དཔལ་འཁོར་ལོ་བདེ་མཆོག་ལྷ་ལྔའི་དཀྱིལ་འཁོར་གྱི་ཆོ་ག
དཔལ་འཁོར་ལོ་བདེ་མཆོག་ལྷ་ལྔའི་དཀྱིལ་འཁོར་གྱི་ཆོ་ག་བཞུགས་སོ། །
ཆོས་ཀྱི་རྗེ་དཔལ་ལྡན་བླ་མ་འགྲོ་བའི་མགོན་པོ་དུས་གསུམ་མཁྱེན་པའི་ཞབས་ལ་ཕྱག་འཚལ་ཞིང་སྐྱབས་སུ་མཆིའོ། །བྱིན་གྱིས་བརླབ་ཏུ་གསོལ། འདིར་དཔལ་སྡོམ་པའི་སྒོ་ནས་རང་གཞན་གྱི་རྒྱུད་སྨིན་པའི་རིམ་པ་ལ། དང་པོ་ས་སློང་བ་ནི། ཤིས་པའི་གནས་སུ་གཏོར་མ་ཉེར་སྤྱོད་དང་བཅས་པ་བཤམས་ལ། བདག་ཉིད་བཅོམ་ལྡན་མཐིང་ནག་ཞལ་གཅིག་ཕྱག །གཉིས་པ་རྡོ་རྗེ་དྲིལ་འཛིན་གར་ཉམས་དགུ། །ཕྱག་རྒྱ་དྲུག་ཅན་གཡས་བརྐྱང་པད་ཉི་དང་། །འཇིགས་དུས་སྟེང་དུ་ཡུམ་བཅས་གསལ་བར་
གྱུར། །ནང་མཆོད་བྱིན་གྱིས་བརླབས་ཏེ་མྱངས་ལ། གཏོར་མ་ཁཎྜརོ་ཧེས་བསངས། སྭ་བྷཱ་ཝས་སྦྱངས། ཨ་ཀཱ་རོས་ལན་གསུམ་བྱིན་གྱིས་བརླབས་ལ། ཡུལ་བདག་གྲོང་བདག་ས་པ་རི་ཝཱ་ར། །ན་མ༔སརྦ་ཏ་ཐཱ་ག་ཏེ་བྷྱོ་ཞེས་སོགས་ལན་གསུམ་གྱིས་གཏོང་མ་ཕུལ་ལ། རྡོར་དྲིལ་འཛིན་པས། གང་ཡང་འདི་ན་ལྷ་དང་གླུ། །གནོད་སྦྱིན་སྲིན་བོའམ་གཞན་ཡང་རུང། །ས་འདི་བདག་གིས་སློང་བགྱིད་ན། །དཀྱིལ་འཁོར་ཆེད་དུ་སྩལ་དུ་གསོལ། །ཞེས་ལན་གསུམ་བརྗོད། གསོལ་བཏབ་གནང་བྱིན་རང་གནས་འཁོད་པར་གྱུར། གཏོར་མ་
གཙང་སར་བསྐྱལ་ལོ། གཉིས་པ་ས་སྦྱང་བ་ནི་སྟེགས་བུ་ལ་སོགས་པའི་དབུས་སུ་སེམས་དཔའི་སྐྱིལ་གྲུང་གིས་འདུག་ནས། གཙོ་བོའི་ང་རྒྱལ་གྱིས་སྙིང་པོ་བརྒྱ་རྩ་བཟླས། ༀ་བྷཱུ་ཁཾ། ས་ཡི་གཞི་འདི་ནམ་མཁའི་རང་བཞིན་གྱུར། །ཧཱུྃ་ལཾ་ཧཱུྃ་གིས་གསེར་གྱི་ས་གཞིར་གྱུར། །རྡོ་རྗེ་བསྡམས་པ་བརྐྱང་པ་ས་ལ་བཞག་ཏེ། ༀ་མེ་དི་ནཱི་བཛྲཱི་བྷ་ཝ་བཛྲ་བནྡྷ་ཧཱུྃ། །རྡོ་རྗེའི་ས་གཞིའི་རང་བཞིན་ཉིད་དུ་གྱུར། །ཧེརུ་ཀའི་ཡིག་བརྒྱས་བརྟན་པར་བྱའོ། གསུམ་བ་ས་གཟུང་བ་ནི། རྡོ་རྗེ་སློབ་དཔོན་དང་མཐའ་སྐོར་དུ་སློབ་མ་རྣམས་འདུག་ལ། སྔོན་འགྲོ་གཏོར་མ་ནས་བཟླས་པའི་བར་བདག་བསྐྱེད་རྣམས་རྫོགས་བའི་རྗེས་སུ། སློབ་དཔོན་སྤོས་ཐོགས་ལ། མ་ལུས་ཕྱོགས་ན་བཞུགས་པ་ཡི། །སངས་རྒྱས་བདག་ལ་དགོངས་སུ་གསོལ། །བདག་ནི་ཆེ་གེ་རྡོ་རྗེ་འཛིན། །འདིར་ནི་དཀྱིལ་འཁོར་བྲི་བར་བྱ། །སངས་རྒྱས་ལ་སོགས་ཀུན་འབྱོན་འཚལ། །དངོས་གྲུབ་འདིར་ནི་ཡང་དག་སྩོལ། །ཞེས་སངས་རྒྱས་རྣམས་བསྙན་གསན་ཕབ། ཕྱོགས་ཀྱི་སློབ་མ་རྣམས་ཀྱིས་མཆོད་བསྟོན་སྔོན་དུ་འགྲོ་བས་ཤར་ནས་གཡོན་སྐོར་གྱིས། དེ་བཞིན་གཤེགས་པ་ཀུན་ཞི་
བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བཤད་དུ་གསོལ། །མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་རྣམས་པར་སྤངས། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ༴ ཞི་བའི་ཆོས་ནི་མཆོག་ལས་བྱུང། །ཡེ་ཤེས་སྤྱོད་པ་རྣམ་སྦྱོང་མཛད། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་དམ་པ༴ སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པ་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་བསྐུལ། སློབ་དཔོན་གྱིས་རྡོ་རྗེ་ཁུ་ཚུར་གཉིས་ཀྱི་མཛུབ་མོ་དག་བརྐྱང་ཏེ་རྩེ་སྤྲད་པ་སྤྱི་བོར་བཞག་ཅིང་། ཧཱུྃ་བཛྲོཏྟིཥྛ། བསྒོམས་པའི་དཀྱིལ་འཁོར་རྟེན་དང་བརྟེན་པར་བཅས། །ནམ་མཁའི་ཁམས་ལ་རབ་ཏུ་བཞུགས་པར་གྱུར། །བཞི་པ་ས་བསྲུང་བ་ནི། ཁ་ཤར་དུ་བལྟ་བས་འགྲེང་བཞིན་དུ་སྤྱི་བོར་ཐལ་མོ་སྦྱར་ལ།
སངས་རྒྱས་ཐམས་ཅད་ལ་ཕྱག་འཚལ་བའི་མོས་པས། ༀ་སརྦ་ཏ་ཐཱ་ག་ཏ་པྲ་ཎ་མེ་ན་བཛྲ་པཱ་ད་བནྡ་ནཾ་ཀ་རོ་མི། བདག་ཉིད་རྡོ་རྗེ་ཧཱུྃ་མཛད་སྐུ་མདོག་ནག །ཞལ་གཅིག་ཕྱག་གཉིས་དམར་ཟླུམ་སྤྱན་གསུམ་པ། །ཁྲོ་གཉེར་བསྡུས་ཤིང་མཆེ་གཙིགས་ཕྱག་རྒྱ་དྲུག །མགོ་ཕྲེང་སྟག་ཤམ་ཀླུ་བརྒྱད་ཀྱིས་བརྒྱན་པ། །རྡོ་རྗེ་དྲིལ་བཅས་འཇིག་རྟེན་གསུམ་པོ་ལས། །རྣམ་རྒྱལ་ཕྱག་རྒྱས་རང་འོད་རིག་མར་འཁྱུད། །གཡས་བརྐྱང་སྟབས་ཀྱིས་སྣ་ཚོགས་པད་ཉི་ལ། །གནས་པའི་འཇིགས་དུས་མནན་པའི་མིག་གཡས་པ། །མ་ལས་ཉི་མ་གཡོན་པ་ཊ་ལས་ཟླ། །མིག་འབྲས་ཧཱུྃ་ལས་རྡོ་རྗེ་ནག་པོ་ལས། །ཁྲོ་ཚོགས་འོད་འཕྲོ་རྐང་མཐིལ་གཉིས་སུ་ཨ། །དེ་ལས་སྣ་ཚོགས་རྡོ་རྗེ་འོད་ཟེར་འབར། །དེ་ནས་རྡོ་རྗེའི་ལྟ་བས་གཡོན་སྐོར་དུ་བལྟས་ལ། བདག་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་རང་ཉིད་བདག །བདག་ནི་སངས་རྒྱས་རྒྱལ་པོ་ཆེ། །བདག་ནི་སྟོབས་ཅན་རྡོ་རྗེ་ཅན། །རྣལ་འབྱོར་དབང་ཕྱུག་
རྒྱལ་པོ་བདག །ང་ནི་ཕྱག་ན་རྡོ་རྗེ་བརྟན། །བསྒྱིངས་དང་བཅས་པར་པད་ཀོར་སྡོན་དུ་འགྲོ་བས་རྡོ་རྗེ་གསོར་ཞིང་དྲིལ་བུ་དཀྲོལ་ནས། རྡོ་རྗེའི་འགྲོས་ཀྱིས། ལྷོར་གཡོན་བརྐྱང། ཤར་དུ་གཡས་བརྐྱང་། བྱང་དུ་ཟླུམ་པོ། ནུབ་ཏུ་ས་ག་རྣམས་བྱས་ཏེ། རིམ་པ་ལྟར། དབྱུག་པ། ཐོ་བ། རལ་གྲི། མདའ་གཞུའི་ཕྱག་རྒྱ་སྟེ་གར་གྱིི་སྦྱོར་བས་དབང་ལྡན་དུ་སོང་ལ། སྐུ་གསུང་ཐུགས་ཀྱི་རྡོ་རྗེ་ཅན། །སངས་རྒྱས་དེང་འདིར་བདག་ལ་གསོན། །ང་ནི་དཔལ་ལྡན་ཧེ་རུ་ཀ །བཀའ་ཡི་འཁོར་ལོ་རབ་སྦྱོར་གྱི། །ལྷ་ཀླུ་ལྷ་མིན་གསང་བ་པ། །བརྗེད་བྱེད་ལ་སོགས་བགེགས་ཀྱི་ཚོགས། །ས་འདིར་མ་གནས་གཞན་དུ་དེངས། །གལ་ཏེ་བདག་བསྒོ་ལས་འདས་ན། །རྡོ་རྗེ་ཁྲོ་བོ་བཞིན་འབར་བའི། །རྡོ་རྗེ་རབ་ཏུ་འབར་བ་འདིས། །མགོ་ནི་ཚལ་པ་བརྒྱར་འགས་ཤིང། །འཇིག་པར་འགྱུར་བར་གདོན་མི་ཟ། །ཞེས་དང། སུམྦྷ་ནི་ལན་གསུམ་བརྗོད། དེ་ནས་གཡས་སུ་བསྐོར་བ་ལན་གསུམ་བྱ་ཞིང་། ཧཱུྃ་ཞེས་བརྗོད། སླར་ཡང་དབུས་སུ་སོང་ནས་སེང་ལྡིང་གི་ཕུར་བུ་བཅུ། ཡུངས་ཀར་གྱི་ཕྱེ་མ་དང་དྲིས་བྱུག །ཚོན་
