དེ་བཞིན་གཤེགས་པའི་སྙིང་པོ་བསྟན་པའི་བསྟན་བཅོས་ཀྱི་རྣམ་འགྲེལ་རང་བྱུང་དགོངས་གསལ།
དེ་བཞིན་གཤེགས་པའི་སྙིང་པོ་བསྟན་པའི་བསྟན་བཅོས་ཀྱི་རྣམ་འགྲེལ་རང་བྱུང་དགོངས་གསལ་ཅེས་བྱ་བ་བཞུགས་སོ། །
དེ་བཞིན་གཤེགས་པའི་སྙིང་པོ་བསྟན་པའི་བསྟན་བཅོས་ཀྱི་རྣམ་འགྲེལ་རང་བྱུང་དགོངས་གསལ་ཅེས་བྱ་བ། བླ་མ་རྒྱལ་བ་སྲས་དང་བཅས་པ་ལ་ཕྱག་འཚལ་ལོ། །འཁོར་འདས་ཀུན་གྱི་སྙིང་པོ་མཆོག །གནས་སྐབས་གསུམ་དུ་འགྱུར་བ་མེད། །རྣམ་དབྱེར་མེད་པའི་ཡོན་ཏན་ཅན། །ཆོས་ཀྱི་དབྱིངས་ལ་ཕྱག་འཚལ་ལོ། །མཁྱེན་བརྩེ་མཐའ་ཡས་འགྲོ་བའི་མགོན། །རང་བྱུང་རྒྱལ་དང་དེ་ཡི་སྲས། །སྙིང་པོའི་དོན་ཟབ་སྟོན་རྣམས་ལ། །མི་ཕྱེད་དད་པའི་ཡིད་ཀྱིས་འདུད། །ཐམས་ཅད་གཟིགས་པ་ཉག་གཅིག་
གི །སྤྱོད་ཡུལ་རྒྱལ་བའི་སྙིང་པོའི་ཚུལ། །ཀུན་མཁྱེན་གཉིས་པས་གསལ་མཛད་པའི། །གཞུང་བཟང་ཅུང་ཟད་དབྱེ་བར་བྱ། །དེ་ལ་རྒྱལ་བ་ཐམས་ཅད་མཁྱེན་པས་ངེས་དོན་མཐར་ཐུག་པའི་མདོ་སྡེ་དང་ཤིན་ཏུ་ཟབ་མོའི་རྒྱུད་སྡེ་རྣམས་སུ་མ་སྦས་གསལ་བར་གསུངས་ཤིང་། ས་བཅུའི་དབང་ཕྱུག་རྒྱལ་ཚབ་མ་ཕམ་པ་དང་སྤྱན་རས་གཟིགས་སོགས་གྲགས་ཆེན་རྒྱལ་བའི་སྲས་པོ་རྣམས་དང་། གྲུབ་ཆེན་ས་ར་ཧ་པ་ཡབ་སྲས། འཕགས་པ་ཀླུ་སྒྲུབ་དང་ཐོགས་མེད་ཞབས་སོགས་ཀྱིས་དགོངས་པ་དྲང་ཐད་དུ་
བཀྲལ་བ། རྟོག་གེ་རྣམ་པར་འཁྱམས་པ་དག་གི་བློའི་སྤྱོད་ཡུལ་དུ་མ་ཆུད་པའི་སྙིང་པོའི་དོན་ཆེས་ཟབ་པའི་ཚུལ་དེ་ཉིད། གངས་རིའི་ལྗོངས་ན་ངེས་དོན་སྙིང་པོ་ཕྱིར་མི་ལྡོག་པའི་སེང་གེའི་སྒྲ་ཆེན་པོ་ཐོག་མར་སྒྲོག་པའི་ཤིང་རྟ་པ། ཐུབ་དབང་གཉིས་པ་རང་བྱུང་རྡོ་རྗེས་རྒྱ་ཆེར་གསལ་བར་མཛད་པ་ལས། དེ་ཉིད་ཀྱི་གསུང་རབ་ཀུན་གྱི་སྙིང་པོར་གྱུར་པ་དེ་བཞིན་གཤེགས་པའི་སྙིང་པོ་བསྟན་པའི་བསྟན་བཅོས་ཞེས་བྱ་བ་འདི་འཆད་པ་ལ་ལྔ། མཚན་བསྟན་པ། ཕྱག་འཚལ་བ། ལུང་གིས་མདོར་བསྟན་པ། དོན་རྒྱས་པར་བཤད་པ། རྙེད་ཚུལ་གྱིས་མཇུག་བསྡུ་བའོ། །དང་པོ་ནི། དེ་བཞིན་ནས། བསྟན་བཅོས། ཞེས་གསུངས་ཏེ། དེ་ཞེས་པ་ནི་ཐ་སྙད་གཞན་སྦྱར་གྱི་སྒྲ་སྟེ་འདིར་གནས་ལུགས་ཆོས་ཀྱི་དབྱིངས་ལ་སྦྱར་བའོ། །དེ་ཉིད་ཇི་བཞིན་ཏུ་རྟོགས་པ་ནི་གཤེགས་པའི་སྒྲས་བསྟན་ཏེ། དོན་དེའི་མཐར་སོན་པའི་ཕྱིར་རོ། །དེ་ཉིད་ཆོས་ཐམས་ཅད་ཀྱི་གནས་སམ་ལུས་སུ་གྱུར་པས་ཆོས་ཀྱི་སྐུར་ཡང་གསུངས་པ་ཡིན་ལ། དེ་ནི་དངོས་པོ་ཀུན་གྱི་དེ་
བཞིན་ཉིད་ཡིན་པས་སྙིང་པོའི་སྒྲས་བསྟན་ཏེ། སྤྱིར་སྙིང་པོའི་སྒྲ་ནི་མི་བསླུ་བ་དང་། བཅུད་དང་སྲ་བའམ་མི་ཕྱེད་པ་དང་། ཁྱབ་བྱེད་རྣམས་ལ་འཇུག་པས་འདིར་ཡང་དེ་དག་གི་དོན་དུ་བཟུང་ངོ་། དེ་བཞིན་གཤེགས་པ་དང་སྙིང་པོ་བདག་ཉིད་གཅིག་པའི་འབྲེལ་པས་འབྲེལ་སྒྲ་སྦྱར་བ་ཡིན་ལ། དེའི་དོན་ཚུལ་བཞིན་ཏུ་སྟོན་པས་ན་སྙིང་པོ་བསྟན་པ་ཞེས་བྱ་བ་སྟེ། རྗོད་བྱེད་ཀྱི་ངོ་བོ་རྩོམ་པ་པོ་ཉོན་མོངས་པའི་རྣམ་གཡེངས་མེད་པའི་ཡིད་ཅན་གྱིས་གསུང་རབ་ཀྱི་དགོངས་པ་འགྲེལ་ཞིང་ཐར་པའི་ལམ་སྟོན་པའི་ངག །ངེས་ཚིག །སྒྲ་ལས་གདུལ་བྱ་རྣམས་ཀྱི་རྒྱུད་ཉོན་མོངས་པ་འཆོས་ཤིང་། འབྲས་བུ་ངན་འགྲོའི་སྲིད་པ་ལས་སྐྱོབ་པའི་ཕྱིར་བསྟན་བཅོས། དབྱེ་བ་མཆོག་དམན་གྱི་དབང་དུ་བྱས་ནས་དོན་མེད་དོན་ལོག་དོན་ལྡན་སོགས་དགུ་དང་། བྱེད་ལས་ཀྱི་དབང་གིས། འཐོར་བ་སྡུད་པ། ཟབ་མོ་དཀྲོལ་བ། ཉམས་པ་གསོ་བ་གསུམ་དུ་གསུངས་པ་ལས། འདིར་མཆོག་གི་བསྟན་བཅོས་གསུམ་དང་། འཐོར་སྡུད་ཟབ་
དཀྲོལ་གྱི་ཁོངས་སུ་གཏོགས་པ་ཡིན་ཅིང་། དཔེ་ལས་མཚན་ཏུ་བཏགས་པ་སོགས་མིང་གི་འདོགས་ཚུལ་མང་དུ་ཡོད་པ་ལས། འདིར་ཟབ་མོ་བརྗོད་བྱའི་དོན་ལས་མཚན་ཏུ་བཏགས་པའོ། །གཉིས་པ་ཕྱག་འཚལ་བ་ནི། སངས་རྒྱས་ནས། ཕྱག་འཚལ་ལོ། །ཞེས་གསུངས་ཏེ། དྲང་དོན་ཏུ། མ་རིག་པའི་གཉིད་སངས་པའི་སྤངས་པ་དང་། ཤེས་བྱ་ལ་བློ་རྒྱས་པ་ནི་ཡེ་ཤེས་ཏེ། སྤངས་རྟོགས་ཕུན་སུམ་ཚོགས་པ་དང་། ལྡན་པའི་སངས་རྒྱས་དང་། དབྱིངས་རང་བཞིན་གྱིས་རྣམ་པར་དག་པའི་བྱང་ཆུབ་དེ་འགྲོ་བ་རྣམས་ཀྱི་དོན་དུ་ཐོབ་པར་རྩེ་གཅིག་ཏུ་སེམས་དཔའི་འཕགས་པ་ཐམས་ཅད་ལ་སྒོ་གསུམ་གུས་པ་ཆེན་པོས་ཕྱག་འཚལ་བའམ། ངེས་པའི་དོན་ཏུ། ཉོན་མོངས་པ་གདོད་ནས་མ་གྲུབ་ཅིང་སངས་པ་དང་། ཡོན་ཏན་གདོད་ནས་ལྷུན་གྱིས་གྲུབ་ཅིང་རྒྱས་པའི་དངོས་པོ་གཤིས་ཀྱི་གནས་ལུགས་ལྷན་ཅིག་སྐྱེས་པ་བྱང་ཆུབ་ཀྱི་སེམས་བདེ་བ་ཆེན་པོའི་སྐུ་དེ་ལ། རྣམ་པས་དབྱེ་ན་སྐུ་ལྔ་ཡེ་ཤེས་ལྔ་ནས། རིགས་མཐའ་ཡས་པའི་བར་དུ་
སྣང་བ་དང་། བྱང་ཆུབ་སེམས་དཔའ་བྱམས་པ་དང་ས་སྙིང་ལ་སོགས་པ་ཡུལ་ཤེས་དྲུག་པོ་རྣམ་པར་དག་པའི་ངོ་བོར་སྣང་བ་རྣམས་ལ་གནས་ལུགས་ལྟ་བ་མཇལ་བའི་ཚུལ་གྱིས་ཕྱག་གིས་འདུད་པའི་སྒྲ་སྦྱར་བའོ། །དེའང་ཡུལ་ཁྱད་པར་ཅན་སངས་རྒྱས་དང་བྱང་སེམས་རྣམས་ལ། བྱེད་པ་ཁྱད་པར་ཅན་ཕྱག་གིས་བཏུད་པས། དགོས་པ་ཁྱད་པར་ཅན་ཉན་པ་པོའི་གཞིའི་རིགས་སད་པ་དང་། རང་བཞིན་གྱིས་གེགས་མེད་པར་འགྲུབ་པ་དང་། ཆོས་ཀྱི་ཚུལ་ཡུན་རིང་དུ་དར་བ་དང་། སེམས་བསྐྱེད་ནས་བར་དུ་གཅོད་པ་ལས་བཟློག་པར་འགྱུར་བའོ། །གསུམ་པ་ལུང་གིས་མདོར་བསྟན་པ་ལ་གཉིས། མངོན་པའི་མདོ་ལས་བྱུང་བ་དང་། ཧེ་བཛྲ་ལས་བྱུང་བའོ། །དང་པོ་ནི། ཐོག་མེད་ནས། ཐོབ་པ་ཡིན། ཅེས་གསུངས་ཏེ། ཐོག་མཐའ་སྐྱེ་འགག་སོགས་སྤྲོས་པ་ཀུན་དང་བྲལ་བའི་སེམས་ཉིད་བདེ་བར་གཤེགས་པའི་སྙིང་པོ་དང་སྒྲིབ་པ་གཉིས་གཅིག་དང་ཐ་དད་དུ་གྲུབ་པ་མེད་པས་དྲི་མ་ལ་དུས་བརྒྱུད་པའི་ཐོག་མ་
དང་། རྫས་བདེན་པའི་ཐོག་མ་མེད་པས་ན་འཁོར་བ་ལ་ཐོག་མ་མེད་པར་གྱུར་ཀྱང་དྲི་མ་དང་བྲལ་ཞིང་རང་ལ་གནས་པའི་དོན་མངོན་དུ་གྱུར་པའི་ཚེ་དོན་གཉིས་ཕུན་སུམ་ཚོགས་པའི་སངས་རྒྱས་འགྲུབ་པས་ཐ་མ་དད་ལྡན་པའོ། །སྙིང་པོའི་ངོ་བོ་ལ་དྲི་མ་རང་བཞིན་གྱིས་དག་ཅིང་གནས་སྐབས་གསུམ་དུ་འགྱུར་བ་མེད་པས་རྟག་པའི་ཆོས་ཅན་དེ་ནི་སེམས་ཅན་རྣམས་ཀྱི་རྒྱུད་ལ་རང་བཞིན་གྱིས་གནས་ཀྱང་། འཁོར་བ་ཐོག་མ་མེད་པ་ནས་ལྷན་ཅིག་སྐྱེས་པའི་སྦུབས་ཀྱིས་བསྒྲིབས་པའི་ཕྱིར་ཐོས་སོགས་རྐྱེན་གྱིས་དྲི་མ་མ་བསལ་བར་དུ་ཇི་བཞིན་མི་མཐོང་སྟེ། དཔེར་ན་གསེར་གྱི་ཁམས་ལས་གྲུབ་པའི་སངས་རྒྱས་ཀྱི་སྐུ་གཟུགས་ནི་པདྨ་དང་འདམ་རྫབ་སོགས་ཀྱིས་བསྒྲིབས་ནས་མི་མཐོང་བ་བཞིན་ཏེ། དེ་བཞིན་གཤེགས་པའི་སྙིང་པོའི་མདོ་ལས་དཔེ་དགུས་གསལ་བར་བསྟན་པའི་དོན་རྒྱུད་བླ་མར་བཤད་པ་བཞིན་ནོ། །འདིའི་ཚིག་རྐང་དང་པོ་འཁྲུལ་གྲོལ་གཉིས་ཀའི་དབང་དུ་བྱས་པ་དང་། གཉིས་པ་གནས་ལུགས། གསུམ་པ་བཞི་
པ་འཁྲུལ་ལུགས་ཁོ་ནའི་དབང་དུ་བྱས་པའོ། །ཚིགས་བཅད་ཕྱི་མས་ནི་ཀུན་གཞི་མདོར་བསྟན་པ་སྟེ། དེའང་འདི་ཙམ་ནས་བྱུང་ངོ་ཞེས་སྔོན་གྱི་ཐོག་མ་མེད་པའི་དུས་ཅན་གྱི་ཁམས་སངས་རྒྱས་ཀྱི་རིགས་སམ་རྒྱུ་བདེ་བར་གཤེགས་པའི་སྙིང་པོ་དེ་ནི། ཀུན་ཉོན་དང་རྣམ་བྱང་གི་ཆོས་རྣམས་ཀུན་གྱི་གནས་སམ་རྟེན་ཡིན་པས་སྤྱི་མིང་དུ་ཀུན་གཞི་ཞེས་བྱ་བ། ས་ཆུ་འདྲེས་པའི་རྙོགས་མ་ལྟར་ཡེ་ཤེས་དང་རྣམ་ཤེས་འདྲེས་མར་གནས་པ་སྟེ། ཀུན་གཞི་དེ་ཡོད་པས་མ་རིག་པའི་ཀུན་རྟོག་ཚུལ་བཞིན་མ་ཡིན་པ་ཡིད་ལ་བྱེད་པས་ལས་དང་ཉོན་མོངས་པ་ཕུང་པོ་ཁམས་སྐྱེ་མཆེད་རྣམས་སྐྱེ་བས་འཁོར་བའི་འགྲོ་བ་ཀུན་དང་། ཁམས་དེ་ཉིད་གཟུང་འཛིན་གྱི་འཆིང་བ་ལས་གྲོལ་བའི་ཚེ། བྱང་ཆུབ་རྣམ་པ་གསུམ་གྱི་མཐར་ཐུག་པ་རྫོགས་པའི་སངས་རྒྱས་ཞེས་བྱ་བའི་མྱ་ངན་ལས་འདས་པ་ཆེན་པོའང་ཐོབ་པ་ཡིན་ཏེ། རྒྱུད་བླ་མ་ལས། ས་ནི་ཆུ་ལ་ཆུ་རླུང་ལ། །སོགས་ཀྱིས་ཁམས་ལ་བརྟེན་པའི་འཁྲུལ་ཚུལ་དང་། འཕགས་པ་ཀླུས། ས་
བོན་གྱུར་པའི་ཁམས་དེ་ཉིད། །ཆོས་རྣམས་ཀུན་གྱི་རྟེན་དུ་འདོད། །རིམ་གྱིས་སྦྱངས་པར་གྱུར་པ་ལས། །སངས་རྒྱས་གོ་འཕངས་ཐོབ་པར་འགྱུར། །ཅེས་གྲོལ་ཚུལ་གསལ་བར་གསུངས་པ་ལྟར་རོ། །གཉིས་པ་ནི། །སེམས་ཅན་ནས། །སངས་རྒྱས་སོ། །ཞེས་གསུངས་ཏེ། འདི་ལྟར་སེམས་ཅན་རྣམས་ནི་གདོད་མ་ནས་རང་བཞིན་སྤྲོས་བྲལ་ལྷུན་གྲུབ་ཀྱི་སངས་རྒྱས་ཉིད་དེ། འོན་ཀྱང་གློ་བུར་གཟུང་འཛིན་གྱི་དྲི་མས་སྒྲིབ་བོ། །སྒྲིབ་པ་དེ་ཉིད་ཐབས་ཀྱིས་བསལ་ན་གཞི་མངོན་གྱུར་གྱི་སངས་རྒྱས་ཞེས་གདགས་སོ། །དེ་ལ་ངོ་བོ་རྣམ་དག་དང་གློ་བུར་དྲི་མས་བསྒྲིབས་པའི་ཚུལ་ཆུའི་རྙོགས་མ་དང་། གསེར་གྱི་གཡའ་དང་། ནམ་མཁའི་སྤྲིན་ལྟ་བུ་སྟེ། དབུས་མཐའ་ལས། ཀུན་ནས་ཉོན་མོངས་རྣམ་པར་དག །དེ་ནི་དྲི་བཅས་དྲི་མ་མེད། །ཆུ་ཁམས་གསེར་དང་ནམ་མཁའ་བཞིན། །དག་པ་བཞིན་དུ་དག་པར་འདོད། །ཅེས་སོ། །དེ་བཞིན་འཕགས་པ་ཀླུ་སྒྲུབ་ཀྱི་ཞལ་སྔ་ནས་ཀྱང་། དྲི་མེད་ཉི་མ་ཟླ་བ་ཡང་། །སྤྲིན་དང་དུ་བ་ཁུག་རྣ་དང་། །སྒྲ་
གཅན་གདོང་དང་རྡུལ་ལ་སོགས། །སྒྲིབ་པ་ལྔ་ཡིས་བསྒྲིབ་པར་འགྱུར། །དེ་བཞིན་འོད་གསལ་བ་ཡི་སེམས། །འདོད་དང་གནོད་སེམས་ལེ་ལོ་དང་། །རྒོད་པ་དང་ནི་ཐེ་ཚོམ་སྟེ། །སྒྲིབ་པ་ལྔ་ཡིས་བསྒྲིབ་པར་འགྱུར། །ཞེས་གསུངས་ཏེ། དཔེར་ན་སེམས་ཉིད་བདེ་གཤེགས་སྙིང་པོ་ཉི་མ་དང་ཟླ་བ་ལྟ་བུ་རང་བཞིན་གྱིས་འོད་གསལ་བའི་ཡོན་ཏན་ལ་སོགས་པ་དང་ལྡན་ཀྱང་། གནས་སྐབས་གློ་བུར་གྱི་སྒྲིབ་པ། འདོད་པའི་འདོད་ཆགས་སྲིད་པ་རླན་པར་བྱེད་པའི་སྤྲིན་ལྟ་བུ་དང་། ཞེ་སྡང་གིས་སེམས་བསྐྱེད་པའི་གནོད་སེམས་དུ་བ་ལྟ་བུ་དང་། གཏི་མུག་གིས་མི་གསལ་བར་བྱེད་པ་ལེ་ལོ་ཁུག་རྣ་ལྟ་བུ་དང་། སེམས་རྒོད་པ་ང་རྒྱལ་དང་བཅས་པ་སྒྲ་གཅན་གྱི་གདོང་ལྟ་བུ་དང་། ལྟ་བ་སྣ་ཚོགས་ཀྱིས་བསྐྱེད་པའི་ཐེ་ཚོམ་རྡུལ་འཚུབས་པ་ལྟ་བུ་སྟེ། སྒྲིབ་པ་ལྔ་པོས་རང་བཞིན་ལ་གོས་པ་མེད་ཀྱང་འཁྲུལ་སྣང་དུ་བསྒྲིབས་པ་ལྟར་སྣང་ནས་མི་གསལ་བར་གསུངས་སོ། །བཞི་པ་རྒྱས་པར་བཤད་པ་ལ་ལྔ། མངོན་པའི་ལུང་དོན་རྒྱས་བཤད།
ཡང་དག་པ་མ་ཡིན་པ་དང་། ཡང་དག་གི་ཀུན་རྟོག་བཤད་པ་དང་། སངས་རྒྱས་ཀྱི་སྙིང་པོ་ཉིད་བཤད་པ་དང་། བརྒལ་ལན་གྱིས་གཏན་ལ་དབབ་པ་དང་། ལུང་གི་ངོ་བོ་ཉིད་བཤད་པ་ལ་ངེས་པ་བསྐྱེད་པའོ། །དང་པོ་ལ་དྲུག །ཐོག་མེད་ཀྱི་ཚུལ་དང་། ཁམས་ཀྱི་དོན་དང་། དེ་ལ་གནས་པའི་ཆོས་དང་། གནས་ཉིད་དང་། ད་ལྟར་ཡོད་པའི་ཚུལ་དང་། ཐ་མའི་དོན་བཤད་པའོ། །དང་པོ་ནི། དེ་ལ་ནས། འོངས་བ་མིན། ཅེས་གསུངས་ཏེ། གོང་དུ་དྲངས་པའི་ལུང་དེ་ལ་ཐོག་མེད་ཅེས་བྱ་བའི་དོན་ནི། རང་བཞིན་རྣམ་དག་གི་ངོ་བོ་ལས་སྔོན་ཏུ་སངས་རྒྱས་ཞེས་བྱ་བ་མེད་ཅིང་། མ་རིག་འཁྲུལ་པའི་བག་ཆགས་ལས་སྔོན་དུ་སེམས་ཅན་ཞེས་བྱ་བ་མེད་པ་ཉིད་དེ། འཁོར་འདས་གཉིས་སུ་སྣང་ཞིང་འཁྲུལ་པའི་དུས་སྐད་ཅིག་མ་དེ་ཉིད་ཡིན་ཏེ། གནས་གཞན་ཞིག་ནས་བརྒྱུད་དེ་འོང་བ་མིན་ཏེ། ཆོས་ཐམས་ཅད་རྟེན་ཅིང་འབྲེལ་འབྱུང་ཡིན་པས་སོ། །དེའང་རིག་པ་དྲུག་ཅུ་པ་ལས། རྟེན་ཅིང་འབྲེལ་བར་འབྱུང་བ་ལས། །འགྲོ་ཀུན་རྒྱུ་དང་འབྲས་བུ་
