དཔལ་དགྱེས་པ་རྡོར་རྗེའི་དཀྱིལ་འཁོར་གྱི་ཆོ་ག་དངོས་གྲུབ་རྒྱ་མཚོ།
དཔལ་དགྱེས་པ་རྡོར་རྗེའི་དཀྱིལ་འཁོར་གྱི་ཆོ་ག་དངོས་གྲུབ་རྒྱ་མཚོ་ཞེས་བྱ་བ་བཞུགས་སོ། །
དཔལ་དགྱེས་པ་རྡོ་རྗེའི་དཀྱིལ་འཁོར་གྱི་ཆོ་ག་དངོས་གྲུབ་རྒྱ་མཚོ་ཞེས་བྱ་བ། བླ་མ་དང་བཅོམ་ལྡན་འདས་དགྱེས་པ་རྡོ་རྗེ་ལ་ཕྱག་འཚལ་ལོ། །ཟུང་འཇུག་ཆེན་པོའི་རྒྱལ་སྲིད་སྐྱོང་ཞིང་བདེ་ཆེན་བདག་མེད་དགའ་མར་འཁྱུད། །སྲིད་པ་གསུམ་པོར་འཇིག་རྟེན་དང་ནི་འཇིག་རྟེན་འདས་པའི་དབང་བསྐུར་སྩལ། །མཆོག་བདེའི་གནས་ལས་རྟག་ཏུ་ཉམས་མེད་དགྱེས་པའི་རྡོ་རྗེའི་གར་མཛད་པ། འགྲོ་བ་མཐའ་དག་ཁྱོད་ཀྱི་གོ་འཕང་མི་འགྱུར་མཆོག་ཏུ་དབང་བསྐུར་སྩོལ། །གང་དེའི་ངོ་བོ་ཉིད་གྱུར་མར་རྔོག་གཞུང་གི་སྲོལ། །རང་བྱུང་ཡབ་སྲས་ཆོས་ཀྱི་སྤྱན་གྱིས་ལེགས་ཕྱེས་བ། །དུས་འདིའི་སྐལ་མཉམ་རྣམས་ཀྱི་ལག་ལེན་ཁྲིགས་བསྡེབ་སྟེ། །བསླད་མེད་བཀོད་ལ་དཔའ་བོ་མཁའ་
འགྲོས་བརྩེ་བར་མཛོད། །ཟབ་མོ་སྔགས་ཀྱི་ལམ་བཟང་ལས་འོངས་བ། །ཡེ་ཤེས་སྐུ་ཅན་རྣམས་ཀྱི་གཤེགས་པའི་ཤུལ། །དངོས་གྲུབ་ནོར་བུ་འབྱུང་པའི་རྒྱ་མཚོ་ནི། །སྐལ་བཟང་འདོ་པ་འཇོ་བའི་གཉེན་དུ་སྦྱིན། །དེའང་བཅོམ་ལྡན་འདས་དགྱེས་པ་རྡོ་རྗེའི་དཀྱིལ་འཁོར་དུ་དབང་བསྐུར་བ་འདོད་པས་ཐོག་མར་ཤེས་པར་བྱ་བ་རྒྱུད་ཀྱི་རྒྱལ་པོ་འདིའི་བསྡུས་པའི་དོན་ནི། འགྲེལ་པ་ལུགས་དང་མན་ངག་ལུགས་གཉིས་སུ་གྲགས་པ་ལས། འདིར་དཔལ་ཛྙཱ་ན་སིདྡྷིས། །གཞི་དངོས་པོའི་གནས་ལུགས། ལམ་གྱི་རིམ་པ། འབྲས་བུ་སྐྱེ་བའི་རིམ་པ་གསུམ་དུ་གསུངས་པ་ལ་བོད་ཀྱི་མཁས་པ་སོ་སོས་འགྲེལ་ཚུལ་མང་ཡང་། དཔལ་རང་བྱུང་ཀུན་མཁྱེན་གྱི་བཞེད་པས། གཞི་ལ་གཉིས་ཏེ་དངོས་
དང་། ལམ་གྱི་གཞི་དབང་ངོ་། །དངོས་ལ་གཉིས། ལུས་དངོས་པོའི་གནས་ལུགས་རྡོ་རྗེའི་ལུས་སྐུ་གསུམ་དང་ཐབས་ཤེས་ཀྱི་རང་བཞིན་རྩ་རླུང་བྱང་ཆུབ་སེམས་ཀྱི་བདག་ཉིད་ཅན་དང་། སེམས་དངོས་པོའི་གནས་ལུགས་རྒྱུད་ལས། སེམས་ཅན་རྣམས་ནི་སངས་རྒྱས་ཉིད། །འོན་ཀྱང་གློ་བུར་དྲི་མས་བསྒྲིབས། །དེ་གསལ་ན་ནི་སངས་རྒྱས་ཉིད། །ཅེས་གསུངས་པ་ལྟར་སེམས་ཀྱི་ཆོས་ཉིད་སྤྲོས་པ་ཀུན་ཞི་སངས་རྒྱས་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་དེ་བཞིན་གཤེགས་པའི་སྙིང་པོ་དང་། སེམས་ཕུང་ཁམས་སྐྱེ་མཆེད་བག་ཆགས་ཐམས་ཅད་ཀྱིས་བགོས་པ། ས་བོན་ཐམས་ཅད་པའི་ཀུན་གཞིའི་རྣམ་པར་ཤེས་པ་གློ་བུར་གྱི་དྲི་མ་དང་ལྷན་ཅིག་པའོ། །དེ་ལ་ལུས་དང་སེམས་དངོས་པོའི་གནས་ལུགས་བདེ་གཤེགས་སྙིང་པོ་ནི་སྦྱང་གཞིའོ། །གློ་བུར་དྲི་མ་མ་རྟོགས་ལོག་རྟོག་སྦྱོར་བའི་ལམ་ལ་ཞུགས་པའི་འཁྲུལ་པ་གནས་སྐབས་བཞི་ལ་སོགས་པ་ནི་སྦྱང་བྱའོ། །ལམ་གྱི་རིམ་པ་བསྐྱེད་རྫོགས་ཀྱི་རྣལ་འབྱོར་ནི་སྦྱོང་བྱེད་དོ། །འབྲས་བུའི་རིམ་པ་གསུམ་ནི་སྦྱངས་འབྲས་སོ། །གཞི་གཉིས་པ་དབང་བསྐུར་བ་ལྔ་སྟེ། ངོ་བོ་རྒྱུད་མ་སྨིན་པ་སྨིན་པར་བྱེད་པ། ངེས་ཚིག་སྒོ་གསུམ་གྱི་དྲི་མ་འཁྲུད་པ་དང་སྐལ་བ་འཇོག་པ། དབྱེ་བ་བུམ་གསང་ཤེར་ཡེ་ཚིག་དབང་བཞི། ཆོ་གའི་རིམ་པ་འོག་ཏུ་འབྱུང་ཞིང་། དགོས་པ་ནི་དབང་གིས་མ་སྨིན་པར་ལམ་
སྒོམ་དུ་མི་རུང་བས་ལམ་སྒོམ་པ་ལ་དབང་བ་དང་། །གསང་བ་མཛོད་ཀྱི་རྒྱུད་ལས། དབང་བསྐུར་ཡང་དག་སྦྱིན་ལྡན་ན། །སྐྱེ་ཞིང་སྐྱེ་བར་དབང་བསྐུར་འགྱུར། དེ་ཡི་སྐྱེ་བ་བདུན་ན་ནི། །མ་བསྒོམས་ཀྱང་ནི་འགྲུབ་པར་འགྱུར། །ཞེས་སོ། །དེ་ལྟར་ན་དབང་བསྐུར་བ་ནི། རང་གི་ལུས་སེམས་ཀྱི་དངོས་པོའི་གནས་ལུགས་རྟོགས་པར་བྱེད་པའི་ཆ་ནས་ལམ་དང་། ལམ་རིམ་པ་གཉིས་ཀྱི་གཞིའམ་བྱ་བ་ཡིན་པས་ལམ་གྱི་གཞི་སྟེ་ལོ་ཏོག་འདོད་པ་ལ་ས་བོན་ལྟར་རིམ་གཉིས་ལ་འཇུག་པའི་ཐོག་མར་མེད་ཀ་མེད་དུ་སོང་བས་དེ་འཆད་པ་ལ་གསུམ། གང་གིས་དབང་བསྐུར་བ་པོ་སློབ་དཔོན་གྱི་མཚན་ཉིད། གང་ལ་བསྐུར་བ་སློབ་མའི་མཚན་ཉིད། ཚུལ་ཇི་ལྟར་དབང་བསྐུར་བའོ། །དང་པོ་ནི། རྒྱུད་ལས། རང་འདོད་ལྷ་མཉམ་རྣལ་འབྱོར་པ། །རབ་མཐོང་སྔགས་ཀྱི་ཕ་རོལ་སོན། །ཞེས་དང་། རིན་ཆེན་འབར་བར། རྡོ་རྗེ་དྲིལ་བུ་ཡེ་ཤེས་དང་། ལྷ་དང་དཀྱིལ་འཁོར་སྦྱིན་སྲེག་དང་། །སྔགས་དང་རྡུལ་ཚོན་གཏོར་མ་དང་། །དབང་བསྐུར་དེ་ཉིད་བཅུ་རིག་པ། །ཞེས་པ་ལ་སོགས་པའི་མཚན་ཉིད་དང་ལྡན་པའོ། །གཉིས་པ་ནི། །དེས་ཤིང་འཇམ་ལ་སྙན་པར་སྨྲ་བ། བྱམས་པ་དང་སྙིང་རྗེའི་སེམས་དང་ལྡན་པ། ཐོས་བསམ་སོགས་དགེ་ལ་བརྩོན་པ། བླ་མ་ལ་གུས་ཤིང་གསང་བ་ཟབ་མོར་མི་སྐྲག་ཅིང་དད་པ། གཏོང་སེམས་ཆེ་ཞིང་བསྟན་བཅོས་མཁས་
པའི་སློབ་མ་ནི་སྐལ་པ་དང་ལྡན་པའོ། །གསུམ་པ་ལ་བཞི། སྔོན་ཏུ་བྱ་བ་བསྙེན་པའི་རིམ་པ། །སའི་ཆོ་ག །སྟ་གོན་ཏུ་གནས་པ། དངོས་གཞིའོ། །དང་པོ་ནི་སྒྲུབ་ཐབས་སུ་བཤད་པའི་གྲངས་བསྙེན་ལ་སོགས་པ་སྦྱིན་སྲེག་གིས་ཁ་བསྐངས་བ་སྔོན་ནས་ལེགས་པར་གྲུབ་པའི་སློབ་དཔོན་ལ། སློབ་མས་ལན་གསུམ་དུ་གསོལ་བ་བཏབ་པར་གྱུར་པ་ན། བསྙེན་པ་ཁ་གསོར་གྲགས་པ་ལྷ་ལ་གནང་བ་ཞུ་བའི་དོན་ཏུ་མཚན་མ་མཐོང་གི་བར་རམ་ཞག་བདུན་ལ་སོགས་པར་བསྙེན་པ་ལ་འཇུག་པར་བྱ་སྟེ། མདོ་སྦྱར་ལས། ཡང་ན་དེ་ལྟར་བཟླས་པ་ལས། ལྷ་ཡི་སྣང་བ་གསལ་བའམ། །མཚན་མ་བཟང་དང་ལྡན་གྱུར་ན། །དེས་ཀྱང་དཀྱིལ་འཁོར་བྲི་བ་ཡིན། །ཞེས་སོ། །གཉིས་པ་ལ་ལྔ། །ས་བརྟག་པ། སློང་བ། སྦྱོང་བ། སྲུང་ཞིང་བཟུང་བ། །བགེགས་བསལ་བའོ། །དང་པོ་ནི། །ཇི་སྐད་དུ། ཚལ་དང་སྐྱེ་བོ་མེད་གནས་དང་། །བྱང་ཆུབ་སེམས་དཔའི་ཁྱིམ་དང་ནི། །དཀྱིལ་འཁོར་ཁང་པའི་ནང་དུ་ཡང་། །དཀྱིལ་འཁོར་དམ་པ་རབ་ཏུ་བཞེངས། །ཞེས་གསུངས་པ་ལྟ་བུའི་གནས་སུ་དཀྱིལ་འཁོར་བྲི་སྟེ། གནས་རྙིང་པར་ནི་ས་བརྟག་ཏུ་མེད་པས་དེའི་ཚུལ་འདིར་མི་འབྲི་ཡི། དགོས་པ་བྱུང་ན་གཞུང་གཞན་ཏུ་ཤེས་པར་བྱའོ། །གཉིས་པ་ནི། སྒྲུབ་ཐབས་ལྟར། རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ། ཟླ་བའི་འོད་ལྟར་
དཀར་བའི་ཧཱུྃ་ལས་འོད་ཟེར་དཀར་པོ་འཕྲོས། ལུས་ཐམས་ཅད་གང་། སྡིག་པ་དང་སྒྲིབ་པ་མ་ལུས་པ་སྦྱངས་ནས་སྟོང་པར་གྱུར། ངག་ཏུ་ཧཱུྃ་ཞེས་བརྗོད་པས། བདག་ཉིད་ལས་ཀྱི་ཧེ་རུ་ཀ་ཞལ་གཅིག་ཕྱག་གཉིས་པར་གསལ་བའི་སྤྱི་བོར་ཟླ་བའི་སྟེང་དུ་ༀ་དཀར་པོ། །ལྐོག་མར་པདྨ་འདབ་མ་བརྒྱད་པའི་སྟེང་དུ་ཨཱཿདམར་པོ། །སྙིང་གར་ཉི་མའི་སྟེང་དུ་ཧཱུྃ་སྔོན་པོས་མཚན་པར་གྱུར། །ནང་མཆོད་བྱིན་གྱིས་བརླབས་ནས་མྱང་ཞིང་རྡོ་དྲིལ་བཟུང་། གཏོར་མ་ཅིག་བཤམས་ལ་སྔོན་འགྲོ་ལྟར་བྱིན་གྱིས་བརླབ། ན་མཿསརྦ་ཏ་ཐཱ་ག་ཏེ་བྷྱོ་སོགས་ལན་གསུམ་གྱིས་འབུལ། རྡོར་དྲིལ་བཅས། གང་ཡང་འདི་ན་ལྷ་དང་ཀླུ། །གནོད་སྦྱིན་སྲིན་པོའམ་གཞན་ཡང་རུང་། །ས་འདི་བདག་གིས་སློང་བགྱིད་ན། །དཀྱིལ་འཁོར་ཆེད་དུ་སྩལ་དུ་གསོལ། །ཞེས་ལན་གསུམ་གྱིས་གསོལ་བ་བཏབ་པས་གང་བ་བྱིན་པར་མོས་ལ་གཏོར་མ་གཙང་སར་བསྐྱལ། དཀྱིལ་འཁོར་གྱི་ས་གཞིར་པ་བྱུང་ལྔས་ཟླུམ་པོར་བྱུག་པའི་དབུས་སུ་དྲི་བཟང་གི་ཆུས་ཐིག་ལེ་བྱ། མེ་ཏོག་སེར་པོའི་ཚོམ་བུ་བཀོད་པའི་མདུན་དུ་མཆོད་
གཏོར། ཆུ་གཉིས་ཉེར་སྤྱོད་ལྔ་གཡས་བསྐོར་དུ་བཤམ། །ལག་གཡས་ས་གནོན་གྱི་ཕྱག་རྒྱ་ས་ལ་ལན་གསུམ་བསྣུན་ཚུལ་བྱས་ལ། པཾ་ལས་བྱུང་བའི་སའི་ལྷ་མོ་ལྟེ་བ་ཡན་ཆད་ས་གསེབ་ནས་འཐོན་པ། སྐུ་མདོག་གསེར་བཙོ་མ་ལྟ་བུ། གཡས་པ་ཁས་ལེན་གྱི་ཕྱག་རྒྱ་དང་། གཡོན་རིན་པོ་ཆེའི་བུམ་པ་བསྣམས་པ། རིན་པོ་ཆེའི་རྒྱན་ཐམས་ཅད་ཀྱིས་བརྒྱན་པ། བདག་གིས་ལས་ཅི་བགྱི་ཞེས་བཀའ་ནོད་པར་གྱུར། དྲིལ་སྟབས་བཅས། ༀ་ཚུར་སྤྱོན་ཚུར་སྤྱོོན་ལྷ་མོ་ཆེ། །ས་ཡི་ལྷ་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་བའི། །མཆོག་གི་རྒྱན་གྱིས་རབ་ཏུ་བརྒྱན། །མགུལ་དོ་ཞབས་གདུབ་སིལ་སིལ་ཅན། །རྡོ་རྗེ་སེམས་དཔའ་རབ་མཆོད་མ། །མཆོད་ཡོན་འདི་ནི་བཞེས་མཛོད་ལ། །དཀྱིལ་འཁོར་ལས་རྣམས་རབ་ཏུ་སྒྲུབས། །ཧྲཱིཿཧཱི་ཧཱི་ཧཱི་པཾ་སྭཱ་ཧཱ། ཞེས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿ དམ་ཚིག་པ་དང་གཉིས་མེད་དུ་གྱུར། ཆུ་གཉིས་དང་། ༀ་པྲྀ་ཐི་བཱི་དེ་བཱི་ས་པ་རི་ཝཱ་ར་པུཥྤེ་
པྲ་ཏཱིཙྪ་སྭཱ་ཧཱ། ནས། ཤབྡའི་བར་གྱིས་མཆོད། གཏོར་མ་བསངས་སྦྱང་། ཨ་ཀཱ་རོ་ལན་གསུམ་གྱིས་བྱིན་བརླབ། ༀ་པྲྀ་ཐི་བཱི་དེ་བཱི་ས་པ་རི་ཝཱ་ར་ན་མཿསརྦ་ཏ་ག་ཏ་བྷྱོ་བི་ཤྭ་མུ་ཁེ་བྷྱཿ སརྦ་ཐཱ་ཁཾ་ཨུངྒ་ཏེ་སྥ་ར་ཎ་ཨི་མཾ་ག་ག་ན་ཁཾ་གྲྀཧྞ་དཾ་བ་ལྱཱ་དི་སྭཱ་ཧཱ། ལན་གསུམ་གྱིས་འབུལ། མ་མ་རིན་ཆེན་སྣ་ཚོགས་འཛིན། །ཀྱེ་ཡི་རྡོ་རྗེ་ཁྲོས་མཆོད་པའི། །ལྷ་མོ་ཁྱོད་ནི་དཔང་དུ་གྱུར། །ཆེ་གེ་བདག་ནི་དཀྱིལ་འཁོར་བྲི། །ཞེས་གསོལ་བ་བཏབ་པས། སའི་ཕྱོགས་འདིར་ཁྱོད་ཀྱིས་དཀྱིལ་འཁོར་བྲིས་ཤིག་ཅེས་གནང་བ་བྱིན་ནས་ཡེ་ཤེས་པ་གཤེགས། དམ་ཚིག་སེམས་དཔའ་གནས་དེ་ཉིད་དུ་ཐིམ་པར་གྱུར། ཞེས་མོས་ལ་མཆོད་གཏོར་བསྡུའོ། །གསུམ་པ་ནི། རྡོ་རྗེ་སློབ་དཔོན་ལྷའི་ང་རྒྱལ་གྱིས་སྟེགས་བུའི་དབུས་སུ་སེམས་སྐྱིལ་གྱིས་འདུག་ལ། ༀ་བྷཱུ་ཁཾ་ཧཱུྃ། ས་གཞི་སྟོང་པ་ཉིད་དུ་གྱུར། ཧཱུྃ་ལཾ་ཧཱུྃ། གསེར་གྱི་ས་གཞིར་གྱུར། ༀ་མེ་དི་ནཱི་བཛྲཱི་བྷ་བཛྲ་བནྡྷ་ཧཱུྃ། ས་གཞི་རྡོ་རྗེའི་རང་བཞིན་དུ་གྱུར། །རྡོ་རྗེ་དང་བཅས་པའི་ལག་པ་ས་ལ་བཞག་ནས། ཨཱཥྚ་ལན་
བདུན་བརྗོད། ས་གཞིའི་ཉེས་སྐྱོན་ཐམས་ཅད་དག་པར་གྱུར། བཞི་པ་ས་སྲུང་བ་ནི། སྟེགས་བུའི་དབུས་སུ་བདུད་རྩི་ལྔའི་ཆུས་བྱུགས་ལ། ར་ལས་ཉི་མའི་དཀྱིལ་འཁོར་ནས། བཛྲ་རཀྵའི་སྔགས་ལན་གསུམ་བརྗོད་པའི་བར་གྱིས་སྲུང་འཁོར་བསྒོམ་མོ། །བཟུངས་ནི། མཆོད་གཏོར་འདུ་བྱས་ལ། སྔོན་འགྲོ་གཏོར་མ་བཏོང་བ་ནས། བཟླས་པ་དང་རྣམ་དག་དྲན་པ་ཡན་སྒྲུབ་ཐབས་ལས་འབྱུང་བ་ལྟར་རྫོགས་པར་བྱའོ། །ལྔ་པ་ནི། སློབ་དཔོན་གྱི་ཕྱོགས་བཞིའམ་མདུན་དུ་ཆུ་གསུམ་ཉེར་སྤྱོད་བཅས་བཤམ། །ཕྱོགས་བཞིའི་སློབ་མ་རྣམས་ཀྱིས་ཐུན་མོང་དུ་བྱིན་རླབས་བྱ་ཞིང་ཆུ་གསུམ་ཉེར་སྤྱོད་རོལ་མོ་བཅས་དང་། དཀར་མོ་རི་དྭགས་སོགས་ཀྱིས་མཆོད། ཁྱོད་ནི་རྣལ་འབྱོར་མ་ཡི་སོགས་ཀྱིས་བསྟོད་ལ། །ཤར་ཕྱོགས་པས། རང་ཉིད་སྐད་ཅིག་གིས་གཽ་རཱི་ནག་མོ་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། གཡས་གྲི་གུག །གཡོན་ཉ་རོ་ཧི་ཏ་བསྣམས་པ། ཞབས་གཡོན་བརྐྱང་བ་སྐྱིལ་ཀྲུང་
ཕྱེད་པའི་གར་གྱིས་པདྨ་དང་ཚངས་པའི་གདན་ལ་བཞུགས་པར་གྱུར། མཎྜལ་ཚོམ་བུ་བདུན་མའི་མཐར། མ་ཚང་བ་མེད་པ་འདི་ཉིད་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་དཀྱིལ་འཁོར་ཆེན་པོ་སྒྲུབ་ཅིང་མཆོད་པའི་ཡོན་ཏུ་འབུལ་བར་བགྱིའོ། །ཐུགས་རྗེས་འགྲོ་བའི་དོན་དུ་བཞེས་སུ་གསོལ། །བཞེས་ནས་བྱིན་གྱིས་བརླབ་ཏུ་གསོལ། །ཞེས་འབུལ་ལ་དྲིལ་སྟབས་བཅས། དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་གཙོ་བོས་བཤད་དུ་གསོལ། །ཞེས་བསྐུལ། དེས་འགྲེས་ཏེ་ལྷོ་ཕྱོགས་པས། རང་ཉིད་སྐད་ཅིག་གིས་ཙཽ་རཱི་དམར་མོ་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། གཡས་ཅང་ཏེའུ། གཡོན་ཕག་པ་
བསྣམས་པ། ཞབས་གཡོན་བརྐྱང་བ་སྐྱིལ་ཀྲུང་ཕྱེད་པའི་གར་གྱིས་པདྨ་དང་དབང་པོའི་གདན་ལ་བཞུགས་པར་གྱུར། མཎྜལ། མཚན་རྣམས་ཐམས་ཅད་ཡང་དག་རྫོགས། །མཚན་མིན་ཐམས་ཅད་ཡང་དག་སྤངས། །ཀུན་ཏུ་བཟང་པོ་སྐུ་ཡི་མཆོག །དཀྱིལ་འཁོར་གཙོ་བོས་བཤད་དུ་གསོལ། །ནུབ་ཕྱོགས་པས། རང་ཉིད་སྐད་ཅིག་གིས་བཻ་ཏཱ་ལི་སེར་མོ་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། གཡས་རུས་སྦལ། གཡོན་ཐོད་པ་བསྣམས་པ། ཞབས་གཡོན་བརྐྱང་བ་སྐྱིལ་ཀྲུང་ཕྱེད་པའི་གར་གྱིས་པདྨ་དང་ཉེ་དབང་གི་གདན་ལ་བཞུགས་པར་གྱུར། མཎྜལ། ཞི་བའི་ཆོས་ནི་མཆོག་ལས་བྱུང་། །ཡེ་ཤེས་སྤྱོད་པ་རྣམ་སྦྱངས་པ། །ཀུན་ཏུ་བཟང་པོ་གསུང་གི་མཆོག །དཀྱིལ་འཁོར་གཙོ་བོས་བཤད་དུ་
གསོལ། །བྱང་ཕྱོགས་པས། རང་ཉིད་སྐད་ཅིག་གིས་གྷསྨ་རཱི་ལྗང་གུ་ཞལ་གཅིག་ཕྱག་གཉིས་སྤྱན་གསུམ་མ། མཆེ་བ་གཙིགས་པ། དབུ་སྐྲ་སེར་པོ་གྱེན་དུ་བརྫེས་པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། གཡས་སྦྲུལ། གཡོན་ཐོད་པ་བསྣམས་པ། ཞབས་གཡོན་བརྐྱང་བ་སྐྱིལ་ཀྲུང་ཕྱེད་པའི་གར་གྱིས་པདྨ་དང་དྲག་པོའི་གདན་ལ་བཞུགས་པར་གྱུར། མཎྜལ། སེམས་ཅན་ཀུན་གྱི་སེམས་ཆེན་པོ། །རང་བཞིན་དག་པས་གོས་པ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་གཙོ་བོས་བཤད་དུ་གསོལ། །ཞེས་བསྐུལ། སློབ་དཔོན་སྟེགས་བུའི་དབུས་སུ་འགྲེང་སྟེ། རྟེན་གཞལ་ཡས་ཁང་འཁོར་གྱི་ལྷ་མོ་བརྒྱད་ལ་བསྡུ། དེ་རྣམས་ཀྱང་གཙོ་བོའི་ཞལ་བརྒྱད་ལ་ཐིམ་ཞིང་། རང་ཉིད་ཧེ་རུ་ཀ་ཞལ་གཅིག་ཕྱག་གཉིས་པའི་རྣམ་པར་གསལ་བའི་རྐང་པ་གཉིས་སུ་ཧཱུྃ་ལས་སྣ་ཚོགས་
རྡོ་རྗེ་རེ་རེ། མིག་གཉིས་སུ་མ་དང་ཊ་ལས་ཉི་མ་དང་། ཟླ་བའི་དཀྱིལ་འཁོར། མིག་གཉིས་ཧཱུྃ་ལས་སྣ་ཚོགས་རྡོ་རྗེའི་ལྟེ་བ་ལ་ཧཱུྃ་རབ་ཏུ་འབར་བ་རེ་རེས་མཚན་པར་གྱུར། བཛྲ་ཊིཥྚ་ཧཱུྃ། ཞེས་བརྗོད་ལ་མྱུར་ཞིང་གཡོ་བའི་མིག་གིས་བལྟ། རྡོར་དྲིལ་དང་བཅས་པའི་ལག་གཉིས་སྙིང་གར་འཁྱུད་པའི་ཚུལ་གྱིས་ཧེ་རུ་ཀའི་ང་རྒྱལ་བསྐྱེད་པ་ནི། ཁ་ཡི་པདྨ་འཛུམ་དང་བཅས། །ཅུང་ཟད་དམར་བའི་མཆེ་བ་འཆང་། །ཀུནྡ་དཀར་གསལ་སོ་ཡི་ཕྲེང་། དཔལ་ལྡན་ཁྲག་འཐུང་རྣལ་འབྱོར་ཆེ། །སེམས་ཅན་སྒྲོལ་བ་རྨད་དུ་བྱུང་། །དེ་ལ་སོགས་པའི་གར་གྱིས་ནི། །བགེགས་ལ་སོགས་པ་བསྐྲད་པར་བྱའོ། །ཞེས་བརྗོད་ལ། བྱང་ཤར་མཚམས་སུ་སོང་ནས། ང་ནི་དཔལ་ལྡན་སྙིང་རྗེའི་སྟོབས། །སྲུང་བའི་འཁོར་ལོ་སྦྱོར་བ་པོ། །རྡོ་རྗེ་རྩེ་མོ་འབར་བ་ཡིས། །ལུས་གསུམ་ལས་སྐྱེས་དགས་བྱ་སྟེ། །རྨོངས་པའི་བདག་ཉིད་གང་མགོ་བོ། །ཚལ་པར་དགས་ཀྱིས་གཞན་དུ་མིན། །བདེ་ཆེན་ཡེ་ཤེས་རྫོགས་སངས་རྒྱས། །རྡོ་རྗེ་སེམས་དཔའ་
དངོས་ལས་སྐྱེས། །ལུས་སྲུལ་པོ་ནི་གང་སུ་དག །བགེས་ཆེན་པོ་རྣམས་སོ་སོར་སོང་། །ཞེས་ལན་གསུམ་མཐར། ས་ཕྱོགས་འདིར་བདག་རྡོ་རྗེ་སློབ་དཔོན་འདི་ཞེས་བྱ་བས་སློབ་མ་ཆེ་གེ་ཞེས་བྱ་བ་རྫོགས་པའི་བྱང་ཆུབ་རྟོགས་པར་བྱ་བ་དང་། སེམས་ཅན་ཐམས་ཅད་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར་བཅོམ་ལྡན་འདས་དགྱེས་པ་རྡོ་རྗེའི་དཀྱིལ་འཁོར་གྱི་འཁོར་ལོ་འབྲི་ཡིས། །གང་སུ་ཡང་རུང་བ་ས་ཕྱོགས་འདིར་གནས་པའི་ལྷ་དང་། ཀླུ་དང་། ལྷ་མ་ཡིན་དང་། གནོད་སྦྱིན་དང་། སྲིན་པོ་དང་། ཡི་དྭགས་དང་། ཤ་ཟ་དང་། རྗེད་བྱེད་དང་། འབྱུང་པོ་དང་། གནོན་པོ་དང་། ནམ་མཁའ་ལྡིང་དང་། མིའམ་ཅི་དང་། རིག་འཛིན་ལ་སོགས་པ་རྒན་པོ་དང་། རྒན་མོ་དང་། གཡོག་དང་འཁོར་དང་བཅས་པ་རྣམས་འདིར་མ་གནས་པར་གཞན་དུ་དེངས་ཤིག །དེ་ལྟར་རྡོ་རྗེ་འཛིན་གྱི་བཀའ་ཐོས་ནས་མྱུར་བ་ཉིད་དུ་དེངས་ཤིག །གང་དག་