སྐུད་དམར་པོ་དང་དར་དམར་པོ་མེ་ཏོག་གི་ཕྲེང་བ་ཅན་བཏགས་པ་གོ་རིམ་བཞིན་ཏུ་འབྲུའི་སྣོད་དུ་བཀོད་ནས་བསངས་སྦྱངས། ཕུར་བུ་རྣམས་ནི་མི་དམིགས་སྟོང་ཉིད་ལས། །དུམ་སྐྱེས་དམར་མོ་ཞལ་གཅིག་གཡས་གྲི་གུག །གཡོན་ཐོད་སྐུ་སྨད་རྡོ་རྗེ་རྩེ་གཅིག་གྱུར། །སྙིང་གི་ས་བོན་འོད་ཀྱིས་ཡེ་ཤེས་པ། །སྤྱན་དྲངས་དམ་ཚིག་པ་དང་དབྱེར་མེད་གྱུར། །དབང་ལྷས་དབང་བསྐུར་རིན་འབྱུང་དབུ་བརྒྱན་གྱུར། །མངོན་པར་རྟོགས་པའི་སྐབས་ཀྱི། ཕྱོགས་བཞིའི་སྔགས་ལས་གཡོན་སྐོར་དུ་ཞེས་པ་ནས། གདུག་ཅན་སྤྱི་བོར་ཕུར་བུས་བཏབ། །ཅེས་པའི་བར་འདོན་ཅིང། དེའི་མཇུག་ཏུ། རང་ཉིད་རྡོ་རྗེ་ཧཱུྃ་མཛད་ཀྱི། །གཡས་པའི་རྡོ་རྗེ་རྡོ་རྗེ་ཡི། །ཐོ་བར་གྱུར་ནས་གཡོན་ཕུར་བུ། །ཕུར་བུའི་གདན་ལ་གདབ་པར་གྱུར། །དེ་ནས་གོང་གི་ༀ་གྷ་གྷ་ནས་ ༀ་བཛྲ་མུངྒ་རའི་བར་གྱི་སྡགས་བརྗོད། དེའི་རྗེས་སུ། བགེགས་ཚོགས་བདེ་ཆེན་རང་བཞིན་གྱུར། །ཅེས་འདོན་པ་བསྒྱུར། མངོན་པར་རྟོགས་པར་བརྗོད་པའི་སྲུང་འཁོར་ཤར་དུ། ༀ་སུམྦྷ་ནི་ཞེས་པ་ནས། ༀ་བཛྲ་ཛྭ་
ལ་ཨ་ན་ལཱརྐ་ཧཱུྃ་ཧཱུྃ་གི་བར་བརྗོད། ལྔ་པ་སའི་ལྷ་མོ་སྟ་གོན་ནི། ས་དེར་བྱི་དོར་བྱས། དྲིའི་མཎྜལ་མེ་ཏོག་གི་ཚོམ་བུ་མཆོད་གཏོར་དང་བཅས་པ་བཤམས། ལག་གཡས་ས་གནོན་གྱིས་ས་ལ་རེག་ཅིང་། ཊཀྐི་ཧཱུྃ་ཛཿཨ་ཧཾ། ལག་གཡས་ཟླ་བ་ཧཱུྃ་གསུམ་མཚན་པ་ཡིས། །ས་ལ་བསྣུན་སྒྲ་ཧཱུྃ་དང་འོད་ཟེར་གྱིས། །བསྐུལ་ལས་ཡེ་ཤེས་པ་དང་ཚུལ་གཅིག་པའི། །པཾ་ལས་ས་ལྷ་གསེར་མདོག་ཞལ་གཅིག་ཕྱག །གཉིས་མ་ཞི་ཉམས་རལ་པའི་ཐོར་ཚུགས་འཆང་། །སྣ་ཚོགས་རྒྱན་ཅན་ན་བཟའ་དཀར་བོས་སྤྲས། །གཡོན་པ་གསེར་བུམ་གཡས་པ་མི་འཇིགས་པ། །སྤྱིན་པའི་ཕྱག་རྒྱས་པདྨ་དཀར་ལ་གནས། །བདག་གི་བཀའ་ནོད་བཞིན་དུ་འཁོད་པར་གྱུར། །ༀ་པྲི་ཐི་ཝཱི་དེ་ཝཱི་ས་པ་རི་ཝཱ་ར་ཨརྒྷཾ་པྲ་ཏཱིཙྪ་སྭཱ་ཧཱ། པཱདྱཾ། པུཥྤཾ། དྷཱུ་པཾ། ཨཱ་ལོ་ཀཾ །གནྡྷཾ། ནི་ཝིདྱཾ། ཤཔྡཾ། ཞེས་མཆོད་ནས། ན་མ་སརྦ་ཏ་ཐཱ་ག་ཏེ་སོགས་ལན་གསུམ་གྱིས་གཏོར་མ་ཕུལ་ལ། སྤོས་སྣོད་རྡོ་རྗེ་དྲིལ་བུ་འཛིན་པས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་
ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །སྐྱོབ་པ་ཤཱཀྱ་སངྒེ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱ་ཕྱིར་དཀྱིལ་འཁོར་བྲི། །ཞེས་གསོལ་བ་བཏབ་པས། ས་ལྷས་གནང་བྱིན་ས་དེར་ཐིམ་པར་གྱུར། །རྡོ་རྗེ་བསྡམས་པ་ས་ལ་བཞག་སྟེ། ༀ་བཛྲི་བྷ་ཝ་ཧཱུྃ། ལན་གསུམ། རྡོ་རྗེ་བཅིངས་པ་ལས། ཧཱུྃ་ཡིག་འབར་སྤྲོས་འོག་གཞི་རྡོ་རྗེར་གྱུར། །ༀ་བཛྲ་དྲིཌྷ་ཏིཥྛ། ལན་གསུམ་གྱིས་བརྟན་པར་བྱའོ། །དྲུག་པ་ལྷ་སྟ་གོན་ལ། ས་གཞིར་དྲི་ཆུས་བྱེ་མ་མེད་པར་བྱུགས་ལ། དཀྱིལ་འཁོར་གྱི་ཐིག་དྲུང་རྟོགས་ལྡན་པའི་དཀྱིལ་ཆོག་ལས་འབྱུང་ཞེས་ཚིག་བཅད་སྤར་གཞུང་ལྟར་རོ། །དེ་ནས་ཁ་ཤར་དུ་ཕྱོགས་ཏེ། བདུད་རྩི་ལྔ་དང་དྲི་བཟང་གིས་སྦྱར་བས་གཙོ་བོའི་གནས་སུ་གྲུ་བཞི་དང་འཁོར་བཞིའི་གནས་སུ་ཟླུམ་པོར་བྱུག་ཅིང་སོ་སོའི་སྔགས་བརྗོད། མེ་ཏོག་གི་ཚོམ་བུ་ནི་མཚམས་བཞིར་དགོད། མཐའ་མཆོད་པས་བསྐོར་ལ་བསངས་སྦྱངས། སྟོང་པའི་ངང་ལས་ཨེ་ལས་ཆོས་འབྱུང་གནས། །ཞེས་པ་ནས། བདག་ཉིད་ཅེས་པའི་མལ་དུ། བཅོལ་ལྡན་ཞེས་བཅུགས་ལ། དམ་ཚིག་པ་བསྐྱེད་པ། ཡེ་
ཤེས་པ་སྤྱན་དྲངས་པ། དབང་བསྐུར་རྒྱས་གདབ། མཆོད་པ་བྱིན་གྱིས་བརླབས་ལ། མཆོད་བསྟོད་རྒྱས་བསྡུས་ཅི་རིགས་ཀྱི་རྗེས་སུ། ལྕེ་ཧཱུྃ་རྡོ་རྗེ་རྩེ་གཅིག་ཧཱུྃ་མཚན་གྱུར། བདུག་སྤོས་དང་རྡོར་དྲི་ཐོགས་ལ། གཉིས་མེད་ཡེ་ཤེས་ལས་བྱུང་བ། །ཁྱབ་བདག་དངོས་ཀུན་བདག་ཉིད་ཅན། །སྟོན་པའི་གཙོ་བོ་ཁྲག་འཐུང་དཔལ། །ཕག་མོ་ལྷན་ཅིག་ཡང་དག་གནས། །གང་ཞིག་ཕྱོགས་བཅུའི་དཔའ་བོ་དང་། །རིག་པའི་ལྷ་མོ་རྫུ་འཕྲུལ་ཅན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་པས། །ནང་པར་དཀྱིལ་འཁོར་བྲི་བགྱི་འཚལ། །རྗེས་སུ་བརྩེ་བས་ཉེར་དགོངས་ཏེ། །ཉེ་བ་རུ་ནི་མཛད་པ་རིགས། །ཞེས་ལན་གསུམ་གྱིས་གསོལ་བ་བཏབ་ནས། སླར་ཡང་མཆོད་བསྟོད་བསྡུས་པ་བྱས་ལ། སྔར་གྱི་སྔགས་རྒྱ་སོགས་དང་། ནམ་མཁའི་ཁམས་ལ་རབ་ཏུ་བཞུགས་པར་གྱུར། །གྱི་བར་བརྗོད། བདུན་པ་བུམ་པ་སྟ་
