རིགས་འདུས་བླ་མ།
གཏོར་སྐྱོང་མཐར་གཏོར་གཞོང་འོག་ཏུ་དམིགས་བྱ་བཀུགས་བསྟིམས་བྱ་ཞིང་རྡོ་རྗེའི་རྒྱས་གདབ་ལ། ཧཱུྃ། རིགས་འདུས་བླ་མའི་དཀྱིལ་འཁོར་འདིར། །སྒྲུབ་ལ་བར་ཆད་འབྱུང་པོའི་ཚོགས། །གཏོར་གཞོང་རི་རབ་འོག་ཏུ་མནན། །བརྟུལ་ཞུགས་རོལ་པའི་བྲོ་བརྡུང་ངོ་། །ༀ་ལྃ་ཨཱཿལྃ་ཧཱུྃ་ལྃ་སྟཱྃ་བྷ་ཡ་ནན། ཞེས་བརྗོད། རྗེས་མཆོད་བསྟོད་ནི། ༀ་ཨཱཿཧཱུྃ། རྒྱ་མཚོ་ལྔ་ཡི་ལྷ་ཚོགས་ལ། །དངོས་བཤམས་ཡིད་ལས་བྱུང་བ་ཡི། །ཕྱི་ནང་གསང་བའི་མཆོད་པའི་སྤྲིན། །རབ་འབྱམས་ནམ་མཁའ་གང་བར་འབུལ། །མ་ཧཱ་སརྦ་པཱུ་ཛཿཧོ༔ ཨེ་མ་ཧོ། ངོ་མཚར་རྨད་བྱུང་བླ་མའི་དཀྱིལ་འཁོར་ལྷ། །གང་འདུལ་སྐུར་བཞེངས་མོས་ལྡན་བྱིན་གྱིས་རློབས། །དངོས་གྲུབ་ཆར་འབེབས་རྣམ་བཞིའི་ཕྲིན་ལས་སྒྲུབས། །རིགས་འདུས་བླ་མ་རྩ་གསུམ་ལྷ་ལ་བསྟོད། །ནོངས་བཤགས་སོགས་ཚོགས་མཆོད་ལྟར་བྱ་ཞིང་། དེ་ནས་བཀྲ་ཤིས་ནི། ༀ། བརྡལ་བ་ཆེན་པོ་བློ་ལས་འདས། །ཆོས་ཀྱི་སྐུ་ཡི་བཀྲ་ཤིས་ཤོག །མ་འགགས་རྩལ་སྣང་བདེ་བ་ཆེ། །ལོངས་སྤྱོད་རྫོགས་སྐུའི་བཀྲ་ཤིས་ཤོག །ཤར་གྲོལ་འཛིན་མེད་འཁོར་འདས་ཁྱབ། །སྤྲུལ་པའི་སྐུ་ཡི་བཀྲ་ཤིས་ཤོག །འཁོར་འདས་བྱ་རྩོལ་མིང་མདོགས་བྲལ། །ཡེ་སངས་རྒྱས་པའི་བཀྲ་ཤིས་ཤོག །ཅེས་པ་འདི་བཞིན་བསླབ་གསུམ་ཡོན་ཏན་གྱིས་མངོན་པར་མཐོ་ཞིང། གདན་ས་ཆེན་པོ་མཚུར་མདོའི་སློབ་དཔོན་འོད་ཟེར་འབྱུང་གནས་ཀྱིས་བཀྲ་ཤིས་པའི་རྟེན་འབྱུང་དགེ་བའི་རིན་པོ་ཆེའི་མེ་ཏོག་སོགས་ཀྱི་མཎྜལ་བཅས་གསུང་བསྐུལ་གནང་བ་བཞིན། མཚམས་གཅོད་བྱིན་འབེབས་ནམ་སྙིང་ཚེ་སྒྲུབ་ནས་བླངས་ཤིང་། འཕྲོས་གསར་སྦྱོར་བཅས་འཇམ་མགོན་སྤྲུལ་སྐུར་འབོད་པའི་ཤཱཀྱའི་སྲས་ཀྱི་རྟགས་ཙམ་འཆང་བ་ཀརྨ་དཔལ་ལྡན་མཁྱེན་བརྩེའི་འོད་ཟེར་གྱིས་བྲིས་པ་དོན་ལྡན་དུ་གྱུར་ཅིག། །།