མི་འགྲོ་བ་དེ་དག་ནི་ཕྱག་ན་རྡོ་རྗེ་རབ་ཏུ་འབར་བ། །ཧཱུྃ་ཀ་ར་ཤིན་ཏུ་ཁྲོས་པ། ཡེ་ཤེས་ཀྱི་རྡོ་རྗེ་ཆེན་པོ་ཀུན་ནས་རབ་ཏུ་འབར་བས་མགོ་བོ་ཚལ་པ་བརྒྱར་འགས་པར་འགྱུར་ཏ་རེ། ཞེས་དང་། ན་མཿས་མནྟ་བུདྡྷེ་བྷྱཿ ༀ་ན་མོ་བཛྲ་ཀྲོ་དྷཱ་ཡ། མ་ཧཱ་དཾཥྚཊྐ་ཊ་བྷཻ་ར་ཝཱ་ཡ། བཛྲ་སནྟོ་ཧ་དཪྤཱ་ཡ། ༀ་ཨ་མྲྀ་ཏ་ཀུཎྜ་ལཱི་ཧཱུྃ་ཕཊ། ཅེས་པའི་སྔགས་བཟླ་བ་དང་། བཀའ་བསྒོའི་ཚིགས་བཅད་ལན་གསུམ་དུ་བརྗོད་དེ། རྡོ་རྗེ་གསོར། དྲིལ་བུ་དཀྲོལ། ཧཱུྃ་ལན་མང་དུ་བརྗོད་ཅིང་དེ་ཉིད་ནས་གཡས་སུ་བསྐོར་བ་གསུམ་གྱི་རྗེས་སུ། ཧེ་རུ་ཀའི་ཐུགས་ཀའི་ཧཱུྃ་གི་འོད་ཟེར་གྱིས་བགེགས་ཐམས་ཅད་ཤིན་ཏུ་བསྐྲད་པར་གྱུར། ཞེས་པ་ནི་ཧེ་རུ་ཀ་འཇིགས་པའི་གར་རོ། །སླར་ཡང་བདག་མེད་མའི་ང་རྒྱལ་གྱིས། ཧཱི་མང་དུ་བརྗོད་ཅིང་དེ་ཉིད་ནས་གཡོན་དུ་བསྐོར་བ་གསུམ་གྱི་རྗེས་སུ། སྙིང་གའི་ཨ་ལས་བདེ་བའི་འོད་ཟེར་འཕྲོས་པས་བགེགས་རྣམས་མྱོས་པར་གྱུར། ཞེས་པ་ནི་བདག་མེད་མ་བདེ་བའི་གར་རོ། །སླར་དཀྱིལ་འཁོར་གྱི་དབུས་སུ་གཡས་བརྐྱང་གིས་འདུག་སྟེ། རང་ཉིད་ཧེ་རུ་ཀར་གསལ་བར་གྱུར། ཧཱུྃ་ཞེས་བརྗོད་པ་
དང་གཡོན་སྔོན་འགྲོའི་གཞི་བཅའ་པད་དཀོར་དང་སྦྲགས་པའི་མཐར་གཡས་བརྐྱང་། ལག་གཉིས་གར་གཡས་སུ་ཕྱིར་བསྒྱུར་དང་སྡིགས་མཛུབ་གཉིས་སྟེང་དུ་ཕྱར་ལ་འོག་ཏུ་སྤྲུགས་པ་གསུམ་གསུམ་སྤེལ། གཡོན་བརྐྱང་གིས་འདུག་སྟེ། རང་ཉིད་བདག་མེད་མར་གསལ་བར་གྱུར། །ཧཱི་ཞེས་གཡས་སྔོན་འགྲོའི་བཞི་བཅའ་པད་དཀོར་དང་སྤྲགས་པའི་མཐར་གཡོན་བརྐྱང་། ལག་གཉིས་གར་གཡོན་ཏུ་ཕྱིར་བསྒྱུར། སྡིགས་མཛུབ་གཉིས་སྟེང་དུ་ཕྱར་ལ་འོག་ཏུ་སྤྲུགས་པ་གསུམ་གསུམ་སྤེལ། སླར་ཡང་རང་ཉིད་ཧེ་རུ་ཀ་ཞལ་གཅིག་ཕྱག་གཉིས་པ་གསལ་བར་གྱུར། ར་ལས་ཉི་མ་ནས་བཛྲ་རཀྵའི་སྔགས་ཀྱི་བར་སྲུང་འཁོར་བསྒོམ། །སྤྲོ་ན་འདིར་རྡོ་རྗེ་གུར་ལས་འབྱུང་བའི་གར་རྣམས་རྒྱས་པར་བྱའོ། །གསུམ་པ་སྟ་གོན་ལ་བཞི། །ལྷ་སྟ་གོན། །བུམ་པ་སྟ་གོན། །སྦྱིན་སྲེག་སྟ་གོན། སློབ་མ་སྟ་གོན་ནོ། །དང་པོ་ནི། བའི་རྣམ་ལྔ་དང་བདུད་རྩི་ལྔ་སྦྱར་བས་ཕོ་བྲང་གི་ཚད་ཙམ་དུ་ཟླུམ་པོར་བྱུགས། ཐིག་ཚོན་གྱི་བྱ་བ་འོག་ཏུ་འབྱུང་ཡང་སྐབས་འདིར་ཚོམ་བུའི་གནས་མི་འཁྲུལ་པའི་ཕྱིར་ཐིག་ཆེན་བརྒྱད་འདེབས་པ་ཕྱག་ལེན་ཏུ་འབྱུང་། སློབ་དཔོན་གྱིས་གཙོ་འཁོར་སོ་སོའི་སྔགས་བརྗོད་བཞིན་དུ་དབུས་སུ་དྲིའི་ཐིག་ལེ་གྲུ་བཞི་དང་། །ཕྱོགས་མཚམས་བརྒྱད་ལ་ཟླུམ་པོ་རེ་བྱ། དེ་སྟེང་
མེ་ཏོག་གི་ཚོམ་བུ་གཙོ་བོ་ལ་ཆེ་ཞིང་འཁོར་རྣམས་ལ་དེའི་སུམ་འགྱུར་གྱི་ཆུང་བ་བཀོད་པའི་མཐར། མདུན་དུ་ཆུ་གསུམ་གཙོ་འཁོར་སྤྱི་ཁྱབ་དང་། མེ་ཏོག་ལ་སོགས་པ་ཆ་དགུ་དགུ་གཡས་བསྐོར་དུ་བཤམ། བསངས་སྦྱང་། སྟོང་པའི་ངང་ལས་སྲུང་བའི་འཁོར་ལོའོ་དབུས་སུ་ནས། །ཕྱོགས་ཀྱི་མདོག་ཅན་གྱི་ལྟེ་བར་བྷྲཱུཾ་ལས་བྱུང་བའི་རིན་པོ་ཆེ་སྣ་ཚོགས་ལས་གྲུབ་པའི་ཁང་པ་བརྩེགས་པ་ནས། ཉི་མའི་གདན་དང་བཅས་པའོ། །ཨ་ནཱི་ལའི་སྔགས་ཀྱིས་རྒྱས་གདབ། དབུས་ཀྱི་གདན་གྱི་སྟེང་དུ་ཧཱུྃ་དང་ཨཾ་སྔོན་པོ་ཡོངས་སུ་གྱུར་པ་ལས་བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ནས། གཡས་བསྐུམ་པས་ཡབ་ལ་འཁྱུད་པ། འདབ་མ་བརྒྱད་ལ་གཾ་ཙཾ་བཾ་གྷཾ་པཾ་ཤཾ་ཙཾ་ཌཾ་རྣམས་ཡོངས་སུ་གྱུར་པ་ལས། ཤར་དུ་གཽ་རཱི་ནག་མོ་གཡས་གྲི་གུག །གཡོན་ཉ་རོ་ཧི་ཏ་བསྣམས་པ། ལྷོར་ཙཽ་རཱི་སོགས་ནས། ནུབ་བྱང་དུ་ཌོཾམྦི་ནཱི་སྣ་ཚོགས་པའི་མདོག་ཅན་གཡས་རྡོ་རྗེ། གཡོན་སྡིགས་མཛུབ་མཛད་པ། ལྷ་མོ་ཐམས་ཅད་ནས་གར་གྱིས་གནས་
པའོ། །རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་སྤྱན་དྲངས་ཏེ་ནམ་མཁར་བཞུགས་པར་གྱུར། ཧཱུྃ་དང་བསངས་གཏོར་གྱིས་ཕྱི་འབྲང་གི་བགེགས་བསྐྲད། འབྲུ་གསུམ་གྱིས་བྱིན་བརླབས་ནས། ཆུ་གཉིས་ཉེར་སྤྱོད་ལྷ་མོ་བརྒྱད་ཀྱིས་མཆོད། ཞེ་སྡང་རྡོ་རྗེ་སོགས་ཀྱིས་བསྟོད། གཽ་རཱི་ཛཿ ནས་ ཧོཿ སླར་ཡང་ཐུགས་ཀའི་ཧཱུྃ་ནས། དབུ་བརྒྱན་པར་གྱུར། མཆོད་པ་བྱིན་གྱིས་བརླབས། འོག་ནས་འབྱུང་བ་ལྟར་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད། སྔགས་ཀྱིས་རྒྱས་གདབ། རྡོར་དྲིལ་སྔགས་ཀྱིས་བསྲུང་ལ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་པའི་སེམས་དཔའ་ནི། །དམ་པའི་སྲིད་པ་བྱེད་པར་ཤོག །ཅེས་དང་། ཐམས་ཅད་དངོས་པོའི་རང་བཞིན་མཆོག །ནས། དེས་ནི་འཇིག་རྟེན་དེ་མཚུངས་ཤོག །བར་དང་། སྒྲུབ་ཐབས་སུ་བཤད་པ་ལྟར་བདུད་རྩི་འབུལ་ཞིང་མྱང་། སྔགས་རྒྱས་གདབ། སློབ་དཔོན་གྱིས་སྤོས་དང་རྡོར་དྲིལ་འཛིན་པས། གཉིས་མེད་ཡེ་ཤེས་ལས་བྱུང་བའི། །ཁྱབ་བདག་དངོས་གྲུབ་བདག་ཉིད་ཅན། །
སྟོན་པའི་གཙོ་བོ་ཁྲག་འཐུང་དཔལ། །བདག་མེད་མ་དང་ཡང་དག་ལྡན། །ཕྱོགས་མཚམས་རྣམས་ཀྱི་མཁའ་འགྲོ་དང་། །རིག་པའི་ལྷ་མོ་རྫུ་འཕྲུལ་ལྡན། །བྱང་ཆུབ་སེམས་དཔའ་ལ་སོགས་ཀུན། །མ་ལུས་བདག་ལ་དགོངས་སུ་གསོལ། །སློབ་མ་ལ་ནི་ཕན་པ་དང་། །ཁྱེད་རྣམས་ལ་ཡང་མཆོད་པའི་ཕྱིར། །རྡོ་རྗེ་ཅན་བདག་འདི་ཞེས་བས། །ནང་པར་དཀྱིལ་འཁོར་འདྲི་བར་འཚལ། །རྗེས་སུ་བརྩེ་བས་ཉེར་དགོངས་ཏེ། །བྱིན་གྱིས་བརླབ་པར་མཛད་དུ་གསོལ། །ཞེས་ལན་གསུམ་དུ་གསོལ་བ་གདབ་ལ། སྟ་གོན་གྱི་དཀྱིལ་འཁོར་རྟེན་དང་བརྟེན་པར་བཅས་པ་རྣམས་ནམ་མཁར་བཞུགས་པར་གྱུར། ཞེས་བྱའོ། །གཉིས་པ་ནི། རིན་པོ་ཆེའི་བུམ་པ་དགུ་ལས་བུམ་དང་བཅས་པའམ། མ་འབྱོར་ན་བུམ་པ་གཉིས་གུ་གུལ་གྱིས་འདུག །ཡུངས་ཀར་གྱིས་བྲབས་ཤིང་། བདུད་རྩི་འཁྱིལ་བའི་སྔགས་རིང་ཐུང་གང་མོས་བཟླས་པས་བགེགས་བསལ། ཧཱུྃ་ལན་བདུན་བཟླས་ལ་རས་ཁ་ཚར་མ་ཉམས་པ་སྣ་ལྔས་མགུལ་ཆིངས་ཕྲོག་ལྔ་པ་བྱ་ཞིང་སྲད་བུས་བཅིང་། ༀ་ཏཔྟེ་ཏཔྟེ་མ་ཧཱ་ཏཔྟེ་སྭཱ་ཧཱ། ཞེས་
བཟླ་ཞིང་ཆུ་གཙང་མས་དགང་ལ་བུམ་རྫས་སོ་ལྔ་གཞུག །འབྲས་བུ་ཅན་གྱི་ཤིང་གིས་ཁ་རྒྱན། བུམ་མཚན་གཟུགས་དངོས་བཏགས་པའམ་དྲི་ངར་བདུད་རྩི་ལྔའི་ཆུས་པདྨ་ལ་གནས་པའི་སོ་སོའི་ཕྱག་མཚན་དང་། ལས་བུམ་ལ་སྣ་ཚོགས་རྡོ་རྗེ་བྲི་བའམ་ཕྱག་བཞེས་སླ་ཐབས་སུ་དེ་ལྟར་བྲིས་པས་གདན་བྱ། རས་དཀར་པོ་དྲི་མ་མེད་པའི་སྟེང་དུ་མེ་ཏོག་དཀར་པོ་གཅལ་དུ་བཀྲམ་པར་ལྷ་གྲངས་དང་མཉམ་པ་ཡོད་ན། རྣམ་རྒྱལ་དབུས་དང་། གཞན་རྣམས་ཕྱོགས་མཚམས་དང་། ལས་བུམ་བྱང་ཤར་དུ་དགོད། རྣམ་རྒྱལ་གྱི་སྟེང་དུ་བདུད་རྩི་ལྔ་དང་སྦྱར་བའི་ཆང་གིས་གང་བའི་ཐོད་པའི་སྟེང་དུ་རྡོ་རྗེའི་ལྟེ་བར་མེ་ཏོག་གི་ཕྲེང་བ་བརྒྱུས་པའི་གཟུངས་ཐག་བཏགས་པ་བཞག །ལྷ་གྲངས་དང་མཉམ་པའི་མཆོད་པ་བཤམས་ལ། སོ་སོར་བསྐྱེད་པ་ནི། རྣམ་རྒྱལ་དུ་གཙོ་བོ་ཡབ་ཡུམ་དང་། བུམ་པ་གཞན་རྣམས་སུ་རིམ་པ་བཞིན་ཏུ་གཽ་རཱི་ནག་མོ་ཞེས་སོགས་ཀྱིས་བསྐྱེད་ཅིང་ཡེ་ཤེས་པ་རྣམས་གཞུག །ཉེར་སྤྱོད་ལྔས་མཆོད་ལ། །གཾ་ལས་སྐྱེས་པའི་གཽ་རཱི་ཤར། ཞེས་སོགས་ཀྱིས་བསྟོད། བདུད་རྩི་མྱང་ནས། གཙོ་བོ་ཡམ་ཡུམ་ལ་འོག་ཏུ་འབྱུང་བ་ལྟར་དང་། གཟུངས་ཐག་རྡོ་རྗེ་དེ་གཽ་རཱིའི་བྷ་གར་ཆུད་པར་བལྟས་ཏེ་བཟླས་པ་བྱས་ལ། རྡོ་རྗེ་བཏོན་པས་ལྷ་མོ་དེ་ཉིད་བདུད་རྩིའི་རང་བཞིན་དུ་ཞུ་བར་བསྒོམ། །བུམ་པ་གཞན་འདུན་ལ་ཡང་ལྷ་བསྐྱེད་པ་
སོགས་རིམ་པ་དེ་ལྟར་ཤེས་པར་བྱའོ། །བུམ་པ་གཉིས་ལ་ནི་རྣམ་རྒྱལ་སྟེང་ཐོད་པའི་བདུད་རྩི་སོགས་བཅའ་གཞི་དེ་དང་འདྲ་བ་ལས། བསངས་སྦྱངས། སྟོང་པའི་ངང་ལས། བྷྲཱུཾ་ལས་རིན་པོ་ཆེའི་བུམ་པ་མཚན་ཉིད་ཐམས་ཅད་ཡོངས་སུ་རྫོགས་པའི་རྣམ་རྒྱལ་གྱི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཚངས་པ་ལ་སོགས་པའི་གདན་གྱི་སྟེང་དང་། བུམ་མཚན་པད་ཉི་བདུད་བཞིའི་གདན་ལ་སྐད་ཅིག་གིས་བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ནས་ཡབ་ལ་འཁྱུད་པ། འདབ་མ་བརྒྱད་ལ། ཤར་དུ་ཚངས་པ་ནས་ཉི་མའི་གདན་དང་བཅས་པའི་སྟེང་དུ། ཤར་དུ་གཽ་རཱི་ནག་མོ་སོགས་ནས། སྐྱིལ་ཀྲུང་ཕྱེད་པའི་གར་གྱིས་གནས་པ། མིག་ཏུ་མོཾ་སོགས་ནས་སྐྱེ་མཆེད་དང་གནས་གསུམ་བྱིན་རླབས། ཡེ་ཤེས་པ་གཞུག་པ། དབང་བསྐུར་རྒྱས་གདབ་པར་སྒྲུབ་ཐབས་བཞིན་བྱ། མཆོད་པ་བྱིན་བརླབས་ལ། དག་ཅིང་དྲི་མེད་སོགས་ཆུ་གསུམ་ཉེར་སྤྱོད་རོལ་མོ། །གཽ་རཱི་སོགས་ལྷ་མོ་བརྒྱད་ཀྱིས་མཆོད། ཐམས་ཅད་དངོས་པོ་སོགས་བསྟོད་པ་ཉི་ཤུ་པས་བསྟོད། གཟུངས་ཐག་གི་སྣེ་གཡོན་པའི་
ཁུ་ཚུར་གྱིས་བཟུང་ལ། སྔགས་ཀྱི་འོད་ཟེར་གཟུངས་ཐག་ལ་འཁྲིལ་ནས་སོང་བས། བཅོམ་ལྡན་འདས་ཡབ་ཡུམ་གྱིས་ཐུགས་རྒྱུད་བསྐུལ། བྱང་ཆུབ་སེམས་ཀྱིས་བུམ་པ་གང་བར་གྱུར། ཞེས་གཙོ་འཁོར་སྙིང་པོ་བརྒྱ་རྩ་ལ་སོགས་པ་བཟླས་པའི་མཐར་ཐོད་པའི་བདུད་རྩི་བུམ་པར་བླུགས་པས། བཅོམ་ལྡན་འདས་ཡབ་ཡུམ་འཁོར་དང་བཅས་པ་འོད་དུ་ཞུ་བ་བུམ་ཆུ་དང་རོ་གཅིག་ཏུ་གྱུར་པར་བསམ། ལས་ཐམས་ཅད་པའི་བུམ་པའི་དབུས་དང་། སྣ་ཚོགས་རྡོ་རྗེའི་མཚན་མ་དང་བཅས་པ་པདྨ་དང་ཉི་མའི་སྟེང་དུ། ཁྲོ་བོ་བདུད་རྩི་འཁྱིལ་བ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་བསྣམས་ཤིང་གཡོན་སྡིགས་མཛུབ་མཛད་པ། ཞབས་གཡོན་བརྐྱང་པའི་སྟབས་ཀྱིས་བཞུགས་པ། དབུ་སྐྲ་དང་སྨིན་མ་སྨ་ར་དམར་སེར་འབར་བ། སྤྱན་གསུམ་དམར་ལ་ཟླུམ་ཞིང་ཞལ་མཆེ་བ་གཙིགས་པ། སྐུ་སྦོམ་ཞིང་ཐུང་ལ་གསུས་པ་འཕྱང་བ། སྦྲུལ་གྱི་ཆུན་པོ་བརྒྱད་ཀྱིས་བརྒྱན་པ། སྟག་གི་
པགས་པའི་ཤམ་ཐབས་ཅན་གྱི་བར་སྲུང་འཁོར་གྱི་སྐབས་ལྟར་བསྐྱེད། ༀ་བཛྲ་པུཥྤེ་ནས། ཨཱ་ལོ་ཀེ་ཨཱཿཧཱུྃ་སྭཱ་ཧཱའི་བར་ཉེར་སྤྱོད་ལྔ་དང་རོལ་མོས་མཆོད། རྣམ་དག་ཆོས་ཀྱི་དབྱིངས་ལས་མ་གཡོས་ཀྱང་། །ཐབས་ཀྱིས་སྤྲུལ་སྐུ་སྣ་ཚོགས་སྟོན་མཛད་ཅིང་། །གདུག་པ་འདུལ་ཕྱིར་ཁྲོ་བོའི་སྐུར་སྟོན་པ། །ཁྲོ་རྒྱལ་བདུད་རྩི་འཁྱིལ་པ་ཁྱོད་ལ་འདུད། །ཅེས་བསྟོད། གཟུངས་ཐག་ལས་བུམ་གྱི་སྟེང་དུ་སྤོས་ལ་བཟུང་སྟེ། ༀ་བཛྲ་ཨ་མྲྀ་ཏ་ཀུཎྜ་ལཱི་ཧཱུྃ་ཕཊ། ཅེས་བརྒྱ་རྩ་སོགས་བཟླས་ནས། བདག་ཅག་དཔོན་སློབ་འཁོར་དང་བཅས་པའི་བགེགས་མ་རུངས་པ་རྣམས་ལས་མ་གྲུབ་ཀྱི་བར་དུ་བསྲུང་དུ་གསོལ། །ཞེས་ཕྲིན་ལས་བཅོལ། སློབ་མ་རྗེས་སུ་འཛིན་པའི་ཚེ་སྐབས་འདིར་ལས་བུམ་གྱི་ཆུས་དགྱེས་རྡོར་གྱི་སྐུ་བརྙན་ལ་ཁྲུས་གསོལ། དེས་དཔོན་སློབ་ཐམས་ཅད་ལ་ཁྲུས་བྱ་ཞིང་གནས་ཁང་རྫས་དང་ཡོ་བྱད་ཀུན་ལ་འཐོར། །ཡུངས་ཀར་དང་ཟན་བསྲེས་པས་ལུས་དྲིལ་གྱིས་བྱས་ཏེ་ལུས་ངག་ཡིད་གསུམ་གྱི་དྲི་མ་བསྡུས་པར་བསམ་ལ་ཆངས་བུ་བྱས་པ་གྱོ་མོའི་ནང་དུ་བླུགས་ལ་རྒྱབ་ཏུ་བོར་བས་བྱུར་བསལ། ཞི་བའི་སྦྱིན་སྲེག་ཡིག་རྙིང་ལས་འབྱུང་བ་ལྟར་རམ་སྤྱི་
ཁྱབ་རྒྱས་པ་ཞིག་བྱ་སྟེ་སྒྲུབ་མཆོད་ཀྱི་དཀྱུས་སུ་དེ་དག་མི་དགོས་སོ། །བཞི་པ་ནི། སློབ་མའི་བར་ཆད་བསལ་བའི་དོན་དུ་སྔོན་འགྲོའི་སྐབས་ལྟར་འབྱུང་པོ་ལ་གཏོར་མ་བཏང་། སྡོམ་ནི། ཁྲུས་བྱས་མཎྜལ་ཕུལ་ནས་ནི། །གཞན་དོན་ལ་བསྐུལ་གསོལ་བ་གདབ། །སྤྲོ་བ་བསྐྱེད་ཅིང་ཉན་པར་བསྐུལ། །སྒྲིབ་སྦྱང་ཚོགས་བསགས་སེམས་བསྐྱེད་ཅིང་། །གནས་གསུམ་བྱིན་བརླབས་མཆོད་བྱས་ལ། །སོ་ཤིང་སྦྱིན་ཞིང་སྐྱོར་ཆུ་བླུད། །ཀུ་ཤུ་སྦྱིན་ཞིང་སྲུང་སྐུད་གདག །ཆོས་བཤད་རྨི་ལམ་བརྟག་པའོ། །ཞེས་པ་རྣམས་སོ། །དེ་ལ་ཉེར་ལྔའི་བར་ཟུར་དུ་མ་གྱུར་པའི་སློབ་མ་རྣམས་ཡོལ་བའི་ཕྱི་རོལ་དུ་ལས་ཐམས་ཅད་པའི་ཆུས་ཁྲུས་བྱས། སློབ་དཔོན་ལ་ཕྱག་གསུམ་སྔོན་དུ་འགྲོ་བས། སྔོན་འགྲོ་སྟ་གོན་གྱི་ཆོས་རྣམས་ཞུ་བའི་ཡོན་དུ་མཎྜལ་འབུལ་ཐལ་མོ་སྦྱར་ཏེ་འཁོད་པ་ལ། བླ་མས། སྔགས་ཀྱི་དངོས་གྲུབ་དོན་གཉེར་གང་། །དཀྱིལ་འཁོར་འདིར་ནི་གཞུག་པར་བྱ། །བསོད་ནམས་འདོད་པས་དེ་ལས་གཞན། །གཞན་ནི་འཇིག་རྟེན་ཕ་རོལ་གཉེར། །སླར་ཡང་དད་དང་ལྡན་པ་ཡིས། །འཇིག་རྟེན་ཕ་རོལ་ལ་དམིགས་ཏེ། །བློ་ལྡན་དཀྱིལ་འཁོར་གཞུག་པར་བྱ། །འདི་ཡི་འབྲས་བུ་མི་
གཉེར་ཏེ། །གལ་ཏེ་འདི་འབྲས་དོན་གཉེར་ན། །འཇིག་རྟེན་ཕ་རོལ་འགྲུབ་མི་འགྱུར། །འཇིག་རྟེན་ཕ་རོལ་ལ་དམིགས་ན། །འབད་པ་མེད་པར་འདི་འབྲས་འགྲུབ། །ཅེས་པའི་དོན་བཀྲོལ་ལ་བཤད་དོ། །དེ་ནས་ཐུན་མོང་མ་ཡིན་པའི་སེམས་བསྐྱེད་པའི་དོན་ཏུ་སློབ་མས་གསོལ་བ་གདབ་པ་ནི། དགའ་ཆེན་ཁྱོད་བདག་སྟོན་པ་པོས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །སྡོམ་པ་རྣམས་ཀྱང་བདག་ལ་སྩོལ། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོས་བདག་ནི་འཇུག་པར་འཚལ། །ཞེས་ལན་གསུམ། སྔགས་ཀྱི་ཐེག་པར་བློ་དགུག་ཅིང་སྤྲོ་བ་བསྐྱེད་པ་ནི། བུ་ཚུར་ཐེག་པ་ཆེན་པོ་པ། །ཁྱོད་ནི་ཚུལ་ཆེན་སྣོད་ཡིན་གྱི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །རྫོགས་པའི་སངས་རྒྱས་གང་འདས་དང་། །གང་དག་དེ་བཞིན་མ་བྱོན་དང་། །ད་ལྟར་བྱུང་བའི་རྫོགས་
སངས་རྒྱས། །འགྲོ་ལ་ཕན་ཕྱིར་བཞུགས་པ་རྣམས། །དེ་དག་ཀུན་གྱིས་གསང་སྔགས་ཀྱི། །ཆོ་ག་མཆོག་བཟང་འདི་མཁྱེན་ནས། །དཔའ་བོས་བྱང་ཆུབ་ཤིང་དྲུང་དུ། །ཐམས་ཅད་མཁྱེན་པ་ཚད་མེད་བརྙེས། །གསང་སྔགས་སྦྱོར་བ་མཉམ་མེད་པས། །སྐྱོབ་པ་སངས་རྒྱས་ཧེ་རུ་ཀས། །བདུད་སྡེ་ཤིན་ཏུ་མི་བཟད་པ། །དཔུང་ཆེན་དག་ཀྱང་དེ་ཡིས་བཅོམ། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་དང་། ཉན་པར་གདམས་པ་ནི། རྟོགས་པ་ཐམས་ཅད་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་ཧེ་རུ་ཀ་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །ཅེས་པའི་དོན་གོ་བར་བྱ། རྒྱུད་དག་པའི་ཕྱིར་ལྷ་རྣམ་པར་དག་པར་བྱ་སྟེ། བདག་གིས་སྡིག་པ་བགྱིས་པ་དང་། །བགྱིད་དུ་བསྩལ་དང་ཡི་རང་བ། །སངས་རྒྱས་སྤྱན་སྔར་མཆིས་ནས་སུ། །དེ་དག་ཐམས་ཅད་བཤགས་པར་བྱ། །
སངས་རྒྱས་བྱང་ཆུབ་སེམས་དཔའ་དང་། །རང་རྒྱལ་དགྲ་བཅོམ་འགྲོ་རྣམས་ཀྱི། །སྒོམ་དང་བཟླས་བརྗོད་བསོད་ནམས་གང་། །དེ་ལ་བདག་ནི་ཡི་རང་ངོ་། བདག་གི་དགེ་བའི་ལས་རྣམས་འདི་དག་གིས། འཇིག་རྟེན་འདིར་ནི་མྱུར་དུ་སངས་རྒྱས་ཤོག །འགྲོ་ལ་ཕན་ཕྱིར་ཆོས་རྣམས་སྟོན་བགྱིད་ཅིང་། །སེམས་ཅན་སྡུག་བསྔལ་མང་པོས་གཟིར་ལས་དགྲོལ། །སེམས་བསྐྱེད་མངོན་པར་སངས་རྒྱས་དང་། །ཆོས་ཀྱི་འཁོར་ལོ་བསྐོར་བ་དང་། བྱང་ཆུབ་སེམས་དཔའི་ཚོགས་ཀྱི་མཆོག །དེ་ལ་བདག་ནི་སྐྱབས་སུ་མཆི། །སངས་རྒྱས་འབྱུང་བ་ཇི་ལྟ་བར། །སྐལ་ལྡན་བྱང་ཆུབ་སེམས་དཔའ་ཡིས། །བྱང་ཆུབ་སེམས་ནི་བསྐྱེད་པ་ལྟར། །དེ་ཉིད་དུ་ནི་སེམས་བསྐྱེད་དོ། །ཞེས་ལན་གསུམ། དེ་ནས་སློབ་མ་ལྷར་བསྐྱེད་པ་ནི། ཁྱེད་རང་རྣམས་སྐད་ཅིག་གིས་སྣ་ཚོགས་པདྨའི་ཟེའུ་འབྲུར་རོའི་སྙིང་གར་ཉི་མའི་དཀྱིལ་འཁོར་ལ་སྐྱིལ་ཀྲུང་ཕྱེད་པའི་གར་གྱིས་ཞུགས་པའི་བཅོམ་ལྡན་འདས་ཀྱེ་
