས་པར་ཤེས་པར་བྱ་བའི་ཕྱིར་དུ་དཔྱིད་ཀྱི་ཐིག་ལེ་མཛད་ཅེས་པ་ནི་ཕམ་འཐིང་པ་ནས་བརྒྱུད་པའི་ལུགས་ཡིན་ལ། ག་ཡ་དྷ་ར་ནས་འབྲོག་མི་ལ་བརྒྱུད་པའི་ལུགས་ལ། སློབ་དཔོན་འདིས་སྔར་གྱི་བསྐྱེད་རིམ་གྱི་གཞུང་གསུམ་གྱི་སྟེང་དུ། རྫོགས་རིམ་སྡོམ་དྲུག་སྟེ་གཞུང་དགུ་མཛད་པར་བཞེད་དེ། སྡོམ་དྲུག་ནི། དཔྱིད་ཀྱི་ཐིག་ལེ་རྩ་ཡི་སྡོམ། གསང་བའི་དེ་ཉིད་ཚིག་གི་སྡོམ། ཨོ་ལ་པ་ཏི་མངོན་རྟོགས་སྡོམ། སྙིང་པོ་བསྡུས་པ་དོན་གྱི་སྡོམ། སྡོམ་པ་བཤད་པ་རྣལ་འབྱོར་གྱི་སྡོམ། ཕྱག་རྒྱ་ཆེན་པོ་ཐིག་ལེ་ཕྱག་རྒྱ་བསྟེན་པའི་སྡོམ་སྟེ་དྲུག་གོ །སྡོམ་པ་བཤད་པའི་ནང་དུ་བརྟུལ་ཞུགས་ཞལ་སྔ་ནས་ཀྱི་གཞུང་། །ཕྱག་གཉིས་དང་ནི་ཞལ་གཅིག་མ། །ཞེས་བཤད་པས། ནག་པོ་པ་ཞེས་མི་མཐུན་པ་ཅིག་གིས་བྱས་པ་ཡིན་གྱི། སྤྱོད་པའི་རྡོ་རྗེས་མཛད་པ་མ་ཡིན་པར་ཕྱི་མ་དག་བཞེད་དོ། །བཞི་པ་ནི། རི་ཁྲོད་པའི་ཞལ་སྔ་ནས་བརྒྱུད་དེ་ཨ་པཱུ་ཛཱུ་ག་ཏས་ཞལ་གཉིས་མ་མཛད། རི་ཁྲོད་པའི་སློབ་མ་མཻ་ཏྲི་པས་དབང་པོ་དང་སྦྱར་ནས་ལྷ་བཅུ་གསུམ་མ། ལྷ་བདུན་མ། ལྷ་ལྔ་མ། ཕྲིན་ལས་ཀྱི་སྒྲུབ་ཐབས་དང་། ཚོགས་འཁོར་ཏེ་གཞུང་དྲུག་མཛད་དོ། །ཀོང་ཀ་ན་རྒྱལ་བ་བཟང་པོའི་སྐོར་ལ་རྩ་རྒྱུད་ཀྱི་འགྲེལ་པ། དེའི་འགྲེལ་བཤད་སྐལ་ལྡན་གྲགས་པས་མཛད་པ། དེ་གཉིས་ཆར་གྱི་བཤད་སྦྱར་ཏ་ཐཱ་ག་ཏ་རཀྵི་ཏས་མཛད་པ་དང་། རྒྱལ་བ་བཟང་པོ་ཉིད་ཀྱིས་སྒྲུབ་པའི་ཐབས་དང་། དཀྱིལ་འཁོར་གྱི་ཆོ་ག་དགུ་བརྒྱ་པ་རྣམས་མཛད་དོ། །གསུམ་པ་དེ་དག་གི་བརྗོད་བྱ་འཁོར་ལོ་བདེ་མཆོག་གི་ལམ་གྱི་རིམ་པ་ལ་གསུམ་སྟེ། རྩ་རྒྱུད་ཀྱི་གླེང་གཞིའི་གསང་བ་ཅེས་པའི་ཚིག་གིས་བསྟན་པའི་ལམ་གྱི་རིམ་པ་དང་། ལེའུ་ལྔ་བཅུ་རྩ་གཅིག་པའི་དེ་ཁོ་ན་ཉིད་བཅུ་བཞིས་བསྟན་པའི་ལམ་གྱི་རིམ་པ་དང་། བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པའོ། །དང་པོ་ནི་རྩ་རྒྱུད་ཀྱི་ཐོག་མར། དེ་ནས་གསང་བ་བཤད་བྱ་བ། །ཞེས་པའི་གསང་བ་ཞེས་པའི་ཚིག་ངེས་དོན་དུ་བཤད་ན། བསྐྱེད་པའི་རིམ་པ་དང་། རྫོགས་པའི་རིམ་པ་དང་། དེ་དག་གིས་བསྒྲུབས་པའི་འབྲས་བུ་གསུམ་བསྟན་པ་ལས། དང་པོ་ནི། གསང་བ་མཆོག་གི་དགྱེས་པ་ན། །ཞེས་སོགས་ཚིགས་བཅད་གཉིས་ཀྱིས་སྟོན་ཏེ། འདི་ལ་རྟེན་ལ་སྦྱར་བ་དང་། བརྟེན་པ་ལ་སྦྱར་བ་གཉིས་ལས་དང་པོ་ནི། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་པས་རྣལ་འབྱོར་པའི་རྟེན་རི་བོ་ཚང་ཚིང་རི་སུལ་ལ་སོགས་པ་སྟོན་ཅིང་། ལྷའི་རྟེན་ལྷ་མངལ་སྐྱེས་དང་། སྒོང་སྐྱེས་གང་བསྒོམ་ཡང་། རླུང་གི་དཀྱིལ་འཁོར་ནས་རི་རབ་ཀྱི་བར་སྟོན་ནོ། །ཡང་ལྷའི་རྟེན་ཐུན་མོང་མ་ཡིན་པ་ཆོས་འབྱུང་ནས་གཞལ་ཡས་ཁང་གི་བར་ཡང་སྟོན་ཏེ། ཞིབ་དུ་མ་སྤྲོས་སོ། །བརྟེན་པ་ལྷ་བསྐྱེད་པ་ལ། ངེས་བརྗོད་བླ་མར། བསྐྱེད་རིམ་གྱི་སྒྲུབ་ཐབས་བདུན་ཅུ་རྩ་ལྔ་སྒོང་སྐྱེས་གཙོ་བོར་བྱས་པའི་སྐྱེ་གནས་བཞི་ཀ་དང་སྦྱར་བ་སྟོན་པ་ནི། འདིར་མཁའ་འགྲོ་ཀུན་དངོས་སེམས་དཔའ་ནི། །ཞེས་པ་ནས། དམ་ཚིག་སྤྱོད་པའི་སྤྱོད་ཡུལ་ཡིན། །ཞེས་པའི་བར་ཚིག་རྐང་དྲུག་མངལ་སྐྱེས་ལ་སྦྱར་བ་དང་། སྒོང་སྐྱེས་ལ་སྦྱར་བ་གཉིས་ཀྱིས་བསྐྱེད་པའི་རིམ་པ་ཡོངས་སུ་རྫོགས་པར་བསྟན་ནོ། །གཉིས་པ་རྫོགས་པའི་རིམ་པ་ལ་སྦྱར་ན། གསང་བ་མཆོག་གི་དགེས་པ་ན། །ཐམས་ཅད་བདག་ཉིད་རྟག་དུ་བཞུགས་ཞེས་པས། རྫོགས་རིམ་རིམ་པ་བཞིའི་དང་པོ་ཤེས་བྱ་རྒྱུད་ཀྱི་རིམ་པ་བསྟན། སྒྲ་ཡི་ཚུལ་ལས་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཡིན། །ཞེས་པས་སྔགས་ཀྱི་རིམ་པ་བསྟན། མཁའ་འགྲོ་ཀུན་དངོས་སེམས་དཔའ་ནི། །རྡོ་རྗེ་སེམས་དཔའ་བདེ་བའི་མཆོག །ཅེས་པས་ཡེ་ཤེས་ཀྱི་རིམ་པ་བསྟན། འདི་ནི་རང་བྱུང་བཅོམ་ལྡན་དཔའ། །མཁའ་འགྲོ་དྲྭ་བའི་སྡོམ་པ་ཡིན། །ཞེས་པས་གསང་བའི་རིམ་པ་བསྟན་ཏེ། དེ་ལྟར་ན་གསང་བ་ཅེས་དང་། དེའི་དོན་ཚིགས་སུ་བཅད་པ་གཉིས་ཀྱིས་ལམ་གྱི་གསང་བ་བསྐྱེད་རྫོགས་གཉིས་ཀ་བསྟན་པས། འཁོར་ལོ་བདེ་མཆོག་གི་ལམ་གྱི་རིམ་པ་མ་ལུས་པ་བསྟན་ནོ། །གསུམ་པ་དེ་དག་གིས་བསྒྲུབས་པའི་འབྲས་བུའི་གསང་བ་ནི། ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་གཉིས་ཏེ། སྔགས་བཟླས་བསམ་གཏན་ལ་སོགས་ལྡན། །ཆོ་གའི་སྦྱོར་ཉིད་ཡེ་ཤེས་ཀྱང་། །ཞེས་པས་བསྟན་ནོ། །གཉིས་པ་ནི་རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། གོས་དང་ཕྱག་རྒྱ་ལྔ་ལ་སོགས། །ཤེས་རབ་ཡན་ལག་ཕུར་བུ་དྲྭ། །ཨཱ་ལི་ཀཱ་ལི་ཞེས་བརྗོད་པ། །རྒྱུ་སོགས་སྟོང་པ་སྔོན་འགྲོ་བ། །འཇུག་པ་སྒྲ་ལ་སོགས་པ་ནས། །ཇི་སྲིད་བསྡུས་པའི་སྦྱོར་ལྡན་ཞིང་། །བདུད་རྩི་ཚིམ་བྱེད་མྱ་ངན་འདས། །ལག་པའི་མཆོད་པ་དབང་བསྐུར་བ། །གོ་ཆ་ཆེན་པོ་ཡང་དག་བསྲུང་། །སྔགས་རྣམས་ཀུན་གྱི་མཆོད་པ་ཡིན། །དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་གསུངས་ཏེ། འདི་ཉིད་ལྷ་མངལ་སྐྱེས་ལྟར་ན། བསྐྱེད་པའི་རིམ་པ་འབའ་ཞིག་གི་མཉམ་བཞག་དང་། རྗེས་སྤྱོད་དང་བཅས་པ་ལ་སྦྱར་བ་དང་། ལྷ་སྒོང་སྐྱེས་ལྟར་ན་བསྐྱེད་རྫོགས་མ་ལུས་པ་ལ་སྦྱར་བ་གཉིས་ལས། འདིར་སྐབས་སུ་བབ་པ་ཕྱི་མ་ལྟར་བཤད་ན། གོས་ནི་ཕན་འདོགས་པས་ན་གོས་ཞེས་བྱ་སྟེ། བསྐྱེད་རིམ་གྱི་སྔོན་འགྲོ་ཚངས་པའི་གནས་བཞི་བསྒོམ་པ་ལ་སོགས་པའོ། །ཕྱག་རྒྱ་ལྔ་ལ་སོགས་པ་ནི་མཉམ་བཞག་གི་དུས་ཀྱི་དཔའ་བོ་དང་དཔའ་མོ་རྣམས་ཀྱི་སྐུ་ལ་ཡོད་པའི་རྒྱན་ནོ། །ཤེས་རབ་ཡན་ལག་ནི་ཕུང་པོ་དང་ཁམས་དང་སྐྱེ་མཆེད་ཀྱི་དག་པ་དྲན་པ་བསྒོམ་པའོ། །ཕུར་བུ་དྲྭ་བ་ནི་རྗེས་སྤྱོད་ཀྱི་དུས་སུ་ཚམ་རྔམ་སྔགས་ཀྱིས་བསྲུང་བ་བྱེད་པའོ། །ཨཱ་ལི་ཀཱ་ལི་ཞེས་བརྗོད་པ་ནི་ངག་དག་པར་བྱེད་པ་སྟེ། དེས་མཚོན་ནས་ཐོག་མ་ཉིད་དུ་ལུས་ངག་ཡིད་གསུམ་དག་པར་བྱའོ། །རྒྱུ་སོགས་བསོད་ནམས་ཀྱི་ཚོགས། སྟོང་པ་སྔོན་དུ་འགྲོ་བ་ཡེ་ཤེས་ཀྱི་ཚོགས་སོ། །འཇུག་པ་ནི་སེམས་ཅན་གྱི་དོན་ལ་འཇུག་ཅིང་སྤྲོ་བ་ཡིན་ལ། སྒྲ་ལ་སོགས་པ་ནས་ནི་དཔལ་མངོན་པར་རྟོགས་པར་ལྷ་བསྐྱེད་པ་ལྟར་སྟོང་པའི་ངང་ལས་འབྱུང་བ་རིམ་བརྩེགས་སྣ་ཚོགས་པདྨའི་བར་དུ་བསྐྱེད་པ་དང་། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེའི་བར་དུ་ཧཱུྃ་ཉི་མའི་སྟེང་དུ་ཡི་གེ་གསུམ་རིམ་པ་བཞིན་དུ་བསམས་ལ། དེའི་སྟེང་དུ་པདྨ་དང་ཟླ་བའི་སྟེང་དུ་ཧཱུྃ་བསམ་སྟེ། ཡི་གེ་གསུམ་ནས་མས་རིམ་གྱིས་གཅིག་ལ་གཅིག་ཐིམ་ནས་ཧཱུྃ་གི་ཐིག་ལེ་ཡང་། ནཱ་དར་གྱུར་པ་ནི་སྒྲ་ཡིན་ལ། སོགས་པ་ཞེས་པ་ནི་ནཱ་ད་སྒྲ་དེ་ཉི་མ་ཟླ་བའི་བར་གྱི་ཚུལ་ཧཱུྃ་ལ་ཐིམ་སྟེ། དེ་ཐམས་ཅད་གྱུར་པ་ལས་རྟེན་དང་བརྟེན་པ་ཐམས་ཅད་དུས་གཅིག་ལ་རྫོགས་པར་བསྐྱེད་པའོ། །དེ་ནས་བརྩམས་ནས་ཇི་སྲིད་བསྡུས་པའི་སྦྱོར་ལྡན་ཞིང་ནི་སྤྲུལ་སྐུ་ལ་དམིགས་པའི་རྗེས་ལ་ལུས་ཀྱི་དཀྱིལ་འཁོར་བསྒོམ་པ་ལོངས་སྤྱོད་རྫོགས་པའི་སྐུ་ལ་དམིགས་པ་དང་། བྱང་ཆུབ་ཀྱི་ཕྱོགས་ཀྱི་དག་པ་དྲན་པ་ཆོས་ཀྱི་སྐུ་ལ་དམིགས་པའི་བར་དང་། ཡེ་ཤེས་སེམས་དཔའ་སྤྱན་དྲང་བའི་བར་བསྡུ་བའོ། །བདུད་རྩི་ཚིམ་བྱེད་ནི་མཆོད་པ་བྱེད་པའི་དུས་སུ་ཆོ་ག་བཞིན་བདུད་རྩི་མྱོང་བའོ། །མྱ་ངན་འདས་ནི་ཕྱག་རྒྱ་བཞི་དང་། རྡོ་རྗེ་སེམས་དཔའ་བསྡུ་བ་ལ་སོགས་པ་རྫོགས་པའི་རིམ་པ་བསྒོམ་པ་སྟེ། དེ་ལྟར་དེ་ཁོ་ན་ཉིད་བཅུ་པོ་དེས་ནི་མཉམ་བཞག་ཁོ་ན་བསྟན་ཏོ། །ལག་པའི་མཆོད་པ་ལ་སོགས་པ་བཞི་ནི་རྗེས་སྤྱོད་ཁོ་ན་སྟེ། རྗེས་སྤྱོད་ཀྱི་དུས་སུ་ལག་པའི་མཆོད་པ་བྱ་བ་དང་། དབང་བསྐུར་བ་ཁྲུས་ཀྱི་རྣལ་འབྱོར་བྱ་བ་དང་། རྗེས་ཀྱི་དུས་སུ་གོ་ཆ་ཆེན་པོས་བདག་ཉིད་ཡང་དག་པར་བསྲུང་བ་དང་། རྩ་བའི་སྔགས་བརྗོད་པ་ལ་སོགས་པའི་སྔགས་རྣམས་ཀུན་གྱི་མཆོད་པ་བྱ་བ་སྟེ། དེ་ལྟར་ན་འབྲས་བུ་འགྲུབ་པ་ལ་མི་བསླུ་ཞིང་། སྒྲུབ་པ་པོ་ལ་ཕན་འདོགས་པར་བྱེད་པ་དེ་ཁོ་ན་ཉིད་བཅུ་བཞི་པོ་དེ་ནི་བདེ་མཆོག་ཉུང་ངུའི་རྒྱུད་འདིར། འབུམ་ཕྲག་གསུམ་པའི་རྒྱུད་ལས་མདོར་བསྡུས་ནས་བཤད་པ་ཡིན་ནོ། །གསུམ་པ་བཤད་རྒྱུད་ཀུན་སྤྱོད་ནས་གསུངས་པའི་ལམ་གྱི་རིམ་པ་ལ་གཉིས་ཏེ། རྒྱུད་ཀྱི་བརྗོད་བྱ་མ་ལུས་པ་འཁྲུགས་སྡེབས་པའི་ལམ་གྱི་རིམ་པ་དང་། ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བའོ། །དང་པོ་ནི་རྣལ་འབྱོར་མ་ཀུན་ཏུ་སྤྱོད་པའི་བརྗོད་བྱ་ཐམས་ཅད་བསྡུ་ན། གཉིས་སུ་བསྡུ་བ་དང་། གསུམ་དུ་བསྡུ་བ་དང་། བཞིར་བསྡུ་བ་གསུམ་ལས། དང་པོ་ནི། དེ་བཞིན་གཤེགས་པའི་དབུགས་དབྱུང་དང་། རྡོ་རྗེ་འཛིན་པའི་དབུགས་དབྱུང་གཉིས་ཏེ། དེ་ཉིད་རྒྱུའི་དབང་དུ་བྱས་ན་ཀུན་རྫོབ་ཀྱི་བདེན་པ་ནི་དེ་བཞིན་གཤེགས་པའི་དབུགས་དབྱུང་། དོན་དམ་པའི་བདེན་པ་ནི་རྡོ་རྗེ་འཛིན་པའི་དབུགས་དབྱུང་། ལམ་གྱི་དབང་དུ་བྱས་ན་བསྐྱེད་རིམ་དང་རྫོགས་རིམ་གཉིས། འབྲས་བུའི་དབང་དུ་བྱས་ན་གཟུགས་སྐུ་དང་། ཆོས་སྐུ་གཉིས་ལ་དབུགས་དབྱུང་གཉིས་སྦྱར་དགོས་ཏེ། ཀུན་སྤྱོད་ལེའུ་བཅུ་གསུམ་པ་ལས། བསོད་ནམས་ཡེ་ཤེས་ཚོགས་དག་ནི། །བདེན་པ་གཉིས་ལ་བརྟེན་པ་ཡིན། །ཞེས་དང་། ལེའུ་བཅུ་གཅིག་པ་ལས། བདེ་གཤེགས་དབུགས་དབྱུང་གསུངས་པ་ནི། །དག་པའི་ལུས་ནི་སྐྱོན་མེད་པ། །ཞེས་གསུངས་པས་སོ། །གཉིས་པ་ནི་ལམ་གྱི་ཀུན་ཏུ་སྤྱོད་པ་དང་། དེ་རྫོགས་པར་བྱེད་པའི་ཡན་ལག་གི་ཀུན་ཏུ་སྤྱོད་པ་དང་། འབྲས་བུའི་ཀུན་ཏུ་སྤྱོད་པ་གསུམ་དུ་འདུས་སོ། །གསུམ་པ་ནི་དེའི་སྔོན་དུ་རྒྱུའི་ཀུན་སྤྱོད་སྔོན་དུ་སོང་བ་ཉམས་སུ་ལེན་པའི་རྟེན་གྱི་གང་ཟག་བགྲངས་ན་བཞིར་འགྱུར་རོ། །དེ་ལྟར་བཤད་ན་ཆོས་ཐམས་ཅད་ཀྱི་རང་བཞིན་སེམས་ཀྱི་རང་བཞིན་སེམས་ཀྱི་ཆོས་ཉིད་སྤྲོས་བྲལ་སྔོན་དུ་འགྲོ་བའི་རྟེན་གྱི་གང་ཟག་ལ་རིགས་གཉིས་ཏེ། ལམ་ལ་འཇུག་པ་དང་། ཞུགས་པའོ། །ལམ་ལ་འཇུག་པ་ལ་གསུམ། སྔར་མི་དགེ་བ་འབའ་ཞིག་སྤྱོད་པ་མ་དག་པ་དང་། སྔར་ཕ་རོལ་ཏུ་ཕྱིན་པས་ཅི་རིགས་རྒྱུད་སྦྱངས་པ་དག་པ་དང་། རེས་སྡིག་པ་སྤྱོད་ཅིང་རེས་དགེ་བ་སྤྱོད་པ་འདྲེས་པ་སྟེ། དེ་སྐད་དུ། དག་དང་མ་དག་འདྲེས་པ་སྟེ། །སྒྲུབ་པ་པོ་ནི་གསུམ་དུ་གནས། །ཞེས་གསུངས་པས་སོ། །ལམ་ལ་ཞུགས་པ་ལ་ཡང་གསུམ་སྟེ། བསྐྱེད་པའི་རིམ་པ་འབའ་ཞིག་ལ་དགའ་བ་མཉེས་པར་བྱེད་པའི་སྒྲུབ་པ་པོ་དང་། རྫོགས་པའི་རིམ་པ་འབའ་ཞིག་བསྒོམས་པའི་རྣམ་པར་དག་པའི་སྒྲུབ་པ་པོ་དང་། ཟུང་དུ་འཇུག་པ་ལ་དགའ་བ་གསལ་བྱེད་ཡོན་ཏན་ལྡན་པ་ཞེས་བྱ་བ་སྟེ། དེ་ཡང་། མཉེས་བྱ་རྣམ་པར་དག་པ་དང་། །གསལ་བྱེད་ཡོན་ཏན་ལྡན་པའི་མི། །ཞེས་གསུངས་པ་ཡིན་ནོ། །ཡང་རྒྱུད་འདི་ནི་གང་ཟག་གཉིས་ཏེ། སྤང་བར་བྱ་བ་དང་། བསྒྲུབ་བར་བྱ་བའི་གང་ཟག་གོ །དང་པོ་ནི། ལེའུ་བཅུ་གཅིག་པ་ལས། ལྐུགས་ཅིང་གླེན་པ་སྡིག་དང་ལྡན། །བྱིས་པའི་ཤེས་པས་ཤེས་པ་ཅན། །སེམས་ཅན་ཡོངས་སུ་མ་སྨིན་དང་། །ཕྱི་རོལ་བསྟན་བཅོས་ཀྱིས་འཆལ་པ། །དེ་དག་ཀུན་གྱིས་མི་ཤེས་ཏེ། །མི་ཤེས་མུན་པས་ཁེབས་པ་དང་། །ཁེངས་པ་ལ་ནི་རྟག་དགའ་བ། །ང་རྒྱལ་ལ་སོགས་བདུན་སེམས་ལྡན། །དེ་དག་ཀུན་ཀྱང་སངས་རྒྱས་ཀྱི། །སྤྱོད་ཡུལ་གསང་བ་མི་ཤེས་སོ། །ཞེས་པའི་ཡན་ལག་གསུངས་པ་དང་། སྒྲུབ་པའི་མཚན་ཉིད་ཀྱང་དེ་ཉིད་ལས། བླ་མའི་རིམ་པས་ཇི་ལྟར་བསྟན། །གང་གིས་མྱུར་དུ་ཤེས་འགྱུར་བ། །སྐྱེ་བ་བྱེ་བ་སྟོང་ཕྲག་ཏུ། །ང་ཡིས་ཡེ་ཤེས་ཀྱིས་བསྐུལ་ཡིན། །དད་པ་ཡང་དག་ལྡན་པ་དང་། །རྣལ་འབྱོར་སྤྱོད་ཚུལ་ལ་གནས་ཡིན། །ཞེས་གསུངས་ལ། ལེའུ་དང་པོ་ལ་རྣལ་འབྱོར་གྱི་དབང་ཕྱུག་ཅེས་གསུངས་སོ། །གཉིས་པ་ལམ་གྱི་ཀུན་ཏུ་སྤྱོད་པ་ལ་གསུམ། རྟེན་དང་བརྟེན་པར་བཅས་པ་བསྐྱེད་པ་ཕྱིའི་ཀུན་སྤྱོད་སྤྲུལ་པའི་སྐུ་ལམ་དུ་བྱེད་པ་དང་། ལུས་ལ་ལྷ་རྣམས་རྫོགས་པར་བསྒོམ་པ་ནང་གི་ཀུན་སྤྱོད་ལོངས་སྐུ་ལམ་དུ་བྱེད་པ་དང་། རྫོགས་པའི་རིམ་པ་ཉམས་མྱོང་དང་བཅས་པ་ནི་རྫོགས་པའི་ཀུན་སྤྱོད་ཆོས་སྐུ་ལམ་དུ་བྱེད་པའོ། །གསུམ་པ་དེ་རྫོགས་པར་བྱེད་པ་ཡན་ལག་གི་ཀུན་ཏུ་སྤྱོད་པ་ལ་གསུམ་སྟེ། དང་པོ་གཉིས་རྫོགས་པར་བྱེད་པའི་ཡན་ལག་དང་། གསུམ་ཀ་རྫོགས་པར་བྱེད་པའི་ཡན་ལག་དང་། དེ་དག་བརྟན་པར་བྱེད་པའི་སྤྱོད་པའོ། །དང་པོ་ལ་ལྔ་སྟེ། ཕུང་པོ་ཁམས་དང་སྐྱེ་མཆེད་སྦྱང་བསྒྱུར་དང་། ཚོགས་གཉིས་བསག་པ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་དང་། དབང་བསྐུར་བའོ། །གཉིས་པ་ལ་ལྔ་སྟེ། སྔགས་མཆོད་དང་། གསང་བའི་མཆོད་པ་དང་། དམ་ཚིག་ཅན་ལ་གཏོར་མ་སྦྱིན་པ་དང་། དམ་ཚིག་དང་སྡོམ་པ་དང་། ཐུན་མོང་གི་བྱ་བ་བྱང་ཆུབ་ཀྱི་ཕྱོགས་ཀྱི་དག་པ་དང་། ཐུན་མཚམས་ཀྱི་བྱ་བའོ། །འདི་ལ་ཡང་ལྔ་སྟེ། ཁམས་དང་རྒྱན་ཆའི་དག་པ། སུམ་བྷ་ནིས་བསྲུང་བ། སྤྱོད་ལམ་གྱི་རྣལ་འབྱོར། ཁ་ཟས་ཀྱི་རྣལ་འབྱོར། ཉལ་བ་དང་ལྡང་བའི་རྣལ་འབྱོར་རོ། །གསུམ་པ་ལ་རང་དོན་གྱི་སྤྱོད་པ་དང་། གཞན་དོན་ཕྱོགས་ལས་རྣམ་པར་རྒྱལ་བའི་སྤྱོད་པ་གཉིས་ལས། དང་པོ་ལ་གསུམ་སྟེ། བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ། གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པའོ། །གསུམ་པ་འབྲས་བུའི་ཀུན་ཏུ་སྤྱོད་པ་ལ་ཐུན་མོང་གི་དངོས་གྲུབ་དང་། མཆོག་གི་དངོས་གྲུབ་དང་། ཕྱག་རྒྱ་ཆེན་པོ་མཆོག་གི་དངོས་གྲུབ་གསུམ་སྟེ། དེ་ལྟར་ན་ཀུན་ཏུ་སྤྱོད་པ་ཞེས་པའི་ཚིག་དེ་ཉིད་ཀྱིས། འཁོར་ལོ་བདེ་མཆོག་གི་ལམ་དང་འབྲས་བུ་མ་ལུས་པ་བསྟན་ཅིང་། ལེའུ་གང་ནས་གང་འབྱུང་ནི་རྒྱུད་ཉིད་ཀྱི་སྟེང་དུ་རྟོགས་པར་བྱའོ། །གཉིས་པ་ལམ་གྱི་དངོས་གཞི་ཉིན་ཞག་ཕྲུགས་གཅིག་ལ་ཇི་ལྟར་བྱ་བའི་ཚུལ་མདོར་བསྡུ་བ་ནི། ཀུན་སྤྱོད་ལེའུ་བཅུ་གཉིས་པ་ལས། འདུག་དང་ལྡང་བ་ཉིད་དང་ནི། །འཇུག་དང་རྫོགས་པ་ཉིད་དག་དང་། །བྱིན་གྱིས་བརླབ་དང་དབང་བསྐུར་དང་། །ཏིང་འཛིན་མཆོད་པ་བསྡུ་བ་ཡིན། །ཞེས་བྱ་བ་དེ་ཁོ་ན་ཉིད་བཅུ་སྟེ། དེ་ལ་འདུག་པ་ཞེས་བྱ་བ་ནི། ཚངས་པའི་གནས་བཞི་དང་། གཞི་སྦྱང་བསྒྱུར་དང་། སྲུང་བའི་འཁོར་ལོ་དང་། བསོད་ནམས་དང་ཡེ་ཤེས་ཀྱི་ཚོགས་བསགས་ནས་བདག་མེད་པ་ལ་བློ་ཅུང་ཟད་འདུག་པ་ཡིན་ནོ། །གཉིས་པ་ལྡང་བ་ནི། བྱང་ཆུབ་ཀྱི་སེམས་ཀྱི་རྒྱུན་གྱིས་སེམས་ཅན་གྱི་དོན་བྱའོ་སྙམ་པའི་བསམ་པས་འབྱུང་བ་རིམ་བརྩེགས་རི་རབ་དང་བཅས་པ་བསྒོམ་པའོ། །གསུམ་པ་འཇུག་པ་ནི་རི་རབ་ཀྱི་སྟེང་དུ་མངོན་པར་བྱང་ཆུབ་པ་ལྔ་ལས་རྟེན་དང་བརྟེན་པ་དུས་གཅིག་ཏུ་ཤིན་ཏུ་གསལ་བར་ཕྱིའི་དཀྱིལ་འཁོར་བསྒོམ་པ་ཡིན་ནོ། །བཞི་པ་རྫོགས་པ་ནི་ལུས་ཀྱི་དཀྱིལ་འཁོར་རྫོགས་པར་བསྒོམས་པ་སྔགས་ཀྱིས་བྱིན་གྱིས་བརླབ་པའོ། །ལྔ་པ་བྱིན་གྱིས་བརླབ་པ་ནི་ཕོ་ཉ་བསྲེ་བ་དང་། གོ་ཆ་བཅིང་བ་དང་། ཡེ་ཤེས་པ་དགུག་པ་ཡིན་ནོ། །དྲུག་པ་དབང་བསྐུར་བ་ནི་རིགས་ཀྱི་བདག་པོས་རྒྱས་གདབ་པ་དང་བཅས་པའོ། །བདུན་པ་ཏིང་ངེ་འཛིན་ནི་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱས་ལ་ལྷའི་སྐུ་མདོག་དང་ཕྱག་མཚན་ལ་སེམས་ཅུང་ཟད་འཛིན་པ་ཡིན་ནོ། །བརྒྱད་པ་མཆོད་པ་ནི་སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་དང་། གསང་བའི་མཆོད་པ་སྟེ། དེ་ལ་བཟླས་པ་སྔགས་མཆོད་ཀྱི་ཁོངས་སུ་འདུས་ལ། གསང་བའི་མཆོད་པ་ནི་རྫོགས་པའི་རིམ་པར་འགྲོ་བའི་སྐབས་ཀྱང་ཡོད་དོ། །གཏོར་མའང་མཆོད་པའི་སྐབས་སུ་འདུ་བ་ཡིན་ཏེ། ཐུན་གོང་མ་རྣམས་ལ་གཏོར་མ་ནི་ཐུན་མཇུག་བསྡུ་བའི་རྗེས་ལ་བཏང་ལ། ཐུན་ཐ་མ་ལ་ནི་གཏོར་མ་དང་དག་པའི་རྗེས་ལ་བསྡུ་བ་བསྒོམ་པ་ཡིན་ནོ། །ཐུན་མཚམས་ཀྱི་བྱ་བ་ལ་ཁ་ཟས་དང་། སྤྱོད་ལམ་དང་། ཕྱི་མཆོད་དང་། ལག་མཆོད་ཀྱང་མཆོད་པའི་ཁོངས་སུ་བསྡུ་ལ། གནས་སྐབས་ཀྱི་མཆོད་པའི་ཚེས་བཅུའི་མཆོད་པའང་མཆོད་པའི་ཕྱིར་འདུའོ། །དགུ་པ་བསྡུ་བ་ཞེས་བྱ་བ་ནི་རྫོགས་པའི་རིམ་པ་སྟེ་རྡོ་རྗེ་སེམས་དཔའ་བསྡུ་བ་ལྟ་བུས་དཀྱིལ་འཁོར་རིམ་པས་བསྡུས་ལ། ཐུན་གོང་མ་རྣམས་ལ་ནི་དེ་ལས་ལངས་ནས་དག་པ་རྗེས་སུ་དྲན་པར་བྱེད་པ་ཡིན་ལ། ཐུན་ཐ་མ་ལ་ནི་དག་པ་རྗེས་དྲན་གྱི་རྗེས་ལ་རྡོ་རྗེ་སེམས་དཔའ་བསྡུ་བར་བྱས་ནས་དེའི་ངང་ལ་ཉལ་བའི་རྣལ་འབྱོར་བྱེད་པ་ཡིན་ནོ། །བཅུ་པ་ཡིན་ཞེས་པ་ངེས་པ་སྟེ། དག་པ་ནི་ཁམས་ཀྱི་དག་པ་དང་། རྒྱན་ཆེའི་དག་པ་བྱས་ལ། དཀྱིལ་འཁོར་གྱི་འཁོར་ལོ་བསྡུས་ཏེ་ཚམ་རྔམ་སྔགས་ཀྱིས་བསྲུངས་ལ། སྤྱོད་ལམ་གྱི་རྣལ་འབྱོར་བྱེད་པ་ཡིན་ནོ་ཞེས་རྗེ་བཙུན་གསུང་ངོ་། །གསུམ་པ་བརྩམ་བྱའི་བསྟན་བཅོས་འཕྲོས་དོན་དང་བཅས་པ་ནི། དེ་ལྟར་ན་སློབ་དཔོན་འདིས་མངོན་པར་རྟོགས་པའི་གཞུང་ཆོ་གའི་ཡན་ལག་ཕལ་ཆེར་ཀུན་ཏུ་སྤྱོད་པའི་རྒྱུད་ལ་བརྟེན་ནས་བརྩམ་པ་ཡིན་ནོ། །དེའི་རྒྱུ་མཚན་གྱིས། འདིའི་རྒྱུད་རྒྱས་པའི་ནང་ནས། རྒྱུད་བསྡུས་པ་འདི་རང་གཞུང་གི་ཤེས་བྱེད་དུ། སློབ་དཔོན་ཉིད་ཀྱིས་ཕྱུང་སྟེ། ཐོག་མར། གང་གི་དྲིན་གྱིས་བདེ་ཆེན་ཉིད། །ཅེས་སོགས་ཚིགས་བཅད་གཅིག་གི་མཆོད་བརྗོད་ཀྱང་མཛད་པ་ཡིན་ལ། གང་ཞིག་ཕྱུང་ན་རྗེ་བཙུན་གྱིས་རྒྱུད་རྒྱས་པ་ལ་རྟོག་པ་དྲུག་ཅུ་རྩ་བཞི་བཞུགས་ཤིང་། རྟོག་པ་རེ་རེ་ལ་ལེའུ་བཅུ་བདུན་བཅུ་བདུན་དུ་བཞུགས་པ་ལས། རྒྱུད་ཉུང་ངུ་འདི་ནི་ཉི་ཤུ་པ་རིག་འཛིན་གྲུབ་པའི་རྟོག་པ་སོང་བའི་རྗེས་ལ་ཉེར་གཅིག་པ་འཁོར་ལོ་གསུམ་བཀོད་པའི་རྟོག་པ་ཡིན་པར་བཞེད་ཅིང་། པུ་ཧྲངས་པའི་རྗེས་སུ་འབྲངས་པ་དག་རྟོག་པ་ཉི་ཤུ་རྩ་ལྔ་པ་ཡིན་པར་བཞེད་དོ། །དེས་ན་སློབ་དཔོན་གྱི་གཞུང་འདི་རྒྱ་བོད་ཀུན་ཏུ་ཉི་ཟླ་ལྟར་དུ་གྲགས་པས། རྒྱ་གར་དུ་ཡང་ལྭ་བ་པ་དང་། པྲཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེ་དང་། ཀུ་མཱ་ར་བོ་དྷི་དང་། ཇོ་བོ་རྗེའི་འགྲེལ་པ་རྣམས་ཡོད་ཅིང་། བོད་དུ་ཡང་ཇོ་བོའི་གསུང་སྒྲོས་བྲིས་པ་ལོ་ཆེན་རིན་བཟང་གི་ཊཱི་ཀ་དང་། མར་དོའི་རྗེས་འབྲངས་ལ་གློ་བོ་ལོ་ཙྪ་བ་དང་། བནྡེ་རྒྱ་མཚོ་གྲགས་ཀྱི་ཊཱི་ཀ་གཉིས་དང་། པུ་ཧྲངས་པའི་རྗེས་འབྲངས་ལ་དམར་ཆོས་ཀྱི་རྒྱལ་པོའི་ཊཱི་ཀ་དང་། མལ་གྱོའི་རྗེས་འབྲང་ལ་གཉན་ཕུལ་བྱུང་བའི་འབྲུ་འབུམ་དང་། རྗེ་བཙུན་གྱི་དོན་འགྲེལ་དང་། དགའ་ལྡན་པ་ཆོས་ཀྱི་རྒྱལ་མཚན་གྱི་ཊཱི་ཀ་རྣམས་ཡོད་དོ། །བཞི་པ་བསྟན་བཅོས་ཀྱི་བརྗོད་བྱ་མངོན་རྟོགས་ཉིད་བཤད་པ་ལ་བཞི་སྟེ། གང་དུ་བསྒོམ་པའི་གནས། གང་གིས་སྒོམ་པའི་གང་ཟག གང་བསྒོམ་པའི་རྣལ་འབྱོར། དེ་ལྟར་བསྒོམས་པའི་འབྲས་བུའོ། །དང་པོ་ནི། མངོན་བརྗོད་བླ་མ་ལས། རི་སུལ་དང་ནི་རི་རྩེ་དང་། །ཆུ་བོའི་ངོགས་དང་འདུས་པ་དང་། །རྒྱ་མཚོ་ཆེན་པོའི་འགྲམ་དག་དང་། །ཤིང་གཅིག་དང་ནི་ཞི་བའི་གནས། །མ་མོའི་ཁྱིམ་མམ་དུར་ཁྲོད་དམ། །སྣ་ཚོགས་སྐྱེད་མོས་ཚལ་མཆོག་གམ། །ལྷ་ཁང་དང་ནི་མཆོད་རྟེན་ནམ། །ཁྱིམ་མམ་བཞི་མདོ་དག་ཏུ་ནི། །སྒྲུབ་པ་པོ་ཡིས་སྦྱོར་བསྒྲུབ་ན། །འདོད་པ་ཀུན་གྱིས་འབྲས་བུ་གསོལ། །གནས་ནི་བརྟག་པར་བྱས་པའམ། །ཡིད་ནི་གང་དུ་དགའ་བ་དེར། །སྣ་ཚོགས་བདེ་མཆོག་དམ་པ་དེར། །དེ་རུ་བསྒྲུབས་ན་དངོས་གྲུབ་འགྱུར། །དབྱེ་བ་དུ་མས་བསྒོམ་པ་ནི། །གདུལ་བྱའི་བསམ་པའི་དབང་གིས་སོ། །ཞེས་གསུངས་པའི་རི་སུལ་ནས་བཞི་མདོའི་བར་རྣམས་གདུལ་བྱའི་བསམ་པའི་དབང་གིས་རྒྱས་པར་དབྱེ་བ་ཡིན་ལ། མདོར་བསྡུ་ན། ཡིད་ནི་གང་དུ་དགའ་བ་དེར། །ཞེས་པ་སྟེ། ཀྱཻ་རྡོ་རྗེར། དང་པོར་གོམས་པར་བྱེད་དུས་ཀྱི། །གནས་ནི་གང་དུ་སྔགས་པའི་སེམས། །གཅིག་ཏུ་མཉམ་གཞག་འགྲུབ་འགྱུར་བའི། །གནས་ནི་བཟང་པོ་ངེས་པར་བརྟག །རང་གི་ཁྱིམ་དུ་ཞེས་གསུངས་པ་དང་མཐུན་ནོ། །གཉིས་པ་ནི་གཞུང་ལས། དང་པོར་རེ་ཤིག་རྣལ་འབྱོར་པའི་དབང་ཕྱུག་གིས་ཞེས་གསུངས་ཏེ། འདི་ལ་བཤད་པ་གསུམ་དུ་གསུངས་པ་ལས། དང་པོ་ནི་རྣལ་འབྱོར་པའི་ཞེས་པ་ནི། སློབ་པའི་རྣལ་འབྱོར་པ་དང་། མི་སློབ་པའི་རྣལ་འབྱོར་པ་གཉིས་སོ། །དེ་ལ་དང་པོ་ནི་རྣལ་འབྱོར་ཏེ། དང་པོ་འཁོར་ལོ་བདེ་མཆོག་གི་དཀྱིལ་འཁོར་དུ་དབང་བསྐུར་བ་ཐོབ་ནས་མཉམ་པར་བཞག་པའི་རྣལ་འབྱོར་བསྐྱེད་རྫོགས་གཉིས་ལ་སྐུ་གསུམ་ལམ་དུ་བྱེད་པ་བསྒོམ་པ་དང་། ཐུན་མཚམས་སུ་གཏོར་མ་གཏོང་བ་གཏོར་མའི་རྣལ་འབྱོར་དང་། ཁ་ཟས་ཀྱི་རྣལ་འབྱོར། ནང་གི་སྦྱིན་སྲེག་དང་། དུས་ཐམས་ཅད་དུ་ལྷའི་ང་རྒྱལ་དང་མི་འབྲལ་བའི་སྤྱོད་ལམ་གྱི་རྣལ་འབྱོར་ཏེ་རྣལ་འབྱོར་བཞི་ཡིན་ལ། པའི་ཞེས་པ་ནི་བཞི་པོ་དེ་དག་ལྡན་པའི་རྣལ་འབྱོར་པའོ། །དབང་ཕྱུག་ནི་བཞི་པོ་དེ་ལ་ཐུན་བཞི་ཡི་རིམ་གྱིས་གོམས་པར་བྱས་པས་དེ་ལ་དབང་དུ་གྱུར་པའོ། །ཡང་བཤད་པ་གཉིས་པ་ནི་མི་སློབ་པའི་རྣལ་འབྱོར་པའི་དབང་དུ་བྱས་ན། རྣལ་འབྱོར་ནི་ཆོས་ཐམས་ཅད་བསམ་གྱིས་མི་ཁྱབ་པ་ཐབས་ཤེས་རབ་གཉིས་སུ་མེད་པ་ཡིན་ལ། པ་ནི་དེ་དང་ལྡན་པའོ། །དབང་ཕྱུག་ནི་མཚོན་བྱེད་ཀྱི་རྫོགས་པའི་རིམ་པ་ལ་མི་ལྟོས་པར་བསམ་གྱིས་མི་ཁྱབ་པ་ལ་དབང་ཐོབ་པ་སྟེ། དེ་ཡང་དང་པོ་དཀྱིལ་འཁོར་དུ་ཞུགས་ཏེ་ལྷ་དང་སྐལ་བ་མཉམ་པར་བྱས་པའི་རྣལ་འབྱོར་པས་ཞག་གཅིག་ལ་ཐུན་བརྒྱད་དུ་བསྒོམས་པའི་བཞི་ཆའམ་བརྒྱད་ཆ་གཅིག་གིས་བར་དུ་ཆོས་ཐམས་ཅད་བསམ་གྱིས་མི་ཁྱབ་པ་ལ་རང་གི་ངང་གིས་མཉམ་པར་འཇོག་པར་ནུས་པ་ནི་རབ་ཀྱི་ཡང་རབ་སྟེ་དེ་ནི་མི་སློབ་པའི་རྣལ་འབྱོར་ཞེས་བྱའོ། །གང་ཟག་དེའི་བསྐྱེད་པའི་རིམ་པའི་དོད་ནི། བླ་མའི་ཆགས་ལྷྭམ་གཉིས་རང་གི་སྤྱི་བོར་བསམས་ནས། བླ་མ་སངས་རྒྱས་བླ་མ་ཆོས། །ཞེས་པ་ལ་སོགས་པས་མོས་གུས་བྱེད་པའོ། །དེས་བསྐྱེད་པའི་རིམ་པར་ཅིས་ཏེ་འགྲོ་སྙམ་ན་བསྐྱེད་རིམ་བསྒོམས་པས་ཀྱང་རང་གི་རྒྱུད་ལ་ཚོགས་གསོག་ཅིང་སྒྲིབ་པ་སྦྱོང་བར་བྱེད་པ་བཞིན་དུ་སྔ་མས་ཀྱང་རང་གི་རྒྱུད་ལ་ཚོགས་གསོག་ཅིང་སྒྲིབ་པ་སྦྱོང་བར་བྱེད་པའི་ཕྱིར་རོ། །འདིའི་རྫོགས་པའི་རིམ་པ་ནི་སྔར་སློབ་པའི་རྣལ་འབྱོར་པ་སློབ་པའི་དུས་སུ་མཚོན་བྱེད་ལ་ལྟོས་པའི་རྫོགས་པའི་རིམ་པ་རྡོ་རྗེ་སེམས་དཔའ་བསྡུས་པ་ལ་སོགས་པ་ལ་གོམས་པར་བྱས་ཟིན་པ་ཡིན་པས་མི་སློབ་པའི་རྣལ་འབྱོར་བསྒོམ་པའི་དུས་སུ་མཚོན་བྱེད་ལ་མི་ལྟོས་པར་ཆོས་ཐམས་ཅད་བསམ་གྱིས་མི་ཁྱབ་པ་གསལ་ལ་མི་རྟོག་པ་དེ་བསྒོམ་པའོ། །ཡང་བཤད་པ་གསུམ་པ་ནི་བདེ་མཆོག་ཉུང་ངུ་དང་། རྣལ་འབྱོར་མ་ཀུན་ཏུ་སྤྱོད་པའི་རྒྱུད་ཀྱི་དགོངས་པས་རྒྱུད་སྡེ་དྲུག་ཏུ་གནས་པ་ཡིན་པས་ན། དེ་ཡང་རྣལ་འབྱོར་པའི་ཞེས་པ་ནི་བྱ་བའི་རྒྱུད་ལ་སོགས་པའི་ཆོ་ག་ཉམས་སུ་ལེན་པའི་གང་ཟག་ལ་བྱ་བའི་རྒྱུད་ཀྱི་རྣལ་འབྱོར་པ་ཞེས་པ་ལ་སོགས་པར་མིང་འདོགས་པ་ཡིན་ལ། རྒྱུད་འདི་རྒྱུད་སྡེ་དྲུག་པ་མའི་ཡང་མ་བླ་ན་མེད་པའི་རྒྱུད་ཡིན་པས་རྒྱུད་འདིའི་ལམ་ཉམས་སུ་ལེན་པའི་སྒྲུབ་པ་པོ་ལ་ཡང་མིང་རྣལ་འབྱོར་པའི་དབང་ཕྱུག་ཞེས་བྱ་སྟེ། དཔེར་ན་འཇིག་རྟེན་ན་བཙུན་མོ་རྣམས་ཀྱི་ཁྱོ་གྲལ་གྱི་གོ་རིམ་མམ། ག་བུར་ལ་སོགས་པའི་སྨན་གྱི་སྣོད་ཀྱི་གོ་རིམ་བཞིན་ནོ། །དེས་ན་འདིར་རྟེན་གྱི་གང་ཟག་ཁྱད་པར་དུ་བསྟན་པ་འདིས་ནི་གང་ཟག་བཞི་ལས་ཡང་རབ་ཀྱི་ཉམས་སུ་བླང་བྱ་ཡིན་པར་ཤུགས་ལ་བསྟན་ནོ། །དེའི་ཕྱིར་བླ་མ་ཕམ་འཐིང་པ་ནི་སྒྲུབ་པའི་ཐབས་འདི་ཉམས་སུ་ལེན་པའི་གང་ཟག་ཡང་རབ་བཞིར་བཞེད་ལ། བླ་མ་དུས་འཁོར་བ་དང་། ཁ་ཆེ་བྱང་ཆུབ་བཟང་པོ་ནི་འདིར་རབ་ཀྱི་རབ་མི་སློབ་པའི་རྣལ་འབྱོར་པའི་ཉམས་བླང་ཕར་བོར་ནས་སློབ་པའི་རྣལ་འབྱོར་ཉམས་སུ་ལེན་པ་ལ་སྒྲུབ་ཐབས་རྒྱས་འབྲིང་བསྡུས་པ་གསུམ་དུ་བཞེད་དོ། །གསུམ་དུ་ཕྱེ་བ་ནི་གཉན་ཕུལ་བྱུང་བས་བཤད་ལ། རྗེ་བཙུན་རྩེ་མོས་ནི་དེ་དག་གི་དོན་བསྡུས་ནས། སེམས་ཅན་ཐམས་ཅད་ལ་གཅིག་ཏུ་བརྩེ་བའི་བློ་དང་ལྡན་པས་ཡང་དག་པའི་བླ་མ་བསྙེན་བཀུར་བས། དཔལ་སྡོམ་པའི་དཀྱིལ་འཁོར་དུ་དབང་བསྐུར་ཞིང་རྗེས་སུ་གནང་བ་ཐོབ་པ་སྤྱི་དང་ཁྱད་པར་གྱི་དམ་ཚིག་ལ་གནས་ཤིང་། བླ་མའི་མན་ངག་གི་ལུང་ཡང་དག་པ་དང་ལྡན་པའི་རྣལ་འབྱོར་པའི་དབང་ཕྱུག་གིས་ཞེས་གསུངས་ཤིང་། རྗེ་བཙུན་ཡང་འདི་བཞིན་དུ་བཞེད་དོ། །དམར་གྱིས་རྣལ་འབྱོར་ནི་ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་ལ་བྱ། དབང་ཕྱུག་ནི་དེ་ཉིད་ལ་དབང་བསྒྱུར་ཞིང་ཕྱུག་པ་སྟེ། མཐར་ཐུག་སངས་རྒྱས་སོ། །ད་ལྟའི་རྣལ་འབྱོར་པ་ལ་དེ་ལྟར་དུ་མིང་འདོགས་པ་ནི་རྒྱུ་ལ་འབྲས་བུའི་མིང་གིས་བཏགས་པའོ་ཞེས་བཞེད་དེ། མིང་གི་འདོགས་ཚུལ་འདི་ནི་སྔར་གྱི་བཤད་ཚུལ་ཐམས་ཅད་ལ་ཡང་ཉེ་བར་མཁོ་བ་ཞིག་སྣང་ངོ་། །གསུམ་པ་ལ་གཉིས་ཏེ། ཇོ་བོ་བྷ་ཌནྟ་ནས་བརྒྱུད་པའི་མངོན་རྟོགས་ཀྱི་ཆིངས་བཤད་པ། ཕམ་འཐིང་པ་ནས་བརྒྱུད་པའི་ཉམས་ལེན་ཞིབ་ཏུ་བཤད་པའོ། །དང་པོ་ནི་རྗེ་བཙུན་པུ་ཧྲངས་ལོ་ཆུང་པ་ནས་རིམ་པ་བཞིན་དུ་བརྒྱུད་པའི་མན་ངག་དམར་ཆོས་ཀྱི་རྒྱལ་པོས་འདི་ལྟར་བཤད་དེ། རྟེན་བསྐྱེད་པའི་རིམ་པ་ལ་མཉམ་པར་བཞག་པའི་རྣལ་འབྱོར་ནི། མཉམ་པར་བཞག་པའི་ཆོས་བཅུ་བཞིས་བསྡུས་པ་ཡིན་ནོ། །ཅི་ལྟར་ན་འདི་ལ་རྒྱུའི་ལྷག་མོས་དང་། འབྲས་བུའི་ལྷག་མོས་གཉིས་ལས། དང་པོ་ལ་ཡང་གཉིས་ཏེ། སྔོན་འགྲོ་དང་། དངོས་གཞིའོ། །དང་པོ་ལ་ཉོན་མོངས་པའི་སྒྲིབ་པ་ལས་བསྲུང་བའི་དོན་དུ་རྣལ་འབྱོར་བསྲུང་བ་དང་། ཤེས་བྱའི་སྒྲིབ་པ་ལས་བསྲུང་བའི་དོན་དུ་བདག་བསྲུང་བ་དང་། ཕྱིའི་བགེགས་ལས་བསྲུང་བའི་ཕྱིར་གནས་བསྲུང་བ་སྟེ། ཚད་མེད་བཞི་བསྒོམ་པ་དང་། ཕུང་ཁམས་སྐྱེ་མཆེད་བྱིན་གྱིས་བརླབ་པ་དང་། སྲུང་བའི་འཁོར་ལོ་བསྒོམ་པ་གསུམ་ལ་བཞེད་དོ། །གཉིས་པ་ལ་གཉིས་ཏེ། ཀུན་རྫོབ་ཀྱི་བདེན་པ་རྟོགས་པར་བྱ་བའི་ཕྱིར་བསོད་ནམས་ཀྱི་ཚོགས་བསག་པ་དང་། དོན་དམ་པའི་བདེན་པ་ལ་རྨོངས་པ་སྤང་བའི་ཕྱིར་ཡེ་ཤེས་ཀྱི་ཚོགས་བསག་པའོ། །གཉིས་པ་འབྲས་བུའི་ལྷག་མོས་ལ་གཉིས་ཏེ། རྟེན་དང་བརྟེན་པར་བཅས་པའི་སངས་རྒྱས་ཀྱི་ཞིང་སྦྱང་བའི་ཕྱིར་བདེ་བ་ཆེན་པོ་འབྲས་བུ་སྤྱིའི་ལྷག་མོས་དང་། སྐུ་གསུམ་ལམ་དུ་བྱ་བའི་ཕྱིར་འབྲས་བུ་བྱེ་བྲག་གི་ལྷག་མོས་སོ། །འདི་ལ་གསུམ་སྟེ། ཆོས་སྐུ་ལམ་དུ་བྱ་ཞིང་ལམ་དང་ལྷ་ལ་ཐེ་ཚོམ་སྤང་བའི་ཕྱིར་ཆོས་སྐུའི་ལྷག་མོས་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་དང་། ལོངས་སྐུ་ལམ་དུ་བྱ་ཞིང་གཙོ་བོའི་ལུས་ལ་ཞེན་པ་སྤང་བའི་ཕྱིར་ལོངས་སྐུའི་ལྷག་མོས་ལུས་ལ་སྐུའི་དཀྱིལ་འཁོར་འགོད་པ་དང་། སྤྲུལ་སྐུ་ལམ་དུ་བྱ་ཞིང་ཆོས་ཐམས་ཅད་སྤྲོ་བ་དང་བསྡུ་བའི་སྒོ་ནས་ཏིང་ངེ་འཛིན་དུ་མ་ལ་དབང་འབྱོར་པར་བྱ་བའི་ཕྱིར་སྤྲུལ་སྐུའི་ལྷག་མོས་སོ། །འདི་ལ་དྲུག་སྟེ། ཏིང་ངེ་འཛིན་བརྟན་པར་བྱ་བའི་ཕྱིར་གོ་ཆ་བགོ་བ་དང་། བཟང་ངན་ནམ་ཐ་དད་ཀྱི་རྟོག་པ་སྤོང་བའི་ཕྱིར་ཡེ་ཤེས་པ་གཞུག་པ་དང་། ཆོས་ཐམས་ཅད་གདོད་མ་ནས་རྣམ་པར་དག་པ་མཚོན་པའི་ཕྱིར་དབང་བསྐུར་བ་དང་། ལྷན་ཅིག་སྐྱེས་པའི་ཡེ་ཤེས་བདེ་བ་ཆེན་པོ་རྟོགས་པར་བྱ་བའི་ཕྱིར་མཆོད་པ་བྱ་བ་དང་། འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་མྱུར་དུ་འགྲུབ་པར་བྱ་བའི་ཕྱིར་བཟླས་པ་བྱ་བ་དང་། ཐུན་མཚམས་ཤེས་ཤིང་མཁའ་འགྲོ་མའི་བྱིན་རླབས་འབྱུང་བའི་ཕྱིར་དུ་བདུད་རྩི་མྱང་བའོ། །དེ་ལྟར་མཉམ་བཞག་གི་ཆོས་བཅུ་བཞི་པོ་དེ་རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། དེ་ལྟར་དེ་ཉིད་བཅུ་བཞི་ནི། །མདོར་བསྡུས་ནས་ནི་བཤད་པ་ཡིན། །ཞེས་པས་བསྟན་པ་ཡིན་ནོ། །ཞེས་བཤད་དོ། །གཉིས་པ་ནི། རྗེ་བཙུན་ཕམ་འཐིང་པའི་མན་ངག་མལ་གྱོ་ནས་བརྒྱུད་པ་རྗེ་བཙུན་རིན་པོ་ཆེ་འདི་ལྟར་བཞེད་དེ། ལམ་མངོན་པར་རྟོགས་པ་ནི་བཞིས་བཅིངས་པ་སྟེ། མཉམ་པར་བཞག་པའི་རྣལ་འབྱོར། སྤྱོད་ལམ་གྱི་རྣལ་འབྱོར། གཏོར་མའི་རྣལ་འབྱོར། ཁ་ཟས་ཀྱི་རྣལ་འབྱོར་རོ། །ཉལ་བའི་རྣལ་འབྱོར་ནི་རྫོགས་པའི་རིམ་པའི་ཁོངས་སུ་འདུ་ལ། ལྡང་བའི་རྣལ་འབྱོར་དང་། ཁྲུས་ཀྱི་རྣལ་འབྱོར་གཉིས་ནི་བསྐྱེད་རིམ་གྱི་སྔོན་འགྲོ་ཡིན་ཅིང་། དག་པ་རྗེས་སུ་དྲན་པ་ནི་ཁ་ཅིག་སྤྱོད་ལམ་གྱི་ཁོངས་སུ་ཡང་སྡུད་མོད་ཀྱི། འདིར་བསྐྱེད་རིམ་བརྟན་པར་བྱེད་པ་ཡིན་པས་མཉམ་གཞག་གི་ཁོངས་སུ་བསྡུའོ། །དང་པོ་མཉམ་པར་བཞག་པའི་རྣལ་འབྱོར་ལ་གཉིས་ཏེ། བསྐྱེད་པའི་རིམ་པ་དང་། རྫོགས་པའི་རིམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་ལ་མཆོད་པ་དང་། བཟླས་པའི་རྣལ་འབྱོར་རོ། །དང་པོ་ལ་གསུམ་སྟེ། རྒྱས་པ་ལ་དགའ་བས་ཅི་སྙེད་ཡོད་པའི་ཆོས་ཇི་ལྟ་བ་བཞིན་དུ་བསྒོམ་པ་དང་། འབྲིང་ལ་དགའ་བས་ཇི་ལྟ་བ་བཞིན་བསྒོམ་པ་དང་། བསྡུས་པ་ལ་དགའ་བས་རང་གི་ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པའོ། །དང་པོ་ལ་གཉིས་ཏེ། བདག་ཉིད་སངས་རྒྱས་སུ་བསྐྱེད་པ་དང་། དེ་ལ་མཆོད་པའོ། །དང་པོ་ལ་གཉིས་ཏེ། རྒྱུ་ཚོགས་གཉིས་བསག་པ་དང་། འབྲས་བུ་ལྷར་བསྐྱེད་པའོ། །དང་པོ་ལ་གཉིས་ཏེ། བསོད་ནམས་ཀྱི་ཚོགས་འཁོར་དང་བཅས་པ་དང་། དོན་ཆེན་པོ་ཡེ་ཤེས་ཀྱི་ཚོགས་བསྒོམ་པའོ། །དང་པོ་ལ་བཞི་སྟེ། སོག་པར་གྱུར་པའི་དགེ་བའི་རྩ་བ་ཐམས་ཅད་གཞན་དོན་དུ་འགྱུར་བར་བྱ་བའི་ཕྱིར་ཚངས་པའི་གནས་བཞི་བསྒོམ་པ་དང་། ཚོགས་སོག་པའི་རྟེན་ཁྱད་པར་ཅན་གཅིག་དགོས་པས་ཕུང་ཁམས་སྐྱེ་མཆེད་གཞི་སྦྱང་བསྒྱུར་དང་། ཚོགས་བསག་དངོས་དང་འབྲེལ་བས་ཚོགས་བསག་བཅུ་གསུམ་གྱིས་ཚོགས་བསག་པ་དང་། དོན་ཆེན་པོ་ཡེ་ཤེས་ཀྱི་ཚོགས་ལ་འཇུག་པ་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པའོ། །དང་པོ་ལ་གཉིས་ཏེ། སྔོན་དུ་བྱ་བའི་རིམ་པ་དང་། རྣལ་འབྱོར་བསྒོམ་པ་དངོས་སོ། །དང་པོ་ནི། ཐོ་རངས་ཀྱི་དུས་སུ་ཚངས་པའི་གནས་བཞི་བསྒོམ་པའི་སྔོན་དུ་ལྡང་བའི་རྣལ་འབྱོར་འཇུག་ལ། དེའི་ཡང་སྔོན་དུ་ཉལ་བའི་རྣལ་འབྱོར་འཇུག་པའི་རིམ་པ་བཞིན་དུ་བརྗོད་ན། མདང་ནུབ་མོ་ཉལ་བའི་རྣལ་འབྱོར་ཆོས་ཐམས་ཅད་བསམ་གྱིས་མི་ཁྱབ་པ་རྡོ་རྗེ་སེམས་དཔའ་བསྡུ་བའི་རྫོགས་པའི་རིམ་པ་སྟོང་པ་ཉིད་ཀྱི་ངང་ལ་ཉལ་བར་བྱ་སྟེ། ཉལ་བའི་རྣལ་འབྱོར་རོ། །དེ་ནས་ལྡང་བའི་རྣལ་འབྱོར་ནས་ཚངས་པའི་གནས་བཞི་བསྒོམ་པ་ལ་ཐུག་གི་བར་དུ་སྔོན་དུ་བྱ་བའི་རིམ་པ་ལ་མན་ངག་ལས་འབྱུང་བའི་ལུགས་དང་། འགྲེལ་པ་དག་ལས་འབྱུང་བའི་ལུགས་དང་། དེས་ལུགས་སྔ་མ་འགོག་པ་མི་འཐད་པར་བསྟན་པ་དང་གསུམ་ལས། དང་པོ་ནི། ནམ་གྱི་བཞི་ཆའམ་བརྒྱད་ཆ་ནས་ལྡང་བར་འདོད་པས། ནམ་མཁའ་ལ་ཌཱ་མ་རུའི་སྒྲ་ཀ་ར་ཀ་ར་ཀུ་རུ་ཀུ་རུ་ཞེས་བྱ་བ་ལ་སོགས་པ་དཔའ་བོ་ཉི་ཤུ་རྩ་བཞིའི་སྔགས་སུ་གྲག་པས་བདག་གི་གཉིད་བསྐུལ་ནས་སད་པ་དང་མཉམ་དུ་དཔལ་འཁོར་ལོ་བདེ་མཆོག་ཞལ་བཞི་ཕྱག་བཅུ་གཉིས་པ་ཡུམ་རྡོ་རྗེ་ཕག་མོ་དང་མཉམ་པར་སྦྱོར་བའི་སྐུ་ཅན་དུ་ལྡང་བར་བྱ་སྟེ། ལུས་ལྷར་བྱིན་གྱིས་བརླབ་པ་སྐུའི་དགའ་བའོ། །སྤྱིར་ལྡང་བའི་རྣལ་འབྱོར་ཙམ་ལ་ཞལ་གཅིག་ཕྱག་གཉིས་པའི་རྣམ་པར་ལངས་ཀྱང་དགོས་པ་འགྲུབ་མོད་ཀྱི་འདིར་ནི་ཚངས་པའི་གནས་བཞི་བསྒོམ་ཚུལ་ཐུན་མོང་མ་ཡིན་པ་ལ་ཞལ་བཞི་པར་ལྡང་དགོས་པས་དེའི་དབང་དུ་བྱས་པའོ། །འདི་ནི་གྲུབ་ཆེན་རྡོ་རྗེ་དྲིལ་བུ་པའི་དགོངས་པ་ཡང་ཡིན་ཏེ། དྲིལ་བུ་པའི་གཞུང་ལས། ནངས་པར་སད་པ་དང་མལ་ནས་ལངས་ལ་ཞེས་གསུངས་ལ། ལངས་ཚུལ་ཡང་། དྲིལ་བུ་གཞུང་ཆུང་ལས། ཉེར་བཞིས་བསྐུལ་ནས་ཞལ་བཞི་ཡི། །དཔའ་བོའི་དབང་པོ་བཞེངས་པར་བྱ། །ཞེས་གསུངས་པས་སོ། །དེ་ནས་ངག་ཏུ་ཤྲཱི་ཧེ་རུ་ཀ་ཨ་ཧཾ་ཞེས་བརྗོད་ལ། དེའི་དོན་ཀུན་སྤྱོད་ལས། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་གསུངས་པ་དྲན་པར་བྱ་བ་ནི་ངག་སྔགས་སུ་བྱིན་གྱིས་བརླབ་པ་གསུང་གི་དགའ་བའོ། །གསུང་གི་དགའ་བ་ཙམ་ལ་མངོན་བརྗོད་ལས་གསུངས་པ་ལྟར་རྐང་པ་བརྒྱད་པ་བརྗོད་པ་དང་། ཀུན་སྤྱོད་ལས་གསུངས་པ་ལྟར་ཨཱ་ལི་ཀཱ་ལི་བརྗོད་པས་ཀྱང་འགྲུབ་མོད་ཀྱི། འདིར་དེ་ལྟར་བརྗོད་པ་ཡང་རྡོ་རྗེ་དྲིལ་བུ་པའི་དགོངས་པ་ཡིན་ཏེ། སྒྲུབ་ཐབས་ལས། རྣལ་འབྱོར་དང་རྗེས་སུ་མཐུན་པའི་གནས་སུ་སྟན་བདེ་བ་ལ་འདུག་སྟེ། བདུད་རྩིའི་རིལ་བུ་ཁར་བཅུག་ལ། ཤྲཱི་ཧེ་རུ་ཀ་ཞེས་བྱ་བའི་དོན་དྲན་པར་བྱ་སྟེ། ཞེས་གསུངས་ཤིང་། སྐུའི་དགའ་བ་སྔོན་དུ་སོང་། ཐུགས་ཀྱི་དགའ་བ་རྗེས་ལ་འབྱུང་བས་གསུང་གི་དགའ་བ་ལས་མ་འདས་པའི་ཕྱིར་རོ། །དེ་ལ་རྣལ་འབྱོར་དང་རྗེས་སུ་མཐུན་པའི་གནས་ནི་བཤད་ཟིན་ལ། ཕྱི་མ་གཉིས་ཀྱི་དོན་ལྭ་བ་པ་དང་། པྲཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེའི་འགྲེལ་པ་རྣམས་སུ་རོ་ལ་ཉེ་བར་གནས་པ་ལ་སྐྲ་བཀྲོལ་ཏེ་བདུད་རྩི་ལྔའི་རིལ་བུ་ཁར་བཅུག་ལ། ཁ་ལྷོ་ཕྱོགས་སུ་བལྟས་པའམ་མོས་ཏེ་ཞེས་གསུངས་ཏེ། རོ་ལ་ཉེ་བར་གནས་པའི་དོན། ཧེ་རུ་ཀའི་ཆས་དྲུག་ནས་གསུངས་པ་ལྟར་རོ་གདན་དངོས་སམ་རས་ལ་སོགས་པ་ལ་རོའི་གཟུགས་བརྙན་བྲིས་པའམ་རོའི་གདན་ཡོད་པར་མོས་པ་ཡང་རུང་སྟེ། བདག་མེད་པ་ལ་གནས་པ་མཚོན་པའོ། །སྐྲ་གྲོལ་བ་ནི་ཁྱིམ་པའི་རྟེན་ཅན་ཡིན་ན། ཐོར་ཅོག་མི་བྱ་བར་བཀྲོལ་ཞེས་པའི་དོན་ཡིན་གྱི། སྐྲ་དངོས་སུ་མེད་ན་བཅོས་མའི་སྐྲས་བརྒྱན་ཞེས་པ་ནི་དོན་མིན་ནོ། །བདུད་རྩི་ལྔའི་རིལ་བུ་ཁར་བཅུག་པ་ནི་བཟའ་བའི་དམ་ཚིག་ཏུ་འགྱུར་པ་དང་། མཁའ་འགྲོས་བྱིན་གྱིས་བརླབ་པ་དང་། ཁ་དག་པས་གསུང་གི་དགའ་བ་དང་རྗེས་སུ་མཐུན་པའོ། །བདུད་རྩི་རིལ་བུ་མེད་ན་ཆང་བདུད་རྩིར་བྱིན་གྱིས་བརླབས་ལ་མྱང་། དེའང་མེད་ན་ཡོད་པར་བསམས་ནས་བྱིན་རླབས་ཀྱི་ཆོ་ག་བྱས་ནས་མྱངས་པར་བསམས་ཏེ། ཆོས་རྗེ་བྲག་ཕུག་པ་སྐབས་འདིར་བདུད་རྩི་བྱིན་རླབས་མཛད་པར་གྲག་གོ །ཁ་ལྷོ་ཕྱོགས་སུ་བལྟས་པའམ། མོས་པ་ནི་བྱ་བའི་རྒྱུད་དང་དུས་འཁོར་བ་དག ཤར་དང་བྱང་གཉིས་ཐབས་ཀྱི་ཕྱོགས་དང་། ནུབ་དང་ལྷོ་གཉིས་ཤེས་རབ་ཀྱི་ཕྱོགས་ཡིན་པས་འདིར་ཤེས་རབ་ཀྱི་རྒྱུད་གཙོ་ཆེ་བ་ལ་དགོངས་པའོ། །འོ་ན་ནུབ་ཀྱི་ཕྱོགས་སུ་ཡང་བལྟ་བར་འགྱུར་རོ་སྙམ་ན་དགོས་པ་གཉིས་པ་ནི། གདུལ་བྱ་དྲག་པོ་དབང་ཕྱུག་ཆེན་པོ་ལྷོ་ཕྱོགས་ན་ཡོད་པས། གདུལ་བྱ་གང་ན་ཡོད་པ་དེར་གཟིགས་པའོ། །མོས་པ་ནི་འཇིག་རྟེན་པའི་ལྷོ་ཕྱོགས་སུ་མོས་པ་ཡིན་གྱི། རྣལ་འབྱོར་པས་ནི་ཁ་གང་བསྟན་ཤར་ཡིན་པའོ། །དེ་ནས་སྙིང་ཁར་ཨ་དཀར་པོ་བསྒོམ་པ་མཉམ་བཞག་རྣམ་པར་མི་རྟོག་པའི་ཡེ་ཤེས་སུ་མོས་པ་བྱ། དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་རྗེས་ཐོབ་དག་པ་འཇིག་རྟེན་པའི་ཡེ་ཤེས་སུ་མོས་པ་བྱ། དེའི་སྟེང་དུ་ཡི་གེ་ཧཱུྃ་གཟུང་འཛིན་དང་བྲལ་བའི་སེམས་སུ་མོས་ཤིང་དེ་ཡང་ཡེ་ཤེས་ལྔའི་བདག་ཉིད་ཅན་དུ་མོས་པ་ནི་སེམས་ཡེ་ཤེས་སུ་བྱིན་གྱིས་བརླབ་པ་ཐུགས་ཀྱི་དགའ་བའོ། །འདི་ཡང་གྲུབ་ཆེན་དྲིལ་བུ་པའི་དགོངས་པ་ཡིན་ཏེ་སྒྲུབ་ཐབས་ལས། སྔར་གྱི་གསུང་གི་དགའ་བའི་རྗེས་སུ་སྙིང་གར་ཟླ་བ་ལ་དཔལ་མཆོག་དང་པོའི་ཡི་གེ་ཡེ་ཤེས་ལྔ་ཡི་རང་བཞིན་ཅན་འོད་ཟེར་དང་བཅས་པའོ། །དེས་སྒོ་གསུམ་གྱི་དྲི་མ་སྦྱོང་ངོ་ཞེས་གསུངས་པས་སོ། །འདི་དག་ལ་སྦྱང་གཞི་ཐ་མལ་པའི་ལུས་དང་ངག་དང་ཡིད་དག་པའི་ཆ་ནས་དག་པ་གསུམ་གྱི་ཐ་སྙད་ཀྱང་རུང་སྟེ། རྗེ་བཙུན་རྩེ་མོས། དང་པོ་ཁོ་ནར་བདག་གི་ལུས་དང་ངག་དང་ཡིད་ཡོངས་སུ་དག་པར་བྱ་བའི་ཕྱིར་ཞེས་གསུང་ཞིང་། ས་ཆེན་གྱིས་ཀྱང་ནག་པོ་པའི་ཐོ་ཡིག་ཏུ་དེ་ལྟར་གསུངས་སོ། །དེ་ལྟར་དག་པ་གསུམ་གྱི་རྗེས་སུ་ཅི་ཞིག་བྱ་སྙམ་ན་རྣལ་འབྱོར་གྱི་གྲོགས་སུ་འགྲོ་ན་ཆུ་གཙང་མའམ་རྡོ་རྗེའི་ཆུས་འོག་དབང་བསྐུར་གྱི་སྐབས་ནས་འབྱུང་བ་ལྟར་ཁྲུས་བྱ། རྣལ་འབྱོར་ལ་མི་ཕན་ན་མི་དགོས་སོ། །དེ་ནས་བསོད་ནམས་ཀྱི་ཚོགས་བསག་པ་རྒྱས་པར་འདོད་པས་ཕྱི་རོལ་མཆོད་པའི་ཆོ་ག་བྱ་སྟེ། པྲཛྙཱ་རཀྵི་ཏས། འདིར་དཔལ་འཁོར་ལོ་སྡོམ་པའི་དཀྱིལ་འཁོར་དུ་མཆོད་པ་འདོད་པའི་རྣལ་འབྱོར་པས་ཐོ་རངས་ལངས་པའམ་སྐབས་ཇི་ལྟ་བ་བཞིན་དུ་ཞེས་དང་། རྗེ་བཙུན་རྩེ་མོས། ནངས་པར་སྔར་ལངས་པའམ་མཚན་ཕྱེད་དམ། སྐབས་ཇི་ལྟར་ཡང་རུང་སྟེ། མཉམ་པར་བཞག་པ་ལས་ལངས་ལ་དཔལ་སྡོམ་པའི་དཀྱིལ་འཁོར་ལ་མཆོད་པ་ལ་སོགས་པ་རྗེས་སུ་སྤྱད་པར་བྱའོ་ཞེས་གསུངས་པས་སོ། །འོ་ན་འདིར་ཡང་མཉམ་པར་བཞག་པ་ལས་ལངས་ལ་ཞེས་དང་། ལུང་སྔ་མའི་མཇུག་ཏུ། དཔལ་བདེ་མཆོག་གི་རྣལ་འབྱོར་དང་ལྡན་པས་ཞེས་གསུངས་པས་བདག་བསྐྱེད་སྔོན་དུ་འགྲོ་དགོས་པ་མ་ཡིན་ནམ་སྙམ་ན། ཐོ་རངས་ཀྱི་ཐུན་ལ་མཉམ་པར་བཞག་པ་ལས་ལངས་པ་ནི་ཉལ་བའི་རྣལ་འབྱོར་ལས་ལངས་པའི་དོན་ཡིན་ལ། ལུང་སྔ་མར་ལྷའི་རྣལ་འབྱོར་དང་ལྡན་པས་བྱ་བར་གསུངས་པ་ནི་ལྡང་བའི་རྣལ་འབྱོར་གྱི་ཚེ་སྐུའི་དགའ་བ་དང་ལྡན་པའི་དོན་ཡིན་པས་ཐོ་རངས་ཀྱི་ཐུན་ལ་ནི་སྐབས་འདིར་བྱ་དགོས་ཏེ། ཀྱཻ་རྡོ་རྗེའི་སྒྲུབ་ཐབས་རྣམས་ལས་སྐབས་འདིར་བྱ་བར་གསུངས་པ་དང་མཐུན་ནོ། །ཐུན་གཞན་ལ་ནི་ཐུན་གྱི་མགོ་མཇུག་གང་དུ་བྱས་ཀྱང་འདྲ་ལ། སྲོད་ཐུན་ལ་ནི་ཐུན་གཞུག་ཏུ་གཏོར་མ་གཏོང་བ་དང་བསྟུན་ལ་བྱ་སྟེ། མཚན་ཕྱེད་ཀྱི་དུས་སུ་བྱ་བར་གསུང་པའི་དོན་ནོ། །རྡོ་རྗེ་སེམས་དཔའི་བསྒོམ་བཟླས་ནི་ཉལ་བའི་རྣལ་འབྱོར་ཚུལ་བཞིན་བྱས་ནས་ལྡང་བའི་རྣལ་འབྱོར་གྱི་བར་དུ་ཐུན་མཚམས་ཀྱི་ཉེས་ལྟུང་མ་བྱུང་བ་ལ་དགོངས་ནས་འདི་དང་ཀྱཻ་རྡོ་རྗེ་གཉིས་ཆར་ལས་ཐོ་རངས་ཀྱི་ཐུན་ལ་བྱ་བར་མ་གསུངས་ལ། ཐུན་གཞན་ལ་ནི་དགའ་བ་གསུམ་གྱི་སྔོན་དུའམ་རྗེས་སུ་ངེས་པར་བྱ་དགོས་ཏེ། སྙིང་པོ་རྒྱན་ལས། སངས་རྒྱས་ཀུན་གྱི་སྐུ་གཅིག་པུ། །པད་དཀར་ཟླ་བའི་དབུས་གནས་ཤིང་། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང་། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླས། །ལྟུང་སོགས་བྱིན་གྱིས་བརླབས་གྱུར་པས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱད་པར་བྱ། །འབུམ་ཕྲག་ཏུ་ནི་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་གསུངས་པས་སོ། །གཉིས་པ་ནི་པྲཛྙཱ་རཀྵི་ཏའི་འགྲེལ་པ་དང་། དེ་བཞིན་གཤེགས་པའི་རྡོ་རྗེའི་འགྲེལ་པར་ཐོག་མར་ཤྲཱི་ཧེ་རུ་ཀ་ཞེས་བྱ་བའི་ཡི་གེ་བཞིའི་དོན་མངོན་དུ་བྱས་ཏེ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་ཡིས་སྟོང་པའོ། །རུ་ནི་ཚོགས་དང་བྲལ་བ་སྟེ། །ཀ་ནི་གང་དུའང་མི་གནས་པའོ། །ཞེས་པའོ། །སེམས་ཅན་ཐམས་ཅད་ལ་ཕན་པ་དང་བདེ་བའི་རྒྱུ་ཤྲཱི་ཧེ་རུ་ཀ་ཨ་ཧཾ་ཞེས་ལན་གསུམ་བརྗོད་ལ་ཉི་མའི་གདན་ལ་བདེ་མཆོག་ཕྱག་གཉིས་པ་རྡོ་རྗེ་དང་དྲིལ་བུ་བསྣམས་པར་བདག་ཉིད་མོས་པ་བྱས་ནས། དེའི་རྗེས་ལ་ཨོཾ་གྱི་ཡི་གེའི་དང་པོ་ཅན་དང་ཧུཾ་ཧཱུྃ་ཕཊ་ཀྱི་ཡི་གེའི་མཐའ་ཅན་གྱི་ཨཱ་ལི་ཀཱ་ལིའི་ཕྲེང་བ་འོད་ཟེར་ལྔ་དང་ལྡན་པ་ལན་གསུམ་དུ་བརྗོད་པས་ཡོངས་སུ་བསྐོར་ནས་གནས་པ་ལས་འཁོར་ལོ་གསུམ་གྱི་ལྷ་ཚོགས་སྤྲོས་ཏེ་བགེགས་ཀྱི་ཚོགས་རྣམས་འཇོམས་པར་བྱེད་པ་བསྒོམས་ལ་ཞེས་ཡི་གེ་བཞིའི་དོན་རྣམ་ཐར་སྒོ་གསུམ་གྱི་སྟོང་ཉིད་བསྒོམ་པ་སེམས་དག་དང་། དེའི་ངང་ལས་ལྷ་སྐུ་ཞལ་གཅིག་ཕྱག་གཉིས་པའི་རྣམ་པར་ལངས་པ་ལུས་དག་དང་། མགོ་བོར་ཨོཾ་དང་། མཐར་ཧུཾ་ཧཱུྃ་ཕཊ་སྦྱར་བའི་ཨཱ་ལི་ཀཱ་ལི་བརྗོད་པ་ངག་དག་ཏུ་བཤད་དོ། །གསུམ་པ་ནི། འདོད་འཇོ་མཁན་པོས་འགྲེལ་པའི་བཤད་པ་དེ་ཉིད་དང་མི་མཐུན་པས་སྔར་གྱི་དགའ་བ་གསུམ་གྱི་ངོ་བོ་དང་། གོ་རིམ་གཉིས་ཀ་མི་འཐད་པར་སྨྲའོ། །དེ་ནི་དོན་མ་རྟོགས་པ་སྟེ། ཕམ་འཐིང་པའི་བཞེད་པས། པྲཛྙཱ་རཀྵི་ཏ་ནི་ནཱ་རོ་པ་ལོ་བཅུ་གཉིས་ཀྱི་བར་དུ་བསྟེན་ཀྱང་ཚོགས་བཤད་ལས། སློབ་བཤད་མ་ཐོབ་པར་གསུངས་པས་ནཱ་རོ་པའི་ཚོགས་བཤད་ཀྱིས་སློབ་བཤད་འགོག་པ་མི་རིགས་པའི་ཕྱིར་རོ། །དེ་ལ་ཡང་འདོད་འཇོ་མཁན་པོས་དེ་སྐད་ཟེར་མོད་ཀྱི་སློབ་བཤད་ཡོད་པར་འདོད་པ་རྣམས་ལ་ཡོད་ཅིང་འདི་ལ་མེད་པ་ཅི་ཡང་མེད་པས། པྲཛྙཱ་རཀྵི་ཏ་ལ་ཡང་ནཱ་རོ་པའི་སློབ་བཤད་ཡོད་པ་ཡིན་ནོ་ཞེས་ཕོ་ཚོད་ཀྱིས་སྨྲའོ། །འདིའང་མ་བརྟགས་པ་སྟེ། ཚད་མེད་བཞི་བསྒོམ་ཚུལ་དང་། ཚོགས་བསག་བཅུ་གསུམ་དང་། སྒྲ་ཚུལ་གྱི་རྟེན་འབྲེལ་དང་། ཕོ་ཉ་གསུམ་བསྲེ་སོགས་མང་དུ་ཡོད་པ་དངོས་སུ་མཐོང་བཞིན་དུ་སྙོན་འདིང་བར་མི་བྱའོ། །འོ་ན་དགའ་བ་གསུམ་གྱི་ངོ་བོ་དང་། གོ་རིམ་སྔར་བཤད་པ་རྣམས་སློབ་བཤད་དུ་ཇི་ལྟར་འགྱུར་ན། གྲུབ་ཆེན་དྲིལ་བུ་པའི་དགོངས་པར་བསྒྲུབས་ཟིན་ཅིང་སྐུའི་དགའ་བ་ཡང་ཚོགས་བཤད་ལས་ཁྱད་པར་དུ་འཕགས་ཏེ། སྤྱིར་ཐུན་མཚམས་ཀྱི་ལྷའི་རྣལ་འབྱོར་དྲན་པ་ཙམ་གྱིས་ལུས་དག་ཕྱག་གཉིས་པས་རུང་ཡང་འདིར་ཚད་མེད་བཞི་བསྒོམ་ཚུལ་ཐུན་མོང་མ་ཡིན་པ་ལ་ཞལ་བཞི་པ་ངེས་པར་དགོས་པའི་ཕྱིར་རོ། །གསུང་གི་དགའ་བ་ཡང་ཚོགས་བཤད་ལས་ཁྱད་པར་འཕགས་ཏེ། ཐ་མལ་པའི་ངག་དག་ནས་ངག་སྔགས་སུ་བྱིན་གྱིས་བརླབ་པ་ཙམ་ཨཱ་ལི་ཀཱ་ལི་དང་རྐང་པ་བརྒྱད་པ་བརྗོད་པས་འགྲུབ་ཀྱང་འདིར་སྔ་མ་ལྟར་བྱས་པས་དགོས་པ་གཉིས་པོ་དེའི་སྟེང་དུ་ཡང་ངེས་དོན་གྱི་ཧེ་རུ་ཀ་དང་། དྲང་དོན་གྱི་ཧེ་རུ་ཀ་དྲན་པ་ལྷག་པོར་འབྱུང་བའི་ཕྱིར་རོ། །ཐུགས་ཀྱི་དགའ་བ་ཡང་ཚོགས་བཤད་ལས་ཁྱད་པར་འཕགས་ཏེ། ཡི་གེ་བཞིའི་དོན་དྲན་པས་སེམས་ལ་བདག་གཉིས་སུ་འཛིན་པའི་རྣམ་རྟོག་དག་ནུས་ཀྱང་ཐ་མལ་དུ་འཛིན་པའི་རྣམ་རྟོག་འདག་པར་མི་ནུས་ལ། འདིར་ནི་ཨ་ལས་ཟླ་བའི་དཀྱིལ་འཁོར་བསྒོམས་པས་དགོས་པ་སྔ་མ་དེ་ཉིད་གྲུབ་ཅིང་། དེའི་སྟེང་དུ་ཧཱུྃ་ཡེ་ཤེས་ལྔའི་བདག་ཉིད་ཅན་བསྒོམས་པས་སེམས་ལ་ཐ་མལ་དུ་འཛིན་པའི་རྣམ་པར་རྟོག་པ་ཡང་འདག་པར་བྱེད་ལ། ཚད་མེད་བཞི་བསྒོམ་པ་དང་། གཞི་སྦྱང་བསྒྱུར་དང་། ཚོགས་ཞིང་སྤྱན་འདྲེན་པའི་རྟེན་ཡང་འདིས་འགྲུབ་པའི་ཕྱིར་རོ། །ཇི་ལྟར་ན་ཨ་ནི་ཆོས་ཉིད་སྐྱེ་བ་མེད་པའི་དོན་ཡིན་པས་ཡུལ་དེ་དང་ཡུལ་ཅན་རྣམ་པར་མི་རྟོག་པའི་ཡེ་ཤེས་མཚོན་ལ། དེ་ལས་ཟླ་བའི་དཀྱིལ་འཁོར་དུ་གྱུར་པས་ནི་རྗེས་ཐོབ་ཀྱི་གནས་སྐབས་སུ་ཡང་མཉམ་གཞག་དང་རྟོགས་པ་མཐུན་པའི་དག་པ་འཇིག་རྟེན་པའི་ཡེ་ཤེས་མཚོན་ནོ། །དེའི་སྟེང་དུ་ཧཱུྃ་བསྒོམས་པས་ནི་སེམས་ཉིད་ཡེ་ཤེས་ལྔའི་རང་བཞིན་གྱི་ཧཱུྃ་གི་གཟུགས་སུ་གྲུབ་པས་ཐ་མལ་གྱི་རྣམ་རྟོག་དག་པའོ། །འདི་ལ་བུ་སྟོན་གྱིས། ཐབས་དང་ཤེས་རབ་རང་བཞིན་ཅན། །ཧཱུྃ་ལས་བྱུང་བའི་རྡོ་རྗེ་ནི། །ཞེས་བཤད་པས་ཐབས་ཤེས་གཉིས་མེད་ཀྱི་རང་བཞིན་ཡིན་པ་དང་། ཧཱུྃ་ནི་སྐུ་དང་གསུང་དང་ཐུགས། །རྡོ་རྗེ་མི་བྱེད་གསུམ་འབྱུང་བ། །ཞེས་ཧ་སྐུ་རྡོ་རྗེ་རྣམ་སྣང་གི་ས་བོན། ཨཱཿགསུང་རྡོ་རྗེ་འོད་དཔག་མེད་ཀྱི་ས་བོན་དུ་བཤད་པ་ཡོད་ཀྱི་ཧཱུྃ་ཆ་ལྔ་ཡེ་ཤེས་ལྔ་ལ་སོ་སོར་སྦྱར་བ་ནི་ཐིམ་རིམ་ཙམ་ལ་དཔགས་པ་ཡིན་པ་འདྲ། རྒྱུད་དང་རྒྱ་གཞུང་གང་ན་ཡང་བཤད་པ་མ་མཐོང་ངོ་ཞེས་གསུང་། དེ་ཡང་མི་འཐད་དེ། སཾ་བུ་ཊི་ལས། ཆ་ལྔ་པ་ཡི་རང་བཞིན་དུ། །སྙིང་གི་དབུས་སུ་རྣམ་པར་གནས། །ཞེས་དང་། མངོན་བརྗོད་ལས། དེ་སྟེང་དེ་ཉིད་མཆོག་དམ་པ། །ཡེ་ཤེས་ལྔ་པོ་ཞི་བ་ཡིན། །སྣ་ཚོགས་འོད་ཟེར་གསལ་བ་ཡིས། །རྣམ་པར་འཕྲོ་བས་ཀུན་དུ་ཁྱབ། །སྔོན་འགྲུབ་པ་ནི་བསྐུལ་ནས་ནི། །བྱིན་གྱིས་བརླབ་པར་བྱེད་པ་ཡིན། །ཞེས་དང་། དེའི་དོན་སློབ་དཔོན་དྲིལ་བུ་པས་སྙིང་གར་ཟླ་བ་ལ་དཔལ་མཆོག་དང་པོའི་ཡི་གེ་ཡེ་ཤེས་ལྔའི་རང་བཞིན་ཅན་འོད་ཟེར་དང་བཅས་པའོ། །ཞེས་གསུངས་པས་སོ། །དེས་ཧཱུྃ་ཡེ་ཤེས་ལྔའི་རང་བཞིན་ཅན་དུ་གྲུབ་མོད་ཆ་ལྔ་པོ་ཡེ་ཤེས་ལྔ་ལ་སོ་སོར་སྦྱར་བ་མི་གྲུབ་བོ་སྙམ་ན། དེ་ཡང་མ་ཡིན་ཏེ། སཾ་བུ་ཊིའི་ལུང་དེ་ཉིད་ཀྱིས་ཧཱུྃ་ཆ་ལྔ་པར་གསུང་ཤིང་། ལུང་གཞན་རྣམས་ཀྱིས་ཡེ་ཤེས་ལྔའི་རང་བཞིན་དུ་གསུངས་པས་ལེགས་པར་གྲུབ་བོ། །རྒྱ་གཞུང་ལས་མ་བཤད་པ་ཡང་མ་ཡིན་ཏེ། ཨ་བྷྱ་ཀ་རས་བདེ་མཆོག་ལྷན་སྐྱེས་ཀྱི་སྒྲུབ་ཐབས་སུ། ཞབས་ཀྱུ་དོན་ཡོད་གྲུབ་པ་དང་། ཧ་འོད་དཔག་མེད། མགོ་བོ་རིན་འབྱུང་། ཟླ་ཚེས་རྣམ་སྣང་། ཐིག་ལེ་ནཱ་ད་དང་བཅས་པ་མི་བསྐྱོད་པར་བཤད་ཅིང་། རིགས་ལྔ་དང་ཡེ་ཤེས་ལྔ་དོན་གཅིག་པའི་ཕྱིར་རོ། །གོ་རིམ་ཀྱང་ཚོགས་བཤད་ལས་ཁྱད་པར་དུ་འཕགས་ཏེ། སྤྱིར་ཐུན་ཕྱི་མ་རྣམས་ལ་ལུས་ངག་ཡིད་གསུམ་ཐོག་མར་གང་བློ་ཡུལ་དུ་འཆར་བ་ནས་དག་པ་བསྒོམ་དགོས་པས་གོ་རིམ་གཙོ་བོ་མ་ཡིན་ཡང་། ཐོ་རངས་ཀྱི་ཐུན་ལ་ལྡང་བའི་རྣལ་འབྱོར་དང་། སྐུའི་དགའ་བ་བསྟུན་དགོས་པ་དྲིལ་བུ་ཞབས་ཀྱི་གཞུང་གིས་གྲུབ་པའི་ཕྱིར་རོ། །འདོད་འཇོ་མཁན་པོས། སྐབས་འདིར། སྔོན་འགྲོའི་གཏོར་མ་བཏང་ནས། སྒྲུབ་པའི་བར་ཆད་ཞི་བའི་ཕྲིན་ལས་བཅོལ་བ་ནི་ཐུན་བཞི་ཀའམ་ཐུན་དང་པོའི་འགོར་བྱའོ། །སྐབས་འདིའི་གཏོར་མ་ནི་ཞིང་སྐྱོང་ལ་སྟེར་བར་མཁའ་འགྲོ་རྒྱ་མཚོ་ལས་གསུངས་པས། འཇིག་རྟེན་པའི་གཏོར་མའོ་ཞེས་སྒྲུབ་ཐབས་རྐྱང་པ་བསྒོམ་པའི་འགོར་སྔོན་འགྲོ་གཏོར་མ་གཏང་བ་ནི་མཐོང་བ་བརྒྱུད་པའི་ལག་ལེན་མེད་པའི་སྐྱོན་ཏེ། སྒྲུབ་ཐབས་དག་ལས། མཆོད་པ་དང་གཏོར་མའི་རྣལ་འབྱོར་བྱ་བར་གསུངས་པ་ནི་སྔར་བཤད་པ་ལྟར། བསོད་ནམས་ཚོགས་བསག་རྒྱས་པ་ཕྱི་རོལ་མཆོད་པའི་ཆོ་ག་བྱ་བའི་དོན་ཡིན་ཅིང་། དེའི་ཚེ་ཞིང་སྐྱོང་གི་གཏོར་མའམ། འཇིག་རྟེན་པའི་གཏོར་མ་ཡང་མཁའ་འགྲོ་སྤྱི་གཏོར་ཡིན་གྱི། དེ་ལས་གཞན་དུ་སྒྲུབ་ཐབས་རྐྱང་པའི་མགོར་སྔོན་འགྲོ་གཏོར་མ་གཏོང་བ་ནི་རྒྱ་བོད་སུའི་ལུགས་ལ་ཡང་མེད་པའི་ཕྱིར་རོ། །གཉིས་པ་རྣལ་འབྱོར་བསྒོམ་པ་དངོས་ནི་གཞུང་ལས། ཚངས་པའི་གནས་བཞི་བསྒོམ་པར་བྱའོ་ཞེས་གསུངས་ཏེ། འགྱུར་ཁ་ཅིག་ལས། དེའི་ཐོག་མར། དང་པོ་ཁོ་ནར་ཞེས་འབྱུང་བ་ལྟར་ན། སྒྲུབ་ཐབས་གཞན་ལས། ཡུལ་དག་པ་ལ་བརྟེན་པའི་ཚོགས་བསག་གི་རྗེས་སུ་འདི་འབྱུང་བ་ལྟར། རྒྱུན་བཤགས་ཀྱི་རྗེས་སུ་མ་ཡིན་གྱི་དང་པོ་ཁོ་ནར་བསྒོམ་ཞེས་གསུངས་པའི་དོན་ནོ། །དེའི་དགོས་པ་ཡང་། ཇོ་བོ་རྗེ་ནས་བརྒྱུད་པ་ལོ་ཆེན་དང་། པུ་ཧྲངས་པ་ནས་བརྒྱུད་པ་དམར་གྱི་འགྲེལ་པ་གཉིས་ལས། རྣལ་འབྱོར་བསྲུང་བ་ཞེས་གསུངས་ཏེ། རྣལ་འབྱོར་ནི་ཞི་གནས་དང་ལྷག་མཐོང་ཟུང་དུ་འཇུག་པའི་ཏིང་ངེ་འཛིན་ཡིན་ལ། ལྷག་མཐོང་གི་རྒྱུ་ཞི་གནས་ཡིན་ཅིང་དེའི་འགལ་རྐྱེན་ཉོན་མོངས་པ་ཞེ་སྡང་དང་། རྣམ་པར་འཚེ་བ་དང་། ཕྲག་དོག་དང་། ཆགས་ཞེན་ནོ། །དེ་དག་གི་གཉེན་པོར་རིམ་པ་ལྟར་བྱམས་པ་དང་། སྙིང་རྗེ་དང་། དགའ་བ་དང་། བཏང་སྙོམས་བསྒོམས་པས་བསྲུང་ཞེས་བཤད་དོ། །རྗེ་བཙུན་གྱིས་ནི་འོག་ནས་བསྒོམ་པར་འགྱུར་བའི་ཕུང་ཁམས་སྐྱེ་མཆེད་ལྷའི་ང་རྒྱལ་བྱེད་པ་སོགས་ཀྱི་མངོན་རྟོགས་མཐའ་དག་གཞན་དོན་དུ་འགྱུར་བར་བྱ་བའི་ཕྱིར་ཐོག་མར་བསྒོམ་ཞེས་གསུངས་ཏེ་དགོས་པ་གཉིས་ཀ་ཡང་མི་འགལ་ལོ། །དེ་རྣམས་ལ་ཅིའི་ཕྱིར་ཚད་མེད་ཅེས་བྱ་ཞེ་ན་ཡུལ་སེམས་ཅན་ཚད་མེད་ལ། བློ་ཚད་མེད་སྔོན་དུ་གཏོང་བས་སོ། །བསྒོམ་བྱའི་རྣལ་འབྱོར་ནི་ཚངས་པའི་གནས་ཞེས་པ་སྟེ། གནས་སྐབས་ཀྱི་ཚངས་པ་གཟུགས་ཁམས་ཀྱི་ལྷ་དང་། གནས་ནི་དེ་ཐོབ་བྱེད་ཀྱི་རྒྱུ་སྟེ། བཤེས་སྤྲིང་ལས། བྱམས་པ་དང་ནི་དེ་བཞིན་སྙིང་རྗེ་དང་། །དགའ་བ་དང་ནི་བཏང་སྙོམས་སྒོམས་མཛོད་ཅིག །གོང་མ་བརྙེས་པར་མ་གྱུར་དེ་ལྟ་ནའང་། །ཚངས་པའི་འཇིག་རྟེན་དུ་ནི་སྐྱེ་བར་འགྱུར། །ཞེས་སོ། །མཐར་ཐུག་གི་ཚངས་པ་ནི་སྒྲིབ་པའི་དྲི་མ་མ་ལུས་པ་དང་བྲལ་ཞིང་ཚངས་པས་ན་ཚངས་པ་སྟེ། བརྟག་གཉིས་ལས། ཚངས་པ་སྒྲིབ་བྲལ་སངས་རྒྱས་ཉིད། །ཅེས་དང་། སྦྱོང་རྒྱུད་ལས། ཚངས་པ་ཆེན་པོ་པདྨའི་གདན་ལ་བཞུགས་ཏེ། ཞེས་དང་། མ་རིག་འཇོམས་པའི་ཚངས་པ་སྟེ་ཞེས་སོ། །གནས་ནི་དེ་ཐོབ་བྱེད་ཀྱི་རྒྱུ་སྟེ། ཚད་མེད་བཞི་ལས་བྱང་ཆུབ་ཀྱི་སེམས་འབྱུང་། དེ་ལས་སྦྱིན་སོགས་ཕ་རོལ་ཏུ་ཕྱིན་པའི་སྤྱོད་པ་འབྱུང་། དེས་མཐར་ཐུག་ཚངས་པ་ཐོབ་པར་བྱེད་པས་སོ། །བཞི་ཞེས་པ་ནི་གྲངས་ངེས་པ་སྟེ། མི་མཐུན་པའི་ཕྱོགས་ཉོན་མོངས་པ་བཞིའི་གཉེན་པོར་བྱམས་པ་སོགས་བཞིར་ངེས་པའོ། །བསྒོམ་ཚུལ་ནི་བསྒོམ་པར་བྱའོ། །ཞེས་པ་སྟེ། འདི་ལ་གཉིས་ཏེ། ཐུན་མོང་གི་བསྒོམ་ཚུལ་དང་། ཐུན་མོང་མ་ཡིན་པའི་བསྒོམ་ཚུལ་ལོ། །དང་པོ་ལ་རྒྱས་པར་བསྒོམ་པ་དང་། བསྡུས་ཏེ་བསྒོམ་པ་གཉིས་ལས། དང་པོ་ནི་བྱམས་སོགས་བཞི་པོ་དམ་བཅའ་དང་འབྲེལ་པའམ། སྨོན་ལམ་དང་འབྲེལ་པའམ། འདུན་པ་དང་འབྲེལ་པ་གང་རུང་གི་སྒོ་ནས་ཕ་རོལ་ཏུ་ཕྱིན་པའི་ལུགས་དང་ཐུན་མོང་དུ་སོ་སོར་བསྒོམ་པ་སྟེ། མངོན་བརྗོད་དུ། ཚངས་པའི་གནས་ནི་བཞི་པོ་དང་། །བསྡུ་བའི་དངོས་པོ་བཞི་རྣམས་དང་། །དགེ་བ་བཅུ་ཡང་དམིགས་ནས་ནི། །སེམས་ཅན་ཀུན་གྱི་དོན་ཡང་བྱ། །ཞེས་དང་། བརྟག་གཉིས་ལས། དང་པོར་བྱམས་པ་བསྒོམ་པར་བྱ། །གཉིས་པར་སྙིང་རྗེ་རྣམ་བསྒོམ་ཞིང་། །གསུམ་པར་དགའ་བ་བསྒོམ་པ་དང་། །ཀུན་གྱི་མཐའ་ན་བཏང་སྙོམས་སོ། །ཞེས་སོ། །གཉིས་པ་ནི་སེམས་ཅན་ཐམས་ཅད་འཁོར་བ་སྡུག་བསྔལ་གྱི་རྒྱ་མཚོ་ལས་བསྒྲལ་ནས་སངས་རྒྱས་ཀྱི་ས་ལ་འགོད་པར་བྱ། དེའི་ཆེད་དུ་ལམ་ཟབ་མོ་བསྒོམ་སྙམ་པའི་བྱང་ཆུབ་ཀྱི་སེམས་བསྒོམ་པ་འདི་ཉིད་ལ་ཚད་མེད་བཞི་ཚང་བར་རྗེ་བཙུན་གྱི་ལཱུ་ཧི་པའི་མངོན་རྟོགས་འབྲིང་པོའི་སྐབས་དང་། ནཱ་རོ་མཁའ་སྤྱོད་ཀྱི་མན་ངག་རྣམས་ལས་འབྱུང་ཞིང་། འགྲེལ་པ་མཁན་པོ་དག་གིས་ཀྱང་འདི་ལྟར་བཤད་པར་སྣང་ངོ་། །པྲཛྙཱ་རཀྵི་ཏའི་འགྲེལ་པ་སོགས་ཚོགས་བཤད་རྣམས་དང་། ཇོ་བོ་རྗེ་དང་། པུ་ཧྲངས་པ་ནས་བརྒྱུད་པ་རྣམས་ལའང་བསྒོམ་ཚུལ་འདི་ཉིད་ལས་གཞན་མི་སྣང་ངོ་། །གཉིས་པ་ནི་རྗེ་བཙུན་གྱིས་སྙིང་ཁའི་ཧཱུྃ་ལས་འོད་ཟེར་སྔོན་པོ་གཅིག་བྱུང་སྟེ། རྩ་བའི་ཞལ་སྔོན་པོ་ནས་ཕར་ལ་སོང་། དང་པོ་ཤར་ཕྱོགས་ཀྱི་ལོ་ཀའི་ཁམས་ཐམས་ཅད་ཁྱབ། དེ་ནས་ཕྱོགས་བཅུའི་ཁམས་གསུམ་གྱི་གནས་ཐམས་ཅད་ཁྱབ་སྟེ་འགྲོ་བ་རིས་དྲུག་དང་སྐྱེ་གནས་བཞིས་བསྡུས་པའི་སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་བསྒོམས་ལ། སླར་འོད་ཟེར་ཧཱུྃ་ལ་བསྡུས་ལ་བཞག་སྟེ་ཐུགས་ཀྱིས་བྱིན་གྱིས་བརླབ་པའོ། །ངག་ཏུ་སུ་ཁེ་བྷ་ཝན་ཏུ་ཞེས་བརྗོད་དེ་གསུང་གིས་བྱིན་གྱིས་བརླབ་པའོ། །ལུས་གཡོན་པའི་སྡིགས་མཛུབ་ཕྱོགས་བཅུར་བསྐོར་ཞིང་བརྡབས་ཏེ་སྐུ་ཡིས་བྱིན་གྱིས་བརླབ་པའོ། །དེ་ལྟར་སྐུ་གསུང་ཐུགས་བྱིན་རླབས་གསུམ་དང་ལྡན་པའི་བྱམས་པ་ཚད་མེད་པ་ནི་ཕ་རོལ་ཏུ་ཕྱིན་པའི་ཐེག་པའི་བྱམས་པ་ཚད་མེད་པ་ལས་ཁྱད་པར་དུ་འཕགས་པ་ཡིན་གསུང་སྟེ། དེ་ལྟ་བུའི་བྱིན་རླབས་གསུམ་ལྡན་གྱི་བྱམས་པ་བསྒོམ་ཚུལ་ཕ་རོལ་ཏུ་ཕྱིན་པའི་ལུགས་ལ་མེད་པའི་ཕྱིར་རོ། །དེ་བཞིན་དུ་སྙིང་ཁའི་ཧཱུྃ་ལས་འོད་ཟེར་ལྗང་གུ་དང་། དམར་པོ་དང་སེར་པོ་རྣམས་རིམ་པ་བཞིན་སྤྲོས་ཏེ། ཞལ་གཞན་གསུམ་པོ་ནས་གཡོན་སྐོར་གྱིས་སོང་སྟེ། དང་པོར་རང་རང་གི་ཕྱོགས་ཁྱབ། དེ་ནས་ཕྱོགས་བཅུ་ཁམས་གསུམ་གྱི་གནས་ཐམས་ཅད་ཁྱབ་སྟེ། ཚད་མེད་གཞན་གསུམ་ལ་བཀོད་ནས་གསུང་གིས་བྱིན་བརླབ་དང་། ཐུགས་ཀྱིས་བྱིན་བརླབ་སྔ་མ་བཞིན་བྱའོ། །གཉིས་པ་ཚོགས་བསག་པ་ལ་རྟེན་ཁྱད་པར་ཅན་དགོས་པས། ཕུང་པོ་དང་། ཁམས་དང་། སྐྱེ་མཆེད་གཞི་སྦྱང་ཞིང་བསྒྱུར་བ་ནི། ཀུན་སྤྱོད་དང་པོ་ལས། དེ་ལ་ཐོག་མར་ཕུང་པོ་ལྔའི་ང་རྒྱལ་བསྐྱེད་པར་བྱ་སྟེ། གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཞེས་པ་ནས། ནམ་མཁའི་ཁམས་པདྨ་དྲྭ་བ་ཅན་ནོ་ཞེས་པའི་བར་གསུངས་ཤིང་། ལཱུ་ཧི་པའི་གཞུང་ལས་ཀྱང་དེ་ཁོ་ན་ལྟར་གསུངས་ཤིང་། མཇུག་ཏུ། དེ་དག་ནི་ཕུང་པོ་དང་ཁམས་དང་། སྐྱེ་མཆེད་རྣམས་ཀྱི་ལྷའི་རྣམ་པར་དག་པའོ། །ཞེས་གསུངས་སོ། །འདི་འཆད་པ་ལ། གང་ལ་བསྒོམ་པའི་གཞི། གང་བསྒོམ་པའི་ལྷ། ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ་དང་བཞི་ལས། དང་པོ་ནི། རང་གི་བློ་ལ་ཐ་མལ་དུ་སྣང་བའི་ཕུང་པོ་ལྔ། སྐྱེ་མཆེད་དྲུག ཁམས་ལྔ་སྟེ་ཆོས་བཅུ་བདུན་ཡིན་ལ། དེ་ཡང་རང་རྒྱུད་ཀྱིས་བསྡུས་པ་སྟེ། འོག་ནས་འཆད་པར་འགྱུར་བའི་དགོས་པ་ལས་ཤེས་སོ། །འདི་དག་གི་མཚན་ཉིད་དང་། མཚན་གཞི་ནི་མངོན་པ་ལས་གསུངས་པ་ལྟར། ཞིབ་ཏུ་གཏན་ལ་དབབ་ཀྱང་འགལ་བ་མེད་ལ། བསྒོམ་པའི་ཚེ་ནི་རང་གི་བློ་ལ་དེ་དང་དེར་སྣང་བ་ཙམ་སྟེ། ཐ་མལ་དུ་སྣང་བ་ལ་ཐ་མལ་གྱི་རྣམ་རྟོག་བཟློག་པ་ཙམ་ཡིན་པའི་ཕྱིར་རོ། །གཉིས་པ་ནི། རྣམ་པར་སྣང་མཛད་ལ་སོགས་པའི་ལྷ་བཅུ་བདུན་ཏེ། མིང་གི་ཐ་སྙད་ནི་ཀུན་སྤྱོད་ལས་དངོས་སུ་གསུངས་ཤིང་། ཨ་བྷི་དྷ་ན་ལས། མི་འཁྲུགས་པ་དང་རྟག་པའི་རིགས། །རྡོ་རྗེ་ཉི་མ་དེ་བཞིན་ཏེ། །འོད་དཔག་མེད་དང་དོན་ཡོད་གྲུབ། །རྡོ་རྗེ་སེམས་དཔའ་བདེ་བ་ཆེ། །ཞེས་གསུངས་སོ། །འདིར་ཨ་བྷྱ་དང་། བི་བྷུ་ཏ་ཙནྟྲ་དང་། བརྩོན་འགྲུས་དཔལ་བཤེས་གཉེན་ལ་སོགས་པ་རྣམས། ཧེ་རུ་ཀ་མི་བསྐྱོད་པ་དང་། རྡོ་རྗེ་སེམས་དཔའ་དྲུག་པར་བཞེད་པ་ལ། བུ་སྟོན་རིན་པོ་ཆེས། དེ་མི་འཐད་པར་སྔར་གྱི་ལུང་དེས་གྲུབ་བོ་ཞེས་གསུངས་ཀྱང་། རྒྱུད་གཉིས་པོ་གོ་རིམ་མི་འདྲ་བར་སྣང་བས། ཨ་བྷི་དྷ་ནའི་རྡོ་རྗེ་སེམས་དཔའ་ནི་རིགས་དྲུག་པ་ཡིན་པར་གསལ་ལོ། །སྐྱེ་མཆེད་ལ་བསྒོམ་པའི་གཏི་མུག་རྡོ་རྗེ་སོགས་དྲུག་ནི་རིམ་པ་ལྟར། ས་སྙིང་དང་། ཕྱག་རྡོར་དང་། ནམ་སྙིང་དང་། འཇིག་རྟེན་དབང་ཕྱུག་དང་། སྒྲིབ་སེལ་དང་། ཀུན་བཟང་ཡིན་པར་མཁས་པ་དག་གིས་བཤད་ཅིང་། ཁམས་ལྔ་ལ་བསྒོམ་པའི་ལྟུང་བྱེད་མ་ལ་སོགས་པ་ནི་རིམ་པ་ལྟར། སངས་རྒྱས་སྤྱན་དང་། མཱ་མ་ཀཱི་དང་། གོས་དཀར་མོ་དང་། སྒྲོལ་མ་དང་། ཆོས་དབྱིངས་རྡོ་རྗེ་མ་རྣམས་ཡིན་པར་བཤད་དོ། །མུ་ཏིག་ཕྲེང་བར། དང་པོ་བཞི་རིམ་པ་ལྟར། མཁའ་འགྲོ་མ་དང་། ལཱ་མ་དང་། ཁཎྜ་རོ་ཧི་དང་། གཟུགས་ཅན་མ་ཡིན་པར་བཤད་པས་དྲིལ་བུ་ལུས་དཀྱིལ་གྱིས་སྐབས་སུ་སྙིང་ཁའི་ནང་སྐོར་ལ། ལཾ་མཱཾ་པཱཾ་ཏཱཾ་བཞི་གཡོན་སྐོར་དུ་བཀོད་པ་ལ་མ་འཁྲུགས་པར་ཤེས་པར་བྱའོ། །གསུམ་པ་ལ། ཨ་བྷི་དྷ་ནའི་དགོངས་པ་ལྷ་ཞལ་ཕྱག་གི་རྣམ་པ་ཅན་བསྒོམ་པ་དང་། ཀུན་སྤྱོད་ཀྱི་དགོངས་པ་ལྷའི་ངོ་བོ་ཙམ་དུ་བསྒོམ་པ་གཉིས་ལས། དང་པོ་ནི། དེ་ཉིད་ལས། རང་གི་གདན་ལ་ལེགས་པར་བཞུགས། །གླང་པོ་སེང་གེ་རྟ་དང་ནི། །རྨ་བྱ་དང་ནི་མཁའ་ལྡིང་དང་། །དེ་སྟེང་ཡི་དྭགས་གདན་ལ་ནི། །དངོས་གྲུབ་ཀུན་གསོལ་བསྒོམ་པར་བྱ། །རྡོ་རྗེ་ལག་པ་ས་ལ་རེག །རྡོ་རྗེ་དྲིལ་བུ་དཀུར་བརྟེན་ཅིང་། །ཞལ་ནི་རྣམ་པར་འགྱུར་བའོ། །འཁོར་ལོ་དྲིལ་བུ་འགྱིང་དང་བཅས། །རིན་ཆེན་དྲིལ་བུའང་དེ་བཞིན་ཏེ། །པདྨའི་དྲིལ་བུའི་རིམ་པ་དང་། །དྲིལ་བུའི་སྣ་ཚོགས་རྡོ་རྗེ་ཉིད། །ཐམས་ཅད་སྙེམས་པར་རྣམ་བསྒོམ་སྟེ། །ཞེས་སོགས་བཤད་ཅིང་། འདིའི་དགོངས་པར་བྱས་ནས། པྲ་ཛྙཱ་རཀྵི་ཏ་དང་། དེ་བཞིན་གཤེགས་པའི་རྡོ་རྗེ་དང་། ཛ་ཡ་སེ་ན་སོགས་ཀྱིས་ཞལ་ཕྱག་གི་རྣམ་པ་ཅན་བསྒོམ་པར་བཤད་དོ། །བསྒོམ་ཚུལ་ནི། གཟུགས་ཀྱི་ཕུང་པོ་ཐམས་ཅད་མགོ་བོའི་མཛོད་སྤུའི་ནང་དུ། ས་བོན་བྷྲཱུཾ་མམ་ཨོཾ་དུ་བསྒོམས་པས། དེ་ཡོངས་སུ་གྱུར་པ་ལས་རྣམ་སྣང་ཞལ་ཕྱག་གི་རྣམ་པ་ཅན་དུ་བསྒོམ་པ་སོགས་མཛད་དེ། གསང་འདུས་འཕགས་ལུགས་ཀྱི་ལུས་དཀྱིལ་བསྒོམ་ཚུལ་ཙམ་ཞིག་སྔོན་འགྲོའི་སྐབས་འདིར་ཡང་ཡོད་པས། རྒྱུད་སྡེ་གཞན་ལས་ཁྱད་པར་དུ་འཕགས་པར་གྲུབ་བོ། །གཉིས་པ་ནི། ཀུན་སྤྱོད་ཀྱི་དགོངས་པ། རྗེ་བཙུན་རིན་པོ་ཆེས། ལྷའི་ངོ་བོ་ཙམ་དུ་བསྒོམ་པར་གསུངས་ཏེ། ཐོག་མར་ཕམ་འཐིང་པའི་མན་ངག་ལས་འབྱུང་བ། སྙིང་ཁའི་ས་བོན་ལས་འོད་ཟེར་འཕྲོས་པས་བདག་གི་སྤྱི་གཙུག་ནས་རྐང་མཐིལ་གྱི་བར་དུ་འོད་ཟེར་གྱིས་ཁྱབ་པས། བདག་གི་ཚེ་ཐོག་མ་མེད་པ་ནས་བསགས་པའི་སྡིག་པ་ཐམས་ཅད་དག་པར་བསྒོམ་སྟེ་བདག་གི་གཞི་སྦྱང་བའོ། །དེ་ནས་འོད་ཟེར་དེ་བདག་གི་བ་སྤུའི་བུ་ག་ནས་ཕར་སོང་ནས་འགྲོ་བ་རིས་དྲུག་གིས་བསྡུས་པའི་སེམས་ཅན་ཐམས་ཅད་ལ་ཕོག་ནས་དེ་དག་གི་རྒྱུད་ལ་ཡོད་པའི་སྡིག་པ་ཐམས་ཅད་དག་པར་བསྒོམ་སྟེ་དེ་ནི་གཞན་གྱི་གཞི་སྦྱང་བའོ། །དེ་ནས་གཞི་བསྒྱུར་བ་ནི་སྔོན་ལ་གཞན་གྱི་གཞི་བསྒྱུར་བར་བྱ་སྟེ། དེ་ཡང་རིས་དྲུག་གིས་བསྡུས་པའི་སེམས་ཅན་ཐམས་ཅད་འཁོར་ལོ་བདེ་མཆོག་དཔག་ཏུ་མེད་པ་བསྒོམ་པར་བྱའོ། །དེ་ནས་བདག་གི་གཞི་བསྒྱུར་བ་ནི། རིས་དྲུག་འཁོར་ལོ་བདེ་མཆོག་གི་རྣམ་པར་བྱས་པ་དེ་དག་འོད་ཟེར་གྱི་རྣམ་པར་བསྡུས་ཏེ། བདག་གི་བ་སྤུའི་བུ་ག་ནས་ཞུགས་ནས། བདག་གི་ཕུང་པོ་དང་། ཁམས་དང་། སྐྱེ་མཆེད། ལྷའི་ང་རྒྱལ་དུ་བསྒོམ་པར་བྱ་སྟེ། དེ་ཡང་བདག་གི་མ་དག་པའི་གཟུགས་ཀྱི་ཕུང་པོ་ནི། གཟུགས་ཀྱི་ཕུང་པོ་མ་ཡིན་ལ། བཅོམ་ལྡན་འདས་རྣམ་པར་སྣང་མཛད་ཡིན་སྙམ་དུ་བསམ་པ་ནས། མ་དག་པའི་ནམ་མཁའི་ཁམས་ནི་ནམ་མཁའི་ཁམས་མ་ཡིན་ལ། པདྨའི་དྲྭ་བ་ཅན་ཡིན་ནོ། །ཞེས་བྱ་བའི་བར་དུ་བསམ་ཞིང་། ངག་དུ་གཟུགས་ཀྱི་ཕུང་པོ་ནི་རྣམ་པར་སྣང་མཛད་དོ་ཞེས་པ་ནས། ནམ་མཁའི་ཁམས་ནི་པདྨ་དྲྭ་བ་ཅན་ནོ་ཞེས་པའི་བར་བརྗོད་པར་གསུངས་སོ། །འདི་ནི་རྣལ་འབྱོར་མ་རྒྱུད་ཀྱི་སྤྱོད་ལམ་གྱི་རྣལ་འབྱོར་དང་བསྒོམ་ཚུལ་སྤྱིར་འདྲ་ཞིང་། རང་གི་ཕུང་ཁམས་སྐྱེ་མཆེད་སོ་སོར་ཕྱེ་ནས་བསྒོམ་པའི་ཆ་ནས་བསྒོམ་ཚུལ་ཞིབ་པའི་ཁྱད་པར་ཡོད་དོ། །འོ་ན་བཤད་རྒྱུད་གཉིས་ཀྱི་དགོངས་པ་གང་ཉམས་སུ་ལེན་ན། ཇོ་བོ་བྷ་ཌནྟའི་བཞེད་པས། གང་ཟག་སྤྲོས་པ་ལ་དགའ་བས་ཨ་བྷི་དྷ་ན་ལས་འབྱུང་བ་ལྟར། ཞལ་ཕྱག་གི་རྣམ་པ་ཅན་བསྒོམ་ལ། ཉུང་ངུའི་རྣལ་འབྱོར་ལ་དགའ་བས་ཀུན་སྤྱོད་ལྟར། ལྷའི་ངོ་བོ་ཙམ་བསྒོམ་པར་གསུངས་པ་འདི་ཉིད་ལེགས་པར་སྣང་སྟེ། རྗེ་བཙུན་གྱིས་ཀྱང་། ཇོ་བོ་བྷ་ཌནྟས་ཨ་བྷི་དྷ་ན་ལྟར། ཞལ་ཕྱག་གི་རྣམ་པ་ཅན་བསྒོམ་པ་དང་། ཕམ་འཐིང་པའི་དགོངས་པ། ང་རྒྱལ་ལམ་མོས་པ་དྲན་པ་ཙམ་ཡིན་པར་གསུངས་པས། ལུགས་གཉིས་ཀ་ལ་ཡང་གང་ཟག་གི་བློའི་བྱེ་བྲག་གིས་གཉིས་ཀ་ཡོད་པར་བཞེད་པའི་ཕྱིར་རོ། །བཞི་པ་ལ་རྗེ་བཙུན་གྱིས། རིགས་ངན་གྱི་ཁང་པ་མེས་སྲེག་པ་བཞིན། ཚོགས་བསག་པའི་རྟེན་ཁྱད་པར་ཅན་དུ་བྱས་པ་ཡིན་པར་གསུངས་ཏེ། དེའི་དོན་ཡང་། རིགས་ངན་གྱིས་རྒྱལ་པོ་ལ་བསྙེན་བཀུར་བྱེད་པའི་ཚེ། ཐོག་མར་ཁང་པ་མེས་བསྲེགས། དེའི་དུས་སུ་རང་ཉིད་རིག་བྱེད་ནས་འབྱུང་བའི་ཆོ་གས་ཁྲུས་བྱས་ཏེ། བསྙེན་བཀུར་བྱས་ན་རྒྱལ་པོ་མཉེས། གཞན་དུ་མ་ཡིན་པ་ལྟར་འདིར་ཡང་། ཕུང་ཁམས་སྐྱེ་མཆེད་ཀྱི་ཆོས་བཅུ་བདུན་ལ། ཐ་མལ་གྱི་རྣམ་རྟོག་སྤངས་ནས་ལྷའི་ངོ་བོར་བསྒོམས་ནས་ཚོགས་བསག་དགོས་པའི་དགོས་པ་ཁྱད་པར་ཅན་ཡོད་དོ། །དེ་ཉིད་ཐོག་མའི་སྐུའི་དགའ་བ་ཙམ་གྱིས་འགྲུབ་པ་མ་ཡིན་ནམ་སྙམ་ན། བདེན་མོད་ཀྱི་དེ་ཙམ་ནི་བླ་མེད་ཀྱི་བསྐྱེད་པའི་རིམ་པའི་རྣལ་འབྱོར་གཞན་རྣམས་ལ་ཡང་ཡོད་ཅིང་། འདིར་ནི་ཕུང་ཁམས་སྐྱེ་མཆེད་ཀྱི་ཆོས་སོ་སོར་ཕྱེ་ནས་ལྷར་བསྒོམས་པས། ཚོགས་བསག་པའི་རྟེན་ཡང་གཞན་ལས་ཁྱད་པར་དུ་འཕགས་པར་གྲུབ་པའོ། །ཇོ་བོ་བྷ་ཌནྟའི་བཞེད་པས། ཤེས་བྱའི་སྒྲིབ་པ་ལས་བསྲུང་བའི་ཕྱིར་བདག་བསྲུང་བ་ཞེས་པའི་ཐ་སྙད་མཛད་ཅིང་། འདིར་ཤེས་བྱ་ནི་བདག་མེད་གཉིས་ཡིན་ལ། དེ་ལ་སྒྲིབ་པ་ནི་གང་ཟག་དང་། ཆོས་ཀྱི་བདག་ཏུ་འཛིན་པའོ། །དེ་ལ་གང་ཟག་གི་བདག་ཡན་ལག་ཕུང་ཁམས་སྐྱེ་མཆེད་ཐ་མལ་དུ་འཛིན་ཅིང་། ཡན་ལག་ཅན་རིལ་པོའི་རྫས་གཅིག་ཏུ་འདོད་པའོ། །དེ་སྤོང་བ་ལ་ཐ་མལ་དུ་འཛིན་པའི་གཉེན་པོར་ལྷ་བསྒོམ་ཞིང་། རིལ་པོ་གཅིག་ཏུ་འཛིན་པའི་གཉེན་པོར་ལྷ་ཡང་དུ་མར་བསྒོམས་པས་སྤོང་ངོ་། །ཆོས་ཀྱི་བདག་དོན་དམ་དུ་བཟུང་བའི་ཡུལ་ཆ་མེད་རྡུལ་ཕྲན་དང་། འཛིན་པའི་ཤེས་པ་ཆ་མེད་ཀྱི་སྐད་ཅིག་ཏུ་བདེན་པར་འདོད་པའོ། །དེའི་གཉེན་པོར་སྣོད་བཅུད་གཞལ་ཡས་ཁང་དང་། ལྷར་མོས་པས་དེ་རྣམས་ཀྱང་སྣང་ཡང་རང་བཞིན་མེད་པ་སྒྱུ་མ་ལྟ་བུར་བསྒོམས་པས་སྤོང་ངོ་། །ཞེས་བཞེད་དོ། །གསུམ་པ་ཚོགས་བསག་དངོས་དང་འབྲེལ་པས་ཚོགས་བསག་པ་བཅུ་གསུམ་གྱིས་ཚོགས་བསག་པ་ནི་གཞུང་ལས། སྐབས་འདིར་སྲུང་བའི་འཁོར་ལོ་བསྒོམ། དེ་ནས་ཚོགས་གཉིས་བསག་པ་འབྲེལ་པ་ཅན་དུ་འབྱུང་བས། དེ་བཞིན་བྱས་ན་ཡང་ལེགས་པ་ཡིན་ནོ་ཞེས་རྗེ་བཙུན་གསུང་ལ། ཕམ་འཐིང་པའི་བཞེད་པས། སྐབས་འདིར་བསོད་ནམས་ཀྱི་ཚོགས་བསགས། དེ་ནས་སྲུང་བའི་འཁོར་ལོ་བསྒོམས་ནས། ཡེ་ཤེས་ཀྱི་ཚོགས་བསག་པ་གཞུང་འཁྲུགས་སྡེབས་པའི་མན་ངག་ལས་འབྱུང་བ་ལྟར་བཤད་ན། བསོད་ནམས་ཀྱི་ཚོགས་བསག་པ་ནི་གཞུང་ལས། དེ་ནས་རང་གི་སྙིང་ཁར། ཡི་གེ་ཨ་ལས་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུྃ་འོད་ཟེར་སྣ་ཚོགས་པ་འཕྲོ་བ་བསམ་པར་བྱས་ལ། དེའི་སྣང་བས་མདུན་དུ་ཡང་དག་པར་རྫོགས་པའི་སངས་རྒྱས་དང་། བླ་མ་ལ་སོགས་པ་བལྟས་ལ་ཕྱག་བྱས་ཏེ། མཆོད་པར་བྱའོ། །དེ་ནས་དཀོན་མཆོག་གསུམ་ལ་སྐྱབས་སུ་འགྲོ་བར་བྱའོ། །ཞེས་ཚོགས་ཞིང་སྤྱན་དྲངས་ནས། ཕྱག་དང་། མཆོད་པ་དང་། སྐྱབས་འགྲོ་གསུམ་ལས་གཞན་མ་གསུངས་སོ། །འདི་ལ་ནཱ་རོ་པའི་མན་ངག་ཕམ་འཐིང་པ་ནས་བརྒྱུད་པ་ལས་ཚོགས་བསག་བཅུ་གསུམ་མཛད་དེ། ཕྱག་དང་། མཆོད་པ་དང་། སྡིག་པ་བཤགས་པ་དང་། སྐྱབས་སུ་འགྲོ་བ་དང་། དམ་ཚིག་དང་སྡོམ་པ་བཟུང་བ་དང་། རྗེས་སུ་ཡི་རང་བ་དང་། བྱང་ཆུབ་ཀྱི་མཆོག་ཏུ་སེམས་བསྐྱེད་པ་དང་། ཆོས་ཀྱི་འཁོར་ལོ་བསྐོར་བར་བསྐུལ་བ་དང་། མྱ་ངན་ལས་མི་འདའ་བར་གསོལ་བ་གདབ་པ་དང་། ལམ་ལ་གནས་པ་དང་། དགེ་བའི་རྩ་བ་བསྔོ་བ་དང་། གནང་བ་ནོད་པ་དང་། གཤེགས་སུ་གསོལ་བའོ། །དང་པོ་ཕྱག་འཚལ་བ་ལ་དེའི་ཡུལ་སྤྱན་འདྲེན་དགོས་པས། བདག་གི་སྙིང་ཁའི་ཧཱུྃ་ལས་འོད་ཟེར་འཕྲོས་པས་མདུན་གྱི་ནམ་མཁར་རྩ་བའི་བླ་མ་ནི་རྡོ་རྗེ་ཆོས་ཀྱི་རྣམ་པ་སྟེ། སྐུ་མདོག་དམར་པོ་གཡས་རྡོ་རྗེ། གཡོན་དྲིལ་བུ་འཛིན་པ་ལ། ཕྱག་ན་རྡོ་རྗེ་ལ་སོགས་པ་བརྒྱུད་པའི་བླ་མ་རྣམས་ཀྱིས་བསྐོར་བ་སྟེ། སློབ་དཔོན་ཀླུ་སྒྲུབ་རབ་ཏུ་བྱུང་བའི་ཆ་ལུགས་ཅན་ཡིན་ལ། གཞན་ཐམས་ཅད་ཀྱང་གཡས་ཌཱ་མ་རུ། གཡོན་ཐོད་པ། གྲུ་མོ་ན་ཁ་ཊྭཱ་ཾག་འཛིན་པ། རུས་པའི་རྒྱན་ཆ་ལྔ་དང་ལྡན་པ། རྣལ་འབྱོར་པའི་ཆ་ལུགས་ཅན་སྟེང་གི་ཆ་ལ་སྤྱན་དྲང་། འོག་གྱི་ཆ་ལ་འཁོར་ལོ་བདེ་མཆོག་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྤྱན་དྲང་ངོ་། །འདིར་གཙུག་ནོར་ལས་ཤར་ཕྱོགས་ཀྱི་དུར་ཁྲོད་དུ་དབང་པོའི་མདུན་ན། བླ་མ་སེང་གེའི་ཁྲི་ལ་བཞུགས་པར་བསྒོམ་ཞེས་གསུངས་པ་ལ་བརྟེན་ནས། མར་དོ་རྗེས་འབྲང་དང་བཅས་པས་འདི་བཞིན་བཞེད་པ་ལ། མཁས་པ་བུས་དེ་ཤིན་ཏུ་མི་རིགས་ཏེ། མངོན་བརྗོད་ལས། བླ་མ་བྱང་སེམས་རྡོ་རྗེ་རིགས་དྲུག་པར་བཤད་པ་དང་། བརྩོན་འགྲུས་དཔལ་གྱིས་ཀྱང་། རྡོ་རྗེ་འཆང་བདག་རྣམ་པ་ཅན། །བླ་མ་ཞེས་བཤད་པ་དང་འགལ་བས། སྔགས་ཀྱི་རྣམ་གཞག་ལས་ཆེས་ཆེར་འཁྱམས་པའོ། །ཞེས་གསུངས་ལ། དེ་ལ་འདོད་འཇོ་མཁན་པོས། དེ་ནི་མ་ངེས་བཞིན་དུ་བཀག་པས་ཤིན་ཏུ་མི་རིགས་ཏེ། སྒྲུབ་ཐབས་དེ་ལས་ཀྱང་། བླ་མ་རྡོ་རྗེ་སེམས་དཔའ་ལྟར་འགྱིང་བག་ཅན། རྒྱན་ཐམས་ཅད་ཀྱིས་བརྒྱན་ནས་བཞུགས་པ་གསལ་བར་བལྟས་ལ་ཞེས་གསལ་བར་གསུངས་པས། བླ་མ་རྡོ་རྗེ་འཆང་དུ་ལྟ་བར་གསུངས་པ་རྣམས་ལུགས་དེ་ལ་ཇི་ལྟར་གནོད། གལ་ཏེ་རྡོ་རྗེ་འཆང་དུ་གསུངས་པས་དུར་ཁྲོད་དུ་བཞུགས་པ་མི་རིགས་སོ་སྙམ་ན། དེ་ལ་འགལ་བ་མེད་དེ། དུར་ཁྲོད་ན་གནས་པ་བཤད་པའི་སྐབས་སུ། དཔའ་བོ་འདུས་པའི་མཆོག་དག་དང་། །རྣལ་འབྱོར་མ་ནི་མཆོག་སྣ་ཚོགས། །ཞེས་དཔའ་བོ་དང་རྣལ་འབྱོར་མ་མཆོག་རྣམས་ཀྱང་དེ་ན་གནས་པར་བཤད་པའི་ཕྱིར་དང་། སྡོམ་འབྱུང་ལས། གྲུབ་ཆེན་རྫུ་འཕྲུལ་ཡང་དག་ཐོབ། །ཚོགས་ནི་དུར་ཁྲོད་དབུས་སུ་བལྟ་བར་བྱ། །ཞེས་གསུངས་ལ། བླ་མ་དེར་བཞུགས་པར་བསྒོམ་པ་ལ་འགལ་བ་ཅུང་ཟད་ཀྱང་མ་མཐོང་ངོ་ཞེས་སུན་འབྱིན་སྨྲའོ། །འདི་ནི་ཤིན་ཏུ་མི་འཐད་དེ། རྣལ་འབྱོར་པ་རང་གི་བློ་ངོར། གཞལ་ཡས་ཁང་དང་། དུར་ཁྲོད་གཉིས་ལ་གནས་མཆོག་དམན་གྱི་རྣམ་པ་ཡོད་པས་དམན་པའི་གནས་དེར་བླ་མ་བསྒོམ་དུ་མི་རུང་བའི་ཕྱིར་རོ། །གལ་ཏེ་དུར་ཁྲོད་དུ་དཔའ་བོ་དང་། རྣལ་འབྱོར་མའི་མཆོག་བཞུགས་པར་བཤད་པས། དེར་བླ་མ་བཞུགས་པ་བསྒོམ་པ་མི་འགལ་ན། རང་གི་བཤང་ལམ་དང་རྐང་མཐིལ་དུ་བསྒོམ་པ་ཡང་མི་འགལ་བར་འགྱུར་ཏེ། བདེ་མཆོག་གི་ལུས་དཀྱིལ་དུ་བཤང་ལམ་དུ་རིན་ཆེན་རྡོ་རྗེ་དང་། ཁཎྜ་རོ་ཧི་བཞུགས་པ་དང་། འདུས་པའི་ལུས་དཀྱིལ་དུ་རྐང་མཐིལ་གཉིས་སུ་གནོད་མཛེས་རྒྱལ་པོ་བཞུགས་པར་བཤད་པའི་ཕྱིར་རོ། །ཡང་ཁྱོད་ཀྱི་རྡོ་རྗེ་འཆང་དུ་གསུངས་པ་ནི་བསྒོམ་པའི་དབང་དུ་མཛད་ལ། རྡོ་རྗེ་འཆང་ཡིན་དུ་ཆུག་ཀྱང་འགལ་བ་མེད་དེ་ཞེས་སྨྲས་པ་ནི་རྡོ་རྗེ་འཆང་མ་ཡིན་པ་གཞིར་བཞག་པའི་གཏམ་དུ་སྣང་ངོ་། །དེས་ན་ཚོགས་ཞིང་གི་སྐབས་འདིར་བླ་མ་གཙོ་བོ་དང་དབྱེར་མེད་དུ་སྤྱན་འདྲེན་པ་དང་། དེའི་རིགས་བདག་གི་ཚུལ་དང་། ལོགས་ཤིག་ཏུ་སྤྱན་འདྲེན་པ་གསུམ་ལས། ཕྱི་མ་འདི་ལ་སྟེང་གི་ཆར་བསྒོམ་པ་ངེས་པར་དགོས་སོ། །དེ་རྣམས་ཀྱི་ཞབས་ལ་ཕྱག་བྱེད་པར་བསམ་ཞིང་། ངག་ཏུ་ན་མོ་གུ་རུ་བྷྱཿ ཞེས་པས་བླ་མའི་ཚོགས་ལ་ཕྱག་བྱ། ན་མཿཤྲཱི་ཙཀྲ་སཾ་བཱ་ར་མཎྜ་ལ་བྷྱཿ ཞེས་བྱ་བས་དཀྱིལ་འཁོར་གྱི་འཁོར་ལོ་ལ་ཕྱག་བྱའོ་ཞེས་རྗེ་བཙུན་གསུང་ངོ་། །བུ་སྟོན་གྱིས་རྣལ་འབྱོར་རོ་གཅིག་བདུད་རྩི་འཐུངས་པས་རྣམ་པར་དག་པའི་ཐུགས། །ཞེས་སོགས་ཚིགས་བཅད་ཕྱེད་དང་དགུས་ཕྱག་འཚལ་བ་ནི་སྔོན་འགྲོའི་སྐབས་སུ་ཧ་ཅང་ཡང་སྤྲོས་པ་ཆེ་བར་སྣང་ངོ་། །གཉིས་པ་མཆོད་པ་ལ། རྗེ་བཙུན་གྱིས་ཕྱིའི་མཆོད་པ་དང་། ཡིད་ལས་བྱུང་བའི་མཆོད་པ་གཉིས་ལས། དང་པོ་ནི། ཆུ་གཉིས་སྔོན་དུ་འགྲོ་བའི་ཉེར་སྤྱོད་རོལ་མོ་དང་བཅས་པས་མཆོད་པའོ། །གཉིས་པ་ནི། ཡིད་ལས་བྱུང་བའི་མཆོད་པ་དང་། ཀུན་ཏུ་བཟང་པོའི་མཆོད་པ་དང་། བླ་ན་མེད་པའི་མཆོད་པ་རྣམས་དོན་གཅིག་པས། དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བཅས་ནས། ན་མོ་ཆོས་ཀྱི་དབྱིངས་ཀྱི་བྱིན་གྱིས་རླབས་དང་། ཞེས་པ་ནས། འབྱུང་བར་གྱུར་ཅིག་ཅེས་པའི་བར་བརྗོད་ནས། སེ་གོལ་གཅིག་གཏོག ཡང་ཕྱག་རྒྱ་བཅས་ཏེ། ཨོཾ་སརྦ་བིད་ནས། སྭཱ་ཧཱའི་བར་བརྗོད་ནས། སེ་གོལ་གཉིས་ཏེ་གསུམ་གཏོག་པའོ། །འདི་ལ་མཆོད་པའི་རྒྱུ། ངོ་བོ། ཡུལ་དང་གསུམ་ལས། དང་པོ་ནི། ན་མོ་ཆོས་ཀྱི་དབྱིངས་ཀྱི་ཞེས་པ་ནས། ཏིང་ངེ་འཛིན་དང་སྨོན་ལམ་གྱི་དབང་གིས་ཞེས་པའི་བར་གྱིས་བསྟན། གཉིས་པ་ནི་འཇིག་རྟེན་གྱི་ཁམས་ན་ཞེས་པ་ནས། བསམ་གྱིས་མི་ཁྱབ་པ་ཞིག་ཞེས་པའི་བར་གྱིས་བསྟན། གསུམ་པ་ནི་བླ་མ་དང་ཞེས་པ་མན་ཆད་ཀྱིས་བསྟན་ནོ། །སྔགས་དོན་ལ། ཨོཾ་སརྦ་བིད་ནི་ཐམས་ཅད་རིག་པའོ། །པུ་ར་པུ་ར་ནི་གང་བ་གཉིས། སུ་ར་སུ་ར་ནི་མཛེས་པ་གཉིས་ཏེ། བཀོད་པའི་ཁྱད་པར་ཕུན་སུམ་ཚོགས་པའོ། །ཨཱ་ཝརྟ་ཨཱ་ཝརྟ་ནི་འཕེལ་བ་གཉིས། ཧོ་ནི་རྒྱས་པ། ན་མཿས་མནྟ་བུདྡྷ་ནཱན་ནི་ཀུན་ནས་སངས་རྒྱས་ལ་ཕྱག་འཚལ་བའོ། །ཨ་བྷི་སྨ་ཡ་ནི་ངོ་མཚར་བ། སྥ་ར་ཎ་ནི་འཕྲོ་བ། ཨི་མཾ་ནི་འདི། ག་ག་ན་ཁཾ་ནི་ནམ་མཁའ། དྷརྨཱ་དྷཱ་ཏུ་ནི་ཆོས་ཀྱི་དབྱིངས། ཨ་ཀ་ཤ་ནི་ནམ་མཁའ་ས་མཱ་པ་ཏི་ནི་མཉམ་པར་ཁྱབ་པ། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། པརྵན་མཎྜ་ལེ་ནི་འཁོར་གྱི་དཀྱིལ་འཁོར། མ་མ་ནི་བདག པྲ་ཎི་དྷི་ནི་སྨོན་ལམ། པུཎྱེ་ནི་བསོད་ནམས། ཛྙཱ་ན་ནི་ཡེ་ཤེས། ཝ་ལེ་ན་ནི་སྟོབས། སརྦ་ཏ་ཐཱ་ག་ཏ་ནི་དེ་བཞིན་གཤེགས་པ་ཐམས་ཅད། ཨ་དྷིཥྛ་ན་ནི་བྱིན་རླབས། ཝ་ལེ་ན་ནི་སྟོབས། དྷརྨཱ་དྷཱ་ཏྭཱ་དྷིཥྛ་ན་ནི་ཆོས་ཀྱི་དབྱིངས་ཀྱི་བྱིན་རླབས། བ་ལེ་ན་ནི་སྟོབས། ཙ་ནི་འབྱེད་པ། སྭཱ་ཧཱ་ནི་གཞི་ཚུགས་ཤིག་པའོ། །འདི་ལ་བུ་སྟོན་གྱིས། བླ་མ་ས་སྐྱ་པས། ཕྱི་མཆོད་དང་། ཡིད་མཆོད་གཉིས་ཀྱིས་མཆོད་ལ། ཡིད་མཆོད་ནི་དཔྲལ་བར་ནམ་མཁའ་མཛོད་ཀྱི་ཕྱག་རྒྱ་བྱས་ནས། ན་མོ་ཆོས་ཀྱི་དབྱིངས་ཀྱི་བྱིན་རླབས་དང་། ཞེས་སོགས་ཚིག་ལྷུག་པ་དང་། ཨོཾ་སརྦ་བིད་པུ་ར་སོགས་ཀྱི་སྔགས་བརྗོད་པ་ལ་ཡིད་མཆོད་དུ་བཞེད་དེ། ལང་ཀ་རྒྱལ་བཟངས་ཀྱིས། སརྦ་བིད་ནས་ཧོའི་བར་གོས་ཟུང་འབུལ་བའི་སྔགས་སུ་བཤད་པ་མ་གཏོགས། བོད་དུ་འགྱུར་བའི་བདེ་མཆོག་གི་སྒྲུབ་དཀྱིལ་རྣམས་ནས་དེ་ལ་ཡིད་མཆོད་དུ་བཤད་པ་མེད་པས། དེ་མ་བྱས་ཀྱང་ཆོ་ག་ཆད་པའི་ཉེས་པ་མེད་དོ། །ཕྱག་རྒྱ་དང་སྔགས་སརྦ་ཨཱ་ཝརྟ་ཡ་ཧོའི་བར་ཡོ་གའི་འགྲེལ་ཆེན་རྣམས་ནས་བཤད། སྔགས་ན་མཿས་མནྟ་མན་ཆད་རྣམ་སྣང་མངོན་བྱང་གི་རྒྱུད་ནས་བཤད་པས། དེ་དག་འདིར་མ་སྦྱར་ནའང་ཉེས་པ་མེད་ཅིང་། སྦྱར་བ་ལ་ལྷག་པའི་ཉེས་པའང་མེད་དོ་ཞེས་བཤད་པ་ནི། ས་སྐྱ་པའི་ཕྱག་ལེན་དགག་པ་ཡིན་ནམ། སྒྲུབ་པ་ཡིན། དང་པོ་ལྟར་ན་སྔགས་ཀྱི་ལུང་ཁུངས་བསྟན་པ་དང་། འདིར་སྦྱར་ན་ཡང་ཉེས་པ་མེད་པར་བཤད་པ་དང་འགལ་ལོ། །ཕྱི་མ་ལྟར་ན་རང་ཉིད་ཀྱང་སྐབས་འདིར་འདོད་དགོས་པས། དེ་མ་བྱས་ཀྱང་ཆོ་ག་ཆད་པའི་ཉེས་པ་མེད་པར་བཤད་པ་དང་འགལ་ལོ། །དེས་ན་རྗེ་བཙུན་གྱིས་དེ་ལྟར་གསུངས་པ་ནི། བྷཱུ་རི་བས་རྒྱུན་བཤགས་ཀྱི་སྐབས་སུ། ཀུན་ཏུ་བཟང་པོའི་མཆོད་སྤྲིན་རྒྱ་ཆེན་དང་། ཞེས་གསུངས་པ་ལྟར་འདིར་ཡང་རིགས་པས། ཅི་ལྟར་བྱ་བའི་ཚུལ་བོད་སྐད་དང་རྒྱ་སྐད་གཉིས་ཀྱིས་དོན་ལས་ཤེས་པས་ཉེས་པ་མེད་ཅིང་འཐད་པ་ཁོ་ནའོ། །འདིར་མཆོད་པའི་རྣམ་གྲངས་ལ་དམར་གྱིས། ཕྱི་དང་། གསང་བ་དང་། དེ་ཁོ་ན་ཉིད་དང་། ལུས་ཀྱི་མཆོད་པ་བཞི་བྱ་བར་བཤད་ཅིང་། བུ་སྟོན་གྱིས་ཆུ་གཉིས་སྔོན་དུ་འགྲོ་བའི་ཉེར་སྤྱོད་དང་། རིག་མ་བཅུ་དྲུག་དང་། རྐང་བརྒྱད་ཀྱི་བསྟོད་པ་རྣམས་བྱ་བར་བཤད་པ་ནི་ལུགས་གཞན་ནོ། །དེ་ནས་རྒྱུན་བཤགས་ལ་རྗེ་བཙུན་གྱིས་སྡིག་པ་བཤགས་པ་ནས་དགེ་བའི་རྩ་བ་བསྔོ་བའི་བར་དགུ་གསུངས་ཤིང་། དམར་གྱིས་སྡིག་པ་བཤགས་པ། རྗེས་སུ་ཡི་རང་བ། བསྔོ་བ། སྐྱབས་འགྲོ། སྨོན་པ་སེམས་བསྐྱེད། འཇུག་པ་སེམས་བསྐྱེད་དང་བརྒྱད་དུ་བཤད་ལ། བུ་སྟོན་གྱིས་ནི་གུར་ནས་འབྱུང་བའི་རྒྱུན་བཤགས་བྱ་བར་བཤད་དོ། །དགུར་མཛད་པའི་བྱང་ཆུབ་ཀྱི་སེམས་བསྐྱེད་པའི་སྐབས་སུ། རྗེ་བཙུན་གྱིས། དེ་ཡང་སེམས་ཅན་མ་བསྒྲལ་བ་བསྒྲལ་ཞེས་བྱ་བ་ནི། སྲིད་པའི་རྒྱ་མཚོར་གནས་པ་ཐམས་ཅད་འཁོར་བ་ལས་སྒྲོལ་བར་འདོད་པའོ། །མ་གྲོལ་བ་ནི་ཉན་ཐོས་དང་རང་སངས་རྒྱས་རྣམས་རང་རང་མྱ་ངན་ལས་འདས་པའི་འཆིང་བ་དམ་པོས་བཅིངས་པ་རྣམས་དགྲོལ་བར་འདོད་པའོ། །དབུགས་མ་ཕྱུང་བ་རྣམས་དབུགས་དབྱུང་བ་ནི་ངན་སོང་གསུམ་གྱིས་བསྡུས་པའི་སེམས་ཅན་བསྲན་ཐབས་མེད་པའི་སྡུག་བསྔལ་ལས་དབུགས་མ་ཕྱིན་པ་རྣམས་དབུགས་དབྱུང་བའོ། །མྱ་ངན་ལས་མ་འདས་པ་མྱ་ངན་ལས་འདའ་བ་ནི། ས་ལ་གནས་པའི་བྱང་ཆུབ་སེམས་དཔའ་མྱ་ངན་ལས་འདས་པ་ལ་འདོད་པ་མེ་འབར་བ་ལྟ་བུ་ཡོད་པ་རྣམས་མྱ་ངན་ལས་འདའ་བར་འདོད་པ་སྟེ། བསམས་པ་དེ་དག་དང་ལྡན་པས་ཐམས་ཅད་ངག་ཏུ་བརྗོད་པར་བྱའོ་ཞེས་གསུངས་ལ། གཞན་རྣམས་ནི་གོ་སླའོ། །འདི་དག་ནི་ཕ་རོལ་དུ་ཕྱིན་པའི་རྒྱུན་བཤགས་དང་། རྡོ་རྗེ་ཐེག་པའི་ཐུན་མོང་མ་ཡིན་པའི་རྒྱུན་བཤགས་གཉིས་ཀ་ཚང་ཞིང་། གྲངས་དང་གོ་རིམ་ཡང་ཕ་རོལ་ཏུ་ཕྱིན་པ་དང་སྒོ་བསྟུན་པ་མི་མཛད་པའི་ལུགས་སུ་སྣང་ངོ་། །བཅུ་གཉིས་པ་གནང་བ་ནོད་པ་ནི་རྗེ་བཙུན་གྱིས། དེ་ནས་ཚོགས་ཞིང་དེ་དག་གི་ཞལ་ནས། རིགས་ཀྱི་བུ་ཁྱོད་ཀྱིས་གནས་པ་འདི་ནི་ལེགས་པར་གནས་པ་ཡིན་གྱི། གནས་པ་འདིས་གནས་ན་མཆོག་གྲུབ་པར་འགྱུར་རོ། །ཞེས་གསུངས་པར་བསམ་མོ་ཞེས་གསུངས་སོ། །བཅུ་གསུམ་པ་གཤེགས་སུ་གསོལ་བ་ནི། དེ་ནས་ཐུན་མཚམས་ཀྱི་གོ་རིམ་མི་འཁྲུག་པར་བྱ་བའི་ཕྱིར། མེ་ཏོག་ལ་སོགས་པ་མཆོད་པ་ལྔ་ཙམ་གྱིས་མཆོད་ལ་གཤེགས་སུ་གསོལ་བར་བྱའོ་ཞེས་གསུངས་སོ། །བཞི་པ་དོན་ཆེན་པོ་ཡེ་ཤེས་ཀྱི་ཚོགས་ལ་བར་ཆད་མི་འབྱུང་བར་བྱ་བའི་ཕྱིར་སྲུང་བའི་འཁོར་ལོ་བསྒོམ་པ་ལ་བཞི་སྟེ། རྒྱུད་གཞུང་ལས་ཇི་ལྟར་གསུངས་པའི་ཚུལ། འགྲེལ་བྱེད་གཞན་གྱིས་ཇི་ལྟར་བཀྲལ་བའི་ཚུལ། མན་ངག་ཐུན་མོང་མ་ཡིན་པའི་ལུགས་བཤད་པ། དེ་ལྟར་བསྒོམ་པའི་དགོས་པའོ། །དང་པོ་ནི་རྩ་རྒྱུད་ལེའུ་གསུམ་པ་ལས། དེ་ལྟར་བདག་ཉིད་གོ་བགོས་ནས། །རྭ་བ་རྣམས་ནི་ཕྱོགས་སུ་དགོད། །འོག་ཏུ་མཚོན་ཆ་དགོད་པར་བྱ། །འཁོར་ལོ་གནས་པའི་བདག་ཉིད་མཉམ། །སྟེང་དུ་མདའ་ཡི་དྲྭ་བ་བྱ། །མཁའ་སྤྱོད་དུ་ནི་གུར་བྱ་སྟེ། །དེ་དག་གིས་ནི་གོ་ཆར་འགྱུར། །དེ་ལྟར་གོ་བགོས་སུམ་ཅུ་ནི། །རྩ་གསུམ་པས་ཀྱང་བཤིག་མི་ནུས། །ཞེས་རྭ་བ་དང་ས་གཞི་དང་། མདའི་དྲྭ་བ་དང་། གུར་ཏེ་བཞི་གསུངས་སོ། །སློབ་དཔོན་གྱི་གཞུང་ལས། དེ་ནས་རྡོ་རྗེའི་དྲྭ་བ་བསམ་པར་བྱ་སྟེ། ཨོཾ་སུམྦྷ་ནི་སུམྦྷ་ཧཱུྃ་ཧཱུྃ་ཕཊ། ཨོཾ་གྲྀཧྣ་གྲྀཧྣ་ཧཱུྃ་ཧཱུྃ་ཕཊ། ཨོཾ་གྲྀཧྣ་པ་ཡ་གྲྀཧྣ་པ་ཡ་ཧཱུྃ་ཧཱུྃ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བཛྲ་ཧཱུྃ་ཧཱུྃ་ཕཊ། ཞེས་བྱ་བའི་སྔགས་ཀྱིས་ཤར་ཕྱོགས་ལ་སོགས་པར་ངེས་པར་བཞག་པར་བྱའོ། །སྟེང་དུ་ནི་མདའི་དྲྭ་བའོ། །ས་གཞི་ནི་ཡི་གེ་ཧཱུྃ་ལས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབས་ལ། དེའི་འོད་ཀྱི་སྣང་བ་ལས་རྡོ་རྗེའི་རྭ་བ་དང་། རྡོ་རྗེའི་བླ་རེ་སྟེ། ཨོཾ་གྷ་གྷ་ནི་བརྡུང་གཉིས། གྷ་ཏ་ཡ་གྷ་ཏ་ཡ་ནི་བརྡུང་དུ་ཆུག་གཉིས། སརྦ་ནི་ཐམས་ཅད། དུཥྚན་ནི་གདུག་པ་རྣམས། ཕཊ་ཕཊ་ནི་ཁོས་གཉིས། ཀཱི་ལ་ཡ་ཀཱི་ལ་ཡ་ནི་ཕུར་བུས་ཐོབ་གཉིས། སརྦ་པཱ་པཾ་ཕཊ་ཕཊ་ནི་ཁོས་གཉིས། ཧཱུྃ་ཧཱུྃ་ཧཱུྃ། བཛྲ་ཀཱི་ལ་ནི་རྡོ་རྗེ་ཕུར་བུ། བཛྲ་དྷ་རོ་ནི་རྡོ་རྗེ་འཆང་གི ཨཱ་ཛྙཱ་པ་ཡ་ཏི་ནི་བཀའ་ལས་མ་འདའ་ཤིག སརྦ་ནི་ཐམས་ཅད། བིགྣན་བགེགས་རྣམས་ཀྱི། ཀཱ་ཡ་ཝཱཀྐ་ཙིཏྟ་ལུས་ངག་ཡིད། ཀཱི་ལ་ཡ་ཀཱི་ལ་ཡ་ནི་ཕུར་བུས་ཐོབ་གཉིས། ཧཱུྃ་ཧཱུྃ་ཕཊ་ཕཊ། ཕུར་བུས་བཏབ་པའི་སྔགས་སོ། །ཨོཾ་བཛྲ་མུད་ཀ་ར་ནི་རྡོ་རྗེ་ཐོ་བས། ཨ་ཀཱོ་ཊ་ཡ་ནི་རྡུངས་ཤིག ཧཱུྃ་ཕཊ། ཕུར་བུ་བརྡུང་བའི་སྔགས་སོ། །ཞེས་རྡོ་རྗེའི་རྭ་བ་དང་། མདའི་དྲྭ་བ་དང་། རྡོ་རྗེའི་ས་གཞི་དང་། དྲྭ་བ་དང་། བླ་རེ་དང་། ཕུར་བུ་བཏབ་པ་སྟེ་དྲུག་གསུངས་སོ། །གཉིས་པ་ནི་པྲཛྙཱ་རཀྵི་ཏའི་འགྲེལ་པ་ལས། དེ་ནས་ཞེས་བྱ་བ་ནི་ཕུང་པོ་ལ་སོགས་པ་རྣམ་པར་དག་པའི་རྗེས་ཐོགས་སུའོ། །རྡོ་རྗེའི་གུར་བསམ་པར་བྱ་སྟེ། ཤར་ལ་སོགས་པའི་ཕྱོགས་སུ་ངེས་པར་དགོད་པར་བྱའོ། །སྟེང་དུ་ནི་མདའི་དྲྭ་བའོ། །ས་གཞི་ནི་ཡི་གེ་ཧཱུྃ་ལས་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །དེའི་འོད་ཀྱི་སྣང་བ་ལས། རྡོ་རྗེའི་རྭ་བ་དང་། རྡོ་རྗེའི་བླ་རེའོ། །ཞེས་བྱ་བའི་ཚིགས་བདུན་པོ་འདི་རྣམས་ནི་མན་ངག་ཇི་ལྟ་བ་བཞིན་དུ་བྲིའོ། །གཡོན་པའི་མཛུབ་མོ་དང་། མཐེ་བོང་བརྡབ་པ་སྔོན་དུ་འགྲོ་བས། ཨོཾ་སུམྦྷ་ནི་སུམྦྷ་ཞེས་བྱ་བའི་སྔགས་བརྗོད་ཅིང་། ནག་པོ་དང་། ལྗང་གུ་དང་། དམར་པོ་དང་། སེར་པོའི་ཁ་དོག་ཚངས་པའི་འཇིག་རྟེན་ནས་གསེར་གྱི་ས་གཞི་ལ་ཐུག་པར་ཁྱབ་ཅིང་འབར་བའི་ལུས་ཆེན་པོ་ཤར་དང་། བྱང་དང་། ནུབ་དང་། ལྷོའི་ཕྱོགས་རྣམས་སུ་རིམ་གྱིས་དགོད་པར་བྱའོ། །སུམྦྷ་ལ་སོགས་པའི་སྔགས་ཀྱི་འོད་ཟེར་གྱི་ཁ་དོག་ལས་དེ་དང་མཐུན་པའི་རྭ་བ་བཞིའོ། །དེ་དང་དུས་མཉམ་པ་ཉིད་དུ་ཧཱུྃ་གི་ཡི་གེ་ལས་སྐྱེས་ཤིང་དེ་ཉིད་ཀྱིས་བྱིན་གྱིས་བརླབས་པའི་སྣ་ཚོགས་རྡོ་རྗེའི་རང་བཞིན་གྱི་ས་གཞིའོ། །དེའི་འོད་ཟེར་གྱིས་སྟེང་དུ་རྡོ་རྗེ་རྩེ་ལྔ་པའི་རྣམ་པའི་མདའི་དྲྭ་བའོ། །དེའི་འོག་དུ་རྡོ་རྗེའི་གུར་དང་། རྡོ་རྗེའི་བླ་རེ་ནི་གནས་ཇི་ལྟ་བ་བཞིན་དུ་བསམ་པའོ། །དེ་ནས་སུམ་བྷ་ལ་སོགས་པའི་སྔགས་བཞི་ལས་གྲུབ་པའི་ཁྭ་གདོང་མ་ལ་སོགས་པའི་ལྷ་མོ་བཞི་དང་། དེ་ཉིད་ཀྱི་ཚེ་གཉིས་གཉིས་ཀྱི་འོད་ཟེར་ལས་བྱུང་བའི་གཤིན་རྗེ་བརྟན་མ་ལ་སོགས་པའི་ལྷ་མོ་བཞི་སྟེ། འདི་བརྒྱད་ནི་ཞལ་གཅིག་པ་ཕྱག་གཉིས་པ་ལྟེ་བ་མན་ཆད་རྩེ་གཅིག་པའི་རྣམ་པའོ། །གཡས་པ་ནི་རྡོ་རྗེ་ཐོ་བ་འཛིན་པ། གཡོན་པ་བདག་ཉིད་ཀྱི་ཕུར་བུའི་ཕྱག་རྒྱ་ཅན་སྤྲོས་ཏེ། ཕྱོགས་བཅུ་ན་གནས་པའི་བགེགས་ཀྱི་ཚོགས་བཀུག་ནས་སྒྲ་རིང་པོར་བརྗོད་པའི་ཧཱུྃ་གི་ཡི་གེ་ལས་གྲུབ་པའི་ཕྱོགས་བརྒྱད་ཀྱི་རྭ་བ་དང་ཉེ་བའི་དོང་རྣམས་སུ་བཅུག་ལ། ཕུར་བུས་གདབ་པའི་སྔགས་སྔོན་དུ་འགྲོ་བས་བགེགས་ཀྱི་ཚོགས་ཕུར་བུས་གདབ་པ་དང་། བརྡུང་བའི་སྔགས་སྔོན་དུ་འགྲོ་བས་བརྡུང་བར་བྱའོ། །ཕུར་བུས་གདབ་པ་དང་བརྡུང་བ་དག་གིས་བགེགས་ཀྱི་ཚོགས་རྣམས་བདེ་བ་ཆེན་པོའི་དེ་བཞིན་ཉིད་དུ་རང་བཞིན་གཅིག་པར་རྣམ་པར་བསམ་པར་བྱའོ། །ཡང་བགེགས་ལྷག་མ་རྣམས་བསྐྲད་ནས་དེ་དག་རྭ་བ་ལ་ཐིམ་པ་ན། ཆུ་ལ་ཆུ་ཐིམ་པ་ལས་ཐིགས་པ་བྱུང་བའི་ཚུལ་གྱིས་མཚམས་བཅིང་བའི་དོན་དུ་ཟླུམ་པོའི་རྡོ་རྗེ་དང་། པདྨ་དང་འཁོར་ལོའི་རྭ་བ་རྣམས་བསམ་པར་བྱའོ། །རྡོ་རྗེའི་རྭ་བ་ལ་སོགས་པ་དེ་ཉིད་མཚམས་མེད་ཅིང་དུམ་བུ་གཅིག་ཏུ་གྱུར་པས་རྣམ་པ་ཐམས་ཅད་དུ་འགྲོ་བ་ལ་བགེགས་མེད་པར་མོས་པ་བྱའོ། །ཞེས་གསུངས་སོ། །པུ་ཧྲངས་པ་ནས་བརྒྱུད་པ། བྲོག་རྭ་བ་དང་། དམར་གྱིས་འདི་ཇི་ལྟ་བ་བཞིན་བཞེད་དེ། འདི་ལ་ལུས་དང་། ཡན་ལག་གཉིས་ལས། ལུས་ལ་སྔགས་ཀྱི་རྭ་བ་དང་། དེ་ལས་རྡོ་རྗེའི་རྭ་བ་དང་། དེ་ལས་འོད་ཟེར་སྣང་བ་དང་། རྡོ་རྗེའི་ས་གཞི་དང་། རྡོ་རྗེའི་གུར་དང་། རྡོ་རྗེའི་བླ་རེ་དང་། མདའི་དྲྭ་བ་སྟེ་བདུན། ཡན་ལག་ལ་ཕུར་བུས་བཏབ་པ་དང་། བརྡུང་བ་གཉིས་ཏེ་དགུར་བཤད་དོ། །བུ་སྟོན་གྱིས་གཞན་རྣམས་འདྲ་བ་ལས། སྔགས་ཀྱི་རྭ་བ་ལོགས་སུ་མི་བྱེད་པར། སྔགས་བརྗོད་པས་སྒོ་མཚམས་མ་བརྒྱད། གསེར་གྱི་ས་གཞི་ནས་ཚངས་པའི་འཇིག་རྟེན་གྱི་བར་དུ་ཁྱབ་པའི་ལུས་ཆེན་པོ་འབར་བ་བཀོད་ནས། དེའི་རྗེས་སུ་སྔགས་དྲུག་དང་། ཕྱག་རྒྱ་དྲུག་གིས་རྡོ་རྗེའི་ས་གཞི་སོགས་དྲུག་བསྒོམ་པ་ཨ་བྷི་དྷ་ན་ལྟར་མཛད་ཅིང་། དེ་ནས་ཕུར་སྟབས་མཛད་དོ། །གསུམ་པ་ནི་རྗེ་བཙུན་ནཱ་རོ་ཏ་པའི་མན་ངག་ཕམ་འཐིང་པ་ནས་བརྒྱུད་པ་རྗེ་བཙུན་གྱིས་འདི་ལྟར་གསུངས་ཏེ། ས་ཕྱོགས་བགེགས་དང་བྲལ་བར་བྱ་བ་དང་། སྲུང་བའི་འཁོར་ལོ་བརྟན་པར་བསྒོམ་པ་དང་། བགེགས་ཚར་བཅད་པ་གསུམ་ལས། དང་པོ་ནི་རང་གི་སྙིང་ཁའི་ཧཱུྃ་ལས་གཤིན་རྗེ་གཤེད་བཅུའམ། ཁཎྜ་རོ་ཧི་བཅུའམ། སྒོ་མཚམས་མ་བརྒྱད། ཁཎྜ་རོ་ཧི་གཉིས་ཏེ་བཅུ་གང་བློ་ལ་མོས་པ་སྤྲོ་གསུང་ནའང་། ཕྱི་མ་གཙོ་བོ་སྟེ། ལུས་ཀྱིས་གཡོན་པའི་སྡིགས་མཛུབ་ཕྱོགས་བཅུར་བསྟན་ཅིང་སེ་གོལ་བརྡབ། ངག་དུ་ཞལ་བཞི་པའི་སྔགས་བརྗོད་དེ། ཕྱོགས་ཤར་ནས་བཟུང་སྟེ། གཡོན་སྐོར་དུ་སྤྲོ་བའི་ཚེ་ཤར་དང་སྟེང་གི་དུས་གཅིག ནུབ་དང་འོག་གི་དུས་གཅིག་ཏུ་སྤྲོ་བ་ལ་སྔགས་ཚན་གཅིག མཚམས་རྣམས་མེ་ནས་བཟུང་སྟེ། གཡས་སྐོར་དུ་སྤྲོ་བ་ལ་སྔགས་ཚན་གཅིག་སྟེ། དེས་བགེགས་ཐམས་ཅད་བསྐྲད་པར་བསམ་མོ། །གཉིས་པ་ནི་ས་ཕྱོགས་དེར་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཧཱུྃ་ལས་སྣ་ཚོགས་རྡོ་རྗེ་ཧཱུྃ་གིས་མཚན་པ་བསྒོམས་ནས། དེ་ལས་འོད་བྱུང་བས། འོག་རྡོ་རྗེའི་ས་གཞི་དང་། ཁོར་ཡུག་ཏུ་རྡོ་རྗེ་ནག་པོ་གདེངས་པ་འགྲེངས་བུར་གྱུར་པའི་རྭ་བ་དང་། ཡང་རྡོ་རྗེ་འཕྲེད་ལ་སོང་བའི་དྲྭ་བ་གཉིས་གཅིག་ཏུ་བྱས་པ་དང་། སྟེང་དུ་རྡོ་རྗེའི་གུར་དང་། དེའི་འོག་ཏུ་རྡོ་རྗེའི་བླ་རེ་དང་། དེ་དག་གི་ཕྱི་རོལ་དུ་མདའི་དྲྭ་བ་དང་། དེའི་ཕྱི་རོལ་དུ་མེ་རི་འབར་བ་རྣམས་བསྒོམས་ལ། སྔར་གྱི་ཕྱག་རྒྱ་དང་། ཨ་བྷི་དྷ་ན་ནས་འབྱུང་བའི་སྔགས་དྲུག་པོ་ལན་གསུམ་གསུམ་བརྗོད་པས་བྱིན་གྱིས་བརླབ་བོ། །གསུམ་པ་ནི། དེ་ནས་སྔར་ཕོ་ཉ་བཅུ་པོས། བགེགས་ཁ་ཅིག་ནི་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་ལ་བཀོད། ནག་པོའི་རིགས་ཁ་ཅིག་ནི་བསྒྲལ་ཏེ་བདེ་བ་ཅན་ལ་སོགས་པའི་ཞིང་དུ་གནས་སྤར། བགེགས་ཀྱི་གཙོ་བོ་ཕྱོགས་སྐྱོང་བཅུ་ནི་བཀུག་སྟེ་འོངས་ནས་མེ་རིའི་ནང་རྡོ་རྗེ་རྭ་བའི་ཕྱི་རོལ་མདའི་དྲྭ་བའི་འོག་ཏུ་འོབས་གཅིག་ཡོད་པར་བསམ་དེའི་ཁ་ཁྱེར་ལ་ཕྱོགས་སྐྱོང་བཅུ་པོ་ཡོད་པར་བསྒོམ་ལ་དེ་ནས་ཕུར་གདབ་བྱ་བར་གསུངས་སོ། །དེའི་རྗེས་སུ་ཕོ་ཉ་བཅུ་པོ་རྣམས་ལས་རང་དང་འདྲ་བའི་སྤྲུལ་པ་དཔག་ཏུ་མེད་པ་སྤྲོས་ཏེ། མཚོན་ཆ་སྣ་ཚོགས་ཐོགས་ནས་རྡོ་རྗེའི་དྲྭ་མིག་ནས་རོ་སྟོད་འཐོན་ཏེ། སྒྲུབ་པ་པོ་ཇི་སྲིད་བྱང་ཆུབ་མ་ཐོབ་ཀྱི་བར་དུ་བར་ཆད་ཐམས་ཅད་བསྲུང་བར་བསམ་མོ། །ཞེས་གསུངས་སོ། །གཞུང་དང་སྦྱར་ན། དེ་ནས་རྡོ་རྗེའི་དྲྭ་བ་བསམ་པར་བྱ་སྟེ། ཞེས་པས་མདོར་བསྟན་ཏེ། དྲྭ་བ་ནི་འགྲེལ་པས་གུར་དུ་བཤད་ཅིང་། སྐད་དོད་ཀྱང་གཅིག་པས་སྲུང་འཁོར་སྤྱིའི་མིང་ངོ་། །ཨོཾ་སུམ་བྷ་ཞེས་པ་ནས། ངེས་པར་བཞག་པར་བྱའོ་ཞེས་པའི་བར་གྱིས་ས་ཕྱོགས་བགེགས་དང་བྲལ་བ་བསྟན། སྟེང་དུ་ནི་ཞེས་པ་ནས་བླ་རེ་སྟེ་ཞེས་པའི་བར་གྱིས་སྲུང་བའི་འཁོར་ལོ་བརྟན་པར་བསྒོམས་པ་ཨོཾ་གྷ་གྷ་ཞེས་པ་མན་གྱིས་བགེགས་ཚར་གཅོད་པ་བསྟན་ཏེ། བསྒོམ་ཚུལ་རྒྱས་པ་ནི་མན་ངག་ལས་བྱུང་བའོ། །བཞི་པ་ནི། དམར་གྱིས་ཕྱིའི་བགེགས་ལས་བསྲུང་བའི་ཕྱིར་གནས་བསྲུང་བ་ཞེས་དང་། རྗེ་བཙུན་གྱིས་དོན་ཆེན་པོ་ཡེ་ཤེས་ཀྱི་ཚོགས་གསོག་པ་ལ་བར་ཆད་མི་འབྱུང་བར་བྱ་བའི་ཕྱིར་ཡིན་པར་གསུངས་སོ། །པྲ་ཛྙཱ་རཀྵི་ཏས། འདིར་ཅིའི་ཕྱིར་སྲུང་བའི་རྡོ་རྗེའི་དྲྭ་བ་ལ་སོགས་པའི་རྗེས་ཐོགས་སུ་སྟོང་པ་ཉིད་བསྒོམ་ཞེས་རྩོད་པར་མི་བྱ་སྟེ། གང་གི་ཕྱིར་རྒྱུད་འདི་ནི་དབང་པོ་རྣོན་པོའི་དབང་དུ་བྱས་པ་ཡིན་ལ། དེ་ལ་སྟོང་པ་ཉིད་ཁོ་ན་དོན་དམ་པའི་སྲུང་བ་ཡིན་ནོ། །འོ་ན་ཇི་ལྟར་ཕྱི་རོལ་དུ་བྲིས་པའི་དཀྱིལ་འཁོར་དུ་རྡོ་རྗེའི་རྭ་བ་ཡིན་ཞེ་ན་མ་ཡིན་ཏེ། གང་གི་ཚེ་བཅོམ་ལྡན་འདས་རྫོགས་པ་དེ་ཉིད་ཀྱི་ཚེ་དམ་ཚིག་གི་འཁོར་ལོ་ཡོངས་སུ་གཅོད་པའི་སྣ་ཚོགས་རྡོ་རྗེའི་རྭ་བ་རྫོགས་པའི་ཕྱིར་རོ། །ཞེས་གསུངས་ཏེ། འདིའི་དོན། སྲུང་བའི་འཁོར་ལོའི་རྗེས་ཐོགས་སུ་ཡེ་ཤེས་ཀྱི་ཚོགས་བསག་བསྒོམ་ན། སྲུང་འཁོར་དོན་མེད་པར་འགྱུར་ཏེ། ཡེ་ཤེས་ཀྱི་ཚོགས་ཀྱིས་སྟོང་ཉིད་དུ་སྦྱངས་པས་དངོས་གཞི་ལ་མི་ཕན་པའི་ཕྱིར་རོ་སྙམ་ན་མ་ཡིན་ཏེ། ཡེ་ཤེས་ཀྱི་ཚོགས་དེ་ཉིད་དོན་དམ་པའི་སྲུང་བ་ཡིན་པས་དངོས་གཞི་ལ་ཕན་པའི་ཕྱིར་རོ། །འོ་ན་བྲིས་པའི་དཀྱིལ་འཁོར་ལ་སྟོང་པ་ཉིད་དུ་སྦྱངས་པའི་རྗེས་སུ་རྡོ་རྗེའི་རྭ་བ་སོགས་མེད་པར་འགྱུར་རོ་སྙམ་ན། མ་ཡིན་ཏེ། རྟེན་བརྟེན་པ་གཅིག་ཆར་དུ་གྲུབ་པའི་ཚེ་རྡོ་རྗེའི་རྭ་བ་སོགས་ཀྱང་གྲུབ་པའི་ཕྱིར་ཞེས་པའི་དོན་ཏོ། །རྗེ་བཙུན་ནཱ་རོ་པའི་དགོངས་པ་ནི། ཡེ་ཤེས་ཀྱི་ཚོགས་ནི་དོན་དམ་པའི་བྱང་ཆུབ་ཀྱི་སེམས་དངོས་སུ་བསྒོམ་པ་ཡིན་པས། དོན་ཆེན་པོ་ཡིན་ལ། དེ་ལ་བར་ཆད་མི་འབྱུང་བའི་ཕྱིར་ཐོག་མར་སྲུང་བའི་འཁོར་ལོ་བསྒོམ་མོ། །འོ་ན་དངོས་གཞི་ལ་མི་ཕན་པར་འགྱུར་རོ་སྙམ་ན་མ་ཡིན་ཏེ། དོན་དམ་པའི་བྱང་ཆུབ་ཀྱི་སེམས་བསྒོམ་པ་དེ་ལས་ལངས་ནས། དེ་རྟོགས་པའི་ཕྱིར་ཀུན་རྫོབ་བྱང་ཆུབ་ཀྱི་སེམས་བསྒོམ་པ་ནི་དངོས་གཞི་ཡིན་པས། གཉིས་ཀའི་བར་ཆད་བསྲུང་བར་འགྱུར་བའི་ཕྱིར་སྙམ་དུ་དགོངས་ཏེ་ཚུལ་འདི་ནི་ཡེ་ཤེས་ཞབས་ལུགས་ལས་རྒྱས་པར་འབྱུང་ངོ་། །འོ་ན་སྤྱིར་བགེགས་ཞེས་བྱ་བ་རང་གང་ཡིན། དེ་དོན་དམ་པར་ཡོད་དམ་ཀུན་རྫོབ་དུ་ཡོད། བསྲུང་ན་ཅི་ལྟར་བསྲུང་ཞེ་ན། སྤྱིར་སྣ་ཚོགས་སུ་སྣང་བ་ཐམས་ཅད་རང་སེམས་གཅིག་གི་ཆོ་འཕྲུལ་ཡིན་ཅིང་། དེ་སྐྱེ་འགག་གནས་གསུམ་གྱིས་སྟོང་པ་ཡིན་ཀྱང་། དེ་ལྟར་མ་རྟོགས་པའི་དབང་གིས། རྣམ་པར་རྟོག་པ་ཕྱིན་ཅི་ལོག་གིས་བསླད་པས་སྡིག་པའི་སེམས་ཉིད་ཕྱི་རོལ་གྱི་བདུད་དུ་སྣང་བ་གང་ཡིན་པ་དེ་ཉིད་ཡིན་ཏེ། ཞི་བ་ལྷས། འདི་ལྟར་འཇིགས་པ་ཐམས་ཅད་དང་། །སྡུག་བསྔལ་དཔག་ཏུ་མེད་པ་ཡང་། །སེམས་ལས་བྱུང་བ་ཡིན་ནོ་ཞེས། །ཡང་དག་གསུང་བ་ཉིད་ཀྱིས་བསྟན། །ཞེས་སོ། །དེ་དོན་དམ་པར་སྤྲོས་པ་ལས་གྲོལ་ཀྱང་། ཐ་སྙད་ཀུན་རྫོབ་ཙམ་དུ་རང་སེམས་མ་ཐུལ་གྱི་བར་དུ་འབྱུང་ལ་ཐུལ་བ་ལས་མི་འབྱུང་སྟེ། ངེས་བརྗོད་ལེའུ་གསུམ་པ་ལས། བདུད་མིན་བདུད་མིན་པ་ཡང་མིན། །རང་གི་སེམས་ནི་བཅིང་བར་བྱ། །རང་གི་སེམས་ནི་ཐུལ་བ་ལ། །བགེགས་ཀྱི་འཇུག་པ་ག་ལ་ཡོད། །ཅེས་གསུངས་པས་ན། གང་དུ་རང་སེམས་གཟུང་འཛིན་གྱི་རྣམ་པར་རྟོག་པ་མི་འཆོར་བར་བཅིངས་པ་དང་། བདག་ལ་གཅེས་པར་འཛིན་པའི་བློ་ལོག་ནས། བདག་གཞན་མཉམ་པར་རྟོག་པའི་བྱང་ཆུབ་ཀྱི་སེམས་དང་ལྡན་པ་དང་། སྣང་བ་གདོན་མི་ཟ་བར་རང་བཞིན་མེད་པར་རྟོགས་པའི་གང་ཟག་གསུམ་ལ་བདུད་མི་འབྱུང་ལ། དེ་རྣམས་དང་མི་ལྡན་ན་བགེགས་ཀྱང་ཡོད་ལ། བསྲུངས་པས་ཀྱང་ཐུབ་སྟེ། དཔེར་ན་རྒྱ་གར་གྱི་ལྷོ་ཕྱོགས་ཀྱི་རྒྱུད་ན། རྒྱལ་པོ་ཕྱི་རོལ་པའི་གྲུབ་མཐའ་འཛིན་པ་གཅིག་ལ་མཆོད་གནས་མུ་སྟེགས་ཞི་བའི་གྲུབ་མཐའ་འཛིན་པ་གཅིག་ཡོད་པ་ལ། དེ་ལ་རཱ་ཛས་ཁོ་རང་གི་ལུགས་ཀྱི་དབང་བསྐུར་ཞུས་པས། དེས་ཀྱང་དཀྱིལ་འཁོར་གྱི་ཁང་པ་བརྩིགས། རྒྱལ་མཚན་དང་བ་དན་ལ་སོགས་པ་ལྔ་བསྒྲེང་། རྡུལ་ཚོན་གྱི་དཀྱིལ་འཁོར་བཞེངས། མཆོད་པ་རྒྱ་ཆེན་པོ་ཡང་བཤམས་ནས་དབང་བསྐུར་བྱེད་ལ། དེ་ལྟ་བའི་ཕྱིར་སྐྱེ་བོའི་ཚོགས་དུ་མ་འདུས་པའི་ཚེ། དེ་ནས་ཐག་མི་རིང་བ་གཅིག་ན། སངས་རྒྱས་པའི་རྣལ་འབྱོར་པ་བྷོ་ཛ་དེ་ཝ་ཞེས་པ་བདེ་མཆོག་བསྒོམ་པ་གཅིག་གི་བསམ་པ་ལ། འདིས་སངས་རྒྱས་ཀྱི་བསྟན་པ་ལ་གནོད་སྙམ་ནས་རླུང་ལྷ་བཀུག་སྟེ། གཏོར་མ་བྱིན་པས། ཁོ་ན་རེ་ད་ཅི་བྱ་ཟེར་བ་ལ། དབང་བསྐུར་གྱི་བྱ་བ་བྱེད་པ་ཕ་གི་ཚོ་རླུང་ལ་བསྐུར་གཅིག་བྱས་པས། དེ་འདྲ་བ་སླ་ཡིས་ཟེར་ཏེ། རི་དྭགས་ཤྭ་བ་ལ་ཞོན་རླུང་གི་བ་དན་ཁྱེར་ཏེ། འཚུབ་མའི་རྣམ་པར་སོང་ནས་ཡུད་ཙམ་གཅིག་གིས་དེ་རྣམས་རྗེས་མེད་པར་བྱས་སོ། །དེར་མུ་སྟེགས་ཀྱི་རྣལ་འབྱོར་པ་དེས་བསམ་པས་ཁོ་བོ་ནི་ཤིན་ཏུ་སྨ་ཕབ་ལ། འདི་ངེས་པར་རི་སུལ་གྱི་སྤྱིལ་པོའི་སངས་རྒྱས་པའི་རྣལ་འབྱོར་པའི་ཆོ་འཕྲུལ་ཡིན་སྙམ་ནས། ལན་དུ་སླར་མེ་ལྷ་བསྐུག་ནས་སྦྱིན་སྲེག་དགང་བླུགས་བདུན་བྱིན་ནས། སངས་རྒྱས་པའི་རྣལ་འབྱོར་པ་ཕ་ཀི་ཟོ་ཞིག་བྱས་པས། མེ་ལྷ་འཁོར་དང་བཅས་པ་སྐད་ཅིག་གིས་འོངས་པ་དང་། རྣལ་འབྱོར་པས་ཀྱང་བར་ཆད་བྱེད་པར་ཤེས་ནས་མོད་ལ་སྲུང་བའི་འཁོར་ལོ་ཕྱོགས་མཚམས་བདུན་རིམ། སྟེང་བཞི་རིམ། འོག་རྡོ་རྗེའི་ས་གཞིར་བསྒོམས་ནས། དེའི་ནང་དུ་རང་ལྷ་སུམ་ཅུ་རྩ་བདུན་རྟེན་དང་བརྟེན་པར་བཅས་པའི་དབུས་སུ། གཙོ་བོའི་ང་རྒྱལ་གྱིས་སྔགས་ཟློས་ཤིང་ཡོད་པའི་ཚེ། མེ་ལྷའི་འཁོར་རྣམས་མེ་རི་ལ་བརྡུགས་ནས་སླར་ལོག་པ་དང་། མེ་ལྷ་ན་རེ་ང་མེའི་རང་བཞིན་ཡིན་པས་དེ་ལ་ཚེགས་མེད་ཀྱིས་ཟེར་ནས། མེ་རི་དང་འོབས་གསུམ་ལས་བརྒལ་ནས་བྱུང་ནས། མདའི་དྲྭ་བ་ལ་རྡུགས་ནས་ལོག་སྟེ། མུ་སྟེགས་ཀྱི་དྲུང་དུ་འོངས་ནས། ངས་ཁོ་ལ་གནོད་པ་མི་འཁྱོལ་བར་འདུག་མར་དགང་བླུགས་བདུན་བླང་ཟེར་ནས་སོང་སྐད་དོ་ཞེས་དམར་གྱིས་བཤད་དེ། སྤྱིར་སྲུང་འཁོར་བསྒོམ་པའི་དགོས་པ་དང་། བྱེ་བྲག་རིམ་པ་མང་པོ་བསྒོམ་པའི་དགོས་པ་ཡང་ལེགས་པར་གྲུབ་པའོ། །གཉིས་པ་དོན་ཆེན་པོ་ཡེ་ཤེས་ཀྱི་ཚོགས་བསྒོམ་པ་ལ་བཞི་སྟེ། གཞུང་ལས་བཤད་པའི་ཚུལ། འགྲེལ་པ་མཁན་པོས་བཀྲལ་བའི་ཚུལ། མན་ངག་གིས་ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ་བཤད་པའོ། །དང་པོ་ནི་སློབ་དཔོན་གྱི་གཞུང་ལས། ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ། ཞེས་བརྗོད་ལ། ཡང་སྟོང་པ་ཉིད་དུ་བསམ་པར་བྱ་སྟེ། བྱང་ཆུབ་ཀྱི་ཚོགས་བསྒོམས་པས། རང་གི་སེམས་ཙམ་ཉིད་ལ་གནས་ཤིང་། མིག་ཡོར་ཙམ་གྱི་ཡེ་ཤེས་དག་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱའོ། །ཞེས་གསུངས་སོ། །གཉིས་པ་ནི་འདིའི་དོན། པྲ་ཛྙཱ་རཀྵི་ཏའི་འགྲེལ་པ་སོགས་འགྲེལ་པ་གསུམ་ལས། མཆོད་པ་ལ་སོགས་པའི་རྗེས་ལ་མཆོད་པ་ལ་སོགས་པ་རྟེན་ཅིང་འབྲེལ་བར་འབྱུང་བ་སེམས་ཙམ་དུ་མོས་པ་བྱས་པ་ལ་བདག་ཉིད་ཀྱི་སྤྱི་བོ་དང་མགྲིན་པ་དང་། སྙིང་ཁ་རྣམས་སུ་ཧེ་རུ་ཀ་ཞེས་བྱ་བའི་ཡི་གེ་གསུམ་བསྒོམ་ཞིང་། ཧེ་ནི་ཆོས་ཐམས་ཅད་རྒྱུ་དང་བྲལ་བ་དང་། དེ་བཞིན་དུ་རྟོགས་པ་དང་བྲལ་བ་དང་། གང་དུ་ཡང་མི་གནས་པ་ཞེས་བརྟགས་ནས། དེ་ལྟ་བུར་ཆོས་ཐམས་ཅད་ཀྱི་རང་བཞིན་མི་ཤེས་པས་སེམས་ཅན་རྣམས་བདག་དང་བདག་གི་བ་ལ་སོགས་པར་བཟུང་བས་འཁོར་བར་འགྱུར་ཏེ། དེ་བས་ན་བདག་ཉིད་ཧེ་རུ་ཀར་གྱུར་ནས། ཇི་ལྟར་དེ་ལྟ་བུའི་རང་བཞིན་དུ་ཆོས་ཐམས་ཅད་ཤེས་པར་གྱུར་པ་དེ་ལྟར་བདག་གིས་བྱའོ་ཞེས་ཆོས་ལ་དམིགས་པའི་སྙིང་རྗེ་བསྐྱེད་ལ། ཨོཾ་སྭ་བྷཱ་ཝ་ལ་སོགས་པའི་སྔགས་བརྗོད་ཅིང་ཁམས་གསུམ་པོ་ཐམས་ཅད་སྟོང་པ་ཉིད་དུ་བལྟ་བར་བྱའོ། །སྨོན་ལམ་གྱི་དབང་གིས་སེམས་དེ་གོང་ནས་གོང་དུ་གནས་པ་དཀར་པོ་དང་། དམར་པོ་དང་། སྔོན་པོའི་ཡི་གེ་ཨོཾ་ཨཱཿཧཱུྃ་གི་རང་བཞིན་དུ་རྣམ་པར་བསམ་པར་བྱའོ། །དེ་ནས་ཡི་གེ་ཨོཾ་ལས་སྐུའི་འཁོར་ལོའི་ལྷ་རྣམས་ཡང་དག་པར་སྤྲོས་ཏེ་འགྲོ་བའི་དོན་བྱས་ནས་སྙོམས་པར་འཇུག་པ་སྔོན་དུ་བྱས་ཏེ་ཞུ་བར་བྱས་ནས་དེ་ཉིད་ལ་ཞུགས་པར་བྱས་ལ། དེ་ནས་ཡི་གེ་ཨཱཿལས་གསུང་གི་འཁོར་ལོའི་ལྷ་རྣམས་དང་། ཡི་གེ་ཧཱུྃ་ལས་ཐུགས་ཀྱི་འཁོར་ལོའི་ལྷ་རྣམས་སོ། །དེ་ནས་ཨོཾ་ནི་ཨཱཿལའོ། །ཨཱཿནི་ཧཱུྃ་ལའོ། །ཨུ་ནི་ཧ་ལའོ། །ཧ་ནི་མགོ་བོ་ལའོ། །མགོ་བོ་ནི་ཟླ་བ་ཕྱེད་པ་ལའོ། །ཟླ་བ་ཕྱེད་པ་ནི་ཐིག་ལེ་ལའོ། །ཐིག་ལེ་ནི་ནཱ་ད་ལ་བསྡུས་ནས་སྐྲའི་རྩེ་མོ་བརྒྱ་སྟོང་དུ་གཤགས་པའི་ཚད་ཙམ་དུ་བཞག་ནས་སེམས་ཅན་རྣམས་ཆོས་ཉིད་མི་ཤེས་པས་འཁོར་བར་འཁོར་ཏེ། དེ་བས་ན་བདག་གིས་ཆོས་ཉིད་ཤེས་པར་བྱས་ནས་དེ་རྣམས་ཀྱིས་རྟོགས་པར་བྱའོ་ཞེས་བྱ་བའི་སྙིང་རྗེ་ཆེན་པོ་དམིགས་པ་མེད་པའི་སྙིང་རྗེའི་ས་བོན་དུ་གྱུར་པར་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་ཞེས་བྱ་བ་ལ་སོགས་པའི་སྔགས་བརྗོད་པས་ནཱ་ད་ཙམ་གྱི་རྟོག་པ་ཡོངས་སུ་སྤང་བར་བྱའོ་ཞེས་གསུངས་ཤིང་། ལུགས་འདིའི་རྗེས་སུ་འབྲང་བ་མར་དོ་སོགས་དང་། ཕྱིས་ཀྱི་བུ་དགེ་གཉིས་ཀྱང་འདི་བཞིན་དུ་བསྒོམ་པར་སྣང་ངོ་། །དེ་ལ་གཞུང་གི་དོན་སྔགས་དང་པོ་བརྗོད་པས་སྟོང་ཉིད་དུ་བསམ་པ་ནི། གནས་གསུམ་དུ་ཡི་གེ་གསུམ་བཀོད་ནས། སེམས་ཅན་གཟུང་འཛིན་གྱི་དབང་གིས་འཁོར་བར་གྱུར་པ་རྣམས་ལ་ཆོས་ལ་དམིགས་པའི་སྙིང་རྗེ་བསྒོམས་ནས། སྔགས་བརྗོད་དེ་ཁམས་གསུམ་སྟོང་ཉིད་དུ་བལྟའོ། །དེ་ནས་ཨོཾ་ཨཱཿཧཱུྃ་ཡི་གེ་གསུམ་དུ་ལངས་པ་ནས། ནཱ་དའི་བར་ནི་རང་གི་སེམས་ཙམ་ཉིད་ལ་གནས་པའི་དོན་དང་། སྔགས་ཕྱི་མ་བརྗོད་དེ་ནཱ་ད་ཡང་མི་དམིགས་པར་བསྒོམས་པ་ནི་མིག་ཡོར་ཙམ་གྱི་ཞེས་པ་མན་ཆད་ཀྱི་དོན་དུ་འཆད་པར་སྣང་ངོ་། །འདོད་འཇོ་མཁན་པོས། སྐབས་འདིར་སྣོད་བཅུད་ཀྱི་སྣང་བ་དོན་ལ་མ་དག་བཞིན་དུ་སྡུད་པ་ཡང་ཆད་སྟོང་བསྒོམ་པ་མ་ཡིན་ཏེ་ཞེས་དང་། རང་བཞིན་གྱིས་གྲུབ་པས་སྟོང་པ་ལ། བྱ་བྱེད་ཐམས་ཅད་འཐད་པར་རྟོག་ན་ནི་སྣང་བ་སྡུད་པ་བསྒོམས་པ་ལ་ཆད་ལྟའི་དོན་མེད་དེ། དགོས་པའི་དབང་གིས་དེ་ལྟར་བྱེད་པ་ཡིན་གྱི། སྣང་བ་མེད་པར་ཁས་མི་ལེན་པའི་ཕྱིར་ཞེས་དང་། འགྲེལ་པར་བཤད་པའི་ཐིམ་རིམ་རྣམས། འཆི་བའི་ཚེ་སྣང་མཆེད་ཐོབ་གསུམ་གྱི་ཐིམ་རིམ་ལ་བཤད་པ་ནི། རང་ཉིད་ཡེ་ཤེས་ཚོགས་བསག་གི་ཚེ། སྣང་བ་མེད་པར་མི་བསྒོམ་པ་དང་འགལ་གྱིས་དོགས་ནས། དེའི་སྐྱོན་སྤོང་བ་དང་། ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་བའི་རང་གི་གྲུབ་མཐའི་རྒྱབ་རྟེན་དུ་འཆད་པར་སྣང་ངོ་། །དེ་ལའང་འགལ་བའི་སྐྱོན་སྤོང་ནི་མི་ནུས་ཏེ། གཞན་གྱིས་དེའི་ཚེ་སྣང་བ་མེད་པར་བསྒོམས་པས། སྤྱིར་སྣང་བ་མེད་པར་ཁས་ལེན་དགོས་ན། ཁྱེད་ཀྱིས་ཀྱང་དེའི་ཚེ་སྣང་བ་སྡུད་པར་བསྒོམས་པས། སྤྱིར་སྣང་བ་སྡུད་པར་ཁས་ལེན་དགོས་པའི་ཕྱིར་རོ། །སྐབས་དེར་སྣང་བ་མེད་པར་སྒོམ་པ་ཙམ་གྱིས་ཆད་ལྟར་འགྱུར་ན། སྣང་བ་སྡུད་པར་བསྒོམ་པ་ལ་ཡང་མཚུངས་ཏེ། སྣང་བ་མེད་པར་བསྒོམ་པར་མཚུངས་པའི་ཕྱིར་དང་། མེད་པར་མི་བསྒོམ་ན། རང་གི་གོས་ལ་སོགས་པའི་སྣང་བ་འདི་གཞལ་ཡས་ཁང་གི་ནང་ན་ཡོད་དམ་ཕྱི་ན་ཡོད་སོགས་ཀྱི་དཔྱད་པ་གཞན་དུ་བཤད་ཟིན་ཏོ། །མངོན་རྟོགས་ཀྱི་དངོས་གཞིས་སྐྱེ་འཆི་བར་དོ་གསུམ་སྦྱོང་བའི་ཚེ་ཡེ་ཤེས་ཚོགས་བསག་འཆི་སྲིད་སྦྱོང་བ་ལ་སྦྱར་བ་ནི་འགྲོ་བའི་རིས་གཅིག་གིས་ཆོས་གསུམ་འཆི་སྲིད་ཐོག་མར་འོང་བ་ནི་གསུང་རབ་མཐའ་དག་དང་འགལ་བ་སོགས་གཞན་དུ་རྒྱས་པར་བཤད་ཟིན་ཏོ། །གསུམ་པ་ནི། རྗེ་བཙུན་གྱིས། དེ་ནས་བསྲུང་བའི་རྣམ་པ་སེམས་སུ་ཤེས་པར་བྱ་བའི་ཕྱིར་དོན་ཆེན་པོ་ཡེ་ཤེས་ཀྱི་ཚོགས་བསྒོམ་པ་ནི་ཕྱི་དང་ནང་གིས་བསྡུས་པའི་ཆོས་ཐམས་ཅད་རང་གི་སེམས་ཙམ་དང་། སྒྱུ་མ་དང་། སྨིག་རྒྱུ་དང་། མིག་ཡོར་ལྟ་བུར་བསྒོམས་ལ། ངག་དུ་ཨོཾ་སྭ་བྷཱ་ཝ་ཤུདྡྷཿསརྦ་དྷརྨཱ་སྭ་བྷཱ་ཝ་ཤུདྡྷོ྅ཧཾ། ཞེས་བརྗོད་ལ་བརྟན་པར་བྱ། ཡང་སྒྱུ་མ་ཡང་རང་བཞིན་མེད་པར་བསྒོམས་ལ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ལ་བརྟན་པར་བྱའོ། །ཞེས་གསུངས་པ་འདི་ཙམ་ཞིག་སྔར་གྱི་གྲུབ་ཆེན་གྱི་གཞུང་གི་དོན་དུ་སྣང་ཞིང་། འདི་སྟོང་ཉིད་ཀྱི་ལྟ་བ་སྣང་བ་ཙམ་ཡང་མི་དམིགས་པ་བསྒོམ་པ་གཙོ་བོ་ཡིན་པས། སྣང་བ་སེམས་སུ་བསྡུ་བ་དང་། སེམས་ཉིད་ཀྱང་མི་དམིགས་པར་བསྒོམ་པ་ཙམ་ཞིག་སྐབས་སུ་བབ་ལ། སྔགས་གཉིས་ཀྱིས་བརྟན་པར་བྱེད་པ་ཡང་འདི་གཉིས་བརྟན་པར་བྱེད་པ་ཡིན་པའི་ཕྱིར་རོ། །འདི་ཉིད་ཇོ་བོའི་ལུགས་ལོ་ཆེན་གྱི་འགྲེལ་ཆུང་ལས། རང་གི་སྙིང་ཁའི་ཧཱུྃ་ལས་འོད་ཟེར་འཕྲོས་པས། རང་གི་ལུས་མི་སྣང་སྟེ། ཟླ་བ་དང་ཡི་གེ་ཧཱུྃ་ལུས་པར་བསམ། དེ་ནས་ཟླ་བ་ཞུ་ནས་ཧཱུྃ་འབའ་ཞིག་ལུས། དེ་ནས་ཧཱུྃ་ཞུ་ནས་ཐིག་ལེ་འོད་ཟེར་དང་བཅས་པ་འབའ་ཞིག་ལུས། དེ་ཡང་རིམ་གྱིས་ཇེ་ཕྲར་གྱུར་ནས་ཐིག་ལེ་ཡང་མི་སྣང་སྟེ། ཕྱི་ནང་གི་ཆོས་ཐམས་ཅད་སྟོང་པ་ཉིད་དུ་བསྒོམས་ནས་དེ་བརྟན་པར་བྱ་བའི་ཕྱིར་སྔགས་དང་པོ་བརྗོད། དེའི་རྗེས་ལ་དེའི་དོན་དྲན་པའི་སྒོ་ནས་སྟོང་ཉིད་བསྒོམ་པ་ནི་གཅིག་དུ་བྲལ་ལ་སོགས་པའི་གཏན་ཚིགས་ཀྱིས་ཆོས་ཐམས་ཅད་སྟོང་པ་ཉིད་དུ་བསྒོམས་ཏེ། སྟོང་པ་ཉིད་ཀྱི་རང་བཞིན་གྱི་ཡེ་ཤེས་དང་། བདག་དབྱེར་མེད་པ་བརྟན་པའི་ཕྱིར་སྔགས་ཕྱི་མ་བརྗོད་པར་གསུངས་པ་དང་ཡང་མཐུན་ཏེ། བསྡུ་རིམ་གྱི་སྒོ་ནས་བསྒོམ་པ་འདི་ནི་གཤིན་རྗེ་གཤེད་ལ་སོགས་པའི་སྒྲུབ་ཐབས་གཞན་རྣམས་ལས་ཀྱང་འབྱུང་ཞིང་། རྒྱས་པར་ན་ལུགས་འདིར་ཡང་རུང་པར་སྣང་ངོ་། །བཞི་པ་ནི་ཇོ་བོའི་འགྲེལ་པར་དགོས་པ་དྲུག་གསུངས་ཏེ། དེ་ལྟར་སྔགས་རྣམ་པ་གཉིས་ལན་གསུམ་དུ་བརྗོད་པ་ནི། སྟོང་པ་ཉིད་རྟོགས་ནུས་པ་དང་། སྟོང་པ་ཉིད་ཀྱི་དྲན་པ་གསོ་བ་དང་། གནས་པ་བརྟན་པ་དང་། ཡེ་ཤེས་ཀྱི་ཚོགས་རྫོགས་པ་དང་། ཐ་མལ་གྱི་ལུས་ངག་ཡིད་གསུམ་གྱི་རྟོག་པ་སྤོང་བ་དང་། རྟེན་དང་བརྟེན་པ་ཐམས་ཅད་སྟོང་པའི་རྣམ་འཕྲུལ་དུ་རྟོགས་པའི་ཕྱིར་ཞེས་བཤད་ལ། འདིའི་དོན་ལོ་ཆེན་གྱི་འགྲེལ་ཆུང་ནས། དང་པོ་གཉིས་དབང་རྟུལ་དང་། དེ་ནས་གཉིས་དབང་རྣོན་དང་། ཕྱི་མ་གཉིས་དབང་འབྲིང་གི་དབང་དུ་བྱས་པར་བཤད་དོ། །འདོད་འཇོ་མཁན་པོས་འགྲེལ་ཆུང་ནས་དང་པོ་དབང་རྟུལ་དང་། གཉིས་པ་དབང་འབྲིང་དང་། ཕྱི་མ་བཞི་དབང་རྣོན་གྱི་དབང་དུ་བྱས་པར་བཤད་ཅེས་བྲིས་འདུག་པ་ནི་འགྲེལ་པ་དེ་ན་མི་སྣང་ངོ་། །སྐབས་འདིར་རྗེ་བཙུན་གྱིས་དངོས་ཀྱི་དགོས་པ། རྣམ་ཀུན་མཆོག་ལྡན་གྱི་སྟོང་པ་ཉིད་བསྒོམ་པ་ཡིན་པས་དོན་ཆེན་པོའོ་ཞེས་དང་། ཆེད་དུ་བྱ་བའི་དགོས་པ་བསྲུང་བའི་རྣམ་པ་སེམས་སུ་ཤེས་པར་བྱ་བའི་ཕྱིར་ཞེས་པ་ཙམ་ཞིག་གསུངས་ལ། རྗེ་བཙུན་རྩེ་མོས་ཡེ་ཤེས་ཚོགས་བསག་གི་དགོས་པ་བཞི་གསུངས་ཏེ། ཡེ་ཤེས་ཚོགས་བསག་དགོས་པ་ཡང་། །རྣམ་པ་བཞི་རུ་ཤེས་བྱ་སྟེ། །ཀུན་ཏུ་བརྟགས་པའི་དྲི་མ་ལས། །དག་པར་བྱ་བའི་དགོས་པ་དང་། །གཉིས་པ་ཐམས་ཅད་མཁྱེན་པ་ཡི། །ལྷ་ཡི་མྱུ་གུ་བསྐྱེད་པ་དང་། །གསུམ་པ་བསོད་ནམས་ཚོགས་དང་ནི། །ཡེ་ཤེས་ཚོགས་སུ་འབྲེལ་ཕྱིར་དང་། །བཞི་པ་ཆོས་ཀྱི་སྐུ་ལས་ནི། །གཟུགས་སྐུ་འགྲུབ་པར་བྱ་ཕྱིར་རོ། །ཞེས་གསུངས་པ་འདི་ནི་ཡེ་ཤེས་ཀྱི་ཚོགས་ཀུན་གྱི་དགོས་པ་ལ་སྦྱར་བར་བྱའོ། །དམར་གྱིས་ཡེ་ཤེས་ཀྱི་ཚོགས་ནི་དམིགས་པ་མེད་པའི་ཤེས་རབ་སྟེ། དེས་རྟག་པ་འཁོར་བའི་མཐའ་མནན་པས་སོ་སོ་སྐྱེ་བོ་ལས་ཁྱད་པར་དུ་བྱས་ལ། གང་གི་བསོད་ནམས་ཀྱི་ཚོགས་ནི་ལྷན་ཅིག་བྱེད་པའི་རྐྱེན་དམིགས་པ་མེད་པའི་སྙིང་རྗེ་སྟེ། ཆད་པ་མྱ་ངན་ལས་འདས་པའི་མཐའ་མནན་ཅིང་གཞན་དོན་འབྱུང་བས་འཕགས་པ་ཉན་རང་ལས་ཁྱད་པར་དུ་བྱས་སོ་ཞེས་གསུངས་པ་ཡང་བཤད་མ་ཐག་པའི་དགོས་པ་ཕྱི་མ་གཉིས་དང་མཐུན་ནོ། །རྒྱུ་ཚོགས་གཉིས་བསག་པ་བཤད་ཟིན་ཏོ། །གཉིས་པ་འབྲས་བུ་ལྷར་བསྐྱེད་པ་ལ་བཞི་སྟེ། དམ་ཚིག་སེམས་དཔའ་བསྐྱེད་པ། ཡེ་ཤེས་ཀྱི་འཁོར་ལོ་དགུག་གཞུག་བྱ་བ། གོ་ཆ་བཅིང་བ། དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པའོ། །དང་པོ་ལ་གཉིས་ཏེ། ཕྱིའི་དཀྱིལ་འཁོར་དག་པ་དང་བཅས་པ་བསྒོམ་པ། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་བསྒོམས་པའོ། །དང་པོ་ལ་གསུམ་སྟེ། ཕྱིའི་དཀྱིལ་འཁོར་བསྒོམ་པ་དངོས། ཕོ་ཉ་གསུམ་བསྲེ་བ། བྱང་ཆུབ་ཀྱི་ཕྱོགས་ཀྱི་དག་པ་དྲན་པའོ། །དང་པོ་ལ་གཉིས་ཏེ། རྟེན་བསྐྱེད་པ་དང་། བརྟེན་པ་བསྐྱེད་པའོ། །དང་པོ་ནི་སློབ་དཔོན་གྱི་གཞུང་ལས། དེ་ལས་ལངས་ནས་རྟེན་དང་བརྟེན་པའི་ཚུལ་དུ་གནས་པར་བེ་རཾ་པ་ལ་སོགས་པར་གནས་པ་ལ། ཡི་གེ་ཡྃ་ཡོངས་སུ་གྱུར་པ་ལས་རླུང་གི་དཀྱིལ་འཁོར་གཞུ་ལྟ་བུ་ལ་རྒྱལ་མཚན་གྱིས་མཚན་པ་མདོག་སྔོན་པོར་རྣམ་པར་བསམ་སྟེ། དེའི་སྟེང་དུ་ཡི་གེ་རྃ་ཡོངས་སུ་གྱུར་པ་ལས་མེའི་དཀྱིལ་འཁོར་གྲུ་གསུམ་འབར་བས་མཚན་པ་ཁ་དོག་དམར་པོའོ། །དེའི་སྟེང་དུ་ཝྃ་ཡོངས་སུ་གྱུར་པ་ལས་ཆུའི་དཀྱིལ་འཁོར་ཁ་དོག་དཀར་པོ་བུམ་པས་མཚན་པའོ། །དེའི་སྟེང་དུ་ཡི་གེ་ལྃ་ཡོངས་སུ་གྱུར་པ་ལས་སའི་དཀྱིལ་འཁོར་གྲུ་བཞི་པ་ལ་ཁ་དོག་སེར་པོ་གྲྭར་རྡོ་རྗེ་རྩེ་གསུམ་པས་མཚན་པའོ། །དེའི་སྟེང་དུ་ཡི་གེ་སུྃ་ཡོངས་སུ་གྱུར་པ་ལས་རིའི་རྒྱལ་པོ་རི་རབ་ཟུར་བཞི་པ། རིན་པོ་ཆེ་སྣ་བཞིའི་རང་བཞིན་ཅན་རྩེ་མོ་ལྕོགས་བརྒྱད་ཀྱིས་ཉེ་བར་མཛེས་པར་བྱས་པའོ། །དེའི་སྟེང་དུ་ཡི་གེ་ཧཱུྃ་ལས་བྱུང་བའི་སྣ་ཚོགས་རྡོ་རྗེ། དེའི་སྟེང་དུ་པྃ་ལས་བྱུང་བའི་སྣ་ཚོགས་པདྨ་འདབ་མ་བརྒྱད་པ་ལྟེ་བ་དང་གེ་སར་དུ་བཅས་པ་ཞེས་གསུངས་ལ། འདིའི་དོན་བཤད་པ་ལ་ཡེ་ཤེས་ཚོགས་བསག་གི་རྗེས་སུ། ནམ་མཁར་ནཱ་ད་འཇོག་པ་དང་མི་འཇོག་པའི་ཁྱད་པར། དཀྱིལ་འཁོར་བཞི་དང་རི་རབ་ཀྱི་ས་བོན་གྱི་ཁྱད་པར། རི་རབ་ཀྱི་སྟེང་དུ་པདྨ་འདོད་པ་དང་མི་འདོད་པའི་ཁྱད་པར་གསུམ་ལས། དང་པོ་ནི། པྲ་ཛྙཱ་རཀྵི་ཏའི་འགྲེལ་པ་དང་། དེ་བཞིན་གཤེགས་པའི་རྡོ་རྗེ་དང་། འཁྲུལ་སྤོང་མཁན་པོས། སྟོང་ཉིད་ལས་ལངས་པའི་ཐོག་མར། རང་གི་སེམས་ཉིད་ནཱ་དའི་གཟུགས་སུ་ནམ་མཁའ་ལ་འཇོག་པར་བཤད་དེ། དེ་ཡང་ལྭ་བ་པའི་འགྲེལ་པར་བཤད་པའི་རྗེས་སུ་འབྲང་བའོ། །འདི་དག་གི་རྗེས་སུ་འབྲངས་ནས་བོད་ཀྱི་མར་དོ་དང་། དམར་དང་། བུ་དགེ་གཉིས་ཀྱང་འདི་བཞིན་དུ་འདོད་དོ། །འདིར་རྗེ་བཙུན་གྱིས། ནམ་མཁར་ནཱ་དཱ་འཇོག་པ་མི་བཞེད་པར། སྟོང་པའི་ངང་ལས་རང་གི་སེམས་ཉིད་ཡྃ་ཡིག་ཏུ་ལངས་ནས། དེ་ལས་རླུང་གི་དཀྱིལ་འཁོར་བསྒོམ་པ་སོགས་ལ་འཇུག་པར་མཛད་དོ། །འདི་གཉིས་ཀྱི་ཁྱད་པར་ནི། རྒྱ་གར་གྱི་ལྭ་བ་པ་སོགས་ཚད་ལྡན་དང་། རྗེ་བཙུན་གྱི་བཞེད་པ། ཡེ་ཤེས་ཚོགས་བསག་གིས་ཐམས་ཅད་སྟོང་ཉིད་དུ་སྦྱངས་པའི་ངང་ལས་རང་གི་སེམས་གསལ་བ་ཙམ། ནཱ་དའམ་ཡྃ་ལ་སོགས་པའི་ས་བོན་དུ་ལངས་ནས་རྟེན་དང་བརྟེན་པར་བཅས་པའི་དཀྱིལ་འཁོར་བསྒོམས་པས། ཐམས་ཅད་རང་གི་སེམས་ཀྱི་རྣམ་འཕྲུལ་དུ་བསྒྲུབ་པའི་ཆེད་ཡིན་ལ། དེ་ལ་ནཱ་ད་དང་། ས་བོན་སོགས་གང་ནས་ལངས་ཀྱང་ཁྱད་པར་མེད་པར་བཞེད་དོ། །ས་ཆེན་གྱིས་ནག་པོ་པའི་སྐབས་སུ་ནཱ་དར་ལངས་པ་དང་། རྗེ་བཙུན་གྱིས་སྐབས་འདིར་ཡྃ་ཡིག་ཏུ་ལངས་པར་གསུངས་པའི་ཁྱད་པར་ཡང་འདི་ཡིན་ཅིང་། འདུས་པ་ཡེ་ཤེས་ཞབས་ལུགས་ལ་ཡེ་ཤེས་ཀྱི་ཚོགས་ཀྱི་རྗེས་སུ་ནམ་མཁར་ཡིག་འབྲུ་ལྔ་འཇོག་པ་དང་མི་འཇོག་པའི་ལུགས་གཉིས་འབྱུང་བའི་གནད་ཀྱང་འདི་ཉིད་ཡིན་ནོ། །དོན་འདི་མ་རྟོག་པར་འདོད་འཇོ་མཁན་པོས་ཡེ་ཤེས་ཚོགས་བསག་གི་རྗེས་སུ། ནམ་མཁར་ནཱ་ད་འཇོག་པ་མེད་ན་བར་དོ་སྦྱོང་བྱེད་ཆད་པས་མངོན་རྟོགས་ཀྱི་དངོས་གཞི་ཆད་པའི་སྐྱོན་ཡོད་དོ་ཞེས་སྨྲ་བ་ནི་རང་ཉིད་ཡེ་ཤེས་ཚོགས་བསག་འཆི་སྲིད་སྦྱོང་བྱེད་ལ་སྦྱར་ནས། སྦྱང་གཞིའི་ཆོས་གསུམ་ལས་འཕེན་གཅིག་གིས་འཕངས་པའི་ཆོས་གསུམ་ལ་འཇོག་དགོས་པའི་གནད་ཙམ་ཡང་བློ་ཡུལ་དུ་མ་ཤར་བའི་གཏམ་སྟེ། གཞན་དུ་རྒྱས་པར་བཀག་ཟིན་ཏོ། །ནཱ་ད་འཇོག་པའི་ཚེ་ན་ཡང་། དེའི་འོད་ལས་ཡཾ་ལས་རླུང་གི་དཀྱིལ་འཁོར་ནས་གྲུབ་པར་འདོད་པ་བུ་སྟོན་གྱི་ལུགས་དང་། རྟེན་པདྨ་མན་ཆད་བསྐྱེད་ཟིན་ནས། ནཱ་ད་ལས་ཨཱ་ལི་ཀཱ་ལི་འཕྲོ་བར་འདོད་པ་འདོད་འཇོ་མཁན་པོའི་ལུགས་གཉིས་ལས། དང་པོ་ཉིད་ལེགས་པར་སྣང་སྟེ། དེ་ནས་བཟུང་སྟེ་ཐམས་ཅད་སེམས་ཀྱི་རྣམ་འཕྲུལ་དུ་བསྒྲུབ་དགོས་པའི་ཕྱིར་རོ། །དེས་ན་སྐབས་འདིར་ནཱ་ད་མ་བཞག་ཀྱང་ཆད་པའི་ཉེས་པ་མེད་ཅིང་། བཞག་ཀྱང་ལྷག་པའི་ཉེས་པ་མེད་པར་ཤེས་པར་བྱའོ། །གཉིས་པ་ནི་གཞུང་འདིར་བེ་རཾ་པ་ལ་སོགས་པ་ཞེས་གསུངས་པའི་བེ་ནི། བེ་ཝ་ཡུ་རླུང་གི་མིང་ཡིན་པས་རླུང་གི་ས་བོན་དང་། རཾ་ནི་མེའི་ས་བོན་ཏེ། གཉིས་དངོས་སུ་བསྟན་ཅིང་ལྷག་མ་གསུམ་པོ་སོགས་ཁོངས་ནས་སྡུད་པར་དམར་གྱིས་བཤད་ཀྱང་བུ་སྟོན་གྱིས་བྷཻ་རམྦྷ་ནི་འོག་གཞིའི་རླུང་གི་མིང་སྟེ་རྩོམ་ཆེན་ཞེས་བསྒྱུར་རོ་ཞེས་གསུངས་པ་ལྟར་ལེགས་པས། ཡཾ་རཾ་བཾ་ལཾ་སུཾ་དང་ལྔ་ལས། འབྱུང་བཞི་དང་རི་རབ་བསྐྱེད་པར་ཐམས་ཅད་མཐུན་ལ། འབྱུང་བཞིའི་རིམ་པ་དེ་ལྟར་འོང་བའི་རྒྱུ་མཚན་ཡང་ཕྱི་རོལ་གྱི་འབྱུང་བ་རླུང་ནས་ཆགས་པའི་རིམ་པའོ། །མེའི་དཀྱིལ་འཁོར་ལོགས་སུ་མེད་ཀྱང་དཀྱིལ་འཁོར་གཞན་གསུམ་ལ་མེ་རྡུལ་ཡོད་པས་སྦྱང་གཞི་ཆད་པའི་སྐྱོན་མེད་པར་ཀླུའི་བྱང་ཆུབ་ཀྱིས་གསུངས་པ་ཉིད་དུས་འཁོར་མ་གཏོགས་པའི་སྔགས་ཀྱི་གཞུང་ཐམས་ཅད་དུ་ཁས་བླང་བར་བྱ་བ་ཡིན་ནོ། །འདི་དག་ཀྱང་རྩ་རྒྱུད་ལེའུ་སུམ་ཅུ་སོ་གཉིས་པར། བ་ལང་ལྷས་ཀྱི་མི་འབྱིང་དང་། །ལྷག་མ་སྐེམས་བྱེད་རྩ་གནས་སོ། །བྲག་ཆེན་པོ་ཡི་ངོ་བོ་རུ། །ཡང་ན་རུས་སྦལ་དག་གིས་སོ། །ཞེས་གསུངས་པའི་དོན་ཏེ། བ་ལང་ནི་རྒྱ་སྐད་ལ་གོ་ཞེས་པ་ས་ཡིན་ལ། ལྷས་ནི་རྟེན་ཉིད་ཡིན་པས་སོ། །མི་འབྱིང་དང་ཞེས་པ་ནི། དེའི་སྟེང་དུ་དངོས་པོ་གཞན་མི་འབྱིང་ཞིང་ལྡིང་བར་བྱེད་པས་ཆུ་བོ། ལྷག་མ་ནི་ཚིག་ཕྲད་དེ་དོན་ལོགས་པ་མེད་དོ། །སྐེམ་བྱེད་ནི་དེས་ཆུ་སྐེམ་པར་བྱེད་པའི་ཕྱིར་ན་མེའོ། །རྩ་གནས་ནི་དང་པོ་ཆགས་པའི་ཚེ་འོག་དག་ཏུ་ཆགས་པས་རླུང་ངོ་། །བྲག་ཆེན་པོ་ནི་རི་རབ་སྟེ། དེའི་སྟེང་དུ་ཐིག་ལེ་སེར་པོ་ཡང་བསྒོམས་ནས་ལྷ་མངལ་སྐྱེས་ལྟར་ན། དེ་དག་ཞུ་བ་ལས། རླུང་ནས་བརྩམས་ཏེ། འབྱུང་བཞི་ལུགས་འབྱུང་གི་སྟེང་དུ་རི་རབ་ཐིག་ལེ་སེར་པོ་དང་བཅས་པ་བསྒོམས་ནས། དེའི་སྟེང་དུ་གཞལ་ཡས་ཁང་བསྐྱེད་པ་སྟེ། ལུགས་འབྱུང་ལུགས་བཟློག་གཉིས་ཀ་ཡང་གཞུང་འདིས་བསྟན་ཏོ། །ཡང་ན་ཞེས་པ་ནི་ལྷ་སྒོང་སྐྱེས་ལྟར་ན། དང་པོར་རྩ་གནས། དེ་ནས་མེ་འབྱིང་། དེ་ནས་སྐེམས་བྱེད། དེ་ནས་བ་ལང་ལྷས། དེ་ནས་བྲག་ཆེན་བསྒོམས་ཏེ། རུས་སྦལ་དག་གིས་སོ་ཞེས་པ་ནི། མུ་ཏིག་ཕྲེང་བར། སའི་ཁྱད་ཆོས་སུ་འཆད་ཀྱང་། བླ་མའི་གསུང་ལས། རུས་སྦལ་གྱི་ཕྱིའི་ལྐོགས་ཤུན་དང་། ནང་སེམས་ཅན་གཅིག་ཆར་དུ་སྐྱེ་བ་ལྟར། དེའི་སྟེང་དུ་ལྷ་སྒོང་སྐྱེས་ཀྱི་སྐྱེད་ཆོག་བསྟན་པར་བཞེད་དོ། །འབྱུང་བཞི་དང་། རི་རབ་ཀྱི་ཁ་དོག་དང་། དབྱིབས་ནི་གཞུང་ཉིད་ན་གསལ་ལོ། །གསུམ་པ་ལ། སྣ་ཚོགས་རྡོ་རྗེའི་འོག་གཞིར་པདྨ་མི་འདོད་པའི་ལུགས་དང་། དེ་འདོད་པའི་ལུགས་དང་། འཐད་མི་འཐད་ཀྱི་ཁྱད་པར་དཔྱད་པ་དང་གསུམ་ལས། དང་པོ་ནི། ལོ་ཆེན་གྱི་འགྲེལ་ཆུང་དང་། དམར་གྱི་ཊཱི་ཀ་དང་། རྗེ་བཙུན་གྱི་སྒྲུབ་ཐབས་རྣམས་ལས། སློབ་དཔོན་གྱི་གཞུང་ཇི་ལྟ་བ་བཞིན་རི་རབ་ཀྱི་སྟེང་དུ་སྣ་ཚོགས་རྡོ་རྗེ། དེའི་སྟེང་དུ་པདྨ་བཤད་ཀྱི། སྣ་ཚོགས་རྡོ་རྗེའི་འོག་ཏུ་པདྨ་མི་འདོད་དོ། །མར་དོ་དང་། དེའི་རྗེས་འབྲང་བྲོག་རྭ་བ་དང་། ཕྱིས་ཀྱི་བུ་དགེ་གཉིས་ཀྱིས་སྣ་ཚོགས་རྡོ་རྗེའི་འོག་ཏུ་ཡང་པདྨ་འདོད་ཅིང་། དེ་ལ་པད་ཆེན་དང་། སྟེང་གི་པདྨ་ལ་པད་ཆུང་ཞེས་པའི་ཐ་སྙད་བྱས་སོ། །འདིར་འདོད་འཇོ་མཁན་པོས། མངོན་བརྗོད་ལས། སྣ་ཚོགས་རྡོ་རྗེ་དང་། པདྨ་གང་ཡང་མ་བཤད་པར། རི་རབ་ཀྱི་སྟེང་དུ་གཞལ་ཡས་ཁང་བསྐྱེད་པའི་ཚུལ་དང་། རྩ་རྒྱུད་དང་། ཀུན་སྤྱོད་ལས། རི་སྟེང་སྣ་ཚོགས་པདྨ་ཡི། །ཞེས་སྣ་ཚོགས་རྡོ་རྗེ་མེད་པར་པདྨ་རྐྱང་པ་བཤད་པའི་ཚུལ་དང་། སྡོམ་འབྱུང་ལས། རི་རབ་ཀྱི་དེ་མ་ཐག་ཏུ། དེ་ཡི་སྟེང་དུ་ཧཱུྃ་བྱུང་བའི། །སྣ་ཚོགས་རྡོ་རྗེ་རྣམ་པར་བསྒོམ། །དེ་ཡི་སྟེང་དུ་པདྨ་ནི། །ལྟེ་བ་གེ་སར་ལྡན་པར་བསྒོམ། །ཞེས་སྣ་ཚོགས་རྡོ་རྗེ་དང་། པདྨ་གཉིས་བཤད་པའི་ཚུལ་གསུམ་གསུངས་པ་ལས། སློབ་དཔོན་འདིས་ཕྱི་མ་ལ་བརྟེན་པ་ཡིན་ནོ་ཞེས་སྨྲའོ། །འདི་ནི་རྣམ་པར་འཁྱམ་སྟེ། ཚུལ་གཉིས་པ་དང་། གསུམ་པ་དོན་མི་གཅིག་ན། གསང་མཐའི་རྩ་བཤད་ཀྱི་ཚུལ་དོར་ནས་བཤད་རྒྱུད་གཞན་ལ་བརྟེན་པ་ལུགས་འདི་ལ་ཤིན་ཏུ་མི་འོས་པའི་ཕྱིར་རོ། །འོ་ན་ཇི་ལྟར་སྙམ་ན། རི་རབ་ཀྱི་སྟེང་དུ་དེ་གཉིས་མེད་པའི་ཕྱོགས་དང་། ཡོད་པའི་ཕྱོགས་གཉིས་ལས། དང་པོ་ནི། མངོན་བརྗོད་ཀྱི་དགོངས་པ་སྔར་བཤད་པ་ཉིད་ཡིན་པས། ནག་པོ་པའི་སྒྲུབ་ཐབས་སུ་འབྱུང་ཞིང་། ཕྱི་མ་ནི་ཐུན་མོང་མ་ཡིན་པའི་རྩ་བཤད་གཉིས་དང་། སྡོམ་འབྱུང་ཚིག་རྒྱས་བསྡུས་ཙམ་ཡིན་གྱི། དོན་ལ་ཁྱད་པར་མེད་པ་ནི་སྒྲུབ་ཐབས་འདིར་འབྱུང་བའོ། །ཚིག་རྒྱས་བསྡུས་ཇི་ལྟར་སྙམ་ན། རྩ་རྒྱུད་ལེའུ་ལྔ་བཅུ་རྩ་གཅིག་པ་ལས། ཚིག་དེ་ཉིད་འབྱུང་བའི་འགྲེལ་པ་མུ་ཏིག་ཕྲེང་བ་ལས། སྣ་ཚོགས་ཞེས་པས་སྣ་ཚོགས་རྡོ་རྗེ་དང་། པདྨ་ཞེས་པས་དེའི་སྟེང་དུ་པདྨ་བསྟན་པར་གསལ་བར་གསུངས་པ་ལས་ཤེས་སོ། །གསུམ་པ་ནི། པདྨ་གཉིས་འདོད་པ་དེ་དག་གིས་ནི་བཤད་རྒྱུད་སོ་སོ་ནས་གསུངས་པའི་བསྐྱེད་ཆོག་གི་ཁྱད་པར་ཡིན་པ་མ་རྟོགས་པར། སྣ་ཚོགས་རྡོ་རྗེ་དེ་གཞལ་ཡས་ཁང་གི་འོག་གཞིའི་སྣ་ཚོགས་རྡོ་རྗེ་ཡིན་པར་བསམས་ནས། དེའི་གདན་ལ་པདྨ་བསྣན་ཅིང་། སྟེང་གི་པདྨ་ལ་པད་ཆུང་ཟེར་བའི་རྒྱུ་མཚན། གཞལ་ཡས་ཁང་གི་ནང་དུ་སོང་ནས། བདེ་ཆེན་འཁོར་ལོའི་པདྨ་ཡིན་པར་སྒྲུབ་པར་སྣང་ངོ་། །འདི་དག་ནི་དོན་མ་རྟོགས་པ་སྟེ། འོག་གཞིའི་སྣ་ཚོགས་རྡོ་རྗེ་ཡིན་ན། པདྨར་མ་ཟད་ཉི་མ་ཡང་དགོས་ཀྱང་། དེའི་དཔྱད་པ་ཅུང་ཟད་ཀྱང་མ་བྱས་འདུག་པའི་ཕྱིར་དང་། བཅོམ་ལྡན་འདས་གྲུབ་པའི་ཚེ་རྡོ་རྗེའི་རྭ་བ་སོགས་ཀྱང་གྲུབ་པར་པྲ་ཛྙཱ་རཀྵི་ཏས་བཤད་པ་དེ་ཉིད་ཀུན་གྱིས་ཚད་མར་བྱེད་པར་སྣང་བས། འོག་གཞིའི་སྣ་ཚོགས་རྡོ་རྗེ་ཡང་དེའི་ཚེ་གྲུབ་པར་ཁས་བླངས་དགོས་པའི་ཕྱིར་རོ། །པད་ཆུང་བདེ་ཆེན་འཁོར་ལོའི་པདྨར་འདོད་པ་ནི་རྣམ་པར་མ་བརྟགས་པ་སྟེ། འཁོར་ལོ་གཞན་རྣམས་བཅོམ་ལྡན་འདས་དང་ལྷན་ཅིག་དུ་གྲུབ་ནས་འཁོར་ལོ་གོང་མ་དེའི་སྔོན་དུ་བསྐྱེད་པ་འགལ་བའི་ཕྱིར་དང་། བསྐྱེད་ཚུལ་ཡང་བདེ་ཆེན་འཁོར་ལོ་མ་གཏོགས་པའི་གཞལ་ཡས་ཁང་གྲུབ་པའི་ཚེ། བདེ་ཆེན་འཁོར་ལོ་ལ་མར་བཀོན་པ་ཡིན་ནམ། གཞལ་ཡས་ཁང་གྲུབ་ཟིན་ནས་བདེ་ཆེན་འཁོར་ལོ་ཡར་འབིགས་པའི་ཚུལ་གྱིས་བྱུང་བ་ཡིན་ཞེས་བརྟགས་ན་ངོས་བཟུང་གང་ཡང་མི་སྣང་བའི་ཕྱིར་རོ། །མདོར་ན་སྒྲུབ་ཐབས་འདིའི་སྐབས་སུ། རི་རབ་ཀྱི་སྟེང་དུ་སྣ་ཚོགས་རྡོ་རྗེ་དང་། པདྨ་ཐོག་མར་བསྐྱེད་ནས། དེའི་སྟེང་དུ་མངོན་བྱང་ལས། ཉི་མ་ཡན་ཆད་ཀྱི་རྟེན་བརྟེན་པ་གཅིག་ཆར་དུ་གྲུབ་པ་ནི་མ་འཁྲུལ་པའི་གནད་དུ་ཤེས་པར་བྱའོ། །པདྨའི་ཁ་དོག་ལྭ་བ་པ་དང་། པྲ་ཛྙཱ་རཀྵི་ཏས་ཕྱོགས་བཞི་དམར། མེ་རླུང་སེར། བདེན་བྲལ་ལྗང་། དབང་ལྡན་གནག་པར་གསུངས་པ་དང་། ནག་པོ་པས་ཕྱོགས་བཞི་དམར། མཚམས་བཞི་མཛེས་ཚོན་དུ་གསུངས་པ་དང་། རྒྱུད་ཁ་ཅིག་ལས། ཕྱོགས་བཞི་ཕྱོགས་མདོག མཚམས་བཞི་མཛེས་ཚོན་དུ་གསུངས་པ་རྣམས་ལས། རྗེ་བཙུན་གྱིས་ནི་གསུམ་པོ་གང་བྱས་ཀྱང་འདྲ་བར་བཞེད་དོ། །གཉིས་པ་བརྟེན་པ་བསྐྱེད་པ་ལ་གཉིས་ཏེ། བསྐྱེད་ཆོག་གི་སྒོ་ནས་སྤྱིར་བསྟན། རྟེན་དང་བརྟེན་པའི་གནས་ཚུལ་སོ་སོར་བཤད་པའོ། །དང་པོ་ནི། སློབ་དཔོན་གྱི་གཞུང་ལས། དེའི་དབུས་སུ་ཨཱ་ལི་ཀཱ་ལིའི་སྦྱོར་བ། དེའི་དབུས་སུ་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན་ཅན། འོད་ཟེར་སྣ་ཚོགས་རྣམ་པར་འཕྲོ་བར་བསམས་ལ། དེ་ཡོངས་སུ་གྱུར་པ་ལས་དཔལ་ཧེ་རུ་ཀ་ཉི་མ་ལ་བཞུགས་ཤིང་དཀྱིལ་འཁོར་གྱི་འཁོར་ལོ་དང་བཅས་པ་བྱུང་བ། དུར་ཁྲོད་བརྒྱད་ཀྱིས་བརྒྱན་པའོ། །ཞེས་གསུངས་སོ། །འདིའི་དོན་འཆད་པ་ལ། བསྐྱེད་རིམ་མངལ་སྒོང་གི་ཁྱད་པར། སྒོང་སྐྱེས་ཀྱི་མངོན་བྱང་བྱེ་བྲག་ཏུ་བཤད་པ། ཤིན་ཏུ་ཟབ་པའི་མན་ངག་གིས་གཉིས་ཀ་ལ་སྦྱར་ཚུལ། དེ་ཉིད་ཀྱིས་སྦྱང་གཞི་སྦྱོང་བའི་ཚུལ་དང་བཞི་ལས། དང་པོ་ནི། ཨ་བྷི་དྷ་ན་ལས། མངལ་སྐྱེས་གླུ་ཡི་སྦྱོར་བ་ཡིས། །སྒོམ་པ་རྣམས་ནི་ཡོངས་སུ་བརྟག །སྒོང་སྐྱེས་གླུ་ནི་མེད་པ་ཡིས། །སྒྲ་དང་སྒྲ་མིན་སྤངས་པའོ། །ཞེས་མངལ་སྐྱེས་ཀྱི་བསྐྱེད་ཆོག་ལ་སྒྲ་སྟེ་སཾ་ཀྲྀ་ཏའི་སྐད་དང་། སྒྲ་མིན་ཏེ་པྲ་ཀྲྀ་ཏ་ལ་སོགས་པའི་སྐད་ཀྱིས་གླུས་བསྐུལ་བ་ཡོད་པ་དང་། སྒོང་སྐྱེས་ཀྱི་བསྐྱེད་ཆོག་ལ་དེ་མེད་པར་གསུངས་སོ། །དེས་ན་འདིར་ཡང་གཞུང་གི་དངོས་བསྟན་དང་། འགྲེལ་པ་རྣམས་ཀྱི་བཤད་ཚུལ་གླུས་བསྐུལ་མེད་པར། རོ་གཅིག་དུ་འདྲེས་པའི་ཐིག་ལེའི་གོང་བུ་ཙམ་ལས་རྟེན་བརྟེན་པ་གཅིག་ཆར་དུ་བསྐྱེད་པས་སྒོང་སྐྱེས་ཀྱི་བསྐྱེད་ཆོག་ཡིན་པར་བདེ་མཆོག་ལ་སྦྱངས་པའི་སྔོན་གྱི་མཁས་པ་དག་མགྲིན་གཅིག་ཏུ་གསུངས་སོ། །འོན་ཀྱང་སྒོང་སྐྱེས་སྦྱོང་བ་གཙོ་བོ་ཡིན་གྱི། སྐྱེ་གནས་བཞི་ཆར་སྦྱོང་བའི་ཚུལ་ནི་འོག་ཏུ་འཆད་དོ། །འདིར་འདོད་འཇོ་མཁན་པོས། མངོན་བརྗོད་ཀྱི་ལུང་དེས། མངལ་སྒོང་གཉིས་ཀྱི་བསྐྱེད་ཆོག་བསྟན་པར་འཆད་ཅིང་། ལཱུ་ཧི་པའི་སྒྲུབ་ཐབས་འདི་སྔ་རབས་པ་དག་སྒོང་སྐྱེས་ཡིན་པས་མངལ་སྐྱེས་དང་མི་སྦྱོར་བ་འདོད་པ་ནི་མི་རིགས་ཏེ། དེ་ལྟར་ཡིན་ན་ནི། སྡོམ་འབྱུང་ལེའུ་གཉིས་པ་བསྐྱེད་རིམ་གྱི་ལེའུ་ལས། མངལ་སྐྱེས་ཀྱི་དབང་དུ་བྱས་ནས་བཤད་པ་དང་། ལེའུ་བཅུ་གསུམ་པར། གླུས་བསྐུལ་མེད་པར་མངོན་བྱང་ལྔ་ལས་བསྐྱེད་པ་ལཱུ་ཧི་པ་བཞིན་དུ་བཤད་པ་གཉིས་འགལ་བར་འགྱུར་བའི་ཕྱིར་ཏེ། ལེའུ་བཅུ་གསུམ་པ་ལས་བཤད་པའི་བསྐྱེད་རིམ་ནི། སྔར་སྦྱང་གཞི་མངལ་སྐྱེས་ལ་བཤད་པ་དང་སྦྱར་དགོས་པའི་ཕྱིར་རོ། །མངལ་སྐྱེས་བཤད་ཚུལ་ནི་སྦྱང་གཞི་ལ་སྐྱེ་འཆི་བར་དོ་གསུམ་བཤད་ནས། བར་དོ་སྐྱེ་བ་ལེན་ཚུལ་སྟོན་པ་ན། དང་པོར་ཕ་མའི་ཀུན་སྤྱོད་མཐོང་བ་དང་། དེ་ནས་ཕའི་ཁ་ནས་ཞུགས་ཏེ། ཕ་མའི་ཁུ་ཁྲག་གི་དབུས་སུ་ཞུགས་ནས་གནས་པར་བཤད་པའི་ཕྱིར་དང་། སྒོང་སྐྱེས་ལ་དེ་མེད་པའི་ཕྱིར་རོ། །དྲིལ་བུ་ཞབས་ཀྱིས། སེམས་ཅན་བརྫུས་ཏེ་འབྱུང་བ་བཞིན། །ས་བོན་མེད་པར་རྣམ་པར་བསྒོམ། །ཞེས་གསུངས་པ་ནི། རྫོགས་རིམ་གྱི་ཡེ་ཤེས་ཀྱི་སྐུ་ཡིན་གྱི། བསྐྱེད་རིམ་གྱི་མ་ཡིན་ཞེས་པ་དང་། འོ་ན་མངོན་བརྗོད་ལས་གླུས་བསྐུལ་མེད་པ་ལཱུ་ཧི་པ་ལྟ་བུའི་བསྐྱེད་ཆོག་རྣམས་སྒོང་སྐྱེས་སུ་བཤད་པ་དང་། འགལ་བ་ཇི་ལྟར་སྤང་སྙམ་ན་བཤད་པར་བྱ་སྟེ། མངོན་བརྗོད་ལས་གླུས་བསྐུལ་མེད་པ་རྣམས་མངལ་སྐྱེས་སུ་མ་གསུངས་པ་ནི། མངལ་དུ་ས་བོན་འདེབས་པ་ཕ་ལྟ་བུའི་ལྷ་ཡབ་དང་། མངལ་དུ་ས་བོན་འཛིན་པའི་མ་ལྟ་བུའི་ལྷ་ཡུམ་མེད་པ་ལ་དགོངས་ལ། དེ་མེད་ཀྱང་ཕ་མའི་ཁུ་ཁྲག་གི་དོད་ཟླ་ཉིའམ། ཟླ་བ་དཀར་དམར་ཡོད་ལ། ཕ་མའི་ཁུ་ཁྲག་ལ་འཇུག་པའི་བར་དོའི་དོད། ནཱ་ད་སོགས་ཡོད་པས་མངལ་སྐྱེས་དང་སྦྱོར་བ་ནི་ཤིན་ཏུ་དགོས་སོ་ཞེས་སྤྲོས་པ་དང་བཅས་ཏེ་སྨྲའོ། །འདི་དག་ནི་བསྐྱེད་རིམ་གྱི་སྦྱང་གཞི་སྦྱོང་བའི་གནད་ཆེས་ཆེར་འཆུག་པར་སྣང་བས་དགག་པར་བྱ་བ་ཡིན་ཏེ། སྤྱིར་མངལ་སྐྱེས་ཁོ་ན་སྦྱང་གཞི་ཡིན་གྱི། སྐྱེ་གནས་གཞན་གསུམ་པོ་སྦྱང་གཞི་མ་ཡིན་པར་འདོད་པ་ནི་ཤིན་ཏུ་མི་འཐད་དེ། རྡོ་རྗེ་གུར་ལས། ཕལ་པའི་རྣམ་རྟོག་གཞོམ་པའི་ཕྱིར། །བསྒོམ་པ་ཡང་དག་རབ་དུ་གྲགས། །ཞེས་གསུངས་ཤིང་། སྐྱེ་གནས་བཞི་ཆར་ལ་ཕལ་པའི་རྣམ་རྟོག་ཡོད་པར་ཁྱད་པར་མེད་པའི་ཕྱིར་དང་། སྒྲུབ་ཐབས་མདོར་བྱས་ལས། རྣམ་རྟོག་བག་ཆགས་ཉེས་པ་ཡིས། །འགྲོ་བ་གསུམ་པོ་རྣམ་རྨོངས་ལ། །བློ་དང་ལྡན་པས་ལེགས་བལྟས་ནས། །རྣལ་འབྱོར་རྒྱུད་ཀྱིས་སྦྱང་བར་བྱ། །ཞེས་གསུངས་པའི་སྦྱང་གཞི་སྐྱེ་གནས་བཞི་ཆར་ལ་ཡོད་པ་ཁྱད་པར་མེད་པའི་ཕྱིར་རོ། །རིགས་པས་ཀྱང་གནོད་དེ། ལམ་མ་བསྒོམས་ན་སྐྱེ་གནས་གཞན་གསུམ་དུ་སྐྱེ་བར་འགྱུར་བའི་གང་ཟག་གིས་རྣལ་འབྱོར་ཆེན་པོའི་བསྐྱེད་རིམ་བསྒོམས་པ་དོན་མེད་པར་འགྱུར་ཏེ། སྦྱང་གཞི་མེད་པའི་ཕྱིར་རོ། །ཁྱད་པར་དུ་མངོན་བརྗོད་ཀྱི་ལུང་གི་དོན། ཚིག་རྐང་སྔ་མ་གཉིས་ཀྱིས། མངལ་སྐྱེས་སྦྱང་གཞིར་སྟོན་པ་མ་ཡིན་པར་འགྱུར་ཏེ། ཕྱི་མ་གཉིས་ཀྱིས་སྒོང་སྐྱེས་སྦྱང་གཞིར་སྟོན་པ་མ་ཡིན་པ་གང་ཞིག རྒྱུ་མཚན་ཀུན་ཏུ་མཚུངས་པའི་ཕྱིར་རོ། །སྡོམ་འབྱུང་གི་ལུང་གིས་ཀྱང་མི་གནོད་དེ། ཕ་མའི་ཀུན་སྦྱོར་མཐོང་ནས། བར་དོ་ཕའི་ཁ་ནས་ཞུགས་ཏེ། ཕ་མའི་ཁུ་ཁྲག་གིས་དབུས་སུ་ཞུགས་པ་སྒོང་སྐྱེས་ལ་མེད་པ་མ་ཡིན་པའི་ཕྱིར་དང་། དེ་མངལ་སྐྱེས་ཡིན་དུ་ཆུག་ན་ཡང་། སྒོང་སྐྱེས་སྦྱོང་ན་མངལ་སྐྱེས་མི་སྦྱོང་བས་ཁྱབ་པར་འདོད་པའི་ལུགས་ལ་གནོད་པ་ཡིན་གྱི། འདིར་སྒོང་སྐྱེས་གཙོ་བོར་གྱུར་པའི་སྐྱེ་གནས་བཞི་ཆར་སྦྱོང་བའི་ལུགས་ལ་གནོད་པ་ཅུང་ཟད་ཀྱང་མེད་པའི་ཕྱིར་ཏེ། སྡོམ་འབྱུང་ལས། དེ་ནས་འདི་ལ་བསྐྱེད་པའི་རིམ། །བསྒོམ་པ་ཡང་དག་རབ་བཤད་བྱ། །སྣ་ཚོགས་ལས་ཀྱི་རང་བཞིན་ལས། །སྐྱེ་གནས་བཞི་པོ་རྣམས་སུ་འགྱུར། །སྒོང་སྐྱེས་དང་ནི་མངལ་སྐྱེས་དང་། །དྲོད་གཤེར་སྐྱེས་དང་རྫུས་སྐྱེས་སོ། །ཞེས་གསུངས་པའི་སྐྱེ་གནས་བཞི་པོ་འདི་སྦྱང་གཞི་སྦྱོང་བྱེད་གང་རུང་གཅིག་ལ་མི་སྦྱོར་བའི་ཐབས་མེད་པའི་ཕྱིར་རོ། །སྡོན་འབྱུང་གི་འགྲེལ་པར་དེ་ལ་ཟླ་བ་དང་ཉི་མ་དང་ས་བོན་དང་མཚན་མའི་རིམ་པས་རྫོགས་པའི་ལྷ་ནི་སྐྱེ་གནས་སྒོ་ང་ལས་སྐྱེས་པའོ། །ཡབ་དང་ཡུམ་གྱི་རྡོ་རྗེ་དང་པདྨ་བསྲུབས་པས་ཞུ་བའི་བྱང་ཆུབ་ཀྱི་སེམས་ལས་ཐོན་པ་ནི་སྐྱེ་གནས་མངལ་ནས་སྐྱེས་སོ། །ཟླ་བ་དང་ས་བོན་ལས་སྐྱེས་པ་ནི་སྐྱེ་གནས་དྲོད་གཤེར་ལས་སྐྱེས་པའོ། །སྤྲོ་བ་ནི་སྐྱེ་གནས་དྲོད་གཤེར་ལས་སྐྱེས་པའོ་ཞེས་ཁ་ཅིག་གོ །ས་བོན་ལ་སོགས་པ་དང་བྲལ་བས་སྐད་ཅིག་ལ་འོད་གསལ་ལས་སྐྱེས་པ་ནི་སྐྱེ་གནས་རྫུས་ཏེ་སྐྱེས་པའོ། །སྐྱེ་གནས་རྫུས་ཏེ་སྐྱེས་པ་ཉིད་ཟབ་མོ་བསྐྱེད་པའི་རིམ་པ་དང་། བརྟག་པ་རྫོགས་པའི་རིམ་པར་ཡང་རྣམ་པར་བཞག་པར་བྱའོ་ཞེས་གསུངས་པ་འདིས་ལེའུ་བཅུ་གསུམ་པའི་བསྐྱེད་རིམ་གྱི་ལེའུ་གཉིས་པ་ནས་གསུངས་པའི་སྐྱེ་གནས་བཞི་མི་སྦྱོང་བ་ལ་དངོས་སུ་གནོད་ཅིང་། སྐྱེ་གནས་བཞི་བཤད་པ་ནི་ལྷའི་བསྐྱེད་ཆོག་བཞི་སྟོན་པར་བཤད་པས། དྲིལ་བུ་ཞབས་ཀྱིས། སེམས་ཅན་རྫུས་ཏེ་འབྱུང་བ་བཞིན། །ས་བོན་མེད་པར་རྣམ་པར་བསྒོམ། །ཞེས་པའི་དོན། བསྐྱེད་རིམ་གྱི་དབང་དུ་བྱས་པ་མ་ཡིན་པར་འདོད་པ་ལ་ཡང་དངོས་སུ་གནོད་པ་ཡིན་ནོ། །མངོན་བརྗོད་ལས། འདིའི་བསྐྱེད་ཆོག་སྒོང་སྐྱེས་སུ་བཤད་པ་དང་། འགལ་བ་སྤོང་བའི་ཚུལ་ཡང་བཞད་གད་ཀྱི་གནས་ཏེ། འདིར་རྒྱུ་རྡོ་རྗེ་འཆང་ཡབ་ཡུམ་མེད་པས་སྒོང་སྐྱེས་སུ་བཤད་ནས་མངལ་སྐྱེས་སུ་མ་བཤད་པ་ཡིན་ན། སྒོང་སྐྱེས་ལ་ཕ་མ་མེད་པར་ཁས་ལེན་དགོས་པའི་ཕྱིར་དང་། ཕ་མའི་སྦྱོང་བྱེད་མེད་པས་རང་ཉིད་མངལ་སྐྱེས་ལ་སྦྱོར་བ་དང་ཡང་འགལ་བའི་ཕྱིར་རོ། །དེས་ན་འདི་དག་ནི་འདུས་པའི་སྐབས་སུ། རྣལ་འབྱོར་ཆེན་པོའི་བསྐྱེད་རིམ་གྱི་སྦྱང་གཞི་ཡིན་ན། འབྱུང་འགྱུར་གྱི་འཛམ་བུ་གླིང་པའི་མི་མངལ་སྐྱེས་ཀྱི་སྐྱེ་འཆི་བར་དོ་གསུམ་ཡིན་པས་ཁྱབ་པའི་གྲུབ་མཐའ་བཅའ་ཉེས་པའི་སྟོབས་ཀྱིས་མངོན་བརྗོད་ལས་བསྐྱེད་ཆོག་འདི་སྒོང་སྐྱེས་སྦྱོང་བྱེད་དུ་གསུངས་པ་བཅོས་དཀའ་བའི་གཏམ་འབའ་ཞིག་ཏུ་སྣང་གི མཁས་པའི་རྣ་བར་འོང་བའི་གཏམ་དུ་མི་སྣང་ངོ་། །གཉིས་པ་ནི། སློབ་དཔོན་གྱི་གཞུང་ལས། ཨཱ་ལི་ཀཱ་ལིའི་སྦྱོར་བ་ཞེས་པ་ཙམ་ལས། ཟླ་བ་དང་ཉི་མ་གང་ཡང་མི་གསལ་བས། འདིའི་དོན། ཟླ་བ་གཅིག་ཏུ་འཆད་པ་དང་། ཟླ་བ་གཉིས་སུ་འཆད་པ་དང་། ཉི་ཟླ་གཉིས་སུ་འཆད་པའི་ཚུལ་དང་གསུམ་ལས། དང་པོ་ནི་པྲ་ཛྙཱ་རཀྵི་ཏའི་འགྲེལ་པར། ཨཱ་ལི་ཀཱ་ལིའི་སྦྱོར་བའོ་ཞེས་བྱ་བ་ལ། གཡོན་སྐོར་དང་གཡས་སྐོར་དུ་གནས་པའི་ཨཱ་ལི་དང་ཀཱ་ལིའི་ཕྲེང་བ་ཡོངས་སུ་གྱུར་པ་ལས་དེས་བྱིན་གྱིས་བརླབས་པའི་གཟུགས་ཅན་གྱི་རྣམ་པའི་ཟླ་བའི་དཀྱིལ་འཁོར་བསམ་པར་བྱ་བ་ནི་འདིའི་རྣལ་འབྱོར་རོ། །དེའི་དབུས་སུ་ཞེས་བྱ་བ་ནི་ཟླ་བའི་དབུས་སུའོ། །ཡི་གེ་ཧཱུྃ་ཞེས་བྱ་བ་ནི་སྔར་བཞག་པའི་ནཱ་ད་ལས་རིམ་པ་རྫོགས་པའོ། །རྡོ་རྗེ་སེམས་དཔའི་རང་བཞིན་ཞེས་བྱ་བ་ནི་རྒྱུའི་རྡོ་རྗེ་འཆང་གི་རང་བཞིན་ནོ། །འོད་ཟེར་སྣ་ཚོགས་རྣམ་པར་འཕྲོ་བ་ཞེས་བྱ་བ་ནི་སྤྲོ་བ་ན་ཁ་དོག་ལྔའི་འོད་ཟེར་གྱི་སྒོ་ནས་བྱུང་བའི་འཁོར་ལོ་ལྔའི་ལྷ་རྣམས་ཀྱིས་འགྲོ་བ་དེའི་རང་བཞིན་དུ་བྱས་ནས་ཡང་བསྡུས་པས་ཕྱོགས་བཅུར་གནས་པའི་གྲུབ་པའི་དཔའ་བོ་དང་རྣལ་འབྱོར་མ་ལ་སོགས་པ་ཐབས་དང་ཤེས་རབ་རོ་མཉམ་པ་སྔོན་དུ་འགྲོ་བའི་སྦྱོར་བས་ཞུ་བར་བྱས་ནས་ནཱ་ད་ལ་ཞུགས་པར་བསམ་པར་བྱའོ་ཞེས་ཟླ་བ་གཅིག་ཏུ་གསུངས་ཤིང་། ལྭ་བ་པའི་འགྲེལ་པར་ཡང་འདི་བཞིན་དུ་བཤད་ལ། བོད་ཀྱི་མར་དོ་རྗེས་འབྲང་དང་བཅས་པ་ཡང་འདིའི་རྗེས་སུ་འབྲང་ངོ་། །དེ་ཡང་མངོན་བརྗོད་དགུ་པའི་བསྐྱེད་ཆོག་གི་དངོས་བསྟན་དུ་སྣང་ངོ་། །གཉིས་པ་ནི་མཁས་པ་བུས། སྒྲུབ་ཐབས་རྣལ་འབྱོར་བཞི་ལྡན་ལས། ཨཱ་ལི་བཅུ་དྲུག་གཡས་སྐོར་གཡོན་སྐོར། མཚན་སོ་གཉིས་ཀྱི་ངོ་བོར་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དཀར་པོ་མེ་ལོང་ལྟ་བུའི་ཡེ་ཤེས། དེའི་སྟེང་དུ་ཀཱ་ལི་སོ་བཞི་ལ་ཌ་ཌྷ། ད་དྷ། ཡ་ལ་དྲུག་བསྣན་པས་བཞི་བཅུ་གཡས་སྐོར་གཡོན་སྐོར། དཔེ་བྱད་བརྒྱད་ཅུའི་ངོ་བོ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་དམར་པོ་མཉམ་པ་ཉིད་ཀྱི་ཡེ་ཤེས་བསྒོམ་པ་ནི་རྣལ་འབྱོར་རོ། །དེ་གཉིས་ཀྱི་དབུས་སུ་སྔར་གྱི་ནཱ་ད་ཞུགས་པ་སོགས་བཤད་ཅིང་། བོད་ཁ་ཅིག་ཟླ་བ་གཅིག་བསྒོམ་པ་ཡོད་པ་ནི་རྒྱུད་དང་། རྣལ་འབྱོར་དབང་ཕྱུག་གི་དགོངས་པ་མ་ཡིན་ཏེ། སཾ་བུ་ཊི་ལས། ཟླ་བའི་དཀྱིལ་འཁོར་དབུས་སུ་ནི། །བྱང་ཆུབ་ཟླ་བ་གཉིས་པ་ཅན། །འདིར་ཡང་སྐར་མའི་རྣམ་པས་ནི། །སངས་རྒྱས་ཡོན་ཏན་ཀ་སོགས་ཀྱི། །གཟུགས་ཀྱི་གཟུགས་བརྙན་ལྟ་བུ་ཡི། །རྣལ་འབྱོར་གྱིས་ནི་འཇུག་པར་འགྱུར། །ཞེས་གསུངས་པས་སོ། །བི་བྷུ་ཏི་དང་། ཨ་ཏི་ཤ་དང་། བོད་ཁ་ཅིག ཀཱ་ལི་ལས་ཉི་མ་བསྐྱེད་པར་འདོད་དེ། དེ་ནི་རྒྱུད་གཞན་གྱི་དགོངས་པའོ། །ཟླ་བའི་དཀྱིལ་འཁོར་བསྒོམ་པ་ནི་རྣལ་འབྱོར་ཡིན་ཏེ། སྡོམ་འབྱུང་ལས། དེ་དབུས་རྣལ་འབྱོར་བསྒོམ་པར་བྱ། །ཞེས་གསུངས་སོ་ཞེས་བཤད་པ་ནི། སཾ་བུ་ཊིའི་རྡོ་རྗེ་སེམས་དཔའ་ལ། ཨ་བྷྱས། བདེ་མཆོག་རྡོ་རྗེ་སེམས་དཔའ་ཞེས་པའི་ཐ་སྙད་མཛད་པས། དེ་དང་འདི་བསྐྱེད་ཆོག་གཅིག་པར་མཛད་པར་སྣང་གི གཞན་རྒྱ་གར་བའི་གཞུང་ནས་འདིའི་སྐབས་སུ་ཟླ་བ་ཉིས་བརྩེགས་བྱས་པ་མི་སྣང་ངོ་། །འོན་ཀྱང་ཀྱཻ་རྡོ་རྗེར་ཡང་མན་ངག་གི་སྐབས་སུ་མཉམ་སྦྱོར་མི་མཉམ་སྦྱོར་གཉིས་ཀ་ཡོད་པ་ལྟར། འདིར་ཡང་མན་ངག་གིས་མི་མཉམ་སྦྱོར་མཛད་པའི་ཚེ་མཉམ་སྦྱོར་ཡང་འགལ་བ་མེད་པ་འདྲ་སྟེ། དེ་ལྟར་ན་བཤད་རྒྱུད་སམ་བུ་ཊི་ལ་བརྟེན་དགོས་པར་སྣང་ངོ་། །གསུམ་པ་ནི་རྒྱ་གར་གྱི་ཀུ་མཱ་ར་བོ་དྷིའི་འགྲེལ་པ་དང་། དེ་བཞིན་གཤེགས་པའི་རྡོ་རྗེ་དང་། བོད་ཀྱི་རྗེ་བཙུན་དང་། དམར་རྣམས་ཀྱི་ཟླ་ཉི་གཉིས་སུ་བཞེད་དོ། །དེ་ལ་རྗེ་བཙུན་གྱི་བཞེད་པ་ནི་འོག་ཏུ་འཆད་ཅིང་། དམར་གྱིས་ཨཱ་ལི་ཀཱ་ལི་རབ་ཏུ་སྦྱོར་བའོ་ཞེས་པ་ནི་སྒྲ་ནཱ་ད་ལས་ཚུལ་ཨཱ་ལི་བཅུ་དྲུག་ཁ་དོག་དཀར་པོ་ཕྲག་གཉིས་གཡོན་སྐོར་དུ་བསམ་པ་ནི་རྣམ་པ་ཡིན་ལ། ངོ་བོ་ནི་འབྲས་བུ་སངས་རྒྱས་ལ་མངའ་བའི་མཚན་བཟང་པོ་སུམ་ཅུ་རྩ་གཉིས་སུ་མོས་པ་བྱའོ། །དེ་ཡོངས་སུ་གྱུར་པ་ལས་ཟླ་བའི་དཀྱིལ་འཁོར་ནི་རྣམ་པ་ཡིན་ལ། ངོ་བོ་མེ་ལོང་ལྟ་བུའི་ཡེ་ཤེས་སུ་མོས་པ་བྱའོ། །དེའི་སྟེང་དུ་ནཱ་ད་ལས་ཀཱ་ལི་སུམ་ཅུ་རྩ་བཞིའི་སྟེང་དུ་ཡ་ར་ལ་ཝ་ཌ་ཌྷ་ཞེས་པ་དྲུག་བསྣན་པས་བཞི་བཅུ། དེ་ཕྲག་གཉིས་ཁ་དོག་དམར་པོ་གཡས་སྐོར་ནི་རྣམ་པ་ཡིན་ལ། ངོ་བོ་དཔེ་བྱད་བཟང་པོ་བརྒྱད་ཅུར་མོས་པ་བྱའོ། །དེ་གྱུར་པ་ལས་ཉི་མའི་དཀྱིལ་འཁོར་ནི་རྣམ་པ། ངོ་བོ་མཉམ་པ་ཉིད་ཀྱི་ཡེ་ཤེས་སུ་མོས་པ་བྱའོ། །དེ་གཉིས་ཁ་སྦྱར་བས་ན་རབ་ཏུ་སྦྱོར་བའོ། །དེའི་དབུས་སུ་ནི་ཞེས་པ་ནི་སྒོང་སྐྱེས་དག་པའི་དབང་དུ་བྱས་ནས། སྟེང་གི་ནཱ་ད་དེ་ཉིད་ཀ་ར་ཀ་ར་ལ་སོགས་པ་རྩ་སྔགས་ཟློ་བཞིན་དུ་ཉི་ཟླའི་དབུས་སུ་ཞུགས་ནས་རིམ་གྱིས་ཡི་གེ་ཧཱུྃ་དངུལ་ཆུའི་མདོག་ཅན། རྡོ་རྗེ་སེམས་དཔའི་ངོ་བོ་ཞེས་པ་ནི་རྒྱུ་རྡོ་རྗེ་འཆང་གི་རང་བཞིན་ཏེ། སོ་སོར་རྟོག་པའི་ཡེ་ཤེས་སུ་མོས་པ་བྱ། དེ་ལས་འོད་ཟེར་སྣ་ཚོགས་པ་ལྕགས་ཀྱུ་ལྟ་བུ་འཕྲོ་བ་རྣམ་པར་བསམ་པས། ཕྱོགས་བཅུའི་སྔོན་གྲུབ་པའི་དཔའ་བོ་དང་མཁའ་འགྲོ་མ་དཔག་ཏུ་མེད་པ་བཀུག་ནས་ཧཱུྃ་ལ་ཞུགས་ཏེ། འདྲེས་པ་ནི་བྱ་བ་གྲུབ་པའི་ཡེ་ཤེས་སུ་མོས་པ་བྱ། དེ་དག་ཡོངས་སུ་གྱུར་པ་ལས་འབྲས་བུ་རྡོ་རྗེ་འཆང་རྟེན་དང་བརྟེན་པར་བཅས་པའི་དཀྱིལ་འཁོར་མེ་ལོང་ལ་གཟུགས་བརྙན་ཤར་བ་བཞིན་དུ་དུས་གཅིག་ཏུ་ཝལ་གྱིས་རྫོགས་པར་བསྒོམ་པ་ནི། ཆོས་ཀྱི་དབྱིངས་ཀྱི་ཡེ་ཤེས་སུ་མོས་པ་བྱ་སྟེ། རྫུས་སྐྱེས་དག་པའི་དབང་དུ་བྱས་པའོ་ཞེས་གསུངས་ཏེ། འདི་ནི་ཉི་ཟླ་གཉིས་ཀྱི་སྒོམ་ཚུལ་རྗེ་བཙུན་དང་འདྲ་བར་སྣང་ཞིང་། མངོན་བྱང་གསུམ་པ་ལ་ནི། ནཱ་ད་སྐབས་འདིར་འཇུག་པ་དང་། དེ་ཡང་ཀ་ར་ཀ་ར་ལ་སོགས་པའི་སྒྲ་དང་བཅས་པའི་ཆ་ནས། ལུགས་སྔ་མ་རྣམས་ལས་ཁྱད་པར་དུ་འཕགས་པར་སྣང་ལ། རྗེ་བཙུན་གྱི་དགོངས་པ་དང་ཡང་ཁྱད་པར་ཆེ་བར་སྣང་ངོ་། །གསུམ་པ་ཤིན་ཏུ་ཟབ་པའི་མན་ངག་གིས་གཉིས་ཀ་ལ་སྦྱར་ཚུལ་ནི། ནཱ་རོ་པའི་མན་ངག་ཕམ་འཐིང་པ་ནས་བརྒྱུད་པ་རྗེ་བཙུན་གྱིས་འདི་ལྟར་བཞེད་དེ། པདྨའི་ལྟེ་བར་ཉི་ཟླ་གཉིས་ཀྱི་བསྒོམ་ཚུལ་ནི་སྔ་མ་དང་འདྲ་ལ། དེ་གཉིས་ཀྱི་བར་དུ་སྒོང་སྐྱེས་ཀྱི་དབང་དུ་བྱས་ནས་རིགས་དྲུག་པ་རྡོ་རྗེ་འཆང་གི་ངོ་བོ་ཡིན་པས། ཡི་གེ་ཧཱུྃ་ཁ་དོག་དཀར་པོ་གཅིག་བསྒོམས་ཏེ། སོ་སོར་ཀུན་ཏུ་རྟོག་པའི་ཡེ་ཤེས་སུ་མོས་པ་བྱ། དེ་ནས་འོག་ནས་འབྱུང་བའི་སྒྲ་ཚུལ་གྱི་རྟེན་འབྲེལ་གྱིས་གཅིག་ཏུ་འདྲེས་པ་ནི་བྱ་བ་ནན་ཏན་གྱི་ཡེ་ཤེས། རྟེན་དང་བརྟེན་པ་སྐུ་ཡོངས་སུ་རྫོགས་པ་ནི་ཆོས་ཀྱི་དབྱིངས་ཀྱི་ཡེ་ཤེས་ཡིན་པ་ལ། སྒྲ་ཚུལ་གྱི་རྟེན་འབྲེལ་ནི་ཉི་ཟླ་ཁ་སྦྱར་གྱི་སྟེང་མཐོ་གང་ཙམ་གྱིས་མ་རེག་པར་ཐ་མལ་པའི་ལུས་ངག་ཡིད་གསུམ་གྱི་རང་བཞིན་མས་རིམ་གྱིས་ཨོཾ་ཨཱཿཧཱུྃ། དེའི་སྟེང་དུ་ཡུམ་གྱི་མཁའ་དག་པའི་རྟགས་སུ་པདྨ། ཡབ་ཀྱི་བྱང་ཆུབ་ཀྱི་སེམས་མཚོན་པ་ཟླ་བ། དེའི་སྟེང་དུ་རང་བཞིན་གྱིས་འོད་གསལ་བ་མཚོན་པ་ཡི་གེ་ཧཱུྃ་བསམ། དེ་ནས་མས་ཡས་རིམ་གྱིས་ཨོཾ་ཨཱཿལ། ཨཱཿཧཱུྃ་ལ། ཧཱུྃ་པདྨ་ལ། པདྨ་ཟླ་བ་ལ། ཟླ་བ་ཧཱུྃ་གི་ཞབས་ཀྱུ་ལ། དེ་ཁོག་པ་ལ། དེ་མགོ་བོ་ལ། དེ་ཟླ་ཚེས་ལ། དེ་ཐིག་ལེ་ལ། ཐིག་ལེ་ནཱ་ད་ལ། ནཱ་ད་ཁ་དོག་དམར་སྐྱ་ཀ་ར་ཀ་ར་ལ་སོགས་པ་ཡབ་ཀྱི་ཕྲེང་སྔགས་ཟློས་ཤིང་ཡས་མར་བྱོན་པ་ལ་ནི་སྒྲ་ཞེས་བྱ། ཉི་ཟླའི་བར་གྱི་ཡི་གེ་ཧཱུྃ་ལ་ནི་ཚུལ་ཞེས་བྱ་སྟེ། རྩ་བའི་རྒྱུད་ལས། སྒྲ་ཡི་ཚུལ་ལས་ངེས་འབྱུང་ཞིང་། །དམ་ཚིག་སྤྱོད་པའི་སྤྱོད་ཡུལ་ཅན། །ཞེས་བྱ་བའི་དགོངས་པ་ཡང་དེ་ཉིད་ཡིན་ནོ། །དེ་ལྟ་བུའི་སྒྲ་དེས་སྟེང་གི་ཉི་མ་ཕུག་ནས་བར་གྱི་ཚུལ་ལ་ཐིམ་པས་རྐྱེན་བྱས་ནས་ཉི་ཟླ་དང་བཅས་པ་ཐམས་ཅད་གཅིག་ཏུ་འདྲེས་པ་ལས་རྟེན་དང་བརྟེན་པར་བཅས་པའི་དཀྱིལ་འཁོར་གྱི་འཁོར་ལོ་མེ་ལོང་ལ་བཞིན་གྱི་དཀྱིལ་འཁོར་བཏེག་པ་བཞིན་དུས་གཅིག་ལ་ཝལ་གྱིས་བསྐྱེད་ལ་དབུས་ཀྱི་གཙོ་བོ་ནས་བཟུང་སྟེ། སྲུང་བའི་འཁོར་ལོའི་བར་དུ་རིམ་གྱིས་གསལ་གདབ་པར་བྱའོ། །ཞེས་གསུངས་སོ། །བཀའ་སྲོལ་འདིའི་ལུགས་ལ་ཡང་རྒྱུད་འཆད་པའི་སྐབས་སུ་སྒོང་སྐྱེས་ཀྱི་སྐབས་སུ། ནམ་མཁར་ནཱ་ད་བཞག་ནས་དེ་ལས་ཨཱ་ལི་ཚར་གཉིས་བྱུང་སྟེ། སྣ་ཚོགས་པདྨའི་ལྟེ་བར་བསམ་པ་ལས་ཟླ་བ། ཡང་ཀཱ་ལི་དམར་པོ་བཞི་བཅུ་པོ་ཚར་གཉིས་བྱུང་བ་ཟླ་བའི་སྟེང་དུ་འཕྲོས་ཏེ། ཟླ་བ་དེ་འོད་དམར་པོ་དང་བཅས་པ་བསྒོམ། དེ་ནས་ནམ་མཁའི་ནཱ་ད་དེ་ལས་ཐིག་ལེ་ནས་རིམ་གྱིས་ཧཱུྃ་རྫོགས་པ་གཅིག་ཏུ་གྲུབ་པ་དེ་ཟླ་བའི་སྟེང་དུ་བབ་པར་བསམ་པ་དང་། ཟླ་བ་ཧཱུྃ་དུ་གྱུར་པ་ལས་རྟེན་དང་བརྟེན་པ་ཐམས་ཅད་དུས་གཅིག་ལ་བསྐྱེད་པ་དང་། མངལ་སྐྱེས་ཀྱི་སྐབས་སུ། ཐོག་མར་ཡེ་ཤེས་ཀྱི་ཚོགས་སྟོང་པར་བསྒོམ་པའི་བར་དུ་བྱས་ལ། དེ་ནས་རྟེན་རི་རབ་དང་། པདྨའི་བར་དུ་བསྐྱེད་པ་དང་། དེར་བརྟེན་པ་ལྷ་མངོན་པར་བྱང་ཆུབ་པ་ལྔས་གཙོ་བོ་བསྐྱེད་པ་ནི། སྣ་ཚོགས་པདྨའི་ལྟེ་བར་ཨཱ་ལི་ལས་ཟླ་བ། དེའི་སྟེང་དུ་ཀཱ་ལི་ལས་ཉི་མ། དེ་གཉིས་ཀྱི་བར་དུ་ཧཱུྃ་བསམ་སྟེ། དེ་ལས་འོད་འཕྲོས་པས་ཉི་མའི་སྟེང་གི་ནམ་མཁའ་ལ་ཨོཾ་ཨཱཿཧཱུྃ་གསུམ་རིམ་པ་བཞིན་དུ་བསམ། དེའི་སྟེང་དུ་སྣ་ཚོགས་པདྨ། དེར་ཉི་མ་ལ་ཡི་གེ་ཧཱུྃ་ནཱ་ད་ཁ་དོག་དམར་པོ་ཆ་ཕྲ་བ་དང་ལྡན་པ་བསམ་སྟེ། དེ་ནས་ཨོཾ་ནས་རིམ་གྱིས་ཡར་ལ་གཅིག་ལ་གཅིག་ཐིམ་ནས་ཧཱུྃ་གི་ནཱ་ད་ཙམ་དུ་འདུས་ནས། དེ་ཀ་ར་ཀ་ར་ལ་སོགས་པའི་སྒྲ་དང་བཅས་ཏེ། ཉི་ཟླའི་བར་གྱི་ཧཱུྃ་ལ་ཞུགས་པས། གཙོ་བོ་ཡབ་ཡུམ་དང་གཞལ་ཡས་ཁང་དུས་གཅིག་ལ་བསྐྱེད་ནས། དེའི་རྗེས་སུ་འཁོར་མངལ་འབྱིན་དང་། ཞུ་བ་གླུས་བསྐུལ་བྱེད་པར་གསུངས་ཤིང་། སྒོང་སྐྱེས་ལ་ལཱུ་ཧི་པའི་སྟེང་དུ་དགོངས་པ་བསྐང་བ་དང་། རྒྱུད་འདི་ཉིད་ཀྱི་སྟེང་དུ་གསུངས་པ་གཉིས་མི་འདྲ་བ་ནཱ་རོ་པའི་དགོངས་པ་ཡིན་ནོ་ཞེས་མུ་ཏིག་ཕྲེང་བ་ལས་གསུངས་སོ། །བཞི་པ་དེ་ཉིད་ཀྱི་སྦྱངས་གཞི་སྦྱོང་བའི་ཚུལ་ནི། མུ་ཏིག་ཕྲེང་བ་ལས། ཨ་བྷི་དྷ་ནར་བསྐྱེད་རིམ་གྱི་སྒྲུབ་ཐབས་བདུན་ཅུ་རྩ་ལྔ་གསུངས་པ་ཐམས་ཅད་སྒོང་སྐྱེས་གཙོ་བོར་གྱུར་པའི་སྐྱེ་གནས་བཞི་ཆར་སྦྱོང་བ་ཡིན་པར་གསུངས་པ་ལྟར་བཤད་ན། མངོན་བྱང་གི་གཙོ་བོ་སྒོང་སྐྱེས་དང་སྦྱར་བ། ཡན་ལག་མངལ་སྐྱེས་དང་སྦྱར་བ། སྐྱེ་གནས་བཞི་ཆར་སྦྱོང་བའི་ཚུལ་དང་གསུམ་ལས། དང་པོ་ནི། འོག་གི་ཟླ་བ་ནི་སྒོང་སྐྱེས་ཀྱི་ཕའི་ཁུ་བ་དང་། ཉི་མ་ནི་མའི་རཀྟ་དང་། བར་གྱི་ཧཱུྃ་ཡིག་ནི་འདིར་ཞུ་བ་གླུས་བསྐུལ་མེད་པས། རྒྱུ་རྡོ་རྗེ་འཆང་གི་ངོ་བོ་ཡིན་པར་གསུངས་པ་ནི་འབྲས་བུའི་རྣམ་པ་ཡིན་ལ། སྦྱང་གཞི་ལ་ནི་ཕ་མ་གཉིས་ཡིན་པར་དེ་ཉིད་ཀྱིས་གྲུབ་བོ། །གཉིས་པ་ནི། དེའི་སྟེང་གི་མཐོ་གང་ཙམ་གྱི་སར། ཨོཾ་ཨཱཿཧཱུྃ་སྟེང་ནས་སྟེང་དུ་བརྩེགས་པ་ནི་ཚེ་སྔ་མའི་མངལ་སྐྱེས་ཀྱི་བར་དོའི་ལུས་ངག་ཡིད་གསུམ། དེ་པདྨ་ལ་ཐིམ་པ་ནི་བར་དོ་མངལ་སྒོ་ནས་ཞུགས་པ་སྟེ། བར་དོ་འཇུག་ཚུལ་ལ། རྣམ་གཞག་རིམ་པར་སྤྱི་གཙུག་རྣམ་སྣང་གི་སྒོ་ནས་འཇུག་པ་དང་། སྡོམ་འབྱུང་དུ་ཁ་ནས་འཇུག་པ་དང་། མངོན་པར་མངལ་སྒོ་ནས་འཇུག་པར་གསུངས་པ་གསུམ་ཡོད་པའི་ནང་ནས། འདི་ཕྱི་མའི་དབང་དུ་བྱས་པའོ། །པདྨ་ཟླ་བ་ལ་ཐིམ་པ་ནི་མའི་མངལ་དུ་ཁུ་ཁྲག་གི་དབུས་སུ་བར་དོ་ཞུགས་ཏེ། མེར་མེར་པོར་གྱུར་པ་ནས། མངལ་གྱི་གནས་སྐབས་དང་། བཙས་ནས་མ་ཤིའི་བར་སྐྱེ་སྲིད་ཐམས་ཅད་བསྡུས་ཏེ་བསྒོམ་པའོ། །ཟླ་བ་ཧཱུྃ་གི་ཞབས་ཀྱུ་ལ་ཐིམ་པ་ནི་དེ་ཉིད་འཆི་བ་སྟེ་སྔར་གྱི་ཧཱུྃ་ཡིག་ལ་ཐ་མལ་པའི་ཡིད་ཅེས་དང་། ཧཱུྃ་ཡིག་འདི་ལ་སེམས་ཀྱི་རང་བཞིན་འོད་གསལ་བ་ཅེས་གསུངས་པས། འཆི་བ་འོད་གསལ་ཡིན་པར་གྲུབ་པའོ། །དེ་ཡང་ཞབས་ཀྱུ་ནས་ནཱ་ད་ལ་ཐིམ་པའི་བར་ནི་ལུགས་འབྱུང་གི་སྣང་བ་གསུམ་གྱི་ཐིམ་རིམ་མཚོན་ལ། ནཱ་ད་དམར་སྐྱ་ཕྲ་ཞིང་བརྗིད་པ། ཀ་ར་ཀ་ར་ལ་སོགས་པའི་སྒྲ་སྒྲོགས་བཞིན་པ་འབབ་པ་ནི་ལུགས་བཟློག་གི་སྣང་བ་གསུམ་གྱིས་འཆི་སྲིད་ལས་ལྡང་བ་མཚོན། དེས་ཉི་མའི་དཀྱིལ་འཁོར་ཕུག་ནས་ཧཱུྃ་གི་ཡི་གེའི་ཚུལ་ལ་ཐིམ་པ་ནི། མངལ་སྐྱེས་ཀྱི་འཆི་སྲིད་ལས་ལངས་ནས་སྒོང་སྐྱེས་ཀྱི་བར་སྲིད་མའི་མངལ་དུ་ཞུགས་པའོ། །རོ་གཅིག་དུ་འདྲེས་པ་ནི་མངལ་དུ་སེམས་ཅན་དང་བཅས་པའི་སྒོ་ངར་གྱུར་པའོ། །དེ་ལས་སྐད་ཅིག་གིས་རྟེན་བརྟེན་པ་གཅིག་ཆར་དུ་གྲུབ་པ་ནི་སྒོ་ང་ཕྱིར་བཙས་ཏེ། སྒོ་ང་བཅག་ནས་སེམས་ཅན་དུ་གྱུར་པའོ། །དེས་ན་མངོན་བྱང་གི་གཙོ་བོ་སྒོང་སྐྱེས་དང་། དེའི་ཡན་ལག་དུ་ཚེ་སྔ་མའི་མངལ་སྐྱེས་ཀྱི་ཆོས་གསུམ་བསྒོམ་པ་འདི་ནི་སྒོང་སྐྱེས་གཙོ་བོ་དང་། མངལ་སྐྱེས་ཡན་ལག་ཏུ་སྦྱར་བ་སྟེ། བསྐྱེད་ཆོག་གཅིག་པོ་འདི་ཉིད་ལ། །མངལ་སྐྱེས་གླུ་ཡི་སྦྱོར་བ་ཡི། །ཞེས་སོགས་ཚིགས་བཅད་གཅིག་གིས་བསྟན་པའི་བསྐྱེད་ཆོག་གཉིས་ཀ་ཚང་བའི་དབང་དུ་བྱས་པ་སྟེ། རྒྱུད་ཀྱི་ཚིག་ལ་ཤིན་ཏུ་ཟབ་པའི་མན་ངག་གི་སྙན་བརྒྱུད་འབའ་ཞིག་གིས་བསྟན་པའི་དོན་ལ་ངེས་པ་བསྐྱེད་པའི་རྒྱུ་རུའང་འགྲོའོ། །སྟེང་གི་བསྐྱེད་ཆོག་མངལ་སྐྱེས་སྦྱོང་བྱེད་ཡིན་ན། གླུའི་སྦྱོར་བ་ཅི་ལྟར་སྙམ་ན། ཀ་ར་ཀ་ར་ལ་སོགས་པ་སྟེ། མངལ་སྐྱེས་གཙོ་བོར་བྱས་པའི་ཚེ། ཞུ་བ་ལས་གླུས་བསྐུལ་བའི་ཚིག་དགོས་ཀྱང་། ཡན་ལག་ཏུ་བྱས་པའི་ཚེ་ཚིག་འདི་ཙམ་གྱིས་ཆོག་པའོ། །འདི་ཉིད་ཀྱིས་རྒྱུད་འཆད་པའི་གནས་སྐབས་ཀྱི་མངལ་སྐྱེས་ཀྱི་སྦྱང་གཞི་སྦྱོང་ཚུལ་ཡང་ལེགས་པར་གྲུབ་སྟེ། མངོན་བྱང་གི་གཙོ་བོ་ཡང་མངལ་སྐྱེས་དང་སྦྱར། དེའི་ཡན་ལག་ཀྱང་ཚེ་སྔ་མའི་མངལ་སྐྱེས་དང་སྦྱར་བར་གྲུབ་པས། མངོན་པར་རྟོགས་པ་དེ་ཉིད་ལ། ཞུ་བ་ལས་གླུས་བསྐུལ་བའི་ཚིག་དང་། ནཱ་དའི་གླུ་ཚིག་གཉིས་ཀ་ཚང་བའི་གནད་ཀྱང་འདི་ཉིད་ཡིན་པའི་ཕྱིར་རོ། །གསུམ་པ་ནི་སྐྱེ་གནས་གཞན་གཉིས་ཀྱི་སྦྱོང་བྱེད་ཇི་ལྟར་ཚང་ན་ཉི་མ་ནི་དྲོད་དང་། ཟླ་བ་ནི་གཤེར་ཡིན་པས། དྲོད་གཤེར་སྐྱེས་སྦྱོང་། འདྲེས་པ་ལས་རྟེན་བརྟེན་པ་གཅིག་ཆར་དུ་གྲུབ་པས་རྫུས་སྐྱེས་སྦྱོང་བར་དམར་གྱིས་བཤད་པ་ལྟར་ཡང་དོན་ལ་གནས་ཤིང་། ཡང་དག་པར་ན་མངོན་བྱང་གཅིག་པོ་དེ་ཉིད་ཀྱིས་སྐྱེ་གནས་བཞི་ཆར་སྦྱོང་བའི་ཚུལ་ཤིན་ཏུ་ཟབ་པའི་མན་ངག་གཞན་ལས་འབྱུང་བ་ཡང་སྐབས་འདིར་ཤེས་པར་བྱའོ། །གཉིས་པ་རྟེན་དང་བརྟེན་པའི་གནས་ཚུལ་སོ་སོར་བཤད་པ་ལ་གཉིས་ཏེ། རྟེན་བཤད་པ་དང་། བརྟེན་པ་བཤད་པའོ། །དང་པོ་ནི། རྗེ་བཙུན་གྱིས་གསལ་གདབ་པའི་ཚེ་གཙོ་བོ་ནས་མེ་རིའི་བར་རིམ་གྱིས་གསལ་གདབ་པར་གསུངས་པ་ནི་ཐོག་མར་རང་གི་སེམས་གང་དུ་གནས་པའི་ས་ནས། ཕར་རིམ་གྱིས་གསལ་གདབ་པའི་དབང་དུ་བྱས་ལ། འཕགས་པས། ཐོག་མར་རྟེན་གསལ་གདབ་པར་གསུངས་པ་ནི་སྤྱི་དང་མཐུན་པའི་དབང་དུ་བྱས་པས། གང་ལྟར་ཡང་འགལ་བ་མེད་མོད་ཀྱི། འདིར་བཤད་པའི་གནས་སྐབས་སུ་ཐོག་མར་རྟེན་བཤད་པ་བདེ་བས། འདི་ལ་བཤད་བྱ་ཁུངས་ཐུབ་ཀྱི་ལུང་འགོད་པ། དེའི་དོན་བཤད་པས་རྣམ་པ་བློ་ཡུལ་དུ་ཤར་བར་བྱ་བ་དང་གཉིས་ལས། དང་པོ་ནི། སྡོམ་འབྱུང་ལས། ཐིག་གི་མཚན་མ་དྲུག་ཅུ་བཞི། །ཀུན་ཏུ་འཁོར་ལོའི་མཐར་ཐུག་བར། །ཞེས་ཐིག་སྐུད་ཆ་ཕྲན་དྲུག་ཅུ་རྩ་བཞི་པའི་ཕྱོགས་གསུངས་པ་དང་། ནག་པོ་དཀྱིལ་ཆོག་ལས། ཟུར་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །དྲྭ་བ་དྲྭ་ཕྱེད་འཕྱང་བས་མཛེས། །གཡེར་ཁའི་ཕྲེང་བའི་དྲྭ་བ་ཅན། །མཚམས་ཀྱི་ཆ་ནི་ཐམས་ཅད་དང་། །སྒོ་ཁྱུད་ཀྱི་ནི་ནང་རྣམས་སུ། །རྡོ་རྗེ་རིན་ཆེན་གྱིས་སྤྲས་པར། །ཕྱི་ཡི་དཀྱིལ་འཁོར་ཐིག་གདབ་བོ། །དེ་ཡི་ནང་དུ་པདྨ་སྟེ། །པདྨའི་རྒྱབ་ཏུ་འཁོར་ལོ་བྱ། །འཁོར་ལོ་གཉིས་པོ་དེ་ཡི་རྒྱབ། །རྡོ་རྗེ་ཕྲེང་བས་བསྐོར་བར་བྱ། །འཁོར་ལོ་གསུམ་ནི་ཆ་ཆེན་པོར། །རྡོ་རྗེའི་ཐེག་གིས་བསྐོར་བར་བྱ། །གེ་སར་དང་ནི་པདྨར་བཅས། །འདབ་མ་བཅུ་དྲུག་དག་ཏུ་གནས། །མན་ངག་དག་ནི་ཐོབ་པ་ལས། །དཀྱིལ་འཁོར་ཐིག་གདབ་ཀུན་ཤེས་ནས། །སྒོ་ནི་འཁོར་ལོའི་བརྒྱད་ཆ་སྟེ། །ཁྱམས་ནི་དེ་ཡི་ཕྱེད་དུ་བྱ། །སྒོ་ཁྱུད་དག་ནི་སྒོ་ཡི་ཚད། །ལྷ་ཡི་སྣམ་བུ་ཚད་དེ་བཞིན། །མཚམས་ཀྱི་ཐིག་ནི་བསྐོར་བ་དག །རྟ་བབས་ཀྱི་ནི་གནས་སུ་བཤད། །བ་དན་དྲིལ་བུ་འོད་ཟེར་གྱིས། །བརྒྱན་པར་ཐམས་ཅད་ཐིག་གདབ་ཅིང་། །ལྕགས་རི་མཐར་ཐུག་པ་ཡི་བར། །རྡོ་རྗེ་ཕྲེང་བས་མངོན་བསྐོར་ཅིང་། །འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། །ཞེས་དང་། ལྷ་སྟ་གོན་གྱི་སྐབས་སུ། ཨིནྡྲ་ནཱི་ལའི་ས་གཞི་ལ། །འཁོར་ལོ་གསུམ་གྱི་བདག་ཉིད་བསམ། །ཞེས་གསུངས་ཤིང་། དེ་དག་གི་དོན། རྗེ་བཙུན་རིན་པོ་ཆེས། དེ་ལ་འཁོར་ལོ་བཞི་ཡི་ས་གཞི་ནི་སྔོན་པོ་ཡིན་ལ། ས་གཞིའི་སྟེང་ནས་ཡར་རྩིབས་ཀྱི་ངོ་བོ་ཅུང་ཟད་ཙམ་འཕགས་པ་ཡིན་ལ། འཁོར་ལོ་སོ་སོའི་མཐོ་དམན་གྱི་ཁྱད་པར་ནི་ལྷ་རྣམས་ཀྱི་པུས་མོའི་ཚད་ཙམ་རེས་འཕགས་པ་ཡིན་ལ། རྡོ་རྗེ་ལ་སོགས་པའི་དཔངས་ནི་ལྷ་དེ་དག་གི་སྐེད་པར་སླེབས་པ་ཡིན་ཞིང་། ཀ་བའི་དཔངས་ནི་དབུའི་སྟེང་ནས་ཡར་ཁྲུ་གང་ཙམ་གྱིས་འཕགས་པ་ཡིན་ལ། སྟེང་གི་ཕུབ་ཀྱིས་ནི་འོག་མའི་ཕུབ་ནོན་པ་སྟེ། བློའི་སྣང་བ་ལ་ཆར་གྱི་ཆུ་ལྟ་བུ་ཡང་གཅིག་གི་སྟེང་དུ་གཅིག་གི་ཆུ་བབས་ནས། དམ་ཚིག་གི་འཁོར་ལོའི་ཕུབ་ཀྱི་འདོད་ཡོན་གྱི་ས་སྟེགས་ཀྱི་ཐད་སོ་ནོན་པ་ཙམ་སྟེ་ཆུའང་འདོད་ཡོན་གྱི་ཕྱི་སོར་འགྲོ་བ་ལྟ་བུའོ། །དམ་ཚིག་གི་འཁོར་ལོ་ནི་ས་སྟེགས་ལ་ཕེབས་པ་སྟེ། ཁ་དོག་ནི་ཤར་སྔོ་བ། ལྷོ་སེར་བ། ནུབ་དམར་བ། བྱང་ལྗང་བའོ། །སྒོ་ནི་ས་གཞི་ལ་བྲིས་པ་བཞིན་བརྩིགས་ནས་ཡོད་པར་འདོད་དེ། ཡ་ཕུབ་ནི་སྒོའི་དངོས་གཞི་ཡིན་པའི་ཕྱིར་ཡ་ཕུབ་ཀྱི་རྩིག་པ་ནི་མེད་པར་འདོད་ལ། སྒོ་ཁང་གི་སྟེང་བཀབ་པ་ནི་རྟ་བབས་ཡིན་པས་ཀ་བ་བཞིས་མཐོ་བར་བཏེག་པ། རྩིག་པའི་དངོས་གཞི་དང་། རྟ་བབས་ཀྱིས་སྟེང་ན་ནམ་མཁའ་སྟོང་པ་དང་བཅས་པའོ། །ཕ་གུ་དང་མདའ་ཡབ་ཀྱི་བར་ན་དྲྭ་ཕྱེད་ཡོད་ལ། མདའ་ཡབ་ཀྱི་སྟེང་ན་ཡར་ལ་པུ་ཤུ་ཞེས་བྱ་བ། རིན་པོ་ཆེའི་དྲྭ་བ་སེང་མ། ནང་ནས་ཕྱིར་མཐོང་བ། མདའ་ཡབ་ཀྱི་དཔངས་དང་མཉམ་པ་ཡོད་དོ། །འདོད་ཡོན་གྱི་སྣམ་བུའི་སྟེང་ན། ཕྱོགས་རེ་ན་རིག་མའི་ལྷ་མོ་བཞི་བཞི་སྟེ། བཅུ་དྲུག་གིས་ཡོངས་སུ་བསྐོར་བ་ཡིན་ནོ། །རྩིག་པ་ལྔ་ནི་ཡེ་ཤེས་ཀྱི་རིམ་པས་ནང་ནས། ནག་པོ་དང་། དཀར་པོ་དང་། སེར་པོ་དང་། དམར་པོ་དང་། ལྗང་གུ་རྣམས་ཡིན་ལ། འབྲི་བའི་དུས་སུ་ནི་ནག་པོ་དང་། ལྗང་ཁུ་ནས་བརྩམས་ཏེ། དཀར་པོ་ཕྱི་རོལ་ཏུ་བཏོན་ཡང་། ཕྱོགས་ཀྱི་རིམ་པ་ཡིན་པའི་ཕྱིར་ཉེས་པ་མེད་དོ་ཞེས་གསུངས་པ་རྣམས་སོ། །གཉིས་པ་ནི། འོག་གཞི་ལོགས་དང་སྟེང་ཐོག་དང་། །སྒོ་དང་རྟ་བབས་ལྔ་ཡིས་བསྡུས། །ཞེས་པ་ལྟར་ལྔ་ལས། དང་པོ་འོག་ལ་སྣ་ཚོགས་རྡོ་རྗེ་དང་། །ཉི་མ་པདྨ་ཁོར་ཡུག་གོ །ཞེས་བཞི་ལས། དང་པོ་སྣ་ཚོགས་རྡོ་རྗེ་ནི་གཞལ་ཡས་ཁང་གནས་པའི་གཞི་སྟེ། ལྟེ་བ་གྲུ་བཞི་པའི་རྒྱར་ཆ་ཆེན་བཅུ་གཉིས་ཡིན་ལ། དེའི་སྟེང་འོག་གི་དཔངས་ནི་ཆ་ཆེན་གཅིག་གོ །དེ་ལས་འཐོན་པའི་ཕྱོགས་བཞིའི་རྭ་ནི་འདིར་སྡོམ་འབྱུང་ལས། རྭ་རྩེ་ནས་རྭ་རྩེའི་བར་ཆ་ཕྲན་དྲུག་ཅུ་རེ་བཞིར་བཤད་པའི་ལུགས་ཡིན་པས། རྭའི་སྲིད་ལ་ཆ་ཆེན་གཉིས་སོ། །དཔངས་ཚད་ནི་རྭ་དབུས་མའི་རྩ་བ་དང་། རྩེ་མོའི་དཔངས་ཆ་ཕྲན་གཉིས་དབུས་ཀྱི་སྦོམ་སའི་དཔངས་ཆ་ཆེན་གཅིག་སྟེ། གཡས་གཡོན་གཉིས་ཕྱོགས་གཉིས་ཀ་ཡང་ཅུང་ཟད་ཙམ་གྱི་ཕྲ་བ་ཆུ་སྲིན་གྱི་ཁ་ནས་བྱུང་བའོ། །ཁ་དོག་ནི་ཤར་སྔོན་པོར་བྱས་པའི་ཕྱོགས་མདོག་སྟེ། ལྟེ་བ་ནི་རྒྱ་གར་བ་ཁ་ཅིག་གི་དཀར་པོར་བཤད་པ་ལྟར་ན། ཡུམ་གྱི་རིགས་བདག་གི་དབང་དུ་བྱས་པ་ཡིན་ཀྱང་འདིར་ནི་ཡབ་ཀྱི་དབང་དུ་བྱས་ནས་མཐིང་ནག་དུ་བཞེད་དོ། །རྭའི་གྲངས་ཕྱོགས་རེ་རེར་གསུམ་གསུམ་སྟེ། བཅུ་གཉིས་སུ་བྱེད་པ་དང་། ཕྱོགས་རེ་རེར་ལྔ་ལྔ་སྟེ་ཉི་ཤུར་བྱེད་པའི་ལུགས་གང་ལྟར་ཡང་འགལ་བ་མེད་དེ། སྔ་མ་ནི་རྟེན་འབྲེལ་ཡན་ལག་བཅུ་གཉིས་རྣམ་པར་དག་པ་དང་། ཕྱི་མ་ནི་འཇིག་ཚོགས་ལ་ལྟ་བའི་རི་བོ་ཉི་ཤུ་དག་པ་མཚོན་པའི་ཕྱིར་རོ། །རྩེ་མོ་ལྔ་པར་བྱེད་པའི་ཚེ་ན། གཡས་གཡོན་གྱི་རྭ་གཉིས་ཀྱི་གཡས་གཡོན་དུ་ཡང་། དེ་དང་འདྲ་བ་གཉིས་གཉིས་བྱེད་པ་ཡིན་གྱི། སྟེང་རྭ་འོག་རྭ་ཡིན་པར་ནི་མི་བཞེད་དོ། །གཉིས་པ་ཉི་མ་ནི་སྣ་ཚོགས་རྡོ་རྗེ་གནས་པའི་གཞི་སྟེ། མེ་ཤེལ་གྱི་རང་བཞིན་ཅན་ཁ་དོག་དམར་པོ། དབྱིབས་ཟླུམ་པོ། རྒྱར་ཆ་ཆུང་དྲུག་ཅུ་རེ་བཞིའོ། །གལ་ཏེ་ཉི་མ་དམར་པོ་ཡིན་ན། བྲི་བྱ་ལ་ཁ་དོག་ལྗང་ཁུར་བྱེད་པ་དང་འགལ་སྙམ་ན། ཉི་མའི་ཁ་དོག་དམར་པོ་ཡིན་ཀྱང་། དེའི་འོག་ན་པདྨ་ཡོད་ལ། དེའི་ལྟེ་བ་ལྗང་གུ་ཡིན་པར་ཨ་བྷྱས་བཤད་པས། དེའི་ཁ་དོག་ཏུ་གྱུར་པ་སྟེ། དཔེར་ན་དར་ལྗང་ཁུའི་སྟེང་དུ་ཤེལ་དམར་པོ་བཞག་པ་ལྟ་བུའོ་ཞེས་བོད་ཀྱི་ཕྲེང་བ་མཁན་པོ་རྣམས་གསུངས་སོ། །འདི་ཡན་ཆད་མངོན་བྱང་ལས་གཅིག་ཆར་དུ་གྲུབ་པའོ། །གསུམ་པ་པདྨ་ནི། སྣ་ཚོགས་རྡོ་རྗེ་གནས་པའི་རྟེན་ཏེ། ལྟེ་བའི་ཚད་ཉི་དཀྱིལ་དང་མཉམ་ལ། འདབ་མའི་རྒྱ་ཆ་ཆུང་གཉིས་པར་ཐིག་གི་རིགས་པས་ཤེས་ཤིང་། གྲངས་ནི་ལ་ལི་ཏ་བཛྲས། འདབ་མ་འབུམ་ལྡན་དེ་དབུས་སུ། །ཞེས་བཤད་ལ། བླ་མ་རྔོག་པ་རྣམས་ཀྱིས། སུམ་ཅུ་སོ་གཉིས་པར་འདོད་ཀྱང་། འདིར་ནི་སྔར་རྟེན་བསྐྱེད་པའི་སྐབས་སུ་བཤད་པ་དེ་ཉིད་ཡིན་པས་འདབ་མ་བརྒྱད་པའོ། །ཁ་དོག་ནི་སྔར་བཤད་པ་ལྟར་རོ། །བཞི་པ་ཁོར་ཡུག་ནི། རྡོ་རྭ་མེ་རི་དང་། དུར་ཁྲོད་གཉིས་ལས། བསྒོམ་བྱའི་སྐབས་སུ་བསྐྱེད་ཆོག་ལས་རྟེན་བརྟེན་པ་གྲུབ་པའི་ཚེ་སྲུང་འཁོར་དྲུག་ཆར་ཡང་གྲུབ་པའི་ཚུལ་དང་། དེ་དག་གི་བསྒོམ་ཚུལ་རྣམས་ནི་སྔར་བཤད་ཟིན་ལ། བྲི་བྱའི་སྐབས་སུ་རྡོ་རྗེའི་རྭ་བ་ཆ་ཕྲན་གཉིས་དང་། མེ་རི་ཆ་ཆེན་གཅིག་ལ་ཐམས་ཅད་བསྡུས་ནས་བྲི་བ་ཡིན་གྱི། གཞན་བྲི་བའི་ལུགས་ནི་མེད་དོ། །དུར་ཁྲོད་ནི་རྡོ་རྗེ་མཁའ་འགྲོའི་དགོངས་པ་སྲུང་འཁོར་གྱི་ཕྱི་རོལ་དུ་ཡོད་པར་རྗེ་བཙུན་བཞེད་དེ། དེ་ཉིད་ལས། རྡོ་རྗེ་རྭ་བའི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པོ་ཡིན། །ཞེས་གསུངས་པས་སོ། །སྡོམ་འབྱུང་གི་དགོངས་པ་རྡོ་རྗེ་རྭ་བའི་ནང་དུ་ཡོད་དེ། དེ་ཉིད་ལས། རྡོ་རྗེ་རྭ་བའི་ནང་དུ་ནི། །དུར་ཁྲོད་བརྒྱད་ཀྱིས་བརྒྱན་པའོ། །ཞེས་བཤད་པས་སོ། །དེ་ལ་ཕྱིས་ཀྱིས་མཁས་པ་དག དེ་ནི་འགྱུར་ཉེས་པ་ཡིན་ཏེ། རྒྱུད་དུ། ཐིག་གི་མཚན་མ་དྲུག་ཅུ་བཞི། །ཀུན་ཏུ་འཁོར་ལོའི་མཐར་ཐུག་བར། །ཞེས་ཆ་ཕྲན་དྲུག་ཅུ་རྩ་བཞི་པས་རྡོ་རྗེ་རྭ་བ་ལ་ཐུག་པར་བཤད་པའི་ཕྱིར་དུར་ཁྲོད་ནང་དུ་འོང་ས་མེད་དོ། །དེས་ན་འགྲེལ་པ་དང་བསྟུན་ནས། འགྱུར་གསར་ལས། རྡོ་རྗེ་རྭ་བ་ནང་དུ་སྟེ། །དུར་ཁྲོད་བརྒྱད་ཀྱིས་བརྒྱན་པའོ། །ཞེས་པ་ཉིད་འགྱུར་ལེགས་སོ་ཞེས་བཤད་ཀྱང་། ལུང་དེས་སྔ་མ་ལ་མི་གནོད་དེ། འཁོར་ལོའི་མཐར་ཐུག་བར། །ཞེས་གསུངས་ཀྱི། རྡོ་རྗེ་རྭ་བ་ཞེས་མ་གསུངས་པས་ཟུར་ཐིག་ནས་བཟུང་བའི་ཟླུམ་སྐོར་ཐོག་མར་གང་འོང་བ་དེ་ཉིད་འཁོར་ལོ་ཡིན་པའི་ཕྱིར་རོ། །དེས་ན་ནག་པོ་དཀྱིལ་ཆོག་ལས། །ལྕགས་རིའི་མཐར་ཐུག་པ་ཡི་བར། །རྡོ་རྗེ་ཕྲེང་བས་མངོན་བསྐོར་ཞིང་། །འོད་ཀྱི་དཀྱིལ་འཁོར་ནང་དུ་ནི། །རིམ་གཉིས་ཐིག་ནི་གདབ་པར་བྱ། །ཞེས་གསུངས་པ་ནི་སྡོམ་འབྱུང་ལྟར། དུར་ཁྲོད་ནང་དུ་འོངས་པའི་ལུགས་སུ་སྣང་སྟེ། ལྕགས་རི་ཐམས་ཅད་ཀྱི་ཕྱི་རོལ་དུ་འབྱུང་བ་ལྟར། རྡོ་རྗེ་རྭ་བའི་ཕྱི་ཐིག་ཟླུམ་ཐིག་ཐམས་ཅད་ཀྱི་ཕྱི་མ་ཡིན་པར་བསྟན་པའི་ཕྱིར་རོ། །མཁས་པ་བུས་ལུང་དེའི་དོན་ལཱུ་ཧི་པའི་འགྲེལ་པར། སྒོ་མཚམས་མ་བརྒྱད་རྡོ་རྗེ་རྭ་བ་ལ་ཐིམ་པས། ཆུ་ལ་ཆུ་ཐིམ་པའི་ཟེགས་མ་ཕྱིར་འཕྲོས་པ་ལྟར། ཕྱི་རུ་རྡོ་རྗེ་དང་། པདྨ་དང་། འཁོར་ལོའི་རྭ་བ་གསུམ་གྲུབ་པའི་ཕྱི་མ་གཉིས་ཀྱི་ཐིག་ལ། རིམ་གཉིས་ཀྱི་ཐིག་ཞེས་བཞེད་པ་ནི་མི་འཐད་དེ། རྡོ་རྗེའི་རྭ་བ་དང་། འོད་ཕྲེང་གི་བར་རྭ་བ་གཞན་གྱིས་ཆོད་པ་མི་རིགས་པའི་ཕྱིར་རོ། །དེས་ན། རིམ་གཉིས་ཐིག་ཅེས་པས། རྡོ་རྗེ་ཕྲེང་བས་མངོན་པར་བསྐོར་བའི་ཕྱི་ཐིག་ནང་ཐིག་གཉིས་སྟོན་པ་ལུང་དེའི་དོན་དུ་སྣང་ངོ་། །མདོར་ན་རྗེ་བཙུན་གྱིས། རྡོ་རྗེ་རྭ་བའི་ནང་དུ་དུར་ཁྲོད་བརྒྱད་བསྒོམ་པ་དང་། ཕྱི་རུ་བསྒོམ་པ་གཉིས་གང་ལྟར་ཡང་རུང་སྟེ། འཁོར་འདས་དབྱེར་མེད་ཡིན་པའི་ཕྱིར་ཞེས་གསུངས་པའི་གནད་ཤེས་ན་མཐའ་གཅིག་པའི་དགག་སྒྲུབ་གང་ཡང་མི་དགོས་པར་སྣང་ངོ་། །དེ་ལ་དུར་ཁྲོད་ནི་སློབ་དཔོན་གྱི་གཞུང་ལས། དེ་ནས་དུར་ཁྲོད་རྣམ་པར་བཤད་དེ་རྡོ་རྗེ་རྭ་བའི་ནང་དུ་གཡོན་སྐོར་གྱིས་ཕྱོགས་ཐམས་ཅད་དང་དབང་ལྡན་ལ་སོགས་པའི་མཚམས་རྣམས་སུ་བཞི་བཞིར་བརྗོད་པར་བྱ་སྟེ། དྲག་དུ་གཏུམ་པ་དང་། ཚང་ཚིང་འཁྲིགས་པ་དང་། འུར་འུར་འབར་བས་ཁྱབ་པ་དང་། འཇིགས་སུ་རུང་བ་རྣམས་ཤར་ལ་སོགས་པའི་ཕྱོགས་སུ་གཡོན་སྐོར་གྱིས་ལེགས་པར་གནས་སོ། །དབང་ལྡན་གྱི་མཚམས་སུ་ནི་ཧ་ཧར་དགོད་པའོ། །བྱིན་ཟའི་མཚམས་སུ་ནི་ནགས་ཚལ་ཕུན་སུམ་ཚོགས་པའོ། །སྲིན་པོའི་གནས་སུ་ནི་མུན་པ་མི་ཟད་པའོ། །རླུང་གི་མཚམས་སུ་ནི་ཀི་ལི་ཀི་ལ་སྒྲ་སྒྲོགས་པ་སྟེ། རྡོ་རྗེ་རྭ་བའི་དུར་ཁྲོད་དེ་རྣམས་ནི། འཇིགས་པའི་གཟུགས་ཀྱི་རོ་ལངས་དང་། འབྱུང་པོ་འདུས་པ་ཅེ་སྤྱང་གི་སྒྲ་སྒྲོགས་པའོ། །རིམ་པ་དེ་ལྟར་གནས་པའི་དུར་ཁྲོད་བརྒྱད་པོ་དེར་ཤིང་དང་། ཕྱོགས་སྐྱོང་བ་དང་། ཀླུའི་དབང་པོ་དང་། སྤྲིན་གྱི་དབང་པོ་རྣམས་ལས། ཤི་རི་ར་དང་། ཨ་ཤྭ་ཐཱ་དང་། ཀ་ཀོ་ལ་དང་། ཙུན་དྷའི་ཤིང་སྟེ་ཤར་ལ་སོགས་པའོ། །ཁ་ཏ་ཀ་དང་། ཀ་ར་ན་ཙ་པ་དང་། ལ་ཏ་པ་ར་ཀ་ཏི་དང་། པ་ཏི་པའོ། །དེ་བཞིན་དུ་དབང་པོ་དང་། སྦྱིན་བདག་དང་། ཀླུའི་དབང་པོ་དང་། གཤིན་རྗེ་དང་། དབང་ལྡན་དང་། བྱིན་ཟ་དང་། སྲིན་པོའི་དབང་པོ་དང་། རླུང་བདག་གོ །དེ་བཞིན་དུ་ནོར་རྒྱས་དང་། འཇོག་པོ་དང་། སྟོབས་ཀྱི་རྒྱུ་དང་། པདྨ་དང་། དེ་བཞིན་དུ་པདྨ་ཆེན་པོ་དང་། ཧུ་ལུནྜ་དང་། རིགས་ལྡན་དང་། དུང་སྐྱོང་ངོ་། །དེ་བཞིན་དུ་སྒྲ་གྲག་དང་། སྨུགས་པ་དང་། མུན་པ་ཅན་དང་། ཀུན་ཏུ་འཁྱིལ་དང་། འཁྲིགས་པ་དང་། གང་བ་དང་། འབབ་པ་དང་། དྲག་པོའི་སྤྲིན་གྱི་བདག་པོ་སྟེ། དེ་རྣམས་དེ་བཞིན་དུ་བསམས་ནས་ཞེས་གསུངས་ཏེ། དུར་ཁྲོད་ཀྱི་གཞུང་འདི་དག་ལཱུ་ཧི་པའི་གཞུང་ན་མེད་ཀྱང་། རྗེ་བཙུན་ནཱ་རོ་པས་ཁ་བསྐང་བ་ཡིན་པར་རྗེ་བཙུན་གསུངས་ཏེ། ཕམ་འཐིང་པའི་སློབ་མ་རྣམས་ཀྱི་རྒྱ་དཔེ་ལ་ཡང་འདི་དག་ཡོད་པ་དང་། མེད་པ་གཉིས་ཡོད་པར་གྲག་གོ །གཉིས་པ་ནི། ལོགས་ལ་རྩིག་པ་ཕ་གུ་དང་། །དྲྭ་ཕྱེད་མདའ་ཡབ་པུ་ཤུའོ། །ཞེས་པ་ལྟར་ལྔ་ལས། དང་པོ་རྩིག་པ་ནི། སྔར་གྱི་སྣ་ཚོགས་རྡོ་རྗེའི་སྟེང་དུ། ཆ་ཆེན་བཅུ་གཉིས་མཉམ་པར་བགོས་པའི་དབུས་ནས་བགྲངས་པའི་ཆ་ཆེན་ལྔ་པ་ལ་དབུས་དོར་མཐའ་གཉིས་གདབ་པའི་མཐའ་ནང་མ་ནི་རྩིག་པའི་ས་ཡིན་པས། དེའི་རྒྱ་ནི་ཐིག་ན་ཇི་ལྟར་ཡོད་པ་བཞིན་ཡིན་ལ། ཆུར་ནི་ཕྱོགས་བཞི་ཆར་ལ་སྒོའི་བུག་པའི་ཐད་དུ། སྒོ་ལོགས་ནས་སྒོ་ལོགས་ཀྱི་བར་རྒྱུན་ཆགས་སུ་སོང་བ་དང་། སྒོའི་སྟེང་གི་ཐད་དུ་ནི་ཕྱོགས་མཐའ་དག་ཏུ་རྒྱུན་ཆགས་སུ་སོང་བའོ། །དཔངས་ནི་ནོར་བུ་རྒྱས་པའི་གཞལ་མེད་ཁང་ཤིན་ཏུ་རབ་ཏུ་གནས་པའི་གསང་བ་དམ་པའི་གསང་བའི་ཆོ་ག་ཞིབ་མོའི་རྒྱལ་པོ་ལས། འཕངས་སུ་དཔག་ཚད་གསུམ་ཡོད་པ། རྒྱར་དཔག་ཚད་ལྔ་ཡོད་པ་ཞེས་གསུངས་པས། ཤར་ནུབ་ཏུ་ཆ་ཆེན་བརྒྱད། ཆ་ཕྲན་སུམ་ཅུ་སོ་གཉིས་ཡོད་པ་དེ་ཉིད་དུམ་བུ་ལྔར་བགོས་པའི་དུམ་བུ་རེ་རེ་ནི་དཔག་ཚད་རེ་རེར་བྱས་པས་འདིར་དཔག་ཚད་རེ་ལ་ཆ་ཕྲན་དྲུག་རེ་དང་། ཆ་ཕྲན་གཅིག་གི་ཆ་གཉིས་རེ་ཐོབ་སྟེ། དེ་ལྟར་ན་རྒྱར་དཔག་ཚད་ལྔ་ཞེས་པའི་དོན་ཏོ། །དཔངས་སུ་དཔག་ཚད་གསུམ་ནི་གྲུ་བཞི་པའི་ཐོག་མན་ཆད་ཀྱི་དཔངས་ཡིན་པས་ཆ་ཕྲན་བཅུ་དགུ་དང་། ཆ་ཕྲན་གཅིག་གི་ལྔ་ཆ་སྟེ། མདོར་ན་རྩིག་པའི་དཔངས་ཆ་ཆེན་བཞི། ཕ་གུ་ལ་ཆ་ཕྲན་གཅིག དྲྭ་ཕྱེད་ལ་ཆ་ཕྲན་གཉིས། གསེར་གྱི་སྐ་རགས་ལ་ཆ་ཕྲན་གཅིག་གི་ལྔ་ཆ་སྟེ། འདི་མན་ཆད་དཔག་ཚད་གསུམ་ཡིན་ལ། སྐ་རགས་དང་ནང་གི་གདུང་དཔངས་མཉམ་པའི་སྟེང་ནས་ཐོག་འབུབས་པ་ཡིན་ནོ། །དེ་ལ་རྩིག་པ་ལྔ་ནི། རྗེ་བཙུན་གྱིས། ཡེ་ཤེས་ཀྱི་རིམ་པ་དང་། ཕྱོགས་ཀྱི་རིམ་པ་གཉིས་གསུངས་པ་བསྒོམ་པ་དང་། བྲི་བའི་གནས་སྐབས་སོ་སོར་སྦྱར་བར་བྱའོ། །གཉིས་པ་ཕ་གུ་ནི། སློབ་དཔོན་ཤྲདྡྷས། འགྲམ་རྒྱབ་རིན་ཆེན་ཕ་གུ་སྟེ། །ཆ་ཆུང་གཅིག་གི་ཚད་དུ་བྱ། །ཞེས་གསུངས་པས། དཔངས་སུ་ཆ་ཆུང་གཅིག་ཡིན་ལ། རྒྱར་ནི་རྩིག་པ་ལས་ཆ་ཆུང་ཕྱེད་ཀྱིས་འཕྱར་དུ་ཡོད་པར་ཡོ་ག་པའི་བླ་མ་རྣམས་བཞེད་དོ། །ཁ་དོག་ནི་ཨ་བྷྱས། རྩིག་པ་ལྔ་ཕྱི་ནང་སྦྲག་པར་འདོད་པའི་ལུགས་ལ་ཁ་དོག་དམར་པོ་དང་། བརྩེགས་པར་འདོད་པའི་ལུགས་ལ་རྩིག་པ་དང་པོའི་ཁ་དོག་ཏུ་འདོད་ཀྱང་། ཤྲདྡྷ་ནས་བརྒྱུད་པའི་མན་ངག་ལས་གཞི་སེར་པོར་བཤད་པས། གསེར་གྱི་རང་བཞིན་ཟུར་གསུམ་དང་། གྲུ་བཞི་དང་། ཟླུམ་པོའི་དབྱིབས་ཀྱི་རིན་པོ་ཆེའི་ཕྲས་སྤྲས་པའོ། །གསུམ་པ་དྲྭ་ཕྱེད་ནི། ཕ་གུའི་སྟེང་དུ་ཆ་ཕྲན་གཉིས་ཀྱི་གཞི་ནག་པོར་བཤད་པ་ནི་བར་སྟོང་གི་དོན་ཡིན་པས། སྟོང་པའི་རང་བཞིན་ལ་བར་སྐབས་སུ་རིན་པོ་ཆེའི་བྲེ་ཕུལ་བཞི། སྟེང་འོག་ཏུ་བརྩེགས་པ་རེ་རེའི་དཔངས་ལ་ཆ་ཕྲན་ཕྱེད་ཡོད་ཅིང་། རྒྱར་ནི་བྲེ་ཕུལ་འོག་མ་ལ་ཆ་ཕྲན་གཅིག གོང་མ་རྣམས་ཆ་ཕྲན་ཕྱེད་ཕྱེད་ཀྱིས་རྒྱ་ཆེ་བར་གྱུར་པའོ། །དེའི་སྟེང་དུ་གསེར་གྱི་སྐ་རགས་ནི་དོན་གསེར་གྱི་གདུང་ལེབ་སྟེ། དཔངས་སུ་ཐིག་སྐུད་གང་ལས་མེད་པས་ཆ་ཕྲན་གཅིག་གི་ལྔ་ཆ་ཡིན་ལ། རྒྱར་བྲེ་ཕུལ་གོང་མ་དང་མཉམ་པའོ། །དེའི་ཕྱི་ངོས་སུ་ཆུ་སྲིན་མ་ཀ་རའི་ཁ་ནས་བྱུང་བའི་དྲྭ་བ་དང་། དྲྭ་བ་ཕྱེད་པ་འཕྱང་བ་སྟེ། དེ་ལ་སློབ་དཔོན་ཤཱཀྱ་བཤེས་གཉེན་གྱིས། དྲྭ་བ་ནི་མུ་ཏིག་གི་ཆུན་འཕྱང་སྟེ། མཆོག་དབུས་ན་ཡོད་པའོ། །དྲྭ་བ་ཕྱེད་པ་ནི་མཆོག་མཐའ་ན་ཡོད་པའོ། །ཞེས་དང་། སློབ་དཔོན་དཔལ་འབྲས་རྡོ་རྗེས། མུ་ཏིག་གི་ཆུན་འཕྱང་དབུས་ན་ནོར་བུས་མཛེས་པ་ལ་ནི་དྲྭ་བ་ཞེས་བྱ་ལ། དབུས་ན་རྒྱན་མེད་པ་ལ་ནི་དྲྭ་བ་ཕྱེད་པ་ཞེས་བྱའོ་ཞེས་གསུངས་པ་ལྟར་རོ། །བཞི་པ་མདའ་ཡབ་ནི་གསེར་གྱི་སྐ་རགས་དང་། ནང་གི་གདུང་མཉམ་པོར་བྱས་པའི་སྟེང་ནས་ཐོག་ཕུབ་པའི་ཕྱམ་གྱི་བྱ་འདབ་འོག་གི་འདོད་སྣམ་དང་ཐད་མཉམ་པོར་ཡོད་པའི་མཐའ་སྐོར་ལ་རིན་པོ་ཆེའི་མདའ་ཡབ་ཐུར་དུ་འཕྱང་བ་སྟེ། འདི་ལ་རྣམ་པ་འདི་ལྟར་ཡིན་གཞུང་རྣམས་ནས་བཤད་པ་མི་སྣང་ཡང་བླ་མ་གོང་མ་རྣམས་ཀྱི་མཐོང་བ་བརྒྱུད་པའི་ཕྱག་བཞེས་ཀྱིས། མཆུ་མེད་པའི་སྤྱི་བླུགས་མགོ་མཇུག་བཟློག་པ་ལྟ་བུའམ། རུས་རྒྱན་རྙིང་པའི་ཟ་ར་ཚགས་ཀྱི་སྣེ་མོའི་རྣམ་པ་ཅན་དུ་བཞེད་དེ། རྒྱ་གར་དང་བལ་པོར་བྲིས་པའི་ཐང་སྐུ་རྙིང་པ་ལ་བྲིས་པ་དང་མཐུན་པར་སྣང་ངོ་། །ཞེས་བླ་མ་དག་གསུང་ངོ་། །ལྔ་པ་པུ་ཤུ་ནི་མདའ་ཡབ་ཀྱི་སྟེང་གི་ཐད་དུ་གྱེན་དུ་འགྲེང་བའི་ཚུལ་གྱིས་གནས་པ་སྟེ། དབྱིབས་ནི་རྗེ་བཙུན་དང་། འཕགས་པ་རིན་པོ་ཆེས་དྲྭ་མིག་གསེང་མའི་པུ་ཤུ་ཞེས་གསུངས་ཏེ། པུ་ཤུའི་རྣམ་པ་ཆ་ཕྲན་གཉིས་པ་ཁོར་ཡུག་ཏུ་ཡོད་པ་ལ་དྲྭ་མིག་གི་ནང་དུ་རིན་པོ་ཆེ་མིག་གསུམ་པ་ཡོད་པའོ། །འདིར་ཨ་བྷྱས་འོག་ཏུ་འཕྱང་བ་ལ་ཤར་བུ་དང་། སྟེང་དུ་བརྩེགས་པ་ལ་མདའ་ཡབ་ཀྱི་ཐ་སྙད་མཛད་ཅིང་། དབྱིབས་ཀྱང་པདྨ་འདབ་མ་ཕྱེད་པའི་དབྱིབས་ཅན་དུ་བཞེད་དོ། །གསུམ་པ་ནི། སྟེང་ཐོག་ཀ་བ་ཤིང་བརྩེགས་དང་། །གདུང་དང་ཐོག་ཕུབ་རིམ་པ་དྲུག །ཞེས་པ་ལྟར་བཞི་ལས། ཀ་བ་ནི་འདིར་འཁོར་ལོ་གོང་མ་བཞི་པོ་རེ་རེ་ལ་བརྒྱད་བརྒྱད་གསུངས་པས་སུམ་ཅུ་རྩ་གཉིས་སོ། །ཤིང་བརྩེགས་ཀྱང་དེའི་རིགས་པས་སུམ་ཅུ་རྩ་གཉིས་སོ། །གདུང་ནི་ཟླུམ་པོ་བཞི་དང་། ཐལ་གདུང་མིག་མངས་རིས་སུ་བྲིས་པ་རྣམས་སོ། །བཞི་པ་ཐོག་ཕུབ་རིམ་པ་དྲུག་ལས། ཐོག་ཕུབ་དང་པོ་ནི་ནག་པོ་དཀྱིལ་ཆོག་ལས། ཨིནྡྲ་ནཱི་ལའི་ས་གཞི་ལ། །འཁོར་ལོ་གསུམ་གྱི་བདག་ཉིད་བསམ། །ཞེས་དང་། རྗེ་བཙུན་གྱིས། འཁོར་ལོ་ཐམས་ཅད་ཀྱི་ས་གཞི་ནི་སྔོན་པོ་ཡིན་ལ་ཞེས་གསུངས་པའི་དོན། རྩིག་པའི་ནང་དུ་རྒྱར་ཆ་ཆེན་གཅིག་པ། དཔངས་སུ་ཆ་ཕྲན་གཅིག་ཡོད་པའི་ལྷ་སྣམ་གྲུ་བཞི་པ་ཕྱོགས་མདོག་ཅན་ནི་དམ་ཚིག་གི་འཁོར་ལོ་ཡིན་ལ། དེའི་དབུས་ཀྱི་ཆ་ཆེན་དྲུག་སྔོན་པོར་བྱེད་པ་ནི། ཨིནྡྲ་ནཱི་ལའི་ས་གཞི་ཡིན་ཅིང་། དེའི་དཔངས་གཞུང་ལས་དངོས་སུ་མ་བཤད་ཀྱང་། སྐུ་འཁོར་གྱི་གདུང་དང་། ཕྱིའི་གསེར་གྱི་གདུང་ལེབ་མཉམ་པོར་འོང་དགོས་པའི་རིགས་པས་ཆ་ཕྲན་ཕྱེད་དང་དགུའོ། །དེའི་སྟེང་དུ་སྐུའི་འཁོར་ལོ་དཀར་པོ་ལྟེ་བའི་རྒྱར་ཆ་ཆེན་ལྔ་ལ་ཆ་ཕྲན་གཅིག་གིས་མ་ཆོགས་པ། དཔངས་ཆ་ཕྲན་གཉིས། དེའི་སྐེད་པར་རྩིབས་ཀྱི་དཔངས་ཆ་ཕྲན་གཅིག ཞེང་ལ་ཆ་ཕྲན་གཉིས་ཡོད་པས་བསྐོར་བ་ནི། རྗེ་བཙུན་གྱིས། ས་གཞིའི་སྟེང་དུ་རྩིབས་ཀྱི་ངོ་བོ་ཡར་ལ་ཅུང་ཟད་འཕགས་པ་ཡིན་ལ། རྩིབས་སོ་སོའི་མཐོ་དམན་གྱི་ཚད་ནི། ལྷ་སོ་སོའི་པུས་མོར་སླེབ་པ་ཙམ་ཡིན་ཅིང་ཞེས་པའི་དོན་ཏོ། །རྩིབ་ཀྱི་རྩེ་མོར་མུ་ཁྱུད་ཆ་ཕྲན་ཕྱེད་ཀྱིས་བསྐོར་བའི་སྟེང་དུ་རྭ་བ་དཔངས་སུ་ཆ་ཕྲན་གཉིས་པས་བསྐོར་བ་ནི། རྭ་བའི་ཚད་ལྷ་སོ་སོའི་སྐེད་པར་སླེབ་པ་ཞེས་གསུངས་པའི་དོན་ནོ། །ཨིནྡྲ་ནཱི་ལའི་ས་གཞིར། རྩིབས་བརྒྱད་ཀྱི་བར་མཚམས་སུ། རྭ་བ་དང་མཉམ་པའི་ཀ་རྟེན་བཙུགས་ནས། དེའི་སྟེང་དུ་ཀ་བ་ཆ་ཕྲན་ལྔ་པ་རེ་རེ་འཛུགས་པ་ནི། ཀ་བའི་ཚད་ལྷ་སོ་སོའི་དབུའི་སྟེང་ནས་ཡར་ཁྲུ་གང་འཕགས་པ་ཞེས་པའི་དོན་ཏོ། །དེ་དག་གི་སྟེང་དུ་ཤིང་བརྩེགས་ཆ་ཕྲན་གཅིག་དང་ཆ་ཕྲན་གཅིག་གི་ལྔ་ཆ་གཅིག དེའི་སྟེང་དུ་གདུང་ཟླུམ་པོ་ཆ་ཕྲན་གཅིག་ཡོད་པས་བསྐོར་ཏེ། དེ་དང་ཕྱིའི་གསེར་གྱི་གདུང་ལེབ་ཐད་མཉམ་པའི་སྟེང་དུ། ཕྱམ་བཏང་ནས་ཐོག་ཕུབ་སྟེ། གསེར་གྱི་གདུང་ལེབ་ཀྱི་ཕྱིར་བྱ་འདབ་ཆ་ཕྲན་གཉིས་འཕྱར་བའི་འོག་ཕྱོགས་སུ་རིལ་བ་སྤྱི་བླུགས་མཆུ་བཅད་པ་ཐུར་དུ་བསྒྲིགས་པ་ལྟ་བུའི་མདའ་ཡབ་ཆ་ཕྲན་གཉིས་དང་། སྟེང་དུ་རིན་པོ་ཆེའི་དྲྭ་མིག་གསེང་མའི་པུ་ཤུ་ཆ་ཕྲན་གཉིས་པས་བསྐོར་བ་ལ། གོས་དང་། འཕན་དང་། མེ་ཏོག་གི་ཕྲེང་བ་དང་། ཟླ་བ་རླུང་གིས་བསྐྱོད་པ་ལ་སོགས་པའི་རྒྱན་དུ་མས་བསྐོར་བ་ནི། དམ་ཚིག་གི་འཁོར་ལོའི་ཐོག་ཕུབ་ཡིན་ལ། འདིའི་དྲྭ་བ་དང་། ཀ་བ་དང་། གདུང་རྣམས་ནི། སྐུ་འཁོར་གྱི་ཡིན་པས། འཁོར་ལོས་མཚན་པར་བྱའོ། །ཐོག་ཕུབ་གཉིས་པ་ནི་སྐུ་འཁོར་གྱི་ལྟེ་བའི་སྟེང་དུ། གསུང་འཁོར་དམར་པོ། ལྟེ་བའི་རྒྱར་ཆ་ཆེན་ཕྱེད་དང་བཞི། དཔངས་སྔ་མ་དང་འདྲ་བ་ལ། ལྟེ་བའི་སྐེད་པར་རྩིབས་དང་མུ་ཁྱུད། རྒྱ་དཔངས་སྔ་མ་དང་འདྲ། མུ་ཁྱུད་ཀྱི་སྟེང་དུ་རྭ་བ་དང་། ཀ་བའི་དཔངས་ཡང་སྔ་མ་དང་འདྲ་ཞིང་། དེའི་སྟེང་དུ་ཤིང་བརྩེགས་ཆ་ཕྲན་རེ་རེའི་སྟེང་དུ་གདུང་ཟླུམ་ཆ་ཕྲན་གཅིག་པ་བཀོད་དོ། །ཡང་སྐུ་འཁོར་གྱི་གདུང་ཟླུམ་གྱི་སྟེང་དུ། རྩིག་པ་དཔངས་སུ་ཆ་ཕྲན་གཅིག ཕ་གུ་དང་། དྲྭ་ཕྱེད་དང་། གསེར་གྱི་གདུང་ལེབ་ཟླུམ་པོ་གསུམ་ཆར་ལ་དཔངས་སུ་ཆ་ཕྲན་གཅིག་བྱས་པ་དང་། ནང་གི་གདུང་ཟླུམ་མཉམ་པའི་སྟེང་དུ། ཐོག་ཕུབ་སྟེ། འདིའི་ཐོག་ནི་སྐུ་འཁོར་གྱི་ཡིན་པས་འཁོར་ལོས་མཚན་པ་དང་། རྭ་བ་སོགས་ནི་གསུང་འཁོར་གྱི་ཡིན་པས་པདྨས་མཚན་པར་བྱའོ། །ཐོག་ཕུབ་གསུམ་པ་ནི་གསུང་འཁོར་གྱི་ལྟེ་བའི་སྟེང་དུ། ཐུགས་ཀྱི་འཁོར་ལོ་སྔོན་པོ། ལྟེ་བའི་རྒྱར་ཆ་ཆེན་གཉིས་དང་། ཆ་ཕྲན་གཅིག དཔངས་ཚད་སྔ་མ་དང་འདྲ། དེའི་སྐེད་པར། རྩིབས་དང་། མུ་ཁྱུད་དང་། རྒྱ་དཔངས་སྔ་མ་དང་འདྲ་བའི་མུ་ཁྱུད་ཀྱི་སྟེང་དུ། རྭ་བ་དང་། ཀ་བ་དང་། ཤིང་བརྩེགས་དང་། གདུང་ཟླུམ་རྣམས་ཀྱང་ཚད་སྔ་མ་བཞིན་དུ་བྱའོ། །ཡང་གསུང་འཁོར་གྱི་གདུང་ཟླུམ་གྱི་སྟེང་དུ། རྩིག་པ་ཆ་ཕྲན་གཅིག ཕ་གུ་དྲྭ་ཕྱེད། གདུང་ལེབ་གསུམ་ལ་ཆ་ཕྲན་གཅིག་སྟེ། དེ་དང་ནང་གི་གདུང་ཟླུམ་ཐད་མཉམ་པའི་སྟེང་དུ་ཐོག་ཕུབ་པ་ནི་གསུང་འཁོར་གྱི་ཡིན་པས། པདྨས་མཚན་པ་བྱ་ལ། རྭ་བ་སོགས་ནི་ཐུགས་འཁོར་གྱི་ཡིན་པས་རྡོ་རྗེས་མཚན་པར་བྱའོ། །ཐོག་ཕུབ་བཞི་པ་ནི། ཐུགས་འཁོར་གྱི་ལྟེ་བའི་སྟེང་དུ། སྣ་ཚོགས་པདྨ་ཡུ་བ་དང་ལྟེ་བའི་རྒྱར་ཆ་ཆེན་གཅིག་པ་ཡུ་བའི་དཔངས་ལ་ཆ་ཕྲན་ཕྱེད་ཡོད་པའི་སྟེང་དུ་འདབ་མ་རྒྱ་དཔངས་སྔར་གྱི་རྩིབས་དང་འདྲ་བའི་རྩེ་མོར་མུ་ཁྱུད་ཆ་ཕྲན་ཕྱེད་པའི་སྟེང་དུ། རྭ་བ་དང་། ཀ་བ་དང་། ཤིང་བརྩེགས་དང་། གདུང་ཟླུམ་རྣམས་སྔ་མ་དང་ཚད་མཉམ་པའོ། །ཡང་ཐུགས་འཁོར་གྱི་གདུང་གི་སྟེང་དུ་རྩིགས་པ་ནས་གདུང་ལེབ་ཀྱི་བར། སྔ་མ་ལྟ་བུ་བྱས་པ་ཐད་མཉམ་པའི་སྟེང་དུ་ཐོག་ཕུབ་པ་ནི། ཐུགས་འཁོར་གྱི་ཡིན་པས། རྡོ་རྗེས་མཚན་པ་བྱ་ལ། རྭ་བ་སོགས་ནི་བདེ་ཆེན་གྱི་འཁོར་ལོའི་ཡིན་པས་གྲི་གུག་གིས་མཚན་པ་བྱའོ། །ཐོག་ཕུབ་ལྔ་པ་ནི་བདེ་ཆེན་འཁོར་ལོའི་གདུང་ཟླུམ་གྱི་སྟེང་དུ་རྩིག་པ་ཆ་ཕྲན་ཕྱེད་དང་གཉིས་ལ། ལྔ་ཆ་གཅིག་གིས་མ་ཆོགས་པ། དེའི་སྟེང་དུ་ཕ་གུ། དྲྭ་ཕྱེད། གདུང་ལེབ་གསུམ་ལ་ཆ་ཕྲན་ཕྱེད་དང་གཉིས་བྱས་པའི་སྟེང་དུ་ཐལ་གདུང་བཞི། མིག་མངས་རིས་སུ་བྲིས་པའི་དཔངས་ལ་ཆ་ཕྲན་གཅིག དེའི་རེ་མིག་བརྒྱད་ཕུབ་པ་ནི། བདེ་ཆེན་འཁོར་ལོའི་ཐོག་ཕུབ་ཡིན་ནོ། །ཐོག་ཕུབ་དྲུག་པ་ནི། དེའི་དབུས་ཀྱི་གདུང་གྲུ་བཞིའི་སྟེང་དུ། རྩིག་པ་ཆ་ཕྲན་ཕྱེད་དང་གཉིས། དེའི་སྟེང་དུ་དྲྭ་ཕྱེད་ཕ་གུ་གསེར་གྱི་གདུང་ལེབ་རྣམས་ལ་ཆ་ཕྲན་ཕྱེད་དང་གཉིས་བྱས་པའི་སྟེང་དུ། ཐོག་གྲུ་བཞིར་ཕུབ་པ་ནི་གཙོ་བོའི་ཐོག་ཕུབ་སྟེ། རྡོ་རྗེ་ནོར་བུ་རིན་པོ་ཆེ་ཆ་ཆེན་གཅིག་པའི་ཏོག་གིས་སྤྲས་པའོ། །ཐོག་ཕུབ་གོང་མ་རྣམས་ལ་ཡང་། བྱ་འདབ་དང་། མདའ་ཡབ་དང་། པུ་ཤུ་རྣམས་ཀྱང་། ཇི་ལྟར་འཚམས་པ་བྱ་ཞིང་། གདུགས་དང་རྒྱལ་མཚན་ལ་སོགས་པའི་རྒྱན་སྣ་ཚོགས་ཀྱིས་སྤྲས་པར་བྱའོ། །ཡང་ཀ་བ་རྣམས་ཀྱི་ཕྱི་སོ་དང་། རྭ་བ་རྣམས་ཕྱི་སོ་མཉམ་པོར་བྱས་པའི་ཀ་བའི་བར་མཚམས་སུ་རྭ་བས་བསྐོར་བ་འབྱུང་ཞིང་། ཀ་བའི་ཐད་དུ་ཀ་གདན་རང་རང་གི་འོག་མའི་ལྟེ་བའི་ཐད་དུ་འཛུགས་པ་ཡང་ཐམས་ཅད་ལ་འདྲ་འོ། །འདིའི་ཐོག་གོང་མ་ནས་སྣ་ཚོགས་རྡོ་རྗེའི་ལྟེ་བའི་བར་དང་། རྩིག་པའི་ནང་ངོས་ཀྱི་རྒྱ་མཉམ་པ་ནི་ལུས་མི་མཉམ་པ་མེད་པ་རྣམ་པར་དག་པ་མཚོན་ལ། འཁོར་ལོ་སོ་སོའི་ལྟེ་བ་སོགས་ཀྱི་གཅོད་ཚུལ་ནི། རྗེ་བཙུན་གྱིས་ནག་པོ་དཀྱིལ་ཆོག་ལས། ཕྱིའི་དཀྱིལ་འཁོར་གྱི་དབྱིབས་ནི་དཀྱིལ་འཁོར་གཞན་དང་མཐུན་ནོ། །ནང་མ་ཆ་ཆེན་བཞི་གནས་པ་ལས། ཆ་ཆེན་དང་པོ་གཅིག་བདེ་ཆེན་འཁོར་ལོ་ལ་བཏང་སྟེ། དེ་ཡི་ཡང་ཕྱེད་ལྟེ་བ་ལ། ཕྱེད་འདབ་མ་ལ། དེ་ནས་ཆ་ཆེན་གཉིས་ལ་ཐག་པ་བརྐྱང་བ་ཆ་གསུམ་མཉམ་དུ་བྱས་ལ། དབུས་སུ་ཕུར་བུ་བཏབ་ལ། དེ་ལ་སྲད་བུ་སྲ་བ་ཉིས་ལྟབ་ཏུ་བྱས་ལ། རྡོ་རྒྱུས་ལ་སོགས་པས་འཁོར་ལོ་རེ་བསྐོར། དེ་ནས་རང་རང་གི་གནས་ཀྱི་ནང་དུ་པན་རེག་གི་ཕྱེད་ཚད་ཙམ་རེ་བསྐོར་ལ། ལྟེ་བའི་གེ་སར་དང་། གྲི་གུག་ལ་སོགས་པའི་རྭ་བ་བྱའོ། །རྡོ་རྒྱུས་ལ་སོགས་པས་པདྨ་འཁོར་ལོའི་རྩིབས་དང་། རྐང་པའི་རི་མོ་བྲིའོ། །ཆ་ཆེན་གཅིག་དམ་ཚིག་གི་འཁོར་ལོ་སྟེ་ལྷ་སྣམ་ལ་བཞག་གོ །སྤྱོད་པ་བ་ཉིད་ཀྱི་དགོངས་པའོ་ཞེས་གསུངས་པའི་དོན་ཏེ། བདེ་ཆེན་འཁོར་ལོའི་ནང་དུ་པན་རེག་གི་ཕྱེད་ཚད་བསྐོར་རྒྱུ་མེད་པས་དེ་ཉིད་ཕྱི་ནས་བསྐོར་ཏེ། ལྷག་མ་ཆ་ཕྲན་ཕྱེད་དང་བརྒྱད་ལ་དུམ་བུ་གསུམ་དུ་བྱས་ནས་བསྐོར་བའི་ཚེ་ཇི་ལྟ་བ་བཞིན་འགྲིག་པའོ། །ཡང་དཱ་རི་ཀ་པས། ཚངས་པའི་ཐིག་གི་ངོས་དེ་རུ། །རེ་རེ་ལྔར་བྱ་ཉི་ཤུ་གདབ། །ཕོ་བྲང་ལ་གཉིས་གེ་སར་གཅིག །གསུམ་གསུམ་གྱི་ནི་འཁོར་ལོ་རྣམས། །ཀ་བ་རྡོ་རྗེ་གྲི་གུག་ཕྲེང་། །པདྨ་འཁོར་ལོ་རེ་རེ་བྱ། །གཅིག་གིས་ཕྱི་ཡི་ཁྱམས་ཡིན་ཏེ། །ཞེས་གསུངས་པ་ལྟར་གཅོད་ན་ཡང་། དཔངས་ཚད་ནི་སྔ་མ་ལས་མ་འདས་སོ། །ཕྱིའི་རྩིག་པའི་རྩ་བར་འདོད་ཡོན་གྱི་སྣམ་བུ་ཞེས་ཀྱང་བྱ། ཁྱམས་ཞེས་ཀྱང་བྱ་བ་ཁ་དོག་དམར་པོ། རྒྱ་དཔངས་ཆ་ཕྲན་གཉིས་པ། དཀྱུས་སུ་སྒོ་ཁྱུད་ཀྱི་རྒྱབ་ནས། གཅིག་ཤོས་ཀྱི་སྒོ་ཁྱུད་ཀྱི་རྒྱབ་ཀྱི་བར་དུ་སོང་བའི་སྟེང་དུ། རིག་མ་བཅུ་དྲུག་ཕྱོགས་རེ་རེར་བཞི་བཞི་སྟེ། ཐམས་ཅད་ཀྱང་འཛུམ་པའི་བཞིན་ལ་མཛེས་པའི་རྒྱན་དང་ལྡན་པ་རྣམས་ལག་ན་རང་རང་གི་མཆོད་རྫས་འཛིན་པ་ཞལ་ནང་དུ་བལྟས་ནས་བཅོམ་ལྡན་འདས་ལ་མཆོད་པ་འབུལ་བའོ། །བཞི་པ་སྒོ་ལ། དརྤན་གྱིས་སྒོ་ཆེ་བ་ལ་དཔངས་སུ་ཆ་ཆེན་གསུམ་དང་། ཆུང་བ་ལ་དཔངས་སུ་ཆ་ཆེན་གཉིས་ཡོད་པར་གསུངས་པ་ལས། འདིར་རྟ་བབས་དཔངས་སུ་སྒོ་ཚད་གཅིག་མའི་ཚེ། ཕྱི་མ་ཉིད་ཁས་ལེན་དགོས་པས། རྩིག་པའི་དཀྱིལ་དུ་རྒྱར་ཆ་ཆེན་གཅིག་པ། དཔངས་སུ་ཆ་ཆེན་གཉིས་པ་བཅད་པའི་སྒོའི་བུག་པ་བྱས་ནས། གཡས་གཡོན་གྱི་རྩིག་པ་ལྔ་ཆར་གྱི་རྒྱུན་མདུན་ཕྱོགས་སུ་ཆ་ཆེན་གཅིག་སོང་བ་ནི་སྒོ་ཁྱུད། དེ་ནས་གཡས་གཡོན་དུ་ནང་ངོས་ཀྱི་ཆ་ཕྲན་གཉིས་གཉིས་སོང་བ་ནི་སྒོ་འགྲམ། དེ་ནས་མདུན་ཕྱོགས་སུ་ནང་ངོས་ཀྱི་ཆ་ཕྲན་གསུམ་གསུམ་སོང་བ་ནི་སྒོ་ལོགས་ཡིན་ནོ། །རྗེ་བཙུན་གྱིས། སྒོ་ནི་ས་ལ་བྲིས་པ་བཞིན་བརྩེགས་ནས་ཀྱང་ཡོད་པར་འདོད་དོ་ཞེས་སོགས་ཀྱི་དོན། སྤྱིར་སྒོ་ཁང་བྲིས་པ་བཞིན་བརྩེགས་ནས་ཀྱང་ཡོད་པར་འདོད་ལ། དམིགས་བསལ་བྲི་བྱའི་ཡ་ཕུབས་ནི་སྒོའི་དངོས་གཞིའི་ཐད་ཀྱི་རྩིག་རྒྱུན་མ་ཆད་པར་མཚོན་པའི་ཕྱིར། དེར་བྲིས་པ་ཡིན་གྱི། བསྒོམ་བྱ་ལ་ཡ་ཕུབས་ཀྱི་ཐད་ཀྱི་རྩིག་པ་མེད་པར་འདོད་དོ། །འོ་ན་བསྒོམ་བྱ་ལ་རྩིག་རྒྱུན་ཆད་པར་འགྱུར་རོ་སྙམ་ན་མ་ཡིན་ཏེ། སྒོའི་སྟེང་དུ་ཡང་ཆ་ཆེན་གཉིས་ཀྱི་རྩིག་རྒྱུན་མ་ཆད་པར་ཡོད་པའི་ཕྱིར་རོ། །དེས་ན་སྒོ་ཁང་གི་རྩིག་པའི་དཔངས་ནི་ཆ་ཆེན་གཉིས་པ་ཡིན་ལ། སྒོ་ལོགས་ཀྱི་རྩིག་གདོང་ནི་མཉམ་པར་བཅད་པ་ཡིན་གྱི། གསེགས་དྲས་ནི་མི་དགོས་སོ། །ལྔ་པ་རྟ་བབས་ནི། རྗེ་བཙུན་གྱིས་སྒོ་ཁང་གི་སྟེང་འགེབས་པ་ནི་རྟ་བབས་ཡིན་པས་ཞེས་སོགས་ཀྱི་དོན། རྟ་བབས་ཀྱིས་སྒོ་ཁང་གི་སྟེང་འགེབས་དགོས་པས། སྒོ་ལོགས་ཀྱི་ཕྱི་མཐའ་ཆ་ཕྲན་རེ་རེ་སོང་བའི་སར་ནང་ངོས་འདོད་སྣམ་ལ་རེག་པ་དང་། ཕྱི་ངོས་སྣ་ཚོགས་རྡོ་རྗེའི་ལྟེ་བ་ཟད་མཚམས་སུ་སྟེགས་བུ་གྲུ་བཞི་དཔངས་སུ་ཆ་ཕྲན་གཅིག དེའི་སྟེང་དུ་བུམ་པ་ཆ་ཕྲན་གཅིག དེའི་སྟེང་དུ་ཀ་བ་ཆ་ཕྲན་ལྔ་པ་བཞི་འཛུགས་སོ། །དེ་དག་གི་སྟེང་དུ་ཞུ་རིང་ཐུང་གཉིས་ལ། དཔངས་སུ་ཆ་ཕྲན་གཅིག སྲིད་དུ་ཞུ་རིང་ཆ་ཕྲན་གཉིས་ཡོད་པ། རྩེ་མོ་ཀ་རྒྱན་དང་། མུན་པའི་ཕྱེད་ནོན་པའི་ཚུལ་གྱིས་ཡོད་པའོ། །དེའི་སྟེང་དུ་མདུན་ངོས་ལ་གདུང་དཀྱུས་སུ་ཆ་ཆེན་བཞི། དཔངས་སུ་ཆ་ཕྲན་གཅིག་ཡོད་པ་དང་། ཀ་བ་ནང་མ་གཉིས་ཀྱི་སྟེང་དུ་ཡང་དེ་དང་མཉམ་པའི་གདུང་འགོད་དོ། །དེའི་སྟེང་དུ་རྟ་བབས་སྣམ་བུ་འོག་མ་དཀྱུས་སུ་ཆ་ཆེན་བཞི། ཞེང་དུ་ཆ་ཕྲན་ལྔ་ཡོད་པས་བཀབ། དེའི་སྟེང་དུ་སྣམ་བུ་གོང་མ་གསུམ་གཡས་གཡོན་དང་། མདུན་ངོས་གསུམ་ཆ་ཕྲན་རེ་རེ་ཐུང་བ་བརྩེགས་ཏེ། མཆོད་རྟེན་གྱི་བང་རིམ་ལྟར་ཡོད་པའི་སྟེང་མ་ལ་དཀྱུས་སུ་ཆ་ཕྲན་བཅུ་དང་། ཞེང་དུ་ཆ་ཕྲན་གཉིས་ཡོད་པའོ། །དེའི་དབུས་སུ་པདྨ་འཁོར་ལོ་གདུགས་གསུམ་ཆ་ཆེན་གཅིག་གི་ཚད་དང་། གཡས་གཡོན་དུ་རི་དྭགས་ཕོ་མོ་གཉིས་དང་། མཇུག་མའི་ངོས་སུ་གདུགས་འཛིན་པའི་སྤྲེའུ་གཉིས་དང་། སྣམ་བུའི་རིམ་པ་རྣམས་ལ་རྒྱལ་མཚན་དང་། བ་དན་ལ་སོགས་པའི་རྒྱན་སྣ་ཚོགས་ཀྱིས་བརྒྱན་པའོ། །སྣམ་བུ་བཞི་ཆར་གྱི་ནང་ངོས་མཉམ་པ་དང་། སྒོའི་སྟེང་གི་ལོགས་ཀྱི་རྩིག་པའི་བར་ན་ཆ་ཕྲན་གཉིས་སྟོང་པར་ཡོད་པ་ནི་རྩིག་པའི་དངོས་གཞི་དང་། རྟ་བབས་ཀྱི་བར་ན་ནམ་མཁའ་སྟོང་པ་དང་བཅས་པའི་དོན་ཡིན་ཞིང་། སྒོ་ཁང་གི་རྩིག་པ་དང་། རྟ་བབས་ཀྱི་བར་ན་ཆ་ཕྲན་གཅིག་ཡོད་པ་ནི་ཀ་བ་བཞིས་མཐོ་བར་བཏེག་པ་ཞེས་དང་། ཀ་བ་བཞི་དགོས་པའི་དོན་ཀྱང་ཡིན་ནོ། །ཀ་བའི་གདན་ལ་སྟེགས་བུ་དང་། བུམ་པ་ཡོད་པ་ནི་ཀླུའི་བློས། བུམ་པ་ཀ་བའི་སྟེང་གནས་པའི། །སྒོ་ལ་སུམ་འགྱུར་རྟ་བབས་ཏེ། །ཞེས་དང་། ཕྲེང་བར། སྟེགས་བུ་བུམ་པ་ལ་གནས་པའི། །རྟ་བབས་ཀ་བ་དྲང་པོར་བྱ། །ཞེས་པས་འགྲུབ་ཅིང་། རྟ་བབས་འདེགས་པའི་གདུང་དགོས་པ་ནི། རིན་ཆེན་འབར་བར། ཡ་ཕུབ་ཐ་མ་རྡོ་རྗེའི་གདུང་། །ཞེས་པས་འགྲུབ་བོ། །འདི་ཉིད་བྲི་བྱ་ལ་མེད་དོ་སྙམ་ན། ཡ་ཕུབ་དང་། རྟ་བབས་ཀྱི་བར་གྱི་ཆ་ཕྲན་གཅིག་པོ་དེ་ཉིད། སློབ་དཔོན་འདིས་གདུང་གི་ཐིག་ཏུ་འདོད་དེ། ཡ་ཕུབ་ཐ་མ་རྡོ་རྗེའི་གདུང་། །བདུན་པ་རྟ་བབས་དག་ཏུ་འགྱུར། །ཞེས་པ་བྲི་བྱའི་སྐབས་སུ་བཤད་པའི་ཕྱིར་རོ། །ཤྲ་དྡྷས་གདུང་ཐིག་དང་། མུན་སྣམ་གང་གི་ཡང་གསལ་ཁ་མེད་ཅིང་། དབང་ཆུར་ནམ་མཁའ་ཞེས་བཤད་པས་མུན་སྣམ་དུ་བཞེད་པ་གདམ་ཁ་ཅན་དེ་གང་ལྟར་ཡང་བསྒོམ་པ་ལ་ནི་ཁྱད་མེད་དོ། །གུན་དྷ་རི་ནི། སྣམ་བུ་འོག་མའི་ནང་ངོས་དཔངས་སུ་ཆ་ཕྲན་ཕྱེད་ཙམ་གྲུས་པའི་དབྱིབས་མཛེས་པོ་འབྱུང་ལ། དྲྭ་བ་དང་དྲྭ་བ་ཕྱེད་པ་ལ་སོགས་པའི་གནམ་རྒྱན་སྣ་ཚོགས་པ་འདོགས་པའོ་ཞེས་པ་འདི་རྗེ་བཙུན་གྱི་དགོངས་པའོ་སྙམ་དུ་ཁོ་བོ་སེམས་སོ། གཞལ་ཡས་ཁང་དེར་ལྷ་སུམ་ཅུ་སོ་བདུན་ལ། པདྨ་དང་ཉི་མའི་གདན་རེ་རེ་ནི་འདྲ་ལ། ཁྱད་པར་གཙོ་བོ་ལ་འཇིགས་བྱེད་དང་། དུས་མཚན་གྱི་གདན་དང་། སྒོ་མཚམས་མ་བརྒྱད་ལ་ཡི་དྭགས་ཀྱི་གདན་ཏེ། སློབ་དཔོན་གྱི་གཞུང་ལས། སྒོ་མཚམས་མ་བརྒྱད་བཤད་མ་ཐག་ཏུ། ཐམས་ཅད་ཀྱང་ཡི་དྭགས་ཀྱི་གདན་ལ་བཞུགས་པ། སེམས་ཅན་གྱི་དོན་མཛད་པ་ལ་བརྩོན་པ་ཞེས་གསུངས་པའི་དོན། འཁོར་གྱི་ལྷ་ཐམས་ཅད་ལ་སྦྱར་ན། སྔོན་བྱུང་གི་རྣམ་འཕྲུལ་དང་འགྲིག་པར་སྣང་ཡང་། འདིའི་འགྲེལ་པར། ཡི་དྭགས་ཀྱི་གདན་ལ་གནས་ཤིང་། འཇིགས་པ་ཆེན་མོ་ཞེས་བྱ་བ་ནི་བརྒྱད་ཆར་ལ་ཡང་རིག་པར་བྱའོ། །དུར་ཁྲོད་དུ་གནས་པ་ཅན་ཉིད་ཀྱི་ཕྱིར་འདི་རྣམས་ཀྱི་གདན་རོ་ཉིད་དོ་ཞེས་གསུངས་པ་ལ་བརྟེན་ནས། རྗེ་བཙུན་དང་། འཕགས་པས་ཀྱང་སྒོ་མཚམས་མ་བརྒྱད་ཁོ་ན་ལ་སྦྱར་བར་མཛད་དོ། །གཉིས་པ་བརྟེན་པ་བཤད་པ་ལ་གཉིས་ཏེ། གཙོ་བོ་ཡབ་ཡུམ་གྱི་རྣམ་པ། འཁོར་གྱི་ལྷ་རྣམས་ཀྱི་རྣམ་པ་བཤད་པའོ། །དང་པོ་ནི། སློབ་དཔོན་གྱི་གཞུང་ལས། བཅོམ་ལྡན་འདས་ཞལ་བཞི་པ། སྤྱན་གསུམ་པ། ཕྱག་བཅུ་གཉིས་པ། སྐུ་མདོག་མཐིང་ག གཡས་བརྐྱང་བས་བཞུགས་པ། འཇིགས་བྱེད་དང་དུས་མཚན་མནན་པ། རྡོ་རྗེ་ཕག་མོ་ལ་འཁྱུད་པའི་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པ། ཕྱག་གཞན་གཉིས་ཀྱིས་གླང་པོ་ཆེའི་ལྤགས་པའི་ན་བཟའ་བསྣམས་པ། གཡས་པའི་ཕྱག་གསུམ་པ་ལ་ཌཱ་མ་རུ། བཞི་པ་ལ་དགྲ་སཏྭ། ལྔ་པ་ལ་གྲི་གུག དྲུག་པ་ལ་མདུང་རྩེ་གསུམ་པ་བསྒྲེང་བ། གཡོན་པའི་ཕྱག་གསུམ་པ་ལ་ཁ་ཊྭཱཾ་ག་རྡོ་རྗེས་མཚན་པ། བཞི་པ་ལ་ཁྲག་གིས་བཀང་བའི་ཐོད་པ་དང་། ལྔ་པ་ལ་རྡོ་རྗེ་ཞགས་པ། དྲུག་པ་ལ་ཚངས་པའི་མགོ་བོ་བསྣམས་པ། རལ་པ་དང་ཅོད་པཎ་གྱིས་བརྒྱན་པ། ཐོད་པའི་ཕྲེང་བའི་ཐོད་ཅན། ཟླ་བ་ཕྱེད་པར་འཇོག་པ། སྣ་ཚོགས་རྡོ་རྗེས་མཚན་པའི་དབུ་རྒྱན་ཅན། ཞལ་རྣམ་པར་འགྱུར་བ། མཆེ་བ་གཙིགས་ཤིང་འཇིགས་པར་བྱེད་པ། སྒེག་པ་ལ་སོགས་པའི་ཉམས་དང་ལྡན་པ། སྐུ་མདོག་མཐིང་ཁར་བསམ་པར་བྱའོ། །ཞལ་གཡས་པ་ཤིན་ཏུ་སེར་བ། རྒྱབ་ཞལ་པདྨ་རཱ་ག་ལྟ་བུའི་མདོག་ཅན། གཡོན་པ་མརྒད་ལྟ་བུའི་མདོག་ཅན། སྟག་གི་ལྤགས་པའི་ན་བཟའ་བསྣམས་པའོ། །མི་མགོ་རློན་པའི་ཕྲེང་བ་འཕྱང་བ། རྣ་ཆ་དང་། གདུ་བུ་དང་། མགུལ་རྒྱན་དང་། སྤྱི་གཙུག་ནོར་བུས་བརྒྱན་པ། མཆོད་ཕྱིར་ཐོགས་འཆང་བ། ཐལ་བ་དང་ཕྱག་རྒྱ་དྲུག་སྟེ། ཕ་རོལ་ཏུ་ཕྱིན་པ་དྲུག་རྣམ་པར་དག་པའི་ཕྱིར། ཕྱག་རྒྱ་དྲུག་གིས་རྒྱས་བཏབ་པའོ། །དེའི་སྤྱན་སྔར་བཅོམ་ལྡན་འདས་མ་ཡུམ་སྐུ་མདོག་དམར་མོ། ཞལ་གཅིག་པ། སྤྱན་གསུམ་པ། ཕྱག་གཉིས་པ། སྐྲ་གྲོལ་བ། གཅེར་བུ། དུམ་བུའི་སྐ་རགས་ཀྱིས་བརྒྱན་པ། ཕྱག་གཡོན་པས་འཁྱུད་ནས་གདུག་པ་དང་། བདུད་ལ་སོགས་པའི་ཁྲག་གིས་བཀང་བའི་ཐོད་པ་བསྣམས་པའོ། །གཡས་པས་ཕྱོགས་ཐམས་ཅད་དུ་གདུག་པ་ཅན་རྣམས་ལ་སྡིགས་མཛུབ་བྱེད་པའི་རྡོ་རྗེ་བསྣམས་པ། བསྐལ་པའི་མེ་ལྟ་བུའི་གཟི་བརྗིད་ཆེན་པོ་དང་ལྡན་པའོ། །ཁྲག་ལ་དགྱེས་ཤིང་ཁྲག་འཛག་པ་བྱིན་པ་གཉིས་འཁྱུད་པ། བདེ་བ་ཆེན་པོ་ཐུགས་རྗེའི་བདག་ཉིད་ཅན་ནོ། །ཞེས་གསུངས་སོ། །འདིའི་དོན་ལ་སྐུ་མདོག་དང་ཕྱག་མཚན་བཤད་པ། རྒྱན་ཆ་དང་གདན་བཤད་པ། དེ་དག་གི་རྣམ་དག་བཤད་པ་དང་གསུམ་ལས། དང་པོ་ནི། སྐུ་བྱིན་པོ་མཐིང་ག་ཡིན་ལ། དེའི་སྟོབས་ཀྱིས་རྩ་བའི་ཞལ་ཡང་དེ་དང་འདྲ་ཞིང་། ཞལ་གཞན་གསུམ་ནི་འདིར་ཕྱོགས་མདོག་སྟེ། རྗེ་ས་ཆེན་གྱིས། ནག་པོ་པའི་སྐབས་སུ་བཅོམ་ལྡན་འདས་ཀྱི་ཞལ་ལ་སོགས་པ་འདི་རྡོ་རྗེ་མཁའ་འགྲོའི་རྗེས་སུ་འབྲང་། ལཱུ་ཧི་པ་ཨ་བྷི་དྷ་ནའི་རྗེས་སུ་འབྲང་ཞེས་གསུངས་ཤིང་། རྡོ་རྗེ་མཁའ་འགྲོར་གཡོན་ཞལ་དམར་བ། རྒྱབ་ཞལ་སེར་བ། གཡས་ཞལ་དཀར་བ་གསུངས་ལ། ཨ་བྷི་དྷ་ན་ནས་སྔ་མ་ལྟར་གསུངས་པའི་ཕྱིར་རོ། །ཕྱག་བཅུ་གཉིས་ཀྱི་གྱེས་ཚུལ་ལ། གཡས་གཡོན་གྱི་དྲུག་དྲུག་མདུན་ནས་རྒྱབ་དུ་བསྒྲིགས་པའི་ཚུལ་གྱིས་ཡོད་པ་ལས། དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་ཡུམ་ལ་འཁྱུད་པ། དེའི་འོག་མ་གཉིས་ཀྱིས་གླང་པོ་ཆེའི་ལྤགས་པ་རློན་པའི་ལག་པ་གཡོན་པ་དང་། རྐང་པ་གཡོན་པ་གཉིས་ནས་བཟུང་སྟེ་སྤུ་ཕྱིར་བསྟན་པ། མཐོ་དམན་གཙོ་བོའི་སྨིན་མཚམས་ཀྱི་ཐད་དང་མཉམ་པར། ཕྱག་མཚན་ཐམས་ཅད་ཀྱི་ཕྱི་རོལ་དུ་བརྒྱངས་ཏེ་འཛིན་པའོ། །གཡས་ཀྱི་གསུམ་པ་ན་ཌཱ་མ་རུ་ནི་རྔེའུ་ཆུང་སྐེད་པ་ཉག་པའོ། །བཞི་པ་ན་དགྲ་སཏྭ་ནི་ཡུ་བ་ཁྲུ་གང་ཡོད་པའི་རྩ་བ་དང་རྩེ་མོར་རྡོ་རྗེ་ཕྱེད་པས་མཚན་པ་སྟེང་གི་རྡོ་རྗེ་ཕྱེད་པའི་འོག་ཏུ་དགྲ་སཏྭ་ཁ་བོ་ཆེ་མེ་ལོང་ཕྱེ་བཀས་པ་ལྟ་བུའི་ཟླུམ་པོའི་ཕྱོགས་སུ་ཡུ་བ་འདོགས་པའོ། །ལྔ་པ་ན་གྲི་གུག་ནི་རྡོ་རྗེ་ཕྱེད་པའི་འོག་ཏུ་ཆུ་སྲིན་གྱི་ཁ་ནས་བྱུང་བའི་གྲི་གུག་ཁ་ལ་སོར་བཅུ་གཉིས་ཡོད་པའོ། །དྲུག་པ་ན་མདུང་རྩེ་གསུམ་པ་ནི་ཡུ་བ་ཁྲུ་གང་ཡོད་པའི་རྩ་བ་དང་། རྩེ་མོར་རྡོ་རྗེ་ཕྱེད་པའི་སྟེང་དུ་པདྨ། དེའི་སྟེང་དུ་རལ་གྲིའི་སོ་ལྟ་བུ་གསུམ་ལ་དབུས་རིང་ཞིང་། གཡས་གཡོན་ཅུང་ཟད་ཐུང་བའོ། །གཡོན་གྱི་གསུམ་པ་ན་རྡོ་རྗེས་མཚན་པའི་ཁ་ཊྭཱཾ་ག་ནི་མངོན་བརྗོད་ལས། མཆོད་ཕྱིར་ཐོགས་དང་འབྲེལ་བའི་རྡོ་རྗེ་ཁ་ཊྭཱཾ་ག སྟེང་དུ་རྩེ་མོ་ལྔ་པའི་རྡོ་རྗེ་རབ་ཏུ་འཇིགས་པར་རྡོ་རྗེ་དྲིལ་བུ་རབ་ཏུ་འཕྱང་ཞིང་སྣ་ཚོགས་པའི་བ་དན་རབ་ཏུ་དཔྱངས་པ། དབུས་སུ་སྣ་ཚོགས་རྡོ་རྗེས་མཚན་པ། འོག་ཏུ་རྡོ་རྗེ་རྩེ་གཅིག་པ་ཞེས་གསུངས་ཤིང་། ཨུ་མཱ་པ་ཏི་ཏ་ཏྲས་མཛད་པའི་ཕག་མོའི་སྒྲུབ་ཐབས་སུ་ཐུར་དུ་རྩེ་གཅིག་པ། གྱེན་དུ་རྩེ་ལྔར་ཡོད་པ་ནག་པོ་ཡུ་བ་དང་བཅས་པ། སྐམ་པོ་དང་། རློན་པའི་མགོ་བོ་དང་། སྣ་ཚོགས་རྡོ་རྗེ་དང་། གསེར་གྱི་བུམ་པའི་རྩ་བ་ནས་འཐོན་པ་གཡེར་ཁའི་སྒྲ་དང་བཅས་པའི་སྣ་ཚོགས་ཀྱི་བ་དན་དང་ལྡན་པས་མཛེས་པར་བྱས་པའི་ཁ་ཊྭཱཾ་ག་ཞེས་བཤད། ཕག་མོ་ཤེས་རབ་སྣང་བའི་སྒྲུབ་ཐབས་སུ། དབྱུག་པ་དཀར་པོ་རྩེ་མོར་རྡོ་རྗེ་རྩེ་ལྔ་པ། དེའི་འོག་ཏུ་མི་མགོ་སྐམ་པོ་དང་། རྙིང་པ་དང་། གསར་པ་རློན་པ་དང་། དེའི་འོག་ཏུ་སྣ་ཚོགས་རྡོ་རྗེ། དེའི་འོག་ཏུ་གསེར་གྱི་བུམ་པ། དེ་མན་ཆད་དབྱུག་པ་སྒྲ་དང་བཅས་པའི་དྲིལ་བུ་གཡེར་ཁས་བརྒྱན་པ། བ་དན་སྣ་ཚོགས་ཀྱིས་མཛེས་པར་བྱས་པ་ཞེས་བཤད་དོ། །འདིར་ཕམ་འཐིང་བའི་མན་ངག་བརྒྱུད་པ་ལས། འོག་ཏུ་རྡོ་རྗེ་རྩེ་ལྔ་པ་ཕྱེད་པའི་སྟེང་དུ། ཡུ་བ་བརྒྱད་གཞོགས་སུ་བྱས་པ་ལ་གྱེན་དུ་འཕེལ་ཁ་ཆེ་བའི་རྣམ་པ་ཅན། དེའི་སྟེང་དུ་སྣ་ཚོགས་རྡོ་རྗེ། དེའི་སྟེང་དུ་བུམ་པ། དེའི་སྟེང་དུ་ཐོད་པ་སྐམ་པོ་གསུམ། དེའི་སྟེང་དུ་རྡོ་རྗེ་རྩེ་ལྔ་པ་ཕྱེད་པས་མཚན་པ། བུམ་པའི་འོག་དུ་དྲིལ་བུ་དང་། ཌཱ་མ་རུ་དང་། འཕན་འཕྱང་བ་སྟེ། དེ་ཡང་འོག་གི་རྡོ་རྗེ་རྩེ་ལྔ་པ་ནི་འགྲོ་བ་རྒྱུད་ལྔ་མཚོན་ཅིང་། ཡུ་བ་བརྒྱད་གཞོགས་ནི་འཕགས་ལམ་ཡན་ལག་བརྒྱད་མཚོན་ལ། གྱེན་དུ་འཕེལ་ཁ་ཆེ་བ་ནི་ཡོན་ཏན་གོང་ནས་གོང་དུ་འཕེལ་བ་དེ་མཚོན་ཞིང་། དེས་འགྲོ་བ་རྒྱུད་ལྔ་འདྲེན་པར་བྱེད་པའོ། །གང་དུ་ཞེ་ན་སྐུ་གསུམ་གྱི་སར་འདྲེན་པར་བྱེད་པའོ། །དེ་ཡང་སྣ་ཚོགས་རྡོ་རྗེ་ནི་ཕྲིན་ལས་སྣ་ཚོགས་པས་སེམས་ཅན་གྱི་དོན་བྱེད་པས་སྤྲུལ་སྐུ་མཚོན་ཞིང་། བུམ་པས་ནི་བདེ་བ་ཆེན་པོ་སྟེ་ལོངས་སྐུ་མཚོན་པར་བྱེད་ལ། ཐོད་པ་སྐམ་པོ་གསུམ་གྱིས་ནི་རྣམ་ཐར་སྒོ་གསུམ་གྱི་རང་བཞིན་གྱི་ཆོས་སྐུ་མཚོན་པར་བྱེད་དོ། །དེའི་སྟེང་གི་རྡོ་རྗེ་རྩེ་ལྔ་པས་ནི་སྐུ་གསུམ་པོ་རེ་རེ་ཡང་ཡེ་ཤེས་ལྔ་ལྔའི་བདག་ཉིད་ཅན་དུ་མཚོན་པར་བྱེད་དོ། །དེ་དག་ནི་ཐུགས་ཀྱི་གསང་བ་མཚོན་ལ། དྲིལ་བུ་དང་། ཌཱ་མ་རུ་ནི་གསུང་གི་གསང་བ་བསམ་གྱིས་མི་ཁྱབ་པ་དང་། འཕན་གྱིས་ནི་སྐུའི་གསང་བ་བསམ་གྱིས་མི་ཁྱབ་པ་མཚོན་པ་ཡིན་ནོ་ཞེས་འབྱུང་ངོ་། །བཞི་པ་ན་ཁྲག་གིས་གང་བའི་ཐོད་པ་ནི། ལྷ་དང་ལྷ་མ་ཡིན་གྱི་མགོ་བོའི་ནང་དུ་བདུད་བཞིའི་ཁྲག་བླུགས་པའོ། །ལྔ་པ་ན་རྡོ་རྗེ་ཞགས་པ་ནི་རྩ་བ་དང་། རྩེ་མོར་རྡོ་རྗེ་ཕྱེད་པས་མཚན་པའི་ཞགས་པ་སེར་པོ་གསུམ་ལྟབ་ཏུ་བྱས་ནས་འཛིན་པའོ། །དྲུག་པ་ན་ཚངས་པའི་མགོ་བོ་ནི། མགོ་བོ་གདོང་བཞི་པའི་སྐྲ་ནས་འཛིན་པའོ། །ཕྱག་གི་གྱེས་ཚུལ་དང་། ཕྱག་མཚན་གྱི་འཛིན་ཚུལ་འདི་ལྟ་བུ་ནི། གཞུང་འགྲེལ་དང་། རྗེ་བཙུན་མཆོག་གིས་གསུངས་ཀྱང་། དེང་སང་གི་ཟིན་བྲིས་འགའ་ཞིག་ལས། གཡས་ཀྱི་གསུམ་པ་ན་ཌཱ་མ་རུ་དང་། གཡོན་གྱི་གསུམ་པ་ན་ཚངས་པའི་མགོ་བོ་འཛིན་པ་ནི། ཌཱ་མ་རུའི་སྒྲས་ཚངས་པ་གཏི་མུག་གི་རང་བཞིན་ཡིན་པས། དེ་ལས་སད་པར་བྱེད་པ་མཚོན་ནོ། །གཡས་ཀྱི་བཞི་པ་ན་དགྲ་སཏྭ་དང་། གཡོན་གྱི་བཞི་པ་ན་ཞགས་པ་འཛིན་པས་ནི་ཞགས་པས་བདུད་དང་ཉོན་མོངས་འཆིང་བར་བྱེད་ཅིང་། དེ་དགྲ་སཏྭས་གཅོད་པ་མཚོན། གཡས་ཀྱི་ལྔ་པས་གྲི་གུག་དང་། གཡོན་གྱི་ལྔ་པས་ཐོད་པ་ཁྲག་གིས་གང་བ་འཛིན་པས་ནི། གྲི་གུག་གིས་ལྷ་དང་ལྷ་མ་ཡིན་གྱི་མགོ་བཅད་ནས། དེའི་ནང་དུ་ཁྲག་བླུགས་པ་མཚོན། གཡས་ཀྱི་དྲུག་པས་མདུང་རྩེ་གསུམ་འཛིན་པ་དང་། གཡོན་གྱི་དྲུག་པས་ཁ་ཊྭཱཾ་ག་འཛིན་པ་ནི་ཚར་བཅད་དང་། རྗེས་འཛིན་མཚོན་པ་ཡིན་ནོ་ཞེས་བྲིས་ཤིང་། དེ་ལ་གཡས་ཡས་འགྱེད་དང་། གཡོན་མས་འགྱེད་ཀྱི་ཐ་སྙད་བྱེད་དོ། །འདི་ལྟ་བུ་ནི་བདེ་མཆོག་གི་རྒྱུད་འགྲེལ། གཞུང་ཕྲན། རྗེ་བཙུན་མཆོག་གི་གསུང་རབ་རྣམས་ལས་མི་འབྱུང་ཞིང་། རྗེ་བླ་མ་རྣམས་ཀྱིས་གསུངས་པ་ཡང་མེད་ལ། རྗེ་བཙུན་གྱིས་གསུངས་པའི་རྣམ་དག་དང་ཡང་འགལ་བས་དོར་བར་བྱ་བ་ཡིན་ནོ། །ཁ་ཅིག་དེ་ཨ་བྷྱའི་བཞེད་པ་ཡིན་ཞེས་ཟེར་བར་སྣང་ཡང་། དེས་མཛད་པའི་སྒྲུབ་ཐབས་འཁྲུལ་སྤོང་དང་། རྡོ་རྗེ་ཕྲེང་བའི་བདེ་མཆོག་གི་སྐབས་རྣམས་སུ་ལཱུ་ཧི་པའི་གཞུང་ཇི་ལྟ་བ་བཞིན་མཛད་པར་སྣང་གི