ཚིགས་བཅད་བརྒྱད་པ།
བརྒྱད་པ་ནི།
ཕྱག་འཚལ་ཏུ་རེས་འཇིགས་པ་ཆེན་མོ། །
བདུད་ཀྱི་དཔའ་བོ་རྣམ་པར་འཇོམས་མ། །
ཆུ་སྐྱེས་ཞལ་ནི་ཁྲོ་གཉེར་ལྡན་མཛད། །
དགྲ་བོ་ཐམས་ཅད་མ་ལུས་གསོད་མ། །ཞེས་པ་སྟེ།
ཏུ་རེའི་སྔགས་ཀྱིས་བསྐུལ་བས་ཞལ་རས་ཁྲོ་གཉེར་ལྡན་པའི་འཇིགས་པ་ཆེན་མོའི་སྐུར་བསྟན་ནས་བདུད་ཀྱི་དཔའ་བོ་དམག་དཔོན་རྣམས་འཇོམས་པ་དང་། བསྟན་ལ་སྡང་བ་དང་། སེམས་ཅན་ལ་འཚེ་བ་དང་། སྒྲུབ་པ་པོ་ལ་བར་དུ་གཅོད་པའི་དགྲ་བོ་མ་ལུས་པ་རྣམས་ཀྱི་གནོད་པའི་བསམ་སྦྱོར་མཚམས་བཅད་དེ་ཞི་བ་ཐར་པའི་ལམ་དུ་འཁྲིད་པར་མཛད་པའོ། །