འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ།

འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ་ཞེས་བྱ་བ་བཞུགས་སོ།། ཨོཾ་སྭ་སྟི་སིདྡྷཾ། འདུལ་བ་མདོ་རྩ་བའི་སྤྱི་དོན་ལེགས་བཤད་འོད་ཀྱི་སྣང་བ་ཚིག་དོན་རབ་གསལ་ཞེས་བྱ་བ། ཁམས་གསུམ་ཆོས་ཀྱི་རྒྱལ་པོ། ཆོས་ཀྱི་རྗེ། ཆོས་འདུལ་བ་ཐམས་ཅད་མཁྱེན་པ་ལ་སྒོ་གསུམ་གུས་པའི་སྒོ་ནས་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། ཤེས་བྱ་ཀུན་ལ་མུན་པ་གཏན་བཅོམ་ཞིང་། །སྲིད་པའི་མཚོ་ལས་འགྲོ་བ་མ་ལུས་པ། །དོན་བཞིན་སྟོན་པས་རབ་ཏུ་འདྲེན་མཛད་པ། །ཀུན་མཁྱེན་ཤཱཀྱའི་གཙོ་ལ་ཕྱག་བགྱིའོ། །བསླབ་གསུམ་ཡོན་ཏན་དཀྱིལ་འཁོར་ཡོངས་གང་ཞིང་། །འདུལ་བ་འབུམ་སྡེའི་འོད་དཀར་རབ་སྤྲོས་པས། །འཆལ་ཚུལ་གདུང་བ་མ་ལུས་སེལ་མཛད་པ། །བཙུན་པ་ཡོན་ཏན་འོད་ཀྱིས་འགྲོ་འདི་སྐྱོངས། །རྣམ་དཔྱོད་བརྩོན་པའི་གྲུ་གཟིངས་ཆེར་ཞུགས་ནས། །ཆོས་འདུལ་རྒྱ་མཚོའི་ཕ་རོལ་མཐར་སོན་ཏེ། །ཚུལ་ཁྲིམས་རིན་ཆེན་དགའ་སྟོན་འགྱེད་མཛད་པ། །དཔལ་ལྡན་བླ་མའི་ཞབས་ལ་ཕྱག་འཚལ་ནས། །བསྟན་པའི་རྩ་བ་སོ་སོ་ཐར་པ་ཡི། །ཐོག་མཐའ་བར་གྱི་རྣམ་གཞག་གསལ་བར་ནི། །རང་ཉིད་དྲན་པ་གསོ་དང་གཞན་དག་ལ། །ཕན་པར་བྱ་ཕྱིར་སྟོན་ལ་སྤྲོ་བ་སྐྱེས། །དེ་ལ་བཅོམ་ལྡན་འདས་ཀྱིས་བླ་ན་མེད་པའི་བྱང་ཆུབ་བརྙེས་པ་ནི་སེམས་ཅན་ཁོ་ནའི་ཆེད་དུ་ཡིན་པས་དེ་བརྙེས་ནས་སེམས་ཅན་གྱི་དོན་མཛད་དགོས་ལ། དེ་ཡང་གདུལ་བྱ་མྱང་འདས་སུ་ཁྲིད་པར་བྱེད་པའི་ལམ་རྣམ་དག་སྟོན་པར་བྱེད་པའི་སྒོ་ནས་ཡིན་གྱི། གཞན་གྱིས་མ་ཡིན་ཏེ། ལངྐར་གཤེགས་པ་ལས། ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང་། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་མཛད། །ཅེས་གསུངས་པ་ལྟར་རོ། །དེ་ཡང་གདུལ་བྱ་བསླབ་པ་གསུམ་ལ་འགོད་པ་ཉིད་ཡིན་ཏེ། ཉོན་མོངས་མ་སྤངས་པར་མྱང་འདས་མི་འཐོབ་ལ། ཉོན་མོངས་སྤོང་བ་ལ་ལྷག་པ་ཤེས་རབ་ཀྱི་བསླབ་པ་དགོས་ཤིང་དེའི་རྒྱུར་ཏིང་ངེ་འཛིན་སེམས་ཀྱི་བསླབ་པ་དགོས་ལ། དེའི་རྒྱུར་ཡང་ཚུལ་ཁྲིམས་ཀྱི་བསླབ་པ་ལ་འགོད་དགོས་པའི་ཕྱིར་ཏེ། ཚུལ་ཁྲིམས་དང་ལྡན་ན་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་སྐྱེ་ཞིང་། ཏིང་ངེ་འཛིན་དང་ལྡན་པའི་ཤེས་རབ་ནི་ཉོན་མོངས་སྤོང་བ་ལ་མཐུ་ཆེ་བས་སོ། །ཚུལ་ཁྲིམས་ཀྱི་བསླབ་པ་ལ་འགོད་པ་ལ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་རྣམས་བསྟན་དགོས་པས། འདིར་དེ་དག་གི་རྣམ་གཞག་འཆད་པ་ལ་གསུམ་སྟེ། བཤད་བྱ་སྟོན་པའི་གསུང་རབ། འཆད་བྱེད་དགོངས་འགྲེལ་གྱི་བསྟན་བཅོས་དང་དེའི་འགྲེལ་པ་ཇི་ལྟར་བྱུང་ཚུལ། སྐབས་ཀྱི་བསྟན་བཅོས་ཀྱི་དོན་ལ་འཇུག་པའོ། །དང་པོ་ལ་གསུང་རབ་ངོས་གཟུང་བ་དང་། ལུང་གིས་སོ་ཐར་ཇི་ལྟར་འགྲེལ་པའི་ཚུལ་གཉིས། དང་པོ་ནི། རྩ་བའི་མདོ་སོ་སོར་ཐར་པ་རྣམ་པ་གཉིས་དང་། དེའི་འགྲེལ་པ་ལུང་གཞི་དང་། རྣམ་འབྱེད། ཕྲན་ཚེགས། གཞུང་དམ་པ་སྟེ་བཞིའོ། །འདི་ལ་ཁ་ཅིག་གདུལ་བྱ་དབང་པོ་རྣོན་པོའི་དབང་དུ་བྱས་ནས་སོ་སོ་ཐར་པ་རྣམ་པ་གཉིས། འབྲིང་གི་དབང་དུ་བྱས་ནས་གཞི་དང་རྣམ་འབྱེད་གཉིས། རྟུལ་པོའི་དབང་དུ་བྱས་ནས་ཕྲན་ཚེགས་དང་གཞུང་དམ་པ་གཉིས་གསུངས་ཞེས་ཟེར་བ་མི་འཐད་དེ། མཆོག་ཟུང་གཉིས་ལ་སོགས་པ་དབང་རྣོན་ལ་བརྟེན་ནས་ཀྱང་ལུང་སྡེ་བཞི་ཀའི་སྐབས་ཀྱི་བཅས་པ་གསུངས་པ་ཡོད་པའི་ཕྱིར། ཡང་ཕྲན་ཚེགས་ལ་གྲགས་པའི་ཕྲན་ཚེགས་དང་། མ་གྲགས་པའི་ཕྲན་ཚེགས་གཉིས་ཡོད་དེ། གཞུང་དམ་པ་ལ་ལུང་ཞུ་བ། འདུལ་བྱེད། གཅིག་ལས་འཕྲོས་པ། ལྔ་ཚན། བཅུ་དྲུག་པ། གླེང་གཞི། མ་མོ། བཀའ་ལུང་གཏམ་གྱི་གཞི་རྐྱང་པའམ། སིལ་བུ། བྲམ་ཟེའི་བུ་མོས་ཞུས་པ་སྟེ་ལེའུ་བཅུ་ཡོད་པ་ལས། དང་པོ་གཉིས་གཞུང་དམ་པ་དང་། ཕྱི་མ་བརྒྱད་མ་གྲགས་པའི་ཕྲན་ཚེགས་ཡིན་པའི་ཕྱིར་ཏེ། བརྒྱད་པོ་དེ་ཕྲན་ཚེགས་ཀྱི་ནང་དུ་བསྡུས་ནས་གསུངས་པའི་ཕྱིར་ཟེར་བ་མི་འཐད་དེ། ལུང་བདུན་པོ་ནི་གཞུང་དམ་པའི་ལེའུ་ཡིན་ལ། ལུང་སིལ་བུ་ནི་ལུང་སྡེ་བཞིས་མ་བསྡུས་པར་མཛོད་ཀྱི་འགྲེལ་བཤད་གཉིས་ལས་བཤད་པའི་ཕྱིར། གླེང་གཞི། མ་མོ། བྲམ་ཟེའི་བུ་མོས་ཞུས་པ་གསུམ་ཕྲན་ཚེགས་སུ་འདོད་པ་མི་འཐད་དེ། གླེང་གཞི་སོགས་སུ་གཏོགས་པའི་དབྱར་གྱི་གཞི་ཞེས་ཕྲན་ཚེགས་ཀྱི་མིང་གིས་མ་བསྟན་པར་གླེང་གཞི་རང་མིང་གིས་བསྟན་པའི་ཕྱིར་དང་། གོས་ཀྱི་གཞི་ཕྲན་ཚེགས་ལ་སོགས་པ་ཞེས་པའི་སོགས་སྒྲས་ལུང་མ་མོ་ལ་སོགས་པ་བསྡུས་པའི་ཕྱིར། ལས་བྱེ་བའི་གཞི་ཞུ་བ་དང་བྲམ་ཟེའི་བུ་མོའི་སྐབས་སོ་ཞེས་བྲམ་ཟེའི་བུ་མོས་ཞུས་པ་ཞུ་བའི་ནང་དུ་བསྡུས་ན་སྡུད་པ་པོ་མི་མཁས་པར་འགྱུར་ཏེ། བརྒྱད་པོ་དེ་གཞུང་དམ་པ་མ་ཡིན་བཞིན་དུ་དེའི་ནང་དུ་བསྡུས་པའི་ཕྱིར་རོ། །ཞུ་བ་དང་འདུལ་བྱེད་ཀྱི་ཁྱད་པར་ནི། ཁ་ཅིག མཚན་ཉིད་ལ་དོགས་པ་གཅོད་པ་ཞུ་བ། བྱ་བ་ལ་དོགས་པ་གཅོད་པ་འདུལ་བྱེད་ཅེས་སྨྲ་མོད། རང་ལུགས་ནི། གང་ཟག་སྤྱིའི་དབང་དུ་བྱས་ནས་བྱ་བ་འདི་དང་འདི་བྱས་ན་ཅི་འགྱུར་ཞུས་པའི་ལན་དུ་གསུངས་པ་ཞུ་བ་དང་། གང་ཟག་སོ་སོའི་བྱ་བ་ལ་དོགས་གཅོད་ཞུས་པའི་ལན་དུ་གསུངས་པ་འདུལ་བྱེད་དུ་འཇོག་གོ །གཉིས་པ་ནི། ལུང་སྡེ་བཞིས་སོ་ཐར་གྱི་མདོའི་དགོངས་པ་འགྲེལ་ཚུལ་ཅི་ལྟ་བུ་ཞེ་ན། ལུང་རྣམ་འབྱེད་ཀྱིས་སོ་ཐར་གྱི་མདོའི་ཚིག་དོན་གཉིས་ཀ་རྒྱས་པར་འགྲེལ་པར་བྱེད་དེ། ཚིག་འགྲེལ་ཚུལ་ནི། རྩ་བར་དགེ་སློང་གང་བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་པའི་ཚིག་འགྲེལ་པ་ལ། རྣམ་འབྱེད་དུ་དགེ་སློང་ནི་ལྔ་སྟེ། མིང་གི་དགེ་སློང་དང་། སློང་བའི་དགེ་སློང་དང་། ཁས་འཆེ་བའི་དགེ་སློང་དང་། དོན་དམ་པའི་དགེ་སློང་དང་། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་སྟེ་ལྔའོ། །འདིར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་གཟུང་ངོ་ཞེས་གསུངས་པ་ལྟ་བུའོ། །དོན་གྱི་ཆ་ཡང་རྒྱས་པར་འགྲེལ་ཏེ། རྣམ་འབྱེད་ལས། བསླབ་པ་འཆའ་བའི་རྒྱུ་གླེང་གཞི། བསླབ་པ་མ་བཅས་པའི་ཉེས་དམིགས། བཅས་པའི་ཕན་ཡོན། བཅས་པ་དང་འགལ་བའི་ལྟུང་བ། དམིགས་བསལ་ལྟུང་མེད། བསླབ་བྱ། ཕྱིར་བཅོས་པའི་ཚུལ་རྣམས་བསྟན་པའི་ཕྱིར་རོ། །ལུང་གཞིས་སོ་ཐར་གྱི་མདོའི་ཚིག་དོན་གཉིས་ཀའི་ཆ་ཡང་རྒྱས་པར་འགྲེལ་ཏེ། ལོ་ཉི་ཤུ་མ་ལོན་པ་ལ་བསྙེན་རྫོགས་ཀྱི་སྡོམ་པ་མི་ཆགས་པར་གསུངས་པ་དེས་ལོ་ཉི་ཤུ་ལོན་པ་མཐུན་རྐྱེན་དང་། མ་ལོན་པ་འགལ་རྐྱེན་དུ་བསྟན་པས་དེས་མཚོན་ནས་རང་བྱུང་བསྙེན་རྫོགས་བསྒྲུབ་པའི་འགལ་རྐྱེན་དང་བྲལ་ཞིང་མཐུན་རྐྱེན་ཚང་བའི་རྣམ་གཞག་རྒྱས་པར་འགྲེལ་པ་ལ། རབ་བྱུང་གི་གཞི་དང་། གླེང་གཞི་གསོ་སྦྱོང་གི་གཞིས་འགྲེལ། བརྟད་བྱུང་གི་སྤང་བའི་སྐབས་སུ་སྟོན་ཟླ་ཐ་ཆུང་གི་ཉར་ཞག་བཅུས་མ་ཚང་བ་ཚུན་ཆད་ཅེས་གསུངས་པ་ནི་དབྱར་ཁས་བླངས་ནས་དགག་དབྱེ་བྱེད་པ་ལ་ཞག་བཅུ་མ་ཚང་བ་ཚུན་ཆད་ཅེས་པའི་དོན་ཡིན་ལ། དེས་ན་དབྱར་དང་དགག་དབྱེའི་རྣམ་གཞག་རྒྱས་པར་འགྲེལ་པ་ལ་དབྱར་གྱི་གཞི་དང་། དགག་དབྱེའི་གཞི་གཉིས། སྤང་ལྟུང་དང་པོ་གསུམ་གྱི་སྐབས་སུ་གོས་ཟིན་པ་སྲ་བརྐྱང་མ་བཏིང་པ་ཞེས་གསུངས་པའི་སྲ་བརྐྱང་གི་རྣམ་གཞག་རྒྱས་པར་སྟོན་པ་ལ་སྲ་བརྐྱང་གི་གཞི། ཟླ་འཇོག་གི་སྤང་བའི་སྐབས་སུ་གོས་རྙེད་པ་དེས་གོས་ལྡང་ན་གོས་བྱེད་པ་དང་། མ་ལྡང་ན་རེ་བ་དང་བཅས་ཏེ་འཇོག་པར་གསུངས་པའི་གོས་ཀྱི་རྣམ་གཞག་རྒྱས་པར་སྟོན་པ་ལ། སྤྱིར་བཏང་ལ་གོས་གཞི་དང་། དམིགས་བསལ་ལ་ཀོ་ལྤགས་ཀྱི་གཞི། བཅོམ་ལྡན་འདས་ཀྱིས་དགེ་སློང་ནད་པ་རྣམས་ལ་ཕན་པ་སོ་སོར་བསྟན་པར་བྱ་བའི་སྨན་གསུངས་པ་འདི་ལྟ་སྟེ་ཞེས་སོགས་གསུངས་པའི་སྨན་གྱི་རྣམ་གཞག་རྒྱས་པར་འགྲེལ་པ་ལ་སྨན་གཞི། བསྒོ་གྱུར་གྱི་ལས་ཞེས་སོགས་ལས་ཀྱི་རྣམ་གཞག་ཟུར་ཙམ་གསུངས་པ་དེ་རྒྱས་པར་འགྲེལ་པ་ལ་ལས་གཞི། རྩ་བར་དབྱུང་བ་དང་མགུ་བའི་རྣམ་གཞག་ཟུར་ཙམ་གསུངས་པ་དེ་རྒྱས་པར་འགྲེལ་པ་ལ་ཀཽ་ཤམྦཱི་དང་། དམར་སེར་ཅན་གྱི་དང་། སྤོ་བའི་དང་། གང་ཟག་གི་གཞི་སྟེ་བཞི་དང་། མ་ངེས་པ་གཉིས་ཀྱི་སྐབས་སུ་ལྟུང་བ་གླེང་དྲན་བྱ་བའི་ཚུལ་གསུངས་པ་དེ་ལ། ལྟུང་བ་གླེང་བ་དང་། གླེང་ནས་ཇི་ལྟར་བྱ་བའི་ཚུལ་རྒྱས་པར་འགྲེལ་པ་ལ་གསོ་སྦྱོང་གཞག་པའི་གཞི། དབྱེན་བྱེད་ལྷག་མའི་སྐབས་སུ་དགེ་འདུན་གྱི་དབྱེན་ཞེས་གསུངས་པའི་དབྱེན་ལ་ལས་བྱེ་བ་དང་འཁོར་ལོ་བྱེ་བ་གཉིས་ལས་དང་པོ་རྒྱས་པར་འགྲེལ་པ་ལ་ཀཽ་ཤམྦཱིའི་གཞི་དང་། གཉིས་པ་རྒྱས་པར་འགྲེལ་པ་ལ་དབྱེན་གྱི་གཞི་གཉིས། རྩོད་པ་ཞི་བྱེད་ཀྱི་ཆོས་བདུན་གསུངས་པ་དེ་རྒྱས་པར་འགྲེལ་པ་ལ་རྩོད་པའི་གཞི། གནས་མལ་གྱི་ལྟུང་བྱེད་ཀྱི་སྐབས་སུ་གནས་མལ་གྱི་རྣམ་གཞག་གསུངས་པ་དེ་རྒྱས་པར་འགྲེལ་པ་ལ་གནས་མལ་གྱི་གཞི་གསུངས་སོ། །དེ་ལྟར་འཐད་པའི་རྒྱུ་མཚན་ཡང་སོ་ཐར་གྱི་མདོའི་འགྲེལ་བྱེད་རྣམས་ཀྱིས་རྩ་བའི་མདོའི་དོན་དེ་དང་དེ་འཆད་པ་ན་ལུང་གཞིའི་དོན་དེ་དང་དེ་འཆད་པའི་ཕྱིར་རོ། །ཕྲན་ཚེགས་ཀྱིས་ནི་ལུང་གཞི་དང་རྣམ་འབྱེད་དུ་མ་ངེས་པའི་ཕྲན་ཚེགས་ཁ་བསྐངས་ནས་འགྲེལ་བར་བྱེད། གཞུང་དམ་པས་སྔར་བཤད་པ་རྣམས་ལ་དོགས་པ་གཅོད་པའི་སྒོ་ནས་འགྲེལ་བར་བྱེད་དོ། །ལུང་སྡེ་བཞི་པོ་སོ་སོའི་གཞུང་ཚད་ཇི་ཙམ་ཞེ་ན། ལུང་གཞི་ལ་བམ་པོ་བརྒྱ་དང་དགུ། རྣམ་འབྱེད་ལ་བརྒྱ་དང་བཅུ་གཅིག་ཡོད་ཅིང་། དེ་ཡང་ཕ་རྣམས་ལ་བརྒྱད་ཅུ་རྩ་གསུམ། མ་རྣམས་ལ་ཉི་ཤུ་རྩ་བརྒྱད་ཡོད་དོ། །ཕྲན་ཚེགས་ལ་ལྔ་བཅུ་རྩ་དྲུག གཞུང་དམ་པ་ལ་བཞི་བཅུ་རྩ་བརྒྱད་ཡོད་ལ། གཎྜིའི་མདོ་དང་འཁར་གསིལ་བསྟན་པ་དང་བཅང་བའི་མདོ་ནི་ཐེག་ཆེན་གྱི་མདོ་ཡིན་ནོ། །གཉིས་པ་ལ་དགོངས་འགྲེལ་གྱི་བསྟན་བཅོས། དེ་དག་གི་འགྲེལ་པ་བྱུང་ཚུལ། འདིར་ཁས་བླང་བར་བྱ་བ་གང་ཡིན་པ་དང་གསུམ། དང་པོ་ལ་སྡེ་ལྔ་ཆར་གྱི་བླང་དོར་བསྟན་པ་དང་། སོ་སོའི་བླང་དོར་བསྟན་པ་དང་། མདོ་ཉིད་ཀྱི་དཀའ་བའི་དོན་སྟོན་པའི་བསྟན་བཅོས་དང་གསུམ་ལས། དང་པོ་ནི། སློབ་དཔོན་ཡོན་ཏན་འོད་ཀྱིས་མཛད་པའི་མདོ་རྩ་བ་དང་། ཀརྨ་ཤ་ཏཾ་གཉིས་སོ། །གཉིས་པ་ལ་དགེ་སློང་གི་བླང་དོར་སྟོན་པ་དང་། དགེ་ཚུལ་གྱི་ཐུན་མོང་གི་བླང་དོར་སྟོན་པའི་བསྟན་བཅོས་གཉིས་ལས། དང་པོ་ནི། དགྲ་བཅོམ་པ་ས་གའི་ལྷས་མཛད་པའི་འདུལ་བ་མེ་ཏོག་ཕྲེང་བརྒྱུད་དང་། སློབ་དཔོན་པདྨས་མཛད་པའི་དགེ་སློང་གི་ལོ་དྲི་བ་གཉིས་སོ། །གཉིས་པ་ནི། སློབ་དཔོན་ཤཱཀྱ་འོད་ཀྱིས་མཛད་པའི་འདུལ་བ་སུམ་བརྒྱ་པ་དང་། སློབ་དཔོན་དགེ་འདུན་བཟང་པོས་མཛད་པར་གྲགས་པའི་ཀཱ་རི་ཀ་ལྔ་བཅུ་པ་དང་། སློབ་དཔོན་པདྨས་མཛད་པའི་དགེ་ཚུལ་གྱི་ལོ་དྲི་བ་དང་གསུམ་མོ། །དགེ་སློང་མ་དང་། དགེ་སློབ་མ་དང་། དགེ་ཚུལ་མའི་ཐུན་མོང་མ་ཡིན་པའི་བླང་དོར་སྟོན་པའི་བསྟན་བཅོས་བོད་དུ་འགྱུར་བ་མ་མངོན་ནོ། །གསུམ་པ་ནི། སློབ་དཔོན་དགེ་ལེགས་བཤེས་གཉེན་གྱིས་མཛད་པའི་དྲི་བ་ཚིག་ལེའུར་བྱས་པའོ། །པཎྜི་ཏ་པུཎྱ་ཤྲཱིས་མཛད་པའི་དགེ་བསྙེན་གྱི་བསླབ་བྱ་སྟོན་པའི་སྡོམ་པ་བརྒྱད་པ་རྩ་འགྲེལ་ནི་ཐེག་ཆེན་གྱི་སྡེ་སྣོད་ཀྱི་ནང་དུ་གཏོགས་ཀྱི། ཐེག་དམན་གྱི་སྡེ་སྣོད་དང་མི་མཐུན་ནོ། །གཉིས་པ་ནི། ཕའི་སོ་ཐར་གྱི་འགྲེལ་པ་ལ་དགེ་སློང་ཆུ་འཐུང་ཞེས་བྱ་བས་མཛད་པའི་བམ་པོ་བརྒྱ་དང་བཅུ་ཡོད་པ་དང་། དྲི་མེད་བཤེས་གཉེན་གྱིས་མཛད་པའི་བམ་པོ་ལྔ་བཅུ་པ་དང་། དཔའ་བོས་མཛད་པའི་འདུལ་བའི་གཞུང་འགྲེལ་བམ་པོ་ཉེར་བདུན་པ། དགེ་ལེགས་བཤེས་གཉེན་གྱིས་མཛད་པའི་བམ་པོ་ཉེར་ལྔ་པ། ཁྱད་པར་བཤེས་གཉེན་གྱིས་མཛད་པའི་འདུལ་བ་བསྡུས་པ་བམ་པོ་བཅུ་བདུན་པ། སྦྲང་བུའི་རྐང་ཅན་གྱིས་མཛད་པའི་འགྲེལ་པ་བམ་པོ་བརྒྱད་མ་དང་། ཚིག་གི་བརྗེད་བྱང་སྟེ་འགྲེལ་པ་བདུན་ཡོད་དོ། །མའི་སོ་ཐར་ལ་དགེ་ལེགས་བཤེས་གཉེན་གྱིས་མཛད་པར་གྲགས་པའི་འགྲེལ་པ་གཅིག་སྣང་བ་འདི་བོད་ཀྱི་ཡིན་པར་མངོན་ཏེ། དེ་ན་འདས་ཞེས་བྱ་བའི་ཚིག་བླ་དྭགས་སུ་བསྣན་པའོ་ཞེས་སོགས་བོད་ཚིག་མང་དུ་སྣང་བའི་ཕྱིར་རོ། །ལུང་གཞི་ལ་དགེ་ལེགས་བཤེས་གཉེན་གྱིས་མཛད་པའི་འགྲེལ་པ་ཡོད་ཅིང་། དེ་ལས་རབ་བྱུང་དང་གསོ་སྦྱོང་དང་དགག་དབྱེའི་གཞིའི་འགྲེལ་པ་ཕལ་ཆེར་བོད་དུ་འགྱུར་རོ། །རྣམ་འབྱེད་ལ་དུལ་བ་ལྷས་མཛད་པའི་འགྲེལ་པ། ཕྲན་ཚེགས་ལ་ཆོས་མཆོག་གི་སློབ་མ་ཚུལ་ཁྲིམས་སྐྱོང་གིས་མཛད་པའི་འགྲེལ་པ། གཞུང་དམ་པའི་ལེའུ་ཉེ་བ་འཁོར་གྱིས་ཞུས་པ་ལ། མདོ་སྡེ་འཛིན་པ་དགེ་བའི་བཤེས་གཉེན་གྱིས་མཛད་པའི་འགྲེལ་པ་ཡོད། གཞུང་དམ་པ་རིལ་པོའི་འགྲེལ་པ་དགེ་ལེགས་བཤེས་གཉེན་གྱིས་མཛད་པ་ཡོད་པར་ནི་དྲི་བའི་ཚིག་ལེའུར་བྱས་པ་ལས་བཤད་མོད་བོད་དུ་མ་འགྱུར་རོ། །བསྟན་བཅོས་ཀྱི་འགྲེལ་པའི་དབང་དུ་བྱས་ན། མདོ་རྩ་ལ། ཆོས་བཤེས་ཀྱིས་མཛད་པའི་རྒྱ་ཆེར་འགྲེལ་དང་། ཚུལ་ཁྲིམས་འབྱུང་གནས་ཀྱིས་བསྒྱུར་བའི་རང་འགྲེལ་དུ་གྲགས་པ་དང་། ཤེས་རབ་བྱེད་ཀྱིས་མཛད་པའི་འགྲེལ་པ་དང་། འགྲེལ་ཆུང་བི་མ་ལ་མི་ཏྲ་རྣམས་ཡོད། ཀརྨ་ཤ་ཏཾ། མེ་ཏོག་ཕྲེང་བརྒྱུད། དགེ་སློང་དང་དགེ་ཚུལ་གྱི་ལོ་དྲི་བ་རྣམས་ལ་འགྲེལ་པ་བོད་དུ་འགྱུར་བ་མེད་དོ། །སུམ་བརྒྱ་པ་ལ་རང་འགྲེལ་འོད་ལྡན་དང་། དུལ་བ་ལྷས་མཛད་པའི་སློབ་ཕན་གཉིས་ཡོད་ལ། སློབ་ཕན་ལྟར་ན་འོད་ལྡན་རང་འགྲེལ་མིན་པར་འདོད་དོ། །ཀཱ་རི་ཀ་ལྔ་བཅུ་པ་ལ་ཀ་མ་ལ་ཤཱི་ལས་མཛད་པར་གྲགས་པའི་དོན་བརྒྱད་མ་བྱ་བ་ཡོད་དོ། །བམ་པོ་ལྔ་བཅུ་པ་འདི་སོ་ཐར་གྱི་འགྲེལ་པ་ཡིན་ཀྱང་མདོ་རྩ་བའི་ཚིག་དོན་གཉིས་ཀ་རྒྱས་པར་འགྲེལ་པས་མདོ་རྩ་བའི་འགྲེལ་པ་གལ་ཆེ་ཤོས་ཅིག་ཏུ་སྣང་ངོ་། །གསུམ་པ་ནི། འོ་ན་མདོ་འགྲེལ་དེ་དག་གི་ནང་ནས་སྐབས་འདིར་གང་ཁས་བླང་བར་བྱ་ཞེ་ན། མདོ་རྣམས་ཀྱི་ནང་ནས་སོ་ཐར་དང་། འགྲེལ་བ་རྣམས་ཀྱི་ནང་ནས་གཞི་འགྲེལ་དང་རྒྱ་ཆེར་འགྲེལ་གཉིས་སྒྲ་ཇི་བཞིན་དུ་ཁས་བླང་བར་བྱ་བ་ཡིན་གྱི་གཞན་རྣམས་ནི་མ་ཡིན་ཏེ། གཞན་རྣམས་ན་མདོ་རྩ་ནས་བཤད་པ་དང་མི་མཐུན་པ་དུ་མ་སྣང་བའི་ཕྱིར། དེས་ན་བོད་དུ་འགྱུར་བའི་ཀརྨ་ཤ་ཏཾ་ནི་སྐབས་འདིར་སྒྲ་ཇི་བཞིན་དུ་ཁས་བླང་དུ་མི་རུང་སྟེ་རྒྱུ་མཚན་སྔར་བཞིན་ནོ།། ༈ །།གསུམ་པ་སྐབས་ཀྱི་བསྟན་བཅོས་ཀྱི་དོན་ལ་འཇུག་པ་ལ་འདིར་བཤད་པར་བྱ་བ་ནི་འདུལ་བ་མདོ་རྩ་བ་སྟེ། འདི་ལ་སྤྱིའི་ཁོག་བསྒྲིག་པ་དང་། གཞུང་སོ་སོའི་དོན་ལ་དཔྱད་པ་གཉིས། དང་པོ་ནི། རྟོག་ལྡན་བསྟན་བཅོས་ལ་འཇུག་པའི་ཡན་ལག་ཏུ་དགོས་འབྲེལ་སྔོན་དུ་བཏང་ནས་བསྟན་བཅོས་དངོས་ལ་འཇུག་པ་ལ་སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་ནས་ཚུལ་ཁྲིམས་ཕུན་སུམ་ཚོགས་པར་བྱ་བའི་ཚུལ། དེ་དག་གཞི་གང་ལ་གནས་ནས་བྱ་བ་དང་གསུམ་ལས། དང་པོ་རབ་བྱུང་གི་གཞི་དང་། གསུམ་པ་གནས་མལ་གྱི་གཞིས་བསྟན། གཉིས་པ་ལ་ལྟུང་བས་མི་གོས་པར་བྱ་བའི་ཕྱིར་མི་མཐུན་ཕྱོགས་ལྟུང་བ་ངོས་གཟུང་བ་དང་། ངོས་ཟིན་ནས་ཚུལ་ཁྲིམས་རྣམ་པར་དག་པར་བྱེད་པའི་ཚུལ་གཉིས་ལས། དང་པོ་ནི། རྣམ་འབྱེད་གཉིས་སྤྱིར་བསྟན་དང་བཅས་པས་བསྟན་ལ། དེ་ཡང་རྣམ་འབྱེད་གཉིས་ཀྱིས་ལྟུང་བ་སོ་སོ་སྟོན་ཅིང་སྤྱིར་བསྟན་གྱིས་ཐུན་མོང་དུ་བསྟན་ནོ། །གཉིས་པ་ལ་དགེ་འདུན་མཐུན་པ་ལས་ཚུལ་ཁྲིམས་རྣམ་པར་དག་པར་འགྱུར་བས་དག་བྱེད་ཀྱི་ཐབས་དང་། མི་མཐུན་པ་ལ་ཚུལ་ཁྲིམས་དག་པར་མི་འགྱུར་བས་མི་མཐུན་པ་ཞི་བར་བྱེད་པའི་ཐབས་གཉིས། དང་པོ་ལ་ལྟུང་བ་སྔར་མ་བྱུང་བ་མི་འབྱུང་ཞིང་བྱུང་ཟིན་གཞན་གྱིས་བཤགས་སུ་གཞུག་པའི་སྒོ་ནས་དག་པའི་ཐབས་དང་། རྣམ་པ་ཐམས་ཅད་དུ་རྐྱེན་ཁྱད་པར་ཅན་བསྟེན་པའི་སྒོ་ནས་དག་པའི་ཐབས་དང་། ལྟུང་བ་བྱུང་ཟིན་ཕྱིར་བཅོས་པའི་སྒོ་ནས་དག་པའི་ཐབས་དང་གསུམ། དང་པོ་ལ་ལྟུང་བ་མི་འབྱུང་བར་གསོ་སྦྱོང་གིས་བྱེད་པས་དེའི་རྣམ་གཞག་གསོ་སྦྱོང་གི་གཞིས་བསྟན། བྱུང་ཟིན་གཞན་གྱིས་བཤགས་སུ་གཞུག་པའི་སྒོ་ནས་ཚུལ་ཁྲིམས་དག་པར་དགག་དབྱེས་བྱེད་ཅིང་། དེའི་རྒྱུར་དབྱར་ཁས་བླངས་དགོས་པས་དེ་གཉིས་ཀྱི་རྣམ་གཞག་དབྱར་གྱི་གཞི་དང་དགག་དབྱེའི་གཞི་གཉིས་ཀྱིས་བསྟན་ནོ། །གཉིས་པ་ལ་ཡང་ཟང་ཟིང་གི་རྐྱེན་བསྟེན་པ་དང་། ཆོས་ཀྱི་རྐྱེན་བསྟེན་པའི་སྒོ་ནས་ཚུལ་ཁྲིམས་དག་པའི་ཐབས་གཉིས་ལས། དང་པོ་གོས་གཞི་ལེའུ་གསུམ་དང་སྨན་གཞིས་བསྟན་ནོ། །གཉིས་པ་ནི། མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཐབས་རྣམས་ཡིན་ལ། དེ་ཐམས་ཅད་ལས་ཀྱི་བྱེད་དགོས་པས་དེའི་རྣམ་གཞག་ལས་གཞི་བསྟན་ནོ། །གསུམ་པ་ལ་ལུས་ལྟ་བུ་ཕྱིར་བཅོས་དངོས་དང་། དེའི་ཡན་ལག་གཉིས་ལས། དང་པོ་ཕྱིར་བཅོས་ཀྱི་གཞིས་སྟོན་ལ། གཉིས་པ་ལ་འཆབ་ཉེས་གང་ལ་འབྱུང་བ་དང་། ལྟུང་བ་ལས་ལྡང་བ་དང་ལྡང་བ་མ་ཡིན་པའི་དུས་ཤེས་དགོས་པས་དེའི་རྣམ་གཞག་དུས་དང་དུས་མ་ཡིན་པ་བསྡུས་པ་འབྱུང་བའི་གཞིས་བསྟན། ཡང་ཕྱིར་བཅོས་སྐབས་སུ་སྤོ་མགུ་སྤྱོད་པ་སོགས་བྱ་དགོས་པས་དེའི་རྣམ་གཞག་ས་གཞན་ན་གནས་པ་སྤྱོད་པའི་གཞིས་སྟོན། སྡིག་པ་ནན་ཏུར་སོགས་ཀྱི་སྐབས་སུ་ལྟུང་བ་གླེང་དྲན་བྱེད་དགོས་པས་ལྟུང་བ་དེ་དག་གླེང་བ་དང་། གླེང་ནས་ཇི་ལྟར་བསྒྲུབ་པའི་ཚུལ་རྣམས་བསླབ་པ་ཡོངས་སུ་སྦྱང་བའི་གཞིས་བསྟན། གཉིས་པ་ལ་མི་མཐུན་པ་ངོས་གཟུང་བ་དང་། དེའི་རྒྱུ་ངོས་གཟུང་ནས་དེ་ཞི་བྱེད་དང་སྦྱར་ནས་བཤད་པ་གཉིས། དང་པོ་ལ་ལས་བྱེ་བ་དང་། འཁོར་ལོ་བྱེ་བ་གཉིས་ལས། དེ་གཉིས་རིམ་བཞིན་ལས་བྱེ་བ་དང་འཁོར་ལོ་བྱེ་བའི་གཞིས་བསྟན་ནོ། །གཉིས་པ་ནི། རྩོད་གཞིས་བསྟན་ནོ། །ཁ་ཅིག་གཞུང་གི་བསྡུ་ཚོམས་འདི་ལྟར་འཆད་དེ། སྡོམ་པ་མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། ཉམས་ན་ཕྱིར་བཅོས་པའི་ཚུལ་གསུམ་ལས། དང་པོ་ནི། རབ་བྱུང་གི་གཞིས་བསྟན། གཉིས་པ་ལ་ཕྱིའི་རྐྱེན་དགེ་བའི་བཤེས་གཉེན་བསྟེན་པའི་སྒོ་ནས་དང་། མི་མཐུན་ཕྱོགས་ངོ་ཤེས་པའི་སྒོ་ནས་དང་། བསླབ་པ་ཡོངས་སུ་སྦྱོང་བའི་སྒོ་ནས་དང་། བདེ་བར་གནས་པའི་རྐྱེན་བསྟེན་པའི་སྒོ་ནས་དང་། ནང་གི་ཉེར་ལེན་བསམ་སྦྱོར་ཕུན་སུམ་ཚོགས་པའི་སྒོ་ནས་བསྲུང་བ་དང་ལྔ་ལས། དང་པོ་ནི། གནས་དང་གནས་པའི་ཚུལ་ཁྲིམས་དང་གནས་དང་གནས་པའི་མཚན་ཉིད་སོགས་ཀྱིས་སྟོན་པས་རབ་བྱུང་གི་གཞིས་འཆད་དོ། །གཉིས་པ་རྣམ་འབྱེད་གཉིས་སྤྱིར་བསྟན་དང་བཅས་པས་འཆད་དོ། །གསུམ་པ་ལ་རང་སྟོབས་ཀྱིས་སྦྱོང་བ་ནི་གསོ་སྦྱོང་གི་གཞི་དང་། གཞན་སྟོབས་ཀྱིས་སྦྱོང་བ་ནི་དབྱར་དང་དགག་དབྱེའི་གཞིས་འཆད། བཞི་པ་ལ་བདེ་བར་གནས་པའི་རྐྱེན་གོས་དང་། སྨན་དང་། གནས་མལ་དང་། སྣོད་སྤྱད་བསྟེན་པ་བཞི་ལས། དང་པོ་གོས་གཞི་ལེའུ་གསུམ་དང་། གཉིས་པ་སྨན་གཞིས་འཆད། དེ་ཡང་གོས་ཡོ་བྱད་ཀྱི་གཙོ་བོ་ཡིན་པས་དང་པོར་བསྟན། སྨན་ཕལ་པ་ཡིན་པས་དེའི་རྗེས་སུ་བསྟན་ནོ། །གསུམ་པ་ནི། གནས་མལ་གྱི་གཞི་དང་། བཞི་པ་ནི། རབ་བྱུང་གི་གཞི་དང་རྣམ་འབྱེད་གཉིས་ཀྱི་ཞར་ལ་འཆད། ལྔ་པ་ནི། ངོ་ཚ་ཁྲེལ་ཡོད་དང་དྲན་ཤེས་བཞིན་སོགས་ཀྱི་སྒོ་ནས་བསྲུང་བ་སྟེ་དེ་ཡང་རབ་བྱུང་གི་གཞིའི་ཞར་ལ་འཆད་དོ། །གསུམ་པ་ཉམས་ན་ཕྱིར་བཅོས་པའི་ཚུལ་ལ་ལྟུང་བ་ཕྱིར་བཅོས་པ་དང་། རྩོད་པ་ཕྱིར་བཅོས་པ་གཉིས་ལས། དང་པོ་ཕྱིར་བཅོས་ཀྱི་གཞི་ལེའུ་བཞིས་འཆད། གཉིས་པ་རྩོད་གཞིས་འཆད་དེ་ཐམས་ཅད་ལས་ལ་རག་ལས་པས། ལས་ཀྱི་རྣམ་གཞག་ནི་ལས་གཞིས་འཆད་པ་ཡིན་ནོ་ཞེས་གསུང་ངོ་།། ༈ །།གཉིས་པ་གཞུང་སོ་སོའི་དོན་ལ་དཔྱད་པ་ལ་གཉིས་ཏེ། འཇུག་པའི་ཡན་ལག་དགོས་འབྲེལ་དང་། དགོས་པ་ཅན་གྱི་བསྟན་བཅོས་ཀྱི་ལུས་དངོས་སོ། །དང་པོ་ནི། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་པ་སྟེ། འདི་ལ་དགོས་དོན། བསྡུས་དོན། ཚིག་དོན། བརྒལ་ལན་དང་བཞི་ལས། དང་པོ་ནི། བསྟན་བཅོས་ཀྱི་ཐོག་མར་དགོས་འབྲེལ་གྱི་ངག་དགོད་པ་ལ་དགོས་པ་ཅི་ཡོད་ཅེ་ན། རྣམ་བཅད་ལ་བསྟན་བཅོས་འདི་ལ་དགོས་སོགས་ཆོས་བཞི་མེད་པར་དོགས་པ་བསལ་ནས། ཡོངས་གཅོད་ལ་དགོས་སོགས་ཆོས་བཞི་ཡོད་པར་ངེས་པའམ་ཡོད་དམ་སྙམ་པའི་དོན་འགྱུར་གྱི་ཐེ་ཚོམ་གྱི་སྒོ་ནས་རྒོལ་བ་རྟོག་ལྡན་བསྟན་བཅོས་ལ་འཇུག་པར་བྱ་བའི་དོན་དུ་ཡིན་ཏེ། ཊཱི་ཀར་མདོ་དང་པོ་འདིས་ནི་འདུལ་བའི་མདོ་འདིའི་འབྲེལ་པ་དང་། བརྗོད་པར་བྱ་བ་དང་། དགོས་པ་དང་། དགོས་པའི་ཡང་དགོས་པ་རྣམས་བརྗོད་དེ། འདི་ལྟར་རྟོག་པ་སྔོན་དུ་བཏང་བ་དག་ནི་འབྲེལ་བ་མེད་པ་དང་། བརྗོད་པར་བྱ་བ་མེད་པ་དང་། དགོས་པ་མེད་པའི་ཚིག་ཀྱང་ཁས་མི་ལེན་ན། བསྟན་བཅོས་ལ་སོགས་པ་གཞན་ལྟ་སྨོས་ཀྱང་ཅི་དགོས་ཏེ། དེ་བས་ན་འདུལ་བའི་མདོ་ལ་བརྗོད་པར་བྱ་བ་མེད་པར་དོགས་པ་བསལ་བའི་ཕྱིར་བརྗོད་པར་བྱ་བ་བསྙད་དོ། །འབྲས་བུ་མེད་པར་དོགས་པ་བཟློག་པའི་ཕྱིར་དགོས་པ་བརྗོད་དོ། །ཐབས་མེད་པར་དོགས་པ་སྤང་བའི་ཕྱིར་འབྲེལ་པ་བཤད་དོ། །འདོད་པའི་དོན་གྲུབ་པར་བྱ་བའི་ཕྱིར་དགོས་པའི་ཡང་དགོས་པ་བསྟན་ཏོ་ཞེས་གསུངས་པས་སོ། །གཉིས་པ་ནི། བརྗོད་བྱ། དགོས་པ། ཉིང་དགོས། འབྲེལ་པ་དང་བཞི་ལས། འདི་ལ་སྤྱིར་ངག་ཙམ་ལ་ཡོད་པ་དང་། དགོས་འབྲེལ་གྱི་ངག་ལ་ཡོད་པ་དང་། བསྟན་བཅོས་ལུས་ལ་ཡོད་པ་གསུམ་ལས། དང་པོ་ནི། ངག་དོན་མཐུན་ཐམས་ཅད་ལ་ཆོས་བཞི་ཚང་སྟེ། དཔེར་ན་བུམ་པར་ཆུ་འོན་ཅིག་ཅེས་པ་ལྟ་བུ་ལ་མཚོན་ན་བུམ་པར་ཆུ་ལེན་པ་ནི་ངག་དེའི་བརྗོད་བྱ། ལེན་པར་གོ་བ་ནི་ངག་དེའི་དགོས་པ། ཆུ་བླངས་ནས་ཁྲུས་དང་བཏུང་བ་སོགས་ཀྱི་སྐྱེས་བུ་ཚིམ་པར་བྱས་པ་ནི་ཉིང་དགོས། ཉིང་དགོས་དགོས་པ་ལ་རག་ལས། དགོས་པ་ངག་ལ་རག་ལས་པ་ནི་འབྲེལ་པའོ། །གཉིས་པ་ནི། བསྟན་བཅོས་འདིའི་བརྗོད་བྱ་སོགས་བཞི་ནི་དགོས་འབྲེལ་ངག་གི་བརྗོད་བྱ། དགོས་འབྲེལ་ངག་ལ་བརྟེན་ནས་བསྟན་བཅོས་འདིའི་བརྗོད་བྱ་སོགས་བཞི་རྟོགས་པ་ནི་དགོས་པ། དེ་ལ་བརྟེན་ནས་བསྟན་བཅོས་འདི་ལ་རྟོག་ལྡན་འཇུག་པ་ནི་ཉིང་དགོས། ཕྱི་མ་ཕྱི་མ་སྔ་མ་སྔ་མ་ལ་རག་ལས་པ་ནི་འབྲེལ་པའོ། །གསུམ་པ་ནི། སྤོང་བདུན་འཁོར་བཅས་ཀྱི་ཚུལ་ཁྲིམས་ནི་བསྟན་བཅོས་འདིའི་བརྗོད་བྱ། བསྟན་བཅོས་འདི་ལ་བརྟེན་ནས་དེ་རྟོགས་པ་ནི་དེའི་དགོས་པ། བསྟན་བཅོས་འདིས་བསྟན་པའི་ཚུལ་ཁྲིམས་ཉམས་སུ་བླངས་པ་ལ་བརྟེན་ནས་ལྷག་མེད་ཀྱི་མྱང་འདས་ཐོབ་པ་ནི་དེའི་ཉིང་དགོས། ཉིང་དགོས་དགོས་པ་ལ་རག་ལས། དགོས་པ་བསྟན་བཅོས་ལ་རག་ལས་པ་ནི་འབྲེལ་པའོ། །ཡང་ན་མདོ་འདི་ནི་ཚུལ་ཁྲིམས་སོགས་རྗོད་བྱེད་ཡིན་པས་ཐབས་དང་། ཚུལ་ཁྲིམས་སོགས་རྟོགས་པ་ནི་མདོ་འདི་ལས་བྱུང་བ་ཡིན་པས་ཐབས་ལས་བྱུང་བ་ཡིན་པས་ན། ཐབས་དང་ཐབས་ལས་བྱུང་བའི་ཚུལ་གྱིས་འབྲེལ་བ་སྟེ། ཊཱི་ཀར་དེ་བས་ན་མདོ་འདི་ནི་ཐབས་ཡིན་ལ། ཚུལ་ཁྲིམས་བསྟན་པ་ནི་ཐབས་ལས་བྱུང་བ་ཡིན་ཏེ། ཐབས་དང་ཐབས་ལས་བྱུང་བའི་མཚན་ཉིད་ནི་འབྲེལ་བ་ཡིན་ནོ་ཞེས་སོ། །དེ་ལ་ཇི་ལྟར་བསྟན་ན། ཉིང་དགོས་དང་བརྗོད་བྱ་དངོས་སུ་བསྟན་ཏེ། ངེས་པར་འབྱུང་བ་ཞེས་པས་ཉིང་དགོས་དང་། ཚུལ་ཁྲིམས་ཞེས་པས་བརྗོད་བྱ་དངོས་སུ་བསྟན་པའི་ཕྱིར། དགོས་པ་དང་འབྲེལ་པ་ཤུགས་ལས་བསྟན་ཏེ། ཚུལ་ཁྲིམས་བསྟན་པའི་དོན་དུ་མདོ་བརྩམས་ཞེས་དམ་བཅས་པ་ཡིན་པའི་ཕྱིར། ཊཱི་ཀར་དེ་ལྟ་བས་ན་བརྗོད་པར་བྱ་བ་དང་དགོས་པའི་ཡང་དགོས་པ་ལ་ནི་ཚུལ་ཁྲིམས་དང་ངེས་པར་འབྱུང་བའི་སྒྲ་གཉིས་ཀྱིས་གོ་རིམ་བཞིན་དུ་མངོན་སུམ་དུ་བསྟན་ལ། འབྲེལ་པ་དང་དགོས་པ་ནི་ཤུགས་ཀྱིས་བསྟན་ཏེ། ཚུལ་ཁྲིམས་བསྟན་པའི་དོན་དུ་མདོ་རྩོམ་པའི་ཕྱིར་རོ་ཞེས་དང་། ཁ་ཅིག་ནི་མངོན་སུམ་དུའོ། །ཁ་ཅིག་ནི་བརྒྱུད་པས་སོ་ཞེས་སོ། །གལ་ཏེ་ཚུལ་ཁྲིམས་ལ་བརྟེན་ནས་ཉོན་མོངས་སྤངས་པའི་མྱང་འདས་ཐོབ་ན་ཟག་མེད་ཀྱི་ཡེ་ཤེས་ཀྱིས་ཉོན་མོངས་སྤོང་བར་བཤད་པ་དང་འགལ་ལོ་ཞེ་ན། སྐྱོན་མེད་དེ། སྤོང་བ་བདུན་པའི་མཚན་ཉིད་ཅན་གྱི་ཚུལ་ཁྲིམས་ལ་བརྟེན་ནས་ཟག་མེད་ཀྱི་ཡེ་ཤེས་ཀྱིས་ཉོན་མོངས་སྤོང་བར་འགྱུར་བའི་ཕྱིར། འདི་ལ་དགོངས་ནས་མདོ་ལས། ཚུལ་ཁྲིམས་ལ་གནས་ཚུལ་ཁྲིམས་ལ་བརྟེན་ནས་འཕགས་པའི་བདེན་པ་བཞི་པོ་དག་ཡང་དག་པ་ཇི་ལྟ་བ་བཞིན་དུ་མཐོང་བར་འགྱུར་རོ་ཞེས་གསུངས་སོ། །གསུམ་པ་ནི། ངེས་པར་འབྱུང་བ་ཞེས་པ་ལ། ངེས་པ་ནི་གདོན་མི་ཟ་བ། འབྱུང་བའི་སྒྲ་རྐང་པ་དང་གཞོན་པ་དང་ཐོབ་པ་ལ་འཇུག་པ་ལས། འདིར་ནི་ཐོབ་པ་ཁོ་ན་ལ་འཇུག་སྟེ། ངེས་པར་ཞེས་པའི་ཚིག་སྨོས་པའི་ཕྱིར་རོ། །དེས་ན་གདོན་མི་ཟ་བར་ཐོབ་པར་བྱ་བ་ནི་ལྷག་མེད་ཀྱི་མྱང་འདས་ཏེ་ཉིང་དགོས་མཐར་ཐུག་གོ །ལམ་བདེན་དང་ལྷག་བཅས་མྱང་འདས་ནི་གནས་སྐབས་ཀྱི་ཉིང་དགོས་ཙམ་ཡིན་ཀྱང་ཉིང་དགོས་མཐར་ཐུག་མ་ཡིན་ཏེ། ལྷག་བཅས་ནི་གདོན་མི་ཟ་བར་ཐོབ་པར་བྱ་བ་མ་ཡིན་པའི་ཕྱིར་དང་། ལམ་ནི་མྱང་འདས་དེ་ཐོབ་པའི་རྒྱུ་ཡིན་པའི་ཕྱིར། ངེས་པར་འབྱུང་བ་མྱང་འདས་དེ་ཐོབ་པའི་ཐབས་སུ་གྱུར་པའི་ཚུལ་ཁྲིམས་ནི་ངེས་པར་འབྱུང་བའི་ཚུལ་ཁྲིམས་ཏེ། སྤོང་བདུན་འཁོར་དང་བཅས་པའོ། །དེ་ཡང་ལུས་ཀྱི་མི་ཚངས་སྤྱོད་མ་བྱིན་ལེན་སྲོག་གཅོད་སྤོང་བ་སྟེ་གསུམ་དང་། ངག་གི་བརྫུན་ཕྲ་མ་ཚིག་རྩུབ་ངག་རྐྱལ་སྤོང་བ་བཞི་སྟེ་སྤོང་བ་བདུན་ཡིན་ལ། འཁོར་དང་བཅས་པ་ནི་ཆང་སྤོང་བ་ལ་སོགས་པའོ། །དབང་དུ་བྱས་ཏེ་ཞེས་པའི་སྐད་དོད་ལ་ཨ་ཐ་ཞེས་འབྱུང་ལ། དེ་ཡང་བཀྲ་ཤིས་པ་དང་དེ་ནས་ཞེས་པའི་ཚིག་ཕྲད་དང་དེ་མ་ཐག་པ་དང་། དབང་དུ་བྱ་བ་ལ་འཇུག་པ་ལས། འདིར་ནི་ཐ་མ་ཁོ་ན་ཡིན་ཏེ། འདི་ནས་བཟུང་ཏེ་མདོ་ཡོངས་སུ་རྫོགས་པའི་བར་ཐམས་ཅད་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ནས་བསྟན་པར་བྱའོ་ཞེས་རྩོམ་པར་དམ་བཅའ་བ་ཡང་བསྟན་པ་ཡིན་ནོ། །བཞི་པ་ནི། ཁོ་ན་རེ། སྤོང་བདུན་འཁོར་བཅས་ཀྱི་ཚུལ་ཁྲིམས་རྟོགས་པའི་ཕྱིར་དུ་བསྟན་བཅོས་འདི་རྩོམ་པ་མི་རིགས་ཏེ། ལུང་སྡེ་བཞིར་སྤོང་བདུན་འཁོར་བཅས་ཀྱི་ཚུལ་ཁྲིམས་བསྟན་ཟིན་པའི་ཕྱིར་རོ་ཞེ་ན། སྐྱོན་མེད་དེ། གཞུང་རྒྱས་པ་ཉན་པས་འཇིགས་ནས་དེ་ལ་འཇུག་མི་ནུས་པའི་གདུལ་བྱ་རྗེས་སུ་གཟུང་བའི་ཕྱིར་དང་། ལུང་དོན་བདེ་བླག་ཏུ་རྟོགས་པར་བྱ་བའི་ཕྱིར་དང་། ལུང་དོན་ཕྱིན་ཅི་ལོག་ཏུ་འཆད་པ་བསལ་བའི་དགོས་པ་ཡོད་པའི་ཕྱིར་རོ། །དང་པོ་ནི་གོ་བར་སླ་ལ། གཉིས་པ་གྲུབ་སྟེ། སྟོན་པས་གཞི་གཅིག་ལ་སྦྱར་ནས་གསུངས་པ་དེ་སློབ་དཔོན་གྱིས་གཞི་དུ་མ་ལ་སྦྱར་ནས་གསུངས་པས་སོ། །དཔེར་ན་ལུང་ལས་ཕམ་པ་དང་པོའི་སྐབས་སུ། དགེ་སློང་གང་བསླབ་པ་མ་ཕུལ་བསླབ་པ་ཉམས་པར་མ་བྱས་པར་མི་ཚངས་པར་སྤྱོད་པ་འཁྲིག་པའི་ཆོས་བསྟེན་ན་ཕམ་པར་འགྱུར་གྱི་ཞེས་གསུངས་པ་ལ། འདིར་སློབ་དཔོན་གྱིས་ལྟུང་བ་སྡེ་ལྔ་སྤྱོད་པའི་རྟེན་གྱི་ཡན་ལག་ལ་བསླབ་པ་མ་ཕུལ་བ་བསླབ་པ་ཉམས་པར་མ་བྱས་པ་དགོས་པར་བསྟན་པ་ལྟ་བུའོ། །གསུམ་པ་གྲུབ་སྟེ། ཁ་ཅིག་རྫས་སྦྱིངས་ཏེ་བརྐུས་པ་ཕྱིས་ལེན་པ་དེ་བརྐུས་ཟིན་བླང་བའི་བློ་མ་ཡིན་པར་མ་བརྐུས་པ་རྐུ་བའི་བློ་ཡིན་ནོ་ཞེས་ཟེར་བ་དེ་འགོག་པར་བྱེད་པ་ལ། དེ་ཕྱིས་དབྱུང་ངོ་སྙམ་པའི་བློས་གང་ཡིན་པ་བཀུར་བའི་འོ་ཞེས་པ་དང་། ཡང་ཁ་ཅིག་གིས་བུར་ཁུ་བྱིན་རླབས་ཅན་རོ་སླར་གྱུར་ན་ལོངས་སྤྱོད་དུ་མི་རུང་བ་དེ་བཞིན་དུ། བྱིན་གྱིས་མ་བརླབས་པའི་བུར་ཁུ་རོ་སླར་གྱུར་པ་ལོངས་སྤྱོད་དུ་མི་རུང་ཞེས་ཟེར་བ་འགོག་པ་ལ། དེ་ནི་མ་ཡིན་ཏེ་ཞེས་སོགས་གསུངས་པ་དང་། ཡང་ཁ་ཅིག་ངོ་བོ་ཉིད་ཚོལ་བ་དང་མཐུན་པར་སྦྱིན་པ་ནན་ཏུར་གྱི་ཚུལ་དུ་བསྟན་པ་ཡིན་ཏེ། མི་འདོད་བཞིན་དུ་སྦྱིན་པ་བྱ་བ་ཡིན་པའི་ཕྱིར་ཟེར་བ་ལ། སློབ་དཔོན་གྱིས་དགེ་འདུན་ལ་གསོལ་བ་བྱ་དགོས་པས་ནན་ཏུར་དུ་མི་འཐད་ཅེས་འགོག་པ་ནི་དེ་ནི་མི་བཟང་སྟེ་ཞེས་སོགས་གསུངས་པའི་ཕྱིར་རོ། །དེ་ལྟར་ཡང་ཊཱི་ཀར་འདིར་དགོས་པ་ནི་ཚུལ་ཁྲིམས་བསྟན་པའོ་ཞེས་སྨྲས་ན། འོ་ན་རྣམ་པར་འབྱེད་པ་ལ་སོགས་པའི་གཞུང་གིས་ཚུལ་ཁྲིམས་དེ་བསྟན་ཟིན་པས་དེའི་ཕྱིར་མདོ་འདི་བརྩམ་པར་མི་བྱ་བ་ཁོ་ནའོ་ཞེ་ན། དེ་ནི་དེ་ལྟ་མ་ཡིན་ཏེ། འདི་ལྟར་གཞུང་གཞན་གྱིས་དེ་བསྟན་མོད་ཀྱི། འོན་ཀྱང་གཞུང་རྒྱས་པ་ཉན་པས་འཇིགས་པ་རྣམས་ཀྱི་དོན་དང་། རྣམ་པར་འབྱེད་པ་ལ་སོགས་པ་དེ་དག་ཉིད་ཡང་དག་པར་བསྟན་པར་བྱ་བའི་ཕྱིར་དང་། ལོག་པར་རྣམ་པར་འཆད་པ་བསལ་བའི་དོན་དུ་སློབ་དཔོན་གྱིས་བརྩམས་སོ་ཞེས་གསུངས་སོ།། ༈ །།གཉིས་པ་དགོས་པ་ཅན་གྱི་བསྟན་བཅོས་ཀྱི་ལུས་དངོས་ལ་གཉིས་ཏེ། སློབ་པ་པོ་རྟེན་གྱི་གང་ཟག་གི་མཚན་ཉིད་དང་། དེས་བསླབ་པར་བྱ་བའི་མཚན་ཉིད་དོ། །དང་པོ་ལ་ལུང་གཞི་དང་། ཕྲན་ཚེགས་དང་། ཞུ་བའི་སྐབས་གསུམ་ལས། དང་པོ་ལ་སྔོན་གྱི་ཆོ་ག་དང་། ད་ལྟར་གྱི་ཆོ་ག་གཉིས། དང་པོ་ལ་ཚིག་གི་དོན་དང་། དོགས་པ་གཅོད་པ་གཉིས། དང་པོ་ལ་སྐྱེ་བ་རྒྱུའི་ཁྱད་པར། སྐྱེ་ཚུལ་གྱི་ཁྱད་པར། ཆོ་ག་གཞན་ཡིན་པར་བསྟན་པ་དང་གསུམ་ལས། དང་པོ་ནི། སྔོན་བཅོམ་ལྡན་འདས་ཀྱིས་ཚུར་ཤོག་གི་སྒོ་ནས་ཕལ་ཆེར་བསྙེན་པར་རྫོགས་པར་མཛད་པས་དགེ་སློང་ཞིག་གི་དྲུང་དུ་རབ་ཏུ་བྱུང་བའི་ཕྱིར་དུ་འོངས་པ་ཚུར་ཤོག་དོན་དུ་གཉེར་ནས་བཅོམ་ལྡན་འདས་ཀྱི་དྲུང་དུ་བཏང་བ་བར་སྐབས་སུ་སྲོག་གི་བར་ཆད་དུ་གྱུར་པ་ལ་བརྟེན་ནས་དགེ་འདུན་འདུས་པས་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་ག་གསུངས་པ་ཡིན་ལ། དེ་ཚུལ་ཇི་ལྟར་བྱ་ན། མཚམས་ནང་དེར་གཏོགས་པའི་དགེ་འདུན་ཐམས་ཅད་འདུས་པ་ན་བསྒྲུབ་བྱ་དེ་སྐྲ་དང་ཁ་སྤུ་བྲེགས། ཆོས་གོས་གསུམ་བགོས་པའི་རབ་ཏུ་བྱུང་བའི་ཆ་ལུགས་འདི་བཞིན་དུ་རྫོགས་པར་བྱས་ཏེ། ལུས་ཀྱི་སྤྱོད་ལམ་དགེ་འདུན་རྒན་རིམ་ལ་ཡན་ལག་ལྔས་ཕྱག་འཚལ། ཐལ་མོ་སྦྱར། སྟན་མེད་པར་ཙོག་ཙོག་པུར་འདུག་སྟེ། དགེ་འདུན་ལ་རབ་ཏུ་བྱུང་བ་དང་བསྙེན་པར་རྫོགས་པར་མཛད་དུ་གསོལ་ཞེས་གསོལ་བ་བཏབ་པར་གྱུར་པ་ལན་གསུམ་དང་། ཆོ་ག་གོ་བར་བྱེད་པའི་གསོལ་བ་གཅིག་དང་བརྗོད་པ་གསུམ་སྟེ་བཞིའི་ལས་ཀྱི་ཉེ་བར་བསྒྲུབ་པའོ། །གཉིས་པ་སྐྱེ་ཚུལ་ནི་དུས་ཅིག་ཆར་དུ་བར་མ་རབ་ཏུ་བྱུང་བ་དང་བསྙེན་པར་རྫོགས་པར་ཉེ་བར་བསྒྲུབས་པར་གྱུར་པ་དེ་ཐོབ་པར་བྱས་པའོ། །སྐབས་འདིའི་རབ་ཏུ་བྱུང་བ་ནི་བར་མ་རབ་བྱུང་ཡིན་ཏེ། གཞི་ཊཱིཀ་ལས། རབ་ཏུ་བྱུང་བ་ཞེས་བྱ་བ་ནི་སྡོམ་པ་ཡང་མ་ཡིན་སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱི་རབ་ཏུ་བྱུང་བ་ཐོབ་པར་མཛད་པའོ། །རྫོགས་པར་བསྙེན་པ་ནི་སྡིག་པ་ཐམས་ཅད་སྤོང་བའི་མཚན་ཉིད་དགེ་སློང་གི་དངོས་པོ་ལ་རྣམ་པར་གཞག་པར་མཛད་པའོ་ཞེས་གསུངས་པའི་ཕྱིར། དགེ་ཚུལ་ལ་བྱེད་པ་མ་ཡིན་ཏེ། དགེ་ཚུལ་ནི་བསྟན་པ་ལ་རིམ་གྱིས་སློབ་པའི་དོན་དུ་བསྟན་པ་ཡིན་ལ། འདིར་བསྟན་པ་ལ་རིམ་གྱིས་སློབ་མི་དགོས་པའི་ཕྱིར་རོ། །གསུམ་པ་ཆོ་ག་གཞན་ཡིན་པར་བསྟན་པ་ནི། རྣམ་པ་དེ་ལྟ་བུ་ནི་སྟེ་ཁོ་ན་ད་ལྟར་གྱི་ཆོ་ག་ལས་གཞན་སྔོན་གྱི་ཆོ་ག་ཡིན་ཞེས་པའི་དོན་ཏེ། ཊཱི་ཀར། ལྟ་བུ་ནི་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པར་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར་རོ། །གཉིས་པ་ལ་དགག་གཞག་སྤང་གསུམ་ལས། དང་པོ་ལ་འདོད་པ་བརྗོད་པ་དང་། དེ་དགག་པ་གཉིས། དང་པོ་ནི། ཁ་ཅིག་སྔོན་ཆོ་ག་ལ་བཅུ་ཡོད་པ་ཡིན་ཏེ། ལུང་མ་མོར། དེ་བཞིན་གཤེགས་པ་རང་བྱུང་དང་། རང་སངས་རྒྱས་ནི་སློབ་དཔོན་མེད་པར་བསྙེན་པར་རྫོགས་པ་དང་། ལྔ་པོ་རྣམས་ཡེ་ཤེས་ཁོང་དུ་ཆུད་པས་དང་། ཚེ་དང་ལྡན་པ་འོད་སྲུང་ཆེན་པོ་སྟོན་པར་ཁས་བླངས་པས་དང་། ཚེ་དང་ལྡན་པ་ལེགས་སྦྱིན་དྲིས་ནས་ལུང་བསྟན་པས་དང་། དགེ་སློང་ཚུར་ཤོག་ཅེས་གསུངས་པས་དང་། སྐྱབས་སུ་འགྲོ་བའི་ཚིག་གསུམ་གྱིས་དང་། ཡུལ་མཐའ་འཁོབ་ན་འདུལ་བ་འཛིན་པ་ལྔའི་དགེ་འདུན་ལས་དང་། ཡུལ་དབུས་སུ་བཅུ་འདུས་པའམ་དེ་ལས་ལྷག་པ་ལས་དང་། བླ་མའི་ཆོས་ཁས་བླངས་པ་ལས་དང་། ཕོ་ཉས་དང་། དགེ་འདུན་སྡེ་གཉིས་ལས་བསྙེན་པར་རྫོགས་པའོ་ཞེས་དང་། མཛོད་འགྲེལ་ལས། བྱེ་བྲག་ཏུ་སྨྲ་བའི་འདུལ་བ་པ་རྣམས་ན་རེ། རྣམ་པ་བཅུས་བསྙེན་པར་རྫོགས་སོ་ཞེས་ཟེར་བ་བསྡུ་བའི་ཕྱིར་སོགས་པའི་སྒྲ་སྨོས་ཏེ། རང་བྱུང་གིས་ནི་སངས་རྒྱས་དང་རང་སངས་རྒྱས་གཉིས་སོ། །ངེས་པ་ལ་ཞུགས་པ་ནི་རྟེན་ལྔ་པོ་རྣམས་སོ། །དགེ་སློང་ཚུར་ཤོག་ཅེས་བྱ་བས་ནི་གྲགས་པ་ལ་སོགས་པ་རྣམས་སོ། །སྟོན་པར་ཁས་བླངས་པས་ནི་འོད་སྲུང་ཆེན་པོའོ། །དྲི་བས་མཉེས་པ་ནི་ལེགས་སྦྱིན། བླ་མའི་ཆོས་ཁས་བླངས་པས་ནི་སྐྱེ་དགུའི་བདག་མོ་ཆེན་མོའོ། །ཕོ་ཉས་ནི་མཆོད་སྦྱིན་ནོ། །འདུལ་བ་འཛིན་པར་གཏོགས་པ་ལྔས་ནི་མཐའ་འཁོབ་ཀྱི་མི་རྣམས་སོ། །བཅུའི་ཚོགས་ཀྱིས་ནི་དབུས་ཀྱི་མི་རྣམས་སོ། །སྐྱབས་སུ་འགྲོ་བ་ལན་གསུམ་བཟླས་པས་ནི་བཟང་སྡེ་དྲུག་ཅུའི་ཚོགས་ཀྱི་བསྙེན་པར་རྫོགས་པར་བྱས་པ་རྣམས་ཏེ། དེ་དག་གི་སོ་སོ་ཐར་པའི་སྡོམ་པ་ནི་གདོན་མི་ཟ་བར་རྣམ་པར་རིག་བྱེད་ལ་རག་ལས་པ་མ་ཡིན་ནོ་ཞེས་དང་། འདུལ་བ་ཚིག་ལེའུར་བྱས་པ་ལས། འདྲེན་པ་རང་རྒྱལ་རབ་བྱུང་གིའོ། །འཕགས་པ་ཀོའུ་ཌི་ཎྱ་སོགས། །ལྔ་སྡེ་རྣམས་ནི་ངེས་པ་ལས། །གང་ཞིག་སློབ་མ་བཟང་སྡེ་རྣམས། །ཐམས་ཅད་སྐྱབས་སུ་འགྲོ་བས་ཐོབ། །ཕོ་ཉ་ཡིས་ནི་མཆོད་སྦྱིན་མ། །ཚུར་ཤོག་དགེ་སློང་ཞེས་བྱས་ཀྱང་། །སྟོན་པར་ཁས་བླངས་པ་ལས་ནི། །དགེ་སློང་འོད་སྲུང་བདག་ཉིད་ཆེ། །དྲི་བས་མཉེས་པ་ཉིད་ཀྱིས་ནི། །སློབ་མ་ལེགས་སྦྱིན་དེ་བཞིན་ནོ། །དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང་། །དེ་བཞིན་འཁོར་ཚོགས་བཅས་པ་ཡི། །གོའུ་ཏ་མ་ལྕི་ཆོས་ཀྱིས། །ཞེས་གསུངས་པའི་དོན་དུ་བསམས་ནས། སྟོན་པ་སངས་རྒྱས་རང་བྱུང་གི་བསྙེན་རྫོགས་དང་། རང་སངས་རྒྱས་མཁན་སློབ་མེད་པར་དང་། ལྔ་སྡེ་བཟང་པོ་ཡེ་ཤེས་ཁོང་དུ་ཆུད་པས་དང་། གྲགས་པ་སོགས་ཚུར་ཤོག་གིས་དང་། བཟང་སྡེའི་ཚོགས་དྲུག་ཅུ་སྐྱབས་སུ་འགྲོ་བར་ཁས་བླངས་པས་དང་། འོད་སྲུང་ཆེན་པོ་སྟོན་པར་ཁས་བླངས་པས་དང་། ལེགས་སྦྱིན་དྲི་བས་དང་། སྐྱེ་དགུའི་བདག་མོ་སོགས་ཤཱཀྱ་མོ་ལྔ་བརྒྱ་ལྕི་བའི་ཆོས་ཁས་བླངས་པས་དང་། མཆོད་སྦྱིན་མོ་འཕྲིན་གྱིས་དང་། ལྷོ་ལམ་པ་གསོལ་བཞིའི་ལས་ཀྱིས་བསྙེན་པར་རྫོགས་པ་སྟེ་སྔོན་ཆོག་བཅུའོ་ཞེས་གསུང་ངོ་། །དེ་ལ་མཚོ་སྣ་བ་ན་རེ། མཛོད་འགྲེལ་ལས། རང་བྱུང་གི་ནི་སངས་རྒྱས་དང་རང་སངས་རྒྱས་གཉིས་སོ་ཞེས་གསུངས་པས་སྟོན་པ་དང་རང་སངས་རྒྱས་གཉིས་ཀ་རང་བྱུང་གི་བསྙེན་རྫོགས་ཡིན་ལ། མཆོད་སྦྱིན་མ་ད་ལྟར་གྱི་ཆོ་གས་བསྙེན་པར་རྫོགས་པ་ཡིན་པས་སྔོན་ཆོག་བརྒྱད་ཅེས་བཞེད་དོ། །དེ་རྣམས་ཀྱང་བསྡུ་ན། ཡུལ་དགེ་འདུན་ལ་བརྟེན་པ་དང་མ་བརྟེན་པ་གཉིས་སམ། ལས་ལ་བརྟེན་པ་དང་མ་བརྟེན་པ་གཉིས་སུ་ཡང་འདུ་ཞིང་། རྟེན་སྐྱེས་པ་ཁོ་ན་ལ་བརྟེན་པ་དང་། བུད་མེད་ཁོ་ན་ལ་བརྟེན་པ་དང་། གཉིས་ཀ་ལ་བརྟེན་པ་གསུམ་དུ་ཡང་འདུའོ། །དེ་ཡང་ལྕི་ཆོས་ཁས་བླངས་པས་བསྙེན་པར་རྫོགས་པ་ནི་བུད་མེད་ཁོ་ན་ལ་བརྟེན་པ་དང་། གསོལ་བཞིའི་བསྙེན་པར་རྫོགས་པ་དང་འཕྲིན་གྱི་བསྙེན་རྫོགས་ནི་གཉིས་ཀ་ལ་བརྟེན་པ་ཡིན་ལ། གཞན་རྣམས་ནི་སྐྱེས་པ་ཁོ་ན་ལ་བརྟེན་ནོ། །ཁ་ཅིག་ཚུར་ཤོག་བུད་མེད་ལ་ཡང་གནང་ངོ་ཞེས་འདོད་དོ། །དེའི་མཚན་ཉིད་ནི། མཁན་སློབ་མེད་པར་རབ་བྱུང་བསྙེན་རྫོགས་ཀྱི་སྡོམ་པ་ཅིག་ཅར་དུ་ཐོབ་པར་བྱེད་པའི་ཐབས་སོ། །དེ་གང་ལ་གནང་ན་དབང་པོ་དང་། རྒྱུད་དང་། དགེ་རྩ་གསུམ་སྨིན་པ་ཤས་ཆེ་ཞིང་། ཉོན་མོངས་པ་དང་། ལས་དང་། རྣམ་སྨིན་གྱི་སྒྲིབ་པ་གསུམ་ཤས་ཆུང་བའི་གང་ཟག་ལ་གནང་ལ། ཁྱད་པར་དུ་རང་བྱུང་དང་མཁན་སློབ་མེད་པ་ནི་སངས་རྒྱས་དང་རང་སངས་རྒྱས་ཁོ་ན་ལ་གནང་། ལྕི་ཆོས་ཁས་བླང་པ་ནི་ཤཱཀྱའི་བུ་མོ་ལྔ་བརྒྱ་པོ་ཁོ་ན་ལ་གནང་། གསོལ་བཞི་དང་འཕྲིན་གྱི་བསྙེན་རྫོགས་ནི་གང་ཟག་སྤྱི་ལ་གནང་། གཞན་རྣམས་རང་རང་ལ་གནང་ངོ་། །དེ་རྣམས་དུས་ནམ་གྱི་ཚེ་བྱུང་ཞེ་ན། རང་བྱུང་གི་བསྙེན་རྫོགས་ནི་སྟོན་པ་སངས་མ་རྒྱས་གོང་དུ་བྱུང་། ཚུར་ཤོག་ནི་སྟོན་པ་སངས་རྒྱས་ནས་མྱ་ངན་ལས་མ་འདས་ཀྱི་བར་དུ་བྱུང་། གཞན་རྣམས་སྟོན་པ་སངས་རྒྱས་ནས་ལོ་བཅུ་གཉིས་ཀྱི་བར་དུ་བྱུང་ངོ་། །འོ་ན་སྔོན་ཆོག་མང་པོར་གཞག་པ་ལ་དགོས་པ་ཅི་ཡོད་ཅེ་ན། དེའི་དགོས་པ་ནི། གདུལ་བྱ་རྣམས་ཀྱི་སྨོན་ལམ་གྱི་དབང་གིས་སྟོན་པས་གདུལ་བྱ་འདུལ་བའི་ཐབས་མང་བར་བསྟན་པའི་ཕྱིར་ཡིན་ནོ། །འོ་ན་སྐབས་འདིར་གསོལ་བཞིའི་སྔོན་ཆོག་གཅིག་པུ་སྨོས་པ་ལ་དགོས་པ་ཅི་ཡོད་ཅེ་ན། སྔོན་གྱི་གསོལ་བཞིའི་ལས་ད་ལྟ་ཡང་རུང་ངམ་སྙམ་པའི་དོགས་པ་ཤས་ཆེ་བས་དེ་བཟློག་པའི་ཕྱིར་དུ་ཡིན་ནོ། །ཅིའི་ཕྱིར་སྔོན་གྱི་ཆོ་ག་ཞེས་བྱ་ཞེ་ན། མཁན་སློབ་དང་བཅས་པའི་ད་ལྟར་གྱི་ཆོ་གའི་སྔ་རོལ་གྱི་ཆོ་གའི་རིགས་ཡིན་པས་སྔོན་ཆོག་གོ །འོ་ན་སྔོན་ཆོག་དང་ད་ལྟར་གྱི་ཆོ་ག་ལ་ཁྱད་པར་ཅི་ཡོད་ཅེ་ན། སྔོན་གྱི་གདུལ་བྱ་རྣམས་སྨིན་པ་ཤས་ཆེ་སྒྲིབ་པ་ཤས་ཆུང་བས་ཚེ་དེ་ལ་མཐོང་ལམ་དངོས་སུ་སྐྱེ་བར་ངེས་པ་དགེ་རྩ་རླབས་པོ་ཆེ་བསགས་པས་བར་ཆད་མེད་པར་ཤས་ཆེ་བས་བར་ཆད་འདྲི་བའི་སྐབས་རྣམས་མེད། སྟོན་པའི་བཀའ་རྫོགས་པར་ནུས་ཤིང་ནད་ཀྱང་ཤས་ཆུང་བས་ན་མཁན་པོ་དང་སློབ་དཔོན་གྱི་སྐོར་རྣམས་མེད། རང་ཤུགས་ཀྱིས་བྱ་བ་རིགས་པ་ལ་འཇུག་པས་རྣམ་འབྱེད་གཉིས་ཀྱི་སྐོར་རྣམས་མེད། སྨན་དང་གོས་མཐའ་གཉིས་དང་བྲལ་བ་ལ་ཤུགས་ཀྱིས་འཇུག་པས་གོས་གཞི་དང་སྨན་གཞིའི་སྐོར་རྣམས་མེད་ལ། ད་ལྟར་གྱི་གདུལ་བྱ་རྣམས་རྒྱུ་མཚན་དེ་རྣམས་ལས་བཟློག་པས་བར་ཆད་འདྲི་བ་སོགས་ཡོད་ཅེས་བཞེད་དོ། །གཉིས་པ་དེ་དགག་པ་ནི། སྔོན་ཆོག་བཅུ་དང་བརྒྱད་དུ་དབྱེ་བ་མི་འཐད་དེ། དེ་ལྟར་ལུང་ཁུངས་ཐུབ་ལས་མ་གསུངས་པའི་ཕྱིར་རོ། །འོ་ན་ལུང་མ་མོ་སོགས་ལས་བསྙེན་རྫོགས་བཅུར་བཤད་པ་མ་ཡིན་ནམ་ཞེ་ན། བཤད་མོད་དེ་ནི་སྔོན་ཆོག་གི་དབྱེ་བ་མ་ཡིན་གྱི། བསྙེན་པར་རྫོགས་ཚུལ་གྱི་དབྱེ་བ་ཡིན་པའི་ཕྱིར་དང་། ཡུལ་དབུས་སུ་བཅུའི་ཚོགས་དང་། མཐའ་འཁོབ་ཏུ་ལྔ་ཚོགས་གསུངས་པ་ནི་ད་ལྟར་གྱི་ཆོ་ག་ལ་ཡང་ཡོད་པའི་ཕྱིར་དང་ད་ལྟར་གྱི་ཆོ་ག་གནང་བའི་རྗེས་ལ་ལྕི་ཆོས་དང་ལྔ་ཚོགས་བྱུང་བས་ན་སྔོན་ཆོག་ཡིན་པ་ཡང་མི་འཐད་ལ། རང་བྱུང་དང་ཡེ་ཤེས་ཁོང་ཆུད་ལ་རིག་བྱེད་ཀྱང་མི་དགོས་པས་ཆོ་ག་ཡིན་པ་ཡང་མི་འཐད་པའི་ཕྱིར་རོ། །མཚོ་སྣ་བ་ན་རེ། སྔོན་ཆོག་བརྒྱད་དུ་དབྱེ་བ་འཐད་དེ། རང་འགྲེལ་དུ་གྲགས་པ་ལས། སྔོན་གྱི་ཆོ་ག་ཞེས་བྱ་བ་ནི་དེ་ལྟ་བུའི་རབ་ཏུ་དབྱེ་བ་ཅན་རབ་ཏུ་བྱུང་བ་དང་བསྙེན་པར་རྫོགས་པའི་ཆོ་གའོ་ཞེས་གསུངས་པའི་ཕྱིར་ཞེས་གསུང་བ་ཡང་མི་འཐད་དེ། རབ་ཏུ་དབྱེ་བ་ཅན་ཞེས་པའི་དོན་དེ་ལྟ་བུའི་ཁྱད་པར་ཅན་ཞེས་པའི་དོན་ཡིན་གྱི། གཞན་དུ་ན་དེ་དབྱེ་གཞིར་བྱེད་དགོས་པར་འགྱུར་ལ། འདོད་ན་སྔོན་ཆོག་ཏུ་འདོད་པ་གཞན་རྣམས་གསོལ་བཞིའི་སྔོན་ཆོག་གི་དབྱེ་བར་འགྱུར་བའི་ཕྱིར་རོ། །གཉིས་པ་རང་ལུགས་ནི། འདིར་བཤད་པའི་གསོལ་བཞིའི་སྔོན་ཆོག་འདི་ཉིད་ཁོ་ན་སྔོན་ཆོག་ཡིན་ཏེ། ལུང་གཞི་སོགས་ལས་ཚུར་ཤོག་ལ་སོགས་པ་གསུང་ཀྱང་། དེ་དག་ལ་སྔོན་ཆོག་གི་ཐ་སྙད་མ་གསུངས་པར་འདི་ཁོ་ན་ལ་སྔོན་ཆོག་གི་ཐ་སྙད་གསུངས་པའི་ཕྱིར་དང་། ཊཱི་ཀར་ལྟ་བུ་ནི་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ། སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པ་གཞན་ནི་མ་ཡིན་ནོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར་རོ། །དུས་ཇི་ཙམ་ན་བྱུང་ཞེ་ན། སྟོན་པ་སངས་རྒྱས་ནས་ལོ་བཅུ་གཉིས་ཕན་དུ་སྔོན་ཆོག་བྱུང་ལ། བཅུ་གསུམ་པ་ནས་ད་ལྟར་གྱི་ཆོ་ག་བྱུང་སྟེ། འགྲེལ་ཆུང་ལས། སྔོན་གྱི་ཆོ་ག་ཞེས་པ་ནི་བཅོམ་ལྡན་འདས་ཞལ་བཞུགས་པའི་ཚེ་ཀོའུ་ཌི་ཎྱ་ལ་སོགས་པའི་ཨ་ཤི་ཕལ་མོ་ཆེ་ཞུགས་ནས་ཝཱ་ར་ཎ་སཱིར་འཁོར་ལོ་བསྐོར་བ་ཚུན་ཆད་ལོ་བཅུ་གཉིས་ཀྱི་བར་དུ་གསོལ་བ་གཅིག་དང་བརྗོད་པ་གསུམ་སྟེ་བཞིའི་ལས་ཀྱི་རབ་ཏུ་བྱུང་བ་དང་བསྙེན་པར་རྫོགས་པ་བྱེད་དོ་ཞེས་གསུངས་པའི་ཕྱིར་རོ། །གསུམ་པ་ནི། ཁོ་ན་རེ་རང་བྱུང་གི་བསྙེན་རྫོགས་ལ་སོགས་པ་དེ་དག་སྔོན་ཆོག་མིན་ན། སྡོམ་གསུམ་ལས། དེ་བས་དགེ་སློང་བྱེད་པ་ལ། །རང་བྱུང་གི་ནི་བསྙེན་རྫོགས་དང་། །ཞེས་པ་ནས། འདི་རྣམས་སྔོན་གྱི་ཆོ་གར་བཤད། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། སྔོན་གྱི་འདུལ་འཛིན་རྣམས་ལ་སྔོན་ཆོག་བཅུ་གྲགས་ཆེ་བས་དེ་དག་གི་བཞེད་པ་དང་སྒོ་བསྟུན་པ་ཡིན་པའི་ཕྱིར་རོ། །གཉིས་པ་ད་ལྟར་གྱི་ཆོ་ག་ལ་གསུམ་སྟེ། མ་ཐོབ་པ་ཐོབ་པར་བྱེད་པའི་ཐབས། ཐོབ་པ་མི་ཉམས་པར་བསྲུང་བའི་ཐབས། འགལ་རྐྱེན་བར་ཆད་ཀྱི་མཚན་ཉིད་དོ། །དང་པོ་ལ་ཚིགས་སྔ་མ་དགེ་ཚུལ་དུ་སྒྲུབ་པ་དང་། ཚིགས་ཕྱི་མ་བསྙེན་རྫོགས་སུ་སྒྲུབ་པ་གཉིས། དང་པོ་ལ། སྔོན་ཆོག་ལ་མེད་ཅིང་ད་ལྟར་གྱི་ཆོ་ག་ལ་ཡོད་པའི་ཁྱད་པར་ལ། མཁན་པོ་ལ་བརྟེན་པ་དང་། བར་ཆད་དྲི་བ་དང་། བསྟན་པ་ལ་རིམ་གྱིས་སློབ་པ་གསུམ་ཡོད་པས་དེ་གསུམ་རིམ་བཞིན་སྟོན་པ་ནི། རབ་ཏུ་བྱུང་བ་དང་ཞེས་པ་དང་། དང་པོའི་མཁན་པོ་ཉིད་ཀྱིས་ཞེས་པ་དང་། དགེ་བསྙེན་ཉིད་དང་། དགེ་ཚུལ་ཉིདདང་། དགེ་སློང་ཉིད་དག་གིས་སྔ་མ་བསྙེན་པར་མ་རྫོགས་པ་ལ་ཕྱི་མ་མི་བྱའོ་ཞེས་གསུངས་པ་འདིའི་སྐབས་སུ་དགོས་དོན་དང་བསྡུས་དོན་གཉིས་ལས། དང་པོ་ནི། དགེ་བསྙེན་ལ་སོགས་པའི་སྡོམ་པ་གསུམ་རིམ་གྱིས་སྦྱིན་པ་ལ་དགོས་པ་ཡོད་དེ། སྡོམ་པ་བརྟན་པ་དང་། བསྟན་པ་རིམ་གྱིས་མི་སྤོང་བ་དང་། རབ་བྱུང་བསྙེན་རྫོགས་བྱེད་པ་པོ་ལ་ཚིག་འདས་ཀྱི་ལྟུང་བ་མི་འབྱུང་བའི་དགོས་པ་ཡོད་པའི་ཕྱིར། གཉིས་པ་ལ་གསུམ་སྟེ། མེད་ན་མི་འབྱུང་བའི་རྒྱུ་དང་རྣམ་གཞག་གི་རྒྱུ་གང་ཡིན་དཔྱད་པ། སྔ་མ་སྔ་མའི་འཇུག་ཐོག་ཏུ་ཕྱི་མ་ཕྱི་མ་རུང་མི་རུང་དཔྱད་པ། སོ་སོའི་དོན་ནོ། །དང་པོ་ནི། སྡོམ་པ་སྔ་མ་སྔ་མ་ཕྱི་མ་ཕྱི་མའི་མེད་ན་མི་འབྱུང་གི་རྒྱུ་དང་བཅས་པ་རྣམ་གཞག་ཡིན་ཞེ་ན། ཁ་ཅིག་མེད་ན་མི་འབྱུང་གི་རྒྱུ་ཡིན་ཏེ། བར་མ་རབ་བྱུང་གི་སྡོམ་པ་མེད་པར་དགེ་ཚུལ་དང་དགེ་ཚུལ་གྱི་སྡོམ་པ་མེད་པར་བསྙེན་རྫོགས་ཀྱི་སྡོམ་པ་མི་སྐྱེ་བའི་ཕྱིར། བར་མ་རབ་བྱུང་མེད་པར་དགེ་ཚུལ་གྱི་སྡོམ་པ་མི་སྐྱེ་སྟེ་ལུང་ལས། ཁྱིམ་པ་རབ་ཏུ་བྱུང་བ་ཞིག་བསྙེན་པར་རྫོགས་པར་བྱེད་ན། རྫོགས་ཞེས་བགྱིའམ། རྫོགས་ཞེས་བྱའོ་ཞེས་གསུངས་པའི་ཕྱིར་དང་། ཊཱི་ཀར་དགེ་ཚུལ་ནི་རབ་ཏུ་བྱུང་བ་ཁོ་ན་ལ་བྱའོ་ཞེས་གསུངས་པའི་ཕྱིར། རིགས་པ་ནི། ཚངས་སྤྱོད་ལ་ཉེར་གནས་ཀྱི་སྡོམ་པ་མེད་པར་དགེ་སློང་མའི་སྡོམ་པ་སྐྱེ་བར་ཐལ། བར་མ་མེད་པར་དགེ་ཚུལ་གྱི་སྡོམ་པ་སྐྱེ་བའི་ཕྱིར་ཞེས་ཟེར་རོ། །བར་མ་མེད་པར་དགེ་ཚུལ་གྱི་སྡོམ་པ་དང་བསྙེན་རྫོགས་ཀྱི་སྡོམ་པ་སྐྱེ་བར་ཐལ། ལུང་བར་སྡོམ་ལས། རབ་ཏུ་མ་བྱུང་བསྙེན་རྫོགས་དང་། །ཞེས་གསུངས་ཤིང་། ལུང་ལས་ཀྱང་། ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བྱེད་ན་བསྙེན་པར་རྫོགས་པ་ཞེས་བགྱིའམ། བསྙེན་པར་རྫོགས་ཞེས་བྱ་ལ། རྫོགས་པར་བྱེད་པ་པོ་དག་ལ་འགལ་ཚབས་ཅན་དུ་འགྱུར་རོ་ཞེས་དང་། ཊཱི་ཀར་ཡང་། དེ་ནི་རྣམ་པར་གཞག་པ་བསྟན་པ་ཡིན་གྱི། འབྱུང་བའི་རྒྱུ་བསྟན་པ་མིན་ཏེ། འདི་ལྟར་དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་གྱི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་ལ། དེ་བཞིན་དུ་དགེ་ཚུལ་གྱི་སྡོམ་པ་མེད་པར་དགེ་སློང་གི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་པའི་ཕྱིར་རོ། །དེ་ལྟར་ན་གོ་རིམ་འདིས་ནི་སྡོམ་པ་ཐམས་ཅད་ཀྱི་ཡང་དག་པར་བླང་བ་བསྟན་པ་ཡིན་ཏེ། འདི་ལྟར་བཙུན་པ་ཁྱིམ་པ་རབ་ཏུ་མ་བྱུང་བ་ཞིག་རྫོགས་པར་བསྙེན་པར་བགྱིད་ན། རྫོགས་པར་བསྙེན་ཞེས་བགྱིའམ་རྫོགས་པར་མ་བསྙེན་ཞེས་བགྱི། ཉེ་བ་འཁོར་རྫོགས་པར་བསྙེན་ཞེས་བགྱིའོ་ཞེས་གསུངས་པའི་ཕྱིར། ཁ་ཅིག་ཚངས་སྤྱོད་ལ་ཉེར་གནས་མེད་པར་དགེ་སློང་མའི་སྡོམ་པ་སྐྱེ་བའི་ཤེས་བྱེད་དུ་དགེ་སློང་དང་དགེ་སློང་མ་རྣམས་ཀྱི་ལས་གཞན་མ་ཡིན་ཞེས་པ་འདྲེན་པ་ཡང་མ་འབྲེལ་བ་ཡིན་ནོ། །གཉིས་པ་ལ་སྔ་མ་སྔ་མའི་འཇུག་ཐོག་ཏུ་ཕྱི་མ་ཕྱི་མ་བྱར་རུང་སྟེ། གཞུང་ལས། དགེ་བསྙེན་དང་དགེ་ཚུལ་གྱི་སྡོམ་པ་བླངས་ནས་དུས་གོ་མ་བརྗོད་པར་བསླབ་པ་བརྗོད་པར་གསུངས་པའི་ཕྱིར། ཁོ་ན་རེ་དུས་གོ་བརྗོད་ནས་བསླབ་པ་བརྗོད་པའི་དབང་དུ་བྱས་པའི་ཕྱིར་ཞེ་ན་མི་འཐད་དེ། ཊཱི་ཀར། དགེ་བསྙེན་དང་དགེ་ཚུལ་དུ་ཁས་བླངས་པའི་དེ་མ་ཐག་ཅེས་གསུངས་པའི་ཕྱིར་རོ།། ༈ །།གསུམ་པ་སོ་སོའི་དོན་ལ་གསུམ་ལས། དགེ་བསྙེན་ལ་མཚན་ཉིད། ངེས་ཚིག དབྱེ་བ་དང་གསུམ་ལས། དང་པོ་ནི། རབ་ཏུ་མ་བྱུང་བའི་གང་ཟག་གང་ཞིག སྤང་བྱ་ལྔ་ཇི་སྲིད་འཚོའི་བར་དུ་སྤོང་བར་ཁས་འཆེ་བའོ། །གཉིས་པ་ནི། ཁ་ཅིག་དགེ་འདུན་ལ་བསྙེན་བཀུར་ཚུལ་བཞིན་དུ་བྱེད་པས་ན་དགེ་བསྙེན་ཞེས་ཟེར་རོ། །རང་ལུགས་ནི། དགེ་བསྙེན་གྱི་སྐད་དོད་དུ་ཨུ་པ་སི་ཀ་ཞེས་འབྱུང་ལ། ཨུ་པ་ནི་ཉེ་བ། སི་ཀ་ནི་དགེ་བ་སྟེ་དོན་དམ་པའི་དགེ་བ་མྱ་ངན་ལས་འདས་པ་དང་ཉེ་བར་གནས་པས་ན་དགེ་བསྙེན་ཞེས་བྱ་སྟེ། ཕྲན་ཚེགས་འགྲེལ་པ་ལས། དགེ་བསྙེན་ཞེས་བྱ་བ་ནི་མྱ་ངན་ལས་འདས་པ་ལ་ཉེ་བར་གནས་པ་ཉིད་ཀྱི་ཕྱིར་རོ་ཞེས་གསུངས་པའི་ཕྱིར་རོ། །གསུམ་པ་ནི། གཞུང་གཞན་དུ་སྐྱབས་གསུམ་འཛིན་པའི་དགེ་བསྙེན། སྣ་གཅིག་སྤྱོད་པ། སྣ་འགའ་སྤྱོད་པ། ཕལ་ཆེར་སྤྱོད་པ། ཡོངས་རྫོགས། ཚངས་སྤྱོད། གོ་མིའི་དགེ་བསྙེན་དང་བདུན་དུ་གསུངས་མོད་འདིར་ནི་ཡོངས་རྫོགས་དང་ཚངས་སྤྱོད་ཀྱི་དགེ་བསྙེན་གཉིས་སོ། །དགེ་ཚུལ་ལ་གསུམ་ལས། དང་པོ་མཚན་ཉིད་ནི། རབ་ཏུ་བྱུང་ཞིང་བསྙེན་པར་མ་རྫོགས་པའི་གང་ཟག་གང་ཞིག སྤང་བྱ་བཅུ་ཇི་སྲིད་འཚོའི་བར་དུ་སྤོང་བར་ཁས་འཆེ་བའོ། །ངེས་ཚིག་ནི། དགེ་ཚུལ་གྱི་སྐད་དོད་དུ་ཤྲ་མ་ཎྱ་ར་ཞེས་འབྱུང་ལ། དེ་ངལ་བར་བྱེད་པ་ལ་འཇུག་པས་ན། བླ་མའམ་དགེ་འདུན་གྱི་བྱ་བ་ལ་ངལ་བར་བྱེད་པས་ན་དགེ་ཚུལ་ཞེས་བྱའོ། །ཁ་ཅིག་དགེ་སྦྱོང་གི་ཆོས་བཞི་སྒྲུབ་པའི་ངང་ཚུལ་ཅན་ཡིན་པས་དགེ་ཚུལ་ཞེས་ཀྱང་ཟེར་རོ། །དབྱེ་ན་ཕ་མ་གཉིས་སུ་ཡོད་དེ། དགེ་ཚུལ་གཉིས་ཀྱང་ངོ་ཞེས་གསུངས་པའི་ཕྱིར་རོ། །གསུམ་པ་དགེ་སློང་ལ་མཚན་ཉིད་ནི། བསྟན་པ་ལ་ཞུགས་ལ་རྫོགས་པའི་གང་ཟག་གང་ཞིག ལུས་ངག་གི་ཁ་ན་མ་ཐོ་བ་མཐའ་དག་སྤོང་བར་ཁས་འཆེ་བའོ། །ངེས་ཚིག་ནི། དགེ་སློང་གི་སྐད་དོད་དུ་བྷིཀྵུ་ཞེས་འབྱུང་ལ། དེ་སློང་བ་ལ་འཇུག་པས་ན་སློང་བས་ན་དགེ་སློང་སྟེ། དགེ་སློང་ལ་རབ་ཏུ་གཅེས་པའི་མདོར། སྒྲ་འཇུག་རྣམ་པར་ཟད་ཕྱིར་དང་། །དགེ་བ་སློང་དང་ཟས་སློང་དང་། །ཉེ་བར་ཞི་དང་ལམ་ཞུགས་དང་། །ལེགས་པར་འཚོ་དང་ཆགས་སྤངས་དང་། །ཡིད་འོང་ཕྱིར་ན་དགེ་སློང་ཞེས་སོ། །དབྱེ་ན་ཕ་མ་གཉིས་སོ། །དང་པོ་གཉིས་ཀྱི་སྡོམ་པ་ནོད་པའི་ཚུལ་ནི། སྐྱབས་སུ་འགྲོ་བ་ཁས་བླང་བའི་ཚིག་རྩོམ་པ་དང་ཞེས་པའི་སྐབས་སུ་དགེ་བསྙེན་གྱི་སྡོམ་པ་ནོད་པའི་ཚུལ་དང་། དོགས་པ་གཅད་པ་གཉིས་ལས། དང་པོ་ནི། རབ་བྱུང་དོན་དུ་གཉེར་བའི་བསྒྲུབ་བྱ་དེ་མཁན་པོ་ཉིད་དུ་འོས་པའི་དགེ་སློང་དེའི་དྲུང་དུ་ཙོག་ཙོག་པུར་འདུག་སྟེ་གུས་པའི་སྤྱོད་ལམ་བསྙེན་པ་ལ་དགེ་སློང་དེས་བར་ཆད་ལེགས་པར་དྲིས་ཏེ་བར་ཆད་མེད་པར་ཤེས་པ་ན་ཁོ་བོས་ཁྱོད་རབ་ཏུ་དབྱུང་ངོ་ཞེས་སྐབས་ཕྱེ་སྟེ། དེ་ནས་སྟོན་པ་དང་དགེ་སློང་རང་ལ་ཕྱག་གསུམ་འཚལ་དུ་བཅུག་སྟེ་སྐྱབས་འགྲོ་རྩོམ་བྱེད་དུ་བྱས་ཏེ་ཁས་ལེན་ལན་གསུམ་གྱིས་སྒོ་ནས་འབོགས་པར་བྱའོ། །དེ་ཡང་བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་རྐང་གཉིས་རྣམས་ཀྱི་མཆོག་ཅེས་པ་ནས། དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་བཟུང་དུ་གསོལ་ཞེས་པའི་རྗེས་ཟློས་ལན་གསུམ་བྱ་སྟེ། རྣམ་གྲངས་ཐ་མ་ལ་སློབ་དཔོན་གྱིས་ཞེས་བརྗོད་པར་བྱའོ། །སྐབས་འདིའི་དཀོན་མཆོག་གསུམ་གྱི་མཚན་གཞི་གང་ཞེ་ན། སངས་རྒྱས་དཀོན་མཆོག་ནི་སངས་རྒྱས་སུ་བྱེད་པའི་ཆོས་མི་སློབ་པའི་ལམ་གྱི་བདེན་པ། ཆོས་དཀོན་མཆོག་ནི་མྱ་ངན་ལས་འདས་པ་སོ་སོར་བརྟགས་འགོག དགེ་འདུན་དཀོན་མཆོག་ནི་དགེ་འདུན་དུ་བྱེད་པའི་ཆོས་སློབ་པ་དང་མི་སློབ་པའི་ལམ་གྱི་བདེན་པ་སྟེ། མཛོད་ལས། གང་ཞིག་གསུམ་ལ་སྐྱབས་འགྲོ་དེ། །སངས་རྒྱས་དགེ་འདུན་བྱེད་པའི་ཆོས། །མི་སློབ་པ་དང་གཉིས་ཀ་དང་། །མྱ་ངན་འདས་ལ་སྐྱབས་སུ་འགྲོ། །ཞེས་སོ། །གཉིས་པ་ནི། ཁ་ཅིག་འདིར། སྐྱབས་འགྲོ་ལན་གསུམ་སྔོན་དུ་བརྗོད་ནས་དེའི་འོག་ཏུ་དགེ་བསྙེན་དང་དགེ་ཚུལ་དུ་ཁས་བླངས་པའི་ཚིག་བརྗོད་པ་ནི་མི་འཐད་དེ། སྐྱབས་འགྲོ་ནི་མྱ་ངན་ལས་འདས་པའི་བསམ་པ་བརྟན་པོ་སྒྲུབ་བྱེད་ཡིན་ལ། དེ་ཡང་སྐྱབས་འགྲོ་དང་ཁས་ལེན་གྱི་ཚིག་རེ་རེ་ནས་སྤེལ་ནས་བརྗོད་ན་སྐྱེ་སླ་བའི་ཕྱིར། དང་པོ་གྲུབ་སྟེ། ཊཱི་ཀར་མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་བས་སྐྱབས་སུ་འགྲོ་བས་མྱ་ངན་ལས་འདས་པའི་བསམ་པ་བརྟན་པོ་སྒྲུབ་པར་བྱེད་དེ། ཇི་ལྟར་ཞེ་ན། རྐང་གཉིས་རྣམས་ཀྱི་མཆོག སངས་རྒྱས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ལམ་ཉེ་བར་སྟོན་པར་མཛད་པ་ལ་ཡང་དག་པར་བརྟེན་པར་བྱེད། འདོད་ཆགས་དང་བྲལ་བ་རྣམས་ཀྱི་མཆོག ཆོས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ཆོས་ཀྱི་མཆོག་མྱ་ངན་ལས་འདས་པ་ལ་ཡང་དག་པར་བརྟེན་པར་བྱེད། ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ་ཞེས་བྱ་བ་འདིས་ནི་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་ཟླ་གྲོགས་ལ་ཡང་དག་པར་བརྟེན་པར་བྱེད་པའི་ཕྱིར་ཏེ། མྱ་ངན་ལས་འདས་པའི་བསམ་པ་བརྟན་པོ་མེད་པར་སུ་ཡང་སྐྱབས་སུ་འགྲོ་བ་བསྒྲུབ་པར་མི་བྱེད་དོ་ཞེས་གསུངས་པའི་ཕྱིར། འོ་ན་བསྙེན་རྫོགས་ཀྱི་སྐབས་སུ་སྐྱབས་འགྲོ་མེད་པས་ངེས་འབྱུང་གི་བསམ་པ་གང་གིས་བསྒྲུབ་ཞེ་ན། བསྙེན་པར་རྫོགས་ཞེས་པའི་ཚིག་དེ་ཉིད་ཀྱིས་ངེས་འབྱུང་གི་བསམ་པ་རྟོགས་པར་བྱེད་དེ། བསྙེན་པར་རྫོགས་ཞེས་པའི་རྫོགས་པ་ནི་མྱ་ངན་ལས་འདས་པ་ཡིན་ལ། བསྙེན་པ་ནི་ཉེ་བའི་དོན་ཡིན་པའི་ཕྱིར། ཊཱི་ཀར་རྫོགས་པར་བསྙེན་པའི་དུས་ན་ནི་རྫོགས་པར་བསྙེན་ཞེས་པའི་སྒྲ་ཁོ་ན་ལས་མྱ་ངན་ལས་འདས་པའི་བསམ་པ་བརྟན་པོར་རྟོགས་པར་བྱ་སྟེ། འདི་ལྟར་རྫོགས་པར་བསྙེན་པ་ཞེས་བྱ་བ་ལ་རྫོགས་པ་ཞེས་བྱ་བ་ནི་གནོད་པ་ཐམས་ཅད་དང་བྲལ་བའི་དངོས་པོ་ལ་བྱ་སྟེ། མྱ་ངན་ལས་འདས་པ་ཡང་དེ་ལྟ་བུའི་རང་བཞིན་ཡིན་ནོ། །བསྙེན་པ་ཞེས་བྱ་བ་ནི་ཉེ་བའི་ཚིག་ཡིན་ཏེ། དེའི་ཕྱིར་བསམ་པ་ཐམས་ཅད་ཀྱིས་མྱ་ངན་ལས་འདས་པ་དང་ཉེ་བར་གྱུར་པ་ནི་རྫོགས་པར་བསྙེན་པ་ཡིན་ནོ་ཞེས་གསུངས་པའི་ཕྱིར་རོ། །འདུལ་འཛིན་ཁ་ཅིག་ན་རེ་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་མི་དགོས་ཏེ། འཆར་ཀ་དང་གཅུང་མཛེས་དགའ་བོ་གཉིས་སྟོན་པའི་ངོ་མ་ཆོག་པར་རབ་ཏུ་བྱུང་ལ་ཀུན་དགའ་བོའི་དབོན་པོ་གཉིས་ལྟོ་ཕྱིར་དུ་རབ་ཏུ་བྱུང་བའི་ཕྱིར་དང་། སོ་ཐར་གྱི་སྡོམ་པ་ལེན་པའི་སྔ་རོལ་ཏུ་འཁོར་བ་ལས་ཡིད་འབྱུང་བའི་ལམ་གྱི་རིམ་པའང་མ་གསུངས་པའི་ཕྱིར་དང་། ད་ལྟའི་རབ་བྱུང་ཕལ་ཆེ་བ་ལ་སོ་ཐར་གྱི་སྡོམ་པ་མ་སྐྱེས་པར་ཐལ། ལེན་པའི་སྔ་རོལ་དུ་ངེས་འབྱུང་གིས་བསམ་པ་མེད་པའི་ཕྱིར། ཁྱབ་པ་ཁས་བླངས། འདོད་ན། སོ་ཐར་གྱི་སྡོམ་པའི་ཉམས་ལེན་བྱེད་མི་དགོས་པར་ཐལ་ལོ་ཞེས་ཟེར་རོ། །དང་པོ་མི་འཐད་དེ། གང་ཟག་དེ་རྣམས་སྲིད་པ་ཐ་མ་པ་ཡིན་པས་ཐར་པ་ཆ་མཐུན་གྱི་དགེ་རྩ་དང་ལྡན་པས་ངེས་འབྱུང་གི་བསམ་པ་མེད་པར་མི་འགྲུབ་པའི་ཕྱིར་དང་། ཕྱོགས་སྔ་གཉིས་པ་ལྟར་ན། འདུལ་བ་མདོ་རྩས་དངོས་སུ་བསྟན་པའི་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་མི་དགོས་པར་ཐལ། དེ་ལེན་པའི་སྔ་རོལ་དུ་འཁོར་བ་ལ་ཡིད་འབྱུང་བའི་ལམ་གྱི་རིམ་པ་མ་གསུངས་པའི་ཕྱིར། འཁོར་གསུམ། གསུམ་པ་ལ། ད་ལྟའི་རབ་བྱུང་སྒྲུབ་པའི་དུས་སུ་མཁན་པོས་འཁོར་བའི་ཉེས་དམིགས་དང་ཐར་པའི་ཕན་ཡོན་བཤད་པ་དོན་མེད་པར་ཐལ། མཁན་པོས་དེ་ལྟར་བཤད་ཀྱང་བསྒྲུབ་བྱ་རྣམས་ཀྱི་རྒྱུད་ལ་ངེས་འབྱུང་གི་བསམ་པ་མི་སྐྱེ་བའི་ཕྱིར། རྟགས་ཁས་བླངས། སོ་ཐར་གྱི་སྡོམ་པ་མ་སྐྱེས་ན་ཉམས་ལེན་མི་དགོས་པར་ཐལ། ཞེས་པ་ཡང་མ་ངེས་པ་ཡིན་ཏེ། མ་སྐྱེས་པ་ལྟུང་བ་ལ་སྦྱར་ན་ཉེས་བྱས་སུ་གསུངས་པའི་ཕྱིར། སྐྱབས་འགྲོ་མ་བྱས་པར་དགེ་ཚུལ་གྱི་སྡོམ་པ་སྐྱེ་བར་ཐལ། མྱང་འདས་ཀྱི་བསམ་པ་མེད་པར་དགེ་ཚུལ་གྱི་སྡོམ་པ་སྐྱེ་བའི་ཕྱིར། རྟགས་ཁས་བླངས། ཁྱབ་སྟེ། ཊཱི་ཀར་སྐྱབས་སུ་འགྲོ་བ་ནི་མྱ་ངན་ལས་འདས་པའི་བསམ་པ་བརྟན་པོ་སྒྲུབ་པར་བྱེད་ཅེས་གསུངས་པའི་ཕྱིར། རང་ལུགས་ནི་སོ་ཐར་གྱི་སྡོམ་པ་སྐྱེ་བ་ལ་ངེས་འབྱུང་གི་བསམ་པ་དགོས་ཏེ། ཊཱི་ཀར་མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་ཞེས་གསུངས་ཞིང་། གཞི་འགྲེལ་ལས་ཀྱང་དེ་དང་མཐུན་པར་བཤད་ལ། ཕྲན་ཚེགས་འགྲེལ་པ་ལས་ཐར་པའི་བསམ་པ་མེད་པར་སྡོམ་པ་མི་སྐྱེ་ཞེས་གསུངས་པའི་ཕྱིར་དང་། མཛོད་འགྲེལ་ལས། ཕྱི་རོལ་པ་རྣམས་ལ་ཡང་དག་པར་བླངས་པའི་ཚུལ་ཁྲིམས་མེད་དམ་ཞེ་ན། ཡོད་མོད་ཀྱི་སོ་སོར་ཐར་པའི་སྡོམ་པ་ནི་མ་ཡིན་ཏེ། ཅིའི་ཕྱིར་ཞེ་ན། དེ་ནི་སྲིད་པ་ལ་བརྟེན་པའི་ཕྱིར། གཏན་ཏུ་སྡིག་པ་ལས་སོ་སོར་ཐར་པ་བྱེད་པ་མ་ཡིན་ནོ་ཞེས་གསུང་ངོ་། །དེང་སང་ཁ་ཅིག་དགེ་བསྙེན་གྱི་སྡོམ་པ་ལ་སོགས་པ་གསུམ་ཀ་ལ་འཇིགས་སྐྱོབ། ལེགས་སྨོན། ངེས་འབྱུང་གི་ཚུལ་ཁྲིམས་གསུམ་གསུམ་ཡོད་མོད་ཀྱི། སྔར་གྱི་ལུང་དེ་དག་དང་མི་འགལ་ཏེ། རྒྱུ་དུས་ཀྱི་ཀུན་སློང་གི་སྒོ་ནས་འཇིགས་སྐྱོབ་སོགས་གསུམ་དུ་ཕྱེ་ཡང་དེ་དུས་ཀྱི་ཀུན་སློང་ལ་ངེས་འབྱུང་གི་བསམ་པ་ངེས་པར་དགོས་པའི་ཕྱིར་ཞེས་གསུངས་པ་ནི་མི་འཐད་དེ། འཇིགས་སྐྱོབ་ཀྱི་ཚུལ་ཁྲིམས་ཀྱི་མཚན་གཞི་དེ་ཆོས་ཅན། འཇིགས་སྐྱོབ་ཀྱི་ཚུལ་ཁྲིམས་མ་ཡིན་པར་ཐལ། ངེས་འབྱུང་གི་ཚུལ་ཁྲིམས་ཡིན་པའི་ཕྱིར། གཏན་ཚིགས་ཁས་བླངས་ཏེ། མྱང་འདས་ཀྱི་བསམ་པ་བརྟན་པོས་ཀུན་ནས་བསླངས་པའི་ཚུལ་ཁྲིམས་ཡིན་པའི་ཕྱིར། གཞན་ཡང་དགེ་ཚུལ་དང་དགེ་སློང་གི་སྡོམ་པའི་དེ་དུས་ཀྱི་ཀུན་སློང་ཡིན་ན་དགེ་བ་ཡིན་པས་ཁྱབ་སྟེ། མཛོད་ལས། དགེ་བ་བཅུ་ཡི་བར་དག་དང་། །སེམས་པ་ཅིག་ཆར་ལྷན་ཅིག་འབྱུང་། །ཞེས་དང་། དེའི་རང་འགྲེལ་དུ། མི་དགེ་བ་དང་ལུང་མ་བསྟན་གྱི་སེམས་ལ་གནས་ནས་དགེ་ཚུལ་དང་དགེ་སློང་གི་སྡོམ་པ་ལེན་པར་བཤད་པའི་ཕྱིར་དང་། རབ་ཏུ་འཇུག་བྱེད་དགེ་སོགས་ལས། །རྗེས་འཇུག་བྱེད་ཀྱང་རྣམ་གསུམ་འགྱུར། །ཞེས་རྒྱུ་དུས་དང་དེ་དུས་ཀྱི་ཀུན་སློང་ལ་མུ་དགུ་གསུངས་པའི་ཕྱིར་དང་། དགེ་ཚུལ་གྱི་སྡོམ་པ་སྐྱེ་བའི་རྒྱུ་ཚོགས་ཚང་ནས་སྐྱེ་བ་ལ་མངོན་དུ་ཕྱོགས་པའི་ཚེ་དགེ་ཚུལ་གྱི་སྡོམ་པ་གཟུགས་ཅན་སྐྱེ་བ་ལ་མི་དགེ་བ་དང་ལུང་མ་བསྟན་གྱི་སེམས་གང་གིས་ཀྱང་གེགས་བྱེད་མི་ནུས་པའི་ཕྱིར་ཏེ། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་བྱེད། །ཅེས་གསུངས་པ་ལྟར་རོ། །རྗེ་བླ་མའི་ཞལ་སྔ་ནས། སྤྱིར་རིགས་བདུན་ཀ་ལ་འཇིགས་སྐྱོབ་ལ་སོགས་པ་གསུམ་གསུམ་ཡོད་མོད་ཀྱི། དང་པོ་གཉིས། སོ་ཐར་གྱི་སྡོམ་པ་མ་ཡིན་ཏེ། མྱང་འདས་ཀྱི་བསམ་པས་མ་ཟིན་པའི་ཕྱིར། མདོ་རྩ་ནས་དངོས་སུ་བསྟན་པའི་དགེ་བསྙེན་གྱི་སྡོམ་པ་སོགས་ཀྱང་མ་ཡིན་ཏེ། མྱ་ངན་ལས་འདས་པའི་བསམ་པ་བརྟན་པོས་མ་ཟིན་པའི་ཕྱིར། ཁྱབ་པ་ཡོད་དེ། མདོ་རྩ་ནས་དངོས་སུ་བསྟན་པའི་སྡོམ་པ་ཐམས་ཅད་ངེས་འབྱུང་གི་ཚུལ་ཁྲིམས་ཀྱི་དབང་དུ་བྱས་པ་ཡིན་པའི་ཕྱིར་ཏེ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། སྔར་གྱི་ལུང་འདི་དག་བྱ་བ་འདིའི་དབང་དུ་བྱས་པ་ཡིན་ནོ། །འཇིགས་སྐྱོབ་དང་ལེགས་སྨོན་གཉིས་ཀྱང་ནམ་ཞིག་མྱང་འདས་ཀྱི་བསམ་པས་ཟིན་པའི་ཚེ། སོ་ཐར་དང་ངེས་འབྱུང་གི་ཚུལ་ཁྲིམས་སུ་གནས་འགྱུར་བ་ཡིན་ནོ་ཞེས་གསུངས་པ་ནི། རྗེ་བཙུན་ས་སྐྱ་པ་རྣམས་ཀྱི་དགོངས་པ་དཔྱིས་ཕྱིན་པའོ། །དགེ་བསྙེན་བསྒྲུབས་ནས་དེའི་འོག་ཏུ་བསླབ་པ་བརྗོད་པར་བྱའོ། །དགེ་ཚུལ་དུ་སྒྲུབ་པ་ལ་དགོས་དོན་དང་བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། དགེ་ཚུལ་གྱི་སྡོམ་པ་སྐྱེ་བ་དང་། བསྙེན་རྫོགས་ཀྱི་སྣོད་རུང་དུ་འགྱུར་བ་དང་། མཐར་མྱང་འདས་ཐོབ་པར་འགྱུར་བའི་ཕྱིར་རོ། །གཉིས་པ་ལ་བཞི་ཏེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་སྦྱིན་པའོ། །དང་པོ་ནི། ཕུན་སུམ་ཚོགས་པ་གསུམ་དང་ལྡན་པའི་བསྒྲུབ་བྱ་ལ་སྟེ། དེ་ཡང་ལུས་ཕུན་སུམ་ཚོགས་པ་ནི་ལོ་བདུན་ལོན་ཞིང་བྱ་རོག་སྐྲོད་ནུས་པའམ་བསམ་པའི་སྒོ་ནས་ལོ་བདུན་ལོན་པར་འདུ་ཤེས་པའོ། །རྟགས་ཕུན་སུམ་ཚོགས་པ་ནི་སྐྲ་དང་ཁ་སྤུ་བྲེགས་པ་སོགས་ཁྱིམ་པའི་རྟགས་སྤངས་ཤིང་རབ་ཏུ་བྱུང་བའི་རྟགས་དང་ལྡན་པའོ། །བསམ་པ་ཕུན་སུམ་ཚོགས་པ་ནི་སྡོམ་པ་ལེན་འདོད་དང་ཐོབ་ཤེས་དང་ངེས་འབྱུང་གི་བསམས་པ་དང་ལྡན་པའོ། །སྡོམ་པ་སྐྱེ་བ་ལ་བསམ་པ་དེ་གསུམ་དགོས་ཏེ། བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ་ཞེས་གསུངས་པའི་ཕྱིར་དང་། སྡོམ་པ་ཐོབ་པར་ཤེས་པའི་ཡུལ་ལ་ལེན་འདོད་སྐྱེ་བར་ལྟར་མི་ཐོབ་པར་ཤེས་པའི་ཡུལ་ལས་དེ་མི་སྐྱེ་བ་ཡིན་པའི་ཕྱིར་དང་། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། གཉིས་པ་ནི། བསྙེན་པར་རྫོགས་པའི་སྡོམ་པ་རྣམ་དག་དང་ལྡན་པ། ལྟ་བ་དང་མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་དུ་གནས་པ། ས་རང་བཞིན་དུ་གནས་པ། མཚམས་ནང་ན་གནས་པ། དགེ་ཚུལ་གྱི་སྡོམ་པ་འབོགས་པའི་ཆོ་ག་ལ་མཁས་པའོ། །གསུམ་པ་ནི་དགེ་ཚུལ་གྱི་སྡོམ་པའོ། །བཞི་པ་ལ་གསུམ་ལས། སྦྱོར་བ་ནི། བར་ཆད་དྲི་བ་དང་། དགེ་བསྙེན་དུ་བསྒྲུབ་པ་དང་། བར་མ་རབ་བྱུང་དུ་བསྒྲུབ་པའོ། །དངོས་གཞི་ནི། སྐྱབས་སུ་འགྲོ་བའི་ཚིག་རྩོམ་པ་དང་། དགེ་ཚུལ་ཉིད་དུ་ཁས་བླང་བའི་ཚིག་བྱའོ་ཞེས་པ་སྟེ་དགེ་བསྙེན་གྱི་སྐབས་དང་འདྲའོ། །མཇུག་ནི་དུས་གོ་དང་བསླབ་པ་བརྗོད་པ་གཉིས་ལས། དང་པོ་ལ་ཡང་དགོས་དོན་དང་། བསྡུས་དོན་གཉིས། དང་པོ་ནི། དེ་ལ་དགོས་པ་ཡོད་དེ། སྡོམ་པ་ཐོབ་དུས་རྟོགས་ནས་རྒན་གཞོན་གྱི་བསྙེན་བཀུར་ཚུལ་བཞིན་དུ་བྱེད་པར་འགྱུར་བའི་དགོས་པ་ཡོད་པའི་ཕྱིར། གཉིས་པ་ལ་བཞི་སྟེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་བརྗོད་པའོ། །དང་པོ་ནི། དགེ་ཚུལ་གྱི་སྡོམ་པ་ཐོབ་མ་ཐག་པ་དེ་ལའོ། །འོ་ན་དེའི་འོག་ཏུ་བསླབ་པ་བརྗོད་པ་ཁས་བླངས་པའི་ཚུལ་གྱིས་བྱའོ་ཞེས་པ་དང་འགལ་ལོ་ཞེ་ན། མི་འགལ་ཏེ། དེ་ལྟར་གསུངས་པ་དེ་ནི་སྡོམ་པ་གསུམ་སྔ་མ་སྔ་མའི་མཇུག་ཐོག་དེ་མ་ཐག་ཏུ་ཕྱི་མ་ཕྱི་མ་ལེན་པའི་དབང་དུ་བྱས་ནས་གསུངས་པའི་ཕྱིར། གཉིས་པ་ནི། དགེ་ཚུལ་གྱི་སློབ་དཔོན་ལས་གཞན་པའི་དགེ་སློང་ཞིག་གིས་བརྗོད་པར་བྱ་སྟེ། བསླབ་པ་བརྗོད་པའི་སྔར་གྲིབ་ཚོད་འཇལ་པའི་ཆེད་དུ་སྟན་ལས་ལྡང་དུ་མི་རུང་བའི་ཕྱིར། གསུམ་པ་ནི། གསུང་རབ་ལས་གྲིབ་ཚོད་དང་། ཉིན་མཚན་གྱི་ཆ་དང་། ཚེས་གྲངས་དང་། ཟླ་བའི་ངོ་དང་། དུས་ཚོད་རྣམས་བརྗོད་པར་བཤད་ལ། ད་ལྟའི་ཕྱག་ལེན་པ་ཁ་ཅིག་ཟླ་བ་དངོས་རབ་འབྲིང་ཐ་མ་ལོ་རྣམས་བརྗོད་དགོས་ཏེ། ལོ་བརྗོད་པ་དགེ་ཚུལ་གྱི་ལོ་དྲི་བ་ལས་བཤད་ཅེས་གསུངས་ཀྱང་མི་འཐད་དེ། ཟླ་བ་དངོས་མ་བརྗོད་ཀྱང་གསུང་རབ་ལས་བཤད་པ་ལྟར་བརྗོད་པས་ཀྱང་བསླབ་པ་རྒན་གཞོན་རྟོགས་པར་འགྱུར་བའི་ཕྱིར་དང་། དགེ་ཚུལ་གྱིས་ལོ་དྲི་བ་ལས། ལོ་རྒན་གཞོན་བརྩི་བའི་ཚུལ་ཙམ་བཤད་ཀྱི། དུས་གོའི་རྣམ་གཞག་ཅུང་ཟད་ཀྱང་མ་བཤད་པའི་ཕྱིར། བཞི་པ་ནི། ཁ་ཅིག་འདུལ་བའི་མདོ་དང་ཀརྨ་ཤ་ཏཾ་ལས་ཕྲ་རིམ་ནས་བརྗོད་པར་གསུངས་ཀྱང་རགས་རིམ་ནས་བརྗོད་དགོས་ཏེ། གཞི་འགྲེལ་ལས་དེ་ལྟར་གསུངས་པའི་ཕྱིར་དང་། རགས་རིམ་ནས་བརྗོད་ན་འཆད་ཉན་སླ་བའི་ཕྱིར་ཟེར་བ་མི་འཐད་དེ། ལུང་ལས་ཕྲ་རིམ་ནས་བརྗོད་པར་གསུངས་པའི་ཕྱིར་ན་གསུང་བ་པོ་མི་མཁས་པའི་སྐྱོན་ཡོད་པའི་ཕྱིར། རང་ལུགས་ནི། ལུང་ལས་གསུངས་པ་ལྟར་ཕྲ་རིམ་ནས་བརྗོད་དགོས་སོ། །གཞི་འགྲེལ་ལས་གསུངས་པ་ནི་བརྗོད་བྱའི་དངོས་པོ་བསྟན་པ་ཡིན་གྱི་བརྗོད་ཚུལ་བསྟན་པ་ནི་མ་ཡིན་ནོ་ཞེས་གསུང་ངོ་། །གཉིས་པ་བསླབ་པ་བརྗོད་པ་ནི་གོ་སླའོ། །དེ་ནི་སློབ་དཔོན་ཡིན་ནོ་ཞེས་སོགས་ཀྱི་སྐབས་སུ། བླ་མའི་རྣམ་གཞག་ལ་གསུམ་སྟེ། བླ་མ་རྣམས་ཀྱི་དབྱེ་བ། བླ་མར་གྱུར་པའི་དུས། མཚན་ནས་སྨོས་པའི་རིམ་པའོ། །དང་པོ་ནི། སློབ་དཔོན་ལ་ལྔ་ཡོད་དེ། དགེ་ཚུལ་གྱི་སྡོམ་པ་སྦྱིན་པའི་སློབ་དཔོན། གསང་སྟེ་སྟོན་པའི་སློབ་དཔོན། ལས་ཀྱི་སློབ་དཔོན། གནས་སྦྱིན་པའི་སློབ་དཔོན། ཀློག་པའི་སློབ་དཔོན་ནོ། །དེ་ཡང་གཞུང་གི་འབྲུ་དང་སྦྱར་ན། བསྒྲུབ་བྱ་ལ་ཆོ་གའི་སྒོ་ནས་དགེ་ཚུལ་གི་སྡོམ་པ་སྦྱིན་པར་བྱེད་པའི་དགེ་སློང་དེ་ནི་བསྒྲུབ་བྱ་དེའི་དགེ་ཚུལ་གྱི་སློབ་དཔོན་ཡིན་ནོ། །བསྒྲུབ་བྱའི་བར་ཆད་ཀྱི་ཆོས་རྣམས་ལྐོག་ཏུ་གསང་སྟེ་དྲི་བར་བྱེད་པའི་དགེ་སློང་དེ་ནི་བསྒྲུབ་བྱ་དེའི་གསང་སྟེ་སྟོན་པའི་སློབ་དཔོན་དང་། དགེ་འདུན་གྱི་དབུས་སུ་བསྙེན་པར་རྫོགས་པའི་གསོལ་བཞིའི་ལས་བྱེད་པའི་དགེ་སློང་དེ་ནི་དེའི་ལས་ཀྱི་སློབ་དཔོན་དང་། བསྒྲུབ་བྱའི་གནས་མེད་ཀྱི་ཉེས་པ་འགོག་པར་བྱེད་པའི་དགེ་སློང་དེ་ནི་དེའི་གནས་སྦྱིན་པའི་སློབ་དཔོན་དང་། བསྒྲུབ་བྱ་ལ་བདེ་བར་གཤེགས་པའི་བཀའ་ཀློག་པར་བྱེད་པའི་དགེ་སློང་དེ་ནི་དེའི་ཀློག་པའི་སློབ་དཔོན་ཡིན་ནོ། །ཅིའི་ཕྱིར་སློབ་དཔོན་ལྔར་བཤད་ཅེ་ན། སྡོམ་པ་ཐོབ་པར་བྱེད་པ་དང་། མི་ཉམས་པར་བསྲུང་བར་བྱེད་པ་དང་། ཆོས་ཤེས་པར་བྱེད་པ་དང་གསུམ་གྱི་དབང་དུ་བྱས་ནས་ལྔར་གཞག་པ་ཡིན་ཏེ། དང་པོ་ནི། དགེ་ཚུལ་གྱི་སྡོམ་པ་ཐོབ་པར་བྱེད་པ་དང་། གསང་སྟོན་ནི་བསྙེན་རྫོགས་ཀྱི་སྡོམ་པ་བརྒྱུད་ནས་ཐོབ་པར་བྱེད་ཅིང་། ལས་སློབ་ནི་བསྙེན་རྫོགས་ཀྱི་སྡོམ་པ་དངོས་སུ་ཐོབ་པར་བྱེད་པ་དང་། གནས་སྦྱིན་པ་ནི་མི་ཉམས་པར་སྲུང་བར་བྱེད་པ་དང་། ཀློག་པའི་སློབ་དཔོན་ནི་ཆོས་ཤེས་པར་བྱེད་པ་ཡིན་པའི་ཕྱིར་རོ། །གཉིས་པ་ནི། དོན་གྲུབ་ན་གྱུར་པ་ཉིད་དོ་ཞེས་པ་སྟེ། སློབ་མའི་དགོས་པ་གང་གིས་སློབ་དཔོན་དུ་འགྱུར་བའི་དོན་ཏེ་དགོས་པ་གྲུབ་ཅིང་རྫོགས་པ་ན་སློབ་དཔོན་དུ་གྱུར་པ་ཉིད་ཡིན་ཏེ། དེར་འགྱུར་བའི་རྒྱུ་མཐར་ཐུག་པ་ཡིན་པའི་ཕྱིར། དཔེར་ན་དགེ་ཚུལ་གྱི་སྡོམ་པ་སྐྱེས་པ་ན་དེའི་སློབ་དཔོན་དུ་འགྱུར་བ་བཞིན་ནོ། །ཁ་ཅིག་བསྒྲུབ་བྱའི་རྒྱུད་ལ་བསྙེན་རྫོགས་ཀྱི་སྡོམ་པ་སྐྱེས་པ་ན་དེའི་གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ཏེ། མ་ཐོབ་པ་ཐོབ་པར་བྱེད་པའི་སློབ་དཔོན་ཡིན་པའི་ཕྱིར་ཏེ། ཊཱི་ཀར་གལ་ཏེ་གསང་སྟེ་སྟོན་པའི་དགོས་པ་ཡོངས་སུ་རྫོགས་པ་ན། གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ནོ་ཞེས་གསུངས་པའི་ཕྱིར་ཞེས་པ་མི་འཐད་དེ། གསང་སྟོན་གྱིས་བསྒྲུབ་བྱ་ལ་བར་ཆད་དྲིས་ནས་བར་ཆད་མེད་པར་རྟོགས་པ་དེ་དགོས་པ་ཡིན་ལ། དེ་ལ་བརྟེན་ནས་སྡོམ་པ་སྐྱེས་པ་དེ་དགོས་པའི་ཡང་དགོས་པ་ཡིན་པས། དགོས་པ་དང་དགོས་པའི་དགོས་པ་མ་ཕྱེད་པའི་སྐྱོན་ནོ། །རང་ལུགས་ནི། གསང་སྟེ་སྟོན་པའི་དགེ་སློང་དེས་བསྒྲུབ་བྱ་ལ་བར་ཆད་དྲིས་ནས་བར་ཆད་ཀྱིས་དག་པར་རྟོགས་པ་ན་བསྒྲུབ་བྱ་དེའི་གསང་སྟེ་སྟོན་པའི་སློབ་དཔོན་དུ་འགྱུར་བ་ཡིན་ཏེ། སྔར་གྱི་ཊཱི་ཀའི་ལུང་དེ་ཉིད་དང་། འགྲེལ་ཆུང་ལས། གསང་སྟེ་སྟོན་པ་ནི་བར་ཆད་དྲིས་ནས་འགྱུར་ཞེས་དང་། ཤེས་རབ་བྱེད་པར་གསང་སྟེ་སྟོན་པའི་སློབ་དཔོན་ནི་བར་ཆད་དྲི་བའི་ལས་བྱས་ཟིན་ནས་གསང་སྟེ་སྟོན་པའི་སློབ་དཔོན་དུ་འགྱུར་རོ་ཞེས་གསུངས་པའི་ཕྱིར་རོ། །ཁ་ཅིག་འོང་བ་ཞུས་པ་ན་འགྱུར་རོ་ཞེས་གསུངས་ཏེ། འདི་དང་ཁྱད་ཆེར་མི་སྣང་ངོ་། །གསང་སྟོན་ལ་རྒྱས་བཤད་མེད་པས་འདིར་སྨོས་པ་ཡིན་ནོ། །འོ་ན་སློབ་དཔོན་དུ་འགྱུར་བའི་དོན་གྲུབ་ན་སློབ་དཔོན་དེ་དང་དེར་འགྱུར་བ་ཡིན་ན། མཁན་པོར་འགྱུར་བའི་དུས་ཡང་དེ་དང་འདྲའམ་ཞེ་ན་མི་འདྲ་སྟེ། མཁན་པོར་གསོལ་བ་ལན་གསུམ་བཏབ་ནས། མཁན་པོར་ཁས་བླངས་པ་ན་མཁན་པོ་དེར་གྱུར་པ་ཡིན་ནོ། །དེ་ཉིད་རྒྱས་པར་བཤད་པ་ལ་གསུམ་སྟེ། ཐོབ་པར་བྱེད་པའི་བླ་མར་འགྱུར་བའི་དུས་དང་། མི་ཉམས་པར་བསྲུང་བའི་དང་། ཆོས་ཤེས་པར་བྱེད་པའི་བླ་མར་འགྱུར་བའི་དུས་སོ། །དང་པོ་ལ་གཉིས་ལས། དང་པོ་སློབ་དཔོན་དུ་འགྱུར་བའི་དུས་ནི། དགེ་ཚུལ་དུ་སྒྲུབ་པ་ལ་བརྗོད་པ་གསུམ་ཡོད་པའི་ཐ་མ་གང་ཡིན་པའི་ཆ་གསུམ་པ་ལ་དགེ་ཚུལ་གྱི་སྡོམ་པ་སྐྱེས་པ་ལས་དགེ་ཚུལ་གྱི་སློབ་དཔོན་དུ་འགྱུར་བའི་དོན་གྲུབ་པ་དང་། དགེ་སློང་དུ་སྒྲུབ་པའི་ཚེ་བརྗོད་པ་གསུམ་གྱི་ཐ་མ་གང་ཡིན་པའི་ཆ་གསུམ་པ་ལ་དགེ་སློང་གི་སྡོམ་པ་སྐྱེས་པས་ལས་ཀྱི་སློབ་དཔོན་དུ་འགྱུར་བའི་དོན་གྲུབ་པ་སྟེ། དཔེར་ན་དགེ་ཚུལ་དུ་བསྒྲུབ་པ་ན་གཞན་བརྗོད་པའི་དུས་སུ་དགེ་ཚུལ་གྱི་སྡོམ་པ་སྐྱེས་པས་དགེ་ཚུལ་དུ་གྱུར་པ་བཞིན་ནོ། །དགེ་ཚུལ་གྱི་ཆོ་ག་ལ་ཆ་གསུམ་ནི། སྐྱབས་བརྗོད། བདག་བརྗོད། གཞན་བརྗོད་པ་དང་གསུམ་ཡིན་ལ། བསྙེན་རྫོགས་ཀྱི་སྐབས་སུ་ཆ་གསུམ་ནི། ངོ་བོ་བརྗོད་པ། བྱ་བ་བརྗོད་པ། བྱེད་པ་བརྗོད་པ་གསུམ་སྟེ་ལས་ཆོག་ལས་ཤེས་པར་བྱའོ། །གཉིས་པ་མཁན་པོར་འགྱུར་བའི་དུས་ནི་གཞན་བརྗོད་པའི་དུས་འདིར་མཁན་པོར་འགྱུར་བའི་དོན་གྲུབ་པ་ཡིན་ནོ། །གང་གི་གཞན་བརྗོད་པ་ཡིན་ཞེ་ན། ཆ་ཐ་མའི་གཞན་བརྗོད་པ་སྟེ། མཁན་པོ་མཛད་དུ་གསོལ་ཞེས་པའི་ཚིག་རྫོགས་ནས། མཁན་པོ་མཁན་པོས་ཞེས་པའི་དུས་སུ་མཁན་པོར་འགྱུར་བའི་དོན་གྲུབ་པ་ཡིན་ནོ། །དེས་ན་རྣམ་གྲངས་ཐ་མ་ལ་གཞན་བརྗོད་པ་ན། བཙུན་པ་མཁན་པོས་ཞེས་པ་དང་། སློབ་དཔོན་མཁན་པོས་ཞེས་མི་བརྗོད་པར། མཁན་པོ་མཁན་པོས་ཞེས་བརྗོད་པའི་རྒྱུ་མཚན་ཡང་དེ་ཡིན་ནོ། །གཉིས་པ་ནི། གནས་སྦྱིན་པའི་སློབ་དཔོན་ནི། དུས་ཞག་གཅིག ཆེད་དུ་བྱ་བ་གནས་ཀྱི་སློབ་དཔོན་དུ་འཛིན་པ་ཉིད་ཀྱི་ཕྱིར། མཚམས་ནང་གཅིག་ཏུ་ཉེ་བར་གནས་པ་མཐར་ཐུག་པ་སྟེ་ཞག་ཕྱི་མའི་སྐྱ་རེངས་ཤར་བ་ན་དེར་འགྱུར་རོ། །གསུམ་པ་ནི། ཀློག་པའི་སློབ་དཔོན་ནི་དངོས་པོ་སངས་རྒྱས་ཀྱི་བཀའ་ཚིགས་སུ་བཅད་པ་གཅིག་གམ་དེའི་ཚད་ཀྱི་རྐྱང་པ་གང་ཡང་རུང་བ། ཀུན་སློང་དཔོན་སློབ་ཀྱི་འདུ་ཤེས་ཉེ་བར་གཞག་པའི་སྒོ་ནས། བྱ་བ་སློབ་དཔོན་གྱིས་བརྗོད་པའི་རྗེས་སུ་སློབ་མས་ལན་གསུམ་བཟླས་ན་ཀློག་པ་མཐར་ཐུག་པས་ཀློག་པའི་སློབ་དཔོན་དུ་འགྱུར་རོ། །གསུམ་པ་མཚན་ནས་སྨོས་པའི་རིམ་པ་ནི། མཁན་སློབ་དེ་གཉིས་ལ་མཁན་པོ་དང་སློབ་དཔོན་ཞེས་པ་ལས་གཞན་བཙུན་པ་ཞེས་སོགས་ཉེ་བར་མི་བརྗོད་དོ། །མཁན་པོ་དང་སློབ་དཔོན་དེ་ལས་གཞན་པའི་གང་ཟག་ལ་མཁན་པོ་དང་སློབ་དཔོན་ཞེས་པའི་མིང་གིས་བརྗོད་པར་མི་བྱའོ། །མཁན་པོའི་མཚན་བརྗོད་པའི་ཚེ་དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བ་དང་བཅས་པ་མ་སྨྲས་པར་མཁན་པོའི་མིང་འབའ་ཞིག་མི་གཟུང་ངོ་། །གཞན་ཡང་རྒན་པ་ལ་བཙུན་པ་དང་། གནས་བརྟན་དང་། ཚེ་དང་ལྡན་པ་ཞེས་པའི་ཉེ་ཚིག་གི་བརྗོད་པར་བྱ། བཙུན་པ་ཞེས་པ་ནི་སངས་རྒྱས་ཀྱི་ཉེ་ཚིག་ཏུ་ཡང་རུང་ལ། གནས་བརྟན་དང་ཚེ་དང་ལྡན་པ་ནི་མཉམ་པ་དང་གཞོན་པ་ལ་ཡང་རུང་ཞིང་། ཚེ་དང་ལྡན་པ་ནི་ཁྱིམ་པ་ལ་ཡང་རུང་ངོ་། །གཞན་ཡང་དགེ་བའི་བཤེས་གཉེན་ལ་སོགས་པ་ཉེ་ཚིག་གིས་བརྗོད་པ་ཡང་ཆོས་དང་མཐུན་ནོ།། ༈ །།གཉིས་པ་ཚིག་ཕྱི་མ་བསྙེན་རྫོགས་སུ་བསྒྲུབ་པ་ནི། དགེ་འདུན་ལས་བསྙེན་པར་རྫོགས་པར་བྱའོ་ཞེས་པའི་སྐབས་སུ། དགོས་དོན་དང་། བསྡུས་དོན་གཉིས་ལས། དང་པོ་ནི། བསྙེན་རྫོགས་ཀྱི་ཆོ་ག་བྱས་པ་ལ་དགོས་པ་ཡོད་དེ། བསྒྲུབ་བྱ་ལ་བསྙེན་རྫོགས་ཀྱི་སྡོམ་པ་སྐྱེ་བ་དང་། མཆོག་ཏུ་དགའ་བའི་ཆོས་ཐོབ་པ་ལ་སོགས་པ་ཕན་ཡོན་བཅུ་ཐོབ་པ་ལ་སོགས་ཀྱི་ཆེད་ཡིན་པའི་ཕྱིར་རོ། །གཉིས་པ་ལ། ཡུལ་གང་ལས། རྟེན་གང་གིས། དངོས་པོ་གང་ཞིག ཆོ་ག་གང་གིས་ནོད་པའོ། །དང་པོ་ནི། ཉེས་མེད་ཕུན་ཚོགས་ཀྱི་དབང་དུ་བྱས་ན་མཁན་པོར་འོས་པ་དང་། སློབ་དཔོན་དུ་འོས་པ་གཉིས་དང་། དགེ་འདུན་ཆོས་གསུམ་ལྡན་ལས་ཐོབ་དགོས་ལ། མཁན་པོ་དང་གསང་སྟོན་མེད་པར་མི་སྐྱེ་བ་ནི་མ་ཡིན་ཏེ། དེ་དང་ལྡན་པའི་ལྟར་མཁན་པོ་མེད་པ་ཉིད་ལ་ཡང་ངོ་ཞེས་དང་། མཁན་པོར་མ་གསོལ་བར་ཡང་ངོ་ཞེས་དང་། བར་ཆད་མ་དྲིས་པར་ཡང་ངོ་ཞེས་གསུངས་པའི་ཕྱིར། དགེ་འདུན་ཆོས་གསུམ་ལྡན་ནི། གྲངས་ཚང་བ། ཁ་སྐོང་གི་ཆོས་དང་ལྡན་པ། མི་མཐུན་པ་གཉིས་དང་བྲལ་བའོ། །གཉིས་པ་རྟེན་ནི་ལུས་ཕུན་ཚོགས། བསམ་པ་ཕུན་ཚོགས། རྟགས་ཕུན་ཚོགས་གསུམ་དང་ལྡན་པ་སྟེ། དང་པོ་ནི། སྐྱེས་ནས་ལོ་ཉི་ཤུ་ལོན་པའམ། ལོན་པར་འདུ་ཤེས་པ་བར་ཆད་དང་བྲལ་བའོ། །གཉིས་པ་ནི། ལེན་པར་འདོད། ཐོབ་པར་ཤེས། མྱང་འདས་ཀྱི་བསམ་པ་དང་ལྡན་པའོ། །གསུམ་པ་ནི། ལུས་བྱི་བྱད་ཀྱི་རྟགས། གོས་ཀྱི་རྟགས། སྣོད་སྤྱད་ཀྱི་རྟགས་གསུམ་ཚང་བའོ། །གསུམ་པ་དངོས་པོ་ནི་བསྙེན་རྫོགས་ཀྱི་སྡོམ་པ་རྣམ་པར་དག་པའོ། །བཞི་པ་ཆོ་ག་ལ་སྦྱོར་བ་དང་། དངོས་གཞི་དང་། མཇུག་གི་ཆོ་ག་གསུམ་ལས། དང་པོ་ནི། བསྙེན་པར་རྫོགས་པའི་ལས་གྲལ་དུ་འདུ་བར་འོས་པའི་དགེ་འདུན་རྣམས་ལས་གྲལ་ལ་མ་འདུས་པའི་གོང་དུ་ཟླ་བ་ཕྱེད་ཚུན་ཆད་ཀྱི་རང་གི་རྒྱུད་ལ་ལེགས་པར་བརྟགས་ཏེ། ལྟུང་བ་བཤགས་པར་འོས་པ་རྣམས་བཤགས། བསྡམ་པར་འོས་པ་རྣམས་བསྡམས། བྱིན་གྱིས་བརླབ་པར་འོས་པ་རྣམས་བྱིན་གྱིས་བརླབས་ཏེ་དག་པར་བྱས་ནས་ལས་གྲལ་དུ་འདུས་པ་ན་མཁན་པོ་ཉིད་དུ་ཕྱོགས་པར་གྱུར་པའི་དགེ་སློང་དེས། ལས་བྱེད་པ་དང་གསང་སྟེ་སྟོན་པར་འོས་པའི་དགེ་སློང་ལ་གསོལ་བ་བཏབ། དེ་ནས་བསྒྲུབ་བྱས་མཁན་པོར་གསོལ་བ་ལན་གསུམ་དུ་བཏབ་ནས། མཁན་པོ་དེས་ཆོས་གོས་གསུམ་བྱིན་གྱིས་བརླབས་ནས་བསྒྲུབ་བྱ་ལ་བཀོན། ལྷུང་བཟེད་ཀྱང་དགེ་འདུན་ལ་བསྟན་ནས་བྱིན་གྱིས་བརླབས་ཏེ་བྱིན། དེ་ནས་བསྒྲུབ་བྱ་ཐོས་པའི་ཉེ་འཁོར་ལས་བཀར། མཐོང་བའི་ཉེ་འཁོར་དུ་ལངས་ནས་ཚོགས་ལ་ཐལ་མོ་སྦྱར་ནས་གུས་པའི་སྤྱོད་ལམ་དང་ལྡན་པར་གཞག་སྟེ། དེ་ནས་ལས་ཀྱི་སློབ་དཔོན་དུ་འོས་པ་དེས་དྲི་བས་སྤྲོ་བར་བྱས་ནས་གསང་སྟོན་དུ་བསྐོ་བའི་ཆེད་དུ་དགེ་འདུན་ལ་གསོལ་བ་འབའ་ཞིག་པའི་ལས་བྱ། དེ་ནས་གསང་སྟོན་དུ་བསྐོས་པ་དེས་བསྒྲུབ་བྱའི་གན་དུ་སོང་སྟེ། ལྐོག་ཏུ་བར་ཆད་དྲིས་ནས་དགེ་འདུན་ལ་ཡོངས་སུ་དག་པ་གོ་བར་བྱས་ཏེ་འོང་བ་ཞུ་བར་བྱའོ། །དེ་ནས་བསྒྲུབ་བྱ་དེ་ཕ་གུའི་སྟེང་དུ་རྩྭ་བཏིང་བ་ལ་ཙོག་ཙོག་པུར་འདུག་ཏུ་བཅུག་སྟེ། དགེ་འདུན་ལ་བསྙེན་པར་རྫོགས་པར་གསོལ་བ་ལན་གསུམ་འདེབས་སུ་གཞུག་གོ །དེ་ནས་ལས་བྱེད་པས་བར་ཆད་དྲི་བའི་ཕྱིར་གསོལ་བ་འབའ་ཞིག་པའི་ལས་བྱས་ནས་བར་ཆད་དྲི་བར་བྱ་བའོ། །དངོས་གཞི་ནི། ལས་སློབ་ཏུ་འོས་པ་དེས་གསོལ་བ་དང་བཞིའི་ལས་ཚིག་ཕྱེད་ཀྱང་མ་འཁྲུགས་པར་སྟོན་པའི་སྒོ་ནས་བསྒྲུབ་བྱ་དེ་བསྙེན་པར་རྫོགས་པར་ཉེ་བར་བསྒྲུབ་པར་བྱ་བའོ།། ༈ །།གསུམ་པ་མཇུག་གི་ཆོ་ག་ལ་དུས་གོ་བརྗོད་པ་དང་། གདམས་ངག་བརྗོད་པ་གཉིས་ལས། དང་པོ་ལ་དགོས་དོན་བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། དེས་སྡོམ་པ་ཐོབ་པའི་དུས་ཤེས་ནས་རྒན་གཞོན་བར་མའི་ཚུལ་དང་བཀུར་སྟི་བྱེད་ཚུལ་ཤེས་པར་འགྱུར་བའི་ཕྱིར་རོ། །གཉིས་པ་ལ་གསུམ་སྟེ། ལོ་འགོ་ངོས་བཟུང་བ་དང་། དངོས་པོ་གང་བརྗོད་པ་དང་། ཚུལ་ཇི་ལྟར་བརྗོད་པའོ། །དང་པོ་ལ་དགག་གཞག་གཉིས་ལས། དང་པོ་ལ། འདོད་པ་བརྗོད་པ་དང་། དེ་དགག་པ་གཉིས་ཀྱི། དང་པོ་ནི། དྲོ་ཁ་ཅིག་ཧོར་ཟླ་བརྒྱད་པའི་ཚེས་བཅུ་དྲུག་ནས་ལོ་འགོ་འཛིན་པར་རིགས་ཏེ། མཛོད་ལས། དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་བཟློག །ཅེས་གསུངས་ཤིང་། ཧོར་ཟླ་བཅུ་གཉིས་པ་ལ་ཉི་མ་ལྡོག་པའི་ཕྱིར་རོ། །ཁྱབ་སྟེ། མཛོད་ཀྱི་འགྲེལ་བཤད་དུ། སངས་རྒྱས་པའི་དུས་ཀྱི་དང་པོ་དགུན་གྱི་དུས་སོ་ཞེས་གསུངས་པའི་ཕྱིར་ཞེས་དང་། སམ་་་་་་ཁ་ཅིག་དམ་བཅའ་དེ་ཉིད་རིགས་པ་ཡིན་ཏེ། གདགས་པ་ལས་ལོ་གཅིག་ལ་མཚན་མོ་ཡུད་ཙམ་བཅོ་བརྒྱད་ཉིན་མོ་ཡུད་ཙམ་བཅུ་གཉིས་པའི་དུས་ཡོད་དེ། དེ་གང་ཞེ་ན། དགུན་ཟླ་ཐ་ཆུང་གི་ཡར་གྱི་ངོའི་ཚེས་བརྒྱད་ལ་མཚན་མོ་ཡུད་ཙམ་བཅོ་བརྒྱད་ཉིན་མོ་ཡུད་ཙམ་བཅུ་གཉིས་ཡོད་དོ་ཞེས་གསུངས་པའི་ཕྱིར་ཞེས་ཟེར། ཡང་བུ་ཁ་ཅིག་ཧོར་ཟླ་དགུ་པའི་ཚེས་བཅུ་དྲུག་ནས་ལོ་འགོ་འཛིན་པ་རིགས་ཏེ། ཉ་ཚེས་དབྱུག་པ་གང་ཡིན་པ། །སྟོན་ཟླ་ཐ་ཆུང་བྱ་བར་བརྗོད། །ཅེས་རྟེན་འབྲེལ་མདོ་འགྲེལ་ལས་བཤད་པའི་ཕྱིར་ཞེས་གསུང་ངོ་། །གཉིས་པ་ནི། ཧོར་ཟླ་བརྒྱད་པ་ནས་ལོ་འགོ་འཛིན་པ་མི་འཐད་དེ། གདགས་པའི་ལུང་མདོ་འགྲེལ་དུ་དྲངས་པ་ལས། རྟ་རྣམས་ནི་སོས་ཀ་འཁྲིག བ་གླང་རྣམས་ནི་དབྱར་གྱི་དུས་སུ་འཁྲིག ཁྱི་རྣམས་ནི་སྟོན་གྱི་དུས་སུ་འཁྲིག་ཅེས་བཤད་པ་དང་མི་འགྲིག་ཅིང་། འགྲེལ་བཤད་རྒྱལ་སྲས་ལས། སྟོན་ནི་ཆར་འབབ་པར་འདྲ་བའི་ཕྱིར་དབྱར་དུ་བྱས། དགུན་སྟོད་ནི་གྲང་བར་འདྲ་བའི་ཕྱིར་དགུན་དུ་བྱས། སོས་ཀ་ནི་ཚ་བར་འདྲ་བའི་ཕྱིར་དཔྱིད་དུ་བྱས་ཞེས་གསུངས་པ་དང་མི་འགྲིག་པའི་ཕྱིར་རོ། །བརྒྱད་པ་ནས་འཛིན་པའི་སྒྲུབ་བྱེད་ཕྱི་མ་ཡང་མི་འཐད་དེ། མཛོད་ལས་དགུན་ཟླ་བཞི་པ་ལ་ཉི་མ་བཟློག་པར་བཤད་ཟེར་བ་དང་། གདགས་པ་ལས། དགུན་ཟླ་གསུམ་པ་ལ་ཉི་མ་ལྡོག་པར་བཤད་པ་མཐུན་པ་ཁས་ལེན་ན་བཞད་གད་ཀྱི་གནས་ཡིན་པའི་ཕྱིར་རོ། །མཛོད་ལས། དགུན་རྣམས་ཀྱི་ནི་ཞེས་སོགས་ཀྱི་དོན་ནི། མཚན་མོ་ཐུང་དུ་འགྱུར་བ་ལས་གོ་བཟློག་ནས་ཉིན་མོ་རིང་དུ་འགྲོ་བ་ལ་བྱ་ཡི། འཇིག་རྟེན་ན་གྲགས་པ་ལྟར་གྱི་ཉི་མ་ལྡོག་པ་ནི་མ་ཡིན་ནོ། །དབྱར་གྱི་ཟླ་བ་གཉིས་པ་ཡི། །ཐ་མའི་ཚེས་དགུ་ནས་མཚན་རིང་། །དགུན་རྣམས་ཀྱི་ནི་བཞི་པ་ལ། །ཐུང་དུ་འགྱུར་རོ་ཉིན་མོ་ཟློག །ཅེས་གསུངས་པའི་དོན་ལ། སྤང་ལོ་ཆེན་པོས། དབྱར་གྱི་ཟླ་བ་གཉིས་པ་ནི་ཁྲུམས་ཀྱི་ཟླ་བ་ཡིན་ལ། དེ་ལ་མར་ངོ་དང་ཡར་ངོ་གཉིས་ཡོད་པའི་ཐ་མ་ཡར་ངོའི་ཚེས་བརྒྱད་ལ་ཉིན་མཚན་མཉམ་པ་ལས་ཚེས་དགུ་ནས་མཚན་མོ་རིང་དུ་འགྱུར་ཞིང་ཉིན་མོ་དེ་ལས་གོ་བཟློག་སྟེ་ཐུང་དུ་འགྱུར་ལ། དགུན་རྣམས་ཀྱི་ནི་བཞི་པ་ནི་དབོའི་ཟླ་བ་ཡིན་ལ། དེ་ལ་མར་ངོ་དང་ཡར་ངོ་གཉིས་ཡོད་པའི་ཐ་མ་ཡར་ངོའི་ཚེས་བརྒྱད་ལ་ཉིན་མཚན་མཉམ་པ་ལས། ཚེས་དགུ་ནས་མཚན་མོ་ཐུང་དུ་འགྱུར་ཞིང་ཉིན་མོ་དེ་ལས་གོ་བཟློག་སྟེ་རིང་དུ་འགྱུར་ཞེས་པའི་དོན་སྟེ། གཞུང་འདིས་སྟོན་ཉིན་མཉམ་མཚན་མཉམ་དང་། དཔྱིད་ཉིན་མཉམ་མཚན་མཉམ་དངོས་སུ་བསྟན་ནས། དབྱར་ཉི་དང་དགུན་ཉི་ལྡོག་ཚུལ་ཤུགས་ལ་བསྟན་པ་ཡིན་ནོ་ཞེས་གསུངས་པ་ནི་ལེགས་བཤད་དོ། །གདགས་པ་ལས། དགུན་ཟླ་ཐ་ཆུང་ཞེས་པ་ནི་འགྱུར་གྱི་སྐྱོན་ཡིན་གྱི། གཞན་དུ་ན་ནང་འགལ་བར་འགྱུར་རོ། །གཉིས་པ་ཡང་མི་འཐད་དེ། མདོ་ཉི་མའི་སྙིང་པོ་ལས་སྨིན་དྲུག་ཟླ་བ་སྟོན་ཟླ་ཐ་ཆུང་དུ་གསུངས་པའི་ཕྱིར་ཏེ། བདག་གི་རྒྱུ་སྐར་སྨིན་དྲུག་བརྗོད། །ཟླ་བ་ཉ་ཚེས་ཟླ་རངས་འགྱུར། །སྟོན་ཟླ་ཐ་ཆུང་ཞེས་བྱ་བར། །འདིར་ནི་རབ་ཏུ་གྲགས་པ་ཡིན། །ཞེས་གསུངས་པའི་ཕྱིར། ཧོར་ཟླ་བཅུ་པའི་གནམ་སྟོང་ལ་གསོ་སྦྱོང་བཅུ་བཞི་པ་འབྱུང་རིགས་པར་ཐལ། དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ལའོ་ཞེས་གསུངས་པ་གང་ཞིག ཧོར་ཟླ་དགུ་པའི་ཚེས་བཅུ་དྲུག་ནས་ལོ་འགོ་འཛིན་རིགས་པའི་ཕྱིར། འདོད་ན། ལོ་དྲི་བ་ལས། རྒྱལ་དང་དབོ་དང་ས་ག་དང་། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་པ་དང་འགལ་ལོ། །ཉ་ཚེས་དབྱུག་པ་གང་ཡིན་པ། །ཞེས་པའི་གཞུང་འདི་རྟེན་འབྲེལ་མདོ་འགྲེལ་ལ་སོགས་པའི་གཞུང་ཚད་ལྡན་གང་ལས་ཀྱང་བཤད་པ་མ་མཐོང་ངོ་། །གཉིས་པ་ནི། ཧོར་ཟླ་བཅུ་པའི་ཚེས་བཅུ་དྲུག་ནས་ལོ་འགོ་འཛིན་པར་རིགས་ཏེ། འགོའི་ཟླ་བའི་མར་ངོའི་ཚེས་གཅིག་ནས་ལོ་འགོ་འཛིན་དགོས་པའི་ཕྱིར་ཏེ། མེ་ཏོག་ཕྲེང་རྒྱུད་ལས། གྲོ་བཞིན་ཟླ་བའི་ཚེས་གཅིག་ནི། །སྔ་མའི་དབྱར་ཏེ་གཙོ་བོ་ཡིན། །ཞེས་གསུངས་ཤིང་། གྲོ་བཞིན་ཟླ་བ་ནི་ཧོར་ཟླ་དྲུག་པའི་ཚེས་བཅུ་དྲུག་ནས་བདུན་པའི་ཚེས་བཅོ་ལྔའི་བར་ལ་བྱ་དགོས་པའི་ཕྱིར་དང་། མདོ་ཉི་མའི་སྙིང་པོ་ལས། ཧོར་ཟླ་དགུ་པའི་ཚེས་བཅུ་དྲུག་ནས། བཅུ་པའི་ཚེས་བཅོ་ལྔའི་བར་ལ་སྨིན་དྲུག་གི་ཟླ་བ་སྟོན་ཟླ་ཐ་ཆུང་དུ་གསུངས་པའི་ཕྱིར་དང་། ལོ་དྲི་བ་ལས། གསོ་སྦྱོང་བཅུ་བཞི་པའི་ཐོག་མ་རྒྱལ་གྱི་ཟླ་བའི་བཅུ་བཞི་པ་སྨོས་པའི་ཕྱིར། གལ་ཏེ་ལོ་འགོ་དེ་ལྟར་འཛིན་ན། ཊཱི་ཀར་དབྱར་དགུན་འབྲིང་ཐུབ་སྟོན་དཔྱིད་འབྲིང་མི་ཐུབ་པར་བཤད་པ་དང་འགལ་ལོ་ཞེ་ན། སྐྱོན་མེད་དེ། འདིར་ཡར་ངོ་སྔོན་འགྲོའི་དབང་དུ་བྱས་པ་ཡིན་པའི་ཕྱིར། སྤྱིར་བསྟན་བཅོས་ཀྱི་ལུགས་ལ་མར་ངོ་སྔོན་འགྲོ་ཡིན་ཏེ། རྒྱལ་སྲས་ལས། ཟླ་བ་ཐམས་ཅད་མར་གྱི་ངོ་སྔའོ་ཞེས་གསུངས་པའི་ཕྱིར། སྐབས་འགའ་ཞིག་ཏུ་ཡར་ངོ་སྔོན་འགྲོ་བཤད་པ་ནི། རྒྱལ་པོའམ་འཇིག་རྟེན་པ་དང་སྒོ་བསྟུན་པ་ཡིན་པར་ཤེས་པར་བྱའོ། །གཉིས་པ་དངོས་པོ་གང་བརྗོད་པ་ནི། གྲིབ་ཚོད་དང་། ཉིན་མཚན་གྱི་ཆ་དང་། ཚེས་གྲངས་དང་། ཟླ་བའི་ངོ་དང་། དུས་ཚོད་དེ་ལྔ་བརྗོད་པར་བྱའོ། །ཁ་ཅིག་རབ་འབྲིང་ཐ་ཆུང་གི་རྣམ་གཞག་བརྗོད་དགོས་ཞེས་པ་མི་འཐད་དེ། གཞུང་ཚད་ལྡན་ལས་མ་བཤད་ཅིང་། གཞན་ལྔ་པོ་ཇི་ལྟ་བ་བཞིན་བརྗོད་ན་མི་རྟོགས་པའི་གནས་མེད་པའི་ཕྱིར་རོ། །ཁ་ཅིག་དགེ་ཚུལ་གྱི་ལོ་དྲི་བ་ལས། ལོ་ཡང་བརྗོད་དགོས་པར་གསུངས་ཞེས་གསུངས་པ་ཡང་མི་འཐད་དེ། དེ་ལས་དུས་གོ་བརྗོད་པར་མ་བཤད་པའི་ཕྱིར། ཇི་ལྟར་བརྗོད་པའི་ཚུལ་ནི། བསྙེན་པར་རྫོགས་པའི་དེ་མ་ཐག་ཏུ་ལས་བྱེད་པ་ལས་གཞན་པའི་དགེ་སློང་ཞིག་གིས་དུས་གོ་བརྗོད་པར་བྱ་སྟེ། དེ་ཡང་ཐོག་མར་གྲིབ་ཚོད་རིག་པར་བྱ་སྟེ། དེ་ཡང་ཤིང་བུ་ལ་སོགས་པ་ཐུར་མ་སོར་བཞི་པས་འཇལ་ན་བཟང་སྟེ། རྟོགས་པར་སླ་བའི་ཕྱིར་ཐུར་མ་སོར་བཞི་པ་དེ་ལ་སྐྱེས་བུ་ཉིད་ཅེས་ཐ་སྙད་དུ་བྱ་ལ། དེའི་གྲིབ་མ་ས་ལ་ཕོག་པའི་སོར་རེ་ལ་རྐང་པ་ཞེས་པའི་ཐ་སྙད་བྱའོ། །ཉིན་མཚན་གྱི་ཆ་ཉི་ཤུ་རྩ་གཉིས་ནི། སྔ་དྲོ། གུང་། གུང་ཚིགས་མ་ཡོལ་བ། ཕྱི་དྲོ། ཉི་མ་བཞི་ཆ་ལུས་པ། ཉི་མ་བརྒྱད་ཆ་ལུས་པ། ཉི་མ་མ་ནུབ་པ། ཉི་མ་ནུབ་པ། རྒྱུ་སྐར་རྣམས་མ་ཤར་བ། རྒྱུ་སྐར་རྣམས་ཤར་བ། ཐུན་དང་པོ། ཐུན་དང་པོའི་ཕྱེད། ཐུན་བར་པ། ཐུན་བར་པའི་ཕྱེད། ཐུན་ཐ་མ། ཐུན་ཐ་མའི་ཕྱེད། སྐྱ་རེངས་མ་ཤར་བ། སྐྱ་རེངས་ཤར་བ། ཉི་མ་མ་ཤར་བ། ཉི་མ་ཤར་བ། ཉི་མའི་བརྒྱད་ཆ་ཤར་བ། ཉི་མའི་བཞི་ཆ་ཤར་བར་རྣམས་སོ། །དུས་ཚོད་ནི་ལྔ་སྟེ། གྲང་བ་དགུན་གྱི་དུས་དང་། ཚ་བ་དཔྱིད་ཀྱི་དུས་དང་། ཆར་བབས་པ་དབྱར་གྱི་དུས་དང་། དུས་ཐུང་ངུར་གནས་པ་དབྱར་ཐུང་ངུའི་དུས་དང་། དབྱར་ཡང་ཡིན་ལ་རིང་པོ་ཡང་ཡིན་པས་དབྱར་རིང་པོའི་དུས་རྣམས་སོ། །དང་པོ་གཉིས་ནི་ཟླ་བ་བཞི་བཞི་སྟེ། མགོའི་ཟླ་བའི་མར་ངོའི་ཚེས་གཅིག་ནས་ལོ་འགོ་གཟུང་བའི་དགུན་ཟླ་རྭ་བ་དང་། འབྲིང་པོ་དང་། ཐ་ཆུང་དང་། དཔྱིད་ཟླ་རྭ་བ་དང་བཞི་ནི་དགུན་གྱི་དུས། དེའི་ཉ་ནས་དཔྱིད་ཟླ་འབྲིང་པོ་དང་། ཐ་ཆུང་དང་། དབྱར་ཟླ་རྭ་བ་དང་། འབྲིང་པོ་བཞི་ནི་དཔྱིད་ཀྱི་དུས་སོ། །དབྱར་གྱི་དུས་ནི་ཟླ་བ་གཅིག་སྟེ། དབྱར་ཟླ་ཐ་ཆུང་ངོ་། །དབྱར་ཐུང་ངུའི་དུས་ནི་ཉིན་ཞག་གཅིག་སྟེ། ཡར་ངོའི་སྔོན་འགྲོ་ལྟར་ན། དབྱར་ཟླ་ཐ་ཆུང་གི་ཚེས་བཅུ་དྲུག་ཡིན་ལ། མར་ངོ་སྔོན་འགྲོ་ལྟར་ན་གྲོ་བཞིན་ཟླ་བའི་ཚེས་གཅིག་གོ །དབྱར་རིང་པོ་ནི་ཟླ་བ་གསུམ་དུ་ཉིན་ཞག་གཅིག་པོ་དེས་མ་ཆོག་པ་སྟེ། སྟོན་ཟླ་རྭ་བའི་མར་ངོ་ཚེས་གཉིས་ནས་བཟུང་སྟེ། སྟོན་ཟླ་རྭ་བ་ཞག་ཉི་ཤུ་རྩ་དགུ་དང་། འབྲིང་པོ་དང་། ཐ་ཆུང་རྣམས་སོ། །གསུམ་པ་ཇི་ལྟར་བརྗོད་པ་ནི། བུ་ཁ་ཅིག་ཕྲ་རིམ་ནས་གསུངས་ཀྱང་རགས་རིམ་ནས་བརྗོད་དགོས་ཏེ། ལོ་དྲི་བ་དང་གཞི་འགྲེལ་ལས་རགས་རིམ་ནས་བརྗོད་པར་གསུངས་ཤིང་། རགས་རིམ་ནས་བརྗོད་ན་འཆད་པ་པོ་འཆད་སླ་བ་དང་། ཉན་པ་པོ་ཉན་སླ་བའི་དགོས་པ་ཡོད་པའི་ཕྱིར་ཞེས་གསུངས་པ་མི་འཐད་དེ། ལོ་དྲི་བ་ལས་དུས་གོ་བརྗོད་པ་མ་བཤད་ཅིང་། གཞི་འགྲེལ་གྱིས་ནི་ལུང་ནས་ཕྲ་རིམ་ནས་བཤད་པའི་དོན་བསྡུས་པ་ཡིན་གྱི་གོ་རིམ་བསྒྱུར་བའི་བརྗོད་ཚུལ་བཤད་པ་མ་ཡིན་ནོ། །གཞན་དུ་ན། སྟོན་པ་ཤཱཀྱ་ཐུབ་པ་དང་སློབ་དཔོན་ཡོན་ཏན་འོད་ཀྱི་དུས་གོ་བརྗོད་ཚུལ་ལ་སྐྱོན་ཆགས་པར་ཐལ། རགས་རིམ་དང་ཕྲ་རིམ་གང་ནས་བརྗོད་ཀྱང་རུང་བ་གང་ཞིག རགས་རིམ་ནས་བརྗོད་ན་དགོས་པ་ཆེ་ཞིང་། ཕྲ་རིམ་ནས་བརྗོད་ན་དགག་བྱ་ཆེ་ལ། དེ་གཉིས་ཀྱིས་ཕྲ་རིམ་ནས་གསུངས་པའི་ཕྱིར་ཞེས་གསུང་མོད། འོན་ཀྱང་ལོ་མ་བརྗོད་ན་ལོ་འདི་ལ་བསྙེན་པར་རྫོགས་སོ་ཞེས་པའི་དུས་མི་ཤེས་པའི་སྐྱོན་བྱུང་གི་དོགས་ཤིང་། ཕྲ་རིམ་ནས་བཙལ་ནས་རགས་རིམ་ནས་བརྗོད་ན་འཇུག་པ་བདེ་བ་ནི་མྱོང་བས་ཀྱང་གྲུབ་པར་སེམས་སོ། །དུས་ཚིགས་ཀྱི་རྣམ་གཞག་རྒྱས་པ་ནི་འོག་ནས་འབྱུང་ངོ་། །གཉིས་པ་གདམས་ངག་བརྗོད་པ་ལ་དགོས་དོན་དང་། བསྡུས་དོན་གཉིས་ལས། དང་པོ་ནི། དེ་ལ་དགོས་པ་ཡོད་དེ། སྡོམ་པ་མི་ཉམས་ཤིང་འཕེལ་བར་བྱ་བའི་ཆེད་ཡིན་པའི་ཕྱིར། གཉིས་པ་ལ་ལྔ་སྟེ། ཡུལ་གང་ལ། རྟེན་གང་གིས། དངོས་པོ་གང་། དུས་ནམ་གྱི་ཚེ། ཚུལ་ཇི་ལྟར་བརྗོད་པའོ། །དང་པོ་ནི། བསྙེན་པར་རྫོགས་མ་ཐག་པའི་དགེ་སློང་དེ་ལའོ། །གཉིས་པ་ནི། ལས་སློབ་ཀྱིས་བརྗོད་དེ། གདམས་ངག་བརྗོད་པ་ནི་དེའི་ལས་ཡིན་པའི་ཕྱིར། གསུམ་པ་ནི་གདམས་ངག་གོ །བཞི་པ་ནི། དུས་གོ་བརྗོད་པའི་དེ་མ་ཐག་ཏུའོ། །ལྔ་པ་ལ་དབྱེ་བ། བསྡུ་བ། གྲངས་ངེས། གོ་རིམ་ངེས་པ། འདི་རྣམས་ཁོ་ན་བརྗོད་པའི་འཐད་པ་དང་ལྔ། དང་པོ་ནི། གདམས་ངག་ཆེ་ལོང་ཙམ་དུ་བརྗོད་ན་བཅུ་གཅིག་དང་། ཞིབ་ཏུ་ཕྱེ་ན་དང་པོ་གསུམ་ལ་བཞི་བཞིར་ཕྱེ་བས་ཉི་ཤུའོ། །གཉིས་པ་ནི། ཉི་ཤུ་པོ་དེ་ཡང་སྤང་བྱ་སྤོང་བ་ལ་གདམས་པ་དང་། བླང་བྱ་ལེན་པ་ལ་གདམས་པ་གཉིས་སོ། །གསུམ་པ་ནི། གདམས་ངག་ལ་བཅུ་གཅིག་ཏུ་གྲངས་ངེས་ཏེ། ཚུལ་ཁྲིམས་ཀྱི་བསླབ་པ་རྫོགས་པའི་དབང་དུ་བྱས་ནས་གདམས་ངག་བརྗོད་པ་གང་ཞིག བཅུ་གཅིག་པོ་དེ་ཙམ་བརྗོད་པས་ཚུལ་ཁྲིམས་ཀྱི་བསླབ་པ་དག་པའི་ཐབས་རྫོགས་པར་འགྲུབ་པའི་ཕྱིར། བཞི་པ་ནི། ཁ་ཅིག་སྤང་བྱ་ཡུལ་ལ་གདམས་པ་དང་། སྤོང་བྱེད་གཉེན་པོ་ལ་གདམས་པ་གཉིས་དེ་ཡང་སྤང་བྱ་ལས་གཉིས་པོ་འབྱུང་བས་དང་པོ་སྔར་བསྟན། གཉིས་པ་ཕྱིས་བསྟན་ནོ། །དང་པོ་ལ་རང་མ་སྨིན་པ་སྨིན་པར་བྱེད་པའི་གདམས་པ་དང་། གཞན་སྨིན་ཟིན་རྗེས་སུ་གཟུང་བའི་གདམས་པ་ཞེས་སོགས་སྨྲ་བ་ནི་མི་འཐད་དེ། གཞུང་དང་མི་འགྲིག་པའི་ཕྱིར། རང་ལུགས་ནི། སྡོམ་པ་ཐོབ་ནས་བསྲུང་བ་ལ་སྲུང་ཚུལ་ཤེས་དགོས་པས། དང་པོ་འཚོ་བ་རྣམ་དག་ལ་བརྟེན་ནས་སྲུང་དགོས་སོ་ཞེས་གདམས་པ་ནི། གནས་རྣམས་བརྗོད་པར་བྱའོ་ཞེས་ཏེ། ཚངས་པར་སྤྱོད་པའི་གནས་ཡིན་པས་ན་གནས་ཞེས་བྱ་སྟེ། ཟས་བསོད་སྙོམས་པ་དང་། གོས་ཕྱག་དར་ཁྲོད་པ་དང་། གནས་ཤིང་དྲུང་པ་དང་། སྨན་བཀུས་ཏེ་བོར་བའོ། །ཕམ་པས་གོས་ན་སྡོམ་པ་མ་བླངས་པ་དང་འདྲ་བར་འགྱུར་བས། དེའི་འོག་ཏུ་ཕམ་པས་མ་གོས་པར་གྱིས་ཤིག་ཅེས་གདམས་པ་ནི། ལྟུང་བར་འགྱུར་བའི་ཆོས་རྣམས་ཞེས་སོ། །དེ་ཡང་དགེ་སྦྱོང་གི་ཆོས་བཞི་ལ་གནས་ན། སྲོག་གཅོད་པའི་ཕམ་པ་ལ་སོགས་པ་སྤོང་སླ་བས་དེའི་འོག་ཏུ་དགེ་སྦྱོང་དུ་བྱེད་པའི་ཆོས་ཁྲོ་ཡང་སླར་མི་ཁྲོ་བ་ལ་སོགས་པ་བཞི་ལ་གདམས་པ་ནི། དགེ་སྦྱོང་དུ་བྱེད་པའི་ཆོས་རྣམས་ཀྱང་ངོ་ཞེས་པས་བསྟན་ནོ། །འོ་ན་འཚོ་བ་བྱ་དཀའ་བ་དགེ་སྦྱོང་གི་ཆོས་བཞི་ལ་གནས་པ་སོགས་ཀྱི་སྒོ་ནས་ཚུལ་ཁྲིམས་བསྲུང་བ་དེ་བདག་གིས་བྱ་མི་ནུས་སོ་སྙམ་ན། ཁྱེད་རང་འདོད་པ་ལྟར་བསྒྲུབ་པ་ཡིན་གྱི་ངེད་ཀྱིས་དབང་མེད་དུ་སྒྲུབ་ཏུ་བཅུག་པ་མ་ཡིན་པས་དེ་ལྟར་སྒྲུབ་དགོས་སོ་ཞེས་གདམས་པ་ནི། མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་བརྗོད་ནས་ཞེས་སོ། །བདག་བསྙེན་པ་རྫོགས་མ་ཐག་པ་ཡིན་པས་དེ་ལྟར་མི་དགོས་སོ་སྙམ་པ་ལ། བསྙེན་པར་རྫོགས་ནས་ལོ་བརྒྱ་ལོན་པ་དང་ཚུལ་ཁྲིམས་མཉམ་པས་དེ་དང་མཚུངས་པར་བསླབ་དགོས་སོ་ཞེས་འདོམས་པ་ནི། ཚུལ་ཁྲིམས་མཉམ་པར་ཞེས་སོགས་སོ། །འོ་ན་བདག་ཁྱིམ་ན་གནས་པའི་ཚེ་ཕ་མ་སོགས་ཀྱིས་ནད་གཡོག་དང་མི་རིགས་པ་ལས་བཟློག རིགས་པ་ལ་སྦྱོར་བར་བྱེད་ན། རབ་ཏུ་བྱུང་ནས་དེ་དག་སུས་བྱེད་སྙམ་ན། མཁན་པོ་དང་མཁན་བུ་གཉིས་ཕ་བུའི་འདུ་ཤེས་འཇུག་པར་བྱའོ་ཞེས་འདོམས་པ་ནི། ཚུལ་དང་འབྲེལ་བའི་གཟུགས་བརྙན་དང་ཞེས་སོ། །འོ་ན་མཁན་པོ་ཁོ་ན་ལ་གུས་པར་བྱའམ་སྙམ་ན། རབ་ཏུ་བྱུང་བ་ཐམས་ཅད་ལ་གུས་པར་བྱ་ཞེས་འདོམས་པ་ནི། དུལ་བར་གནས་པ་ཉིད་དང་ཞེས་སོ། །འོ་ན་ཚུལ་ཁྲིམས་ཁོ་ནའི་འཇུག་ལྡོག་ལ་བསླབ་པར་བྱའམ་སྙམ་ན། བསླབ་པ་གསུམ་ཀ་རྫོགས་པར་བྱ་དགོས་པས་དེ་གསུམ་བརྗོད་པའི་ལུང་ལ་ཁ་ཏོན་བྱེད་པ་དང་བསྒོམ་པ་ལ་སོགས་ལ་འཇུག་པར་བྱ་དགོས་ཞེས་འདོམས་པ་ནི། དགོས་པ་རྗེས་སུ་སྒྲུབ་པ་ལ་ཡང་ངོ་ཞེས་སོ། །དགེ་སློང་གི་སྤང་བྱ་དེ་ཙམ་དུ་ཟད་དམ་སྙམ་ན། འདིར་བརྗོད་པ་དེ་རྣམས་ཆེ་ལོང་ཙམ་ཡིན་གྱི་བསླབ་པའི་གཞི་ཕྲ་མོ་རྣམས་གསོ་སྦྱོང་གི་དུས་སུ་མཁན་སློབ་དང་འགྲོགས་བཤེས་ལ་བརྟེན་ནས་ཤེས་པར་འགྱུར་བས་དེ་རྣམས་ཤེས་དགོས་སོ་ཞེས་འདོམས་པ་ནི། མ་བརྗོད་པར་ཡང་དག་པར་བླངས་པ་ཞེས་སོ། །ཚུལ་ཁྲིམས་རྣམ་དག་དེ་རྒྱུ་གང་ལ་བརྟེན་ནས་བསྒྲུབ་སྙམ་ན། ཁྱད་དུ་གསོད་པའི་གཉེན་པོར་གུས་པ་ལ་སྦྱར་བ་དང་། བསྒྲུབ་པར་བྱ་བའི་ཐབས་སྦྱོར་བ་བག་ཡོད་ལ་སྦྱོར་བ་གཉིས་ཀྱི་དང་པོ་ནི། ཐོབ་པར་དཀའ་བའི་དལ་འབྱོར་ཐོབ་ཅིང་སངས་རྒྱས་ཀྱི་བསྟན་པ་དང་མཇལ་ནས་བསྙེན་པར་རྫོགས་པའི་སྡོམ་པ་ཐོབ་པས་གུས་པས་སྦྱོར་བའི་བརྩོན་འགྲུས་ཀྱིས་རྗེས་སུ་བསྒྲུབ་པ་ལྷུར་ལོངས་ཤིག་ཅེས་འདོམས་པ་ནི། གུས་པ་ལ་ཡང་ངེས་པར་སྦྱར་བར་བྱའོ་ཞེས་སོ། །གཉིས་པ་ནི། བག་ཡོད་པ་ལ་བརྟེན་ནས་བསྒྲུབ་པས་བག་ཡོད་པར་གྱིས་ཤིག་ཅེས་འདོམས་པ་ནི། བསྒྲུབ་པར་བྱ་བ་ཐབས་བརྗོད་པ་དང་བཅས་པ་ལ་ཡང་ངོ་ཞེས་གསུངས་སོ། །ལྔ་པ་ནི། བཅུ་གཅིག་པོ་འདི་ཙམ་ཞིག་འདིར་སྨོས་པ་ལ་རྒྱུ་མཚན་ཡོད་དེ། འདི་ཙམ་གྱིས་འདུལ་བ་རྒྱས་པའི་དོན་མདོར་བསྡུས་བརྗོད་པ་དེ་འགྲུབ་པའི་ཕྱིར་རོ།། ༈ །།གཉིས་པ་མི་ཉམས་པར་བསྲུང་བའི་ཐབས་ལ་གཉིས་ཏེ། གནས་དང་གནས་པའི་ཚུལ་ཁྲིམས་དང་། གནས་དང་གནས་པའི་མཚན་ཉིད་དོ། །དང་པོ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ་ཞེས་སོགས་སོ། །གཉིས་པ་ལ། བཅས་པའི་སྐབས་ནས་འབྱུང་བ་དང་། རྗེས་བཅས་ཀྱི་སྐབས་ནས་འབྱུང་བ་གཉིས། དང་པོ་ལ་གཉིས་ཏེ། གཞུང་གི་དོན་དང་། དཀའ་བའི་གནས་ལ་དཔྱད་པའོ། །དང་པོ་ལ། ལྔ་ཕྲུགས་ཉི་ཤུ་རྩ་གཅིག་སྟེ། ལུང་བར་སྡོམས་ལས། ལོ་བཅུ་ལོན་དང་འཛིན་དང་མཁས། །རིགས་དང་གསལ་དང་འཛིན་འཇུག་དང་། །སློབ་དང་སློབ་འཇུག་རྣམ་པ་གཉིས། །ཕུན་སུམ་ཚོགས་གཉིས་རྣམ་པ་གསུམ། །སློབ་དང་མི་སློབ་བྱུང་ཤེས་དང་། །གནས་འཆའ་འཆར་འཇུག་ལྟུང་བ་ཤེས། །ལྷོ་ཡི་རི་ལ་རྒྱུ་བ་ཡི། །སྡེ་ཚན་ཡང་དག་བསྡུས་པ་ཡིན། །ཞེས་གསུངས་ཏེ། བསྡུ་ན་གཉིས་ཏེ། བཙུན་པ་བརྟན་པའི་ཡན་ལག་དང་། མཁས་ཤིང་ཕན་འདོགས་པའི་ཡན་ལག་གོ །དང་པོ་ནི། གནས་པས་གནས་ལ་མ་ཞུས་པར་བྱ་བ་མི་བྱའོ་ཞེས་བཤད་ན། གནས་དང་གནས་པའི་མཚན་ཉིད་ཇི་ལྟ་བུ་ཞེ་ན། དེ་འཆད་ཅེས་པའམ། ཡང་ན་དེ་ལྟར་བཤད་ན་བསྙེན་པར་རྫོགས་ནས་ལོ་ཇི་ཙམ་ནས་གཞན་གྱི་མཁན་པོ་སོགས་གསུམ་བྱར་རུང་ཞེ་ན། བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་བཅུ་མ་ལོན་པར་གཞན་གྱི་རབ་ཏུ་བྱུང་བ་དང་བསྙེན་པར་རྫོགས་པའི་མཁན་པོ་ཉིད་དང་། གཞན་གྱི་གནས་མེད་ཀྱི་ཉེས་པ་འགོག་པའི་གནས་ཀྱི་བླ་མ་ཉིད་དང་། རང་ཉིད་ཀྱང་གནས་ཀྱི་བླ་ལ་མ་བརྟེན་པར་འདུག་པར་མི་བྱ་སྟེ། དེ་གསུམ་བྱེད་དུ་རུང་བའི་བཙུན་པ་བརྟན་པའི་ཡན་ལག་མ་ཚང་བ་ཡིན་པའི་ཕྱིར། དེས་ན་གསུམ་པོ་དེ་ནུས་པ་ལ་བརྟན་པའི་ཡན་ལག་ཏུ་ལོ་བཅུ་ལོན་པ་དགོས་ལ། མ་ལོན་པ་ནི་གནས་པའི་རིགས་ཡིན་པར་དོན་གྱིས་བསྟན་ནོ། །གཉིས་པ་ལ་བསྟན་བཤད་གཉིས་ལས། དང་པོ་ནི། འོ་ན་བསྙེན་པར་རྫོགས་ནས་ལོ་བཅུ་ལོན་པ་ཙམ་གྱིས་མཁན་སོགས་གསུམ་པོ་བྱར་རུང་ངམ་ཞེ་ན། ལོ་བཅུ་ལོན་ཀྱང་འོག་ནས་འབྱུང་བའི་ལྔ་ཚན་ལྷན་ཅིག་ཏུ་སྦྱར་བ་ཉི་ཤུ་རྩ་གཅིག་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་གཞན་གྱི་མཁན་སོགས་གསུམ་པོ་བྱར་རུང་བ་མ་ཡིན་ཏེ། དེ་གསུམ་བྱར་རུང་བའི་མཁས་པའི་ཡན་ལག་མ་ཚང་བའི་ཕྱིར། གཉིས་པ་ལ་བཞི་སྟེ། སྡེ་སྣོད་གཉིས་ཤེས་པའི་ཡོན་ཏན་དང་། སྡེ་སྣོད་གསུམ་ཤེས་པའི་དང་། དགེ་སྦྱོང་ཚུལ་གྱིས་དང་། འདུལ་བའི་སྡེ་སྣོད་ཤེས་པའི་ཡོན་ཏན་ནོ། །དང་པོ་ནི། ལྷན་ཅིག་སྦྱར་བ་དེ་རྣམས་གང་ཡིན་ཞེ་ན། ནད་གཡོག་རང་གི་བྱེད་དམ་གཞན་བྱེད་དུ་འཇུག་ནུས་པ། འགྱོད་པ་བསལ་བ་རང་གིས་བྱེད་དམ་བྱེད་དུ་འཇུག་ནུས་པ། སྡིག་པ་ཅན་གྱི་ལྟ་བའི་རྣམ་པ་སྤང་བ་རང་གིས་བྱེད་དམ་བྱེད་དུ་འཇུག་ནུས་པ། གནས་མངོན་པར་མི་དགའ་བ་འདོར་བ་རང་གིས་བྱེད་དམ་བྱེད་དུ་འཇུག་ནུས་པ་སྟེ། བཞི་པོ་དེའི་སྟེང་དུ་ལོ་བཅུ་ལོན་པ་བསྣན་པའི་ལྔ་པ་དེ་ནི་ལྔ་ཚན་དང་པོའོ། །དེ་ཡང་འབྲས་བུ་ལ་གཞག་ན། སྡུག་བསྔལ་ལ་ཇི་མི་སྙམ་པའི་བཟོད་པ་དང་ལྡན་པའི་སྒོ་ནས་ནད་གཡོག་རང་གི་བྱེད་དམ་བྱེད་དུ་འཇུག་ནུས་པ། འདུལ་བ་ཤེས་པའི་སྒོ་ནས་ལྟུང་བ་བྱུང་བ་ཡིད་ལ་གཅགས་པའི་འགྱོད་པ་བསལ་བ་རང་གིས་བྱེད་དམ་བྱེད་དུ་འཇུག་ནུས་པ། མངོན་པར་ཤེས་པའི་སྒོ་ནས་སྡིག་པ་ཅན་གྱི་ལྟ་བའི་རྣམ་པ་སྤང་བ་རང་གིས་བྱེད་དམ་བྱེད་དུ་འཇུག་ནུས་པ། བསམ་པ་ཤེས་པའི་སྒོ་ནས་སློབ་མ་དེ་གནས་སམ་ཡུལ་མངོན་པར་མི་དགའ་བ་འདོར་བ་དག་ལ་རང་གི་བྱེད་དམ་གཞན་བྱེད་དུ་འཇུག་ནུས་པའོ། །གཉིས་པ་ལ་གཉིས་ཏེ། ཡན་ལག་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། ལྔ་པ་ལྷག་མ་རྣམས་ཀྱི་ཡན་ལག་གང་ཞེ་ན། སློབ་པ་ཉིད་ཅེས་པ་ཡན་ཆད་དངོས་སུ་ལྔ་པ་ཚང་བ་མ་ཡིན་པ་རྣམས་ལ་ཚུལ་ཁྲིམས་དང་ལྡན་པ་ཉིད་དང་། མང་དུ་ཐོས་པ་ཉིད་ཡན་ལག་ཏུ་སྦྱར་རོ། །དེ་ལ་ཚུལ་ཁྲིམས་དང་ལྡན་པ་ནི་བསམ་བཞིན་དུ་ཉེས་བྱས་ཙམ་ཡང་མི་བྱེད་པ་ཡིན་ལ། མང་དུ་ཐོས་པ་ནི་ལྔ་པ་དེའི་གཞི་འདིང་ལ་ནང་པའི་སྡེ་སྣོད་མང་དུ་ཐོས་པ་ཡོད་པ་ཡིན་ན། ཕྱི་རོལ་པའི་བསྟན་བཅོས་མང་དུ་ཐོས་པ་ལ་བྱེད་ལ། ནང་པའི་སྡེ་སྣོད་མང་དུ་ཐོས་པ་ཡོད་པ་མ་ཡིན་ན། ནང་པའི་སྡེ་སྣོད་མང་དུ་ཐོས་པ་ཉིད་ལ་བྱེད་དོ། །གཉིས་པ་ལ་གཉིས་ཏེ། ཚིག་དོན་གཉིས་ཀ་ཤེས་པའི་དང་། དོན་ཤེས་པའི་ཡོན་ཏན་ནོ། །དང་པོ་ལ་རང་འཛིན་པ་དང་། གཞན་འཛིན་དུ་འཇུག་པ་གཉིས་ལས། དང་པོ་ནི། དེ་གཉིས་གང་དང་སྦྱོར་ཞེ་ན། སྡེ་སྣོད་མངོན་པར་ཤེས་པ་ཉིད་དོ་ཞེས་ཏེ། མདོ་སྡེ་དང་། འདུལ་བ་དང་། མངོན་པའི་སྡེ་སྣོད་གསུམ་མངོན་པར་ཤེས་པ་སྟེ། དེ་གསུམ་ཀ་ལ་འཛིན། མཁས། རིག་གསལ་བཞི། ཚུལ་ལྡན་མང་ཐོས་གཉིས་སྦྱར་བས་ལྔ་པ་བཞི་སྟོན་ནོ། །དེ་ཡང་འཛིན་པ་ནི་སྡེ་སྣོད་གསུམ་གྱི་ཚིག་དོན་མི་བརྗེད་པར་འཛིན་པ། མཁས་པ་ནི་སྡེ་སྣོད་གསུམ་ཕན་ཚུན་འབྲེལ་བས་འདྲེས་པར་གནས་པ་ལ་སོ་སོར་འབྱེད་ནུས་པ། རིག་པ་ནི་སྡེ་སྣོད་གསུམ་པོ་དེ་ཚད་མ་གསུམ་དང་མི་འགལ་བར་རྩོམ་ནུས་པ། གསལ་བ་ནི་སྡེ་སྣོད་གསུམ་པོ་དེ་ལུང་རིགས་དང་སྦྱར་ནས་གཞན་ལ་གསལ་བར་སྟོན་ནུས་པའོ། །གཉིས་པ་ནི། དེ་དག་འཛིན་དུ་འཇུག་ནུས་པ་ཉིད་དོ་ཞེས་ཏེ། མདོ་སྡེ་འཛིན་དུ་འཇུག་ནུས། འདུལ་བ་འཛིན་དུ་འཇུག་ནུས། མ་མོ་འཛིན་དུ་འཇུག་ནུས། དེའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་དྲུག་པའོ། །དེ་ལྟར་ན་འདུལ་བ་ལ་གནས་པ་མ་ཚང་བར་འགྱུར་རོ་ཞེ་ན། སྐྱོན་མེད་དེ། སྡེ་སྣོད་གསུམ་པོ་དེ་རང་གིས་བསྟན་པའི་སྒོ་ནས་གཞན་འཛིན་དུ་འཇུག་ནུས་པ་ཉིད་ཡིན་པའི་ཕྱིར་རོ། །གཉིས་པ་དོན་ཤེས་པའི་ཡོན་ཏན་ལ་བཞི་སྟེ། བསླབ་པ་གསུམ་ཤེས་པའི་ཡོན་ཏན། ཚུལ་ཁྲིམས་ཤེས་པའི་ཡོན་ཏན། ཕུན་ཚོགས་གཉིས་ཀྱི་ཡོན་ཏན། ཚོགས་སྦྱོར་གཉིས་ཀྱི་ཡོན་ཏན་ནོ། །དང་པོ་ལ་གཉིས་ཏེ། རང་སློབ་པ་དང་། གཞན་སློབ་ཏུ་འཇུག་པའི་ཡོན་ཏན་ནོ། །དང་པོ་ནི། ལྷག་པའི་ཚུལ་ཁྲིམས་ལ་སློབ། ལྷག་པའི་སེམས་ལ་སློབ། ལྷག་པའི་ཤེས་རབ་ལ་སློབ་པ་ཉིད་དེ། དེའི་སྟེང་དུ་ཡན་ལག་ཐུན་མོང་བ་གཉིས་བསྣན་པའི་ལྔ་པ་དེ་ནི་ལྔ་ཚན་བདུན་པའོ། །དེ་ལ་ལྷག་པའི་ཚུལ་ཁྲིམས་ལ་སློབ་པ་ནི་འདུལ་བར་གཏོགས་པའི་བསླབ་པའི་གཞི་མཐའ་དག་ལ་སློབ་པ་དང་། ལྷག་པའི་སེམས་ནི་བསམ་གཏན་བཞིར་གཏོགས་པའི་སེམས་ལ་སློབ་པ་དང་། ལྷག་པའི་ཤེས་རབ་ཅེས་པ་ནི་ལམ་བདེན་ལ་སློབ་པའོ། །གཉིས་པ་ནི། བསླབ་པ་གསུམ་པོ་དེ་ལ་རང་སློབ་པར་མ་ཟད། དེའི་སྟེང་དུ་གཞན་ལྷག་པའི་ཚུལ་ཁྲིམས་ལ་སློབ་ཏུ་འཇུག་ནུས། ལྷག་པའི་སེམས་ལ་སློབ་ཏུ་འཇུག་ནུས། ལྷག་པའི་ཤེས་རབ་ལ་སློབ་ཏུ་འཇུག་ནུས་པ། དེའི་སྟེང་དུ་ཡན་ལག་ཐུན་མོང་བ་གཉིས་བསྣན་པའི་ལྔ་པ་དེ་ནི་ལྔ་ཚན་བརྒྱད་པའོ། །གཉིས་པ་ནི། བསླབ་པ་གསུམ་ལ་སློབ་པ་དང་སློབ་ཏུ་འཇུག་ནུས་པའི་ལྔ་པ་གཉིས་སུ་ཕྱེ་བ་དེ་བཞིན་དུ་འདིར་ཡང་ལྔ་ཚན་གཉིས་སྦྱར་རོ། །ཇི་ལྟར་ཞེ་ན། ལྷག་པའི་སྤྱོད་པ་ལ་སློབ། ལྷག་པའི་འདུལ་བ་ལ་སློབ། ལྷག་པའི་སོ་སོ་ཐར་པ་ལ་སློབ། དེའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་དགུ་པའོ། །གསུམ་པོ་དེ་ལ་སློབ་ཏུ་འཇུག་ཀྱང་ནུས་པའི་སྟེང་དུ་ཚུལ་ལྡན་མང་ཐོས་གཉིས་བསྣན་པའི་ལྔ་པ་དེ་ནི་ལྔ་ཚན་བཅུ་པའོ། །ལྷག་པའི་སྤྱོད་པ་ནི་བསྟན་བཅོས་ནས་བཤད་པའི་འགྲོ་འཆག་ཉལ་འདུག་གི་སྤྱོད་པ། ལྷག་པའི་འདུལ་བ་ནི་ལུང་སྡེ་བཞི་ནས་བཤད་པའི་བསླབ་པ། ལྷག་པའི་སོ་སོར་ཐར་པ་ནི་རྩ་བའི་ལུང་སོ་སོར་ཐར་པ་ནས་བཤད་པའི་བསླབ་པའི་གཞི་རྣམས་ལ་སློབ་པ་ཉིད་དོ། །གསུམ་པ་ཕུན་ཚོགས་གཉིས་ཀྱི་ཡོན་ཏན་ལ་གཉིས་ལས། ཕུན་ཚོགས་དང་པོ་ནི་དད་པ་ཕུན་ཚོགས། ཚུལ་ཁྲིམས་ཕུན་ཚོགས། ཐོས་པ་ཕུན་ཚོགས། གཏོང་བ་ཕུན་ཚོགས། ཤེས་རབ་ཕུན་སུམ་ཚོགས་པའི་ལྔ་ཚན་འདི་ནི་ལྔ་ཚན་བཅུ་གཅིག་པའོ། །དེ་ལ་དད་པ་ཕུན་སུམ་ཚོགས་པ་ནི་དྭང་བའི་དད་པ་དང་། འདོད་པའི་དད་པ་དང་། ཡིད་ཆེས་པའི་དད་པ་ཕུན་སུམ་ཚོགས་པ་སྟེ་ཕྱིར་ནུར་བ་མེད་པའི་མཚན་ཉིད་ཅན་ནོ། །ཚུལ་ཁྲིམས་ཕུན་སུམ་ཚོགས་པ་ནི་བཅས་རང་གི་ཉེས་པས་མ་གོས་པའི་ཚུལ་ཁྲིམས་སོ། །ཐོས་པ་ནི་འདུལ་བ་ཐོས་པ། གཏོང་བ་ནི་མ་ཆགས་པར་གཏོང་བའོ། །ཤེས་རབ་ནི་ཆོས་རབ་ཏུ་རྣམ་པར་འབྱེད་པའི་ཤེས་རབ་བོ། །ཕུན་ཚོགས་གཉིས་པ་ནི་ཀྱང་ཞེས་པ་ཕུན་ཚོགས་གོང་མ་ལ་བསྙེགས་པས་ཚུལ་ཁྲིམས་ཕུན་ཚོགས། ཏིང་ངེ་འཛིན་ཕུན་ཚོགས། ཤེས་རབ་ཕུན་ཚོགས། རྣམ་པར་གྲོལ་བ་ཕུན་ཚོགས། རྣམ་གྲོལ་དེ་ཤེས་པ་དང་མཐོང་བ་ཕུན་སུམ་ཚོགས་པའི་ཡན་ལག་ལྔ་པ་གཅིག་ཏུ་སྦྱར་བ་དེ་ནི་ལྔ་ཚན་བཅུ་གཉིས་པའོ། །དེ་ཡང་ཚུལ་ཁྲིམས་ནི་དགེ་སློང་གི་རྒྱུད་ཀྱི་ཚུལ་ཁྲིམས། ཏིང་ངེ་འཛིན་ནི་མི་སློབ་པའི་རྒྱུད་ཀྱི་ཟག་པ་མེད་པའི་ཏིང་ངེ་འཛིན། ཤེས་རབ་ནི་དེའི་རྒྱུད་ཀྱི་སྡུག་ཀུན་དང་ལམ་བདེན་ལ་དམིགས་པའི་ཟག་མེད་ཀྱི་ཤེས་རབ་བོ། །རྣམ་པར་གྲོལ་བ་ནི་དེའི་རྒྱུད་ཀྱི་སྤང་བྱ་མཐའ་དག་ལས་གྲོལ་བའི་རྣམ་གྲོལ་ལོ། །རྣམ་གྲོལ་དེ་ཤེས་པ་ནི་འགོག་བདེན་ལ་དམིགས་པའི་ཟད་མི་སྐྱེ་ཤེས་པ། དེ་མཐོང་བ་ནི་འགོག་བདེན་ལ་དམིགས་པའི་མི་སློབ་པའི་ཡང་དག་པའི་ལྟ་བའོ། །བཞི་པ་ལ་གཉིས་ཏེ། ཡན་ལག་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། སློབ་པ་ཉིད་ཡན་ཆད་ལྔ་པ་མ་ཚང་བ་རྣམས་ལ་ཚུལ་ལྡན་མང་ཐོས་གཉིས་བསྣན་པར་མ་ཟད་བརྩོན་འགྲུས་རྩོམ་པ་ཉིད་དང་ཤེས་རབ་དང་ལྡན་པ་ཉིད་དང་ཡང་སྦྱར་བས་ཐུན་མོང་གི་ཡན་ལག་བཞིའོ། །དེ་ལ་བརྩོན་འགྲུས་རྩོམ་པ་ཉིད་ནི་སྡིག་པ་མི་དགེ་བ་སྐྱེས་པ་སྤོང་བ་དང་། མ་སྐྱེས་པ་མི་བསྐྱེད་པའི་ཕྱིར་དང་། གཉེན་པོ་དགེ་བའི་ཆོས་མ་སྐྱེས་པ་བསྐྱེད་པའི་ཕྱིར་དང་། སྐྱེས་ཟིན་འཕེལ་བའི་ཕྱིར་དུ་བརྩོན་འགྲུས་རྩོམ་པའོ། །ཤེས་རབ་དང་ལྡན་པ་ནི་རྒྱུ་རྐྱེན་ཤེས་ཤིང་གཅིག་ལས་མང་དུ་སྤྲོ་ནུས་པ་དང་ཕྱིས་འབྱུང་བ་སྔ་ནས་ཤེས་པ་དང་ལྡན་པའོ། །གཉིས་པ་ནི། དེ་གང་དང་སྦྱོར་ཞེ་ན། དྲན་པ་དང་ལྡན་པ་གཞིར་བྱས་ཏེ་དེའི་སྟེང་དུ་ཚུལ་ལྡན་མང་ཐོས་གཉིས། བརྩོན་འགྲུས་རྩོམ་ཤེས་གཉིས་ཏེ་བཞི་བསྣན་པའི་ལྔ་པ་དེ་ནི་ལྔ་ཚན་བཅུ་གསུམ་པའོ། །ནང་དུ་ཡང་དག་པར་གཞག་པ་གཞིར་བྱས་ལ་དེའི་སྟེང་དུ་སྔར་གྱི་བཞི་པོ་དེ་བསྣན་པ་དེ་ནི་ལྔ་ཚན་བཅུ་བཞི་པ་དང་། མཉམ་པར་གཞག་པ་གཞིར་བཟུང་ནས་དེའི་སྟེང་དུ་སྔར་གྱི་བཞི་པོ་དེ་བསྣན་པའི་ལྔ་པ་དེ་ནི་ལྔ་ཚན་བཅོ་ལྔ་པའོ། །དེ་ལ་དྲན་པ་དང་ལྡན་པ་ནི་སྔར་བཟུང་ཟིན་གྱི་དོན་མི་བརྗོད་པར་འཛིན་ནུས་པའི་དྲན་པ་དང་ལྡན་པ་དང་། ནང་དུ་ཡང་དག་པར་གཞག་པ་ནི་ལུས་འདུ་འཛི་ལས་དབེན། སེམས་མི་དགེ་བའི་རྣམ་རྟོག་ལས་དབེན་པ་དང་། མཉམ་པར་གཞག་པ་ནི་སེམས་རྩེ་གཅིག་ཏུ་དམིགས་པ་ལ་འཇོག་ནུས་པའོ། །གསུམ་པ་དགེ་སྦྱོང་ཚུལ་གྱི་ཡོན་ཏན་ལ། སློབ་པ་དང་མི་སློབ་པ་གཉིས་ལས། དང་པོ་ནི། སློབ་པའི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། རྣམ་གྲོལ་དེ་ཤེས་མཐོང་གི་ཡན་ལག་ལྔ་ཚང་བ་དེ་ནི་ལྔ་ཚན་བཅུ་དྲུག་པའོ། །དེ་ཡང་འབྲས་བུ་ཕྱི་མ་ཐོབ་ཕྱིར་དུ་སློབ་པས་ན་སློབ་པ་ཉིད་ཡིན་ལ། དེའི་ཚུལ་ཁྲིམས་ནི་སློབ་པའི་རྒྱུད་ཀྱི་ཟག་མེད་ཀྱི་སྡོམ་པ་དང་། ཏིང་ངེ་འཛིན་ནི་དེའི་རྒྱུད་ཀྱི་ཟག་མེད་ཀྱི་ཏིང་ངེ་འཛིན་དང་། ཤེས་རབ་ནི་དེའི་རྒྱུད་ཀྱི་སྡུག་ཀུན་དང་ལམ་བདེན་ལ་དམིགས་པའི་ཟག་མེད་ཀྱི་ཤེས་རབ་དང་། རྣམ་པར་གྲོལ་བ་ནི་དེའི་རྒྱུད་ཀྱི་སྤང་བྱ་ཕྱོགས་གཅིག་ལས་གྲོལ་བའི་རྣམ་གྲོལ་དང་། དེ་ཤེས་པ་ནི་འགོག་བདེན་ལ་དམིགས་པའི་ཆོས་ཤེས་དང་རྗེས་ཤེས་དང་། བར་ཆད་མེད་ལམ་ལས་གཞན་པའི་ཁྱད་པར་ཅན་གྱི་ལམ་མོ། །དེ་མཐོང་བ་ནི་འགོག་བདེན་ལ་དམིགས་པའི་ཆོས་བཟོད་དང་། རྗེས་བཟོད་དང་། དེ་འདྲེན་པར་བྱེད་པའི་སྦྱོར་བའི་ལམ་དང་བར་ཆད་མེད་པའི་ལམ་མོ། །གཉིས་པ་ནི། འབྲས་བུ་ཕྱི་མ་ཐོབ་པའི་ཕྱིར་དུ་མི་སློབ་པས་ན་མི་སློབ་པ་ཉིད་དེ། དེའི་རྒྱུད་ཀྱི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་། རྣམ་པར་གྲོལ་བ་དང་། དེ་ཤེས་མཐོང་གི་ཡན་ལག་ལྔ་ཚང་བ་དེ་ནི་ལྔ་ཚན་བཅུ་བདུན་པའོ། །དེ་ལ་མི་སློབ་པའི་ཚུལ་ཁྲིམས་ནི་མི་སློབ་པའི་རྒྱུད་ཀྱི་ཟག་མེད་ཀྱི་སྡོམ་པ་ཡིན་ལ། གཞན་རྣམས་ཕུན་ཚོགས་འོག་མ་དང་འདྲའོ། །བཞི་པ་འདུལ་བ་ཤེས་པའི་ཡོན་ཏན་ལ་གསུམ་སྟེ། དོན་ཤེས་པའི་དང་། འཁོར་ལ་མ་ཆགས་པའི་དང་། ཚིག་དོན་གཉིས་ཀ་ཤེས་པའི་ཡོན་ཏན་ནོ། །དང་པོ་ནི། བྱུང་བ་མངོན་པར་ཤེས། བཅས་པ་མངོན་པར་ཤེས། རྗེས་སུ་བཅས་པ་མངོན་པར་ཤེས། བཀག་པ་མངོན་པར་ཤེས། གནང་བ་མངོན་པར་ཤེས་པའི་ཡན་ལག་ལྔ་ཚང་བ་དེ་ནི་ལྔ་ཚན་བཅོ་བརྒྱད་པའོ། །དེ་ཡང་བྱུང་བ་ནི་གླེང་གཞི། བྱེད་རྒྱུ། རྒྱུ་མཚན་དང་བཅས་པ་དང་། བཅས་པ་ནི་སྟོན་པའི་གསུང་གིས་མཚམས་དང་པོ་གཞག་པ་དང་། རྗེས་སུ་བཅས་པ་ནི་སྟོན་པའི་གསུང་གིས་མཚམས་དང་པོར་གཞག་པའི་གཞི་དེ་ལ་གསུང་གིས་མཚམས་གཉིས་པ་རྣམ་པར་གཞག་པ་དང་། བཀག་པ་ནི་སྲོག་ལ་བབས་ཀྱང་མི་བྱའོ་ཞེས་བཀག་པ་དང་། གནང་བ་ནི་གཞི་དེ་བྱས་ན་ཕན་ཡོན་ཡོད་ཅིང་མ་བྱས་ན་ཉེས་པ་མེད་པས་ཅི་དགར་གནང་བ་སྟེ། ཉི་མའི་སུམ་ཆ་བདེ་བ་མ་ཡིན་པ་ལ་ཕྱི་རོལ་པའི་བསྟན་བཅོས་བཀླག་པར་གནང་བ་ལྟ་བུའོ། །མངོན་པར་ཤེས་པ་ནི་གསལ་བར་ངེས་པའོ། །གཉིས་པ་ལ་ཡན་ལག་ཐུན་མོང་བ་དང་། ཐུན་མོང་མ་ཡིན་པ་གཉིས་ལས། དང་པོ་ནི། བར་དུ་གཅོད་པ་མངོན་པར་ཤེས་པ་དང་། བར་དུ་གཅོད་པ་མ་ཡིན་པར་མངོན་པར་ཤེས་པ་དང་། སྨྲ་བ་པོ་ཉིད་དང་། རྗེས་སུ་སྟོན་པ་ཉིད་དེ་བཞི་པོ་དེ་ཐུན་མོང་གི་ཡན་ལག་ཏུ་སྦྱར་རོ། །གཉིས་པ་ནི། བཞི་པོ་དེ་གཏན་དུ་གནས་འཆར་འཇུག་ནུས་པ་དང་སྦྱར་བའི་ལྔ་པ་དེ་ནི་ལྔ་ཚན་བཅུ་དགུ་པའོ། །ཡན་ལག་བཞི་པོ་དེ་རེ་ཞིག་གནས་འཆའ་ནུས་པ་དང་སྦྱར་བ་ནི་ལྔ་ཚན་ཉི་ཤུ་པའོ། །དེ་ལ་སྲོག་གཅོད་པ་ལ་སོགས་པ་ནི་བར་དུ་གཅོད་པ་ཡིན་པར་མངོན་པར་ཤེས་པ་དང་། གནང་བ་དང་བསྒྲུབ་པའི་བྱ་བ་ནི་བར་དུ་གཅོད་པ་མ་ཡིན་པ་མངོན་པར་ཤེས་པ་ཉིད་དང་། བླང་དོར་གྱི་གནས་གཞན་ལ་སྨྲ་བར་བྱེད་པ་པོ་ཉིད་དང་། གཞན་བླང་དོར་ལ་འགོད་པའི་སྒོ་ནས་སྤྲོ་བ་བསྐྱེད་ནུས་པ་ནི་རྗེས་སུ་སྟོན་པ་ཉིད་དང་། རང་གི་སློབ་མ་གཞན་ལ་གཏན་དུ་གནས་འཆར་འཇུག་ནུས་པ་ཉིད་དང་། རང་གི་སློབ་མ་རེ་ཞིག་གཞན་ལ་གནས་འཆར་འཇུག་ནུས་པ་ཉིད་དོ། །གསུམ་པ་ནི་ལྟུང་བ་མངོན་པར་ཤེས། ལྟུང་བ་མ་ཡིན་པ་མངོན་པར་ཤེས། ཡང་བ་མངོན་པར་ཤེས། ལྕི་བ་མངོན་པར་ཤེས། སོ་སོར་ཐར་པ་དང་རྒྱས་པ་ཐོན་པའི་ལྔ་པ་དེ་ནི་ལྔ་ཚན་ཉེར་གཅིག་པའོ། །དེ་ཡང་སྲོག་གཅོད་པ་ལ་སོགས་པ་ནི་ལྟུང་བ། གསོ་སྦྱོང་ལ་སོགས་པ་ནི་ལྟུང་བ་མ་ཡིན་པ་དང་། ཀུན་སློང་ཞན་པས་བྱས་པའི་ལྟུང་བ་ནི་ཡང་བ་དང་། ཀུན་སློང་དྲག་པོས་བྱས་པའི་ལྟུང་བ་ནི་ལྕི་བ་མངོན་པར་ཤེས་པ་དང་། རྩ་བའི་ལུང་སོ་སོ་ཐར་པ་ཁ་ཏོན་ཏུ་ཐོན་པ་དང་། རྒྱས་པ་ལུང་སྡེ་བཞི་ཁ་ཏོན་དུ་ཐོན་པ་ཉིད་དོ།། ༈ །།གཉིས་པ་དཀའ་བའི་གནས་ལ་དཔྱད་པ་ལ་དྲུག་སྟེ། ལོ་བཅུ་ལོན་པ་དང་པོར་བསྟན་པའི་དགོས་པ། ལྔ་ཕྲུགས་ཀྱི་བསྡུ་བ། རང་དབང་ཅན་ཡིན་མིན་གྱི་ཁྱད་པར། ལྔ་པ་ཁ་སྡུས་ཀྱིས་ཆོག་མི་ཆོག ལྔ་པ་ཉི་ཤུ་རྩ་གཅིག་ཚང་དགོས་མི་དགོས། ཡོན་ཏན་གྱི་ཆ་ཙམ་གྱིས་ཆོག་མི་ཆོག་དཔྱད་པའོ། །དང་པོ་ནི། དེ་ལ་དགོས་པ་ཡོད་དེ། མཁན་སོགས་གསུམ་པོ་བྱར་རུང་བའི་རྒྱུའི་གཙོ་བོ་ཡིན་པ་དང་། ལྔ་པ་ལྷག་མ་རྣམས་ཀྱི་ཡུལ་ཉིད་ཡིན་པར་བསྟན་པ་དང་། འདུལ་བ་ལ་གནས་པའི་དོན་ཉིད་ཀྱང་བསྟན་པ་དང་། ལྔ་པ་དང་པོའི་ཡན་ལག་བདེ་བླག་ཏུ་རྟོགས་པའི་ཆེད་ཡིན་པའི་ཕྱིར། དེ་ལྟར་ཡང་ཊཱི་ཀར། དེ་ལ་ལོ་བཅུ་ལོན་པ་ཉིད་འདི་ནི་ལྔ་པ་དང་པོའི་ཡན་ལག་ལྔ་པ་ཡིན་པར་རིག་པར་བྱ་སྟེ། འདུལ་བ་ལ་གནས་པའི་དོན་ཉིད་ཀྱང་བསྟན་པ་ཡིན་དེ་ལྔ་པ་ལྷག་མ་རྣམས་ཀྱི་ནི་ཡུལ་ཡིན་པར་སྟོན་ཏེ། གང་ལ་ལོ་བཅུ་ལོན་པ་ཉིད་དང་འདུལ་བ་ལ་གནས་པའི་དོན་ཉིད་གཉིས་པོ་དེ་དག་ཡོད་པ་དེས་ནི་མཁན་པོ་ཉིད་ལ་སོགས་པ་གསུམ་པོ་དག་ཀྱང་བྱ་སྟེ། འདི་ལྟར་དེ་ནི་མཁན་པོ་ཉིད་ལ་སོགས་པ་དག་གི་གཙོ་བོའི་རྒྱུ་ཡིན་པའི་ཕྱིར་རོ་ཞེས་དང་། དེའི་ཕྱིར་ལོ་བཅུ་ལོན་པ་ཉིད་དང་། འདུལ་བ་ལ་གནས་པའི་དོན་ཉིད་ནི་བཟླ་བར་བྱ་བ་མ་ཡིན་པའི་ཡན་ལག་ཡིན་ནོ། །དོན་འདི་བསྟན་པའི་ཕྱིར་དང་པོར་ལོ་བཅུ་ལོན་པ་སྨོས་སོ་ཞེས་སོ། །ལྔ་པ་ལྷག་མ་རྣམས་ཀྱི་ཡུལ་ཡིན་པར་བསྟན་ཞེས་པའི་དོན་ནི། ལྔ་པ་ལྷག་མ་དང་ལྡན་པ་རྣམས་ཀྱིས་མཁན་སོགས་གསུམ་པོ་བྱེད་པ་ལ་ལོ་བཅུ་ལོན་པ་གཞིར་གཟུང་དགོས་ཞེས་པའི་དོན་ཡིན་ནོ། །གཉིས་པ་ནི། ཁ་ཅིག་ན་རེ། ཉེར་གཅིག་པོ་དེ་ཡང་ལྔ་པ་ཁྱད་པར་ཅན་ཡིན་མིན་གཉིས་སུ་འདུ་ལ། དེ་ཡང་སྡེ་སྣོད་གསུམ་ཤེས་པའི་ཡོན་ཏན་ནམ། འཕགས་རྒྱུད་ཀྱི་ལམ་ཡན་ལག་ཏུ་ཡོད་པ་ནི་ཁྱད་པར་ཅན་དང་། དེ་ལས་གཞན་པ་ནི་ཁྱད་པར་ཅན་མ་ཡིན་པའི་ལྔ་པ་ཡིན་ཞིང་། ཁྱད་པར་ཅན་མ་ཡིན་པའི་མཚན་གཞི་ནི་བྱུང་བཅས་ཀྱི་ལྔ་པ་སོགས་ཕྱི་མ་བཞིའོ་ཞེས་ཟེར། མཚོ་་་་་་ཁ་ཅིག་ཚིག་དོན་གཉིས་ཀ་ཤེས་པ་ཡན་ལག་ཏུ་ཡོད་པ་ནི་ཁྱད་པར་ཅན་དང་། ཚིག་དོན་རེ་རེ་ཤེས་པ་ཡན་ལག་ཏུ་ཡོད་པ་ནི་ཁྱད་པར་ཅན་མ་ཡིན་པ་ཡིན་ལ། ལྟུང་ཤེས་ཀྱི་ལྔ་པ་ནི་ཁྱད་པར་ཅན་མ་ཡིན་པའོ་ཞེས་ཟེར། དེ་གཉིས་ཀ་མི་འཐད་དེ། ལྔ་པ་ཁྱད་པར་ཅན་དང་ཁྱད་པར་ཅན་མ་ཡིན་པའི་ཐ་སྙད་གཞུང་ཁུངས་ཐུབ་གང་ལས་ཀྱང་མ་བཤད་པའི་ཕྱིར། རང་ལུགས་ལ། ལྔ་པ་རང་དབང་ཅན་ཡིན་མིན་གཉིས་སུ་འདུ་ལ། དང་པོ་ནི། ལྔ་པ་རང་ཉིད་དང་ལྡན་པར་འཇོག་པ་ལྔ་ཚན་གཞན་ལྡན་པ་ལ་མི་ལྟོས་པ་སྟེ་སྡེ་སྣོད་འཛིན་པའི་ལྔ་པ་ལྟ་བུའོ། །ལྔ་པ་རང་དབང་ཅན་མ་ཡིན་པ་ནི་རང་ཉིད་དང་ལྡན་པར་འཇོག་པ་ལྔ་ཚན་གཞན་ལ་ལྟོས་པའི་ལྔ་པ་སྟེ། འཛིན་འཇུག་གི་ལྔ་པ་ལྟ་བུའོ། །ལོ་བཅུ་ལོན་པ་དང་འདུལ་བ་ཤེས་པ་གཉིས་པོ་མཁན་སོགས་གསུམ་པོ་བྱེད་པའི་གཙོ་བོའི་རྒྱུར་མཚུངས་ན་སློབ་པ་དང་མི་སློབ་པའི་སྐབས་སུ་འདུལ་བ་ཤེས་པ་དེ་གང་གིས་བསྟན་ཞེ་ན། ལོ་བཅུ་ལོན་པས་བསྟན་པ་ཡིན་ཏེ། ལོ་བཅུ་ལོན་པའི་འཕགས་པ་ཡིན་ན་འདུལ་བ་ཤེས་པས་ཁྱབ་པའི་ཕྱིར་ཏེ། དེ་བསླབ་པ་ལ་གུས་པས་བསྙེན་པར་རྫོགས་ནས་ལོ་བཅུའི་བར་དུ་འདུལ་བ་ངེས་པར་སློབ་ཅིང་། དེ་ཙམ་གྱིས་འདུལ་བ་ཤེས་པར་ཡང་འགྱུར་བའི་ཕྱིར་དང་། བསྙེན་པར་རྫོགས་ནས་ལོ་བཅུའི་བར་དུ་ལྟུང་བས་མ་གོས་ན་འདུལ་བ་ཤེས་པར་གྲུབ་ལ། ལྟུང་བས་གོས་ན་འཕགས་ལམ་མི་ཐོབ་པའི་ཕྱིར་རོ། །ཊཱི་ཀར་དེ་ལ་ཉེས་པ་མེད་དེ། ལོ་བཅུ་ལོན་པ་ཉིད་ཅེས་སྨོས་པའི་ཕྱིར་ཏེ། འདི་ལྟར་དེ་གཉིས་ནི་འཕགས་པ་ཡིན་པས། ལོ་བཅུ་པོ་དག་ལ་འདུལ་བ་ལ་གདོན་མི་ཟ་བར་འབད་པ་ཡིན་པའི་ཕྱིར་ཞེས་སོ། །གསུམ་པ་ལ་གསུམ་སྟེ། ལྔ་པ་རང་དབང་ཅན་ཡིན་མིན་གྱི་ཁྱད་པར། ཡན་ལག་རང་དབང་ཅན་ཡིན་མིན་གྱི་ཁྱད་པར། གང་ཟག་རང་དབང་ཅན་ཡིན་མིན་གྱི་ཁྱད་པར་རོ། །དང་པོ་ནི། བཤད་ཟིན་ལ། དེའི་ཐ་སྙད་ནི་ཊཱི་ཀར་གཞན་དུ་ལྔ་པ་རང་དབང་ཅན་ཁོ་ནར་འགྱུར་ལ་ཞེས་པས་བསྟན་ནོ། །གཉིས་པ་ནི། ཁ་ཅིག་རང་གི་ལྔ་པའི་གཞི་འདིང་བྱེད་ཅིང་ལྔ་པ་གཞན་གྱི་ཁ་སྐོང་དུ་འགྲོ་བ་ནི་ཡན་ལག་རང་དབང་ཅན་གྱི་དོན་ཡིན་ཏེ། དཔེར་ན་ཕུན་ཚོགས་གོང་མའི་ཡན་ལག་ལྟ་བུའོ། །རང་གི་ལྔ་པའི་གཞི་འདིང་མི་བྱེད་པར་ལྔ་པ་གཞན་གྱི་ཁ་སྐོང་དུ་འགྲོ་བ་ནི་ཡན་ལག་རང་དབང་ཅན་མ་ཡིན་པ་སྟེ། དཔེར་ན་ཚུལ་ལྡན་མང་ཐོས་དང་བརྩོན་འགྲུས་རྩོམ་ཤེས་ལྟ་བུའོ་ཞེས་ཟེར་བ་མི་འཐད་དེ། གནས་དང་རེ་ཞིག་གི་གནས་ཤེས་པ་རྩ་འགྲེལ་ལ་བརྟེན་ནས། ཡན་ལག་རང་དབང་ཅན་ཡིན་མིན་གྱི་ཐ་སྙད་བྱེད་པ་གང་ཞིག དེའི་འགྲེལ་པར་དེ་ལྟར་མ་བཤད་པའི་ཕྱིར་ཏེ། གཏན་དུ་གནས་འཆར་འཇུག་ནུས་པ་དང་། རེ་ཞིག་གནས་འཆར་འཇུག་ནུས་པ་གཉིས་བསྡོམས་ནས་ཡན་ལག་གཅིག་ཏུ་མི་བྱ་བར་ཡན་ལག་རེ་རེ་བྱ་བའི་དོན་ལ་བཤད་པའི་ཕྱིར་ཏེ། ཊཱི་ཀར་དེ་ལ་གནས་དང་རེ་ཞིག་གི་གནས་ཞེས་བྱ་བ་ལ་དང་ཞེས་བྱ་བའི་སྒྲ་ནི་གནས་དང་རེ་ཞིག་གི་གནས་གཉིས་རང་དབང་ཡོད་པར་བསྟན་པའི་ཕྱིར་རོ། །འདི་སྐད་བསྟན་ཏེ། གནས་དང་རེ་ཞིག་གི་གནས་ཞེས་བྱ་བའི་ཡན་ལག་གཉིས་པོ་ནི་ལྔ་པ་གཅིག་ཏུ་གཞག་པར་མི་བྱའི། མདོ་སྔ་མར་བསྟན་མ་ཐག་པའི་ཡན་ལག་བཞི་དང་སོ་སོར་སྦྱར་ཏེ། ལྔ་པ་གཉིས་སུ་བྱའོ་ཞེས་བྱ་བའི་ཐ་ཚིག་གོ་ཞེས་གསུངས་པའི་ཕྱིར། རང་ལུགས་ནི། གནས་འཆར་འཇུག་ནུས་པ་ལྟ་བུ་ནི་ཡན་ལག་རང་དབང་ཅན་དང་། དེ་མཐོང་བའི་ཡན་ལག་དང་སོ་སོར་ཐར་པ་འདོན་པའི་ཡན་ལག་ལྟ་བུ་ནི་རང་དབང་ཅན་མ་ཡིན་པའོ། །གསུམ་པ་ནི། བརྟན་མཁས་ཀྱི་ཡོན་ཏན་དང་ལྡན་པ་ནི་གང་ཟག་རང་དབང་ཅན་དང་། མི་ལྡན་པ་ནི་རང་དབང་ཅན་མ་ཡིན་པའོ། །དེ་ལྟར་ཡང་མི་སློབ་པ་ཉིད་དོ་ཞེས་པའི་ཊཱི་ཀར་བཅོམ་ལྡན་འདས་ཀྱིས་ལོ་བཅུ་ལོན་པ་ཉིད་ཅེས་གསུངས་པ་ནི་རང་དབང་ཡོད་པར་བསྟན་པ་ཡིན་པས། གལ་ཏེ་དེ་གཉིས་ལ་འདུལ་བ་ལ་གནས་པའི་དོན་མེད་པར་གྱུར་ན་དེ་ཉིད་ཇི་ལྟར་རང་དབང་ཅན་དུ་འགྱུར་ཞེས་གསུངས་པའི་ཕྱིར། བཞི་པ་ཁ་བསྡུས་ཀྱི་ཆོག་མི་ཆོག་ནི། ཁ་ཅིག་ན་རེ་ཁ་བསྡུས་ཀྱིས་ཆོག་སྟེ། སུམ་བརྒྱ་པར། ཚུལ་ཁྲིམས་ལྡན་ཞིང་འདུལ་བའི་ཆོ་ག་ཤེས། །ནད་པར་སྙིང་བརྩེ་འཁོར་ནི་དག་པ་དང་། །ཆོས་དང་ཟང་ཟིང་ཕན་འདོགས་ཀྱིས་བརྩོན་པ། །དུས་སུ་འདོམས་པ་དེ་དག་བླ་མར་བསྔགས། །ཞེས་གསུངས་པའི་ཕྱིར་ཟེར་བ་མི་འཐད་དེ། འོ་ན་བསྙེན་པར་རྫོགས་ནས་ལོ་བཅུ་མ་ལོན་པར་མཁན་སོགས་གསུམ་བྱེད་རུང་བར་ཐལ། ལུང་དེར། ཚུལ་ཁྲིམས་དང་ལྡན་པ་སྨོས་ཀྱི་ལོ་བཅུ་ལོན་པ་མ་སྨོས་པའི་ཕྱིར། ཁྱབ་པ་ཁས་བླངས་སོ། །གཞན་ཡང་མཁན་སོགས་གསུམ་བྱེད་པ་ལ་ཁ་བསྡུས་ཀྱི་ཆོག་པའི་ཤེས་བྱེད་དུ་ལུང་འདི་འདྲེན་པ་མ་འབྲེལ་ཏེ། ལུང་དེས་ཡོན་ཏན་དེ་རྣམས་དང་ལྡན་ན་གནས་བླ་མ་བྱེད་རུང་བས་ཁྱབ་པར་མ་བསྟན་གྱི། གནས་བླ་མ་འཚོལ་བ་རྣམས་ཀྱིས་ཡོན་ཏན་དེ་རྣམས་དང་ལྡན་པ་བཙལ་བར་བྱ་ཞེས་བསྟན་པའི་ཕྱིར་རོ། །ལྔ་པ་ནི། མཁན་སོགས་གསུམ་བྱེད་པ་ལ་ལྔ་ཕྲུགས་ཉི་ཤུ་རྩ་གཅིག་ཚང་མི་དགོས་ཏེ། ལོ་བཅུ་ལོན་པའི་སྟེང་དུ་ལྔ་ཕྲུགས་གང་རུང་ཅིག་དང་ལྡན་པས་ཆོག་པའི་ཕྱིར་ཏེ། འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ་ཞེས་གསུངས་པའི་ཕྱིར་དང་། གང་ཟག་གཅིག་ལ་ཉི་ཤུ་རྩ་གཅིག་ཚང་བ་མི་སྲིད་པའི་ཕྱིར་ཏེ། སློབ་མི་སློབ་འགལ་བའི་ཕྱིར་རོ། །དྲུག་པ་ཡོན་ཏན་གྱི་ཆ་ཙམ་གྱིས་ཆོག་མི་ཆོག་ནི། བརྟན་མཁས་ཀྱི་ཆ་ཙམ་གྱིས་མི་ཆོག་སྟེ། གལ་ཏེ་ཆོག་ན་བསྙེན་པར་རྫོགས་ནས་ཞག་གཅིག་ཙམ་ལོན་པ་དང་། སོ་ཤིང་འདོར་ཤེས་པ་ཙམ་གྱིས་བརྟན་མཁས་ཀྱི་ཡོན་ཏན་དང་ལྡན་པར་འགྱུར་བའི་ཕྱིར་རོ། །བྱུང་བ་དང་བཅས་པ་དང་ཞེས་སོགས་ཀྱི་སྐབས་སུ། རྗེས་བཅས་ལ་དབྱེ་ན་དགུ་སྟེ། མཚན་ཉིད་མི་འདོར་བ་གསུམ་དང་། འདོར་བ་དྲུག་གོ །དང་པོ་ནི། དགག་པའི་རྗེས་སུ་དགག་པ་བཅས་པ། སྒྲུབ་པའི་རྗེས་སུ་སྒྲུབ་པ་བཅས་པ། གནང་བའི་རྗེས་སུ་གནང་བ་བཅས་པ་དང་གསུམ། དང་པོ་ནི། བཟང་བྱིན་གྱིས་མི་ཚངས་སྤྱོད་བྱས་པ་བཀག་པ་ལས་དེའི་རྗེས་སུ་པྲ་མོ་ལ་མི་ཚངས་སྤྱོད་བཀག་པ་དང་། གཉིས་པ་ནི། དབྱར་ཁས་བླང་པར་བྱའོ་ཞེས་བསྒྲུབས་ནས། དབྱར་སྔ་མའི་ཁས་ལེན་མ་གྲུབ་ན་དབྱར་ཕྱི་མ་ཁས་ལེན་དགོས་པར་བསྟན་པ་ལྟ་བུའོ། །གསུམ་པ་ནི། མཆིལ་ལྷྭམ་གནང་བའི་རྗེས་སུ་ཡུ་རིང་དང་ཡུ་ཕྱེད་གནང་བ་ལྟ་བུའོ། །གཉིས་པ་མཚན་ཉིད་འདོར་བ་དྲུག་ནི། དགག་པའི་རྗེས་སུ་སྒྲུབ་པ་དང་། དགག་པའི་རྗེས་སུ་གནང་བ། སྒྲུབ་པའི་རྗེས་སུ་དགག་པ། སྒྲུབ་པའི་རྗེས་སུ་གནང་བ། གནང་བའི་རྗེས་སུ་དགག་པ། གནང་བའི་རྗེས་སུ་སྒྲུབ་པ་བཅས་པའོ། །དང་པོ་ནི། ཕྱི་བཞིན་འབྲང་བའི་དགེ་སྦྱོང་མདུན་དུ་འགྲོ་བ་བཀག་པའི་རྗེས་སུ་ཉམས་ང་བ་ལ་སོགས་པའི་ཚེ་སྔོན་དུ་འགྲོ་བ་སྒྲུབ་པ་ལྟ་བུའོ། །གཉིས་པ་ནི། དུས་མ་ཡིན་པའི་ཁ་ཟས་བཀག་པའི་རྗེས་སུ་ནད་པ་ལ་གནང་བ་ལྟ་བུའོ། །གསུམ་པ་ནི། གསོ་སྦྱོང་བྱའོ་ཞེས་བསྒྲུབས་ནས་གནས་མཛེས་པ་འདོད་པས་གསོ་སྦྱོང་བྱ་བ་བཀག་པ་ལྟ་བུའོ། །བཞི་པ་ནི། ཚེས་བཅུ་བཞི་དང་བཅོ་ལྔ་ལ་ཆོས་བཤད་ཉན་བྱའོ་ཞེས་བསྒྲུབས་ནས་ནད་པས་དེ་མ་བྱས་ཀྱང་ཉེས་པ་མེད་པར་གནང་བ་ལྟ་བུའོ། །ལྔ་པ་ནི། མཆིལ་ལྷྭམ་གནང་བའི་རྗེས་སུ་སྒྲ་ཀྲོག་ཀྲོག་ཟེར་བ་བཀག་པ་ལྟ་བུའོ། །དྲུག་པ་ནི། ལམ་གྲོགས་དང་བཅས་ཏེ་ལམ་དུ་འགྲོ་བར་གནང་བའི་རྗེས་སུ་ལམ་དུ་གྲོགས་ན་ན་ནད་གཡོག་བྱེད་དགོས་སོ་ཞེས་སྒྲུབ་པ་ལྟ་བུའོ། །གཉིས་པ་རྗེས་བཅས་ཀྱི་སྐབས་ནས་འབྱུང་བ་ལ་གཉིས་ལས། དང་པོ་མཚན་ཉིད་མི་འདོར་བ་ནི་རང་ཉིད་གནས་ལ་བརྟེན་དགོས་ཤིང་གནས་དེ་བརྟན་མཁས་ཀྱི་ཡོན་ཏན་དང་ལྡན་པ་རང་ལས་རྒན་པ་མེད་ན་ཇི་ལྟར་བྱ་ཞེ་ན། རང་ལས་གཞོན་པ་བརྟན་མཁས་ཀྱི་ཡོན་ཏན་དང་ལྡན་པ་ལ་གནས་བཅའ་བར་བྱའོ། །དེ་ལ་གནས་པ་སློབ་མའི་བྱ་བ་ཐམས་ཅད་བྱ་དགོས་སམ་ཞེ་ན། བྱ་བ་གཞན་ཐམས་ཅད་ནི་དགོས་ལ། འདུད་པ་སྟེ་ཕྱག་ནི་བྱ་མི་དགོས་སོ། །གཉིས་པ་མཚན་ཉིད་འདོར་བ་ནི། བརྟན་མཁས་དང་མི་ལྡན་པའི་གཉུག་མར་གནས་པ་རྣམས་ཀྱིས་གནས་ཀྱི་བླ་མ་ལ་བརྟེན་དགོས་ན་ལམ་དུ་འགྲོ་བས་ཀྱང་དེ་ལྟར་དགོས་སམ་ཞེ་ན། བསྙེན་པར་རྫོགས་ནས་སྡོམ་རྒྱུན་བར་མ་ཆད་དུ་ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་ལྟུང་ཤེས་ཀྱི་ལྔ་པ་དང་ལྡན་ན་གནས་མ་བཅས་པར་ལྗོངས་རྒྱུ་འགྲོ་བར་བྱར་རུང་ངོ་། །འོ་ན་ལོ་ལྔ་ལོན་པ་དང་ལྟུང་ཤེས་ཀྱི་ལྔ་པ་དང་ལྡན་པ་གང་གཙོ་བ་ཡིན་ཞེ་ན། གཉིས་ཀ་གཙོ་བ་ཡིན་ཏེ། ལོ་ལྔ་ལོན་པ་དང་ལྟུང་ཤེས་ཀྱི་ལྔ་པ་དང་ལྡན་པ་ལས་གཞན་དུ་མི་ལྡན་ན་དགྲ་བཅོམ་པ་སྔོན་གྱི་གནས་རྗེས་སུ་དྲན་པས་འདས་པ་རིག་པ་དང་། འཆི་འཕོ་བ་དང་སྐྱེ་བ་ཤེས་པས་མ་འོངས་པ་རིག་པ་དང་། ཟག་པ་ཟད་པ་ཤེས་པས་ད་ལྟར་བ་སྟེ་དུས་གསུམ་རིག་པ་ཡིན་ཡང་གནས་མ་བཅས་པར་ལྗོངས་རྒྱུར་འགྲོ་བར་མི་བྱའོ། །སྐབས་འདིར་ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པས་གནས་མ་བཅས་པར་ལྗོངས་རྒྱུར་རུང་བར་བཤད་པ་དེ་ངེས་གཟུང་ཡིན་ནམ་མཚོན་དོན་ཡིན་ཞེ་ན། ཁ་ཅིག་་་་་་ཤ མཚོན་དོན་ཡིན་ཏེ། གཞན་དུ་ན་བསྙེན་པར་རྫོགས་ནས་ལོ་ལྔ་ལོན་ཞིང་སྡེ་སྣོད་འཛིན་པའི་ལྔ་པ་དང་ལྡན་པའི་དགེ་སློང་དེས་གནས་ལ་མ་བརྟེན་པར་ལྗོངས་རྒྱུ་འགྲོར་མི་རུང་བར་ཐལ། དེ་ངེས་གཟུང་བའི་ཕྱིར། འདོད་ན། ཡོན་ཏན་ལྷག་པ་སྐྱོན་དུ་འགྱུར་ཏེ། ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པའི་དགེ་སློང་དེ་གནས་ལ་མ་བརྟེན་པར་ལྗོངས་རྒྱུར་འགྲོར་རུང་། ལོ་ལྔ་ལོན་ཞིང་སྡེ་སྣོད་འཛིན་པའི་ལྔ་པ་དང་ལྡན་པས་གནས་ལ་མ་བརྟེན་པར་དེ་ལྟར་མི་རུང་བ་ཡིན་པའི་ཕྱིར། ཞེས་གསུངས། གྲོ་་་་་་ཁ་ཅིག་མཚོན་དོན་ཡིན་ཏེ། ཐ་མ་ཞེས་སྨོས་པ་ནི་ལྔ་པ་དེ་ཉེ་བའི་དབང་དུ་བྱས་ནས་སྨོས་པ་ཡིན་ཏེ། དཔེར་ན་ཁྱིམ་ཚེས་ཉེ་བ་ནས་མེ་ལེན་ཞེས་པ་བཞིན་ནོ། །དེ་ལྟ་མ་ཡིན་ན། སྐབས་འདིར་དེ་བག་ཡངས་སུ་གནང་བ་མིན་པར་ཐལ། བསྙེན་པར་རྫོགས་ནས་ལོ་ལྔ་ལོན་ཞིང་ལྟུང་ཤེས་ཀྱི་ལྔ་པ་དང་ལྡན་པ་ནི་སྒྲུབ་པར་བཀའ་བའི་ཕྱིར་ཞེས་གསུང་། དང་པོ་མི་འཐད་དེ། ལྟུང་ཤེས་ཀྱི་ལྔ་པ་དང་ལྡན་པའི་སྡེ་སྣོད་འཛིན་པའི་ལྔ་པ་དང་ལྡན་པ་ཟེར་རམ། ལྟུང་ཤེས་ཀྱི་ལྔ་པ་དང་མི་ལྡན་པའི་སྡེ་སྣོད་འཛིན་པའི་ལྔ་པ་དང་ལྡན་པ་ཟེར་བ་ཡིན་བརྟག་གྲང་། དང་པོ་ལྟར་ན་འབྲེལ་མེད་ལ། གཉིས་པ་ལྟར་ན་འདོད་པ་ཡིན་ནོ། །གཉིས་པ་ཡང་མི་འཐད་དེ། དགེ་སློང་བསླབ་བྱིན་དེས་དགྲ་བཅོམ་ཐོབ་པ་ན་ཆད་ལས་ལས་གྲོལ་བར་འགྱུར་བ་དེས་མཚོན་ནས་ཕྱིར་འོང་སོགས་ཐོབ་པ་ན་ཆད་ལས་ལས་གྲོལ་བར་འགྱུར་བར་ཐལ། དེས་དགྲ་བཅོམ་ཐོབ་པ་ན་ཆད་ལས་ལས་གྲོལ་བ་དེ་བག་ཡངས་སུ་གནང་བ་གང་ཞིག ལྟུང་ཤེས་ཀྱི་ལྔ་པ་དང་ལྡན་པ་ལས་ཕྱིར་འོང་ཐོབ་པ་དཀའ་བ་ཡིན་པའི་ཕྱིར། དེས་ན་ངེས་གཟུང་ཡིན་ཏེ། མཚོན་དོན་ཡིན་ན་གཞན་དུ་ན་ཞེས་པའི་ཚིག་དོན་གྱིས་སྟོང་པའི་ཕྱིར་རོ།། ༈ །།གསུམ་པ་འགལ་རྐྱེན་བར་ཆད་ཀྱི་མཚན་ཉིད་ནི། རབ་ཏུ་བྱུང་བའི་ཕྱིར་ཉེ་བར་འོངས་པ་ལ་ཞེས་སོགས་ཏེ། དགོས་དོན་དང་། བསྡུས་དོན་གཉིས་ལས། དང་པོ་ནི། བར་ཆད་དྲི་བ་ལ་དགོས་པ་ཡོད་དེ། བར་ཆད་དྲིས་ནས་ཡོངས་སུ་དག་པར་མ་ཤེས་པར་བསྒྲུབ་བྱ་རབ་བྱུང་དང་བསྙེན་པར་རྫོགས་པར་བྱས་ན་རྒྱུད་དེ་ལ་སྡོམ་པ་མི་སྐྱེ་བའམ། སྐྱེས་ཀྱང་རྒྱུན་མི་གནས་པ་ལ་སོགས་པའི་སྒོ་ནས་བསྒྲུབ་བྱ་དེ་ལ་མི་ཕན་ཞིང་བསྟན་པ་ལ་གནོད། བྱེད་པ་པོ་ལ་ཉེས་བྱས་སུ་འགྱུར་བའི་ཕྱིར་དང་། བར་ཆད་དྲིས་ནས་ཡོངས་སུ་དག་པ་ལ་རབ་ཏུ་བྱུང་བ་སོགས་བྱས་ན། སྔར་ཇི་སྐད་བཤད་པ་ལས་བཟློག་སྟེ་འབྱུང་བ་ཡིན་པའི་ཕྱིར། གཉིས་པ་ལ་བཞི་སྟེ། ཡུལ་གང་ལ། རྟེན་གང་གིས། དངོས་པོ་གང་། ཚུལ་ཇི་ལྟར་འདྲི་བའོ། །དང་པོ་ནི། རབ་ཏུ་འབྱུང་བ་དང་བསྙེན་པར་རྫོགས་པར་འདོད་པའི་བསྒྲུབ་བྱ་ལའོ། །གཉིས་པ་ནི། འབྲས་བུའི་མིང་རྒྱུ་ལ་བཏགས་ཏེ་རབ་ཏུ་འབྱུང་བའི་ཚེ་མཁན་པོས་དང་། བསྙེན་པར་རྫོགས་པའི་ཚེ་གསང་སྟོན་གྱིས་ལྐོག་ཏུ་དང་། ལས་སློབ་ཀྱིས་དགེ་འདུན་གྱི་དབུས་སུ་འདྲིའོ། །གསུམ་པ་ལ་སྡོམ་པ་སྐྱེ་བའི་དང་། གནས་པའི་དང་། ཁྱད་པར་དུ་འགྲོ་བའི་དང་། མཛེས་པའི་བར་ཆད་དང་བཞི་ལས། དང་པོ་ནི། ངན་སོང་གསུམ། སྒྲ་མི་སྙན། མི་མ་ཡིན་པ། སྤྲུལ་པ་རྣམས་ནི་རྣམ་སྨིན་གྱི་སྒྲིབ་པ་ཅན་དང་། མཚམས་མེད་ལྔ་བྱས་པ། རྐུ་ཐབས་སུ་གནས་པ། མུ་སྟེགས་ཅན། མུ་སྟེགས་ཅན་ཞུགས་པ། དགེ་སློང་མ་སུན་ཕྱུང་བ། སྔོན་རབ་ཏུ་བྱུང་བ་རྣམས་ལས་ཀྱི་སྒྲིབ་པ་ཅན་དང་། ཟ་མ། མ་ནིང་། བླང་དོར་གཏན་མི་ཤེས་པའི་གླེན་ལྐུགས་དང་། ལོ་ཉི་ཤུ་མ་ལོན་པ་ལ་མ་ལོན་པར་ཤེས་པའམ་ཐེ་ཚོམ་ཟ་བ་ནི་སྐྱེ་བའི་བར་ཆད་དོ། །གཉིས་པ་ནི། ཕ་མ་དང་རྒྱལ་པོས་མ་གནང་བ་དང་། བྲན་དང་བུ་ལོན་ཅན་ནོ། །གསུམ་པ་ནི། མཛེ་དང་། འབྲས་དང་། ཕོལ་མིག་ལ་སོགས་པ་ནད་ཀྱི་རིགས་ཅན་རྣམས་སོ། །བཞི་པ་ནི། རིགས་ལ་སྐྱོན་ཆགས་པ་ལྷྭམ་མཁན། གདོལ་པ། གཡུང་མོ་སོགས་དང་། ལུས་ལ་སྐྱོན་ཆགས་པ་ལག་རྡུམ་རྐང་རྡུམ་ལ་སོགས་པ་ལྟ་བུ། དབྱིབས་ལ་སྐྱོན་ཆགས་པ་དང་། སྐྲ་སེར་དང་། སྐྲ་སེར་སྐྱ་ལ་སོགས་པ་མདོག་ལ་སྐྱོན་ཆགས་པའོ། །བཞི་པ་ཚུལ་ཇི་ལྟར་འདྲི་བ་ནི། འགལ་རྐྱེན་རྣམས་དགག་པའི་ཚུལ་དང་། མཐུན་རྐྱེན་རྣམས་བསྒྲུབ་པའི་ཚུལ་གྱིས་དྲི་བར་བྱའོ།། ༈ །།གཉིས་པ་ཕྲན་ཚེགས་ཀྱི་སྐབས་ནས་འབྱུང་བ་ལ། ཐུན་མོང་བའི་ཆོ་གའི་སྤྲོས་པ་དང་། ཐུན་མོང་མ་ཡིན་པ་བུད་མེད་ཀྱི་ཆོ་གའི་སྤྲོས་པ་གཉིས། དང་པོ་ནི། བཀོལ་བ་རྒྱལ་པོས་བཀྲབས་པའོ་ཞེས་སོགས་ཏེ། འདིར་སྣོད་སྤྱད་ཀྱི་རྟགས་ཀྱི་སྐབས་སུ་ལྷུང་བཟེད་མེད་པར་རབ་ཏུ་འབྱུང་བ་དང་བསྙེན་པར་རྫོགས་པར་མི་བྱའོ། །ཆུང་ངུ་དང་། ཆེན་པོ་དང་། སྐྱབས་ཀྱང་མི་བྱའོ་ཞེས་བཤད་ན། ལྷུང་བཟེད་ཀྱི་ཚད་ཇི་ལྟ་བུ་ཞེ་ན། ཁའི་ཆའི་ཞེས་སོགས་གསུངས་ཏེ། ཁ་ཅིག་མ་ག་དྷའི་བྲེའུ་ཆུང་གང་ལ་བོད་ཀྱི་ཕུལ་དོ། དེ་གསུམ་འཕེལ་དུ་སོང་བས་ཕུལ་དྲུག ཚོད་མ་ལྷུང་བཟེད་ཀྱི་སུམ་ཆ་ཡིན་པས་ཕུལ་གསུམ། མཐེ་བོའི་ལྟོའི་ཤུལ་ཕུལ་གང་ཡིན་པས་ཕུལ་བཅུ་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེའི་བར་འབྲིང་ཚད་ཡིན་ནོ་ཞེས་ཟེར། འོ་ན་བསོད་སྙོམས་ཕུལ་དགུ་གསུམ་ཉི་ཤུ་རྩ་བདུན་ལས་ལྷག་པ་ལེན་རུང་བར་ཐལ། ལྷུང་བཟེད་ཆུང་ཚད་གསུམ་ལེན་རུང་བ་གང་ཞིག ཆུང་ཚད་ཀྱི་ནང་དུ་ཕུལ་བཅུ་ཤོང་བ་དེ་རིགས་པའི་ཕྱིར། འདོད་ན་གཞུང་དང་འགལ་ལོ། །ཁ་ཅིག་མ་ག་དྷའི་བྲེའུ་ཆུང་གང་ལ་བོད་ཀྱི་ཕུལ་དོ། དེ་སུམ་འཕེལ་དུ་སོང་བས་ཕུལ་དྲུག ཚོད་མ་འབྲས་ཆེན་གྱི་སུམ་ཆ་ཡིན་པས་ཕུལ་དོ། མཐེ་བོའི་ལྟོ་ཤུལ་ཕུལ་གང་དང་ཕུལ་དགུ་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེ་གཉིས་ཀྱི་བར་འབྲིང་ཚད་ཡིན་ནོ་ཞེས་ཟེར་བ་ཡང་མི་འཐད་དེ། ཡུལ་གང་གི་བྲེའི་ཕུལ་ཡིན་པ་མི་རྟོགས་པའི་ཕྱིར་དང་། ལྷུང་བཟེད་ཆུང་ཚད་ཀྱི་ཁའི་མཐེ་བོའི་ལྟོ་ཤུལ་ཕུལ་གང་། ཆ་ཚད་ཀྱི་ཁའི་མཐེ་བོའི་ལྟོ་ཤུལ་ཕུལ་དོ་ཡོད་ཟེར་མི་རིགས་ཏེ། ལྷུང་བཟེད་ཆེ་བས་ཁ་རྒྱ་ཆེ་བ་དང་། ལྷུང་བཟེད་ཆུང་བས་རྒྱ་ཆུང་བའི་ངེས་པ་མེད་པའི་ཕྱིར། མཁས་པ་ཁ་ཅིག་ཆུང་ཚད་ཚོང་དུས་འགུར་མོའི་གསེར་བྲེའི་འབྲས་ཆན་བྲེ་ལྔ། ཚོད་མ་བྲེ་གང་དང་སུམ་གཉིས། མཐེ་བོའི་ལྟོའི་གོ་ས་ལ་བཞི་གསུམ། བསྡོམས་ན་བྲེ་བདུན་དང་ལྔ་ཕུལ་དོ་འབྱུང་ལ། ཆེ་ཚད་དེ་ཉིས་འགྱུར། དེ་གཉིས་ཀྱི་བར་འབྲིང་པོ་ཞེས་གསུང་བའང་མི་འཐད་དེ། མཆན་ཁུང་གི་བཀུར་བར་གསུངས་པ་དང་མི་འགྲིག་པའི་ཕྱིར་རོ། །རང་ལུགས་ནི། མ་ག་དྷའི་བྲེའུ་ཆུང་གང་ལ་བོད་ཀྱི་བདུན་ཕུལ་དོ་དང་ཁྱོར་བ་གང་ཡོད། བདུན་ཕུལ་རེ་ལ་ཁྱོར་བ་གསུམ་རེ་ཡོད་པས་ཁྱོར་བ་ཉི་ཤུ་རྩ་གཅིག་གི་འབྲས་ཆན། དེ་སྦགས་པར་ནུས་པའི་ཚོད་མ་ཁྱོར་བ་ལྔའམ་དྲུག་ཤོང་བ་ཆུང་ཚད། དེ་ཉིས་འགྱུར་ཆེ་ཚད། དེ་གཉིས་ཀྱི་བར་འབྲིང་ཚད་དུ་འགྱུར་བའོ། །དེ་ལྟར་ཡང་བམ་ལྔ་ལས། མ་ག་དྷའི་བྲེའུ་ཆུང་གང་ལ་བོད་ཀྱི་བདུན་ཕུལ་དོ་དང་ཁྱོར་བ་གང་ཡོད་དོ། །མ་ག་དྷའི་བྲེའུ་ཆུང་ཕྱེད་དང་དོ་ལ་བདུན་ཕུལ་ཕྱེད་དང་བཞི་ཡོད་དོ། །ཞེས་གསུངས་པའི་ཕྱིར། དེས་ན་ལྷུང་བཟེད་ཆུང་ཚད་ཀྱི་ཁའི་ཆའི་མཐེ་བོའི་ལྟོ་གང་གི་ལྷག་མ་ལ་འབྲས་དྲུས་བསྐམས་ཁྱོར་བ་ཉི་ཤུ་རྩ་བདུན་ཡོད་པར་གྲུབ་བོ། །མཐེ་བོའི་ལྟོ་གང་ནི་མཐེ་བོ་འཕྲེད་དུ་གཞག་པའི་ལྟོ་ལ་བྱེད་རིགས་ཏེ། བམ་ལྔར་མཐེབ་སོར་གཅིག་སྟེ་མཐེ་བོའི་ཚིགས་དང་པོའི་ཟུར་ཡ་གཅིག་ནས། ལྟོ་རོལ་དུ་བཀྲིས་ཏེ་ཟུར་ཡ་གཅིག་ལ་ཐུག་པའོ་ཞེས་གསུངས་པའི་ཕྱིར། དགེ་སློང་གི་ལྷུང་བཟེད་ཆུང་ངུ་ནི་དགེ་སློང་མའི་ལྷུང་བཟེད་ཆེ་ཚད་ཡིན་ལ། ཆུང་ཚད་ནི་ལྟོ་འགྲངས་བ་ཙམ་ཤོང་བ་དང་། དེ་དག་གི་བར་ནི་འབྲིང་ཚད་ཡིན་པར་གསུངས་སོ།། ༈ །།གཉིས་པ་ཐུན་མོང་མ་ཡིན་པ་བུད་མེད་ཀྱི་ཆོ་གའི་ཁྱད་པར་ནི། དགེ་སློང་གི་གནས་སུ་དགེ་སློང་མའོ་ཞེས་སོགས་ཏེ། སྤྱིར་བཏང་ལ་སྔར་སྐྱེས་པ་རབ་ཏུ་འབྱུང་བ་དང་། བསྙེན་པར་རྫོགས་པའི་ཆོ་ག་དེ་ཉིད་བུད་མེད་རྣམས་ཀྱི་ཡང་ཡིན་ནོ་ཞེས་བསྟན་ནས། ཁྱད་པར་ཅུང་ཟད་ཀྱང་མེད་དམ་སྙམ་ན། སྔར་སྐྱེས་པ་རབ་ཏུ་བྱུང་བ་སོགས་ཀྱི་སྐབས་སུ། དགེ་སློང་ཞེས་སྨོས་པའི་སྐབས་སུ་འདིར་དགེ་སློང་མ་ཞེས་བརྗོད་པར་བྱ་སྟེ། རབ་ཏུ་བྱུང་བ་དང་བསྙེན་པར་རྫོགས་པ་དེའི་ཚེ་དགེ་སློང་མ་འགའ་ཞིག་མཁན་མོ་ཉིད་དུ་གནས་པ་ལའོ་ཞེས་དང་། རང་གིས་དགེ་བསྙེན་མ་ཉིད་དུ་ཉེ་བར་སྒྲུབས་ནས་དགེ་སློང་མའི་དགེ་འདུན་ལ་ཞུ་བའི་དགེ་སློང་མ་ལ་གཏད་པར་བྱའོ་ཞེས་པ་ལྟ་བུའོ། །དེ་ལྟར་བརྗོད་དགོས་པར་ངེས་སམ་ཞེ་ན། འདི་ལ་རབ་ཏུ་འབྱུང་བ་དང་། བསྙེན་པར་རྫོགས་པའི་སྐབས་གཉིས་ལས། རབ་ཏུ་བྱུང་བའི་སྐབས་ཐམས་ཅད་དུ་དགེ་སློང་གི་གནས་སུ་དགེ་སློང་མ་ཞེས་བརྗོད་དགོས་ཏེ། བུད་མེད་རབ་ཏུ་འབྱུང་བའི་ཚེ་མཁན་སློབ་དང་། རང་བྱུང་ཞུ་བ་པོ་དང་། དགེ་འདུན་ཡང་ཡང་དགེ་སློང་མ་ཁོ་ནས་བྱེད་དགོས་པའི་ཕྱིར། གཉིས་པ་ལ་དགེ་སློང་མ་ཁོ་ནས་བྱ་བ་དང་། གཉིས་ཀ་ཚོགས་ནས་བྱ་བའི་སྐབས་གཉིས་ལས། དང་པོ་ནི། དགེ་སློང་མའི་དགེ་འདུན་ཚོགས་ནས་མཁན་མོར་གསོལ་བ་བཏབ་ནས། བསྒྲུབ་བྱ་དེ་སྟན་ནང་ཚང་ཅན་ལ་སྤྱོད་ལམ་ཅི་བདེ་བར་གཞག་སྟེ། དགེ་སློབ་མའི་སྡོམ་པ་སྦྱིན་པར་བྱའོ། །འདི་ལ་ལྔ་སྟེ། ཡུལ་གང་ལ། རྟེན་གང་གིས། དངོས་པོ་གང་། དུས་ནམ་གྱི་ཚེ། ཚུལ་ཇི་ལྟར་སྦྱིན་པའོ། །དང་པོ་ནི་བསྙེན་པར་རྫོགས་པར་འདོད་པའི་དགེ་ཚུལ་མ་ལའོ། །གཉིས་པ་ནི། ཆོས་གསུམ་ལྡན་གྱི་དགེ་སློང་མའི་དགེ་འདུན་གྱིས་སོ། །གསུམ་པ་ནི། དགེ་ཚུལ་གྱི་བསླབ་གཞིའི་སྟེང་དུ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལ་སློབ་པའི་དགེ་སློབ་མའི་སྡོམ་པའོ། །བཞི་པ་ནི། ཁྱིམ་སོ་བཟུང་བ་ཡིན་ན་ལོ་བཅུ་ཡན་ཆད་དང་། ཁྱིམ་སོ་མ་བཟུང་བ་ཡིན་ན་ལོ་བཅོ་བརྒྱད་ཡན་ཆད་ལོན་པའི་དུས་སུ་སྦྱིན་པར་བྱ་བ་ཡིན་ཏེ། བསྙེན་པར་རྫོགས་པའི་དུས་ཀྱི་དང་པོར་ལོ་གཉིས་ཀྱིས་མ་ལོན་པའི་དང་པོ་ལ་སྦྱིན་པར་བཤད་པ་གང་ཞིག ཁྱིམ་སོ་གཟུང་བ་བསྙེན་པར་རྫོགས་པའི་དུས་ཀྱི་དང་པོ་ལོ་བཅུ་གཉིས་དང་། ཁྱིམ་སོ་མ་བཟུང་བ་བསྙེན་པར་རྫོགས་པའི་དུས་ཀྱི་དང་པོ་ནི་ལོ་ཉི་ཤུ་ལོན་པ་ལ་བཤད་པའི་ཕྱིར། ལྔ་པ་ལ་སྦྱོར་བ་དང་། དངོས་གཞི་དང་། མཇུག་གསུམ་ལས། དང་པོ་ནི། དགེ་སློང་མའི་དགེ་འདུན་གྱི་དབུས་སུ་ལས་བྱེད་པའི་དགེ་སློང་མ་དེས་གསོལ་བ་ལན་གསུམ་འདེབས་སུ་གཞུག་པའོ། །གཉིས་པ་ནི། ལས་བྱེད་པའི་དགེ་སློང་མ་དེས་དགེ་སློང་མའི་དགེ་འདུན་གྱི་དབུས་སུ་གསོལ་བ་དང་གཉིས་ཀྱི་ལས་ཀྱི་བསླབ་པའི་སྡོམ་པ་ཞེས་པའི་མིང་གིས་སྦྱིན་པར་བྱའོ། །གསུམ་པ་ནི། ལས་བྱེད་པའི་དགེ་སློང་མ་དེས་དེའི་བསླབ་པ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་བརྗོད་པར་བྱ་བའོ། །དེ་ནས་དགེ་སློབ་མ་དེས་ལོ་གཉིས་ཀྱི་བར་དུ་ཆོས་བཅུ་གཉིས་པོ་དེ་ལ་ལེགས་པར་བསླབས་ཏེ། ལོ་བཅུ་གཉིས་སམ་ཉི་ཤུ་ལོན་པ་ན་དགེ་སློང་མའི་དགེ་འདུན་ཚོགས་ཏེ་གསང་སྟོན་གྱིས་ལྐོག་ཏུ་བར་ཆད་དྲིས་པའི་རྗེས་ལ་དགེ་སློང་མའི་དགེ་འདུན་ཚོགས་པ་ལ་གསོལ་བ་ལན་གསུམ་བཏབ་སྟེ། དགེ་སློང་མའི་དགེ་འདུན་གྱི་དབུས་སུ་བར་ཆད་དྲིས་ནས་གསོལ་བ་དང་གཉིས་ཀྱི་ལས་ཀྱིས་ཚངས་སྤྱོད་ལ་ཉེ་བར་གནས་པའི་སྡོམ་པ་སྦྱིན་པར་བྱ་སྟེ། ཚངས་སྤྱོད་ལ་ཉེར་གནས་ཀྱི་སྡོམ་པ་མ་ཐོབ་པར་བུད་མེད་བསྙེན་པར་རྫོགས་པར་མི་འགྱུར་བའི་ཕྱིར་རོ། །དེས་ན་འདི་དག་གི་སྐབས་སུ་ཡང་དགེ་སློང་གི་གནས་སུ་དགེ་སློང་མ་ཞེས་བརྗོད་པར་བྱའོ། །གཉིས་པ་གཉིས་ཀ་ཚོགས་ནས་བྱ་བ་ལ་སྦྱོར་བ་དང་། དངོས་གཞི་དང་། རྗེས་གསུམ་ལས། དང་པོ་ནི། ཚངས་སྤྱོད་ལ་ཉེར་གནས་ཀྱི་སྡོམ་པ་བྱིན་ནས། དགེ་སློང་མའི་དགེ་འདུན་གྱི་སྟེང་དུ་དགེ་སློང་གི་དགེ་འདུན་བསྣན་ཏེ་གཉིས་ཀའི་དགེ་འདུན་ཚོགས་པའི་དབུས་སུ་ལས་བྱེད་པའི་དགེ་སློང་གི་བསྒྲུབ་བྱ་དེ་བསྙེན་པར་རྫོགས་པའི་ཆེད་དུ་གཉིས་ཀའི་དགེ་འདུན་ལ་གསོལ་བ་ལན་གསུམ་འདེབས་སུ་གཞུག གསོལ་བ་འབའ་ཞིག་པའི་ལས་བྱས་ནས་བར་ཆད་འདྲི་བའོ། །གཉིས་པ་ནི། ལས་བྱེད་པའི་དགེ་སློང་དེས་གཉིས་ཀའི་དགེ་འདུན་གྱི་དབུས་སུ་གསོལ་བ་དང་བཞིའི་ལས་ཀྱི་བསྒྲུབ་བྱ་དེ་བསྙེན་པར་རྫོགས་པར་ཉིད་དུ་བསྒྲུབ་པར་བྱའོ། །གསུམ་པ་ནི། དེའི་རྗེས་སུ་ལས་བྱེད་པའི་དགེ་སློང་དེས་གདམས་ངག་བརྗོད་པར་བྱའོ། །དེ་ཡང་དགེ་སློང་གི་སྐབས་དང་མི་འདྲ་བའི་ཁྱད་པར་ནི། གནས་རྣམས་བརྗོད་པའི་སྐབས་སུ་ཤིང་དྲུང་པ་མ་གཏོགས་གཞན་སྔར་དང་འདྲའོ། །ཕམ་པར་འགྱུར་བ་ལ་བརྒྱད་བརྗོད་པར་བྱ་སྟེ་ཐུན་མོང་བ་བཞིའི་སྟེང་དུ། རེག་པ་དང་ནི་ལུས་བཀན་དང་། །འཆབ་པ་དང་ནི་བཟློག་པའོ། །ཞེས་པ་བཞི་བསྣན་པའོ། །ཕམ་པ་དང་དགེ་སྦྱོང་ཆོས་བཞིའི་བར་དུ་ལྕི་བའི་ཆོས་བརྒྱད་པོ་རྣམས་བརྗོད་པར་བྱའོ། །ཆོས་བརྒྱད་ནི། དགེ་སློང་མས་དགེ་སློང་རྣམས་ལ་བསྙེན་པར་རྫོགས་པར་གསོལ་བ་དང་། ཟླ་བ་ཕྱེད་ཕྱེད་ཅིག་གདམས་ངག་བཙལ་བ་དང་། དགེ་སློང་མེད་པའི་གནས་སུ་དབྱར་ཁས་མི་བླང་བ་སྟེ་ཕའི་དགེ་འདུན་དང་འབྲེལ་བ་གསུམ། དགེ་སློང་ལ་ཚུལ་ཁྲིམས་ཉམས་པ་ལ་སོགས་པས་གླེང་བར་མི་བྱ་བ་དང་། སྤྱོ་བར་མི་བྱ་བ་དང་། དགེ་སློང་གསར་བུ་ལ་ཡང་ཕྱག་བྱ་བ་སྟེ་ཕ་ཡན་འགར་བ་དང་འབྲེལ་བ་གསུམ། གཉིས་ཀའི་དགེ་འདུན་ལ་མགུ་བ་སྤྱད་པར་བྱ་བ་དང་། དགག་དབྱེ་བྱ་བ་སྟེ། གཉིས་ཀའི་དགེ་འདུན་དང་འབྲེལ་པ་གཉིས་ཏེ་བརྒྱད་དོ། །བུད་མེད་བསྙེན་པར་རྫོགས་པའི་སྐབས་འདིར་བར་ཆད་འདྲི་བའི་གནས་སྐབས་གསུམ་ཡོད་དེ། གསང་སྟེ་སྟོན་པའི་དགེ་སློང་མས་ལྐོག་ཏུ་བར་ཆད་འདྲི་བ་དང་། ལས་བྱེད་པའི་དགེ་སློང་མས་དགེ་སློང་མའི་དགེ་འདུན་གྱི་དབུས་སུ་བར་ཆད་འདྲི་བ་དང་། ལས་བྱེད་པའི་དགེ་སློང་གིས་གཉིས་ཀའི་དགེ་འདུན་གྱི་དབུས་སུ་བར་ཆད་དྲི་བ་རྣམས་སོ། །ཕྱི་མ་འདི་གཉིས་ལ་ནི་འདྲི་བ་པོ་དང་བསྒྲུབ་བྱའི་བར་དུ་དགེ་སློང་མ་གཞན་ཞིག་གིས་བསྒྲིགས་ནས་དེའི་རྗེས་ཟློས་བྱེད་པའི་སྒོ་ནས་ལན་འདེབས་པར་བྱ་བ་ཡིན་ལ། གསང་སྟོན་གྱིས་དྲི་བའི་ཚེ་ན་དེ་ལྟར་མི་དགོས་སོ། །འདིར་དགེ་སློབ་མའི་སྡོམ་པ་དེ་སྡོམ་པ་དང་བར་མ་གང་ཡིན་དཔྱད་པ་ལ། མཁས་པ་ཁ་ཅིག་ན་རེ་བར་མ་མཚན་ཉིད་པ་ཡིན་ཏེ། འདི་རང་བཞིན་གྱི་མི་དགེ་བ་སྤོང་བྱེད་མ་ཡིན་ལ། རང་བཞིན་གྱི་མི་དགེ་བ་སྤོང་བ་དེ་དང་འགྲོགས་ནས་ཀྱང་མ་སྐྱེས་པའི་ཕྱིར། དགེ་ཚུལ་གྱི་སྡོམ་པ་དང་རྫས་གཅིག་ཅེས་པ་ཡང་རྫས་ལོགས་སུ་མ་གྲུབ་པ་ཙམ་ལ་བཏགས་པ་ཡིན་ལ། གཞན་དུ་ན་མཚན་གྱུར་པའི་ཚེ་གཏོང་བར་འགྱུར་ཏེ། སྐྱེས་པ་ལ་དེ་མེད་པའི་ཕྱིར། ཁྱབ་པ་ཁས་བླངས། སོ་ཐར་རིགས་བརྒྱད་ཅེས་པ་ཡང་བཏགས་པ་ཙམ་ཡིན་ནོ་ཞེས་གསུང་ངོ་། །དེ་ནི་མི་འཐད་དེ། མཛོད་ལས། སོ་སོར་ཐར་ཅེས་བྱ་རྣམ་བརྒྱད། །ཅེས་གསུངས་པའི་ཕྱིར་དང་། བུད་མེད་ལ་ནི་དགེ་སློབ་མ་ཞེས་བྱ་བའི་ཚིགས་གཞན་ཡོད་དོ་ཞེས་བསླབ་ཚིགས་སུ་བཤད་པའི་ཕྱིར། གཞན་ཡང་དགེ་སློབ་མའི་སྡོམ་པ་དེས་རང་བཞིན་གྱི་ཁ་ན་མ་ཐོ་བ་སྤོང་བར་ཐལ། དགེ་སློབ་མ་དེས་རང་བཞིན་གྱིས་ཁ་ན་མ་ཐོ་བ་སྤོང་བའི་ཕྱིར། དེང་སང་ཤ་་་་་་ཁ་ཅིག་དགེ་སློབ་མའི་སྡོམ་པ་སོ་ཐར་རིགས་བརྒྱད་གང་རུང་མ་ཡིན་ཏེ་ཇི་སྲིད་འཚོའི་མཐའ་ཅན་དང་། ཉིན་ཞག་གི་མཐའ་ཅན་གང་རུང་མ་ཡིན་པའི་ཕྱིར། དེས་ན་ཚངས་སྤྱོད་ལ་ཉེར་གནས་ཀྱི་སྡོམ་པ་ནི་རིགས་བརྒྱད་ཀྱི་གཅིག་ཏུ་བགྲང་བ་ཡིན་ནོ་ཞེས་གསུངས་པ་ཤིན་ཏུ་མི་འཐད་དེ། མཛོད་དང་བྱང་ས་སོགས་ལས་སོ་ཐར་རིགས་བརྒྱད་བཤད་པའི་གནས་སྐབས་ཐམས་ཅད་དུ་དགེ་སློབ་མའི་སྡོམ་པ་བགྲང་གི་ཚངས་སྤྱོད་ལ་ཉེར་གནས་མ་བགྲངས་པའི་ཕྱིར་དང་། ཚངས་སྤྱོད་ལ་ཉེར་གནས་ལ་སྤང་བྱ་ཟུར་པ་མེད་པས་སྡོམ་པའི་དོན་མེད་པའི་ཕྱིར། གཞན་ཡང་དགེ་སློབ་མའི་སྡོམ་པ་ཇི་སྲིད་འཚོའི་མཐའ་ཅན་མ་ཡིན་པ་ཡང་མི་འཐད་དེ། དགེ་སློབ་མའི་སྡོམ་པ་ལོ་གཉིས་སུ་སྤྱད་ནས་བསྙེན་པར་རྫོགས་པའི་ཚེ་ན་ཡང་མི་གཏོང་བ་ཡིན་པའི་ཕྱིར་ཏེ། ཊཱི་ཀར་ལོ་གཉིས་ལས་ལྷག་ན་ཡང་དེ་ཕྱིན་ཆད་བརྟུལ་ཞུགས་དེ་ཉམས་པར་ཡང་མི་འགྱུར་ལ། དེ་ཕྱིན་ཆད་མི་རུང་བར་བྱ་བ་ཡང་མ་ཡིན་ནོ་ཞེས་གསུངས་པའི་ཕྱིར། གཞན་ཡང་དེ་ཇི་སྲིད་འཚོའི་མཐའ་ཅན་གྱི་སྡོམ་པ་ཡིན་པར་ཐལ། དེ་རྟེན་གྱི་གང་ཟག་ཤི་མ་འཕོས་ཀྱི་བར་དུ་མི་གཏོང་བའི་སྡོམ་པ་ཡིན་པའི་ཕྱིར། གཞན་དུ་ན་དགེ་སློང་མའི་སྡོམ་པ་དེ་ཇི་སྲིད་འཚོའི་མཐའ་ཅན་ཡིན་པར་མི་འགྲུབ་བོ།། ༈ །།གསུམ་པ་ཞུ་བ་ཕལ་ཆེ་བའི་སྐབས་ནས་འབྱུང་བ་ལ་ལྔ་སྟེ། སྡོམ་པ་སྐྱེ་བ་དང་མི་སྐྱེ་བའི་བར་ཆད་བསྟན་པ་དང་། སྐྱེ་ལ་ཉེས་བྱས་ཀྱི་དང་། བར་ཆད་ཀྱི་མཚོན་དོན་དང་། བར་ཆད་ཀྱི་མཚན་ཉིད་དང་། སྐྱེ་མི་སྐྱེ་དོགས་གཅོད་དང་བཅས་པའོ། །དང་པོ་ནི། ལྷ་ལ་སོགས་པ་མི་མ་ཡིན་པའི་འགྲོ་བ་པ་དང་། མི་ཡིན་ཀྱང་བྱང་གི་སྒྲ་མི་སྙན་པ་ནི་སྡོམ་པའི་ཞིང་མ་ཡིན་ཏེ་སྡོམ་པ་མི་སྐྱེ་བའི་ཕྱིར། མཚན་ལན་གསུམ་དུ་གྱུར་པ་ཡང་དེའི་ཞིང་མ་ཡིན་ཏེ་མ་ནིང་གི་རིགས་ཡིན་པའི་ཕྱིར། མཚན་གྱུར་ཐབས་དང་པོ་གཉིས་ལ་ནི་སྡོམ་པ་མི་ཉམས་ཤིང་གསར་དུ་ལེན་ན་ཡང་སྐྱེའོ། །མཁན་པོ་དེ་དང་ལྡན་པའི་སྡོམ་པ་སྐྱེ་བ་ལྟར་མཁན་པོ་མེད་པ་ཉིད་ལ་ཡང་སྐྱེའོ། །མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཡང་སྐྱེའོ། །དེ་དགེ་སློང་མ་ཡིན་པར་ཤེས་ན་ནི་མི་སྐྱེ་སྟེ། ལུང་ལས། བསྙེན་པར་རྫོགས་པར་འཚལ་བ་མཁན་པོ་རྐུ་ཐབས་སུ་གནས་པས་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ་ཞེས་ཤེས་ན་ནི་བསྙེན་པར་མ་རྫོགས་ཞེས་བྱའོ་ཞེས་སོ། །དེ་ལ་ཁ་ཅིག་འདིར་མཁན་པོ་མེད་ཀྱང་སྡོམ་པ་སྐྱེ་བར་བཤད་ན། གོང་དུ་དགེ་སློང་འགའ་ཞིག་མཁན་པོ་ཉིད་དུ་གནས་པ་ལའོ་ཞེས་གསུངས་པ་དང་འགལ་ལོ་ཞེ་ན། འདིའི་ལན་ལ་ཁ་ཅིག མཁན་པོ་རང་གི་བྱ་བ་བྱེད་པའི་དུས་སུ་མཁན་པོ་ཡོད་ན་དངོས་གཞིའི་དུས་སུ་མཁན་པོ་མེད་ཀྱང་སྡོམ་པ་སྐྱེ་བའི་དོན་ཡིན་ནོ་ཞེས་གསུངས་པ་མི་འཐད་དེ། མཁན་པོ་རང་གི་བྱ་བ་བྱེད་པའི་དུས་སུ་ཡོད་ན་མཁན་པོ་ཡོད་པ་ཉིད་ཡིན་པའི་ཕྱིར། ཁ་ཅིག་དོན་ལ་མཁན་པོ་མེད་ཀྱང་བསྒྲུབ་བྱ་དེའི་བསམ་ངོ་ལ་ཡོད་ན་སྐྱེ་ཞེས་པ་ཡང་མི་འཐད་དེ། བསམ་ངོ་ལ་མཁན་པོ་ཡོད་ན་ཡང་ཡོད་པ་ཉིད་ཡིན་པའི་ཕྱིར་དང་། དོན་ལ་མཁན་པོ་མེད་པ་ཞེས་པའི་དོན་ལ་བརྟགས་ན་མི་འཐད་པའི་ཕྱིར། ཁ་ཅིག་མཁན་པོ་ཡོད་ཀྱང་མཁན་པོ་མཚན་ཉིད་དང་ལྡན་པ་མེད་ཀྱང་སྡོམ་པ་སྐྱེ་ཞེས་པའི་དོན་ཡིན་ནོ་ཞེས་པ་ཡང་མི་འཐད་དེ། བསྙེན་པར་མ་རྫོགས་པ་ལ་ཡང་ཞེས་པ་དང་ཟློས་པའི་སྐྱོན་དུ་འགྱུར་བ་ཡིན་པའི་ཕྱིར། དེས་ན་མཁན་པོ་མེད་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་དེ། གསང་སྟོན་མེད་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པའི་ཕྱིར་ཏེ་བར་ཆད་མ་དྲིས་པར་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པའི་ཕྱིར་ཏེ། བར་ཆད་མ་དྲིས་པར་ཡང་ངོ་ཞེས་གསུངས་ཤིང་། གཞན་ཡང་། དེ་ཡོད་དེ། མཁན་པོར་གསོལ་བ་མ་བཏབ་པར་ཡང་བསྙེན་རྫོགས་ཀྱི་སྡོམ་པ་སྐྱེ་བ་ཡོད་པ་གང་ཞིག མཁན་པོར་གསོལ་བ་མ་བཏབ་པར་མཁན་པོར་འགྱུར་བ་མེད་པའི་ཕྱིར། དང་པོ་གྲུབ་སྟེ། མཁན་པོར་མ་གསོལ་བར་ཡང་ངོ་ཞེས་གསུངས་པའི་ཕྱིར། འོ་ན་བསྙེན་པར་རྫོགས་པའི་ཚེ་དགེ་འདུན་ལ་གསོལ་བ་འདེབས་ན། མཁན་པོ་དང་། བསྒྲུབ་བྱ་དང་། དགེ་འདུན་གྱི་མིང་མ་བརྗོད་ན་སྡོམ་པ་མི་སྐྱེ་བར་བཤད་པ་དང་། འདིར་ཡང་དེ་གཉིས་ཀྱི་མིང་མ་བརྗོད་ན་ཡང་མི་སྐྱེའོ་ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། མཁན་པོ་དང་བཅས་ཏེ་བསྙེན་པར་རྫོགས་པའི་ཚེ་མཁན་པོའི་མིང་མ་བརྗོད་ན་སྡོམ་པ་མི་སྐྱེ་ཞེས་པའི་དོན་ཡིན་པའི་ཕྱིར། དེས་ན་གོང་དུ་མཁན་པོ་དགོས་པར་བཤད་པ་ནི་ཉེས་མེད་ཕུན་ཚོགས་ཀྱི་དབང་དུ་བྱས་པ་ཡིན་ལ་འདིར་མེད་ཀྱང་སྐྱེ་བར་བཤད་པ་ནི་སྐྱེ་ལ་ཉེས་བྱས་ཀྱི་དབང་དུ་བྱས་པ་ཡིན་ཏེ་མཁན་པོ་མེད་ཀྱང་བསྒྲུབ་བྱའི་རྒྱུད་ལ་སྡོམ་པ་ནི་སྐྱེ་ལ། བྱེད་པ་པོ་ལ་ཉེས་བྱས་སུ་འགྱུར་བའི་ཕྱིར། གཉིས་པ་ནི། ཚིག་སྔ་མ་མེད་པ་ལ་ནི་ཞེས་སོགས་སོ། །གསུམ་པ་ནི། སྐྱེས་པ་འདྲ་བའི་བུད་མེད་ཞེས་སོགས་སོ། །བཞི་པ་བར་ཆད་ཀྱི་མཚན་ཉིད་ནི། དེ་ཉིད་ལ་ཞེས་སོགས་སོ། །ལྔ་པ་སྐྱེ་མི་སྐྱེའི་དོགས་པ་བཅད་པ་ལ་བཞི་སྟེ། སྔོན་རབ་ཏུ་བྱུང་བ་ལ་དོགས་པ་བཅད། སྔོན་ལྟུང་བ་བྱུང་བ་ལ་དོགས་པ་བཅད། བུད་མེད་ཀྱི་ལས་ཀྱི་ཁ་སྐོང་ལ་དོགས་པ་བཅད། འགལ་རྐྱེན་གྱིས་མི་སྐྱེ་བར་བསྟན་པའོ། །དང་པོ་ནི། བུད་མེད་བསླབ་པ་ཕུལ་བ་མཚན་མ་གྱུར་ན་རབ་བྱུང་བསྙེན་རྫོགས་བྱར་མི་རུང་བ་ལས་བསླབ་པ་ཕུལ་ནས་སྐྱེས་པ་ཉིད་དུ་མཚན་གྱུར་པ་ན་སླར་རབ་ཏུ་བྱུང་བ་དང་བསྙེན་པར་རྫོགས་པ་རུང་བ་ཉིད་དོ། །འདི་ནི་བཀོལ་བ་དྲུག་པོ་དག་གོ་ཞེས་པའི་སྐབས་སུ་སྔོན་རབ་ཏུ་བྱུང་བ་བུད་མེད་ལ་སྡོམ་པ་སྐྱེ་བའི་བར་ཆད་དུ་གསུངས་པ་དེའི་དམིགས་བསལ་སྟོན་པའོ། །གཉིས་པ་ནི། བུད་མེད་ཕམ་པར་འགྱུར་བ་ཐུན་མོང་མ་ཡིན་པ་རེག་པ་ལ་སོགས་པ་ལྷག་པར་སྤྱད་པ་ཅན་སྐྱེས་པ་ཉིད་དུ་མཚན་གྱུར་པ་ཡང་རབ་ཏུ་བྱུང་བ་དང་བསྙེན་པར་རྫོགས་པ་རུང་བ་ཉིད་དོ། །འདི་ནི་གོང་དུ་ཕམ་པ་འབྱུང་བ་སྡོམ་པ་སྐྱེ་བའི་བར་ཆད་དུ་གསུངས་པའི་དམིགས་བསལ་ལོ། །གསུམ་པ་ནི། གོང་དུ་དགེ་འདུན་གྱིས་བསྣན་པར་བྱའོ་ཞེས་གསུངས་ན། དགེ་སློང་གི་དགེ་འདུན་གང་ཡང་རུང་བས་བསྣན་པས་ཆོག་གམ་སྙམ་ན། བུད་མེད་བསྙེན་པར་རྫོགས་པར་བྱ་བ་ལ་གཉུག་མར་གནས་པའི་དགེ་སློང་གི་དགེ་འདུན་རྣམས་ཡན་ལག་ཉིད་ཡིན་གྱི་འགྲོ་བར་ཆས་པ་དང་། གློ་བུར་དུ་འོངས་པ་རྣམས་མ་ཡིན་ཏེ་དེ་ལ་མི་དབང་བའི་ཕྱིར། བཞི་པ་ནི། སྡོམ་པ་སྐྱེ་བཞིན་པ་སྐྱེ་བའི་སྐད་ཅིག་དུ་མས་བར་ཆོད་པའི་ཚེ་ཉིད་ན་ལེན་སེམས་བཟློག་པའི་སྒོ་ནས་ཕུལ་ལམ། མཚན་གཉིས་སྐྱེས་པ་ལ་སོགས་པའི་སྐྱོན་གྱིས་རྟེན་ཉམས་ན་སྡོམ་པ་མི་སྐྱེ་སྟེ། བསམ་པ་མཐུན་པའི་རྐྱེན་མ་ཚང་བ་དང་སྐྱེ་བའི་འགལ་རྐྱེན་བར་ཆད་མ་སྤངས་པའི་ཕྱིར། དེའི་ཤུགས་ལ་སྐྱེ་བ་ལ་མངོན་དུ་གྱུར་པའི་སྐད་ཅིག་མ་རྒྱུ་མ་ཚང་བ་མེད་པའི་ཕྱི་མ་ལ་སྡོམ་པ་སྐྱེ་བ་ལ་ནི་གང་གིས་ཀྱང་གེགས་བྱ་བར་མི་ནུས་ཏེ། རྒྱུ་ནུས་པ་ཐོགས་མེད་སྔོན་དུ་སོང་བའི་ཕྱིར། རྣམ་འགྲེལ་ལས། མ་ཚང་མེད་རྒྱུ་དེ་ལ་ནི། །འབྲས་བུ་གང་གིས་བཟློག་པར་ནུས། །ཞེས་དང་། ཊཱི་ཀར་འདིར་སྐྱེ་བ་ལ་མངོན་དུ་གྱུར་པ་ནི་སྐྱེ་བའི་ཚེ་ཉིད་མ་ཡིན་པར་རིག་པར་བྱ་སྟེ། དེ་ལ་ནི་སྐྱེ་བའི་ཕྱིར་གང་གིས་ཀྱང་གེགས་བྱ་བར་མི་ནུས་པས་འདི་ལྟར་སྐད་ཅིག་མ་དུ་མས་ཚོད་པ་ལ་སྐྱེ་བའི་ཚེ་ཉིད་ཅེས་བྱའོ་ཞེས་གསུངས་པ་ཡིན་ནོ་ཞེས་གསུང་ངོ་། །གལ་ཏེ་སྡོམ་པ་སྐྱེ་བ་དང་མཚན་གཉིས་དུས་མཉམ་དུ་འབྱུང་བ་སྲིད་པར་འགྱུར་ཏེ། ནུས་པ་ཐོག་མེད་སྔོན་དུ་སོང་བའི་ཕྱིར་རོ་ཞེ་ན། སྐྱོན་མེད་དེ། དེའི་ཚེ་མཚན་གཉིས་ཅིག་ཅར་དུ་འབྱུང་བའི་དངོས་རྒྱུ་ཡོད་ན་སྡོམ་པ་སྐྱེ་བའི་ནུས་པ་ཐོགས་མེད་འགལ་བའི་ཕྱིར། ༈ །གཉིས་པ་དེས་བསླབ་པར་བྱ་བའི་མཚན་ཉིད་ལ་གཉིས་ཏེ། སྤང་བའི་བསླབ་པ་དང་། ཉམས་སུ་བླང་བའི་བསླབ་པའོ། །དང་པོ་ལ་གཉིས་ཏེ། སྡེ་ལྔ་སོ་སོའི་མཚན་ཉིད་དང་། ཞུ་བ་སྤྱིར་བསྟན་པའོ། །དང་པོ་ལ་གཉིས་ཏེ། དགེ་སློང་གི་སྡེ་ལྔ་སྤྱིར་བཤད་པ་དང་། དགེ་སློང་མའི་སྡེ་ལྔ་བྱེ་བྲག་ཏུ་བཤད་པའོ། །དང་པོ་ལ་གཉིས་ཏེ། ཐུན་མོང་བ་བསླབ་པ་ཕུལ་བའི་ཆོ་ག་དང་། སྡེ་ལྔ་སོ་སོ་བཤད་པའོ། །དང་པོ་ལ་སྤྱིར་སྡོམ་པའི་གཏོང་རྒྱུ་དང་། བྱེ་བྲག་བསླབ་པ་འབུལ་བའི་ཆོ་ག་གཉིས་ལས། དང་པོ་ནི། མཛོད་ལས། བསླབ་པ་ཕུལ་དང་ཤི་འཕོས་དང་། །མཚན་གཉིས་དག་ནི་འབྱུང་བ་དང་། །རྩ་བ་ཆད་དང་མཚན་འདས་ལས། །སོ་སོར་ཐར་པའི་འདུལ་བ་གཏོང་། །ཞེས་གསུངས་པའི་དང་པོ་བཞི་ནི་རིགས་སྤྱིའི་གཏོང་རྒྱུ་ཡིན་ལ། མཚན་མོ་འདས་པ་ནི་བསྙེན་གནས་ཁོ་ནའི་ཡིན་ནོ། །གཞན་ཡང་མཚན་ལན་གསུམ་དུ་གྱུར་པ་དང་། ལོ་ཉི་ཤུ་མ་ལོན་པར་བསྙེན་པར་རྫོགས་ནས་ཉི་ཤུ་མ་ལོན་པར་ཤེས་པ་ནི་གཏོང་བ་ནི། ཉི་ཤུ་མ་ལོན་པའི་དུས་དེ་ཉིད་ལ་དེ་ལྟར་ཤེས་ན་སྡོམ་པར་གཏོང་བ་ཡིན་གཞན་དུ་ན་མི་གཏོང་བར་མངོན་ནོ། །གཉིས་པ་ལ་ཡུལ་དང་། དངོས་པོ་དང་། རྟེན་དང་། བསམ་པ་དང་། མཐར་ཐུག་གོ །དང་པོ་ནི། རང་ལས་རྒྱུད་ཐ་དད་པ་ལུས་ཐ་མལ་པར་གནས་པ། སྨྲ་ཤེས་ཤིང་དོན་གོ་བའི་མིའོ། །དངོས་པོ་ནི། བདག་ཉིད་ཀྱི་རྒྱུད་དུ་གཏོགས་པའི་བསླབ་པ་ཡིན་པ། རྟེན་ནི་བདག་ཉིད་ཤེས་པ་རང་བཞིན་དུ་གནས་པ། གཟུགས་གཞན་དུ་མ་བསྒྱུར་ཞིང་མི་སྣང་བར་མ་བྱས་པ། བསམ་པ་འདུ་ཤེས་མ་འཁྲུལ་ཞིང་ཀུན་སློང་བསླབ་པ་གཏོང་བར་འདོད་པས་སྦྱོར་བ་ལུས་ངག་གང་ཡང་རུང་བས་བརྡ་སྤྲད་པར་བྱས་ཏེ། མཐར་ཐུག་ཡུལ་གྱིས་དོན་གོ་བ་ན་གཏོང་བར་འགྱུར་རོ། །འོ་ན་སྡོམ་པའི་གཏོང་རྒྱུ་དུ་མ་ཡོད་ན་འདིར་འདི་ཁོ་ན་གསུངས་པའི་རྒྱུ་མཚན་ཅི་ཡིན་ཞེ་ན། རྣམ་འབྱེད་དུ། བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་ལྟུང་བའི་དངོས་གཞི་བསྐྱེད་པ་ལ་བསླབ་པ་མ་ཕུལ་བསླབ་པ་ཉམས་པར་མ་བྱས་པ་ཞེས་གསུངས་པའི་རྟེན་གྱི་དོན་དེ་སྒྲུབ་པའི་ཕྱིར་ཡིན་ལ། གཞན་རྣམས་སྐབས་འདིར་རྣམ་འབྱེད་ལས་མ་གསུངས་པའི་ཕྱིར་དང་། སྡེ་ལྔའི་དངོས་གཞི་བསྐྱེད་པའི་རྟེན་དང་ཡང་མ་འབྲེལ་བའི་ཕྱིར་རོ། །འོ་ན་བསླབ་པ་ཉམས་པར་བྱས་པ་དེ་གང་ཡིན་ཞེ་ན། མ་མོར་དེ་གཉིས་ལ་ཁྱད་པར་མེད་པར་བཤད་ལ། བམ་ལྔར་བསླབ་པ་ཕུལ་བ་དང་བསླབ་པ་ཉམས་པ་གཉིས་ཀ་ལ་སྡོམ་པ་མེད་པ་ཉིད་དུ་འདྲ་སྟེ། བསླབ་པ་ཕུལ་བས་ནི་བཏང་བའི་སྒོ་ནས་སྡོམ་པ་མེད་པར་བྱས་ལ། བསླབ་པ་ཉམས་པར་བྱས་པ་ནི་བསླབ་པའི་ཡུལ་མཐུ་མེད་པར་བྱས་པའི་སྒོ་ནས་སྡོམ་པ་མེད་པར་བྱས་པ་ཡིན་ནོ་ཞེས་གསུངས་སོ། །སོ་ཐར་གྱི་འགྲེལ་པར་དངོས་སུ་ལྟུང་བའི་དངོས་གཞི་བསྐྱེད་པའི་གཞི་ལ་མ་ཞུགས་ཀྱང་དགེ་སློང་སོགས་ཀྱི་འདུ་ཤེས་བོར་ནས་ཁྱིམ་པ་དང་མཐུན་པའི་རྟགས་ཆ་ལུགས་འཛིན་ཅིང་སྤྱོད་པ་བྱེད་པས་སྡོམ་པ་གཏོང་བ་ལྟ་བུ་ལ་བཤད་དོ། །འོ་ན་བསླབ་པ་ཕུལ་བ་ལ་དགོས་པ་ཅི་ཡོད་ཅེ་ན། སྲོག་གི་བར་ཆད་དུ་འགྱུར་བ་ལ་སོགས་པའི་ཉེས་དམིགས་ཆེན་པོ་བྱུང་ན་ཡང་ཡུལ་ངན་དང་གྲོགས་ངན་སྤངས་པའི་སྒོ་ནས་སྡོམ་པ་གཅེས་པར་གཟུང་དགོས་ཏེ། བསླབ་པ་ཕུལ་ན་སོ་ཐར་གྱི་སྡོམ་པ་གཏོང་བས་ཡོན་ཏན་ཐམས་ཅད་ཀྱི་རྩ་བ་དང་བྲལ་བར་འགྱུར་བའི་ཕྱིར་དང་། ཕྱི་མར་ཡང་རྒྱུ་མཐུན་གྱི་འབྲས་བུ་ཚུལ་ཁྲིམས་མཐར་མ་ཕྱིན་པ་ལ་སོགས་པའི་ཉེས་པ་དུ་མ་འབྱུང་བའི་ཕྱིར་རོ། །བསྟན་པ་དང་སེམས་ཅན་མང་པོ་ལ་ཕན་པའི་དགག་དགོས་ཆེན་པོ་བྱུང་ན་ཕུལ་བ་ལ་དགོས་པ་ཡོད་དེ། སྔར་བསྲུངས་པའི་ཕན་ཡོན་ཆེན་པོ་འབྱུང་བ་དང་། ད་ལྟར་ལྟུང་བས་མི་གོས་པ་དང་། ཕྱིས་ལེན་ན་སྐྱེ་བའི་ཕན་ཡོན་ཡོད་པའི་ཕྱིར། ཇི་སྐད་དུ། དགེ་སློང་ལ་རབ་ཏུ་གཅེས་པའི་མདོ་ལས། གང་ཞིག་བསླབ་ལ་མི་གནས་པ། །བདེ་གཤེགས་རྒྱལ་མཚན་འཛིན་པ་བས། །བསླབ་ལ་མི་གནས་སྐད་ཅིག་ལ། །གཟུགས་བོར་ཁྱིམ་པར་གནས་པ་བཟང་། །ཞེས་གསུངས་སོ། །གཉིས་པ་ལ་གཉིས་ཏེ། སྤྱིའི་དོན་དང་། སོ་སོའི་དོན་ནོ། །དང་པོ་ལ་ལྔ་སྟེ། བསླབ་པ་བཅས་པའི་ཕན་ཡོན། ཕན་ཡོན་ཅན་གྱི་བཅས་པ། བཅས་པ་དང་འགལ་བའི་ལྟུང་བའི་རྣམ་གཞག དེའི་རྟེན་གྱི་ཡན་ལག བསྡུས་པའི་དོན་བཤད་པའོ། །དང་པོ་ལ་ལུང་ལས་བསླབ་པ་བཅས་པའི་ཕན་ཡོན་འདི་ལྟ་སྟེ། དགེ་འདུན་བསྡུ་བར་བྱ་བའི་ཕྱིར་དང་། དགེ་འདུན་ལེགས་པར་གནས་པར་བྱ་བའི་ཕྱིར་དང་། དགེ་འདུན་བདེ་བར་གནས་པར་བྱ་བའི་ཕྱིར་དང་། གནོང་མི་ཁུར་བའི་གང་ཟག་རྣམས་ཚར་གཅད་པའི་ཕྱིར་དང་། ངོ་ཚ་ཤེས་པ་རྣམས་བདེ་བར་གནས་པར་བྱ་བའི་ཕྱིར་དང་། མངོན་པར་མ་དད་པ་རྣམས་དད་པར་བྱ་བའི་ཕྱིར་དང་། མངོན་པར་དད་པ་རྣམས་ཕྱིར་ཞིང་འབྱུང་བར་བྱ་བའི་ཕྱིར་དང་། ཚེ་འདིའི་ཟག་པ་རྣམས་རྣམ་པར་བསྡམ་པར་བྱ་བའི་ཕྱིར་དང་། ཚེས་རབས་ཕྱི་མའི་ཟག་པ་རྣམས་བཟློག་པར་བྱ་བའི་ཕྱིར་དང་། དེའི་ཚངས་པར་སྤྱོད་པ་སྐྱེ་བོ་མང་པོ་ལ་ཕན་པ་དང་ཡངས་པར་འགྱུར་བ་དང་། ལྷ་དང་མིའི་བར་དག་ལ་ཡང་དག་པར་རབ་ཏུ་བསྟན་པ་ཡུན་རིང་དུ་གནས་པར་འགྱུར་བའོ་ཞེས་གསུངས་སོ། །དེ་ཡང་དགེ་འདུན་བསྡུ་བའི་ཕྱིར་ཞེས་པ་ནི། རིགས་བཞི་ལས་བྱུང་བ་རྣམས་རབ་བྱུང་བསྙེན་རྫོགས་ཀྱི་སྒོ་ནས་བསྡུ་བར་བྱེད་ཅེས་པའོ། །ལེགས་པར་གནས་པ་ཞེས་པ་ནི། འདོད་པ་བསོད་ཉམས་ཀྱི་མཐའ་ལ་བརྩོན་པ་བཟློག་ནས་ཆོ་ག་ཤེས་པ་སོགས་ཀྱི་ཆོས་བསྟན་པའི་རྗེས་སུ་འཇུག་པས་ལེགས་པར་གནས་པར་འགྱུར་བའོ། །བདེ་བར་གནས་པའི་ཕྱིར་ཞེས་པ་ནི། ངལ་ཞིང་དུབ་པའི་མཐའ་ལ་བརྩོན་པ་བཟློག་ནས་བདེ་བར་འགྱུར་བའོ། །དེ་གསུམ་གྱིས་མདོར་བསྟན་ནས། ལྷག་མ་རྣམས་ཀྱིས་རྒྱས་པར་འཆད་པ་ནི། གནོང་མི་ཁུར་བ་ཞེས་སོགས་ནི། ལྟུང་བ་བྱེད་པ་རྣམས་ནན་ཏུར་གྱིས་ཚར་གཅད་པའོ། །ངོ་ཚ་དང་ལྡན་པ་ཞེས་པ་ནི། ཕྱི་མའི་ཉོན་མོངས་པ་སྤོང་བ་དང་རྗེས་སུ་མཐུན་པའོ། །མངོན་པར་མ་དད་པ་རྣམས་ཞེས་སོགས་ནི། ཡོ་བྱད་རྐྱེན་དུ་བབ་པ་དག་ཡོད་པས་སོ། །མངོན་པར་དད་པ་རྣམས་ཞེས་སོགས་ནི། ཞུགས་པ་རྣམས་ཡོངས་སུ་སྨིན་པར་བྱ་བའི་ཕྱིར་རོ། །ཚེ་འདིའི་ཟག་པ་ཞེས་སོགས་ནི། ཀུན་དཀྲིས་མགོ་མནན་པས་སོ། །ཚེ་རབས་ཕྱི་མའི་ཞེས་སོགས་ནི། ཀུན་དཀྲིས་ཀྱི་བག་ལ་ཉལ་སྤོང་བས་སོ། །དེའི་ཚངས་པར་ཞེས་སོགས་ཀྱི་སྒྲ་ནི། ཚངས་པ་ནི་མྱ་ངན་ལས་འདས་པ་ཡིན་ལ། དེ་དང་མཐུན་པར་སྤྱོད་པ་འདུལ་བ་སྟེ་བསྙེན་པར་རྫོགས་པའོ། །རིགས་རུས་ཐ་དད་པའི་སྐྱེ་བོ་མང་པོ་ལ་ཕན་པ་དང་ཡངས་པ་སྟེ་གོང་ནས་གོང་དུ་ཁྱད་པར་དུ་འགྱུར་བའོ། །རྟེན་ལྷ་མི་གཉིས་ལ་ཡང་དག་པ་ཇི་ལྟ་བ་བཞིན་དུ་རབ་ཏུ་བསྟན་པ་ཞེས་པ་ནི། ངོ་བོ་ཇི་ལྟར་ཡོད་པ་དང་གྲངས་ཇི་སྙེད་ཡོད་པའོ། །ཡུན་རིང་དུ་གནས་ཞེས་པ་ནི། གཅིག་ནས་གཅིག་ཏུ་བརྒྱུད་དེ་ཡུན་རིང་དུ་གནས་པའོ། །གཉིས་པ་ཕན་ཡོན་ཅན་གྱི་བཅས་པ་ནི། ཚུལ་ཁྲིམས་ཀྱི་དབང་དུ་བྱས་པའི་བླང་དོར་སྟོན་པའི་འདུལ་བ་སྟེ། བམ་ལྔ་ལས། གླེང་གཞི་དང་། བསླབ་པ་བཅས་པ་དང་། ལྟུང་བ་རྣམ་པར་གཞག་པ་གསུམ་གྱིས་རིག་པར་བྱའོ། །ཞེས་དང་། ཡང་དེ་ཉིད་ལས། བསླབ་པ་བཅས་པ་ནི་འཇིག་རྟེན་དང་འགལ་བ་དང་འདུལ་བ་དང་འགལ་བ་བཟློག་པའི་ཕྱིར་རང་བཞིན་གྱི་ཁ་ན་མ་ཐོ་བ་དང་བཅས་པ་དང་། བཅས་པའི་ཁ་ན་མ་ཐོ་བ་དགག་པའི་ལྟུང་བ་སྡེ་ལྔའོ་ཞེས་གསུངས་པའི་ཕྱིར། འོ་ན་བླང་དོར་སྟོན་པའི་འདུལ་བ་དེའི་མཚན་གཞི་ཇི་ལྟ་བུ་ཡིན་ཞེ་ན། འདི་ལ་བྱེ་བྲག་ཏུ་སྨྲ་བའི་ལུགས་ཀྱིས་ཡིད་ཀྱི་ཤེས་པ་ལ་ཚུལ་ཁྲིམས་ཀྱི་བླང་དོར་སྟོན་པའི་མིང་ཚིག་ཡི་གེའི་ཚོགས་སུ་སྣང་བའི་སྒྲ་སྤྱི་ལྡན་མིན་འདུ་བྱེད་དེ་ལ་མིང་ཞེས་བྱ་སྟེ། དེ་ལས་དོན་ལ་འཇུག་པའི་ཕྱིར་རོ། །དེ་ཉིད་རྗོད་བྱེད་ལུང་གི་འདུལ་བའི་མཚན་གཞི་ཡིན་ཏེ། མཛོད་ལས། ཆོས་ཀྱི་ཕུང་པོ་བརྒྱད་ཁྲི་དག །གང་རྣམས་ཐུབ་པས་གསུངས་དེ་དག །ཚིག་གམ་མིང་ཡིན་དེ་དག་ཀྱང་། །གཟུགས་དང་འདུ་བྱེད་དག་ཏུ་འདུས། །ཞེས་གསུངས་སོ། །དེས་ན་འདིའི་མིང་དང་། མིང་ཚིག་ཡི་གེ་གསུམ་གྱི་ནང་ཚན་དུ་གྱུར་པའི་མིང་ལ་ཁྱད་པར་ཡོད་དོ། །བཅས་པ་དེ་བསྲུང་དགོས་ཀྱི་གང་ཟག་ནི་བཅས་ལྡན་ནོ། །གསུམ་པ་བཅས་འགལ་གྱི་ལྟུང་བའི་རྣམ་གཞག་ལ་གཉིས་ཏེ། བསྙེན་པར་མ་རྫོགས་པའི་ལྟུང་བ་དང་། རྫོགས་པའི་ལྟུང་བའོ། །དང་པོ་ནི། ཉེས་བྱས་སུ་ངེས་ཏེ། མ་རྫོགས་པའི་སྡོམ་པ་ནི་སྡོམ་པའི་ཐ་མ་ཡིན་པའི་ཕྱིར་ཞེས་དགྲ་བཅོམ་པ་ཟླ་བ་ནོར་བུ་བཞེད། རྫོགས་མ་རྫོགས་ཀྱི་བྱེ་བྲག་བསྟན་པའི་ཕྱིར་ཞེས་དགྲ་བཅོམ་པ་ཉེར་སྦས་བཞེད་དོ། །བསྙེན་པར་མ་རྫོགས་པའི་རྒྱུད་ཀྱི་ལྟུང་བ་ལ་དབྱེ་ན། ཕམ་འདྲའི་ཉེས་བྱས། དེ་ལས་གཞན་པའི་བཤགས་བྱའི་ཉེས་བྱས། བསྡམ་བྱའི་ཉེས་བྱས་དང་གསུམ་མོ།། ༈ །།གཉིས་པ་བསྙེན་པར་རྫོགས་པའི་ལྟུང་བ་ལ་བཅུ་སྟེ། དབྱེ་བ་དང་། བསྡུ་བ་དང་། ངོ་བོ་དང་། མཚན་ཉིད་དང་། རྒྱུ་དང་། གྲངས་ངེས་དང་། གོ་རིམ་དང་། སྒྲ་དོན་དང་། བསྲུངས་པའི་ཕན་ཡོན་དང་། མ་བསྲུངས་པའི་ཉེས་དམིགས་སོ། །དང་པོ་ལ་དབྱེ་གཞི་དང་། དབྱེ་སྒོ་གཉིས་ལས། དང་པོ་ནི་བསྙེན་པར་རྫོགས་པའི་རྒྱུད་ལ་འབྱུང་བའི་ལྟུང་བ་ཙམ་མོ། །གཉིས་པ་ནི། གསལ་བའི་དབྱེ་བ་མཐའ་ཡས་ཀྱང་སྡེ་ཚན་གྱི་སྒོ་ནས་དབྱེ་ན། ཕམ་པར་འགྱུར་བའི་སྡེ་ཚན་སོགས་ལྔ་ཡོད་དེ། ཊཱི་ཀར་ལྟུང་བྱེད་སྡེ་ལྔ་པོ་ཕམ་པར་འགྱུར་བའི་སྡེ་དང་། དགེ་འདུན་ལྷག་མའི་སྡེ་དང་། ལྟུང་བྱེད་ཀྱི་སྡེ་དང་། སོ་སོར་བཤགས་པའི་སྡེ་དང་། བསླབ་པའི་སྡེ་ཞེས་དང་། བསྡུ་བ་ལས། ལྟུང་བའི་སྡེ་ཚན་རྣམ་ལྔ་སྟེ། །དེ་ལ་བསླབ་བྱ་རྣམ་པ་བཞི། །ཞེས་གསུངས་པའི་ཕྱིར། དེ་ལྟར་ཡིན་ན་སྦོམ་པོ་དང་ཉེས་བྱས་ཀྱི་དབྱེ་བ་མ་བྱས་པར་འགྱུར་རོ་ཞེ་ན། སྐྱོན་མེད་དེ། ཕམ་པས་ཀུན་ནས་བསླངས་པའི་སྦོམ་པོ་ནི་ཕམ་པའི་སྡེ་ཚན་དུ་གཏོགས་ལ། ལྷག་མས་ཀུན་ནས་བསླངས་པའི་སྦོམ་པོ་ནི་ལྷག་མའི་སྡེ་ཚན་ཏུ་གཏོགས་ཤིང་སྦོམ་པོ་ཐམས་ཅད་དེ་གཉིས་སུ་འདུས་པའི་ཕྱིར་ཏེ། རྣམ་འབྱེད་དུ་ཉེས་པ་སྦོམ་པོ་ནི་གཉིས་ཏེ། ཕམ་པ་ལས་བྱུང་བ་དང་། དགེ་འདུན་ལྷག་མ་ལས་བྱུང་བའོ་ཞེས་དང་། འདུལ་བྱེད་དུ། བཙུན་པ་ཉེས་པ་སྦོམ་པོ་ཇི་ལྟར་བཤགས་པར་བགྱི། ཉེ་བ་འཁོར་ཉེས་པ་སྦོམ་པོ་ནི་བཞི་པོ་འདི་དག་ཡིན་ཏེ། ཕམ་པར་འགྱུར་བས་ཀུན་ནས་བསླངས་པ་ལྕི་བ་དང་། ཕམ་པར་འགྱུར་བས་ཀུན་ནས་བསླངས་པ་ཡང་བ་དང་། དགེ་འདུན་ལྷག་མས་ཀུན་ནས་བསླངས་པ་ལྕི་བ་དང་། དགེ་འདུན་ལྷག་མས་ཀུན་ནས་བསླངས་པ་ཡང་བའོ་ཞེས་གསུངས་པའི་ཕྱིར། གཉིས་པ་ལ་གཉིས་ཏེ། བསྡུ་བ་དངོས་དང་། བཅས་རང་གི་ཁྱད་པར་རོ། །དང་པོ་ནི། འདུ་ཤེས་གཙོ་བོ་དང་། དངོས་པོ་གཙོ་བོའི་ལྟུང་བ་གཉིས་སུ་འདུས་ཏེ། འོད་ལྡན་ལས། བསླབ་པའི་གཞི་ནི་གཉིས་ཏེ། འདུ་ཤེས་གཙོ་བོར་བྱ་བ་དང་། དངོས་པོ་གཙོ་བོར་བྱ་བའོ་ཞེས་གསུངས་པས་སོ། །སྦྱོར་བའི་ཆ་ནས་རྒྱུན་དང་ལྡན་པ་དང་མི་ལྡན་པ་གཉིས་སུ་འདུས་ཏེ། དང་པོ་ནི། སྦྱོར་བ་དང་མཐར་ཐུག་གི་བར་དུ་དུས་གཞན་གྱིས་ཆོད་དུ་བཏུབ་པ་སྟེ་སྲོག་གཅོད་ལྟ་བུའོ། །གཉིས་པ་ནི། སྦྱོར་མཐའི་བར་དུ་དུས་གཞན་གྱིས་ཚོད་དུ་མི་བཏུབ་པ་སྟེ་རེག་པ་ལྟ་བུའོ། །མཐར་ཐུག་གི་ཆ་ནས་འཕེན་པས་འགྲུབ་པ་དང་མི་འགྲུབ་པ་གཉིས། དང་པོ་ནི། སྦྱོར་བ་བརྩམས་ནས་སྦྱོར་བ་གཞན་གྱིས་མཐར་ཐུག་གྲུབ་པ་རང་ཉིད་ཀྱིས་ཤེས་པ་ལ་མི་ལྟོས་པའི་ལྟུང་བ་སྟེ་མ་བྱིན་ལེན་དང་སྲོག་གཅོད་ཀྱི་ཕམ་པ་ལྟ་བུའོ། །གཉིས་པ་ནི། དེ་ལས་བཟློག་པ་སྟེ་ཕམ་ལྷག་དང་པོ་གཉིས་ལྟ་བུའོ། །ཕྱིར་བཅོས་ཀྱི་སྒོ་ནས་ལྷག་མ་མེད་པ་དང་ལྷག་མ་དང་བཅས་པའི་ལྟུང་བ་གཉིས། དང་པོ་ནི། ཕམ་པ་བཞིའོ། །གཉིས་པ་ནི། ཕམ་པ་ལས་གཞན་པའི་ལྟུང་བ་རྣམས་སོ། །གཞིའི་སྒོ་ནས་སེམས་ཅན་ལ་བརྟེན་པ་དང་སེམས་ཅན་མ་ཡིན་པ་ལ་བརྟེན་པ་གཉིས་སོ། །བྱེད་པའི་སྒོ་ནས་རང་གིས་བསྒྲུབ་དགོས་པ་དང་བཅོལ་བས་རྫོགས་པ་གཉིས་སོ། །འབྱུང་བའི་སྒོ་ནས་ལུས་དང་ངག་ལས་འབྱུང་བ་གཉིས་སོ། །བྱ་བའི་སྒོ་ནས་བྱ་བ་མི་བྱེད་པའི་ཕྱིར་མི་སྦྱོར་བ་དང་མི་བྱ་བ་བྱེད་པའི་སྦྱོར་བ་དང་བཅས་པ་གཉིས་ཏེ། བསྡུ་བར། བྱ་བ་མི་བྱེད་པ་དང་ནི། །མི་བྱ་བ་ནི་བྱེད་པའི་ཕྱིར། །མི་སྦྱོར་བ་དང་སྦྱོར་བཅས་ལས། །ལྟུང་བའི་ཉེས་པ་འབྱུང་བར་འགྱུར། །ཞེས་གསུངས་སོ། །ངོ་བོའི་ཆ་ནས་མི་དགེ་བ་དང་ལུང་མ་བསྟན་གྱི་ལྟུང་བ་གཉིས་སམ། རང་བཞིན་དང་བཅས་པའི་ལྟུང་བ་གཉིས་སུ་འདུས་སོ། །དང་པོ་ནི། སྲོག་གཅོད་ཀྱི་ཕམ་པ་ལྟ་བུ། གཉིས་པ་ནི་ས་རྐོ་མེ་རེག་གི་ལྟུང་བྱེད་ལྟ་བུའོ། །གཉིས་པ་ལ་གསུམ་སྟེ། བཅས་རང་གཉིས་ཁྱབ་ཆེ་ཆུང་དཔྱད། དེ་གཉིས་ཀྱི་ཁྱད་པར་ལ་དཔྱད། ཞར་ལ་སྡིག་ལྟུང་ངོ་བོ་གཅིག་དང་ཐ་དད་ལ་དཔྱད་པའོ། །དང་པོ་ནི། ཁ་ཅིག་རྟེན་སྤྱི་ལ་ལྟོས་ཏེ་རང་བཞིན་གྱི་ཁ་ན་མ་ཐོ་བ་ཁྱབ་ཆེ་སྟེ། དེ་བཅས་པས་བསྡམས་པ་དང་མ་བསྡམས་པ་གཉིས་ཀའི་རྒྱུད་ལ་འབྱུང་། བཅས་ལྟུང་བསྡམས་པ་ཁོ་ནའི་རྒྱུད་ལ་འབྱུང་བའི་ཕྱིར། རྟེན་རབ་བྱུང་ལ་ལྟོས་ནས་བཅས་པའི་ཁ་ན་མ་ཐོ་བ་ཁྱབ་ཆེ་སྟེ། དེ་ཡོད་པར་རང་བཞིན་གྱི་ཁ་ན་མ་ཐོ་བ་ཡོད་པས་མ་ཁྱབ། རང་བཞིན་གྱི་ཁ་ན་མ་ཐོ་བ་ཡོད་པར་བཅས་པའི་ལྟུང་བ་ཡོད་པས་ཁྱབ་པའི་ཕྱིར་ཟེར་བ་མི་འཐད་དེ། ཤེས་པ་རང་བཞིན་དུ་མི་གནས་པ་དང་། ལས་དང་པོ་པ་ལ་རང་བཞིན་གྱི་ཁ་ན་མ་ཐོ་བ་འབྱུང་ཡང་བཅས་ལྟུང་མི་འབྱུང་བའི་ཕྱིར་དང་། དགེ་སློང་སོ་སྐྱེ་ལ་འཇིག་ལྟ་མངོན་དུ་གྱུར་པའི་ཚེ་བཅས་ལྟུང་འབྱུང་བར་མ་ངེས་པའི་ཕྱིར། གཉིས་པ་ལ་ཁ་ཅིག་གཞི་དེ་ལ་རྐྱེན་ལ་ལྟོས་ཏེ་གནང་བ་འབྱུང་བའི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བ་དང་། དེ་ལས་བཟློག་པ་རང་བཞིན་གྱི་ཁ་ན་མ་ཐོ་བ་ཡིན་ཟེར་བ་མི་འཐད་དེ། འོ་ན་ཆང་འཐུང་བ་རྐྱེན་ལ་ལྟོས་ཏེ་གནང་བ་ཡོད་པར་ཐལ། དེ་བཅས་པའི་ཁ་ན་མ་ཐོ་བ་ཡིན་པའི་ཕྱིར། རྟགས་གྲུབ་སྟེ། མཛོད་ལས། བཅས་པའི་ཁ་ན་མ་ཐོ་བ། །མྱོས་འགྱུར་ལས་གཞན་བསྲུང་ཕྱིར་རོ། །ཞེས་གསུངས་པའི་ཕྱིར། འདོད་མི་ནུས་ཏེ། ཊཱི་ཀར་བཀག་པ་ཞེས་བྱ་བ་ནི་སྲོག་ལ་བབས་ཀྱང་གཞི་འདི་རྣམ་པ་ཐམས་ཅད་དུ་མི་བྱའོ་ཞེས་བྱ་བ་སྟེ། དཔེར་ན་ང་ལ་སྟོན་པར་སྨྲ་བ་རྣམས་ཀྱིས་ཆང་ནི་རྩའི་མཆོག་མས་ཀྱང་མི་གླུད་མི་འཐུང་ངོ་ནས་གསུངས་པའི་ཕྱིར། གལ་ཏེ་ལུས་ལ་བཀུད་པ་དང་མཁུར་བར་བསྲེལ་བ་སོགས་གནང་བ་ཆང་གི་གཞི་ལ་ཡོད་པ་མ་ཡིན་ནམ་ཞེ་ན། འོ་ན་སྲོག་གཅོད་པའི་གཞི་ལ་གནང་བ་ཡོད་པར་ཐལ། ལུས་གཏར་བ་དང་བསྲེག་པ་གནང་བ་ཡིན་པའི་ཕྱིར། ཁྱབ་པ་ཁས་བླངས། འདོད་ན་སྲོག་གཅོད་ཀྱི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བ་ཡིན་པར་ཐལ་ལོ། །མཚན་ཉིད་དེ་ལ་ཁ་ཅིག དགེ་སེམས་ཀྱིས་ཀུན་ནས་བསླངས་ཏེ་སྲོག་གཅོད་པའི་གཞི་ལ་གནང་བ་ཡོད་པར་ཐལ། དེ་བཅས་པའི་ཁ་ན་མ་ཐོ་བ་ཡིན་པའི་ཕྱིར་ཏེ། དགེ་སེམས་ཀྱིས་ཀུན་ནས་བསླངས་པའི་རང་བཞིན་གྱི་ཁ་ན་མ་ཐོ་བ་གཞག་ཏུ་མེད་པའི་ཕྱིར་ཞེས་པ་མི་འཐད་དེ། དགེ་སེམས་ཀྱིས་ཀུན་ནས་བསླངས་པའི་མ་བསད་པའི་མཚམས་མེད་དེ་བཅས་པའི་ཁ་ན་མ་ཐོ་བ་ཡིན་པར་ཐལ། དེ་རང་བཞིན་གྱི་ཁ་ན་མ་ཐོ་བ་མ་ཡིན་པའི་ཕྱིར། རྟགས་ཁས་བླངས། འདོད་མི་ནུས་ཏེ། དེ་སྲོག་གཅད་ཀྱི་ལས་ལམ་གང་ཞིག བསྟན་པ་ལ་མ་ཞུགས་པའི་ཁྱིམ་པ་ལ་འབྱུང་བའི་ཕྱིར། ཁ་ཅིག་དེ་གཉིས་ཀྱི་མཚན་ཉིད་རིམ་བཞིན། ཉོན་མོངས་ཀྱིས་ཀུན་ནས་བསླངས་པའི་ཁ་ན་མ་ཐོ་བ་དང་། དགེ་བ་དང་ལུང་མ་བསྟན་གང་རུང་གིས་ཀུན་ནས་བསླངས་པའི་ཁ་ན་མ་ཐོ་བ་ཞེས་ཟེར། དེ་ལ་ཁ་ཅིག་ལྟུང་བ་ཡིན་ན་རང་བཞིན་གྱི་ཁ་ན་མ་ཐོ་བ་ཡིན་པས་ཁྱབ་པར་ཐལ། དེ་ཡིན་ན་ཉོན་མོངས་ཀྱིས་ཀུན་ནས་བསླངས་པས་ཁྱབ་པའི་ཕྱིར་ཏེ། དེ་ཡིན་ན་འདི་དང་འདི་བྱའོ་ཞེས་པའི་བདག་འཛིན་ཉོན་མོངས་ཅན་གྱིས་ཀུན་ནས་བསླངས་པས་ཁྱབ་པའི་ཕྱིར་ཟེར་བ་མི་འཐད་དེ། ཉན་ཐོས་དགྲ་བཅོམ་པའི་རྒྱུད་ལ་ལྟུང་བ་འབྱུང་བ་ཡོད་ཀྱང་ཉོན་མོངས་མེད་པའི་ཕྱིར། མཚན་ཉིད་ཀྱང་མི་འཐད་དེ། དགེ་སེམས་ཀྱིས་ཀུན་ནས་བསླངས་པའི་སྲོག་གཅོད་ཀྱི་ལས་ལམ་ཆོས་ཅན། བཅས་པའི་ཁ་ན་མ་ཐོ་བ་ཡིན་པར་ཐལ། མཚན་ཉིད་དེའི་ཕྱིར། སྲོག་གཅོད་ཀྱི་ཕམ་པ་ཆོས་ཅན། རང་བཞིན་གྱི་ཁ་ན་མ་ཐོ་བ་ཡིན་པར་ཐལ། མཚན་ཉིད་དེའི་ཕྱིར་ཏེ། ཞེ་སྡང་གིས་ཀུན་ནས་བསླངས་པའི་ཁ་ན་མ་ཐོ་བ་ཡིན་པའི་ཕྱིར། གཏན་ཚིགས་གྲུབ་སྟེ། གསོད་དང་གནོད་སེམས་ཚིག་རྩུབ་པོ། །ཞེ་སྡང་གིས་ནི་མཐར་ཕྱིན་བྱེད། །ཅེས་གསུངས་པའི་ཕྱིར། འདོད་ན། འོག་ནས་འགོག་གོ །ཁ་ཅིག་རྒྱུ་མི་དགེ་བས་ཀུན་ནས་བསླངས་ཤིང་ངོ་བོ་མི་དགེ་བ་ཡིན་པ། འབྲས་བུ་རྣམ་སྨིན་འབྱིན་ནུས་ཀྱི་ཁ་ན་མ་ཐོ་བ་དང་། རྒྱུ་དགེ་བ་དང་ལུང་མ་བསྟན་གང་རུང་གིས་ཀུན་ནས་བསླངས་ཤིང་ངོ་བོ་ལུང་མ་བསྟན་ཡིན་པ། འབྲས་བུ་རྣམ་སྨིན་འབྱིན་མི་ནུས་པའི་ཁ་ན་མ་ཐོ་བ་ཞེས་པ་མི་འཐད་དེ། ཁམས་གོང་མའི་ཁ་ན་མ་ཐོ་བ་ཡིན་ན་བཅས་པའི་ཁ་ན་མ་ཐོ་བ་ཡིན་དགོས་པར་ཐལ། དེ་ཡིན་ན་རང་བཞིན་གྱི་ཁ་ན་མ་ཐོ་བ་མིན་དགོས་པའི་ཕྱིར། རྟགས་ཁས་བླངས། འདོད་མི་ནུས་ཏེ། རྩ་ཉོན་དང་བཅས་པའི་ཁ་ན་མ་ཐོ་བའི་གཞི་མཐུན་མེད་པའི་ཕྱིར་ཏེ། རྩ་ཉོན་ནི་བཅས་པ་ལ་མི་ལྟོས་པར་ངོ་བོ་ཉིད་ཀྱི་སྐྱོན་ཆགས་པ་ཡིན་པའི་ཕྱིར། གཞན་ཡང་བཅས་པའི་ཁ་ན་མ་ཐོ་བ་ཡིན་ན་མི་དགེ་བ་ཡིན་པས་ཁྱབ་པར་ཐལ། བཅས་པའི་ཁ་ན་མ་ཐོ་བའི་རྣམ་སྨིན་ངན་སོང་གསུམ་དུ་སྐྱེ་བར་བཅོམ་ལྡན་འདས་ཀྱིས་གསུངས་པའི་ཕྱིར། རང་ལུགས་ནི། བཅས་པ་ལ་མི་ལྟོས་པར་སྐྱེས་པའི་ཁ་ན་མ་ཐོ་བ་དེ་རང་བཞིན་གྱི་ཁ་ན་མ་ཐོ་བའི་མཚན་ཉིད། བཅས་པ་གཞག་པའི་དབང་གིས་བསྐྱེད་པའི་ཁ་ན་མ་ཐོ་བ་དེ་བཅས་པའི་ཁ་ན་མ་ཐོ་བའི་མཚན་ཉིད་དོ། །དེ་ལ་ཁོ་ན་རེ་སྲོག་གཅོད་ཀྱི་ཕམ་པ་ཆོས་ཅན། བཅས་པའི་ཁ་ན་མ་ཐོ་བར་ཐལ། མཚན་ཉིད་དེའི་ཕྱིར། འདོད་ན། རང་བཞིན་གྱི་ལྟུང་བ་མ་ཡིན་པར་འགྱུར་ཞིང་། དེ་ཡང་འདོད་ན། རང་བཞིན་གྱི་ལྟུང་བ་གཞི་མ་གྲུབ་པར་ཐལ་ལོ་ཞེ་ན། འདོད་པ་ཡིན་ཏེ། རང་བཞིན་གྱི་ལྟུང་བ་འདོད་པ་ནི་ལས་ལམ་དང་ལྟུང་བ་ངོ་བོ་གཅིག་ཏུ་འདོད་པའི་ལུགས་ཡིན་ལ། འདི་ནི་འོག་ནས་འགོག་གོ །རང་བཞིན་གྱི་ལྟུང་བ་མེད་དེ། བཅས་པ་ལ་མི་ལྟོས་པར་ངོ་བོ་ཉིད་ཀྱི་སྐྱོན་ཆགས་པའི་ཆ་ནས་རང་བཞིན་གྱི་ཁ་ན་མ་ཐོ་བར་འཇོག་པ་ཡིན་པའི་ཕྱིར་ཏེ། རྣམ་འབྱེད་ལས། ཉོན་མོངས་ཀྱིས་ཀུན་ནས་བསླངས་པ་ནི་རང་བཞིན་གྱི་ཡིན་ཏེ། ངོ་བོ་ཉིད་ཀྱིས་སྐྱོན་ཆགས་པའི་ཕྱིར་ཞེས་གསུངས་པའི་ཕྱིར། གསུམ་པ་ལ་གང་ལ་དཔྱོད་པའི་གཞི་དང་། དེ་ལ་དཔྱོད་པའི་ཚུལ་གཉིས་ལས། དང་པོ་ནི། རང་བཞིན་གྱི་ཁ་ན་མ་ཐོ་བ་དང་། བཅས་པའི་ལྟུང་བ་ལྟ་བུའོ། །དེའང་དུད་འགྲོ་བསད་པའི་ལྟུང་བ་དང་། དེའི་ལས་ལམ་ལྟ་བུ་ངོ་བོ་གཅིག་དང་ཐ་དད་གང་ཡིན་ཞེས་དཔྱད་པར་བྱའོ། །གཉིས་པ་ལ་དགག་གཞག་གཉིས་ལས། དང་པོ་ལ་ཁ་ཅིག་དུད་འགྲོ་བསད་པའི་ལྟུང་བྱེད་དང་། དེའི་སྡིག་པ་གཉིས་ངོ་བོ་ཐ་དད་ཡིན་ཏེ། ལྟུང་བྱེད་ནི་རབ་ཏུ་བྱུང་བ་ཁོ་ནའི་རྒྱུད་ལ་འབྱུང་བ་དང་། དེ་འབྱུང་བ་བཅས་པ་ལ་ལྟོས་པ་དང་། མིང་དང་རིགས་བརྗོད་པའི་བཤགས་པས་ཕྱིར་བཅོས་པར་བྱ་བ་ཡིན་ལ། དུད་འགྲོ་བསད་པའི་སྡིག་པ་ནི་རྟེན་ཁྱིམ་པ་དང་རབ་བྱུང་གཉིས་ཀའི་རྒྱུད་ལ་འབྱུང་བ་དང་། དེ་འབྱུང་བ་བཅས་པ་ལ་མི་ལྟོས་པ་དང་། སྟོབས་བཞིའི་བཤགས་པས་ཕྱིར་བཅོས་པར་བྱ་བ་ཡིན་པའི་ཕྱིར་ཞེས་གསུངས། དེ་ལ་གཞན་དག་ཐལ་བ་གསུམ་གྱི་དགག་པ་བརྗོད་དེ། དང་པོ་ནི། ལྟུང་བ་ཐམས་ཅད་ལུང་མ་བསྟན་དུ་ཐལ། ལྟུང་བ་ཐམས་ཅད་མི་དགེ་བ་ལས་ངོ་བོ་ཐ་དད་གང་ཞིག དགེ་བར་གཞག་ཏུ་མེད་པའི་ཕྱིར། དང་པོ་ཁས་བླངས། འདོད་མི་ནུས་ཏེ། ལུང་ལས། བཙུན་པ་ནོངས་པ་མི་དགེ་བས་ཀུན་ནས་བསླངས་པ་མཆིས་སམ། མི་དགེ་བའམ་ལུང་མ་བསྟན་གྱིས་ཀུན་ནས་བསླངས་པ་མཆིས་སམ། བཙུན་པ་ནོངས་པ་མི་དགེ་བ་མཆིས་སམ། དགེ་བ་མཆིས་སམ། ལུང་དུ་མ་བསྟན་པ་མཆིས་སམ། ཞེས་ཞུས་པའི་ལན་དུ་མི་དགེ་བ་དང་ལུང་མ་བསྟན་ཡོད་པར་གསུངས་ཤིང་། བཙུན་པ་ནོངས་པ་རྣམ་པར་སྨིན་པ་དང་བཅས་པ་ཞིག་གམ། ནོངས་པ་རྣམ་པར་སྨིན་པ་མེད་པ་ཞིག་ཅེས་པའི་ལན་དུ་གཉིས་ཀ་ཡོད་པར་གསུངས་པའི་ཕྱིར་དང་། ལྟུང་བྱེད་ཀྱི་སྐབས་རེ་རེའི་མཐར་ཡང་། ལྟུང་བར་བྱེད། སྲེག་པར་བྱེད། འཚེད་པར་བྱེད་ཅེས་གསུངས་པའི་ཕྱིར། གཞན་ཡང་བཅས་པའི་ལྟུང་བ་དང་རང་བཞིན་གྱི་ཁ་ན་མ་ཐོ་བ་དང་བཅས་པའི་ལྟུང་བ་གཉིས་ལ་རྐྱེན་ལ་ལྟོས་ནས་གནང་བ་ཡོད་མེད་ཀྱི་ཁྱད་པར་མེད་པར་ཐལ། ལྟུང་བ་ཐམས་ཅད་ལུང་མ་བསྟན་ཡིན་པའི་ཕྱིར། ཐལ་བ་གཉིས་པ་ནི། བཅས་པའི་ལྟུང་བ་ལུང་མ་བསྟན་དང་ངོ་བོ་ཐ་དད་དུ་ཐལ། རང་བཞིན་གྱི་ལྟུང་བ་མི་དགེ་བ་དང་ངོ་བོ་ཐ་དད་ཡིན་པའི་ཕྱིར། རྟགས་ཁས་བླངས། ཐལ་བ་གསུམ་པ་ནི། ལྷག་མ་ཕྱིར་བཅོས་བྱས་པས་དེའི་ཆའི་སྡིག་པ་མི་འདག་པ་ཐལ། དེ་གཉིས་ངོ་བོ་ཐ་དད་ཡིན་པའི་ཕྱིར། འདོད་ན། ལྷག་མ་ཕྱིར་བཅོས་མ་བྱས་ན་ངན་སོང་དུ་ལྟུང་བ་དང་ཕྱིར་བཅོས་བྱས་ན་ལྷ་མིར་སྐྱེ་བར་བཤད་པ་དེ་མི་འཐད་པར་ཐལ་ལོ། །གཞན་ཡང་དགེ་སློང་གི་ལོ་དྲི་བ་ལས། ཕམ་པ་དང་། ལྷག་མ་དང་། སྦོམ་པོ་དང་། ལྟུང་བྱེད་དང་། སོར་བཤགས་དང་། ཉེས་བྱས་རྣམས་བསྲུངས་ན་གཞན་འཕྲུལ་དབང་བྱེད་ནས་རྒྱལ་ཆེན་རིགས་བཞིའི་བར་རིམ་བཞིན་སྐྱེ་ཞིང་། མ་བསྲུངས་པའི་ཉེས་དམིགས་ཚ་བ་ནས་ཡང་སོས་ཀྱི་བར་དྲུག་ཏུ་རིམ་བཞིན་སྐྱེ་བར་བཤད་པ་དང་འགལ་ལོ་ཞེས་གསུང་། གཉིས་པ་དེ་དགག་པ་ནི། ལྟུང་བ་ཐམས་ཅད་ལུང་མ་བསྟན་དུ་ཐལ། མི་དགེ་བ་དང་ངོ་བོ་ཐ་དད་ཡིན་པའི་ཕྱིར། ཞེས་པ་ནི། དུད་འགྲོ་གསོད་པའི་སྡིག་པ་དང་དེའི་ལས་ལམ་གཉིས་ཤན་མ་ཕྱེད་པའི་སྐྱོན་དུ་སྣང་བས་རྟགས་མི་འགྲོའོ། །བཅས་ལྟུང་ལུང་མ་བསྟན་དང་ངོ་བོ་ཐ་དད་དུ་ཐལ་ཞེས་པ་ཡང་མ་འབྲེལ་ཏེ། རང་བཞིན་གྱི་ལྟུང་བ་ལུང་མ་བསྟན་ཡིན་ན་བཅས་ལྟུང་ལུང་མ་བསྟན་ཡིན་པ་ཤིན་ཏུ་རིགས་པའི་ཕྱིར། ཐལ་བ་གསུམ་པ་ཡང་མ་ངེས་ཏེ། ལྟུང་བ་དེའི་དངོས་གཞི་ཕྱིར་བཅོས་བྱས་པས་དེའི་སྦྱོར་ལྟུང་མི་འདག་པར་ཐལ། དེ་གཉིས་ངོ་བོ་ཐ་དད་ཡིན་པའི་ཕྱིར་ཏེ། དུས་སྔ་ཕྱིར་སྐྱེས་པའི་ལྟུང་བ་ཐ་དད་ཡིན་པའི་ཕྱིར། ལྟུང་བ་ཐམས་ཅད་ལུང་མ་བསྟན་ཡིན་པར་འདོད་པ་ཡང་མི་འཐད་དེ། ལྟུང་བྱེད་འབའ་ཞིག་པ་རེ་རེའི་སྐབས་སུ་ལྟུང་བར་བྱེད། སྲེག་པར་བྱེད་ཅེས་སོགས་དང་། འདུལ་བ་ལ་བསྟོད་པ་ལས། གང་ཞིག་སྟོན་པ་ཐུགས་རྗེའི་བསྟན་པ་ལས། །ཡལ་བར་སེམས་ཤིང་ཅུང་ཟད་འདའ་བྱེད་ན། །དེ་ནི་དེ་ལ་སྡུག་བསྔལ་གཞན་དབང་ཐོབ། །སྨྱུག་ཚལ་བསྲེགས་པས་ཨ་སྨྲའི་ཚལ་ཉམས་བཞིན། །འདི་ན་ལ་ལ་རྒྱལ་པོའི་ཚུལ་ཅན་འགའ། །ལན་འགའ་འདས་ཀྱང་ཆད་པ་ཐོབ་མི་འགྱུར། །ཐུབ་པའི་བཀའ་ལས་ཚུལ་མིན་འདའ་བྱེད་ན། །དུད་འགྲོར་སྐྱེ་འགྱུར་ཨེ་ལའི་འདབ་ཀླུ་བཞིན། །ཞེས་གསུངས་སོ། །གཉིས་པ་རང་ལུགས་ནི། སྡིག་ལྟུང་ངོ་བོ་གཅིག་ཡིན་ཅིང་། དུད་འགྲོ་གསོད་པའི་ལྟུང་བ་དང་དེའི་ལས་ལམ་ངོ་བོ་ཐ་དད་ཡིན་ལ། དེ་བཞིན་དུ་བསམས་བཞིན་དུ་བཅས་མཚམས་ལས་འདས་པའི་ལྟུང་བ་ཐམས་ཅད་ལུང་མ་བསྟན་དང་ངོ་བོ་ཐ་དད་ཡིན་ཏེ། མི་དགེ་བར་ངེས་པའི་ཕྱིར། ཁོ་ན་རེ་ལྟུང་བ་ཕྱིར་བཅོས་བྱས་པས་དེའི་ཆའི་སྡིག་པ་མི་འདག་པར་ཐལ། ལྟུང་བྱེད་དང་དེའི་ལས་ལམ་ངོ་བོ་ཐ་དད་ཡིན་པའི་ཕྱིར། འདོད་ན། འདག་པར་བཤད་པ་དང་འགལ་ལོ་ཞེ་ན། དུད་འགྲོ་གསོད་པའི་ལྟུང་བྱེད་ཕྱིར་བཅོས་བྱས་པས་ལས་ལམ་ཡང་བར་འགྱུར་གྱི་འདག་པར་ནི་མ་ངེས་སོ། །དུད་འགྲོ་གསོད་པའི་ལྟུང་བྱེད་དང་དེའི་ལས་ལམ་ངོ་བོ་ཐ་དད་ཡིན་ཏེ། དུད་འགྲོ་གསོད་པའི་ལས་ལམ་ནི་དུད་འགྲོ་གསོད་པའི་སྦྱོར་བ་བྱས་ནས་དུད་འགྲོ་ཤི་བ་དང་དུས་མཉམ་དུ་སྐྱེས་པའི་རིག་བྱེད་དང་རིག་བྱེད་མ་ཡིན་པའི་གཟུགས་ཤིག་ལ་འཇོག་ལ། དེའི་ལྟུང་བྱེད་ནི་དུད་འགྲོ་ཤི་བ་དེ་ལ་མཐར་ཐུག་ཏུ་བྱས་པའི་སྐད་ཅིག་ཕྱི་ལོགས་སུ་འབྱུང་བའི་ཕྱིར། དེ་བཞིན་དུ་བརྫུན་དུ་སྨྲ་བའི་ཕམ་པ་དང་དེའི་ལས་ལམ་ཡང་ངོ་བོ་ཐ་དད་ཡིན་ཏེ། བརྫུན་སྨྲའི་ཕམ་པ་ནི་བརྫུན་ཚིག་དེ་ཕ་རོལ་པོས་ཡིད་ཤེས་ཀྱི་གོ་བའི་སྐབས་སུ་འབྱུང་ལ། ལས་ལམ་ནི་དེའི་སྔ་ལོགས་བརྫུན་ཚིག་ཉན་ཤེས་ཀྱིས་ཐོས་པའི་སྐབས་ཀྱི་རིག་བྱེད་དང་རིག་བྱེད་མ་ཡིན་པའི་གཟུགས་ལ་འཇོག་པའི་ཕྱིར། གཞན་ཡང་ལྟུང་བ་དང་ལས་ལམ་ངོ་བོ་ཐ་དད་ཡིན་ཏེ། ལྟུང་བ་ནི་གསུང་རབ་ནས་བཤད་པའི་མིང་རིགས་བརྗོད་པའི་བཤགས་པས་འདག་ལ། ལས་ལམ་ནི་དེ་ཙམ་གྱིས་འདག་པར་མ་ངེས་པའི་ཕྱིར་ཏེ། གང་ཟག་དམ་པ་ལ་ཚིག་ངན་སྨྲས་པའི་རྣམ་སྨིན་ཚེ་རབས་དུ་མར་མྱོང་བ་སོགས་བཤད་པའི་ཕྱིར་རོ། །གསུམ་པ་ངོ་བོ་ལ་དངོས་དང་། ལྟུང་བ་གྲུབ་པ་ལ་རིག་བྱེད་དགོས་མི་དགོས་དཔྱད་པ་གཉིས། དང་པོ་ནི། རིག་བྱེད་མ་ཡིན་པའི་གཟུགས་མི་དགེ་བའམ་རིག་བྱེད་ཀྱི་གཟུགས་ལུང་དུ་མ་བསྟན་པ་སྟེ། གཏམ་གྱི་གཞིར། ཉེ་བ་འཁོར་ལྟུང་བ་ནི་རྣམ་པར་རིག་བྱེད་ཅེས་ཀྱང་བྱ་ལ། རྣམ་པར་རིག་བྱེད་མ་ཡིན་པ་ཞེས་ཀྱང་བྱའོ་ཞེས་དང་། དགེ་བའམ་མི་དགེ་བའམ་ལུང་དུ་མ་བསྟན་པ་ཡིན་ཞེས་དྲིས་པ་ལ། མི་དགེ་བ་དང་ལུང་དུ་མ་བསྟན་པར་བརྗོད་པར་བྱའོ་ཞེས་སོགས་གསུངས་སོ། །དེའང་རང་གཞན་གྱི་ཁ་ན་མ་ཐོ་བ་དང་། བཅས་པ་ལས་བསམ་བཞིན་དུ་འདས་པ་ནི་མི་དགེ་བ་ཡིན་ལ། བཅས་པ་ལས་མ་བསམས་པར་འདས་པ་ནི་ལུང་མ་བསྟན་ཏེ། གཏམ་གཞིར། མི་དགེ་བ་གང་ཞེ་ན། གང་བཅོམ་ལྡན་འདས་ཀྱིས་བསླབ་པ་བཅས་པ་ལས་བསམ་བཞིན་དུ་འདའ་བར་བྱེད་པ་ནི་མི་དགེ་བའོ། །ལུང་དུ་མ་བསྟན་པ་གང་ཞེ་ན། གང་བཅོམ་ལྡན་འདས་ཀྱིས་བསླབ་པ་བཅས་པ་ལས་མ་བསམས་པར་འདས་པ་ནི་ལུང་དུ་མ་བསྟན་པའོ་ཞེས་གསུངས་སོ། །གཉིས་པ་ནི། འདི་ལ་ཁ་ཅིག་ལྟུང་བ་ནི་གཉིས་ཏེ། བྱ་བ་མི་བྱེད་པའི་ལྟུང་བ་དང་། མི་བྱ་བ་བྱེད་པའི་ལྟུང་བའོ། །དང་པོ་ལ་རིག་བྱེད་མི་དགོས་ཏེ། བྱ་བ་མ་བྱས་པ་ཙམ་གྱིས་ལྟུང་བར་འགྱུར་བའི་ཕྱིར་ཏེ། ལུང་དུ་བཙུན་པ་ལུས་སུ་ཡང་མ་ཐོན་ངག་ཏུ་ཡང་མ་ཐོན་པར་དགེ་སློང་མར་མི་རུང་བ་མཆིས་སམ། ཡོད་དེ་དགེ་སློང་མ་ཟླ་མོའི་ཕམ་པ་འཆབ་ནའོ་ཞེས་དང་། སེམས་འབའ་ཞིག་ལ་ལྟུང་བ་འགྱུར་བ་མཆིས་སམ། ཡོད་དེ་གསོ་སྦྱོང་མི་བྱེད་པའོ་ཞེས་གསུངས་པའི་ཕྱིར་ཞེས་པ་མི་འཐད་དེ། འདོད་པའི་རིག་བྱེད་མ་ཡིན་པ་གྲུབ་པ་ལ་རིག་བྱེད་ངེས་པ་དགོས་པའི་ཕྱིར་ཏེ། མཛོད་འགྲེལ་ལས། གཉིས་ཀ་ཡང་མི་བྱེད་ན་འདོད་པ་ན་སྤྱོད་པའི་རྣམ་པར་རིག་བྱེད་མེད་པ། རྣམ་པར་རིག་བྱེད་མེད་པ་ཅན་ཡང་མེད་པས་ཇི་ལྟར་ན་དེ་གཉིས་ཀྱི་ལམ་དུ་འགྱུར་ཏེ་འདི་ལ་འབད་པར་བྱའོ་ཞེས་དང་། ཊཱི་ཀར་ཉེས་བྱས་ཡོངས་སུ་རྫོགས་པ་ཡིན་གྱི་ན་སྨད་ཀྱི་ནི་མ་ཡིན་ཏེ། ཁ་རྣམ་པར་འགྱུར་བ་ལ་སོགས་པའི་རྣམ་པར་རིག་བྱེད་དེ་དེ་ལ་ཡོད་པའི་ཕྱིར་ཞེས་གསུངས་པའི་ཕྱིར། ལུང་སྔ་མའི་དོན་ནི་རྣམ་པར་རིག་བྱེད་ཅུང་ཟད་ལས་མེད་པས་དམན་པ་ལ་དགག་སྒྲ་སྦྱོར་བའོ་ཞེས་གསུང་ངོ་། །བཞི་པ་མཚན་ཉིད་ལ་ལྟུང་བའི་མཚན་ཉིད་ནི། རབ་བྱུང་གིས་སྟོན་པས་བཅས་པ་ལས་འདས་པའི་ཁ་ན་མ་ཐོ་བའོ། །དེ་ཡང་ལྔ་ལས་ཕམ་པའི་མཚན་ཉིད། བསྙེན་པར་རྫོགས་པའི་རྒྱུད་ཀྱི་དངོས་གཞིའི་ལྟུང་བ་གང་ཞིག ཁྱོད་ཀྱི་དག་བྱེད་ཆད་པའི་བསླབ་པ་ལ་ལྟོས་པའི་རིགས་ཡིན་པ། དགེ་འདུན་ལྷག་མའི་མཚན་ཉིད་གང་ཞིག ངོ་བོའི་ཆ་ནས་དབྱུང་བས་ཁྱོད་ལས་བསླང་དུ་རུང་བའི་རིགས་ཡིན་པ། ཡང་ན་གང་ཞིག་ངོ་བོའི་ཆ་ནས་ཕམ་པ་ལས་ཡང་ཞིང་། སྤང་ལྟུང་སོགས་ལས་ལྕི་བའི་རིགས་ཡིན་པ། འོག་མ་རྣམས་ཀྱང་དེ་ལས་དཔགས་ཏེ་ཤེས་པར་བྱའོ། །ལྔ་པ་རྒྱུ་ནི། མི་ཤེས་པ་ལ་སོགས་པ་བཞི་སྟེ། བསྡུ་བར། དེ་ཡི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང་། །ཉོན་མོངས་མང་དང་མ་གུས་པ། །ཞེས་གསུངས་པ་ལྟར་རོ། །དྲུག་པ་གྲངས་ངེས་ནི། བཅས་པ་མི་འདྲ་བ་ལྔ་ཡོད་པའི་རྒྱུ་མཚན་གྱིས་སྡེ་ཚན་ལྔར་བསྟན་པ་ཡིན་ལ། བཅས་པ་ལྔར་འཇོག་པའི་རྒྱུ་མཚན་ཡང་དེ་ཙམ་གྱིས་དགག་བྱ་ཁེགས་པ་དང་། བསྒྲུབ་བྱ་སྒྲུབ་ནུས་པར་སངས་རྒྱས་བཅོམ་ལྡན་འདས་ཀྱིས་དགོངས་ནས་གསུངས་པའོ། །བདུན་པ་གོ་རིམ་ནི། སྡེ་ཚན་སྔ་མ་སྔ་མ་ཆད་པ་ལྕི་བའི་རིམ་པ་ཡིན་ལ་ཕམ་པ་བཞི་ནི་འདིར་བཅས་པའི་རིམ་པ་དང་། བསྐལ་པ་དང་པོའི་དུས་སུ་ལས་ལམ་འདི་དག་ཇི་ལྟར་འབྱུང་བའི་རིམ་པ་དང་། ཉོན་མོངས་པ་འདི་དག་གི་རིམ་པ་དང་། གཞན་ནི་ཕལ་ཆེར་བཅས་པའི་རིམ་པའོ། །བརྒྱད་པ་སྒྲ་དོན་ནི། འདིས་ལྟུང་བར་བྱེད་པས་ལྟུང་བ་དང་། དམ་པས་སྨད་པའི་ཕྱིར་ཁ་ན་མ་ཐོ་བ་དང་། ཚུལ་ཁྲིམས་ཀྱི་མི་མཐུན་ཕྱོགས་ཡིན་པས་འཆལ་བའི་ཚུལ་ཁྲིམས་དང་། འབྲས་བུ་ཡིད་དུ་མི་འོང་བ་འབྱིན་པའི་ཕྱིར་ཉེས་པ་ཞེས་བྱ་བ་ནི་རྣམ་གྲངས་སོ། །ཕམ་པའི་སྒྲ་དོན་ནི། གཞན་སྤང་བྱ་རྒྱལ་བར་བྱེད་ཅིང་གཉེན་པོ་ཕམ་པར་བྱེད་པར་འགྱུར་བའི་ཕྱིར་ཕམ་པའོ། །དགུ་པ་ཕན་ཡོན་ནི། བཅས་པའི་ཕན་ཡོན་སྔར་བཤད་ཟིན་ལ། བསླབ་པ་བསྲུངས་པའི་ཕན་ཡོན་ནི། བམ་ལྔར། ཚུལ་ཁྲིམས་ཀྱི་ཕན་ཡོན་རྣམ་པ་བཅུ་སྟེ། འགྱོད་པ་མེད་པའི་རིམ་གྱིས་མཆོག་ཏུ་དགའ་བ་སྔོན་དུ་འགྲོ་བའི་ཆོས་ཐོབ་པར་འགྱུར་བ་དང་། འགྱོད་པ་མེད་པར་འཆི་བའི་དུས་བྱེད་པར། ཕྱོགས་བཅུར་སྙན་པའི་སྒྲ་གྲག་པར། བདེ་བར་གཉིད་ལོག་ཅིང་བདེ་བར་སད་པར། གཉིད་ལོག་པ་ན་ལྷ་རྣམས་བསྲུང་བར། གཞན་ལས་སྡིག་པའི་བག་ཚ་བ་དང་འཇིགས་པ་དང་ཡ་ང་བ་མེད་པར། དགྲ་བོ་རྣམས་ཀྱིས་གླགས་ཞིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པའི་ཕན་འདོགས་པར། གནོད་སྦྱིན་དང་མི་མ་ཡིན་པ་དང་གདུག་པ་ཅན་གཉུག་མར་གནས་པ་རྣམས་ཀྱིས་གླགས་ཞིག་རྙེད་ན་ཡང་ཚུལ་ཁྲིམས་རྣམ་པར་དག་པའི་དབང་གིས་དེ་དག་བསྲུང་བ་ལ་སོགས་པའི་ཕན་འདོགས་པར། གཞན་ལས་ཆོས་གོས་ལ་སོགས་པ་དག་ཆོས་ཀྱིས་ཚེགས་ཆུང་ངུས་ཐོབ་པར། གང་དུ་སྐྱེ་བར་འདོད་པ་ལ་སོགས་པའི་སྨོན་ལམ་ཡང་དག་པར་འགྲུབ་པར་འགྱུར་བའོ་ཞེས་སོ། །བཅུ་པ་མ་བསྲུངས་པའི་ཉེས་དམིགས་ནི། སྟོན་པས་སྨོད་པ་དང་། ལྷས་དང་། མཁན་སློབ་ལ་སོགས་པ་གྲོགས་དམ་པས་དང་། དེས་མ་སྨད་ཀྱང་ཆོས་ཉིད་ཀྱིས་སྨད་པ་དང་། དམ་པའི་ཆོས་མ་ཐོས་པ་ཐོས་པར་མི་འགྱུར་བ་དང་། ཐོས་པ་བརྗེད་པ་དང་། མ་རྟོགས་པ་མི་རྟོགས་པ་དང་། ཕྱོགས་དང་ཕྱོགས་མཚམས་རྣམས་སུ་སྡིག་པའི་སྒྲ་གྲག་པ་དང་། འགྱོད་པ་དང་བཅས་ཏེ་འཆི་བར་འགྱུར་བ་དང་། ངན་སོང་གསུམ་དུ་སྐྱེ་བ་ལ་སོགས་པའོ། །བཞི་པ་རྟེན་གྱི་ཡན་ལག་ནི། སྡོམ་པ་གསོར་རུང་ཡན་ཆད་དང་ལྡན་པ་དང་། བསླབ་པ་བཅས་པ་དང་འབྲེལ་བ་དང་། ཤེས་པ་རང་བཞིན་དུ་གནས་པ་གསུམ་ནི་ཐམས་ཅད་ཀྱི་ཡན་ལག་ཡིན་ལ། གཟུགས་གཞན་དུ་མ་བསྒྱུར་བ་དང་། མི་སྣང་བར་མ་བྱས་པ་དང་། མཚན་མ་གྱུར་པ་གསུམ་ནི་འགའ་ཞིག་གི་ཡན་ལག་ཡིན་ནོ།། ༈ །།ལྔ་པ་བསྡུས་པའི་དོན་བཤད་པ་ནི། རྣམ་པར་འབྱེད་པའི་དཀྱུས་འདི་རྣམས་ལ་རྣམ་པ་གསུམ་གྱིས་ས་གཅོད་པར་མཛད་དེ། ལྟུང་བ་རྣམ་པར་གཞག་པ་དང་། ལྟུང་བ་མེད་པ་དང་། བསླབ་བྱའོ། །དང་པོ་ནི། དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་རྣམ་པར་གཞག་པ་སྟེ། བམ་ལྔར། ལྟུང་བ་རྣམ་པར་གཞག་པ་ནི་བསམ་པ་དང་སྦྱོར་བའི་སྒོ་ནས་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་ཅི་རིགས་པར་རྣམ་པར་གཞག་པའོ་ཞེས་པ་ལྟར་རོ། །དེ་ལ་མདོར་བསྟན་པ་དང་། རྒྱས་པར་བཤད་པ་གཉིས་སམ། ཡན་ལག་གི་མཚན་ཉིད་དང་། སེལ་བ་གཉིས་ཅི་རིགས་པས་འཆད་དོ། །ཡན་ལག་གི་མཚན་ཉིད་ནི་བཞི་སྟེ། གཞི་དང་། བསམ་པ་དང་། སྦྱོར་བ་དང་། མཐར་ཐུག་གི་ཡན་ལག་གོ །གཞིའི་ཡན་ལག་ལ་ཡུལ་དང་རྟེན་ལ་སོགས་པ་དུ་མ་ཡོད་ཅིང་། བསམ་པའི་ཡན་ལག་ལ་ཀུན་སློང་དང་འདུ་ཤེས་གཉིས་སོ། །འདུ་ཤེས་དང་སྦྱོར་བའི་ཡན་ལག་མ་ཚང་བ་ལའང་དངོས་གཞི་འབྱུང་བ་ཡོད་དོ། །གཉིས་པ་སེལ་བ་ལ་གསུམ་སྟེ། དབྱེ་བ། མཚན་ཉིད། སེལ་བ་ལ་ཅིར་འགྱུར་བའོ། །དང་པོ་ལ་ཐུན་མོང་བའི་སེལ་བ་དང་། ཐུན་མོང་མ་ཡིན་པའི་སེལ་བ་གཉིས། དང་པོ་ལ་བཞིར་ཡོད་དེ། སྡོམ་པ་གཏན་ནས་མ་བླངས་པ་ལྟ་བུའི་བསླབ་པའི་ཡན་ལག་གི་སེལ་བ་དང་། སྨྱོ་བ་ལ་སོགས་པ་རང་བཞིན་དུ་གནས་པའི་སེལ་བ་དང་། རང་རང་གི་ཀུན་སློང་མེད་པ་བསམ་པའི་སེལ་བ་དང་། རང་རང་གི་ལས་དང་པོ་པ་ནི་བཅས་པའི་སེལ་བའོ། །བསླབ་རྒྱུན་གཅིག་པ་ལྟུང་བ་དངོས་གཞི་ཀུན་གྱི་ཐུན་མོང་གི་ཡན་ལག་ཡིན་ཀྱང་། བསླབ་རྒྱུན་ཐ་དད་པ་ལྟུང་བ་དངོས་གཞི་ཀུན་གྱི་ཐུན་མོང་གི་སེལ་བ་མ་ཡིན་ཏེ། བསླབ་རྒྱུན་ཐ་དད་པའི་སེལ་བ་དེ་ཁང་པ་ཁང་ཆེན་གྱི་ལྟུང་བ་ལྟ་བུ་སྦྱོར་བ་རྒྱུད་ལྡན་རྣམས་ལ་འཇུག་ཀྱང་རེག་པའི་ལྷག་མ་ལྟ་བུ་སྦྱོར་བ་རྒྱུད་མི་ལྡན་རྣམས་ལ་མི་འཇུག་སྟེ། བསླབ་རྒྱུན་སྔ་མ་ལ་བུད་མེད་ལ་རེག་པའི་སྦྱོར་བ་བྱས་ནས་ཁྱིམ་པར་བབ། སླར་བསྙེན་པར་རྫོགས་པ་བྱས་པའི་ཚེ་སྔར་རེག་པའི་དབང་གིས་བསླབ་རྒྱུན་ཕྱི་མ་ལ་རེག་པའི་ན་སྨད་བསྐྱེད་པ་མེད་པའི་ཕྱིར། གཉིས་པ་ཐུན་མོང་མ་ཡིན་པའི་སེལ་བ་ལ་བཞི་སྟེ། གཞིའི་ཡན་ལག་མ་ཚང་བ་གཞིའི་སེལ་བ། བསམ་པའི་ཡན་ལག་མ་ཚང་བ་བསམ་པའི་སེལ་བ། སྦྱོར་བའི་ཡན་ལག་མ་ཚང་བ་སྦྱོར་བའི་སེལ་བ། མཐར་ཐུག་གི་ཡན་ལག་མ་ཚང་བ་མཐར་ཐུག་གི་སེལ་བའོ། །གཉིས་པ་སེལ་བའི་མཚན་ཉིད་ནི། ལྟུང་བ་རང་རང་གི་དངོས་གཞི་རྫོགས་པར་བསྐྱེད་པ་ལ་ངེས་གཟུང་དུ་དགོས་པའི་ཡན་ལག་མ་ཚང་བའོ། །གཅིག་ལ་མཚོན་ན་མ་བྱིན་ལེན་གྱི་ཕམ་པ་བསྐྱེད་པ་ལ་ངེས་གཟུང་དུ་དགོས་པའི་ཡན་ལག་མ་ཚང་བ་དེ་མ་བྱིན་ལེན་གྱི་ཕམ་པའི་སེལ་བའི་མཚན་ཉིད། གཞན་ལ་འགྲེའོ། །གསུམ་པ་སེལ་བ་ལ་ཅིར་འགྱུར་བ་ལ་གཉིས་ཏེ། དངོས་དང་། དེ་ལས་འཕྲོས་པའི་སྦོམ་པོའི་དོན་བཤད་པའོ། །དང་པོ་ལ་བཞིར་ཡོད་དེ། ན་སྨད་དུ་འགྱུར་བ། ཆེས་ན་སྨད་དུ་འགྱུར་བ། ལྟུང་བ་གཞན་དུ་འགྱུར་བ། ལྟུང་མེད་དུ་འགྱུར་བའོ། །དང་པོ་ནི། མ་བྱིན་ལེན་གྱི་ཕམ་པ་བསྐྱེད་པའི་ཡན་ལག་མ་ཚང་བ་མིའི་རྫས་རིན་ཐང་མ་ཚང་བ་ལྟ་བུའམ། སྐྱོན་ནས་སྨྲ་བའི་ལྟུང་བྱེད་བསྐྱེད་པའི་ཡན་ལག་མ་ཚང་བ་མཚན་མཐུན་མ་ཚང་བ་ལྟ་བུ་ཡན་ལག་གཅིག་མ་ཚང་བ་ལ་ལྟུང་བ་ན་སྨད་དུ་འགྱུར་ཏེ། དགག་བྱ་མ་རྫོགས་པའི་ཕྱིར། ཁྱབ་པ་ཡོད་དེ། མ་ཆོག་པ་རྐུས་ནའོ་ཞེས་དང་། འོག་མ་དག་ལ་ནི་གཞན་ལ་ན་སྨད་པ་ཉིད་དོ། །ཞེས་གསུངས་པའི་ཕྱིར། དེ་ཡང་ཕམ་ལྷག་གི་ན་སྨད་སྦོམ་པོ་དང་། ལྟུང་བྱེད་སོར་བཤགས་གསུམ་གྱི་ན་སྨད་ཉེས་བྱས། ཉེས་བྱས་ཀྱི་ན་སྨད་ཉེས་བྱས་ཕྲ་མོར་འགྱུར་ཏེ། ཁ་ན་མ་ཐོ་བ་ན་སྨད་པ་དག་གི་ཆ་ཉིད་ནི་ན་སྨད་པ་ཉིད་དོ་ཞེས་གསུངས་པའི་ཕྱིར། གཉིས་པ་ཆེས་ན་སྨད་ནི། མ་བྱིན་ལེན་གྱི་ཕམ་པའི་སྐབས་སུ་མི་མ་ཡིན་པའི་རྫས་རིན་ཐང་མ་ཚང་བ་དང་། སྐྱོན་སྨྲའི་ལྟུང་བྱེད་ཀྱི་སྐབས་སུ་ལྟ་བ་མཐུན་པ་དང་མཚན་མཐུན་པའི་ཡན་ལག་གཉིས་མ་ཚང་བ་ལ་ཆེས་ན་སྨད་དུ་འགྱུར་ཏེ། དགག་བྱ་ཆེས་མ་རྫོགས་པའི་ཕྱིར། ཁྱབ་སྟེ། དུ་མ་མ་ཚང་བ་ལ་ནི་དེ་བས་ཀྱང་ངོ་ཞེས་གསུངས་པའི་ཕྱིར། ཕམ་ལྷག་གཉིས་ཀྱི་ཆེས་ན་སྨད་ལ་ཉེས་བྱས། སྦོམ་པོ་ལྟུང་བྱེད་སོར་བཤགས་གསུམ་གྱི་ཆེས་ན་སྨད་ལ་ཉེས་བྱས་ཕྲ་མོ། ཉེས་བྱས་ཀྱི་ཆེས་ན་སྨད་ལ་ཉེས་བྱས་ཕྲ་མོའི་ཕྲ་མོ། ཉེས་བྱས་ཕྲ་མོའི་ཆེས་ན་སྨད་ལ་ཉེས་བྱས་ཆེས་ཕྲ་མོའི་ཕྲ་མོར་འགྱུར་ཏེ། སྒྲུབ་བྱེད་སྔར་བཞིན་ནོ། །ཆེས་ན་སྨད་དུ་འགྱུར་བ་ལ་ཡན་ལག་གཉིས་མ་ཚང་བ་ངེས་པར་མི་དགོས་ཏེ། མི་ཡུལ་དུ་དགོས་པའི་འཁྲིག་ཚིག་བསྙེན་བཀུར་རེག་པའི་ལྷག་མའི་སྐབས་སུ་དུད་འགྲོ་མོ་ལ་དེ་བྱས་ན་ཡང་ཡན་ལག་གཅིག་མ་ཚང་ཡང་ཆེས་ན་སྨད་དུ་འགྱུར་བའི་ཕྱིར་ཏེ། མི་ལ་དུད་འགྲོ་ཡང་ངོ་ཞེས་གསུངས་པའི་ཕྱིར། གསུམ་པ་ལྟུང་བ་གཞན་དུ་འགྱུར་བ་ལ་གསུམ་སྟེ། སྡེ་ཚན་གཞན་དུ་འགྱུར་བ། སྡེ་ཚན་གཞན་དུ་མ་གྱུར་ཀྱང་བཅས་པ་གཞན་དུ་འགྱུར་བ། གནས་སྐབས་གཞན་དུ་འགྱུར་བའོ། །དང་པོ་ནི། མི་གསོད་པའི་ཡན་ལག་མ་ཚང་བ་དུད་འགྲོ་གསོད་ན་ཕམ་པའི་སྡེ་ཚན་ལས་གཞན་ལྟུང་བྱེད་བསྐྱེད་པ་ལྟ་བུའོ། །གཉིས་པ་ནི། གཞི་མེད་ཀྱི་སྐུར་འདེབས་ཀྱི་ལྷག་མའི་ཡན་ལག་མ་ཚང་བ་སྦྱོར་བ་མི་གསལ་བས་སྐུར་པ་བཏབ་ན་བག་ཙམ་གྱིས་ལྷག་མ་བསྐྱེད་པ་ལྟ་བུའོ། །གསུམ་པ་ནི། རེག་པའི་ལྷག་མའི་ཡན་ལག་མ་ཚང་བ་རེག་པའི་བདེ་བ་མྱོང་འདོད་མེད་པར་རེག་འདོད་ཙམ་གྱིས་བུད་མེད་ལ་རེག་པས་ལྟུང་བ་རྣམ་གཞག་གི་གནས་སྐབས་ལས་གཞན་བསླབ་བྱའི་ཉེས་བྱས་སུ་འགྱུར་བ་ལྟ་བུ་ཡིན་ཏེ། དེས་ལྟུང་བ་རྣམ་གཞག་གི་ལྟུང་བ་མི་བསྐྱེད་པར་བསླབ་བྱའི་ཉེས་བྱས་བསྐྱེད་པའི་ཕྱིར། བཞི་པ་ལྟུང་མེད་དུ་འགྱུར་བ་ལ་བཞི་སྟེ། ལྟུང་བའི་དངོས་གཞི་མེད་པ་ལ་དགོངས་ནས་ལྟུང་བ་མེད་པ། ལྟུང་བ་རྣམ་གཞག་གི་ལྟུང་བ་མེད་པ་ལ་དགོངས་ནས་ལྟུང་བ་མེད་པ། སྐབས་དེར་གཏོགས་ཀྱི་ལྟུང་བ་མེད་པ་ལ་དགོངས་ནས་ལྟུང་བ་མེད་པ། ལྟུང་བ་གཏན་མེད་པའི་ལྟུང་བ་མེད་པའོ། །དང་པོ་ནི། ལུང་འདུལ་བྱེད་ལས། ཚེ་དང་ལྡན་པ་ཚུར་ཤོག་རྫས་ཉུང་ངུ་ཉུང་ངུ་ནས་བརྐུས་ན་ལྟུང་བ་མེད་དོ་ཞེས་གསུངས་པ་ལྟ་བུའོ། །གཉིས་པ་ནི། ཉེ་སྡེས། གསོད་འདོད་མེད་པར་མངལ་བླུག་པ་ལ་ལུང་རྣམ་འབྱེད་ལས་ཉེ་སྡེ་ལ་ལྟུང་བ་མེད་དོ་ཞེས་གསུངས་པ་ལྟ་བུའོ། །གསུམ་པ་ནི། ལྷུང་བཟེད་དོ་གསུམ་ཙམ་ལས་ལྷག་པ་ལེན་པའི་སྐབས་སུ་འབྲུ་རྗེན་པ་ལྷུང་བཟེད་དོ་གསུམ་ཙམ་ལས་ལྷག་པ་ལེན་པ་ལ་ལྟུང་བ་མེད་དེ། ལས་སུ་མ་བྱས་པ་ལ་ཡང་ངོ་ཞེས་ལྟུང་མེད་དུ་གསུངས་པ་ལྟ་བུའོ། །བཞི་པ་ལ་གཉིས་ཏེ། རང་བཞིན་དང་བཅས་པ་མཐའ་དག་གི་ལྟུང་བ་མེད་པ་དང་། བཅས་པ་འབའ་ཞིག་གི་ལྟུང་བ་མེད་པའོ། །དང་པོ་ནི། ཤེས་པ་རང་བཞིན་དུ་མི་གནས་པ་དང་། རང་རང་གི་ཀུན་སློང་མེད་པ་དང་། རང་རང་གི་ལས་དང་པོ་པ་དང་། བསླབ་པའི་སེལ་བ་སྡོམ་པ་གཏན་མ་བླངས་པ་ལྟ་བུའོ། །གཉིས་པ་ལ་བཞི་སྟེ། དགག་བྱ་ཉེས་དམིགས་མེད་པ་དང་། རྣམ་གཞག་བག་ཡངས་དང་འབྲེལ་བས་དང་། འགལ་རྐྱེན་བར་ཆད་དང་ལྡན་པས་དང་། སྒྲུབ་པར་མི་ནུས་པ་ཕྱོགས་གཅིག་ལ་ཞུགས་པས་ལྟུང་བ་མེད་པའོ། །ལྟུང་མེད་བཞི་པོ་བཅས་པ་འབའ་ཞིག་གི་སྐབས་སུ་ཡིན་གྱི། རང་བཞིན་གྱི་ཁ་ན་མ་ཐོ་བའི་སྐབས་སུ་ལྟུང་མེད་བཞི་པོ་མི་སྲིད་པའི་ཕྱིར་ཏེ། རང་བཞིན་གྱི་ཁ་ན་མ་ཐོ་བ་ངོ་བོ་ཉིད་ཀྱི་དགག་བྱར་གྱུར་པས་དགག་བྱ་ཉེས་དམིགས་མེད་པས་ལྟུང་བ་མི་སྲིད་པའི་ཕྱིར་དང་། སྲོག་ལ་བབས་ཀྱང་གནང་བ་མེད་པས་རྣམ་གཞག་བག་ཡངས་དང་འབྲེལ་བའི་ལྟུང་བ་མེད་པ་ཡང་མི་སྲིད་པའི་ཕྱིར། རང་བཞིན་གྱི་ཁ་ན་མ་ཐོ་བ་དེ་ཉིད་ཚུལ་ཁྲིམས་ཀྱི་བར་ཆད་ཡིན་པས་འགལ་རྐྱེན་བར་ཆད་སྤོང་བའི་དོན་དུ་གནང་བ་མི་སྲིད་པའི་ཕྱིར། རང་བཞིན་གྱི་ཁ་ན་མ་ཐོ་བ་སྤོང་བའི་དོན་དུ་སྲོག་འདོར་བར་གསུངས་པས་སྒྲུབ་པར་མི་ནུས་པ་ཕྱོགས་གཅིག་ལ་ཞུགས་པས་ལྟུང་བ་མེད་པ་ཡང་མི་སྲིད་པའི་ཕྱིར། དེ་ལ་དང་པོ་དགག་བྱ་ཉེས་དམིགས་མེད་པས་ལྟུང་བ་མེད་པ་ནི། ཉི་མ་གཅིག་ལ་རྡོའམ་སོ་ཕག་རིམ་པ་གསུམ་ལས་ལྷག་པ་རྩིག་པ་དང་། བྱེ་མ་འབའ་ཞིག་བརྐོ་བ་ལ་ལྟུང་མེད་དུ་གསུངས་པ་ལྟ་བུའོ། །དེས་ལྟུང་བ་མི་བསྐྱེད་པ་ནི་བཅས་པ་རྣམ་གཞག་གི་དགག་བྱ་མེད་པས་ལྟུང་བ་བསྐྱེད་པའི་བཅས་པ་མ་མཛད་པའོ། །གཉིས་པ་ལ་གཉིས་ཏེ། བག་ཡངས་ཆེན་པོ་དང་འབྲེལ་བའི་ལྟུང་བ་མེད་པ་དང་། བག་ཡངས་ཁ་འཐོར་བ་དང་འབྲེལ་བའི་ལྟུང་བ་མེད་པའོ། །དང་པོ་ལ་ལྔ་སྟེ། ལུང་གང་ལས་གསུངས་པ། གཞི་གང་ལ་བྱ་བ། ཆེད་དུ་བྱ་བ་གང་གི་ཕྱིར་བྱ་བ། ཆོ་ག་གང་གིས་བྱ་བ། སྡེ་པ་གང་གི་ལུགས་ཡིན་པའོ། །དང་པོ་ནི། ལུང་ཕྲན་ཚེགས་ལས། དགེ་སློང་དག་བསླབ་པའི་གཞི་ཕྲ་མོ་དང་ཕྲན་ཚེགས་གང་ཡིན་པ་དེ། དགེ་འདུན་ཚོགས་ལ་སྐབས་དབྱེ་ཞིང་བདེ་བ་ལ་རེག་པར་གནས་པར་བྱའོ། །ཞེས་གསུངས་སོ། །གཉིས་པ་ནི། བསླབ་པའི་གཞི་ཕྲ་མོ་རྣམས་ལ་བྱ་བ་ཡིན་ལ། དགྲ་བཅོམ་པ་འོད་སྲུང་གིས་དོག་མཐའ་གཞི་བསྡུས་ཀྱི་ཉེས་བྱས་ཁོ་ན་དང་། ཡང་མཐའ་ཕམ་ལྷག་མན་ལ་མཛད་ཀྱང་། རང་བཞིན་གྱི་ཁ་ན་མ་ཐོ་བའི་སྤང་ལྟུང་མན་ལ་བག་ཡངས་མེད་དོ། །དེས་ན་ཆང་མ་གཏོགས་པའི་སྤང་ལྟུང་མན་གྱི་བཅས་པའི་ཁ་ན་མ་ཐོ་བ་རྣམས་ལ་བྱ་སྟེ། རྣམ་པར་གཏན་ལ་དབབ་པ་བསྡུ་བ་ལས། ལྟུང་བ་ཕྲན་ཚེགས་ཞེས་བྱ་བ་ནི་རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་སོ་ཞེས་གསུངས་སོ། །གསུམ་པ་ལ་བཞི་སྟེ། རྣམ་པར་གཏན་ལ་དབབ་པ་བསྡུ་བ་ལས། དགེ་འདུན་གྱི་དབྱེན་སྤང་བ་དང་། གང་ཟག་རླབས་པོ་ཆེ་བསྟན་པ་ལ་འཇུག་པའི་དོན་དང་། བསྟན་པ་འཕེལ་བར་བྱ་བ་དང་། དཀའ་བས་འཚོ་བ་སྤང་བའོ། །ཞེས་གསུངས་སོ། །དེའི་དོན་ཡང་དང་པོ་ནི། དགེ་སློང་འགའ་ཞིག་ལ་ལྟུང་བ་བྱུང་བ་ལ། རང་ཉིད་ཀྱིས་མ་བྱུང་བར་འདུ་ཤེས། ཁ་ཅིག་གིས་བྱུང་བར་ཤེས་ཏེ་གླེངས་པས་འཐབ་རྩོད་དུ་འགྱུར་བ་ཞི་བའི་ཕྱིར་དང་། གཉིས་པ་ནི་གང་ཟག་རིགས་རྒྱུད་མཐོན་པོ་བསྟན་པ་ལ་ཞུགས་ན་ཕན་འདོགས་ཆེན་པོ་འབྱུང་བ་བསླབ་པའི་གནས་ཕྲ་མོ་བསྲུང་མི་ནུས་པ་དེ་བསྟན་པ་ལ་འཇུག་པ་དང་། གསུམ་པ་དང་བཞི་པ་ནི། དུས་ཀྱི་མཐའ་སྙིགས་མ་ལྔ་བདོ་བའི་དུས་སུ་རབ་ཏུ་བྱུང་བ་རྣམས་ཟས་གོས་མ་རྙེད་པར་འཚོ་དཀའ་བར་འགྱུར་བ་དང་། བསྟན་པ་སྙིགས་མའི་དུས་སུ་བསླབ་པ་ཕྲ་མོ་རྣམས་བསྲུང་དགོས་པས་བསྟན་པ་ལ་ཞུགས་པ་རྣམས་སྒྱིད་ལུགས་ཅིང་མ་ཞུགས་པ་རྣམས་འཇིག་ནས་གསར་དུ་འཇུག་པ་མེད་པར་འགྱུར་བས་ཉེས་དམིགས་དེ་རྣམས་སྤང་བའི་དོན་དུ་དགེ་འདུན་ཚོགས་ནས་བསླབ་པའི་གཞི་ཕྲ་མོ་དང་ཕྲན་ཚེགས་འགའ་ཞིག་མ་བསྲུངས་ཀྱང་ཉེས་པ་མི་འབྱུང་བའི་ཕྱིར་དུ་བག་ཡངས་སུ་བྱེད་དོ། །བཞི་པ་ཆོ་ག་གང་གིས་བྱ་བ་ནི། གསོལ་བཞིའི་ལས་ཀྱིས་བྱ་བ་ཡིན་ཏེ། དེ་ཉིད་ལས། གསོལ་བ་དང་བཞིའི་ལས་ཀྱིས་བསླབ་པའི་གཞིའི་ཕྲན་ཚེགས་ལ་བག་ཡངས་སུ་བྱེད་པའོ་ཞེས་གསུངས་པའི་ཕྱིར་རོ། །ཆོ་ག་འདི་ནི་རྒྱ་གར་མཁན་པོ་སྣ་སྒ་པ་ནས་བརྒྱུད་པ་ལས་འབྱུང་ངོ་། །ལྔ་པ་སྡེ་པ་གང་གི་ལུགས་ཡིན་པ་ནི། ཐམས་ཅད་ཡོད་པ་སྨྲ་བའི་ལུགས་ཡིན་གྱི། སྡེ་པ་གཞན་འགའ་ཞིག་ནི་མི་འདོད་དེ། བཙུན་པ་ངོ་བོ་ཉིད་མེད་པས་མཛད་པའི་འགྲེལ་པ་ལས། ཐམས་ཅད་ཡོད་པར་སྨྲ་བའི་སྡེ་པ་ལ་ནི་བསླབ་པའི་གཞི་ཕྲན་ཚེགས་ཕྲ་མོ་ཁ་ཅིག་ལ་གལ་ཏེ་དགེ་འདུན་ཚོགས་པས་བག་ཡངས་སུ་བྱས་ན་བག་ཡངས་སུ་བྱས་པ་ཡིན་ནོ་ཞེས་གྲག་གོ །འདིར་ཡང་གྲག་པ་ཙམ་དུ་ཟད་ཀྱི། བསླབ་པའི་གཞི་གང་ལ་ཡང་བག་ཡངས་སུ་དགེ་འདུན་གྱིས་བྱས་པའམ་བྱེད་པ་ནི་མེད་དོ་ཞེས་གསུངས་སོ། །གཉིས་པ་བག་ཡངས་ཁ་འཐོར་བ་དང་འབྲེལ་བས་ལྟུང་བ་མེད་པ་ནི། སྲ་བརྐྱང་བཏིང་ན་འཆང་འབྲལ་འཇོག་གསུམ་གྱི་ལྟུང་བ་དང་། ཁང་པ་ཁང་ཆེན་གྱི་གནང་བ་བྱིན་ན་དེ་དག་བརྩིགས་ཀྱང་ཉེས་པ་མི་འབྱུང་བ་ལྟ་བུའོ། །གསུམ་པ་ལ་གཉིས་ཏེ། གཙོ་བོའི་བར་ཆད་དང་། གཙོ་བོ་མ་ཡིན་པའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ལ་གཉིས་ཏེ། རང་གི་གཙོ་བོའི་བར་ཆད་དང་ལྡན་པས་ལྟུང་བ་མེད་པ་དང་། གཞན་གྱི་གཙོ་བོའི་བར་ཆད་དང་ལྡན་པས་ལྟུང་བ་མེད་པའོ། །དང་པོ་ལ་གསུམ་སྟེ། རང་གི་སྲོག་གི་དང་། རང་གི་ཚུལ་ཁྲིམས་ཀྱི་དང་། རང་གི་དགེ་སྦྱོང་ཚུལ་གྱི་བར་ཆད་དང་ལྡན་པས་ལྟུང་བ་མེད་པའོ། །དང་པོ་ནི། དགེ་སློང་གིས་བཅས་པ་འགའ་ཞིག་བསྲུངས་ན་རང་གི་སྲོག་གི་བར་ཆད་དུ་འགྱུར་ལ། མ་བསྲུངས་པར་གློད་ན་སྲོག་གི་བར་ཆད་དུ་མི་འགྱུར་བ་ནང་འདོམས་ན་རང་གི་སྲོག་གི་བར་ཆད་སྤོང་བའི་དོན་དུ་ཆང་འཐུང་བ་སོགས་འགའ་ཡར་མ་གཏོགས་བཅས་པའི་ཁ་ན་མ་ཐོ་བ་རྣམས་གནང་བ་ཡིན་ཏེ། ཕྲན་ཚེགས་ལས། རང་བཞིན་གྱི་ཁ་ན་མ་ཐོ་བ་དང་བཅས་པ་དག་མ་གཏོགས་པ་གཞན་གྱིས་ནད་པ་བསྐྱང་བར་བྱའོ་ཞེས་གསུངས་པའི་ཕྱིར། གཉིས་པ་ལ་གཉིས་ཏེ། དངོས་དང་། ཞར་ལས་བྱུང་བའོ། །དང་པོ་ནི། དགེ་སློང་གིས་བཅས་པ་འགའ་ཞིག་བསྲུང་བ་དང་རང་བཞིན་གྱི་ཁ་ན་མ་ཐོ་བ་བསྲུང་བ་ཐབས་གཞན་མེད་པར་ནང་འདོམས་ན་ཆང་འཐུང་བ་སོགས་འགའ་རེ་མ་གཏོགས་པའི་བཅས་རྐྱང་ཐམས་ཅད་གནང་སྟེ། སྲོག་གི་བར་ཆད་སྤོང་བའི་དོན་དུ་བཅས་པ་གནང་བ་ནི་གང་ཞིག སྲོག་གི་བར་ཆད་སྤོང་བ་བས་རང་བཞིན་གྱི་ཁ་ན་མ་ཐོ་བ་སྤོང་བ་དགོས་པ་ཆེ་བའི་ཕྱིར་ཏེ། ལུང་ཕྲན་ཚེགས་ལས། སྲོག་ཉིད་སྤང་བར་བྱ་ཞིང་སྲོག་ཆགས་གསད་པར་མི་བྱའོ། །ཞེས་གསུངས་པའི་ཕྱིར། གཉིས་པ་ཞར་ལས་བྱུང་བ་ལ་གཉིས་ཏེ། རང་བཞིན་གྱི་ཁ་ན་མ་ཐོ་བ་ནང་འདོམས་ན་ཇི་ལྟར་བྱ་བ། བཅས་པ་ཆེ་ཆུང་དང་དགག་དགོས་ཆེ་ཆུང་འབྲེལ་མ་འབྲེལ་བསམ་པའོ། །དང་པོ་ནི། ཁ་ཅིག་མི་གསོད་པ་དང་། དུད་འགྲོ་གསོད་པ་དང་། རང་ཉིད་གསོད་པ་གསུམ་འདོམས་ན། དུད་འགྲོ་གསོད་པ་གནང་སྟེ། ལྟུང་བ་ཆེ་བའི་ངོར་ཆུང་བ་གནང་བ་ཡོད་པ་གང་ཞིག བདག་ཉིད་གསོད་ན་སྦོམ་པོ་བསྐྱེད། མི་གསོད་ན་ཕམ་པ་བསྐྱེད། དུད་འགྲོ་གསོད་ན་ལྟུང་བྱེད་ལས་མི་བསྐྱེད་ཅིང་ཆུང་བ་བཤགས་པས་འདག་པའི་ཕྱིར་ཞེས་ཟེར་བ་མི་འཐད་དེ། རང་བཞིན་གྱི་ཁ་ན་མ་ཐོ་བ་ལ་གནང་བ་མེད་པའི་ཕྱིར། དེའི་ཚེ་བདག་ཉིད་གསོད་དུ་འཇུག་པར་བྱ་བ་ཡིན་ཏེ། ལུང་ལས། སྲོག་ཉིད་སྤང་བར་བྱ་ཞིང་སྲོག་ཆགས་གསད་པར་མི་བྱའོ་ཞེས་གསུངས་པའི་ཕྱིར། དུད་འགྲོ་གསོད་པ་གནང་བ་ཡང་མི་འཐད་དེ། དེའི་ལྟུང་བ་བཤགས་དགོས་པའི་ཕྱིར། གཞན་ཡང་། དེ་གསུམ་འདོམས་པ་ན་བདག་ཉིད་གསོད་པས་སྦོམ་པོ་བསྐྱེད་པ་མ་ཡིན་པར་ཐལ། དེའི་ཚེ་རང་ཉིད་གསོད་འདོད་ཀྱིས་རང་ཉིད་གསོད་པའི་སྦྱོར་བ་ལ་ཞུགས་པ་མ་ཡིན་གྱི། ཚུལ་ཁྲིམས་བསྲུང་འདོད་ཀྱི་བསམ་པས་བདག་ཉིད་ཀྱི་སྲོག་འདོར་བ་ལ་ཞུགས་པ་ཡིན་པའི་ཕྱིར། བཅས་པའི་ཁ་ན་མ་ཐོ་བ་ནང་འདོམས་ན་བཅས་པ་ཆེ་བའི་ངོར་ཆུང་བ་གནང་བས་ཁྱབ་བམ་མ་ཁྱབ་ཅེ་ན། མ་ཁྱབ་སྟེ། ཆུང་བའི་ངོར་ཆེ་བ་གནང་བ་ཡོད་པའི་ཕྱིར་ཏེ། དགེ་ཚུལ་གྱི་དབྱར་རལ་བའི་ཉེས་པ་སྤོང་བའི་དོན་དུ་ནུབ་ལྷག་ཉལ་གྱི་ལྟུང་བྱེད་གནང་བ་ཡོད་པའི་ཕྱིར་ཏེ། དགེ་ཚུལ་དང་ལྡན་པས་སོ་ཞེས་གསུངས་པའི་ཕྱིར། གཉིས་པ་ལ་ཁ་ཅིག་བཅས་པ་ཆེ་ཆུང་དང་དགག་དགོས་ཆེ་ཆུང་ལ་ངེས་པ་མེད་དེ། དགག་བྱ་ཆེ་ལ་བཅས་པ་ཆུང་བ་ཡང་ཡོད། དགག་བྱ་ཆུང་ལ་བཅས་པ་ཆེ་བ་ཡང་ཡོད་པའི་ཕྱིར། དང་པོ་གྲུབ་སྟེ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ལ་སྡིག་པ་མཚམས་མེད་འབྱུང་བས་གདགས་བྱ་ཆེ་ལ། ལྟུང་བ་ནི་ན་སྨད་པ་ལས་མི་བསྐྱེད་པས་བཅས་པ་ཆུང་བ་ཡིན་པའི་ཕྱིར། དགག་བྱ་ཆུང་ལ་བཅས་པ་ཆེ་བ་ཡང་ཡོད་དེ། དགེ་སློང་མས་ཟླ་མོའི་ཕམ་པ་འཆབ་པ་དགག་བྱ་ཆུང་བ་གང་ཞིག བཅས་པ་ཆེ་བ་ཡིན་པའི་ཕྱིར། དང་པོ་གྲུབ་སྟེ། ཟླ་མོའི་ལྟུང་བ་འཆབ་པ་ལ་ཉེས་པ་ཆེར་མེད་པའི་ཕྱིར། གཉིས་པ་གྲུབ་སྟེ། དེ་ལ་ཕམ་པ་བཅས་པའི་ཕྱིར་ཞེས་ཟེར་ན། དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བ་ནི་བྱ་བ་དེ་འབྲེལ་གྱི་དགག་བྱ་ཆེ་ཡང་བཅས་པ་རྣམ་འཇོག་གི་དགག་བྱ་ཆེ་བ་མ་ཡིན་ཏེ། དེ་བཞིན་གཤེགས་པ་མཐོང་ན་དད་པ་སྐྱེ་བ་འབྱུང་ཉེ། ངན་སེམས་ཀྱི་ཁྲག་ཕྱུང་བ་བྱུང་རིང་ཞིང་འབྲེལ་ཆུང་བས་དགག་བྱ་གནས་སྐབས་ཀྱི་སྒོ་ནས་མ་རྫོགས་པའི་ཕྱིར་དང་། དགེ་སློང་མའི་འཆབ་པའི་ཕམ་པ་བྱ་བ་དེ་འབྲེལ་གྱི་དགག་བྱ་ཆུང་ཡང་བཅས་པ་རྣམ་འཇོག་གི་དགག་བྱ་ཆེ་བ་ཡིན་ཏེ། བུད་མེད་ཆགས་པའི་སྲེག་པ་ཆེ་བས་འཆབ་པའི་ཕམ་པ་མ་བཅས་ན། གཅིག་གིས་གཅིག་གི་ལྟུང་བ་གསང་སྟེ་དགེ་སློང་མ་ཀུན་མ་དག་པར་འགྱུར་བའི་ཕྱིར། དེས་ན་བཅས་པ་རྣམ་འཇོག་གི་དགག་བྱ་ཆེ་ཆུང་དང་ལྟུང་བ་ཆེ་ཆུང་ཡང་འབྲེལ་ལ་བཅས་པ་ཆེ་ཆུང་ཡང་འབྲེལ་ལོ། །གསུམ་པ་རང་གི་དགེ་སྦྱོང་ཚུལ་གྱི་བར་ཆད་དང་ལྡན་པས་ལྟུང་བ་མེད་པ་ནི། བྱིན་ལེན་ལ་སོགས་པའི་བཅས་པ་བསྲུང་བ་དང་། དབེན་པར་གནས་ཏེ་བདག་མེད་བསྒོམས་པ་ལས་ལམ་གོང་མ་སྐྱེ་བའི་ཐབས་གཞན་མེད་པར་ནང་འདོམས་ན་ཇི་ལྟར་བྱ་སྙམ་ན། ཆང་འཐུང་བ་ལ་སོགས་པ་འགའ་ཡང་མ་གཏོགས་བཅས་པ་རྣམས་གནང་སྟེ། རང་གི་ཚུལ་ཁྲིམས་ཀྱི་བར་ཆད་སྤང་བའི་དོན་དུ་བཅས་པ་གནང་བ་གང་ཞིག ཚུལ་ཁྲིམས་བསྲུང་བ་དེ་ལམ་གོང་མ་སྐྱེ་བའི་དོན་དུ་ཡིན་པས། བཅས་པ་དེ་བསྲུང་བ་བས་རང་གི་ལམ་གོང་མ་སྐྱེ་བའི་བར་ཆད་བསྲུང་བ་དགོས་པ་ཆེ་བའི་ཕྱིར། དགོན་པ་བས་ཆོས་གོས་ཞག་དྲུག་འབྲལ་དུ་གནང་བ་ཡང་དེའི་ཕྱིར་ཡིན་ནོ། །གཉིས་པ་གཞན་གྱི་གཙོ་བོའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པ་ལ་གསུམ་སྟེ། གཞན་གྱི་སྲོག་གི་བར་ཆད་དང་། གཞན་གྱི་ཚུལ་ཁྲིམས་ཀྱི་བར་ཆད་དང་། གཞན་གྱི་དགེ་སྦྱོང་ཚུལ་གྱི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ནི། དགེ་སློང་གིས་བཅས་པ་བསྲུངས་ན་གཞན་གྱི་སྲོག་གི་བར་ཆད་སྤོང་མི་ནུས་ལ། མ་བསྲུངས་ན་སྤོང་ནུས་པ་ཡིན་ན་ཆང་འཐུང་བ་ལ་སོགས་པ་འགའ་རེ་མ་གཏོགས་པ་བཅས་པ་རྣམས་གནང་སྟེ། བུད་མེད་ཆུས་ཁྱེར་བ་གཟུང་དུ་གནང་བའི་ཕྱིར་ཏེ། སྙིང་བརྩེ་བས་སྡུག་བསྔལ་ལས་ཐར་བར་བྱ་བའི་ཕྱིར་ལྟུང་བ་མེད་ཅེས་གསུངས་པའི་ཕྱིར། རིགས་པས་ཀྱང་གྲུབ་སྟེ། བཅས་པ་དེ་བསྲུང་བ་བས་གཞན་གྱི་སྲོག་གི་བར་ཆད་བསྲུང་བ་དགོས་པ་ཆེ་བའི་ཕྱིར། ཁོ་ན་རེ་བུད་མེད་ཆུས་ཁྱེར་བ་གཟུང་བ་དེ་གནང་བ་མ་ཡིན་པར་ཐལ། གཞན་གྱི་སྲོག་གི་བར་ཆད་སྤོང་བའི་ཕྱིར་རྐུན་པོའི་ལག་ནས་མི་གཏོང་བས་ཉེས་བྱས་བསྐྱེད་པའི་ཕྱིར་ཏེ། སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་སོ་ཞེས་གསུངས་པའི་ཕྱིར་རོ། །གཞན་ཡང་དེ་ཡིན་ཏེ། བུད་མེད་གསོད་པར་ངེས་པ་རབ་ཏུ་འབྱིན་པར་བྱེད་པ་ལ་ལྷག་མ་བསྐྱེད་པར་བཤད་པའི་ཕྱིར་ཏེ། རབ་ཏུ་འབྱིན་པའི་ལྷག་མའོ་ཞེས་གསུངས་པའི་ཕྱིར་ཞེས་ཟེར་ན་སྐྱོན་མེད་དེ། སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་ཞེས་པ་ནི་རྐུ་སེམས་ཀྱི་དབང་གིས་ཉེས་བྱས་བསྐྱེད་པའི་དོན་ཡིན་ལ། རྐུ་སེམས་ཀྱི་ཉེས་བྱས་ནི་རང་བཞིན་གྱི་ཁ་ན་མ་ཐོ་བ་ཡིན་པའི་ཕྱིར་དང་། བུད་མེད་སྐྱོན་གསུམ་ལྡན་རབ་ཏུ་བྱུང་བས་ལྷག་མ་བསྐྱེད་པ་ནི་སྲོག་སྐྱོབ་མི་ནུས་ཤིང་བསྟན་པ་ལ་རྨ་འབྱིན་པས་ལྷག་མར་བཅས་པ་ཡིན་པའི་ཕྱིར། སྲོག་སྐྱོབ་མི་ནུས་ཏེ། ཕྱིས་བཙུན་མོ་ཕྲེང་ལྡན་མ་ལ་སྲོག་སྐྱོབ་ཞུ་དགོས་བྱུང་བར་གསུངས་པའི་ཕྱིར། གཉིས་པ་ནི། དགེ་སློང་གིས་བཅས་པ་འགའ་ཞིག་བསྲུངས་ན་གཞན་རྒྱུད་སྡིག་པས་གོས་པར་འགྱུར་ཞིང་མ་བསྲུངས་ན། གོས་པར་མི་འགྱུར་བ་ལྟ་བུ་འདོམས་ན། ཆང་སོགས་འགའ་རེ་མ་གཏོགས་བཅས་པ་རྣམས་གནང་བ་ཡིན་ཏེ། དབྱར་ཕྱི་མ་ཟླ་བ་གཉིས་ལ་བབ་པ་ན་དགེ་སློང་སྡིག་ཅན་རང་གི་གནས་སུ་སླེབ་ནས་དགེ་ཚུལ་སུན་འབྱིན་པའམ། སྡིག་ལྟ་ལ་འགོད་པར་འགྱུར་ན་དེ་སྤང་བའི་དོན་དུ་ནུབ་ལྷག་ཉལ་གནང་བ་ཡིན་ཏེ། དགེ་སློང་སྡིག་ཅན་ཉེ་བར་གནས་པར་གྱུར་ནའོ་ཞེས་གསུངས་པའི་ཕྱིར། རིགས་པས་ཀྱང་གྲུབ་སྟེ། བཅས་པ་དེ་བསྲུང་བ་བས་གཞན་གྱི་ཚུལ་ཁྲིམས་ཀྱི་བར་ཆད་བསྲུང་བ་དགོས་པ་ཆེ་བའི་ཕྱིར། གསུམ་པ་ནི། བཙུན་མོའི་འཁོར་དུ་མཚན་མོ་མི་གནས་ན་གཞན་རྒྱུད་ལ་ལམ་གོང་མ་མི་སྐྱེ་ལ། གནས་ན་ལམ་གོང་མ་སྐྱེ་བ་ནང་འདོམས་ན། མཚན་མོ་གནས་ཏེ་ཆོས་སྟོན་པ་གནང་བ་ཡིན་ཏེ། ཤཱ་རིའི་བུས་བཙུན་མོ་དཔལ་ལྡན་མ་ལ་མཚན་ཐོག་ཐག་ཏུ་ཆོས་བསྟན་པས་མཐོང་ལམ་སྐྱེས་པ་ལྟ་བུའོ། །རིགས་པས་ཀྱང་གྲུབ་སྟེ། བཅས་པ་བསྲུང་བ་བས་གཞན་གྱི་ལམ་གོང་མ་སྐྱེ་བའི་བར་ཆད་བསྲུང་བ་དགོས་པ་ཆེ་བའི་ཕྱིར། གཉིས་པ་གཙོ་བོ་མ་ཡིན་པའི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པ་ལ་གསུམ་སྟེ། ལུས་ཀྱི་བར་ཆད་དང་། ལོངས་སྤྱོད་ཀྱི་བར་ཆད་དང་། བསོད་ནམས་ཀྱི་བར་ཆད་ཀྱི་རྐྱེན་དང་ལྡན་པས་ལྟུང་བ་མེད་པའོ། །དང་པོ་ནི། བཅས་པ་འགའ་རེ་བསྲུངས་ན་རང་གཞན་གྱི་ལུས་ཆུད་ཟོས་སུ་འགྲོ་ལ། མ་བསྲུངས་ན་མི་འགྲོ་བ་ཐབས་གཞན་མེད་པར་ནང་འདོམས་ན། དེ་གཉིས་དགག་དགོས་གང་ཆེ་བརྟགས་ཏེ་བཅས་པ་སྲུང་བ་དགོས་པ་ཆེ་ན་མི་གནང་། ལུས་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ། ནད་པ་དང་ནད་གཡོག་མར་མེའི་སྣང་བ་དང་བཅས་པ་ལ་ཉལ་དུ་གནང་བའི་ཕྱིར་ཏེ། དེ་སྒྲུབ་པར་བྱེད་པའི་ནད་པ་དང་ནད་གཡོག་ལྷན་ཅིག་གནས་པ་ལ་ཉེས་པ་མེད་དོ་ཞེས་གསུངས་པའི་ཕྱིར། གཉིས་པ་ནི། དམག་དང་ཆོམ་རྐུན་བྱུང་བའི་ཚེ་རིན་པོ་ཆེ་ལ་སོགས་པ་ལ་རེག་པའི་བཅས་པ་འགའ་ཞིག་བསྲུང་ན་རང་གཞན་གྱི་ལོངས་སྤྱོད་ཆུད་ཟོས་པར་འགྱུར་ལ། མ་བསྲུངས་ན་མི་འགྱུར་བ་ཐབས་གཞན་མེད་པ་ནང་འདོམས་ན། དེ་ལ་ཡང་སྔར་ལྟར་བརྟགས་ནས་བཅས་པ་བསྲུང་བ་དགོས་པ་ཆེ་ན་མ་གནང་ལ། ལོངས་སྤྱོད་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ། འཇིགས་པར་གྱུར་ན་རང་གི་ལ་མི་གནོད་ན་མཆོད་རྟེན་ནམ་དགེ་འདུན་གྱི་དབྱིག་གམ་གསེར་སྦས་པ་ཁྱེར་ཏེ་འགྲོ་བར་བྱའོ་ཞེས་གསུངས་པའི་ཕྱིར། གསུམ་པ་ནི། བཅས་པ་འགའ་ཞིག་བསྲུངས་ན་རང་གཞན་གྱི་བསོད་ནམས་གསོག་པ་དེ་མི་འགྲུབ་ལ། མ་བསྲུངས་ན་འགྲུབ་པ་ལྟ་བུ་ཐབས་གཞན་མེད་པར་ནང་འདོམས་ན་དེ་གཉིས་དགག་དགོས་གང་ཆེ་བརྟགས་ཏེ་བཅས་པ་བསྲུང་བ་དགོས་པ་ཆེ་ན་མ་གནང་ལ། བསོད་ནམས་ཀྱི་བར་ཆད་བསྲུང་བ་དགོས་པ་ཆེ་ན་གནང་སྟེ་དཀོན་མཆོག་མཆོད་པའི་དོན་དུ་གླུ་ལེན་པ་གནང་བ་དང་། སྦྱིན་བདག་གི་བསོད་ནམས་ཀྱི་བར་ཆད་བསྲུངས་པའི་དོན་དུ་རྐང་པ་གཉིས་པ་དྲིས་བསྐུ་བ་གནང་བའི་ཕྱིར་ཏེ། དཀོན་མཆོག་མཆོད་པའི་དོན་དུ་དབྱངས་ཀྱི་ང་རོ་བྱའོ་ཞེས་དང་། བསོད་ནམས་འདོད་པས་རྐང་པ་གཉིས་ལ་ལུས་སྐུད་པའི་དྲིས་བསྐུད་པ་བསྟེན་པར་བྱའོ་ཞེས་གསུངས་པའི་ཕྱིར། བཞི་པ་སྒྲུབ་པར་མི་ནུས་པས་ཕྱོགས་གཅིག་ལ་ཞུགས་པས་ལྟུང་བ་མེད་པ་ལ་གསུམ་སྟེ། ཤེས་པ་རང་དབང་མེད་པས་སྒྲུབ་པར་མི་ནུས་པ་ལ་ལྟུང་བ་མེད་པ་དང་། བྱ་དཀའ་བས་སྒྲུབ་པར་མི་ནུས་པ་ལ་ལྟུང་བ་མེད་པ་དང་། ལྟུང་བ་ནང་འདོམས་པས་སྒྲུབ་པར་མི་ནུས་པ་ལ་ལྟུང་བ་མེད་པའོ། །དང་པོ་ནི། སྨྱོ་བ་ལ་སོགས་པ་ལ་ལྟུང་བ་མེད་པའོ། །གཉིས་པ་ནི། མཐའ་འཁོབ་ཏུ་བསྙེན་པར་རྫོགས་པ་ལ་དགེ་སློང་བཅུ་བཙལ་དུ་མེད་ན་ལྔའི་ཚོགས་ཀྱིས་བསྙེན་པར་རྫོགས་པ་གནང་བ་ལྟ་བུའོ། །གསུམ་པ་ནི། བཅས་པ་མཉམ་ཞིང་དགག་དགོས་ཀྱང་མཉམ་ན་བཅས་པ་གཅིག་མ་བསྲུངས་པ་ལ་ལྟུང་བ་མེད་པ་སྟེ། དགེ་སློང་མས་ཉིན་མོ་འབྲལ་བ་དང་གཅིག་པུ་ལམ་དུ་འགྲོ་བ་གཉིས་ཐབས་གཞན་མེད་པར་ནང་འདོམས་ན་གཅིག་པུ་ལམ་དུ་འགྲོ་བ་ལ་ལྟུང་བ་མེད་པ་ལྟ་བུའོ། །གཉིས་པ་དེ་ལས་འཕྲོས་པ་སྦོམ་པོའི་དོན་བཤད་པ་ལ། སྒྲའི་བརྗོད་རིགས་ཀྱི་དབྱེ་བ་དང་། མཚན་ཉིད་པའི་དབྱེ་བ་གཉིས་སོ། །དང་པོ་ནི། སྤྱིར་ཕམ་ལྷག་གཉིས་ལ་སྦོམ་པོ་ཞེས་གསུངས་ཏེ། མ་མོར། ཉེས་པ་སྦོམ་པོའི་ཉེས་པ་གང་ཞེ་ན། ཕས་ཕམ་པ་དང་། དགེ་འདུན་ལྷག་མའོ། །ཅིའི་ཕྱིར་ཉེས་པ་སྦོམ་པོ་ཞེས་བྱ་ཞེ་ན། རྣམ་པ་གཉིས་ཀྱི་ཕྱིར་ཉེས་པ་སྦོམ་པོའོ་ཞེས་གསུངས་ཏེ། ཉེས་པ་སྦོམ་པོ་ཡིན་པས་ན་སྦོམ་པོ་དང་། རང་བཞིན་གྱི་ཉེས་པ་སྦོམ་པོ་ཡིན་པས་ན་ཉེས་པ་སྦོམ་པོ་སྟེ། དེ་ནི་ཉེས་པ་སྦོམ་པོ་ཞེས་བྱའོ་ཞེས་གསུངས་པའི་ཕྱིར། འདིར་ནི་དམན་པ་སྦོམ་པོ་སྟོན་པར་བྱེད་པ་ལ། འོད་ལྡན་དུ་དེ་ལྟར་བྱས་ན་ཉེས་པ་སྦོམ་པོ་ཞེས་བྱ་བའི་སྒྲ་ནི་རྣམ་པ་གཉིས་སུ་སྟོན་ཏེ། མིང་དུ་ཆགས་པའི་སྒྲ་དང་། ཡོན་ཏན་གྱི་སྒྲའོ། །དེ་ལ་མིང་དུ་ཆགས་པའི་སྒྲ་ནི་ཉེས་པ་ཆུང་ངུའོ་ཞེས་བྱ་བ་ཡིན་ནོ། །ཡོན་ཏན་གྱི་སྒྲ་ནི་ཉེས་པ་མང་པོ་ཞེས་བྱ་བ་ཡིན་ནོ་ཞེས་སོ། །དེ་གཉིས་ཀྱི་ཁྱད་པར་ལ་མཁས་པ་ཁ་ཅིག སྔ་མ་ནི་རྟེན་དགེ་སློང་དང་། སྡེ་ཚན་ཕམ་ལྷག་ཁོ་ན་དང་། གནས་སྐབས་སྦྱོར་དངོས་དང་། གདགས་གཞི་དང་ཕྱིར་བཅོས་སྦོམ་པོའི་མིང་གིས་བྱེད་པ་སྟེ་སྦོམ་པོ་མཚན་ཉིད་པ་ཡིན་ནོ། །ཕྱི་མ་ནི་རྟེན་རབ་བྱུང་སྡེ་ལྔ་ཐམས་ཅད་དང་། སྡེ་ཚན་སྡེ་ལྔ་ཐམས་ཅད་དང་། གནས་སྐབས་སྦྱོར་བའི་སྦྱོར་བ་སོགས་ཐམས་ཅད་དང་། གདགས་གཞི་གཅིག་གམ་དུ་མ་དང་། ཕྱིར་བཅོས་གང་ལ་བཏགས་པ་དེ་ཉིད་ཀྱིས་མིང་གིས་བྱེད་དེ་བཏགས་པ་བ་ཡིན་ནོ། །གཉིས་པ་སྦོམ་པོ་མཚན་ཉིད་པའི་དབྱེ་བ་ལ། དབྱེ་བ་དངོས། བསྡུ་བ། ངོ་བོ། སྒྲ་དོན་དང་བཞི། དང་པོ་ནི། སྦོམ་པོ་མཚན་ཉིད་པ་དབྱེ་གཞིར་བྱས་ནས་དབྱེ་ན་བཞི་སྟེ། ཕམ་པར་གཏོགས་པའི་སྦོམ་པོ་ལྕི་ཡང་གཉིས། ལྷག་མར་གཏོགས་པའི་སྦོམ་པོ་ལྕི་ཡང་གཉིས་སོ། །ཤིན་ཏུ་ལྕི་བ་ལ་སོགས་པའི་བྱེ་བྲག་གིས་བརྒྱད་དུ་ཡང་ཡོད་དེ། འདུལ་བ་ཚིག་ལེའུར་བྱས་པ་ལས། ལྕི་དང་ཤིན་ཏུ་ལྕི་བ་ཉིད། །ཡང་དང་ཤིན་ཏུ་ཡང་བ་སྟེ། །ཕས་ཕམ་པ་ནི་ཀུན་བསླངས་པའི། །སྦོམ་པོ་རྣམ་པ་བཞི་ཡིན་ནོ། །སྒྲག་པར་མི་བྱེད་ལྕི་བ་སྟེ། །གཞན་གྱིས་དེ་ལ་འབད་པ་ཡིས། །བཟློག་ཀྱང་མི་ཉན་རབ་ལྕིར་ཤེས། །གཞན་ལ་ཁྲེལ་ཡོད་ཡང་བ་སྟེ། །རང་ཉིད་ངོ་ཚས་ཤིན་ཏུ་ཡང་། །བསམ་པའི་དབྱེ་བས་འགྱུར་བ་ཡིན། །དེ་བཞིན་དགེ་འདུན་ལྷག་མ་ཡི། །ཀུན་སློང་སྦོམ་པོ་རྣམ་པ་བཞི། །ཞེས་སོ། །གཉིས་པ་ནི། ཕམ་པས་ཀུན་ནས་བསླངས་པ་དང་། ལྷག་མས་ཀུན་ནས་བསླངས་པའི་སྦོམ་པོ་གཉིས་སུ་འདུས་སོ། །གསུམ་པ་ནི། སྦོམ་པོའི་རྒྱུ་ཚོགས་ཚང་བ་ལས་སྐྱེས་པའི་རིག་བྱེད་གང་ཞིག སྦོམ་པོའི་མིང་གིས་ཕྱིར་བཅོས་པར་བྱ་བའི་རིགས་ཡིན་པའོ། །བཞི་པ་ནི། ཕམ་ལྷག་དངོས་གཞི་ལས་དམན་ཞིང་ལྟུང་བ་གཞན་ལས་ཁ་ན་མ་ཐོ་བ་ཆེ་བས་ན་དམན་པ་སྦོམ་པོ་ཞེས་བྱའོ། །གཉིས་པ་ལྟུང་མེད་ནི་སེལ་བའི་ཞར་ལ་བསྟན་ཟིན་ཏོ། །གསུམ་པ་བསླབ་བྱ་ནི། ལྟུང་བ་རྣམ་གཞག་དེ་མི་འབྱུང་བར་བྱ་བའི་ཕྱིར་བསླབ་པས་ན་བསླབ་བྱ་སྟེ། གཉིས་པ་སོ་སོའི་སྐབས་སུ་འཆད་པར་འགྱུར་རོ།། ༈ །།གཉིས་པ་སོ་སོའི་དོན་ལ་ལྔ་སྟེ། གཅོད་པར་བྱེད་པ་ཕམ་པའི་སྡེ་དང་། གསོ་བ་དགེ་འདུན་ལ་རག་ལས་པས་དགེ་འདུན་ལྷག་མའི་སྡེ་དང་། ལྟུང་བར་བྱེད་པ་ལྟུང་བྱེད་ཀྱི་སྡེ་དང་། སྨྲེ་སྔགས་འདོན་པའི་སྒོ་ནས་སོ་སོར་བཤགས་པར་བྱ་བ་སོར་བཤགས་ཀྱི་སྡེ་དང་། བསླབ་བྱའི་སྡེའོ། །དང་པོ་ལ་སྡོམ་ནི། མི་ཚངས་སྤྱོད་དང་རྐུ་བ་དང་། །མི་ལ་གསད་པར་མི་བྱ་དང་། །བརྫུན་དུ་སྨྲ་དང་བཅས་པ་ཡི། །ཆོས་བཞི་འདིར་ནི་གསུངས་པ་ཡིན། །ཞེས་གསུངས་པའི་དོན་ནི་བཞི་སྟེ། རང་གཞན་གཉིས་ཀ་ལ་གནོད་པ་མི་ཚངས་པར་སྤྱོད་པའི་དང་། གཞན་གྱི་ལོངས་སྤྱོད་ལ་གནོད་པ་མ་བྱིན་ལེན་གྱི་དང་། གཞན་གྱི་སྲོག་ལ་གནོད་པ་སྲོག་གཅོད་ཀྱི་དང་། གཞན་གྱི་དོན་འགྲུབ་པ་ལ་གནོད་པ་བརྫུན་དུ་སྨྲ་བའི་ཕམ་པའོ། །དང་པོ་ལ་སྤྱིའི་དོན་དང་། གཞུང་གི་དོན་ལ་སྦྱར་བ་གཉིས་ལས། དང་པོ་ནི། བམ་ལྔར། གླེང་གཞི་དང་། བསླབ་པ་བཅས་པ་དང་། ལྟུང་བ་རྣམ་པར་གཞག་པའི་དོན་སྟོན་ཏེ། དེ་ལ་གླེང་གཞི་ནི་ཡུལ་དང་། གང་ཟག་དང་། ཉོན་མོངས་པ་དང་། ཉེས་པའི་གཞིའི་བྱེ་བྲག་གིས་རྣམ་པ་བཞིའོ། །བསླབ་པ་བཅས་པ་ནི། འཇིག་རྟེན་དང་འགལ་བ་དང་འདུལ་བ་དང་འགལ་བ་བཟློག་པའི་ལྟུང་བ་སྡེ་ལྔའོ། །ལྟུང་བ་རྣམ་པར་གཞག་པ་ནི། བསམ་པ་དང་སྦྱོར་བའི་སྒོ་ནས་དངོས་གཞི་དང་། སྦྱོར་བ་དང་། སྦྱོར་བའི་སྦྱོར་བ་རྣམ་པར་གཞག་པའོ་ཞེས་གསུངས་པའི་དོན་ནི་གསུམ་སྟེ། བསླབ་པ་འཆའ་བའི་གླེང་གཞི་དང་། བཅས་པ་འཇོག་པའི་རྒྱུ་མཚན་དགག་བྱ་དང་། ལྟུང་བའི་རྒྱུ་ཚོགས་ཡན་ལག་བརྩི་བའོ། །དང་པོ་ནི་སྟོན་པ་མངོན་པར་རྫོགས་པར་སངས་རྒྱས་ནས་ལོ་བཅུ་གསུམ་ལོན་པ་ན། བཟང་སྦྱིན་གྱིས་སྔོན་གྱི་ཆུང་མ་ལ་ལོག་པར་སྤྱད་པ་ལ་བརྟེན་ནས། ཆོས་ཀྱི་རྗེས་བསླབ་པ་བཅས་པའི་ཕན་ཡོན་བཅུ་གཟིགས་ཏེ། ཡུལ་སྤོང་བྱེད་དུ་གང་ཟག་བཟང་སྦྱིན་གྱིས། ཉོན་མོངས་པ་འདོད་ཆགས་ཀྱིས་ཀུན་ནས་བསླངས་ཏེ་ཉེས་པ་མི་ཚངས་པར་སྤྱོད་པ་ལ་བརྟེན་ནས་མི་ཚངས་སྤྱོད་སྤོང་བའི་བསླབ་པའི་གཞི་འདི་བཅས་སོ། །གཉིས་པ་བཅས་པ་འཇོག་པའི་རྒྱུ་མཚན་དགག་བྱ་ལ། མཐོང་བའི་ཉེས་དམིགས་དང་། མ་མཐོང་བའི་ཉེས་དམིགས་གཉིས་ལས། དང་པོ་ནི། ཚེ་འདི་ལ་ལུས་དང་། སྲོག་དང་། ཚངས་པར་སྤྱོད་པ་དང་། དགེ་སྦྱོང་གི་ཚུལ་དང་། ལོངས་སྤྱོད་དང་བསོད་ནམས་ཀྱི་བར་ཆད་དུ་འགྱུར་ཞིང་གཞན་མ་དད་པ་ལ་སོགས་པའོ། །མ་མཐོང་བའི་ཉེས་དམིགས་ནི་མི་དགེ་བའི་ལས་ལམ་བཅུ་པོ་རྣམས་ཀྱིས་འབྲས་བུ་གསུམ་གསུམ་འབྱིན་པ་ཡིན་ཏེ། མཛོད་ལས། ཐམས་ཅད་བདག་པོ་རྒྱུ་མཐུན་དང་། །རྣམ་སྨིན་འབྲས་བུ་འབྱིན་པར་འདོད། །ཅེས་སོ། །དེ་ཡང་མི་ཚངས་སྤྱོད་ཀྱི་རྣམ་སྨིན་གྱི་འབྲས་བུ་ནི་དེ་ཆེ་འབྲིང་ཆུང་གསུམ་ལ་བརྟེན་ནས་རིམ་པ་ལྟར། དམྱལ་བ་དང་། ཡི་དྭགས་དང་། དུད་འགྲོར་སྐྱེ་བའོ། །རྒྱུ་མཐུན་གྱི་འབྲས་བུ་ལ་གཉིས་ཡོད་པ་ལས། མྱོང་བ་རྒྱུ་མཐུན་ནི། ལུས་མི་སྡུག་པ་དང་། ཆུང་མ་དགྲ་ཟླ་ཅན་དུ་འགྱུར་བ་ལ་སོགས་པའོ། །བྱེད་པ་རྒྱུ་མཐུན་ནི། དེར་ཡང་མི་ཚངས་པར་སྤྱོད་པ་ལ་དགའ་བའི་ངང་ཚུལ་ཅན་དུ་འགྱུར་བའོ། །བདག་པོའི་འབྲས་བུ་ནི། ཡུལ་ཕྱོགས་རྡུལ་འཁྲིགས་པ་སོགས་སུ་སྐྱེ་བའོ། །གསུམ་པ་ཡན་ལག་ལ་ཐུན་མོང་གི་ཡན་ལག་ནི་བསྙེན་པར་རྫོགས་པའི་སྡོམ་པ་གསོ་རུང་ཡན་ཆད་དུ་ཡོད་པ། ཤེས་པ་རང་བཞིན་དུ་གནས་པ། ལས་དང་པོ་པ་མ་ཡིན་པ་ཞེས་པ་ནི་ཀུན་ལ་སྦྱར་རོ། །ཐུན་མོང་མ་ཡིན་པའི་ཡན་ལག་ལ་བཞི་སྟེ། གཞིའི་ཡན་ལག་དང་། ཀུན་སློང་གི་དང་། སྦྱོར་བའི་དང་། མཐར་ཐུག་གི་ཡན་ལག་གོ །དང་པོ་ལ། གང་ལ་རྩལ་བར་བྱ་བའི་ཡན་ལག་དང་། དེ་ལ་རྩལ་བརྟེན་གྱི་ཡན་ལག་གཉིས་ལས། དང་པོ་ནི། མི་དང་། མི་མ་ཡིན་པ་དང་། སྐྱེས་པ་དང་། བུད་མེད་དང་། མ་ནིང་དང་། རང་དང་གཞན་གང་ཡང་རུང་བའི་ལུས་ཕྱེད་དུ་ལངས་པ་ཡན་ཆད་ཀྱི་རྨའི་སྒོ་གསུམ་གང་ཡང་རུང་བ་མ་ཉམས་པ་དང་བགྲོད་དུ་རུང་བའོ། །གཉིས་པ་ནི། རང་རྒྱུད་དུ་གཏོགས་པའི་ནོར་བུ་ནད་མེད་པ་དང་ལས་སུ་རུང་བའོ། །ཀུན་སློང་ནི་རིག་པའི་བདེ་བ་ཉམས་སུ་མྱོང་བར་འདོད་པའོ། །སྦྱོར་བ་རེག་ཅིང་རྩོལ་བར་ཞུགས་པའོ། །མཐར་ཐུག་དེའི་རེག་པའི་བདེ་བ་ཉམས་སུ་མྱོང་བའི་ཚེ་མི་ཚངས་པར་སྤྱོད་པའི་ཕམ་པའི་དངོས་གཞིར་འགྱུར་ལ། དགེ་ཚུལ་ལ་ནི་ཕམ་འདྲའི་ཉེས་བྱས་སོ། །ཁ་ཅིག་འདིར་འདུ་ཤེས་མ་འཁྲུལ་པ་ཞེས་འདོད་པ་ནི་ནོར་བ་ཡིན་ནོ། །གཉིས་པ་གཞུང་དོན་ལ་སྦྱར་བ་ནི། གང་ཞིག་བྱས་ན་ལྟུང་བ་འདིར་འགྱུར་བ་ཡིན་ཞེ་ན། བཅུག་རེག་ཉམས་སུ་མྱོང་བ་བྱས་ནའོ། །ཟག་བྱེད་དོ། །དེར་རོ། །མ་ཉམས་པར་རོ། །ཁའམ་བཤང་བའི་ལམ་དུའོ། །ཉམས་པ་དག་ལ་ནི་སྦོམ་པོའོ། །མི་རུང་བ་ཉིད་ལ་ནི་ན་སྨད་དོ། །ཞེས་གསུངས་ཏེ། ཡན་ལག་གི་མཚན་ཉིད་དང་། སེལ་བ་གཉིས་ལས། དང་པོ་ནི། བཅུག་ཞེས་པའི་སྒྲ་བྱེད་པར་བསྒྲུབ་ན་དེས་འཛུད་པར་བྱེད་པས་ན་བཅུག་པ་སྟེ་ཕོའི་ཟག་བྱེད་དོ། །བཅུག་ཞེས་པའི་སྒྲ་གནས་སུ་བསྒྲུབ་ན་དེར་བཅུག་པར་བྱ་བ་ཡིན་པས་ན་བཅུག་པ་སྟེ་རྨའི་སྒོ་གསུམ་མོ། །གནས་སུ་བསྒྲུབ་པ་ལ་སྦྱར་བ་ཐོག་མར་བཤད་ན། བཅུག་པར་བྱ་བ་དགེ་སློང་རང་གི་རྨའི་སྒོ་གཉིས་སམ་གཞན་གྱི་སྒོ་གསུམ་གང་ཡང་རུང་བ་དགེ་སློང་རང་གིས་ཟག་བྱེད་བཅུག་སྟེ་བཅུག་པར་བྱ་བ་དེའི་རེག་པའི་བདེ་བ་དགེ་སློང་རང་གིས་ཉམས་སུ་མྱོང་ན་དགེ་སློང་དེ་ཕམ་པར་འགྱུར་ལ། བཅུག་པའི་སྒྲ་བྱེད་པ་པོ་བསྒྲུབ་པ་དང་སྦྱར་ན་དགེ་སློང་མའི་རྨའི་སྒོ་སོགས་གསུམ་གང་རུང་དུ་འཛུད་པར་བྱེད་པ་སྐྱེས་པའི་ཟག་བྱེད་བཅུག་སྟེ་དེའི་རེག་པའི་བདེ་བ་དགེ་སློང་མས་ཉམས་སུ་མྱོང་ན་དགེ་སློང་མ་དེ་ཕམ་པར་འགྱུར་ཞིང་། དགེ་སློང་གི་རྨའི་སྒོ་གཉིས་གང་རུང་དུ་སྐྱེས་པ་གཞན་གྱི་ཟག་བྱེད་བཅུག་སྟེ། དེའི་རེག་པའི་བདེ་བ་དགེ་སློང་གིས་ཉམས་སུ་མྱོང་ན་དགེ་སློང་དེ་ཕམ་པར་འགྱུར་རོ་ཞེས་ཊཱི་ཀར་བཤད་དེ། བཅུག་པའི་སྒྲ་བྱེད་པ་པོར་བསྒྲུབ་པའི་ཕྱོགས་ལ་བརྟེན་ནས་ནི་བརྟེན་པར་བྱ་བ་དགེ་སློང་དང་དགེ་སློང་མ་རྣམས་ཀྱི་ཁ་དང་བཤང་བའི་ལམ་དང་མོའི་དབང་པོར་འཛུད་པར་བྱེད་པས་བཅུག་པ་ལ་ཕམ་པར་འགྱུར་བ་རྣམ་པར་འཇོག་པར་བྱེད་དོ། །ཕོའི་དབང་པོའི་བཅུག་པ་དེའི་རེག་པ་ནི་བརྟེན་པར་བྱ་བ་ཁ་དང་བཤང་བའི་ལམ་དང་མོའི་དབང་པོ་དང་ལྡན་པའི་ཕྱོགས་དེར་རེག་པའོ། །རེག་པ་དེ་ཉམས་སུ་མྱོང་བར་བྱས་པ་ནི་ཉམས་སུ་མྱོང་བར་འགྱུར་བ་གང་ཡིན་པའོ། །དེ་ཉམས་སུ་མྱོང་བར་གྱུར་ན་དེའི་ཚེ་བརྟེན་པར་བྱ་བ་དགེ་སློང་དང་དགེ་སློང་མ་དེ་ཕམ་པར་འགྱུར་ཏེ་ཞེས་གསུངས་སོ། །འཛུད་པར་བྱེད་པས་བཅུག་པ་དེ་གང་ཡིན་ཞེ་ན་ཕོའི་ཟག་བྱེད་དོ། །བཅུག་པར་བྱ་བ་དེ་གང་ཞེ་ན་མོའི་ཟག་བྱེད་དེའོ། །བཅུག་པ་ཙམ་གྱིས་ཕམ་པར་འགྱུར་རམ་སྙམ་ན། མ་ཉམས་པར་བཅུག་ན་འགྱུར་གྱི་གཞན་དུ་ན་མ་ཡིན་ནོ། །དེར་མ་ཟད་ཁའམ་བཤང་བའི་ལམ་དུ་བཅུག་ན་ཡང་འགྱུར་རོ། །འདིར་མ་ཉམས་པ་ཞེས་པ་མོའི་དབང་པོ་ཁོ་ན་ལ་སྦྱར་ཡང་དོན་གྱིས་བཅུག་བྱ་གསུམ་དང་། འཇུག་བྱེད་དེ་བཞི་ཀ་ལ་མ་ཉམས་པ་ཞེས་སྦྱར་དགོས་སོ། །གཉིས་པ་སེལ་བ་ནི། རྨའི་སྒོ་མ་ཉམས་པ་དགོས་ན། ཉམས་པ་ལ་ཅིར་འགྱུར་ཞེ་ན། ཡན་ལག་གཞན་ཚང་ན་ཉམས་པ་དག་ལ་སྦོམ་པོར་འགྱུར་རོ། །བགྲོད་དུ་མི་རུང་བ་ལ་བཅུག་པ་ལ་ནི་ན་སྨད་དུ་འགྱུར་ཏེ། མ་ཉམས་ཤིང་བགྲོད་དུ་རུང་བ་གང་ལ་དངོས་གཞི་དང་། སྦོམ་པོ་དང་། ཉེས་བྱས་སུ་འགྱུར་བ་དེ་ལ་བགྲོད་དུ་མི་རུང་བའི་ཡུལ་ལ་རིམ་པ་ལྟར། སྦོམ་པོ་དང་། ཉེས་བྱས་དང་། ཉེས་བྱས་ཕྲ་མོར་འགྱུར་རོ་ཞེས་པའི་དོན་ཏོ། །རྨའི་སྒོ་གསུམ་གྱི་མཐའ་ལ་ཁའི་ནི་སོའི་ནང་ངོས་ཕན་ཆད། བཤང་བའི་ལམ་གྱི་ནི་བུ་གུའི་སྦུབས་ཀྱི་མཐའ་ཡན་ཆད། ཟག་བྱེད་མོའི་དབང་པོའི་ནི་པགས་རིམ་དང་པོ་ཡན་ཆད་ལ་བཤད་ཅིང་། ཕོའི་ཟག་བྱེད་ཀྱི་ནོར་བུ་རྨའི་སྒོ་དེ་དག་དང་ཕྲད་པ་ནི་བཅུག་པའི་མཐའ་ཡིན་ཏེ། རྨའི་མཐའ་དེ་དག་ལས་ནོར་བུ་འདས་དགོས་པ་ནི་མ་ཡིན་ནོ་ཞེས་ཊཱི་ཀར་བཤད་དོ། །གཉིས་པ་གཞན་གྱི་ལོངས་སྤྱོད་ལ་གནོད་པ་མ་བྱིན་ལེན་གྱི་ཕམ་པ་ལ་གསུམ་སྟེ། སྤྱིའི་དོན་དང་། གཞུང་དང་སྦྱར་བ་དང་། དོགས་པ་གཅད་པའོ། །དང་པོ་ལ་གསུམ་ལས། གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་དགེ་སློང་ནོར་ཅན་གྱིས་ཉོན་མོངས་པ་འདོད་ཞེན་གྱིས་ཀུན་ནས་བསླངས་ཏེ་ཉེས་པ་ཤིང་བརྐུས་པ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་རྒྱུ་མཚན་ལ་མཐོང་བའི་ཉེས་དམིགས་སྔར་བཞིན་ནོ། །མ་མཐོང་བའི་ཉེས་དམིགས་ལ་རྣམ་སྨིན་གྱི་འབྲས་བུ་སྔར་དང་འདྲ་ལ། མྱོང་བ་རྒྱུ་མཐུན་ཕྱི་མ་ལ་ལོངས་སྤྱོད་ཆུང་བར་འགྱུར་བ་དང་། བྱེད་པ་རྒྱུ་མཐུན་རྐུ་བ་ལ་དགའ་བ་དང་། བདག་པོའི་འབྲས་བུ་ཡུལ་ཕྱོགས་སད་སེར་སོགས་གནོད་པ་མང་པོར་འགྱུར་བའོ། །གསུམ་པ་བྱེད་རྒྱུ་ཡན་ལག་བརྩི་བ་ལ་བཞི་ལས། རྟེན་གྱི་ཡན་ལག་ཐུན་མོང་བ་སྔར་བཞིན་ཡིན་པ་ལ་ཡུལ་ནི་མིའི་འགྲོ་བ་པ་བདག་ཉིད་ལས་རྫས་ཐ་དད་པ། དངོས་པོ་སྔར་མ་བྱིན་ཞིང་རིན་ཐང་ཚང་བ། བསམ་པ་ལ་གཉིས་ལས། འདུ་ཤེས་མ་འཁྲུལ་བ་ཀུན་སློང་རྐུ་སེམས་ཀྱིས། སྦྱོར་བ་ལུས་ངག་ཏུ་གྲུབ་ཅིང་མ་འཁྱོགས་པས་རྐུ་བར་རྩོམ་པ། མཐར་ཐུག་གནས་ནས་གནས་སུ་སྤགས་པ་ན་མ་བྱིན་ལེན་གྱི་ཕམ་པར་འགྱུར་རོ། །དེ་ཡང་ལུང་དུ། དགེ་སློང་བདག་ཉིད་ཀྱིས་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད། བང་ཆེན་པས་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད། བྱིན་གྱིས་བརླབས་ཏེ་རྐུ་བར་བྱེད། རྐུར་འཇུག་པར་བྱེད། གནས་ནས་གནས་སུ་སྤགས་པར་བྱེད་ཅེས་གསུངས་ལ། དེའི་དོན་ལ་འཕགས་པ་ཉེར་སྦས་ཀྱིས། ལུང་དང་པོ་དྲུག་གིས་མ་བྱིན་ལེན་གྱི་སྦྱོར་བ་བསྟན། ཐ་མ་གསུམ་གྱིས་མ་བྱིན་ལེན་གྱི་མཐར་ཐུག་བསྟན་ཞེས་གསུངས་ལ། ཡོན་ཤཱཀ་རྣམ་གཉིས་ཀྱང་དེའི་རྗེས་སུ་འབྲངས་ནས་འཆད་དོ། །གཉིས་པ་གཞུང་དོན་ལ་སྦྱར་བ་ནི། རྐུའམ་རྐུར་བཅུག་པ་དག་གིས་སོ། །མངགས་པས་ཀྱང་ངོ་། །མ་བྱིན་པའོ། །མ་ཤ་ཀ་ལྔ་ལ་སོགས་པའོ། །རྐུ་སེམས་ཀྱིས་སོ། །མིའི་རྒྱུད་ཀྱིས་ཡོངས་སུ་བཟུང་བའོ། །དེར་འདུ་ཤེས་པས་སོ་ཞེས་གསུངས་ཏེ། གང་ཞིག་བྱས་ན་ལྟུང་བ་འདིར་འགྱུར་ཞེ་ན། རང་གིས་རྐུ་བའམ་གཞན་རྐུར་བཅུག་པ་དག་གིས་བརྐུས་ན་འགྱུར་རོ། །རྐུར་བཅུག་པ་དེ་ཉིད་ཀྱིས་དངོས་སུ་རྐུས་པ་ཞིག་དགོས་སམ་ཞེ་ན། རྐུར་བཅུག་པ་དེས་ཀྱང་གཞན་མངགས་ཏེ་རྐུར་བཅུག དེས་ཀྱང་གཞན་མངགས་ཏེ་རྐུར་བཅུག་ན་ཡང་འགྱུར་རོ། །ཇི་ལྟ་བུ་ཞིག་བརྐུས་ན་འགྱུར་ཞེ་ན། སྐྱེས་པ་བུད་མེད་སོགས་སུས་ཀྱང་མ་བྱིན་པ་བརྐུས་ན་འགྱུར་རོ། །ཇི་ཙམ་ཞིག་བརྐུས་ན་འགྱུར་ཞེ་ན། མ་ཤ་ཀ་ལྔ་དང་སོགས་པ་དྲུག་ལ་སོགས་པ་བརྐུས་ན་འགྱུར་རོ། །ཀུན་སློང་ཇི་ལྟ་བུས་ཞེ་ན། རྐུ་སེམས་ཀྱིས་བརྐུས་ན་འགྱུར་ཏེ། རྐུ་སེམས་ཀྱི་མཚན་ཉིད་ལ་ཁ་ཅིག་གཞན་གྱི་ཡིན་ཏེ་མ་གནང་ཡང་རང་ཉིད་འཚོ་བའི་དོན་དུ་གཏན་དུ་དབྲལ་བར་འདོད་པ་ཞེས་གསུངས་པ་མི་འཐད་དེ། ཡིད་གཅུགས་ཀྱི་སེམས་ཀྱིས་ཕ་རོལ་པོའི་རྫས་ལེན་པའི་ཀུན་སློང་ཆོས་ཅན། རྐུ་སེམས་སུ་ཐལ། མཚན་ཉིད་དེའི་ཕྱིར། གཞན་ཡང་། གཞན་དོན་དུ་རྫས་རྐུ་བའི་རྐུ་སེམས་ཆོས་ཅན། མཚན་ཉིད་དེར་ཐལ། རྐུ་སེམས་ཡིན་པའི་ཕྱིར། གཏན་ཚིགས་གྲུབ་སྟེ། གཞན་དོན་དུ་རིན་ཐང་ཚང་བའི་རྫས་བརྐུས་པས་མ་བྱིན་ལེན་དུ་གཏོགས་པའི་སྦོམ་པོ་བསྐྱེད་པའི་ཕྱིར། རང་ལུགས་ནི། མི་རིགས་པའི་སྦྱོར་བས་གཞན་གྱིས་བདག་ཏུ་གཟུང་བའམ། དེར་འདུ་ཤེས་ཏེ་དབྲལ་བར་འདོད་པའི་མཚུངས་ལྡན་ནོ། །སུས་བདག་ཏུ་གཟུང་བ་བརྐུས་ན་འགྱུར་ཞེ་ན། མིའི་རྒྱུད་ཀྱི་རྫས་བདག་ཏུ་གཟུང་བ་བརྐུས་ན་འགྱུར་རོ། །དེ་ཙམ་གྱིས་འགྱུར་རམ་ཞེ་ན། མིས་བདག་ཏུ་གཟུང་བ་ལ་དེར་འདུ་ཤེས་པས་བརྐུས་ན་འགྱུར་རོ། །གསུམ་པ་དོགས་པ་བཅད་པ་ལ་བཞི་སྟེ། བདག་པོ་དང་། དངོས་པོ་དང་། རིན་ཐང་དང་། མཐར་ཐུག་ལ་དོགས་པ་གཅོད་པའོ། །དང་པོ་ནི། མ་བྱིན་ལེན་གྱི་རྫས་བདག་ལ་དབྱེ་ན་བཞི་སྟེ། དབྱར་རྙེད་དགེ་འདུན་ལ་དབང་བ་ལྟ་བུ་བཀའ་སྩལ་གྱིས་བདག་པོར་གཞག་པ་དང་། ཤོ་གམ་རྒྱལ་པོར་དབང་བ་ལྟ་བུ་ཡུལ་ཆོས་ཀྱིས་དང་། ཕ་ནོར་བུར་དབང་བ་ལྟ་བུ་རིགས་རྒྱུད་ཀྱིས་དང་། རི་དྭགས་ལིངས་བཏབ་པ་ལིངས་པར་དབང་བ་ལྟ་བུ་བསམ་སྦྱོར་གྱི་བདག་པོར་གཞག་པའོ། །དེ་གཞི་ཀ་རྒན་ཞུགས་ལྟ་བུ་གཅིག་ལ་ཚང་བ་སྲིད་པས་གང་གཙོ་ཆེ་ཞེ་ན། སྔ་མ་སྔ་མ་གཙོ་ཆེའོ་ཞེས་གསུངས་སོ། །གཉིས་པ་ནི། ཁ་ཅིག་སུམ་བརྒྱ་པར། དེ་བཞིན་མི་དབང་བསོད་སྙོམས་ལེན་པ་དང་། །ཞེས་པ་དང་། ཟན་དྲོན་དང་འབྲས་ཆན་ཞེས་སོགས་ཀྱི་དོན་དུ་བསམས་ནས་མ་བྱིན་ལེན་གྱི་ཕམ་པ་བསྐྱེད་པ་ལ་བརྐུ་བྱའི་དངོས་པོ་དུར་ཁྲོད་ཀྱི་རྫས་སོགས་དམན་པ་མ་ཡིན་པ་དང་། གཡོས་སུ་བྱས་པའི་ཁ་ཟས་མ་ཡིན་པར་དགོས་ཟེར་བ་མི་འཐད་དེ། དུད་འགྲོའི་ཁ་ཟས་རིན་ཐང་ཚང་བ་བརྐུས་པའི་སྦོམ་པོ་བསྐྱེད་པ་ལ་གཡོས་སུ་མ་བྱས་པ་དགོས་པར་ཐལ། དམ་བཅས་དེའི་ཕྱིར། འདོད་མི་ནུས་ཏེ། རིན་ཐང་བརྩི་བར་བྱའོ་ཞེས་གསུངས་པའི་ཕྱིར། གཞན་ཡང་ཀཱ་རི་ཀཱ། གདོང་བུ་འབྲས་བུ་ཤུན་པ་ཆུ། །ཞེས་པའི་འགྲེལ་པ་དོན་བརྒྱད་མར། མྱ་ངམ་གྱི་ཐང་དུ་མགུལ་དུ་བཏུང་བའི་ཆུ་བརྐུས་ན་ཕམ་པར་གསུངས་པའི་ཕྱིར། གསུམ་པ་ནི། ཞུ་བའི་སྐབས་སུ། ཀ་ཀ་ནི་བཞི་ལ་མ་ཤ་ཀའོ། །ལྔ་ཉིད་ནི་ཀཱརྵཱ་པ་ཎི་བཞི་ཆའི་དཔེ་ཡིན་ནོ། །གང་ན་དེའི་ཚིགས་ཉིད་ཉི་ཤུ་ཡིན་པ་དེ་ལ་བརྟེན་ནས་སོ། །ཞེས་གསུངས་པའི་དོན་བཤད་པར་བྱ་སྟེ། ཀཱརྵཱ་པ་ཎ་ནི་མ་བྱིན་ལེན་གྱི་རིན་ཐང་གི་མ་མཐའི་ཚད་ཡིན་པས་དེའི་ཚད་ཇི་ལྟ་བུ་ཞེ་ན། ཀ་ཀ་ནི་ཞེས་བྱ་བ་ནི་བུན་ཀྲི་ཀ་ཞེས་བྱ་བ་སྟེ། མགྲོན་བུ་ཉི་ཤུའི་རིན་ཐང་གི་མིང་ཡིན་ནོ། །དེ་ནི་ཟོང་གི་ཁྱད་པར་ཞིག་ཡིན་ཏེ། ཊཱི་ཀར་ཟོང་ཞེས་བྱ་བ་ནི་ཀ་ཀ་ནི་དང་བ་ར་ས་ཀ་ལ་སོགས་པའོ་ཞེས་གསུངས་པའི་ཕྱིར། དེ་བཞི་ཀ་ལ་མ་ཤ་ཀ་གཅིག་གོ་དེ་ཡང་མགྲོན་བུ་བརྒྱད་ཅུའི་རིན་ཐང་གི་མིང་ཡིན་ནོ། །འོ་ན་མ་ཤ་ཀ་ལྔ་བརྐུས་ན་ཕམ་པར་འགྱུར་བ་ངེས་གཟུང་ཡིན་ནམ་ཞེ་ན། རྣམ་འབྱེད་ལས། མ་ཤ་ཀ་ཉིད་གསུངས་པ་ནི་ཀཱརྵཱ་པ་ཎ་བཞི་ཆའི་དཔེ་ཡིན་པས་དེའི་བཞི་ཆ་བརྐུས་ན་ཕམ་པར་འགྱུར་གྱི་མ་ཤ་ཀ་ལྔ་ལ་མ་ངེས་སོ། ཀཱརྵཱ་པ་ཎ་ནི་སེར་རམ་དངུལ་ལས་བྱས་པའི་ཟོང་ཞིག་ཡིན་ཏེ། ཞུ་ཊཱིཀ་ཏུ་ཀཱརྵཱ་པ་ཎ་ནི་ཟོང་གི་ཁྱད་པར་དངུལ་ལས་བྱས་པ་གཟུགས་དོད་པ་གཅོད་དུ་རུང་བའོ་ཞེས་གསུངས་སོ། །འོ་ན་མ་ཤ་ཀ་ལྔ་ཀཱརྵཱ་པ་ཎ་བཞི་ཆའི་དཔེ་ཡིན་པའི་རྒྱུ་མཚན་ཅི་ཡིན་ཞེ་ན། བསླབ་པ་འཆའ་བའི་ཡུལ་དུས་གང་ན་ཀཱརྵཱ་པ་ཎ་དེའི་ཚིགས་སམ་ཚད་མ་ཤ་ཀའི་གྲངས་ཉི་ཤུ་ཡིན་པ་དེ་ལ་བརྟེན་ནས་གཞག་པ་ཡིན་ནོ། །རྒྱ་ཆེར་འགྲེལ་པ་བརྩམས་པའི་དུས་ན་ཀཱརྵཱ་པ་ཎ་གཅིག་ལ་མ་ཤ་ཀ་བཅུ་དྲུག་ཏུ་བྱེད་པ་ཡིན་པས་མ་ཤ་ཀ་བཞི་བརྐུས་ན་ཕམ་པར་འགྱུར་བ་སོགས་གཞན་ལ་ཡང་སྦྱར་ཏེ་ཤེས་པར་བྱའོ། །ཇི་སྐད་དུ་གཏམ་གྱི་གཞིར། བཙུན་པ་མ་ཤ་ཀ་གསུམ་བརྐུས་པས་ཕམ་པར་འགྱུར་བ་མཆིས་སམ། བཀའ་སྩལ་པ་ཡོད་དེ། གང་ན་མ་ཤ་ཀ་བཅུ་གཉིས་ལ་ཀཱརྵཱ་པ་ན་གཅིག་ཏུ་འགྱུར་བ་ནའོ། །མ་ཤ་ཀ་ལྔ་ལས་ལྷག་པ་བརྐུས་ན་ཕམ་པར་མི་འགྱུར་བ་མཆིས་སམ། བཀའ་སྩལ་པ་ཡོད་དེ། གང་ན་མ་ཤ་ཀ་བཞི་བཅུ་ལ་ཀཱརྵཱ་པ་ཎ་གཅིག་ཏུ་འགྱུར་བ་ནའོ། །ཞེས་གསུངས་སོ། །བོད་ན་ཀཱརྵཱ་པ་ཎ་ལ་སོགས་པའི་རྣམ་གཞག་མེད་པས་མ་བྱིན་ལེན་གྱི་རིན་ཐང་གི་ཚད་ཇི་ལྟ་བུ་ཞེ་ན། རྒྱ་ན་རེ་རྟ་རྒོད་མ་རེ་ཙམ་ཡིན་ཏེ་གསོད་པའི་ཆད་པ་དང་སྒོ་བསྟུན་པའི་ཕྱིར་དང་། དེ་ཙམ་གྱིས་དགག་བྱ་རྫོགས་པའི་ཕྱིར་རོ་ཞེས་གསུངས། ཤ་མི་ན་རེ་རྒྱལ་ཁྲིམས་ཆོས་དང་མཐུན་པ་ཡོད་ན་གང་ཞིག་བརྐུས་ན་སྲོག་གཅོད་པའི་ནག་ཐོབ་པའི་མ་མཐའི་རྫས་ཙམ་རིན་ཐང་གི་ཚད་ཡིན་ལ་ཆོས་དང་མཐུན་པ་མེད་ན་བསླབ་པ་འཆའ་བའི་དུས་ཀྱི་རིན་ཐང་རྩི་བ་ཡིན་ཟེར་བ་མི་འཐད་དེ། རྒྱལ་ཁྲིམས་ཆོས་དང་མཐུན་པ་ཡོད་ན་སྲོག་གཅོད་པའི་ཆད་པ་བྱེད་མི་རིགས་པའི་ཕྱིར་དང་། ཆོས་དང་མཐུན་པ་མེད་ན་བསླབ་པ་འཆའ་བའི་དུས་ཀྱི་རིན་ཐང་བརྩི་བ་མི་འཐད་པར་ཐལ། རིན་ཐང་ནི་རྐུ་བའི་གནས་དང་དུས་ཀྱི་སོ་ཞེས་གསུངས་པའི་ཕྱིར། ཁ་ཅིག་ནས་ཁལ་བཞི་ཙམ་ལ་བྱེད་དེ། འོད་ལྡན་དུ་ཆུ་གཏོང་འགོག་གི་སྐབས་སུ་དེ་ལ་དཔེ་བྱེད་པའི་ཕྱིར་ཞེས་དང་། ཁ་ཅིག་གསེར་མགུར་ཞོ་ཕྱེད་ཙམ་ལ་བྱེད་པ་ཡིན་ཏེ། རང་འགྲེལ་ལས། མང་བ་སེ་བ་བརྒྱད་ཅེས་གསུངས་པའི་ཕྱིར་ཞེས་པ་ཡང་མི་འཐད་དེ། སྟོན་པ་འཁོར་བཅས་ལ་གདུགས་ཚོད་འདྲེན་པ་ལ་ཀཱརྵཱ་པ་ཎ་ལྔ་བརྒྱ་ཙམ་དགོས་པར་བཤད་པ་ལ། ཁྱེད་ལྟར་ན་གསེར་མགུར་མོ་ཞོ་ཉིས་སྟོང་དུ་འགྱུར་བས་དེ་མི་འགྲིག་ཅིང་། སྨད་འཚོང་མ་ལ་ནུབ་རེ་ལ་ཀཱརྵཱ་པ་ཎ་ལྔ་བརྒྱ་རེ་སྟེར་བ་ཡོད་པར་བཤད་པས་དེ་དང་མི་འགྲིགས་པའི་ཕྱིར། གཞན་དག་ན་རེ་གསོད་པའི་ཆད་པ་ཁོ་ན་དང་སྒོ་བསྟུན་པའི་རྟགས་ཀྱང་མ་གྲུབ་སྟེ། ཆད་པ་གཅོད་པ་ཙམ་དང་སྒོ་བསྟུན་པའི་ཕྱིར་ཏེ། ལུང་དུ་ཇི་ཙམ་མ་བྱིན་པར་བླངས་ན་དེ་རྒྱལ་པོའམ། བློན་པོ་ཆེན་པོས་བཟུང་ནས། དེ་ལ་འདི་སྐད་ཅེས། ཀྱེ་མི་ཁྱོད་ནི་རྐུན་མའོ། །བྱིས་པའོ་ཞེས་སོགས་གསུངས་པས་ན་འཇིག་རྟེན་ཕལ་གྱི་རྐུན་མའི་ཐ་སྙད་དང་ཆད་པས་གཅོད་པ་རིགས་པ་ཙམ་དུ་བྱེད་པ་ཡན་ཆད་ལ་འཐད་དོ། །དེས་ན་སེ་བ་གསུམ་ཙམ་ལ་དངོས་པོ་ཚང་སྟེ། དོན་བརྒྱད་མར། རྒྱ་གར་གྱི་རིན་ཐང་དང་སྦྱར་ན་དངུལ་ཞོ་གཅིག་ཙམ་བརྐུས་ན་ཕས་ཕམ་པར་བརྩིའོ་ཞེས་གསུངས་པའི་ཕྱིར་ཞེས་དམར་སྟོན་གསུང་ངོ་། །ཁ་ཅིག་བྲེ་དོ་ཙམ་ལ་བྱེད་དོ། །དངུལ་ཞོའི་བརྒྱད་ཆ་བརྐུས་ན་ཕམ་ཞེས་གསུངས་པའི་ཕྱིར་ཞེས་ཟེར་བ་ལ། ཆོས་རྗེ་གནས་བརྟན་པའི་གསུང་གིས་དེ་མི་འཐད་དེ། ལུང་ལས། གསེར་གྱི་ཕྲེང་བ་བརྐུས་ན་ཕམ་པར་མི་འགྱུར་བ་མཆིས་སམ། ཡོད་དེ་རིན་ཐང་མ་ཚང་བའམ། མི་མིན་གྱིས་བདག་གིར་བྱས་པའོ་ཞེས་གསུངས་པའི་ཕྱིར་དང་། དེ་ལྟ་ན་ཀཱརྵཱ་པ་ཎ་གཅིག་ལ་བྲེ་བརྒྱད་དུ་འགྱུར་ལ། འདོད་ན་བྲམ་ཟེའི་རས་ཡུག་གི་གཏམ་རྒྱུད་སོགས་དང་མི་འགྲིག་གོ །རང་ལུགས་ནི། གསེར་ཞོ་གང་གི་བརྒྱད་ཆ་ཙམ་ལ་རིན་ཐང་གི་ཚད་དུ་རིགས་ཏེ། དོན་བརྒྱད་མར། དངུལ་ཞོ་གཅིག་བརྐུས་ན་ཕམ་ཞེས་པ་དང་། ཤེས་རབ་བྱེད་པར། དེང་སང་གི་དུས་དང་སྦྱར་ན་རྒྱ་གར་ཡུལ་གྱི་མ་ཤ་ལ་བོད་ཀྱི་དངུལ་གྱི་ཐང་དུ་བརྩིས་ན་དངུལ་གསེར་ཞོའི་བརྒྱད་ཆ་གཅིག་ཡོད་དེ། བརྒྱད་ཆ་གཅིག་ཡན་ཆད་བརྐུས་ན་ཕམ་ཞེས་གསུངས་པའི་ཕྱིར། འཁྲུལ་སྤོང་དུ། མི་གཅིག་གིས་ཟ་མ་གཟབ་པ་ཅིག་ཙམ་ལ་ཆ་གཞག་པ་ཡིན་པར་གསུངས་ལ། དེ་ཡང་སྔ་མ་དང་དོན་གྱི་ཁོག་གཅིག་ཏུ་འགྲིག་པར་སྣང་སྟེ་འདི་ལ་ཡང་ནས་ཁལ་ཕྱེད་ཙམ་དགོས་པའི་ཕྱིར། བཞི་པ་མཐར་ཐུག་ལ་དོགས་པ་གཅད་པ་ནི། མ་བྱིན་ལེན་གྱི་མཐར་ཐུག་གནས་སྤགས་ལ་འཇོག་གམ་གྲུབ་བློ་ལ་འཇོག་ཅེ་ན། ཁ་ཅིག་གྲུབ་བློ་ལ་འཇོག་དགོས་ཏེ། གནས་སྤགས་ལ་འདོད་ན་ཞིང་ཁང་བརྐུས་པ་སོགས་ཀྱིས་ཕམ་པ་གཞག་ཏུ་མི་རུང་བར་འགྱུར་རོ་ཞེས་ཟེར་བ་མི་འཐད་དེ། གནས་སྤགས་ཀྱི་དོན་རྫས་གཞག་པ་སྤོ་བ་ལ་ཟེར་བ་མ་ཡིན་གྱི། གནས་སྐབས་འདི་ཙམ་ལས་འདས་ནས་གནས་སྐབས་འདི་ཙམ་དུ་གྱུར་པ་ན་ཕམ་པར་འགྱུར་རོ་ཞེས་གསུངས་པའི་ཚད་ལས་འདས་པ་ལ་འཇོག་པ་ཡིན་པའི་ཕྱིར། དེས་ན་ཞིང་ཁང་བརྐུས་པ་ལ་གནས་སྤགས་ཀྱི་དོན་ཚང་སྟེ། རིབ་མ་ལ་སོགས་པས་བསྐོར་ནས་རྐུ་བའི་ཚེ་མ་བསྐོར་བའི་གནས་ནས་བསྐོར་བའི་གནས་སུ་སྤགས་པ་ཡིན་པའི་ཕྱིར་དང་། ཕུར་པ་བཏབ་ནས་རྐུ་བའི་ཚེ་སྔར་ཕུར་པ་མ་བཏབ་པའི་གནས་ནས་ཕུར་པ་བཏབ་བའི་གནས་སུ་སྤགས་པ་ཡིན་པའི་ཕྱིར། དེས་ན་མཐར་ཐུག་གནས་སྤགས་ལ་འཇོག་རིགས་པ་ཡིན་ཏེ། བམ་ལྔར་གནས་ནས་གནས་སུ་སྤོས་པ་ན་བརྐུས་པ་དེ་བྱེ་བྲག་ཏུ་བྱས་ནས་བསྟན་པའི་ཕྱིར་ཞེས་དང་། སུམ་བརྒྱ་པར། དེ་ལྟར་བརྐུ་བྱའི་དབྱེ་བས་རྐུ་དབྱེ་བ། །དེ་ནི་འདུལ་བརྒྱ་མཚོ་ལ་བལྟས་ཡིན། །ཞེས་གསུངས་པའི་ཕྱིར། མ་བྱིན་ལེན་གྱི་མཐར་ཐུག་གནས་སྤགས་ལ་འཇོག་ན་ཞིང་ལ་ཆུ་གཏོང་འགོག་གི་སྒོ་ནས་རྐུ་བའི་ཚེ་གནས་སྤགས་ཇི་ལྟར་ཚང་ཞེ་ན། གཞན་གྱི་ལས་ཀྱི་མཐའ་དག་ལ་ཆུ་གཏོང་བའམ་འགོག་པ་ལ་ནི་རང་གི་ལས་ཀྱི་མཐའ་གྲུབ་པ་སྐྱེད་མ་གཏོགས་པ་དེའི་ཆེད་དུ་དེར་འདུན་པས་གཞན་དུ་གྱུར་ནའོ་ཞེས་གསུངས་ཏེ། གྲུབ་ན་བརྐུས་པ་ཡིན་ནོ་ཞེས་སྦྱར་རོ། །གང་ན་དགེ་སློང་རང་གི་ཞིང་ལས་ཀྱི་མཐའ་ལོ་ཐོག་འཕེལ་བའོ། །གང་གི་ཚེ་ཞེ་ན་ཆུ་ཡོད་པའི་ཚེ་གཏོང་བའམ་དཀོན་པའི་ཚེ་འགོག་སྟེ་རྐུ་བ་ལ་ནི་སྟེ་དེའི་ཚེ་ནའོ། །གང་དུ་ན་གཞན་གྱི་ལས་ཀྱི་མཐའ་ལའོ། །ཅིའི་ཆེད་དུ་ཞེ་ན། རང་གི་ལས་ཀྱི་མཐའ་གྲུབ་པ་དེའི་ཆེད་དུའོ། །གྲུབ་པའི་ཁྱད་པར་ཇི་ལྟ་བུ་ཞེ་ན། རྒྱུན་པའི་ཞིང་གི་ཡོན་ཏན་གྱི་སྐྱེད་མ་གཏོགས་པ་སྟེ། དེ་མི་རྩི་བར་ཆུ་གཏོང་འགོག་ལས་གསར་དུ་བྱུང་བ་དེ་བརྩི་བར་བྱའོ། །གཞན་གྱི་ལས་ཀྱི་མཐའ་གྲུབ་ན་ཡང་དེ་ལྟར་ཡིན་ནམ་ཞེ་ན། གྲུབ་པ་ལས་གཞན་དུ་སྟེ་ཕུང་པར་གྱུར་ནའོ། །བསམ་པ་གང་གིས་ཞེ་ན་བདག་གི་དེ་གྲུབ་པར་བྱ་བ་དང་། གཞན་གྱི་དེ་ཕུང་བར་བྱ་བའི་དེར་འདུན་པས་སོ། །དེ་གཉིས་ནི་རྐུ་སེམས་ཡིན་ལ། མཐར་ཐུག་ལ་གནས་སྤགས་ཚང་སྟེ། རང་གི་ཞིང་ལ་སྐྱེད་མ་གྲུབ་པའི་གནས་ནས་གྲུབ་པའི་གནས་སུ་སྤགས་པའི་ཕྱིར་དང་། གཞན་གྱི་ཞིང་ལ་མ་ཕུང་བའི་གནས་ནས་ཕུང་བའི་གནས་སུ་སྤགས་པའི་ཕྱིར། ཤགས་ཀྱིས་གལ་ཏེ་བླའི་གྲྭར་རྒྱལ་ནའོ། །གལ་ཏེ་འོག་ཟུར་ན་ཕ་རོལ་པོའི་སྦྱོར་བ་ཉིད་བཏང་ནའོ་ཞེས་གསུངས་པའི་རྐུ་བ་ལ་གནས་སྤགས་ཚང་སྟེ། བླ་སྟེ་རྒྱལ་པོའི་གྲྭར་ཤགས་འགྱེད་པའི་སྒོ་ནས་ཕ་རོལ་གྱི་རྫས་རྐུ་བ་ན་ཤགས་རྒྱལ་བའི་ཚེ་དང་། འོག་ཟུར་བློན་པོའི་དྲུང་དུ་ཤགས་འགྱེད་པའི་སྒོ་ནས་རྐུ་བ་ན་ཕ་རོལ་པོས་རྩོད་པའི་སྦྱོར་བ་ཉིད་གཏོང་བ་ན་བརྐུས་པ་ཡིན་ཏེ། རིམ་པ་ལྟར་ཤགས་མ་རྒྱལ་བའི་གནས་ནས་རྒྱལ་བའི་གནས་སུ་སྤགས་པའི་ཕྱིར་དང་། རྩོད་པའི་སྦྱོར་བ་མ་བཏང་བའི་གནས་ནས་བཏང་བའི་གནས་སུ་སྤགས་པའི་ཕྱིར་ཞེས་འོད་ལྡན་ལས་བཤད་དོ། །གལ་ཏེ་གྲུབ་བློ་ཁོ་ན་ལ་འདོད་ན། གཏམས་པ་སྦས་པ་ལ་གལ་ཏེ་སྤོ་བ་དང་ལྷན་ཅིག་ཏུ་དང་། སྤོས་པའི་འོག་ཏུ་དང་། གལ་ཏེ་སྔར་ན་ནི་སྦྱོར་བ་གཞན་ཉིད་དོ་ཞེས་པའི་སྐབས་སུ། གཞན་གྱི་རྫས་བཅོལ་བ་དེ་ཞལ་ལྟ་བས་རྫས་སྤོས་པ་དང་ལྷན་ཅིག་གྲུབ་བློ་སྐྱེས་པ་དང་། སྤོས་པའི་འོག་ཏུ་གྲུབ་བློ་སྐྱེས་དང་། སྤོས་པའི་སྔར་གྲུབ་བློ་སྐྱེས་པ་དང་གསུམ་ལས། དང་པོ་གཉིས་ཀྱི་ཚེ་དངོས་གཞི་དང་། གསུམ་པའི་ཚེ་ན་སྦྱོར་སྦོམ་བསྐྱེད་པར་བཤད་པ་དང་འགལ་ཏེ། དེའི་ཚེ་ན་གྲུབ་བློ་སྐྱེས་པའི་ཕྱིར་རོ། །ཁྱབ་པ་ཁས་བླངས་སོ། །ཁོ་ན་རེ་མ་བྱིན་ལེན་གྱི་ཕམ་པའི་མཐར་ཐུག་གྲུབ་པ་ལ་གྲུབ་བློ་མི་དགོས་ན་གསང་སྔགས་དག་གིས་འདྲེན་པ་ནི་སྣང་བ་ནའོ་ཞེས་པའི་ཊཱི་ཀར། ཅི་སྟེ་ཤིན་ཏུ་ཐག་རིང་པོ་ནས་དྲངས་ཏེ་རྐང་པའི་དྲུང་དུ་འོངས་ཀྱང་ཇི་སྲིད་སྣང་བར་མ་གྱུར་ན་ཡང་བརྐུས་པར་མི་འགྱུར་ཏེ། གྲུབ་པའི་བློ་མེད་པའི་ཕྱིར་རོ། །གལ་ཏེ་རྐུན་མ་མང་པོ་ཞིག་ཡོད་པ་ལས་གཅིག་ཁོ་ན་ཞིག་གིས་གལ་ཏེ་མཐོང་ན་ཡང་དེའི་ཚེ་ཐམས་ཅད་ཀྱིས་མཐོང་བ་ཁོ་ན་ཡིན་ནོ། །ཞེས་གསུངས་པའི་ཕྱིར་ཞེ་ན། སྐྱོན་མེད་དེ། གྲུབ་པའི་བློ་མེད་པའི་ཕྱིར་རོ་ཞེས་པ་ནི། བྱུང་བར་ཤེས་པའི་བློ་མེད་པའི་ཕྱིར་ཞེས་པའི་དོན་ཡིན་པའི་ཕྱིར། ཁྱེད་ལྟར་ན་དེའི་ཚེ་གནས་སྤགས་ཚང་ཡང་གྲུབ་བློ་མ་ཚང་ཞེས་པའི་དོན་དུ་འཆད་དགོས་ལ། དེའི་ཚེ་གནས་སྤགས་ནི་ཚང་སྟེ་རྫས་དེ་མི་སྣང་བའི་གནས་ནས་སྣང་བའི་གནས་སུ་སྤགས་པ་ཡིན་པའི་ཕྱིར། ཁ་ཅིག་གྲུབ་བློས་ཁྱད་པར་དུ་བྱས་པའི་གནས་སྤགས་ལ་བྱེད་གསུང་བ་ཡང་མི་འཐད་པར་སྣང་སྟེ། རྐུན་མ་མང་པོ་ཞིག་གིས་ཐག་རིང་པོ་ནས་རྫས་དེ་རྐང་པའི་དྲུང་དུ་དྲངས་ཏེ་རྐུན་པོ་གཅིག་ཁོ་ནས་མཐོང་བའི་ཚེ་རྐུན་པོ་གཞན་རྣམས་ཀྱི་རྒྱུད་ལ་གྲུབ་བློ་སྐྱེས་པ་ཐལ། དེའི་ཚེ་ན་རྐུན་པོ་དེ་ཐམས་ཅད་ལ་མ་བྱིན་ལེན་གྱི་ཕམ་པ་བྱུང་བའི་ཕྱིར་ཏེ། ལུང་དྲངས་མ་ཐག་དེའི་ཕྱིར། སྔ་མའི་ཁྱབ་པ་ཁས་བླངས། དབྲལ་བར་བྱ་བ་དུ་མ་ཉིད་ཡིན་ན་དེའི་ཆ་སོ་སོའོ། །རྐུན་པོ་རྣམས་ཀྱང་ངོ་ཞེས་པའི་དོན། དབྲལ་བར་བྱ་བ་དེ་རྫས་བདག་མི་དུ་མ་ཉིད་ཡིན་ན་དེའི་ཆ་སོ་སོ་ལ་རིན་ཐང་བརྩི། རྐུན་པོ་རྣམས་ཀྱང་དགེ་སློང་དུ་མ་ཉིད་ཡིན་ན་ཆ་སོ་སོའི་རིན་ཐང་བརྩི་དགོས་པས། རྫས་བདག་ཐ་དད་པ་བཅུའི་ནོར་དགེ་སློང་གཅིག་གིས་བརྐུས་ན་རིན་ཐང་ཚང་བ་བཅུ་ལ་དངོས་གཞིར་འགྱུར་ལ། རྫས་བདག་བཅུ་ལ་རྐུན་མ་དགེ་སློང་བཅུས་བརྐུས་པའི་ཚེ་རིན་ཐང་ཚང་བ་བརྒྱ་ལ་དངོས་གཞིར་འགྱུར་ཞེས་པའི་དོན་ཡིན་ལ། འདི་ལ་ཁ་ཅིག་བརྐུ་བྱ་དང་རྐུ་བྱེད་གཉིས་ཀའི་འགོད་རྫས་དང་འཇོག་རྫས་གཉིས་ཡོད་པ་ལས། འགོད་རྫས་ཡིན་ན་དེ་ལྟར་ཡིན་ཀྱང་འཇོག་རྫས་ཡིན་ན་རིན་ཐང་ཚང་བ་གཅིག་བརྐུས་ནའང་ཕམ་པར་འགྱུར་བ་ཡིན་ནོ་ཞེས་གསུངས་མོད་ཤེས་བྱེད་ཡོད་པར་མ་མཐོང་ངོ་། །གསུམ་པ་གཞན་གྱི་སྲོག་ལ་གནོད་པ་སྲོག་གཅོད་ཀྱི་ཕམ་པ་ལ་གསུམ་སྟེ། སྤྱིའི་དོན་དང་། གཞུང་ལ་སྦྱར་བ། དོགས་པ་གཅད་པའོ། །དང་པོ་ལ་གླེང་གཞི་ནི་ཡུལ་སྤོང་བྱེད་དུ་གང་ཟག་དགེ་སློང་རབ་ཏུ་མང་པོས། ཉོན་མོངས་པ་མི་བཟོད་པས་ཀུན་ནས་བསླངས་ཏེ། ཉེས་པ་མི་བསད་པ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི། མཐོང་བའི་ཉེས་དམིགས་སྔར་བཞིན་ཡིན་ལ། མ་མཐོང་བའི་ཉེས་དམིགས་ལ་རྣམ་སྨིན་སྔར་དང་འདྲ། རྒྱུ་མཐུན་ལ་མྱོང་བ་རྒྱུ་མཐུན་ཚེ་ཐུང་བ་དང་། བྱེད་པ་རྒྱུ་མཐུན་སྲོག་གཅོད་པ་ལ་དགའ་བ་དང་། བདག་པོའི་འབྲས་བུ་ས་ཕྱོགས་གཟི་བརྗིད་ཆུང་བར་སྐྱེ་བའོ། །ཡན་ལག་ལ་རྟེན་གྱི་ཡན་ལག་སྔར་བཞིན། ཡུལ་གྱི་ཡན་ལག་མིའི་འགྲོ་བ་པ་ཡིན་པ། བདག་ཉིད་ལས་རྒྱུད་ཐ་དད་པའོ། །བསམ་པ་ལ་འདུ་ཤེས་མ་འཁྲུལ་ཞིང་། ཀུན་སློང་གསོད་པར་འདོད་པའི་བསམས་པའོ། །སྦྱོར་བ་རང་ངམ་བསྐོས་པས་ལུས་ངག་ཏུ་གྲུབ་ཅིང་མ་འཁྱོགས་པར་རྩོམ་པའོ། །མཐར་ཐུག་དེའི་རྐྱེན་གྱིས་རང་ཉིད་ཀྱི་སྔར་སྲོག་འགགས་པའོ། །གཉིས་པ་གཞུང་དོན་ལ་སྦྱར་བ་ནི། སྲོག་བཅད་ནའོ། །དེ་ལྟར་བསམས་པས་སོ། །མིར་གྱུར་པའི་འོ། །དེ་ལྟར་འདུ་ཤེས་པས་སོ། །གང་ཡང་རུང་བས་སོ་ཞེས་གསུངས་ཏེ། གང་ཞིག་བྱས་ན་སྲོག་གཅོད་པའི་ཕམ་པར་འགྱུར་ཞེ་ན། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །ཞེས་པ་ལྟར་གྱི་སྲོག་གི་དབང་པོ་མ་འོངས་པ་སྐྱེ་བ་དགག་པའི་སྒོ་ནས་བཅད་ནའོ། །ཁ་ཅིག་སྲོག་ནི་ལུས་ལ་རྣམ་ཤེས་འཇུག་པའི་རྟེན་རླུང་ཁྱད་པར་ཅན་ཡིན་གསུང་བ་མི་འཐད་དེ། རླུང་ནི་བེམས་པོ་ཡིན་ལ་སྲོག་ནི་ལྡན་མིན་འདུ་བྱེད་ཡིན་པའི་ཕྱིར། ཀུན་སློང་ནི་སྲོག་གཅོད་པ་དེ་ལྟར་བསམ་པས་སོ། །གང་གི་ཞེ་ན་མིར་གྱུར་པའམ་མིར་ཆགས་པའི་འོ། །དེ་ལ་མིར་ཆགས་པ་ནི། དང་པོར་མེར་མེར་པོ་ཡིན་ཏེ། །མེར་མེར་པོ་ལས་ནུར་ནུར་པོ། །ནུར་ནུར་པོ་ལས་སྒོར་སྒོར་པོ། །སྒོར་སྒོར་པོ་ལས་མཁྲང་འགྱུར་ཏེ། །མཁྲང་ལས་རྐང་ལག་འགྱུས་པ་དང་། །སྐྲ་སྤུ་སེན་པོ་རྣམས་དང་ནི། །དབང་པོ་གཟུགས་ཅན་ལ་སོགས་པ། །མཚོན་རྣམས་ཡོངས་སུ་རྫོགས་པར་འགྱུར། །ཞེས་མངལ་གྱི་གནས་སྐབས་ལྔ་གསུངས་པའི་མཁྲང་འགྱུར་གྱི་བར་གྱི་གནས་སྐབས་བཞི་ལ་འཇོག་སྟེ། ལུས་དང་སྲོག་དང་ཡིད་ཀྱི་དབང་པོ་གསུམ་འདུས་པའོ། །མིར་གྱུར་པ་ནི་རྐང་ལག་འགྱུས་པ་ལ་སོགས་པའི་མངལ་གྱི་གནས་སྐབས་ལྔ་པ་དང་། བཙས་པའི་གནས་སྐབས་ཀྱི་བྱིས་པ་དང་གཞོན་ནུ་དང་། དར་བབ་དང་། དར་ཡོལ་དང་། རྒན་པོའི་གནས་སྐབས་ལྔ་རྣམས་ཏེ་དབང་པོ་དྲུག་འདུས་པའོ། །འདུ་ཤེས་ནི་མི་ལ་མི་དེ་ལྟར་དུ་འདུ་ཤེས་པ་སྟེ་འདུ་ཤེས་མ་འཁྲུལ་བའོ། །སྦྱོར་བ་ཇི་ལྟ་བུས་ཞེ་ན། དུག་དང་མཚོན་ལ་སོགས་པ་གང་ཡང་རུང་བའི་སྦྱོར་བས་སོ། །གསུམ་པ་དོགས་པ་གཅོད་པ་ལ་གཉིས་ཏེ། ཡུལ་ལ་དོགས་པ་གཅོད་པ་དང་། སྦྱོར་བ་ལ་དོགས་པ་གཅོད་པའོ། །དང་པོ་ནི། འོ་ན་འགྲོ་བར་མཚུངས་པ་ལ་མི་བསད་ན་ཕམ་པ་དང་། མི་མིན་བསད་ན་སྦོམ་པོ་དང་། དུད་འགྲོ་བསད་ན་ལྟུང་བྱེད་དུ་འཚལ་བའི་རྒྱུ་མཚན་ཅི་ཡིན་ཞེ་ན། འགྲོ་བ་རབ་འབྲིང་ཐ་མ་གསུམ་གྱི་དབང་དུ་བྱས་པ་ཡིན་ཏེ། འོད་ལྡན་ལས། མི་རྣམས་ཁོ་ན་ལ་དཀོན་མཆོག་གསུམ་རྣམ་པར་འཇོག་པ་དང་། སྡོམ་པ་གསུམ་གནས་ལ། མི་མ་ཡིན་པ་རྣམས་ལ་ཡང་བསམ་གཏན་དང་ཟག་མེད་ཀྱི་སྡོམ་པ་གཉིས་གནས་ཤིང་། དུད་འགྲོ་རྣམས་ལ་སྡོམ་པ་མེད་པ་ཡིན་ཞེས་གསུངས་པས་མི་རྣམས་གཙོ་བོ་ཡིན། མི་མིན་རྣམས་འབྲིང་ཡིན། དུད་འགྲོ་རྣམས་ཐ་ཆད་པ་ཡིན་པས་ལྟུང་བ་ཐ་དད་པར་ཁོང་དུ་ཆུད་པར་བྱའོ་ཞེས་སོ། །གཉིས་པ་ལ་གསུམ་སྟེ། སྦྱོར་བ་ཐ་མ་ལ་རྩོད་པ་སྤོང་བ་དང་། སྦྱོར་བ་དང་པོ་ལ་རྩོད་པ་སྤོང་བ་དང་། དགྲ་བཅོམ་པ་ཆོས་དགའི་འདོད་པ་བསྟན་པའོ། །དང་པོ་ནི། གལ་ཏེ་མི་བཅུས་ཉིན་གཅིག་ལ་གསོད་པའི་སྦྱོར་བ་བྱས་ཏེ། དང་པོས་མི་དེ་ཞག་བཅུ་ནས་འཆི་བར་འགྱུར་བའི་མཚོན་བསྣུན། གཉིས་པས་ཞག་དགུ་ནས་འཆི་བར་འགྱུར་བའི་མཚོན་བསྣུན་པ་ནས། ཐ་མས་ད་ལྟ་རང་འཆི་བར་འགྱུར་བའི་མཚོན་བསྣུན་ན་བཅུ་ཆར་ལ་ཕམ་པ་བསྐྱེད་དམ་མི་བསྐྱེད། བསྐྱེད་ན་དེ་ཤི་བ་ཐ་མ་ཁོ་ན་ལ་སྣང་བ་འགལ་ལ་མི་བསྐྱེད་ན་བྱེ་བྲག་བཤད་པར། དགུ་པོ་དག་གིས་ཕམ་པའི་རྣམ་པར་རིག་བྱེད་མ་ཡིན་པ་གཟུང་ལ། བཅུ་པས་ནི་ཕམ་པའི་རྣམ་པར་རིག་བྱེད་དང་རྣམ་པར་རིག་བྱེད་མ་ཡིན་པ་ཡང་གཟུང་བ་ཡིན་ནོ། །ཞེས་གསུངས་པ་དང་འགལ་ལོ་ཞེ་ན། འདིའི་ལན་ལ་འོད་ལྡན་དུ་འགལ་བ་མེད་དེ། བཅུ་ཚན་གྱི་ཡང་སྦྱོར་བ་མཐུན་པའི་ཕྱིར་དང་། འབྲས་བུ་གཅིག་པའི་ཕྱིར་རོ་ཞེས་གསུངས་ཏེ། དེའི་དོན་ལ་རྨ་ཚོ་ལ་སོགས་པ་སྦྱོར་བ་གྲོས་བྱས་གཅིག་པའི་དོན་ཡིན་གསུང་པ་མི་འཐད་དེ། བཅུ་པོ་རང་རང་གི་མཚོན་བསྣུན་པ་ལ་མི་ལྟོས་པར་འགྱུར་ཏེ། དམག་ལ་སོགས་པ་དོན་གཅིག་ཕྱིར་ཞེས་གསུངས་པའི་ཕྱིར། སློབ་དཔོན་རྒྱ་ན་རེ་ནུས་པའི་མཐུ་སྡོམ་པ་ཡིན་གསུང་བ་ལ། གཞན་དག་ན་རེ་སྦྱོར་བ་རེ་རེས་འཆི་ངེས་སུ་བྱས་པ་མ་ཡིན་པར་ཐལ། ཕྱི་མ་ཕྱི་མས་སྔ་མ་སྔ་མ་ལ་མ་ལྟོས་པར་འཆི་བར་ངེས་པ་དེ་མེད་པའི་ཕྱིར་ཞེས་གསུངས་སོ། །རང་ལུགས་མི་བཅུ་པོ་རང་གི་སྟེང་ན་འཆི་ངེས་ཀྱི་སྦྱོར་བ་རེ་རེ་ཡོད་པས་སྦྱོར་བ་མཐུན་པའི་ཕྱིར་དང་། འབྲས་བུ་མི་དེ་ཤི་བར་གཅིག་པའི་ཕྱིར། ཐམས་ཅད་ལ་སྦྱོར་བ་དེས་ཤི་བ་ཡོད་པའི་ཕྱིར་ཞེས་པ་དམར་སྟོན་གསུང་བ་ནི་ལེགས་བཤད་དོ། །འཆི་བའི་སྐད་ཅིག་མ་ཐ་མ་ལ་གསོད་པའི་སྦྱོར་བ་བྱས་པས་ནི་ཕམ་པར་མི་འགྱུར་ཏེ། འོད་ལྡན་དུ་དབུགས་རྒྱུ་བ་ཐ་མར་གྱུར་པ་ནི་འཇིག་པའི་གནས་སྐབས་ཉིད་ཡིན་པའི་ཕྱིར་ག་ལ་མཚུངས་ཞེས་གསུངས་སོ། །གཉིས་པ་ནི། ཚེས་གཅིག་གི་ཉིན་ཚེས་བཅུ་ནས་འཆི་བར་འགྱུར་བའི་མཚོན་བསྣུན་པ་ནས་ཐ་མས་བཅུའི་ཉིན་ད་ལྟ་རང་འཆི་བར་འགྱུར་བའི་མཚོན་བསྣུན་ན་ཐམས་ཅད་ལ་ཕམ་པ་བསྐྱེད་དམ་མི་བསྐྱེད། བསྐྱེད་ན་དེ་ཤི་བའི་དང་པོ་ཁོ་ན་ལ་སྣང་བ་འགལ་ལ་མི་བསྐྱེད་ན་བྱེ་བྲག་བཤད་པ་དང་འགལ་ལོ་ཞེ་ན། ལན་སྔར་བཞིན་ནོ། །གསུམ་པ་ནི། བཙུན་པ་ཆོས་དགའ་ན་རེ་ཡང་ཚེའི་སྐད་ཅིག་མ་གཅིག་ལུས་པ་ལ་ཡང་གསོད་པ་གང་ཡིན་པ་དེ་མཐར་འགྱུར་ལ། གཞན་རྣམས་ལ་ནི་སྦོམ་པོར་འགྱུར་ཞེས་ཟེར་རོ་ཞེས་འོད་ལྡན་ལས་གསུངས་སོ། །བཞི་པ་གཞན་གྱི་དོན་འགྲུབ་པ་ལ་གནོད་པ་བརྫུན་དུ་སྨྲ་བའི་ཕམ་པ་ལ་སྤྱིའི་དོན་དང་། གཞུང་དང་སྦྱར་བ་གཉིས། དང་པོ་ལ། གླེང་གཞི་ནི་ཡུལ་ཡངས་པ་ཅན་དུ་གང་ཟག་ཉ་པའི་རིགས་ལས་རབ་ཏུ་བྱུང་བའི་དགེ་སློང་ལྔ་བརྒྱས་ཉོན་མོངས་པ་གྲགས་པ་འདོད་པས་ཀུན་ནས་བསླངས་ཏེ། ཉེས་པ་མིའི་ཆོས་བླ་མ་ཡང་དག་པ་མ་ཡིན་པར་སྨྲས་པ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི། མཐོང་ཆོས་ཀྱི་ཉེས་དམིགས་དང་རྣམ་སྨིན་གྱི་འབྲས་བུ་སྔར་དང་འདྲ། རྒྱུ་མཐུན་ལ་མྱོང་བ་རྒྱུ་མཐུན་སྐུར་བ་མང་བ་དང་། བྱེད་པ་རྒྱུ་མཐུན་བརྫུན་དུ་སྨྲ་བ་ལ་དགའ་བའོ། །བདག་པོའི་འབྲས་བུ་ས་ཕྱོགས་དྲི་ང་བར་སྐྱེ་བའོ། །བྱེད་རྒྱུ་ལ་ཐུན་མོང་གི་ཡན་ལག་སྔར་གྱི་སྟེང་དུ་བདག་ཉིད་མིའི་ཆོས་བླ་མ་དང་མི་ལྡན་པ། ཡུལ་གྱི་ཡན་ལག་ཐ་སྙད་ལྔ་ལྡན་ཏེ་རང་ལས་རྒྱུད་ཐ་དད་པའི་མི་སྨྲ་ཤེས་དོན་གོ་བ་ཤེས་པ་རང་བཞིན་དུ་གནས་པ་མ་ནིང་དང་མཚན་གཉིས་པ་མ་ཡིན་པ། དངོས་པོ་མིའི་ཆོས་བླ་མའི་མཚན་ཉིད་ཅན། བསམ་པ་ལ་གཉིས་ལས་འདུ་ཤེས་མ་འཁྲུལ་བ། ཀུན་སློང་འདུ་ཤེས་བསྒྱུར་བའི་དོན་ཅན་སྨྲ་བར་འདོད་པ། སྦྱོར་བ་ངག་མཚན་ཉིད་དྲུག་ལྡན་ཏེ་རང་གི་ཡིན་པ་དང་། ངག་ཡིན་པ་དང་བདག་ཉིད་དང་འབྲེལ་བ་དང་། བསམས་པའི་དོན་དང་། གསལ་པོར་དང་། མངོན་སུམ་དུ་སྨྲས་པའོ། །མཐར་ཐུག་དེའི་རྐྱེན་གྱིས་དོན་གོ་བའོ། །འདི་ལ་གནས་བརྟན་ཆེན་པོའི་གསུང་གིས་ཡུལ་གྱི་ཡན་ལག་ཐ་སྙད་ལྔ་ལྡན་མི་དགོས་ཏེ། བམ་ལྔ་ལས་མ་ནིང་དང་མཚན་གཉིས་པ་གང་ཡང་རུང་བ་ལ་ནི་ན་སྨད་པ་མེད་དོ་ཞེས་གསུངས་པའི་ཕྱིར། གསལ་བར་སྨྲས་པ་དགོས་ཟེར་བ་ལ་ཡང་དཔྱད་པར་བྱའོ་ཞེས་གསུང་ངོ་། །གཉིས་པ་གཞུང་དོན་ལ་སྦྱར་བ་ནི། འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲས་ནའོ་ཞེས་ཏེ། གང་ཞིག་བྱས་ན་སྨྲ་བའི་ཕམ་པར་འགྱུར་ཞེ་ན། བདེན་པའི་འདུ་ཤེས་བསྒྱུར་བ་སྟེ་སྦས་ཏེ་བརྫུན་པའི་འདུ་ཤེས་ཀྱིས་དགེ་སློང་རང་ཉིད་མིའི་ཆོས་བླ་མ་དང་མི་ལྡན་བཞིན་དུ་དེ་དང་ལྡན་ཞེས་སྨྲས་ན་བརྫུན་དུ་སྨྲ་བའི་ཕམ་པར་འགྱུར་རོ། །མིའི་ཆོས་བླ་མ་གང་ཞེ་ན། འདོད་ཡོན་ལྔ་ནི་མི་རྣམས་ཀྱི་ཆོས་ཡིན་ལ་དེ་ལས་བླ་མའམ་གོང་མའམ་མཆོག་ཏུ་གྱུར་པས་ན་མིའི་ཆོས་བླ་མ་ཞེས་བྱའོ། །ཡང་ན་མིའི་ཆོས་ནི་སྒྲིབ་པ་ལྔ་སྟེ་འདོད་པ་ལ་འདུན་པ་དང་། གནོད་སེམས་དང་། རྨུགས་པ་དང་གཉིད་གཅིག་ཏུ་བྱས་པ་དང་། རྒོད་འགྱོད་གཉིས་གཅིག་ཏུ་བྱས་པ་དང་། ཐེ་ཚོམ་སྟེ་ལྔ་ཡིན་ལ་དེ་དང་བྲལ་བས་ན་མིའི་ཆོས་བླ་མ་ཞེས་བྱའོ། །ཡང་ན་མི་རྣམས་ཀྱི་བརྟེན་པར་བྱ་བའི་ཆོས་ཀྱང་ཡིན་ལ་བླ་མ་ཡང་ཡིན་པས་ན་མིའི་ཆོས་བླ་མ་ཞེས་བྱ་སྟེ། མདོར་ན་བསམ་གཏན་དང་པོའི་ཉེར་བསྡོགས་ཀྱིས་ཐོབ་པའི་དགེ་བའམ་དེ་ཐོབ་པ་སྔོན་དུ་འགྲོ་དགོས་པའི་ཡོན་ཏན་ཁྱད་པར་བ་ནི་མིའི་ཆོས་བླ་མ་ཡིན་ནོ། །མི་ཆོས་བླ་མ་བརྗོད་པའི་ཚུལ་ལ་འབྲས་བུའི་སྒོ་ནས་དང་། ངོ་བོའི་དང་། ཁྱད་པར་གྱི་ཆོས་ཀྱི་དང་། གཞན་ལ་སྙད་བཏགས་པའི་དང་། ཉམས་པའི་དང་། ནོར་བའི་དང་། ཟུར་གྱི་དང་། ལུས་ཀྱི་སྒོ་ནས་བརྗོད་པ་དང་བརྒྱད་དུ་ཡོད་དེ་རྒྱས་པར་གཞུང་དོན་ལས་ཤེས་པར་བྱའོ།། ༈ །།གཉིས་པ་གསོ་བ་དགེ་འདུན་ལ་རག་ལས་པ་དགེ་འདུན་ལྷག་མའི་སྡེ་ལ་གཉིས་ཏེ་དངོས་དང་། མ་ངེས་པའི་སྡེ་བཤད་པའོ། །དང་པོ་ལ་སྡོམ་ནི། ཁུ་བ་འཛིན་དང་འཁྲིག་ཚིག་བསྙེན་བཀུར་སྨྱན། །ཁང་པ་ཁང་ཆེན་དང་ནི་གཞི་མེད་དང་། །བག་ཙམ་དགེ་འདུན་དབེན་དང་དེའི་རྗེས་ཕྱོགས། །ཁྱིམ་སུན་འབྱིན་དང་བཀའ་བློ་མི་བདེ་བའོ། །ཞེས་ཏེ། བཅུ་གསུམ་ཡོད་པ་བསྡུ་ན། དངོས་པོ་ལས་གྱུར་པ་དང་། བསྒོ་བ་ལས་གྱུར་པ་གཉིས། དང་པོ་ལ་གཉིས་ཏེ། འདོད་པ་ལས་གྱུར་པ་དང་། གནོད་པ་ལས་གྱུར་པའོ། །དང་པོ་ལ་གཉིས་ཏེ། རང་འདོད་པ་བསྟེན་པ་དང་། གཞན་འདོད་པ་བསྟེན་དུ་འཇུག་པ་ལས་གྱུར་པ་གཉིས། དང་པོ་ལ་གཉིས་ཏེ། རེག་བྱའི་བདེ་བ་ལས་གྱུར་པ་དང་། སྨྲ་བའི་བདེ་བ་ལས་གྱུར་པའོ། །དང་པོ་ལ་གཉིས་ཏེ། རང་གི་ལུས་ཀྱི་རེག་བྱའི་བདེ་བ་ལས་གྱུར་པ་དང་། གཞན་གྱི་ལུས་ཀྱི་རེག་བྱའི་བདེ་བ་ལས་གྱུར་པའོ། །དང་པོ་ནི། འབྱིན་པའི་དགེ་འདུན་ལྷག་མ་སྟེ་འདི་ལ་གླེང་གཞི་རྒྱུ་མཚན་བྱེད་རྒྱུ་དང་གསུམ། དང་པོ་ནི། ཡུལ་མཉན་ཡོད་དུ་གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས་ཉེས་པ་རང་གི་ཁུ་བ་བྱུང་བ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་ནི། རང་གི་ལུས་ལ་གནོད་པ་དང་ཕམ་པ་དང་པོའི་རྒྱུར་འགྱུར་བའོ། །གསུམ་པ་ལ་བཞི་ལས་གཞིའི་ཡན་ལག་གང་དབྱུང་བར་བྱ་བ་རང་གི་ཁུ་བ་ཡིན་པ་དང་པོའི་གནས་ན་གནས་པ་ཐ་སྙད་དུ་བྱར་ཡོད་པའི་ཚད་དུ་ལོངས་པའོ། །གང་ལས་དབྱུང་བ་ནི་སྐྱེས་པའི་ཡན་ལག་གི་རྣམ་པ་ཡིན་པ། གང་གིས་འབྱིན་པ་ནི་སེམས་ཅན་དུ་བགྲང་བ་དང་དེའི་རྣམ་པར་གནས་པའོ། །གཉིས་པ་ཀུན་སློང་ཁུ་བ་ཕྱུང་བའི་འདུན་པ་རྒྱུན་ལྡན། གསུམ་པ་སྦྱོར་བ་ནི་རེག་ཅིང་རྩལ་བར་ཞུགས་པའོ། །བཞི་པ་མཐར་ཐུག་ནི་ཁུ་བ་སྦུབས་སུ་འོང་ཞིང་བདེ་བ་མྱོང་བའོ། །གཉིས་པ་ནི། འཛིན་དང་ཞེས་པ་རེག་པའི་དགེ་འདུན་ལྷག་མ་སྟེ། འདི་ལ་གསུམ་ལས་གླེང་གཞི་ཡུལ་མཉན་ཡོད་དུ། གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས། ཉེས་པ་བུད་མེད་ཀྱི་ལུས་ལ་རེག་པ་ལ་བརྟེན་ནས་བསླབ་པའི་གཞི་འདི་བཅས་སོ། །གཉིས་པ་རྒྱུ་མཚན་ནི། བདག་ཉིད་ཉོན་མོངས་པའི་བསམ་པ་སྐྱེ་བ་དང་། ཕམ་པ་དང་པོའི་རྒྱུར་འགྱུར་བ་དང་། གཞན་མ་དད་པ་ལ་སོགས་པའི་རྒྱུར་འགྱུར་བའོ། །གསུམ་པ་བྱེད་རྒྱུ་ལ་བཞི་ལས། ཡུལ་ནི་མིའི་བུད་མེད་ཤེས་པ་རང་བཞིན་དུ་གནས་པ་མཚན་དོན་བྱེད་ནུས་པ། ལུས་བསྟེན་རུང་མ་ཉམས་པའི་རྨའི་སྒོ་གསུམ་ལས་གཞན་པའི་ལུས་དངོས་སམ་སྐྲའམ་དེ་དང་འབྲེལ་བའི་གོས་ཡིན་པའོ། །རེག་བྱེད་ནི་རང་གི་ལུས་མ་ཉམས་པ། ཟག་བྱེད་ལས་གཞན་པ་མིག་ནས་པུས་མོའི་བར་གང་ཡང་རུང་བ་ཡིན་པའོ། །བསམ་པ་ལ་གཉིས་ལས་འདུ་ཤེས་འདྲ། ཀུན་སློང་རེག་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་འདོད་ཆགས་དང་ལྡན་པའོ། །སྦྱོར་བ་རེག་པར་རྩོམ་པ། མཐར་ཐུག་རེག་པ་ལས་བྱུང་བའི་བདེ་བ་ཉམས་སུ་མྱོང་བའོ། །གཉིས་པ་སྨྲ་བའི་བདེ་བ་ལས་རྒྱུར་པ་ལ་གཉིས་ཏེ་འཁྲིག་ཚིག་སྨྲ་བ་དང་། བསྙེན་བཀུར་བསྔགས་པའོ། །དང་པོ་ལ་གསུམ་ལས་གླེང་གཞི་གསུམ་སྔ་མ་དང་འདྲ། ཉེས་པ་འཁྲིག་ཚིག་སྨྲས་པའོ། །རྒྱུ་མཚན་སྔ་མ་དང་འདྲ། ཡན་ལག་ལ་བཞི་ལས་གཞིའི་ཡན་ལག་ལ་ཡུལ་མིའི་བུད་མེད། མཚན་དོན་བྱེད་ནུས་ཐ་སྙད་བཞི་དང་ལྡན་པ། རྫུ་འཕྲུལ་མ་ཐོབ་པའོ། །གང་བརྗོད་པའི་དངོས་པོ་ནི་ཡུལ་དེར་འཁྲིག་པར་གྲགས་པའོ། །ཀུན་སློང་འཁྲིག་ཚིག་སྨྲས་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་འདོད་ཆགས་དང་ལྡན་པའོ། །སྦྱོར་བ་ངག་དྲུག་ལྡན། མཐར་ཐུག་ཡུལ་དེས་དོན་གོ་བའོ། །གཉིས་པ་ལ་གླེང་གཞི་ནི་ཡུལ་མཉན་ཡོད་དུ། གང་ཟག་འཆར་ཀས་ཉོན་མོངས་པ་འདོད་ཆགས་ཀྱིས། ཉེས་པ་རྒྱལ་བྱེད་ཚལ་བསྐོར་བའི་བུད་མེད་ལ་ང་ལྟ་བུ་ཚུལ་ཁྲིམས་དང་ལྡན་པ་ལ་འཁྲིག་པའི་བསྙེན་བཀུར་བྱས་ན་བསྙེན་བཀུར་རྣམས་ཀྱི་མཆོག་ཡིན་ནོ་ཞེས་སྨྲས་པ་ལ་བརྟེན་ནས་འདི་བཅས་སོ། །རྒྱུ་མཚན་དང་། སྦྱོར་བ་དང་། མཐར་ཐུག་ནི་སྔར་དང་འདྲ་ལ། ཀུན་སློང་ནི་བསྙེན་བཀུར་བསྔགས་པ་ལས་བྱུང་བའི་བདེ་བ་ཉམས་སུ་མྱོང་བར་འདོད་པའི་འདུན་པ་ཀུན་ཏུ་ཆགས་པ་དང་ལྡན་པའོ། །གཉིས་པ་གཞན་འདོད་པ་བསྟེན་དུ་བཅུག་པ་ལས་གྱུར་པ་ནི་སྨྱན་བྱེད་ལྷག་མ་སྟེ། གླེང་གཞི་ནི་ཡུལ་མཉན་ཡོད་དུ། གང་ཟག་དྲུག་སྡེས་ཉོན་མོངས་པ་འདོད་ཆགས་ཀྱིས། ཉེས་པ་སྨྱན་བྱས་པ་ལ་བརྟེན་ནས་འདི་བཅས་སོ། །བྱེད་རྒྱུ་ལ་བཞི་ལས་ཡུལ་སྤྲད་བྱ་མཚན་དོན་བྱེད་ནུས་པ། ཐ་སྙད་བཞི་དང་ལྡན་པ། ལུས་བསྟེན་དུ་རུང་བ། མི་མཐུན་པར་གནས་པ། བདག་ཉིད་ལས་རྒྱུད་ཐ་དད་པའོ། །བདག་པོ་ལྟ་བུ་ལ་སྨྱན་བྱེད་ན་དེ་གཉིས་ཐ་སྙད་ལྔ་དང་ལྡན་པའོ། །བསམ་པ་ལ་འདུ་ཤེས་མ་འཁྲུལ་ཞིང་སྤྲད་བྱ་མི་མཐུན་པར་མཐུན་པར་བསྒྲུབ་པའི་ཆེད་དུ་ཕྲིན་གྱི་སྦྱོར་བ་ལན་གསུམ་བྱེད་པར་འདོད་པ། སྦྱོར་བ་རང་ངམ་བསྐོས་པས་ཕྲིན་ལན་གསུམ་བྱེད་པའོ། །མཐར་ཐུག་དེ་གཉིས་ཀྱི་བསྟེན་བྱ་བསྟེན་བྱེད་ཕྲད་པའི་ཚེ་སྨྱན་བྱེད་པའི་ལྷག་མར་འགྱུར་རོ། །ཁ་ཅིག་འདིའི་གཞིའི་ཡན་ལག་ལ་སྐྱེས་པ་དང་བུད་མེད་དགོས་ཞེས་པ་མི་འཐད་དེ། སྐྱེས་པ་ནང་གི་སྨྱན་བྱས་པས་སྨྱན་བྱེད་ལྷག་མ་བསྐྱེད་པ་ཡིན་པའི་ཕྱིར་ཏེ། འགྲེལ་ཆུང་ལས། སྐྱེས་པ་ནང་གི་སྨྱན་བྱེད་ན་སྡིག་པ་ཤིན་ཏུ་ཆེ་བའི་ཕྱིར་ལྷག་མ་ཉིད་དུ་འགྱུར་ཞེས་གསུངས་པའི་ཕྱིར་དང་། སྐྱེས་པ་ནང་གི་སྨྱན་བྱས་པས་ལྷག་མ་མི་བསྐྱེད་ན་བུད་མེད་སྤྱིས་བསྐྱེད་ཀྱི་ལྟུང་བའི་སྐབས་སུ་སྨྱན་བྱེད་པ་ནི་མ་གཏོགས་པ་ཞེས་སྨོས་རིགས་པ་ལས་མ་སྨོས་པའི་ཕྱིར་རོ། །གཉིས་པ་གནོད་པ་ལས་གྱུར་པ་ལ་གཉིས་ཏེ། སེམས་ཅན་སྤྱི་ལ་གནོད་པ་དང་། བྱེ་བྲག་ཏུ་བསྙེན་པར་རྫོགས་པ་ལ་གནོད་པ་གཉིས་ལས། དང་པོ་ལ་གཉིས་ཏེ། ཁང་པ་ཁང་ཆེན་གྱི་ལྷག་མའོ། །དང་པོ་ལ་གླེང་གཞི་ནི་ཡུལ་མཉན་ཡོད་དུ། གང་ཟག་དགེ་སློང་རབ་ཏུ་མང་པོས་ཉོན་མོངས་པ་འདོད་ཞེན་གྱིས། ཉེས་པ་ཁང་པ་བརྩིགས་པ་ལ་བརྟེན་ནས། ཁང་པའི་ལྷག་མ་འདི་བཅས་སོ། །རྒྱུ་མཚན་ནི། སྲོག་ཆགས་ལ་གནོད་པ་དང་། འཐབ་རྩོད་དུ་འགྱུར་བ་དང་གནས་ཚེ་ཐུང་བ་དང་། རང་གི་བསམ་གཏན་དང་གློག་པ་ལ་གནོད་པ་སོགས་སོ། །བྱེད་རྒྱུ་ལ་གཞིའི་ཡན་ལག་ས་གཞི་དང་ཡོ་བྱད་གཞན་ལས་བཙལ་བའམ་དེ་གནང་བ་གཞི་མ་དག་པ་དང་མ་བསྟན་པའོ། །གང་རྩིག་པར་བྱ་བ་ནི་གཅིག་གི་ཆེད་ཡིན་པ་ཚད་ལས་ལྷག་པ། སྤྱོད་ལམ་བཞི་ཤོང་བ། སྔར་གཞན་གྱིས་བརྩམས་པ་མ་ཡིན་པའོ། །དེ་ལ་ཚད་ནི་འཇལ་བྱེད་ཀྱི་ཁྲུ་ཕྱེད་དང་དོ་ལ་བདེ་བར་གཤེགས་པའི་མཐོ་གང་ཡིན་པས་ནང་རོལ་གྱི་སྲིད་དུ་བདེ་བར་གཤེགས་པའི་མཐོ་བཅུ་གཉིས་ཏེ། འཇལ་བྱེད་ཀྱི་ཁྲུ་བཅོ་བརྒྱད་དང་། ཞེང་དུ་བདེ་བར་གཤེགས་པའི་མཐོ་བདུན་ཏེ་འཇལ་བྱེད་ཀྱི་ཁྲུ་ཕྱེད་དང་བཅུ་གཅིག་གོ །སྤྱོད་ལམ་བཞི་ཤོང་བ་ནི་འདུག་པའི་གནས་ལ་སྐྱིལ་ཀྲུང་དོག་པ་མེད་པ་དང་། འགྲེང་བའི་ཚེ་མགོ་བོ་ཐོག་ལ་མི་རེག་པ་དང་། འཆག་པའི་གནས་ལ་གོམ་པ་གསུམ་འདོར་དུ་ཡོད་པ་དང་། ཉལ་བའི་གནས་ལ་རྐང་ལག་བརྐྱངས་ཏེ་ཉལ་དུ་རུང་བའོ། །བསམ་པའི་ཡན་ལག་ལ་འདུ་ཤེས་མ་འཁྲུལ་ཞིང་ཀུན་སློང་རྩིག་འདོད་རྒྱུན་མ་ཆད་པ། སྦྱོར་བ་རང་ངམ་གཞན་ལ་བཅོལ་བས་རྩིག་པར་ཞུགས་པ། མཐར་ཐུག་ཕལ་ཆེར་བསྐོར་བ་དང་ཕལ་ཆེར་བཀབ་པ་ན་ལྷག་མར་འགྱུར་རོ། །གཉིས་པ་ཁང་ཆེན་ལ་གླེང་གཞི་ནི། ཡུལ་ཀོའུ་ཤམྦཱིར་གང་ཟག་དྲུག་སྡེས། ཉོན་མོངས་པ་མི་བཟོད་པས། ཉེས་པ་གཙུག་ལག་ཁང་བརྩིགས་པ་ལ་བརྟེན་ནས་འདི་བཅས་སོ། །རྒྱུ་མཚན་འདྲ། བྱེད་རྒྱུ་ཕལ་ཆེར་སྔ་མ་དང་འདྲ་བ་ལ་ས་གཞི་དང་ཡོ་བྱད་གཞན་ལ་བཙལ་བ་ཞེས་པ་དང་། ཚད་ལྷག་ཞེས་པ་དང་། གཅིག་ཆེད་དུ་ཞེས་པ་གསུམ་པོ་དེ་མི་སྦྱོར་ལ། ཚོགས་ཆེད་དུ་ཞེས་པའམ་བཞི་ཡན་ཆད་ཀྱིས་ཆེད་དུ་ཞེས་པ་སྦྱར་རོ། །ཁ་ཅིག་ཁང་ཆེན་གྱི་ལྷག་མ་བསྐྱེད་པ་ལ་དཀོན་མཆོག་གསུམ་པོ་གང་རུང་གི་ཆེད་བརྩིག་པ། དངོས་ཀྱི་བདག་པོ་ཁྱིམ་པ་ཡིན་པ་དགོས་ཏེ། རྣམ་འབྱེད་ལས་ཆེན་པོ་ཞེས་བྱ་བ་ནི་སྦྱིན་པར་བྱ་བའི་ཆོས་ཀྱིས་ཡིན་གྱི་ཚད་ཀྱིས་ནི་མ་ཡིན་ནོ་ཞེས་དང་འོད་ལྡན་ལས་ཁང་པ་དང་ལྷ་ཁང་དུ་གཏོགས་པ་ཞེས་གསུངས་པའི་ཕྱིར་ཞེས་པ་མི་འཐད་དེ། མདོ་རྩ་འདིར་ཁང་ཆེན་གྱི་ཡན་ལག་ཚང་བ་མ་བསྟན་པར་ཐལ། དཀོན་མཆོག་གསུམ་པོ་གང་རུང་གི་ཆེད་དུ་རྩིག་པ་ཡན་ལག་ཏུ་དགོས་པ་གང་ཞིག དེ་འདིར་མ་བསྟན་པའི་ཕྱིར། ལུང་གི་དོན་ནི། ཆེན་པོ་དང་མང་པོ་ཞེས་པ་ནི་འགྱུར་ཁྱད་ཡིན་པས་ཆེད་དུ་བྱ་བ་མང་པོའི་ཆེད་དུ་ཞེས་པའི་དོན་དང་། ལྷ་ཁང་ཞེས་པའི་ལྷའི་སྒྲ་དེ་དགེ་འདུན་ལ་ཡང་འཇུག་ལ། སཾ་གྷ་ཞེས་པའི་སྒྲ་དགེ་འདུན་དང་ཚོགས་གཉིས་ཀ་ལ་འཇུག་པས་བོད་དུ་དགེ་འདུན་དང་ཚོགས་གཉིས་ཀ་ལ་བསྒྱུར་བ་མང་པོ་ཡོད་པའི་ཕྱིར། དེས་ན་འདིར་ཚོགས་ཞེས་པ་ནི་ཁྱིམ་པའམ་རབ་བྱུང་ཡིན་ཀྱང་རུང་སྟེ་བཞི་ཡན་ཆད་འདུས་པ་ལ་ཚོགས་ཞེས་བྱ་བར་ཤེས་པར་བྱའོ། །གཉིས་པ་ལ་གཞི་མེད་ཀྱི་སྐུར་འདེབས་དང་། བག་ཙམ་གི་སྐུར་འདེབས་ཀྱི་དགེ་འདུན་ལྷག་མ་གཉིས། དང་པོ་ལ་གླེང་གཞི་ནི་ཡུལ་རྒྱལ་པོའི་ཁབ་ཏུ། གང་ཟག་མཛའ་བོ་དང་ས་ལས་སྐྱེས་གཉིས་ཀྱིས། ཉོན་མོངས་པ་མི་བཟད་པས་ཀུན་ནས་བསླངས་ཏེ། ཉེས་པ་མཐོང་ཐོས་དོགས་པའི་གཞི་མེད་བཞིན་དུ་གྱད་བུ་ནོར་ལ་མི་ཚངས་སྤྱོད་བྱས་སོ་ཞེས་སྐུར་པ་བཏབ་པ་ལ་བརྟེན་ནས་འདི་བཅས་སོ། །རྒྱུ་མཚན་ནི་སྐུར་འདེབས་ཀྱི་ཚིག་བདེན་པར་བཟུང་ན་ཡུལ་དེ་ལ་གནོད་པ་དང་། བདེན་པར་མ་བཟུང་ན་ཡང་སྐུར་འདེབས་མཁན་དུ་འཛིན་པ་དང་། ལྷ་དང་བཅས་པའི་འཇིག་རྟེན་གྱིས་སྤོང་བ་དང་། ངན་སོང་དུ་སྐྱེ་བར་འགྱུར་ཏེ། ཡང་དག་སྡོམ་དང་དཀའ་ཐུབ་ཅན། །དྲང་སྲོང་རྣམས་ལ་སྐུར་འདེབས་པ། །དེ་དག་སྤྱིའུ་ཚུགས་སུ་ནི། །དམྱལ་བ་ཁོ་ནར་འགྲོ་བར་འགྱུར། །ཞེས་གསུངས་སོ། །བྱེད་རྒྱུ་ལ་བཞི་ལས་གཞིའི་ཡན་ལག་ནི་ཡུལ་བསྙེན་པར་རྫོགས་པའི་སྡོམ་པ་དང་ལྡན་པ་དང་། ཐ་སྙད་གསུམ་དང་ལྡན་པ། རང་ལས་རྒྱུད་ཐ་དད་པའོ། །གོ་བྱའི་ཡུལ་ཐ་སྙད་ལྔ་དང་ལྡན་ཞིང་རང་ལས་རྒྱུད་ཐ་དད་པའོ། །དངོས་པོ་ནི་ཕམ་པ་བཞིའམ་བརྒྱད་ལས་གང་ཡང་རུང་བ། བསམ་པ་འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་བའི་དོན་ཅན། ཉམས་པར་འདུན་པས་སྐུར་བར་འདོད་པ། སྦྱོར་བ་དེའི་མིང་གིས་ངག་མཚན་ཉིད་བཞི་ལྡན་གྱིས་སྐུར་པ་བཏབ་པའོ། །ངག་མཚན་ཉིད་དྲུག་ལྡན་མི་དགོས་ཏེ། བམ་ལྔར་བརྡ་ཕྲད་པའི་ཐབས་མངོན་སུམ་མམ། བརྒྱུད་པའམ་ཕྲིན་དང་སྤྲིང་ཡིག་དང་བརྡ་ལ་སོགས་པས་གོ་བར་བྱེད་པ་གང་ཡང་རུང་བ་ལ་ན་སྨད་པ་མེད་དོ། །ཞེས་གསུངས་པའི་ཕྱིར། མཐར་ཐུག་གང་ལ་སྨྲ་བའི་ཡུལ་དེས་དོན་གོ་བའོ། །གཉིས་པ་བག་ཙམ་ལ་གླེང་གཞི་གསུམ་འདྲ་བ་ལ། ཉེས་པ་གྱད་བུ་ནོར་དང་ཨུཏྤལའི་མདོག་ཅན་དང་མི་ཚངས་པར་སྤྱོད་པ་མཐོང་ཞེས་པ་ལྟ་བུ་གཞན་གྱི་ཆ་དང་མི་མཐུན་པ་དང་མཐུན་པས་སྐུར་བའོ། །རྒྱུ་མཚན་སོགས་འདྲ་ལ་སྦྱོར་བ་མིང་ནས་སྨོས་ཤིང་གཞན་ལ་སྨོས་པའི་ཚིག་མི་གསལ་བ་མཚན་ཉིད་དྲུག་ལྡན། མཐར་ཐུག་དོན་གོ་བའོ། །འདི་དང་གཞི་མེད་ཀྱི་ཁྱད་པར་ནི་སྐུར་འདེབས་གཞིར་བྱས་པ་ལ་སྔ་མས་བྱེད་པ་པོ་དང་བྱ་བ་སྦྱར་ནས་གསལ་བར་སྨོས་པ་ཡིན་ལ། འདིར་ནི་བྱ་བྱེད་མ་སྦྱར་བར་མི་གསལ་བར་སྨོས་པའོ། །གཉིས་པ་བསྒོ་བ་ལས་གྱུར་པ་ལ་གཉིས་ཏེ། བསྒོ་གྱུར་ཐུན་མོང་བ་དང་། ཐུན་མོང་མ་ཡིན་པའོ། །དང་པོ་ནི། བཟློག་པའི་ཚུལ་གྱིས་མི་གཏོང་བར་རྗེས་སུ་བསྒྲུབ་པའི་རང་བཞིན་ནི་རྗེས་སུ་མཐུན་ནོ། །གསོལ་བ་ནི་བཟློག་པ་དང་འདྲ་བ་ཉིད་དོ། །ཚིག་གི་སྐད་ཅིག་མ་གཅིག་ཉིད་དོ། །བཟླས་པ་ནི་ཐ་དད་པ་ཉིད་དོ། །མཇུག་སྡུད་པ་ནི་མ་ཡིན་ནོ། །བསྐྲད་པ་དང་གླེང་བ་དང་དྲན་པར་མ་བྱས་པ་ནི་དེའིའོ། །དེ་ལ་ནི་བསྒོ་བར་མི་བྱ་བ་ཉིད་དོ། །དེ་དག་ལ་བཞམ་པ་དང་ལས་ཀྱི་མི་བསྒོ་བར་མི་བྱའོ། །དེའི་མཐའ་ལ་མི་གཏོང་ནའོ་ཞེས་གསུངས་ཏེ། འདི་ལ་དགོས་དོན་དང་། ཚིག་དོན་གཉིས་ལས། དང་པོ་ནི། བསྒོ་གྱུར་བཞིའི་ཐུན་མོང་གི་མདོ་འདི་གསུངས་པ་ལ་དགོས་པ་ཅི་ཡོད་ཅེ་ན། འདི་ལ་དགོས་པ་ཡོད་དེ་སྒོ་བ་ལས་གྱུར་པའི་ལྟུང་བ་འདི་དག་རྐྱེན་བཟློག་པ་ལ་ལྟོས་པ་དང་། བཟློག་ཚུལ་མཚུངས་པ་དག་འདིར་བསྡུས་ཏེ་བསྟན་པས་ཚིག་ཚེགས་ཆུང་བ་དང་། དེའི་དོན་བདེ་བླག་ཏུ་རྟོགས་པར་འགྱུར་བ་ཡིན་པའི་ཕྱིར་རོ། །གཉིས་པ་ནི། བསྒོ་གྱུར་གྱི་ལྟུང་བ་རྣམས་ཚུལ་ཇི་ལྟར་བསྐྱེད་ཅེ་ན། དགེ་འདུན་གྱི་དབྱེན་ལ་སོགས་པ་ལ་འཇུག་པ་ན་བཞམ་སྟེ་བསྒོ་བ་ལ་སོགས་པ་བཟློག་ཚུལ་ལྔའི་ཚུལ་གྱིས་བཟློག་ཀྱང་མི་གཏོང་བ་སྟེ་ཉེས་སྤྱོད་དེ་མི་སྤོང་བར་ལུས་ངག་གི་རྗེས་སུ་བསྒྲུབ་པའམ་ཅང་མི་སྨྲ་བའི་རང་བཞིན་གང་ཡིན་པ་དེ་ནི་བསྒོ་གྱུར་གྱི་ལྟུང་བ་བསྐྱེད་པར་རྗེས་སུ་མཐུན་ཏེ། བཟློག་པའི་གྲངས་ཇི་སྙེད་པའི་ལྟུང་བ་ཡང་དེ་སྙེད་བཟློག་པ་སྦྱོར་བར་གྱུར་པ་ན་ལྟུང་བ་ཡང་སྦྱོར་བ། བཟློག་པ་མཐར་ཐུག་པ་ན་ལྟུང་བ་ཡང་མཐར་ཐུག བཟློག་པ་གཅིག་ཏུ་གྱུར་པ་ན་ལྟུང་བ་ཡང་གཅིག་ཏུ་འགྱུར་བའི་ཕྱིར། གསོལ་བ་ནི་བཟློག་བྱེད་དངོས་མ་ཡིན་པས་གསོལ་བའི་མཐའ་ལ་མ་བཏང་བ་ལ་བསྒོ་གྱུར་གྱི་ལྟུང་བ་མི་སྐྱེད་དམ་ཞེ་ན། འདྲ་བ་ཉིད་དོ་ཞེས་པ་བཤད་པའི་གཞིར་གཞག གང་འདྲ་ན་དབྱེན་ལ་སོགས་པ་བཟློག་དོན་དུ་བྱས་པའི་གསོལ་བ་ནི་འདྲ། གང་དང་འདྲ་ན་དབྱེན་སོགས་བཟློག་དོན་དུ་བྱས་པའི་བརྗོད་པ་དང་པོ་དང་འདྲ། གང་ལ་འདྲ་ན་བསྒོ་གྱུར་གྱི་ལྟུང་བ་བསྐྱེད་པ་ལ་འདྲ། ཇི་ལྟར་འདྲ་ན་བརྗོད་པ་དང་པོའི་མཐའ་ལ་མ་བཏང་བ་ལ་སྦོམ་པོ་བསྐྱེད་པ་བཞིན་དུ་གསོལ་བའི་མཐའ་ལ་མ་བཏང་ན་སྦོམ་པོ་བསྐྱེད་པར་འདྲ། གསོལ་བ་དེ་ལ་ཚིག་སྐད་ཅིག་སྔ་ཕྱི་དུ་མ་ཡོད་པས་ལྟུང་བ་ཐ་དད་བསྐྱེད་དམ་ཞེ་ན། གསོལ་བའི་ཚིག་གི་སྐད་ཅིག་མ་རྣམས་ནི་ལྟུང་བ་གཅིག་སྐྱེད་པར་བྱེད་པ་ཡིན་ནོ། །བརྗོད་པ་ནི་ཡང་ནས་ཡང་དུ་བསྐྱར་བ་ཡིན་པས་ལྟུང་བ་གཅིག་ཁོ་ན་བསྐྱེད་དམ་ཞེ་ན། བཟླས་པ་སྟེ་བརྗོད་པ་རྣམས་ནི་ལྟུང་བ་ཐ་དད་བསྐྱེད་པའི་བྱེད་པ་པོ་ཉིད་ཡིན་ནོ། །བརྗོད་པ་གསུམ་པོའི་མཇུག་སྡུད་དེ་བརྗོད་པ་གསུམ་ལས་ལོགས་སུ་ལྟུང་བ་སྐྱེད་བྱེད་ཡིན་ནམ་ཞེ་ན། བརྗོད་པ་གསུམ་པོའི་མཇུག་སྡུད་པ་ནི་ལྟུང་བ་བསྐྱེད་པའི་བྱེད་པ་པོ་མ་ཡིན་ཏེ་ལས་བྱས་ཟིན་དགེ་འདུན་ལ་གོ་བར་བྱེད་པ་ཙམ་ཡིན་པའི་ཕྱིར། བཞམ་བསྒོའི་འོག་ཏུ་སྔ་རོལ་ཏུ་དབྱེན་ལ་སོགས་པ་རྩོམ་པ་ལ་འཇུག་པ་དེ་ལ་ལྟུང་བ་ཅིར་འགྱུར་ཞེ་ན། བཞམ་བསྒོ་བྱས་པ་ཕྱིན་ཆད་དབྱེན་ལ་སོགས་པ་བརྩམ་པ་ལ་འཇུག་པ་ནི་སྦྱོར་བ་ཉིད་ཡིན་པས་སྦོམ་པོར་འགྱུར་རོ། །དེར་ངེས་སམ་ཞེ་ན་ཁྱིམ་སུན་འབྱིན་པའི་དགེ་སློང་བསྐྲད་པ་ནན་ཏུར་མ་བྱས་པར་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བའི་དགེ་སློང་ལྟུང་བ་གླེང་བ་དང་དྲན་པར་མ་བྱས་པར་དགེ་འདུན་ལ་ངག་མི་སྙན་པར་བརྗོད་པ་ནི་སྦྱོར་བ་དེའི་སྦྱོར་བ་ཡིན་པས་ཉེས་བྱས་སུ་འགྱུར་རོ། །དེའི་ཤུགས་ལ་ཁྱིམ་སུན་འབྱིན་པ་བསྐྲད་པ་ནན་ཏུར་བྱས་ནས་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བ་ལྟུང་བ་གླེང་དྲན་བྱས་ནས་དགེ་འདུན་ལ་ངག་མི་སྙན་པ་བརྗོད་པ་ལ་ནི་སྦོམ་པོར་འགྱུར་བར་བསྟན་ནོ། །སྔ་མ་དེ་གཉིས་ལ་བཞམ་བསྒོ་བྱར་རུང་ངམ་ཞེ་ན། ཁྱིམ་སུན་འབྱིན་པ་བསྐྲད་པ་ནན་ཏུར་མ་བྱས་པར་དགེ་འདུན་ལ་སྐུར་པ་འདེབས་པ་དང་། བཀའ་བློ་མི་བདེ་བ་ལྟུང་བ་གླེང་དྲན་མ་བྱས་པར་དགེ་འདུན་ལ་ངག་མི་སྙན་པ་བརྗོད་པ་དེ་ལ་ནི་བཞམ་བསྒོ་མི་བྱ་སྟེ། གཞམ་བསྒོ་མ་རན་ཅིང་མི་ཆགས་པའི་ཕྱིར། དེ་ལྟར་བྱས་ནས་དགེ་འདུན་ལ་སྐུར་པ་འདེབས་པ་དང་ངག་མི་སྙན་པ་བརྗོད་པ་དེ་གཉིས་ལ་བཞམ་བསྒོ་ངེས་པར་བྱ་དགོས་སམ་ཞེ་ན། བསྐྲད་པ་ནན་ཏུར་དང་གླེང་དྲན་བྱས་པའི་རྗེས་སུ་དགེ་འདུན་ལ་དེ་ལྟར་བརྗོད་པ་དེ་དག་ལ་ཡིད་གཅུགས་པའི་གང་ཟག་གི་བཞམ་པ་དང་། དགེ་འདུན་གྱི་ལས་ཀྱི་མི་བསྒོ་བར་མི་བྱ་སྟེ་བསྒོ་རན་ཞིང་བསྒོ་བ་ཆགས་པའི་ཕྱིར། གང་གི་མཐའ་ལ་མི་གཏོང་བ་ལ་ལྷག་མར་འགྱུར་ཞེ་ན། བརྗོད་པ་གསུམ་པ་དེའི་མཐའ་ལ་མི་གཏོང་ན་དགེ་འདུན་ལྷག་མར་འགྱུར་རོ། །རྒྱ་གར་བ་ཁ་ཅིག་བརྗོད་པ་གསུམ་མཇུག་སྡུད་དང་བཅས་པའི་མཐའ་ལ་མ་བཏང་ན་དགེ་འདུན་ལྷག་མར་འགྱུར་ཞེས་གསུང་ངོ་། །ཁ་ཅིག་བསྒོ་གྱུར་གི་ལྟུང་བ་ལ་བཟློག་པ་ལྔའི་མཐའ་ལ་མ་བཏང་བའི་ལྟུང་བ་ལྔ་པོ་འདིར་ངེས་ཞེས་གསུང་བ་མི་འཐད་དེ། དབྱེན་རྩོམ་འཇུག་གི་སྦོམ་པོ་དེ་ལྔ་པོ་དེ་གང་གིས་ཀྱང་མ་བསྡུས་པའི་ཕྱིར། གཉིས་པ་ཐུན་མོང་མ་ཡིན་པ་ལ་བཞི་ཡོད་པ་ལས། དང་པོ་དགེ་འདུན་དབྱེན་གྱི་ལྷག་མ་ལ་གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་ལྷས་བྱིན་གྱིས། ཉོན་མོངས་པ་རྙེད་བཀུར་འདོད་པས། ཉེས་པ་དགེ་འདུན་གྱི་དབྱེན་བྱས་པ་ལ་བརྟེན་ནས་འདི་བཅས་སོ། །རྒྱུ་མཚན་དགེ་འདུན་སྡེ་གཉིས་ལ་ཤིན་ཏུ་གནོད་པ་དང་། བསྐལ་པར་མནར་མེད་དུ་སྐྱེ་བ་ལ་སོགས་པའོ། །བྱེད་རྒྱུ་ལ་བཞི་ལས་སྦྱོར་བ་རྩམ་པའི་གཞི་ནི་བདག་ཉིད་འཁོར་ལོའི་དབྱེན་གྱི་སྦྱོར་བ་མཚན་ཉིད་པ་ལ་ཞུགས་པ་ཡིན་པ། རྫོགས་པར་བྱེད་པའི་རྐྱེན་དགེ་འདུན་མཚན་ཉིད་པ་ལས་ངོ་བོ་ཉིད་ཆོས་དང་ལྡན་པ། བསམ་པ་ལ་འདུ་ཤེས་མ་འཁྲུལ་ཞིང་ཀུན་སློང་ཆོས་ལས་ཆོས་མ་ཡིན་པ་དབྱེ་བར་འདོད་པ། སྦྱོར་བ་འབྱེད་པར་རྩོམ་པ། མཐར་ཐུག་བརྗོད་པ་གསུམ་པའི་མཐའ་ལས་འདས་པའོ། །སྤྱིར་དགེ་འདུན་གྱི་དབྱེན་དང་། དབྱེན་གྱི་མཚམས་མེད་དང་། དབྱེན་གྱི་ལྷག་མ་གསུམ་གསུངས་པ་ལ་ཁྱད་པར་ཡོད་དེ། དགེ་འདུན་དབྱེན་ངོ་བོ་ལྡན་མིན་འདུ་བྱེད་ལུང་མ་བསྟན་ཡིན་ཞིང་དགེ་འདུན་ཕྱོགས་གཉིས་ལ་ལྡན་པ་ཡིན་ཏེ། མཛོད་ལས། དགེ་འདུན་དབྱེན་ནི་མི་འཕྲོད་པའི། །རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །དེ་དང་དགེ་འདུན་ཡང་དག་ལྡན། །ཞེས་གསུངས་སོ། །དབྱེན་གྱི་མཚམས་མེད་ནི་མནར་མེད་དུ་འཕེན་པའི་མི་དགེ་བ་ཡིན་ཞིང་། དབྱེན་གྱི་ལྷག་མ་ནི་བཅས་པ་ལས་འདས་པའི་ལྟུང་བའི་དངོས་གཞི་ཡིན་ལ། དེ་གཉིས་ནི་བྱེད་པ་པོའི་གང་ཟག་ལ་ལྡན་པ་ཡིན་ཏེ། དེ་ལ་ཁ་ན་མ་ཐོ་བརྫུན། །དེ་དང་འབྱེད་པོ་ཡང་དག་ལྡན། །ཞེས་གསུངས་པའི་ཕྱིར། ལས་དང་པོ་པ་ལ་འབྱུང་མི་འབྱུང་གི་ཁྱད་པར་ཡང་ཡོད་དེ། ལྷས་བྱིན་ལ་དགེ་འདུན་ཕྱེ་བས་དབྱེན་དང་དབྱེན་གྱི་མཚམས་མེད་བྱུང་ཡང་དབྱེན་གྱི་དགེ་འདུན་ལྷག་མ་ནི་མ་བྱུང་སྟེ། མ་བཅས་པ་ཉིད་ལའོ་ཞེས་གསུངས་པའི་ཕྱིར། དགེ་སློང་མ་ལ་དབྱེན་གྱི་ལྷག་མ་དང་། ལས་ཀྱི་དབྱེན་འབྱུང་ཡང་འཁོར་ལོའི་དབྱེན་དང་དབྱེན་གྱི་མཚམས་མེད་མི་འབྱུང་སྟེ། དེ་གཉིས་བྱེད་པ་པོ་དགེ་སློང་ཡན་ལག་ཏུ་དགོས་པའི་ཕྱིར། གཞན་ཡང་འདི་དག་ལ་ཁྱད་པར་མང་དུ་ཡོད་དོ། །གཉིས་པ་དེའི་རྗེས་སུ་ཕྱོགས་པའི་དགེ་འདུན་ལྷག་མ་ལ་གླེང་གཞི་ནི། ཡུལ་རྒྱལ་པོའི་ཁབ་ཏུ་གང་ཟག་དགེ་སློང་ཀོ་ཀ་ལི་ཀ་ལ་སོགས་པ་བཞིས། ཉོན་མོངས་པ་རྙེད་བཀུར་འདོད་པས། ཉེས་པ་ལྷས་བྱིན་གྱིས་དགེ་འདུན་གྱི་དབྱེན་བྱེད་པའི་གྲོགས་བྱས་པ་ལ་བརྟེན་ནས་འདི་བཅས་སོ། །རྒྱུ་མཚན་སྔར་དང་འདྲ། བྱེད་རྒྱུ་ལ་བཞི་ལས་གཞི་གང་ལ་གང་གིས་གྲོགས་བྱས་པའི་ཡུལ་ནི་དབྱེན་མཚན་ཉིད་པའི་སྦྱོར་བ་ལ་ཞུགས་པ། རྐྱེན་ནི་འདྲ། བསམ་པ་འདུ་ཤེས་མ་འཕྲུལ་ཞིང་། ཀུན་སློང་དེའི་གྲོགས་བྱ་བར་འདོད་པ། སྦྱོར་བ་སྒྲུབ་པར་རྩོམ་པ། མཐར་ཐུག་འདྲའོ། །གསུམ་པ་ཁྱིམ་སུན་འབྱིན་པའི་ལྷག་མ་ལ་གླེང་གཞི་ནི། ཡུལ་མཉན་ཡོད་དུ། གང་ཟག་འགྲོ་འགྱོགས་དང་ནབ་སོ་གཉིས་ཀྱིས། ཉོན་མོངས་པ་ཕྲག་དོག་གིས་ཀུན་ནས་བསླངས་ཏེ། ཉེས་པ་ཁྱིམ་པ་སུན་འབྱིན་པ་ལ་བརྟེན་ནས་འདི་བཅས་སོ། །རྒྱུ་མཚན་སྐུར་འདེབས་བཞིན་ནོ། །བྱེད་རྒྱུ་ལ་བཞི་ལས་གཞི་ལ་ཡུལ་ནི་མཚན་ཉིད་དང་ལྡན་པའི་དགེ་འདུན་རང་ལ་སྐྲོད་པར་བྱེད་པ་པོ་ཡིན་པ། གོ་བྱའི་ཡུལ་ཐ་སྙད་ལྔ་དང་ལྡན་པ་རྒྱུད་ཐ་དད་པའོ། །བདག་ཉིད་བསྐྲད་པར་བྱས་ལ་ཆགས་པ། རྐྱེན་འདྲའོ། །བསམ་པ་འདུ་ཤེས་མ་འཁྲུལ་ཞིང་ཀུན་སློང་དགེ་འདུན་ལ་སྐུར་པ་འདེབས་པར་འདོད་པ། སྦྱོར་བ་ངག་མཚན་ཉིད་དྲུག་ལྡན་གྱིས་རྩོམ་པ། མཐར་ཐུག་འདྲའོ། །བཞི་པ་བཀའ་བློ་མི་བདེ་བའི་ལྷག་མ་ལ་གླེང་གཞི་ནི། ཡུལ་ཀོའུ་ཤམྦཱིར། གང་ཟག་འདུན་པས། ཉོན་མོངས་པ་གླེང་བར་མི་འདོད་པས་ཀུན་ནས་བསླངས་ཏེ། ཉེས་པ་ལྟུང་བ་གླེང་དུ་མ་སྟེར་བ་ལ་བརྟེན་ནས་བསླབ་པའི་གཞི་འདི་བཅས་སོ། །རྒྱུ་མཚན་ནི་ལྟུང་བ་གླེང་མཁན་སྤངས་པས་གླེང་བའི་བྱ་བ་རྒྱུན་ཆད་པ་དང་དགེ་འདུན་སྤངས་པའོ། །བྱེད་རྒྱུ་ཡན་ལག་བརྩི་བ་ལ་བཞི་ལས་གཞི་ལ་ཡུལ་གྱི་ཡན་ལག་གང་སྤང་བའི་དངོས་པོ་བདག་ཉིད་ཀྱི་བསླབ་པའི་གཞི་དང་གླེང་བྱེད་དགེ་འདུན་མཐའ་དག་གོ །གོ་བྱ་ནི་གླེང་བྱེད་མཚན་ཉིད་དང་ལྡན་པ་བདག་ཉིད་ལ་གླེང་བ་པོ་ཡིན་པའོ། །བདག་ཉིད་གླེང་དྲན་བྱས་ལ་ཆགས་པ་ཡིན་པ། རྐྱེན་སྔ་མ་དང་འདྲ། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྤོང་བར་འདོད་པ། སྦྱོར་བ་ཁྱེད་ཅག་དགེ་ཡང་རུང་མི་དགེ་ཡང་རུང་ཞེས་སོགས་སྤོང་བའི་ཚིག་མཚན་ཉིད་དྲུག་ལྡན། མཐར་ཐུག་བརྗོད་པ་གསུམ་པའི་མཐའ་ལ་མ་བཏང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ། །ཤ་་་་་་ཁ་ཅིག་གླེང་བྱེད་དགེ་སློང་གིས་གླེངས་པ་ན་ཁྱེད་ཅག་དགེ་ཡང་རུང་སྡིག་ཀྱང་རུང་ཁོ་བོ་ཅག་ལ་ཅང་མ་སྨྲ་ཞིག ཁོ་བོ་དགེ་ཡང་རུང་སྡིག་ཀྱང་རུང་ཁྱེད་ཅག་ལ་ཅང་མི་སྨྲའོ། །ཞེས་གླེང་བ་པོ་རེ་རེ་བ་འགོག་པ་ལ་དང་པོར་བརྗོད་བཅས་བྱ། དེ་ལ་མི་གཏོང་ན་དེའི་རྗེས་སུ་གདམས་ངག་འཇོག་པ་དང་། གཏམ་སྨྲ་བ་འགོག་པ་དང་། གསོ་སྦྱོང་འཇོག་པ་དང་དགག་དབྱེ་འཇོག་པར་བྱ། དེ་ལ་མི་གཏོང་ན་ཕྱིར་འགྱེད་ནན་ཏུར་བྱེད། གླེང་བྱེད་དགེ་འདུན་གྱིས་གླེངས་པ་ན་ཁྱེད་རྣམས་དགེ་ཡང་རུང་ཞེས་སོགས་ཀྱི་སྒོ་ནས་གླེང་བ་པོ་མཐའ་དག་འགོག་པར་བྱེད་པ་ལ། དང་པོར་བརྗོད་བཅས་བྱ། མཉན་པ་མ་ཡིན་པའི་སྒོ་ནས་སྐབས་མི་འབྱེད་ན་ཕུར་བཅས་བྱ། དེ་ལ་མི་གཏོང་ན་གདམས་ངག་འཇོག་པ་ནས་དགག་དབྱེ་འཇོག་པའི་བར་བྱ། དེ་ལ་མི་གཏོང་ན་བཞམ་སྟེ་བསྒོ་བ་ལ་སོགས་པ་བཟློག་པ་ལྔ་བྱ། དེའི་མཐའ་ལ་མི་གཏོང་ན་དངོས་གཞིར་འགྱུར་རོ་ཞེས་གསུངས་པ་མི་འཐད་དེ། བམ་ལྔར་གླེང་བ་པོ་རེ་རེ་འགོག་པ་དང་མཐའ་དག་གང་འགོག་ཀྱང་དང་པོར་བརྗོད་བཅས་བྱ་བ་ནས་དགག་དབྱེ་འཇོག་པའི་བར་བྱ། དེ་ལ་མི་གཏོང་ན་བཞམ་སྟེ་བསྒོ་བ་ལ་སོགས་པ་བཟློག་པ་ལྔ་བྱ། དེའི་མཐའ་ལ་མི་གཏོང་ན་ལྷག་མར་འགྱུར་བར་གསུངས་པའི་ཕྱིར། མཚོ་་་་་་ཁ་ཅིག་དེ་ལྟར་ན་བཀའ་བློ་མི་བདེ་བའི་དགེ་འདུན་ལྷག་མ་མི་སྲིད་པར་ཐལ་བའི་སྐྱོན་ཡོད་དེ། དང་པོ་ལྟུང་བ་གླེང་བའི་སྐབས་ཕྱེ་ཤིག་ཞེས་བརྗོད་པ་ན། སྐབས་འགོག་པ་ལ་ནི་བཞམ་བསྒོ་སོགས་བཟློག་པ་བྱས་ཀྱང་མི་འཆགས་པའི་ཕྱིར། ཞེས་བཀག་ནས་ཁོང་རང་གི་ལུགས་ལ་དང་པོར་སྐབས་ཕྱེ་བ་ཡིན་ལ། གླེང་པའི་ཚེ་ན་སྐབས་འགོག་པར་བྱེད་པ་ལ་བཞམ་བསྒོ་སོགས་བཟློག་པ་ལྔ་བྱ། དེའི་མཐའ་ལ་མ་གཏང་ན་བཀའ་བློ་མི་བདེ་བའི་ལྷག་མར་འགྱུར་བའི་ཕྱིར་ཞེས་གསུངས་པ་མི་འཐད་དེ། ལྟུང་བ་གླེང་བའི་ཚེ་ལྟུང་བ་ཕྱིར་བཅོས་གྱིས་ཤིག་ཅེས་བརྗོད་པར་བྱ་བ་ཡིན་པའི་ཕྱིར་ཏེ། ལུང་དུ་ཡང་འཕགས་པ་ཤཱ་རིའི་བུས་དྲུག་སྡེ་ལ་ལྟུང་བ་ཕྱིར་བཅོས་གྱིས་ཤིག་ཅེས་བརྗོད་པ་ན་ལྟུང་བ་མ་མཐོང་ཞེས་སྨྲས་པའི་ཕྱིར་དང་། དགེ་སློང་འདུན་པས་སྲོག་ཆགས་དང་བཅས་པའི་ཆུ་ལ་རྩྭ་དང་ལོ་མ་བཏབ་པའི་ཚེ་ན་ཡང་ཚེ་དང་ལྡན་པ་འདུན་པ་ལྟུང་བ་ཕྱིར་བཅོས་གྱིས་ཤིག་ཅེས་གླེང་བའི་ཕྱིར། དེས་ན་ལྟུང་བ་ཕྱིར་བཅོས་གྱིས་ཤིག་ཅེས་པ་ལྟ་བུ་ཕྱོགས་གཅིག་ནས་གླེང་བ་ཡིན་ལ། ལྟུང་བའི་ངོ་བོ་ནས་གཟུང་སྟེ་ཕྱིར་བཅོས་གྱིས་ཤིག་ཅེས་པ་ནི་མཐའ་དག་དྲན་པར་བྱེད་པའོ།། ༈ །།གཉིས་པ་མ་ངེས་པའི་སྡེ་ལ་སྡོམ་ནི། དབེན་པ་སྐྱབས་ཡོད་འདུག་པའོ། །ཞེས་ཏེ། མ་ངེས་པ་དང་པོ་ནི། གླེང་གཞི་སྟོན་པ་མཉན་ཡོད་ན་བཞུགས་པའི་ཚེ་ན། འཆར་ཀ་དང་དགེ་སློང་མ་སྦེད་མ་གཉིས། གནས་དབེན་པ་སྐྱབས་དང་བཅས་པ་པུས་མོ་སྤྲད་དེ་ཆོས་སྟོན་པ་དགེ་བསྙེན་མ་ས་ག་མས་མཐོང་སྟེ། འདི་དག་མ་དད་པས་མཐོང་ན་མི་རུང་ངོ་སྙམ་ནས་སྟོན་པ་ལ་གསོལ་བ་ལ་བརྟེན་ནས་འདི་བཅས་སོ། །དེ་ཡང་དབེན་པ་སྐྱབས་དང་བཅས་པར་དགེ་སློང་ཕོ་མོ་པུས་མོ་སྤྲད་དེ་ཆོས་སྟོན་པ་ནི། ཕམ་ལྷག་གང་རུང་འབྱུང་ལ་ཕམ་པར་ཡང་མ་ངེས་ལྷག་མར་ཡང་མ་ངེས་པས་མ་ངེས་པ་ཞེས་བྱ་སྟེ་འདོམ་གང་ཚུན་ཚད་དུ་གནས་པའོ། །གཉིས་པ་ནི། དགེ་སློང་མ་ཤི་རི་ཥ་དང་དགེ་སློང་གསོ་སྦྱོང་འཕགས་གཉིས་དབེན་པ་སྐྱབས་དང་བཅས་པར་འདོམ་གང་ཕན་ཆད་དུ་ཐ་དད་དུ་གནས་ནས་ཆོས་སྟོན་པ་ལེགས་སྐྱེས་མས་མཐོང་ནས་མ་དད་པས་མཐོང་ན་མི་ལེགས་སོ་སྙམ་ནས། སྟོན་པ་ལ་གསོལ་བ་ལ་བརྟེན་ནས་འདི་བཅས་སོ། །དེ་ཡང་དབེན་པ་སྐྱབས་དང་བཅས་པར་དགེ་སློང་ཕོ་མོ་ཕན་ཚུན་ཐ་དད་དུ་བསྡད་དེ་ཆོས་སྟོན་པ་ནི། ལྟུང་བྱེད་དང་སོར་བཤགས་ཉེས་བྱས་གསུམ་པོ་གང་རུང་དུ་འགྱུར་ལ། ལྟུང་བྱེད་ཁོ་ནར་ཡང་མ་ངེས་སོར་བཤགས་དང་ཉེས་བྱས་ཁོ་ན་འབྱུང་བར་ཡང་མ་ངེས་པས་ན་མ་ངེས་པའི་སྡེར་གཞག་པའོ།། ༈ །།གསུམ་པ་ལྟུང་བར་བྱེད་པ་ལྟུང་བྱེད་ཀྱི་སྡེ་ལ་གཉིས་ཏེ། ཞག་གི་ཆད་ལས་དང་འབྲེལ་བ་སྤང་བའི་ལྟུང་བྱེད་དང་། ལྟུང་བྱེད་འབའ་ཞིག་པའོ། །དང་པོ་ལ་ཐུན་མོང་དང་། ཐུན་མོང་མ་ཡིན་པ་གཉིས་ལས། དང་པོ་ནི། ཉིན་མཚན་གྱི་དང་པོ་མ་ཡིན་པ་ལ་ཐ་མ་མ་ཡིན་པ་མེད་པ་ཉིད་དོ་ཞེས་སོགས་ཏེ། འདི་ལ་ལྔ་སྟེ། དུས་དང་འབྲེལ་བའི་ཐུན་མོང་བ། བདག་པོ་དང་འབྲེལ་བའི་ཐུན་མོང་བ། ཤན་དང་འབྲེལ་བའི་ཐུན་མོང་བ། ཕྱིས་བཅོས་དང་འབྲེལ་བའི་ཐུན་མོང་བ། དང་པོ་གསུམ་དང་འབྲེལ་བའི་ཐུན་མོང་བའོ། །དང་པོ་ནི། ཞག་གི་རྒྱུན་དང་འབྲེལ་བའི་སྤང་བའི་ལྟུང་བྱེད་རྣམས་བསྐྱེད་པའི་ཞག་དང་པོ་ལྔ་སྟེ། དེ་ལོན་པ་ལ་ཉིན་མཚན་གཉིས་ཀ་འདས་པ་ཡན་ལག་ཏུ་དགོས་སམ་ཞེ་ན། དེའི་ཞག་དང་པོ་དེ་ལོན་པ་ལ་ཉིན་མཚན་གྱི་དང་པོ་མ་ཡིན་པ་སྟེ། ཐ་མ་དེ་འདས་པས་ཞག་ལོན་པ་ཡིན་གྱི། ཐ་མ་མ་ཡིན་པ་གོང་གི་ཐུན་བརྒྱད་པོ་རྣམས་དེའི་ཉིན་ཞག་ཏུ་མེད་པ་ཡིན་ཏེ་དེའི་ཉིན་ཞག་ཏུ་མི་བརྩི་བའི་ཕྱིར་རོ། །ཁ་ཅིག་ཞག་འདའ་མི་ནུས་པ་དེ་ཉིན་གྱི་དང་པོ་མ་ཡིན་པ་ལ་ཡོད་ཀྱི། མཚན་གྱི་ཐ་མ་མ་ཡིན་པ་ལ་མེད་ཟེར་བ་མི་འཐད་དེ། མཚན་གྱི་ཐ་མ་དེ་ཁོ་རང་གིས་ཁོ་རང་འཇིག་པར་ཐལ། ཁོ་རང་གིས་ཁོ་རང་འདའ་བའི་ཕྱིར། རྟགས་ཁས་བླངས། གཞན་ཡང་ཚེས་གཅིག་གི་ཉིན་གྱི་དང་པོ་དེ་ལ་ཚེས་གཅིག་གི་མཚན་མོ་འདའ་བའི་ནུས་པ་ཡོད་པར་ཐལ། ས་བོན་ལ་མྱུ་གུ་བསྐྱེད་པའི་ནུས་པ་ཡོད་པའི་ཕྱིར། བསལ་བ་ཁས་བླངས། ཞག་གིས་རྒྱུན་དང་འབྲེལ་བའི་སྤང་ལྟུང་ནི། གོས་ཞག་བཅུ་འཆད་སྤང་། ལྷུང་བཟེད་ཞག་བཅུ་འཆད་སྤང་། ཆོས་གོས་དང་འབྲལ་སྤང་། གསོག་འཇོག་གི་སྤང་བ་རྣམས་སོ། །གོང་གི་ཐུན་དེ་རྣམས་ལ་ལྟུང་བ་གཏན་མི་སྐྱེད་དམ་ཞེ་ན། བུད་མེད་དང་ལྷན་ཅིག་ཉལ་བ་ལ་སོགས་པ་ཡུལ་རྟེན་ལྷན་ཅིག་པ་ལས་བྱུང་བའི་ལྟུང་བ་དངོས་གཞི་རྣམས་ལ་ནི། མཚན་མོ་དེའི་མདུན་རོལ་གྱི་ཐུན་དེ་རྣམས་སྦྱོར་བའི་ལྟུང་བ་བསྐྱེད་པའི་སྣོད་ཡིན་ནོ། །ཁ་ཅིག་སྤང་ལྟུང་རྣམས་ལ་སྦྱོར་ལྟུང་མེད་དེ། ཞག་རྒྱུན་ལྡན་གྱི་སྤང་ལྟུང་རྣམས་བསྐྱེད་པའི་རྒྱུར་འགྱུར་གྱི་དངོས་པོ་དེ་སྐྱ་རེངས་འཆར་ཁ་ཚུན་ཆད་དུ་རུང་ལ། སྐྱ་རེངས་ཤར་ནས་སྤང་ལྟུང་བསྐྱེད་པའི་ཕྱིར་ཟེར་བ་མི་འཐད་དེ། འགྲེལ་ཆུང་དུ་གོས་ཞག་བཅུ་འཆད་སྤང་ལ་ནི་དང་པོ་ནས་ལྷོད་ཡངས་སུ་འཇོག་ན་འཆད་ཙམ་ནས་ལྟུང་བ་བསྐྱེད་པར་བཤད་པའི་ཕྱིར། བམ་ལྔར་ཞག་བཅུ་འདས་པས་བསྐྱེད་པའི་སྤང་བའི་ལྟུང་བྱེད་རྣམས་ལ་ནི་མཐར་ཐུག་པར་ན་དངོས་གཞི། སྔ་རོལ་དུ་ནི་ཉེས་བྱས་སོ་ཞེས་གསུངས་པའི་ཕྱིར། དེས་ན་སྐྱ་རེངས་ཤར་བའི་མགོ་བརྩམས་པ་ནས་གསལ་བ་ལ་ཐུག་གི་བར་དུ་སྦྱོར་བའི་ལྟུང་བ་བསྐྱེད་ལ་གསལ་བ་ཤར་བ་ན་དངོས་གཞིར་འགྱུར་རོ། །ཉིན་མཚན་གྱི་དང་པོ་དེ་གང་ཡིན་ཞེ་ན། སྐྱ་རེངས་དང་པོའི་སྐད་ཅིག་མ་དང་པོ་དེ་ནི་ཉིན་མཚན་དེའི་དང་པོ་ཡིན་ནོ། །ལུང་རྣམ་འབྱེད་ལས། སྐྱ་རེངས་དང་པོ་ཤར་བ་ན་ནམ་མཁའ་སྔོ་སྐྱར་འགྱུར། སྐྱ་རེངས་བར་པ་ཤར་བ་ན་ནམ་མཁའ་སེར་པོར་འགྱུར། སྐྱ་རེངས་ཐ་མ་ཤར་བ་ན་ནམ་མཁའ་དམར་པོར་འགྱུར་ཞེས་གསུངས་པའི་དོན་ལ། ཁ་ཅིག་མཚོ་མ་དྲོས་པའི་ནང་ན་ཤིང་འཛམ་བུ་ཞེས་བྱ་བ་ཡོད་དེའི་རྩེ་མོ་བཻཌཱུརྻ་སྐེད་པ་གསེར་རྩ་བ་པདྨ་རཱ་ག་ལས་བྱས་པ་ཡིན་པས། ཤིང་དེའི་རྩེ་མོ་ལ་ཉི་མ་ཤར་བ་དང་དེའི་མདངས་ཆུ་ལ་ཕོག