རྡོ་རྗེ་སྐུ་མདོག་སྔོན་པོ་ཞལ་གཅིག་ཕྱག་གཉིས་པ། གཡས་རྡོ་རྗེ་དང་གཡོན་ཐོད་པ་འཛིན་ཅིང་། གཡོན་པའི་གྲུ་མོར་ཁ་ཊྭཱཾ་ག་དང་ལྡན་པ། །དབུ་སྐྲ་སེར་པོ་གྱེན་ཏུ་བརྫེས་པ། ཐོད་པ་སྐམ་པོ་ལྔའི་དབུ་རྒྱན་དང་། །རློན་པ་ལྔ་བཅུའི་དོ་ཤལ་ཅན། སྤྱན་གསུམ་པ། ཞལ་མཆེ་བ་གཙིགས་པ། ཕྱག་རྒྱ་དྲུག་གིས་བརྒྱན་པར་སྒོམས་ཤིག །ཅེས་བརྗོད་ཅིང་དྲི་བཟང་གི་ཆུས་སྙིང་ཁ། མགྲིན་པ། སྤྱི་བོ་རྣམས་སུ་བྱུགས་ལ། ཧཱུྃ་ཨཱཿༀ། ཞེས་བརྗོད། ཡང་དེ་བཞིན་དུ་རྡོ་རྗེ་གཏུགས་ལ། སྙིང་གར་ཧཱུྃ་ལས་རྡོ་རྗེ་སྔོན་པོ་ཧཱུྃ་གིས་མཚན་པ། མགྲིན་པར་ཨཱ་ལས་པདྨ་དམར་པོ་ཨཱཿས་མཚན་པ། སྤྱི་བོར་ༀ་ལས་འཁོར་ལོ་དཀར་པོ་ༀ་ཀྱིས་མཚན་པའི་འོད་ཟེར་ལྕགས་ཀྱུ་ལྟ་བུས། སྐུ་དང་གསུང་དང་ཐུགས་རྡོ་རྗེ་རྣམས་བཀུག་སྟེ། རང་རང་གི་ས་བོན་ལ་ཐིམ་པར་སྒོམས་ཤིག་བྱས་ལ། སློབ་དཔོན་གྱིས་དྲིལ་བུ་འཁྲོལ་བཞིན་པས་མེ་ཏོག་ལ་སོགས་པ་སློབ་པའི་གནས་སོ་སོར་འབུལ་བའི་ཚུལ་བྱས་ལ། །ༀ་བཛྲ་པུཥྤེ་ཨཱཿཧཱུྃ་སོགས་ཉེར་སྤྱོད་ལྔས་
མཆོད་པས་རིགས་གསུམ་གྱི་ལྷ་མཉེས་པར་བསམ་པ་ནི་སྐུ་གསུང་ཐུགས་ཀྱི་ལྷས་སློབ་མ་ལྷག་པར་གནས་པར་བྱས་པ་ཡིན་ནོ། །དེ་ནས་དངོས་གྲུབ་ཀྱི་མཚན་མ་བརྟག་པའི་དོན་དུ་སོ་ཤིང་སྦྱིན་པ་ནི། ཇི་སྐད་དུ། ཨུ་དུམ་ཝཱ་ར་ཨ་ཤྭ་ཏྭ། །མེ་ཏོག་བཅིངས་ཤིང་དྲི་ཡིས་བྱུགས། །སོར་ནི་བཅུ་གཉིས་ཚད་དུ་བྱ། །ཞེས་གསུངས་པ་ལྟ་བུའི་སོ་ཤིང་ངམ། དེ་དག་མ་རྙེད་ན། །ལྕང་མའམ། ཤུག་པའམ། བལ་བུ་ལ་སོགས་པ་འབུས་མ་ཟོས་ཤིང་། ཡ་ཡོ་གས་ཆག་ལ་སོགས་པའི་སྐྱོན་དང་བྲལ་བ་སོར་བཅུ་གཉིས་པ་དྲིའི་ཆུས་བརླན་ཞིང་། རྩེ་མོར་མེ་ཏོག་སྔོན་པོ་བཅིངས་པ། ༀ་ཨཱཿཧཱུྃ་བཟླས་ཏེ་བྱིན་ལ། བའི་རྣམ་ལྔས་བྱུགས་པའི་མཎྜལ་ཁྲུ་གང་ངམ་ཁྲུ་བཞི་པ་བྱས་ནས། སོ་འདྲུད་པའི་ཚུལ་གྱིས། དེའི་དབུས་སུ་དོར་དུ་གཞུག་པ་ནི། ཤར་ཕྱོགས་ངོས་སུ་ཁ་བལྟས་ཏེ། །མི་སྨྲ་བར་ནི་སོ་ཤིང་བཅའ། །བཅའ་ཞིང་དེ་བཞིན་མི་དགས་ཤིང་། །ཕན་ཚུན་ཏུ་ཡང་མི་འདོར་རོ། །སོ་ཤིང་མདུན་ཏུ་དྲང་པོར་དོར། །ཞེས་པ་བཞིན་སོ་ཤིང་མཎྜལ་དུ་དོར་མཛོད་བྱས་ལ་འདོར་དུ་བཅུག་པས། རྩེ་མོ་བདག་དང་གྱེན་དུ་ལྟ་ན་མཆོག་གི་དངོས་གྲུབ། ཤར་ལྷོ་ནུབ་ཏུ་ལྟ་ན་དངོས་གྲུབ་འབྲིང་། མཚམས་དང་བྱང་དུ་ལྟ་ན་འཇིག་རྟེན་པའི་དངོས་གྲུབ། འོག་ཏུ་བལྟས་ནས་འོག་
གི་དངོས་གྲུབ་འགྲུབ་པར་ལུང་བསྟན་ནོ། །སྒྲིབ་པ་སྦྱོར་བའི་དོན་ཏུ་ཁྱོར་ཆུ་སྦྱིན་པ་ནི། །དྲི་བཟང་གི་ཆུ། ༀ་ཧྲཱིཿབི་ཤུདྡྷ་དྷརྨཱཿསརྦ་པཱ་པཱ་ནི་ཙཱ་སྱ་བི་ཤོ་དྷ་ཡ་སརྦ་བི་ཀལྤཱན་ཨ་པཱ་ན་ཡ་ཧཱུྃ་གིས་བསྔགས་ཏེ། ཧུབ་གསུམ་འཐུང་དུ་གཞུག་ཅིང་རྣམ་རྟོག་ཐམས་ཅད་སྦྱངས་བར་བསམ། རྨི་ལམ་གྱི་ལྟས་བརྟག་པའི་དོན་ཏུ། ༀ་ཨཱཿཧཱུྃ་བཟླས་པའི་ཀུ་ཤ་ཉུང་བསྔས་དང་། མང་བསྟན་ཏུ་སྦྱིན། བར་ཆད་སྲུང་བའི་ཕྱིར་སྐུད་པ་དམར་པོ་ལ་རྩ་བའི་སྔགས་ཀྱིས་བཏབ་པའི་སྲུང་སྐུད་མདུད་པ་གསུམ་དང་ལྡན་པ་སྐྱེས་པའི་དཔུང་པ་གཡོན་དང་། བུད་མེད་ཀྱི་གཡས་སུ་གདབ། དེ་ལ་དྲི་བཟང་ཆུས་བྱུག །སྤྲོ་བ་བསྐྱེད་པའི་ཕྱིར་ཆོས་བཤད་པ་ནི། འཇིག་རྟེན་ཁམས་ནི་མ་ལུས་པར། །ཐམས་ཅད་མཁྱེན་པ་འབྱུང་མི་འགྱུར། །ཨུ་དུམ་ཝཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་བཞིན། །འབྱུང་འགྱུར་ཡང་ནི་མི་འབྱུང་སྲིད། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། གཉིས་མེད་ཟབ་མོའི་སྤྱོད་ཚུལ་འདིས། །སེམས་ཅན་སངས་རྒྱས་བྱེད་པ་ཡིན། །བསྐལ་པ་གྲངས་མེད་མང་པོར་ནི། །སྔོན་ཏུ་བྱས་
པའི་རྣམ་སྨིན་གང་། །དེ་ཀུན་ཟད་པར་འགྱུར་བ་ནི། །ཟབ་མོའི་དཀྱིལ་འཁོར་མཐོང་བས་སོ། །ཞེས་བརྗོད་ལ་རང་གནས་སུ་བཏང་། སློབ་དཔོན་གྱིས་སྟ་གོན་གྱི་ལྷ་ལ་མཆོད་བསྟོད་མདོར་སྡུས་དང་ཡི་གེ་བརྒྱ་པ་ཅི་འགྲུབ་བཟླས་པས་ནོངས་པ་འཆགས། དགེ་བ་བསྔོ། མར་མེ་དང་སྤོས་སོགས་མཆོད་པ་རྒྱུན་མ་ཆད་པར་ཕུལ། །སློབ་མ་རྣམས་བླ་མ་དང་དཀྱིལ་འཁོར་ལ་མགོ་ཕྱོགས་པས་ཉལ་ཏེ་རྨི་ལམ་གང་བྱུང་ནངས་པར་བླ་མ་ལ་ཞུ་ཞིང་བཟང་ན་སྐལ་བ་དང་ལྡན་པར་བཟང་ལ། ངནན་་དྲག་པོའི་སྦྱིན་སྲེག་གམ། བའི་རྣམ་ལྔའི་བཏུང་བ་ལ་འཁྱིལ་བའི་སྔགས་བཟླས་པའམ་བདུད་རྩི་ལྔའི་ཆུ་སྦྱིན། བཟང་ངན་གང་བྱུང་ཡང་རྨི་ལམ་དང་སྣང་བ་བསྲེས་ལ་སྒྱུ་མའི་དོན་དྲན་པར་བྱར་བཅུག་སྟེ། གཟུགས་ནི་དབུ་བ་གདོས་པ་འདྲ། །དབུ་བ་དེ་ལ་སྙིང་པོ་མེད། །དེ་ལ་རྣལ་འབྱོར་བློ་མི་ལྟོས། །ཆོས་ཀུན་དེ་ལྟར་ཡིད་ལ་བྱོས། །ཞེས་ཚོར་བ་སོགས་ལའང་དེ་བཞིན་ཏུ་སྦྱར་ལ་བཤད་དོ། །ལྔ་པ་དངོས་གཞི་ལ་གསུམ། དཀྱིལ་འཁོར་ཞག་གི་ཆོ་ག །དབང་བསྐུར་བ། རྗེས་ཀྱི་བྱ་བའོ། །དང་པོ་ལ་གསུམ། ཐིག་ཚོན་གྱི་ཆོ་ག །དཀྱིལ་འཁོར་སྒྲུབ་པ། དེ་ལ་མཆོད་པའོ། །དང་པོ་ནི། སྟ་གོན་དང་ཞག་གིས་བར་དུ་མཆོད་ན་ནང་པར་བསྐྱེད་རིམ་རྒྱས་པ་བསྡུ་རིམ་ཡན་གྲུབ་ནས་ཧེ་རུ་ཀ་ཕྱག་གཉིས་པའི་རྣམ་པས་ལས་
བྱ། བར་མཆོད་ན་བསྐྱེད་རིམ་བསྐྱར་བལྡབས་མི་དགོས། དཀྱིལ་འཁོར་གྱི་གཉིས་འགྱུར་གྱི་སྲད་བུ་གསར་པ་ལྔ་ཚན་རེ་རེ་ཁ་དོག་ལྔར་བསྒྱུར་བ་ཚངས་བུར་བྱས་ཏེ་རིན་པོ་ཆེའམ་ཐོད་པའི་སྣོད་དུ་དབུས་སུ་སྔོན་པོ། ཕྱོགས་བཞིར་དཀར་སེར་དམར་ལྗང་བཀོད་ལ། བསངས་སྦྱང་། སྟོང་པའི་ངང་ལས་སྲད་བུ་སྔོན་པོ་ཧཱུྃ་ལས་མི་བསྐྱོད་དགྱེས་པ་རྡོ་རྗེ་སྔོན་པོ། དཀར་པོ་བྷྲཱུཾ་ལས་རྣམ་སྣང་དགྱེས་པ་རྡོ་རྗེ་དཀར་པོ། སེར་པོ་ཨཱཾ་ལས་རིན་འབྱུང་དགྱེས་པ་རྡོ་རྗེ་སེར་པོ། དམར་པོ་ཛྲཱིཾ་ལས་སྣང་མཐའ་དགྱེས་པ་རྡོ་རྗེ་དམར་པོ། །ལྗང་གུ་ཁཾ་ལས་དོན་ཡོད་དགྱེས་པ་རྡོ་རྗེ་ལྗང་གུ་རྣམས་ཞལ་བརྒྱད་དང་ལྡན་པའི་རྩ་ཞལ་རང་རང་གི་སྐུ་མདོག་དང་མཚུངས་ཤིང་། གཡས་ཞལ་ཀུནྡ་ལྟར་དཀར་བ། ནས། འཇིགས་པར་མཛད་པ། རང་གི་མིག་ཉི་ཟླ་འབར་བའི་འོད་ཟེར་གྱིས། སྟ་གོན་གྱི་ལྷའི། ཐུགས་ཀ་ནས་ཡེ་ཤེས་ཀྱི་ཐིག་སྐུད་ལྔ་སྤྱན་དྲངས། གཽ་རཱི་ཛཿསོགས་ཀྱིས་བསྟིམ། མཆོད་ཡོན་སོགས་ཀྱིས་མཆོད། ཞེ་སྡང་རྡོ་རྗེ་སོགས་ཀྱིས་བསྟོད། ༀ་ཨཱཿཧཱུྃ། རིགས་ལྔ་ཞུ་བ་
ཐིག་སྐུད་སོ་སོའི་རྣམ་པར་གྱུར་རང་ཉིད་ཧེ་རུ་ཀ་དང་སློབ་མ་གྷསྨ་རཱིར་གྱུར། ༀ་ཨཱཿཧཱུྃ་བརྗོད་བཞིན་པས་ལྔ་པོ་གཅིག་ཏུ་བསྒྲིལ་ཞིང་བསྐྱིལ་ནས་སྣོད་དུ་བཞག །ༀ་བཛྲ་ས་མ་ཡ་སཱུ་ཏྲ་མཱ་ཏི་ཀྲ་མ་ཧཱུྃ། བརྒྱ་རྩས་བརྟན་པར་བྱ། ཐིག་སྐུད་ཀྱི་མཐའ་གཉིས་དང་དབུས་སུ་ༀ་དཀར་ཨཱཿདམར་ཧཱུྃ་མཐིང་གིས་མཚན་པར་གྱུར། དེ་ནས་དང་པོར་ཡེ་ཤེས་ཀྱི་ཐིག་གདབ་པ་ནི། སློབ་དཔོན་ཤར་ན་གནས་པས། ཛ་ཛཿ ཞེས་ཐིག་གི་སྣ་གྲོགས་ཀྱི་ལག་ཏུ་གཏད། །དེས་ཀྱང་སྐུད་པའི་སྣ་བཟུང་ལ་རྒྱབ་ནས་བསྐོར་ཏེ་ནུབ་ཏུ་སོང་ལ། ༀ་བཛྲ་ས་མ་ཡ་སཱུ་ཏྲ་མ་ཏི་ཀྲ་མ་ཏི། ཞེས་བརྗོད་ཅིང་། ཐིག་སྐུད་ཀྱི་སྒྲས་འཇིག་རྟེན་གྱི་ཁམས་ཀྱི་བདེ་བར་གཤེགས་པ་ཐམས་ཅད་ལ། ཁྱེད་ཀྱིས་སེམས་ཅན་གྱི་དོན་མཛད་པའི་དུས་ཡིན་ནོ། །ཞེས་བསྐུལ་བར་གྱུར་བར་མོས་ལ་སློབ་དཔོན་རྡོར་དྲིལ་དང་བཅས་པའི་ཁུ་ཚུར་གཡོན་པས་ལྟེ་བའི་ཐད་དུ་བཟུང་། གཡས་ཀྱི་མཐེབ་སྲིན་གྱིས་སྟེང་ནས་བཅུས་ཏེ་འོག་ནས་གྱེན་དུ་ལན་གསུམ་བཏབ། དེ་བཞིན་དུ། གྲོགས་ལྷོ་དང་། སློབ་དཔོན་རྒྱབ་ནས་བསྐོར་ཏེ་བྱང་དུ་གནས་པས་གཉིས་པ། དེ་ནས་གྲོགས་ཀྱིས་རྒྱབ་ནས་བསྐོར་ཏེ་དབང་ལྡན་དང་། སློབ་
དཔོན་གྱིས་བསྐོར་ཏེ་མེར་འདུག་ལ་ཤར་གྱི་ལོགས་ཐིག །སློབ་མས་བསྐོར་ཏེ་བདེན་བྲལ་དང་། སློབ་དཔོན་གྱིས་བསྐོར་ཏེ་རླུང་དུ་གནས་པས་ནུབ་ཀྱི་ལོགས་ཐིག །སློབ་དཔོན་དེ་ཉིད་དང་། གྲོགས་ཀྱིས་བསྐོར་ཏེ་དབང་ལྡན་དུ་གནས་པས་བྱང་གི་ལོགས་ཐིག །སློབ་དཔོན་གྱིས་རྒྱབ་ནས་བསྐོར་ཏེ་མེ་དང་། །གྲོགས་ཀྱིས་བསྐོར་ཏེ་བདེན་བྲལ་དུ་གནས་པས་ལྷོའི་ལོགས་ཐིག །སློབ་དཔོན་དེ་ཉིད་དང་། གྲོགས་ཀྱིས་བསྐོར་ཏེ་རླུང་དུ་གནས་པས་ཟུང་ཐིག་དང་པོ། །སློབ་དཔོན་བདེན་བྲལ་དང་། གྲོགས་དབང་ལྡན་དུ་གནས་པས་ཟུར་ཐིག་གཉིས་པ་རྣམས་གདབ་སྟེ་སྲད་བུ་ཆད་པ་དང་ཕྱོགས་འཁྲུལ་རིང་ཐུང་སོགས་སྐྱོན་སྤང་བ་ནན་ཏན་ཏུ་བྱ། ཐམས་ཅད་དུ་གཡས་བསྐོར་གྱིས་འགྲོ་ཞིང་སློབ་དཔོན་དབང་ལྡན་དང་སློབ་མ་མེ་མཚམས་སུ་མི་འགྲོའོ། །དེ་ལྟར་ལེ་ཐིག་ནམ་མཁར་བཏབ་ནས། ཐིག་སྐུད་གཞན་དཀར་ཆལ་དུ་སྤགས་པས་ལས་ཀྱི་ཐིག་གདབ་པ་ནི། དང་པོ་ཤར་ནུབ་ཚངས་ཐིག་གདབ། དབུས་ནས་མཐའ་བར་ཆ་བཞི་བགོ །གཅིག་གིས་དབུས་སུ་ཟླུམ་པོར་བསྐོར། །ཤར་ནུབ་ཚངས་ཟླུམ་འཛོམ་པ་ནས། །སྔ་མའི་ཚད་ལས་གཉིས་འགྱུར་གྱིས། །གཡས་གཡོན་བྱ་རྗེས་བཙལ་བའི་སྟེང་། །ལྷོ་བྱང་ཐིག་གདབ་དེ་བཞིན་དུ། །ཕྱོགས་བཞིའི་ཚངས་ཟླུམ་འཕྲད་མཚམས་ནས། །བྱ་རྗེས་བཙལ་སྟེང་ཟུར་ཐིག་གདབ། །ཟུར་ནས་
ཟུར་གྱི་བྱ་རྗེས་སྟེང་། །ངོས་སུ་གྲུ་ུབ ཞིར་བཅད་པ་ནི། །མདའ་ཡབ་ཕྱི་མཐའི་ཐིག་ཡིན་ནོ། །དེ་ཉིད་ཚངས་ནས་ཟུར་ཐིག་བར། །དུམ་བུ་དྲུག་བགོས་དུམ་རེ་ལ། །ཆ་ཆེན་དང་ནི་སྒོམ་ཚད་གྲགས། །དེ་ཡི་བཞི་ཆ་ཆ་ཆུང་ངོ་། །ཚངས་ནས་གཡས་གཡོན་ཆ་ཆེན་གཉིས། དང་པོ་ཕྱེད་གདབ་ཕྱི་མ་གདབ། །གཉིས་པ་བཞི་ཆར་གདབ་པར་བྱ། །སྒོ་དང་སྒོ་ཁྱུད་སྒོ་འགྲམ་ལོགས། །མུན་པ་ཀ་བ་ཀ་རྒྱན་ནོ། །ལྔ་པ་དབུས་དོར་མཐའ་གཉིས་གདབ། དྲུག་པ་ཕྱེད་གདབ་ཕྱི་མ་གདབ། །རྩིགས་པ་འདོད་སྣམ་ཕ་གུ་དང་། །དྲ་ཕྱེད་ཤར་བུ་མདའ་ཡབ་བོ། །དང་པོ་དང་ནི་གཉིས་པ་གཉིས། །མདའ་ཡབ་ལས་ཀྱང་ཕྱི་རོལ་ཏུ། །ཆ་ཆེན་གཅིག་གི་ཚོད་ཙམ་གདབ། །ལྔ་པ་དྲུག་པའི་ཆ་རྣམས་ནི། །རང་རང་ཟུར་ཐིག་བར་དུ་གདབ། །ལྔ་པའི་ནང་མཐའ་རྩ་བའི་ཐིག །དབུས་ནས་ཆ་ཆེན་གཅིག་དང་གཉིས། །བསྐོར་ཞིང་སོ་སོའི་ནང་ལོགས་ནས། །ཆ་ཕྲན་རེས་བསྐོར་ལྟེ་བ་དང་། །འདབ་མ་མུ་ཁྱུད་བཅས་པའོ། །དེ་རྒྱབ་ལྷ་སྣམ་ཆ་ཕྲན་གཉིས། །ལོགས་སུ་ཐིག་གདབ་དཀྱུས་ཐིག་ནི། །ཤར་སྒོའི་གཡས་ལོགས་ཀ་རྒྱན་གྱི། །རྩེ་ནས་ནུབ་གཡས་ཀ་རྒྱན་རྩེར། །དབུས་སུ་ལྟེ་བ་ལ་རེག་གདབ། །ཤར་སྒོའི་གཡོན་ནས་ནུབ་སྒོའི་གཡོན། །དེ་བཞིན་ལྷོ་བྱང་ཕན་ཚུན་སྒོའི། །གཡས་ནས་གཡས་དང་གཡོན་ནས་གཡོན། །ལྟེ་བ་ལ་རེག་ཐིག་བརྒྱད་པོ། །དུར་ཁྲོད་ས་གཞིའི་
མཐའ་བར་གདབ། །པདྨའི་མུ་ཁྱུད་ནང་སྐོར་དང་། །ཚངས་ཟུར་སོ་སོ་འདོམས་པ་ནས། །ལོགས་ནས་ལོགས་དང་ཟུར་ནས་ཟུར། །གྲུབ་བཞི་བསྣོལ་མའང་སྤྲོ་ན་གདབ། །མདའ་ཡབ་ཕྱི་རུ་སྒོ་ཆད་གཅིག །ཚངས་ནས་ཀ་རྒྱན་ཕྱི་ཐིག་པར། །རྟ་བབ་དོན་ཏུ་བཞི་ཆར་གདབ། །ཚངས་ནས་གཡས་གཡོན་བརྒྱད་བདུན་དྲུག །ལྔ་རྣམས་བཅད་པས་གསེར་སྣམ་དང་། །ཤར་བུ་རིན་ཆེན་མདའ་ཡབ་ཡུལ། །གསེར་སྣམ་ཕྱི་དང་ཚངས་ཐིག་ནས། །ཆ་ཆུང་གཉིས་བསྐོར་གླང་རྒྱབ་སྟེ། །མདའ་ཐིག་ཕྱི་དང་ཚངས་ནས་གཉིས། །དོར་ཏེ་གཉིས་བསྐོར་གླང་སྣ་འབྱུང་། ནང་དུ་སུམ་ཆ་རེ་ཡང་ངོ་། །མདའ་ནས་གཅིག་དང་ཚངས་ནས་གསུམ། །དོར་ཏེ་ཀ་རྒྱན་རྩེ་ནས་བཟུང་། །སྟེང་དུ་བསྐོར་རོ་མདའ་ནས་གཉིས། །ཚངས་ནས་ཕྱེད་ལྔ་འཕགས་པ་ནས། །ཚད་དེས་བསྐོར་བ་རྡོ་རྭའོ། །རྟ་བབ་སྣམ་བུའི་སྟེང་ནས་ཕྱིར། །ཆ་ཆེན་གཅིག་གདབ་དབུས་དོར་ལ། །མཐའ་གཉིས་བཅད་པས་པདྨ་དང་། །འཁོར་ལོ་གདུགས་དང་དབུས་རྭའི་ཡུལ། །དབུས་རྭའི་སྨད་ཆ་སྒོ་ཚད་མཉམ། །རྩེ་མོ་དེ་ཕྱེད་གསེགས་འགྲོས་བཅད། །མདའ་ཡབ་ཟུར་ནས་ཟླུམ་ཐིག་བསྒོས་དེ་རྒྱབ་སྒོ་ཚད་གཅིག་གསུམ་པའོ། །དང་པོ་པད་རྭ་ཕྱོགས་རེ་ལ། །བརྒྱད་ཆར་བསིལ་ཞིང་ཕྱི་མ་གཉིས། །དུར་ཁྲོད་ས་སྟེ་ཕྱོགས་མཚམས་རྣམས། །དཀྱུས་ཐིག་རྩེས་བཅད་ཆ་ཕྲན་ནི། །
གསུམ་གྱི་ཚད་ཙམ་ཕྱོགས་བཞི་ཟླུམ། །མཚམས་བཞི་ཞུ་མཆོག་དབྱིབས་སུ་བཅད། །དེ་རྒྱབ་ཆ་ཆེན་གཅིག་གཉིས་བགོས། །ནང་མ་རྡོ་ར་ཕྱི་མ་ནི། །མེ་རིའོ་ཕྱོགས་རེར་བཞིའམ་དྲུག །བཅད་དེ་གཡོན་བསྐོར་འབར་བར་བྱ། །ཡེ་ཤེས་ཀྱི་ཐིག་སྐུད་ལ་ཉེར་སྤྱོད་ལྔ་དང་རོལ་མོས་མཆོད། ཡེ་ཤེས་ཀྱི་ཐིག་སྐུད་ལྔ་པོ་སྟ་གོན་གྱི་ལྷའི་ཐུགས་ཀར་གཤེགས་པར་གྱུར། རྡུལ་ཚོན་ཁ་དོག་ལྔ་དབུས་སྔོན་པོ་སོགས་ཐིག་སྐུད་ལྟར་བཀོད། །བསངས་སྦྱང་། སྟོང་པའི་ངང་ལས། རྡུལ་ཚོན་སྔོན་པོ་ཧཱུྃ་ལས་སོགས་ཐིག་གི་སྐབས་ལྟར་འདོན་པ་བརྗེས་ཏེ་མཆོད་བསྟོད་ཡན་བྱ། ༀ་ཨཱཿཧཱུྃ། རིགས་ལྔ་ཞུ་བ་རྡུལ་ཚོན་སོ་སོའི་རྣམ་པར་གྱུར། ༀ་བཛྲ་བེ་ག་ཀྲམ་ཧཱུྃ། ཞེས་ཡེ་ཐིག་ནམ་མཁར་བཏེགས་པའི་འོག་ཏུ་ཞུགས་པར་མོས། མིག་གཉིས་ཧཱི་ཧཱི་ལས་ཉི་ཟླར་གྱུར། ཧཱི་ཧཱི་ཞེས་བརྗོད་ལ་ཐར་པའི་སྒོར་འཇུག་པའི་སྡིག་སྒྲིབ་བསལ་བར་མོས་ཏེ་དྲི་བཟང་ཆུས་སྒོའི་ཕྱི་ཐིག་དབྱེ། སློབ་དཔོན་གྱིས་བྱང་ཤར་ནས་གཡས་བསྐོར་ཆ་ཆེན་གཅིག་གི་བར་དུ་ཕྱི་ནས་རིམ་པར་དཀར་སེར་དམར་ལྗང་ནག་པོའི་རྩིག་པ་མཁྱིད་གང་ཙམ་དུ་གཡོན་པའི་རྡོ་རྗེ་ཁུ་ཚུར་གྱིས་འཐེན་ཅིང་། ཐོད་པས་བཀབ་པའི་སྟེང་དུ་རྡོ་རྗེ་བཞག་ལ། ཆོས་དབྱིངས་འདི་ནི་དག་པ་
སྟེ། །སེམས་ཅན་ཁམས་ནི་རབ་སྒྲོལ་བ། །རྒྱལ་ཆེན་དགྱེས་པ་རྡོ་རྗེ་ཡི། །དཀྱིལ་འཁོར་རབ་ཏུ་བྲི་བར་བྱ། །ཞེས་བརྗོད་ཅིང་མེ་ཏོག་གཏོར་ནས་ཚོན་བྲ་བརྟག་གོ །དེ་ཡང་། །སྒོ་ཡི་ཉི་ཤུའི་ཆ་རུ་ནི། །རི་མོ་མཉམ་པར་དགྱེ་བར་བྱ། །སྦོམ་པོར་དགྱེས་པས་ནད་ཀྱིས་འདེབས། །ཕྲ་མོས་ནོར་རྣམས་རྣམ་པར་འཇིག །ཡོན་པོས་རྣམ་འགྲེས་ཆད་པ་ཡིས། །བླ་མ་དང་ནི་སློབ་མ་འཆི། །གཡས་བསྐོར་མིན་པར་དགྱེས་པ་ཡིས། །ཚོན་ནི་ཕུར་བུས་བཏབ་པར་འགྱུར། །ཞེས་གསུངས་པའི་སྐྱོན་དང་བྲལ་བར་བྲིའོ། །ཚོན་ཐོབ་ནི། པད་ལྟེ་ནག་ལ་ཟེའུ་འབྲུ་ནི། སྣ་ལྔ་པད་འདབ་བརྒྱད་དམར་པོ། །གོང་རས་མུ་ཁྱུད་ནག་པོ་ལ། །ཐོད་པའི་ཕྲེང་ངམ་རྡོར་ཕྲེང་སེར། །ལྷ་སྣམ་སྒོ་ཡི་ཁྱམས་དང་བཅས། །ཕྱོགས་མདོག་བུམ་པ་བརྒྱད་ཀྱིས་མཛེས། །རྩིག་པ་སྔོ་ལྗང་དམར་སེར་དཀར། །འདོད་སྣམ་དམར་ལ་སྒོ་ཁྱུད་ཀྱི། །མཚམས་སུ་ཟླ་ཕྱེད་རྡོ་རྗེས་མཚན། །ཕ་གུ་སེར་པོ་རིན་ཆེན་བཀྲ། །དྲྭ་ཕྱེད་དཀར་ལ་གཞི་མ་ནག །ཤར་བུ་སྔོན་པོ་མདའ་ཡབ་དཀར། རིན་ཆེན་དྲྭ་བ་དྲྭ་ཕྱེད་ནི། །ཆུ་སྲིན་ཁ་ནས་དཔྱངས་བ་དང་། །རིལ་བ་ཐུར་བསྟན་པད་འདབ་ཀྱི། །དབྱིབས་ཅན་རི་མོས་རྣམ་པར་མཛེས། །རྟ་བབ་སྣམ་བུ་འོག་རིམ་བཞིན། །གསེར་སྣམ་སེར་ལ་ཤར་བུ་སྔོ། །རིན་ཆེན་དམར་ལ་མངའ་
ཡབ་དཀར། །དེ་སྟེང་པདྨ་སྣ་ཚོགས་མདོག །འཁོར་ལོ་སེར་པོ་གཡས་གཡོན་ཏུ། །རི་དྭགས་ཕོ་མོ་བཅས་པའོ། །གླང་རྒྱབ་ནང་དང་རྡོ་རྗེའི་རྭ། །རྟ་བབ་ཀ་བ་ཕྱོགས་ཀྱི་མདོག །མུན་པ་ནག་ལ་རྒྱན་མཛེས་ཚོན། །བར་ཁྱམས་ལྗང་གུ་པ་ཏྲ་རིས། །རྟ་བབ་གཡས་གཡོན་བུམ་བཟང་ལས། །འཐོན་པའི་ཤིང་ལ་རྒྱལ་སྲིད་བདུན། །ཡང་ན་པདྨ་མདོག་ལྔ་དང་། །སེང་སོགས་རྒྱལ་མཚན་བརྒྱད་སྤེལ་བྱ། །དུར་ཁྲོད་ས་གཞི་ལྗང་གུ་ལ། །ཆུ་ཡིས་བཅད་པའི་ལིང་ཚེ་བརྒྱད། །ཤིང་ཆེན་བརྒྱད་དྲུང་ཕྱོགས་སྐྱོང་ནི། །ཤར་དུ་བརྒྱ་བྱིན་སེར་པོ་ཡིས། །རྡོ་རྗེ་བསྣམས་ཤིང་གླང་ཆེན་ཞོན། །ལྷོ་རུ་གཤིན་རྗེ་དུད་པའི་མདོག །བེ་ཅོན་འཛིན་ཅིང་མ་ཧེ་ཞོན། །ནུབ་ཏུ་ཆུ་ལྷ་དཀར་པོ་ནི། །སྤྲུལ་ཞགས་འཛིན་ཅིང་ཆུ་སྲིན་ཞོན། །བྱང་དུ་གནོད་སྦྱིན་གསེར་མདོག་ཅན། །དབྱུག་པ་ཐོགས་ནས་རྟ་མཆོག་ཞོན། །བྱང་ཤར་འབྱུང་པོ་ཁ་དོག་དཀར། །རྩེ་གསུམ་འཛིན་ཅིང་ཁྱུ་མཆོག་ཞོན། །ཤར་ལྷོར་མེ་ལྷ་དམར་སེར་ཕྱག །བགྲང་ཕྲེང་རིལ་བ་ར་སྐྱེས་ཞོན། །ལྷོ་ནུབ་སྲིན་པོ་སྔོ་ནག་སྟེ། །རལ་གྲི་ཕྱར་ནས་རོ་ལངས་ཞོན། །ནུབ་བྱང་རླུང་ལྷ་ལྗང་ནག་ནི། །བ་དན་འཛིན་ཅིང་ཤ་བ་ཞོན། །མེ་ལྷ་མ་གཏོགས་གཡོན་པ་རྣམས། །ཐོད་པ་བསྣམས་པ་ཡུམ་ལ་འཁྱུད། །ཤིང་ལོའི་གསེབ་ནས་ལུས་འཐོན་ཞིང་། །ཕྱོགས་སྐྱོང་བཞོན་པའི་གདོང་ཅན་གྱི། །ཞིང་སྐྱོང་བརྒྱད་ནི་གྲི་ཐོད་འཛིན། །
