སྣང་སྲིད་དབང་དུ་སྡུད་པའི་གསོལ་འདེབས་བྱིན་རླབས་སྤྲིན་ཆེན།
ༀ་ཨཱཿཧཱུྃ་ཧྲཱིཿ བདེ་ཆེན་འབར་བ་དབང་གི་ཕོ་བྲང་དུ། །བདེ་སྟོང་སོ་སོར་རྟོག་པའི་ཡེ་ཤེས་སྐུ། །མ་ཆགས་བདེ་ལྡན་པདྨའི་རང་བཞིན་ལས། །རྡོ་རྗེ་ཉི་མ་སྣང་བ་ཆེན་པོའི་དཔལ། །ཆོས་སྐུ་སྣང་བ་མཐའ་ཡས་རྡོ་རྗེ་ཆོས། །འཇིག་རྟེན་དབང་ཕྱུག་ཐུགས་རྗེའི་རྗེས་ཆགས་གཟུགས། །པདྨ་རྒྱལ་པོ་འཁོར་འདས་མངའ་དབང་བསྒྱུར། །སྣང་སྲིད་ཟིལ་གནོན་དབང་ཆེན་ཧེ་རུ་ཀ །གསང་བ་ཡེ་ཤེས་བཛྲ་ཝཱ་ར་ཧི། །བདེ་མཆོག་འདོད་པའི་རྒྱལ་པོ་བདེ་ཆེན་གཏེར། །མ་ལུས་སྐྱེ་རྒུའི་ཡི་འཕྲོག་རིག་བྱེད་མ། །མཆོག་ཐུན་ཕྱག་རྒྱའི་དབང་ཕྱུག་བདེ་སྟོང་གར། །དབང་མཛད་རྡོ་རྗེ་དཔའ་བོ་ཌཱ་ཀིའི་ཚོགས། །སྣང་སྟོང་མཉམ་པ་ཆེན་པོའི་ངང་ཉིད་དུ། །རྡོ་རྗེ་སྐུ་ཡི་གར་གྱིས་སྲིད་གསུམ་གཡོ། །འགག་མེད་གསུང་གི་བཞད་སྒྲས་ཁམས་གསུམ་འགུགས། །འོད་ཟེར་དམར་པོས་འཁོར་འདས་ཡོངས་ལ་ཁྱབ། །སྲིད་ཞིའི་དྭངས་བཅུད་གཡོ་ཞིང་སྡུད་པར་བྱེད། །རྡོ་རྗེ་ཆགས་པ་ཆེན་པོའི་ཐུགས་ཀྱིས་ནི། །རྣམ་གཉིས་དངོས་གྲུབ་འདོད་དགུའི་མཆོག་སྩོལ་ཞིང་། །རྡོ་རྗེ་ལྕགས་ཀྱུ་ཞགས་པ་ཆེན་པོ་ཡིས། །སྣང་སྲིད་བདེ་བ་ཆེན་པོར་སྡོམ་བྱེད་པ། །མཐའ་ཡས་སྒྱུ་འཕྲུལ་དྲྭ་བའི་རོལ་གར་ཅན། །ཏིལ་གྱི་གོང་བུ་ཕྱེ་བ་བཞིན་བཞུགས་པའི། །རབ་འབྱམས་རྩ་གསུམ་དབང་གི་ལྷ་ཚོགས་ལ། །གུས་པས་གསོལ་བ་འདེབས་སོ་བྱིན་གྱིས་རློབས། །མཆོག་མཐུན་དངོས་གྲུབ་འདོད་དགུའི་དཔལ་མཐའ་ཐག །ཐོགས་མེད་དབང་དུ་བྱེད་པའི་དངོས་གྲུབ་སྩོལ། །ཅེས་པའང་རབ་ཚེ་ས་ཡོས་ཟླ་༧ ཚེས་༡ ལ་དྷཱི་མིང་པས་སྤེལ་བ། གསོལ་བ་བཏབ་ན་གང་ཟག་སུ་ཡང་རུང་སྟེ་དབང་གི་ལས་ཀུན་ཇི་ལྟར་བསམ་པ་བཞིན་འགྲུབ་པར་གདོན་མི་ཟའོ། །སྤྱི་འགྲོའི་བསོད་ནམས་རྒུད་པས་སྙིགས་ལྔའི་མུན། །ཆེར་ལྷག་བདོ་བའི་འཛམ་བུའི་ལྷོ་གླིང་འདིར། །ཕན་ཚུན་དམག་འཁྲུགས་ངན་པའི་མཚོན་གཤོམ་དང་། །དུས་མིན་འཆི་འཇིགས་ས་གཡོས་འབྱུང་སོགས་རྐྱེན། །དཀར་མིན་བསོད་ནམས་མི་དགེའི་བྱས་བསགས་ཀུན། །ཐོགས་མེད་ཐུགས་བསྐྱེད་དམ་པས་བཟློག་གྱུར་ཅིག །གསོལ་བཏབ་རེ་བའི་འབྲས་སྐོང་དཔག་བསམ་དབང་། །ཕྱོགས་ཀླས་ཁམས་གསུམ་ལམ་ལྔའི་སྐྱེ་འགྲོ་ཀུན། །བདེ་ལྡན་བདེ་བའི་ཞིང་བཟང་མངོན་བགྲོད་ཤོག །དེང་སང་སྙིགས་ལྔའི་རང་མདངས་ཀྱི་རྒུད་པ་ཆེས་བདོ་བས་དུས་མིན་གྱི་རྐྱེན་འཇིགས་བཟློག་པའི་སླད། །རང་གཞུང་ནས་བཀའ་བཟང་ཆེད་ཕེབས་ཀྱི་དགོངས་བཞེད་ལྟར། རྫོགས་པའི་སངས་རྒྱས་༧དཔལ་ཀརྨ་པའི་མཚན་གྱི་ཡི་གེས་བརྗིད་པ་ཨོ་རྒྱན་ཕྲིན་ལས་པས་སྤེལ་བ་གངས་ལྗོངས་ཕན་བདེའི་མཛེས་རྒྱན་དུ་གྱུར་ཅིག །སརྦ་མངྒ་ལཾ།། །།