འདི་ལྟ་བུའི་ཕྱག་མཚན་འཛིན་ཚུལ་བྱས་པ་གཏན་མི་སྣང་ངོ་། །དེས་ན་ཡས་འགྱེད་མས་འགྱེད་ཀྱི་འཁྲུལ་གཞི་ནི། སློབ་དཔོན་སྤྱོད་པའི་རྡོ་རྗེས། སྒྲུབ་ཐབས་ཀྱི་མཆོད་བརྗོད་དུ། ཡི་དྭགས་གདན་ལ་བཞུགས་ཤིང་ཞལ་རྣམས་ཀུན་ལ་སྤྱན་གསུམ་དང་ནི་ཕག་མོ་དམར་ལུས་ལ། །རྩ་བའི་ཕྱག་གཉིས་ཀྱིས་འཁྱུད་གཉིས་ཀྱིས་མྱུར་དུ་གླང་ཆེན་གཙོ་བོ་རྒྱངས། །ལྷག་མ་གཡོན་པ་ཕྱག་བཞི་ཡིས་ནི་ཁ་ཊྭཱཾ་ཞགས་པ་མི་ཐོད་ཚངས་པའི་མགོ་བོ་འཆང་། །གཡས་པ་གྲི་གུག་རྩེ་གསུམ་དགྲ་སཏྭ་རྔ་ཆུང་འཆང་བའི་ཧེ་རུ་ཀ་ལ་ཕྱག་འཚལ་ཏེ། །ཞེས་གསུངས་པའི་གཞུང་གི་འབྲུ་གནོན་པ་ན། གཡོན་གྱི་བཞི་མདུན་ནས་ཕར་བགྲངས་པ་དང་། གཡས་ཀྱི་བཞི་རྒྱབ་ནས་ཚུར་བགྲང་དགོས་པ་ལ་འཁྲུལ་གཞི་བྱས་པར་སྣང་ཡང་། དེ་ལྟར་བགྲངས་པ་ཉིད་ཀྱིས་འཛིན་ཚུལ་སྔ་མ་ལས་མ་འདས་པར་གྲུབ་བོ། །བླ་ཆེན་འཕགས་པས་གཞུང་འདིའི་དོན་གཡོན་པ་མདུན་ནས་བགྲངས་པ་དང་། གཡས་པ་རྒྱབ་ནས་བགྲངས་པའི་འཛིན་ཚུལ་མཛད་པ་ལ། མཁས་པ་བུས། དེ་ནི་དགོངས་པ་མ་ཡིན་ཏེ། ལང་ཀ་རྒྱལ་བ་བཟང་པོའི་དཀའ་འགྲེལ་ལས་ཀྱང་། གཡས་ཀྱི་གསུམ་པ་དང་། བཞི་པ་དང་། ལྔ་པ་དང་། དྲུག་པ་ན་རྩེ་གསུམ་པ་དང་། དགྲ་སཏྭ་དང་། གྲི་གུག་དང་། ཌཱ་མ་རུ་བསྣམས་པ། གཡོན་གྱི་བཞི་པ་ན་ཁ་ཊྭཱཾ་ག་དང་། ཐོད་པ་དང་། ཞགས་པ་དང་། ཚངས་པའི་མགོ་བོ་བསྣམས་པ་ཞེས་བཤད་དོ། །ཀུན་སྤྱོད་ལས་ཀྱང་། ཕྱག་གཉིས་ཡང་དག་འཁྱུད་པ་དང་། །གཉིས་ཀྱིས་གླང་པོའི་ལྤགས་པ་འཛིན། །དགྲ་སཏྭ་མདུང་རྩེ་གསུམ་གྲི་གུག །ཌཱ་མ་རུ་ནི་གཡས་པས་འཕྱར། །ཁ་ཊྭཱཾ་ག་དང་ཐོད་པའི་ཁྲག །ཞགས་པ་མགོ་བོ་འཕྱར་བ་སྟེ། །གཡོན་པ་རུ་ནི་ཡང་དག་བཤད། །ཞེས་གསུངས་པས་སོ། །ཞེས་དགག་པ་མཛད་པས་ནི། འཕགས་པའི་དགོངས་པ་ལ་ནི་མི་གནོད་དེ། འགྲེལ་པ་དེས་ནི་རྩ་བའི་ཚིག་རིས་བཞིན་དུ་བགྲངས་པར་སྣང་བས། རྩ་བའི་དགོངས་པ། ཕྱག་ལྷག་མ་བརྒྱད་གཡོན་སྐོར་དུ་བགྲངས་པར་གྲུབ་པའི་ཚེ། འགྲེལ་པའི་དགོངས་པ་ཡང་དེ་བཞིན་དུ་གྲུབ་པའི་ཕྱིར་དང་། ནག་པོ་པའི་ལུགས་ཀྱི་ཞལ་ཕྱག་རྡོ་རྗེ་མཁའ་འགྲོ་ལ་བརྟེན་པ་དང་། ལཱུ་ཧི་པའི་ལུགས་ཀྱི་ཞལ་ཕྱག་མངོན་བརྗོད་དགུ་པ་ལ་བརྟེན་པ་ཡིན་གྱི། ཀུན་སྤྱོད་ནས་གསུངས་པ་དེ་གཉིས་གང་ཡང་མ་ཡིན་པར་སྣང་བའི་ཕྱིར་རོ། །ཡུམ་རྡོ་རྗེ་ཕག་མོ་ནི། དེའི་སྤྱན་སྔར་ཞེས་པ་ནས། ཐུགས་རྗེ་ཆེན་པོའི་བདག་ཉིད་ཅན་ནོ་ཞེས་པའི་བར་ཏེ། གཞན་རྣམས་ནི་གོ་སླ་ལ། འདིར་ཕྱག་གཡས་ཀྱིས་རྡོ་རྗེ་བསྣམས་པར་གསུངས་ཤིང་། མན་ངག་གིས་རྡོ་རྗེས་མཚན་པའི་གྲི་གུག་བསྣམས་པར་མཛད་པར་སྣང་བ་ནི། ཀུན་སྤྱོད་ལེའུ་དྲུག་པ་ལས། མདུན་ན་བཞུགས་པའི་བཅོམ་ལྡན་ཡུམ། །ཞལ་གཅིག་འབར་བ་ཆེན་པོ་སྟེ། །འཁྱུད་པ་ཡི་ནི་ཐོད་པ་དག །གདུག་པ་བདུད་ཀྱི་ཁྲག་གང་བསྣམས། །གཡས་པས་རྟག་ཏུ་སྡིགས་མཛུབ་དང་། །མ་རུངས་པ་ཡི་གྲི་གུག་བསྣམས། །ཞེས་གསུངས་པ་ལ་བརྟེན་པ་སྟེ། ནཱ་རོ་པས་མཛད་པའི་རྡོ་རྗེ་རྣལ་འབྱོར་མའི་སྒྲུབ་ཐབས་ལས། ཕྱག་མཚན་རྡོ་རྗེ་གསུངས་ཀྱང་མན་ངག་གིས་རྡོ་རྗེས་མཚན་པའི་གྲི་གུག་དུ་མཛད་པ་ལྟ་བུའོ། །བྱིན་པ་གཉིས་ཀྱིས་འཁྱུད་པ་ནི། སྡོམ་འབྱུང་དང་ཀུན་སྤྱོད་ལས་དངོས་སུ་གསུངས་ཤིང་། འགྲེལ་པར། བྱིན་པས་འཁྱུད་པ་ནི་ཤིང་ལ་འཛེགས་པའི་འཁྱུད་ཐབས་ཀྱིས་གནས་པའོ། །གཉིས་པ་རྒྱན་ཆ་དང་གདན་བཤད་པ་ནི། རལ་པ་དང་ཅོད་པཎ་གྱིས་བརྒྱན་པ་ཞེས་སོགས་དང་། གང་གིས་གཡས་བརྐྱངས་པས་བཞུགས་པས། འཇིགས་བྱེད་དང་དུས་མཚན་མནན་པ་ཞེས་པ་སྟེ། རལ་པ་ནི་ཐོར་ཅོག་ཏུ་བྱས་པའོ། །ཅོད་པཎ་ནི། ཐོད་པ་སྐམ་པོ་ལྔའི་སྟེང་གི་རྩེ་ཕྲན་ནོ། །ཐོད་པའི་ཕྲེང་བའི་ཐོད་ཅན་ནི་ཐོད་པ་སྐམ་པོ་ལྔ་ལྔའོ། །ཟླ་བ་ཕྱེད་པ་འཇོག་པ་ནི་གཡོན་ཕྱོགས་སུ་ཚེས་གཅིག་གི་ཟླ་བ་འཇོག་པའོ། །སྣ་ཚོགས་རྡོ་རྗེས་མཚན་པའི་དབུ་རྒྱན་ཅན་ནི། སྣ་ཚོགས་རྡོ་རྗེ་ཉིད་དབུ་རྒྱན་དུ་བྱས་པ་སྟེ། མཚོག་མའི་སྟེང་གི་རལ་པ་ལ་འཇོག་པའོ། །འདིར་འདོད་འཇོ་མཁན་པོས། འཁྲུལ་སྤོང་ལས་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན་ཞེས་བཤད་པས། སྣ་ཚོགས་རྡོ་རྗེས་མཚོག་མ་ནོན་པར་འདོད་པ་ནི་རྒྱུད་ཀྱི་དོན་མ་ཡིན་ནོ་ཞེས་དང་། མངོན་སྤྱོད་ལས་ཀྱང་། ལན་དུ་མར་ཟླ་ཕྱེད་དུ་གསུངས་པས་ཚེས་གཅིག་གི་ཟླ་བར་འཆད་པ་དོན་མ་ཡིན་ནོ་ཞེས་སྨྲ་བ་ནི་མི་འཐད་དེ། སྡོམ་འབྱུང་ལས། སྤྱི་བོར་སྣ་ཚོགས་རྡོ་རྗེས་མཚན། །ཞེས་གསུངས་པས་སྐྲ་མཚམས་ནས། སོར་བཞི་གཞལ་བ་མཚོག་མ། དེ་ནས་སོར་བཞི་གཞལ་བ་སྤྱི་བོ་ཡིན་པས། དེ་གཉིས་ཀྱི་མཚམས་སུ་སྣ་ཚོགས་རྡོ་རྗེ་བཞག་པ་ན། རེས་མཚོག་མ་དང་། རེས་སྤྱི་བོ་མཚན་པ་ཞེས་པའི་ཐ་སྙད་ཀྱིས་གསུངས་པའི་ཕྱིར་དང་ཟླ་བ་ཕྱེད་པ་ཞེས་པ་ནི། ཟླ་བ་མ་རངས་པ་སྤྱིའི་མིང་ཡིན་གྱི། ཕྱེད་བཀས་ཚེས་བརྒྱད་ཀྱི་ཟླ་བ་ལྟ་བུ་ཁོ་ན་ལ་འཇུག་པ་མ་ཡིན་པའི་ཕྱིར་ཏེ། ཀྱེ་རྡོར་རྩ་སྔགས་ཀྱི་སྔགས་དོན་འཆད་པ་ན། མཆེ་བ་ཟླ་བ་ཕྱེད་པ་ལྟ་བུ་ཞེས་གསུངས་པ་མཆེ་བ་ཚེས་གཅིག་གི་ཟླ་བ་ལྟ་བུ་ཡོད་པའི་དོན་ཡིན་གྱི། ཚེས་བརྒྱད་ཀྱི་ཟླ་བ་ལྟ་བུའི་མཆེ་བ་མི་རིགས་པའི་ཕྱིར་དང་། སྔོན་བྱུང་ལའང་ལྷ་དང་ལྷ་མ་ཡིན་གྱིས་རྒྱ་མཚོ་བསྲུབས་པ་ལས། ཟླ་ཚེས་བྱུང་བ་དབང་ཕྱུག་གི་མགོ་རྒྱན་དུ་བྱས་པ་དེ་ཕྲོགས་ནས། འདིར་བཅོམ་ལྡན་འདས་ཀྱི་དབུར་བརྒྱན་པ་ཡིན་ལ། དེ་ཉིད་གཡོན་ངོས་སུ་འཇོག་པ་ནི་གཡོན་ཕྱོགས་སུ་བྱང་སེམས་འབབ་པ་མཚོན། ཚེས་གཅིག་གི་ཟླ་བ་དཔེར་བྱས་པ་ནི་ཚེས་གཅིག་ནས་བཅོ་ལྔའི་བར་གྱི་ཟླ་བ་གོང་དུ་འཕེལ་བ་ལྟར་བྱང་སེམས་གོང་ནས་གོང་དུ་འཕེལ་བ་མཚོན་དགོས་པའི་ཕྱིར་རོ། །སྡོམ་འབྱུང་ལས་ཀྱང་། ཟླ་བ་ཕྱེད་པས་རྣམ་པར་བརྒྱན། །ཅེས་པ་དང་། སྙིང་པོར་ཟླ་བའི་དཀྱིལ་འཁོར་སྟེ། །ཞེས་པའི་དོན་འགྲེལ་པས། ཟླ་བ་ཚེས་པས་བརྒྱན་པའི་རལ་པའི་ཅོད་པཎ་ནོ་ཞེས་གསུངས་པ་རྣམས་ལ་ཡང་། ཟླ་བའི་དཀྱིལ་འཁོར་རངས་པ་དང་། ཟླ་བ་ཕྱེད་བཀས་གཉིས་ཀ་ལ་འཆད་དགོས་པར་ཐལ་བའི་སྐྱོན་ཡོད་ཅིང་། དེ་ལྟར་འདོད་ན། ཟླ་བ་ཚེས་པ་ཞེས་གསུངས་པ་དང་འགལ་ལོ། །དེས་ན་ཟླ་བ་ཕྱེད་པའི་དོན། ཚེས་བརྒྱད་ཀྱི་ཟླ་བ་ལྟ་བུ་ལ་འདོད་པ་ནི་མན་ངག་མེད་པར་ཚིག་ཙམ་ལ་བརྟེན་པའི་མཚོན་བྱེད་དུ་སྣང་ཞིང་འཇིག་རྟེན་གྱི་ཐ་སྙད་ལ་ཡང་དངོས་པོ་གཅིག་དུམ་བུར་སོང་བའི་ཚེ་ཆེ་ཆུང་གི་ཁྱད་པར་ཡོད་ཀྱང་། ཕྱེད་མར་སོང་ཞེས་པ་ཙམ་ལ་ཡང་མ་དཔྱད་པར་སྣང་ངོ་། །སྟག་གི་ལྤགས་པའི་ན་བཟའ་ནི། རྒྱབ་ཕྱོགས་ནས་གཡོགས་པ་སྟག་གི་ལྤགས་པའི་ཤམ་ཐབས་འཕྱང་བ་དང་། མདུན་ཕྱོགས་ནས་བཅིངས་པ་སྟག་གི་ལྤགས་པའི་ཤམ་ཐབས་བཅིངས་པ་དང་། རྒྱབ་ཕྱོགས་སུ་ལག་པ་དང་། རྐང་པ་མདུད་དེ། མདུན་ཕྱོགས་སུ་གསང་གནས་ཀྱི་འོག་ཏུ་ལྷུག་གེ་ཡོད་པ། སྟག་གི་ལྦགས་པའི་ཤམ་ཐབས་གྲོལ་བ་དང་གསུམ་ལས། ཡུམ་དང་ཞལ་སྦྱོར་གྱི་ཚེ་ཕྱི་མ་ཉིད་ཡིན་གསུང་ངོ་། །རྣ་ཆ་དང་སོགས་ནི་ཕྱག་རྒྱ་དྲུག་སྟོན་ཏེ། དེ་དག་ཀྱང་གང་ཞེ་ན། བརྟག་པ་གཉིས་པའི་ལེའུ་དྲུག་པ་ལས། སྒོམ་པ་པོ་ཡིས་རྣམ་འཛིན་པ། །རྣ་བ་དག་ལ་རྣ་ཆ་བཟང་། །སྤྱི་བོར་འཁོར་ལོ་རྣམ་པར་འཛིན། །ལག་པ་དག་ལ་ལག་གདུབ་གཉིས། །སྐེད་པ་ལ་ཡང་སྐ་རགས་ཉིད། །རྐང་པར་དེ་བཞིན་རྐང་གདུབ་བོ། །ལག་པའི་རྩ་བར་དཔུང་རྒྱན་ཉིད། །མགྲིན་པར་རུས་པའི་ཕྲེང་བ་སྟེ། །ཞེས་པ་དང་། རྐུན་མའི་སྐྲ་ལས་ཅོད་པཎ་བྱས། །དེ་ལས་ཧཱུྃ་བྱུང་སྦྱར་བར་བྱ། །སངས་རྒྱས་ལྔ་ཡི་ཐོད་པ་རྣམས། །རྣལ་འབྱོར་སྤྱོད་པས་རྣམ་པར་འཛིན། །ཐོད་པ་སོར་ལྔ་པ་ཡི་ཚད། །བྱས་པའི་ཅོད་པཎ་འཛིན་པར་བྱེད། །ཅེས་བྱ་བ་དང་། ཐལ་བ་སྐྲ་ཡི་མཆོད་ཕྱིར་ཐོགས། །ཞེས་པ་དང་། དེ་ཉིད་ཀྱི་དོན་གསལ་བར་བྱ་བའི་ཕྱིར། ཀུན་ཏུ་སྤྱོད་པའི་ལེའུ་བཅུ་བདུན་པ་ལས། ཀུན་ཏུ་མི་དབུག་བཅིང་བ་དང་། །གཞུག་དང་དེ་བཞིན་བསྐྱོད་པ་དང་། །འབེབས་པ་དང་ནི་འཁྱིལ་བའོ། །དང་པོ་འདིར་ནི་བརྒྱན་པ་དང་། །རྣམ་པ་ཀུན་ཏུ་བཅིང་བ་དང་། །དཔུང་རྒྱན་དག་དང་དེ་བཞིན་དུ། །ལག་པའི་རྒྱ་ནི་ཉིད་དག་དང་། །རྐང་གདུབ་རབ་ཏུ་གཞུག་པའོ། །འོག་པགས་དང་ནི་བརྒྱད་པའོ། །རོ་ལྡན་བཅུ་དྲུག་ཤེས་པར་བྱ། །ཚངས་སྐུད་སྐུད་པ་གཅིག་ཏུ་འགྱུར། །ཕྲེང་བ་ཉི་ཤུ་རྩ་ལྔ་ཡིན། །ཞེས་འབྱུང་ངོ་། །དེ་ལྟར་དེ་དག་གི་ཚིག་དོན་ཡང་ཀུན་ཏུ་མི་དབུག་ནི་བུ་ག་མེད་པ་སྟེ་མགོ་རྒྱན་ཡིན་པས་མགོ་ལ་བཀོན་པ་སྟེ། དང་པོ་འདིར་ནི་བརྒྱན་པ་དང་། །ཞེས་པའི་དོན་ཏོ། །བཅིང་བ་ནི་རྣ་རྒྱན་ཏེ། རྣམ་པ་ཀུན་དུ་བཅིང་བ་དང་གི་དོན་ཡིན་ནོ། །གཞུག་པ་ནི་གདུ་བུ་དྲུག་སྟེ། དཔུང་རྒྱན་དག་ལ་སོགས་པ་ཚིག་རྐང་གསུམ་གྱིས་བསྟན་ཏོ། །དེ་བཞིན་བསྐྱོད་པ་ནི་སྐ་རགས་ཏེ། འོག་པག་ནི་བརྒྱད་པ་ཡིན་ཞེས་པས་ཕྲེང་བ་རིམ་པ་བརྒྱད་ཡོད་དོ། །འབེབས་པ་ནི་མགུལ་རྒྱན་ཏེ། མགྲིན་པ་ནས་སྒྲ་འབེབས་པ་ཡིན་ལ། དེ་ཉིད་རོ་ལྡན་བཅུ་དྲུག་ཤེས་པར་བྱ། །ཞེས་པ་སྟེ། རོ་ལྡན་ནི་མགྲིན་པ་ཡིན་ལ། དེར་ཕྲེང་བ་བརྒྱད་དང་། དོ་ཤལ་བརྒྱད་དེ་བཅུ་དྲུག་ཡིན་ནོ། །འདི་ལ་ཨ་བྷྱ་ཀ་ར་ན་རེ། རོ་ལྡན་ནི་བུད་མེད་ཡིན་ལ། དེའི་སྐ་རགས་ནི་རིམ་པ་བཅུ་དྲུག་ཡིན་ནོ་ཞེས་ཀྱང་ཟེར་རོ། །ཀུན་དུ་འཁྱིལ་བ་ནི་སེ་རལ་ཁ་རྒྱ་གྲམ་དུ་འཁྱིལ་པ་དང་། ཐོད་པའི་དོ་ཤལ་ཡིན་ཏེ། དེའང་དང་པོ་ནི་ཚངས་སྐུད་སྐུད་པ་གཅིག་ཏུ་འགྱུར་ཞེས་པ་རྒྱ་གྲམ་དུ་འཁྱིལ་པ་ལས་སྲད་བུ་རེ་རེ་ལས་མེད་པ་ལ་བྱའོ། །གཉིས་པ་དོ་ཤལ་ནི་ཕྲེང་བ་ཉི་ཤུ་རྩ་ལྔ་ཉིད། །ཅེས་བྱ་བ་ཉི་ཤུ་རྩ་ལྔ་ཉིད་དམ། ཉིས་ལྟབ་ཏུ་བྱས་ན་ལྔ་བཅུ་ཐམ་པ་ཡིན་ནོ། །དེ་ལྟར་ལུང་དེ་དག་གི་དོན་བླ་མའི་གསུང་དང་མི་འགལ་བར་བརྗོད་ན། ཐོག་མར་མགོ་རྒྱན་གྱི་སྤྱི་བོར་རུས་པའི་འཁོར་ལོ་ལ་བུ་ག་བརྒྱད་ཕུག་སྟེ། རུས་པའི་ཕྲེང་བ་འཁོར་ལོའི་རྩིབས་ལྟ་བུར་གྱུར་པ་བརྒྱད་བྱ། དེ་ལ་བརྒྱད་ཀྱི་རྩིབས་གསུམ་མ་གཏོགས་པ་རྩིབས་ལྔའི་ཐད་ཀར་མིའི་ཐོད་པ་སོར་ལྔ་པའི་ཚད་མི་མགོའི་རི་མོ་བྲིས་པ་རེ་བཞག དེ་དག་གི་སྟེང་འོག་གཉིས་ན་ཕར་རུས་པའི་ཕྲེང་བ་ཐོད་པ་ལྟ་བུར་འཁོར་བ་རེ་བྱ། ཐོད་པའི་བར་མཚམས་སྡེབ་པའི་ཕྲེང་བ་ཐོད་ལྟར་འཁོར་བ་གསུམ་གསུམ་བྱ། དཔྲལ་བའི་ཐད་ཀར་སོར་གསུམ་གྱིས་དྲྭ་བ་དྲྭ་ཕྱེད་བྱ། གཞན་རྣམས་སུ་རྣ་བ་ཕྱེད་ནོན་ཙམ་གྱི་དྲྭ་བ་དྲྭ་ཕྱེད་བྱ། འཁོར་ལོའི་རྒྱབ་ངོས་ཀྱི་ཐད་ཀར་སྣ་ཚོགས་རྡོ་རྗེ་དང་། དེའི་གཡོན་ངོས་སུ་ཚེས་གཅིག་གི་ཟླ་བ་བྱས་ལ་སྐྲའི་ཐོར་ཚུགས་ཀྱི་ཅོད་པཎ་ལ་བརྟེན་པར་བྱ། སྐྲ་མེད་ན་བཅོས་མའི་སྐྲ་བྱས་ལ། བྲིས་སྐུའམ་གླེགས་བམ་བཅུག་ལ། སྤྱི་གཙུག་དབུ་རྒྱན་གྱི་ནང་ན་ཡར་ལ་ཐོར་ཚུགས་སུ་རྐུན་པོ་བསད་པའི་སྐྲ་ལ་བཅིངས་ཏེ། ཐག་པའི་མཐའ་གཉིས་སུ་ན་རེས་འཇོག་པ་ནི་ཅོད་པཎ་ཞེས་བྱའོ། །རྣ་རྒྱན་ནི་རུས་པའི་འཁོར་ལོ་ལ་ཁུག་པ་གསུམ་དང་། ཁུག་ཕྱེད་གཉིས་ཏེ་ལྔ་ཡིས་བརྒྱན་པ་ཡིན་ནོ། །མགུལ་རྒྱན་ནི་གཞུང་གཡས་གཡོན་གཉིས་དབུས་དང་གསུམ་ལ་ཕྲེང་བ་བརྒྱད་ཀྱིས་བར་བསྡམས་པ་དང་། དེ་ལ་དོ་ཤལ་གྱི་ཚུལ་དུ་འཕྱང་བ་རུས་པའི་མདུང་རྩེ་དུ་མས་མཛེས་པར་བྱས་པའི་བརྒྱད་དེ་བཅུ་དྲུག་ཡིན་ནོ། །དཔུང་རྒྱན་གཉིས་དང་། ལག་རྒྱན་གཉིས་དང་། རྐང་རྒྱན་གཉིས་ཏེ་གདུ་བུ་དྲུག་སྟེ་ཕ་ད་ཚུ་ད་གཉིས་དབུས་དང་། རུས་པའི་གཞུང་གསུམ་ལས་ཕྲེང་བ་ལྔ་ལྔ་ཡིས་བར་བསྡམས་པ་སྨད་ངོས་སུ་མདུང་རྩེ་དང་གཡེར་ཁ་དུ་མས་མཛེས་པར་བྱས་པ་ཡིན་ནོ། །དེའང་དཔུང་རྒྱན་གཉིས་རིང་། དེ་བས་རྐང་གདུབ་ཐུང་། དེ་བས་ཀྱང་ལག་གདུབ་ཐུང་ངོ་། །སྐ་རགས་ཀྱི་གཞུང་གསུམ་ཕ་ད་ཚུ་ད་སྟེ་ལྔའི་བར་ཕྲེང་བ་བརྒྱད་རིམ་མམ་བཅུ་དྲུག་རིམ་གྱིས་བར་བསྡམས་ལ་དེ་ལ་དྲྭ་བ་དྲྭ་ཕྱེད་གཡེར་ཁ་དང་རུས་པའི་མདུང་རྩེ་དུ་མས་མཛེས་པར་བྱས་པ་མཐེབ་སོར་བརྒྱད་ཀྱི་ཚད་དང་མཉམ་པ་དྲྭ་བ་ལྔ་དང་དྲྭ་ཕྱེད་བཅོ་བརྒྱད་ཀྱིས་མཛེས་པར་བྱས་པ་ཡིན་ལ། གཡས་གཡོན་གྱི་དྲྭ་ཕྱེད་གསུམ་གསུམ་ལ་གཉིས་ཀྱིས་པུས་མོའི་ཐད་ཀར་སླེབ་པ་དབུས་མས་ནི་བྱིན་པའི་དཀྱིལ་ཙམ་སླེབ་པ་ཡིན་ཏེ། དེ་དག་ལ་དྲིལ་བུ་ཆུང་ངུ་མཛེས་པ་རེ་གདགས་པར་བྱའོ། །རུས་པའི་ཚངས་སྐུད་ནི། རུས་པའི་འཁོར་ལོ་རྩིབས་བརྒྱད་ལ་བུ་ག་ཕུག་སྟེ། རྒྱ་གྲམ་དུ་བསྡམས་ལ་འཁོར་ལོ་མདུན་དང་རྒྱབ་ཏུ་འོང་བར་བྱ་སྟེ། རྒྱ་གྲམ་དུ་བཅིང་བར་བྱའོ། །རུས་པའི་ཚངས་སྐུད་འདི་ཡོད་ཀྱང་རུང་མེད་ཀྱང་ཆོག་སྟེ། རྐུན་པོ་བསད་པའི་སྐྲ་ལས་སྐུད་པ་སུམ་སྒྲིལ་བྱས་པ་དེའང་བསྐོར་ལྔའམ་གསུམ་གསུམ་དུ་བྱ་སྟེ་རྡོ་རྗེའི་མདུད་པ་གསུམ་གྱིས་བར་འཚམས་པར་བསྡམས་ལ། དེ་ལྟ་བུའི་སེ་རལ་ཁར་ལག་པ་གཡས་པ་བཏོན་ལ། གོན་པ་ནི་ཚངས་པའི་སྐུད་པ་ཞེས་བྱ་བ་དངོས་ཡིན་ནོ། །དགུ་བསྒྲིལ་དུ་བྱས་པའི་སྐུད་པ་གཅིག་ལ་སྔ་མ་བཞིན་རྡོ་རྗེའི་མདུད་པ་བྱས་པས་ཀྱང་བཏུབ་བོ། །ཐོད་པའི་ཚལ་བུ་སོར་ལྔ་པའི་ཚད་དང་མཉམ་པ་བྱ་སྟེ། དེའང་སྐྱེས་པ་ལ་གཞོན་ནུ་མའི་ཐོད་པ་ཡིན་ཞིང་། བུད་མེད་ལ་སྐྱེས་པ་ཡིན་ནོ། །སྟག་གི་ལྤགས་པའི་ཤམ་ཐབས་ཀྱི་སྟེང་དུ་རྐུན་པོ་བསད་པའི་སྐྲ་ལས་བྱས་པའི་སྐ་རགས་ཉིས་སྐོར་གྱིས་བསྡམས་ལ་དེའི་སྟེང་དུ་རུས་རྒྱན་གྱིས་སྐ་རགས་བཅིང་བར་བྱའོ། །ཁ་ཅིག་ནི་ཕོ་རྒྱན་མོ་རྒྱན་བྱ་བ་ཡོད་ཞེས་ཟེར་ན། ཨ་བྷྱ་ཀ་རས་བྱས་པའི་སྐ་རགས་དང་མི་མགོའི་དོ་ཤལ་གཉིས་མིན་པ་ཁྱད་པར་མ་མཐོང་ལ། ལུས་ཀྱི་ཚད་དང་མཉམ་པར་བྱེད་ན་སྐྱེས་པ་རྣམས་མགོ་ཆེ་ལ། ཡན་ལག་གཞན་དང་སྐེད་པ་ཕྲ་བས་མགོ་རྒྱན་ཆེ་ལ། གཞན་ཕྲ་བར་བྱ། བུད་མེད་རྣམས་ནི་མགོ་ཆུང་ལ་ཡན་ལག་གཞན་སྦོམ་པས། མགོ་རྒྱན་ཆུང་ལ་གཞན་ཆེ་བར་བྱའོ། །རྒྱན་དྲུག་གི་མཚན་ཉིད་དོ། །ཞེས་རྗེ་བཙུན་རིན་པོ་ཆེས་གསུང་ངོ་། །ཞབས་ཀྱིས་འཇིགས་བྱེད་དང་། དུས་མཚན་གནོན་པའི་ཚུལ་ལ། རྩ་འགྲེལ་གཉིས་ལས་ཞབས་གཡས་བརྐྱང་བས་འཇིགས་བྱེད་དང་། དུས་མཚན་གནོན་ཞེས་པ་དང་། གཡས་བརྐྱང་བ་དང་། གཡོན་བསྐུམ་པས་འཇིགས་བྱེད་དང་དུས་མཚན་གནོན་ཞེས་པ་ཙམ་ལས་གསལ་ཁ་མ་བྱུང་ཞིང་། ཁྱད་པར་གསལ་བྱེད་ལས། འདིའི་གོ་རིམ་དང་བསྟུན་ནས་གཡས་པས་འཇིགས་བྱེད་དང་། གཡོན་པས་དུས་མཚན་མནན་པ་དང་། ཇོ་བོ་རྗེས་ལྷན་སྐྱེས་ཀྱི་སྒྲུབ་ཐབས་ལས། དེ་ལས་བཟློག་སྟེ་གསུངས་པ་སོགས་དུ་མ་སྣང་བ་ལས། རྗེ་བཙུན་གྱིས་ཕྱི་མ་ལྟར་མཛད་པ་ནི། མངོན་བརྗོད་ལས། འཇིགས་བྱེད་དང་ནི་དུས་མཚན་དག །སྲེད་དང་སྡང་བ་ཞབས་ཀྱིས་གནོན། །ཞེས་དང་། རྟག་དང་ཆད་པའི་རྣམ་རྟོག་གིས། །འཇིགས་བྱེད་དུས་མཚན་འོག་དུ་བྱས། །ཞེས་གསུངས་པའི་དོན་དུ་མཛད་པ་སྟེ། འཇིགས་བྱེད་རྟག་པ་འཁོར་བའི་མཐའ་སྲེད་པའི་ངོ་བོ་ཞབས་གཡོན་པ་ཤེས་རབ་ཀྱི་རང་བཞིན་གྱིས་མནན་པས་ཟུང་འཇུག་ཏུ་འགྱུར་ལ། དུས་མཚན་ཆད་པ་མྱ་ངན་ལས་འདས་པའི་མཐའ་སྤང་བའི་ངོ་བོ་ཞབས་གཡས་པ་ཐབས་ཀྱི་རང་བཞིན་གྱིས་མནན་པས་ཟུང་འཇུག་ཏུ་འགྱུར་བའོ། །རྗེ་བཙུན་གྱིས་འཇིགས་བྱེད་ནག་པོ་ལག་པ་བཞི་པ། གཡས་ཌཱ་མ་རུ་དང་གྲི་གུག གཡོན་ཁ་ཊྭཱཾ་ག་དང་ཐོད་པ་བསྣམས་པ། དུས་མཚན་མ་དམར་མོ་གྲི་གུག་དང་ཐོད་པ་འཛིན་པ་ཞེས་གསུངས་པ་ལ། མཁས་པ་བུས། དེ་འདྲ་བའི་ཕྱག་མཚན་ནི་རྒྱུད་འགྲེལ། སྒྲུབ་ཐབས་སོགས་ན་འདུག་པ་མ་མཐོང་ཞེས་གསུངས་པ་ནི། མ་གཟིགས་པ་ཐུགས་མེད་ན་ཡང་། འདི་ནི་ཕམ་འཐིང་པའི་མན་ངག་སྟེ། མན་ངག་ཏུ་འགྲོ་ཚུལ་ནི། རྩ་རྒྱུད་ལས། ཧེ་རུ་ཀ་ཞལ་བཞི་ཕྱག་བཞི་པ་ནས། ཕྱག་འབུམ་པའི་བར་གསུངས་པའི་ཕྱག་བཞི་པ་དང་། སངས་རྒྱས་ཐོད་པའི་གཙོ་བོ་དང་། རྡོ་རྗེ་མཁའ་འགྲོ་ནས་གསུངས་པའི་གཙོ་བོ་མང་པོ་ཕྱག་མཚན་དེ་ལྟར་དུ་གསུངས་ལ། འདིར་སངས་རྒྱས་ཀྱི་ཡེ་ཤེས་གཅིག་ཉིད། གདུལ་བྱ་དབང་ཕྱུག་ཆེན་པོར་སྤྲུལ་ནས་བཏུལ་བའི་ཚེ། དེའི་ཕྱག་མཚན་བཅོམ་ལྡན་འདས་ཀྱི་ཕྱག་མཚན་དུ་བཟུང་བར་གསུངས་པས། འདིར་གདུལ་བྱ་ལ་ཕྱག་མཚན་ཉུང་ཤོས་དེ་ཉིད་སྦྱར་བའི་སྐབས་ཡིན་པའི་ཕྱིར་དང་། དེ་ཉིད་ཀྱིས་དུས་མཚན་མའི་ཕྱག་མཚན་ཡང་དེ་ལྟར་དུ་གྲུབ་པའི་ཕྱིར་རོ། །གསུམ་པ་དེ་དག་གི་རྣམ་དག་ནི། ལྭ་བ་པས། ཞལ་བཞིར་གསུངས་པ་གང་ཡིན་པ། །དགའ་བ་བཞི་ཡི་རང་བཞིན་གསུངས། །དགའ་ཀུན་རྫོགས་པའི་བྱང་ཆུབ་གཅིག །སྟོང་པའི་རང་བཞིན་ཉིད་ཀྱི་ཕྱིར། །ཞལ་གཅིག་ཏུ་ནི་རབ་ཏུ་གྲགས། །སྤྱན་གསུམ་སྲིད་པ་གསུམ་དུ་ཤར། །ཐོག་མཐའ་མེད་པའི་ཆོས་རྣམས་ནི། །བེམ་པོའི་རང་བཞིན་ལས་བཟློག་པ། །རལ་པའི་དོན་དུ་རབ་ཏུ་གསུངས། །སྣ་ཚོགས་སེམས་ཅན་དོན་མཛད་པས། །སྣ་ཚོགས་རྡོ་རྗེས་མཚན་པ་ཡིན། །ཟླ་བ་བྱང་ཆུབ་སེམས་འགྱུར་བ། །བདེ་ཆེན་རང་བཞིན་འོད་གསལ་བའོ། །སྲིད་པའི་ཡན་ལག་བཅུ་གཉིས་ཕྱིར། །བཅུ་གཉིས་ཕྱག་དང་མངོན་དུ་ལྡན། །ཡུལ་རྣམས་དང་ནི་དབང་པོ་རྣམས། །གཉིས་མེད་རྣམ་པའི་སྤྱོད་ཡུལ་གྱི། །ཕྱག་རྣམས་མཚན་མས་མཚན་པ་ཡིན། །བྱང་ཆུབ་སེམས་ནི་རྡོ་རྗེར་གྱུར། །ཤེས་རབ་དྲིལ་བུར་རབ་ཏུ་བརྗོད། །སྐུ་གསུམ་དག་ཕྱིར་མདུང་རྩེ་གསུམ། །གླང་པོ་གཏི་མུག་བྲལ་བ་སྟེ། །དགྲ་སཏྭ་ཞེ་སྡང་གཅོད་བྱེད་པ། །ལུས་ངག་སེམས་ལས་ཡང་དག་བྱུང་། །ཞགས་པས་ཉེས་པ་འཆིང་བ་སྟེ། །ལུས་ཅན་མ་ལུས་མི་མཐུན་ཕྱོགས། །སེམས་ཅན་དོན་བྱེད་རྩོམ་པས་ན། །ཟངས་གྲི་ཤིན་ཏུ་རྣོ་བའོ། །མགོ་བོ་ཚངས་པའི་རང་བཞིན་གྱིས། །ཁ་ཊྭཱཾ་སྟོང་པའི་རྣམ་པ་སྟེ། །ཅང་ཏེའུ་ཐབས་རྣམ་དག་པའོ། །རྟག་ཏུ་དགའ་བའི་རང་བཞིན་གྱིས། །ཆོས་ཀྱི་དབྱངས་སྒྲ་ཧཱུྃ་མཛད་པའོ། །ཐོད་པ་ནམ་མཁའི་དཀྱིལ་འཁོར་ཏེ། །སྙིང་རྗེ་རོ་ཡིས་ཡོངས་བཀང་བའོ། །གསོལ་བ་དངོས་གྲུབ་རྒྱུ་ཡིན་ནོ། །མཆེ་བ་བཞི་ནི་མངོན་གྱུར་པ། །བདུད་བཞི་འཇོམས་པར་མཛད་པའོ། །འོད་ཟེར་འཁྲིགས་པས་འཁྲུགས་ལྡན་པའི། །རྟག་ཏུ་ཚེམས་ཀྱི་ཕྲེང་བ་གཉིས། །རྡོ་རྗེ་རོ་ཡིས་ཡོངས་བཀང་བས། །ཧ་ཧ་བཞད་པས་གསོལ་མཛད་ཞལ། །ཉོན་མོངས་བདུད་བཞི་དག་ཉིད་པས། །མགོ་བོ་དོ་ཤལ་གྱིས་བརྒྱན་བྱས། །སྟོང་ཉིད་དག་པས་སྡིགས་མཛུབ་བོ། །ཞེས་སོ། །རྗེ་བཙུན་གྱིས། བཅོམ་ལྡན་འདས་སྐུ་མདོག་སྔོན་པོ་ཞལ་བཞི་པ། རྩ་བའི་ཞལ་ནི་ལུས་མདོག་མཚུངས་པ། གཡས་ཞལ་ནི་ཤིན་ཏུ་སེར་བ། རྒྱབ་མ་དམར་བ། གཡོན་པ་ལྗང་བ་སྟེ། ཚད་མེད་པ་བཞིའམ། འབྱུང་བ་བཞིའམ། རྣམ་ཐར་བཞིའམ། ཕྲིན་ལས་བཞི་འགྲུབ་པའི་རྟགས་ཡིན་ནོ། །ཁམས་གསུམ་ལ་གཟིགས་ཤིང་། དུས་གསུམ་གྱི་དངོས་པོ་མཁྱེན་པའི་བརྡར་ཞལ་རེ་རེ་ལ་སྤྱན་གསུམ་གསུམ་མོ། །རྟེན་ཅིང་འབྲེལ་བར་འབྱུང་བ་བཅུ་གཉིས་ལུགས་འབྱུང་དང་། ལུགས་ལས་ཟློག་པ་ཐུགས་སུ་ཆུད་པའི་བརྡར་ཕྱག་བཅུ་གཉིས་པ། ཐབས་དང་ཤེས་རབ་གཉིས་སུ་མེད་པའི་བརྡར་རྡོ་རྗེ་ཕག་མོ་ལ་འཁྱུད་པའི་ཕྱག་གཉིས་ཀྱིས་ཡེ་ཤེས་ལྔ་རོ་གཅིག་པའི་བརྡར་རྡོ་རྗེ་དང་། སྟོང་པ་ཉིད་ཀྱི་སྒྲ་སྒྲོགས་པའི་བརྡར་དྲིལ་བུ་བསྣམས་པ། འོག་མ་གཉིས་ཀྱིས་གཏི་མུག་སྤངས་པའི་བརྡར་གླང་པོ་ཆེའི་པགས་པ་མགོ་གཡས་སུ་བསྟན་ཏེ་བརྒྱངས་པའི་ཚུལ་གྱིས་བསྣམས་པ། མཆོག་ཏུ་དགའ་བའི་སྒྲས་སངས་རྒྱས་ཐམས་ཅད་བསྐུལ་བའི་རྟགས་སུ། གཡས་ཀྱི་གསུམ་པ་ན་ཌཱ་མ་རུ། ཉེས་པ་ཐམས་ཅད་གཅོད་པའི་བརྡར་བཞི་པ་ན་དགྲ་སཏྭ། དངོས་པོ་དང་དངོས་པོ་མེད་པའི་རྣམ་པར་རྟོག་པ་ཐམས་ཅད་གཅོད་པའི་བརྡར་ལྔ་པ་ན་གྲི་གུག སྲིད་པ་གསུམ་གྱི་ཉེས་པ་འཇོམས་པའི་རྟགས་སུ་དྲུག་པ་ན་མདུང་རྩེ་གསུམ་པ་བསྒྲེང་བའོ། །བྱང་ཆུབ་ཀྱི་སེམས་དང་མི་འབྲལ་བ་མཚོན་པས་ན་གཡོན་གྱི་གསུམ་པ་ན་ཁ་ཊྭཱཾ་ག་རྡོ་རྗེས་མཚན་པ། བདེ་བ་ཆེན་པོ་སྐྱོང་བའི་རྟགས་སུ་བཞི་པ་ན་ཁྲག་གིས་གང་བའི་ཐོད་པ། ཡང་དག་པའི་ཡེ་ཤེས་སེམས་ཅན་གྱི་རྒྱུད་ལ་འཆིང་བ་ནི་ལྔ་པ་ན་རྡོ་རྗེ་ཞགས་པ། རྣམ་པར་རྟོག་པ་ཐམས་ཅད་བཅོམ་པའི་བརྡར་དྲུག་པ་ན་ཚངས་པའི་མགོ་བོ། པདྨ་དང་ཉི་མའི་གདན་གྱི་སྟེང་ན་ཞབས་གཡས་པ་ཐུགས་རྗེ་ཆེན་པོའི་རང་བཞིན་བརྐྱངས་པས་དུས་མཚན་དམར་མོ་མྱ་ངན་ལས་འདས་པའི་མཐའ་མནན་པ། ཞབས་གཡོན་པ་ཤེས་རབ་ཀྱི་རང་བཞིན་བསྐུམས་པས་འཇིགས་བྱེད་ནག་པོ་འཁོར་བའི་མཐའ་མནན་པའོ། །ཚོགས་གཉིས་ཡོངས་སུ་རྫོགས་པ་ནི་རལ་པའི་ཐོར་ཚུགས་ཀྱིས་བརྒྱན་པ། ཡེ་ཤེས་ལྔའི་རང་བཞིན་གྱི་དབུ་རེ་རེ་ལ་ཐོད་པ་སྐམ་པོ་ལྔ་ལྔའི་ཅོད་པཎ། ཚོགས་རིམ་གྱིས་རྫོགས་ཤིང་བྱང་ཆུབ་ཀྱི་སེམས་མཚོན་པ་ནི་དབུའི་གཙུག་གི་གཡོན་ལ་ཟླ་བ་ཕྱེད་པ་འཇོག་པ། ཕྲིན་ལས་སྣ་ཚོགས་ཀྱིས་སེམས་ཅན་གྱི་དོན་མཛད་པ་ནི་སྣ་ཚོགས་རྡོ་རྗེས་སྤྱི་བོར་བརྒྱན་པ། ཞལ་རྣམ་པར་འགྱུར་བ་ནི་ལོག་པར་ལྟ་བ་སྤངས་པ། མཆེ་བ་རྣམ་པར་གཙིགས་པ་ནི་བདུད་བཞི་འཇོམས་པ། སྟག་གི་པགས་པའི་ཤམ་ཐབས་ཀྱིས་ནི་གཟུང་འཛིན་སྤངས་པ། མི་མགོ་རློན་པ་ཁྲག་འཛག་པ་ལྔ་བཅུ་ཐམ་པའི་དོ་ཤལ་གྱིས་ནི་ཡི་གེ་ཨཱ་ལི་ཀཱ་ལི་ལྔ་བཅུ་དག་པ། རྣ་རྒྱན་གཉིས་ནི་བཟོད་པའི་ཕ་རོལ་ཏུ་ཕྱིན་པ། གདུ་བུ་དྲུག་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ། མགུལ་གྱི་ཕྲེང་བ་དང་དོ་ཤལ་ནི་སྦྱིན་པའི་ཕ་རོལ་ཏུ་ཕྱིན་པ། སྐ་རགས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ། སྤྱི་བོའི་རྒྱན་རྣམས་ནི་བསམ་གཏན་གྱི་ཕ་རོལ་ཏུ་ཕྱིན་པ། ཐལ་བ་དང་མཆོད་ཕྱིར་ཐོགས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ཕ་རོལ་ཏུ་ཕྱིན་པ་དྲུག་རྣམ་པར་དག་པའི་ཕྱག་རྒྱ་དྲུག་གིས་རྒྱས་བཏབ་པའོ། །སྒེག་པ་དང་། དཔའ་བ་དང་། མི་སྡུག་པ་དང་། དགོད་པ་དང་། དྲག་ཤུལ་དང་། འཇིགས་སུ་རུང་བ་དང་། སྙིང་རྗེ་དང་། རྔམ་པ་དང་། ཞི་བ་དང་ལྡན་པ་སྟེ། གར་གྱི་ཉམས་དགུ་དང་ལྡན་པའོ། །ཡུམ་རྡོ་རྗེ་ཕག་མོ་ནི་སྐུ་མདོག་དམར་ཞིང་སྐྲ་གྲོལ་བ་ནི་སེམས་ཅན་ལ་རྗེས་སུ་ཆགས་པ། ཞལ་གཅིག་པ་ནི་དེ་བཞིན་ཉིད་དུ་རོ་གཅིག་པ། སྤྱན་གསུམ་པ་ནི་སྔར་བརྗོད་དོ། །གཅེར་བུ་ནི་ཉོན་མོངས་པའི་སྒྲིབ་གཡོགས་དང་བྲལ་བ། ཕྱག་གཡོན་པས་འཁྱུད་ནས། གདུག་པ་དང་བདུད་ལ་སོགས་པའི་ཁྲག་གིས་བཀང་བའི་ཐོད་པ་བསྣམས་པ་ནི་གདུག་པ་ལ་སོགས་པ་ཉིད་འདུལ་བ། གཡས་པས་ཕྱོགས་ཐམས་ཅད་དུ་གདུག་པ་ཅན་རྣམས་ལ་སྡིགས་མཛུབ་བྱེད་ཅིང་གྲི་གུག་རྡོ་རྗེས་མཚན་པ་བསྣམས་པ་ནི་ཉོན་མོངས་པ་ཚར་གཅོད་པ། ཐལ་བ་དང་མཆོད་ཕྱིར་ཐོགས་མ་གཏོགས་པའི་རྒྱན་ལྔ་ནི་ཕ་རོལ་ཏུ་ཕྱིན་པ་ལྔ་སྟེ། ཤེས་རབ་ནི་ལྷ་མོ་ཉིད་ཡིན་པའི་ཕྱིར་རོ། །ལྷ་མོ་འོག་ནས་འབྱུང་བ་རྣམས་ཀྱི་རྒྱན་ཡང་དེ་བཞིན་དུ་ཤེས་པར་བྱའོ། །བསྐལ་པའི་མེ་ལྟ་བུའི་གཟི་བརྗིད་དང་ལྡན་པ་ནི་བདུད་ཐམས་ཅད་སྐྲག་པར་བྱེད་པ། བདེ་བ་གསོལ་བའི་བརྡར་ཁྲག་གསོལ་བ་ལ་དགྱེས་ཤིང་བྷ་ག་ནས་ཁྲག་འཛག་པ། ཐབས་ཤེས་རབ་ཟུང་དུ་འཇུག་པ་མཚོན་པ་ནི་བྱིན་པ་གཉིས་ཀྱིས་ལེགས་པར་འཁྱུད་པ་སྟེ། བཅོམ་ལྡན་འདས་ནི་ལྷག་མཐོང་དང་ཐུགས་རྗེ་ཆེན་པོའི་བརྡ་ཡིན་ལ། ཡུམ་ནི་ཞི་གནས་དང་བདེ་བ་ཆེན་པོའི་བརྡའི་རང་བཞིན་ཡིན་ནོ་ཞེས་གསུངས་ཏེ། འདི་དག་ནི་ཕལ་ཆེར། པྲ་ཛྙཱ་རཀྵི་ཏའི་འགྲེལ་པ་ལ་བརྟེན་པར་སྣང་ངོ་། །གཙོ་བོ་ཡབ་ཡུམ་གསལ་བཏབ་ནས་འཁོར་རྣམས་གསལ་མ་བཏབ་པའི་བར་འདིར་པྲ་ཛྙཱ་རཀྵི་དང་། ལྭ་བ་པས་མཁའ་གསང་བྱིན་རླབས་དང་། ལྟེ་བ། སྙིང་ག མགྲིན་པ། སྤྱི་བོ་རྣམས་སུ་ཕན་ཚུན་གྱི་སྙིང་པོ་དང་ཉེ་སྙིང་བཀོད་དེ། ཕན་ཚུན་ཙུམྦ་ན་དང་། ཡི་གེ་གསུམ་གྱི་དགའ་བ་བརྩམ་པར་བཤད་ཅིང་། འཁྲུལ་སྤོང་དང་ཁྱད་པར་གསལ་བྱེད་ལས། འཁོར་གྱི་ལྷ་རྣམས་གསལ་བཏབ་པའི་རྗེས་སུ་དེ་ལྟར་བཤད་པ་ནི་སློབ་དཔོན་གྱི་གཞུང་དང་། ནཱ་རོ་པའི་མན་ངག་གཉིས་ཀ་ལས་མི་འབྱུང་ཞིང་། ཀུན་སྤྱོད་བརྒྱད་པར། ཡི་གེ་དྱཾ་ནི་སྣ་རྩེར་ཡང་དག་སྦྱར། །བྱཾ་ནི་མཚམས་ཀྱི་ལྟེ་བར་ཡང་དག་དགོད། །ལྟེ་བ་སྙིང་ག་དཔྲལ་བ་རུ། །སྔགས་ཀྱི་ཚོགས་དང་བཅས་པས་བྱིན་གྱིས་བརླབ། །ལྟེ་བ་སྙིང་ག་དག་ཏུ་རྣལ་འབྱོར་མ། །སངས་རྒྱས་མཁའ་འགྲོ་མ་ཡི་སྔགས་ཀྱིས་ནི། །ཨ་ཝ་དྷཱུ་ཏཱི་གཉིས་ཀྱི་དཔའ་བྱིན་བརླབ། །རྣལ་འབྱོར་མ་དང་དཔའ་བོ་གཉིས་མེད་ཡིན། །ཞེས་ཡེ་ཤེས་ཀྱི་འཁོར་ལོ་དགུག་གཞུག་གི་རྗེས་སུ་གསུངས་པ་ནི། ཡེ་ཤེས་པ་དང་དམ་ཚིག་པ་དབྱེར་མེད་པའི་དགའ་བ་སྐྱོང་བ་རྒྱས་པ་ཡིན་ལ། མདོར་བསྡུ་ན་ལག་པ་གཉིས་ཀྱིས་པད་སྐོར་དང་འཁྱུད་རྒྱ་བྱས་ཏེ། ཡོ་ག་ཤུདྡྷཿའི་སྔགས་བརྗོད་པས་ཆོག་པའི་དོན་ཡིན་པར་སྣང་གི སྔ་མ་རྣམས་སྟོན་པ་མ་ཡིན་ཏེ། སྔར་གྱི་ལུང་དེའི་དེ་མ་ཐག་ཏུ། དང་པོར་དགའ་བ་དཔའ་བོ་སྟེ། །མཆོག་ཏུ་དགའ་བ་རྣལ་འབྱོར་མ། །རབ་ཏུ་དགའ་བ་མ་ལུས་ཉིད། །དེ་བདེའི་ཐབས་ནི་ཀུན་རིག་པའོ། །ལྷ་ཡུལ་ས་སྟེང་ས་འོག་ཏུ། །སྐད་ཅིག་གིས་ནི་གཟུགས་གཅིག་འགྱུར། །བསྒོམ་པ་བདག་ཉིད་བཤད་པའོ། །བསྡུ་བའི་ཆོ་ག་དྲན་པ་ནི། །གཡས་དང་གཡོན་ནི་ལག་གཉིས་ཀྱིས། །བསྐོར་བ་མཁའ་འགྲོ་བདེ་དེ་ཡིན། །ཞེས་གསུངས་པས་སོ། །རྒྱ་གར་བ་རྣམས་ཀྱང་ཐུགས་དགྱེས་པར་གྱུར་ཅིག གཉིས་པ་འཁོར་གྱི་ལྷ་རྣམས་བཤད་པ་ནི། སློབ་དཔོན་གྱི་གཞུང་ལས། མཁའ་འགྲོ་མ་དང་། ལཱ་མ་དང་ཞེས་པ་ནས། དཔའ་བོ་དང་རྣལ་འབྱོར་མ་འདི་ཐམས་ཅད་ཀྱི་དཔྲལ་བར་རྡོ་རྗེའི་ཕྲེང་བའོ། །ཞེས་པའི་བར་གྱིས་བསྟེན་ཏེ། བདེ་ཆེན་འཁོར་ལོའི་པདྨའི་འདབ་མ་བཞི་ལ། ཤར་དུ་ཌཱ་ཀི་ནཱི་སྟེ་མཁའ་འགྲོ་མ་ནག་མོ། བྱང་དུ་ལཱ་མ་སྟེ་མཛེས་མ་ལྗང་གུ། ནུབ་ཏུ་ཁཎྜ་རོ་ཧ་སྟེ་དུམ་སྐྱེས་མ་དམར་མོ། ལྷོར་རཱུ་བི་ནི་སྟེ་གཟུགས་ཅན་མ་སེར་མོ་རྣམས་ཞལ་གཅིག་ཕྱག་བཞི་མ། གཡས་གཉིས་ན་ཌཱ་མ་རུ་དང་གྲི་གུག གཡོན་གཉིས་ན་ཁ་ཊྭཱཾ་ག་དང་ཐོད་པ་སྟེ་འདི་དག་ནི་རྒྱབ་ནས་ཚུར་བགྲངས་པའོ། །གཅེར་བུ་སྐྲ་གྲོལ་བ་སྤྱན་གསུམ་པ། གཡས་བརྐྱངས་པས་བཞུགས་པ། ཞལ་མཆེ་བ་རྣམ་པར་གཙིགས་པ། ཕྱག་རྒྱ་ལྔས་བརྒྱན་པ་བསམ་པར་བྱའོ། །འདི་དག་གི་སྐུ་མདོག་ཕྱག་མཚན་རྒྱན་ཆ་རྣམས་མངོན་བརྗོད་ཀྱི་ལེའུ་བཞི་པ་ལས་གསུངས་པས། ནག་པོ་ཞབས་ཀྱི་འཁོར་ལོ་གཞན་རྣམས་ཀྱི་ལྷ་ཞལ་གཅིག་ཕྱག་གཉིས་པར་བྱེད་པའི་ཚེ་ན་ཡང་། བཞི་པོ་ཞལ་གཅིག་ཕྱག་བཞི་པར་རྡུལ་ཚོན་བྲི་བའི་སྐབས་སུ་གསུངས་ཤིང་། རྗེ་བཙུན་རྩེ་མོས་དྲིལ་བུ་པའི་སྒྲུབ་ཐབས་སུ་ཡང་འདི་བཞིན་དུ་གསུངས་སོ། །མཚམས་བཞིར་བདུད་རྩི་ལྔས་ཡོངས་སུ་གང་བའི་བུམ་པའི་སྟེང་དུ་བྱང་སེམས་དཀར་པོས་གང་བའི་ཐོད་པ་བཞི་འཇོག་པར་མངོན་བརྗོད་ལས་གསུངས་ཤིང་། ཀུན་སྤྱོད་ལས་ཀྱང་། ཕྱོགས་བྲལ་གྱི་ནི་བཞི་པོ་དག །ལྔ་ཡིས་གང་བའི་ཐོད་པ་ཉིད། །ཅེས་གསུངས་སོ། །སྔར་བཤད་པའི་ཐུགས་འཁོར་དེའི་ཤར་རྩིབས་པུལླཱི་ར་མ་ལ་ཡར་དཔའ་བོ་ཁཎྜ་ཀ་པཱ་ལི་སྟེ་ཐོད་པའི་དུམ་བུ་དང་། དཔའ་མོ་པྲ་ཙཎྜི་སྟེ་རབ་གཏུམ་མ་ཞལ་སྦྱོར་གྱི་ཚུལ་ལོ། །དེ་བཞིན་དུ་བྱང་རྩིབས་ཛཱ་ལེན་དྷ་ར་སྟེ། འབར་བ་འཛིན་པར་མ་ཧཱ་ཀཾ་ཀཱ་ལ་སྟེ་ཀེཾ་རུས་ཆེན་པོ་དང་། ཙཎྜ་ཨཀྵི་སྟེ་གཏུམ་པའི་མིག་ཅན་མའོ། །འདིར་བུ་དགེ་གཉིས་ཀྱིས་དྲྭ་བ་འཛིན་པར་བསྒྱུར་བ་ནི། སྔོན་གྱི་སྒྱུར་བྱེད་དམ་པ་འབྲོག་མི་སོགས་ལ་ཟུར་ཟ་བར་སྣང་ཡང་ཛྭ་ལ་ཆུ་ལ་འཇུག་པ་ལ། དེ་ལས་བཟློག་པའི་དོན་ལ། ཨ་ནཱིའི་འཕེལ་བ་བྱས་པས། ཛྭ་ལ་འབར་བའམ་མེ་ལ་འཇུག་པའི་དོན་མ་རྟོགས་པའོ། །ནུབ་རྩིབས་ཨོ་ཌི་ཡ་ནཱ་སྟེ་འཇིག་རྟེན་ན་གྲགས་པའི་ཨུ་རྒྱན་དུ་ཀཾ་ཀ་ལ་སྟེ་ཀེང་རུས་དང་། བྲ་བྷཱ་ཝ་ཏི་སྟེ་འོད་ལྡན་མའོ། །ལྷོ་རྩིབས་ཨརྦུ་ད་ར་བི་ཀ་དཾཥྚི་ཎ་སྟེ་མཆེ་བ་རྣམ་པར་གཙིགས་པ་དང་། མ་ཧཱ་ནཱ་སཱི་སྟེ་སྣ་ཆེན་མ་གཉིས་སོ། །ཤར་ལྷོའི་རྩིབས་གོ་ད་ཝ་རཱི་སྟེ་མཆོག་སྦྱིན་དུ་སུ་རཱ་ལྷའམ་ཆང་ལ་འཇུག བཻ་རཱི་སྟེ་ཆང་སྒྲའམ་ལྷ་སྒྲ་དང་། ཝི་རཱ་མ་ཏཱི་སྟེ་དཔའ་བོའི་བློ་ཆེན་མའོ། །ལྷོ་ནུབ་ཀྱི་རྩིབས་རཱ་མེ་ཤྭ་རར་ཨ་མི་ཏཱ་བྷ་བ་སྟེ་འོད་དཔག་མེད་དང་། ཁར་ཝ་རཱི་སྟེ་མིའུ་ཐུང་མའོ། །ནུབ་བྱང་གི་རྩིབས་དེ་ཝཱི་ཀོ་ཊི་སྟེ་ལྷ་མོའི་མཁར་དུ་བཛྲ་པྲ་བྷ་བ་སྟེ་རྡོ་རྗེའི་འོད་དང་། ལང་ཀ་ཤྭ་རཱི་སྟེ་ལང་ཀའི་དབང་ཕྱུག་མའོ། །བྱང་ཤར་གྱི་རྩིབས་མཱ་ལ་བ་སྟེ་ཕྲེང་བ་ཅན་མར་བཛྲ་དེ་ཧ་སྟེ་རྡོ་རྗེའི་སྐུ་དང་། དྲུ་མཙྪ་ཡཱ་ཏ་ཤིང་གྲིང་མའོ། །འདི་དག་ནི་ཐུགས་ཀྱི་འཁོར་ལོའི་ལྷ་སྟེ་སྐུ་མདོག་སྔོན་པོ་ཐུགས་ཀྱི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་གསུང་གི་འཁོར་ལོའི་ཤར་རྩིབས་ཀཱ་མ་རཱུ་པ་སྟེ་འདོད་པའི་གཟུགས་སུ་ཨཾ་གུ་རཱི་སྟེ་མྱུ་གུ་ཅན་དང་། ཨེ་རཱ་ཝ་ཏྭི་སྟེ་ས་སྲུང་མའོ། །བྱང་རྩིབས་ཨོ་དྲར་བཛྲ་ཛ་ཊཱི་སྟེ་རྡོ་རྗེ་རལ་པ་ཅན་དང་། མཧཱ་བྷཻ་ར་ཝཱ་སྟེ་འཇིགས་བྱེད་ཆེན་མོའོ། །ནུབ་རྩིབས་ཏྲི་ཤ་ཀུ་ནི་སྟེ་དགེ་མཚན་གསུམ་པར་མ་ཧཱ་བཱི་ར་སྟེ་དཔའ་བོ་ཆེན་པོ་དང་བཱ་ཡུ་བེ་གཱ་སྟེ་རླུང་གི་ཤུགས་ཅན་མའོ། །ལྷོ་རྩིབས་ཀོ་ས་ལ་སྟེ་དགེ་བ་ཅན་དུ་བཛྲ་ཧཱུྃ་ཀཱ་ར་སྟེ་རྡོ་རྗེ་ཧཱུྃ་མཛད་དང་། སུ་རཱ་བྷཀྵི་སྟེ་ཆང་འཐུང་མའོ། །ཤར་ལྷོའི་རྩིབས་ཀ་ལིཾ་ཀར་སུ་བྷ་ཏྲ་སྟེ་རབ་ཏུ་བཟང་པོ་དང་། ཤྱཱ་མ་དེ་ཝཱི་སྟེ་སྔོ་བསངས་ལྷ་མོའམ་ལྗང་ལྷ་མོའོ། །ལྷོ་ནུབ་ཀྱི་རྩིབས་ལཾ་པཱ་ཀ་སྟེ་འཕྱང་བ་ཅན་དུ་བཛྲ་བྷ་ཏྲ་སྟེ་རྡོ་རྗེ་བཟང་པོ་དང་། སུ་བྷ་ཏྲ་སྟེ་ཤིན་ཏུ་བཟང་མོའོ། །ནུབ་བྱང་གི་རྩིབས་ཀཉྩིར་མ་ཧཱ་བྷཻ་ར་ཝ་སྟེ་འཇིགས་བྱེད་ཆེན་པོ་དང་། ཧ་ཡ་ཀརྞ་སྟེ་རྟ་རྣ་མའོ། །བྱང་ཤར་གྱི་རྩིབས་ཧི་མཱ་ལ་ཡ་སྟེ་གངས་ཅན་དུ་བི་རུ་པཀྵ་སྟེ་མིག་མི་བཟང་དང་། ཁ་ག་ན་ནཱི་སྟེ་བྱ་གདོང་མའོ། །འདི་དག་ནི་གསུང་གི་འཁོར་ལོའི་ལྷ་སྟེ་སྐུ་མདོག་དམར་པོ་གསུང་གི་གསང་བ་བསམ་གྱིས་མི་ཁྱབ་པའི་ངོ་བོའོ། །དེའི་ཕྱི་རོལ་སྐུའི་འཁོར་ལོའི་ཤར་རྩིབས་པྲེ་ཏ་པུ་རཱི་སྟེ་ཡི་དྭགས་ཀྱི་གྲོང་དུ་མཧཱ་བ་ལ་སྟེ་སྟོབས་པོ་ཆེ་དང་། ཙཀྲ་ཝཻ་ར་སྟེ་འཁོར་ལོའི་ཤུགས་ཅན་མའོ། །བྱང་རྩིབས་གྲྀ་ཧ་དེ་ཝ་སྟེ་ཁྱིམ་གྱི་ལྷར་རཏྣ་བཛྲ་སྟེ་རིན་ཆེན་རྡོ་རྗེ་དང་། ཁཎྜ་རོ་ཧཱ་སྟེ་དུམ་སྐྱེས་མའོ། །ནུབ་རྩིབས་སཽ་རཱཥྚར་སྟེ་ཡུལ་འཁོར་བཟང་པོར་ཧ་ཡ་གྲཱྀ་ཝ་སྟེ་རྟ་མགྲིན་དང་། ཤཽཎྜི་ནི་སྟེ་ཆང་འཚོང་མའོ། །ལྷོ་རྩིབས་སུ་ཝརྞ་དྭི་སྟེ་གསེར་གླིང་དུ་ཨཱ་ཀཱ་ཤ་གརྦྷ་སྟེ་ནམ་མཁའི་སྙིང་པོ་དང་། ཙཀྲ་ཝརྨི་ཎི་སྟེ་འཁོར་ལོའི་གོ་ཆ་མའོ། །ཤར་ལྷོའི་རྩིབས་ན་ག་ར་སྟེ་གྲོང་ཁྱེར་དུ་ཤྲཱི་ཧེ་རུ་ཀ་སྟེ་དཔལ་ཧེ་རུ་ཀ་དང་། སུ་ཝཱི་ར་སྟེ་ཤིན་ཏུ་དཔའ་མོའོ། །ལྷོ་ནུབ་ཀྱི་རྩིབས་སིནྡྷཱུར་པདྨ་ནི་ཤྭ་ར་སྟེ་པདྨ་གར་གི་དབང་ཕྱུག་དང་། མ་ཧཱ་བ་ལི་སྟེ་སྟོབས་ཆེན་མའོ། །ནུབ་བྱང་གི་རྩིབས་མ་རུ་སྟེ་མྱ་ངམ་དུ་བཻ་རོ་ཙ་ན་སྟེ་རྣམ་པར་སྣང་མཛད་དང་། ཙཀྲ་ཝརྟི་ནཱི་སྟེ་འཁོར་ལོས་སྒྱུར་མའོ། །བྱང་ཤར་གྱི་རྩིབས་ཀུ་ལ་ཏར་བཛྲ་སཏྭ་སྟེ་རྡོ་རྗེ་སེམས་དཔའ་དང་། མ་ཧཱ་བཱིརྻ་སྟེ་བརྩོན་འགྲུས་ཆེན་མོའོ། །འདི་དག་ནི་སྐུའི་འཁོར་ལོའི་ལྷ་སྟེ་སྐུ་མདོག་དཀར་པོ་སྐུའི་གསང་བ་བསམ་གྱིས་མི་ཁྱབ་པའི་ངོ་བོའོ། །དཔའ་བོ་ཉི་ཤུ་རྩ་བཞི་ནི་ཞལ་གཅིག་ཕྱག་བཞིའི་དང་པོ་གཉིས་ཀྱིས་རྡོ་རྗེ་དང་དྲིལ་བུ་འཛིན་པས་རང་རང་གི་ཡུམ་ལ་འཁྱུད་པ། གཡས་འོག་མས་ཌཱ་མ་རུ། གཡོན་འོག་མས་ཁ་ཊྭཱཾ་ག་འཛིན་པར་གཞུང་ལས་གསུངས་ཤིང་། རྗེ་བཙུན་གྱིས། ཕམ་འཐིང་པའི་དགོངས་པས་ཁ་ཊྭཱཾ་ག་ནི་གྲུ་མོར་འོང་ལ། གཡོན་པ་དངོས་སུ་ནི་ཐོད་པ་འོང་སྟེ། རྩ་བའི་རྒྱུད་ཀྱི་ལེའུ་དང་པོ་ལས། མཆོད་གཞི་དཔའ་བོ་ཆེན་པོ་ནི། །ཞེས་བྱ་བའི་གཞུང་གི་དགོངས་པ་ཡིན་ནོ་ཞེས་གསུངས་ཏེ། བསྒོམ་པའི་ཚེ་ནི་ཐོད་པ་བསྒོམ་ལ། འབྲི་བ་ལྟ་བུའི་ཚེ་ནི་མི་འབྲི་སྟེ། གཞུང་ན་སྦས་པ་ཡིན་པའི་ཕྱིར་རོ། །གཞན་རྒྱན་ཆ་ལུགས་དང་། བཞུགས་ཚུལ་རྣམས་ནི་གཙོ་བོ་དང་འདྲ་ཞིང་། དཔའ་མོ་ཉི་ཤུ་རྩ་བཞིའི་ཕྱག་མཚན་རྒྱན་ཆ་ལུགས། འཁྱུད་པའི་ཚུལ་ཐམས་ཅད་རྡོ་རྗེ་ཕག་མོ་དང་འདྲ་བར་བཞེད་དོ། །དེ་ནས་དམ་ཚིག་གི་འཁོར་ལོའི་ཤར་སྒོར་ཁྭའི་གདོང་ཅན་མ་ནག་མོ། བྱང་སྒོར་འུག་པའི་གདོང་ཅན་ལྗང་གུ། ནུབ་སྒོར་ཁྱིའི་གདོང་ཅན་དམར་མོ། ལྷོ་སྒོར་ཕག་གི་གདོང་ཅན་སེར་མོ། ཤར་ལྷོར་གཤིན་རྗེ་བརྟན་མ་གཡས་སྔོ་ལ་གཡོན་སེར་བ། ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་ལ་གཡོན་དམར་བ། ནུབ་བྱང་དུ་གཤིན་རྗེ་མཆེ་བ་མ་གཡས་དམར་ལ་གཡོན་ལྗང་བ། བྱང་ཤར་དུ་གཤིན་རྗེ་འཇོམས་མ་གཡས་ལྗང་ལ་གཡོན་སྔོ་བའོ། །དེ་དག་གི་ཕྱག་གི་གྲངས་དང་། ཕྱག་མཚན་ནི་སྙིང་པོའི་རྣལ་འབྱོར་མ་བཞི་དང་མཚུངས་ཤིང་། གཞུང་ལས་ཡི་དྭགས་ཀྱི་གདན་ལ་ཞབས་གཡས་བརྐྱངས་པས་བཞུགས་ཤིང་། སེམས་ཅན་གྱི་དོན་ལ་མངོན་པར་བརྩོན་པའོ། །ཞེས་གསུངས་སོ། །འདིར་ལོ་ཆེན་གྱི་འགྲེལ་ཆུང་ལས། རྡོ་རྗེ་ཕག་མོའི་ངེས་ཚིག་ནི་བྱི་བ་དང་ཆོས་མཐུན་ཏེ། བྱི་བས་རྫས་འཕྲོག་པར་བྱེད་པ་བཞིན་དུ་ཧེ་རུ་ཀའི་ཞེ་སྡང་འཕྲོག་པར་བྱེད་པས་ན་ཕག་མོའོ། །ཧེ་རུ་ཀས་ཕག་མོའི་འདོད་ཆགས་འཕྲོག་པར་བྱེད་པ་སྟེ། དེའི་ཕྱིར་འདོད་ཆགས་དང་། ཞེ་སྡང་དང་འགལ་བའི་ཆོས་དང་ལྡན་པར་བསྟན་པ་ནི། དེ་དག་སྤང་བར་བྱ་བའི་ཕྱིར་རོ། །མཚམས་རྣམས་སུ་བྱང་ཆུབ་ཀྱི་སེམས་ཀྱི་བཀང་བའི་སྣོད་བཞི་ཞེས་བྱ་བ་ནི་མཚམས་བཞིར་བུམ་པ་བཞིའི་སྟེང་དུ་ཐོད་པ་བཞི་བདུད་རྩི་ལྔས་བཀང་བ་བསམ་མོ། །དེ་ཡང་བུམ་པ་ནི་གཞལ་ཡས་ཁང་སྟེ་ཆོས་ཀྱི་དབྱིངས་ཡིན་ལ། ཐོད་པ་ནི་ཐབས་ཏེ་སྙིང་རྗེ་ཆེན་པོའོ། །དང་པོར་ཐུགས་ཀྱི་འཁོར་ལོ་ཞེས་བྱ་བ་ལ་སོགས་པ་སྨོས་ཏེ། དེ་ཡང་གནས་ཉི་ཤུ་རྩ་བཞི་ན་གནས་པའི་འཇིག་རྟེན་གྱི་མཁའ་འགྲོ་མ་རྣམས་གདུལ་བའི་ཕྱིར་རོ། །དེ་རྣམས་དང་མཐུན་པར་བྱ་བའི་ཕྱིར་ཐོད་པའི་དུམ་བུ་དང་། རབ་ཏུ་གཏུམ་མོ་ལ་སོགས་པར་མིང་དུ་བཏགས་ཀྱི་ངེས་པའི་ཚིག་ནི་མེད་དོ། །སྒོ་རྣམས་སུ་ཞེས་བྱ་བ་ནི་ཁྭ་གདོང་མ་ནི་བྱ་རོག་གིས་རྒྱང་རིང་པོ་མཐོང་བ་ལྟར་དུས་གསུམ་མཁྱེན་པའི་ཕྱིར་རོ། །འུག་གདོང་མ་ནི་འུག་པས་ཉིན་མོ་མི་མཐོང་བ་ལ་མཚན་མོ་མཐོང་བ་དང་འདྲ་བར་གཟུང་འཛིན་དུ་མི་མཐོང་ལ་གཉིས་སུ་མེད་པར་མཐོང་བའི་ཕྱིར་རོ། །ཁྱི་གདོང་མ་ནི་ཁྱི་ནི་ཟན་ཟ་བ་ལ་མ་ཡེངས་པར་བལྟ་བ་བཞིན་དུ་དེ་བཞིན་ཉིད་ལ་ལྷུན་གྱིས་གྲུབ་པར་དམིགས་པའི་ཕྱིར་རོ། །ཕག་གདོང་མ་ནི་ཕག་ནི་རྣམ་པར་རྟོག་པ་མེད་པ་བཞིན་དུ་ཆོས་ཀྱི་དབྱིངས་ཀྱང་རྟོག་པ་མེད་པའོ། །མཚམས་རྣམས་ན་གནས་པའི་ལྷ་མོ་ནི་ཡིད་འཕྲོག་པའི་གཟུགས་གཉིས་ཏེ་ཞེས་པ་ནི་འགྲོ་བ་རྣམས་འཁོར་བ་ལས་འདྲེན་པར་མཛད་པ་དང་། མྱ་ངན་ལས་འདས་པར་འཇོག་པར་མཛད་པའི་ཕྱིར་གཟུགས་གཉིས་སུ་བསྟན་ནོ། །དེ་ལ་གཤིན་རྗེ་སྲེག་མ་ནི་འཆི་བ་སྲེག་པའོ། །གཤིན་རྗེའི་ཕོ་ཉ་མོ་ནི་འཆི་བ་མི་སྟེར་བའོ། །གཤིན་རྗེ་མཆེ་བ་མ་ནི་འཆི་བ་ཟོས་པའོ། །གཤིན་རྗེ་འཇོམས་མ་ནི་འཆི་བ་བརླག་པ་སྟེ་གཏན་བཅོམ་པའོ། །ཐམས་ཅད་ཀྱང་ཡི་དྭགས་ཀྱི་གདན་ལ་བཞུགས་ཤིང་ཞེས་པ་ནི་ལྷ་ཐམས་ཅད་ཀྱང་མི་རོའི་གདན་ལ་བཞུགས་པ་སྟེ། དེ་ནི་ཆོས་ཐམས་ཅད་བདག་མེད་པར་བསྟན་པའི་ཕྱིར་དང་། ལྷ་དེ་ཉིད་ཀྱང་ཆོས་ཉིད་དང་ཡེ་ཤེས་དབྱེར་མེད་པའི་ངོ་བོར་བསྟན་པའི་ཕྱིར་དང་། ཆོས་ཐམས་ཅད་ཀྱང་མི་རྟག་པ་ཡིན་ནོ་ཞེས་བསྟན་པའི་ཕྱིར་དང་། རྣལ་འབྱོར་པ་རྣམས་སྐྱོ་བ་བསྐྱེད་པས་བསྒོམ་པ་ལ་བརྩོན་འགྲུས་སྐྱེ་བའི་ཕྱིར་རོ། །དཔྲལ་བར་རྡོ་རྗེ་ཕྲེང་བ་ནི་རིགས་དྲན་པའི་ཕྱིར་དང་། གཉིས་སུ་མེད་པའི་ཡེ་ཤེས་ཀྱི་རང་བཞིན་ཡིན་པར་བསྟན་པའི་ཕྱིར་ཞེས་གསུངས་སོ། །དཔྲལ་བར་རྡོ་རྗེའི་ཕྲེང་བས་བསྐོར་བ་རིགས་དྲན་པའི་ཕྱིར་ཡིན་ཞེས་པའི་དོན་འདིར་མི་བསྐྱོད་པ་གཙོ་བོར་གྱུར་པའི་རིགས་དྲུག་པའི་དཀྱིལ་འཁོར་ཡིན་པར་བསྟན་པའི་ཆེད་ཡིན་ཏེ། མངོན་བརྗོད་དུ། ཐུགས་འཁོར་གྱི་ལྷ་རྣམས་ཀྱི་དཔྲལ་བར་རྡོ་རྗེའི་ཕྲེང་བ། གསུང་འཁོར་གྱི་ལ་པདྨ། སྐུ་འཁོར་གྱི་ལ་འཁོར་ལོའི་ཕྲེང་བ་བཤད་པའི་རིགས་ལས་ཁྱད་པར་དུ་བྱས་པའོ། །འདིར་འཁོར་གྱི་ལྷ་ཞལ་གཅིག་ཕྱག་བཞི་པར་མཛད་པ་ནི་ཨ་བྷི་དྷ་ན་ལ་བརྟེན་ལ། དྲིལ་བུ་པ་དང་། ནག་པོ་པའི་སྒྲུབ་ཐབས་སུ་ཞལ་གཅིག་ཕྱག་གཉིས་པར་མཛད་པ་ནི་ཀུན་སྤྱོད་ལ་བརྟེན་པར་སྣང་ངོ་། །གཉིས་པ་ཕོ་ཉ་གསུམ་བསྲེ་བ་ནི། སློབ་དཔོན་གྱི་གཞུང་ལས། སྐབས་འདིར་མ་བྱུང་ཡང་། རྗེ་བཙུན་ནཱ་རོ་པའི་སློབ་བཤད། ཕམ་འཐིང་པ་ནས་བརྒྱུད་པ། རྗེ་བཙུན་ཆེན་པོས་འདི་ལྟར་གསུངས་ཏེ། དེ་ལྟར་རྟེན་དང་བརྟེན་པར་བཅས་པའི་དཀྱིལ་འཁོར་ཡོངས་སུ་རྫོགས་པར་བསྐྱེད་ནས་ཕོ་ཉ་བསྲེ་བ་ལས། སྤྱིར་ཕོ་ཉ་བསྲེ་བ་ཞེས་བྱ་བ་ནི་རྒྱལ་པོའི་ཕོ་ཉ་དང་འདྲ་སྟེ། དངོས་གྲུབ་འགྲུབ་པ་ལ་ཤིན་དུ་མྱུར་བའི་ཕྱིར་ཕོ་ཉ་ཞེས་བྱའོ། །དེའང་རྣམ་པ་གསུམ་སྟེ། ཕོ་ཉ་སྔགས་སྐྱེས་དང་། ཞིང་སྐྱེས་དང་། ལྷན་སྐྱེས་སོ། །དེ་སྐད་དུ་རྩ་བའི་རྒྱུད་ལས། ཕོ་ཉ་རྣམ་གསུམ་ལེགས་འདྲེས་ནས། །སྒྲུབ་པ་པོ་ལ་དངོས་གྲུབ་སྟེར། །ཞེས་འབྱུང་ངོ་། །དེ་ལ་བསྒོམ་པ་དང་སྤྲོས་པ་གཅད་པ་གཉིས་ལས། དང་པོ་བརྗོད་ན་བློ་རྒྱ་ཆེ་ཆུང་གི་རིམ་པས། རྩིབས་དང་ལྷ་རེ་རེའི་སྟེང་ནས་བསྲེ་བ་དང་། འཁོར་ལོ་རེ་རེའི་སྟེང་དུ་བསྲེ་བ་དང་། དཀྱིལ་འཁོར་གྱི་འཁོར་ལོ་ཡོངས་སུ་རྫོགས་པ་ལ་བསྲེ་བའོ། །དེ་རེ་རེ་ལ་ཡང་ཡུལ་ལ་ཡུལ་གྱི་ཞེན་པ་དང་། ལྷ་ལ་ལྷའི་ཞེན་པ་བྱ་སྟེ། དེ་ལ་བདག་གིས་བསྒོམས་པའི་བློ་ལ་སྣང་བ་ནི་ཕོ་ཉ་སྔགས་སྐྱེས། འཛམ་བུ་གླིང་གི་ཡུལ་རྣམས་ན་སྤྲུལ་པའི་སྐུ་ཉིད་དུ་དངོས་སུ་བཞུགས་པ་རྣམས་ནི་ཕོ་ཉ་ཞིང་སྐྱེས། འོག་མིན་ལོངས་སྤྱོད་རྫོགས་པའི་གནས་ན་བཞུགས་པ་རྣམས་ནི་ཕོ་ཉ་ལྷན་སྐྱེས་སོ། །དེ་གསུམ་བསྲེ་བ་བློ་ཐ་མའི་དབང་དུ་བྱས་ནས་བརྗོད་ན། བདག་གི་བློ་ལ་སྣང་བའི་ཐུགས་ཀྱི་འཁོར་ལོའི་ཤར་ཕྱོགས་ཀྱི་རྩིབས་པུལླཱི་ར་མ་ལ་ཡ་འདི་འཛམ་བུའི་གླིང་ན་བཞུགས་པའི་ཡུལ་དེ་ཉིད་ཡིན་ལ། དེ་ཉིད་འོག་མིན་ན་བཞུགས་པའི་ཡུལ་དེ་ཉིད་ཡིན་ཞིང་། དེའང་ཆོས་ཀྱི་སྐུ་ལས་བྱུང་བ་ཡིན་ནོ་སྙམ་དུ་ཡུལ་ལ་ཡུལ་གྱི་ཞེན་པ་བྱ། ཡང་བློ་སྣང་གི་ཐུགས་ཀྱི་འཁོར་ལོའི་ཤར་རྩིབས་ལ་བཞུགས་པའི་ཁཎྜ་ཀ་པཱ་ལི་དང་། རབ་ཏུ་གཏུམ་མོ་འདི་འཛམ་བུའི་གླིང་ན་བཞུགས་པའི་སྤྲུལ་པའི་སྐུའི་བཅོམ་ལྡན་འདས་དེ་ཉིད་ཡིན་ལ། དེ་ཉིད་འོག་མིན་ན་བཞུགས་པའི་ལོངས་སྐུའི་བཅོམ་ལྡན་འདས་ཡིན་ཞིང་། དེ་ཉིད་ཆོས་ཀྱི་སྐུ་ལས་བྱུང་བའོ་སྙམ་དུ་ལྷ་ལ་ལྷའི་ཞེན་པ་བྱའོ། །དེ་བཞིན་དུ་ཡུལ་སོ་སོ་དང་། ལྷ་སོ་སོ་ཡོངས་སུ་རྫོགས་ཀྱི་བར་དུ་བསྲེ་བར་བྱའོ། །དེ་དག་ཀྱང་བསྒོམས་པ་དང་བསྟུན་ནས་ལྷ་རེ་རེ་གསལ་བཏབ་པ་དང་བསྲེ་ཞིང་བསྒོམ་པ་ཡིན་ནོ། །བློ་འབྲིང་གིས་འཁོར་ལོ་རེ་རེ་ནས་བསྲེ་ན་ཐུགས་ཀྱི་འཁོར་ལོའི་རྩིབས་བརྒྱད་པོ་འདི་ཉིད་འཛམ་བུའི་གླིང་ན་བཞུགས་པའི་ཡུལ་བརྒྱད་པོ་ཡིན་ལ། དེ་ཉིད་འོག་མིན་ན་བཞུགས་པའི་ཡུལ་བརྒྱད་པོ་ཡིན་ཞིང་དེ་ཆོས་ཀྱི་སྐུ་ལས་བྱུང་བ་ཡིན་ནོ་ཞེས་ཡུལ་ལ་ཡུལ་གྱི་ཞེན་པའོ། །རྩིབས་བརྒྱད་པོའི་དཔའ་བོ་དང་དཔའ་མོ་དེ་དག་འཛམ་བུའི་གླིང་ན་བཞུགས་པའི་སྤྲུལ་པའི་སྐུའི་དཔའ་བོ་དང་རྣལ་འབྱོར་མ་ཡིན་ལ། དེ་ཉིད་འོག་མིན་ན་བཞུགས་པའི་སྤྲུལ་པའི་སྐུའི་དཔའ་བོ་དང་རྣལ་འབྱོར་མ་ཡིན་ཞིང་། དེ་ཆོས་ཀྱི་སྐུ་ལས་བྱུང་བ་ཡིན་སྙམ་དུ་ལྷ་ལ་ལྷའི་ཞེན་པ་བྱའོ། །དེ་བཞིན་དུ་འཁོར་ལོ་སོ་སོ་དང་། ལྷ་རྣམས་སོ་སོ་ཡོངས་སུ་རྫོགས་ཀྱི་བར་དུ་བསྲེ་བར་བྱའོ། །བློ་རྒྱ་ཆེན་པོས་ཐམས་ཅད་ཀྱང་དུས་གཅིག་ཏུ་བསྲེ་ན། བློ་ལ་སྣང་བའི་གཞལ་ཡས་ཁང་སྲུང་བའི་འཁོར་ལོ་དང་། དུར་ཁྲོད་བརྒྱད་དང་བཅས་པ་འདི་ནི་ཕྱི་རོལ་སྣོད་ལ་བཞུགས་པའི་ཞིང་སྐྱེས་ཀྱི་ཡུལ་རྣམས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་གཞལ་ཡས་ཁང་ཡིན་ཞིང་། དེ་ཆོས་ཀྱི་སྐུ་ལས་བྱུང་བ་ཡིན་སྙམ་དུ་ཡུལ་ལ་ཡུལ་གྱི་ཞེན་པ་དང་། ཡང་བློ་ལ་སྣང་བའི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་སྔགས་སྐྱེས་འདི་ཉིད་འཛམ་བུའི་གླིང་ན་བཞུགས་པའི་སྤྲུལ་པའི་སྐུ་ཞིང་སྐྱེས་ཡིན་ལ། དེ་ཉིད་འོག་མིན་ན་བཞུགས་པའི་ལྷན་སྐྱེས་ཀྱི་ལྷ་དྲུག་ཅུ་རྩ་གཉིས་ཡིན་ཞིང་། དེ་ཆོས་ཀྱི་སྐུ་ལས་བྱུང་བའོ་སྙམ་དུ་ལྷ་ལ་ལྷའི་ཞེན་པ་བྱའོ། །བསྒོམ་པའི་རིམ་པའི་དབང་དུ་བྱས་ན་དེ་ཙམ་ཞིག་གིས་བཏུབ་བོ། །གལ་ཏེ་སྤྲོས་པ་གཅོད་པར་འདོད་ན། དེ་ལྟར་ཕོ་ཉ་བསྲེས་པས་འདྲེས་པར་ག་ལ་འགྱུར་སྙམ་ན། འདྲེ་བར་འགྱུར་ཏེ། ཞེན་པས་འཇུག་ཅིང་འབྲེལ་པས་མི་བསླུ་བའི་ལམ་ཡིན་པའི་ཕྱིར་རོ། །དེའང་ཇི་ལྟར་ཞེ་ན། ལམ་བསྒོམ་པའི་དུས་སུ་ཞེན་པ་ནི་ཞིང་སྐྱེས་དང་ལྷན་སྐྱེས་ལ་ཞེན་ཅིང་འཇུག་པ་ནི་སྔགས་སྐྱེས་ལ་འཇུག་པར་འབྲེལ་བས་མི་བསླུ་བ་སྟེ། དཔེར་ན་ནམ་མཁའ་ལ་ཟླ་བ་བྱུང་ན་ཆུ་ནང་དུ་འཆར་བ་བཞིན་དུ། ཆོས་སྐུའི་བྱིན་རླབས་ཀྱིས་འོག་མིན་དུ་ལོངས་སྐུ་འབྱུང་ལ། དེའི་མཐུས་འཛམ་བུ་གླིང་དུ་སྤྲུལ་སྐུ་འབྱུང་ལ། དེའི་མཐུས་སྒྲུབ་པ་པོའི་བློ་ལ་སྣང་བ་ཡིན་ནོ། །ཡང་འདིར་བསྒོམ་པ་མས་སྒོམ། བྱིན་གྱིས་ཡས་རློབ་ཅེས་བྱ་བ་དང་། བསྒོམ་པ་མས་སྒོམ་ལ་རྟོགས་པ་ཡས་འཆར་ཞེས་བྱ་བ་ཡིན་ཏེ། བསྒོམ་པ་མས་སྒོམ་པ་ནི་སྔགས་སྐྱེས་ཁོ་ན་ལ་འཇུག་པ་ཡིན་ལ། བྱིན་གྱིས་ཡས་རློབ་པ་ནི་སྔགས་སྐྱེས་ཞིང་སྐྱེས་ཀྱིས་བྱིན་གྱིས་རློབ་ལ། ཞིང་སྐྱེས་ལ་ལྷན་སྐྱེས་ཀྱིས་བྱིན་གྱིས་རློབ་ལ། དེ་ལ་ཆོས་སྐུས་བྱིན་གྱིས་རློབ་པ་ཡིན་པའི་ཕྱིར་རོ། །རྟོགས་པ་ཡས་འཆར་བ་ནི་སྔགས་སྐྱེས་བསྒོམས་པས་སྔོན་ལ་ཞིང་སྐྱེས་ཀྱི་རྟོགས་པ་སྐྱེ་བ་ལྟ་བུ་ནི་མ་ཡིན་ཏེ། ཐོག་མ་ཁོ་ནར་ཆོས་ཐམས་ཅད་རང་བཞིན་ཆོས་ཀྱི་སྐུའི་རྟོགས་པ་སྐྱེ་ལ། དེས་ལྷན་སྐྱེས་ལོངས་སྤྱོད་རྫོགས་པའི་སྐུ་འགྲུབ་ཅིང་། དེའི་ཐུགས་རྗེ་ཆེན་པོས་འཇིག་རྟེན་དུ་སྤྲུལ་པའི་སྐུ་ཞིང་སྐྱེས་འབྱུང་ལ། དེ་དག་གིས་སྒྲུབ་པ་པོའི་རྒྱུད་བྱིན་གྱིས་རློབ་པ་ན་སྔགས་སྐྱེས་ཀྱི་སྣང་བ་འབྱུང་བ་ཡིན་ནོ། །ཡང་འདིར་ཕོ་ཉ་འདྲི་བར་ནི་རྟོགས་ན། བསྲེ་བའི་ཡུལ་མ་ཚང་སྟེ། བློ་སྣང་སྔགས་སྐྱེས་ལ་ལྷ་ཐམས་ཅད་ཚང་ཡང་འཛམ་བུའི་གླིང་ན་བདེ་བ་ཆེན་པོའི་འཁོར་ལོ་མི་བཞུགས་སོ་ཞེས་བྱ་བ་དང་། འོག་མིན་ན་ནི་བདེ་བ་ཆེན་པོའི་འཁོར་ལོ་ཁོ་ན་ལས་གཞན་པ་མི་བཞུགས་པར་གྲག་གོ་ཞེས་སྨྲ་ན། དེ་ལྟར་ནི་མ་ཡིན་ཏེ་འཛམ་བུའི་གླིང་ལ་སོགས་པ་ཕྱི་རོལ་ནའང་རྟེན་དང་བརྟེན་པར་བཅས་པ་ཐམས་ཅད་ཚང་བར་བཞུགས་ལ། འོག་མིན་ན་ཡང་ཐམས་ཅད་བཞུགས་པ་ཉིད་ཡིན་ཏེ། རྒྱུ་ལ་ཆོས་ཐམས་ཅད་ཚང་བར་ཉམས་སུ་བླངས་པས་འབྲས་བུ་ནི་གནས་གྱུར་གྱི་ཚུལ་དུ་འབྱུང་བ་ཉིད་ཡིན་པས་ན་འདི་ལ་མ་ཚང་བ་ག་ལ་སྲིད། ཡང་ཁྱོད་སྨྲ་བ་བཞིན་ཡིན་དུ་ཆུག་ནའང་འཛམ་བུ་གླིང་ན་བཞུགས་པ་ནི་བསྡུ་བྱ་འཁོར་ཡིན་ལ། འོག་མིན་ན་བཞུགས་པ་ནི་བསྡུ་བྱེད་གཙོ་བོ་ཡིན་པས་ན། འཁོར་ལ་བསྲེས་པས་ཀྱང་གཙོ་བོ་ཚང་ལ་གཙོ་བོ་ལ་བསྲེས་པས་ཀྱང་འཁོར་ཚང་སྟེ། དཔེར་ན་འཇིག་རྟེན་ན་འཁོར་མཉེས་ན་གཙོ་བོ་ཡང་མཉེས་ལ། གཙོ་བོ་མཉེས་ན་འཁོར་ཡང་མཉེས་པར་འགྱུར་བ་བཞིན་ནོ། །གཞན་ཡང་ལྷ་རེ་རེའི་ལུས་ལ་ཡང་རྟེན་དང་བརྟེན་པར་བཅས་པའི་དཀྱིལ་འཁོར་ཐམས་ཅད་ཚང་བར་ཡོད་པས་ན་ལྷ་རེ་རེ་ལ་བསྲེས་པས་ཀྱང་ཐམས་ཅད་ཚང་བར་འགྱུར་བ་ཡིན་ནོ། །དེ་ལྟར་དེ་དག་ཐམས་ཅད་ཀྱི་མིང་ནི་བློའི་སྤྱོད་ཡུལ་གཅིག་ལ་ཕོ་ཉ་གསུམ་བསྲེ་བ་ཞེས་བྱ་བ་ཡིན་ནོ། །ཡང་མངོན་པར་རྟོགས་པ་གཅིག་ལ་ཕོ་ཉ་གསུམ་བསྲེ་བ་ཞེས་བྱ་བ་ནི། ཕྱིའི་དཀྱིལ་འཁོར་དག་པ་དང་བཅས་པ་ཕྱི་རོལ་ན་ཡོད་པ་དང་མཐུན་པས་ན་ཕོ་ཉ་ཞིང་སྐྱེས། ལུས་ཀྱི་དཀྱིལ་འཁོར་སྔགས་ཀྱི་བྱིན་གྱིས་བརླབ་པ་དང་བཅས་པ་སྔགས་ལས་བྱུང་བས་ན་ཕོ་ཉ་སྔགས་སྐྱེས། རྫོགས་པའི་རིམ་པ་སྤྱོད་པ་དང་བཅས་པ་རང་བཞིན་མེད་པའི་ངོ་བོ་ཡིན་པའི་ཕྱིར་ཕོ་ཉ་ལྷན་སྐྱེས་ཏེ་མངོན་པར་རྟོགས་པ་རྫོགས་པ་གཅིག་ལ་ཕོ་ཉ་གསུམ་བསྲེ་བ་ཞེས་བྱའོ། །ཡང་དཀྱིལ་འཁོར་གྱི་འཁོར་ལོ་གཅིག་ལ་ཕོ་ཉ་གསུམ་བསྲེ་ན་བདེ་བ་ཆེན་པོའི་འཁོར་ལོ་ནི་ཕོ་ཉ་ལྷན་སྐྱེས། འཁོར་ལོ་གསུམ་ནི་ཕོ་ཉ་ཞིང་སྐྱེས། སྒོ་མཚམས་མ་བརྒྱད་ནི་ཕོ་ཉ་སྔགས་སྐྱེས་ཡིན་ནོ་ཞེས་ཤེས་པར་བྱའོ། །དེ་ལྟར་བློའི་རིམ་པས་རིམ་གྱིས་བསྲེ་བའམ་ཅིག་ཆར་དུ་བསྲེ་བའང་རུང་སྟེ། ཕོ་ཉ་བསྲེ་བ་ལ་བློ་དད་པས་བརྟན་པར་བསྒོམ་པར་བྱའོ་ཞེས་གསུངས་པ་འདིའི་དོན་ལ་ལེགས་པར་དཔྱད་ན་དོན་དེ་ཚུལ་བཞིན་དུ་ངེས་པར་འགྱུར་རོ། །འདི་ལ་བླ་མ་ཕྱི་མ་དག །ཕོ་ཉ་རྣམ་གསུམ་ལེགས་འདྲེས་ན། །སྒྲུབ་པ་པོ་ལ་དངོས་གྲུབ་སྟེར། །ཞེས་པ་འདི་རྩ་རྒྱུད་ན་མི་སྣང་ཞིང་། གཞུང་འགྲེལ་རྣམས་ལས། སྐབས་འདིར་ཕོ་ཉ་བསྲེ་བ་མི་སྣང་བས་མ་དག་པ་ཡིན་ནོ་ཞེས་ཀྱང་སྨྲ་ཞིང་། སྔར་པྲ་ཛྙཱ་རཀྵི་ཏ་ནི། ནཱ་རོ་པ་ལོ་བཅུ་གཉིས་བསྟེན་ཀྱང་། ཚོགས་བཤད་ལས་སློབ་བཤད་མ་ཐོབ་པར་མལ་གྱོའི་རྗེས་འབྲང་དག་སྨྲ་ཡང་། སློབ་བཤད་ཡོད་པར་འདོད་པ་རྣམས་ལ་ཡོད་ཅིང་། ཁོ་ལ་མེད་པའི་བཤད་པ་ཁྱད་པར་ཅན་ཅིའང་མི་འདུག་ལ་ཞེས་ཀྱང་སྨྲ་བ་ནི། བ་ལང་ལ་རྟ་ལ་མེད་པའི་ཁྱད་ཆོས་ཅིའང་མི་འདུག་ཅེས་ཀྱང་སྨྲ། ནོག་ལྐོག་ཤལ་སོགས་ཡིན་ནོ་བྱས་པ་ལ། དེ་དག་ནི་རྟ་ལ་མེད་པས་བ་ལང་གི་ཁྱད་ཆོས་སུ་མི་འཐད་དོ་ཞེས་ཀྱང་སྨྲ་བ་དང་མཚུངས་སོ། །འོ་ན་སློབ་བཤད་ཡིན་ན། གཞུང་འགྲེལ་ན་མེད་ཀྱང་། རྒྱུད་ལ་བརྟེན་དགོས་པས། རྒྱུད་གང་ལ་བརྟེན་ཅེ་ན་བཤད་པར་བྱ་སྟེ། རྩ་རྒྱུད་ལེའུ་དང་པོ་ལས། ཕོ་ཉ་ལྷན་ཅིག་སྐྱེས་གྲུབ་ནི། །མཆོག་དང་འབྲིང་དང་ཐ་མ་སྟེ། །ཞེས་ཕོ་ཉ་གསུམ་དུ་གསུངས་ཤིང་། ལེའུ་ཉི་ཤུ་རྩ་དྲུག་པ་ལས། རིམ་དང་རིམ་ལས་བཟློག་པ་ཡིས། །ཕོ་ཉ་རྣམས་ནི་ཡང་དག་གནས། །འོག་དང་སྟེང་གྲུབ་རྟག་ཏུ་སྟེར། །བདག་གི་ཕོ་ཉ་མ་ཀུན་འགྲོ། །ཕོ་ཉ་མ་སྟེ་ཀུན་གྲུབ་སྟེར། །ཞེས་དང་། ཉི་ཤུ་རྩ་བདུན་པ་ལས། དེ་བཞིན་ཕོ་ཉ་ལེགས་འདྲེས་པ། །སྒྲུབ་པ་པོ་ཡིས་དངོས་གྲུབ་འཐོབ། །ཅེས་གསུངས་པ་རྣམས་ཀྱི་དོན་བསྡུས་ནས། རྗེ་བཙུན་གྱི་ཚིག་རྐང་གཉིས་གསུངས་པ་དོན་བསྡུས་པའི་ལུང་ངོ་། །དེ་དག་གི་དོན་ནི། རིམ་པ་ནི། རབ་གཏུམ་མ་ནས་བཟུང་སྟེ། ལྷ་རྣམས་ཡས་རིམ་མམ། ཕྱོགས་གཡོན་སྐོར་དུ་འགོད་པ་དང་། རིམ་པ་ལས་བཟློག་པ་ནི། བརྩོན་འགྲུས་ཆེན་མོ་ནས་བཟུང་སྟེ་མས་རིམ་མམ། མཚམས་གཡས་སྐོར་དུ་འགོད་པའི་ཕོ་ཉ་རྣམས་དཀྱིལ་འཁོར་ལ་གནས་པ་ནི། ཕོ་ཉ་སྔགས་སྐྱེས་ཏེ། ཐ་མའི་དོན་ནོ། །འོག་གྲུབ་ཅེས་པ་ནི། འཛམ་བུའི་གླིང་ན་བཞུགས་པའི་ཕོ་ཉ་ཞིང་སྐྱེས་ཏེ། འབྲིང་གི་དོན་ཏོ། །སྟེང་གྲུབ་ཅེས་པ་ནི་འོག་མིན་ན་བཞུགས་པའི་ལྷན་སྐྱེས་ཏེ། མཆོག་གི་དོན་ཏོ། །དེས་ན་བདག་གི་ཕོ་ཉ་མ་ནི་སྔགས་སྐྱེས་ཡིན་ལ། དེ་ཉིད་ཞིང་སྐྱེས་དང་། ལྷན་སྐྱེས་ཀུན་དུ་འགྲོ་བས། དངོས་གྲུབ་སྟེར་ཅེས་པའོ། །ཉམས་ལེན་གང་གིས་ན། དེ་བཞིན་ཕོ་ཉ་ལེགས་འདྲེས་པ། །ཞེས་སོགས་ཏེ། འདྲེས་པས་སྟེར་ཅེས་པའི་དོན་ཏེ། རྒྱུད་ཀྱི་སྟེང་གི་ཉམས་ལེན་གྱི་རིམ་པ་འདི་ལྟ་བུ་གང་ལ་མེད་པ་ནི་ཚོགས་བཤད་དང་། ཡོད་པ་ནི་སློབ་བཤད་དུ་ངེས་པར་བྱའོ། །གསུམ་པ་བྱང་ཆུབ་ཀྱི་ཕྱོགས་ཀྱི་དག་པ་དྲན་པ་ལ་དྲུག་སྟེ། གང་དུ་བསྒོམ་པའི་གནས་སྐབས་ཀྱི་ངེས་པ། གང་བསྒོམ་པ་བྱང་ཆུབ་ཀྱི་ཕྱོགས་ངོས་གཟུང་། གང་ལ་བསྒོམ་པའི་གཞི་ངོས་གཟུང་། དེ་ལ་དེ་ཇི་ལྟར་བསྒོམ་པའི་ཚུལ། དེ་ལྟར་བསྒོམ་པའི་དགོས་པ། གོ་རིམ་ལ་རྩོད་པ་སྤོང་བའོ། །དང་པོ་ནི། ཀུན་སྤྱོད་ལེའུ་གསུམ་པར། ལྷ་དང་སྦྱར་ནས་བསྒོམ་ཚུལ་ཙམ་ལས། གནས་སྐབས་གང་དུ་བསྒོམ་པ་གསལ་བར་མ་གསུངས་ལ། གྲུབ་ཆེན་འདིས། གནས་སྐབས་འདིར་བསྒོམ་པར་གསུངས། སློབ་དཔོན་དྲིལ་བུ་པས། ལུས་དཀྱིལ་གྱི་ལྷ་རྣམས་གསལ་གདབ་ཟིན་པའི་རྗེས་སུ་བསྒོམ་པའང་གསུངས་ཤིང་། ནག་པོ་སྤྱོད་པ་བས། སངས་རྒྱས་སུ་བསྐྱེད་པ་དང་། དེ་ལ་མཆོད་པ་གཉིས་རྫོགས་ནས་བཟླས་པའི་གོང་དུ་བསྒོམ་པར་གསུངས་སོ། །དེ་དག་གི་དོན་ཡང་བསྒོམ་གཞི་ལྷ་གསལ་གདབ་པ་ཙམ་ནི་སྔོན་དུ་འགྲོ་དགོས་ཤིང་། དེའི་རྗེས་སུ་གང་དུ་བསྒོམས་ཀྱང་འདྲ་བར་བཞེད་དོ། །གཉིས་པ་ནི། སྤྱིར་བྱང་ཕྱོགས་སོ་བདུན་ལ་ཕ་རོལ་ཏུ་ཕྱིན་པའི་ཐེག་པ་ལས། མངོན་པ་གོང་འོག་གཉིས་ནས། སྡེ་ཚན་བདུན་གྱི་ས་མཚམས་ཅུང་ཟད་མི་འདྲ་བ་དང་། མངོན་རྟོགས་རྒྱན་ལས་སོ་བདུན་པོ་ཐམས་ཅད་རྣམ་མཁྱེན་གྱི་རྣམ་པར་བཤད་པ་དང་། རྡོ་རྗེ་ཐེག་པ་ལས་རྡོ་རྗེ་རྩེ་མོར་གཞལ་ཡས་ཁང་གི་ཆ་ཤས་ལ་སྦྱར་བ་དང་། ཀུན་སྤྱོད་ལས་ལྷ་སུམ་ཅུ་སོ་བདུན་ལ་སྦྱར་བ་དང་། སཾ་བུ་ཊིར། རབ་དགའ་ལ་སོགས་པའི་ས་བཅུ་གསུམ་ལ་སྦྱར་བ་སོགས་དུ་མ་ཡོད་པའི་ནང་ནས། སྐབས་འདིར་སངས་རྒྱས་ཀྱི་ཡེ་ཤེས་གཅིག་ཉིད་ལ་བྱང་ཕྱོགས་སོ་བདུན་ལྡོག་པའི་སྒོ་ནས་ཕྱེ་བའོ། །དེ་ཡང་སཾ་བུ་ཊིར། ཕ་རོལ་ཏུ་ཕྱིན་པའི་ལུགས་ཇི་ལྟ་བ་བཞིན་གྱི་བསྒོམ་ཚུལ་དང་གོ་རིམ་བཤད་ལ། ཀུན་སྤྱོད་གཉིས་པ་ལས། རྒྱས་བཤད་ཀྱི་སྐབས་སུ་སྐབས་འདི་ནས་བསྟན་པའི་ལྷའི་གོ་རིམ་བཞིན་དུ་བཤད་ཅིང་། དོན་བསྡུའི་སྐབས་སུ་སྡེ་ཚན་བདུན་པོ་ཕ་རོལ་ཏུ་ཕྱིན་པའི་གོ་རིམ་བཞིན་དུ་བཤད་དོ། །གསུམ་པ་ནི་ཀུན་སྤྱོད་གསུམ་པ་ལས། དེ་ལ་དེ་རྣམས་ཀྱི་ལྷའི་རྣལ་འབྱོར་པ་གྲངས་ཇི་ལྟ་བར་མདོར་བསྡུས་པ་སྟེ། ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ་ཞེས་པ་ནས། མི་དགེ་བའི་ཆོས་རྣམས་མ་སྐྱེས་པ་རྣམས་མི་བསྐྱེད་པ་ནི་གཤིན་རྗེ་འཇོམས་མའོ་ཞེས་པའི་བར་གསུངས་ཤིང་། སློབ་དཔོན་གྱི་གཞུང་ལས་ཀྱང་། དེས་ནས་གཞན་ཡང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལྷའི་སྦྱོར་བར་བྱ་སྟེ། དེ་དག་ཀྱང་གང་ཞེ་ན། ལུས་རྗེས་སུ་དྲན་པ་ནི་ཞེས་སོགས་རྒྱུད་ཀྱི་ཚིག་ཇི་ལྟ་བ་བཞིན་གསུངས་སོ། །རྒྱུད་གཞུང་འདི་གཉིས་ཆར་ལས། འཁོར་ལོ་གསུམ་གྱི་ཡུམ་འབའ་ཞིག་སྨོས་པ་ནི། ཤེས་རབ་ཀྱི་རྒྱུད་གཙོ་བོར་གྱུར་པ་དང་། རྩ་རྣམས་ལྷ་མོ་ཡིན་པ་ལ་དགོངས་ལ། ཡབ་ཧེ་རུ་ཀ་ཙམ་ཞིག་སྨོས་པས་ནི། ཡུམ་བཞིན་དུ་ཡབ་དཔའ་བོ་རྣམས་ཀྱང་དག་གོ །ཞེས་བྱ་བ་ལ་དགོངས་ལ། དེས་ན་བསྒོམ་པ་དང་བརྗོད་པ་གཉིས་ཀའི་དུས་སུ་ཟུང་འཇུག་ཏུ་ཤེས་པར་བྱ་བའི་ཕྱིར། འདིར་བསྡེབས་ཏེ་བྲིས་པ་ཡིན་ནོ་ཞེས་རྗེ་བཙུན་གྱིས་གསུངས་པས། གང་ལ་བསྒོམ་པར་བྱ་བའི་གཞི་ནི་ལྷ་སུམ་ཅུ་སོ་བདུན་པོ་ཐམས་ཅད་དོ། །བཞི་པ་ནི་རྗེ་བཙུན་དང་། དམར་གྱིས་དེ་ཡང་ལྷའི་སྐུ་རྡོས་པའི་རྣམ་པ་ལྟ་བུར་མཐོང་སྟེ། ལྷ་ལ་མངོན་པར་ཞེན་པ་སྐྱེས་ན་ཚུར་དག་ཏུ་སྦྱར་བར་བྱ་སྟེ་ཡང་དག་པར་ན་མཁའ་འགྲོ་མ་ནི་ལུས་རྗེས་སུ་དྲན་པའོ། །ཞེས་བྱ་བ་ལ་སོགས་པར་ཤེས་པར་བྱའོ། །ལམ་ལ་སོམ་ཉི་ཟ་ན་སྟེ། ཕ་རོལ་དུ་ཕྱིན་པའི་ཐེག་པ་ལ་ལམ་དམན་པའམ་ལོག་པ་ཞིག་ཏུ་གོ་ན་དེ་ནི་མ་ཡིན་ཏེ། ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ། །ཞེས་བྱ་བ་ལ་སོགས་པ་སྟེ། དག་བྱ་བྱང་ཆུབ་ཀྱི་སེམས་ཀྱི་ཆོས་སུ་བྱས་ནས་དག་བྱེད་ལྷས་དག་པར་བྱེད་པ་སྟེ། ལམ་དམན་པའམ་གུད་དུ་མ་ལས་པར་ཤེས་པར་བྱའོ། །དེ་ལྟར་ལྷ་ལ་ཞེན་པ་མི་སྐྱེ་ཞིང་། ལམ་ལ་སོམ་ཉི་མི་ཟ་ན་ནི་བྱང་ཆུབ་ཀྱི་ཕྱོགས་ཀྱི་དག་པ་ངག་ཏུ་བརྗོད་མི་དགོས་སོ་ཞེས་གསུངས་ལ་བླ་མ་གོང་མ་རྣམས་ནི་ཅིས་ཀྱང་ལག་ལེན་ལ་མཛད་དོ། །ཞེས་གསུངས་སོ། །ལྔ་པ་ནི་རྗེ་བཙུན་དང་། དམར་གྱི་བཞེད་པ་ནི་བསྒོམ་ཚུལ་གྱི་སྐབས་སུ་བསྟན་པ་དེ་ཉིད་ཡིན་ལ། དམར་གྱིས་དགོས་དོན་གྱི་སྐབས་སུ། ལྷ་ལ་ཞེན་པ་སྤང་བའི་ཕྱིར་ཡིན་ནོ། །སྤང་བྱ་ཞེན་པ་ལ་གསུམ་སྟེ། ལྷ་ལ་རྒྱུད་ཐ་དད་དུ་ཞེན་པ་དང་། ཡང་དག་ཏུ་ཞེན་པ་དང་། བེམ་པོར་ཞེན་པའོ། །དེ་ལ་ཞེན་པ་དང་པོའི་གཉེན་པོར། ལྷ་ཐམས་ཅད་གཙོ་བོའི་ཐུགས་གཉིས་སུ་མེད་པ། ཆོས་ཀྱི་སྐུར་རོ་གཅིག་ཏུ་གོ་བས་རྒྱུད་ཐ་དད་དུ་ཞེན་པ་སྤོང་ངོ་། །གསལ་བ་ལྟར་སྣང་ཡང་དེ་ལ་རང་བཞིན་མེད་པ་སྒྱུ་མ་ལྟ་བུར་བསྒོམས་པས་ཡང་དག་ཏུ་ཞེན་པ་སྤོང་ངོ་། །དེ་ཉིད་ཉམས་མྱོང་གསལ་བ་དང་མ་བྲལ་བས་བེམ་པོར་ཞེན་པ་སྤོང་ངོ་། །ཞེས་གསུངས་པས་ནི་རྡོ་རྗེ་ཐེག་པའི་བསྐྱེད་རིམ་གྱི་གནད་མཐའ་དག་ལ་མཁོ་བར་སྣང་ཞིང་། སྐབས་འདིར་ཕར་དག་གི་དགོས་པའི་དགོས་པ་དང་པོ་བསྟན་ཏེ། གཙོ་བོའི་ཐུགས་གཉིས་སུ་མེད་པའི་ཡེ་ཤེས། བྱང་ཕྱོགས་སོ་བདུན་ཉིད་ལྟར་ཤར་བར་བསྟན་པའི་ཕྱིར་རོ། །ཚུར་དག་གི་དགོས་པས་དགོས་པ་ཕྱི་མ་གཉིས་བསྟན་ཏེ། ལྷ་སུམ་ཅུ་སོ་བདུན་བྱང་ཕྱོགས་སོ་བདུན་དུ་ཤེས་པས་ཡང་དག་ཏུ་འཛིན་པ་དང་། བེམ་པོར་འཛིན་པ་གཉིས་ཀ་སྤོང་ནུས་པའི་ཕྱིར་རོ། །ཇོ་བོའི་འགྲེལ་པར་དགོས་པ་བཞི་གསུངས་ཏེ། ཧེ་རུ་ཀའི་ལྷ་ཚོགས་རྣམས་ཆོས་སྐུའི་རང་བཞིན་དུ་བསྟན་པ་དང་། ལྷར་ཞེན་པ་བཟློག་པ་དང་། སྒྱུ་མ་དང་སྟོང་པ་གཉིས་སུ་མེད་པར་མཚོན་པ་དང་། །ཅིག་ཆར་ལམ་དུ་བྱས་པ་ཐེག་པའི་ཁྱད་པར་རོ་ཞེས་གསུངས་པའི་དང་པོ་གསུམ་ནི་ཚུར་དག་གི་དགོས་པ་དང་། ཕྱི་མ་ནི་ཕར་དག་གི་དགོས་པ་ཡིན་པས་དོན་གཅིག་པར་སྣང་ངོ་། །འགྲེལ་པ་གསུམ་ལས། ལྷ་ལ་མངོན་པར་ཞེན་པ་དོར་བ་དང་། ཐམས་ཅད་ཤེས་པ་ཉིད་ཐོབ་པར་བྱ་བའི་ཕྱིར་དུ་བསྒོམ་པར་བཤད་པ་ཡང་རིམ་པ་ལྟར། ཕར་དག་དང་ཚུར་དག་གི་དགོས་པར་སྣང་སྟེ། མངོན་པར་ཞེན་པ་དོར་ཚུལ་ནི་བཤད་ཟིན་ལ། སརྦ་ཛྙཱ་ན་ཞེས་པ་གཅིག་ཉིད་ཐམས་ཅད་ཤེས་པ་དང་། ཐམས་ཅད་མཁྱེན་པ་གཉིས་ཀ་ལ་འཇུག་པས་བྱང་ཕྱོགས་སོ་བདུན་གཟུགས་ཀྱི་རྣམ་པ་ལྷ་སོ་བདུན་དུ་བསྒོམས་པས། ཕ་རོལ་ཏུ་ཕྱིན་པའི་ཐེག་པ་ལས་བསྒོམ་ཚུལ་ཁྱད་པར་འཕགས་པའི་སྒོ་ནས་བྱང་ཕྱོགས་སོ་བདུན་གྱིས་བསྡུས་པའི་ཐམས་ཅད་མཁྱེན་པའི་ཡེ་ཤེས་ཐོབ་ཅེས་པའི་དོན་ཡིན་པའི་ཕྱིར་རོ། །འདི་ལ་འདོད་འཇོ་མཁན་པོས། དེ་ལྟར་བཤད་པའི་དང་པོ་ནི། འབྲས་བུའི་སྐབས་ན་གཉིས་མེད་བདེ་ཆེན་གྱི་ཡེ་ཤེས་ཉིད་ལྷར་ཤར་བ་ཡིན་ལ། དེ་དང་རྗེས་སུ་མཐུན་པར་འབྲས་བུ་ལམ་དུ་བྱེད་པའི་དོན་ཡིན་གྱི། སོ་བདུན་པོ་ཐེག་ཆེན་གཞན་དང་ཐུན་མོང་བ་ཉིད་ལྷར་སྟོན་པ་དང་། ལྷ་སྐུ་ཤ་རུས་ལ་སོགས་པའི་རྡོས་ཅན་མ་ཡིན་པར་འཇའ་ཚོན་ལྟར་བསྒོམ་པ་ཙམ་གྱི་དོན་མ་ཡིན་ནོ་ཞེས་བཤད་པ་འདི་རྗེ་བཙུན་དང་། དམར་གྱི་བཞེད་པ་ལ་ཟུར་ཟ་བར་སྣང་ན་ཡང་། འབྲས་བུ་ལམ་བྱེད་དེ་ཉིད་ལ་ལྷའི་རྣམ་པར་ཞེན་པ་སྤངས་ནས། ཡེ་ཤེས་ཀྱི་ངོ་བོར་བསྒོམ་པའི་ཚུལ་དག་བསྒོམ་དགོས་པས་སྔ་མ་ནི་སུན་འབྱིན་མི་ནུས་ལ། ལྷ་སྐུ་ཤ་རུས་ལ་སོགས་པའི་རྡོས་ཅན་མ་ཡིན་པར་འཇའ་ཚོན་ལྟར་བསྒོམས་པ་ཙམ་གྱི་དོན་དུ་མི་འདོད་པས། ཕྱོགས་སྔ་ཡང་མ་ལོངས་པར་སྣང་ངོ་། །སོ་བདུན་པོ་ཐེག་ཆེན་གཞན་དང་ཐུན་མོང་བ་ཉིད་ལྷར་སྟོན་པ་མ་ཡིན་པ་དང་། ཁྱེད་རང་གིས་དགོས་པ་གཉིས་པ་བཤད་པའི་ཚེ། ཕུང་ཁམས་སྐྱེ་མཆེད་ཀྱི་གཞི་ཐམས་ཅད་རང་བཞིན་མེད་པར་ཤེས་པའི་རྟོགས་པ་དམ་པ་རྒྱུད་ལ་བསྐྱེད་པའི་དོན་ཡིན་ཅེས་འཆད་པ་གཉིས་ནང་འགལ་ཏེ། ཐམས་ཅད་ཤེས་པ་ཅེས་པའི་དོན་གཞི་ཤེས་ལ་བྱས་འདུག་པའི་ཕྱིར་རོ། །དྲུག་པ་ནི་རྗེ་བཙུན་གྱིས། གཞུང་ནས་ཡང་དག་སྤོང་བ་ཞེས་མཇུག་དུ་སྨོས་པ་ནི། ལྷའི་གོ་རིམ་མི་འཁྲུག་པར་བྱ་བའི་ཕྱིར་ཡིན་ལ། དཔལ་ཧེ་རུ་ཀ་མཇུག་ཏུ་སྨོས་པ་ནི་བྱང་ཆུབ་ཀྱི་ཕྱོགས་ཀྱི་འཕགས་པའི་ལམ་ཡན་ལག་བརྒྱད་ཀྱི་གོ་རིམ་མི་འཁྲུག་པར་བྱ་བའི་དགོས་པ་ཡིན་ནོ་ཞེས་གསུངས་ལ། གཞན་ཡང་ཀུན་སྤྱོད་ལས་གསུངས་པའི་ས་དང་ལྷའི་གོ་རིམ་ལ་སྦྱར་བ་དང་། སཾ་བུ་ཊི་ནས་གསུངས་པའི་སྦྱར་ཚུལ་གོ་རིམ་མི་འདྲ་བར་སྣང་བ་ནི། སངས་རྒྱས་ཀྱི་ཡེ་ཤེས་གཅིག་ཉིད་ལ་བྱང་ཕྱོགས་སོ་བདུན་ལྡོག་པའི་སྒོ་ནས་ཕྱེ་བ་ཡིན་པས། གང་ལྟར་སྦྱར་ཡང་འགལ་བ་མེད་པར་རྟོགས་པའི་ཆེད་ཡིན་ནོ། །གཉིས་པ་ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབ་པ་དང་བཅས་པ་ལ་གཉིས་ཏེ། ལུས་ཀྱི་དཀྱིལ་འཁོར་བསྒོམ་ཚུལ། སྔགས་ཀྱི་བྱིན་གྱིས་བརླབ་པའི་ཚུལ་ལོ། །དང་པོ་ནི་སློབ་དཔོན་གྱི་གཞུང་ལས། དེ་ནས་གཞན་ཡང་སྐུའི་དཀྱིལ་འཁོར་མཆོག །ཅེས་པ་ནས། འདི་དག་ནི་སྐུའི་འཁོར་ལོ་སྟེ། ས་འོག་ན་གནས་པའོ་ཞེས་པའི་བར་གྱིས་བསྟན་ཏེ། འདི་འཆད་པ་ལ་གཞུང་ལས་བཤད་པའི་ལུས་དཀྱིལ་ངོས་གཟུང་། མ་བཤད་པའི་ལུས་དཀྱིལ་ཁ་བསྐང་བའི་ཚུལ། དེ་དག་གི་བསྒོམ་ཚུལ་ཞིབ་ཏུ་བཤད་པ། དེ་ལྟར་བསྒོམ་པའི་དགོས་པ། རྟོག་པས་བརྟགས་པའི་ལུགས་དགག་པ་དང་ལྔ་ལས། དང་པོ་ནི། ལཱུ་ནག་གཉིས་ཀྱི་གཞུང་ལས། འཁོར་ལོ་གསུམ་གྱི་ལུས་དཀྱིལ་ཁོ་ན་བཤད་ཀྱི། གཞན་ལྷ་བཅུ་གསུམ་དང་། རྟེན་ལུས་དཀྱིལ་མ་བཤད་པ་ནི་ཨ་བྷི་དྷ་ནའི་དགུ་པ་མ་གཏོགས་པའི་ལུས་དཀྱིལ་སྟོན་པའི་སྐབས་ཕལ་ཆེར་དང་། རྡོ་རྗེ་མཁའ་འགྲོ་དང་། ཀུན་སྤྱོད་ཀྱི་ལུས་དཀྱིལ་སྟོན་པའི་སྐབས་རྣམས་སུ། འཁོར་ལོ་གསུམ་གྱི་ལུས་དཀྱིལ་ལས་གཞན་མ་བཤད་པའི་དབང་དུ་བྱས་པའོ། །དེ་དག་ལས་དེ་ལྟར་བཤད་པའི་རྒྱུ་མཚན་ཡང་། ཕ་རོལ་ཏུ་ཕྱིན་པ་བ་དག་དེ་དང་མི་མཐུན་པའི་སའི་རྣམ་གཞག་མཐོང་ན། འགྱོད་པ་སྐྱེ་བར་འགྱུར་བས་དེ་བཟློག་ནས། དེ་དང་ལུང་སྒོ་བསྟུན་གྱི་དབང་དུ་བྱས་པ་སྟེ། རྩ་རྒྱུད་དང་། སཾ་བུ་ཊ་གཉིས་ཀ་ལས། གནས་དེ་རབ་ཏུ་དགའ་བའི་ས། །དེ་བཞིན་ཉེར་གནས་དྲི་མ་མེད། །ཞིང་ནི་འོད་བྱེད་ཤེས་པར་བྱ། །ཉེ་བའི་ཞིང་དེ་འོད་འཕྲོ་ཅན། །ཚནྡོ་མངོན་དུ་གྱུར་པ་སྟེ། །ཉེ་བའི་ཚནྡོ་སྦྱང་དཀའ་བ། །འདུ་བ་རིང་དུ་སོང་བ་སྟེ། །ཉེ་བའི་འདུ་བ་མི་གཡོ་བ། །དུར་ཁྲོད་ལེགས་པའི་བློ་གྲོས་ཏེ། །ཉེ་བའི་དུར་ཁྲོད་ཆོས་ཀྱི་སྤྲིན། །ཕ་རོལ་ཕྱིན་བཅུའི་ས་རྣམས་ལ། །རྣལ་འབྱོར་མ་ཡི་ཀླ་ཀློའི་སྐད། །པུ་ལ་སོགས་པ་ཅི་གསུངས་པ། །ཕྱི་དང་ནང་དུ་ཡང་དག་བསམ། །ཞེས་གསུངས་པས་སོ། །དེ་ལྟར་ཕ་རོལ་ཏུ་ཕྱིན་པ་དང་ལུང་སྒོ་བསྟུན་ན། སློབ་ལམ་ས་བཅུ་ལས་མེད་པས། རྒྱུད་གཞུང་རྣམས་ཀྱི་དངོས་བསྟན་འཁོར་ལོ་གསུམ་གྱི་ལུས་དཀྱིལ་ལས་མ་གསུངས་ཀྱང་། དོན་ལ་ས་བཅུ་གསུམ་མི་བཞེད་པ་མ་ཡིན་པས། ལུས་དཀྱིལ་ལ་ཡང་དེ་དང་མཐུན་པར་འབྱུང་དགོས་ཏེ། མངོན་བརྗོད་ལས། དཔེ་མེད་པ་དང་ཡེ་ཤེས་ལྡན། །རྡོ་རྗེའི་ས་ནི་བཅུ་གསུམ་པ། །ཞེས་གསུངས་ཤིང་། རྩ་རྒྱུད་ལས། རྣལ་འབྱོར་མ་ཡི་ས་དང་གནས། །ཧེ་རུ་ཀ་དཔལ་སྐུའི་ཡན་ལག །ཐམས་ཅད་བརྟན་གཡོའི་བདག་ཉིད་ཅན། །ཞེས་རྣལ་འབྱོར་མ་རྒྱུད་ཀྱི་ས་དང་། གནས་ཐམས་ཅད་ལུས་ལ་ཚང་དགོས་པར་གསུངས་པའི་ཕྱིར་རོ། །གཉིས་པ་ལ་གཉིས་ཏེ། ལྷ་བཅུ་གསུམ་ཁ་བསྐང་བའི་ཚུལ། རྟེན་གྱི་དཀྱིལ་འཁོར་ཁ་བསྐང་བའི་ཚུལ་ལོ། །དང་པོ་ནི། དེ་ལྟར་འཁོར་ལོ་གསུམ་གྱི་སྟེང་དུ། ས་ལྷག་མ་རྣམས་བགྲོད་པའི་ལུས་དཀྱིལ་ཁ་བསྐང་དགོས་ན། དཀྱིལ་འཁོར་གང་ཞིག་ཁ་བསྐང་སྙམ་ན། འདིར་རྫོགས་པའི་རིམ་པ་དང་ཐུན་མོང་གི་དབང་དུ་བྱས་ནས། སཾ་བུ་ཊི་ལས། དཀྱིལ་འཁོར་ལུས་སུ་གསུངས་པ་སྟེ། །དཀྱིལ་འཁོར་བྷ་གར་བརྗོད་པ་ཉིད། །དཀྱིལ་འཁོར་བྱང་ཆུབ་སེམས་ཉིད་དེ། །དཀྱིལ་འཁོར་གསུམ་ནི་ཡོངས་སུ་བརྟག །ཅེས་ལུས་རྩའི་དཀྱིལ་འཁོར་ལ། རྩ་ཉི་ཤུ་རྩ་བཞི་དང་། བུ་ག་བརྒྱད་དང་འབྲེལ་བའི་རྩ་བརྒྱད། སྙིང་ག་སྦས་པའི་རྩ་ལྔ་སྟེ། སུམ་ཅུ་རྩ་བདུན། རྩ་ཡི་གེའི་དཀྱིལ་འཁོར་ལ། པུ་ཛཱ་ལ་སོགས་པ་ཉེར་བཞི་དང་། ཧཱུྃ་རིང་པོ་བརྒྱད་དང་། ཀྱཻ་རྡོར་ལྟར་ན། བྷྲཱུྃ་ཨཱྃ་ཛྲཱིྃ་ཁྃ་ཧཱུྃ་ངམ། བདེ་མཆོག་ལྟར་ན། ལྃ་མཱྃ་པཱྃ་ཏཱྃ་ཧཱུྃ་སྟེ་སུམ་ཅུ་རྩ་བདུན། བྱང་ཆུབ་སེམས་ཀྱི་དཀྱིལ་འཁོར་ལ། སོ་དང་སེན་མོ་བསྐྱེད་པ་ལ་སོགས་པའི་ཁམས་ཉི་ཤུ་རྩ་བཞི། རྣམ་ཤེས་བརྒྱད་དང་འབྲེལ་བའི་ཁམས་བརྒྱད། དེ་དག་གི་རྩ་བ་བདུད་རྩི་ལྔ་སྟེ་སུམ་ཅུ་རྩ་བདུན་ཏེ། ཚན་པ་གསུམ་དང་། དེ་དག་གི་ཁྱབ་བྱེད་དུ་གྱུར་པའི་རླུང་རྣམས་ཀྱིས་ས་བཅུ་གསུམ་བགྲོད་དགོས་པས། ལྷ་ལྷག་མ་བཅུ་གསུམ་ངེས་པར་ཁ་བསྐང་དགོས་པའོ། །འོ་ན་ལྷ་གང་། ལུས་ཀྱི་གནས་གང་དུ་ཁ་བསྐང་ན། དམར་གྱིས་ཡེ་ཤེས་ཀྱི་འཁོར་ལོའི་ལྷ་ལྔ་སྙིང་གར་བསྒོམ་པ་དང་། དམ་ཚིག་གི་འཁོར་ལོའི་སྒོ་མཚམས་མ་བརྒྱད། སྣ་བུག་གཉིས་གཅིག་ཏུ་བྱས་པའི་བུ་ག་བརྒྱད་དུ་བསྒོམ་པ་ནི། བཤད་རྒྱུད་སཾ་བུ་ཊའི་རྗེས་སུ་འབྲངས་ནས་བྷ་དན་ཏ་བཞེད། སློབ་དཔོན་རྡོ་རྗེ་དྲིལ་བུ་པས་ངེས་བརྗོད་ཀྱི་རྗེས་སུ་འབྲངས་ནས་སྙིང་གའི་བདེ་ཆེན་འཁོར་ལོའི་ཕྱི་རོལ་དུ་རྩ་འདབ་མ་བརྒྱད་ལ་བསྒོམ་གསུང་ངོ་། །བླ་མ་ཕམ་འཐིང་པ་རྡོ་རྗེ་མཁའ་འགྲོའི་རྗེས་སུ་འབྲངས་ནས། ལྷ་མོ་བཅུ་གཉིས་གཙོ་བོའི་ཕྱག་བཅུ་གཉིས་ལ་འགོད་པ་ཡིན་ནོ་ཞེས་གསུངས་ཀྱང་། སྙིང་གའི་རྩ་འདབ་ལ་འགོད་པ་ངེས་བརྗོད་ན་གསལ་བར་མི་སྣང་ཞིང་། ཕྱག་བཅུ་གཉིས་ལ་འགོད་པ་ངེས་བརྗོད་ན་གསལ་བར་སྣང་ངོ་། །འོ་ན་ཅི་ལྟར་སྙམ་ན། འདི་ལ་ཕ་རོལ་ཏུ་ཕྱིན་པ་དང་ལུང་སྒོ་བསྟུན་དབང་བཙན་པར་བྱས་ནས། ཇོ་བོ་ནཱ་རོ་ཏ་པ་དོན་ལ་ས་བཅུ་གཅིག་ལས་མི་བཞེད་པར་རྒྱ་གར་ན་གྲགས་ཤིང་། མུ་ཏིག་ཕྲེང་བ་ལས་ཀྱང་། ས་བཅུ་གསུམ་དུ་བཤད་པ་ནི་གདུལ་བྱ་སྤྲོ་བ་བསྐྱེད་པའི་ཆེད་ཡིན་གྱི། དོན་ལ་ས་བཅུ་གཅིག་ལས་མེད་གསུང་ཞེས་པ་ཡང་། ནཱ་རོ་པའི་གསུང་སྒྲོས་ཀྱི་དབང་དུ་བྱས་པ་ཡིན་པས་དེའི་མན་ངག་འཛིན་པའི་ཕམ་འཐིང་པའི་བརྒྱུད་པ་འདི་ལ། མ་མོ་བཅུ་གཉིས་ཕྱག་བཅུ་གཉིས་ལ་འགོད་པར་སྣང་སྟེ། ས་ཆེན་གྱིས། ནག་པོ་པའི་སྐབས་དང་རྗེ་བཙུན་གྱིས་ལཱུ་ཧི་པའི་སྐབས་སུ་དེ་ལྟར་གསུངས་པས་སོ། །ཕྱག་བཅུ་གཉིས་ལ་འགོད་པ་འདི་ཡང་ངེས་བརྗོད་ཀྱི་དགོངས་པར་སྣང་སྟེ། དེ་ཉིད་ལས། མཁའ་འགྲོ་མ་ནི་རྡོ་རྗེ། ལཱ་མ་ནི་དྲིལ་བུ། དུམ་སྐྱེས་མ་དང་གཟུགས་ཅན་མ་ནི་གླང་པོ་ཆེའི་པགས་པ་འཛིན་པའི་ཁུ་ཚུར། ཁྭ་གདོང་མ་ནི་རྡོ་རྗེ་མདུང་། འུག་གདོང་མ་ནི་ལྕགས་ཀྱུ། ཁྱི་གདོང་མ་ནི་གྲི་གུག ཕག་གདོང་མ་ནི་ཅང་ཏེའུ། གཤིན་རྗེ་སྲེག་མ་ནི་ཐོད་པའི་ཁ་ཊྭཱཾ་ག གཤིན་རྗེ་ཕོ་ཉ་མ་ནི་ཞགས་པ། གཤིན་རྗེ་མཆེ་བ་མ་ནི་ཚངས་པའི་མགོ་བོ། གཤིན་རྗེ་འཇོམས་པ་ནི་དགྲ་སཏྭ། བྱང་ཆུབ་ཀྱི་སེམས་ཀྱི་སྣོད་ནི་ཞལ་བཞིའི་ངོ་བོ་ཞེས་གསུངས་པ་འདི། གཙོ་བོའི་ཕྱག་མཚན་དང་ཅུང་ཟད་མི་འདྲ་ཡང་། ཕྱག་ལ་འགོད་ཚུལ་འདྲ་བའི་ཕྱིར་རོ། །དེའི་ཚེ་གཙོ་བོ་གང་དུ་འགོད་ན། སྤྱིར་མངོན་བརྗོད་དགུ་པའི་ལུགས་འདི། ཕྱིའི་ཧེ་རུ་ཀའི་ལུས་ལ། ལྷ་སུམ་ཅུ་སོ་དྲུག་དང་། ཕུང་ཁམས་སྐྱེ་མཆེད་ཀྱི་ལྷ་བཅུ་བདུན་དང་། སྐུ་གསུང་ཐུགས་ཀྱི་རྡོ་རྗེ་གསུམ་སྟེ། ལྷ་ལྔ་བཅུ་ང་དྲུག་འགོད་པ་ལས་གཙོ་བོ་འགོད་པ་མ་གསུངས་ཀྱང་། སཾ་བུ་ཊ་ལས། ལུས་ཀྱི་སྙིང་གི་ནང་དུ་ཡང་། །རྩ་རྣམས་ལྔ་ནི་རྣམ་པར་གནས། །ཞེས་དང་། རྡོ་རྗེ་དྲིལ་བུ་པས། ཐུགས་སུ་ཨ་ཝ་དྷཱུ་ཏཱི་ཧཱུྃ། །མ་བཅོས་ནང་གི་བདག་ཉིད་དོ། །ཞེས་གསུངས་པས། སྙིང་གར་འགོད་པ་ལས་འོས་མེད་པས། རྗེ་བཙུན་གྱིས་ཀྱང་དེ་ལྟར་གསུངས་སོ། །འོ་ན་ས་བཅུ་གསུམ་བགྲོད་པའི་ལུས་དཀྱིལ་ཇི་ལྟར་བསྒོམ་སྙམ་ན། འདི་ལ་ལཱུ་ནག་གཉིས་ཀྱི་སྐབས་སུ་ཡང་། དྲིལ་བུ་པའི་གཞུང་ལས་གསུངས་པ་ལྟར། སྙིང་གའི་རྩ་འདབ་ཕྱི་ནང་ལ་འགོད་པ་འདི་ཉིད་དགོས་པ་ལ་དགོངས་ནས། གཞུང་དུ་གསལ་བར་མ་གསུངས་པར་མན་ངག་གི་ཁ་བསྐང་དགོས་པའི་གནད་ཀྱང་འདི་ཉིད་ཡིན་ནོ། །སྡོམ་འབྱུང་ལས། བུ་ག་བརྒྱད་ལ་འགོད་པར་གསུངས་ཀྱང་འདི་དང་གནད་འདྲ་སྟེ། བུ་ག་བརྒྱད་དང་འབྲེལ་བའི་རྩ་བརྒྱད་ནི་སྙིང་གའི་ཕྱི་སྐོར་གྱི་རྩ་བརྒྱད་པོ་དེ་ཉིད་ཡིན་པས། རྩའི་ངོ་བོ་ལ་འགོད་པ་དང་། རྩའི་འབྲས་བུ་ལ་འགོད་པའི་ཁྱད་པར་ཙམ་ཡིན་པའི་ཕྱིར་དང་། བུ་ག་བརྒྱད་དུ་དུར་ཁྲོད་བརྒྱད་འགོད་པར་གསུངས་ཤིང་། སྒོ་མཚམས་མ་བརྒྱད་ཀྱང་དུར་ཁྲོད་བརྒྱད་ན་བཞུགས་པའི་དབང་དུ་བྱས་པ་ཡིན་པའི་ཕྱིར་རོ། །གཉིས་པ་ནི་རྟེན་ལུས་དཀྱིལ་ལཱུ་ནག་གཉིས་ཀྱི་གཞུང་ལས་དངོས་སུ་མ་གསུངས་ཀྱང་མན་ངག་གིས་ངེས་པར་ཁ་བསྐང་དགོས་ཏེ། སཾ་བུ་ཊི་ལས། ལུས་ནི་དཀྱིལ་འཁོར་ཉམས་དགའ་བ། །སྒོ་བཞི་ཇི་སྐད་གསུངས་པའོ། །རང་གི་ཡན་ལག་བརྒྱད་བྱུང་བས། །ཀ་བ་དེ་ཡིས་བསྐོར་ནས་གནས། །དངོས་པོ་ཀུན་གྱིས་མཉམ་པའི་ཕྱིར། །གྲུ་བཞི་པར་ནི་རབ་ཏུ་གྲགས། །སྐུ་གསུང་ཐུགས་ཀྱི་ངོ་བོ་ནི། །འཁོར་ལོ་གསུམ་ནི་གཅིག་ཏུ་གསུངས། །རི་ནི་མགོ་བོའི་ཟེའུ་འབྲུ་ལ། །ཇི་ལྟར་རྩོམ་ཆེན་ལ་སོགས་རིམ། །བླ་མའི་དུས་ཐབས་རིམ་ཉིད་ཀྱིས། །དེ་ནི་རྫོགས་པར་དཀྱིལ་འཁོར་གནས། །རྐང་པའི་མཐིལ་དུ་རྩོམ་ཆེན་རླུང་། །གཞུ་ཡི་དབྱིབས་སུ་རྣམ་པར་གནས། །སུམ་མདོ་ཡི་ནི་གནས་སུ་ནི། །དེ་བཞིན་གྲུ་གསུམ་འབར་བ་ཉིད། །ཟླུམ་པོའི་རྣམ་པའི་གཟུགས་ཀྱིས་ནི། །ཆུ་ནི་ལྟོ་བར་རྣམ་པར་གནས། །སྙིང་ཁར་ཡང་ནི་ས་ཉིད་དེ། །ཀུན་ནས་གྲུ་བཞི་པ་ཉིད་དོ། །སྒལ་ཚིགས་དབྱིག་གུའི་གཟུགས་ཀྱིས་ནི། །རི་རབ་རི་རྒྱལ་དེ་བཞིན་ནོ། །ཞེས་གསུངས་པའི་དོན་གྲུབ་ཆེན་དྲིལ་བུ་པས། རྐང་མཐིལ་སུམ་མདོ་ལྟོ་སྙིང་ག །རླུང་དང་མེ་ཆུ་ས་ཡིན་ནོ། །སྒལ་ཚིགས་རི་རྒྱལ་དེ་བཞིན་ཏེ། །ལུས་ནི་མཉམ་པ་སྒོ་བཞི་རླུང་། །རྒྱན་རྣམས་རབ་མཛེས་ཧེ་རུ་ཀའི། །ལུས་ནི་དཀྱིལ་འཁོར་དུ་འདོད་དོ། །ཞེས་དངོས་སུ་གསུངས་པས་ལཱུ་ནག་གཉིས་ཀྱི་སྐབས་སུ་ཡང་དེ་དག་བསྒོམ་དགོས་པར་གྲུབ་པའི་ཕྱིར་རོ། །དེར་མ་ཟད་ལཱུ་ཧི་པའི་སྐབས་སུ། དེར་ནི་སྤྱི་བོའི་ཆར་གནས་པ། །འདམ་སྐྱེས་འདབ་མ་སུམ་ཅུ་གཉིས། །དབྱངས་དང་གསལ་བྱེད་མཛེས་པར་གནས། །སུམ་ཅུ་རྩ་གཉིས་བྱང་ཆུབ་འདོད། །པདྨའི་ནང་དུ་སོན་པ་གང་། །དེ་ནི་ཟླ་བའི་དཀྱིལ་འཁོར་བརྗོད། །སྤྱི་བོའི་ནང་དུ་ཀླད་པ་ནི། །གང་ཞིག་གནས་པ་དེ་རུ་གསུངས། །དེ་ནང་ཧཾ་གི་རྣམ་པ་ནི། །ཐིག་ལེའི་གཟུགས་ཅན་མི་ཤིགས་པ། །འཇིག་རྟེན་ཀུན་གྱི་རྩ་བ་དེ། །བརྟེན་པའི་བདག་ཉིད་གཡོ་བའི་བདག །གསལ་དང་མི་གསལ་གཟུགས་ལས་ནི། །ས་བོན་གཟུགས་ཀྱིས་ཡང་དག་གནས། །ཞེས་གསུངས་པའི་དོན་རྣམས་ཀྱང་བསྒོམ་དགོས་པར་གྲུབ་བོ། །རིན་པོ་ཆེ་བུས། སཾ་བུ་ཊི་ནས་གསུངས་པའི་རྟེན་ལུས་དཀྱིལ་བསྒོམ་པ་དང་། བཤད་རྒྱུད་རྡོ་རྗེ་ཕྲེང་བ་ནས་གསུངས་པའི་རྟེན་ལུས་དཀྱིལ་བསྒོམ་པར་འདམ་ཁ་ཅན་དུ་གསུངས་པ་མི་འཐད་དེ། སྐབས་འདིར་གསང་མཐའ་རང་གི་བཤད་རྒྱུད་ནས་བཤད་པའི་རྟེན་ལུས་དཀྱིལ་ཡོད་བཞིན་དུ། ཕ་རྒྱུད་ནས་གསུངས་པའི་རྟེན་ལུས་དཀྱིལ་དང་གདམ་ཁ་ཅན་བྱེད་དོན་མེད་པའི་ཕྱིར་རོ། །གསུམ་པ་དེ་དག་གི་བསྒོམ་ཚུལ་ཞིབ་ཏུ་བཤད་པ་ལ་གཉིས་ཏེ། བསྐྱེད་ཆོག་ཡོད་མེད་ཀྱི་ཚུལ་ལ་དཔྱད་པ། གནས་དང་རྣམ་པ་སོགས་བཤད་པའོ། །དང་པོ་ནི། སྤྱིར་ལུས་དཀྱིལ་ལ་བསྐྱེད་ཆོག་ཡོད་པའི་ལུགས་དང་། དེ་མེད་པར་རྐྱེན་ཙམ་གྱིས་གསལ་གདབ་པའི་ལུགས་གཉིས་ལས། དང་པོ་ནི། ཕ་རྒྱུད་གསང་བ་འདུས་པའི་ལུས་དཀྱིལ་ཏེ། སྤྱི་བོ་ལ་སོགས་པར་ཨོཾ་ལ་སོགས་པ་རྩ་ཁམས་ཀྱི་རང་བཞིན་གྲུབ་པ་མེད་ཀྱང་། གཟུགས་ཕུང་ལ་སོགས་པའི་ངོ་བོ་ཨོཾ་ལ་སོགས་པ་གསར་དུ་བསྐྱེད་ནས། དེ་ཡོངས་སུ་གྱུར་པ་ལས་རྣམ་སྣང་ལ་སོགས་པའི་ལྷ་གསལ་འདེབས་པའམ། ཡི་གེའི་རྣམ་པ་ཉིད་ལྷའི་ངོ་བོར་བསྒོམ་པ་གང་རུང་བྱ་བར་གསུངས་ཏེ། གསང་འདུས་རྩ་རྒྱུད་ལས། རིག་པ་ཆེན་པོའི་སྐྱེས་བུའི་གཟུགས་འདི་དེ་བཞིན་གཤེགས་པ་ཐམས་ཅད་ཀྱི་སྔགས་ཀྱིས་བྱིན་གྱིས་བརླབ་བོ་ཞེས་གསུངས་པའི་དོན། འགྲེལ་པས། སྔགས་ནི་ཨོཾ་ལ་སོགས་པ་དང་། བྱིན་གྱིས་བརླབ་པ་ནི་བཀོད་པ་ལ་བཤད་པའི་ཕྱིར་དང་། མདོར་བྱས་ལས་ཀྱང་། རྣམ་སྣང་མཛད་ཀྱི་ཡི་གེ་ཨོཾ། །གཟུགས་ཕུང་ངོ་བོ་ཉིད་ཀྱིས་ནི། །སྔགས་ཤེས་པས་ནི་སྤྱི་བོར་དགོད། །ཅེས་གསུངས་པའི་ཕྱིར་རོ། །འདི་དང་ཕྱི་ལ་ཨོཾ་ཡོངས་སུ་གྱུར་པ་ལས། རྣམ་སྣང་བསྒོམ་པ་བསྐྱེད་ཆོག་ཡིན་མིན་གྱི་ཁྱད་པར་མེད་པས་བསྐྱེད་ཆོག་ལས་བསྐྱེད་པའི་ལུགས་ཏེ། མ་རྒྱུད་ལ་ལྟོས་ནས་མི་ཟབ་བོ། །གཉིས་པ་ནི་སྐབས་འདིར་གཞུང་འགྲེལ་རྣམས་ལས་ལུས་དཀྱིལ་གསལ་གདབ་པ་ཙམ་མ་གཏོགས། བསྐྱེད་ཆོག་དང་རྐྱེན་གང་ཡང་མ་གསུངས་ཀྱང་ནཱ་རོ་པའི་མན་ངག་རྗེ་བཙུན་དང་། དམར་གྱིས་སྒྲ་ཚུལ་གྱི་རྐྱེན་གྱིས་གསལ་གདབ་པར་གསུངས་ཏེ། དེ་ནས་འོག་རླུང་གིས་ལྟེ་བའི་ཨཾ་མས་འཕུལ་བ་ནི་ཚུལ། ལྟག་པའི་རླུང་གིས་སྤྱི་གཙུག་གི་ཧཾ་ཡས་ཕུལ་བ་ནི་སྒྲ་སྟེ་དེ་ལྟར་སྒྲ་ཚུལ་གཉིས་སྙིང་གའི་གནས་སུ་དཀྲུག་གིས་འདྲེས་པས་རྐྱེན་བྱས་ནས་རྟེན་དང་བརྟེན་པ་ཕྱིའི་ཧེ་རུ་ཀ་དང་བཅས་པ་དུས་གཅིག་ཏུ་ཝལ་གྱིས་བསྐྱེད་ལ་རིམ་གྱིས་གསལ་གདབ་པར་བྱ་སྟེ། ཞེས་གསུངས་ཤིང་། དམར་གྱིས་སྒྲ་ཚུལ་དེ་ལྟར་གསུངས་པའི་རྗེས་སུ། སྒྲ་ཚུལ་ལས་བྱུང་བ་ཞེས་གསུངས་ཀྱང་རྐྱེན་ལས་འོས་མ་འདས་སོ། །འོ་ན་ཕྱིའི་སྒྲ་ཚུལ་ཡང་བསྐྱེད་ཆོག་མ་ཡིན་པར་རྐྱེན་ཙམ་དུ་གསུངས་སོ་སྙམ་ན། བློ་གྲོས་རྩིང་པོས་བརྟགས་ན་དེ་ལྟར་ཡིན་ཡང་། རྣམ་དཔྱོད་ཞིབ་མོས་དཔྱད་ན་ཡེ་མི་མཚུངས་ཏེ། ཕྱིའི་སྒྲ་ཚུལ་ལ་ནི་སྒྲ་ཚུལ་དེ་ཉིད་རོ་གཅིག་ཏུ་འདྲེས་པ་ལས། རྟེན་བརྟེན་པ་ཅིག་ཆར་དུ་བྱུང་བ་ཡིན་པས་ཉེར་ལེན་གྱི་རྒྱུ་གཞན་མེད་ལ། འདིར་ནི་ཉེར་ལེན་གྱི་རྒྱུ་རྐང་མཐིལ་ལ་སོགས་པའི་ལུས་རགས་པ་དང་། པུ་ཛཱ་ལ་སོགས་པའི་ཕྲ་བ་རྩ་ཁམས་རྣམས་རང་རང་གི་གནས་སུ་རྟེན་དང་བརྟེན་པའི་ངོ་བོར་རང་བཞིན་གྱིས་གྲུབ་ནས་ཡོད་པ་སྙིང་གའི་སྒྲ་ཚུལ་གྱི་རྐྱེན་གྱིས་རྣམ་པ་བློ་ངོར་གསལ་བ་ཙམ་ཡིན་པའི་ཕྱིར་རོ། །དེ་བཞིན་དུ་པུ་ཛཱ་ལ་སོགས་པ་ལུས་དཀྱིལ་གྱི་ལྷར་བསྐྱེད་པ་ཡང་། ཕྱིའི་ས་བོན་ལས་བསྐྱེད་པ་དང་ཡེ་མི་འདྲ་སྟེ། འདི་ནི་པུ་ཛཱ་ལ་སོགས་པ་ངོ་བོ་ལྷ་ཡིན་ཀྱང་། རྣམ་པ་ཡི་གེའི་དབྱིབས་སུ་གནས་པ་དེ་ཉིད་ལྷའི་རྣམ་པར་ཤར་བ་ཙམ་ཡིན་ལ། ཕྱི་ལ་ནི་ཨོཾ་ལ་སོགས་པ་སྔར་མེད་གསར་དུ་བསྐྱེད་ནས། དེ་འོད་དུ་ཞུ་བ་ལས་ལྷ་ཞལ་ཕྱག་གི་རྣམ་པ་ཅན་གྲུབ་པ་ལ་འཇོག་དགོས་པའི་ཕྱིར་རོ། །དེ་བཞིན་དུ་ནག་པོ་པའི་སྒྲུབ་ཐབས་ལས། བསྐྱེད་ཆོག་དང་རྐྱེན་གང་ཡང་མ་གསུངས་ཀྱང་། ནཱ་རོ་པའི་མན་ངག་གིས། དཀྱིལ་འཁོར་རྒྱལ་མཆོག་གི་ལྷ་རང་གནས་སུ་འཁོད་པས་རྐྱེན་བྱས་ནས་ལུས་ཀྱི་གནས་དེ་དང་དེར་ལྷ་ཞལ་ཕྱག་གི་རྣམ་པ་ཅན་བསྒོམ་པར་གསུངས་པ་དང་། རྡོ་རྗེ་དྲིལ་བུ་པས། འོད་ཟེར་སྤྲོས་པས་སྔོན་འགྲུབ་པ། །བསྐུལ་ནས་ཕྱག་འཚལ་རང་ལུས་གཞུག །རྐང་མཐིལ་སུམ་མདོ་ལྟོ་སྙིང་ག །རླུང་དང་མེ་ཆུ་ས་ཡིན་ནོ། །ཞེས་དང་། དྲིལ་བུ་གཞུང་ཆུང་ལས། མཛོད་སྤུའི་ནང་ནས་རང་ལུས་གཞུག །ལུས་ལ་རྟེན་དང་བརྟེན་པ་ཡི། །འཁོར་ལོ་གསལ་གདབ་ཉེ་བར་དམིགས། །ཞེས་ཚོགས་ཞིང་བསྟིམས་པའི་རྐྱེན་གྱིས་གསལ་གདབ་པར་གསུངས་པ་དང་། དེ་བཞིན་དུ་ཀྱེ་རྡོ་རྗེའི་མན་ངག་ལས། ཚོགས་ཞིང་བསྟིམས་པའི་རྐྱེན་དང་། ཡེ་ཤེས་ཀྱི་འཁོར་ལོ་དགུག་གཞུག་གི་རྐྱེན་གྱིས་གསལ་གདབ་པར་གསུངས་པ་རྣམས་ཀྱང་། ལུས་ལ་རང་བཞིན་གྱིས་གྲུབ་པ་རྐྱེན་གྱིས་གསལ་གདབ་པའི་ལུགས་ཏེ། མ་རྒྱུད་ཀྱི་ཟབ་ཁྱད་ཡིན་པར་སྐལ་བ་དང་ལྡན་པ་དག་གིས་ཤེས་པར་གྱིས་ཤིག གསུམ་པ་དེ་དག་གི་བསྒོམ་ཚུལ་ཞིབ་ཏུ་བཤད་པ་ནི། དེ་ལྟར་སྒྲ་ཚུལ་གྱི་རྐྱེན་གྱིས་ཅིག་ཆར་དུ་རྣམ་པར་གྲུབ་པ་རིམ་གྱིས་གསལ་གདབ་པའི་ཚེ་ཐོག་མར་རྟེན་གསལ་གདབ་པ་ནི་རྐང་མཐིལ་གཉིས་སུ་རླུང་གི་དཀྱིལ་འཁོར་སྦྱང་གཞི་དང་ཚད་མཉམ་པ་རེ་རེ་བསྒོམས་ནས། འདི་ཕྱིའི་གཞལ་ཡས་ཁང་གི་རྟེན་དུ་གྱུར་པའི་རླུང་གི་དཀྱིལ་འཁོར་ཉིད་ཡིན་སྙམ་དུ་ཞེན་པ་བྱ་ཞིང་། ཕྱིའི་གཞལ་ཡས་ཁང་གི་རྟེན་དུ་གྱུར་པའི་རླུང་གི་དཀྱིལ་འཁོར་ཡང་འདི་ཉིད་ཡིན་སྙམ་དུ་ཞེན་ན་ཡང་ཁྱད་པར་མེད་དེ། གནས་རྐང་མཐིལ་དེར་དེ་གཉིས་དབྱེར་མེད་གཅིག་དུ་བསྒོམ་དགོས་པའི་ཕྱིར་རོ། །དེ་བཞིན་དུ་གཞན་རྣམས་ལ་ཡང་འགྲེའོ། །སུམ་མདོ་གྲུ་གསུམ་ནི་མེའི་དཀྱིལ་འཁོར་གྲུ་གསུམ། ལྟོ་བ་ཟླུམ་པོ་ནི་ཆུའི་དཀྱིལ་འཁོར་ཟླུམ་པོ་དང་། བྲང་གྲུ་བཞི་ནི་སའི་དཀྱིལ་འཁོར་གྲུ་བཞི་དང་། སྒལ་ཚིགས་བརྩེགས་པ་དབྱུ་གུའི་གཟུགས་སུ་ཡོད་པ་ནི་རི་རབ་དང་། མགོ་བོའི་ཟུར་བཞི་པོ་རི་རབ་ཀྱི་སྟོད་ཀྱི་ཆ་སྟེ་མཚམས་བཞིའི་ལྕོག་དང་། དཔྲལ་བ་དང་། ལྟག་པ་དང་། རྣ་བ་གཉིས་ནི་རི་རབ་ཀྱི་སྟེང་གི་སྣ་ཚོགས་རྡོ་རྗེ་དང་། ཀླད་པ་དཀར་པོ་ནི་མངོན་བྱང་ལྔའི་ཟླ་བ་དང་། ཀླད་ཁྱིམ་དམར་པོ་ནི་ཉི་མ་དང་། དེ་གཉིས་ཀྱི་བར་གྱི་ཧཾ་ཡིག་ནི་ཡི་གེ་ཧཱུྃ་རྡོ་རྗེ་སེམས་དཔའི་རང་བཞིན་དང་། ལུས་འདོམ་གང་གྲུ་བཞི་ནི་གཞལ་ཡས་ཁང་གྲུ་བཞི་དང་། སྙིང་ཁ་ཆོས་ཀྱི་འཁོར་ལོ་ནས་འབྱུང་བ་བཞིའི་རླུང་རྒྱུ་བ་ནི་སྒོ་བཞི་དང་། རྐང་བརྒྱད་ནི་ཀ་བ་བརྒྱད་དང་། མིག་དང་། རྣ་བ་དང་། སྣ་དང་། ལྕེ་དང་། མཆུ་དང་། རྒྱུ་ལོང་ལ་སོགས་པ་ནི་གཞལ་ཡས་ཁང་གི་རྒྱན་ཅེས་པ་ཙམ་ལས་མ་གསུངས་ཀྱང་། མིག་པཉྩ་རེ་ཁཱའི་རྩིག་པ་སོགས་ཀྱཻ་རྡོར་ནས་འབྱུང་བ་བཞིན་བསྒོམ་པར་འཕགས་པས་བཤད་པ་ལྟར་བསྒོམས་ན་ཡང་ཤིན་ཏུ་ལེགས་པ་ཡིན་ཏེ། རྒྱན་གྱི་རྣམ་པ་ཞིག་ནི་བསྒོམ་དགོས་ཤིང་། གྲུབ་ཆེན་གྱི་མན་ངག་ལས་བྱུང་བ་དེ་ཉིད་རྒྱུད་ཀྱི་དགོངས་པ་ཡིན་པའི་ཕྱིར་དང་། རྗེ་བཙུན་རྩེ་མོས་དཀྱིལ་འཁོར་སྟོན་པའི་སྐབས་སུ་རྐང་མཐིལ་རླུང་ནས་ལྕེ་དང་མཆུ་འདོད་ཡོན་གྱི་སྣམ་བུའི་བར་སྟོན་པར་གསུངས་པས་ཀྱང་འདི་ཉིད་བཞེད་པར་གསལ་བའི་ཕྱིར་རོ། །དེ་དག་ཀྱང་གནས་དེ་དང་དེར་སྦྱང་གཞི་དང་འཚམས་པའི་ཁ་དོག་དང་། དབྱིབས་ཀྱི་རྣམ་པ་བསྒོམ་པ་ནི་རྒྱས་པའི་ལུགས་ཡིན་ལ། དེ་ཙམ་བསྒོམ་མི་ནུས་ན་དོད་ཙམ་དུ་བསྒོམས་པས་ཀྱང་རུང་སྟེ། དེའི་དོན་ཡང་ཕྱིའི་རླུང་གི་དཀྱིལ་འཁོར་གྱི་དོད་རྐང་མཐིལ་ཡིན་སྙམ་དུ་བསྒོམ་པ་མ་ཡིན་གྱི། ཕྱིའི་རླུང་གི་དཀྱིལ་འཁོར་ཡང་རྐང་མཐིལ་གཉིས་པོ་འདི་ཉིད་ཡིན་སྙམ་དུ་དབྱེར་མེད་དུ་བསྒོམ་པ་ཡིན་ལ། དེ་ཙམ་གྱིས་ཕྱིའི་གཞལ་ཡས་ཁང་ནང་རྡོ་རྗེའི་ལུས་ལ་བསྒོམ་པའི་དོན་ལེགས་པར་ཚང་བའི་ཕྱིར་རོ། །དེ་ནས་བརྟེན་པ་གསལ་གདབ་པ་ལ་ཐོག་མར་གཙོ་བོ་ཡབ་ཡུམ་གསལ་གདབ་པ་ནི། སྙིང་ག་ཆོས་ཀྱི་འཁོར་ལོའི་དབུས་ཀྱི་རྩ་ཨ་ཝ་དྷཱུ་ཏཱི་ཧཱུྃ་གི་དབྱིབས་སུ་གནས་པའི་ནང་གི་ཁམས་བྱང་ཆུབ་ཀྱི་སེམས་ཡབ་དང་། ཕྱི་ཤུན་གྱི་རྩ་ཡུམ་དུ་རང་བཞིན་གྱིས་གྲུབ་པ་འདིར་སྒྲ་ཚུལ་གྱི་རྐྱེན་གྱིས། ཞལ་ཕྱག་གི་རྣམ་པ་ཅན་དུ་གསལ་བ་བློ་ངོར་གསལ་གདབ་པ་སྟེ། གྲུབ་ཆེན་དྲིལ་བུ་པས། འདི་དག་གནས་སུ་རྣལ་འབྱོར་མ། །རྩ་ཡིན་དཔའ་བོ་ཉི་ཤུ་བཞི། །ལུས་ཀྱི་ཁམས་སུ་བརྟག་པར་བྱ། །ཞེས་གསུངས་པ་དེ་ཉིད། ཐུགས་སུ་ཨ་ཝ་དྷཱུ་ཏཱི་ཧཱུྃ། །མ་བཅོས་ནང་གི་བདག་ཉིད་དོ། །ཞེས་གསུངས་པ་གཙོ་བོ་ཡབ་ཡུམ་དུ་བསྒོམ་པ་ལ་ཡང་ངེས་པར་སྦྱར་དགོས་པའི་ཕྱིར། སྙིང་པོའི་རྣལ་འབྱོར་མ་བཞི་ནི། འདིར་ཕྱག་དང་པོ་བཞི་ལ་བཀོད་ཅིང་། དེ་ཉིད་ཀྱང་ཕྱག་མཚན་དང་ཐབས་དང་ཤེས་རབ་སྦྱར་བའི་ཚུལ་དུ་བསྒོམ་པའོ། །བུམ་ཐོད་བཞི་སྐབས་འདིར་བསྒོམ་ཚུལ་མི་སྣང་ལ། མངོན་བརྗོད་དགུ་པར། ཞལ་བཞིའི་ངོ་བོར་འདུག་པའོ། །ཞེས་གསུངས་པའི་དོན་ནི། ཕྱིའི་བུམ་ཐོད་བཞི་ཡང་བཅོམ་ལྡན་འདས་ཀྱི་ཞལ་བཞི་ལ་ཚང་ཞེས་པ་ཙམ་དུ་འདུག་གོ །དེ་ནས་འཁོར་ལོ་གསུམ་གྱི་ལུས་དཀྱིལ་ལ། སྤྱི་བོ་ལ་སོགས་པའི་གནས་དེ་དག པུལླཱི་ར་མ་ལ་སོགས་པའི་ཡུལ་ཉི་ཤུ་རྩ་བཞིར་བསྒོམ་ཞིང་། པུ་ལ་སོགས་པའི་རྩ་ཡི་གེའི་དབྱིབས་སུ་གནས་པ་རྣམས་ལ། ནང་གི་ཁམས་དཔའ་བོ་དང་། ཕྱི་ཤུན་གྱི་རྩ་དཔའ་མོར་བསྒོམ་པ་ནི་སྔར་གྱི་དྲིལ་བུ་པའི་གཞུང་གིས་དངོས་སུ་བསྟན་པས། དེ་དང་དེའི་ངོ་བོར་གདོད་མ་ནས་གྲུབ་པ། སྐབས་འདིར་སྒྲ་ཚུལ་གྱི་རྐྱེན་གྱིས་ཞལ་ཕྱག་གི་རྣམ་པ་ཅན་བསྐྱེད་པ་བློ་ངོར་རིམ་གྱིས་གསལ་གདབ་པ་ནི། སྔར་གྱི་གཙོ་བོ་ཡབ་ཡུམ་དང་ཁྱད་པར་མེད་དོ། །སློབ་དཔོན་གྱི་གཞུང་འདིར། མགོ་བོ་ལ་ནི་རབ་ཏུ་གཏུམ་མོའོ་ཞེས་སོགས་ཡུམ་རྐྱང་ལས་མ་སྨོས་པ་ནི། ཤེས་རབ་ཀྱི་རྒྱུད་གཙོ་ཆེ་བར་བསྟན་པའི་ཆེད་ཡིན་ལ། བསྒོམ་པའི་ཚེ་ཡབ་ཡུམ་གཉིས་ཀ་ངེས་པར་བསྒོམ་དགོས་ཏེ། དྲིལ་བུ་པས། སྤྱི་བོར་ཁཎྜ་ཀ་པཱ་ལི་དང་། རབ་ཏུ་གཏུམ་མོའོ་ཞེས་སོགས་ཡབ་ཡུམ་གཉིས་ཀ་སྦྱར་ནས་གསུངས་པའི་ཕྱིར་རོ། །འདི་དག་རེ་རེའི་སྟེང་དུ་ཡང་། ཕྱི་རོལ་གྱི་ཡུལ་ངོས་གཟུང་བ། ནང་གི་གནས་ངོས་གཟུང་བ། དེར་ལྷ་གང་བསྒོམ་པའི་ཚུལ། དེ་དག་ས་དང་སྦྱར་བ་བཞི་བཞིའི་སྒོ་ནས་རྟོགས་པར་བྱ་དགོས་ཏེ། དང་པོ་ཕྱི་རོལ་གྱི་ཡུལ་རྣམས་ནི། སྟེང་ཚངས་པའི་འཇིག་རྟེན་ནས། འོག་གཞི་རླུང་གི་དཀྱིལ་འཁོར་ཡན་ཆད་གྲུབ་པ་དང་ལྷན་ཅིག་ཏུ་ཡུལ་ཉི་ཤུ་རྩ་བཞི་གྲུབ་ཅིང་། བྱེ་བྲག་འཛམ་བུའི་གླིང་གྲུབ་པ་དང་དུས་མཉམ་དུ། དེར་ཡང་ཡུལ་ཉི་ཤུ་རྩ་བཞི་གྲུབ་པས། དེ་ཉིད་འདིར་ཡང་བཤད་ན་པུལླཱི་ར་མ་ལ་ཡ་ནི་ཕྱི་རོལ་དུ་རྡོ་རྗེ་གདན་ལྟེ་བར་བྱས་པ་དེའི་ལྷོ་ནུབ་ན་ཡོད་ལ། དེ་ཉིད་ནང་ལུས་ལ་མགོ་བོ་ཅེས་དང་། མཚོག་མ་ཞེས་དང་། སྤྱི་བོ་ལ་ཞེས་པ་རྣམས་འབྱུང་བ་དོན་གཅིག་པས། སྤྱི་གཙུག་ནས་སྐྲ་མཚམས་ཀྱི་བར་ཕྱེད་མར་བྱས་པའི་དཀྱིལ་ལོ། །དེར་ཁཎྜ་ཀ་པཱ་ལི་དང་རབ་ཏུ་གཏུམ་མོ་བཞུགས་པ་ནི། ཕྱི་རོལ་དུ་སྤྲུལ་པའི་སྐུ་ས་དང་པོ་ཐོབ་པའི་ཚུལ་བཟུང་བ་དངོས་སུ་བཞུགས་ལ། ནང་དུ་རྩ་ཁམས་ཀྱི་ཚུལ་དུ་བཞུགས་ཏེ་ཀུན་ལ་འགྲེའོ། །ཛཱ་ལེན་དྷ་ར་ནི་ཕྱིའི་ཡུལ་ནུབ་བྱང་ན་རྡོ་ལ་མེ་འབར་བ་སྟེ། ནང་དུ་སྤྱི་གཙུག་ཚངས་པའི་བུ་གའོ། །འདིར་དམར་དང་བུས། དྲྭ་བ་འཛིན་དུ་བསྒྱུར་པ་མི་འཐད་པའི་ཚུལ་སྔར་བཤད་ཟིན། ལོ་ཆེན་དང་། འབྲོག་མི། མལ་གྱོ་རྣམས་ཀྱིས་དོན་འདི་ཉིད་ཐུགས་ལ་བཞག་ནས་འབར་བ་འཛིན་དུ་བསྒྱུར་བ་རྗེ་བཙུན་གོང་མས་ཚད་མར་འཛིན་པ་འདིའི་རྗེས་སུ་འབྲང་བར་བྱའོ། །དེར་མ་ཧཱ་ཀཾ་ཀ་ལ་དང་གཏུམ་པའི་མིག་ཅན་མའོ། །ཨཽ་ཌི་ཡ་ན་ནི་ཕྱི་རུ་འཕུར་འགྲོ་སྟེ་ནུབ་ཕྱོགས་ན་ཡོད་ལ། ནང་ལུས་ལ་རྣ་བ་གཡས་པའི་བུ་གའི་ནང་དུ་ཀཾ་ཀཱ་ལ་དང་འོད་ལྡན་མའོ། །ཨར་བུ་ད་ནི་རྒྱ་གར་ལྷོ་ནུབ་ལ་ཡོད་ལ། ནང་ལུས་ཀྱི་ལྟག་པ་ན་མཆེ་བ་རྣམ་པར་གཙིགས་པ་དང་། སྣ་ཆེན་མའོ། །བཞི་པོ་ལ་གནས་ཞེས་པ་ཐུན་མོང་གི་མིང་སྟེ། ཡུལ་དེ་བཞིའི་རླུང་སེམས་དབུ་མར་ཞུགས་པས་ས་དང་པོ་རབ་ཏུ་དགའ་བའི་རྟོགས་པ་སྐྱེ་ཞིང་། ས་དེ་ལ་རྒྱུའི་སྒོ་ནས་གནས་ཞེས་པ་རྣལ་འབྱོར་མ་རྒྱུད་ཀྱི་ཐུན་མོང་མ་ཡིན་པའི་ཐ་སྙད་ཡིན་ལ། དེས་ནང་རྟེན་འབྲེལ་བྱས་ནས། ཕྱིའི་ཡུལ་དེ་རྣམས་ལ་གནས་པའི་དཔའ་བོ་དང་རྣལ་འབྱོར་མ་རྣམས། ངོ་བོ་སངས་རྒྱས་ཡིན་ཀྱང་རྣམ་པ་ས་དང་པོ་ཐོབ་པའི་ཚུལ་དུ་བཞུགས་པ་རྣམས་བདག་གི་དབང་དུ་འདུས། ཡང་ཐོག་མར་དེ་རྣམས་སྤྱོད་པའི་སྒོ་ནས་བདག་གི་དབང་དུ་འདུས་ན། དེས་ཕྱི་རྟེན་འབྲེལ་བྱས་ནས་ནང་དུ་གནས་གཞིའི་རླུང་སེམས་དབུ་མར་ཞུགས་ཏེ་ས་དང་པོའི་རྟོགས་པ་སྐྱེའོ། །དེས་ས་ལྷག་མ་རྣམས་ལ་བསྒྲེ་བར་བྱའོ། །གོ་ད་ཝ་རཱི་ནི་ཕྱི་རྒྱ་གར་ལྷོ་ཕྱོགས་དཔལ་གྱི་རིའི་རྩ་ན། ཆུ་བོ་གོ་ད་ཝ་རཱི་འབབ་པའི་འགྲམ་མོ། །དེ་ཉིད་ནང་ལུས་ལ་རྣ་བ་གཡོན་པའི་ནང་སྟེ། དེར་སུ་རཱ་ཝི་རི་དང་བརྟན་པའི་བློ་ཅན་མའོ། །རཱ་མེ་ཤྭ་ར་ནི་ཕྱི་ལྷོ་ནུབ་ན་དགའ་བྱེད་དབང་ཕྱུག་གིས་བྱས་པའི་དབང་ཕྱུག་གི་རྟེན་ཡོད་པ། ནང་ལུས་ལ་སྨིན་མའི་དབུས་ཏེ། དེར་འོད་དཔག་མེད་དང་མིའུ་ཐུང་མའོ། །དེ་ཝཱི་ཀོ་ཊི་ནི་ཕྱི་ཤར་ཕྱོགས་ཀྱི་ལྷ་མོའི་མཁར། ནང་ལུས་ཀྱི་མིག་གཉིས། དེར་རྡོ་རྗེའི་འོད་དང་ལང་ཀའི་དབང་ཕྱུག་མའོ། །མཱ་ལ་ཝ་ནི་ཕྱིའི་ལྷོ་ཕྱོགས་ན་ཡོད་དོ། །ནང་ལུས་ཀྱི་ཕྲག་པ་གཉིས་ཏེ། དེར་རྡོ་རྗེའི་སྐུ་དང་ཤིང་གྲིབ་མའོ། །ཉེ་བའི་གནས་ཞེས་པ་ས་གཉིས་པ་སྟེ་སྔ་མ་བཞིན་སྦྱར་རོ། །ཐུགས་ཀྱི་འཁོར་ལོའོ། །ཀཱ་མ་རཱུ་པ་ནི་ཕྱི་ཆགས་པ་ཤས་ཆེ་བའི་ཡུལ་ལྷོ་ཕྱོགས་ན་ཡོད། ནང་ལུས་ཀྱི་མཆན་ཁུང་གཉིས་ཏེ། དེར་ཨཾ་ཀུ་རི་དང་ཨེ་རཱ་ཝ་ཏིའོ། །ཨོ་ཏྲེ་བི་ཤ་ནི་ཕྱི་ཤར་ཕྱོགས་ན་ཡོད། ནང་ལུས་ཀྱི་ནུ་མ་གཉིས་ཏེ། དེར་རྡོ་རྗེ་རལ་པ་ཅན་དང་འཇིགས་བྱེད་ཆེན་མོའོ། །ཞིང་ཞེས་པ་ས་གསུམ་པ་སྟེ་སྔ་མ་བཞིན་དུ་སྦྱར་རོ། །ཏྲི་ཤ་ཀུ་ནེ་ནི་ཕྱི་ལྷོ་ནུབ་ཀྱི་ཡུལ། ནང་ལུས་ཀྱི་ལྟེ་བ་སྟེ་དེར་དཔའ་བོ་ཆེན་པོ་དང་རླུང་གི་ཤུགས་ཅན་མའོ། །ཀོ་ས་ལ་ནི་ཕྱི་རྒྱལ་པོ་གསལ་རྒྱལ་གྱི་ཡུལ་ཏེ་ནུབ། ནང་ལུས་ཀྱི་སྣ་རྩེ་སྟེ། དེར་རྡོ་རྗེ་ཧཱུྃ་མཛད་དང་ཆང་འཐུང་མའོ། །ཉེ་བའི་ཞིང་ཞེས་པ་ས་བཞི་པ་སྟེ་སྔ་མ་བཞིན་སྦྱར་རོ། །ཀ་ལིཾ་ཀ་ནི་ཕྱི་ལྷོ་ཕྱོགས་རྒྱལ་པོའི་ཁབ། ནང་ལུས་ཀྱི་ལྕེའི་རྩ་བ་སྟེ། དེར་རབ་ཏུ་བཟང་པོ་དང་ཤྱཱེ་མ་དེ་ཝཱིའོ། །ལཾ་པ་ཀ་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་མགྲིན་པ་སྟེ། དེར་རྡོ་རྗེ་བཟང་པོ་དང་ཤིན་ཏུ་བཟང་མོའོ། །ཚནྡོ་ཧ་ཞེས་པ་ས་ལྔ་པ་སྟེ་སྔ་མ་བཞིན་སྦྱར་རོ། །ཀཱཉྩི་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་སྙིང་ག་སྟེ། དེར་འཇིགས་བྱེད་ཆེན་པོ་དང་རྟ་རྣ་མའོ། །ཧི་མ་ལ་ཡ་ནི་ཕྱི་ཁ་བའི་རི་བྱང་ཕྱོགས་ན་ཡོད། ནང་ལུས་ཀྱི་འདོམས་བར་སྟེ་ཕོའི་འབྲས་བུ་གཉིས་ན་མིག་མི་བཟང་དང་ཁ་གཱ་ན་ནའོ། །ཉེ་བའི་ཚནྡོ་ཧ་ཞེས་པ་ས་དྲུག་པ་སྟེ་སྔ་མ་བཞིན་སྦྱར་རོ། །གསུང་གི་འཁོར་ལོའོ། །པྲེ་ཏ་པུ་རཱི་ནི་ཕྱི་ཡི་དྭགས་གྲོང་ཞེས་པ་བྱང་ཕྱོགས་ན་ཡོད། ནང་ལུས་ཀྱི་མཚན་མའི་རྩ་བ་སྟེ་དེར་སྟོབས་པོ་ཆེ་དང་འཁོར་ལོའི་ཤུགས་ཅན་མའོ། །གྲྀ་ཧ་དེ་ཝ་ནི་ཕྱི་ལྷོ་ཕྱོགས་ན་ཡོད། ནང་ལུས་ཀྱི་བཤང་ལམ་སྟེ། དེར་རིན་ཆེན་རྡོ་རྗེ་དང་ཁཎྜ་རོ་ཧའོ། །འདུ་བ་ཞེས་པ་ས་བདུན་པ་སྟེ་སྔ་མ་བཞིན་སྦྱར་རོ། །སཽ་རཱཥྚ་ནི་ཕྱི་ལྷོ་ནུབ་ན་སྭ་ཝ་ནཱ་ཐའི་རྟེན་ཡོད་ལ། ནང་ལུས་ཀྱི་བརླ་རྩ་གཉིས་ཏེ། དེར་རྟ་མགྲིན་དང་ཤཽཎྜི་ནིའོ། །སུ་ཝ་ར་ན་དྭི་པ་ནི་ཕྱི་ལྷོ་ནུབ་ན་སྲིན་པོས་བཟུང་བའི་གསེར་གྱིས་གང་བའི་གླིང་ཕྲན། ནང་ལུས་ཀྱི་བྱིན་པ་གཉིས་ཏེ། དེར་ནམ་མཁའི་སྙིང་པོ་དང་འཁོར་ལོའི་གོ་ཆའོ། །ཉེ་བའི་འདུ་བ་ནི་ས་བརྒྱད་པ་སྟེ་སྔ་མ་བཞིན་སྦྱར་རོ། །ན་ག་རར་ནི་ཕྱི་ལྷོ་ཕྱོགས་ན་པ་ཏྲ་ན་ག་ར་ལ་སོགས་པ་ཡུལ་ཆེན་པོ་བཅུ་དྲུག་ཡོད་པས་ནང་ལུས་ལ་མཐེ་བོང་བཞི་མ་གཏོགས་པའི་སོར་མོ་བཅུ་དྲུག་སྟེ། དེར་དཔལ་ཧེ་རུ་ཀ་དང་ཤིན་ཏུ་དཔའ་མོའོ། །འདིར་རྒྱུད་གཞུང་རྣམས་ལས། སོར་མོ་ཞེས་པ་ཙམ་དང་། རྐང་སོར་བརྒྱད་ཅེས་པ་ལས་མི་འབྱུང་ཡང་། ནཱ་རོ་པའི་མན་ངག་གིས་ལག་སོར་བརྒྱད་ཀྱང་བསྣན་པ་རྒྱུད་ཚིག་དེ་དག་གིས་ཐོན་པ་སྟེ། གཞན་དུ་ན་རྐང་སོར་ལ་ལུས་དཀྱིལ་གྱི་ལྷ་བཀོད་ནས་ལག་སོར་ལ་མི་འགོད་པའི་རྒྱུ་མཚན་མི་རྙེད་པའི་ཕྱིར་རོ། །སིནྡྷུ་ནི་ཕྱི་ལྷོ་ཕྱོགས་ན་ཆུ་བོ་སིནྡྷུ་འབབ་པའི་འགྲམ། ནང་ལུས་ཀྱི་རྐང་པའི་བོལ་གཉིས་ཏེ། དེར་པདྨ་གར་གྱི་དབང་ཕྱུག་དང་སྟོབས་ཆེན་མའོ། །དུར་ཁྲོད་ཅེས་པ་ས་དགུ་པ་སྟེ་སྔ་མ་བཞིན་སྦྱར་རོ། །མ་རུ་ནི་ཕྱི་ལྷོ་ཕྱོགས་ན་མྱ་ངམ་གྱི་གྲོང་ཁྱེར་ཞེས་ཀྱང་ཟེར། བུད་མེད་གཞོན་ནུ་མ་གཟུགས་བཟང་བ་ཡོད་པས་ན་གཞོན་ནུའི་གྲོང་ཁྱེར་ཟེར་ལ། ནང་ལུས་ཀྱི་རྐང་ལག་གི་མཐེ་བོང་བཞི་སྟེ། དེར་རྣམ་པ་སྣང་མཛད་དང་འཁོར་ལོས་སྒྱུར་མའོ། །ཀུ་ལ་ཏཱ་ནི་ཕྱི་ལྷོ་ནུབ་ན་རྡོ་པུས་མོ་འདྲ་བ་ཡོད་པའི་ས་ནང་ལུས་ཀྱི་པུས་མོ་གཉིས་ཏེ། དེར་རྡོ་རྗེ་སེམས་དཔའ་དང་བརྩོན་འགྲུས་ཆེན་མོའོ། །ཉེ་བའི་དུར་ཁྲོད་ཅེས་པ་ནི་ས་བཅུ་པ་སྟེ་སྔ་མ་བཞིན་སྦྱར་རོ། །སྐུའི་འཁོར་ལོའོ། །འཁོར་ལོ་གསུམ་གྱི་ལུས་དཀྱིལ་གྱི་ལྷ་འདི་དག ལུས་ཀྱི་རྒྱབ་ཕྱོགས་ན་ཡོད་པ་རྣམས་མདུན་ཕྱོགས་དང་། མདུན་མ་རྣམས་རྒྱབ་ཕྱོགས་སུ་ཞལ་གཟིགས་ཤིང་། གཡས་གཡོན་རྣམས་ཀྱང་དེས་འགྲེ་ཞིང་། སྟེང་མ་རྣམས་འོག་ཏུ་དང་། འོག་མ་རྣམས་སྟེང་དུ་སྟེ་ཐམས་ཅད་ཀྱང་གཙོ་བོ་ལ་ཞལ་གཟིགས་པའོ། །དེ་ནས་སྒོ་མ་བཞི་ནི་གཡས་ཀྱི་ཕྱག་ལྷག་མ་བཞི་དང་། མཚམས་མ་བཞི་ནི་གཡོན་གྱི་ཕྱག་ལྷག་མ་བཞི་ལ་འགོད་ཅིང་། འགོད་ཚུལ་ཡང་ལྷ་དེ་དག་ཞལ་ནང་བསྟན་གྱི་ཚུལ་གྱིས་ཕྱག་མཚན་མདུན་ཕྱོགས་སུ་ཡོད་པར་འགོད་དགོས་ཏེ། ཕྱག་མཚན་རྣམས་དེ་དག་གི་ཐབས་སུ་གསུངས་པའི་ཕྱིར། དཔེར་ན་ཕག་མོ་ཡུམ་རྐྱང་དུ་བྱེད་པའི་ཚེ་ཁ་ཊྭཱཾ་ག་འཛིན་པ་བཞིན་ནོ། །ཕྱག་ལ་འགོད་པའི་ཚེ་ལུས་དཀྱིལ་དུ་འགྱུར་རམ་མི་འགྱུར་སྙམ་ན། འདི་འདོད་འཇོ་མཁན་པོས་དུམ་སྐྱེས་མ་དང་། གཟུགས་ཅན་མ་གཉིས་ཁུ་ཚུར་གཉིས་སུ་བཤད་པ་ནི། ལྷག་མ་བཅུ་ལ་ཡང་མཚུངས་ལ། དེའི་ཚུལ་ཡང་ཕྱག་མཚན་དང་ངོ་བོ་དབྱེར་མེད་པའི་ཕྱག་མགོ་བཅུ་གཉིས་ལས་དེ་རྣམས་བསྐྱེད་ནས་གནས་ཀྱང་ཕྱག་མགོའི་ནང་དུ་གཟུགས་བརྙན་ཤར་བ་བཞིན་བྱེད་དེ། དེ་ནི་ཐོད་པ་བཞི་ལ་ཡང་ཤེས་པར་བྱའོ་ཞེས་སྨྲའོ། །འདི་ནི་རང་ཉིད་མངོན་བརྗོད་དགུ་པར་ལུས་ལ་ལྷ་དྲུག་ཅུ་འགོད་པ་ལུས་དཀྱིལ་དུ་ཡང་སྨྲ། ལུས་དཀྱིལ་ཡིན་ན་ལུས་རྒྱུར་སོང་བ་གཅིག་དགོས་ཞེས་ཀྱང་སྨྲས་པའི་འགལ་བ་སྤོང་བར་འདོད་པར་སྣང་ན་ཡང་། དེས་འགལ་བ་སྤོང་མི་ནུས་ཏེ། ཕྱག་ལྷག་མ་བཅུ་པོ་བློས་བཏགས་ཡིན་པའི་ཕྱིར་རོ། །དེའི་རྗེས་འབྲང་ཁ་ཅིག