བསྟན་སྲུང་གཙོ་མོ་དུད་སོལ་མའི་གཏོར་ཆོག་འབྲིང་པོ་ཡོངས་འདུས་ལྗོན་པའིི་སྐྱེད་ཚལ།
བསྟན་སྲུང་གཙོ་མོ་དུད་སོལ་མའི་གཏོར་ཆོག་འབྲིང་པོ་ཡོངས་འདུས་ལྗོན་པའིི་སྐྱེད་ཚལ་ཞེས་བྱ་བ་བཞུགས་སོ། །
ན་མ་ཨུཏྟ་ར་ཤྲཱི་ཧེ་རུ་ཀ་པཱ་དཱ་ཡ། འཕགས་བཞིའི་སྐྱེད་ཡུམ་ཤེས་རབ་ཕ་རོལ་ཕྱིན། །བདུད་འདུལ་ཁྲག་འཐུང་ཆེན་མོའི་སྐུར་བསྟན་པ། །འདོད་ཁམས་དབང་ཕྱུག་དགྱེས་པའི་འཛུམ་ཞལ་གྱིས། །བདག་འཁོར་བྱང་ཆུབ་བར་དུ་སྐྱོང་བར་མཛོད། བིརྦ་ནཱ་རོ་མར་པ་སོགས། །གྲུབ་པས་བསྟེན་ཅིང་མཁས་པས་བསྔགས། །ཐུབ་བསྟན་སྐྱོང་མཛད་ཚོགས་ཀྱི་རྗེ། །ཕྲིན་ལས་སྙིང་པོ་འདི་རྨད་དོ། །ཁྲག་འཐུང་ནག་མོ་ཆེན་མོ་དུད་པའི་སོལ་བ་མའི་གཏོར་ཆོག་འབྲིང་པོར་བྱ་བ་ལ་གསུམ། སྦྱོར་བ། དངོས་གཞི། རྗེས་སོ། །དང་པོ་ནི། འདི་ཉིད་ཆེད་དུ་སྒྲུབ་པའི་གནས་ཕྱི་ནང་གི་རྟེན་དང་རྟེན་གྱི་གཏོར་མ་སོགས་རྒྱུན་དུ་ཡོད་པའི་སར། མཆོད་གཏོར་དང་ཕྱི་མཆོད་གསོ་བྲན་བྱ། འབུལ་གཏོར་
དང་སྨན་རཀ་གི་ཕུད་མཆོད་བཤམ། རྟེན་མེད་ཅིང་ཉི་ཚེ་བའི་གསོལ་མཆོད་ལྟ་བུ་ལ། ལྕགས་སམ་ཐོད་པའི་སྣོད་དུ་མཆོད་གཏོར་གྲུ་གསུམ་བྲ་གཟུགས་མ་གྲོང་ངེ་བ་རྩེ་མོ་གསུམ་པའི་གཡས་གཡོན་མདུན་ལོགས་སུ་ཐོད་གཟུགས་ཀྱི་ནང་སྐུ་གསུང་ཐུགས་སྤྲུལ་གསུམ། དེ་རྒྱབ་མ་མོ་བཞི། དེ་རྒྱབ་གདོང་ཅན་བརྒྱད། དེ་རྒྱབ་སྒོ་མ་བཞི་རྣམས་ལ་ཟུར་གསུམ་རིམ་པར་སུམ་ཆས་ཆུང་དུ་བཏང་བའི་མཐར་ཐེབས་ཀྱུ་གྲངས་མང་གཡས་བསྐོར་དུ་བསྐོར། ཉི་ཟླ་དང་ཞི་རྒྱན་གྱི་རྩེར་མེ་རི་དུང་ཁོག་མས་མཚན་པ། གཏོར་རྩེ་གཡས་གཡོན་དབུས་གསུམ་དུ་མན་ཐིག་རེས་བརྒྱན་པས་ནོར་བུ་སུམ་ཚོམས་སུ་དོད་པ་ལ་ཤ་སྣ་སྙིང་སྣའི་འཕན་དར་གྱིས་བརྒྱན། ཁུར་བ་ཤིང་ཏོག་ཆང་དང་ཁྲག་སྣ་ཁྱད་
པར་བྱ་མོ་ནག་མོ་དང་ར་རོག་པོའི་ཤ་ཁྲག་བླུགས། འབུལ་གཏོར་ཟུར་གསུམ་རྩེ་གསུམ་ཉམས་ཙམ་དོད་ཅིང་ཐེབས་ཀྱུ་བཅུ་དགུས་བསྐོར་བ་མེ་རི་དུང་ཁོག་མས་བརྒྱན་པ་དང་། ཕྱི་མཆོད་གྲང་ཚར། སྨན་རཀ་ཕུད་སྐྱེམས་རྣམས་བཤམ་མོ། །གཉིས་པ་དངོས་གཞི་ལ། བསྐྱེད་བསྟིམ་དམ་བསྒྲག་མཆོད་ཅིང་བསྟོད། །བཟླས་པ་སྟོང་བཤགས་བཅས་ཏེ་བརྒྱད། །ཅེས་པའི་དང་པོ་དམ་ཚིག་པ་བསྐྱེད་པ་ནི། བསྙེན་སྒྲུབ་སྐབས་བདག་བསྐྱེད་ཀྱང་ལྷ་མོར་བསྒོམ་པ་ཡིན་རུང་། གཏོར་ཆོག་ཙམ་ལ་དགྱེས་རྡོར་དང་གདན་བཞི་གང་ཡང་རུང་བའི་བདག་བསྐྱེད་རྒྱས་བསྡུས་གང་རུང་སྔོན་ཏུ་གྲུབ་པར་བྱས་ནས། རང་ཉིད་ཡི་དམ་ལྷར་གསལ་བའི་མདུན་དུ་ལྷ་མོ་དུད་སོལ་མ་རྣམ་སྨིན་གྱི་ལུས་ཅན་དུ་གསལ་བའི་ཐུགས་ཀར་པདྨ་དམར་པོ་འདབ་མ་བརྒྱད་པ་ཁ་བྱེ་བའི་དབུས་སུ་ༀ་དཀར་པོ་འོད་ཟེར་དང་བཅས་པ། དེའི་སྟེང་དུ་རྃ་དམར་པོ། དེ་ལས་མེ་འབར་བའི་གཟུང་འཛིན་རྣམ་སྨིན་གྱི་ལུས་ཐུལ་གྱིས་བསྲེགས་ནས་ཐལ་བའི་ཕུང་པོར་གྱུར། དེའི་སྟེང་དུ་སྲོག་གི་ཨྃ་དཀར་པོ་འོད་ཟེར་དང་བཅས་པའི་སྟེང་དུ་བྃ་དཀར་པོ་ལས་བུམ་པ་དཀར་པོར་གྱུར་
པའི་ཁ་ནས་བདུད་རྩི་དཀར་ལྷུང་ལྷུང་བབ་པ་ཨྃ་ལ་ཐིམ་པས་ཨྃ་ཡིག་འོད་དུ་འབར་བར་གྱུར། ༀ་ཨྃ་མ་ཧཱ་ཀཱ་ལཱི་དེ་བཱི་ཀཱ་ལཱི་བེ་ཀྲཱནྟ་ཀཱ་ལ་རཱ་ཏྲི་ཙནྡ་རཱུ་བི་ནཱཾ་ཧཱུཾ་ཕཊ། ༀ་དེ་ཡོངས་སུ་གྱུར་པ་ལས་དུར་ཁྲོད་བརྒྱད་གཞལ་ཡས་ཁང་ཐོད་མཁར་ཟུར་གསུམ་པ་སུམ་རིམ་དང་བཅས་པ་མེ་རླུང་དམར་ནག་འཚུབས་པའི་དབུས་སུ། ཡེ་ཤེས་ཀྱི་དཔལ་ལྡན་ལྷ་མོ་དུད་པའི་སོལ་བ་མ་ནག་མོ་སྤྲིན་དང་བུང་བ་ལྟར་གནག་པ། ཤིིན་ཏུ་སྦེག་ལ་ཀེང་རུས་ཀྱི་ལུས་ཅན་ཞལ་གཅིག་ཕྱག་བཞི་མ། གཡས་ཀྱི་དང་པོ་ན་རལ་གྲི་མེ་འབར་བ་འཕྱར་ཞིང་གཉིས་པ་ན་ཐོད་རློན་དམར་གྱིས་བཀང་ནས་ཞལ་དུ་གསོལ་བ། གཡོན་གྱི་དང་པོ་ན་ཤཀྟིའི་མཚོན་ཆ་འཛིན་ཅིང་འོག་མ་ན་ཏྲི་ཤཱུ་ལ་རྩེ་གསུམ་པའི་མགུལ་ན་དར་དཔྱངས་འཕུར་བ་བསྣམས་པ། མི་རོ་རེངས་པ་ཁར་བཅུག་ནས་མཆེ་བ་བཞི་གཙིགས་པ། སྤྱན་གསུམ་དམར་པོ་ཟློག་ཅིང་ཁམས་གསུམ་ལ་ལྟ་བ། དབུ་
