བཅོམ་ལྡན་འདས་དགྱེས་པ་རྡོ་རྗེའི་སྒྲུབ་ཐབས་དངོས་གྲུབ་ཆར་འབེབས།
བཅོམ་ལྡན་འདས་དགྱེས་པ་རྡོ་རྗེའི་སྒྲུབ་ཐབས་དངོས་གྲུབ་ཆར་འབེབས་ཞེས་བྱ་བ་བཞུགས་སོ། །
ༀ་སྭསྟི། དཔལ་དགྱེས་པ་རྡོ་རྗེའི་སྒྲུབ་ཐབས་དངོས་གྲུབ་ཆར་འབེབས་ཞེས་བྱ་བ། བླ་མ་དང་དཔལ་དགྱེས་པ་རྡོ་རྗེ་ལ་ཕྱག་འཚལ་ལོ། །དཔལ་ལྡན་ལྷན་ཅིག་སྐྱེས་དགའི་རོལ་རྩེ་སངས་རྒྱས་ཐམས་ཅད་དགྱེས་པའི་རྡོ་རྗེ་ནི། །སྙིང་རྗེ་རྣམ་གསུམ་རོ་མཉམ་ཞི་བའི་མཐར་སྤངས་མཚན་འཛིན་བཅོམ་པས་སྲིད་ལས་གྲོལ། །ཁྲག་འཐུང་བྱེ་བའི་འཁོར་ལོའི་དབང་ཕྱུག་བདག་མེད་ལྷ་མོས་བདེ་བའི་གར་གྱིས་འཁྱུད། །ཁྱོད་ཞབས་པདྨོར་གུས་པས་འདུད་དོ་ཐུགས་བརྩེས་བྱིན་རློབས་གྲུབ་གཉིས་མཆོག་སྩོལ་མཛོད། །དགྱེས་མཛད་སྤྲུལ་པའི་སྐུར་བཞེངས་ལོ་ཙཱ་བ། །སྙན་གྲགས་ཕྲིན་ལས་ཕུལ་བྱུང་མར་སྟོན་རྗེ། །བརྒྱུད་པའི་སྲོག་འཛིན་ཀརྨ་པ་ཡབ་སྲས། །ངོ་མཚར་རྩ་བརྒྱུད་
བླ་མ་ལ་ཕྱག་འཚལ། །རྡོ་རྗེ་འཆང་དབང་ཚེ་འདིར་བརྙེས་བྱེད་པ། །བརྒྱུད་དང་གདམས་པའི་ཟབ་དོན་འཁྲུལ་མེད་ནི། །རྗེ་བཙུན་རྔོག་པའི་བཀའ་སྲོལ་ཇི་ལྟ་བར། །སྒྲུབ་ཐབས་རིམ་པ་བྱིན་རླབས་གཟི་ལྡན་འཆད། །དེའང་དགྱེས་པ་རྡོ་རྗེའི་རྣལ་འབྱོར་ལ་གནས་པར་འདོད་པས་ཇི་སྐད་དུ། དངོས་པོའི་གནས་ལུགས་ལམ་དང་ནི། །འབྲས་བུ་སྐྱེ་བའི་རིམ་པའོ། །ཞེས་གསུངས་པའི་ལུས་སེམས་དངོས་པོའི་གནས་ལུགས་སྦྱང་གཞི་བྱས་ནས། སྦྱོང་བྱེད་ལམ་གྱི་རིམ་པ་སྒོམ་པ་ལ་གཉིས་ཏེ་བསྐྱེད་རིམ་དང་རྫོགས་རིམ་མོ། །བསྐྱེད་རིམ་ལ་གཉིས། དངོས་དང་ཡན་ལག་གོ །དང་པོ་ལ་ལྔ། བསྒོམ་པར་བྱ་བ། སྒོམ་པའི་དགོས་པ། སྒོམ་པའི་གནས། སྒོམ་པ་པོའི་གང་ཟག །ཇི་ལྟར་
བསྒོམ་པའི་ཚུལ་ལོ། །དང་པོ་ལ་རིགས་བསྡུས་པ་དང་རིགས་བྱེ་བྲག་པའི་དཀྱིལ་འཁོར་འཁོར་ལོ་ལམ་དུ་བྱེད་པའི་ཚུལ་གཉིས་ལས་འདིར་ནི་རིགས་བྱེ་བྲག་པ་མི་བསྐྱོད་དགྱེས་པ་རྡོ་རྗེ་ལྷ་དགུའི་དཀྱིལ་འཁོར་གྱི་རྣལ་འབྱོར་བསྟན་པར་བྱ་བའོ། །དེ་ལའང་གཙོ་བོའི་ཞལ་ཕྱག་དབང་གིས་དབྱེ་བ་བཞིར་འགྱུར་བ་ལས་སྐབས་འདིར་ཕྱག་བཅུ་དྲུག་པ་གཙོ་བོར་བྱས་པའི་དཀྱིལ་འཁོར་རོ། །གཉིས་པ་ནི། ཀུན་རྫོབ་པའི་རྣམ་རྟོག་གི་གཉེན་པོར་ལྷའི་རྣལ་འབྱོར་བསྒོམ་པས་མུན་པ་ལ་སྒྲོན མེ་བཏེགས་པ་ལྟར་གློ་བུར་འཁྲུལ་པ་སྐད་ཅིག་གིས་སེལ་ཞིང་། བརྟེན་པ་རྫོགས་རིམ་བདེ་བ་ཆེན་པོའི་ཡེ་ཤེས་འདྲེན་པའི་རྟེན་ཏུ་གྱུར་པས་མཆོག་གི་དངོས་གྲུབ་ཀྱི་རྒྱུར་འགྱུར་བ་ཡིན་ནོ། །གསུམ་པ་ནི། རྒྱུད་ལས། དུར་ཁྲོད་དང་ནི་ཆུ་འགྲམ་དང་། །ནགས་ཚལ་སྐྱེ་བོ་མེད་གྲོང་དུ། །སྙིང་རྗེ་ཆེན་པོ་ཀྱེ་རྡོ་རྗེ། །བསྙེན་བཀུར་བ་ལ་དངོས་གྲུབ་སྟེར། །ཞེས་གསུངས་པ་ལྟར་རམ། གོང་མས་བྱིན་གྱིས་བརླབས་ཤིང་ཡིད་དང་མཐུན་པའི་གནས་སུའོ། །བཞི་པ་ནི། སློབ་དཔོན་མཚན་ཉིད་དང་ལྡན་པ་ལས་འདི་ཉིད་ཀྱི་དབང་བསྐུར་བ་ཐོབ་ཅིང་དམ་ཚིག་དང་ལྡན་པས་སོ། །ལྔ་པ་ལ་ཉེར་བསྡོགས་དང་དངོས་སོ། །དང་པོ་ཡོ་བྱད་ཉེ་བར་བསྡོགས་པ་ནི། གནས་ཁང་ལེགས་པར་བརྒྱན་པའི་གུང་དུ་བརྟགས་པ་ཕྱི་མའི་ལེའུ་དྲུག་པ་ལས་གསུངས་པ་ལྟར་རམ། བྲིས་སྐུ་རབ་
གནས་དང་ལྡན་པ་བཀྲམ་པའི་མདུན་དུ་སྟེགས་ཀྱི་ཁར་མཎྜལ་དང་། མཆོད་པ་དང་གཏོར་མ་ཕྱག་ལེན་བཞིན་དུ་བཤམ། སྒྲུབ་པ་པོ་སྟན་བདེ་བར་རྡོ་རྗེ་སྐྱིལ་མོ་ཀྲུང་གིས་འདུག་པའི་མདུན་དུ་གཡོན་ནས་ཐོད་པ་མཚན་ལྡན་བདུད་རྩི་ལྔའི་རིལ་བུ་དང་ལྡན་པའི་ཆང་གིས་གང་བ། ཌཱ་མ་རུ། རྡོ་རྗེ། དྲིལ་བུ་རྣམས་དང་། བསངས་གཏོར་དང་། ཆུ་གཉིས་ཀྱི་དུང་ཆོས་ཆུ་གཙང་འོ་མ་འདྲེས་པས་གང་བ། བཟེད་ཞལ། མེ་ཏོག་གི་སྣོད་དང་བཅས་པ་བཤམ། གཡས་ནས་བརྩམས་སྟེ་ཉེར་སྤྱོད་ལྔ་ཡང་བཀོད་ཅིང་། གཞན་ཡང་དགོས་པའི་ཡོ་བྱད་ཚོགས་པར་བྱའོ། །གཉིས་པ་བསྒོམ་ཚུལ་དངོས་ལ་སྤྱི་དང་ཁྱད་པར་རོ། །སྤྱིར་མངལ་སྒོང་བརྫུས་སྐྱེས་གསུམ་གྱི་སྦྱོང་བྱེད་དམ་དབང་པོ་རབ་འབྲིང་ཐ་གསུམ་གྱི་ཁྱད་པར་རམ། ཡང་ན་གང་ཟག་བསྡུས་པ་ལ་དགའ་བས་རྡོ་རྗེ་རྣམ་པ་བཞིས་བསྐྱེད་པ་ལ་དབྱེ་བ་བཅུ་གཉིས། སྤྲོས་པ་ལ་དགའ་བས་ཆོ་ག་གསུམ་བསྐྱེད་ལ་དབྱེ་བ་བཅུ་དྲུག །ཤིན་ཏུ་སྤྲོས་པ་ལ་དགའ་བས་དོན་ཚན་བཞི་ལས་དབྱེ་སྟེ་བསྐྱེད་པ་གསུམ་ཡོད། །དོན་ཚན་བཞི་ནི། བསྐྱེད་རིམ། བཟླས་པ། རྫོགས་རིམ། ཐུན་མཚམས་ཀྱི་ཆོས་སོ། །དང་པོ་ལ་རྒྱུའི་ཧེ་རུ་ཀ་བསྐྱེད་པའི་ཆོས་བཅུ། འབྲས་བུའི་ཧེ་རུ་ཀ་བསྐྱེད་པའི་ཆོས་བཅུ། གཉིས་པ་ལ་དམིགས་པ་ཐ་དད་པ། གསུམ་པ་ལ་ཆགས་གྲོལ་གྱི་དབྱེ་བ། བཞི་པ་ལ་དག་པ། གཏོར་མ།
གླུ། སྨོན་ལམ་བཞིར་དབྱེ་བ་རྗེ་མར་རྔོག་གི་བཞེད་པ་ཐུན་མོང་མ་ཡིན་པའོ། །ཁྱད་པར་རྗེ་རང་བྱུང་ཞབས་དང་སྤྱན་སྔ་ཐམས་ཅད་མཁྱེན་པའི་ཕྱག་བཞེས་སུ་གོང་བཤད་གསུམ་ཀ་ཚང་བའི་ཉམས་ལེན་གྱི་ཆིངས་སུ་མཛད་པ་བཞིན་འདིར་ཡང་དེའི་རྗེས་སུ་འབྲང་སྟེ། ཐོག་མར་ཚོགས་པ་ཡོད་ན། ལས་ཀྱི་རྡོ་རྗེས་ཕྱག་འཚལ། མཎྜལ་སྤྱི་མཐུན་ཚོམ་བུ་བདུན་མའི་གཤམ་དུ། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ། ལྷའི་རྣལ་འབྱོར་གྱི་རིམ་པ་ལ་གནས་པར་བསྐུལ་བའི་ཆེད་དུ་འབུལ་བར་བགྱིའོ། །ཞེས་ཕུལ། ཡོ་ག་ས་མཱ་དྷིཀྲ་མ་ཧཱུྃ། ཞེས་རྣལ་འབྱོར་ལ་གནས་བར་བསྐུལ་ལོ། །དེ་ནས་ལུས་ཀྱི་མངོན་ཞེན་བཟློག་པའི་ཕྱིར་ཡན་ལག་དྲུག་ལྡན་གྱི་བསྐྱེད་རིམ་བསྒོམ་པ་དང་། ངག་གི་མངོན་ཞེན་བཟློག་པའི་ཕྱིར་བཟླས་པ་བྱ་བ་དང་། སེམས་ཀྱི་མངོན་ཞེན་བཟློག་པའི་ཕྱིར་རྫོགས་རིམ་བསྒོམ་པ། ཐུན་མཚམས་ཀྱི་བྱ་བའོ། །དང་པོ་ལ་གཉིས། སྦྱོར་བ་དང་། དངོས་སོ། །སྦྱོར་བ་ལའང་དགུ་སྟེ། དམ་ཚིག་བསྟེན་དང་གཏོར་མ་སྦྱིན། །མཆོད་པ་བྱིན་རླབས་སྐྱབས་སེམས་དང་། རྡོར་སེམས་བླ་མ་དག་པ་དང་། །ཚངས་གནས་ཡེ་ཚོགས་སྲུང་འཁོར་རོ། །ཞེས་པའི་དང་པོ་བདུད་རྩི་མྱང་བ་ནི། ཚུལ་བཞིན་བསྒྲུབ་པའི་རིལ་བུ་ཡོད་ན་ལྕེར་བཞག །མེད་ན་ནང་མཆོད་བྱིན་གྱིས་བརླབ་སྟེ། རང་
གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ། ཟླ་བའི་འོད་ལྟར་དཀར་བའི་ཧཱུྃ་ལས་འོད་ཟེར་དཀར་པོ་འཕྲོས། ལུས་ཐམས་ཅད་གང་། སྡིག་པ་དང་སྒྲིབ་པ་མ་ལུས་པ་སྦྱངས་ནས་སྟོང་པར་གྱུར། ངག་ཏུ་ཧཱུྃ་ཞེས་བརྗོད་པས། བདག་ཉིད་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པར་གསལ་བའི་སྤྱི་བོར་ཟླ་བའི་སྟེང་དུ་ༀ་དཀར་པོ། །ལྐོག་མར་པདྨ་འདབ་མ་བརྒྱད་པའི་སྟེང་དུ་ཨཱཿདམར་པོ། །སྙིང་གར་ཉི་མའི་སྟེང་དུ་ཧཱུྃ་སྔོན་པོས་མཚན་པར་གྱུར། ༀ་བཛྲ་ཨ་མྲྀ་ཏ་ཀུཎྜ་ལཱི་ཧ་ན་ཧ་ན་ཧཱུྃ་ཕཊ་ཅེས་བསངས། ༀ་སྭ་བྷཱ་ཝ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོ྅ཧཾ་གིས་སྦྱངས། སྟོང་པའི་ངང་ལས་ཡཾ་ལས་རླུང་། རཾ་ལས་མེ། ༀ་ཨཱཿཧཱུྃ་ལས་ཐོད་པའི་སྒྱེེད་བུ་གསུམ་གྱི་སྟེང་དུ། ཨ་ལས་ཐོད་པ་ཡངས་ཤིང་རྒྱ་ཆེ་བའི་ནང་དུ། ཧཱུྃ་བུཾ་ཨཾ་ཛཱིཾ་ཁཾ། ལཱཾ་མཱཾ་པཱཾ་ཏཱཾ་པཱཾ་ལས་སྐྱེས་པའི་བདུད་རྩི་ལྔ་དང་། ཤ་ལྔར་གྱུར། ཧ་ཧོཿཧྲཱིཿ ཞེས་བརྗོད་པས། ཐ་མལ་པའི་ཁ་དོག་དང་དྲི་དང་ནུས་པ་ཕྲོགས་
ཤིང་། རླུང་གཡོས། མེ་སྦར། བཅུད་རྣམས་བསྐོལ་བས། ཉི་མ་འཆར་ཁ་ལྟ་བུའི་མདོག་ཅན་གྱི་རླངས་པ་ཧཱུྃ་ལས་རྡོ་རྗེ་ཁ་ཊྭཱྃ་ག་འབར་བར་གྱུར་པ་ཞུ་ཞིང་། དེ་ཉིད་དུ་ལན་གསུམ་ལྷུང་བས་དྲི་མ་ཐམས་ཅད་དང་བྲལ་བ་ཤེལ་ལྟར་གསལ་བའི་དམ་ཚིག་གི་བདུད་རྩིས་གང་བའི་སྟེང་དུ། ༀ་ལས་བྱུང་བའི་ཟླ་བ་ཁ་ཆོད་ཀྱི་ཚུལ་དུ་གནས་པ་ལ་གཡས་སྐོར་དུ་ཨཱ་ལི་གཡོན་སྐོར་དུ་ཀཱ་ལི་ཡོངས་སུ་གྱུར་པའི་ༀ་ཨཱཿཧཱུྃ་ལས་འོད་ཟེར་འཕྲོས། ཕྱོགས་བཅུར་བཞུགས་པའི་རྡོ་རྗེ་འཛིན་པ་ཐམས་ཅད་ཀྱི་ཐུགས་ཀ་ནས། ཡེ་ཤེས་ཀྱི་བདུད་རྩི་བཀུག །ཟླ་བ་ཡི་གེ་གསུམ་དང་བཅས་པ་ཞུ་བས་བདུད་རྩིའི་རྒྱ་མཚོར་གྱུར། ཞེས་བྱིན་གྱིས་རླབས་པའི་བདུད་རྩི་གཡོན་པའི་མཐེབ་སྲིན་སྦྱར་བས་མྱང་། ལག་གཉིས་བསྣོལ་བས་རྡོར་དྲིལ་བླང་སྟེ། རྡོ་རྗེ་ཐབས་བདེ་ཆེན་གྱི་བདག་ཉིད་དུ་མོས་ལ། ༀ་མ་ཧཱ་བཛྲ་ཧཱུྃ། ཞེས་བརྗོད་ཅིང་གསོར། དྲིལ་བུ་ཤེས་རབ་སྟོང་ཉིད་ཀྱི་རང་བཞིན་དུ་མོས་ཏེ། ༀ་བཛྲ་གྷཎྚེ་ཨཱཿ ཞེས་པས་དཀྲོལ་ལ་པང་དུ་བཞག་གོ །གཉིས་པ་འབྱུང་པོ་ལ་
