ཚིགས་བཅད་གསུམ་པ།
གསུམ་པ་ནི།
ཕྱག་འཚལ་གསེར་སྔོན་ཆུ་ནས་སྐྱེས་ཀྱི། །
པདྨས་ཕྱག་ནི་རྣམ་པར་བརྒྱན་མ། །
སྦྱིན་པ་བརྩོན་འགྲུས་དཀའ་ཐུབ་ཞི་བ། །
བཟོད་པ་བསམ་གཏན་སྤྱོད་ཡུལ་ཉིད་མ། །ཞེས་པ་སྟེ།
གསེར་སྔོན་པོའི་ཆུ་སྐྱེས་པདྨ་ཕྱག་ན་བསྣམས་པའི་ལྷ་མོས་འདོད་པའི་དོན་གཏོང་བའི་སྦྱིན་པ་དང་། དགེ་བ་ལ་སྤྲོ་བའི་བརྩོན་འགྲུས་དང་། དཀའ་ཐུབ་སྟེ་ཉེས་སྤྱོད་སྡོམ་པའི་ཚུལ་ཁྲིམས་དང་། ཞི་བ་སྟེ་ཆོས་རབ་ཏུ་རྣམ་འབྱེད་ཀྱི་ཤེས་རབ་དང་། འགའ་རྐྱེན་གྱིས་མི་འཁྲུགས་པའི་བཟོད་པ་དང་། དགེ་བའི་དམིགས་པར་སེམས་རྩེ་གཅིག་ཏུ་གནས་པའི་བསམ་གཏན་ཏེ་ཕྱིན་དྲུག་མཐའ་དག་ཁོང་དུ་ཆུད་པའོ། །