སྟེ། །འདི་ལས་སེམས་ཅན་ཅི་ཡང་མེད། །སྟོང་པ་ཁོ་ནའི་ཆོས་རྣམས་ལས། །སྟོང་པ་ཉིད་ནི་འབྱུང་བར་ཟད། །ཅེས་སོ། །གཉིས་པ་ནི། ཁམས་ནི་ནས། དེ་སྐད་བརྗོད། །ཅེས་གསུངས་ཏེ། ཁམས་སངས་རྒྱས་ཀྱི་སྙིང་པོ་དེ་ལ་ནི་སངས་རྒྱས་ཀྱི་ཡོན་ཏན་ཐམས་ཅད་ཚང་བར་ཡོད་པས་སྔར་མེད་གསར་དུ་བྱེད་པ་པོ་གཞན་མེད་ཀྱང་ནི་རང་གི་མཚན་ཉིད་ངོ་བོ་མི་འགྱུར་བར་འཛིན་པས་ཁམས་སམ་རིགས་ཞེས་རྒྱུའི་དོན་དེ་སྐད་དུ་བརྗོད་དོ། །གསུམ་པ་ནི། ཆོས་ནི་ནས། ཀུན་གཞིར་བཤད། ཅེས་གསུངས་ཏེ། ཁམས་དེ་ལ་གནས་པའི་ཆོས་ནི་སྲིད་པ་འཁོར་བ་དང་ཞི་བ་མྱ་ངན་ལས་འདས་པ་གཉིས་སུ་སྣང་བ་ལ་བཤད་པ་ཡིན་ཏེ། དེ་གཉིས་ཀྱི་བག་ཆགས་འཚོགས་པ་དེ་ལ་མ་རིག་བག་ཆགས་ཀྱི་ས་ཞེས་ཀྱང་བྱ། ཡང་དག་པ་གཉེན་པོའི་རྟོག་པ་དང་ཡང་དག་མིན་པ་འཁོར་བའི་རྟོག་པ་གཉིས་ཀྱི་འདུ་བྱེད་གཡོ་བས་བག་ཆགས་དཀར་ནག་གཉིས་ཀྱིས་འཁོར་འདས་གཉིས་བསྐྱེད་པའི་རྒྱུ་ཡི་རྐྱེན་ཏེ་ཀུན་གཞིར་གྲགས་པའང་
དོན་དེ་ལ་དགོངས་ཏེ་བཤད་པ་ཡིན་ནོ། །བཞི་པ་ནི། གནས་ན་ནས། ལ་རབ་གནས། །ཞེས་གསུངས་ཏེ། དེ་ལྟར་འཁོར་འདས་ཀྱི་ཆོས་ཐམས་ཅད་ཀྱི་གནས་སམ་རྟེན་ནི་སེམས་ཉིད་རྒྱལ་བའི་སྙིང་པོ་དེ་ཡིན་ཏེ། ཡང་དག་པ་མ་ཡིན་པའི་ཀུན་ཏུ་རྟོག་པ་དང་དེས་བསྐྱེད་པའི་ལས་དང་ཉོན་མོངས་པ་སྡུག་བསྔལ་བ་ཐམས་ཅད་ནི་སེམས་ཉིད་རང་བཞིན་གྱིས་རྣམ་པར་དག་པ་ལ་རབ་ཏུ་གནས་ཀྱང་སེམས་ཉིད་རང་བཞིན་གྱིས་འོད་གསལ་བ་དེ་ནི་སྐྱེ་འགག་གནས་གསུམ་དང་བྲལ་བ་འདུས་མ་བྱས་པའི་རང་བཞིན་ཡིན་པས་དེ་རྣམས་གང་ལ་ཡང་མི་བརྟེན་ཅིང་། དེ་རྣམས་ཀྱི་སྐྱེ་འཇིག་གིས་གོས་པ་མ་ཡིན་ཏེ། རྒྱལ་བ་བྱམས་པས། ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་དག་པ་ལ་རབ་གནས། །སེམས་ཀྱི་རང་བཞིན་ཆོས་རྣམས་ནི། །གང་ལ་ཡང་ནི་གནས་པ་མེད། །ཞེས་གསུངས་པ་བཞིན་ནོ། །ལྔ་པ་ནི། དག་པ་ནས། འཁོར་བ་ཡིན། ཅེས་གསུངས་ཏེ། སེམས་ཉིད་སངས་རྒྱས་ཀྱི་སྙིང་པོ་རང་བཞིན་གྱིས་རྣམ་པར་དག་པ་དེ་
ཉིད་ངོ་བོ་སྟོང་རང་བཞིན་གསལ་རྣམ་པ་འགག་པ་མེད་པར་སྐུ་གསུམ་གྱི་རང་བཞིན་དུ་ད་ལྟར་སེམས་ཅན་ཐམས་ཅད་ལ་བཞུགས་ནས་ཡོད་དེ། དེ་ལྟར་ཡོད་ཀྱང་མ་རིག་པའི་ཀུན་རྟོག་གིས་བསྒྲིབས་ནས་རང་གི་ངོ་བོ་མ་མཐོང་བའམ་མ་རྟོགས་པའི་ཕྱིར་འཁྲུལ་རྟོག་གི་རྒྱ་མཚོར་བྱིང་སྟེ་འགྲོ་བ་དྲུག་གི་གནས་སུ་འཁོར་བ་ཡིན་ཏེ། བྱང་ཆུབ་སེམས་འགྲེལ་ལས། ཇི་ལྟར་སྐྱེ་བོ་སེམས་རྨོངས་པས། །སྒྱུ་མ་སྨིག་རྒྱུ་དྲི་ཟ་ཡི། །གྲོང་ཁྱེར་ལ་སོགས་མཐོང་བ་ལྟར། །དེ་བཞིན་གཟུགས་སོགས་སྣང་བ་ཡིན། །ཞེས་སོ། །དྲུག་པ་ནི། དེ་ཉིད་ནས། ཐ་སྙད་བྱས། །ཞེས་གསུངས་ཏེ། དེ་ལྟར་ན་སྤང་བྱ་གློ་བུར་གྱི་དྲི་མ་དེ་ཉིད་གཟོད་མ་ནས་མ་གྲུབ་པར་ཤེས་ཏེ་གཟུང་འཛིན་བླང་དོར་གྱི་རྟོག་པ་བསལ་བས་འཁོར་འདས་དབྱེར་མེད་ཀྱི་དོན་མངོན་སུམ་དུ་གྱུར་པ་ན་སྲིད་པའི་མྱ་ངན་ལས་འདས་པས་དྲི་བྲལ་གློ་བུར་རྣམ་དག་གི་ཆ་དེ་ལ་འཁོར་བའི་ཐ་མ་དང་ལྡན་པའི་ཐ་སྙད་དུ་བྱས་པ་ཡིན་གྱི། སེམས་ཉིད་སངས་རྒྱས་ཀྱི་སྙིང་པོ་གདོད་མ་ནས་
རང་བཞིན་གྱིས་རྣམ་པར་དག་ཅིང་ཡོན་ཏན་རང་ཆས་སུ་གནས་པས་ངོ་བོ་ལ་བོགས་དབྱུང་དུ་མེད་དེ། དཔལ་སྡོམ་པ་ལས། སངས་རྒྱས་རྣམས་ནི་བྱོན་གྱུར་ཏམ། །མ་བྱོན་ན་ཡང་རྣམ་ཀུན་ཏུ། །རྒྱུན་ཆད་མེད་པའི་ཆོས་ཉིད་ནི། །འཕེལ་འགྲིབ་སྤངས་ཏེ་གནས་པ་ཡིན། །ཞེས་སོ། །དེས་ན་སེམས་ཉིད་རྟོགས་མ་རྟོགས་ཀྱི་དབང་གིས་སངས་རྒྱས་དང་སེམས་ཅན་དོན་དམ་དང་ཀུན་རྫོབ། འཁོར་འདས་སོགས་ཀྱི་རྣམ་པ་སོ་སོར་སྣང་ཞིང་དེ་སྐད་དུ་བརྗོད་པ་ཡིན་ཏེ། འཕགས་པ་ཀླུས། སེམས་ཉིད་རྣམ་པ་གཉིས་སུ་མཐོང་། །ཇི་ལྟར་འཇིག་རྟེན་འཇིག་རྟེན་འདས། །བདག་ཏུ་འཛིན་ལས་འཁོར་བ་སྟེ། །སོ་སོར་རིག་ན་དེ་ཉིད་དོ། །ཞེས་གསུངས་སོ། །གཉིས་པ་ཡང་དག་པ་མ་ཡིན་པ་དང་། ཡང་དག་པའི་ཀུན་རྟོག་བཤད་པ་ལ་གསུམ། ཡང་དག་པ་མ་ཡིན་པའི་ཀུན་རྟོག་ལ་བརྟེན་ནས་འཁོར་བའི་ཚུལ། འཁྲུལ་པའི་རྩ་བ་བླང་དོར་གྱིས་བྱུང་བ། གཉེན་པོའི་རྟོགས་པའི་དོན་ནོ། །དང་པོ་ནི། ཐོག་མཐའ་ནས། །སྟོན་པ་ཡིན། །ཅེས་གསུངས་
ཏེ། སེམས་ཉིད་རྒྱལ་བའི་སྙིང་པོ་རང་བཞིན་གྱིས་རྣམ་པར་དག་པ་ལ་ཐོག་མཐའི་བྱེ་བྲག་མེད་ཀྱང་དུས་ཀྱི་ཐོག་མ་དང་མཐའ་མ་ནི། ཡང་དག་པ་མ་ཡིན་པའི་ཀུན་ཏུ་རྟོག་པས་སྒྲོ་བཏགས་པ་ཉིད་ལ་བརྟེན་པ་སྟེ་སེམས་ཉིད་ནམ་མཁའ་ལྟ་བུ་དེ་རང་གིས་རང་མ་རིག་པས་སེམས་ཉིད་ལ་ང་དང་བདག་ཏུ་འཛིན་པ་ཅན་གྱི་ཉོན་མོངས་པའི་ཡིད་གཡོ་བ་མངོན་པར་འདུ་བྱེད་པའི་རྟོག་པ་རླུང་དང་འདྲ་བ་ལངས་པ་དེ་ཡིན། ལས་དང་ཉོན་མོངས་ཆུ་དང་འདྲ་བས་བསྒྲུབས་པ་སྟེ། ལས་ཉོན་དེ་ཡིས་གཟུགས་སོགས་ཕུང་པོ་ལྔ། དམིགས་པ་ཡུལ་གྱི་ཁམས་དྲུག །རྟེན་དབང་པོའི་ཁམས་དྲུག །བརྟེན་པ་རྣམ་པར་ཤེས་པའི་ཁམས་དྲུག་དང་བཅོ་བརྒྱད། མིག་ལ་སོགས་པ་ནང་གི་སྐྱེ་མཆེད་དྲུག །གཟུགས་ལ་སོགས་པ་ཕྱིའི་སྐྱེ་མཆེད་དྲུག་དང་བཅུ་གཉིས་ལ་སོགས་པ། སའི་དཀྱིལ་འཁོར་ལྟ་བུ་བསྐྱེད་ཅིང་ས་ལ་འགྲོ་བ་བརྟེན་པ་ལྟར་གཉིས་སུ་སྣང་བའི་ཆོས་ཀུན་བདེན་པར་གྲུབ་པ་མེད་བཞིན་ཏུ་འཁྲུལ་ངོར་བདེན་པ་ལྟར་སྟོན་པ་ཡིན་
ཏེ། རྒྱུད་བླ་མ་ལས། ཚུལ་བཞིན་མ་ཡིན་ཡིད་བྱེད་ནི། །སེམས་ཀྱི་རང་བཞིན་ལ་གནས་ཏེ། །ཚུལ་བཞིན་མ་ཡིན་ཡིད་བྱེད་ཀྱིས། །ལས་དང་ཉོན་མོངས་རབ་ཏུ་བྱེད། །ལས་དང་ཉོན་མོངས་ཆུ་ལས་ནི། །ཕུང་པོ་སྐྱེ་མཆེད་ཁམས་རྣམས་འབྱུང་། །ཞེས་སོ། །གཉིས་པ་ནི། དེ་ལ་ནས། མ་ཡིན་ནམ། །ཞེས་གསུངས་ཏེ། དེ་ལྟར་ན་སྣང་བ་སེམས་ཀྱི་རང་སྣང་ཡིན་པས་གཟུང་འཛིན་གཉིས་སུ་གྲུབ་པ་མེད་ཀྱང་འཁྲུལ་རྟོག་ལས་བྱུང་བའི་མེད་པ་ལ་ཡོད་པར་བཏགས་པའི་གཟུང་འཛིན་གཉིས་སུ་སྣང་བའི་ཡུལ་ཀུན་བརྟགས་དེ་ལ་འདོད་པ་བླང་ཞིང་མི་འདོད་པ་དོར་བའི་བླང་དོར་བྱེད་མཁན་གྱི་ཤེས་པ་དེ་འཁྲུལ་པ་ཡིན་ཏེ། ཅིའི་ཕྱིར་ཞེ་ན། ཕྱི་རོལ་གྱི་ཡུལ་ནི་སེམས་འཁྲུལ་པས་སྒྲོ་བཏགས་པ་ཡིན་གྱི་དོན་ལ་མེད་པ་ཡིན་པས་བཟུང་བ་མེད་དེ། དེ་མེད་པས་དེ་ལ་བརྟེན་པའི་འཛིན་པའང་མེད་མོད། ཐོག་མེད་ཀྱི་བག་ཆགས་བརྟས་པའི་མཐུ་ལས་སྣང་བ་ཡིན་ནོ། །དཔེར་ན་ནམ་མཁའ་རང་བཞིན་སྟོང་པ་འདི་ལ་བླང་བྱ་དང་དོར་བྱར་མེད་པ་
བཞིན་ཏུ། ཡུལ་རང་གི་སེམས་ཀྱི་སྣང་བ་ཡིན་པ་མི་འདོད་ཅིང་དོར་བ་བྱར་མེད་ལ། རང་སེམས་ཀྱི་སྣང་བ་དེ་ཉིད་འདོད་པས་བླང་བས་ཅི་ཞིག་འབྱུང་སྟེ་བླང་བྱར་མེད་དོ། །དེ་བས་ན་རང་སྣང་གཅིག་པུ་ལ་བླང་དོར་གཉིས་སུ་འཛིན་མཁན་གྱི་ཡང་དག་པ་མ་ཡིན་པའི་ཀུན་ཏུ་རྟོག་པ་ནི་རྫུན་པ་མ་ཡིན་ནམ་སྟེ་ངེས་པར་མི་བདེན་བརྫུན་ནོ། །གསུམ་པ་ནི། དེ་ཤེས་ནས། དགག་ཕྱིར་གསུངས། །ཞེས་གསུངས་ཏེ། དེ་ལྟར་གཟུང་འཛིན་གཉིས་མེད་དོ་སྙམ་དུ་རྟོག་པའི་ཤེས་པ་དེ་དག་གི་གཉེན་པོར་གསུངས་མོད་ཀྱང་གཟུང་འཛིན་གཉིས་མེད་ཅིང་སྟོང་པ་ཡིན་སྙམ་པའི་རྟོགས་པ་དེ་ཡང་བདེན་པའམ་དོན་དམ་པ་མིན་ཏེ། རྨི་ལམ་དུ་བུ་འཆི་རྒྱུ་མེད་ཀྱང་ཤི་བ་རྨིས་ནས་བུ་མེད་དོ་སྙམ་པ་ལྟར། གཟུང་འཛིན་གཉིས་སུ་མ་གྲུབ་བོ་སྙམ་པའི་རྟོག་མེད་ཀྱི་ཤེས་པ་དེ་སྙེམས་བྱེད་ཀྱི་རྟོག་པ་ཆེན་པོར་གྱུར་པའི་ཕྱིར་ཏེ། ཞི་བ་ལྷས། དེ་ཕྱིར་རྫུན་པའི་དངོས་གང་ཡིན། །དེ་ཡི་དངོས་མེད་གསལ་བར་རྫུན། །དཔེར་ན་རྨི་ལམ་བུ་ཤི་ལ། །དེ་
མེད་སྙམ་པའི་རྣམ་རྟོག་ནི། །དེ་ཡོད་རྣམ་པར་རྟོག་པ་ཡི། །གེགས་ཡིན་དེ་ཡང་རྫུན་པ་ཡིན། །ཅེས་སོ། །དེ་ཡང་དངོས་འཛིན་གྱི་གཉེན་པོ་སྟོང་པ་ཉིད་ཡིན་ཀྱང་། སྟོང་ཉིད་ལ་མངོན་པར་ཞེན་ན་གསོར་མི་རུང་བའི་ལྟ་བར་གསུངས་ཏེ། དཀོན་མཆོག་བརྩེགས་པ་ལས། འོད་སྲུངས་གང་ཟག་ཏུ་ལྟ་བ་རི་རབ་ཙམ་ལ་གནས་པ་ནི་བླའི། མངོན་པའི་ང་རྒྱལ་ཅན་སྟོང་པ་ཉིད་དུ་ལྟ་བ་ནི་དེ་ལྟ་མ་ཡིན་ནོ། །ཞེས་དང་། རྩ་ཤེས་ལས། སྟོང་པ་ཉིད་ལ་ལྟ་ཉེས་ན། །ཤེས་རབ་ཆུང་རྣམས་ཕུང་བར་འགྱུར། །ཞེས་དང་། རྒྱལ་བ་རྣམས་ཀྱིས་སྟོང་པ་ཉིད། །ལྟ་ཀུན་ངེས་པར་འབྱིན་པར་གསུངས། །གང་དག་སྟོང་པ་ཉིད་ལྟ་ལ། །དེ་དག་གསོར་མི་རུང་བར་གསུངས། །ཞེས་སོ། །དེས་ན་སྟོང་ཉིད་ལ་ཞེན་པའི་བློ་དེ་ཉིད་ཀྱང་དཔང་དགོས་ཏེ། མདོ་སྡེ་རྒྱན་ལས། སེམས་ལས་གཞན་མེད་པར་ནི་བློས་རིག་ནས། །དེ་ནས་སེམས་ཀྱང་མེད་པ་ཉིད་དུ་རྟོགས། །བློ་དང་ལྡན་པས་གཉིས་པོ་མེད་རིག་ནས། །དེ་མི་ལྡན་པ་ཆོས་ཀྱི་དབྱིངས་ལ་གནས། །ཞེས་
དང་། ཞི་བ་ལྷས། སྟོང་ཉིད་བག་ཆགས་གོམས་པས་ནི། །དངོས་པོའི་བག་ཆགས་སྤོང་འགྱུར་ཞིང་། །ཅི་ཡང་མེད་ཅེས་གོམས་པས་ན། །དེ་ཡང་ཕྱི་ནས་སྤོང་བར་འགྱུར། །ཞེས་སོ། །དེ་ཡང་གཟུགས་སོགས་རྨི་ལམ་གྱི་ཡུལ་བཞིན་རང་སེམས་ཀྱི་སྣང་བ་ཁོ་ན་་ཡིན་པ་ལ་གཅིག་དང་དུ་མའི་ཆ་སོ་སོར་ཕྱེས་ནས་ནམ་མཁའ་ལྟར་བློ་ཡི་ཡུལ་དུ་ཅི་ཡང་མེད་པའི་སྟོང་པ་ཉིད་དུ་རྟོག་པའི་ཆ་ཕྱེ་མཁན་གྱི་ཤེས་པ་ཁྱོད་རང་ཡང་དོན་ལ་འཁྲུལ་པ་མ་ཡིན་ནམ་སྟེ་སྣང་བ་ཐམས་ཅད་སེམས་ཀྱི་རང་འོད་སྣང་སྟོང་དབྱེར་མེད་ཆུ་ཟླ་ལྟ་བུ་ཡིན་པས་ཆ་ཕྱེ་རྒྱུ་མ་གྲུབ་པ་ལ་ཕྱེས་ན་འཁྲུལ་པ་ཡིན་ནོ། །དེ་ལྟ་བུའི་སྣང་སྟོང་དབྱེར་མེད་མི་ཤེས་པས་སྔར་དངོས་པོར་ཡོད་པ་དེ་ཕྱིས་སྟོང་ཉིད་ཀྱིས་བཅོམ་ནས་མེད་པར་འཛིན་པ་ནི་ཉེས་པ་ཆེན་པོར་གསུངས་ཏེ། དཔལ་ས་ར་ཧ་ཆེན་པོས། དངོས་པོར་འཛིན་པ་ཕྱུགས་དང་འདྲ་བ་སྟེ། །དངོས་མེད་འཛིན་པ་དེ་བས་ཀྱང་ནི་བླུན། །ཞེས་གསུངས་སོ། །འོན་ཀྱང་ཕུང་པོ་ལྔ་རིལ་པོར་འཛིན་པ་སོགས་
བདེན་པར་ཞེན་པ་དགག་པའི་ཕྱིར་ཆ་སོ་སོར་འབྱེད་ཅིང་སྟོང་པར་གཏན་ལ་དབབ་པའི་ཚུལ་བཀའ་བསྟན་བཅོས་ཚད་མར་གྱུར་པ་རྣམས་ལས་གསུངས་པ་ཡིན་ནོ། །གསུམ་པ་སངས་རྒྱས་ཀྱི་སྙིང་པོ་ཉིད་བཤད་པ་ལ་གསུམ། རང་གི་ངོ་བོ་བསྟན་པ། ཡོན་ཏན་བཤད་པ། དཔེ་དོན་དང་སྦྱར་ནས་བཤད་པའོ། །དང་པོ་ནི། ཐམས་ཅད་ནས། དོན་མི་ཤེས། །ཞེས་གསུངས་ཏེ། འདི་ལྟར་སྣང་བའི་ཆོས་ཐམས་ཅད་གདོད་མ་ནས་སྐྱེ་བ་མེད་ཅིང་བདེན་པར་མ་གྲུབ་པས་དོན་དམ་དུ་བདེན་པ་མིན་ལ། སེམས་ཀྱི་རང་རྩལ་འགག་མེད་སོ་སོར་སྣང་བས་འཁྲུལ་ངོར་རྫུན་པའང་མིན་ཏེ། དཔེར་ན་ཆུ་དྭངས་པའི་ནང་དུ་ཟླ་བའི་གཟུགས་བརྙན་སྣང་བ་ན་ཟླ་བར་སྣང་བའི་དུས་ནས་ཟླ་བར་ཡོད་མ་མྱོང་བ་དང་། ཟླ་བ་མེད་བཞིན་དུ་ཟླ་བའི་གཟུགས་དང་ཁ་དོག་སྣང་བ་ཙམ་མ་འགག་པ། ཟླ་སྣང་དང་མེད་དངོས་གཉིས་དབྱེར་མི་ཕྱེད་ཅིང་། ཆུ་ཟླའི་མཚན་ཉིད་སྟོང་པར་ཤེས་ན་ཟླ་འཛིན་རང་སར་གྲོལ་བ་བཞིན་ཏུ་ཡུལ་སྣང་རྣམས་སྣང་བའི་དུས་ཉིད་
