རིམ་པ་བཞི་པའི་ཁྲིད་ཡིག་གསུང་སྒྲོས་མ།
རིམ་པ་བཞི་པའི་ཁྲིད་ཡིག་གསུང་སྒྲོས་མ་བཞུགས་སོ།། །།སྐུ་གསུམ་ལྷུན་གྲུབ་གཞིར་གནས་རྩ་ཁམས་ལ། །ཨཾ་ཡིག་འོད་ཀྱིས་བྱང་སེམས་བཞུས་པ་ལས། །ཡས་འབབ་མས་བརྟན་དགའ་བཞིའི་རིམ་གྱིས་ནི། །གསང་བ་སྒྲུབ་མཛད་རྗེ་བཙུན་བླ་མ་རྒྱལ། །གང་གི་ཞབས་པད་བསྟེན་པའི་བཀའ་དྲིན་ལས། །ཚུལ་བཞིན་རྙེད་པ་ཤེས་བྱ་རྒྱུད་ཀྱི་རིམ། །ཉམས་ལེན་སྔགས་དང་སྐྱེ་བ་ཡེ་ཤེས་དང་། །འབྲས་བུ་གསང་བའི་རིམ་པ་འདིར་བརྗོད་བྱ།། །།རྣལ་འབྱོར་གྱི་དབང་ཕྱུག་ཆེན་པོ་སྤྱོད་པའི་རྡོ་རྗེའི་དགོངས་པས་འཁོར་ལོ་བདེ་མཆོག་གི་ལམ་གྱི་རིམ་པ་ནི། སྐལ་བ་དང་ལྡན་པའི་རྟེན་གྱི་གང་ཟག་ལ། སྦྱིན་བྱ་བཞི་བྱིན་ནས་བསླབ་བྱ་གཉིས་ལ་བསླབས་ཏེ། གྲོགས་སྤྱོད་པ་གསུམ་གྱིས་མཚམས་སྦྱར་བས། འབྲས་བུ་སྐུ་གསུམ་ཡེ་ཤེས་ལྔ་འགྲུབ་པ་ཞིག་ཡིན་པར་བཞེད་དོ། །དེ་ལ་སྐལ་བ་དང་ལྡན་པའི་རྟེན་གྱི་གང་ཟག་ནི་ཕ་རོལ་ཏུ་ཕྱིན་པའི་ཐེག་པས་རིམ་པ་བཞིན་བློ་སྦྱངས་ནས། རྡོ་རྗེ་ཐེག་པའི་སྣོད་རུང་དུ་བྱས་པའི་སྐལ་དམན་རིམ་གྱིས་འཇུག་པའམ། སྐྱེ་བ་སྔ་མ་ནས་ཐེག་པ་ཆེན་པོའི་ལམ་ལ་གོམས་པའི་སྟོབས་ཀྱིས་ཚེ་འདིར་དང་པོ་ཉིད་ནས་སེམས་ཅན་ཀྱི་དོན་དུ་ཕྱག་ཆེན་མཆོག་གི་དངོས་གྲུབ་ཐོབ་པར་འདོད་པའི་སྐལ་ལྡན་ཅིག་ཆར་བ་གང་ཡང་རུང་བའོ། །དེ་ལ་སྦྱིན་བྱ་བཞི་བྱིན་པ་ནི་འཁོར་ལོ་བདེ་མཆོག་ལྷ་མངལ་སྐྱེས་ལྟར་བསྐྱེད་པའི་དཀྱིལ་འཁོར་དུ་མངོན་པར་དབང་བསྐུར་བ་བཞི་ཚུལ་བཞིན་ཐོབ་པའོ། །དེས་བསླབ་བྱ་གཉིས་ལ་བསླབ་པ་ནི། རིམ་པ་གཉིས་ལ་བསླབ་པ་སྟེ། འདི་ལ་སྔོན་འགྲོ་དང་དངོས་གཞི་གཉིས་ལས། དང་པོ་ལ་ཚོགས་གསོག་པར་བྱེད་པར་མཎྜལ་གྱི་ཁྲིད། བྱིན་རླབས་འཇུག་པར་བྱེད་པ་བླ་མའི་རྣལ་འབྱོར། སྡིག་པ་སྦྱོང་བར་བྱེད་པ་རྡོ་རྗེ་སེམས་དཔའི་བསྒོམ་བཟླས་གསུམ་གྱི་དང་པོ་གཉིས་ཕྱོགས་གཅིག་ཏུ་ཉམས་སུ་ལེན་པ་ནི། གནས་དབེན་པར་མཎྜལ་དང་། ཚོམ་བུའི་རྒྱུ་རྣམས་འདུས་བྱས་ཏེ། སྐྱབས་