སྐྲ་ཁམས་སེར་གྱེན་དུ་བརྫེས་ཤིང་ལན་བུ་གཡོན་དུ་འཁྱིལ་བ། དབུ་ལ་སྦྲུལ་དང་ཐོད་ཕྲེང་གིས་བརྒྱན་ཅིང་རྨ་བྱའི་རྒྱལ་མཚན་སྤྱི་གཙུག་ན་ཕྱར་བ། སྙན་ཆ་གཡས་པ་སྦྲུལ་གྱི་མགུལ་ནས་དྲིལ་བུ་གསིལ་ཞིང་གཡོན་པ་སེང་གེ་རལ་དམར་ཅན་འཕྱོ་བ། རྣ་ལྟག་གཉིས་ན་མེ་ཏོག་དང་དར་ནག་གི་ཅོད་པན་འཕུར་བ། ལྷ་མ་ཡིན་ལ་སོགས་པའི་ཐོད་པས་དོ་ཤལ་བྱས་པ། གླང་པོ་ཆེའི་ཀོ་བ་རློན་པས་སྟོད་གཡོགས་ཤིང་། བ་ལང་གི་ཀོ་རློན་ཆན་པས་དྲས་པ་ལ་རེ་ལྡེ་སེར་པོའི་ཤམ་བུ་བཏགས་པས་སྨད་དཀྲིས་པ། རུས་པས་རྒྱན་ཆ་ལྔས་བརྒྱན་ཅིང་ཀླུ་ཆེན་པོ་བརྒྱད་གཤིབས་པའི་སྐ་རགས་ཅན། ཁྲག་ཞག་དང་ཐལ་ཆེན་གྱི་ཐིག་ལེ་ཚོམ་བུར་བཀོད་པ། ཞབས་གཉིས་ལྕགས་སྒྲོག་གིས་མཛེས་པར་བརྒྱན་ཅིང་བོང་བུ་དམར་གའི་སྟེང་ན་བཙན་སྐྱིལ་བརྗིད་པའི་ཚུལ་གྱིས་བགྱིང་ཞིང་རོལ་པ། ཡེ་ཤེས་ཀྱི་མེ་དཔུང་རབ་ཏུ་འབར་བའི་དབུས་ན་གསུང་ནི་དུང་དང་འབྲུག་
གི་སྒྲ་ལྟ་བུར་སྒྲོག་ཅིང་མ་མོ་མཁའ་འགྲོ་ཤ་ཟ་ཐམས་ཅད་དབང་དུ་སྡུད་པའི་སྐུར་གསལ་བར་གྱུར། གཙོ་རྐྱང་བསྐྱེད་པ་ལ་ཡེ་ཤེས་པ་བཅུག་ཟིན་ནས་འཁོར་རྣམས་ཉི་མ་དང་ཟེར་བཞིན་བསྒོམ་པ་རྩ་གཞུང་རྣམས་ཀྱི་དགོངས་པ་ཡིན་ཀྱང། ཕྱིས་ཀྱི་བླ་མ་བརྒྱུད་པའི་ཕྱག་བཞེས་ལྟར་སྐབས་འདིར་མོས་བསྐྱེད་ཙམ་སྤྲོ་ན། ཐོད་མཁར་ནང་གི་གྲུ་གསུམ་དུ་སྐུ་གསུང་ཐུགས་སྤྲུལ་གྱི་མ་མོ་གསུམ། ནག་མོ་གཅེར་བུ་མི་སྙིང་དང་ཐོད་ཁྲག་ཐོགས་ཤིང་བོང་བུ་ལ་ཞོན་པ། ཞིང་གོས་རེ་ལྡེ་རུས་པས་བརྒྱན་པ། ཐོད་མཁར་ཕྱིའི་ཕྱོགས་བཞིར་རིགས་བཞིའི་ལྷ་མོ་དཀར་སེར་དམར་ལྗང་བཞི་གྲི་ཐོད་འཛིན་ཅིང་དུར་ཁྲོད་ཆས་ཅན་བོང་བུ་ལ་ཞོན་པ། དེ་རྒྱབ་ཤར་དུ་སེང་གདོང་མ། ལྷོར་སྟག་གདོང་མ། ནུབ་ཏུ་སྤྱང་གདོང་མ། བྱང་དུ་ཕག་གདོང་མ། བྱང་ཤར་བྱ་རྒོད་གདོང་མ། ཤར་ལྷོར་ཅུང་གའི་གདོང་མ། ལྷོ་ནུབ་ཏུ་དུར་བྱའི་གདོང་མ། ནུབ་བྱང་དུ་བྱ་རོག་གདོང་མ་རྣམས་ཀྱང་གྲི་ཐོད་འཛིན་ཅིང་དུར་ཁྲོད་ཆས་ཅན་དྲིལ་རྟ་
ལ་ཞོན་པ། ཕྱོགས་བཞིར་སྒོ་སྲུང་ཀམ་ཀའི་གདོང་ཅན་མཚོན་ཆ་སྣ་ཚོགས་ཐོགས་ཤིང་དྲིལ་ནག་སྟག་སྤྱང་སྤྲེའུ་ལ་ཞོན་པ། གཞན་ཡང་ཐུགས་སྤྲུལ་ནག་མོ་འབུམ་སྡེ་སོགས་སྤྲུལ་པའིིི་ལས་མཁན་བྱེ་བ་འབུམ་ཕྲག ཡེ་ཤེས་དང་ལས་དང་འཇིག་རྟེན་ལས་གྲུབ་པའི་མ་མོ་མཁའ་འགྲོ་ཤ་ཟ་ཐམས་ཅད་ཀྱིས་བསྐོར་བར་གྱུར། ལྷ་མོའི་ཐུགས་ཀར་འོད་སྒོ་ངའི་དབྱིབས་ལྟ་བུ་སོར་བཞིའི་ཚད་མེ་དམར་ལྟ་བུའི་དབུས་སུ་ཧཱུཾ་མཐིང་ནག་ཟླ་བ་དང་ཉི་མའི་དཀྱིལ་འཁོར་ཅན། དེ་ལས་འོད་འཕྲོས་དགྲ་བགེགས་ཐམས་ཅད་ཚར་བཅད་དྲེགས་བྱེད་ཐམས་ཅད་ཀྱི་སྲོག་གི་སྙིང་པོ་བསྡུས་ཏེ་ཚུར་འདུས་པས་ཧཱུཾ་གི་མཐའ་སྐོར་འོད་ཀྱི་ཐིག་ལེའི་ནང་དུ། ༀ་ཧཱུཾ་ཤྲཱི་ཡ་དེ་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུཾ་བྷྱོ། སྔ གས་ཀྱི་ཕྲེང་བ་འོད་ཟེར་དང་བཅས་པས་བསྐོར་བར་གྱུར། རང་གི་ཐུགས་ཀའི་ཧཱུཾ་ལས་ཧཱུཾ་གཅིག་ཆད་དེ་ལྷ་མོའི་བྷ་གར་ཐིམ། བཛྲ་ལཱ་སྱ་རཱ་ག་ཡ་མི་ཧཱུཾ། འདི་ནི་གསང་བའི་ལྷ་མོ་བྷ་
གར་གཞུག་པ་ཞེས་བྱ་སྟེ་ལྷ་མོ་བདག་སྒོམ་དུ་བྱེད་པའི་ཚེ། རང་གི་ཐུགས་ཀའི་ཧཱུཾ་ལས་ཧཱུཾ་ཆད་དེ་བདག་ཉིད་ཀྱི་གསང་བར་གཞུག་པ་ཡིན་ནོ། གཙོ་འཁོར་ཐམས་ཅད་ཀྱི་གནས་གསུམ་དུ་སྐུ་གསུང་ཐུགས་རྡོ་རྗེ་གསུམ་གྱི་ངོ་བོ་ༀ་ཨཱཿཧཱུཾ། འཁོར་ཐམས་ཅད་ཐུགས་ཀར་བྷྱོ་ཡིག་གིས་མཚན་པ། བདག་མདུན་གྱི་ཐུགས་ཀའི་ས་བོན་ལས་འོད་ཟེར་ལྕགས་ཀྱུ་ལྟ་བུ་འཕྲོས་པས་རང་བཞིན་གྱི་གནས་ནས་དཔལ་ལྷ་མོ་ནག་མོ་འབུམ་སྡེའི་ཚོགས་དང་བཅས་པ་སྐད་ཅིག་གིས་སྤྱན་དྲངས་པར་གྱུར། གཉིས་པ་ཡེ་ཤེས་པ་སྤྱན་དྲངས་ཤིང་བསྟིམས་པ་ནི། གུ་གུལ་སོགས་སྦྱར་སྤོས་འདུག །དབྱངས་རོལ་བཅས། བྷྱོ། རི་རབ་ཆེན་པོའི་བྱང་ཤར་མཚམས། གཡུ་མཚོ་མུ་ལེ་ཐིང་གི་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནང་། །གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་ནག་མོ་འབུམ་སྡེའི་ཚོགས། །གནས་
