ཟ་བྱེད་རྡོ་རྗེ་མཁའ་འགྲོའི་གསོན་སྦྱངས།

ཟ་བྱེད་རྡོ་རྗེ་མཁའ་འགྲོའི་གསོན་སྦྱངས་ཆོ་ག་བཞུགས་སོ། །བླ་མ་དམ་པ་རྣམས་ལ་ཕྱག་འཚལ་ལོ། །མདུན་དུ་མར་མེ་དང་ཏིལ་ནག་སྡིག་གཟུགས་ལ་སྦྱིན་བདག་གི་སྣ་བུག་གཡས་ནས་རླུང་ཕྱུང་སྟེ་སྡིག་སྒྲིབ་བསྟིམ་པའི་དམིགས་པ་བྱ་ཞིང་མིང་དང་བྱང་བུ་བྲིས་པ་བཞག་ལ། སངས་ཆོས་ཚོགས་མ་དང་། མར་མེ་ལས་སྔགས་ཀྱིས་བསངས། སྭ་བྷཱ་ཝས་སྦྱངས། ཆོས་རྣམས་མི་དམིགས་སྟོང་ཉིད་གྱུར། །དེ་ཡི་ངང་ལས་ཞི་བ་ཡི། །ཐབ་ཁུང་དཀར་ཞིང་ཟླུམ་པོ་རྒྱར། །ཁྲུ་གང་ཟབས་སུ་ཁྲུ་ཕྱེད་པ། །མུ་རན་ཁ་ཁྱེར་སོར་བཞི་བཞིའི། །ཕྱི་རིམ་རྡོ་རྗེ་དཀར་པོ་ཡིན། །ཕྲེང་བས་ཡོངས་བསྐོར་དབུས་ཉིད་དུ། །པདྨ་འདབ་བརྒྱད་རྡོ་རྗེ་དང་། །གྲུ་བཞིར་ཟླ་ཕྱེད་རྡོ་རྗེ་སོགས། །མཚན་ཉིད་ཡོངས་རྫོགས་ལྟེ་བ་ལ། །པད་ཉིར་ཧཱུྃ་ལས་བཅོམ་ལྡན་འདས། །ཟ་བྱེད་རྡོ་རྗེ་མཁའ་འགྲོ་མཆོག །སྐུ་མདོག་སྔོན་པོ་སྤྱན་གསུམ་པ། །བསྐལ་པའི་མེ་དཔུང་ལྟར་འབར་ཞིང་། །མཆེ་བ་རབ་གཙིགས་ཕྱག་གཉིས་ཀྱིས། །རྡོ་རྗེ་དྲིལ་བུ་ཐུགས་ཀར་ནི། །བསྣོལ་འཛིན་ཕྱག་རྒྱ་དྲུག་གིས་སྤྲས། །གར་གྱི་ཉམས་དགུ་ལྡན་པ་ཡིས། །འཇིགས་དུས་གདན་ལ་གཡས་བརྐྱང་སྟབས། །ཡེ་ཤེས་མེ་འབར་དབུས་ན་བཞུགས། །དེ་ཡི་གནས་གསུམ་ༀ་ཨཱཿཧཱུྃ། །ཧཱུྃ་གི་འོད་ཀྱིས་ཡེ་ཤེས་པ། །སྤྱན་དྲངས་ནམ་མཁར་བཞུགས་པར་གྱུར། ༀ་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ་སྭཱ་ཧཱ། དེ་བཞིན་ཤབྡའི་བར་ལའང་སྦྱར་ཏེ་མཆོད། ཛཿཧཱུྃ་བྃ་ཧོཿདམ་ཚིག་དང་། །ཡེ་ཤེས་སེམས་དཔའ་གཉིས་མེད་གྱུར། །ༀ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲཱི་ཡེ་ཧཱུྃ། མི་བསྐྱོད་རྡོ་རྗེས་དབུ་བརྒྱན་གྱུར། །མཐའ་ཡས་འཇིག་རྟེན་ཁམས་རྣམས་ན། །མཆོད་ཡོན་ཇི་སྙེད་ཡོད་པ་ཀུན། །བློ་ཡིས་ཡོངས་སུ་སྤྲུལ་ནས་ནི། །རྡོ་རྗེ་མཁའ་འགྲོར་མཆོད་པ་འབུལ། །ༀ་བཛྲ་ཨརྒྷཾ་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཨཱཿཧཱུྃ་སྭཱ་ཧཱ། ཞབས་བསིལ། མེ་ཏོག །བདུག་སྤོས། མར་མེ། དྲི་ཆབ། ཞལ་ཟས། རོལ་མོ་སོགས་ཤབྡའི་བར་དུའང་སྦྱར་ཏེ་མཆོད། བཅོམ་ལྡན་མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ཀྱི་དབང་ཕྱུག་མཁའ་ཆེན་པོ། །རྡོ་རྗེ་གསུམ་མཆོག་མཆོག་གི་དཀྱིལ་འཁོར་གསུམ། །བཅོམ་ལྡན་རྡོ་རྗེ་མཁའ་འགྲོར་ཕྱག་འཚལ་བསྟོད། །གང་གི་ཐུགས་རྗེའི་མེ་དཔུང