འགྲོ་སེམས་བསྐྱེད་སྔོན་དུ་སོང་ནས་མདུན་གྱི་ནམ་མཁའི་སྟེང་གི་ཆ་ལ་སེང་གེས་བཏེག་པའི་རིན་པོ་ཆེའི་ཁྲི། སྣ་ཚོགས་པདྨ་དང་། ཟླ་བའི་གདན་གྱི་སྟེང་དུ། རྩ་བའི་བླ་མ་རྗེ་བཙུན་རྡོ་རྗེ་ཆོས་ཀྱི་རྣམ་པ་ཅན། སྐུ་མདོག་དམར་པོ་ཞལ་གཅིག་པ། ཕྱག་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བསྣོལ་ནས་འཛིན་པ། རུས་པའི་རྒྱན་དྲུག་གིས་བརྒྱན་པ། ཕྱག་ན་རྡོ་རྗེ་ལ་སོགས་པ་བརྒྱུད་པའི་བླ་མ་ཐམས་ཅད་ཀྱིས་བསྐོར་བ་དང་། འོག་གི་ཆ་ལ་འཁོར་ལོ་བདེ་མཆོག་ལྷ་སུམ་ཅུ་སོ་བདུན་གྱི་དཀྱིལ་འཁོར་མངོན་སུམ་ལྟར་དམིགས་ནས་མཎྜལ་ཚོམ་བུ་བདུན་པ་དབུལ་ཏེ། ཚར་བདུན་བདུན་གྱི་རྗེས་སུ་རིམ་པ་གཉིས་ཀྱི་ཏིང་ངེ་འཛིན་བཟང་པོ་སྐྱེ་བར་གསོལ་བ་གདབ་པ་ཡུན་རིང་དུ་བྱའོ། །གསུམ་པ་ནི། ཨ་བྷི་དྷ་ན་ནས་གསུངས་པའི་རྡོ་རྗེ་སེམས་དཔའི་བསྒོམ་བཟླས་སྡིག་པ་དག་པའི་མཚན་མ་ནམ་བྱུང་གི་བར་དུ་བྱའོ། །གཉིས་པ་ལ་བསྐྱེད་རིམ་ལ་བསླབ་པ་དང་། རྫོགས་རིམ་ལ་བསླབ་པ་གཉིས་ལས། དང་པོ་ནི། སྐྱབས་འགྲོ་སེམས་བསྐྱེད་ནས་བྱང་ཆུབ་ཀྱི་ཕྱོགས་ཀྱི་དག་པ་དྲན་པའི་བར་འཁོར་ལོ་བདེ་མཆོག་མངལ་སྐྱེས་ཀྱི་མངོན་པར་རྟོགས་པ་ཚང་བར་བསྒོམས་ནས། དེ་ནས་གཙོ་བོའི་ཞལ་དང་། སྤྱན་དང་། ཕྱག་མཚན་དང་། འཁོར་གྱི་ལྷ་དང་། གཞལ་ཡས་ཁང་པ་དང་། སྣོད་བཅུད་ཐམས་ཅད་ཀྱང་རྟེན་དང་བརྟེན་པར་བསྒོམས་ཏེ་བསྐྱེད་རིམ་ལ་སེམས་འཛིན་ནོ། །མཇུག་ཏུ་སྔགས་ཀྱི་བཟླས་པ་ཅུང་ཟད་དང་། དཀྱིལ་འཁོར་གྱི་འཁོར་ལོ་སྣ་བུག་གཉིས་ནས་སྙིང་གར་བསྡུས་ཏེ། གོ་ཆ་གསུམ་དང་། ཚམ་རྔམ་སྔགས་ཀྱི་བསྲུང་བ་བྱས་ནས་རྗེས་སྤྱོད་ལམ་ལ་འཇུག་གོ །དེ་ལྟ་བུའི་ཚུལ་གྱིས་སྣང་བའི་དངོས་པོ་ཐམས་ཅད་ལྷར་མ་ཤར་གྱི་བར་དུ་བསྒོམ་པར་བྱའོ། །གཉིས་པ་ནི། སློབ་དཔོན་འདིས་བླ་མེད་སྤྱིའི་རྫོགས་པའི་རིམ་པ་གསང་བའི་དེ་ཁོ་ན་ཉིད་རབ་ཏུ་གསལ་བ་མཛད་དེ། ཕ་རྒྱུད་གསང་བ་འདུས་པ་དང་མ་རྒྱུད་འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