གོན་ནི། བུམ་བསྐྱེད་འདོན་འགྲིགས་ལྟར་རོ། །བརྒྱད་པ་སློབ་མ་སྟ་གོན་ནི། སློབ་མ་ཉེར་ལྔའི་བར་ཟུང་དུ་མ་གྱུར་པ་རྣམས། ལས་བུམ་གྱི་ཆུས་ཁྲུས་བྱས། སློབ་དཔོན་ལ་ཕྱག་གསུམ་སྔོན་དུ་འགྲོ་བས། ཐམ་མོ་སྦྱར་ཏེ་འཁོད་པ་ལ། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་འཇུག་པར་བྱེད། །དེ་ལས་གཞན་པའི་དངོས་གྲུབ་འདོད། །གཞན་དག་འཇིན་རྟེན་གཞན་དོན་གཉེར། །འཇིག་རྟེན་ཕ་རོལ་དོན་གཉེར་བའི། །དད་པ་མང་དུ་བྱེད་པ་ཡི། །བློ་ལྡན་དཀྱིལ་འཁོར་འཇུག་བྱ་ཡི། །ཚེ་འདིའི་འབྲས་བུ་འདོད་མི་བྱ། །ཚེ་འདི་འདོད་པར་གྱུར་པ་ལ། །འཇིག་རྟེན་ཕ་རོལ་དོན་མི་འབྱུང་། །འཇིག་རྟེན་ཕ་རོལ་དོན་གཉེར་སྐྱེས། །ཚེ་འདིར་འབྲས་བུ་རབ་ཏུ་རྒྱས། །ཞེས་བྱང་ཆུབ་མཆོག་ཏུ་སེམས་བསྐྱེད་དུ་བཅུག་ཏེ། མཎྜལ་ཕུལ་ནས། དགའ་ཆེན་ཁྱོད་བདག་སོགས་ནས། འཇུག་པར་འཚལ། །བར་ཞེས་ལན་གསུམ་རྗེས་ཟློས་བྱེད་དུ་བཅུག་ནས། སློབ་མའི་གཙོ་བོ་གཅིག་ལ་དམིགས་ཏེ། བུ་ཚུར་ཐེག་པ་ཆེན་པོ་ཡི། །ཁྱོད་ནི་ཚུལ་ཆེན་སྣོད་ཡིན་ཏེ། །གསང་སྔགས་
སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །དེ་བཞིན་གང་དག་མ་བྱོན་དང་། །ད་ལྟར་བྱུང་བའི་རྫོགས་སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་བཟང་པོ་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་མཚན་མེད་བརྙེས། །གསང་སྔགས་སྦྱོར་བ་མཉམ་མེད་པ། །སྐྱོབ་པ་ཤཱཀྱ་སེངྒེ་ཡིས། །བདུད་སྡེ་ཤིན་ཏུ་མི་ཟད་པ། །དཔུང་ཆེན་དག་ཀྱང་དེ་ཡིས་བཅོམ། །འཇིག་རྟེན་མཐུན་པར་གཤེགས་ནས་སུ། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་བརྗོད། དེ་ནས་སློབ་མས། འདོད་ཆགས་ཞེ་སྡང་གཏི་མུག་ལས་གྱུར་པའི། །ཞེས་པ་ནས། རྣམ་དག་བསམ་ཡས་ཡང་དག་བསྟེན་པར་བགྱི། །ཞེས་པའི་བར་ལྔ་རྣམ་དག་ཚོགས་ཞིང་གི་སྐབས་ལྟར་ལན་གསུམ་དང་།