འདི་ཉིད་དུ་གཤེགས་སུ་གསོལ། །ད་ལྟ་སྙིགས་མའི་དུས་འདི་རུ། །དམ་ཅན་བཞུད་པར་མི་འོས་ཀྱང་། །སྔོན་ཚེ་བྱང་ཆུབ་ཤིང་གི་དྲུང་། །ཐུབ་པ་ཆེན་པོའི་སྤྱན་སྔ་རུ། །ཇི་ལྟར་ཁས་བླངས་དམ་བཅས་ལྟར། །སངས་རྒྱས་བསྟན་པ་བསྲུང་བ་དང་། །འགྲོ་ཀུན་བདེ་ལ་འགོད་པའི་ཕྱིར། །དཔལ་ལྡན་ལྷ་མོ་གཤེགས་སུ་གསོལ། །གསང་སྔགས་སྲུང་མ་དམ་ཚིག་ཅན། །འཁོར་བཅས་གཤེགས་ཤིང་བཞུགས་སུ་གསོལ། །བྷྱོ། གཞན་ཡང་གཤིན་རྗེའི་ཕོ་བྲང་དང་། །ལྷ་ཁང་དུར་ཁྲོད་རི་སུལ་ནས། །ཆོས་སྐྱོང་སྲུང་མ་འཁོར་བཅས་རྣམས། །མཆོད་པ་འབུལ་བ་བཞེས་སླད་དུ། །ད་ལྟ་ཉིད་དུ་བྱོན་ནས་ཀྱང་། །གཉིས་མེད་བརྟན་པར་བཞུགས་སུ་གསོལ། །ཞེས་སྤྱན་དྲངས་པས་ཡེ་ཤེས་པ་འཁོར་བཅས་མདུན་གྱི་ནམ་མཁར་སྤྲིན་གྱི་ཕུང་པོ་འཐིབས་པའམ་བུང་བ་ཚང་ལ་འདུ་བ་བཞིན་དུ་ཐིབ་ཐིབ་བྱོན་པར་བསམ་ལ་དགུག་གཞུག་བཅིངས་མཉེས་ཀྱི་ཕྱག་རྒྱས། ༀ་ཧཱུཾ་ཤྲཱི་ཡ་དེ་ཝཱི་ཀཱ་ལི་ཀཱ་ལི་ཧཱུཾ་བྷྱོ་དྲི་ཤྱ་ཛཿཧཱུཾ་བཾ་ཧོཿ ས་མ་ཡ་སྟཱཾ། ས་མ་ཡ་
ཧོཿ ཞེས་དམ་ཡེ་གཉིས་མེད་ཆུ་ལ་ཆུ་འདྲེས་པ་ལྟར་བཞུགས་པར་བསམ། གསུམ་པ་བཀའ་བསྒོ་དམ་བསྒྲག་ནི། དཔལ་ལྡན་ལྷ་མོ་དུད་པའི་སོལ་བ་མ་ཁྱོད་ཀྱིས་བདག་ལ་སྐུ་དངོས་སུ་སྟོན་ཅིག །གལ་ཏེ་སྐུ་དངོས་སུ་མི་སྟོན་ན། བླ་མ་གོང་མ་རྡོ་རྗེ་འཛིན་པ་རྣམས་ཀྱི་སྤྱན་སྔར་དམ་བཅས་པ་བཞིན་དུ་སངས་རྒྱས་ཀྱི་བསྟན་པ་གཉན་པོ་བསྲུང་བ་དང་། བླ་མ་དམ་པ་རྣམས་ཀྱི་ཕྲིན་ལས་སྒྲུབས་ཤིག །སྔགས་འཆང་སྒྲུབ་པ་པོ་བདག་ཅག་གི་དགྲ་བགེགས་ཐམས་ཅད་མྱུར་དུ་སྒྲོལ་ཅིག །ཚེ་དང་དཔལ་སྐྱེད་ཅིག །གཞན་ཡང་བདག་ཅག་གི་ཡིད་ལ་གང་འདོད་པ་ཐམས་ཅད་ཁྱེད་ཀྱིས་སྒྲུབས་ཤིག །སྔགས་མཐར། ཨེ་ཨཱ་རལླི་ཧྲིཾ་ཛཿ ནང་མཆོད་དམ་གུར་གུམ་གྱི་ཆུ་ལ་སྔགས་བཏབ་པ་འཐོར་ལ། འདི་ནི་ཁྱོད་ཀྱི་དམ་ཚིག་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་སྲུང་ན་དངོས་གྲུབ་ནི། །རྡོ་རྗེ་བདུད་རྩིའི་ཆུ་འདིས་འགྲུབ། ༀ་ཧ་ན་ཧ་ན་བཛྲ་ས་མ་ཡ་ཨ་ཏི་ཀྲ་མ་ནཾ་ཧཱུཾ་ཕཊ། སྤྱི་ལ་དེ་ཙམ་གྱིས་མཐུས།
སྒྲུབ་པ་ཁྱད་པར་བ་དང་ལས་དྲག་པོའི་སྐབས་སུ་གནད་ཀྱི་དམ་བསྒྲག་ཕྲིན་ལས་རྒྱས་པའི་ལྟར་བྱའོ། བཞི་པ་མཆོད་པ་ལ་ཐོག་མར་མཆོད་རྫས་རྣམས། ༀ་སཾ་ཤོ་ངྷ་ནེ་ཧཱུཾ་ཕཊ། ༀ་སྭ་བྷཱ་བ་ཤུདྡྷཿ སོགས་ཀྱིས་བསང་སྦྱང་། ༀ་ཨཱཿཧཱུཾ་ཧ་ཧོཿཧྲཱིཿལན་གསུམ། མཆོད་རྫས་ཀྱི་ཁ་དོག་དྲི་རོ་ངན་པ་བསལ་ནས་ངོ་བོ་ཡེ་ཤེས་ཀྱི་བདུད་རྩི། རྣམ་པ་ཕྱི་ནང་གསང་བའི་མཆོད་རྫས་ནམ་མཁའ་མཛོད་ཀྱི་འཁོར་ལོའི་སྤྲིན་ཆེན་པོར་གྱུར། ཕྱི་མཆོད་ནི། ༀ་ཧཱུཾ་ཤྲཱི་ཡ་དེ་ཝཱི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུཾ་བྷྱོ། ༀ་བཛྲ་ཨརྒྷཾ་པྲ་ཏིཙྪ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ཧཱུཾ་སྭཱ་ཧཱས་མཆོད་ཡོན་དང་། སྙིང་པོའི་མཐར། ༀ་བཛྲ་པྲ་བ་ར་སད་ཀ་ར་པྲ་ཏཱིཙྪ་པཱུ་ཛ་མེ་གྷ་ས་མུ་དྲ་སོགས་བཏགས་པས་ཞབས་བསིལ་འབུལ། ཉེར་སྤྱོད་ལྔའང་སྔགས་ཙམ་གྱིས་འབུལ་ཆོག་ཀྱང་ཚིགས་བཅད་སྤྲོ་ན། ཧཱུྃ། ཨུཏྤལ་པདྨ་དབང་ལྔའི་མེ་ཏོག་དང་། །ཙནྡན་ཨ་གར་གུ་གུལ་ཚིལ་ཆེན་སྤོས། །སྦྱར་དང་ལྷན་སྐྱེས་བདུད་རྩི་ལྔ་ཡི་དྲི། །འབྲུ་སྣ་འབྲས་ཟན་ཤ་ལྔ་དགྲ་བགེགས་ལུས། །ཉི་ཟླ་ནོར་བུ་ཞུན་ཆེན་མར་ནག་
མེ། །རོལ་མོ་སྙན་དབྱངས་ཐོད་རྔ་རྐང་གླིང་སྒྲ། །མ་གཅིག་ལྷ་མོ་འཁོར་དང་བཅས་ལ་འབུལ། སྙིང་པོའི་མཐར། ༀ་བཛྲ་པུཥྤེ་དྷཱུ་པེ་གནྡྷེ་ནཻ་བིདྱ་ཨཱ་ལོ་ཀེ་ཤཔྡ་པཱུ་ཛ་མེ་གྷ་སོགས། ནང་མཆོད་ནི། མཛེས་དགུའི་གཟུགས་དང་སྙན་བརྗིད་སྒྲ་དབྱངས་ཚོགས། །དྲི་ཞིམ་སྤོས་དང་རོ་ལྡན་ཤ་ཁྲག་ཟླས། །རེག་འཇམ་ན་བཟའི་བྱེ་བྲག་དཔག་མེད་རྣམས། །བསྟན་སྲུང་ཆེན་མོ་འཁོར་དང་བཅས་ལ་འབུལ། །རྡོ་རྗེའི་དབང་པོ་མཆོག་ཏུ་ཚིམ་གྱུར་ཅིག །སྙིང་པོའི་མཐར། ༀ་བཛྲ་རཱུ་པ་ཤཔྡ་གནྡྷེ་ར་ས་སྤཪྴེ་པཱུ་ཛ་མེ་གྷ་སོགས། གསང་མཆོད་ནི། ཧཱུཾ། རང་བྱུང་དམ་རྫས་བདུད་རྩི་ལྔ། །རྩ་བ་བརྒྱད་ལ་ཡན་ལག་སྟོང་། །དམར་ཆེན་མཚོ་དང་མཱཾ་སའི་དྲི། །ག་བུར་ཤེལ་གྱི་པོག་སྤོས་འདི། །མཚན་བཟང་ནག་མོ་རེ་མ་ཏི། །མ་ཚོགས་སྟོང་གི་ཚོགས་བཅས་ལ། །དགྱེས་མཆོད་དམ་པ་འབུལ་ལགས་ན། །བཞེས་ནས་དབང་དང་དངོས་གྲུབ་སྩོལ། །སརྦ་པཉྩ་ཨ་མྲྀ་ཏ་མཱཾ་ས་རཀྟ་ལ་ཁཱ་