་འབར་བའི་མཐུས། །ཆགས་སོགས་ཉེས་པའི་བུད་ཤིང་ཀུན་བསྲེགས་ཤིང་། །བདེ་ཆེན་ཡེ་ཤེས་སྣང་བ་རྒྱས་མཛད་པ། །བཅོམ་ལྡན་རྡོ་རྗེ་མཁའ་འགྲོར་ཕྱག་འཚལ་བསྟོད། །བདག་སོགས་འགྲོ་ཀུན་སྡིག་སྒྲིབ་ཀུན་དག་ཅིང་། །ཚེ་དཔལ་ལོངས་སྤྱོད་དགོས་འདོད་མ་ལུས་པ། །ཡིད་བཞིན་མཆོག་སྩོལ་དངོས་གྲུབ་འབྱུང་བ་ཡིས། །བཅོམ་ལྡན་རྡོ་རྗེ་མཁའ་འགྲོར་ཕྱག་འཚལ་བསྟོད། །ཅེས་བསྟོད། དམིགས་ཡུལ་དང་སེམས་ཅན་ཐམས་ཅད་ཀྱི་སྡིག་སྒྲིབ་དང་བཀྲ་མི་ཤིས་པའི་དངོས་པོ་ཐམས་ཅད་སྙིང་ཁའི་པཾ་ལས་སྡིག་སྒྲིབ་ཀྱི་ངོ་བོ་ཤ་ཟའི་གཟུགས་སུ་གནས་པ། ལྟེ་བ་ལ་ཧཱུྃ་རྡོ་རྗེ་གནོད་སྦྱིན་དུ་གྱུར་པས་དེད་དེ་སྣ་སྒོའི་ལམ་ནས་ཐོན། མདུན་གྱི་ཏིལ་དང་མིང་ཡིག་ལ་ཐིམ་པ་བཅོམ་ལྡན་འདས་རྡོ་རྗེ་མཁའ་འགྲོའི་ཞལ་དུ་ཕུལ་ཏེ་སྦྱངས་པར་གྱུར། ཞེས་ཏིལ་ལན་དགུ་བསྐོར་ཞིང་འབུལ། མིང་ཡིག་ཀྱང་སྲེག །དེ་དག་གི་ཚེ། ༀ་བཛྲ་ཌཱ་ཀི་ཁ་ཁ་ཁཱ་ཧི། སརྦ་པཱ་པཾ་ད་ཧ་ན་བྷསྨིན་ཀུ་རུ་ཡེ་སྭཱ་ཧཱ། ལན་གསུམ་རྗེས་མ་བྱང་བུ་སྲེག །དམིགས་ཡུལ་གྱི་སྡིག་སྒྲིབ་ཐམས་ཅད་སྦྱངས་པ་དང་། ཁྱད་པར་དམ་ཚིག་ཉམས་པ་ཐམས་ཅད་དག་པ་དང་། ནད་གདོན་བར་ཆད་ཞི་བ་དང་སྦྱང་པར་མཛད་དུ་གསོལ། མཆོད་བསྟོད་གོང་ལྟར། ཞེས་ཡེ་ཤེས་པ་གཤེགས། དམ་ཚིག་པ་བསྡུས། བཛྲ་མུཿ དཀོན་མཆོག་རིན་ཆེན་གསུམ་ལ་ཕྱག་འཚལ་ལོ། །དགེ་བ་འདི་ཡིས་ཉེ་བར་མཚོན་ནས་ནི། །སེམས་ཅན་རྣམས་ཀྱིས་དུས་གསུམ་བསགས་པ་ཡི། །ཟག་བཅས་ཟག་མེད་ཟུང་འཇུག་དགེ་བ་རྣམས། །བླ་མེད་བྱང་ཆུབ་ཆེན་པོར་བསྔོ་བར་བགྱི། །འགྲོ་ཀུན་ཐམས་ཅད་མཁྱེན་པ་ཐོབ་པར་ཤོག །ཅེས་དགེ་རྩ་བྱང་ཆུབ་ཆེན་པོར་བསྔོའོ། །ཞེས་པ་འདི་ནི་རྡོ་རྗེ་མཁའ་འགྲོའི་ལེའུ་ཞེ་དྲུག་པ་ལས། སློབ་མ་ཡི་ནི་རྐང་མཐིལ་དུ། །གཞུ་འདྲའི་རླུང་གི་དཀྱིལ་འཁོར་བསམ། །ལྟེ་བར་ཡེ་ཤེས་མེ་འབར་བས། །དེ་ཡིའོད་ཟེར་སྙིང་གར་འབར། །འབར་བས་ཀུན་ནས་འཁྲིགས་པར་བསམ། །པཾ་ལས་བྱུང་བའི་མི་སྡུག་གཟུགས། །སྡིག་ནི་སྣ་ཡི་སྒོ་ནས་བྱུང་། །དེ་ནས་ཁྲོ་བོའི་གཟུགས་བསྒོམ་པ། །དེ་ནས་ཀུན་ནས་ཟ་བར་བསྒོམ། །ཞེས་གསུངས་པ་ལྟར་སྡིག་སྒྲིབ་བྱང་ཕྱིར་ཟ་བྱེད་རྡོ་རྗེ་མཁའ་འགྲོའི་གསོན་སྦྱངས་ལ་སྦྱར་བ་འདི་ནི། དཔལ་ལྡན་བླ་མ་དམ་པ་རྣམས་ཀྱིས་བྱིན་གྱིས་བརླབས་པའི་མཚན་གྱི་མདངས་ཙམ་འཛིན་པ་རྒྱལ་ཁམས་ཀྱི་སྙོམ་ལས་པར་གྲགས་པའི་མིང་ཅན་གྱིས་གཞན་ལ་ཕན་ཕྱིར་བཀོད་པའོ། །སརྦ་མངྒ་ལཾ།། །།