ནས་བདེན་པར་ཡོད་མ་མྱོང་བ་དང་། བདེན་པར་མེད་བཞིན་དུ་སྣང་ཙམ་མ་འགག་པར་སྣང་བ་སྟེ། དེས་ན་སྣང་སྟོང་དབྱེར་མི་ཕྱེད་པ་དང་། མཚན་ཉིད་སྟོང་པར་ཤེས་ནས་སྣང་བར་འཛིན་པ་རང་སར་གྲོལ་བ་ཤེས་བྱ་ཀུན་ལ་མཁས་པའི་རྒྱལ་བ་སྲས་དང་བཅས་པས་བཞེད་ཅིང་འདོད་དེ། ཧེ་བཛྲ་ལས། རང་བཞིན་གདོད་ནས་མ་སྐྱེས་པ། །རྫུན་མིན་བདེན་མིན་དེ་བཞིན་དུ། །ཐམས་ཅད་ཆུ་ཡི་ཟླ་བ་ལྟར། །འདོད་པས་རྣལ་འབྱོར་མས་ཤེས་གྱིས། །ཞེས་སོ། དེ་ལྟར་སྣང་སྟོང་ཟུང་འཇུག་གི་རང་བཞིན། གྲུབ་མཐའ་དང་གཉེན་པོས་མ་བཅོས་པའི་ཐ་མལ་གཉུག་མའི་ཤེས་པ་དེ་ཉིད་ལ། ཆོས་དབྱིངས་དང་། ཆོས་སྐུ་དང་། བདེ་བ་ཆེན་པོ་དང་། ཤེས་རབ་ཕར་ཕྱིན་དང་། རྒྱལ་བའི་སྙིང་པོ་ལ་སོགས་པ་མིང་དུ་མ་ཟེར་ཏེ་དོན་སེམས་ཉིད་གཉུག་མའི་ཤེས་པ་གཅིག་ཁོ་ན་ཡིན་ལ། དེ་ཉིད་རིག་དང་མ་རིག་གི་ཁྱད་པར་ཙམ་མ་གཏོགས་ངོ་བོ་འགྱུར་བ་མེད་པའི་ཆོས་ཉིད་ཡིན་པས་གཞི་མངོན་ཏུ་འགྱུར་པ་འབྲས་བུའི་དུས་དང་།
ལམ་བྱང་ཆུབ་སེམས་དཔས་རྟོགས་པའི་ཚེ་སྔར་མེད་ཀྱི་ཡོན་ཏན་བསྐྱེད་པ་སོགས་བཟང་དུ་འཕགས་པ་རྣམས་ཀྱིས་ཀྱང་བཏང་བ་མེད་ཅིང་། གཞིའི་གནས་སྐབས་མ་རྟོགས་པའི་དུས་སུ་ངོ་བོའི་ཡོན་ཏན་མི་ལྡན་པ་སོགས་ངན་དུ་སེམས་ཅན་གྱིས་ཀྱང་མ་བཏང་སྟེ། ཆོས་ཉིད་བསལ་བཞག་དང་བྲལ་བའི་ཕྱིར་རོ། དེ་ལྟར་ཡང་རྒྱུད་བླ་མ་ལས། ཇི་ལྟར་སྔར་བཞིན་ཕྱིས་དེ་བཞིན། །འགྱུར་བ་མེད་པའི་ཆོས་ཉིད་དོ། །ཞེས་སོ། །དོན་འདི་ནི་ས་བཅུའི་བྱང་སེམས་རྣམས་ཀྱིས་ཀྱང་བསམ་གྱིས་མི་ཁྱབ་པས་རྫོགས་པའི་སངས་རྒྱས་མ་ཐོབ་བར་དུ་ཚིག་དང་ཐ་སྙད་དུ་མ་དག་གིས་གནས་ལུགས་ཀྱི་དོན་བརྗོད་མོད་ཀྱང་། ཆོས་ཉིད་བསམ་གྱིས་མི་ཁྱབ་ཅིང་རྟོག་གེའི་ཡུལ་མ་ཡིན་པས་ཐ་སྙད་ཀྱིས་བརྗོད་པས་ཆོས་ཉིད་དེ་ཡི་དོན་ཅི་ལྟ་བ་བཞིན་དུ་མི་ཤེས་སོ། །འོ་ན་སངས་རྒྱས་ཁོ་ནའི་སྤྱོད་ཡུལ་དེ་སོ་སོའི་སྐྱེ་བོ་རྣམས་ལ་ཅིའི་ཕྱིར་བསྟན་སྙམ་ན། རྒྱལ་བ་བྱམས་པས། སེམས་ཞུམ་སེམས་ཅན་དམན་ལ་བརྙས་པ་དང་། །ཡང་དག་མིན་
འཛིན་ཡང་དག་ཆོས་ལ་སྐུར། །བདག་ཆགས་ལྷག་པའི་སྐྱོན་ལྔ་གང་དག་ལ། །ཡོད་པ་དེ་དག་དེ་སྤང་དོན་ཏུ་གསུངས། །ཞེས་གསུངས་པ་ལྟར། ཡོན་ཏན་ཀུན་ལྡན་སངས་རྒྱས་ཀྱི་སྙིང་པོས་སེམས་ཅན་ཐམས་ཅད་ལ་ཁྱབ་པར་མ་ཤེས་ནས་བདག་གིས་སངས་རྒྱས་མི་ཐོབ་སྙམ་དུ་སེམས་ཞུམ་ནས་སེམས་མི་བསྐྱེད་པ་དང་། སེམས་ཅན་དམན་པ་ལ་ཁམས་ཡོད་པར་མ་ཤེས་ནས་བརྙས་པ་དང་། ཁམས་ལ་བསྒྲིབས་པའི་དྲི་མ་ཡང་དག་པར་ཡོད་པ་མ་ཡིན་པ་ལ་བདེན་པར་འཛིན་ཅིང་ཡོད་པར་སྒྲོ་འདོགས་པ་དང་། ཡང་དག་པའི་སངས་རྒྱས་ཀྱི་ཡོན་ཏན་སྟོབས་སོགས་རྣམས་ཡེ་ནས་ཡོད་པ་ལ་མེད་ཅེས་སྐུར་པ་འདེབས་པ་དང་། སེམས་ཅན་ཐམས་ཅད་ལ་ཁམས་ཡོད་པར་འདྲ་བར་མ་ཤེས་ནས་ཡོན་ཏན་ཅུང་ཟད་སྐྱེས་ནས་བདག་ཅག་ལྷག་གོ་སྙམ་ནས་ང་རྒྱལ་བ་སྟེ། སྐྱོན་དེ་ལྔ་སྤོང་བའི་དོན་དུ་བསྟན་པའོ། །ཁ་ཅིག་གིས་དགོས་པ་བསྟན་པ་འདིས་བདེ་གཤེགས་སྙིང་པོའི་དོན་བསྟན་པ་རྣམས་དྲང་དོན་ཡིན་པར་བཤད་
ཀྱང་། དེ་ལྟ་ན་སྟོང་པ་ཉིད་དུ་བསྟན་པ་ཐམས་ཅད་བདག་གཅིག་དང་རིལ་པོར་འཛིན་པ་བཟློག་པའི་ཆེད་དུ་གསུངས་པས་དེའང་དྲང་དོན་ཏུ་འགྱུར་ལ། སྟོང་པ་ཉིད་ཆོས་ཐམས་ཅད་ཀྱི་གནས་ལུགས་ཡིན་པས་མི་མཚུངས་སོ་སྙམ་ན། བློའི་སྤྱོད་ཡུལ་དུ་གྱུར་པའི་སྟོང་པ་ཙམ་གནས་ལུགས་སུ་འགྱུར་ན་བློ་འདས་ཆོས་ཉིད་འོད་གསལ་བའི་རང་བཞིན་གནས་ལུགས་སུ་ཅིའི་ཕྱིར་མི་འགྱུར། དེས་ན་འཁོར་ལོ་བར་པར་སྟོང་ཉིད་སྤྲོས་བྲལ་གྱི་ལུང་མང་དུ་གསུངས་པ་ཐམས་ཅད་བསམ་གྱིས་མི་ཁྱབ་པའི་དབྱིངས་དེ་ཉིད་སྐྱེ་འགག་གནས་གསུམ་སོགས་འདུས་བྱས་ཀྱི་མཚན་ཉིད་ཀྱིས་དབེན་པར་བསྟན་པ་ཡིན་གྱིས། ཁམས་དེ་མེད་པར་བསྟན་པ་ནི་མ་ཡིན་ཏེ། འཕགས་པ་ཀླུ་སྒྲུབ་ཀྱིས། སྟོང་པ་ཉིད་ནི་སྟོན་པའི་མདོ། །རྒྱལ་བས་ཇི་སྙེད་གསུངས་པ་དེ། །དེ་དག་ཀུན་གྱི་ཉོན་མོངས་ལྡོག །ཁམས་དེ་ཉམས་པར་བྱེད་མ་ཡིན། །ཅེས་གསུངས་སོ། །གཉིས་པ་ལ་གཉིས། མདོར་བསྟན། རྒྱས་བཤད་དོ། །དང་པོ་ནི། དེ་ཉིད་ནས། གསུངས་
པ་ཡིན། །ཅེས་གསུངས་ཏེ། སངས་རྒྱས་ཀྱི་སྙིང་པོ་དེ་ཉིད་ངོ་བོ་སྟོང་ཞིང་རང་བཞིན་གསལ་ལ་རྣམ་པ་མ་འགག་པར་རོལ་པའི་ཆ་ལ། ཆོས་སྐུའི་ཡོན་ཏན་སོ་གཉིས་དང་། གཟུགས་སྐུའི་ཡོན་ཏན་སོ་གཉིས་ཏེ་དྲུག་ཅུ་རྩ་བཞི་པོ་ཚང་བར་ཡོད་པར་བཤད་པ་དེ་ནི་གཙོ་བོར་སྨོས་པའི་རིགས་ཡིན་ཏེ། རྒྱས་པར་བྱེད་ན་དེ་རེ་རེ་ལ་ཡང་བྱེ་བ་ཕྲག་རེའམ་གྲངས་མེད་པ་མངའ་བར་གསུངས་པ་ཡིན་ནོ། །གཉིས་པ་ལ་གཉིས། ཆོས་སྐུའི་ཡོན་ཏན་དང་། གཟུགས་སྐུའི་ཡོན་ཏན་བཤད་པའོ། །དང་པོ་ལ་ལྔ། སྟོབས་བཅུ། མི་འཇིགས་པ་བཞི། མ་འདྲེས་པ་བཅོ་བརྒྱད། ད་ལྟར་ཡོད་ཀྱང་མི་སྣང་བའི་ཚུལ། རྟོགས་པར་བྱ་བའི་ཚུལ་ལུང་དང་བཅས་པའོ། །དང་པོ་ནི། གནས་དང་ནས། སྟོབས་བཅུ། །ཞེས་གསུངས་ཏེ། སངས་རྒྱས་ཐམས་ཅད་སྔོན་སེམས་བསྐྱེད་དང་སྡོམ་པའི་དམ་བཅའ་བརྟན་པ་ལས། དགེ་བས་རྣམ་སྨིན་ཡིད་དུ་འོང་བ་ཐོབ་པ་ནི་གནས་དང་རྣམ་སྨིན་ཡིད་དུ་མི་འོང་བ་ཐོབ་པ་ནི་གནས་མིན་དང་དེ་ལས་ལྡོག་པ་
མཁྱེན་པའི་སྟོབས་དང་པོ། ལས་འབྲས་ཤེས་པས་ལས་རྣམས་ཀྱི་རྣམ་སྨིན་མཁྱེན་པའི་སྟོབས་གཉིས་པ། ཁམས་རྣམས་དང་མཐུན་པར་ཞུགས་པས་སེམས་ཅན་གྱི་ཁམས་སྣ་ཚོགས་མཁྱེན་པའི་སྟོབས་གསུམ་པ། དབང་པོ་དང་མཐུན་པར་ཆོས་སྟོན་པས་དབང་པོ་མཆོག་དམན་མཁྱེན་པའི་སྟོབས་བཞི་པ། མོས་པ་དང་མཐུན་པར་ཞུགས་པས་འགྲོ་བའི་མོས་པ་སྣ་ཚོགས་མཁྱེན་པའི་སྟོབས་ལྔ་པ། ཐེག་པ་ཐམས་ཅད་ལ་གོམས་པ་ལས་ཐེག་པ་གསུམ་མམ་འཁོར་འདས་ཀུན་ཏུ་འགྲོ་བའི་ལམ་སྣ་ཚོགས་མཁྱེན་པའི་སྟོབས་དྲུག་པ། ཏིང་ངེ་འཛིན་ལྷུར་བླངས་པས་བསམ་གཏན་སོགས་ཉོན་མོངས་པ་དང་དྲི་མ་མེད་པ་མཁྱེན་པའི་སྟོབས་བདུན་པ། སེམས་ཅན་ལ་ལྷག་པའི་བསམ་པ་སོགས་ལས་ལྷའི་མིག་གིས་འཆི་འཕོ་དང་སྐྱེ་བ་མཁྱེན་པའི་སྟོབས་བརྒྱད་པ། དགེ་བ་ཆུད་མ་གསན་པས་རང་གཞན་གྱི་སྔོན་གྱི་གནས་རྗེས་སུ་དྲན་པའི་སྟོབས་དགུ་པ། ཟག་པ་ཟད་པ་མཁྱེན་པའི་སྟོབས་བཅུ་པ་སྟེ། དེ་ལྟར་ན་ནུས་པའི་མཐུ་འགྲན་ཟླ་བྲལ་
བའི་སྟོབས་རྣམ་པ་བཅུའོ། གཉིས་པ་ནི། དེ་རྟེན་ནས། རྩོད་མེད་ཉིད། །ཅེས་གསུངས་ཏེ། སྟོབས་བཅུ་དེ་ལ་བརྟེན་པའི་མི་འཇིགས་པ་བཞི་སྟེ། རང་དོན་རྟོགས་པ་ཕུན་ཚོགས་སུ་དམ་བཅས་པ་ལ་མི་འཇིགས་པ་ནི། འཁོར་གྱི་དབུས་སུ། བདག་ནི་ཆོས་ཀུན་གྱི་དབྱིངས་སུ་མངོན་པར་རྫོགས་པར་བྱང་ཆུབ་པའོ། །ཞེས་ཞལ་གྱིས་བཞེས་པ་ལ་བྱང་ཆུབ་པ་མ་ཡིན་པའི་རྒོོལ་བ་པོ་མེད་པ་དང་། གཞན་དོན་བར་ཆད་ཀྱི་ཆོས་བསྟན་པ་ལ་མི་འཇིགས་པ་ནི། འདོད་ཆགས་སོགས་ཐར་བའི་གེགས་ཡིན་པས་འགོག་པར་བྱེད་དོ་ཞེས་སྟོན་པ་ལ་དེ་དག་གེགས་མ་ཡིན་ནོ་ཞེས་རྒོལ་བ་པོ་མེད་པ་དང་། གཞན་དོན་ངེས་འབྱིན་གྱི་ལམ་སྟོན་པ་ལ་མི་འཇིགས་པ་ནི། བྱང་ཕྱོགས་སོ་བདུན་འཁོར་བ་ལས་ངེས་པར་འབྱིན་པའི་ལམ་ཡིན་ནོ་ཞེས་སྟོན་པ་ལ་ལམ་མ་ཡིན་ཅེས་པའི་རྒོལ་བ་པོ་མེད་པ་དང་། རང་དོན་སྤངས་པ་ཕུན་ཚོགས་སུ་བསྟན་པ་ལ་མི་འཇིགས་པ་ནི། ཟག་པ་བག་ཆགས་དང་བཅས་པ་འགག་པའི་འགོག་པ་ཐོབ་བོ་
ཞེས་སྟོན་པ་ལ་དེ་མ་ཐོབ་བོ་ཞེས་པའི་རྒོལ་བ་མེད་པ་སྟེ། མདོར་ན་ཆོས་མཐུན་གྱི་རྩོད་པ་པོ་དངོས་དང་བརྒྱུད་ནས་མེད་པ་ཉིད་དོ། །གསུམ་པ་ནི། རྒྱུ་དེས་ནས། ཆོས་སྐུ་ཡིན། །ཅེས་གསུངས་ཏེ། མི་འཇིགས་པ་བཞི་བརྙེས་པའི་རྒྱུ་དེས་ཉན་རང་བྱང་སེམས་དང་མ་འདྲེས་པའི་ཆོས་བཅོ་བརྒྱད་མངའ་བ་སྟེ། དེ་ལ་སྤྱོད་པས་བསྡུས་པ་དྲུག་ནི། སྐུའི་སྤྱོད་པ་ལ་འཁྲུལ་པ་མེད་པས་མ་འཁྲུལ་བ་དང་། གསུང་གི་བརྗོད་པ་ཅ་ཅོ་མེད་པ་དང་། ཐུགས་ཤེས་བྱ་ཐམས་ཅད་ལ་དྲན་པ་མ་ཉམས་པས་བརྗེད་པ་མི་མངའ་བ་དང་། སྤྱོད་ལམ་རྣམ་བཞིའི་དུས་རྟག་ཏུ་མཉམ་པར་མ་བཞག་པ་མི་མངའ་བ་དང་། འཁོར་འདས་ལ་ཐ་དད་ཀྱི་འདུ་ཤེས་སྣ་ཚོགས་མི་མངའ་བ་དང་། སོ་སོ་མ་བརྟགས་པའི་བཏང་སྙོམས་མེད་པ་དང་དྲུག་གོ །རྟོགས་པས་བསྡུས་པ་དྲུག་ནི། ཆོས་སྟོན་པའི་འདུན་པ་ཉམས་པ་མི་མངའ་བ་དང་། དེ་བཞིན་ཏུ་དོན་གྱི་བརྩོན་འགྲུས་དང་། གདུལ་བྱ་ལ་སོགས་པ་དྲན་པ་དང་། མཉམ་པ་ཉིད་རྟོགས་པའི་ཏིང་ངེ་འཛིན་དང་།
འཁོར་འདས་ཐམས་ཅད་ཤེས་པའི་ཤེས་རབ་དང་། ཟག་པ་ས་བོན་དང་བཅས་པ་ལས་རྣམ་པར་གྲོལ་བའི་རྣམ་གྲོལ་གྱི་ཡེ་ཤེས་མཐོང་བ་དྲུག་ལས་ཡོངས་སུ་ཉམས་པ་མི་མངའ་བ་རྣམས་སོ། །ཕྲིན་ལས་ཀྱི་བསྡུས་པ་གསུམ་ནི། སྤྱོད་ལམ་ཐམས་ཅད་ཀྱིས་སེམས་ཅན་མི་འདུལ་བ་མེད་པའི་སྐུའི་ཕྲིན་ལས་དང་། ཡན་ལག་དྲུག་ཅུ་དང་ལྡན་པས་གསུང་གི་ཕྲིན་ལས་དང་། གདུལ་བྱ་མཁྱེན་ཅིང་བརྩེ་བས་འཛིན་པའི་ཐུགས་ཀྱི་ཕྲིན་ལས་ཏེ། ཕྲིན་ལས་གསུམ་པོ་རྣམས་ཡེ་ཤེས་སྔོན་དུ་འགྲོ་བ་དང་། ཡེ་ཤེས་ཀྱི་རྗེས་སུ་འཇུག་པ་ཐོབ་པའོ། །ཡེ་ཤེས་ཀྱིས་བསྡུས་པ་གསུམ་ནི། འདས་པ་དང་། མ་འོངས་པ་དང་། ད་ལྟར་བྱུང་བའི་དུས་གསུམ་ལ་མ་ཆགས་མ་ཐོགས་པའི་ཡེ་ཤེས་ཀྱི་གཟིགས་པ་སྒྲིབ་པ་མེད་པ་བཅོ་བརྒྱད་དེ། དེ་ལྟར་ཡོན་ཏན་སོ་གཉིས་དང་ལྡན་པ་ནི་རང་བཞིན་རྣམ་དག་ཆོས་ཀྱི་སྐུ་ཡིན་ལ། གློ་བུར་གྱི་དྲི་མ་དག་པའི་ཚེ་ཡོན་ཏན་དེ་དག་གི་ནུས་པ་མངོན་ཏུ་འགྱུར་བ་ཡིན་ནོ། བཞི་པ་ནི། ད་ལྟ་ནས། གཡོས་
པས་ལན། །ཅེས་གསུངས་ཏེ། སེམས་ཉིད་བདེ་གཤེགས་སྙིང་པོ་ལ་ཆོས་སྐུའི་ཡོན་ཏན་རྣམས་ཚང་བར་ཡོད་ཀྱང་མ་རིག་པས་ད་ལྟ་གཞི་སེམས་ཅན་གྱི་དུས་སུ་ཡོན་ཏན་དེ་ལ་འགལ་བར་བྱེད་དེ། ཇི་ལྟར་བྱེད་ན། སེམས་ཉིད་དབྱིངས་དང་རིག་པ་དབྱེར་མེད་པ་འདི་ལ་སངས་རྒྱས་ཀྱི་ཡོན་ཏན་ཐམས་ཅད་ཚང་ཞིང་ཅིའི་ངོ་བོར་ཡང་མ་གྲུབ་པ་ཞིག་ཡིན་པ་ལ་ཡིན་པ་བཞིན་དུ་མ་ཤེས་ཤིང་མ་ངེས་པས། ཡུལ་མེད་པ་རྣམ་རྟོག་གིས་ཡོད་པར་རྟོག་པའི་ཀུན་བརྟགས་བྱས་ཤིང་། ཡུལ་དེས་བསྐྱེད་པའི་འཁྲུལ་པའི་རྟོག་པ་དེ་གཞན་དབང་ཡིན་ཏེ། རྒྱན་ལས། གང་ཞིག་ཡོད་པ་མ་མཐོང་མེད་མཐོང་བ་ཞེས་སོ། །གཟུང་འཛིན་དེའི་དབང་གིས་དོན་དམ་པའི་བདེན་པ་ཆོས་ཉིད་འགྱུར་བ་མེད་པའི་ཡོངས་སུ་གྲུབ་པ་གཟུང་འཛིན་གཉིས་ལས་འདས་པའི་སེམས་ཉིད་ཀྱི་ངོ་བོ་རང་གིས་རང་མ་རིག་ཅིང་མ་ཤེས་པས། རང་ཉིད་འཁྲུལ་བའི་སྣང་བ་ལ་རང་གིས་བདེན་ཞེན་བྱས་པ་ཉིད་འཁོར་བ་ཁ་བརྒྱུད་པའི་བག་ཆགས་སུ་གྱུར་ཏེ་སྡུག་བསྔལ་དུ་མས་