ཧི། ཁྱད་པར་གཏོར་མ་འབུལ་བ་ནི། བསང་སྦྱང་། གཏོར་མའི་ནང་དུ་ཧ་སེར་པོས་ཁ་དོག་ངན་པ་བཅོམ་ནས་ཁ་དོག་ཕུན་སུམ་ཚོགས་པར་གྱུར། ཧོཿདཀར་པོས་དྲི་ངན་པ་བཅོམ་ནས་དྲི་ཕུན་སུམ་ཚོགས་པར་གྱུར། ཧྲཱིཿསྔོན་པོས་རོ་ངན་པ་བཅོམ་ནས་རོ་ཕུན་སུམ་ཚོགས་པར་གྱུར། ༀ་ཨཱཿཧཱུཾ། གསུམ། ༀ་ཧ་ཧོཿཧྲཱིཿསྭཱ་ཧཱ། གསུམ་པ་བརྗོད་པས་བྱིན་བརླབ། ཐལ་མོ་བརྐྱང་ལ་ཡིད་ཀྱིས་བཏེགས་ལ་ཞལ་དུ་བསྟབ་པའི་ཚུལ་གྱིས། ལྷ་མོ་ཁྱོད་ལ་མཆོད་པ་འབུལ་བ་ནི། །ཕྱི་ནང་གསང་བའི་ཚོགས་ཀྱི་མཆོད་པ་དང་། །དམ་ཉམས་བསྒྲལ་བའི་དོན་སྙིང་མཁལ་མར་བཅས། །ཤ་ཁྲག་དམར་གྱི་གཏོར་མ་འདི་བཞེས་ལ། །རྣལ་འབྱོར་བཅོལ་བའི་ཕྲིན་ལས་འགྲུབ་པར་མཛོད། །ཅེས་དང་། སྙིང་པོའི་མཐར། ས་པཱ་རི་བཱ་ར། མ་ཧཱ་བ་ལིཾ་ཏ་ཁཱ་ཧི། མ་ཧཱ་མཱཾ་ས་ཁཱ་ཧི། མ་ཧཱ་གོ་རོ་ཙ་ན་ཁཱ་ཧི། མ་ཧཱ་ཙིཏྟ༴ མ་ཧཱ་རཀྟ༴ མ་ཧཱ་བ་སུ་ཏ་ཁཱ་ཧི། ༀ་ཨི་དཾ་བ་ལིཾ་གྲིཧྞ་པཱ་ཡ་གྲིཧྞ་པཱ་ཡ་ཧཱུཾ་ཕཊ། ༀ་ཨི་དཾ་བ་ལིཾ་ཁ་ཁ་ཁཱ་ཧི་ཁཱ་ཧི། ལན་གསུམ་
གྱིས་འབུལ་ལོ། །ལྔ་པ་བསྟོད་པ་དངོས་གྲུབ་འབྱུང་རྒྱུད་ནས་གསུངས་པ་ནི། ཧཱུཾ་བྷྱོ། དཔལ་ལྡན་ལྷ་མོ་མི་ཕམ་སྲིད་གསུམ་བདག །རང་དོན་བསྒྲུབ་ཕྱིར་རྣམ་ཐར་གསུམ་གཞོལ་ཡང་། །སྙིང་རྗེའི་དབང་གིས་རྗེས་ལ་ཐོབ་པ་ཡི། །ཤེས་རབ་སྣ་ཚོགས་དག་གིས་འགྲོ་དོན་མཛད། །ལྷ་མོ་སྐུ་མདོག་ནག་མོ་ཆར་སྤྲིན་མདོག །མཚན་མོ་ནག་མོ་ཤིན་ཏུ་གཏུམ་པའི་གཟུགས། །ཤིན་ཏུ་སྦེག་ཅིང་ཀེང་རུས་ལུས་ཅན་མ། །ཞལ་གཅིག་ཕྱག་བཞི་ཞབས་གཉིས་བརྗིད་པའི་སྐུ། །རལ་པ་གྱེན་བརྫེས་ལན་བུ་གཡོན་དུ་འཁྱིལ། །སྐྲ་སེར་སྦྲུལ་དང་ཐོད་པའི་ཕྲེང་ཐོད་བཅིངས། །རྣ་ལྟག་མེ་ཏོག་དར་ནག་ཅོད་པན་ཅན། །ཁྲག་གི་ཆང་གིས་ར་རོ་སྤྱན་གསུམ་དམར། །མི་རོ་རེངས་པ་ཁར་བཅུག་མཆེ་བ་བཞི། །རྣམ་པར་གཙིགས་ནས་ཁྲག་ལ་ཤིན་ཏུ་དགྱེས། །སྙན་གཡས་སྦྲུལ་གྱི་མགུལ་ནས་དྲིལ་གསིལ་ཞིང་། །གདུག་པ་བཏུལ་ནས་ཚངས་པའི་སྒྲ་སྒྲོག་མ། །སྙན་ཆ་གཡོན་པ་སེང་གེ་རལ་པ་
དམར། །དཔའ་མོ་ཁམས་གསུམ་སེང་གེའི་སྒྲ་སྒྲོག་མ། །ཕྱག་བཞི་གཡས་ཀྱི་དང་པོ་རལ་གྲི་ཕྱར། །འོག་མས་བྷནྡྷ་རཀྟ་དམར་སྐྱིལ་བཀང་། །གཡོན་གྱི་དང་པོ་ཤཀྟིའི་མཚོན་ཆ་འཛིན། །འོག་མ་ཏྲི་ཤཱུལ་མགུལ་ནས་དར་ནག་འཕྱངས། །ཤཀྟི་རལ་གྲི་མཚོན་གྱིས་བསད་པ་ཡི། །ལྷ་མ་ཡིན་གྱི་ཐོད་སོགས་དོ་ཤལ་མཛད། །གླང་པོ་ཆེ་ཡི་ཀོ་རློན་སྟོད་གཡོགས་མཛེས། །སྨད་ནི་བ་གླང་ཀོ་རློན་དྲས་པ་ལ། །ཕྱེད་ནི་རེ་ལྡེ་སེར་པོའི་ཤམ་བུ་དཀྲིས། །ཀླུ་ཡི་དབང་པོ་གཤིབས་པའི་སྐེད་བཅིངས་མཛད། །ཞབས་གཉིས་ལྕགས་སྒྲོག་དག་གིས་མཛེས་པར་བརྒྱན། །ཁྲག་ཞག་མེ་ཡི་ཐིག་ལེ་ཚོམ་བུར་བྲིས། །བྷྱོ། བོང་བུ་གྭ་ཞོན་མཚན་མོ་དུར་ཁྲོད་རྒྱུ། །བོང་བུའི་རྨིག་པ་གློག་གི་ཤུགས་ཅན་མ། །ཁམས་གསུམ་སྐད་ཅིག་གཅིག་ལ་བསྐོར་བ་མཛད། །གསུང་ནི་དུང་དག་འབྲུག་གི་སྒྲ་ལྟ་བུས། །མ་མོ་མཁའ་འགྲོ་ཤ་ཟ་དབང་དུ་སྡུད། །ལྷོ་ཕྱོགས་གཤིན་རྗེའི་ཕོ་བྲང་རྟག་
ཏུ་གནས། །དམ་པའི་ས་ནས་གཟུགས་སྐུ་གཉིས་གཟིགས་མ། །ཏིང་འཛིན་དབང་ཐོབ་གཟུགས་ཁམས་གནས་སུ་བྱོན། །ཚངས་པའི་རྒྱལ་པོ་ལ་སོགས་ཕྱག་བྱས་མ། །གཞན་ལ་དབང་སྒྱུར་འདོད་ཁམས་མཐར་ཡང་ཕྱིན། །དབང་ཕྱུག་ཆེན་པོའི་སྐུ་ལ་དགེས་འཁྲིལ་མ། །སུམ་ཅུ་རྩ་གསུམ་ཚལ་བཞིར་བྱོན་པའི་ཚེ། །ལྷ་རྣམས་དབུགས་དབྱུང་བརྒྱ་བྱིན་ཕྱག་བྱས་མ། །ལྷ་མ་ཡིན་རྣམས་ཕམ་པར་མཛད་པའི་ཚེ། །ལྷ་མིན་དབང་པོ་ཀུན་གྱིས་ཕྱག་བྱས་མ། །སྐུ་མཆོག་རི་རབ་ཆེ་དང་འགྲན་པའི་ཚེ། །ལྟེ་བའི་ཐད་ཀྱི་ཕྱོགས་ནས་ཉི་ཟླ་འཆར། །རྒྱལ་ཆེན་བཞི་ལ་སོགས་པས་ཕྱག་བྱས་མ། །རྒྱ་མཚོའི་གཏིང་ནས་མེ་འབར་མཚོ་སྐེམ་ནུས། །ས་འོག་དབང་པོ་ཀུན་གྱིས་ཕྱག་བྱས་མ། །ལྷ་མོ་ཁྱོད་ཀྱི་ཆོ་འཕྲུལ་འདི་བསྟན་པས། །བདུད་དང་གཤིན་རྗེའི་རྒྱལ་པོ་འདར་ཞིང་འདུད། །མ་མོ་སྲིན་མོའི་ཚོགས་རྣམས་འདར་ཞིང་རྔམས། །ཙིཏྟ་རིན་ཆེན་གུར་