གཏོར་མ་སྦྱིན་པ་ནི། ཆུ་གཙང་དང་ནང་མཆོད་ཀྱིས་བྲན་ལ། བསངས་སྦྱང་། སྟོང་པའི་ངང་ལས། ཡཾ་ལས་རླུང་གི་དཀྱིལ་འཁོར་དུད་ཁ་གཞུའི་དབྱིབས་ལྟ་བུ་མཐའ་མ་གཉིས་བ་དན་གྱིས་མཚན་པ། དེའི་སྟེང་དུ་རཾ་ལས་མེའི་དཀྱིལ་འཁོར་དམར་པོ་གྲུ་གསུམ་པ། དེའི་སྟེང་དུ་ཨ་ལས་ཐོད་པ་ཕྱི་དཀར་ལ་ནང་དམར་བ། ནང་གི་དབུས་སུ་མིའི་ཤ་དང་བྱང་ཆུབ་ཀྱི་སེམས། ཤར་དུ་གླང་པོ་ཆེའི་ཤ་དང་དྲི་ཆེན། ལྷོར་རྟའི་ཤ་དང་དྲི་ཆུ། ནུབ་ཏུ་བ་ལང་གི་ཤ་དང་རཀྟ། བྱང་དུ་ཁྱིའི་ཤ་དང་རྒྱུངས་པ། དེ་རྣམས་ཀྱི་ཕྱིའི་རྣམ་པ་ༀ། སྲོག་ལ་ཨཱཿ དེའི་སྟེང་དུ་ཟླ་ཕྱེད་རྡོ་རྗེའི་རྩེ་མོ་ལ་ཧཱུྃ་གིས་མཚན་པ་མགོ་ཐུར་དུ་བལྟ་བ། རླུང་གིས་མེ་སྦར་ཐོད་པ་བསྲོས་ཤ་ལྔ་བདུད་རྩི་ལྔ་ཁོལ་བས། ༀ་དང་ཨཱཿལས་འོད་ཟེར་འཕྲོས་ཏེ་ཟླ་ཕྱེད་རྡོ་རྗེ་ཧཱུྃ་དང་བཅས་པ་ལས་ཡེ་ཤེས་ཀྱི་བདུད་རྩི་བབ། དམ་ཚིག་གི་བདུད་རྩི་དང་གཉིས་སུ་མེད་པར་འདྲེས་པར་གྱུར། ༀ་ཨཱཿཧཱུྃ། གསུམ། མཐར་ཟླ་
ཕྱེད་རྡོ་རྗེ་ཡང་ཐོད་པའི་ནང་དུ་ལྷུངས་ཏེ་ཞུ་བས་བདུད་རྩིའི་རང་བཞིན་དུ་གྱུར། པད་ཀོར་རྡོ་རྗེ་ཐལ་མོ་ཁ་ཕྱེ་བས། ༀ་ཨིནྡྲ། ཛ་མ། ཛ་ལ། ཛཀྑ། བྷཱུ་ད། བཧྣི། བཱ་ཨུ། རཀྑ། ཙནྡ། སཱུཛྫ། མཱ་ད། བཔྤ། ཏ་ལ། པཱ་ཏཱ་ལ། ཨཊྠ་སཔྤ་སྭཱ་ཧཱ། ཨི་དཾ། བ་ལིཾ། བྷུཉྫ། ཛིགྷ། པུལླ། དྷུཔྤ། མཱཾ་ས། བི་གྷ། ཨམྦྷ། སཔྤ། ཀཛྫ། སཔྤ། ས་བྷཱ། ཁཱནྟི། ཁུ་ནི། ཕེ་ཌ། གཱ་ད། ༀ་ཨ་ཀཱ་རོ་མུ་ཁཾ་སརྦ་དྷརྨ་ཎཱཾ་ཨཱ་དྱ་ནུཏྤནྣ་ཏྭ་ཏ། ༀ་ཨཱཿཧཱུྃ་ཕཊ་སྭཱ་ཧཱ། ལན་གསུམ་གྱིས་བསྔོ། གཡས་རྡོ་རྗེ་དང་བཅས་པའི་ཐལ་མོ་སྙིང་ཁར་བཞག །གཡོན་པས་དྲིལ་བུ་འཁྲོལ་བཞིན་པས། ལྷ་ཆེན་བརྒྱད་པོ་འཁོར་དང་བཅས། །ཀླུ་ཆེན་བརྒྱད་པོ་འཁོར་དང་བཅས། །འཇིག་རྟེན་སྐྱོང་བ་བརྒྱད་རྣམས་དང་། །གནོད་སྦྱིན་ཚོགས་རྣམས་མ་ལུས་དང་། །སྲིན་པོའི་ཚོགས་རྣམས་མ་ལུས་དང་། །འབྱུང་པོའི་ཚོགས་རྣམས་མ་ལུས་དང་། ཡི་དྭགས་ཚོགས་རྣམས་མ་ལུས་དང་། །ཤ་ཟའི་ཚོགས་རྣམས་མ་ལུས་དང་། །སྨྱོ་བྱེད་ཚོགས་རྣམས་མ་ལུས་
དང་། །རྗེད་བྱེད་ཚོགས་རྣམས་མ་ལུས་དང་། །མཁའ་འགྲོའི་ཚོགས་རྣམས་མ་ལུས་དང་། །དེ་ལ་སོགས་པ་འབྱུང་པོའི་ཚོགས། །མ་ལུས་འཁོར་དང་བཅས་པ་ཀུན། །འདིར་གཤེགས་བདག་ལ་དགོངས་སུ་གསོལ། །མཆོད་སྦྱིན་གཏོར་མ་འདི་སྣོམས་ལ། །རྣལ་འབྱོར་བདག་ཅག་འཁོར་བཅས་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་པ་བཟང་། ལོངས་སྤྱོད་རྒྱ་ཆེན་ཀུན་ཐོབ་ཅིང་། །དབང་དང་མངོན་སྤྱོད་དགྲ་སྡེ་འཇོམས། །དགར་དང་བསད་དང་དགུག་པ་དང་། །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་བདག་ལ་སྩོལ། །དམ་ཚིག་ཅན་གྱིས་བདག་ལ་སྲུངས། །དངོས་གྲུབ་ཀུན་གྱི་སྡོང་གྲོགས་མཛོད། །དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །མཁའ་འགྲོའི་བྱད་སོགས་མེད་པར་མཛོད། །འཇིག་རྟེན་བདེ་ཞིང་ལོ་ལེགས་
དང་། །འབྲུ་རྣམས་འཕེལ་ཞིང་ཆོས་འཕེལ་དང་། །བདེ་ལེགས་ཐམས་ཅད་འབྱུང་བ་དང་། །ཡིད་ལ་འདོད་པ་ཀུན་རྫོགས་མཛོད། །ཅེས་ཕྲིན་ལས་བཅོལ་ལ། གཏོར་མ་བཏང་ངོ་། །སླར་ཡང་དྲིལ་བུ་གསིལ་ཞིང་། ༀ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ལན་གསུམ། བདག་དང་གནས་དང་རྣལ་འབྱོར་བསྲུང་བར་གྱུར། །གསུམ་པ་མཆོད་པ་བྱིན་རླབས་ནི། ༀ་སརྦ་སཾ་ཤོ་དྷ་ནི་ཨཱཿཧཱུྃ་སྭཱ་ཧཱས་བསངས། སྭ་བྷཱ་ཝས་སྦྱངས། སྟོང་པའི་ངང་ལས། ཨ་ལས་ཐོད་པའི་སྣོད་ཡངས་ཤིང་རྒྱ་ཆེ་བ་རྣམས་ཀྱི་ནང་དུ། ཧཱུྃ་འོད་དུ་ཞུ་བ་ལས་བྱུང་བའི་ལྷ་རྫས་ལས་གྲུབ་པའི་བསང་གཏོར། མཆོད་ཡོན། །ཞབས་བསིལ། མེ་ཏོག །བདུག་སྤོས། སྣང་གསལ། དྲི། ཞལ་ཟས། རོལ་མོ་ལ་སོགས་པའི་མཆོད་པ་ཡོ་བྱད་རྣམས་རང་བཞིན་སྟོང་པ། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་སྐྱེད་ནུས་པ་གྱུར། །ༀ་སརྦ་སཾ་ཤོདྷ་ནི་ཨཱཿཧཱུྃ་སྭཱ་ཧཱ། ༀ་ཛཿཧཱུྃ་བཾ་ཧོཿཁཾ་རཾ་ཨཱཿཧཱུྃ་སྭཱ་ཧཱ། ༀ་ནཱི་རཱི་ཏི་ཧཱུྃ་ཁ་ཨཱཿཧཱུྃ་སྭཱ་ཧཱ། ༀ་
བཛྲ་པུཥྤེ་ཨཱཿཧཱུྃ་སྭཱ་ཧཱ། སོགས་དང་རོལ་མོ་བྱ་ཞིང་། ༀ་བཛྲ་གྷཎྚར་ཎི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་པྲ་ཙ་ལི་ཏེ་པྲཛྙཱ་པ་ར་མི་ཏཱ་མཱ་ད་སཾ་བྷཱ་ཝ་བཛྲ་དྷརྨ་ཧྲྀ་ད་ཡ་སནྟོ་ཥ་ནི་ཧཱུྃ་ཧཱུྃ་ཧཱུྃ་ཧོཿཨཱཿཁཾ་སྭཱ་ཧཱ། བཞི་པ་སྐྱབས་སུ་འགྲོ་བ་ནི། བདག་དང་ནམ་མཁའི་མཐའ་དང་མཉམ་པའི་སེམས་ཅན་ཐམས་ཅད་ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་གཅིག་ཏུ་བསྡུས་པའི་ངོ་བོར་གྱུར་པ། ཆོས་ཀྱི་ཕུང་པོ་སྟོང་ཕྲག་བརྒྱད་དུ་རྩ་བཞིའི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་མངའ་བདག །དྲིན་ཅན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ལ་སྐྱབས་སུ་མཆིའོ། །ཡི་དམ་དཀྱིལ་འཁོར་གྱི་ལྷ་ཚོགས་རྣམས་ལ༴ སངས་རྒྱས་ལ༴ ཆོས་ལ༴ དགེ་འདུན་ལ༴ དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས་ཡེ་ཤེས་ཀྱི་སྤྱན་དང་ལྡན་པ་རྣམས་ལ༴ བརྒྱའམ་
ཉེར་གཅིག་ལ་སོགས་པ་བྱ། སེམས་བསྐྱེད་པ་ནི། སེམས་ཅན་ཀུན་གྱི་དོན་གྱི་ཕྱིར། །བདག་ནི་ཧེ་རུ་ཀར་གྱུར་ཅིང་། །སེམས་ཅན་ཐམས་ཅད་ཧེ་རུ་ཀའི། །གོ་འཕང་མཆོག་ལ་འགོད་པར་བགྱི། །ལན་གསུམ། ལྔ་པ་རྡོར་སེམས་བསྒོམ་བཟླས་ནི་ནག་པོ་དམ་ཚིག་རྡོར་རྗེའི་བཞེད་པ་ལྟར། བདག་ཉིད་ཀྱི་སྤྱི་བོར་པད་ཟླ་ལ་ཧཱུྃ་ལས་རྡོར་སེམས་ཧེ་རུ་ཀ་སྐུ་མདོག་དཀར་པོ། གཡས་རྡོ་རྗེ་ཐུགས་ཀར་འཛིན་ཅིང་། གཡོན་དྲིལ་བུ་སྙེམས་པ་དཀུར་བརྟེན་པ། །དར་དང་རུས་པ་དང་། རིན་པོ་ཆེས་བརྒྱན་པ། ཞབས་སེམས་སྐྱིལ་གྱིས་བཞུགས་པའི་པང་དུ་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་ཅན་གྱིས་འཁྱུད་པ། གཉིས་ཀའི་གནས་གསུམ་དུ་ཡིག་འབྲུ་གསུམ་དང་ཁྱད་པར་ཡབ་ཀྱི་ཐུགས་ཀར་ཟླ་བ་ལ་ཧཱུྃ་གི་མཐར་ཡིག་བརྒྱ་དཀར་པོས་བསྐོར་བ། དེ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། དམ་ཚིག་པ་ལ་ཐིམ། ཛཿཧཱུྃ་བཾ་ཧོཿགཉིས་སུ་མེད་པར་གྱུར། སླར་ཡང་ཧཱུྃ་གི་འོད་ཀྱིས་དབང་
ལྷ་སྤྱན་དྲངས་ཏེ་དབང་བསྐུར། བདུད་རྩིས་སྐུ་གང་། ཆུ་ལྷག་སྤྱི་བོར་འཁྱིལ་པ་ལས་མི་བསྐྱོད་པས་དབུ་བརྒྱན་པར་གྱུར། བཅོམ་ལྡན་འདས་བདག་གི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། །ཞེས་གསོལ་བ་བཏབ་པས། ཐུགས་ཀའི་སྔགས་འཁོར་ལས་བདུད་རྩི་བབས། རྡོར་སེམས་ཀྱི་སྐུ་གང་སྦྱོར་མཚམས་ནས་ལུད་དེ། རང་གི་སྤྱི་བོ་ནས་ཞུགས་པས་སྡིག་སྒྲིབ་ཉེས་ལྷུང་རྣམ་སྨིན་གྱི་ཕུང་པོ་དང་བཅས་པ་དག་ནས་རང་ལུས་འོད་གསལ་བར་གྱུར། ༀ་བཛྲ་ཧེ་རུ་ཀ་ས་ཏྭ་ས་མ་ཡ། མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ། ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ ཤྲེ་ཡཿ ཀུ་རུ་ཧཱུྃ། ཧ་ཧ་ཧ་ཧ་ཧོཿ བྷ་ག་ཝཱ་ན། ཧེ་རུ་ཀ་མཱ་མེ་མུཉྩ་ཧེ་རུ་ཀོ་བྷ་བ་མ་ཧཱ་ས་མ་ཡ་ས ཏྭ་ཨཱཿཧཱུྃ་ཕཊ། ཞེས་ཅི་ནུས་དང་ཡང་སྙིང་བཟླ། མགོན་པོ་བདག་ནི་མི་ཤེས་རྨོངས་པ་ཡིས། །
དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཀྱེ། །ཐུགས་རྗེ་ཆེན་པོའི་བད ག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། །ཞེས་གསོལ་བ་བཏབ་པས། རྡོ་རྗེ་སེམས་དཔའི་ཞལ་ནས། རིགས་ཀྱི་བུ་ཁྱོད་ཀྱི་སྡིག་སྒྲིབ་ཐམས་ཅད་དག་གོ །ཞེས་གསུངས་ཤིང་མཐར་རྡོར་སེམས་འོད་དུ་ཞུ་ནས་རང་ཉིད་ལ་ཐིམ་པར་གྱུར། ༀ་ཨཱཿཧཱུྃ། གཉིས་སུ་མེད་པར་གྱུར་པར་མོས། དྲུག་པ་བླ་མ་དག་པའི་ཆོ་ག་ལ་རྔོག་པ་གོང་མ་རྣམས་ཀྱི་བཞེད་པས་གསལ་བ་གདབ་པ་དང་། ཚོགས་བསགས་གཉིས། དང་པོ་ནི། བླ་མ་མཉམ་མེད་སངས་རྒྱས་རིན་པོ་ཆེ། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱིས་། སྐུ་གསུང་ཐུགས་ཀྱི་རང་བཞིན་བྱིན་བརླབས་པ། །བཀའ་དྲིན་ཆེན་པོའི་ཞབས་ལ་ཕྱག་འཚལ་ལོ། །རིགས་ཀུན་གཙོ་བོ་དྲུག་པ་རྡོ་རྗེ་འཆང་། །དུས་གསུམ་རྒྱལ་བ་སྐྱེད་མཛད་རྣལ་འབྱོར་མ། །གསང་བའི་མཛོད་འཛིན་རྡོ་རྗེ་སྙིང་པོ་དང་། །གྲུབ་
