པར་སྐྲུན་དགེ་བསྔོ།
འདི་ཕྱིའི་ཚེ་རབས་གཏན་གྱི་སྐྱབས་གཅིག་དཔལ་རྒྱལ་བའི་དབང་པོ་༧སངས་རྒྱས་ཀརྨ་པ་༧ཨོ་རྒྱན་འགྲོ་འདུལ་ཕྲིན་ལས་རྡོ་རྗེ་མཆོག་གིས་དབུས་བསྟན་འཛིན་གྱི་སྐྱེས་ཆེན་དམ་པ་གང་ན་སུ་བཞུགས་ཞབས་པད་བརྟན་ཅིང་མཛད་ཕྲིན་རྒྱས་པ་དང་ཐུགས་བཞེད་མྱུར་དུ་འགྲུབ་ནས། འཛམ་བུའི་གླིང་འདིར་རིས་མེད་རྒྱལ་བའི་བསྟན་པ་སྤྱི་དང་། ཁྱད་པར་དྭགས་བརྒྱུད་ཀརྨ་པ་ཡི་མདོ་སྔགས་བཤད་སྒྲུབ་ལས་གསུམ་གྱི་བསྟན་པ་ཕྱོགས་བཅུར་འཕེལ་ཞིང་རྒྱས་ཏེ་མི་ནུབ་ཡུན་དུ་གནས་པ་དང་། རྒྱལ་བསྟན་སྲི་ཞུ་བསྙེན་བཀུར་ལ་འབད་པའི་སྦྱིན་པའི་བདག་པོ་གཙོ་གྱུར་སྐྱེ་འགྲོ་ཀུན་ཕུན་ཚོགས་སྡེ་བཞིའི་དཔལ་ལ་རོལ་པ་དང་། ལུས་དང་ལས་ཀྱིས་འབྲེ ལ་བའི་ཕ་མའི་གཙོས་ཕྱི་མའི་སྔ་ལམ་དུ་གྱུར་པ་རྣམས་ཀྱི་བྱས་བསགས་སྡིག་ལྟུང་བྱང་ཞིང་བདེ་ཆེན་དག་པའི་ཞིང་དུ་སྐྱེ་བ་དང་། ཡངས་པའི་ཡུལ་གྲུ་ཀུན་ཏུ་ནད་མཚོན་མུ་གེ་འབྱུང་བཞིའི་གནོད་པ་དང་། ཕྱུགས་ནད་རྒུད་ཚོགས་རིགས་རང་སར་ཞི་ཞིང་ཆོས་འབྱོར་བདེ་དགེའི་དཔལ་ལ་རོལ་པའི་རྒྱུར་དམིགས་ཏེ། དིལ་ཡག་སྒྲུབ་དཔོན་སྤྲུལ་མིང་འཛིན་པ་ཀརྨ་གཞན་ཕན་བློ་གྲོས་ནས་ཉེར་མཁོའི་ཆོ་ག་གཅེས་བཏུས་འདི་ཉིད་ཆོས་སྦྱིན་དུ་པར་སྐྲུན་ཞུས་པ་ལགས། ༈ །གླེགས་བམ་འདི་ལེགས་གྲུབ་བྱུང་བ་ལ་ཡིག་འཇུག ཞུ་དག དཔེ་སྒྲིག འཆར་འགོད་སོགས་ལ་མཐུན་སྦྱོར་གནང་བ་པོ་དིལ་གྲྭ་མཁན་པོ་སངས་རྒྱས་ཕྲིན་ལས། རྫོགས་ཆེན་བསྟན་འཛིན་རྣམ་དག བླ་མ་རབ་བརྟན་ཚེ་རིང་། སྒར་གྲྭ་བཀྲ་ཤིས་དགའ་བ་བཅས་ལ་ཐུགས་རྗེ་ཆེ་ཞུ་རྒྱུ་ཡིན།