་ཀྱང་བརྗོད་བྱ་རིམ་པ་བཞི་སྟོན་པར་མཚུངས་པའོ། །མ་རྒྱུད་སྤྱིའི་རྫོགས་པའི་རིམ་པ་རིམ་པ་བཞི་པ་མཛད་དེ། ཀྱེ་རྡོ་རྗེ་དང་འཁོར་ལོ་བདེ་མཆོག་གཉིས། རྗོད་བྱེད་གླེང་གཞིའི་ཡི་གེ་ཐ་དད་ཀྱང་བརྗོད་བྱ་རིམ་པ་བཞི་སྟོན་པར་མཚུངས་པའོ། །འཁོར་ལོ་བདེ་མཆོག་གི་ཐུན་མོང་མ་ཡིན་པའི་རྫོགས་པའི་རིམ་པ་དཔྱིད་ཀྱི་ཐིག་ལེ་མཛད་དེ། སཾ་བུ་ཊིའི་བརྟག་པ་དྲུག་པ་ནས་སྙིང་གའི་ཧཱུྃ་གི་ནང་གི་བྱང་ཆུབ་ཀྱི་སེམས་དཔྱིད་དང་། ལྟེ་བའི་ཨཾ་ཐིག་ལེ་གཉིས་སྙོམས་པར་འཇུག་པའི་རྫོགས་རིམ་བསྒོམ་ཚུལ་གསུངས་པ་དེ་སྟོན་པའོ། །རིམ་པ་བཞི་པ་འདི་ལའང་འབྲོག་མི་ནས་བརྒྱུད་པ་ལམ་སྐོར་དགུའི་ཁོངས་སུ་གཏོགས་པ་དང་། ནཱ་རོ་ཏ་པ་ནས་བརྒྱུད་པ་གསང་མཐའ་བའི་ལུགས་གཉིས་ལས། ཕྱི་མ་ལ་རྗེ་ས་ཆེན་གྱིས་ནག་འབུམ་དུ་རིམ་བཞིའི་བསྡུས་དོན་དང་། ཐོ་ཡིག་གཉིས། ལོགས་སུ་རིམ་བཞི་ལམ་སློང་དང་གསུམ་མཛད་ཅིང་འདི་དང་པུ་ཧྲངས་ལོ་ཆུང་གི་དངོས་སློབ་དམར་བརྩོན་འགྲུས་རྒྱལ་མཚན་གྱིས་མཛད་པའི་རིམ་བཞི་གཉིས་ལ་ཁྱད་པར་མི་འདུག་པས། ནཱ་རོ་པའི་མན་ངག་ཏུ་ཡིད་ཆེས་བསྐྱེད་པའི་རྒྱུར་འགྱུར་བ་ཡིན་ནོ་གསུང་ངོ་། །དེ་དག་གི་དོན་ཉམས་སུ་ལེན་པ་ལ། རིམ་པ་བཞི་ལས། དང་པོ་ཤེས་བྱ་རྒྱུད་ཀྱི་རིམ་པ་ནི། སྤྱིར་ཐ་མལ་པ་འཆི་བའི་དུས་སུ་འབྱུང་བ་བཞིའི་རིམ་གྱིས་རགས་པ་ལུས་ཐིམ་ཚུལ་དང་། སྣང་མཆེད་ཐོབ་གསུམ་གྱི་རིམ་གྱིས་སེམས་ཐིམ་ཚུལ་དང་། དེ་ནས་ལུགས་ལྡོག་གི་སྣང་བ་གསུམ་ལས་བར་དོ་གྲུབ་ཚུལ་དང་། དེ་ཉིད་མངལ་དུ་སྐྱེ་བ་བླངས་པ་ན་ཕ་མའི་ཁུ་ཁྲག་ལས་ལུས་གྲུབ་ཚུལ་དང་། དེ་ལས་ཐོག་མར་རྩ་ཁམས་ཇི་ལྟར་གྲུབ་པ། བར་དུ་ཇི་ལྟར་འཕེལ་བ། མཐར་ཇི་ལྟར་གནས་པའི་ཚུལ་རྣམས་རྒྱས་པར་ཤེས་པར་བྱ་བ་ཡིན་ཞིང་། འདིར་སྐབས་སུ་བབ་པའི་ཉམས་ལེན་ནི། སྔར་བཞིན་དག་པ་དྲན་པའི་བར་མངོན་པར་རྟོགས་པ་ཚང་བར་བསྒོམས་ནས། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས། སྣོད་བཅུད་ཐམས་ཅད་སྲུང་བའི་འཁོར་ལོ་ལ་བསྡུ། དེ་དུར་ཁྲོད་བརྒྱད་ལ། དེ་གཞལ་ཡས་ཁང་ལ། དེ་འཁོར་གྱི་ལྷ་རྣམས་ལ། འཁོར་གྱི་ལྷ་རྣམས་ཕྱོགས་གཡོན་སྐོར་གྱིས་སྣ་བུག་གཡོན་དང་། མཚམས་གཡས་སྐོར་གྱིས་སྣ་བུག་གཡས་ནས་སྙིང་གའི་ཧཱུྃ་ལ་བསྡུ། ཡུམ་ཡང་འོད་ཀྱི་རྣམ་པས་སྣ་བུག་གཡོན་ནས་ལྟེ་བའི་ཨཾ་ལ་བསྟིམས་པས་ཨཾ་གི་འོད་ཀྱིས་མུན་ཁུང་དུ་སྒྲོན་མེ་བཏེག་པ་ལྟར་ལྟེ་བ་སྤྲུལ་པའི་འཁོར་ལོ་གསལ་གདབ་སྟེ། ནང་སྐོར་འདབ་མ་བརྒྱད་ལ་ཨ་ཀ་ཙ་ཊ་ཏ་པ་ཡ་ཤ་བརྒྱད། དེ་རེ་རེ་ལ་འདབ་ཆུང་བདུན་བདུན་གྱེས་པས་ཕྱི་སྐོར་ང་དྲུག་ལ་མདུན་ནས་གཡོན་སྐོར་དུ་ཨཱ་ལི་བཅུ་དྲུག གཡས་སྐོར་དུ་ཀཱ་ལི་སོ་བཞི། ཨཱ་ཨཱི་ཨཱུ་ཨཻ་ཨཽ་ཨཾ་སྟེ་རིང་པོ་དྲུག་བཀོད། ཐམས་ཅད་ཀྱང་ཁ་དོག་དམར་པོ་མགོ་གྱེན་བསྟན་ནོ། །ཡང་དེའི་འོད་ཀྱིས་སྙིང་ག་ཆོས་ཀྱི་འཁོར་ལོ་གསལ་གདབ་སྟེ། འདི་ལ་རིམ་བཞིའི་གཞུང་དང་ཐོ་ཡིག་ལས་དབུས་སུ་ཧཱུྃ་དང་། ཕྱོགས་བཞིར་ཨོཾ་ཏྲཱཾ་ཧྲཱིཿཨཱཿམཚམས་བཞིར་ལྃ་མཱྃ་པཱྃ་ཏཱྃ་བཞི་བཀོད་པར་བཤད་ཀྱང་། འདིར་དཔྱིད་ཀྱི་ཐིག་ལེ་ལྟར་དབུས་སུ་ཧཱུྃ། ཕྱོགས་བཞིར་ཨ་ཨི་ཨེ་ཨོ་སྟེ་ཐུང་ངུ་བཞི། མཚམས་བཞིར་ཡ་ར་ལ་ཝ་བཞི་ཁ་དོག་སྔོན་པོ་མགོ་ཐུར་བསྟན་བཀོད་གསུངས། ཡང་དེའི་འོད་ཀྱིས་མགྲིན་པ་ལོངས་སྤྱོད་ཀྱི་འཁོར་ལོ་གསལ་གདབ་སྟེ། གཞུང་དང་ཐོ་ཡིག་ལས་ཕྱོགས་བཞིར་ཐུང་ངུ་བཞི་བཀོད་པར་གསུངས་ཀྱང་། འདིར་དཔྱིད་ཐིག་ལྟར་དབུས་སུ་ཨོཾ། ཕྱོགས་བཞིར་ནང་སྐོར་ལ་ཨཱ་ཨཱི་ཨཱུ་ཨཻ་སྟེ་རིང་པོ་བཞི། དེ་རེ་རེ་ལ་འདབ་ཆུང་གསུམ་གསུམ་དུ་གྱེས་པའི་ཕྱི་སྐོར་བཅུ་གཉིས་ལ་དབྱངས་མ་ནིང་དང་བྲལ་བ་བཅུ་གཉིས་ཁ་དོག་དམར་པོ་མོག་གྱེན་བསྟན་འགོད་གསུང་། འཁོར་ལོ་འདི་གཉིས་དཔྱིད་ཐིག་ལྟར་ན་གཡོན་སྐོར་རོ། །ཡང་དེའི་འོད་ཀྱིས་སྤྱི་བོ་བདེ་ཆེན་གྱི་འཁོར་ལོ་གསལ་གདབ་སྟེ། དབུས་སུ་ཧཾ། འདབ་མ་སོ་གཉིས་ལ་ཨཱ་ལི་བཅུ་དྲུག་གཡས་སྐོར་དང་གཡོན་སྐོར་དུ་ཁ་དོག་དཀར་པོ་མགོ་ཐུར་བསྟན་འགོད་དོ། །དེ་དག་གི་དབུས་སུ་རྩ་གསུམ་ཡང་གསལ་གདབ་སྟེ། དབུས་སུ་ཨ་ཝ་དྷཱུ་ཏཱི། གཡས་སུ་མེ་མ་དམར་པོ་ཁ་གྱེན་བསྟན། དེའི་ནང་དུ་ཀཱ་ལི་གཉིས་གཉིས་ལ་ཨཱ་ལི་རེ་རེས་སྤེལ་བ། མགོ་བོར་ཨོཾ་དང་མཐར་ཧཱུྃ་ཕཊ་དང་ལྡན་པ་ཁ་གྱེན་བསྟན། གཉིད་མ་དཀར་པོ་ཁ་ཐུར་བསྟན། དེའི་ནང་དུ་ཡི་གེ་སྔ་མ་དང་འདྲ་བ་ཁ་ཐུར་བསྟན་ནོ། །བཤང་སྒོར་རླུང་དང་སུམ་མདོར་མེ་སྟེ། དེ་ལྟར་རྩ་གསུམ་འཁོར་ལོ་དྲུག་ཡི་གེ་དང་བཅས་པ་ཡུན་རིང་དུ་གསལ་གདབ་ཅིང་བསྒོམ་མོ། །དེ་དག་ནི་རྒྱུད་ཀྱི་རིམ་པ་སྟེ། རྒྱུད་ནི་འཁོར་ལོ་བཞི་ལ་སོགས་པ་ལུས་ལ་ཡེ་ནས་གནས་པ་ཡིན་ལ། རིམ་པ་ནི་དེ་རིམ་གྱིས་གསལ་འདེབས་པ། མཐར་ཕྱིན་པའི་ཚད་ནི་རྩ་གསུམ་དང་འཁོར་ལོ་དྲུག་ཡིད་ལ་གསལ་བར་སྣང་བའོ། །གཉིས་པ་ཉམས་ལེན་སྔགས་ཀྱི་རིམ་པ་ལ་སྔོན་འགྲོ་ནི། རླུང་འབྱུང་འཇུག་དང་བསྟུན་ཏེ། རླུང་ཕྱིར་འབྱུང་བའི་ཚེ་གཡས་མེ་མ་ཡི་གེ་དང་བཅས་པ་གསལ་གདབ། ནང་དུ་འཇུག་པའི་ཚེ་གཡོན་གཉིད་མ་ཡི་གེ་དང་བཅས་པ་གསལ་གདབ། ཅུང་ཟད་གནས་པའི་ཚེ་ཨཾ་འབར་བ་ལ་སེམས་གཏད་དེ་ཡུན་རིང་དུ་བསྒོམ། དེ་ལ་གོམས་ནས་ནང་དུ་འཇུག་པ་དང་བསྟུན་ཏེ། རླུང་ལྟེ་བའི་ཨཾ་ལ་བསྟིམ་ཞིང་ཤེས་པ་ཨཾ་ལ་གཏད་དེ་སྟེང་རླུང་ཐུབ་ཚད་དུ་མནན། དེ་ལྟར་དྲག་ལ་ཡུན་ཐུང་བ་ཡང་ཡང་དུ་བསྒོམས་པས་ལྟེ་བའི་གནས་སུ་དུ་བ་ལ་སོགས་པའི་རྟགས་ལྔ་སྐྱེས་ཞིང་ཨཾ་གི་མེ་ཡང་སོར་གཉིས་ལ་སོགས་པ་ནས་མགྲིན་པའི་བར་དུ་འབར་བ་སྙམ་བྱེད་པ་འབྱུང་ངོ་། །དེ་ནས་སྔགས་རིམ་དངོས་ནི་འོག་རླུང་དྲག་ཏུ་བསྐུམས་པས་ཨཾ་གིས་མེ་སྦར་ཏེ། ཡར་རོ་མ་ནས་སོང་སྟེ་འཁོར་ལོ་གོང་མ་གསུམ་གྱི་ཡིག་འབྲུ་རྣམས་རིམ་པ་བཞིན་དུ་བསྲེགས་ནས་སྨིན་མཚམས་གནས་ཀྱི་སྒོ་ཕྱེ་ནས། སྣ་བུག་གཡས་ནས་བྱུང་སྟེ། མདུན་གྱི་ནམ་མཁར་དེ་བཞིན་གཤེགས་པ་དཔག་ཏུ་མེད་པ་བསྒོམས་ལ། དང་པོར་གཅིག་དང་དེ་ནས་ཇེ་མང་། མཐར་ཐམས་ཅད་ཀྱི་ཤངས་བུག་གཡས་ནས་ཞུགས། དེ་དག་གི་སྤྱི་བོ་ལ་སོགས་པའི་འཁོར་ལོ་བཞི་རིམ་པ་བཞིན་བཞུ་བཏུལ་བྱས་ནས་ལྟེ་བའི་གནས་སུ་མེ་དང་བྱང་ཆུབ་ཀྱི་སེམས་འདྲེས་པ་དེ་རྩ་གཡས་ནས་བྱུང་བ་ཤངས་བུག་གཡས་ནས་རང་གི་སྣ་བུག་གཡོན་དུ་ཞུགས། སྤྱི་བོ་གསེར་གྱི་སྒོ་ཕྱེ་སྟེ་སྤྱི་བོའི་འཁོར་ལོ་བྱང་ཆུབ་སེམས་ཀྱིས་ཁེངས། ཡང་གཡོན་རྐྱང་མ་ནས་ཞུགས་ཏེ། འཁོར་ལོ་འོག་མ་རིམ་པ་གསུམ་རིམ་པ་བཞིན་ཁེངས་པས་འཁོར་ལོ་བཞིའི་གནས་སུ་ཡས་འབབ་ཀྱི་དགའ་བ་བཞི་སྐྱེས་པར་བསམ། བྱང་ཆུབ་ཀྱི་སེམས་ཨཾ་ལ་ཕོག་པས་ཨཾ་དྲག་ཏུ་འབར་ཏེ་དབུ་མ་ཁ་བྱེ་ནས་སྙིང་ཁའི་ཧཱུྃ་དང་། མགྲིན་པའི་ཨོཾ་ཞེན་ཐོགས་མེད་པར་བཅོམ་ནས་སྤྱི་བོའི་ཧཾ་ལ་ཕོག་པས། དེ་ལས་བྱང་ཆུབ་ཀྱི་སེམས་འཛག་པའི་འབར་འཛག་ལ་སེམས་གཏད་དེ་སྟེང་རླུང་མནན་ལ་བསྒོམ་མོ། །དེའི་ཚེ་ལུས་འཕར་གཡོ་དང་། ངག་ཏུ་ཀུ་ཅོ་འདོན་པ་སོགས་བྱུང་ན་ཧཾ་མགོ་གཅད་པ་ཞེས་བྱ་བ། རླུང་རྔུབ་ཅིང་དྲག་ཏུ་འབུད་པ་ལན་གསུམ་བྱས་ནས་སྤྱི་བོའི་ཧཾ་མི་དམིགས་པར་བྱ། དེས་ཀྱང་མ་ཞི་ན་སྙིང་ག་ཡན་ཆད་ཀྱི་ལུས་ཁ་ཡེད་དུ་བྱ། དེས་ཀྱང་མ་ཞི་ན་ཐམས་ཅད་སེམས་སུ་ཤེས་པར་བྱའོ། །དེ་དག་ནི་སྔགས་ཀྱི་རིམ་པ་སྟེ། སྔགས་ནི་ལྟེ་བའི་ཨཾ། རིམ་པ་ནི་རིམ་གྱིས་སྦར་ཏེ། རང་གི་འཁོར་ལོ་དང་དེ་བཞིན་གཤེགས་པའི་འཁོར་ལོ་རྣམས་བསྲེག་པ་ནས་འབར་འཛག་ལ་སེམས་གཏད་པའི་བར་རོ། །མཐར་ཕྱིན་པའི་ཚད་ནི་འཕར་གཡོ་ལ་སོགས་པའོ། །གསུམ་པ་སྐྱེ་བ་ཡེ་ཤེས་ཀྱི་རིམ་པ་ནི། ཨཾ་གི་མེས་སྤྱི་བོའི་ཧཾ་ལས་བྱང་ཆུབ་ཀྱི་སེམས་དབུ་མའི་ལམ་ནས་རྡོ་རྗེ་ནོར་བུའི་བར་དུ་ཕབ་ནས་བདེ་བ་ལ་སེམས་གཏད་དེ་རླུང་ཁ་སྦྱར་བསྒོམ་མོ། །དེ་ལྟར་གཏད་པས་བདེ་བ་མི་བཟོད་ཅིང་ནོར་བུ་འགས་པ་སྙམ་བྱེད་ན་མས་བརྟན་གྱི་དགའ་བ་བཅུ་དྲུག་བསྒོམ་པ་ནི། རྡོ་རྗེ་ནོར་བུའི་རྐེད་པར་བདེ་བ་ལ་སེམས་གཏད་པས་དགའ་བའི་དགའ་བ། དེར་ཡང་མི་བཟོད་ན་རྩ་བར་བདེ་བ་ལ་སེམས་གཏད་པས་དགའ་བའི་མཆོག་དགའ། དེར་ཡང་མི་བཟོད་ན་དེ་ནས་ལྟེ་བའི་བར་གྱི་བཞི་ཆ་གཅིག་ལ་བདེ་བ་ལ་སེམས་གཏད་པས