དེའི་མདངས་ནམ་མཁའ་ལ་ཕོག་པས་སྔོན་པོར་འགྱུར་བ་སོགས་ཡིན་ནོ་ཞེས་གསུངས་པ་མི་འཐད་དེ། ཤིང་རིལ་པོ་ལ་ཉི་མ་ཕོག་པ་ན་ནམ་མཁའ་ཁྲ་བོར་འགྱུར་བར་ཐལ། དམ་བཅའ་དེའི་ཕྱིར། གཞན་ཡང་། འདི་ནས་བྱང་དུ་རི་ནག་པོ། །དགུ་འདས་གངས་རིའོ་དེ་ནས་ནི། །སྤོས་ངད་ལྡན་པའི་ཚུ་རོལ་ན། །ཆུ་ཞེང་ལྔ་བཅུ་ཡོད་པའི་མཚོ། །ཞེས་སོགས་བཤད་པས་མཚོ་དེ་རྡོ་རྗེ་གདན་གྱི་བྱང་ཕྱོགས་ན་ཡོད་ལ། དེར་ནམ་མཁའ་སྔོ་སོགས་སུ་གྱུར་པས་འཛམ་གླིང་ཀུན་ཏུ་ནམ་མཁའ་སྔོ་སོགས་ཡོད་པ་ལ་འབྲེལ་མེད་པའི་ཕྱིར། དེས་ན་ལུང་དེའི་དོན་ནི་ཉི་མའི་ངོ་བོ་མེ་ཤེལ་ཡིན་པ་དམར་པོར་ཡོད་ལ། འོད་ཟེར་དཀར་པོར་ཡོད་པས་ཐག་རིང་པོ་ནས་ནམ་མཁའ་ལ་ཕོག་པས་སྔོ་སྐྱར་འགྱུར་ལ། དེ་བས་ཉེ་བར་ཕོག་པ་ན་སེར་པོར་འགྱུར། དེ་བས་ཉེ་བ་ན་དམར་པོར་འགྱུར་ཞིང་། ཤིན་ཏུ་ཉེ་བ་ན་འོད་ཟེར་འཁྲུགས་པས་དཀར་པོར་གྱུར་པ་ཡིན་ནོ། །སྐྱ་རེངས་དེ་ནམ་གྱི་ཚེ་འཆར་ཞེ་ན། ཤ་་་་་་ཁ་ཅིག་མཚན་མོ་ལ་ཐུན་གསུམ་དུ་བྱས་པའི་ཐུན་ཐ་མའི་ཕྱེད་ན་འཆར། ཐུན་དགུར་བྱས་པའི་ཐུན་བདུན་པའི་ཕྱེད་ནས་འཆར་ཏེ། དགེ་སློང་མའི་སོ་ཐར་འགྲེལ་པར་ཐུན་ཐ་མའི་ཕྱེད་རྒྱལ་པོ་རྔ་བརྡུང་དུ་ཉེ་བ་ན་ཞེས་གསུངས་པའི་ཕྱིར་ཞེས་གསུང་བ་མི་འཐད་དེ། ཁྱེད་ཀྱི་དུས་གོ་བརྗོད་པའི་སྐབས་སུ་ཐུན་ཐ་མ་མཐུན་ཐ་མའི་ཕྱེད། སྐྱ་རེངས་མ་ཤར་བ་སྐྱ་རེངས་ཤར་བ་ཞེས་པ་དང་འགལ་བའི་ཕྱིར། དེས་ན་མཚན་མོ་ལ་ཐུན་དགུར་བྱས་པའི་ཐུན་བརྒྱད་པའི་ཕྱེད་ནས་འཆར་ཏེ། ལུང་དུ། ཆ་བརྒྱད་པ་ལུས་པ་ན་འཆར་ཞེས་པ་དང་། ཐུན་ཐ་མའི་དང་པོའི་ཕྱེད་རྒྱལ་པོ་རྔ་བརྡུང་དུ་ཉེ་བ་ན་ཞེས་གསུངས་པའི་ཕྱིར་དང་ཆ་དགུར་བྱས་པའི་ཆ་དགུ་པ་དེ་ཐུན་ཐ་མ་ཡིན་ལ། དེའི་དང་པོའི་ཕྱེད་ཆ་བརྒྱད་པ་དེ་ཡིན་པའི་ཕྱིར། ཉིན་མཚན་གྱི་དང་པོ་དེར་ངེས་སམ་ཞེ་ན། གསོ་སྦྱོང་དང་དགག་དབྱེ་ལ་སོགས་པའི་ལས་ལ་ཆོས་ལྡན་གྱི་དགོས་པའི་དབང་གིས་དུས་ལས་འདས་ཤིང་ཡོལ་བ་ལ་ནི། ཉི་མ་ཤར་བའི་སྐད་ཅིག་དང་པོ་ཚུན་ཆད་ཉིན་མཚན་གྱི་དང་པོ་ཡིན་པས་ཉི་མ་འཆར་ཁ་ཚུན་ཆད་དུ་གྲུབ་ན་ལེགས་པར་གྲུབ་པ་ཡིན་ནོ། །གཉིས་པ་བདག་པོ་དང་འབྲེལ་བའི་ཐུན་མོང་བ་ནི། བདག་འབྲེལ་གྱི་སྤང་ལྟུང་རྣམས་ལ་རྒྱུར་གྱུར་གྱི་དངོས་པོ་དེ་རང་གི་ཡིན་པ་ལ་རང་གི་ཡིན་པར་འདུ་ཤེས་པའམ། ཐེ་ཚོམ་ཟ་བ་གང་རུང་ཡན་ལག་ཏུ་དགོས་ལ། རང་གི་ལ་གཞན་གྱིར་འདུ་ཤེས་པ་དང་གཞན་གྱི་ལ་རང་གིར་འདུ་ཤེས་པ་མི་བསྐྱེད་དོ། །ནི་ཞེས་པ་ནི་མ་བྱིན་ལེན་དང་ཤི་བའི་ཡོ་བྱད་གཉིས་ལས་དགར་བའི་ཚིག་ཡིན་པས་དེ་གཉིས་ལ་རང་གི་ཡིན་པ་ལ་ཡིན་པར་འདུ་ཤེས་པའམ་ཐེ་ཚོམ་ཟ་བ་མི་དགོས་སོ། །བདག་འབྲེལ་གྱི་ལྟུང་བ་དེ་གང་ཡིན། ཇི་ཙམ་གྱིས་རང་གི་ཡིན་པ་དང་བྲལ་བར་འགྱུར་ཞེ་ན། འབྲལ་སྤང་མ་གཏོགས་པའི་སྤང་ལྟུང་ཐམས་ཅད་བདག་འབྲེལ་གྱི་ལྟུང་བ་ཡིན་ཅིང་། རང་གི་ཡིན་པ་དེ་ནི་བསམ་པ་ཐག་པ་ནས་གཞན་ལ་བསྔོས་པ་ཉིད་ན་བྲལ་བ་ཉིད་དོ། །དེར་མ་ཟད་མ་འོངས་པ་ན་རབ་ཏུ་བྱུང་བ་ལ་སྦྱིན་པར་བྱ་སྙམ་དུ་རབ་ཏུ་བྱུང་བའི་དོན་དུ་ངེས་པར་བྱས་པ་ཡང་རང་གི་ཡིན་པ་དང་བྲལ་བ་ཉིད་ཡིན་ནོ། །དེར་མ་ཟད་ཆོས་གོས་ལས་ཀྱང་རྣམ་པར་བརྟགས་པ་སྟེ་མཁན་པོ་དང་སློབ་དཔོན་གྱི་མིང་གིས་རུང་བ་རྣམ་དག་བྱས་པ་ལས་ཀྱང་རང་གི་ཡིན་པ་དེ་དང་བྲལ་ལོ། །གསུམ་པ་ཤན་དང་འབྲེལ་བའི་ཐུན་མོང་བ་ནི། བསྔོས་པ་དང་། ངེས་པར་བྱས་པ་དང་། རུང་བ་རྣམ་དག་བྱས་པ་དེས་རང་གི་ཉིད་ཅེས་བྱ་བའི་དངོས་པོ་འདི་ལ་རྗེས་སུ་ཞུགས་པ་སྟེ་ཤན་བརྡེག་པར་བྱས་པ་ཉིད་ཀྱང་ཉམས་པ་ཡིན་ནོ། །ཤ་་་་་་ཁ་ཅིག་ཚེས་གཅིག་ལ་གོས་ཞིག་རྙེད་ནས་བྱིན་གྱིས་བརླབ་པ་སོགས་མ་བྱས་པར་བཞག ཚེས་བཞི་ལ་གོས་ཤིག་རྙེད་ན་སྔ་མ་དེ་ཞག་བཅུ་འདས་ཀར་ཤན་རྡེག་པ་ཡིན་གྱི་དེའི་སྔ་རོལ་ཏུ་མི་རྡེག་གསུང་། གྲོ་་་་་་ཁ་ཅིག་ཕྱི་མ་དེ་རྙེད་མ་ཐག་ཏུ་ཤན་བརྡེག་ལ། ཚེས་ལྔ་ལྟ་བུ་ལ་གོས་སྔ་མ་དེ་གཞན་ལ་བསྔོ་བ་སོགས་བྱས་ཀྱང་ཤན་དེ་མི་ཉམས་པ་ཡིན་ཞེས་གསུང་། དང་པོ་མི་འཐད་དེ་ཤན་སྟོབས་ཀྱི་ཞག་བཅུ་འཆང་སྤང་མེད་པར་ཐལ། ཞག་བཅུ་འདའ་ཀ་ཚུན་ཆད་དུ་ནི་ཤན་མི་རྡེག་ལ་ཞག་བཅུ་འདས་ནས་ཀྱང་མི་རྡེག་པའི་ཕྱིར། སྔ་མ་ཁས་བླངས། གཉིས་པ་ཡང་མི་འཐད་དེ། འདི་ལ་རྗེས་སུ་ཞུགས་པ་ཉིད་ཀྱང་ཉམས་པ་ཡིན་ནོ་ཞེས་གསུངས་པའི་ཕྱིར། དེར་མ་ཟད་ཤེས་པ་རང་བཞིན་དུ་གནས་པ་ལས་ཉམས་ན་ཡང་ཤན་རྗེས་སུ་ཞུགས་པ་དེ་ཉམས་པ་ཡིན་ནོ། །ཅི་ལྟ་བུ་ལ་ཤན་བརྡེག་ཅེ་ན། ཤན་རྡེག་བྱེད་གོས་དེ་ཡོད་ན་དངོས་པོ་དེ་ལྟ་བུ་དེ་གོས་གཞན་ལ་ཤན་འབྱུང་སྨན་དང་ལྷུང་བཟེད་ལ་ཡང་དེས་མཚོན། དེ་བཞིན་དུ་ཞག་བཅུ་འཆང་སྤང་གི་ཤན་རྡེག་བྱེད་དེ་ཞག་བཅུ་འཆང་སྤང་གཞན་ལ་ཤན་རྡེག་གི་ཟླར་འཇོག་གི་སྤང་བའི་ཤན་མི་རྡེག ཟླར་འཇོག་གི་སྤང་བ་ལ་ཡང་དེས་མཚོན་ནོ། །དེར་ངེས་སམ་ཞེ་ན་སྨན་ཞག་བདུན་པ་ལ་ནི། ནང་རིགས་མཐུན་ཁོ་ན་ལ་ཤན་རྡེག་གི་གཞན་ལ་མི་བརྡེག་སྟེ། འབྲུ་མར་གྱིས་འབྲུ་མར་ལ་ཤན་རྡེག་གི་བུ་རམ་སོགས་ལ་མི་རྡེག་པ་བཞིན་ནོ། །ཤ་་་་་་ཁ་ཅིག་རྡེག་བྱེད་ཁྱད་པར་ཅན་དང་། ཁྱད་པར་ཅན་མ་ཡིན་པ་གཉིས་དང་། བརྡེག་བྱ་ཁྱད་པར་ཅན་དང་། ཁྱད་པར་ཅན་མ་ཡིན་པ་གཉིས་ལས། གོས་ཀྱི་ཤན་རྡེག་བྱེད་ཡིན་ན་བྱིན་གྱིས་མ་བརླབས་པས་ཁྱབ། སྨན་གྱི་ཤན་རྡེག་བྱེད་ཡིན་ན་བྱིན་བརླབས་ཅན་ཡིན་པས་ཁྱབ། ཤན་རྡེག་བྱེད་གོས་དེ་བརྡེག་བྱ་བྱིན་གྱིས་བརླབས་པ་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་དང་། བྱིན་གྱིས་མ་བརླབས་པ་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་མ་ཡིན་པའོ། །བརྡེག་བྱ་བྱིན་བརླབས་ཅན་དེ་རྡེག་བྱ་ཁྱད་པར་ཅན་དང་། བྱིན་གྱིས་མ་བརླབས་པ་དེ་བརྡེག་བྱ་ཁྱད་པར་ཅན་མ་ཡིན་པའོ་ཞེས་གསུངས་པ་མི་འཐད་དེ། ཤན་རྡེག་བྱེད་ཀྱི་གོས་དེ་རྡེག་བྱེད་ཁྱད་པར་ཅན་དང་ཁྱད་པར་ཅན་མ་ཡིན་པའི་གཞི་མཐུན་ཡིན་པར་ཐལ། བྱིན་བརླབ་ཅན་ལ་རྡེག་པའི་ཆ་ནས་རྡེག་བྱེད་ཁྱད་པར་ཅན་དང་། བྱིན་གྱིས་མ་བརླབས་པ་ལ་རྡེག་པའི་ཆ་ནས་ཁྱད་པར་ཅན་མ་ཡིན་པ་ཡིན་པའི་ཕྱིར་དང་། ཤན་རྡེག་བྱེད་ཁྱད་པར་ཅན་དང་ཁྱད་པར་ཅན་མ་ཡིན་པའི་ཁྱད་པར་རྒྱ་གར་གྱི་མཁས་པ་སུས་ཀྱང་མ་བཤད་པའི་ཕྱིར་རོ། །བཞི་པ་ཕྱིར་བཅོས་དང་འབྲེལ་བའི་ཐུན་མོང་བ་ནི། སྤང་བའི་ལྟུང་བྱེད་དེ་ཡོད་ན་ཕྱིར་བཅོས་བྱེད་པའི་ཚེ་ཕྱིས་རྙེད་ཀྱི་ཡོ་བྱད་རིགས་མཐུན་པ་དང་མི་མཐུན་པ་བདག་གིར་བྱས་པ་ཙམ་ལ་སྤང་བར་བྱ་དགོས་པ་ཉིད་དོ། །དེ་ལྟར་ངེས་སམ་ཞེ་ན་གོས་ཁྲུ་གང་བས་ཆུང་བ་ནི་སྤང་མི་དགོས་ཏེ། དམ་དུམ་ལྟ་བུར་ཡིད་ལ་སྣང་བས་གོས་ཀྱི་མངོན་ཞེན་མི་སྐྱེ་བའི་ཕྱིར། དགེ་འདུན་དབང་བ་དེ་ཡང་སྤང་མི་དགོས་སོ། །དེའི་ཚེ་སྤང་རྒྱུའི་དངོས་པོ་མེད་ན། བཙལ་ནས་སྤང་དགོས་སམ་སྙམ་ན། སྤང་ལྟུང་ཕྱིར་བཅོས་བྱེད་པ་འདི་ལ་སྤང་རྒྱུའི་དངོས་པོ་མེད་པ་དེ་སྤང་བའི་གཙོ་བོ་ཡིན་པས་བཙལ་ནས་སྤང་མི་དགོས་སོ། །ལྔ་པ་དང་པོ་གསུམ་དང་འབྲེལ་བའི་ཐུན་མོང་བ་ནི། འཆང་འབྲལ་འཇོག་གསུམ་གྱི་སྤང་བ་འདི་གསུམ་ནི་སྲ་བརྐྱང་བཏིང་བའི་དགེ་སློང་ལ་མི་འབྱུང་སྟེ། སྲ་བརྐྱང་བཏིང་བའི་སྟོབས་ཀྱིས་བག་ཡངས་སུ་བྱས་པའི་ཕྱིར། དེ་ལ་སློང་བའི་སྤང་བ་སོགས་ཀྱང་མི་འབྱུང་བ་ལ་དེ་འདིར་མི་སྟོན་པའི་རྒྱུ་མཚན་ཅི་ཡིན་ཞེ་ན། འདིར་ལུང་རྣམ་འབྱེད་ཀྱི་སྐབས་ནས་བསྟན་པའི་གསུམ་པོ་བཤད་པ་ཡིན་ལ། སློང་བའི་སྤང་བ་སོགས་མི་འབྱུང་བ་ཞུ་བའི་སྐབས་སུ་འབྱུང་བས་སྲ་བརྐྱང་གི་སྐབས་སུ་འཆད་དོ།། ༈ །།གཉིས་པ་ཐུན་མོང་མ་ཡིན་པ་ལ་བཅུ་ཚན་གསུམ་ལས། དང་པོ་ལ་སྡོམ་ནི། འཆང་བ་འབྲལ་བ་འཇོག་པ་དང་། །ཁྲུར་འཇུག་པ་དང་ལེན་པ་དང་། །སློང་དང་སྟོད་གཡོགས་སྨད་གཡོགས་བཅས། །རིན་ཐང་སོ་སོར་བསྐུར་བའོ། །ཞེས་ཏེ། དང་པོ་ནི། གང་ཞིག་བྱས་ན་གོས་འཆང་བའི་སྤང་བར་འགྱུར་ཞེ་ན། གཞི་གང་འཆང་བའི་དངོས་པོ་ནི་གོས་རུང་བ་ཚད་དང་ལྡན་པ་རང་གི་ཡིན་པ། བྱིན་གྱིས་མ་བརླབས་པའམ་བརླབས་ཀྱང་ཤན་གྱིས་གོས་པ། རྟེན་གྱི་གང་ཟག་སྲ་བརྐྱང་མ་བཏིང་བའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་འཆང་བར་འདོད་པས། སྦྱོར་བ་རང་སྟོབས་སམ་ཤན་སྟོབས་གང་རུང་གིས་ཞག་བཅུར་བཅངས་ནས། མཐར་ཐུག་ཞག་བཅུ་གཅིག་པའི་སྐྱ་རེངས་ཤར་བའི་ཚེ་འཆང་བའི་སྤང་བར་འགྱུར་རོ། །གཞན་ལ་ཞེ་ཐག་པ་ནས་བསྔོས་པ་དང་། ལྷག་པ་དང་མཁོ་བའི་ཡོ་བྱད་དུ་བྱིན་གྱིས་བརླབས་པ་དང་སྲ་བརྐྱང་བཏིང་བ་ལ་འདི་མི་འབྱུང་ངོ་། །ལྷག་པའི་ཡོ་བྱད་བྱིན་གྱིས་བརླབ་པ་ནི། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་ལྷག་པ་རུང་བ་མ་བགྱིས་པ་རུང་བ་བགྱི་བར་འོས་པ་འདི་མཁན་པོའི་ལགས་པར་རུང་བར་བགྱིའོ། །མཁན་པོ་ལ་ཡིད་གཏད་ནས་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ། །ཞེས་ལན་གསུམ་དུ་བརྗོད་སློབ་དཔོན་སོགས་ལ་འདོན་པ་པོ། མཁོ་བའི་ཡོ་བྱད་བྱིན་གྱིས་བརླབ་པ་ནི། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་འདི་བདག་དང་ཚངས་པར་མཚུངས་པར་སྤྱོད་པ་རྣམས་ཀྱི་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ཞེས་ལན་གསུམ་བརྗོད་དོ། །དེ་ཉིད་ལྷུང་བཟེད་ལྷག་པ་ལ་ཡང་མཚུངས་སོ། །ཤན་ལ་དབྱེ་ན་བཞི་སྟེ། ཞག་ཤན་ཡིན་ལ་བྱིན་གྱིས་མ་བརླབས་པའི་ཤན་མ་ཡིན་པ་དང་། བྱིན་གྱིས་མ་བརླབས་པའི་ཤན་ཡིན་ལ་ཞག་ཤན་མ་ཡིན་པ་དང་། གཉིས་ཀ་ཡིན་པ་དང་། གཉིས་ཀ་མ་ཡིན་པའི་ཤན་ནོ། །དང་པོ་ལ་གཉིས་ལས། དང་པོ་བརླབས་པས་བརླབས་པ་ལ་བརྡེག་པའི་ཤན་ནི། ཞག་བདུན་པའི་སྨན་བུ་རམ་ལྟ་བུ་གཅིག་ཚེས་གཅིག་ལ་བྱིན་གྱིས་བརླབས། ཚེས་གཉིས་ལ་རིགས་འདྲ་ཕྱི་མ་གཅིག་བྱིན་གྱིས་བརླབས་ནས་བཅངས་ན་སྔ་མས་ཞག་བདུན་འདས་པ་ནི། ཕྱི་མས་ཞག་བདུན་མ་ལོན་ན་ཡང་ལོན་པའི་དོད་བྱས་ནས་གཉིས་ཀ་ལ་བརྟེན་པའི་ལྟུང་བ་འབྱུང་བ་ལྟ་བུའོ། །གཉིས་པ་མ་བརླབས་པས་མ་བརླབས་པ་ལ་བརྡེག་པའི་ཤན་ནི། འཆང་བ་གཉིས་ཀྱི་སྐབས་སུ་ཚེས་གཅིག་ལ་གོས་སམ་ལྷུང་བཟེད་གཅིག་རྙེད། ཚེས་བརྒྱད་ལྟ་བུ་ལ་གཞན་གཅིག་རྙེད་དེ་སྔ་ཕྱི་གཉིས་ཀ་བྱིན་གྱིས་མ་བརླབས་པར་བཅངས་ན། སྔར་རྙེད་པ་དེ་ཞག་བཅུ་འདས་པ་ན་ཕྱི་མས་ཞག་བཅུ་མ་ལོན་ཡང་ལོན་པའི་དོད་བྱས་ནས་གཉིས་ཀ་ལ་ལྟུང་བ་འབྱུང་བ་ལྟ་བུའོ། །ལྟུང་བ་འདི་སྨན་ལ་མེད་དེ་ཕྱི་མ་མེད་གོང་དུ་སྔ་མ་ལ་ལྟུང་བ་བྱུང་ཟིན་པའི་ཕྱིར། མུ་གཉིས་པ་ནི། ཚེས་གཅིག་ལ་སྨན་ནམ་གོས་སམ་ལྷུང་བཟེད་གཉིས་རྙེད་པ་ལས་གཅིག་བྱིན་གྱིས་བརླབས། གཅིག་བྱིན་གྱིས་མ་བརླབས་པར་རང་རང་གི་ཞག་དུས་འདས་པར་བཅངས་ན། བྱིན་གྱིས་མ་བརླབས་པ་དེས་བརླབས་པ་ཤན་གྱིས་གོས་ནས་ལྟུང་བ་གཉིས་འབྱུང་བ་ལྟ་བུའོ། །འདི་བརླབས་པའི་ཤན་ཡིན་གྱི་ཞག་ཤན་མ་ཡིན་ནོ། །མུ་གསུམ་པ་ནི། ཚེས་གཅིག་ལ་གོས་སམ་ལྷུང་བཟེད་གཅིག་རྙེད། དེ་བྱིན་གྱིས་མ་བརླབས་པར་ཚེས་གཉིས་ལ་ཕྱི་མ་གཅིག་རྙེད་དེ། བྱིན་གྱིས་བརླབས་ན་སྔ་མས་ཞག་བཅུ་ལོན་པ་ན་ཕྱི་མ་བྱིན་གྱིས་བརླབས་པས་ཞག་བཅུ་མ་ལོན་ཡང་ལོན་པའི་དོད་བྱས་ནས་ཤན་གྱིས་གོས་པས་བྱིན་གྱིས་བརླབས་པའི་ཤན་དང་ཞག་ཤན་གཉིས་ཀ་ཡིན་པ་ལྟ་བུའོ། །འདི་སྨན་ལ་མེད་དེ་སྔ་མ་བྱིན་ལེན་བྱས་ན་ལྟུང་བ་བྱུང་ཟིན་པའི་ཕྱིར་རོ། །མུ་བཞི་པ་ནི། སྤང་ལྟུང་སུམ་ཅུ་ལས་གང་ཡང་རུང་བ་ཞིག་བྱུང་སྟེ་མ་བཤགས་པའི་བར་ལ་གོས་ལ་སོགས་པ་རུང་བ་ཚད་ལྡན་ཞིག་རྙེད་ན་སྔ་མའི་ཤན་གྱིས་ཕྱི་མ་ཡང་ཕྱིར་བཅོས་བྱེད་པའི་ཚེ་སྤོང་དགོས་པའོ། །མུ་དང་པོ་གསུམ་ནི་ལྟུང་བའི་ཤན་ཡིན་ལ་ཐ་མ་ནི་སྤོང་བའི་ཤན་ཡིན་ནོ། །གཉིས་པ་འབྲལ་བའི་སྤང་བ་ནི། གང་ཞིག་བྱས་ན་ཆོས་གོས་དང་འབྲལ་བའི་སྤང་བར་འགྱུར་ཞེ་ན། རང་གི་ཆོས་གོས་གསུམ་པོ་གང་ཡང་རུང་བ་ཚད་ལྡན་བྱིན་གྱིས་བརླབས་པ། འཇིགས་པ་དང་བཅས་པའི་དགོན་པ་ལས་གཞན་པའི་གནས་སུ། རྟེན་གྱི་གང་ཟག་སྲ་བརྐྱང་བཏིང་བ་དང་སྣམ་སྦྱར་དང་མི་འབྲལ་བའི་གནང་བ་ཐོབ་པ་མ་ཡིན་པའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་གནས་དེ་ལས་འདའ་འདོད་ཀྱི་བསམ་པ་དང་ལྡན་པས། སྦྱོར་བ་ཆོས་གོས་གཞག་པའི་གནས་ཉེ་འཁོར་དང་བཅས་པ་ལས་ཕྱི་རོལ་དུ་མཚན་མོ་འདས་ནས། མཐར་ཐུག་ཞག་ཕྱི་མའི་སྐྱ་རེངས་དང་པོ་ཤར་བ་ན་འབྲལ་བའི་སྤང་བའོ། །སྣམ་སྦྱར་གཞག་སྟེ་ཉི་མ་དེ་ཉིད་ལ་ཕྱིར་ལྡོག་པར་བྱའོ་སྙམ་པའི་བསམ་པས་ཆུ་ཀླུང་སོགས་བརྒལ་ནས་སོང་བ་ལ། རྐྱེན་དབང་གིས་ལྡོག་མ་ནུས་ན་དེའི་བྱིན་བརླབས་ཡིད་ཀྱིས་ཕྱུང་སྟེ་ཁྱིམ་པའི་གོས་ཡན་ཆད་གང་རུང་ལ་བྱིན་གྱིས་བརླབས་པ་ནི། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བའི་གོས་འདི་སྣམ་སྦྱར་དུ་བྱིན་གྱིས་བརླབ་བོ། །ཞེས་ལན་གསུམ་བརྗོད་ནས་ཐབས་ལེགས་བྱའོ། །བླ་གོས་མཐང་གོས་ལ་ཡང་འདོན་པ་བསྒྱུར་རོ། །ཡུལ་གཞན་མེད་ན་རང་གིས་ཀྱང་རུང་ངོ་། །གསུམ་པ་ཟླར་འཇོག་གི་སྤང་བ་ནི། རྟེན་སྲ་བརྐྱང་མ་བཏིང་ཞིང་ཆོས་གོས་གསུམ་པོ་གང་རུང་མེད་པའི་དགེ་སློང་གིས་འཇོག་པའི་དངོས་པོ་གོས་སུ་བྱར་རུང་བ་ཁྲུ་གང་དུ་ལོངས་ཤིང་འཁོར་གསུམ་མི་ཁེབས་པ་ཁ་སྐོང་ལ་རེ་བ་དང་བཅས་པ་བྱིན་གྱིས་བརླབས་པའམ་མ་བརླབས་པ་ཤན་གྱིས་གོས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་ཞག་སུམ་ཅུར་འཆང་བར་འདོད་པས། སྦྱོར་བ་དེ་ལྟར་བཅངས་ཏེ། མཐར་ཐུག་ཞག་སུམ་ཅུ་འདས་ནས་སོ་གཅིག་པའི་སྐྱ་རེངས་ཤར་བ་ན་སྤང་བའོ། །འདིར་ཁ་ཅིག་བཅུ་ཚན་དང་པོས་བཅུ་ཚན་གཉིས་པའི་ཞག་བཅུ་འཆང་སྤང་བསྐྱེད་པ་ཡིན་ལ། བཅུ་ཚན་གསུམ་པ་ལ་ཡང་ཡིན་ཟེར་བ་མི་འཐད་དེ། བཅུ་པ་དང་པོ་དང་གཉིས་པ་དང་གསུམ་པ་དག་ནི་ཤན་གྱི་ཕྱིར་ཕན་ཚུན་ལྟོས་པ་མེད་དོ་ཞེས་གསུངས་པའི་ཕྱིར། དེས་ན་འདིར་རིགས་ལྡོག་ལ་ཤན་མི་འབྱུང་བ། ཤན་འབྱུང་བ་རིགས་མི་ལྡོག་པ། ཤན་ཡང་འབྱུང་ལ་རིགས་ཀྱང་ལྡོག་པ། ཤན་ཡང་མི་འབྱུང་རིགས་ཀྱང་མི་ལྡོག་པ་དང་མུ་བཞི་ལས། དང་པོ་ནི། ཚེས་གཅིག་ལྟ་བུ་ལ་རེ་བ་དང་བཅས་པའི་ཁ་སོག་གི་གོས་གཞག ཚེས་ལྔ་ལྟ་བུ་ལ་རེ་བའི་ཡུལ་མེད་པར་སོང་བ་ལྟ་བུའོ། །གཉིས་པ་ནི། ཚེས་གཅིག་ལྟ་བུ་ལ་རེ་བ་དང་བཅས་ཏེ་ཁ་སོག་གི་གོས་གཞག ཚེས་ལྔ་ལྟ་བུ་ལ་ཁ་སྣོན་དང་བཅས་ཏེ་འཁོར་གསུམ་མི་ཁེབས་པ་རྙེད་པ་ལྟ་བུའོ། །གསུམ་པ་ནི། ཚེས་གཅིག་ལ་ཁ་སོག་གི་གོས་རེ་བ་དང་བཅས་པ་གཞག ཚེས་ལྔ་ལྟ་བུ་ལ་རིགས་མཐུན་ཚད་ཆོག་རྙེད་པ་ལྟ་བུའོ། །བཞི་པ་ནི། རེ་བ་དང་བཅས་ཏེ་བཅངས་པ་ན་ཁ་སྣོན་མ་རྙེད་པ་ལྟ་བུའོ། །ལྟུང་བ་བསྐྱེད་ཚུལ་ཁ་ཅིག་ནག་འབྱམས་སུ་བསྐྱེད་པ་ཡིན་ཏེ། དེ་ཡང་ཚེས་གཅིག་ལྟ་བུ་ལ་གོས་གཅིག་རྙེད་དེ་བྱིན་གྱིས་མ་བརླབས་པར་གཞག ཚེས་ལྔ་ལ་གོས་གཞན་ཞིག་རྙེད་པ་ན་སྔ་མས་ཞག་བཅུ་འདས་ཏེ་བཅུ་གཅིག་པའི་སྐྱ་རེངས་ཤར་བ་ན་དེ་གཉིས་ཀའི་གཞི་ལས་སྤང་ལྟུང་འབྱུང་ལ། དེ་ཕྱིན་ཆད་ཞག་རེ་རེ་འདས་པ་ན་སྤང་ལྟུང་རེ་རེ་བསྐྱེད་པའི་ཕྱིར་ཏེ། གྲོང་དུ་རྒྱུ་བའི་སྐབས་སུ་གྲོང་བཞི་ཕན་ཆད་ནས་གྲོང་རེ་རེ་འདས་པ་ན་ལྟུང་བྱེད་རེ་རེ་བསྐྱེད་པའི་ཕྱིར་ཞེས་པ་མི་འཐད་དེ། ཞག་བཅུ་འདས་པ་ན་ཡང་སྤང་ལྟུང་རེ་རེ་བསྐྱེད་པའི་ཕྱིར། དེ་ལྟ་མ་ཡིན་ན་ལམ་དུ་ཕྱིན་པས་བསྐྱེད་པའི་ལྟུང་བ་རྣམས་ཀྱི་སྐབས་སུ་རྒྱང་གྲགས་གཅིག་འདས་ནས་གོམ་པ་རེ་རེ་འདས་པ་ན་ལྟུང་བྱེད་རེ་རེ་བསྐྱེད་པར་ཐལ། ཞག་བཅུ་འཆང་སྤང་གི་སྐབས་སུ་ཞག་བཅུ་འདས་པ་ཕན་ཆད་ཞག་རེ་རེ་འདས་པ་ན་སྤང་ལྟུང་རེ་རེ་བསྐྱེད་པའི་ཕྱིར། འདོད་མི་ནུས་ཏེ། ལམ་དུ་འགྲོ་བ་ལས་རྒྱང་གྲགས་ཀྱི་བདག་ཉིད་དོ་ཞེས་གསུངས་པའི་ཕྱིར་རོ། །དེས་ན་ཁྲིའུ་རྩེ་ཁས་བླང་བར་བྱའོ། །ཞར་ལ་བཟོ་སྒྲུབ་པའི་བསླབ་བྱ་ནི། སྣམ་སྦྱར་དང་གདིང་བ་གཉིས་རྒྱུ་གསར་པ་ལ་ཉིས་རིམ་དུ་བྱ། བླ་གོས་མཐང་གོས་གཉིས་ལ་ཆིག་རྐྱང་། ཟླ་བ་བཞིའི་དུས་ཚིགས་སུ་སྤྱད་པ་ལ་ནི་དེ་དག་ཉིས་འགྱུར་བྱ་ཞིང་ལྷག་པ་མི་སྦྱར། སྣམ་སྦྱར་གྱི་སྣམ་ཕྲན་དགུ་ཡན་ཆད་ཉི་ཤུ་རྩ་ལྔ་མན་ཆད་ཟུང་མི་བྱ། སྣམ་ཕྲན་དགུ་པ་བཅུ་གཅིག་པ་བཅུ་གསུམ་པ་གསུམ་ལ་གླེགས་བུ་ཕྱེད་དང་གསུམ་པ་བྱ། སྣམ་ཕྲན་བཅོ་ལྔ་པ་བཅུ་བདུན་པ་བཅུ་དགུ་པ་གསུམ་ལ་གླེགས་བུ་ཕྱེད་དང་བཞི་པ་བྱ། སྣམ་ཕྲན་ཉེར་གཅིག་པ་ཉེར་གསུམ་པ་ཉེར་ལྔ་པ་གསུམ་ལ་གླེགས་བུ་ཕྱེད་དང་ལྔ་པ་བྱ། གླེགས་བུ་དང་གླེགས་བུ་ཕྱེད་པ་མཉམ་དུ་མི་བསྒྲིག་པར་ཕན་ཚུན་བསྣོལ་མར་བྱའོ། །གླེགས་བུ་རྣམས་ཚད་མཉམ་པ་གླེགས་བུ་ཕྱེད་པ་རྣམས་ཀྱང་ཚད་མཉམ་དུ་བྱ། ཚལ་བུ་རྣམས་ཀྱི་ཁ་དབུས་ནས་གཡས་གཡོན་དུ་བལྟ་བར་བྱ། མཐའ་སྐོར་དང་ཚལ་བུའི་ཚད་རབ་སོར་བཞི། འབྲིང་སོར་ཕྱེད་དང་གསུམ། ཐ་མ་སོར་གཉིས་སམ་མཐེབ་སོར་གང་བྱའོ། །སྣམ་སྦྱར་དང་བླ་གོས་ཆེ་ཚད་སྲིད་དུ་ཁྲུ་ལྔ་དང་ཞེང་དུ་ཁྲུ་གསུམ། ཆུང་ཚད་སྲིད་དུ་ཁྲུ་ཕྱེད་དང་ལྔ་དང་ཞེང་དུ་ཕྱེད་དང་གསུམ་པ། འབྲིང་ཚད་དེ་དག་གི་བར་དུ་བྱ་ཞིང་། མཐང་གོས་ནི་དོ་དང་བཞི་ཡང་ཡིན་ལ། དོ་དང་ལྔ་ཡང་ཡིན་ནོ། །བླ་གོས་ལ་སྣམ་ཕྲན་བདུན་དང་གླེགས་བུ་ཕྱེད་དང་གསུམ་པ། མཐང་གོས་ལ་སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པ་བྱའོ། །དེ་གཉིས་ལ་སྣམ་ཕྲན་དང་གླེགས་བུ་ངེས་པར་དགོས་པ་ནི་མ་ཡིན་ཏེ། ཚིག་ལེའུར་བྱས་པ་ལས། སྣམ་སྦྱར་ངེས་པར་དྲས་ཏེ་བྱ། །གཞན་ནི་མ་ངེས་གང་གི་ཕྱིར། །འདོད་ཆུང་རང་གི་ཆོས་གོས་ཀྱི། །ལས་ཀྱི་སྐྱོ་བར་འགྱུར་ཕྱིར་རོ། །ཞེས་གསུངས་པའི་ཕྱིར། སྣམ་སྦྱར་གྱི་སྣོད་གཏུར་བུའི་ཚད་ནི། སྲིད་དུ་ཁྲུ་གསུམ་པ་ཞེང་དུ་ཁྲུ་ཕྱེད་དང་གསུམ་པ་ཉིས་ལྟེབ་ཏུ་བྱས་ནས་བརྩེམས་ཤིང་དབུས་སུ་ཁ་བཏོད། ཁ་རྒྱུན་བུ་གུ་ཅན་ལ་ཐི་གུས་བརྒྱུད་པར་བྱའོ། །བཞི་པ་ཁྲུར་འཇུག་པའི་སྤང་བ་ནི། རྟེན་དགེ་སློང་གིས་ཡུལ་དགེ་སློང་མ་བདུན་བརྒྱུད་ཚུན་ཆད་ཀྱི་ཉེ་དུ་མ་ཡིན་པ་ལ། དངོས་པོ་ཆོས་གོས་གསུམ་བྱིན་གྱིས་བརླབས་པ་དང་གདིང་བ་དག་ལས་གང་ཡང་རུང་བ་འདུ་ཤེས་མ་འཁྲུལ་བའམ་ཐེ་ཚོམ་ཟ་བས། སྦྱོར་བ་མངོན་སུམ་དུ་ཁྲུར་འཇུག་གམ། འཚེད་དུ་འཇུག་གམ། འཆག་ཏུ་འཇུག་པས། མཐར་ཐུག་གོས་ཀྱི་ཕྱོགས་གཅིག་ཆུར་བཅུག་པ་ན་སྤང་བའོ། །ལྔ་པ་ལེན་པའི་སྤང་བ་ནི། རྟེན་དང་ཡུལ་གོང་དང་འདྲ་ཞིང་། དངོས་པོ་གོས་སམ་དེས་མཚོན་པའི་ལྷུང་བཟེད་རུང་བ་ཚད་དང་ལྡན་པ། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་ན་སྤང་བའོ། །དྲུག་པ་སློང་བའི་སྤང་བ་ནི། རྟེན་དགེ་སློང་རང་གི་ཆོས་གོས་ཚང་མ་ཡོད་པ། ཡུལ་ཁྱིམ་པ་ཉེ་དུ་མ་ཡིན་པ་ལ་དངོས་པོ་གོས་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་ན་སྤང་བའོ། །བདུན་པ་སློང་བར་རིགས་པའི་སྤང་བ་ནི། གཞིའི་ཡན་ལག་ལ་རྟེན་ཆོས་གོས་ཚང་མ་མེད་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ་ལ་དངོས་པོ་ཁྱིམ་པའམ་རབ་ཏུ་བྱུང་བའི་གོས་སྟོད་གཡོགས་སྨད་གཡོགས་ལས་ལྷག་པ། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །རང་ལ་འཚོ་བའི་ཡོ་བྱད་ཀྱི་གོས་གང་མེད་པ་དེ་སློང་བར་རིགས་ཀྱི་ལྷག་པོ་བསླངས་ན་ལྟུང་བར་འགྱུར་ཞེས་པའི་དོན་ཏོ། །འདིར་ཁ་ཅིག་་་་་་ཤ་སློང་བའི་སྤང་བ་བསྐྱེད་པ་ལ་གོས་ཚང་མ་ཡོད་པ་དགོས། སློང་རིགས་ཀྱི་སྤང་བ་བསྐྱེད་པ་ལ་གོས་གསུམ་ཡན་ཆད་མ་ཚང་བ་དགོས་གསུངས་པ་མི་འཐད་དེ། གོས་གཅིག་མ་ཚང་བའི་དགེ་སློང་དེས་གོས་གཉིས་བསླངས་ན་སྤང་བ་སྐྱེད་དམ་མི་སྐྱེད། མི་བསྐྱེད་ན་ཚད་ལས་ལྷག་པ་སློང་ན་ཉེས་བྱས། ཐོབ་ན་དངོས་གཞིར་གསུངས་པ་དང་འགལ། སྐྱེད་ན་སློང་བའི་སྤང་བ་སྐྱེད་དམ། སློང་རིགས་ཀྱི་སྤང་བ་སྐྱེད། དང་པོ་ལྟར་ན་སློང་བའི་སྤང་བ་སྐྱེད་པ་ལ་གོས་ཚང་བ་ཡོད་དགོས་པ་དང་འགལ། གཉིས་པ་ལྟར་ན་སློང་རིགས་ཀྱི་སྤང་བ་བསྐྱེད་པ་ལ་གོས་གསུམ་ཡན་ཆད་མ་ཚང་བ་དགོས་པ་དང་འགལ་ལོ། །དེ་བཞིན་དུ་གོས་གཉིས་མ་ཚང་བའི་དགེ་སློང་དེས་གོས་གསུམ་བསླངས་ན་ཅིར་འགྱུར་ཞེས་བརྟགས་ནས་འགོག་པར་བྱའོ། །ཁ་ཅིག་སློང་བའི་སྤང་བ་བསྐྱེད་པ་ལ། གོས་གཉིས་ཡན་ཆད་ཚང་བ་དགོས་ཞེས་རང་ལུགས་བཞག་ནས། གཞན་དག་སློང་རིགས་ཀྱི་སྤང་བ་བསྐྱེད་པ་ལ་གོས་བཞི་ཚང་བ་དགོས་ཟེར་བ་ལ་གནོད་བྱེད་འདི་ལྟར་བརྗོད་དེ། གོས་གསུམ་མ་ཚང་བའི་དགེ་སློང་དེས་སྦྱིན་བདག་གཅིག་གི་ཡུལ་ལ་གོས་གསུམ་བསླངས་པ་ལ་སློང་བའི་སྤང་བ་སྐྱེད་དམ། སློང་རིགས་ཀྱི་སྤང་བ་སྐྱེད། ཕྱི་མ་ལྟར་ན་དེས་གོས་གསུམ་སློང་རིགས་པར་ཐལ། དེའི་ཕྱིར་ཞེས་གསུངས་པ་ནི་ཁྱེད་རང་ལ་ཡང་མཚུངས་ཏེ། གོས་གསུམ་མ་ཚང་བའི་དགེ་སློང་དེས་སྦྱིན་བདག་གཅིག་གི་ཡུལ་ལ་སྦྱོར་བ་གཅིག་གིས་གོས་གསུམ་སློང་རིགས་པར་ཐལ། དེ་ལྟར་སློང་བ་ལ་སློང་རིགས་ཀྱི་སྤང་བ་བསྐྱེད་པའི་ཕྱིར། དེས་ན་ལུགས་གཉིས་ཀ་མི་འཐད་དེ། སྣམ་སྦྱར་མ་ཚང་བའི་དགེ་སློང་དེས་ཁྱིམ་པ་ཉེ་དུ་མ་ཡིན་པ་ལ་སྣམ་སྦྱར་བསླངས་ཏེ་དེ་ལས་ལྷག་པ་ཐོབ་ན་སྤང་ལྟུང་བསྐྱེད་པའི་ཕྱིར་ཏེ། བམ་ལྔར་ཡ་བ་ཐོབ་ན་ན་སྨད་པ་མེད། ཡ་བ་ལས་ལྷག་པ་ཐོབ་ན་ཡང་ན་སྨད་པ་མེད་ཅེས་གསུངས་པའི་ཕྱིར། དེས་ན་སློང་བའི་སྤང་བ་བསྐྱེད་པ་ལ་གོས་ཚང་མ་ཡོད་དགོས། སློང་རིགས་ཀྱི་སྤང་བ་བསྐྱེད་པ་ལ་གོས་མ་ཚང་བ་དགོས་ཏེ། གོས་གཅིག་མ་ཚང་བའི་དགེ་སློང་དེ་ཡང་སློང་རིགས་ཀྱི་སྤང་བ་སྐྱེད་པའི་བྱེད་པ་པོ་ཡིན་པའི་ཕྱིར་ཏེ། དེས་གོས་གཅིག་སློང་བ་རིགས་པའི་ཕྱིར་རོ། །བརྒྱད་པ་སྤགས་པ་སློང་བའི་སྤང་བ་ནི། རྟེན་དགེ་སློང་སྲ་བརྐྱང་མ་བཏིང་བས། ཡུལ་ཁྱིམ་པ་ཉེ་དུ་མ་ཡིན་པས་རང་ལ་བསྔོས་པའི་གོས། འདུ་ཤེས་མ་འཁྲུལ་ཞིང་ཀུན་སློང་རང་ལ་བསྔོས་པར་ཤེས་པ། དངོས་སུ་འབུལ་ལོང་མེད་པར་སྔ་ཚོམས་སུ་སློང་འདོད་པས། སྦྱོར་བ་ངག་དྲུག་ལྡན་གྱིས་བསླངས་ཏེ། མཐར་ཐུག་དེའི་རྐྱེན་གྱིས་ཐོབ་པ་ན་སྤང་བའོ། །དགུ་པ་སོ་སོ་ནས་སྤགས་པ་སློང་བའི་སྤང་བ་ནི་གཞན་སྔ་མ་དང་འདྲ་བ་ལ། རང་ལ་ཁྱིམ་བདག་བཟའ་མི་གཉིས་ཀྱིས་སོ་སོ་ནས་བསྔོས་པའི་གོས་ཞེས་སྦྱར་རོ། །བཅུ་པ་བསྐུར་བའི་སྤང་བ་ནི། རྟེན་དགེ་སློང་གིས་ཡུལ་ཞལ་ཏ་བ་ལ་དངོས་པོ་ཁྱིམ་པ་ཉེ་དུ་མ་ཡིན་པས་བསྐུར་བའི་གོས་ཀྱི་རིན། འདུ་ཤེས་མ་འཁྲུལ་ཞིང་ཀུན་སློང་སློང་འདོད་ཀྱི་བསམ་པས། སྦྱོར་བ་བསྐུལ་བསྡད་དྲུག་ལས་ལྷག་པས་བསླངས་ཏེ། མཐར་ཐུག་ཐོབ་པ་ན་སྤང་བའོ། །བཅུ་ཚན་གཉིས་པ་ལ་སྡོམ་ནི། སྲིན་བལ་འབའ་ཞིག་ཆ་གཉིས་དང་། །དྲུག་དང་མཐོ་གང་ལམ་དང་ནི། །ཁྲུ་བ་དང་ནི་གསེར་དངུལ་ལེན། །མངོན་མཚན་ཅན་དང་ཉོ་ཚོང་ངོ་། །ཞེས་གསུངས་ཏེ། སྲིན་བལ་གྱི་སྟན་གྱི་སྤང་བ་དང་། བལ་ནག་པོ་འབའ་ཞིག་པ་དང་། ཆ་གཉིས་བསྲེས་པའི་སྟན་གྱི་སྤང་བ་གསུམ་ནི་རིམ་པ་ལྟར། རྟེན་དགེ་སློང་གིས། དངོས་པོ་ཡུལ་དུས་དེར་དཀོན་པའི་སྲིན་བལ་དང་བལ་རང་བཞིན་གྱིས་ནག་པོ་དང་། ཆ་གཉིས་བསྲེས་ཏེ་འདུ་ཤེས་མ་འཁྲུལ་ཞིང་ཀུན་སློང་སྟན་བྱེད་འདོད་ཀྱིས། སྦྱོར་བ་རང་ངམ་གཞན་བསྐོས་པས་སྟན་བྱེད་པར་བརྩམས་ཏེ། མཐར་ཐུག་སྲིན་བལ་ལ་སོགས་པ་དེ་དག་བཀྲམ་པ་ཙམ་ན་སྤང་བའོ། །བཞི་པ་ལོ་དྲུག་གི་ནང་དུ་སྟན་བྱེད་པའི་སྤང་བ་ནི། རྟེན་དགེ་སློང་གིས་དངོས་པོ་ལོ་དྲུག་གི་ནང་དུ་སྟན་གཉིས་པ། འདུ་ཤེས་མ་འཁྲུལ་ཞིང་ཀུན་སློང་སྟན་གསར་པ་བྱེད་འདོད་ཀྱིས། སྦྱོར་བ་ལོ་དྲུག་གི་ནང་དུ་སྟན་གཉིས་པ་བརྩམས་ཏེ། མཐར་ཐུག་ཟིན་པ་ན་སྤང་བའོ། །ལྔ་པ་མཐོ་གང་གི་སྤང་བ་ནི། རྟེན་དགེ་སློང་གིས་རང་དབང་བའི་གདིང་བ་གསར་པ་ལ་གདིང་བ་རྙིང་པ་བཅོས་སུ་རུང་བ་ཚུན་ཆད་ཡོད་བཞིན་དུ་དེ་ལས་བདེ་བར་གཤེགས་པའི་མཐོ་གང་གིས་མ་སླན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་སྤྱོད་པར་འདོད་པས། སྦྱོར་བ་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་སྤང་བའོ། །ཤ་་་་་་ཁ་ཅིག་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གི་མ་སླན་པའི་གདིང་བ་གསར་པ་བཅོས་ན་སྤང་བ་འདི་ལྟར་འགྱུར་ཏེ། དེའི་དགག་བྱ་ནི་གདིང་བ་གསར་པ་ལ་འདོད་ཞེན་སྐྱེ་བའི་དགག་བྱ་ཡོད་པས་དེ་དགག་པའི་ཆེད་ཡིན་པའི་ཕྱིར་ཏེ། སོ་སོ་ཐར་པ་ལས་ཁ་དོག་མི་སྡུག་པར་བྱ་བའི་ཕྱིར་ཞེས་གསུངས་པའི་ཕྱིར་ཞེས་གསུངས་པ་མི་འཐད་དེ། གདིང་བ་གསར་པ་ལ་རྙིང་པ་མ་གླན་ན་སྦྱིན་བདག་སྔ་མའི་བསོད་ནམས་སྤེལ་བ་རྒྱུན་ཆད་པའི་དགག་བྱ་དང་། སྦྱིན་བདག་ཕྱི་མའི་བསོད་ནམས་ཡུན་རིང་དུ་མི་འཕེལ་བའི་དགག་བྱ་ཡོད་པས་དེ་དགག་པའི་ཆེད་ཡིན་པའི་ཕྱིར་ཏེ། ལུང་དུ་ངའི་ཉན་ཐོས་དྲིན་མི་ཤེས་པ་ཁྱིམ་པ་དང་བྲམ་ཟེ་དད་པ་ཅན་ཞེས་སོགས་གསུངས་པའི་ཕྱིར། ཁ་ཅིག་གདིང་བ་རྙིང་པ་ཡོད་ཀྱང་འདྲ་ལ་མེད་ཀྱང་འདྲ་གླན་དགོས་ཀྱི་མ་གླན་ན་ལྟུང་བར་འགྱུར་རོ་ཞེས་ཟེར་བ་མི་འཐད་དེ། གལ་ཏེ་ཡོད་ན་ཞེས་གསུངས་པའི་ཕྱིར་དང་གཞན་དུ་ན་རབ་བྱུང་བྱས་མ་ཐག་པའི་གང་ཟག་གི་གདིང་བ་གསར་པ་ལ་ལོངས་སྤྱོད་དུ་མི་རུང་བར་འགྱུར་རོ། །དྲུག་པ་བལ་ཁུར་བའི་སྤང་བ་ནི། རྟེན་དགེ་སློང་གིས་དངོས་པོ་བལ་གྱི་ཁུར་རང་གི་ཡིན་པ་ལམ་རྒྱང་གྲགས་གཅིག་འདས་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་དུ་སྤྱོད་པར་འདོད་པས། སྦྱོར་བ་བལ་གྱི་ཁུར་ཁྱེར་བ་གཞན་མེད་ན་དཔག་ཚད་གསུམ་ཚུན་ཆད་ལ་ལྟུང་བ་མེད། དེ་ནས་བརྩམས་ནས་རྒྱང་གྲགས་གཅིག་གི་མཐར་ཕྱིན་པའམ། ཁུར་ཁྱེར་བ་ཡོད་ན་དང་པོ་ནས་བརྩམས་ཏེ་རྒྱང་གྲགས་རེ་རེའི་མཐར་སྤང་ལྟུང་རེ་རེ་དེའི་ཕྱེད་རེ་ལ་ཉེས་བྱས་རེའོ། །སླ་་་་་་ཁ་ཅིག་བལ་ཁུར་གྱི་སྤང་བ་བསྐྱེད་པ་ལ་བལ་ཁུར་དུ་ལོངས་པ་དགོས་གསུང་བ་མི་འཐད་དེ། དགོས་མེད་དུ་ཞྭ་དང་ལྷྭམ་སྒྲོག་གུ་ཅན་དང་། སྟོད་སྐོར་ནང་ཚངས་ཅན་དང་། རྒྱ་ཅང་དང་། ལྕག་པོད་དང་། ཤུར་བུ་ཁྲི་འུར་ལྡང་བའི་བལ་ཁྱེར་ན་སྤང་བར་འགྱུར་བའི་ཕྱིར། དེས་ན་དགོས་པ་ཡོད་ན་ཞྭ་དང་ལྷྭམ་སྒྲོག་གུ་ཅན་སོགས་ལྡང་བའི་བལ་ཁྱེར་དུ་རུང་ངོ་། །བདུན་པ་བལ་རྨེལ་དུ་འཇུག་པའི་སྤང་བ་ནི། རང་གིས་བྱིན་གྱིས་བརླབས་པའི་ཆོས་གོས་ཞེས་པའི་དོད་དུ་ལུག་གི་བལ་ཁྲུར་འཇུག་གམ། འཚེད་དུ་འཇུག་གམ། འཆག་ཞེས་པའི་ཚབ་ཏུ་རྨལ་དུ་འཇུག་ཅེས་འདོན་པ་བསྒྱུར་ཏེ་ལྟུང་བའི་རྣམ་གཞག་འཁྲུར་འཇུག་གི་སྐབས་དང་འདྲའོ། །བརྒྱད་པ་རིན་པོ་ཆེ་བདག་གིར་བྱེད་པའི་སྤང་བ་ནི། རྟེན་དགེ་སློང་རུང་བ་གསུམ་པོ་གང་དང་ཡང་མི་ལྡན་པས། དངོས་པོ་གསེར་དངུལ་ལ་སོགས་པའི་རིན་པོ་ཆེ་ཡིན་པ། ཉོ་ཚོང་ལ་སོགས་པའི་ཐ་སྙད་གདགས་སུ་རུང་བ་རང་གི་ཡིན་པ་ལག་པས་སླེབ་པའི་མངོན་སུམ་དུ་གནས་པ་ལ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རང་གར་རེག་གམ་རེག་ཏུ་འཇུག་འདོད་པས། སྦྱོར་བ་རང་ངམ་གཞན་མངོན་སུམ་དུ་བསྐོས་ཏེ་རེག་པར་རྩོམ་ཞིང་། མཐར་ཐུག་རེག་པ་རྫོགས་པ་ན་སྤང་བའོ། །རིན་པོ་ཆེའི་རུང་བ་བྱ་ཚུལ་ལ་གསུམ་སྟེ། སྦྱིན་བདག་བདག་པོ་ཡིན་སྙམ་དུ་རང་གི་བསམ་པས་མོས་སུ་གཞུག་པ་དང་། ཞལ་ཏ་བའམ་གཉེར་བྱེད་པའི་དགེ་བསྙེན་ལྟ་བུ་བདག་པོ་ཉིད་དུ་ཁས་ལེན་དུ་འཇུག་པ་དང་། བྱིན་གྱིས་བརླབ་པ་ནི། བསྙེན་པར་མ་རྫོགས་པ་ཞིག་ལ་ཟུར་གྱིས་གོས་ཏེ་མདུན་དུ་གཞག་ཏུ་བཅུག་ནས། རྟེན་དང་ཡུལ་གཉིས་ཀ་འགྲེངས་ཏེ་མི་རེག་པར་ལག་པ་བརྐྱངས་ཏེ་འཛིན་པའི་ཚུལ་དུ་བྱས་ནས། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བས། དངོས་པོ་རུང་བ་མ་ལགས་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདི་དངོས་པོ་རུང་བར་བསྒྲུབ་པར་བགྱིའོ། །ཞེས་ལན་གསུམ་བརྗོད་ལ་ཐབས་ལེགས་བྱའོ། །དགུ་པ་མངོན་མཚན་ཅན་གྱི་སྤང་བ་ནི། རྟེན་རྐྱེན་ཁྱད་པར་ཅན་དང་མི་ལྡན་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ། རང་དང་ནོར་མི་གཅིག་པ་ལ། དངོས་པོ་རིན་པོ་ཆེའམ་འབྲུ་ལ་སོགས་པའི་ནོར་རང་དབང་བ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་སྐྱེད་ཀྱི་ཁེ་འདོད་པས། སྦྱོར་བ་བུན་སྐྱེད་བྱེད་པ་ལ་ཞུགས་ཏེ། མཐར་ཐུག་སྐྱེད་ཐོབ་པ་ན་སྤང་བའོ། །བཅུ་པ་ཉོ་ཚོང་གི་སྤང་བ་ནི། རྟེན་སྔོན་གྱི་བུ་ལོན་ཆགས་པས་ཉོ་ཚོང་མ་བྱས་ན་བུ་ལོན་མི་ཁྱེར་ཞིང་བུ་ལོན་མ་ཁྱེར་ན་མ་བྱིན་ལེན་གྱི་ཕམ་པར་འགྱུར་བ་ལ་སོགས་པའི་རྐྱེན་ཁྱད་པར་ཅན་དང་མི་ལྡན་པ་སྟེ། འདི་རྟེན་གོང་མ་ལ་ཡང་མཚུངས་སོ་དངོས་པོ་འབྲུ་དང་གོས་ལ་སོགས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རང་དགར་ཉོ་ཚོང་བྱེད་པར་འདོད་པས། སྦྱོར་བ་མོད་པའི་ཚེ་ཉོ་ཞིང་དཀོན་པའི་ཚེ་ཚོང་བར་བརྩམས་པས། མཐར་ཐུག་དེའི་རྐྱེན་གྱིས་ཁེ་སྤོགས་གྲུབ་པའི་ཚེ་སྤང་བའོ། །བཅུ་ཚན་གསུམ་པ་ལ་སྡོམ་ནི། ལྷུང་བཟེད་གཉིས་དང་ཐ་ག་གཉིས། །བྱིན་ཕྲོག་སྟོན་ཟླ་ཐ་ཆུང་དང་། །དགོན་པ་བ་དང་རས་ཆེན་དང་། །བསྔོས་པ་དང་ནི་གསོག་འཇོག་གོ །ཞེས་ཏེ། དང་པོ་ལྷུང་བཟེད་ལྷག་པོ་འཆང་བའི་སྤང་བ་ནི། རྟེན་དགེ་སློང་གིས་དངོས་པོ་ལྷུང་བཟེད་རུང་བ་ཚད་དང་ལྡན་པ་ལྷག་པོ། ལྷག་པའི་ཡོ་བྱད་དུ་བྱིན་གྱིས་བརླབ་པ་སོགས་ཀྱིས་རུང་བ་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་རྒྱུན་དུ་འཆང་འདོད་ཀྱི་བསམ་པས། སྦྱོར་བ་ཞག་བཅུ་བཅངས་ཏེ། མཐར་ཐུག་བཅུ་གཅིག་པའི་སྐྱ་རེངས་ཤར་བའི་ཚེ་སྤང་བའོ། །གཉིས་པ་ལྷུང་བཟེད་ལྷག་པོ་ཚོལ་བའི་སྤང་བ་ནི། རྟེན་ལྷུང་བཟེད་རུང་བ་ཚད་ལྡན་ཡོད་པའི་དགེ་སློང་གིས། ཡུལ་ཁྱིམ་པ་ཉེ་དུ་མ་ཡིན་པ་ལ། དངོས་པོ་ལྷུང་བཟེད་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་སློང་འདོད་ཀྱི་བསམ་པས། སྦྱོར་བ་ངག་མཚན་ཉིད་དྲུག་ལྡན་གྱིས་བསླངས་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །གསུམ་པ་འཐག་ཏུ་འཇུག་པའི་སྤང་བ་ནི། རྟེན་དགེ་སློང་གིས་ཡུལ་ཐ་ག་པ་ཉེ་དུ་མ་ཡིན་པ་ལ། དངོས་པོ་གོས་ཀྱི་རྒྱུ་རུང་བ་ཚད་ལྡན་རང་གི་ཡིན་པ། བསམ་པ་འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་འཐབ་ཏུ་འཇུག་འདོད་ཀྱི་བསམ་པས། སྦྱོར་བ་རང་ངམ་བསྐོས་པར་རྔན་པ་མ་བྱིན་པར་འཐགས་སུ་བཅུག་སྟེ། མཐར་ཐུག་ལག་ཏུ་ཐོབ་པ་ན་སྤང་བའོ། །བཞི་པ་འཐག་པ་བསྐྱེད་པའི་སྤང་བ་ནི། འཐག་པ་བསྐྱེད་པའི་དངོས་པོ་ནི་སྦྱིན་བདག་གིས་རང་ལ་བསྔོས་པའི་དོགས་པ་རུང་བ་ཚད་ལྡན་ལས་ལྷག་པ་སྦྱིན་བདག་ལས་བསླངས་ཏེ། རང་ངམ་བསྐོས་པས་འཐག་ཏུ་གཞུག་པ་སོགས་སྔར་བཞིན་ནོ། །ལྔ་པ་བྱིན་ཕྲོག་གི་སྤང་བ་ནི། རྟེན་དགེ་སློང་གིས་ཡུལ་དགེ་སློང་ཆོས་བརྒྱད་ལྡན་ལ་དངོས་པོ་རང་གིས་བྱིན་པའི་ཆོས་གོས། འདུ་ཤེས་མ་འཁྲུལ་ཞིང་ཀུན་སློང་རང་ངམ་གཞན་གྱི་དོན་དུ་འཕྲོག་འདོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་ཕྲོག་སྟེ། མཐར་ཐུག་དབྲལ་བར་བྱ་བའི་དགེ་སློང་གི་ལུས་ལས་ཆོས་གོས་དེ་བྲལ་བ་ན་སྤང་བའོ། །ཤ་་་་་་ཁ་ཅིག་ལྷུང་བཟེད་ཕྲོག་པས་བྱིན་ཕྲོག་གི་སྤང་བ་སྐྱེད་དེ། འགྲེལ་པར་གོས་ཞེས་པ་མཚོན་པ་སྟེ། དགེ་སྦྱོང་གི་ཡོ་བྱད་གང་ཡང་རུང་བ་ཕྲོག་པ་ལ་དངོས་གཞིར་འགྱུར་རོ་ཞེས་གསུངས་པའི་ཕྱིར་ཟེར་བ་མི་འཐད་དེ། གོས་ཞེས་པ་ནི་འགྱུར་སྐྱོན་ཡིན་པས་དག་པར་བསྒྱུར་ན་ཆོས་གོས་ཞེས་པ་མཚོན་པ་སྟེ། དགེ་སྦྱོང་གི་ཡོ་བྱད་གང་ཡང་རུང་བ་ཕྲོག་པ་ལ་དངོས་གཞིར་འགྱུར་ཞེས་འབྱུང་ལ། དེའི་དོན་ཡང་ཆོས་གོས་ཞེས་པ་མཚོན་པ་སྟེ། ལྷག་པའི་ཡོ་བྱད་དང་འཚོ་བའི་ཡོ་བྱད་ཀྱི་གོས་གང་ཡང་རུང་བ་ཕྲོག་ན་སྤང་ལྟུང་སྐྱེད་ཅེས་པའི་དོན་ཡིན་ཏེ། བམ་ལྔར་གོས་ཉིད་དུ་གཏོགས་པའི་ཡོ་བྱད་གང་ཡང་རུང་བ་ཕྲོག་པ་ལ་ན་སྨད་པ་མེད་དོ་ཞེས་གསུངས་པའི་ཕྱིར་དང་། རྩ་བར་དེ་གོས་ཉིད་ཡིན་ནའོ་ཞེས་གསུངས་པའི་ཕྱིར། ཁྱེད་ལྟར་ན་ཕོར་པ་སོགས་ཕྲོག་པས་ཀྱང་ཕྲོག་པའི་སྤང་བ་སྐྱེད་པར་ཐལ། ཡོ་བྱད་གང་ཡང་རུང་བ་ཞེས་སྨོས་པའི་ཕྱིར། ཁྱབ་པ་ཁས་བླངས་སོ། །ཊཱི་ཀར་རྐུ་སེམས་ཀྱིས་ཕྲོག་ན་མ་བྱིན་ལེན་གྱི་ལྟུང་བར་འགྱུར་ཞེས་གསུངས་པའི་དོན་ནི། ཁོ་རང་དབང་བའི་བསམ་པས་ཕྲོགས་ན་མ་བྱིན་ལེན་གྱི་ལྟུང་བར་འགྱུར་གྱི། སྐབས་འདིའི་ལྟུང་བར་མི་འགྱུར་ཞེས་པའི་དོན་ནོ། །དྲུག་པ་བརྟད་པ་ལས་བྱུང་བའི་སྤང་བ་ནི། རྟེན་དབྱར་གནས་པའི་དགེ་སློང་གིས། དངོས་པོ་དབྱར་གནས་པར་ཁས་བླངས་པ་ལས་བྱུང་བའི་གོས་ཀྱི་རྙེད་པ་རུང་བ་ཚད་ལྡན། དུས་དབྱར་ཁས་བླངས་ནས་དགག་དབྱེ་མ་བྱས་པའི་གོང་དུ། རྐྱེན་དབང་མ་གཏོགས་པར་འདུ་ཤེས་མ་འཁྲུལ་ཞིང་ཀུན་སློང་དབྱར་ནང་དུ་བདག་གིར་བྱེད་འདོད་པ་དང་། དབྱར་ནང་དུ་རང་དགར་བགོད་འདོད་པ་དང་དགག་དབྱེ་མཐོན་པའི་ཕྱི་དེ་ཉིན་པར་མི་བགོ་བར་འདོད་པས། སྦྱོར་བ་དེ་དང་དེ་ལྟར་བྱེད་པས་སྔ་མ་ནི་དགག་དབྱེའི་ནང་དུ་བདག་གིར་བྱས་པ་དང་བགོས་པ་དང་། ཕྱི་མ་སྦྱིན་བདག་གིས་ཁོ་བོ་མ་སླེབ་ཀྱི་བར་དུ་མ་བགོ་ཞིག་ཅེས་པའི་ཚིག་གི་དབང་མེད་ན་སྦེད་པ་མ་བསྐོས་པར་གཞག་པ་དུས་དེ་དང་དེ་ལས་འདས་ན། རིམ་བཞིན་དབྱར་གྱི་རྙེད་པ་བདག་གིར་བྱེད་སྔས་པ་དང་བགོད་སྔས་པ་དང་། བགོད་འཕྱིས་པའི་སྤང་བར་འགྱུར་རོ། །རྐྱེན་དབང་མ་གཏོགས་ཞེས་པ་ནི་བརྟད་པ་གློ་བུར་གྱི་དགོས་པའི་དབང་གིས་མཐའ་དགག་དབྱེ་འབྱུང་བ་ལ་ཞག་བཅུ་ཙམ་ན་རྙེད་པ་ནི་བདག་གིར་བྱེད་དུ་མི་རུང་བ་མ་གཏོགས་པ་སྟེ་རུང་ངོ་ཞེས་པའི་དོན་ནོ། །མཚོ་་་་་་ཁ་ཅིག་བརྟད་པའི་དབང་གིས་ཞེས་སོགས་ཀྱི་དོན་ནི་བཅུ་ཚམས་སུ་བདག་གིར་བྱེད་དུ་རུང་ཞེས་པ་ཡིན་ལ། དེ་བགོས་ན་ཞེས་པའི་དོན་ནི་སོ་སོའི་སྐལ་བ་བགོས་ན་སྤང་བར་འགྱུར་ཞེས་པའི་དོན་ཡིན་གསུངས་པ་མི་འཐད་དེ། འགྲེལ་པར་གཙུག་ལག་ཁང་གང་དག་ན་ཆོས་གོས་ཀྱི་ཟོང་ངེས་པར་གྱུར་པ་ཡོད་པ་ནི་ཇི་སྲིད་དུ་མ་ཐོབ་པ་དེ་སྲིད་དུ་དེ་ལ་བདག་གིར་བྱ་བ་མི་འབྱུང་ལ་ཞེས་གསུངས་པའི་ཕྱིར། དེས་ན་གཞུང་སྔ་མས་སོ་སོའི་སྐལ་བ་ངོ་རིགས་སུ་བྱེད་རུང་བར་བསྟན། ཕྱི་མས་སོ་སོའི་སྐལ་བ་དབང་བྱར་ཡོད་པ་བགོས་ན་སྤང་བར་འགྱུར་ཞེས་པའི་དོན་ནོ། །བདུན་པ་དགོན་པ་བའི་འབྲལ་སྤང་ནི། རྟེན་སྣམ་སྦྱར་དང་མི་འབྲལ་བའི་གནང་བ་མ་ཐོབ་པ་དང་སྲ་བརྐྱང་མ་བཏིང་བའི་དགེ་སློང་གིས། དངོས་པོ་རང་གི་ཆོས་གོས་གསུམ་པོ་གང་རུང་དངོས་ཀྱི་བྱིན་བརླབས་ཅན་དགོན་པར་འཇིགས་པའི་དབང་གིས་སྤྱོད་ཡུལ་གྱི་གྲོང་དུ་འཇིགས་པ་མ་བྲལ་བར་དུ་གཞག་ཏུ་རུང་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་ཞག་དྲུག་འབྲལ་འདོད་ཀྱི་བསམ་པས། སྦྱོར་བ་བར་ཆད་ཀྱི་རྐྱེན་མེད་པར་རང་གི་གནས་དང་ཆོས་གོས་གཞག་པའི་གནས་གཉིས་ཉེ་འཁོར་དང་བཅས་པ་ལས་གཞན་དུ་གནས་ལ། མཐར་ཐུག་ཞག་དྲུག་འདས་ཏེ་བདུན་པའི་སྐྱ་རེངས་ཤར་བ་ན་སྤང་བའོ། །ཁ་ཅིག་དགོན་པ་བའི་འབྲལ་སྤང་བསྐྱེད་པ་ལ། སྣམ་སྦྱར་དང་འབྲལ་བ་ཡན་ལག་ཏུ་དགོས་གསུངས་པ་མི་འཐད་དེ། ཆོས་གོས་གསུམ་ལས་གང་ཡང་རུང་བ་དང་བྲལ་ན་འདིའི་འབྲས་སྤང་བསྐྱེད་པའི་ཕྱིར་ཏེ། སོ་སོ་ཐར་པ་ལས་དགེ་སློང་དགོན་པ་བ་དེ་འདོད་ན་ཆོས་གོས་གསུམ་པོ་གང་ཡང་རུང་བ་ཞིག་སྤྱོད་ཡུལ་གྱི་གྲོང་དུ་གཞག་པར་བྱའོ་ཞེས་དང་། ཊཱི་ཀར་ཆོས་གོས་གསུམ་ལས་གང་ཡང་རུང་བ་གཅིག་ཅེས་གསུངས་པའི་ཕྱིར། བརྒྱད་པ་རས་ཆེན་བཙལ་སྔས་གཞག་འཕྱིས་པའི་སྤང་བ་ནི། རྟེན་དབྱར་གནས་དང་འབྲེལ་བའི་དགེ་སློང་གིས། དངོས་པོ་རས་ཆེན་རུང་བ་ཚད་ལྡན་ཆར་ཆུ་སྐྱོབ་ནུས་པ་ཟླ་བ་བཞིར་སྤྱད་པའི་རྙིང་པ་མ་ཡིན་པ། བཙལ་བའི་དུས་དབྱར་ཁས་ལེན་པའི་སྔ་རོལ་ཟླ་བ་གཅིག་གི་ནང་དུ་བཙལ་དུ་རུང་ཞིང་། འཇོག་པའི་དུས་དགག་དབྱེ་ཐོན་ནས་ཟླ་བ་ཕྱེད་ཀྱི་བར་དུ་གཞག་ཏུ་རུང་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དོན་དུ་དབྱར་ཁས་ལེན་པའི་ཟླ་བ་གཅིག་གི་གོང་དུ་ཚོལ་འདོད་པའམ། དགག་དབྱེ་གྲོལ་ནས་ཟླ་བ་ཕྱེད་ཀྱི་འོག་ཏུ་ཡང་རས་ཆེན་སྦེད་པ་མ་བསྐོས་པར་འཇོག་འདོད་ཀྱི་བསམ་པས་སྦྱོར་བ་དེ་ལྟར་བྱེད་ཅིང་། མཐར་ཐུག་དེའི་རྐྱེན་གྱིས་ཟླ་བ་གཅིག་གི་གོང་དུ་བཙལ་ནས་རྙེད་པ་ན་བཙལ་སྔས་ཀྱི་སྤང་བ་དང་། དགག་དབྱེ་གྲོལ་ནས་སྦེད་པ་མ་བསྐོས་པར་ཟླ་བ་ཕྱེད་ལས་ལྷག་པ་བཅངས་ན་གཞག་འཕྱིས་པའི་སྤང་བའོ། །ཁ་ཅིག་རས་ཆེན་བཙལ་སྔས་དང་དབྱར་རྙེད་བདག་གིར་བྱེད་པའི་སྤང་ལྟུང་བསྐྱེད་པ་ལ་ཁྱིམ་པའི་ཡུལ་ལ་བཙལ་བ་ཡན་ལག་ཏུ་དགོས་གསུངས་པ་མི་འཐད་དེ། རས་ཆེན་བཙལ་སྔས་ཀྱི་སྤང་ལྟུང་འདི་དོན་མེད་པའི་ཡོ་བྱད་གསོག་པ་དགག་བྱར་བྱས་པ་ཡིན་ཞིང་། དབྱར་རྙེད་བདག་གིར་བྱས་པའི་སྤང་བ་ནི་དབྱར་རལ་བ་དགག་བྱར་བྱས་པ་གང་ཞིག ཁྱིམ་པ་དང་རབ་ཏུ་བྱུང་བ་གང་གི་ཡུལ་ལས་རྙེད་ཀྱང་དགག་བྱ་དེ་གཉིས་ཁྱད་པར་མེད་པའི་ཕྱིར། དགུ་པ་བསྔོས་བསྒྱུར་གྱི་སྤང་བ་ནི། རྟེན་དགེ་སློང་གི་ཡུལ་ཁྱིམ་པའམ་རབ་ཏུ་བྱུང་བས་དགེ་སློང་གི་གང་ཟག་གམ་དགེ་འདུན་ལ་བསྔོས་པའི་གོས། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་མེད་པར་རང་དགར་བསྒྱུར་འདོད་ཀྱི་བསམ་པས་རང་ལ་བསྒྱུར་ཏེ། མཐར་ཐུག་ལག་ཏུ་ཐོབ་པ་ན་སྤང་བའོ། །ཁ་ཅིག་བསྔོས་བསྒྱུར་གྱི་སྤང་བ་བསྐྱེད་པ་ལ། སྦྱིན་པར་བྱེད་པའི་སྤྱིན་བདག་ཁྱིམ་པ་ཉེ་དུ་མ་ཡིན་པ་ཡན་ལག་ཏུ་དགོས་ཤིང་། བསྒྱུར་རྒྱུའི་དངོས་པོ་ལ་གོས་དང་ལྷུང་བཟེད་གཉིས་ཡོད་ལ། སྦྱོར་བ་ངག་མཚན་ཉིད་ལྔ་ལྡན་དགོས་གསུང་བ་དང་པོ་མི་འཐད་དེ། རབ་བྱུང་གིས་བསྔོས་པ་བསྒྱུར་ན་ཡང་སྤང་ལྟུང་བསྐྱོད་པའི་ཕྱིར་ཏེ། བམ་ལྔར་སྦྱིན་པར་བྱེད་པ་ཁྱིམ་པ་དང་རབ་ཏུ་བྱུང་བ་མཚན་དང་ལྟ་བ་མཐུན་པ་དང་མི་མཐུན་པ་གང་ཡང་རུང་བ་ལ་ན་སྨད་པ་མེད་དོ་ཞེས་གསུངས་པའི་ཕྱིར། གཉིས་པ་མི་འཐད་དེ་ལྷུང་བཟེད་བསྒྱུར་བས་བསྔོས་བསྒྱུར་གྱི་སྤང་བ་མི་བསྐྱེད་པའི་ཕྱིར་ཏེ། ལུང་ལས་རྙེད་པ་ནི་གཉིས་ཏེ། གོས་ཀྱི་རྙེད་པ་དང་ཟས་ཀྱི་རྙེད་པའོ། །འདིར་ནི་གོས་ཀྱི་རྙེད་པ་ཡིན་པར་ངེས་དགོངས་སོ་ཞེས་དང་། དེའི་དོན་ཊཱི་ཀར་གོས་ཀྱི་རྙེད་པ་ཡིན་པར་ངེས་དགོཾངཾས་སོ་ཞེས་པས་ཟས་ཀྱི་རྙེད་པ་བསལ་ཏོ་ཞེས་གསུངས་པའི་ཕྱིར། ཁོ་ན་རེ་ལྷུང་བཟེད་བསྒྱུར་བས་བསྔོས་བསྒྱུར་གྱི་སྤང་བ་བསྐྱེད་དེ། ཟས་ཀྱི་རྙེད་པ་བསལ་ཏོ་ཞེས་གསུངས་པའི་ཕྱིར་ཞེ་ན། འོ་ན་གནས་ཁང་གི་རྙེད་པ་བསྒྱུར་བས་ཀྱང་བསྔོས་བསྒྱུར་གྱི་སྤང་བ་བསྐྱེད་པར་ཐལ། ཟས་གྱི་རྙེད་པ་བསལ་ཏོ་ཞེས་གསུངས་པའི་ཕྱིར། ཁྱབ་པ་ཁས་བླངས། ངག་མཚན་ཉིད་ལྔ་ལྡན་གྱིས་བསྒྱུར་དགོས་པ་ཡང་མི་འཐད་པར་ཐལ། ལུས་ཀྱིས་བསྒྱུར་ན་ཡང་བསྔོས་བསྒྱུར་གྱི་སྤང་བ་བསྐྱེད་པའི་ཕྱིར་ཏེ། ཊཱི་ཀར་ཉེ་དུ་མ་ཡིན་པ་ཡན་ལག་ཏུ་མི་དགོས་པ་དེ་བཞིན་དུ། འདིར་ཚིག་ཉིད་ཀྱང་དེ་དང་འདྲའོ་ཞེས་གསུངས་པའི་ཕྱིར། བཅུ་པ་གསོག་འཇོག་གི་སྤང་བ་ནི། རྟེན་དགེ་སློང་ནད་པ་མ་ཡིན་པས་དངོས་པོ་ལྷའི་བདུད་རྩི་དང་སྣར་བླུག་པ་ཙམ་ལས་གཞན་པ། དགེ་སློང་གི་རྟེན་རུང་གི་སྨན་བཞི་པོ་གང་རུང་བྱིན་ལེན་བྱས་པ། འདུ་ཤེས་མ་འཁྲུལ་ཞིང་ཀུན་སློང་ཕྱིས་ལོངས་སྤྱོད་འདོད་ཀྱི་བསམ་པས། སྦྱོར་བ་རང་རང་གི་གསོག་འཇོག་གི་དུས་ལས་འདས་པ་སྟེ། སྤྱིའི་དུས་སྨན་བཞི་པོ་བྱིན་ལེན་བྱས་པ་ཉི་མ་ཕྱེད་ཡན་དུ་བསྟེན་དུ་རུང་ཞིང་། ཕྱེད་ཡོལ་ནས་བྱིན་ལེན་མ་བཤིག་པར་བཅངས་ན་དགེ་སློང་དེ་ལ་གསོག་འཇོག་གི་སྤང་བའོ། །སོ་སོའི་དུས་ནི་བུ་རམ་ལྟ་བུ་ཞག་བདུན་པའི་སྨན། ཞག་བདུན་པར་བྱིན་གྱིས་བརླབས་པ་སླར་ཡང་བྱིན་གྱིས་མ་བརླབས་པའམ་བྱིན་ལེན་མ་བཤིག་པར་ཞག་བདུན་ལས་འདས་ཏེ་བརྒྱད་པའི་སྐྱ་རེངས་དང་པོ་ཤར་བ་དང་། ཐུན་ཚོད་དུ་རུང་བའི་བཏུང་བ་སྨན་བཞི་པོ་གང་རུང་ལས་སྦྱར་བ། ཕྱི་དྲོ་བྱིན་ལེན་བྱས་པ་ཉི་མ་མ་ནུབ་བར་བསྟེན་དུ་རུང་ཞིང་། དེ་ནས་བྱིན་ལེན་མ་བཤིག་པར་བཅངས་ན་ཉིན་མཚན་གྱི་དུས་མཚམས་ལས་འདས་ཏེ་མཚན་མོའི་ཐུན་དང་པོ་ཤར་བ་ན་སྤང་བའོ་ཞེས་གསུང་ངོ་། །འདིར་མཐའ་དཔྱད་པ་ལ་རྒྱ་གར་མཁས་པའི་ལུགས། བོད་སྔ་མའི་ལུགས། རང་གི་ལུགས་དང་གསུམ་ལས། དང་པོ་ཁ་ཅིག་སྨན་ཞག་བདུན་པར་བྱིན་གྱིས་བརླབས་པ་ཁོ་ནའི་གཞི་ལས་གསོག་འཇོག་གི་སྤང་ལྟུང་བསྐྱེད་པ་ཡིན་གྱི་སྨན་གཞན་གྱི་གཞི་ལས་གསོག་འཇོག་གི་ཉེས་བྱས་སུ་འགྱུར་གྱི་སྤང་ལྟུང་མི་སྐྱེད་གསུང་ངོ་། །སློབ་དཔོན་ཆོས་བཤེས་ནི་སྨན་བཞི་ཀའི་གཞི་ལས་སྤང་ལྟུང་སྐྱེད་པར་བཤད་དོ། །གཉིས་པ་ནི། ཤ་སླ་་་་་་བོད་ཁ་ཅིག་སྨན་རྣམ་པ་བཞི་ཀ་སྔ་དྲོ་བྱིན་ལེན་བྱས་བྱིན་གྱིས་མ་བརླབས་པར་གུང་ཡོལ་བ་ན། སྨན་དེ་གསོག་འཇོག་ཏུ་སོང་ལ་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད། དེ་བཞིན་དུ་སྨན་བཞི་པོ་གང་རུང་ཕྱི་དྲོ་བྱིན་ལེན་བྱས་བྱིན་གྱིས་མ་བརླབས་པར་ཐུན་ཚོད་འདས་པ་ན། སྨན་དེ་གསོག་འཇོག་ཏུ་སོང་བས་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད་གསུང་བ་མི་འཐད་དེ། དེ་ལྟར་སྐྱེད་པ་རྒྱ་གར་བ་སུས་ཀྱང་མ་བཤད་པའི་ཕྱིར་དང་གནོད་བྱེད་ཡོད་པའི་ཕྱིར་རོ། །མཚོ་་་་་་ཁ་ཅིག་སྨན་སྔ་དྲོ་བྱིན་ལེན་བྱས་ཤིང་བྱིན་གྱིས་མ་བརླབས་པར་གུང་ཡོལ་བ་ན་དགེ་སློང་དེ་ལ་གསོག་འཇོག་གི་སྤང་ལྟུང་སྐྱེད་དེ། དགེ་སློང་མའི་སོ་ཐར་ལས་གུང་ཡོལ་བ་ན་སྤང་བར་འགྱུར་རོ་ཞེས་གསུངས་པའི་ཕྱིར་ཞེས་པ་མི་འཐད་དེ། དེའི་དོན་ནི་གུང་ཡོལ་བ་ན་བཟར་མི་རུང་བས་སྤང་དགོས་པར་འགྱུར་ཞེས་པའི་དོན་ཡིན་པའི་ཕྱིར། གསུམ་པ་རང་ལུགས་ནི། སྨན་བཞི་པོ་སྔ་དྲོ་བྱིན་ལེན་བྱས་བྱིན་གྱིས་མ་བརླབས་པར་གུང་ཡོལ་བ་ན་སྨན་དེ་གསོག་འཇོག་དུ་སོང་། དེ་བཞིན་དུ་སྨན་བཞི་པོ་ཕྱི་དྲོ་བྱིན་ལེན་བྱས་བྱིན་གྱིས་མ་བརླབས་པ་ཐུན་ཚོད་འདས་པ་ན་སྨན་དེ་གསོག་འཇོག་ཏུ་སོང་ངོ་། །དེས་ན་སྨན་ཞག་བདུན་བར་བྱིན་གྱིས་བརླབས་པ་ཡང་ཞག་བདུན་པའི་ཐུན་ཐ་མ་ཚུན་དུ་བྱིན་གྱིས་བརླབས་པ་ཡིན་ཏེ། ཉི་མ་འདས་སོ་ཅོག་བརྗོད་པར་བྱའོ་ཞེས་དང་། ཊཱི་ཀར་དགེ་སློང་དེས་ཉི་མ་བདུན་པ་དེ་ཉིད་ཀྱི་ནང་དུ་སྨན་སྔ་མ་ཤོས་ཡོངས་སུ་ལོངས་སྤྱོད་པར་བྱ་ཞིང་། ཞེས་སོགས་གསུངས་པའི་ཕྱིར། ཞག་བདུན་པར་བྱིན་གྱིས་བརླབས་པ་ཡང་ཞག་བདུན་པའི་ཐུན་ཚོད་ཀྱི་མཐའ་འདས་པ་ན་གསོག་འཇོག་ཏུ་སོང་ངོ་། །ཡང་ཊཱི་ཀར་རུང་བའི་ཕྱིར་གསེར་ལ་སོགས་པ་དང་འདྲའོ་ཞེས་གསུངས་པའི་དོན་ལ། ཁ་ཅིག་བུ་རམ་ལྟ་བུ་བཟའ་བའི་ཕྱིར་མ་ཡིན་པ་ཡོ་བྱད་ཀྱི་ཕྱིར་འཆང་ན་རིན་པོ་ཆེའི་རུང་བ་གསུམ་པོ་གང་རུང་གཅིག་བྱས་ཏེ་འཆང་དུ་རུང་བ་ཡིན་ཏེ། དཔེར་ན་གསེར་རུང་བ་བྱས་ནས་ཇི་ཙམ་འདོད་པ་འཆང་དུ་རུང་བ་བཞིན་ཞེས་གསུང་བ་མི་འཐད་དེ། དེའི་དོན་ནི་བུ་རམ་བཟའ་བའི་ཕྱིར་མ་ཡིན་པར་གོས་སོགས་ཀྱི་དོན་དུ་ཞག་བདུན་ལས་ལྷག་པ་བཅང་དུ་རུང་སྟེ། དཔེར་ན་གསེར་ཆོས་ལྡན་གྱི་དགོས་པའི་ཕྱིར་ཇི་ཙམ་དུ་འདོད་པ་བཅད་དུ་རུང་བ་བཞིན་ཞེས་པའི་དོན་ཡིན་པའི་ཕྱིར། ཁ་ཅིག་ཚེས་གཅིག་ལྟ་བུ་ལ་སྨན་ཞག་བདུན་པར་བྱིན་གྱིས་བརླབས་པ་དེ་ཚེས་དགུའི་སྐྱ་རེངས་ཤར་བ་ན་སྨན་དེ་གསོག་འཇོག་ཏུ་འགྱུར་ཏེ། ཞག་བདུན་པར་བྱིན་གྱིས་བརླབས་པའི་སྨན་དེ་གསོག་འཇོག་ཏུ་འགྱུར་བ་ལ་བྱིན་གྱིས་བརླབས་ནས་སྐྱ་རེངས་བརྒྱད་པ་ཤར་བ་དགོས་པའི་ཕྱིར་སྟེ། སྐྱ་རེངས་བརྒྱད་པ་ཤར་ནའོ་ཞེས་གསུངས་པའི་ཕྱིར། གཞན་དུ་ན་དབྱར་ཞག་བདུན་བྱིན་གྱིས་བརླབས་པ་དེ་ཞག་བདུན་འདས་ཏེ་བརྒྱད་པའི་སྐྱ་རེངས་ཤར་བ་ན་དབྱར་རལ་བར་ཐལ། སྨན་ཞག་བདུན་པར་བྱིན་གྱིས་བརླབས་པ་དེ་ཞག་བདུན་འདས་ཏེ་བརྒྱད་པའི་སྐྱ་རེངས་ཤར་བ་ན་གསོག་འཇོག་ཏུ་འགྱུར་བའི་ཕྱིར་ཞེས་གསུངས་པ་ནི་མི་མཚུངས་ཏེ། དབྱར་ཞག་བདུན་བྱིན་གྱིས་བརླབས་པ་ནི་ཞག་བདུན་འདས་མ་ཐག་ཏུ་དབྱར་རལ་བ་དགག་བྱར་བྱས་པ་ཡིན་ལ། སྨན་ཞག་བདུན་པར་བྱིན་གྱིས་བརླབས་པ་ནི་ཞག་བདུན་གྱི་ནང་དུ་གསོག་འཇོག་ཏུ་འགྱུར་བ་དགག་པའི་ཆེད་ཡིན་པའི་ཕྱིར། སྐྱ་རེངས་བརྒྱད་པ་ཤར་ནའོ་ཞེས་པ་ནི་འགྱུར་སྐྱོན་ཡིན་ཏེ། འགྲེལ་ཆུང་དུ་བརྒྱད་པའི་སྐྱ་རེངས་ཤར་བ་ནའོ་ཞེས་པ་དང་། ཊཱི་ཀར་ཡང་ཉི་མ་བརྒྱད་པའི་སྐྱ་རེངས་ཤར་བ་ན་སྤང་བའི་ལྟུང་བྱེད་དུ་འགྱུར་ཞེས་གསུངས་པའི་ཕྱིར། དེས་ན་གསོག་འཇོག་གི་སྤང་བ་ནི་གསོག་འཇོག་ཏུ་སོང་ཟིན་བཟའ་བའི་ཕྱིར་ཞག་འདས་པར་བཅངས་པའི་གཞི་ལས་བྱུང་བའི་སྤང་ལྟུང་དང་། གསོག་འཇོག་གི་ལྟུང་བྱེད་འབའ་ཞིག་པ་ནི་གསོག་འཇོག་ཏུ་སོང་ཟིན་ཟོས་པའི་གཞི་ལས་བྱུང་བའི་ལྟུང་བྱེད་ཡིན་ནོ།། ༈ །།གཉིས་པ་ལྟུང་བྱེད་འབའ་ཞིག་ལ་སྤྱིའི་སྡོམ་ནི། ཤེས་བཞིན་དང་ནི་ས་བོན་དང་། །མ་བསྐོས་པ་དང་ཡང་ཡང་དང་། །ཆུ་དང་ཁྱིམ་དང་བསམ་བཞིན་དང་། །འགྲོན་ལམ་རྐུན་མ་ཆོས་སྟོན་ནོ། །ཞེས་གསུངས་ཏེ། བཅུ་ཚན་དགུ་ལས་དང་པོ་ལ་སྡོམ་ནི། བརྫུན་སྐྱོན་དགེ་སློང་ཕྲ་མ་དང་། །སྐྱོ་སྔོགས་བྱེད་དང་སྟོན་པ་དང་། །འདོན་དང་གནས་ངན་ལེན་དང་ཆོས། །བཤེས་ངོར་བྱེད་དང་ཁྱད་དུ་གསོད། །ཅེས་ཏེ། དང་པོ་བརྫུན་དུ་སྨྲ་བའི་ལྟུང་བྱེད་ནི། རྟེན་དགེ་སློང་གིས་དངོས་པོ་གོང་དུ་བསྟན་པའི་ཕམ་པར་འགྱུར་བའི་བརྫུན་དང་། ལྷག་མར་འགྱུར་བའི་བརྫུན་དང་། ཤེས་བཞིན་དུ་ཆོས་མ་ཡིན་པར་ཆོས་དང་། ཆོས་ཆོས་མ་ཡིན་པར་སྟོན་པ་སྦོམ་པོར་འགྱུར་བའི་བརྫུན་དང་། གསོ་སྦྱོང་གི་ཚེ་ཅི་འདི་ལ་ཁྱེད་ཡོངས་སུ་དག་གམ་ཞེས་ལན་གསུམ་དུ་དྲིས་པ་ན་ཅང་མི་སྨྲ་བས་འདའ་བར་བྱེད་པ་ལྟ་བུ་ཉེས་བྱས་སུ་འགྱུར་བའི་བརྫུན་དང་། འོག་ནས་འབྱུང་བ་ལྟར་དགེ་འདུན་ལྷག་མས་སྐུར་པ་འདེབས་པའི་ལྟུང་བྱེད་ཀྱི་བརྫུན་རྣམས་ལས་གཞན་པའི་ཤེས་བཞིན་གྱི་བརྫུན། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྨྲ་འདོད་ཀྱི་བསམ་པས། སྦྱོར་བ་རང་གིས་སྨྲས་ཏེ། མཐར་ཐུག་ཉན་པ་པོས་བརྡ་འཕྲོད་ཅིང་དོན་གོ་བ་ན་ལྟུང་བྱེད་དོ། །གཉིས་པ་སྐྱོན་ནས་བརྗོད་པའི་ལྟུང་བྱེད་ནི། རྟེན་དགེ་སློང་གིས། ཡུལ་དགེ་སློང་ཕ་རོལ་པོ་ལ། བསམ་པ་འདུ་ཤེས་མ་འཁྲུལ་ཞིང་ཀུན་སློང་སྐྱོན་གདགས་འདོད་ཀྱི་བསམ་པས། སྦྱོར་བ་ཡུལ་དུས་དེར་སྐྱོན་དུ་གྲགས་པ་ཚིག་འཇམ་རྩུབ་གང་གིས་སྨྲས་ཀྱང་རུང་། མཐར་ཐུག་དོན་གོ་བ་ན་ལྟུང་བྱེད་དོ། །གསུམ་པ་ཕྲ་མ་བྱེད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མཐུན་པ་དག་ལ། འདུ་ཤེས་མ་འཁྲུལ་ཞིང་ཀུན་སློང་ཕྲ་མ་བྱེད་འདོད་ཀྱི་བསམ་པས། སྦྱོར་བ་ངག་དྲུག་ལྡན་གྱིས་མིང་ནས་སྨོས་ཏེ་ཕྲ་མའི་ཚིག་སྨྲས་པས། མཐར་ཐུག་དོན་གོ་བ་ན་ལྟུང་བྱེད་དོ། །བཞི་པ་སྐྱོ་སྔོགས་བྱེད་པའི་ལྟུང་བྱེད་ནི། རྟེན་རྩོད་པའི་རྒྱུས་ཤེས་ཤིང་ཞི་བྱེད་ལ་གཏོགས་པའི་དགེ་སློང་གིས། ཡུལ་དགེ་སློང་ཕ་རོལ་པོ་དག་གི་ཆོས་ཀྱི་རྩོད་པ་བཞི་པོ་གང་རུང་དགེ་འདུན་གྱིས་ཆོས་ཕྱོགས་སུ་ཞི་བར་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་རྩོད་པ་དཀྲུགས་འདོད་ཀྱི་བསམ་པས། སྦྱོར་བ་ཁྱེད་ཀྱི་རྩོད་པ་དེ་ལེགས་པར་ཞི་བར་བྱས་པ་མ་ཡིན་ནོ་ཞེས་སོགས་སྐྱོ་སྔོགས་ཀྱི་ཚིག་བརྗོད་པས། མཐར་ཐུག་ཡུལ་གྱིས་དོན་གོ་བ་ན་ལྟུང་བྱེད་དོ། །ལྔ་པ་ཁྱིམ་པ་མོ་ལ་ཆོས་སྟོན་པའི་ལྟུང་བྱེད་ནི། རྟེན་དགེ་སློང་གིས་ཡུལ་ཁྱིམ་པ་མོ་ཉེ་དུ་མ་ཡིན་པ་ལུས་བསྟན་རུང་སྨྲ་ཤེས་དོན་གོ་རྫུ་འཕྲུལ་ཅན་དང་མཁས་པའི་རང་བཞིན་ཅན་མ་ཡིན་པ་ལ། འདུ་ཤེས་མ་འཁྲུལ་ཞིང་ཀུན་སློང་ཆོས་བསྟན་འདོད་ཀྱི་བསམ་པས། སྦྱོར་བ་གནས་གཅིག་ཏུ་ཁྲིམས་གྲོགས་མེད་པར་བཀར་གཏོགས་པའི་ཆོས་ཚིག་ལྔའམ་དྲུག་ལས་ལྷག་པར་སྟོན་པ། མཐར་ཐུག་དོན་གོ་བ་ན་ལྟུང་བའོ། །དྲུག་པ་བསྙེན་པར་མ་རྫོགས་པ་དང་ལྷན་ཅིག་འདོན་པའི་ལྟུང་བྱེད་ནི། རྟེན་དགེ་སློང་གིས། འདོན་པར་བྱ་བའི་དངོས་པོ་སྟོན་བྱེད་དུ་གྱུར་པའི་ཆོས་དང་ཡི་གེ་གང་རུང་། འདུ་ཤེས་མ་འཁྲུལ་ཞིང་ཀུན་སློང་རང་དགར་བསྙེན་པར་མ་རྫོགས་པ་དང་ཅིག་ཅར་རམ་མཇུག་ཐོག་ཏུ་འདོན་པར་འདོད་པས། སྦྱོར་བ་མི་འདོད་བཞིན་དུ་གྲུབ་པ་མ་གཏོགས་པར་བསྙེན་པར་མ་རྫོགས་པ་དང་ཅིག་ཅར་རམ་འཇུག་ཐོག་ཏུ་འདོན་པས། མཐར་ཐུག་དོན་གོ་བ་ན་ལྟུང་བའོ། །བདུན་པ་གནས་ངན་ལེན་བརྗོད་པའི་ལྟུང་བྱེད་ནི། རྟེན་ཁྱིམ་པ་མ་དད་པ་བཟློག་པའི་ཕྱིར་གནས་ངན་ལེན་བརྗོད་པར་མ་བསྐོས་པའི་དགེ་སློང་གིས། བརྗོད་པའི་ཡུལ་ཕམ་པ་དང་ལྷག་མའི་མཚན་ཉིད་མི་ཤེས་པའི་གང་ཟག་ལ། འདུ་ཤེས་མ་འཁྲུལ་ཞིང་ཀུན་སློང་བསྙེན་རྫོགས་ཀྱི་སྡོམ་པ་གསོར་རུང་ཡན་ཆད་དང་ལྡན་པའི་གནས་ངན་ལེན་བརྗོད་པར་འདོད་པས། སྦྱོར་བ་ཕམ་ལྷག་གང་རུང་གི་གནས་ངན་ལེན་སྨྲས་པས། མཐར་ཐུག་དོན་གོ་བ་ན་ལྟུང་བའོ། །བརྒྱད་པ་མི་ཆོས་བླ་མ་བདེན་པར་སྨྲ་བའི་ལྟུང་བྱེད་ནི། རྟེན་དགེ་སློང་གིས་ཡུལ་བསྙེན་པར་མ་རྫོགས་པ་དང་བདེན་པ་མ་མཐོང་བ་ལ། དངོས་པོ་རང་གིས་ཐོབ་པའི་སྒོམ་བྱུང་གི་ཡོན་ཏན། འདུ་ཤེས་མ་འཁྲུལ་ཞིང་ཀུན་སློང་དེ་སྨྲ་འདོད་ཀྱི་བསམ་པས། སྦྱོར་བ་རང་གིས་ཐོབ་པའི་མི་ཆོས་བླ་མ་འདུ་ཤེས་མ་བསྒྱུར་བར་སྨྲས་ཏེ། མཐར་ཐུག་དོན་གོ་བ་ན་ལྟུང་བའོ། །དགུ་པ་བཤེས་ངོར་བྱེད་པའི་ལྟུང་བྱེད་ནི། རྟེན་དགེ་སློང་སྔར་རྙེད་པ་དེ་ཡུལ་ལ་བསྔོས་པ་ལ་དད་པས་ཕུལ་བས་དངོས་པོ་དགེ་འདུན་གྱི་ཟས་ལས་གཞན་པའི་རྙེད་པ་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་ཏེ་སྐུར་པ་འདེབས་འདོད་ཀྱི་བསམ་པས། སྦྱོར་བ་རྙེད་པ་སྦྱིན་པར་མི་རིགས་པ་ལ་བསྔོས་སོ་ཞེས་སྨྲས་ཏེ། མཐར་ཐུག་དོན་གོ་བ་ན་ལྟུང་བའོ། །བཅུ་པ་ཁྱད་དུ་གསོད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་དག་ལ་གསོ་སྦྱོང་གི་ཚེ། འདུ་ཤེས་མ་འཁྲུལ་ཞིང་ཀུན་སློང་ཁྱད་དུ་གསོད་འདོད་ཀྱི་བསམ་པས། སྦྱོར་བ་བསླབ་པ་འདི་ལྟ་བུ་འདོན་པས་ཅི་ཞིག་བྱ་ཞེས་ཁྱད་དུ་གསོད་པའི་ཚིག་བརྗོད་ཅིང་། མཐར་ཐུག་དོན་གོ་བ་ན་ལྟུང་བའོ། །བཅུ་ཚན་གཉིས་པ་ལ་སྡོམ་ནི། ས་བོན་འཕྱ་བ་བསྒོ་བ་དང་། །ཁྲི་དང་གདིང་དང་སྐྲོད་པ་དང་། །ཕྱིས་གནོན་འབྱུང་བ་འདེབས་པ་དང་། །རིམ་པ་གཉིས་སུ་རྩིག་པའོ། །ཞེས་ཏེ། དང་པོ་ས་བོན་དང་སྐྱེ་བ་འཇིག་པའི་ལྟུང་བྱེད་ནི། རྟེན་དགེ་སློང་རྫུ་འཕྲུལ་དང་སྤྲུལ་པའི་གནས་སྐབས་མ་ཡིན་པ་བར་ཆད་དང་མི་ལྡན་པ་དོན་ཁྱད་པར་ཅན་སྒྲུབ་པའི་སྐབས་མ་ཡིན་པས། དངོས་པོ་ས་བོན་དང་སྐྱེ་བ་རང་གི་ཆོས་སུ་གྲུབ་པ་དང་མ་ཉམས་པ་རུང་བར་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་ཉམས་པར་འདུན་པས། སྦྱོར་བ་རང་ངམ་གཞན་གྱིས་བཅོམ་པས། མཐར་ཐུག་ཉམས་པ་ན་ལྟུང་བའོ། །གཉིས་པ་འཕྱ་བའི་ལྟུང་བྱེད་ནི། རྟེན་དགེ་སློང་གསོལ་བ་འབའ་ཞིག་པའི་ལས་ཀྱིས་དམན་པའི་གྲངས་སུ་བགྲངས་པས། ཡུལ་གང་ཟག་བཅུ་གཉིས་པོ་བསྐོས་པའམ་མ་བསྐོས་ཀྱང་རུང་ལ་བསྐོས་པ་བག་ཡངས་སུ་བྱས་པ་ལ་ཡང་། འདུ་ཤེས་མ་འཁྲུལ་ཞིང་ཀུན་སློང་འཕྱ་འདོད་ཀྱི་བསམ་པས་འདུ་ཤེས་བསྒྱུར་ཏེ། སྦྱོར་བ་བདག་ཉིད་དང་འབྲེལ་བའི་དོན་གྱིས་ཡུལ་དེས་ཐོས་པར་མིང་ནས་སྨོས་ཏེ་གསལ་པོར་འཕྱ་བའམ། མིང་ནས་མ་སྨོས་པར་ཁ་ཅིག་དག་འདི་ལྟར་བྱེད་དོ་ཞེས་ཟུར་གྱི་བཞོགས་འཕྱས་བྱེད་ཀྱང་རུང་། མཐར་ཐུག་དོན་གོ་བ་ན་ལྟུང་བའོ། །གང་ཟག་བཅུ་གཉིས་ནི། གནས་ཁང་ཟས་ལ་བསྐོ་བ་གཉིས། །ཐུག་པ་བག་ཚོས་འགྲིམ་པ་གཉིས། །ཕྲན་ཚེགས་འགྲིམ་པར་བྱེད་པ་དང་། །སྣོད་སྤྱད་འགྲུབ་དང་གོས་ཀྱི་གཉིས། །དབྱར་གྱི་རས་ཆེན་སྦེད་དང་འགེད། །མངག་གཞུག་པ་དང་མཛེས་ཆོས་ཏེ། །གང་ཟག་བཅུ་དང་གཉིས་པོ་དག །སྟོན་པས་ཡང་དག་བཤད་པ་ཡིན། །ཞེས་གསུངས་པ་ལྟར་རོ། །གསུམ་པ་བསྒོ་བ་རྣ་ལ་གཟོན་པའི་ལྟུང་བྱེད་ནི། རྟེན་གཞན་གྱི་སྲོག་སྐྱོབ་པ་ལ་སོགས་པའི་རྐྱེན་དང་མི་ལྡན་པའི་དགེ་སློང་གིས། ཡུལ་དགེ་སློང་ཕ་རོལ་པོས་རང་ལ་ཆོས་མཐུན་གྱི་བསྒོ་བ་དང་དྲིས་པ་ལ། འདུ་ཤེས་མ་འཁྲུལ་ཞིང་ཀུན་སློང་རྣ་ལ་གཟོན་འདོད་ཀྱི་བསམ་པས། སྦྱོར་བ་ལན་ལོག་པར་འདེབས་པའི་ཚིག་སྨྲ་བར་བརྩམས་ཏེ། མཐར་ཐུག་ཡུལ་དེས་དོན་གོ་བ་ན་ལྟུང་བའོ། །བཞི་པ་གནས་མལ་གྱི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་འདུན་གྱི་གནས་མལ་ལ་ལོངས་སྤྱོད་ནས་བླ་གབ་མེད་པར་གཞག་པ་རང་གིས་མ་བསྡུས་པའམ་གཞན་སྡུད་དུ་མ་བཅུག་པར། འདུ་ཤེས་མ་འཁྲུལ་ཞིང་ཀུན་སློང་རང་གར་འདུག་པའམ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་བཞག་ནས་དེ་ཉིད་དུ་འདུག་པའམ་འགྲོ་བར་བརྩམས་ཏེ། མཐར་ཐུག་དེའི་རྐྱེན་གྱིས་གནས་མལ་ཕན་ཕུན་དུ་གྱུར་རམ་མ་གྱུར་ཀྱང་གནས་མལ་ནས་འདོམ་བཞི་བཅུ་རྩ་དགུ་འདས་ནས་ཕྱིན་ན་ལྟུང་བའོ། །ལྔ་པ་གདིང་བའི་ལྟུང་བྱེད་ནི། རྟེན་དགེ་སློང་གིས་གནས་གཙུག་ལག་ཁང་དུ་སྲོག་ཆགས་ཕྲ་མོ་སྐྱེ་བའི་སར། དངོས་པོ་རྩ་དང་ལོ་མ་ལ་སོགས་པའི་གདིང་བ་བཏིང་བ་དེ། འདུ་ཤེས་མ་འཁྲུལ་ཞིང་ཀུན་སློང་རང་དགར་འདོར་འདོད་ཀྱི་བསམ་པས། སྦྱོར་བ་རང་དེར་འདུག་པའམ་གཞན་དུ་འགྲོ་བའི་ཚེ་རང་ངམ་བསྐོས་པས་མ་བསྡུས་པས། མཐར་ཐུག་ཕན་ཕུན་དུ་གྱུར་པའམ་འདོམ་བཞི་བཅུ་རྩ་དགུ་ལས་འདས་པར་ཕྱིན་ན་ལྟུང་བའོ། །དྲུག་པ་སྐྲོད་པའི་ལྟུང་བྱེད་ནི། རྟེན་དགེ་སློང་གིས་གནས་གཙུག་ལག་ཁང་ནས་ཡུལ་དགེ་སློང་ཕ་རོལ་པོ། འདུ་ཤེས་མ་འཁྲུལ་ཞིང་ཀུན་སློང་རང་དགར་སྐྲོད་འདོད་ཀྱི་བསམ་པས། སྦྱོར་བ་ཡུལ་དེ་ལ་གནོད་པ་བསལ་བའམ་དགེ་འདུན་འཁྲུག་ལོང་ཞི་བ་ལ་སོགས་པའི་དོན་མ་ཡིན་པར་རང་ངམ་གཞན་དངོས་སུ་བསྐོས་པས་སྐྲོད་པར་བརྩམས་ཏེ། མཐར་ཐུག་དེའི་རྐྱེན་གྱིས་གཙུག་ལག་ཁང་ཉེ་འཁོར་དང་བཅས་པ་ལས་འདས་པ་ན་ལྟུང་བའོ། །བདུན་པ་ཕྱིས་གནོན་བྱེད་པའི་ལྟུང་བ་ནི། རྟེན་དགེ་སློང་གིས་གནས་དགེ་འདུན་གྱི་གཙུག་ལག་ཁང་དུ་དགེ་སློང་སྔར་ཞུགས་པ་ལ། བསམ་པ་འདུ་ཤེས་མ་འཁྲུལ་ཞིང་ཀུན་སློང་མཐོ་འཚམ་པར་འདུན་པས། སྦྱོར་བ་ན་བ་དང་འཇིགས་པའི་དབང་མ་གཏོགས་པར་ལུས་ངག་གང་ཡང་རུང་བས་ཕྱིས་གནོན་བྱེད་པར་བརྩམས་ཏེ། མཐར་ཐུག་གནོད་པས་ཟིལ་གྱིས་མནན་པ་ན་ལྟུང་བའོ། །བརྒྱད་པ་རྩ་བ་འབྱུང་བ་ལ་འདུག་པའི་ལྟུང་བྱེད་ནི། རྟེན་དགེ་སློང་གིས་གནས་དགེ་འདུན་གྱི་གཙུག་ལག་ཁང་གི་སྟེང་གི་ཐོག་རྡོལ་བའི་ཉེན་དང་བཅས་པ་ལ་ཁྲིའམ་ཁྲིའུ་ཡི་རྩ་བ་རྣོན་པོ་ཕུར་བུ་ལྟར་བཀན་པའམ་རྐང་རྟེན་མ་བཅུག་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་འདུག་འདོད་པའི་བསམ་པས། སྦྱོར་བ་དེ་ལ་འདུག་པ་ལ་སོགས་པ་བྱེད་པར་བརྩམས་ཏེ། མཐར་ཐུག་འདུག་པའམ་ཉལ་བའི་བྱ་བ་རྫོགས་པ་ན་ལྟུང་བའོ། །དགུ་པ་སྲོག་ཆགས་དང་བཅས་པ་ལ་འདེབས་པའི་ལྟུང་བྱེད་ནི། རྟེན་དགེ་སློང་གིས་ཆུ་དང་རྩ་དང་ཤིང་ལ་སོགས་པ་ལ་སྲོག་ཆགས་མིག་ལམ་དུ་སྣང་བཞིན་དུ། འདུ་ཤེས་མ་འཁྲུལ་ཞིང་ཀུན་སློང་རང་དོན་མ་ཡིན་པར་ལོངས་སྤྱོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་ལོངས་སྤྱོད་པར་བརྩམས་ཏེ། མཐར་ཐུག་དེའི་རྐྱེན་གྱིས་སྲོག་ཆགས་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །བཅུ་པ་རིམ་པ་ལྷག་པ་བརྩིག་པའི་ལྟུང་བྱེད་ནི། རྟེན་དགེ་སློང་གིས་སྤྱོད་ལམ་བཞི་ཤོང་བ་ཡན་ཆད་ཀྱི་གཙུག་ལག་ཁང་རྩིག་པའི་ཉི་མ་དེ་ཉིད་དམ། ཉི་མ་གཞན་ལ་ཡང་འཇིམ་པ་མེད་པར་ཕ་གུ་རིམ་པ་གསུམ་ལས་ལྷག་པར་བརྩིགས། ཆུ་ཁུང་མ་གཏོད་བརྐོས་ཏེ་རྨང་མ་བཅུག སྒོ་ཆ་གོང་མ་མ་བཅུག་པ་ལ། འདུ་ཤེས་མ་འཁྲུལ་ཞིང་ཀུན་སློང་རིམ་པ་གསུམ་ལས་ལྷག་པ་རྩིག་འདོད་ཀྱི་བསམ་པས། སྦྱོར་བ་སྦྱིན་བདག་རིངས་པའི་རྐྱེན་མེད་པར་རང་ངམ་བསྐོས་པས་རིམ་པ་གསུམ་ལས་ལྷག་པ་བརྩིག་པར་བརྩམས་ཏེ། མཐར་ཐུག་རིམ་པ་ལྷག་གཅིག་མྱུར་དུ་འཇིག་པའི་ཉེན་དང་བཅས་པ་ན་ལྷུང་བའོ། །བཅུ་ཚན་གསུམ་པ་ལ་སྡོམ་ནི། མ་བསྐོས་ཉི་མ་ནུབ་པ་དང་། །ཟས་དང་ཆོས་གོས་གཉིས་དག་དང་། །དོན་མཐུན་གྲུ་དང་དབེན་པ་གཉིས། །དགེ་སློང་མ་ཡིས་སྦྱོར་བཅུག་པའོ། །ཞེས་ཏེ། དང་པོ་མ་བསྐོས་པར་ཆོས་སྟོན་པའི་ལྟུང་བྱེད་ནི། རྟེན་མི་ཆོས་བླ་མའི་མཐུ་དང་མི་ལྡན་ཞིང་དགེ་སློང་མའི་སྟོན་པར་མ་བསྐོས་པའམ་བསྐོས་ཀྱང་མཚན་ཉིད་དང་མི་ལྡན་པའི་དགེ་སློང་གིས། འདུ་ཤེས་མ་འཁྲུལ་ཞིང་ཀུན་སློང་དགེ་སློང་མ་ལ་ཆོས་སྟོན་འདོད་ཀྱི་བསམ་པས། སྦྱོར་བ་ལུང་གི་དམ་པའི་ཆོས་ཤླཽ་ཀ་གཅིག་ཡན་ཆད་སྟོན་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །གཉིས་པ་ཉི་མ་ནུབ་ཀྱི་བར་དུ་ཆོས་སྟོན་པའི་ལྟུང་བྱེད་ནི། རྟེན་དགེ་སློང་དགེ་སློང་མའི་སྟོན་པར་བསྐོས་ཀྱང་དུས་ཉི་མ་ནུབ་ཀྱི་བར་དུ། འདུ་ཤེས་མ་འཁྲུལ་ཞིང་ཀུན་སློང་ཉི་མ་ནུབ་ནས་ཀྱང་ཆོས་སྟོན་འདོད་ཀྱི་བསམ་པས། སྦྱོར་བ་ཆོས་སྟོན། མཐར་ཐུག་དོན་གོ་བ་ན་ལྟུང་བའོ། །གསུམ་པ་ཟས་ཅུང་ཟད་ཙམ་གྱི་ཕྱིར་ཆོས་སྟོན་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོ་ཟས་གོས་ཀྱི་ཕྱིར་ཆོས་སྟོན་པ་མ་ཡིན་པ་ལ། འདུ་ཤེས་བསྒྱུར་ཏེ་ཀུན་སློང་སྐུར་པ་གདབ་འདོད་ཀྱི་བསམ་པས། སྦྱོར་བ་ཟས་ཅུང་ཟད་ཙམ་གྱི་ཕྱིར་ཆོས་སྟོན་ཏོ་ཞེས་སྐུར་པ་འདེབས་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཞི་པ་གོས་བྱེད་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མ་ཉེ་དུ་མ་ཡིན་པའི་གོས། འདུ་ཤེས་མ་འཁྲུལ་ཞིང་ཀུན་སློང་རང་དགར་བཟོ་བྱེད་འདོད་ཀྱི་བསམ་པས། སྦྱོར་བ་བཟོ་བྱེད་པར་བརྩམས་ཏེ། མཐར་ཐུག་བཟོ་ཟིན་པ་ན་ལྟུང་བའོ། །ལྔ་པ་གོས་བྱིན་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་མའི་དགེ་འདུན་ལ་གོས་འབུལ་བའམ། ཕོངས་པ་ལ་སྦྱིན་པ་ལ་སོགས་པ་མ་གཏོགས་པར། ཡུལ་དགེ་སློང་མ་ཉེ་དུ་མ་ཡིན་པ་ལ། འདུ་ཤེས་མ་འཁྲུལ་ཞིང་ཀུན་སློང་མཛའ་བོ་བཤེས་ངོ་ཙམ་གྱིས་སྟེར་འདོད་པའི་བསམ་པས། སྦྱོར་བ་སྟེར་བར་བརྩམས་ཏེ། མཐར་ཐུག་ཡུལ་གྱིས་གོས་དེ་ཐོབ་པ་ན་ལྟུང་བའོ། །དྲུག་པ་དགེ་སློང་མ་དང་ལྷན་ཅིག་འགྲོན་ལམ་དུ་འགྲོ་བ་དང་། བདུན་པ་དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་དགེ་སློང་མ་ཉེ་དུ་མ་ཡིན་པ་དང་ལྷན་ཅིག་པའི་ལམ་རྒྱང་གྲགས་ལས་འདས་པར་འགྲོ་བ་དང་། ཆུ་ལ་བརྟེན་པའི་ལམ་ལ་ཐད་ཀར་ཕ་རོལ་ཏུ་འགྲོ་བ་དང་། གྲུར་ཞུགས་པ་དང་ཡོ་བ་དང་སྟིམ་ཆད་པ་ལ་སོགས་པའི་རྐྱེན་མེད་ཅིང་ཁྲིམས་གྲོགས་མེད་པར་རྒྱུན་ནམ་རྒྱུན་ལས་བཟློག་པས། རྒྱང་གྲགས་ལས་འདས་པ་འགྲོ་བ་ལ། འདུ་ཤེས་མ་འཁྲུལ་ཞིང་ཀུན་སློང་ལྷན་ཅིག་འགྲོ་འདོད་ཀྱི་བསམ་པས། སྦྱོར་བ་རྒྱང་གྲགས་ལས་འདས་པར་འགྲོ་བར་བརྩམས་ཏེ། མཐར་ཐུག་རྒྱང་གྲགས་རེ་རེ་འདས་པ་ན་ལྟུང་བྱེད་རེ་རེ། རྒྱང་གྲགས་ཕྱེད་ཕྱེད་འདས་པ་ན་ཉེས་བྱས་རེ་རེ་བསྐྱེད་པའོ། །བརྒྱད་པ་དབེན་པར་བུད་མེད་དང་ལྷན་ཅིག་འདུག་པ་དང་། དགུ་པ་འགྲེང་བའི་ལྟུང་བྱེད་གཉིས་ནི། རྟེན་དགེ་སློང་གིས་ཡུལ་བུད་མེད་ཉེ་དུ་མ་ཡིན་པ་དང་དབེན་པ་སྐྱབས་ཡོད་པར་འདོམ་གང་གི་བར་དུ་འདུག་པ་དང་། དགེ་སློང་མ་ཉེ་དུ་མ་ཡིན་པ་དང་ལྷན་ཅིག་དབེན་པ་སྐྱབས་ཡོད་པར་བར་འདོམ་གང་ཙམ་དུ་གཉིས་ཀ་འགྲེང་བ་སྟེ་གཉིས་ཀ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་བུད་མེད་དང་ལྷན་ཅིག་འདུག་པ་དང་འགྲེང་བར་འདོད་པའི་བསམ་པས། སྦྱོར་བ་ཁྲིམས་གྲོགས་མེད་པར་དེ་ལྟར་བྱེད་པར་བརྩམས་ཏེ། མཐར་ཐུག་སྔ་མ་ལ་ཡུལ་རྟེན་གཉིས་ཀ་འདུག་པ་དང་། ཕྱི་མ་ལ་གཉིས་ཀ་འགྲེང་བའི་སྤྱོད་ལམ་རྫོགས་པ་ན་ལྟུང་བའོ། །བཅུ་པ་སྦྱོར་དུ་བཅུག་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་མ་ཉེ་དུ་མ་ཡིན་པ་སྦྱིན་བདག་ཁྱིམ་པ་ཉེ་དུ་མ་ཡིན་པ་ལ། རང་ཐོས་བསམ་སོགས་ཀྱི་ཡོན་ཏན་དང་མི་ལྡན་པ་ལ་ལྡན་ནོ་ཞེས་བརྫུན་གྱི་སྒོ་ནས་དུས་རུང་གི་ཟས་སྦྱོར་དུ་བཅུག་པ། འདུ་ཤེས་མ་འཁྲུལ་པའམ་ཐེ་ཚོམ་ཟ་བས་ཀུན་སློང་དགེ་སློང་མས་ཡང་དག་པ་མ་ཡིན་པས་ཡོན་ཏན་གྱི་སྒོ་ནས་སྦྱོར་དུ་བཅུག་པ་ཟ་འདོད་པའི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །བཅུ་ཚན་བཞི་པ་ལ་སྡོམ་ནི། ཡང་ཡང་དང་ནི་འདུག་གནས་གཅིག །ཕྱེ་དང་བཅའ་དང་སྟོབས་པ་དང་། །འདུས་དང་དུས་མིན་གསོག་འཇོག་དང་། །ཁ་ནས་མིད་དང་བསོད་པ་ཉིད། །ཅེས་ཏེ། དང་པོ་ཡང་ཡང་ཟ་བའི་ལྟུང་བྱེད་ནི། རྟེན་དགེ་སློང་ན་བ་དང་དགེ་འདུན་དང་མཆོད་རྟེན་གྱི་དོན་དུ་ཕྱག་དར་རེ་ལྡེའི་རྒྱ་ཙམ་གྱི་ལས་བྱས་པ་དང་། ལམ་དཔག་ཚད་ཕྱེད་དུ་ཕྱིན་པ་མ་ཡིན་ཞིང་སྲ་བརྐྱང་མ་བཏིང་བས། དུས་ཉི་མ་གཅིག་ལ་མགྲོན་དུ་བོས་པ་གཉིས་ལས། ཕྱི་མ་ལ་ཁྲུ་གང་དུ་ལོངས་པའི་གོས་ཀྱི་རྙེད་པ་མེད་པར་བཟའ་བ་ལྔ་དང་བཅའ་བ་ལྔའི་ཁོངས་སུ་གཏོགས་པའི་དུས་རུང་གི་ཟས་ཚད་དུ་ལོངས་པ། འདུ་ཤེས་མ་འཁྲུལ་ཞིང་ཀུན་སློང་ཟས་གཉིས་པ་ཟ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །གཉིས་པ་འདུག་གནས་སུ་ཟ་བའི་ལྟུང་བྱེད་ནི། རྟེན་དགེ་སློང་མིན་པས་གནས་མུ་སྟེགས་ཅན་ཤ་སྟག་གི་འདུག་གནས་སུ། མུ་སྟེགས་ཅན་གྱི་སྦྱིན་བདག་ཉེ་དུ་མ་ཡིན་པས་ཅི་བདེར་མ་བསྟབས་བཞིན་དུ། འདུ་ཤེས་མ་འཁྲུལ་ཞིང་ཀུན་སློང་འདུག་གནས་སུ་ཞག་ལོན་པའི་ཟས་ཟ་འདོད་པའི་བསམས་པས། སྦྱོར་བ་ཟས་གཉིས་པ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །གསུམ་པ་ལྷུང་བཟེད་དོ་གསུམ་ཙམ་ལས་ལྷག་པ་ལེན་པའི་ལྟུང་བྱེད་ནི། རྟེན་དགེ་སློང་གིས་སྦྱིན་བདག་ཁྱིམ་པ་རང་ལ་ཟས་སྟོབས་ཅིང་ཅི་བདེར་སྟོབས་པ་པོ་མ་ཡིན་པ་ལ། དུས་རུང་གིས་ཟས་ལས་སུ་བྱས་པ་ལྷུང་བཟེད་འབྲིང་ཚད་དོའམ་གསུམ་སྟེ། འབྲས་མ་ཐུག་པོ་ཆེ་དྲུས་པ་སྐམ་པོ་མ་ག་དྷའི་བྲེའུ་ཆུང་ཕྱེད་དང་ལྔ་བཙོས་པས་དེ་གསུམ་འཕེལ་དུ་གྱུར་པ་དེ་སྦག་པར་ནུས་པའི་ཚོད་མ་དང་བཅས་པ་བསླང་དུ་རུང་ལ། དེ་བས་ལྷག་པ་འདུ་ཤེས་མ་འཁྲུལ་ཞིང་ཀུན་སློང་རང་དགར་བསླངས་པ་གཞན་དུ་ཟ་འདོད་པའི་བསམ་པས། སྦྱོར་བ་གཞན་དུ་ཁྱེར་ནས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ཤ་སླ་་་་་་ཁ་ཅིག ལྷུང་བཟེད་དོ་ལེན་ན་ཆེ་ཚད་གང་དང་ཆུང་ཚད་གང་ཡིན། གསུམ་ལེན་ན་ཆུང་ཚད་གསུམ་ལེན་པ་ཡིན་གསུང་བ་མི་འཐད་དེ། ལྷུང་བཟེད་དོ་ལེན་ཀྱང་འབྲིང་ཚད་དོ་ལེན་ལ་གསུམ་ལེན་ན་ཡང་འབྲིང་ཚད་གསུམ་བླང་བར་བྱ་བ་ཡིན་ཏེ། སོ་སོ་ཐར་པ་ལས། དགེ་སློང་འདོད་ན་ལྷུང་བཟེད་གང་བ་དོའམ་གསུམ་བླང་བར་བྱའོ་ཞེས་དང་། བམ་ལྔ་དང་འདུལ་བ་བསྡུས་པ་ལས་མཁན་པོས་འབྲིང་ཚད་ལ་བྱེད་པར་བཤད་པའི་ཕྱིར་རོ། །བཞི་པ་སྟན་གཅིག་པའི་ཟས་ཀྱི་ལྟུང་བྱེད་ནི། རྟེན་དགེ་སློང་ནད་པ་མ་ཡིན་པས་བཟའ་བར་བྱ་བའི་ཁོངས་སུ་གཏོགས་པའི་དུས་རུང་གི་ཟས་བཅའ་བར་བྱ་བ་དང་། སྐྱོ་མ་མ་ཡིན་པ་དེ་རིང་ད་མི་ཟའོ་སྙམ་པའི་སྤངས་པ་རྫོགས་པ་ལྷག་པོར་མ་བྱས་པ། འདུ་ཤེས་མ་འཁྲུལ་ཞིང་ཀུན་སློང་སྤངས་པ་རྫོགས་པ་ལྷག་པོར་མ་བྱས་པ་བཟའ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །སླ་་་་་་ཁ་ཅིག་བཟའ་བར་བྱ་བ་དང་བཅའ་བར་བྱ་བ་གང་རུང་སྤངས་པས་སྤངས་པ་རྫོགས་པ་ཡིན་ཏེ། ཟས་ཙམ་མོ་ཞེས་གསུངས་པའི་ཕྱིར་ཞེས་པ་མི་འཐད་དེ། སྤང་རྒྱུའི་ཟས་དེ་ལ་བཟའ་བར་བྱ་བ་དང་བཅའ་བར་བྱ་བ་གང་རུང་གིས་ཆོག་པའི་སྒྲུབ་བྱེད་དུ་ཟ་རྒྱུའི་ཟས་ལ་བཟའ་བར་བྱ་བ་དང་འཆའ་བར་བྱ་བ་གང་རུང་གིས་ཆོག་པའི་ཕྱིར་ཞེས་པ་འབྲེལ་མེད་པའི་ཕྱིར། དེས་ན་སྤངས་པ་རྫོགས་པའི་སྤང་རྒྱུའི་ཟས་ལ་བཟའ་བར་བྱ་བ་དགོས་ཏེ། བཅའ་བར་བྱ་བ་དག་དང་ཐུག་པ་ལས་གཞན་པ་ཞེས་གསུངས་པའི་ཕྱིར། ཟས་སྤངས་པ་ཟ་ན་ལྷག་པོར་བྱ་དགོས་པས། དེའི་ཚུལ་ནི་བྱིན་ལེན་བྱས་ནས་ཟས་ལག་ཏུ་བཟུང་ཏེ་ལྷག་པོར་གསོལ་བའི་ཡུལ་དགེ་སློང་ཟས་ཀྱི་གནས་མ་བཏང་བའི་མདུན་དུ་ཙོག་པུར་འདུག་སྟེ། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བ་འཚལ་མ་འཚལ་ལགས་ཏེ་སྤངས་ཞིང་འཚལ་བར་བགྱིས་པ་ལས་བཟའ་བ་དང་བཅའ་བ་རྙེད་ནས་འཚལ་བར་འཚལ་ན། ཚེ་དང་ལྡན་པས་ལྷག་པོར་བགྱིས་ཏེ་བདག་ལ་སྩལ་དུ་གསོལ་ཞེས་གསོལ་བ་ལན་གཅིག་གདབ་བོ། །དེ་ནས་ཡུལ་དེས་ཟས་དེ་ལག་ཏུ་བཟུང་ནས་དེས་ཟས་མ་སྤངས་ན་ཁམ་གཉིས་སམ་སུམ་ཙམ་ཟ་ཞིང་སྤངས་ན་ཟ་མི་དགོས། དེ་ནས་ཁྱོད་ཀྱིས་འགྱུར་གྱི་བཞུད་ཅིག་ཅེས་སམ་ཅི་བདེར་གསོལ་ཅིག་ཅེས་སྨྲས་ནས་ཟ་བ་པོ་ལ་གཏད་པས་བཟར་རུང་ངོ་། །ལྔ་པ་སྤངས་པ་སྟོབ་པའི་ལྟུང་བྱེད་ནི། མུ་གེའི་དུས་མ་ཡིན་པར་རྟེན་དགེ་སློང་གིས་ཟས་རུང་བ་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་ཟས་སྤངས་པ་ལྷག་པོར་མ་བྱས་པར་སྟོབ་འདོད་ཀྱི་བསམ་པས། སྦྱོར་བ་ལྷག་པོར་བྱས་སོ་ཞེས་སྟོབས་པར་བརྩམས་ཏེ། མཐར་ཐུག་ཡུལ་དགེ་སློང་གིས་ཟོས་པ་ན་སྟོབ་པ་པོ་ལ་ལྟུང་བའོ། །དྲུག་པ་འདུས་ཤིང་ཟ་བའི་ལྟུང་བྱེད་ནི། རྟེན་དགེ་སློང་གིས་འདུས་པ་ཆེན་པོའི་དུས་མ་ཡིན་པར་མཚམས་ནང་གཅིག་ཏུ། དགེ་འདུན་སྤྱི་ལས་ལོགས་སུ་དགེ་སློང་གསུམ་ཡན་ཆད་དང་ལྷན་ཅིག་ཏུ་དུས་རུང་གི་ཟས་ཚད་ལྡན། འདུ་ཤེས་མ་འཁྲུལ་ཞིང་ཀུན་སློང་འདུས་ཤིང་ཟ་འདོད་ཀྱི་བསམ་པས། སྦྱོར་བ་ཅིག་ཅར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ལྟུང་བ་འདི་ཡང་ཡང་ཟ་བའི་སྐབས་བཞིན་དུ་ན་བ་དང་། ལས་བྱས་པ་དང་། ལམ་དུ་ཞུགས་པ་དང་། སྲ་བརྐྱང་བཏིང་བ་ལ་མི་བྱུང་ངོ་། །བདུན་པ་དུས་མ་ཡིན་པར་ཟ་བའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་དུས་རུང་གི་ཟས་རང་གི་གླིང་གི་ཉི་མ་ཕྱེད་ཡོལ་ནས་སྐྱ་རེངས་མ་ཤར་བར་ལ་དེར་འདུ་ཤེས་པའམ་ཐེ་ཚོམ་ཟ་བས། ཀུན་སློང་ཟ་འདོད་ཀྱི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ཁ་ཅིག་དགེ་སློང་རང་ཉིད་གནས་པའི་གླིང་ལ་བྱེད་དེ། ལུང་དུ་བཙུན་པ་དུས་མ་ཡིན་པ་བཅའ་བར་བགྱི་བ་དང་བཟའ་བར་བགྱི་བ་འཚལ་བ་ལ་ལྟུང་བར་མི་འགྱུར་བ་མཆིས་སམ། བཀའ་སྩལ་པ། ཡོད་དེ་འཛམ་བུ་གླིང་པའི་དགེ་སློང་གིས་གླིང་གཞན་གསུམ་དུའོ་ཞེས་གསུངས་པའི་ཕྱིར། དེའི་དོན་ནི་འཛམ་བུ་གླིང་པའི་དགེ་སློང་གིས་ལུས་འཕགས་གླིང་དུ་དུས་སུ་ཟོས་པ་ན་འཛམ་བུ་གླིང་དུ་དུས་མ་ཡིན་པར་ཟོས་པས་ལྟུང་བར་འགྱུར་རམ་ཞེ་ན་མི་འགྱུར་ཞེས་པའོ། །ཞེས་གསུངས་པ་ཡང་མི་འཐད་དེ། དེ་ལྟར་ན་རྫས་ཀྱི་ནུས་པ་ལ་བརྟེན་ནས་གླིང་ཐམས་ཅད་དུ་བགྲོད་ནུས་པའི་དགེ་སློང་གིས་དུས་ཐམས་ཅད་དུ་ཟས་ཟ་རུང་བར་ཐལ་བའི་ཕྱིར་རོ། །དེས་ན་རང་སྐྱེས་པའི་གླིང་ལ་བྱ་དགོས་ཏེ་ལུང་སྔ་མ་དེ་ཉིད་ཀྱི་ཕྱིར་དང་། སློབ་མ་ལ་ཕན་པ་ལས། འཛམ་བུ་གླིང་པའི་དགེ་སློང་གིས་འཛམ་བུ་གླིང་གི་དུས་ཀྱི་ལུས་འཕགས་གླིང་དུ་ཉི་མ་ནུབ་པ་ན་ཟས་ཟོས་པ་ལ་ལྟུང་བ་མེད་དོ་ཞེས་གསུངས་པའི་ཕྱིར། བརྒྱད་པ་གསོག་འཇོག་གི་ལྟུང་བྱེད་ནི། རྟེན་དགེ་སློང་གི་ན་བ་ལ་སོགས་པའི་རྐྱེན་མེད་པར་སྨན་བཞི་པོ་གང་རུང་བྱིན་ལེན་བྱས་ནས་གསོག་འཇོག་བྱས་འདུ་ཤེས་མ་འཁྲུལ་ཞིང་ཀུན་སློང་རང་དགར་ཟ་འདོད་པའི་བསམ་པས། སྦྱོར་བ་མུ་གེའི་དུས་མ་ཡིན་པར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བྱེད་དོ། །གསོག་འཇོག་ལས་འཕྲོས་ནས་ལག་ཉ། མཚམས་བཙོས། ཞག་ལོན། དགེ་སློང་གིས་བཙོས་པ་དང་བཞི་ཡོད་པའི་དང་པོ་ལག་ཉ་ནི། དགེ་སློང་མིན་པས་ངལ་བ་དང་བརྗེད་པ་དང་ཆུད་ཟ་བའི་རྐྱེན་མེད་པར་མྱུར་དུ་ལོངས་སྤྱོད་པའི་ཟས་འབྲུ་ལ་སོགས་པ་ལ་རེག་ན་ལག་ཉར་འགྱུར་རོ། །གཉིས་པ་མཚམས་བཙོས་ནི། ཁྱིམ་པ་དང་མི་ལྡན་ཞིང་རུང་ཁང་མ་ཡིན་པའི་དགེ་སློང་རང་དབང་བའི་མཚམས་དངོས་སམ། དེའི་ཉེར་འཁོར་གྱི་ནང་དུ་ཟས་དང་འབྲུ་ལ་སོགས་པ་རྗེན་པ་བཙོས་པ་ལས་འགྱུར་རོ། །གསུམ་པ་ཞག་ལོན་ནི། གཞག་པའི་གནས་དང་འཇོག་པའི་དངོས་པོ་ཕལ་ཆེ་བ་མཚམས་བཙོས་དང་འདྲ་ལ། ཞག་ལོན་པ་རྗེན་པ་ཡན་ལག་ཏུ་མི་དགོས་དེ་ལྟར་ཞག་གཅིག་འདས་པ་ན་ཞག་ལོན་དུ་འགྱུར་རོ། །བཞི་པ་དགེ་སློང་གིས་བཙོས་པ་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་མྱུར་དུ་ལོངས་སྤྱོད་པའི་ཟས་དང་འབྲུ་ལ་སོགས་པ་རྗེན་པ་མཚམས་ཀྱི་ཕྱི་ནང་གང་དུ་བཙོས་ཀྱང་དེར་འགྱུར་རོ། །བཞི་པོ་དེ་ནད་ལ་ཕན་པའམ་མུ་གེའི་དུས་མ་ཡིན་པར་དགེ་སློང་གིས་ཟོས་ན་ཉེས་བྱས་སོ། །དགུ་པ་བྱིན་ལེན་མ་བྱས་པར་ཟ་བའི་ལྟུང་བྱེད་ནི། རྟེན་དགེ་སློང་གིས་གནས་བྱང་གི་སྒྲ་མི་སྙན་མ་ཡིན་པར་ནད་ལ་ཕན་པ་ལ་སོགས་པའི་རྐྱེན་མེད་པར་སྨན་བཞི་པོ་གང་རུང་བྱིན་ལེན་མ་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་བྱིན་ལེན་མ་བྱས་པར་ཟ་འདོད་ཀྱི་བསམ་པས། སྦྱོར་བ་དེ་ལྟར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །བྱིན་ལེན་ནི། ལེན་པའི་ཡུལ་བསླབ་པ་བྱིན་པ་དང་དགེ་སློབ་མ་དང་དགེ་ཚུལ་མན་ཆད་བསྙེན་པར་མ་རྫོགས་པ། སྦྱིན་འདོད་དང་ལྡན་པ་མི་མིན་ཡན་ཆད་ཟས་གྱེན་དུ་འདེགས་ནུས་པ། ཁྲུ་གང་ལས་མཐོ་བར་གནས་པ་མ་ཡིན་པས་ཐོབ་པའི་ཕྱོགས་དང་མདུན་དྲང་པོ་ནས། ལག་པ་གཉིས་གན་རྐྱལ་དུ་བཀན་པའི་ལུས་དངོས་སམ་དེ་དང་འབྲེལ་བས་མཚམས་གཞན་གྱིས་བར་མ་ཆོད་པར་གནས་པས། ལེན་པ་པོ་དགེ་སློང་མ་ཡན་ཆད་བསླབ་པ་གསོ་རུང་དང་ལྡན་པ་ལ་དངོས་པོ་སྨན་བཞི་པོ་གང་རུང་བྱིན་ལེན་མ་བྱས་པར་དྲངས་པའོ། །ཐོབ་པའི་ཕྱོགས་ལ་གནས་པའི་དམིགས་བསལ་ནི། སྤྲེའུ་ཤིང་གི་ཡལ་ག་ལ་གནས་པས་ཤིང་ཐོག་སྦྱིན་པ་ལྟ་བུ་བླང་དུ་རུང་ངོ་། །ལུང་དུ་བྱིན་ལེན་ལ་ལྔ་གསུངས་ཏེ། ལག་པས་ལག་པར་ནོད་པ། ལག་པ་དང་འབྲེལ་པས་ལག་པ་དང་འབྲེལ་པར་ནོད་པ། ལག་པས་ལག་པ་དང་འབྲེལ་པར་ནོད་པ། ལག་པ་དང་འབྲེལ་པས་ལག་པར་ནོད་པ། གཞག་པའི་བྱིན་ལེན་དང་ལྔའོ། །ཕྱི་མ་ནི་ཡུལ་དེས་བྱིན་ལེན་བྱས་པ་བླངས་ན་ཡུལ་ཆོས་ཀྱི་དབང་གིས་མི་སྨད་པར་བྱ་བ་ཡིན་ན་རི་མོ་བྲིས་པའི་སྟེང་དུ་ཞོ་གཅིག་ཅེས་བསྟན་ན་ཡང་བྱིན་ལེན་ཡིན་ནོ། །རེག་པ་མཚམས་གཞན་གྱི་དོན་ལ། ཤ་ལ་་་་་་ཁ་ཅིག་སོར་བཞིས་བར་མ་ཆོད་པ་དགོས་ཏེ། འགྲེལ་པར་སྒོ་འཕར་ལ་སོགས་པས་བར་མ་ཆོད་པར་ཞེས་གསུངས་པའི་ཕྱིར། ཞེས་པ་མི་འཐད་དེ་སོ་ཐར་གྱི་འགྲེལ་པ་སྦྲང་བུའི་རྐང་པ་ཅན་ལས། མཁར་སིལ་གྱི་ཡུ་བ་ཙམ་གྱིས་བར་མ་ཆོད་པ་ཞེས་གསུངས་པའི་ཕྱིར། འགྲེལ་པར་སྒོ་འཕར་ཞེས་པ་གླིང་བཞིའི་དབང་གིས་ཡིན་ནོ། །བྱིན་ལེན་བྱེད་པའི་ཀུན་སློང་ལ། འདི་ནི་སྦྱིན་པ་པོའོ་བདག་ནི་ལེན་པ་པོའོ་སྙམ་པའི་བསམ་པས་བླང་དགོས་ཏེ། ཕྲན་ཚེགས་འགྲེལ་པར་བདག་ནི་བླང་བ་པོའོ་འདི་ནི་སྦྱིན་པ་པོའོ་སྙམ་པའི་སེམས་ནི་བྱིན་ལེན་ནོ་ཞེས་གསུངས་པའི་ཕྱིར། བྱིན་ལེན་འཇིག་པ་ལ་རྒྱུ་དགུ་སྟེ། ཞོ་ལས་མར་དུ་གྱུར་པ་ལྟ་བུ་དངོས་པོ་གཞན་དུ་གྱུར་པ་དང་། ས་བོན་ལས་མྱུ་གུ་འབྱུང་བ་ལྟ་བུ་སྐྱེ་བ་གཞན་དུ་གྱུར་པ་དང་། བདག་ཉིད་དགེ་སློང་མ་ཡིན་པར་གྱུར་པ་དང་། དངོས་པོ་དེ་མ་རྫོགས་པས་ཕྲོགས་པ་དང་། མ་རྫོགས་པ་ལ་བསྔོས་པ་དང་། ལག་པས་ལེན་མི་ནུས་པར་འདྲིལ་བ་དང་། ནམ་མཁའ་ལ་ལག་པས་མི་སླེབ་པར་འཕངས་པ་དང་། རང་གིས་མ་གཟུང་བར་མ་རྫོགས་པས་རེག་པ་དང་། ལྟུང་བ་བྱུང་ནས་སྤངས་པའོ། །བཅུ་པ་བསོད་པ་སློང་བའི་ལྟུང་བྱེད་ནི། རྟེན་དགེ་སློང་ན་བ་མ་ཡིན་པས་དངོས་པོ་འོ་མ་དང་ཞོ་ལ་སོགས་པ་ཡུལ་དུས་དེར་བསོད་པར་གྲགས་པ་ཁྱིམ་པ་ཉེ་དུ་མ་ཡིན་པས་ཅི་བདེར་མ་བསྟབས་པ་ལ། འདུ་ཤེས་མ་འཁྲུལ་ཞིང་ཀུན་སློང་བསླངས་ཏེ་ཟ་བར་འདོད་པས། སྦྱོར་བ་དེ་ལྟར་བརྩམས་ནས། མཐར་ཐུག་མགུལ་དུ་མིད་པ་ན་ལྟུང་བའོ། །བཅུ་ཚན་ལྔ་པ་ལ། སྡོམ་ནི། སྲོག་ཆགས་བཅས་དང་ཉལ་སར་འདུག །འགྲེང་དང་གཅེར་བུ་དམག་དང་ནི། །ཞག་གཉིས་གཤོམ་དཀྲུགས་འགྲོ་བ་དང་། །བརྡེག་དང་གཟས་དང་གནས་ངན་ལེན། །ཞེས་ཏེ། དང་པོ་སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་ནི། རྟེན་དགེ་སློང་གིས་རང་དོན་དུ་སྲོག་ཆགས་དང་བཅས་པའི་ཆུ་ལ་ཁྲུས་དང་བཏུང་བ་སོགས་ལུས་ཀྱི་ཆེད་དང་། ཆོས་གོས་དང་ལྷུང་བཟེད་ལ་སོགས་པ་ཡོ་བྱད་ཀྱི་ཆེད་དུ་ལོངས་སྤྱོད་པ་དང་། སྲོག་ཆགས་ཅན་གྱི་ཆུ་འབབ་པ་དང་། འགོག་པ་དང་གཞན་དུ་བསྒྱུར་བ་དང་། རྩ་དང་ཤིང་གཅོད་པ་དང་མེར་འཇུག་པ་ལ་སོགས་པ་ལ། འདུ་ཤེས་མ་འཁྲུལ་ཞིང་ཀུན་སློང་སྲོག་ཆགས་དང་བཅས་པར་ཤེས་བཞིན་དུ། སྦྱོར་བ་རང་ངམ་བསྐོས་པས་ལོངས་སྤྱོད་པར་བརྩམ་ཏེ། མཐར་ཐུག་སྲོག་ཆགས་ཇི་སྙེད་ཅིག་ཤི་བ་དེ་སྙེད་ཀྱི་ལྟུང་བར་འགྱུར་རོ། །འདིར་ཆུ་འཚག་དགོས་པས་འདི་ལ་ལྔ་སྟེ། སྤྱད་འཚག་དང་། བུམ་འཚག་ལྕེའུ་ཅན་དང་། གྲུ་གསུམ་འཚག་དང་། རིལ་བ་ཞབས་འཚག་ཅན་དང་། གསལ་འཚག་དང་ལྔའོ། །ཆུ་རུང་བ་ལྔ་སྟེ། དགེ་འདུན་དང་། གང་ཟག་དང་། ཆུ་འཚག་དང་། ཆུ་རུང་བ་དང་། ཆུ་བརྟགས་ཏེ་རུང་བའོ། །གཉིས་པ་ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་ནི། རྟེན་དགེ་སློང་གིས་བར་ཆད་ཀྱི་ཆོས་དང་མི་ལྡན་བཞིན་དུ་ཁྱིམ་པ་ཕོ་མོ་སྤྲོད་པ་ལ་ཞུགས་པའམ་ཕྱོགས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་དག་དང་གནས་གཅིག་ཏུ་འདུག་པར་འདོད་པས། སྦྱོར་བ་མངོན་སུམ་དང་བརྟགས་ཏེ་འདུག་པར་བརྩམས་ནས། མཐར་ཐུག་དེ་དག་གིས་ཚོར་སར་འདུག་པ་ན་ལྟུང་བའོ། །གསུམ་པ་ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་ནི། ཁྱིམ་དེར་ཤེས་བཞིན་དུ་དབེན་པ་སྐྱབས་ཡོད་པར་འགྲེངས་ཏེ་འདུག་པ་སྟེ། རྟེན་ལ་སོགས་པ་གོང་བཞིན་ནོ། །བཞི་པ་གཅེར་བུ་ལ་ཟོས་བྱིན་པའི་ལྟུང་བྱེད་ནི། རྟེན་དགེ་སློང་གིས་མུ་སྟེགས་གཅེར་བུ་ཕོ་མོ་གང་རུང་ཉེ་དུའམ་ནད་པའམ་དགེ་བ་ལ་སྦྱོར་བའི་དོན་མ་ཡིན་པར་དུས་རུང་གི་ཟས་རང་དང་དེ་གཉིས་ཀས་བཟར་རུང་བ། འདུ་ཤེས་མ་འཁྲུལ་ཞིང་རང་དགར་སྦྱིན་པར་འདོད་པས། སྦྱོར་བ་རང་གི་ལག་གིས་སྟེར་བར་བརྩམས་ཏེ། མཐར་ཐུག་དེས་ཐོབ་པ་ན་ལྟུང་བའོ། །ལྔ་པ་དམག་ལ་བལྟ་བའི་ལྟུང་བྱེད་ནི། བར་ཆད་ཀྱི་རྐྱེན་དང་མི་ལྡན་པའི་དགེ་སློང་གིས་ཁྱིམ་པའི་དམག་མཚན་ཉིད་དང་ལྡན་པ་འཐབ་པའམ་འཐབ་པའི་ཆས་སུ་ཞུགས་པ་ལ། འདུ་ཤེས་མ་འཁྲུལ་ཞིང་ཀུན་སློང་བལྟ་འདོད་ཀྱི་བསམ་པས། སྦྱོར་བ་རྒྱལ་པོ་ལ་སོགས་པས་བཀུག་པ་མ་ཡིན་པར་རང་གི་གནས་ཉེ་འཁོར་དང་བཅས་པ་ལས་འདས་ནས་བལྟ་བར་བརྩམས་ཏེ། མཐར་ཐུག་མཐོང་བ་ན་ལྟུང་བྱེད་དོ། །དྲུག་པ་དམག་གི་ནང་ན་གནས་པའི་ལྟུང་བྱེད་ནི། རྟེན་དང་ཡུལ་སྔ་མ་བཞིན་ལ་གནས་དམག་གི་ནང་དུ་དགོས་པ་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་དམག་གི་ནང་དུ་གནས་འདོད་ཀྱི་བསམ་པས། སྦྱོར་བ་ཞག་གཉིས་ལས་འདས་པར་གནས་པར་བརྩམས་ཏེ། མཐར་ཐུག་མཚན་མོ་གཉིས་པ་འདས་ནས་ཕྱི་མའི་སྐྱ་རེངས་ཤར་བ་ན་ལྟུང་བའོ། །བདུན་པ་དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་ནི། རྟེན་དང་ཡུལ་གོང་བཞིན་ལ། འདུ་ཤེས་མ་འཁྲུལ་ཞིང་ཀུན་སློང་དཔུང་གི་ཡན་ལག་ཉམས་སུ་མྱོང་བར་འདོད་པས། སྦྱོར་བ་དཀྲུགས་པར་བརྩམས་ཏེ། མཐར་ཐུག་རེག་པའམ་གཡུལ་གཤོམ་པ་དཀྲུགས་པ་ལ་སོགས་པའི་བྱ་བ་རྫོགས་པ་ན་ལྟུང་བའོ། །བརྒྱད་པ་བརྡེག་པའི་ལྟུང་བྱེད་ནི། རྟེན་དགེ་སློང་གིས་ཡུལ་དགེ་སློང་ཕ་རོལ་པོ་ལ་ཕན་པའི་དོན་མ་ཡིན་པར་ལུས་སམ་དེས་འཕངས་པའམ། དེ་དང་འབྲེལ་བའི་དབྱུག་པ་ལ་སོགས་པའམ་ཡུངས་ཀར་ཙམ་ཡང་། འདུ་ཤེས་མ་འཁྲུལ་ཞིང་ཀུན་སློང་རྙོག་པ་ཅན་གྱི་སེམས་ཀྱིས། སྦྱོར་བ་བརྡེག་པར་བརྩམས་ཏེ། མཐར་ཐུག་ཕོག་པ་ན་རྡེག་སྤྱད་རེ་རེ་ལ་ལྟུང་བ་རེ་རེའོ། །དགུ་པ་བརྡེག་པར་གཟས་པའི་ལྟུང་བྱེད་ནི། གོང་གི་བརྡེག་ཅེས་པའི་གནས་སུ་བརྡེག་པར་གཟས་པ་ཞེས་པ་བཅུག་སྟེ་ཡན་ལག་གཞན་ཐམས་ཅད་སྔ་མ་བཞིན་ནོ། །གཟས་པའི་ཚུལ་ནི་བརྡེག་ཚུལ་བྱེད་པའོ། །བཅུ་པ་གནས་ངན་ལེན་འཆབ་པའི་ལྟུང་བྱེད་ནི། རྟེན་དགེ་སློང་གིས་ཡུལ་སྡོམ་པ་གསོར་རུང་ཡན་ཆད་ཀྱི་ཕམ་ལྷག་གང་རུང་གི་ལྟུང་བ། འདུ་ཤེས་མ་འཁྲུལ་ཞིང་ཀུན་སློང་བདེ་བ་ལ་མི་རེག་པ་དང་། དགེ་སྦྱོང་གི་ཚུལ་དང་། སྲོག་དང་ཚངས་སྤྱོད་ཀྱི་བར་ཆད་དང་། དགེ་འདུན་འཁྲུགས་ཀྱི་དོགས་པའི་དབང་མ་གཏོགས་པར་འཆབ་འདོད་ཀྱི་བསམ་པས། སྦྱོར་བ་དེ་ལྟར་འཆབ་པར་བརྩམས་ཏེ། མཐར་ཐུག་མཚན་མོ་འདས་པ་ན་ལྟུང་བའོ། །བཅུ་ཚན་དྲུག་པ་ལ་སྡོམ་ནི། བདེ་དང་མེད་དང་འདུན་པ་དང་། །བསྙེན་པར་མ་རྫོགས་ཆོས་དང་སྨྲ། །དགེ་ཚུལ་ཁ་དོག་བསྒྱུར་བ་དང་། །རིན་པོ་ཆེ་དང་ཚ་བའི་དུས། །ཞེས་ཏེ། དང་པོ་ཟས་གཅོད་པའི་ལྟུང་བྱེད་ནི། རྟེན་དགེ་སློང་གིས་ཡུལ་ཟན་བཅད་པས་ཕན་པའི་ནད་པ་མ་ཡིན་པའི་དགེ་སློང་ལ། སྦྱིན་བདག་གིས་དུས་རུང་གི་ཟས་རུང་བ་ཚད་ལྡན་འདྲེན་པར་བསྔོས་པ། འདུ་ཤེས་མ་འཁྲུལ་ཞིང་ཀུན་སློང་ཟན་བཅད་འདོད་ཀྱི་བསམ་པས། སྦྱོར་བ་ཟན་གཅོད་པའི་ཚིག་སྨྲ་བར་བརྩམས་ནས། མཐར་ཐུག་ཡུལ་དེའི་ཟན་ཆད་ནས་གུང་ཚིགས་ཡོལ་བ་ན་ལྟུང་བའོ། །གཉིས་པ་མེ་ལ་རེག་པའི་ལྟུང་བྱེད་ནི། རྟེན་དགེ་སློང་གིས་དཀོན་མཆོག་དང་ཚངས་པར་མཚུངས་པ་རྣམས་ཀྱི་ཆོས་ལྡན་གྱི་དོན་དང་ལྷུང་བཟེད་དང་ཚོན་གྱི་ལས་ལ་སོགས་པ་ལ་དུས་བྱིན་གྱིས་བརླབས་པ་མ་གཏོགས་པ། འདུ་ཤེས་མ་འཁྲུལ་ཞིང་ཀུན་སློང་མེ་ལ་རེག་འདོད་ཀྱི་བསམ་པས། སྦྱོར་བ་རང་ངམ་གཞན་ལ་མངོན་སུམ་དུ་བསྐོས་ཏེ། མཐར་ཐུག་མེ་ལ་རེག་པ་དང་སྦར་བ་དང་གསོད་པ་ལ་སོགས་པ་བྱས་ན་ལྟུང་བའོ། །འདིར་དུས་དྲན་བྱེད་ཚུལ་ལ་ཁ་ཅིག་གཞི་གང་ལ་བྱ་བ། ཚུལ་ཇི་ལྟར་བྱ་བ་གཉིས་ལས། དང་པོ་ནི། སྔར་བཀག་ལ་ཕྱིས་གནང་བའི་གཞི་ལ་དུས་དྲན་བྱེད་ལ་དམིགས་བསལ་ཡུལ་ངེས་པ། དུས་ངེས་པ། ཕྱོགས་ངེས་པ། གཞི་ངེས་པ་དང་བཞི། སླ་་་་་་ཁ་ཅིག་དེའི་སྟེང་དུ་རྟེན་ངེས་པ་དང་ལྔ། དང་པོ་ནི། ཨ་སྨ་པ་རནྟའི་ཡུལ་དུ་རྟག་ཏུ་ཁྲུས་བྱེད་པ་དང་། གཉིས་པ་ནི། སོས་ཀ་རྣམས་ཀྱི་ཟླ་བ་ཕྱེད་དང་གཉིས་དང་དབྱར་རྣམས་ཀྱི་ཟླ་བ་དང་པོ་གཉིས་ཀྱི་དུས་སུ་ཉི་མ་རེ་རེ་ཞིང་ཁྲུས་བྱེད་པ་དང་། གསུམ་པ་ནི། ནང་མ་རེ་རེ་བཞིན་གདོང་ཁྲུ་བ་ལ་དུས་དྲན་མི་དགོས་ཏེ། ཀཱ་རི་ཀ་ལྔ་བཅུ་པར། ནངས་པར་སྔར་ལངས་ཏེ། །གདོང་དང་སོ་ཡི་དྲི་བཀྲུས་ནས། །ཞེས་དང་། སུམ་བརྒྱ་པར། ཁ་དང་གདོང་གི་དྲི་བཀྲུས་ནས། །ཞེས་དང་། གདོང་ཕྱིས་བཅང་བར་བྱའོ། །ཞེས་གསུངས་པའི་ཕྱིར། ཞེས་གསུངས་པ་ནི་མི་འཐད་དེ་སྒྲ་མི་སྙན་དུ་དགེ་སློང་གིས་བྱིན་ལེན་མ་བྱས་པར་ཟས་ཟ་བ་ལ་དུས་དྲན་བྱེད་མི་དགོས་པར་ཐལ། དམ་བཅའ་སྔ་མ་དེའི་ཕྱིར། འདོད་མི་ནུས་ཏེ། ལུང་ལས་སྒྲ་མི་སྙན་དུ་དུས་བྱིན་གྱིས་མ་བརླབས་པར་ཁའི་སྒོ་ནས་ཟས་མིད་ན་ཉེས་བྱས་སུ་འགྱུར་ཞེས་གསུངས་པའི་ཕྱིར། ཨ་སྨ་པ་རནྟའི་ཡུལ་དུ་རྟག་ཏུ་ཁྲུས་བྱེད་པ་ལ་དུས་དྲན་མི་དགོས་པ་མ་གྲུབ་སྟེ། ཊཱི་ཀར་དེར་ཡང་བློ་གྲོས་དེ་ཉེ་བར་བཞག་སྟེ་ཁྲུས་བྱ། ཞེས་གསུངས་པའི་ཕྱིར། གཉིས་པ་ཡང་མི་འཐད་དེ་སོས་ཀ་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་། དབྱར་རྣམས་ཀྱི་ཟླ་བ་དང་པོ་གཉིས་ཀྱི་དུས་སུ་ཉི་མ་རེ་རེ་བཞིན་ཁྲུས་བྱེད་པ་སྔར་མ་བཀག་པའི་ཕྱིར། གསུམ་པ་མི་འཐད་དེ་གླེང་གཞིར་རིགས་ཀྱི་འཚོ་བའི་མནའ་མ་དང་སྨད་འཚོང་མ་དག་ནངས་མ་རེ་རེ་བཞིན་ཁྲུས་བྱེད་མོད། འཕགས་པ་རྣམས་ནངས་མ་རེ་རེ་བཞིན་ཁྲུས་མཛད་དེ་ཅི་ཞིག་བགྱི། ཞེས་སྨྲས་པ་ལ་བརྟེན་ནས་ནངས་མ་རེ་རེ་བཞིན་ཁྲུས་བྱེད་པ་བཀག་པ་ཡིན་ལ། ནངས་མ་རེ་རེ་བཞིན་གདོང་འཁྲུ་དགོས་ན་དགག་བྱ་དེ་སོ་ན་གནས་པའི་ཕྱིར། གཞན་ཡང་ནངས་མ་རེ་རེ་བཞིན་ལུས་འཁྲུ་དགོས་པར་ཐལ། ལུས་ཕྱིས་བཅང་བར་བྱའོ། །ཞེས་གསུངས་པའི་ཕྱིར། ཁྱབ་པ་ཁས། ཀཱ་རི་ཀཱའི་དོན་ནི་ཁ་ལ་གདོང་དུ་བསྒྱུར་བ་ཡིན་ཏེ། མུ་ཁ་ཞེས་པའི་སྒྲ་ཁ་དང་གདོང་གཉིས་ཀ་ལ་འཇུག་པའི་ཕྱིར། དེས་ན་ཁ་དང་སོ་ཡི་དྲི་བཀྲུས་ནས། །ཞེས་པའི་དོན་ཡིན་ནོ། །བཞི་པ་ཡང་མི་འཐད་དེ། སུམ་བརྒྱ་པར། མི་མ་ཡིན་པ་དང་གནོད་སྦྱིན་གྱི་གནས་སུ་རིན་པོ་ཆེའི་ཁྲི་དང་ཐེམ་སྐས་སོགས་ལ་ལོངས་སྤྱོད་པའི་ཚེ་མྱུར་དུ་འཇིག་པ་ཡིན་བསམ་པས་མི་རྟགས་པས་ཉེན་པར་ཡིད་ལ་བྱ་སྟེ་འདུག་པ་སོགས་བྱེད་པར་བཤད་པའི་ཕྱིར། ལྔ་པ་ཡང་མི་འཐད་དེ་ཁྱེད་ཀྱི་རྟེན་ངེས་པ་དེ་ལྟ་ན་སྒྲ་མི་སྙན་དུ་དགེ་སློང་གིས་ཟས་བྱིན་ལེན་མ་བྱས་པར་ཟ་བ་དང་། ཟན་ཆད་པའི་གང་ཟག་གིས་བྱིན་ལེན་མ་བྱས་པར་ཟ་བ་ལ་ཡང་དུས་དྲན་མི་དགོས་པར་འགྱུར་ལ། འདོད་ན་སྒྲ་མི་སྙན་པའི་དུས་དྲན་དགོས་པའི་གཞི་མེད་པར་འགྱུར་རོ། །རང་ལུགས་ལ་སྔར་བཀག་པ་ཕྱིས་གནང་བའི་གཞི་ལ་དུས་དྲན་བྱེད་པ་ཡིན་ཏེ། དེས་ན་མེ་ལ་དུས་དྲན་དགོས་པའི་དུས་སུ་དུས་དྲན་མ་བྱས་པར་རེག་ན་དུས་དྲན་མ་བྱས་པའི་ཉེས་བྱས་དང་། མེ་ལ་རེག་པའི་ལྟུང་བྱེད་གཉིས་སྐྱེད་ལ། དེ་བཞིན་དུ་རིན་པོ་ཆེ་ལས་བྱས་པའི་དེ་བཞིན་གཤེགས་པའི་སྐུ་གཟུགས་ལ་དུས་དྲན་མ་བྱས་པར་རེག་ན་དུས་དྲན་མ་བྱས་པའི་ཉེས་བྱས་དང་། རིན་པོ་ཆེ་ལ་རེག་པའི་ལྟུང་བྱེད་གཉིས་སྐྱེད་པ་སོགས་སྤྲོས་ཏེ་ཤེས་པར་བྱའོ། །དུས་དྲན་བྱེད་པའི་ཚུལ་ལ་ནད་པ་སོགས་ལ་ཕྱི་དྲོའི་ཁ་ཟས་ཟ་བའི་ཚེ་སྒྲ་མི་སྙན་པའི་དུས་དྲན་ཏེ། སྟོན་པས་གནང་བས་དངོས་པོ་འདི་རྣམས་ལ་བདག་དང་བདག་གིར་འཛིན་པ་ཡང་མེད། འཛིན་པ་པོ་དང་བསྔོ་བ་པོ་ལ་སོགས་པ་ཡང་ཡང་དག་པར་མེད་པའི་དོན་དྲན་པ་དང་། རིན་པོ་ཆེ་ལས་བྱས་པའི་དེ་བཞིན་གཤེགས་པའི་སྐུ་གཟུགས་ལ་རེག་པའི་ཚེ་འདི་ནི་བདག་གི་སྟོན་པའི་སྐུའོ་སྙམ་པའི་དྲན་པ་དང་ཆོས་ལྡན་གྱི་དགོས་པ་ཡིན་པའི་ཕྱིར་མེ་ལ་སོགས་པ་ལ་རེག་པའི་བྱ་བ་འདི་ནི་སྟོན་པས་གནང་བས་རུང་སྙམ་པས་དུས་དྲན་པ་ལ་སོགས་པ་དུ་མ་ཡོད་དོ། །གསུམ་པ་འདུན་པ་ཕྱིར་བསྒྱུར་གྱི་ལྟུང་བྱེད་ནི། རྟེན་དགེ་སློང་གིས་དགེ་འདུན་གི་ཆོས་ལྡན་གྱི་ལས་མཚན་ཉིད་པ་རང་གི་འདུན་པ་ཕུལ་བ་ལ། འདུ་ཤེས་མ་འཁྲུལ་ཤིང་ཀུན་སློང་འདུན་པ་ཕྱིར་བསྒྱུར་འདོད་ཀྱི་བསམ་པས་སྦྱོར་བ་བདག་འདུན་པ་མི་འབུལ་གྱི་ཕྱིར་འོན་ཅིག་ཅེས་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཞི་པ་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་ནི། རྟེན་ན་བ་དང་ནད་གཡོག་མ་ཡིན་པའི་དགེ་སློང་གིས། དགེ་སློང་སྡིག་ཅན་ཉེ་བར་གནས་པ་དང་དགེ་ཚུལ་ལམ་གྱིས་དུབ་པ་སོགས་ཀྱི་རྐྱེན་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་མ་རྫོགས་པ་དང་ལྷན་ཅིག་ཉལ་འདོད་ཀྱི་བསམ་པས། སྦྱོར་བ་མཚམས་གཞན་གྱིས་བར་མ་ཆོད་པར་ཁྲུ་ཕྱེད་དང་དགུའི་ནང་རོལ་གྱི་གནས་གཅིག་ཏུ་ནུབ་གསུམ་བསྟུད་མར་རང་དང་མ་རྫོགས་པ་གཉིས་ཀ་ཉལ་ཞིང་གཉིད་ལོག་པ་ནས་བརྩམས་ཏེ། མཐར་ཐུག་སྤྱོད་ལམ་དེས་ནུབ་གསུམ་པའི་མཚན་མོ་དེའི་སྐད་ཅིག་མ་འདས་པ་ན་ལྟུང་བའོ། །ལྔ་པ་སྡིག་ལྟ་མི་གཏོང་བའི་ལྟུང་བྱེད་ནི། རྟེན་དགེ་སློང་གི་ཆང་འཐུང་བ་ལྟ་བུ་བཅོམ་ལྡན་འདས་ཀྱིས་མཐོ་རིས་དང་ཐར་པའི་བར་ཆད་དུ་གསུངས་པ་དེ་དག་བསྟེན་ཡང་བར་ཆད་དུ་མི་འགྱུར་རོ་ཞེས། འདུ་ཤེས་མ་འཁྲུལ་བར་རློམ་པས་ཀུན་སློང་སྐུར་པ་གདབ་འདོད་ཀྱི་བསམ་པས། སྦྱོར་བ་སྐུར་པ་འདེབས་པ་ལ་ཞུགས་པའི་ཚེ་དགེ་འདུན་གྱི་བཞམ་བསྒོ་དང་གསོལ་བཞིའི་ལས་ཀྱིས་བཟློག་ཀྱང་། མཐར་ཐུག་བརྗོད་པ་གསུམ་པའི་མཐའ་ལ་མི་གཏོང་ན་ལྟུང་བའོ། །དྲུག་པ་སྤངས་པའི་རྗེས་ཕྱོགས་ཀྱི་ལྟུང་བྱེད་ནི། རྟེན་དགེ་སློང་གིས་སྡིག་ལྟ་ཅན་བཟོད་པར་མ་གསོལ་བ་དགེ་འདུན་གྱིས་གནས་ནས་ཕྱུང་བ་ལ། འདུ་ཤེས་མ་འཁྲུལ་ཞིང་ཀུན་སློང་གནས་དབྱུང་དེ་དང་ལྷན་ཅིག་གཏམ་འདྲེ་བ་དང་ཉལ་འདོད་སོགས་ཀྱི་བསམ་པས། སྦྱོར་བ་ན་བ་དང་ཆོས་ལྡན་གྱི་དོན་མ་གཏོགས་པར་ལྷན་ཅིག་གཏམ་འདྲེ་བ་སོགས་བྱེད་པ་བརྩམས་ཏེ། མཐར་ཐུག་དེ་དང་ལྷན་ཅིག་གཏམ་འདྲེ་བ་སོགས་དང་ཉལ་བ་སོགས་བྱས་ནས་མཚན་མོ་དེའི་མཐའི་སྐད་ཅིག་མ་འདས་པ་ན་ལྟུང་བའོ། །བདུན་པ་དགེ་ཚུལ་བསྙིལ་བ་སྡུད་པའི་ལྟུང་བྱེད་ནི། རྟེན་དགེ་སློང་གིས་དགེ་ཚུལ་སྡིག་ལྟ་ཅན་བཟོད་པར་མི་གསོལ་བ་བསྙིལ་བ་ན་བ་དང་འདུལ་བ་ལ་སོགས་པའི་དོན་མ་ཡིན་པར་འདུ་ཤེས་མ་འཁྲུལ་ཞིང་ཀུན་སློང་བསྙིལ་བ་སྡུད་འདོད་ཀྱི་བསམ་པས། སྦྱོར་བ་གཉིས་ཀ་ལྷན་ཅིག་གཏམ་འདྲེ་བ་དང་ཉལ་བ་ལ་སོགས་པ་བྱེད་པར་བརྩམས་ཏེ། མཐར་ཐུག་དེ་དང་ལྷན་ཅིག་དེ་ལྟར་བྱས་ནས་དེའི་མཚན་མོ་མཐའི་སྐད་ཅིག་མ་འདས་པ་ན་ལྟུང་བའོ། །བརྒྱད་པ་ཁ་མ་བསྒྱུར་བའི་གོས་གྱོན་པའི་ལྟུང་བྱེད་ནི། རྟེན་དགེ་སློང་གིས་ཆུ་འཚག་མ་གཏོགས་ལྷུང་བཟེད་ཀྱི་ཁ་གཡོགས་ཙམ་གྱིས་གོས་དཀར་པོ་ལ། འདུ་ཤེས་མ་འཁྲུལ་ཞིང་ཀུན་སློང་ཁ་མ་བསྒྱུར་བའི་གོས་དཀར་པོ་ལོངས་སྤྱོད་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་ལྟུང་བའོ། །འདིར་ཚོས་ཆེན་བརྒྱད་ཀྱིས་ཁ་བསྒྱུར་བའི་གོས་བགོ་བ་ལ་ཉེས་བྱས་སུ་གསུངས་པའི་ཚོས་ཆེན་བརྒྱད་ནི། སུམ་བརྒྱ་པ། མཚལ་དང་དེ་བཞིན་རྒྱ་སྐྱེགས་བརྩོད་རྣམས་དང་། །གུར་གུམ་དང་ནི་ཐང་ཤིང་ལི་ཁྲི་དང་། །སྨ་ཤིང་ལེ་བརྒན་རྩི་རྣམས་མི་རུང་སྟེ། །བརྒྱད་པོ་ཚོན་ཆེན་ཡིན་པས་བཀག་ཕྱིར་རོ། །ཞེས་སོ། །དགུ་པ་ལོངས་པའི་གཞིར་གཏོགས་ཀྱི་ལྟུང་བྱེད་ནི། རྟེན་དགེ་སློང་གིས་ཆུད་འཛའ་བའི་རྐྱེན་མེད་ཅིང་སྦྱིན་བདག་བསོད་ནམས་འདོད་པས་བསྟབས་པའམ། མི་མ་ཡིན་པའི་གནས་སུ་བསོད་ནམས་ལས་གྲུབ་པ་ལྟ་བུ་མ་ཡིན་པ་རང་མི་དབང་བའི་རིན་པོ་ཆེའམ། རིན་པོ་ཆེར་སྨོས་པ་རོལ་མོར་སྤྱད་པའི་ལག་ཆའམ་གཡུལ་དུ་སྤྱད་པའི་མཚོན་ཆ་དགོས་པ་སྒྲུབ་ནུས་ལ། འདུ་ཤེས་མ་འཁྲུལ་ཞིང་དགོད་བག་གིས་རེག་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་མངོན་སུམ་དུ་རེག་པར་བརྩམས་ཏེ། མཐར་ཐུག་རེག་པ་ན་ལྟུང་བའོ། །བཅུ་པ་ཁྲུས་བྱེད་པའི་ལྟུང་བྱེད་ནི། རྟེན་ཁྲུས་ཀྱིས་ཕན་པའི་ནད་པ་དང་ལས་བྱས་པ་དང་ལམ་དུ་ཞུགས་པ་མ་ཡིན་པའི་དགེ་སློང་གིས། དུས་དབྱར་ཟླ་རྭ་བའི་ཚེས་གཅིག་ནས་དབྱར་ཟླ་ཐ་ཆུང་གི་ཉའི་བར་ཟླ་བ་ཕྱེད་དང་གསུམ་མ་གཏོགས་པ་རྐྱེན་དང་མི་ལྡན་པར། འདུ་ཤེས་མ་འཁྲུལ་ཞིང་ཀུན་སློང་རང་དགར་ཁྲུས་བྱེད་འདོད་ཀྱི་བསམ་པས། སྦྱོར་བ་ཟླ་བ་ཕྱེད་ཕྱེད་ཀྱི་ནང་དུ་ཁྲུས་བྱེད་པར་བརྩམས་ཏེ། མཐར་ཐུག་ལུས་རིལ་པོ་ཁྲུས་བྱེད་ན་ལྟུང་བའོ། །བཅུ་ཚན་བདུན་པ་ལ། སྡོམ་ནི། དུད་འགྲོ་འགྱོད་པ་སོར་མོ་དང་། །རྩེ་དང་ལྷན་ཅིག་སྔངས་བྱེད་དང་། །སྦེད་དང་གདེང་མེད་གཞི་མེད་དང་། །སྐྱེས་པ་མེད་པར་ལམ་འགྲོ་བའོ། །ཞེས་ཏེ། དང་པོ་དུད་འགྲོ་གསོད་པའི་ལྟུང་བྱེད་ནི། རྟེན་དགེ་སློང་གིས་དུད་གྲོར་གཏོགས་པའི་སྲོག་ཆགས། འདུ་ཤེས་མ་འཁྲུལ་ཞིང་ཀུན་སློང་གསོད་སེམས་ཀྱིས། སྦྱོར་བ་རང་ངམ་གསོད་པར་བསྐོས་པས་གསོད་པར་བརྩམས་ཏེ། མཐར་ཐུག་དེའི་རྐྱེན་གྱིས་ཤི་ན་ཇི་སྙེད་ཤི་བ་དེ་སྙེད་ཀྱི་ལྟུང་བའོ། །གཉིས་པ་འགྱོད་པ་བསྐྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ། འདུ་ཤེས་མ་འཁྲུལ་ཞིང་ཀུན་སློང་ཡིད་མི་བདེ་བ་སྐྱེད་འདོད་ཀྱི་བསམ་པས། སྦྱོར་བ་བཞད་གད་ཡན་ཆད་ཀྱིས་ཁྱོད་ལ་སྡོམ་པ་མ་སྐྱེས་སོ་ཞེའམ། སྐྱེས་ཀྱང་ཕམ་པ་བྱུང་བའོ་ཞེས་སོགས་ཀྱིས་འགྱོད་པ་སྐྱེད་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །གསུམ་པ་ག་ག་ཚིལ་བྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ་སྐྱི་གཡའ་བའི་གནས་རྣམས་སུ། འདུ་ཤེས་མ་འཁྲུལ་ཞིང་ཀུན་སློང་སྐྱི་གཡའ་བར་བྱ་བའི་བསམ་པས། སྦྱོར་བ་རེག་པར་བརྩམས་ཏེ། མཐར་ཐུག་རེག་ནས་སྐྱི་གཡའ་བར་བྱས་པ་ན་ལྟུང་བའོ། །བཞི་པ་ཆུ་ལ་རྩེ་བའི་ལྟུང་བྱེད་ནི། རྟེན་དགེ་སློང་གིས་འཇིག་རྟེན་ན་གྲགས་པའི་ཆུ་ལ། འདུ་ཤེས་མ་འཁྲུལ་ཞིང་ཀུན་སློང་དགོད་བག་གི་དགའ་བ་ཉམས་སུ་མྱོང་བར་བྱ་བའི་བསམ་པས། སྦྱོར་བ་རང་ངམ་བསྐོས་པས་རྩེ་བར་བརྩམས་ཏེ། མཐར་ཐུག་ལྟེ་བ་ནུབ་པའི་ཚད་དུ་ཆུར་ཞུགས་ཏེ་རྩེ་བ་ན་ལྟུང་བའོ། །ལྔ་པ་བུད་མེད་དང་ལྷན་ཅིག་ཉལ་བའི་ལྟུང་བྱེད་ནི། རྟེན་དགེ་སློང་གིས་བུད་མེད་ཉེ་དུ་མ་ཡིན་པ་ལུས་རྟེན་རུང་དང་གནས་གཅིག་ཏུ་བར་དུ་མཚམས་ཆོད་ན་འདོམ་གང་གི་ནང་དང་། མཚམས་མ་ཆོད་ན་འདོམ་དགུའི་ནང་དུ། འདུ་ཤེས་མ་འཁྲུལ་ཤིང་ཀུན་སློང་ལྷན་ཅིག་ཉལ་འདོད་ཀྱི་བསམ་པས། སྦྱོར་བ་ཁྲིམས་གྲོགས་མེད་པར་གཉིས་ཀ་ཉལ་ནས་གཉིད་ལོག་པར་བརྩམས་ཏེ། མཐར་ཐུག་མཚན་མོ་དེའི་སྐད་ཅིག་མ་འདས་པ་ན་ལྟུང་བའོ། །དྲུག་པ་སྔངས་པར་བྱེད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་ལ་འཇིགས་པའི་རྒྱུ་ཡིད་དུ་མི་འོང་བའི་གཟུགས་དང་སྒྲ་དང་དྲི་དང་རེག་བྱ་ལྟ་བུ་དང་། ཡི་དྭགས་དང་ཤ་ཟ་ལ་སོགས་པའི་ཚུལ་གྱིས། འདུ་ཤེས་མ་འཁྲུལ་ཞིང་ཀུན་སློང་སྤངས་པར་བྱེད་འདོད་ཀྱི་བསམ་པས། སྦྱོར་བ་བཞད་གད་ཡན་ཆད་ཀྱིས་འཇིགས་པ་སྟོན་པར་བརྩམས་ཏེ། མཐར་ཐུག་སྔངས་སྐྲག་སྐྱེས་པ་ན་ལྟུང་བའོ། །བདུན་པ་སྦེད་པའི་ལྟུང་བྱེད་ནི། རྟེན་དགེ་སློང་གིས་དངོས་པོ་རབ་བྱུང་བ་སྡེ་ལྔའི་ལྷུང་བཟེད་ཆོས་གོས་སོགས་འཚོ་བའི་ཡོ་བྱད་གང་ཡང་རུང་བ་ཆུད་འཛའ་བ་སོགས་ཀྱི་རྐྱེན་མེད་པར། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་དང་ཕན་འདོད་ལས་གཞན་པས། སྦྱོར་བ་རང་ངམ་བསྐོས་པས་སྦེད་པར་བརྩམས་ཏེ། མཐར་ཐུག་སྦས་ཟིན་པ་ན་ལྟུང་བའོ། །བརྒྱད་པ་གདེང་མེད་པར་སྤྱོད་པའི་ལྟུང་བྱེད་ནི། རྟེན་དགེ་སློང་གིས་དགེ་སློང་གཞན་རང་དང་ནོར་མི་གཅིག་པ་ལ་བྱིན་པ། འདུ་ཤེས་མ་འཁྲུལ་ཞིང་ཀུན་སློང་རྐུ་སེམས་དང་མི་ལྡན་ཡང་དེས་གནང་བའི་གདེང་མེད་བཞིན་དུ་ཅི་དགར་ལོངས་སྤྱོད་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་ལོངས་སྤྱོད་པ་ན་ལྟུང་བའོ། །དགུ་པ་སྐུར་འདེབས་ཀྱི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོ་ལ་མཐོང་ཐོས་དོགས་པའི་གཞི་མེད་པར། འདུ་ཤེས་མ་འཁྲུལ་ཞིང་ཀུན་སློང་ཉམས་པར་འདུན་པས་འདུ་ཤེས་བསྒྱུར་ཏེ་སྐུར་པ་འདེབས་འདོད་ཀྱི་བསམ་པས། སྦྱོར་བ་མིང་ནས་སྨོས་ཏེ། དགེ་འདུན་ལྷག་མ་བྱུང་ངོ་ཞེས་སྐུར་པ་འདེབས་པར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །བཅུ་པ་བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། རྟེན་དགེ་སློང་གིས་བུད་མེད་ལུས་རྟེན་རུང་ཐ་མལ་པ་ཉེ་དུ་མ་ཡིན་པ་དང་ལྷན་ཅིག་ཁྲིམས་གྲོགས་མེད་པར་རྒྱང་གྲགས་ལས་འདས་པར་ལམ་དུ་འགྲོ་བ་ལ། འདུ་ཤེས་མ་འཁྲུལ་ཞིང་ཀུན་སློང་ལྷན་ཅིག་ལམ་དུ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་བརྩམས་ཏེ། མཐར་ཐུག་རྒྱང་གྲགས་ལས་འདས་པ་ན་ལྟུང་བའོ། །རྒྱང་གྲགས་རེ་རེ་ལ་ལྟུང་བ་རེ་རེ། ཕྱེད་རེ་ལ་ཉེས་བྱས་རེའོ། །བཅུ་ཚན་བརྒྱད་པ་ལ་སྡོམ་ནི། རྐུ་དང་ཉི་ཤུ་མ་ལོན་དང་། །བརྐོ་དང་མགྲོན་དང་བསླབ་པ་དང་། །འཐབ་དང་མི་སྨྲ་འགྲོ་བ་དང་། །མི་གུས་ཆང་འཐུང་དུས་མིན་པའོ། །ཞེས་ཏེ། དང་པོ་རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་ནི། རྟེན་དགེ་སློང་གིས་ཆོམ་རྐུན་དང་ལྷན་ཅིག་འདུ་ཤེས་མ་འཁྲུལ་ཞིང་། ཀུན་སློང་རང་དགར་ལྷན་ཅིག་འགྲོ་འདོད་ཀྱི་བསམ་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་རྒྱང་གྲགས་རེ་རེ་འདས་པ་ན་ལྟུང་བ་རེ་རེ། དེའི་ཕྱེད་རེ་འདས་པ་ལ་ཉེས་བྱས་རེའོ། །གཉིས་པ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་ནི། རྟེན་བསྒྲུབ་བྱའི་མཁན་པོ་བྱེད་པའི་དགེ་སློང་གིས་བསྒྲུབ་བྱ་བསྙེན་པར་རྫོགས་པར་འདོད་པ་སྐྱེས་ནས་མངལ་བཤོལ་བརྩིས་ཀྱང་ཉི་ཤུ་མ་ལོན་པར། འདུ་ཤེས་པའམ་ཐེ་ཚོམ་ཟ་བར་ཀུན་སློང་རང་དགར་མཁན་པོ་བྱེད་འདོད་ཀྱི་བསམ་པས། སྦྱོར་བ་བསྙེན་རྫོགས་བྱེད་པར་བརྩམས་ཏེ། མཐར་ཐུག་བརྗོད་པ་གསུམ་པའི་ངོ་བོ་བརྗོད་པ་རྫོགས་ནས་བྱེད་པ་བརྗོད་པའི་འགོ་རྩོམ་པའི་ཚེ། མཁན་པོ་ལ་ལྟུང་བྱེད་སློབ་དཔོན་དང་དགེ་འདུན་ལ་ཉེས་བྱས་སོ། །མངལ་བཤོལ་དང་བཅས་ཏེ་ཉི་ཤུ་མ་ལོན་ཡང་བསྒྲུབ་བྱ་རང་ཉིད་ཀྱིས་ལོན་པར་འདུ་ཤེས་ན་བསམ་པའི་སྒོ་ནས་ནར་སོན་པ་ཡིན་པས་བསྙེན་པར་རྫོགས་པ་ཆགས་ལ། དེ་བསྙེན་པར་རྫོགས་པའི་རྗེས་ལ་མངལ་བཤོལ་དང་བཅས་པའི་ཉི་ཤུ་མ་ལོན་པའི་ཚེ་གོང་དུ་བསྙེན་རྫོགས་ལེན་དུས་ལོ་ཉི་ཤུ་མ་ལོན་པར་འདུག་སྙམ་དུ་འདུ་ཤེས་ན་དེའི་ཚེ་བསྙེན་རྫོགས་ཀྱི་སྡོམ་པ་འཇིག་སྟེ། དེའི་ཚེ་ལུས་སེམས་གང་ཡང་ནར་མ་སོན་པས་སྡོམ་པའི་རྟེན་ཉམས་པའི་ཕྱིར་རོ། །མ་ལོན་ཡང་ལོན་པར་འདུ་ཤེས་པས་བསྙེན་རྫོགས་ཆགས་ནས་མངལ་བཤོལ་དང་བཅས་པའི་ཉི་ཤུ་ལོན་པའི་ཚེ་ལེན་དུས་ལོ་ཉི་ཤུ་མ་ལོན་འདུག་སྙམ་དུ་ཤེས་ཀྱང་སྡོམ་པ་མི་འཇིག་སྟེ། སྡོམ་པ་བསྐྱེད་ཤིང་གཏོང་རྒྱུ་གཞན་མ་བྱུང་ན་ལུས་ཀྱི་སྒོ་ནས་ནར་སོན་པས་སྡོམ་པའི་རྟེན་དུ་རུང་བས་སོ། །སྐྱེས་ནས་ཉི་ཤུ་མ་ལོན་ཡང་མངལ་བཤོལ་དང་བཅས་པས་ཉི་ཤུ་ལོན་ན་བསྙེན་རྫོགས་ཆགས་ལ། མཁན་སློབ་དང་དགེ་འདུན་ལ་ཉེས་བྱས་སྐྱེད་དོ། །ཉི་ཤུ་ལོན་པ་ལ་མ་ལོན་པར་འདུ་ཤེས་ཀྱང་ལུས་ཀྱི་སྒོ་ནས་སྡོམ་པའི་རྟེན་དུ་རུང་བས་སྡོམ་པ་སྐྱེའོ། །དགེ་ཚུལ་དུ་བསྒྲུབས་པའི་ཚེ་ཡང་ལོ་དྲུག་ལོན་ནས་མངལ་བཤོལ་དང་བཅས་པས་བདུན་དུ་འགྱུར་བས་སྐྱེ་ལ་ཉེས་བྱས་སོ། །གསུམ་པ་ས་བརྐོ་བའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་འཇིག་རྟེན་ན་གྲགས་པའི་ས་མཐས་པར་གནས་པ། འདུ་ཤེས་མ་འཁྲུལ་ཞིང་ཀུན་སློང་རང་དགར་བརྐོ་འདོད་ཀྱི་བསམ་པས། སྦྱོར་བ་རང་ངམ་གཞན་བསྐོས་པས་མངོན་སུམ་དུ་བརྐོ་བར་བརྩམས་ཏེ། མཐར་ཐུག་སོར་བཞི་ཡན་ཆད་བརྐོས་ན་ལྟུང་བའོ། །བཞི་པ་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་ནི། རྟེན་དགེ་སློང་གིས་ན་བ་ལ་སོགས་པའི་རྐྱེན་མེད་པར་སྦྱིན་བདག་གིས་དུས་ཇི་ཙམ་མགྲོན་དུ་བོས་པ་ལ་འདུ་ཤེས་མ་འཁྲུལ་ཞིང་ཀུན་སློང་མགྲོན་དུ་བོས་པ་ལས་རིང་དུ་འདུག་སྟེ་ཟ་འདོད་པའི་བསམ་པས། སྦྱོར་བ་སྦྱིན་བདག་གིས་དུས་ཇི་ཙམ་བཞེད་པར་བཞུགས་ཤིག་ཅེས་པ་ལྟ་བུ་མེད་པར་ཟླ་བ་བཞི་མགྲོན་དུ་བོས་པ་ལྟ་བུ་ལ་དེ་རྫོགས་པའི་འོག་ཏུ་ཡང་འདུག་ནས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་ལྟུང་བའོ། །ལྔ་པ་བསླབ་པ་ལ་ཉེར་འཇོག་སྤོང་བའི་ལྟུང་བྱེད་ནི། རྟེན་དགེ་སློང་གིས་དགེ་སློང་ཕ་རོལ་པོས་འདུལ་བར་གཏོགས་པའི་རང་གི་བསླབ་པར་བསླབ་པར་བྱའོ་ཞེས་བརྗོད་པ་ན། འདུ་ཤེས་མ་འཁྲུལ་ཞིང་ཀུན་སློང་འདུ་ཤེས་བསྒྱུར་ཏེ་བསླབ་པ་ལ་མི་སློབ་པའི་ཚིག་སྨྲ་འདོད་ཀྱི་བསམ་པས། སྦྱོར་བ་བསླབ་པ་ལ་ཉེར་བར་འཇོག་པ་པོ་ལ་ཁྱོད་ཀྱིས་མི་ཤེས་པས་གཞན་ཤེས་པ་ལ་འདྲིའི་བར་དུ་བསླབ་པ་འདི་ལ་མི་སློབ་བོ་ཞེས་གང་ཟག་ལ་མི་ཤེས་པ་དང་བསླབ་པ་ལ་མི་སློབ་པའི་ཚིག་སྨྲ་བར་བརྩམས་ཏེ། མཐར་ཐུག་དོན་གོ་བ་ན་ལྟུང་བའོ། །དྲུག་པ་ཉན་རྣ་ལས་གྱུར་པའི་ལྟུང་བྱེད་ནི། རྟེན་དགེ་སློང་དགེ་སློང་ཕ་རོལ་པོ་རྩོད་ཟླར་གྱུར་པ་དག་རྩོད་པ་བཞི་ལས་གང་ཡང་རུང་བའི་རྩོད་པ་བྱེད་པ་ལ། འདུ་ཤེས་མ་འཁྲུལ་ཞིང་ཀུན་སློང་ནོར་བ་དང་རྩོད་པ་ཞི་འདོད་མ་ཡིན་པར་རྩོད་པ་དཀྲུགས་པའི་ཆེད་དུ་ཉན་འདོད་ཀྱི་བསམ་པས། སྦྱོར་བ་ཉན་པའི་ཕྱིར་རྣ་བ་གཏོད་པར་བརྩམས་ཏེ་མཐར་ཐུག་དོན་གོ་བ་ན་ལྟུང་བའོ། །བདུན་པ་མི་སྨྲ་བར་འགྲོ་བའི་ལྟུང་བྱེད་ནི། རྟེན་དགེ་སློང་ཁ་སྐོང་བར་འོས་པ་དགེ་འདུན་གྱི་ནང་དུ་གསོལ་བ་ལ་སོགས་པའི་ལས་ལ་འདུས་པ། གསོལ་བ་ཙམ་ཡང་མ་བྱས་པར་ལས་ཀྱི་གནས་དེ་ནས་དེ་ན་འཁོད་པ་ལ་མ་སྨྲས་པ། འདུ་ཤེས་མ་འཁྲུལ་ཞིང་ཀུན་སློང་མ་སྨྲས་པར་འགྲོ་འདོད་ཀྱི་བསམ་པས། སྦྱོར་བ་འགྲོ་བར་བརྩམས་པས། མཐར་ཐུག་ལས་ཐོས་པའི་ཉེ་འཁོར་ལས་འདས་པར་ཕྱིན་པ་ན་ལྟུང་བའོ། །བརྒྱད་པ་མ་གུས་པའི་ཚུལ་ལས་གྱུར་པའི་ལྟུང་བྱེད་ནི། རྟེན་དགེ་སློང་གིས་སྟོན་པ་དང་དགེ་འདུན་དང་ཞལ་ཏ་བས་ཆོས་ལྡན་གྱི་བཀའ་བསྒོ་བ་རང་གི་སྒྲུབ་ནུས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་དང་འགལ་བར་བྱེད་འདོད་ཀྱི་བསམ་པས། སྦྱོར་བ་ཤད་ཀྱིས་སྦྱངས་པ་མ་བྱས་པར་འགལ་བ་བྱེད་པར་བརྩམས་ཏེ། མཐར་ཐུག་འགལ་བའི་བྱ་བ་རྫོགས་པ་ན་ལྟུང་བའོ། །དགུ་པ་མྱོས་འགྱུར་འཐུང་བའི་ལྟུང་བྱེད་ནི། རྟེན་རབ་ཏུ་བྱུང་བས་ཕབ་བཏབ་པའི་འབྲུའི་ཆང་དང་། ཕབ་མ་བཏབ་པའི་རྒུན་ཆང་ལ་སོགས་པ་བཅོས་པའི་ཆང་དངོས་སམ་སྦང་མ་དང་ཚིག་མ་ལ་སོགས་པ་སྨྱོས་པའི་ནུས་པ་ཅན་ལ། འདུ་ཤེས་མ་འཁྲུལ་ཞིང་ཀུན་སློང་འཐུང་བ་དང་སྦང་མ་སོགས་ཟ་འདོད་ཀྱི་བསམ་པས། སྦྱོར་བ་དེ་ལྟར་ལོངས་སྤྱོད་པར་བརྩམས་ཏེ། མཐར་ཐུག་མགུལ་དུ་མིད་པ་ན་དགེ་སློང་ལ་ལྟུང་བྱེད་དང་དགེ་ཚུལ་ལ་ཉེས་བྱས་སོ། །བཅུ་པ་དུས་མ་ཡིན་པར་འགྲོ་བའི་ལྟུང་བྱེད་ནི། རྟེན་སྲ་བརྐྱང་མ་བཏིང་ཞིང་བར་ཆད་ཀྱི་རྐྱེན་དང་མི་ལྡན་པའི་དགེ་སློང་གིས། གནས་ན་འཁོད་པའི་རབ་ཏུ་བྱུང་བ་ལ་མ་སྨྲས་པར་རབ་ཏུ་བྱུང་བའི་གནས་ནས་ཁྱིམ་པའི་གནས་སུ་ཉི་མ་ཕྱེད་ནས་སྐྱ་རེངས་མ་ཤར་བའི་དུས་སུ། འདུ་ཤེས་དུས་མ་ཡིན་པ་ལ་མ་ཡིན་པར་ཤེས་པའམ་ཐེ་ཚོམ་ཟ་བས། ཀུན་སློང་འཁོད་པ་ལ་མ་སྨྲས་པར་རང་དགར་དུས་མིན་དུ་འགྲོ་འདོད་ཀྱི་བསམས་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་དེའི་རྐྱེན་གྱིས་རང་གི་གནས་ཉེ་འཁོར་དང་བཅས་པ་ལས་འདས་ན་ལྟུང་བའོ། །བཅུ་ཚན་དགུ་པ་ལ་སྡོམ་ནི། ཟས་བཅས་སྐྱ་རེང་ད་གདོད་དང་། །ཁབ་རལ་དང་ནི་ཁྲི་རྐང་དང་། །བརྡ་དང་གདིང་དང་གཡོན་པ་དང་། །རས་ཆེན་བདེ་གཤེགས་ཆོས་གོས་སོ། །ཞེས་ཏེ། དང་པོ་གྲོང་དུ་རྒྱུ་བའི་ལྟུང་བྱེད་ལ་སྔ་དྲོ་གྲོང་རྒྱུ་དང་ཕྱི་དྲོ་གྲོང་རྒྱུ་གཉིས་ལས། དང་པོ་ནི། རྟེན་དགེ་སློང་དེའི་ཚིག་གིས་དགེ་འདུན་སྦྱིན་བདག་ཁྱིམ་པའི་ཁྱིམ་དུ་ཟོས་ལ་སྤྱན་དྲངས་པ་ལ་སྦྱིན་བདག་ལ་དུས་ལས་མ་ཡོལ་བར་བྲིམས་ཤིག་ཅེས་མ་བསྒོས་པར། འདུ་ཤེས་མ་འཁྲུལ་ཞིང་ཀུན་སློང་གྲོང་དུ་རྒྱུ་འདོད་ཀྱི་བསམ་པས། སྦྱོར་བ་བར་ཆད་ཀྱི་རྐྱེན་དང་མི་ལྡན་བཞིན་དུ་དེ་ལྟར་འགྲོ་བར་བརྩམས་ཏེ། མཐར་ཐུག་གྲོང་གསུམ་ལ་སོགས་པར་རྒྱུ་བ་ན་ལྟུང་བའོ། །གཉིས་པ་ཕྱི་དྲོ་གྲོང་རྒྱུ་ནི་ཉི་མ་ཕྱེད་ནས་སྐྱ་རེངས་མ་ཤར་བར་ཁྱིམ་བཞི་ལ་སོགས་པར་འགྲོ་ན་དགེ་སློང་འཁོད་པ་ལ་སྨྲས་ཀྱང་ལྟུང་བའོ། །གཉིས་པ་རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ནི། རྟེན་དགེ་སློང་གིས་བར་ཆད་ཀྱི་རྐྱེན་དང་མི་ལྡན་པ་དང་རྒྱལ་པོ་སོགས་ཀྱིས་ཆོས་ལྡན་གྱི་དོན་ལ་བོས་པ་དང་། དགོས་པ་ཁྱད་པར་ཅན་དང་མི་ལྡན་པ་རྒྱལ་པོའི་ཕོ་བྲང་དུ་བཙུན་མོའི་གནས་སུ་ཉི་མ་དམར་ཐག་ཆོད་ནས་སང་སྐྱ་རེངས་ཐ་མ་མ་ཤར་གྱི་བར་ལ། དེར་འདུ་ཤེས་པའམ་ཡིད་གཉིས་ཟ་བས་ཀུན་སློང་རྒྱལ་པོའམ་བཙུན་མོའི་གནས་སུ་མཚན་མོ་འགྲོ་འདོད་ཀྱི་བསམ་པས། སྦྱོར་བ་དེ་ལྟར་འགྲོ་བར་བརྩམས་ཏེ། མཐར་ཐུག་གནས་དེའི་སྒོ་བཅད་ན་གཏན་པའི་གནས་དང་མ་བཅད་ན་གཏན་པ་གཉིས་འགྱུར་འདས་པ་ན་ལྟུང་བའོ། །གསུམ་པ་བསླབ་པའི་གཞི་ཁྱད་དུ་གསོད་པའི་ལྟུང་བྱེད་ནི། རྟེན་སོ་ཐར་གྱི་མདོ་གཉིས་ཡན་ཆད་ཐོས་ཤིང་དོན་གོ་བའི་དགེ་སློང་གིས་གསོ་སྦྱོང་གི་དུས་སུ། འདུ་ཤེས་མ་འཁྲུལ་ཞིང་ཀུན་སློང་བཞད་གད་ཡན་ཆད་ཀྱིས་མདོའི་དོན་ལ་ས་བརྐོ་བ་སོགས་ལྟུང་བར་འགྱུར་བ་ད་གདོད་ཤེས་སོ་ཞེས་བསླབ་པ་ཁྱད་དུ་གསོད་འདོད་ཀྱི་བསམ་པས། སྦྱོར་བ་དེ་ལྟར་ཁྱད་དུ་གསོད་པའི་ཚིག་སྨྲ་བར་བརྩམས་ཏེ། མཐར་ཐུག་འདུལ་བར་གཏོགས་པའི་བསླབ་པ་ཁྱད་དུ་གསོད་ན་ལྟུང་བའོ། །བཞི་བ་ཁབ་རལ་འཆོས་པའི་ལྟུང་བྱེད་ནི། རྟེན་དགེ་སློང་གིས་བ་སོ་དང་རུས་པ་དང་རིན་པོ་ཆེ་ལ་སོགས་པ་ཡུལ་དུས་དེར་དཀོན་ཞིང་རིན་ཆེ་བར་གྱུར་པའི་རྒྱུ་ལ། འདུ་ཤེས་མ་འཁྲུལ་ཞིང་ཀུན་སློང་ཁབ་རལ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་ཁབ་རལ་བྱེད་པར་བརྩམས་ཏེ། མཐར་ཐུག་ཁབ་རལ་ཟིན་པ་ན་ལྟུང་བའོ། །ལྔ་པ་ཁྲི་རྐང་འཆོས་པའི་ལྟུང་བྱེད་ནི། རྟེན་དགེ་སློང་གིས་དགེ་འདུན་གྱི་ཁྲིའམ་ཁྲིའུའི་རྐང་པ་བུ་གར་གཞུག་པ་མན་ཆད་ཁྲུ་གང་ཚད་ཡིན་ལ། དེ་ལས་ལྷག་པར་འདུ་ཤེས་མ་འཁུལ་ཞིང་ཀུན་སློང་དེ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་བྱེད་པར་བརྩམས་ཏེ། མཐར་ཐུག་ལྷག་པོ་ཟིན་པ་ན་ལྟུང་བའོ། །དྲུག་པ་ཤིང་བལ་གྱིས་གོས་པར་བྱས་པའི་ལྟུང་བྱེད་ནི། རྟེན་དགེ་སློང་གིས་དགེ་འདུན་གྱི་གནས་མལ་ཤིང་བལ་གྱིས་གོས་པར་བྱས་པ་ལ། འདུ་ཤེས་མ་འཁྲུལ་ཞིང་ཀུན་སློང་དེ་ལྟར་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་བྱེད་པར་བརྩམས་ཏེ། མཐར་ཐུག་དགེ་འདུན་གྱིས་གནས་མལ་ཤིང་བལ་གྱིས་གོས་པར་བྱས་པ་ན་ལྟུང་བའོ། །བདུན་པ་གདིང་བ་དང་། བརྒྱད་པ་གཡན་པ་དང་། དགུ་པ་རས་ཆེན་ཞེས་གསུངས་པ་ལ་གདིང་བའི་ཚད་སྲིད་དུ་ཁྲུ་གསུམ། ཞེང་དུ་ཁྲུ་དོ་དང་སོར་དྲུག སྲིད་དུ་མི་ཆོག་ན་ཁྲུ་ཕྱེད་དང་དོ་མན་ཆད་བསྐྱེད་དོ། །གཡན་པ་དགབ་པའི་ཚད་སྲིད་དུ་ཁྲུ་དྲུག་དང་། ཞེང་དུ་ཁྲུ་གསུམ་མོ། །རས་ཆེན་གྱི་ཚད་སྲིད་དུ་ཁྲུ་དགུ་ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འདི་རྣམས་རྡུལ་ཁྲུ་ཡིན་པས་ལོ་བདུན་ལོན་པའི་དགེ་ཚུལ་དང་ནར་སོན་པའི་དགེ་སློང་གཉིས་གདིང་བ་ཚད་མཉམ་དུ་ཤེས་པར་བྱའོ། །དེ་ཡང་རྟེན་དགེ་སློང་གིས་གདིང་བ་དང་། གཡན་པ་དགབ་པ་དང་། རས་ཆེན་རྣམས་ཚད་ལྷག་པ་ལ་ལྷག་པར་ཤེས་ཤིང་། ཀུན་སློང་ལྷག་པ་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་ལྟར་བྱེད་པར་བརྩམས་སྟེ། མཐར་ཐུག་ལྷག་པོ་ཟིན་པ་ན་ལྟུང་བའོ། །བཅུ་པ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་ནི། སྟོན་པའི་སྣམ་སྦྱར་དང་བླ་གོས་ཀྱི་ཚད་ནི་སྲིད་དུ་སྟོན་པ་རང་གི་ཁྲུ་ལྔ་དང་ཞེང་དུ་ཁྲུ་གསུམ་མོ། །སྟོན་པའི་ཁྲུ་རེ་ལ་འཇལ་བྱེད་ཀྱི་ཁྲུ་གསུམ་ཡིན་པས་སྟོན་པའི་ཆོས་གོས་ཀྱི་ཚད་ལ་སྲིད་དུ་འཇལ་བྱེད་ཀྱི་ཁྲུ་བཅོ་ལྔ་དང་། ཞེང་དུ་ཁྲུ་དགུ་འབྱུང་ངོ་། །དེ་ཡང་རྟེན་དགེ་སློང་གིས་སྟོན་པའི་སྐུ་ལུས་ཙམ་མེད་པར་དེའི་ཆོས་གོས་ཀྱི་ཚད་ཙམ་མམ་དེ་ལས་ལྷག་པར། འདུ་ཤེས་མ་འཁྲུལ་ཞིང་ཀུན་སློང་དེ་ལྟར་བྱེད་འདོད་ཀྱི་བསམ་པས། སྦྱོར་བ་རང་ངམ་བསྐོས་པས་དེ་ལྟར་བྱེད་པར་བརྩམས་ཏེ། མཐར་ཐུག་བདེ་བར་གཤེགས་པའི་ཆོས་གོས་ཀྱི་ཚད་དེ་ལས་ལྷག་པ་ཟིན་པ་ན་ལྟུང་བའོ།། ༈ །།བཞི་པ་སོར་བཤགས་ཀྱི་སྡེ་ཚན་ལ་སྡོམ་ནི། གྲོང་དང་ཁྱིམ་གཞན་ཉིད་དང་ནི། །བསླབ་པ་དང་ནི་དགོན་པ་སྟེ། །སངས་རྒྱས་ཕན་པར་མཛད་པ་ཡིས། །སོ་སོར་བཤགས་པར་བྱ་བར་གསུངས། །ཞེས་ཏེ། དང་པོ་དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་ནི། རྟེན་དགེ་སློང་གིས་དགེ་སློང་མ་ཉེ་དུ་མ་ཡིན་པ་ལ། དེར་ཤེས་བཞིན་དུ་ཀུན་སློང་རང་དོན་དུ་དགེ་སློང་མ་ཉེ་དུ་མ་ཡིན་པ་ལས་ཟས་བླངས་ཏེ་ཟ་འདོད་པའི་བསམ་པས། སྦྱོར་བ་རང་དང་དགེ་སློང་མ་གཉིས་ཀ་གྲོང་ངམ་ལམ་པོ་ཆེ་ན་འདུག་སྟེ་དེ་ལས་ཟས་བླངས་སྟེ་བཟའ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་དང་པོའོ། །གཉིས་པ་གྲལ་རིམ་དུ་མ་ཕེབས་པར་འབྲིམ་དུ་འཇུག་པ་མ་བཟློག་པར་ཟ་བའི་སོར་བཤགས་ནི། སྦྱིན་བདག་ཁྱིམ་པས་དགེ་འདུན་གདུགས་ཚོད་ལ་སྤྱན་དྲངས་པ་ན་དགེ་སློང་མས་བསྐོ་བཤམ་གྱི་ངོས་མགྲོན་བྱས་པ་ལ། རྟེན་དགེ་སློང་རང་ངམ་ཟས་གཅིག་པའི་དགེ་སློང་གཞན་གྱིས། སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་མ་བསྒོ་བ་ལ། འདུ་ཤེས་མ་འཁྲུལ་ཞིང་ཀུན་སློང་རང་དགར་བསྐོ་བཤམ་བྱས་པ་ཟ་འདོད་ཀྱི་བསམ་པས། སྦྱོར་བ་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་གཉིས་པའོ། །གསུམ་པ་བསླབ་པ་དྲལ་ཏེ་ཁྱིམ་དུ་འཇུག་པའི་སོར་བཤགས་ནི། རྟེན་བསླབ་པའི་སྡོམ་པ་བཅས་པར་གཏོགས་པའི་དགེ་སློང་གིས། ཟས་མི་སློང་བའི་ཁྱིམ་གྱི་བསླབ་པའི་སྡོམ་པ་བཅས་པའི་ཁྱིམ་དུ། འདུ་ཤེས་མ་འཁྲུལ་ཞིང་ཁྱིམ་དེ་ནས་ཟས་བླངས་ཏེ་ཟ་འདོད་ཀྱི་བསམ་པས། སྦྱོར་བ་དེ་ལྟར་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་གསུམ་པའོ། །བཞི་པ་ནགས་བརྟག་པ་ལས་གྱུར་པའི་སོར་བཤགས་ནི། རྟེན་དགེ་སློང་གིས་དགེ་འདུན་གྱིས་ནགས་ཉུལ་བར་བསྐོས་པ་ན་འཇིགས་པ་དང་བཅས་པའི་གནས་མ་ཉུལ་བར་ཁྱིམ་པ་ཉེ་དུ་མ་ཡིན་པའི་ཟས་བླངས་ཏེ། འདུ་ཤེས་མ་འཁྲུལ་ཞིང་ཀུན་སློང་ནགས་མ་ཉུལ་བར་ཤེས་བཞིན་དུ། སྦྱོར་བ་ཟས་ཟ་བར་བརྩམས་ཏེ། མཐར་ཐུག་མགུལ་དུ་མིད་པ་ན་སོར་བཤགས་བཞི་པའོ། །ལྔ་པ་བསླབ་བྱ་ཉེས་བྱས་ཀྱི་སྡེ་ལ་དགུ་ཡོད་པ་ལས། དང་པོ་གོས་བགོ་བའི་སྡེ་ནི། ཤམ་ཐབས་ལ་ཡང་རྣམས་བདུན་དང་། །ཞེས་པ་ནི། ཤམ་ཐབས་པུས་གོང་ཡན་ཆད་དུ་ཧ་ཅང་རྩིང་པ་དང་། ལོང་བུར་སླེབ་པའི་འཇོལ་བ་དང་། གྲྭ་གླང་པོ་ཆེའི་སྣ་ལྟར་ནར་བ་དང་། ལྟེ་བའི་སྟེང་དུ་མགོ་ལྟེབ་པ་ཏ་ལའི་ལོ་མ་ལྟར་དང་། སྐེ་རགས་ཀྱི་བར་དུ་མངོན་པའི་ཕུར་མ་ལྟ་བུ་དང་། སྦྲུལ་མགོའི་གདེང་ཀ་ལྟར་ཕྱིར་ཕྱུང་བ་མ་ཡིན་པར་ཟླུམ་པོར་བགོའོ། །སྟོད་གཡོག་ལ་ཡང་རྣམ་གསུམ་ནི། རྩེངས་འཇོལ་ནར་གསུམ་དང་བྲལ་བ་ཟླུམ་པོར་བགོའོ། །གཉིས་པ་ཁྱིམ་དུ་འགྲོ་བའི་སྡེ་ལ། ཤིན་ཏུ་བསྡམས་ལ་སོགས་པ་ལྔ་ནི། དྲན་ཤེས་བཞིན་གྱིས་བསྡམས་ཤིང་ཁྱིམ་གཞན་དུ་འགྲོ་བ་དང་། ཆོས་གོས་ལེགས་པར་བགོ་བ་དང་། སྒྲ་བསྐྱུངས་བ་དང་། མིག་མི་གཡེང་བ་དང་། གཉའ་ཤིང་གང་ཙམ་དུ་བལྟ་ཞིང་འགྲོ་བའོ། །མགོ་གཡོགས་ལ་སོགས་རྣམ་པ་ལྔ་ནི། མགོ་གོས་ཀྱིས་མི་གཡོགས། གོས་མི་བརྫེ། གོས་དཔུང་པ་གཉིས་སུ་མི་གཟར། ལག་པ་གཡས་གཡོན་བསྣོལ་ཏེ་གཉའ་གོང་དུ་མི་བསྣོལ་བ་དང་ལྟག་པར་མི་བསྣོལ་བའོ། །མཆོང་ལ་སོགས་པ་རྣམ་པ་ལྔ་ནི། རྐྱེན་ལ་མི་ལྟོས་པར་མི་མཆོང་། རྐང་པ་མི་བརྐྱང་། ཙོག་པུས་མི་འགྲོ། བྲང་པ་རྐྱང་པ་བཙུགས་སྟེ་མི་འགྲོ། གྲུ་བརྒྱང་མི་བྱའོ། །ལུས་ལ་སོགས་པ་རྣམ་པ་ལྔ་ནི། ལུས་གཅུས་ཏེ་མི་འགྲོ། མགོ་མི་བསྒྱུར། ལག་པ་མི་དཀྲུགས། གཉིས་ཕྲག་པ་སྤྲད་དེ་མི་འགྲོ། གཉིས་ལག་པ་མི་སྦྲེལ་ལོ། །གསུམ་པ་ཁྱིམ་དུ་འདུག་པའི་སྡེ་ལ། འདུག་པར་བྱ་བ་དགུ་དག་ནི། ཁྱིམ་དུ་སྟན་ལ་མི་བསྒོ་བར་མི་འདུག མ་བརྟགས་པར་མི་འདུག ལུས་ཐམས་ཅད་ལྗིད་ཀྱིས་ཕབ་སྟེ་མི་འདུག རྐང་པ་བརྐྱངས་ཏེ་མི་བསྣོལ། བརླའི་སྟེང་དུ་བརླ་མི་གཞག ལོང་བུའི་སྟེང་དུ་ལོང་བུ་མི་གཞག རྐང་པ་ཁྲིའི་འོག་ཏུ་མི་དགུག རྐང་པ་མི་གདངས། འདོམ་མི་སྣང་བར་བྱ་བ་དང་དགུའོ། །དེའི་བསླབ་བྱ་ནི། ལག་པ་འགྲམ་པ་ལ་མི་བརྟེན། སྟན་ཕྲག་པ་ལ་མི་བསྐུར་རོ། །བཞི་པ་ཟས་བླང་བའི་སྡེ་ཚན་ལ། བྱིན་ལེན་བྱ་བ་བརྒྱད་རྣམས་སོ། །ཞེས་པ་ནི། ལྷུང་བཟེད་ཀྱི་མུ་དང་ཁ་ད་ཆད་དུ་ཟས་མི་བླང་། ཚོད་མ་དང་འབྲས་ཆན་མཉམ་དུ་མི་བླང་། གྲལ་རིམ་བཞིན་དུ་བླང་། ལྷུང་བཟེད་ལ་བལྟ་ཞིང་བླང་། ཟས་མ་འོངས་པར་ལྷུང་བཟེད་མི་བཟེད། ཚོད་མ་འདོད་པའི་ཕྱིར་འབྲས་ཆན་གྱིས་ཚོད་མ་མི་དགབ་པ་དང་ཚོད་མས་འབྲས་ཆན་མི་དགབ། ཟས་ཀྱི་སྟེང་དུ་ལྷུང་བཟེད་མི་བཟེད། སྐྱོན་དེ་རྣམས་དང་བྲལ་བས་ཟས་ལེགས་པར་བླང་ངོ་། །ལྔ་པ་ཟས་ཟ་བའི་སྡེ་ཚན་ལ། ཟས་ལ་ལེགས་པར་བྱ་བ་དྲུག་ནི། ཁམ་ཧ་ཅང་ཆུང་བ་དང་། ཆེས་པ་མ་ཡིན་པ་དང་། ཁམ་རན་པར་བཟའ་བ་དང་། ཁམ་མ་བཟས་པར་ཁ་མི་གདངས་པ་དང་། ཁ་ཁམ་གྱིས་བཀང་ནས་མི་སྨྲ་བ་དང་། ལེགས་པར་ཟས་བཟའ་བར་བྱའོ། །ཙུག་ཙུག་ལ་སོགས་པ་རྣམ་པ་ལྔ་ནི། ཟས་ཟ་བའི་ཚེ་ཙུག་ཙུག་དང་། ཅག་ཅག་དང་། ཧུ་ཧུ་དང་། ཕུ་ཕུ་མི་བྱ། ལྕེ་ཡང་ཡང་ཕྱུང་ཏེ་ཟས་མི་བཟའོ། །འབྲུ་ནས་ཐ་དད་བྱེད་པ་ལྔ་ནི། འབྲུ་རེ་རེ་ནས་མི་བཟའ། ཟས་ལ་འཕྱས་མི་གདགས། མཁུར་བ་མི་སྤོ། རྐན་མི་གཏོགས། ཁམ་འཕྲོར་མི་བཅད་དོ། །ལག་པ་བལྡག་ལ་སོགས་པ་ལྔ་ནི། ལག་པ་མི་བལྡོག ལྷུང་བཟེད་མི་འབྱོག ལག་པ་མི་སྤྲུགས། ལྷུང་བཟེད་མི་སྐྱོམ། མཆོད་རྟེན་ལྟ་བུའི་གཟུགས་བྱས་ཏེ་མི་གཞོམ་མོ། །དྲུག་པ་ལྷུང་བཟེད་དུ་སྤྱད་པའི་སྡེ་ལ། འཕྱ་ལ་སོགས་པའི་རྣམ་པ་བཞི་ནི། དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱ་བའི་ཕྱིར་མི་བལྟ། ལག་པ་འབགས་པས་ཆུའི་སྣོད་ལ་མི་བཟུང་། དྲུང་ན་འདུག་པའི་དགེ་སློང་ལ་ཟས་དང་སྦགས་པའི་ཆུས་མི་གཏོར། ཁྱིམ་བདག་ལ་མ་དྲིས་པར་འབགས་ཆུ་མི་དབོའོ། །ལྷུང་བཟེད་ལ་ཡང་རྣམ་པ་བཅུ་ནི། ལྷུང་བཟེད་དུ་ཟས་ལྷག་མ་བླུགས་ཏེ་མི་འདོར། ལྷུང་བཟེད་གཙང་མར་གཙུག་ལག་གི་ཚིགས་སུ་བཅད་དེ་ཆུ་སྦྱིན། འོག་གཞི་མེད་པར་གད་ཁར་གཡང་སར། དཀན་གཟར་པོར་ལྷུང་བཟེད་མི་གཞག འགྲེངས་ཏེ་ལྷུང་བཟེད་མི་བཀྲུ། གད་ཀར་གཡང་སར་དཀན་གཟར་པོར་མི་བཀྲུ། དེས་འབབ་ཆུའི་རྒྱུན་ལས་བཟློག་སྟེ་མི་བཅུ། ལམ་གྱི་བཞི་མདོར་མི་གཞག་གོ །བདུན་པ་ཆོས་སྟོན་པའི་སྡེ་ལ། འགྲེང་ལ་སོགས་པ་རྣམ་པ་ལྔ་ནི། ཉན་པ་པོ་མི་ན་བར་འདུག་པ་ལ་འཆད་པ་པོ་འགྲེངས་ཏེ་མི་འཆད་པ་དང་། དེ་བཞིན་དུ་ཉལ་བ་ལ་འདུག་པས་དང་། སྟན་མཐོན་པོའམ་བཟང་པོ་ལ་འདུག་པ་ལ་སྟན་དམའ་བའམ་ངན་པ་ལ་འདུག་པས་དང་། མདུན་དུ་འགྲོ་བ་ལ་ཕྱི་ནས་འགྲོ་བས་དང་། ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་བས་ཆོས་མི་འཆད་པའོ། །མགོ་གཡོགས་ལ་སོགས་རྣམ་པ་ལྔ་ནི། ཉན་པ་པོ་མི་ན་བར་མགོ་གཡོགས་པ་དང་། གོས་བརྫེས་པ་དང་། གཟར་བ་དང་། ལག་པ་གཉའ་གོང་དུ་བསྣོལ་བ་དང་། ལྟག་པར་བསྣོལ་བ་ལ་ཆོས་མི་བཤད་དོ། །དོ་ཀེར་ཅན་ལ་སོགས་པ་ལྔ་ནི། ཉན་པ་པོ་མིན་པར་དོ་ཀེར་ཅན་དང་། ཞྭ་གྱོན་པ་དང་། ཅོད་པཎ་དང་། ཕྲེང་བ་ཅན་དང་། མགོ་དཀྲིས་པ་ལ་ཆོས་མི་བཤད་དོ། །གླང་ཆེན་ལ་སོགས་བཞོན་པ་ལྔ་ནི། ཉན་པ་པོ་མི་ན་བར་གླང་པོ་ཆེ་དང་། རྟ་ཞོན་པ་དང་། ཁྱོགས་དང་། བཞོན་པའི་སྟེང་ན་འདུག་པ་དང་། མཆིལ་ལྷྭམ་གྱོན་པ་ལ་ཆོས་མི་བཤད་དོ། །ལག་ན་མཁར་བ་ལ་སོགས་དྲུག་ནི། ཉན་པ་པོ་མི་ན་བར་ལག་ན་མཁར་བ་དང་། གདུགས་དང་། མཚོན་ཆ་དང་། རལ་གྲི་དང་། དགྲ་སཏྭ་ཐོགས་པ་དང་། གོ་ཆ་གྱོན་པ་ལ་ཆོས་མི་བཤད་དོ། །བརྒྱད་པ་སྒྲུབ་པའི་ཚུལ་ལས་གྱུར་པའི་སྡེ་ལ། ན་བ་རྣམ་པ་བཞི་རྣམས་སོ། །ཞེས་པ་ནི། མི་ན་བར་འགྲེངས་ཏེ་དང་། ཆུའི་ནང་དུ་དང་། རྩ་སྔོན་གྱི་ཕྱོགས་སུ་བཤང་གཅི་མི་བྱ་མི་འདོར། མཆིལ་མ་དང་སྣབས་དང་སྐྱུགས་པ་དང་བླུགས་པ་ཡང་དེ་བཞིན་དུ་མི་འདོར་རོ། །དགུ་པ་རྒྱུ་བ་དགག་པའི་བསླབ་བྱ་ནི། གནོད་པ་མེད་ན་ཤིང་ལ་མི་གང་ཙམ་ལས་མཐོ་བ་ལ་མི་འཛེགས་པ་ལ་བསླབ་པར་བྱ་སྟེ་དེ་ལས་འདས་ན་ཉེས་བྱས་སོ། །དེ་ལྟར་ན་ཉེས་བྱས་བརྒྱ་དང་བཅུ་གཉིས་སོ།། ༈ །།གཉིས་པ་དགེ་སློང་མའི་སྡེ་ལྔ་བྱེ་བྲག་ཏུ་བཤད་པ་ལ་གཉིས་ཏེ། དགོས་པ་དང་། དགེ་སློང་མའི་སྡེ་ལྔ་སོ་སོའི་གྲངས་བསྟན་པའོ། །དང་པོ་ནི། ཊཱི་ཀར་དགེ་སློང་གི་རྣམ་པར་འབྱེད་པར་སྨྲས་ནས། ད་ནི་དགེ་སློང་མའི་རྣམ་པར་འབྱེད་པ་བརྗོད་པར་བྱ་སྟེ། གང་གི་ཕྱིར་ལུས་ཀྱི་བྱེ་བྲག་གིས་བསམ་པའི་བྱེ་བྲག་ཏུ་འགྱུར་ལ། བསམ་པའི་བྱེ་བྲག་གིས་ལྟུང་བའི་བྱེ་བྲག་ཏུ་འགྱུར་ཞིང་། ལྟུང་བའི་བྱེ་བྲག་གིས་བཅས་པའི་བྱེ་བྲག་ཏུ་འགྱུར་བས་དགེ་སློང་མ་རྣམས་ཀྱི་འདུལ་བ་ལོགས་ཤིག་ཏུ་རྣམ་པར་གཞག་པ་དེའི་ཕྱིར། དགེ་སློང་མ་རྣམས་ཀྱི་བསླབ་པའི་གཞི་དགེ་སློང་རྣམས་དང་མཐུན་པ་གང་ཡིན་པ་དེ་ནི་དགེ་སློང་གི་རྣམ་པར་འབྱེད་པར་བཤད་པ་ཉིད་ཀྱིས་རྣམ་པར་ཕྱེ་བ་ཡིན་ནོ། །མི་མཐུན་པ་གང་ཡིན་པ་དེའི་བྱེ་བྲག་གི་རྣམ་པ་འདིར་བརྗོད་པར་བྱ་སྟེ། དེ་ལ་དགེ་སློང་ལ་ཚུལ་ཁྲིམས་རྣམ་པར་གཞག་པ་ལ་ལ་དགེ་སློང་མ་རྣམས་ཀྱི་མ་ཡིན་པ་ཡང་ཡོད་དེ། དཔེར་ན་ཀུན་ཏུ་སྤྱོད་པ་བསྔགས་པ་ལྟ་བུ་དང་། ལ་ལ་ཉེས་པ་ཆུང་བ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་ལ་ཁུ་བ་འབྱིན་པ་དགེ་འདུན་ལྷག་མར་འགྱུར་བ་དགེ་སློང་མ་རྣམས་ཀྱི་ལྟུང་བྱེད་དུ་འགྱུར་བ་ལྟ་བུ་དང་། ལ་ལ་ཉེས་པ་ཆེ་བ་ཉིད་དུ་རྣམ་པར་གཞག་པ་ཡང་ཡོད་དེ། དཔེར་ན་དགེ་སློང་རྣམས་ཀྱི་ལུས་ཀྱིས་རེག་པའི་དགེ་འདུན་ལྷག་མ་རྣམས་དགེ་སློང་མ་རྣམས་ཀྱི་ཕམ་པར་འགྱུར་བ་ལྟ་བུ་སྟེ་དེ་དག་གི་བྱེ་བྲག་བརྗོད་པར་བྱའོ། །ཞེས་གསུངས་པའི་དོན། དགེ་སློང་གི་རྣམ་འབྱེད་ལས་ལོགས་སུ་དགེ་སློང་མའི་རྣམ་འབྱེད་བསྟན་པ་ལ་དགོས་པ་ཅི་ཡོད་ཅེ་ན། སྡེ་ལྔ་ཐུན་མོང་བ་རྣམས་ནི་སྔར་བཤད་པ་ལས་རྟོགས་པར་ནུས་ཀྱང་། དགེ་སློང་མའི་སྡེ་ལྔའི་ཐུན་མོང་མ་ཡིན་པའི་ཁྱད་པར་རྣམས་ལོགས་ཤིག་ཏུ་འཆད་ཅེས་པའོ། །གཉིས་པ་ལ་སྡེ་ལྔ་ལས། དགེ་སློང་མའི་ཕམ་པ་ལ་བརྒྱད་དུ་ཡོད་དེ་ཐུན་མོང་བ་བཞི་དང་། ཐུན་མོང་མིན་པ་བཞི་རྣམས་སུ་ཡོད་པའི་ཕྱིར། གཉིས་པ་དགེ་འདུན་ལྷག་མ་ལ་ཉི་ཤུར་ཡོད་དེ་ཐུན་མོང་བ་བདུན་དང་། ཐུན་མོང་མ་ཡིན་པ་བཅུ་གསུམ་དུ་ཡོད་པས་སོ། །གསུམ་པ་སྤང་ལྟུང་ལ་སུམ་ཅུ་སོ་གསུམ་ཡོད་དེ། ཐུན་མོང་བ་བཅུ་དགུ་དང་། ཐུན་མོང་མིན་པ་བཅུ་བཞི་ཡོད་པས་སོ། །ལྟུང་བྱེད་འབའ་ཞིག་པ་ལ་བརྒྱ་དང་བརྒྱད་ཅུ་ཡོད་དེ་ཐུན་མོང་བ་བདུན་བཅུ་རྩ་གཉིས་དང་། ཐུན་མོང་མ་ཡིན་པ་བརྒྱ་དང་བརྒྱད་རྣམས་སུ་ཡོད་པས་སོ། །བཞི་པ་སོར་བཤགས་ལ་བཅུ་གཅིག་ཡོད་དེ་ཐུན་མོང་བ་གཅིག་དང་། ཐུན་མོང་མ་ཡིན་པ་བཅུ་ཡོད་པས་སོ། །ལྔ་པ་བསླབ་བྱ་ཉེས་བྱས་ལ་བརྒྱ་དང་བཅུ་གཉིས་ཡོད་དེ་ཐུན་མོང་བ་བརྒྱ་དང་བཅུ། ཐུན་མོང་མ་ཡིན་པ་གཉིས་ཡོད་པས་སོ། །ཐམས་ཅད་བསྡོམས་ན་དགེ་སློང་མའི་ཁྲིམས་སུམ་བརྒྱ་དྲུག་ཅུ་རྩ་བཞིའོ། །གཉིས་པ་ཞུ་བ་སྤྱིར་བསྟན་པ་འཆད་པ་ལ་གཉིས་ཏེ། སྤྱིའི་དོན་དང་། ཡན་ལག་གི་དོན་ནོ། །དང་པོ་ལ་བཞི་སྟེ། གོ་རིམ་ལ་སྐྱོན་ཆག་པ་སྤང་བའི་ཕྱིར་སྤྱིར་བསྟན་ཕྱིས་བསྟན་པའི་འཐད་པ། རང་དགའི་ཉེས་པ་སྤང་བའི་ཕྱིར་དུ་ལུང་གང་ནས་འབྱུང་བ། འབྲས་བུ་མེད་པར་དོགས་པ་བཟློག་པའི་ཕྱིར་དགོས་དོན་བཤད་པ། བདེ་བླག་ཏུ་རྟོགས་པར་བྱ་བའི་ཕྱིར་བསྡུས་དོན་བཤད་པའོ། །དང་པོ་ལ་བཞི་སྟེ། རྒོལ་བ། བསམ་པ། རྩོད་པའི་ཚུལ། ལན་ནོ། །དང་པོ་ནི། རྩ་འགྲེལ་གྱི་དགོངས་པ་ལེགས་པར་མི་ཤེས་པའི་རྒོལ་བ་ཁ་ཅིག་གིའོ། །གཉིས་པ་ནི། རྣམ་འབྱེད་གཉིས་སྔར་བསྟན་ནས་སྤྱིར་བསྟན་ཕྱིས་བསྟན་པའི་གོ་རིམ་ལ་སྐྱོན་ཆགས་སྙམ་པའོ། །གསུམ་པ་ནི། ཤེས་བྱ་ཆོས་ཅན། རྣམ་འབྱེད་གཉིས་སྔར་བསྟན་ནས་སྤྱིར་བསྟན་ཕྱིས་བསྟན་པའི་གོ་རིམ་དེ་མི་འཐད་པར་ཐལ། སྤྱིར་བསྟན་ཡི་གེ་ཉུང་བས་མདོར་བསྟན་ནམ་རྩ་བ་ལྟ་བུ་ཡིན་ལ། རྣམ་འབྱེད་ནི་ཡི་གེ་མང་བས་རྒྱས་བཤད་དམ་འགྲེལ་པ་ལྟ་བུ་ཡིན་པའི་ཕྱིར། ཁྱབ་སྟེ། ཀ་ལཱ་པ་ལས། གཉིས་ལས་དང་པོ་མཆོད་འོས་སམ། །ཡང་ན་ཡི་གེ་རབ་ཉུང་བ། །ཞེས་བཤད་ཅིང་། རྩ་བ་ལས་འགྲེལ་པ་ལས། མདོར་བསྟན་ལས་རྒྱས་བཤད་འབྱུང་བའི་ཕྱིར་རོ་ཞེས་ཟེར་རོ། །བཞི་པ་ལན་ནི། གོ་རིམ་མི་མཐུན་པའི་སྐྱོན་མེད་དེ། བཅོམ་ལྡན་འདས་ཀྱིས་དང་པོར་ལུང་རྣམ་འབྱེད་གསུངས་ཤིང་། དེའི་རྗེས་སུ་དེ་ལ་དོགས་གཅོད་ཀྱི་ཞུ་བ་འབྱུང་བས་ལུང་དང་མཐུན་པར་བསྟན་པ་ཡིན་པའི་ཕྱིར། གཉིས་པ་རང་དགའི་ཉེས་པ་སྤང་བ་ལ་བཞི་སྟེ། རྒོལ་བ། བསམ་པ། རྩོད་པ། ལན་ནོ། །དང་པོ་ནི། ལུང་གི་དོན་ལེགས་པར་མི་ཤེས་པའི་རྒོལ་བའོ། །གཉིས་པ་ནི། ལུང་དུ་སྤྱིར་བསྟན་གྱི་ལེའུ་མ་གསུངས་པས་འདིར་སྤྱིར་བསྟན་གྱི་ལེའུ་བཤད་པར་རང་བཟོ་ཡིན་པས་མི་འཐད་སྙམ་པའོ། །གསུམ་པ་ནི། འདིར་སྤྱིར་བསྟན་གྱི་ལེའུ་བཤད་པ་རང་བཟོར་ཐལ། ལུང་ལས་སྤྱིར་བསྟན་གྱི་ལེའུ་ཞེས་པ་མ་བཤད་པའི་ཕྱིར་ཞེས་ཟེར་བའོ། །བཞི་པ་ལན་ལ་ཁ་ཅིག་འདིར་ལེའུ་དེ་བཤད་པ་རང་བཟོ་མ་ཡིན་ཏེ། རྫས་བཀག་པ་བས་ཞེས་སོགས་དང་། འདྲ་བ་ལ་ཡང་ངོ་ཞེས་པ་དང་། མི་ལ་དུད་འགྲོ་ཡང་ངོ་ཞེས་པ་རྣམས་ལུང་རྣམ་འབྱེད་ལས་བསྡུས་པ་ཡིན་ལ། རྫུ་འཕྲུལ་གྱི་ཆོས་ཅན་མ་ཡིན་པ་རེག་པ་མ་ཡིན་པའི་ཡན་ལག་ཡིན་ནོ། །ཞེས་པ་ལུང་འདུལ་བྱེད་ལས་བསྡུས། གཞན་རྣམས་ནི་ལུང་ཞུ་བ་ལས་བསྡུས་པའི་ཕྱིར་ཞེས་གསུངས་སོ། །རང་ལན་ནི། འདིར་སྤྱིར་བསྟན་གྱི་ལེའུ་ལོགས་སུ་འཆད་པ་ལ་རང་བཟོའི་སྐྱོན་མེད་དེ། ལུང་ཞུ་བ་ལས་ལྟུང་བ་དུ་མའམ་སྤྱི་གཏན་ལ་འབེབས་བྱེད་ཀྱི་ལུང་ཞུ་བ་དང་། རེ་རེ་བ་གཏན་ལ་འབེབས་བྱེད་ཀྱི་ལུང་ཞུ་བ་གཉིས་ལས། དུ་མའམ་སྤྱིའི་གཏན་ལ་འབེབས་བྱེད་ཀྱི་ཞུ་བ་རྣམས་ཕྱོགས་གཅིག་ཏུ་བསྡུས་ནས་འདིར་ལེའུ་གཅིག་ཏུ་མཛད་པའི་ཕྱིར། གསུམ་པ་དགོས་དོན་བཤད་པ་ནི། འདིར་སྤྱིར་བསྟན་གྱི་ལེའུ་ལོགས་སུ་བཤད་པ་ལ་དགོས་པ་ཡོད་དེ། ཚིག་ཚོགས་བསྐྱུང་བ་དང་། རུང་མཐུན་རྟོགས་པའི་དགོས་པ་ཡོད་པའི་ཕྱིར། ཊཱི་ཀར་ཉེ་བར་འཁོར་གྱིས་ཞུས་པ་ལས་ལྟུང་བའི་མཚན་ཉིད་རྣམ་པ་གཉིས་སུ་གསུངས་ཏེ། ཕམ་པར་འགྱུར་བ་ལ་སོགས་པ་དག་ལ་སོ་སོར་ངེས་པ་དང་སྤྱིར་བསྟན་པའོ། །དེ་ལ་སོ་སོར་ངེས་པ་གང་ཡིན་པ་དེ་ནི་དེ་དག་ཉིད་དང་ཅིག་ཅར་རྣམ་པར་བཞག་ཟིན་ཏོ། །སྤྱིར་བསྟན་པ་གང་ཡིན་པ་འདི་མན་ཆད་དུ་རྣམ་པར་བཤད་པར་བྱའོ། །དེ་ནི་རྣམ་པར་འབྱེད་པའི་ཤན་ཡིན་པའི་ཕྱིར། རྣམ་པར་འབྱེད་པ་བསྟན་པའི་འོག་ཏུ་སྤྱིར་བསྟན་པ་ཉིད་ཀྱིས་རྣམ་པར་བཀོད་དེ། ཞེས་གསུངས་པའི་ཕྱིར། ཚིག་ཚོགས་བསྐྱུང་བའི་དགོས་པ་ཅི་ལྟ་བུ་ཞེ་ན། བཅོམ་ལྡན་འདས་ཀྱིས་སྐབས་དུ་མར་ལྟུང་བ་དུ་མ་ལ་སྦྱར་ནས་གསུངས་པ་དེ། འདིར་སློབ་དཔོན་གྱིས་མདོའི་ཚིག་གིས་བསྡུས་ནས་སྟོན་པ། དཔེར་ན་བསླབ་པ་བྱིན་པ་ནི་འདྲ་བ་ཉིད་དོ་ཞེས་པ་ལྟ་བུའོ། །རུང་མཐུན་རྟོགས་པའི་དགོས་པ་ནི། ལུང་དུ་ལྟུང་བ་གཅིག་གམ་ཕྱོགས་འགའི་ཡན་ལག་ཏུ་གསུངས་པ་དེ། འདིར་ལྟུང་བ་གཞན་ནམ་མཐའ་དག་གི་ཡན་ལག་ཏུ་ཚིག་གཅིག་གིས་བསྡུས་ནས་སྟོན་པ། དཔེར་ན་ལུང་དུ་འཁྲིག་ཚིག་སྨྲ་བ་དང་བསྙེན་བསྐུར་བསྔགས་པ་གཉིས་སྨྲ་བའི་ཡུལ་ལ་རྫུ་འཕྲུལ་གྱི་ཆོས་ཅན་མ་ཡིན་པར་དགོས་པ་བསྟན་པ་བཞིན་དང་། ལུང་དུ་མ་བྱིན་ལེན་ལ་གཞི་ཆུང་ངུ་དུ་མ་བསྡོམས་ནས་ཕམ་པ་མི་བསྐྱེད་པར་བཤད་པ་དེ། འདིར་བྱ་བ་དུ་མའི་འབྲས་བུ་ལྟུང་བ་རྣམ་པར་མི་གཞག་ཅེས་སྤྱི་ལ་སྦྱར་ནས་བཤད་པ་ཡིན་ནོ། །བཞི་པ་བསྡུས་དོན་བཤད་པ་ལ་བཞི་སྟེ། སྒྲ་དོན། ཡན་ལག་གི་མཚན་ཉིད། སེལ་བའི་མཚན་ཉིད། ལྟུང་བ་ཐ་དད་བསྐྱེད་པའི་ཚུལ་ལོ། །དང་པོ་ནི། ལྟུང་བ་མཐའ་དག་ལ་སྤྱིར་བསྟན་པས་སམ་གཉིས་སམ་གསུམ་ལ་སྤྱིར་བསྟན་པས་སམ། སྤྱིར་བསྟན་གྱི་ཞར་བྱུང་ཡིན་པས་སྤྱིར་བསྟན་ནོ། །གཉིས་པ་ལ་གཉིས་ཏེ། འདིར་འགྱུར་གྱི་ཡན་ལག་དང་། ཁ་སྐོང་གི་ཡན་ལག་གོ །དང་པོ་ནི། ལྟུང་བ་དེ་བསྐྱེད་པ་ལ་ཡན་ལག་དེ་ངེས་པར་མི་དགོས་ཀྱང་དེས་ལྟུང་བ་དེ་བསྐྱེད་པ་སྟེ། དཔེར་ན་བསླབ་པ་བྱིན་པ་ནི་འདྲ་བ་ཉིད་དོ་ཞེས་དང་། འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལ་ཡང་ངོ་། །ཞེས་བཤད་པ་བཞིན་ནོ། །གཉིས་པ་ནི། ལྟུང་བ་དེ་བསྐྱེད་པ་ལ་ཡན་ལག་དེ་ངེས་པར་དགོས་པ་སྟེ། འདི་ལ་ཐུན་མོང་གི་ཡན་ལག་དང་། ཐུན་མོང་མ་ཡིན་པའི་ཡན་ལག་གཉིས། དང་པོ་ལ། མཐའ་དག་གི་ཡན་ལག་དང་། ཕལ་ཆེ་བའི་ཡན་ལག་གཉིས། དང་པོ་ལ་བསླབ་པའི་ཡན་ལག་དང་། བསམ་པའི་ཡན་ལག་གཉིས། དང་པོ་ལ་བཞི་སྟེ། བསྙེན་རྫོགས་ཀྱི་སྡོམ་པ་གསོ་རུང་དང་ལྡན་པ། ཚིག་གཅིག་པ། རྒྱུན་གཅིག་པ། བཅས་པ་གཞག་པའོ། །དང་པོ་ནི། སྤྱིར་བསྟན་གྱི་གཞུང་སྔ་མ་གསུམ་གྱིས་བསྟན་ནོ། །གཉིས་པ་ནི། ཚིག་སྔ་མ་སྦྱོར་བ་བྱས་པ་ལ་ཡང་ངོ་། །ཞེས་པས་བསྟན་ཏོ། །གསུམ་པ་ནི། ཉེས་པ་དེ་མེད་པ་ཉིད་ལ་འོང་བ་ནི་ཐ་དད་ཅེས་པས་བསྟན། བཞི་པ་ནི་ཁ་ཅིག་སྤྱིར་བསྟན་དུ་མ་བཤད་པར་བསྡུས་འབྱུང་གཞི་ནས་འཆད་ཟེར་ཡང་། གཞི་གཅིག་ལ་དུ་མ་ཉིད་ལ་ཅེས་སོགས་ཀྱིས་བསྟན་ཏོ། །གཉིས་པ་བསམ་པའི་ཡན་ལག་ནི། བསམ་པ་རང་བཞིན་དུ་གནས་པ་དགོས་ལ། ཁ་ཅིག་འགྲོ་བ་གཞན་གྱི་རྣམ་པ་བསྟན་པ་ན་ཞེས་པས་བཤད་པར་འདོད་ཀྱང་། རང་ལུགས་ལ། ཐ་སྙད་དུ་རུང་བའི་འདུ་ཤེས་ལས་ཉམས་པ་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་མི་འབྱུང་ཞེས་བཤད་པས་བསྡུས་འབྱུང་གཞིས་བསྟན། གཉིས་པ་ཕལ་ཆེ་བའི་ཡན་ལག་ལ་གཉིས་ཏེ། ལུས་ཀྱི་ཡན་ལག་དང་། མཚན་གྱི་ཡན་ལག་གོ །དང་པོ་ནི། ཁ་ཅིག་ན་རེ་སྲོག་གཅོད་བཞི་མ་བྱིན་ལེན་ཕམ་ལྷག་དང་པོ་གཉིས་ལས་གཞན་པའི་ལྟུང་བ་བསྐྱེད་པ་ལ། ལུས་གཞན་དུ་མ་བསྒྱུར་བ་དགོས་དེ་ཡང་འགྲོ་བ་གཞན་གྱི་རྣམ་པ་བསྟེན་པ་ཞེས་སོགས་ཀྱིས་བསྟན་ཞེས་ཟེར་རོ། །རང་ལུགས་ནི། འཁྲིག་ཚིག་སྨྲ་བའི་ལྷག་མ་བསྐྱེད་པ་ལ་ལུས་མི་སྣང་བ་མ་བྱས་པ་དགོས་ཤིང་། བལ་ཁུར་གྱི་ལྟུང་བ་བསྐྱེད་པ་ལ་ལུས་གཞན་དུ་མ་བསྒྱུར་བ་ཡན་ལག་ཏུ་དགོས་ཏེ། དེ་ཡང་འགྲོ་བ་གཞན་གྱི་རྣམ་པ་བསྟེན་པ་ན། ཞེས་སོགས་ཀྱིས་ཤུགས་ལ་བསྟན་ནོ། །གཉིས་པ་མཚན་གྱི་ཡན་ལག་ནི། ཁ་ཅིག་རྗེས་སུ་མཐུན་པ་མིང་ཙམ་དང་ཐུན་མོང་མ་ཡིན་པའི་ལྟུང་བ་བསྐྱེད་པ་ལ་མཚན་དེ་ལ་སྦྱོར་བ་བྱས་ཏེ་དེ་ལ་མཐར་ཐུག་གྲུབ་པ་དགོས་ལ། དེ་ཡང་མཚན་གྱུར་གྱི་གཞུང་རྣམས་ཀྱིས་བསྟན་པར་འདོད་དོ། །རང་ལུགས་ནི། མཚན་ཕྱི་མ་དེ་ལ་ལྟུང་བ་ཆེ་བའི་བཅས་པ་བཞག་པའི་ལྟུང་བ་དེ་བསྐྱེད་པ་ལ་མཚན་ཕྱི་མ་དེ་ལ་སྦྱོར་བ་བྱས་ཏེ་དེ་ལ་མཐར་ཐུག་གྲུབ་དགོས་པར་མཚན་གྱུར་གྱི་གཞུང་རྣམས་ཀྱིས་བསྟན་ནོ། །གཉིས་པ་ཐུན་མོང་མ་ཡིན་པའི་ཡན་ལག་ལ་བཞི་སྟེ། གཞི། བསམ། སྦྱོར་བ། མཐར་ཐུག་གོ །དེ་ཡང་གཞི་ནི། ལྟུང་བ་བསྐྱེད་པའི་རྒྱུ་ཚོགས་སུ་གྱུར་ཅིང་། འདུ་ཤེས་ཀྱི་དམིགས་ཡུལ་དུ་གྱུར། སྦྱོར་བ་བྱེད་པའི་གཞིར་གྱུར་པའོ། །བསམ་པ་ནི། ལྟུང་བའི་རྒྱུ་ཚོགས་སུ་གྱུར་ཅིང་། བློ་ཡི་ཆོས་སུ་གྱུར་པའོ། །སྦྱོར་བ་ནི། ལྟུང་བའི་རྒྱུ་ཚོགས་སུ་གྱུར་ཅིང་། མཐར་ཐུག་ལ་སྦྱོར་བའོ། །མཐར་ཐུག་ནི། ལྟུང་བའི་རྒྱུ་ཚོགས་མཐར་ཐུག་པའོ། །དང་པོ་གཞིའི་ཡན་ལག་ལ་སེམས་ཅན་གྱི་གཞི་ལས་གྱུར་པ་དང་། སེམས་ཅན་མ་ཡིན་པའི་གཞི་ལས་གྱུར་པ་གཉིས། དང་པོ་ལ། སེམས་ཅན་ཙམ་གྱི་གཞི་ལས་གྱུར་པ་དང་། སེམས་ཅན་སོ་སོའི་གཞི་ལས་གྱུར་པ་གཉིས། དང་པོ་ནི། ཕམ་ལྷག་དང་པོ་གཉིས་ཏེ། དེ་ཡང་མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་དོ་ཞེས་པས་བསྟན། གཉིས་པ་སོ་སོ་ལས་གྱུར་པ་ལ། མི་མ་ཡིན་གྱིས་བསྐྱེད་པའི་ལྟུང་བ་དངོས་གཞི་རྣམ་པར་མ་གཞག་པས་དུད་འགྲོས་བསྐྱེད་པ་དང་། མིས་བསྐྱེད་པ་གཉིས་ལས། དང་པོ་ནི། དུད་འགྲོ་འདེབས་སྤྱོད་གཉིས། དུད་འགྲོ་གསོད་པའི་ལྟུང་བྱེད་དེ་གསུམ་མོ། །མིས་བསྐྱེད་པ་ལ་མི་སྤྱིས་བསྐྱེད་པ། བྱེ་བྲག་པས་བསྐྱེད་པ་གཉིས། དང་པོ་ནི། སྲོག་གཅོད་དང་། མ་བྱིན་ལེན་གྱི་ཕམ་པ་གཉིས་སོ། །མི་བྱེ་བྲག་པས་བསྐྱེད་པ་ལ། དགེ་སློང་གིས་བསྐྱེད་པ། དགེ་སློང་མས་བསྐྱེད་པ། བསྙེན་པར་རྫོགས་པ་སྤྱིས་བསྐྱེད་པ། སྡེ་ལྔ་སྤྱིས་བསྐྱེད་པ། དགེ་ཚུལ་ཁོ་ནས་བསྐྱེད་པ། མུ་སྟེགས་པས་བསྐྱེད་པ། ཁྱིམ་པ་སྤྱིས་བསྐྱེད་པ། ཁྱིམ་པ་ཕོ་ཁོ་ནས་བསྐྱེད་པ། མོ་ཁོ་ནས་བསྐྱེད་པ། གཉིས་ཀས་བསྐྱེད་པ། མ་རྫོགས་པ་སྤྱིས་བསྐྱེད་པ། ཐ་སྙད་སྤྱིས་བསྐྱེད་པ་སྟེ་བཅུ་གཉིས་སོ། །དང་པོ་ནི། བརྡེག་པའི་ལྟུང་བྱེད་སོགས་ཞེ་དྲུག་གོ །གཉིས་པ་ནི། འཁྲུར་འཇུག་གི་སྤང་བ་སོགས་བཅུ་བཞིའོ། །གསུམ་པ་ནི། སྐུར་འདེབས་ཀྱི་ལྟུང་བ་གསུམ་མོ། །བཞི་པ་ནི། སྦེད་པ་དང་གྲོང་རྒྱུའི་ལྟུང་བྱེད་གཉིས་སོ། །ལྔ་པ་ནི། བསྙིལ་བ་སྡུད་པའི་ལྟུང་བྱེད་དོ། །དྲུག་པ་ནི་འདུག་གནས་སུ་ཟ་བ་དང་གཅེར་བུ་ལ་ཟས་བྱིན་པའི་ལྟུང་བྱེད་གཉིས་སོ། །བདུན་པ་ནི། གོས་སློང་བ་སོགས་ཉི་ཤུ་རྩ་བདུན་ནོ། །བརྒྱད་པ་ནི། དམག་ནང་ན་གནས་པ་སོགས་ཀྱི་ལྟུང་བྱེད་གསུམ་དང་། རྐུན་མ་དང་ལྷན་ཅིག་ལམ་དུ་འགྲོ་བའི་ལྟུང་བྱེད་དེ་བཞིའོ། །དགུ་པ་ནི། ཁྱིམ་པ་མོ་ལ་ཆོས་སྟོན་པ། བུད་མེད་དང་ལྷན་ཅིག་ཉལ་བ། བུད་མེད་དང་ལྷན་ཅིག་ལམ་དུ་འགྲོ་བའི་ལྟུང་བྱེད་དང་གསུམ་མོ། །བཅུ་པ་ནི་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བའི་ལྟུང་བྱེད་གཉིས་སོ། །བཅུ་གཅིག་པ་ནི། འདོན་པའི་ལྟུང་བྱེད། གནས་ངན་ལེན་བརྗོད་པ། མིའི་ཆོས་བླ་མ་བདེན་པར་བརྗོད་པ། མ་རྫོགས་པ་དང་ནུབ་གསུམ་ལྷག་པར་ཉལ་བའི་ལྟུང་བྱེད་དང་བཞིའོ། །བཅུ་གཉིས་པ་ནི་རྫུན་དུ་སྨྲ་བའི་ཕམ་པ་སོགས་བཅུ་གཉིས་སོ། །གཉིས་པ་སེམས་ཅན་མ་ཡིན་པའི་གཞི་ལས་གྱུར་པ་ལ་འབྱུང་བ་ལས་གྱུར་པ་དང་། འབྱུང་གྱུར་ལས་གྱུར་པ་གཉིས་ལས། དང་པོ་ནི། ཁ་ཅིག་རླུང་གིས་བསྐྱེད་པའི་ལྟུང་བ་དངོས་གཞི་རྣམ་པར་མ་བཞག་ལ། སས་བསྐྱེད་པ། ཆུས་བསྐྱེད་པ། མེས་བསྐྱེད་པ་གསུམ། དང་པོ་ནི། ས་རྐོ་བའི་ལྟུང་བྱེད། གཉིས་པ་ནི། ཆུ་ལ་རྩེ་བ་དང་། ཁྲུས་བྱེད་པའི་ལྟུང་བྱེད་གཉིས། གསུམ་པ་ནི་མེ་རེག་གི་ལྟུང་བྱེད་ཡིན་གསུང་བ་མི་འཐད་དེ། དེ་གསུམ་ནི། འཇིག་རྟེན་ན་གྲགས་པའི་ས་ཆུ་མེ་གསུམ་གྱིས་བསྐྱེད་པའི་དབང་དུ་བྱས་པ་ཡིན་ལ། དེ་གསུམ་འབྱུང་བ་མ་ཡིན་པའི་ཕྱིར་རོ། །གཉིས་པ་འབྱུང་གྱུར་གྱིས་བསྐྱེད་པ་ལ་ལྔ་སྟེ། གནས་ཁང་ལས་གྱུར་པ། ཟས་ལས་གྱུར་པ། གོས་ལས་གྱུར་པ། སྣོད་སྤྱད་ལས་གྱུར་པ། བཏུང་བ་ལས་གྱུར་པའོ། །ཁ་ཅིག་གནས་ཁང་ལས་གྱུར་པ་རྣམས་འདིར་མི་སྟོན་ཏེ། རྣམ་འབྱེད་ཀྱི་སྐབས་ནས་འཆད་གསུང་བ་མི་འཐད་དེ། གནས་ཁང་གིས་བསྐྱེད་པའི་ལྟུང་བ་རྣམས་ཀྱི་བསླབ་པའི་ཡན་ལག་དང་བསམ་པའི་ཡན་ལག་འདིར་བསྟན་པའི་ཕྱིར་དང་། ཀུན་སློང་གིས་སེལ་བ་ནི་བཏང་བ་ཡང་ངོ་ཞེས་པ་དང་། ཚད་ཀྱི་སེལ་བ་ནི་ཕྱེད་བྱས་པ་ལ་བྱེད་པ་ནི་ཕྱེད་ཉིད་དོ་ཞེས་པས་བསྟན་པའི་ཕྱིར་རོ། །གཉིས་པ་བསམ་པའི་ཡན་ལག་ལ། འདུ་ཤེས་དང་ཀུན་སློང་གཉིས་དང་པོ་ལ་ཐེ་ཚོམ་ཟ་བ་དང་། དེར་འདུ་ཤེས་པ་གཉིས་ལས། དང་པོ་ནི། ཐམས་ཅད་ལ་ཐེ་ཚོམ་ཟ་བས་ཞུགས་པ་ནི་བསམ་པ་དང་བཅས་པ་ཡིན་ནོ་ཞེས་དང་། ཕྱི་མ་ནི། སྦྱོར་བ་ལ་ནི་འདུ་ཤེས་ཡན་ལག་ཡིན་ནོ། །བསམ་པ་ལ་ནི་དེ་ཉིད་དོ་ཞེས་པས་བསྟན། གཉིས་པ་ཀུན་སློང་ལ་རྒྱུན་མ་ཆད་པ་དང་། ལྟུང་བ་གང་བཅས་པའི་གཞི་དེས་ཀུན་ནས་བསླང་བ་དང་རང་དོན་དུ་བྱེད་པ་རྣམས་ལས་རང་ཁོ་ནའི་དོན་དུ་བྱེད་འདོད་པ་དགོས་པ་རྣམས་རིམ་པ་བཞིན་བཏང་བ་ཡང་ངོ་ཞེས་དང་། དེའི་ཆ་ནི་དེར་གཏོགས་སོ་ཞེས་དང་། རང་གི་དོན་ཉིད་གཙོ་ཆེར་ཡོད་པའོ་ཞེས་པས་བསྟན་ནོ། །གསུམ་པ་སྦྱོར་བའི་ཡན་ལག་ལ། བཅོལ་ཡང་རྫོགས་པས་བསྐྱེད་པའི་གཞི་ཕལ་ཆེར་ལ་ནི་ཐ་སྙད་ལྔ་ལྡན་དགོས་པས་ཐ་སྙད་ལྔ་ནི་སྨྲ་ཤེས་དོན་གོ ཤེས་པ་རང་བཞིན་དུ་གནས་པ། མ་ནིང་དང་། མཚན་གཉིས་པ་མ་ཡིན་པའོ། །ཕལ་ཆེར་ཞེས་པས་སྲོག་གཅོད་དང་མ་བྱིན་ལེན་གྱི་ཕམ་པ་གཉིས་མ་གཏོགས་སོ། །སྦྱོར་བ་རང་གི་བྱེད་པ་ལ་ངག་ཁོ་ནས་བྱེད་པ་དང་། ལུས་ཀྱི་བྱེད་པ་གཉིས། དང་པོ་ལ་ངག་མཚན་ཉིད་ལྔ་ལྡན་དགོས་ལ། ལྔ་ནི། ངག་ཡིན་པ། རང་གི་ཡིན་པ། བདག་ཉིད་དང་འབྲེལ་བ། མ་ནོར་བ། གསལ་བའོ། །དེ་ཡང་ངག་གིའོ། །རང་གིའོ་བདག་ཉིད་དང་འབྲེལ་པའོ་ཞེས་དང་། ནོར་ན་ཡང་ངོ་ཞེས་དང་། གཞོག་ཕྱེས་བྱེད་ན་ཡང་ངོ་ཤེས་པས་བསྟན་ནོ། །བཞི་པ་མཐར་ཐུག་གི་ཡན་ལག་ནི། རྣམ་འབྱེད་ཀྱི་སྐབས་སུ་བསྟན་ཏེ། དཔེར་ན་བཅུག་རེག་ཉམས་སུ་མྱོང་བ་བྱས་ནའོ་ཞེས་དང་། སྲོག་བཅད་ནའོ་ཞེས་དང་། ཤི་ནའོ་ཞེས་དང་། གོ་བར་བྱས་པ་ལ་བརྡ་ཕྲད་ན་མཐའོ་ཞེས་སོགས་ཀྱིས་བསྟན་ནོ། །གསུམ་པ་སེལ་བའི་མཚན་ཉིད་ནི། ཡན་ལག་གི་ལོག་ཕྱོགས་ནི་སེལ་བའོ། །སེལ་བ་དེ་དག་ལས། ཁ་ཅིག་ལས་ནི་ལྟུང་མེད་དུ་འགྱུར། ཁ་ཅིག་ལ་ནི་ན་སྨད་དུ་འགྱུར། ཁ་ཅིག་ལ་ནི་གཞི་གཞན་འགྱུར་གྱི་ལྟུང་བར་འགྱུར་རོ། །བཞི་པ་ལྟུང་བ་ཐ་དད་དུ་བསྐྱེད་པའི་ཚུལ་ལ་དྲུག་སྟེ། བསླབ་རྒྱུན་ཐ་དད་པ། བསམ་རྒྱུན་ཐ་དད་པ། བཅས་པ་ཐ་དད་པ། ཀུན་སློང་ཐ་དད་པ། གཞི་ཐ་དད་པ། བྱ་བ་ཐ་དད་པས་ལྟུང་བ་ཐ་དད་དུ་བསྐྱེད་པའོ། །དེ་རྣམས་ནི་གཞུང་སོ་སོའི་སྟེང་དུ་རྟོགས་པར་བྱའོ། །གཉིས་པ་ཡན་ལག་གི་དོན་ལ་ལྔ་སྟེ། རྒྱུད་ཀྱི་ཡན་ལག་དང་། ཡུལ་གྱི་ཡན་ལག་དང་། ལྟུང་བ་ཐ་དད་པའི་རྒྱུ་ཞར་བྱུང་དང་བཅས་པ་དང་། འདུ་ཤེས་བསམ་པའི་མཚན་ཉིད་དང་། ཡན་ལག་གི་སེལ་བའོ། །དང་པོ་ལ་བཞི་སྟེ། བསླབ་པའི་ཡན་ལག་ཞར་བྱུང་དང་བཅས་པ་དང་། བསམ་པའི་ཡན་ལག་སེལ་བ་དང་བཅས་པ་དང་། ཚིགས་ཀྱི་ཡན་ལག་ཞར་བྱུང་དང་བཅས་པ་དང་། མཚན་གྱི་ཡན་ལག་ཞར་བྱུང་དང་བཅས་པའོ། །དང་པོ་ལ་དངོས་དང་། ཞར་བྱུང་གཉིས་ལས། དང་པོ་ནི། གོང་དུ་རྟེན་དགེ་སློང་གི་སྡེ་ལྔའི་གཞི་ལ་སྦྱོར་བ་ལ་ལྔ་ཀ་རྫོགས་པར་བསྐྱེད་པར་བཤད་པ་ལ་དགེ་སློང་གང་ཡང་རུང་བས་བསྐྱེད་དམ་སྙམ་ན། ཉམས་པ་ལྟུང་བ་ལ་སྦྱར་ན་ཉེས་བྱས་སོ་ཞེས་གསུངས་ཏེ། ཉམས་ཞེས་པ་བཤད་པའི་གཞིར་གཞག གང་ཉམས། གང་ལས་ཉམས། གང་གིས་ཉམས། ཇི་ལྟར་ཉམས། ཉམས་བྱེད་ལ་ཕམ་པར་འཇོག་པའི་རྒྱུ་མཚན། ཉམས་པས་ལྟུང་བ་ལ་སྦྱར་ན་ཅིར་འགྱུར། དགག་སྒྲུབ་གང་ཡིན། བརྡའི་དོན་མདོ་དང་སྦྱར་བ་དང་བརྒྱད་དོ། །དང་པོ་ནི། ཕམ་པ་ཀུན་ཏུ་སྤྱོད་པའི་རྟེན་དེའོ། །གཉིས་པ་ནི། སྡོམ་པ་དགོས་པ་སྒྲུབ་ནུས་པ་ལས་སོ། །གསུམ་པ་ནི། ཕམ་པ་འཆབ་བཅས་ཀྱིས་ཉམས་སོ། །བཞི་པ་ལ་བྱེ་བྲག་ཏུ་སྨྲ་བའི་ལུགས། མདོ་སྡེ་པའི་ལུགས། སྔ་རབས་པའི་ལུགས་དང་གསུམ་ལས། དང་པོ་ནི། ཕམ་པ་འཆབ་བཅས་འཆབ་མེད་གཉིས་ཡོད་པ་ལས། འཆབ་བཅས་བྱུང་ན་སྡིག་ལྟུང་བཤགས་པས་མི་འདག སྡོམ་པ་བླངས་ཀྱང་མི་སྐྱེ་བའི་ཚུལ་དུ་ཉམས། ཁ་ཅིག་འཆབ་མེད་བྱུང་ན་སྡིག་ལྟུང་བཤགས་པས་འདག སྡོམ་པ་བླངས་ཀྱང་སྐྱེ་ཞེས་ཟེར། ཕམ་པ་ཐུན་མོང་བ་བྱུང་ན་སྡོམ་པ་སྐྱེ་བ་མི་འཐད་དེ། ཤེས་བྱེད་མེད་ཅིང་གནོད་བྱེད་ཡོད་པའི་ཕྱིར། ཕམ་པ་བྱུང་བས་སྡོམ་པ་མི་གཏོང་སྟེ། མ་དག་པའི་གཞི་བཅུ་གཅིག་ལ་སྐུར་འདེབས་བྱེད་པ་ལ་ལྟུང་བྱེད་དུ་གསུངས་པའི་ཕྱིར། གཉིས་པ་མདོ་སྡེ་པའི་ལུགས་ནི། ཕམ་པ་ལ་འཆབ་བཅས་ཁོ་ནར་ངེས། ཕམ་པ་བྱུང་ན་སྡིག་ལྟུང་བཤགས་པས་མི་འདག སྡོམ་པ་བླངས་ཀྱང་མི་སྐྱེ། ཕམ་པས་སྡོམ་པ་གཏོང་སྟེ། ལུང་ལས་དེ་བྱས་ན་བྱས་མ་ཐག་ཏུ་དགེ་སློང་དུ་མི་རུང་། དགེ་སྦྱོང་དུ་མི་རུང་། ཤཱཀྱའི་སྲས་སུ་མི་རུང་ཞེས་གསུངས་པའི་ཕྱིར། ཕམ་པ་བྱུང་ན་སྡོམ་པ་མི་སྐྱེ་སྟེ། ཕྱིས་བླང་དུ་མི་རུང་བའི་ཕྱིར་ཞེས་གསུངས་པའི་ཕྱིར། འཆབ་སེམས་ཕམ་པའི་ཡན་ལག་ཏུ་མི་དགོས་ན་བསམ་གཏན་པ་དགའ་བྱེད་ལ་ཕམ་པ་བྱུང་བར་ཐལ། འཆབ་སེམས་མ་གཏོགས་པའི་ཕམ་པའི་ཡན་ལག་གཞན་ཚང་གི་བསྒྲུབ་པའི་ལྟུང་བ་བྱུང་བའི་ཕྱིར། འདོད་ན། དེས་ལྟུང་བ་ཕྱིར་བཅོས་པའི་རྣམ་གཞག་གསུངས་པ་མི་འཐད་པར་ཐལ་ལོ། །གསུམ་པ་སྔ་རབས་པའི་ལུགས་ནི། ཕམ་པ་འཆབ་བཅས་འཆབ་མེད་གཉིས་སུ་ཡོད་ལ་འཆབ་བཅས་བྱུང་ན་སྡིག་ལྟུང་བཤགས་པས་མི་འདག་ཅིང་སྡོམ་པ་བླངས་ཀྱང་མི་སྐྱེ། འཆབ་མེད་ཀྱིས་ཉམས་ཀྱང་སྡིག་ལྟུང་བཤགས་པས་འདག སྡོམ་པ་བླངས་ན་སྐྱེ། ཕམ་པས་སྡོམ་པ་གཏོང་བར་བྱེད་ཟེར་རོ། །ཕམ་པས་སྡོམ་པ་གཏོང་ན་བསམ་གཏན་པ་དགའ་བྱེད་དགྲ་བཅོམ་ཐོབ་ནས་སྔར་གྱི་གྲལ་དུ་གནས་པར་བཤད་པ་དང་འགལ་ལོ་ཞེ་ན། དེ་ནི་གཟེངས་བསྟོད་པའི་ཕྱིར་མཛད་ཀྱི། སྡོམ་ལྡན་ཡིན་པའི་སྒོ་ནས་མ་ཡིན་ནོ་ཞེས་འདོད་དོ། །འདིར་ནི་དང་པོ་ཉིད་ཁས་བླངས་པར་བྱ་བ་ཡིན་ཏེ། ཊཱི་ཀར་དགེ་སློང་ཕམ་པར་འགྱུར་བ་ལ་ནི་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། ཚངས་པར་མཚུངས་པར་སྤྱོད་པ་རྣམས་དང་ལྷན་ཅིག་གནས་པ་དང་སྤྱོད་པ་དག་མེད་པའི་ཕྱིར་རོ། །སྡོམ་པ་ཡང་དག་པར་བླང་བ་ནི་རྣམ་པར་གྲོལ་བའི་ཕྱིར་ཡིན་ན། དེས་རྣམ་པར་གྲོལ་བ་འཐོབ་པ་ཐག་རིང་དུ་སྤངས་པའི་ཕྱིར། དེས་ན་དེའི་སྡོམ་པ་ནི་མེད་པ་དང་འདྲ་བ་ཡིན་ནོ་ཞེས་གསུངས་པའི་ཕྱིར། ལྔ་པ་ཉམས་བྱེད་ལ་ཕམ་པར་འདོགས་པའི་རྒྱུ་མཚན་ནི། ཕམ་པས་གཉེན་པོ་ཕམ་པར་བྱེད་པས་ན་ཕམ་པའོ། །དྲུག་པ་ཉམས་པས་བྱས་ན་ཅིར་འགྱུར་བ་ནི། ཉམས་པ་དེ་སྡེ་ལྔ་ལ་སྦྱར་ན་ཉེས་བྱས་སུ་འགྱུར་རོ། །བདུན་པ་དགག་སྒྲུབ་གང་ཡིན་པ་ནི། ཉེས་བྱས་ལས་མི་བསྐྱེད་ཅེས་དགག་པ་ཡིན་ནམ། ཉེས་བྱས་བསྐྱེད་ཅེས་སྒྲུབ་པ་ཡིན་ཞེ་ན། ཕམ་པ་འཆབ་བཅས་བྱུང་བའི་དགེ་སློང་དེ་སྡོམ་ལྡན་ཡིན་པས་དེ་ལ་སྡེ་ལྔའི་དངོས་གཞི་བསྐྱེད་དམ་སྙམ་པའི་དོགས་པ་ཡོད་པ་ལ་ཉེས་བྱས་ཡིན་གྱི་ལྟུང་བ་བསྐྱེད་པ་དགག་པའི་དོན་ནོ། །བརྒྱད་པ་བརྡ་དོན་མདོ་དང་སྦྱར་བ་ནི། ཤེས་བྱེད་ཀྱི་ཁུངས་མེད་དམ་སྙམ་པ་ལ། ལུང་ལས་སྔོན་ལྟུང་བ་བྱུང་བ་དང་། རྐུ་ཐབས་སུ་གནས་པ་དང་། དང་པོ་འཁྲུགས་པ་དང་། མ་ནིང་དང་དགེ་སློང་མ་སུན་ཕྱུང་བས་ཉམས་པར་བྱས་ན་ཉེས་བྱས་སོ་ཞེས་གསུངས་པའི་སྔོན་ལྟུང་བ་བྱུང་བ་ཞེས་པ་འདི་ལ་དགོངས་པའི་ཕྱིར་རོ། །སྡོམ་པ་གཏན་མ་སྐྱེས་པ་དེ་ཁྱིམ་པ་དང་འདྲ་བས་ལྟུང་བ་གཏན་མེད་པར་འགྱུར་རོ་སྙམ་ན། མ་སྐྱེས་པ་ལྟུང་བ་ལ་སྦྱར་ན་ཉེས་བྱས་སོ་ཞེས་གསུངས་ཏེ། མ་སྐྱེས་པ་ཞེས་པ་བཤད་པའི་གཞིར་བཞག་ནས། འདི་ལ་བརྒྱད་ལས། གང་མ་སྐྱེས་ན་རབ་ཏུ་བྱུང་བའི་ཕྱོགས་ཀྱི་སྡོམ་པ་ནི་མ་སྐྱེས། གང་ལ་ན་ལེན་པའི་རྟེན་དེ་ལ་མ་སྐྱེས། གང་གིས་མ་སྐྱེས་ན་འགལ་རྐྱེན་བྱུང་བའམ་མཐུན་རྐྱེན་མ་ཚང་བའི་དབང་གིས་མ་སྐྱེས། ཇི་ལྟར་མ་སྐྱེས་ན་ལེན་ཆོག་བྱས་ཀྱང་སྐྱེ་མ་ཉན་པའི་ཚུལ་གྱིས་མ་སྐྱེས། མ་སྐྱེས་པ་དེས་ལྟུང་བ་ལ་སྦྱར་ན་ཅིར་འགྱུར་ན་ཉེས་བྱས་སུ་འགྱུར་རོ། །དགག་སྒྲུབ་གང་ཡིན་ན་སྒྲུབ་པ་ཡིན་ཏེ་སྡོམ་པ་གཏན་མ་སྐྱེས་པས་ཁྱིམ་པ་དང་འདྲ་བས་དེས་ལྟུང་བ་གཏན་མི་བསྐྱེད་དམ་སྙམ་ན་ཉེས་བྱས་བསྐྱེད་ཅེས་སྒྲུབ་པ་ཡིན་པའི་ཕྱིར། དེ་ལ་ཉེས་བྱས་བསྐྱེད་པའི་རྒྱུན་མཚན་ནི། དེ་རབ་ཏུ་བྱུང་བའི་བསྙེན་པར་རྫོགས་པ་ཉིད་དུ་ཁས་བླང་བ་དང་དེ་དག་གི་རྒྱུད་ལ་བར་མ་རབ་བྱུང་ཡོད་པའི་ཕྱིར་ཞེས་ཊཱི་ཀར་གསུངས་སོ། །བརྡ་དོན་མདོ་དང་སྦྱར་བ་ནི། དེ་ལ་ཤེས་བྱེད་ཡོད་དེ། ལུང་ལས་རྐུ་ཐབས་སུ་གནས་པ་དང་། དང་པོ་འཁྲུགས་པ་དང་། མ་ནིང་དང་། དགེ་སློང་མ་སུན་ཕྱུང་ནས་ཉམས་པར་བྱས་ན་ཉེས་བྱས་སོ་ཞེས་གསུངས་པའི་དང་པོ་འཁྲུགས་པས་ཉམས་པར་བྱས་ན་ཉེས་བྱས་སོ་ཞེས་པ་འདི་ལ་དགོངས་པའི་ཕྱིར། ངག་དོན་ནི། དང་པོ་སྲོག་གཅོད་ཀྱི་ཕམ་པ་འཆབ་བཅས་ཀྱི་ཉམས་པའི་དགེ་སློང་ཆོས་ཅན། ཁྱོད་ཀྱིས་ལྟུང་བ་ལ་སྦྱར་བས་ཉེས་བྱས་ལས་ལྷག་པ་མི་བསྐྱེད་དེ། ཁྱོད་ཕམ་པ་འཆབ་བཅས་ཀྱིས་ཉམས་པའི་དགེ་སློང་ཡིན་པའི་ཕྱིར། ཕྱི་མ་ལ། སྡོམ་པ་བླངས་ནས་མ་སྐྱེས་པའི་བར་མ་རབ་བྱུང་གི་རྟགས་ཅན་ཆོས་ཅན། ཁྱོད་ཀྱིས་ལྟུང་བ་ལ་སྦྱར་བས་ཉེས་པ་གཏན་ནས་མི་བསྐྱེད་པ་མ་ཡིན་ཏེ། ཉེས་བྱས་ཙམ་ཞིག་བསྐྱེད་པའི་ཕྱིར། འོ་ན་རབ་བྱུང་ཕྱོགས་ཀྱི་སྡོམ་པ་སྐྱེས་པ་རྣམས་ལ་ཅིར་འགྱུར་ཞེ་ན། བསྙེན་པར་མ་རྫོགས་ཤིང་རབ་ཏུ་བྱུང་བ་དགེ་ཚུལ་ཕ་མ་གཉིས་དགེ་སློབ་མ་དང་གསུམ་གྱིས་ཡང་དག་པར་བླངས་པ་བསླབ་པའི་གཞི་བཅུ་དང་། དགེ་སློབ་མས་དེའི་སྟེང་དུ་རྩ་བའི་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལས་འདས་པ་ལ་ཡང་ངོ་སྟེ་ཉེས་བྱས་སུ་འགྱུར་རོ། །འོ་ན་བླངས་པ་མ་ཡིན་པ་ལས་འདས་པ་ལ་ཅིར་འགྱུར་ཞེ་ན། བསྙེན་པར་མ་རྫོགས་ཤིང་རབ་ཏུ་བྱུང་བ་གསུམ་པོ་དེས་དངོས་སུ་བླངས་པའི་བསླབ་པ་དེའི་ཕྱོགས་དང་མཐུན་ཏེ་ཕྱོགས་ལ་བརྟེན་པ་ལས་འདས་པ་ལ་ནི་ཡིད་ཀྱི་བསྡམ་བྱའི་ཉེས་བྱས་སུ་འགྱུར་རོ། །འདིར་བླངས་འདས་ཀྱི་མཐའ་དཔྱད་པ་ལ་བརྒྱད་དེ། དབྱེ་བ། བསྡུ་བ། མཚན་ཉིད། གྲངས་ངེས། གོ་རིམ་ངེས་པ། སྒྲ་བཤད་པ། བསྲུངས་པའི་ཕན་ཡོན། མ་བསྲུངས་པའི་ཉེས་དམིགས་སོ། །དང་པོ་ལ་གཉིས་ཏེ། འཐད་པ་འགོད་པ་དང་། འཁྲུལ་པ་དགག་པའོ། །དང་པོ་ནི། དགེ་ཚུལ་ཕ་མ་གཉིས་ལ་ནི་བསླབ་པའི་གཞི་བཅུ་དང་། ཁྱིམ་པའི་རྟགས་སྤོང་བ་དང་། རབ་ཏུ་བྱུང་བའི་རྟགས་བླངས་པ་ལས་འདས་པའི་བླངས་འདས་བཅུ་གཉིས། དགེ་སློབ་མ་ལ་དེའི་སྟེང་དུ་རྩ་བའི་ཆོས་དྲུག་དང་རྗེས་མཐུན་གྱི་ཆོས་དྲུག་ལས་འདས་པའི་བླངས་འདས་བཅུ་གཉིས་ཏེ་ཉི་ཤུ་རྩ་བཞིའོ། །གཉིས་པ་ལ་འདོད་པ་བརྗོད་པ་དང་། སུན་འབྱིན་བཤད་པ་གཉིས། དང་པོ་ལ་ཁ་ཅིག་བླངས་འདས་སོ་དྲུག་ཏུ་དབྱེ་སྟེ། སྲོག་གཅོད་བཞི་དང་མ་བྱིན་ལེན། །མི་ཚངས་སྤྱོད་དང་བརྫུན་དུ་སྨྲ། །གཞི་མེད་བག་ཙམ་དགེ་འདུན་དབྱེན། །དེར་རྗེས་ཕྱོགས་དང་ཁྱིམ་སུན་འབྱིན། །བཤེས་ངོར་བྱེད་དང་འཕྱ་བ་དང་། །ཟས་ཅུང་ལྷག་མས་སྐུར་འདེབས་དང་། །བསླབ་པ་སྤོང་དང་འབྲས་ཆན་འགེབས། །ཆང་དང་གླུ་གར་རོལ་མོ་བྱེད། །བརྒྱན་དང་ཁ་དོག་སྤོས་བྱུག་ཕྲེང་། །ཁྲི་དང་བསྟན་ནི་ཆེ་མཐོ་དང་། །ཕྱི་དྲོའི་ཁ་ཟས་གསེར་དངུལ་ལེན། །ཉམས་པ་རྣམ་པ་གསུམ་དག་སྟེ། །སུམ་ཅུ་དྲུག་ནི་བླངས་ལས་འདས། །ཞེས་གསུངས་སོ། །ཁ་ཅིག་དེའི་སྟེང་དུ་ཁྱད་གསོད་གཉིས། ཙུག་ཙུག་ལ་སོགས་བཞི། ཁང་པ་ཁང་ཆེན་གཉིས་ཏེ་བརྒྱད་བསྣོན་ལ། ཁྱད་གསོད་གཉིས་ལ་བཤགས་བྱའི་ཉེས་བྱས་སུ་འགྱུར་ཏེ། བསླབ་པའི་དངོས་པོ་ལ་ཉེ་བར་འཇོག་པ་སྤོང་བ་ཡང་ཁྱད་གསོད་ཡིན་པས་ཁྱད་གསོད་མཚུངས་པའི་ཕྱིར། ཙུག་ཙུག་སོགས་བཞི་ལ་བཤགས་བྱའི་ཉེས་བྱས་སུ་འགྱུར་ཏེ། ཚོད་མས་འབྲས་ཆན་འགེབས་པ་དང་རྫུན་དུ་མཚུངས་པའི་ཕྱིར། ཁང་པ་ཁང་ཆེན་གཉིས་ལས་བཤགས་བྱའི་ཉེས་བྱས་སུ་འགྱུར་ཏེ། ཊཱི་ཀར་ཁ་ཅིག་ནི་བཤགས་པར་བྱ་བའི་ཉེས་བྱས་སུ་འགྱུར་ལ་ཞེས་གསུངས་པའི་ཕྱིར་ཞེས་འདོད། གྲོ་་་་་་ཁ་ཅིག་དེའི་སྟེང་དུ་མཁན་པོར་གསོལ་བར་བཏབ་པ་ཉམས་པ་བོར་ནས་གསོ་སྦྱོང་མ་བྱས་པ། དགག་དབྱེ་མ་བྱས་པ། དབྱར་ཁས་མ་བླངས་པ། གནས་བླ་མ་ལ་མ་བརྟེན་པ། དཀོན་མཆོག་ལ་མ་གུས་པ་དང་ལྔ་བསྣན་ཏེ། ཊཱི་ཀར་མ་གུས་པའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མ་གུས་པའི་གཞི་ལས་བྱུང་བ་ཞེས་བྱ་བ་ནི། སངས་རྒྱས་དང་ཆོས་དང་དགེ་འདུན་ལ་མ་གུས་པ་ལས་གྱུར་པ་སྟེ། དེ་ལ་དཀོན་མཆོག་གསུམ་ལ་མ་གུས་པ་ནི། གསུམ་ལ་སྐྱབས་སུ་སོང་བས་སྡོམ་པ་ཡང་མིན། སྡོམ་པ་མ་ཡིན་པ་ཡང་མ་ཡིན་པའི་ངོ་བོ་ཉིད་ཀྱིས་རབ་ཏུ་བྱུང་བ་དང་། དགེ་ཚུལ་དང་དགེ་སློབ་མའི་སྡོམ་པ་ཡང་དག་པར་བླངས་པ་ལས་འདས་པ་ཉིད་ཡིན་པས་དེ་ལ་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། མི་སྦྱོང་བའི་གཞི་ལས་བྱུང་བ་གང་གི་ཕྱོགས་དང་མཐུན་པ་ཉིད་ཡིན་ཞེ་ན། མི་སྦྱོང་བ་ཞེས་བྱ་བ་ནི་གསོ་སྦྱོང་དང་དགག་དབྱེ་མི་བྱ་བ་དང་། མི་གནས་པར་འདུག་པ་ལ་སོགས་པ་བདག་ཉིད་ཀྱི་ཚུལ་ཁྲིམས་རྣམ་པར་དག་པ་མི་བྱེད་པ་སྟེ། གཞི་དེ་ལས་བྱུང་བའི་ཉེས་པ་ནི་མི་སྦྱོང་བའི་གཞི་ལས་བྱུང་བ་ཞེས་བྱའོ། །དེ་ལ་གཞི་དེས་བསླབ་པའི་གཞི་ཡང་དག་པར་བླངས་པ་འདྲལ་བར་བྱེད་པ་ནི་བསླབ་པ་ཡང་དག་པར་བླངས་པ་ལས་འདའ་བ་ཉིད་ཡིན་པས། དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་གསུངས་པའི་ཕྱིར་རོ། །ཞེས་གསུངས་སོ། །གཉིས་པ་ནི། འདེབས་སྤྱོད་གཉིས་བླངས་འདས་སུ་འདྲེན་པ་མི་རིགས་ཏེ། དགེ་སློང་ལ་འདེབས་སྤྱོད་ཀྱི་ལྟུང་བ་བསྐྱེད་པའི་གསོད་སེམས་ལ་ལྟོས་མི་དགོས་པའི་ཕྱིར་ཏེ། སྲོག་ཆགས་ལ་ལྟོས་མེད་ཀྱི་སེམས་ཀྱིས་ཞུགས་པ་ཙམ་གྱིས་འགྲུབ་པའི་ཕྱིར། གལ་ཏེ་ལྟོས་མེད་ཀྱི་སེམས་ཉིད་བསོད་སེམས་ཡིན་ནོ་ཞེ་ན། འོ་ན་ལམ་དུ་སྲོག་ཆགས་ལ་གནོད་པ་ཡོད་དམ་མེད་སྙམ་པའི་བློ་སྐྱེ་བའི་དགེ་སློང་ལམ་དུ་འགྲོ་བར་གནང་བའི་སྐབས་མེད་པར་ཐལ། དེ་ལམ་དུ་འགྲོ་བའི་ཚེ་ལྟོས་མེད་ཀྱི་སེམས་སྐྱེ་བའི་ཕྱིར། དགེ་ཚུལ་གྱིས་དུད་འགྲོ་ཕྲ་མོས་གང་བར་ཤེས་བཞིན་དུ་མི་ལ་འཆི་བའི་སེམས་ཀྱིས་ནགས་མེས་གཏོང་བ་ཕྱོགས་མཐུན་དུ་བཤད་པ་མི་རིགས་པར་ཐལ། དེ་ལ་ལྟོས་མེད་ཀྱི་སེམས་སྐྱེ་བའི་ཕྱིར། གཉིས་ཀའི་ཁྱབ་པ་ཁས། བཤེས་ངོར་བྱེད་པ་དང་། འཕྱ་བ་དང་། ཟས་ཅུང་སོགས་བརྫུན་ལས་ལོགས་སུ་འདྲེན་པ་མི་འཐད་པར་ཐལ། དགེ་སློང་ལ་གཞི་དེ་རྟེན་གྱི་བརྫུན་དུ་སྨྲ་བའི་ལྟུང་བྱེད་དང་། དེ་ལས་གཞན་པའི་ལྟུང་བ་གཉིས་ལས་རྣམ་པར་མ་བཞག དགེ་ཚུལ་ལ་བརྫུན་དུ་སྨྲ་བའི་ལྟུང་བ་ལས་གཞན་པའི་གཞི་དེ་རྟེན་གྱི་ལྟུང་བར་རྣམ་པར་མ་བཞག་པའི་ཕྱིར། འབྲས་ཆན་འགེབས་པ་བརྫུན་དུ་འདྲེན་པ་མི་འཐད་དེ། གཡོ་སྒྱུས་ཀུན་ནས་བསླངས་པ་ཙམ་ཡིན་གྱི་བརྫུན་གྱི་མཚན་ཉིད་མ་ཚང་བའི་ཕྱིར། མཁན་པོར་གསོལ་བ་བཏབ་པ་ལས་ཉམས་པ་བླངས་འདས་སུ་འདྲེན་པ་མི་འཐད་དེ། འདིར་ནི་ཕྱོགས་མཐུན་མ་ཡིན་པའི་བླངས་འདས་འདྲེན་དགོས་ལ། ཊཱི་ཀར། མཁན་པོ་དང་སློབ་དཔོན་རྣམས་དང་ཚངས་པར་མཚུངས་པར་སྤྱོད་པ་གཞན་ལ་མ་གུས་པ་ལ་སོགས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། སུམ་བརྒྱ་པ་རྩ་འགྲེལ་ལས་ཀྱང་བླ་མར་གསོལ་བཏབ་ལས་ཉམས་པ་ཕྱོགས་མཐུན་དུ་གསུངས་པའི་ཕྱིར། ཁྱད་གསོད་གཉིས་བརྫུན་དུ་འདྲེན་པ་མི་འཐད་དེ། ལྟུང་བ་དེ་ཉིད་སྐྱེས་པ་ལ་བརྫུན་གྱི་ཀུན་སློང་མི་དགོས་པའི་ཕྱིར། ཙུག་ཙུག་ལ་སོགས་བཞི་བརྫུན་དུ་འདྲེན་པ་མི་འཐད་དེ། ཀུན་སྤྱོད་མ་བསྡམ་པ་ཙམ་གྱིས་བཞག་པ་ཡིན་པའི་ཕྱིར། ཁང་པ་ཁང་ཆེན་ལོགས་སུ་འདྲེན་པ་མི་འཐད་དེ། ཤེས་བྱེད་མེད་པའི་ཕྱིར། ཁ་ཅིག་མ་བྱིན་ལེན་འདོད་ཀྱིས་ཀུན་ནས་བསླངས་པ་ལ་དགོངས་ཞེས་པ་དང་། ཁ་ཅིག་མི་ཚངས་པ་སྤྱོད་འདོད་ཀྱིས་ཀུན་ནས་བསླངས་པ་ལ་དགོངས་ཞེས་དང་། ཁ་ཅིག་འདེབས་སྤྱོད་ཀྱི་ལྟུང་བ་བསྐྱེད་པ་ལ་དགོངས་ཞེས་པ་ཡང་འཐད་པར་མ་མཐོང་ངོ་། །དེས་ན་ཁྱིམ་པའི་རྟགས་སྤངས་པ་ལས་འདས་པའི་བླངས་འདས་སུ་བསྡུ་བར་བྱ་སྟེ། ཊཱི་ཀར་ཁྱིམ་བྱེད་པ་ནི་ཁྱིམ་ནས་ཁྱིམ་མེད་པར་རབ་ཏུ་བྱུང་བའི་བསླབ་པའི་གཞི་ཡང་དག་པར་བླངས་པ་ལས་འདས་པའི་ཕྱིར། འདི་ལ་ཁ་ཅིག་ནི་བཤགས་པར་བྱ་བའི་ཉེས་བྱས་སུ་འགྱུར་བའང་ཡོད་དོ། །ཁ་ཅིག་ནི་བསྡམ་པར་བྱ་བའི་ཉེས་བྱས་སུ་འགྱུར་བའང་ཡོད་ཅེས་གསུངས་པའི་ཕྱིར། དཀོན་མཆོག་གསུམ་ལ་མ་གུས་པ་བླངས་འདས་སུ་འདྲེན་པ་ཡང་མི་རིགས་སྟེ། ཊཱི་ཀར་དཀོན་མཆོག་གསུམ་ལ་མ་གུས་པ་ནི་སྡོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཡིན་པས་དེ་ལ་ནི་བསྡམ་པར་བྱ་བའི་ཉེས་བྱས་སུ་འགྱུར་ཞེས་གསུངས་ཤིང་། ཕྱོགས་མཐུན་གྱི་སྡོམ་དུ། དབྱར་གནས་གཅིག་ཏུ་བྱ་བ་དང་། །གསོ་སྦྱོང་དགག་དབྱེར་བཅས་པ་དང་། །ཞེས་གཉེན་པོ་ཕྱོགས་མཐུན་དུ་གསུངས་པའི་ཕྱིར། སྔར་གྱི་ལུང་གཉིས་ཀྱང་ཤེས་བྱེད་དུ་མ་འབྲེལ་ཏེ། དེ་གཉིས་ཀྱིས་རིམ་པ་བཞིན་དཀོན་མཆོག་གསུམ་ལ་མ་གུས་པའི་རྒྱུས་བར་མ་རབ་བྱུང་དང་། དགེ་ཚུལ་དང་། དགེ་སློབ་མའི་སྡོམ་པ་ལས་འདས་པ་བཤགས་བྱར་གསུངས་ཀྱི། གསུམ་ལ་མ་གུས་པ་ཙམ་བཤགས་བྱར་གསུངས་པ་མ་ཡིན་པའི་ཕྱིར་དང་། གསོ་སྦྱོང་དང་དགག་དབྱེ་མ་བྱས་པའི་རྒྱུས་སྡོམ་པ་ལས་འདས་པ་བཤགས་བྱར་བསྟན་པ་ཡིན་པའི་ཕྱིར། ཁ་ཅིག་ཉམས་པ་གསུམ་བླངས་འདས་སུ་འདྲེན་པ་མི་རིགས་ཏེ། སུམ་བརྒྱ་པར་ཕྱོགས་མཐུན་དུ་བཤད་པའི་ཕྱིར། ཞེས་ཟེར་ཡང་སྐྱོན་མེད་དེ། ཁྱིམ་པ་དང་མུ་སྟེགས་བྱེད་ཀྱི་གོས་དང་སྣོད་སྤྱོད་ཀྱི་རྟགས་འཆང་བ་བླངས་འདས་སུ་ཊཱི་ཀར་གསལ་བར་གསུངས་པའི་ཕྱིར། གཉིས་པ་བསྡུ་བ་ནི། ལྷག་མ་དང་བཅས་པ་དང་། ལྷག་མ་མེད་པའི་ལྟུང་བ་གཉིས་སུ་འདུ་ཞིང་། རང་བཞིན་གྱིས་ཁ་ན་མ་ཐོ་བ་དང་། བཅས་པའི་ལྟུང་བ་དང་། བཅས་རྐྱང་གི་ལྟུང་བ་གསུམ་དུ་ཡང་འདུ་ལ། ཚུལ་ཁྲིམས་ཀྱི་དང་། བག་ཡོད་ཀྱི་དང་། བརྟུལ་ཞུགས་ཀྱི་མི་མཐུན་ཕྱོགས་ཀྱི་ལྟུང་བ་གསུམ་དུ་ཡང་འགྱུར་རོ། །གསུམ་པ་མཚན་ཉིད་ནི། བསྙེན་པར་མ་རྫོགས་པའི་རབ་བྱུང་གིས་ཡུལ་ཁྱད་པར་ཅན་གྱི་དྲུང་དུ་ཁས་བླངས་པ་ལས་འདས་པའི་ལྟུང་བ་གང་ཞིག ཕྱོགས་མཐུན་ལས་གཞན་དུ་གྱུར་བ་དེ་བླངས་འདས་ཀྱི་ལྟུང་བའི་མཚན་ཉིད་དོ། །བཞི་པ་གྲང་ངེས་ནི། དགེ་ཚུལ་གྱི་སྡོམ་པ་ལས་འདས་པའི་ལྟུང་བ་བཅུར་ངེས་ཏེ། བཅུ་ལས་མང་ན་མི་འདུ་ལ་ཉུང་ན་དོན་རྟོགས་དཀའ་བས་བཅུར་བསྟན་པའི་ཕྱིར། ལྔ་པ་གོ་རིམ་ངེས་པ་ནི། རྩ་བ་བཞི་ནི་ལྕི་རིམ་ནས་བསྟན་ལ། ཡན་ལག་རྣམས་ཀྱི་ནང་ནས་མྱོས་འགྱུར་ལྕི་བས་སྔར་བསྟན་ཅིང་། གཞན་རྣམས་འཇིག་རྟེན་གྱི་བྱ་བའི་རིམ་པ་དང་མཐུན་པར་བསྟན་ཅེས་ཁ་ཅིག་གསུངས་སོ། །རང་ལུགས་ནི། ལུང་གི་གོ་རིམ་བཞིན་དུ་བསྟན་པ་ཡིན་ནོ། །དྲུག་པ་སྒྲ་བཤད་པ་ནི། ཡུལ་ཁྱད་པར་ཅན་གྱི་དྲུང་དུ་ཁས་བླངས་པ་ལས་འདས་པས་ན་བླངས་འདས་སོ། །བདུན་པ་ཕན་ཡོན་ནི། འདི་བསྲུངས་པས་ཕན་ཡོན་བཅུ་ཐོབ་སྟེ། བམ་ལྔ་ལས། ཕན་ཡོན་བཅུ་འདི་ལྟ་སྟེ། ཚུལ་ཁྲིམས་རྣམ་པར་དག་པ་ལ་བརྟེན་ནས་འགྱོད་པ་མེད་པ་ལ་སོགས་པའི་རིམ་གྱིས་ཏིང་ངེ་འཛིན་གྱི་བསླབ་པ་དང་། དེ་ལས་ཤེས་རབ་ཀྱི་བསླབ་པ་དང་དེ་ལས་མཐར་མྱ་ངན་ལས་འདས་པ་འཐོབ་པར་འགྱུར་བ་དང་། འགྱོད་པ་མེད་པར་འཆི་བའི་དུས་བྱེད་པ་དང་། ཕྱོགས་བཅུར་སྙན་པའི་སྒྲ་བསྒྲགས་པ་དང་། བདེ་བར་གཉིད་ལོག་ཅིང་སད་པ་དང་། གཉིད་ལོག་པ་ན་ལྷ་རྣམས་ཀྱིས་བསྲུང་བར་འགྱུར་བ་དང་། འཇིགས་པ་རྣམས་ཀྱི་ནང་དུ་འགྲོ་བ་ན་བག་ཚ་བ་དང་འཇིགས་པ་སོགས་སུ་མི་འགྱུར་བ་དང་། དགྲ་བོས་གླགས་རྙེད་ཀྱང་གླགས་ལྟ་བར་མི་བྱེད་ཀྱི་སྲུང་བ་ལ་སོགས་པའི་སྒོ་ནས་ཕན་འདོགས་པ་དང་། གནོད་སྦྱིན་དང་མི་མ་ཡིན་ལ་སོགས་པ་གཉུག་མར་གནས་པ་ལ་སོགས་ཀྱི་གླགས་རྙེད་ཀྱང་གླགས་ལྟ་བར་མི་བྱེད་ཀྱི་ཚུལ་ཁྲིམས་རྣམ་པར་དག་པ་དེའི་དབང་གིས་དེ་ལ་ཕན་འདོགས་པ་དང་ཆོས་གོས་ལ་སོགས་པ་དག་ཀྱང་ཆོས་དང་མཐུན་པར་ཚེགས་ཆུང་ངུས་གཞན་ལས་འཐོབ་པར་འགྱུར་བ་དང་། གང་དུ་སྐྱེ་བར་འདོད་པ་ལ་སོགས་པའི་སྨོན་ལམ་ཡང་དག་པར་འགྲུབ་པར་འགྱུར་བའོ། །ཞེས་གསུངས་པ་ལྟ་བུའོ། །བརྒྱད་པ་མ་བསྲུངས་པའི་ཉེས་དམིགས་ནི། ལུང་དམ་པའི་གླེང་གཞིའི་ལེའུ་ལས། སྟོན་པ་སངས་རྒྱས་ཀྱིས་སྨད་པ་དང་། ལྷ་རྣམས་ཀྱིས་ཆོམ་རྐུན་ལ་སོགས་པའི་ཐ་སྙད་ཀྱིས་དང་། གྲོགས་དམ་པ་རྣམས་ཀྱིས་དང་ཚུལ་མིན་ཡིད་ལ་བྱེད་པའི་ཚེ་བདག་ཉིད་ཀྱིས་དང་། ཉེས་པ་དང་བཅས་ཤིང་སྨད་པར་འོས་པའི་ཆོས་ཉིད་ཀྱིས་སྨད་པ་དང་། ཕྱོགས་དང་ཕྱོགས་མཚམས་རྣམས་སུ་སྡིག་པའི་སྒྲ་དང་ཚིགས་སུ་བཅད་པ་མ་ཡིན་པར་གྲགས་པར་འགྱུར་བ་དང་། ཆོས་མ་ཐོས་པ་ཐོས་པར་མི་འགྱུར་བ་དང་། སྔར་ཐོས་པ་བརྗེད་པར་འགྱུར་བ་དང་། ལམ་གྱི་རྟོགས་པ་སྐྱེ་བར་མི་འགྱུར་བ་དང་། འགྱོད་བཞིན་དུ་འཆི་ཞིང་ཤི་ནས་ངན་འགྲོར་འགྲོ་བར་གསུངས་པ་ལྟ་བུའོ། །ཕྱོགས་མཐུན་ཅི་ལྟ་བུ་ཞེ་ན། འདི་ལ་གཉིས་ཏེ། ཕྱོགས་མཐུན་བདེ་བླག་ཏུ་རྟོགས་པའི་ཕྱིར་དུ་ཉེས་མེད་དུ་གནང་བ་དང་། ཕྱོགས་མཐུན་དངོས་བཤད་པའོ། །དང་པོ་ལ་གཉིས་ལས། དབྱེ་བ་ནི། འདུལ་བ་བྱེ་བྲག་ཏུ་བཤད་པ་འོད་ལྡན་དུ་གྲགས་པ་ལས། འཆང་བ་དང་ནི་འབྲལ་བ་དང་། །དེ་བཞིན་ས་ནི་བརྐོ་བ་དང་། །རིན་ཆེན་རེག་དང་མེ་ལ་རེག །བཏང་ནས་ཟ་བར་བྱེད་པ་དང་། །བྱིན་ལེན་མ་བྱས་ཟ་བ་དང་། །དེ་བཞིན་གསོག་འཇོག་ཟ་བ་དང་། །ལྗོན་ཤིང་འཛེགས་དང་ཤིང་གཅོད་དང་། །རྩ་སྔོན་མི་གཙང་འདོར་བ་དང་། །ས་བོན་འཇོམས་དང་བསླབ་པའི་གཞི། །བཅུ་པོ་རྣམས་ནི་མ་གཏོགས་པ། །སོ་སོར་ཐར་པ་བསྟན་པ་དག །བླངས་པའི་ཕྱོགས་མཐུན་ཤེས་པར་བྱ། །ཞེས་འཆད་པ་ལ་ཆོས་གོས་དང་ལྷུང་བཟེད་གཉིས་སུ་ཕྱེ་ནས་ཉེས་མེད་བཅུ་གསུམ་བཤད་པའོ། །ཁ་ཅིག་དེའི་སྟེང་དུ་དགེ་ཚུལ་ལ་འབྲེལ་སྤང་མེད་པས། དགོན་པའི་འབྲེལ་སྤང་གི་ཕྱོགས་མཐུན་དང་། ཞག་བཅུ་འཆང་སྤང་མེད་པས། ཟླར་འཇོག་སྤང་བའི་ཕྱོགས་མཐུན་མེད། ལས་གྲལ་དུ་གནས་ན་རྐུ་ཐབས་ཀྱི་བར་ཆད་དུ་འགྱུར་བས་ལས་གྲལ་ནས་མ་སྨྲས་པར་འགྲོ་བ་ལ་ལྟུང་བ་མེད། གསོག་འཇོག་སོང་ཟིན་ཟོས་པའི་ཉེས་པ་མེད་པས་གསོག་འཇོག་བྱེད་པ་ལ་ལྟུང་བ་མེད། དགེ་ཚུལ་ནང་ཕན་ཚུན་ལྷན་ཅིག་ཉལ་བ་ལ་ལྟུང་བ་མེད་དེ་ཉེས་མེད་ཕྱེད་དང་བཅོ་བརྒྱད་དུ་འདོད་དོ། །མཁས་པ་བྱ་ནི་ཕྱེད་འཇོག་ཚུལ་མི་འཐད་པས་བཅུ་བདུན་ཞེས་བཞེད་དོ། །དེ་ལ་དང་པོ་དགོན་པའི་ཕྱོགས་མཐུན་མེད་པ་མི་འཐད་དེ། དགེ་སློང་ལ་དགོན་པའི་གནས་དང་ཆོས་གོས་གཉིས་གང་རུང་དང་བྲལ་བས་ལྟུང་བ་གཉིས་རྣམ་པར་བཞག་ལ། དགེ་ཚུལ་ལ་གང་དུ་གནས་པར་ཡིད་དམ་བཅས་པའི་དགོན་པར་མི་གནས་པ་ལ་ལྟུང་བར་འགྱུར་བའི་ཕྱིར། གཉིས་པ་ཟླར་འཇོག་གི་ཕྱོགས་མཐུན་མེད་པ་མི་འཐད་དེ། བསླབ་པའི་གཞི་བཅུ་དང་ཉེས་མེད་བཅུ་གསུམ་ལས་གཞན་པའི་སོ་ཐར་གྱི་མདོ་ལས་ལྟུང་བར་བསྟན་པ་ཐམས་ཅད་དགེ་ཚུལ་ལ་ཕྱོགས་མཐུན་དུ་གསུངས་པའི་ཕྱིར། ལས་གྲལ་ནས་མ་སྨྲས་པར་འགྲོ་བའི་ཉེས་པ་མེད་པ་ཡང་མི་འཐད་དེ། དགེ་ཚུལ་གྱིས་ལས་གྲལ་ནས་སྨྲས་ནས་འགྲོ་བ་ལ་དགག་བྱ་མེད་ཅིང་དགོས་པ་ཡོད་པའི་ཕྱིར་དང་། བསྒྲུབ་བྱས་ལས་གྲོལ་ལ་མ་སྨྲས་པར་འགྲོ་མི་འོས་པའི་ཕྱིར། གསོག་འཇོག་བྱེད་པ་ལ་ལྟུང་བ་མེད་པ་མི་འཐད་དེ། དགེ་ཚུལ་གྱིས་སྒོག་པ་དང་རྨིག་པ་གཅིག་པའི་ཤ་ཟ་བའི་ཕྱིར་འཆང་བ་ལ་ཉེས་བྱས་འབྱུང་བ་ཡོད་པའི་ཕྱིར། དེས་ན་ཉེས་མེད་བཅུ་གསུམ་དུ་ངེས་སོ། །གཉིས་པ་ངོ་བོ་ནི། དགེ་སློང་ཕ་མའི་སོ་སོ་ཐར་པའི་མདོ་ལས་ལྟུང་བར་བཅས་པ་རྣམས་ཀྱི་ནང་ནས་དགེ་ཚུལ་ཕ་མ་ལ་གང་གནང་བ་རྣམས་འདིར་ཉེས་པ་མེད་དོ། །གཉིས་པ་ཕྱོགས་མཐུན་དངོས་ལ་བཞི་སྟེ། དབྱེ་བ། བསྡུ་བ། མཚན་ཉིད། གང་གི་ཕྱོགས་མཐུན་དུ་འགྱུར་བའོ། །དང་པོ་ནི། ཊཱི་ཀར། རྟགས་དང་སློང་དང་སྣོད་དང་ནི། །ལོངས་སྤྱོད་འཕྱར་གཡེང་འདོད་པ་དང་། །གནོད་པ་དང་ནི་གནས་པ་དང་། །མ་གུས་མི་སྦྱོང་གཞི་ལས་བྱུང་། །ཞེས་གསུངས་པའི་མཐུན་ཡུལ་བཅུའི་ཕྱོགས་མཐུན་བཅུར་འགྱུར་རོ། །གཉིས་པ་ནི། བར་མ་བླངས་པའི་ཕྱོགས་མཐུན་དང་སྡོམ་པ་བླངས་པའི་ཕྱོགས་མཐུན་གཉིས་སམ། བླངས་པ་སྤྱིའི་ཕྱོགས་མཐུན་དང་བླངས་པ་སོ་སོའི་ཕྱོགས་མཐུན་གཉིས་སུ་ཡང་འདུའོ། །གསུམ་པ་ནི། ལྟུང་བ་རྣམ་གཞག་དང་མཐུན་པ་གསུམ་པོ་གང་རུང་གིས་མཐུན་ཞིང་། རང་རིགས་ལྟུང་བ་རྣམ་གཞག་གི་ཀུན་ནས་མ་བསླངས་ལ། བསླབ་པ་གཞན་དུ་མ་བཅས་ཀྱང་ཉེས་པ་དང་བཅས་པ་དེ་ཕྱོགས་མཐུན་གྱི་ལྟུང་བའི་མཚན་ཉིད་དོ། །མཐུན་པ་གསུམ་ནི། དགག་བྱ་ཉེས་དམིགས་མཐུན་པ། སྦྱོར་བ་རྗེས་གྲུབ་མཐུན་པ། བརྒྱུད་པ་རྒྱུར་འགྲོ་མཐུན་པའོ། །དཔེར་ན་དགེ་སློང་གིས་རྐུན་པོར་མ་གྲགས་པ་ལས་ཟས་ལེན་པ་ནི་མ་བྱིན་ལེན་དང་དགག་བྱ་མཐུན་པ་ལྟ་བུ་དང་། དགེ་སློང་གིས་སྔ་དྲོ་སྒོག་པ་ཟ་བ་ནི་དུས་མ་ཡིན་པར་ཁ་ཟས་ཟ་བ་དང་སྦྱོར་བ་རྗེས་གྲུབ་མཐུན་པ་ལྟ་བུ་དང་། ཉིན་མོ་བློས་ཕབ་ནས་ཉལ་བ་ནི་མི་ཚངས་སྤྱོད་དང་བརྒྱུད་པ་རྒྱུར་འགྲོ་མཐུན་པ་ལྟ་བུའོ། །བཞི་པ་ནི། རྟགས་ཀྱི་གཞི་ལས་བྱུང་བའི་བླངས་འདས་དང་ཕྱོགས་མཐུན་གཉིས་ལས། མུ་སྟེགས་ཅན་དང་ཁྱིམ་པའི་གོས་དང་སྣོད་སྤྱད་ཀྱི་རྟགས་འཆང་བ་ནི་དེའི་བླངས་འདས་ཡིན་ཏེ། ཊཱི་ཀར་མུ་སྟེགས་ཅན་གྱི་རྟགས་འཆང་བ་དེ་བཞིན་དུ་རབ་ཏུ་བྱུང་བའི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ་ཞེས་དང་། ལྷུང་བཟེད་ཀྱང་མི་རུང་བ་ཐོགས་ཏེ་བསོད་སྙོམས་ལ་རྒྱུ་བ་ནི་རབ་ཏུ་བྱུང་བ་གཞན་གྱི་རྟགས་དང་འདྲ་བ་དང་། ཁྱིམ་པའི་ལྷུང་བཟེད་འཆང་བ་ནི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་བཤགས་པ་བྱ་བའི་ཉེས་བྱས་སུ་འགྱུར་རོ་ཞེས་གསུངས་པའི་ཕྱིར། དེའི་ཕྱོགས་མཐུན་ནི་རྔ་བལ་ལས་བྱས་པའི་ཆོས་གོས་འཆང་བ་དང་། ཆོས་གོས་ཚད་ལས་ལྷག་པར་འཆང་བ་དང་། བྱེད་དུ་འཇུག་པ་དང་། སྐྲ་འཆན་པས་བྲེགས་པ་ལྟ་བུའོ། །རིན་པོ་ཆེ་བླངས་ནས་བདག་གིར་བྱེད་པ་ནི་སློང་བའི་གཞི་ལས་བྱུང་བའི་བླངས་འདས་ཡིན་ལ། མི་དགོས་བཞིན་དུ་གོས་སློང་བ་དང་། པགས་པ་སློང་བ་སོགས་ནི་སློང་བའི་གཞི་ལས་བྱུང་བའི་ཕྱོགས་མཐུན་ནོ། །རིན་པོ་ཆེ་ལས་བྱས་པའི་ཁབ་རལ་བྱེད་དུ་བཅུག་ནས་བདག་གིར་བྱེད་པ་ནི་སྣོད་ཀྱི་གཞི་ལས་བྱུང་བའི་བླངས་འདས་ཡིན་ལ། བ་སོ་དང་རྭ་སོགས་ལས་ཁབ་རལ་བྱེད་དུ་བཅུག་ནས་འཆང་བ་ལྟ་བུ་ནི་སྣོད་ཀྱི་གཞི་ལས་བྱུང་བའི་ཕྱོགས་མཐུན་ནོ། །དུས་མ་ཡིན་པའི་ཁ་ཟས་ཟ་བ་དང་། མྱོས་འགྱུར་ཐུང་བ་ལྟ་བུ་ནི་ལོངས་སྤྱོད་ཀྱི་གཞི་ལས་བྱུང་བའི་བླངས་འདས་དང་། སྔ་དྲོ་སྒོག་པ་ཟ་བ་ལྟ་བུ་ནི་དེའི་ཕྱོགས་མཐུན་ནོ། །གླུ་གར་དང་རོལ་མོ་བྱེད་པ་ནི་འཕྱར་གཡེང་གི་གཞི་ལས་བྱུང་བའི་བླངས་འདས་དང་། རྒྱུག་མཆོངས་དང་ཀུན་ཏུ་རྩེ་བ་ལྟ་བུ་ནི་དེའི་ཕྱོགས་མཐུན་ནོ། །མི་ཚངས་པར་སྤྱོད་པ་ནི་འདོད་པའི་གཞི་ལས་བྱུང་བའི་བླངས་འདས་དང་། འབྱིན་པ་རེག་པ་འཕྲིག་ཚིག་བསྙེན་བཀུར་བསྔགས་པ་རྣམས་ནི་དེའི་ཕྱོགས་མཐུན་ནོ། །སྲོག་གཅོད་པ་དང་། མ་བྱིན་པར་ལེན་པ་གཉིས་ནི་གནོད་པའི་གཞི་ལས་བྱུང་བའི་བླངས་འདས་དང་། བརྡེག་པ་དང་། བརྡེག་པར་གཟས་པ་དང་། ཟན་གཅོད་དུ་འཇུག་པ་རྣམས་ནི་དེའི་ཕྱོགས་མཐུན་ནོ། །མི་ཚངས་པར་སྤྱོད་འདོད་ཀྱི་བུད་མེད་དང་ལྷན་གཅིག་ཉལ་བ་ནི་གནས་པའི་གཞི་ལས་བྱུང་བའི་བླངས་འདས་དང་། མི་ཚངས་པར་སྤྱོད་འདོད་མེད་པར་བུད་མེད་དང་ལྷན་གཅིག་ཉལ་བ་དང་། དགེ་ཚུལ་བསྙིལ་བ་དང་ལྷན་ཅིག་ཉལ་བ་ནི་དེའི་ཕྱོགས་མཐུན་ནོ། །མཁན་པོ་དང་སློབ་དཔོན་ལ་མ་གུས་པ་ནི་མ་གུས་པའི་གཞི་ལས་བྱུང་བའི་ཕྱོགས་མཐུན་དང་། གསོ་སྦྱོང་དང་དགག་དབྱེ་མི་བྱེད་པ་ནི་མི་སྦྱོང་བའི་གཞི་ལས་བྱུང་བའི་ཕྱོགས་མཐུན་ཡིན་ལ། འདི་གཉིས་ནི་སྡོམ་པ་ཐ་དག་འཇིག་པའི་ཕྱོགས་དང་མཐུན་པའོ། །འོ་ན་ཕམ་པས་ཉམས་པ་དེ་ལྟུང་བ་སྡེ་ལྔའི་གཞི་ལ་སྦྱར་བས་ཉེས་བྱས་ལས་ལྷག་པར་མི་བསྐྱེད་པ་ངེས་སམ་སྙམ་ན། བསླབ་པ་བྱིན་པ་ནི་འདྲ་བ་ཉིད་དོ་ཞེས་ཏེ། འདྲ་བ་ཞེས་པ་གཞིར་བཞག་ནས། གང་འདྲ་ན། བསླབ་པ་སྦྱིན་བྱ་སྤྱོད་བཞིན་པའི་དགེ་སློང་ནི་འདྲ། གང་དང་འདྲ་ན་དགེ་སློང་རྣམ་དག་དང་འདྲ། གང་ལ་འདྲ་ན་སྡེ་ལྔ་བསྐྱེད་པའི་རྟེན་ལ་འདྲ། ཇི་ལྟར་འདྲ་ན་དགེ་སློང་རྣམ་དག་དེས་སྡེ་ལྔའི་གཞི་ལ་སྦྱོར་བ་ལས་སྦྱོར་བའི་ལྟུང་བ་དང་། དངོས་གཞི་དང་། མཐར་ཐུག་གི་ལྟུང་བ་གསུམ་གསུམ་བསྐྱེད་པ་བཞིན་དུ། བསླབ་བྱིན་དགེ་སློང་གིས་ཀྱང་སྡེ་ལྔའི་གཞི་ལ་སྦྱོར་བ་ལས་ལྟུང་བ་དེ་གསུམ་བསྐྱེད་པའོ། །དེའི་དམིགས་བསལ་ནི། དབྱེན་བྱེད་དང་དེ་རྗེས་ཕྱོགས་པའི་ལྟུང་བ་མི་བསྐྱེད་དེ། བསླབ་བྱིན་ལས་ཀྱི་ཁ་སྐོང་དུ་མི་རུང་བའི་ཕྱིར་རོ། །ཁ་ཅིག་ལས་གྲལ་ནས་མ་སྨྲས་པར་འགྲོ་བའི་ལྟུང་བ་ཡང་མེད་ཞེས་གསུངས་སོ། །འོ་ན་བསླབ་པ་བྱིན་པའི་དོན་གང་ཞེ་ན། སྔ་རབ་པ་ནི་ཕམ་པ་འཆབ་མེད་ཀྱིས་སྡོམ་པ་གཏོང་བས། ཡང་སྡོམ་པ་བླངས་ནས་སྔར་གི་སྡོམ་པ་གཏོང་བྱེད་ཀྱི་ཕམ་པ་འདག་ཕྱིར་དུ་ཇི་སྲིད་འཚོའི་བར་དུ་བསླབ་པ་མནོས་ནས་སྤྱོད་དགོས་པར་བཞེད། མདོ་སྡེ་པས་ནི་འཆབ་སེམས་མ་གཏོགས་པའི་ཡན་ལག་གཞན་ཚང་གིས་བསྐྱེད་པའི་ཕམ་པར་གཏོགས་པའི་སྦོམ་པོ་ལྕི་བ་འདག་ཕྱིར་ཚེ་ཇི་སྲིད་འཚོའི་བར་དུ་བསླབ་པ་ནོད་པར་བཞེད། འདིར་ཁ་ཆེ་བྱེ་བྲག་ཏུ་སྨྲ་བ་ནི་ཕམ་པ་འཆབ་བཅས་དང་འཆབ་མེད་གང་བྱུང་ཀྱང་སྡོམ་པ་མི་གཏོང་ཞིང་། འཆབ་མེད་ལ་ཕྱིར་བཅོས་རུང་བས་ཕམ་པ་འདག་ཕྱིར་དུ་ཚེ་ཇི་སྲིད་བར་དམན་སྤྱོད་དང་དུ་ལེན་ཅིང་ཁྱད་པར་ཅན་གྱི་སྤྱོད་པ་སྤོང་བའི་བསླབ་པར་ནོས་ནས་སྤྱོད་པར་བཞེད་དོ། །བསླབ་བྱིན་དགེ་སློང་ཞེས་པ་ནི་མཚོན་པ་སྟེ། དགེ་ཚུལ་དང་དགེ་སློབ་མ་བསླབ་པ་བྱིན་པ་ཡང་ཡོད་དོ། །འོད་ལྡན་ལས། འོ་ན་ཅི་དགེ་ཚུལ་ལ་བསླབ་པ་བྱིན་པ་ཡང་ཡོད་དོ་ཅེ་ན། ཡོད་དོ་ཞེས་དང་། ཕྲན་ཚེག་ཊཱི་ཀ་ལས་དགེ་སློང་དག་ཇི་ལྟ་བུ་གཞན་ལ་ཡང་བསླབ་པ་བྱིན་ཅིག་ཞེས་གསུངས་སོ། །འདིའི་ཊཱི་ཀར་ཇི་ལྟར་དགེ་སློང་གིས་དགེ་སློང་ལ་བརྡེགས་པ་དང་། གཟས་པ་དང་། འགྱོད་པ་བསྐྱེད་པ་དང་། སྐྲོད་པ་ལ་སོགས་པ་བྱེད་པ་ལ་ལྟུང་བྱེད་དུ་འགྱུར་བ་དེ་བཞིན་དུ། དགེ་སློང་གིས་བསླབ་པ་བྱིན་པ་ལ་དེ་དག་བྱས་ན་ཡང་དགེ་སློང་ལ་ལྟུང་བྱེད་དུ་འགྱུར་རོ་ཞེས་པའི་དོན་ལ། ཁ་ཅིག་སྒྲ་ཇི་བཞིན་པར་འཆད་པ་མི་འཐད་དེ། བསྙེན་པར་མ་རྫོགས་པ་དང་ལྡན་པ་ཞེས་སོགས་དང་འགལ་བའི་ཕྱིར། ཁ་ཅིག་རྣམ་དག་གིས་རྣམ་དག་ལ་དེ་དག་བྱས་པ་ལ་ལྟུང་བྱེད་དུ་འགྱུར་བ་དེ་བཞིན་དུ། བསླབ་བྱིན་གྱིས་བསླབ་བྱིན་ལ་དེ་དག་བྱས་པ་ལ་ལྟུང་བྱེད་དུ་འགྱུར་བའི་དོན་དུ་བཞེད་པ་ཡང་མི་འཐད་དེ། དེ་ལ་ནི་མ་ཡིན་ནོ་ཞེས་པ་དང་ཟློས་པར་འགྱུར་བའི་ཕྱིར། རང་ལུགས་ནི་བསླབ་བྱིན་དང་རྣམ་དག་ལྟུང་བ་བསྐྱེད་ཚུལ་འདྲ་སྟེ། རང་འགྲེལ་ལས་དགེ་སློང་གཞན་དག་ལྟུང་བ་ལ་སྦྱོར་བ་བཞིན་དུ་འདིས་ཀྱང་ལྷག་པར་སྤྱད་པས་དགེ་སློང་ལ་བརྡེག་པ་དང་། གཟས་པ་དང་། འགྱོད་པ་བསྐྱེད་པ་དང་། སྐྲོད་པར་བྱེད་ན་ལྟུང་བྱེད་དུ་འགྱུར་ཞེས་གསུངས་པའི་ཕྱིར། འོ་ན་རྣམ་དག་གི་ཡུལ་གྱི་དགེ་སློང་ལ་རྣམ་དག་དགོས་པ་བཞིན་དུ། བསླབ་བྱིན་གྱི་ཡུལ་གྱི་དགེ་སློང་ལ་བསླབ་བྱིན་ངེས་པར་དགོས་སམ་སྙམ་ན། བསླབ་བྱིན་གྱི་ཡུལ་ལ་རྣམ་དག་གིས་ཀྱང་བསྐྱེད་ཅེས་དོགས་སྤོང་ཡིན་པས། དེས་ན་རྣམ་དག་གིས་རྣམ་དག་ལ་བརྡེག་གཟས་སོགས་བྱས་པས་ལྟུང་བྱེད་དུ་འགྱུར་བ་བཞིན་དུ། བསླབ་བྱིན་གྱིས་དགེ་སློང་རྣམ་དག་ལ་དེ་དག་བྱས་ན་ཡང་ལྟུང་བྱེད་དུ་འགྱུར་ཞེས་འདོན་པ་བསྒྱུར་བར་བྱ་བ་ཡིན་ཏེ། བརྡེག་གཟས་ཀྱི་ལྟུང་བྱེད་བཤད་པའི་སྐབས་ཀྱི་འགྲེལ་པ་ལ། བྱ་འདུལ་ཆེན་པོས་དེ་ལྟར་མཛད་ཅིང་དཔེ་དོན་དེ་ལྟར་སྦྱོར་བ་གཞུང་གི་སྐབས་དང་ཡང་འགྲིག་གོ །འདྲ་བའི་རྒྱུ་མཚན་ནི་བསྙེན་པར་རྫོགས་པའི་སྡོམ་པ་དགོས་པ་སྒྲུབ་ནུས་དང་ལྡན་པའི་ཕྱིར་འདྲ་བ་བསྟན་པའི་དགོས་པ་ནི། བསླབ་བྱིན་ནི་རྣམ་གྲངས་ཀྱི་བསྙེན་པར་མ་རྫོགས་པ་ཡིན་པས་སྡེ་ལྔའི་དངོས་གཞི་མི་བསྐྱེད་དོ་སྙམ་པའི་དོགས་པ་བསལ་བ་དང་། བསླབ་པ་བྱིན་པ་ཡང་བསྙེན་པར་རྫོགས་པ་ཡིན་པས་དགེ་སློང་དང་འདྲ་བར་བསླབ་དགོས་པ་གོ་བ་དང་། ལུང་དུ་གཞི་དུ་མ་ལ་སྦྱར་བ་འདིར་སྤྱིར་བསྟན་ནས། ཚིག་ཚོགས་ཀྱུང་བའི་དགོས་པ་ཡང་ཡོད་དོ། །ཞར་བྱུང་ནི་འོ་ན་བསླབ་བྱིན་དེས་སྡེ་ལྔ་ཀ་བསྐྱེད་པའི་རྟེན་དུ་དགེ་སློང་རྣམ་དག་དང་འདྲ་ན། ཡུལ་ལ་ཡང་རྣམ་དག་དང་འདྲའམ་སྙམ་ན། བསྙེན་པར་མ་རྫོགས་པ་དང་ལྡན་པའམ་འདྲ་བ་ཉིད་ཀྱང་ཡིན་ནོ་ཞེས་ཏེ། འདྲ་ཞེས་པ་གཞིར་གཞག གང་འདྲ་ན་བསླབ་བྱིན་ནི་འདྲ། གང་དང་འདྲ་ན་བསྙེན་པར་མ་རྫོགས་པ་དགེ་ཚུལ་སོགས་དང་འདྲ། གང་ལ་འདྲ་ན་རྣམ་དག་གི་ཡུལ་ལ་འདྲ། ཇི་ལྟར་འདྲ་ན་རྣམ་དག་ལ་མ་རྫོགས་པས་འགྲུབ་པ་བྱིན་ལེན་སོགས་བསླབ་བྱིན་གྱིས་ཀྱང་འགྲུབ། མ་རྫོགས་པ་ཡུལ་དུ་བྱས་པས་བསྐྱེད་པ་འདོན་པའི་ལྟུང་བྱེད་སོགས་མ་རྫོགས་པ་སྤྱིས་བསྐྱེད་བཞི་ནི་བསླབ་བྱིན་གྱིས་ཀྱང་བསྐྱེད། རྣམ་དག་གིས་ཡུལ་དུ་མ་རྫོགས་པ་བྱས་པས་མི་བསྐྱེད་པ་ཕྲ་མ་བྱེད་པའི་ལྟུང་བྱེད་སོགས་བསླབ་བྱིན་གྱིས་ཀྱང་མི་བསྐྱེད་པའི་ཕྱིར། དམིགས་བསལ་ནི་སྐུར་འདེབས་ཀྱི་ལྟུང་བ་དངོས་གཞི་གསུམ་དང་། གནས་ངན་ལེན་བརྗོད་པ་དང་གནས་ངན་ལེན་འཆབ་པའི་ལྟུང་བྱེད་གཉིས་དང་ལྔ་པོ་བསླབ་བྱིན་ཡུལ་དུ་བྱས་པས་ཀྱང་བསྐྱེད་དོ། །འདྲ་བའི་རྒྱུ་མཚན་ནི། རྩ་བའི་ལྟུང་བ་བྱུང་ཞིང་དེའི་ཆད་ལས་ལ་གནས་དུ་ཚེ་བའི་ཕྱིར། འདྲ་བར་བསྟན་པའི་དགོས་པ་ནི། བསླབ་པ་བྱིན་པ་དེ་ཐམས་ཅད་དུ་དགེ་སློང་གཞན་དང་འདྲའོ་སྙམ་པའི་དོགས་པ་བསལ་ནས་བྱིན་ལེན་བསོག་འཇོག་སོགས་ལ་དགེ་སློང་རང་བཞིན་དུ་གནས་པ་གཞན་དང་མི་འདྲ་བར་གོ་བའི་ཆེད་ཡིན་ནོ། །ཊཱི་ཀར་མདོ་འདིས་ནི། དགེ་སློང་གཞན་གྱི་ཡུལ་ལ་དགེ་སློང་ཐ་མལ་པ་གཞན་དང་མི་འདྲ་བར་བསྟན་ནོ་ཞེས་སོ། །འོ་ན་བསླབ་བྱིན་དེས་བསླབ་བྱིན་གཞན་ལ་ལྟོས་ནས་ཀྱང་བསྙེན་པར་མ་རྫོགས་པ་དང་འདྲའམ་ཞེ་ན། དེ་ལ་ནི་མ་ཡིན་ནོ་ཞེས་ཏེ་བསླབ་བྱིན་དེ་ལྟར་མཚན་མཐུན་པའི་བསླབ་བྱིན་གཞན་ལ་ལྟོས་ནས་བསྙེན་པར་མ་རྫོགས་པ་དང་འདྲ་བ་མ་ཡིན་ཏེ། མ་རྫོགས་པས་བསླབ་བྱིན་གཞན་ལ་འགྲུབ་པ་བྱིན་ལེན་སོགས་བསླབ་བྱིན་གྱིས་མི་འགྲུབ། མ་རྫོགས་པ་ཡུལ་དུ་བྱས་པས་བསྐྱེད་པ་འདོན་པའི་ལྟུང་བྱེད་སོགས་བསླབ་བྱིན་གྱིས་མི་བསྐྱེད། བསླབ་བྱིན་གཞན་གྱིས་མ་རྫོགས་པ་ཡུལ་དུ་བྱས་པས་མི་བསྐྱེད་པ་ཕྲ་མ་བྱེད་པའི་ལྟུང་བྱེད་སོགས་བསླབ་བྱིན་ཡུལ་དུ་བྱས་པས་བསྐྱེད་པའི་ཕྱིར། འདི་དག་གི་ཁུངས་ནི་བཙུན་པ་རེ་ཞིག་དགེ་སློང་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གསུམ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློང་གིས་གསོག་འཇོག་བྱས་པ་དང་། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་དགེ་སློང་མ་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ་གསུམ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་ལ་རྒྱུ་དུས་གསོག་འཇོག་བགྱིས་པར་འགྱུར། བཞིས་ཏེ་བཞི་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། བསླབ་པ་བྱིན་པས་གསོག་འཇོག་བྱས་པ་དང་། དགེ་སློང་གིས་གསོག་འཇོག་བྱས་པ་དང་། དགེ་སློང་གིས་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་མོ་ལ་རྒྱུ་དུས་གསོག་འཇོག་བགྱིས་པར་འགྱུར། བཞིས་ཏེ་བཞི་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། བསླབ་པ་བྱིན་པ་མོས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་ཊཱི་ཀར་དྲངས་སོ། །འོ་ན་བསླབ་བྱིན་མོ་དེ་ཉམས་པ་ཡིན་ཞིང་། དགེ་སློབ་མ་དེ་རྣམ་དག་ཡིན་པས་བསླབ་བྱིན་མོ་དེ་དགེ་སློབ་མ་ལ་ལྟོས་ཏེ་བསྙེན་པར་མ་རྫོགས་པ་དང་ལྡན་པ་ཡིན་ནམ་སྙམ་ན། དགེ་སློབ་མ་ལ་ཡང་ངོ་ཞེས་ཏེ་བསླབ་བྱིན་མོ་དེ་དགེ་སློབ་མ་ལ་ལྟོས་ཏེ་བསྙེན་པར་མ་རྫོགས་པ་དང་འདྲ་བ་མ་ཡིན་ཏེ། བསླབ་བྱིན་མོས་བྱིན་ལེན་དང་གསོག་འཇོག་བྱས་པས་དགེ་སློབ་མས་བྱིན་ལེན་དང་གསོག་འཇོག་བྱས་པར་འགྱུར་ལ། འདོན་པའི་ལྟུང་བྱེད་སོགས་དགེ་སློབ་མ་ཡུལ་དུ་བྱས་པས་ཀྱང་བསྐྱེད་པའི་ཕྱིར། ལུང་ཞུ་བ་ལས་བཙུན་པ་རེ་ཞིག་དགེ་སློབ་མ་ལ་རྒྱུ་དུས་གསོག་འཇོག་བགྱིས་པར་འགྱུར། ལྔས་ཏེ་ལྔ་གང་ཞེ་ན་བདག་ཉིད་ཀྱིས་གསོག་འཇོག་བྱས་པ་དང་། དགེ་སློབ་མས་གསོག་འཇོག་བྱས་པ་དང་། བསླབ་པ་བྱིན་པ་མོས་གསོག་འཇོག་བྱས་པ་དང་། དགེ་སློང་མས་གསོག་འཇོག་བྱས་པ་དང་། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་གསུངས་སོ། །འདིར་ལྡན་པའི་དོན་འདྲ་བར་བཤད་པ་ནི། ལྡན་པ་དང་འདྲ་བ་གཉིས་ཀའི་སྐད་དོད་ཝ་ཏུ་ཅེས་འབྱུང་ལ། དེ་ཉིད་ཝ་ཏུ་རྐྱེན་ཅན་དུ་བཤད་པའི་ཚེ་དང་ལྡན་པ་དང་། ཝ་ཏིའི་ཀྱི་རྐྱེན་ཅན་དུ་བཤད་པའི་ཚེ་འདྲ་བ་ལ་འཇུག་སྟེ། རྣམ་འགྲེལ་དུ་ཏཾ་དྭཾ་ཏྲ་ཅེས་པའི་སམ་སྐྲྀ་ཏའི་སྒྲ་གཅིག་ཉིད་ལ། དེ་ལྡན་བཅོམ་ལྡན་ཚད་མ་ཉིད། །ཅེས་དང་། དེ་བཞིན་བཅོམ་ལྡན་ཚད་མ་ཉིད། །ཅེས་པའི་འགྱུར་གཉིས་འབྱུང་བ་བཞིན་ནོ། །གཉིས་པ་བསམ་པའི་ཡན་ལག་སེལ་བ་དང་བཅས་པ་ལ་གསུམ་སྟེ། གཞན་འདོད་དགག སྐབས་དོན་ལ་སྦྱར། རྟོགས་པར་བྱ་བའི་དོན་བཤད་པའོ། །དང་པོ་ནི། ཁ་ཅིག་འགྲོ་བ་གཞན་གྱི་རྣམ་པ་ཞེས་སོགས་ཀྱི་གཞུང་འདིས་བསམ་པའི་ཡན་ལག་སྟོན་པ་མ་ཡིན་གྱི། སྡེ་ལྔ་བསྐྱེད་པའི་རྟེན་སྡོམ་པ་གསོ་རུང་དང་ལྡན་པ་ལ་ལྡན་པར་འདུ་ཤེས་པ་དགོས་པར་སྟོན་ཏེ། འདིར་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལའོ་ཞེས་དང་། སུམ་བརྒྱ་པར། སྡོམ་བརྩོན་སྡོམ་བརྩོན་ཉིད་དུ་འདུ་ཤེས་ན། །དངོས་གཞིའོ་ཞེས་གསུངས་ཤིང་། སྡོམ་ལྡན་དུ་འདུ་ཤེས་ནས་ཉེས་སྤྱོད་ལ་འཇུག་པ་ན་ཁྱད་གསོད་འབྱུང་བའི་ཕྱིར་ཟེར་བ་ནི་མི་འཐད་དེ། བདག་ནི་ཉམས་པའོ་སྙམ་པའི་བསམ་པ་ཅན་ལ་ཡང་མེད་དོ་ཞེས་གསུངས་ཤིང་། དེད་དཔོན་འཆང་བ་ཅན་གྱིས་བདག་ནི་ཉམས་པའོ་སྙམ་ནས་མི་ཚངས་པར་སྤྱོད་པ་ལས་ཕམ་པར་འགྱུར་བར་གསུངས་པའི་ཕྱིར། ལྟུང་བ་བསྐྱེད་པའི་རྒྱུར་ཁྱད་གསོད་དགོས་པ་ཡང་མི་འཐད་དེ། མི་ཤེས་པ་དང་བག་མེད་པ་ཡང་ལྟུང་བ་འབྱུང་བའི་རྒྱུར་བཤད་པའི་ཕྱིར། གཉིས་པ་སྐབས་དོན་ལ་སྦྱར་བ་ནི། ཁ་ཅིག་ལྟུང་བ་སྡེ་ལྔ་བསྐྱེད་པ་ལ་ཤེས་པ་རང་བཞིན་དུ་གནས་པ་དགོས་ཟེར་བ་མི་འཐད་དེ། འདིར་འགྲོ་བ་གཞན་གྱི་རྣམ་པ་བརྟེན་པ་དང་དགེ་སློང་གི་འདུ་ཤེས་ཡོད་པ་གཉིས་སྦྱར་ནས་གསུངས་པའི་ཕྱིར་དང་། འདི་བསྡུས་པའི་ཞུ་བར་བཙུན་པ་དགེ་སློང་བདག་ཉིད་དུད་འགྲོའི་སྐྱེ་གནས་སུ་བསྒྱུར་བར་འགྱུར་ཏེ། མིའི་སྲོག་དང་བྲལ་བར་བྱས་ན་ཅིར་འགྱུར། ཉེ་བར་འཁོར་བདག་ནི་དགེ་སློང་ཡིན་ལ་བྱ་བ་མ་ཡིན་པ་བྱེད་སྙམ་དུ་འདུ་ཤེས་ན་མཐར་འགྱུར་རོ་ཞེས་གཟུགས་གཞན་དུ་བསྒྱུར་བ་ལ་དོགས་པ་བཅད་པའི་ཕྱིར་རོ། །འོ་ན་ཤེས་པ་རང་བཞིན་དུ་མི་གནས་པས་ལྟུང་བ་ལ་སྦྱར་ན་ཅིར་འགྱུར་ཞེ་ན། ཤེས་པ་རང་བཞིན་དུ་མི་གནས་པ་ལ་བརྒྱད་དེ། སྨྱོ་བ། སེམས་འཁྲུགས་པ། ཚོར་བས་གཟིར་བ། འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་བརྗེད་པ་དང་བཞི། གཉིད་ལོག་པ། སྙོམས་པར་ཞུགས་པ། ར་རོ་བ། དེའི་དོད་ཐུབ་དང་བཞིའོ། །དང་པོ་བཞིའི་སྐབས་སུ་སྦྱོར་ལྟུང་དང་དངོས་གཞིའི་ལྟུང་བ་གཏན་མེད། ཕྱི་མ་བཞིའི་སྐབས་སུ་ལྟུང་བ་གསར་དུ་ཀུན་ནས་སློང་བ་མེད་ཀྱང་སྐབས་གཞན་དུ་སྦྱོར་བ་བྱས་ཏེ། དེ་རྣམས་ཀྱི་སྐབས་སུ་མཐར་ཐུག་འགྲུབ་པ་ཡོད་དེ། བུད་མེད་དང་གནས་གཅིག་ཏུ་ལྷན་ཅིག་གཉིད་ལོག་ནའོ་ཞེས་དང་། ཁང་པ་བྱེད་དུ་བཅུག་ནས་སྙོམས་པར་ཞུགས་པའི་ཚེ་ཁང་པ་གྲུབ་ན་དགེ་འདུན་ལྷག་མར་གསུངས་པའི་ཕྱིར། གསུམ་པ་རྟོགས་བྱའི་དོན་བཤད་པ་ནི། ཁ་ཅིག་སྲོག་གཅོད་བཞི། མ་བྱིན་ལེན་ཕམ་ལྷག་དང་པོ་གཉིས་ལས་གཞན་པའི་ལྟུང་བ་བསྐྱེད་པ་ལ་གཟུགས་གཞན་དུ་མ་བསྒྱུར་བ་དགོས་ཤིང་། བདུན་པོ་དེ་ལ་གཟུགས་བསྒྱུར་མ་བསྒྱུར་འདྲ་ཞེས་ཟེར་བ་མི་འཐད་དེ། བམ་ལྔ་ལས་ཕམ་པ་བཞི་དང་ལྷག་མ་བཅུ་གསུམ་པོ་ཐམས་ཅད་ལ་དགེ་སློང་གིས་འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་ན་ན་སྨད་པ་མེད་ཅེས་རེ་རེ་ལ་སྦྱར་ནས་གསུངས་པའི་ཕྱིར། གཞན་ཡང་བདུན་པོ་ལས་གཞན་པའི་ལྟུང་བ་བསྐྱེད་པ་ལ་གཟུགས་གཞན་དུ་མ་བསྒྱུར་བ་མི་དགོས་པར་ཐལ། འགྲོ་བ་གཞན་གྱི་རྣམ་པ་བསྟན་པ་དགེ་སློང་གི་འདུ་ཤེས་ཡོད་པ་དེ་ལྟུང་བ་ལ་སྦྱོར་བས་དགེ་སློང་གཞན་དང་འདྲ་བར་ལྟུང་བ་རྫོགས་པར་བསྐྱེད་པའི་ཕྱིར་ཏེ། ཊཱི་ཀར་དགེ་སློང་སྔགས་དང་སྨན་ལ་སོགས་པའི་དབང་གིས་འགྲོ་བ་གཞན་གྱི་རྣམ་པ་ཞེས་བྱ་བ་དུད་འགྲོ་ལ་སོགས་པའི་གཟུགས་སུ་བསྒྱུར་བས་གཟུགས་དེས་མི་ཚངས་པར་སྤྱོད་པ་ལ་སོགས་པའི་བྱ་བ་མ་ཡིན་པ་བྱེད་པ་དེའི་ཚེ་བདག་ནི་དགེ་སློང་ཡིན་ནོ་སྙམ་དུ་འདུ་ཤེས་པར་གྱུར་ནས་ལྟུང་བ་ལ་སྦྱོར་བ་ནི་དགེ་སློང་གཞན་དང་འདྲ་བ་ཉིད་དེ། ཇི་ལྟར་དགེ་སློང་གཞན་ལྟུང་བ་ལ་སྦྱོར་བ་ལ་གཞི་ཇི་ལྟར་བ་ལས་ཁ་ན་མ་ཐོ་བར་འགྱུར་བ་བཞིན་དུ་དེ་ལ་ཡང་འགྱུར་རོ་ཞེས་སྡེ་ལྔ་ཀ་བསྐྱེད་པ་ལ་སྦྱར་ནས་གསུངས་པའི་ཕྱིར། འོན་ཀྱང་བལ་ཁུར་བ་དང་ས་བོན་འཇོམས་པའི་ལྟུང་བྱེད་སོགས་གཟུགས་བསྒྱུར་བས་ལྟུང་བ་མི་རྫོགས་པ་འགའ་ཞིག་ལ་དམིགས་བསལ་དགོས་སོ། །འོ་ན་མི་མིན་མིར་སྤྲུལ་པ་དེས་སྡོམ་པ་བླངས་ཀྱང་མི་སྐྱེ་བས་དགེ་སློང་གིས་མི་མ་ཡིན་དུ་སྤྲུལ་པའི་ཚེ་སྡོམ་པ་འཇིག་ཅིང་དེའི་དབང་གིས་ལྟུང་བ་ཡང་མེད་དམ་སྙམ་ན་ཞེས་པའམ། ཡང་གཟུགས་མ་བསྒྱུར་བ་ལ་ལྟུང་བ་རྫོགས་མོད་བསྒྱུར་བ་ལ་ཅིར་འགྱུར་ཞེ་ན། འགྲོ་བ་ཞེས་སོགས་སྨོས་ཏེ་དགེ་སློང་གིས་སྔགས་རྫས་སོགས་ཀྱི་མཐུས་མིའི་འགྲོ་བ་ལས་གཞན་དུ་དུད་འགྲོ་ལྟ་བུའི་རྣམ་པའམ་དབྱིབས་བསྟེན་པ་ན་བདག་ནི་དགེ་སློང་ཡིན་ནོ་སྙམ་དུ་དགེ་སློང་གི་འདུ་ཤེས་ཡོད་པ་ན། དགེ་སློང་གཞན་དུ་འདྲ་བར་ལྟུང་བ་རྫོགས་པར་བསྐྱེད་དོ། །དེའི་ཚེ་དགེ་སློང་གི་འདུ་ཤེས་མེད་ན་ཅིར་འགྱུར་སྙམ་ན། མེད་ན་ནི་ན་སྨད་པ་ཉིད་དོ་ཞེས་ཏེ་དགེ་སློང་གིས་སྔགས་རྫས་སོགས་ཀྱིས་དུད་འགྲོར་བསྒྱུར་བའི་ཚེ་བདག་ནི་དགེ་སློང་ངོ་སྙམ་པའི་འདུ་ཤེས་མེད་ཅིང་དུད་འགྲོ་དེ་ཉིད་དུ་འདུ་ཤེས་ན་ན་སྨད་པ་ཉིད་དོ་སྔར་གི་སྦྱོར་ལྟུང་ཙམ་དུ་འགྱུར་གྱི། མཐར་ཐུག་གི་ལྟུང་བ་མེད་དེ་དེའི་ཚེ་ཤེས་པ་རང་བཞིན་མི་གནས་པར་སོང་བའི་ཕྱིར་རོ། །གསུམ་པ་ཚིགས་ཀྱི་ཡན་ལག་ཞར་བྱུང་དང་བཅས་པ་ལ་གཉིས་ཀྱི། དང་པོ་སྤྱི་དོན་ལ་གཉིས་ཏེ། གཙོ་བོ་མ་ཡིན་པའི་དོན་དང་། གཙོ་བོའི་དོན་ནོ། །དང་པོ་ལ། སྡོམ་གསུམ་རིམ་གྱིས་མནོས་པའི་དགེ་སློང་དེ་ལ་སྡོམ་པ་གསུམ་ཇི་ལྟར་ལྡན་པའི་ཚུལ་དང་། དེས་ལྟུང་བ་ཇི་ལྟར་བསྐྱེད་པའི་ཚུལ་གཉིས་ལས། དང་པོ་ནི། ཁ་ཅིག་སྡོམ་པ་སྤོང་སེམས་ཡིན་པས་སྡོམ་པ་གཞན་གཉིས་བག་ལ་ཞ་བའི་ཚུལ་དུ་ལྡན་ཞེས་ཟེར་བ་མི་འཐད་དེ། བསྟན་བཅོས་འདིའི་ལུགས་ཀྱི་སྡོམ་པ་གཟུགས་ཅན་དུ་ཁས་ལེན་དགོས་པའི་ཕྱིར་ཏེ། མཛོད་དུ། དང་པོའི་རྣམ་རིག་རྣམ་རིག་མིན། །ཞེས་དང་། རྣམ་རིག་མིན་རྣམ་གསུམ་ཞེས་བྱ། །ཞེས་དང་། བམ་ལྔ་ལས་དགེ་སློང་གི་སྡོམ་པ་རིག་བྱེད་མ་ཡིན་པའི་གཟུགས་སུ་གསུངས་པའི་ཕྱིར། རང་ལུགས་ནི། སྡོམ་པ་གཟུགས་ཅན་ཡིན་པས་དེའི་རྒྱུད་ལ་སྡོམ་གསུམ་ངོ་བོ་ཐ་དད་དུ་ཡོད་དེ། མཛོད་དུ། ཐ་དད་དེ་དག་འགལ་བ་མེད། །ཅེས་གསུངས་པའི་ཕྱིར། དཔེར་ན་དགེ་སློང་གི་སྤོང་བདུན་ངོ་བོ་ཐ་དད་དུ་གནས་པ་བཞིན་ནོ། །གཉིས་པ་དེས་ལྟུང་བ་ཇི་ལྟར་བསྐྱེད་པའི་ཚུལ་ལ་ཁ་ཅིག་སྡོམ་གསུམ་རིམ་གྱིས་མནོས་པའི་དགེ་སློང་དེས་མི་གསད་ན་དགེ་སློང་གི་བསླབ་པ་དང་འགལ་བའི་ཆ་ནས་ཕམ་པ། དགེ་ཚུལ་གྱི་བསླབ་པ་དང་འགལ་བའི་ཆ་ནས་ཕམ་འདྲའི་ཉེས་བྱས། དགེ་བསྙེན་གྱི་བསླབ་པ་དང་འགལ་བའི་ཆ་ནས་བསོད་ནམས་མ་ཡིན་པ་དང་གསུམ་བསྐྱེད་ཅིང་། དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་དགེ་སློང་གི་དུས་སུ་མཐར་ཐུག་གྲུབ་ན་དགེ་ཚུལ་གྱི་སྡོམ་པ་དང་འགལ་བའི་ཕམ་འདྲའི་ཉེས་བྱས་དང་། དགེ་སློང་གི་སྡོམ་པ་དང་འགལ་བའི་སྦོམ་པོ་གཉིས་འབྱུང་ཞེས་ཟེར་བ་ལ། གཞན་དག་ན་རེ་དེ་ལ་ཕམ་པ་སོགས་གསུམ་བསྐྱེད་པ་མི་འཐད་དེ། དེ་ལྟར་བསྐྱེད་པའི་བཅས་པ་མ་མཛད་པའི་ཕྱིར་ཏེ། དེ་འདྲའི་བཅས་པ་མཛད་པ་ལ་དགོས་པ་མེད་པའི་ཕྱིར་ཏེ། མི་བསད་པས་ཕམ་པ་བསྐྱེད་པའི་བཅས་པ་མཛད་པས་ཉེས་སྤྱོད་ལས་བཟློག་མི་ནུས་ན་ཕམ་འདྲའི་ཉེས་བྱས་དང་བསོད་ནམས་མ་ཡིན་པར་འགྱུར་ཞེས་བཅས་པས་བཟློག་མི་ནུས་པའི་ཕྱིར། གཞན་ཡང་། ཕམ་པ་འཆབ་མེད་བྱུང་བའི་དགེ་སློང་དེས། ཕམ་པ་འཆབ་མེད་འདག་ཕྱིར་དུ་བསླབ་པ་སྤྱོད་པ་ལས་ལོགས་སུ་ཕམ་འདྲའི་ཉེས་བྱས་འཆབ་མེད་འདག་ཕྱིར་དུ་ཡང་བསླབ་པ་སྤྱོད་དགོས་པར་ཐལ། དེ་ལ་ཕམ་པ་འཆབ་མེད་དང་ཕམ་འདྲའི་ཉེས་བྱས་འཆབ་མེད་གཉིས་ཀ་བྱུང་བའི་ཕྱིར། རྟགས་ཁས། ཁྱབ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ། །ཞེས་གསུངས་པའི་ཕྱིར། འདོད་ན་ཕམ་པའི་བསླབ་པ་སྤྱོད་པའི་ཆ་ནས་དགེ་སློང་རྣམས་ཀྱི་གྲལ་ཞབས་སུ་འཁོད་པར་བྱ་བ་དང་། ཕམ་འདྲའི་ཉེས་བྱས་ཀྱི་བསླབ་པ་སྤྱོད་པའི་ཆ་ནས་དགེ་ཚུལ་རྣམས་ཀྱི་གྲལ་ཞབས་སུ་འཁོད་རིགས་པར་འགྱུར་རོ། །གཞན་ཡང་། དགེ་ཚུལ་གྱི་དུས་སུ་མི་གསོད་པའི་སྦྱོར་བ་བྱས་ནས་དགེ་སློང་གི་དུས་སུ་མཐར་ཐུག་གྲུབ་པའི་དགེ་སློང་དེ་རྣམ་དག་ཡིན་ནམ་མ་ཡིན། དང་པོ་ལྟར་ན་མ་ཡིན་པར་ཐལ། རྩ་ལྟུང་བྱུང་བའི་ཕྱིར། ཕྱི་མ་ལྟར་ན་ཕམ་པ་བྱུང་བར་ཐལ། རྩ་ལྟུང་བྱུང་བའི་ཆ་ནས་དགེ་སློང་རྣམ་དག་མ་ཡིན་པའི་ཕྱིར། ཕམ་པ་མ་བྱུང་བ་དགོས་མེད་དུ་ཐལ། དགེ་སློང་རྣམ་དག་མིན་པའི་ཕྱིར། ཞེས་ཟེར་བ་ལ་ལན་རིམ་པ་བཞིན། དགེ་སློང་གིས་མི་བསད་པས་ཕམ་པ་དང་། ཉེས་བྱས་དང་། སྦོམ་པོ་གསུམ་བསྐྱེད་པའི་བཅས་པ་གསུམ་མཛད་པ་དོན་མེད་པར་ཐལ། མི་བསད་པའི་ཕམ་པར་འགྱུར་བའི་བཅས་པ་མཛད་པས་ཉེས་སྤྱོད་ལས་བཟློག་མ་ནུས་ན་སྦོམ་པོ་དང་ཉེས་བྱས་ཀྱི་བཅས་པ་མཛད་པས་བཟློག་མི་ནུས་པར་མཚུངས་པའི་ཕྱིར། གཞན་ཡང་། དགེ་སློང་གིས་དེ་བཞིན་གཤེགས་པ་ལ་ངན་སེམས་ཀྱི་ཁྲག་ཕྱུང་བས་སྦོམ་པོར་འགྱུར་བའི་བཅས་པ་དོན་མེད་པར་ཐལ། མཚམས་མེད་དུ་འགྱུར་བར་བསྟན་པས་བཟློག་མ་ནུས་ན། སྦོམ་པོའི་བཅས་པ་མཛད་པས་བཟློག་མི་ནུས་པའི་ཕྱིར། གཞན་ཡང་། སྡོམ་གསུམ་རིམ་གྱིས་མནོས་པའི་དགེ་སློང་དེས་དགེ་སློང་གི་བསླབ་པའི་གནས་རྣམས་ལས་མི་འདའ་བར་བྱའོ་སྙམ་པའི་བསྲུང་སེམས་ལས་ལོགས་སུ་དགེ་ཚུལ་གྱི་བསླབ་པ་བསྲུང་སེམས་བསྟེན་དགོས་པར་ཐལ། དེས་སྡོམ་པ་གསུམ་ཆར་བསྲུང་དགོས་པའི་ཕྱིར། ཁྱབ་པ་ཁས། འདོད་ན་དེ་དགེ་ཚུལ་གྱི་སྡོམ་པ་བསྲུང་བའི་ཆ་ནས་དགེ་ཚུལ་གྱི་བསླབ་གྲལ་དང་། དགེ་སློང་གི་སྡོམ་པ་བསྲུང་བའི་ཆ་ནས་དགེ་སློང་གི་བསླབ་གྲལ་དུ་འཇོག་རིགས་པར་ཐལ་ལོ། །ཡང་ཁྱེད་ལྟར་ན། ཕམ་འདྲའི་ཉེས་བྱས་འཆབ་མེད་བྱུང་བའི་དགེ་ཚུལ་བསྙེན་པར་རྫོགས་པའི་དགེ་སློང་དེ་རྣམ་དག་ཡིན་ནམ་མ་ཡིན་དྲིས་ན་སྔར་གྱི་སྐྱོན་དེ་ཁྱེད་ལ་ཡང་མཚུངས་སོ། །དེས་ན་རང་ལུགས་ནི། དེས་རྒྱུད་ལ་སྡོམ་པ་གསུམ་ཀ་མངོན་གྱུར་དུ་ཡོད་ཀྱང་འོག་མ་གཉིས་ཀྱི་ཕྱེད་པ་བག་ལ་ཞ་བའི་ཚུལ་དུ་གནས་ཏེ། ཉི་མ་དང་ཟླ་བའི་འོད་བཞིན་ནོ། །དེས་ན་དགེ་སློང་གིས་མི་བསད་པའི་ཚེ་ཕམ་པ་ཁོ་ན་བསྐྱེད་ཀྱི། ཕམ་འདྲའི་ཉེས་བྱས་དང་། བསོད་ནམས་མ་ཡིན་པ་ནི་མི་བསྐྱེད་དོ། །གཉིས་པ་གཙོ་བོའི་དོན་བཤད་པ་ལ་ལྔ་སྟེ། ཁྱབ་པ། ངོ་བོ། སེལ་བ། ཅིར་འགྱུར། རྒྱུ་མཚན་ནོ། །དང་པོ་ནི། ཁ་ཅིག་ལྟུང་བ་རྒྱུན་ལྡན་རྣམས་ལ་ཁྱབ་པ་ཡིན་གྱི། རེག་པའི་ལྷག་མ་ལྟ་བུ་རྒྱུན་དང་མི་ལྡན་པ་རྣམས་ལ་ཁྱབ་པ་མ་ཡིན་ཏེ། དེ་ལ་ཚིག་ཐ་དད་ཀྱི་སེལ་བ་མེད་པའི་ཕྱིར། ཚིགས་འཕོ་བ་ལ་ཡུན་རིང་དུ་འགོར་ཞིང་རེག་པའི་ལྷག་མ་ལྟ་བུ་ལ་མེད་མི་རུང་གི་སྦྱོར་བ་བྱས་ནས་མཐར་ཐུག་གྲུབ་པ་ཆེས་མྱུར་བའི་ཕྱིར་ཞེས་ཟེར་བ་ལ། གཞན་དག་ན་རེ་དེ་ལ་ཚིགས་ཐ་དད་ཀྱི་སེལ་བ་མེད་པ་མི་འཐད་དེ། བརྗོད་པ་གསུམ་པ་རྫོགས་པ་དང་རེག་པ་ཉམས་སུ་མྱོང་བ་དུས་མཉམ་པ་སྲིད་པའི་ཕྱིར་དང་། ཚིགས་མར་འཕོ་བ་ལ་ཚིགས་ཐ་དད་ཀྱི་སེལ་བ་ཡོད་དེ། བསླབ་པ་ཕུལ་བ་དང་རེག་པ་མྱོང་བ་དུས་མཉམ་པ་ཡོད་པའི་ཕྱིར་ཏེ། བསླབ་པ་ཕུལ་བའི་དོན་གོ་བ་དང་རེག་པ་མྱོང་བ་དུས་མཉམ་པ་སྲིད་པའི་ཕྱིར་ཟེར་བ་ལ། ཁ་ཅིག་རེག་པའི་དུས་སུ་རེག་པ་སྤོང་འདོད་ཡོད་དམ་མེད། ཡོད་ན་ཚིགས་ཕྱི་མ་ལ་སྦོམ་པོར་འགྱུར་བ་འགལ། མེད་ན་ཡན་ལག་ངེས་པའི་བར་ཆད་ཡོད་པས་སྡོམ་པ་མི་སྐྱེའོ་ཞེས་ཟེར་རོ། །རང་ལུགས་ལ་བརྗོད་པ་གསུམ་པ་རྫོགས་ཁ་མར་རེག་པ་མྱོང་བའི་དུས་སུ་ཆགས་སེམས་དྲག་པོ་སྐྱེས་ན་སྡོམ་པ་མི་སྐྱེ་སྟེ། སྒྲེན་མོ་དང་། འཁྲུགས་པ་དང་། མཚན་དུག་མ་དག་ལ་ཡང་མི་སྐྱེ་ཞེས་གསུངས་པའི་ཕྱིར། ཕྲན་ཚེགས་འགྲེལ་དུ་གཅུང་མཛེས་དགའ་ལ་སྡོམ་པ་སྐྱེས་པ་དང་། ཆགས་སེམས་ཀྱིས་འཁྲུགས་པ་ལ་སྡོམ་པ་མི་སྐྱེ་བར་བཤད་པའི་འགལ་སྤོང་དང་བཅས་པ་གསུངས་པའི་ཕྱིར། ཁྱབ་པའི་དོན་ཡང་ལྟུང་བ་རྒྱུན་དང་ལྡན་མི་ལྡན་མཐའ་དག་ལ་ཁྱབ་པ་ཡིན་ཏེ། དངོས་གཞིའི་ལྟུང་བ་བསྐྱེད་པ་ལ་ཚིག་གཅིག་པ་ཡན་ལག་ཏུ་དགོས་པའི་ཕྱིར། གཉིས་པ་ངོ་བོ་ནི། སྡོམ་པའི་ཚིག་གཅིག་གི་སྟེང་དུ་མེད་མི་རུང་གི་སྦྱོར་བ་བྱས་ནས་མཐར་ཐུག་གྲུབ་པ་ནི་ངོ་བོ་ཡིན་ནོ། །གསུམ་པ་སེལ་བ་ལ། ཁ་ཅིག་འདིར་ཚིགས་ཀྱི་སེལ་བ་མི་འཐད་དེ། ལྟུང་བ་བསྐྱེད་པ་ལ་ཚིག་གཅིག་པ་ཡན་ལག་ཏུ་མི་དགོས་པའི་ཕྱིར་ཏེ། ལུང་ཞུ་བ་ལས་ཕམ་པ་དང་པོ་གསུམ་དང་འབྱིན་པ། འཁྲིག་ཚིག་བསྙེན་བཀུར་བསྔགས་པ་སྨྱན། ཁ་མ་བསྒྱུར་བའི་གོས་གྱོན་པའི་ལྟུང་བྱེད་སོགས་ལ་ཚིགས་སྔ་མ་ལ་སྦྱོར་བ་བྱས་ནས་ཕྱི་མ་ལ་མཐར་ཐུག་གྲུབ་པ་ཡོད་པར་གསུང་པའི་ཕྱིར། ཡང་དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་དགེ་སློང་གི་རྟེན་ལ་མཐར་ཐུག་གྲུབ་པ་ན་ཕམ་པར་འགྱུར་བ་ཡིན་ཏེ། ཕམ་པ་དང་ཕམ་འདྲའི་ཉེས་བྱས་གཉིས་མིང་ཐ་དད་མ་གཏོགས་བྱེད་ལས་གཅིག་པས་ལྟུང་བ་མཉམ་པའི་ཕྱིར་བྱེད་པ་གཅིག་སྟེ་བསླབ་པ་སྤྱད་པའི་སྒོ་ནས་ཕྱིར་བཅོས་བྱ་དགོས་པར་མཚུངས། སྡོམ་པ་ཕྱིས་བླངས་ཀྱང་མི་སྐྱེ་བར་མཚུངས་པའི་ཕྱིར་ཞེས་ཟེར། འོ་ན་ས་རྐོ་བའི་ལྟུང་བྱེད་དང་ས་ཉམས་པ་བསྐོས་པའི་ཉེས་བྱས་གཉིས་བྱེད་པ་གཅིག་པས་ལྟུང་བ་མཉམ་པར་ཐལ། དེ་གཉིས་ཆོས་བརྒྱད་ལ་ཕྱིར་བཅོས་བྱེད་དགོས་པར་མཚུངས། ལས་ལམ་ལ་སྒྲིབ་པར་མཚུངས་པའི་ཕྱིར་ཏེ། གལ་ཏེ་ལྟུང་བྱེད་དང་ཉེས་བྱས་གཉིས་མིང་རིགས་ཐ་དད་པས་མི་མཚུངས་སོ་ཞེ་ན། ཕམ་པ་དང་ཕམ་འདྲའི་ཉེས་བྱས་ཀྱང་མིང་རིགས་ཐ་དད་པ་མིན་ནམ། གཞན་ཡང་། དགེ་སློང་གི་རྟེན་ལ་མི་གསོད་པའི་སྦྱོར་བ་བྱས་ནས། དགེ་སློང་གི་བསླབ་རྒྱུན་གཞན་ལ་མཐར་ཐུག་གྲུབ་པ་ལ་ཕམ་པར་འགྱུར་བར་ཐལ། དགེ་ཚུལ་གྱི་རྟེན་ལ་མི་གསོད་པའི་སྦྱོར་བ་བྱས་ནས་སྦྱོར་བ་དེའི་དབང་ཙམ་གྱིས་དགེ་སློང་གི་རྟེན་ལ་མཐར་ཐུག་གྲུབ་པ་ན་ཕམ་པར་འགྱུར་བའི་ཕྱིར། རྟགས་ཁས། འདོད་ན། ཉེས་པ་དེ་མེད་པ་ལ་འོང་བ་ནི་ཐ་དད་ཅེས་གསུངས་པ་དང་འགལ་ལོ། །གཞན་ཡང་། ལུང་དུ་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ། །ཞེས་གསུངས་པ་མི་འཐད་པར་ཐལ། དེ་ལ་ཚིགས་ཀྱི་སེལ་བ་མེད་པའི་ཕྱིར། རྟགས་ཁས། ལུང་ཞུ་བར་ཕམ་པ་དང་པོ་གསུམ་སོགས་ཚིགས་སྔ་མ་ལ་སྦྱོར་བ་བྱས་ནས་ཕྱི་མ་ལ་མཐར་ཐུག་གྲུབ་པ་གསུངས་པས་མི་གནོད་དེ། དེ་ནི་ཚིག་སྔ་མ་ལ་རང་གི་སྦྱོར་བ་ཡོད་ཅིང་ཕྱི་མ་ལ་མེད་མི་རུང་གི་ཉེ་སྦྱོར་ཡོད་པ་ལ་དགོངས་པས་སོ། །ཁ་ཅིག་འདིའི་སེལ་བ་ནི་འདུན་པ་ལོག་པའི་སེལ་བ་ཡིན་ཏེ། བསྙེན་པར་རྫོགས་འདོད་བུད་མེད་ལ་རེག་པའི་ཚེ་རེག་པ་སྤོང་བའི་སེམས་ཡོད་དམ་མེད། མེད་ན་ཡན་ལག་མེད་པའི་བར་ཆད་དུ་འགྱུར་བས་སྡོམ་པའི་ཚིགས་འཕོ་བ་མི་འཐད་པས་ཚིགས་ཀྱི་སེལ་བར་མི་འགྱུར་ཞིང་། ཡོད་ན་འདུན་པ་ལོག་པའི་སེལ་བ་འགྱུར་གྱི། ཚིགས་ཀྱི་སེལ་བར་བྱེད་པ་མི་འཐད་དོ་ཞེ་ན། སྤྱིར་སྤང་བྱ་སྤོང་སེམས་སྐྱེས་པ་ཙམ་གྱིས་ཉེས་སྤྱོད་ཀྱི་བྱ་བ་ལ་ཞུགས་པའི་འདུན་པ་ལོག་པ་མ་ཡིན་ཏེ། མཛོད་འགྲེལ་ལས་ལས་ཀྱི་ལམ་གྱི་སྦྱོར་བ་བྱས་ནས་འཕགས་ལམ་སྐྱེས་ན་ལས་ཀྱི་ལམ་དུ་མི་འགྱུར་ཏེ། རྟེན་འགལ་བའི་ཕྱིར་ཞེས་གསུངས་པས་དེའི་ཤུགས་ལ་དུད་འགྲོ་གསོད་པའི་སྦྱོར་བ་བྱས་པའི་ཚོགས་སྦྱོར་བ་ལྟ་བུའི་རྒྱུད་ལ་དུད་འགྲོ་བསད་པའི་ལས་ལམ་སྐྱེ་བར་བསྟན་པའི་ཕྱིར། སྤང་བྱ་རེ་རེ་ནས་སྤོང་སེམས་རེ་རེ་དགོས་ན། འོ་ན་ད་ལྟ་སྡོམ་པ་སྐྱེ་བ་མི་སྲིད་པར་ཐལ། སྤང་བྱ་མཐའ་ཡས་པའི་ཕྱིར། རང་ལུགས་འདིའི་སེལ་བ་ནི་ཚིགས་ཀྱི་སེལ་བ་ཡིན་ནོ། །བཞི་པ་ཅིར་འགྱུར་ལ། ལྟུང་བ་སྡེ་བཞི་ལ་སྦྱོར་བ་འཕེན་པས་འགྲུབ་ལ། མཐར་ཐུག་འཕེན་པས་མི་འགྲུབ་པ། མཐར་ཐུག་འཕེན་པས་འགྲུབ་ལ། སྦྱོར་བ་འཕེན་པས་མི་འགྲུབ་པ། གཉིས་ཀ་འཕེན་པས་མི་འགྲུབ་པ། གཉིས་ཀ་འཕེན་པས་འགྲུབ་པ་དང་མུ་བཞི་སྟེ། དང་པོ་ནི། སློང་བ་དང་སློང་རིགས་ཀྱི་སྤང་བ་ལྟ་བུའོ། །གཉིས་པ་ནི། ཁང་པ་དང་ཁང་ཆེན་གྱི་ལྷག་མ་དང་སྟན་བྱེད་པའི་སྤང་བ་ལྟ་བུའོ། །གསུམ་པ་ནི། འབྱིན་པའི་ལྷག་མ་དང་ཉན་རྣ་ལས་གྱུར་པའི་ལྟུང་བྱེད་ལྟ་བུའོ། །བཞི་པ་ནི་སྲོག་གཅོད་པའི་ཕམ་པ་ལྟ་བུའོ། །འོ་ན་དེ་དག་གི་དོན་གང་ཞེ་ན། ལྟུང་བ་དེའི་མཐར་ཐུག་གི་སྔ་ལོགས་དེ་མ་ཐག་དེར་མེད་མི་རུང་གི་སྦྱོར་བ་མི་དགོས་པར་ལྟུང་བ་བསྐྱེད་པ་ནི་སྦྱོར་བ་འཕེན་པས་འགྲུབ་པ་ཡིན་ལ། སྔ་ལོགས་དེ་མ་ཐག་དེར་ངེས་པར་མེད་མི་རུང་གི་སྦྱོར་བ་དགོས་པ་ནི་སྦྱོར་བ་འཕེན་པས་མི་འགྲུབ་པ་དང་། མཐར་ཐུག་འགྲུབ་པ་རང་ཉིད་ཀྱིས་ཤེས་པ་ལ་མ་ལྟོས་པར་གཞན་ལ་གྲུབ་པས་ལྟུང་བ་བསྐྱེད་པ་ནི་མཐར་ཐུག་འཕེན་པས་འགྲུབ་པ་དང་། མཐར་ཐུག་གྲུབ་པ་རང་ཉིད་ཀྱིས་ངེས་པར་ཤེས་དགོས་པ་ནི་མཐར་ཐུག་འཕེན་པས་མི་འགྲུབ་པའོ། །དེ་ལྟར་བཞི་ཡོད་པ་ལས་ཁ་ཅིག་སྦྱོར་མཐར་གཉིས་ཀ་འཕེན་པས་མི་འགྲུབ་པར་མི་ཚངས་སྤྱོད་སོགས་དང་། མཐར་ཐུག་འཕེན་པས་འགྲུབ་ལ་སྦྱོར་བ་འཕེན་པས་མི་འགྲུབ་པ་ཁང་པ་ཁང་ཆེན་སོགས་ལ་ལྟུང་བ་ན་སྨད་དུ་འགྱུར་ཏེ། ཚིགས་ཕྱི་མ་ལ་སྦྱོར་བ་མེད་ཀྱང་ལུས་ངག་གི་བྱེད་པ་ཡོད་པའི་ཕྱིར། སྦྱོར་བ་འཕེན་པས་འགྲུབ་ལ་མཐར་ཐུག་འཕེན་པས་མི་འགྲུབ་པ་སློང་དང་སློང་རིགས་སོགས་ཀྱི་སྤང་བ་ལ་བསྡམ་བྱའི་ཉེས་བྱས་ཙམ་དུ་འགྱུར་ཏེ། ལུས་ངག་གི་བྱེད་པ་མེད་པར་ཡིད་ཉེས་སྤྱོད་ལ་ཞུགས་པ་ཙམ་ཡོད་པའི་ཕྱིར། ཁྱབ་སྟེ། སུམ་བརྒྱ་པར། སེམས་བསྐྱེད་པ་ནི་བསྡམ་བྱ། །ཞེས་གསུངས་པའི་ཕྱིར། སྦྱོར་མཐར་གཉིས་ཀ་འཕེན་པས་འགྲུབ་པ་སྲོག་གཅོད་ལྟ་བུ་ལ་ལྟུང་བ་གཏན་མེད་དུ་འགྱུར་ཏེ། བསྙེན་པར་རྫོགས་པའི་ཚེ་ལུས་ངག་གི་བྱེད་པ་དང་བསམ་པ་གང་ཡང་མེད་པའི་ཕྱིར་ཞེས་ཟེར་རོ། །བསྡམ་བྱའི་ཉེས་བྱས་སུ་འགྱུར་བ་དང་ལྟུང་མེད་དུ་འགྱུར་བ་མི་འཐད་དེ། སྦྱོར་མཐར་གཉིས་ཀ་འཕེན་པས་འགྲུབ་པ་མ་བྱིན་ལེན་ལྟ་བུའི་དབང་དུ་བྱས་ནས་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་བསྙེན་པར་རྫོགས་པར་བྱ་བའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ་ཞེས་གསུངས་པའི་ཕྱིར། ཁོ་ན་རེ་བསྡམ་བྱའི་ཉེས་བྱས་སུ་འགྱུར་བ་ལ་དགོངས་སོ་ཞེས་ཟེར་ན། མི་འཐད་དེ་དེ་ལྟར་ཡིན་ན་སྐབས་འདིར་ལྟུང་བ་ན་སྨད་དུ་འགྱུར་བའི་ཤེས་བྱེད་དུ་ལུང་དེ་དྲངས་པ་ལ་འབྲེལ་མེད་པའི་ཕྱིར། ཁོ་ན་རེ་མ་བྱིན་ལེན་གྱི་སྦྱོར་མཐར་གཉིས་ཀ་འཕེན་པས་འགྲུབ་པ་མ་གྲུབ་སྟེ། མ་བྱིན་ལེན་གྱི་མཐར་ཐུག་འགྲུབ་པ་ཐོབ་བློ་སྐྱེ་བ་ལ་ལྟོས་པའི་ཕྱིར། ཞེས་པ་ཡང་མི་འཐད་དེ། ཁྱེད་ཀྱིས་ཐོབ་བློ་རྐུ་སེམས་སུ་ཁས་བླངས་ལ། ཊཱི་ཀ་ལས་དེའི་ཕྱིར་རམ་དེའི་རྒྱུར་བརྐུས་པ་ཡིན་གྱི། བསྙེན་པར་རྫོགས་པར་བྱེད་པའི་དུས་ན་བརྐུ་བའི་བྱ་བ་ཡང་མེད་པ་ལ་ནི་སྦྱོར་བ་སྔ་མ་དེ་ན་སྨད་པ་ཉིད་དོ་ཞེས་གསུངས་པའི་ཕྱིར་རོ། །བུ་དྲོ་་་་་་ཁ་ཅིག་སྦྱོར་བ་སྔ་མ་ན་སྨད་ཞེས་པའི་དོན་དུ་བསམས་ནས། དགེ་ཚུལ་གྱི་རྟེན་ལ་མིའི་རྫས་རིན་ཐང་ཚང་བ་རྐུ་བའི་སྦྱོར་བ་བྱས། དགེ་སློང་གི་དུས་སུ་མཐར་ཐུག་གྲུབ་པ་ན་སྔར་གྱི་སྦྱོར་བའི་ཉེས་བྱས་དེ་སྦོམ་པོར་སོང་བར་བཞེད་པ་ཡང་མི་འཐད་དེ། སྐབས་འདིའི་ལྟུང་བ་དེ་ན་སྨད་པ་མ་ཡིན་པར་ན་སྟོད་པ་ཡིན་པར་ཐལ། སྐབས་འདིའི་ན་སྨད་དེ་ཉེས་བྱས་སྦོམ་པོར་སོང་བ་ལ་བྱེད་རིགས་པའི་ཕྱིར། ལྔ་པ་རྒྱུ་མཚན་ནི། ལུང་དུ་བསྙེན་པར་མ་རྫོགས་པས་རྐུ་བ་ལ་སྦྱོར་ཞིང་། བསྙེན་པར་རྫོགས་པའི་ཕྱིར་རྐུ་བར་བྱེད་ན་སྦོམ་པོར་འགྱུར་རོ་ཞེས་གསུངས་པའི་ཕྱིར། གཉིས་པ་ཡན་ལག་གི་དོན་ནི། འོ་ན་ལུས་བསྒྱུར་བ་ལ་དེ་ལྟར་ཡིན་མོད། ཚིགས་སྔ་ཕྱི་ལ་ཇི་ལྟར་ཡིན་ཞེ་ན། ཚིགས་སྔ་མ་དགེ་ཚུལ་གྱི་རྟེན་ལ་ལྟུང་བ་འབྱུང་རུང་གི་སྦྱོར་བ་བྱས་ནས་སྦྱོར་བ་དེའི་རྐྱེན་ཙམ་གྱིས་དགེ་སློང་གི་རྟེན་ལ་མཐར་ཐུག་གྲུབ་ན་ཡང་ངོ་སྟེ་ན་སྨད་དུ་འགྱུར་རོ། །དཔེར་ན་དགེ་ཚུལ་ལམ་དགེ་སློབ་མའི་དུས་སུ་མི་གསོད་པའི་སྦྱོར་བ་བྱས་ནས་དེའི་རྐྱེན་ཙམ་གྱིས་དགེ་སློང་གི་དུས་སུ་མི་དེ་ཤི་ན་སྲོག་གཅོད་ཀྱི་སྦོམ་པོར་འགྱུར་བ་ལྟ་བུའོ། །འོ་ན་དགེ་སློང་གི་རྟེན་ལ་སྦྱོར་བ་བྱས་ནས་དགེ་ཚུལ་གྱི་རྟེན་ལ་མཐར་ཐུག་གྲུབ་པ་ལ་ཅིར་འགྱུར་ཞེ་ན། ཕྱི་མ་དགེ་སློང་གི་ཚིགས་ནི་སྔ་མ་དགེ་ཚུལ་གྱི་ཚིགས་དེ་དང་ལྡན་པ་ཉིད་ཡིན་པས་དགེ་སློང་གི་རྟེན་ལ་སྦྱོར་བ་བྱས་ནས་དགེ་ཚུལ་གྱི་དུས་སུ་མཐར་ཐུག་གྲུབ་ན་མཐར་ཐུག་གི་རྟེན་དེ་ལ་བཅས་རིགས་གང་ཡོད་ཀྱི་ལྟུང་བ་རྫོགས་པར་བསྐྱེད་དོ། །དཔེར་ན་དགེ་སློང་གི་རྟེན་ལ་མི་གསོད་པའི་སྦྱོར་བ་བྱས་ནས་བསླབ་པ་ཕུལ་ཏེ་དགེ་ཚུལ་དུ་བབས་པའི་ཚེ་མཐར་ཐུག་གྲུབ་ན་ཕམ་འདྲའི་ཉེས་བྱས་བསྐྱེད་པ་བཞིན་ནོ། །ཞར་བྱུང་ནི་སྔར་རྣམ་འབྱེད་ཀྱི་སྐབས་སུ་ལྟུང་བ་བསྐྱེད་པའི་གཞིའི་ཡན་ལག་ཏུ་བཤད་པ་དེའམ། དེ་དང་འདྲ་བ་ལ་སྤྱད་པས་ལྟུང་བར་འགྱུར་གྱི་དེ་ལས་བཟང་བ་ལ་མི་འགྱུར་རམ་སྙམ་ན། སྲིན་བལ་ལ་སྟན་བྱས་ན་སྤང་བར་འགྱུར། ཞེས་སྔར་རྫས་བཀག་པ་དེ་བས་བཟང་བ་མོན་དར་ལ་སྟན་བྱེད་ན་ཡང་བཀག་པ་ཡང་དེ་དང་ལྡན་པ་ཉིད་ཡིན་པས་སྤང་ལྟུང་དུ་འགྱུར་རོ། །སྲིན་བལ་དང་རིན་ཐང་འདྲ་བ་དུ་གུ་ལའི་རས་བལ་ལ་སྟན་བྱས་ན་ཡང་ངོ་སྟེ་སྤང་བར་འགྱུར་རོ། །རྫས་བཀག་པ་ཞེས་པའི་གཞུང་ཚན་གཉིས་པོ་འདི་ལ་ཁ་ཅིག