གཟིངས་པ་སྟེ། འཕགས་པ་ཀླུ་སྒྲུབ་ཞབས་ཀྱིས། ཇི་ལྟར་རང་གིས་འདམ་གཡོས་པས། །བྱིས་པ་གཞན་ཞིག་བྱིང་བ་ལྟར། །དེ་བཞིན་རྟོག་འདམ་བྱིང་བས། །སེམས་ཅན་རྣམས་ནི་འབྱུང་མི་ནུས། །དངོས་མེད་དངོས་པོར་ལྟ་བ་ཡི། །སྡུག་བསྔལ་ཚོར་བ་ཉམས་སུ་མྱོང་། །ཞེས་སོ། །ཀྱེ་མ་ནི་ཡ་མཚན་པའི་དོན་ཏེ། ཅིའི་ཕྱིར་ན། འགྱུར་མེད་ཡོངས་གྲུབ་ཆོས་སྐུའི་ཡོན་ཏན་རྣམ་པར་དབྱེ་བ་མེད་པའི་མཚན་ཉིད་ཅན་འདི་ཉིད་སེམས་ཅན་གྱི་རྒྱུད་ལ་དོན་དམ་བདེན་པའི་ངོ་བོ་ཇི་ལྟ་བར་ཡོད་པར་ཡིད་ཆེས་པའི་བདེན་པར་རྟོགས་པ་ཅན་དེ་ལ་དོན་དམ་བདེན་པ་ཤེས་པའི་ཤེས་རབ་ཕྱིན་ཅི་མ་ལོག་པའི་ཡོངས་གྲུབ་ཡིན་ཅིང་། ད་ལྟར་མ་རིག་པའི་དུས་སུ་ཡོན་ཏན་ཡོད་ཀྱང་ནུས་པ་ཆུང་བ་དེ་ཡོན་ཏན་རྣམས་དོན་དམ་པའི་བདེན་པར་ཡོད་པར་ཤེས་པའི་ཤེས་པ་དེ་བོར་ནས་དོན་ལ་མེད་ཅིང་མི་བདེན་པའི་གཟུང་འཛིན་གྱིས་དབྱེན་བཅོས་ཏེ་འཁོར་འདས་ཀྱི་འཁྲུལ་སྣང་དུ་མ་བཟོས་ཤིང་། དེ་ལ་རྗེས་སུ་འབྲང་བའི་འདུ་
བྱེད་ཀྱི་ཤེས་པ་དུ་མ་ཆུ་རླབས་བཞིན་དུ་གཡོས་པས་ལེན་པ་ཡིན་ནོ། །ལྔ་པ་ནི། ད་ནི་ནས། སྟོང་མ་ཡིན། ཅེས་གསུངས་ཏེ། ཆོས་སྐུ་རང་ལ་གཞུགས་པ་ཐོས་བསམ་གྱིས་རྟོགས་པ་དེའི་ཕྱིར། ད་ནི་སེམས་ཉིད་སངས་རྒྱས་ཀྱི་སྙིང་པོ་འདི་ལ་ཡོན་ཏན་ཐམས་ཅད་ཚང་བར་ཡོད་པ་ཡིན་པ་ལ་ཡིན་པ་བཞིན་དུ་ཤེས་པར་གྱིས་ལ་ཤེས་པ་དེ་ལ་གོམས་པས་ཡང་ཡང་གསོས་བཏབ་ནས་ཇི་ལྟ་བར་རྟོགས་པས་ཆོག་སྟེ་ཡོན་ཏན་གྱི་ནུས་པ་མངོན་སུམ་དུ་ཐོབ་པར་འགྱུར་རོ། །དེ་ཅིའི་ཕྱིར་ན། སེམས་ཉིད་བདེ་གཤེགས་སྙིང་པོ་འདི་ལ་རང་གི་འཁྲུལ་སྣང་འདུ་ཤེས་ཀྱི་འཆིང་བ་ལས་གཞན་པའི་དྲི་མ་བདེན་དངོས་སུ་གྲུབ་པ་བསལ་བར་བྱ་རྒྱུ་ལོགས་སུ་ཅི་ཡང་མེད་ཅིང་། ཡོན་ཏན་རང་བཞིན་གྱིས་ལྡན་པས་སྔར་མེད་གསར་དུ་བསྒྲུབ་ཅིང་བཞག་པར་བྱ་བ་ཅུང་ཟད་ཀྱང་མེད་པས། ཡང་དག་པའི་སེམས་ཉིད་བསལ་བཞག་དང་བྲལ་བ་དེ་ཉིད་རང་ལ་རང་གིས་བལྟ་རུ་མེད་པའི་ཚུལ་གྱིས་ཡང་དག་པར་བལྟའོ། །དེ་ལྟར་བལྟས་པས། སེམས་ཉིད་
དབྱིངས་དང་ཡེ་ཤེས་དབྱེར་མེད་པ་ཡིན་པ་ལ་ཡིན་པར་མཐོང་ངོ་། །དེས་ན་དྲི་མ་གློ་བུར་བ་ནི་འདུ་ཤེས་ཡིན་ལ། དེའི་རང་གི་ངོ་བོ་སྨིག་རྒྱུ་ལྟར་མེད་པ་ལ་མེད་པར་ཡང་དག་པར་མཐོང་ན་འདུ་ཤེས་ཀྱི་འཆིང་བ་ལས་རྣམ་པར་གྲོལ་ཏེ། སྟོབས་པོ་ཆེན་པོའི་རྒྱུད་ལས་ཀྱང་། འདི་ལ་བསལ་བྱ་ཅི་ཡང་མེད། །བསྣན་པར་བྱ་བ་ཅུང་ཟད་མེད། །དེ་ཉིད་མཐོང་ན་རྣམ་པར་གྲོལ། ཞེས་སོ། །སེམས་ཉིད་ལ་སྤང་ཐོབ་ཀྱི་བྱ་བ་ཅི་ཡང་མེད་པ་དེའི་ཕྱིར་དྲི་མ་སེམས་ཀྱི་རང་བཞིན་མ་ཡིན་པས་སེམས་ཉིད་དང་རྣམ་པར་དབྱེ་བ་དང་བཅས་པའི་མཚན་ཉིད་ཅན་གྱི་གློ་བུར་དྲི་མ་དག་གིས་ནི་ཁམས་བདེ་གཤེགས་སྙིང་པོ་ལ་མ་གོས་པས་སྟོང་ཞིང་རང་བཞིན་རྣམ་པར་དག་གི །རྣམ་པར་བྱུང་བའི་དམིགས་པ་གསར་དུ་གཞག་པར་བྱ་བ་མེད་ཅིང་ཡོན་ཏན་སེམས་ཉིད་ཀྱི་རང་བཞིན་ཡིན་པས་སེམས་ཉིད་དང་རྣམ་པར་དབྱེར་མེད་པའི་འབྲལ་མི་རུང་བའི་མཚན་ཉིད་ཅན་གྱི་བླ་ན་མེད་པའི་སངས་རྒྱས་ཀྱི་ཆོས་ཀྱིས་ཁམས་དེ་སྟོང་པ་ནི་མ་ཡིན་
ནོ། །འདི་ནི་དཔལ་ཕྲེང་གི་མདོ་ལས་གསུངས་པའི་དོན་རྒྱུད་བླ་མའི་ལུང་ངོ་། །གཉིས་པ་གཟུགས་སྐུའི་ཡོན་ཏན་བཤད་པ་ལ་གསུམ། ཡོན་ཏན་གྱི་ངོ་བོ། །དེ་ལུས་ལ་གནས་པའི་འཐད་པ། དག་མ་དག་གི་ཚུལ་ལོ། །དང་པོ་ནི། དེ་ལ་ནས། དཔེ་བྱད། །ཅེས་གསུངས་ཏེ། ཆོས་ཀྱི་སྐུ་དེ་ལ་སྣང་བའི་ཆ་ལོངས་སྤྱོད་རྫོགས་པ་དང་སྤྲུལ་པའི་རྣམ་རོལ་ཏེ་གཟུགས་སྐུ་གཉིས་ཀྱི་རང་བཞིན་ནམ་ཡོན་ཏན་ནི་མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བརྒྱད་ཅུ་ཐམ་པར་གསུངས་པ་ཡིན་ལ། མཚན་ནི། རྒྱུད་བླ་མར། ལེགས་གནས་འཁོར་ལོས་མཚན་པ་དང་། །ཞེས་སོགས་དང་། མངོན་རྟོགས་རྒྱན་ལས། ཕྱག་ཞབས་འཁོར་ལོས་མཚན་དང་རུས་སྦལ་ཞབས། །ཞེས་སོགས་ཀྱིས་བསྟན་པ་ལྟར་ཡིན་ལ། འདི་གཉིས་གྲངས་འདྲེན་ཚུལ་ཅུང་ཟད་མི་འདྲ་བ་ནི་མདོ་སྡེ་སོ་སོའི་དགོངས་པའོ། །དཔེ་བྱད་ནི། རྒྱན་ལས། ཐུབ་པའི་སེན་མོ་ཟངས་མདོག་དང་། །མདོག་སྣུམ་མཐོ་དང་སོགས་ཀྱིས་བསྟན་པ་ལྟར་ཏེ་འདིར་མ་སྤྲོས་སོ། །གཉིས་པ་
ནི། ཐོབ་པའི་ནས། ཐ་སྙད་བྱས། །ཞེས་གསུངས་ཏེ། དེ་ལྟར་གཟུགས་སྐུ་གཉིས་ཀྱི་ཡོན་ཏན་མཚན་དཔེ་རྣམས་ཐོབ་པར་བྱེད་པའི་རྒྱུ་རང་ལུས་རྩ་རླུང་ཐིག་ལེ་ལས་གྲུབ་པ་འདི་ཉིད་ཡིན་པས། ཡོན་ཏན་དེ་དག་རང་གི་ལུས་རྣམ་པར་དག་པ་ལས་བྱུང་བ་ཡིན་ཅིང་། ལུས་དེ་གང་ལས་བྱུང་སྙམ་ན། བོད་གྱི་འདོད་པ་ལྟར་ཕྱྭ་དང་། མུ་སྟེགས་པས་འདོད་པའི་རྟག་གཅིག་རང་དབང་ཅན་གྱི་བདག་དང་། དབང་ཕྱུག །ཚངས་པ་སོགས་དང་། ཉན་ཐོས་བྱེ་སྨྲ་བས་བཞེད་པའི་ཕྱི་རོལ་དུ་བདེན་པར་གྲུབ་པའི་རྡུལ་ཕྲན་ཆ་མེད་དང་། མདོ་སྡེ་པ་ལྟར་སྣང་བ་མི་བདེན་ཀྱང་དབང་པོ་ལ་རྣམ་པ་གཏོད་མཁན་གྱི་དོན་བདེན་པ་བ་ཕག་གམ་ལྐོག་ན་མོར་ཡོད་པས་བྱས་པར་འདོད་པ་སོགས་དེ་དག་གིས་ལུས་འདི་བྱས་པ་མིན་ནོ། །འོ་ན་གང་ཡིན་ན། སེམས་སེམས་ལྟར་དུ་སྣང་བ་དང་། སེམས་ལུས་ལྟར་དུ་སྣང་བ་སྟེ་ཆ་གཉིས་སུ་ཡོད་པ་ལས། ལུས་ནི་ཕྱི་མ་ཉིད་ཡིན་པས། སེམས་ཀྱི་ཆ་ལས་སྣང་བ་སྟེ། །ཟབ་མོ་ནང་དོན་ལས། དེ་ལྟར་
རྩ་རླུང་ཐིག་ལེ་གསུམ། །སེམས་ཀྱི་ཆ་ལས་སྣང་བ་སྟེ། །ཞེས་སོ། །དེ་བས་སེམས་མ་དག་པའི་བར་དུ། བར་དོ་གསུམ་དུ་ཡང་ལུས་ལ་རྒྱུན་ཆད་མེད་ཅིང་གཟུགས་མེད་དུ་ཡང་ཡིད་ཀྱི་ལུས་ཡོད་པ་སྟེ། གཟུགས་མེད་ཅེས་བྱ་ཡིད་ལུས་སོ། །ཞེས་སོ། །དེས་ན་སེམས་ཀྱི་ཆ་དག་པ་ལ་སྔར་བསྟན་པ་ལྟར་ཆོས་སྐུའི་ཡོན་ཏན་ཏུ་འགྱུར་ལ། ལུས་ཀྱི་ཆ་དབང་པོ་སྒོ་ལྔའི་རྣམ་པར་ཤེས་པ་གཟུང་བ་དང་འཛིན་པ་ཡི་རྣམ་པར་འགྱུར་བ་མ་དག་པ་དེ་ལམ་གྱི་རྟོགས་པས་སྦྱངས་ཤིང་དག་པས། གནས་ལུགས་ཀྱི་རང་བཞིན་མངོན་ཏུ་གྱུར་པ་དེའི་ཚེ་གཟུགས་སྐུ་ཐོབ་པར་གྱུར་པའི་མིང་དང་ཐ་སྙད་དུ་བྱས་པའོ། །དེ་ཡང་ས་དང་པོ་ཐོབ་ནས་དབང་པོ་ལྔ་གནས་འགྱུར་བའམ། དབང་འབྱོར་བ་ཐོབ་སྟེ། མིག་གི་དབང་པོ་ལ་སོགས་པ་རེ་རེས་ཀྱང་གཟུགས་སྒྲ་དྲི་རོ་རེག་བྱ་སྟེ་དོན་ལྔ་ལྔ་ལ་འཇུག་པས་དབང་པོ་ལྔ་པོས་ཡོན་ཏན་གྱི་ཁྱད་པར་བརྒྱ་ཕྲག་བཅུ་གཉིས་འབྱུང་བ་ལ་དབང་འབྱོར་ཐོབ་སྟེ། མདོ་སྡེ་རྒྱན་ལས། དབང་པོ་ལྔ་རྣམས་གནས་གྱུར་ནས། །དོན་
ཀུན་འཇུག་དང་ཐམས་ཅད་ཀྱང་། །ཡོན་ཏན་ཕྲག་བརྒྱ་བཅུ་གཉིས་འབྱུང་། །དབང་འབྱོར་དམ་པ་ཐོབ་པར་འགྱུར། །ཅེས་སོ། དེ་བཞིན་དུ་ས་གཉིས་པ་ལ་སོགས་པའི་ཡོན་ཏན་འཕེལ་བ་མཐར་ཕྱིན་ནས་སངས་རྒྱས་ཀྱི་སར་ནི་ཡོན་ཏན་ཀྱི་གྲངས་ཚད་མེད་ཅིང་བསམ་གྱིས་མི་ཁྱབ་སྟེ། མདོ་སྟེ་རྒྱན་ལས། སངས་རྒྱས་སྤྲུལ་པ་དེ་རྟག་ཏུ། །མཛད་པ་གྲུབ་པའི་བྱེ་བྲག་དང་། །གྲངས་དང་ཞིང་དང་རྣམ་ཀུན་ཏུ། །བསམ་མི་ཁྱབ་པར་ཤེས་པར་བྱ། །ཞེས་སོ། །འདི་ལ་ཁ་ཅིག་སེམས་ཀྱི་དྲི་མ་དག་པ་ལ་སངས་རྒྱས་སུ་འགྱུར་བར་རིགས་ཀྱི། ལུས་ནི་ཕ་མའི་རྐྱེན་ལས་བྱུང་བས་མི་གཙང་བ་འཇིག་པའི་རང་བཞིན་ཡིན་པས་འདུས་བྱས་ལས་འདུས་མ་བྱས་ཀྱི་ཡོན་ཏན་འབྱུང་བ་མི་རིགས་སོ་སྙམ་ན། འཕགས་པ་ཀླུས། ཤེས་དང་མི་ཤེས་མ་དག་ལས། །ལུས་འདི་ཉིད་ལ་ཐམས་ཅད་དེ། །རང་གི་རྣམ་པར་རྟོག་པས་བཅིངས། །དེ་ཉིད་ཤེས་ན་གྲོལ་བར་འགྱུར། །ཅེས་དང་། འཕགས་པ་ཐོགས་མེད་ཞལ་ནས། གཟུགས་ཀྱི་ཕུང་པོ་
གནས་གྱུར་པའི་ཕྱིར་ཞིང་དང་། ལུས་དང་། མཚན་དང་། དཔེ་བྱད་བཟང་པོ་དང་། དབྱངས་མཐའ་ཡས་པ་དང་། སྤྱི་གཙུག་ལྟར་མི་མངོན་པ་ལ་དབང་འབྱོར་བ་དང་། ཞེས་གསུངས་པ་སོགས་ཐུན་མོང་ཐེག་པ་དང་མཐུན་པའི་ཆོས་ཚུལ་ལས་ཀྱང་ལུས་གནས་གྱུར་པའི་མཚན་དཔེ་གསུངས་པ་ཡོད་ཅིང་། བརྟག་གཉིས་ལས། བཙུན་མོའི་བྷ་ག་བདེ་ཆེན་དུ། །སྟོན་པ་སུམ་ཅུ་རྩ་གཉིས་མཚན། །གཙོ་བོ་བྱད་བརྒྱད་ཅུར་ལྡན། །ཁུ་བ་ཞེས་བྱའི་རྣམ་པར་གནས། །ཞེས་སོགས་ཐུན་མིན་གྱི་ཐེག་པ་རྣམས་ནས་ལུས་འདི་ཉིད་གཟུགས་སྐུའི་རང་བཞིན་ཏུ་ཡང་ཡང་གསུངས་ཏེ། དེས་ན་སེམས་ཀྱི་རྩལ་དུ་སྣང་བའི་ལུས་འདི་ལ་གཟུགས་སྐུའི་ཡོན་ཏན་ཐམས་ཅད་ཚང་བར་ཡོད་ཀྱང་། རང་གི་འཁྲུལ་རྟོག་གིས་བཅིངས་བས་མི་མཐོང་བ་ཡིན་ཅིང་། འཆིང་བ་དང་བྲལ་ན་གཟུགས་སྐུ་གཉིས་ཀྱི་ཡོན་ཏན་དུ་སྣང་བར་འགྱུར་རོ། ཡོན་ཏན་དྲུག་ཅུ་རྩ་བཞི་པོ་རྣམས་ལ་དངོས་ཀྱི་རྒྱུ་དང་རྐྱེན་གྱི་རྒྱུ་གཉིས་སུ་ཡོད་པ་ལས། ཆོས་སྐུའི་དངོས་རྒྱུ་སེམས་
ཉིད་འོད་གསལ་བའི་རང་བཞིན་དང་། གཟུགས་སྐུའི་དངོས་རྒྱུ་སེམས་ལུས་ལྟར་དུ་སྣང་བ་ཉིད་ཡིན་ལ། དྲི་མ་དག་ཅིང་གསལ་བར་བྱེད་པའི་རྐྱེན་གྱི་རྒྱུ་ནི་སྔོན་སེམས་བསྐྱེད་པ་ཉིད་ཀྱིས་གནས་དང་གནས་མ་ཡིན་པ་མཁྱེན་པ་སོགས་དང་། བླ་མ་བསུ་སྐྱེལ་བྱས་པས་ཕྱག་ཞབས་འཁོར་ལོས་མཚན་པ་སོགས་ཡོན་ཏན་དྲུག་ཅུ་རྩ་བཞི་པོ་རེ་རེ་བཞིན་འགྲུབ་པའི་རྒྱུ་བུ་མོ་རིན་ཆེན་གྱིས་ཞུས་པའི་མདོ་ལས་གསུངས་པ་ལྟར་རོ། །གསུམ་པ་ནི། དེ་བས་ནས། གཟུགས་སྐུའོ། །ཞེས་གསུངས་སོ། །གཟུགས་སྐུ་རྣམ་གཉིས་ལུས་ལ་གནས་པའི་ཚུལ་བཤད་མ་ཐག་པ་དེ་ལྟ་བས་ན། སྦྱང་གཞི་རྩ་དང་རླུང་དང་ཐིག་ལེ་རྣམས་སྦྱང་བྱ་གློ་བུར་གྱི་དྲི་མ་རྣམ་པར་དག་པས་དག་པའི་གཟུགས་ཀྱི་སྐུར་གནས་གྱུར་པ་ཡིན་ཏེ། རྩ་སྐུ། རླུང་གསུང་། ཐིག་ལེ་ཐུགས་ཀྱི་དཀྱིལ་འཁོར་དུ་སྦྱང་ཞིང་། དྲི་མ་མ་སྦྱངས་པའི་སེམས་ཅན་གྱི་གནས་སྐབས་སུ་མ་དག་པའམ་དྲི་བཅས་ཀྱི་གཟུགས་ཀྱི་སྐུར་གནས་པའོ། །དེ་དག་ཀྱང་ཐམས་ཅད་མཁྱེན་པ་རང་
བྱུང་ཞབས་ཉིད་ཀྱིས་ཟབ་མོ་ནང་གི་དོན་ལས་གསལ་བར་གསུངས་ཏེ། དག་པའི་གནས་སྐབས་ལ་དགོངས་ནས། སྐུ་གསུམ་རྩ་རླུང་ཐིག་ལེ་ཅན། །ཞེས་དང་། མ་དག་པའི་གནས་སྐབས་ལ་དགོངས་ནས། དེ་ལྟར་ཕུང་པོ་ཁམས་སྐྱེ་མཆེད། །རྩ་རླུང་ཐིག་ལེ་ལ་གྲུབ་པ། །དྲི་མར་བཅས་པའི་སེམས་ཉིད་ལས། །བྱུང་སྟེ་དྲི་བཅས་སྤྲུལ་སྐུར་གསུངས། །ཞེས་དང་། དེའི་འགྲེལ་པར། འདིར་སྔགས་ཀྱི་ཐེག་པ་ནས། སྐྱེ་བ་སངས་རྒྱས་སྤྲུལ་པའི་སྐུར་གསུངས་པའི་དོན། ཕུང་ཁམས་སྐྱེ་མཆེད་རིམ་གྱིས་རྫོགས་པའི་ཚེ། མཆོག་གི་སྤྲུལ་པ་དྲི་མ་དང་བཅས་པ་གཟུགས་ཀྱི་སྐུ་ཡིན་ནོ། །དྲི་མ་མེད་པར་སྦྱངས་པ་ན། བྷ་ག་ནི་ཆོས་ཀྱི་དབྱིངས་ཡིན་ལ། ཟླ་བ་བཅུ་ནི་ས་བཅུའི་རང་བཞིན་གྱི་བསྙེན་པར་རྫོགས་པ་ནི་ཡེ་ཤེས། མ་ནི་མཁན་པོ། ཕྲུ་མ་ནི་ཆོས་གོས། ངག་གི་བཟླས་པ་ནི་ཨ་ཧཾ། དེའི་ལུས་སྦྱོང་པ་ལ་སོགས་པ་ནི་དབང་བསྐུར་བར་བྱེད་པ་འོད་ཟེར་ཆེན་པོའི་ཚུལ། དེ་གནས་སྐབས་བཞི་རྫོགས་པ་ནི་སྐུ་བཞིའི་སངས་རྒྱས་སུ་བཞུགས་ཀྱང་མ་