ཤར་དཀར་ལྷོ་སྔོ་ནུབ་དམར་པོ། །བྱང་སེར་བྱང་ཤར་སོགས་རིམ་བཞིན། སྔོ་སྐྱ་དམར་སྔོ་ལྗང་གུའོ། །ཆུ་བརྒྱད་དབུས་གནས་ཀླུ་ཆེན་བརྒྱད། །ཡུམ་བཅས་སྦྲུལ་འཇུག་ཐལ་སྦྱར་ཅན། །ཤར་དང་དབང་ལྡན་ནས་རིམ་བཞིན། །སེང་དཀར་དམར་ནག་སེར་སྔོ་དཀར། །ཁྲོ་བོ་དག་གོ་སྤྲིན་ཆེན་བརྒྱད། །སེར་སེར་དཀར་སྔོ་དམར་སྔོ་སེར། །དཀར་པོ་རྣམས་སོ་རི་བོ་བརྒྱད། །སྣ་ཚོགས་དཀར་གཉིས་ལྗང་གུ་ཕྱོགས། །ནག་པོ་སེར་གཉིས་སྔོན་པོ་མཚམས། །སོ་སོར་མེ་ཆེན་འབར་བ་བརྒྱད། །རི་རྩེར་མཆོད་རྟེན་བརྒྱད་པོ་ཡང་། །ལྷོ་ནག་ཤར་ལྷོ་དམར་ལྷོ་ནུབ། །ལྗང་གུ་གཞན་རྣམས་དཀར་པོའོ། །ལོགས་ཀྱི་ཕུག་པར་གྲུབ་ཆེན་བརྒྱད། །ཨིནྡྲ་བོ་དྷི་བཙུན་མོ་ཤར། །ཀུ་ཀུ་རི་པ་ཁྱི་བཅས་བྱང་། །པདྨ་བཛྲ་ཡུག་ས་ནུབ། །ཀླུ་སྒྲུབ་སྙིང་པོ་དགེ་སློང་ལྷོ། །ཌོམྦི་སྟག་ཞོན་ཤར་ལྷོ་སྟེ། །ལཱུ་ཧི་ཉ་གསོལ་ལྷོ་ནུབ་མཚམས། །ནུབ་བྱང་དྲིལ་བུ་པ་ཡུམ་བཅས། །བྱང་ཤར་མདའ་བསྣུན་མདའ་གཞུ་འཛིན། །དུར་ཁྲོད་བཀོད་པ་འཇིགས་རུང་བྲི། །རྡོ་རྭ་གཞི་དཀར་ཕྲེང་བ་ནག །མེ་རི་ཁ་དོག་སྣ་ཚོགས་སྤེལ། །མ་བརྗོད་སྤྱི་ལྟར་ཤེས་པ་བྱ། །དེ་ནས་ལྷ་མཚན་དགོད་པ་ནི། །པདྨའི་དབུས་སུ་ཐོད་པ་དཀར། །སྣ་ཚོགས་རྡོ་རྗེས་མཚན་པ་བྲི། །པད་འདབ་ཤར་ནས་གཡས་བསྐོར་དུ། །གྲི་གུག་ཅང་ཏེའུ་རུས་སྦལ་སྦྲུལ། །ནག་དམར་སེར་དང་ལྗང་
གུའི་མདོག །བྱང་ཤར་ནས་བརྩམས་སེང་གེ་དང་། །དགེ་སློང་འཁོར་ལོ་རྡོ་རྗེ་རྣམས། །སྔོ་དཀར་སེར་པོ་སྣ་ཚོགས་མདོག །འདོད་སྣམ་ཤར་ནས་རིམ་པ་བཞིན། །པི་ཝང་མ་སེར་གླིང་བུ་དམར། །རྔ་ཟླུམ་མ་ནག་རྔ་ཆེན་དཀར། །བཞད་མ་སེར་ལ་སྒེག་མོ་དམར། །གླུ་མ་དམར་སེར་གར་ཁྲ་བོ། །མེ་ཏོག་མ་དཀར་སྤོས་མ་ནག །མར་མེ་མ་དམར་དྲི་མ་སེར། །གཟུགས་དཀར་རོ་དམར་རེག་མ་ལྗང་། །ཆོས་འབྱུང་མ་དཀར་དེ་དག་རྣམས། །གཟུགས་སམ་ཕྱག་མཚན་ཐིག་ལེ་དགོང་། དེ་ལྟར་ཚོན་བཀྱེ་གྲུབ་མ་ཐག་ཏུ་རྡུལ་ཚོན་ལྷག་མ་ལ་མཆོད་ཅིང་གཤེགས་པ་ཐིག་གི་སྐབས་ཀྱིས་འགྲེའོ། །དེ་ནས་བུམ་པ་རྣམས་སྤོས་དང་རོལ་མོས་སྣ་དྲངས་དཀྱིལ་འཁོར་ལ་ལན་གསུམ་བསྐོར་ཏེ་རྣམ་རྒྱལ་ཤར་དང་། གཞན་རྣམས་ཕྱོགས་མཚམས། ལས་བུམ་བྱང་ཤར་དུ་བཀོད། །བླ་བྲེ་འཕན་གདུགས་ལྡ་ལྡི་རྒྱལ་མཚན་བརྒྱད་ལ་སོགས་པས་བརྒྱན། །སྐུ་བརྙན་རིས་སུ་བྲིས་པའམ་འབུར་དུ་གཏོད་པའང་བཞུགས་སུ་གསོལ། སྲུང་བའི་ཡན་ལག་ཏུ་མདའ་བོ་ཆེ་བཞི་དར་ཁ་དོག་བཞི་བཏགས་པ་དང་། རལ་གྲི་བཞི་དང་། མེ་ལོང་བཞི་ལ་སོགས་པ་ཟུར་བཞིར་བཙུག་ལ་ཚོན་སྐུད་ཀྱི་དྲྭ་བ་སྦྲེལ། ཉེར་སྤྱོད་ལྔ་པོ་རེ་རེ་ལའང་རབ་བརྒྱ་རྩ། ཐ་ན་བཅུ་ལས་མི་ཉུང་བས་བསྐོར། སྟེགས་གཞན་ནམ། ཀཾ་ཚང་གི་ཕྱག་རྒྱུན་ལྟར་ན་དཀྱིལ་འཁོར་གྱི་ལྷོར་དབུ་རྒྱན་ཐོར་ཚུགས་སུ་
དཔྱངས། ནུབ་ཏུ་རྡོ་རྗེ། བྱང་དུ་དྲིལ་བུ། དབུས་སུ་མིང་དབང་རྡོ་རྗེ། ཉེ་ལོགས་སུ་བརྟུལ་ཞུགས་རྗེས་གནང་གྲི་ཐོད། མིག་དར། མེ་ཏོག །དམ་ཆུ་བདུད་རྩི། མཆོག་དབང་གསུམ་པོའི་བཅའ་གཞི་རྒྱས་པའམ། བསྡུ་ན་དཀྱིལ་འཁོར་ལྷོ་དང་ནུབ་ཏུ་ཐོད་ཆང་རིག་ཙཀ་སོགས་འདུ་བྱའོ། །ཚོགས་ཀྱི་ཡོ་བྱད་བཟའ་བཅའ་བཏུང་བའི་རིགས་གྱུར་ཅི་འབྱོར་དང་། །འབྱུང་པོ་སྤྱི་དང་ཆོས་སྐྱོང་གི་གཏོར་མ། ཁྱད་པར་དུ་དཔལ་ནཱ་རོ་པ་ཡབ་སྲས་ཀྱིས་ཐུན་མོང་མ་ཡིན་པའི་ཆོས་སྐྱོང་བ་དུད་པའི་སོལ་བ་མའི་གཏོར་མ་ཆེ་ཞིང་ལེགས་པ་བཤམ། བསངས་ཆུ་ལ་ལས་བུམ་གྱི་ཆུ་ཅུང་ཟད་རེ་བསྲེའོ། །གཉིས་པ་ནི། སྒྲུབ་པ་པོ་རྣམས་ཁྲུས་བྱས་ཤིང་། དྲི་བཟང་པོས་བྱུགས་པ་དང་། རུས་པའི་རྒྱན་ཆ་ལྔས་བརྒྱན་ཏེ། དཀྱིལ་འཁོར་གྱི་ཤར་ཕྱོགས་སུ་སྟན་ན་འཚངས་ཅན་ལ་རྡོ་རྗེ་སྐྱིལ་ཀྲུང་གིས་འདུག་ནས་བདུད་རྩིའི་རིལ་བུ་ཁར་བཅུག་པའམ་ནང་མཆོད་བྱིན་གྱིས་བརླབས་ལ་ལྕེར་བཞག་ཅིང་། གཏོར་མ་སྦྱིན་པ་ནས་རྡོར་སེམས་བསྒོམ་བཟླས་ཡན་ཆད་གྲུབ་པ་དང་། རྡུལ་ཚོན་གྱི་དཀྱིལ་འཁོར་བསངས་སྦྱང་། ༀ་ཨཱཿཧཱུྃ། བརྗོད་ཅིང་ནང་མཆོད་དཀྱིལ་འཁོར་ལ་འཐོར་ལ། ཕྱག་མཚན་རྣམས་བདུད་རྩིའི་ཐིག་ལེར་གྱུར། ཉིན་ཕྱི་མ་རྣམས་ལ། ལྷ་ཚོགས་འོད་དུ་ཞུ་བའི་ཞེས་སྦྱར་མཆན། རྡུལ་ཚོན་གྱི་
དཀྱིལ་འཁོར་ཐབས་ཤེས་རབ་ཀྱི་ངང་ལས་ལྷ་དགུ་གཞལ་ཡས་ཁང་དང་བཅས་པར་གསལ་བ་ནི། ཨེ་ལས་ཆོས་ཀྱི་འབྱུང་གནས་དཀར་པོ་གྲུ་གསུམ་པ་ནས་ཕྱོགས་ཀྱི་མདོག་ཅན་གྱི་ལྟེ་བར། བྷྲཱུཾ་ལས་བྱུང་བའི་རིན་པོ་ཆེ་སྣ་ཚོགས་ལས་གྲུབ་པའི་ཁང་པ་བརྩེགས་པ་ནས་ཉི་མའི་གདན་དང་བཅས་པ། སྔགས་ཀྱིས་རྒྱས་གདབ། དབུས་ཀྱི་གདན་ལ་ཐོད་པ་དང་སྣ་ཚོགས་རྡོ་རྗེ་ཐིག་ལེའི་རྣམ་པར་གནས་པ་དེ་ཡོངས་སུ་གྱུར་པ་ལས། བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ནས་གཡས་བསྐུམ་པས་འཁྱུད་པའི་བར་གྱིས་གཙོ་བོ་ཡབ་ཡུམ་དང་། འདབ་མ་བརྒྱད་ལ་སོ་སོའི་ཕྱག་མཚན་ཐིག་ལེའི་རྣམ་པར་གནས་པ་དེ་ཡོངས་སུ་གྱུར་པ་ལས། ཤར་དུ་གཽ་རཱི་ནག་མོ་གཡས་གྲི་གུག་གཡོན་ཉ་རོ་ཧི་ཏ་བསྣམས་པ། ལྷོར་ཙཽ་རཱི་དམར་མ་གཡས་ཅང་ཏེའུ་གཡོན་ཕག་པ་བསྣམས་པ། ནུབ་ཏུ་བཻ་ཏཱ་ལི་སེར་མོ་གཡས་རུས་སྦལ་གཡོན་ཐོད་པ་བསྣམས་པ། བྱང་དུ་གྷསྨ་རཱི་ལྗང་གུ་
གཡས་སྦྲུལ་གཡོན་ཐོད་པ་བསྣམས་པ། བྱང་ཤར་དུ་པུཀྐ་སཱི་སྔོན་མོ་གཡས་སེང་གེ་གཡོན་དགྲ་སྟྭ་བསྣམས་པ། ཤར་ལྷོར་ཤ་བ་རཱི་དཀར་མོ་གཡས་དགེ་སློང་གཡོན་གསིལ་བྱེད་བསྣམས་པ། ལྷོ་ནུབ་ཏུ་ཙཎྜ་ལཱི་སྔོན་མོ་གཡས་འཁོར་ལོ་གཡོན་ཐང་གཤོལ་བསྣམས་པ། ནུབ་བྱང་དུ་ཌོམྦི་ནཱི་སྣ་ཚོགས་པའི་མདོག་ཅན། །གཡས་རྡོ་རྗེ། གཡོན་སྡིགས་མཛུབ་མཛད་པ། ལྷ་མོ་ཐམས་ཅད་ནས་གནས་པའོ་ཞེས་པའི་བར་དང་། སྐྱེ་མཆེད་ཀྱི་ལྷ་རྡོ་རྗེ་གསུམ་དང་བཅས་པ་བསྒོམ་ལ་རྒྱས་གདབ། སྟ་གོན་གྱི་ལྷ་ནམ་མཁར་བཞུགས་པ་རྣམས་སྤྱན་དྲངས་ཏེ་ཐིམ། གཽ་རཱི་ཛཿ ཙཽ་རཱི་ཧཱུྃ། བཻ་ཏཱ་ལཱི་བྃ། གྷསྨ་རཱི་ཧོཿ རྡུལ་ཚོན་གྱི་དཀྱིལ་འཁོར་དང་རོ་གཅིག་ཏུ་གྱུར། ཞེས་མདུན་བསྐྱེད་བསྒྲུབ། དེ་ནས་ཡེ་ཤེས་ཀྱི་དཀྱིལ་འཁོར་གཞུག་པའི་དོན་དུ་བདག་བསྐྱེད་བསྒོམ་པ་ནི། བླ་མ་དག་པའི་གསོལ་འདེབས་བླ་མ་མཉམ་མེད་ཅེས་སོགས་ནས་བརྩམ། མངོན་རྟོགས་ཡོངས་རྫོགས། བཟླས་པ་དང་དག་པ་བརྗོད་པ་ལ་ཐུག་གི་བར་བཏང་། ཐུགས་ཀའི་ས་བོན་གྱི་འོད་ཀྱིས་
རྟེན་གཞལ་ཡས་ཁང་འཁོར་གྱི་ལྷ་མོ་བརྒྱད་ལ་བསྡུ། དེ་རྣམས་ཀྱང་གཙོ་བོའི་ཞལ་བརྒྱད་ལ་ཐིམ་སྟེ། རང་ཉིད་གཙོ་བོ་ཡབ་ཡུམ་དུ་གསལ་བ་སྙོམས་པར་ཞུགས་པའི་སིད་ཀྱི་སྒྲས་ཡེ་ཤེས་ཀྱི་དཀྱིལ་འཁོར་སྤྱན་དྲངས་པ་རྣམས་བདག་ཉིད་ཀྱི་ཞལ་དུ་ཞུགས། རྡོ་རྗེའི་ལམ་ནས་ལྷ་མོའི་པདྨར་བབ་པ། སླར་ཡང་ནམ་མཁར་ཐོན་ཏེ་གནས་པར་གྱུར། སྒྲུབ་ཐབས་ལྟར་བགེགས་བསྐྲད་བྱིན་རླབས་མཆོད་པ་ནས་ཨ་བྷི་ཥེ་ཀའི་སྔགས་ཀྱིས་རྒྱས་གདབ་པའི་བར་གྱིས་མདུན་བསྐྱེད་ལ་ཡེ་ཤེས་པ་བསྟིམ་དབང་བསྐུར་རྒྱས་གདབ་གྲུབ་ནས་བདུད་རྩི་འབུལ་མྱང་སྔགས་ཀྱིས་རྒྱས་གདབ་པའང་བྱའོ། །མདུན་བསྐྱེད་ལ་མཆོད་བསྟོད་རྒྱས་པར་བྱ་སྟེ། དེ་ལ་བཞི། ཕྱི་ནང་གསང་མཆོད་བསྟོད་པའོ། །དང་པོ་ལའང་ལྔ། ཆུ་གསུམ་ཉེར་སྤྱོད་རོལ་མོར་བཅས་པ། འདོད་ཡོན་ལྔ། །རྒྱལ་སྲིད་བདུན། སྒེགས་སོགས་བརྒྱད། ཕྱག་རྒྱ་ཉི་ཤུའི་མཆོད་པའོ། །དང་པོ་ནི། བསངས་སྦྱང་། མཆོད་པ་བྱིན་གྱིས་བརླབ། དག་ཅིང་དྲི་མེད་ཡིད་འོང་བའི། །སྔགས་ཀྱི་བསང་གཏོར་མཆོག་འདི་དག །མཆོག་ཏུ་དད་པས་ཁྱེད་ལ་འབུལ། །ཅི་བདེ་བར་
ནི་བཞེས་སུ་གསོལ། །པད་ཀོར་སྔོན་དུ་འགྲོ་བས། གཡས་པའི་མཐེབ་མཛུབ་ཀྱིས་བསང་གཏོར་དབུལ་ཞིང་། ༀ་ཤྲཱི་ཧེ་རུ་ཀ་ས་པ་རི་ཝཱ་ར་སརྦ་སཾ་ཤོདྷ་ནི་ཨཱཿཧཱུྃ་ཕཊ་སྭཱ་ཧཱ། བསང་གཏོར་གྱི་གནས་སུ། མཆོད་ཡོན་ཞེས་བཅུག་ལ། །རྡོ་རྗེའི་ཐལ་མོ་གཉིས་ཀྱིས་དུང་ཆོས་བཟུང་ལ་མཆོད་ཡོན་བཟེད་ཞལ་དུ་དབུལ་ཞིང་། ༀ་ཤྲཱི་ཧེ་རུ་ཀ་ས་པ་རི་ཝཱ་ར་ཛཿཧཱུྃ་བཾ་ཧོཿཁཾ་རཾ་ཨཱཿཧཱུྃ་ཕཊ་སྭཱ་ཧཱ། དེ་བཞིན་དུ་མཆོད་ཡོན་གྱི་གནས་སུ། ཞབས་བསིལ་དང་། ཛཿཧཱུྃ་སོགས་ཀྱི་གནས་སུ། ནཱི་རཱི་ཏི་ཧཱུྃ་ཁཿཞེས་བཅུག་ལ། གཡས་པའི་མཐེབ་མཛུབ་སྦྱར་བའི་ཁུ་ཚུར་གྱིས་མེ་ཏོག་བླངས་ལ་ལན་གསུམ་བསྐོར་ནས། །མཐེབ་ཆུང་ནས་མཛུབ་མོའི་བར་རིམ་གྱིས་བཀྲོལ་ཏེ་བཟེད་ཞལ་དུ་སྒྲེང་ངོ་། །དེ་ནས་ལག་པ་གཡོན་པས་དྲིལ་བུ་འཁྲོལ་ཞིང་། གཡས་པས་མཆོད་རྫས་སོ་སོར་བླངས་ནས་བསྟབ་པའི་ཚུལ་གྱིས་དབུལ་བའམ། སོ་སོའི་ཕྱག་རྒྱ་དང་བཅས་པས། མེ་ཏོག་འདི་ནི་བཟང་ཞིང་དགེ །དག་པའི་སྐྱེ་གནས་ལས་དག་པ། །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགྱེས་པར་མཛོད། །ༀ་ཤྲཱི་ཧེ་རུ་ཀ་ས་པ་རི་ཝཱ་ར་བཛྲ་པུཥྤེ་ཨཱཿཧཱུྃ་སྭཱ་ཧཱ།
ནགས་ཚལ་ལས་བྱུང་ཕན་པ་ཡི། །གང་ཞིག་དྲི་དང་བདུག་སྤོས་མཆོག །བདག་གིས་དད་པས༴ བཞེས་ནས༴ ༀ༴ དྷཱུ་པེ༴ སྲིན་པོ་འཇོམས་ཤིང་དག་བྱེད་ལ། །དགེ་ཞིང་མུན་པ་རྣམ་སེལ་བ། །བདག་གིས༴ བཞེས་ནས༴ ༀ༴ ཨཱ་ལོ་ཀེ༴ ལྷན་ཅིག་སྐྱེས་དང་སྦྱར་བའི་དྲི། །ཚིམ་བྱེད་དག་པའི་བདུད་རྩི་འདི། །བདག་གིས༴ བཞེས་ནས༴ ༀ༴ གནྡྷེ༴ གཤོས་གཙང་བཟའ་བ་དང་བཅས་པའི། ཁ་དོག་དྲི་དང་རོ་ལྡན་པ། །བདག་གིས༴ བཞེས་ནས༴ ༀ༴ ནཻ་ཝི་དྱ༴ ཞེས་ཉེར་སྤྱོད་ལྔའི་མཆོད་པ་གུར་ལས་གསུངས་པ་དང་། སྣ་ཚོགས་དྲིལ་བའི་སྒྲ་རྣམས་དང་། །ཅང་ཏེའུ་ལ་སོགས་སྒྲ་ཡི་ཚོགས། །བདག་གིས་དད་པས་འབུལ་ལགས་ཀྱི། །བཞེས་ནས་བདག་ལ་དགྱེས་པར་མཛོད། །ༀ་ཤྲཱི་ཧེ་རུ་ཀ་ས་པ་རི་ཝཱ་ར་བཛྲ་ཤཔྡ་ཨཱ༔ཧཱུྃ་སྭཱ་ཧཱ། གཉིས་པ་ནི། རང་གི་སྙིང་ག་ནས་སྤྲོས་པའི་འདོད་ཡོན་གྱི་ལྷ་མོ་དུ་མས་མཆོད་པར་བསམ་ལ། གཟུགས་ལ་རྣམ་གསུམ་ཤེས་བྱ་སྟེ། །ལྷ་རྣམས་ལ་ནི་དབུལ་བར་བྱ། །དེ་ཉིད་
བཅོམ་ལྡན་རྒྱལ་བ་ནི། །མངའ་བདག་རྡོ་རྗེ་རྣམ་སྣང་མཛད། །གཡོན་ཁུ་ཚུར་གྱི་སྟེང་དུ་གཡས་པའི་ཐལ་མོ་མེ་ལོང་གི་ཚུལ་ལྟར་བཞག་ལ། ༀ་ཤྲཱི་ཧེ་རུ་ཀ་སོགས་ཀྱི་མཐར། རཱུ་པ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ། སྒྲ་ལ་རྣམ་གསུམ༴ ལྷ་རྣམས་ལ༴ དེ་ཉིད་བཅོམ་ལྡན་རྡོ་རྗེ་ཅན། །རྡོ་རྗེ་སེམས་དཔའ་གྲགས་ཆེན་པོ། །རཱུ་པའི་གནས་སུ་ཤཔྡ་ཞེས་བཅུག་ལ་རོལ་མོ་བྱ། དྲི་ལ་རྣམས་གསུམ༴ ལྷ་རྣམས་ལ༴ དེ་ཉིད་བཅོམ་ལྡན་སངས་རྒྱས་ནི། །རིན་ཆེན་ཕུང་པོར་རབ་ཏུ་གྲགས། །གཡོན་ཁུ་ཚུར་ལས་མཛུབ་མོ་བརྐྱང་བ་ཁ་སྟེང་དུ་ཕྱོགས་པ་ལ་གཡས་པའི་ཐལ་མོས་དྲི་བླངས་ནས་བྱུགས་པའི་ཚུལ་གྱིས། གནྡྷེ༴ རོ་ལ་རྣམ་གསུམ༴ ལྷ་རྣམས་ལ༴ དེ་ཉིད་བཅོམ་ལྡན་འདོད་ཆགས་ཆེ། །རྡོ་རྗེ་ཆོས་ཀྱིས་བཞེས་སུ་གསོལ། །ཐལ་མོ་གཉིས་བཀན་ནས་ཞལ་ཟས་འབུལ་བའི་ཚུལ་གྱིས། ར་ས༴ རེག་ལ་རྣམ་གསུམ༴ ལྷ་རྣམས་ལ༴ དེ་ཉིད་བཅོམ་ལྡན་སྣ་ཚོགས་པ། །དོན་ཡོད་འབྲས་བུ་སྟེར་བ་པོ། །གོས་ཟུར་དབུལ་ཞིང་། སྤཪྴེ༴ ཞེས་དང་། སྲབ་འཇམ་
ཡང་པ་ལྷ་ཡི་གོས། །སོགས་དང་། སྣ་ཚོགས་དབང་པོའི་གཞུ་ལྟར་རབ་བཀྲ་ཞིང་། །སོགས་ཀྱི་མཐར། ༀ་བཛྲ་བསྟྲ་ཨཱཿཧཱུྃ་སྭཱ་ཧཱ། ཞེས་པས་གོས་ཟུང་འབུལ་ལོ། །གསུམ་པ་ནི། རིན་ཆེན་སྣ་བདུན་རི་མོར་བྲིས་པ་སོགས་འབུལ་བའམ་སོ་སོའི་ཕྱག་རྒྱ་སྤྱི་མཐུན་བྱས་ལ། གསེར་ལས་ལེགས་བྱས་ལྟེ་བ་ཤིན་ཏུ་ཟླུམ། །རྩིབས་སྟོང་ལྡན་ཞིང་མུ་ཁྱུད་རབ་མཉམ་བཟང་། །དང་པོའི་ས་ལས་རྣམ་པར་རྒྱལ་གྱུར་གང་། །འཁོར་ལོ་རིན་ཆེན་ནམ་མཁའ་བཀང་སྟེ་འབུལ། །ༀ་ཙཀྲ་རཏྣ་པཱུ་ཛི་ཏེ་ཨཱཿཧཱུྃ། བདག་དང་མཐའ་ཡས་པའི་སེམས་ཅན་ཐམས་ཅད་དྲན་པ་ཡང་དག་བྱང་ཆུབ་ཀྱི་ཆོས་བླ་ན་མེད་པ་ཀུན་ཏུ་སྤྱོད་པ་ཐོབ་པར་གྱུར་ཅིག །གཞན་ལའང་དེས་འགྲེ། ཡན་ལག་ཐམས་ཅད་ལེགས་སྐྱེས་ས་ལ་ནི། །རབ་གནས་གངས་ཅན་རྩེ་འབྲའི་གླང་པོ་མཆོག །རྒྱལ་པོ་ལ་འོས་མཁའ་ལ་རབ་འགྲོ་བའི། །གླང་པོ་རིན་ཆེན༴ ཧ་སྟི༴ ཤེས་རབ་ཡང་དག་བྱང་ཆུབ་ཀྱི་ཆོས༴ ཐོ་རངས་དུས་སུ་ཕྱོགས་རྣམས་མ་ལུས་པའི། །ས་
རྣམས་བསྐོར་ནས་སླར་ཡང་ལྡོག་གྱུར་གང་། །རྨ་བྱའི་མགྲིན་འདྲ་སྤུ་ནི་ཡིད་འོང་བའི། །རྟ་མཆོག་རིན་ཆེན༴ ཨ་ཤཱ་རཏྣ༴ བརྩོན་འགྲུས་ཡང་དག་བྱང་ཆུབ་ཀྱི་ཆོས༴ དྲི་མེད་བཻ་ཌཱུཪྱ་འདྲའི་རིན་པོ་ཆེ། །ཀུན་ཏུ་དཔག་ཚད་ཙམ་དུ་སྣང་བྱེད་པ། །སྒྲིབ་མེད་མཚན་མོ་ཅི་འདྲ་ཉིན་དེ་བཞིན། །ནོར་བུ་རིན་ཆེན༴ མ་ཎི་རཏྣ༴ དགའ་བ་ཡང་དག་བྱང་ཆུབ་ཀྱི་ཆོས༴ གང་ཞིག་རེག་དྲི་གཟུགས་དང་མདངས་ལྡན་པ། །བུད་མེད་དམ་པ་དྲེགས་ལྡན་རྣམས་ཀྱིས་མཆོག །ལྷ་མོ་བཞིན་དུ་ཡོན་ཏན་ཀུན་ལྡན་པ། །བཙུན་མོ་རིན་ཆེན༴ སྟྲཱི་རཏྣ༴ ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཆོས༴ གང་ཡང་འདི་ན་རྒྱལ་ལ་མུ་ཏིག་དང་། །གསེར་སོགས་མང་པོ་ཐུབ་ལ་ཕུལ་བ་ཡི། །ནོར་ལྡན་མཚུངས་པར་ནོར་མང་ལྡན་པ་ཡི། །ཁྱིམ་བདག་རིན་ཆེན༴ གྲྀ་ཧསྤ་ཏི་རཏྣ༴ ཏིང་ངེ་འཛིན་ཡང་དག་བྱང་ཆུབ་ཀྱི་ཆོས༴ །འགྲོ་དང་ཀུན་ཏུ་གནས་དང་རྣམ་ལྡོག་པར། །མ་ལུས་དཔུང་
ལ་མཁས་པར་བྱེད་པ་ཡི། །དཔལ་ལྡན་བདུན་པ་འབྱུང་འགྱུར་མི་ཡི་ནི། །བློན་པོ་རིན་ཆེན༴ པུ་རུ་ཥ་རཏྣ༴ བཏང་སྙོམས་ཡང་དག་བྱང་ཆུབ་ཀྱི་ཆོས་སོགས། བཞིས་ནི། སྒེག་མོའི་ལག་པས་སྒེག་མོ་སྟེ། །ཕྲེང་བས་ཕྲེང་བའི་མཁའ་འགྲོ་མ། །ཧཱུྃ་གི་གླུ་ཡིས་དམ་ཚིག་གླུ། །ལག་བསྐུམ་པས་ནི་གར་ཉིད་དེ། །མཆོད་པ་འདི་དག་བླ་ན་མེད། །སངས་རྒྱས་ཐམས་ཅད་མཉེས་པར་བྱེད། །སངས་རྒྱས་རྣམས་ནི་མཆོད་པས་མཆོད། །འདོད་པའི་དངོས་གྲུབ་བྱེད་པར་འགྱུར། །ཕྱག་རྒྱ་མཐོར་བརྒྱུད་ལྟར་བྱ་ཞིང་། ༀ་བཛྲ་ས་ཏྭ་སུ་སཾ་གྲ་ཧཱ་ད། ༀ་བཛྲ་ལཱ་སྱ་ཧཱུྃ། ༀ་བཛྲ་རཏྣ་མཱ་ནུཏྟ་རཾ། ༀ་བཛྲ་མཱ་ལེ་ཏྲཱཾ། ༀ་བཛྲ་དྷརྨ་གཱ་ཡ་ནི། ༀ་བཛྲ་གཱི་ཏི་ཧྲཱིཿ ༀ་བཛྲ་ཀརྨ་ཀ་རོདྡྷ་བེ། ༀ་བཛྲ་ནྲྀ་ཏཱི་ཨཱཿ མེ་ཏོག་གི་སྐྱུར་བའི་ཚུལ་གྱིས་དང་། བདུག་པས་བདུག་པའི་ཚུལ་གྱིས་དང་། སྡོང་བུ་མར་མེའི་མཆོད་པ་དང་། །བྱུག་པའི་ཚུལ་གྱིས་རྗེས་སུ་དྲི། མཆོད་པ་འདི་རྣམས་སོགས་སྔར་བཞིན་དང་། བཛྲ་ས་ཏྭ་
སོགས་ཀྱི་གླུ་བཞི་པོ་སྔོན་ཏུ་འགྲོ་བས། ༀ་བཛྲ་དྷཱུ་པེ་ཧཱུྃ། པུཥྤེ་ཏྲཱཾ། ཨཱ་ལོ་ཀེ་ཧྲཱིཿ གནྡྷེ་ཨཱཿ ལྔ་པ་ནི། རིན་ཆེན་འབར་བ་དང་བཟང་པོ་ཡོངས་བཟུང་དགོངས་པ་ལྟར་ཕྱག་ལེན་ཏུ་རྒྱས་པར་སྦྱར་བའི་ཚུལ་འབྱུང་ཡང་བསྡུ་ན། གར་པད་བཅས། ཏེ་ན་ཧཱུྃ། ཏེ་ན་ཧཱུྃ། ཏེ་ན་ཏེ་ཏེ་ཧཱུྃ། ཧཱུྃ་ཧཱུྃ། པི་ཝང་ཚུལ་གྱིས་སྒྲེང་བ་དང་། །གླིང་བུའི་ཚུལ་གྱིས་སྒྱུར་བ་དང་། །དུང་གི་ཚུལ་གྱིས་འབུད་པ་དང་། །སིལ་ཁྲོལ་ཚུལ་གྱིས་རྡེབ་པ་དང་། །ཕྱག་འཚལ་ཚུལ་གྱིས་འདུད་པ་དང་། །རྔ་ཡབ་ཚུལ་གྱིས་གཡོབ་པ་དང་། །རྒྱལ་མཚན་ཚུལ་གྱིས་སྒྲེང་བ་དང་། །བླ་བྲེའི་ཚུལ་གྱིས་བྲེ་བ་དང་། །བ་དན་ཚུལ་གྱིས་འཕྱར་བ་དང་། །གདུགས་ཀྱི་ཚུལ་གྱིས་དགབ་པ་དང་། །རྔ་ཟླུམ་ཚུལ་གྱིས་རྡེབ་པ་དང་། །རྫ་རྔའི་ཚུལ་གྱིས་རྡུང་བ་དང་། །གར་གྱི་ཚུལ་གྱིས་ཡན་ལག་སྐྱོད། །བཞད་པའི་ཚུལ་གྱིས་འཛུམ་པ་དང་། །སྒེག་པའི་ཚུལ་གྱིས་སྒེག་པ་དང་། །ཁྲོ་བའི་ཚུལ་གྱིས་འཇིགས་པ་དང་། །མདའ་འཕེན་ཚུལ་
གྱིས་དྲང་བར་བྱ། །རྡོ་རྗེ་གསོར་ཞིང་ཕྱག་འཚལ་ལོ། །ཆགས་པའི་ཚུལ་གྱིས་ནུ་མ་འཇིབ། །གུས་པའི་ཚུལ་གྱིས་ཐལ་མོ་སྦྱོར། །རྡོ་རྗེའི་མཆོད་པ་ཉི་ཤུ་པོས། །ཧེ་རུ་ཀ་དཔལ་འཁོར་བཅས་མཆོད། །གཉིས་པ་ནང་གི་མཆོད་པ་ནི། ཟླ་ཞུན་བྱང་སེམས་ག་བུར་གྱིས་གང་བའི། །པདྨའི་སྣོད་འཛིན་ལྷ་མོ་གཽ་རཱི་མ། །ཞིང་གི་རྡུལ་དང་མཉམ་པར་སྤྲུལ་ནས་ཀྱང་། །བདེ་ཆེན་མངོན་པར་འཕེལ་སླད་ལྷ་རྣམས་མཆོད། །གཡོན་རྡོ་རྗེ་ཁུ་ཚུར་གྱི་སྟེང་དུ་གཡས་པའི་ཐལ་མོ་བཀན་ལ་བཞག་པ་དཀར་ཆའི་སྣོད་འཛིན་པའི་ཚུལ་གྱིས། ༀ་གཽ་རཱི་གཾ་ཨཱཿཧཱུྃ་སྭཱ་ཧཱ། །ཉི་འོད་མདངས་ཆགས་རང་བྱུང་མེ་ཏོག་ནི། །སིཧླས་ཡོངས་བཀང་སྣོད་འཛིན་ཙཽ་རཱི་མ། །ཞིང་གི༴ གཏུམ་མོའི་ནུས་པ་རྒྱས་ཕྱིར་ལྷ་རྣམས་མཆོད། །སྔ་མ་ལས་ཟློག་པར་མར་ཆའི་སྣོད་འཛིན་པའི་ཚུལ་གྱིས། ༀ་ཙཽ་རཱི་ཙཾ༴ ནང་གི་གདུང་བ་སེལ་བྱེད་གླ་རྩི་སྟེ། །རྡོ་རྗེ་དྲི་ཆུའི་སྣོད་འཛིན་བཻ་ཏཱ་ལི། །ཞིང་གི༴ མཚན་འཛིན་དྲི་མ་སྦྱོང་ཕྱིར་ལྷ་རྣམས་མཆོད། །མཆོད་ཡོན་གྱི་
ཕྱག་རྒྱས། ༀ་བཻ་ཏཱ་ལི་བཾ། བཞི་མཉམ་བདུད་རྩིས་གང་བའི་ཐོད་པ་ཡིས། །ཕྱག་གཉིས་རྟག་ཏུ་བྲེལ་གྱུར་གྷསྨ་རཱི། །ཞིང་གི༴ འཆི་མེད་ཐོབ་པར་བྱ་ཕྱིར་ལྷ་རྣམས་མཆོད། །གཡོན་པའི་ཁུ་ཚུར་གྱི་སྟེང་དུ་གཡས་པའི་སོར་མོ་རྣམས་ཀྱི་རྩེ་མོ་བསྡུས་ཏེ་བཞག་པ་སྨན་འཛིན་པའི་ཚུལ་གྱིས། ༀ་གྷསྨ་རཱི་གྷཾ༴ སཱ་ལི་སྐྱེས་པ་རབ་བརྗོད་ཙནྡ་དམར། །རྡོ་རྗེ་སྟོབས་ཀྱི་སྣོད་འཛིན་པུཀྐ་སཱི། །ཞིང་གི༴ མཐའ་ཡས་མཐུ་སྟོབས་རྒྱས་ཕྱིར་ལྷ་རྣམས་མཆོད། །ཁུ་ཚུར་གཉིས་མཉམ་དུ་གཤིབས་ཏེ་ཁ་དྲུང་དུ་འཇོག་པ་ཤ་ལ་རོལ་པའི་ཚུལ་བྱས་ལ། ༀ་པུཀྐ་སཱི་པཾ༴ རོ་བཅུད་སྦྲང་རྩིའི་བཏུང་བ་དང་བཅས་པའི། །རྣལ་འབྱོར་ལྷུང་བཟེད་ཐོགས་པའི་རི་ཁྲོད་མ། །ཞིང་གི༴ རྡོ་རྗེའི་ལུས་ཐོབ་བྱ་ཕྱིར་ལྷ་རྣམས་མཆོད། །རྡོ་རྗེ་ཐལ་མོ་ཁ་ཕྱེ་བས་སྣོད་འཛིན་པ་ལྟར་བྱས་ལ། ༀ་ཤ་བ་རཱི་ཤཾ༴ གཞོམ་མེད་ནཱ་དའི་རང་བཞིན་ཅང་ཏེའུ། །དབྱངས་གསལ་རྡོ་རྗེའི་སྒྲ་སྒྲོགས་ཙཎྜ་ལཱི། །ཞིང་གི༴ རྡོ་རྗེ་ཆོས་ནི་འགྲུབ་ཕྱིར་ལྷ་རྣམས་མཆོད། །གཡོན་དགུར་བཞག་ཅིང་
གཡས་པའི་ཁུ་ཚུར་གྱི་མཛུབ་མོ་དང་མཐེའུ་ཆུང་འཁྱོག་པོར་བྱས་པ་ཅང་ཏེའུ་འཁྲོལ་པའི་རྣམ་པས། ༀ་ཙཎྜ་ལཱི་ཙོ༴ ཐབས་ཤེས་སྙོམས་པར་འཇུག་ལས་དགའ་བ་བཞི། །ཟག་མེད་ཡོངས་སུ་བསྐྱེད་པའི་ཌོམྦི་ནཱི། །ཞིང་གི༴ བདེ་སྟོང་དབྱེར་མེད་ཐོབ་ཕྱིར་ལྷ་རྣམས་མཆོད། །སྙིང་གར་ཁུ་ཚུར་བསྣོལ་བ་འཁྱུད་པའི་ཚུལ་གྱིས། ༀ་ཌོམྦི་ནཱི་ཌོཾ༴ ཐམས་ཅད་ལའང་མཐར་སེ་གོལ་དང་བཅས་པ་བྱའོ། །གསུམ་པ་གསང་བའི་མཆོད་པ་ནི། གཙོ་འཁོར་ཐམས་ཅད་དཔའ་བོའི་ཆ་ལུགས་སུ་བསྒྱུར་ཏེ་གཡུང་མོས་འཁྱུད་པ་ལས་བྱུང་བའི་བདེ་བ་ཆེན་པོའི་དེ་ཁོ་ན་ཉིད་སྐུ་ཉམས་སུ་བསྟར་བའི་མོས་པས། གང་གིས་རྣམ་རྟོག་རྣམ་སྤངས་ཏེ། །བྱང་ཆུབ་སེམས་ནི་རྣམ་བསྒོམ་ཞིང་། །ལུས་དང་སེམས་ནི་རྣམ་དག་པ། །འདི་ནི་དོན་དམ་མཆོད་པ་ཡིན། །ཞེས་པ་རྣམས་ཀྱི་མཐར། པཱུ་ཛ་བཛྲའི་སྔགས་ཀྱིས་རྒྱས་གདབ་པར་བྱའོ། །བཞི་པ་བསྟོད་པ་བྱ་བ་ནི། དོན་དྲན་པ་དང་སྔགས་ཀྱིས་རྡོར་དྲིལ་བཟུང་ལ། ཐམས་ཅད་དངོས་པོའི་རང་བཞིན་མཆོག །གདོད་ནས་ཐམས་ཅད་བདག་ཉིད་གནས། །ཐབས་དང་ཤེས་རབ་གཉིས་མེད་པའི། །ཀྱེའི་རྡོ་
རྗེ་ལ་ཕྱག་འཚལ། །བདག་མེད་མས་ནི་མགུལ་ནས་འཁྱུད། །དབུ་སྐྲ་སེར་པོ་གྱེན་ཏུ་འབར། །ཞལ་བརྒྱད་པ་ལ་སྤྱན་གསུམ་པ། །མགོན་པོ་དེ་ལ་གུས་ཕྱག་འཚལ། །སྤྱི་བོའི་སྟེང་ན་ནག་པོ་མཛེས། །དཀར་དང་དམར་པོ་གཡས་དང་གཡོན། །གང་གི་ལྷག་མའི་ཞལ་རྣམས་ནི། །ནག་པ་དེ་ལ་བདག་ཕྱག་འཚལ། །གླང་པོ་རྟ་བོང་གླང་རྔ་མོ། །མི་དང་ཤ་ར་བྷ་བྱི་ལ། །གཡས་པའི་ཕྱག་བརྒྱད་ལ་གནས་པའི། །ཐོད་པ་འཛིན་ལ་བདག་ཕྱག་འཚལ། །ས་དང་ཆུ་དང་རླུང་དང་མེ། །ཟླ་ཉི་གཤིན་རྗེ་གསང་བ་པ། །གཡོན་པའི་ཕྱག་བརྒྱད་ལ་གནས་པའི། །ཐོད་པ་འཛིན་ལ་བདག་ཕྱག་འཚལ། །ཞབས་བཞི་ཡིས་ནི་བདུད་བཞི་པོ། །མཉམ་པར་མནན་ཞིང་གཅེར་བུ་ཉིད། །ཉི་མར་ཞབས་གཡས་བརྐྱང་དང་བསྐུམ། །གར་མཛད་དེ་ལ་བདག་ཕྱག་འཚལ། །འཁོར་ལོ་བཞི་ཡི་བདག་ཉིད་མཛེས། །འཛག་པའི་མགོ་བོས་རྣམ་པར་བརྒྱན། །དེ་བཞིན་
གཤེགས་པ་རྣམ་དག་པའི། །ཕྱག་རྒྱ་ལྔས་ནི་རྣམ་པར་བརྒྱན། །སྣ་ཚོགས་རྡོ་རྗེ་སྤྱི་བོར་འཛིན། །དཔྲལ་བར་རིགས་ཀྱི་བདག་པོ་ཉིད། །དམ་པའི་དགའ་བ་ཡང་དག་ཐོབ། །བདེ་ཆེན་དེ་ལ་བདག་ཕྱག་འཚལ། །གཾ་ལས་སྐྱེས་པའི་གཽ་རཱི་ཤར། ཁ་དོག་ནག་ཅིང་གཡོན་པ་ཉ། །གཡས་པ་ན་ནི་གྲི་གུག་འཛིན། །ཚངས་པ་མནན་ལ་བདག་ཕྱག་འཚལ། །ཙཾ་ལས་བྱུང་བའི་ཆོམ་རྐུན་མ། །བཙོད་ཀྱི་ཁ་དོག་ལྷོ་ཕྱོགས་སུ། །ཕྱག་ན་ཕག་དང་ཅང་ཏེའུ་བསྣམས། །དབང་པོ་མནན་ལ་བདག་ཕྱག་འཚལ། །བཾ་ལས་སྐྱེས་པའི་སེར་མོ་ནུབ། །རོ་ལངས་མ་ནི་ཉེ་དབང་མནན། །ཕྱག་གཡོན་ལྷུང་བཟེད་གཡས་པ་ཡིས། །རུས་སྦལ་འཛིན་ལ་བདག་ཕྱག་འཚལ། །གྷསྨི་རཱི་ནི་བྱང་གི་སྒོར། །ལྗང་གུ་གྷཾ་ལས་བྱུང་བ་ཡི། །ཕྱག་ན་སྦྲུལ་དང་ཐོད་པས་བྲེལ། །དྲག་པོ་མནན་ལ་བདག་ཕྱག་འཚལ། །གཤིན་རྗེ་མནན་ཞིང་པཾ་ལས་བྱུང་། །གཡོན་པ་དགྲ་སྟྭ་སེང་གེ་གཡས། །
དབང་ལྡན་དུ་ནི་འཇིགས་གཟུགས་མ། །ཕྱག་འཚལ་པུཀྐ་སཱི་སྔོན་ལའོ། །རི་ཁྲོད་མ་དཀར་ཤཾ་ལས་བྱུང་། །མེ་རུ་གནོད་སྦྱིན་སྟེང་དུ་གནས། །གཡོན་ན་གསིལ་བྱེད་གཡས་པ་ན། །དགེ་སློང་འཛིན་ལ་བདག་ཕྱག་འཚལ། །གཏུམ་མོ་ནམ་མཁའི་སྔོ་བསངས་མ། །སྲིན་པོར་ཙཾ་ལས་བྱུང་བ་ཡི། །གཡོན་ན་ཐོང་གཤོལ་འཁོར་ལོ་གཡས། །ཕྱག་འཚལ་སྲིན་པོ་མནན་ཁྱོད་ལའོ། །ཌོཾ་ལས་འཁྲུངས་པའི་གཡུང་མོ་ནི། །རླུང་མཚམས་ཐག་བཟང་རིས་སྟེང་གཤེགས། །ཕྱག་གཡོན་སྡིག་མཛུབ་གཡས་རྡོ་རྗེ། །སྣ་ཚོགས་མདོག་ལ་བདག་ཕྱག་འཚལ། །སྐྱིལ་ཀྲུང་ཕྱེད་པའི་གར་གྱིས་གནས། །ཕྱག་རྒྱ་ལྔ་ཡིས་རྣམ་པར་བརྒྱན། །གཅེར་བུ་སྤྱན་གསུམ་ཐམས་ཅད་ལ། །བདག་ནི་གུས་པས་ཕྱག་འཚལ་ལོ། །ཕུང་པོ་ཁམས་རྣམས་རྣམ་དག་པ། །བྱང་ཆུབ་སེམས་ལས་བྱུང་བ་ཡི། །བདེ་རབ་སྟེར་འདི་ཐམས་ཅད་ལ། །དངོས་པོ་ཀུན་གྱིས་ཕྱག་འཚལ་
ལོ། །ཉིད་ཀྱི་ཕྱག་ན་གཟུང་བ་ཡི། །ཕྱག་མཚན་ས་བོན་ལས་བྱུང་བའི། །བདེ་ཆེན་འདོད་པ་ཐམས་ཅད་ལ། །རྟག་ཏུ་ཡང་དག་ཕྱག་འཚལ་ལོ། །གང་ཞིག་ཉི་ཟླ་ཁ་སྦྱོར་གནས་ས་བོན། །གཉིས་ལས་སྐྱེས་པའི་གཙོ་བོ་རིག་མར་བཅས། །ཉིད་ཀྱིས་ཉིད་ཀྱི་དཀྱིལ་འཁོར་འདི་ལ་ནི། །འཇིག་རྟེན་གསུམ་པོ་སྤྲུལ་པར་མཛད་དང་ལྡན། །ཉིད་ལ་འདི་དག་ཐམས་ཅད་མ་ལུས་པའི། །ཞི་བ་བདེ་གསོལ་རིག་མ་བསྡུ་བྱེད་པའི། །ཤེས་རབ་ཆགས་པ་བདུད་རྩིའི་རོ་ཉིད་ཀྱིས། །གནས་སུ་ཞི་བ་དེ་ལ་ཕྱག་འཚལ་ལོ། །མཁའ་འགྲོ་མ་གཙོ་ཀྱེའི་རྡོ་རྗེ། །ལྷ་མོ་འཁོར་ལོ་བཅས་བསྟོད་པས། །བདག་གིས་བསོད་ནམས་གང་ཐོབ་པ། །དེས་ནི་འཇིག་རྟེན་དེ་མཚུངས་ཤོག །ཅེས་སློབ་དཔོན་མཚོ་སྐྱེས་རྡོ་རྗེས་མཛད་པའི་བསྟོད་པ་ཉི་ཤུ་པ་དང་། ཁྱོད་ནི་རྣལ་འབྱོར་མ་ཡི་སོགས་ཀྱིས་བསྟོད་ནས། སྟུ་ཏི་བཛྲའི་སྔགས་ཀྱིས་རྒྱས་གདབ་བོ། །སྒྲུབ་མཆོད་ཞག་མང་དུ་སྒྲེལ་ན་སྐབས་འདིར་བུམ་བསྐྱེད་བཟླས་པ། ལས་བུམ་ཕྲིན་ལས་བཅོལ་བའི་བར་སྟ་
གོན་སྐབས་ལྟར་བྱའོ། །གཉིས་པ་དབང་བསྐུར་བ་ལ་བཞི། བདག་ཉིད་འཇུག་ཅིང་དབང་བླང་བ། །བར་ཆད་ཞི་བའི་ཕྱིར་གཏོར་མ་སྦྱིན་པ། སློབ་མ་དཀྱིལ་འཁོར་དུ་གཞུག་པ། དབང་བཞི་བསྐུར་བའི་ཆོ་གའོ། །དང་པོ་ལ་གསུམ། །གླུ། གཏོར་ཆོག །བདག་འཇུག་དངོས་སོ། །དང་པོ་སློབ་མ་དཀྱིལ་འཁོར་དུ་གཞུག་པའི་དོན་དུ་དམ་ཚིག་གི་གླུས་བསྐུལ་བ་ནི། རྡོར་དྲིལ་འཛིན་པས། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་མཐའ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །རྡོ་རྗེ་འཛིན་པར་བདག་སྒྲུབས་ཤིག །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་སྒྲུབས་ཤིག །ཉེས་པ་མེད་པ་རྟག་པ་སྟེ། །འདོད་ཆགས་ཀུན་གྱི་རྗེས་སུ་ཆགས། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་བདག་སྒྲུབས་ཤིག ། ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་ཏུ་བཟང་པོ་ཀུན་བདག་ཉིད། །བྱང་ཆུབ་སེམས་སུ་བདག་སྒྲུབས་
ཤིག །དངོས་གྲུབ་ཆེན་པོ་མཆོག་གི་མཆོག །དབང་ཕྱུག་ཆེན་པོ་རྒྱལ་བའི་རྒྱལ། །གྲུབ་པའི་རྡོ་རྗེ་ཆེར་གསལ་བས། །རྡོ་རྗེ་བསྙེམས་པར་བདག་སྒྲུབས་ཤིག །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཉིད་དེ། །འདོད་ཆགས་མཉམ་པའི་དམ་ཚིག་མཆོག །ཅེས་པ་དང་། བདེན་པ་བསྒྲག་པ་ཡང་བྱ་སྟེ། ཤེས་རབ་ཐབས་བདག་དཀྱིལ་འཁོར་གྱི། །བདེན་པའི་བྱིན་རླབས་གང་ཡིན་པའི། །མགོན་པོ་ཁྱོད་ཀྱི་བདེན་པ་དེས། །བདག་གི་འདོད་པ་སྐོངས་གྱུར་ཅིག །ཅེས་སོ། འདི་ད་ལྟའི་ཕྱག་བཞེས་སུ་བདག་འཇུག་གི་རྗེས་སུ་མཛད་དོ། །གཉིས་པ་བདག་ཉིད་ཀྱི་བར་ཆད་ཞི་བའི་ཕྱིར་འབྱུང་པོ་ཐམས་ཅད་གཏོར་མ་བཏང་བ་ནི་འོག་ནས་འབྱུང་བ་ལྟར་བྱའོ། །གསུམ་པ་ནི། དཀྱིལ་འཁོར་གྱི་གཙོ་བོ་བླ་མ་དབྱེར་མེད་པས་སློབ་དཔོན་གྱི་བྱ་བ་མཛད་པར་མོས་ལ་སློབ་མ་གཞུག་པ་ཇི་ལྟ་བ་བཞིན་དུ་ཚིག་གི་འདོར་ལེན་ཕྱེད་བར་བྱས་ལ་རང་ཉིད་ཀྱིས་དཀྱིལ་འཁོར་དུ་འཇུག་ཅིང་དབང་རྫོགས་པར་བླང་ངོ་། །གཉིས་པ་ནི། སྒྲུབ་པའི་གྲོགས་རྩ་སྔགས་བཟླ་བཞིན་དུ་དཀྱིལ་འཁོར་གྱི་སྲུང་བར་
བཞག་ལ། སློབ་དཔོན་ལ་སོགས་པ་དཀྱིལ་འཁོར་གྱི་ཁང་པའི་ཕྱི་རོལ་ཏུ་ཕྱིན་ཅིང་། ས་ཕྱོགས་གཙང་མར་དབུས་སུ་མཆོད་གཏོར། གཡས་ཆུ་གཉིས། གཡོན་དུ་མདུན་ནས་རྒྱབ་ཏུ་བརྩམས་ཏེ་ཉེར་སྤྱོད་ཕྲེང་ཚར། །མདུན་དུ་ནང་མཆོད་ཆུ་སྣོད་སོགས་འདུ་བྱས་ལ། མདུན་གྱི་ནམ་མཁར་ཆོས་འབྱུང་ནས་དབུ་བརྒྱན་པར་གྱུར། ཞེས་པའི་བར་སྒྲུབ་ཐབས་ལྟར་ལ། ༀ་པྲ་ཝ་ར་སཏྐར་ཨཱརྒྷཾ་པྲ་ཏཱིཙྪ་སྭཱ་ཧཱ། ཨཱརྒྷཾ་གྱི་གནས་སུ། པཱ་དྱཾ་སྦྱར་ནས་ཆུ་གཉིས། ༀ་བཛྲ་པུཥྤེ་པྲ་ཏཱིཙྪ་སྭཱ་ཧཱ། སོགས་ཉེར་སྤྱོད་རོལ་མོས་མཆོད། གཏོར་མ་བསངས་སྦྱང་། བྱིན་གྱིས་བརླབ། ༀ་ཨིནྡྲ་སོགས་ལན་གསུམ་གྱིས་ཕུལ། དབང་པོ་མཐར་བྱེད་ཆུ་བདག་དང་། ནོར་བྱིན་བྱིན་ཟ་བདེན་བྲལ་རླུང་། །འབྱུང་པོ་ས་ལྷ་འཁོར་དང་བཅས། །ཚངས་དང་ཟླ་ཉི་ལ་སོགས་གཟའ། །གཞན་ཡང་ཚངས་རིས་དམ་པ་དང་། །ཚངས་པའི་འདུན་ན་འདོན་པ་ཉིད། །དགའ་ལྡན་དང་ནི་འཐབ་བྲལ་བ། །རྒྱལ་པོ་ཆེན་པོ་བཞི་ཡི་རིས། །གཞན་འཕྲུལ་དབང་བྱེད་པ་རྣམས་དང་། །གང་ཞིག་འཕྲུལ་དགའ་ཡི་ནི་ལྷ། །གཙང་མའི་གནས་ན་གང་
དག་གནས། །བདེ་བ་ཅན་ན་གནས་རྣམས་དང་། །འོག་མིན་གནས་ན་གནས་པ་དང་། །འོད་ཟེར་ཅན་གྱི་འཇིག་རྟེན་གནས། །སུམ་ཅུ་རྩ་གསུམ་གནས་པ་རྣམས། །ཀླུ་ཆེན་སྟོབས་རྒྱུད་དུད་སྐྱོད་དང་། །དེ་བཞིན་མཐའ་ཡས་ནོར་རྒྱས་ཉིད། །འཇོག་པོ་དང་ནི་རིགས་ལྡན་ཏེ། །པད་ཆེན་པདྨ་བཟང་པོ་ཅན། །ལྷ་མིན་སེམས་ཅན་དམྱལ་བར་བཅས། །རྡོ་རྗེ་གསུམ་གྱི་རང་བཞིན་རྣམས། །མཆོད་སྦྱིན་གཏོར་མ་འདི་སྣོམས་ལ། ནས། ཡིད་ལ་འདོད་པ་ཀུན་རྫོགས་མཛོད། །ཅེས་པའི་བར་གྱིས་ལས་བཅོལ། རྡོ་རྗེའི་གླུ་བླང་། ༀ་པྲ་ཝར་སཏྐ་ཨཱཉྩ་མཱ་ནཾ་པྲ་ཏཱིཙྪ་སྭཱ་ཧཱ། །ཞེས་པས་མཆོད་ཡོན་སྤྲེང་ལ་མཆོད་གཏོར་གཤེགས། རྡོ་རྗེ་སེམས་དཔའི་ཡི་གེ་བརྒྱ་པ་ལ། ༀ་ཨཱཿཧཱུྃ་བཛྲ་མུཿ བཏགས་ལ་སེ་གོལ་གཏོགས། གཏོར་མགྲོན་རྣམས་རང་རང་གི་གནས་སུ་གཤེགས་པར་གྱུར། ཉེ་རེག་སྤྲོ་ན་སྐབས་འདིར་བྱ། ཧེ་རུ་ཀ་ཕྱག་གཉིས་པའི་ང་རྒྱལ་གྱིས་ནང་དུ་འོངས་ཏེ་རྡོར་དྲིལ་རོལ་མོ་བཅས་དཀྱིལ་འཁོར་ལ་གཡས་སུ་ལན་གསུམ་བསྐོར། ཤར་དུ་གཡོན་སྔོན་འགྲོའི་གཞི་བཅའ་དང་
སྦྲགས་ལ། ཧཱུྃ་ཧཱུྃ་ཧཱི་ཧཱི་བརྗོད་དེ་གཡས་བརྐྱང་སྟབས་ཀྱིས། ༀ་བཛྲ་བེ་ག་ཧཱུྃ། དཀྱིལ་འཁོར་གྱི་ནང་དུ་རྡོ་རྗེ་ཤུགས་ཀྱི་འཇུག་པས་ཞུགས་པར་གྱུར། མེ་ཏོག་སྔོན་པོའི་ཕྲེང་བ་གཙོ་བོ་ལ་འབུལ་བའི་མོས་པས། ༀ་པ་ར་མ་ས་ཁཱ་ཤ་ཡ་སུ་ལ་ལི་ཏ་བི་ལཱ་ས་ན་མ་ཏེ་ན་མཱ་མི་བྷ་ག་བནྟཾ་ཛཿཧཱུྃ་བཾ་ཧོཿ ཧི་ཧི་ཧི་ཧི་ཧཱིཿཔྲ་ཏཱིཙྪ་ཀུ་སུ་མཱཉྫ་ལི་ནཱ་ཐ་ཧོཿ ཞེས་དཀྱིལ་འཁོར་དུ་དོར་ཞིང་། སླར་ཡང་ཕྲེང་བའི་དབང་བསྐུར་བའི་མོས་པས། རང་གི་སྤྱི་བོར་བཅིངས་ཏེ་ཕྱག་བྱས་ལ། དེ་རིང་འགྲོ་བ་ཀུན་ལ་དངོས་གྲུབ་མཆོག །ལུས་པ་མེད་པའི་བཀའ་དྲིན་སྩོལ་བར་མཛོད། །ཅེས་གསོལ་ཏེ་སྐོར་བ་ནས་འདི་བར་སློབ་མ་དབང་བསྐུར་སྐབས་མི་དགོས་སོ། །གསུམ་པ་ནི། ལས་ཀྱི་སློབ་དཔོན་གྱིས་ཡོལ་བའམ་ཕྱི་རོལ་ཏུ་སྤོས་ཆུའི་བསང་གཏོར། མཎྜལ། མེ་ཏོག །གདོང་གཡོགས་རྣམས་ཉེར་བསྡོག་བྱ། སློབ་མ་རྣམས་གོས་གཙང་གྱོན་ཅིང་མཆིལ་ལྷམ་ཕུད་དེ་གནས་པ་འཁྲུས་བྱ། མཎྜལ་སྤྱི་མཐུན། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་དཀྱིལ་འཁོར་དུ་འཇུག་པའི་ཆོས་རྣམས་ཞུ་བའི་ཡོན་དུ་འབུལ་བར་བགྱིའོ། །ཞེས་ཕུལ།
སྡོམ་ནི། གསོལ་གདབ་གདོང་བཅིང་ནང་དུ་གཞུག །བགེགས་བསལ་དྲི་ལན་གསོལ་བ་བཏབ། །སྒོ་བཞིར་ཞུགས་དང་ལྔ་རྣམ་དང་། །སྡོམ་པ་བསྒྲག་གཟུང་མེ་ཏོག་སྦྱིན། །དོན་དམ་སེམས་བསྐྱེད་དམ་བསྒྲག་གཉིས། །མནའ་ཆུ་སློབ་དཔོན་དམ་བཞག་དང་། གསོལ་བ་གདབ་ཅིང་བདུད་རྩི་བླུད ། །ཡེ་ཤེས་དབབ་དང་བརྟན་པར་བྱ། །སྣང་བ་བརྟག་ཅིང་མེ་ཏོག་གཏོར། །མིག་དབྱེ་དཀྱིལ་འཁོར་བསྟན་པའོ། །ཞེས་བྱ་བ་རྣམས་ལས་ཐོག་མར་གསོལ་བ་གདབ་པ་ནི། །ཐལ་སྦྱར་བཅས། སངས་རྒྱས་ཀུན་ཀྱི་རང་བཞིན་སྐུ། །སློབ་དཔོན་ལ་ནི་སྐྱབས་སུ་མཆི། །གཙོ་བོ་ལྷ་མོ་བཅས་པ་ཡི། །ལྷ་རྣམས་ལ་ཡང་ཕྱག་འཚལ་ལོ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་འཇུག་པར་འཚལ། །ལན་གསུམ། ༀ་ཨཱཿཧཱུྃ་དང་སྤོས་ཆུས་བསངས་པའི་གདོང་གཡོགས་དམར་པོ་བཅིང་། ལས་རྡོར་གྱི་རྡོ་རྗེ་ལ་འཛིན་དུ་བཅུག་ནས་ནང་དུ་ཁྲིད་དེ་སློབ་དཔོན་གྱི་མདུན་དུ་འཁོད་པ་ལ། ན་མཿས་མནྟཿསོགས་གཙུག་ཏོར་འཁོར་ལོས་སྒྱུར་བའི་སྔགས་དང་། ན་མཿས་མནྟ་བུདྡྷེ་བྷྱཿ སོགས་བདུད་རྩི་འཁྱིལ་བའི་སྔགས་རིང་ལན་རེ་བརྗོད་པས་བགེགས་བསལ། གུ་གུལ་བདུག །ཡུངས་ཐུན་བྲབས། སློབ་དཔོན་གྱིས། བུ་ཁྱོད་སུ་
ཡིན་ཞེས་འདྲི། སློབ་མས་ཀྱང་བདག་སྐལ་པ་བཟང་པོ་ལགས་ཞེས་ལན་གསུམ་བརྗོད་ཅིང་། སློབ་དཔོན་གྱིས། དཀྱིལ་འཁོར་པ་ལ། དེ་བཞིན་གཤེགས་པ་ཀུན་གྱི་གནས། །ཧེ་རུ་ཀ་དཔལ་གྲོང་ཁྱེར་མཆོག །སྙིང་པོའི་དཀྱིལ་འཁོར་འདི་རུ་ནི། །བདག་གིས་སློབ་མ་གཞུག་པར་བགྱི། །ཞེས་གསོལ་བ་བཏབ་བོ། །དེ་ནས། དཀྱིལ་འཁོར་གྱི་ཤར་གྱི་སྒོ་ཕྱེས་ཏེ་ནང་དུ་ཞུགས་ནས་ཤར་གྱི་ལྷ་སྣམ་ལ་གནས་པར་གྱུར་པར་མོས་མཛོད། ཐལ་མོ་གནས་གསུམ་སྦྱར་ཏེ། ༀ་ན་མ་སྟེ་ཧཱུྃ། ན་མཱ་མི་ཧཱུྃ། ན་མོ་ན་ན་མ༔ཧཱུྃ་སྭཱ་ཧཱ། ཞེས་གནས་ལྔ་ས་ལ་གཏུགས་པའི་ཕྱག་བྱ་ཞིང་ཡིད་ཀྱིས་ལྷ་དགུའི་ཞབས་ལ་བཏུད་པའི་ཕྱག་བྱས་པས་ཤིན་ཏུ་མཉེས་པར་སེམས་སུ་བཅུག་གོ །སྒོ་དེ་ཉིད་ནས་ཐོན་ཏེ་གཡས་བསྐོར་གྱིས་ལྷོའི་སྒོ་སོགས། ནུབ། བྱང་རྣམས་ནས་ཕྱག་བྱ་བ་རིགས་འགྲེ། སླར་ཡང་ཤར་སྒོ་ནས་ཞུགས་ཏེ་ཤར་གྱི་ལྷ་སྣམ་ལ་འཁོད་པར་གྱུར་པར་མོས་ལ་སྡིག་པ་བཤགས་པ་སོགས་ལྔ་རྣམ་དག་སྟ་གོན་གྱི་སྐབས་ལྟར་ལན་གསུམ་བྱའོ། །དེ་ནས་སྡོམ་པ་བསྒྲག་པ་ནི། སངས་རྒྱས་ཆོས་དང་དགེ་འདུན་