སངས་རྒྱས་སྲས་བཅས་སོགས་ནས་འདས་ལ་འགོད། །ཅེས་པའི་བར་ལན་གསུམ་གྱིས་སྡོམ་པ་བཟུང་། སློབ་མའི་སྙིང་མགྲིན་དཔྲལ་བར་དྲིའི་ཐིག་ལེ་བྱ་ཞིང་། སྙིང་གར་རྡོ་རྗེའི་ལྟེ་བར་ཧཱུྃ་ནག་པོ། །མགྲིན་པར་པདྨའི་ཟེའུ་འབྲུར་ཨཱཿདམར་པོ། །དཔྲལ་བར་འཁོར་ལོར་ༀ་དཀར་མཚན་པར་གྱུར། །ཞེས་བྱིན་གྱིས་བརླབས་ཤིང་། ཉེར་སྤྱོད་ལྔས་མཆོད། སོ་ཤིང་སོར་བཅུ་གཉིས་པ་དྲི་བཟང་གི་ཆུས་བྱུགས་ཤིང་། སྲད་བུ་དམར་པོས་བཅིངས་པའི་མེ་ཏོག་གིས་རྩེ་མོ་བརྒྱན་པ་སློབ་མའི་ལག་ཏུ་གཏད། དྲིས་བྱུགས་པའི་མཎྜལ་ཁྲུ་གང་གྲུ་བཞི་པ་ལ་ཁ་ཤར་བྱང་དུ་བལྟས་ལ། ༀ་བཛྲ་ཧཱ་ས་ཧ། ཡིས་རྩེ་མོ་ཅུང་ཟད་འཆོས་ཏེ་དོར། རྩེ་མོ་བདག་ལ་ལྟ་ན་མཆོག་དངོས་གྲུབ། །གྱེན་ཐུར་མཁའ་དང་ས་སྤྱོད་ཕྱོགས་ལྟ་ན། །འཇིག་རྟེན་སྐྱོང་བ་བརྒྱད་ཀྱི་དངོས་གྲུབ་བོ། །སྲུང་སྐུད་དམར་པོ་ལུས་ཚད་དང་མཉམ་པ་སུམ་བལྟབ་ལ། ཁཎྜ་རོ་ཧེ་བདུན་བཟླས་ཤིང་མདུད་པ་གསུམ་གདབ། ཧཱུྃ་སྐྱེས་སྲད་བུས་བགེགས་སོགས་འགེགས་པར་གྱུར། ༀ་བུདྡྷ་མི་ཏི་རཀྵ་རཀྵ་སརྦཱཾ་སྭཱ་ཧཱ། ཞེས་དཔུང་པ་གཡོན་དུ་བཅིངས་ནས་བསྲུང་། བཾ་སྐྱེས་དུང་ཆུས་སྡིག་
སྒྲིབ་བཀྲུ་བར་བྱེད། ༀ་ཧྲིཿབི་ཤུདྡྷཱཿདྷརྨྨཱཿསརྦ་པཱ་པཱ་ནི་ཙཱ་སྱ་བི་ཤོ་དྷ་ཡ་སརྦ་བི་ཀལྤཱན་ཨ་བ་ན་ཡ་ཧཱུྃ། ཞེས་ཁྱོར་བ་ལན་གསུམ་འཐུང་དུ་བཅུག །འཇིག་རྟེན་དུ་ནི་ཀུན་མཁྱེན་དང་། །ཨུ་དུམྦ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་ཞིག །འབྱུང་འགྱུར་ཡང་ན་མི་འབྱུང་ངོ་། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །གང་གིས་མཉམ་མེད་སེམས་ཅན་དོན། །མྱ་ངན་མི་འདའ་བྱེད་པར་ནུས། །བསྐལ་པ་བྱེ་བ་དུ་མ་རུ། །སྡིག་པ་བྱས་པར་གྱུར་པ་གང་། །དེ་ཀུན་དཀྱིལ་འཁོར་འདི་འདྲ་བ། །མཐོང་བས་བྱང་བར་འགྱུར་ལགས་ན། །གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ནས་ནི། །གོ་འཕང་བླ་ན་མེད་པར་འགྱུར། །གང་དག་སྤྱོད་པ་མཆོག་འདི་ལ། །བློ་གྲོས་བརྟན་ཅིང་མི་གཡོ་བ། །དེ་དག་གིས་ནི་ངན་འགྲོའི་རྒྱུ། །སྡུག་བསྔལ་ཀུན་འབྱུང་རབ་ཏུ་
བཅད། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་ཕྱིར་རྒྱལ་བ་སྲས་བཅས་པ། །བདག་ཉིད་ཆེན་པོ་ཀུན་གྱི་ནི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་བཟུང་སྟེ་སྐྱེ་བཞིན་པས། །དེ་ཕྱིར་ཁྱེད་རྣམས་ཐེག་ཆེན་ལ། །སང་ནི་རབ་ཏུ་སྐྱེ་བར་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །ཁྱེད་རྣམས་དེར་ནི་དོང་བས་ན། །རང་བྱུང་སྐལ་པ་ཆེན་པོ་པ། །འཇིག་རྟེན་ཐམས་ཅད་མཁྱེན་པ་ཡི། །དེ་བཞིན་གཤེགས་པ་རྣམས་སུ་འགྱུར། །ༀ་བཛྲ་ཨམྲྀ་ཏ་ཀུཎྜ་ལི་ཧ་ན་ཧ་ན་ཧཱུྃཕཊ། ཅེས་བསྲུངས། ཧཱུྃ་དྷཱིཿལས་སྐྱེས་ཀུ་ཤ་དགེ་བའི་ལྟས། །ཧཱུྃ་དང་། དྷཱིཿལན་བདུན་དང་། ཁཎྜ་རོ་ཧེ་བཟླས་པ། ཆེ་བསྟན་དང་ཆུང་བ་སྔས་སུ་གཏད་ལ། ༀ་བཛྲ་ཏཱིཀྵྞ་བཾ། དོ་ནུབ་རྨི་ལམ་གང་བྱུང་བ་ང་ལ་སྨྲོས་ཤིག །ཅེས་བསྒོས་ནས་སོ་སོའི་གནས་སུ་བཏང་ངོ། །དགུ་པ་ཐིག་ཚོན་ལྷག་གནས་ནི་སྤར་གཞུང་ལྟར་རོ། །བདེ་མཆོག་ལྷ་ལྔའི་ཆོ་ག་ལྟ་གོན་དང་ཕྱག་བཞི་པ་བཅས་ནག་འགྲོས་སྤར་གསར་དུ་
བསྐྲུན་པ་འདིར་གཏེར་སྒར་མི་འགྱུར་རྡོ་རྗེ་ནས་ཞལ་འདེབས་འབྲེལ་འཇོག་དང་ཆེད་དུ་གསུང་བསྐུལ་གནང་བ་ལྟར་སྒྲུབ་སློབ་བླ་མིང་དོན་གྲུབ་ནས་ཡོན་སྦྱར་སྤར་དུ་བསྒྲུབས་པས་འབྲེལ་ཐོགས་རྣམས་རྡོ་རྗེ་སེམས་དཔའི་གོ་འཕང་ལ་འགོད་པའི་རྒྱུར་གྱུར་ཅིག། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།