་དགའ་བའི་དགའ་བྲལ། དེར་མི་བཟོད་ན་ལྟེ་བར་བདེ་བ་ལ་སེམས་གཏད་པས་དགའ་བའི་ལྷན་སྐྱེས། དེ་བཞིན་དུ་ལྟེ་བ་ནས་སྙིང་གའི་བར་ལ་མཆོག་དགའི་བཞི། སྙིང་ག་ནས་མགྲིན་པའི་བར་ལ་དགའ་བྲལ་གྱི་བཞི། མགྲིན་པ་ནས་སྤྱི་བོའི་བར་དུ་ལྷན་སྐྱེས་ཀྱི་བཞི་སྐྱེས་པར་བསམས་ལ་རིམ་པ་བཞིན་བདེ་བ་ལ་སེམས་གཏད་དོ། །དེ་དག་ནི་ཡེ་ཤེས་ཀྱི་རིམ་པ་སྟེ། ཡེ་ཤེས་ནི་དགའ་བ་བཅུ་དྲུག་གི་མཐར་ལྷན་སྐྱེས་མྱོང་བ། རིམ་པ་ནི་རྡོ་རྗེ་ནོར་བུར་བདེ་བ་བསྒོམ་པ་ནས་མཛོད་སྤུར་བདེ་བ་བསྒོམ་པའི་བར་རོ། །མཐར་ཕྱིན་པའི་ཚད་ནི་བདག་གི་རྒྱུད་བདེ་བས་མྱོས་པ་ལ་སོགས་པའོ། །བཞི་པ་འབྲས་བུ་གསང་བའི་རིམ་པ་ནི། སྣའི་བར་གྱི་ཀ་བ་མེད་པ་སྒོ་ང་སྟོང་པ་ལྟ་བུར་བསྒོམས་ལ། དེ་ནས་སྲོག་རྩོལ་གྱི་རླུང་ཆ་མཉམ་སྟེ་སྤོས་དུད་བཞིན་ལུས་ཀྱི་ནང་ནས་བྱུང་། སྣའི་ཕུག་ཏུ་ཆི་ལི་ལི་འཆིལ་ནས་ཕར་མི་འགྲོ་བར་བསམ་མོ། །དེ་དག་ནི་གསང་བའི་རིམ་པ་སྟེ། གསང་བ་ནི་སྲོག་འཛིན་པའི་རླུང་། རིམ་པ་ནི་རླུང་སྐྱོན་རྣམས་རིམ་གྱིས་སེལ་བ། མཐར་ཕྱིན་པའི་ཚད་ནི་ལུས་རས་བལ་གྱི་ཟེགས་མ་ལྟར་ཡང་བ་དང་། སྨིག་རྒྱུ་ལ་སོགས་པའི་རྟགས་ལྔ་མཐོང་བའོ། །དེའི་ཚེ་ཆོས་ཐམས་ཅད་རང་གི་སེམས་སུ་འདུས་པས་ཕྱི་རོལ་གྱི་ཡུལ་ལ་མི་རྟོག་པར་བསྒོམ། སེམས་ཀྱི་རྟོག་པ་བྱུང་ཚོར་ཐམས་ཅད་མི་དམིགས་པར་བསྒོམ། དེ་ནས་ནང་གི་སེམས་དང་ཕྱི་རོལ་གྱི་ཡུལ་ཐམས་ཅད་གཉིས་སུ་མེད་པར་མི་དམིགས་པར་བསྒོམ་མོ། །དེ་ལྟར་བསྒོམས་པས་མངོན་པར་ཤེས་པ་ལྔ་རིམ་གྱིས་འཐོབ་པ་འབྱུང་སྟེ། དེ་ལ་གཉིས་སུ་མེད་པའི་རིམ་པ་ཞེས་ཀྱང་གསུང་ངོ་། །དེ་ལྟར་བསྒོམས་པས་ཆོས་མཆོག་མན་ཆད་ཀྱི་ལམ་ཆོད་ནས་ཕྱག་རྒྱ་ལུང་སྟོན་པ་འབྱུང་ལ། དེ་ལ་བརྟེན་ནས་འཇིག་རྟེན་ལས་འདས་པའི་ཡེ་ཤེས་མངོན་དུ་བྱེད་དེ། གནས་ལ་སོགས་པའི་ས་བཅུ་གཉིས་རིམ་གྱིས་བགྲོད་ནས་འབྲས་བུ་སྐུ་གསུམ་ཡན་ལག་བདུན་ལྡན་འཐོབ་པར་འགྱུར་རོ། །འདི་དག་ནི་ཉམས་སུ་ལེན་པའི་རིམ་པ་ས་