རྟོགས་པས་འཁོར་བའི་ལུས་སུ་གྱུར་ཏོ། །ཞེས་བརྟག་གཉིས་སོགས་ཀྱི་ལུང་དང་བཅས་རྒྱས་པར་གསུངས་པ་བཞིན་ནོ། །གསུམ་པ་དེའི་དཔེ་དོན་སྦྱར་ཏེ་བཤད་པ་ལ་བཞི། དཔེ་དངོས་བསྟན། དེ་དོན་དང་སྦྱར། ཀུན་རྟོག་གཉིས་ཀྱིས་བཅོམ་པའི་ཚུལ་གོ་རིམ་དང་བཅས་པ་དང་། མི་འགྱུར་ཡང་དག་ཐོབ་པའི་ཚུལ་ལུང་དང་བཅས་པའོ། །དང་པོ་ནི། དཔེར་ན་ནས། དགོས་འདོད་འབྱུང་། ཞེས་གསུངས་ཏེ། སེམས་ཉིད་རྒྱལ་བའི་སྙིང་པོ་འདི་ཉིད་དཔེར་བྱ་བས་མཚོན་ན། ཤུན་པ་དང་བཅས་པའི་རིན་པོ་ཆེ་བཻཌཱུརྻ་དེ་ལ་ཤུན་པས་བསྒྲིབས་པའི་ཕྱིར་དགོས་འདོད་འབྱུང་བའི་ཡོན་ཏན་མི་སྣང་སྟེ། ཡོན་ཏན་དེ་སྣང་བར་བྱ་བའི་ཕྱིར་དང་པོ་རེ་བས་ཕྱི་བ་དང་། བ་ཚའི་ཆུར་སྦངས་ཏེ་སྦྱངས་པ་སྤེལ་ནས་དྲི་མ་རགས་པ་ཕྲལ་བ་དང་། བར་དུ་ཆུ་སྐྱུར་པོས་སྦངས་ནས་བལ་གྱི་ལྭ་བས་དྲི་མ་ཕྲ་བ་སྦྱངས་པ་དང་། མཐར་ཆུ་གཙང་མས་སྦངས་ནས་ཀཱ་ཤི་ཀའི་རས་སྲབ་མོས་དྲི་མ་ཤིན་ཏུ་ཕྲ་བ་སྦྱངས་ནས་སྒྲིབ་བྱེད་ཤུན་པའི་དྲི་མ་ཐམས་
ཅད་དག་པ་དེ་ནི་རིན་པོ་ཆེ་ཐམས་ཅད་ཀྱི་མཆོག་ནོར་བུ་དགོས་འདོད་འབྱུང་བའི་གནས་སུ་འགྱུར་རོ། །གཉིས་པ་ནི། དེ་བཞིན་ནས། ལ་རབ་སྦྱངས། །ཞེས་གསུངས་ཏེ། དཔེ་དེ་བཞིན་དུ་སེམས་ཀྱི་རང་བཞིན་འོད་གསལ་སངས་རྒྱས་ཀྱི་སྙིང་པོ་བཻཌཱུརྻ་ལྟ་བུ་དེ་ལ་སངས་རྒྱས་ཀྱི་ཡོན་ཏན་ཐམས་ཅད་ཚང་བར་ཡོད་ཀྱང་ཕ་རོལ་ཏུ་ཕྱིན་པ་དྲུག་གི་མི་མཐུན་པའི་ཕྱོགས་སེར་སྣ་སོགས་ཉོན་མོངས་པའི་སྒྲིབ་པ་དང་། འཁོར་གསུམ་དུ་བདེན་པར་འཛིན་པའི་ཤེས་བྱའི་སྒྲིབ་པ་དང་། བྱིང་རྒོད་གཉིས་སྙོམས་འཇུག་གི་སྒྲིབ་པ་སྟེ། ཤུན་པ་སྒྲིབ་པ་དེ་གསུམ་པོས་བསྒྲིབས་ནས་མི་གསལ་བ་དེ་སྦྱང་བའི་ཕྱིར། ཐོག་མར་ཚོགས་ལམ་བཞི་གསུམ་བཅུ་གཉིས་དང་སྦྱོར་ལམ་ངེས་འབྱེད་ཆ་བཞིར་དྲི་མ་རགས་པ་ཉོན་སྒྲིབ་སྦྱང་། མ་དག་ས་བདུན་དུ་ཕྲ་བ་ཤེས་སྒྲིབ་སྦྱང་བ་དང་། དག་པའི་ས་གསུམ་དུ་ཤིན་ཏུ་ཕྲ་བ་སྙོམས་འཇུག་གམ་མཚན་འཇིན་བཞི་པོ་རབ་ཏུ་སྦྱང་བར་བྱ་བ་ཡིན་ནོ། །དེའང་འཕགས་པ་ཀླུས། ཇི་ལྟར་རིན་ཆེན་བཻཌཱུརྻ། །དུས་རྣམས་
ཀུན་ཏུ་འོད་གསལ་བ། །རྡོ་ཡི་ནང་དུ་གནས་གྱུར་ན། །དེ་ཡི་འོད་ནི་གསལ་མ་ཡིན། །དེ་བཞིན་ཉོན་མོངས་ཀྱིས་བསྒྲིབས་པའི། ཆོས་དབྱིངས་ཤིན་ཏུ་དྲི་མེད་ལའང་། །འཁོར་བར་འོད་ནི་གསལ་མ་ཡིན། །མྱ་ངན་འདས་ན་འོད་གསལ་འགྱུར། །ཅེས་གསུངས་སོ། །འདི་དག་གི་དོན་རྒྱས་པ་རྗེ་ཉིད་ཀྱི་ནང་དོན་རང་འགྲེལ་ལས་འདི་ལྟར་འབྱུང་སྟེ། དག་དང་ཉོན་མོངས་དང་ལྡན་ཕྱིར། །ཀུན་ནས་ཉོན་མོངས་མེད་དག་ཕྱིར། །རྣམ་པར་དབྱེ་བ་མེད་ཆོས་ཕྱིར། །ལྷུན་གྲུབ་རྣམ་པར་མི་རྟོག་ཕྱིར། །ཞེས་རྒྱུད་བླ་མར་གསུངས་པ་ཡིན་ནོ། །ཚུལ་འདི་ཉན་ཐོས་དང་རང་སངས་རྒྱས་དང་། ཐེག་པ་ལ་གསར་དུ་ཞུགས་པའི་བྱང་ཆུབ་སེམས་དཔའ་རྣམས་ཀྱིས་ཀྱང་རྟོགས་དཀའ་བར་གསུངས་ཀྱང་། རེ་ཞིག་དཔེར་བསྟན་པར་བྱ་སྟེ། ནོར་བུ་རིན་པོ་ཆེ་བཻཌཱུརྻ་ཆེན་པོ་ཤུན་པ་དང་བཅས་པའི་ཚེ་ཤུན་པ་དང་བཅས་ཀྱང་། ནང་དུ་ནོར་བུ་ལ་ཤུན་པ་འདྲེས་པ་མེད་པ་ལྟར། སེམས་ཅན་གྱི་དུས་ན་སངས་རྒྱས་ཀྱི་སྙིང་པོ་དྲི་མ་རྣམས་ཀྱིས་
བསྒྲིབས་ཀྱང་། མ་འདྲེས་པས་ན་དག་ལ་ཉོན་མོངས་པ་དང་ལྡན་པ་ཡིན་ནོ། ཡང་ཐོག་མ་ནས་ཤུན་པ་དང་བཅས་པའི་ནོར་བུ་ཡིན་ཀྱང་། ཤུན་པ་དེ་ནི་ནོར་བུ་ལས་བྱུང་བ་ཡང་མ་ཡིན། ནོར་བུ་ལས་གཞན་ནས་བྱུང་བ་མ་ཡིན་ཏེ། གང་ནས་ཀྱང་མ་བྱུང་བའི་ཤུན་པ་དེ་རྣམ་པར་དག་པར་བྱས་པས་དག་པ་ལྟར། སེམས་སངས་རྒྱས་ཀྱི་སྙིང་པོའི་སྒྲིབ་པ་དག་པའི་སངས་རྒྱས་ཀྱང་དེ་ཁོ་ན་བཞིན་དུ་ཡིན་ནོ། །ཡང་ནོར་བུའི་ཡོན་ཏན་དེ་རྣམས་དང་ཐ་མ་ཁྱད་མེད་ཀྱང་། སྔ་མ་ལ་ནི་ཡོན་ཏན་མི་སྣང་ལ། ཕྱི་མ་དྲི་མ་མེད་པ་དེ་རྒྱལ་མཚན་གྱི་རྩེར་བཏགས་ཏེ་གསོལ་བ་བཏབ་ན་ཡོན་ཏན་འབྱིན་པ་བཞིན་དུ། སངས་རྒྱས་ཀྱི་ཡོན་ཏན་ཐམས་ཅད་ད་ལྟར་ཡོད་ཀྱང་སྐྱོན་མེད་པའི་རྣམ་པར་དཀར་བས་མ་བསྐྱེད་ན་ནུས་པ་མི་འབྱིན་པས་ཡོན་ཏན་རྣམ་པར་དབྱེ་བ་མེད་པའི་ཆོས་ཉིད་ཡིན་ནོ། །དེ་ལྟ་བུའི་ནོར་བུ་ང་ནི་ཤུན་པ་ཅན་ནོ། །ང་ནི་ཤུན་པའོ། །གསོལ་བ་འདེབས་པ་ལ་ཡོན་ཏན་སྦྱིན་ནོ། མི་སྦྱིན་ནོ། །ཞེས་རྣམ་པར་མི་རྟོག་ཅིང་ལྷུན་གྱིས་
གྲུབ་པ་བཞིན་ཕྲིན་ལས་འཇུག་སྟེ། དེས་ན་སངས་རྒྱས་ཀྱི་སྙིང་པོ་ཡང་ལྷུན་གྱིས་གྲུབ་ཅིང་རྣམ་པར་མི་རྟོག་སྟེ། ཚུལ་དེ་ལྟར་རྟོགས་པར་བྱའོ། །ཞེས་སོགས་གསུངས་སོ། །གསུམ་པ་ནི། ཡང་དག་ནས་བཞི་བྲལ་བ། །ཞེས་གསུངས་ཏེ། དེའང་སྤང་གཉེན་གྱི་རྟོག་པ་ནི་ཚོགས་སྦྱོར་ན་ཡོད་ལ། །ངོ་བོ་ནི་མི་རྟག་པར་འཛིན་པ་དང་། འདུས་བྱས་ལ་དངོས་པོར་འཛིན་པ་དང་། སྲིད་པ་སྡུག་བསྔལ་གསུམ་གྱི་རང་བཞིན་ལ་བདེ་བར་འཛིན་པ་དང་། བདག་མེད་པའི་དངོས་པོ་ལ་བདག་ཏུ་འཛིན་པ་སྟེ། དེ་ལྟར་ཡང་དག་པ་མ་ཡིན་པའི་ཀུན་ཏུ་རྟོག་པ་སྤང་བྱའི་མཚན་ཉིད་ཅན་དེ་ཉིད། འདུས་བྱས་མི་རྟག་པ། ཟག་བཅས་སྡུག་བསྔལ་བ། ཆོས་ཐམས་ཅད་སྟོང་ཞིང་བདག་མེད་པ། མྱ་ངན་ལས་འདས་པ་ནི་ཞི་བར་ཤེས་པ་སྟེ་ཡང་དག་པའི་ཀུན་ཏུ་རྟོག་པ་གཉེན་པོའི་མཚན་ཉིད་ཅན་དང་ཕན་ཚུན་གཡུལ་སྤྲད་པས། དཔེར་ན་མེའི་མཚན་ཉིད་མ་ཡིན་པའི་གཙུབས་ཤིང་གཙུབས་གཏན་གཉིས་བསྲུབས་པ་ལས་མེ་བྱུང་ནས་ཤིང་ཁོ་
རང་གཉིས་ཚིག་སྟེ་མེའང་རང་ཡལ་བ་བཞིན་དུ། གཉེན་པོ་ནི་སྤང་བྱ་ལ་ལྟོས་པའི་ཕྱིར་སྤང་བྱ་ཟད་པ་དང་དུས་མཉམ་དུ་གཉེན་པོའི་རྟོག་པའང་ཟད་པའི་ཚེ་འཕགས་པའི་རྣམ་པར་མི་རྟོག་པའི་ཤེས་རབ་ཀྱི་དབང་པོ་སྐྱེས་ནས་སྤང་གཉེན་གྱི་ཀུན་ཏུ་རྟོག་པ་དང་བྲལ་བར་འགྱུར་ཏེ། འོད་སྲུང་གིས་ཞུས་པ་ལས། ཤིང་གཉིས་དྲུད་པ་ལས་ནི་མེ་འབྱུང་སྟེ། །བྱུང་བ་དེ་ཡིས་དེ་ཉིད་བསྲེག་པ་ལྟར། །དེ་བཞིན་ཤེས་རབ་དབང་པོ་སྐྱེས་ནས་ཀྱང་། །སྐྱེས་པ་དེ་ཡིས་དེ་ཉིད་སྲེག་པར་བྱེད། །ཅེས་སོ། །མཚན་འཛིན་བཞི་ནི། བཤད་མ་ཐག་པའི་སྤང་གཉེན་གྱི་རྟོག་པ་གཉིས་དང་། རྨི་ལམ་གྱི་ཆུ་རྨི་ལམ་ཡིན་པ་ཤེས་བཞིན་ཏུ་བརྒལ་བའི་རྩོལ་བ་བྱེད་པ་ལྟར་དེ་བཞིན་ཉིད་ལ་མཚན་མར་རྟོག་པ་དང་། འབྲས་བུའི་མཚན་མར་འཛིན་པ་རྣམས་སོ། །དེ་ལ་ཚོགས་སྦྱོར་དུ་ཡོད་པའི་སྤང་གཉེན་གཉིས་སུ་འཛིན་པའི་རྟོག་པ་ནི་དེ་བཞིན་ཉིད་དམིགས་ཀྱིས་སེལ་ལ་དེ་གཉིས་ཀྱི་འཛིན་རྟོག་བྲལ་བས་ཆོས་ཉིད་མངོན་སུམ་དུ་མཐོང་བ་ནི་མཐོང་བའི་ལམ་
མོ། །མཉམ་བཞག་རྣམ་པར་མི་རྟོག་པའི་ཡེ་ཤེས་དང་རྗེས་ཐོབ་སྒྱུ་མ་ལྟ་བུར་སྲིད་ཞི་མཉམ་པར་འཛིན་པ་ཙམ་དེ་ནི་དེ་བཞིན་ཉིད་ལ་དམིགས་པའི་རྟོག་པ་སྟེ་སྐབས་འདིར་ཉོན་ཡིད་ཀྱི་ལྷག་མ་ལུས་པའི་ཕྱིར་སྒོམ་ལམ་མ་དག་ས་བདུན་ལ་གནས་པ་ཡིན་ཅིང་། ཡིད་དང་འཛིན་པ་དང་རྣམ་པར་རྟོག་པའི་རླབས་བྲལ་ནས་ས་བརྒྱད་པ་ཐོབ་མ་ཐག་འབྲས་བུའི་མཚན་མ་ཙམ་འབྱུང་སྟེ། དེ་ནི་སངས་རྒྱས་གངྒའི་བྱེ་སྙེད་ཀྱིས་ཞལ་བསྟན་ནས་མི་རྟོག་པ་ལས་བསླངས་ཏེ། སངས་རྒྱས་ཀྱི་ཞིང་དང་བྱང་ཆུབ་ཀྱི་སྙིང་པོ་ཡོངས་སུ་སྦྱང་བ་ལ་འཇུག་པས་དག་པའི་ས་ཡིན་ཅིང་། ད་རུང་ས་བོན་ཐམས་ཅད་པའི་དྲི་མའི་ཆ་དག་པ་ས་གསུམ་གྱིས་སྤངས་པས་འབྲས་བུའི་མཚན་མར་འཛིན་པ་ཡང་ཞི་བས་དེ་ལྟར་མཚན་འཛིན་བཞི་དང་བྲལ་བ་ནི། སངས་རྒྱས་ཀྱི་རྣམ་པར་མི་རྟོག་པའི་ཡེ་ཤེས་ཞེས་བྱའོ། །བཞི་པ་ནི། དེ་ཚེ་ནས། དེ་ལ་བརྗོད། ཅེས་གསུངས་ཏེ། བཤད་མ་ཐག་པའི་མཚན་འཛིན་བཞིའི་དྲི་མ་དང་བྲལ་བ་དེའི་ཚེ་ཆོས་ཀྱི་
སྐུ་ཞི་བ་ཆེན་པོའི་ངང་དུ་བཞུགས་ཤིང་སྤྲོས་པ་ཐམས་ཅད་དང་བྲལ་བ་ནམ་མཁའ་ལྟ་བུའི་སྐུ་བརྙེས་པ་ཅན་དེ་ལ་མཁྱེན་བརྩེ་ནུས་པའི་འོད་ཟེར་མཚན་དང་དཔེ་བྱད་ཀྱི་མེ་ཏོག་རྒྱས་པར་འགྱུར་ནས་གཟུགས་སྐུ་གཉིས་ཀྱིས་སེམས་ཅན་གྱི་དོན་མཛད་པ་སྟེ། ཟབ་མོ་ནང་དོན་ལས། རྒྱལ་བ་ནམ་མཁའི་སྐུ་ཅན་ཡེ་ཤེས་ཉི་མའི་དཀྱིལ་འཁོར་ལས། །ཕྱོགས་བཅུའི་འཇིག་རྟེན་ཀུན་ཏུ་གཟུགས་སྐུ་འཁོར་བ་ཇི་སྲིད་སྟོན། །ཞེས་སོ། །དེ་ལྟ་བུའི་སངས་རྒྱས་དེ་ནི་དྲི་མས་མ་དག་པའི་གནས་སྐབས་དང་། མ་དག་པ་དང་དག་པ་གཉི་ག་དང་ལྡན་པའི་གནས་སྐབས་དང་། ཤིན་ཏུ་རྣམ་པར་དག་པའི་གནས་སྐབས་དང་གསུམ་པོ་ནི་གོ་རིམ་བཞིན་དུ་འཁོར་བའི་སེམས་ཅན་དང་། ལམ་ཞུགས་བྱང་ཆུབ་སེམས་དཔའ་དང་། སངས་རྒྱས་དེ་བཞིན་གཤེགས་པའི་གནས་སྐབས་གསུམ་དུ་བརྗོད་པའམ་གསུངས་ཀྱང་སངས་རྒྱས་དེ་ནི་སྔར་མེད་པ་གསར་དུ་སྐྱེས་པ་མིན་ཏེ། ཅི་ལྟར་སྔར་ཡོད་པ་བཞིན་ཕྱིས་ཀྱང་དེ་བཞིན་དུ་མི་འགྱུར་ཏེ། སངས་རྒྱས་ཀྱི་
སྙིང་པོ་དེ་ངོ་བོ་འགྱུར་བ་མེད་པའི་དེ་བཞིན་ཉིད་ཡིན་པས་སོ། །འོན་ཀྱང་གནས་འགྱུར་བའི་ཆ་ནི་གློ་བུར་བའི་དྲི་མ་གཟུང་འཛིན་གྱི་འཆིང་བ་ལས་གྲོལ་ཞིང་བྲལ་བའི་ཆ་དེ་ཉིད་ལ་བརྗོད་པ་སྟེ། མདོ་སྡེ་རྒྱན་ལས། སྔ་མ་ཕྱི་མ་ཁྱད་མེད་ཀྱང་། །སྒྲིབ་པ་ཀུན་གྱི་དྲི་མེད་པ། །དེ་བཞིན་ཉིད་ནི་སངས་རྒྱས་འདོད། །དག་པ་མ་ཡིན་མི་དག་མིན། །ཅེས་གསུངས་སོ། སྤྱི་དོན་བཞི་པ་བརྒལ་ལན་གྱིས་གཏན་ལ་དབབ་པ་ལ་བདུན། རྒྱུ་མེད་པ་དང་རྒྱུ་ཕྱི་རོལ་དུ་མི་འཐད་པ་མདོར་བསྟན། ཡིད་དག་པ་དང་མ་དག་པའི་ཤེས་པ་བཤད། བྱ་བ་གྲུབ་པའི་ཡེ་ཤེས་ཀྱི་ངོ་བོ། བྱ་བ་གྲུབ་པའི་ཕྲིན་ལས། མཉམ་ཉིད་ཡེ་ཤེས་ཀྱི་དོན། སྐུ་གསུམ་རྟག་པའི་ཚུལ། དེ་ལ་མ་ངེས་སྤང་པའོ། །དང་པོ་ནི། གང་དག་ནས། །བྱད་ཅི་ཡོད། །ཅེས་གསུངས་ཏེ། བཀའ་དང་བསྟན་བཅོས་ཀྱི་དགོངས་པ་མ་ལོན་པའི་གང་ཟག་གང་དག་གསུང་རབ་ལ་གོ་བ་ཉེས་པས་ལྟ་བ་ངན་པ་སེམས་ལ་ཞུགས་པ་རྣམས་ནི། སངས་རྒྱས་ཀྱི་ཡོན་ཏན་རྣམས་ཆོས་ཉིད་སྟོང་པ་
རྒྱུ་མེད་པ་དེ་ཁོ་ན་ལས་སྐྱེ་བར་འདོད་པའི་གྲུབ་མཐའ་དེ་ནི་ལུང་རིག་དང་མི་མཐུན་ཞིང་མདོ་རྒྱུད་ཀྱི་དགོངས་པ་མ་ཡིན་ཏེ། གུར་ལས། རྒྱུ་ལས་འབྲས་གཞན་མེད་པའི་ཕྱིར། །ཐབས་ནི་སྟོང་པ་ཉིད་མ་ཡིན། །ཞེས་དང་། ཀླུ་སྒྲུབ་ཞལ་ནས། དེ་བཞིན་ས་བོན་ཐམས་ཅད་ལ། །རྒྱུ་དང་འདྲ་བའི་འབྲས་བུ་འབྱུང་། །ས་བོན་མེད་པར་འབྲས་ཡོད་པར། །ཤེས་ལྡན་གང་གིས་བསྒྲུབ་པར་ནུས། །ཞེས་གསུངས་པ་དང་། ཡང་ན་ཁ་ཅིག་རང་ཉིད་ལ་སངས་རྒྱས་ཀྱི་ཡོན་ཏན་རྣམས་གདོད་ནས་ཡོད་པ་མིན་ལ་ཕྱི་རོལ་ཐོས་བསམ་གྱི་བག་ཆགས་གསར་དུ་བཞག་ནས། ཡང་ནས་ཡང་དུ་ཐོས་དོན་བསམ་ཞིང་དེ་དོན་སྒོམ་པ་སོགས་ལན་མང་དུ་བྱས་པས་རྒྱུ་རྐྱེན་དེ་དག་ཀུན་གྱིས་བག་ཆགས་དེ་འཕེལ་བ་དང་རྒྱས་པ་ལས་སངས་རྒྱས་ཀྱི་ཡོན་ཏན་རྣམས་སྔར་མེད་གསར་དུ་བསྐྱེད་པར་འདོད་པའི་རྟོག་པ་ནི་རིགས་པ་མ་ཡིན་ཏེ། སངས་རྒྱས་བཅོམ་ལྡན་འདས་རྣམས་ཀྱི་སྐུ་དང་ཡེ་ཤེས་ནི་འདུས་མ་བྱས་ཡིན་པའི་ཕྱིར། འདུས་བྱས་ཀྱི་རྒྱུ་རྐྱེན་གྱིས་