ཏེ། །དཀོན་མཆོག་གསུམ་ལ་སྐྱབས་སུ་སོང་། །འདི་ནི་སངས་རྒྱས་རིགས་དག་པའི། །སྡོམ་པ་བརྟན་པོར་གྱུར་པའོ། །རྡོ་རྗེ་དྲིལ་བུའི་ཕྱག་རྒྱ་ནི། །བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་མ་ཁྱོད་ཀྱིས་བཟུང་བྱ་སྟེ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་སྡོམ་པ་ཡིན་པར་བཤད། །རིན་ཆེན་རིགས་ལ་རྟག་ཏུ་ནི། །ཉིན་རེ་བཞིན་དུ་ལན་དྲུག་ཏུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞིན་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་པའི་ཆོས་ཀྱང་མ་ལུས་གཟུང་། །འདི་ནི་པདྨའི་རིགས་དག་པའི། །དམ་ཚིག་ཡིད་དུ་འོང་བའོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བགྱི། །མཆོད་པའི་ལས་ཀྱང་ཅི་ནུས་བགྱི། །ཞེས་པས་རིགས་ལྔའི་སྡོམ་པ་དང་། གང་ཕྱིར་རྡོ་རྗེ་
འཛིན་པ་ཡི། །དངོས་གྲུབ་སློབ་དཔོན་རྗེས་འབྲང་གསུངས། །དེ་བས་དེ་ལ་བརྙས་པ་ནི། །རྩ་བའི་ལྟུང་བ་དང་པོར་བཤད། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པ་ཡིན་པར་བཤད། །རྡོ་རྗེ་སྤུན་ལ་ཁྲོས་པ་ནི། །ཉེས་པར་བརྗོད་པ་གསུམ་པ་ཡིན། །སེམས་ཅན་རྣམས་ལ་བྱམས་སེམས་སྤོང་། །བཞི་པ་ཡིན་པར་རྒྱལ་བས་གསུངས། །ཆོས་ཀྱི་རྩ་བ་བྱང་ཆུབ་སེམས། །དེ་སྤོང་པ་ནི་ལྔ་པ་ཡིན། །རང་དང་གཞན་གྱི་གྲུབ་པའི་མཐའ། །ཆོས་ལ་སྨོད་པ་དྲུག་པ་ཡིན། །ཡོངས་སུ་མ་སྨིན་སེམས་ཅན་ལ། །གསང་བ་སྒྲོག་པ་བདུན་པ་ཡིན། །ཕུང་པོ་སངས་རྒྱས་ལྔ་བདག་ཉིད། །སྨོད་པར་བྱེད་པ་བརྒྱད་པ་ཡིན། །རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ་ཡིན། །གདུག་ལ་རྟག་ཏུ་བྱམས་ལྡན་པར། །བྱེད་པ་དེ་ནི་བཅུ་པར་འདོད། །མིང་སོགས་བྲལ་བའི་ཆོས་རྣམས་ལ། །དེར་རྟོག་པ་ནི་བཅུ་གཅིག་པ། །
སེམས་ཅན་དད་དང་ལྡན་པ་ལ། །སེམས་སུན་འབྱིན་པ་བཅུ་གཉིས་པ། །དམ་ཚིག་ལ་ནི་ཇི་བཞིན་ཉིད། །མི་བསྟེན་པ་དེ་བཅུ་གསུམ་པ། །ཤེས་རབ་རང་བཞིན་བུད་མེད་ལ། སྨོད་པར་བྱ་པ་བཅུ་བཞི་པ། །སྔགས་པས་འདི་དག་སྤང་ན་ནི། །དངོས་གྲུབ་ངེས་པར་ཐོབ་པར་འགྱུར། །ཞེས་སློབ་དཔོན་གྱིས་ལན་གཅིག་བསྒྲག ། སློབ་མས་སྡོམ་པའི་འཛིན་ཅིང་དམ་ཚིག་བསྲུང་བར་ཁས་ལེན་པ་ནི། སློབ་དཔོན་འདིར་ནི་བདག་ལ་གསོན། །གཙོ་བོས་ཇི་ལྟར་བཀའ་སྩལ་བ། །དེ་ལྟར་བདག་ནི་བགྱིད་པར་འཚལ། །ཇི་ལྟར་དུས་གསུམ་མགོན་པོ་རྣམས། །ཞེས་སོགས་ལན་གསུམ་གྱིས་སྡོམ་པ་བཟུང་ངོ་། །དེ་ནས། སློབ་མ་རྣམས་བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ཞལ་བརྒྱད། ཕྱག་བཅུ་དྲུག །ཞབས་བཞི་པ། རྒྱན་ཐམས་ཅད་ཀྱིས་བརྒྱན་ཅིང་ཡུམ་བདག་མེད་མ་དང་མཉམ་པར་སྦྱོར་བའི་སྐུར་གྱུར། ལས་ཐམས་ཅད་པས་བསངས་པའི་མེ་ཏོག །ༀ་ཨཱཿཁཾ་བཱི་ར་ཧཱུྃ། ཞེས་པས་གཏད་པ་ཐལ་མོའི་བར་དུ་བཅུག་སྟེ་སྙིང་
གར་བཟུང་། སློབ་དཔོན་གྱིས་དེའི་སྙིང་གར་རྡོ་རྗེ་བཞག་ལ། ༀ་སརྦ་ཡོ་ག་ཙིཏྟ་ཨུཏྤ་ད་ཡཱ་མི། རྗེས་ཟློས་ལན་གསུམ། ༀ་སུ་ར་ཏེ་ས་མ་ཡ་སྟྭཾ། ༀ་བོ་དྷི་ཙིཏྟ་བཛྲ་ཡ་ཐཱ་སུ་ཁཾ། ལན་གཅིག་གིས་དོན་དམ་སེམས་བསྐྱེད་བརྟན་པར་བྱས་ནས། ལྷའི་དམ་ཚིག་བསྒྲག་པ་ནི། དེ་རིང་ཁྱོད་དཔའ་བོ་དང་རྣལ་འབྱོར་མ་ཐམས་ཅད་ཀྱི་ནང་དུ་ཞུགས་ཀྱིས། ངས་ཁྱོད་ལ་དཔལ་ཧེ་རུ་ཀའི་ཡེ་ཤེས་བསྐྱེད་པར་བྱའོ། །ཁྱོད་དེ་བཞིན་གཤེགས་པ་ཐམས་ཅད་དང་། །དཔའ་བོ་དང་རྣལ་འབྱོར་མ་ཐམས་ཅད་ཀྱི་དངོས་གྲུབ་ཐོབ་པར་འགྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་དཀྱིལ་འཁོར་མ་མཐོང་བའི་མདུན་དུ་སྨྲ་བར་མི་བྱ་སྟེ། ཁྱོད་དམ་ཚིག་ཉམས་པར་འགྱུར་ཏ་རེ། སྙིང་གར་རྡོ་རྗེ་བཞག་ལ། ཧེ་རུ་ཀ་དཔལ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་བརྗོད་དོ། །མནའ་ཆུ་བླུད་པ་ནི། ཐོད་པའི་ནང་དུ་བདུད་རྩིའི་རིལ་བུ་མ་དཱ་ན་དང་སྦྱར་བ། ཡི་གེ་
གསུམ་གྱིས་བྱིན་གྱིས་བརླབས་ལ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། །ༀ་སརྦ་པཉྩ་ཨ་མྲྀ་ཏ་ཨུ་ད་ཀ་ཧཱུྃ། ཞེས་པས་འཐུང་དུ་གཞུག་ཅིང་། །སློབ་དཔོན་གྱིས་དམ་ཚིག་བསྒྲག་པ་ནི། དེང་ནས་བརྩམས་ཏེ་ཁྱོད་ཀྱི་དཔལ་ཧེ་རུ་ཀ་ང་ཡིན་གྱི། ངས་གང་བྱོས་ཤིག་ཅེས་བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པའི་ལས་མ་བྱེད་ཅིག །ཁྱོད་མི་བདེ་བ་མ་སྤངས་པར་ཚེའི་དུས་བྱས་ནས་དམྱལ་བར་ལྟུང་བར་འགྱུར་ཏ་རེ། ཞེས་བསྒྲག་གོ །དེ་ནས་ཡེ་ཤེས་པ་དབབ་པའི་དོན་དུ། དཔའ་བོ་དང་རྣལ་འབྱོར་མ་ཐམས་ཅད་ཀྱིས་བྱིན་གྱིས་རློབས་ལ། དཔལ་ཧེ་རུ་ཀ་བདག་ལ་ཕོབ་ཅིག །ལན་གསུམ་གསོལ་བ་གདབ་ཏུ་གཞུག །བདུད་རྩི་ལྔའི་ཆུ་བྱིན་ནས། ཁྱོད་རང་གི་སྙིང་གར་ཉི་མའི་དཀྱིལ་འཁོར། །དེའི་དབུས་སུ་ཧཱུྃ་སྔོན་པོ་འོད་ཟེར་དང་བཅས་པ། དེའི་མཐའ་མ་ན་སྙིང་པོའི་སྔགས་མེ་མར་གྱི་རྣམ་པ་བཞིན་དུ་དམར་
ལྷག་ལྷག་པ་སྒོམས་ཤིག །དཀྱིལ་འཁོར་གྱི་གཙོ་བོ་བཅོམ་ལྡན་འདས་སེམས་དཔའ་སུམ་བརྩེག་ཏུ་བཞུགས་པའི་ས་བོན་ཧཱུྃ་སྔོན་པོ་ལས་འོད་ཟེར་དཀར་པོ་ཕྲེང་མ་ཆད་པར་ན་ར་ར་བྱུང་བ། ཁྱོད་རང་གི་སྙིང་གར་ཞུགས་པས་རྐྱེན་བྱས་པས་ལུས་འོད་དུ་མེ་རེ་རེ་ཞུ་བར་གྱུར། དམིགས་པ་དེ་ལ་སེམས་རྩེ་གཅིག་ཏུ་གཏོད་ལ་གཞན་གང་ལའང་ཡེངས་སུ་མ་གཞུག །ཅེས་བརྡ་སྦྱར་ལ་འབེབས་རྫས་སམ་གུ་གུལ་བདུག་ཅིང་རོལ་མོའི་སྒྲ་དྲག་ཏུ་བྱ། མཁའ་འགྲོ་ཐམས་ཅད་ཀྱི་བྱིན་རླབས་སློབ་མའི་རྒྱུད་ལ་ཤར་བར་བལྟས་ཏེ། སྙིང་པོའི་གཤམ་དུ་ཨ་ཨ། བཏགས་པ་བཟླས་ལ་ཡེ་ཤེས་པ་དབབ་པོ། །དེ་ཡང་། སྐུ་ཕེབས་ན་འཕར་བ་དང་འདར་བ་སོགས་དང་། གསུང་ཕེབས་ན་ཆོས་སྨྲ་བ་དང་། ཐུགས་ཕེབས་ན་མི་རྟོག་པའི་ཏིང་ངེ་འཛིན་འབྱུང་ངོ་། །དེས་མ་ཕེབས་ན་སྔ་མ་བཞིན་དུ་ཡང་ཡང་བསྐྱར་ཏེ་དབབ་པས་ཕེབས་པར་འགྱུར་རོ། །ཕེབས་པར་གྱུར་ན། སློབ་མ་སྣང་བ་མཐའ་ཡས་སུ་བསྒོམས་ཏེ། ལྕེ་ལ་ཨཱཿདམར་པོ་བསམ་ནས། སྨྲོས་ཤིག་བུ་ཡིས་དགེ་མི་དགེ །ཞེས་དྲིས་པས་དགེ་བ་དང་མི་དགེ་བ་ཐམས་ཅད་སྟོན་པར་བྱེད་དོ། །ཡེ་ཤེས་པ་བབས་པ་ན་སློབ་དཔོན་གྱི་ལག་པ་སྤོས་ཆུས་བརླན་
ཏེ། སློབ་མའི་སྤྱི་བོར་བཞག་ལ་ཏིཥྛ་བཛྲ་ཞེས་པས་བརྟན་པར་བྱ་ཞིང་། རྡུལ་ཚོན་གྱི་དཀྱིལ་འཁོར་གྱི་ཁ་དོག་ཇི་ལྟ་བུ་མཐོང་ཞེས་འདྲིའོ། །དེ་རྣམས་ཀྱིས་ཀྱང་རང་གིས་ཇི་ལྟར་མཐོང་བ་བཞིན་བརྗོད་པར་བྱ་སྟེ། དཀར་སེར་དམར་ལྗང་སྣ་ཚོགས་རྣམས་ལ་རིམ་པ་བཞིན་དུ་ཞི་བ་དང་། རྒྱས་པ་དང་། དབང་དང་། མངོན་སྤྱོད་དང་། ལས་ཐམས་ཅད་པ་འགྲུབ་པའི་ལྟས་སུ་ངེས་པར་བྱའོ། །དེ་ནས་སློབ་དཔོན་གྱིས། ཡང་དག་པ་ཡི་དཀྱིལ་འཁོར་འདིར། །བདག་གི་སློབ་མ་གཞུག་པར་བྱ། །ལྷ་རྣམས་ཀྱི་ནི་རིགས་ཇི་བཞིན། །ཇི་ལྟར་བསོད་ནམས་དེ་བཞིན་ཤོག །ཅེས་བརྗོད་པའི་རྗེས་སུ། སློབ་མས་པྲ་ཏཱིཙྪ་བཛྲ་ཧོཿ ཞེས་པས་མེ་ཏོག་ཕྲེང་བ་དཀྱིལ་འཁོར་གྱི་དབུས་སུ་དམིགས་ལ་དོར་རོ། །དེ་ཡང་གཙོ་བོ་ལ་ཕོག་ན་མཆོག་གི་དངོས་གྲུབ་འཁོར་རྣམས་ལ་ཕོག་ན་ཐུན་མོང་གི་དངོས་གྲུབ། ཕོ་བྲང་གི་ནང་དུ་ཚུད་ན་འཇིག་རྟེན་དངོས་གྲུབ་ཐོབ་ཅིང་། ལན་གསུམ་བསྐྱར་ཡང་ཕོ་བྲང་དུ་མ་ཆུད་ན་གདོན་མི་ཟ་བར་འཆིའོ། །ཞེས་བཤད། སློབ་དཔོན་གྱིས་སླར་ཡང་མེ་ཏོག་གི་ཕྲེང་བ་དེ་བླངས་ཏེ། སེམས་ཅན་སྟོབས་ཅན་ཁྱོད་ཀྱིས་ནི། །འདི་ནི་རབ་ཏུ་གཟུང་བར་གྱིས། །ཤེས་མེ་ཏོག་གི་ཕྲེང་བ་མགོ་ལ་བཅིང་། སློབ་མའི་མིག་ཏུ་ༀ་
ཡིག་རེ་རེ་གསལ་བར་གྱུར། ཧེ་རུ་ཀ་དཔལ་དེང་ཁྱོད་ཀྱི། །མིག་འབྱེད་པར་ནི་བརྩོན་པར་མཛོད། །ཕྱེ་བས་ཐམས་ཅད་མཐོང་བར་འགྱུར། །རྡོ་རྗེའི་མིག་ནི་བླ་ན་མེད། །ཅེས་གདོང་གཡོགས་བསལ་ནས། དཀྱིལ་འཁོར་བཟང་པོ་འདི་ལ་ལྟོས། །ད་ནི་དད་པ་རབ་ཏུ་བསྐྱེད། །ཁྱོད་ནི་རྣལ་འབྱོར་མ་རིགས་སྐྱེས། །སྔགས་དང་ཕྱག་རྒྱས་བྱིན་གྱིས་བརླབས། །འགྲོ་བ་ཕུན་ཚོགས་དངོས་གྲུབ་ཀྱང་། །ཐམས་ཅད་འདི་ལས་མངོན་དུ་འགྱུར། །དངོས་གྲུབ་ཐོབ་ཕྱིར་དམ་ཚིག་སྐྱོངས། །གསང་སྔགས་ལ་ཡང་བརྩོན་པར་གྱིས། །ཞེས་ལྟ་བར་བསྐུལ་ནས། དཀྱིལ་འཁོར་གྱི་དབུས་སུ་བཅོམ་ལྡན་འདས་སོགས་ནས་དུར་ཁྲོད་མེ་རིའི་བར་མངོན་རྟོགས་ལྟར་ལྷ་ངོ་རྒྱས་པར་བསྟན། །བདག་འཇུག་སྐབས་སོགས་བསྡུ་ན། ཆོས་འབྱུང་གི་ནང་དུ་སྣ་ཚོགས་པདྨ་དང་སྣ་ཚོགས་རྡོ་རྗེའི་ལྟེ་བར་མཚན་ཉིད་ཐམས་ཅད་ཡོངས་སུ་རྫོགས་པའི་གཞལ་ཡས་ཁང་དུར་ཁྲོད་རྡོ་རྗེའི་རྭ་བ་མེ་རིས་བསྐོར་བའི་གཞལ་ཡས་ཁང་གི་
དབུས་སུ། པདྨ་དམར་པོ་འདབ་མ་བརྒྱད་པའི་ལྟེ་བར་བཅོམ་ལྡན་འདས་ཡབ་ཡུམ། །འདབ་མ་བརྒྱད་ལ་གཽ་རཱི་ལ་སོགས་པའི་ལྷ་མོ་བརྒྱད་སོགས་རྟེན་དང་བརྟེན་པར་བཅས་པའི་དཀྱིལ་འཁོར་མངོན་སུམ་དུ་མཐོང་བར་གྱུར། ཞེས་སམ། མཚན་ཙམ་གྱིས་ལྷ་ངོ་བསྟན་ལ། དེ་ལས་ཀྱང་ཁྱོད་ཀྱི་མེ་ཏོག་ཕོག་པའི་ལྷ་ནི་འདི་ཡིན་ནོ་ཞེས་བསྟན་ནོ། །བཞི་པ་ལ་བཞི། བུམ་པ། གསང་བ། ཤེས་རབ་ཡེ་ཤེས། དབང་བཞི་པའོ། །དང་པོ་རྡུལ་ཚོན་གྱི་དཀྱིལ་འཁོར་དུ་བུམ་པའི་དབང་བསྐུར་བ་ལ་བཅོ་བརྒྱད་དེ། གསོལ་གདབ་རིག་པའི་དབང་ལྔ་དང་། །ཐུན་མོང་རྗེས་གནང་དམ་ཚིག་གསུམ། །རིགས་ལྔའི་རྗེས་སུ་གནང་བ་དང་། །ལུང་བསྟན་གཟེངས་བསྟོད་དབུགས་དབྱུང་དང་། སློབ་དཔོན་དབང་དང་བརྟུལ་ཞུགས་སོ། །དེ་ལ་ཐོག་མར་མཎྜལ་ཕུལ། གསོལ་བ་གདབ་པ་ནི། ཧེ་རུ་ཀ་དཔལ་དབང་བསྐུར་བ། འགྲོ་བ་སྐྱོབ་ཕྱིར་གཟི་བརྗིད་ཅན། །ཇི་ལྟར་ཡོན་ཏན་འབྱུང་ལ་སོགས། །དེ་བཞིན་བདག་ལའང་དེ་སྩོལ་ཅིག །དཔའ་བོ་ཆེན་པོ་མི་ལྡོག་པའི། །དབང་བསྐུར་བ་ནི་བདག་ལ་སྩོལ། །སེམས་ཅན་ཀུན་གྱི་དོན་གྱི་ཕྱིར། །
བདག་ནི་རྟག་ཏུ་སློབ་དཔོན་བགྱིད། །ལན་གསུམ། དེ་ནས་རྒྱུ་དབང་ནི། །སློབ་མ་བའི་རྣམ་ལྔས་བྱུགས་པའི་མཎྜལ་ཤར་དུ་བཀོད་པ་ལ་བཞག་ནས། ༀ་བཛྲ་ཨ་མྲྀ་ཏས་བསངས། རཀྵའི་སྔགས་ཀྱིས་བསྲུང་ལ། དཀྱིལ་འཁོར་གྱི་ཤར་ཕྱོགས་སུ་དབང་སྟེགས་མཆོད་པའི་བཀོད་པ་དུ་མ་དང་ལྡན་པའི་དབུས་སུ། །སློབ་མ་སྐད་ཅིག་གིས་པད་ཉིའི་གདན་ལ་མི་བསྐྱོད་པ་སྐུ་མདོག་སྔོན་པོ་རྡོ་རྗེ་དང་དྲིལ་བུ་འཛིན་པ། མཱ་མ་ཀི་སྔོན་མོ་གྲི་ཐོད་འཛིན་པ་དང་མཉམ་པར་སྦྱོར་བ་ལ། །མཁའ་འགྲོ་མ་དུ་མས་བདུད་རྩིའི་བུམ་པས་དབང་བསྐུར་བར་སྒོམས། བུམ་པ་རྒྱས་པར་ཡོད་ན་སོ་སོའི་བུམ་ཆུ་རྣམ་རྒྱལ་དུ་བསྡུས་ཏེ། སློབ་མའི་སྤྱི་བོར་བཀོད་དེ། དབང་བསྐུར་རྡོ་རྗེ་ཆེན་པོ་ནི། ཁམས་གསུམ་ཀུན་གྱིས་ཕྱག་བྱས་པ། །སངས་རྒྱས་ཀུན་གྱི་གསང་གསུམ་ལས། །རབ་ཏུ་བྱུང་བ་སྦྱིན་པར་བྱ། །ཞེས་དང་སྙིང་པོའི་མཐར། །ༀ་བཛྲ་ཨུ་ད་ཀ་ཨ་བྷི་ཥིཉྩ་མཱཾ། ཞེས་བརྗོད་ཅིང་བུམ་པའི་ཆུ་བདུད་རྩི་བྱང་ཆུབ་སེམས་སུ་དམིགས་ལ་སྤྱི་བོར་བླུགས། ཁ་གདོང་བཀྲུས་ཤིང་ཅུང་ཟད་
འཐུང་དུ་གཞུག་གོ །དེ་ལྟར་ཆུའི་དབང་བསྐུར་བས་ཀུན་གཞིའི་རྣམ་པར་ཤེས་པ་གནས་གྱུར་ནས་མེ་ལོང་ལྟ་བུའི་ཡེ་ཤེས་རྒྱུད་ལ་སྐྱེས་པའི་མོས་པ་གྱིས་ཤིག །དབུ་རྒྱན་དབང་ནི། བསངས་ཤིང་སྲུང་། སློབ་མ་སྐད་ཅིག་གིས་པད་ཉིའི་གདན་ལ་རིན་ཆེན་འབྱུང་ལྡན་སེར་པོ་རིན་པོ་ཆེ་དང་། དེས་ཡུ་བ་བྱས་པའི་དྲིལ་བུ་འཛིན་པ། ཡུམ་རིན་ཆེན་སྒྲོལ་མ་སེར་མོ་གྲི་ཐོད་འཛིན་པ་དང་མཉམ་པར་སྦྱོར་བ། དབང་རྫས་བསངས་སྦྱང་། སྟོང་པའི་ངང་ལས། པད་ཉིའི་གདན་ལ་དབུ་རྒྱན་ཨཱཾ་ལས་རིན་ཆེན་འབྱུང་ལྡན༴ ནས། མཉམ་པར་སྦྱོར་བ། གཙོ་བོའི་ཐུགས་ཀའི་འོད་ཟེར་གྱིས་བསྒོམས་པ་དང་འདྲ་བའི་ཡེ་ཤེས་པ་སྤྱན་དྲངས། ཛཿཧཱུྃ་བཾ་ཧོཿ དམ་ཚིག་པ་དང་གཉིས་སུ་མེད་པར་གྱུར། སྭཱ་རཏྣ་དྷྲྀཀ་གསུམ། ༀ་བཛྲ་པུཥྤེ་སོགས་ཉེར་སྤྱོད་རོལ་མོས་མཆོད། རིན་ཆེན་འབྱུང་ལྡན་ཡབ་ཡུམ་སྙོམས་པར་ཞུགས་ཤིང་ཞུ་བ་དབུ་རྒྱན་གྱི་གཟུགས་སུ་གསལ་བ་མཁའ་འགྲོ་མ་དུ་མས་དར་དཔྱངས་དང་བཅས་
པ་བསྣམས་ཏེ་དབང་བསྐུར་བར་གྱུར། མགོར་བསྐོན་ལ། ཐོར་ཚུར་ཅོད་པན་གྱིས་བརྒྱན་པ། །སངས་རྒྱས་ཀུན་གྱིས་བསྔགས་པ་ཡི། །རིན་ཆེན་དག་གི་དབུ་རྒྱན་དང་། །དར་དཔྱངས་དབང་བསྐུལ་སྦྱིན་པར་བྱ། །ༀ་རཏྣ་ཨ་བྷི་ཥིཉྩ་མི། དེ་ལྟར་དབུ་རྒྱན་དར་དཔྱངས་དང་བཅས་པས་དབང་བསྐུར་བས་ཉོན་མོངས་པ་ཅན་གྱི་ཡིད་གནས་གྱུར་ནས། མཉམ་པ་ཉིད་ཀྱི་ཡེ་ཤེས་རྒྱུད་ལ་སྐྱེས་པའི་མོས་པ་གྱིས་ཤིག །རྡོ་རྗེའི་དབང་ནི། བསངས་སྲུང་། །ཚིག་རྣམས་དབུ་རྒྱན་གྱིས་འགྲེས་ཏེ། སློབ་མ་སྐད་ཅིག་གིས་པད་ཉིའི་གདན་ལ་སྣང་བ་མཐའ་ཡས་དམར་པོ་པདྨ་དང་དེས་ཡུ་བ་བྱས་པའི་རིལ་བུ་འཛིན་པ། ཡུམ་གོས་དཀར་མོ་དམར་མོ་གྲི་ཐོད་འཛིན་པ་སོགས། དབང་རྫས་བསངས་སྦྱང་། སྟོང་པའི་ངང་ལས་པད་ཉིའི་གདན་ལ་རྡོ་རྗེ་ཛྲཱིཾ་ལས་སྣང་བ་མཐའ་ཡས་ནས། མཉམ་པར་སྦྱོར་བ། སྤྱན་དྲངས། བསྟིམ། མཆོད། སྣང་བ་མཐའ་ཡས་ཡབ་ཡུམ་སྙོམས་པར་ཞུགས་ཤིང་ཞུ་བ་རྡོ་རྗེའི་རྣམ་
པར་གསལ་བ་མཁའ་འགྲོ་མ་དུ་མས་བསྣམས་ཏེ་དབང་བསྐུར་བར་གྱུར། ལག་པ་གཡས་སུ་གཏད་ལ། སངས་རྒྱས་ཀུན་གྱི་རྡོ་རྗེའི་དབང་། །དེ་རིང་ཁྱོད་ལ་བསྐུར་བར་བྱ། །སངས་རྒྱས་ཀུན་ཏུ་རབ་བསྒྲུབ་ཕྱིར། །རྡོ་རྗེ་འདི་ནི་ཁྱོད་ཀྱིས་ལོངས། །ༀ་བཛྲ་ཨ་བྷིི་ཥིཉྩ། རྡོ་རྗེའི་དབང་བསྐུར་བས་ཡིད་ཀྱི་རྣམ་པར་ཤེས་པ་གནས་གྱུར་ནས། སོ་སོར་ཀུན་ཏུ་རྟོག་པའི་ཡེ་ཤེས་རྒྱུད་ལ་སྐྱེས་པའི་མོས་པ་གྱིས་ཤིག །དྲིལ་བུའི་དབང་ནི། བསངས་སྲུང་། སློབ་མ་སྐད་ཅིག་གིས་པད་ཉིའི་གདན་ལ་དོན་ཡོད་གྲུབ་པ་ལྗང་གུ་རལ་གྲི་དང་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་དམ་ཚིག་སྒྲོལ་མ་ལྗང་གུ་གྲི་ཐོད་འཛིན་པ་དང་མཉམ་པར་སྦྱོར་བ། དབང་རྫས་བསངས་སྦྱང་། སྟོང་པའི་ངང་ལས་པད་ཉིའི་གདན་ལ་དྲིལ་བུ་ཁཾ་ལས་དོན་ཡོད་གྲུབ་པ་ནས། མཉམ་པར་སྦྱོར་བ། དྲངས། བསྟིམ། མཆོད། དོན་ཡོད་གྲུབ་པ་ཡབ་ཡུམ་སྙོམས་པར་ཞུགས་ཤིང་ཞུ་བ་དྲིལ་བུའི་རྣམ་པར་གསལ་བ་མཁའ་འགྲོ་མ་དུ་
མས་བསྣམས་ཏེ་དབང་བསྐུར་བར་གྱུར། ལག་གཡོན་དུ་གཏད། སངས་རྒྱས་ཀུན་གྱི་དྲིལ་བུའི་དབང་། །དེ་རིང་༴ སངས་རྒྱས༴ དྲིལ་བུ་འདི་ནི་ཁྱོད་ཀྱིས་ལོངས། །ༀ་བཛྲ་ཨ་དྷི་པ་ཏི་སྟྭཾ། ཨ་བྷི་ཥིཉྩ་མི། ཏིཥྛ་བཛྲ་ས་མ་ཡ་སྟྭཾ། དེ་ལྟར་དྲིལ་བུའི་དབང་བསྐུར་བས་སྒོ་ལྔའི་རྣམ་པར་ཤེས་པ་གནས་གྱུར་ནས། བྱ་བ་གྲུབ་པའི་ཡེ་ཤེས་རྒྱུད་ལ་སྐྱེས་པའི་མོས་པ་གྱིས་ཤིག །མིང་དབང་ནི། བསངས་སྲུང་། སློབ་མ་སྐད་ཅིག་གིས་པད་ཉིའི་གདན་ལ་རྣམ་སྣང་དཀར་པོ་འཁོར་ལོ་དང་དེས་ཡུ་བ་བྱས་པའི་དྲིལ་བུ་འཛིན་པ། ཡུམ་སངས་རྒྱས་སྤྱན་མ་དཀར་མོ་གྲི་ཐོད་འཛིན་པ་དང་མཉམ་པར་སྦྱོར་བ། མཁའ་འགྲོ་མ་དུ་མས་ཆོས་ཐམས་ཅད་སྟོང་པ་ཉིད་དུ་རྟོགས་པའི་བརྡར་རྡོ་རྗེ་སྤྱི་བོར་བཞག་སྟེ་མིང་གི་དབང་བསྐུར་བར་གྱུར། སངས་རྒྱས་ཀུན་གྱི་མིང་གི་དབང་། །དེ་རིང་༴ སངས་རྒྱས༴ མིང་གི་དབང་ནི་ཁྱོད་ཀྱིས་ལོངས། །ༀ་བཛྲ་ས་ཏྭ་སྟྭཾ་ཨ་བྷི་ཥིཉྩ་མི། ༀ་བཛྲ་ནཱ་མ་