པའི་སྤྱི་མེས་ས་ར་ཧ་པར་འདུད། །ཐེག་མཆོག་དབུ་མའི་སྲོལ་འབྱེད་ཀླུ་སྒྲུབ་དང་། །མུ་སྟེགས་རྒོལ་བ་ཚར་གཅོད་འཕགས་པ་ལྷ། །གནས་ལྔ་རིག་པའི་པཎ་ཆེན་ཟླ་བ་གྲགས། །རྣལ་འབྱོར་མཱ་ཏངྒི་པའི་ཞབས་ལ་འདུད། །ས་བཅུའི་དབང་ཕྱུག་རྗེ་བཙུན་ཏིལླི་པ། །མཁས་གྲུབ་ཀུན་གྱི་གཙུག་རྒྱན་ནཱ་རོ་པ། །ཕྱག་རྒྱ་ཆེ་བརྙེས་མངའ་བདག་མཻ་ཏྲི་པ། །སྒྲ་སྒྱུར་མར་པ་ལོ་ཙཱའི་ཞབས༴ །ཟུང་འཇུག་སྐུ་བརྙེས་ཆོས་སྐུ་རྡོ་རྗེའི་ཞབས། །དེ་སྲས་ཞེ་སྡང་རྡོ་རྗེ་སེང་གེ་སྒྲ། །ཀུན་དགའ་རྡོ་རྗེ་རྒྱ་སྒོམ་ཡེ་ཤེས་འོད། །གྲུབ་ཆེན་ཀརྨ་པཀྴིའི་ཞབས་ལ༴ བླ་མ་གཉན་རས་ཚུལ་ཁྲིམས་རིན་ཆེན་མཚན། །རང་བྱུང་རྡོ་རྗེ་ཆོས་ཀྱི་རྒྱལ་མཚན་མཆོག །ཡེ་ཤེས་དཔལ་བ་རིག་པའི་རལ་གྲི་དང་། །ཀུན་མཁྱེན་མཐོང་བ་དོན་ལྡན་ཞབས་ལ༴ །དཔལ་འབྱོར་དོན་གྲུབ་སྤྱན་སྔ་ཆོས་ཀྱི་གྲགས། །ཀརྨ་ཕྲིན་ལས་མི་བསྐྱོད་རྡོ་རྗེའི་ཞབས། །དཀོན་མཆོག་ཡན་ལག་གྲགས་པ་
དོན་གྲུབ་དང་། །རྣམ་རྒྱལ་དཔལ་བཟང་ཡབ་སྲས་ཞབས་ལ༴ བཀྲ་ཤིས་དཔལ་གྲུབ་མཁན་ཆེན་ཉི་མའི་མཚན། །ཕྲིན་ལས་ཞབས་དང་གོ་ཤྲཱི་དོན་ཡོད་སྙིང་། །ཆོས་ཀྱི་དོན་གྲུབ་བསྟན་པའི་ཉིན་མོར་བྱེད། །ཚེ་དབང་ཀུན་ཁྱབ་ཀརྨ་རཏྣར་འདུད། །བློ་གྲོས་མཐའ་ཡས་པདྨ་དབང་མཆོག་དང་། །བཀའ་བརྒྱུད་ནོར་བུའི་ཕྲེང་བ་ཐམས་ཅད་ལ། །སྒོ་གསུམ་གུས་པ་ཆེན་པོས་གསོལ་བཏབ་པས། །འདི་ནས་བཟུང་སྟེ་ཚེ་རབས་ཐམས་ཅད་དུ། །ཟབ་མོའི་ལམ་བཟང་རྒྱུད་སྡེ་དུ་མའི་བཅུད། །ཉམས་སུ་བླངས་ནས་ཡེ་ཤེས་སྐུ་འགྲུབ་ཤོག །ཕུན་ཚོགས་དགེ་ལེགས་ཀུན་སྩོལ་དཀོན་མཆོག་གསུམ། །རྒྱ་ཆེན་སྨོན་ལམ་ཡོངས་གྲུབ་ལ་བཏུད་དེ། །རྣམ་དག་མོས་པའི་བློ་ཡིས་རབ་དད་པས། །གཅིག་ཏུ་འདོད་པའི་དོན་རྣམས་གསོལ་བར་བགྱི། །བདག་ནི་སྐྱེ་ཞིང་སྐྱེ་བ་ཐམས་ཅད་དུ། །རིགས་གཟུགས་སྐལ་པ་མཆོག་དང་ལྡན་པ་དང་། །ཐེག་པ་བླ་ན་མེད་པ་ལེགས་འདོམས་
པའི། །དགེ་བའི་བཤེས་ཀྱིས་རྗེས་སུ་འཛིན་གྱུར་ཅིག །ཁྱད་པར་དཔལ་ལྡན་བླ་མ་མཆོག་གི་ནི། །སྐྱེས་པའི་རབས་ཀྱི་ཕྲེང་བ་ཀུན་ཏུ་ཡང་། །ཟབ་ཅིང་རྒྱ་ཆེའི་གསུང་ལས་སྐྱེས་གྱུར་ཏེ། །བླ་ན་མེད་པའི་བྱང་ཆུབ་མྱུར་ཐོབ་ཤོག །སངས་རྒྱས་ཀུན་གྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོར་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །གཉིས་པ་བསོད་ནམས་ཀྱི་ཚོགས་བསགས་པ་ནི། ཧེ་བཛྲ་ཞེས་བརྗོད་པས། རང་ཉིད་སྐད་ཅིག་གིས་དགྱེས་པ་རྡོ་རྗེ་སྐུ་མདོག་ནག་པོ་ཞལ་བརྒྱད། །ཕྱག་བཅུ་དྲུག །ཞབས་བཞི་པ། །རྒྱན་ཐམས་ཅད་ཀྱིས་བརྒྱན་ཅིང་ཡུམ་བདག་མེད་མ་དང་མཉམ་པར་སྦྱོར་བའི་སྐུར་གྱུར་པའི་སྙིང་གར་ཧྲཱི་ལས་པདྨ་དམར་པོ་འདབ་མ་བརྒྱད་པའི་དབུས་སུ། །རལ་ལས་ཉི་མའི་དཀྱིལ་འཁོར་དམར་པོ། དེའི་དབུས་སུ་ཧཱུྃ་སྔོན་པོ་
འོད་ཟེར་ལྔ་དང་བཅས་པ། ཧཱུྃ་གི་འོད་ཟེར་གྱིས་བཅོམ་ལྡན་འདས་འཁོར་གྱི་ལྷ་མོས་མཆོད་པ་བྱེད་བཞིན་པ་དང་བཅས་པའི་དཀྱིལ་འཁོར་གྱི་ཤར་ཁྱམས་ན་རང་གི་བླ་མ་བཞུགས་པ་མདུན་གྱི་ནམ་མཁར་སྤྱན་དྲངས། །སྙིང་གའི་ས་བོན་ལས་འཕྲོས་པའི་གཽ་རཱི་ལ་སོགས་པའི་ལྷ་མོ་བརྒྱད་ཀྱིས་མཆོད་པར་གྱུར། དཀར་མོ་རི་དྭགས་མཚན་མ་འཛིན། །ཆོམ་རྐུན་བདུད་ལས་རྒྱལ་བའི་སྣོད། །རོ་ལངས་མ་ནི་ཆུ་ལག་མ། །གྷསྨརཱི་ནི་སྨན་འཛིན་ཞིང་། པུཀྐ་སཱི་ནི་རྡོ་རྗེའི་ལག །དེ་བཞིན་རི་ཁྲོད་མ་རོ་འཛིན། །གདོལ་བ་མོ་ནི་ཅང་ཏེའུ་བརྡུང་། །འདི་རྣམས་ཀྱིས་ནི་གཙོ་བོ་མཆོད། །འདོད་ཆགས་ཆེན་པོའི་རྗེས་ཆགས་པས། །གཡུང་མོས་སྐུ་ལ་འཁྱུད་པ་ཉིད། །ༀ་གཽ་རཱི་གཾ་ཨཱཿཧཱུྃ་སྭཱ་ཧཱ། ༀ་ཙཽ་རཱི་ཙཾ་ཨཱཿཧཱུྃ་སྭཱ་ཧཱ། ༀ་བཻ་ཏཱ་ལཱི་པཾ་ཨཱཿཧཱུྃ་སྭཱ་ཧཱ། ༀ་གྷསྨ་རཱི་གྷཾ་ཨཱཿཧཱུྃ་སྭཱ་ཧཱ། ༀ་པུཀྐ་སཱི་པཾ་ཨཱཿཧཱུྃ་སྭཱ་ཧཱ། ༀ་ཤ་པ་རཱི་ཤཾ་ཨཱཿཧཱུྃ་སྭཱ་ཧཱ། ༀ་ཙཎྜ་ལཱི་ཙཾ་ཨཱཿཧཱུྃ་སྭཱ་ཧཱ། ༀ་ཌོམྦི་ནཱི་ཌཾ་ཨཱཿཧཱུྃ་
སྭཱ་ཧཱ། ཞེས་པའི་སྔགས་རྣམས་ལ་ཐལ་མོ་སྦྱར་བ་སྔོན་ཏུ་འགྲོ་བས། ལྷ་མོ་རྣམས་ཀྱིས་རིམ་བཞིན་མཆོད་པར་བལྟས་ལ། །མཐར་སེ་གོལ་གཏོགས་སོ། །དེ་ནས་སྡིག་པ་བཤགས་པ་ལ་སོགས་བྱ་སྟེ། ཇི་སྲིད་ཐོག་མ་མེད་པའི་འཁོར་བར་ཕྱིན་ཅི་ལོག་གི་རྟོག་པས་བསགས་པའི་སྡིག་པའི་ལས་བདག་གིས་བགྱིས་པ་དེ་དག་ཐམས་ཅད་བཅོམ་ལྡན་འདས་ཀྱི་སྤྱན་སྔར་བཤགས་ཤིང་ཕྱིས་བསྡམས་པར་བགྱིའོ། །སེམས་ཅན་ཐམས་ཅད་ཀྱི་དགེ་བ་ཇི་སྙེད་པ་ཐམས་ཅད་ལ་རྗེས་སུ་ཡི་རང་ཞིང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཁམས་གསུམ་ཐམས་ཅད་བདེ་བ་ཆེན་པོའི་རྣམ་པར་རོ་གཅིག་པའི་སངས་རྒྱས་ཀྱེའི་རྡོ་རྗེ་དང་། དེས་གསུངས་པའི་སྔགས་དང་། ཕྱག་རྒྱ་དང་། དཀྱིལ་འཁོར་ལ་སོགས་པའི་ཆོས་དང་། དེའི་འཁོར་ན་གནས་པའི་ལྷ་མོའི་ཚོགས་ལ་བདག་སྐྱབས་སུ་མཆི་བར་བགྱིའོ། །སེམས་ཅན་ཐམས་ཅད་ཀྱི་དོན་བྱ་བའི་ཕྱིར་རྣམ་པ་
ཐམས་ཅད་ཀྱི་མཆོག་དང་ལྡན་པའི་སྟོང་པ་ཉིད་ཀྱི་མཚན་ཉིད་ཀྱི་བྱང་ཆུབ་ཀྱི་སེམས་ཡང་དག་པར་བསྟེན་པར་བགྱིའོ། །ཞེས་དང་། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་བཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་སྐྱབས་སུ་མཆི། །བྱང་ཆུབ་སེམས་སུ་འདི་བགྱིས་ཏེ། །བདག་དང་གཞན་དོན་རབ་སྒྲུབ་ཕྱིར། །བདག་གིས་བྱང་ཆུབ་སེམས་མཆོག་བསྐྱེད། །ཨཻ་མའོ་སེམས་ཅན་ཀུན་འགྲོན་གཉེར། །བྱང་ཆུབ་སྤྱོད་མཆོག་མཛད་བཞིན་སྤྱད། །འགྲོ་ལ་ཕན་ཕྱིར་སངས་རྒྱས་ཤོག །སངས་རྒྱས་སྲས་བཅས་ཐམས་ཅད་དང་། །དཔའ་བོ་རྣལ་འབྱོར་མ་རྣམས་ཀུན། །བདག་ལ་དགོངས་པར་མཛད་དུ་གསོལ། །བདག་མིང་འདི་ཞེས་བགྱི་བས་ནི། །དུས་འདི་ནས་ནི་བཟུང་ནས་སུ། །བྱང་ཆུབ་སྙིང་པོ་མཆིས་ཀྱི་བར། ཇི་ལྟར་དུས་
གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །སངས་རྒྱས་རྣལ་འབྱོར་སྡོམ་པ་ལ། སྡོམ་པ་ཡི་ནི་ཚུལ་ཁྲིམས་དང་། །དགེ་བའི་ཆོས་ནི་སྡུད་པ་དང་། །སེམས་ཅན་དོན་བྱེད་ཚུལ་ཁྲིམས་གསུམ། །བདག་གིས་བརྟན་པོར་བཟུང་བར་བགྱི། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །དེང་ནས་བརྩམས་ཏེ་བཟུང་བར་བགྱི། །ནམ་དུ་ཡང་ནི་མི་སྤང་ངོ་། །རྡོ་རྗེའི་རིགས་མཆོག་ཆེན་པོ་ལ། །རྡོ་རྗེ་དྲིལ་བུའི་ཕྱག་རྒྱ་ཡང་། །ཡང་དག་ཉིད་དུ་བཟུང་བར་བགྱི། །སློབ་དཔོན་དག་ཀྱང་བཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་དུས་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་ནང་གསང་བ་ཐེག་པ་
གསུམ། །དམ་པའི་ཆོས་ནི་གཟུང་བར་བགྱི། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པ་ནི། །ཡང་དག་ཉིད་དུ་བཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །བླ་ན་མེད་པའི་བྱང་ཆུབ་སེམས། །དམ་པ་བདག་གིས་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །བདག་གིས་སྡོམ་པ་མ་ལུས་བཟུང་། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་འདས་ལ་འགོད། ཧེ་བཛྲ་མཎྜལ་མུཿ ཚོགས་ཞིང་དེ་རྣམས་རང་བཞིན་གྱི་གནས་སུ་གཤེགས་པར་གྱུར། ཞེས་བསྒོམ། །བདུན་པ་ཚངས་པའི་གནས་བཞི་བསྒོམ་པ་ནི། སེམས་ཅན་ཐམས་ཅད་བདེ་བ་དང་བདེ་བའི་རྒྱུ་དང་ལྡན་པར་གྱུར་ཅིག །སོགས་ནས། ཉེ་རིང་ཆགས་སྡོང་གཉིས་དང་བྲལ་བའི་བཏང་སྙོམས་ཆེན་པོ་ལ་གནས་པར་གྱུར་ཅིག །ཅེས་པའི་དོན་དྲན་པར་བྱས་ལ་ནན་ཏན་ཏུ་བསྒོམ་མོ། །བརྒྱད་པ་ཡེ་
ཤེས་ཀྱི་ཚོགས་བསགས་པ་ནི། རང་གི་སྙིང་གའི་ཧཱུྃ་ལས་འོད་འཕྲོས་པས། སྣོད་ཀྱི་འཇིག་རྟེན་བཅུད་ཀྱི་སེམས་ཅན་ལ་བསྡུ། དེ་རྣམས་རང་གི་ལུས་ལ་ཐིམ་ཞིང་། ལུས་ཀྱང་སྙིང་གའི་པདྨ་འདབ་བརྒྱད་ལ་ཐིམ་སྟེ་རིམ་པ་བཞིན་ཏུ་ཉི་མ་དང་། ཧཱུྃ་ཡང་ཞབས་ཀྱུ་ཁོག་པ་ཟླ་ཚེས་ཐིག་ལེའི་བར་དུ་འདུས་ནས། ནཱ་དའི་རྣམ་པར་གནས་པ་ལས་སྟོང་ཉིད་ཀྱི་རང་སྒྲ་བྱུང་བར་གྱུར། །ༀ་ཤུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སྟོང་ཉིད་ཀྱི་དོན་ངེས་པར་བྱས་ནས་མཉམ་པར་བཞག་གོ །འདི་ནི་རྡོ་རྗེ་བཞི་ལས་སྟོང་ཉིད་བྱང་ཆུབ་ཅེས་བྱའོ། །དགུ་པ་སྲུང་འཁོར་ནི་སློབ་དཔོན་མཚོ་སྐྱེས་སོགས་དང་རྔོག་ལུགས་པ་རྣམས་རྩ་རྒྱུད་དངོས་བསྟན་ལྟར་བསྡུས་པ་བཞེད་ཀྱང་། རང་ལུགས་པ་དང་རང་བྱུང་ཡབ་སྲས་རྣམས་ཀྱིས་བཤད་རྒྱུད་ནས་ཁ་སྐོང་བའི་ལུགས་སུ་མཛད་པ་ལྟར་སྤྲོ་ན། སྟོང་པའི་ངང་ལས། ར་ལས་ཉི་མའི་དཀྱིལ་འཁོར་གྱི་སྟེང་དུ། ཧཱུྃ་ལས་སྣ་ཚོགས་རྡོ་རྗེ། ལྟེ་བ་ལ་ཧཱུྃ་གིས་མཚན་པ། དེའི་འོད་ཟེར་གྱི་རྩེ་མོ་ལས། རྡོ་རྗེ་རྒྱ་གྲམ་དཔག་ཏུ་མེད་པ་སྤྲོས་