བསྐྱེད་པ་མ་ཡིན་ཏེ། འཁོར་ལོ་སྡོམ་པ་ལས། རང་བཞིན་ལྷུན་གྱིས་གྲུབ་པ་ལ། །རྒྱུ་དང་རྐྱེན་གྱིས་བསྐྱེད་པ་འཁྲུལ། ཞེས་དང་། བྱམས་མགོན་གྱི་ཞལ་ནས། དེ་བཞིན་ཉིད་འདི་ཐམས་ཅད་ལ། ཁྱད་པར་མེད་པར་དག་གྱུར་པ། །དེ་བཞིན་གཤེགས་ཉིད་དེ་ཡི་ཕྱིར། །འགྲོ་ཀུན་དེ་ཡི་སྙིང་པོ་ཅན། །ཞེས་སོ། །དེའང་ཕྱི་རོལ་མུ་སྟེགས་རྟག་པར་ལྟ་བ་དཔེར་ན་དབང་ཕྱུག་པ་རྣམས་ཕྱི་ནང་གི་དངོས་པོ་ཐམས་ཅད་དབང་ཕྱུག་གིས་བསྐྱེད་པར་འདོད་པ་སོགས་དང་། ཆད་པར་ལྟ་བ་ཕུར་བུ་བ་རྣམས་དངོས་པོ་ཐམས་ཅད་རྒྱུ་མེད་ངོ་བོ་ཉིད་ཀྱིས་བྱུང་བར་འདོད་པའི་ལྟ་བ་ངན་དེ་དང་ཁྱད་པར་ཅི་ཞིག་ཡོད་དེ་ཅུང་ཟད་ཀྱང་མེད་དོ། །ཞེས་སོ། །གཉིས་པ་དག་མ་དག་གི་ངེས་པ་ནི། འདུ་བྱེད་ནས། ཡེ་ཤེས་ཀྱི། །ཞེས་གསུངས་ཏེ། རྒྱལ་བ་རྣམས་ཀྱིས་སོ་སོར་རྟོག་པའི་ཡེ་ཤེས་ཀྱིས་འཇིག་རྟེན་ཀུན་ལ་ཉིན་མཚན་ལན་དྲུག་ཏུ་གཟིགས་ཤིང་སེམས་ཅན་རྣམས་ཀྱི་སེམས་རྒྱུད་ཐ་དད་པ་གཅིག་ཅར་དུ་མཁྱེན་པ་སོགས་མཁྱེན་
བརྩེའི་ཡེ་ཤེས་གཞན་དོན་དུ་འཕྲོ་བའམ་གཡོ་བ་འདུ་བྱེད་པ་ནི་སྐད་ཅིག་གིས་སྐྱེ་འགག་ལྟར་སྣང་བ་སྟེ། དེའང་མ་དག་པའི་འདུ་བྱེད་ཡིད་ཀྱི་གཡོ་བ་དག་དང་འབད་རྩོལ་ལ་མ་ལྟོས་པར་སྐྱེ་འགག་བྱེད་པའི་ཆ་ཙམ་ཞིག་མཚུངས་སོ། །གལ་ཏེ་སངས་རྒྱས་ཀྱི་ཡེ་ཤེས་ཀུན་རྫོབ་ཏུ་སྐྱེ་འགག་ལྟར་སྣང་བ་དེ་ལྟ་མ་ཡིན་ན་རྒྱལ་བའི་ཡེ་ཤེས་ཀྱིས་གདུལ་བྱ་མི་མཁྱེན་མི་གཟིགས་པའི་ཕྱིར་སྤྲུལ་སྐུ་རྒྱུན་མི་འཆད་དུ་འབྱུང་བ་མི་འཐད་པས་ལོངས་སྤྲུལ་གཉིས་ཀྱི་གཟུགས་སྐུའི་ཕྲིན་ལས་རྒྱུན་ཆད་པར་འགྱུར་བས་རིགས་པ་མ་ཡིན་ལ། འོན་ཀྱང་ཡེ་ཤེས་དེ་ལ་འདུ་བྱེད་ཀྱི་མིང་གིས་ནི་མི་བརྗོད་དེ། བློས་བཏགས་པའི་བདེན་གྲུབ་ཏུ་མེད་ཅིང་གཅིག་དང་ཐ་དད་ལས་འདས་པས། སོ་སོར་རྟོག་པའི་ཡེ་ཤེས་ཀྱི་མིང་གིས་བརྗོད་དེ། ནང་དོན་ལས། ཀུན་རྟོག་དག་པ་སོ་སོར་རྟོགས། །སྒོ་ལྔའི་རྣམ་ཤེས་བྱ་བ་གྲུབ། །ཅེས་དང་། སྐུ་གསུམ་ལ་འཇུག་པའི་མདོ་ལས། ཀུན་གཞི་གནས་གྱུར་པ་ནི་མེ་ལོང་ལྟ་བུའི་ཡེ་ཤེས་སོ། །ཀུན་གཞི་ལ་གནས་པའི་ཡིད་གནས་
གྱུར་པ་ནི་མཉམ་པ་ཉིད་ཀྱི་ཡེ་ཤེས་སོ། །ཡིད་གནས་པའི་གྱུར་པ་ན་སོ་སོར་རྟོག་པའི་ཡེ་ཤེས་སོ། །སྒོ་ལྔའི་ཤེས་པ་གནས་གྱུར་པ་ནི་བྱ་བ་གྲུབ་པའི་ཡེ་ཤེས་སོ། །ཞེས་གསུངས་སོ། །གསུམ་པ་བྱ་གྲུབ་ཡེ་ཤེས་ཀྱི་ངོ་བོ་བཤད་པ་ལ་གཉིས། སྒོ་ལྔ་ཡུལ་དང་ཡུལ་ཅན་གྱི་སྣང་ཚུལ། ཁྱད་པར་དང་གཏན་ཚིག་གོ །དང་པོ་ནི། འབྱུང་བ་ནས། ཅི་ཡང་མེད། །ཅེས་གསུངས་ཏེ། རྒྱུའི་གཟུགས་འབྱུང་བ་ཆེན་པོ་ས་ཆུ་མེ་རླུང་རྣམས་དང་སོགས་ཁོངས་ནས་འབྱུང་གྱུར་གཟུགས་སྒྲ་དྲི་རོ་རེག་བྱ་རྣམས་ཀྱི་རང་བཞིན་གང་ཡིན་པ་དེ་ནི། སེམས་ཅན་ཀྱི་དུས་སུ་སེམས་ཕྱི་རོལ་ཡུལ་དུ་སྣང་བས་མིང་དང་མཚན་མ་སོགས་ཀྱི་འཛིན་པ་དང་བཅས་པའི་དྲི་མ་གློ་བུར་བས་བསླད་པ་དེ་ཉིད་དག་ཅིང་གནས་གྱུར་པའི་ཚེ། སངས་རྒྱས་ཀྱི་སར་རང་རང་གི་ངོ་བོ་ཡེ་ཤེས་ཀྱི་རྩལ་ཆེན་རྫོགས་པའི་ནུས་ལྡན་ཏུ་གྱུར་པས། ཞིང་རྣམ་དག་ལ་དབང་འབྱོར་ཐོབ་ཅིང་ཅི་ལྟར་འདོད་པ་བཞིན་ཏུ་ལོངས་སྤྱོད་ཀུན་ཏུ་སྟོན་པར་བྱེད་པ་སྟེ། རྒྱན་ལས། དོན་
བཅས་འཛིན་པ་གཞན་འགྱུར་ན། །ཇི་ལྟར་འདོད་བཞིན་ལོངས་སྤྱོད་དག །བསྟན་ཕྱིར་ཞིང་ནི་དག་པ་ལ། །དབང་འབྱོར་དམ་པ་ཐོབ་པར་འགྱུར། །ཞེས་སོ། །དེས་ན་འཁྲུལ་པའི་སེམས་ཅན་གྱི་སྣང་ངོ་དང་མ་འཁྲུལ་བ་འཕགས་པའི་གཟིགས་ངོ་གཉིས་པོ་ལ་ཡང་། སྣང་བར་སྣང་ཙམ་ཞིག་ལ་ནི་ཁྱད་པར་ཅི་ཡང་མེད་དེ། དཔེར་ན་སྒྱུ་མའི་ལྟད་མོ་བ་དང་། སྒྱུ་མའི་མཁན་པོ་གཉིས་ཀ་ལའང་སྒྱུ་མའི་རྟ་གླང་བུད་མེད་སོགས་སྣང་བ་ཙམ་ཞིག་ལ་ནི་ཁྱད་མེད་པ་བཞིན་ནོ། །གཉིས་པ་ཁྱད་པར་དང་གཏན་ཚིག་ནི། གཉིས་འཛིན་ནས། ཇི་ལྟར་འཇུག །ཅེས་གསུངས་ཏེ། འོ་ན་སེམས་ཅན་དང་སངས་རྒྱས་གཉིས་པོ་སྣང་བ་ཙམ་ལ་ཁྱད་པར་མེད་ན་འཁྲུལ་མ་འཁྲུལ་ཅེས་དབྱེ་སྙམ་ན། སྣང་ཙམ་ལ་ཁྱད་མེད་ཀྱང་། འཛིན་སྟངས་ལ་ཁྱད་ཡོད་དེ། འཁྲུལ་པས་ནི། གཟུང་འཛིན་གཉིས་ཐ་དད་དུ་འཛིན་པ་ཡོད་ལ། མ་འཁྲུལ་བ་ལ་གཉིས་འཛིན་མེད་པས་ཁྱད་པར་ནི་དེ་ཡིན་ནོ། །དེ་ཡང་སེམས་ཅན་གྱིས་སྣང་བ་སེམས་ཀྱི་རང་སྣང་དབྱེར་མེད་
ཡིན་པར་མ་ཤེས་པས་བདེན་པར་བཟུང་ནས་བླང་དོར་བྱས་པས་འཆིང་བར་འགྱུར་ཏེ། དཔེར་ན་སྒྱུ་མའི་ལྟད་མོ་བས་སྒྱུ་མའི་རྟ་གླང་སོགས་ལ་བདེན་པར་བཟུང་བ་བཞིན་ཏེ། ཀླུ་སྒྲུབ་ཀྱི་ཞལ་ནས། སྒྱུ་མ་ཇི་ལྟ་ཇི་ལྟ་བར། །དེ་བཞིན་སེམས་ཅན་ཡུལ་ལ་སྤྱོད། །འགྲོ་བ་སྒྱུ་མའི་རང་བཞིན་ཡིན། །དེ་བཞིན་དུ་ནི་བརྟེན་ནས་བྱུང་། །ཞེས་སོ། །འཕགས་པ་རྣམས་ནི་ཡུལ་སྣང་སྟོང་དབྱེར་མེད་དུ་ཤེས་ཤིང་བདེན་པར་མི་འཛིན་པས་འཁྲུལ་པར་མི་འགྱུར་ཏེ། སྒྱུ་མའི་མཁན་པོས་རང་གིས་སྤྲུལ་པའི་རྟ་གླང་སོགས་ལ་བདེན་པར་མི་འཛིན་པ་བཞིན་ཏེ། རིག་པ་དྲུག་ཅུ་པ་ལས། དངོས་པོ་གཟུགས་བརྙན་ལྟ་བུར་ནི། །ཡེ་ཤེས་མིག་གིས་རབ་མཐོང་བ། །བདག་ཉིད་ཆེན་པོ་དེ་དག་ནི། །ཡུལ་གྱི་འདམ་ལ་མི་ཆགས་སོ། །ཞེས་སོ། །དེས་ན་སངས་རྒྱས་ཀྱིས་སྣང་བ་རྣམས་ཆུ་ཟླ་ལྟར་དངོས་པོ་དང་དངོས་མེད་གང་དུའང་མི་འཛིན་པར་སྣང་སྟོང་དབྱེར་མེད་དུ་གཟིགས་ནས་གཞན་ཡང་དེ་ལ་དགོད་པ་ཡིན་ཏེ། མདོ་ཏིང་ངེ་འཛིན་རྒྱལ་པོ་
ལས། རྒྱལ་བ་གང་དག་མྱ་ངན་འདས་པ་ཀུན། །ཐམས་ཅད་ཆུ་ཟླ་ལྟ་བུར་གཟིགས་པས་ན། །ཞེས་སོ། །གལ་ཏེ་གཉིས་འཛིན་ཡོད་མེད་ཀྱི་ཁྱད་པར་དེ་ལྟ་མ་ཡིན་པར་སྣོད་བཅུད་ཆུ་ཟླ་ལྟ་བུར་སངས་རྒྱས་ཀྱི་ཡེ་ཤེས་ཀྱི་ཡུལ་དུ་མི་སྣང་ན་རྒྱལ་བའི་གཟུགས་སྐུ་གཉིས་ཀྱི་ཕྲིན་ལས་ཡུལ་གང་ལ་ཚུལ་ཇི་ལྟར་འཇུག་སྟེ། ཕྲིན་ལས་ལ་འཇུག་པ་མེད་པའི་སྐྱོན་དུ་འགྱུར་བས་རིགས་པ་མ་ཡིན་ནོ། །བཞི་པ་བྱ་བ་གྲུབ་པའི་ཕྲིན་ལས་ལ་ལྔ། དཔེ་བཤད་པའི་དོན་འགོད་པ་དང་། གཞན་རྒྱུད་ཁོ་ནར་འདོད་པའི་སྐྱོན་བརྗོད་པ་དང་། སྣང་བ་ལ་འཁྲུལ་པས་མ་ཁྱབ་པའི་དཔེ་དགོད་ནས་མ་ངེས་པ་བརྗོད་པ་དང་། ཇི་སྙེད་པའི་ཡེ་ཤེས་འཁྲུལ་པ་མ་ཡིན་པའི་དཔེ་དོན་བཤད་པ་དང་། ཕྲིན་ལས་དང་འབྲེལ་བའི་དོན་ཏོ། །དང་པོ་ནི། ཡིད་བཞིན་ནས། བཤད་ཀྱིས། །ཞེས་གསུངས་ཏེ། དེའང་སངས་རྒྱས་རྣམས་ནི་རང་དོན་ཆོས་སྐུ་མངོན་དུ་མཛད་ཅིང་། གཞན་དོན་དུ་མཁྱེན་བརྩེ་དང་ནུས་པའི་ཡེ་ཤེས་ཚད་མེད་པ་མངའ་བས། ཤེས་བྱའི་དངོས་པོ་ཐམས་
ཅད་དང་སེམས་ཅན་མ་ལུས་པའི་སེམས་རྒྱུད་ཐམས་ཅད་དུས་ཅིག་ཆར་དུ་མཁྱེན་ཅིང་གང་ལ་གང་འདུལ་གྱི་སྐུ་གསུང་ཐུགས་ཀྱི་ཕྲིན་ལས་སྟོན་པ་ཡིན་ཏེ། མདོ་ལས་། དེ་བཞིན་གཤེགས་པ་ནི་སྐུ་ནམ་མཁའི་རང་བཞིན་ཀྱང་མི་འདོར་ལ། །སངས་རྒྱས་ཀྱི་ཞིང་ཐམས་ཅད་དུའང་ཀུན་ཏུ་སྟོན་ཏོ། །གསུང་བརྗོད་དུ་མེད་པའི་ཆོས་ཉིད་ཀྱང་མི་འདོར་ལ། །སྒྲ་རྣམ་པར་རིག་པ་ཇི་ལྟ་བ་བཞིན་དུ་ཆོས་སྟོན་ཏོ། །སེམས་དམིགས་པ་ཐམས་ཅད་དང་ཡང་བྲལ་ལ། སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་། བསམ་པ་ཡང་རབ་ཏུ་ཤེས་སོ། །ཞེས་གསུངས་ལ། དེ་ལྟར་འབྱུང་བའི་རྒྱུ་མཚན་ཀྱང་། རྒྱལ་བའི་བྱིན་རླབས་དང་སྨོན་ལམ་གྱི་ནུས་པ་དང་གདུལ་བྱ་ལས་དག་པ་གསུམ་ཚོགས་པ་ལས་ཏེ། རྒྱུད་བླ་མར། ཇི་ལྟར་བཻཌཱུའི་ས་གཞི་གཙང་མ་ལ། །ལྷ་དབང་ལུས་ཀྱི་གཟུགས་བརྙན་སྣང་བ་ལྟར། །དེ་བཞིན་འགྲོ་སེམས་ས་གཞི་གཙང་མ་ལ། །ཐུབ་པའི་དབང་པོའི་སྐུ་ཡི་གཟུགས་བརྙན་འཆར། །ཅེས་སོགས་གསུངས་སོ། །
དེས་ན་རྒྱུད་བླ་མ་དེ་བཞིན་གཤེགས་པའི་ཕྲིན་ལས་ཀྱི་དཔེར། བརྒྱ་བྱིན་རྔ་སྤྲིན་སོགས་དགུ་དང་། གཞན་དག་ལས་ཡིད་བཞིན་གྱི་ནོར་བུ་དང་སོགས་ཁོངས་ནས་དཔག་བསམ་གྱི་ཤིང་རྣམས་རྒྱལ་བའི་ཕྲིན་ལས་ཀྱི་དཔེར་བརྗོད་པ་ནི་ཡེ་ཤེས་མེད་པའི་དཔེ་མ་ཡིན་ཏེ། སངས་རྒྱས་ཉིད་ཡེ་ཤེས་དངོས་ཡིན་པས་སོ། །དེའང་སྡུད་པ་ལས། ཡེ་ཤེས་མེད་ན་ཡོན་ཏན་འཕེལ་མེད་བྱང་ཆུབ་མེད། །རྒྱ་མཚོ་ལྟ་བུའི་སངས་རྒྱས་ཆོས་ཀྱང་མེད་པར་འགྱུར། །ཞེས་སོ། །འོན་ཀྱང་མཚན་མར་འཛིན་པ་དང་། རྣམ་པར་རྟོག་པ་དང་འབད་རྩོལ་མེད་པའི་སྒོ་ནས་མཁྱེན་བརྩེའི་ཡེ་ཤེས་ཀྱི་ནུས་པ་སྟོན་པར་མཛད་ནས་སེམས་ཅན་གྱི་སྡུག་བསྔལ་དང་། ཉོན་མོངས་གཅོད་པ་ཡིན་ཏེ། རྒྱུད་བླ་མ་ལས། ནུས་པ་ཡེ་ཤེས་ཐུགས་རྗེ་ཡིས། །སྡུག་བསྔལ་ཉོན་མོངས་གཅོད་ཕྱིར་རོ། །ཞེས་སོ། །མདོར་ན་རྣམ་པར་རྟོག་པ་མེད་བཞིན་ཏུ་སངས་རྒྱས་ཀྱི་ཕྲིན་ལས་ལྷུན་གྲུབ་ཏུ་འབྱུང་བ་སྟེ། འཕགས་པ་ཀླུས། ཤིན་ཏུ་དྲི་མེད་ཆོས་སྐུ་ལ། །ཡེ་ཤེས་རྒྱ་མཚོ་
གནས་གྱུར་ནས། །སྣ་ཚོགས་ནོར་བུ་ཇི་བཞིན་ཏུ། །དེ་ལ་སེམས་ཅན་དོན་རྣམས་འབྱུང་། །ཞེས་གསུངས་པས། ཆོས་སྐུའི་ཕྲིན་ལས་གཟུགས་སྐུ་གཉིས་ནི་སངས་རྒྱས་ཀྱི་མཁྱེན་བརྩེའི་ནུས་པ་བསྟན་པ་སྟེ། ལས་དག་པའི་སྣང་བ་ལ་ཤར་བར་བཤད་པ་ཡིན་གྱིས་གདུལ་བྱའི་དག་སྣང་ཁོ་ནར་བཤད་པ་ནི་མ་ཡིན་ནོ། གཉིས་པ་གཞན་རྒྱུད་ཁོ་ནར་འདོད་པའི་སྐྱོན་བརྗོད་པ་ནི། གཞན་རྒྱུད་ནས། འཁྲུལ་པར་འགྱུར། །ཅེས་གསུངས་ཏེ། བཤད་མ་ཐག་པ་ལྟར་རྒྱལ་བའི་སྐུ་དང་ཡེ་ཤེས་ཇི་སྐད་བཤད་པ་རྣམས་ནི་གཞན་རྒྱུད་གདུལ་བྱའི་དག་སྣང་ཁོ་ན་བར་བཤད་པ་མིན་ནོ། །གལ་ཏེ་དེ་ལྟར་མ་ཡིན་པར། སངས་རྒྱས་ལ་ཡེ་ཤེས་མེད་ཅིང་གཟུགས་སྐུ་གཞན་རྒྱུད་གདུལ་བྱའི་དག་སྣང་ཁོ་ན་ཡིན་ན་སངས་རྒྱས་ཀྱི་ཡེ་ཤེས་དེ་གཞན་གདུལ་བྱའི་རྒྱུད་ཀྱི་ཡེ་ཤེས་སུ་འགྱུར་ཏེ། ཡེ་ཤེས་དེ་གཞན་རྒྱུད་ཁོ་ན་ཡིན་པའི་ཕྱིར་རོ། །དེ་ལྟར་འདོད་ན་ཡེ་ཤེས་དེ་ཉིད་འཁྲུལ་པར་འགྱུར་ཏེ། གཞན་རྒྱུད་འཁྲུལ་པ་དེ་ཡེ་ཤེས་ཡིན་པར་སྣང་
བའི་ཕྱིར་རོ། །གཞན་ཡང་ཡེ་ཤེས་གཞན་སྣང་ཡིན་ན་དེས་གཞན་རྗེས་སུ་འཛིན་མི་ནུས་ཏེ་དབུལ་པོས་བཟའ་བ་སྟེར་དུ་མེད་པ་བཞིན་རང་ལ་ཡེ་ཤེས་མེད་པའི་གཟུགས་སྐུ་དེ་མིང་ཙམ་ཟད་པས་སོ། །གསུམ་པ་སྣང་བ་ལ་འཁྲུལ་པས་མ་ཁྱབ་པའི་དཔེ་དགོད་ནས་མ་ངེས་པ་བརྗོད་པ་ནི། གལ་ཏེ་ནས། ཅན་ཏུ་འགྱུར། ཅེས་གསུངས་ཏེ། གལ་ཏེ་སངས་རྒྱས་ལ་སྣང་བཅས་ཀྱི་ཡེ་ཤེས་ཡོད་ཅིང་ཡེ་ཤེས་དེ་ལ་སེམས་ཅན་གྱི་འཁྲུལ་པ་དེ་སྣང་ན་སྐྱོན་ཡོད་དེ། ཡེ་ཤེས་དེས་རང་གི་སྣང་བ་འཛིན་པ་ཡིན་པས་འཛིན་རྟོག་ཅན་དུ་འགྱུར་ཞེས་འདོད་པ་ཡིན་ཅེ་ན། འོ་ན་མེ་ལོང་ནང་དུ་གཟུགས་བརྙན་སྣང་བ་ན་ཡང་སྣང་དུས་ཀྱི་མེ་ལོང་དེ་ཡང་འཛིན་པའི་རྣམ་རྟོག་ཅན་ཏུ་འགྱུར་ཏེ་གཟུགས་བརྙན་སྣང་བའི་ཕྱིར་རོ། །དེས་ན་སངས་རྒྱས་ཀྱི་ཇི་སྙེད་མཁྱེན་པའི་ཡེ་ཤེས་དེ་ལ་གདུལ་བྱ་སྣང་ཡང་འཛིན་རྟོག་ཅན་ཏུ་མི་འགྱུར་ཏེ། དཔེར་ན་མེ་ལོང་ནང་དུ་གཟུགས་སྣང་འཛིན་པ་དང་རྟོག་པ་མེད་པ་ལྟ་བུའོ། །བཞི་པ་ཇི་སྙེད་པའི་ཡེ་ཤེས་འཁྲུལ་པ་མ་ཡིན་