ཨ་བྷི་ཥཻ་ཀ་ཏཿ ཀྱེ་དཔལ་ཆེ་གེ་མོ་ཞེས་བྱའོ། །མིང་གི་བྱེ་བྲག །རྡོ་རྗེ་བཞད་པ། རྡོ་རྗེ་རྣམ་པར་སྒེག་པ། ཞེས་སྐྱེས་པ་དང་། རྡོ་རྗེ་བསྙེམས་མ། རྡོ་རྗེ་མཚོན་ཆ་མ། རྡོ་རྗེ་ཨེ་མ་འོ་བདེ་བ། རྡོ་རྗེ་བདག་མེད་མ། ཞེས་པ་བུད་མེད་རྣམས་ལའོ། །གཙོ་བོ་ལ་མེ་ཏོག་ཕོག་ན། རྡོ་རྗེ་སེམས་དཔའ། དགྱེས་པ་རྡོ་རྗེ། རང་བྱུང་རྣམ་སྣང་ཆེན་པོ། །རྡོ་རྗེ་ཨཱ་ར་ལི། །ཐུགས་རྡོ་རྗེ་ཁྲོ་བོ། །རྡོ་རྗེ་ཁྲོ་བོ། །རྡོ་རྗེ་བདུད་རྩི། བདུད་རྩི་འཁྱིལ་བ། ཧེ་རུ་ཀ །སྙིང་རྗེའི་སྟོབས་ཤེས་གདགས་ཤིང་། དེ་ལྟར་མིང་གི་དབང་བསྐུར་བས་མིང་གཞིའི་ཕུང་པོ་གནས་གྱུར་ནས། །ཆོས་དབྱིངས་ཡེ་ཤེས་རྒྱུད་ལ་སྐྱེས་པའི་མོས་པ་གྱིས་ཤིག །དེས་མ་རིག་པ་ལྔ་གནས་གྱུར་ཏེ་རིག་པའི་ཡེ་ཤེས་ལྔ་མངོན་ཏུ་བྱེད་པས་རིག་པའི་དབང་ངོ་། །ཞེས་བརྡ་སྤྲད། ཐུན་མོང་གི་དངོས་གྲུབ་རྗེས་སུ་གནང་བ་ནི། །སློབ་མ་སྐད་ཅིག་གིས་བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ཞལ་བརྒྱད། ཕྱག་བཅུ་དྲུག །ཞབས་བཞི་པ། རྒྱན་ཐམས་ཅད་ཀྱིས་བརྒྱན་ཅིང་ཡུམ་བདག་མེད་མ་དང་མཉམ་པར་སྦྱོར་བའི་སྐུར་གྱུར། གྲི་ཐོད་བསངས་སྦྱང་། སྟོང་པའི་ངང་
ལས་ཨ་ལས་གྲི་གུག་ཤེས་རབ་གྱི་རང་བཞིན་དང་། ཧཱུྃ་ལས་ཐོད་པ་ཐབས་བདེ་བའི་རང་བཞིན་དུ་བསམ། ཧེ་རུ་ཀ་དཔལ་ཁ་ཊྭཱཾ་ག །རྣལ་འབྱོར་མ་ནི་ཌ་མ་རུ། །རྡོ་རྗེ་ཁ་ཊྭཱྃ་རྡོ་རྗེར་བཅས། །དྲིལ་བུ་སིལ་སིལ་སྒྲ་སྒྲོགས་ཤིང་། །ཚངས་པའི་སྐུད་ཐོགས་རྣལ་འབྱོར་བདག །གྲི་གུག་དང་ནི་ཀ་པཱ་ལ། །དཔའ་པོ་ཆེན་པོས་བླང་བར་གྱིས། །དབང་བསྐུར་སྐབས། དེ་རྣམས་དང་ལྡན་པས་ཞི་བ་དང་། རྒྱས་པ་དང་། དབང་དང་། དྲག་པོ་དང་། བསྐྲད་པ་དང་། རྨོངས་པར་བྱ་བ་དང་། །དགྲའི་སྡེ་འཇིག་པ་དང་། བསད་པ་ལ་སོགས་པ་ལས་དེ་རྣམས་ཐོགས་པ་མེད་པར་བྱོས་ཤིག །མཆིལ་ལྷྭམ་བགོ་བ་དང་། ཆར་དབབ་པ་དང་། ཉི་མ་དང་ཟླ་བ་བཟུང་བ་ལ་སོགས་པ་མཁའ་འགྲོ་མའི་དངོས་གྲུབ་ཐམས་ཅད་ཀྱང་ཅི་དགའ་བར་བསྒྲུབ་པར་གྱིས་ཤིག །ཅེས་གྲི་གུག་གཡས། ཐོད་པ་གཡོན་ཏུ་སྦྱིན། དམ་ཚིག་གསུམ་སྦྱིན་པ་ནི། །སློབ་མ་པད་ཟླའི་གདན་ལ་སྐད་ཅིག་གིས་རྡོ་རྗེ་སེམས་དཔའ་
སྐུ་མདོག་དཀར་པོ་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་པ། དར་དང་རིན་པོ་ཆེའི་རྒྱན་གྱིས་སྤྲས་པ། ཞབས་སེམས་དཔའི་སྐྱིལ་མོ་ཀྲུང་གིས་བཞུགས་པ། རྡོ་རྗེ་བསངས་ཤིང་། སྟོང་པའི་ངང་ལས་ཧཱུྃ་ལས་བྱུང་བའི་རྡོ་རྗེར་གྱུར། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་ཏུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །བཅོམ་ལྡན་འདས་དཔལ་མཆོག་དང་པོའི་སྐྱེས་བུའོ་ཞེས་བརྗོད་དེ། །ལག་པ་གཡས་བྱིན་ལ། དེས་ཀྱང་བདག་འཇུག་ལ་འདི་རིགས་མ་བརྗོད་ཀྱང་རུང་། འཁོར་བ་དང་མྱ་ངན་ལས་འདས་པ་དབྱེར་མེད་དུ་རྟོགས་པར་བྱའོ། །སྙམ་པའི་བློས་སྙིང་གར་རྡོ་རྗེ་བཟུང་བ་ནི་ཐུགས་ཀྱི་དམ་ཚིག་གོ །དྲིལ་བུ་བསངས་ལ། སྟོང་པའི་ངང་ལས་ཨ་ལས་བྱུང་བའི་དྲིལ་བུར་གྱུར། འདི་ནི་རྣལ་འབྱོར་མ་ཀུན་གྱི། །ཤེས་རབ་དབྱངས་ཀྱི་རྗེ་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅད། །བྱང་ཆུབ་མཆོག་ཏུ་རྒྱལ་པས་བཤད། །སྲིད་པ་ངོ་བོ་ཉིད་ཀྱིས་
དག །ངོ་བོ་ཉིད་ཀྱིས་དངོས་མེད་བྱས། །རང་བཞིན་དག་པའི་སེམས་དཔའ་ནི། །སྲིད་པའི་དམ་པ་བྱེད་པར་འགྱུར། །ཞེས་དྲིལ་བུ་གཡོན་དུ་བྱེད་ལ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སེམས་ཅན་ཐམས་ཅད་ལ་སྒྲོགས་པར་བྱའོ་སྙམ་པའི་བློས་དཀྲོལ་དུ་གཞུག་པ་ནི་གསུང་གི་དམ་ཚིག་གོ །དེ་ནས་རང་གི་མེ་ཏོག་ཕོག་པའི་ལྷ་བསྒོམ་པར་གསུངས་ཀྱང་སྤྱི་ཁྱབ་ཏུ། སློབ་མ་བཅོམ་ལྡན་འདས་ཡབ་ཡུམ་གྱི་སྐུར་གསལ་བར་གྱུར། །རྡོར་དྲིལ་འཁྱུད་པའི་ཚུལ་གྱིས། ཡིད་ཀྱི་ལུས་ནི་བརྟན་པའི་ཕྱིར། །ཕྱག་རྒྱའི་དམ་ཚིག་ཅེས་སུ་བརྗོད། །དམ་ཚིག་ཡིད་ནི་བརྟན་པ་གང་། །དེ་ཕྱིར་ཕྱག་རྒྱར་རབ་ཏུ་གྲགས། ཤེས་དང་། དུས་འདི་ནས་བཟུང་སྟེ་ཡི་དམ་གྱི་ལྷ་དང་སྐད་ཅིག་ཀྱང་མི་འབྲལ་བར་གྱིས་ཤིག་ཅེས་བྱ་བ་ནི་སྐུའི་དམ་ཚིག་གོ །རིགས་ལྔའི་རྗེས་གནང་ནི། བདག་འཇུག་སྐབས་ལྷ་བསྐྱེད་དོར་ཏེ་ཚིགས་བཅད་རྐྱང་པས་རུང་། །སློབ་མ་རྣམ་སྣང་དཀར་པོ་བྱང་ཆུབ་མཆོག་གི་ཕྱག་རྒྱ་ཅན་དར་དང་རིན་པོ་ཆེའི་རྒྱན་གྱིས་བརྒྱན་པ་པད་ཟླའི་སྟེང་ལ་རྡོ་རྗེ་
སྐྱིལ་ཀྲུང་གིས་བཞུགས་པར་གྱུར། དེའི་ཕྱག་རྒྱ་བྱེད་དུ་གཞུག །འཇིག་རྟེན་ཁམས་ནི་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་སྣ་ཚོགས་འདུལ་གྱུར་པ། །ཆོས་ཀྱི་འཁོར་ལོ་རབ་ཏུ་སྐོར། །ཞེས་དང་། ཁྱོད་ཀྱི་གདུལ་བྱ་གཏི་མུག་ཅན་རྣམས་ཀྱི་དོན་གྱིས་ཤིག །ཅེས་བརྗོད། དེ་བཞིན་དུ་སྦྱར་ཏེ། མི་བསྐྱོད་པ་སྔོན་པོ་ས་གནོན་དང་མཉམ་བཞག་གི༴ ཆོས་ཀྱི་གནས་སུ། རྡོ་རྗེའི་འཁོར་ལོ༴ གདུལ་བྱ་ཞེ་སྡང་ཅན༴ རིན་ཆེན་འབྱུང་ལྡན་སེར་པོ་མཆོག་སྦྱིན་མཉམ་བཞག་གི༴ ནོར་བུའི་འཁོར་ལོ༴ སེར་སྣ་ཅན༴ སྣང་བ་མཐའ་ཡས་དམར་པོ་ཏིང་ངེ་འཛིན་གྱི༴ །པདྨའི་འཁོར་ལོ༴ འདོད་ཆགས་ཅན༴ དོན་གྲུབ་ལྗང་གུ་སྐྱབས་སྦྱིན་མཉམ་བཞག་གི༴ ལས་ཀྱི་འཁོར་ལོ༴ ལེ་ལོ་ཅན༴ ཞེས་བསྒྱུར་རོ། །སློབ་དཔོན་དབུ་ཞྭ་ཕུད་ཆོས་གོས་སྣམ་སྦྱར་བགོས་པའི་སྣེ་ལ་སློབ་མ་དག་གིས་འཛིན་དུ་བཅུག་པའམ། །གཞུང་གཞན་ནས་འབྱུང་བ་བཞིན། །གྲྭ་གཉིས་རྣ་བ་ལྟར་བྱས་པ་གཡོན་པའི་ཁུ་ཚུར་གྱིས་གཟུང་། གཡས་སྐྱབས་སྦྱིན་གྱི་ཕྱག་རྒྱ་བྱས་ཏེ། འདིར་ནི་
ངས་ཁྱོད་ལུང་བསྟན་ཡིན། །རྡོ་རྗེ་སེམས་དཔའ་དེ་བཞིན་གཤེགས། །སྲིད་པ་ཤིན་ཏུ་དག་པས་ན། །སྲིད་དང་ངན་འགྲོ་རྣམས་ལས་བཏོན། ཤྲཱི་ཆེ་གེ་མོ་ནཱ་མ་སརྦ་ཏ་ཐཱ་ག་ཏ་སིདྡྷི་ས་མ་ཡ་སྟྭཾ་བྷུརྦྷུ་ཝ་སྭ། ཞེས་དང་། དབང་བསྐུར་སྐབས། ཁྱོད་ཀྱི་གཟུགས་ཀྱི་ཕུང་པོ་དང་གཏི་མུག་རྣམ་པར་དག་པ་ནི་གཽ་རཱི་མའོ། །ཚོར་བའི་ཕུང་པོ་དང་སེར་སྣ་རྣམ་པར་དག་པའི་ཙཽ་རཱི་མའོ། །འདུ་ཤེས་ཀྱི་ཕུང་པོ་དང་འདོད་ཆགས་རྣམ་པར་དག་པ་ནི་བཻ་ཏཱ་ལིའོ། །འདུ་བྱེད་ཀྱི་ཕུང་པོ་དང་ཕྲག་དོག་རྣམ་པར་དག་པ་ནི་གྷསྨ་རཱིའོ། །རྣམ་པར་ཤེས་པའི་ཕུང་པོ་དང་ཉོན་མོངས་པ་ཞེ་སྡང་རྣམ་པར་དག་པ་ནི་བདག་མེད་མའོ། །འབྱུང་བས་རྣམ་པར་དག་པ་ནི་པུཀྐ་སཱིའོ། །ཆུ་རྣམ་པར་དག་པ་ནི་ཤ་བ་རཱིའོ། །མེ་རྣམ་པར་དག་པ་ནི་ཙཎྜ་ལཱིའོ། །རླུང་རྣམ་པར་དག་པ་ནི་ཌོམྦི་ནཱིའོ། །མིག་གི་དབང་པོ་དང་མིག་གི་རྣམ་ཤེས་རྣམ་པར་དག་པ་ནི་གཏི་མུག་རྡོ་རྗེའོ། །རྣ་བའི་དབང་པོ་དང་
རྣ་བའི་རྣམ་ཤེས་རྣམ་པར་དག་པ་ནི་ཞེ་སྡང་རྡོ་རྗེའོ། །སྣའི་དབང་པོ་དང་སྣའི་རྣམ་ཤེས་རྣམ་པར་དག་པ་ནི་སེར་སྣ་རྡོ་རྗེའོ། །ལྕེའི་དབང་པོ་དང་ལྕེའི་རྣམ་ཤེས་རྣམ་པར་དག་པ་ནི་འདོད་ཆགས་རྡོ་རྗེའོ། །ལུས་ཀྱི་དབང་པོ་དང་ལུས་ཀྱི་རྣམ་ཤེས་རྣམ་པར་དག་པ་ནི་ཕྲག་དོག་རྡོ་རྗེའོ། །ཡིད་ཀྱི་དབང་པོ་དང་ཡིད་ཀྱི་རྣམ་ཤེས་རྣམ་པར་དག་པ་ནི་རེག་བྱ་རྡོ་རྗེ་མ་སྟེ། ཁྱོད་རང་གི་ཕུང་ཁམས་སྐྱེ་མཆེད་ཐམས་ཅད་ལྷ་དང་ལྷ་མོར་བསྟན་པ་ཡིན་ནོ། །དེ་ལྟར་ལུང་བསྟན་པས་སྔོན་མ་ཤེས་པའི་རང་ངོ་ལྷར་ཤེས་པའི་དགའ་བ་སྐྱེས་པ་ལ་གཟེངས་བསྟོད་པ་ནི། བདེ་ཆེན་ཐེག་པ་འདི་ལ་ནི། །ཕྱིན་ཆད་འཆི་བ་ཡོད་མ་ཡིན། །སྲིད་པ་ཤིན་ཏུ་དག་པས་ན། །སྲིད་པའི་སྡུག་བསྔལ་འདས་པའོ། །དབང་བསྐུར་སྐབས། ཁྱེད་ཅག་ཐོག་མ་མེད་པ་ནས་ཁམས་གསུམ་འཁོར་བར་འཁོར། ངལ་བ་དོན་མེད་པ་འབའ་ཞིག་ཏུ་སོང་། ད་ནི་བཅོམ་ལྡན་འདས་དགྱེས་པ་རྡོ་རྗེའི་དཀྱིལ་འཁོར་དུ་ཞུགས་ཤིང་དབང་བསྐུར།
དམ་ཚིག་དང་སྡོམ་པ་ཐོབ་པས། མི་མཐུན་པའི་ཕྱོགས་ཐམས་ཅད་ལས་འཇིགས་པ་མེད་པར་བྱོས་ལ། ཐབས་བསྐྱེད་རྫོགས་གཉིས་བསྒོམས་པས་ངེས་པར་འཚང་རྒྱའོ། །ཞེས་པས་དབུགས་དབྱུང་། དེ་ནས་རྡོ་རྗེ་སློབ་དཔོན་དུ་དབང་བསྐུར་བ་ནི། རྡོར་དྲིལ་གཏད་ལ་འཁྱུད་པའི་ཚུལ་བྱེད་དུ་གཞུག་ཅིང་། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བ། །སློབ་དཔོན་དབང་དུ་རབ་ཏུ་བརྗོད། །ཅེས་དང་། རྡོ་རྗེ་ཆེ་དང་དྲིལ་ཆེན་ལོང་། །རྡོ་རྗེ་ལ་ནི་རྡོ་རྗེ་གནས། །དེ་རིང་རྡོ་རྗེ་སློབ་དཔོན་འགྱུར། །སློབ་མ་བསྡུ་བ་ཉིད་དུ་གྱིས། །སེམས་ཅན་ཐམས་ཅད་ལ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་བཤད་ཅིང་སློབ་མ་བསྡུ་བར་བྱའོ། །སྙམ་དུ་རྡོ་རྗེ་གསོར་ཞིང་། དྲིལ་བུ་དཀྲོལ། རྡོ་རྗེ་སེམས་དཔའི་བརྟུལ་ཞུགས་སྦྱིན་པ་ནི། འདི་དེ་སངས་རྒྱས་ཐམས་ཅད་ཀྱིས། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་བཅང་། །ཕྱག་ན་རྡོ་རྗེའི་བརྟུལ་ཞུགས་
བརྟན། ༀ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛ་ཨེ་ཥ་ཏྭཱཾ་དྷཱ་ར་ཡ་མི་བཛྲ་ས་ཏྭ་ཧི་ཧི་ཧི་ཧི་ཧཱུྃ། སློབ་མའི་ལག་པ་གཡས་པར་རྡོ་རྗེ་གཏད་ལ་ལན་གསུམ་གསོར་ཏེ་མཐར་སྙིང་གར་གཟུང་དུ་གཞུག་ཅིང་། ཁྱོད་ཀྱིས་འཇིག་རྟེན་པའི་སྤྱོད་པ་ཐམས་ཅད་བརྟུལ་ནས་སྔགས་ཀྱི་སྤྱོད་པ་ལ་ཞུགས་པར་བྱའོ་སྙམ་དུ་སེམས་བསྐྱེད་པར་བྱོས་ཤིག །ཅེས་བརྗོད་དོ། །དེ་ལྟར་དབང་བསྐུར་བས། །ལུས་ཀྱི་སྒྲིབ་པ་དག །ལམ་བསྐྱེད་པའི་རིམ་ལ་བསྒོམ་པ་དང་། རྒྱུད་ཉན་ཞིང་འཆད་པ་ལ་སོགས་པས་རང་གཞན་གྱི་དོན་བྱེད་པ་ལ་དབང་ངོ་། །བུམ་དབང་རྫོགས་པར་ཐོབ་པའི་གཏང་རག་གི་མཎྜལ་དབུལ་ལོ། །གཉིས་པ་ལུས་ཀྱི་དཀྱིལ་འཁོར་དུ་གསང་དབང་བསྐུར་བ་ནི། །གསོལ་གདབ་ལུས་ཀྱི་དཀྱིལ་འཁོར་སྒྲུབ། ཡེ་ཤེས་དབབ་ཅིང་མེ་ཏོག་དོར། །མིང་དང་སྙོམས་འཇུག་དབང་བསྐུར་དང་། རྗེས་གནང་ཡན་ལག་བཅས་པའོ། །ཞེས་པའི་རིམ་པ་བཞིན་དུ་ངེས་པར་བྱ་སྟེ། ནམ་ཕྱེད་ཀྱི་དུས་དཀྱིལ་འཁོར་གྱི་ལྷོ་ཕྱོགས་སུ། བདུད་རྩི་ལྔའི་མཎྜལ་གྱི་དབུས་སུ། སློབ་དཔོན་སྟན་བཟང་པོའི་སྟེང་དུ་གནས་པ་ལ། སློབ་མས་མཎྜལ་སྔོན་དུ་འགྲོ་བས་ཡིད་ལས་བྱུང་བའི་རིག་མ་གུས་པས་
ཕུལ་ཏེ། ཁྱོད་ནི་ཧེ་རུ་ཀ་དཔལ་ཏེ། བདེ་གཤེགས་རྣམས་ཀྱི་བདེ་སྩོལ་མཛད། །བྱང་ཆུབ་སེམས་དཔའ་ཆེ་རྣམས་ཀྱི། །ཡང་དག་དོན་མཆོག་རྣམ་དག་པ། །ཇི་ལྟར་དེ་ཉིད་བདུད་རྩི་ཡི། །མཆོག་གི་དབང་ནི་བསྐུར་བ་བཞིན། །དེ་བཞིན་བདག་ལ་འཁོར་བ་ཡི། །སྡུག་བསྔལ་དག་ནི་བསལ་བར་མཛོད། །རྣལ་འབྱོར་བདུད་རྩི་དྲི་མེད་མཆོག །མ་རིག་ཉེས་པའི་རབ་རིབ་འཇོམས། །གང་གིས་བླ་མེད་བྱང་ཆུབ་པ། །དེ་འདིར་བདག་གིས་ཐོབ་པར་མཛོད། །ཅེས་གསོལ་བ་ལན་གསུམ་གདབ་བོ། །བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ནས། འཇིགས་པར་མཛད་པ། ཡིད་ལས་བྱུང་བའི་རིག་མ་བདག་མེད་མ་སྐུ་མདོག་ནག་མོ་ཞལ་གཅིག་ཕྱག་གཉིས་སྤྱན་གསུམ་མངའ་བ། །མཆེ་བ་གཙིགས་པ། དབུ་སྐྲ་སེར་པོ་གྱེན་ཏུ་བརྫིས་པ། ཕྱག་གཡས་གྲི་གུག །གཡོན་ཐོད་པ་བསྣམས་པས་ཡབ་ལ་འཁྱུད་
པ། གཅེར་བུ་ཕྱག་རྒྱ་ལྔ་དང་ལྡན་ཞིང་། ཐོད་པ་སྐམ་པོ་ལྔའི་དབུ་རྒྱན་དང་། སྐམ་པོ་ལྔ་བཅུའི་ཕྲེང་བས་བརྒྱན་པ། གཡོན་གྱི་གྲུ་མོར་ཁ་ཊྭཱཾ་ག་དང་ལྡན་པ། སྟག་གི་པགས་པས་སྨད་དཀྲིས་པ། །ཞབས་གཡོན་བརྐྱང་བའི་སྐྱིལ་ཀྲུང་ཕྱེད་པས་པདྨ་དང་རོའི་སྙིང་གར་ཉི་མའི་གདན་ལ་བཞུགས་པ། གཙོ་བོའི་ཐུགས་ཀའི་འོད་ཟེར་གྱིས་བསྒོམས་པ་དང་འདྲ་བའི་ཡེ་ཤེས་ཀྱི་ལྷ་མོ་སྤྱན་དྲངས། གཽ་རཱི་ཛཿསོགས། དམ་ཚིག་པ་དང་གཉིས་མེད་དུ་གྱུར། ཐུགས་ཀའི་འོད་ཟེར་གྱིས་སྤྱན་དྲངས་པའི་བདུད་རྩིའི་བུམ་པ་ཐོགས་པའི་ལྷ་མོ་རྣམས་ཀྱིས་དབང་བསྐུར་བས། རིགས་ཀྱི་བདག་པོ་མི་བསྐྱོད་པས་དབུ་བརྒྱན། ཉེར་སྤྱོད་ལྔས་མཆོད་ཅིང་། །དེ་ནས་རང་གི་སྙིང་ག་ལ་སོགས་པར་དྲིའི་ཆུས་ཐིག་ལེ་བྱ་ཞིང་། བླ་མ་དཀྱིལ་འཁོར་གྱི་གཙོ་བོ་དང་རིག་མ་བདག་མེད་མར་གསལ་བའི་སྙིང་གར་མི་བསྐྱོད་པ་སྔོན་པོ་རྡོ་རྗེ་དང་དྲིལ་བུ་འཛིན་པ། ལྟེ་བར་དོན་གྲུབ་ལྗང་གུ་རལ་གྲི་དང་དེས་ཡུ་བ་བྱས་པའི་དྲིལ་
བུ་འཛིན་པ། གསང་བར་རྡོ་རྗེ་འཆང་ཆེན་པོ་དཀར་པོ་རྡོ་རྗེ་དང་དྲིལ་བུ་འཛིན་པ། ལྐོག་མར་སྣང་བ་མཐའ་ཡས་དམར་པོ་པདྨ་དང་དེས་ཡུ་བ་བྱས་པའི་དྲིལ་བུ་འཛིན་པ། དཔྲལ་བར་རིན་འབྱུང་སེར་པོ་རིན་པོ་ཆེ་དང་དེས་ཡུ་བ་བྱས་པའི་དྲིལ་བུ་འཛིན་པ། སྤྱི་གཙུག་ཏུ་རྣམ་སྣང་དཀར་པོ་འཁོར་ལོ་དང་དེས་ཡུ་བ་བྱས་པའི་དྲིལ་བུ་འཛིན་པ། ཐམས་ཅད་ཀྱང་ཞབས་རྡོ་རྗེ་སྐྱིལ་མོ་ཀྲུང་གིས་པད་ཉིའི་གདན་ལ་བཞུགས་པ། །རྒྱན་ཐམས་ཅད་ཀྱིས་བརྒྱན་པར་གྱུར། སླར་ཡང་ཉེར་སྤྱོད་ཀྱིས་མཆོད། །གཡོན་པའི་མཐེབ་སྲིན་གྱིས་ནང་མཆོད་ཀྱི་བདུད་རྩི་གནས་དེ་རྣམས་སུ་འཐོར་ཞིང་། ༀ་ཨཱཿཧཱུྃ་ཕཊ་སྭཱ་ཧཱ། ཞེས་ལན་དྲུག་བརྗོད་པས། ལྷ་ཐམས་ཅད་མཉེས་པར་བསམ་ལ་དཀྱིལ་འཁོར་བསྒྲུབ་བོ། །ལུས་དཀྱིལ་སྔོན་མ་མཐོང་བའི་བརྡར་འབྲུ་གསུམ་གྱིས་གདོང་གཡོགས་བཅིང་། སློབ་དཔོན་ལ་གཡོན་དུ་བསྐོར་བ་ལན་གསུམ་བྱས་ནས་ཁ་ཤར་དུ་བལྟས་ཏེ། རྐང་པ་གཉིས་གཤིབས་ལ་འགྲེང་། ཨཱཿཁཾ་བཱི་ར་ཧཱུྃ། གིས་མེ་ཏོག་ཐལ་སྦྱར་བར་དུ་བཟུང་། སློབ་མ་སྐད་ཅིག་གིས་བདག་མེད་མ་
ནས། བཞུགས་པའི་ལྟེ་བར་ཆོས་འབྱུང་དམར་པོའི་དབུས་སུ་རང་འདྲ་བའི་བདག་མེད་མ། སླར་ཡང་དེའི་ལྟེ་བར་ཆོས་འབྱུང་དམར་པོའི་དབུས་སུ་བདག་མེད་མ། དེའི་ལྟེ་བར་ཆོས་འབྱུང་དམར་པོ་བར་མེད་དུ་འཁོར་བས་ལུས་ཐམས་ཅད་ཟག་མེད་ཀྱི་བདེ་བ་ཆེན་པོས་ཁྱབ་པར་གྱུར། ཞེས་དམིགས་ལ། ༀ་ཨཾ་སྭཱ་ཧཱ་ཨ་ཨཱ། ཞེས་བདུག་པ་རོལ་མོ་དང་བཅས་ཡེ་ཤེས་པ་དབབ། པྲ་ཏཱིཙྪ་བཛྲ་ཧོཿ ཞེས་ལུས་དཀྱིལ་དུ་མེ་ཏོག་དོར་ལ་རིགས་ངེས་པར་བྱ། སེམས་ཅན་སྟོབས་ཅན་ཁྱོད་ཀྱིས་ནི། །འདི་ནས་ཡང་དག་བཟུང་བར་གྱིས།་མེ་ཏོག་སླར་བཟུང་། འབྲུ་གསུམ་གྱིས་གདོང་གཡོགས་བསལ། རྨོངས་ཕྱིར་འཁོར་བའི་གཟུགས་ཅན་ཉིད། །རྨོངས་མེད་འཁོར་བ་དག་པས་ནི། །འཁོར་བ་མྱ་ངན་འདས་པར་འགྱུར། །ཞེས་གསུངས་པའི་ཚུལ་གྱིས་སློབ་དཔོན་གྱི་སྙིང་གར་མི་བསྐྱོད་པ། ལྟེ་བར་དོན་གྲུབ། གསང་བ་རྡོ་རྗེ་འཆང་། ལྐོག་མར་སྣང་བ་མཐའ་ཡས། དཔྲལ་བར་རིན་འབྱུང་། སྤྱི་གཙུག་ཏུ་རྣམ་སྣང་རྣམས་མངོན་
སུམ་དུ་མཐོང་བར་མོས། མེ་ཏོག་ཕོག་པའི་གོ་རིམ་ལྟར་མིང་གདགས་ཚུལ་ཡིག་རྙིང་ལས་ཤེས། ཡིད་ལས་བྱུང་བའི་རིགས་མ་བདག་མེད་མ་དང་དཀྱིལ་འཁོར་གྱི་གཙོ་བོ་ཐབས་ཤེས་གཉིས་སུ་མེད་པར་སྙོམས་པར་ཞུགས་པའི་སྦྱོར་མཚམས་ནས་དགའ་བ་སྒྱུ་མ་ལྟ་བུ་སིད་དང་ཕཊ་ཀྱི་སྒྲ་དང་བཅས་པའི་འོད་ཟེར་འཕྲོས་པས། སངས་རྒྱས་ཐམས་ཅད་བསྐུལ། ཚུར་འདུས་ཏེ་ཞལ་དུ་ཞུགས། ཐུགས་ཀར་ཞུ། རྩ་དབུ་མ་ནས་སོང་། རྡོ་རྗེའི་ལམ་ནས་བྱང་ཆུབ་ཀྱི་སེམས་སངས་རྒྱས་ཐམས་ཅད་ཞུ་བའི་ངོ་བོ་གྱུར། ༀ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་ང་རྒྱལ་བཟུང་། འོ་མ་དང་བདུད་རྩི་ལྔ་སྦྱར་བ་ཉ་ཕྱིས་ལ་སོགས་པའི་སྣོད་དུ་བླུགས་པ། སློབ་དཔོན་གྱི་མཐེབ་སྲིན་གྱིས་བླངས་ཏེ། ཇི་ལྟར་འདས་པའི་སངས་རྒྱས་ཀྱིས། །བྱང་ཆུབ་སྲས་པོར་དབང་བསྐུར་ལྟར། །དེ་བཞིན་གསང་བའི་སེམས་རྒྱུན་གྱིས། །དོ་ནུབ་ཁྱོད་ལ་དབང་བསྐུར་རོ། །ཞེས་བརྗོད་ཅིང་ལྕེ་ཐོག་ཏུ་བྱིན་པས། ལུས་ཐམས་