པས། འོག་ཏུ་རྡོ་རྗེའི་ས་གཞི། བར་སྣང་དུ་རྡོ་རྗེའི་ར་བ་དང་དྲ་བ། སྟེང་དུ་རྡོ་རྗེའི་གུར་ཡངས་ཤིང་རྒྱ་ཆེ་བ། །འོག་གཞིའི་ཉི་མ་ལས་འོད་ཟེར་ཕྱི་རོལ་ཏུ་འཕྲོས་པས་མེ་རི་དང་། རྡོ་རྗེ་རྒྱ་གྲམ་ལས་རྡོ་རྗེ་རྐྱང་པ་དཔག་ཏུ་མེད་པ་སྤྲོས་པས། །རྡོ་རྗེའི་དྲ་མིག་རྣམས་ཀྱང་བཀག་པར་གྱུར། །ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་བརྟན་པར་བྱིན་གྱིས་བརླབ་བོ། །དེའི་དབུས་སུ་བྲུཾ་ལས་འཁོར་ལོ་སེར་པོ་རྩིབས་བཅུ་རྩེ་མོ་རྣོ་དབལ་དང་ལྡན་པ་གཡས་སྐོར་དུ་མྱུར་བར་མི་མངོན་པར་འཁོར་ཞིང་རབ་ཏུ་མི་གཡོ་བའི་དབུས་དང་རྩིབས་རྣམས་ལ། པདྨ་དང་ཉི་མའི་དཀྱིལ་འཁོར་གྱི་སྟེང་དུ། །ཧཱུྃ་རེ་རེ་ཡོངས་སུ་གྱུར་པ་ལས། དབུས་སུ་རང་ཉིད་ཧཱུྃ་མཛད་སྐུ་མདོག་མཐིང་ནག་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱས་རྡོ་རྗེ་དང་དྲིལ་བུ་ཐུགས་ཀར་བསྣོལ་ཐབས་སུ་འཛིན་པ། མི་བསྐྱོད་པའི་དབུ་རྒྱན་ཅན། །ཤར་དུ་གཤིན་རྗེ་གཤེད་ནག་པོ་གཡས་ཐོ་བ་
བསྣམས་པ། རྣམ་སྣང་གི་དབུ་རྒྱན་ཅན། ལྷོར་གཞན་གྱིས་མི་ཐུབ་པ་དཀར་པོ་རྡོ་རྗེས་མཚན་པའི་དབྱུག་པ་དཀར་པོ་བསྣམས་པ། མི་བསྐྱོད་པའི་དབུ་རྒྱན་ཅན། ནུབ་ཏུ་རྟ་མགྲིན་དམར་པོ་ཆུ་སྐྱེས་དམར་པོ་བསྣམས་པ། འོད་དཔག་མེད་ཀྱི་དབུ་རྒྱན་ཅན། བྱང་དུ་བདུད་རྩི་འཁྱིལ་བ་སྔོན་པོ་རྡོ་རྗེ་བསྣམས་པ། དོན་གྲུབ་ཀྱི་དབུ་རྒྱན་ཅན། ཤར་ལྷོར་འདོད་པའི་རྒྱལ་པོ་ལྕགས་ཀྱུ་བསྣམས་པ། ལྷོ་ནུབ་ཏུ་དབྱུག་སྔོན་ཅན་དབྱུག་པ་སྔོན་པོ་བསྣམས་པ། །ནུབ་བྱང་དུ་སྟོབས་པོ་ཆེ་རྩེ་གསུམ་བསྣམས་པ། བྱང་ཤར་དུ་མི་གཡོ་བ་རལ་གྲི་བསྣམས་པ། །བཞི་ཀ་ཡང་རོལ་པའི་ཁྲོ་བོ་སྐུ་མདོག་སྔོན་པོ་མི་བསྐྱོད་པའི་དབུ་རྒྱན་ཅན། སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་འཁོར་ལོ་བསྣམས་པ། རྣམ་སྣང་གི་དབུ་རྒྱན་ཅན། །འོག་ཏུ་གནོད་མཛེས་ནག་པོ་གཏུམ་ཤིང་འཛིན་པ། །མི་བསྐྱོད་པའི་དབུ་བརྒྱན་ཅན། །ཐམས་ཅད་ཀྱང་ཞལ་གཅིག་
ཕྱག་གཉིས་པ། གཡས་རང་རང་གི་ཕྱག་མཚན་ཕྱག་ཐབས་སུ་བསྣམས་ཤིང་། གཡོན་ཐུགས་ཀར་སྦྲུལ་གྱི་ཞགས་པ་དང་བཅས་པའི་སྡིགས་མཛུབ་མཛད་པ། ཞབས་གཡོན་བརྐྱང་བའི་སྟབས་ཀྱིས་བཞུགས་པ། །དབུ་སྐྲ་དང་སྨིན་མ་སྨ་ར་དམར་སེར་འབར་བ། སྤྱན་གསུམ་དམར་ལ་ཟླུམ་ཞིང་ཞལ་མཆེ་བ་གཙིགས་པ། སྐུ་སྦོམ་ཞིང་ཐུང་ལ་གསུས་པ་འཕྱང་བ། །སྤྲུལ་གྱི་ཆུན་པོ་བརྒྱད་ཀྱིས་བརྒྱན་པ། སྟག་གི་པགས་པའི་ཤམ་ཐབས་ཅན། །རོལ་པའི་ཁྲོ་བོ་བཞི་ནི། ལྷའི་ན་བཟའ་དང་རིན་པོ་ཆེའི་རྒྱན་གྱིས་བརྒྱན་པ། བསྐལ་པའི་མེ་ལྟར་འབར་བའི་གཟི་བརྗིད་མངའ་བ། སྤྲུལ་པའི་སྤྲིན་དུ་མས་བགེགས་ཀྱི་ཚོགས་རྣམས་བརླག་པར་བྱེད་པའོ། །གཙོ་འཁོར་ཐམས་ཅད་ཀྱི་གནས་གསུམ་འབྲུ་གསུམ་གྱིས་མཚན་པ། །དེ་ལས་འོད་འཕྲོས། བསྒོམས་པ་དང་འདྲ་བའི་ཡེ་ཤེས་ཀྱི་སྲུང་འཁོར་རྟེན་དང་བརྟེན་པར་བཅས་པ་སྤྱན་དྲངས། །བཛྲ་ས་མཱ་ཛཿ
ༀ་བཛྲ་མ་ཧཱ་ཀྲོ་དྷ་རཱ་ཛ་ས་པཱ་རི་ཝཱ་ར་ཛྲཿཧཱུྃ་སོགས་ཆུ་གཉིས་ཉེར་སྤྱོད་རོལ་མོ་བཅས་པས་མཆོད། ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། བསྲུང་བྱ་རྣམས་འཁོར་ལོའི་ལྟེ་བར་དམིགས། སྔགས་བཟླས་པའི་ཚེ་གནོད་བྱེད་ཉེ་བ་རྣམས་རྩིབས་ཀྱིས་གཏུགས། སྤྲུལ་པའི་ཁྲོ་བོའི་ཚོགས་ཀྱིས་རྒྱང་རིང་དུ་གནས་པའི་བགེགས་བཅོམ་པར་བསྒོམ་ལ། ན་མཿས་མནྟ་བུདྡྷ་ནཱཾ། ན་མཿས་མནྟ་དྷ རྨཱ་ཎཱཾ། ན་མཿས་མནྟ་སཾ་གྷཱ་ནཱཾ། ༀ་སི་ཏཱ་ཏཱ་ཡ་ཏྲེ། ༀ་བི་མ་ལ། ༀ་ཤང་ཀ་ར། ༀ་པྲ་ཏྱངྒི་ར། བཛྲ་ཨུཥྞིཥ་ཙཀྲ་བརྟི། སརྦ་ཡནྟྲ་མནྟྲ། མཱུ་ལ་ཀརྨ། བནྡྷ་ནཾ། ཏཱ་ཌ་ནཾ། ཀཱི་ལ་ནཱཾ་ཐཱ། མ་མ་ཀྲྀ་ཏ་ཡེ་ན་ཀེན་ཙིཏ་ཀྲྀ་ཏནྟ་ཏྲ། སརྦནྟུ། ཚིནྡྷ་ཚིནྡྷ། བྷིནྡ་བྷིནྡ། ཙི་རི་ཙི་རི། གི་རི་གི་རི། མཱ་ར་མཱ་ར། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཅེས་ཕྱིར་བཟློག་ལ་སོགས་པའི་དུས་སུ་ཅི་འགྲུབ་བཟླའོ། །དེ་རྣམས་ཀྱིས་སྦྱོར་བའི་ཆོས་དགུ་གྲུབ་བོ། ༈ །གཉིས་པ་དངོས་གཞི་ལ་དྲུག །ཕོ་བྲང་བསྐྱེད་པ་རྣམ་པར་སྣང་མཛད་ཀྱི་ཡན་ལག །རྗེས་སུ་ཆགས་པ་རྡོ་རྗེ་འཆང་གི་ཡན་ལག །དབང་བསྐུར་བ་མི་བསྐྱོད་པའི་ཡན་ལག །བདུད་
རྩི་མྱང་བ་འོད་དཔག་མེད་ཀྱི་ཡན་ལག །མཆོད་པ་དོན་ཡོད་གྲུབ་པའི་ཡན་ལག །བསྟོད་པ་རིན་ཆེན་འབྱུང་ལྡན་གྱི་ཡན་ལག་གོ །དེ་ལ་ཡན་ལག་དང་པོ་ནི། སྲུང་བའི་འཁོར་ལོའི་དབུས་སུ། ཨེ་ལས་ཆོས་ཀྱི་འབྱུང་གནས་དཀར་པོ་རྩ་བ་ཕྲ་བ་ཐུར་དུ་ཟུག་པ། ཁ་གདེངས་ཆེ་བ་གྱེན་ཏུ་བསྟན་པའི་ནང་དུ། །པཾ་ལས་སྣ་ཚོགས་པདྨ་དང་། ཧཱུྃ་ལས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཕྱོགས་ཀྱི་མདོག་ཅན་གྱི་ལྟེ་བར། ལཾ་ལས་སའི་དཀྱིལ་འཁོར་གྲུབ་བཞི་སེར་པོ། །དེའི་སྟེང་དུ་བཾ་ལས་ཆུའི་དཀྱིལ་འཁོར་ཟླུམ་པོ་དཀར་པོ། །དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་དམར་པོ། །དེའི་སྟེང་དུ་ཡཾ་ལས་རླུང་གི་དཀྱིལ་འཁོར་ཟླ་གམ་དུད་ཁ། དེའི་སྟེང་དུ་བྲུཾ་ལས་འཁོར་ལོ་དཀར་པོ་རྩིབས་སུམ་ཅུ་རྩ་གཉིས་པའི་དབུས་སུ། ནམ་མཁའི་ནཱ་ད་ཆ་གཅིག་ཞུགས་པས། དེ་ཐམས་ཅད་འདྲེས་པ་ལས་བྱུང་བ་རིན་པོ་ཆེ་སྣ་ཚོགས་ལས་གྲུབ་པའི་ཁང་པ་བརྩེགས་པ་གྲུ་བཞི་སྒོ་བཞི་པ། ཕྱི་ནས་དཀར་སེར་
དམར་ལྗང་སྔོ་བའི་རྩིག་པ་རིམ་པ་ལྔ་དང་ལྡན་ཞིང་། རིན་པོ་ཆེའི་ཕ་གུ་དང་དོ་ཤལ་དང་དོ་ཤལ་ཕྱེད་པ་འཕྱང་བ། །ཤར་བུ་དང་མདའ་ཡབ་ཀྱིས་མཛེས་པ། ཀ་བ་བཞི་བཞིས་བཏེགས་པའི་རྟ་བབས་བང་རིམ་བཞི་དང་ལྡན་པའི་སྟེང་དུ། པདྨ་ལ་གནས་པའི་ཆོས་ཀྱི་འཁོར་ལོ་དང་། གདུགས་དང་རི་དྭགས་དང་བཅས་པ། འདོད་ཡོན་གྱི་སྣམ་བུ་ད མར་པོ་ལ་ལྷ་མོ་བཅུ་དྲུག་དཀྱིལ་འཁོར་པ་ལ་མཆོད་པའི་ཚུལ་གྱིས་འཁོད་ཅིང་། སྒོ་ཁྱུད་ཀྱི་མཚམས་སུ་ཟླ་ཕྱེད་རྡོ་རྗེས་སྤྲས་པ། ལྷ་རྣམས་ཀྱི་ཤར་དཀར། ལྷོ་སེར། ནུབ་དམར། བྱང་ལྗང་བ། ཀ་བ་བརྒྱད་དང་ལྡན་ཞིང་། རྡོ་རྗེའི་གདུང་ཉེ་བར་སྤྲས་པ། ཐོག་ཕྱུར་བུར་གྱུར་པའི་རྩེ་མོར་རྡོ་རྗེ་རིན་པོ་ཆེའི་ཏོག་གིས་སྤུད་པ། གཞན་ཡང་གོས་དང་། མེ་ཏོག་གི་ཕྲེང་བ་དང་། རྔ་ཡབ་དཀར་པོ་དང་། གདུགས་དང་། བ་དན་ཁ་དོག་སྣ་ཚོགས་པ་རླུང་གིས་བསྐྱོད་པ་དང་དྲིལ་བུ་འཁྲོལ་བ་ལ་སོགས་པས་
བརྒྱན་པའི་དབུས་སུ། པདྨ་དམར་པོ་འདབ་མ་བརྒྱད་པ་གེ་སར་དང་བཅས་པ། གཞལ་ཡས་ཁང་གི་ཕྱི་རོལ་རྡོ་རྗེའི་ཕྲེང་བས་བསྐོར་བའི་ནང་དུ། ཤར་དུ་གཏུམ་དྲག །ལྷོར་འཇིགས་སུ་རུང་བ། །ནུབ་ཏུ་འབར་བ་འཁྲུགས་པ། བྱང་དུ་ཚང་ཚིང་འཁྲིགས་པ། བྱང་ཤར་དུ་ཧ་ཧ་རྒོད་པ། ཤར་ལྷོར་དཔལ་གྱི་ནགས། ལྷོ་ནུབ་ཏུ་འཇིགས་པའི་མུན་པ། ནུབ་བྱང་དུ་ཀི་ལི་ཀི་ལི་སྒྲོགས་པ། དུར་ཁྲོད་ཆེན་པོ་དེ་རྣམས་སུ་ཤཱིཪྵ་ལ་སོགས་པའི་ཤིང་ཆེན་པོ་བརྒྱད་ཀྱི་དྲུང་བརྒྱ་བྱིན་ལ་སོགས་པའི་ཕྱོགས་སྐྱོང་བརྒྱད་ཡུམ་དང་བཅས་པ། །ལྷའི་དགེ་འདུན་ལ་སོགས་པའི་ཞིང་སྐྱོང་བརྒྱད་ཕྱོགས་སྐྱོང་གི་བཞོན་པའི་གདོང་ཅན་ཤིང་ལོའི་གསེབ་ནས་ལུས་སྟོད་ཕྱུང་བ། མཚོ་ཆེན་པོ་བརྒྱད་ལ་གནས་པའི་ནོར་རྒྱས་སེར་པོ་ལ་སོགས་ཀླུ་ཆེན་བརྒྱད་ཡུམ་དང་བཅས་པས་ཐལ་མོ་སྦྱར་བའི་སྟེང་དུ་སྒྲོགས་བྱེད་སོགས་སྤྲིན་བརྒྱད་ལྡིང་བ། གཞན་ཡང་མེ་དང་རི་བོ་མཆོད་རྟེན་རྣལ་འབྱོར་
གྱི་དབང་ཕྱུག་བརྒྱད་བརྒྱད་གནས་ཤིང་། དུར་ཁྲོད་ཀྱི་བཀོད་པ་འཇིགས་སུ་རུང་བ་དང་ལྡན་པའི་གཞལ་ཡས་ཁང་གི་དབུས་ཀྱི་པདྨའི་ལྟེ་བར་ཚངས་པ། དབང་པོ། །ཉེ་དབང་། དྲག་པོ་སྟེ་བདུད་བཞིའི་གདན། འདབ་མ་བརྒྱད་ལ། ཤར་དུ་ཚངས་པ་སེར་པོ། ལྷོར་དབང་པོ་དཀར་པོ། །ནུབ་ཏུ་ཉེ་དབང་དམར་པོ། །བྱང་དུ་དྲག་པོ་སྔོན་པོ། །བྱང་ཤར་དུ་གཤིན་རྗེ་ནག་པོ། །ཤར་ལྷོར་ནོར་བདག་སེར་པོ། །ལྷོ་ནུབ་ཏུ་སྲིན་པོ་སྔོ་ནག །ནུབ་བྱང་དུ་ཐག་བཟང་རིས་ལྗང་གུ་རྣམས་གན་རྐྱལ་དུ་གནས་པའི་སྙིང་གར་ཉི་མའི་གདན་དང་བཅས་པའོ། །ༀ་སརྦ་ཏ་ཐཱ་ག་ཏ་ཨ་ནཱི་ལ་ཡ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡན་ལག་གཉིས་པ་ལ་གསུམ། མངོན་བྱང་ལྔས་གཙོ་བོ་རྒྱུ་རྡོར་འཛིན་སྐྱེད་པ། །མཁའ་གསང་བྱིན་གྱིས་བརླབ་སྟེ་སྙོམས་འཇུག་བྱ་བ། སྔགས་ཀྱིས་རྒྱས་གདབ་པའོ། །དང་པོ་ནི། དབུས་ཀྱི་གདན་ལ། ཨ་ཨཱ། ཨི་ཨཱི། ཨུ་ཨཱུ། རྀ་རཱྀ། ལྀ་ལཱྀ། ཨེ་ཨཻ། ཨོ་ཨཽ། ཨཾ་ཨཿ ཉིས་འགྱུར་ལས་ཟླ་བའི་དཀྱིལ་
