གོང་མ་རྣམ་གསུམ་གྱི་སྐུ་བསྟོད།
ལ་ལཱ་ར་སཱ་དྷཱུ་ཏཱིར་དག་པའི་མཐུས། །དབེན་གསུམ་བདུད་རྩིས་བརླན་པའི་པདྨ་ཅན། །མི་ཤིགས་སྙིང་པོའི་ཆར་ཡང་རྡོ་རྗེའི་སྲོག །ལོ་ཙཱ་ཆེན་པོའི་ཞབས་ལ་གསོལ་བ་འདེབས། །འགྲེའོ། །སྒྱུ་འཕྲུལ་དྲྭ་བའི་ཆ་ཤས་བཅུ་དྲུག་རྫོགས། །ཉིན་བྱེད་ཉི་ཤུའི་འོད་ཟེར་རྣམ་པར་འཕྲོ། །ཆགས་སྡང་རྨོངས་པ་ཆེན་པོའི་ཕ་རོལ་སོན། །ལོ་ཙཱ་༴ དངོས་ཀུན་བྱང་ཆུབ་ཉེ་བར་ཐོབ་པས་སྡུད། །སྐད་ཅིག་མཁའ་སྣང་རྡུལ་མུན་མཆོག་ཏུ་རྫོགས། །ཐིག་རླུང་འགྱུར་མེད་སྣ་ཚོགས་རོ་ཡི་མྱོས། །ལོ་ཙཱ་༴ དགྱེས་མཛད་སྡོམ་པ་དཔལ་ལྡན་འདུས་པ་སྟེ། །ཁྱབ་བདག་དུས་འཁོར་བཅོམ་ལྡན་རྡོ་རྗེ་སེམས། །རྡོ་རྗེ་སློབ་དཔོན་གཟུགས་ཀྱིས་མངོན་སྤྲུལ་པ། །ལོ་ཙཱ་ཆེན་པོའི་ཞབས་ལ་གསོལ་བ་འདེབས། །བདག་ཀྱང་ཤེས་རབ་བཅོམ་ལྡན་འདས་མ་དང་། ཧེ་རུ་ཀ་དཔལ་སྙོམས་པར་འཇུག་པ་ལ། །སྤྱི་བོར་རིགས་བདག་མཆོག་གིས་སྦ་བ་ཡི། །ལོ་ཙཱ་ཆེན་པོའི་དངོས་གྲུབ་སྩལ་དུ་གསོལ། ༈ །བྱང་ཕྱོགས་མུན་པའི་སྨག་རུམ་ན། །གངས་ལ་ཉི་མ་ཤར་འདྲ་བའི། །ཐོས་པ་དགའ་ཞེས་བྱ་བ་ཡི། །སྐྱེས་བུ་དེ་ལ་གུས་ཕྱག་འཚལ། །གོང་གི་ཤློ་ཀ་འདི་ནི་པཎ་ཆེན་ནཱ་རོའི་གསུང་ངོ་། །བྱང་ཕྱོགས་རྒྱུད་དུ་སྐུ་འཁྲུངས་ཤིང་། །འཇིག་རྟེན་སྐྱོན་གྱིས་མ་གོས་པར། །དཀའ་བ་སྤྱད་པའི་ངོ་མཚར་ཅན། །མི་ལ་མཆོག་ལ་གསོལ་བ་འདེབས། །འགྲེའོ། །བདེ་ཆེན་བརྗོད་མེད་རོ་ཡིས་མྱོས། །སྲིད་གསུམ་དག་པའི་ཕྱག་རྒྱས་བཅིངས། །བསྲེག་བཞུའི་ལམ་ནས་ལྷན་ཅིག་སྐྱེས། །མི་ལ་༴ རགས་སྣང་ཕྲ་ཐིག་ཟབ་མོར་བསྟེན། །ཕྲ་མྱོང་བདག་བྱིན་བརླབས་པར་མཛད། །གསང་བའི་དཀྱིལ་འཁོར་རིགས་ཀྱི་བདག །མི་ལ་༴ འཛག་མེད་གཙོ་མོར་ས་བོན་བཀྲོལ། །སྲིད་བདག་ལམ་དུ་སྙིང་རྗེས་ལེན། །ནུས་པ་དྲག་པོའི་སྐུར་བཞེངས་པ། །མི་ལ་མཆོག་ལ་གསོལ་བ་འདེབས། །བདག་ཀྱང་འཁོར་བ་མི་སྤོང་ཞིང་། །མྱང་འདས་ཞི་བར་མི་འཇུག་སྟེ། །མཁའ་སྤྱོད་དབང་ཕྱུག་མི་ལ་ཡི། །མཆོག་གི་དངོས་གྲུབ་འགྲུབ་གྱུར་ཅིག ༈ །ཞིང་མཆོག་དཔལ་ལྡན་སྟུག་པོ་བཀོད་པ་ན། །མཉམ་མེད་མི་གཡོ་ཆོས་སྐུ་མངོན་དུ་མཛད། །ཞི་སྐུ་དཔག་བསམ་ཤིང་ལྟར་འགྲོ་སྒྲོལ་རྟག །རྗེ་བཙུན་སྒམ་པོ་པ་ལ་གསོལ་བ་འདེབས། འགྲེའོ། །ཤེས་བྱ་མི་སྣང་ཤེས་པ་མི་འཇུག་ཅིང་། །སྐད་ཅིག་གཅིག་ལ་ཤེས་དང་ཤེས་བྱ་ཀུན། །དུས་གསུམ་ཇི་ལྟ་ཇི་སྙེད་མཁྱེན་པ་པོ། །རྗེ་བཙུན་༴ སྐུ་བཞིའི་ས་བོན་གསལ་བར་སྨིན་མཛད་ནས། །ཕྱག་རྒྱ་གསུམ་གྱིས་ཐིག་རླུང་སེམས་གསུམ་་་སྦྱངས། །བསྐྱེད་དང་རྫོགས་པའི་བྱང་ཆུབ་རིམ་པར་བསྟེན། །རྗེ་བཙུན་༴ འཕགས་ཆེན་རྣམས་ལ་ལོངས་སྤྱོད་རྫོགས་སྐུ་དང་། །རིགས་གསུམ་གདུལ་བྱར་མཆོག་གི་སྤྲུལ་སྐུ་སྟེ། །ཡོངས་གྲགས་ཟླ་འོད་གཞོན་ནུ་ས་བཅུའི་མགོན། །རྗེ་བཙུན་སྒམ་པོ་པ་ལ་གསོལ་བ་འདེབས། །བདག་ཀྱང་གདུལ་བྱའི་ཁམས་དང་དབང་པོ་བཞིན། །མི་རྟོག་ཡེ་ཤེས་ཕྲིན་ལས་འཇུག་བྱེད་ཅིང་། །ཕྲིན་ལས་སྲིད་མཐའི་བར་དུ་གནས་བྱེད་པ། །རྗེ་བཙུན་སྒམ་པོ་པ་ལྟར་འགྲུབ་གྱུར་ཅིག །རྗེ་བཙུན་གོང་མ་རྣམ་གསུམ་ལ་རྗེ་བཙུན་ཐམས་ཅད་མཁྱེན་པ་རྡོ་རྗེ་དགའ་བའི་དབྱངས་ཅན་གྱིས་བསྟོད་པར་མཛད་པའོ། །