རྩ་ཕྱག་གཉིས་བཞུ་ནས་ཕྱག་བཅུ་གཉིས་སུ་སོང་བས་སྦྱང་གཞི་ལ་མེད་པའི་སྐྱོན་མེད་དོ་ཞེས་སྨྲ་བ་ནི་རང་ཉིད་གསང་བ་འདུས་པའི་ཞལ་ལྷག་མ་གཉིས་ལ་ས་སྙིང་སོགས་སྦྱང་གཞི་མེད་པས་མི་འགོད་ཅེས་སྨྲ་བ་དང་འགལ་ཏེ། རྩ་ཞལ་བཞུ་ན་ཞལ་གསུམ་དུ་འགྱུར་བར་མཚུངས་པའི་ཕྱིར་རོ། །དེས་ན་གནད་ཀྱི་དོན་ནི། རྗེ་བཙུན་གྱི་ཀུན་སྤྱོད་ཀྱི་ཊཱི་ཀར། མ་མོ་བཅུ་གཉིས་ཕྱག་ལ་འགོད་པའི་ཚེ་ན་ཡང་ལུས་དཀྱིལ་ལྷ་སུམ་ཅུ་རྩ་བདུན་གྱི་ཐ་སྙད་གསུངས་ཤིང་། ལཱུ་ཧི་པའི་སྒྲུབ་ཐབས་ཀྱི་སྐབས་སུ་དཀྱིལ་འཁོར་གྱི་ལྷ་རེ་རེ་ལ་ཡང་ལྷ་སུམ་ཅུ་རྩ་བདུན་ཚང་བར་གསུངས་པ་རྣམས་ནི་ལྷ་དེ་དང་དེའི་ལུས་ལ་བཀོད་པའི་དཀྱིལ་འཁོར་གྱི་ལྷ་ཡིན་པའི་རྒྱུ་མཚན་གྱིས་ལུས་དཀྱིལ་གྱི་ཐ་སྙད་གསུངས་པ་སྟེ་གཞན་དུ་རྒྱས་པར་བཤད་ཟིན་ཏོ། །རྡོ་རྗེའི་ལུས་ལ་བཀོད་པས་ས་ལམ་བགྲོད་པའི་ཚུལ་ཇི་ལྟར་སྙམ་ན། ཕྱིའི་གནས་ཕྱོགས་ཀྱི་དུར་ཁྲོད་བཞི། ནང་གི་ཁ་དང་། སྣ་དང་། ཆུ་ལམ་དང་། བཤང་ལམ་སྟེ་བཞིའམ། སྙིང་གའི་ཕྱི་སྐོར་གྱི་ཕྱོགས་ཀྱི་རྩ་བཞི་ནི་སྒོ་མ་བཞི་སྟེ། དེ་དག་གི་རླུང་སེམས་དབུ་མར་ཞུགས་པས་ཐུན་མོང་བའི་མིང་ཀུན་ཏུ་འོད་བྱེད་པའམ། ཐུན་མོང་མ་ཡིན་པའི་མིང་དཔེ་མེད་པ་ཐོབ་སྟེ། དགོངས་པ་ལུང་སྟོན་པ་ལས། འཇིག་རྟེན་དང་ནི་འཕགས་པའི་ཆོས། །སྔ་མ་ཀུན་གྱིས་བསྐྲུན་མེད་ཅིང་། །དེ་ཕྱིར་ཀུན་ཏུ་འོད་བྱེད་པ། །དཔེ་མེད་ཡེ་ཤེས་ཞེས་སུ་བཤད། །ཅེས་སོ། །ཕྱིའི་ཡུལ་མཚམས་ཀྱི་དུར་ཁྲོད་བཞི་དང་། ནང་གི་རྣ་བ་གཉིས་དང་། མིག་གཉིས་སམ། སྙིང་གའི་ཕྱི་སྐོར་གྱི་མཚམས་ཀྱི་རྩ་བཞི་ནི་མཚམས་མ་བཞི་སྟེ་དེ་དག་གི་རླུང་སེམས་དབུ་མར་ཞུགས་པས། བཅུ་གཉིས་པ་ཡེ་ཤེས་ཆེན་པོ་ཐོབ་སྟེ། དགོངས་པ་ལུང་སྟོན་ལས། ཐུབ་པའི་སྤྱོད་ཡུལ་མ་གཏོགས་པ། །རྒྱལ་སྲས་ཀུན་གྱི་ས་ལས་བརྒལ། །ཤེས་བྱ་ཀུན་ལ་འཇུག་ཆོས་ཅན། །ས་དེ་ཡེ་ཤེས་ཆེན་པོར་བཞེད། །ཅེས་སོ། །ཕྱི་གླིང་བཞི་དང་གླིང་བཞི་གཅིག་ཏུ་བསྡོམས་པ་སྟེ་ལྔ། ནང་སྙིང་གི་ནང་དུ་སྦས་པའི་རྩ་ལྔ་ནི་དེ་དག་གི་རླུང་སེམས་དབུ་མར་ཞུགས་པས་བཅུ་གསུམ་རྡོ་རྗེ་འཛིན་པའི་ས་ཐོབ་སྟེ། ངེས་བརྗོད་ལས། རྡོ་རྗེའི་ས་ནི་བཅུ་གསུམ་པ། །ཞེས་དང་། དགོངས་པ་ལུང་སྟོན་ལས། སངས་རྒྱས་རྣམས་ཀྱིས་གང་བསྟན་པའི། །སར་གྱུར་དེ་ནི་བཅུ་གསུམ་པ། །ཞེས་གསུངས་པས་སོ། བཞི་པ་དེ་ལྟར་བསྒོམ་པའི་དགོས་པ་ནི་ལོངས་སྐུ་ལམ་དུ་བྱ་བར་རྗེ་བཙུན་དང་། དམར་གྱིས་གསུངས་ཏེ། ལུས་འདི་ཉིད་ལ་ཕྱག་ཆེན་མཆོག་གི་དངོས་གྲུབ་ཐོབ་པའི་ཚེ། ལུས་དཀྱིལ་གྱི་རྟེན་དང་བརྟེན་པའི་དབང་རྟེན་རགས་པ་དང་། རྩ་ཁམས་འདི་དག་འཁོར་ལོ་བདེ་མཆོག་གི་རྟེན་དང་བརྟེན་པར་གནས་གྱུར་པ་དེ་ཉིད་ལོངས་སྤྱོད་རྫོགས་པའི་སྐུ་ཡིན་པའི་ཕྱིར་རོ་སྙམ་དུ་དགོངས་སོ། །དམར་གྱིས་གཙོ་བོའི་ལུས་ལ་ཞེན་པ་སྤང་བའི་ཕྱིར་ཞེས་དགོས་པ་ལྷག་པོ་གསུངས་པ་ནི་ཤིན་ཏུ་ལེགས་ཏེ། ལུས་ཀྱི་ཆ་ཤས་སོ་སོར་ཕྱེ་ནས། རྟེན་དང་བརྟེན་པའི་ཆ་ཤས་སོ་སོར་བསྒོམས་པས། གཙོ་བོའི་ལུས་སུ་མངོན་པར་ཞེན་པ་སྤང་བའི་ཕྱིར་རོ། །འདིས་ནི་གྱ་ནོམ་ལྷར་ཞེན་གྱི་རྣམ་རྟོག་ཕྱོགས་ཅིག་སྤོང་བར་བསྟན་ནོ། །དེང་སང་གི་སྐྱེ་བོ་འགའ་ཞིག་ཞེན་པ་འདི་སྤོང་གིས་དོགས་ནས། མིག་པཉྩ་རེ་ཁཱ་སོགས་བསྒོམས་ན། ལྷའི་མིག་དང་། སྣ་ལ་སོགས་པའི་རྣམ་པ་མི་ཡོང་ཞེས་སྨྲ་བ་ནི་མན་ངག་གི་ཕུ་ཐག་མ་ཆོད་པའོ། །གཞན་ས་བགྲོད་པའི་དགོས་པ་ནི་གསེབ་ཚགས་སུ་བསྟན་ཅིང་། ནང་གི་རྩ་ཁམས་ལྷར་ཤར་བའི་སྟོབས་ཀྱིས། ཕྱི་རོལ་གྱི་ཡུལ་སྣང་ཐམས་ཅད་ལྷར་འཆར་བའི་དགོས་པ་ཡང་། ལུས་དཀྱིལ་གྱི་རྣམ་བཤད་བདེ་ཆེན་བཅུད་ཀྱི་སྙིང་པོར་བསྟན་ཟིན་པས་དེར་བལྟ་བར་བྱའོ། །ལྔ་པ་རྟོག་པས་བཏགས་པའི་ལུགས་དགག་པ་ལ་གཉིས་ཏེ། འདོད་པ་བརྗོད་པ་དང་། དེ་དགག་པའོ། །དང་པོ་ནི་འདོད་འཇོ་མཁན་པོས་དཀྱིལ་འཁོར་གཉིས་ཀ་བསྒོམ་པ་ལཱུ་ནག་ལྟ་བུ་དང་། ལུས་དཀྱིལ་གཅིག་བུ་བསྒོམ་པ་མངོན་བརྗོད་དགུ་པ་ལྟ་བུ་ཡིན་ན། སྔོན་དུ་རྟེན་གྱི་དཀྱིལ་འཁོར་བསྐྱེད་ཟིན་པ་དེ་ལ། ལུས་རྟེན་གྱི་དཀྱིལ་འཁོར་དུ་བསྒོམ་ལུགས་སྔར་བྱས་པ་མེད་པས། ལུས་དཀྱིལ་བསྒོམ་རན་པ་ན། སྔར་བསྐྱེད་པའི་གཞལ་ཡས་ཁང་དེ་ཉིད་ཀྱི་སྟེང་ནས་བྱེད་ཀྱིས། སྔ་མ་དེ་བསྡུས་ནས་བསྐྱེད་པ་མ་ཡིན་ཏེ། ཞེས་དང་། སྔར་བསྐྱེད་པའི་གཞལ་ཡས་ཁང་དེ་ཉིད་ཀྱི་ནང་དུ་གཞལ་ཡས་ཁང་གཉིས་པ་ཅིག་བསྐྱེད་པ་ཡང་མ་ཡིན་ནོ། །འོ་ན་གཞལ་ཡས་ཁང་སྔ་མའི་སྟེང་ནས་ཇི་ལྟར་བསྒོམ་སྙམ་ན། རྡོ་རྗེ་ཕྲེང་བར་ལུས་ཀྱི་ཆ་དུ་མ་ཞིག་གཞལ་ཡས་ཁང་གི་ཆ་སོ་སོར་བསྐྱེད་པར་གསུངས་པ་ནི་རྒྱས་པའི་ལུགས་ཡིན་ལ། འདིར་ནི་དཔེར་ན། བྷྲཱུྃ་ཡིག་གཅིག་པུ་ལས་ཕྱིའི་གཞལ་ཡས་ཁང་ཐམས་ཅད་བསྐྱེད་པ་བཞིན་དུ། དྲིལ་བུ་པས། ལུས་ནི་མཉམ་པ་གྲུ་བཞི་པ། །རྒྱན་རྣམས་རབ་མཛེས་ཧེ་རུ་ཀའི། །ལུས་ཀྱི་དཀྱིལ་འཁོར་ཉིད་དུ་འདོད། །ཅེས་པས། ལུས་འདོམ་གང་ཡན་མན་དང་ཕན་ཚུན་དུ་མཉམ་པ་ལས། ངོས་བཞི་མཉམ་པའི་གཞལ་ཡས་ཁང་གྲུ་བཞི་པ་བསྐྱེད་པ་དང་། ཕ་གུ་དང་དྲྭ་ཕྱེད་སོགས་རྒྱན་གྱིས་རབ་ཏུ་མཛེས་པའི་ཧེ་རུ་ཀའི་རྟེན་གྱི་ལུས་དཀྱིལ་བསྒོམ་པར་བཤད་པ་ནི་བསྡུས་པའོ། །ཞེས་དང་། ལུས་རྟེན་གྱི་དཀྱིལ་འཁོར་དུ་བསྒོམས་པའི་མཚམས་ནས། རང་གི་རིགས་འདྲ་སྔ་མ་དང་། ལུས་ཀྱི་ཆ་རེ་ལ་བརྟེན་ནས་རིགས་འདྲ་ཕྱི་མ་སྐྱེས་པར་བསྒོམ་པ་ཡིན་ནོ། །དེའང་རྐང་པ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས། འབྱུང་བཞིའི་རླུང་གཞུའི་དབྱིབས་ཅན་སོགས་སུ་བསྒོམ་པ་ཡིན་ལ། སྔར་བསྐྱེད་པ་ད་དུང་གནས་པའི་དཀྱིལ་འཁོར་བཞི། དེ་རྣམས་ཀྱི་དབྱིབས་ཅན་གྱི་ལུས་ཀྱི་ཆ་བཞི་ལས་བསྐྱེད་པ་ཡིན་གྱི། རྐང་མཐིལ་གྱི་རླུང་དེར་བསྐྱེད་པ་མ་ཡིན་ནོ་ཞེས་དང་། བརྟེན་པ་ལྷའི་སྐབས་སུ་དྲིལ་བུ་པའི་དབང་ཆོག་ལས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་གསུངས་པའི་དོན། ལུས་དཀྱིལ་གྱི་ལྷའི་དཀྱིལ་འཁོར་གང་ལས་བསྒྲུབ་པའི་སྒྲུབ་གཞི་ནི། རྡུལ་ཚོན་དང་། རས་བྲིས་ཀྱི་དཀྱིལ་འཁོར་ལ་ལྷ་བསྒྲུབ་པའི་སྒྲུབ་གཞི་ཕྱག་མཚན་དང་སྐུ་མདོག་ལ་སོགས་པ་གསར་དུ་བསྒྲུབ་དགོས་པ་བཞིན་དུ། འབྲི་མཁན་གྱིས་གསར་དུ་བསྒྲུབ་མི་དགོས་པར། རྩ་དང་ཁམས་རྣམས་རང་བཞིན་གྱིས་ཏེ་གདོད་མ་ནས་གནས་ལ། དེ་ཡང་དེའི་སྒྲུབ་གཞི་ཡིན་པའི་དོན་ཡིན་གྱི། ལུས་ཀྱི་རྩ་དང་ཁམས་ལ་སོགས་པ་ཧེ་རུ་ཀའི་དཀྱིལ་འཁོར་དུ་གདོད་ནས་གནས་པ་མ་ཡིན་ཏེ། ཡིན་ན་དེ་ཉིད་ལས། དེ་ཡི་རང་བཞིན་མི་ཤེས་རྣམས། །སྣོད་དུ་བྱ་བར་བཞེད་པ་སྟེ། །ཞེས་གསུངས་པ་དང་ནང་འགལ་བར་འགྱུར་པའི་ཕྱིར་ཏེ། བདེ་མཆོག་གི་དཀྱིལ་འཁོར་གྱི་དེ་ཉིད་མི་ཤེས་པ་འགལ་བའི་ཕྱིར་ཞེས་བྲིས་སོ། །གཉིས་པ་ནི། འདི་དག་རིམ་པ་བཞིན་མི་འཐད་པར་སྟོན་ཏེ། ལཱུ་ནག་གཉིས་ཕྱི་ནང་གཉིས་ཀ་བསྒོམ་པ་དང་། མངོན་བརྗོད་དགུ་པ་ལུས་དཀྱིལ་གཅིག་པུ་བསྒོམ་པ་ཡིན་ཞེས་པའི་ཁྱད་པར་ནི། སུས་ཀྱང་བསྒྲུབ་པར་མི་ནུས་ཏེ། མངོན་བརྗོད་དགུ་པར་ཐོག་མར་མངོན་བྱང་ལས་རྟེན་གཞལ་ཡས་ཁང་དང་། བརྟེན་པ་གཙོ་བོ་ཡབ་ཡུམ་ཅིག་ཆར་བསྐྱེད་ནས། དེའི་རྗེས་སུ་གཙོ་བོའི་ལུས་ལ་ལུས་དཀྱིལ་འགོད་པར་གསུངས་ཤིང་། ཁྱེད་རང་གིས་ཀྱང་དེ་ལྟར་བྱས་པའི་ཕྱིར་རོ། །དེ་ལྟར་ན་ཡང་ལུས་དཀྱིལ་འབའ་ཞིག་ཡིན་ན། སྔོན་དུ་རྟེན་གྱི་དཀྱིལ་འཁོར་བསྐྱེད་ཟིན་པ་དེ་ལ་ལུས་དཀྱིལ་བསྒོམ་རན་པ་ན། ལུས་ཀྱི་ཆ་ཤས་ཡོངས་སུ་གྱུར་པ་ལས་ལུས་ཀྱི་ཆ་ཤས་རེ་རེ་དང་། རང་རང་གི་རིགས་འདྲ་སྔ་མ་ལས་རིགས་འདྲ་ཕྱི་མ་སྐྱེས་པ་ལུས་དཀྱིལ་དུ་འདོད་པ་དང་འགལ་ཏེ། ཆ་ཤས་མ་བསྲེས་པའི་གོང་ནས་ལུས་དཀྱིལ་ཡིན་པའི་ཕྱིར་རོ། །བྷྲཱུྃ་ཡིག་གཅིག་པོ་ལས་ཕྱིའི་གཞལ་ཡས་ཁང་ཐམས་ཅད་བསྐྱེད་པ་བཞིན་དུ་ལུས་འདོམ་གང་མཉམ་པ་ལས་ཧེ་རུ་ཀའི་ལུས་དཀྱིལ་ཅིག་ཆར་དུ་བསྐྱེད་པ་ཡང་ཡེ་མ་བརྟགས་པ་སྟེ། བྷྲཱུྃ་ལས་གཞལ་ཡས་ཁང་བསྐྱེད་པ་ནི། གནས་དེ་ཉིད་དུ་བསྐྱེད་པ་ཡིན་ལ། འདི་གནས་དེ་ཉིད་དུ་བསྐྱེད་པར་ནི་ཁྱེད་མི་འདོད་ཅིང་། ཕྱིའི་གཞལ་ཡས་ཁང་ལ་ཐིམ་པར་བསྒོམ་པ་ནི་བློས་སྒྲོ་བཏགས་པ་ཙམ་ཡིན་པའི་ཕྱིར་རོ། །གཞན་ཡང་རྐང་མཐིལ་གཉིས་བགྲད་པ་གཞུའི་དབྱིབས་སུ་ཡོད་པ་ཡོངས་སུ་གྱུར་པ་ལས་ཞེས་པའི་དོན། ཐོག་མར་རྐང་མཐིལ་གཉིས་སུ་རླུང་རེ་བསྒོམས་ནས་དེ་ཕྱིར་སྤྲོ་བ་ཡིན་ནམ། རྐང་མཐིལ་གཉིས་ཕྱིར་སྤྲོས་ཏེ་རླུང་དང་ཕྲད་པའི་ཚེ་རླུང་དུ་བསྒོམ་པ་ཡིན། དང་པོ་ལྟར་ན་རྐང་མཐིལ་གཉིས་སུ་རླུང་བསྒོམས་ཟིན་ནས་དེ་གནས་དེར་བཞག་པ་ལ་ཉེས་པ་ཅི་ཞིག་ཡོད། ཕྱི་མ་ལྟར་ན་རྐང་མཐིལ་ཕར་སོང་ནས་ཕྲད་མཚམས་སུ་ཡོངས་སུ་གྱུར་པའི་ཚུལ་འདི་འདྲ་ཡང་ལུང་རིགས་གང་ནས་བཤད། བློ་ལ་ཇི་ལྟར་འཆར་ལེགས་པར་སོམས་ཤིག ལུས་ཀྱི་རྐང་མཐིལ་གྱི་ཆ་འབྱུང་བཞིའི་རླུང་དུ་བསྐྱེད་པ་ཡིན་གྱི། རྐང་མཐིལ་གྱི་རླུང་དེར་བསྐྱེད་པ་མ་ཡིན་ན། སཾ་བུ་ཊི་ལས། རྐང་པའི་མཐིལ་དུ་རྩོམ་ཆེན་རླུང་། །ཞེས་པའི་རླུང་འདི་བསྐྱེད་གཞིའི་ལུས་ཀྱི་ཆ་ཡིན་ནམ། བསྐྱེད་ཟིན་པའི་འབྱུང་བཞིའི་རླུང་ཡིན། དང་པོ་ལྟར་ན། རྐང་མཐིལ་གྱི་རླུང་དེར་བསྐྱེད་པ་མ་ཡིན་པ་དང་འགལ། ཕྱི་མ་ལྟར་ན། བསྐྱེད་ཟིན་པའི་རླུང་གཞལ་ཡས་ཁང་གི་འོག་ཏུ་ཡོད་པ་དང་འགལ་ལོ། །མངོན་བརྗོད་དགུ་པའི་ལུས་དཀྱིལ་མ་བསྒོམས་པའི་གོང་གི་གཞལ་ཡས་ཁང་དེ་ཕྱི་དཀྱིལ་ཡིན་ན། ལཱུ་ནག་གཉིས་ཕྱི་ནང་གཉིས་ཀ་བསྒོམ་པ་དང་། འདི་ལུས་དཀྱིལ་ཁོ་ན་ཡིན་པ་དང་འགལ། ཕྱི་དཀྱིལ་མ་ཡིན་ན་ནི། ལཱུ་ཧི་པའི་སྔར་གྱི་གཞལ་ཡས་ཁང་དེ་ཕྱི་དཀྱིལ་མ་ཡིན་པ་དང་རྣམ་པ་ཐམས་ཅད་དུ་མཚུངས་སོ། །དྲིལ་བུ་ལུས་དཀྱིལ་ལ་མངོན་བྱང་ལས་གཞལ་ཡས་ཁང་དང་། གཙོ་བོ་ཅིག་ཆར་དུ་བསྐྱེད་པའི་ཚུལ་ཁ་བསྐང་བ་ནི་གནད་མ་ལུས་པ་བཅོས་པ་སྟེ། དེ་ལྟར་བསྐང་བའི་ཚུལ་མལ་གྱོ་ནས་བརྒྱུད་པ་དང་། པུ་ཧྲངས་པ་ནས་བརྒྱུད་པ་དང་། པཎ་ཆེན་ཤཱཀྱ་ཤྲཱི་ནས་བརྒྱུད་པ་གང་ལ་ཡང་མི་སྣང་བས་གསར་དུ་བཟོས་པ་ལས་མ་འདས་ལ། བཟོས་པ་དེ་ཡང་རང་ཉིད་ལུས་དཀྱིལ་བསྒོམ་པའི་གཞི་ལ་སྔར་ཕྱི་དཀྱིལ་བསྐྱེད་དགོས་པར་དམ་བཅས་པའི་གྲུབ་མཐའི་སྟོབས་ཀྱིས་འདི་མི་བྱེད་ཁ་མེད་བྱུང་བ་ཡིན་གྱི། འདི་མ་བཅོས་པའི་དཀྱིལ་འཁོར་ཡིན་པར་གསུངས་པས་ཕྱི་དཀྱིལ་བཅོས་མ་བསྐྱེད་པར་འགལ་བའི་ཕྱིར་རོ། །བརྟེན་ལྷའི་སྐབས་སུ་རང་བཞིན་གྱིས་གྲུབ་པའི་དོན་བཅོས་མ་གཉིས་གསར་དུ་བསྒྲུབ་དགོས་པ་བཞིན་དུ་འབྲི་མཁན་གྱིས་གསར་དུ་བསྒྲུབ་མི་དགོས་པར། དང་པོ་ནས་གནས་པའི་དོན་ཡིན་ན་བྲིས་ཟིན་པའི་བཅོས་མ་གཉིས་ཀྱིས་དཀྱིལ་འཁོར་དེ་ཡང་རང་བཞིན་གྱིས་གྲུབ་པའི་དཀྱིལ་འཁོར་དུ་འགྱུར་ཏེ། ལུས་དཀྱིལ་གྱི་རྩ་ཁམས་ཕ་མའི་ཁུ་ཁྲག་ལས་གསར་དུ་བསྒྲུབ་དགོས་པ་བཞིན་དུ་ཕ་མ་གཉིས་ཀྱིས་གསར་དུ་བསྒྲུབ་མི་དགོས་པར་བྲིས་ཟིན་པ་ཕྱིན་ཆད་དང་པོ་ནས་གནས་པར་མཚུངས་པའི་ཕྱིར་རོ། །ལུས་ཀྱི་རྩ་ཁམས་ཧེ་རུ་ཀའི་དཀྱིལ་འཁོར་དུ་གདོད་མ་ནས་གནས་པ་ཡིན་ན། དེའི་རང་བཞིན་མི་ཤེས་པ་འགལ་ཞེས་པ་ནི་རྒྱུད་བླར། ལུས་ཅན་ལ་སངས་རྒྱས་གདོད་མ་ནས་གནས་ཀྱང་། མི་ཤེས་པའི་ཚུལ་དཔེ་དགུས་བསྟན་པ་ལ་འཕངས་པར་སྣང་སྟེ། རྣམ་དབྱེར་བཅས་པའི་མཚན་ཉིད་ཅན། །གློ་བུར་དག་གིས་ཁམས་སྟོང་གི །རྣམ་དབྱེར་མེད་པའི་མཚན་ཉིད་ཅན། །བླ་མེད་ཆོས་ཀྱི་སྟོང་མ་ཡིན། །ཞེས་གསུངས་པས་སོ། །གཉིས་པ་དེ་སྔགས་ཀྱིས་བྱིན་གྱིས་བརླབ་པ་ནི་སློབ་དཔོན་གྱི་གཞུང་ལས། དེ་ཡང་སྐུ་གསུང་ཐུགས་ཀྱི་དབྱེ་བས་ཡི་གེ་གསུམ་གྱི་ངོ་བོ་ཉིད་དེ། མཐོ་རིས་དང་ནི་མི་ཡུལ་དང་། །ས་འོག་དག་ཏུ་སྐད་ཅིག་མ། །གཅིག་གིས་སྐུ་གཅིག་ཏུ་འགྱུར་རོ། །སྐད་ཅིག་ཙམ་གྱིས་རྣལ་འབྱོར་བདག །སྐད་ཅིག་སྔགས་དང་ཕྱག་རྒྱ་ཅན། །ཀུན་ནས་ཀུན་ཏུ་སྐད་ཅིག་སྟེ། །སྐད་ཅིག་གིས་ནི་གསང་སྔགས་འདོན། །ཨོཾ་ཨཱཿཧཱུྃ་ཨོཾ་སརྦ་ཝཱི་ར་ཡོ་གི་ནཱི། ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ྅ཧཾ། ཞེས་གསུངས་ཏེ། བདེ་ཆེན་གྱི་འཁོར་ལོ་ལུས་ལ་འདུས། དམ་ཚིག་གི་འཁོར་ལོ་སྐུ་ལ་འདུས་ཏེ། འཁོར་ལོ་གསུམ་གྱི་སེམས་ཅན་གྱིས་དོན་མཛད་པ་ནི། སྐུ་དང་གསུང་དང་ཐུགས་ཀྱི་དབྱེ་བས་ཞེས་པའོ། །ཡི་གེ་གསུམ་གྱི་ངོ་བོ་ཉིད་ཅེས་པ་ནི་འོག་གི་ཡི་གེ་གསུམ་བརྗོད་པའི་ཚེ། ཐམས་ཅད་དྲན་པའི་ཤེས་བྱེད་དུ། དེ་ཉིད་གོང་ལ་གནས་ན་ལུས་ཀྱི་སྟོད་དང་། བར་ལ་གནས་པ་ནི་མཐོ་རིས་སོགས་སོ། །སྐད་ཅིག་མ་གཅིག་གིས་སྐུ་གཅིག་ཏུ་འདུས་པ་ནི་སྐད་ཅིག་གིས་ལུས་ལ་ཚང་བར་བསྒོམ་པའོ། །ཡེ་ཤེས་ཞབས་ལུགས་ཀྱི་འདུས་པ་ན་ཡབ་སྔོན་ལ་བསྐྱེད་ནས་ཡུམ་ཕྱིས་བསྐྱེད་པ་ཡོད་པ་ལྟ་བུ་ནི་མ་ཡིན་ཏེ། སྐད་ཅིག་རྣམ་པའི་རྣལ་འབྱོར་བདག །ཅེས་པ་དུས་མཉམ་དུའོ། །ཡང་ངེས་བརྗོད་ནས་ལྷ་སྔོན་ལ་གྲུབ་ནས་རྒྱན་ཕྱིས་འདོགས་པ་ཡོད་པ་དེ་ལྟ་བུ་ཡང་མ་ཡིན་ཏེ། སྐད་ཅིག་རྣམ་པའི་ཕྱག་རྒྱ་ཅན། །ཞེས་པ་རྒྱན་དང་བཅས་པར་རོ། །ཡང་ཀྱཻ་རྡོ་རྗེ་ནས་རྟེན་སྔོན་ལ་བསྐྱེད་ནས། བརྟེན་པ་ཕྱིས་བསྐྱེད་པ་ཡོད་དེ། དེ་ལྟ་བུ་ཡང་མ་ཡིན་ཏེ། ཀུན་ནས་ཀུན་ཏུ་སྐད་ཅིག་སྟེ། །ཞེས་པ་རྟེན་དང་བརྟེན་པ་དུས་གཅིག་ཏུ་བསྐྱེད་པས་སོ། །རྒྱུད་སྡེ་གཞན་ནས་སྔགས་ཀྱིས་བྱིན་གྱིས་བརླབ་པའི་གནད་ཟབ་མོ་མ་བཤད་ལ། འདི་ནས་བཤད་པས་ན། སྐད་ཅིག་གིས་ནི་གསང་སྔགས་འདོན། །ཅེས་པ་སྔགས་ཀྱིས་བྱིན་གྱིས་བརླབ་པའོ། །ཅི་ལྟར་བྱིན་གྱིས་བརླབ་ན། ཨོཾ་ཨཱཿཧཱུྃ། ཞེས་པ་ལ་སོགས་པ་སྨོས་ཏེ། དེའི་དོན་ཨོཾ་ཞེས་བརྗོད་པའི་ཚེ་ལུས་ཀྱི་སྐུའི་འཁོར་ལོ་དང་། ཕྱིའི་སྐུའི་འཁོར་ལོ་དང་། འཛམ་བུ་གླིང་ན་བཞུགས་པའི་སྐུའི་འཁོར་ལོ། འོག་མིན་ལོངས་སྐུའི་འཁོར་ལོ་བཞི་དྲན་པར་བྱ། དེ་བཞིན་དུ་ཨཱཿཞེས་བརྗོད་པས་གསུང་གི་འཁོར་ལོ་བཞི་དྲན་པར་བྱ། ཧཱུྃ་ཞེས་བརྗོད་པས་ཐུགས་ཀྱི་འཁོར་ལོ་བཞི་དྲན་པར་བྱ། སརྦ་བཱི་ར་ཡོ་གི་ནི་དཔའ་བོ་དང་རྣལ་འབྱོར་མ་ཐམས་ཅད་ཅེས་བྱ་བ་ཡིན་ཏེ། རྟེན་དང་བརྟེན་པར་བཅས་པའི་ལྷ་དྲུག་ཅུ་རྩ་གཉིས་པོ་ཐམས་ཅད་དྲན་པར་བྱའོ། །ཀཱ་ཡ་ཞེས་པ་སྐུ་སྟེ་སྐུ་བཞི་དབྱེར་མི་ཕྱེད་སྙམ་དུ་བསམ། ཝཱཀ་ཞེས་པ་གསུང་སྟེ་གསུང་བཞི་དབྱེར་མི་ཕྱེད། ཙིཏྟ་ཞེས་པ་ཐུགས་ཏེ་ཐུགས་བཞི་དབྱེར་མི་ཕྱེད་སྙམ་དུ་དྲན་པར་བྱའོ། །བཛྲ་སྭ་བྷཱ་ཝ་ཨཱཏྨ་ཀོ྅ཧཾ་ཞེས་པ་གཉིས་སུ་མེད་པ་དབྱེར་མི་ཕྱེད་པ་རྡོ་རྗེའི་རང་བཞིན་ང་ཡིན་སྙམ་དུ་བསམས་ལ། ཨོཾ་བཛྲ་ཤུདྡྷཿསརྦ་དྷརྨཱཿབཛྲ་ཤུདྡྷོ་ནི་རྡོ་རྗེའི་དག་པ་ཆོས་ཐམས་ཅད་རྡོ་རྗེར་དག་པའི་རང་བཞིན་ནོ། །ཞེས་པ་དངོས་པོ་ཐམས་ཅད་ལྷའི་རང་བཞིན་ལ་དེ་དང་བདག་གིས་ལུས་ཀྱང་སངས་རྒྱས་ཀྱི་སྐུ་གསུང་ཐུགས་རྡོ་རྗེའི་རང་བཞིན་དུ་དག་ལ། ཆོས་ཐམས་ཅད་བརྗོད་པ་དང་བྲལ་བ་རྡོ་རྗེའི་རང་བཞིན་དུ་དག་གོ་ཞེས་དྲན་པར་བྱའོ། །པྲ་ཛྙཱ་རཀྵི་ཏས་སྔར་བཤད་པའི་ཚིགས་བཅད་དེ་དག་ལུས་དཀྱིལ་གྱི་དོན་བསྡུར་བྱས་ནས། སྔགས་གཉིས་པོ་སྔར་མངོན་བྱང་ལས་རྟེན་བརྟེན་པ་ཅིག་ཆར་དུ་བསྐྱེད་མ་ཐག་ཏུ་བརྗོད་པར་བཤད་དོ། །དམར་གྱིས་སྔགས་དོན་སྔ་མ་དང་འདྲ་བ་ལ་ཕོ་ཉ་གསུམ་བསྲེའི་ཐ་སྙད་མཛད་ཀྱང་། རྗེ་བཙུན་གྱིས་ཕོ་ཉ་གསུམ་བསྲེ་བ་སྔར་མཛད་ཅིང་། ཕོ་ཉ་གསུམ་བསྲེའི་དོན་སྔགས་སྐྱེས་གཞིར་བྱས་ནས། དེ་ལ་ཞིང་སྐྱེས་བསྲེ། ཞིང་སྐྱེས་གཞིར་བྱས་ནས། དེ་ལ་སྔགས་སྐྱེས་བསྲེ་བ་ནི་རྟོགས་པ་མས་འཆར་དང་། དེ་ལྟར་བསྒོམས་པས་ལྷན་སྐྱེས་ཀྱིས་ཞིང་སྐྱེས་བྱིན་གྱིས་རློབ། ཞིང་སྐྱེས་ཀྱིས་སྔགས་སྐྱེས་བྱིན་གྱིས་རློབ། དེས་རྣལ་འབྱོར་པའི་སེམས་རྒྱུད་བྱིན་གྱིས་རློབ་པ་ནི་བྱིན་གྱིས་ཡས་རློབ་སྟེ་དེ་ཉིད་ལ་བཞེད། སྔགས་ཀྱིས་བྱིན་གྱིས་བརླབ་པ་ནི་ཕོ་ཉ་གསུམ་ངོ་བོ་གཅིག་ཏུ་དྲན་པ་ཙམ་ལ་བཞེད་པ་ནི་མན་ངག་གི་མཆོག་རབ་ཏུ་སྣང་ངོ་། །གཉིས་པ་ཡེ་ཤེས་ཀྱི་འཁོར་ལོ་དགུག་གཞུག་བྱ་བ་ནི་སློབ་དཔོན་གྱི་གཞུང་ལས། དེ་ནས་གོ་ཆ་གཉིས་ཤེས་ནས། །ཡེ་ཤེས་འཁོར་ལོ་རྣམ་པར་བསྒོམ། །སྔགས་དང་ཕྱག་རྒྱའི་སྦྱོར་ཤེས་པས། །དམ་ཚིག་འཁོར་ལོ་ལ་མྱུར་གཞུག །ཅེས་གསུངས་ཤིང་། འདི་ཉིད་མངོན་བརྗོད་དང་། ཀུན་སྤྱོད་གཉིས་ལས་ཀྱང་འབྱུང་ངོ་། །རྒྱུད་གཞུང་དེ་དག་ལས། སྔོན་ལ་གོ་ཆ་བགོས་ནས། ཡེ་ཤེས་ཀྱི་འཁོར་ལོ་གཞུག་པ་རྗེས་ལ་གསུངས་པ་ལྟར་བྱས་ན་ཡང་ལེགས་ཞེས་གསུངས་ཤིང་། འགྲེལ་པ་རྣམས་ཀྱིས་ཀྱང་དེ་ལྟར་མཛད་དོ། །འདིར་ནཱ་རོ་པའི་མན་ངག་གིས་འཁྲུགས་ཀྱི་ཚུལ་དུ་སྔོན་ལ་ཡེ་ཤེས་པ་བཅུག་ནས། གོ་ཆ་བཅིང་བ་རྗེས་ལ་མཛད་པ་ནི། ཤིང་གཉིས་གཟེར་གྱིས་བསྡམས་ནས་མི་འབྲལ་བར་བྱེད་པ་བཞིན། དམ་ཚིག་པ་དང་ཡེ་ཤེས་པ་མི་འབྲལ་བར་བྱེད་པ་ཡིན་ཞེས་གསུངས་པ་ལྟར་བཤད་ན། ལུས་ཀྱི་མཛུབ་མོ་མདུད་བྱས་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པོར་རབ་དུ་སྦྱར། །འདི་ནི་དཔྲལ་བའི་དབྱེས་སུ་རབ་བཞག་ནས། །བསྐོར་ཞིང་བསྐོར་བས་ཀུན་ནས་བསྐོར་བར་བྱ། །རྐང་པ་མནན་ཅིང་སྟེང་དུ་བལྟ། །གྱེན་དུ་ཕཻཾ་གྱི་སྒྲ་སྒྲོགས་ཤིང་། །ཕྱོགས་བཅུའི་འཇིག་རྟེན་ཁམས་བཞུགས་པའི། །དཔའ་བོ་རྣལ་འབྱོར་མ་རྣམས་དགུག །ཞེས་རྒྱུད་གཞུང་གསུམ་ལས་གསུངས་པ་ལྟར། ལུས་དང་། ངག་དང་། སེམས་ཀྱི་སྦྱོར་བས་ཡེ་ཤེས་པ་སྤྱན་དྲངས་ནས། ཕྱི་མཆོད་དང་། ཡིད་ལས་བྱུང་བའི་མཆོད་པ་གཉིས་ཀྱིས་མཆོད་དེ། ངེས་བརྗོད་བཅུ་བཞི་པ་ལས། ཛཿཧཱུྃ་བྃ་ཧོའི་སྦྱོར་བ་ཡིས། །དགུག་དང་དེ་བཞིན་གཞུག་པ་དང་། །བཅིངས་ནས་དབང་དུ་བྱ་བ་ཡིན། །ཞེས་གསུངས་པ་ལྟར་དགུག་གཞུག་བྱས་ལ། གཞུང་ལས། ཨོཾ་ཡོ་ག་ཤུདྡྷཿསརྦ་དྷ་རྨཱཿཡོ་ག་ཤུདྡྷོ྅ཧཾ། དེ་ནས་སྙིང་པོའི་ཕྱག་རྒྱ་བསྟན་པར་བྱ་སྟེ། ལག་པ་གཡས་པ་དང་གཡོན་པ་དག་བསྐོར་ཞིང་། མཁའ་འགྲོ་མའི་བདེ་བའི་དམ་པར་གཞུག་པར་བྱའོ། །ཞེས་གསུངས་པ་ལྟར་གཉིས་སུ་མེད་པའི་བདེ་བ་དམ་པ་དྲན་པར་བྱའོ། །གསུམ་པ་གོ་ཆ་དགོད་པ་ནི། སློབ་དཔོན་གྱི་གཞུང་ལས། དེ་ནས་གོ་ཆ་གཉིས་བཤད་པར་བྱ་སྟེ། སྙིང་གར་ནི་ཨོཾ་ཧའོ། །མགོ་བོར་ནི་ན་མ་ཧིའོ། །སྤྱི་གཙུག་ལ་ནི་སྭཱ་ཧཱ་ཧུ། ཕྲག་པ་གཉིས་ལ་ནི་བཽ་ཥ་ཊ་ཧེ། མིག་གཉིས་ལ་ནི་ཧཱུྃ་ཧཱུྃ་ཧོཿ ཡན་ལག་ཐམས་ཅད་ལ་མཚོན་ཆ་ཕཊ་ཧཾ། དང་པོ་རྡོ་རྗེ་སེམས་དཔའ་སྟེ། །གཉིས་པ་རྣམ་པར་སྣང་མཛད་གཞུག །གསུམ་པ་པདྨ་གར་དབང་ཕྱུག །བཞི་པ་དཔལ་ལྡན་ཧེ་རུ་ཀ །རྡོ་རྗེ་ཉི་མ་རྟ་མཆོག་སྟེ། །དྲུག་པ་གོ་ཆ་རྣམས་ཀྱིས་བསྲུང་། །ཨོཾ་ཨོཾ་བྃ་ནི་རྡོ་རྗེ་ཕག་མོ་ཉིད། ཨོཾ་ཧྃ་ཡོཾ་ནི་ཡཱ་མི་ནི། ཨོཾ་ཧྲཱིཾ་མོཾ་ནི་རྨོངས་བྱེད་མའོ། །ཨོཾ་ཧྲིཾ་ཧྲིཾ་ནི་སྦྱིན་བྱེད་མའོ། །ཨོཾ་ཧཱུྃ་ཧཱུྃ་ནི་སྐྱོད་བྱེད་མའོ། །ཨོཾ་ཕཊ་ཕཊ་ནི་ཙཎྜཱི་ཀ་སྟེ། །ཡན་ལག་ཐམས་ཅད་ལ་མཚོན་ཆ་ཡིན་ཏེ། ལྟེ་བ་དང་། སྙིང་ག་དང་། མགོ་བོ་དང་། སྤྱི་གཙུག་དག་གི་མཚོན་ཆ་ཉིད་དོ། །ཞེས་གསུངས་ཏེ་འདི་དག་གི་དོན་ལ་ལྷ་གང་ལ་འགོད་པ། རྣམ་པ་གང་འགོད་པ་གཉིས་ལས། དང་པོ་ནི་བུ་སྟོན་གྱིས། རྣལ་འབྱོར་མ་ཀུན་སྤྱོད་ཀྱི་ཊཱི་ཀར། འདིར་ཁ་ཅིག་ཡབ་དྲུག་ལའང་ཡུམ་གྱིས་འཁྱུད། ཡུམ་དྲུག་ལའང་ཡབ་ཀྱིས་འཁྱུད་པ། ཡི་གེ་འགོད་ནའང་ཡབ་ཀྱི་ཡི་གེའི་གནས་སུ་ཡུམ་གྱི་ཡི་གེ་དང་། ཡུམ་གྱི་ཡི་གེའི་གནས་སུ་ཡབ་ཀྱི་ཡི་གེ་འགོད་པར་བཤད་པ་ནི་མི་འཐད་དེ། མཁའ་འགྲོ་རྒྱ་མཚོར། དེ་ཕྱིར་བསྲུང་བ་ཨོཾ་ཧ་ཡིན། །མི་རྣམས་ཀྱི་ནི་སྙིང་དབུས་སུ། །སུམ་ཅུ་བདུན་དག་ཉིད་དཀྱིལ་འཁོར། །རྡོ་རྗེ་ཕག་མོས་འཁྱུད་པ་ཡང་། །ཞེས་ཡབ་ཡུམ་གྱིས་འཁྱུད་པར་བཤད་ཅིང་། གང་ཚེ་རྡོ་རྗེ་ཕག་མོ་ནི། །གཙོ་མོ་རྣམ་པར་གནས་པ་ན། །ཨོཾ་བཾ་ཞེས་བྱ་ལ་སོགས་པའི། །སྔགས་ཀྱི་ཡི་གེ་སྦྱིན་པར་བྱ། །ཞེས་ཡུམ་གཙོ་བོར་བྱེད་པ་ན། ཡུམ་རྐྱང་པའི་ས་བོན་འགོད་པར་བཤད་པའི་ཕྱིར་དང་། ལྭ་བ་པས་ཀྱང་དེ་བཞིན་དུ་བཤད་པའི་ཕྱིར་རོ། །ཞེས་བཀག་ནས། འདིར་བླ་མ་མལ་གྱོའི་རྗེས་སུ་འབྲང་བ་རྣམས་ཡབ་ལའང་གོ་ཆ་གཉིས་ཆར་དགོད། དེ་བཞིན་དུ་ཡུམ་དང་ལྷ་ཐམས་ཅད་ལའང་གོ་ཆ་གཉིས་ཆར་འགོད་པར་བཞེད་དོ། །པུ་ཧྲངས་ལོ་ཆུང་གི་རྗེས་སུ་འབྲང་བ་རྣམས་ཡབ་ལ་ཡབ་ཀྱི་གོ་ཆ་དང་། དཔའ་མོ་རྣམས་ལ་ཡུམ་གྱི་གོ་ཆ་འགོད་པར་བཞེད་དོ། །ཛ་ཡ་སེ་ན་དང་། བ་རེག་ལོ་ཙཱ་བ་དང་། རྨ་བན་ལོ་ཙཱ་བའི་རྗེས་སུ་འབྲང་བ་རྣམས་གཙོ་བོ་ཡབ་ལ་དཔའ་བོའི་གོ་ཆ་དང་། ཡུམ་ལ་དཔའ་མོའི་གོ་ཆ་འགོད་ཀྱི་འཁོར་ལ་གོ་ཆ་མི་འགོད་པར་བཞེད་དོ། །འདི་གསུམ་ལས་ཕྱོགས་གཉིས་པ་ལེགས་ཏེ། ཡུམ་ལའང་གོ་ཆ་གཉིས་ཀ་དགོས་ན། ཡུམ་རྐྱང་པ་ལའང་གོ་ཆ་གཉིས་ཀ་ཡོད་པར་འགྱུར་བ་ལས། བོད་དུ་འགྱུར་བའི་ཕག་མོའི་སྒྲུབ་ཐབས་ལྷ་སོ་བདུན་མ་སོགས་གང་ལས་ཀྱང་དཔའ་མོའི་གོ་ཆ་ལས་གཞན་མ་བཤད་པའི་ཕྱིར་ཞེས་བཞེད་དོ། །འདི་ནི་གཞན་ལུགས་དགག་པ་དང་ནང་འགལ་ཏེ། མཁའ་འགྲོ་རྒྱ་མཚོ་དང་ལྭ་བ་པས་ཡབ་ཀྱི་དཔའ་བོའི་གོ་ཆ་ལ་ཡུམ་གྱིས་འཁྱུད་པར་གསུངས་པ་དེ་ཉིད་ཀྱིས། དཔའ་བོ་རྣམས་ལ་ཡབ་ཀྱི་གོ་ཆ་ཁོ་ན་འགོད་པ་ལ་དངོས་སུ་གནོད་པའི་ཕྱིར་རོ། །གཞུང་དེས་དཔའ་བོ་རྣམས་ལ་ཡབ་ཡུམ་གྱི་གོ་ཆ་གཉིས་ཀ་འགོད་པར་གྲུབ་ན། མངོན་བརྗོད་ལས། གོ་ཆ་གཉིས་པོ་ཉིད་དག་ཀྱང་། །འཁོར་ལོ་ཀུན་ལ་རྣམ་བསྒོམས་ནས། །ཞེས་པས་ཀྱང་འཁོར་ལོ་ཀུན་ལ་གོ་ཆ་གཉིས་ཀ་ཡོད་པར་གྲུབ་ཅིང་། དེའི་དོན་ལྷ་ཕོ་ལ་དཔའ་བོའི་གོ་ཆ་དང་། མོ་ལ་དཔའ་མོའི་གོ་ཆ་བྱས་པ་ནི་འཁྱོག་པོའི་བཤད་པ་སྟེ། དེ་ལྟར་ན་འཁོར་ལོ་བར་པ་གསུམ་ལ་བཤད་དུ་རུང་ཡང་། འཁོར་ལོ་གོང་འོག་གཉིས་ལ་བཤད་དུ་མི་རུང་བའི་ཕྱིར་རོ། །ནག་པོ་དཀྱིལ་ཆོག་ལས། དཔའ་བོ་ཀུན་དང་རྣལ་འབྱོར་མར། །གོ་ཆ་གསུམ་གྱིས་བརྒྱན་པ་ཡིན། །ཞེས་པའི་དོན། ལྷ་ཕོ་ལ་དཔའ་བོ་དང་། མོ་ལ་དཔའ་མོ་དང་། གཙོ་བོ་ལ་གོ་ཆ་ཆེན་པོས་བརྒྱན་པས་སྤྱིར་བསྡུས་ནས་དེ་སྐད་གསུངས་ཀྱི་ལྷ་རེ་རེ་ལ་གོ་ཆ་གསུམ་གསུམ་ཡོད་པ་ལ་དགོངས་པ་མ་ཡིན་ནོ། །ཞེས་པ་ཡང་སྔ་མ་དང་མཚུངས་ཏེ། དེ་འདྲ་བའི་བཤད་པ་ནི། དཔའ་བོ་ཀུན་དང་རྣལ་འབྱོར་མར། །གོ་ཆ་གསུམ་གྱིས་བརྒྱན་པ་ཡིན། །ཞེས་པའི་ཡི་གེའི་དོན་ལ་མ་ཞུགས་པའི་ཕྱིར། དེས་ན་ལུང་འདི་གཉིས་ཀྱི་དོན། ལྷ་རེ་རེ་ཡང་གོ་ཆ་གཉིས་གཉིས་ཀྱིས་བརྒྱན་པ་དམིགས་པ་རྒྱ་ཆེ་བས་བསྒོམ་ཚུལ་སྟོན་ཀྱང་། དཔའ་བོ་ལ་ཡབ་ཀྱི་གོ་ཆ་དང་། དཔའ་མོ་ལ་ཡུམ་གྱི་གོ་ཆ་གསུངས་པ་དང་། ཡང་སྐབས་འགའ་ཞིག་ཏུ་གཙོ་བོ་ལ་གསུངས་ནས་འཁོར་ལ་མ་གསུངས་པ་སོགས་ནི་དམིགས་པ་རྒྱ་ཆུང་བས། དངོས་སུ་དེ་ཙམ་བསྒོམས་ནས། གཞན་རྣམས་མོས་པ་བྱེད་པ་ཙམ་གྱི་དབང་དུ་བྱས་པ་ནི་རྒྱུད་གཞུང་རྣམས་ཀྱི་དགོངས་པ་རྗེ་བཙུན་མཆོག་གིས་བཀྲལ་བའི་ལུགས་སོ། །གཉིས་པ་ནི་རྩ་རྒྱུད་ལེའུ་དྲུག་པ་ལས། ཡན་ལག་དྲུག་ནི་ཧེ་རུ་ཀ །དབང་པོ་དྲུག་དང་མཉམ་སྦྱོར་བ། །ཡི་གེ་རེ་རེར་ཡང་དག་གནས། །ཞེས་འབྱུང་བས། ཧ་ཧི་ཧུ་ཧེ་ཧོ་ཧཾ་སྟེ་ཐུང་ངུ་དྲུག་ལ་རྐྱེན་རྩ་རྒྱུད་ཀྱི་ལེའུ་དེ་ཉིད་ལས། ཨོཾ་ན་མཿསྭཱ་ཧཱ་བཽ་ཥ་ཊ། ཧུཾ་ཧཱུྃ་ཕཊ་དང་ཡང་དག་ལྡན། །ཞེས་འབྱུང་བ་ཡན་ལག་ཏུ་སྦྱར་ན། རིམ་པ་བཞིན་དུ་ཨོཾ་ཧ་ལ་སོགས་པར་འགྱུར་བའོ། །ཡང་རྩ་རྒྱུད་ལེའུ་བརྒྱད་པ་ལས། ཡི་གེ་བྃ་དང་ཡོཾ་དང་ནི། །ཡི་གེ་མོཾ་དང་ཧྲཱིཾ་ཉིད་དང་། །ཧཱུྃ་དང་ཕཊ་ཅེས་བཤད་པ་ནི། །རྣལ་འབྱོར་མ་ནི་དྲུག་ཏུ་བཤད། །ཅེས་དང་། ཡང་ལེའུ་དེ་ཉིད་ལས། ཨོཾ་ཧཱྃ་ཧྲིཾ་ཧྲིཾ་ཧཱུྃ་ཕཊ། ཅེས་པ་དྲུག་དང་རིམ་པ་བཞིན་དུ་སྦྱར་ན་ཨོཾ་བཾ་ཞེས་པ་ལ་སོགས་པར་འགྱུར་བའོ། །འདི་དག་ལ་ཇོ་བོ་བྷ་དན་ཏ་ནི་མངོན་བརྗོད་བླ་མའི་ལེའུ་སུམ་ཅུ་རྩ་བདུན་པའི་རྗེས་སུ་འབྲངས་ནས། ཡི་གེ་དེ་རྣམས་ཡོངས་སུ་གྱུར་པ་ལས། ལྷ་ཡབ་ཀྱི་སྐབས་སུ་ཡུམ་དང་གཉིས་སུ་མེད་པར་བཞུགས་པ་དང་། ཡུམ་གྱི་སྐབས་སུ་ཡབ་དང་གཉིས་སུ་མེད་པར་བཞུགས་པར་བཞེད་དོ། །ཕམ་འཐིང་པ་རྗེས་འབྲང་དང་བཅས་པ་ཀུན་སྤྱོད་དང་། ལཱུ་ཧི་པའི་དགོངས་པས་རང་རང་གི་གནས་སུ་ཟླ་བ་ལ་སྔགས་བསམས་ནས་ལྷར་མོས་པ་ཉིད་ཀྱིས་ཆོག་ཅེས་གསུངས་ཏེ། སྔ་མ་ནི་སྤྲོས་པ་ལ་དགའ་བའི་དབང་དུ་བྱས་པ་དང་། ཕྱི་མ་ནི་ཉུང་ངུའི་རྣལ་འབྱོར་ལ་དགའ་བའི་དབང་དུ་བྱས་པ་ཡིན་པས་གཉིས་ཀ་ཡང་རུང་ངོ་། །དམར་གྱིས། མཁའ་འགྲོ་རྒྱ་མཚོ་ལས། གལ་ཏེ་དངོས་གྲུབ་མཆོག་འདོད་ན། །སྔགས་དང་ལྷ་ལ་ཐ་དད་མེད། །ཅེས་གསུངས་པས་ཁོ་བོ་ནི་ཕྱི་མ་འཐད་དོ་སྙམ་དུ་སེམས་སོ་ཞེས་བཤད་དོ། །བཞི་པ་དབང་བསྐུར་ཞིང་རིགས་ཀྱི་བདག་པོས་རྒྱས་གདབ་པ་ནི། སློབ་དཔོན་གྱི་གཞུང་ལས། སྔགས་ཕྲེང་གི་འོག ཇི་ལྟར་བལྟམས་པ་ཙམ་གྱིས་ཀྱང་། །ཞེས་པ་ནས། དབང་བསྐུར་བའི་སྔགས་སོ་ཞེས་པའི་བར་གསུངས་ཏེ། འདི་ལ་བཞི་སྟེ། དབང་ལྷ་སྤྱན་དྲང་བ། མཆོད་ཅིང་གསོལ་བ་གདབ་པ། དབང་བསྐུར་བའི་ཚུལ། རིགས་བདག་གི་རྒྱས་གདབ་པའོ། །དང་པོ་ནི། རྗེ་བཙུན་གྱིས། དེ་ནས་དབང་བསྐུར་བ་བརྗོད་པར་བྱ་སྟེ། གང་གི་ཡེ་ཤེས་ཀྱི་དཀྱིལ་འཁོར་སྤྱན་དྲང་བའི་སྐབས་ཀྱི་ལུས་ཀྱི་ཕྱག་རྒྱ་དང་། སྔགས་དང་། ཏིང་ངེ་འཛིན་གྱིས་དབང་བསྐུར་གྱི་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་མདུན་གྱི་ནམ་མཁར་སྤྱན་དྲངས་ཞེས་གསུངས་པ་ལྟར་བྱའོ། །པྲ་ཛྙཱ་རཀྵི་ཏའི་འགྲེལ་པ་ལས་ནི་ཡེ་ཤེས་ཀྱི་འཁོར་ལོ་དགུག་པ་དང་དུས་མཉམ་པའི་རྡོ་རྗེ་རྣལ་འབྱོར་མ་ཡེ་ཤེས་ཀྱི་བདུད་རྩིས་བཀང་བའི་ཐོད་པ་དང་། ཌཱ་མ་རུ་འཛིན་པ་དབང་ལྷ་ཡིན་པར་བཤད་དོ། །གཉིས་པ་ནི་ཡེ་ཤེས་ཀྱི་འཁོར་ལོའི་སྐབས་ལྟར་ཕྱི་དང་། ཡིད་ཀྱི་མཆོད་པས་མཆོད། དེ་བཞིན་གཤེགས་པ་ཁྱེད་རྣམས་ཀྱིས་བདག་ལ་དབང་བསྐུར་དུ་གསོལ་ཞེས་གསོལ་བ་གདབ་པའོ། །གསུམ་པ་ནི་དེ་བཞིན་གཤེགས་པ་རྣམས་ཀྱི་ཕྱག་ན་ཡེ་ཤེས་ཀྱི་བདུད་རྩིས་གང་བའི་བུམ་པས་སྤྱི་གཙུག་ནས་མར་ལ་དབང་བསྐུར་ཞིང་། ངག་ཏུ། ཇི་ལྟར་བལྟམས་པ་ཙམ་གྱིས་ཀྱང་། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཧཱུྃ་ཞེས་བརྗོད་ཅིང་དབང་བསྐུར་བས་ལུས་ཐམས་ཅད་བྱང་ཆུབ་ཀྱི་སེམས་ཀྱི་ཆུ་རྒྱུན་གྱིས་གང་སྟེ། ལུས་ངག་ཡིད་གསུམ་གྱི་དྲི་མ་སྦྱངས་ཞེས་རྗེ་བཙུན་གསུང་སྟེ། ལུས་ཐམས་ཅད་ནི་སྨིན་མཚམས་ཡན་ཆད་དང་། མགྲིན་པ་ཡན་ཆད་དང་། སྙིང་ག་ཡན་ཆད་དང་། རྐང་མཐིལ་ཡན་ཆད་གང་སྟེ། དེས་བུམ་པ་དང་། གསང་བ་དང་། ཤེས་རབ་ཡེ་ཤེས་དང་། དབང་བཞི་པ་ཐོབ་པ་སྟེ། གྲུབ་ཆེན་མཚོ་སྐྱེས་ཀྱིས་ཀྱཻ་རྡོ་རྗེའི་སྐབས་སུ་ཡང་དེ་ལྟར་གསུངས་ཤིང་། སངས་རྒྱས་ཐོད་པའི་ལེའུ་གསུམ་པ་ལས། བརྩེ་དང་ལྡན་པའི་གྲགས་ཆེན་མོ། །འཁོར་བའི་འདམ་དུ་བྱིང་བ་བདག །དབང་བསྐུར་བ་ཡིས་བདག་བསྒྲལ་ཕྱིར། །རྡོ་རྗེ་རྣལ་འབྱོར་མས་ཁྲུས་ཤིག །དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །དཔེར་ན་པི་ཝཾ་སྦྱོར་ཀུན་ཚོགས། །རྒྱུད་དང་བྲལ་ན་བརྡུང་མི་རུང་། །དེ་བཞིན་དབང་དང་བྲལ་ན་ནི། །སྔགས་དང་བསམ་གཏན་འགྲུབ་མི་འགྱུར། །རྨོངས་པ་གང་ཞིག་དབང་མེད་པར། །བདག་ནི་དབང་བསྐུར་ཞེས་སྨྲ་བ། །ཇི་སྲིད་སངས་རྒྱས་བཞུགས་ཀྱི་བར། །སློབ་མར་བཅས་ཏེ་དམྱལ་བར་འགྲོ། །དེ་ལྟར་ཤེས་བྱ་རྣལ་འབྱོར་མ། །སླར་ཡང་བདག་ལ་དབང་བསྐུར་ཅིག །ཅེས་གསོལ་བ་གདབ་པ་འདི་སྒྲུབ་ཐབས་ཀྱི་དབང་ལྷ་སྤྱན་དྲངས་པ་ལ་གསོལ་བ་གདབ་པའི་སྐབས་སུ་གསུངས་ཤིང་། ཚིགས་བཅད་གཉིས་པས་གསང་དབང་དང་། གསུམ་པས་ཤེས་རབ་ཡེ་ཤེས་དང་། བཞི་པས་དབང་བཞི་པ་བསྟན་པར་དཀའ་འགྲེལ་ཡེ་ཤེས་ལྡན་ལས་བཤད་པས། སྐབས་འདིར་དབང་བཞི་ཐོབ་དགོས་པ། བླ་མེད་ཀུན་གྱི་དགོངས་པར་སྣང་བའི་ཕྱིར་རོ། །དེས་དྲི་མ་གང་དག་པ་ནི། ལུས་དང་། ངག་དང་། ཡིད་དང་། དེ་གསུམ་ཆར་གྱི་དྲི་མ་དག་པའོ། །དབང་བསྐུར་བ་དེ་དག་གི་དུས་སུ། དཀྱིལ་འཁོར་གྱི་འཁོར་ལོ་དེ་དག་གི་ཐུགས་ཀ་ནས་སྒོ་མཚམས་མ་བརྒྱད་དཔག་ཏུ་མེད་པ་སྤྲོས་ཏེ། དེས་བདག་གི་དཀྱིལ་འཁོར་མཆོད་པ་དང་། བཀྲ་ཤིས་ཀྱི་གླུ་དང་། བགེགས་བསྐྲད་པས་ནམ་མཁའི་ཁམས་ཐམས་ཅད་གང་བར་བསམ་པར་བྱའོ་ཞེས་གསུངས་སོ། །བཞི་པ་ནི་རྗེ་བཙུན་གྱིས་ཆུ་ལྷག་མ་ཡར་ལུད་པ་ལས། རིགས་ཀྱི་བདག་པོས་དབུར་བརྒྱན་པར་བསམས་ཏེ། དེ་ཡང་བདེ་བ་ཆེན་པོའི་འཁོར་ལོ་ལྷ་ལྔ་དང་། སྒོ་མཚམས་མ་བརྒྱད་དེ་བཅུ་གསུམ་ལ་ནི། བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ཉིད་ཀྱིས་དབུ་བརྒྱན་པ་ཡིན་ལ། ཐུགས་ཀྱི་འཁོར་ལོ་རྣམས་ལ་ནི་མི་བསྐྱོད་པ། གསུང་གི་འཁོར་ལོ་རྣམས་ལ་ནི་འོད་དཔག་ཏུ་མེད་པ། སྐུའི་འཁོར་ལོ་རྣམས་ལ་ནི་རྣམ་པར་སྣང་མཛད་ཀྱིས་དབུ་བརྒྱན་པར་བྱའོ་ཞེས་གསུངས་ལ། འགྲེལ་པར་ནི་ཆུའི་ལྷག་མ་ལས་སྐྱེས་པའི་དེ་བཞིན་གཤེགས་པ་རྣམས་སྤྱི་བོར་བལྟས་ཏེ། ཨོཾ་སརྦ་ཏ་ཐཱ་ག་ཏ་ཞེས་བྱ་བ་ལ་སོགས་པའི་སྔགས་བརྗོད་པར་བྱའོ། །དེ་ལ་བཅོམ་ལྡན་འདས་ལ་ནི་མི་བསྐྱོད་པའོ། །ཡུམ་ལ་ནི་རྣམ་པར་སྣང་མཛད་ཀྱིས་སོ། །མཁའ་འགྲོ་མ་ལ་སོགས་པ་ལ་རིན་ཆེན་འབྱུང་ལྡན་ནོ། །ཐུགས་དང་། གསུང་དང་། སྐུའི་འཁོར་ལོར་སོན་པ་རྣམས་ལ་མི་བསྐྱོད་པ་དང་། འོད་དཔག་མེད་དང་། རྣམ་པར་སྣང་མཛད་དོ། །དམ་ཚིག་གི་འཁོར་ལོར་སོན་པ་རྣམས་ལ་ནི་དོན་ཡོད་གྲུབ་པས་སོ་ཞེས་གསུངས་པས་འདི་ཡང་འགལ་བ་མེད་ལ། དྲིལ་བུ་པའི་སྒྲུབ་ཐབས་སུ་རྗེ་བཙུན་གྱིས་ཀྱང་འདི་བཞིན་མཛད་དོ། །རིགས་ཀྱི་བདག་པོས་རྒྱས་གདབ་པའི་རྗེས་ལ། དབང་བསྐུར་གྱི་ལྷ་དེ་དག་གཤེགས་སུ་གསོལ་བའམ། མི་དམིགས་པར་བྱ་བའམ། བདག་གི་ལུས་ལ་བསྡུ་བ་སྟེ་རང་གི་བློ་ལ་གང་བདེ་བ་ཡིན་ནོ་ཞེས་རྗེ་བཙུན་གསུང་ངོ་། །བདག་ཉིད་སངས་རྒྱས་སུ་བསྐྱེད་པ་བསྟན་ཟིན་ཏོ། །གཉིས་པ་དེ་ལ་མཆོད་པ་ནི་སློབ་དཔོན་གྱི་གཞུང་ལས། ཨོཾ་ཤྲཱི་བཛྲ་ཧེ་ཧེ་ཞེས་པ་ནས། དེ་དག་ནི་མཆོད་པའི་སྔགས་སོ་ཞེས་པའི་བར་ཡབ་ཀྱི་སྙིང་པོ་དང་ཉེ་སྙིང་གཉིས། ཡུམ་གྱི་སྙིང་པོ་དང་ཉེ་སྙིང་གཉིས། དཔའ་བོ་ཉི་ཤུ་རྩ་བཞི་དང་། དཔའ་མོ་ཉི་ཤུ་བཞིའི་སྔགས། སྒོ་མཚམས་མ་བརྒྱད་ཀྱི་སྔགས། སྙིང་པོའི་རྣལ་འབྱོར་མ་བཞིའི་སྔགས། ཡབ་ཀྱི་རྐང་པ་བརྒྱད་པ་ཙམ་ཞིག་གསུངས་ལ། འགྲེལ་པར་དེ་ནས་མཆོད་པ་སྔོན་དུ་འགྲོ་བས་རོ་མ་ཞེས་བྱ་བའི་ལྷ་མོས་ཉེ་བར་བཏབ་པའི་བདུད་རྩི་མྱངས་ཏེ། སྙིང་པོ་ནས་བཟུང་ནས་རྐང་པ་བརྒྱད་པའི་མཐར་ཐུག་པའི་སྔགས་ཀྱིས་བསྟོད་པར་བྱའོ་ཞེས་སྔགས་འདི་དག་གིས་བསྟོད་པར་བྱས་ནས། དེའི་སྔོན་དུ་ཕྱི་མཆོད་ནང་མཆོད་གཉིས་ཏེ། གསུམ་ཙམ་ཞིག་བཞེད་དོ། །རྗེ་བཙུན་གྱིས་བདག་གི་མངོན་པར་རྟོགས་པ་ནར་མའི་སྐབས་སུ། གསང་སྔགས་ཀྱི་མཆོད་པ་དང་། ཕྱིའི་མཆོད་པ་དང་། བདུད་རྩིའི་མཆོད་པ་དང་། མཉེས་པའི་མཆོད་པ་དང་། ཡིད་ལས་བྱུང་བའི་མཆོད་པ་དང་། བསྟོད་པའི་མཆོད་པ་སྟེ་དྲུག་པོ་འབའ་ཞིག་བྱེད་པ་ཡིན་ལ། ཚེས་བཅུའི་མཆོད་པ་ལ་སོགས་པའི་དུས་སུ་ནི་ཕྱི་མཆོད་ཀྱི་རྗེས་སུ་རིག་མ་བཅུ་དྲུག་དང་། རིན་ཆེན་སྣ་བདུན་དང་། འདོད་ཡོན་ལྔའི་མཆོད་པ་སྟེ་གསུམ་བསྣན་པས་དགུའི་མཆོད་པ་བྱེད་པ་ཡིན་ནོ་ཞེས་གསུངས། དམར་གྱིས་གསང་སྔགས་ཀྱི་མཆོད་པ་མི་བྱེད་པར། ཕྱི་དང་ནང་དང་མཉེས་མཆོད། ཡིད་ལས་བྱུང་བའི་མཆོད་པ་དང་། དེ་ཁོ་ན་ཉིད་དང་། བསྟོད་པའི་མཆོད་པ་སྟེ་དྲུག་མཛད་དོ། །དེ་ལ་སྔགས་ཀྱི་མཆོད་པ་ནི། རྩ་སྔགས་གཉིས་སུ་མེད་པ་དང་། སྙིང་པོ་གཉིས་སུ་མེད་པ་དང་། ཉེ་སྙིང་གཉིས་སུ་མེད་པས་གཙོ་བོ་ཡབ་ཡུམ་གསལ་གདབ་པའི་ཚུལ་གྱིས་མཆོད། ཞལ་བཞི་པའི་སྔགས་དང་སྙིང་པོའི་རྣལ་འབྱོར་མ་བཞི་གཉིས་སུ་མེད་པ་དང་། འཁོར་ལོ་གསུམ་ཡབ་ཡུམ་རྣམས་ཀྱི་སྔགས་གཉིས་སུ་མེད་པ་དང་། རྐང་པ་བརྒྱད་པ་དང་སྒོ་མཚམས་མ་བརྒྱད་གཉིས་སུ་མེད་པས་ལྷ་ཐམས་ཅད་གསལ་གདབ་པའི་ཚུལ་གྱིས་མཆོད་པར་བྱ་བ་ནི་སྔགས་ཀྱི་མཆོད་པའོ་ཞེས་རྗེ་བཙུན་གསུངས་སོ། །སྔགས་མཆོད་ཀྱི་དམིགས་པ་དེ་ལྟར་ཡིན་པ་ལ་ཁ་ཅིག སྔགས་མཆོད་ཀྱི་ཚེ་རང་གི་སྙིང་ག་ནས་མཆོད་ཡོན་ལ་སོགས་པའི་མཆོད་རྫས་དུ་མ་སྤྲོས་ཏེ། དཀྱིལ་འཁོར་གྱི་མཐའ་བསྐོར་ནས་རང་ལ་མཆོད་པར་བསམ་ཞེས་པ་ནི་སྔགས་མཆོད་དང་ཕྱི་མཆོད་ཀྱི་དམིགས་པའི་ཁྱད་པར་མ་ཕྱེད་པའོ། །དེ་ལ་བུ་སྟོན་གྱིས། དེ་ཉིད་བཅུ་བཞིའི་སྔགས་རྣམས་ཀུན་གྱིས་མཆོད་པའོ། །ཞེས་པ་ལ་བརྟེན་ནས་ལྷ་ཐམས་ཅད་གསལ་འདེབས་པའི་ཚུལ་གྱིས་སྔགས་ཚང་བར་བཟླས་པ་སྔགས་ཀྱི་མཆོད་པ་ཞེས་ལག་ལེན་ལ་མཛད་དེ། བྱས་ཀྱང་འགལ་བ་མེད་དོ། །སྒྲུབ་ཐབས་ཀྱི་གཞུང་གང་ནས་ཀྱང་མ་བཤད་པས་མ་བྱས་ཀྱང་སྐྱོན་མེད་དོ་ཞེས་གསུངས་པ་ནི། སྒྲུབ་ཐབས་ཀྱི་རྒྱལ་པོ་གཞུང་འདིའི་རྩ་བར། སྔགས་རྣམས་རྫོགས་པའི་མཐར་དེ་དག་ནི་སྔགས་ཀྱི་མཆོད་པའོ་ཞེས་པ་འདི་ཉིད་ཀྱིས་ཆོག་ཅིང་། རང་ཉིད་ཀྱང་སྒྲུབ་ཐབས་རྣལ་འབྱོར་བཞི་ལྡན་དུ་དེ་ལ་བརྟེན་ནས་སྔགས་མཆོད་དངོས་སུ་མཛད་པ་ལ་ཡང་སྔར་གྱི་དཔྱད་པ་དེ་དག་མཚུངས་སོ། །གཉིས་པ་ཕྱིའི་མཆོད་པ་ནི་དངོས་སུ་བཤམས་ན་ལེགས། མ་བཤམས་ཀྱང་ཡིད་ཀྱིས་སྤྲུལ་པ་ལ་ཡང་ཕྱི་མཆོད་དུ་མིང་འདོགས་ཏེ། མདུན་དུ་བཤམས་པའམ་ཡིད་ཀྱིས་བསམ་པ་དེ་ཞལ་བཞི་པའི་སྔགས་ཀྱིས་བསང་། སྭ་བྷཱ་ཝའི་སྔགས་ཀྱིས་སྟོང་པར་བསྒོམ། ཨ་བདུན་ལས་ཐོད་པའི་སྣོད་བདུན། དེའི་ནང་དུ་ཧཱུྃ་ལས་མཆོད་ཡོན་ལ་སོགས་པ་དྭངས་ཤིང་ཐོགས་པ་མེད་པའི་ཡེ་ཤེས་ཀྱི་བདུད་རྩིའི་རང་བཞིན་གྱིས་གང་བར་བསམ། བཛྲ་ཨརྒྷཾ་ཞེས་བྱ་བ་ལ་སོགས་པ་རང་རང་གི་སྔགས་ཀྱིས་བྱིན་གྱིས་བརླབས་ལ། འབུལ་བའི་ཚུལ་ནི་ཚོགས་ཞིང་གི་སྐབས་དང་འདྲ་ཞིང་། ཁྱད་པར་སྐབས་འདིར་གྷཎྜེ་ར་ཎིའི་སྐབས་སུ་རྡོ་རྗེ་དྲིལ་བུ་གསིལ་བ་ཡང་རྗེ་བཙུན་གསུང་ངོ་། །གསུམ་པ་ནང་བདུད་རྩིའི་མཆོད་པ་ནི། བདུད་རྩི་དངོས་སུ་འབྱོར་རམ་བསམས་ཀྱང་རུང་སྟེ། འོག་ནས་འབྱུང་བའི་གཏོར་མ་བཞིན་བྱིན་གྱིས་བརླབས་ལ་ལག་པ་གཡོན་པའི་མཐེ་བོང་དང་སྲིན་ལག་གིས་འཐོར་ནས། དང་པོར་བདག་གི་རྩ་བའི་བླ་མ་གང་ཡིན་པའི་མཚན་བརྗོད་པ་སྔོན་དུ་འགྲོ་བས་ཨོཾ་ཨཱཿཧཱུྃ་ཞེས་བརྗོད་ཅིང་མཆོད། དེ་ནས་བླ་མ་བརྒྱུད་པ་རྣམས་ཀྱི་མཚན་བརྗོད་པ་སྔོན་དུ་འགྲོ་བས་མཆོད་དེ། ཧེ་རུ་ཀ་དཔལ་དཀྱིལ་འཁོར་དང་། །གསང་བའི་བདག་པོ་རྡོ་རྗེ་འཆང་། །དཔལ་ལྡན་སློབ་དཔོན་ས་ར་ཧ། །ཀླུ་སྒྲུབ་རི་ཁྲོད་མགོན་པོ་དང་། །ལཱུ་ཧི་པ་དང་དྷ་རི་ཀ །རྡོ་རྗེ་དྲིལ་བུ་རུས་སྦལ་ཞབས། །འབར་འཛིན་སྤྱོད་འཆང་གུ་ཧྱེ་པ། །བར་མ་རྣམ་རྒྱལ་ཏཻ་ལོ་པ། །ནཱ་རོ་པ་དང་ཕམ་འཐིང་པ། །བློ་གྲོས་གྲགས་པ་རྗེ་བཙུན་མཆོད། །ཨོཾ་ཨཱཿཧཱུྃ་ཞེས་བརྗོད་ཅིང་མཆོད། བསོད་ནམས་རྩེ་མོ་གྲགས་པའི་མཚན། །ས་སྐྱ་པཎ་ཆེན་འཕགས་པའི་ཞབས། །དཀོན་མཆོག་དཔལ་དང་བསོད་ནམས་དཔལ། །བློ་གྲོས་བརྟན་པ་དཔལ་ལྡན་པ། །ཡེ་ཤེས་རྒྱལ་མཚན་ཀུན་དགའི་མཚན། །དཀོན་མཆོག་རྒྱལ་མཚན་བླ་མ་མཆོད། །ཨོཾ་ཨཱཿཧཱུྃ་ཞེས་བརྗོད། ལཱུ་ཧི་པ་ཉིད་ལ་ནི། ལཱུ་ཧི་པ་དང་དྷ་རི་ཀ །ཞེས་པའི་རྗེས་སུ། ཨན་དྷར་པ་དང་ཏཻ་ལོ་པ། །ཞེས་པ་སྒྲེལ་བས་ཆོག་གོ །དེ་ནས་ཡང་དཀྱིལ་འཁོར་རྣམས་ལ་སྔགས་མཆོད་ཀྱི་སྔགས་དང་མཐུན་པར་མཆོད་པར་བྱ་ཞིང་། ཡི་གེ་གསུམ་བརྗོད་པས་ཆོས་སྐྱོང་སྲུང་མ་རྣམས་ལའང་མཆོད་དོ། །དེ་དག་གི་དུས་སུ་མདུན་དུ་བསྐྱེད་པ་དེ་ལས་ཐོད་པ་བདུད་རྩིས་བཀང་བ་དུ་མ་ཆད་ཅིང་གཙོ་བོ་ནས་བཟུང་ནས། ལྷ་ཐམས་ཅད་དང་དུར་ཁྲོད་ཆེན་པོ་རྣམས་ལ་ཕྱག་གཡོན་པར་ཐོད་པ་བདུད་རྩིས་བཀང་བ་རེ་ཕུལ་བར་བསམ། ཐོད་པ་བཞི་པོ་དེ་བྱང་ཤར་གྱི་གཤིན་རྗེ་འཇོམས་མའི་ཕྱག་དུ་ཕུལ་བར་བསམ། གཏོར་མ་དང་བདུད་རྩི་གཉིས་ཀ་བྱང་ཤར་གྱི་དུར་ཁྲོད་དུ་བསྐྱེད་པར་བྱ་བ་ནི་མན་ངག་གོ །བཞི་པ་མཉེས་པའི་མཆོད་པ་ནི། དེ་ནས་བདག་གི་ལྕེ་ལ་བདུད་རྩི་མྱངས་བར་བྱས་པས་ཕྱི་ནང་གི་ལྷ་ཐམས་ཅད་དགྱེས་པར་གྱུར་ནས་ཨོཾ་ཧྲཱིཿཧ་ཧ་ཧཱུྃ་ཧཱུྃ་ཕཊ་ཅེས་ལྷ་ཐམས་ཅད་ཀྱི་ཞལ་ནས་གསུངས་པར་བསམས་ལ། བདག་གིས་ཀྱང་བརྗོད་ཅིང་ལག་པ་གཉིས་སྙིང་ཁར་རྣམ་ལྔ་འདོད་པའི་བསྐོར་བ་བྱ་སྟེ། མཐར་འཁྱུད་པའི་སྟངས་ཀ་བྱས་ལ་བདེ་བ་ཆེན་པོས་མཉེས་པའི་མཆོད་པ་བྱའོ། །ལྔ་པ་ཡིད་ལས་བྱུང་བའི་མཆོད་པ་ནི་ཚོགས་ཞིང་གི་སྐབས་སུ་བཤད་པ་ལྟར་རོ། །དྲུག་པ་བསྟོད་པའི་མཆོད་པ་ནི་པྲ་ཛྙཱ་རཀྵི་ཏས། གཞུང་ནས་འབྱུང་བའི་སྔགས་ཐམས་ཅད་བསྟོད་པའི་མཆོད་པར་བཞེད་ཀྱང་། རྗེ་བཙུན་གྱིས་བདེ་ཆེན་གྱི་ལྷ་མོ་བཞིའི་སྔགས་ཡན་ཆད་ལ་མན་ངག་གིས་འཁྲུགས་སྡེབས་པ་དང་སྤེལ་ཚུལ་སྦྱར་ནས་སྔགས་ཀྱི་མཆོད་པ་དང་། རྐང་པ་བརྒྱད་པས་བསྟོད་པའི་མཆོད་པ་བསྟན་པར་བཞེད་པས། དེ་ལྟར་ན་རྡོ་རྗེ་དྲིལ་བུ་གསིལ་ཞིང་། ཡབ་ཡུམ་གྱི་རྐང་པ་བརྒྱད་པ་གཉིས་ཀྱིས་བསྟོད་དོ། །སྤྲོས་པ་ལ་དགའ་ན། རྒྱལ་བ་སྤྲུལ་པ་དུས་མཐའི་མེ་ལྟར་རབ་ཏུ་འཇིགས་མཛད་ཅིང་། །ཞེས་སོགས་དང་། ཆོས་དབྱིངས་རྣམ་དག་དབྱིངས་ལས་མ་གཡོས་ཤིང་། །ཞེས་སོགས་ཀྱིས་བསྟོད་པར་རྗེ་བཙུན་དང་བུ་སྟོན་གསུང་ངོ་། །དེ་ལྟར་བདག་ཉིད་སངས་རྒྱས་སུ་བསྐྱེད་པ་ལ་མཆོད་ནས་བཟླས་པ་བྱ། དེའི་རྗེས་ལ་ཐུན་གོང་མ་གསུམ་ལ་ནི་རྡོ་རྗེ་སེམས་དཔའ་བསྡུ་བའི་ཚུལ་གྱིས་རྫོགས་པའི་རིམ་པ་བསྒོམ་པ་དང་། དེ་ལས་ལྷའི་སྐུར་ལངས་ནས་དག་པ་རྗེས་སུ་དྲན་པར་བྱ་སྟེ། དེ་དག་ནི་མཉམ་པར་བཞག་པའི་རྣལ་འབྱོར་ཞེས་བྱ་བ་ཡིན་ནོ། །དེ་ནས་སྤྱོད་ལམ་གྱི་རྣལ་འབྱོར་དང་། ཁ་ཟས་ཀྱི་རྣལ་འབྱོར་གཉིས་འབྲེལ་ཞིང་འབྱུང་བ་ཡིན་ལ། བླ་མ་ཁ་ཅིག་ནི་དག་པ་རྗེས་སུ་དྲན་པ་སྤྱོད་ལམ་གྱི་ཁོངས་སུ་འདུའོ་ཞེས་གསུང་ངོ་། །སྲོད་ཀྱི་ཐུན་ལ་ནི་ལཱུ་ཧི་པའི་གཞུང་ཇི་ལྟ་བ་བཞིན་དུ་བཟླས་པའི་རྗེས་ལ་གཏོར་མ་བཏང་ལ། དེ་ནས་དག་པ་རྗེས་སུ་དྲན་པར་བྱ་སྟེ། དེ་ནས་སྐབས་ཁ་ཅིག་ཏུ་འབྲེལ་པར་བྱུང་ན། སྤྱོད་ལམ་དང་ཁ་ཟས་ཀྱི་རྣལ་འབྱོར་བྱས་ལ་རྡོ་རྗེ་སེམས་དཔའ་བསྡུ་བའི་རྫོགས་པའི་རིམ་པ་བསྒོམ་པའི་ཚུལ་གྱིས་ཉལ་བའི་རྣལ་འབྱོར་བྱ་སྟེ། གཉིད་ལོག་པར་བྱའོ། །ནངས་པར་ལྡང་བའི་རྣལ་འབྱོར་བྱ་སྟེ་ལངས་ལ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །ཐུན་བཞི་ཀ་ལ་གཏོར་མ་གཏོང་བར་འདོད་ན། ཟླས་པའི་རྗེས་ལ་རྫོགས་པའི་རིམ་པ་བསྒོམས་ལ། དེ་ལས་ལངས་ཏེ་གཏོར་མ་བཏང་ནས་དག་པ་རྗེས་སུ་དྲན་པ་དང་། སྤྱོད་ལམ་དང་ཁ་ཟས་ཀྱི་རྣལ་འབྱོར་ལ་འཇུག་པ་ཡིན་ཏེ། དེ་ལྟར་ན་ནི་དག་པ་རྗེས་སུ་དྲན་པ་སྤྱོད་ལམ་གྱི་ཁོངས་སུ་མཛེས་སོ། །ཡང་ལུགས་གཞན་སྲོད་ཐུན་གྱི་སྐབས་སུ་བཟླས་པའི་རྗེས་ལ་གཏོར་མ་བཏང་ནས་རྫོགས་པའི་རིམ་པའི་ངང་ལ་ཉལ་ཏེ། ནངས་པར་ལྡང་བའི་རྣལ་འབྱོར་གྱི་རྗེས་ལ་དག་པ་རྗེས་སུ་དྲན་པ་བྱས་ནས་དེའི་རྗེས་ལ་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྒྲུབ་པར་བྱའོ་ཞེས་ཀྱང་གསུང་ངོ་། །རྒྱས་པ་ལ་དགའ་བས་ཇི་སྙེད་ཡོད་པའི་ཆོས་ཐམས་ཅད་ཇི་ལྟ་བ་བཞིན་དུ་བསྒོམ་པའི་མངོན་པར་རྟོགས་པ་བསྟན་ཟིན་ཏོ། །གཉིས་པ་འབྲིང་ལ་དགའ་བས་ཅི་ལྟ་བ་བཞིན་དུ་བསྒོམ་པ་ནི་ཉལ་བའི་རྣལ་འབྱོར་དང་། ལྡང་བའི་རྣལ་འབྱོར་དང་། དེ་དང་འབྲེལ་པ་དགའ་བ་གསུམ་ནི་རྒྱས་པའི་སྐབས་དང་འདྲའོ། །བསམ་གཏན་གྱི་གྲོགས་སུ་འགྲོ་ན་ཁྲུས་བྱས། སྟན་བདེ་བ་ལ་བསྡད་ནས་མངོན་པར་རྟོགས་པ་བསྒོམ་པ་ནི། བདག་གིས་སྟན་བདེ་བ་འདི་ལ་བསྡད་ལ་སེམས་ཅན་ཐམས་ཅད་ཀྱི་དོན་དུ་རྣམ་པ་ཐམས་ཅད་མཁྱེན་པའི་སངས་རྒྱས་བདེ་མཆོག་འཁོར་ལོའི་གོ་འཕང་ཐོབ་པར་བྱའོ་སྙམ་པའི་བྱང་ཆུབ་ཀྱི་སེམས་བསྒོམ་པ་ནི་ཚད་མེད་པ་བཞིའི་དོད་ཡིན་ནོ། །དེ་ནས་བདག་བླ་མ་དམ་པའི་དཀྱིལ་འཁོར་དུ་བཙུད་ཚུན་ཆད་བདག་གི་ལུས་ནི་རྟེན་གཞལ་ཡས་ཁང་པ་ཡིན་ལ། དེ་ལ་བརྟེན་པ་ལྷ་བཅུ་བདུན་དང་དྲུག་ཅུ་རྩ་གཉིས་ཀྱི་དཀྱིལ་འཁོར་ནི་ངོ་བོ་ཉིད་ཀྱིས་གནས་པ་ཡིན་སྙམ་པ་ནི་ཕུང་པོ་ཁམས་དང་སྐྱེ་མཆེད་གཞི་སྦྱང་བསྒྱུར་གྱི་དོད་ཡིན་ནོ། །དེ་ནས་བླ་མའི་ཆགས་ལྷྭམ་གཉིས་སྤྱི་བོར་བསྒོམས་ལ། འདི་ཉིད་ན་སངས་རྒྱས་དང་ཆོས་དང་དགེ་འདུན་ཐམས་ཅད་ཀྱི་ངོ་བོ་ཡིན་བདག་གི་རྒྱུད་ལ་ཡོན་ཏན་རིན་པོ་ཆེ་བསྐྱེད་པར་བྱེད་པའང་འདི་ཡིན་སྙམ་དུ་བསམས་ལ། གུས་འདུད་དྲག་པོ་བྱས་ལ་སྤྱི་བོ་ནས་མར་བསྟིམས་ཏེ་ཚོགས་གསག་བཅུ་གསུམ་གྱི་དོད་ཡིན་ནོ། །དེ་ནས་ལས་དང་པོ་པ་ལ་བར་ཆད་འབྱུང་བར་འདྲ་བས་ན་སྲུང་བའི་འཁོར་ལོ་རྒྱས་པ་བཞིན་བསྒོམས་ཏེ་ཡེ་ཤེས་ཀྱི་ཚོགས་མི་དགོས་པར་སྲུང་འཁོར་གྱི་དབུས་སུ་སྒྲ་ཚུལ་གྱི་རྐྱེན་གྱིས་ལུས་དཀྱིལ་གྱི་ཐོག་མར་རྟེན་དང་། དེ་ནས་ཕྱིའི་ཧེ་རུ་ཀ་དང་། དེ་ནས་སྙིང་གའི་ཧེ་རུ་ཀ་ནས་བཟུང་སྟེ། བརྟེན་པ་ལྷ་ཐམས་ཅད་གསལ་གདབ། སྔགས་ཀྱིས་བྱིན་གྱིས་བརླབ་པ་ནི་འདྲ། དེ་ནས་སྐབས་འདིར་ལྷ་ལ་ཞེན་པ་སྐྱེ་བ་དང་། ལམ་ལ་སོམ་ཉི་ཟ་ན་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་སྔར་རྒྱས་པའི་སྐབས་སུ་བསྟན་པ་ལྟར་བྱ། ལྷ་ལ་ཞེན་པ་དང་། ལམ་ལ་སོམ་ཉི་མེད་ན་མ་བྱས་ཀྱང་བཏུབ་ཞེས་ཀྱང་གསུང་ངོ་། །དེ་ནས་ཡན་ལག་ལྷག་མ་གསུམ་དང་། མཆོད་པ་དྲུག་ནི་རྒྱས་པའི་གནས་སྐབས་སུ་བསྟན་པ་ལྟར་སྟེ། འབྲིང་ལ་དགའ་བས་ཅི་ལྟ་བ་བཞིན་དུ་བསྒོམ་པ་ཞེས་བྱ་བའི་མངོན་པར་རྟོགས་པ་བསྟན་ཟིན་ཏོ། །གསུམ་པ་བསྡུས་པ་ལ་དགའ་བས། ལུས་ལ་ཇི་ལྟར་གྲུབ་པ་ཙམ་ཞིག་བསྒོམ་པ་ནི་ཉལ་བ་དང་། ལྡང་བ་དང་། ཁྲུས་ཀྱི་རྣལ་འབྱོར་ནི་གོང་དུ་བསྟན་པ་ཉིད་དང་འདྲ་ལ། དེ་ནས་སྟན་བདེ་བ་ལ་བསྡད་ནས་བདག་གིས་སེམས་ཅན་ཐམས་ཅད་ཀྱི་དོན་དུ་བཅོམ་ལྡན་འདས་འཁོར་ལོ་བདེ་མཆོག་གི་གོ་འཕང་ཐོབ་པར་བྱའོ་ཞེས་བྱང་ཆུབ་ཀྱི་སེམས་ཡུན་རིང་དུ་བསྒོམ། བླ་མའི་ཆགས་ལྷྭམ་གཉིས་སྤྱི་བོར་བསྒོམས་ལ། མོས་གུས་དྲག་པོ་བྱས་ལ་བསྟིམ། སྤྱི་གཙུག་གི་ཧཾ་དང་། ལྟེ་བའི་ཨཾ་གཉིས་སྒྲ་ཚུལ་གྱིས་རང་གི་སྙིང་གར་འདྲེས་པར་གྱུར་པའི་རྟེན་འབྲེལ་གྱིས་རྟེན་དང་བརྟེན་པར་བཅས་པའི་དཀྱིལ་འཁོར་ལུས་ཀྱི་དཀྱིལ་འཁོར་འབྲིང་གི་རྣལ་འབྱོར་བཞིན་གསལ་བཏབ་ལ་སྔགས་ཀྱིས་བྱིན་གྱིས་བརླབ་པ་དང་བརྟན་པར་བྱ་བ་སྔར་དང་འདྲ། ལྷ་ལ་ཞེན་པ་སྐྱེ་བ་དང་། ལམ་ལ་སོམ་ཉི་ཟ་ན་བྱང་ཆུབ་ཀྱི་ཕྱོགས་ཀྱི་དག་པ་དྲན་པར་བྱ་བ་སྐབས་འདིར་བྱ། མི་སྐྱེ་ན་མི་དགོས། འདི་རང་བྱུང་གི་དཀྱིལ་འཁོར་ཡིན་པའི་ཕྱིར་ཡེ་ཤེས་པ་གཞུག་པ་དང་། གོ་ཆ་བཅིང་བ་དང་དབང་བསྐུར་བ་ནི་མི་དགོས། མཆོད་པ་ལ་སོགས་པ་མན་ཆད་ཀྱི་ཆོ་ག་རྣམས་འདྲ་བ་ཉིད་ཡིན་ཏེ། གོང་དུ་བསྟན་པ་བཞིན་འདིར་ཡང་ཉམས་སུ་བླང་བར་བྱའོ། །བསྡུས་པ་ལ་དགའ་བས་ཇི་ལྟར་གྲུབ་པ་ཙམ་ཞིག་བསྒོམ་པ་ཞེས་བྱ་བའང་བསྟན་ཟིན་ཏོ། །གཉིས་པ་བཟླས་པའི་རྣལ་འབྱོར་ལ་བདུན་ཏེ། གང་དུ་བཟླས་པའི་གནས་སྐབས་གང་བཟླ་བའི་སྔགས་ཀྱི་དབྱེ་བ། བཟླས་པའི་དུས་ཀྱི་དམིགས་པ། ཇི་ཙམ་བཟླས་པའི་གྲངས། གང་ལ་བརྟེན་པའི་ཡུལ་ཕྲེང་བ། ཇི་ལྟར་བཟླས་པའི་མན་ངག