འཁོར་མངོན་པར་བྱང་ཆུབ་པ་དང་པོ་དང་། མེ་ལོང་ལྟ་བུའི་ཡེ་ཤེས། དེའི་སྟེང་དུ། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧཀྵཿ ཡ་ར་ལ་ཌ་ཌྷ་ཎ། ཉིས་འགྱུར་ལས་ཉི་མའི་དཀྱིལ་འཁོར་མངོན་བྱང་གཉིས་པ་དང་། མཉམ་པ་ཉིད་ཀྱི་ཡེ་ཤེས། དེ་གཉིས་ཀྱི་དབུས་སུ་ཧཱུྃ་དང་ཨཾ་ལས་རྡོ་རྗེ་ཧཱུྃ་གིས་མཚན་པ་དང་། གྲི་གུག་ཨཾ་གིས་མཚན་པ་མངོན་བྱང་གསུམ་པ་དང་། སོ་སོར་ཀུན་ཏུ་རྟོག་པའི་ཡེ་ཤེས། དེ་དག་ལས་འོད་ཟེར་འཕྲོས་ཤིང་། སླར་འདུས་པས་ཉི་ཟླ་ས་བོན་ཕྱག་མཚན་རྣམས་འདྲེས་པ་མངོན་བྱང་བཞི་པ་དང་། བྱ་བ་ནན་ཏན་གྱི་ཡེ་ཤེས་ཏེ་རྡོ་རྗེ་བཞི་ཡིས་ས་བོན་བསྡུ་བའོ། །དེ་ཐམས་ཅད་ཡོངས་སུ་གྱུར་པ་ལས། བཅོམ་ལྡན་འདས་རྒྱུ་རྡོ་རྗེ་འཛིན་པ་སྐུ་མདོག་ནག་པོ་ཞལ་བརྒྱད་དང་ལྡན་པའི་རྩ་བའི་ཞལ་ནག་པོ། །གཡས་ཞལ་ཀུནྡ་ལྟར་དཀར་བ། གཡོན་ཞལ་དམར་ཞིང་ཆེར་འཇིགས་པ། ལྷག་མ་
གཡས་ཞལ་གཉིས་དང་གཡོན་ཞལ་གཉིས་བུང་བ་ལྟར་ནག་ཅིང་། སྟེང་ཞལ་དུད་ཁ་གཙིགས་པའི་ཉམས་ཅན། སྤྱན་ཉི་ཤུ་རྩ་བཞི་ཕྱེ་བ། དབུ་སྐྲ་སེར་པོ་གྱེན་ཏུ་བརྫེས་པ། དཔྲལ་བའི་སྟེང་དུ་ཐོད་པ་ལྔ་ལྔའི་ཕྲེང་བ་དང་། སྣ་ཚོགས་རྡོ་རྗེ་སྤྱི་བོར་འཛིན་པ། ཞལ་ནས་ཧཱུྃ་གི་སྒྲ་སྤྲོ་ཞིང་། འཁོར་ལོ། སྙན་ཆ། མགུལ་རྒྱན། ཕྱག་ཞབས་ཀྱི་གདུ་བུ། སྐ་རགས། ཐལ་བས་བྱུགས་པ་སྟེ་ཕྱག་རྒྱ་དྲུག་དང་ལྡན་པ། མགོ་བོ་ལྔ་བཅུའི་ཕྲེང་བའི་དོ་ཤལ་འཕྱང་བ། ཕྱག་བཅུ་དྲུག་གི་གཡས་ཀྱི་ཕྱག་གི་ཐོད་པ་བརྒྱད་ན། རིམ་པ་བཞིན་ཏུ། གླང་པོ་ཆེ་དཀར་པོ། རྟ་སྔོན་པོ། བོང་བུ་ཁམ་པ། གླང་དམར་པོ། རྔ་མོང་ཐལ་ཀར། མི་དམར་པོ། ཤར་བྷ་སྔོན་པོ། །བྱི་ལ་གྭ་པ། གཡོན་གྱི་ཕྱག་གི་ཐོད་པ་བརྒྱད་ན། །སའི་ལྷ་མོ་སེར་མོ། །ཆུའི་ལྷ་མོ་དཀར་མོ། །རླུང་གི་ལྷ་མོ་དུད་ཁ། །མེའི་ལྷ་མོ་དམར་མོ། །ཟླ་བའི་ལྷ་མོ་དཀར་མོ། །ཉི་མའི་ལྷ་མོ་དམར་མོ། །
གཤིན་རྗེ་ནག་པོ། ནོར་བདག་སེར་པོ། །སྙིང་གར་ཐལ་མོ་སྦྱར་བ་རྣམས་བསྣམས་པའི་ཕྱག་དང་པོ་གཉིས་ཀྱིས་ཡུམ་ལ་འཁྱུད་པ། །གཅེར་བུ་ཞབས་བཞིའི་མདུན་མ་གཉིས་གཡས་བརྐྱང་བའི་གར་དང་རྒྱབ་མ་གཉིས་སྐྱིལ་ཀྲུང་ཕྱེད་པའི་སྟབས་ཀྱིས་ཉི་མའི་དཀྱིལ་འཁོར་ལ་བདུད་བཞི་མཉམ་པར་མནན་ཞིང་། གར་གྱི་ཉམས་དགུ་དང་ལྡན་པ། འཇིགས་པའང་འཇིགས་པར་མཛད་པའོ། །ཡུམ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་མངའ་བ། །མཆེ་བ་གཙིགས་པ། དབུ་སྐྲ་སེར་པོ་གྱེན་ཏུ་བརྫིས་པ། ཕྱག་གཡས་གྲི་གུག །གཡོན་ཐོད་པ་བསྣམས་པས་ཡབ་ལ་འཁྱུད་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། ཞབས་གཡོན་བརྐྱང་། གཡས་བསྐུམ་པས་ཡབ་ལ་འཁྱུད་པ། མངོན་པར་བྱང་ཆུབ་པ་ལྔ་པ་དང་། ཆོས་དབྱིངས་ཡེ་ཤེས་ཀྱི་བདག་
ཉིད་དོ། །གཉིས་པ་ནི། ཡུམ་གྱི་གསང་གནས་སྟོང་པའི་ངང་ལས། ཧྲཱིཿལས་པདྨ་དམར་པོ་འདབ་མ་བརྒྱད་པ། ཨཱཿལས་ཟེའུ་འབྲུ། ཕཊ་སེར་པོས་བུ་ག་བཀག་པར་གྱུར། ༀ་པདྨ་སུ་ཁ་དྷར་མ་ཧཱ་རཱ་ག་སུ་ཁཾ་དད་ཙ་ཏུར་ནནྡ་བྷ་ག་བི་ཤྭ་ཧཱུྃ་ཧཱུྃ་ཧཱུྃ་ཀཱཪྻཾ་ཀུ་རུ་ཥྭ་མེ། ཞེས་ཡབ་ཀྱིས་བསྐུལ་བར་བསྒོམ། ཡབ་ཀྱི་གསང་གནས་སྟོང་པའི་ངང་ལས་ཧཱུྃ་ལས་རྡོ་རྗེ་སྔོན་པོ། །ༀ་དཀར་པོ་ལས་ནོར་བུ། ཕཊ་སེར་པོས་བུ་ག་བཀག་པར་གྱུར། ༀ་བཛྲ་མ་ཧཱ་དྭེ་ཥ་ཙ་ཏུར་ནནྡ་དཱ་ཡ་ཀ་ཁ་ག་མུ་ཁཻ་ཀར་སོ་ནཱ་ཐ་ཧཱུྃ་ཧཱུྃ་ཧཱུྃ་ཀཱཪྻཾ་ཀུ་རུ་ཥྭ་མེ། ཞེས་ཡུམ་གྱིས་བསྐུལ་བར་བལྟས་ལ། བསྲུབ་པ་དང་དང་སྲུབ་པའི་སྦྱོར་བས། ཡབ་ཡུམ་ཐབས་དང་ཤེས་རབ་གཉིས་སུ་མེད་པར་སྙོམས་པར་ཞུགས་པའི་སྦྱོར་མཚམས་ནས། དགའ་བ་སྒྱུ་མ་ལྟ་བུ་སིད་དང་ཕཊ་ཀྱི་སྒྲ་དང་བཅས་པའི་འོད་ཟེར་འཕྲོས་པས། སངས་རྒྱས་ཐམས་ཅད་བསྐུལ། ཚུར་འདུས་ཏེ་ཞལ་དུ་ཞུགས། ཐུགས་ཀར་ཞུ། རྩ་དབུ་མ་ནས་སོང་།
རྡོ་རྗེའི་ལམ་ནས་བྱང་ཆུབ་སེམས་ཀྱི་ངོ་བོ་གཾ་ཙཾ་བཾ་གྷཾ་པཾ་ཤཾ་ཙཾ་ཌཾ་ས་བོན་བརྒྱད་ཡུམ་གྱི་པདྨར་སྤྲོས་པ་ལས། ཡབ་ཡུམ་གཉིས་དང་སངས་རྒྱས་ཐམས་ཅད་ཟག་པ་མེད་པའི་བདེ་བས་ཚིམ་པར་གྱུར། གསུམ་པ་ནི། ༀ་སརྦ་ཏ་ཐཱ་ག་ཏ་ཝ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ང་རྒྱལ་བཟུང་། ཡན་ལག་གསུམ་པ་ལའང་གསུམ། གང་ལ་དབང་བསྐུར་བ་ལྷའི་བསྐྱེད་ཆོག་ཇི་ལྟར་དབང་བསྐུར་བ་དངོས། དེ་རྒྱས་གདབ་པའི་སྔགས་སོ། །དང་པོ་ལ་ལྔ། འཁོར་སྤྲོ་བ། བར་སྲིད་ཞུགས་ཏེ་ཞུ་བ་གླུས་བསྐུལ། འབྲས་བུ་རྡོ་རྗེ་འཛིན་པར་བཞེངས་པ། སེམས་དཔའ་དང་སྐྱེ་མཆེད་གནས་གསུམ་བྱིན་གྱིས་བརླབ་པ། དམ་ཡེ་དབྱེར་མེད་དུ་བྱ་བའོ། །དང་པོ་ནི། ཡུམ་གྱི་མངལ་དུ་གནས་པའི་ས་བོན་ལྷ་མོ་སོ་སོའི་སྐུར་གྱུར་པ་རྣམས་རང་རང་གི་སྟན་ལ་འཁོར། ༀ་གཽ་རཱི་གཾ་སྭཱ་ཧཱ། ཡུམ་གྱི་མཁའ་ནས་གཾ་སྤྲོས་པ་ལས། གཽ་རཱི་ནག་མོ་གཡས་གྲི་གུག །གཡོན་ཉ་རོ་ཧི་ཏ་བསྣམས་པ་ཕྱུང་སྟེ། །ཤར་གྱི་པདྨའི་འདབ་མར་ཚངས་པའི་གདན་ལ་བཞུགས་པར་གྱུར། ༀ་ཙཽ་རཱི་ཙཾ་སྭཱ་ཧཱ། ཙཾ་སྤྲོས་པ་
ལས་ཙཽ་རཱི་དམར་མོ་གཡས་ཅང་ཏེའུ། གཡོན་ཕག་པ་བསྣམས་པ་ཕྱུང་སྟེ། ལྷོའི་པདྨའི་འདབ་མར་དབང་པོའི་གདན་ལ་བཞུགས་པར་གྱུར། ༀ་བཻ་ཏཱ་ལཱི་བཾ་སྭཱ་ཧཱ། བཾ་སྤྲོས་པ་ལས། བཻ་ཏཱ་ལཱི་སེར་མོ་གཡས་རུ་སྦལ། གཡོན་ཐོད་པ་བསྣམས་པ་ཕྱུང་སྟེ། ནུབ་ཀྱི་པདྨའི་འདབ་མར་ཉེ་དབང་གི་གདན་ལ་བཞུགས་པར་གྱུར། ༀ་གྷསྨ་རཱི་གྷཾ་སྭཱ་ཧཱ། གྷཾ་སྤྲོས་པ་ལས། གྷསྨ་རཱི་ལྗང་གུ་གཡས་སྦྲུལ། གཡོན་ཐོད་པ་བསྣམས་པ་ཕྱུང་སྟེ། བྱང་གི་པདྨའི་འདབ་མར་དྲག་པོའི་གདན་ལ་བཞུགས་པར་གྱུར། ༀ་པུཀྐ་སཱི་པཾ་སྭཱ་ཧཱ། པཾ་སྤྲོས་པ་ལས། པུཀྐ་སཱི་སྔོན་མོ་གཡས་སེང་གེ །གཡོན་དགྲ་སྟྭ་བསྣམས་པ་ཕྱུང་སྟེ། བྱང་ཤར་གྱི་པདྨའི་འདབ་མར་གཤིན་རྗེའི་གདན་ལ་བཞུགས་པར་གྱུར། ༀ་ཤ་བ་རཱི་ཤཾ་སྭཱ་ཧཱ། ཤཾ་སྤྲོས་པ་ལས། ཤ་བ་རཱི་དཀར་མོ། གཡས་དགེ་སློང་། གཡོན་གསིལ་བྱེད་བསྣམས་པ་ཕྱུང་སྟེ། ཤར་ལྷོའི་པདྨའི་འདབ་མར་ནོར་བདག་གི་གདན་ལ་
བཞུགས་པར་གྱུར། ༀ་ཙཎྜ་ལཱི་ཙཾ་སྭཱ་ཧཱ། ཙཾ་སྤྲོས་པ་ལས། ཙཎྜ་ལཱི་སྔོན་མོ། གཡས་འཁོར་ལོ། །གཡོན་ཐོད་གཤོལ་བསྣམས་པ་ཕྱུང་སྟེ། ལྷོ་ནུབ་ཀྱི་པདྨའི་འདབ་མར་སྲིན་པོའི་གདན་ལ་བཞུགས་པར་གྱུར། ཨོཾ་ཌོམྦི་ནཱི་ཌཱཾ་སྭཱ་ཧཱ། ཌཱཾ་སྤྲོས་པ་ལས། ཌོམྦི་ནཱི་སྣ་ཚོགས་པའི་མདོག་ཅན། གཡས་རྡོ་རྗེ། གཡོན་སྡིགས་མཛུབ་མཛད་པ་ཕྱུང་སྟེ། ནུབ་བྱང་གི་པདྨའི་འདབ་མར་ཐག་བཟང་རིས་ཀྱི་གདན་ལ་བཞུགས་པར་གྱུར། ལྷ་མོ་ཐམས་ཅད་ཀྱང་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་གཙིགས་པ། དབུ་སྐྲ་སེར་པོ་གྱེན་ཏུ་བརྫེས་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། ཞབས་གཡོན་བརྐྱང་པའི་སྐྱིལ་ཀྲུང་ཕྱེད་པའི་གར་གྱིས་གནས་པའོ། །གཉིས་པ་ནི། ནམ་མཁའི་ནཱ་ད་དཀར་མདའ་འཕོ་བ་བཞིན་ཏུ་བཅོམ་ལྡན་འདས་ཀྱི་ཞལ་དུ་ཞུགས་ནས་ཡུམ་གྱི་པདྨར་བབས་པས། ཡུམ་
བདེ་བའི་ངོ་བོར་ཞུ། ཡུམ་ཞུ་ུབས་ཡབ་ཀྱང་བདེ་བའི་ངོ་བོར་ཞུ་ནས། དངུལ་ཆུའི་རྣམ་པ་ལྟ་བུར་གྱུར་བས། མཚམས་ཀྱི་ལྷ་མོ་བཞིས་ཚད་མེད་པའི་རང་བཞིན་གྱི་གླུས་བསྐུལ་བ་ནི། རྗེ་བཙུན་སྙིང་རྗེའི་ཡིད་བཞེངས་ཤིག །པུཀྐ་སཱི་ནི་བདག་ལ་སྐྱོབས། །སྟོང་པའི་རང་བཞིན་ཉིད་སྤོངས་ལ། །བདག་ལ་བདེ་ཆེན་སྦྱོར་བཞེད་མཛོད། །ཁྱོད་མེད་ན་ནི་བདག་འགུམས་པས། ཀྱེ་ཡི་རྡོ་རྗེ་ཁྱོད་བཞེངས་ཤིག །སྟོང་པའི་རང་བཞིན་ཉིད་སྤོངས་ལ། །རི་ཁྲོད་མ་འབྲས་གྲུབ་པར་མཛོད། །དགའ་གཙོ་འཇིག་རྟེན་འགྲོན་གཉེར་བ། །སྟོང་པ་ཉིད་ལ་ཞུགས་སམ་ཅི། །ཁྱོད་མེད་ཕྱོགས་ནི་མི་འཚལ་བས། །གདོལ་པ་མོ་བདག་ཞུ་བ་བགྱི། །བདག་གིས་ཁྱོད་ཀྱི་ཐུགས་འཚལ་གྱི། །མིག་འཕྲུལ་མངའ་བ་ཁྱོད་བཞེངས་ཤིག །གཡུང་མོ་བདག་ཉིད་དྲན་ཉམས་པས། །སྙིང་རྗེ་རྒྱུན་ཆད་མ་མཛད་ཅིག གསུམ་པ་ནི། ཤིན་ཏུ་སྙན་པའི་གླུས་བསྐུལ་བས།
བྱང་ཆུབ་ཀྱི་སེམས་དངུལ་ཆུའི་རྣམ་པ་ལས། ཧཱུྃ་དང་ཨཾ་ལས་རྡོ་རྗེ་ཧཱུྃ་གིས་མཚན་པ་དང་། གྲི་གུག་ཨཾ་གིས་མཚན་པར་གྱུར། དེ་ལས་འོད་ཟེར་འཕྲོས། འདུས་པ་ལས། བཅོམ་ལྡན་འདས་འབྲས་བུ་རྡོ་རྗེ་འཛིན་པ་སྐུ་མདོག་ནག་པོ་ཞལ་བརྒྱད་དང་ལྡན་པའི་རྩ་བའི་ཞལ་ནག་པོ། །གཡས་ཞལ་ཀུནྡ་ལྟར་དཀར་བ། གཡོན་ཞལ་དམར་ཞིང་ཆེར་འཇིགས་པ། ལྷག་མ་གཡས་ཞལ་གཉིས་དང་གཡོན་ཞལ་གཉིས་བུང་བ་ལྟར་ནག་ཅིང་། སྟེང་ཞལ་དུད་ཁ་གཙིགས་པའི་ཉམས་ཅན། སྤྱན་ཉི་ཤུ་རྩ་བཞི་ཕྱེ་བ། དབུ་སྐྲ་སེར་པོ་གྱེན་ཏུ་བརྫེས་པ། དཔྲལ་བའི་སྟེང་དུ་ཐོད་པ་ལྔ་ལྔའི་ཕྲེང་བ་དང་། སྣ་ཚོགས་རྡོ་རྗེ་སྤྱི་བོར་འཛིན་པ། ཞལ་ནས་ཧཱུྃ་གི་སྒྲ་སྤྲོ་ཞིང་། འཁོར་ལོ། སྙན་ཆ། མགུལ་རྒྱན། ཕྱག་ཞབས་ཀྱི་གདུ་བུ། སྐ་རགས། ཐལ་བས་བྱུགས་པ་སྟེ་ཕྱག་རྒྱ་དྲུག་དང་ལྡན་པ། མགོ་བོ་ལྔ་བཅུའི་ཕྲེང་བའི་དོ་ཤལ་འཕྱང་བ། ཕྱག་བཅུ་དྲུག་གི་གཡས་ཀྱི་ཕྱག་གི་ཐོད་
པ་བརྒྱད་ན། རིམ་པ་བཞིན་ཏུ། གླང་པོ་ཆེ་དཀར་པོ། རྟ་སྔོན་པོ། བོང་བུ་ཁམ་པ། གླང་དམར་པོ། རྔ་མོང་ཐལ་ཀར། མི་དམར་པོ། ཤར་བྷ་སྔོན་པོ། །བྱི་ལ་གྭ་པ། གཡོན་གྱི་ཕྱག་གི་ཐོད་པ་བརྒྱད་ན། །སའི་ལྷ་མོ་སེར་མོ། །ཆུའི་ལྷ་མོ་དཀར་མོ། །རླུང་གི་ལྷ་མོ་དུད་ཁ། །མེའི་ལྷ་མོ་དམར་མོ། །ཟླ་བའི་ལྷ་མོ་དཀར་མོ། །ཉི་མའི་ལྷ་མོ་དམར་མོ། །གཤིན་རྗེ་ནག་པོ། ནོར་བདག་སེར་པོ། །སྙིང་གར་ཐལ་མོ་སྦྱར་བ་རྣམས་བསྣམས་པའི་ཕྱག་དང་པོ་གཉིས་ཀྱིས་ཡུམ་ལ་འཁྱུད་པ། །གཅེར་བུ་ཞབས་བཞིའི་མདུན་མ་གཉིས་གཡས་བརྐྱང་བའི་གར་དང་རྒྱབ་མ་གཉིས་སྐྱིལ་ཀྲུང་ཕྱེད་པའི་སྟབས་ཀྱིས་ཉི་མའི་དཀྱིལ་འཁོར་ལ་བདུད་བཞི་མཉམ་པར་མནན་ཞིང་། གར་གྱི་ཉམས་དགུ་དང་ལྡན་པ། འཇིགས་པའང་འཇིགས་པར་མཛད་པའོ། །ཡུམ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་མངའ་བ། །མཆེ་བ་གཙིགས་པ།
དབུ་སྐྲ་སེར་པོ་གྱེན་ཏུ་བརྫིས་པ། ཕྱག་གཡས་གྲི་གུག །གཡོན་ཐོད་པ་བསྣམས་པས་ཡབ་ལ་འཁྱུད་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། ཞབས་གཡོན་བརྐྱང་། གཡས་བསྐུམ་པས་ཡབ་ལ་འཁྱུད་པའོ། །ཞེས་པའི་བར་གྱིས་གཙོ་བོ་ཡབ་ཡུམ་སྔར་ལྟར་གསལ་བར་བསྒོམ་པ་ནི་རྡོ་རྗེ་བཞི་ལས་གཟུགས་རྫོགས་པའོ། །བཞི་པ་ནི། བཅོམ་ལྡན་འདས་ཀྱི་ཐུགས་ཀར་རང་འདྲའི་ཡེ་ཤེས་སེམས་དཔའ། དེའི་ཐུགས་ཀར་ཏིང་འཛིན་སེམས་དཔའ་རྡོ་རྗེ་རྩེ་དགུ་པའི་ལྟེ་བར་ཉི་མའི་དཀྱིལ་འཁོར་གྱི་དབུས་སུ་ཧཱུྃ་སྔོན་པོ། །ཡུམ་གྱི་ཐུགས་ཀར་ཟླ་བའི་དཀྱིལ་འཁོར་གྱི་སྟེང་དུ་ཨཾ་སྔོན་པོ་འོད་ཟེར་དང་བཅས་པ། མིག་ཏུ་མོཾ་ལས་གཏི་མུག་རྡོ་རྗེ་མ་དཀར་མོ། རྣ་བར་དྭེཾ་ལས་ཞེ་སྡང་རྡོ་རྗེ་མ་ནག་མོ། སྣ་ལ་མཾ་ལས་སེར་སྣ་རྡོ་རྗེ་མ་སེར་མོ། ལྕེ་ལ་རཱཾ་ལས་འདོད་ཆགས་རྡོ་རྗེ་མ་དམར་མོ། དཔྲལ་བར་ཨིཾ་ལས་ཕྲག་དོག་རྡོ་རྗེ་མ་ལྗང་
གུ། སྙིང་གའི་ཆ་སྟོད་དུ་ཨ་ལས་རེག་བྱ་རྡོ་རྗེ་མ་སྔོན་མོ། སྤྱི་བོར་ༀ་ལས་སྐུ་རྡོ་རྗེ་མ་དཀར་མོ། མགྲིན་པར་ཨཱཿལས་གསུང་རྡོ་རྗེ་མ་དམར་མོ། སྙིང་གའི་ཆ་སྨད་དུ་ཧཱུྃ་ལས་ཐུགས་རྡོ་རྗེ་མ་སྔོན་མོ། དེ་ཐམས་ཅད་ཀྱང་ཞལ་གཅིག་ཕྱག་གཉིས་མ། གཡས་གྲི་གུག །གཡོན་ན་ཐོད་པ་བསྣམས་ཤིང་ཁ་ཊཱྃ་ག་མཆན་ཁུང་དུ་བཅུག་པ། སྤྱན་གསུམ་པ། དབུ་སྐྲ་སེར་པོ་གྱེན་ཏུ་བརྫེས་པ། ཕྱག་རྒྱ་ལྔ་དང་ལྡན་པ། སྟག་གི་པགས་པས་སྨད་དཀྲིས་པ། རོའི་སྟན་ལ་སྐྱིལ་ཀྲུང་ཕྱེད་པའི་གར་གྱིས་བཞུགས་པའོ། །ༀ་སརྦ་ཏ་ཐཱ་ག་ཏ་ཁེ་ཙ་དཱི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་བྷུ་ཙ་རི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ༀ་སརྦ་ཏ་ཐཱ་ག་ཏ་བ་ཏ་ལ་ཝཱ་སི་ནཱི་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་པར་བྱ་སྟེ་རྡོ་རྗེ་བཞི་ལས་ཡིག་འབྲུ་དགོད་པའོ། །ལྔ་པ་ནི། རང་གི་སྙིང་གའི་ཧཱུྃ་ལས་འོད་ཟེར་འཕྲོས་པས། ཡེ་ཤེས་ཀྱི་དཀྱིལ་འཁོར་མདུན་གྱི་ནམ་མཁའ་སྤྱན་དྲངས། རྡོ་རྗེའི་རྩེ་མོས་བསང་
གཏོར་གྱི་ཆུ་མཆོད་རྫས་ལ་གཏོར་ཞིང་། ཧཱུྃ་ཧཱུྃ་ཧཱུྃ་བརྗོད་པས་བགེགས་བསྐྲད་ནས། ལག་པ་གཡས་རྡོ་རྗེ་དང་བཅས་པས་མཆོད་པ་རྣམས་ལ་བསྐོར་ཞིང་། ༀ་ཨཱཿཧཱུྃ་ལན་གསུམ་བརྗོད་པས། མཆོད་པའི་ཡོ་བྱད་རྣམས་རང་བཞིན་སྟོང་པ། བྱེད་ལས་དབང་པོ་དྲུག་གི་སྤྱོད་ཡུལ་དུ་ཟག་པ་མེད་པའི་བདེ་བ་སྐྱེད་ནུས་པར་གྱུར། ཞེས་བྱིན་གྱིས་བརླབས་ལ། གཡོན་དྲིལ་བུ་དཀྲོལ་ཞིང་། གཡས་པས་མཆོད་རྫས་སྟོབ་པའི་ཚུལ་གྱིས་དབུལ་བཞིན་པས། ༀ་ཛཿཧཱུྃ་བཾ་ཧོཿཁཾ་རཾ་ཨཱཿཧཱུྃ་སྭཱ་ཧཱ། ཞེས་པའི་མཆོད་ཡོན། ༀ་ནཱི་རི་ཏི་ཧཱུྃ་ཁཿཨཱཿཧཱུྃ་སྭཱ་ཧཱ། ཞེས་པས་ཞབས་བསིལ། ༀ་བཛྲ་པུཥྤེ་ཨཱཿཧཱུྃ་སྭཱ་ཧཱ། ཞེས་པས་མེ་ཏོག །དེ་བཞིན་དུ། དྷུ་པེ༴ གནྡྷེ༴ ནཻ་བི་དྱེ༴ ཨཱ་ལོ་ཀེ་ཨཱཿཧཱུྃ་སྭཱ་ཧཱ། ཞེས་པའི་མཆོད་པ་ལྔས་མཆོད། །གོང་བཞིན་གཽ་རཱི་མ་ལ་སོགས་པ་ལྷ་མོ་བརྒྱད་ཀྱིས་ཀྱང་མཆོད་ནས། རྡོ་རྗེ་དང་དྲིལ་བུ་བཟུང་ལ། ཞེ་སྡང་རྡོ་རྗེར་ཕྱག་འཚལ་བསྟོད། །གཏི་མུག་རྡོ་རྗེར་ཕྱག་འཚལ་བསྟོད། །སེར་སྣ་རྡོ་རྗེ་བདག་ལ་སྐྱོབས། །འདོད་ཆགས་རྡོ་རྗེ་བདག་ལ་སྩོལ། །ཕྲག་དོག་རྡོ་རྗེ་ང་རྒྱལ་ཏེ། །སྒྱུ་འཕྲུལ་རྡོ་རྗེ་མགོན་པོ་ཀུན། །ལས་
ཀུན་རབ་ཏུ་སྒྲུབ་བྱེད་པ། །ཐམས་ཅད་རྡོ་རྗེ་བདག་མགུར་འགྱུར། །ཞེས་པས་བསྟོད། སོ་སོའི་ཕྱག་རྒྱ་བཅིངས་ལ་གཽ་རཱི་ཛཿ ཞེས་པས་ཡེ་ཤེས་པ་དགུག །ཙཽ་རཱི་ཧཱུྃ་གིས་གཞུག །པཻ་ཏཱ་ལཱི་བཾ་གྱིས་བཅིངས། །གྷསྨ་རཱི་ཧོཿ ཞེས་པས་དགྱེས་པར་བྱས། གཉིས་པ་དབང་བསྐུར་བ་དངོས་ནི། སླར་ཡང་ཐུགས་ཀའི་ཧཱུྃ་ལས་འོད་ཟེར་ནག་པོ་ལྕགས་ཀྱུའི་རྣམ་པར་འཕྲོས་པས་ཁམས་གསུམ་ན་བཞུགས་པའི་སངས་རྒྱས་ཐམས་ཅད་སྤྱན་དྲངས་པ་ལ། གཽ་རཱི་མ་ལ་སོགས་པས་མཆོད། མགོན་པོ་དེ་བཞིན་གཤེགས་པ་ཀུན། ཁྱེད་ཀྱིས་བདག་ལ་དབང་སྐུར་ཅིག །ཅེས་གསོལ་བ་བཏབ་པས། སངས་རྒྱས་དེ་རྣམས་ཧེ་རུ་ཀའི་གཟུགས་སུ་གྱུར་ནས་བདུད་རྩི་ལྔས་གང་བའི་བུམ་པས་དབང་བསྐུར་བ་ན། མེ་ཏོག་གི་ཆར་འབབ་པ་དང་། རྔའི་སྒྲ་གྲགས་པ་དང་། གུར་གུམ་གྱི་ཆར་འབབ་པ་དང་། གཟུགས་རྡོ་རྗེ་མ་ལ་སོགས་པས་མཆོད་པ་དང་། རྡོ་རྗེའི་གླུ་སྤྱན་མ་ལ་སོགས་པས་ལེན་པ་དང་། རིག་པའི་རྒྱལ་པོ་ཁྲོ་བོ་རྣམས་ཀྱིས་
བགེགས་བསྐྲད་ཅིང་དབང་བསྐུར། ཆུའི་ལྷག་མ་ཅུང་ཟད་ཡར་འཁྱིལ་བ་ལས་རང་གི་རིགས་ཀྱི་བདག་པོས་དབུ་བརྒྱན་པ་ནི། །གཙོ་བོ་ཡབ་ཡུམ་ལ་མི་བསྐྱོད་པ། པུཀྐ་སཱི་དང་གཽ་རཱི་ལ་མི་བསྐྱོད་པ། ཤ་བ་རཱི་དང་ཙཽ་རཱི་ལ་རྣམ་པར་སྣང་མཛད། ཙཎྜ་ལཱི་དང་བཻ་ཏཱ་ལཱི་ལ་རིན་ཆེན་འབྱུང་ལྡན། ཌོམྦི་ནཱི་དང་གྷསྨ་རཱི་ལ་སྣང་བ་མཐའ་ཡས་ཀྱིས་དབུ་བརྒྱན་པར་བསམ་ལ། གསུམ་པ་སྔགས་རྒྱས་གདབ་པ་ནི། ༀ་སརྦ་ཏ་ཐཱ་ག་ཏ་ཨ་བྷི་ཥཻ་ཀ་ཏ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཡན་ལག་བཞི་པ་ལའང་གསུམ། བྱིན་གྱིས་བརླབ་པ། བདུད་རྩི་མྱང་བ། སྔགས་རྒྱས་གདབ་པའོ། །དང་པོ་ནི། བདུད་རྩི་བྱིན་རླབས་གོང་དུ་འབྱུང་བ་ལྟར་འདིར་ཡང་བྱ་སྟེ། བསྡུ་ན་གོང་དུ་སོང་བས་འཐུས་པར་མཛད། གཉིས་པ་ནི། གཙོ་འཁོར་ཐམས་ཅད་ཀྱི་ལྗགས་ཀྱི་རྩེ་མོ་རྡོ་རྗེར་གྱུར་པའི་འོད་ཀྱི་སྦུ་གུས་བདུད་རྩི་དྲངས་ཏེ་གསོལ་བར་དམིགས་ལ། གཡོན་པའི་མཐེབ་སྲིན་གྱིས་ནང་མཆོད་བླངས་ནས་འབུལ་ཞིང་། ཕྱོགས་བཅུ་དུས་གསུམ་གྱི་དེ་བཞིན་གཤེགས་པ་ཐམས་ཅད་ཀྱི་ངོ་བོ་དཔལ་ལྡན་རྩ་
བའི་བླ་མ་དམ་པའི་ཞལ་དུ་ༀ་ཨཱཿཧཱུྃ། བཅོམ་ལྡན་འདས་རིགས་དྲུག་པ་རྡོ་རྗེ་འཆང་ཆེན་པོའི་ཞལ་དུ་ༀ་ཨཱཿཧཱུྃ། དེ་བཞིན་དུ་སྦྱར་ཏེ། བཅོམ་ལྡན་རྡོ་རྗེ་ཕག་མོའི༴ རྒྱལ་སྲས་རྡོ་རྗེ་སྙིང་པོའི༴ གྲུབ་ཆེན་ས་ར་ཧ་པའི༴ དཔལ་ལྡན་འཕགས་པ་ཀླུ་སྒྲུབ༴ རྒྱལ་སྲས་ཨཱཪྻ་དེ་བའི༴ པཎ་ཆེན་ཟླ་བ་གྲགས་པའི༴ རྣམ་འབྱོར་མཱ་ཏངྒི་པའི༴ ཏཻ་ལོ་ཤེས་རབ་བཟང་པོའི༴ ནཱ་རོ་ཛྙ་ན་སིདྡྷིའི༴ མངའ་བདག་རྒྱལ་བ་མཻ་ཏྲིའི༴ མར་པ་ཆོས་ཀྱི་བློ་གྲོས༴ རྔོག་སྟོན་ཆོས་སྐུ་རྡོ་རྗེའི༴ རྔོག་སྟོན་ཞེ་སྡང་རྡོ་རྗེའི༴ རྔོག་སྟོན་སེང་གེ་སྒྲ་ཡི༴ རྔོག་སྟོན་ཀུན་དགའ་རྡོ་རྗེའི༴ རྒྱ་སྒོམ་ཡེ་ཤེས་འོད་གྱི༴ གྲུབ་ཆེན་ཀརྨ་པཀྴིའི༴ གཉན་རས་དགེ་འདུན་འབུམ་གྱི༴ བཤེས་གཉེན་ཚུལ་ཁྲིམས་རིན་ཆེན༴ ཀུན་མཁྱེན་རང་བྱུང་རྡོ་རྗེའི༴ བླ་མ་ཆོས་ཀྱི་རྒྱལ་མཚན༴ ཡོར་པ་ཡེ་ཤེས་དཔལ་པའི༴ བཀའ་བཞིར་རཏྣ་བྷ་དྲའི༴ རྗེ་བཙུན་མཐོང་བ་དོན་ལྡན༴ བྱང་སེམས་དཔལ་འབྱོར་དོན་