པའི་དཔེ་དོན་བཤད་པ་ནི། སེམས་ཅན་ནས། འགག་པ་མེད། །ཅེས་གསུངས་ཏེ། དེ་ལྟར་ན་སེམས་ཅན་གྱི་འཁྲུལ་པའི་སྣང་བར་ཇི་སྙེད་པ་རྣམས་ཀྱི་ཡེ་ཤེས་ཡུལ་དུ་ཇི་ལྟ་བ་བཞིན་དུ་སྣང་བར་གྱུར་ཀྱང་སྣང་བ་ལ་འཁྲུལ་པས་མ་ཁྱབ་སྟེ། སྣོད་བཅུད་ཆུ་ནང་ཟླ་བ་ལྟར་སྣང་སྟོང་དབྱེར་མེད་དུ་གཟིགས་ཤིང་བདེན་པ་དང་རྫུན་པ་གང་དུའང་མི་འཛིན་པས་ཡེ་ཤེས་དང་ཕྲིན་ལས་ལ་སེམས་ཅན་གྱི་བདེན་འཛིན་འཁྲུལ་པས་ནམ་ཡང་གོས་པ་མིན་ཏེ། རིག་པ་དྲུག་ཅུ་པ་ལས། གང་ལས་རྟེན་ན་དངོས་པོ་རྣམས། །ཆུ་ཡི་ཟླ་བ་ཁོ་ན་ལྟར། །ཡང་དག་མ་ཡིན་ལོག་མིན་པར། །ཤེས་པ་དེ་དག་ལྟས་མི་འཕྲོག །ཅེས་སོ། །དེ་ཡང་དཔེར་ན་ནམ་མཁའ་སྟོང་པ་ལ་འབྱུང་བ་ཆེན་པོ་རྣམས་སྐྱེ་འགག་ཏུ་སྣང་ཡང་ནམ་མཁའ་ཆགས་འཇིག་གིས་གོས་པ་མིན་ཞིང་སྐྱེ་བ་དང་འགག་པ་མེད་པ་དེ་བཞིན་དུ་ཡེ་ཤེས་ལ་འཁྲུལ་པས་གོས་པ་མེད་དེ། འཕགས་པ་ལྷས། དཔེར་ན་ཆུ་ཡི་ཟླ་བ་ལ། །ཆུ་ཡིས་མངོན་པར་གོས་པ་མེད། །སྣ་ཚོགས་གཟུགས་
བརྙན་འདྲ་བ་སྟེ། །མཐོང་བས་སྐྱོན་གྱིས་གོས་མི་འགྱུར། ཅེས་སོ། །ལྔ་པ་ཕྲིན་ལས་དང་འབྲེལ་བའི་དོན་བཤད་པ་ནི། རྒྱལ་བའི་ནས། ཞེས་བརྗོད། །ཅེས་གསུངས་ཏེ། བཤད་མ་ཐག་པ་དེ་ལྟར་རྒྱལ་བའི་མཁྱེན་པའི་ཡེ་ཤེས་དང་བརྩེ་བའི་ཐུགས་རྗེས་སེམས་ཅན་གྱི་ཁམས་ལ་ཅི་སྙེད་པའི་ཉོན་མོངས་པ་དང་ལྷན་ཅིག་ཏུ་ཞུགས་ཤིང་མཁྱེན་ཀྱང་ནམ་མཁའ་སྐྱེ་འཇིག་གིས་མ་གོས་པ་དེ་བཞིན་དུ་ཉོན་མོངས་པའི་ཚོགས་ཀྱིས་ཅུང་ཟད་ཀྱང་གོས་པ་མེད་དེ། དཔེར་ན་ཉི་མའི་འོད་ཟེར་ནི། རི་དང་ས་གཞི་ནགས་ཚལ་མི་གཙང་བའི་ལྗན་ལྗིན་ལ་སོགས་པར་ཉེ་རིང་མེད་པར་འཇུག་ཅིང་དེ་དག་སྣང་བ་དང་སྐེམ་པ་དང་སྲེག་པར་བྱེད་ཀྱང་། དེ་རྣམས་ཀྱི་ཉི་འོད་ལ་གོས་པ་མེད་པ་སྟེ། རྒྱན་ལས། ཇི་ལྟར་ཉི་མའི་འོད་ཟེར་དག །འཇུག་ལ་བདག་གིར་བྱ་བ་མེད། །དེ་བཞིན་སངས་རྒྱས་ཡེ་ཤེས་ཀྱང་། །འཇུག་ལ་བདག་གིར་མཛད་མི་མངའ། །ཞེས་སོ། །དེ་ནི་སངས་རྒྱས་ཀྱི་གཞན་དོན་གྱི་ཡེ་ཤེས་ཡིན་པའི་ཕྱིར་ཡེ་ཤེས་འདི་ལ་འཁྲུལ་པའི་མིང་
གིས་ནི་མི་བརྗོད་དེ། ཡེ་ཤེས་བཞིའི་ནང་ནས་བྱ་བ་གྲུབ་པའི་ཡེ་ཤེས་ཞེས་སུ་བརྗོད་པ་ཡིན་ནོ། །དེའང་མ་དག་པའི་གནས་སྐབས་སུ་དབང་པོ་ལྔའི་ཤེས་པ་ནི་ཡུལ་ལ་འཇུག་པ་ལས་འབད་རྩོལ་མི་དགོས་པར་འཇུག་པ་ལྟར། དེ་གནས་གྱུར་པ་ལས་གྱུར་པའི་བྱ་བ་གྲུབ་པའི་ཡེ་ཤེས་ཀྱང་འཇིག་རྟེན་གྱི་ཁམས་ཐམས་ཅད་དུ་སྤྲུལ་པ་རྣམ་པ་ཚོགས་པ་དཔག་ཏུ་མེད་པ་བསམ་གྱིས་མི་ཁྱབ་པ་འབད་རྩོལ་མི་དགོས་པས་ཞུགས་ཤིང་སེམས་ཅན་ཀུན་གྱི་དོན་སྒྲུབ་པ་སྟེ། མདོ་སྡེ་རྒྱན་ལས། བྱ་བ་གྲུབ་པའི་ཡེ་ཤེས་ནི། ཁམས་རྣམས་ཀུན་ཏུ་སྣ་ཚོགས་ཞིང་། །དཔག་མེད་བསམ་ཡས་སྤྲུལ་པ་ཡིས། །སེམས་ཅན་ཀུན་གྱི་དོན་སྒྲུབ་པའོ། །ཞེས་སོ། །གནས་འགྱུར་བའི་ཚུལ་ཇི་ལྟར་སྙམ་ན། དཔེར་ན་ནམ་མཁའ་རང་བཞིན་གྱིས་དག་པ་ཡིན་ཀྱང་། ཁུ་རླངས་ལ་སོགས་པའི་རྐྱེན་པའི་ཚེ། གནས་འགྱུར་བའམ་ནམ་མཁའ་དག་གོ་ཞེས་བརྗོད་པ་བཞིན་དུ་ཡིན་གྱིས། རང་གི་ངོ་བོ་ལས་གཞན་པའི་སྔར་མེད་གསར་དུ་ཐོབ་པར་བྱ་བ་མེད་དེ།
ཇི་སྐད་དུ། ཆུ་ཁམས་གསེར་དང་ནམ་མཁའ་བཞིན། །རང་བཞིན་གྱིས་ནི་དག་པར་འདོད། །ཅེས་གསུངས་པ་ལྟར་རོ། །ལྔ་པ་མཉམ་ཉིད་ཡེ་ཤེས་ཀྱི་དོན་བརྗོད་པ་ནི། སྒྲིབ་གསུམ་ནས། དགག་ཕྱིར་བརྗོད། །ཅེས་གསུངས་ཏེ། ཉོན་མོངས་ཤེས་བྱ་སྙོམས་འཇུག་གི་སྒྲིབ་པ་གསུམ་གཉེན་པོས་དག་པར་གྱུར་པ་ན། ཀུན་གཞི་ལ་གནས་པའི་ཉོན་མོངས་པ་ཅན་གྱི་ཡིད་ང་བདག་ཏུ་འཛིན་པ་དེའང་བདག་གཞན་ཐ་དད་དུ་འཛིན་པ་ལས་གྲོལ་ནས། མཉམ་པ་ཉིད་ཀྱི་ཡེ་ཤེས་སུ་གནས་འགྱུར་ཏེ། དེའང་སྲིད་པའི་མཐའ་ལ་མི་གནས་པར་མྱ་ངན་ལས་འདས་པ་ཞི་བ་ཆེན་པོའི་ངང་ལ་བཞུགས་པའང་ཡིན་ལ། ཞི་བའི་མཐའ་ཡང་མི་གནས་པར། བྱམས་པ་དང་སྙིང་རྗེ་ཆེན་པོ་དང་ལྡན་པས་སེམས་ཅན་རྣམས་ཀྱི་མོས་པ་ཇི་བཞིན་དུ། ལོངས་སྤྱོད་རྫོགས་སྐུ་སོགས་གཟུགས་ཀྱི་སྐུ་གདུལ་བྱ་སོ་སོ་དེ་ལ་སྣང་བ་སྟོན་པ་ཡིན་ཏེ། མདོ་སྡེ་རྒྱན་ལས། མི་གནས་ཞི་བར་ཞུགས་པ་ཡང་། །མཉམ་ཉིད་ཡེ་ཤེས་ཡིན་པར་བརྗོད། །དུས་རྣམས་ཀུན་ཏུ་
བྱམས་པ་དང་། །ཐུགས་རྗེ་ཆེན་པོ་དག་དང་ལྡན། །སེམས་ཅན་རྣམས་ལ་མོས་པ་བཞིན། །སངས་རྒྱས་སྐུ་ནི་ངེས་པར་སྟོན། ཅེས་སོ། །དེའང་ལ་ལའི་རྟོག་པ་ལ་རྫོགས་པའི་སངས་རྒྱས་ཐོབ་པའི་ཚེ་མར་མེ་ཤི་བ་ལྟར་ཤེས་པ་རྒྱུན་ཆད་ནས་ཞི་བ་གཅིག་པུའི་མཐའ་ལ་གནས་པར་འདོད་ན། །ཐེག་དམན་གྱི་ཉན་རང་དགྲ་བཅོམ་པ་ལྷག་མེད་ཀྱི་མྱང་འདས་སུ་ཞུགས་ནས་ཕྲིན་ལས་རྒྱུན་ཆད་པ་དང་མཚུངས་པར་འགྱུར་བས་ལོག་རྟོག་དེ་དགག་པའི་ཕྱིར་ཚུལ་འདྲ་གསལ་བར་བརྗོད་པ་ཡིན་ནོ། །དྲུག་པ་སྐུ་གསུམ་རྟག་པའི་ཚུལ་བཤད་པ་ལ་གསུམ་སྟེ། རྟག་པའི་ཚུལ་གསུམ་གྱི་དོན་དང་། མི་རྟག་པ་གསུམ་གྱི་དོན་དང་། དེ་ཡེ་ཤེས་དང་དྲི་མར་བཤད་པའོ། །དང་པོ་ནི། ཡེ་ཤེས་ནས། སྤྲུལ་སྐུ་ཡིན། །ཞེས་གསུངས་ཏེ། སངས་རྒྱས་ཀྱི་ཡེ་ཤེས་ནི་ནམ་དུའང་འགྱུར་བ་མི་མངའ་བའི་ཕྱིར་རྟག་པ་གསུམ་ཡིན་ཏེ། དེའང་རང་བཞིན་གྱི་རྟག་པ་ནི་དབྱིངས་དང་ཡེ་ཤེས་དབྱེར་མེད་པའི་རང་དོན་ཆོས་ཀྱི་དབྱིངས་ཡིན་ཏེ། ཆོས་ཀྱི་
སྐུ་ལ་འགྱུར་བ་མེད་པའི་ཕྱིར་རོ། །རྒྱུན་གྱི་རྟག་པ་ནི་ལོངས་སྤྱོད་རྫོགས་པའི་སྐུ་སྟེ་ངེས་པ་ལྔ་དང་ལྡན་པའི་ཕྱིར་རོ། །རྒྱུན་མི་འཆད་པར་རྟག་པ་ནི་སྤྲུལ་པའི་སྐུ་ཡིན་ཏེ། འཁོར་བ་མ་སྟོང་གི་བར་དུ་མཛད་པ་ཕྲིན་ལས་རྒྱུན་མི་འཆད་པའི་ཕྱིར་རོ། །དེ་ཡང་མདོ་སྡེ་རྒྱན་ལས། རང་བཞིན་དང་ནི་རྒྱུན་མི་འཆད། །རྒྱུན་གྱིས་དེ་དག་རྟག་པ་ཉིད། །ཅེས་སོ། །གཉིས་པ་མི་རྟག་པ་གསུམ་གྱི་དོན་ནི། དེ་ལ་ནས། རྟག་པ་མིན། །ཅེས་གསུངས་ཏེ། ཇི་སྐད་བཤད་པའི་ཡེ་ཤེས་དེ་གསུམ་ལ་སྒྲིབ་བྱེད་མི་རྟག་པ་གསུམ་ཡོད་དེ། དེ་ཡང་གཟུགས་སོགས་ཕུང་པོ་ལྔ་པོ་དེ་རང་བཞིན་གྱིས་དོན་དམ་པ་སྟོང་པ་ཉིད་ཀྱི་ཡེ་ཤེས་ཡིན་པར་མ་ཤེས་ནས་ཕྱིས་བློས་བཟོ་བཅོས་བྱས་པའི་སྟོང་པ་དེ་ཉི་ཚེ་བའི་སྟོང་ཉིད་ཡིན་པའི་ཕྱིར་རྟག་པ་མིན་ནོ། །ཉོན་མོངས་པ་ཅན་གྱི་ཡིད་དང་དེས་བསྐྱེད་པའི་གཡོ་བའི་རྟོག་ཡིད་ནི་འཁྲུལ་པ་ཡིན་པའི་ཕྱིར་རྟག་པ་མིན་ཅིང་། རྣམ་ཤེས་ཚོགས་དྲུག་གི་ཤེས་པ་རྐྱེན་བཞིས་འདུས་བྱས་པ་ཡིན་པའི་ཕྱིར་རྟག་པ་མིན་ནོ། །
གསུམ་པ་དེ་ཡེ་ཤེས་དྲི་མར་བཤད་པ་ནི། འོན་ཀྱང་ནས། ཡེ་ཤེས་ཡིན། །ཅེས་གསུངས་ཏེ། འོན་ཀྱང་བཤད་མ་ཐག་པའི་མི་རྟག་པ་གསུམ་པོ་དེའི་སྦུབས་ན་ཡེ་ཤེས་རྟག་པ་གསུམ་རང་ཆས་སུ་ཡོད་དེ་སེམས་ཅན་གྱི་གནས་སྐབས་ན་དྲི་མ་དང་ཡེ་ཤེས་འདྲེས་པའི་ཕྱིར་རོ། །དེ་ལ་མི་རྟག་པ་གསུམ་པོ་དེ་ནི་འཁྲུལ་པ་གློ་བུར་བའི་དྲི་མ་སྦྱང་བྱ་ཡིན་ཏེ། །རྟག་པ་གསུམ་པོ་དེ་ནི་གནས་ལུགས་ཡོངས་སུ་གྲུབ་པའི་ཡེ་ཤེས་སྦྱངས་བའི་འབྲས་བུ་ཡིན་ནོ། །བདུན་པ་མ་ངེས་བ་སྤོང་བ་ལ་དྲུག །མུ་སྟེགས་པའི་བདག་དང་མི་མཐུན་པའི་དོན། ཉན་རང་གི་ཞི་བ་དང་མི་མཚུངས་པའི་དོན། སེམས་ཅན་དང་མི་མཚུངས་པའི་དོན། ཕྱིར་མི་ལྡོག་པའི་དོན། དྲི་མ་གཏན་མི་ལྡང་པའི་དོན། ཐམས་ཅད་ཀྱི་དོན་བསྡུ་བའོ། །དང་པོ་ནི། མུ་སྟེགས་ནས། མ་བཏགས་ཕྱིར། །ཅེས་གསུངས་ཏེ། དེ་ལྟར་ཆོས་ཀྱི་དབྱིངས་རང་བཞིན་གྱིས་འོད་གསལ་བ་སངས་རྒྱས་ཀྱི་སྙིང་པོ་དེ་སྐུ་གསུམ་གྱི་རང་བཞིན་དུ་འགྱུར་བ་མེད་ཅིང་རྟག་པར་ཡོད་ན། མུ་
སྟེགས་པའི་བདག་དང་མཚུངས་པར་འགྱུར་རོ་ཞེ་ན་མུ་སྟེགས་པ་རྣམས་ཀྱིས་བཏགས་པའི་གང་ཟག་གི་བདག་འགྱུར་བ་མེད་པས་རྟག་པ། དུ་མ་མ་ཡིན་པས་གཅིག་པུ་རྒྱུ་རྐྱེན་ལ་མི་ལྟོས་པས་རང་དབང་ཅན་དུ་བློས་བརྟགས་པ་ནི། ཕུང་པོ་ལྔ་བདག་མེད་པ་ལ་བདག་ཏུ་བཏགས་པའི་འཁྲུལ་པ་དང་མཚུངས་པ་མིན་ཏེ། སེམས་ཉིད་ཆོས་ཀྱི་སྐུ་སྐྱེ་འགག་སོགས་སྤྲོས་པའི་དྲྭ་བ་ཐམས་ཅད་ལས་གྲོལ་བར་འདུས་མ་བྱས་ཤིང་ལྷུན་གྱིས་གྲུབ་པ་ནམ་མཁའ་ལྟ་བུར་ཀུན་ལ་ཁྱབ་པའི་རང་བཞིན་ཅན་ཡིན་པས་དོན་དམ་པར་རྟག་ཅེས་གསུངས་པའི་ཕྱིར་རོ། །དེས་ན་མུ་སྟེགས་པས་ནི་བློས་བྱས་ཀྱི་ཡིད་ཀྱིས་བཏགས་པའི་སྒྲོ་བཏགས་ཡིན་པ་དང་། དེ་བཞིན་གཤེགས་པ་ནི་དོན་དམ་པ་སྟོང་པ་ཉིད་ཀྱི་ཡེ་ཤེས་གཅིག་དང་ཐ་དད་ལས་གྲོལ་བ་བདག་མེད་པའི་རང་བཞིན་ཅན་ཡིན་པས་བདག་དང་བདག་གིར་སྒྲོ་བཏགས་བྱས་པ་མ་ཡིན་ཞིང་རྟོག་པས་མ་བརྟགས་པའི་ཕྱིར་མུ་སྟེགས་པས་བརྟགས་པའི་བདག་དང་མི་མཚུངས་ཏེ། འཕགས་པ་ཀླུ་སྒྲུབ་
ཀྱིས། ཆོས་དབྱིངས་གང་ཕྱིར་བདག་མ་ཡིན། །སྐྱེས་པ་མ་ཡིན་བུད་མེད་མིན། །གཟུང་དང་འཛིན་པ་རྣམ་གྲོལ་བ། །ཇི་ལྟར་བདག་ཅེས་རྟོག་པར་བྱ། །ཞེས་སོ། །གཉིས་པ་ཉན་རང་གི་ཞི་བ་དང་མི་མཚུངས་པའི་དོན་ནོ། །ཉན་རང་ནས། ཀུན་རྟོག་ཕྱིར། །ཅེས་གསུངས་ཏེ། དེ་ལ་ཉན་རང་གི་ཞི་བ་ནི། སངས་རྒྱས་ཀྱིས་མ་བསྐུལ་བར་དུ་ཞི་བ་གཅིག་པུའི་ངང་ལ་གནས་པར་གསུངས་ཏེ། །ཀླུ་སྒྲུབ་ཀྱི་ཞལ་སྔ་ནས། ཅི་སྲིད་སངས་རྒྱས་ཀྱིས་མ་བསྐུལ། །དེ་སྲིད་ཡེ་ཤེས་ལུས་དངོས་ཅན། །ཏིང་འཛིན་མྱོང་པས་བརྒྱལ་གྱུར་པ། །ཉན་ཐོས་དེ་དག་གནས་པར་འགྱུར། ཅེས་གསུངས་པ་བཞིན་ཡིན་ལ། དེ་ལྟར་མཐའ་གཉིས་ལ་མི་གནས་པའི་དབྱིངས་སུ་བཞུགས་པའི་སངས་རྒྱས་རྣམས་དང་། ཉན་རང་ཞི་བ་ཕྱོགས་གཅིག་པའི་ངང་ལ་བཞུགས་པ་དང་མཚུངས་པ་མིན་ཏེ། དམིགས་པ་མེད་པའི་སྙིང་རྗེའི་དབང་ལས་མཐའ་ཡས་པའི་གདུལ་བྱ་གང་ལ་གང་འདུལ་བའི་ལོངས་སྤྲུལ་གཉིས་ཀྱི་གཟུགས་སྐུའི་ཡོན་ཏན་རྣམ་པ་མང་པོ་ཀུན་
སྟོན་པའི་ཕྱིར་རོ། །དེ་སྐད་དུའང་རྣལ་འབྱོར་སྤྱོད་པའི་གཞུང་འབུམ་པ་ལས། ཐབས་ལ་མཁས་པས་ཞིར་གནས་མིན། །ཤེས་རབ་ཀྱིས་ནི་འཁོར་བར་མིན། །མཐའ་གཉིས་རྣམ་པར་སྤངས་ནས་ཀྱང་། །རྟོག་པ་མེད་པར་འགྲོ་དོན་སྤྱོད། །ཅེས་འབྱུང་བ་ལྟར་རོ། །གསུམ་པ་སེམས་ཅན་དང་མི་མཚུངས་པའི་དོན་ནི། སེམས་ཅན་ནས། མ་བསྐྱེད་ཕྱིར། །ཅེས་གསུངས་ཏེ། དེ་ལྟ་བུའི་གཟུགས་སྐུ་ཞེས་བྱ་བ་དེ་སེམས་ཅན་གྱི་ལུས་དང་མཚུངས་སམ་སྙམ་ན། སེམས་ཅན་གྱི་ལུས་ཕུང་ཁམས་སྐྱེ་མཆེད་ཀྱི་བདག་ཉིད་ལས་དང་ཉོན་མོངས་པས་འཕངས་པའི་འདུས་བྱས་དེ་དང་མཚུངས་པ་མིན་ཏེ། གཟུགས་སྐུ་གཉིས་ཟག་བཅས་ལས་དང་ཉོན་མོངས་པའི་རྐྱེན་གྱིས་མ་བསྐྱེད་པའི་ཕྱིར། དེར་མ་ཟད་ཤིན་ཏུ་རྣམ་དག་སངས་རྒྱས་ཀྱི་གནས་སྐབས་སུ་ཟག་མེད་ཀྱི་ལས་ཀྱིས་བསྐྱེད་པའི་ཡིད་ཀྱི་རང་བཞིན་གྱི་ལུས་ཀྱི་སྐྱེ་བའང་མེད་ན། ཕུང་པོ་མངོན་པར་གྲུབ་པའི་སྐྱེ་བ་ཅི་སྨོས། རྣམ་འགྱུར་སྣ་ཚོགས་པའི་རྒ་བའང་མེད་ན་འདུ་བྱེད་ཡོངས་སུ་སྨིན་