དེ་ལྟར་བཟླས་པའི་དགོས་པའོ། །དང་པོ་ནི་མངོན་པར་རྟོགས་པ་རྒྱས་འབྲིང་བསྡུས་པ་གསུམ་པོ་གང་བསྒོམས་ཀྱང་ཚེས་བཅུའི་མཆོད་པ་ལ་སོགས་པའི་དུས་སུ་ནི་མཆོད་པའི་རྗེས་ལ་གཏོར་མ་འབྱུང་ལ་མངོན་པར་རྟོགས་པ་ནར་མའི་སྐབས་སུ་མཆོད་པའི་རྗེས་ལ་བཟླས་པ་འབྱུང་སྟེ། རྩ་རྒྱུད་ལེའུ་སོ་ལྔ་པ་ལས། མཆོད་པ་གཉིས་མེད་སྦྱོར་བ་བདག །གང་དག་རབ་སྒྲུབ་བྱེད་པའི་སྔགས། །ལས་ནི་སོ་སོར་སྦྱར་བར་བྱ། །ཞེས་གསུངས་པས་སོ། །གཉིས་པ་ལ་གསུམ་སྟེ། བསྙེན་པའི་སྔགས། སྒྲུབ་པའི་སྔགས། ལས་སྦྱོར་གྱི་སྔགས་སོ། །དང་པོ་ནི། རྩ་རྒྱུད་ལེའུ་བརྒྱད་པ་ལས། ས་སྟེང་ན་ནི་རིན་ཆེན་བཞི། །ཕྲེང་བའི་སྔགས་ནི་དམ་པ་ཡིན། །ཞེས་པ་ཡབ་ཡུམ་གྱི་རྩ་སྔགས་གཉིས་གཉིས་སུ་མེད་པ་དང་། སྙིང་པོ་གཉིས་གཉིས་སུ་མེད་པ་དང་། ཉེ་སྙིང་གཉིས་གཉིས་སུ་མེད་པ་དང་། གོ་ཆ་གཉིས་གཉིས་སུ་མེད་པ་སྟེ། དེ་རྣམས་གང་བཟླས་ཀྱང་ཆོག་གོ་ཞེས་གསུངས། དེ་ལ་རྩ་སྔགས་སམ་ཕྲེང་སྔགས་ཞེས་པ་ནི་རྐང་པ་བརྒྱད་པའི་རྐང་པ་དང་པོའི་འགོར་ནི་ཨོཾ་ནི་ངེས་པར་དགོས་ལ། དེ་ཉིད་ཀྱི་གཤམ་གྱི་ཧུཾ་ཧཱུྃ་ཕཊ་དང་། རྐང་པ་ལྷག་མ་རྣམས་ཀྱི་ཨོཾ་དང་ཧུཾ་ཧཱུྃ་ཕཊ་མེད་པར་བྱ་སྟེ། དེའི་རྗེས་ལ་འཁོར་ལོ་གསུམ་གྱི་དཔའ་བོའི་སྔགས་ཀ་ར་ཀ་ར་ལ་སོགས་པ་སྦྲེལ་ནས་མཐར་ཧུཾ་ཧཱུྃ་ཕཊ་བཏགས་པ་ནི་ཡབ་ཀྱི་རྩ་བའི་སྔགས་སོ། །ཡུམ་གྱི་རྩ་སྔགས་ཀྱང་ཧེ་རུ་ཀ་མངོན་འབྱུང་དང་ཕག་མོ་མངོན་འབྱུང་གཉིས་ལས་འབྱུང་སྟེ། སློབ་དཔོན་གྱི་གཞུང་འདིར་ནི་མ་བཤད་དོ། །གཉིས་པ་སྒྲུབ་པའི་སྔགས་ནི་རྒྱུད་ནས་བཤད་པའི་ལས་ཚོགས་སྒྲུབ་པའི་དུས་སུ་མདུན་དུ་རྡུལ་ཚོན་ནམ། མེ་ཏོག་ཚོམ་བུ་ལ་སོགས་པའི་དཀྱིལ་འཁོར་ལ་བརྟེན་ནས། དཀྱིལ་འཁོར་གྱི་ལྷ་གྲངས་དང་མཐུན་པའི་རང་རང་གི་སྔགས་ཟློས་ཤིང་། རྫས་ལ་མཚན་མ་མ་མཐོང་གི་བར་དུ་བསྒྲུབ་པའོ། །གསུམ་པ་ལས་སྦྱོར་གྱི་སྔགས་ནི་ལས་བཞིའི་བྱེ་བྲག་གིས། སྔགས་ཀྱི་ཁ་དོག་དང་། དམིགས་པ་དང་། སྤེལ་ཚིག་རྣམས་བཞི་བཞིར་འགྱུར་ཏེ། ཞི་བའི་ལས་བསྒྲུབ་ན་མཉེས་མཆོད་ཀྱི་དུས་ཀྱི་བྱང་སེམས་ནོར་བུའི་རྩེ་མོ་ན་ཡོད་པ་དེ་ཁ་དོག་དཀར་པོར་དྲངས་ལ་སྙིང་གར་ཉི་མའི་སྟེང་དུ་ཧཱུྃ་ཁ་དོག་དཀར་པོ་འོད་ཁ་དོག་དཀར་པོ་འཕྲོ་བ། འོད་ཀྱི་སྒོ་ནས་འཁོར་ལོ་ལྔའི་ལྷ་དཀར་པོ་འཕྲོས་ནས་རང་གཞན་གྱི་ནད་དང་གདོན་ལ་སོགས་པ་ཞི་བར་བསམ་ཞིང་། མཐའ་རྟེན་ལ་ཤཱནྟིཾ་ཀུ་རུ་སྭཱ་ཧཱ་ཞེས་པ་བཏགས་ལ་བཟླ། དེ་བཞིན་དུ་གཞན་གསུམ་གྱི་དམིགས་པ་ནི་སྔགས་ཀྱི་འོད་ལས་འཁོར་ལོ་ལྔའི་ལྷ་ཚོགས་རྒྱས་པ་ལ་སེར་པོ། དབང་ལ་དམར་པོ། དྲག་པོ་ལ་ནག་པོ་འཕྲོས་ནས། རང་རང་གི་ལས་རང་གཞན་གྱི་ལུས་དང་། ལོངས་སྤྱོད་ལ་སོགས་པ་རྒྱས་པ་དང་། ཆེ་གེ་བཏགས་ལ་ཆགས་ཤིང་འདུན་པ་དང་འགའ་ཞིག་བདག་གི་མདུན་དུ་འོངས་པ་དང་། ལུས་སེམས་རེངས་པ་དང་། ལུས་སེམས་ཕྲལ་པ་ལ་སོགས་པ་གང་འདོད་པ་བྱས་པར་བསམ་ཞིང་། སྔགས་ཀྱི་མཐའ་རྟེན་རྒྱས་པ་ལ་པུཥྚིཾ་ཀུ་རུ་སྭཱ་ཧཱ། དབང་ལ་ཝཱ་ཤཾ་ཀུ་རུ་སྭཱ་ཧཱ། དགུག་པ་ལ་ཨཱ་ཀརྵ་ཡ་ཧྲི་ཛ་ཞེས་པ་དང་། རྨོངས་པ་ལ་མོ་ཧ་དང་། མནན་པ་ལ་ཛམྦྷ་ཡ་དང་། གསད་པ་ལ་མཱ་ར་ཡ་ཕཊ་ཅེས་བཏགས་ལ་བཟླའོ། །གསུམ་པ་ནི་རྗེ་བཙུན་ཆེན་པོས། གསང་སྔགས་གང་བཟླ་བ་ཡབ་ཀྱི་ཐུགས་ཀའི་ཧཱུྃ་ལས་བྱུང་ནས། ཡབ་ཀྱི་ཞལ་ནས་འཐོན་ཏེ་ཡུམ་གྱི་ཞལ་དུ་ཞུགས། ཡུམ་གྱི་སྐུའི་དབྱིབས་བརྒྱུད། ཡུམ་གྱི་པདྨ་ནས་ཡབ་ཀྱི་གསང་བའི་རྡོ་རྗེའི་བུ་གར་ཞུགས། སྐུའི་དབྱིབས་བརྒྱུད་དེ། ཐུགས་ཀའི་ཧཱུྃ་ལ་ཐིམ་པའི་ཚུལ་གྱིས་ཏེ། དེའང་ཞི་བ་ལ་ཁ་དོག་དཀར་པོ་སྔགས་གཅིག་གི་རྟིང་ལ་གཅིག་འབྲེང་བ་མདའི་ཤུགས་ཀྱིས་རབ་ཏུ་འགྲོ་བ་ཞེས་པ་དང་། རྒྱས་པ་ལ་ཁ་དོག་སེར་པོ་གསང་སྔགས་རྣམས་བུངས་བསྐྱེད་ནས་སྒྲོའི་ཆུན་པོ་ལྟ་བུའི་ཚུལ་གྱིས་འགྲོ་བ་ཞེས་བྱ་བ་དང་། དབང་ལ་ནི་ཁ་དོག་དམར་པོ་སྔགས་གཅིག་གི་མཇུག་མ་ལ་གཅིག་གི་མགོ་འཁྱུད་ནས་འགྲོ་བ་སྟེ་ལྕགས་སྒྲོག་ལྟ་བུ་ཞེས་བྱ་བ་དང་། དྲག་པོ་ལ་ནི་ཁ་དོག་ནག་པོ་ཡབ་ཡུམ་གྱི་སྔགས་སྒྲིལ་བ་སྲད་བུ་ལྟ་བུ་ཞེས་བྱ་བའི་ཚུལ་གྱིས་བཟླ་སྟེ། དེའང་མཆོག་བསྒྲུབ་པ་ལ་ནི་རིན་ཆེན་བཞི་ཞེས་བྱ་བ་རྩ་སྔགས་གཉིས་དང་། སྙིང་པོ་གཉིས་དང་། ཉེ་སྙིང་གཉིས་དང་། གོ་ཆ་གཉིས་ཏེ། བཞི་པོ་དེ་གང་མོས་པ་གཉིས་སུ་མེད་པར་བཟླ་བ་ཡིན་ལ། འཁོར་ལོ་རྣམས་ཀྱི་སྔགས་ནི་ཐུན་མཇུག་ལ་ཅི་རིགས་པར་བཟླ་བ་ཡིན་ནོ་ཞེས་གསུངས་སོ། །བཞི་པ་ནི་བརྟག་གཉིས་ལས། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གསུངས་ཤིང་། དེ་ཉིད་དུས་བཞིའི་བྱེ་བྲག་གིས་བཞིར་འགྱུར་བ་སྟེ། སྡོམ་འབྱུང་ལེའུ་བཅུ་གཅིག་པ་ལས། རྫོགས་ལྡན་དུས་སུ་གཅིག་བཟླས་ཏེ། །གསུམ་ལྡན་དུས་སུ་ཉིས་འགྱུར་བཟླ། །གཉིས་ལྡན་དུས་སུ་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླ། །ཞེས་སོ། །དབང་བསྐུར་གྱི་དུས་ཀྱི་བསྙེན་པའི་སྔགས་དང་། གྲངས་ནི་ནག་པོ་སྤྱོད་པ་བས། དཔའ་བོའི་སྙིང་པོའི་གསང་སྔགས་ནི། །ཁྲི་ཕྲག་གསུམ་དུ་བཟླས་བརྗོད་བྱ། །དཔའ་བོ་རྣལ་འབྱོར་མ་འཁོར་ལོའི། །ཁྲི་ཕྲག་གཉིས་ནི་བསྙེན་པར་བྱ། །ཀ་ཁྭའི་གདོང་སོགས་བརྒྱད་པོ་དང་། །སྙིང་པོའི་རྣལ་འབྱོར་མ་བཞི་ནི། །སྟོང་ཕྲག་ལྔ་དང་ལྔ་བརྒྱ་ནི། །སྔོན་དུ་བསྙེན་པས་འགྲུབ་པར་འགྱུར། །ཞེས་གསུངས་སོ། །ལྔ་པ་ནི་ལས་བཞིའི་ཕྲེང་བ་རྒྱས་པར་སྡོམ་འབྱུང་དུ་ཤེས་པར་བྱས་ལ། ཁྱད་པར་དུ་བདེ་མཆོག་གི་སྐབས་འདིར། མིའི་རུས་པའི་ཕྲེང་བ་བསྔགས་ཏེ་མངོན་བརྗོད་ལེའུ་ལྔ་པ་ལས། དུང་ཆེན་ཕྲེང་བ་བླངས་ནས་ནི། །སྡོམ་པ་མཆོག་གིས་བཟླས་པ་བྱ། །ཞེས་སོ། །དྲུག་པ་ལ་ལྔ་སྟེ། འགྲོ་བ་དག་པ་དང་། རྡོ་རྗེའི་བཟླས་པ་དང་། འགོག་པའི་བཟླས་པ་དང་། ཁྲོ་བོའི་བཟླས་པ་དང་། མདོ་ལིའི་བཟླས་པའོ། །དང་པོ་ནི་ཐུགས་ཀའི་ཧཱུྃ་གི་འོད་ཟེར་གྱིས་ས་གསུམ་གྱི་འགྲོ་བ་ལྷར་བྱས་ནས་འོད་སླར་ཧཱུྃ་ལ་བསྡུ་བའོ། །གཉིས་པ་ནི་ཧཱུྃ་ལས་སྔགས་ཕྲེང་རྩོལ་བའི་རླུང་ཧཱུྃ་དང་འགྲོགས་ཏེ། སྣ་གཡས་ནས་འཐོན་ནས། འགྲོ་བ་ལྷར་བྱས་པའི་སྣ་གཡོན་ནས་སྲོག་གིས་རླུང་ཨོཾ་དང་འགྲོགས་ཏེ་ཐུགས་ཀར་སླེབ་པ་ནི་གནས་པ། དེ་མ་ཐག་ཏུ་དེ་དག་གི་སྣ་གཡས་ནས་རྩོལ་བའི་རླུང་ཧཱུྃ་དང་ལྷན་ཅིག་ཏུ་འཐོན། སླར་བདག་གི་སྲོག་གི་རླུང་ཨོཾ་དང་འགྲོགས་ནས་ཐུགས་ཀའི་ཧཱུྃ་ལ་ཐིམ་སྟེ་གནས་པ་ནི་ཨཱཿའོ། །དེ་སྐད་དུ་མངོན་བརྗོད་ལེའུ་བཅུ་གསུམ་པ་ལས། སྲོག་དང་རྩོལ་བ་ལེགས་བསྡམས་ནས། །ཨོཾ་ཨཱཿཧཱུྃ་གསུམ་བརྗོད་བྱ་ཞིང་། །ས་གསུམ་རྒྱུ་དང་མི་རྒྱུ་བ། །སྐུ་གསུང་ཐུགས་ལ་གནས་པར་བྱ། །ཞེས་སོ། །གསུམ་པ་ནི། རྣམ་རྟོག་བཀག་ལ་ཡིད་ཀྱིས་བཟླས་པ་བྱ་སྟེ། མངོན་བརྗོད་ལེའུ་སོ་གསུམ་པ་ལས། འགོག་པ་ཁྲོ་བོ་རྣམ་པར་བསྒོམ། །ཞེས་སོ། །བཞི་པ་ནི་སྣོད་མ་ཡིན་པའི་སྐྱེ་བོ་མེད་པའི་ས་དང་། བྱིང་བ་གསེང་བ་དང་། གདོན་གྱི་བར་གཅོད་བཟློག་པའི་ཕྱིར། ལེའུ་དེ་ཉིད་ལས། ཡེ་ཤེས་ཁྲོ་བོ་ལྷན་ཅིག་ཏུ། །སྤྲིན་གྱི་འབྲུག་སྒྲ་ལྟ་བུར་བཟླ། །ཞེས་སོ། །ལྔ་པ་ནི་ཡབ་ཀྱི་ཞལ་ནས་སྔགས་ཕྲེང་འཐོན་ནས་ཡུམ་གྱི་ཞལ་དུ་ཞུགས་ཏེ། སྐུའི་དབྱིབས་བརྒྱུད་པར་བསམ་ཞིང་བཟླས་ཏེ། དེ་སྐད་དུ་མངོན་བརྗོད་ལེའུ་ཉེར་བཞི་པ་ལས། གཉིས་མེད་འཁྱུད་པའི་སྦྱོར་བ་ཡིས། །གསང་སྔགས་བཟླས་ན་དངོས་གྲུབ་འགྱུར། །ཞེས་སོ། །དེ་ལྟར་ན་གང་གིས་སྔགས་གང་ཟློས་ཀྱང་སྣོད་མ་ཡིན་པའི་སྐྱེ་བོ་ཡོད་སར་ཤིབ་བུར་བཟླས་ཏེ། གལ་ཏེ་ཐོས་པར་གྱུར་ན་རྩ་རྒྱུད་ལེའུ་སོ་བརྒྱད་པ་ལས། སྔགས་རྣམས་བག་མེད་པས་འདོན་ན། །དེ་ལ་ང་ནི་མི་བལྟ་སྟེ། །མཁའ་འགྲོ་སྟོང་ཕྲག་དུ་མ་ཡིས། །ངན་པའི་བདག་ཉིད་ཅན་དེ་ཟ། །ཞེས་སོ། །བདུན་པ་ནི་མངོན་བརྗོད་སོ་གཉིས་པ་ལས། སྔགས་པས་འདི་དག་བཟླས་ན་ནི། །མཁའ་འགྲོ་མ་ཡི་དྲྭ་བ་ཡི། །སྡོམ་པའི་དངོས་གྲུབ་ཐོབ་པ་སྟེ། །ཟླ་བ་དྲུག་གིས་དེ་དབང་འགྱུར། །ཞེས་སོ། །དེ་དག་གིས་ནི་མཉམ་པར་བཞག་པའི་རྣལ་འབྱོར་བསྐྱེད་པའི་རིམ་པ་བསྟན་ཟིན་ནས། གཉིས་པ་རྫོགས་པའི་རིམ་པ་ནི། ཉིན་མོའི་ཐུན་གསུམ་གྱི་སྐབས་སུ་བར་འདིར་རྫོགས་པའི་རིམ་པ་བསྒོམ་པར་བྱ་བ་ཡིན་ལ། གཞུང་ལས་ནི་འོག་ཏུ་འབྱུང་སྟེ། ཨཱ་ལི་ཀཱ་ལི་མདུན་བསམས་ནས། །ཞེས་པ་ནས། དེ་ལས་གཟུངས་ནི་འཐོབ་པར་འགྱུར། །ཞེས་པའི་བར་རོ། །འདི་ཉིད་ཀུན་སྤྱོད་ལེའུ་བཅུ་གཉིས་པ་ལས། ཨཱ་ལི་ཀཱ་ལི་མདུན་བསམས་ཏེ། །རྣལ་འབྱོར་ཆེན་པོ་རྣམ་གནས་ལ། །ཟླ་བའི་དཀྱིལ་འཁོར་ལེགས་རྫོགས་པ། །ལྟེ་བའི་རྩ་བ་ལ་གནས་བསྒོམ། །དེ་ཡི་དབུས་གནས་བསམ་པ་ནི། །དམ་པའི་གནས་མཆོག་ཡི་གེ་སྟེ། །སྐུ་གསུང་ཐུགས་ཀྱི་རྡོ་རྗེ་ཅན། །ལྷ་ཡི་སྐུ་ནི་བསྒོམ་པར་བྱ། །དེ་ནི་གཟུགས་ལས་འདས་པ་སྟེ། །དངོས་པོ་མེད་པའི་སེམས་ཉིད་ཡིན། །བསམ་མི་ཁྱབ་པ་ཉིད་བསམ་སྟེ། །བསམ་དེའང་མཚན་མར་བརྟག་མི་བྱ། །ཡང་ན་བདག་ཉིད་སེམས་བསམ་པ། །དེ་ལས་གཟུངས་ནི་ཐོབ་པར་འགྱུར། །ཞེས་གསུངས་ཏེ། །འདི་དག་གི་དོན་རྗེ་བཙུན་གྱིས། འདི་ལ་དོན་གསུམ་སྟེ། རྡོ་རྗེ་སེམས་དཔའ་བསྡུ་བ་དང་། ཡི་གེ་བསྡུ་བ་དང་། ཐིག་ལེ་བསྡུ་བའོ། །དང་པོ་ནི་རྩ་བའི་དཔེ་ལྔ་དང་། ཡན་ལག་གི་དཔེ་དུ་མས་མཚོན་པ་སྟེ། དེའང་བསྐྱེད་པའི་རིམ་པའི་ཐུན་གྱི་མཇུག་ཏུ། བཅོམ་ལྡན་འདས་ཀྱི་ལྟེ་བར་པདྨ་འདབ་མ་བརྒྱད་པ་ལ་ལྟེ་བར་ཟླ་བས་བརྒྱན་པར་བསྒོམ། དེར་ཧཱུྃ་ལས་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དཀར་པོ་རྡོ་རྗེ་དྲིལ་བུ་འཛིན་པ། ཡུམ་རྡོ་རྗེ་སྙེམས་མ་གྲི་གུག་དང་ཐོད་པ་འཛིན་པས་ཡབ་ལ་འཁྱུད་པའི་ཚུལ་དུ་བཞུགས་པ། གཉིས་ཀའང་རུས་པའི་རྒྱན་ཆ་ལྔ་ཡིས་བརྒྱན་པའི་ཐུགས་ཀར་ཟླ་བའི་སྟེང་དུ་ཡི་གེ་ཧཱུྃ་བསྒོམ། ཧཱུྃ་དེ་ལས་འོད་ཟེར་འཕྲོས་པས་རྡོ་རྗེ་སེམས་དཔའ་ཡབ་ཡུམ་དང་། ཕྱིའི་ཧེ་རུ་ཀ་ཡབ་ཡུམ་ནས་འཁོར་ལོ་ནང་མ་ནས་ཕར་རིམ་གྱིས་རིམ་གྱིས་ཇེ་གསལ་ཇེ་གསལ་ཁམས་གསུམ་སྣོད་བཅུད་ཐམས་ཅད་གསལ་བར་བྱས་ལ། དེའི་སྟོབས་ཀྱིས་ཐམས་ཅད་ཕྲིག་ཕྲིག་གཡོ་བར་བསམ་སྟེ། དེ་ནི་རྡོ་ཁབ་ལེན་གྱིས་ལྕགས་གཡོ་བ་ཞེས་བྱ་བའི་དཔེ་དང་པོ་ཡིན་ནོ། །དེ་ནས་ཁམས་གསུམ་སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ། དེ་བཞིན་དུ་སྲུང་བའི་འཁོར་ལོ་དུར་ཁྲོད་བརྒྱད་ལ། དུར་ཁྲོད་བརྒྱད་གཞལ་ཡས་ཁང་ལ། གཞལ་ཡས་ཁང་དམ་ཚིག་གི་འཁོར་ལོ་ལ། དེ་སྐུའི་འཁོར་ལོ་ལ། དེ་གསུང་གི་འཁོར་ལོ་ལ། དེ་ཐུགས་ཀྱི་འཁོར་ལོ་ལ། དེ་སྙིང་པོའི་རྣལ་འབྱོར་མ་བཞི་ལ། དེ་བཅོམ་ལྡན་འདས་ཀྱི་ཞལ་བཞི་ལ་བསྡུ་སྟེ་དཔེ་གཉིས་པ་ལྕི་བས་དངུལ་ཆུ་སྡུད་པ་ཞེས་བྱ་བ་ཡིན་ནོ། །འབྲིང་བསྡུས་གཉིས་ལ་ཕྱིའི་དཀྱིལ་འཁོར་མེད་པས་ཁམས་གསུམ་ལུས་ལ་བསྡུ་བ་ཉིད་དཔེ་གཉིས་པ་ཡིན་ནོ། །དེ་ནས་བཅོམ་ལྡན་འདས་ཞལ་བཞི་ཕྱག་བཅུ་གཉིས་པ་ནི་ཞལ་གཅིག་ཕྱག་གཉིས་པར་བསྡུ་སྟེ། དཔེ་གསུམ་པ་རུས་སྦལ་ཡན་ལག་འཁུམས་པ་ཞེས་བྱ་བ་ཡིན་ནོ། །དེ་ནས་བདག་ཕྱིའི་ཧེ་རུ་ཀ་ཡུམ་ཡབ་ལ་བསྡུ། ཡབ་ལྟེ་བའི་རྡོ་རྗེ་སེམས་དཔའ་ཡབ་ཡུམ་ལ་བསྡུ། རྡོ་རྗེ་སྙེམས་མའང་ཡབ་ལ། ཡབ་ཧཱུྃ་ལ། ཧཱུྃ་གི་གདན་ཟླ་བ་ལ། དེ་ཞབས་ཀྱུ་ལ། ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་བོ་ཟླ་ཚེས་ལ། ཟླ་ཚེས་ཐིག་ལེ་ལ་བསྡུ་སྟེ། དེ་ནི་དཔེ་བཞི་པ་སྐར་མདའ་གཅིག་ལ་གཅིག་ཐིམ་པ་ཞེས་བྱ་བ་ཡིན་ནོ། །དེ་ནས་ཐིག་ལེ་དེའང་ཇེ་ཕྲ་ཇེ་ཕྲ་མི་དམིགས་པ་བསམ་གྱིས་མི་ཁྱབ་པའི་ངང་ལ་གཞག་པར་བྱ་སྟེ། དེ་ནི་རྩ་བའི་དཔེ་ལྔ་པ་ལན་ཚཱ་ཆུ་ལ་ཐིམ་པ་ཞེས་བྱ་བ་ཡིན་ནོ། །དེ་ནས་ཡན་ལག་གི་དཔེ་ནི་ངོ་བོ་ཉིད་ཀྱི་སྟེང་དུ་དབབ་སྟེ་གོང་གི་སྤྲོས་པ་རྣམས་ནི་ཆ་ལུགས་སམ། འོད་ཟེར་རམ། མཚོ་དང་རླབས་ཞེས་བྱ་བ་ཡིན་ལ། བསམ་གྱིས་མི་ཁྱབ་པའི་ངོ་བོ་འདི་ནི་གར་མཁན་དངོས་སམ། ཉི་མའམ་རྒྱ་མཚོ་ཉིད་དང་འདྲ་བ་ཡིན་པས་ན། གར་མཁན་དང་། ཆ་ལུགས་དང་། ཉི་མ་དང་། འོད་ཟེར་དང་། མཚོ་དང་། རླབས་དང་། ངོ་བོ་ཉིད་ཀྱི་སྟེང་དུ་ནི་ཆུ་ལ་ཆུ་བཞག་པའམ། མར་ལ་མར་བཞག་པ་སྟེ་ཡན་ལག་གི་དཔེ་ལྔས་མཚོན་པ་ཡིན་ནོ། །དེའི་ངང་ལ་བློ་ཇི་ཙམ་གནས་པ་ཅིག་བཞག་ལ། ལྡང་བར་འདོད་ན་གོང་དུ་བསྟན་པའི་ལྡང་བའི་རྣལ་འབྱོར་བྱིན་རླབས་གསུམ་དང་ལྡན་པའི་ཧེ་རུ་ཀར་ལངས་ཏེ། ཐུན་བཞི་ཀ་ལ་གཏོར་མ་ཡོད་ན་སྐབས་འདིར་བཏང་སྟེ་དག་པ་རྗེས་སུ་དྲན་པ་བྱ། གཏོར་མ་མེད་ན་ལངས་པའི་རྗེས་ཁོ་ན་ལ་དག་པ་རྗེས་དྲན་བྱ་བ་ཡིན་ནོ། །རྡོ་རྗེ་སེམས་དཔའ་བསྡུ་བ་ཞེས་བྱ་བའི་རིམ་པ་འདི་ནི་བསྐྱེད་པའི་རིམ་པའི་རྗེས་ལ་ཅིས་ཀྱང་བསྒོམ་པ་ཡིན་ནོ། །རྡོ་རྗེ་སེམས་དཔའ་བསྡུ་བའོ། །ཡི་གེ་བསྡུ་བ་དང་ཐིག་ལེ་བསྡུ་བ་འདི་གཉིས་ནི་བསྐྱེད་རིམ་གྱི་རྗེས་ལ་ཅིས་ཀྱང་འབྱུང་བའི་རྫོགས་རིམ་ནི་མ་ཡིན་ཏེ། རྣལ་འབྱོར་པ་བསྐྱེད་རིམ་ལ་བརྟན་པའམ། ཡང་ན་ལས་དང་པོ་པ་ཉིད་ནས་ཀྱང་རུང་སྟེ། རླུང་དང་། སེམས་ཀྱི་དམིགས་པ་ལ་བརྟེན་ནས་ཏིང་ངེ་འཛིན་གྱི་ཡེ་ཤེས་མྱུར་དུ་ཚོལ་བར་འདོད་པའི་རྟེན་འབྲེལ་ཡིན་པས་བསྐྱེད་པའི་རིམ་པ་རྒྱས་པར་བསྒོམས་པའི་རྗེས་སམ། འདི་ཉིད་གཙོ་བོར་བྱེད་པའི་དུས་སུ་སྐད་ཅིག་གིས་ཧེ་རུ་ཀ་ཡབ་ཡུམ་དུ་དྲན་པར་བྱས་པའི་ལྟེ་བར་པདྨ་འདབ་མ་བཞི་པའི་ཤར་དུ་ས་རླུང་གི་རང་བཞིན་ལ་སེར་པོ། གཡོན་དུ་ཆུ་རླུང་གི་རང་བཞིན་ཝ་དཀར་པོ། རྒྱབ་ཏུ་མེ་རླུང་གི་རང་བཞིན་ར་དམར་པོ། གཡས་སུ་རླུང་གི་རླུང་གི་རང་བཞིན་ཡ་ལྗང་གུ། དབུས་སུ་ནམ་མཁའི་རླུང་གི་རང་བཞིན་ཐིག་ལེ་ཁ་དོག་སྔོན་པོ་གཅིག་བསམས་ལ། རིམ་གྱིས་བློ་སྦྱང་བའི་ཕྱིར་དབུགས་ཕྱིར་རྒྱུ་བའི་དུས་སུ་མདུན་གྱི་ལ་སེར་པོ་ལས་འོད་ཟེར་ཁ་དོག་སེར་པོ་སྦོམ་ཕྲ་སྐུད་པ་འབྲིང་པོ་ཙམ་ལངས་ཏེ་གྱེན་དུ་ཕྱུང་ནས། སྣ་སྒོ་གཡོན་པ་ནས་བྱུང་སྟེ། མདུན་དུ་སོར་བཅུ་དྲུག་ཙམ་གྱི་ཚད་དུ་བྱུང་བར་བསམ། རླུང་ནང་དུ་འཇུག་པ་དང་བསྟུན་ལ་འོད་ཟེར་དེ་ནང་དུ་ལྡོག་སྟེ། ལ་སེར་པོ་དེ་ལ་བསྟིམས་ལ་ཡིད་ཀྱིས་ལ་སེར་པོ་དེ་ལ་བལྟ་ཞིང་རླུང་ཁ་སྦྱར་གྱི་དམིགས་པ་བྱའོ། །དེས་དུ་བ་ལྟ་བུའི་རྟགས་མཐོང་བ་དེའི་ཚེ་ས་རླུང་དབང་དུ་གྱུར་པའི་རྟགས་ཡིན་པས་ལ་སེར་པོ་དེ་གཡོན་གྱི་ཝ་དཀར་པོ་ལ་བསྟིམ། ཝ་དཀར་པོ་ལས་འོད་ཟེར་དཀར་པོ་སྣ་བུག་གཡོན་པ་ནས་འབྱུང་བ་དང་། འཇུག་པ་དང་རླུང་གི་རྣལ་འབྱོར་དང་བཅས་པ་སྔ་མ་བཞིན་བསྒོམས་པས་སྨིག་རྒྱུ་ལྟ་བུ་མཐོང་བ་དེའི་ཚེ་ཆུ་རླུང་དབང་དུ་འདུས་པས་ཝ་དཀར་པོ་དེ་རྒྱབ་ཀྱི་ར་དམར་པོ་ལ་བསྟིམ། ར་དམར་པོ་ལས་འོད་ཟེར་དམར་པོ་སྣ་གཡོན་ནས་འབྱུང་བ་དང་འཇུག་པ་དང་རླུང་གི་རྣལ་འབྱོར་སྔ་མ་བཞིན་དུ་བསྒོམས་པས། སྲིན་བུ་མེ་ཁྱེར་ལྟ་བུའི་རྟགས་མཐོང་བ་དེའི་ཚེ་མེ་རླུང་དབང་དུ་འདུས་པ་ཡིན་པས་ར་དམར་པོ་དེ་གཡས་ཀྱི་ཡ་ལྗང་གུ་ལ་བསྟིམས་ལ་གཞག ཡ་དེ་ལས་འོད་ཟེར་ལྗང་གུ་སྣ་གཡོན་ནས་འབྱུང་བ་དང་། འཇུག་པ་དང་། རླུང་གི་རྣལ་འབྱོར་སྔ་མ་བཞིན་དུ་བསྒོམས་པས་མར་མེ་འབར་བ་ལྟ་བུའི་རྟགས་མཐོང་བ་དེའི་ཚེ་རླུང་གི་རླུང་དབང་དུ་འདུས་པའི་རྟགས་ཡིན་པས་ཡི་གེ་ཡ་ལྗང་གུ་དེ་དབུས་ཀྱི་ཐིག་ལེ་སྔོན་པོ་ལ་བསྟིམས་ལ་གཞག དེ་ནས་ཐིག་ལེ་སྔོན་པོ་ལས་འོད་ཟེར་འབྱུང་འཇུག་མེད་པར་ཐིག་ལེ་ལ་ཡིད་ཀྱིས་བལྟ་ཞིང་རླུང་ཁ་སྦྱར་གྱི་རྣལ་འབྱོར་བསྒོམས་པས། ནམ་མཁའ་སྤྲིན་མེད་ལྟ་བུ་མཐོང་བ་དེའི་ཚེ་ནམ་མཁའི་རླུང་དབང་དུ་འདུས་པ་ཡིན་པས་འདིའི་མཇུག་ཏུ་མཐོང་བའི་ལམ་གྱི་ཡེ་ཤེས་སྐྱེ་ཞེས་གསུང་ངོ་། །ཡི་གེ་བསྡུ་བའོ། །ཐིག་ལེ་བསྡུ་བ་ནི་ཡི་གེ་རྣམས་ཀྱི་ཤུལ་དུ་ཐིག་ལེར་བསྒོམ་པ་སྟེ། ཤར་དུ་ཐིག་ལེ་སེར་པོ། གཡོན་དུ་དཀར་པོ། རྒྱབ་ཏུ་དམར་པོ། གཡས་སུ་ལྗང་གུ་རྣམས་བསྒོམས་ལ། འོད་ཟེར་གྱི་སྐུད་པའི་འབྱུང་འཇུག་དང་རླུང་དང་རླུང་གི་རྣལ་འབྱོར་ལ་སོགས་པ་སྔ་མའི་ཚུལ་དུ་བསྒོམས་པས་མཐར་ཕྱིན་པའི་ཚད་སྔ་མ་བཞིན་དུ་འབྱུང་བར་འགྱུར་རོ། །དེས་ན་འདི་གཉིས་ཀྱང་རྣལ་འབྱོར་པ་རང་གི་བློ་ལ་གང་བདེ་བ་བསྒོམ་པ་ཡིན་ལ། གཅིག་གི་རྗེས་ལ་གཅིག་བསྒོམ་པ་ནི་མ་ཡིན་ནོ། །རྫོགས་པའི་རིམ་པ་བསྟན་ཟིན་ཏེ་རིམ་པ་གཉིས་ཀྱི་སྔོན་པར་རྟོགས་པ་གཙོ་བོ་རྣམས་བསྟན་ཟིན་ཏོ་ཞེས་གསུངས་སོ། །གཉིས་པ་དག་པ་རྗེས་སུ་དྲན་པ་ནི། སློབ་དཔོན་གྱི་གཞུང་ལས། སོ་དང་སེན་མོ་དག་ལ་ནི་ཁཎྜ་ཀ་པཱ་ལིའོ་ཞེས་པ་ནས། དཔའ་བོ་སེང་གེ་བཞིན་དུ་སྤྱོད། །ཅེས་པའི་བར་གསུངས་ཏེ། འདིའང་ཀུན་སྤྱོད་ཀྱི་ལེའུ་བཅོ་ལྔ་པ་ལས། རྩ་བའི་སྔགས་ཀྱི་དཔའ་བོ་གང་། །ཚངས་པའི་སྐུད་པ་ལ་སོགས་བརྟག །ལྷ་ཡི་སྙིང་པོའི་གསང་སྔགས་ཀྱི། །བརྒྱ་ཕྱེད་ཕྲེང་བས་བརྒྱན་པ་ཡིན། །དཔའ་བོའི་གོ་ཆ་དྲུག་གི་ནི། །རྒྱ་འདིས་ལུས་ནི་མཛེས་པ་ཡིན། །རྡོ་རྗེ་ཕག་མོ་སོགས་སྔགས་གང་། །མགུལ་ཆུས་རྐེ་ལ་མཛེས་པ་ཡིན། །སངས་རྒྱས་ཀུན་གྱི་མཁའ་འགྲོ་མ། །པགས་པའི་གོས་ནི་འཛིན་པའི་མཆོག །ཁ་ཊྭཱཾ་ག་ནི་ལྷ་ཡི་སྐུ། །ཤེས་རབ་ཌཱ་མ་རུ་རུ་བརྟག །ཐོད་པའི་དུམ་བུ་ལ་སོགས་ཀུན། །ལུས་ཀྱི་ཁམས་ལ་རྣམ་པར་བརྟག །ཡི་གེ་བདུན་ནི་གསང་སྔགས་ཀྱི། །རྣ་ཆས་སྙན་ནི་མཛེས་པ་ཡིན། །རྣལ་འབྱོར་མ་དྲུག་གསང་སྔགས་གང་། །སྐེ་རགས་བྱས་པ་བརྒྱན་པ་ཡིན། །འཁོར་ལོ་ཀུན་གྱི་རྣལ་འབྱོར་མའི། །སྔགས་ནི་ལག་པའི་ཐོད་པ་ཡིན། །རྣམ་པར་སྣང་མཛད་ཡུམ་སྔགས་གང་། །ཐོད་པ་མགོ་བོ་བརྒྱན་པ་ཡིན། །དེ་ལྟར་བདག་ཉིད་རྣམ་གནས་ནས། །ཚམ་རྔམ་སྔགས་ཀྱིས་ལེགས་པར་བསྲུང་། །རྟག་ཏུ་ཚངས་པར་སྤྱོད་འགྱུར་བ། །རྐང་པ་བརྒྱད་པའི་སྔགས་ཀྱིས་མཆོད། །ཉིན་མོ་བཅོམ་ལྡན་དཔའ་བོ་སྟེ། །མཚན་མོ་བཅོམ་ལྡན་མ་བརྟག་བྱ། །མི་བྱ་ཅི་ཡང་ཡོད་མིན་ཏེ། །རྟག་ཏུ་མི་བསམ་ཡོད་མ་ཡིན། །མི་བཟའ་ཅི་ཡང་ཡོད་མིན་ལ། །དགེ་དང་མི་དགེ་མི་སྨྲ་མེད། །བདག་ཉིད་ཇི་བཞིན་འགྲོ་ཇི་བཞིན། །བདག་ཅི་འདྲ་བ་གཞན་དེ་བཞིན། །དེ་ལྟར་རྣམ་བསམ་རྣལ་འབྱོར་བདག །འཇིགས་པ་ཐམས་ཅད་ཡོངས་སྤངས་ཏེ། །དཔའ་བོ་སེང་གེ་བཞིན་དུ་སྤྱོད། །བསམ་པ་ཐམས་ཅད་རྫོགས་བྱེད་ཡིན། །ཞེས་པས་བསྟན་ཏེ། འདི་དག་གི་དོན་རྗེ་བཙུན་གྱིས། དེ་ཡང་གཏོར་མའི་རྗེས་ལ་འབྱུང་ན་ནི་རྗེས་སྤྱོད་ཀྱི་རྣལ་འབྱོར་དུ་ཡང་འགྲོ་ལ། རིམ་པ་གཉིས་ཁོ་ནའི་རྗེས་ལ་འབྱུང་ན་ནི་སྟན་གཅིག་གི་སྟེང་དུ་བརྗོད་པ་ཡིན་པའི་ཕྱིར་མཉམ་གཞག་གི་ཁོངས་སུ་འདུས་པ་ཡིན་ནོ། །དེ་ཡང་ལག་ཏུ་ལེན་པར་འདོད་ན། གཏོར་མ་གཏང་བའམ། མ་བཏང་ཡང་རུང་སྟེ། མཉམ་གཞག་བསྒོམ་པའི་སྟན་དེ་ལས་མ་ལངས་པར་ལུས་ཀྱི་ཌཱ་མ་རུའི་སྒྲ་དང་བཅས་པའམ། མེད་ཀྱང་བཏུབ་སྟེ། ངག་ཏུ་འོག་ནས་འབྱུང་བ་རྣམས་གསལ་བར་བརྗོད་ཅིང་། སེམས་ཀྱིས་མ་དག་པའི་ཁམས་དང་། རྒྱན་ཆ་ལ་སོགས་པ་དེ་དང་དེ་དག་དག་པའི་ལྷ་དང་། སྔགས་དེ་དང་དེའི་ངོ་བོ་ཡིན་ནོ་སྙམ་དུ་མོས་པ་བྱ་བ་ཡིན་གྱི་ལྷ་དང་སྔགས་ཀྱི་རྣམ་པར་བསྒོམ་ནི་མི་དགོས་སོ། །ཞེས་གསུངས་ཏེ། ཇི་ལྟར་བརྗོད་པའི་ཚུལ་ནི་མངོན་པར་རྟོགས་པར་བསྟན་ཟིན་ཏོ། །འོག་གི་ཁ་ཊྭཱཾ་ག་ནི་ལྷ་ཡི་སྐུ། །ཞེས་སོགས་ཚིགས་བཅད་གཅིག་ནི་སྤྱོད་ལམ་གྱི་རྣལ་འབྱོར་དང་། སྤྲུལ་པ་ལས་བྱུང་དཔའ་བོ་རྣམས། །ཞེས་པ་ནས། ཀ་ནི་གང་དུའང་མི་གནས་པའོ། །ཞེས་པའི་བར་ནི་དེ་དག་གི་རྒྱུ་མཚན་སྟོན་པར་འགྲེལ་པས་བཤད་དོ། །གསུམ་པ་གཏོར་མའི་རྣལ་འབྱོར་ནི། གཞུང་ལས་རྡོ་རྗེ་ཐལ་མོ་ཁ་གྱེན་དུ་ཕྱེ་ལ་ཞེས་པ་ནས། ས་ཧ་ཡི་ཀ་བྷ་ཝནྟུ་ཧཱུྃ་ཕཊ། ཅེས་པའི་བར་འདས་པའི་གཏོར་སྔགས་དང་། དེ་ཉིད་ལན་ལྔ་བརྗོད་པས་འབུལ་ཚུལ་དང་། འཇིག་རྟེན་པའི་གཏོར་སྔགས་ཙམ་ཞིག་གསུངས་ལ། དེ་ཉིད་ཀུན་སྤྱོད་ཀྱི་ལེའུ་བཅུ་པ་ལས་ཀྱང་གསུངས་སོ། །འདི་དག་གི་དོན་ལ་ལྔ་སྟེ། གཏོར་མ་གཏང་བ་དང་། ཡོ་བྱད་དང་། ཆོ་ག་དང་། གཏོང་ཚུལ་དང་། དགོས་པའོ། །དང་པོ་ལ་གཉིས་ལས། རྒྱུན་གྱི་དུས་ནི་མངོན་བརྗོད་ལས། ཆོ་ག་འདི་ཡི་རིམ་པ་ཡིས། །ཐུན་མཚམས་བཞི་རུ་སྦྱིན་པར་བྱ། །ཞེས་གསུངས་སོ། །གཉིས་པ་ཁྱད་པར་གྱི་དུས་ནི་ཀུན་སྤྱོད་ལེའུ་བཅུ་པ་ལས། ཟླ་བ་མར་ངོའི་ཚེས་བཅུ་དང་། །ཟླ་བ་ཡར་ངོའི་དེ་ཉིད་ལ། །ཞེས་དང་། དགུན་ཟླ་འབྲིང་པོ་ལ་སོགས་པའི། །ཚེས་བཅུ་ལ་ནི་དད་པས་མཆོད། །ཅེས་གསུངས་པ་ལྟར་རོ། །གཉིས་པ་ཡོ་བྱད་ནི་ལེའུ་དེ་ཉིད་ལས། མྱུར་དུ་འབད་པས་ཤ་དང་ཆང་དག་གིས། །རྡོ་རྗེ་ལྷ་མོ་རབ་ཏུ་མཆོད་པར་བྱ། །ཞེས་དང་། འགྱུར་ཁ་ཅིག་ལས། འབད་པས་དཔའ་བོ་ཆང་སོགས་དང་། །རྡོ་རྗེ་ལྷ་མོ་རབ་མཆོད་ཅིང་། །ཞེས་གསུངས་པ་ལྟར་རོ། །གསུམ་པ་ཆོ་ག་ལ་མདུན་བསྐྱེད་དང་མ་འབྲེལ་བའི་འདས་པ་དང་། འཇིག་རྟེན་པའི་གཏོར་མ་གཉིས་ཀ་ཡང་མངོན་པར་རྟོགས་པར་བསྟན་ཟིན་ཅིང་། མདུན་བསྐྱེད་དང་འབྲེལ་ན་གནས་སྐབས་དེར་རང་གི་སྙིང་གའི་ས་བོན་ལས་འོད་ཟེར་འཕྲོས་ཏེ། དུར་ཁྲོད་ཆེན་པོ་བརྒྱད་ལ་ཕོག་པས། དཀྱིལ་འཁོར་གྱི་འཁོར་ལོ་ཆ་བརྒྱད་དུ་གྱུར་པར་བསམས་ལ། ཡེ་ཤེས་ཀྱི་འཁོར་ལོ་ཆ་བརྒྱད་སྤྱན་དྲངས་ནས་བསྟིམས་ལ་ཆོ་ག་གཞན་ཐམས་ཅད་ནི་འདྲ་བ་ཉིད་དོ། །བཞི་པ་གཏོང་ཚུལ་ནི་ལེའུ་དེ་ཉིད་ལས། ལྷོ་ཕྱོགས་ཁ་བལྟས་རྣལ་འབྱོར་པས། །གནས་ནི་མཐོན་པོར་རབ་ཏུ་མཆོད། །མཚན་མོ་སྐྲ་ནི་གྲོལ་གྱུར་པས། །བརྟུལ་ཞུགས་གོས་མེད་གཏོར་མ་སྤྱིན། །ཞེས་གསུངས་པ་ལྟར་རོ། །ལྔ་པ་དགོས་པ་ནི་ལེའུ་དེ་ཉིད་ལས། དེ་ཡི་ལག་ཏུ་འོངས་པའི་དཔལ། །གང་གིས་ཀྱང་ནི་གཞོམ་མི་ནུས། །དེ་ནི་སྐྱེ་བོ་དད་ལྡན་རྣམས་ཀྱིས་མཆོད། །ཧེ་རུ་ཀ་དཔལ་མངོན་པར་རྒྱས་གྱུར་ནས། །ཀུན་ཏུ་དགྱེས་པས་མཆོག་ནི་གསོལ་འགྱུར་ཏེ། །གང་ཕྱིར་མཆོག་ནི་དེ་ཡི་ལག་ན་གནས། །ཞེས་གསུངས་སོ། །དེ་ལྟར་གཏོར་མ་བཏང་ནས། འཇིག་རྟེན་དང་འཇིག་རྟེན་ལས་འདས་པའི་གཏོར་མགྲོན་རྣམས་རང་བཞིན་གྱི་གནས་སུ་གཤེགས་སུ་གསོལ། མདུན་དུ་སྤྲུལ་པ་རྣམས་བདག་གི་ལུས་ལ་བསྡུ་བར་བྱའོ། །ཡང་ན་གཏོར་མ་ཕྱི་རོལ་དུ་གཏོང་བའི་ཚེ་གོང་གི་ཕྲིན་ལས་བཅོལ་བའི་ཚིགས་སུ་བཅད་པ་རྣམས་བརྗོད་ཅིང་བཏང་ལ་ལོག་ནས་བཟོད་པར་གསོལ་བ་དང་སྤྲུལ་པ་བདག་གི་ལུས་ལ་བསྡུ་བར་བྱ་སྟེ། དེ་ལྟར་ནའང་འགལ་བ་མེད་དོ། །དེ་ལྟར་གཏོར་མ་བཏང་བ་རྫོགས་ནས་སྟན་བདེ་བ་ལ་འདུག་སྟེ་དག་པ་རྗེས་སུ་དྲན་པར་བྱ། དེ་ནས་དཔའ་བོའི་གོ་ཆ་དང་། དཔའ་མོའི་གོ་ཆ་དང་། གོ་ཆ་ཆེན་པོ་དང་། ཞལ་བཞི་པའི་ཚམ་རྔམ་སྔགས་ཀྱིས་བསྲུངས་ལ་སྤྱོད་ལམ་གྱི་རྣལ་འབྱོར་དྲན་པ་ཙམ་བྱའོ། །བཞི་པ་ཁ་ཟས་ཀྱི་རྣལ་འབྱོར་ནི་གནས་སྐབས་འགའ་ཞིག་ཏུ་ཁ་ཟས་དང་འབྲེལ་བའི་ཚེ་ཁ་ཟས་གཏོར་མ་བཞིན་བྱིན་གྱིས་བརླབ་པའམ། ལག་པ་གཡོན་པའི་མཐེབ་སྲིན་རེག་ནས་ཨོཾ་ཨཱཿཧཱུྃ་ཞེས་བརྗོད་ནས་དེ་བདུད་རྩིའི་རང་བཞིན་དུ་བྱིན་གྱིས་བརླབས་ལ་སྐབས་འདིར་ལག་པའི་མཆོད་པ་བྱེད་པར་སྤྲོ་ན་རྗེ་བཙུན་བསོད་ནམས་རྩེ་མོས། དང་པོ་ཁོ་ནར་ལུས་དང་ངག་ཡིད་ཡོངས་སུ་དག་པ་དང་ལྡན་པས། མཆོད་པའི་ཡོ་བྱད་མེ་ཏོག་ལ་སོགས་པ་ལྔ་དང་། གོང་བུ་དང་ཞུ་བའི་རྫས་ཅི་འབྱོར་བ་མདུན་དུ་བྱས་ལ། དེ་དག་ཆོ་ག་བཞིན་དུ་བསང་སྦྱང་བ་དང་བྱིན་གྱིས་བརླབ་པར་བྱའོ། །དེ་ནས་བདུད་རྩི་ལྔ་དང་སྦྱར་བའི་ཆང་བྱིན་གྱིས་བརླབས་པས། ཨོཾ་ཨཱཿཧཱུྃ་ཞེས་བརྗོད་ཅིང་། ལག་པ་གཡོན་པ་ལ་གཏོར་ལ་མཉེ་བར་བྱའོ། །དེ་ནས་ལག་པ་གཡོན་པའི་སོར་མོ་ལྔ་བསྡུས་པ་དང་དྲུག་ལ་མེ་ཏོག་རེ་རེ་བཞག་པས་ཟླ་བའི་དཀྱིལ་འཁོར་དྲུག་བཀོད་པ་ལ། མཐེ་བོང་ལ་ཨོཾ་ཧ་དཀར་པོ། མཛུབ་མོ་ལ་ན་མ་ཧིཿསེར་པོ། གུང་མོ་ལ་སྭཱ་ཧཱ་ཧུ་དམར་པོའོ། །མིང་མེད་ལ་བཽ་ཥ་ཊ་ཧེ་ནག་པོའོ། །མཐེའུ་ཆུང་ལ་ཧུཾ་ཧཱུྃ་ཧོཿདམར་སེར་རོ། །བསྡུས་པའི་སེན་མོ་ལ་ཕཊ་ཧྃ་ལྗང་གུ་བསམས་ལ། དེ་དག་ཡོངས་སུ་གྱུར་པ་ལས་གོ་རིམ་ཇི་ལྟ་བར། རྡོ་རྗེ་དང་། འཁོར་ལོ་དང་། པདྨ་དང་། རྡོ་རྗེ་གདེངས་པ་དང་། རིན་པོ་ཆེ་དང་། རལ་གྲི་རྣམས་ཇི་ལྟར་བརྗོད་པའི་ཁ་དོག་དང་། ཡི་གེ་རྣམས་ཀྱིས་མཚན་པའོ། །དེ་དག་ལས་འོད་ཟེར་སྤྲོ་བ་དང་བསྡུ་བ་དང་གཅིག་ཏུ་གྱུར་པ་ལས། རྡོ་རྗེ་སེམས་དཔའ་དང་། རྣམ་པར་སྣང་མཛད་དང་། པདྨ་གར་དབང་དང་། དཔལ་ཧེ་རུ་ཀ་དང་། རྡོ་རྗེ་ཉི་མ་དང་། རྟ་མཆོག་རྣམས་ཇི་སྐད་བཤད་པའི་སྐུ་མདོག་དང་ལྡན་པ། རྡོ་རྗེ་སེམས་དཔའ་ནི་ཞལ་གསུམ་པ། རྩ་བ་དཀར་བ། གཡས་སྔོ་བ། གཡོན་དམར་བའོ། །ཕྱག་དྲུག་པ་སྟེ། རྡོ་རྗེ་དང་། དྲིལ་ཐོད། ཁ་ཊྭཱཾ་ག ཅང་ཏེའུ་དང་། མགོ་བོ་འཆང་། རྣམ་པར་སྣང་མཛད་ལ་སོགས་པ་ནི་ཞལ་གཅིག་པ། ཕྱག་བཞི་པ། གཡས་ཀྱི་དང་པོ་འཁོར་ལོ་ལ་སོགས་པ་རང་གི་མཚན་མ་འཛིན་པ། གཡོན་དང་པོ་དེས་མཚན་པའི་དྲིལ་བུ། གཡས་ཀྱི་གཉིས་པ་ན་ཌཱ་མ་རུ། གཡོན་གྱི་གཉིས་པ་ལ་ཐོད་པ་དང་གྲུ་མོར་ཁ་ཊྭཱཾ་གའོ། །ཐམས་ཅད་ཀྱང་རང་དང་མཚུངས་པའི་ཤེས་རབ་དང་གཉིས་སུ་མེད་པ་ཕྱག་རྒྱ་དྲུག་གིས་བརྒྱན་པ། གཡས་བརྐྱང་བས་བཞུགས་པར་བསམ་མོ། །ལག་པའི་མཐིལ་དུ་ཡང་གྲུབ་པའི་པདྨ་འདབ་མ་ལྔ་པ་བསམ་སྟེ་དེའི་ལྟེ་བ་ནས་བརྩམས་ཏེ་གཡོན་སྐོར་གྱིས་མེ་ཏོག་རེ་རེ་བཞག་པས་ཟླ་བའི་གདན་བསམས་པར་བྱས་ལ། ལྟེ་བར་ཨོཾ་བྃ་དམར་པོའོ། །འདབ་མ་རྣམས་ལ་ཤར་ནས་གཡོན་སྐོར་གྱི་རིམ་པས་ཧྃ་ཡོཾ་ནག་པོའོ། །ཧྲིཾ་མོཾ་དཀར་པོ་དང་། ཧྲིཾ་ཧྲིཾ་སེར་མོ་དང་། ཧཱུྃ་ཧཱུྃ་ལྗང་གུ་དང་། ཕཊ་ཕཊ་དུད་ཀའི་མདོག་ཅན་རྣམས་ཡོངས་སུ་གྱུར་པ་ལས་བྱུང་བའི་གྲི་གུག་སྟེ་རང་རང་གི་མདོག་དང་ས་བོན་གྱིས་མཚན་པའོ། །དེ་དག་ལས་སྤྲོ་བ་དང་། བསྡུ་བ་དང་གཅིག་དུ་གྱུར་པ་ལས། རྡོ་རྗེ་ཕག་མོ་དང་། གཤིན་རྗེ་མ་དང་། རྨོངས་བྱེད་མ་དང་། སྐྱོད་བྱེད་མ་དང་། སྐྲག་བྱེད་མ་དང་། གཏུམ་མོ་རྣམས་ཏེ། ཇི་སྐད་བཤད་པའི་སྐུ་མདོག་དང་ལྡན་པའོ། །རྡོ་རྗེ་ཕག་མོ་ནི་ཞལ་གསུམ་ཕྱག་དྲུག་མ་སྟེ། དབུས་མ་དམར་ཞིང་། གཡས་སྔོ་བ། གཡོན་ལྗང་བ། ཕྱག་དྲུག་ན། ཐོད་པ་དང་ནི་ཁ་ཊྭཱཾ་འཛིན། །ཞགས་པ་ལྕགས་ཀྱུ་ཕྱག་ན་བསྣམས། །ཚངས་པའི་མགོ་དང་གྲི་གུག་བསྣམས། །དངོས་གྲུབ་ཐམས་ཅད་རབ་གསོལ་བའོ། །གཞན་རྣམས་ནི་ཞལ་གཅིག་ཕྱག་བཞི་མ་སྟེ། ཐོད་པ་དང་ཁ་ཊྭཱཾ་ག་དང་། དྲིལ་བུ་གཡོན་ནའོ། །གཡས་ཌཱ་མ་རུ་དང་གྲི་གུག་འཛིན་པའོ། །ཐམས་ཅད་ཀྱང་རང་དང་མཚུངས་པའི་ཐབས་དང་གཉིས་སུ་མེད་པ། རྡོ་རྗེ་ཕག་མོ་ནི་ཕྱག་རྒྱ་དྲུག་གིས་བརྒྱན་པ། གཞན་ནི་ཕྱག་རྒྱ་ལྔས་བརྒྱན་པའོ། །ཐམས་ཅད་ནི་གཡོན་བརྐྱང་པས་བཞུགས་པའོ། །དཔའ་བོ་རྣམས་ནི་སྟག་གི་པགས་པའི་ཤམ་ཐབས་ཅན་ནོ། །རྣལ་འབྱོར་མ་ཐམས་ཅད་ནི་ཕྱོགས་ཀྱི་གོས་ཅན་ནོ། །རྡོ་རྗེ་སེམས་དཔའ་ཕག་མོ་དང་། །ཡཱ་མཱི་ན་དང་རྣམ་སྣང་མཛད། །པདྨ་གར་དབང་རྨོངས་བྱེད་བཅས། །སྐྱོད་བྱེད་མ་དང་ཧེ་རུ་ཀ །རྡོ་རྗེ་ཉི་མ་སྐྲག་བྱེད་མ། །ཙཎྜི་ཀ་དང་རྟ་མཆོག་སྟེ། །གཉིས་མེད་སྦྱོར་བས་ཡང་དག་འཁྱུད། །ཡང་ན་སོ་སོར་བསྒོམ་པར་བྱ། །ཞེས་འབྱུང་ངོ་། །དེ་ལྟར་ལྷའི་རྣམ་པར་མི་ནུས་པ་རྣམས་ཀྱིས་ཡི་གེའི་རྣམ་པ་ཉིད་ལྷའི་རྣམ་པར་མོས་པར་བྱའོ། །ལག་པའི་ས་དང་ཆུ་དང་མེ་དང་རླུང་དང་ནམ་མཁའི་ཁམས་རྣམས་ཀྱང་། ལྟུང་བྱེད་མ་དང་། གསོད་བྱེད་མ་དང་། འགུགས་བྱེད་མ་དང་། གར་གྱི་དབང་ཕྱུག་མ་དང་། པདྨའི་དྲྭ་བ་ཅན་ཏེ་སྙིང་པོའི་རྣལ་འབྱོར་མ་ལྔར་མོས་པར་བྱའོ། །ལག་པའི་རྒྱབ་ཏུ་ནི་འཁོར་ལོ་གསུམ་པོ་གསལ་བར་བལྟ་བར་བྱའོ། །གལ་ཏེ་ཕྱིའི་མཆོད་པ་དང་འབྲེལ་བར་དེའི་རྗེས་ལ་བྱེད་ན་ནི་ཕྱིའི་དཀྱིལ་འཁོར་གྱི་གཟུགས་བརྙན་ཉིད་བལྟ་བར་བྱའོ། །དེ་ལྟར་ཐམས་ཅད་རྫོགས་པར་བྱས་ནས་ཐམས་ཅད་ཀྱང་ཕོ་ཉ་གསུམ་དབྱེར་མི་ཕྱེད་པའི་ངོ་བོར་མོས་པར་བྱའོ། །དེ་ནས་རང་རང་གི་སྔགས་ཀྱིས་མེ་ཏོག་ལ་སོགས་པས་མཆོད་པར་བྱ་སྟེ། ཨོཾ་ཧཿན་མ་ཧཱིཿསྭཱ་ཧཱ་ཧུ། བཽ་ཥ་ཊ་ཧེ་ཧུཾ་ཧཱུྃ་ཧོ་ཕཊ་ཧཾ་ཞེས་བྱ་བས་སོར་མོ་རྣམས་ཀྱི་རྡོ་རྗེ་སེམས་དཔའ་ལ་སོགས་པ་མཆོད་པར་བྱའོ། །ཨོཾ་བྃ་ཧྃ་ཡོཾ་ཧྲིཾ་མོཾ་ཧྲིཾ་ཧྲིཾ་ཧཱུྃ་ཧཱུྃ་ཕཊ་ཕཊ་ཅེས་བྱ་བས་ནི་ལག་པའི་མཐིལ་དུ་རྡོ་རྗེ་ཕག་མོ་ལ་སོགས་པ་མཆོད་པར་བྱའོ། །ལྷག་མ་རྣམས་ལ་ནི་ཕྱིའི་མཆོད་པའི་སྐབས་སུ་བསྟན་པ་ལྟར་སྔར་རྒྱས་པར་སོ་སོར་དབུལ་བའམ། ཡང་ན་ནི་ཐམས་ཅད་ལ་རྩ་བའི་སྔགས་དང་། སྙིང་པོ་དང་ཉེ་བའི་སྙིང་པོ་རྣམས་ཀྱིས་དབུལ་བར་བྱའོ། །དེ་ལ་དང་པོ་ནི་མེ་ཏོག་གིས་སོ། །དེ་ནས་བདུག་པ་ལ་སོགས་པ་བཞིའོ། །དེ་ནས་ཞུ་བའི་རྫས་ཀྱིས་སོ། །མཐར་གོང་བུའི་རྫས་ཀྱི་མཆོད་ལ། གང་ཡང་རུང་བས་བསྟོད་ལ། ཆོ་ག་ལྷག་པ་དང་མ་ཚང་བ་ཁ་བསྐང་བའི་དོན་དུ་ཡི་གེ་བརྒྱ་པ་བཟླས་ཏེ། འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་གདབ་པར་བྱའོ། །ཕྱེད་ནི་སྣོད་གཞན་དུ་བཞག ཕྱེད་ནི་ཙཱ་རུའི་བཟའ་བར་བྱས་ལ་བསྲེ་བར་བྱའོ། །དེ་ནས་ཡང་ལག་པའི་མཐིལ་དུ་འབྱར་བའི་རྫས་གཡས་པའི་སྲིན་ལག་གིས་བླངས་ལ་སྙིང་ག་དང་། ལྐོག་མ་དང་། སྤྱི་བོ་རྣམས་སུ་ཧཱུྃ་ཨཱཿཨོཾ་ཞེས་བརྗོད་ནས་བྱུག་པར་བྱའོ། །དེ་ནས་ཡང་ལག་པ་ལ་ཆང་གིས་ཨོཾ་ཨཱཿཧཱུྃ་ཞེས་བརྗོད་ཅིང་གཏོར་ལ་ཕན་ཚུན་མཉེས་ཏེ་ལུས་ཐམས་ཅད་ལ་བྱུགས་ལ་ལྷའི་འཁོར་ལོ་དེ་བདག་ཉིད་ལ་གཞུག་པར་བྱའོ། །སྔགས་ཀྱང་བརྗོད་དོ། །དེ་ནས་ཡོངས་སུ་སྦྱངས་པའི་ཁ་ཟས་རྣམས་ནང་གི་སྦྱིན་སྲེག་གི་ཚུལ་གྱིས་གཡོན་གྱིས་ཀུན་དུ་སྤྱོད་པས་ལོངས་སྤྱོད་པར་བྱའོ། །ལག་པ་ལ་མཆོད་པའི་ཆོ་ག་རྒྱས་པར་བྱས་པའོ། །ཞེས་གསུངས་པ་ལྟར་ཉམས་སུ་བླང་བར་བྱའོ། །དེ་ལྟར་ལག་པ་མཆོད་པར་བྱས་པ་དེས། དཀོན་མཆོག་དང་། འབྱུང་པོའི་ཕུད་ཀྱི་བྱ་བ་གཞན་ནས་འབྱུང་བ་བཞིན་བྱས་ལ། དེ་ནས་བདག་གི་ལུས་ཕྱིའི་ཧེ་རུ་ཀ་ལ། ལུས་ཀྱི་དཀྱིལ་འཁོར་ལྷ་དྲུག་ཅུ་རྩ་གཉིས་ཀྱི་དཀྱིལ་འཁོར་ཡིན་པར་མོས་པ་དང་། ཁྱད་པར་དུ་མེ་ལྟེ་བ་ནས་སྙིང་ག་ལ་ཡར་འབར་ཏེ། སྙིང་གའི་མེའི་དབུས་ན་བཅོམ་ལྡན་འདས་ཧེ་རུ་ཀ་ཡབ་ཡུམ་ཙམ་མམ། ལྷ་བཅུ་གསུམ་ཙམ་མམ། དཀྱིལ་འཁོར་གྱི་འཁོར་ལོ་ཐམས་ཅད་རྫོགས་པ་གང་རུང་གསལ་པོར་དམིགས་ལ། ཁ་ནི་སྦྱིན་སྲེག་གི་ཐབ་ཁུང་། ལུས་ནི་ལྷའི་དཀྱིལ་འཁོར། ལག་པ་ནི་གཟར་བུ། ཁ་ཟས་ནི་བསྲེག་རྫས་སུ་བསམས་ལ། ལྷ་མཆོད་པའི་བསམ་པས་ཐོག་མར་ལག་པ་གཡོན་པས་ལོངས་སྤྱད་པར་བྱའོ། །ལག་པ་གཡོན་པས་རྟག་ཏུ་མི་བྱེད་ནའང་། གཡོན་གྱི་ཀུན་དུ་སྤྱོད་པ་ཡིན་པའི་ཕྱིར། ཁམ་དང་པོ་ལག་པ་གཡོན་པས་ལོངས་སྤྱད་ལ་དེ་ནས་ཅི་བདེར་སྤྱད་དོ། །ཁ་ཟས་ཀྱི་རྣལ་འབྱོར་གྱི་དུས་སུ་ལས་བཞིའི་མཐའ་རྟེན་གྱི་སྔགས་དང་། སྙིང་གའི་ཧེ་རུ་ཀའི་ཞལ་གྱི་ཁ་དོག ཞི་བ་ལ་དཀར་པོ་ཞེས་བྱ་བ་ལ་སོགས་པར་བསྒྱུར་ཞིང་། ཁ་ཟས་ཀྱི་མཆོད་པ་བྱས་ན་ལས་བཞི་པོ་གང་ལ་དམིགས་པ་འགྲུབ་པར་འགྱུར་རོ་ཞེས་གསུངས་སོ། །ཁ་ཟས་ཀྱི་རྗེས་ལ་ལྷག་མའི་གཏོར་མས་འབྱུང་པོ་ཚིམ་པར་བྱ་བ་དང་། སྦྱིན་སྲེག་གི་རྗེས་དང་མཐུན་པར། བདག་མེད་པར་དྲན་པར་བྱས་ལ་ངལ་བསོ་བར་བྱའོ། །དེ་ལྟར་རིམ་པ་གཉིས་བརྟན་པར་བྱེད་པའི་སྤྱོད་པ་ནི། རྣལ་འབྱོར་མ་ཀུན་སྤྱོད་དང་། སློབ་དཔོན་གྱི་གཞུང་གཉིས་ཀ་ལས། དག་པ་དྲན་པའི་རྗེས་སུ་གཞུང་ཅུང་ཟད་ཅིག་འབྱུང་བས། དེ་བརྗོད་ན་རང་དོན་གྱི་སྤྱོད་པ་དང་། གཞན་དོན་གྱི་སྤྱོད་པ་གཉིས། དང་པོ་ལ་བསྐྱེད་རིམ་བརྟན་པར་བྱེད་པ་སྤྲོས་བཅས་ཀྱི་སྤྱོད་པ་དང་། རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ་གཉིས། དང་པོ་ནི་འབྱོར་པ་དང་བཅས་པས་ཀུན་ཏུ་སྤྱོད་ན་བསྐྱེད་པའི་རིམ་པ་ཅུང་ཟད་བརྟན་པ་དེས་ཚོགས་ཀྱི་ཁང་པ་སུམ་རིམ་བརྩིགས་ལ། ནང་མའི་ནང་དུ་ལྷ་དྲུག་ཅུ་རྩ་གཉིས་ཀྱི་འབག་དང་། ང་རྒྱལ་འཛིན་པའི་དཔའ་བོ་དང་། དཔའ་མོ་དྲུག་ཅུ་རྩ་གཉིས། དཀྱིལ་འཁོར་གྱི་རྣམ་པའི་ཚུལ་དུ་བཀོད་པ་ཐམས་ཅད་ཀྱིས་ཀྱང་མངོན་པར་རྟོགས་པ་ཚུལ་གཅིག་ཏུ་བསྒོམ། རིམ་པ་གཉིས་པ་ལ་རྡོ་རྗེ་མའི་ང་རྒྱལ་འཛིན་པ་གྲངས་ཅི་རིགས་པ་བཀོད་ལ་ཚོགས་ཀྱི་འཁོར་ལོའི་ཁ་ཟས་ཀྱི་གཡོས་བྱ་ཞིང་། ཐུན་མཚམས་རྣམས་སུ་ཕྱི་ནང་ན་གནས་པ་རྣམས་ལ་ཚོགས་ཀྱི་འཁོར་ལོའི་སྟོན་མོ་དྲང་བར་བྱའོ། །རིམ་པ་ཐ་མར་གླུ་ལེན་པ་དང་གར་བྱེད་པ་ལ་སོགས་པའི་རྣལ་འབྱོར་རིག་མ་བཅུ་དྲུག་གི་ང་རྒྱལ་འཛིན་ཅིང་དཀྱིལ་འཁོར་མཆོད་པའི་བསམ་པ་དང་ལྡན་པ་དགོད་དོ། །དེ་ལྟ་བུའི་ཚུལ་གྱིས་ཐུན་བཞིའམ་དྲུག་ཏུ་ཚོགས་ཀྱི་འཁོར་ལོ་བྱ་ཞིང་། ལོའམ་ཟླ་བ་དུ་མར་བསྒྲུབས་ནས་བསྐྱེད་པའི་རིམ་པའི་དམིགས་པ་ཤིན་ཏུ་བརྟན་པར་བྱེད་པ་ཡིན་ནོ། །ཡོ་བྱད་འབྱོར་པ་དེ་ཙམ་མེད་པས་རང་ཉིད་ཧེ་རུ་ཀའི་ང་རྒྱལ་དང་ལྡན་པ། རྒྱན་དྲུག་བགོས་ལ་ཌཱ་མ་རུ་དང་ཁ་ཊྭཱཾ་ག་དང་ཐོད་པ་འཛིན་པས་ཐུན་དྲུག་གམ་གསུམ་དུ་བསྐྱེད་རིམ་བརྟན་པར་བྱ་ཞིང་བསྒོམ་པ་ཡིན་ནོ། །རྫོགས་རིམ་བརྟན་པར་བྱེད་པ་སྤྲོས་མེད་ཀྱི་སྤྱོད་པ་ནི་མཉམ་གཞག་གི་དུས་སུ་འཇིག་རྟེན་གྱི་ཆོས་བརྒྱད་མགོ་སྙོམས་པ་སྙམ་བྱེད་ན་དེ་བརྟན་ནམ་མི་བརྟན་བརྟག་པའི་དོན་དུ་མཚན་མོ་ལམ་ཀའི་གཞི་མདོ་ལ་སོགས་པར་ཕྱིན་ཏེ་ཡུལ་རྣམས་ཉེ་བར་ལོངས་སྤྱོད་ནས་རྣམ་པར་རྟོག་པ་སྐྱེའམ་མི་སྐྱེ་རྟོག་ཅིང་བརྟན་པར་བྱེད་པ་ཡིན་ནོ། །ཉིན་མོའི་དུས་སུ་ནི་བྲམ་ཟེ་ལ་སོགས་པ་རང་གི་རིགས་དང་མཐུན་པའི་སྤྱོད་པས་གནས་པར་བྱ་བ་ཡིན་ནོ། །གཉིས་ཀ་བརྟན་པར་བྱེད་པ་ཤིན་ཏུ་སྤྲོས་མེད་ཀྱི་སྤྱོད་པ་ནི། སྤྲོས་མེད་ཀྱི་སྤྱོད་པས་ཐ་མལ་གྱི་རྣམ་རྟོག་མི་སྐྱེ་བར་ངེས་པར་བརྟན་པ་དང་། རང་གི་ཡུལ་འཁོར་ཡོངས་སུ་སྤངས་ཏེ་རང་གི་རིགས་དང་རུས་དང་ཆོ་འབྲང་ལ་སོགས་པ་ཐམས་ཅད་གསང་ནས་སྨྱོན་པར་བརྫུས་ཏེ། སྨྱོན་པའི་སྦྱོར་བས་རང་གི་རྟོགས་པའི་ཡེ་ཤེས་ཀུན་ཏུ་སྐྱོང་ཞིང་བརྟན་པར་བྱེད་པ་ཡིན་ནོ། །གཞན་གྱི་དོན་གྱི་སྤྱོད་པ་ནི་ཤིན་དུ་སྤྲོས་མེད་ཀྱི་སྤྱོད་པས་ཡེ་ཤེས་ཤིན་དུ་བརྟན་ནས་ནུས་པ་ཆེན་པོ་སྐྱེས་པ་དེའི་ཚེ་སེམས་ཅན་ཐམས་ཅད་རྗེས་སུ་གཟུང་བའི་སྤྱོད་པས་རྣལ་འབྱོར་པར་ཁས་བླངས་ནས་སློབ་དཔོན་བིརྺ་པའམ། སློབ་དཔོན་ལཱུ་ཧི་པ་བཞིན་དུ་གཞན་དོན་གྱི་སྤྱོད་པ་བྱེད་པ་ཡིན་ནོ། །དེ་ལ་སློབ་དཔོན་ལཱུ་ཧི་པའི་དགོངས་པ་ཇོ་བོ་ནཱ་རོ་ཏ་པས་བསྐང་བས་མངོན་པར་རྟོགས་པ་འདི་སྐུ་གསུམ་ལམ་དུ་བྱེད་པའི་སྒྲུབ་ཐབས་ཡིན་ཏེ། དེ་ཡང་བློའི་སྤྱོད་ཡུལ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་བཞག་པ་དང་། མངོན་པར་རྟོགས་པ་གཅིག་ལ་སྐུ་གསུམ་དུ་བཞག་པའོ། །དང་པོ་ནི་བདག་གི་བློ་སྣང་གི་དཀྱིལ་འཁོར་ནི་ཞིང་སྐྱེས་ཀྱིས་སྤྲུལ་ལ། ཞིང་སྐྱེས་ཉིད་ཀྱང་ལྷན་སྐྱེས་ཀྱིས་སྤྲུལ་པའི་ཕྱིར་དེ་གཉིས་ཀའང་སྤྲུལ་པའི་སྐུའོ། །ལྷན་སྐྱེས་ནི་གནས་འཕོ་བ་མེད་པའི་ཚུལ་གྱིས་ཟག་པ་མེད་པའི་བདེ་བ་དང་། ཆོས་ལ་ལོངས་སྤྱོད་པའི་ཕྱིར་ལོངས་སྤྱོད་རྫོགས་པའི་སྐུའོ། །ཆོས་ཀྱི་སྐུ་ནི་ཆོས་ཀྱི་སྐུ་ཉིད་དོ། །གཉིས་པ་དཀྱིལ་འཁོར་གྱི་འཁོར་ལོ་རྫོགས་པ་གཅིག་ལ་སྐུ་གསུམ་དུ་འཇོག་ན། བདེ་བ་ཆེན་པོའི་འཁོར་ལོ་ནི་ཆོས་ཀྱི་སྐུ། འཁོར་ལོ་གསུམ་ནི་ལོངས་སྐུ། སྒོ་མཚམས་མ་བརྒྱད་ནི་སྤྲུལ་པའི་སྐུའོ། །མངོན་པར་རྟོགས་པ་རྫོགས་པ་གཅིག་ལ་སྐུ་གསུམ་དུ་འཇོག་ན། ཕྱིའི་དཀྱིལ་འཁོར་དག་པ་དང་བཅས་པ་སྤྲུལ་པའི་སྐུ་ལམ་དུ་བྱེད་པའི་སྒྲུབ་ཐབས། ལུས་ཀྱི་དཀྱིལ་འཁོར་སྔགས་ཀྱིས་བྱིན་གྱིས་བརླབས་པ་དང་བཅས་པ་ལོངས་སྤྱོད་རྫོགས་པའི་སྐུ་ལམ་དུ་བྱེད་པའི་སྒྲུབ་ཐབས། རྫོགས་པའི་རིམ་པ་སྤྱོད་པ་དང་བཅས་པ་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་སོ། །དེ་ལ་འབྲིང་བསྡུས་ཀྱི་དབང་དུ་བྱས་ན་ཕྱིའི་དཀྱིལ་འཁོར་མེད་པས་ལུས་ལ་ལྷ་རྣམས་རྫོགས་པར་བསྐྱེད་པ་ཙམ་ནི་སྤྲུལ་པའི་སྐུ་ཡིན་ལ། བསྐྱེད་པ་གསལ་གདབ་པ་དང་། ཐིམ་པའི་ཚུལ་གྱིས་ལོངས་སྤྱོད་པ་ནི་ལོངས་སྤྱོད་རྫོགས་པའི་སྐུ་ཡིན་ལ། རྫོགས་པའི་རིམ་པ་སྤྱོད་པ་དང་བཅས་པ་ནི་ཆོས་ཀྱི་སྐུ་ལམ་དུ་བྱེད་པའི་སྒྲུབ་ཐབས་ཡིན་ནོ། །བཞི་པ་དེ་ལྟར་བསྒོམས་པའི་འབྲས་བུ་ལ་གསུམ་སྟེ། ཞི་སོགས་བྱ་བ་དམན་པའི་དངོས་གྲུབ་དང་། འབྲིང་གྲུབ་པ་ཆེན་པོ་བརྒྱད་དང་མཁའ་སྤྱོད་ཀྱི་དངོས་གྲུབ་དང་། རབ་ཕྱག་རྒྱ་ཆེན་པོ་མཆོག་གི་དངོས་གྲུབ་སྐུ་གསུམ་གྱི་རང་བཞིན་སངས་རྒྱས་ཀྱི་ས་རྡོ་རྗེ་འཛིན་པ་ཉིད་འགྲུབ་པ་ཡིན་ནོ། །དེ་ལ་མཁའ་སྤྱོད་ཀྱི་དངོས་གྲུབ་ནི་གཞུང་ལས། འཕོ་བའི་ཚེ་ན་རྣལ་འབྱོར་པ། །ཞེས་པ་ནས། མཁའ་སྤྱོད་གནས་སུ་འཁྲིད་པར་བྱེད། །ཅེས་པའི་བར་ཏེ། ཀུན་སྤྱོད་ལེའུ་བཅུ་བདུན་པ་ལས། རྣལ་འབྱོར་པ་ནི་འཕོ་བའི་ཚེ། །དཔལ་ལྡན་ཧེ་རུ་ཀ་ལ་སོགས། །དཔའ་བོ་དག་ནི་ཐམས་ཅད་དང་། །རྣལ་འབྱོར་མ་ནི་ཇི་སྙེད་པ། །ལག་ན་མེ་ཏོག་སྣ་ཚོགས་བསྣམས། །བ་དན་རྒྱལ་མཚན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །སྣ་ཚོགས་གླུས་ནི་ཉེ་བར་མཆོད། །འཆི་བ་ཞེས་པ་རྣམ་རྟོག་སྟེ། །མཁའ་ལ་སྤྱོད་པའི་གནས་སུ་ཁྱེར། །དེ་ལྟར་དཔའ་བོ་ཆེན་པོ་དང་། །རྣལ་འབྱོར་མ་ནི་ས་སྟེང་དཀོན། །ཞེས་གསུངས་པའི་དོན་དུ་སྣང་ངོ་། །གལ་ཏེ་མཁའ་སྤྱོད་ཀྱི་གོ་འཕང་འཆི་ཁར་མ་ཐོབ་ན། འཁོར་ལོས་སྒྱུར་བ་ལ་སོགས་པ་མཐོ་རིས་ཀྱི་རྟེན་ལ་ལམ་ལྷག་མ་རྣམས་བགྲོད་པར་བྱེད་དེ། དེ་ཉིད་ལས། བསམ་གཏན་གྱི་ནི་བསམ་ཙམ་མམ། །འདོན་ཅིང་ཀློག་གམ་བྲིས་པ་ཡིས། །མཐོ་རིས་ལོངས་སྤྱོད་ཐོབ་འགྱུར་ཏེ། །ཡང་ན་འཁོར་ལོས་སྒྱུར་ཉིད་འགྱུར། །ཞེས་གསུངས་སོ། །རབ་ཕྱག་རྒྱ་ཆེན་པོ་མཆོག་གི་དངོས་གྲུབ་ནི། གློ་བོ་ལོ་ཙཱ་བ་དང་། དམར་གྱིས། རྫོགས་རིམ་གྱི་གཤམ་དུ། བསམ་གྱིས་མི་ཁྱབ་དེ་བསམ་ན། །དེ་ལས་གཟུངས་ནི་ཐོབ་པར་འགྱུར། །ཞེས་པས་བསྟན་པར་བཞེད་དེ་བསྐྱེད་རིམ་གྱི་མཐར། རྫོགས་རིམ་བསམ་གྱིས་མི་ཁྱབ་པ་ལྔ་བསམ་ན། ཕན་ཡོན་འབྲས་བུ་ནི་གཟུངས་ཀྱི་སྐད་དོད། དྷ་ར་ཅེས་པ་འཛིན་པ་སྟེ། སངས་རྒྱས་ཀྱི་ཡོན་ཏན་སྟོབས་དང་། མི་འཇིགས་པ་ལ་སོགས་པའི་རྒྱན་མ་ལུས་པ་འཛིན་ཅིང་ཐོབ་པར་འགྱུར་ཞེས་བྱ་བའི་ཐ་ཚིག་གོ་ཞེས་བཤད་ཅིང་། རྗེ་བཙུན་གྱིས་ནི་ཀུན་སྤྱོད་ལེའུ་བཅུ་གསུམ་པ་ལས། བསྟན་པ་ཡིས་ནི་སྤྲུལ་པ་ཡིན། །བཤད་པས་ལོངས་སྤྱོད་རྫོགས་པར་འདོད། །སོ་སོ་བསྟན་པ་མ་ལུས་ཉིད། །མྱ་ངན་འདས་པ་དེ་ཉིད་བསྟན། །སྐུ་གསུམ་འཁོར་ལོ་གསུམ་དུ་བཤད། །ཆོས་དང་ལོངས་སྤྱོད་སྤྲུལ་མཚན་ཉིད། །ཅེས་གསུངས་པ་ལྟར་སྐུ་གསུམ་ཉིད་ལ་བཞེད་དེ། བཅུ་གསུམ་རྡོ་རྗེ་འཛིན་པའི་སར། །གློ་བུར་གྱི་དྲི་མ་མ་ལུས་པ་དང་བྲལ་བའི་ཚེ་སྣང་བའི་དངོས་པོ་ཐམས་ཅད་བདེ་བ་ཆེན་པོ་ལྷན་ཅིག་སྐྱེས་པའི་ངོ་བོར་སྡོམ་པ་ནི་ཆོས་ཀྱི་སྐུ་དང་། དེ་ཉིད་འོག་མིན་དུ་གདུལ་བྱ་དག་པ་རྣམས་ལ་ལྷ་དྲུག་ཅུ་རྩ་གཉིས་ཀྱི་རྟེན་དང་བརྟེན་པར་བཅས་པའི་དཀྱིལ་འཁོར་དུ་ཤར་བ་ནི་ལོངས་སྤྱོད་རྫོགས་པའི་སྐུ་དང་། དེ་ཉིད་གདུལ་བྱ་གྲུབ་པའི་ས་ལ་གནས་པ་རྣམས་ལ་སྤྲུལ་པ་མཆོག་གི་དཀྱིལ་འཁོར་དུ་ཤར་བ་ནས། རིགས་ཅན་གསུམ་ལ་ཤཱཀྱ་ཐུབ་པ་ལ་སོགས་པ་དང་། རི་བོང་དང་། སྟག་དང་། སེང་གེ་དང་། གཟིངས་དང་ཟམ་པ་ལ་སོགས་པའི་རྣམ་འཕྲུལ་མཐའ་ཡས་པས་སེམས་ཅན་གྱི་དོན་བསམ་གྱིས་མི་ཁྱབ་པ་མཛད་པ་ནི་སྤྲུལ་པའི་སྐུར་བཞེད་ཅིང་། དེ་དག་གི་ཕྲིན་ལས་ཐམས་ཅད་ཀྱང་སྐུ་གསུམ་གྱི་ཕྲིན་ལས་ཡིན་པར་བཞེད་དོ།། །།དགེ་ལེགས་ཐར་པའི་ཡོན་ཏན་མ་ལུས་པ། །གང་ལ་བརྟེན་ནས་བདེ་བླག་བསྒྲུབ་ནུས་པའི། །ལུས་རྟེན་ཕུན་ཚོགས་དལ་བ་ཐོབ་དུས་འདིར། །རིན་ཆེན་སངས་རྒྱས་བསྟན་ལ་འཇུག་པར་རིགས། །དེ་ལའང་ཕ་རོལ་ཕྱིན་པའི་སྡེ་སྣོད་ལས། །བསྒྲུབ་བྱའི་དོན་གཅིག་སྒྲུབ་བྱེད་རྣམ་བཞི་ཡིས། །བསྒྲུབ་པའི་ཚུལ་གྱིས་ཁྱད་པར་ཆེས་འཕགས་པའི། །རྡོ་རྗེ་ཐེག་པ་སྙིང་པོར་བླང་བྱ་ཡིན། །ཟབ་མོའི་རྒྱུད་ལའང་བྱ་སྤྱོད་རྣལ་འབྱོར་དང་། །རྣལ་འབྱོར་ཆེ་དང་གསང་དང་གསང་བའི་མཐའི། །རྒྱུད་སྡེ་དྲུག་གི་རྩེར་སོན་སྡོམ་པའི་རྒྱུད། །སྐལ་བཟང་སྐྱེ་བོའི་འཇུག་ངོགས་དམ་པ་ཡིན། །ཚུལ་འདི་ཕྱེ་ལ་འགྲན་པའི་ཟླ་མེད་པ། །གྲུབ་པའི་འཁོར་ལོས་སྒྱུར་བ་ལཱུ་ཧི་པས། །ལེགས་པར་བཀྲལ་བའི་མངོན་པར་རྟོགས་པའི་གཞུང་། །ཇི་བཞིན་བཤད་པའི་བསྟན་བཅོས་འདི་བྱས་སོ། །ཐོག་མར་སྐུལ་བྱེད་ཐར་པའི་ལམ་ཞུགས་པ། །དད་ལྡན་བསོད་ནམས་རིན་ཆེན་བསམ་པ་ཚིམ། །བར་དུ་སྐུལ་བྱེད་བློ་གསལ་འདུས་པའི་ཚོགས། །ཀུན་ཀྱང་འདི་ལ་དགའ་བས་རྗེས་ཡི་རང་། །ཐ་མར་རྩེ་གཅིག་གསོལ་བ་འདེབས་བྱེད་པ། །འཇིག་རྟེན་བྱ་བ་བཏང་ནས་དམ་པའི་ཆོས། །བརྩོན་པས་སྒྲུབ་བྱེད་ཀུན་དགའ་མཆོག་ལྡན་གྱི། །དགོངས་པ་དབྱར་གྱི་མཚོ་བཞིན་གང་བར་གྱུར། །སྦས་པའི་སྙན་བརྒྱུད་ཧ་ཅང་གསལ་སྟོན་དང་། །བྱིས་བློ་གནས་ལུགས་དོན་ལས་གོལ་བ་དང་། །མ་འབྲེལ་འགལ་བའི་ཚིག་སྦྱོར་ཅི་མཆིས་པ། །བླ་མ་མཁའ་འགྲོའི་ཚོགས་ཀྱིས་བཟོད་པར་མཛོད། །འདི་བགྱིས་པ་ལས་ངལ་བར་གྱུར་པའི་དགེ་ཚོགས་དྲི་མེད་སྟོན་ཀའི་ཟླ་ལྟར་དཀར་བའམ། །སེམས་ཀྱི་མཚོ་ལ་པདྨོས་ཁེབས་པ་ལྟ་བུ་གང་ཞིག་ཐོབ་པ་དེ་ཡིས་ལུས་ཅན་ཀུན། །གནས་གསུམ་མཁའ་འགྲོའི་ཚོགས་ཀྱིས་བརྩེ་བའི་གླང་ཆེན་ཁུར་གྱིས་མཁའ་སྤྱོད་གནས་སུ་ལེགས་ཁྲིད་ནས། །སྤྲུལ་པའི་ལུས་ཀྱིས་སངས་རྒྱས་ཞིང་སྦྱངས་སེམས་ཅན་སྨིན་བྱས་རྡོ་རྗེ་འཛིན་པའི་ས་ཐོབ་ཤོག །བདག་ཀྱང་དེང་ནས་བྱང་ཆུབ་མ་ཐོབ་བར། །སངས་རྒྱས་ཀུན་གྱིས་བསྔགས་པའི་ཞིང་གི་མཆོག །བདེ་བ་ཅན་དུ་གྲགས་པ་དེར་སྐྱེས་ནས། །འོད་དཔག་མེད་པའི་ཞལ་མཆོག་མཐོང་བར་ཤོག །ཆོས་ཚུལ་འདི་ཡང་སྲིད་པའི་མཐར་ཐུག་བར། །བླ་མ་ལ་གུས་དད་དང་སྙིང་རྗེར་བཅས། །དམ་ཚིག་སྡོམ་ལྡན་འགྲོ་བ་མ་ལུས་པ། །རྟག་ཏུ་བརྟེན་པའི་ཕྲིན་ལས་དབང་བསྒྱུར་ཤོག །དཔལ་འཁོར་ལོ་བདེ་མཆོག་ལཱུ་ཧི་པའི་ལུགས་ཀྱི་བསྐྱེད་པའི་རིམ་པའི་རྣམ་པར་བཤད་པ་འདོད་དགུ་སྦྱིན་པའི་དཔག་བསམ་ལྗོན་པ་ཞེས་བྱ་བ་འདི་ནི་སྒོམ་སྡེའི་ཡུལ་དུ་སྐྱེས་པའི་དགེ་སློང་བློ་གསལ་ཞིང་དད་པ་དང་ལྡན་པ་བསོད་ནམས་རིན་ཆེན་གྱིས། བདེ་མཆོག་ལཱུ་ཧི་པའི་རྣམ་བཤད་གསང་མཐའི་ཟབ་དོན་འདུས་པ་ཞིག་གྱིས་ཤིག་ཅེས་རྒྱང་རིང་པོ་ནས་གསོལ་བ་བཏབ་པ་དང་། བར་དུ་དོན་གཉེར་དུ་མས་བསྐུལ་ཞིང་། མཐར་སྐྱེས་བུ་དུ་མས་འཕྲལ་དུ་བསྐུལ་བའི་ངོར། རྡོ་རྗེ་འཛིན་པ་མཆོག་གི་ས་བརྙེས་པ་རྗེ་བཙུན་ཀུན་དགའ་བཟང་པོའི་ཞལ་སྔ་ནས་དང་། འཇིག་རྟེན་དབང་ཕྱུག་དང་མི་གཉིས་པའི་ཐུགས་མངའ་བ་མུས་ཆེན་དཀོན་མཆོག་རྒྱལ་མཚན་དཔལ་བཟང་པོའི་གསུང་ལས་སྐྱེས་པ་མང་དུ་ཐོས་པའི་དགེ་སློང་བསོད་ནམས་སེང་གེས་གསང་མཐའི་རྒྱུད་འགྲེལ་གཞུང་ཕྲན། མན་ངག་རྣམས་ལ་ཡུན་རིང་དུ་འདྲིས་པར་བྱས་ནས་མེ་ཕོ་རྟའི་ལོ་ལ་དཔལ་ཨེ་ཝཾ་ཆོས་ལྡན་གྱི་དགོན་པར་སྦྱར་བའི་ཡི་གེ་པ་ནི་གཞོན་ནུ་བཟང་པོའོ།། །།བཀྲ་ཤིས་པར་གྱུར་ཅིག །དགེའོ།། །།