ཚིགས་བཅད་དྲུག་པ།
དྲུག་པ་ནི།
ཕྱག་འཚལ་བརྒྱ་བྱིན་མེ་ལྷ་ཚངས་པ། །
རླུང་ལྷ་སྣ་ཚོགས་དབང་ཕྱུག་མཆོད་མ། །
འབྱུང་པོ་རོ་ལང་དྲི་ཟ་རྣམས་དང་། །
གནོད་སྦྱིན་ཚོགས་ཀྱིས་མདུན་ནས་བསྟོད་མ། །ཞེས་པ་སྟེ།
ལྷའི་དབང་པོ་བརྒྱ་བྱིན་དང་། དྲང་སྲོང་གི་གཙོ་བོ་མེ་ལྷ་དང་། འཇིག་རྟེན་བྱེད་པོ་ཚངས་པ་དང་། འཇིག་རྟེན་བཟོ་གནས་དང་བཀོད་པའི་ཁྱད་པར་བྱེད་པོ་རླུང་ལྷ་དང་། གཞན་ཡང་དྲག་པོ་དང་ཁྱབ་འཇུག་སོགས་འཇིག་རྟེན་ན་དབང་ཕྱུག་ཏུ་གྲགས་པ་རྣམས་ནི་སྣ་ཚོགས་དབང་ཕྱུག་སྟེ། དེ་ལྟ་བུའི་ཆེས་ཆེ་བ་རྣམས་ཀྱིས་ཀྱང་མཆོད་པའི་གནས་སུ་གྱུར་ཅིང་། ཚོགས་བདག་སོགས་འབྱུང་པོ་དང་། རོ་ལངས་ཀྱི་ལས་བྱེད་པའི་འཇིགས་བྱེད་དང་། སྣ་ཚོགས་ཤིང་རྟ་སོགས་དྲི་ཟ་དང་། རྣམ་ཐོས་བུ་སོགས་གནོད་སྦྱིན་དང་། མདངས་འཕྲོགས་པའི་ལྷ་མ་སྲིན་རྣམས་ཏེ། འདུལ་བར་དཀའ་བའི་ཚོགས་དེ་རྣམས་ཀྱིས་ཀྱང་མདུན་ནས་བསྟོད་པར་བྱེད་པ་སྟེ་འགྲོ་བ་ཐམས་ཅད་ཀྱི་བླ་མར་གྱུར་པའོ། །