མཚམས་དང་བཅས་པ་ཙམ་ཞིག་བྲིས་པ་ཡིན་ལ། རྒྱུད་རིམ་གྱི་སྐབས་སུ་རྩ་ཁམས་ལ་སོགས་པ་ཐོས་བསམ་གྱིས་ཇི་ལྟར་གཏན་ལ་དབབ་པའི་ཚུལ་དང་། རིམ་པ་ཕྱི་མ་རྣམས་ཀྱི་སྐབས་སུ་ཉམས་སྐྱེ་ཚུལ་ངོ་སྤྲོད་དང་བཅས་པ་དང་། གེགས་འབྱུང་ཚུལ་སེལ་ཚུལ་དང་བཅས་པ་དང་། ཡོན་ཏན་ཇི་ལྟར་འབྱུང་བའི་ཚུལ་རྣམས་ནི་རྣལ་འབྱོར་གྱི་དབང་ཕྱུག་ས་སྐྱ་པ་ཆེན་པོའི་རིམ་བཞི་ལམ་སློང་ལས་རྒྱས་པར་ཤེས་པར་བྱའོ། །ཉན་ཐོས་རང་རྒྱལ་ཕ་རོལ་ཕྱིན་པ་དང་། །བྱ་སྤྱོད་རྣལ་འབྱོར་རྒྱུད་དང་བླ་མེད་ཀྱིའང་། །ཐབས་ཀྱི་རྒྱུད་ལས་ཁྱད་པར་ཆེས་འཕགས་པའི། །གདམས་པའི་མཆོག་འདི་འདོམས་པར་བྱེད་པོ་ཉིད། །དབུ་སྐྱེས་ལྷག་བསམ་གངས་རིའི་རྩེ་ལྟར་དཀར། །བཞིན་རས་ཐུགས་རྗེ་བྱེ་རུའི་མདོག་ལྟར་དམར། །གསུང་དབྱངས་གོམ་སྟབས་ངང་པའི་འགྲོས་ལྟར་དལ། །དོན་བརྒྱད་བཞེས་ཚེ་བདེ་བ་ཅན་དུ་གསུངས། །དེ་ཚེ་དད་དང་བརྩོན་པའི་མགོ་དཀར་ཞིང་། །རྣམ་དཔྱོད་ལྟོ་བར་གསུང་རབ་ཤ་རུས་ཚོགས། །འབད་རྩོལ་མེད་པར་འཇུ་བར་ནུས་པ་ཡི། །གོ་བོའི་མིང་ཅན་རབ་འབྱམས་སྨྲ་བས་བསྡེབས། །ཉེས་ཚོགས་མཆིས་གང་བདག་གིས་ཉེས་པ་སྟེ། །བླ་མ་མཁའ་འགྲོའི་ཚོགས་ལ་བཟོད་པར་གསོལ། །དགེ་ཚོགས་ཅི་མཆིས་བླ་མའི་དྲིན་ལས་ཏེ། །འགྲོ་བ་ཀུན་ལ་ཕན་བདེའི་རྒྱུར་སྦྱིན་ནོ། །ཟབ་མོའི་གདམས་པ་རིམ་པ་བཞི་ཉམས་སུ་བླང་བའི་ཚུལ་འདི་ནི། ས་གསུམ་འགྲོ་བའི་རེ་བ་སྐོང་བར་མཛད་པའི་བདག་ཉིད་འདྲེན་པ་ཆེན་པོ་རྗེ་བཙུན་མུས་པའི་ཞལ་ནས་བྱུང་བ་བཞིན་སྟག་བྱང་ཆུབ་སེམས་དཔས་བསྐུལ་བའི་ངོར་མང་དུ་ཐོས་པའི་དགེ་སློང་བསོད་ནམས་སེང་གེ་གླིང་ཁ་བདེ་བ་ཅན་དུ་བྲིས་པ་འདི་ལ་མཁའ་འགྲོ་སྲུང་མའི་ཚོགས་རྣམས་བཟོད་པར་མཛད་དུ་གསོལ། འདིས་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དགེ་བ་འདི་ཡིས་དུས་གསུམ་གྱི། །རྒྱལ་བ་ཀུན་གྱི་གསང་ཆེན་མཛོད། །བླ་མེད་མཆོག་གི་བསྟན་པ་ནི། །དར་རྒྱས་ཡུན་དུ་འབར་གྱུར་གཅིག །དགེའོ། །དགེའོ། །དགེའོ།། །