སྲིན་བལ་འབའ་ཞིག་ཆ་གཉིས་དང་། །བལ་ཁུར་རྨེལ་དང་གསེར་དངུལ་རེག །མངོན་མཚན་ཉོ་ཚོང་བསོད་པ་སློང་། །ཁབ་རལ་ལས་གྱུར་ཁྱབ་པ་འོ། །ཞེས་ལྟུང་བ་བཅུ་གཅིག་ཁོ་ན་ལ་སྦྱོར་བ་མི་འཐད་དེ། བམ་ལྔ་ལས་དེས་ན་ལྟུང་བའི་ཕྱིར་ནི་རྫས་བཟང་པོ་ཡང་ངན་པ་དང་འདྲ་བས་བཟང་པོ་ལ་མི་ཚངས་པར་སྤྱོད་པ་ཡང་ངན་པ་ལ་སྤྱོད་པ་དང་འདྲ་ལ། བཟང་པོ་བརྐུས་པ་ཡང་ངན་པ་བརྐུས་པ་དང་འདྲ། རྫུན་བཟང་པོ་སྨྲས་པ་ཡང་ངན་པ་སྨྲས་པ་དང་འདྲ་བར་ལྟུང་བར་འགྱུར་བ་ལ་སོགས་པའི་ཚུལ་དུ་རིགས་པར་བྱའོ་ཞེས་དང་། འདྲ་བ་ལ་ཡང་ངོ་ཞེས་པའི་སྐབས་སུ། དེ་ཉིད་ལས། དེས་ན་ལྟུང་བའི་ཕྱིར་ན་རྫས་འདྲ་བ་གཅིག་བཀག་ན་དེ་དང་འདྲ་བ་གཞན་དགག་པའི་ཕྱིར་ཏེ། ལྟུང་བ་སྡེ་ལྔ་ལ་སོགས་པ་བསླབ་པའི་གཞི་ཐམས་ཅད་ལ་འདྲ་བ་གཅིག་བཀག་ན་འདྲ་བ་གཞན་བཀག་པར་འགྱུར་ཞིང་། རྫས་འདྲ་བ་གཅིག་ལས་འདས་ན་ལྟུང་བར་འགྱུར་བ་བཞིན་དུ་རྫས་འདྲ་བ་གཞན་ལས་འདས་ན་ཡང་ལྟུང་བ་དེ་ཉིད་དུ་འགྱུར་བར་ཤེས་པར་བྱའོ་ཞེས་གསུངས་པའི་ཕྱིར། རང་ལུགས་ནི་ཡུལ་ཁྱད་པར་ཅན་རྙེད་དཀའ་ཞིང་འབྱུང་རིང་བས་དེ་ལ་ལྟུང་བ་རྫོགས་པར་མི་འགྱུར་རམ་ཞེ་ན། རྫས་ཞེས་པའི་གཞུང་ཚན་གཉིས་ནི་སྡེ་ལྔ་ཀ་ལ་སྦྱོར་ཏེ། རྒྱལ་པོའི་བཙུན་མོ་རིན་པོ་ཆེ་ལ་མི་ཚངས་པར་སྤྱད་ན་ཡང་ཕམ་པར་འགྱུར་བ་དང་། དེ་བཞིན་དུ་ནོར་བུ་དོན་ཞགས་བརྐུས་ན་ཡང་ཕམ་པ། མི་མཚན་དཔེས་བརྒྱན་པ་བསད་ན་ཡང་ཕམ་པ། ང་ནི་སངས་རྒྱས་ཡིན་ནོ་ཞེས་པ་ལྟ་བུའི་བརྫུན་སྨྲས་ཀྱང་ཕམ་པར་འགྱུར་བ་སོགས་ལ་སྦྱོར། ཁོ་ན་རེ་བཙུན་མོ་རིན་པོ་ཆེ་ལ་མི་ཚངས་པར་སྤྱོད་པས་ཕམ་པར་འགྱུར་བ་འདིར་བསྟན་མི་དགོས་པར་ཐལ། རྣམ་འབྱེད་ལས་བུད་མེད་ལ་མི་ཚངས་པར་སྤྱོད་པས་ཕམ་པར་འགྱུར་བ་བསྟན་ཟིན་ལ། བཙུན་མོ་རིན་པོ་ཆེ་ཡང་བུད་མེད་ལས་མ་འདས་པའི་ཕྱིར་ཞེ་ན། འོ་ན་འདུལ་བྱེད་ཀྱི་སྐབས་སུ་གསང་སྔགས་ཀྱིས་ཆུད་གསོན་པ་སྦོམ་པོར་འཆད་མི་རིགས་པར་ཐལ། གོང་དུ་རྣམ་འབྱེད་ཀྱི་སྐབས་སུ་ཆུད་གཟོན་པ་སྦོམ་པོར་བཤད་ལ། གསང་སྔགས་ཀྱིས་ཆུད་གཟོན་ཀྱང་ཆུད་གཟོན་པ་ལས་མ་འདས་པའི་ཕྱིར། འདྲ་བ་ལ་ཡང་ངོ་ཞེས་པའི་དོན་ཡང་སྒྲ་མི་སྙན་པའི་བུད་མེད་ལ་མི་ཚངས་པར་སྤྱད་ཀྱང་ཕམ་པར་འགྱུར་བ་སོགས་དང་། ལྷའི་རིན་པོ་ཆེ་ལ་རེག་ཀྱང་ལྟུང་བྱེད་དུ་འགྱུར་བ་སོགས་ལ་སྦྱོར། ལུང་ཞུ་བ་ལ་ལྷའི་རིན་པོ་ཆེ་ལ་རེག་པ་ཉེས་བྱས་སུ་བཤད་པ་ནི་ལྷའི་གནས་སུ་དུས་དྲན་མ་བྱས་པར་དེ་ལ་རེག་པའི་ཉེས་བྱས་ལ་དགོངས་པར་མངོན་ནོ། །བཞི་པ་མཚན་གྱི་ཡན་ལག་ཞར་བྱུང་དང་བཅས་པ་ལ་གཉིས་ཏེ། སྤྱིའི་དོན་དང་། གཞུང་དོན་ནོ། །དང་པོ་ལ་གཉིས་ཏེ། ལྟུང་བ་ཐུན་མོང་དང་ཐུན་མོང་མ་ཡིན་པའི་ཁྱད་པར་དང་། ལྟུང་བའི་དབྱེ་བའོ། །དང་པོ་ལ་གཉིས་ལས། གཞན་ལུགས་དགག་པ་ནི། ཁ་ཅིག་དགེ་སློང་ཕ་མའི་དགེ་འདུན་གཉིས་ཀ་བསགས་ནས་བཅས་པའམ། གཅིག་ལ་བཅས་ནས་གཞན་ལ་བསྒྲགས་པ་ནི་བཅས་པ་ཐུན་མོང་བ་ཡིན་ཅིང་། དེ་ལས་འདས་པའི་ལྟུང་བ་ནི་ལྟུང་བ་ཐུན་མོང་བ་དང་། དེ་ལས་གཞན་པའི་ལྟུང་བ་རྣམས་ཐུན་མོང་མིན་པའོ་ཞེས་ཟེར་བ་མི་འཐད་དེ། གཞི་མེད་ཀྱི་སྐུར་འདེབས་དང་། བག་ཙམ་མི་གསལ་བ་དང་། དབྱེན་ལ་སོགས་པ་རྣམས་དགེ་སློང་མ་ལ་ཡང་ལོགས་སུ་བཅས་པའི་ཕྱིར། གཉིས་པ་རང་ལུགས་ནི། དགེ་སློང་ཕ་མ་གཉིས་ཀྱི་ཐུན་མོང་བའི་སྡོམ་གྱིས་བསྡུས་ཤིང་། དགེ་སློང་ཕ་མ་གཉིས་ལ་ལྟུང་བ་མིང་མཐུན་པ་དང་། ཆེ་ཆུང་མཐུན་པར་བཅས་པ་རྣམས་ནི་བཅས་པ་ཐུན་མོང་བ་ཡིན་ཞིང་། དེ་ལས་འདས་པའི་ལྟུང་བ་ནི་ལྟུང་བ་ཐུན་མོང་བ་ཡིན་ལ། དེ་ལས་གཞན་དུ་གྱུར་པའི་ལྟུང་བ་རྣམས་ཐུན་མོང་མ་ཡིན་པའོ། །གཉིས་པ་ལྟུང་བའི་དབྱེ་བ་ལ་གསུམ་སྟེ། མཚན་ཉིད་ཅི་འདྲ་བའི་ལྟུང་བ་དང་། རྗེས་སུ་མཐུན་པ་མིང་ཙམ་གྱི་ལྟུང་བ་དང་། ཐུན་མོང་མ་ཡིན་པའི་ལྟུང་བའོ། །དང་པོ་ནི། ལྟུང་བ་ཐུན་མོང་བ་ཡིན་ཞིང་ཡན་ལག་ཐུན་མོང་དུ་བཞག་པའོ། །གཉིས་པ་ནི། ལྟུང་བ་ཐུན་མོང་མ་ཡིན་ཞིང་ཐུན་མོང་མིན་པ་གཞིའི་ཡན་ལག་མི་མཐུན་པའོ། །དང་པོ་ལ་གསུམ་སྟེ། དབྱེ་བ། མཚན་གྱུར་ན་ཅིར་འགྱུར་བ། རྒྱུ་མཚན་ནོ། །དང་པོ་ལ་དགག་གཞག་གཉིས་ལས། དང་པོ་ནི། ཁ་ཅིག་ཕམ་པ་བཞི་དང་སྨྱན་ལ་སོགས་པ་ལྔ་བཅུ་རྩ་ལྔར་བཞེད། ཁ་ཅིག་དེའི་སྟེང་དུ་སྦེད་པའི་ལྟུང་བྱེད་དང་མ་གུས་པའི་ཕྱོགས་གཅིག་བསྣན་ནས་ལྔ་བཅུ་རྩ་བདུན་དུ་བཞེད་དེ། དེ་ཡང་། ཕམ་པ་བཞི་དང་སྨྱན་དང་གཞི་མེད་དང་། །བག་ཙམ་འཆང་བ་དང་ནི་འཇོག་པ་དང་། །སློང་ལ་སོགས་པ་ལྔ་དང་གསེར་དངུལ་དང་། །མངོན་མཚན་ཉོ་ཚོང་ལྷུང་བཟེད་ཚོང་སྤོགས་གསུམ། །བརྫུན་དང་འདོན་དང་མི་ཆོས་བདེན་སྨྲ་དང་། །ས་བོན་འདེབས་དང་རིམ་གཉིས་ཕྱོགས་གཅིག་དང་། །འདུག་གནས་ལ་སོགས་གསུམ་དང་དུས་མིན་ཟས། །བྱིན་ལེན་མ་བྱས་སྲོག་ཆགས་བཅས་སྤྱོད་དང་། །གཅེར་བུ་དམག་གསུམ་མེ་རེག་མ་རྫོགས་དང་། །ཁ་མ་བསྒྱུར་དང་ལོངས་པ་ཁྲུས་བྱེད་དང་། །དུད་འགྲོ་རྩེ་དང་སྦེད་དང་གཞི་མེད་དང་། །རྐུན་མ་བསྐོ་དང་མགྲོན་གཉེར་རིང་འདུག་དང་། །མ་གུས་ཕྱོགས་གཅིག་ཆང་དང་དུས་མིན་འགྲོ། །ཕྱི་དྲོ་གྲོང་རྒྱུ་རྒྱལ་པོའི་ཕོ་བྲང་འཇུག །ཁབ་རལ་གདིང་དང་གཡན་པ་བདེ་གཤེགས་གོས། །ཞེས་པའི་སྡོམ་མཛད་དོ། །མ་གུས་ཕྱོགས་གཅིག་འདྲེན་པ་མི་རིགས་ཏེ། དེ་ལྟར་ན་སྐྲོད་པའི་ཕྱོགས་གཅིག་དང་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་ཀྱི་ཕྱོགས་གཅིག་ཀྱང་རྗེས་སུ་མཐུན་པའི་མིང་ཙམ་དུ་འདྲེན་རིགས་པར་འགྱུར་རོ། །དེའི་དམིགས་བསལ་ལ་ཁ་ཅིག་དགེ་སློང་གི་ཕོའི་དབང་པོས་རེག་པ་མྱོང་བ་དང་། དགེ་སློང་མས་ཟག་བྱེད་ཀྱིས་རེག་པ་མྱོང་བ་གཉིས་མཚན་ཉིད་ཅི་འདྲ་བ་མ་ཡིན་ཞིང་། དགེ་སློང་གིས་དགེ་སློང་ཉམས་པ་ལ་སྐུར་པ་བཏབ་པའི་ལྷག་མ་དེ་མཚན་ཉིད་ཅི་འདྲ་བ་མ་ཡིན་ཏེ། ལྷག་མ་དེ་རྒྱུད་ལྡན་གྱི་དགེ་སློང་དེ་དགེ་སློང་མར་མཚན་གྱུར་པ་ན་སྦོམ་པོར་འགྱུར་བའི་ཕྱིར་ཞེས་ཟེར་བ་མི་འཐད་དེ། དགེ་སློང་མས་དགེ་སློང་ཉམས་པ་ལ་ཕམ་པས་སྐུར་བ་བཏབ་པ་ལ་ལྷག་མར་མི་འགྱུར་བའི་ཤེས་བྱེད་མེད་པའི་ཕྱིར། གཉིས་པ་རང་ལུགས་ནི། མ་གུས་པའི་ཕྱོགས་གཅིག་མ་གཏོགས་པའི་ལྔ་བཅུ་རྩ་དྲུག་ཏུ་དབྱེ་ཞིང་། སྦོད་པའི་ལྟུང་བྱེད་འདྲེན་རིགས་ཏེ། རབ་ཏུ་བྱུང་བའི་སྡེ་ལྔའི་ཡོ་བྱད་གང་ཡང་རུང་བ་སྦས་པ་ལས་དགེ་སློང་དང་དགེ་སློང་མ་ལ་ལྟུང་བྱེད་དུ་བསྟན་པའི་ཕྱིར། དམིགས་བསལ་ནི། དགེ་སློང་གི་ལྷུང་བཟེད་ཕུལ་དགུ་ཤོང་བ་ལས་ལྷག་པ་བཙལ་བའི་སྤང་ལྟུང་དེ་མཚན་ཉིད་ཅི་འདྲ་བ་མ་ཡིན་ཏེ། དེ་རྒྱུད་ལྡན་གྱི་དགེ་སློང་དགེ་སློང་མར་མཚན་གྱུར་པ་ན་ཉེས་བྱས་སུ་འགྱུར་བའི་ཕྱིར། དགེ་སློང་མས་ལྷུང་བཟེད་ཕུལ་དགུ་ཤོང་བ་ལས་ཆུང་བ་བཙལ་བའི་སྤང་བ་དེ་ཡང་མཚན་ཉིད་ཅི་འདྲ་བ་མིན་ཏེ། དེ་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་པ་ན་ཉེས་བྱས་སུ་འགྱུར་བའི་ཕྱིར། གཉིས་པ་མཚན་གྱུར་ན་ཅིར་འགྱུར་བ་ནི། མཚན་ཉིད་ཅི་འདྲ་བའི་ལྟུང་བའི་སྦྱོར་བ་བྱེད་བཞིན་པ་མཚན་གྱུར་ན་ལྟུང་བ་དེ་ཉིད་དུ་འགྱུར་ཞིང་། དེ་རྒྱུད་ལྡན་མཚན་གྱུར་ན་ཡང་སོ་ན་གནས་སོ། །གསུམ་པ་རྒྱུ་མཚན་ནི། དེ་ལྟར་འགྱུར་ཏེ་དགག་བྱ་དང་བཅས་པ་མཚུངས་ཤིང་། ཡན་ལག་ཐུན་མོང་དུ་ཚང་བར་མཚུངས་པའི་ཕྱིར། གསུམ་པ་ཐུན་མོང་མ་ཡིན་པའི་ལྟུང་བ་ལ། ཤ་སླ་་་་་་ཁ་ཅིག་ཐུན་མོང་མ་ཡིན་པའི་ལྟུང་བ་བསྐྱེད་པ་ལ། མཚན་དེ་ཉིད་ལ་སྦྱོར་བ་བྱས་ནས་མཚན་དེ་ཉིད་ལ་མཐར་ཐུག་གྲུབ་པ་དགོས་པས་ཐུན་མོང་མིན་པའི་ལྟུང་བའི་སྦྱོར་བ་བྱེད་བཞིན་པ་མཚན་གྱུར་པ་དང་། རྒྱུད་ལྡན་མཚན་གྱུར་ན་ལྟུང་བ་ཆུང་བའམ་མེད་པར་འགྱུར་ཞེས་གསུངས་པ་མི་འཐད་དེ། དགེ་སློང་མ་འབྱིན་པའི་སྦྱོར་བ་བྱེད་བཞིན་མཐར་ཐུག་གྲུབ་པ་དང་མགོ་མཉམ་དུ་དགེ་སློང་དུ་མཚན་གྱུར་ན་འབྱིན་པའི་ལྟུང་བྱེད་དུ་འགྱུར་ཏེ། འབྱིན་པའི་ལྟུང་བྱེད་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་ན་ལྟུང་བྱེད་དེ་ཉིད་སོ་ན་གནས་པའི་ཕྱིར། ཁྱབ་རྟགས་གྲུབ་སྟེ། ན་སྨད་པའི་དོན་གྱི་སྦྱོར་བ་གང་ཡིན་པ་དེ་ཉིད་ལས་སོ་ཞེས་དང་། ན་སྨད་པ་ནི་རང་གི་ཉིད་དོ་ཞེས་དང་། ཊཱི་ཀར། འདི་ལྟ་སྟེ་དཔེར་ན་དགེ་སློང་མ་ཁུ་བ་འབྱིན་པའི་ལྟུང་བ་བྱེད་བཞིན་དུ་དེ་མཚན་གྱུར་ཏེ་དགེ་སློང་དུ་གྱུར་ན་ཁུ་བ་འབྱིན་པ་དེ་དགེ་སློང་ལ་ཡང་ལྟུང་བྱེད་ཁོ་ནར་འགྱུར་གྱི། དགེ་འདུན་ལྷག་མ་ཉིད་དུ་མི་འགྱུར་བ་ལྟ་བུའོ་ཞེས་གསུངས་པའི་ཕྱིར། ཡང་ཁ་ཅིག་མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེས་པ་ནི་མཚན་ཉིད་ཅི་འདྲ་བའི་ལྟུང་བ་ཁོ་ནའི་དབང་དུ་བྱས་ནས་བྱེད་བཞིན་པ་མཚན་གྱུར་ན་ཅིར་འགྱུར་བ་དང་། རྒྱུད་ལྡན་མཚན་གྱུར་ན་ཅིར་འགྱུར་བ་དཔྱོད་པ་ཡིན་གསུང་བ་མི་འཐད་དེ། ན་སྨད་པའི་དོན་གྱིས་ཞེས་པའི་སྔ་འགྲེལ་དུ། དེ་ལྟར་སྤྱིར་བཏང་བ་བྱས་ནས་དེའི་དམིགས་ཀྱིས་བསལ་བ་བསྟན་པའི་ཕྱིར། ན་སྨད་པའི་དོན་གྱིས་སྦྱོར་བ་གང་ཡིན་པ་ཉིད་ལས་སོ། །ཞེས་བྱ་བ་སྨྲས་ཏེ་ཞེས་མཚམས་སྦྱར་བའི་ཕྱིར། གཞན་ཡང་གཞུང་དེ་མཚན་ཉིད་ཅི་འདྲ་བའི་ལྟུང་བ་ཁོ་ནའི་དབང་དུ་བྱས་པ་མ་ཡིན་པར་ཐལ། འདིའི་སྐབས་སུ་ཐུན་མོང་མ་ཡིན་པའི་ལྟུང་བ་གཉིས་དཔེར་བྱས་ནས་བཤད་པའི་ཕྱིར་ཏེ། དེ་ལས་གལ་ཏེ་ན་ལྟུང་བ་ན་སྨད་པའི་ཞིང་ཉིད་དུ་འགྱུར་བ་ཡང་ཡོད་དེ། འདི་ལྟ་སྟེ། དཔེར་ན་དགེ་སློང་ཁུ་བ་འབྱིན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེའི་མཐར་ཐུག་གྲུབ་པ་དང་མགོ་མཉམ་དུ་དེ་དགེ་སློང་མར་མཚན་གྱུར་ན་དེ་ལ་སྦྱོར་བ་དེའི་དངོས་གཞི་ལྟུང་བྱེད་དུ་འགྱུར་བ་ལྟ་བུ་དང་། དགེ་སློང་མས་ལུས་བརྐན་པའི་སྦྱོར་བ་ལ་ཞུགས་པའི་ཚེ་སྦྱོར་བ་དེའི་མཐར་ཐུག་དང་མགོ་མཉམ་དུ་དེ་དགེ་སློང་དུ་གྱུར་ན་སྦྱོར་བ་དེའི་དངོས་གཞི་ཉེས་པ་སྦོམ་པོར་འགྱུར་བ་ལྟ་བུའོ་ཞེས་གསུངས་པའི་ཕྱིར། གཉིས་པ་གཞུང་དོན་ལ་གསུམ་སྟེ། སྤྱིར་བསྟན་པའི་ཚུལ་གྱིས་མདོར་བསྟན་པ་དང་། དམིགས་ཀྱིས་བསལ་བའི་ཚུལ་གྱིས་རྒྱས་པར་བཤད་པ་དང་། དེ་དག་གི་རྒྱུ་མཚན་བསྟན་པའོ། །དང་པོ་ནི། ཚིགས་སྔ་མ་སྦྱོར་བ་བྱས་ཕྱི་མ་མཐར་ཐུག་གྲུབ་ན། ན་སྨད་དུ་འགྱུར་ན་མཚན་སྔ་མ་ལ་སྦྱོར་བ་བྱས། ཕྱི་མ་ལ་མཐར་ཐུག་གྲུབ་པ་ལ་ཅིར་འགྱུར་ཞེ་ན། མཚན་སྔ་མ་ལ་སྦྱོར་བ་བྱེད་བཞིན་པ་མཚན་འགྱུར་བ་ནི་མཚན་ཕྱི་མ་དེ་ལ་གང་གཞག་པའི་ལྟུང་བ་བསྐྱེད་པའི་ཞིང་ཡིན་ནོ། །དཔེར་ན་དགེ་སློང་མི་གསོད་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་ཕམ་པ་དང་། དགེ་སློང་ཁུ་བ་འབྱིན་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་ལྟུང་བྱེད་དུ་འགྱུར་བ་དང་། དགེ་སློང་མ་ལུས་བཀན་གྱི་སྦྱོར་བ་བྱེད་བཞིན་པ་དགེ་སློང་དུ་མཚན་གྱུར་ན་སྦོམ་པོར་འགྱུར་བ་བཞིན་ནོ། །གཉིས་པ་ནི། དེར་ངེས་སམ་ཞེ་ན། མཚན་སྔ་མ་ལ་ན་སྨད་པ་སྟེ་ལྟུང་བ་ཆུང་བའི་དོན་གྱི་སྦྱོར་བ་བྱེད་བཞིན་པ་མཚན་ཕྱི་མ་ལྟུང་བ་ཆེ་བའི་བཅས་པ་ཅན་དུ་མཚན་འགྱུར་ན་མཚན་སྔ་མའི་ལྟུང་བ་ཆུང་བ་དེ་ཉིད་དུ་འགྱུར་གྱི། མཚན་ཕྱི་མ་ལ་གཞག་པའི་ལྟུང་བ་ཆེ་བར་མི་འགྱུར་ཏེ། དཔེར་ན་དགེ་སློང་མ་འབྱིན་པའི་སྦྱོར་བ་བྱེད་བཞིན་པ་དགེ་སློང་དུ་མཚན་གྱུར་ན་ལྟུང་བྱེད་དུ་འགྱུར་བ་བཞིན་ནོ། །འོ་ན་རྒྱུད་ལྡན་མཚན་གྱུར་པ་ལས་ཅིར་འགྱུར་ཞེ་ན། ལྟུང་བ་བྱས་པ་རྒྱུད་ལྡན་མཚན་གྱུར་པ་ནི་མཚན་ཕྱི་མ་དེ་ལ་ལྟུང་བ་གང་གཞག་དེ་ཉིད་དུ་འགྱུར་བ་ཡིན་ཏེ། དཔེར་ན་དགེ་སློང་མ་རེག་པའི་ཕམ་པ་རྒྱུད་ལྡན་དགེ་སློང་དུ་མཚན་གྱུར་ན་སྦོམ་པོར་འགྱུར་བ་དང་། དགེ་སློང་མ་འཆབ་པའི་ཕམ་པ་རྒྱུད་ལྡན་དགེ་སློང་དུ་མཚན་གྱུར་ན་ཉེས་བྱས་སུ་འགྱུར་བ་བཞིན་ནོ། །བྱས་པ་ནི་དེ་ཉིད་ཡིན་ནོ་ཞེས་པ་དེ་ལྟར་ངེས་སམ་ཞེ་ན། ལྟུང་བ་ན་སྨད་པ་སྟེ་ཆུང་བ་རྒྱུད་ལྡན་གྱི་ལྟུང་བ་ཆེ་བའི་བཅས་རིགས་ཅན་དུ་མཚན་གྱུར་ན་རང་གི་ཉིད་དེ་ལྟུང་བ་ཆུང་བ་དེ་ཉིད་སོ་ན་གནས་སོ། །དཔེར་ན་དགེ་སློང་མ་འབྱིན་པའི་ལྟུང་བྱེད་རྒྱུད་ལྡན་དགེ་སློང་དུ་མཚན་གྱུར་ན་ལྟུང་བྱེད་དེ་ཉིད་སོ་ན་གནས་པ་བཞིན་ནོ། །མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེས་བཤད་ན་དགེ་སློང་ལྷུང་བཟེད་ལྷག་པོ་བཅངས་ནས་ཞག་བཅུ་འདས་པར་མ་ལོན་པ་དགེ་སློང་མ་མཚན་གྱུར་ན་ལྷུང་བཟེད་འཆང་བའི་སྤང་བར་འགྱུར་རམ་སྙམ་ན། དགེ་སློང་ལྷུང་བཟེད་ལྷག་པོ་བཅངས་ནས་ཞག་བཅུ་འདས་པར་མ་ལོན་པ་དགེ་སློང་མར་མཚན་གྱུར་པ་ནི་དགེ་སློང་མ་དེས་ཉི་མ་དེ་ལ་ལྷུང་བཟེད་རྙེད་པའི་ཆ་ཉིད་ཡིན་པས་སྤང་བར་མི་འགྱུར་རོ། །གོས་ཀྱི་སེལ་བ་ནི། འདིས་དོགས་པ་བཅད་མི་དགོས་ཏེ་ཆོ་ག་འདྲ་བའི་ཕྱིར། འོ་ན་རྒྱུད་ལྡན་ལྟུང་བ་དེའི་བཅས་རིགས་མེད་པར་མཚན་གྱུར་པ་ལ་ཇི་ལྟར་ཡིན་ཞེ་ན། འཁོར་དང་འཁོར་མང་ཉེ་བར་འཇོག་པའི་ལྟུང་བྱེད་རྒྱུད་ལྡན་གྱི་དགེ་སློང་མ་ལྟུང་བ་དེའི་ཞིང་ཉིད་མ་ཡིན་པ་དགེ་སློང་ཉིད་དུ་མཚན་གྱུར་པ་ལ་ནི་ལྟུང་བ་དེ་ཉམས་ཤིང་ཞིག་གོ །གོས་བྱེད་པ་དང་མ་བསྐོས་པར་ཆོས་སྟོན་པའི་ལྟུང་བྱེད་རྒྱུད་ལྡན་གྱི་དགེ་སློང་དགེ་སློང་མར་མཚན་གྱུར་པ་ལ་ཡང་དེ་ལྟར་སྦྱར་རོ། །བཅས་རིགས་ཅན་དུ་མཚན་གྱུར་ན་མི་ཉམས་པར་ངེས་སམ་ཞེ་ན། མཚན་གྱུར་པ་དེ་ལ་ལྷག་མ་སོགས་ཉེས་པ་བཅབ་པ་ཉམས་པ་མ་ཡིན་པ་མ་ཡིན་སྟེ། ཉམས་པ་ཡིན་ཏེ་དགེ་སློང་གིས་དགེ་སློང་མ་ལ་བཅབ་པ་ལ་ཡང་ལྟུང་བ་མེད་ཅིང་། དགེ་སློང་མས་དགེ་སློང་ལ་བཅབ་པ་ལ་ཡང་ལྟུང་བ་མེད་པའི་ཕྱིར། འོ་ན་ཕམ་པ་བཅབ་པའི་ཉེས་པ་ཡང་ཉམས་སམ་ཞེ་ན། རྒྱ་་་་་་ཁ་ཅིག་ཉམས་ཞེས་བཞེད་པ་ལ་གཞན་དག་ན་རེ། སྲོག་གཅོད་པ་ཕམ་པ་འཆབ་བཅས་བྱུང་བའི་དགེ་སློང་མ་དགེ་སློང་དུ་མཚན་གྱུར་པ་དེ་བསླབ་པ་ཕུལ་ནས་སྡོམ་པ་བླངས་ན་སྐྱེ་བར་ཐལ། དེ་ལ་ཕམ་པ་འཆབ་བཅས་ཀྱིས་ཉམས་པའི་ཕྱིར་ཞེས་བྱ་བ་མི་འཐད་དེ། ཕམ་པ་འཆབ་བཅས་བྱུང་བའི་དགེ་སློང་བསླབ་པ་ཕུལ་ནས་ཁྱིམ་པར་བབས་པའི་ཁྱིམ་པ་དེས་སྡོམ་པ་བླངས་ན་སྐྱེ་བར་ཐལ། དེ་ལ་ཕམ་པ་འཆབ་བཅས་མེད་པའི་ཕྱིར། ཁྱབ་པ་ཁས་སོ། །འཆབ་སེམས་བསྐྱེད་ཚུལ་ལ། བམ་ལྔར་མཚམས་ནང་དེ་ན་མཐོལ་ཡུལ་གྱི་དགེ་སློང་ཡོད་ན་འཆབ་སེམས་སྐྱེས་པ་ཙམ་གྱིས་འཆབ་བཅས་སུ་འགྱུར་ལ། མེད་ན་འཆབ་སེམས་སྐྱེས་ཀྱང་མི་འགྱུར་བར་གསུངས་སོ། །འོ་ན་ལྷག་མ་བཅབ་པའི་ཉེས་པ་རྒྱུད་ལྡན་མཚན་གྱུར་པ་ན་འཆབ་ཉེས་དེ་ཉམས་པས་དེ་འདག་པའི་ཕྱིར་དུ་སྔར་མནོས་པའི་སྤོ་བ་ཞིག་ཀྱང་ལྷག་མ་ཐུན་མོང་བ་རྒྱུད་ལྡན་མཚན་གྱུར་པ་ན་ལྷག་མ་དེ་མི་ཉམས་པར་ཡོད་པས་དེ་འདག་པའི་ཕྱིར་དུ་སྤྱོད་པའི་མགུ་བ་མི་ཉམས་སམ་ཞེ་ན། མགུ་བ་སྤྱོད་བཞིན་པ་མཚན་གྱུར་ན་ལྷག་མ་མ་ཉམས་ཀྱང་སྔར་མགུ་བ་རིལ་གྱིས་སམ་ཆ་ཤས་ཀྱི་སྤྱད་པ་དོན་མེད་པ་ཉིད་ཡིན་ཏེ། དེ་མ་སྤྱད་པ་དང་འདྲ་བས་ཡང་མགུ་བ་མནོས་ནས་སྤྱོད་དགོས་པའི་ཕྱིར། གསུམ་པ་ནི། མཚན་གྱུར་པ་ན་ལྟུང་བ་ཡོད་པ་མེད་པར་འགྱུར་བ་དང་། མེད་པ་དེ་ཡོད་པར་མི་འགྱུར་བ་དང་། ཆེ་བ་ཆུང་བར་འགྱུར་བ་དང་། ཆུང་བ་ཆེ་བར་མི་འགྱུར་བ་དང་། མགུ་བ་སྤྱོད་པ་དོན་མེད་པ་སོགས་སུ་འགྱུར་བའི་རྒྱུ་མཚན་ཇི་ལྟར་ཡིན་ཞེ་ན། མཚན་གྱུར་པ་འདི་ལ་ཆོ་ག་སྟེ། བཅས་པ་རྣམས་གྱུར་ཅིང་འཕོས་པ་ཡིན་པའི་ཕྱིར། སྐབས་འདིར་ཁ་ཅིག་ན་སྨད་པའི་དོན་གྱི་ཞེས་པའི་གཞུང་ཚན་འདི་སྦྱོར་བ་ཆུང་ཆེའི་མུ་ཁོ་ན་འཆད་པ་ཡིན་ཞེས་པ་དང་། བྱས་པ་ནི་དེ་ཉིད་ཡིན་ཞེས་པ་འདི་ཐུན་མོང་མ་ཡིན་པ་དང་རྗེས་སུ་མཐུན་པའི་མིང་ཁོ་ནའི་དབང་དུ་བྱས་ནས་སྟོན་ལ། དེ་ཡང་ཆེ་ཆུང་གི་མུ་ཁོ་ན་སྟོན་ནོ་ཞེས་ཟེར་བ་མི་འཐད་དེ། བྱས་པ་ནི་ཞེས་པའི་གཞུང་འདིས་ཆེ་ཆུང་གི་མུ་ཁོ་ན་སྟོན་པ་ལ་མ་ཡིན་པར་ཐལ། ན་སྨད་པ་ནི་རང་གི་ཉིད་དོ་ཞེས་པ་ནི། བྱས་པ་ནི་ཞེས་པའི་དམིགས་བསལ་དུ་སྦྱར་བའི་ཕྱིར། ན་སྨད་པ་ནི་རང་གི་ཉིད་དུ་ཞེས་པའི་སྔ་འགྲེལ་དུ་རྣམ་པ་དེའི་དམིགས་ཀྱིས་བསལ་བ་བསྟན་པའི་ཕྱིར་ཞེས་མཚམས་སྦྱར་བའི་ཕྱིར། བྱས་པ་ནི་དེ་ཉིད་ཅེས་པས་ཐུན་མོང་མ་ཡིན་པའི་ལྟུང་བ་དང་རྗེས་སུ་མཐུན་པ་མི་ཙམ་ཁོ་ནའི་དབང་དུ་བྱས་པ་མ་ཡིན་པར་ཐལ། ན་སྨད་པ་ནི་རང་གི་ཞེས་པའི་འགྲེལ་པའི་མཇུག་སྡུད་ཀྱི་སྐབས་སུ། ཁ་ཅིག་ནི་མཉམ་པར་འགྱུར་བའང་ཡོད་དེ། དཔེར་ན་སྲོག་གཅོད་པ་ལ་སོགས་པ་ལྟ་བུའོ་ཞེས་གསུངས་པའི་ཕྱིར། དྲོ་་་་་་ཁ་ཅིག་བྱས་པ་ནི་ཞེས་པའི་གཞུང་འདི་ཐུན་མོང་མ་ཡིན་པའི་དབང་དུ་བྱས་ནས་བྱེད་བཞིན་པ་ལ་ཅིར་འགྱུར་དཔྱོད་པ་ཡིན་ཞེས་གསུང་བ་མི་འཐད་དེ། དེ་མཚན་གྱུར་པ་ནི་ཞེས་པའི་སྐབས་སུ་དཔྱད་ཟིན་པའི་ཕྱིར། དེས་ན་འགྲེལ་པར་སྦྱོར་བ་དང་དངོས་གཞིའི་ཞིང་དུ་སྤྱིར་སྦྱར་ཞེས་པའི་སྦྱོར་བའི་ཞིང་ནི། ལྟུང་བ་ཆུང་བའི་ཞིང་ལ་བྱེད་ཀྱི། སྦྱོར་ལྟུང་མཚན་ཉིད་པའི་ཞིང་མ་ཡིན་ཏེ། འགྲེལ་པར་གལ་ཏེ་ན་ལྟུང་བ་ན་སྨད་པའི་ཞིང་ཉིད་དུ་འགྱུར་བའང་ཡོད་དེ་ཞེས་གསུངས་པའི་ཕྱིར། དངོས་གཞིའི་ཞིང་ཡང་ལྟུང་བ་རྫོགས་ཟིན་གྱི་ཞིང་ལ་བྱའོ། །དེའི་འོག་ཏུ་སྦྱོར་བའི་ཞིང་ཉིད་ཡིན་པ་སྟོན་ཞེས་གསུངས་པ་ནི་སྦྱོར་བ་མཚན་ཉིད་པའི་མ་ཡིན་གྱི། སྦྱོར་བ་དེས་མཚན་སྔ་མ་ལྟུང་བ་གང་བསྐྱེད་པའི་ཞིང་དུ་འགྱུར་བ་ལ་བྱེད་དགོས་ཏེ། སྦྱོར་ལྟུང་མཚན་ཉིད་པ་ཡིན་པ་ལ་སྒྲུབ་བྱེད་མེད་ཅིང་གནོད་བྱེད་ཡོད་པའི་ཕྱིར་དང་། དེའི་འོག་ཏུ་དངོས་གཞིའི་ཞིང་ཡིན་པ་སྟོན་ཞེས་གསུངས་པ་ནི་ལྟུང་བ་གྲུབ་ཟིན་གྱི་ཞིང་ལ་བྱ་དགོས་ཏེ། སྒྲ་ཇི་བཞིན་པར་ཁས་ལེན་ན་འགྲེལ་པར་སྦྱོར་ལྟུང་དཔེར་བཤད་པར་མི་འཐད་པར་འགྱུར་རོ། །གཉིས་པ་ཡུལ་གྱི་ཡན་ལག་ནི། ལྟུང་བ་ཆུང་བའི་སྦྱོར་བ་བྱེད་བཞིན་པ་མཚན་གྱུར་ན། ཆུང་བ་དེ་ཉིད་བསྐྱེད་པར་ངེས་སམ་ཞེ་ན། མེད་མི་རུང་གི་སྦྱོར་བ་བྱེད་བཞིན་པ་དེའི་ཚེའམ། དེའི་གནས་སྐབས་ཀྱི་ཕོ་མོའི་ལུས་དེ་ལྟུང་བ་བསྐྱེད་པའི་བྱེད་པ་པོ་ཡིན་ཏེ། དཔེར་ན་དགེ་སློང་གིས་སྐྱེས་པ་ལ་རེག་པའི་སྦྱོར་བ་བྱེད་བཞིན་པ་དགེ་སློང་མར་མཚན་གྱུར་ན་སྐྱེས་པའི་ལུས་ལ་རེག་པའི་སྦྱོར་བ་བྱེད་པ་ཡོད་ན་དེའི་ཚེ་སྐྱེས་པའི་ལུས་དེ་དགེ་སློང་མ་དེ་ལ་རེག་པའི་ཕམ་པ་བསྐྱེད་པའི་བྱེད་པ་པོ་ཡིན་གྱིས་སྦོམ་པོ་ཙམ་གྱི་བྱེད་པ་པོ་མ་ཡིན་པ་དང་། དགེ་སློང་གིས་སྐྱེས་པ་ལ་རེག་པའི་ཚེ་སྐྱེས་པ་བུད་མེད་དུ་མཚན་གྱུར་ནས་དགེ་སློང་དེས་བུད་མེད་ལ་རེག་པའི་སྦྱོར་བ་ཡོད་ན་དེའི་ཚེ་བུད་མེད་ཀྱི་ལུས་དེ་དགེ་སློང་དེ་ལ་རེག་པའི་ལྷག་མ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱི་བྱེད་པ་པོ་མ་ཡིན་པ་དང་། དགེ་སློང་མས་བུད་མེད་ཀྱི་ལུས་ལ་རེག་པའི་སྦྱོར་བ་བྱེད་བཞིན་པའི་ཚེ་དགེ་སློང་མ་དེ་དགེ་སློང་དུ་མཚན་གྱུར་ནས་དེས་བུད་མེད་ཀྱི་ལུས་ལ་རེག་པའི་སྦྱོར་བ་ཡོད་ན་དེའི་གནས་སྐབས་ཀྱི་བུད་མེད་ཀྱི་ལུས་དེ་དགེ་སློང་དེ་ལ་རེག་པའི་ལྷག་མ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱིས་བྱེད་པ་པོ་མ་ཡིན་པ་དང་། དགེ་སློང་མས་བུད་མེད་ལ་རེག་པའི་སྦྱོར་བ་བྱེད་བཞིན་པའི་ཚེ་བུད་མེད་སྐྱེས་པར་མཚན་གྱུར་ནས་དགེ་སློང་མ་དེས་སྐྱེས་པའི་ལུས་ལ་རེག་པའི་སྦྱོར་བ་བྱེད་པ་ཡོད་ན་དེའི་གནས་སྐབས་ཀྱི་སྐྱེས་པའི་ལུས་དེ་དགེ་སློང་མ་དེ་ལ་རེག་པའི་ཕམ་པ་བསྐྱེད་པའི་བྱེད་པ་པོ་ཡིན་གྱི་སྦོམ་པོ་ཙམ་གྱི་བྱེད་པ་པོ་མ་ཡིན་པ་ལྟ་བུའོ། །མིས་བསྐྱེད་པའི་ལྟུང་བ་རྣམས་བསྐྱེད་ནུས་ཀྱི་ཡན་ལག་ཏུ་གྱུར་པའི་མི་དེ་ལ་མིའི་ཕ་མ་ལས་སྐྱེས་པ་དགོས་སམ་སྙམ་ན། མིའི་འགྲོ་བ་ལས་གཞན་ཕ་མ་དུད་འགྲོ་སོགས་ལས་སྐྱེས་པའི་མི་ནི་མི་རང་གི་འགྲོ་བ་ཉིད་མ་ཡིན་པ་མ་ཡིན་པར་ཡིན་པས་མིས་བསྐྱེད་པའི་ལྟུང་བ་རྣམས་རྫོགས་པར་བསྐྱེད་དོ། །དེ་བཞིན་དུ་དུད་འགྲོ་དང་མི་མིན་ལ་ཡང་སྦྱོར་རོ། །རེག་པའི་ཕམ་པ་རྒྱུད་ལྡན་གྱི་དགེ་སློང་མ་དགེ་སློང་དུ་མཚན་གྱུར་ན་རིག་པའི་ཕམ་པ་སྦོམ་པོར་འགྱུར་བ་སོགས་ཀྱི་དོན་ནི་ངོ་བོ་འགྱུར་བ་མ་ཡིན་གྱི། རྟེན་དགེ་སློང་དང་ཕྲད་པའི་དབང་གིས་ཕམ་པའི་ཕྱིར་བཅོས་མི་འཇུག་པར་སྦོམ་པོའི་མིང་རིགས་ཀྱི་ཕྱིར་བཅོས་འཇུག་པ་ལྟ་བུ་ཡིན་པ་འགྲེལ་པ་ལས་བཤད་དོ། །དེའི་ཚེ་ལུས་བྱེད་པ་པོ་ཉིད་ཡིན་ཞེས་པའི་འགྲེལ་པར། དགེ་སློང་གིས་ཡུལ་དགྲ་བཅོམ་མ་ཡིན་པའི་དུས་སུ་གསོད་པའི་སྦྱོར་བ་བྱས་པའི་འོག་ཏུ་དགྲ་བཅོམ་ཐོབ། འདུན་པ་ལོག་པའི་འོག་ཏུ་སྔར་གྱི་སྦྱོར་བའི་རྐྱེན་གྱིས་ཤི་ན་དགྲ་བཅོམ་གྱི་ལུས་དེ་དགེ་སློང་དེ་ལ་སྲོག་གཅོད་པའི་ལྟུང་བ་ཉི་ཚེའི་བྱེད་པ་པོར་གསུངས་པ་ནི། ཤ་མིས་སྦྱོར་ལྟུང་ལ་དགོངས་པ་གསུང་ཡང་མཐར་ཐུག་སྲོག་གཅོད་ཀྱི་ཕམ་པ་མི་འབྱུང་ཡང་སྦོམ་པོར་འགྱུར་བ་ལ་དགོངས་སོ། །འོ་ན་དགེ་སློང་འགྲོ་བ་གཞན་གྱི་རྣམ་པ་བསྟེན་པ་དགེ་སློང་གི་འདུ་ཤེས་ཡོད་པ་དེ་ལྟུང་བ་བསྐྱེད་པའི་རྟེན་ལ་གཟུགས་མ་བསྒྱུར་བའི་དགེ་སློང་དང་འདྲ་ན་ཡུལ་གཟུགས་བསྒྱུར་བ་དེས་ཀྱང་མ་བསྒྱུར་བ་དང་འདྲ་བར་ལྟུང་བ་རྫོགས་པར་བསྐྱེད་དམ་ཞེ་ན། མི་འགའ་ཞིག་གི་སྔགས་རྫས་ཀྱིས་མིའི་འགྲོ་བ་ལས་གཞན་གྱི་རྣམ་པ་བསྟེན་པ་ཡང་མིའི་འགྲོ་བ་མ་ཡིན་པ་མ་ཡིན་པས་མི་དེར་འདུ་ཤེས་བསམ་གཞན་དུ་འདུ་ཤེས་པས་བསད་ཀྱང་མཐར་ཐུག་ལ་ཕམ་པ། སྦྱོར་བ་ལ་མིང་ཤེས་ཡོད་ན་སྦོམ་པོ། གཞན་དུ་འདུ་ཤེས་ན་ཉེས་བྱས་སུ་འགྱུར་རོ། །དུད་འགྲོ་ལ་མཐར་ཐུག་ལྟུང་བྱེད་དང་། མི་མིན་ལ་མཐར་ཐུག་སྦོམ་པོར་འགྱུར་ལ། སྦྱོར་བ་ལ་མིའི་འདུ་ཤེས་ཡོད་ན་སྦོམ་པོ། མེད་ན་ཉེས་བྱས་སུ་འགྱུར་རོ་ཞེས་སྦྱར་རོ། །འགྲོ་བ་གཞན་གྱི་རྣམ་པ་བསྟེན་ལ་བསད་པ་ལ་ཡང་ངོ་ཞེས་པའི་གཞུང་འདིས། མདོ་གང་གི་དོན་འཆད་པའི་མདོ་དེའི་དོན་གཞན་ཡང་གསལ་བར་བསྟན་པའི་ཕྱིར་བཤད་པ་ནི། སོ་སོ་སྐྱེ་བོའི་གནས་སྐབས་དེས་འཕགས་པའི་གནས་སྐབས་གཞན་ཐོབ་པ་ནི་རྒྱུད་གཞན་ཉིད་མ་ཡིན་པས་ཡུལ་སོ་སོའི་སྐྱེ་བོའི་དུས་སུ་གསོད་པའི་སྦྱོར་བ་བྱས། འཕགས་པའི་དུས་སུ་མཐར་ཐུག་གྲུབ་ནའང་ལྟུང་བ་རྫོགས་པར་འགྱུར་རོ། །གསུམ་པ་ལྟུང་བ་ཐ་དད་དུ་བསྐྱེད་ཚུལ་ཞར་བྱུང་དང་བཅས་པ་ལ་ལྔ་སྟེ། བསླབ་རྒྱུན་ཐ་དད་པས་ལྟུང་བ་ཐ་དད། བསམ་རྒྱུད་ཐ་དད་པས་ལྟུང་བ་ཐ་དད། བཅས་པ་ཐ་དད་པས་ལྟུང་བ་ཐ་དད། ཉེར་ལེན་ཐ་དད་པས་ལྟུང་བ་ཐ་དད། གཞི་དང་བྱ་བ་ཐ་དད་པས་ལྟུང་བ་ཐ་དད་དུ་འགྱུར་ཚུལ་ལོ། །དང་པོ་ནི། ལྟུང་བའི་སྦྱོར་བ་བྱས་ནས་ཁྱིམ་པར་བབས་ཡང་བསྙེན་རྫོགས་བྱས་ནས་སྔར་གྱི་བྱ་བའི་འཕྲོ་ཟིན་པར་བྱས་ནས་གཞི་གཅིག་ལ་བྱས་པ་ཡིན་པས་ཕྱིར་བཅོས་གཅིག་གིས་འདག་གམ་ཞེ་ན། སྔར་ལྟུང་བའི་སྦྱོར་བ་བྱས་ནས་ཉེས་པ་དེ་མེད་པ་ཉིད་ཀྱིས་ཁྱིམ་པར་བབས། ཡང་ཉེས་པ་དེ་འོང་པ་དགེ་སློང་དུ་གྱུར་ནས་སྔར་གྱི་བྱ་བའི་འཕྲོ་ཟིན་པར་བྱས་ན་ཕྱིར་བཅོས་ཐ་དད་དུ་འཇུག་དགོས་པའི་ལྟུང་བ་ཐ་དད་དུ་འགྱུར་རོ། །དཔེར་ན་དགེ་སློང་གིས་མ་གནང་བའི་སྟན་བྱེད་པར་བརྩམས་ནས་ཁྱིམ་པར་བབས། སླར་བསྙེན་པར་རྫོགས་ནས་སྟན་གཅིག་བྱས་པའི་རྗེས་སུ་སྔར་གྱིས་སྟན་གྱིས་འཕྲོ་ཟིན་པར་བྱས་ན་ལྟུང་བ་སྔ་ཕྱི་ཐ་དད་དུ་འགྱུར་བ་བཞིན་ནོ། །གཉིས་པ་ནི། བསླབ་རྒྱུན་གཅིག་གིས་གཞི་གཅིག་ལ་བསྟེན་པའི་ལྟུང་བ་ཕྱིར་བཅོས་གཅིག་གིས་འདག་གམ་ཞེ་ན། ལྟུང་བ་བྱེད་པར་བརྩམས་ཏེ་འདུན་པ་ལོག་པའི་དབང་གིས་བྱ་བ་དེ་བཏང་ནས་སྔར་གྱི་སྦྱོར་བའི་འཕྲོ་ཟིན་པར་བྱས་ན་ཕྱིར་བཅོས་ཐ་དད་འཇུག་པའི་ལྟུང་བ་ཐ་དད་དུ་འགྱུར་རོ། །གསུམ་པ་ནི། བསླབ་རྒྱུན་དང་བསམ་རྒྱུན་གཅིག་པའི་གཞི་གཅིག་གི་ལྟུང་བ་རྣམས་ཕྱིར་བཅོས་གཅིག་གིས་འདག་གམ་ཞེ་ན། བྱ་བའི་གཞི་གཅིག་ལ་བསླབ་པ་དུ་མ་ཉིད་བཅས་པ་ལ་ནི་དེ་ལས་འདས་ན་བཅས་པ་ཇི་སྙེད་ཡོད་པ་དེ་སྙེད་ཀྱི་ཉེས་པར་འགྱུར་རོ། །དཔེར་ན་བསྙེན་པར་མ་རྫོགས་པ་དང་ནུབ་གཉིས་ལྷན་ཅིག་ཉལ་ནས་ནུབ་གསུམ་པ་ལ་བུད་མེད་དང་ལྷན་ཅིག་ཉལ་ན་བུད་མེད་དང་ལྷན་ཅིག་ཉལ་བའི་ལྟུང་བྱེད་དང་མ་རྫོགས་པ་དང་ལྷན་ཅིག་པར་ཉལ་བའི་ལྟུང་བྱེད་གཉིས་འབྱུང་བ་དང་། དགེ་སློང་ཞར་བ་མ་ཡིན་པ་ལ་སྐྱོན་དང་བརྫུན་སྨྲ་འདོད་ཀྱི་བསམ་པས་ཞར་བ་ཞེས་བརྗོད་ན་སྐྱོན་སྨྲ་བའི་ལྟུང་བྱེད་དང་བརྫུན་སྨྲ་བའི་བྱང་བྱེད་གཉིས་འབྱུང་བ་བཞིན་ནོ། །བཞི་པ་ནི་ཆའི་ལྟུང་བ་དང་ཆ་ཅན་གྱི་ལྟུང་བ་རྣམས་ཕྱིར་བཅོས་གཅིག་གིས་འདག་གམ་ཞེ་ན། ཁ་ན་མ་ཐོ་བ་ལྕི་བ་མི་ཚངས་པར་སྤྱོད་པ་ལྟ་བུ་དེའི་ཆའམ། ཤན་ནམ་ལྷག་མ་སྟེ་དེའང་གཉིས་ཏེ། ཆ་ཤས་ཀྱི་ཆར་གྱུར་པ་སྦྱོར་བའི་ལྟུང་བ་ལྟ་བུ་དང་། ཆར་གཏོགས་པས་ཆར་གྱུར་པ་འབྱིན་པ་དང་རེག་པ་ལྟ་བུ་སྟེ། ཊཱི་ཀར་ཆའི་ངོ་བོ་ཉིད་ཅེས་བྱ་བ་ནི་མི་ཚངས་པར་སྤྱོད་པ་སྤྱད་པའི་ཕྱིར་འགྲོ་བ་གང་ཡིན་པ་དེ་ནི་ཉེས་བྱས་སོ། །བདག་ཉིད་ཀྱིས་བསྙེན་བཀུར་བསྔགས་པ་གང་ཡིན་པ་དེ་ནི་དགེ་འདུན་ལྷག་མའོ། །གནས་ངན་ལེན་སྨྲ་བ་གང་ཡིན་པ་དེ་ནི་གཞན་ཡིན་ནོ། །བདག་ཉིད་ཀྱི་དོན་དུ་བུད་མེད་ལ་གཞོལ་བ་གང་ཡིན་པ་དེ་ནི་ཕམ་པར་འགྱུར་བར་གཏོགས་པའི་སྦོམ་པོའོ། །ཆ་དང་ཆ་ཅན་སྦྱར་བ་ནི། མི་ཚངས་པར་སྤྱོད་པ་ནི་ཆ་ཅན་ཡིན་ལ། འབྱིན་པ་དང་རེག་པ་དང་འཁྲིག་པ་སྨྲ་བ་ལ་སོགས་པ་ཆ་ཡིན་ནོ། །དེ་བཞིན་དུ་མ་བྱིན་ལེན་ནི་ཆ་ཅན་ཡིན་ལ། བྱིན་པ་འཕྲོག་པ་དང་བསྡོས་སྐྱུར་དང་སྐྲོད་པ་དང་སྦེད་པ་ལ་སོགས་པ་ནི་ཆ་ཡིན་ནོ། །སྲོག་གཅོད་པ་ནི་ཆ་ཅན་ཡིན་ལ། རྩོད་པ་དང་བཅས་པའི་གཞི་མི་གཏོང་བ་དང་ས་བོན་དང་སྐྱེ་བའི་ཚོགས་འཇིག་པ་དག་ནི་ཆ་ཡིན་ནོ། །མི་ཆོས་བླ་མ་སྨྲ་བ་ཆ་ཅན་ཡིན་ལ། ཕམ་པ་དང་ལྷག་མའི་སྐུར་འདོད་བྱེད་པ་སོགས་ཆ་ཡིན་ནོ། །ཆ་དང་ཆ་ཅན་སྦྱར་བ་ནི་རྒྱས་པར་ཊཱི་ཀ་ལས་ཤེས་པར་བྱའོ། །དེར་ན་ཆར་གཏོགས་པས་ཆ་གྱུར་པ་འབྱིན་པ་ལྟ་བུ་དེ་ནི་ཁ་ན་མ་ཐོ་བ་ལྕི་བ་དེ་དང་དགག་བྱ་རིགས་མཐུན་པའི་ལྟུང་བ། མི་ཚངས་སྤྱོད་ལྟ་བུ་ལ་ལྟོས་པའི་ཡང་བ་འབྱིན་པའི་ལྷག་མ་ལྟ་བུ་དེར་གཏོགས་པ་སྟེ། མི་ཚངས་པར་སྤྱོད་པ་ལ་སོགས་པའི་ཆར་གཏོགས་པའི་ཁ་ན་མ་ཐོ་བ་རང་གི་ལྕི་བ་འབྱིན་ལྷག་ལྟ་བུ་དང་འབྲེལ་བ་ཡིན་གྱི། རིགས་མི་མཐུན་པར་མི་ཚངས་པར་སྤྱོད་པའི་སྦྱོར་བ་ལྟ་བུར་ཡང་མི་གཏོགས་ལ། དགག་བྱ་ཙམ་རིགས་མཐུན་པའི་ཕམ་པར་ཡང་མི་གཏོགས་ཏེ་ཆ་ཅན་དང་ཆར་གཏོགས་རྣམས་ཀུན་སློང་གི་རྣམ་པ་ཐ་དད་ལས་སྐྱེས་པའི་ཕྱིར། ཁུ་བ་འབྱིན་པ་ལ་འབྱིན་པའི་ལྷག་མར་གོང་དུ་བསྟན་ཟིན་པའི་ཕྱིར་འདིར་བསྟན་པའི་དགོས་པ་ཅི་ཡིན་ཞེ་ན། དེ་ལྟར་ཡིན་མོད་ཀྱི་ཧ་ཅང་ཐལ་བ་སེལ་བའི་དགོས་པ་ཡོད་པའི་ཕྱིར། རང་ཊཱིཀ་ཏུ་མདོ་འདིས་མ་བརྗོད་པ་ནི་ཅུང་ཟད་ཀྱང་མི་བརྗོད་ཀྱི་ཧ་ཅང་ཐལ་བར་འགྱུར་བ་སེལ་བར་བྱེད་དོ་ཞེས་གསུངས་སོ། །ཇི་ལྟར་སེལ་ན་ཁུ་བ་འབྱིན་པའི་འདུན་པས་ཁུ་བ་ཕྱུང་བ་མི་ཚངས་པ་སྤྱོད་པའི་སྦོམ་པོ་ཡིན་ན་ཧ་ཅང་ཐལ་ཏེ། ཀུན་སློང་གི་རྣམ་པར་ཐ་དད་པའི་ལྟུང་བ་གཞན་གྱི་ཀུན་སློང་གིས་ལྟུང་བ་གཞན་ཀུན་ནས་སློང་བར་འགྱུར་བའི་ཕྱིར་རོ། །དེས་ན་དེ་ནི་འབྱིན་པའི་ལྷག་མ་ཡིན་གྱི་ཕམ་པའི་སྦོམ་པོ་མ་ཡིན་ནོ་ཞེས་པའི་ཚུལ་གྱིས་སོ། །མདོ་སྔ་མ་དེའི་སྤྲོས་པ་བསྟན་པར་བྱ་བའི་ཕྱིར་བཤད་པ་ནི། ཁུ་བ་དབྱུང་སེམས་ཀྱིས་རྨའི་ནང་དུ་ཁུ་བ་དབྱུང་ན་བྱ་བ་གཞན་ཡིན་པས་ལྷག་མར་མི་འགྱུར་རོ་ཞེ་ན། དབྱུང་སེམས་ཀྱིས་ཁུ་བ་ཕྱུང་བ་ཐམས་ཅད་ལ་མཐའ་ཕམ་པ་ཉིད་མ་གཏོགས་པ་དགེ་འདུན་ལྷག་མར་འགྱུར་ཏེ། དབྱུང་སེམས་ཀྱིས་རྨ་མ་ཉམས་པའི་ནང་དུ་ཁུ་བ་ཕྱུང་ནས་རེག་པ་མྱོང་ན་ཕམ་པ། དེ་ལྟར་ཕྱུང་ནས་རེག་པ་མ་མྱོང་ན་ལྷག་མར་འགྱུར་བ་དང་། རྨ་ཉམས་པར་དབྱུང་སེམས་ཀྱིས་ཁུ་བ་ཕྱུང་ན་ལྷག་མར་འགྱུར་རོ། །ལྔ་པ་ནི། ཕུང་པོ་ལས་བརྐུས་ན་ལན་རེ་རེ་བཞིན་བླངས་པ་ཐ་དད་ཅེས་པའི་གཞུང་དེས་མདོ་གང་གི་དོན་བཤད་པའི་མདོའི་དོན་གཞན་ཡང་བསྟན་པར་བྱ་བའི་ཕྱིར་བཤད་པ་ནི། མཐར་ཐུག་ཐ་དད་པས་བར་དུ་ཆོད་པའི་བྱ་བའམ་སྦྱོར་བ་དུ་མས་མཐར་ཐུག་གཅིག་གྲུབ་པའི་ཚད་དུ་ཆོག་པ་ནི་འབྲས་བུ་མཐར་ཐུག་གི་ལྟུང་བ་གཅིག་ཏུ་རྣམ་པར་མི་གཞག་གོ །དཔེར་ན་སྦྱོར་བ་ཆུང་ངུ་དུ་མས་ཡང་ནས་ཡང་དུ་ས་སོར་ཕྱེད་ལས་ལྷག་པ་བརྐོས་ཀྱང་ས་བརྐོ་བའི་ལྟུང་བྱེད་དུ་མི་འགྱུར་བ་དང་། ཁང་པའི་གཞི་སོ་སོ་ལ་རྩིག་པའི་བྱ་བ་བྱས་ནས་བསྡོམས་པ་ན་ཁང་པའི་ཚད་དུ་ཆོག་ཀྱང་ལྷག་མར་མི་འགྱུར་བ་བཞིན་ནོ། །འོ་ན་གང་ཟག་གཞན་གྱིས་བྱས་པའི་བཟོ་ལ་སོགས་པའི་འཕྲོ་བྱེད་པ་ལ་ཅིར་འགྱུར་ཞེ་ན། གཞན་གྱིས་ཁང་པ་དང་སྟན་གྱི་ཕྱེད་བྱས་ཟིན་པ་ལ་དེའི་འཕྲོ་བྱེད་པ་ནི་ཕྱེད་ཉིད་དེ་ན་སྨད་དུ་འགྱུར་ཏེ། དེ་ཡང་སྟན་འཕྲོ་བྱས་ན་ཉེས་བྱས་ཁང་པའི་འཕྲོ་བྱས་ན་སྦོམ་པོར་འགྱུར་རོ། །ཤུགས་ལ་གཞན་གྱིས་ཅུང་ཟད་བྱས་པའི་འཕྲོ་ཟིན་པར་བྱེད་ན་ལྟུང་བ་རྫོགས་པར་བསྐྱེད་ཅེས་སྟོན་ནོ། །སྔར་རྣམ་འབྱེད་དུ་ཕམ་པས་སྐུར་པ་བཏབ་ན་ལྷག་མ་དང་། ལྷག་མས་སྐུར་པ་བཏབ་ན་ལྟུང་བྱེད་དུ་འགྱུར་བར་བསྟན་ནས་དེ་ལས་གཞན་པའི་ལྟུང་བས་སྐུར་བ་འདེབས་ན་ཅིར་འགྱུར་མ་བསྟན་པས་དེ་ལ་ཅིར་འགྱུར་ཞེ་ན། ཁ་ན་མ་ཐོ་བ་ཕམ་པ་དང་ལྷག་མ་དེ་བས་ན་སྨད་པ་སྦོམ་པོ་ལྟུང་བྱེད་སོར་བཤགས་ཉེས་བྱས་དག་གིས་སྐུར་བ་བཏབ་པའི་ཆ་འབྲས་བུ་ནི་ན་སྨད་པ་སྟེ་ཉེས་བྱས་སུ་འགྱུར་རོ། །བཞི་པ་འདུ་ཤེས་བསམ་པའི་མཚན་ཉིད་ནི། གོང་དུ་ཡིད་གཉིས་ནི་འདུ་ཤེས་དང་འདྲ་ཞེས་བསྟན་ན། དེ་ལ་སྦྱོར་བ་དེ་བྱའོ་སྙམ་པའི་ཀུན་སློང་མེད་པའི་ལྟུང་བ་མི་རྫོགས་པར་འགྱུར་རམ་ཞེ་ན། སྲོག་གཅོད་ལ་སོགས་པ་བསླབ་པའི་གཞི་ཐམས་ཅད་ལ་མི་ཡིན་མིན་ཐེ་ཚོམ་ཟ་བས་གསོད་པ་ལྟ་བུའི་བྱ་བ་ལ་ཞུགས་པ་ལ་གང་ཡིན་ཡང་བྱའོ་སྙམ་པའི་བསམ་པ་སྤྱི་ཞུགས་དང་བཅས་པ་ཡིན་པས་ལྟུང་བ་རྫོགས་པར་བསྐྱེད་དོ། །ལྟུང་བ་བསྐྱེད་པ་ལ་འདུ་ཤེས་དང་དོན་གང་གཙོ་ཆེ་བ་ཡིན་ཞེ་ན། སྦྱོར་བའི་ལྟུང་བ་བསྐྱེད་པ་ལ་ནི་འདུ་ཤེས་ཡན་ལག་གམ་རྒྱུའི་གཙོ་བོ་ཡིན་ཏེ། ཤིང་སྐམ་ལ་མིར་འདུ་ཤེས་ནས་གསོད་པའི་སྦྱོར་བ་བྱས་ན་ཉེས་པ་སྦོམ་པོ་དང་། མི་ལ་དུད་འགྲོར་འདུ་ཤེས་ཏེ་གསོད་པའི་སྦྱོར་བ་བྱས་ན་ཉེས་བྱས་སུ་འགྱུར་བའི་ཕྱིར། མཐར་ཐུག་གི་ལྟུང་བ་བསྐྱེད་པ་ལ་གང་བསམ་པའི་དོན་དང་འདུ་ཤེས་འཕྲད་པ་དེ་ཉིད་ཡན་ལག་ཏུ་དགོས་པ་ཡིན་ནོ། །དེར་ངེས་སམ་ཞེ་ན་མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་པ་སྟེ། འདུ་ཤེས་དོན་དང་ཕྲད་པ་མི་དགོས་ཏེ་མི་ལ་མི་ཚངས་པར་སྤྱོད་སྙམ་ནས་ཀླུ་ལ་སྤྱོད་ཀྱང་ཕམ་པ་དང་། མི་ལ་ཁུ་བ་དབྱུང་བསམས་ནས་དུད་འགྲོ་ལ་འབྱིན་པར་བྱེད་ནའང་ལྷག་མར་འགྱུར་རོ། །དེར་མ་ཟད་མི་བདེན་པ་བརྫུན་ཏུ་སྨྲ་བའི་ལྟུང་བ་བསྐྱེད་པ་ལ་ཉན་པ་པོ་འདུ་ཤེས་དོན་དང་ཕྲད་པ་ཡང་མི་དགོས་ཏེ། ལྷས་བྱིན་ལ་སྨྲའོ་བསམ་ནས་མཆོད་སྦྱིན་ལ་སྨྲས་ཀྱང་ལྟུང་བ་རྫོགས་པར་བསྐྱེད་དོ། །འགྲོ་བ་གཞན་གྱི་རྣམ་པ་བསྟེན་པ་བསད་པ་ལ་ཡང་ངོ་ཞེས་པའི་སྐབས་སུ། ཆོས་བཤེས་ཀྱིས་མི་སྟག་གི་རྣམ་པ་བསྟེན་པ་དེ་ལ་སྟག་ཏུ་འདུ་ཤེས་པས་བསད་པས་ཕམ་པར་འགྱུར་ཞེས་སྲོག་གཅོད་ཀྱི་ཕམ་པ་བསྐྱེད་པ་དེ་ལ་མིར་ཤེས་དང་མིར་ཐེ་ཚོམ་ཟ་བ་མི་དགོས་པར་གསུངས་པ་ལ། ཤ་མི་སོགས་བོད་སྔ་མ་ཁ་ཅིག་ན་རེ། འོ་ན་མི་སྟག་གི་རྣམ་པ་ཅན་ལ་སྟག་ཏུ་འདུ་ཤེས་ནས་གསོད་པའི་སྦྱོར་བ་ལ་སྦོམ་པོར་འགྱུར་བར་ཐལ། དེའི་མཐར་ཐུག་ལ་ཕམ་པར་འགྱུར་བའི་ཕྱིར། གལ་ཏེ་སྦྱོར་བ་ལ་སྦོམ་པོར་མི་འགྱུར་ཏེ་མིར་ཤེས་མེད་པས་སོ་ཞེ་ན། མཐར་ཐུག་ལ་ཡང་མཚུངས་སོ་ཞེས་དང་། གཞན་ཡང་། མི་སྟག་གི་རྣམ་པ་ཅན་དེའི་རྫས་ལ་སྟག་གི་རྫས་སུ་འདུ་ཤེས་ནས་བརྐུས་ན་ཕམ་པར་འགྱུར་བར་ཐལ། མི་སྟག་གི་རྣམ་པ་ཅན་རྟག་ཏུ་འདུ་ཤེས་ནས་བསད་པས་ཕམ་པར་འགྱུར་བའི་ཕྱིར། གཞན་ཡང་ལྷས་བྱིན་ལ་མཆོད་སྦྱིན་དུ་འདུ་ཤེས་ནས་བསད་པས་ཕམ་པར་འགྱུར་བར་ཐལ། གཏན་ཚིགས་སྔ་མ་དེའི་ཕྱིར། མི་སྟག་གི་རྣམ་པ་ཅན་ལ་སྟག་ཏུ་འདུ་ཤེས་ནས་བསད་པས་ཕམ་པ་མི་བསྐྱེད་པར་ཐལ། དེར་འདུ་ཤེས་པས་སོགས་ཞེས་དང་། འོད་ལྡན་ལས་མི་གཞན་ཡིན་ལ་མིར་འདུ་ཤེས་པས་ཞེས་པའི་འགྲེལ་པར། མི་མིན་པའི་འདུ་ཤེས་ཀྱིས་མིའི་སྲོག་དང་བྲལ་བ་ལ་ནི་མཐར་ཐུག་འགྱུར་བ་མེད་པར་བསྟན་ཏོ་ཞེས་གསུངས་པའི་ཕྱིར་ཞེས་དང་། བུ་སྟོན་གྱིས་དེ་ལ་སྟག་ཏུ་འདུ་ཤེས་ནས་བསད་ན་ཕམ་པར་མི་འགྱུར་ཏེ། འདི་གང་ལས་བཏུས་པའི་ཞུ་བར་མི་ལ་མི་མ་ལགས་པའི་འདུ་ཤེས་ཀྱིས་གུམ་པར་བྱེད་ན་ཅིར་འགྱུར། བཀའ་སྩལ་པ་ཉེས་པ་སྦོམ་པོར་འགྱུར་རོ་ཞེས་གསུངས་པའི་ཕྱིར་དང་། གཏམ་གྱི་གཞི་ལས་གང་གིས་གཞན་གྱི་འདུ་ཤེས་ཀྱིས་མ་འཚོ་བ་དང་བྲལ་བ་དེ་བསྙེན་པར་རྫོགས་པར་བྱེད་ན་བསྙེན་པར་རྫོགས་པར་བགྱི་འམ། བསྙེན་པར་རྫོགས་པར་བྱ་བ་ལ་ཞེས་གསུངས་པའི་ཕྱིར། རྒྱལ་ཚབ་པ་ན་རེ་ཕྱོགས་སྔ་སྔར་ལྟར་བྱས་ན་བོད་ཀྱི་སྐྱོན་འཇུག་ཀྱང་བོད་རྣམས་ཀྱིས་ཕྱོགས་སྔ་མ་ལོངས་པ་ཡིན་ཏེ། ཊཱི་ཀར་མིར་འདུ་ཤེས་ཀྱང་རུང་གཞན་དུ་འདུ་ཤེས་ཀྱང་རུང་ཞེས་པའི་དོན་ནི། མིར་ཤེས་པའམ་དེ་ལས་གཞན་མི་ཡིན་མིན་ཐེ་ཚོམ་ཟ་ཡང་རུང་ཞེས་པའི་དོན་ཡིན་གསུང་། བོ་དོང་པས་དེར་འདུ་ཤེས་པས་ཞེས་པས་སྤྱིར་བཏང་དང་། འགྲོ་བ་གཞན་གྱི་རྣམ་པ་ཞེས་སོགས་དམིགས་བསལ་ལོ་ཞེས་སྐྱོན་སྤོང་མཛད་དོ། །དེ་ཐམས་ཅད་ཀྱིས་བརྗོད་པའི་སྐྱོན་རིམ་པར་སྤངས་ནས། ཆོས་བཤེས་ཀྱི་འགྲེལ་པའི་གཞུང་འཛུགས་པར་བྱ་སྟེ། འདི་ལྟར་བོད་ཀྱི་ཐལ་འགྱུར་སྔ་མ་མི་འཐད་དེ། ཊཱི་ཀར་སྦྱོར་བ་ནི་འདུ་ཤེས་ལོག་པའི་དབང་གིས་ཁ་ན་མ་ཐོ་བ་ཆེ་ཆུང་དུ་འགྱུར་གྱི། དངོས་གཞི་ལ་ནི་དངོས་པོ་ཇི་ལྟ་བ་ལ་ཁ་ན་མ་ཐོ་བར་འགྱུར་རོ་ཞེས་པས་ལན་བཏབ་ཟིན་པའི་ཕྱིར་དང་། རྩ་བར་ཡང་སྦྱོར་བ་ལ་ནི་འདུ་ཤེས་ཡན་ལག་ཡིན་ནོ། །བསམ་པ་ལ་ནི་དེ་ཉིད་དོ། །ཞེས་སྦྱོར་མཐའ་ལ་འདུ་ཤེས་དང་། དངོས་པོ་གང་གཙོ་བསལ་བར་བཤད་པ་ངེས་པར་མཛད་དུ་གསོལ། ཐལ་འགྱུར་གཉིས་པ་མི་འཐད་དེ། ཊཱི་ཀར་མདོ་འདི་ནི་མ་བྱིན་པར་ལེན་པ་ལ་སོགས་པ་ལྟུང་བྱེད་ཀྱི་སྡེ་ཐམས་ཅད་ལ་སྦྱར་བ་མ་ཡིན་གྱི་སྲོག་གཅོད་པའི་སྐབས་འབའ་ཞིག་དང་སྦྱོར་རོ་ཞེས་གསུངས་ཤིང་། རྩ་བར་ཡང་བསད་པ་ལ་ཡང་ངོ་ཞེས་སྲོག་གཅོད་ལ་བཀར་ནས་གསུངས་པའི་ཕྱིར། ཐལ་འགྱུར་གསུམ་པ་མི་འཐད་དེ། ལྷ་མཆོད་རྒྱུད་ཐ་དད་ཡིན་པས་མི་མཚུངས་པའི་རྩོད་སྤོང་ཊཱི་ཀ་ལས་བཤད་ཟིན་ཅིང་། སྟག་གི་རྣམ་ལྡན་འདི་གསོད་སྙམ་པའི་དུས་ཀྱི་བསད་བྱ་དེ་སྟག་གི་རྣམ་ལྡན་དུ་ཡོད་ཅིང་། ལྷས་བྱིན་གྱིས་རྣམ་ལྡན་འདི་གསད་པར་བྱའོ་སྙམ་པའི་དུས་ཀྱི་གསད་བྱ་མཆོད་སྦྱིན་དེ་ལྷས་བྱིན་གྱིས་རྣམ་ལྡན་དུ་མེད་པའི་ཕྱིར། ཐལ་འགྱུར་བཞི་པ་ཡང་མི་འཐད་དེ། དེར་འདུ་ཤེས་པས་སོ་ཞེས་པའི་སྐབས་སུ་གསད་བྱ་དེ་ཉིད་མ་ནོར་བར་བསད་པ་དགོས་ཞེས་པའི་དོན་དུ་འགྲེལ་པས་བཤད་ཅིང་། འོད་ལྡན་གྱི་ལུང་གིས་ཆོས་བཤེས་འགོག ཁོ་བོས་ཀྱང་ཆོས་ཤེས་ཀྱི་ལུང་གིས་འོད་ལྡན་འགོག་ན་མཚུངས་པར་འགྱུར་ཏེ། རྒྱ་ཆེར་འགྲེལ་དང་འོད་ལྡན་མི་མཐུན་པ་དུ་མ་ཡོད་པ་ཁྱེད་རྣམས་ཀྱིས་ཀྱང་ཁས་བླངས་པའི་ཕྱིར་རོ། །བུས་མདོ་འདི་ཞུ་བ་ལས་བཏུས་གསུང་བའང་མི་འཐད་དེ། ཁྱེད་ཀྱིས་དྲངས་པའི་ལུང་དེས་འདུ་ཤེས་ཁོ་ན་ལ་དོགས་པ་གཅོད་ལ། འདིར་གཟུགས་བསྒྱུར་བ་ལ་དོགས་པ་གཅོད་པའི་ཕྱིར། ཊཱི་ཀར་འདིར་གཞུང་ནི་ཨུ་དྲ་ཡ་ནའི་རྟོགས་པ་བསྟན་པར་བྱ་སྟེ་ཞེས་གསུང་ཞིང་། རྟོགས་བརྗོད་དེ་ལུང་རྣམ་འབྱེད་ཀྱི་བཙུན་མོའི་འཁོར་སྡུད་ཀྱི་གླེང་གཞིའི་སྐབས་ན་ཡོད་པའི་ཕྱིར། གཏམ་གྱི་གཞིའི་ལུང་དྲངས་པ་དེས་ཀྱང་མི་གནོད་དེ། རྒྱུད་ཐ་དད་པ་དང་རྣམ་པ་ལྡན་མི་ལྡན་སྔར་བཤད་པས་ལན་བཏབ་ཟིན་པའི་ཕྱིར། རྒྱལ་ཚབ་པའི་སྐྱོན་སྤོང་དེ་ཡང་ཆོས་བཤེས་ཀྱི་འགྲེལ་པ་རས་སུ་མི་བོར་བའི་བཤད་པར་སྣང་མོད། ལུང་དོན་མ་ཡིན་ཏེ་གཞན་དུད་འགྲོ་མ་ཡིན་པ་དང་། སྤྲུལ་པ་བསད་པ་ལ་ཡང་ངོ་ཞེས་པའི་འགྲེལ་པར། དུད་འགྲོར་འདུ་ཤེས་ནས་མི་བསད་པ་ལ་ཕམ་པར་འགྱུར་བར་གསལ་བར་བཤད་པས་ད་དུང་སྐྱོན་སྤོང་དགོས་སོ། །དེས་ན་ཆོས་བཤེས་ཀྱི་ལུགས་འདི་ནི་མཛོད་འགྲེལ་དུ། དགྲ་བཅོམ་པ་མ་ཡིན་པའི་འདུ་ཤེས་ཀྱིས་དགྲ་བཅོམ་པ་གསོད་པར་བྱེད་ན་མཚམས་མེད་པ་ཁོ་ནར་འགྱུར་ཏེ། འདི་གསོད་སྙམ་དུ་རྟེན་ངེས་པར་གཟུང་བའི་ཕྱིར་ཞེས་གསུངས་པ་དང་ཡང་ལེགས་པར་འགྲིག་པ་ཡིན་ནོ། །གོང་དུ་བསྟན་པའི་ཕྱིར་མཐུ་དང་ལྡན་པ་ཉིད་ཡིན་ན་དངོས་གཞིའོ་ཞེས་བཤད་ན། མཐུ་དང་ལྡན་པ་དེ་གང་ཞེ་ན། ཡན་ལག་ཐམས་ཅད་དང་དུ་བླང་དུ་རུང་བ་ཉིད་དེ། ལག་པས་ལག་པར་དང་། རྐང་པས་རྐང་པར་དང་། འདོམས་ཀྱིས་འདོམས་སུ་དང་། ཚིགས་ཀྱིས་ཚིགས་སུ་སྤྲད་དུ་རུང་བ་ནི་འཁྲིག་པ་བསྟན་པའི་ཕྱིར་མཐུ་དང་ལྡན་པ་ཉིད་ཡིན་ནོ། །ལྔ་པ་ཡན་ལག་གི་སེལ་བ་ལ་གཉིས་ཏེ། ཅིར་འགྱུར་གྱི་མདོ་དང་། ཡན་ལག་སོ་སོའི་མཚན་ཉིད་དོ། །དང་པོ་ནི། ཡན་ལག་མ་ཚང་བ་ལ་ཅིར་འགྱུར་ཞེ་ན། འོག་མ་སྟེ་འོག་ནས་འཆད་པའི་ལྟུང་བ་དག་གི་ཡན་ལག་ཚང་བ་ལས་གཞན་གཅིག་མ་ཚང་བ་ལ་ན་སྨད་དུ་འགྱུར་རོ། །དཔེར་ན་དགེ་སློང་གི་ལུས་མ་ཉམས་པས་བུད་མེད་ཀྱི་ལུས་ཉམས་པ་ལ་རེག་ན་སྦོམ་པོར་འགྱུར་བ་བཞིན་ནོ། །ཡན་ལག་དུ་མ་མ་ཚང་བ་ལ་ཅིར་འགྱུར་ཞེ་ན། འོག་ནས་དེ་ཆད་འགྱུར་གྱི་ཡན་ལག་དུ་མ་མ་ཚང་བ་ལ་ནི་ན་སྨད་པ་དེ་བས་ཀྱང་ན་སྨད་པ་སྟེ་ཆེས་ན་སྨད་དུ་འགྱུར་རོ། །དཔེར་ན་དགེ་སློང་གིས་ལུས་ཉམས་པས་བུད་མེད་ཀྱི་ལུས་ཉམས་པ་ལ་རེག་ན་ཉེས་བྱས་སུ་འགྱུར་བ་བཞིན་ནོ། །ཆེས་ན་སྨད་དུ་འགྱུར་བ་དེ་ཁོ་ནར་ངེས་སམ་ཞེ་ན། མི་ཡུལ་དུ་དགོས་པའི་ལྟུང་བ་ལ་དུད་འགྲོ་ཡུལ་དུ་བྱས་ན་ཡང་ངོ་སྟེ་ཆེས་ན་སྨད་དུ་འགྱུར་རོ། །དཔེར་ན་གོ་བྱའི་ཡུལ་དུད་འགྲོ་ལ་མི་ཆོས་བླ་མའི་བརྫུན་སྨྲས་ན་ཉེས་བྱས་སུ་འགྱུར་བ་བཞིན་ནོ། །གཉིས་པ་ཡན་ལག་སོ་སོའི་མཚན་ཉིད་ལ་གསུམ་སྟེ། གཞིའི་ཡན་ལག བསམ་པའི་ཡན་ལག སྦྱོར་བའི་ཡན་ལག་གོ །དང་པོ་ལ་གཉིས་ཏེ། སེམས་ཅན་ལས་གྱུར་པ་དང་སེམས་ཅན་མ་ཡིན་པ་ལས་གྱུར་པའོ། །དང་པོ་ལ་བཞི་སྟེ། ཆགས་པ་དགག་བྱར་བྱས་པའི་ལྟུང་བའི་ཡན་ལག ཐ་སྙད་ཀྱིས་བསྐྱེད་པའི། ཁྱིམ་པས་བསྐྱེད་པའི། བསྙེན་པར་རྫོགས་པས་བསྐྱེད་པའི་ལྟུང་བའི་ཡན་ལག་ཞར་བྱུང་དང་བཅས་པའོ། །དང་པོ་ནི་ཡན་ལག་ཚང་མ་ཚང་གི་ལྟུང་བ་ཆེ་ཆུང་དུ་འགྱུར་བ་ཡིན་ན་ཡན་ལག་དེ་གང་ཞེ་ན། ཡུལ་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པའི་ཕམ་ལྷག་གཉིས་དང་མི་ཚངས་སྤྱོད་ཀྱི་ཕམ་པ་ལས་གཞན་དེ་མ་ཡིན་པའི་ཆགས་པ་དགག་བྱར་བྱས་པའི་ལྟུང་བ་རྣམས་བསྐྱེད་པའི་ཡན་ལག་ཡིན་ནོ། །དཔེར་ན་འཁྲིག་ཚིག་དང་བསྙེན་བསྐུར་བསྔགས་པ་སྨྲ་བའི་ཡུལ་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་བཞིན་ནོ། །འདིའི་སྐབས་ཀྱི་རྫུ་འཕྲུལ་གྱི་ཆོས་ཅན་ནི། ཤ་མིས་རྫུ་འཕྲུལ་གྱི་ཆོས་ཐོབ་པ་ཙམ་ལ་བཞེད་ཀྱང་། བྱ་འདུལ་གྱིས་རྫུ་འཕྲུལ་གྱི་ཆོས་ལ་གནས་བཞིན་པ་ལ་བཞེད་པ་ལྟར་ལེགས་སོ། །འོ་ན་རེག་པའི་ཕམ་ལྷག་བསྐྱེད་པ་ལ་གང་ཡན་ལག་ཡིན་ཞེ་ན། རེག་པའི་ཕམ་ལྷག་བསྐྱེད་པ་ལ་ཡུལ་རྟེན་གཉིས་ཀའི་ལུས་མ་ཉམས་པ་ཡན་ལག་ཏུ་དགོས་སོ། །རོ་མ་ཉམས་པ་ལ་རེག་པས་རེག་པའི་ཕམ་ལྷག་རྫོགས་པ་བསྐྱེད་པ་ཁས་ལེན་དགོས་ཏེ། ལུང་ལས། རོ་ལ་རེག་ན་ལྷག་མར་འགྱུར་རོ་ཞེས་དང་། ཊཱི་ཀར་དང་། རོ་མ་ཉམས་པ་ལ་ན་སྨད་པ་མེད་དོ་ཞེས་འབྱུང་བའི་ཕྱིར་རོ། །གལ་ཚིལ་བྱེད་པ་ལ་ཡུལ་རྟེན་གཉིས་ཀའི་ལུས་མ་ཉམས་པ་ཡན་ལག་ཏུ་དགོས་སོ། །གསར་དུ་མ་ཉམས་པ་ཁོ་ན་ལ་འགྱུར་རམ་ཞེ་ན། སེན་མོ་དང་། སོ་དང་། ཤ་མེད་པའི་རུས་པ་དང་། མཆན་ཁུང་ལྟ་བུའི་སྤུ་དག་ནི་མ་ཉམས་པ་ལས་གཞན་ཉམས་པ་དང་ལྡན་པའམ་འདྲ་བ་ཉིད་ཡིན་ནོ། །གཉིས་པ་ཐ་སྙད་ཀྱིས་བསྐྱེད་པའི་ལྟུང་བའི་ཡན་ལག་ནི། བརྫུན་དུ་སྨྲ་བ་སོགས་ལ་གང་ཡན་ལག་ཏུ་འགྱུར་བ་ཡིན་ཞེ་ན། བརྫུན་དུ་སྨྲ་བའི་ལྟུང་བ་སོགས་ཐ་སྙད་ཀྱིས་བསྐྱེད་པའི་ལྟུང་བ་རྣམས་ཀྱི་དངོས་གཞི་བསྐྱེད་པ་ལ་ཡུལ་མིའི་འགྲོ་བ་ཡན་ལག་ཏུ་དགོས་སོ། །མི་གང་ཡང་རུང་བས་བསྐྱེད་དམ་ཞེ་ན། མི་ཡིན་ཡང་ཤེས་པ་རང་བཞིན་དུ་གནས་པ་ལས་ཉམས་པ་ལ་ནི་མ་ཡིན་ནོ། །དཔེར་ན་གོ་བྱའི་ཡུལ་སྨྱོན་པ་ལ་དགེ་སློང་ཕ་རོལ་པོ་ལ་ཕམ་པས་སྐུར་པ་བཏབ་ན་སྦོམ་པོར་འགྱུར་བ་བཞིན་ནོ། །མ་ནིང་དང་མཚན་གཉིས་ནི་ཉམས་པ་དེ་དང་ལྡན་པའི་འདྲ་བ་ཉིད་ཡིན་པས། དེ་ཡུལ་དུ་བྱས་ནས་གོས་སློང་བ་སོགས་བྱས་ན་ཉེས་བྱས་སུ་འགྱུར། ཆགས་པ་དགག་བྱར་བྱས་པའི་ཕོ་མོ་ཡུལ་དུ་བྱེད་པའི་ལྟུང་བ་ཐམས་ཅད་འདིར་མི་སྐྱེད་དེ། མ་ནིང་མོ་དང་མ་ནིང་ཕོ། །སྤྲུལ་པ་མོ་ལ་ཡང་ངོ་ཞེས་དང་། རྣམ་པ་དེ་ལྟ་བུ་ལ་ནི་མཚན་གཅིག་ཤོས་དོན་མེད་དོ་ཞེས་གསུངས་པའི་ཕྱིར། སྤགས་པ་སློང་བ་ལྟ་བུ་མ་ནིང་མཚན་གཉིས་པ་ལས་རྫོགས་པར་མི་སྐྱེད་དེ། གདོན་གྱིས་བརླམས་པ་དང་འདྲ་བར་ཤེས་པས་རང་གཞན་མི་གསལ་ཞིང་། ལུས་ཀྱང་རོ་དང་འདྲ་བར་དོར་བར་བྱ་བ་ཡིན་པའི་ཕྱིར། ཟ་མ་ནི་མ་གཏོགས་ཏེ། དེ་ལ་མི་ཁྱད་པར་ཅན་གྱི་ཐ་སྙད་ཐོབ་པའི་ཕྱིར། དཔེར་ན་ལྟ་ཤིང་ལྟ་བུའོ། །རང་བཞིན་གྱི་མ་ནིང་ངམ་སྐྱེས་ནས་མ་ནིང་ནི་འགྲེལ་པར་མཚན་གཉིས་ཀ་ཡོད་པ་ལ་བཤད་ཀྱང་། མཛོད་ཀྱི་འགྲེལ་བཤད་གཉིས་ལས་མཚན་གང་ཡང་མེད་པ་ལ་བཤད་ཅིང་། མེ་ཏོག་ཕྲེང་རྒྱུད་ལས། གང་སྐྱེས་ཉིད་ནས་མཚན་མ་ནི། །གཉིས་ཀ་མེད་པ་མཚན་མེད་ཡིན། །ཞེས་གསུངས་པ་ལྟར་འཐད་པར་མངོན་ནོ། །རེག་པའི་ཕམ་ལྷག་གི་ཡན་ལག་མ་ཚང་བ་ཇི་ལྟ་བུ་ཞེ་ན། རེག་པའི་ཕམ་ལྷག་ནི་ཐ་སྙད་ཀྱིས་བསྐྱེད་པའི་ལྟུང་བ་དང་འདྲ་བར་ཏེ། མི་མ་ཡིན་པ་ཡུལ་དུ་བྱས་པ་བཞིན་དུ་མི་རང་བཞིན་ཉམས་པ་ཡུལ་དུ་བྱས་ན་སྦོམ་པོ་འགྱུར་རོ། །གསུམ་པ་ཁྱིམ་པས་བསྐྱེད་པའི་ལྟུང་བའི་ཡན་ལག་ནི། ཁྱིམ་པ་ཡུལ་དུ་དགོས་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། ཕྱི་རོལ་པའི་རབ་ཏུ་བྱུང་བ་དང་། སྡོམ་པ་བླངས་ཀྱང་མ་ཆགས་པ་དང་། ཕམ་པས་ཉམས་པ་དག་ནི་ཕྱེད་ཉིད་ཁྱིམ་པར་གྱུར་པ་ཡིན་པས་ཁྱིམ་པ་ཡུལ་དུ་བྱེད་དགོས་ཀྱི་སྐབས་སུ་དེ་རྣམས་ཡུལ་དུ་བྱས་ནས་སྤགས་པ་སློང་བ་སོགས་བྱེད་པ་ལ་ཉེས་བྱས་སུ་འགྱུར་བ་བཞིན་ནོ། །བཞི་པ་བསྙེན་པར་རྫོགས་པས་བསྐྱེད་པའི་ལྟུང་བའི་ཡན་ལག་ཞར་བྱུང་དང་བཅས་པ་ནི། དགེ་སློང་ཕ་མ་ཡུལ་དུ་བཞག་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། བསྙེན་པར་རྫོགས་པ་བྱས་ཤིང་བསྙེན་རྫོགས་ཀྱི་སྡོམ་པ་སྐྱེས་པ་ཅན་ཕམ་པས་མ་ཉམས་པ་ཉིད་ནི་དགེ་སློང་དང་། དགེ་སློང་མ་ཡུལ་དུ་གཞག་པའི་བསླབ་པའི་ལྟུང་བ་རྣམས་ཀྱི་དངོས་གཞི་བསྐྱེད་པ་དག་ལ་ཡན་ལག་ཡིན་པས་བསླབ་པ་བྱིན་པ་དང་མ་འབྲེལ་བའི་ཕམ་པ་བྱུང་བ་དང་། ཕྱི་རོལ་པའི་རབ་བྱུང་དང་སྡོམ་པ་མ་སྐྱེས་པའི་རྟགས་ཅན་དང་། མ་རྫོགས་པའི་རབ་ཏུ་བྱུང་བ་གསུམ་པོ་ཡུལ་དུ་བྱས་ནས་བརྡེག་གཟས་སོགས་བྱས་ན་ན་སྨད་དུ་འགྱུར་རོ། །དམིགས་བསལ་ནི་བསླབ་པ་མ་བྱིན་པའི་ཕམ་པ་འཆབ་མེད་བྱུང་བ་ཡུལ་དུ་བྱས་ནས་སྐུར་འདེབས་དངོས་གཞི་གསུམ་དང་། གནས་ངན་ལེན་བརྗོད་འཆབ་གཉིས་དང་ལྔ་རྫོགས་པར་བསྐྱེད་དོ། །དེའི་ནང་གསེས་ཀྱི་ཁྱད་པར་བསྟན་པའི་ཕྱིར་བཤད་པ་ནི། མཚན་མཐུན་པ་དང་ལྟ་བ་ཁས་བླངས་པ་སྟེ་ལྟ་བ་མཐུན་པ་དག་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་པ་སྟེ་རང་གི་ཕྱོགས་སུ་གཅིག་པ་ཡིན་པས་རང་ཕྱོགས་ལ་བརྟེན་པའི་ལྟུང་བ་རྣམ་པར་བཞག་པའི་དངོས་གཞི་བསྐྱེད་པ་ལ་མཚན་དང་ལྟ་བ་མཐུན་པ་ཡན་ལག་ཏུ་དགོས་སོ། །གཞན་ཕྱོགས་དགེ་སློང་མ་ཡུལ་དུ་གཞག་པའི་དགེ་སློང་ལ་ལྟུང་བ་བསྐྱེད་པ་ལ་ལྟ་མཐུན་ཡན་ལག་ཏུ་དགོས་སོ། །དམིགས་བསལ་ནི། སྐུར་འདེབས་ཀྱི་དངོས་གཞིའི་ལྟུང་བ་གསུམ་ནི། མཚན་མི་མཐུན་ཡན་ལག་ཏུ་བྱས་པས་ཀྱང་སྐྱེད་ལ། སྐུར་འདེབས་དངོས་གཞི་གསུམ། དབྱེ་ན། དེར་རྗེས་ཕྱོགས། སྡིག་ལྟ་མི་གཏོང་བ། སྤངས་པའི་རྗེས་ཕྱོགས་དང་བདུན་ནི། ལྟ་བ་མི་མཐུན་པ་ཡུལ་དུ་བྱས་པས་ཀྱང་རྫོགས་པར་བསྐྱེད་དེ། འོ་ན་བསྙེན་པར་རྫོགས་པ་ཡུལ་དུ་བྱེད་དགོས་ཀྱི་སྐབས་སུ། ཁྱིམ་པ་ཡུལ་དུ་བྱས་ན་ཅིར་འགྱུར་ཞེ་ན། བསྙེན་པར་རྫོགས་པ་ཡུལ་དུ་བྱེད་དགོས་ཀྱི་དངོས་གཞི་འདིར་གཏོགས་པ་ལ་ཁྱིམ་པ་ཡུལ་དུ་བྱས་པ་ནི་རྟགས་ཅན་ཡུལ་དུ་བྱས་པ་ཉིད་ཀྱི་བས་ན་སྨད་སྟེ་ཆེས་ན་སྨད་པ་འགྱུར་སྟེ། དཔེར་ན་རྟགས་ཅན་ལ་བརྡེབ་གཟས་སོགས་བྱས་ན་ཉེས་བྱས། ཁྱིམ་པ་ལ་དེ་བྱས་ན་ཕྲ་མོར་འགྱུར་བ་ལྟ་བུའོ། །གཉིས་པ་སེམས་ཅན་མ་ཡིན་པ་ལས་གྱུར་པ་ནི། རབ་ཏུ་བྱུང་བའི་རྫས་ཀྱིས་བསྐྱེད་པའི་ལྟུང་བ་རྣམས་ལ་གང་ཡན་ལག་ཏུ་འགྱུར་བ་ཡིན་ཞེ་ན། རབ་ཏུ་བྱུང་བའི་རྫས་ཀྱིས་བསྐྱེད་པའི་ལྟུང་བའི་དངོས་གཞི་དག་བསྐྱེད་པ་ལ་ནི་རྫས་དེ་རུང་བ་ཉིད་དང་ཚད་དང་ལྡན་པས་བསྐྱེད་ཅིང་། ལ་སོགས་པ་ཞེས་པས་ནི་ཚད་བས་ཆེ་བས་ཀྱང་བསྐྱེད་པར་སྟོན་ཏོ། །འདིར་ཁ་ཅིག་གོས་ལ་ནག་པོ་མ་ཡིན་པའི་ཁ་དོག་རུང་བ་དང་། ཟླུམ་པོ་སོགས་མ་ཡིན་པའི་དབྱིབས་རུང་བ་དགོས་ཟེར་བ་མི་འཐད་དེ། བལ་ནག་པོ་འབའ་ཞིག་ལ་སྟན་བྱས་པས་སྤང་ལྟུང་མི་བསྐྱེད་པར་ཐལ། ནག་པོ་ཁ་དོག་མི་རུང་བ་ཡིན་པའི་ཕྱིར། ཁོ་ན་རེ་སྤང་ལྟུང་དེ་ཁ་དོག་མི་རུང་བས་གཞག་པ་ཡིན་ནོ་ཞེ་ན། འོ་ན་བལ་ནག་པོ་མོད་ཅིང་རིན་ཆུང་། དཀར་པོ་དཀོན་ཞིང་རིན་ཆེ་བའི་ཚེ་དཀར་པོ་འབའ་ཞིག་ལ་སྟན་བྱེད་པ་ལ་སྤང་ལྟུང་དུ་མི་འགྱུར་བར་ཐལ། ཁས་ལེན་དེའི་ཕྱིར། དབྱིབས་ཀྱང་དེ་ལྟར་མི་འཐད་དེ། ལྷུང་བཟེད་ལ་ཁ་གཡོགས་ཟླུམ་པོར་མི་རུང་བའི་ཤེས་བྱེད་མེད་པའི་ཕྱིར། རང་ལུགས་ནི། གོས་ལ་རྒྱུ་རུང་བ་དགོས་ཤིང་། སྣོད་ལ་ལྷུང་བཟེད་ལྕགས་སམ་ས་ལས་བྱས་པ་ཁ་དོག་ནག་པོ་ས་ལྷུང་ཚོས་པ་དགོས་ལ། ཕོར་པ་ཡང་རིན་པོ་ཆེ་ལས་མ་བྱས་པ་དགོས་སོ། །ཟས་ལ་བྱིན་ལེན་མ་བྱས་པར་ཟ་བའི་ལྟུང་བ་དང་གསོག་འཇོག་གི་ལྟུང་བ་རྫོགས་པར་བསྐྱེད་པ་ལ་གཞི་གཞན་ལ་བརྟེན་པའི་རུང་བ་དགོས་ལ། བསོད་པ་སློང་བའི་ལྟུང་བ་རྫོགས་པར་བསྐྱེད་པ་ལ་ཟས་རུང་བ་དགོས་སོ། །འདིར་རབ་ཏུ་བྱུང་བའི་རྫས་ཞེས་སྨོས་པ་ནི་སྡེ་ལྔ་ཆར་གྱི་ཡོ་བྱད་གང་ཡང་རུང་བ་སྦས་ཀྱང་ལྟུང་བྱེད་དུ་འགྱུར་བར་ངེས་པའི་ཆེད་ཡིན་ལ། འདིར་ཊཱི་ཀར་ལྷུང་བཟེད་ཚད་ལྷག་སྡུད་ཅེས་འབྱུང་བར་འགྱུར་སྐྱོན་ཡིན་ནམ། ཆེ་བ་དང་དཀར་བ་ཞེས་ཀྱང་བཤད་པས་དཔྱད་པར་བྱའོ་ཞེས་གསུངས་སོ། །གཉིས་པ་བསམ་པའི་ཡན་ལག་ནི་རང་དོན་དུ་བྱེད་པའི་ལྟུང་བ་རྣམས་ལ་རང་གཞན་གཉིས་ཀའི་དོན་བྱེད་ན་རང་དོན་དུ་བྱེད་པ་ཡོད་པས་ལྟུང་བ་རྫོགས་པར་འགྱུར་རམ་ཞེ་ན། འཁྲིག་ཚིག་སྨྲ་བ་དང་། བསྙེན་བཀུར་བ་སྔགས་པ་སོགས་རང་དོན་དུ་བྱེད་པའི་ལྟུང་བའི་དངོས་གཞི་བསྐྱེད་པ་ལ་རང་ཁོ་ནའི་དོན་ཉིད་དུ་བྱེད་པ་གཙོ་ཆེར་ཡོད་པ་སྟེ། ཡན་ལག་ཏུ་དགོས་པས་རང་གཞན་གཉིས་ཀའི་དོན་ནམ། གཞན་ཁོ་ནའི་དོན་དུ་དེ་དག་བྱེད་ན་ལྟུང་བ་ན་སྨད་དུ་འགྱུར་རོ། །གསུམ་པ་སྦྱོར་བའི་ཡན་ལག་ནི། ཐ་སྙད་ཀྱིས་བསྐྱེད་པའི་ལྟུང་བ་མིའི་འགྲོ་བས་བསྐྱེད་ན་རང་བཞིན་ཉམས་པ་མ་ཡིན་པའི་མི་གང་ཡང་རུང་བས་བསྐྱེད་དམ་ཞེ་ན། ངག་གི་རྣམ་པར་རིག་བྱེད་ཀྱིས་བསྐྱེད་པའི་ལྟུང་བ་རྣམས་ལ་ནི་ཡུལ་དོན་གོ་བ་ཡན་ལག་ཏུ་དགོས་པས་དོན་མི་གོ་བ་ལ་འཁྲིག་ཚིག་དང་བསྙེན་བཀུར་བསྔགས་པ་སྨྲས་ཀྱང་ན་སྨད་དུ་འགྱུར་བ་བཞིན་ནོ། །དོན་གོ་བ་གང་ཞེ་ན། སྨྲ་བ་པོ་ཉིད་ལ་ཡོད་པ་སྟེ། ངག་སྨྲ་ནུས་པ་ཉིད་ལ་ཡོད་པའི་དོན་གོ་བ་ནི་ཡན་ལག་ཡིན་ནོ། །ཐམས་ཅད་དགོས་སམ་ཞེ་ན། གསོད་པ་དང་རང་གི་དོན་དུ་རྐུ་བ་སྟེ་དེ་མ་བྱིན་ལེན་གྱི་ཕམ་པ་མ་གཏོགས་དེ་དག་ལས་གཞན་པའི་ལྟུང་བའི་ཡན་ལག་ཡིན་གྱི། དེ་གཉིས་ནི་སྨྲ་མི་ཤེས་པའི་དོན་གོ་བས་ཀྱང་འགྲུབ་བོ། །ངག་གི་རིག་བྱེད་ཀྱིས་བསྐྱེད་པ་གཞན་ལ་སྨྲ་ཤེས་དོན་གོ་དགོས་སམ་ཞེ་ན། སྡོམ་པའམ་ཡི་དམ་ཡང་དག་པར་ལེན་པར་བྱེད་པ་དག་ལ་ནི། སྨྲ་ཤེས་དོན་གོ་དགོས་པ་དེར་མ་ཟད་པ་སྟེ། སྨྲ་མི་ཤེས་པའི་དོན་གོ་བས་ཀྱང་གྲུབ་པ་ཡོད་དོ། །བོད་སྔ་མ་ཁ་ཅིག་རྟེན་གྱི་དབང་དུ་བྱས་པ་ཡིན་གསུངས་ཡང་ཁ་སྐོང་བྱེད་པའི་ཡུལ་གྱི་དབང་དུ་བྱས་པ་ཡིན་ནམ་དཔྱད་པར་བྱའོ། །འོ་ན་མཐོལ་བཤགས་བྱ་བ་ཡང་སྨྲ་མི་ཤེས་པའི་དོན་གོ་བས་འགྲུབ་བམ་ཞེ་ན། སྨྲ་ཤེས་ལ་ཡོད་པའི་དོན་གོ་བ་དེ་ནི་མཐོལ་བཤགས་བྱ་བའི་སྣོད་དམ་རྟེན་ཡིན་པས་སྨྲ་མི་ཤེས་པ་ལ་མཐོལ་བཤགས་བྱས་ཀྱང་བྱས་པར་མི་འགྱུར་ཞིང་། དེ་ལ་མ་མཐོལ་ཀྱང་འཆབ་པའི་ཉེས་པར་མི་འགྱུར་རོ། །འདིར་ཊཱི་ཀར་མཐོལ་བ་གཅིག་པུ་ལ་དངོས་སུ་བཤད་པ་ནི་མཚོན་པ་ཙམ་སྟེ། མཐོལ་བཤགས་གཉིས་ཀ་ལ་སྦྱར་རོ། །འོ་ན་ངག་གིས་བསྐྱེད་པའི་ལྟུང་བ་རྣམས་ཀྱི་དོན་ལུས་ཀྱི་རིག་བྱེད་ཀྱིས་ཀྱང་གོ་ནུས་ཤིང་ལག་ཡིག་དང་འཕྲིན་ཡིག་གིས་ཀྱང་གོ་ནུས་པས་དེ་རྣམས་ཀྱིས་ཀྱང་ལྟུང་བ་རྫོགས་པར་བསྐྱེད་དམ་ཞེ་ན། སྨྲ་བའི་ཕམ་པ་སོགས་ཀྱིས་བསྐྱེད་པའི་ལྟུང་བ་རྣམས་ལ་ངེས་པར་ངག་གི་རིག་བྱེད་ཀྱིས་བསྐྱེད་དགོས་སོ། །གཞན་གྱིས་སྨྲས་པས་འགྱུར་རམ་ཞེ་ན། རང་གི་ངག་ཁོ་ནས་བསྐྱེད་དགོས་སོ། །གཞན་ལ་སྙད་བཏགས་པས་འགྲུབ་བམ་སྙམ་ན། བདག་ཉིད་དང་འབྲེལ་པ་སྟེ་རང་ངོས་ནས་སྨྲས་པ་ངེས་པར་དགོས་སོ་གཞན་བྱེད་དུ་བཅུག་པས་བསྐྱེད་པའི་ལྟུང་བ་རྣམས་ལ་རང་གི་བཅོལ་བ་དེས་བརྒྱུད་ནས་གཞན་ལ་བཅོལ་བས་ཀྱང་འགྲུབ་བམ་ཞེ་ན། རང་གིས་དངོས་སུ་བསྐོས་པ་ཉིད་བྱེད་དུ་བཅུག་པ་ཡིན་པས་བསྐོས་པ་དེས་བཅོལ་ཡང་རང་ལ་ལྟུང་བ་མི་རྫོགས་ལ། འོན་ཀྱང་སྲོག་གཅོད་དང་མ་བྱིན་ལེན་གཉིས་ནི་མ་གཏོགས་སོ། །དེ་དག་གིས་ནི་རྣམ་པར་འབྱེད་པའི་ཞུ་བར་གཏོགས་པ་ཕལ་ཆེ་བ་སྟེ། ལུང་གཞན་ནས་འབྱུང་བ་ཡང་ཡོད་ཅེས་པ་དོན་གྱིས་བསྟན་ཏེ། བསླབ་པའི་གཞི་ཐམས་ཅད་སྤྱིར་བསྟན་པའི་མདོ་རྣམས་རྫོགས་པར་བཤད་ཟིན་ཏོ།། །།འདིར་ཉེ་བར་མཁོ་བའི་སྡོམ་ཚིགས་བསྟན་པར་བྱ་སྟེ། མཚན་གྱུར་གྱི་སྐབས་སུ་མཚན་ཉིད་ཅི་འདྲ་བའི་སྡོམ་ནི་བཤད་ཟིན་ལ། རྗེས་སུ་མཐུན་པའི་རབ་དབྱེ་གསུམ་ལས། མཚན་མཐུན་ཡན་ལག་ཏུ་དགོས་པ་ནི། བསྒོ་གྱུར་གཞི་དང་འཕྲོག་པ་དང་། །བསྔོས་བསྒྱུར་སྐྱོན་དང་ཕྲ་མ་དང་། །སྐྱོ་སྔོགས་གནས་ངན་ལེན་ཤེས་ངོ་། །ཁྱད་གསོད་འཕྱ་བསྒོ་ཁྲི་དང་གདིང་། །ཕྱིས་གནོད་འབྱུང་བ་སྤངས་པ་སྟོབས། །འདུས་ཟ་བརྡེག་གཟས་གནས་ངན་ལེན། །བདེ་དང་འདུན་པ་ཆོས་དང་སྨྲ། །དགེ་ཚུལ་འགྱོད་པ་སོ་མོ་སྔངས། །ཉེས་འཇོག་ཉན་རྣ་མ་སྨྲས་འགྲོ། །མ་གུས་ཟས་བཅས་ད་གདོད་ཁྲི། །བརྡལ་དང་སེངྒེ་ལས་གྱུར་ཏེ། །དེ་ལྟར་བཞི་བཅུ་ཐམ་པའོ། །མཚན་མི་མཐུན་ཡན་ལག་ཏུ་དགོས་པ་ནི། འཁྲུར་འཇུག་པ་དང་ལེན་པ་དང་། །ཁྱིམ་པ་མོ་ལ་ཆོས་སྟོན་དང་། །དེ་དང་ལམ་འགྲོ་བུད་མེད་ཉལ། །དེ་ལྟར་དེ་ནི་ལྔ་ཡིན་ནོ། །ཆོ་ག་འཇིག་པ་ནི། འབྲལ་བ་སྤངས་པ་ཟ་བ་དང་། །གསོག་འཇོག་བྱེད་དང་ཟ་བ་བཞི། །འཕྲོ་ཟིན་པ་ལ་ཉེས་བྱས་སུ་འགྱུར་བ་བཅུ་དགུ་ནི། ཁང་པ་ཁང་ཆེན་འཁྲུར་འཇུག་དང་། །སྲིན་བལ་འབའ་ཞིག་ཆ་གཉིས་དང་། །རིན་ལྷག་བཟོ་བྱེད་ཁབ་རལ་བདུན། །བུད་མེད་ཡན་ལག་ཏུ་དགོས་པའི་ལྟུང་བ་ཉེར་བཞི་ནི། རེག་པ་འཁྲིག་ཚིག་བསྙེན་བཀུར་སྨྱན། །འཁྲུ་ལེན་བལ་རྨེལ་ཆོས་སྟོན་དང་། །མ་བསྐོས་སོགས་དང་ཉལ་ཤོམ་གཉིས། །ཉལ་འགྲོ་སོར་བཤགས་དང་པོ་གཉིས། །ཐ་སྙད་སྦྱིན་བསྐྱེད་བཅུ་གཉིས་ནི། །གཉེན་གྱི་སྤྲད་བྱའི་བདག་པོ་དང་། །ཁང་པའི་བཙལ་བྱ་ཁང་ཆེན་ཕྱེ། །མི་ཆོས་བླ་མ་སྐུར་འདེབས་གསུམ། །ཁྱིམ་སུན་ཤེས་བཞིན་བཤེས་དོ་དང་། །ཟས་ཅུང་སྡིག་ལྟ་བརྗོད་པ་ཡི། །གོ་བྱའི་ཡུལ་ཕྱིས་བཅུ་གཉིས་སོ། །མ་རྫོགས་པ་སྤྱིས་བསྐྱེད་པ་ནི། །འདོན་དང་གནས་ངན་ལེན་དང་ཆོས། །ནུབ་ལྷག་མ་ལེན་པ་དང་ལྔ། །བུད་མེད་སྤྱིས་བསྐྱེད་པ་ནི། འཛིན་དང་འཁྲིག་ཚིག་བསྙེན་བཀུར་སྨྱན། །དབེན་པར་འདུག་དང་ཉལ་དང་དྲུག །ཁྱིམ་པས་བསྐྱེད་པ་སོ་ལྔ་དང་། །རྐུ་གསོད་ལྔ་པོ་མ་གཏོགས་པ། །བཅོལ་རྫོགས་ཕོ་ཉ་རྣམས་ཞེས་སྦྱར། །ཁྱིམ་པས་བསྐྱེད་པ་སོ་ལྔ་ལ། །ཁྱིམ་པ་ཕོ་ཡིས་བསྐྱེད་པ་ནི། །ཉལ་ཤོམ་གཉིས་དང་དམག་གསུམ་དང་། །རྐུན་མ་དང་འགྲོ་དྲུག་ཡིན་ནོ། །ཁྱིམ་པ་མོ་ཡིས་བསྐྱེད་པ་ནི། །ཆོས་སྟོན་པ་དང་ཉལ་ཤོམ་གཉིས། །ལམ་དུ་འགྲོ་དང་རྣམ་པ་བཞི། །གང་ཡང་རུང་བས་བསྐྱེད་པ་ནི། །ཁྱིམ་སུན་འབྱིན་དང་སློང་སོགས་ལྔ། །མངོན་མཚན་ཉོ་ཚོང་ལྷུང་བཟེད་ཚོལ། །འཐག་གཉིས་རས་ཆེན་བདག་གིར་བྱེད། །སྦྱོར་བཅུག་ཡང་ཡང་ཟ་བ་དང་། །འདུག་གནས་ཕྱེ་དང་གསོད་པ་དང་། །ཟན་གཅོད་འགྲོན་གཉེར་མ་སྨྲས་འགྲོ། །གྲོང་རྒྱུ་ཕོ་བྲང་འགྲོ་བ་དང་། །སོར་བཤགས་བཞི་སྟེ་ཉི་ཤུ་བདུན། །དགེ་སློང་ཕ་མས་བསྐྱེད་པ་ལ། །དགེ་སློང་ཕ་ཡིས་བསྐྱེད་པ་ནི། །མཚན་མཐུན་དགོས་པ་བཞི་བཅུ་སྟེ། །སྐྲོད་དང་ཟས་ཅུང་གདེང་མ་ལེན། །གྲལ་རིམ་ནགས་བརྟགས་བཞི་བཅུ་དྲུག །དགེ་སློང་མ་ཡིས་བསྐྱེད་པ་ནི། །འཁྲུ་དང་ལེན་དང་རྨེལ་བ་དང་། །མ་བསྐོས་སོགས་དགུ་འདུག་མ་གཏོགས། །སོ་སོར་བཤགས་པ་དང་པོ་གཉིས། །དེ་ལྟར་དེ་ནི་གཞི་བཅུ་བཞིའོ། །རྫོགས་པ་སྤྱིས་བསྐྱེད་སྐུར་འདེབས་གསུམ། །རབ་བྱུང་སྤྱིས་བསྐྱེད་རྣམ་གཉིས་ཏེ། །སྦེད་དང་མ་སྨྲས་འགྲོ་བའོ། །དགེ་ཚུལ་སྤྱིས་བསྐྱེད་བསྙིལ་བའོ། །རྫས་དང་ཡོ་བྱད་ཀྱིས་བསྐྱེད་པ་ལ། གོས་ཀྱིས་བསྐྱེད་པ་སོ་དྲུག་ནི། །འཆང་ནས་རྨེལ་འཇུག་བར་བཅུ་བདུན། །འཐག་ནས་དངོས་བསྒྱུར་བར་བདུན་དང་། །བཤེས་ངོར་ཁྲི་དང་ཆོས་གོས་གཉིས། །ཁ་དོག་སྦེད་པ་གདེང་མེད་དང་། །བརྡལ་ལ་སོགས་པ་རྣམ་ལྔའོ། །བསྐུར་དང་གཏད་པ་དངོས་བསྒྱུར་དང་། །བཤེས་ངོར་ལྷུང་བཟེད་མཚུངས་གསུང་མོད། །འཕྲོག་པ་སྦེད་པ་ཡོ་བྱད་ཙམ། །ཡིན་ལ་ཁྲི་ནི་ཁྲི་ལས་དང་། །སྣོད་སྤྱད་ལ་བརྟེན་དེ་གསུམ་དང་། །ལྷུང་བཟེད་གཉིས་དང་གདིང་བ་དང་། །རྩ་དབྱུང་ཁས་རལ་ཁྲི་རྐང་དགུ། །ཟས་ལ་བརྟེན་པ་ཉེར་གཅིག་སྟེ། །གསོག་འཇོག་སྦྱོར་བཅུག་ཡང་ཡང་གསོག །གཅེར་བུ་བདེ་དང་མགྲོན་གཉེར་དང་། །ཆང་དང་ཟས་བཅས་སོར་བཤགས་བཞི། །བྱེ་བྲག་ཚད་དང་ལྡན་པ་དགོས་པ་ནི། འབྲལ་བ་འཁྲུར་འཇུག་སློང་སོགས་བཞི། །སྲིན་བལ་ལ་སོགས་རྣམ་པ་དྲུག །དགོས་པ་རས་ཆེན་ཁྲི་གོས་བྱེད། །སྦེད་པ་གདེང་མེད་བརྡལ་སོགས་ལྔ། །དེ་ལྟར་ཉི་ཤུ་རྩ་ལྔའོ། །ཀུན་སློང་རང་ཁོ་ནའི་དོན་དུ་དགོས་པ་ནི། བླ་མ་འཁྲིག་ཚིག་བསྙེན་བཀུར་དང་། །འབྲལ་བ་གཉིས་དང་བྱིན་འཕྲོག་དང་། །གཏད་པ་མ་གཏོགས་ཉི་ཤུ་དྲུག །བླ་མ་འཕྱ་བ་སྦྱོར་བཅུག་དང་། །ཡང་ཡང་འདུག་ནས་ཕྱེ་དང་ནི། །གསོད་པ་མེད་དང་མགྲོན་གཉེར་དང་། །ཁབ་རལ་བདལ་ལ་སོགས་པ་ལྔ། །སོ་སོར་བཤགས་བཞི་གཞི་བཅུ་བརྒྱད། །མཐར་ཐུག་དོན་གོ་དགོས་པ་ནི། །བླ་མ་འཁྲིག་ཚིག་བསྙེན་བཀུར་དང་། །གཞི་མེད་བག་ཙམ་ཤེས་བཞིན་བཅུ། །འཕྱ་བ་བསྒོ་བ་ཕྱིས་གནོན་དང་། །མ་བསྐོས་ཉི་ནུབ་ཟས་ཅུང་དང་། །སྟོབ་པ་བདེ་དང་འདུན་པ་སྨྲ། །དགེ་ཚུལ་འགྱོད་པ་སྔངས་བྱེད་དང་། །གཞི་མེད་བསླབ་པ་ཉན་རྣ་དང་། །མ་གུས་ད་གདོད་སུམ་ཅུ་གསུམ། །སྦྱོར་བ་ངག་ཁོ་ནས་བྱེད་པ་ཅན་ནི། དེ་ལས་ཕྱིས་གནོན་སྤངས་པ་གཉིས། །སྡངས་བྱེད་ཉན་རྣ་མ་གུས་པ། །མ་གཏོགས་ཉི་ཤུ་རྩ་བདུན་དང་། །བསྒོ་གྱུར་བཞི་དང་འཁྲུ་བ་ནས། །སོ་སོའི་བར་དྲུག་རྨེལ་བ་དང་། །མངོན་མཚན་ཉོ་ཚོང་ལྷུང་བཟེད་ཚོལ། །རས་ཆེན་ཚོལ་དང་སྡིག་ལྟ་དང་། །མ་ལོན་པ་སྟེ་བཞི་བཅུ་བཞི། །ལུས་ངག་གང་རུང་གིས་བྱེད་པ་ཅན་ནི། བསྐུར་པ་བརྟད་པ་དངོས་བསྒྱུར་དང་། །ཕྱིས་གནོན་གོས་སྟེར་བཤམས་དཀྲུགས་དང་། །སྤངས་པ་ཉིད་དང་མ་གུས་པའོ། །ལུས་ངག་གཉིས་ཀ་དགོས་པ་ནི། །དེ་གསུམ་གསོད་སློང་ཟས་ལེན་པའོ། །བཅོལ་ཡང་རྫོགས་པ་ནི། རྐུ་དང་གསོད་པ་གཞི་དང་སྨྱན། །ཁང་པ་ཁང་ཆེན་སྲིན་བལ་དང་། །འབའ་ཞིག་ཆ་གཉིས་དྲུག་དང་གསེར། །འཐག་གཉིས་བྱིན་འཕྲོག་ས་བོན་སྤྲོད། །རིམ་ལྷག་མེ་རེག་རིན་ཆེན་རེག །ཆུ་དང་སྔངས་བྱེད་སྦེད་པ་དང་། །ས་བརྐོ་ཁབ་རལ་ལ་སོགས་བདུན། །སུམ་ཅུ་གཉིས་སྟེ་ཁྲི་གདེང་གི །འདིངས་པ་སོར་བཤགས་ཐ་གསུམ་གྱི། །ཟས་ལེན་བཅོལ་ཡང་འགྲུབ་པ་ཡིན། །ཞེས་པའོ། །གཉིས་པ་ཉམས་སུ་བླང་བའི་བསླབ་པ་ལ་གཉིས་ཏེ། སྤྱིའི་དོན་དང་། སོ་སོའི་དོན་ནོ། །དང་པོ་ལ་ལྔ་སྟེ། དབྱེ་བ་དང་། སྒྲ་འཇུག་པའི་རྒྱུ་མཚན་དང་། བསྡུ་བ་དང་། གྲངས་ངེས་དང་། གོ་རིམ་ངེས་པའོ། །དང་པོ་ནི། གཞི་བཅུ་བདུན་ཏེ་ལུང་གཞིར་སྡོམ་ནི། རབ་བྱུང་གསོ་སྦྱོང་གཞི་དང་ནི། །དགག་དབྱེ་དབྱར་དང་ཀོ་ལྤགས་དང་། །སྨན་དང་གོས་དང་སྲ་བརྐྱང་དང་། །ཀཽ་ཤམྦཱི་དང་ལས་ཀྱི་གཞི། །དམར་སེར་ཅན་དང་གང་ཟག་དང་། །སྤོ་དང་གསོ་སྦྱོང་གཞག་པ་དང་། །གནས་མལ་དང་ནི་རྩོད་པ་སྟེ། །དགེ་འདུན་དབྱེན་རྣམས་བསྡུས་པ་ཡིན། །ཞེས་གསུངས་སོ། །འོ་ན་གཞུང་དམ་པར་གཞི་བཅོ་བརྒྱད་དུ་བཤད་པ་དང་འགལ་ཞེ་ན། འདིའི་ལན་དུ་འགྲེལ་ཆུང་ལས་རབ་བྱུང་གི་གཞི་ལ་རབ་བྱུང་དང་བསྙེན་རྫོགས་དང་། གནས་ཀྱི་སྐབས་གསུམ་ཐ་དད་དུ་བྱེད་པ་ཡིན་ཞེས་པ་མི་འཐད་དེ། དེ་ལྟར་ན་གཞི་བཅུ་དགུར་འགྱུར་བའི་ཕྱིར་དང་། དེ་ལྟར་བཤད་པ་མེད་པའི་ཕྱིར། རང་ལུགས་ནི་ཀཽ་ཤམྦཱིའི་གཞི་ལ། ཕྱིར་བཅོས་ཀྱི་གཞི་དང་། ལས་བྱེད་པའི་གཞི་གཉིས་སུ་ཕྱེ་བ་ཡིན་ཏེ། ཀཽ་ཤམྦཱིའི་གཞིའི་སྡོམ་ལ། ཀཽ་ཤམ་བར་གྱི་འཐབ་ཀྲོལ་གྱིས། །དགེ་སློང་རྩོད་པ་སྣ་ཚོགས་དང་། །ཁྲིའུ་དང་རྩོད་པར་བྱེད་པ་དང་། །རིང་པོ་ལེན་གྱི་སྤྱོད་པ་དང་། །ངན་སྤོང་ལན་ཚྭ་ཁང་པ་དང་། །བསྲུང་དང་ཚལ་སྡུག་གླང་ཆེན་དང་། །མ་འགགས་པས་ནི་དེ་བྱས་དང་། །མཉན་ཡོད་དུ་ནི་ཞི་བར་བྱས། །ཞེས་པའི་སྡོམ་གྱི་རིང་པོ་ལེན་གྱི་ནས། མ་འགགས་པས་ནི་དེ་བྱས་ཀྱི་བར་ལུང་བར་མར་ཁ་འཕངས་ཏེ། དགེ་སློང་དག་སྔོན་བྱུང་བ་ཡུལ་ཀ་ཤའི་རྒྱལ་པོ་ཚངས་བྱིན་ཞེས་བྱ་བ་དང་། ཡུལ་ས་ལའི་རྒྱལ་པོ་རིང་པོ་ལེན་གཉིས་ཕན་ཚུན་རྩོད་པར་འགྱུར་ཏེ། རྒྱས་པར་ནི་ལུང་བར་མའི་ཏིང་ངེ་འཛིན་དང་ལྡན་པའི་ལེའུ་ལས་རིང་པོར་ལེན་གྱི་མདོ་འབྱུང་བ་བཞིན་ནོ། །ཞེས་བཤད་པས། དེར་ཁ་འཕངས་པ་བསྡུས་པ་ནི་ཕྱིར་བཅོས་ཀྱི་གཞི་དང་། སྡོམ་ལྷག་མ་རྣམས་ཀྱིས་བསྡུས་པ་ནི་ལས་བྱེ་བའི་གཞི་ཡིན་ལ། ད་ལྟ་ལུང་ན་དེ་ལས་མེད་ཀྱང་ཁ་འཕངས་རྣམས་ཕྱིར་བཅོས་ཀྱི་བྱེ་བྲག་ཡིན་པས་དམར་སེར་ཅན་གྱི་གཞི་དང་གཉིས་གཅིག་ཏུ་བསྡོམས་ནས་ཕྱིར་བཅོས་ཀྱི་གཞི་ཞེས་བཏགས་པ་སྟེ། རྒྱ་ཆེར་འགྲེལ་ལས། ཀཽ་ཤམྦཱི་བ་དང་དམར་སེར་ཅན་གྱི་གཞི་གཉིས་ལ་ཕྱིར་བཅོས་ཀྱི་གཞི་ཞེས་བྱ་བའི་མིང་གཞན་དུ་བྱ་སྟེ་ཕྱིར་བཅོས་པར་བྱ་བར་གང་ཟག་གི་བྱེ་བྲག་ཐམས་ཅད་བསྟན་པའི་ཕྱིར་རོ། །འཐབ་ཀྲོལ་བྱེད་པ་ལ་སོགས་པའི་གང་ཟག་ཇི་སྙེད་ཕྱིར་བཅོས་པར་བྱ་བ་དེ་དག་ཐམས་ཅད་དེ་གཉིས་ཀྱིས་ཕྱིར་བཅོས་པར་གསུངས་པས་དེའི་ཕྱིར་དོན་དང་མཐུན་པའི་མིང་བསྟན་པར་བྱ་བའི་ཕྱིར་དེ་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་གཞན་དུ་བྱ་སྟེ། དེས་ན་མིང་བརྗོད་པ་ཁོ་ནས་བརྡ་འཕྲོད་སླ་བར་འགྱུར་རོ་ཞེས་གསུངས་སོ། །སྲ་བརྐྱང་གི་གཞིའི་མིང་དོན་ཡན་ཆད་བརྡ་འཕྲོད་པ་སླ་ལ། ཀཽ་ཤམྦཱིའི་དགེ་སློང་གིས་ཡངས་པ་ཅན་པའི་དགེ་སློང་ལ་གནས་དབྱུང་བྱས་པས་རྩོད་པ་ཆེན་པོར་གྱུར་ནས་ལས་བྱེ་བར་གྱུར་པ་ལ་ཀཽ་ཤམྦཱིའི་གཞི་ཞེས་བཏགས་སོ། །དམར་སེར་ཅན་གྱི་གཞི་ནི། དམར་སེར་ཅན་འཐབ་ཀྲོལ་བྱེད་པ་ལ་བསྡིགས་པ་ནན་ཏུར་བྱ་བ་དང་། དེ་བཞིན་དུ་སྨད་པ་དང་། བསྐྲད་པ་དང་། ཕྱིར་འགྱེད་ནན་ཏུར་དང་། མ་མཐོང་བར་གནས་ནས་དབྱུང་། ཕྱིར་མི་འཆོས་པ་གནས་ནས་དབྱུང་། སྡིག་ལྟ་ཅན་གནས་ནས་དབྱུང་། སྤོ་བ་དང་གཞི་ནས་སྤོ་བ་དང་། ཡང་གཞི་ནས་བསླང་བའི་སྤོ་བ་དང་། མགུ་བ་དང་དབྱུང་བའི་ཆོ་ག་རྣམས་བསྟན་པ་ལ་ཐོག་མའི་མིང་ནས་སྨོས་ཏེ། དམར་སེར་ཅན་གྱི་གཞི་ཞེས་བཏགས་སོ། །གང་ཟག་གི་གཞི་ནི། གང་ཟག་གཞན་ཞིག་དགེ་འདུན་ལྷག་མའི་ལྟུང་བ་བྱུང་ནས་མ་བཅབས་པ་དང་། གང་ཟག་གཞན་ཞིག་ལྟུང་བ་གཉིས་བྱུང་ནས་ཟླ་བ་གཉིས་སུ་མ་ཤེས། ཤེས་ནས་ཟླ་བ་གཉིས་སུ་བཅབས་པ་ལ་སོགས་པ་བཅབས་པ་དང་། མ་བཅབས་པའི་བྱེ་བྲག་མང་པོ་བྱུང་བའི་ཁྱད་པར་གཏན་ལ་འབེབས་པ་ལ་གང་ཟག་བྱེ་བྲག་པའི་མིང་མ་སྨོས་པར་གང་ཟག་འབའ་ཞིག་ཅེས་སྨོས་ནས་བསྟན་པས་ན་གང་ཟག་གི་གཞི་ཞེས་བཏགས་སོ། །སྤོ་བ་དང་གཞི་ནས་སྤོ་བ་དང་། ཡང་གཞི་ནས་བསླངས་ཏེ་སྤོ་བ་དང་། མགུ་བ་སྤྱོད་ཚུལ་སྟོན་པ་ལ་ཕྱོགས་གཅིག་གི་མིང་བཏགས་ནས་སྤོ་བའི་གཞི་ཞེས་བཏགས་སོ། །གསོ་སྦྱོང་བཞག་པའི་གཞི་སྡོམ་ནི། མ་དག་གསོ་སྦྱོང་དགེ་སློང་དག །མཽའུ་འགལ་བུ་ཡིས་ཉམས་པ་དང་། །དེ་ནས་སྟོན་པས་སྨད་པ་དང་། །དགེ་འདུན་གྱིས་བོར་གསོ་སྦྱོང་ངོ་། །ཞེས་པའི་སྡོམ་གྱི་ཚིགས་སུ་བཅད་པ་འདི་ནི་ཡུལ་ཙམ་པར་གསོ་སྦྱོང་གི་མདོ་རྒྱས་པར་གསུང་སྟེ། གསོ་སྦྱོང་གི་མདོ་དེ་ཡང་ལུང་བར་མ་ཡང་དག་འགྲོ་བའི་ལེའུ་ལས་འབྱུང་ངོ་ཞེས་ཁ་འཕངས་པ་རྣམས་དང་། ལུང་འདི་ན་ཡོད་པ་ལ་ལྟུང་བ་གླེང་པའི་ཕྱིར་སྐབས་འབྱེད་གཞུག་པ་དང་། མི་འབྱེད་ན་མི་སྨྲ་བ་དང་། གདམས་ངག་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པ་ཆོས་དང་ལྡན་མི་ལྡན་གྱི་རྣམ་གཞག་རྒྱས་པར་སྟོན་པ་ལ་གསོ་སྦྱོང་གཞག་པའི་གཞི་ཞེས་ཕྱོགས་གཅིག་ནས་མིང་བཏགས་པའོ། །གནས་མལ་གྱི་གཞི་ལ་སོགས་པའི་ཚིག་གི་དོན་ནི་རྟོགས་པར་སླའོ། །གཉིས་པ་ནི། དེ་རྣམས་ལ་གཞི་ཞེས་བྱ་བ་ནི། གཞིའི་སྐད་དོད་ཝསྟུ་ཞེས་བྱ་བ་དོན་ལྔ་ལ་འཇུག་པར་བཤད་ཀྱང་། འདིར་དེ་དང་དེའི་རྟེན་བྱེད་པས་ན་གཞི་ཞེས་བྱ་སྟེ། བརྗོད་བྱ་དེ་སྟོན་པས་ན་རྗོད་བྱེད་ལ་ཡང་གཞིར་གདགས་ཏེ། གཞི་འགྲེལ་ལས། གཞི་ཞེས་བྱ་བ་ནི་རྟེན་ཏེ་དེའི་རབ་ཏུ་བྱུང་བ་ལ་སོགས་པའི་རྟེན་དུ་གྱུར་པ་ཉེ་བར་སྟོན་པའི་གཞུང་ནི་རབ་ཏུ་བྱུང་བའི་གཞི་ལ་སོགས་པའི་སྒྲར་གསུངས་སོ། །ཞེས་སོ། །གསུམ་པ་ནི། མདོ་འདི་ཐར་པ་དོན་དུ་གཉེར་བའི་གང་ཟག་རྣམས་ལ་མྱ་ངན་ལས་འདས་པའི་གཞིར་ལྷག་པ་ཚུལ་ཁྲིམས་ཀྱི་བསླབ་པ་དགོས་ཤིང་། དེ་ལེན་པ་དང་། བསྲུང་བ་དང་། ཉམས་ན་ཕྱིར་བཅོས་པའི་ཐབས་གསུམ་བསྟན་ཚུལ་སྔར་བཤད་ཟིན་ཏོ། །བཞི་པ་ནི་དོན་དེ་བསྟན་པ་ནི་དེ་ཙམ་གྱི་གྲུབ་པའི་ཕྱིར་རོ། །ལྔ་པ་ནི་ཕལ་ཆེར་ལུང་ལས་བཤད་པའི་གོ་རིམ་ཡིན་ལ། དབྱར་དགག་གཉིས་ནི་རྒྱུ་འབྲས་ཀྱི་རིམ་པ་ཡིན་ལ། གོས་དང་སྨན་ནི་གོས་ཡོ་བྱད་ཀྱི་གཙོ་བོ་ཡིན་ལ་སྨན་གཙོ་བོ་མ་ཡིན་པ་དང་། གོས་གཞི་གསུམ་སྲ་བརྐྱང་རྒྱུ་ལྟ་བུ་དང་། དགག་དབྱེ་དང་དུས་འབྲེལ་བའི་ཕྱིར་དང་པོར་བསྟན་ལ། གཉིས་པོ་ཡང་གོས་སྤྱིར་བསྟན་ལྟ་བུ་ཡིན་ལ་ཀོ་ལྤགས་དམིགས་བསལ་ཡིན་པའི་ཕྱིར་རོ། །ལས་ཀྱི་གཞི་ནི་ཐམས་ཅད་ལ་དགོས་པའི་ཕྱིར་དབུས་སུ་བསྟན་ནོ། །རྩོད་པའི་གཞི་གསུམ་བརྗོད་བྱ་མཐུན་པས་ཕྱོགས་གཅིག་ཏུ་བསྟན་ལ་འཁོར་ལོ་བྱེ་བ་རྗོད་བྱ་ཉུང་བའི་ཕྱིར་རྩོད་གཞིའི་གོང་དུ་བསྟན་ནོ། །གནས་མལ་ནི་ཐམས་ཅད་བྱ་བའི་རྟེན་ཡིན་པས་ཐ་མར་བསྟན་ནོ། །གཉིས་པ་སོ་སོའི་དོན་ལ་ལྔ་སྟེ། བསླབ་པ་ཡོངས་སུ་སྦྱོང་བའི་དང་། བདེ་བར་གནས་པའི་རྐྱེན་བསྟེན་པའི་དང་། བྱ་བའི་ཐབས་ལས་ཀྱི་དང་། གསོ་བ་ཕྱིར་བཅོས་པའི་དང་། དེ་ཐམས་ཅད་ཀྱི་རྟེན་གནས་མལ་གྱི་གཞིའོ། །དང་པོ་ལ་གསུམ་སྟེ། གསོ་སྦྱོང་གི་སྒོ་ནས་དང་དབྱར་གྱི་སྒོ་ནས་དང་། དགག་དབྱེའི་སྒོ་ནས་བསླབ་པ་ཡོངས་སུ་སྦྱོང་བའོ། །དང་པོ་ལ་གཉིས་ཏེ། ཞི་གནས་ཀྱི་གསོ་སྦྱོང་དང་། མཐུན་པའི་གསོ་སྦྱོང་ངོ་། །དེ་སྐད་དུ་ཡང་ཀརྨ་ཤ་ཏམ་ལས། གསོ་སྦྱོང་ཞེས་བྱ་བ་ནི་བསླབ་པ་གསུམ་པོ་དག་གསོ་ཞིང་སྦྱོང་བར་བྱེད་པ་དག་སྟེ། དེ་ཡང་རྣམ་པ་གཉིས་ཏེ། མཐུན་པའི་གསོ་སྦྱོང་དང་། ཞི་གནས་ཀྱི་གསོ་སྦྱོང་ངོ་ཞེས་སོ། །ཞི་གནས་ཀྱི་གསོ་སྦྱོང་ལ་ལྔ་སྟེ། གང་དུ་སྒྲུབ་པའི་གནས། གང་གིས་སྒྲུབ་པའི་རྟེན། གང་བསྒྲུབ་པའི་དངོས་པོ། ཇི་ལྟར་སྒྲུབ་པའི་ཚུལ། དེ་ལྟར་བསྒྲུབས་པའི་དགོས་པའོ། །དང་པོ་ནི། ཉིན་མོ་སྐྱེ་བོའི་རྒྱུ་འགྲུལ་དང་། མཚན་མོ་སྒྲའི་རླག་ཅོར་དང་གཅན་ཟན་དང་ཆོན་རྐུན་པ་ལ་སོགས་པས་གནོད་པ་མེད་ཅིང་། ལོག་འཚོ་དང་བྲལ་བའི་ཡོ་བྱད་མོད་ཅིང་རྣལ་འབྱོར་དང་མཐུན་པའོ། །གཉིས་པ་ནི། ཚུལ་ཁྲིམས་རྣམ་པར་དག་པ་དང་ལྡན་ཞིང་སྡེ་སྣོད་ལ་ཐོས་བསམ་གྱིས་རྒྱུད་སྦྱངས་པ། ལུས་འདུ་འཛི་ལས་བསྲིང་བ་དང་སེམས་རྣམ་རྟོག་ལས་བསྲིང་བ་གཉིས་དང་ལྡན་པ། འདོད་པ་ཆུང་ཞིང་། ཆོག་ཤེས་པ། ཐར་པ་དོན་དུ་གཉེར་བའོ། །ཇི་སྐད་དུ་མཛོད་ལས། ཚུལ་གནས་ཐོས་དང་བསམ་ལྡན་པས། །སྒོམ་པ་ལ་ནི་རབ་ཏུ་སྦྱོར། །ཞེས་སོ། །གསུམ་པ་ནི། ཞི་གནས་དང་ལྷག་མཐོང་གཉིས་ཡིན་ལ། དེ་ཡང་དང་པོ་ཞི་གནས་སྒྲུབ་དགོས་ཏེ། ཞི་གནས་དང་ལྡན་པའི་ལྷག་མཐོང་ནི། ཉོན་མོངས་པ་སྤོང་བ་ལ་མཐུ་ཆེ་བ་ཡིན་པའི་ཕྱིར། འདི་ལ་དགོངས་ནས། སྤྱོད་འཇུག་དུ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཉོན་མོངས་རྣམ་པར་འཇོམས་པར་ཤེས་བྱས་ནས། །ཐོག་མར་ཞི་གནས་བཙལ་བྱ་དེ་ཡང་ནི། །འཇིག་རྟེན་ཆགས་པ་མེད་ལ་མངོན་དགས་འགྲུབ། །ཅེས་སོ། །ཞི་གནས་སྒོམ་པ་ལ་གཉིས་ཏེ། འདོད་ཆགས་ཤས་ཆེ་བའི་གང་ཟག་གིས་མི་སྡུག་པ་དང་། རྣམ་རྟོག་ཤས་ཆེ་བའི་གང་ཟག་གིས་དབུགས་དབྱུང་རྔུབ་སྒོམ་ཚུལ་གཉིས་མཛོད་ལས་བཤད་ལ། དེ་རེ་རེ་ཡང་སེམས་གནས་པའི་ཐབས་དགུ་དགུའི་སྒོ་ནས་ཉམས་སུ་བླང་བར་བྱ་སྟེ། སེམས་གནས་དགུ་པའི་ཚེ་ལུས་སེམས་ཤིན་ཏུ་སྦྱངས་པའི་བདེ་བ་ཁྱད་པར་ཅན་སྐྱེས་པའི་ཞི་གནས་མཚན་ཉིད་པ་ཐོབ་པར་མདོ་སྡེ་རྒྱན་ལས་བཤད་པ་ལྟར་ཁས་བླང་བར་བྱའོ། །ལྷག་མཐོང་སྒོམ་པའི་ཚུལ་ནི། ཞི་གནས་གྲུབ་པར་གྱུར་པ་ཡིས། །དྲན་པ་ཉེར་གཞག་བསྒོམ་པར་བྱ། །ཞེས་གསུངས་པ་ལྟར་ཞི་གནས་གྲུབ་ནས་ལྷག་མཐོང་དྲན་པ་ཉེར་གཞག་ལ་སོགས་པ་བྱང་ཕྱོགས་སོ་བདུན་ལ་འཇུག་སྟེ། དེ་ཡང་། མཚན་ཉིད་རབ་ཏུ་རིག་པ་ཡིད་ལ་བྱེད་པ་སོགས་ཡིད་བྱེད་བདུན་གྱི་སྒོ་ནས་འཇུག་སྟེ། ཟད་པ་ཤེས་པ་ཐོབ་པའི་ཚེ་སྦྱོར་བ་མཐའི་འབྲས་བུ་ཡིད་ལ་བྱེད་པ་སྐྱེས་པ་ཡིན་པས་ཐར་པ་ཐོབ་པ་ཡིན་ནོ། །ལྔ་པ་ནི། དེ་ལྟ་བུའི་ཚུལ་གྱིས་སྤང་བྱ་རྣམས་སྤངས་ནས་མྱ་ངན་ལས་འདས་པ་འཐོབ་པར་འགྱུར་བའོ། །འདིར་སྤོང་བ་པའི་ཞལ་ཏ་བས་བསྡུ་བའི་ཕྱིར་གཎྜི་བརྡུང་ངོ་། །ཞེས་བཤད་པའི་གཎྜིའི་རྒྱུ་དང་ཚད་ལ་སོགས་པ་ཇི་ལྟ་བུ་ཞེ་ན། རྒྱུ་ནི། གཎྜིའི་མདོ་ལས། ཙནྡན་བིལ་བ་པ་ལ་ཤ །ཨ་ཤྭད་ཐ་དང་ཙནྡན་དམར། །རྒྱ་སྟར་ཧ་ལ་ཀིངྴུ་ཀ །ཤིཾ་ཤ་པ་དང་ཧ་མ་ལ། །ཨ་སྨྲ་སྟར་བུ་སྐྱུ་རུ་ར། །ཏནྟི་ས་ར་ཨ་ཤྭ་ཀམ། །འདི་དག་ཐམས་ཅད་མེད་ན་ཡང་། །ཝོ་སེ་ལ་ནི་འབད་དེ་བྱ། །ཞེས་དང་། ཚད་ཡང་། ཚད་ནི་ཆུ་རུ་སོར་ཚད་ཀྱི། །བརྒྱད་ཅུ་རྩ་བཞི་ཉིད་བྱ་ཞིང་། །ཞེང་དུ་སོར་དྲུག་བྱ་བ་སྟེ། །དཔངས་སུ་ཡང་ནི་གཉིས་བྱའོ། །སོར་མོའི་ཚིགས་ཀྱི་ཚད་དག་གིས། །ཟུར་བཞི་ཚད་ནི་གཉིས་པ་ཡིན། །ལེགས་མཉམ་ཉིད་དང་ཤིན་ཏུ་གསལ། །རྩེ་གཉིས་སྦལ་པའི་མགོ་བཞིན་ནོ། །དེ་ནས་རྡུང་བར་བྱེད་པ་ཡང་། །ཤིང་དེ་ཉིད་ལས་འབད་དེ་བྱ། །སོར་བཅུ་གཉིས་ཀྱི་ཚད་དག་ལ། །ཟླུམ་ཞིང་རྩེ་གཉིས་ནེའུ་ལེའི་མགོ །ཆང་གཟུང་ཚད་ཀྱང་དེ་བཞིན་ནོ། །ཤིན་ཏུ་འཇམ་དང་རྩིབས་མཉམ་པར། །ཞེས་སོ། །གཎྜི་དེ་བརྡུང་བའི་གནས་ནི། ཁང་སྟེང་གིས་མཚོན་པའི་ས་ཕྱོགས་མཐོ་བ་ནས་སོ། །གྲངས་ཇི་ཙམ་ཞེ་ན། ཚོགས་པ་ཆེན་པོའི་ཚེ། དགེ་འདུན་བསྡུ་བའི་ཕྱིར་ནི་རྒྱུད་གསུམ་དང་རྒྱུད་དེ་སྙེད་ཀྱི་ཏོག་སྟེ་རྒྱུད་གསུམ་ཏོག་གསུམ་མོ། །དེ་ཡང་རྒྱུད་གསུམ་ནི། ཐོག་མར་གཅིག་ནས་བཟུང་སྟེ་བཅོ་བརྒྱད་ཀྱི་བར་དུ་སྒྲ་ཇེ་ཆེར་གཏོང་། དེ་ནས་བཅུ་བདུན་གྱི་བར་སྒྲ་ཇེ་ཆུང་དུ་གཏོང་བ་ནི་རྒྱུད་གཅིག་ཡིན་ལ། རྒྱུད་གཉིས་པ་དང་གསུམ་པ་ནི་དེ་དང་འདྲའོ། །དེ་ལྟར་ན་རྒྱུད་རེ་རེ་ལ་སུམ་ཅུ་རྩ་ལྔ་རྩ་ལྔ་སྟེ་བརྒྱ་དང་ལྔ། མཇུག་གི་ཏོག་གསུམ་བསྣན་པས་བརྒྱ་རྩ་བརྒྱད་དུ་འགྱུར་རོ། །གཎྜི་བརྡུང་ཚུལ་ཐམས་ཅད་ཀྱི་ཐོག་མར་དཀོན་མཆོག་གསུམ་ལ་ཕྱག་འཚལ་བ་དང་། ཤངས་འཚལ་ལན་གསུམ་སྔོན་དུ་འགྲོ་དགོས་པ་ཡིན་ནོ། །མཇུག་ཏུ་སྒྲ་ཆེན་པོ་གསུམ་རྒྱུད་གསུམ་པོ་དེའི་ཏོག་དང་འདྲ་བ་ཡིན་པས་ན་ཏོག་ཅེས་བྱ་སྟེ་མཆོད་རྟེན་གྱི་ཏོག་བཞིན་ནོ། །ཏོག་ཅེས་པ་སྒྲའི་གདངས་ལ་འདོད་པ་ནི་ཤིན་ཏུ་ནོར་ཏེ། བོད་ཡིག་གི་བརྡ་དག་ཀྱང་འཁྲུག་འདུག་པའི་ཕྱིར་རོ། །ཏོག་མེད་པའི་རྒྱུད་རྣམས་ལ་བྱི་བོ་ཞེས་བྱ་སྟེ། ཏོག་མེད་ཀྱི་མཆོད་རྟེན་ལ་མཆོད་རྟེན་བྱི་བོ་ཞེས་གྲགས་པ་བཞིན་ནོ། །ལུང་ཁ་ཅིག་ལས་སྔར་བཤད་པའི་རྒྱུད་གསུམ་དང་ཏོག་གཉིས་ཞེས་བཤད་དོ། །ཚངས་པར་མཚུངས་པ་ཤི་བ་ལ་འཕྲག་པ་སྟེ་ཕུང་པོ་དབྱུང་བའི་དོན་དུ་རྒྱུད་གཅིག་ཏོག་མེད་པའི་བྱི་བོའོ། །ལུང་ཁ་ཅིག་ལས་ནི་རྒྱུད་གཅིག་དང་ཏོག་གཅིག་གི་ཞེས་བཤད། སྤོང་བ་པ་བསྡུ་བའི་དོན་དུ་འཁར་གསིལ་ལོ། །ལུང་ཁ་ཅིག་ལས་ནི་དེའི་དོན་དུ་གཎྜི་ཆུང་ངུ་བརྡུང་ཞེའོ། །སེར་བ་ལ་སོགས་པའི་གནོད་པ་བྱུང་བ་ལ་ནི། གནོད་པ་སེལ་བ་ལ་ཇི་ཙམ་གྱིས་ཆོག་པ་བརྡུང་ངོ་། །དགེ་འདུན་ཟས་ཀྱི་ཕྱིར་འདུ་བའི་དོན་དུ་ནི་གཎྜི་དང་གཎྜི་ཆུང་བ་གཉིས་ཀ་བརྡུང་ངོ་། །ཇི་ལྟར་ཞེ་ན་དེ་གཉིས་བར་དུ་བཅད་དེའོ། །ཇི་ཙམ་དུ་ཞེ་ན། རྒྱང་པ་སྟེ་ཐོག་མར་ཆུང་ངུ་བརྡུང་སྟེ་ཁང་སྐྱོང་དང་གཙང་སྦྱོར་ལ་སོགས་པས་སངས་རྒྱས་མཆོད་པ་དང་། ལྷུང་བཟེད་བཀྲུ་བ་ལ་སོགས་པའི་ལས་བྱས་ཟིན་པ་ཙམ་དེའི་འོག་ཏུ་ཆེན་པོ་བརྡུང་བའོ་ལྷག་མ་ནི་གོ་བར་ཟད་དོ། །གཎྜི་ཆུང་ངུ་ནི་རྒྱུད་གཅིག་ཏོག་གཅིག་པ་ཡིན་ལ། ཆེན་པོ་ནི་རྒྱུད་གསུམ་ཏོག་གསུམ་པ་ཡིན་ནོ་ཞེས་བླ་མ་གསུང་ངོ་། །ཐེག་ཆེན་གྱི་སྡེ་སྣོད་ལས་ནི་གཎྜི་ལ་ཡུམ་ཆེན་མོའི་འདུ་ཤེས་ཉེ་བར་གཞག་པ་དང་། ཕན་ཡོན་ཡང་། རྒྱལ་པོ་གང་ཚེ་ཡུལ་འཁོར་དུ། །གཎྜི་འདི་ནི་གྲག་གྱུར་པ། །དེར་ནི་དཔལ་དང་གྲགས་པ་དང་། །འདོད་པ་འདི་ནི་ལོངས་སྤྱོད་འགྱུར། །ཞེས་སོགས་རྒྱས་པར་གསུངས་སོ། །གཉིས་པ་མཐུན་པའི་གསོ་སྦྱོང་ལ་ལྔ་སྟེ། བཅུ་བཞི་པ་དང་། བཅོ་ལྔ་པ་དང་། བཀྲ་ཤིས་ཀྱི་དང་། གནོད་པ་ལས་བཟློག་པའི་དང་། དགེ་འདུན་བྱེ་བ་འདུམས་པའི་གསོ་སྦྱོང་ངོ་། །འདི་དག་ལ་བཞི་ལས། གང་དུ་བྱ་བའི་གནས། གང་གི་ཚེ་བྱ་བའི་དུས། གང་དག་བྱ་བའི་ཚོགས་པ། ཇི་ལྟར་བྱ་བའི་ཆོ་གའི་ཁྱད་པར་རོ། །དང་པོ་ནི། ལས་ཐམས་ཅད་མཚམས་ཀྱི་ནང་དུ་བྱ་དགོས་ལ། དེ་ཡང་གནས་ལ་བློ་མཐུན་བྱས་ལ་མ་ཞིག་པ་གཅིག་དགོས་ཏེ། གཞན་དུ་ན་མི་ཆགས་པའི་ཕྱིར། གསོ་སྦྱོང་ལྟ་བུ་གཅིག་ལ་གནས་ལ་བློ་མཐུན་བྱས་ལ་མ་ཞིག་པ་གཅིག་ཡིན་ན། དེར་ལས་གཞན་བྱ་བ་ལ་ཡང་བློ་མཐུན་བྱ་མི་དགོས་ཏེ། ལས་གཞན་གྱི་གནས་ཀྱང་དེ་ཡིན་ནོ། །ཞེས་གསུངས་པའི་ཕྱིར། མཚམས་ལ་ལས་ཀྱི་མཚམས་དང་། རང་བཞིན་གྱི་མཚམས་གཉིས། དང་པོ་ལ་མཚམས་པོ་ཆེ་དང་། མཚམས་བུ་ཆུང་དཀྱིལ་འཁོར་བ་གཉིས་ཡོད་ལ། རང་བཞིན་གྱི་མཚམས་ནི་རྩིག་པ་ལ་སོགས་པས་བསྐོར་བའོ། །གཉིས་པ་ནི། བཅོ་ལྔ་པ་དང་བཅུ་བཞི་པ་བྱ་བའི་དུས་གཉིས་བཤད་པར་བྱ་སྟེ། ཕྱི་མ་གསུམ་གྱི་དུས་ནི་སྐབས་སུ་བབ་པའི་དུས་དེ་དང་དེར་བྱ་བ་གོ་སླ་བའི་ཕྱིར་རོ། །སྤྱིར་ལོ་གཅིག་ལ་གསོ་སྦྱོང་ཉི་ཤུ་རྩ་བཞི་ཡོད་དོ། །དགེ་སློང་གི་ལོ་དྲི་བར་གསོ་སྦྱོང་དུ་ཡོད། ཉི་ཤུ་རྩ་བཞི་སྟེ་དགུན་ཟླ་འབྲིང་པོ་དང་། དཔྱིད་ཟླ་རྭ་བ་དང་། ཐ་ཆུང་དང་། དབྱར་ཟླ་འབྲིང་པོ་དང་། སྟོན་ཟླ་རྭ་བ་དང་ཐ་ཆུང་རྣམས་ཀྱི་མར་གྱི་ངོའི་གསོ་སྦྱོང་རྣམས་ནི་བཅུ་བཞི་པའོ། །ལྷག་མ་རྣམས་ནི་བཅོ་ལྔ་པའོ། །ཞེས་གསུངས་ཏེ། ཕྱེད་ཚེས་པའི་ལུགས་ཡིན་ནོ། །མཛོད་འགྲེལ་ལས། དགུན་དང་དཔྱིད་དང་དབྱར་རྣམས་ཀྱི། །ཟླ་བ་ཕྱེད་དང་གཉིས་འདས་ཤིང་། །ཟླ་བ་ཕྱེད་ནི་ལུས་པ་ན། །མཁས་པས་ཞག་མི་ཐུབ་པ་དོར། །ཞེས་པ་དང་། འདིར་ཡང་དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ལའོ་ཞེས་དང་། རྒྱལ་སྲས་སུ་གསུང་རབ་ལས་ནི་དུས་གསུམ་ཁོ་ན་ཡིན་གྱི། འཇིག་རྟེན་པའི་ལྟར་དྲུག་ནི་མ་ཡིན་ཏེ། དགུན་སྟོད་ནི་གྲང་བར་འདྲ་བའི་ཕྱིར་དགུན་དུ་བཤད་དོ། །སོ་ཀ་ནི་ཚ་བར་འདྲ་བའི་ཕྱིར་དཔྱིད་དུ་བཤད། སྟོན་ནི་ཆར་འབབ་ཏུ་འདྲ་བའི་ཕྱིར་དབྱར་དག་ཡིན་ནོ་ཞེས་གསུངས་ཏེ། དེ་དག་གི་དོན་ནི། འདིར་དུས་ཚིགས་གསུམ་སྟེ། དགུན་དང་། དཔྱིད་དང་། དབྱར་གྱི་དུས་སོ། །དང་པོ་ལ་དགུན་དང་དགུན་སྟོད་གཉིས། གཉིས་པ་ལ་དཔྱིད་དང་སོས་ཀ་གཉིས། གསུམ་པ་ལ་དབྱར་དང་སྟོན་གྱི་དུས་གཉིས་སུ་ཕྱེ་ནས་དེ་དག་གི་ཟླ་བ་ཕྱེད་དང་གཉིས་འདས་ནས་ཟླ་བ་ཕྱེད་ལུས་པ་ན་གསོ་སྦྱོང་བཅུ་བཞི་པ་འབྱུང་བར་བསྟན་ཏེ། ཟླ་བའི་ངོས་འཛིན་ཡང་ཚིག་ལེར། ཁ་བ་སོས་ཀ་དབྱར་རྣམས་ཀྱི། །ཟླ་བ་གཉིས་དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ། །ས་ག་དང་ནི་ཆུ་སྟོད་དང་། །དེ་བཞིན་ཁྲུམས་སྨད་སྨིན་དྲུག་ཅན། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །ཅེས་དང་། དགེ་ཚུལ་གྱི་ལོ་དྲི་བར། རྒྱལ་དང་དབོ་དང་ས་ག་ཅན། །ཆུ་སྟོད་ཁྲུམས་སྨད་སྨིན་དྲུག་ཅན། །འདི་རྣམས་ཀྱི་ནི་ནག་པོའི་ཕྱོགས། །ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་ཏེ། སྟོན་ཟླ་ཐ་ཆུང་སྨིན་དྲུག་གིས་ཉ་བའི་ཚེས་བཅུ་དྲུག་ནི་མར་ངོ་སྔོན་འགྲོའི་དབང་དུ་བྱས་པའི་དགུན་ཟླ་རྭ་བ་མགོའི་ཟླ་བའི་ཚེས་གཅིག་ཡིན་ལ། དེ་ནས་ཟླ་བ་ཕྱེད་དང་གཉིས་འདས་ནས་ཟླ་བ་ཕྱེད་ལུས་པའི་དུས་ནི་རྒྱལ་གྱི་ཟླ་བའི་གནམ་སྟོང་ཡིན་པས་དེར་ཞག་མི་ཐུབ་གཅིག་འབྱུང་ཞིང་། དེ་ནས་ཟླ་བ་ཕྱེད་དང་གཉིས་འདས་ནས་ཕྱེད་ལུས་པའི་དུས་ནི་དབོའི་ཟླ་བའི་གནམ་སྟོང་ཡིན་པས། ཞག་མི་ཐུབ་འབྱུང་བ་སོགས་རིགས་པས་དཔྱད་པས་འགྲུབ་སྟེ། འདིས་ལོ་འགོ་མགོ་ཟླ་ནས་འཛིན་པ་ཡང་གྲུབ་བོ། །དུས་ཚིགས་དྲུག་པོ་དེ་ལ་གསོ་སྦྱོང་བཅུ་བཞི་པ་བྱ་བར་བཤད་པས། ལྷག་མ་བཅོ་བརྒྱད་པོ་དེ་གསོ་སྦྱོང་བཅོ་ལྔ་པ་ཡིན་པར་གྲུབ་སྟེ། གསོ་སྦྱོང་བྱའོ། །ཚེས་བཅོ་ལྔ་ལའོ། །ཞེས་གསུངས་པའི་ཕྱིར། གསོ་སྦྱོང་མི་ཐུབ་པ་དྲུག་པོ་དེ་ཚེས་བཅོ་ལྔ་ལ་བྱེད་པ་ཡིན་ཀྱང་། དེ་ལ་བཅུ་བཞི་པ་ཞེས་བརྗོད་པའི་རྒྱུ་མཚན་ཡོད་དེ། གསོ་སྦྱོང་སྔ་མ་བྱས་པའི་ཉིན་མོ་ནས་འདིའི་བར་ལ་ཉི་མ་གཅིག་ཆད་པས་ཞག་བཅུ་བཞི་ལས་མེད་པའི་ཕྱིར་རོ། །ཊཱི་ཀ་ལས་འདི་ལྟར་ཚེས་གཅིག་ནས་བཅོ་ལྔའི་བར་གྱི་ཉི་མ་གང་ཡང་རུང་བ་ལས་ཉི་མ་གཅིག་ཆད་པས་སྤྱིར་ཞག་བཅུ་བཞི་ཡོད་པའི་ཕྱིར་འཇིག་རྟེན་པའི་དབང་དུ་བྱས་ནས་བཅོམ་ལྡན་འདས་ཀྱིས་ཀྱང་སོ་སོ་ཐར་པའི་མདོ་ལས་གསོ་སྦྱོང་བཅུ་བཞི་པ་ཞེས་གསུངས་པར་ཟད་ཀྱི། དངོས་སུ་ན་ཟླ་བའི་ངོ་དེའི་ཚེས་གྲངས་གང་ལ་ཉི་མ་གཅིག་ཆད་པ་དེ་ཉིད་ས་སྟོང་དུ་དོར་བར་ཟད་ཀྱི། གསོ་སྦྱོང་ནི་ཉི་མ་འདི་ལ་ཆད་པ་མ་ཡིན་ལ། གསོ་སྦྱོང་བཅུ་བཞི་པ་ཞེས་བྱ་བའི་ཉི་མ་དེ་ཉིད་ཚེས་བཅོ་ལྔ་པ་ཡིན་པའི་ཕྱིར་རོ་ཞེས་དང་། བམ་ལྔར་གསོ་སྦྱོང་ཉི་ཤུ་རྩ་བཞི་ཡོད་དེ། དེ་དག་ཚེས་གྲངས་ཀྱི་ཡང་དག་པ་ལ་ལྟོས་ནས་ཐམས་ཅད་གསོ་སྦྱོང་བཅོ་ལྔ་པ་ཡིན་ནོ། །འཇིག་རྟེན་པའི་ཐ་སྙད་ཀྱི་དུས་ལ་ལྟོས་ནས་ནི་དྲུག་ནི་གསོ་སྦྱོང་བཅུ་བཞི་པ་ཡིན་ཏེ་ཞེས་གསུངས་པའི་ཕྱིར། ཁ་ཅིག་འདི་ལ་བརྟེན་ནས་གསོ་སྦྱོང་ཉི་ཤུ་རྩ་བཞི་པོ་ཐམས་ཅད་གསོ་སྦྱོང་བཅོ་ལྔ་པ་ཡིན་ནོ། །ཞེས་ཟེར་བ་ནི་མི་རིགས་ཏེ། འོ་ན་གསོ་སྦྱོང་བཅུ་བཞི་པ་གཞི་མ་གྲུབ་པར་ཐལ། དམ་བཅའ་དེའི་ཕྱིར། འདོད་ན། ཟླ་ཕྱེད་གསོ་སྦྱོང་བཅུ་བཞི་པ། །ཞེས་གསུངས་པ་དང་འགལ་ལོ། །འོ་ན་ལོ་གཅིག་ལ་ཞག་མི་ཐུབ་དྲུག་འབྱུང་བའི་རྒྱུ་མཚན་ཅི་ཡིན་ཞེ་ན། ཚེས་ཞག་གིས་ཉིན་ཞག་གི་དོད་མ་ཐུབ་པའི་རྒྱུ་མཚན་གྱིས་ཡིན་ཏེ། ཉིན་ཞག་ནི་ཐམས་ཅད་དུ་ཡུད་ཙམ་སུམ་ཅུ་ཚང་བ་ཡིན་ལ། ཚེས་ཞག་ཡུད་ཙམ་ཕྱེད་དང་སུམ་ཅུ་ཙམ་རེ་ལ་འཇོག་པའི་ཕྱིར། འདི་ལ་སྤྱིར་ཞག་ནི་གསུམ་སྟེ་ཚེས་ཞག་ཉིན་ཞག་ཁྱིམ་ཞག་གོ །དང་པོ་ནི། ཟླ་བ་འཕེལ་འགྲིབ་ལ་ཆ་སུམ་ཅུར་བྱས་པའི་ཆ་གཅིག་དང་། གཉིས་པ་ནི། ཚེས་གཅིག་གི་ནམ་ལངས་པ་ནས་ཚེས་གཉིས་ཀྱི་ནམ་ལངས་ཁའི་བར་ལྟ་བུའོ། །གསུམ་པ་ནི། ལུག་གླང་འཁྲིག་པ་ཀར་ཀ་ཊ། །སེངྒེ་བུ་མོ་སྲང་སྡིག་པ། །གཞུ་དང་ཆུ་སྲིན་བུམ་པ་ཉ། །ཞེས་པའམ་ཁྱིམ་རེ་རེ་ཉི་མ་ཅི་ཙམ་གནས་པའི་སུམ་ཅུ་ཆ་གཅིག་གོ །དེ་ཡང་ལོ་གཅིག་ལ་ཉིན་ཞག་སུམ་བརྒྱ་དང་དོན་གཅིག ཚེས་ཞག་སུམ་བརྒྱ་རེ་ལྔ། ཁྱིམ་ཞག་སུམ་བརྒྱ་དྲུག་ཅུ་ཡོད་དོ། །དེས་ན་ཉིན་ཞག་པས་ཚེས་ཞག་ཡུད་ཙམ་ཕྱེད་ཕྱེད་ཀྱིས་མྱུར་བར་འདའ་བས་ཚེས་ཞག་དྲུག་ཅུ་ནས་ཉིན་ཞག་ང་དགུ་ཡིན་པས་ཞག་མི་ཐུབ་གཅིག་འབྱུང་ངོ་། །གསོ་སྦྱོང་བཅོ་ལྔ་པ་ལ་ཡར་ངོའི་གསོ་སྦྱོང་བཅུ་གཉིས་དང་། མར་ངོའི་གསོ་སྦྱོང་དྲུག་ཡོད་པ་དུས་གང་ལ་འབྱུང་བ་ནི་དཔྱད་པས་ཤེས་སོ། །གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །ཞེས་དང་། ཉིན་ཞག་གིས་མི་ཆོག་པར་བྱའོ། །དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ནའོ། །ཞེས་པའི་དོན་བཤད་ཟིན་ཏོ།། །།གསུམ་པ་ནི་རབ་ཏུ་བྱུང་བའི་སྡེ་ལྔ་ཆར་རོ། །བཞི་པ་ལ་སྦྱོར་དངོས་མཇུག་གསུམ་ལས། སྦྱོར་བ་ལ་སྟན་ཐབས་ཉམས་པར་མི་བྱ་བ་དང་། ཆོས་བཤད་ཉན་ཉམས་སུ་མྱོང་བར་བྱ་བ་དང་། རང་གཞན་གྱི་ལྟུང་བ་ཕྱིར་བཅོས་པ་དང་གསུམ། དང་པོ་ནི། ཕྱག་དར་བྱ་བ་དང་། སྟན་འདིང་བ་དང་། གཎྜི་བརྡུངས་ཏེ་འདི་ཅིའི་ཕྱིར་ཞེས་འདྲི་བ་ལ། གསོ་སྦྱོང་གིའོ་ཞེས་ལན་བཏབ་པའོ། །གཉིས་པ་ནི། གཙུག་ལག་ཁང་གི་བདག་པོ་དང་། གཙུག་ལག་ཁང་གི་ལྷ་རྣམས་ཀྱི་དོན་དུ་མདོ་འདོན་པར་བསྐུལ་ནས། ལྷ་མི་ཀུན་ཆོས་ཉན་པ་ལ་བསྐུལ་བའི་ཕྱིར་དུ་ཆོས་བསྒྲགས་པའི་མདོ་ཚིགས་སུ་བཅད་པ་བཞི་པ་འདོན། དེ་ནས་ཐོག་མར་ཕྱག་འཚལ་བའི་རྒྱུད། བར་དུ་མདོ་འདོན་པའི་རྒྱུད། ཐ་མར་བསྔོ་བའི་རྒྱུད་གསུམ་གྱིས་ཚུལ་ཁྲིམས་རྣམ་པར་དག་པའི་མདོ་འདོན་པ་ཕྱག་ལེན་ལ་མཛད་དོ། །གསུམ་པ་ལ་གསུམ་སྟེ། རང་གི་དང་། གཞན་གྱི་དང་། གཉིས་ཀའི་ལྟུང་བ་ཕྱིར་བཅོས་པའོ། །དང་པོ་ནི། གསོ་སྦྱོང་སྔ་མ་འདས་ཚུན་ཆད་རང་ལ་ལྟུང་བ་བྱུང་མ་བྱུང་ལེགས་པར་བརྟགས་ལ། བྱུང་བར་ཤེས་ན་བསྡམ་བྱ་རྣམས་བསྡམས་ལ། བཤགས་པར་ནུས་པ་རྣམས་བཤགས། བཤགས་པར་མི་ནུས་པ་རྣམས་ཀྱི་ལྟུང་བ་རྣམས་བྱིན་གྱིས་བརླབས་ལ་ལས་གྲལ་དུ་འདུ། འདུས་ནས་དྲན་ན་དྲུང་ན་མོ་ལ་བྱིན་གྱིས་བརླབ་ལས་བྱེད་པས་དྲན་ན་ཡིད་ཀྱིས་བྱིན་གྱིས་བརླབ་བོ། །གཉིས་པ་ནི། དེའི་ཚེ་རང་གཅིག་པུ་ལྟུང་བ་དང་མི་ལྡན་པར་ཤེས་ན། གྲོགས་བཀའ་བློ་བདེ་ཞིང་ཤེས་པ་གཅིག་ལ་བསྐུལ་ལ། ཀུན་གྱིས་མཐོང་བར་ཕྱིར་བཅོས་བྱེད་དུ་གཞུག དེའི་ཐབས་ཀྱིས་གཞན་ལའང་བསྐུལ་མ་བྱའོ། །གསུམ་པ་ནི། དེའི་ཚེ་རང་གཞན་ཐམས་ཅད་ལྟུང་བ་མཐུན་པར་གྱུར་ན། དགེ་སློང་གཅིག་ནས་གཞན་དུ་ལྟུང་བ་ཕྱིར་བཅོས་སུ་བཏང་ལ། དེའི་མདུན་དུ་ཕྱིར་བཅོས་བྱ་མ་གྲུབ་ན་བྱིན་གྱིས་བརླབ་བོ། །གཉིས་པ་དངོས་གཞི་ནི། གནས་བརྟན་གྱིས་སོ་སོ་ཐར་པའི་མདོ་འདོན་པར་བྱ་བ་ཡིན་ལ། འདིར་གདོན་པར་བྱ་བ་ནི་ལྔ་སྟེ། གླེང་གཞི་དང་། ཕམ་པ་དང་། ལྷག་མ་དང་། མ་ངེས་པ་དང་། ལྟུང་བྱེད་ཀྱི་སྡེ་ཚན་རྣམས་སུ་ཡོད་པ་ལས། ནུས་ན་རིལ་གྱིས་འདོན་པར་བྱ་བ་ཡིན་ལ། མ་ནུས་ན་གླེང་གཞི་ཚིག་ཏུ་བརྗོད་པ་ཉིད་ཀྱིས་བཏོན་ནས། ལྷག་མ་རྣམས་ཐོས་པར་བསྒྲགས་པས་ཀྱང་རུང་ངོ་། །དེ་བཞིན་དུ་མ་ངེས་པའི་སྡེ་ཚན་ཡན་ཆད་བཏོན་ནས། ལྷག་མ་ཐོས་པར་བསྒྲགས་པས་ཀྱང་རུང་ངོ་། །སྡེ་ཚན་བཞི་པ་སྤང་ལྟུང་ལ་རེག་ནས་རྫོགས་པར་འདོན་དགོས་ཏེ། ཕལ་ཆེར་བྱས་ནས་ལྷག་མ་བཞག་པ་ནི་མི་མཛེས་པའི་ཕྱིར། འདིར་བཞི་པ་ཞེས་པ་སོ་ཐར་གྱི་མདོ་འདོན་པ་ལྔའི་བཞི་པ་ཡང་མ་ཡིན། ལྟུང་བ་སྡེ་ལྔའི་བཞི་པ་ཡང་མིན་གྱི། སོ་ཐར་གྱི་མདོ་ལས་ཕམ་ལྷག མ་ངེས་པ། ལྟུང་བྱེད། སོར་བཤགས། བསླབ་བྱ་ཉེས་བྱས་ཀྱི་སྡེ་དང་དྲུག་གི་ནང་གི་བཞི་པ་ཡིན་པར་ཊཱི་ཀ་ལས་བཤད་དོ། །སོ་ཐར་གྱི་མདོ་འདོན་པ་ནི་གནས་བརྟན་གྱི་ལས་ཡིན་པས། དེས་ཚིག་ཕྱེད་ཀྱང་མ་འཁྲུལ་བར་ལེགས་པར་འཐོན་པས་བཏོན་ལ། དེས་མ་ནུས་ན་གནས་བརྟན་གཉིས་པས་བཏོན། དེས་ཀྱང་མ་ནུས་ན་གསུམ་པ་སོགས་རེ་མོས་ཀྱིས་འདོན་པ་སོགས་བྱ་བ་ཡིན་ནོ། །དེ་ཡང་ཇི་ལྟར་འདོན་ན། གསོལ་བ་དང་རྣམ་པར་བཞག་པ་འཛིན་དུ་འཇུག་པར་སྔར་བྱས་ཏེ་རྣམ་པར་གཞག་པ་ནི། ཚེ་དང་ལྡན་པ་དག བདག་ཅག་གསོ་སྦྱོང་བྱ་སྟེ། སོ་སོར་ཐར་པའི་མདོ་འདོན་པ་འདོན་གྱི། ཁྱེད་ཅག་སུ་ལ་ལྟུང་བ་ཡོད་པ་དེས་མཐོལ་ཅིག ལྟུང་བ་མེད་ན་ཅང་མ་སྨྲ་ཞིག་ཅེས་སོགས་བརྗོད་པའོ། །དགེ་ཚུལ་སོགས་བསྙེན་པར་མ་རྫོགས་པ་ལ་ཡང་གསོ་སྦྱོང་ཡོད་དེ། སུམ་བརྒྱ་པ་ལས། གལ་ཏེ་མངོན་སུམ་གསུངས་པ་མེད་གྱུར་ཀྱང་། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །ཅེས་གསུངས་པས་སོ། །དེ་བྱེད་པར་འདོད་ན། ཚུལ་ཁྲིམས་ཡང་དག་པར་ལྡན་པའི་མདོ་བཏོན་ནས། དགེ་ཚུལ་རྣམས་དགེ་སློང་གི་མདུན་དུ་ཙོག་པུར་འདུག་སྟེ། གསོ་སྦྱོང་གི་ཚིག་ལན་གསུམ་ལས། ཐབས་ལེགས་བྱས་ནས་ཐོས་པའི་ཉེ་འཁོར་ལས་ལོགས་སུ་བཀར་ཏེ། དེ་ནས་དགེ་སློང་གིས་གསོ་སྦྱོང་བྱའོ། །དམིགས་བསལ་ལ། འགྲོན་པོ་མི་སྡོད་ན་འགྲོ་བཞིན་དུ་བྱའོ། །སྒྲ་མི་འདོད་ན་མདོར་བསྡུ་བས་སོ། །དེ་ཙམ་ཡང་མི་ནུས་ན་བྱིན་གྱིས་བརླབ་པར་བྱའོ། །ཞེས་པའི་དོན་ཡང་ངེས་པར་བྱའོ། །གསུམ་པ་མཇུག་ནི། བསྔོ་བ་སྨོན་ལམ་གྱིས་རྒྱས་གདབ་པར་བྱའོ། །དེ་དག་གིས་ནི་ཚུལ་ཁྲིམས་གསོ་ཞིང་སྡིག་པ་སྦྱོང་བར་བྱེད་པས་ན་གསོ་སྦྱོང་སྟེ། ཇི་སྐད་དུ། དགེ་བ་མཐའ་དག་ཡང་དག་གསོ་བྱེད་ཅིང་། །སྡིག་པ་མཐའ་དག་ཡང་དག་འདིར་སྦྱོང་བ། །དགེ་གསོ་ཕྱིར་དང་སྡིག་པ་རྣམ་སྦྱོང་ཕྱིར། །དེ་བཞིན་གཤེགས་པས་གསོ་སྦྱོང་ཞེས་གསུངས་སོ། །ཞེས་སོ། །གཉིས་པ་དབྱར་གྱི་སྒོ་ནས་བསླབ་པ་ཡོངས་སུ་སྦྱོང་བ་ནི། མདོར་དབྱར་གནས་པར་ཁས་བླང་བར་བྱའོ། །ཟླ་བ་གསུམ་དུའོ། །ཚེས་བཅུ་དྲུག་ལའོ། །དབྱར་ཟླ་འབྲིང་པོའི་ཉའི་ཕྱི་དེ་ཉིན་པར་བགྱིའོ། །དབྱར་ཟླ་ཐ་ཆུང་གི་ཉའིའོ་ཞེས་གསུང་སྟེ། འདི་ལ་དྲུག་སྟེ། དགོས་པ། རྟེན། དུས། གནས། ཆོ་ག དམ་ཚིག་བསྲུང་བའི་ཚུལ་ལོ། །དང་པོ་ནི། འཕྱ་དང་སྲོག་ཆགས་གནོད་པ་དང་། །ལུས་སྲོག་གནོད་སྤོང་རལ་གྲུམ་འཆོས། །དོན་བྱ་ཉུང་དང་ཐོས་སོགས་འཕེལ། །དགག་དབྱེ་སྲ་བརྐྱང་འབྱུང་བའོ། །ཞེས་པ་ལྟར་རོ། །གཉིས་པ་ནི་རབ་ཏུ་བྱུང་བ་སྡེ་ལྔ་ཆར་རོ། །གསུམ་པ་ནི། དུས་ནམ་གྱི་ཚེ་ཁས་ལེན་ཞེ་ན། དབྱར་སྔ་མ་ནི་དབྱར་ཟླ་འབྲིང་པོའི་ཉ་ལ་སྦྱོར་བ་ཚུལ་འཇུག་བྱས་ནས་དེའི་ཚེས་བཅུ་དྲུག་ལ་དབྱར་ཁས་ལེན་བྱ་བ་ཡིན་ལ། དབྱར་ཕྱི་མ་ལ་དབྱར་ཟླ་ཐ་ཆུང་གི་ཉ་ལ་སྦྱོར་བ་བྱས་ནས། དེའི་ཕྱི་དེ་ཉིན་ཚེས་བཅུ་དྲུག་ལ་དབྱར་ཁས་ལེན་བྱ་བ་ཡིན་ནོ། །ཡུན་ཇི་སྲིད་དུ་ཞེ་ན། ཟླ་བ་གསུམ་དུ་བྱ་བ་ཡིན་ཏེ་དུས་དེ་ཙམ་གྱིས་དགག་བྱ་ཁེགས་ཤིང་དགོས་པ་འགྲུབ་པའི་ཕྱིར་རོ། །ལུང་དུ་ཟླ་བ་བཞིར་གསུངས་པ་དང་འགལ་ལོ་ཞེ་ན། སྐྱོན་མེད་དེ། དེ་ནི་དབྱར་སྔ་ཕྱི་དུས་བསྡོམས་པའི་དབང་དུ་བྱས་པའི་ཕྱིར་རོ། །ཚིག་ལེར། གྲོ་བཞིན་ཟླ་བའི་ཚེས་གཅིག་ནི། །སྔ་མའི་དབྱར་ཏེ་གཙོ་བོ་ཡིན། །དེ་ཉིད་ཁྲུམས་སྟོད་ཟླ་བ་ཡི། །ཚེས་གཅིག་ཞེས་ནི་ཕྱི་མར་གྲགས། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ་སྔར་བཤད་པ་ནི་ཡར་ངོ་སྔོན་འགྲོ་འཇིག་རྟེན་པའི་དབང་དུ་བྱས་པ་ཡིན་ལ། འདི་ནི་མར་ངོ་སྔོན་འགྲོ་བསྟན་བཅོས་ལས་གྲགས་པའི་དབང་དུ་བྱས་པའི་ཕྱིར་རོ། །བཞི་པ་ནི། མཚམས་གྱི་ནང་ཡིན་པ་དང་། བདེ་བར་གནས་པའི་རྐྱེན་ཡོད་ཅིང་མི་མཐུན་པའི་རྐྱེན་མེད་པ། གཙུག་ལག་ཁང་ལ་སོགས་པ་མཛེས་ཤིང་ཡིད་དུ་འོང་བ་གཡོགས་མ་དང་བཅས་པའོ། །ལྔ་པ་ལ་གཉིས་ཏེ། སྦྱོར་བ་དང་། དངོས་གཞིའོ། །དང་པོ་ལ་གསུམ་སྟེ། གནས་བྱི་དོར་བྱ་བའི་ཚུལ། གནས་མལ་སྟ་གོན་བྱ་བའི་ཚུལ། བྱེད་པ་པོ་བསྐོ་ཞིང་དེ་ལྟར་བྱ་བའི་ཚུལ་ལོ། །དང་པོ་ནི། ཞག་བཅུའམ་ཟླ་བ་ཕྱེད་ཀྱིས་ཁས་ལེན་འབྱུང་བར་འགྱུར་བའི་དུས་ཉིད་ན་གཙུག་ལག་ཁང་གི་རི་མོ་སོགས་དང་། རྒྱན་གདགས་པ་ལ་སོགས་པ་བྱི་དོར་བྱ་བའོ། །གཉིས་པ་ནི། དེའི་ཉི་མ་སྔ་མ་ཚེས་བཅོ་ལྔ་ལ་དགེ་འདུན་ལ་བསྟབ་རྒྱུ་གནས་མལ་ལ་སོགས་པ་སྟ་གོན་བྱ་བའོ། །གསུམ་པ་ལ་གསུམ་སྟེ་སྦྱོར་དངོས་མཇུག་གསུམ་མོ། །དང་པོ་ནི། གནས་མལ་སྟོབས་པ་པོ་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །གང་ཟག་གཅིག་གིས་སྟོབ་མི་ནུས་ན་གཉིས་གསུམ་ལ་སོགས་པ་དུ་དགོས་པ་བསྐོ་བར་བྱའོ། །དེའི་བྱ་བའི་ལས་ནི་བསྐོས་པའི་དགེ་སློང་དེས་དྲི་དག་གིས་བསྐུས་པའི་ཚུལ་ཤིང་སྟ་གོན་བྱས་ནས། གཟེབ་ཀྱི་སྤྲོག་མར། རས་དཀར་པོ་བཏིང་པས་དཀྲིས་པ་དག་རྒན་རིམ་དུ་བཞག་ནས། ཚེ་དང་ལྡན་པ་དག་གནས་འདི་ན་ཁྲིམས་སུ་བྱ་བ་འདི་དང་འདི་ཡོད་དོ། །ཞེས་སོགས་ཁྲིམས་སུ་བྱ་བ་བརྗོད་པར་བྱའོ། །གཉིས་པ་ནི། དེ་ནས་གཞན་གྱིས་ཚུལ་ཤིང་བླང་བ་དང་། དབྱར་ཁས་བླང་བའི་ཕྱིར་དགེ་འདུན་ལ་གསོལ་བ་འབའ་ཞིག་པའི་ལས་བྱས་ནས་ཚུལ་ཤིང་ལེགས་པར་འགྲིམ་པར་བྱའོ། །གསུམ་པ་མཇུག་ནི་ཚུལ་ཤིང་བགྲངས་ནས། གནས་འདིར་དགེ་སློང་འདི་སྙེད་ཀྱིས་ཚུལ་ཤིང་བླངས་སོ་ཞེས་གོ་བར་བྱའོ། །དེ་བཞིན་དུ་གནས་མལ་བསྟབས་ཏེ་ལོངས་སྤྱོད་ཚུལ་ཡང་གོ་བར་བྱའོ། །གཉིས་པ་དངོས་གཞི་ནི། དགེ་སློང་གི་མདུན་དུ་འདུག་སྟེ། ཚེ་དང་ལྡན་པ་དགོངས་སུ་གསོལ། བདག་མིང་འདི་ཞེས་བགྱི་བ། མཚམས་ཀྱི་ནང་དང་བཅས་པའི་གནས་འདིར། འདི་ལྟ་སྟེ། གནས་རལ་བ་དང་གྲུམ་པ་བཅོས་པའི་སླད་དུ། སྦྱིན་བདག་མིང་འདི་ཞེས་བགྱི་བ་དང་། ཞལ་ཏ་བ་མིང་འདི་ཞེས་བགྱི་བ་དང་། སྤྱོད་ཡུལ་གྱི་གྲོང་ཆེ་གེ་མོ་ཞེས་བགྱི་བ་དང་། བྲོ་གཡོག་པ་ཆེ་གོ་མོ་ཞེས་བགྱི་བ་ལ་བརྟེན་ནས། དབྱར་སྔ་མ་ཟླ་བ་གསུམ་དུ་གནས་པར་ཁས་བླང་ངོ་། །བདག་དབྱར་འདི་ན་མཆིས་ཤིང་། བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་དང་ཐབས་ལེགས་བྱའོ། །ཕྱི་མ་ལ་ཕྱི་མ་ཟླ་བ་གསུམ་དུ་ཞེས་འདོན་པ་བསྒྱུར་རོ། །ཡུལ་མེད་ན་བསམ་པས་འགྲུབ་ཅིང་། དམ་བཅས་པས་ཀྱང་གནས་པར་འགྱུར། བྱེད་པ་པོ་ལ་ཉེས་བྱས་ཙམ་བསྐྱེད་དོ། །དྲུག་པ་དམ་ཚིག་སྲུང་བའི་ཚུལ་ལ་གཉིས་ཏེ། དབྱར་རལ་བ་སྤང་བ་དང་། རལ་ཡང་ཉེས་པ་མེད་པའོ། །དང་པོ་ནི། བྱིན་གྱིས་མ་བརླབས་པར་མཚམས་ཀྱི་ཕྱི་རོལ་ཏུ་སྐྱ་རེངས་ཤར་བར་མི་བྱའོ་ཞེས་པའི་ཤུགས་ལ། ཆོས་ལྡན་གྱི་བྱ་བའི་དོན་དུ་དབྱར་བྱིན་གྱིས་བརླབས་ནས་འགྲོར་རུང་ཞེས་བསྟན་པ་ལ། འོ་ན་ཞག་ཇི་ཙམ་དུ་བྱིན་གྱིས་བརླབ་ཏུ་རུང་བ་ཡིན་ཞེ་ན། ཞག་བདུན་དུ་བྱིན་གྱིས་བརླབས་ཏེ་དེ་ཡང་མཚམས་ནང་དུ་དགེ་སློང་ཆོས་དགུ་ལྡན་གྱི་དྲུང་དུ་ཙོག་པུར་འདུག་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་ནང་མཚམས་དང་བཅས་པའི་གནས་འདིར། དབྱར་སྔ་མའམ་ཕྱི་མ་ཟླ་བ་གསུམ་དུ་གནས་པར་ཁས་བླངས་པ་ལས། བདག་མིང་འདི་ཞེས་བགྱི་བ་ཆོས་ལྡན་གྱི་བགྱི་བ་ཞིག་གི་སླད་དུ་དགུང་བདུན་མཚམས་ཀྱི་སླད་རོལ་དུ་མཆི་བ་དང་། དེ་ཚུན་ཆད་སླར་མཆི་བར་བྱིན་གྱིས་རློབ་བོ། །བདག་དབྱར་འདི་ན་མཆིས་ཤིང་བདག་གི་དབྱར་གྱི་གནས་ནི་འདི་ལགས་སོ། །ཞེས་ལན་གསུམ་དང་ཐབས་ལེགས་བྱའོ། །གལ་ཏེ་ཞག་བདུན་ཕན་ཆོད་བཞི་བཅུ་ཚུན་ལ་མཚམས་ཀྱི་ཕྱི་རོལ་དུ་འགྲོ་དགོས་པ་བྱུང་ན། དགེ་འདུན་ལ་ཞག་བཞི་བཅུའི་གནང་བ་གསོལ་ཏེ། དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གནང་བ་བྱིན་པས་ཞག་བཞི་བཅུར་བག་ཡངས་སུ་འགྱུར་རོ། །དབྱར་ཟླ་བ་གསུམ་དུ་གནས་པའི་ཐའི་ཞག་དྲུག་ལ་བྱིན་གྱིས་བརླབས་པ་མི་ཆགས་ཏེ་དུས་ཧ་ཅང་ཐུང་བ་ཡིན་པའི་ཕྱིར་རོ། །གཉིས་པ་ནི། ཟས་དང་། སྨན་དང་། ནད་གཡོག་དག་མེད་ལ། དེ་དག་མེད་པར་འཚོ་མི་ནུས་ན། དེ་ལས་འདའ་བར་བྱའོ། །དགེ་སྦྱོང་གི་ཚུལ་དང་སྲོག་དང་ཚངས་པར་སྤྱོད་པའི་བར་ཆད་ཡོད་ན་ཡང་ངོ་ཞེས་གསུང་བ་ལྟར་རོ། །རྐྱེན་དབང་གིས་གསོ་སྦྱོང་གཉིས་སམ་གསུམ་ཐལ་ནས་དགག་དབྱེ་བྱར་རུང་བ་ཡོད་དེ། མདོར་གལ་ཏེ་གནས་པ་ཁས་བླངས་པ་དག་གིས་དགེ་སློང་འཐབ་ཀྲོལ་བྱེད་པ་དག་འོང་བར་ཐོས་པར་གྱུར་ན། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ། །ཞེས་གསུངས་པའི་ཕྱིར། གསུམ་པ་དགག་དབྱེའི་སྒོ་ནས་བསླབ་པ་ཡོངས་སུ་སྦྱོང་བ་ནི། དབྱར་གནས་པས་དགེ་འདུན་ལ་མཐོང་བ་དང་། ཐོས་པ་དང་། དོགས་པ་དག་གིས་དགག་དབྱེ་བྱའོ། །དབྱར་རྣམས་ཀྱི་ཐ་མའི་ཉི་མ་ལའོ། །ཞེས་སོགས་གསུངས་ཏེ། སྔར་དབྱར་གྱི་ནང་དུ་ལྟུང་བ་གླེང་བར་མི་བྱའོ་ཞེས་དགག་པ་ལས། འདིར་ལྟུང་བ་གླེངས་ཤིག་ཅེས་གླེང་པའི་སྐབས་དབྱེ་བས་ན་དགག་དབྱེ་ཞེས་བྱ་སྟེ། འདི་ལ་གཉིས་སྤྱིར་བཏང་དང་། དམིགས་བསལ་ལོ། །དང་པོ་ལ་ལྔ་སྟེ། གནས་དང་། དུས་དང་། གང་ཟག་དང་། ཆོ་ག་དང་། དགོས་པའོ། །དང་པོ་ནི། དབྱར་གང་དུ་ཁས་བླངས་པའི་གནས་དེ་ཉིད་དམ་གཞན་དུ་ཡང་རུང་ངོ་། །གཉིས་པ་ནི། དབྱར་སྔ་ཕྱིའི་བྱེ་བྲག་གིས་སྟོན་ཟླ་འབྲིང་པོའི་ཉའམ་སྟོན་ཟླ་ཐ་ཆུང་གྱི་ཉའོ། །གསུམ་པ་ནི། རབ་ཏུ་བྱུང་བ་སྡེ་ལྔ་པོ་དབྱར་རལ་བ་དང་མ་རལ་བ་ཐམས་ཅད་དོ། །བཞི་པ་ལ་སྦྱོར་དངོས་རྗེས་གསུམ་ལས། དང་པོ་ནི། དགག་དབྱེ་འབྱུང་བའི་ཞག་བདུན་ནས། ཟླ་བ་ཕྱེད་ཀྱི་བར་གང་རུང་ལ་ཞེ་འཁོན་ཡོད་ན་བཟོད་གསོལ་དང་། གཙུག་ལག་ཁ་བརྒྱན་པ་ལ་སོགས་པ་བྱས་ལ། ཉའི་ཉིན་པར་རྩྭ་དར་བྷ་སྟ་གོན་བྱ། དགེ་འདུན་ཐམས་ཅད་འདུས་ནས་ཕྱག་ཟིང་པོར་བྱས་ལ་འགྲེངས་ཏེ་འདུད་པ་དང་བཅས་པས། དབྱར་གྱི་ནང་དུ་ཐུགས་དང་འགལ་བ་ཐམས་ཅད་བཟོད་པར་གསོལ་ཞེས་བྱས་ལ་འདུག་སྟེ། རྒྱུན་བཤགས་ནས་ཚུལ་ཁྲིམས་རྣམ་དག་གིས་མདོ་འདོན་པ་ཡན་ཆད་གསོ་སྦྱོང་བཞིན་བྱས་པའི་རྗེས་སུ་དགེ་ཚུལ་རྣམས་ལོགས་སུ་བཀར་ཏེ། འདུན་པ་དང་ཡོངས་དག་ལེན་དགོས་པ་ཡོད་ན་ལེན་པ་དང་ལྟུང་བ་བཤགས་བསྡམས་བྱིན་གྱིས་བརླབས་པ་དང་། ལས་མཚམས་གཅོད་པ་གྲུབ་ན་གསོ་སྦྱོང་གི་སྐབས་བཞིན་བྱས་ལ། གནས་ལ་བློ་མཐུན་བྱའོ། །གཉིས་པ་དངོས་གཞི་ནི། ལས་བྱེད་པས་དགེ་སློང་དགག་དབྱེ་བྱེད་པར་བསྐོ་བར་འོས་པ་ལ་སྤྲོ་བ་དྲིས་ཏེ་གསོལ་བ་དང་གཉིས་ཀྱི་ལས་ཀྱིས་བསྐོའོ། །གཅིག་གིས་མི་ནུས་ན་དུ་མ་ཀོས་ཏེ་དགག་དབྱེ་བྱ་བའི་ཕྱིར་གསོལ་བའི་ལས་བྱས་པའི་རྗེས་ལ་བསྐོས་པའི་དགེ་སློང་གིས་རྒན་རིམ་གྱིས་ཙྭ་དར་བྷ་བྲིམ་མོ། །དེ་ནས་དགེ་སློང་གཞན་རྣམས་གསུམ་གསུམ་མན་ཆད་ཀྱིས་བསྐོས་པ་དེ་རྒན་ན་ཕྱག་བྱས་ཙོག་པུར་འདུག་སྟེ། ཡུལ་དང་བྱེད་པ་པོའི་ལག་པས་རྩྭ་དར་བྷ་བཟུང་རྐང་པས་ཀྱང་ཅུང་ཟད་མནན་ཏེ། དགག་དབྱེའི་ཆོ་ག་ལན་གསུམ་བརྗོད་པར་བྱའོ། །ནད་པ་ངལ་བ་ལ་སོགས་ཀྱི་གནོད་པ་བྱུང་དོགས་ཡོད་ན་གཉིས་སམ་གཅིག་བརྗོད་པས་ཀྱང་འགྲུབ་བོ། །བསྐོས་པས་བསྐོས་པ་གཞན་ཡོད་ན་ཕན་ཚུན་དགག་དབྱེ་བྱེད། མེད་ན་དེར་གནས་པའི་དགེ་སློང་གཞན་ལ་དགག་དབྱེ་གོ་བར་བྱའོ། །གསུམ་པ་མཇུག་ནི་དེ་ནས་རྩྭ་ཆུན་བགྲངས་ཏེ། གནས་འདིར་དགེ་སློང་འདི་སྙེད་ཀྱིས་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་གོ་བར་བྱས་ནས། གཞན་རྣམས་ཀྱིས་ཀྱང་ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་བརྗོད་པར་བྱའོ། །དེ་ནས་རྫས་ཀྱི་དགག་དབྱེ་བྱ་སྟེ། བསྐོས་པའི་དགེ་སློང་དེ་དག་གི་རྫས་གང་ཡང་རུང་བ་ཐ་ན་ཁབ་ཙམ་གྱི་ཀྱང་དགེ་འདུན་ལ་རྫས་ཀྱི་དགག་དབྱེ་བརྩམ་པར་བྱ་སྟེ། རྫས་དེ་བླངས་ཏེ་ཚིག་གིས་གོ་བར་བྱ་སྟེ། བཙུན་པ་རྫས་འདི་ལྟ་བུས་ཀྱང་དབྱར་གནས་པའི་དགེ་སློང་ལ་དགག་དབྱེ་བགྱིད་རུང་ངོ་ཞེས་པའོ། །དགེ་སློང་གིས་དགག་དབྱེ་བྱས་པ་དེའི་འོག་ཏུ་དགེ་ཚུལ་རྣམས་ལ་དགག་དབྱེ་གོ་བར་བྱའོ། །དེའི་འོག་ཏུ་དགེ་སློང་མ་སོགས་ལའོ། །ལྔ་པ་དགོས་པ་ནི། ལྟུང་བའི་དགག་དབྱེས་ཆོས་རྣམ་པར་དག་པ་དང་། རྫས་ཀྱི་དགག་དབྱེས་རྙེད་པའི་སྒོ་འདུ་བའི་དགོས་པ་འགྲུབ་པའོ། །གཉིས་པ་དམིགས་བསལ་ལ། དགག་དབྱེའི་དུས་ཚོགས་པའི་དམིགས་བསལ་དང་། བྱ་བའི་དངོས་པོའི་དམིགས་བསལ་གཉིས་ལས། དང་པོ་ནི། གནས་པར་མི་ནུས་པ་ཉིད་ཡིན་ན། སྤྱོད་ཡུལ་དུ་གྱུར་པའི་དགེ་སློང་ལ་ཚོགས་ཀྱི་དགག་དབྱེ་གོ་བར་བྱའོ། །དབྱར་གྱི་ནང་དུ་བྱ་བས་འགྲོ་དགོས་ན་དགག་དབྱེ་བྱའོ་ཞེས་པའོ། །གཉིས་པ་ནི། གཞིའམ་གང་ཟག་གམ་གཉིས་ཀ་བཞག་ནས་དགག་དབྱེ་བྱེད་པར་ཁས་བླང་བའོ། །དེ་ལ་གཞི་གཞག་པ་ནི། ལྟུང་བའི་གཞི་འདི་དང་འདི་མ་གཏོགས་པ་གཞན་གྱིས་གླེངས་ཤིག་ཅེས་པ་དང་། གང་ཟག་གཞག་པ་ནི། གང་ཟག་འདི་མ་གཏོགས་པ་གཞན་གྱིས་གླེངས་ཤིག་ཅེས་པ་ལྟ་བུའོ། །དེ་ཡང་རེག་པ་ལྟ་བུ་གང་ལས་བྱུང་བའི་ཡུལ་གྱི་གང་ཟག་ཡིན་གྱི། གླེང་བྱེད་ནི་མ་ཡིན་ནོ།། ༈ །།གཉིས་པ་བདེ་བར་གནས་པའི་རྐྱེན་བསྟེན་པ་ལ་གཉིས་ཏེ། གོས་བསྟེན་པ་དང་། སྨན་བསྟེན་པའོ། །དང་པོ་ལ་གསུམ་སྟེ། གོས་ཐམས་ཅད་ཀྱི་གཏེར་ལྟ་བུ་སྲ་བརྐྱང་གི་གཞི། གོས་རུང་བ་ཕལ་ཆེ་བ་གོས་ཀྱི་གཞི། མི་རུང་བ་ཕལ་ཆེ་བ་ཀོ་ལྤགས་ཀྱི་གཞིའོ། །དང་པོ་ལ། གཞིའི་སྐབས་ནས་འབྱུང་བ་དང་། ཞུ་བ་ལ་སོགས་པའི་སྐབས་ནས་འབྱུང་བ་གཉིས་ལས། དང་པོ་ལ་གསུམ་སྟེ། སྲ་བརྐྱང་གདིང་བའི་ཚུལ། བསྐྱང་བའི་ཚུལ། དབྱུང་བའི་ཚུལ་ལོ། །དང་པོ་ལ་བསྟན་བཤད་གཉིས་ལས། དང་པོ་ནི། སྲ་བརྐྱང་གདིང་བར་བྱའོ། །ཞེས་སོགས་ཏེ། སྲ་བརྐྱང་དང་གཏན་པ་ནི་མིང་གི་རྣམ་གྲངས་ཡིན་ལ། དེ་ཡང་ཆོས་གོས་གང་ལ་གདིང་བར་བྱ་བའི་པང་ལེབ་ལྟ་བུ་ལ་དངོས་སུ་འཇུག་ཅིང་། ཆོས་གོས་ལའང་སྲ་བརྐྱང་ངམ་གཏན་པའི་མིང་གིས་བཏགས་པ་ཡིན་ལ། དེ་ཆོས་གོས་གསུམ་ལ་འདོགས་པའི་རྒྱུ་མཚན་ནི་དེ་དང་འདྲ་བའི་ཕྱིར། དཔེར་ན་སྨན་བྱ་རོག་རྐང་ཞེས་པ་ལྟ་བུའོ། །བཏགས་པའི་དགོས་པ་ནི། འདྲ་བའི་ཆོས་བཞི་པོ་ཡོད་པ་དེ་གོ་བའི་ཆེད་དུའོ། །དེ་དག་གང་ཞེ་ན། གཏན་པའི་སྟེང་དུ་ཆོས་གོས་བཏིང་བས་ཁ་དོག་གཅིག་ཏུ་འགྱུར་བ་ལྟར་འདིས་ཀྱང་འདིང་བ་པོ་རྣམས་བློ་གཅིག་ཏུ་འདུས་པས་དབྱེར་མེད་པ་དང་། གཏན་པའི་སྟེང་དུ་སྣམ་ཕྲན་དང་གླེགས་བུ་དུ་མ་གནས་པ་ལྟར། འདི་ལའང་འདིང་བ་པོ་དུ་མའི་བྱིན་རླབས་གནས་པས་རོ་གཅིག་པ་དང་། གཏན་པས་ཆོས་གོས་མི་འཁུམས་པར་བྱེད་པ་ལྟར། འདིས་ཀྱང་འདིང་བ་པོ་བག་ཡངས་སུ་བྱེད་པས་མི་འཁུམས་པར་བྱ་བ་གཅིག་པ་དང་། གཏན་པས་ཆོས་གོས་དག་ལ་ཁྱབ་པ་ལྟར། འདིས་ཀྱང་འདིང་བ་པོ་དག་རྙེད་པ་དང་ཕན་ཡོན་འདྲ་བར་སྒྲུབ་པས་ཁྱབ་པར་འདྲ་བའོ། །དངོས་ལ་གནོད་བྱེད་ནི་གོས་འདིང་བའི་གཞིར་གྱུར་པའི་པང་ལེབ་མ་ཡིན་པའི་ཕྱིར་རོ། །དེས་ན་སྲ་བརྐྱང་དང་ཆོས་གོས་སྲ་བརྐྱང་གཅིག་དུ་མ་འཁྲུལ་བ་གལ་ཆེའོ། །དེས་ན་དགེ་འདུན་རྣམས་ཆོས་ཅན། ཆོས་གོས་སྲ་བརྐྱང་འདིང་བར་གནང་སྟེ། དེས་ཁྱད་པར་དུ་བྱས་པའི་དགོས་པ་མཐོང་བའི་ཕྱིར་རོ། །འདི་ནི་གནང་བའི་བསླབ་པའོ། །གཉིས་པ་ལ་བཞི་སྟེ་གང་གི་དོན་དུ་གདིང་བ་ཕན་ཡོན་གྱི་རྣམ་གཞག གང་གིས་གདིང་བ་གང་ཟག་གི་རྣམ་གཞག གང་གདིང་བ་དངོས་པོའི་རྣམ་གཞག ཇི་ལྟར་གདིང་བ་ཆོ་གའི་རྣམ་གཞག་གོ །དང་པོ་ནི། སྲ་བརྐྱང་བཏིང་ཆགས་དང་ལྡན་པའི་དགེ་སློང་དེ་ལ་འཆང་འབྲལ་འཇོག་པའི་ལྟུང་བ་གསུམ་པོ་དག་མི་འབྱུང་བ་ཇི་ལྟ་བ་དེ་བཞིན་དུ། སྲ་བརྐྱང་བཏིང་ན་ནི་ཡང་ཡང་ཟ་བ་དང་། འདུས་ཤིང་ཟ་བ་དང་། ཤོག་ཅིག་ཅེས་མ་སྨྲས་པར་གོས་ཐོབ་ཏུ་རེ་བའི་བསམ་པས་གྲོང་དུ་འགྲོ་བ་དང་། ཕྱིན་ནས་གོས་སློང་བ་ལ་ཡང་ཉེས་པ་མེད་ལ། སྲ་བརྐྱང་བཏིང་ཆགས་དང་ལྡན་པ་དེས་མཚམས་ཀྱི་ཕྱི་རོལ་ན་གནས་ཀྱང་ལྷག་མ་མཚམས་ནང་ན་གནས་པ་དག་དང་རྙེད་པ་ཐུན་མོང་དུ་དབང་བ་ཉིད་དུ་འགྱུར། མ་སྨྲས་པར་གྲོང་དུ་འགྲོ་བ་ཞེས་པས་སློང་བའི་སྦྱོར་ལྟུང་མེད་པར་བསྟན། གོས་སློང་བ་ལ་ཉེས་པ་མེད་ཅེས་པས་སློང་བའི་དངོས་གཞིའི་ལྟུང་བ་མེད་པ་བསྟན་ནོ། །གཉིས་པ་ནི། ཆོ་གའི་སྒོ་ནས་དབྱར་གནས་པར་ཁས་མ་བླངས་པ་དང་། ཁས་བླངས་ནས་དབྱར་རལ་བ་དང་དབྱར་ཕྱི་མར་གནས་པར་ཁས་བླངས་པ་དང་། དབྱར་གནས་གཞན་དུ་གནས་པར་ཁས་བླངས་པ་དག་ལ་མཚམས་འདིར་སྲ་བརྐྱང་གདིང་བ་དེ་མི་འབྱུང་ངོ་། །དེར་མ་ཟད་སྤོ་བ་སྤྱོད་པ་ལ་སོགས་པ་ས་གཞན་ན་གནས་པ་དག་ལ་ཡང་སྲ་བརྐྱང་གདིང་བ་དེ་མི་འབྱུང་ངོ་། །སྲ་བརྐྱང་གདིང་བའི་འོག་ཏུ་ས་གཞན་ན་གནས་པ་ཉིད་ཐོབ་པ་ཉིད་ཡིན་ན་སྲ་བརྐྱང་གདིང་བ་དེ་མི་འབྱུང་ངོ་། །དེ་རྣམས་ལ་སྲ་བརྐྱང་གི་ཕན་ཡོན་ཡང་མི་འབྱུང་ངམ་ཞེ་ན། ཐ་མ་དབྱར་གནས་གཞན་དུ་ཁས་བླངས་པ་མ་གཏོགས་དབྱར་ཁས་མ་བླངས་པ་དང་། དབྱར་རལ་བ་དང་། དབྱར་ཕྱི་མར་ཁས་བླངས་པ་དང་། ས་གཞན་ན་གནས་པ་དག་དང་། དགེ་ཚུལ་ནི་དབྱར་གྱི་རྙེད་པ་དབང་ངོ་། །གནས་ནས་དབྱུང་བ་ནི་དབྱར་གྱི་རྙེད་པ་མི་དབང་སྟེ། ཆོས་དང་ཟང་ཟིང་གཉིས་ཀྱི་སྒོ་ནས་སྤངས་པའི་ཕྱིར། དགེ་འདུན་དང་འཁོར་ལོ་བྱེ་བ་ན་ཆོས་མིན་པའི་ཕྱོགས་དང་མཐུན་པ་དག་ཏུ་སོང་བ་ནི། གནས་དབྱུང་ནན་ཏུར་བྱས་པ་དེ་དང་རྙེད་པ་ཐོབ་ཚུལ་འདྲ་བས་རྙེད་པ་མི་དབང་ངོ་། །གསུམ་པ་ནི། དངོས་གཞི་སྟེ་དབྱར་སྔ་མའི་ཟླ་བ་གསུམ་གྱི་དགག་དབྱེའི་མཐའ་ཡན་ཆད་དུ་རྙེད་པ་དབྱར་བསྡུས་པའམ་སོ་སོའི་རྒྱུ་ལས་བྱུང་བ། སྲ་བརྐྱང་གདིང་བའི་ཉི་མ་ཡན་ཆད་དུ་ལག་ཏུ་གྲུབ་པ་གོས་ཀྱི་རྙེད་པར་བགྲང་བ་སྟེ། གོས་དངོས་སམ་གོས་ཀྱི་དོན་དུ་ཕུལ་བའི་རིན་པོ་ཆེ་ལྟ་བུས་སྒྲུབ་པའི་ཆོས་གོས་གཙོ་བོ་གསུམ་པོ་གདིང་ངོ་། །དེ་སྐད་དུ་ཡང་ལུང་ལས། བཙུན་པ་གང་ཟག་གི་ཆོས་གོས་གདིང་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །བཙུན་པ་གང་ཟག་གི་བླ་གོས་གདིང་དུ་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །བཙུན་པ་གང་ཟག་གི་མཐང་གོས་གདིང་དུ་རུང་ངམ། ཉེ་བ་འཁོར་མི་རུང་ངོ་། །དགེ་འདུན་ལ་ཕུལ་ན་རུང་ངོ་། །ཞེས་གསུངས་སོ། །མཚོ་་་་་་ཁ་ཅིག་གདིང་བའི་ཉིན་མོའི་མཐར་གྲུབ་པ་ཞེས་པའི་དོན། གཟོ་ཚེམས་ལེགས་པར་གྲུབ་པ་ཞེས་པ་ལ་འཆད་པ་མི་འཐད་དེ། དེ་ནི་ཟིན་པའོ་ཞེས་པས་བསྟན་པའི་ཕྱིར། སུ་དབང་བ་གདིང་ཞེ་ན་དགེ་འདུན་གྱི་དབང་བྱར་ཡོད་པའི་ཆོས་གོས་གདིང་ངོ་། །གོས་ཀྱི་ཁྱད་པར་ནི། སྣམ་བུ་ལྟར་སྤུ་བཤད་ཅིང་། དབྱུག་པས་གདབ་པར་མ་བྱས་པ་དང་། ཡ་ཡོ་སྟེ་ཁ་གླེང་པོར་མ་གྱུར་པ་དང་། སྲིལ་ལ་སོགས་པས་མ་རྨུགས་པ་དང་། ཁ་མ་ཟེགས་པ་དེ་གདིང་བར་བྱའོ། །རུང་བའི་ཚོན་གྱིས་ཁ་བསྒྱུར་བ་དང་། སྔར་དུས་ཚིགས་སུ་ཡོངས་སུ་མ་སྤྱད་པ་དེ་གདིང་བར་བྱའོ། །དུས་ཚིགས་སུ་མ་སྤྱད་ཀྱང་མི་སྲ་བ་དེ་མི་རུང་བས་སྲ་བ་དེ་གདིང་བར་བྱའོ། །སྲ་བ་ཡིན་ཀྱང་མཐུད་མ་ཅན་དང་། ལྷན་རིང་ཅན་དང་ལྷན་པ་ཅན་དང་། ཆོས་གོས་དག་གི་མཐའ་ཐོག་དག་ཏུ་སྐུད་པའི་ཚོམ་གྱི་ཆ་ག་རྟབས་པའི་ཆ་ག་ཅན་དང་། མཐའ་ཟེགས་པ་ལ་ཟུང་བཏབ་པའི་ཟུང་ཅན་མ་ཡིན་པ་དེ་གདིང་བར་བྱའོ། །སྤང་ལྟུང་ཕྱིར་བཅོས་བྱས་པའི་སྤངས་པ་དང་། རྒྱུ་མ་བརྟགས་པ་རྔ་བལ་ལ་སོགས་པ་དང་། བདག་པོ་སྔ་མ་དང་བྲལ་ཞིང་ཕྱི་མ་དང་ཕྲད་པ་མ་ཡིན་པ་དེ་གདིང་། མཚོན་གྱིས་དྲས་ཤིང་ཁབ་ཀྱིས་དྲུབ་པ་དེ་གདིང་། བཟོ་ཚེམས་ལེགས་པར་ཟིན་པ་དེ་གདིང་ངོ་། །སྲིད་དུ་ཁྲུ་ལྔ་ཞིང་དུ་ཁྲུ་གསུམ་ཡོད་པ་དེ་གདིང་ངོ་། །དེར་ངེས་སམ་ཞེ་ན། ཚད་ལྷག་པ་དང་སུམ་ཕྲུག་ལྷག་པ་གཉིས་ཀ་གདིང་ངོ་། །ལོ་སྔ་མར་མ་བཏིང་བ་གདིང་བར་བྱའོ། །ད་ལྟ་སྤྲོག་མ་འཇོང་མོར་གདིང་བ་དེ་གདིང་བར་བྱའོ། །སྤྲོག་མ་གཅིག་ཏུ་སུམ་ཕྲུག་དུ་མ་ཡང་གདིང་བར་བྱའོ། །གཅིག་ཁོ་ནས་གདིང་བར་བྱ་བ་ཡིན་ནམ་ཞེ་ན། སུམ་ཕྲུག་ཇི་སྙེད་ཡོད་པ་གདིང་བར་བྱེད་པ་ཡང་དེ་སྙེད་བསྐོ་བར་བྱའོ། །སྲ་བརྐྱང་གདིང་བའི་ཚེ་དགེ་འདུན་རྣམས་ཀྱིས་ཇི་ལྟར་འཇུག་ཅེ་ན། སྲ་བརྐྱང་གདིང་བ་དེ་ནི་རེ་རེ་བའི་ཆོས་གོས་ཀྱི་བྱིན་བརླབས་ལས། གཞན་དགེ་འདུན་གྱིས་བྱིན་གྱིས་བརླབས་པ་ཡིན་པ་རྒྱུ་མཚན་དེའི་ཕྱིར། གང་ཟག་གི་བྱིན་གྱིས་བརླབས་པ་དག་ཕྱུང་ནས་འཇུག་པར་བྱའོ། །བཞི་པ་ལ་གསུམ་སྟེ། སྦྱོར་བའི་ཆོ་ག་དང་། དངོས་གཞིའི་ཆོ་ག་དང་། མཇུག་གི་ཆོ་གའོ། །དང་པོ་ལ་གཉིས་ཏེ། དགེ་འདུན་གྱི་བྱ་བ་དང་། བརྐོས་པའི་གང་ཟག་གི་བྱ་བའོ། །དང་པོ་ནི། སྲ་བརྐྱང་གདིང་རྒྱུ་རྙེད་པའི་ཚེ་ཞག་མ་ལོན་པར་ཚོགས་པས་སྲ་བརྐྱང་གདིང་བར་བྱའོ་སྙམ་དུ་མོས་པ་བསྐྱེད་པར་བྱའོ། །མཚམས་ཀྱི་ནང་དུ་གསོལ་བ་དང་གཉིས་ཀྱི་ལས་ཀྱིས་སྲ་བརྐྱང་གདིང་བར་བློ་མཐུན་བྱའོ། །སྲ་བརྐྱང་གདིང་བ་བསྐོ་བ་དེ་ཡང་མཚམས་ཀྱི་ནང་ཁོ་ནར་བྱའོ། །གང་ཟག་ཇི་ལྟ་བུ་བསྐོ་ཞེ་ན། གང་ཟག་གང་ལ་སྲ་བརྐྱང་གདིང་བ་འབྱུང་བ་དབྱར་སྔ་མ་ཁས་བླངས་ཤིང་མ་རལ་བ་ལ་སོགས་པ་དེ་བསྐོ་བར་བྱའོ། །བསྐོས་པའི་གང་ཟག་དེ་ལ་དགེ་འདུན་གྱི་སྲ་བརྐྱང་གདིང་རྒྱུའི་དངོས་པོ་རྣམས་གཏད་པར་བྱའོ། །དེ་ཡང་གསོལ་བ་འབའ་ཞིག་པའི་ལས་བྱས་ནས་གཏད་པར་བྱའོ། །གཉིས་པ་ནི། །བསྐོས་པའི་གང་ཟག་དེས་སྲ་བརྐྱང་གདིང་བའི་སྔོན་དུ་སྲ་བརྐྱང་གདིང་རྒྱུ་དེ་ལ་བཀྲུ་བ་དང་། དྲུབ་པ་དང་། ཚོན་གྱིས་ཁ་སྒྱུར་བ་སོགས་ལ་འཇུག་པར་བྱའོ། །ལན་གཅིག་ཙམ་བྱ་བའམ་ཞེ་ན། བཀྲུ་བ་ལ་སོགས་པ་ལན་གཉིས་སམ་གསུམ་གྱི་བར་དུ་བསྒྲུབ་པར་བྱའོ། །ངེས་པར་བྱ་དགོས་སམ་ཞེ་ན། བཟོ་ཚེམས་ལེགས་པར་ཟིན་པ་ཞིག་རྙེད་ན་གདིང་བར་སྐོས་པ་པོ་རང་གིས་ཁབ་སྲུབ་གཉིས་སམ་གསུམ་བསྒྲུབ་པར་བྱའོ། །སེམས་ཇི་ལྟར་བསྐྱེད་པར་བྱ་ཞེ་ན། སྲ་བརྐྱང་གི་རྒྱུའི་དངོས་པོ་དེ་མནོས་པའི་ཚེ་ན། འདི་ལ་སྲ་བརྐྱང་གདིང་བར་འགྱུར་རོ་སྙམ་པ་དང་། རང་གིས་འདིང་བར་བྱེད་པའི་ཚེ་གདིང་ངོ་སྙམ་པ་དང་། བཏིང་ཟིན་པའི་མཇུག་ཏུ་བཏིང་ངོ་སྙམ་པའི་སེམས་བསྐྱེད་པར་བྱའོ། །སེམས་བསྐྱེད་པ་ཉམས་ན་གདིང་བ་མི་འབྱུང་ངམ་སྙམ་ན། དང་པོ་གདིང་བར་འགྱུར་རོ་སྙམ་པའི་སེམས་བསྐྱེད་པ་ཉམས་ན་སྲ་བརྐྱང་གདིང་བ་མི་འབྱུང་བ་མ་ཡིན་ལ། གཉིས་པ་ཉམས་ན་མི་འབྱུང་ངོ་། །དེ་ནས་སྲ་བརྐྱང་འདིང་བར་བསྐོས་པ་དེས། ཚེ་དང་ལྡན་པ་དག་བདག་སང་སྲ་བརྐྱང་འདིང་བར་འགྱུར་གྱི། ཁྱེད་ཅག་གིས་རང་རང་གི་ཆོས་གོས་ཀྱི་བྱིན་བརླབས་དབྱུང་བར་བྱའོ། །ཞེས་དགེ་འདུན་ཚོགས་པ་ལ་བརྗོད་པར་བྱའོ། །བསྐོས་པའི་གང་ཟག་དེས་དགེ་འདུན་འདུ་བའི་ཐབས་གཎྜི་བརྡུང་བ་དང་། གནས་མལ་བཤམ་པ་སོགས་རྗེས་སུ་བསྒྲུབ་པར་བྱའོ། །གཉིས་པ་དངོས་གཞི་ནི། སྲ་བརྐྱང་ལ་དྲི་དང་མེ་ཏོག་གིས་མཆོད་ཅིང་། བདུག་སྤོས་དྲི་ཞིམ་པོས་བདུགས་པའི་སུམ་ཕྲུག་དུ་མ་བཟེབ་ཀྱི་སྤྲོག་མར་ལྷན་ཅིག་བཞག་པ་པང་པར་ཐོགས་ཏེ། དགེ་སློང་རྒན་རིམ་དུ་འདུག་པ་ལ། སྲ་བརྐྱང་གདིང་བ་བསྒྲུབ་པར་བྱའོ། །དུས་ནམ་གྱི་ཚེ་ཞེ་ན། ཚེས་བཅུ་དྲུག་གི་ནངས་པར་རོ། །ཟླ་བ་གང་གི་ཞེ་ན་སྟོན་ཟླ་འབྲིང་པོའོ། །ཅི་ཞིག་གིས་བསྒྲུབ་པར་བྱ་ཞེ་ན། ལན་གསུམ་བཟླས་པས་སོ། །ཅི་ཞིག་ལན་གསུམ་བཟླས་པས་ཞེ་ན། གདིང་ངོ་ཞེས་པའི་ཆོ་གས་སོ། །དེ་ཡང་ཇི་ལྟར་ཞེ་ན། རེ་ཞིག་དང་པོར་དགེ་འདུན་ཐམས་ཅད་ལ་གདིང་ངོ་ཞེས་པའི་སྔགས་ལན་གསུམ་བཟླས་པས་བསྒྲུབ་པར་བྱ་སྟེ། འདིའི་སྔགས་ནི། དགེ་འདུན་བཙུན་པ་རྣམས་གསན་དུ་གསོལ། ཆོས་གོས་འདི་ནི་དགེ་འདུན་གྱི་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་བ་སྲ་བརྐྱང་འདིང་བར་བསྐོས་པ་ལགས་ཏེ། འདི་ལྟར་གནས་བསྡུ་བ་དང་། དགེ་སློང་རྣམས་བདེ་བར་གནས་པར་བགྱི་བ་དང་། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱད་པའི་སླད་དུ་བདག་སྲ་བརྐྱང་འདིང་བ་དགེ་སློང་མིང་འདི་ཞེས་བགྱི་བས། ཆོས་གོས་འདིས་དགེ་འདུན་གྱི་སྲ་བརྐྱང་གདིང་བར་བགྱིའོ། །གནས་གང་དུ་སྲ་བརྐྱང་བཏིང་བར་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླའོ། །གསུམ་པ་འཇུག་ནི། དེ་ནས་དགེ་སློང་རེ་རེའི་མདུན་དུ་འདུག་སྟེ། དགེ་སློང་རེ་རེ་ལ་ཡང་གདིང་ངོ་ཞེས་བྱ་བའི་སྔགས་ལན་གསུམ་གསུམ་བཟླས་པས་བསྒྲུབ་པར་བྱའོ། །འདིའི་སྔགས་ནི། གནས་བརྟན་ནམ་བཙུན་པའམ་ཚེ་དང་ལྡན་པ་དགོངས་སུ་གསོལ། ཆོས་གོས་འདི་ནི་དགེ་འདུན་གྱི་སྲ་བརྐྱང་དུ་བློ་མཐུན་པར་བགྱིས་པ་ལགས། བདག་དགེ་སློང་མིང་འདི་ཞེས་བགྱི་བ་ནི་སྲ་བརྐྱང་འདིང་བར་བསྐོས་པ་ལགས་ཏེ། དེའི་སླད་དུ་འདི་ལྟར་གནས་བསྡུ་བ་དང་། དགེ་སློང་རྣམས་བདེ་བར་གནས་པར་བགྱི་བ་དང་། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་ཡོངས་སུ་སྤྱོད་པའི་སླད་དུ་བདག་སྲ་བརྐྱང་འདིང་ན། དགེ་སློང་མིང་འདི་ཞེས་བགྱི་བས་ཆོས་གོས་འདི་དགེ་འདུན་གྱི་སྲ་བརྐྱང་གདིང་ལགས་ཏེ། གནས་གང་དུ་སྲ་བརྐྱང་བཏིང་བ་ཆོས་གོས་རྙིང་པ་རྣམས་དང་ཡང་མི་འབྲལ་ན། གསར་པ་རྣམས་དང་ལྟ་ཅི་སྨོས་ཞེས་ལན་གསུམ་བཟླས་པས་སོ། །དེ་ནས་འདིང་བར་བྱེད་པ་ལས་གཞན་ཡུལ་དེས་ནི་ལེགས་པར་ཏེ་ཁ་ན་མ་ཐོ་བ་མེད་པར་བཏིང་ངོ་། །ཤིན་ཏུ་སྟེ་ཐེ་ཚོམ་མེད་པར་བཏིང་ངོ་། །སྲ་བརྐྱང་འདི་ལ་རྙེད་པ་དང་ཕན་ཡོན་གང་ཡོད་པ་དེ་བདག་གི་ཡིན་ནོ་བརྗོད་པར་བྱའོ། །ཆོ་གས་གདིང་དགོས་པར་ངེས་སམ་ཞེ་ན། སྲ་བརྐྱང་གདིང་བ་འདི་ལ་རྗེས་སུ་ཡི་རང་བས་ལེགས་པར་བཏིང་ངོ་། །ཤིན་ཏུ་བཏིང་ངོ་། །འདི་ལ་ཕན་ཡོན་དང་རྙེད་པ་གང་ཡོད་པ་དེ་བདག་གི་ཡིན་ནོ། །ཞེས་པ་དེ་ཉམས་སུ་མྱོང་ན་སྲ་བརྐྱང་བཏིང་བ་འབྱུང་ངོ་། །དེ་ཡང་སྲ་བརྐྱང་བཏིང་བའི་དགེ་འདུན་མངོན་སུམ་དུ་འདུས་པར་གྱུར་པས། དེ་ལྟར་མྱོང་ན་གདིང་བ་འབྱུང་གི་གཞན་དུ་ན་མ་ཡིན་ནོ། །སྲ་བརྐྱང་གི་ཕན་ཡོན་ལ་གནས་བསྡུ་བ་ཞེས་གསུངས་པ་ནི། འབྲས་བུ་སྲ་བརྐྱང་གི་ཕན་ཡོན་མཐོང་ནས་རྒྱུ་དབྱར་གནས་པ་ལ་གུས་པས་འཇུག་པའོ། །གཞན་གཉིས་ནི་གོ་བར་ཟད་དོ། །གཉིས་པ་བསྐྱང་བའི་ཚུལ་ནི། སྲ་བརྐྱང་དེ་ཕྱིས་དུས་དུས་སུ་སེར་བུ་ལ་བསྲང་བ་དང་། ཉི་མ་ལ་བསྲང་བ་དང་། རྡུལ་སྤྲུག་པར་བྱའོ། །ཁྱིམ་དུ་བ་ཅན་དང་རྡུལ་ཅན་དུ་གཞག་པར་མི་བྱའོ། །རྒྱལ་པོའི་ཕོ་བྲང་དུ་གཞག་པར་མི་བྱ། སྲ་བརྐྱང་གདིང་བར་བསྐོས་པའི་དགེ་སློང་དེ་སྲ་བརྐྱང་དང་བྲལ་བར་མི་བྱ་ཞིང་། སྲ་བརྐྱང་དེ་ཁྱེར་ཏེ་གཞན་དུ་འགྲོ་བར་ཡང་མི་བྱ་སྟེ། སྲ་བརྐྱང་གི་བྱིན་བརླབས་འཇིག་པའི་དགག་བྱ་ཡོད་པའི་ཕྱིར། དེ་ཁྱེར་ནས་མི་གཙང་བའི་སྐྱབས་གཉིས་སུ་འཇུག་པར་མི་བྱ། དེ་ཁྱེར་ནས་བླ་གབ་མེད་པར་ཅུང་ཟད་ཀྱང་འདུག་པར་མི་བྱའོ། །གསུམ་པ་དབྱུང་བའི་ཚུལ་ལ་བསྟན་བཤད་གཉིས་ལས། དང་པོ་ནི། སྲ་བརྐྱང་དབྱུང་བ་ཆོས་ཅན། རྣམ་པ་གཉིས་སུ་ཡོད་དེ། རང་འཇུག་བྲལ་གྱི་དབྱུང་བ་དང་། བཅོས་མའི་དབྱུང་བ་གཉིས་ཡོད་པའི་ཕྱིར། ལས་ལ་ལྟོས་མེད་དུ་སྲ་བརྐྱང་གི་བྱིན་བརླབས་མེད་པར་སོང་བ་ནི་རང་འཇུག་བྲལ་གྱི་དབྱུང་བ་ཡིན་ལ་ལས་ལ་ལྟོས་ནས་སྲ་བརྐྱང་གི་བྱིན་བརླབས་མེད་པར་སོང་བ་ནི་བཅོས་མའི་དབྱུང་བའོ། །གཉིས་པ་ལ་གཉིས་ལས། རང་འཇུག་བྲལ་གྱི་དབྱུང་བ་ནི། སྲ་བརྐྱང་གིས་སྲ་བརྐྱང་བཏིང་མཚམས་ལས་མཚམས་ཀྱི་ཕྱི་རོལ་དུ་ཕྱིན་པ་དང་། བྱིན་གྱིས་རློབ་པར་བྱེད་པ་མེད་པ་སྟེ་སྲ་བརྐྱང་སྲུང་བ་པོ་མེད་པར་མཚམས་ཀྱི་ནང་དུ་སྐྱ་རེངས་ཤར་བ་དང་། དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་རྣམས་ལའང་རང་འཇུག་པ་དང་བྲལ་བ་དེ་འགྲུབ་བོ། །དང་པོ་གཉིས་ཀྱིས་ནི་དགེ་འདུན་སྤྱིའི་རང་འཇུག་བྲལ་དང་། ཕྱི་མས་ནི་གང་ཟག་སོ་སོའི་རང་འཇུག་བྲལ་འགྲུབ་བོ། །འདིང་བར་བསྐོས་པ་དེས་སྲུང་བ་པོ་དགེ་སློང་གཞན་མེད་པར་མཚམས་ཀྱི་ཕྱི་རོལ་ཏུ་སྐྱ་རེངས་ཤར་བར་གནས་ན། དེ་ལ་སྲ་བརྐྱང་དང་བྲལ་བའི་འབྲལ་སྤང་འབྱུང་ཞིང་སྲ་བརྐྱང་གི་བྱིན་བརླབས་མེད་པར་ཡང་འགྱུར་རོ། །དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་དེ་གང་ཟག་གང་ལ་འགྲུབ་ཅེ་ན། སྦྱོར་བས་འགྲོ་བ་ལ་སོགས་པའི་གང་ཟག་དེ་ལ་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པར་དེར་འགྲུབ་བོ། །དེ་ལ་མ་དྲུག་སྟེ། སྦྱོར་བས་འགྲོ་བའི་མ། ངེས་པར་བྱེད་པའི་མ། མཐར་ཐུག་པའི་མ། བརྩམས་པ་ཞིག་པའི་མ། བསམ་པ་རྒྱུན་ཆད་པའི་མ། མཚམས་འདས་ཀྱི་མའོ། །དེའང་སྲ་བརྐྱང་གི་བྱིན་བརླབས་ལ་ཡང་མི་བརྟེན། སྲ་བརྐྱང་གི་ཕན་ཡོན་ལ་ཡང་མི་བརྟེན། མཚམས་ཀྱི་ནང་དུ་མི་འོང་སྙམ་པའི་བློ་སྐྱེས་པའམ། མཚམས་ཀྱི་ནང་དུ་འོང་ངམ་མི་འོང་ཐེ་ཚོམ་ཟ་བཞིན་དུ་མཚམས་ཀྱི་ནང་ནས་ཕྱི་རོལ་དུ་འདས་པ་ནི་སྦྱོར་བས་འགྲོ་བའི་མའོ། །མཚམས་ཀྱི་ཕྱི་རོལ་དུ་སྲ་བརྐྱང་འདི་ལ་མི་བརྟེན། མཚམས་ཀྱི་ནང་དུ་མི་འོང་སྙམ་པའི་བློ་སྐྱེས་པའི་བརྟེན་ནམ་མི་བརྟེན། འོང་ངམ་མི་འོང་སྙམ་པའི་ཐེ་ཚོམ་ཟ་བ་ནི་ངེས་འབྱེད་ཀྱི་མ། རང་གི་ཆོས་གོས་མ་གྲུབ་བར་དུ་སྲ་བརྐྱང་འདི་ལ་བརྟེན་ལ། རང་གི་ཆོས་གོས་གྲུབ་ནས་སྲ་བརྐྱང་ལ་མི་བརྟེན་སྙམ་པའི་བློ་སྐྱེས་པ་ན། རང་གི་ཆོས་གོས་ཀྱི་བཟོ་ལེགས་པར་ཟིན་པ་ནི་མཐར་ཐུག་པའི་མ། དེ་འདྲའི་བློ་སྐྱེས་པ་ན་ཆོས་གོས་བྱ་རྒྱུའི་དངོས་པོ་དེ་མེས་ཚིག་པའམ། ཆོམ་རྐུན་པ་སོགས་ཀྱིས་ཁྱེར་བ་ནི་བརྩོམས་པ་ཞིག་པའི་མ། དེ་འདྲའི་བློ་སྐྱེས་ཏེ་སྦྱིན་བདག་གི་ཡུལ་ལ་ཆོས་གོས་ཀྱི་རེ་བ་བྱས་པ་ན། སྦྱིན་བདག་དེ་ཤི་བ་ལྟ་བུ་ནི་བསམ་པ་རྒྱུན་ཆད་པའི་མ། སྲ་བརྐྱང་འདི་ལ་བརྟེན་ནམ་མི་རྟེན་སྙམ་པའི་ཐེ་ཚོམ་ཟ་བཞིན་དུ་མཚམས་ཀྱི་ཕྱི་རོལ་དུ་འདས་པ་ནི་མཚམས་འདས་ཀྱི་མའོ། །དེ་ཉིད་གཞུང་དོན་དུ་འཆད་པ་ལ། སྲ་བརྐྱང་བཏིང་མཚམས་ལས། མཚམས་ཀྱི་ཕྱི་རོལ་དུ་འདས་པ་ན་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྲུབ། དེ་ཙམ་གྱིས་འགྲུབ་བམ་ཞེ་ན་མཚམས་ཀྱི་ནང་དུ་ཕྱིར་མི་འོང་སྙམས་པའི་སེམས་སྐྱེས་པའམ། འོང་མི་འོང་ཐེ་ཚོམ་ཟ་བའི་བློ་སྐྱེས་ཏེ་མཚམས་ལས་འདས་པ་ན་དེ་འགྲུབ་བོ། །དེ་ཡང་ཆོས་གོས་སྲ་བརྐྱང་ལ་ཆོས་གོས་བྱ་སྙམ་པའི་བསམ་པ་རྗེས་སུ་འབྲེལ་པ་མེད་ན་དེའི་ཚེ་འགྲུབ་སྟེ། འདིས་ནི་སྦྱོར་འགྲོའི་མ་དེ་བསྟན་ནོ། །མཚམས་ཀྱི་ཕྱི་རོལ་དུ་མཚམས་ནང་དུ་མི་འོང་སྙམ་པའི་བློ་སྐྱེས་ན་ཡང་ངོ་སྟེ་དེའི་དཀྱིལ་འཁོར་གྱི་ཁོངས་སུ་གཏོགས་པར་འཆད་པ་དེ་འགྲུབ། བསམ་པ་ཇི་ལྟ་བུས་འགྲུབ་ཅེ་ན། སྲ་བརྐྱང་འདི་ལ་ཆོས་གོས་བྱ་སྙམ་པའི་བསམ་པ་རྗེས་སུ་འབྲེལ་བ་མེད་ན་དེའི་ཚེ་འགྲུབ་སྟེ་འདིས་ནི་ངེས་འབྱེད་ཀྱི་མ་བསྟན་ནོ། །ཡོད་ན་མི་འགྲུབ་བམ་ཞེ་ན། གུད་དུ་རང་གི་ཆོས་གོས་མ་གྲུབ་ཀྱི་བར་སྲ་བརྐྱང་འདི་ལ་བརྟེན་སྙམ་པའི་བསམ་པ་རྗེས་སུ་འབྲེལ་བ་ཡོད་ན། མཚམས་ཀྱི་ཕྱི་རོལ་དུ་ཕྱིན་པ་ན་བྱེད་པར་འགྱུར་བ་ཉིད་ཆད་ན་རང་འཇུག་བྲལ་གྱི་དབྱུང་བ་དེ་འགྲུབ་བོ། །མཚམས་ནང་དུ་མི་འགྲུབ་བམ་ཅེ་ན། མཚམས་ཀྱི་ཕྱི་ནས་ནང་དུ་འོང་བའི་ཚེ་བྱེད་པར་འགྱུར་བ་ཆད་ན་ཡང་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པར་འགྲུབ་བོ། །བྱེད་པར་འགྱུར་བ་ཆད་པ་དེ་གང་ཞེ་ན། རང་གི་ཆོས་གོས་ཀྱི་བཟོ་ཚེམས་ལེགས་པར་ཟིན་པ་ན་བྱེད་པར་འགྱུར་བ་མཐར་ཐུག་པ་དང་། ཆོས་གོས་ཀྱི་རྒྱུ་དེ་མེས་ཚིག་པ་སོགས་ཀྱི་སྒོ་ནས་བརྩམས་པ་ཞིག་པ་དང་། ཆོས་གོས་དེ་གང་ལས་རེ་བའི་ཡོན་བདག་ལྟ་བུ་ཤི་ནས་རེ་བ་ཆད་པ་ལྟ་བུ་བསམ་པ་རྒྱུན་ཆད་པ་སྟེ། དེ་གསུམ་ལ་བྱེད་པར་འགྱུར་བ་ཆད་པ་སྟེ་གནས་སོ། །མཚམས་ཀྱི་ནང་དུ་སྲ་བརྐྱང་འདི་ལ་བརྟེན་ནམ་མི་བརྟེན། མཚམས་ནང་དུ་འོང་ངམ་མི་འོང་སྙམ་པའི་ཐེ་ཚོམ་ཟ་བཞིན་དུ་མཚམས་ལས་འདས་པ་དེ་ཆོས་ཅན། ཁྱོད་ལས་དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་འབྱུང་སྟེ། དེའི་རྒྱུ་ཚོགས་ཚང་བའི་ཕྱིར། དཔེར་ན་ཕྱིར་མི་འོང་ངོ་སྙམ་དུ་མཐའ་གཅིག་ཏུ་ངེས་པས་འབྱིན་པ་སྟེ། དེའི་དཀྱིལ་འཁོར་གྱི་ཁོངས་སུ་གཏོགས་པར་ཆད་པ་དང་འདྲའོ། །དེ་བཞིན་དུ་མཚམས་ཀྱི་ཕྱི་རོལ་ལ་ཡང་སྦྱར་རོ། །གཉིས་པ་བཅོས་མའི་དབྱུང་བ་ནི། རང་འཇུག་བྲལ་གྱི་དབྱུང་བ་དེ་བྱར་རུང་ངམ་ཞེ་ན། གསོལ་བཞིའི་ལས་ལས་གཞན་པའི་སྦྱོར་འགྲོ་ལ་སོགས་པས་སྲ་བརྐྱང་དབྱུང་བར་བྱ་བ་རྗེས་སུ་བསྒྲུབ་པར་མི་བྱའོ། །དུས་ནམ་གྱི་ཚེ་དབྱུང་ཞེ་ན། སྲ་བརྐྱང་དེ་དབྱུང་བའི་དུས་ནི་དཔྱིད་ཟླ་རྭ་བའི་ཉ་ལའོ། །དེ་ཡང་ལོ་དེ་ཉིད་ཀྱི་མོད་ལ་འབྱུང་བ་ཉ་དེ་ཉིད་ལ་དབྱུང་ངོ་། །དེར་ངེས་སམ་ཞེ་ན། ཆོམ་རྐུན་པས་བཅོམ་པའི་དོན་ཉིད་དུ་ནི་དཔྱིད་ཟླ་རྭ་བའི་ཉའི་སྔར་ཡང་དབྱུང་དུ་རུང་ངོ་། །གསུམ་པ་ཞར་ལ་ཐོས་བྱུང་གི་མ་བཤད་པ་ནི། སྲ་བརྐྱང་དབྱུང་ཟིན་ནས་དེའི་ཕན་ཡོན་འབྱུང་བ་མེད་དམ་ཞེ་ན། སྲ་བརྐྱང་དུས་ཀྱི་སྔ་རོལ་དུ་ཕྱུང་བའི་དུས་དེར་སྲ་བརྐྱང་འདིང་བ་མཚམས་དེའི་ཕྱི་རོལ་ན་གནས་པ་དེ་མཚམས་ཀྱི་ནང་དུ་སྲ་བརྐྱང་ཕྱུང་བའི་གཏམ་མ་ཐོས་ཀྱི་བར་དུ་སྲ་བརྐྱང་གི་ཕན་ཡོན་རྗེས་སུ་འཇུག་གོ །གུད་དུ་ཆོས་གོས་མ་གྲུབ་ཀྱི་བར་དུ་སྲ་བརྐྱང་འདི་ལ་བརྟེན་སྙམ་པའི་བསམ་པ་རྗེས་སུ་འབྲེལ་བ་མེད་ན། མ་བྲོས་ཀྱི་བར་དུ་ཕན་ཡོན་རྗེས་སུ་འཇུག་གོ །དེ་འདྲའི་བསམ་པ་རྗེས་སུ་འབྲེལ་བ་ཡོད་ན་བྱེད་པར་འགྱུར་བ་མ་ཆད་ཅིང་མ་ཐོབ་ཀྱི་བར་དུ་ཕན་ཡོན་འཇུག་གོ །སྲ་བརྐྱང་གི་བྱིན་བརླབས་མ་ཕྱུང་བར་ཆོམ་རྐུན་པས་བཅོམ་པ་དང་། མ་བཅོས་པ་ཐམས་ཅད་ཀྱིས་སྲ་བརྐྱང་དེའི་དུས་ཀྱི་རྙེད་པ་བགོ་བར་མི་བྱའོ། །གཉིས་པ་ཞུ་བའི་སྐབས་ནས་འབྱུང་བ་ལ་བཞི་སྟེ། གང་གི་ཚེ་གདིང་བ་དུས་ཀྱི་མཚན་ཉིད། གདིང་དབྱུང་ངོ་བོ་ཉིད་ཀྱི་མཚན་ཉིད། གང་དུ་གདིང་བ་གནས་ཀྱི་མཚན་ཉིད། ཁ་སྐོང་དང་ཕན་ཡོན་གྱི་མཚན་ཉིད་དོ། །དང་པོ་ནི། ལོ་དེ་ལ་སྟོན་ཟླ་འབྲིང་པོ་གཉིས་ཡོད་ན་སྲ་བརྐྱང་གང་ལ་གདིང་ཞེ་ན། དགག་དབྱེ་ཇི་ལྟར་བ་བཞིན་དུ་སྟེ། དབྱར་ཟླ་བ་གསུམ་དུ་ཁས་བླངས་ཏེ། སྟོན་ཟླ་འབྲིང་པོ་ལ་སྲ་བརྐྱང་གདིང་ངོ་། །དེས་མཚོན་ནས་འཐབ་ཀྲོལ་ཅན་གྱི་རྐྱེན་དབང་གིས་དགག་དབྱེ་དུས་ཀྱི་སྔ་རོལ་དང་། ཕྱིས་བྱེད་པ་ན་ཡང་དགག་དབྱེ་ཇི་ལྟ་བ་བཞིན་དུ་གདིང་ངོ་། །ཁ་ཅིག་སྟོན་ཟླ་འབྲིང་པོ་གཉིས་བྱུང་བ་ན་སྔ་མ་ཤོལ་ཟླར་བྱེད་ཟེར་བ་ཡང་མི་འཐད་དེ། འདིའི་སྐབས་ཀྱི་འགྲེལ་བར་སྟོན་ཟླ་འབྲིང་པོ་ངོ་གཉིས་སུ་གྱུར་པ་ན། ཚེས་བཅུ་དྲུག་ཅེས་བྱ་བའི་ཉི་མ་སྔ་མ་ལ་གདིང་བ་ཞེས་པ་དང་། འགྲེལ་ཆུང་ལས་ཀྱང་སྟོན་ཟླ་འབྲིང་པོ་གཉིས་དང་། ཚེས་གྲངས་མི་མཐུན་པ་ལ་ནི། དགག་དབྱེ་ཇི་ལྟ་བ་བཞིན་དུ་གདིང་ཞེས་གསུངས་པའི་ཕྱིར། དགག་དབྱེ་རྐྱེན་དབང་གིས་སྔ་ཕྱིར་བྱས་པའི་ཚེ། གསོ་སྦྱོང་གི་མཐའ་མ་ཡིན་པ་ལ་སྲ་བརྐྱང་གདིང་དུ་རུང་ངམ་ཞེ་ན། གསོ་སྦྱོང་བྱས་པའི་མཐའ་མ་ཡིན་པ་ལ་སྲ་བརྐྱང་གདིང་བར་མི་བྱའོ། །སྲ་བརྐྱང་དབྱུང་བ་ལ་གསོ་སྦྱོང་གི་མཐའ་མ་ཡིན་པ་ལ་མི་བྱའོ། །ཆོམ་རྐུན་པས་བཅོམ་པའི་དབང་གིས་སྲ་བརྐྱང་དུས་ཀྱི་སྔ་རོལ་དུ་དབྱུང་བ་འདི་ནི་གསོ་སྦྱོང་བྱས་པའི་ཉི་མ་དེ་ཉིད་ཀྱི་མཐའ་ལ་བྱའོ། །རང་འཇུག་བྲལ་དང་བཅོས་མའི་དབྱུང་བ་མ་ཡིན་པའི་སྲ་བརྐྱང་དབྱུང་བ་གཞན་མེད་དམ་ཞེ་ན། སྲ་བརྐྱང་བཏིང་ཟིན་པའི་འོག་ཏུ་དགེ་སློང་གློ་བུར་བ་མང་པོ་ལྷགས་ནས་གསོ་སྦྱོང་བྱས་ན་སྲ་བརྐྱང་གི་བྱིན་བརླབས་ཕྱུང་བ་ཉིད་ཡིན་ཏེ། དེའི་ཚེ་སྲ་བརྐྱང་འདིང་བ་པོ་རྣམས་ལ་དུས་མ་ཡིན་པར་སྲ་བརྐྱང་གདིང་ངོ་སྙམ་པའི་བློ་སྐྱེ་བའི་ཕྱིར། གཉིས་པ་ནི། སྲ་བརྐྱང་བཏིང་བའི་འོག་ཏུ་དགེ་འདུན་ཕྱོགས་གཉིས་སུ་བྱེ་བ་ན་སྲ་བརྐྱང་ལྷན་ཅིག་བཏིང་བ་ཡིན་པས་ལྷན་ཅིག་དབྱུང་དགོས་སམ་སྙམ་ན། སྲ་བརྐྱང་བཏིང་ནས་དགེ་འདུན་ཆོས་ཕྱོགས་པ་དང་། ཆོས་མིན་ཕྱོགས་པ་གཉིས་སུ་བྱེ་བ་དག་ལ་ནི་སྲ་བརྐྱང་དབྱུང་བ་དེ་ཐ་དད་པར་གྲུབ་པས་ཐ་དད་དུ་དབྱུང་བར་བྱ། སྲ་བརྐྱང་མ་བཏིང་བར་ཕྱོགས་གཉིས་སུ་བྱེ་བ་ན་སྲ་བརྐྱང་བཏིང་བ་དེ་སུས་བྱ་ཞེ་ན། དེའི་ཚེ་ན་ཆོས་སྨྲ་བ་དག་ཡོད་པས་ཆོས་ཕྱོགས་པས་གདིང་བར་བྱ་སྟེ། ཆོས་ཕྱོགས་པས་བྱས་ན་ལེགས་པར་བྱས་པའི་ཕྱིར། ཆོས་མིན་ཕྱོགས་པས་སྲ་བརྐྱང་བཏིང་བའི་ཚེ་དབྱར་གྱི་རྙེད་པ་དེ་སུ་དབང་ཞེ་ན། མཚམས་ནང་དུ་ཆོས་ཕྱོགས་པ་ལས་གཞན་ཆོས་མ་ཡིན་པ་དག་གིས་སྲ་བརྐྱང་བཏིང་ཀྱང་དབྱར་རྙེད་པའི་རྙེད་པ་ནི་ཆོས་ཕྱོགས་པ་ལ་འོས་པ་ཡིན་ལ། སྲ་བརྐྱང་གི་རྙེད་པ་ནི་ཐུན་མོང་དུ་དབང་བ་ཡིན་ནོ། །ཕལ་ཆེར་ལྷན་ཅིག་ཏུ་གནས་ནས་དེའི་འོག་ཏུ་བྱེ་བ་ན་ཆོས་མ་ཡིན་པའང་དབྱར་རྙེད་དབང་སྟེ། དབྱར་ཕལ་ཆེར་གནས་ནས་དེའི་འོག་ཏུ་ཤི་བ་དང་བབ་པའང་དབྱར་རྙེད་དབང་བའི་ཕྱིར། འོ་ན་ཆོས་མིན་ཕྱོགས་པ་དང་གནས་དབྱུང་ནན་ཏུར་བྱས་པ་གཉིས་སྤངས་པར་མཚུངས་པས་ཆོས་མ་ཡིན་པ་ཉི་ཚེས་སྲ་བརྐྱང་བཏིང་ན། གཏིང་བའི་གོ་ཆོད་པ་བཞིན་དུ་གནས་དབྱུང་ནན་ཏུར་བྱས་པ་ཉི་ཚེས་སྲ་བརྐྱང་བཏིང་ན་ཡང་བཏིང་བའི་གོ་ཆོད་དམ་ཞེ་ན། རང་བཞིན་དུ་གནས་པས་སྤངས་པ་གནས་དབྱུང་ནན་ཏུར་བྱས་པ་ཉི་ཚེ་ལ་སྲ་བརྐྱང་གདིང་བར་མི་འགྱུར་ཏེ། གནས་དབྱུང་ནན་ཏུར་བྱས་པ་ཉི་ཚེས་ལས་བྱས་པས་ལས་མི་འཆགས་པའི་ཕྱིར། བསམ་པ་ཇི་ལྟ་བུས་སྲ་བརྐྱང་གདིང་བ་འགྲུབ་ཅེ་ན། སྲ་བརྐྱང་འདི་ལ་རྙེད་པ་དང་ཕན་ཡོན་འགྲུབ་སྙམ་པའི་བསམ་པ་གནས་པ་ནི་སྲ་བརྐྱང་བཏིང་བ་འཆགས་པ་ཡིན་ནོ། །གདིང་དབྱུང་ལྷན་ཅིག་ཏུ་བྱ་བ་ལ་འདུན་པ་ཕུལ་བའི་དབང་གི་ལྷག་མ་རྣམས་ཀྱིས་གདིང་དབྱུང་གི་བྱ་བ་བྱས་ན། འདུན་པ་ཕུལ་བ་དེས་ཀྱང་དེ་བྱས་པ་ཉིད་ཡིན་ནོ། །བསམ་པ་ཇི་ལྟ་བུ་ཡོད་ན་སྲ་བརྐྱང་ཕྱུང་བར་འགྱུར་སྙམ་ན། སྲ་བརྐྱང་འདི་ལ་རྙེད་པ་དང་ཕན་ཡོན་འགྲུབ་སྙམ་པའི་བསམ་པ་དང་བྲལ་བས་དེ་མི་འགྲུབ་སྙམ་ན་སྲ་བརྐྱང་ཕྱུང་བ་ཡིན་ནོ། །བསམ་པ་གནས་པ་ནི་བཏིང་བ་ཡིན་ལ། དེ་དང་བྲལ་བ་ནི་ཕྱུང་བ་ཡིན་པ་དེའི་ཕྱིར། གདིང་དབྱུང་ལ་འདུན་པ་མ་ཕུལ་བ་ནི་གྲལ་དུ་འདུག་ཏུ་ཟིན་ཀྱང་། གཉིད་ལོག་གམ། ཏིང་ངེ་འཛིན་ལ་སྙོམས་པར་ཞུགས་ན། གདིང་དབྱུང་གི་གཏམ་མ་ཐོས་ཀྱི་བར་དུ་སྲ་བརྐྱང་བཏིང་བ་དང་། ཕྱུང་བ་མི་འབྱུང་ངོ་། །བཏིང་བ་ལ་ནི་རྗེས་སུ་ཡི་རང་ཉམས་སུ་མྱོང་དགོས་པར་གོང་དུ་བསྟན་ཟིན་ཏོ། །གསུམ་པ་ནི། སྲ་བརྐྱང་བཏིང་བ་གཅིག་ལ་བཏིང་བའི་གནས་དེ་ཁོ་ན་ཉིད་དུ་གནས་པ་གཅིག་དགོས་སམ་ཞེ་ན། སྲ་བརྐྱང་གདིང་བའི་ཚེ་མཚམས་གཅིག་པ་ཉིད་ཡིན་ན། དབྱར་གྱི་དུས་དེར་གནས་གཞན་དུ་སྟེ་མཚམས་ཐ་དད་པར་གནས་པ་རྣམས་ཀྱང་སྲ་བརྐྱང་བཏིང་བའི་ཕྱིར་གནས་གཅིག་པ་ཉིད་ཡིན་ནོ། །སྲ་བརྐྱང་བཏིང་བའི་འོག་ཏུ་མཚམས་གཅིག་པ་ཉིད་ཡིན་ན། སྲ་བརྐྱང་གཏིང་བ་གནས་གཅིག་པ་གྲུབ་བམ་ཞེ་ན། གནས་གཞན་དུ་གནས་པ་རྣམས་ཀྱང་བཏིང་བའི་ཕྱིར། གནས་གཅིག་པ་ཡིན་པ་དེ་ནི་བཏིང་བའི་ཚེ་མཚམས་དེ་ན་གནས་པ་དེ་ཉིད་ཡིན་ནོ། །བཏིང་ནས་མཚམས་ཐ་དད་པར་སོང་ནས། སྲ་བརྐྱང་དེ་དང་པོ་བཏིང་བའི་གནས་དེ་ཁོ་ནར་འཇོག་དགོས་སམ་ཞེ་ན། སྲ་བརྐྱང་བཏིང་ཟིན་ནས་མཚམས་ཐ་དད་པར་བྱས་ན་མཚམས་དེའི་ནང་གི་གནས་གང་ཡང་རུང་བ་དེ་སྲ་བརྐྱང་གི་ལས་དེའི་གནས་ཡིན་པས་གང་འདོད་པ་གཅིག་ཏུ་གཞག་པར་བྱ་སྟེ། བཏིང་མཚམས་ལས་ཐ་དད་པར་ཕྱིན་པ་མེད་པའི་ཕྱིར། གདིང་བའི་མཚམས་གཅིག་ལ་བཏིང་ཟིན་ནས་མཚམས་ཐ་དད་པར་བྱས་ན་བཏིང་བའི་ཚེ་མཚམས་གཅིག་པས་དབྱུང་བ་ཡང་ལྷན་གཅིག་ཏུ་བྱའམ་ཞེ་ན། སྲ་བརྐྱང་བཏིང་ནས་མཚམས་ཐ་དད་པར་བྱས་པ་ཉིད་ཡིན་ན་གནས་སོ་སོར་སྲ་བརྐྱང་དེ་དབྱུང་ངོ་། །གནས་གཅིག་པ་ཉིད་ཡིན་ན་ལྷན་ཅིག་ཏུ་དབྱུང་ངམ་ཞེ་ན། བཏིང་ཟིན་པའི་འོག་ཏུ་དགེ་འདུན་ལས་དང་འཁོར་ལོ་བྱེ་བ་ཉིད་ན་གནས་གཅིག་ཀྱང་ཕྱོགས་སོ་སོར་དབྱུང་ངོ་། །འདི་ནི་གནས་གཅིག་པའི་གཞི་ལ་དོགས་པ་དཔྱད། བཏིང་ནས་ཕྱེ་བ་ཞེས་སོགས་ཀྱིས་ལྷན་ཅིག་ཏུ་བཏིང་བའི་གཞི་ལ་དོགས་པ་དཔྱད་པ་ཡིན་ནོ། །བཞི་པ་ནི། སྲ་བརྐྱང་མ་བཏིང་བས་སྲ་བརྐྱང་ཕྱུང་བ་ནི་སྲ་བརྐྱང་མ་ཕྱུང་བ་མ་ཡིན་ཏེ་ཕྱུང་བ་ཡིན་ནོ། །སྲ་བརྐྱང་དབྱུང་བའི་ཁ་སྐོང་དུ་འོས་པ་ལ་སྲ་བརྐྱང་གདིང་བ་འབྱུང་བ་གཅིག་དགོས་སམ་ཞེ་ན། སྲ་བརྐྱང་གདིང་བ་མི་འབྱུང་བ་ཉིད་ཀྱིས་སྲ་བརྐྱང་དབྱུང་བ་ཁ་སྐོང་དུ་མི་རུང་བ་ཉིད་མ་ཡིན་ནོ། །མ་བཏིང་བ་ཉིད་ཀྱིས་ཕྱུང་ན་ཕྱུང་བའི་གོ་ཆོད་མོད། དབྱུང་བར་མི་རུང་ངམ་ཞེ་ན། སྲ་བརྐྱང་མ་བཏིང་བ་ཉིད་ཀྱིས་སྲ་བརྐྱང་དབྱུང་བར་མི་རུང་བ་ཉིད་མིན་ཏེ་རུང་ངོ་། །སྲ་བརྐྱང་བཏིང་བའི་ཕན་ཡོན་སྔར་བཤད་པ་དེ་ཙམ་དུ་ཟད་དམ་ཞེ་ན། སྲ་བརྐྱང་བཏིང་ན་ནི་སྣམ་སྦྱར་མེད་པར་གྲོང་དུ་འཇུག་པ་དང་། ལ་སོགས་པ་གྲོང་ཆེར་དུ་འཇུག་པ་དང་། ལམ་གྱི་སུམ་མདོ་དང་། བཞི་མདོ་ལ་སོགས་པ་ཚུན་ཆད་དུ་འདུག་པ་ལ་ཡང་ཉེས་པ་མེད་དོ། །སྣམ་སྦྱར་དང་བྲལ་བའི་འབྲལ་སྤང་མི་འབྱུང་བར་གོང་དུ་བསྟན་ལ། འདིས་སྣམ་སྦྱར་ཁྱེར་བའི་དཀའ་ཚེགས་མེད་པར་བསྟན་ནོ། །སྟོད་གཡོགས་དང་སྨད་གཡོགས་མེད་པར་གྲོང་དུ་འགྲོར་རུང་ངམ་ཞེ་ན། སྟོད་ཀྱི་གོས་གཅིག་དང་སྨད་ཀྱི་གོས་གཅིག་མེད་པར་གྲོང་དུ་ཕྱིན་ན་རབ་ཏུ་བྱུང་བའི་རྟགས་ཉམས་པའི་ཉེས་པ་ཡོད་ལ་འབྲལ་བའི་ཉེས་པ་མེད་དོ། །དགེ་འདུན་ཐམས་ཅད་དབྱར་ཕྱི་མར་ཁས་བླངས་ན། དེ་ལ་སྲ་བརྐྱང་གདིང་བ་འབྱུང་བར་གསུངས་པ་སྒྲ་ཇི་བཞིན་དུ་ཁས་བླངས་ན་དབྱར་ཕྱི་མར་ཁས་བླངས་པ་དང་ཞེས་པ་ལ་དབྱར་སྔ་མ་ཁས་བླངས་པ་དང་ཞེས་དང་། དངོས་གཞིའི་དུས་ཀྱི་ཞེས་པ་ལ་དབྱར་ཕྱི་མའི་དུས་ཀྱི་ཞེས་པ་དང་། སྟོན་ཟླ་འབྲིང་པོ་ཞེས་པ་ལ་སྟོན་ཟླ་ཐ་ཆུང་ཞེས་པ་དང་། དཔྱིད་ཟླ་རྭ་བ་ཞེས་པ་ལ་དཔྱིད་ཟླ་འབྲིང་པོ་ཞེས་སྦྱར་རོ། །དགེ་སློང་མ་ལ་ཆོས་གོས་གསུམ་ཞེས་པའི་དོད་དུ་ཆོས་གོས་ལྔ་ཞེས་སྦྱར་རོ། །སྤྱི་དོན་རགས་པ་ཙམ་གྱིས་སྲ་བརྐྱང་གི །རྣམ་གཞག་བདེ་བླག་རྟོགས་པ་མེད་མཐོང་ནས། །གཞུང་དོན་ཞིབ་ཏུ་བཀོད་པའི་ལེགས་བཤད་འདི། །དོན་གཉེར་བློ་གསལ་ཚོགས་རྣམས་གུས་པས་ལོངས།། ༈ །།གཉིས་པ་གོས་ཀྱི་གཞི་ལ་བཅུ་སྟེ། གོས་སྒྲུབ་པའི་ཚུལ། དབྱེ་བ། སོ་སོའི་མཚན་ཉིད། བྱིན་རླབས་ཀྱི་ཆོ་ག བྱིན་རླབས་འཇིག་པའི་རྒྱུ། བཅང་བའི་བསམ་པ། ལོངས་སྤྱོད་པའི་གང་ཟག ལོངས་སྤྱོད་པའི་ཆོ་ག དགོས་པ། མཇུག་ཏུ་ཇི་ལྟར་བྱ་བའོ། །དང་པོ་ལ། དྲ་བ་དང་། དྲུབ་པ་དང་། ཁ་སྒྱུར་བའི་ཚུལ་རྣམས་གཞུང་བཞིན་དུ་ཤེས་པར་བྱའོ། །གཉིས་པ་དབྱེ་བ་ལ་འཚོ་བའི་ཡོ་བྱད། མཁོ་བའི་ཡོ་བྱད། ལྷག་པའི་ཡོ་བྱད་དང་གསུམ་མོ། །དང་པོ་ལ། འཚོ་བའི་ཡོ་བྱད་དངོས་དང་། ཡོ་བྱད་ཀྱི་གོས་གཉིས་ཀྱི། དང་པོ་ལ་བཅུ་གསུམ་སྟེ། སྣམ་སྦྱར། བླ་གོས། མཐང་གོས། ཤམ་ཐབས། ཤམ་ཐབས་ཀྱི་གཟན། རྔུལ་གཟན། རྔུལ་གཟན་གྱི་གཟན། གདོང་ཕྱིས། རྣག་གཟན། གཡན་པ་དགབ་པ། སྐྲ་བཟེད། གདིང་བ། དབྱར་གྱི་རས་ཆེན་ནོ། །གཉིས་པ་ཡོ་བྱད་ཀྱི་གོས་ནི་སྟན་ལ་སོགས་པའོ། །གསུམ་པ་སོ་སོའི་མཚན་ཉིད་ལ་གསུམ་ལས། དང་པོ་འཚོ་བའི་ཡོ་བྱད་ནི། རྒྱུ་རུང་བ་རྔ་བལ་ལ་སོགས་པ་ཧ་ཅང་རྒྱུ་ངན་པ་མ་ཡིན་པ། དཔག་བསམ་གྱི་ཤིང་ལས་བྱུང་བ་སོགས་ཧ་ཅང་རྒྱུ་བཟང་བ་མ་ཡིན་པ། སྲིན་བལ་དང་དར་སོགས་རྒྱུ་རུང་བ་བདུན་པོ་རྣམས་ལས་གྲུབ་པ། ཁ་དོག་ངུར་སྨྲིག་དང་སྔོན་པོ་དང་། ཙག་གིས་བསྒྱུར་བ། དབྱིབས་སྤུ་ཅན་དང་། ལུག་རུ་འཁྱིལ་བ་ལྟ་བུ་སོགས་མ་ཡིན་པ་མ་བཀག་ཅིང་གནང་བའོ། །ཚད་ལ་ཆོས་གོས་གསུམ་དང་ཤམ་ཐབས་ཀྱི་ཚད་འབྲལ་སྤང་གི་སྐབས་སུ་བཤད་ཟིན། ཤམ་ཐབས་ཀྱི་གཟན་ནི་ཤམ་ཐབས་དང་མཉམ་པ། གདོང་ཕྱིས་ཁྲུ་གང་པ། རྣག་གཟན་བླ་གོས་དང་མཉམ་པ། གཡན་པ་དགབ་པ་སྲིད་དུ་ཁྲུ་དྲུག་དང་ཞེང་དུ་ཁྲུ་གསུམ་མོ། །སྐྲ་བཟེད་ཞེང་དུ་ཁྲུ་ཕྱེད་དང་གཉིས་སྲིད་དུ་ཁྲུ་གསུམ་ཡིན་ནོ། །རྔུལ་གཟན་དང་རྔུལ་གཟན་གྱི་གཟན་བླ་གོས་དང་མཉམ་ལ། གདིང་བ་སྲིད་དུ་ཁྲུ་གསུམ་ཞེང་དུ་ཁྲུ་དོ་སོར་དྲུག རས་ཆེན་སྲིད་དུ་ཁྲུ་དགུ་ཞེང་དུ་ཁྲུ་གསུམ་དང་སོར་བཅོ་བརྒྱད་དོ། །འཚོ་བའི་ཡོ་བྱད་ནི་རེ་རེ་གནང་གི་གཉིས་མ་གནང་ཞིང་། སོ་སོ་རང་མིང་གིས་བྱིན་གྱིས་རླབས་དགོས་པའོ། །གཉིས་པ་མཁོ་བའི་ཡོ་བྱད་ནི། ཚད་ཁྲུ་གང་ཡན་ཆད་ཡིན་པ་དང་། ཡ་མཐའ་མ་ངེས་པ་དང་རང་གཞན་ཐུན་མོང་གི་མིང་གིས་བྱིན་གྱིས་རླབས་དགོས་པའོ། །གསུམ་པ་ལྷག་པའི་ཡོ་བྱད་ནི། བྱིན་གྱིས་རླབས་བྱ་གཉིས་ལས། ལྷག་པ་གཞན་ཁོ་ནའི་མིང་གིས་བྱིན་གྱིས་རླབས་དགོས་པའམ། གཞན་ལ་ཡིད་གཏད་དེ་བཅང་བར་བྱ་བའོ། །བཞི་པ་བྱིན་གྱིས་རླབས་པའི་ཆོ་ག་ལ་གསུམ་ལས་དང་པོ་འཚོ་བའི་ཡོ་བྱད་བྱིན་གྱིས་བརླབ་པ་ནི། དགེ་སློང་ཆོས་ལྔ་ལྡན་གྱི་མདུན་དུ་ལྷྭམ་ཕུད་བསླབ་པ་རྒན་ན་ཕྱག་བྱས་ལ་འགྲེང་སྟེ་གཉིས་ཀའི་ལག་པས་སྣམ་སྦྱར་བཟུང་སྟེ། བཙུན་པ་དགོངས་སུ་གསོལ། བདག་དགེ་སློང་མིང་འདི་ཞེས་བགྱི་བའི་ཆོས་གོས་བགྱིས་ལགས་པ་རུང་བ་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ཞེས་ལན་གསུམ་དང་ཐབས་ལེགས་བྱའོ། །རྐྱེན་དབང་གིས་བྱིན་གྱིས་བརླབ་ན། དགོངས་གསོལ་འདྲ། བདག་དགེ་སློང་མིང་འདི་ཞེས་བགྱི་བའི་ཆོས་གོས་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །ཞེས་པ་ལན་གསུམ་དང་ཐབས་ལེགས་བྱའོ། །བླ་གོས་སོགས་འཚོ་བའི་ཡོ་བྱད་གཞན་རྣམས་ཀྱང་བྱིན་རླབས་དེ་གཉིས་ཀ་ལ་སྣམ་སྦྱར་ཞེས་པའི་ཐད་དུ་བླ་གོས་སོགས་འདོན་པ་བསྒྱུར་རོ། །རྒྱུའི་བྱིན་རླབས་བྱེད་ན། གཉིས་ཀས་སྣམ་སྦྱར་གྱི་རྒྱུ་བཟུང་སྟེ་དགོངས་གསོལ་སྔར་བཞིན། བདག་དགེ་སློང་མིང་འདི་ཞེས་བགྱི་བའི་གོས་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་བོ། །འཚལ་ན་སྣམ་ཕྲན་དགུ་པ་ལ་སོགས་པར་བགྱིས་ཏེ། གླེགས་བུ་ཕྱེད་དང་གསུམ་པ་ལ་སོགས་པར་བགྱིའོ། །བར་ཆད་མ་བྱུང་ན་བཀྲུའོ། །བསྐྱང་ངོ་། །དྲའོ། །བརྡེབ་བོ། །ཟུང་གདབ་བོ། །དྲུབ་བོ། །ཁ་བསྒྱུར་རོ། །ཡང་ན་འདི་ལ་ལྷན་ཐབས་སུ་གླན་ནོ། །རྐྱེན་ཇི་ལྟ་བ་བཞིན་དུ་བགྱིས་སྟེ། ཆོས་གོས་འདི་ནི་རུང་བ་སྤྱད་པར་འོས་པའོ། །ཞེས་ལན་གསུམ་འདས་ཐབས་ལེགས་བྱའོ། །ཆོས་གོས་གཞན་གཉིས་ཀྱི་རྒྱུའི་བྱིན་བརླབས་བྱེད་ན། བླ་གོས་ལ་སྣམ་ཕྲན་བདུན་པ་གླེགས་བུ་ཕྱེད་དང་གསུམ་པ་ཞེས། མཐང་གོས་ལ་སྣམ་ཕྲན་ལྔ་པ་གླེགས་བུ་ཕྱེད་དང་གཉིས་པ་ལ་སོགས་པ་ཞེས་སྦྱར་གཞན་རྣམས་སྣམ་སྦྱར་དང་འདྲའོ། །ཡོ་བྱད་ཀྱི་གོས་སྟན་ལ་སོགས་པ་བྱིན་གྱིས་བརླབ་ན་དགོངས་གསོལ་སྔར་བཞིན། བདག་མིང་འདི་ཞེས་བགྱི་བའི་ཡོ་བྱད་ཀྱི་གོས་འདི་སྟན་དུ་བྱིན་གྱིས་བརླབ་བོ། །ཞེས་བརྗོད། སྐ་རགས་སོགས་ལ་འདོན་པ་བསྒྱུར་རོ། །ཡང་ན་སྦྱིན་བདག་སོགས་ལ་ཡིད་གཏད་དེ་བཅང་བར་བྱའོ། །གཉིས་པ་མཁོ་བའི་ཡོ་བྱད་བྱིན་གྱིས་བརླབ་པ་ནི། དགོངས་གསོལ་སྔར་བཞིན། གོས་འདི་བདག་དང་ཚངས་པ་མཚུངས་པར་སྤྱོད་པའི་མཁོ་བའི་ཡོ་བྱད་ཀྱི་གོས་སུ་བྱིན་གྱིས་བརླབ་བོ། །ཞེས་པ་གསུམ་དང་ཐབས་ལེགས་བྱའོ། །གསུམ་པ་ལྷག་པའི་ཡོ་བྱད་བྱིན་གྱིས་བརླབ་པ་ནི། ཆོས་གོས་ལྷག་པོ་ཡོད་ན། བདག་མིང་འདི་ཞེས་བགྱི་བའི་གོས་ལྷག་པ་རུང་བ་བགྱིད་པ། རུང་བ་བགྱིད་པར་འོས་པ་འདི་མཁན་པོའི་ལགས་པར་རུང་བར་བགྱིའོ། །ཞེས་སོགས་བྱའོ། །ཡང་ན་དགེ་སློང་ཆོས་གསུམ་ལྡན་ལ་ཡིད་བརྟེན་པར་བྱའོ། །ལྔ་པ་བྱིན་བརླབས་འཇིག་པའི་རྒྱུ་ནི། དགེ་སློང་ལས་ཉམས་པ་དང་། སྤངས་པ་དང་། བསྔོས་པ་དང་། ཕྲོགས་པ་དང་། བརླག་པ་དང་། ཕྱུང་བ་དང་། ཡིད་བརྟེན་པ་ནི་ཤི་བ་ལ་ཤི་བར་ཤེས་པས་འཇིག་གོ །དྲུག་པ་བཅང་བའི་བསམ་པ་ནི། སྣམ་སྦྱར་ནི་མུ་སྟེགས་དང་བསྙེན་པར་མ་རྫོགས་པ་ལས་ཁྱད་པར་དུ་བྱ་བའི་ཕྱིར་བཅང་བསམ་པ་དང་། བླ་གོས་མཐང་གོས་ནི་སྟོད་སྨད་གཅེར་བ་སྤངས་སྙམ་པའི་བསམ་པ་དང་། ཡོ་བྱད་ཐམས་ཅད་མི་རྟག་པས་ཉེན་པའི་བསམ་པས་བཅང་བར་བྱའོ། །མཁོ་བའི་ཡོ་བྱད་ནི་དཀོན་མཆོག་མཆོད་པའམ། ཆོས་ཕྱིར་དུ་ལུས་གསོ་བའི་དོན་དུ་བཅང་སྙམ་པ་དང་། ལྷག་པའི་ཡོ་བྱད་ནི། གོས་གཉིས་པ་ལྟ་བུ་མཁན་པོ་སོགས་གཞན་གྱི་ཡིན་སྙམ་པའི་བསམས་པས་བཅང་ངོ་། །ཁྲུ་གང་དུ་མ་ལོངས་པའི་ཕྲན་ཚེགས་ཐམས་ཅད་ལ་སེམས་ཀྱིས་བརྟག་པར་བྱའོ། །བདུན་པ་ལོངས་སྤྱོད་པའི་གང་ཟག་ནི་སྤྱིར་རབ་ཏུ་བྱུང་བ་ཚུལ་ཁྲིམས་དང་ལྡན་པས་བཅང་ཞིང་། ཁྱད་པར་སྣམ་སྦྱར་ནི་དགེ་སློང་གིས་བཅང་བར་བྱའོ། །བརྒྱད་པ་ལོངས་སྤྱོད་པའི་ཆོ་ག་ནི། ཆུད་ཟ་བ་དང་། མ་གུས་པ་དང་། སྟོད་གཡོགས་སྨད་དུ་བགོ་བ་ལ་སོགས་པ་དང་། རྟགས་གཞན་དུ་བསྒྱུར་བ་ལ་སོགས་པ་སྤང་སྟེ་བཅང་བར་བྱའོ། །དགུ་པ་བྱིན་གྱིས་བརླབ་པའི་དགོས་པ་ནི། དངོས་སུ་གོས་ལྷག་པོ་བཅང་བའི་ལྟུང་བ་མི་འབྱུང་ཞིང་། བརྒྱུད་ནས་མངོན་ཞེན་དང་འབྲལ་བའི་ཕན་ཡོན་འབྱུང་བའོ། །བཅུ་པ་མཇུག་ཏུ་ཇི་ལྟར་གྲུབ་པ་ནི། རྙིངས་ཤིང་ཟད་ན་ལྷན་པས་གླན་པ་དང་། ཟུང་གདབ་པ་དང་རལ་ན་བཙེམས་པ་ལ་སོགས་པས་བཅོས་པར་བྱ་ཞིང་། བཅོས་སུ་མི་རུང་བར་གྱུར་ན་སྦྱིན་བདག་གིས་བསོད་ནམས་སྤེལ་བ་ལ་སོགས་པའི་ཆེད་དུ་ས་དང་ལྕི་བ་ལ་སོགས་པ་དང་བསྲེ་ནས་གཙུག་ལག་ཁང་ངམ་མཆོད་རྟེན་གྱི་སེར་ཁ་ལ་གླན་པ་སོགས་བྱའོ།། ༈ །།གསུམ་པ་ཀོ་ལྤགས་ཀྱི་གཞི་ལ་གཉིས་ཏེ། ཡུལ་དབུས་དང་མཐའ་འཁོབ་ཀྱི་བྱེ་བྲག་བསྟན་པ། མཐའ་འཁོབ་ཏུ་ཀོ་ལྤགས་བསྟན་པའི་ཚུལ་ལོ། །དང་པོ་ནི། མདོར་ཤར་དུ་ལི་ཁ་ར་ཤིང་འཕེལ་གྱི་མདུན་གྱི་ནགས་ལི་ཁ་རའི་ཤིང་ཚང་ཚིང་ཅན་ཞེས་བྱ་བའོ། །ལྷོར་ནི་འདམ་བུ་ཅན་གྱི་ལྷོ་ན་ཆུ་ཀླུང་དེ་ཞེས་བྱ་བའོ། །ནུབ་ཏུ་ནི་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་གཉིས་སོ། །བྱང་དུ་ནི་ཨུ་ཤི་རའི་རི་ཞེས་བྱའོ་ཞེས་གསུང་སྟེ། དེ་དག་གི་ཡུལ་དབུས་མ་ག་དྷ་ལ་ལྟོས་པའི་ནང་གི་ཕྱོགས་ཀྱི་ཆ་རྣམས་ནི་ཡུལ་དབུས་ཡིན་ལ། དེ་དག་གི་ཕྱི་རོལ་གྱི་དོན་ཕྱོགས་ཆ་ཕན་ཆད་ནི་མཐའ་འཁོབ་ཡིན་ནོ། །གཉིས་པ་ནི་ཡུལ་མཐའ་འཁོབ་ཏུ་མཆིལ་ལྷྭམ་དང་ཀོ་ལྤགས་བསྟན་དུ་རུང་ཞིང་དེའི་ཁྱད་པར་ནི་ཁ་དོག་ཁྲ་བོ་དང་། དབྱིབས་གསེར་སོགས་ཀྱིས་སྤྲས་པ་དང་། སྒྲ་ཀྲོག་ཀྲོག་ཟེར་བ་སོགས་ཀྱི་མཆིལ་ལྷྭམ་མི་རུང་ཞིང་། གླང་པོ་ཆེ་དང་རྟ་བོང་སོགས་ཀྱི་ཀོ་ལྤགས་མི་རུང་ལ་ཆུ་ལ་ཆབ་རོམ་ཆགས་པའི་ཡུལ་དུ་ནི་ཞྭ་དང་ལྷྭམ་སྒྲོག་གུ་ཅན་ཡང་གནང་བ་ཡིན་ནོ།། །།གཉིས་པ་བདེ་བར་གནས་པའི་རྐྱེན་སྨན་བསྟེན་པའི་གཞི་ལ་གཉིས་ཏེ། སྤྱིའི་དོན་དང་། གཞུང་དོན་ལ་དོགས་པ་གཅོད་པའོ། །དང་པོ་ལ། དགོས་དོན་དང་བསྡུས་དོན་གཉིས་ལས། དང་པོ་ནི། སྨན་བསྟེན་པ་ལ་དགོས་པ་ཡོད་དེ། ཚེ་རིང་ཞིང་དགེ་བའི་བྱ་བ་ཡུན་རིང་དུ་འཕེལ་བར་འགྱུར་བའི་ཕྱིར་ཏེ། དེ་ལས་ནད་ཞི་ཞིང་བདེ་བར་འཚོ་བར་འགྱུར་བའི་ཕྱིར། གཞན་ཡང་སྦྱིན་པ་པོའི་བསོད་ནམས་མངོན་པར་སྤེལ་བ་དང་། སངས་རྒྱས་ཀྱི་བཅས་པ་བསྲུང་བའི་དགོས་པ་ཡང་ཡོད་དོ། །གཉིས་པ་ལ་དྲུག་སྟེ། རྒྱུ། དབྱེ་བ། མཚན་ཉིད། བྱིན་གྱིས་བརླབ་པའི་ཚུལ། བཙོ་ཞིང་གཞག་པའི་གནས་རུང་བའི་ཁང་པར་བློ་མཐུན་བྱ་བ། ལོངས་སྤྱོད་པའི་ཚུལ་ལོ། །དང་པོ་ནི། ལོག་འཚོ་དང་བྲལ་ཞིང་ཡང་དག་པའི་འཚོ་བ་དང་ལྡན་པའི་གཞི་ལས་སྨན་དེ་སྒྲུབ་པར་བྱའོ། །གཉིས་པ་ནི། སྨན་ལ་མཚན་ཉིད་ཐ་དད་པའི་སྒོ་ནས་དབྱེ་ན། དུས་རུང་། ཐུན་ཚོད་དུ་རུང་བ། ཞག་བདུན་པ། འཚོ་བཅང་གི་སྨན་དང་བཞི། བཞི་པོ་དེར་གྲངས་ངེས་པའི་རྒྱུ་མཚན་ནི། བཅོམ་ལྡན་འདས་ཀྱི་སྨན་བཞིར་གསུངས་ཀྱི། དེ་ལས་གཞན་མ་གསུངས་པའི་ཕྱིར་དང་། དེར་མ་འདུས་པའི་སྨན་ཡང་མེད་པའི་ཕྱིར་རོ། །གསུམ་པ་ལ་གཉིས་ཏེ། སྤྱིའི་མཚན་ཉིད་དང་། སོ་སོའི་མཚན་ཉིད་དོ། །དང་པོ་ནི། དྲི་རོ་རེག་བྱའི་སྐྱེ་མཆེད་གསུམ་འདུས་ཀྱི་ཟས་དེ་སྨན་གྱི་མཚན་ཉིད། གཉིས་པ་ལ་སྨན་གང་ཞིག་བཀྲེས་པའི་ནད་སེལ་བ་ལ་གཙོ་བོར་གྱུར་པ་དེ་དང་པོའི་མཚན་ཉིད། དེ་གང་ཞིག་སྐོམ་པའི་ནད་སེལ་བ་ལ་གཙོ་བོར་གྱུར་པ་བཏུང་བ་ཆོས་གསུམ་ལྡན་དེ་གཉིས་པའི་མཚན་ཉིད། ཆོས་གསུམ་ནི། རྒྱུ་སྨན་གསུམ་པོ་གང་རུང་ལས་སྦྱར་བ། ངོ་བོ་བཏུང་བ་ཡིན་པ། ཤིན་ཏུ་སླ་བའོ། །དེ་གང་ཞིག་བཀྲེས་འདུས་གཉིས་ཀའི་ནད་སེལ་བ་ལ་གཙོ་བོར་གྱུར་པ་དེ་གསུམ་པའི་མཚན་ཉིད། དེ་གང་ཞིག་འདུས་པའི་ནད་སེལ་བ་ལ་གཙོ་བོར་གྱུར་པ་དེ་བཞི་པའི་མཚན་ཉིད་དོ། །བཞི་པ་བྱིན་གྱིས་བརླབ་པའི་ཚུལ་ལ་གཉིས་ཏེ། དགོས་དོན་དང་། བསྡུས་དོན་ནོ། །དང་པོ་ནི། སྨན་བྱིན་གྱིས་བརླབ་པ་ལ་དགོས་པ་ཡོད་དེ། བདེ་བ་ལ་རེག་པར་གནས་པ་དང་། གསོག་འཇོག་མི་འབྱུང་བ་དང་། བཅས་པའི་མཚམས་ཟིན་པའི་དགོས་པ་ཡོད་པའི་ཕྱིར། དང་པོ་གྲུབ་སྟེ། སྨན་བྱིན་གྱིས་བརླབས་ནས་བཅང་པ་ཡང་ནས་ཡང་དུ་བྱིན་ལེན་མི་དགོས་པ་སོགས་ཀྱི་དགོས་པ་ཡོད་པའི་ཕྱིར། གཉིས་པ་གྲུབ་སྟེ། བྱིན་གྱིས་རླབས་པ་ལ་གསོག་འཇོག་མི་འབྱུང་ངོ་ཞེས་གསུངས་པའི་ཕྱིར། གསུམ་པ་གྲུབ་སྟེ། བྱིན་གྱིས་བརླབས་པས་འདི་ཚུན་ཆད་དུ་ལོངས་སྤྱོད་དུ་རུང་ལ། དེ་ཕན་ཆད་དུ་ལོངས་སྤྱོད་དུ་མི་རུང་ངོ་ཞེས་མཚམས་ཟིན་པར་འགྱུར་བའི་ཕྱིར། གཉིས་པ་བསྡུས་དོན་ལ་བདུན་ཏེ། ཡུལ་གང་གི་དྲུང་དུ། དངོས་པོ་གང་། རྟེན་གང་གིས། དུས་ནམ་གྱི་ཚེ། ཡུན་ཇི་སྲིད། ཆོ་ག་གང་གིས་རློབ། བྱིན་རླབས་ཀྱི་འཇིག་རྒྱུའོ། །དང་པོ་ནི། བསྙེན་པར་རྫོགས་པའི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་པར་གནས་པ། ས་རང་བཞིན་དུ་གནས་པ། མཚམས་ཀྱི་ནང་ན་གནས་པ་སྟེ། ཆོས་བདུན་ལྡན་གྱི་དྲུང་དུ་བྱིན་གྱིས་བརླབ་བོ། །གཉིས་པ་ནི། དུས་རུང་ལས་གཞན་ཡིན་པ། རུང་བ་ཡིན་པ། ཚད་དང་ལྡན་པ། རང་གི་ཡིན་པ། བྱིན་ལེན་བྱས་ནས་ཆགས་པ། སྔར་བྱིན་གྱིས་བརླབས་པ་དང་མ་འབྲེལ་བ། ཆོ་ག་རྫོགས་པ་དེ་བྱིན་གྱིས་བརླབ་བོ། །དང་པོ་དགོས་ཏེ། ཕྱི་དྲོ་ལོངས་སྤྱོད་ཕྱིར་དུ་བྱིན་གྱིས་རློབ་པ་ཡིན་ལ། དུས་རུང་ཕྱི་དྲོར་ལོངས་སྤྱད་དུ་མི་རུང་བའི་ཕྱིར། གཉིས་པ་དགོས་ཏེ། ལོངས་སྤྱོད་དུ་མི་རུང་བ་ལ། བྱིན་རླབས་མི་ཆགས་པའི་ཕྱིར། གསུམ་པ་དགོས་ཏེ། ཤིན་ཏུ་ཆུང་བ་ལ་སྨན་གྱི་མངོན་ཞེན་མི་རྫོགས་པའི་ཕྱིར། བཞི་པ་དགོས་ཏེ། གཞན་གྱི་ཟས་རང་གིས་བྱིན་གྱིས་བརླབ་པ་དོན་མེད་པའི་ཕྱིར། ལྔ་པ་དགོས་ཏེ། བྱིན་རླབས་ཀྱི་རྟེན་མེད་པར་བྱིན་རླབས་མི་ཆགས་པའི་ཕྱིར། དྲུག་པ་དགོས་ཏེ། བྱིན་གྱིས་བརླབས་ཟིན་པ་ལ་བྱིན་གྱིས་བརླབ་པ་གཉིས་པ་མི་ཆགས་པའི་ཕྱིར། བདུན་པ་ཆོ་ག་རྫོགས་པ་ལ། སྤྱིར་ཆོ་ག་རུང་ཆུ་བཏབ་པ་དགོས་ཏེ། རུང་ཆུ་མ་བཏབ་པ་ཕྱི་དྲོ་ལོངས་སྤྱད་དུ་མི་རུང་བའི་ཕྱིར། བཏུང་བ་རྣམས་ཚགས་ཀྱིས་བཙགས་པ་དགོས་ཏེ། མ་བཙགས་ན་དུས་རུང་སོགས་དང་འདྲེས་པར་འགྱུར་བའི་དགག་བྱ་ཡོད་པའི་ཕྱིར། གསུམ་པ་རྟེན་གང་གིས་རློབ་ན། བསྙེན་རྫོགས་དང་དགེ་སློབ་མའི་སྡོམ་པ་གསོ་རུང་མན་ཆད་དང་ལྡན་པ། ལྟ་བ་མཐུན་པ། མཚན་མཐུན་པ་དེས་བརླབ་བོ། །ཁ་ཅིག་གནས་དབྱུང་མ་བྱས་པ་དགོས་ཟེར་བ་མི་འཐད་དེ། གནས་དབྱུང་ནད་པ་དགེ་སློང་རྣམས་ཀྱིས་བསྐྱང་དགོས་པར་གསུངས་པའི་ཕྱིར། ཁ་ཅིག་ནད་པ་ཡིན་པ་དགོས་ཏེ། དང་པོ་མ་ཡིན་པ་དག་ནི་ནད་པའི་ཕྱིར་རོ། །ཞེས་དང་། ནད་པའི་ཆེད་དུ་ཡོངས་སུ་ལོངས་སྤྱོད་པའི་ཕྱིར་ཞེས་གསུངས་པའི་ཕྱིར། ཞེས་དང་། ཁ་ཅིག་ཐུན་ཚོད་དུ་རུང་བ་དང་འཚོ་བཅང་གཉིས་ནད་པ་ཁོ་ནས་བྱིན་གྱིས་རློབ་ལ། ཞག་བདུན་པ་ནི་གང་ཟག་ལྔ་ཆར་གྱིས་བྱིན་གྱིས་རློབ་ཏུ་རུང་སྟེ། ཁྱིམ་བདག་ལུག་སྐྱེས་ཀྱི་གཏམ་རྒྱུད་ལས་ལམ་ཞུགས་ཀྱི་དབང་དུ་བྱས་ཏེ། བུ་རམ་ཞག་བདུན་པར་བྱིན་གྱིས་རླབས་ཏེ་བསྐུར་བར་བྱའོ། །ཞེས་གསུངས་པའི་ཕྱིར་ཞེས་ཟེར། དེ་ལ་གཞན་དག་ན་རེ། དེ་ནི་བུ་རམ་ཞག་བདུན་པར་བྱིན་ལེན་བྱས་ཏེ་བསྐུར་ཞེས་པའི་དོན་ཡིན་པས་བྱིན་ལེན་ལ་བྱིན་རླབས་ཀྱི་སྒྲས་བསྟན་པ་ཡིན་ཏེ། དཔེར་ན་ལྷུང་བཟེད་བྱིན་གྱིས་བརླབས་ཏེ་ལག་པ་དག་མཉལ་དུ་བཅུག་ནས་ཞེས་ཟེར་རོ། །དེའི་དོན་མི་འཐད་དེ། ལུག་སྐྱེས་ཀྱི་གཏམ་རྒྱུད་དུ་བྱིན་གྱིས་རློབ་པའི་ཆོ་ག་ཡང་གསུངས་པའི་ཕྱིར། དཔེ་ཡང་མི་འཐད་དེ། དེ་ལྟར་ན་གཞུང་སྔ་ཕྱིར་འབྲེལ་མེད་དུ་འགྱུར་བའི་ཕྱིར་རོ། །དེས་ན་མིན་པས་ཞག་བདུན་པའི་སྨན་བྱིན་གྱིས་རློབ་ཏུ་རུང་སྟེ། ཞག་བདུན་པའི་ལག་རྒྱགས་འབའ་ཞིག་ལ་བརྟེན་ནས་ཞག་དུ་མར་བགྲོད་པའི་དགེ་སློང་ལྟུང་མེད་སྒྲུབ་པའི་ཐབས་ཡོད་པའི་ཕྱིར། བཞི་པ་དུས་ནམ་གྱི་ཚེ་བརླབ་པ་ནི་སྔ་དྲོ་བརླབ་སྟེ། ཟས་སྔ་མའི་ཚེ་ཞེས་གསུངས་པའི་ཕྱིར། ལྔ་པ་ཡུན་ཇི་སྲིད་དུ་བྱིན་གྱིས་བརླབ་པ་ལ། ཐུན་ཚོད་དུ་རུང་བ་ནི་མཚན་མོའི་མཐུན་དང་པོ་ཚུན་ཆད་དང་། ཞག་བདུན་པ་ནི་ཞག་བདུན་གྱི་མཐའ་ཚུན་ཆད་དུ་བྱིན་གྱིས་བརླབ་ཅིང་། འཚོ་བཅང་ནི་ཇི་སྲིད་མཚོའི་བར་དུ་བྱིན་གྱིས་བརླབ་བོ། །དེ་ཡང་ཞག་བདུན་ཞེས་པ་ཞག་བདུན་པའི་སྨན་གྱི་རིང་མཐའ་གཟུང་བ་ཡིན་གྱིས། ལྔ་པའམ་དྲུག་པར་བྱིན་གྱིས་བརླབ་ཏུ་མི་རུང་བ་ནི་མ་ཡིན་ཏེ། ཊཱི་ཀར་བུ་རམ་དེ་ཞག་བདུན་པ་ལ་སོགས་པར་བྱིན་གྱིས་བརླབས་ཏེ་ཞེས་གསུངས་པའི་ཕྱིར། དེས་མཚོན་ནས་འཚོ་བཅང་གི་སྨན་དེ་ཟླ་བ་ཕྱེད་ལ་སོགས་པར་བྱིན་གྱིས་བརླབ་ཏུ་རུང་ངམ་སྙམ་སྟེ་ཤེས་ལྡན་རྣམས་ཀྱིས་དཔྱད་པར་བྱའོ། །ཁ་ཅིག་འཚོ་བཅང་ཞེས་པ་ནད་ཇི་སྲིད་འཚོ་བར་ཡིན་གྱི། ཇི་སྲིད་འཚོའི་བར་དུ་མ་ཡིན་ཞེས་པ་མི་འཐད་དེ། དེ་ལ་ཤེས་བྱེད་མེད་པའི་ཕྱིར་དང་། སུམ་བརྒྱ་པ་ལས། དེ་དག་མ་ཤི་བར་བཅང་སྨན་དུ་གསུངས། །ཞེས་དང་། འགྲེལ་ཆུང་ལས། ཚེ་གཅིག་པའི་སྔགས་ཀྱིས་བརྟགས་ཏེ་ཞེས་གསུངས་པའི་ཕྱིར། དྲུག་པ་བྱིན་གྱིས་རླབས་ཀྱི་ཆོ་ག་ལ། སྦྱོར་དངོས་རྗེས་གསུམ་ལས། དང་པོ་ནི། མཆིལ་ལྷྭམ་ཕུད། བསླབས་པ་རྒན་ན་ཕྱག་བྱ། ཐུགས་གཏད་པར་ཞུ་ཞེས་གསོལ་ནས་འགྲེང་བའི་སྤྱོད་ལམ་བསྟན་ནོ། །དངོས་གཞིའི་སྐབས་སུ་སྔགས་ཚིག་ལན་གསུམ་བརྗོད། མཇུག་ཏུ་ཐབས་ལེགས་བྱའོ། །བདུན་པ་བྱིན་བརླབས་ཀྱི་འཇིག་རྒྱུ་ནི། བྱིན་ལེན་གྱི་འཇིག་རྒྱུ་ཐམས་ཅད་ཀྱིས་འཇིག་ལ་ལག་ཉ་སོགས་མི་རུང་བ་དང་འདྲེས་པ་དང་། རོ་སླ་གྱུར་པ་དང་དུས་ཀྱི་འཕན་པ་ཟད་པས་ཀྱང་འཇིག་གོ །ལྔ་པ་རུང་ཁང་གཅོད་ཚུལ་ལ་གཉིས་ཏེ། དགོས་དོན་དང་། བསྡུས་དོན་ནོ། །དང་པོ་ལ་དེ་ལ་དགོས་པ་ཡོད་དེ། ཞག་ལོན་དང་མཚམས་བཅོས་མི་འབྱུང་བའི་དགོས་པ་ཡོད་པའི་ཕྱིར། གཉིས་པ་ལ་བདུན་ཏེ། གནས་གང་དུ། རྟེན་གང་གིས། དུས་ནམ་གྱི་ཚེ། ཆོ་ག་གང་གིས་གཅད། རུང་ཁང་གི་བྱེད་ལས། སྒྲ་བཤད། འཇིག་རྒྱུའོ། །དང་པོ་ལ་ཁ་ཅིག་རང་བཞིན་གྱི་མཚམས་ཡིན་པ་གཅིག་དགོས་ཏེ། ཊཱི་ཀར་མཚམས་ཞེས་པ་གནས་ཀྱི་གཞི་བརྗོད་དེ། གསོལ་བ་ལ་སོགས་པ་ལས་ཀྱིས་གཅད་པ་ཉི་ཚེ་མི་གཟུང་ཞེས་གསུངས་པའི་ཕྱིར། རིགས་པས་ཀྱང་གྲུབ་ཏེ། གལ་ཏེ་དཀོན་མཆོག་ལ་མ་གུས་པ་འགོག་པ་ཡིན་པས། དཀོན་མཆོག་གི་ཕོ་བྲང་ཡོད་པའི་གནས་སུ་རུང་ཁང་མ་བཅད་པ་ལ་ཉེས་པ་ཡོད་ཀྱི། ལས་མཚམས་ཙམ་དུ་རུང་ཁང་མ་བཅད་པ་ལ་ཉེས་པ་མེད་པའི་ཕྱིར་ཟེར་རོ། །རུང་ཁང་དེ་རང་བཞིན་གྱིས་མཚམས་ཡིན་པ་ཁོ་ནར་གཅོད་དགོས་པ་མི་འཐད་དེ། བམ་ལྔ་ལས་མཚམས་ཀྱི་ནང་དུ་བཙོས་པ་དང་། མཚམས་ཀྱི་ནང་དུ་ཞག་ལོན་པ་ཞེས་དེ་གཉིས་ཀའི་སྐབས་སུ་མཚམས་སྨོས་པ་སྤྱིར་འདྲ་སྟེ། ཀུན་དགའ་རྭ་བའི་ནང་དུ་དགེ་འདུན་གྱི་མཚམས་གསོལ་བ་ལ་སོགས་པའི་ལས་ཀྱིས་བཅད་པ་དང་། རྩིག་པ་ལ་སོགས་པའི་རང་མཚམས་དང་། དགེ་སློང་གི་གནས་དང་། དེ་དག་གི་གནས་ཉེ་འཁོར་དང་བཅས་པ་སྟེ། ཇི་སྐད་དུ། ཆོས་གོས་མཚམས་བསྟན་པ་དེ་དག་ལས་རུང་བའི་ཁང་པ་དང་། རུང་བའི་ས་གཞིར་མ་བྱས་པ་གང་ཡང་རུང་བ་དེ་དག་ཐམས་ཅད་སྤྱིར་གཟུང་ངོ་ཞེས་གསུངས་པའི་ཕྱིར། དེས་ན་ཉི་ཚེ་མི་བཟུང་ཞེས་པས་ལས་མཚམས་དང་རང་བཞིན་གྱི་གནས་གཉིས་ཀར་རུང་ཁང་གཅོད་པར་གྲུབ་ཅིང་། རུང་ཁང་གཅོད་པའི་གནས་ལ་སྟེང་གཡོག་དང་བཅས་པ་དགོས་ཏེ། བླ་གབ་མེད་པར་རུང་ཁང་གཅད་པ་བཀག་པའི་ཕྱིར། རང་ངམ་རང་དང་འདྲ་བའི་གང་ཟག་གི་གནས་སྐབས་དབང་བྱར་ཡོད་པར་དགོས་ཏེ། མུ་སྟེགས་ཅན་གྱི་གནས་དང་། དགེ་སློང་མའི་གནས་སུ་རུང་ཁང་གཅོད་པ་བཀག་པའི་ཕྱིར། དགེ་ཚུལ་འབྱུང་འཇུག་བྱར་ཡོད་པའི་དགེ་ཚུལ་དབང་བའི་གནས་སུ་རུང་ཁང་གཅད་དུ་མི་རུང་སྟེ། ཊཱི་ཀར་དགེ་ཚུལ་གྱི་གང་ཟག་གམ་དགེ་ཚུལ་གྱི་ཚོགས་སྤྱིར་དབང་བའི་གནས་ནི་དགེ་སློང་གི་གནས་མ་ཡིན་ནོ་ཞེས་གསུངས་པའི་ཕྱིར། ཁྱིམ་པའི་གྲོང་ན་དགེ་འདུན་དབང་བའི་མཛོད་ཡོད་པར་ཡང་རུང་ཁང་གཅོད་དུ་མི་རུང་སྟེ། ཁྱིམ་བདག་གི་གཞིར་ཡང་ཞེས་གསུངས་པའི་ཕྱིར། བཙོག་པོ་མ་ཡིན་པ་དགོས་ཏེ། ཤིང་དྲུང་དང་། གླང་པོ་ཆེའི་རྭ་བར་རུང་ཁང་གཅོད་པ་བཀག་པའི་ཕྱིར་རོ། །ཀུན་ལ་མཁོ་བའི་གནས་མ་ཡིན་པ་དགོས་ཏེ། བང་རིམ་དང་སྒོ་ཁང་དུ་དེ་གཅོད་པ་བཀག་པའི་ཕྱིར། དཀོན་མཆོག་གི་གནས་དང་མཆོད་རྟེན་གྱི་གཞི་མ་ཡིན་པ་དགོས་ཏེ། དེ་གཉིས་དགེ་འདུན་གྱི་གནས་ཡིན་པའི་ཕྱིར་དང་། དེར་རུང་ཁང་བཅད་ན་དཀོན་མཆོག་ལ་མ་གུས་པར་འགྱུར་བའི་ཕྱིར། སྔར་རུང་ཁང་བཅད་ཟིན་མ་ཡིན་པ་དགོས་ཏེ། བཅད་ཟིན་ལ་གཉིས་པ་མི་འཆགས་པའི་ཕྱིར། གཉིས་པ་རྟེན་གང་གིས་གཅད་པ་ལ། ཁ་ཅིག་ན་རེ་རྡོ་བ་བཏེག་པའི་མཐའ་ལས་བྱུང་བའི་རུང་ཁང་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་དུ་གནས་པ། ས་རང་བཞིན་དུ་གནས་པ། མཚམས་ཀྱི་ནང་ན་གནས་པ། ལག་གི་གླར་གྱུར་པ་དེས་གཅོད་ཟེར་བ་མི་འཐད་དེ། བསླབ་པ་བྱིན་ཆགས་སྤྱོད་བཞིན་པའི་དགེ་སློང་ལ་ཞག་ལོན་དང་མཚམས་བཙོས་ཀྱི་ཉེས་པ་འབྱུང་བ་ཡོད་པས་དེ་འགོག་པའི་ཐབས་བསྟན་དགོས་པའི་ཕྱིར། དེས་ན་སྤྱིར་དགེ་འདུན་ཆོས་སུམ་ལྡན་གྱིས་གཅོད་ལ། ཁྱད་པར་དུ་རྡོ་བ་བཏེག་པའི་མཐའ་ལས་བྱུང་བའི་རུང་ཁང་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། ས་རང་བཞིན་དུ་གནས་པ་མ་གཏོགས་གཞན་སྔར་དང་འདྲ་བ་དེས་གཅོད་དོ། །སེམས་བསྡུས་པ་ལས་བྱུང་བའི་རུང་ཁང་ནི། ཆོས་དེ་ལྡན་གྱི་དགེ་སློང་ལག་གི་གླར་གྱུར་མ་གྱུར་ཐམས་ཅད་ཀྱིས་གཅོད་ཅིང་། འཕྲལ་ལས་བྱུང་བའི་རུང་ཁང་ནི། གནས་དེར་ཕྱིན་པའི་དགེ་སློང་ཇི་སྙེད་ཡོད་པ་དེས་གཅོད་དོ། །གསུམ་པ་དུས་ནི། རྡོ་བཏེག་རུང་ཁང་ནི། སོ་ཕག་དང་པོར་འཇོག་པའི་ཚེ་གཅོད། སེམས་བསྡུས་རུང་ཁང་ནི་སོ་ཕག་འགྲེམས་པ་ནས་མཁར་ལས་མ་ཟིན་གྱི་བར་དེར་གཅོད་ཅིང་། འཕྲལ་བྱུང་རུང་ཁང་ནི་གནས་དེར་ཕྱིན་ནས་བྱ་བ་གཞན་མ་བརྩམས་གོང་དེར་གཅོད་དོ། །བཞི་པ་ཆོ་ག་ནི། སྤྱིར་དགེ་འདུན་གྱིས་གསོལ་བ་དང་གཉིས་ཀྱི་ལས་ཀྱིས་གཅོད་ལ། ཁྱད་པར་རྡོ་བཏེགས་རུང་ཁང་ནི་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་ཞེས་ཆོ་ག་ལན་གསུམ་བརྗོད་པས་གཅོད་པ་དང་། སེམས་བསྡུས་རུང་ཁང་ནི་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བར་སེམས་བསྡུས་ཤིག་ཅེས་པའི་ཆོ་ག་ལན་གསུམ་བརྗོད་པས་གཅོད་ལ། འཕྲལ་བྱུང་རུང་ཁང་ནི་དེར་འདུས་ཀྱི་དགེ་འདུན་ཐམས་ཅད་ཀྱིས་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའོ་ཞེས་ཆོ་ག་ཅིག་ཆར་བརྗོད་པས་གཅོད་དོ། །སོ་ཐར་གྱི་འགྲེལ་པ་འདུལ་བ་བསྡུས་པ་ལས། ཤེས་པ་ཆུང་ངུའི་རུང་ཁང་དང་འཇུག་པ་ཞན་པའི་རུང་ཁང་གཉིས་ཀྱང་གསུངས་སོ། །ལྔ་པ་བྱེད་ལས་ནི། མཚམས་གཅིག་གི་ནང་དུ་རུང་ཁང་གཅིག་བཅད་པས། མཚམས་དེར་གཏོགས་པའི་གཙུག་ལག་ཁང་དུ་མ་ཡང་རུང་ཁང་དང་ལྡན་པར་འགྱུར་སྟེ། གཅིག་གི་གཙུག་ལག་ཁང་དུ་མའི་བྱ་བ་བྱེད་པ་ལ་མི་མཛེས་པ་མེད་དོ། །དེ་ནི་ཐ་དད་པར་གྱུར་པའི་རུང་བ་ཉིད་དུ་མ་རྟེན་ཏོ་ཞེས་གསུངས་པའི་ཕྱིར་རོ། །དྲུག་པ་སྒྲ་བཤད་པ་ནི། མཚམས་ནང་ཡིན་ཡང་ཟས་ཞག་ཏུ་བཞག་རུང་བ་དང་། རྗེན་པ་བཙོར་རུང་བས་རུང་ཁང་ཞེས་བྱའོ། །བདུན་པ་འཇིག་རྒྱུ་ནི། མཚམས་ཀྱི་འཇིག་རྒྱུ་ཐམས་ཅད་ཀྱིས་འཇིག་ལ། ལས་ཀྱི་འཇིག་པ་ཡང་ཡོད་དོ། །དྲུག་པ་སྨན་ལོངས་སྤྱོད་པའི་ཚུལ་ལ་ལྔ་སྟེ། རྟེན། དངོས་པོ། དུས། སྣོད། ལོངས་སྤྱོད་པའི་ཆོ་ག་དངོས་སོ། །དང་པོ་ནི། རང་གི་ཟས་ལ་སྤྱོད་པ་ལ། གོས་གཅིག་པ་ལ་སོགས་པ་དང་བྲལ་བས་སྤྱོད་ཅིང་། དགེ་འདུན་གྱི་ནང་དུ་ཞུགས་ཏེ་ཟས་ལ་སྤྱོད་པ་དང་། གང་གིས་གོས་སྟོང་ཕྲག་བརྒྱ་པ། ཟས་རོ་བརྒྱ་པ། ཁང་པ་བརྩེགས་པ་ལྔ་བརྒྱ་པ་ལ་སྤྱོད་པ་ནི་སྡེ་ལྔའི་སྡོམ་པ་གསོ་རུང་ཡན་ཆད་དང་ལྡན་པ། མྱ་ངན་ལས་འདས་པའི་བསམ་པ་རྣམ་པར་དག་པ་དང་ལྡན་པ། དགེ་བའི་བྱ་བ་ལ་བརྩོན་པ། གོས་གཅིག་པ་སོགས་དང་བྲལ་བ་དེས་སྤྱོད་དོ། །ཁ་ཅིག་གནས་དབྱུང་མ་བྱས་པ་དགོས་ཟེར་བ་མི་འཐད་དེ། གནས་དབྱུང་ནད་པ་གྲོགས་རྣམས་ཀྱིས་བསྐྱང་བར་གསུངས་པའི་ཕྱིར། གཉིས་པ་དངོས་པོ་ནི། ངོ་བོ་གནས་སྐབས་ཆོ་གའི་སྒོ་ནས་རུང་བའོ། །དེའི་ལྡོག་ཕྱོགས་མི་རུང་བ་ལ་ངོ་བོའི་སྒོ་ནས་མི་རུང་བ་ནི། ཆང་དང་སྒོག་པ་དང་རྨིག་པ་གཅིག་པའི་ཤ་ལྟ་བུའོ། །གནས་སྐབས་ཀྱི་སྒོ་ནས་མི་རུང་བ་ནི། ཤ་རློན་པ་མ་བཙོས་པ་དང་། ཨ་སྨྲ་རུས་པ་མ་ཆག་པ་ལྟ་བུ། ཆོ་གའི་སྒོ་ནས་མི་རུང་བ་ནི། ཞག་ལོན་དང་མཚམས་བཙོས་སུ་གྱུར་པའི་ཟས་ལྟ་བུའོ། །གསུམ་པ་དུས་ནི། དུས་རུང་རྣམས་ནི་རྐྱེན་དང་མི་ལྡན་པའི་གང་ཟག་གིས་སྐྱ་རེངས་ཤར་ནས་གུང་མ་ཡོལ་གྱི་བར་དུ་སྤྱོད་ལ། སྨན་ཕྱི་མ་གསུམ་བྱིན་གྱིས་བརླབ་པ་ནི། རང་རང་གི་བྱིན་བརླབས་ཀྱི་མཐའ་ཚུན་ཆད་དུ་སྤྱད་དུ་རུང་ཞིང་། མ་བརླབས་པ་ནི་སྔ་དྲོ་ཕྱི་དྲོ་གཉིས་ཀར་ན་མི་ན་ཐམས་ཅད་ཀྱིས་སྤྱད་པར་བྱ་བ་དང་། སྨན་ཕྱི་མ་གསུམ་བྱིན་བརླབས་བྱས་པ་ནི་ཕྱི་མ་ཕྱི་མ་སྔ་མ་དང་བསྲེས་སྟེ་ལོངས་སྤྱོད་པར་མི་བྱའོ། །བཞི་པ་སྣོད་ནི། རིན་པོ་ཆེའི་སྣོད་ལས་གཞན་ཡིན་པ་དང་། གཙང་བ། སོ་སོ་བ་ཡིན་པ། ཀོ་ལྤགས་ཀྱི་སྣོད་མ་ཡིན་པ་དེར་སྤྱོད་པར་བྱའོ། །ལྔ་པ་ལོངས་སྤྱོད་པའི་ཆོ་ག་དངོས་ལ་སྦྱོར་དངོས་རྗེས་གསུམ་གྱི་བྱ་བ་གསུམ། དང་པོ་ནི། ལུས་ཀྱིས་ལེགས་པར་འདུག་པ་དང་ཆོས་གོས་ལེགས་པར་བགོ་བ་སོགས་བྱ། ངག་གི་འདི་དང་འདི་ལས་སྦྱིན་ཞེས་པ་ལྟ་བུ་ཀླག་ཅོར་དང་བྲལ་བར་བྱ། ཡིད་ཀྱིས་བདག་ནི་ལེན་པ་པོའོ། །འདི་ནི་སྦྱིན་པ་པོའོ། །སྙམ་དུ་བྱིན་ལེན་གྱི་སེམས་ཀྱིས་བླང་བར་བྱའོ། །གཉིས་པ་ནི། ལུས་ཀྱིས་ཁམ་ཆེ་ཆུང་སོགས་དང་བྲལ་བ་དང་། ངག་གིས་སྒྲ་ཅག་ཅག་སོགས་དང་བྲལ་བ་དང་། ཡིད་ཀྱིས་རྒྱགས་པའི་གཉེན་པོར་བདག་ལ་ནད་པ་དང་། ཟས་ལ་སྨན་གྱི་འདུ་ཤེས་ཉེ་བར་གཞག ཟས་ལ་ཆགས་པའི་གཉེན་པོར་འདུ་ཤེས་བཅུ་བསྟེན། ལྟུང་བའི་གཉེན་པོར་བསླབ་པའི་གནས་དྲན་པ་དང་ཤེས་བཞིན་གྱིས་ཟིན་བཞིན་དུ་བཟའ་བར་བྱའོ། །གསུམ་པ་མཇུག་གི་ཆོ་ག་ནི། ཟས་ཟོས་ཟིན་པའི་རྗེས་སུ་ཁ་དང་ལག་པ་སོགས་བཀྲུ་བ་དང་གཙུག་ལག་གི་ཚིགས་སུ་བཅད་པ་གཉིས་ཡན་ཆད་འདོན་ཞིང་བསྔོ་བ་ཡང་བྱའོ། །གཉིས་པ་གཞུང་དོན་ལ་དོགས་པ་བཅད་པ་དེ་ལ་ལུང་གི་བྱེ་བྲག་གི་གཉིས་ལས། གཞིའི་སྐབས་ནས་འབྱུང་བ་ལ་གསུམ་སྟེ། སྨན་བསྟན་པའི་ཚུལ། རུང་ཁང་བློ་མཐུན་བྱ་བ། འཕངས་པའི་ཚེའི་དམིགས་བསལ་ལོ། །དང་པོ་ལ་གསུམ་སྟེ། སྨན་བསྟེན་ཚུལ་དངོས། བྱིན་གྱིས་རླབས་པའི་ཆོ་ག སྨན་གྱི་མཚོན་དོན་ནོ། །དང་པོ་ལ་བསྟན་བཤད་གཉིས་ལས། དང་པོ་ནི། ཁ་ཅིག་སྨན་བསྟེན་པར་བྱའོ། །ཞེས་པས་རབ་བྱུང་ཐམས་ཅད་ཀྱིས་བཟའ་ཞིང་བཏུང་བའི་ཕྱིར་སྨན་བསྟེན་པ་སྤྱིར་བསྟན་གསུང་བ་མི་འཐད་དེ། གཞུང་དེས་རབ་བྱུང་ནད་པ་འབའ་ཞིག་གིས་སྨན་བསྟེན་པར་བསྟན་པའི་ཕྱིར་ཏེ། ལུང་ལས་དགེ་སློང་ནད་པ་རྣམས་ལ་ཕན་པ་སོ་སོ་བསྟན་པའི་སྨན་གསུངས་པ་གང་དག་ཡིན་པ་དེ་དག་འདི་ལྟ་སྟེ། ཞུན་མར་དང་། འབྲུ་མར་དང་། སྦྲང་རྩི་དང་། བུ་རམ་གྱི་དབུ་བ་དག་གོ་ཞེས་དང་། འདིར་ཡང་དང་པོ་མ་ཡིན་པ་ཉིད་དག་ནི་ནད་པའི་ཕྱིར་རོ། །ཞེས་གསུངས་པའི་ཕྱིར། འོ་ན་སྨན་དེ་ལ་དུ་ཡོད་ཅེ་ན། སྨན་ཆོས་ཅན། རྣམ་པ་བཞིར་ཡོད་དེ། སྐྱ་རེངས་ཤར་ནས་ཉི་མ་གུང་གི་བར་བྱེ་བྲག་མེད་པར་ལོངས་སྤྱོད་དུ་རུང་བ་དུས་སུ་རུང་བ་དང་། ཐུན་ཚོད་ཀྱི་མཐའི་བར་བྱིན་གྱིས་བརླབས་ནས་ལོངས་སྤྱོད་དུ་རུང་བ་ཐུན་ཚོད་དུ་རུང་བ་དང་། ཞག་བདུན་གྱི་བར་དུ་ལོངས་སྤྱོད་དུ་རུང་བའི་ཞག་བདུན་པར་བྱིན་གྱིས་བརླབས་པའི་སྨན་དང་། ཇི་སྲིད་འཚོའི་བར་དུ་ལོངས་སྤྱོད་དུ་རུང་བ་ཇི་སྲིད་འཚོའི་བར་བྱིན་གྱིས་བརླབས་པའི་སྨན་རྣམས་སུ་ཡོད་པའི་ཕྱིར། ནད་པ་འབའ་ཞིག་གིས་བསྟེན་བྱ་ཡིན་པ་འདིས་གྲུབ་སྟེ། སྨན་ཕྱི་མ་གསུམ་བྱིན་གྱིས་བརླབས་པ་ཅན་ལ་བཤད་པའི་ཕྱིར་ཏེ། ཊཱི་ཀར་ཐུན་ཚོད་དུ་རུང་བ་ཞེས་བྱ་བ་ནི་ཐུན་ཚོད་ཀྱི་མཐའི་དུས་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །ཞག་བདུན་པ་ཞེས་བྱ་བ་ནི་ཞག་བདུན་གྱི་མཐའ་ཚུན་ཆད་དུ་མཚན་མོ་དང་ཉིན་མོའི་ངོ་བོ་ཉིད་ཀྱི་དུས་སུ་རང་གི་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ། །འཚོ་བའི་བར་དུ་བཅང་བ་ཞེས་བྱ་བ་ནི་ཇི་སྲིད་འཚོའི་དུས་ཀྱི་མཐའ་ཚུན་ཆད་དུ་རང་གིས་བྱིན་གྱིས་བརླབས་ཏེ་བསྟེན་པར་བྱ་བ་གང་ཡིན་པའོ་ཞེས་གསུངས་པའི་ཕྱིར། དང་པོ་དུས་རུང་མ་ཡིན་པ་སྨན་ཕྱི་མ་གསུམ་བྱིན་གྱིས་བརླབས་པ་ཉིད་དག་ནི་ནད་པའི་ཕྱིར་ཏེ་ནད་པ་འབའ་ཞིག་གིས་ལོངས་སྤྱོད་པར་བྱ་བ་ཡིན་གྱི། མི་ན་བས་ལོངས་སྤྱོད་དུ་མི་རུང་ངོ་། །སྨན་ཕྱི་མ་གསུམ་བྱིན་གྱིས་བསླབས་ནས་ནད་པ་འབའ་ཞིག་གིས་ལོངས་སྤྱོད་བྱར་གཞུང་འདིས་བསྟན་ཏེ། འདིའི་མདོ་སྦྱོར་དུ། ལུང་ལས་བཙུན་པ་ཐུན་ཚོད་དུ་རུང་བ་དང་། ཞག་བདུན་པ་དང་འཚོའི་བར་དུ་བཅང་བའི་སྨན་བྱིན་ལེན་བགྱིས་པ་དང་། བྱིན་གྱིས་བརླབས་པ་གང་དག་ལགས་པ་དེ་དག་བྲོ་མ་འཚལ་བས་ཡོངས་སུ་སྤྱད་དུ་རུང་ངམ་ཉེ་བ་འཁོར་མི་རུང་ངོ་། །བྱིན་ལེན་བགྱིས་པ་དང་བྱིན་གྱིས་རླབས་པ་དེ་དག་བྲོ་འཚལ་བས་ཡོངས་སུ་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པའི་ཕྱིར། དང་པོ་མ་ཡིན་པ་ན་མི་ན་གཉིས་ཀས་ལོངས་སྤྱོད་དུ་རུང་བ་དེ་གང་ཞེ་ན། རྩོ་རྩ་སྟེ་ཀུ་ཤུ་དང་། ཆུ་ཤིང་གི་འབྲས་བུ་དང་། རྒྱ་ཤུག་དང་། ཨ་ཤྭཏྛྀ་དང་། ཨུ་དུམ་ཝ་དང་། རྩུ་པ་རུ་ཤ་ག་དང་། རྒུན་འབྲུམ་གྱི་ཆུ་དང་། ཤིང་ཐོག་འབྲ་གོ་ལས་སྦྱར་བའི་བཏུང་བ་སོགས་འཚགས་ཀྱིས་བཙགས་པ་རུང་བའི་ཆུས་བཏབ་པ་ནི་ན་མི་ན་གཉིས་ཀས་དུས་སྔ་དྲོ་ཕྱི་དྲོར་ལོངས་སྤྱོད་དུ་རུང་ངོ་། །དེར་མ་ཟད་བཅོས་པའི་ཆང་ཚྭར་གྱུར་པ་དང་། འབྲུའི་ཆང་ཚྭར་གྱུར་པ་དང་། ཞོ་ཁ་ཆུ་ཞོའི་དྭངས་མ་དང་། དར་བའི་དྭངས་མ་ཆུར་ཁུ་དང་། འབྲུ་སོགས་ཕབས་མེད་པར་མནན་པའི་རྩབས་མོ་སྐྱུར་བག་དང་ལྡན་པ་ཚགས་ཀྱིས་བཙགས་པ་རུང་བའི་ཆུས་བཏབ་པ་ཤིན་ཏུ་སླ་བ་གཞན་སྣང་བ་འདམ་བུའི་ཉག་མའི་མདོ་ལྟ་བུ་ཁ་དོག་ཅུང་ཟད་སེར་བ་དག་ཀྱང་དེ་དང་འདྲ་བར་ན་མི་ན་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དུས་རུང་ལས་སྦྱར་བའི་བཏུང་བ་སྦྱར་བཙགས་བྱས་ཏེ་ལོངས་སྤྱོད་པའི་ཕྱིར་སྦྱར་བཙགས་མ་བྱས་པ་དེ་དགེ་སློང་རང་ཉིད་ཀྱི་བྱིན་ལེན་བྱེད་དུ་རུང་ངམ་ཞེ་ན། དུས་རུང་ལས་སྦྱར་བའི་བཏུང་བ་ཚགས་ཀྱིས་བཙགས་པ་རུང་བའི་ཆུས་བཏབ་པ། ཤན་དང་བྱེ་བ་དེ་ལྟ་བུ་ཉིད་ཀྱི་མདུན་རོལ་དུ་སྟེ། སྦྱར་བཙགས་མ་བྱས་པ་དེ་ལ་བསྙེན་པར་རྫོགས་པ་མཚན་མཐུན་པས་རེག་པ་སྟེ་བྱིན་ལེན་བྱེད་དུ་མི་རུང་སྟེ། དགོས་པ་མེད་ཅིང་དགག་བྱ་དང་ལྡན་པའི་ཕྱིར། དང་པོ་གྲུབ་སྟེ། སྦྱར་བཙགས་བྱས་པ་ན་བྱིན་ལེན་ཞིག་པའི་ཕྱིར། གཉིས་པ་གྲུབ་སྟེ། ལག་ཉར་འགྱུར་བའི་དགག་བྱ་ཡོད་པའི་ཕྱིར། དེར་མ་ཟད་ཨ་རུ་ར་དང་། སྐྱུ་རུ་ར་སོགས་འབྲས་བུ་ལྔ་བྱིན་གྱིས་མ་བརླབས་པ་དེ་ཡང་ན་མི་ན་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དེས་འཚོ་བཅང་གི་རྩ་བ་སྡོང་བུ། འབྲས་བུ། མེ་ཏོག འདབ་མ་ལ་སོགས་པ་ཡང་མཚོན་ནོ། །བུ་རམ་བྱིན་གྱིས་མ་བརླབས་པ་དེ་ཡང་ན་མི་ན་གང་ཟག་གཉིས་ཀས་དུས་ཐམས་ཅད་དུ་ལོངས་སྤྱོད་དུ་རུང་ངོ་། །དེས་ཞག་བདུན་པ་གཞན་ཡང་མཚོན་ནོ། །སྨན་བྱིན་གྱིས་བརླབས་པ་དེ་མི་ན་བས་ལོངས་སྤྱད་དུ་མི་རུང་བར་ངེས་སམ་ཞེ་ན། དམིགས་བསལ་གྱི་བུ་རམ་བྱིན་གྱིས་བརླབས་པ་དེ་གཟའ་བ་ལ་ལམ་དཔག་ཚད་དུ་ཞུགས་པ་དང་། དགེ་བསྐོས་དང་ལག་གི་གླ་རྣམས་ནི་ནད་པ་དང་འདྲ་བར་ལོངས་སྤྱད་དུ་རུང་བ་ཉིད་དོ། །དེར་མ་ཟད་ཟན་ཆད་པའི་དགེ་སློང་གིས་ཀྱང་བུ་རམ་བྱིན་གྱིས་བརླབས་པ་དེ་བཟར་རུང་ངོ་། །གཞན་དུས་སུ་རུང་བ་མ་ཡིན་པ་སྟེ། དུས་མ་ཡིན་པར་རུང་བ་མར་དང་འབྲུ་མར་དུས་སུ་ཡང་བཟར་རུང་སྟེ། རང་འགྲེལ་ལས། ནད་པ་ཉིད་ཀྱི་སོགས་ཞེས་གསུངས་ཏེ། ནད་པ་དང་འདྲ་བའི་ཕྱིར་ཞེས་པའི་དོན་ནོ། །དེས་ན་གང་ཟག་བཞི་པོ་དེ་བུ་རམ་བྱིན་གྱིས་བརླབས་པ་དང་མར་དང་འབྲུ་མར་བྱིན་གྱིས་བརླབས་པ་དེ་དུས་མ་ཡིན་པར་བཟར་རུང་བར་མ་ཟད་དུས་སུ་ཡང་བཟར་རུང་ངོ་། །གཉིས་པ་རྒྱས་བཤད་ལ་ལྔ་སྟེ། ཐུན་ཚད་དུ་རུང་བ། ཞག་བདུན་པ། འཚོ་བཅང་གི་སྨན། དུས་རུང་དུས་མ་ཡིན་པ་ལ་བརྟེན་པའི་ཚུལ། འདྲེས་པ་ལ་ཆོ་ག་སྔ་མས་འཇུག་པའོ། །དུས་རུང་མ་སྨོས་པར་ཕྱི་མ་གསུམ་སྨོས་པ་ནི་ལོངས་སྤྱོད་པའི་དུས་ཀྱི་ཁྱད་པར་མི་འདྲ་བ་ཡོད་པས་སོ། །དང་པོ་ཐུན་ཚོད་རུང་བའི་སྨན་ནི་ངོ་བོ་བཏུང་བ་དགོས། དེ་ཡང་ཤིན་ཏུ་སླ་བའོ། །རྒྱུ་དུས་རུང་ལས་སྦྱར་བའི་བཏུང་བ་དེའི་སྦྱར་བཙགས་སུས་བྱེད་ཅེ་ན། བཏུང་བ་དེའི་རྫས་སམ་རྒྱུ་བཏུང་བ་དེ་ཉིད་མིན་པའི་ཕྱིར། གལ་ཏེ་དུས་སུ་རུང་བ་ཡིན་ན་བསྙེན་པར་མ་རྫོགས་པས་བསྐོལ་བ་ལ་སོགས་པས་སྦྱར་ཞིང་འཚགས་ཀྱིས་ཀྱང་བཙགས་པར་བྱའོ། །བསྙེན་པར་རྫོགས་པས་སྦྱར་བཙགས་བྱེད་མི་རུང་སྟེ། སྦྱར་བཙགས་བྱས་པ་ན་བྱིན་ལེན་འཇིག་པའི་ཕྱིར་ཏེ། བཏུང་བའི་ངོ་བོར་གྱུར་པའི་ཕྱིར་ཏེ། དུས་རུང་དུས་མི་རུང་དུ་སོང་བའི་ཕྱིར། དེའི་ཤུགས་ལ་དུས་མི་རུང་ལས་སྦྱར་བའི་ལྟུང་བའི་སྦྱར་བཙགས་བསྙེན་པར་རྫོགས་པས་བྱེད་དུ་རུང་བར་བསྟན་ནོ། །བསྐོལ་དུ་མི་རུང་སྟེ། དགེ་སློང་གིས་བཙོས་པར་འགྱུར་བའི་ཕྱིར། ལུང་ལས་འབྲས་བུ་བརྒྱུད་ལས་སྦྱར་བའི་བཏུང་བ་ཐུན་ཚོད་དུ་བཏུང་བར་བཤད་པ་དེ་ངེས་གཟུང་ཡིན་ནམ་མཚོན་དོན་ཡིན་ཞེ་ན། མཚོན་དོན་ཡིན་ནོ་ཞེས་སྟོན་པ་ནི་ཐུན་ཚོད་དུ་རུང་བའི་བཏུང་བ་དེ་དག་ཏུ་འབྲས་བུ་བརྒྱུད་ལ་སྦྱར་བའི་བཏུང་བ་ལས། གཞན་བལ་པོ་སེའུ་ལ་སོགས་པ་སྟེ་དུས་རུང་གི་ཙ་བ་སྡོང་བུ་འདབ་མ་ལ་སོགས་པ་ལས་སྦྱར་བའི་བཏུང་བ་དེ་ཡང་ཐུན་ཚོད་དུ་རུང་བའི་རྫས་ཡིན་ནོ། །འདིས་ནི་བལ་པོ་སེའུ་སོགས་དུས་རུང་ཡིན་པར་གྲུབ་བོ། །ལུང་ལས་དགེ་སློང་དག་གིས་བུ་རམ་ཟོས་པ་དང་། དེ་དག་ལ་སྐོམ་པའི་གནོད་པ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། བུ་རམ་ཆུར་བྱས་སྟེ་བཏུང་བར་བྱའོ་ཞེས་གསུངས་ཏེ། དེས་མཚོན་ནས་ཇི་སྲིད་འཚོ་བཅང་ལས་སྦྱར་བའི་བཏུང་བ་ཤིན་ཏུ་སླ་བ་ཡང་བསྙེན་པར་རྫོགས་པས་བཏུང་དུ་རུང་བར་གྲུབ་བོ། །དེ་རྣམས་ཀྱིས་ལོངས་སྤྱོད་ཀྱི་མཐའ་གང་ཞེ་ན། བཏུང་བ་དེའི་རྒྱུ་དུས་རུང་ལས་སྦྱར་བ་ཡིན་ན་ཐུན་ཚོད་གྱི་མཐའ་སྟེ་ལོངས་སྤྱོད་གྱི་མཐའ་ཡིན་ནོ། །ཐུན་ཚོད་ཀྱི་མཐའ་དེ་གང་ཞེ་ན། ཁ་ཅིག་མཚན་མོའི་ཐུན་དང་པོའི་སྐད་ཅིག་མ་དང་པོ་ལ་བྱེད་པ་དང་ལ་ལ་མཚན་ཐུན་དང་པོ་ལ་བྱེད་པ་དང་། གཞན་དག་མཚན་ཐུན་ཐ་མ་ལ་འདོད་པ་དང་། སྲོད་ཐུན་ཐ་མ་ལ་འདོད་པ་སོགས་དུ་མ་སྣང་ཡང་ལུང་རིགས་དང་འགལ་བས་མི་འཐད་དོ། །རང་ལུགས་ནི། སྲོད་ཐུན་དང་པོ་ལ་བྱེད་ལ་དེ་ཡང་འོད་དམར་འཆར་བ་ལ་བྱེད་པ་ཡིན་ཏེ། ཊཱི་ཀར་མཚན་མོའི་ཐུན་ཚོད་ཀྱི་ཆའི་ཚད་ཀྱི་མཐའ་གང་ཡིན་པ་དེ་ཞེས་དང་། འགྲེལ་ཆུང་ལས་ཞག་བདུན་པ་དང་ཚེས་གཅིག་གི་སྔགས་ཀྱིས་བཏང་བ་ལས་སྐོམ་དུ་བྱས་ཏེ་བཏུང་ན་དམར་ཐག་ཆོད་ཀྱི་བར་དུའོ་ཞེས་གསུངས་པའི་ཕྱིར། བཏུང་བ་དེ་རྒྱུ་དུས་རུང་ལས་དུས་མི་རུང་ལས་སྦྱོར་བ་ཡིན་ན་བཏུང་བ་དེའི་རྒྱུ་དེའི་ལོངས་སྤྱོད་ཀྱི་མཐའ་གང་ཡིན་པ་བཏུང་བ་དེའི་ལོངས་སྤྱོད་ཀྱི་མཐའ་ཡིན་ནོ། །དེས་ན་བུ་རམ་ལ་སྦྱར་བའི་བཏུང་བའི་ལོངས་སྤྱོད་ཀྱི་མཐའ་ཞག་བདུན་པ་དང་། ཨ་རུ་ར་ལ་སྦྱར་བའི་ལོངས་སྤྱོད་ཀྱི་མཐའ་ཇི་སྲིད་འཚོའི་བར་ཡིན་ཏེ། བུ་རམ་ཞག་བདུན་པ་ཡིན་པ་གང་ཞིག ཨ་རུ་ར་ཇི་སྲིད་འཚོའི་སྨན་ཡིན་པའི་ཕྱིར། དེས་ན་སྨན་ཕྱི་མ་གསུམ་མི་འགལ་སྟེ། ཐུན་ཚོད་ཀྱི་མཐའ་དང་ལྷན་ཅིག་འགལ་བ་མེད་དོ་ཞེས་གསུངས་པའི་ཕྱིར། གཞན་ཉིད་ཡིན་ན་དེའི་གང་ཡིན་པའོ་ཞེས་པ་ལ། རྒྱ་གར་བ་ཁ་ཅིག་ན་རེ་བཏུང་བའི་རོ་སླ་བར་མ་གྱུར་ན་གཞན་ཉིད་ཡིན་ན་དེའི་གང་ཡིན་པའོ་ཞེས་པ་ལྟར་ཡིན་གྱི། རོ་སླར་གྱུར་ན་རོ་སླར་ནམ་གྱུར་གྱི་སྐད་ཅིག་དང་པོ་ཚུན་ཆད་ལྟུང་བ་དེའི་ལོངས་སྤྱོད་ཀྱི་མཐའ་ཡིན་ཞེས་ཟེར་རོ། །དེ་འགོག་པ་ནི། ཞག་ལྔ་ན་རོ་སླ་བར་གྱུར་པའི་བུར་ཁུ་དེའི་ལོངས་སྤྱོད་ཀྱི་མཐའ་དེ་ཞག་ལྔ་པ་ཡིན་པ་དེ་ནི་འཐད་པ་མ་ཡིན་ཏེ། དེ་ཞག་བདུན་བར་བྱིན་གྱིས་བརླབ་རུང་གི་བཏུང་བ་གང་ཞིག་བཏུང་བ་དེ་ལོངས་སྤྱོད་པའི་དུས་ལས་ལྷག་པ་ལ་བསྟེན་པ་དེ། དེ་གཞིར་བཟུང་ནས་བྱིན་རླབས་བྱས་པ་བྱིན་རླབས་མི་ཆགས་པའི་ཕྱིར་རོ། །བྱིན་གྱིས་བརླབས་པ་ནི་ལོངས་སྤྱོད་རུང་སྤྱོད་མི་རུང་དུ་མི་འགྱུར་བའི་ཕྱིར་བྱིན་གྱིས་བརླབ་པ་ཡིན་པའི་ཕྱིར། གལ་ཏེ་ཞག་ལྔ་པར་བྱིན་གྱིས་རློབ་བོ་སྙམ་ན། མངོན་ཤེས་མེད་པའི་དགེ་སློང་རྣམས་ཀྱིས་བུར་ཁུ་དེ་བྱིན་གྱིས་བརླབ་པར་བྱ་བ་མ་ཡིན་པར་འགྱུར་ཏེ། མངོན་ཤེས་མེད་པའི་དགེ་སློང་ཕལ་པ་རྣམས་ཀྱིས་བུར་ཁུ་དེ་ཇི་ཙམ་ན་རོ་སླ་བར་འགྱུར་བ་དེ་བགྲོད་ཅིང་ཁོང་དུ་ཚུད་པ་མ་ཡིན་པའི་ཕྱིར། ཁྱབ་པ་ཁས་སོ། །ལྷག་མ་རྣམས་ནི་གཞུང་དོན་ལས་ཤེས་པར་བྱའོ།། ༈ །།གསུམ་པ་བྱ་བའི་ཐབས་ལས་ཀྱི་གཞི་ལ་གཉིས་ཏེ། མདོར་བསྟན་པ་དང་། རྒྱས་པར་བཤད་པའོ། །དང་པོ་ནི། བར་ཆད་འདྲི་བའི་གསོལ་བ་འབའ་ཞིག་པ་དང་། བསྙེན་རྫོགས་སུ་བསྒྲུབ་པའི་གསོལ་བཞིའི་ལས་སོགས་དུ་མ་བཤད་ན། ལས་དེ་རྣམས་རྒྱུ་གང་ལ་བརྟེན་ནས་འགྲུབ་ཅེ་ན་ཆོ་ག་ལས་འདས་ན་ལས་མི་འཆགས་སོ་ཞེས་སོགས་གསུངས་ཏེ། རྒྱུ་ཆོ་ག་ལས་འདས་ཤིང་མ་ཚང་ན་འབྲས་བུ་ལས་གཏན་མི་འཆགས་པའམ། ཉེས་མེད་ཕུན་ཚོགས་མི་འཆགས་སོ། །འོ་ན་ཆོ་ག་ནི་གང་། ལས་ནི་གང་ཞེ་ན། ད་ལྟར་གྱི་ཆོ་གའི་སྐབས་འདིར་ལས་རང་རང་གི་སྐབས་སུ་དགེ་འདུན་གྲངས་ཚང་བ་དང་། ལས་ལྷག་ཆད་ནོར་གསུམ་མེད་པར་གསལ་བར་བརྗོད་པ་དང་། ལས་བྱེད་པ་པོ་བསྙེན་པར་རྫོགས་པ་ཚུལ་ཁྲིམས་རྣམ་དག་དང་ལྡན་པ་ནི་ཆོ་ག་ཉིད་དོ། །ལས་དང་བརྗོད་པ་གང་ཞེ་ན། གསོལ་བ་འབའ་ཞིག་པ་དང་། གསོལ་བ་དང་གཉིས་ཀྱི་ལས་ཀྱིས་གསོལ་བ་དང་། གསོལ་བ་དང་བཞིའི་ལས་ཀྱིས་གསོལ་བ་སྟེ་གསོལ་བ་གསུམ་དང་། གསོལ་བ་དང་གཉིས་ཀྱི་ལས་ཀྱིས་བརྗོད་པ་དང་། གསོལ་བ་དང་བཞིའི་ལས་ཀྱིས་བརྗོད་པ་སྟེ་བརྗོད་པ་གཉིས་དང་། སོ་སོར་ཐར་པའི་མདོ་འདོན་པ་ལྔ་དང་། དགེ་འདུན་ལ་དགག་དབྱེ་ལན་གསུམ་དུ་གོ་བའི་སྔགས་རྣམས་ནི་ལས་ཏེ། དང་པོ་གཉིས་ལས་མཚན་ཉིད་པ་ཡིན་ལ། ཕྱི་མ་གཉིས་ལས་བཏགས་པ་བ་ཡིན་ནོ། །ལས་དང་བརྗོད་པའི་ཁྱད་པར་གང་ཞེ་ན། གསོལ་བ་ལ་སོགས་པ་ངག་ཏུ་བརྗོད་པའི་སྒྲ་རང་མཚན་པ་ནི་བརྗོད་པ་ཡིན་ལ། བརྗོད་པ་དེ་ལ་བསྟན་ནས་ཡིད་ཀྱི་བློ་ལ་མིང་ཚིག་ཡི་གེར་སྣང་བའི་སྒྲ་སྤྱི་ནི་ལས་སོ། །ལས་ཐོས་པར་བྱ་བ་མ་ཡིན་པ་དགེ་ཚུལ་ལ་སོགས་པས་ཐོས་པས་ནི་ལས་དེ་མི་འཆགས་པར་མི་འགྱུར་རོ། །དགེ་འདུན་གྱིས་མི་ཆགས་པའི་ལས་མི་བྱ་སྟེ། ལྟུང་བར་འགྱུར་བའི་ཕྱིར་རོ། །གཉིས་པ་ལ་གསུམ་སྟེ་མི་འཆག་པ་སོ་སོར་ཕྱེ་སྟེ་བཤད་པ། བྱེད་པ་པོ་དགེ་འདུན་གྱི་རྣམ་གཞག དེས་བྱ་བའི་ལས་ཀྱི་དབྱེ་བའོ། །དང་པོ་ནི། མི་འཆགས་པས་མི་བྱ་བ་གང་ཞེ་ན། ཆོས་མ་ཡིན་པ་སྟེ། སྦྱིན་ལས་ལ་གསོལ་བ་མ་བཏབ་པ། བསྐོ་ལས་ལ་སྤྲོ་བ་མ་དྲིས་པ། ཆད་ལས་ལ་གླེང་དྲན་མ་བྱས་པ་སོགས་ཆོ་ག་མ་ཚང་བ་ལ་ལས་མི་བྱའོ། །ཆོ་ག་ཚང་ཡང་བྱེད་པ་པོ་དགེ་འདུན་མི་མཐུན་པ་གཉིས་དང་ལྡན་པས་ལས་མི་བྱའོ། །ཡུལ་གང་ལ་བྱ་ཞེ་ན། ཚོགས་ཀྱི་མི་བྱའོ་ཞེས་གསུངས་ཏེ། ཡུལ་བཞིར་མ་ལོངས་པ་ལ་བྱ་བ་ཡིན་གྱི། ཚོགས་ལོངས་ཀྱི་ཡུལ་ལ་ལས་མི་བྱ་སྟེ། མི་འཆགས་པའི་ཕྱིར། འོན་ཀྱང་རྣམ་གཞག་གི་ལས་ལ་ནི་ཆགས་པ་ཡོད་དོ་ཞེས་གསུངས་མོད་དཔྱད་པར་བྱའོ། །གཉིས་པ་ལ་གཉིས་ཏེ། དགེ་འདུན་གྱི་གྲངས་དང་། ཁ་སྐོང་གི་རྣམ་གཞག་གོ །དང་པོ་ནི། དགེ་འདུན་དུ་མ་གྱུར་པ་དག་གིས་མི་བྱའོ་ཞེས་བཤད་ན། ཇི་ཙམ་གྱིས་དགེ་འདུན་དུ་ལོངས་པ་ཡིན་ཞེ་ན། དགེ་སློང་དང་དགེ་སློང་མ་རྣམས་ཀྱི་དབྱུང་བའི་ལས་ལ་ནི་དགེ་སློང་ཉི་ཤུ་ལ་སོགས་པ་ཡན་ཆད་དགེ་སློང་གི་དགེ་འདུན་ཉིད་དོ། །ཡུལ་དབུས་སུ་སྐྱེས་པ་བསྙེན་པར་རྫོགས་པ་ལ་ནི་དགེ་སློང་བཅུ་ལ་སོགས་པ་ཡན་ཆད་དགེ་སློང་གི་དགེ་འདུན་ཉིད་དོ། །ཐམས་ཅད་དུ་བཅུ་ངེས་པར་དགོས་སམ་ཞེ་ན། ཡུལ་མཐའ་འཁོབ་དག་ཏུ་དགེ་སློང་བཅུ་བསག་ཏུ་མེད་ན་འདུལ་བ་འཛིན་པ་སྟེ། ལས་བྱེད་པ་པོ་དང་བཅས་པའི་ལྔ་ལ་སོགས་པ་ཡན་ཆད་དོ། །དབྱུང་བ་དང་བསྙེན་པར་རྫོགས་པའི་ལྷག་མར་གྱུར་པའི་དགེ་སློང་གི་ལས་རྣམས་ལ་དགེ་སློང་བཞི་ལ་སོགས་པ་ཡན་ཆད་དགེ་སློང་གི་དགེ་འདུན་ནོ། །སྤྱིར་དགེ་འདུན་གྲངས་ཚང་བ་ལ་བཅུ་གཅིག་ཡོད་དེ། དགེ་སློང་མའི་དབྱུང་བའི་ལས་ལ་དགེ་སློང་ཕ་ཉི་ཤུ། མ་ཉི་ཤུ་སྟེ་བཞི་བཅུ། ཡུལ་དབུས་སུ་བུད་མེད་བསྙེན་པར་རྫོགས་པ་ལ་ཕ་བཅུ། མ་བཅུ་གཉིས་ཏེ་ཉེར་གཉིས། ཕའི་དབྱུང་བའི་ལས་ལ་དགེ་སློང་ཉི་ཤུ། ཡུལ་དབུས་སུ་སྔོན་རོལ་གྱི་སྡོམ་པ་གཉིས་དང་། འཁོར་དང་འཁོར་མང་པོའི་གནང་བ་བྱིན་པའི་ལས་ལ་དགེ་སློང་མ་བཅུ་གཉིས། མཐའ་འཁོབ་ཏུ་བུད་མེད་བསྙེན་པར་རྫོགས་པ་ལ་ཕ་ལྔ་དང་། མ་དྲུག་སྟེ་བཅུ་གཅིག ཡུལ་དབུས་སུ་སྐྱེས་པ་བསྙེན་པར་རྫོགས་པ་ལ་དགེ་སློང་བཅུ། དགེ་འདུན་གྱི་དབྱེན་ལ་རང་ཕྱོགས་བཞི། གཞན་ཕྱོགས་བཞི། འབྱེད་པ་པོ་རང་དང་བཅས་པའི་དགུ། མའི་དགག་དབྱེ་དང་། མའི་མགུ་བ་སྤྱོད་པའི་ལས་ལ་ཕ་མ་བཞི་བཞི་སྟེ་བརྒྱད། མཐའ་འཁོབ་ཏུ་སྔོན་རོལ་གྱི་སྡོམ་པ་གཉིས་སྦྱིན་པ་ལ་མ་དྲུག