གྲུབ༴ སྤྱན་སྔ་ཆོས་ཀྱི་གྲགས་པའི༴ རྗེ་བཙུན་ཀརྨ་ཕྲིན་ལས༴ འཇིགས་བྲལ་མི་བསྐྱོད་རྡོ་རྗེའི༴ སྤྲུལ་སྐུ་དཀོན་མཆོག་ཡན་ལག༴ རྒྱལ་ཚབ་གྲགས་པ་དོན་གྲུབ༴ སྟག་ལུང་རྣམ་རྒྱལ་དཔལ་བཟང་༴ ཆོས་རྗེ་ངག་དབང་རྣམ་རྒྱལ༴ མཚུངས་མེད་བཀྲ་ཤིས་དཔལ་གྲུབ༴ མཁན་ཆེན་ཀརྨ་ཉི་མའི༴ མཁན་མཆོག་ཕྲིན་ལས་མཚན་ཅན༴ གོ་ཤྲཱི་དོན་ཡོད་སྙིང་པོའི༴ དཔལ་ཆེན་ཆོས་ཀྱི་དོན་གྲུབ༴ ཀུན་གཟིགས་ཆོས་ཀྱི་འབྱུང་གནས༴ ཀརྨ་ཚེ་དབང་ཀུན་ཁྱབ༴ མཆོག་སྤྲུལ་ཕྲིན་ལས་རབ་རྒྱས༴ རྒྱལ་སྲས་བློ་གྲོས་མཐའ་ཡས༴ པདྨ་དབང་མཆོག་རྒྱལ་པོའི་༴ རང་བྱུང་རིག་པའི་རྡོ་རྗེའི་༴ དྲིན་ཅན་རྩ་བརྒྱུད་བླ་མའི་ཞལ་དུ་ༀ་ཨཱཿཧཱུྃ། ཞེས་བརྒྱུད་པའི་བླ་མ་རྣམས་ལ་འབུལ། ༀ་དེ་བ་པི་ཙུ་བཛྲཱ་ཡ་ༀ་ཨཱཿཧཱུྃ། ༀ་ཨཾ་ནཻ་རཱཏྨ་ཡཻ་ༀ་ཨཱཿཧཱུྃ། ༀ་གཽ་རཱི་གཾ་སོགས་ཀྱིས་གཙོ་བོ་ཡབ་ཡུམ་འཁོར་བརྒྱད་བཅས་པ་དང་། ༀ་ཧཱུྃ་ཤྲི་ཡ་སོགས་ཀྱིས་དུད་སོལ་མ་དག ༀ་མ་ཧཱ་ཀཱ་ལཱ་ཱཡ། ༀ་མ་ཧཱ་ཀཱ་ལི་ཡི། ཞེས་པས་ཆོས་
སྐྱོང་སྤྱི་སྟེ་ཐམས་ཅད་ལ་འབྲུ་གསུམ་སྦྱར་བས་ནང་མཆོད་འབུལ། གསུམ་པ་ནི། ༀ་སརྦ་ཏ་ཐཱ་ག་ཏ་ཨ་མྲྀ་ཏ་སྭཱ་ད་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་སྔགས་རྒྱས་གདབ་བོ། །ཡན་ལག་ལྔ་པ་ལ་དངོས་དང་། རྒྱས་གདབ་བོ། དང་པོ་ནི། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས། འཇིག་རྟེན་ན་གཟུགས་སྡུག་པ། སྒྲ་སྙན་པ། དྲི་ཞིམ་པ་ལ་སོགས་པ་འོད་ཟེར་གྱིས་བསྡུས། ལྷ་རྣམས་ལ་མཆོད་པའི་ལྷ་མོ་དཔག་ཏུ་མེད་པ་སྤྲུལ་པ། དེ་རྣམས་ཀྱིས་བདག་ལྷ་དགུར་གསལ་བ་ལ་མཆོད་པར་བསམ་ཞིང་། སོཾ་སརྦ་སཾ་ཤོདྷ་ནི་སོགས། བསང་གཏོར་དང་མཆོད་ཡོན་ནས་ལྷ་མོ་བརྒྱད་ཡན་གྱིས་མཆོད། གཉིས་པ་ནི། ༀ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧཾ། ཞེས་རྒྱས་གདབ་བོ། །ཡན་ལག་དྲུག་པ་ལ་གསུམ། དངོས་དང་། རྒྱས་གདབ། ཁྱད་པར་ལྷའི་རྣལ་འབྱོར་རོ། །དང་པོ་ནི། སྔགས་ཚན་གཉིས་བརྗོད་ཅིང་དོན་དྲན་བཞིན་པས་རྡོར་དྲིལ་བཟུང་ལ། ཁྱོད་ནི་རྣལ་འབྱོར་མ་ཡི་ཚོགས་ཀྱིས་ཡོངས་སུ་བསྐོར། །ཁྱོད་ནི་ཉིད་ཀྱི་ཐུགས་ཀྱིས་ཁྱོད་དགོངས་འགྲུབ། །ཁྱོད་ནི་རྒྱུ་དང་མི་རྒྱུ་
འཁོར་བ་ཀུན་སྒྲུབ་པ། སྙིང་རྗེའི་ཐུགས་ཀྱིས་སེམས་ཅན་བྱང་ཆུབ་ཏུ། །ཀུན་རྫོབ་སྒྱུ་མ་བྱང་ཆུབ་སྒྲུབ་པ་ཡི། །དགྱེས་པ་རྡོ་རྗེ་དཔལ་གྱི་ཧེ་རུ་ཀ་ལ་བསྟོད། །གཉིས་པ་ནི། ༀ་སརྦ་ཏ་ཐཱ་ག་ཏ་སྟུ་ཏི་བཛྲ་སྭ་བྷཱ་བ་ཨཱཏྨ་ཀོ྅ཧཾ། གསུམ་པ་ནི། འོག་ཏུ་འབྱུང་བའི་སྙིང་པོ། ཉེ་སྙིང་། རྩ་སྔགས་ལན་རེ་བརྗོད་པས། གཙོ་བོ་ཡབ་ཡུམ་གྱི་སྐུ་མདོག་ཕྱག་མཚན་རྒྱན་ཆ་ལུགས་ཤིན་ཏུ་གསལ་བར་གྱུར། འཁོར་བརྒྱད་ཀྱི་སྔགས་བརྗོད། ལྷ་མོ་བརྒྱད་སྐུ་མདོག་ཕྱག་མཚན་རྒྱན་ཆ་ལུགས་ཤིན་ཏུ་གསལ་བར་གྱུར། ༀ་ཨཱཿཧཱུྃ། གཞལ་ཡས་ཁང་དུ་དུར་ཁྲོད་ཆེན་པོ་བརྒྱད་རྡོ་ར་མེ་རི་དང་བཅས་པ་ཤིན་ཏུ་གསལ་བར་གྱུར། ཞེས་མོས་ལ་རིམ་གྱིས་གསལ་བཏབ་སྟེ་ཇི་སྲིད་མི་སྐྱོའི་བར་བསྒོམ་མོ། ༈ །གཉིས་པ་ངག་གི་མངོན་ཞེན་བཟློག་པའི་དོན་དུ་བཟླས་པ་བྱ་བ་ལ་གསུམ། །ཕྲེང་བ་བྱིན་བརླབ། ཏིང་ངེ་འཛིན། བཟླས་བ་དངོས་སོ། །དང་པོ་ནི། ལས་མཐུན་ནམ་བོདྷི་ཙིའི་ཕྲེང་བ་འདུ་བྱས། རང་གི་ལག་པ་གཡོན་པའི་སོར་མོ་རྣམས་པདྨ་འདབ་མ་ལྔ་པ། །མཐིལ་དུ་ཟླ་དཀྱིལ་ལ་ཨཱ་ལི་གཡོན་སྐོར་
དུ་གནས་པའི་ལྟེ་བར་ཨ། ལག་པ་གཡས་པའི་སོར་མོ་རྣམས་རྡོ་རྗེ་རྩེ་ལྔ་པ། མཐིལ་དུ་ཉི་དཀྱིལ་ལ་ཀཱ་ལི་གཡས་བསྐོར་དུ་གནས་པའི་ལྟེ་བར་ཧཱུྃ། པད་ཀོར་དང་བཅས་ཕྲེང་བ་བླང་སྟེ་ཐལ་མོ་སྦྱར་བའི་བར་དུ་བཟུང་ལ། བསངས་སྦྱང་། སྟོང་པའི་ངང་ལས་བདུད་རྩིའི་ཡི་གེ་སུཾ་དཀར་པོ་འོད་ཟེར་འཕྲོ་བར་གྱུར། ཐལ་མོ་བསྲུབ་པའི་ཚུལ་བྱ་ཞིང་། རྡོ་རྗེ་དང་པདྨ་སྙོམས་པར་ཞུགས། བྱང་ཆུབ་ཀྱི་སེམས་སུཾ་ལ་ཁྱབ། དེས་ཨཱ་ལི་ཀཱ་ལི་ལ་ཁྱབ། དེ་ཕྲེང་བ་དང་གཉིས་སུ་མེད་པར་གྱུར། ཞེས་མོས་ལ། ༀ་པ་དེ་པ་དེ་མ་ཧཱ་ཛྙཱ་ན། སརྦ་བུདྡྷ་མ་ཡཾ་བྷ་བེ་ཏ་ཧཱུྃ་ཧཱུྃ་ཧཱུྃ་ཧོ་ཧོ་ཧོ་ཨཱཿཁཾ་སྭཱ་ཧཱ། ཞེས་ཐོག་མར་བརྒྱ་རྩ་དཀྱུས་ལ་གསུམ་རེ་བཟླས་པས་མཐུ་དང་ལྡན་པར་འགྱུར་རོ། །གཉིས་པ་ནི། ཡུམ་གྱི་ཐུགས་ཀར་ཟླ་བ་ལ་གནས་པའི་ཨ་ཡིག་གི་མཐར་བཟླ་བྱའི་སྔགས་ཕྲེང་རང་མདོག་གཡས་བསྐོར་དུ་གནས་པ་ལས་འོད་ཟེར་དང་སྔགས་ཀྱི་ཕྲེང་བ་བྱུང་། ཡུམ་གྱི་ཞལ་ནས་ཡབ་ཀྱི་ཞལ་དུ་ཞུགས། ཨ་བ་དྷཱུ་ཏི་ནས་མར་སོང་། རྡོ་རྗེ་
ནོར་བུ་ནས་ཡུམ་གྱི་པདྨར་བབ་སྟེ་ཐུགས་ཀར་ཞུགས། སླར་ཡང་ཡུམ་གྱི་ཞལ་ནས་ཡབ་ཀྱི་ཞལ་དུ་ཞུགས་ཏེ་ཐི་གུ་སྒྲོ་ཆུན་ལྕགས་སྒྲོག་མདའི་ཤུགས་ཀྱི་འགྲོས་ཀྱིས་འཁོར་བས་ཕྲིན་ལས་བཞི་བསྒྲུབ་པར་གྱུར། གསུམ་པ་ནི། ༀ་དེ་ཝ་པི་ཙུ་བཛྲ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་སྙིང་པོའོ། །ༀ་བཛྲ་ཀརྟརི་ཧེ་བཛྲཱ་ཡ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། ཞེས་ཉེ་བའི་སྙིང་པོའོ། །ༀ་ཨཥྚཱ་ན་ནཱ་ཡ། པིཾ་གོདྷ་ཀེ་ཤ་བརྟྨནེ། ཙ་ཏུར་པིཾ་ཤ་ཏི་ནེ་ཏྲཱ་ཡ། ཥོ་ཌ་ཤ་བྷུ་ཛཱ་ཡ། ཀྲྀཥྞ་ཛི་མཱུ་ཏ་པ་པུ་ཥཻ། ཀ་པཱ་ལ་མཱ་ལ་ཨ་ནཻ་ཀཾ་དྷཱ་རི་ཎེ། ཨཱཏྨཏ་ཀྲུར་ཙིཏྟ་ལ། ཨཥྞིནྡུ་དཾཥྚི་ནེ། ༀ་མཱ་ཱར་ཡ་མཱ་ར་ཡ། ཀཱར་ཡ་ཀཱར་ཡ། གརྫ་ཡ་གརྫ་ཡ། ཏརྫ་ཡ་ཏརྫ་ཡ། ཤོ་ཥ་ཡ་ཤོ་ཥ་ཡ། སཔྟ་སཱ་ག་རཱ་ཱན། བནྡྷ་བནྡྷ། ནཱ་གཱཨཱཥྚ་ཀཱན། གྲྀཧྞ་གྲྀཧྞ། ཤ་ཏྲཱུ་ནྲ་ཧ་ཧཱ་ཧི་ཧཱི་ཧུ་ཧཱུ་ཧེ་ཧཻ་ཧོ་ཧཽ་ཧཾ་ཧཾཿཕཊ་སྭཱ་ཧཱ། རྩ་བའི་སྔགས་སོ། །ༀ་གཽ་རི་གཾ་ཨཱཿཧཱུྃ་སྭཱ་ཧཱ། ལ་སོགས་པ་ནི་ལྷ་མོ་བརྒྱད་སོ་སོའི་སྙིང་པོ་སྟེ། རྩ་རྒྱུད་ལས། འཁོར་ལོའི་བདག་པོའི་བཟླས་པ་འབུམ། །དཀྱིལ་འཁོར་ཅན་གྱི་དེ་བཞིན་ཁྲི། །ཞེས་གཙོ་འཁོར་
གྱི་བཟླས་པའི་གྲངས་སུ་གསུངས་པ་བཞིན་བཟླ་སྟེ། །འཁོར་ལོའི་བདག་པོ་ལ་ནི་རྩ་སྔགས་ཉིད་གཙོ་བོར་བཟླ་བར་བཞེད་དོ། །གསུམ་པ་སེམས་ཀྱི་མངོན་ཞེན་བཟློག་པའི་ཕྱིར་རྫོགས་པའི་རིམ་པ་བསྒོམ་པ་ལ། དངོས་པོའི་གནས་ཐབས། ལམ་གྱི་གནས་ཐབས། འབྲས་བུའི་གནས་ཐབས་སོ། །དང་པོ་ལ་གཉིས་ཏེ། སེམས་དངོས་པོའི་གནས་ཐབས་ཀྱིས་བསྒོམ་རྒྱུའི་དོན་གྱི་ངོ་བོ་ཤེས་པར་བྱ་བའི་ཕྱིར་ལྟ་བའི་དོན་གཏན་ལ་དབབ་པ་དང་། ལུས་དངོས་པོའི་གནས་ཐབས་ཀྱིས་བསྒོམ་པའི་གནད་ཤེས་པར་བྱ་བའི་ཕྱིར་ལུས་ཀྱི་གནས་ལུགས་གཏན་ལ་དབབ་པའོ། །ལམ་གྱི་གནས་ཐབས་ལ་གཞན་ལུས་ཤེས་རབ་དང་། རང་ལུས་ཐབས་ལྡན་ནོ། །འདི་ལ་གཏུམ་མོ་སྒྱུ་ལུས་འོད་གསལ་རྣམས་བསྒོམ་པ་སྟེ། །སྒོམ་པའི་ཐབས་བླ་མའི་ཞལ་ལས་ཤེས་པར་བྱའོ། །འབྲས་བུའི་གནས་ཐབས་ལ་མཉམ་བཞག་རྗེས་ཐོབ་གཉིས་ལས། ལྷན་ཅིག་སྐྱེས་པའི་ཡེ་ཤེས་གོང་ནས་གོང་དུ་སྐྱེ་བ་ལ་བྱའོ། །སྐབས་འདིར་དེ་དག་ཇི་བཞིན་མི་ནུས་པས་གཞུང་གི་དགོངས་པ་ཧོལ་ཁོང་དུ་མི་ལུས་པའི་ཕྱིར་རྫོགས་རིམ་གྱི་ས་བཅད་དུ་སྨོས་པ་ལ་གཉིས། རྣམ་དག་དྲན་པ་དང་། ཐུན་བསྡུ་བའོ། །དང་པོ། སྙིང་རྗེའི་སྤྱན་ནི་དམར་པོ་སྟེ། །རྡོ་རྗེ་གསུམ་གྱིས་དག་པའི་སྤྱན། །བྱམས་པའི་ཐུགས་ལ་ཡན་ལག་
གནག །བསྡུ་བའི་དངོས་པོ་བཞི་ཡིས་ནི། །ཞབས་ནི་རྣམ་པ་བཞི་ཞེས་བརྗོད། །ཞལ་བརྒྱད་རྣམ་པར་ཐར་པ་བརྒྱད། །ཕྱག་ནི་སྟོང་པ་བཅུ་དྲུག་ཉིད། །གུག་སྐྱེད་ཀྱིས་ནི་སངས་རྒྱས་ལྔ། །གདུག་པ་འདུལ་ཕྱིར་ཁྲོ་བོར་བྱས། །གཟུགས་ལ་དཀར་མོ་རྟག་ཏུ་བཤད། །སྒྲ་ལ་ཆོམ་རྐུན་མ་རབ་གྲགས། །དྲི་ཡི་ཆ་ལ་རོ་ལངས་མ། །རོ་ལ་གྷསྨ་རཱི་རབ་གྲགས། །ཤ་ཡིས་པུཀྐ་སཱི་རུ་བྱས། །དེ་བཤིན་ཁྲག་གིས་རི་ཁྲོད་མ། །གདོལ་པ་མོ་ནི་ཁུ་བར་བརྗོད། །གཡུང་མོ་རྐང་དང་ཚིལ་བུ་དག །པགས་པ་བྱང་ཆུབ་ཡན་ལག་བདུན། །རུས་པ་བདེན་པ་བཞི་པོ་ཉིད། །ཅེས་པས་ཀུན་རྫོབ་སྒྲ་སོ་སོའི་རྣམ་དག་དང་། དེ་ཐམས་ཅད་ཀྱང་བདེ་སྟོང་དབྱེར་མེད་ཀྱི་རང་བཞིན་དུ་རྣམ་པར་དག་པའོ། །ཞེས་པས་དོན་དམ་དེ་བཞིན་ཉིད་ཀྱི་རྣམ་དག་བསྒོམ་པའོ། །གཉིས་པ་ནི། ཐུགས་ཀའི་ས་བོན་གྱི་འོད་ཀྱིས་བརྟན་གཡོ་སྣོད་བཅུད་ཐམས་ཅད་གཞལ་ཡས་ཁང་ལ་བསྡུ། དེ་ཡང་ལྷ་མོ་བརྒྱད་ལ་ཐིམ་དེ་རྣམས་