ཅད་ཟག་མེད་ཀྱི་བདེ་བས་ཁྱབ་པར་གྱུར། ཞེས་མོས། དམ་ཚིག་འབོགས་པ་ནི། ཁྲག་ཆེན་པོ་ནི་ག་བུར་བཅས། །ཙནྡན་དམར་དང་ཡང་དག་སྦྱར། །དེ་བཞིན་རྡོ་རྗེ་ཆུ་དང་བཅས། །ལྔ་པ་སེམས་ལས་བྱུང་བར་བཤད། །སངས་རྒྱས་ཀུན་དང་མཐུན་པར་གསུངས། །དམ་ཚིག་འདི་ནི་བླ་ན་མེད། །བཟང་པོ་ཁྱོད་ཀྱིས་བསྐྱང་བར་བྱ། །དེ་ལྟར་གསང་བའི་དབང་བསྐུར་བས་ངག་གི་དྲི་མ་དག །ཤ་ལྔ་དང་བདུད་རྩི་ལྔ་བརྟེན་པ་དང་། །རྩ་རླུང་བྱང་ཆུབ་སེམས་ཀྱི་རྫོགས་རིམ་བསྒོམ་པ་ལ་དབང་བ་ཡིན་ནོ། །གསང་དབང་ཐོབ་པའི་གཏོང་རག་ཏུ་མཎྜལ་འབུལ། གསུམ་པ་བྷ་གའི་དཀྱིལ་འཁོར་དུ་ཤེས་རབ་ཡེ་ཤེས་ཀྱི་དབང་བསྐུར་བ་ནི། མཎྜལ་མཆོད་དང་གསོལ་བ་གདབ། །འཁོར་ལོ་བསྒྲུབ་ཅིང་ཡེ་ཤེས་དབབ། །མེ་ཏོག་དབུལ་དང་ལྷ་ངོ་བསྟན། །ཕྱག་རྒྱ་གཏད་ཅིང་དབང་དོན་བསྟན། །ཞེས་པ་སྟེ། ཐོ་རངས་དཀྱིལ་འཁོར་གྱི་ནུབ་ཕྱོགས་སུ། །བདུད་རྩི་བྱང་ཆུབ་སེམས་ཀྱིས་བྱུག་པའི་མཎྜལ་གྱི་སྟེང་དུ། ཚོན་དཀར་པོས་ཆོས་འབྱུང་གྲུ་གསུམ་པའི་ལོགས་དཀྱིལ་འཁོར་ལ་བསྟན་པ་བྲིས་པའི་དབུས་དང་། །ཕྱོགས་བཞི། སླར་ཡང་ཕྱོགས་
མཚམས་བརྒྱད། །ཕྱིའི་ཤར་ནུབ་ཏུ་དྲིའི་ཐིག་ལེ་བྱ་ཞིང་། མེ་ཏོག་གི་ཚོམ་བུ་བཀོད། ལྷ་གྲངས་དང་མཉམ་པའི་ཉེར་སྤྱོད་ལྔས་བསྐོར། །ཞིམ་པའི་བཟའ་བ་བཏུང་བ་དང་། བ་ལ་ཚེ་མཆོག་མ་དཱ་ན། ཞེས་སོགས་བཤད་པ་ལྟར་ཚོགས་ཀྱི་ཡོ་བྱད་ཀྱང་བཤམ། བླ་མ་ལ་མཆོད་པའི་མཎྜལ་ཕུལ་ནས། བཅོམ་ལྡན་ཞི་བ་ཆེན་པོ་ཀྱེ། །རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་སྒྲུབ་པ་པོ། །རྡོ་རྗེ་རྣལ་འབྱོར་ལས་བྱུང་བ། །ཇི་ལྟར་ཁྱོད་ནི་བདག་ཉིད་ཆེ། །མངའ་བདག་བདག་ལའང་དེང་སྩོལ་ཅིག །འཁོར་བ་འདམ་གྱི་ཚོགས་དག་ཏུ། །བྱིང་བ་སྐྱབས་མེད་བདག་ལ་སྐྱོབས། །གསོལ་གདབ་ལན་གསུམ། མཎྜལ་བསངས་སྦྱང་། སྟོང་པའི་ངང་ལས། ཆོས་འབྱུང་གི་ནང་དུ་པདྨ་འདབ་མ་བཞི་པ་དང་བརྒྱད་པ་རིམ་པ་གཉིས་ཀྱི་ལྟེ་བ་དང་འདབ་མ་རྣམས་ལ་རོ་དང་ཉི་མའི་གདན་ལ་ལྷ་མོ་བཅོ་ལྔར་སྐད་ཅིག་གིས་གསལ་བ་ནི། །དབུས་སུ་བདག་མེད་མ། ཕྱོགས་བཞིའི་ཤར་དུ་རྡོ་རྗེ་མ། ལྷོར་གསང་བའི་གཽ་རཱི། ནུབ་ཏུ་ཆུའི་རྣལ་འབྱོར་མ། །བྱང་དུ་རྡོ་རྗེ་མཁའ་
འགྲོ་མ། ཕྱི་སྐོར་གྱི་ཤར་དུ་དཀར་མོ། །ལྷོར་ཆོམ་རྐུན་མ། ནུབ་ཏུ་རོ་ལངས་མ། །བྱང་དུ་གྷསྨ་རཱི། བྱང་ཤར་དུ་པུཀྐ་སཱི། ཤར་ལྷོར་རི་ཁྲོད་མ། ལྷོ་ནུབ་ཏུ་གདོལ་པ་མ། ནུབ་བྱང་དུ་ཌོམྦི་ནཱི། འོག་ཏུ་ས་སྤྱོད་མ། སྟེང་དུ་མཁའ་སྤྱོད་མ་རྣམས་སྐུ་མདོག་ནག་མོ་ནས། ཉི་མའི་གདན་ལ་བཞུགས་པ། གཙོ་མོའི་ཐུགས་ཀའི་འོད་ཟེར་སོགས་དྲངས་བསྟིམ་དབང་བསྐུར་གོང་ལྟར་ལ། བདུད་རྩིའི་བུམ་པ་ཐོགས་པའི་ལྷ་མོ་རྣམས་ཀྱིས་དབང་བསྐུར། །ཆུ་ལྷག་ཡར་འཁྱིལ་བ་ལས། གཙོ་མོ་དང་པུཀྐ་སཱི་དང་དཀར་མོ་ལ་མི་བསྐྱོད་པ། རྡོ་རྗེ་མ་དང་རི་ཁྲོད་མ་དང་ཆོམ་རྐུན་མ་དང་ས་སྤྱོད་མ་ལ་རྣམ་པར་སྣང་མཛད། གསང་བའི་གཽ་རཱི་དང་གདོལ་པ་མོ་དང་རོ་ལངས་མ་ལ་རིན་ཆེན་འབྱུང་ལྡན། ཆུའི་རྣལ་འབྱོར་མ་དང་ཌོམྦི་ནཱི་དང་གྷསྨ་རཱི་དང་མཁའ་སྤྱོད་མ་ལ་འོད་དཔག་མེད། རྡོ་རྗེ་མཁའ་འགྲོ་མ་ལ་དོན་ཡོད་གྲུབ་པས་དབུ་བརྒྱན་པར་གྱུར། ཞེས་རྒྱས་གདབ། བདག་འཇུག་སྐབས་སོགས་ཚིག་གི་སྤྲོས་པ་མི་
ལྕོག་ན། ཉི་མའི་གདན་ལ་དབུས་སུ་བདག་མེད་མ། ཕྱོགས་བཞིར་རྡོ་རྗེ་མ་སོགས་བཞི་དང་། འདབ་མ་བཅུ་ལ་གཽ་རཱི་ལ་སོགས་བཅུ། གཙོ་འཁོར་ཐམས་ཅད་ཀྱང་སྐུ་མདོག་ནག་མོ་སོགས་སྔར་ལྟར་ལ། དབང་བསྐུར་བས་མི་བསྐྱོད་པ་སོགས་རིགས་བདག་སོ་སོས་དབུ་བརྒྱན་པར་གྱུར་ཞེས་པ་ཙམ་གྱིས་རུང་ངོ་། །གང་ལྟར་ཡང་། ཉེར་སྤྱོད་ལྔས་མཆོད། དབྱངས་ཡིག་བཅོ་ལྔ་ལ་འབྲུ་གསུམ་བཏགས་པས་ནང་མཆོད་འབུལ། །འབྲུ་གསུམ་གྱིས་གདོང་གཡོགས་བཅིང་། ཆོས་འབྱུང་གི་དཀྱིལ་འཁོར་ལ་གཡོན་བསྐོར་ལན་གསུམ། ཁ་ལྷོར་ཕྱོགས་པས་འགྲེང་ཞིང་མེ་ཏོག་འཛིན་པ་སོགས་སྔར་ལྟར་ལ། སློབ་མའི་སྙིང་གར་བདག་མེད་མ་སྐུ་མདོག་ནག་མོ་ནས། གདན་ལ་བཞུགས་པ་ཚོན་གང་བར་གསལ། བླ་མ་དང་གཙོ་བོ་ཐ་མི་དད་པའི་ཐུགས་ཀ་ནས་བསྒོམས་པ་དང་འདྲ་བའི་བདག་མེད་མའི་སྐུ་ཕྲ་མོ་དཔག་ཏུ་མེད་པ་བྱུང་སྟེ། །རང་གི་སྙིང་གར་ཞུགས། །ལུས་ཐམས་ཅད་ཤིག་ཤིག་གང་། །ཟག་མེད་ཀྱི་བདེ་བ་ཆེན་པོ་རྒྱུད་ལ་སྐྱེས་པར་གྱུར། །སྔགས་སོགས་གོང་ལྟར་
གྱིས་ཡེ་ཤེས་པ་དབབ་བོ། །དེས་མ་ཕེབ་ན། སློབ་མའི་སྨིན་མཚམས་སུ་དུས་པའི་ཆོས་འབྱུང་དམར་པོའི་དབུས་སུ་གཡུང་དྲུང་རིས་དམར་པོ་འཁོར་བར་བསྒོམས་ལ་བསྐྱར་ནས་དབབ་བོ། །དེ་ནས་དཀྱིལ་འཁོར་དུ་མེ་ཏོག་དོར་ཞིང་སླར་བཟུང་། གདོང་གཡོགས་བསལ་བ་སོགས་སྔར་དང་མཚུངས། རྡོ་རྗེ་སྙེམས་མ་ལ་སོགས་མིང་གདགས། འདི་ལྟར་རྟེན་དང་བརྟེན་པར་བཅས་པ་ནི། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བཙུན་མོའི་བྷ་ག་རྣམས་ལ་བཞུགས་སོ་ཞེས་དང་། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་གསུངས་ཏེ། ཆོས་འབྱུང་དང་དེར་བཞུགས་པའི་ལྷ་ཡང་བདེ་སྟོང་དབྱེར་མེད་ལས་མ་འདས་པའོ། །ཞེས་གོ་བར་བྱས་ལ། སློབ་མ་ཞལ་ཕྱག་རྒྱས་པར་བསྐྱེད་དགོས་ཀྱང་བདག་འཇུག་སྐབས་སོགས་སུ། བཅོམ་ལྡན་འདས་དགྱེས་པ་རྡོ་རྗེ་སྐུ་མདོག་ནག་པོ་ཞལ་བརྒྱད། ཕྱག་བཅུ་དྲུག །ཞབས་བཞི་པ། རྒྱན་ཐམས་ཅད་ཀྱིས་བརྒྱན་པ་ལ། དཀྱིལ་འཁོར་གྱི་
གཙོ་བོས་ཡིད་ལས་བྱུང་བའི་རིག་མ་བདག་མེད་མའི་རྣམ་པ་གཟུགས་དང་ལང་ཚོ་ཕུན་སུམ་ཚོགས་པ་ལོ་བཅུ་དྲུག་ལོན་པའི་ན་ཚོད་ཅན་གཏད་པར་མོས་ཏེ། ལྷ་མོ་དགའ་སྦྱིན་གནས་སྦྱིན་མ། །སྣ་ཚོགས་གཟུགས་ཅན་ཡིད་འོང་མ། །ཁྱེར་ཅིག་ཁྱེར་ཅིག་སེམས་དཔའ་ཆེ། །ཁྱེར་ལ་མཆོད་པ་རྟག་ཏུ་གྱིས། །ལྷ་མོ་དེ་དག་སྙོམས་འཇུག་གི་མཐུས་དགའ་བ་བཞི་རིམ་པར་སྐྱེས་པའི་མཐར་ལྷན་ཅིག་སྐྱེས་དགའི་ཡེ་ཤེས་ཉམས་སུ་མྱོང་བར་མོས། དེ་ནས། ལོངས་སྤྱོད་ཀྱི་ནི་རླབས་གཉིས་ལ། རང་གི་གཡས་དང་ལག་གཞན་གྱི། །མཐེ་བོང་དང་ནི་སྲིན་ལག་གིས། །དེ་ནི་རྣལ་འབྱོར་པ་ཡིས་བཙིར། །དེ་ལས་ཡེ་ཤེས་སྐྱེ་བར་འགྱུར། །ཞེས་གསུངས་པ་ལྟར་རྩ་རྦ་རླབས་བཙིར་ལ། །དཔེའི་ལྷན་སྐྱེས་ངོས་བཟུང་སྟེ། དེ་ཡང་། དེ་ལས་ཅི་ཞིག་སྐྱེས་ཞེས་ན། །གཞོན་ནུའི་དགའ་བ་ཇི་བཞིན་ནམ། །ལྐུགས་པའི་རྨི་ལམ་ཇི་བཞིན་ནོ། །མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་
ཧེ་རུ་ཀ །ཞེས་གསུངས་པ་ཡིན་ནོ། །ཞེས་བརྗོད་དོ། །དེ་ལྟར་ཤེས་རབ་ཡེ་ཤེས་ཀྱི་དབང་བསྐུར་བས་རྟོག་པའི་སྒྲོ་འདོགས་བཅད་ཅིང་། ལྷན་ཅིག་སྐྱེས་པའི་ཡེ་ཤེས་ཤར་བར་བྱས། སེམས་ཀྱི་དྲི་མ་སྦྱོང་ཞིང་ཡེ་ཤེས་དང་ལས་ཀྱི་ཕྱག་རྒྱའི་རྣལ་འབྱོར་བསྒོམ་པ་ལ་དབང་ངོ་། །གཏོང་རག་མཎྜལ་འབུལ། བཞི་པ་དོན་དམ་བྱང་སེམས་ཀྱི་དཀྱིལ་འཁོར་དུ་ཚིག་དབང་བསྐུར་བ་ལ་གཉིས་ཏེ། སློབ་མར་དབང་བསྐུར་བའི་ཚེ་རྔོག་པའི་ཕྱག་ལེན་ཇི་ལྟར་བ་གུར་རིགས་བསྡུས་ཀྱི་དཀྱིལ་ཆོག་ལས་འབྱུང་བ་ཉིད་འདིར་སྦྱར་དགོས་ཤིང་དཀྱུས་འདི་མི་དགོས་སོ། །བདག་འཇུག་ཙམ་གྱི་སྐབས་དེ་ཉིད་མི་ལྕོགས་ན་མདོ་སྦྱར་གྱི་དགོངས་པ་ནི། དཀྱིལ་འཁོར་གྱི་བྱང་ཕྱོགས་སུ་སློབ་མ་གནས་པའི་མོས་པས་མཎྜལ་ཕུལ། ཡང་དག་ཡེ་ཤེས་མཆོག་ཐོབ་སྟེ། །རང་རིག་པ་ཡི་ངོ་བོ་ལ། །བདག་ནི་ཤིན་ཏུ་ངེས་ཤེས་སྐྱེས། །གཉིས་མེད་ཡེ་ཤེས་འདི་ཉིད་ནི། །འགྲོ་བ་གཞན་ལ་ཡོད་མ་ཡིན། །ཆོས་ཀྱི་བདུད་རྩི་འདི་འཐུང་ཕྱིར། །བླ་མ་ཆེ་ལ་གསོལ་བ་འདེབས། །གལ་ཏེ་བཀའ་དྲིན་ཐོབ་གྱུར་ན། །འཇིགས་པ་མེད་
པའི་བཀའ་དྲིན་སྩོལ། །ལན་གསུམ་གསོལ་བ་གདབ་པས། གང་གི་ཚེ་དབང་གསུམ་པའི་ཉམས་སུ་མྱོང་བ་དེ་ཉིད་ཚིག་གིས་ངོ་སྤྲད་པའི་བཀའ་དྲིན་བསྩལ་བར་གྱུར། ཕྱི་ནས་དེ་ཉིད་ཡང་དག་བཤད། །རྣམ་དག་ཡེ་ཤེས་གཟུགས་ཅན་དང་། །འཁོར་བ་རྣམ་པར་རྟོག་པ་ལ། །ཁྱད་པར་ཅུང་ཟད་ཡོད་མ་ཡིན། །མཆོག་དགར་སྒོམ་པ་མེད་ཅིང་སྒོམ་པ་པོའང་མེད། །ལུས་ཀྱང་མེད་ཅིང་གཟུང་བ་མེད་ལ་འཛིན་པ་མེད། །ཤ་དང་ཁྲག་ཀྱང་མེད་ཅིང་བཤང་དང་གཅི་བ་མེད། །སྐྱུགས་བྲོ་རྨོངས་མེད་གཙང་སྦྲ་མཆོད་ཕྱིར་ཐོགས་མེད་དང་། ཆགས་མེད་སྡང་བ་མེད་དང་རྨོངས་མེད་ཕྲག་དོག་མེད། །སེར་སྣ་མེད་དང་ང་རྒྱལ་མེད་ཅིང་མཐོང་བྱ་མེད། །བསྒོམ་དང་སྒོམ་པ་པོ་མེད་བཤེས་དང་དགྲ་མེད་ཅིང་། །རློམས་སེམས་མེད་པའི་ལྷན་ཅིག་སྐྱེས་པ་སྣ་ཚོགས་ཉིད། །ཅེས་དང་། ཡེ་ཤེས་འདི་ནི་ཆེས་ཕྲ་ཞིང་། །རྡོ་རྗེ་ནམ་མཁའི་དབྱིངས་ལྟ་བུ། །རྡུལ་བྲལ་ཐར་སྦྱིན་ཞི་བ་
ཉིད། །ཁྱོད་རང་ཡང་ནི་དེ་ཡི་ཕ། །དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བསྐུར་བས། །ལུས་ངག་ཡིད་གསུམ་ཐ་དད་དུ་འཛིན་པའི་དྲི་མ་སྦྱངས། བདེ་སྟོང་གཉིས་སུ་མེད་པའི་རྫོགས་པའི་རིམ་པ་བསྒོམ་པ་ལ་དབང་ངོ་། །ཞེས་པ་རྣམས་ཀྱིས་གྲུབ་བོ། །དེ་ནས་དམ་ཚིག་ཁས་ལེན། དབང་བཞི་རྫོགས་པར་ཐོབ་པའི་གཏོང་རག་ཏུ་མཎྜལ་ལུས་འབུལ་བ། དགེ་བསྔོ་སོགས་སྤྱི་ལྟར་བྱས་ལ་སློབ་མ་རྣམས་གྱིས་སོ། །གསུམ་པ་རྗེས་ཀྱི་ཆོ་ག་ལ་གསུམ། ཚོགས་ཀྱི་འཁོར་ལོ། གཏོང་རག་མཆོད་བསྟོད། རྗེས་ཀྱི་བྱ་བ་དངོས་སོ། །དང་པོ་ནི་གཞན་དུ་ཤེས་པར་བྱའོ། །གཉིས་པ་ནི། མཆོད་པ་བྱིན་གྱིས་བརླབས་ལ། ཆུ་གསུམ་ཉེར་སྤྱོད་རོལ་མོ་དང་། ལྷ་མོ་བརྒྱད་ཀྱིས་མཆོད་ཅིང་བསྟོད་པ་བཅས་དཀྱུས་སུ་རྒྱས་བསྡུས་སྐབས་དང་སྦྱར་ལ། སྒྲུབ་མཆོད་ཉིན་ཐ་མར་ཚིགས་བཅད་བཅས་རྒྱས་པར་བྱའོ། །གསུམ་པ་ལ། ཐོག་མར་ལྷག་ཆད་སྐོང་བ་ནི། དཀྱིལ་འཁོར་ལ་བསྐོར་བ་ལན་གསུམ་ཡི་གེ་བརྒྱ་པ་ལན་གསུམ་བཟླ། གཙོ་བོ་ནུས་པ་མ་མཆིས་ཤིང་། །མ་ཚང་བ་དང་ལྷག་གྱུར་དང་། །གང་ཡང་འགལ་བར་གྱུར་པ་རྣམས། དེ་ཀུན་བཟོད་པར་མཛད་པར་
རིགས། །གསང་སྔགས་ཉམས་དང་བྱ་བ་ཉམས། །ཆོ་ག་ཉམས་པར་གྱུར་པ་གང་། །དེ་ཡང་ཁྱོད་ཀྱིས་བཟོད་པར་མཛོད། །ཅེས་བཟོད་པར་གསོལ། །སྐྱེ་ཞིང་སྐྱེ་བར་རིགས་མཆོག་ཏུ། །སོགས་ཀྱིས་སྨོན་ལམ་གདབ། རས་བྲིས་ཡིན་ན། ཡེ་ཤེས་པ་རྣམས་རྟེན་འདི་ཉིད་ལ་བརྟན་པར་བཞུགས་སུ་གསོལ། ༀ་སུ་པྲ་ཏིཥྛ་བཛྲཱ་ཡ་སྭཱ་ཧཱ། ཞེས་བརྟན་བཞུགས་བྱ། རྡུལ་ཚོན་གྱི་ནུབ་མཐའ་མ་ལ། ༀ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །བཛྲ་མུཿ ཞེས་པས་ཡེ་ཤེས་པ་གཤེགས། དམ་ཚིག་པ་རང་གི་སྙིང་གར་ཐིམ་པར་གྱུར། །ལས་ཀྱི་ཧེ་རུ་ཀར་གསལ། གནས་གསུམ་སྲུང་། བཀྲ་ཤིས་བརྗོད་པ་ནི་མེ་ཏོག་ཆར་དུ་བསྙིལ་ལ། བཀྲ་ཤིས་གང་ཞིག་ཆོས་ཀྱི་དབྱིངས་ལས་ལེགས་གྲུབ་པ། །དགྱེས་པའི་རྡོ་རྗེ་འཇིགས་བྱེད་རྒྱལ་པོ་འབར་བའི་སྐུ། །ཤེས་རབ་བདག་མེད་པདྨ་ལ་ནི་རྡོ་རྗེས་རོལ། །བདེན་པ་
དེས་ཀྱང་བདེ་ཆེན་ལ་གནས་བཀྲ་ཤིས་ཤོག །བཀྲ་ཤིས་གང་ཞིག་པདྨ་དམར་པོ་གེ་སར་བཅས། །འདབ་བརྒྱད་ལ་གནས་ལྷ་མོས་ཞལ་བརྒྱད་ལ་ཕྱོགས་ཤིང་། །རོལ་ཐབས་སྣ་ཚོགས་ཀྱིས་ནི་གཙོ་བོ་མཉེས་པར་བྱེད། །བདེན་པ༴ རབ་དམར་སྤྱན་གྱིས་དུས་གསུམ་གདུལ་བྱ་ལ་གཟིགས་ཤིང་། །ནང་སྟོང་ལ་སོགས་བཅུ་དྲུག་ཕྱག་གིས་དུག་གསུམ་སེལ། །བསྡུ་དངོས་ཞབས་བཞི་ཡིས་ནི་བདུད་བཞི་འཇོམས་མཛད་པ། །བདེན་པ༴ ལོག་རྟོག་བསལ་ཕྱིར་དབུ་སྐྲ་དམར་སེར་གྱེན་དུ་འབར། །སྒེག་པ་ལ་སོགས་རོ་དགུའི་ཆ་བྱད་རབ་ཏུ་གསལ། །འཁོར་ལོ་ལ་སོགས་ཕྱག་རྒྱ་ལྔ་ཡིས་རབ་ཏུ་བརྒྱན། བདེན་པ༴ མེ་ལོང་ལ་སོགས་ཡེ་ཤེས་བཞི་ལས་གྲུབ་པའི་སྐུ། །གཽ་རཱི་ལ་སོགས་ཕྱོགས་ཀྱི་པདྨ་ལ་གནས་པ། །ཚངས་པ་ལ་སོགས་བདུད་བཞི་ཞབས་ཀྱིས་གནོན་མཛད་པ། བདེན་པ༴ བྱམས་པ་ལ་སོགས་ཚད་མེད་བཞི་ལས་གྲུབ་པའི་སྐུ། །པུཀྐ་སཱི་སོགས་
མཚམས་ཀྱི་པདྨ་ལ་གནས་པ། །གཤིན་རྗེ་ལ་སོགས་བདུད་བཞི་ཞབས་ཀྱིས་གནོན་མཛད་པ། བདེན་པ༴ བཀྲ་ཤིས་གང་ཞིག་དྲན་པ་ཉེ་བར་གཞག་པ་བཞི་རྣམས་དང་། །ཡང་དག་སྤོང་བ་རྫུ་འཕྲུལ་དབང་པོ་སྟོབས་ལ་སོགས། །བྱང་ཆུབ་ཕྱོགས་རྣམས་སུམ་ཅུ་རྩ་བདུན་ཡོངས་རྫོགས་པ། །བདེན་པ༴ བཀྲ་ཤིས་གང་ཞིག་རིན་ཆེན་ཕ་གུས་མཛེས་པའི་གཞལ་ཡལ་ཁང་། །འདོད་པ་ལྔ་ཡི་ལོངས་སྤྱོད་མཆོག་གི་བཀོད་པ་དང་། །མུ་ཏིག་དྲ་བ་རིན་ཆེན་ཉི་ཟླ་གསེར་གྱི་དྲིལ་བུ་དཔྱངས། །བདེན་པ༴ བཀྲ་ཤིས་གང་ཞིག་རྟ་བབ་པདྨ་འཁོར་ལོ་གདུགས་ཀྱིས་ཕུབ། །མཛེས་པའི་རི་དྭགས་བ་དན་བཅུ་དྲུག་ལེགས་བརྐྱང་བ། །རླུང་གིས་བསྐྱོད་པའི་དྲིལ་བུ་དམ་པའི་ཆོས་སྒྲ་སྒྲོགས། །བདེན་པ༴ བཀྲ་ཤིས་གང་ཞིག་དུར་ཁྲོད་བརྒྱད་ཀྱིས་ལེགས་བསྐོར་བ། །ཤཱིཪྵ་ལ་སོགས་བྱང་ཆུབ་ཤིང་བརྒྱད་གནས་པ་ལ། །གླང་ཆེན་གདོང་ཅན་ལ་སོགས་
བརྒྱད་པོ་གནས་པ་ཡི། །བདེན་པ་དེས་ཀྱང་བདེ་ཆེན་ལ་གནས་བཀྲ་ཤིས་ཤོག །ཅེས་ཌོམྦི་ཞབས་ཀྱིས་མཛད་པ་དང་། ཉིན་མོ་བདེ་ལེགས་སོགས་བརྗོད་པར་བྱའོ། །རྡུལ་ཚོན་ཨ་ཀཱ་རོ་བརྗོད་ཅིང་མཐའ་ནས་བསྡུས་ཏེ། བུམ་པར་བླུགས་ནས་རྒྱ་མཚོར་འབབ་པའི་ཆུ་ཀླུང་དུ་དོར་ཞིང་ཆུ་གཙང་མས་གང་བ་ཁྱེར་ལ། དཀྱིལ་འཁོར་གྱི་ཁང་པར་བསང་གཏོར་བྱས་པས་བཀྲ་ཤིས་ཤིང་བྱིན་ཆགས་པར་འགྱུར་རོ། །ནཱ་རོ་མཻ་ཏྲཱི་ཞལ་ལུང་བདུད་རྩིའི་རྒྱུན། །དགྱེས་མཛད་ལོ་ཙཱའི་ཐུགས་ཀྱི་བུམ་པར་བསྐྱིལ། །རྔོ་སྟོན་རྡོ་རྗེ་འཛིན་པའི་ཕྲེང་སོགས་ཀྱིས། །སྐལ་ལྡན་རྣམས་ལ་རྟོགས་གྲོལ་གསོས་སུ་བཀྱེས། །གྲུབ་པའི་སྐྱེ་བོའི་ཕྱག་ཏུ་བརྒྱུད་པ་ལས། །མཁས་འདོད་བློ་གྲོས་ཆུ་ཡིས་མ་བསླད་པས། །དུས་ཀྱི་མཐར་ཡང་བྱིན་རླབས་ཟིལ་དངར་བརྒྱས། །བློ་བཟང་རྣམས་ཀྱི་སྙིང་གི་བཅུད་དུ་གྲུབ། །སོ་སྐྱེའི་བློ་ཡིས་སྐྱོན་གྱུར་གང་མཆིས་བླ་མ་ལྷ་ལ་བཤགས། །བསོད་ནམས་གཟི་བརྗིད་སྣ་ཚོགས་འབར་བས་འགྲོ་བ་མཐའ་ཡས་པའི། །ལྷན་སྐྱེས་སྙིང་གི་མུན་པ་རབ་བསལ་ཐར་པའི་གྲོང་ཁྱེར་དུ། །ཟུང་འཇུག་སྣང་བའི་དགའ་སྟོན་ཆེན་པོར་ལོངས་སྤྱོད་ཡོངས་གྲུབ་ཤོག །ཅེས་པ་འདིའང་དཀྱིལ་འཁོར་གྱི་དབང་ཕྱུག་ཧེ་རུ་ཀའི་ངོ་བོར་བཞུགས་པའི་དཔལ་ལྡན་བླ་མ་དམ་པ་དག་གིས་གསེར་གྱི་མེ་ཏོག་དང་བཅས་
རྗེས་སུ་གནང་བ་ཡང་ནས་ཡང་དུ་བསྩལ་བ་དང་། མཁྱེན་པའི་སྤྱན་རས་ཡངས་ཤིང་བསྟན་འགྲོ་ལ་ཐུགས་གཅིག་ཏུ་གཞོལ་བའི་སྐྱེས་ཆེན་ཁྱད་པར་ཅན་དག་གིས་ཀྱང་ཡང་ཡང་བཀས་བསྐུལ་བ་ལྟར། མར་རྔོག་གི་གསུང་རྣམས་གཞིར་བཞག །རྗེ་རང་བྱུང་བ་དང་སྤྱན་སྔ་ཐམས་ཅད་མཁྱེན་པའི་དགོངས་དོན་སྲོག་ཏུ་བཟུང་སྟེ་རྒྱས་བསྡུས་ཀྱི་བསྣོན་འབྲིད་ཕྲན་བུ་ཙམ་ལས་རང་བཟོའི་ཚིག་གིས་མ་བསླད་པར། ཀུན་མཁྱེན་ཏཱའི་སི་ཏུའི་བཀའ་འབངས་ཀརྨ་ངག་དབང་ཡོན་ཏན་རྒྱ་མཚོས་གདན་ས་ཆེན་པོ་དཔལ་སྤུངས་ཀྱི་ཡང་དབེན་ཏུ་སྦྱར་བ་དགེ་ལེགས་འཕེལ། ཞེས་པ་འདིའང་མདོ་ཁམས་བཀའ་བརྒྱུད་ཀྱི་གདན་ས་ཆེན་པོ་དཔལ་སྤུངས་ཐུབ་བསྟན་ཆོས་འཁོར་གླིང་དུ་པར་དུ་བསྒྲུབས་པའོ། །མངྒ་ལཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།