ཕུབ་གཞལ་ཡས་ཁང་། །ཉི་ཟླའི་དཀྱིལ་འཁོར་བརྩེགས་པའི་འོད་ཟེར་འབར། །ཕྱོགས་བཅུའི་འཇིག་རྟེན་དུག་གི་བཅུད་བསྡུས་ནས། །ཉི་ཟླའི་དཀྱིལ་འཁོར་དག་ལ་ཐིམ་པར་མཛད། །དུག་གི་རླངས་པས་ནག་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་སློང་མཛད་མ། །དེ་ཕྱིར་ནད་ཀྱི་བདག་མོ་དམ་ལ་འདུས། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ནས། །ཟླ་བའི་དཀྱིལ་འཁོར་དག་ལ་ཐིམ་པར་མཛད། །བདུད་རྩིའི་རླངས་པས་དཀར་པོའི་ཕྱོགས་རྣམས་ཀྱི། །བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོ་དམ་ལ་འདུས། །གང་ཞིག་ཁྱེད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །ལྷ་མོ་ཁྱོད་ལ་བདག་གིས་རྟག་ཏུ་བསྟོད། །རྒྱུན་དུ་དེ་ཙམ་གྱིས་འཐུས་ལ་སྤྲོ་ན་རྒྱུད་ལས་འབྱུང་བ་གཞན་རྣམས་དང་། ཏིལ་མར་མ་སོགས་ཀྱིས་བསྟོད་པར་བྱའོ། །དྲུག་པ་བཟླས་པ་བྱ་བ་ནི། ལྷ་མོའི་ཐུགས་ཀའི་ས་བོན་ཧཱུཾ་ཡིག་གི་མཐར་སྙིང་པོའི་སྔགས་
ཀྱི་ཕྲེང་བས་བསྐོར་བ་ལ་དམིགས་ཏེ་བཟླས་པ་བྱ། གང་བདག་བསྐྱེད་ཐུགས་ཀའི་འོད་ཟེར་ཕོག་པས་ཐུགས་རྒྱུད་བསྐུལ་སྔགས་ཕྲེང་འགལ་མེ་ལྟར་གཡོན་དུ་འཁོར། །ཅི་འདོད་པའི་ལས་རབ་འབྱམས་བསྒྲུབ་པར་མོས་ལ་སྔགས་ཅི་ནུས་སུ་བཟླས་པའི་མཐར། ཐུན་གཏོར་ལ་བདུད་རྩི་བྲན། །མཆེ་བའི་ཕྱག་རྒྱ་བཅས་ལ། བྷྱོ། དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཙིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མ། །ཀཱི་ལིའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚལ་དབུས་ན། །ཚོགས་དང་ཕོ་ཉར་བཅས་པ་རུ། །གཙིགས་བྱེད་གཏུམ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་སུ་གནས་པར་མཛད་དུ་གསོལ། །བདག་གི་སེམས་ལ་ཅི་འདོད་པ། །དེ་ནི་ཁྱོད་ཀྱིས་གྲུབ་པར་མཛོད། །བདག་གི་ལས་ནི་ཅི་བྱེད་ཀྱང་། །དེ་ལ་ཀུན་གྱིས་གྲོགས་མཛོད་ཅིག །ལྷ་མོ་ནག་མོ་མཐུ་མོ་ཆེ། །འཕགས་མ་ཁྱེད་ལ་ཕྱག་འཚལ་བསྟོད། །བསྟན་ལ་གནོད་པའི་གདུག་པ་ཀུན། །མྱུར་དུ་བསྒྲལ་བའི་ཕྲིན་ལས་མཛོད། །
ཉིན་དང་མཚན་དུ་བྱ་ར་མཛོད། །བཅོལ་བའི་ཕྲིན་ལས་གྲུབ་པར་མཛོད། །སྙིང་པོའི་མཐར། གྲྀཧྞ་གྲྀཧྞ་སརྦ་དུཥྚན་བྷཀྵ་བྷཀྵ་ཕྲེཾ་ཕྲུཾ་ཕྲིཾ་ཕཊ་སྭཱ་ཧཱ། ཞེས་སེ་གོལ་གཏོགས་ལ་ཐུན་གཏོར་འབུལ་ལོ། །བདུན་པ་སྐོང་བ་ནི། སྐོང་རྫ་རྣམས་བསང་སྦྱང་། སྟོང་པའི་ངང་ལས་གནས་ཁང་དུར་ཁྲོད་དྲག་པོའི་བཀོད་པ་འཇིགས་སུ་རུང་བའི་དབུས་སུ། ཧཱུཾ་ཡིག་དཔག་ཏུ་མེད་པ་འོད་དུ་ཞུ་བ་ལས་བྱུང་བའི། ཕྱི་ནང་གསང་བའི་རྟེན་རྫས་སྒྲུབ་རྫས་སྐོང་རྫས་མཆོད་རྫས་ཀྱི་བྱེ་བྲག་བསམ་གྱིས་མི་ཁྱབ་པ་འཇིག་རྟེན་གྱི་ཁམས་རྒྱས་པར་གང་ཞིང་རྒྱུན་མི་ཆད་པར་འབྱུང་བ་དང་། སྨན་གཏོར་རཀྟ་དམ་ཡེ་གཉིས་སུ་མེད་པའི་བདུད་རྩིའི་རྒྱ་མཚོ་ཁ་དོག་དྲི་རོ་ནུས་མཐུ་ཕུན་སུམ་ཚོགས་ཤིང་ཟད་མི་ཤེས་པར་གྱུར། ༀ་ཧ་ཧོཿཧྲཱིཿསྭཱ་ཧཱ། ལན་གསུམ། ན་མཿསརྦ་སོགས་ནམ་མཁའ་མཛོད་ཀྱི་སྔགས་རྒྱ་ལན་གསུམ་གྱིས་སྤེལ་ལ། བྷྱོ། དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱི། །བསྟན་པ་སྲུང་བར་མངའ་གསོལ་
བའི། །ཆོས་སྐྱོང་སྲུང་མ་དུད་སོལ་མ། །ཁྱོད་ཀྱི་ཐུགས་དམ་གཉན་པོ་ནི། །རིག་འཛིན་རྣལ་འབྱོར་བདག་གིས་བསྐང་། །དམ་ཅན་སྲུང་མ་འདིར་བྱོན་ཅིག །རྣལ་འབྱོར་དགྲ་ལྷ་འདིར་བྱོན་ཅིག །འབོད་པའི་དམ་རྫས་ཡིན་པའི་ཕྱིར། །གཡབ་དར་ནག་པོས་ཐུགས་དམ་བསྐང་། །སྒྲུབ་པའི་དམ་རྫས་ཡིན་པའི་ཕྱིར། །རྟག་གཏོར་ཆེན་པོས་ཐུགས་དམ་བསྐང་། །མ་དང་མི་འབྲལ་འགྲོགས་པའི་ཕྱིར། །རྒྱུན་གྱི་གཏོར་མས་ཐུགས་དམ་བསྐང་། །དམ་ཚིག་ཉན་པོ་བསྲེ་བའི་ཕྱིར། །བདུད་རྩི་སྨན་གྱིས་ཐུགས་དམ་བསྐང་། །བསྟན་པའི་དམ་རྫས་ཡིན་པའི་ཕྱིར། །དགྲ་བགེགས་ཤ་དང་ནལ་བུའི་ཤ །མཱཾ་སའི་བྱེ་བྲག་དཔག་མེད་ཀྱིས། །བསྐང་ངོ་ཁྱེད་ཀྱི་ཐུགས༴ དགྱེས་པའི་དམ་རྫས་ཡིན་པའི་ཕྱིར། །ར་ནག་ཁྲག་དང་བྱ་ནག་ཁྲག །དགྲ་བགེགས་ཁྲག་ལ་སོགས་པ་ཡི། །རཀྟའི་རྒྱ་མཚོས༴ དགྲ་བགེགས་གསུར་ལ་རྔམས་པའི་ཕྱིར། །ཚིལ་ཆེན་