ཀྱང་གཙོ་བོའི་ཞལ་བརྒྱད་ལ་ཐིམ་ཞིང་། ཡུམ་ཡབ་ལ། ཡབ་ཐུགས་ཀའི་ཡེ་ཤེས་སེམས་དཔའ་དང་ཏིང་ངེ་འཛིན་སེམས་དཔའ་ལ་རིམ་གྱིས་འདུས་པས། དེ་ཉིད་ཀྱང་ཞབས་ཀྱུ། ཁོག་པ་ཟླ་ཚེས་ཐིག་ལེ་ནཱ་དའི་རྣམ་པར་སྣང་བ་མི་དམིགས་པར་གྱུར་ཏེ། ཆོས་ཐམས་ཅད་ཀྱི་རང་བཞིན་འོད་གསལ་བའི་དེ་ཁོ་ན་ཉིད་ལ་ཞུགས་པར་གྱུར། ཞེས་མཉམ་པར་བཞག །སླར་རང་ཉིད་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པའི་སྐུར་གྱུར། སྤྱི་བོར་ༀ། མགྲིན་པར་ཨཱཿ ཐུགས་ཀར་ཧཱུྃ་གིས་མཚན་པར་གྱུར། ཞེས་མོས་ལ་ཐུན་མཚམས་ཀྱི་བྱ་བ་ལ་འཇུག་གོ །གཉིས་པ་ཐུན་མཚམས་ཀྱི་ཆོས་ལ་གསུམ། གཏོར་མ་བཏང་བ། རྡོ་རྗེའི་གླུ་བླང་བ། སྨོན་ལམ་གདབ་པའོ། །དང་པོ་ནི། འབྱུང་པོ་ཐམས་ཅད་པའི་གཏོར་མ་བཤམས་ལ། མདུན་གྱི་ནམ་མཁར་ཆོས་འབྱུང་གྲུ་གསུམ་པའི་ནང་དུ། པདྨ་འདབ་མ་བརྒྱད་པ། དཀར་སྔོ་དམར་བའི་མདོག་ཅན་གསུམ་བརྩེགས་མར་གནས་པ། རང་གི་གནས་གསུམ་གྱི་ༀ་ཨཱཿཧཱུྃ་ལས་འོད་ཟེར་
དཀར་དམར་མཐིང་ཁ་འཕྲོས་པས་ས་བླ་ས་འོག་ས་སྟེང་གི་འགྲོ་བ་ཐམས་ཅད་ལ་ཕོག །ཚུར་འདུས་པས། སྟེང་དུ་ༀ་དཀར་པོ། །བར་དུ་ཧཱུྃ་སྔོན་པོ། །འོག་ཏུ་ཨཱཿདམར་པོ། དགུ་དགུ་ཡོངས་སུ་གྱུར་པ་ལས་སྟེང་དུ་སྐུ་རྡོ་རྗེ་ལྷ་ཆེན་བརྒྱད་དང་བཅས་པ་དཀར་པོ། །བར་མ་ལ་ཐུགས་རྡོ་རྗེ་ཕྱོགས་སྐྱོང་བརྒྱད་དང་བཅས་པ་མཐིང་ཁ། །འོག་མ་ལ་གསུང་རྡོ་རྗེ་ཀླུ་ཆེན་བརྒྱད་དང་བཅས་པ་དམར་པོའི་མདོག་ཅན། །ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། རང་འོད་ཀྱི་ཡུམ་ལ་འཁྱུད་ཅིང་གཡས་བརྐྱང་བའི་སྟབས་ཀྱིས་བཞུགས་པ། ཐམས་ཅད་ཀྱི་གནས་གསུམ་ཡི་གེ་གསུམ་གྱིས་མཚན་པའི་ཐུགས་ཀའི་ས་བོན་གྱི་འོད་ཀྱིས་རང་འདྲའི་ཡེ་ཤེས་པ་སྤྱན་དྲངས་བར་བསམ་ལ། གཽ་རཱི་ཨཱངྐུ་ཤ་ཛཿ ཙཽ་རཱི་པཱ་ཤ་ཧཱུྃ། བཻ་ཏཱ་ལཱི་བནྡྷ་བཾ། གྷསྨ་རཱི་གྷཎྚ་ཧོཿ ཞེས་དགུག་གཞུག་བཅིང་མཉེས་བྱས་ལ། སླར་ཡང་སྙིང་ཁའི་འོད་ཟེར་ལྕགས་ཀྱུ་ལྟ་བུས་རྒྱལ་བ་སྲས་དང་བཅས་པ་སྤྱན་
དྲངས་མཆོད་པ་ལྔས་མཆོད། དེ་རྣམས་ཀྱིས་དབང་བསྐུར་བས་སྐུ་རྡོ་རྗེ་འཁོར་བཅས་ལ་རྣམ་པར་སྣང་མཛད། །ཐུགས་རྡོ་རྗེ་འཁོར་བཅས་ལ་མི་བསྐྱོད་པ། གསུང་རྡོ་རྗེ་འཁོར་བཅས་ལ་འོད་དཔག་ཏུ་མེད་པས་དབུ་བརྒྱན་པར་བསྒོམས་ནས་གཏོར་མ་སྔར་ལྟར་བྱིན་གྱིས་བརླབས་ལ། གཏོར་མགྲོན་རྣམས་ཀྱི་ལྗགས་རྡོ་རྗེའི་སྦུ་གུས་གསོལ་བས་དགྱེས་པར་གྱུར་པར་བལྟས་ཏེ། རྡོར་དྲིལ་དང་བཅས་པའི་རྡོར་ཐལ་ཁ་ཕྱེ་བས། །ༀ་ཨིནྡྲ་སོགས་ཀྱི་མཐར། དྲིལ་བུ་བསིལ་ཞིང་། ཨ་ཀཱ་རོ་བཏགས་པ་ལན་གསུམ་གྱིས་བསྔོ། ལྷ་ཆེན་བརྒྱད་པོ་སོགས་གོང་ལྟར་བརྗོད་ལ་ཕྲིན་ལས་བཅོལ། ཡིག་བརྒྱ་བརྗོད་ལ་བཟོད་པར་གསོལ། བཛྲ་མུཿཞེས་བརྗོད་ལ་སེ་གོལ་ལན་གསུམ་གཏོགས་ཤིང་། གཏོར་མའི་མགྲོན་རྣམས་རང་བཞིན་གྱི་གནས་སུ་གཤེགས་པར་གྱུར་ཞེས་མོས། ཆོས་སྐྱོང་གི་གཏོར་མ་བཏང་བར་འདོད་ནའང་སྐབས་འདི་ཉིད་དུ་བྱའོ། །གཉིས་པ་ནི་ཅང་ཏེའུ་བརྡུང་ལ། །ཀོལླ་ཨི་རི ཊྚ་སོགས་སམ། དག་པོ་བཀླག་མི་ཤེས་ན་མངའ་བདག་མར་པས་བོད་སྐད་དུ་བསྒྱུར་བ། པདྨ་ལ་ནི་རྡོ་རྗེ་གནས། །པདྨ་ཉིད་ནི་ཞིང་
ཡིན་ནོ། །རྒྱུན་ཏུ་ཅང་ཏེའུ་བརྡུང་བྱ་སྟེ། །སྙིང་རྗེས་ཀུ་ཅོ་བསྒྲག་མི་བྱ། །དེ་རུ་སྟོབས་ལྡན་འབད་པས་བཟའ། །ཆང་ཡང་མང་པོ་བཏུང་བར་བྱ། །གྲོགས་པོ་སྐལ་ལྡན་གཞུག་པར་བྱ། །སྐལ་བ་མེད་པ་རྣམ་པར་སྤང་། །བཞི་མཉམ་གླ་རྩི་སིཧླ་དང་། །ག་བུར་རྣམས་ཀྱིས་བྱུགས་པར་བྱ། །དེར་ནི་ཚོད་མ་ཤ་ཆེན་གྱིས། །བཀང་བ་དག་ཀྱང་བཟའ་བར་བྱ། །འགྲོ་དང་འོང་བ་འགོག་མི་བྱེད། །དག་དང་མ་དག་བསམ་མི་བྱ། །རུས་པའི་རྒྱན་གྱིས་ལུས་ལ་བརྒྱན། །དེ་རུ་རོ་ནི་གཞུག་པར་བྱ། །འདུས་ཕྱིར་གཉིས་ནི་སྦྱོར་བ་བྱ། །དེར་ནི་རེག་མིན་སྤང་མི་བྱ། །ཞེས་དབྱངས་དང་བཅས་ཏེ་བྱའོ། །གསུམ་པ་ནི། རྡོ་རྗེ་ཐལ་མོ་སྙིང་གར་བཞག་ལ། སྐྱེ་ཞིང་སྐྱེ་བར་རིགས་མཆོག་ཏུ། །སྐྱེ་ཞིང་ཁེངས་མེད་དམ་ཚིག་ལྡན། །དགྱེས་པ་རྡོ་རྗེ་སྟོན་པ་དང་། །བརྩེ་ལྡན་བླ་མར་གུས་གྱུར་ཅིག །སྐྱེ་ཞིང་སྐྱེ་བར་གྱུར་པ་ན། །ལག་པ་རྡོ་རྗེ་རིལ་བུ་འཁྲོལ། །ཟབ་མོའི་ཆོས་ནི་སྟོན་པ་དང་། །བཙུན་མོའི་ཤུ་
ཀྲ་ལེན་འགྱུར་ཤོག །ཀུན་ཏུ་སངས་རྒྱས་ཐམས་ཅད་ཀྱི། །རྡོ་རྗེ་འཆང་ཆེན་གོ་འཕང་ལྡན། །དགེ་བ་འདི་ཡིས་ཐོབ་འགྱུར་ཞིང་། །འགྲོ་བ་ལྔས་ཀྱང་ཐོབ་པར་ཤོག །བྱང་ཆུབ་རྡོ་རྗེས་བསྔགས་པ་ཡི། །རྫོགས་པའི་བྱང་ཆུབ་ཕྱིར་སྤྱོད་དང་། །རྫོགས་སངས་རྒྱས་ཀྱི་སྤྱོད་པ་གང་། །བདག་ཀྱང་དེ་ཉིད་སྤྱོད་པར་ཤོག །ཅེས་པ་ལ་སོགས་པ་བྱའོ། །དེ་དག་གིས་བསྐྱེད་རིམ་དངོས་གཞི་བཤད་ཟིན་ནས། གཉིས་པ་ཡན་ལག་ལ་གཉིས། དམ་ཚིག་དང་། སྤྱོད་པའོ། དང་པོ་ནི། རྩ་བའི་དམ་ཚིག་བཅུ་བཞི་དང་། །ཡན་ལག་གི་དམ་ཚིག་ལྔ་ལ་སོགས་པ་སྲོག་བཞིན་དུ་བསྲུང་ངོ་། །གཉིས་པ་ནི། གཏོར་མ་ཆུ་སྦྱིན་སྭཙྪ་ལ་སོགས་ལས་དང་པོ་པའི་བྱ་བ་བཅོ་ལྔར་གྲགས་པ་རྣམས་སྐབས་སུ་ཅི་ནུས་བྱའོ། །དེ་ལྟ་བུས་བསྐྱེད་པའི་རིམ་པ་མཐར་ཕྱིན་པ་ན། རང་བྱིན་རླབས་དང་ལྷན་ཅིག་སྐྱེས་པའི་རྣལ་འབྱོར་གྱི་རྫོགས་པའི་རིམ་པ་ལ་བསླབ་ཅིང་། བསྲུང་བ་དང་བཟའ་བའི་དམ་ཚིག་ལ་སོགས་པ་བསྟེན་པས་ཡེ་ཤེས་ལ་དབང་བར་གྱུར་བ་ན། སྤྲོས་བཅས། སྤྲོས་མེད། ཚོགས་སྤྱོད། ཕྱོགས་ལས་རྣམ་པར་རྒྱལ་བ་མཐར་ཕྱིན་པའི་བར་གྱི་སྤྱོད་པ་རྣམ་པ་བཞིས་མཚམས་སྦྱར་བས་འབྲས་བུ་སྐྱེ་བའི་
རིམ་པ་ཡོངས་སུ་རྫོགས་པར་འགྱུར་ཏེ། དེ་ལའང་གསུམ། བསྐྱེད་རིམ། རྫོགས་རིམ། གཉིས་ཀའི་མཐར་ཐུག་གི་འབྲས་བུའོ། །དང་པོ་ནི། ལུས་ཐ་མལ་དུ་འཛིན་པའི་ཞེན་པ་སྤངས་ཤིང་ཕྲིན་ལས་ཆེན་པོ་བཞི་དང་ཕྲན་ཚེགས་རྣམས་འགྲུབ་པས་གཞན་གྱི་དོན་བྱེད་དོ། །གཉིས་པ་ལ་རྟགས་དང་ཡོན་ཏན་གཉིས་ལས། རྟག་ནི་དུབ་ལ་སོགས་པ་ངེས་པ་ཅན་ལྔ་དང་། ངེས་པ་མེད་པ་ལྔ་དང་། སྐུའི་སྒོ་དགུ་བཀག་པས་ཡན་ལག་གི་རླུང་ལ་དབང་ཐོབ་པ་དང་། གསུང་གི་སྒོ་བཀག་པས་འཁོར་ལོའི་རྩ་རླུང་ལས་སུ་རུང་བ་དང་། ཐུགས་ཀྱི་སྒོ་དབྱེ་བ་ལས་མངོན་ཤེས་ལྔ་འཆར་ཞིང་ཡེ་ཤེས་ཀྱི་རླུང་དབུ་མར་ཟིན་པའོ། །ཡོན་ཏན་ལ་གཉིས་ཏེ་ཐུན་མོང་གི་ཡོན་ཏན་ལྟ་སྟངས་བཞི་དང་གྲུབ་པ་ཆེན་པོ་བརྒྱད། །ཐུན་མོང་མ་ཡིན་པ་གསང་གནས་ནས་གཙུག་ཏོར་གྱི་བར་དུ་རྩ་རླུང་བྱང་ཆུབ་ཀྱི་སེམས་བརྟན་པས་དག་པའི་ས་ཐོབ་པར་འགྱུར་ཏེ། །བརྒྱ་ཕྲག་བཅོ་བརྒྱད་ལས་རླུང་འགག་པ་ཡིས། །རིམ་པ་བཞིན་དུ་ས་རེ་འཐོབ་བར་འགྱུར། །ཞེས་པ་ལྟར་རོ། །གསུམ་པ་ནི། སྐུ་བཞི་ཡེ་ཤེས་ལྔ་དབང་ཕྱུག་གི་ཡོན་ཏན་བརྒྱད་དང་ལྡན་པ་སངས་རྒྱས་རྡོ་རྗེ་འཆང་གི་གོ་འཕང་སྟེ། དེ་ཉིད་ཚེ་འདི་ལ་མངོན་ཏུ་བྱེད་པར་འགྱུར་རོ། །དགྱེས་རྡོར་རྒྱུད་ཀྱི་རྒྱ་མཚོ་བསྲུབས་པ་ལས། །སྒྲུབ་ཐབས་སྙིང་པོ་དྲི་མེད་བཻཌཱུརྱ། །རང་བཟོས་མ་བསླད་བརྒྱུད་པའི་ཕྱག་བཞེས་ཅན། །
དངོས་གྲུབ་གྲུ་ཆར་འཇོ་བའི་དཔྱིད་འདི་གྲུབ། །མར་རྔོག་རིང་ལུགས་བྱིན་རླབས་རྒྱུན་འབར་བ། །རང་བྱུང་ཡབ་སྲས་རྣམ་དཔྱོད་ཀྱིས་ཕྱེས་པའི། །རྒྱས་པ་གང་དེ་དེང་སང་སྐྱེ་བོ་ཡི། །སྤྱོད་ཡུལ་འཚམས་པར་ཉུང་ངུ་རྣམ་གསལ་བྱས། །ནོངས་པ་གང་མཆིས་བཅོམ་ལྡན་རྣལ་འབྱོར་མར། །བཤགས་ཤིང་དགེ་བས་དགྱེས་མཛད་སྤྲུལ་བའི་སྐུའི། །བསྟན་པ་ཉིན་མོའི་དཔལ་བཞིན་གསལ་བ་དང་། །འགྲོ་ཀུན་ཟུང་འཇུག་ཧེ་རུ་ཀ་འགྲུབ་ཤོག །ཅེས་པ་འདིའང་དཀྱིལ་འཁོར་གྱི་དབང་ཕྱུག་ཧེ་རུ་ཀའི་ངོ་བོར་བཞུགས་པའི་དཔལ་ལྡན་བླ་མ་དམ་པ་དག་གིས་གསེར་གྱི་མེ་ཏོག་དང་བཅས་ཏེ་རྗེས་སུ་གནང་བ་ཡང་ནས་ཡང་དུ་བསྩལ་བ་དང་། མཁྱེན་པའི་སྤྱན་རས་ཡངས་ཤིང་བསྟན་འགྲོ་ལ་ཐུགས་གཅིག་ཏུ་གཞོལ་བའི་སྐྱེས་ཆེན་ཁྱད་པར་ཅན་དག་གིས་ཀྱང་ཡང་ཡང་བཀས་བསྐུལ་ལྟར། མར་རྔོག་གི་གསུང་རྣམས་གཞིར་བཞག །རྗེ་རང་བྱུང་བ་དང་སྤྱན་སྔ་ཐམས་ཅད་མཁྱེན་པའི་དགོངས་དོན་སྲོག་ཏུ་བཟུང་སྟེ་རྒྱས་བསྡུས་ཀྱི་བསྣོན་འབྲིད་ཕྲན་བུ་ཙམ་ལས་རང་བཟོའི་ཚིག་གིས་མ་བསླད་བར། ཀུན་མཁྱེན་ཏཱའི་སི་ཏུའི་བཀའ་འབངས་ཀརྨ་ངག་དབང་ཡོན་ཏན་རྒྱ་མཚོས་གདན་ས་ཆེན་པོ་དཔལ་སྤུངས་ཀྱི་ཡང་དབེན་དུ་སྦྱར་བ་དགེ་ལེགས་འཕེལ། །བླ་མའི་བཀས་གནང་རང་བཟོ་མེད་པའི་གཞུང་། །བྱིན་རླབས་དད་ལྡན་བརྒྱུད་པའི་ཟམ་མ་ཆད། །
མར་ལུགས་དགྱེས་རྡོར་སྒྲུབ་པའི་ཐབས་འདི་ཡང་། །དཔལ་སྤུངས་ཐུབ་བསྟན་ཆོས་འཁོར་གླིང་ཆེན་པོ་ན། །ཡི་གེའི་སྤྲིན་ཆེན་འཕྲོ་བའི་ཕྱི་མོ་རུ། །དགོས་པ་ཆེན་པོས་བསྒྲུབས་པའི་དགེ་གང་དེས། །རྗེ་བཙུན་བླ་མའི་དགོངས་པ་ཡོངས་རྫོགས་ཤིང་། །ཀཾ་ཚང་བསྟན་པའི་རྫོགས་ལྡན་གསར་འཆར་ཤོག། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།