ཀརྨ་པ་ཡབ་སྲས་ཀྱི་གསུང་མར་མེའི་སྨོན་ལམ།

མར་མེ་སྨོན་ལམ་སྐལ་བཟང་གི་དགའ་སྟོན། ༀ་སྭསྟི། མི་འགྱུར་སྣང་སྟོང་ཟུང་འཇུག་ཆོས་ཀྱི་སྐུ། །བདེ་ཆེན་གྲུབ་པའི་ལང་མཚོ་རྒྱས་པའི་ཀློང་། །ཟག་བྲལ་ལྷུན་གྲུབ་དགྱེས་པའི་མཁའ་དབྱིངས་ལས། །འགྱུར་མེད་ཤིས་པའི་དགའ་སྟོན་རྩོལ་གྱུར་ཅིག །དགེ་ཚོགས་དཔལ་གྱི་དུམ་བུ་ལས་འོང་བའི། །རང་བཞིན་རྣམ་དཀར་དགེ་བའི་ས་བོན་དང་། །མཆོག་གསུམ་སྣང་གསལ་འོད་ཀྱིས་ལེགས་མཆོད་པའི། །ལེགས་བྱས་ཕྱོགས་ཀྱི་འཛུམ་དཀར་གྲོལ་བ་འདིས། །པདྨོ་སྟོང་དུ་བཞད་པའི་ཞིང་འདི་རུ། །རྫོགས་ལྡན་དཔྱིད་ཀྱི་ལང་ཚོ་འགུགས་དང་ལྷན། །འཁྲུགས་རྩོད་དུས་ཀྱི་སྐལ་པ་ཞི་བ་དང་། །ཕུན་ཚོགས་དཔལ་ཡོན་རྒྱས་པའི་བཀྲ་ཤིས་ཤོག །ཁྱད་པར་ནུབ་ཕྱོགས་ཨ་རིའི་ནོར་འཛིན་ཁྱོན། །བཤད་སྒྲུབ་ཆུ་སྐྱེས་ལང་མཚོ་དགོད་པ་དང་། །ཟབ་གསང་དར་དིར་སྒྲོགས་པའི་མགྲིན་དབྱངས་ཀྱིས། །བགྲང་ཡས་ཞིང་ཁམས་རྒྱ་མཚོ་འགེངས་གྱུར་ཅིག །ཅེས་པ་འདི་ལྷག་བསམ་ཟླ་བྲལ་བསྟན་འཛིན་ཆོས་ཉིད་ནས་བསྐུལ་ངོར་ཀརྨ་པའི་མཚན་གྱི་ཅོད་པན་འཆང་བ་ཨོ་རྒྱན་ཕྲིན་ལས་སུ་འབོད་པ་དེས་བྲིས་པ་བཀྲ་ཤིས་པར་གྱུར་ཅིག ༈ །ཀུན་གཞི་རང་རིག་ཡེ་ཤེས་ཀུན་ཏུ་གསལ། །ཆོས་རབ་རྣམ་འབྱེད་ཤེས་རབ་ཕ་རོལ་ཕྱིན། །རིག་པའི་རང་བཞིན་མ་རིག་སྒྲིབ་པས་དབེན། །སྟོང་གསལ་ཟུང་འཇུག་གསལ་བའི་དེ་བཞིན་ཉིད། །སྣང་གསལ་འོད་ཟེར་སྣང་བས་ཕྱོགས་ཀུན་ཁྱབ། །སྣང་གསལ་བསོད་ནམས་འགྲོ་ཀུན་བདེ་ལ་སྦྱོར། །སྣང་གསལ་རང་བཞིན་ཆོས་ཉིད་དེ་བཞིན་ཉིད། །སྣང་གསལ་རྒྱལ་བའི་ཡེ་ཤེས་མངོན་གྱུར་ཤོག །ཅེས་ཏཱ་ཡི་སི་ཏུ་པས་སོ། ༈ །རྫོགས་པའི་སངས་རྒྱས་སྒྲོན་མེའི་རྒྱལ་པོ་དང་། །འཇིག་རྟེན་དབང་ཕྱུག་ཀརྨ་པ་ལ་སོགས། །སྲས་བཅས་རྒྱལ་བའི་མདུན་ས་ཉམས་དགའ་བར། །ཞི་བ་རབ་མཛེས་མར་མེ་འདི་ཕུལ་བས། །ཕན་ཚུན་དགྲ་རུ་མཐོང་བའི་བསམ་ངན་དུག །རང་གཞན་སུ་ཡི་རྒྱུད་ལའང་མི་འབྱུང་བར། །བྱམས་པའི་སེམས་ཀྱིས་མ་བུ་འཕྲད་པ་བཞིན། །འཛམ་བུའི་གླིང་ཀུན་ཞི་བདེས་ཁྱབ་པར་ཤོག །ཅེས་གོ་ཤྲི་རྒྱལ་ཚབ་པས་སོ།། །།