དུད་པས་ཐུགས༴ ཆུ་དང་ཚལ་སྐྱེས་མེ་ཏོག་དང་། །ཙནྡན་ཨ་ཀ་རུ་སྤོས་དང་། དྲི་བཟང་སྦྱར་བའི་ཡོན་ཆབ་ཀྱིས། །བསྐང་ངོ་ཁྱེད་ཀྱི་ཐུགས་དམ་བསྐང་། །གྲོ་ནས་འབྲས་ཀྱི་བཤོས་གཙང་དང་། །འབྲུ་རྩི་ཞུན་ཆེན་སྣང་གསལ་སོགས། །ཕྱི་ཡི་མཆོད་པ་རྣམ་ལྔ་ཡི། །བསྐང་ངོ་ཁྱེད་ཀྱི་ཐུགས་དམ་བསྐང་། །གཟུགས་སྡུག་སྒྲ་སྙན་དྲི་ཞིམ་པ། །རོ་བཟང་རེག་བྱ་འཇམ་པ་ཡི། །འདོད་པའི་ཡོན་ཏན་རྣམ་ལྔ་ཡི། །བསྐང་ངོ་ཁྱེད་ཀྱི་ཐུགས་དམ་བསྐང་། །མི་རྟ་གླང་སོགས་ཤ་ལྔ་དང་། །བྱང་སེམས་རྒྱུད་པ་རཀྟ་སོགས། །བདུད་རྩི་ལྔ་ལ་སོགས་པ་ཡི། །གསང་བའི་མཆོད་པས་ཐུགས་དམ་བསྐང་། །བཟའ་བའི་དམ་རྫས་ཡིན་པའི་ཕྱིར། །བཤོས་གཙང་དམར་གྱིས་བརྒྱན་པ་དང་། །ཆང་དང་ཁུར་བ་སྒོག་བཙོང་སོགས། །ཚོགས་ཀྱི་མཆོད་པས༴ ཕྱི་ཡི་རྟེན་རྫས་ཡིན་པའི་ཕྱིར། །བོང་བུ་གྭ་དམར་ལུག་ནག་དང་། །དར་ནག་བྷཉྫ་མ་རལ་གྱིས། །བསྐང་ངོ་ཁྱེད་ཀྱི༴
ནང་གི་རྟེན་རྫས་ཡིན་པའི་ཕྱིར། །རྨ་བྱ་ནོར་བུའི་རྒྱལ་མཚན་དང་། །ནལ་བུའི་རྒྱལ་མཚན་བྷཉྫ་ཡིས། །བསྐང་ངོ་ཁྱེད་ཀྱི༴ གསང་བའི་རྟེན་རྫས་ཡིན་པའི་ཕྱིར། །ཨ་མྲྀ་ཏ་དང་མྱོས་བྱེད་བཅུད། །དགྲ་བགེགས་གྲི་སྙིང་ནལ་བུའི་སྙིང་། །ཙིཏྟ་སྙིང་གིས་ཐུགས་དམ༴ སྐུ་ཡི་རྟེན་རྫས་ཡིན་པའི་ཕྱིར། །ལུགས་སྐུ་འདག་སྐུ་བྲིས་སྐུ་དང་། །དར་སྐུ་སྐུ་འབག་ལ་སོགས་ཀྱིས། བསྐང་ངོ་ཁྱེད་ཀྱི༴ གསུང་གི་རྟེན་རྫས་ཡིན་པའི་ཕྱིར། །རྔ་དང་རྫ་རྔ་རྔ་ཆེན་དང་། །འཁར་རྔ་དུང་དང་ཆ་ལང་དང་། །གདུང་བའི་དབྱངས་ཀྱིས་ཐུགས་དམ༴ དམ་ཚིག་གཉན་པོ་བསྐུལ་བའི་ཕྱིར། །དམ་ཚིག་དྲིལ་བུས་ཐུགས༴ ཕྲིན་ལས་གཉན་པོ་བསྐུལ་བའི་ཕྱིར། །ཅང་ཏེའུ་སྒྲ་ཡིས༴ འཇིག་རྟེན་དབང་དུ་སྡུད་པའི་ཕྱིར། །གསང་བའི་རྔེའུ་ཆུང་༴ །ཐུགས་དམ་གནད་ནས་བསྐུལ་བའི་ཕྱིར། །ཕྱག་རྒྱ་སྔགས་དང་ཏིང་འཛིན་དང་། །སྙིང་པོ་འཛབ་ཀྱི་བཟླས་པ་ཡིས། །
བསྐང་ངོ་ཁྱེད་ཀྱི་ཐུགས་དམ་བསྐང་། །བྷྱོ། གཞན་ཡང་ཐུགས་དམ་བསྐང་བ་ནི། །ཤ་ཁྲག་དམར་གྱི་གཏོར་མ་འདིས། །འགུགས་བྱེད་མ་དང་གསོད་བྱེད་མ། །ལས་མཁན་རྣམས་ཀྱི་ཐུགས་དམ་བསྐང་། །ཕྲིན་ལས་རྣམ་བཞི་སྒྲུབ་བྱེད་པའི། །མཁའ་འགྲོ་བཞི་ཡི༴ དགྲ་བགེགས་མ་ལུས་སྒྲོལ་བྱེད་པའི། །གདོང་ཅན་བརྒྱད་ཀྱི་ཐུགས་དམ་བསྐང་། །ཉམས་པའི་ཤ་ཁྲག་ཟ་བྱེད་པའི། །སྒོ་མ་བཞི་ཡི༴ དྲག་པོའི་ལས་ལ་འགྱེད་པའི་ཕྱིར། །ནག་མོ་འབུམ་སྡེའི༴ གཞན་ཡང་སྤྲུལ་པའི་ལས་མཁན་ནི། །དཀར་མོ་སེར་མོ་དམར་མོ་དང་། །ལྗང་ནག་ལ་སོགས་འབུམ་སྡེའི་ཚོགས། །བསྐང་ངོ་ཁྱེད་ཀྱི༴ བདུད་ཀྱི་དམག་དཔུང་བཟློག་པའི་ཕྱི། །ཡང་སྤྲུལ་བྱེ་བའི༴ མཉེས་པའི་རྟེན་དང་མ་ཉམས་ཕུད། །ཚོགས་དང་མཆོད་གཏོར་རྒྱ་ཆེན་འདིས། །འདོད་ཁམས་མ་མོ་ཀུན་གྱི་གཙོ། །འཁོར་བཅས་ཐུགས་དམ་བསྐང་གྱུར་ཅིག །དེ་ལྟར་ལྷ་མོ་འཁོར་བཅས་ཀྱི། །
ཐུགས་དམ་བསྐང་བའི་བྱིན་བརླབས་ཀྱིས། །རིག་འཛིན་རྣལ་འབྱོར་བདག་ཅག་ལ། །མཁའ་འགྲོའི་ཉམས་ཆགས་བྱུང་བས་སྐང་། །འཇིག་རྟེན་མཁའ་འགྲོའི་གནོད་པ་ཟློག །མ་མོའི་དལ་ཡམས་བྱུང་བ་ཟློག །གཤིན་རྗེའི་ཁྲམ་ཁ་བཏབ་པ་ཟློག །བདུད་ཀྱི་ཞགས་པ་ནག་པོ་ཆོད། །བནྡེའི་བྱད་ཁ་སླར་ལ་སྒྱུར། །སྡེ་བརྒྱད་གནོད་པ་ཐམས་ཅད་ཟློག །གཞན་གྱི་རྦད་འདྲེ་ཕུར་ཁ་སྒྱུར། །རྨིས་ལྟས་མཚན་མ་ངན་པ་ཟློག །ལོ་ཀེག་ཟླ་ཀེག་ཐམས་ཅད་སྒྱུར། །སྡང་བའི་དགྲ་དང་གནོད་པའི་བགེགས། །བདུད་དང་བར་དུ་གཅོད་པའི་ཚོགས། །ཐམས་ཅད་ཐལ་བ་རྡུལ་དུ་རློག །བདག་ཅག་རྣལ་འབྱོར་ཐམས་ཅད་ཀྱི། །དམ་ཚིག་ཉམས་པ་སྐོང་གྱུར་ཅིག །མཆོག་དང་ཐུན་མོང་ལ་སོགས་པའི། །དངོས་གྲུབ་མ་ལུས་སྩལ་དུ་གསོལ། །ཚེ་དང་དབང་ཕྱུག་སྤེལ་དུ་གསོལ། །དཔལ་དང་གྲགས་པ་བསྒྲུབ་ཏུ་གསོལ། །འཁོར་དང་བསྟན་པ་བསྲུང་དུ་གསོལ། །