ཕམ་པར་གཏོགས་པའི་སྦོམ་པོ་ལྕི་བ་བཤགས་པའི་ཡུལ་ལ་ཕ་དྲུག་སྟེ། འདི་གཉིས་སྡེ་ཚན་གཅིག་ཏུ་བྱའོ། །མཐའ་འཁོབ་ཏུ་སྐྱེས་པ་བསྙེན་པར་རྫོགས་པ་ལ་ཕ་ལྔ། དབྱུང་བ་དང་བསྙེན་རྫོགས་ཀྱི་ལྷག་མའི་ལས་ལ་ཕ་བཞི་གྲངས་ཚང་རྣམས་སུ་ཡོད་པས་སོ། །གཉིས་པ་ལ་གཉིས་ཏེ། སྤྱིར་བསྟན་པ་དང་། འཁྲུལ་བཅས་བྱེ་བྲག་ཏུ་བཤད་པའོ། །དང་པོ་ནི། གོང་དུ་དགེ་འདུན་གྲངས་ཚང་བ་ཞེས་བཤད་ན། དེ་ལ་དགེ་སློང་ཇི་ལྟ་བུ་ཚང་དགོས་ཞེ་ན། མི་འདུག་པར་འགྲེང་བ་ནི་ལས་དེའི་ཁ་སྐོང་དུ་འོས་པ་མ་ཡིན་ཏེ། དགེ་འདུན་དང་སྤྱོད་ལམ་མི་མཐུན་པའི་ཕྱིར། དེར་མ་ཟད་གང་ཟག་གང་ལ་སྦྱིན་ལས། ཆད་ལས། བསྐོ་ལས་བྱ་བའི་ཡུལ་དེ་ཡང་ལས་དེའི་ཁ་སྐོང་དུ་འོས་པ་མ་ཡིན་ནོ། །དེའི་དམིགས་བསལ་ནི། གསོ་སྦྱོང་སོགས་རྣམ་གཞག་གི་ལས་ལ་ནི་རུང་ངོ་། །འདུན་པ་དང་ཡོངས་དག་ཕུལ་བས་དགེ་འདུན་དང་མཐུན་པ་འགྲུབ་པས་དེ་ལས་དེའི་ཁ་སྐོང་དུ་རུང་ངམ་སྙམ་ན། ལས་དེའི་ཕྱིར་དུ་འདུན་པ་དང་ཡོངས་སུ་དག་པ་ཕུལ་བའི་ཆོ་ག་ལས་དགེ་སློང་དེ་ལས་དེ་ལ་དངོས་སུ་མ་འདུས་པར་ལས་ཀྱི་ཁ་སྐོང་དུ་འོས་པ་མ་ཡིན་པ་ཉིད་དོ། །ནད་པ་དང་ཚངས་སྤྱོད་ལ་བར་དུ་གཅོད་པའི་རྐྱེན་དང་ལྡན་པ་ལས་གཞན་གྱིས་འདུན་པ་དང་ཡོངས་དག་དེ་གཉིས་འབུལ་བར་བྱ་བ་ཉིད་མ་ཡིན་ཏེ། ངེས་པར་ལས་ལ་འཇུག་དགོས་པའི་ཕྱིར། ལྷག་མ་ནི་བཞི་ལ་སོགས་པའོ་ཞེས་བཤད་ན་དགེ་སློང་བཞིས་དགག་དབྱེ་བྱར་རུང་ངམ་སྙམ་ན། གནས་དེ་ན་དགེ་སློང་བཞི་ལས་མེད་ན་གསུམ་གྱིས་གཅིག་དགག་དབྱེ་བྱེད་པ་ཉིད་དུ་མི་བསྐོ་སྟེ། དགག་དབྱེ་གོ་བར་བྱ་བའི་ཡུལ་དེ་ལ་དགེ་འདུན་ཚང་དགོས་པའི་ཕྱིར། དེར་མ་ཟད་དགེ་ཚུལ་ལ་སོགས་པ་བསྙེན་པར་མ་རྫོགས་པ་དང་། ཕམ་པས་ཉམས་པ་དང་། མཚམས་མེད་བྱས་པ་དང་། མདོ་སྡེ་ཚངས་པའི་དྲྭ་བ་ནས་གསུངས་པའི་ལྟ་བའི་རྣམ་པ་དྲུག་ཅུ་རྩ་གཉིས་པོ་དག་ལས་གང་ཡང་རུང་བ་ཀུན་ཏུ་སྤྱོད་པའི་སྡིག་པའི་ལྟ་བ་ཅན་དང་། ས་གཞན་ན་གནས་པ་ཉི་ཤུ་རྩ་ལྔ་དང་། ཆོས་མ་ཡིན་པའི་ཕྱོགས་ལས་ཐ་དད་དུ་གནས་པ་ཆོས་ཕྱོགས་པ་རྣམས་ཀྱང་ཁ་སྐོང་བ་ཉིད་མ་ཡིན་ནོ། །དེ་ཡང་སྡིག་པའི་ལྟ་བ་ཅན་ནི་ཆོས་ཕྱོགས་པའི་ལས་ཀྱི་ཁ་སྐོང་དུ་མི་འོས་པ་ཡིན་གྱི། ཆོས་མ་ཡིན་པའི་ཕྱོགས་ཀྱི་ལས་ཀྱི་ཁ་སྐོང་དུ་རུང་ལ། ཆོས་ཕྱོགས་པ་ནི་ཆོས་མིན་པའི་ལས་ཀྱི་ཁ་སྐོང་དུ་མི་རུང་བ་ཡིན་གྱི། ཆོས་ཕྱོགས་པའི་ལས་ཀྱི་ཁ་སྐོང་དུ་རུང་ངོ་། །ཤ་མཚོ་་་་་་ཁ་ཅིག་ཐ་དད་པ་ཆོས་ཕྱོགས་པ་ལ་བྱེད་པ་མི་རིགས་ཏེ། ཆོས་མིན་པའི་ལས་ཀྱི་ཁ་སྐོང་དཔྱོད་པའི་སྐབས་མིན་པའི་ཕྱིར། ཞེས་སྒྲུབ་བྱེད་དང་བཅས་ཏེ་གསུངས་པ་མི་འཐད་དེ། རང་ཊཱིཀ་ལས་དེ་ལས་ཐ་དད་པ་ཆོས་ཕྱོགས་པ་ལ་གཟུང་ཞེས་བཤད་པའི་ཕྱིར། གཉིས་པ་ནི། བསླབ་པ་འཁྲུལ་པ་དང་བཅས་པས་ཀྱང་ལས་ཀྱི་ཁ་སྐོང་བ་མ་ཡིན་ནོ། །འོ་ན་གང་གིས་འཁྲུལ་བཅས་སུ་འགྱུར་ཞེ་ན། བསྡམ་བྱའི་ཉེས་བྱས་ཀྱིས་ཀྱང་འཁྲུལ་པ་དང་བཅས་པ་ཡིན་གྱི། བཤགས་བྱའི་ལྟུང་བ་འབའ་ཞིག་གིས་འཁྲུལ་པ་དང་བཅས་པ་ཡིན་པར་མ་ཟད་དོ། །འདི་ལ་རྒྱ་གར་བ་ཁ་ཅིག་ཕམ་པ་གང་ཡང་རུང་བ་བྱུང་བས་བསླབ་པ་འཁྲུལ་བཅས་ཡིན་པས་ཁ་སྐོང་བར་འོས་པ་ཉིད་མ་ཡིན་གྱི། ལྟུང་བ་གཞན་བྱུང་བས་ཁ་སྐོང་དུ་མི་འོས་པ་མ་ཡིན་ནོ། །དེ་ཡང་ལུང་ལས་བཙུན་པ་ཇི་ཙམ་གྱིས་དགེ་སློང་མཚན་ཉིད་གཙང་བར་གྱུར་པ་ལགས། བཀའ་སྩལ་པ་ཉེ་བར་འཁོར་ཕམ་པར་འགྱུར་བ་བཞི་ལས་གང་ཡང་རུང་བ་མ་བྱུང་བའོ་ཞེས་གསུངས་པའི་ཕྱིར། ལྟུང་བ་གཞན་བྱུང་བས་འཁྲུལ་བཅས་སུ་འགྱུར་ན། ད་ལྟར་གྱི་གནས་སྐབས་སུ་སོ་སོར་ཐར་པའི་སྡོམ་པ་དྲུང་ཕྱུང་བ་ཡིན་པར་ཐལ། བསྡམ་བྱའི་ཉེས་བྱས་ཙམ་གྱིས་ཀྱང་བསླབ་པ་འཁྲུལ་བཅས་སུ་འགྱུར་ཞིང་། འཁྲུལ་བཅས་ཡིན་ན་ལས་ཀྱི་ཁ་སྐོང་དུ་མི་རུང་བས་ཁྱབ་པ་གང་ཞིག བསྡམ་བྱའི་ཉེས་བྱས་ཙམ་གྱིས་མ་གོས་པའི་དགེ་སློང་ཤ་སྟག་གི་ཁ་སྐོང་ཚང་བ་ད་ལྟ་མི་སྲིད་པའི་ཕྱིར། རྟགས་དང་པོ་ཁས་བླངས་སོ་ཞེ་ན། བསླབ་པ་འཁྲུལ་བཅས་སུ་འགྱུར་བ་ལ་ཕམ་པ་བྱུང་མི་དགོས་ཏེ། ལུང་སིལ་བུ་ལས་ཇི་ཙམ་གྱིས་རང་བཞིན་དུ་གནས་པ་མ་ལགས་པར་འགྱུར། བཀའ་སྩལ་པ་ཉེ་བར་འཁོར་ཇི་ཙམ་གྱིས་ལྷག་པར་བྱ་བ་མ་ཡིན་པ་ལྷག་པར་སྤྱོད་ཅིང་དགེ་སློང་གི་བསླབ་པ་ལ་མི་སློབ་པ་སྟེ། ཉེ་བར་འཁོར་དེ་ཙམ་གྱིས་རང་བཞིན་དུ་གནས་པ་མ་ཡིན་པར་འགྱུར་ཞེས་དང་། དགག་དབྱེའི་གཞི་ཞུ་བ་ལས་གལ་ཏེ་བསྡམ་པར་བྱ་བ་ཤེས་ན་བསྡམ་པར་བྱས་ལ་དགག་དབྱེ་བྱ། གལ་ཏེ་བཤགས་པར་བྱ་བར་ཤེས་ན་བཤགས་ཏེ་དགག་དབྱེ་བྱའོ་ཞེས་གསུངས་པའི་ཕྱིར། ལྟུང་བ་གཞན་བྱུང་བས་བསླབ་པ་འཁྲུལ་བཅས་སུ་འགྱུར་ཏེ། ངོ་ཚ་མེད་པ་ལས་ཐ་དད་དུ་རང་བཞིན་དུ་གནས་པ་མ་ཡིན་པའི་དགེ་སློང་དེས་འདུན་པ་ཕྱིར་བཟློག་གི་མི་མཐུན་པ་མི་འཆགས་པར་གསུངས་པ་ནི། ལས་ཀྱི་ཁ་སྐོང་དུ་མི་འོས་པའི་རྒྱུ་མཚན་གྱིས་ཡིན་པའི་ཕྱིར་ཏེ། ལུང་ལས་བཙུན་པ་གང་དག་གིས་སླར་བཟློག་པ་མི་འཆགས། ཉེ་བར་འཁོར་བཅུ་གཉིས་ཀྱིས་ཏེ། བྱིས་པ་དང་། རྨོངས་པ་དང་། ཞེས་པ་ནས། རང་བཞིན་དུ་གནས་པ་མ་ཡིན་པ་དང་། བསླབ་པ་བྱིན་པའོ་ཞེས་གསུངས་པའི་ཕྱིར། དེས་ན་ཚུལ་ཁྲིམས་ཡོངས་སུ་དག་པ་ཞེས་གསུངས་པའི་ལྟུང་བ་ཐམས་ཅད་ཀྱིས་ཡོངས་སུ་དག་པ་ཡིན་གྱི། ཕམ་པ་ཉི་ཚེས་དག་པ་ནི་མ་ཡིན་ནོ། །འཁྲུལ་བཅས་སུ་འགྱུར་བའི་ལྟུང་བ་ཕྱིར་བཅོས་བྱས་ནས་ལས་ལ་འཇུག་དགོས་སམ་ཞེ་ན། ལྟུང་བ་བྱིན་གྱིས་བརླབས་པས་ལས་ལ་སྒྲིབ་པའི་ཆ་དེ་དག་པ་ཉིད་དུ་འགྱུར་རོ། །ལྟུང་བ་ཐམས་ཅད་བྱིན་གྱིས་བརླབས་པས་འདག་གམ་ཞེ་ན། ཉི་མ་དེ་ཉིད་ལ་ཕྱིར་བཅོས་ནུས་པ་ཉིད་ཡིན་ན་དག་པར་མི་འགྱུར་རོ། །ནུས་པ་དེ་གང་ཞེ་ན། ལས་བྱེད་པའི་ཉི་མ་དེའི་ཚེ་བཤགས་པ་དེ་ལེན་པ་སྟེ་བཤགས་ཡུལ་ཡོད་ན་ལྟུང་བྱེད་འབའ་ཞིག་ཏུ་འགྱུར་བ་དང་། སོ་སོར་བཤགས་པར་བྱ་བ་དང་། འཕྲལ་ལ་བཤགས་པ་ཙམ་གྱིས་འདག་པའི་ཉེས་པ་རྣམས་ཉི་མ་དེ་ཉིད་ལ་ཕྱིར་བཅོས་བྱས་པས་འདག་པའི་ལྟུང་བ་ཡིན་ཏེ། བཤགས་ཡུལ་ཁྱད་པར་ཅན་ཡོད་ཅིང་དེའི་དྲུང་དུ་མིང་རིགས་ཀྱི་སྒོ་ནས་བཤགས་པ་བྱས་པས་འདག་པའི་ལྟུང་བའི་རིགས་སུ་གནས་པ་ཡིན་པའི་ཕྱིར། ཞིབ་ཏུ་གཞུང་གི་སྟེང་དུ་རྟོགས་པར་བྱའོ། །གསུམ་པ་ནི། བཟློག་པའི་ཕྱིར་བསྒོ་བ་དང་། ཞེས་པའི་སྐབས་སུ། གསོལ་བཞིའི་ལས་སུམ་ཅུ་གསུངས་ལ། སྤྱིར་ལས་བརྒྱ་རྩ་གཅིག་ཏུ་གསུངས་ཏེ། གཏམ་གྱི་གཞི་ལས་བཙུན་པ་ལས་དུ་དག་ཏུ་མཆིས། ཉེ་བར་འཁོར་བརྒྱ་རྩ་གཅིག་གོ །བཙུན་པ་ལས་དུ་དག་གིས་ལས་ཐམས་ཅད་བསྡུས། ཉེ་བར་འཁོར་གསུམ་གྱིས་ཏེ། གསོལ་བའི་ལས་དང་། གསོལ་བ་དང་གཉིས་ཀྱི་ལས་དང་། གསོལ་བ་དང་བཞིའི་ལས་ཀྱིས་སོ། །བཙུན་པ་ལས་བརྒྱ་རྩ་གཅིག་པོ་གང་དག་ལགས་པ་དེ་དག་ལ་གསོལ་བའི་ལས་ནི་དུ། གསོལ་བ་དང་གཉིས་ཀྱི་ལས་ནི་དུ། གསོལ་བ་དང་བཞིའི་ལས་དག་ནི་དུ་མཆིས། བཀའ་སྩལ་པ་ཉེ་བར་འཁོར། གསོལ་བའི་ལས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ་ཞེས་གསུང་ལ། རྒྱ་ཆེར་འགྲེལ་དུ་དེ་དག་སྡོམ་གྱི་ཚིགས་སུ་བཅད་པས་གསུངས་པ་ནི། གསང་དང་ནང་དུ་དྲི་ཕྱིར་དང་། །གསོ་སྦྱོང་དེ་ལ་ལྟུང་བཅས་དང་། །དེ་ལ་དགེ་འདུན་ཡིད་གཉིས་དང་། །རྩོད་དང་དེས་ཉིད་མ་ཡིན་དང་། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱར་གནས་ཁས་བླང་ཉིད་དང་ནི། །འཆི་བའི་རྫས་དང་ནོར་འདྲ་དང་། །ཆོས་གོས་སྲ་བརྐྱང་གཏད་པ་དང་། །ཆོས་གོས་སྦྱིན་པར་བྱ་བ་དང་། །གནས་ངན་ལེན་ནི་བརྗོད་པ་དང་། །གྲངས་སུ་གཞུག་པ་བཞི་དག་དང་། །ཁྱིམ་གྱི་སྡོམ་དང་དེ་གཞིག་དང་། །ལྷུང་བཟེད་ཁ་དབུབ་བྱ་བ་དང་། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ནི་གསུམ་པོ་དག །མི་འབྲལ་སྨྱོས་དང་དགག་དབྱེ་དང་། །གནས་མལ་སྟོབ་པར་བྱེད་པ་དང་། །རུང་བའི་ས་གཞི་བརྐོ་བ་དང་། །སྲ་བརྐྱང་དང་ནི་དེ་འདིང་དང་། །སྤོང་དང་ལག་གི་གླ་དང་ནི། །གནས་ཁང་བསྐོ་ལ་སོགས་པ་དང་། །གཟུ་དང་གསལ་དང་སྦེད་པ་དང་། །ཚུལ་ཤིང་འབྲིམས་པར་བྱེད་པ་དང་། །ཁང་པ་ཁང་ཆེན་བསྟན་པ་དང་། །གླེང་དང་འབྲལ་བར་མི་འགྱུར་དང་། །སྟན་དང་ལྷུང་བཟེད་འབྲིམས་པ་དང་། །མ་དད་གོ་བར་བྱ་བ་དང་། །སྟོན་པ་དང་ནི་ནགས་ཉུལ་དང་། །ཕྱག་མི་བྱ་དང་མང་ཕྱིར་དང་། །འཁར་བ་དྲྭ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང་། །བསླབ་པ་སྦྱིན་དང་ཉེར་གནས་དང་། །བུ་དང་ཉེ་དུའི་ཕྱིར་འགྲོ་བ། །གསོལ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང་། །མུ་སྟེགས་གནས་དང་མཚམས་འགྲོལ་དང་། །མཐུན་སྦྱིན་གསོ་སྦྱོང་བདུན་པོ་དང་། །བརྒྱད་དང་དྲན་དང་མ་མྱོས་དང་། །དེ་ཉིད་འཚོལ་དུ་གཞུག་པ་དང་། །བསྒོ་བར་བྱ་བ་རྣམས་དང་ནི། །ཉམས་པ་བྱིན་པར་བྱ་བ་དག །གསོལ་དང་བཞི་ཡི་ལས་ཡིན་ནོ། །ཞེས་གསུང་སྟེ། འདི་དག་གི་ནང་གསེས་ཀྱི་དབྱེ་དུ་དང་མཚན་ཉིད་ནི་འགྲེལ་པ་ལས་ཤེས་པར་བྱའོ།། ༈ །།བཞི་པ་གསོ་བ་ཕྱིར་བཅོས་ཀྱི་གཞི་ལ་གཉིས་ཏེ། ལྟུང་བ་ཕྱིར་བཅོས་དང་། རྩོད་པ་ཕྱིར་བཅོས་གཉིས། དང་པོ་ནི། ཕྱིར་བཅོས་ཀྱི་གཞི། དུས་དང་དུས་མ་ཡིན་པ་བསྡུས་པ་འབྱུང་བའི་གཞི། ས་གཞན་ལ་གནས་པ་སྤྱོད་པའི་གཞི། ཡོངས་སུ་སྦྱོང་བའི་གཞི་སྟེ་བཞིས་འཆད་ལ། འདི་ལ་ཡང་རང་ཉིད་མི་སྤྲོ་བ་ནན་ཏུར་གྱིས་ཕྱིར་བཅོས་པ་དང་། རང་ཉིད་སྤྲོ་བ་མཐོལ་བཤགས་ཀྱིས་ཕྱིར་བཅོས་པ་གཉིས། དང་པོ་ལ་སྤྱིའི་རྣམ་གཞག་དང་། སོ་སོའི་དོན་ཞིབ་ཏུ་བཤད་པ་གཉིས་ལས། དང་པོ་ལ། བྱ་བ་ངན་པ་འཕྲོ་གཅོད་དུ་གཞུག་པ་དང་། ལྟུང་བ་ཕྱིར་བཅོས་སུ་གཞུག་པ་གཉིས། དང་པོ་ལ། ཚུལ་ཁྲིམས་དང་འགལ་བའི་སྒོ་ནས་ཁྱིམ་པ་སུན་འབྱིན་པར་བྱེད་པ་ལ་བསྐྲད་པ་ནན་ཏུར། དགེ་འདུན་ལ་འཐབ་ཀྲོལ་རྒྱུན་མ་ཆད་པར་བྱེད་པ་ལ་བསྡིག་པ་ནན་ཏུར། དགེ་འདུན་ལྷག་མའི་ལྟུང་བ་རིགས་འདྲ་བཞི་བཏུད་དེ་བྱེད་པ་ལ་སྨད་པ་ནན་ཏུར། ཁྱིམ་པ་ལ་བརྙས་འཐབ་བྱེད་པ་ལ་ཕྱིར་འགྱེད་ནན་ཏུར་དང་བཞི་སྟེ། དེ་རྣམས་སྡེ་སྣོད་འཛིན་པ་ལ་སོགས་པའི་དམིགས་བསལ་ཅན་མ་གཏོགས་པ་ལ་དགེ་འདུན་གྱིས་ལྟུང་བ་གླེང་བའི་གང་ཟག་བསྐོ་ཞིང་། དེས་ལྟུང་བ་གླེང་བ་ན་སྐབས་མི་འབྱེད་དམ། ཕྱེ་ནས་མི་མཉན་ནམ། ཚོགས་སུ་འདུ་བ་མི་སྟེར་རམ། ལྟུང་བ་མ་མཐོང་ངོ་ཞེས་ཟེར་རམ། ཁས་བླངས་ནས་ཕྱིར་མི་འཆོས་པ་གང་ཡིན་ཡང་རུང་སྟེ། བཞམ་བསྒོ་སྔོན་དུ་འགྲོ་བས་གསོལ་བཞིའི་ལས་ཀྱིས་གཞི་གང་ཡིན་གྱི་ནན་ཏུར་བྱ་སྟེ། གཞན་གྱིས་དགོས་པ་མི་འགྲུབ་པའི་ཕྱིར། དེ་ལ་བསྐྲད་པ་ནན་ཏུར་ནི། སུན་འབྱིན་པའི་གནས་དེ་གནས་སུ་མི་གཞུག་གོ །བསྡིག་པ་ནན་ཏུར་ནི་འཐབ་ཀྲོལ་རྒྱུན་མི་གཅོད་ན་གནས་ནས་འབྱིན་ནོ་ཞེས་བསྡིག་པའོ། །སྨད་པ་ནན་ཏུར་ནི། ཉེས་པ་དེ་ལས་སླར་མ་ལོག་བར་དུ་གཞན་ལ་གནས་འཆའ་ཞིང་འདུག་ཅིག་ཅེས་པའོ། །ཕྱིར་འགྱེད་ནན་ཏུར་ནི། ཁྱོད་ཁྱིམ་པ་ལ་བཟོད་པ་མི་གསོལ་ན། ངེད་ཀྱང་ཁྱོད་ལས་ཕྱིར་འགྱེད་པར་བྱའོ་ཞེས་པའོ། །དེ་དག་ནན་ཏུར་བྱས་པས་བཟོད་པར་གསོལ་ན། གསོལ་བཞིའི་ལས་ཀྱིས་བཟོད་པ་བླང་ངོ་། །དེ་དག་ཕྱིར་མི་འཆོས་ཤིང་བཟོད་པ་གསོལ་དུ་མ་འདོད་ན་གནས་དབྱུང་བྱ་སྟེ། འཐབ་ཀྲོལ་ལ་འབད་པ་མ་ལོག་ན་གནས་ནས་དབྱུང་བར་གསུངས་པ་དེ་གཞན་ལ་ཡང་རིགས་པ་མཚུངས་པའི་ཕྱིར། གཉིས་པ་ནི། གང་ཟག་དམན་པ་ལྟུང་བ་བྱས་ནས། རང་ཉིད་ཕྱིར་མི་འཆོས་པ་ལ་གང་ཟག་གཞན་གྱིས་ཕྱིར་འཆོས་སུ་གཞུག་པའི་ཕྱིར་དུ། གླེང་བྱེད་མཚན་ཉིད་དང་ལྡན་པས། བརྟག་རྣམ་པར་བརྟགས། དཔྱད་རྣམ་པར་དཔྱད་ནས་དང་པོར་སྐབས་འབྱེད་དུ་གཞུག སྐབས་མི་འབྱེད་ན། ཁྱེད་ལ་བརྗོད་རྒྱུ་ཞིག་ཡོད་པས། གཞན་དུ་མ་འགྲོ་ཞིག་ཅེས་བརྗོད་བཅས་བྱ། བྱས་ཀྱང་སྐབས་འབྱེད་དུ་མ་འདོད་ན། དེ་ལ་གདམས་ངག་མི་སྦྱིན། གཏམ་མི་བྱ། དེས་ཀྱང་འབྱེད་དུ་མི་འདོད་ན། གསོལ་བཞིའི་ལས་ཀྱིས་གསོ་སྦྱོང་གཞག དེས་ཀྱང་འབྱེད་པར་མ་འདོད་ན་དགག་དབྱེ་གཞག དེས་ཀྱང་འབྱེད་དུ་མ་འདོད་ན་བཀའ་བློ་མི་བདེ་བ་ཡིན་པས་བཟློག་པའི་ཕྱིར་བསྒོ་བའི་ལས་བྱ། དེས་ཀྱང་གཏང་དུ་མ་འདོད་ན་དགེ་འདུན་ལྷག་མར་འགྱུར་རོ། །སྐབས་ཕྱེ་ནས་མཉན་པར་མི་བྱེད་ན། རྟ་དམུ་རྒོད་ཕུར་པས་བཏགས་པ་བཞིན། ཁྱོད་ལ་ལྟུང་བ་འདི་བྱུང་ངོ་ཞེས་ལྟུང་བ་བཀལ་ཏེ་གཏང་བ་ཕུར་བཅས་བྱའོ། །སྐབས་ཕྱེ་ནས་ལྟུང་བ་བྱུང་མ་བྱུང་ལ་མ་འཆམས་ན་དཔང་པོ་ཡོད་ན་དཔང་པོ་ལ་དྲི། དཔང་པོ་བདེན་པ་མཐོང་བའམ། ཡོན་ཏན་ཆེར་མཆོག་ཏུ་གྱུར་པས་གླེང་བྱ་བདེན་པར་བཅད་ན་གླེང་བྱ་ལ་དག་པ་སྦྱིན། ད་དུང་གླེང་ན་གླིང་བྱེད་ལ་ཕྱིར་འགྱེད་ནན་ཏུར་བྱ། གླེང་བྱེད་བདེན་པར་བཅད་ནས་ལྟུང་བ་མ་མཐོང་ངོ་ཞེས་ཟེར་ན། མ་མཐོང་བ་གནས་དབྱུང་བྱ། ལྟུང་བ་དེ་འདྲས་ཐར་པ་ལ་མི་སྒྲིབ་ཟེར་ན། སྡིག་ལྟ་ལས་བཟློག་པའི་ཕྱིར་བསྒོ་བའི་ལས་བྱ། དེས་མ་བཏང་ན་སྡིག་ལྟ་ཅན་གནས་ནས་དབྱུང་བར་བྱ། ལྟུང་བ་ཡོད་པར་ཁས་བླངས་ནས་བཤགས་བྱ་ཡན་ཆད་ཕྱིར་མི་འཆོས་ན་ཕྱིར་མི་འཆོས་པ་གནས་ནས་དབྱུང་བར་བྱ། ཁས་བླངས་ནས་བརྗོད་པས་ཁྱད་དུ་གསོད་ན་དེའི་ངོ་བོ་ཉིད་འཚོལ་བ་དང་མཐུན་པ་སྦྱིན། ཁས་བླངས་ནས་ཕྱིར་འཆོས་ནས་ལྟུང་བ་གང་ཡིན་པ་དེའི་ཕྱིར་བཅོས་བྱེད་དུ་གཞུག འཐབ་ཀྲོལ་བྱེད་པ་ལ་བསྡིག་པ་ལ་སོགས་པས་བཟློག་ཀྱང་མ་ལོག་ན་གནས་ནས་དབྱུང་། རྩོད་པ་རྣམ་པར་གཏན་ལ་དབབ་པས་མ་ཞི་ན་གནས་ནས་དབྱུང་། འཐབ་ཀྲོལ་གྱི་རྒྱུ་ཉེ་བར་སྒྲུབ་པ་གནས་ནས་དབྱུང་། དགེ་སློང་མ་དང་འདྲེ་ཞིང་གནས་པ་གནས་ནས་དབྱུང་སྟེ། འདི་བཞི་བྱ་བ་དམན་པ་འཕྲོ་གཅོད་དུ་འཇུག་པའི་ནན་ཏུར་རོ། །དེར་གནས་ནས་ཕྱུང་བ་དེ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་དུ་བྱས་ན་ལས་བྱེ་བ་ཡིན་པས། དེ་གཉིས་ཀྱི་ཕྱོགས་སུ་མ་ལྷུང་བའི་དགེ་འདུན་གཟུ་བོར་རྣམས་ཀྱིས་ཕྱག་དང་མངོན་ལྡང་སོགས་ཀྱི་གུས་པ་དང་གཏམ་མི་བྱ། དགེ་སློང་མས་མངོན་ལྡང་ཙམ་དང་དགེ་བསྙེན་གྱིས་བསོད་སྙོམས་སྟེར་བ་ཙམ་མ་གཏོགས། ཕྱག་དང་གཏམ་སྨྲ་བ་སོགས་མི་བྱ་བར་ཚར་གཅད་དོ། །གལ་ཏེ་བཟོད་པར་གསོལ་ན། གསོལ་བ་དང་བཞིའི་ལས་ཀྱིས་བཟོད་པ་བླངས་ཏེ། མཐུན་པ་དང་མཐུན་པའི་གསོ་སྦྱོང་བྱིན་ནས་གསོ་སྦྱོང་ལྷན་ཅིག་བྱས་པས་རང་བཞིན་དུ་གནས་པ་ཐོབ་བོ། །དེ་རྣམས་ལ་བརྟེན་ནས་རྩོད་པར་གྱུར་ན་རྩོད་པ་ཞི་བྱེད་ཀྱིས་ཞི་བར་བྱ་སྟེ། དཔེར་ན་ཆང་འཐུང་བ་ལྟུང་བ་ཡིན་མིན་རྩོད་ན། འགྱེད་ཕྱིར་རྩོད་པ་ཡིན་པས་མངོན་སུམ་དང་གང་མང་གིས་ཞི་བར་བྱའོ། །དེ་ལ་ནན་ཏུར་བྱས་པས་རིགས་མི་རིགས་ལ་རྩོད་པ་བྱུང་ན། མངོན་སུམ་དང་དྲན་པས་འདུལ་བ་དང་། མ་སྨྱོས་པས་འདུལ་བ་སྦྱིན། ཆང་འཐུང་མ་འཐུངས་ལ་བརྟེན་ནས་རྩོད་པ་བྱུང་ན། ལྟུང་ཕྱིར་གྱི་རྩོད་པ་ཞི་བྱེད་ཀྱིས་ཕྱིར་བཅོས་ཏེ། རྒོལ་ཕྱི་རྒོལ་གཉིས་ལས་གཞན་དུ་མ་འཕྲོས་ན་ཁས་བླངས་པས་ཕྱིར་བཅོས། འཕྲོས་ན་བཅས་པའི་ཉི་ཚེ་བ་ལ་མངོན་སུམ་གྱིས་ཕྱིར་བཅོས། དགེ་འདུན་མཐའ་དག་དང་འབྲེལ་ན་རྩྭ་བཀྲམ་པ་ལྟ་བུ་ཕན་ཚུན་གཅིག་གིས་གཅིག་ལ་བཤགས་པའི་ཕྱིར་བཅོས་པ་བྱའོ། །སྡེ་སྣོད་འཛིན་པ་ལ་སོགས་པའི་གང་ཟག་བདུན་ལ་ནན་ཏུར་མི་བྱ་སྟེ། ས་གའི་ལྷས། མདོ་སྡེ་འདུལ་བ་མངོན་པ་རྣམས། །མཁས་ཤིང་གྲགས་དང་ལྡན་པ་དང་། །བསོད་ནམས་ལྡན་པ་ལ་སོགས་ནི། །བསྐྲད་ཅིང་བཀར་བར་འོས་པ་མིན། །གང་ཕྱིར་འདི་དག་མུ་སྟེགས་ཀྱི། །རིག་དྭགས་སྐྲག་བྱེད་སེངྒེའི་བུ། །འདི་དག་ཁྱིམ་པར་གྱུར་ན་ཡང་། །སྟོན་པའི་བློ་ཡིས་རབ་དྭངས་བསྐྱེད། །འདི་དག་རྣམས་ཀྱིས་གཙུག་ལག་ཁང་། །མཛེས་བྱེད་ཁྱུ་མཆོག་སྒྲ་སྒྲོགས་བཞིན། །དེ་བས་འདི་དག་སྨད་ན་ནི། །རང་གི་བསྟན་པ་སྨད་པ་ཡིན། །ཞེས་གསུངས་པ་ནི་བུ་སྟོན་གྱི་ལེགས་བཤད་དོ། །གཉིས་པ་སོ་སོའི་དོན་ཞིབ་ཏུ་བཤད་པ་ལ་དོན་བརྒྱད་དེ། དབྱེ་བ། བསྡུ་བ། མཚན་ཉིད། སྔོན་འགྲོའི་ཆོས། མཇུག་གི་ཆོ་ག ནན་ཏུར་གང་བྱ་བའི་རྒྱུར་འགྲོ་བ། སྒྲ་བཤད་ལ། ནན་ཏུར་བྱ་བའི་ཚུལ་ལོ། །དང་པོ་ལ། ཁ་ཅིག་ནན་ཏུར་ལ་དབྱེ་ན་བཅོ་ལྔ་སྟེ། བསྡིག་པ་ལ་སོགས་པ་བཞི། གནས་དབྱུང་བདུན། ལྷུང་བཟེད་ཁ་དབུབ། དགེ་ཚུལ་བསྙིལ་བ། གསོ་སྦྱོང་གཞག་པ། དགག་དབྱེ་གཞག་པའོ་ཞེས་གསུངས་པ་མི་འཐད་དེ། ལྷུང་བཟེད་ཁ་དབུབ་དང་དགེ་ཚུལ་བསྙིལ་བ་ནི་ནན་ཏུར་དུ་མི་འཐད་པའི་ཕྱིར་ཏེ། ཊཱི་ཀར་འདི་དག་ནི་ཡང་དག་པར་བསྡམ་པར་བྱ་བ་ཙམ་ཡིན་གྱི། གཞན་ལ་བཅོལ་བར་བྱ་བ་ཉིད་མ་ཡིན་པས་མངོན་སུམ་དུ་མ་གྱུར་པར་བྱའོ་ཞེས་སོ། །གཞན་ཡང་དགེ་ཚུལ་བསྙིལ་བའི་ལས་དེ་གནས་དབྱུང་དུ་ཐལ། ཆོས་དང་ཟང་ཟིང་གཉིས་ཀས་སྤང་འོས་ཀྱི་ནན་ཏུར་ཡིན་པའི་ཕྱིར། རྟགས་ཁས། འདོད་ན། དགེ་ཚུལ་བསྙིལ་བའི་གང་ཟག་དེ་བསྟན་པ་ལ་ཞུགས་རྫོགས་ཀྱི་གང་ཟག་ཏུ་ཐལ། གནས་དབྱུང་ནན་ཏུར་བྱས་པའི་གང་ཟག་ཡིན་པའི་ཕྱིར། གཞན་ཡང་ལྷུང་བཟེད་ཁ་དབུབ་དེ་ནན་ཏུར་མིན་པར་ཐལ། དེ་ཁྱིམ་པ་ལ་བྱེད་དགོས་པ་གང་ཞིག་ཁྱིམ་པ་ལ་ནན་ཏུར་བྱ་བ་བཀག་པའི་ཕྱིར་ཏེ། ཁྱིམ་པ་ལ་མི་བྱའོ་ཞེས་གསུངས་པའི་ཕྱིར། གཉིས་པ་བསྡུ་བ་ལ། ཁ་ཅིག རྟེན་གྱི་སྒོ་ནས་བསྡུ་ན་ཁྱིམ་པ་ལ་བྱ་བ་དང་རབ་བྱུང་ལ་བྱ་བ་གཉིས། ངོ་བོའི་སྒོ་ནས་བསྡུ་ན། བསྐྲད་པ་ནན་ཏུར། རྣམ་དག་ནན་ཏུར། སྨད་པ་ནན་ཏུར་གསུམ། ཆོ་གའི་སྒོ་ནས་བསྡུ་ན་གསོལ་བཞིས་བསྒྲུབ་པ་དང་། གསོལ་བ་འབའ་ཞིག་པས་བསྒྲུབ་པ་གཉིས་ཞེས་གསུངས་སོ། །གསུམ་པ་མཚན་ཉིད་ནི། རང་མི་འདོད་བཞིན་དུ་ལས་ཀྱི་ཆད་པས་བཅད་ལ། མཇུག་ཏུ་བཟོད་པར་གསོལ་དགོས་སུ་འདུག་པའོ། །དེ་ཡང་རང་མི་འདོད་བཞིན་དུ་ཞེས་པས་ངོ་བོ་ཉིད་འཚོལ་བ་དང་མཐུན་པ་སྦྱིན་པ་བསལ་ཏེ། དེ་འདོད་བཞིན་དུ་བྱ་བའི་ཕྱིར། ལས་ཀྱིས་ཞེས་པས་ནི་གནས་བླ་མས་སློབ་མ་ཆད་པས་གཅོད་པ་བསལ་ཏེ། དེ་ལས་ལ་མ་ལྟོས་པར་ཆད་པས་གཅོད་པའི་ཕྱིར། ཆད་པས་བཅད་པ་ཞེས་པས་དམན་པའི་གནས་སུ་བགྲང་བ་བསལ་ཞེས་གསུངས། མཇུག་བཟོད་པར་གསོལ་དགོས་སུ་འདུག་པ་ཞེས་པ་ནི། ནན་ཏུར་ཕྱིས་བྱས་པའི་སྟོབས་ཀྱིས་སྔར་བྱས་འཇིག་པའི་ནན་ཏུར་དེ་ནན་ཏུར་ཡིན་པར་བསྡུ་བའི་དོན་ནོ་ཞེས་གསུངས་སོ། །བཞི་པ་སྔོན་འགྲོའི་ཆོས་ལ་ཁ་ཅིག་ན་རེ། ཕྱིར་མི་འཆོས་གནས་དབྱུང་ལ་གླེང་དྲན་དང་ཁས་བླངས་པ་སྔོན་དུ་འགྲོ་དགོས་ལ། སྡིག་ལྟ་མི་གཏོང་བ་གནས་དབྱུང་ལ་བཞམས་བསྒོ་དང་། འཐབ་ཀྲོལ་ལ་འབད་པས་མ་ལོག་པ་ལ་བསྡིག་པ་ནན་ཏུར་དང་། རྣམ་པར་གཏན་ལ་འབབ་པ་ལས་གྱུར་པའི་གནས་དབྱུང་ལ། མངོན་སུམ་བརྒྱད་སྔོན་དུ་འགྲོ་དགོས་པར་གསུངས་པས་དེ་ལས་གཞན་པའི་ནན་ཏུར་ལ་ཡང་སྔོན་འགྲོའི་ཆོས་ཤིག་དགོས་པས་དེ་ལ་བཞམས་བསྒོ་སྔོན་དུ་གཏོང་དགོས་པར་གྲུབ་པ་ཡིན་ཏེ། སྡིག་ལྟ་མི་གཏོང་པ་དང་དགེ་ཚུལ་བསྙིལ་བ་གཉིས་ལ་དེ་སྔོན་དུ་འགྲོ་དགོས་པར་གསུངས་པས་རྒྱུ་མཚན་མཚུངས་པའི་ཕྱིར་དང་། རྩ་བ་ལས་ཀྱང་། གནས་ནས་ཕྱུང་བ་ཡང་དེ་བཞིན་ནོ། །ཞེས་གནས་དབྱུང་སྤྱི་ལ་བཤད་པའི་ཕྱིར་ཞེས་གསུངས། ཤ་་་་་་ཁ་ཅིག་དགེ་སློང་མ་དང་འདྲེ་ཞིང་གནས་པའི་རྒྱུར་གནས་ནས་དབྱུང་བ་ལ་ཡང་སྨད་པ་ནན་ཏུར་སྔོན་དུ་འགྲོ་དགོས་པ་ཡིན་ཏེ། དགེ་འདུན་ལྷག་མའི་ལྟུང་བ་རྒྱུན་དུ་བྱེད་པ་ལ་སྨད་པ་ནན་ཏུར་བྱེད་རིགས་པ་གང་ཞིག དེ་གཉིས་རྒྱུ་ངོ་བོ་ཆོ་ག་དོད་ཐུབ་པ་ཡིན་པའི་ཕྱིར། འཐབ་ཀྲོལ་གྱི་རྒྱུ་ཉེ་བར་བསྒྲུབ་པ་ལ་ཡང་བསྡིག་པ་ནན་ཏུར་སྔོན་དུ་འགྲོ་དགོས་པ་ཡིན་ཏེ། འཐབ་ཀྲོལ་ལ་འབད་པས་མ་ལོག་པ་གནས་ནས་དབྱུང་བ་ལ་བསྡིག་པ་ནན་ཏུར་སྔོན་དུ་འགྲོ་དགོས་པ་གང་ཞིག དེ་གཉིས་རྒྱུ་ངོ་བོ་ཆོ་ག་དོད་ཐུབ་པ་ཡིན་པའི་ཕྱིར་ཞེས་གསུངས་སོ། །ལྔ་པ་མཇུག་གི་ཆོས་ལ། ཁ་ཅིག་ན་རེ་སྨད་པ་བསྐྲད་པ་ཕྱིར་འགྱེད་ནན་ཏུར་བྱས་ནས་དེའི་མཐའ་ལ་མི་གཏོང་ན་གནས་དབྱུང་བྱ་བ་ཡིན་ཏེ། བསྡིག་པ་ནན་ཏུར་བྱས་ནས་དེའི་མཐའ་ལ་མི་གཏོང་ན་གནས་དབྱུང་བྱ་བ་གང་ཞིག དེ་དག་རྒྱུ་ངོ་བོ་ཆོ་ག་དོད་ཐུབ་ཡིན་པའི་ཕྱིར་ཞེས་གསུངས་མོད། དཔྱད་པར་བྱའོ། །དྲུག་པ་ནན་ཏུར་གང་ལྟུང་བའི་རྒྱུར་འགྲོ་བ་ལ་ཁ་ཅིག་ན་རེ། བསྡིག་པ་སྨད་པ་ཕྱིར་འགྱེད་ནན་ཏུར་བྱས་ནས་དགེ་འདུན་ལ་སྐུར་འདེབས་བྱེད་ན་བཞམས་བསྒོ་ལ་སོགས་པ་ལྔ་བྱས་པ་དེའི་མཐའ་ལ་མི་གཏོང་ན་ལྷག་མར་འགྱུར་ཏེ། བསྐྲད་པ་ནན་ཏུར་བྱས་པའི་དགེ་སློང་གིས་དགེ་འདུན་ལ་སྐུར་འདེབས་བྱེད་པ་ལ་བཞམས་བསྒོ་སོགས་བྱས་ནས་དེའི་མཐའ་ལ་མ་བཏང་བ་ལ་ལྷག་མ་བསྐྱེད་པ་གང་ཞིག རྒྱུ་མཚན་མཚུངས་པའི་ཕྱིར། འོ་ན་ལྷག་མ་བཅུ་གསུམ་དུ་མ་ངེས་པར་ཐལ། ཞེས་པ་ལ་དངོས་བཅས་དང་རུང་མཐུན་གཉིས་ཀའི་དབང་དུ་བྱས་ན་འདོད་ལ། དངོས་བཅས་ཀྱི་དབང་དུ་བྱས་ན་ཁྱབ་པ་མེད་ཅེས་གསུངས་སོ། །ཁ་ཅིག་གསོ་སྦྱོང་དང་དགག་དབྱེ་གཞག་པའི་གང་ཟག་དགེ་འདུན་ལ་སྐུར་འདེབས་བྱེད་པ་ལ་ཡང་བཞམས་བསྒོ་སོགས་ལྔ་བྱས་པའི་མཐའ་ལ་མི་གཏང་བ་ལ་ལྷག་མར་འགྱུར་ཏེ། དེ་གཞན་དང་རྒྱུ་མཚན་མཚུངས་པའི་ཕྱིར་ཞེས་པ་ཡང་མི་འཐད་དེ། ཧ་ཅང་ཐལ་བའི་ཕྱིར་དང་གཏན་ཚིགས་ཀྱང་མ་གྲུབ་པའི་ཕྱིར་རོ། །བདུན་པ་སྒྲ་བཤད་པ་ནི། འོག་ཏུ་འཇུག་ཅིང་ལྟུང་བའི་དོན་གྱིས་ན་ནན་ཏུར་ཞེས་བྱའོ། །བརྒྱད་པ་བྱ་བའི་ཚུལ་ལ། དགོས་དོན་བསྡུས་དོན་གཉིས་ལས། དང་པོ་ནི། ཉེས་སྤྱོད་ལ་མ་ཞུགས་པ་རྣམས་མི་འཇུག་པ་དང་། ཞུགས་ཟིན་པ་རྣམས་བཟློག་པ་དང་། ཁྱིམ་པ་རྣམས་མ་དད་པ་སྤོང་བའི་དགོས་པ་ཡང་ཡོད་དོ། །གཉིས་པ་ལ་དྲུག་སྟེ། ཡུལ་གང་ལ། རྟེན་གང་གིས་དུས་ནམ་གྱི་ཚེ། ཆོ་ག་གང་གིས། ནན་ཏུར་བྱས་པའི་བསླབ་བྱ། གྲོལ་རྒྱུའོ། །དང་པོ་ནི། སྡེ་ལྔའི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ་ལྟ་བ་དང་སྤྱོད་པ་ཆོས་མིན་པའི་ཕྱོགས་སུ་མ་སོང་བ་ཡིན་པ། གནས་དབྱུང་མ་ཡིན་པ། ཚོགས་ལོངས་མིན་པ། ནད་པ་མིན་པ། འབྱེད་ནུས་པ་མིན་པ། གླེང་དྲན་སྔོན་དུ་སོང་བ་ཡིན་པ། རང་རང་གི་གཞི་ལེགས་པ་དང་ལྡན་པ་སྟེ་ཆོས་དགུ་ལྡན་གཅིག་ལ་བྱའོ། །དཔེར་ན་ཕྱིར་མི་འཆོས་གནས་དབྱུང་བྱེད་པ་ལ། དེ་ལ་ལྟུང་བ་དེ་གླེང་ཞིང་ཁས་བླངས་ནས་ཕྱིར་མི་འཆོས་པར་རང་དགར་འཇོག་པ་ལ་བྱ་བར་གསུངས་པ་ལྟ་བུའོ། །གཉིས་པ་རྟེན་གང་གིས་བྱ་བ་ནི། ནན་ཏུར་བྱེད་དགོས་དང་ལྡན་ཞིང་གྲངས་ཚང་བ། ཁ་སྐོང་བར་འོས་པ་མི་མཐུན་པ་གཉིས་དང་བྲལ་བའི་དགེ་འདུན་གྱིས་སོ། །གསུམ་པ་དུས་ནམ་གྱི་ཚེ་བྱ་བ་ནི། ཕ་རོལ་པོས་སེམས་གཏད་པར་མི་ནུས་པ་དང་། དབྱར་ཁས་བླངས་པའི་དུས་མ་ཡིན་པར་བྱའོ། །བཞི་པ་ཆོ་ག་གང་གིས་བྱ་བ་ལ། སྦྱོར་བ་དང་། དངོས་གཞི། མཇུག་རྣམས་སོ། །དང་པོ་ནི། སྟན་བཏིང་བ་ལ་སོགས་པ་འདུ་བའི་སྐབས་རྗེས་སུ་སྒྲུབ་པའོ། །གཉིས་པ་ནི། གསོལ་བ་དང་བཞིའི་ལས་བྱ་བའོ། །གསུམ་པ་ནི། མཇུག་བསྡུ་བརྗོད་པ་དང་། འདི་ཉིད་དུ་ལྟུང་བ་འདི་ཕྱིར་བཅོས་པར་གྱིས་ཤིག དགེ་འདུན་འདི་ཉིད་ཀྱིས་ཁྱོད་བག་ཡངས་སུ་བྱེད་པར་འགྱུར་རོ་ཞེས་བརྗོད་པར་བྱའོ། །ལྔ་པ་ནན་ཏུར་བྱས་པའི་བསླབ་བྱ་ནི། སྡིག་སྨད་བསྐྲད་ཕྱིར་འགྱེད་ནན་ཏུར་བྱས་པའི་གང་ཟག་རྣམས་ཀྱིས་ཁྱད་པར་ཅན་གྱི་སྤྱོད་པ་སྤོང་ཞིང་། འགྲོགས་ཤེས་དགེ་སློང་ལ་བརྟེན་ནས་གནས་པར་བྱའོ། །ཁྱད་པར་བསྐྲད་པ་ནན་ཏུར་བྱས་པའི་གང་ཟག་གིས་ནི་གང་དུ་ཁྱིམ་པ་སུན་ཕྱུང་བའི་གནས་ཉེ་འཁོར་དང་བཅས་པ་ཉིད་དུ་མི་འདུག་པར་བསླབ་པར་བྱའོ། །དྲུག་པ་གྲོལ་རྒྱུ་ལ་ཐུན་མོང་བ་དང་། བྱེ་བྲག་པ་དང་། ཞར་ལ་བཟོད་པར་གསོལ་བའི་ཚུལ་དང་གསུམ། དང་པོ་ནི། བཟོད་པར་གསོལ་བ་དང་། དགྲ་བཅོམ་པ་ཐོབ་པ་གཉིས་ཏེ། དེ་ཡང་ཁྱིམ་སུན་འབྱིན་པའི་གང་ཟག་དེས་ཁྱིམ་པ་དེ་ཉིད་ལ་བཟོད་གསོལ་བྱས་པས། དེ་ཉིད་ལས་གྲོལ་བ་ཡིན་གྱི། ལས་ཀྱིས་བཟོད་པ་གསོལ་བ་ལ་ལྟོས་པ་ནི་མ་ཡིན་ཏེ། ཊཱི་ཀར་ཁྱིམ་པས་བཟོད་པ་དེ་ནི་བཟོད་པ་ཡིན་ཞེས་གསུངས་པའི་ཕྱིར། གཉིས་པ་བྱེ་བྲག་གི་གྲོལ་རྒྱུ་ནི། གསོ་སྦྱོང་གཞག་པ་དང་། དགག་དབྱེ་གཞག་པའི་ནན་ཏུར་ནི། གང་གིས་འཇོག་པར་བྱེད་པའི་དགེ་འདུན་ནམ། དེས་བསྐོས་པའི་དགེ་སློང་དང་ལྷན་ཅིག་ཏུ་གསོ་སྦྱོང་དང་། དགག་དབྱེ་བྱས་ན་དེ་ལས་གྲོལ་བ་ཉིད་དུ་འགྱུར་རོ། །བསྡིག་སྨད་བསྐྲད་ཕྱིར་འགྱེད་པ་རྣམས་ནི་ཕྱིར་བཅོས་བྱས་པའི་སྟོབས་ཀྱིས་ཀྱང་གྲོལ་བ་ཉིད་དུ་འགྱུར་རོ། །ཁ་ཅིག་གནས་དབྱུང་བྱས་པའི་གང་ཟག་ལ་ནན་ཏུར་གཞན་བྱས་ན་ཡང་གྲོལ་བར་འགྱུར་རོ་ཞེས་པ་མི་འཐད་དེ་གནས་དབྱུང་དེ་ཆད་ལས་ཀྱི་མཐའ་ཡིན་པས་དེའི་སྟེང་དུ་ནན་ཏུར་གཉིས་པ་མི་འཆགས་པའི་ཕྱིར། གསུམ་པ་ཞར་ལ་བཟོད་པར་གསོལ་ཚུལ་ལ་དགོས་དོན་དང་། བསྡུས་དོན་གཉིས་ལས། དང་པོ་ནི། བྱེད་པ་པོ་ཆད་ལས་ལས་གྲོལ་བ་དང་། རང་ཉིད་ཀྱིས་སངས་རྒྱས་ཀྱི་བསྟན་པ་སྡུད་པའི་དགོས་པ་ཡོད་དོ། །གཉིས་པ་ལ་གསུམ་སྟེ། ཡུལ་གང་ལས། རྟེན་གང་གིས། ཆོ་ག་གང་གིས་བཟོད་པ་བླང་བའོ། །དང་པོ་ནི། ལོག་པ་སྤངས་ཤིང་ཡང་དག་པའི་བསམ་པ་དང་ལྡན་པ་ཞིག་དགོས་ཏེ། གཤེ་བ་ཞེས་སོགས་གསུངས་པའི་ཕྱིར། ལོག་པའི་རྟེན་སྤངས་ཤིང་ཡང་དག་པའི་རྟེན་ལ་བརྟེན་པ་ཞིག་དགོས་ཏེ། བླའི་གྲྭ་ཞེས་སོགས་གསུངས་པའི་ཕྱིར་རབ་བྱུང་གི་རྟགས་དང་ལྡན་ཞིང་ཁྱིམ་པའི་རྟགས་དང་མི་ལྡན་པ་ཞིག་དགོས་ཏེ། ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཅན་ལ་མི་བརྟེན་ཞེས་གསུངས་པའི་ཕྱིར། སྤང་བྱ་རྣམས་སྤོང་ཞིང་བླང་བྱ་ལེན་པ་ཞིག་དགོས་ཏེ། ཆོས་མ་ཡིན་པ་དང་། དགེ་སློང་གི་བསླབ་པ་དག་ལ་མི་སློབ་པར་མི་བྱེད་ཅེས་འབྱུང་བའི་ཕྱིར། དམའ་དབབ་པའི་ཚུལ་ཞིག་དགོས་པ་ཡིན་ཏེ། སྐྲ་འགྲེང་བར་གྱུར་པ་དང་ཞེས་སོགས་འབྱུང་བའི་ཕྱིར། ང་རྒྱལ་དང་གྱང་གྱིང་སྤངས་པ་ཞིག་དགོས་ཏེ། དགེ་འདུན་ལ་སྤུ་བསྙོལ་བར་བྱེད་པ་ཞེས་འབྱུང་བའི་ཕྱིར། ལུས་ངག་ཡིད་གསུམ་གུས་པས་འཇུག་པ་ཞིག་དགོས་ཏེ། མཚུངས་པ་ཉེ་བར་སྟོན་པ་ཞེས་འབྱུང་བའི་ཕྱིར། ནན་ཏུར་གྱི་རྒྱུ་ལས་ལོག་པ་ཞིག་དགོས་ཏེ། རྒྱུ་ལས་བཟློག་པ་ཞེས་འབྱུང་བའི་ཕྱིར། གསོལ་བ་ལན་གསུམ་གྱི་བར་དུ་འདེབས་པ་ཞིག་དགོས་ཏེ། བཟོད་པར་གསོལ་བའོ་ཞེས་འབྱུང་བའི་ཕྱིར། ཚོགས་ལོངས་མིན་པ་ཞིག་དགོས་ཏེ། ཚོགས་ཀྱིས་མ་ཡིན་ཞེས་འབྱུང་བའི་ཕྱིར། ནན་ཏུར་བྱས་པ་ཞིག་དགོས་ཏེ། དེ་མེད་ན་གཞི་མེད་པར་འགྱུར་བའི་ཕྱིར། གཉིས་པ་རྟེན་གང་གིས་བླང་བ་ནི། བཟོད་པ་ལེན་དགོས་དང་ལྡན་ཞིང་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ནན་ཏུར་བྱེད་པའི་དགེ་འདུན་ནམ་དེས་བསྐོས་པའི་དགེ་སློང་གིས་བླང་ངོ་། །གསུམ་པ་ཆོ་ག་གང་གིས་བླང་བའི་ཚུལ་ནི། སྦྱོར་དངོས་རྗེས་གསུམ་རིམ་པ་ལྟར་གསོལ་བ་ལན་གསུམ་འདེབས་པ། གསོལ་བཞིའི་ལས་བྱ་བ། ཐབས་ལེགས་བརྗོད་པའོ། །གཉིས་པ་རང་སྤྲོ་བ་བཤགས་པ་ལ་སོགས་པའི་སྒོ་ནས་ཕྱིར་བཅོས་པའི་ཚུལ་ལ། དགོས་དོན་དང་བསྡུས་དོན་གཉིས་ལས། དང་པོ་ནི། ལྟུང་བ་དག་པར་འགྱུར་བ་སྟེ། མིང་དང་རིགས་དང་ལྡན་པར་བརྗོད་ན་ལྟུང་བ་ལས་ལྡང་ངོ་ཞེས་དང་། སོ་ཐར་ལས་ཀྱང་མཐོལ་ན་བདེ་བ་ལ་རེག་པར་གནས་པར་འགྱུར་ཞེས་དང་། བམ་ལྔ་ལས་མཐོལ་ཞིང་བཤགས་ན་ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་ཅིང་། མངོན་མཐོ་དང་ངེས་པར་ལེགས་པའི་བདེ་བ་ཡང་ཉམས་སུ་མྱོང་བར་འགྱུར་བའི་ཕྱིར་རོ་ཞེས་གསུངས་པའི་ཕྱིར། དག་པའི་ཚུལ་ཡང་འགའ་ཞིག་ཕྱིར་བཅོས་བྱས་པས་ལྟུང་བའི་ངོ་བོ་མི་འདག་སྟེ། སྒོམ་སྤང་ཡིན་པའི་ཕྱིར་དང་། ལུང་ལས་ངག་སྨྲས་ཀྱིས་ལྟུང་བ་ཕྱིར་བཅོས་བྱས་ཀྱང་གཏུན་ལྟ་བུའི་སེམས་ཅན་དམྱལ་བར་སྐྱེ་བར་གསུངས་པའི་ཕྱིར་དང་། ངག་སྨྲས་ཀྱིས་ཕྱིར་བཅོས་བྱས་ཀྱང་སྐྱེ་བ་ལྔ་བརྒྱར་བ་གླང་དུ་སྐྱེ་བར་གསུངས་པའི་ཕྱིར་དང་། ཕྱིར་བཅོས་བྱས་པ་དགོས་པ་མེད་པ་ཡང་མིན་ཏེ། འཕེལ་བ་རྒྱུན་གཅོད་པའི་དགོས་པ་ཡོད་པའི་ཕྱིར་ཞེས་གསུངས་པ་ཡང་མི་འཐད་དེ། ལྟུང་བའི་འཕེལ་བ་རྒྱུན་གཅོད་པ་ཙམ་གྱི་ཕྱིར་དུ་ཕྱིར་བཅོས་བྱེད་པ་མི་འཐད་དེ། མཐོལ་བ་བྱས་པས་ཀྱང་འཕེལ་བ་རྒྱུན་གཅོད་ནུས་པའི་ཕྱིར། དེས་ན་ལྟུང་བ་ཕྱིར་བཅོས་བྱས་པས་ལྟུང་བ་འདག་པ་ཡིན་ཏེ། ཕྱིར་བཅོས་མ་བྱས་ན་ངན་འགྲོར་སྐྱེ་བར་གསུངས་པའི་ཕྱིར། ཕྱིར་བཅོས་བྱས་ན་བདེ་འགྲོར་སྐྱེ་བར་གསུངས་པའི་ཕྱིར། ཡང་ཁ་ཅིག་ལྟུང་བ་ཕྱིར་བཅོས་བྱས་པས་མངོན་གྱུར་བྱེད་པ་དང་བཅས་པ་འདག་ཅིང་། བག་ཆགས་ས་བོན་དང་བཅས་པ་མི་འདག་སྟེ། གདུག་པ་རྣམས་སེལ་སྨན་འདི་ཡིན། །ཞེས་པའི་བམ་ལྔར་གདུག་པ་ནི་ལྟུང་བ་དེ་སྦྲུལ་དང་འདྲ་བ་དེ་སེལ་བའི་སྨན་ཞེས་རྣམ་པར་གསོན་པ་སྟེ་ཀུན་ཏུ་གཅོད་པ་སེལ་བའོ། །ཞེས་བཤད་པའི་ཕྱིར་ཞེས་དང་། ཁ་ཅིག་ལས་མྱོང་ངེས་མ་ཡིན་པའི་སྡིག་པ་དང་ངོ་བོ་གཅིག་ཏུ་གྱུར་པའི་ལྟུང་བ་རྣམས་ནི་མངོན་གྱུར་བྱེད་པ་དང་བཅས་པ་འདག་ཅིང་། ལས་མྱོང་ངེས་དང་ངོ་བོ་གཅིག་ཏུ་གྱུར་པའི་ལྟུང་བ་རྣམས་ནི་མངོན་གྱུར་པ་མགོ་གནོན་པ་ཙམ་ཡིན་གྱི། གཏན་དག་པ་ནི་མ་ཡིན་ཏེ། གཞན་དུ་ན་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་ལྟུང་བ་སྦོམ་པོ་ཕྱིར་བཅོས་བྱས་པ་ན་དེའི་མཚམས་མེད་ཀྱང་དག་པར་ཐལ་བའི་ཕྱིར། ཞེས་གསུང་བ་ཡང་མི་འཐད་དེ་སྡིག་ལྟུང་ངོ་བོ་གཅིག་མ་ཡིན་པའི་ཕྱིར་དང་། ལུང་ལས་བཤད་པ་ལྟར་གྱི་ཕྱིར་བཅོས་བྱས་ཀྱང་ལྟུང་བ་དག་པར་མ་ངེས་ན། ལུང་ལ་ཡིད་བརྟན་མི་རུང་བར་འགྱུར་བས་སོ། །དེས་ན་ལྟུང་བ་ནི་ཇི་ལྟར་བཤད་པ་ལྟར་གྱི་ཕྱིར་བཅོས་བྱས་ན་འདག་ལ། ལྟུང་བ་དེའི་སྟོབས་ཀྱིས་བཞག་པའི་སྡིག་པ་ནི་འདག་པར་མ་ངེས་ཏེ། དག་བྱེད་ཀྱི་རྒྱུ་དེ་ལ་མིང་རིགས་བརྗོད་པའི་སྟོབས་ཀྱིས་དག་པ། མཐར་བཙལ་བས་རྐྱེན་མ་འབྱོར་བས་དག་པ། མཚན་གྱུར་པས་དག་པ། དགྲ་བཅོམ་པ་ཐོབ་པས་དག་པ། སྟོང་ཉིད་བསྒོམས་པས་དག་པ་རྣམས་སུ་ཡོད་པའི་ཕྱིར། དེ་ལས་དང་པོ་གཉིས་དག་བྱེད་མཚན་ཉིད་པ་ཡིན་ཏེ། མིང་རིགས་བརྗོད་པས་ལྡང་ཞེས་དང་། མཐར་བཙལ་བས་རྐྱེན་མ་འབྱོར་བ་ཞེས་སོགས་གསུངས་པའི་ཕྱིར། མཚན་གྱུར་པས་ལྟུང་བ་དག་པར་གསུངས་པ་ནི། མངོན་གྱུར་བྱེད་ལས་ཙམ་མེད་པ་ལ་དགོངས་ནས་ལྟུང་བ་དག་ཅེས་གསུངས་པ་ཡིན་གྱི། ལྟུང་བ་དག་པ་མཚན་ཉིད་པ་མ་ཡིན་ཏེ། ཐུན་མོང་མ་ཡིན་པའི་ལྟུང་བ་བྱུང་བ་མཚན་གྱུར་པ་དེ་ཡང་མཚན་གྱུར་པ་ན་ལྟུང་བ་དེ་སོ་ན་གནས་པར་གསུངས་པའི་ཕྱིར། དགྲ་བཅོམ་པ་ཐོབ་པ་ན་ལྟུང་བ་དག་པར་གསུངས་པ་ནི། ཁ་ཅིག་དག་བྱེད་ཀྱི་རྒྱུ་ཙམ་ཡིན་ཟེར་བ་ནི་མི་རིགས་ཏེ། ལྟུང་བ་མ་དག་པར་དགྲ་བཅོམ་ཐོབ་པ་མི་སྲིད་པའི་ཕྱིར། དེས་ན་དག་པའི་ངོ་བོ་ཡིན་ནོ། །སྟོང་ཉིད་བསྒོམས་པས་དག་པ་ནི། མདོ་སྡེ་རྒྱན་ལས། ལྟུང་དང་འབྱུང་དང་ལྡང་བ་དང་། །ཞེས་པའི་འགྲེལ་པར་ཆོས་ཀྱི་སྡོམ་ལ་ཡང་དག་པར་ཇི་ལྟ་བ་བཞིན་སོ་སོར་རྟོག་པས་ལྟུང་བ་ཕྲ་མོ་ལས་ལྡང་བར་གསུངས་པ་ལྟ་བུའོ། །གཉིས་པ་བསྡུས་པའི་དོན་ལ། བསམ་པ་དག་པས་དང་། སྦྱོར་བ་དག་པས་ཕྱིར་བཅོས་གཉིས་ལས། དང་པོ་ནི། སྔར་བྱས་པ་ལ་འགྱོད་སེམས། ཕྱིན་ཆད་སྡོམ་སེམས། ཕྱིར་བཅོས་འདོད། ངེས་འབྱུང་གི་བསམ་པ་སྟེ་བཞི་དང་ལྡན་པའོ། །དང་པོ་གཉིས་དགོས་ཏེ། ལུང་ལས། ཉེས་པ་མཐོང་སྡོམ་འདྲི་བར་གསུངས་པའི་ཕྱིར། ཕྱིར་བཅོས་འདོད་དགོས་ཏེ། བཞད་གད་ཀྱི་དངོས་པོས་ནི་གང་གི་ཡང་མི་འགྱུར་རོ་ཞེས་གསུངས་པའི་ཕྱིར། གཞན་ཡང་དེ་གཉིས་ངེས་པར་དགོས་ཏེ། ཊཱི་ཀར་སྡོམ་པ་མེད་ན་བཤགས་པ་ཅི་ཡང་མི་འགྱུར་ཏེ། གཞན་དུ་ན་བརྫུན་འབའ་ཞིག་ཏུ་འགྱུར་རོ་ཞེས་གསུངས་ཞིང་། ཕྱིར་བཅོས་འདོད་མེད་ན་ཕྱིར་བཅོས་ཀྱི་ཆོ་ག་མི་འཆགས་པའི་ཕྱིར། ངེས་འབྱུང་གི་བསམ་པ་དགོས་ཏེ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་ཞེས་གསུངས་པའི་ཕྱིར། གཉིས་པ་སྦྱོར་བ་དག་པས་ཕྱིར་བཅོས་པའི་ཐབས་ལ་གཉིས་ཏེ། འཆབ་ཉེས་མི་འབྱུང་བར་བྱ་བའི་ཕྱིར་མཐོལ་བས་ཕྱིར་བཅོས་པ་དང་། ཉེས་པ་དངོས་ཕྱིར་བཅོས་པའི་ཚུལ་ལོ། །དང་པོ་ལ་དགོས་དོན་དང་བསྡུས་དོན་གཉིས། དང་པོ་ནི། འཆབ་ཉེས་མ་བྱུང་བ་རྣམས་མི་འབྱུང་བར་བྱ་བའི་ཕྱིར་དང་། བྱུང་བ་རྣམས་རྒྱུན་གཅོད་པའི་ཆེད་དུ་ཡིན་ཏེ། གཞི་འགྲེལ་ལས། བཅབས་ན་ཉེས་པ་ཆར་བཞིན་འབབ། །མ་བཅབས་ཆར་བཞིན་དེ་མི་འབབ། །ཅེས་སོ། །གཉིས་པ་བསྡུས་དོན་ལ། ཡུལ་གང་ལ། རྟེན་གང་གིས། དངོས་པོ་གང་། ཆོ་ག་གང་གིས་མཐོལ་བ་དང་བཞི་ལས་དང་པོ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ལུས་ཐ་མལ་པར་གནས་པ། ཤེས་པ་རང་བཞིན་དུ་གནས་པ། མཚམས་ཀྱི་ནང་ན་གནས་པ་སྟེ་ཆོས་བདུན་ལྡན་ལའོ། །གཉིས་པ་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་ནས་ཕྱུང་བ་མ་ཡིན་པ་དེ་བཞི་ལྡན་གྱིས་སོ། །གསུམ་པ་ནི། བསྡམ་བྱའི་ཉེས་བྱས་ལས་གཞན་པའི་ལྟུང་བ་ཡིན་པ། རང་རྒྱུད་ལ་བྱུང་བ། ངོ་བོ་དྲན་པའམ་ཡིད་གཉིས་ཟ་བ་ཡིན་པ། སྔར་བཤགས་ཟིན་མ་ཡིན་པའོ། །བཞི་པ་ལ་སྦྱོར་དངོས་མཇུག་གསུམ་ལས། དང་པོ་ནི། མཆིལ་ལྷྭམ་གཉིས་ཕུད། ཕྱག་འཚལ་བའི་འོས་ཡིན་ན་ཕྱག་འཚལ། ཐལ་མོ་སྦྱར་བ་སོགས་བྱའོ། །གཉིས་པ་ནི། སྔགས་ཚིག་ལན་གསུམ་གྱི་བར་དུ་བརྗོད། གསུམ་པ་ནི། མཐོང་སྡོམ་དྲི་བ་སོགས་བྱའོ། །བསྒོ་གྱུར་དངོས་གཞིའི་ལྟུང་བ་མཐོལ་བ་ནི། མཚམས་དེར་གཏོགས་པའི་ཐམས་ཅད་ལ་མཐོལ་ལོ། །སོར་བཤགས་ནི། གནས་དེར་འདུས་ཀྱི་དགེ་འདུན་ཐམས་ཅད་ལ་བྱ་ལ་སྔགས་ཚིག་ནི་གཅིག་གིས་ཆོག་གོ །དེ་ཉིད་ལ་འདི་དང་འོག་མ་དང་བཅས་ཏེ། ཞེས་པའི་སྐབས་སུ་བསྙེན་པར་མ་རྫོགས་པའི་མཐོལ་བཤགས་བསྟན་པས། འདི་ལ་གཉིས་ལས་དང་པོ་དགོས་དོན་ནི། ལྟུང་བ་དག་པ་དང་། ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པའོ། །བསྡུས་དོན་ལ་བཞི་ལས་ཡུལ་གང་ལ་མཐོལ་བ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་ལ་སོགས་པའི་ཆོས་བདུན་གྱི་སྟེང་དུ། ཁ་ན་མ་ཐོ་བ་མི་མཐུན་པ་དང་ལྡན་པའི་ཡུལ་ལའོ། །རྟེན་གང་གིས་མཐོལ་བ་ནི། རབ་ཏུ་བྱུང་ཞིང་བསྙེན་པར་མ་རྫོགས་པའི་སྡོམ་པ་གསུམ་པོ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དང་། ལུས་ཐ་མལ་དུ་གནས་པ། དགེ་ཚུལ་བསྙིལ་བ་མ་ཡིན་པས་སོ། །དངོས་པོ་གང་མཐོལ་ན། ཕམ་འདྲའི་ཉེས་བྱས་ལས་གཞན་རང་གི་རྒྱུད་ལ་འབྲེལ་བར་འབྱུང་བ། ངོ་བོ་དྲན་ནམ་ཡིད་གཉིས་ཟ་བ། སྔར་མཐོལ་མ་ཟིན་པའོ། །ཆོ་ག་གང་གིས་མཐོལ་བ་ནི་སྔ་མ་བཞིན་ནོ། །གཞན་ལ་ནི་དེ་དང་བཅས་པའི་བཤགས་པས་སོ། །ཞེས་པའི་སྐབས་སུ་དགེ་སློང་གི་ལྟུང་བ་དངོས་དང་། འཆབ་ཉེས་ཕྱིར་བཅོས་པའི་ཐབས་གཉིས་བསྟན་པ་ལ། འཆབ་ཉེས་ཕྱིར་བཅོས་པའི་ཚུལ་ལ། འཆབ་པ་མི་འབྱུང་བར་བྱ་བའི་ཕྱིར་མཐོལ་བ་དང་། འཆབ་ཉེས་དངོས་ཕྱིར་བཅོས་པའི་ཐབས་གཉིས་ལས། དང་པོ་ལ་གཉིས་ལས་དགོས་དོན་ནི་འཆབ་ཉེས་མི་འབྱུང་བར་བྱ་བའི་ཕྱིར་དང་། བཅབས་ཉེས་དངོས་ཕྱིར་བཅོས་པའི་ཐབས་སྣོད་རུང་དུ་སྒྲུབ་པའི་ཆེད་ཡིན་ནོ། །བསྡུས་དོན་ལ་ཡང་བཞི་ལས། གང་ལ་མཐོལ་བའི་ཡུལ་ནི། བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་ཆོས་བདུན་ལྡན་གྱི་ཡུལ་ལའོ། །རྟེན་གང་གིས་མཐོལ་བ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་དང་ལྡན་པ། བསམ་པ་རང་བཞིན་དང་། ལུས་ཐ་མལ་དུ་གནས་པ། གནས་དབྱུང་མ་ཡིན་པ་དེས་སོ། །གང་མཐོལ་བའི་དངོས་པོ་ནི། བསྡམ་བྱའི་ཉེས་བྱས་ལས་གཞན་ཡིན་པ། རང་རྒྱུད་ལ་བྱུང་བ། དྲན་ནམ་ཡིད་གཉིས་ཟ་བ། སྔར་མཐོལ་མ་ཟིན་པའོ། །ཆོ་ག་གང་གིས་མཐོལ་བ་ནི་སྔར་བཞིན་ནོ། །གཉིས་པ་བཅབས་ཉེས་དངོས་ཕྱིར་བཅོས་པའི་ཚུལ་ལ་གཉིས་ལས། དགོས་དོན་ནི་བཅབས་ཉེས་དག་པ་དང་། ལྟུང་བ་དངོས་ཕྱིར་བཅོས་པའི་སྣོད་རུང་དུ་བསྒྲུབ་པའི་ཆེད་ཡིན་ནོ། །བསྡུས་དོན་ལ་བཞི། ཡུལ་གང་ལ་བཤགས་པ་ནི། བསྙེན་རྫོགས་ཀྱི་སྡོམ་པ་རྣམ་པར་དག་པ་ལ་སོགས་པའི་ཆོས་བདུན་ལྡན་གྱི་སྟེང་དུ་ལྟུང་བ་ནང་རིགས་མི་མཐུན་པའི་ཡུལ་ལ་བཤགས་དགོས་ཏེ་ཁ་ན་མ་ཐོ་བ་མི་མཐུན་པའོ། །སྡེ་ཚན་ལས་ཞེས་འབྱུང་བའི་ཕྱིར། རྟེན་གང་གིས་བཤགས་ན། བསྙེན་རྫོགས་གསོ་རུང་སོགས་ཆོས་བདུན་དང་ལྡན་པ། དེའི་སྟེང་དུ་གནས་ནས་ཕྱུང་བ་མ་ཡིན་པ་དགོས་ཏེ། གནས་དབྱུང་བྱས་པའི་བཤགས་ཡུལ་མེད་པའི་ཕྱིར། ངོ་བོ་གང་བཤགས་ན་བསྡམ་བྱའི་ཉེས་བྱས་དང་། ཕམ་ལྷག་བཅབས་པའི་ཉེས་པ་ལས་གཞན་ཡིན་པ། ངོ་བོ་དྲན་རྣམ་ཡིད་གཉིས་ཟ་བ། བཤགས་ཟིན་མ་ཡིན་པ་དེ་བསྡམ་བྱའི་ཉེས་བྱས་བཅབས་པའི་ཉེས་པ་ནི་བསྡམས་པས་འདག ཕམ་པ་བཅབས་པའི་ཉེས་པ་ཕྱིར་བཅོས་སུ་མེད། ལྷག་མའི་བཅབས་ཉེས་འདག་པ་ལ་སྤོ་བ་སྤྱད་དགོས་པའི་ཕྱིར། ཆོ་ག་གང་གིས་བཤགས་པ་ནི། སྦྱོར་དངོས་མཇུག་གསུམ་ནི་སྔ་མ་བཞིན་ནོ། །མི་འདྲ་བའི་ཁྱད་པར་ནི། ལྟུང་བ་དངོས་དེ་ལ་གཅིག་བྱུང་བ། གཉིས་བྱུང་བ། ཚད་མེད་བྱུང་བ་ཞེས་དང་། བཅབས་པ་དེ་ལ་ཡང་ཞག་གཅིག་བཅབས་པ། གཉིས་བཅབས་པ། གསུམ་ནས་གྲངས་ཤེས་པའི་བར་བཅབས་པ། དཔག་ཏུ་མེད་པ་བཅབས་སོ་ཞེས་བཤགས་སོ། །ལྟུང་བ་གཅིག་ཕྱིར་བཅོས་བྱེད་པའི་ཚེ། ལྟུང་བ་དེ་བྱུང་ནས་ཞག་གཅིག་ལོན་ན་ཞག་གཅིག་བཅབས་ཞེས་པ་དང་། ཟླ་བ་ཕྱེད་ལོན་ན་ཟླ་བ་ཕྱེད་བཅབས་ཞེས་དང་། གྲངས་མི་ཤེས་པའི་བར་དུ་བཅབས་ན་དཔག་ཏུ་མེད་པ་བཅབས་སོ་ཞེས་སོ། །དེ་བཞིན་དུ་གཉིས་བྱུང་བ་དང་། ཚད་མེད་པ་བྱུང་བ་དང་། དཔག་ཏུ་མེད་པ་བྱུང་བ་ལ་ཡང་དེ་བཞིན་དུ་ཤེས་པར་བྱ་སྟེ། བཤགས་པས་འདག་པ་བཅུ་དྲུག་གོ །ཁ་ཅིག་ལྟུང་བ་གཅིག་བྱུང་ན་ལྟུང་བ་བྱུང་ཞེས་པ་དང་། གཉིས་བྱུང་ན་ལྟུང་བ་དག་བྱུང་ཞེས་པ་དང་། གསུམ་བྱུང་ན་ལྟུང་བ་མང་པོ་བྱུང་ཞེས་པ་དང་། བཞི་ནས་གྲངས་ཤེས་པའི་བར་དུ་བྱུང་ན་ཚད་མེད་པ་བྱུང་ཞེས་པ་དང་། གྲངས་མི་ཤེས་པ་བྱུང་ན་ལྟུང་བ་དཔག་ཏུ་མེད་པ་བྱུང་ཞེས་བརྗོད་པར་བྱ་ཞེས་གསུངས་པ་མི་འཐད་དེ། མང་པོ་ལ་ཚད་ཤིན་ཏུ་མང་པོ་ཞེས་གསུངས་ཀྱི། ཚད་ཤིན་ཏུ་མང་པོ་ལས་ལོགས་སུ་མང་པོ་ཞེས་མ་གསུངས་པའི་ཕྱིར། གཉིས་པ་ལྟུང་བ་དངོས་ཀྱི་ཕྱིར་བཅོས་ལ་གཉིས་ལས། དགོས་དོན་ནི། ལྟུང་བ་དག་པར་བྱ་བའི་ཕྱིར་དུའོ། །བསྡུས་དོན་ལ་བཞི་ལས། ཡུལ་ནི་བསྙེན་པར་རྫོགས་པའི་སྡོམ་པ་རྣམ་དག་ལ་སོགས་པ་ཆོས་བདུན་ལྡན་གྱི་སྟེང་དུ་ལྟུང་བ་མི་མཐུན་པ་ལའོ། །དེ་ཡང་མཚམས་ནང་དུ་བཤགས་ན་ཕམ་པར་གཏོགས་པའི་སྦོམ་པོ་ལྕི་བ་ནི་དགེ་སློང་དྲུག་ཡན་ཆད། ཡང་བ་ནི་བཞི་ཡན་ཆད་གུད་དུ་མ་ཆད་པ་དང་། ལྷག་མར་གཏོགས་པའི་སྦོམ་པོ་ལྕི་བ་ནི་དགེ་སློང་ལྔ་ཡན་ཆད་གུད་དུ་མ་ཆད་པ་དེའི་ཡུལ་ལ་བཤགས། མཚམས་ཀྱི་ཕྱི་རོལ་དུ་བཞི་དང་ལྔ་དང་དྲུག་གུད་དུ་བཅད་པའི་ཡུལ་ཉིད་ལ་བཤགས་ཀྱང་རུང་ངོ་། །དེ་ལས་གཞན་པའི་བཤགས་བྱའི་ལྟུང་བ་ཐམས་ཅད་དགེ་སློང་གཅིག་གིས་མདུན་དུ་བཤགས་པས་ཀྱང་འདག་གོ །རྟེན་ནི་བསྙེན་རྫོགས་ཀྱི་སྡོམ་པ་གསོ་རུང་ཡན་ཆད་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་དབྱུང་མ་ཡིན་པའོ། །དངོས་པོ་ནི་སྦོམ་པོ་ལྕི་ཡང་། སྤང་བའི་ལྟུང་བྱེད། ལྟུང་བྱེད་འབའ་ཞིག་པ། སོར་བཤགས། ལྷག་མ་བཅབས་ཉེས་ལས་གཞན་པའི་ཉེས་པ་སོགས་གང་རུང་ཡིན་པ། ངོ་བོ་ཤེས་སམ་དྲན་པར་ནུས་པ། བཤགས་ཟིན་མ་ཡིན་པའོ། །ཆོ་ག་ནི་སྦྱོར་དངོས་མཇུག་གསུམ་ལས། དང་པོ་ནི་སྤང་བའི་ལྟུང་བ་ཕྱིར་བཅོས་པའི་ཚེ་ཞག་གཅིག་སྤང་བྲལ་སྔོན་དུ་གཏང་བ་དང་། ཡུལ་འོས་པ་ལ་ཕྱག་འཚལ། ཙོག་བུར་འདུག ཐལ་མོ་སྦྱར་བ་སོགས་དང་། དངོས་གཞི་སྔགས་ཚིག་ལན་གསུམ་དུ་བརྗོད་པ་སོགས་བྱའོ། །གང་ཟག་ཁྱད་པར་ཅན་ལྔ་པོ་དེའི་ལྷག་མ་ཡང་གཅིག་གི་མདུན་དུ་བཤགས་པས་འདག དེའི་སྤང་ལྟུང་ཡང་ཞག་གཅིག་གི་སྤང་བྲལ་སྔོན་དུ་གཏང་མི་དགོས་ཤིང་། སྦོམ་པོ་ལྕི་ཡང་རྣམས་ཀྱང་གཅིག་གི་མདུན་དུ་བཤགས་པས་འདག སྔགས་ཚིག་ཀྱང་ལྟུང་བ་གཅིག་བྱུང་ངོ་ཞེས་དང་། གཉིས་བྱུང་ན་གཉིས་བྱུང་ངོ་ཞེས་དང་། གསུམ་ནས་གྲངས་ཤེས་པའི་བར་བྱུང་ན་ཚད་མེད་པ་བྱུང་ངོ་ཞེས་བརྗོད་པར་བྱའོ། །དགེ་འདུན་ལྷག་མ་ལ་ནི་དུས་འདི་སྲིད་ཅིག་བཅབས་པ་དང་། མ་བཅབས་པ་གཅིག་ཤེས་པས་ལྷག་མ་དངོས་དང་། བཅབས་ཉེས་ཕྱིར་བཅོས་པའི་ཚུལ་བསྟན་པས། འདི་ལ་གསུམ་སྟེ། ལྷག་མའི་བཅབས་ཉེས་ཕྱིར་བཅོས་པའི་ཚུལ་དང་། འཆབ་ཉེས་མི་འབྱུང་བར་བྱ་བའི་ཕྱིར་མཐོལ་བ། ཉེས་པ་དངོས་ཕྱིར་བཅོས་པའི་ཚུལ་ལོ། །གཉིས་པ་ནི། མཐོལ་བའི་རྣམ་གཞག་སྤྱིར་བསྟན་པ་ཤེས་པར་བྱའོ། །ལྷག་མའི་བཅབས་ཉེས་ཕྱིར་བཅོས་པའི་ཚུལ་ལ་གཉིས་ལས། དགོས་དོན་ནི། བཅབས་ཉེས་དག་པས་ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པར་འགྱུར་བའོ། །བསྡུས་དོན་ལ། སྤོ་བ་ནོད་པའི་ཚུལ་དང་། སྤྱད་པའི་ཚུལ་གཉིས། དང་པོ་ལ་དྲུག་ལས། ཡུལ་གང་ལས་ནོད་པ་ནི། དགེ་སློང་བཞི་ཡན་ཆད་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ཆོ་ག་ཤེས་པ་དང་ལྡན་པའི་ཆོས་བཞི་ཚང་བ་ལའོ། །རྟེན་ནི། ཕམ་པ་མ་བྱུང་བའི་བསྙེན་རྫོགས་ཀྱི་སྡོམ་པ་དང་ལྡན་པ། གཞན་ཕྱོགས་སུ་མ་སོང་བ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ནང་དུ་གནས་པ་ཚོགས་ལོངས་མིན་པ། སྤོ་བ་མནོས་ཤིང་ཆགས་ལ་མ་ཞིག་པ་དང་ལྡན་པ་མ་ཡིན་པ། གནས་དབྱུང་མ་ཡིན་པ་སྟེ། ཆོས་བཅུ་ལྡན་དེས་སོ། །ཁ་ཅིག་ཕམ་པའི་སྡོམ་པ་གསོ་རུང་དང་ལྡན་པ་ཞེས་གསུངས་པ་མི་འཐད་དེ། ལྷག་མ་འཆབ་བཅས་རྒྱུད་ལྡན་གྱི་ཕམ་པ་འཆབ་མེད་བྱུང་བའི་གང་ཟག་དེ་ལ་དང་པོ་ནས་བསླབ་པ་སྦྱིན་པར་བྱའི། སྤོ་བ་སྦྱིན་དགོས་པ་མ་ཡིན་པའི་ཕྱིར། ཁ་ཅིག་གང་ཟག་ཁྱད་པར་ཅན་མ་ཡིན་པ་ཞེས་པའང་མི་རིགས་ཏེ། གང་ཟག་ཁྱད་པར་ཅན་དེས་སྤོ་བ་སྤྱད་མི་དགོས་པར་བསྟན་པ་ཡིན་གྱི། སྤྱོད་དུ་མི་རུང་བ་བསྟན་པ་མིན་པའི་ཕྱིར། ལྟུང་བ་གང་གི་དོན་དུ་ནོད་པ་ནི། ལྷག་མ་བཅབས་པའི་ཉེས་པ་ཡིན་པ། རང་རྒྱུད་ལ་བྱུང་བ། ངོ་ཤེས་ཤིང་དྲན་པར་ནུས་པ། བཤགས་ཟིན་མ་ཡིན་པ་དེའི་དོན་དུ་ནོད་པའོ། །ཡུན་ཇི་སྲིད་ནོད་པ་ནི། ལྷག་མ་ཡུན་ཇི་སྲིད་དུ་སྤྱད་པ་དེ་སྲིད་དུ་ནོད་པར་བྱའོ། །ཆོ་ག་གང་གིས་ནོད་པའི་ཚུལ་ལ་སྦྱོར་དངོས་མཇུག་གསུམ་རིམ་པ་ལྟར། དགེ་འདུན་སྡུད་པ་སོགས་དང་། གསོལ་བཞིའི་ལས་བྱ་བ་དང་། མཇུག་སྡུད་བརྗོད་པ་སོགས་སོ། །སྒྲ་བཤད་ནི། རང་བཞིན་དུ་གནས་པའི་ས་ནས་ས་གཞན་དུ་སྤོ་བར་བྱེད་པ་ན་སྤོ་བ་ཞེས་བྱའོ། །གཉིས་པ་སྤོ་བ་སྤྱོད་པའི་ཚུལ་ལ་དྲུག་སྟེ། ཡུལ་གང་ལ། གནས་གང་དུ། རྟེན་གང་གིས། ལྟུང་བ་གང་གི་དོན་དུ། ཡུན་ཇི་སྲིད་ཅིག ཇི་ལྟར་སྤྱོད་པའི་ཚུལ་ལོ། །དང་པོ་ནི། བསྙེན་རྫོགས་ཀྱི་སྡོམ་པ་རྣམ་དག་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ཀྱི་ནང་ན་གནས་པ་བཞི་ཡན་ཆད་ཀྱི་དགེ་སློང་གི་དགེ་འདུན་དུ་ལོངས་པ། མང་པོའི་ནང་ནས་གུད་དུ་བཅད་པ་མ་ཡིན་པ་དེའི་ཡུལ་ལ་སྤྱོད་པར་བྱའོ། །གནས་གང་དུ་སྤྱོད་པ་ནི་གནས་བརྟན་དང་བཅས་སོ་སོ་ཐར་པའི་མདོ་འདོན་ནུས་པ་དང་བཅས། ཕྱིར་བཅོས་བྱེད་པའི་ཟླ་བོ་མིང་མཐུན་པ་གསུམ་དུ་མ་ལོངས་པ་ཡིན་པ། སྤོ་བ་མནོས་པའི་གནས་གང་ཡིན་པ་དེར་རོ། །རྟེན་ནི་སྤོ་བ་མནོས་པ་ལ་མ་ཞིག་པའི་རྟེན་དེས་སོ། །ལྟུང་བ་གང་གི་དོན་དུ་སྤྱོད་ན། ལྷག་མ་བཅབས་པའི་ཉེས་པ་འདག་པའི་ཕྱིར་དུའོ། །ཡུན་ཇི་སྲིད་དུ་སྤྱོད་ན། ལྷག་མ་ཇི་ཙམ་བཅབས་པ་དེ་ཙམ་ཞིག་སྤྱོད་དོ། །ཚུལ་ཇི་ལྟར་སྤྱོད་ན། ཁྱད་པར་ཅན་གྱི་སྤྱོད་པ་སྤོང་བ་དང་། དམན་སྤྱོད་དང་དུ་ལེན་པ་དང་། སྤོ་བའི་འདས་པ་དང་འབྱུང་འགྱུར་བརྗོད་པ་དང་། འཐབ་ཀྲོལ་ཅན་གྱི་རྐྱེན་དབང་གིས་བཏང་ཞིང་བྲལ་ན་ཡང་བླང་བའི་ཚུལ་དུ་བསླབ་པར་བྱའོ། །ཁྱད་པར་ཅན་གྱི་སྤྱོད་པ་ལ་རང་བཞིན་དུ་གནས་པའི་ཡུལ་ལ། གུས་པའི་སྤྱོད་པ་སྤོང་བ་དང་། ལྷག་པའི་སྤྱོད་པ་དང་། བླ་མའི་གནས་སྤོང་བ་སོགས་པ་ལ་བསླབ་པར་བྱའོ། །གཉིས་པ་ལྷག་མ་དངོས་ཀྱི་ཕྱིར་བཅོས་དབྱུང་བར་བྱ་བ་ལ་གཉིས་ལས། དགོས་དོན་ནི། ལྷག་མ་དངོས་འདག་པ་དང་། དམན་པའི་གནས་ནས་འདོན་པའི་དོན་དུ་ཡིན་ནོ། །བསྡུས་དོན་ལ་བཞི་ལས། ཡུལ་གང་ལ་བྱ་བ་ནི། བསྙེན་རྫོགས་སྡོམ་པ་གསོ་རུང་ཡན་ཆད་དང་ལྡན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། ཆོས་མ་ཡིན་པའི་ཕྱོགས་སུ་མ་སོང་བ། གནས་ནས་མ་ཕྱུང་བ། མཚན་མཐུན་པ། ཚོགས་ལོངས་མ་ཡིན་པ། གསོལ་བ་ལན་གསུམ་དུ་འདེབས་པ་ཡིན་པ། མགུ་བ་གསུམ་ལས་གང་རུང་སྤྱོད་ཟིན་པ་ཡིན་པ་དེ་ལའོ། །དགེ་སློང་མའི་དབྱུང་བ་ལ་ནི་མཚན་མཐུན་པ་ཡན་ལག་དུ་མི་དགོས་ཏེ། ཕ་མ་གཉིས་ཀའི་དགེ་འདུན་གྱིས་དབྱུང་བ་བྱེད་དགོས་པའི་ཕྱིར། རྟེན་གང་གིས་བྱ་ན། དགེ་སློང་ཉི་ཤུའམ་བཞི་བཅུ་ཡན་ཆད་གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་ཀྱི་ཆོ་ག་ཤེས་པ་དེས་སོ། །ལྟུང་བ་གང་གི་དོན་དུ་བྱ་ན། ལྷག་མ་ཡིན་པ། ངོ་བོ་དྲན་ནམ་ཡིད་གཉིས་ཟ་བ། རང་རྒྱུད་ལ་འབྲེལ་པར་འབྱུང་བ། ལྷག་མའི་བཅབས་ཉེས་དང་མི་ལྡན་པ་དེའི་དོན་དུའོ། །ཆོ་ག་སྦྱོར་དངོས་རྗེས་གསུམ་ལས། དང་པོ་སྔར་དང་འདྲ། དངོས་གཞིའི་སྐབས་སུ་གསོལ་བ་དང་བཞིའི་ལས་བྱ་བ་དང་། གསོལ་བ་དང་བརྗོད་པ་དང་པོའི་བར་དུ་སྨད་པར་བྱ། བརྗོད་པ་གསུམ་པ་བྱས་མ་ཐག་ཏུ་ཟེངས་བསྟོད་པར་བྱའོ། །མཇུག་ནི། མཇུག་སྡུད་བྱ་བའོ། །ལྷུང་བཟེད་ཁ་དབུབ་དང་སྲང་བ་གཉིས་ལས། དང་པོ་ལ། དགོས་དོན་ནི། ཉེས་སྤྱོད་ལ་མ་ཞུགས་པ་མི་འཇུག་པའི་ཕྱིར་དང་། ཞུགས་ཟིན་བཟློག་པའི་ཕྱིར་དུའོ། །བསྡུས་དོན་ལ་བཞི་ལས། ཡུལ་གང་ལ་བྱ་བ་ནི། ཁྱིམ་པ་ཡིན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། རབ་ཏུ་བྱུང་བ་ལ་སྤྱོ་བ་དང་གཤེ་བ་དང་། སྐུར་པ་འདེབས་པར་བྱེད་པ་ཡིན་པ། རང་ཕྱོགས་དང་མཐུན་པ། ཚོགས་ལོངས་མ་ཡིན་པ། སྔར་ལྷུང་བཟེད་ཁ་དབུབ་བྱས་པ་དང་མ་འབྲེལ་བ་ཡིན་པ་དེ་ལའོ། །རྟེན་གང་གིས་བྱ་ན། གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་བྱེད་པའི་ཆོ་ག་ཤེས་པ་སྟེ་མཚན་ཉིད་བཞི་ལྡན་གྱིས་སོ། །ཆོ་ག་གང་གིས་བྱ་བ་སྦྱོར་དངོས་མཇུག་གསུམ་ལས། དང་པོ་ནི་དགེ་འདུན་བསྡུ་བ་དང་། སྟན་བཤམ་པ་སོགས་བྱ། གཉིས་པ་ནི་གསོལ་བ་འབའ་ཞིག་པའི་ལས་ཀྱིས་བྱའོ། །མཇུག་ནི། དེ་ལྟར་བྱས་པ་དེ་གཞན་ལ་ཡང་གོ་བར་བྱའོ། །བསླབ་བྱ་ནི། ཁྱིམ་དེར་མི་འགྲོ་བ་ལ་སོགས་པའོ། །ལྷུང་བཟེད་ཁ་སྲང་བ་ལ་གཉིས་ཏེ། དང་པོ་དགོས་དོན་ནི། རབ་ཏུ་བྱུང་བ་རྣམས་འཚོ་བས་མི་ཕོངས་པར་བྱ་བའི་ཕྱིར་དང་། ཁྱིམ་པ་དེ་ཡང་བསོད་ནམས་འཕེལ་བར་བྱ་བའི་དོན་དུ་ཡིན་ནོ། །བསྡུས་དོན་ལ་གསུམ་ལས། ཡུལ་ནི་ལྷུང་བཟེད་ཁ་བུབ་བྱས་པ་དང་འབྲེལ་བ་ཡིན་པ། གང་ལ་མི་རིགས་པ་བསྒྲུབ་པའི་ཡུལ་ལ་བཟོད་པར་གསོལ་ཟིན་ཅིང་། དགེ་འདུན་ལ་ཡང་བཟོད་པའི་ཕྱིར་གསོལ་བ་ལན་གསུམ་འདེབས་པ་དེ་ལའོ། །རྟེན་ནི། སྔར་གྱི་སྟེང་དུ་ལྷུང་བཟེད་ཁ་འབུབ་བྱེད་པ་པོའི་དགེ་འདུན་ནམ། དེས་སྐོས་པའི་དགེ་སློང་ངོ་། །ཆོ་ག་སྦྱོར་དངོས་མཇུག་གསུམ་ལས། དང་པོ་གཉིས་སྔར་བཞིན་མཇུག་ཁས་བླངས་པ་དགེ་འདུན་གཞན་ལ་གོ་བར་བྱའོ། །བཅབས་པའི་སེམས་མ་སྐྱེས་ན་མཐའ་ལས་ལྡང་ཞེས་པའི་སྐབས་སུ། བསླབ་པ་སྦྱིན་པའི་རང་བཞིན། སྦྱིན་པའི་ཚུལ། སྤྱོད་པའི་ཚུལ་དང་གསུམ་ལས། དང་པོ་ལ། མདོ་སྡེ་པ་ལྟར་ན་འཆབ་སེམས་མ་གཏོགས་པའི་ཕམ་པའི་ཡན་ལག་ཀུན་ཚང་གིས་བསྐྱེད་པའི་ཕམ་པར་གཏོགས་པའི་སྦོམ་པོ་ལྕི་བ་འདག་པའི་ཕྱིར་དུ་ཁྱད་པར་ཅན་གྱི་སྤྱོད་པ་སྤོང་དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པ་ཉིད་དོ་ཞེས་འདོད། སྔ་རབས་པ་རྣམས་ནི། ཕམ་པ་བྱུང་བའི་ཚེ་སྡོམ་པ་གཏོང་བས་ཡང་སྡོམ་པ་བླངས་ལ་སྔར་གྱི་སྡོམ་པ་གཏོང་བྱེད་ཀྱི་ཕམ་པ་འདག་ཕྱིར་དུ་ཁྱད་པར་ཅན་གྱི་སྤྱོད་པ་སྤོང་། དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པར་བྱའོ་ཞེས་བཞེད། བྱེ་བྲག་ཏུ་སྨྲ་བའི་ལུགས་ལ་ཕམ་པ་འཆབ་བཅས་དང་། འཆབ་མེད་གང་བྱུང་ཡང་སྡོམ་པ་མི་གཏོང་ལ། འཆབ་བཅས་བྱུང་ན་ཕྱིར་བཅོས་སུ་མེད་ཅིང་ཕམ་པ་འཆབ་མེད་བྱུང་བ་ལ་ཁྱད་པར་ཅན་གྱི་སྤྱོད་པ་སྤོང་། དམན་སྤྱོད་དང་དུ་ལེན་པའི་བར་མ་དགེ་བའི་རང་བཞིན་སྦྱིན་པར་བྱའོ། །སྦྱིན་པའི་ཚུལ་ལ་དྲུག་ལས། ཡུལ་ནི་བསྙེན་པར་རྫོགས་པའི་སྡོམ་པ་གསོ་རུང་ཡན་ཆད་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། བསམ་པ་རང་བཞིན་དུ་གནས་པ། ལུས་ཐ་མལ་དུ་གནས་པ། མཚམས་ནང་ན་གནས་པ། ཚོགས་ལོངས་མ་ཡིན་པ། གནས་དབྱུང་མ་ཡིན་པ། ལྟུང་བ་དེ་དག་ཕྱིར་བསླབ་པ་དེ་བྱིན་པ་དང་མ་འབྲེལ་བ་སྟེ་བཅུ་ལྡན་དེ་ལའོ། །རྟེན་ནི། གྲངས་ཚང་བ། ཁ་སྐོང་བར་འོས་པ། མི་མཐུན་པ་གཉིས་དང་བྲལ་བ། ལས་ཀྱི་ཆོ་ག་ཤེས་པ་སྟེ་བཞི་ལྡན་དེས་སོ། །ལྟུང་བ་གང་གི་དོན་དུ་བྱ་བ་ནི། ཕམ་པ་འཆབ་མེད་དམ་ཕམ་འདྲའི་ཉེས་བྱས་འཆབ་མེད་གང་རུང་ཡིན་པ། བདག་རྒྱུད་ལ་འབྲེལ་བར་འབྱུང་བ། ངོ་བོ་དྲན་ནམ་ཡིད་གཉིས་ཟ་བ་དེའི་དོན་དུའོ། །ཡུན་ནི་ཇི་སྲིད་འཚོའི་བར་དུ་སྦྱིན་ནོ། །ཆོ་ག་ནི་སྦྱོར་དངོས་མཇུག་གསུམ་གྱི། དང་པོ་ནི། གཎྜི་བརྡུང་། སྟན་བཤམ་པར་བྱ་བ་དང་། གསོལ་བ་ལན་གསུམ་གྱི་བར་དུ་འདེབས། དངོས་གཞི་ནི་གསོལ་བ་དང་བཞིའི་ལས་བྱའོ། །མཇུག་ནི། མཇུག་སྡུད་བརྗོད་པ་དང་། ཁྱད་པར་ཅན་གྱི་སྤྱོད་པ་སྤང་བ་སོགས་ཀྱི་བསླབ་བྱ་བརྗོད་པར་བྱའོ། །གསུམ་པ་ནི། ཁྱད་པར་ཅན་གྱི་སྤྱོད་པ་སྤོང་བ་སོགས་སོ། །ས་གཞན་ན་གནས་པའི་སྤྱིའི་དོན་ལ་དྲུག་སྟེ། དབྱེ་བ། བསྡུ་བ། མཚན་ཉིད། བསླབ་བྱ། སྒྲ་བཤད་པ། གྲོལ་རྒྱུའོ། །དང་པོ་ལ་དབྱེ་གཞི་དང་། དབྱེ་ངོ་གཉིས། དང་པོ་ནི། ལུང་ལས་གསུངས་པའི་ས་གཞན་ན་གནས་པ་ཙམ་མོ། །གཉིས་པ་ལ་རགས་པའི་དབྱེ་བ་དང་། ཞིབ་ཏུ་དབྱེ་བ་གཉིས། དང་པོ་ལ་སྤོ་སྤྱོད་གསུམ། མགུ་སྤྱོད་གསུམ། སྤོ་ལྡན་གསུམ། མགུ་ལྡན་གསུམ། བསྡིག་པ་སོགས་བཞི། གནས་དབྱུང་བདུན། བསླབ་པ་སྦྱིན་པ། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སྟེ་ཉི་ཤུ་རྩ་ལྔའོ། །ཁ་ཅིག་དགེ་ཚུལ་བསྙིལ་བ་དང་རྩ་དྲུག་ཏུ་འདོད་དོ། །ཞིབ་ཏུ་དབྱེ་བ་ལ་ཁ་ཅིག་སྤོ་སྤྱོད་གསུམ། མགུ་སྤྱོད་གསུམ། སྤོ་བ་སྤྱད་ནས་མགུ་བ་སྤྱོད་པ། གཞི་མགུ་སྤྱོད་པ། ཡང་མགུ་སྤྱོད་པ་གསུམ། གཞི་སྤོ་སྤྱད་ནས་མགུ་བ་སྤྱོད་པ་སོགས་གསུམ། གླེང་བྱེད་དེས་བསམ་པར་འོས་པ་རྣམས་བསམ། བརྟག་པར་འོས་པ་རྣམས་བརྟག ཡང་སྤོ་སྤྱོད་ནས་མགུ་བ་སྤྱོད་པ་སོགས་གསུམ། སྤོ་ལྡན་གསུམ། མགུ་ལྡན་གསུམ། སྤོ་བ་སྤྱད་པའི་གཞི་ལས་མགུ་ལྡན་གཞི་ལྡན་ཡང་ལྡན་གསུམ། གཞི་སྤོ་སྤྱད་པའི་གཞི་ལས། མགུ་ལྡན་གཞི་ལྡན་ཡང་ལྡན་གསུམ། ཡང་སྤོ་སྤྱད་པའི་གཞི་ལས། མགུ་ལྡན་གཞི་ལྡན་ཡང་ལྡན་གསུམ་སྟེ་བསྡོམས་པས་སུམ་ཅུ། དེའི་སྟེང་དུ་བསྡིག་པ་སོགས་བཞི། གནས་དབྱུང་བདུན། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སྟེ་བཞི་བཅུ་ཞེ་གསུམ་མོ་ཞེས་གསུངས་པ་མི་འཐད་དེ། སྤོ་བ་སྤྱོད་པའི་གཞི་ལ་མགུ་བ་སྤྱོད་པ་སོགས་གསུམ། གཞི་སྤོ་སྤྱོད་པའི་གཞི་ལས་མགུ་སྤྱོད་སོགས་གསུམ། ཡང་སྤོ་སྤྱོད་པའི་གཞི་ལས་མགུ་སྤྱོད་སོགས་གསུམ་བགྲངས་ནས་དེ་ལས་ལོགས་སུ་གྱུར་པའི་མགུ་སྤྱོད་སོགས་གསུམ་བགྲང་རྒྱུ་མེད་པའི་ཕྱིར་དང་། ཡང་མགུ་སྤྱད་པའི་གཞི་ལས་མགུ་ལྡན་སོགས་གསུམ། ཡང་སྤོ་སྤྱད་པའི་གཞི་ལས་མགུ་ལྡན་སོགས་གསུམ་བགྲངས་ནས་དེ་ལས་ལོགས་སུ་གྱུར་པའི་མགུ་ལྡན་གསུམ་བགྲང་རྒྱུ་མེད་པའི་ཕྱིར་རོ། །གཉིས་པ་བསྡུ་བ་ལ། ངོ་བོའི་སྒོ་ནས་བསྡུ་ན། སྤངས་པ་ས་གཞན་ན་གནས་པ། སྨད་པ་ས་གཞན་ན་གནས་པ། དག་བྱེད་ས་གཞན་ན་གནས་པ་དང་གསུམ་མོ། །རྣམ་གྲངས་ཀྱི་སྒོ་ནས་བསྡུ་ན། ས་གཞན་ན་གནས་པ་ནན་ཏུར་བྱས་པ་དང་མ་བྱས་པ་གཉིས་སུ་འདུས་ཏེ། ནན་ཏུར་བཅུ་གཅིག་པོ་བྱས་པ་ནི་ས་གཞན་ན་གནས་པ་ནན་ཏུར་བྱས་པ་ཡིན་ལ། དེ་ལས་གཞན་པའི་ས་གཞན་ན་གནས་པ་རྣམས་ནི་ནན་ཏུར་མ་བྱས་པ་དེ་ཡིན་པའི་ཕྱིར། བསླབ་བྱའི་སྒོ་ནས་བསྡུ་ན་ས་གཞན་ན་གནས་པ་ཆེན་པོ་དང་ཆུང་ངུ་གཉིས་ཏེ། དང་པོ་ནི། སྤོ་སྤྱོད་གསུམ། མགུ་སྤྱོད་གསུམ། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་རྣམས་ཡིན་ལ། གཉིས་པ་ནི། དེ་ལས་གཞན་པའི་ས་གཞན་ན་གནས་པ་རྣམས་སོ། །གསུམ་པ་མཚན་ཉིད་ནི། སྨད་པ་བྱེད་པའི་ཆོ་གའི་སྒོ་ནས་ཁྱད་པར་ཅན་གྱི་སྤྱོད་པ་ལྔ་སྤོང་བའི་བདག་ཉིད་དོ། །བཞི་པ་བསླབ་བྱ་ནི་བསྙིལ་བ་དང་ནན་ཏུར་བྱས་པའི་གང་ཟག་རྣམས་ཀྱིས་བཟོད་པར་གསོལ་བར་བྱ། ཁྱད་པར་བསྡིག་པ་ལ་སོགས་པ་བཞི་ནི་འགྲོགས་བཤེས་དགེ་སློང་ལ་བརྟེན་ནས་གནས་པ་སོགས་བྱའོ། །སྤོ་སྤྱོད་གསུམ། མགུ་སྤྱོད་གསུམ། བསླབ་སྦྱིན། ངོ་བོ་ཉིད་འཚོལ་བ་དང་མཐུན་པར་སྦྱིན་པ་སོགས་ཀྱིས་ནི་ཁྱད་པར་ཅན་གྱི་སྤྱོད་པ་སྤོང་བ་དང་། དམན་སྤྱོད་དང་དུ་ལེན་པར་བྱ་ཞིང་། དེ་ལས་གཞན་པ་རྣམས་ཀྱིས་ཁྱད་པར་ཅན་གྱི་སྤྱོད་པ་སྤོང་བ་ལ་བསླབ་པར་བྱའོ། །ལྔ་པ་སྒྲ་བཤད་ནི། རང་བཞིན་དུ་གནས་པའི་ས་ལས་གཞན་ན་གནས་པས་ས་གཞན་ན་གནས་པ་ཞེས་བྱའོ། །དྲུག་པ་གྲོལ་རྒྱུ་ལ། བསྙིལ་བ་དང་ནན་ཏུར་བྱས་པ་དང་ངོ་བོ་ཉིད་འཚོལ་བ་དང་མཐུན་པར་སྦྱིན་པ་རྣམས་ནི་བཟོད་པར་གསོལ་བ་ནས་རང་བཞིན་དུ་གནས་པ་ཐོབ་བོ། །ཕྱིར་འགྱེད་ནན་ཏུར་བྱས་པའི་གང་ཟག་ནི་བཟོད་པར་གསོལ་བའི་ཕྱིར་དགེ་འདུན་ལ་གསོལ་ནས་གང་ལ་བརྙས་པར་བྱས་པའི་ཡུལ་དེ་ལ་བཟོད་གསོལ་བྱས་ཤིང་། དེས་བཟོད་པ་ན་རང་བཞིན་དུ་གནས་པ་ཡིན་ཏེ། རྩ་བ་ལས་འདི་བཟོད་པར་གསོལ་བའི་ལས་ཀྱི་གནས་སུ་དེ་ལ་བཟོད་པ་གསོལ་དུ་གཞུག་གོ་ཞེས་དང་། རང་ཊཱིཀ་ལས་ཁྱིམ་པ་ལ་བཟོད་པར་གསོལ་བར་བྱ་བ་ཡིན་གྱི། འདིར་ལས་ཀྱིས་ནི་མི་བྱ་ཞེས་གསུངས་པའི་ཕྱིར། འོ་ན་ཀརྨ་ཤ་ཏམ་ལས་འདི་ལ་ལས་བྱེད་པར་བཤད་པ་དང་འགལ་ལོ་ཞེ་ན། སྐྱོན་མེད་དེ་དེ་ལྟར་གསུངས་པ་དེ་རྩ་འགྲེལ་དང་མི་མཐུན་པས་ཁས་མི་ལེན་པའི་ཕྱིར་རོ། །སྤོ་སྤྱོད་མགུ་སྤྱོད་རྣམས་ཀྱིས་ནི་རང་རང་གི་ཉེས་པའི་གཞི་ལས་གྲོལ་བས་ན་རང་བཞིན་དུ་གནས་པ་ཐོབ། སྤོ་ལྡན་རྣམས་ཀྱིས་ནི་མགུ་བ་མནོད་པ་དང་། མགུ་ལྡན་རྣམས་ཀྱིས་ནི་དབྱུང་བ་བྱས་པས་རང་བཞིན་དུ་གནས་པ་ཐོབ་བོ། །བསླབ་བྱིན་གྱིས་དགྲ་བཅོམ་པའི་འབྲས་བུ་ཐོབ་པ་ན་རང་བཞིན་དུ་གནས་པ་ཐོབ་ལ། གཞན་རྣམས་ཀྱིས་ཀྱང་དགྲ་བཅོམ་གྱི་འབྲས་བུ་ཐོབ་པ་ན་རང་བཞིན་དུ་གནས་པ་ཐོབ་སྟེ། བསླབ་བྱིན་ལ་རྩ་བས་དངོས་སུ་གསུངས་ཤིང་། སྤོ་སྤྱོད་དང་མགུ་སྤྱོད་རྣམས་ལ་འགྲེལ་བས་དངོས་སུ་གསུངས་པའི་ཕྱིར་རོ།། ༈ །།བསྡུས་འབྱུང་གི་གཞིའི་སྐབས་སུ། འཆབ་པའི་རྣམ་གཞག་ལ་བཞི་སྟེ། གཞི། བསམ་པ། སྦྱོར་བ། མཐར་ཐུག་རྣམས་སོ། །དང་པོ་ལ་གང་དུ་འཆབ་པའི་གནས་དང་། གང་འཆབ་པའི་ལྟུང་བ་གཉིས། དང་པོ་ནི་མཐོལ་ཡུལ་དུ་འོས་པའི་དགེ་སློང་སྤོང་བའི་གནས་ཡིན་པ། མཚམས་ནང་ཡིན་པ་ཞིག་དགོས་ཏེ། གནས་གཞན་དུ་འཆབ་པ་མི་འབྱུང་བའི་ཕྱིར། གང་འཆབ་པའི་ངོ་བོ་ནི། དགེ་འདུན་ལྷག་མ་ཡིན་པ་རང་རྒྱུད་ལས་བྱུང་བ། ངོ་བོ་དྲན་ནམ་ཡིད་གཉིས་ཟ་བའོ། །རང་རྒྱུད་ལ་བྱུང་བ་ཞིག་དགོས་ཏེ། གཞན་རྒྱུད་ཀྱི་ལྷག་མ་བཅབས་པས་ལྟུང་བྱེད་དུ་གསུངས་པའི་ཕྱིར། བསམ་པ་ལ་འདུ་ཤེས་དང་ཀུན་སློང་གཉིས་ལས། དང་པོ་ནི་གཞི་དེ་ལ་མ་འཁྲུལ་བ་ཞིག་དགོས་ལ། ཀུན་སློང་ནི་ལྷག་མ་འཆབ་འདོད་དང་ལྡན་པའམ། མཐོལ་བའི་སེམས་མེད་པ་ཡན་ལག་ཏུ་རུང་སྟེ། མཐོལ་སེམས་མེད་པ་ཡང་འཆབ་སེམས་དང་འདྲ་སྟེ། འཆབ་པའི་སེམས་མ་བཏང་བ་ནི་དེའི་སེམས་ཉིད་ཡིན་ཞེས་གསུངས་པའི་ཕྱིར། སྦྱོར་བ་ནི་འཆབ་པར་རྩོམ་པའོ། །འདིར་ལུས་ངག་ཏུ་ཐོན་པ་ནི་མི་དགོས་ཏེ། བྱ་རྒྱུ་མ་བྱས་པའི་ལྟུང་བ་ཡིན་པའི་ཕྱིར། མཐར་ཐུག་ནི་ཉིན་ཞག་ཕྱི་མའི་སྐྱ་རེངས་ཤར་བ་སྟེ། སྐྱ་རེངས་མ་ཤར་བར་བཅབས་ཀྱང་ལྷག་མ་བཅབས་པའི་ཉེས་པ་སྤོ་བ་སྤྱོད་དགོས་མི་འབྱུང་བའི་ཕྱིར། བསླབ་པ་ཡོངས་སུ་སྦྱང་བའི་སྐབས་སུ་ལྟུང་བ་གླེང་བའི་སྤྱིའི་དོན་ལ་གཉིས་ལས་དགོས་དོན་ནི། ལྟུང་བ་དྲན་པ་དང་། དེ་ལ་བརྟེན་ནས་ཕྱིར་བཅོས་འབྱུང་བ་དང་། དེ་ལས་ལྟུང་བ་དག་པ་དང་། ཚུལ་ཁྲིམས་བསྲུངས་པའི་ཕན་ཡོན་བཅུ་ཐོབ་པའི་དགོས་པ་ཡོད་དོ། །བསྡུས་དོན་ལ་བདུན་ལས། དང་པོ་ཡུལ་གང་ལ་གླེང་བ་ནི། སྡེ་ལྔའི་སྡོམ་པ་གསོ་རུང་དང་ལྡན་པ། ཤེས་པ་རང་བཞིན་དུ་གནས་པ། ལུས་ཐ་མལ་དུ་གནས་པ། གནས་དབྱུང་མ་ཡིན་པ། ཆོས་མ་ཡིན་པའི་ཕྱོགས་སུ་མ་སོང་བ། ནད་པ་མ་ཡིན་པ། འབྱེད་ནུས་མ་ཡིན་པ་སྟེ་བདུན་ལྡན་པའོ། །རྟེན་ནི། བསྙེན་རྫོགས་ཀྱི་སྒོམ་པ་རྣམ་པར་དག་པ་དང་ལྡན་པ། ལྟ་བ་མཐུན་པ། མཚན་མཐུན་པ། ཐ་སྙད་གསུམ་དང་ལྡན་པ། ས་རང་བཞིན་དུ་གནས་པ། ལུས་ཐ་མལ་དུ་གནས་པ། ནད་པའམ་དེས་བསྐོས་པ་མ་ཡིན་པ། ཡུལ་དེ་ལ་ལྟུང་བ་བྱུང་བ་ལེགས་པར་ཤེས་པ་སྟེ་བརྒྱད་ལྡན་གྱིས་སོ། །གནས་ནི། སྤྱིར་བཏང་ལ་དབེན་པའི་ཕྱོགས་སུ་གླེང་བར་བྱ་བ་ཡིན་ཏེ། མཐའ་མ་ཡིན་པ་ལ་མི་བྱའོ། །ཞེས་གསུངས་པའི་ཕྱིར། འོ་ན་ལུང་ལས་ཆོས་བཞིན་ལྟུང་བ་གང་གིས་གླེང་བར་བགྱི། ཉེ་བར་འཁོར་དགེ་འདུན་གྱི་ནང་དུའོ། །ཞེས་དང་། ཆོས་བཞིན་ལྟུང་བ་དེ་གང་དུ་དྲན་པར་བགྱི། ཉེ་བར་འཁོར་དགེ་འདུན་གྱི་ནང་དུའོ། །ཞེས་པ་དང་། གླེང་བ་པོ་ཉིད་ཀྱང་དེ་བཞིན་ནོ། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། ནན་ཏུར་བྱེད་པ་དང་མ་འབྲེལ་བའི་ལྟུང་བ་རྣམས་དབེན་པར་གླེང་། ནན་ཏུར་བྱེད་པ་དང་འབྲེལ་བའི་ལྟུང་བ་རྣམས་དགེ་འདུན་གྱི་ནང་དུ་གླེང་ཞེས་པའི་དོན་ཡིན་པའི་ཕྱིར། དུས་ནམ་གྱི་ཚེ་གླེང་བ་ནི། དབྱར་གནས་པའི་དུས་མ་ཡིན་པ་སེམས་གཏད་བཟོད་པའི་དུས་སུ་བྱའོ། །ཇི་ལྟར་བྱ་བའི་ཚུལ་ནི། གླེང་བྱེད་དེས་བསམ་པར་འོས་པ་རྣམས་བསམས། བརྟགས་པར་འོས་པ་རྣམས་བརྟགས། དྲན་པ་དང་ཤེས་བཞིན་སྔོན་དུ་གཏང་། བྱམས་པ་དང་སྙིང་རྗེའི་སེམས་ཀྱིས་གླེང་བར་བྱའོ། །དེ་ལ་བསམ་པར་འོས་པ་རྣམས་བསམས་ཞེས་པའི་དོན་ནི། རང་ཉིད་ཚུལ་དང་མཐུན་པར་གླེང་མི་གླེང་བརྟག་པའོ། །བརྟག་པར་འོས་པ་བརྟགས་ཅེས་པ་ནི། གང་ཟག་དེ་ལ་གླེང་རིགས་མི་རིགས། དུས་དེར་གླེང་རིགས་མི་རིགས། གནས་དེར་གླེང་རིགས་མི་རིགས་བརྟག་པའོ། །དེའི་དུས་སུ་གླེང་བྱ་དེས་ཀྱང་གླེང་བྱེད་དེ་ཚུལ་དང་མཐུན་པར་གླེང་མི་གླེང་བརྟགས་ནས་ཚུལ་དང་མཐུན་པར་གླེང་ན་གླེང་བ་པོ་འདི་བདག་གིས་ལེགས་པར་རྙེད་དོ་སྙམ་པའི་བསམ་པས་གླེང་བ་དེ་ཁས་བླང་བར་བྱའོ། །གླེང་ནས་ཇི་ལྟར་བྱ་བའི་ཚུལ་ལ་ཁ་ཅིག་ན་རེ། གླེང་བའི་སྐབས་འབྱེད་མི་འབྱེད་གཉིས་ལས། སྐབས་མི་འབྱེད་པ་དེ་ལ། མཐའ་དག་ལ་སྐབས་མི་འབྱེད་པ་དང་། ཕྱོགས་འགའ་ལ་སྐབས་མི་འབྱེད་པ་གཉིས། དང་པོ་ལ་བཞམས་བསྒོ་སོགས་བཟློག་པ་ལྔ་བྱེད། དེས་མ་བཏང་ན་བཀའ་བློ་མི་བདེ་བའི་ལྷག་མར་འགྱུར་རོ། །ལྷག་མ་བཞི་བཏུད་བྱེད་པའི་དགེ་སློང་ལ་སྨད་པ་ནན་ཏུར་བྱེད། དེས་མ་བཏང་ན་གནས་དབྱུང་བྱེད་དེ། འཐབ་ཀྲོལ་ལ་འབད་པས་མ་ལོག་པ་ལ་གནས་དབྱུང་བྱེད་པའི་འདུལ་བ་མདོར་བསྡུས་སྦྱར། ཕྱོགས་འགའ་ལ་སྐབས་མི་འབྱེད་ན་དང་པོ་བརྗོད་བཅས་བྱེད། དེའི་རྗེས་ལ་གདམས་ངག་གཞག དེའི་མཐའ་ལ་མ་བཏང་ན་གསོ་སྦྱོང་གཞག དེ་ནས་དགག་དབྱེ་གཞག་པར་བྱེད། དེས་ཀྱང་མ་བཏང་ན་དགེ་འདུན་ལ་བརྙས་པ་ཡིན་པས་ཕྱིར་འགྱེད་ནན་ཏུར་བྱེད། དེས་མ་བཏང་ན་གནས་དབྱུང་བྱེད་དེ། བསྡིག་པ་ནན་ཏུར་བྱས་ནས་མ་བཏང་བ་ལ་གནས་དབྱུང་བྱེད་པ་གང་ཞིག རྒྱུ་མཚན་མཚུངས་པའི་ཕྱིར། སྐབས་ཕྱེ་བ་དེ་ལ་མཉན་པ་དང་མི་མཉན་པ་གཉིས། མི་མཉན་པ་དེ་ལ་དང་པོར་ཕུར་བཅས་བྱེད། དེ་ལ་མ་བཏང་ན་གདམས་ངག་གཞག་པ། གསོ་སྦྱོང་གཞག་པ། དགག་དབྱེ་གཞག་པ་བྱེད་ཅེས་གསུངས། བམ་ལྔ་ལས་ནི། ཕྱོགས་འགའ་དང་ཐ་དད་གང་ལ་སྐབས་མ་ཕྱེ་ཡང་དང་པོར་གདམས་ངག་གཞག དེས་མ་བཏང་ན་གསོ་སྦྱོང་གཞག དེས་མ་བཏང་ན་དགག་དབྱེ། དེས་ཀྱང་སྐབས་མི་འབྱེད་ན། བཞམས་བསྒོ་སོགས་བཟློག་པ་ལྔ་བྱ་སྟེ། དེའི་མཐའ་ལ་མི་གཏོང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ་ཞེས་གསུངས་སོ། །གཉིས་པ་རྩོད་པ་ཞི་བྱེད་ལ་གསུམ་ལས། ལས་བྱེད་པའི་དབྱེན་ནི། མཛོད་ལས། ལས་ཀྱི་དབྱེན་ནི་གླེང་གསུམ་ན། །དེ་ནི་བརྒྱད་དག་ཡན་ཆད་ཀྱིས། །ཞེས་ཏེ། གཞི་བསམ་སྦྱོར་བ་མཐར་ཐུག་གི་ཡན་ལག་བཞི་ལས། དང་པོ་ལ། གང་དུ་དབྱེ་བའི་གནས་ནི། གླིང་གསུམ་པོ་གང་རུང་ཡིན་པ་མཚམས་ནང་ཡིན་པ་ཞིག་དགོས་ཏེ། ལས་ཀྱི་དབྱེན་ནི་གླིང་གསུམ་ན། །ཞེས་དང་། ཊཱི་ཀར་དབྱེ་བའི་སེམས་ཀྱིས་མཚམས་ཀྱི་ནང་དུའོ། །ཞེས་གསུངས་པའི་ཕྱིར། གང་དབྱེ་བའི་ཡུལ་ནི། ཆོས་ཕྱོགས་པ་བཞི་ཡན་ཆད་གྲངས་ཚང་བ། ཆོས་མིན་ཕྱོགས་ལ་རང་ཉིད་མ་གཏོགས་པའི་བཞི་ཡན་ཆད་གྲངས་ཚང་བའོ། །གཉིས་ཀ་ཡང་ཁ་སྐོང་དུ་འོས་པ་ཞིག་དགོས་ཏེ། ཁ་སྐོང་དུ་མི་འོས་པས་ལས་བྱས་ཀྱང་མི་འཆགས་པའི་ཕྱིར། གང་གིས་དབྱེ་བའི་གང་ཟག་ནི་ཆོས་མིན་པ་སྟེ། ཆོས་ཕྱོགས་པའི་གང་ཟག་གིས་ལས་བྱས་ན་ལེགས་པར་བྱས་པ་ཡིན་པའི་ཕྱིར། བསམས་པ་ལ་འདུ་ཤེས་དང་། ཀུན་སློང་གཉིས་ལས། དང་པོ་ནི། གཞི་དེ་ལ་མ་འཁྲུལ་བ་ཡིན་ལ། ཀུན་སློང་ནི་ཆོས་དང་འདུལ་བ་ལ་དེ་དང་མི་མཐུན་པར་ཤེས་བཞིན་དུ་ཆོས་མ་ཡིན་པ་ལ་མངོན་པར་ཞེན་ཅིང་། འབྱེད་འདོད་རྒྱུན་མ་ཆད་པའོ། །སྦྱོར་བ་ནི། ལས་འབྱེད་པར་བརྩོན་པ། མཐར་ཐུག་ནི་ལས་བརྒྱ་རྩ་གཅིག་ལས་གང་ཡང་རུང་བ་བྱས་པའོ། །གཉིས་པ་འཁོར་ལོའི་དབྱེན་ལ་གསུམ་སྟེ། རང་གཞན་ངོས་གཟུང་ཞིང་གང་དང་ལྡན་པ། ཇི་ལྟར་འབྱེད་པའི་ཚུལ། དེ་མི་འབྱུང་བའི་དུས་སོ། །དང་པོ་ནི་མཛོད་ལས། དགེ་འདུན་དབྱེན་ནི་མི་འཕྲོད་པའི། །རང་བཞིན་ལྡན་པ་མ་ཡིན་ཆོས། །ཉོན་མོངས་ཅན་མིན་ལུང་བསྟན་མིན། །དེ་དང་དགེ་འདུན་ཡང་དག་ལྡན། །དེ་ཡི་ཁ་ན་མ་ཐོ་བརྫུན། །དེ་དང་འབྱེད་པོ་ཡང་དག་ལྡན། །བསྐལ་པར་མནར་མེད་པར་སྨིན་འགྱུར། །ཞེས་ཏེ། དགེ་འདུན་གྱི་དབྱེན་ནི་དགེ་འདུན་སྡེ་གཉིས་ཐུགས་རྩེ་མི་འཕྲོད་པའི་རང་བཞིན་ལྡན་པ་མ་ཡིན་པའི་འདུ་བྱེད་མ་བསྒྲིབས་ལུང་མ་བསྟན་ཡིན་གྱི། དགེ་མི་དགེ་གང་རུང་མ་ཡིན་ལ་དེ་དང་ཕྱོགས་གཉིས་ཀྱི་དགེ་འདུན་ཡང་དག་པར་ལྡན། དགེ་འདུན་གྱི་དབྱེན་དེའི་ཁ་ན་མ་ཐོ་བའི་བརྫུན་དེ་དང་འབྱེད་པ་པོ་ལྷས་བྱིན་ལྟ་བུ་དང་ཡང་དག་པར་ལྡན། དེའི་རྣམ་སྨིན་ནི་བར་གྱི་བསྐལ་པར་མནར་མེད་སྨིན་པར་འགྱུར་བའོ། །སྔ་མ་ལ། དབྱེན་ལྡན་དང་། ཕྱི་མ་ལ་བརྫུན་ལྡན་ཞེས་བྱའོ། །གཉིས་པ་ནི། དགེ་སློང་ལྟ་སྤྱོད་ཚུལ་ལྡན་པས། །འབྱེད་དོ་གཞན་དུའོ་བྱིས་པ་རྣམས། །སྟོན་དང་ལམ་གཞན་ལ་བཟོད་པ། །བྱེ་བའོ་དེ་ནི་མི་གནས་སོ། །དེ་ནི་འཁོར་ལོའི་དབྱེན་དུ་འདོད། །འཛམ་བུའི་གླིང་ནའོ་དགུ་སོགས་ཀྱིས། །ཞེས་ཏེ། གང་ཟག་གང་གིས་འབྱེད་ན། དགེ་སློང་ཉིད་ཀྱིས་འབྱེད་ཀྱི། དགེ་སློང་མ་སོགས་ཀྱིས་མིན་ཏེ། དེས་འབྱེད་མི་ནུས་པའི་ཕྱིར། དེ་ལྟ་བ་སྤྱད་པས་ཡིན་གྱི། སྲེད་པ་སྤྱད་པས་མ་ཡིན་ཏེ། བསམ་པ་གཡོ་བས་མི་བརྟན་པའི་ཕྱིར། དེ་ཡང་ཚུལ་ཁྲིམས་དང་ལྡན་པས་ཡིན་གྱི། མི་ལྡན་པས་མ་ཡིན་ཏེ། དེའི་ཚིག་མི་བཙན་པའི་ཕྱིར། གནས་གང་དུ་འབྱེད་ན། སྟོན་པ་མངོན་སུམ་བཞུགས་པའི་གནས་ལས་གཞན་དུ་སྟེ། སྟོན་པ་ནི་གཟི་བྱིན་ཆེ་བས་སོ། །གང་འབྱེད་ན་བྱིས་པ་རྣམས་འབྱེད་ཀྱི་ཆོས་མངོན་སུམ་དུ་མཐོང་བའི་འཕགས་པ་དང་། དེ་དང་འདྲ་བའི་སོ་སྐྱེ་མཁས་པ་རྣམས་ནི་མ་ཡིན་ནོ། །ཅི་ཙམ་གྱིས་དབྱེ་བ་ཡིན་ཞེ་ན། ལྷས་བྱིན་ལྟ་བུ་སྟོན་པ་གཞན་དང་དེས་བསྟན་པའི་ལམ་གཞན་བརྟུལ་ཞུགས་ལྔ་པོ་ལ་བཟོད་པ་སྟེ་འདོད་པས་ཁས་ལེན་པའམ། ཚུལ་ཤིང་བླངས་པའི་ཚེ་ན་དབྱེ་བའོ། །འཁོར་ལོའི་དབྱེན་འདི་ཉིད་ཉིན་ཞག་གི་བར་དུ་མི་གནས་ཏེ། དེའི་གོང་དུ་མཆོག་ཟུང་གིས་ངེས་པར་འདུམས་པའི་ཕྱིར་རོ། །སྒྲ་དོན་ནི། ཅིའི་ཕྱིར་འཁོར་ལོའི་དབྱེན་ཞེས་བྱ་ཞེ་ན། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། །མྱུར་བར་འགྲོ་སོགས་རྩིབས་སོགས་ཀྱིས། །ཞེས་གསུངས་པ་ལྟར། མཐོང་ལམ་ནི་རྒྱལ་པོའི་འཁོར་ལོ་རིན་པོ་ཆེ་དང་ཆོས་མཚུངས་པས་ན། ཆོས་ཀྱི་འཁོར་ལོ་ཞེས་བྱ་ལ། དེ་སྐྱེ་བ་ལ་གེགས་བྱེད་པས་ན་འཁོར་ལོའི་དབྱེན་ཞེས་བྱ་སྟེ། ལུང་མ་མོ་ལས་འཕགས་པའི་ལམ་ལས་ཐ་དད་དུ་འབྱེད་པས། དེ་སྤངས་ནས་ལམ་གཞན་དུ་འཇོག་པ་ནི་འཁོར་ལོའི་དབྱེན་ནོ་ཞེས་གསུངས་པའི་ཕྱིར། ཡུལ་གང་དུ་འབྱུང་ན་འཛམ་བུའི་གླིང་ཁོ་ན་ན་འབྱུང་ངོ་། །གྲངས་དུ་ཞིག་འབྱེད་ཞེ་ན། ཆོས་ཕྱོགས་པ་བཞི་དང་། རང་མ་གཏོགས་པའི་ཆོས་མིན་ཕྱོགས་པ་བཞི་སྟེ། དགུ་ཡན་ཆད་ཀྱིས་འབྱེད་པར་བྱེད་དོ། །གསུམ་པ་ནི། དང་པོ་མཐའ་སྐྱོན་ཟུང་གཅིག་གི །སྔ་རོལ་ཐུབ་པ་ནོངས་པ་དང་། །མཚམས་མ་བཅད་པ་དག་ཏུ་ཡང་། །འཁོར་ལོའི་དབྱེན་ནི་མི་འབྱུང་ངོ་། །ཞེས་གསུངས་པ་ལྟར་ཤེས་པར་བྱའོ། །གསུམ་པ་རྩོད་པ་ཞི་བྱེད་དངོས་ལ། དགོས་བསྡུས་གཉིས་ལས། དང་པོ་ནི། རྩོད་པ་དང་རྩོད་པ་ཞི་བྱེད་བསྟན་པ་ལ་དགོས་པ་ཡོད་དེ། ཇི་སྐད་བཤད་པ་ལྟར་གྱི་རྩོད་པ་ཞི་བྱེད་ཀྱིས་དགེ་འདུན་མཐུན་པར་འགྱུར་ལ། དེ་ལ་བརྟེན་ནས་དགེ་བའི་ཕྱོགས་འཕེལ་བར་འགྱུར་བའི་ཕྱིར་རོ། །བསྡུས་དོན་ལ་བདུན་ཏེ། རྩོད་པའི་རྒྱུ། རྩོད་པའི་ངོ་བོ། རྩོད་པའི་དབྱེ་བ། རྩོད་པའི་ཞི་བྱེད། རྩོད་པ་འཕྲུལ་མ། ཞི་བྱེད་འཕྲུལ་མ། རྩོད་པ་མཐར་སྐྱེལ་བའོ། །དང་པོ་ལ་ནང་གི་རྒྱུ་དང་། ཕྱིའི་རྒྱུ་གཉིས། དང་པོ་ནི། འདོད་ཆགས་ཁོང་ཁྲོ་སོགས་རྩ་བའི་ཉོན་མོངས་པ་རྣམས་ཡིན་ལ། དེའི་གཙོ་བོ་ཡང་བདག་འཛིན་ཡིན་ནོ། །ཚོར་འདུ་གཉིས་ཀྱང་རྩོད་པའི་རྒྱུ་ཡིན་ཏེ། མཛོད་ལས། རྩོད་པའི་རྩ་བར་གྱུར་ཕྱིར་དང་། །ཞེས་གསུངས་པའི་ཕྱིར། ཕྱིའི་རྒྱུ་ནི། དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་སོགས་བཞི་ཀ་ཡོད་དོ། །དངོས་པོའི་དོན་ནི། སྒྲ་མི་རྟག་པ་ཡིན་པ་ལ་སྒྲ་རྟག་གོ་ཞེས་པ་ལྟ་བུ་དང་། ཆོས་ཐམས་ཅད་བདག་མེད་པ་ཡིན་པ་ལ། ཉེར་ལེན་གྱི་ཕུང་པོ་བདག་དང་བཅས་པ་ཡིན་ནོ་ཞེས་རྩོད་པ་ལྟ་བུའོ། །གདམས་ངག་སོགས་གཞག་པའི་དོན་ནི། བམ་ལྔ་ལས་གདམས་ངག་གཞག་པ་དང་། གསོ་སྦྱོང་གཞག་པ་དང་། དགག་དབྱེ་གཞག་པའི་རིམ་གྱིས་ལྟུང་བ་འབྱིན་པ་པོའི་གང་ཟག་གཞག་སྟེ། དགེ་འདུན་རང་བཞིན་དུ་གནས་པ་ལས་ལོགས་སུ་སྤང་བའོ་ཞེས་བཤད་དོ། །ལྟུང་བ་བཅས་པའི་རྩོད་པ་ནི། སྡོམ་པ་གསོ་བའི་ལྷག་མ་ཡོད་པའི་ལྟུང་བ་དེ་ཉིད་རྩོད་གཞི་ཉིད་དུ་རུང་གི ཕམ་པ་བཅབ་པ་ནི་རྩོད་གཞིར་མི་རུང་སྟེ། ཕམ་པ་འཆབ་བཅས་བྱུང་བའི་གང་ཟག་དེ་རྩོད་ཟླ་ཉིད་དུ་མི་རུང་བའི་ཕྱིར་ཏེ། ཊཱི་ཀར་སྤངས་པ་ཉིད་ནས་གཞན་གྱི་ཕྱོགས་ཉིད་ཀྱི་བར་དུ་གྱུར་ན་ཡང་ཞེས་དང་། བམ་ལྔར་ལྟུང་བ་དང་བཅས་པ་ནི་ལྟུང་བ་སྡེ་ལྔའི་ལྷག་མ་དག་ལས་ལྷག་མར་གྱུར་པའི་ལྟུང་བའོ། །ཞེས་གསུངས་པའི་ཕྱིར། ལས་ལ་མི་མཐུན་པའི་རྩོད་པ་ནི། ལས་ལ་འདུ་བ་མི་སྟེར་བའམ་འདུས་ཀྱང་འདི་ལྟ་བུའི་ལས་མ་བྱེད་ཅིག་ཅེས་ཟློག་པར་བྱེད་པའོ། །གཉིས་པ་རྩོད་པའི་ངོ་བོ་ནི། དགྲ་བོས་མི་མཐུན་པར་སྨྲས་པའི་ཚིག་གི་ཕྱིར་སེམས་གཞོལ་བས་ལན་འདེབས་པར་འདོད་པས་རྒྱུད་འཁྲུག་པ་དང་བཅས་པའི་ཀུན་སློང་ངོ་། །ཁ་ཅིག་ལུང་ལས་དེ་ལ་བརྟེན་ནས་འདིར་འཐབ་པ་དང་། རྩོད་པ་དང་། མཚང་འབྲུ་བ་དང་། འགྱེད་པ་གང་ཡིན་པ་ཉིད་འགྱེད་པའི་ཕྱིར་རྩོད་པའོ། །ཞེས་པ་དང་འགལ་བར་ཐལ་ལོ་ཞེ་ན། སྐྱོན་མེད་དེ། རྩོད་པའི་འབྲས་བུ་ལ་རྩོད་པར་བཏགས་པའི་ཕྱིར་རོ། །ཡང་ལུང་ལས། འགྱེད་པའི་ཕྱིར་རྩོད་པ་གང་ཡིན་པ་དེ་ནི་མི་དགེ་བ་དང་བཅས་ལུང་མ་བསྟན་དང་བཅས་པའོ། །ཞེས་གསུངས་པ་དང་འགལ་ལོ་ཞེ་ན། སྐྱོན་མེད་དེ། རྒྱུ་ལ་དགོངས་པའི་ཕྱིར་ཞེས་གསུངས་སོ། །གསུམ་པ་དབྱེ་བ་ལ། རགས་པའི་དབྱེ་བ་དང་། ཞིབ་ཏུ་དབྱེ་བ་གཉིས། དང་པོ་ལ་བཞི་སྟེ། འགྱེད་ཕྱིར་གྱི་རྩོད་པ། མི་གདམས་ཕྱིར་གྱི་རྩོད་པ། ལྟུང་ཕྱིར་གྱི་རྩོད་པ། བྱ་ཕྱིར་གྱི་རྩོད་པའོ། །གཉིས་པ་ནི་བཅུ་གཅིག་ཏུ་ཡོད་དེ། འགྱེད་ཕྱིར་གྱི་རྩོད་པ་གཅིག མི་གདམས་ཕྱིར་གྱི་རྩོད་པ་ལྔ། ལྟུང་ཕྱིར་གྱི་རྩོད་པ་བཞི། བྱ་ཕྱིར་གྱི་རྩོད་པ་གཅིག་རྣམས་སུ་ཡོད་པའི་ཕྱིར་རོ། །མི་གདམས་ཕྱིར་གྱི་རྩོད་པ་ལྔར་འགྱུར་བའི་རྒྱུ་མཚན་ནི། དེ་ལ་རྒྱུ་བཅས་དང་རྒྱུ་མེད་གཉིས། དང་པོ་ནི། གང་གིས་གླེང་བའི་ལྟུང་བ་དེ་ཡོད་པའོ། །རྒྱུ་མེད་ནི་གང་གིས་གླེང་བའི་ལྟུང་བ་དེ་ཉིད་མེད་པའོ། །དེ་ལ་བཞི་སྟེ། གཞི་མེད་པ་དང་། གཞི་རྗེས་སུ་སྒྲུབ་པའི་དབང་ཉིད་དང་། ཕྱིར་བཅོས་པ་ལ་མི་ལྟོས་པ་དང་། སྨྱོས་པས་བྱས་པ་རྣམས་སོ། །ལྟུང་ཕྱིར་གྱི་རྩོད་པ་བཞི་ནི། འདི་ལ་ཉེས་པ་རང་གི་ངོ་བོ་མི་ཤེས་པ་དང་། ཤེས་པ་གཉིས་ལས། ཤེས་པ་ལ་གསུམ་སྟེ། ཕྱིར་མ་འཕྲོས་པ་དང་། ཉི་ཚེ་བ་དང་། དགེ་འདུན་མཐའ་དག་དང་འབྲེལ་པས་སོ། །ཞི་བྱེད་གང་རྩོད་པ་ཐམས་ཅད་ཀྱི་ཞི་བྱེད་དུ་འགྱུར་བ། རྩོད་པ་གང་ཞི་བྱེད་ཐམས་ཅད་འཇུག་པའི་གཞིར་གྱུར་པ། རྩོད་པ་སོ་སོ་ལ་ཞི་བྱེད་སོ་སོར་བསྟན་པའོ། །དང་པོ་ནི། བབས་པ་དང་ཤི་བ་ལྟ་བུ་སྟེ། དེས་རྩོད་པ་རང་ཞིར་འགྱུར་བའི་ཕྱིར། གཉིས་པ་ནི། བྱ་ཕྱིར་རྩོད་པ་ཡིན་ཏེ། ཞི་བ་ཐམས་ཅད་ནི་བྱ་བའི་ཕྱིར་རྩོད་པ་འཇུག་ཅེས་གསུངས་པའི་ཕྱིར། གསུམ་པ་ལ་སྡོམ་ནི། མངོན་སུམ་དྲན་པ་མ་མྱོས་དང་། །གང་མང་དང་ནི་ངོ་བོ་ཉིད། །རྩྭ་རྣམས་བཀྲམ་པ་ལྟ་བུ་དང་། །ཁས་བླངས་པ་ནི་བྱ་བའོ། །ཞེས་པ་ལྟར་བདུན་ལས། འགྱེད་ཕྱིར་རྩོད་པ་ལ་མངོན་སུམ་གྱི་ཞི་བྱེད། གང་མང་གི་ཞི་བྱེད་གཉིས་འཇུག་ལ། དང་པོ་ལ་བརྒྱད་དེ། རྒོལ་དང་གཟུ་དང་དགེ་འདུན་གཞི་པོ་དང་། །གསལ་བ་དང་ནི་གསལ་བའི་གསལ་བ་དང་། །དགེ་འདུན་གཞན་དང་སྡེ་སྣོད་འཛིན་པ་དང་། །གནས་བརྟན་མཐུ་དང་ལྡན་པའི་མངོན་སུམ་མོ། །ཞེས་པ་ལྟར། ཚོགས་པར་དབྱུང་བའི་མངོན་སུམ། གཟུ་བོའི་མངོན་སུམ། དགེ་འདུན་གཞི་པོའི་མངོན་སུམ། གསལ་བའི་མངོན་སུམ། གསལ་བའི་གསལ་བའི་མངོན་སུམ། དགེ་འདུན་གྱི་སྡེ་གཞན་གྱི་མངོན་སུམ། སྡེ་སྣོད་འཛིན་པའི་མངོན་སུམ། གནས་བརྟན་མཐུ་ལྡན་གྱི་མངོན་སུམ་རྣམས་ཏེ་སྔ་མ་སྔ་མས་མ་ཞི་ན་ཕྱི་མ་ཕྱི་མས་ཞི་བར་བྱེད་དོ། །གང་མང་གི་ཞི་བྱེད་ནི། མངོན་སུམ་གྱིས་ཞི་བར་མ་ནུས་ན། དགེ་འདུན་གཞི་པོས་ཕྱོགས་གཉིས་ཀ་ལ་ཚུལ་ཤིང་བྲིམས་ནས་ཚུལ་ཤིང་བགྲངས་ཏེ་གང་མང་བྱ་བ་གསུངས་སོ། །མི་གདམས་པའི་རྩོད་པ་ལ་རྒྱུ་བཅས་རྒྱུ་མེད་གཉིས་ལས། རྒྱུ་བཅས་ནི་གླེང་བྱེད་དང་རྟོགས་པ་གཅིག་ཏུ་བྱས་པའི་སྒོ་ནས་རྩོད་པ་དེ་ཞི་བར་བྱེད། རྒྱུ་མེད་ཡིན་ན། གླེང་བྱ་ལ་དག་པ་བྱིན་པའི་སྒོ་ནས་ཞི་བར་བྱེད་དེ། དེ་ཡང་རྒྱུ་མེད་ཀྱི་དང་པོ་གསུམ་ལ་གང་ཟག་འདི་ནི་དྲན་པ་དང་ལྡན་པ་ཡིན་པས། འདི་ལ་ལྟུང་བ་བྱུང་བ་མ་དྲན་པས་འདི་ལ་ལྟུང་བ་མེད་དོ་ཞེས་དགེ་འདུན་གྱིས་གསོལ་བཞིའི་ལས་ཀྱིས་དག་པར་སྟེར་བ་དང་། བཞི་པ་སྨྱོས་པས་བྱས་པ་ལ། གང་ཟག་འདི་མ་སྨྱོས་པའི་དུས་སུ་ཉེས་པ་མ་བྱས་པས་སྨྱོས་པ་འདི་ལ་ལྟུང་བ་མེད་དོ་ཞེས་དགེ་འདུན་གྱིས་གསོལ་བཞིའི་ལས་ཀྱིས་དག་པ་སྟེར་བའོ། །ལྟུང་ཕྱིར་རྩོད་པ་ཞི་བྱེད་ལ་གཉིས་ཡོད་པའི་ཉེས་པ་རང་གི་ངོ་བོ་ཤེས་པའི་རྩོད་པ་ཞི་བྱེད་ལ་གསུམ་ལས། དང་པོ་ཕྱིར་འཕྲོས་པ་མེད་པའི་རྩོད་པ་ཞི་བྱེད་ལ་ཡང་ལྟུང་བ་ཁས་མི་ལེན་ཞིང་ཕྱིར་མི་བཅོས་པས་རྩོད་པ་ནི། ལྟུང་བ་ཁས་བླངས་པ་དང་། ལྟུང་བ་ཕྱིར་བཅོས་བྱ་བས་རྩོད་པ་དེ་ཞི་བར་བྱེད་དོ། །ལྟུང་བ་ཁས་མི་ལེན་པ་ཁོ་ནའི་རྩོད་པ་ནི། གླེང་བྱེད་ལ་ཁས་བླངས་པས་ཞི་བར་བྱེད་དོ། །གཉིས་པ་ཕྱིར་འཕྲོས་པ་དང་བཅས་པ་རྣམ་པ་གཉིས་པོ་ཉི་ཚེ་བའི་རྩོད་པ་ནི་མངོན་སུམ་གྱིས་འདུལ་བས་སོ། །གསུམ་པ་དགེ་འདུན་མཐའ་དག་དང་འབྲེལ་བའི་རྩོད་པ་ནི། རྩྭ་བཀྲམ་པ་ལྟར་ཕྱོགས་གཉིས་པོ་ཕན་ཚུན་འདུད་ཅིང་བཤགས་པའི་སྒོ་ནས་ཞི་བར་བྱའོ། །ཡང་ན་ལྟུང་ཕྱིར་རྩོད་པ་ལ་གཉིས་ལས། ཉེས་པ་རང་གི་ངོ་བོ་མི་ཤེས་པ་ལ་ངོ་བོ་ཉིད་འཚོལ་བ་དང་མཐུན་པར་བྱིན་པར་ཁས་བླངས་པའི་སྒོ་ནས་ཞི་བར་བྱེད། གཉིས་པ་ནི་ཕྱིར་བཅོས་པར་ཁས་བླངས་པའི་སྒོ་ནས་ཞི་བར་བྱེད། བྱ་ཕྱིར་རྩོད་པ་ནི་ལས་ལ་མཐུན་པ་སྦྱིན་པའི་སྒོ་ནས་སམ་ཞི་བྱེད་གཞན་ཡང་འཇུག་གོ །ལྔ་པ་རྩོད་པ་འཕྲུལ་མ་ལ་ཁ་ཅིག་ན་རེ། ལྟུང་ཕྱིར་རྩོད་པ་ལ་ཕྱིར་འཕྲོས་པ་མེད་པ་དང་། འཕྲོས་པ་དང་བཅས་པ་གཉིས་པོ་ཉི་ཚེ་བ་དང་། དགེ་འདུན་མཐའ་དག་དང་འབྲེལ་བ་གསུམ་ཡོད་པ་བཞིན་དུ་མི་གདམས་པའི་ཕྱིར་རྩོད་པ་ལ་ཡང་དེ་གསུམ་ཡོད་དེ། རྒྱུ་མཚན་མཚུངས་པའི་ཕྱིར། མི་གདམས་པའི་ཕྱིར་རྩོད་པ་ལ། གཞི་མེད་པ་དང་། གཞན་རྗེས་སུ་སྒྲུབ་པའི་དབང་ཉིད་དང་། ཕྱིར་བཅོས་ལ་མི་ལྟོས་པ་དང་། སྨྱོས་པས་བྱས་པ་བཞི་ཡོད་པ་ལྟར་ལྟུང་ཕྱིར་རྩོད་པ་ལ་ཡང་བཞི་ཡོད་དེ། རྒྱུ་མཚན་མཚུངས་པའི་ཕྱིར་ཞེས་གསུངས་པ་མི་འཐད་དེ། ལྟུང་ཕྱིར་རྩོད་པ་གང་གིས་གླེང་བའི་ལྟུང་བ་དེ་ཡོད་དགོས་པའི་ཕྱིར། དྲུག་པ་ཞི་བྱེད་འཕྲུལ་མ་ལ་ཁ་ཅིག ཕྱིར་འཕྲོས་པ་མེད་པའི་རྩོད་པ་ལ་ཕྱིར་བཅོས་བྱེད་པར་ཁས་བླངས་པས་ཞི་བ་བཞིན་མངོན་སུམ་གྱིས་ཀྱང་ཞི་བྱེད་འཇུག་སྟེ། རྒྱུ་མཚན་མཚུངས་པའི་ཕྱིར། ཕྱིར་འཕྲོས་པ་དང་བཅས་པ་རྣམ་པ་གཉིས་པོ་ཉི་ཚེ་བའི་རྩོད་པ་དེ་ལ། མངོན་སུམ་གྱི་ཞི་བྱེད་འཇུག་པ་བཞིན་དུ་ཕྱིར་བཅོས་པར་ཁས་བླངས་པའི་སྒོ་ནས་ཀྱང་ཞི་བྱེད་འཇུག་སྟེ་རྒྱུ་མཚན་མཚུངས་པའི་ཕྱིར་ཞེས་གསུངས་སོ། །བདུན་པ་རྩོད་པ་མཐར་བསྐྱལ་བ་ནི་འགྱེད་ཕྱིར་རྩོད་པ་ལ་མངོན་སུམ་དང་གང་མང་གིས་མ་ཞི་ན་གནས་དབྱུང་བྱེད་པ་བཞིན་དུ། ཞི་བྱེད་གཞན་རྣམས་ཀྱིས་མ་ཞི་ན་ཡང་གནས་དབྱུང་བྱེད་དེ། རྒྱུ་མཚན་མཚུངས་པའི་ཕྱིར། ལྟུང་ཕྱིར་གྱི་རྩོད་པའི་གཞི་ལ་བརྟེན་ནས་འཐབ་པ་དང་མཚང་འབྲུ་བ་སོགས་ཀྱི་རྩོད་པ་བྱུང་ན་དེ་ཞི་བར་བྱ་བའི་ཕྱིར་བསྡིགས་པ་ནན་ཏུར་བྱེད། དེས་མ་ཞི་ན་གནས་དབྱུང་བྱེད་དོ། །དགེ་འདུན་གྱིས་རྩོད་པ་ཞི་བྱེད་ལ་ཞུགས་པ་དེའི་ཚེ་གང་ཟག་འགའ་ཞིག་ཆེད་དུ་བྱས་ནས་ཞི་བྱེད་ལ་མ་འདུས་ན་ཕྱིར་འགྱེད་ནན་ཏུར་བྱ། དེས་ཀྱང་མ་འདུས་ན་གནས་དབྱུང་བྱ་ཞེས་གསུངས་སོ། །ལྔ་པ་དེ་ཐམས་ཅད་ཀྱི་རྟེན་གནས་མལ་གྱི་གཞི་ལ། ཕྱག་བྱ་བ་དང་མི་བྱ་བའི་རིམ་པ་མཚན་ནས་བརྗོད་པའི་ཚུལ། གནས་མལ་བསྟེན་པ་དངོས། འདུལ་བ་མདོར་བསྡུས་ཏེ་བསྟན་པ་དང་གསུམ་ལས། དང་པོ་གཉིས་ནི་གཞུང་ལས་ཤེས་པར་བྱའོ། །གསུམ་པ་འདུལ་བ་མདོར་བསྡུ་བ་བསྟན་པ་ནི། མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མིན་པར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ། །ཞེས་པའི་སྐབས་སུ། མཁས་པ་གཞན་གྱི་ལུགས་འགོད་པ་དང་། བླ་མའི་བཞེད་པ་བསྟན་པ་གཉིས་ལས། དང་པོ་ལ་ཁ་ཅིག་ན་རེ། འདི་ལ་བཞི་སྟེ། གཞི་གང་ལ་རུང་མཐུན་བཅས་པ། རུང་མཐུན་རང་གི་ངོ་བོ། རུང་མཐུན་བཅས་པའི་དགོས་པ། རུང་མཐུན་སྦྱར་བ་ལས་དངོས་གཞི་དང་ན་སྨད་པ་ཇི་ལྟར་འགྱུར་བའི་ཚུལ་ལོ། །དང་པོ་ནི། ཁ་ཅིག་ལུང་ལས་གནང་མེད་བཀག་མེད་ལ་རུང་མཐུན་བྱ་བར་གསུངས་པའི་ཕྱིར་དེ་ལ་བྱའོ་ཞེས་ཟེར་ཏེ། དེ་ནི་མི་འཐད་དེ། དེ་འདྲའི་གཞི་མི་སྲིད་ཅིང་། སྟོན་པས་གནང་བཀག་མ་བྱས་ཀྱང་གནང་བཀག་གི་བསླབ་པ་འཆའ་ན་ཁྱེད་སངས་རྒྱས་སུ་ཐལ་ལོ། །དེས་ན་ལུང་གི་དགོངས་པ་ནི། རུང་མཐུན་བཅའ་བའི་གོང་ཡན་ཆད་དུ་གནང་མེད་བཀག་མེད་ལ་དགོངས་པ་ཡིན་གྱི། རུང་མཐུན་བཅས་ནས་མི་རུང་བ་ཐམས་ཅད་བཀག་ཚར་བ་ཡིན་པའི་ཕྱིར་རོ། །ཡང་ཁ་ཅིག་རུང་མཐུན་མ་གསུང་གོང་དུའང་གནང་བཀག་གི་རྒྱུ་མཚན་དང་ལྡན་པ་ལ་གནང་བཀག་བཅས་པས་ཁྱབ་སྟེ། དགོན་པ་བ་ཕམ་པར་གྱུར་ཟིན་ཞེས་དང་། ངས་གནང་བ་གང་ཡིན་པ་ཁྱོད་ཀྱིས་ཤེས་སོ་ཞེས་སོགས་གསུངས་པའི་ཕྱིར། དེས་ན་ས་བརྐོ་བ་བཀག་པས་དགག་བྱ་དང་ལྡན་པའི་བྱེ་མ་བརྐོ་བ་བཀག་ཟིན་པ་ཡིན་ནོ་ཞེ་ན། ལུང་གི་དགོངས་པ་སྔར་བཤད་ཚར་རོ། །རྒྱུ་མཚན་མཚུངས་པ་ཐམས་ཅད་གཅིག་བཀག་པས་ཐམས་ཅད་དགག་པར་འགྱུར་ན། དུད་འགྲོ་གསོད་པ་སོགས་བཀག་པས་འདེབས་སྤྱོད་ཡང་དགག་པར་འགྱུར་ལ། བརྫུན་བཀག་པས་བཞི་མེད་དང་། བག་ཙམ་གྱི་སྐུར་འདེབས་དང་། བརྫུན་དུ་སྨྲ་བའི་ལྟུང་བྱེད་ཀྱང་དགག་པར་འགྱུར་ལ། འདོད་ན། དེ་དག་ལ་ལས་དང་པོ་པ་མི་སྲིད་པར་ཐལ་ཞིང་། རུང་མཐུན་བཅས་པའང་དགོས་པ་མེད་པར་འགྱུར་རོ། །དེས་ན་རུང་མཐུན་གསུངས་པའི་གོང་ཡན་ཆད་དུ་རུང་ངོ་ཞེས་དངོས་སུ་གནང་བ་ཡང་མེད། མི་རུང་བས་མི་བྱའོ་ཞེས་དངོས་སུ་བཀག་པ་ཡང་མེད་པ་དོན་ལ་གནང་བཀག་གི་རྒྱུ་མཚན་ཡོད་པའི་གཞི་དེ་ལ་བརྩིའོ། །རུང་མཐུན་བཅས་རྟིང་མི་རུང་བ་ཐམས་ཅད་རུང་མཐུན་གྱིས་བཀག རུང་བ་ཐམས་ཅད་རུང་མཐུན་གྱིས་གནང་བ་ཡིན་པས་དེའི་གཞི་དེ་ལ་བྱའོ། །གཉིས་པ་རུང་མཐུན་རང་གི་ངོ་བོ་ནི། སྔར་སྒྲུབ་པའི་བསླབ་པ་འཆའ་བའི་རྒྱུ་མཚན་ཡོད། དགག་པའི་བསླབ་པ་འཆའ་བའི་རྒྱུ་མཚན་མེད་ན་རུང་བར་བསྒྲུབ་བཟློག་ན་མི་རུང་བར་བསྒྲུབ་སྟེ། དཔེར་ན་མིག་སྨན་མིག་ལ་ཕན་པའི་ཕྱིར་དུ་བསྟེན། སྒེག་རྫས་སུ་མི་བསྟེན་ཞེས་གསུངས་པས། སྔར་ཏམ་བུ་ལ་རུང་བས་ཟོ་ཞིག མི་རུང་བས་མ་ཟ་གཅིག་ཅེས་གང་ཡང་མ་གསུངས་ཀྱང་སྨན་རྣམས་ཁ་ཤོལ་བའི་དོན་དུ་རུང་ལ། སྒེག་རྫས་སུ་མི་རུང་བར་སྒྲུབ་པ་དང་། སྔར་འགྲེང་ཏེ་བཤང་བ་མི་བྱའོ་ཞེས་མི་རུང་བར་བསྟན་པས་ཉལ་ཏེ་བཤང་གཅི་བྱེད་པའང་མི་རུང་བར་བསྒྲུབ་པ་དང་། སྔར་རྡོའི་ཡོལ་གོར་དུ་ཟས་ཟ་བ་གནང་བས་ཁམ་ཕོར་དུའང་ཟས་ཟ་བ་གནང་བར་སྒྲུབ་པ་སྟེ། མདོར་ན་ཆོས་ཅན་རུང་མཐུན་མ་བཅས་གོང་གི་གནང་མེད་བཀག་མེད་དེ་ལ། རྟགས་དགོས་པ་ཡོད་པས་རུང་བ་དང་མཐུན། དགག་བྱ་མེད་པས་མི་རུང་བ་དང་འགལ་བ་རྟགས་སུ་བཀོད་ནས་རུང་བར་བསྒྲུབ། ཡང་དགག་བྱ་ཡོད་པས་མི་རུང་བ་དང་མཐུན་དགོས་པ་མེད་པས་རུང་བ་དང་འགལ་བ་རྟགས་སུ་བཀོད་ནས་མི་རུང་བར་བསྒྲུབ་པ་ཡིན་ལ། སྟོན་པས་རུང་མཐུན་བཅས་པས་ཆོས་ཅན་དེའི་སྟེང་དུ་རྟགས་དེས་བསྒྲུབ་བྱའི་ཆོས་དེ་སྒྲུབས་ཤིག་ཅེས་གསུངས་པས། རྟགས་དེ་ལ་ཆོས་ཀྱིས་ཁྱབ་པར་སྟོན་པས་བཅས་པ་ཡིན་ལ། ཕྱིས་རུང་མཐུན་སྦྱོར་བ་པོས་རྟགས་དེས་ཆོས་ཅན་དེ་ལ་བསྒྲུབ་བྱའི་ཆོས་དེ་བསྒྲུབས་ནས་འཇུག་ཟློག་བྱེད་པ་ཡིན་ནོ། །གསུམ་པ་རུང་མཐུན་བཅས་པའི་དགོས་པ་ནི། སྔར་དགག་དགོས་དང་ལྡན་ཡང་། དགག་སྒྲུབ་ཀྱི་བསླབ་པ་དངོས་སུ་མ་བཅས་པ་རྣམས་ལ། ཕྱི་རབས་ཀྱི་སྐྱེ་བོས་བཅས་པ་ནི་མེད་སྙམ་ནས་དགག་བྱ་དང་ལྡན་པ་ལ་ཞུགས། དགོས་པ་དང་ལྡན་པ་ལས་ལོག་པས་ཉེས་དམིགས་ཆེན་པོ་འབྱུང་བས་དེ་དགག་པའི་ཕྱིར་དུ་མྱ་ངན་ལས་འདས་པའི་གེགས་སུ་གྱུར་པ་རྣམས་ནི་དགག་དགོས། གྲོགས་སུ་གྱུར་པ་རྣམས་ནི་སྒྲུབ་དགོས་པས་དགག་དགོས་དང་ལྡན་པ་ལ་བཅས་པས་ཁྱབ་པར་མཛད་པ་ཡིན་ལ། རྗེས་འཇུག་གིས་ཀྱང་དེ་ལྟར་འཇུག་ཟློག་བྱས་པས་མྱ་ངན་ལས་འདས་པའི་གེགས་སུ་གྱུར་པ་སྤངས་ཤིང་གྲོགས་སུ་གྱུར་པ་བསྟེན་པས་མྱ་ངན་ལས་འདས་པ་ཐོབ་པའི་ཐབས་སུ་འགྱུར་བའི་ཕྱིར་རོ། །བཞི་པ་རུང་མཐུན་སྦྱར་བ་ལ་དངོས་གཞི་དང་ན་སྨད་དུ་ཇི་ལྟར་འགྱུར་ཚུལ་ནི། གཞི་ལ་སོགས་པའི་ཡན་ལག་ཐམས་ཅད་མཉམ་ན་མཉམ་པར་འགྱུར་ཏེ་ལུག་བལ་དཀོན་ཞིང་རིན་ཆེ་བར་དེའི་སྟན་བྱས་ན་ལྟུང་བ་དངོས་བཞིར་འགྱུར་བ་བཞིན་ནོ། །ཆུ་ལ་རྩེ་བའི་ལྟུང་བ་ཆུ་མ་ཡིན་པ་ལ་རྩེས་ན་ན་སྨད་པའམ། རང་གིས་བྱ་དགོས་པའི་ལྟུང་བ་གཞན་ལ་བཅོལ་ན་ན་སྨད་པ་ལྟར། གཞིའི་ཡན་ལག་ལ་སོགས་པའི་སྒོ་ནས་ན་སྨད་ན་ལྟུང་བའང་ན་སྨད་དེ། བོན་པོའི་འདུག་གནས་སུ་ཟ་བ་དང་། བོན་པོ་ལ་ཟས་བྱིན་པའམ་ན་སྨད་པར་འགྱུར་བར་ཤེས་པར་བྱའོ། །དེའི་རྗེས་སུ་འབྲངས་ནས་ཕྱིར་བཅོས་པའི་ཚུལ་ཡང་ཤེས་པར་བྱའོ། །ཞེས་གསུངས་སོ།། ༈ །།གཉིས་པ་ནི། འདུལ་བ་མདོར་བསྡུས་ལ་གཉིས་ཏེ། སྤྱིའི་དོན་དང་ཡན་ལག་གི་དོན་ནོ། །དང་པོ་ལ་གསུམ་སྟེ། བཤད་བྱའི་མདོ་དགོད་པ། གོ་རིམ་ལ་སྐྱོན་ཆགས་པ་སྤོང་བ། བསྡུས་པ་རྒྱས་པར་བཤད་པའོ། །དང་པོ་ནི། འདུལ་བ་འོད་ལྡན་དུ་ཕྲན་ཚེགས་དྲངས་པ་ལས། དེ་ནས་བཅོམ་ལྡན་འདས་ཀྱིས་ཡོངས་སུ་མྱ་ངན་ལས་འདས་པའི་དུས་དེའི་ཚེ་དགེ་སློང་རྣམས་ལ་བཀའ་སྩལ་པ། དགེ་སློང་དག་ངས་ཁྱེད་ལ་འདུལ་བར་རྒྱ་ཆེར་ནི་བསྟན་གྱི། མདོར་བསྡུས་པ་མ་བསྟན་པས་འོན་ཀྱང་མདོར་བསྡུས་པ་ཡང་ཉོན་ཅིག དགེ་སློང་དག་ངས་ཁྱེད་ལ་གང་ཞིག་གནང་བ་ཡང་མེད་ལ། བཀག་པ་ཡང་མེད་ལ། རུང་བ་དང་ཉེ་ཞིང་བྱ་བ་མ་ཡིན་པ་ཟློག་པར་བྱེད་པ་ནི་བྱ་བ་ཡིན་པར་གཟུང་བར་བྱའོ། །མི་རུང་བ་དང་ཉེ་ཞིང་། རུང་བ་དང་འགལ་བ་ནི་བྱ་བ་མ་ཡིན་པས་སྤྱད་པར་མི་བྱའོ། །ཞེས་གསུངས་སོ། །གཉིས་པ་ནི། ཁ་ཅིག་ན་རེ་དངོས་བཅས་སྔར་བསྟན་ནས། རུང་མཐུན་ཕྱིས་སྟོན་པ་འདི་གོ་རིམ་ལ་སྐྱོན་ཆགས་པ་ཡིན་ཏེ། དངོས་བཅས་རྒྱས་བཤད་དང་། རུང་མཐུན་མདོར་བསྟན་ལྟ་བུ་ཡིན་པའི་ཕྱིར། ཁྱབ་སྟེ། སྒྲའི་བསྟན་བཅོས་ལས། དང་པོ་གཉིས་ལས་མཆོད་འོས་སམ། །ཡང་ན་ཡི་གེ་རབ་ཉུང་བ། །ཞེས་བཤད་པའི་ཕྱིར་ཞེ་ན། སྐྱོན་མེད་དེ། ལུང་ལས་དངོས་བཅས་སྔར་བསྟན། རུང་མཐུན་ཕྱིས་བསྟན་པ་ལྟར་འདིར་ཡང་དེ་དང་མཐུན་པར་བསྟན་པ་དང་། དངོས་བཅས་ལ་བརྟེན་ནས། མདོར་བསྡུས་ཀྱི་སྤང་བླང་ལ་འཇུག་དགོས་པའི་ཕྱིར། གསུམ་པ་ལ་ལྔ་སྟེ། དབྱེ་བ། ངོ་བོ། མཚན་ཉིད། ངེས་ཚིག་སྦྱོར་བའི་ཚུལ། རྒྱུ་མཚན་ནོ། །དང་པོ་ལ་གསུམ་སྟེ། རྒྱུ་མཚན་གྱི་སྒོ་ནས། ངོ་བོའི་སྒོ་ནས། གནས་སྐབས་ཀྱི་སྒོ་ནས་དབྱེ་བའོ། །དང་པོ་ལ་གསུམ་སྟེ། དགག་པའི། སྒྲུབ་པའི། གནང་བའི་འདུལ་བ་མདོར་བསྡུས་པའོ། །དང་པོ་ནི། བྱེ་མ་འཐས་པར་གནས་པའི་སྲོག་ཆགས་དང་བཅས་པ་བརྐོས་པ་བཀག་པ་ལྟ་བུའོ། །གཉིས་པ་ནི། དགེ་ཚུལ་གྱིས་གསོ་སྦྱོང་བྱེད་དགོས་པ་ལྟ་བུ་སྟེ། སུམ་བརྒྱ་པར། གལ་ཏེ་མངོན་སུམ་གསུངས་པ་མེད་གྱུར་ཀྱང་། །དགག་དབྱེ་གསུངས་ཕྱིར་འདིར་ནི་གསོ་སྦྱོང་ཡོད། །དགག་དབྱེ་དག་པ་གོ་བར་བྱ་ཕྱིར་ཏེ། །དེ་ལས་གསོ་སྦྱོང་དོན་ནི་ཐ་དད་མིན། །ཞེས་པ་ལྟར་རོ། །གསུམ་པ་ནི། ཁམ་ཕོར་དུ་ཟས་ཟ་བ་གནང་བ་ལྟ་བུའོ། །གཉིས་པ་ངོ་བོའི་སྒོ་ནས་འདུལ་བ་མདོར་བསྡུས་ལ་གཉིས་ཏེ། རྒྱུ་ཚོགས་དང་བཅས་པའི་འདུལ་བ་མདོར་བསྡུས་དང་། བཅས་པ་ངོ་བོ་ཡན་ལག་གི་འདུལ་བ་མདོར་བསྡུས་སོ། །དང་པོ་ནི་སྲོག་ཆགས་དང་བཅས་པའི་བྱེ་མ་བརྐོ་བ་བཀག་པ་ལྟ་བུའོ། །གཉིས་པ་ནི། འཁྲིག་ཚིག་སྨྲ་བའི་ལྷག་མ་བསྐྱེད་པ་ལ་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་བཞིན་དུ་བསྙེན་བསྐུར་བསྔགས་པའི་ལྷག་མ་བསྐྱེད་པ་ལ་ཡང་རྫུ་འཕྲུལ་གྱི་ཆོས་ཅན་མ་ཡིན་པ་དགོས་པ་ལྟ་བུའོ། །གསུམ་པ་གནས་སྐབས་ཀྱི་སྒོ་ནས་དབྱེ་ན། ངོ་བོ་ཉིད་ཀྱི་མདོར་བསྡུས་དང་། བྱེད་པའི་མདོར་བསྡུས་གཉིས་སོ། །གཉིས་པ་ངོ་བོ་ནི། གསལ་ཁ་མ་དོད་པ་སྟེ། འདུལ་བའི་བསླབ་པ་རྣམ་པར་གཞག་པའི་བདག་ཉིད་བྱ་བ་དང་སྦྱར་ནས་གསལ་ཁ་མ་དོད་པའོ། །གསུམ་པ་མཚན་ཉིད་ནི། འདུལ་བའི་བསླབ་པ་རྣམ་པར་གཞག་པའི་བདག་ཉིད་གང་ཞིག་བྱ་བ་དང་སྦྱར་ནས་གསལ་ཁ་མ་དོད་པའོ། །བཞི་པ་ངེས་ཚིག་ནི། ཚུལ་ཁྲིམས་སྟོན་པར་བྱེད་པས་འདུལ་བ། དགག་དགོས་ཀྱི་རྒྱུ་མཚན་ལ་བརྟེན་ནས་གཞི་དང་མ་སྦྱར་བར་བླང་དོར་མདོར་བསྡུས་ཏེ་སྟོན་པར་བྱེད་པས་མདོར་བསྡུས་ཞེས་བྱའོ། །གང་ལ་སྦྱར་བའི་ཚུལ་ནི། སྤྱིར་གནང་བཀག་མཛད་ལ་གསལ་ཁ་དོད་པའི་སྒོ་ནས་གནང་བཀག་མ་མཛད་པ་དེ་ལ་བྱའོ། །འདུལ་བ་མདོར་བསྡུས་ཞེས་པའི་ཐ་སྙད་ནི་རྒྱ་ཆེར་འགྲེལ། རང་འགྲེལ། བམ་ལྔ། འགྲེལ་ཆུང་། འགྲེལ་པ་བར་མ། སུམ་བརྒྱ་པ་རྩ་འགྲེལ་རྣམས་ལས་བཤད་དེ། སུམ་བརྒྱ་པ་ལས། འདུལ་བ་མདོར་བསྡུས་ཞེས་བྱ་སྒྲོན་མ་དང་། །འདྲ་བ་གཞན་ནི་བདེ་བར་གཤེགས་པའི་གསུང་། །ཞེས་སོ། །ལྔ་པ་རྒྱུ་མཚན་ལ་གསུམ་སྟེ། དགག་པའི་རྒྱུ་མཚན། སྒྲུབ་པའི་རྒྱུ་མཚན། གནང་བའི་རྒྱུ་མཚན་ནོ། །ཁ་ཅིག་འདུལ་བ་མདོར་བསྡུས་ལ་རྒྱུ་ཚོགས་དང་བཅས་པ་དང་། ཡན་ལག་གི་འདུལ་བ་མདོར་བསྡུས་དང་། ངོ་བོ་ཉིད་ཀྱི་འདུལ་བ་མདོར་བསྡུས་དང་། བྱེད་པའི་འདུལ་བ་མདོར་བསྡུས་བཞིར་དབྱེ་བ་མི་འཐད་དེ། འདུལ་བ་མདོར་བསྡུས་ཀྱི་བསྟན་དོན་འདུལ་བ་མདོར་བསྡུས་མ་ཡིན་པའི་ཕྱིར་ཏེ། འདུལ་བ་མདོར་བསྡུས་དང་རྒྱས་པ་གཉིས་ཀ་ཡང་འདུལ་བའི་གསུང་རབ་ལ་བྱེད་དགོས་པའི་ཕྱིར་རོ། །ཁ་ཅིག་འདུལ་བ་མདོར་བསྡུས་ཡིན་ན་འདུལ་བ་རུང་མཐུན་ཡིན་དགོས་ཟེར་བ་ཡང་མི་འཐད་དེ། འདུལ་བ་མདོར་བསྡུས་དེ་ལ་རུང་མཐུན་དང་མི་རུང་མཐུན་གཉིས་ཡོད་པའི་ཕྱིར་ཏེ། མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུ། ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ། །ཞེས་གསུངས་པའི་ཕྱིར། གཉིས་པ་ཡན་ལག་གི་དོན་ནི། སྤྱི་དོན་རྒྱས་པར་བཤད་པ་ཉིད་ཀྱིས་ལེགས་པར་གྲུབ་པ་ཡིན་ནོ། །ཡོན་ཏན་ཀུན་གྱི་རྩ་བ་ངེས་འབྱུང་གི །ཚུལ་ཁྲིམས་ཡིན་པ་དམ་པ་རྣམས་ཀྱིས་གསུངས། །དེ་ཕྱིར་དེ་ཉིད་མ་ཐོབ་ཐོབ་པ་དང་། །ཐོབ་པ་བསྲུང་དང་ཉམས་ན་ཕྱིར་བཅོས་པའི། །ཚུལ་འདི་བླ་མའི་གསུང་བཞིན་བདག་དང་ནི། །གཞན་ལ་ཕན་ཕྱིར་ཚིག་དོན་རབ་གསལ་བར། །རང་བཟོ་སྤངས་ཏེ་གཟུ་བོའི་བློ་ཡིས་བསྒྲུབས། །བདག་བློ་རྣམ་དཔྱོད་སྦྱངས་པ་ཞན་པ་དང་། །བརྗོད་བྱ་ཟབ་རྒྱས་རྟོགས་པར་དཀའ་བའི་ཕྱིར། །ནོངས་པ་མཆིས་གང་འཕགས་དང་མཁས་པ་ཡིས། །བཟོད་མཛོད་སླར་ཡང་བློ་གྲོས་སྩལ་དུ་གསོལ། །འདི་ལས་སྐྱེས་པའི་རྣམ་དཀར་དགེ་བ་གང་། །ལྷག་བསམ་སྐལ་ལྡན་ཤིང་རྟ་ལ་བཅིབས་ནས། །ཀུན་མཁྱེན་རྒྱ་མཚོ་ཆེན་པོར་འདྲེས་གྱུར་ཏེ། །བགྲང་ཡས་ལུས་ཅན་ཚིམ་པའི་རྒྱུ་རུ་བསྔོ། །བདག་ཀྱང་དེང་ནས་ཚེ་རབས་ཐམས་ཅད་དུ། །ཡོན་ཏན་གཞི་ལྡན་ཚུལ་ཁྲིམས་ལྷག་བསམ་ཅན། །འདུལ་བ་རྒྱ་མཚོའི་ཚིག་དོན་ཀུན་རྟོགས་ནས། །ཐར་འདོད་འགྲོ་ལ་རྟག་ཏུ་སྟོན་པར་ཤོག །འདུལ་བ་མདོ་རྩ་བའི་སྤྱིའི་རྣམ་པར་གཞག་པ་བདག་གཞན་རབ་ཕན་ཚིག་དོན་རབ་གསལ་ཞེས་བྱ་བ་འདི་ནི། ཐོག་མར་དཔལ་ལྡན་ས་སྐྱ་པའི་གདུང་བརྒྱུད་དྲི་མ་མེད་པར་སྐུ་འཁྲུངས་ཤིང་། མཁྱེན་རབས་དང་ཐུགས་རྗེ་ཚད་མེད་པ་དང་ལྡན་པ། སློབ་དཔོན་ཆེན་པོ་ངག་གི་དབང་ཕྱུག་གྲགས་པ་རྒྱལ་མཚན་དཔལ་བཟང་པོའི་བཀས་བསྐུལ་ཞིང་། གཞན་ཡང་བློ་གསལ་ཞིང་ཡིད་གཞུངས་པའི་སྡེ་སྣོད་འཛིན་པ་དུ་མས་ཡང་ཡང་བསྐུལ་བའི་ངོར། ཤར་ཀོང་པོའི་ཆོས་སྨྲ་བའི་དགེ་སློང་དབང་ཕྱུག་གྲུབ་པ་དཔལ་བཟང་པོས། དངོས་པོ་ཞེས་བྱ་བ་ཤིང་ཕོ་ཁྱིའི་ལོ། ཧོར་ཟླ་བཅུ་གཅིག་པ། མགོ་ཡིས་ཉ་བའི་ཡར་ཚེས་ལྔ་ལ་ཐུབ་བསྟན་རྣམ་པར་རྒྱལ་བའི་ཆོས་གྲྭ་ཆེན་པོར་ལེགས་པར་གྲུབ་པའི་ཡི་གེ་པ་ནི། ལྷན་སྐྱེས་ཀྱི་བློ་གྲོས་མི་དམན་པ་དཀོན་མཆོག་དཔལ་གྱིས་བགྱིས་སོ། །འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག། ༈ །།འདི་བསྒྲུབས་པ་ལས་བྱུང་བ་ཡི། །དགེ་བ་བདག་གིས་གང་ཐོབ་པ། །དེས་ནི་སྐྱེ་བོ་ཐམས་ཅད་ཀྱིས། །བདེ་གཤེགས་ཤེས་རབ་ཐོབ་པར་ཤོག །འགྲོ་བའི་སྡུག་བསྔལ་སྨན་གཅིག་པུ། །བདེ་བ་ཐམས་ཅད་འབྱུང་བའི་གནས། །བསྟན་པ་རྙེད་དང་བཀུར་སྟི་དང་། །བཅས་ཏེ་ཡུན་རིང་གནས་གྱུར་ཅིག །དགེའོ། །དགེའོ། །དགེའོ།། །