རྒྱལ་མཆོག་བཅུ་དྲུག་པ་ཆེན་པོའི་བླ་མ་རྒྱང་འབོད།

བླ་མ་མཁྱེན་ནོ། །རྒྱལ་བ་ཀུན་གྱི་ཕྲིན་ལས་རང་གཟུགས་ཉིད། །འཇིག་རྟེན་མགོན་གཅིག་ཕྱག་ན་པད་དཀར་འཆང་། །བདག་ཅག་གདུལ་བྱའི་མགོན་དུ་མི་ཡི་ཟོལ། །རང་བྱུང་ཁྱབ་བདག་རིག་པའི་རྡོ་རྗེའི་ཞབས། །གསོལ་བ་འདེབས་སོ་རྒྱལ་དབང་ཀརྨ་པ། །གདུང་བས་འབོད་དོ་རིག་གྲོལ་ཡེ་ཤེས་མཆོག །ཐུགས་བརྒྱུད་བྱིན་རླབས་འཕོ་བར་བྱིན་གྱིས་རློབས། །སྙིགས་ལྔའི་རྒུད་པས་གངས་ལྗོངས་རྒྱལ་བའི་བསྟན། །ཉམས་པར་གྱུར་ཚེ་མེ་རོ་གསོ་བའི་སླད། །ཐུགས་བསྐྱེད་བཙན་པོའི་གོ་ཆ་ཆེར་བགོས་ཏེ། །རྒྱལ་བསྟན་འཛམ་གླིང་མཐའ་གྲུར་སྤེལ་མཛད་པོ། །གསོལ་བ་འདེབས་སོ་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །གཏན་བདེའི་གོ་འཕང་ཐོབ་པར་བྱིན་གྱིས་རློབས། །ཚུལ་ཁྲིམས་རྣམ་དག་ཡོན་ཏན་གཞི་ཡིན་ཕྱིར། །དམ་ཆོས་འདུལ་བར་གཅེས་སྤྲས་དགོས་སོ་ཞེས། །བརྩེ་བའི་གདམས་ཟབ་ཡང་ནས་ཡང་བསྩལ་མོད། །ཇི་བཞིན་ཉམས་ལེན་མི་ནུས་བདག་སོགས་རྣམས། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །ཉམས་མེད་ཚུལ་ཁྲིམས་ལྡན་པར་བྱིན་གྱིས་རློབས། །ཐོས་པའི་ཤེས་རབ་མུན་སེལ་སྒྲོན་མེ་སྟེ། །མདོ་སྔགས་རིག་པའི་གནས་བཅས་འཆད་ཉན་གྱིས། །བསྟན་པ་སྐྱོངས་ཞེས་བརྩེ་བའི་བཀས་བསྐུལ་མོད། །ཇི་བཞིན་ལག་ལེན་མ་ལུས་བདག་སོགས་ལ། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །ཐོས་བསམ་ཤེས་རབ་རྒྱས་པར་བྱིན་གྱིས་རློབས། །འཁོར་ལོ་མཐའ་མའི་ངེས་དོན་མདོ་སྡེ་ཡི། །དགོངས་པ་ཐུན་མིན་གཞན་སྟོང་དབུ་མའི་སྲོལ། །རང་ལུགས་ཟུང་ཞེས་ཁྱེད་ཀྱིས་བཀའ་བསྩལ་མོད། །ད་དུང་གཞན་ཟེར་རྗེས་ཟློས་བྱེད་རྣམས་ལ། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །ངེས་དོན་ལྟ་བ་རྟོགས་པར་བྱིན་གྱིས་རློབས། །མར་རྔོག་ནས་བརྒྱུད་རྒྱུད་སྡེའི་བསྐྱེད་རྫོགས་དང་། །ཐུན་མིན་ཕྱག་ཆེན་ཆོས་དྲུག་གདམས་ངག་གི། སྒོ་འཕར་ཡངས་པོར་ཕྱེས་ཏེ་བསྩལ་མོད་ཀྱང་། །ནོར་བུ་བོར་ནས་འཆིང་བུ་འཚོལ་རྣམས་ལ། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །མན་ངག་ཉམས་ལེན་ནུས་པར་བྱིན་གྱིས་རློབས། །སྒྲུབ་བརྒྱུད་ཀརྨ་ཀམ་ཚང་མན་ངག་གནང་། །ཉམས་ལེན་ནུས་ན་རྡོ་རྗེ་འཛིན་པའི་ས། །ཚེ་རབས་གཞན་ལ་རེ་ལྟོས་མི་དགོས་ཞེས། །དབུགས་དབྱུང་སྩལ་མོད་ལེ་ལོའི་དབང་ཤོར་རྣམས། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །ཚེ་གཅིག་སངས་རྒྱས་ཐོབ་པར་བྱིན་གྱིས་རློབས། །གདན་ས་གསར་བཞེངས་བཀའ་བསྟན་གསར་སྤེལ་གྱིས། །བསྟན་པའི་མེ་རོ་རྨང་ནས་གསོ་བ་ཡི། །ཐུགས་བསྐྱེད་བདག་གིར་བཞེས་པའི་ཕྲིན་ལས་རྒྱུན། །ཡོངས་སུ་མི་སྐྱོང་ཡལ་བར་འདོར་རྣམས་ལ། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །བསྟན་འགྲོའི་དོན་ཆེན་འགྲུབ་པར་བྱིན་གྱིས་རློབས། །བདག་སོགས་བདག་མེད་འཁྲུལ་པས་ནོངས་གྱུར་ཚེ། །བྱམས་པའི་ཐུགས་རྗེས་ཡལ་བར་མ་དོར་བར། །ཐབས་དང་ཤེས་རབ་ཞི་དྲག་ཟུང་འབྲེལ་གྱིས། །སྐྱོན་རྣམས་སྤངས་ཤིང་ཡོན་ཏན་སྤེལ་བའི་སླད། །ཉིན་མཚན་ལྟོས་མེད་སྐུ་ངལ་ཁྱད་བསད་ནས། །རྗེས་སུ་སྐྱོང་བའི་བཀའ་དྲིན་དེང་འདིར་དྲན། །ཐུགས་རྗེས་གཟིགས་ཤིག་རྒྱལ་དབང་ཀརྨ་པ། །གདུང་བས་འབོད་དོ་རིག་པའི་རྡོ་རྗེ་མཆོག །ཐུགས་ཡིད་དབྱེར་མེད་འདྲེས་པར་བྱིན་གྱིས་རློབས། །དེ་ལྟར་གདུང་བའི་ཤུགས་ཀྱིས་གསོལ་བཏབ་པས། །སེང་གེ་ཁྱུང་གི་ཕྲུ་གུ་ཇི་བཞིན་དུ། །སློབ་མ་བས་ཀྱང་ཡང་སློབ་བཟང་ངོ་ཞེས། །གྲུབ་ཐོབ་གོང་མའི་རྡོ་རྗེའི་ལུང་གི་དོན། །ཇི་བཞིན་བདག་རྒྱུད་སྨིན་པར་བྱིན་གྱིས་རློབས། །ཅེས་པ་འདི་དིལ་ཡག་སྒྲུབ་དཔོན་རིན་པོ་ཆེ་ནས་གནང་སྐྱེས་དང་བཅས། ༧རྒྱལ་མཆོག་བཅུ་དྲུག་པ་ཆེན་པོར། བླ་མ་རྒྱང་འབོད་ཀྱི་གསོལ་འདེབས་ཤིག་བྲིས་ཞེས་ཡང་ནས་ཡང་དུ་ནན་ཏན་ཆེན་པོས་བསྐུལ་མ་གནང་བ་བཞིན། ཁྲ་འགུ་སྤྲུལ་མིང་འཛིན་པས་སྟག་མོ་ལུས་སྦྱིན་དུ་མངོན་པ་མཛོད་ཀྱི་བཤད་ཁྲིད་ཅིག་དབུ་འཛུགས་སྐབས་མགོན་པོ་གང་གིས་བསྟན་འགྲོའི་དོན་ཆེན་ལ་དགོངས་ནས་བསྩལ་བའི་རྡོ་རྗེའི་གསུང་རྣམས་རྗེས་སུ་དྲན་བཞིན་གསོལ་བ་བཏབ་པའོ།། །།