ཉིན་དང་མཚན་དུ་བྱ་ར་མཛོད། །ལེགས་དང་སྤྲོད་ལ་ཉེས་དང་བསྣོལ། །བསམ་པ་སྒྲུབས་ལ་རེ་བ་སྐོངས། །མཐུ་སྟོབས་སྐྱེད་ལ་དཔུང་གཉེན་མཛོད། །ལུས་དང་གྲིབ་མ་བཞིན་དུ་འགྲོགས། །ཉིན་དང་མཚན་དུ་བྱ་ར་མཛོད། །གཞན་ཡང་ཡིད་ལ་ཅི་འདོད་པ། །དེ་ནི་ཁྱོད་ཀྱིས་སྒྲུབ་པར་མཛོད། །ཅེས་རྔོག་ཀུན་དགའ་རྒྱལ་མཚན་གྱི་མཛད་པའོ། །ཚར་གྲངས་ལྟ་བུར་ཉུང་ངུར་མོས་ན། བྷྱོ། །སྔོན་ཚེ་དཔག་བསམ་བྱང་ཆུབ་ཤིང་གི་དྲུང་། །རྒྱལ་བ་ཐུབ་པ་ཆེན་པོའི་སྤྱན་སྔ་རུ། །བསྟན་པ་གཉན་པོ་སྲུང་བར་ཞལ་བཞེས་པའི། །ཁྲག་འཐུང་དུད་སོལ་ལྷ་མོའི་ཐུགས་དམ་བསྐང་། །མཐའ་བྲལ་ཆོས་ཀྱི་དབྱིངས་ལས་མ་གཡོས་ཀྱང་། །སྣ་ཚོགས་རྫུ་འཕྲུལ་མཐའ་ཡས་སྤྲུལ་པའི་སྐུ། །ཡེ་ཤེས་མཁའ་འགྲོའི་གཙོ་མོ་འཁོར་དང་བཅས། །དགྱེས་རྒུའི་མཆོད་སྤྲིན་རྣམས་ཀྱིས་ཐུགས་དམ་བསྐང་། །དཔལ་ལྡན་ལྷ་མོ་རྒྱལ་བ་ཀུན་གྱི་ཡུམ། །ཤེས་རབ་ཕ་རོལ་ཕྱིན་མའི་ངོ་བོ་ཉིད། །མཆོག་དང་
ཐུན་མོང་དངོས་གྲུབ་སྟེར་མཛད་པ། །དམ་ཚིག་རྫས་མཆོག་རྣམས་ཀྱིས༴ ཉེར་སྤྱོད་འདོད་ཡོན་ཤ་ལྔ་བདུད་རྩི་ལྔ། །རྟག་གཏོར་རྟེན་གཏོར་རྒྱུན་ག ཏོར་ཤ་རུས་ཁྲག །བདུད་རྩི་སྨན་དང་རཀྟའི་རྒྱ་མཚོ་ཡིས། །འདོད་ཁམས་དབང་ཕྱུག་འཁོར་བཅས༴ སྐུ་གསུང་ཐུགས་དང་ཡོན་ཏན་ཕྲིན་ལས་དང་། །ཕྱི་ནང་གསང་རྟེན་སྤྱི་དང་ཁྱད་པར་མཆོག །ཕྱག་རྒྱ་སྔགས་བཟླས་ཏིང་འཛིན་བྱེ་བྲག་དང་། །སྦྱོར་སྒྲོལ་ཚོགས་ཀྱི་འཁོར་ལོས༴ ལྷ་མོ་འཁོར་བཅས་ཐུགས་དམ་བསྐངས་བའི་མཐུས། །ཉམས་ཆགས་འགལ་འཁྲུལ་ཅི་མཆིས་བྱང་བ་དང་། །འགལ་རྐྱེན་མི་མཐུན་གནོད་པའི་ཕྱོགས་རྣམས་ཞི། །ཡིད་ལ་འདོད་པའི་དོན་ཀུན་ཐོགས་མེད་འགྲུབ། །བཤད་སྒྲུབ་བསྟན་པ་ཕྱོགས་བཅུར་རྒྱས་པ་དང་། །མཆོག་ཐུན་དངོས་གྲུབ་སྒྲུབ་པའི་གྲོགས་མཛོད་ཅིག །བརྒྱད་པ་བཤགས་པ་ནི། ཧཱུྃ། འགྲོ་བའི་དོན་ཏུ་སྐུ་མཆོག་འཇིགས་པ་ནི། །མ་ལུས་ཁྱབ་པར་གསལ་
བར་མཛད་པ་ཡིས། །ང་རྒྱལ་དྲེགས་པ་ཅན་རྣམས་འཇོམས་མཛད་པ། །ཡོན་ཏན་རྫོགས་པའི་སྐུ་ལ་ཕྱག་འཚལ་ལོ། །འདའ་དཀའ་རྡོ་རྗེའི་དམ་ཚིག་གཏན་གྱི་གཉེར། །བསྲུང་བར་དམ་བཅས་སྐུ་ཡི་དམ་ཚིག་ལ། །སྐུ་ཡི་སྤྱོད་པ་ཚུལ་བཞིན་མ་རྟོགས་ཏེ། །ཁམས་གསུམ་ཁྱབ་པའི་སྐུ་ལ་བཟོད་པར་གསོལ། །རྣལ་འབྱོར་གདུང་སོབ་བདག་ཅག་འདིར་འདུས་རྣམས། །སྤྱི་དང་ཁྱད་པར་དམ་ཚིག་མི་གཏོང་ཡང་། །ཀློང་དུ་གྱུར་པའི་གོམས་ཤས་རྩལ་ཆུང་བ། །མ་གཅིག་ལྷ་མོའི་སྐུ་ལ་བཟོད་པར་གསོལ། །ཐུགས་རྗེས་ངེས་པར་གཟིགས་པའི་ལྷ་མོ་ལ། །དམ་རྫས་གཙང་མའི་མཆོད་པ་མ་བཤམས་ཏེ། །ཕོངས་སེམས་དབང་གིས་མཆོད་པའི་རྒྱུ་ཆུང་བ། །རྫོང་མོ་དཀའ་ཟློག་སྐུ་ལ༴ མ་གཅིག་སྐུ་མདོག་ཕྱག་མཚན་ཆ་ལུགས་ལ། །དོན་དང་མཐུན་པར་ཚུལ་བཞིན་མ་བྲིས་ཏེ། །འཕགས་མའི་ཐུགས་རྗེས་གསལ་བར་གྱུར་པ་རྣམས། །བདུད་ལས་རྒྱལ་བའི་སྐུ་ལ༴ བུ་
ཡི་ཚུལ་གྱིས་རྒྱུ་ཡི་དམ་ཚིག་ལ། །ལེ་ལོ་གཉིད་དབང་གཡེང་བྲེལ་གཏམ་ལ་སོགས། །ཐུགས་དང་འགལ་བར་གྱུར་པ་ཅི་མཆིས་པ། །ཐུགས་རྗེ་ཆེན་པོས་ཚངས་པར་སྩལ་དུ་གསོལ། །ཅེས་དང་མན་ངག་གི་ཡི་གེ་བརྒྱ་པ་བརྗོད་དོ། །གསུམ་པ་རྗེས་ཀྱི་བྱ་བ་ལ་ལྔ། དང་པོ་བསྐུལ་ཅིང་ཕྲིན་ལས་བཅོལ་བ་ནི། བྷྱོ། སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །ཁྱོད་ཀྱིས་དེང་ནས་འཁོར་བ་ཇི་སྲིད་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་སོགས། །ཞི་བར་བྱ་ཕྱིར་ཚེ་དང་བསོད་ནམས་སྤེལ། །ནག་པོའི་ཕྱོགས་ནི་དགུགས་ཅིང་དབང་དུ་སྡུད། །སྨྱོ་འབོག་བསད་པ་ལ་སོགས་ལས་འདི་དག །བསྟན་པ་བསྲུང་ཕྱིར་ལས་འདི་འགྲུབ་པར་མཛོད། །འདི་ལས་འགལ་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེའི་མགོ་འགེམས་ཤོག །དེ་སྐད་རྒྱལ་བའི་སྤྱན་སྔར་ཁས་བླངས་ཤིང་། །དམ་བཅས་བཞིན་དུ་ཕྲིན་ལས་གྲུབ་པར་མཛོད། །རྣལ་འབྱོར་བདག་དང་