པའི་རྒ་བ་ལྟ་ཅི་སྨོས། །བག་ཆགས་ཕྲ་མོའི་ནད་ཀྱང་མེད་ན། ཉོན་མོངས་པའི་ནད་ལྟ་ཅི་སྨོས། བསམ་གྱིས་མི་ཁྱབ་པར་བསྒྱུར་བའི་འཆི་འཕོ་བའང་མེད་ན། ཚེ་ཡོངས་སུ་གཏུགས་པའི་འཆི་འཕོ་བ་ལྟ་ཅི་སྨོས་ཏེ། རྒྱུད་བླ་མར། དེ་ནི་ཡིད་ཀྱི་རང་བཞིན་གྱི། །ལུས་ཀྱིས་སྐྱེ་མེད་རྟག་པའི་ཕྱིར། །བསམ་མི་ཁྱབ་བསྒྱུར་འཆི་འཕོ་ཡིས། །དེ་ནི་མི་འཆི་བརྟན་པའི་ཕྱིར། །བག་ཆགས་ཕྲ་མོའི་ནད་རྣམས་ཀྱིས། །གནོད་མེད་ཞི་བ་ཉིད་ཀྱི་ཕྱིར། །ཟག་མེད་མངོན་པར་འདུ་བྱེད་ཀྱིས། །གཡུང་དྲུང་ཕྱིར་ན་རྒ་བ་མེད། །ཅེས་སོ། །བཞི་པ་ཕྱིར་མི་ལྡོག་པའི་དོན་ནི། ཕྱིར་ལ་ནས། མངོན་གྱུར་ཕྱིར། ཞེས་གསུངས་ཏེ། སྔར་དྲི་བཅས་ཀྱི་སངས་རྒྱས་དེ། བར་དུ་ལམ་གྱི་དྲི་མ་བསལ་ཡང་སླར་འཁོར་བར་ལྡོག་པར་མི་འགྱུར་རམ་སྙམ་ན། རྟོགས་པས་གནས་ལུགས་མངོན་ཏུ་གྱུར་པའི་སངས་རྒྱས་དེ་ཕྱིར་ལ་ལྡོག་ཅིང་སླར་ཉོན་མོངས་པར་མི་འགྱུར་ཏེ། སོ་སོ་རང་རིག་པའི་ཡེ་ཤེས་ཀྱིས་ཡེ་ནས་གནས་པའི་སེམས་ཉིད་གནས་ལུགས་ཅི་
ལྟ་བུ་ཡིན་པ་ལ་ཡིན་ལུགས་བཞིན་དུ་མངོན་སུམ་དུ་གྱུར་པའི་ཕྱིར་ཏེ། དཔལ་ཆོས་ཀྱི་གྲགས་པས། འཚེ་བ་མེད་དང་ཡང་དག་དོན། །ངོ་བོ་ཉིད་ལས་ཕྱིན་ལོག་གིས། །འབད་དུ་ཟིན་ཀྱང་མི་ལྡོག་སྟེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་སོ། །ལྔ་པ་དྲི་མ་གཏན་མི་ལྡང་བའི་དོན་ནི། དྲི་མ་ནས། བྲལ་བའི་ཕྱིར། །ཅེས་གསུངས་ཏེ། ལམ་མཐར་ཕྱིན་ཀྱང་། ད་དུང་ཕྱིན་ཅི་ལོག་གི་བློའི་དྲི་མ་ལྡང་བར་འགྱུར་རམ་སྙམ་ན། མངོན་ཏུ་གྱུར་ནས་དྲི་མ་སླར་ལྡང་བ་གཏན་ནས་མེད་དེ། དྲི་མ་ནི་གཟུང་འཛིན་ཐ་དད་དུ་འཛིན་པའི་ཀུན་རྟོག་འཁྲུལ་པ་ཡིན་ལ་དེའི་རྒྱུ་ནི་མ་རིག་པ་ཡིན་པས། དེ་དང་བྲལ་བའི་ཕྱིར་ཏེ། ཆོས་ཀྱི་གྲགས་པས། ལྟ་བའི་ས་བོན་སྤངས་པའི་ཕྱིར། །སླར་མི་ལྡོག་པ་ཉིད་ཡིན་ནོ། །ཞེས་སོ། །དྲུག་པ་དོན་བསྡུ་བ་ནི། དེ་ཕྱིར་ནས། མ་ཤེས་སོ། །ཞེས་གསུངས་ཏེ། རྒྱུ་མཚན་དེ་དག་གི་ཕྱིར་སེམས་ཉིད་རང་བཞིན་གྱིས་འོད་གསལ་བ་ཡོན་ཏན་དྲུག་ཅུ་རྩ་བཞི་དང་བཅས་པའི་སངས་རྒྱས་འདི། ད་ལྟར་གཞི་སེམས་ཅན་གྱི་དུས་སུ་
ཚང་བར་ཡོད་ཀྱང་གཟུང་འཛིན་གྱི་དྲི་མས་བསྒྲིབས་ནས་མ་ཤེས་སོ། །དེའང་དཔེར་ན་མི་དབུལ་པོའི་ཁྱིམ་དུ་གཏེར་ཡོད་པ་མ་ཤེས་ནས་དབུལ་ཕོངས་ཀྱིས་སྡུག་བསྔལ་བ་ལྟ་བུ་སྟེ། བྱམས་པ་མགོན་པོའི་ཞལ་སྔ་ནས། ཇི་ལྟར་མི་དབུལ་ཁྱིམ་ནང་ས་འོག་ན། །མི་ཟད་པ་ཡི་གཏེར་ནི་ཡོད་གྱུར་ལ། །མི་དེས་དེ་མ་ཤེས་ཤིང་གཏེར་དེ་ཡང་། །དེ་ལ་ང་འདིར་ཡོད་ཅེས་མི་སྨྲ་ལྟར། །དེ་བཞིན་ཡིད་ཀྱི་ནང་ཆུད་རིན་ཆེན་གཏེར། །དྲི་མེད་བཞག་དང་བསལ་མེད་ཆོས་ཉིད་ཀྱང་། །མ་རྟོགས་པས་ན་དབུལ་བའི་སྡུག་བསྔལ་ནི། །རྣམ་མང་རྒྱུན་དུ་སྐྱེ་དགུ་འདིས་མྱོང་ངོ་། །ཞེས་སོ། །ལྔ་པ་ལུང་གིས་ངོ་བོ་ཉིད་བཤད་པ་ལ་ངེས་པ་བསྐྱེད་པ་ལ་བཞི། མདོ་སྡེ་རྒྱན་གྱི་ལུང་། འཕགས་པ་ཀླུ་སྒྲུབ་ཀྱི་ཐེག་པ་ཆེན་པོ་ཉི་ཤུ་པའི་ལུང་། རྒྱུད་བླ་མའི་ལུང་། མདོ་རྒྱུད་ལས་གསུངས་པའི་དོན་བསྡུས་པའོ། །དང་པོ་ནི། གང་ཚེ་ནས། མི་བརྗོད་དོ། །ཞེས་གསུངས་ཏེ། གང་གི་ཚེ་སྤྱིར་ཐོས་བསམ་སྒོམ་པ་ལས་བྱུང་བའི་ཤེས་རབ་དང་། ཁྱད་པར་བླ་
མའི་བྱིན་རླབས་དང་སློབ་མའི་མོས་གུས་ཀྱི་རྟེན་འབྲེལ་ཚོགས་པས་སེམས་ཉིད་བདེ་གཤེགས་སྙིང་པོའི་གནས་ལུགས་མངོན་སུམ་དུ་རྟོགས་པ་དེའི་ཚེ། དཔེ་ཇི་ལྟ་ན། ལྕགས་བསྲེགས་པ་ལ་ཚ་བ་ཞི་བ་ནི་གདུང་བ་མེད་པ་ཡིན་པ་དང་། མིག་ལ་རབ་རིབ་ཟུག་གཟིར་ཞི་བས་རབ་རིབ་མེད་པ་ཡིན་པས། །ཚ་བ་དང་རབ་རིབ་ཀྱི་དངོས་པོ་ཡོད་པ་ཡང་མ་ཡིན་ལ། དེ་གཉིས་ཞི་བས་་མཚན་ཉིད་ལྕགས་དང་མིག་གསལ་པོ་ཡོད་པས་དེ་ནི་མེད་པའང་མ་ཡིན་པ་ལྟར། མ་རིག་པ་སངས་ཤིང་ཡེ་ཤེས་རྒྱས་པ་དེའི་དུས་ན་སེམས་རྣམ་ཤེས་ཚོགས་བརྒྱད་སངས་པ་དང་ཡེ་ཤེས་ལྔ་རྒྱས་པ་ལ། ཀུན་རྫོབ་འཁྲུལ་པའི་དྲི་མ་ཚ་བ་དང་རབ་རིབ་བཞིན་ཏུ་ཡོད་པར་མི་བརྗོད་ཅིང་། ལྕགས་དང་མིག་དྭངས་པ་བཞིན་ཏུ་མེད་པར་མི་བརྗོད་དོ། །གཉིས་པ་ཐེག་ཆེན་ཉི་ཤུ་པའི་ལུང་ནི། དམ་པའི་ནས། སྤྱོད་ཡུལ་ཡིན། །ཅེས་གསུངས་ཏེ། དམ་པ་སྟེ་ངེས་པའི་དོན་དུ་ན་ཆོས་ཐམས་ཅད་གདོད་ནས་སྐྱེ་བ་མེད་པའི་ཕྱིར། དོན་དམ་དེ་ཉིད་དུ་ནི་འཁོར་བ་ལས་གྲོལ་
བར་བྱ་བའང་མེད་དེ། ནམ་མཁའ་སྐྱེ་འགག་མེད་ཅིང་འགྱུར་བ་མེད་པ་བཞིན་ཏུ་སངས་རྒྱས་ནི་གནས་སྐབས་ཐམས་ཅད་དུ་འགྱུར་བ་མེད་པ་དེ་བཞིན་ཏེ། དེས་ན་རྟོགས་མ་རྟོགས་ཙམ་ལས་སེམས་ཅན་དང་ནི་སངས་རྒྱས་གཉིས་ཀའི་མཚན་ཉིད་གཅིག་ཅིང་ངོ་བོ་དབྱེར་མེད་དོ། །ཚུ་རོལ་འཁོར་བ་ཕ་རོལ་མྱང་འདས་གཉིས་ཀ་སྐྱེ་བ་མེད་པས། རང་བཞིན་མྱ་ངན་ལས་འདས་པའང་མེད་དོ། །རྒྱུ་མཚན་དེའི་ཕྱིར་དུ་འདུས་བྱས་ཀྱི་ཆོས་ཐམས་ཅད་མངོན་པར་སྟོང་ཞིང་བདག་མེད་པ་སྟེ། དེ་བས་ན་བསམ་གྱིས་མི་ཁྱབ་པའི་གནས་འདི་ལྟ་བུ་ནི་ཀུན་མཁྱེན་སངས་རྒྱས་ཀྱི་ཡེ་ཤེས་འབའ་ཞིག་གི་སྤྱོད་ཡུལ་ཡིན་གྱི་དེ་ལས་གཞན་པ་དག་གིས་བསམ་གྱིས་མི་ཁྱབ་བོ། གསུམ་པ་རྒྱུད་བླ་མའི་ལུང་ནི། ཕྲ་ཕྱིར་ནས། ཡུལ་མ་ཡིན། ཅེས་གསུངས་ཏེ། ཆོས་ཐམས་ཅད་གྱི་ཆོས་ཉིད་སངས་རྒྱས་སྙིང་པོ་འདི་ཉིད་དཔག་དཀའ་ཞིང་ཤིན་ཏུ་ཕྲ་བས་སྨྲ་བསམ་བརྗོད་པའི་ཡུལ་ལས་འདས་པའི་ཕྱིར་ཐོས་པའི་ཤེས་རབ་ཀྱི་ཡུལ་མ་
ཡིན་ལ། དོན་དམ་བདེན་པ་ཡིན་པའི་ཕྱིར་རྟོག་དཔྱོད་ཀྱིས་བསམ་པའི་ཤེས་རབ་ཀྱི་ཡུལ་ཡང་མིན་ཏེ་ཀུན་རྫོབ་ཡིན་པའི་ཕྱིར་དེས་དོན་དམ་ཇི་བཞིན་གཞལ་མི་ནུས་ལ། ཆོས་ཐམས་ཅད་ཀྱི་དེ་ཁོ་ན་ཉིད་གཞལ་བར་དཀའ་བའི་གཏིང་ཟབ་པས་མཚན་མའི་སྤྱོད་ཡུལ་ལས་འདས་པའི་ཕྱིར་འཇིག་རྟེན་པའི་སྒོམ་པ་བསམ་གཏན་དང་གཟུགས་མེད་བཞི་ལ་སོགས་པའི་ཁོངས་ནས་ཉན་རང་གི་དྲན་ཉི་དང་། རྟེན་འབྲེལ་འབྱུང་ལྡོག །རྣམ་ཐར་བརྒྱད། སྙོམས་འཇུག་དག་གི་ཡུལ་དུ་བྱས་ནས་ཀྱང་རྟོགས་པར་ནུས་པ་མ་ཡིན་ནོ། །བཞི་པ་མདོ་རྒྱུད་ལས་གསུངས་པའི་དོན་བསྡུས་པ་ནི། རང་རིག་ནས། །རྒྱ་མཚོར་འཁྱམས། །ཞེས་གསུངས་ཏེ། འོ་ན་སེམས་ཉིད་འོད་གསལ་བདེ་གཤེགས་སྙིང་པོ་དེ་དག་གང་གིས་ཀྱང་རྟོགས་པའི་ཡུལ་མིན་ན། རྟོགས་པའི་ཐབས་ཅི་ཞིག་ཅེ་ན། རྣལ་འབྱོར་པ་རྣམས་ཀྱི་སོ་སོར་རང་རིག་པའི་ཡེ་ཤེས་ཀྱི་སྤྱོད་ཡུལ་དུ་གྱུར་པ་སྟེ། དེ་མངོན་ཏུ་བྱེད་པའི་ཐབས་ནི་རང་བྱུང་གཤིས་ཀྱི་སྙིང་པོ་སྔོོན་གོམས་དགེ་སྟོབས་
ཀྱིས་སད་པའི་ཆོས་དབྱིངས་ཉིད་རྣམ་པ་ཀུན་ལྡན་གྱི་བླ་མར་སྣང་བ་ལ་ཡིད་ཆེས་ངེས་ཤེས་སྐྱེས་པའི་དབང་གིས་བཟོད་དུ་མེད་པའི་གདུང་ཤུགས་དང་། དེས་ཆོས་ཐམས་ཅད་ལ་རྒྱས་ཐེབས་པའི་སྣང་སྲིད་བླ་མར་ཤར་པའི་ཉམས་མྱོང་བརྗོད་བྲལ་གྱིས་དུས་འདའ་བའི་དད་པས་དོན་དམ་པ་ལ་སྒྲིབ་བྱེད་ཐམས་ཅད་རང་སངས་སུ་གྱུར་ནས་མཐར་ཐུག་པའི་ཡེ་ཤེས་མངོན་སུམ་དུ་རྟོགས་པའི་ཡེ་ཤེས་སྐྱེད་པར་བྱེད་དེ། རྒྱལ་བ་བྱམས་པས། རང་བྱུང་རྣམས་ཀྱི་དོན་དམ་དེ། །དད་པ་ཉིད་ཀྱིས་རྟོགས་བྱ་ཡིན། །ཅེས་གསུངས་སོ། །གནས་ལུགས་རྟོགས་རིམ་བཞིན་དེ་ལྟར་མ་རྟོགས་པའི་ཁམས་གསུམ་པོ་དག་ལ་བཟོད་དུ་མེད་པའི་སྙིང་རྗེ་ཆེན་པོ་ཤུགས་ཀྱིས་སྐྱེ་ཞིང་། དེར་མ་ཟད་ཆེད་དུ་སྒོམ་པའང་རྒྱལ་སྲས་རྣམས་ཀྱི་གཞུང་ལམ་ཡིན་པའི་ཕྱིར། །དེ་ལྟར་རྗེས་འཇུག་རྣམས་ལ་ཐུགས་བརྩེ་པས་གདམས་པའི་ཕྱིར། རྒྱལ་བ་ཉིད་ཀྱིས་ཀྱང་གཞུང་གི་མཇུག་བསྔོ་བའི་དོན་འདུས་པར་གཞུང་ཟོར་ཡང་པའི་དགོས་པས་འདིར་སྟབས་
གཅིག་ཏུ་གསུངས་པ། ཀྱེ་མ་གནས་ལུགས་ཟབ་མོའི་ཚུལ་འདི་མ་རྟོགས་པས་སྤངས་བླང་གི་དོན་ལ་ཤེས་རབ་མ་སྐྱེས་པའི་བྱིས་པ་དག་ཕྱིན་ཅི་ལོག་ལ་སྤྱོད་པས་འཁོར་བའི་རྒྱ་མཚོར་འཁྱམས་པ་སྙིང་རྗེ་བའི་གནས་ཡིན་ནོ། །སྤྱི་དོན་ལྔ་པ་རྙེད་ཚུལ་གྱིས་མཇུག་བསྡུ་བ་ལ་གཉིས། རྙེད་ཚུལ་དངོས། སྨོན་ལམ་མོ། །དང་པོ་ནི། ཐུབ་པ་ནས། རྡོ་རྗེས་བྲིས། །ཞེས་གསུངས་ཏེ། བདེ་གཤེགས་སྙིང་པོའི་དོན་འདི་བདག་ཅག་གི་འདྲེན་པ་ཐུབ་པ་ཆེན་པོའི་གསུང་དྲི་མ་མེད་པ་དང་། མཁྱེན་རབ་ཀྱི་བདག་ཉིད་འཇམ་དཔལ་དབྱངས་དང་། སེམས་ཅན་ཐམས་ཅད་ལ་བདེ་ལེགས་འབྱུང་བའི་གནས་རྒྱལ་ཚབ་བྱམས་པ་དང་། ཐུགས་རྗེས་འཁོར་བ་དོང་ནས་སྤྲུགས་པའི་འཕགས་མཆོག་སྤྱན་རས་གཟིགས་དབང་ཕྱུག་སྟེ་དེ་དག་གི་རྣམ་པར་ཐར་པ་ལ་བསྐལ་པ་གྲངས་མེད་པ་ནས་གོམས་པར་བྱས་པའི་སྟོབས་ཀྱིས་དང་། ད་ལྟར་ཡང་རྒྱལ་དང་དེ་སྲས་རྣམས་ཀྱི་བཀའ་དང་བསྟན་བཅོས་ཀྱི་དགོངས་པ་མ་ནོར་བ་མངོན་ཏུ་མཛད་ནས། དེ་ཉིད་ཕྱི་
མའི་གདུལ་བྱ་ལ་བརྩེ་བས་རྗེས་སུ་གདམས་པའི་མཐུ་དང་དབང་ཆེན་པོ་ཐོབ་པ་ཡིས། དཔལ་ལྡན་ཀརྨཔ་གསུམ་པ་རང་བྱུང་རྡོ་རྗེས་གཞན་གྱི་དོན་དུ་གསལ་བར་བྲིས་པའོ། །གཉིས་པ་སྨོན་ལམ་ནི། འགྲོ་ཀུན་ནས། སྙིང་པོ་རྫོགས་སོ། །ཅེས་གསུངས་ཏེ། འདི་ལྟར་ཐེག་པ་ཆེན་པོའི་དོན་མཐར་ཐུག་པ་གསལ་བར་མཛད་པའི་དགེ་བ་སངས་རྒྱས་གྲངས་མེད་པས་གསུངས་ཀྱང་མཐར་གཏུགས་པར་མི་ནུས་པའི་ཕན་ཡོན་ཆེན་པོ་དང་ལྡན་པས་ན། དེ་ལྟའི་དགེ་བ་བསྔོ་བའི་ཡུལ་འགྲོ་བ་ཀུན་ལ་བྱིན་པས་དེའི་མཐུས་སེམས་ཅན་དེ་ཐམས་ཅད་ཀྱིས། རང་ལ་ཡོད་པའི་སངས་རྒྱས་ཀྱི་སྙིང་པོ་འདི་ཉིད། གནད་ཀྱི་གདམས་ངག་ཟབ་མོ་འདི་ལྟ་བུ་ལ་ཐོས་བསམ་སྒོམ་གསུམ་མཐར་ཕྱིན་ནས། གློ་བུར་བའི་དྲི་མ་ཐམས་ཅད་དག་པའི་གནས་ལུགས་མ་ནོར་བ་དེ་རྟོགས་ཤིང་ཤེས་པར་ཤོག་ཅིག །རྒྱུའི་ཐེག་པ་ལས་གསལ་ཞིང་རྒྱས་པར་གསུངས་པའི་སངས་རྒྱས་ཀྱི་སྙིང་པོ་གཏན་ལ་དབབ་པ་འདི་གསང་སྔགས་རྡོ་རྗེ་ཐེག་པའི་ལྟ་བའི་ཡང་
སྙིང་པོ་ཡིན་ཅིང་། དེས་ན་མཐར་ཐུག་གི་ལྟ་བ་བཤད་པ་རྫོགས་སོ། །ཞེས་པའོ། །ཟབ་ཅིང་ཀུན་གྱིས་མི་རྟོགས་ལ། །རྟོགས་ན་སངས་རྒྱས་འགྱུར་བའི་དོན། །ཕྱོགས་ཙམ་གོ་བས་གློ་བུར་གྱི། །དྲི་མའི་སྦུབས་མཐུག་བརྟོལ་བར་འགྱུར། །སྙིང་པོ་ཡོད་པར་ཡིད་ཆེས་ཙམ། །སྐྱེས་ཀྱང་རྒྱལ་བའི་གདུང་འཚོབ་གསུངས། །གོ་སླ་དོན་འདུས་གཞུང་བཟང་འདི། །གོ་མྱོང་རྟོགས་པས་མཐར་འབྱིན་འཚལ། །སྐལ་མཉམ་དག་ལ་ཕན་པའི་བློས། །ཚིག་ཙམ་མཆོག་གི་རྗེས་སུ་བཀྲལ། དགེ་བས་བདེ་གཤེགས་སྙིང་པོའི་ཞལ། །འགྲོ་བ་ཀུན་གྱིས་མཇལ་བར་ཤོག །སྙིང་པོ་གཏན་ལ་དབབ་པའི་གཞུང་འདི་ལ་སྔ་ཕྱིར་བྱོན་པའི་འགྲེལ་པ་དང་མཆན་བུ་ཁ་ཤས་མཆིས་ཀྱང་། འཇམ་དབྱངས་དོན་གྲུབ་འོད་ཟེར་གྱི་གསུང་ཉིད་ཁྱད་པར་དུ་འཕགས་ཤིང་། ཐམས་ཅད་མཁྱེན་པ་ཞྭ་དམར་ལྔ་པས་དེའི་དོན་བསྡུས་ཏེ་མཆན་བུ་མཛད་པ་རྣམས་ཀྱི་སྙིང་པོ་བླངས་ནས། མདོ་ཁམས་བཀའ་བརྒྱུད་ཀྱི་གདན་ས་ཆེན་པོ་དཔལ་སྤུངས་ཐུབ་བསྟན་ཆོས་འཁོར་གླིང་གི་གན་ངྷོ་ལར་ཀརྨ་ངག་དབང་ཡོད་ཏན་རྒྱ་མཚོ་བློ་གྲོས་མཐའ་ཡས་པའི་སྡེས་སྔ་འགྲེལ་ཚད་མའི་ལེགས་བཤད་གསལ་བར་བགྱིས་
པ་དགེ་ལེགས་འཕེལ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།