བདག་གི་འཁོར་རྣམས་ལ། །ཞལ་ནས་བདུད་རྩིའི་ཆར་གྱི་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་རྣམས་ཞི་བར་མཛོད། །ཚེ་དང་དབང་ཐང་ལོངས་སྤྱོད་རྒྱས་པར་མཛོད། །ཟང་ཟིང་ལོ་ཐོག་འབྲུ་ཡི་ཕུང་པོ་དང་། །རིན་ཆེན་རྐང་འགྲོ་ཕྱོགས་རྣམས་འཕེལ་བར་མཛོད། །གཞན་ཡང་ཁྱོད་ལ་ཕྲིན་ལས་བཅོལ་བ་ནི། །བླ་མ་སྨོད་ཅིང་དཀོན་མཆོག་དབུ་འཕང་སྨད། །བདག་གི་དགེ་བའི་བར་ཆད་བྱེད་པའི་དགྲ། །བསྟན་དང་འགྲོ་ལ་འཚེ་བའི་ལས་ངན་འདི། །ཁྱོད་ཀྱི་ཁོང་ནས་དུག་གི་རླུང་བུས་ལ། །འདུ་བ་རྣམ་བཞིའི་ནད་རྣམས་ཁོང་ནས་སློང་། །པགས་བཞི་ལྷུ་རྣམས་ས་ལ་རྡེབ་ཏུ་ཆུག །དོན་སྙིང་རྣམ་ལྔའི་ཁོང་ཁྲག་སྐྱུག་ཏུ་ཆུག །ལས་ངན་འཁོར་བཅས་བྲང་ཆེན་བརྡུང་དུ་ཆུག །སྨྲེ་སྔགས་ཆོ་ངེ་གནམ་ལ་འབོད་དུ་ཆུག །འཆི་བའི་དུས་འདས་སྨྱོ་འབོགས་བསད་པར་མཛོད། །གཅན་གཟན་མཁའ་ལྡིང་ལ་སོགས་ལྟས་ངན་ཕོབ། །བསྟན་པ་སྲུང་བའི་ལས་
རྣམས་གྲུབ་པར་མཛོད། །གཉིས་པ་འདོད་པའི་དོན་ལ་གསོལ་བ་འདེབས་པ་ནི། མཁའ་འགྲོ་མ་དུད་པའི་སོལ་བ་མ་འཁོར་དང་བཅས་པ་ཁྱོད་རྣམས་ཀྱིས། མཆོད་སྦྱིན་གྱི་གཏོར་མ་ཁ་དོག་དམ་པ་དྲི་དམ་པ་རོ་དམ་པ་དང་ལྡན་པ་འདི་གསོལ་ལ། རྣལ་འབྱོར་པ་བདག་ཅག་འཁོར་དང་བཅས་པའི་ནད་ཀྱི་རིགས་སུ་གྱུར་པ། རླུང་ལས་གྱུར་པ། མཁྲིས་པ་ལས་གྱུར་པ། བད་ཀན་ལས་གྱུར་པ། འདུས་པ་ལས་གྱུར་པའི་ནད་བཞི་བརྒྱ་རྩ་བཞི་པོ་ཐམས་ཅད་ཞི་ཞིང་བཟློག་པར་གྱུར་ཅིག །གདོན་གྱི་རིགས་སུ་གྱུར་པ། ལྷ་ཡི་གདོན། ཀླུའི་གདོན། གནོད་སྦྱིན་གྱི་གདོན་ལ་སོགས་པ། གདོན་བརྒྱད་ཁྲི་བཞི་སྟོང་གི་གནོད་པ་ཐམས་ཅད་ཞི་ཞིང་བཟློག་པར་མཛོད་ཅིག །ཆགས་ཆེ་བ་དང་། རྨི་ལམ་ངན་པ་དང་། མཚན་མ་ངན་པ་དང་། ལྟས་ངན་པ། །བཀྲ་མི་ཤིས་པ་ཐམས་ཅད་ཞི་ཞིང་བཟློག་པར་མཛོད་ཅིག །གཞན་ཡང་རྣལ་འབྱོར་པ་བདག་ཅག་དང་ལུས་དང་
གྲིབ་མའི་ཚུལ་བཞིན་དུ་འགྲོགས་པར་མཛོད་ཅིག །སྔོན་ནས་སུས། ཕྱི་ནས་སྐྱོལ། བསམ་པ་ཐམས་ཅད་འགྲུབ་ཏུ་ཆུག །བསམ་པ་ཐམས་ཅད་མཐར་ཕྱིན་ཏུ་ཆུག་ཅིག །གསུམ་པ་བསྙེན་སྒྲུབ་སོགས་དམིགས་བསལ་ལ་མཆོད་བསྟོད་མདོར་བསྡུས་ཙམ་བྱ། གཏོར་ཆོག་ཙམ་ལ་མི་དགོས། ཡིག་བརྒྱ་བརྗོད་ལ། གང་ཡང་བདག་རྨོངས་བློ་ཡིས་ནི། །མ་ཚང་བ་དང་ཉམས་པ་དང་། །ཁྱོད་ཀྱི་དགོངས་པ་མ་འགྲུབ་པ། །མཁའ་འགྲོའི་ཚོགས་ལ་བཟོད་པར་གསོལ། །ཅེས་ནོངས་པ་བཤགས། བཞི་པ་གཤེགས་བསྡུ་ནི། བཛྲ་ལཱ་སྱ་རཱ་ག་ཡ་མི་ཧཱུྃ། ཞེས་དམ་ཚིག་གི་ལྷ་མོ་དང་ཡེ་ཤེས་པ་དབྱེར་མེད་པར་རྟེན་རྫས་དང་བྲིས་སྐུའི་ཐུགས་ཀར་བསྡུ་བའམ། གཏོར་མ་དེ་ཉིད་གཤེགས་པ་ཡིན་ན། བཛྲ་མུཿ ཞེས་སེ་གོལ་ལན་གསུམ་གཏོགས་པས་སྒྲུབ་པ་པོ་ཁྱོད་ཀྱིས་ཇི་ལྟར་བསྒོ་བ་བཞིན་བྱའོ། །ཞེས་དགྱེས་བཞིན་ཞལ་གྱིས་བཞེས་ཏེ་འཁོར་དང་བཅས་ཤོ་དིར་གྱིས་དགྱེས་པར་བསམ་མོ། །གཏོར་མ་དཔལ་འབར་བཙུགས་ལ་ས་གཙང་སར་བསྐྱལ་ལོ། །ལྔ་པ་བསྔོ་སྨོན་ཤིས་བརྗོད་ནི། སེམས་ཅན་ཐམས་ཅད་ནད་མེད་ཅིང་། སེམས་ཅན་ཐམས་ཅད་བདེ་
གྱུར་ཅིག །གང་གི་ལམ་ནས་འགྲོ་བ་ཡི། །སངས་རྒྱས་ཉིད་དང་འཕྲད་པར་ཤོག །མ་བསྒྲལ་བ་རྣམས་བསྒྲལ་བ་དང་། །མ་གྲོལ་བ་རྣམས་བདག་གིས་བགྲོལ། །ད་ལྟ་ཉིད་དུ་རྗེས་བརྩེ་བའི། །ལམ་དེ་ཉིད་ལ་གནས་པར་ཤོག །ཅེས་དང་སྨོན་ལམ་ཤིས་བརྗོད་སྤྱི་མཐུན་རྒྱས་བསྡུས་འཚམས་པར་བརྗོད། །སྙིང་པོའི་བསྟན་པ་རྒྱས་པ་དང་། །འཇིག་རྟེན་རྒུད་པ་ཞི་འདོད་རྣམས། །གོང་མའི་གསུང་བཟང་ལེགས་བཤད་ཀྱི། །ལང་ཚོས་སྤྲས་འདི་བསྟེན་པར་རིགས། །མཆོད་སྒྲུབ་ཕྲིན་ལས་རྒྱས་པས་བསྟན་སྲུང་ཆེས། །མ་ཡིས་བུ་བཞིན་གཟིགས་པ་མི་གཡེལ་བར། །ནག་པོའི་རྩ་ལག་མཐུ་སྟོབས་ཕྱིར་བསྙེལ་ནས། །སྒྲུབ་བརྒྱུད་བསྟན་པའི་དབུ་འཕང་དགུང་སྙེགས་ཤོག །ཅེས་འདོད་ཁམས་དབང་ཕྱུག་དུད་སོལ་མའི་ཕྲིན་ལས་འབྲིང་པོ་འདི་ཉིད་བསྙེན་སྒྲུབ་ལའང་འཇུག་པ་བདེ་བ་དང་། རྒྱུན་གྱི་གཏོར་ཆོག་ལའང་རྒྱས་བསྡུས་མཚམས་པར་མཐོང་ཞིང་། སྒྲུབ་བརྒྱུད་བསྟན་པའི་སྒྲོན་མེ་རྗེ་དབོན་བསམ་འཕེལ་མཆོག་གི་སྤྲུལ་སྐུའི་ཞལ་སྔ་ནས་གསུང་བསྐུལ་གནང་བ་ལྟར། ཀརྨ་ངག་དབང་ཡོན་ཏན་རྒྱ་མཚོའམ་བློ་གྲོས་མཐའ་ཡས་པའི་སྡེས་ཤྲཱི་དེ་བཱི་ཀོ་ཊའི་སྒྲུབ་གནས་སུ་བགྱིས་པ་དགེ་ལེགས་འཕེལ།། ༈ །།མཁོ་
རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།