དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལས་ལྷ་དགུའི་ཡང་གསང་སྒྲུབ་པའི་ཟིན་བྲིས།
དཔལ་འཇིག་རྟེན་དབང་ཕྱུག་གི་ཆོ་གའི་ཟིན་བྲིས་རབ་གསལ་ཐར་པའི་ལམ་ཆེན་ལས། ལྷ་དགུའི་ཡང་གསང་སྒྲུབ་པའི་ཟིན་བྲིས་བཞུགས་སོ། །
ན་མོ་ལོ་ཀེ་ཤྭ་ར་དེ་ཝ་པཉྩ་ཡེ། རྒྱལ་བ་རྒྱ་མཚོའི་ལྷ་དགུའི་ལྷ་ཚོགས་ལ། །གུས་པས་ཕྱག་འཚལ་བཀའ་གནང་བྱིན་གྱིས་རློབས། །ཡང་གསང་འཁོར་ལོ་ལྔ་ཡི་སྒྲུབ་པ་ལ། །སྒྲུབ་པའི་ལུགས་དང་ཁྲིད་ཀྱི་རིམ་པ་གཉིས། །ཁྲིད་རིམ་རྩ་རླུང་བསྒོམ་ལུགས་གཞན་དུ་གསལ། །འདིར་ནི་བསྐྱེད་རིམ་བསྙེན་སྒྲུབ་བྱ་བའི་ཚུལ། །མཚམས་བཅད་མི་དགོས་གང་དགར་བསྒོམ་པས་ཆོག །བདག་བསྐྱེད་འདོན་པའི་ཆས་ཙམ་མ་གཏོགས་པ། །སྒྲུབ་པའི་རྫས་ནི་ཅི་ཡང་མི་
དགོས་སོ། །ད་ནང་བདག་བསྐྱེད་ཚར་གཅིག་ཐོན་གྱི་ནས། །སྤྱོད་ལམ་ཀུན་ཏུ་སྔགས་བཟླས་དམིགས་པ་བསྒོམ། །དགོང་མོ་གཏོར་བསྔོས་རྒྱས་བསྡུས་ཅི་རིགས་དང་། །ཉལ་ཁ་ཐུན་བསྡུ་བསྔོ་སྨོན་རྒྱ་ཡིས་གདབ། །དེ་ལྟར་ཞག་བདུན་མན་ཆད་ལོ་ཟླའི་བར། །ཉམས་སུ་ལེན་པ་ཡང་གསང་སྒྲུབ་པ་ཉིད། །དེ་ཚེ་བསྒོམ་བྱ་དམིགས་པའི་རིམ་པ་ནི། །བདག་ཉིད་རྒྱལ་བ་རྒྱ་མཚོ་ཡབ་ཡུམ་སྐུ། །ཕྱི་ནི་དར་དམར་གུར་ཕུབ་ལྟ་བུ་ལ། །ནང་ནི་སྟོང་གསལ་ཕྲུ་མ་ཕུས་བཏབ་
བཞིན། །དེ་དབུས་ཨ་ཝ་དྷུ་ཏི་མཐིང་གསལ་དྲང་། །ཡར་སྣ་ཧྃ་ཡིག་ཐིག་ལེ་དངུལ་ཆུའི་མདོག །མར་སྣ་ཨཱཿཤད་ཐིག་ལེ་དམར་པོས་མཚན། །གཡས་གཡོན་རོ་མ་དམར་དང་རྐྱང་མ་དཀར། །ཡར་སྣེ་སྣ་བུག་མར་སྣེ་ལྟེ་འོག་ཟུག །འཁོར་ལོ་ལྔ་ཡི་རྩ་འདབ་གདུགས་རྩིབས་བཞིན། །སྤྱི་བོར་རྩ་འདབ་སུམ་བཅུ་སོ་གཉིས་དཀར། །མགྲིན་པར་བཅུ་དྲུག་དམར་པོ་ཁ་ཡར་ཕྱོགས། །སྙིང་ཀའི་རྩ་བརྒྱད་མཐིང་ཀ་ཅུང་ཟད་སྦུབ། །ལྟེ་བའི་རེ་བཞི་སེར་པོ་ཁ་ཡར་ཕྱོགས། །གསང་གནས་སོ་གཉིས་སམ་ཉེར་བརྒྱད་ལྗང་གུ་དྲང་། །འཁོར་ལོ་ལྔ་ཡི་རྩ་མདུད་དབུ་མའི་ནང་། །སྤྱི་བོར་གཏི་མུག་ངོ་བོ་ༀ་དཀར་པོ། །མགྲིན་པར་འདོད་ཆགས་ངོ་བོ་ཧྲཱིཿདམར་པོ། །སྙིང་གར་ཞེ་སྡང་ངོ་བོ་ཧཱུྃ་མཐིང་ཀ །ལྟེ་བར་ང་རྒྱལ་ངོ་བོ་ཏྲཱཾ་སེར་པོ། །གསང་གནས་ཕྲག་དོག་ངོ་བོ་ཨཱཿལྗང་གུ། །དེ་དག་རྣམས་ལས་འོད་ཟེར་ཕྱོགས་བཅུར་འཕྲོས། །བདག་དང་འབྲེལ་ཐོགས་གཙོར་བྱས་འགྲོ་
ཀུན་གྱི། །དུག་ལྔའི་སྒོ་ནས་བསགས་པའི་སྡིག་སྒྲིབ་དང་། །ལམ་རྒྱུད་ལྔ་རུ་སྐྱེ་བའི་ས་བོན་ཀུན། །འོད་ཟེར་དེས་བསྡུས་ཡིག་འབྲུ་ལྔ་ལ་ཐིམ། །བར་རླུང་གསུས་པ་ཐེར་ཙམ་གང་བ་ཡིས། །དབུ་མའི་མར་སྣེར་གཏུམ་མོ་ཡེ་ཤེས་མེ། །ནར་གྱིས་འབར་བས་དུག་ལྔའི་ས་བོན་བསྲེགས། །ཡེ་ཤེས་ལྔ་ཡི་སྤྱན་རས་གཟིགས་གྱུར་ཏེ། །སྤྱི་བོར་སྐུ་ཡི་སྤྱན་གཟིགས་ཡབ་ཡུམ་དཀར། །འཁོར་ནི་ཌཱ་ཀི་དཀར་མོ་རྩ་འདབ་གྲངས། །ཐུགས་ཀར་ཧྲཱིཿཡིག་དཀར་པོ་རེ་རེས་མཚན། །མགྲིན་པར་གསུང་གི་སྤྱན་གཟིགས་ཡབ་ཡུམ་དམར། །དམར་མོ་བཅུ་དྲུག་ཐུགས་ཀར་ནི་ཡིག་མཚན། །སྙིང་ཁར་ཐུགས་ཀྱི་སྤྱན་གཟིགས་ཡབ་ཡུམ་མཐིང་། །འཁོར་བརྒྱད་སྔོན་མོའི་ཐུགས་ཀར་ཧ་ཡིག་རེ། །ལྟེ་བར་ཡོན་ཏན་སྤྱན་གཟིགས་ཡབ་ཡུམ་སེར། །སེར་མོ་རེ་བཞི་ཐུགས་ཀར་རི་ཡིག་རེ། །གསང་བར་ཕྲིན་ལས་སྤྱན་གཟིགས་ཡབ་ཡུམ་ལྗང་། །རྩ་འདབ་གྲངས་
མཉམ་ཌཱ་ཀིའི་ཐུགས་ཀར་ས། །འཁོར་རྣམས་རང་རྟགས་གྲི་ཐོད་ཁ་ཊཱཾ་ག །ཡབ་ལྔའི་ཐུགས་ཀར་པདྨ་ཟླ་བའི་སྟེང་། །རང་མདོག་ཧྲཱིཿལ་ཡིག་བཅུ་གཡས་སུ་འཁོར། །ཡུམ་ལྔའི་ཐུགས་ཀར་ཆོས་འབྱུང་རྐྱང་པའི་སྟེང་། །རང་མདོག་ཧྲཱིཿ ལ་ཡུམ་སྔགས་གཡོན་དུ་འཁོར། །དེ་ནས་བར་རླུང་ཐེར་ཙམ་བཟུང་བ་ཡིས། །གསང་གནས་ཨཱཿཤད་གཏུམ་མོའི་མེ་འབར་ཏེ། །རྩ་གནས་མེས་གང་སྤྱི་བོའི་ཧྃ་ལ་རེག །བདུད་རྩི་བྱང་སེམས་འོ་མའི་རྒྱུན་བཞིན་བབས། །ལྷ་ཚོགས་ཀུན་གྱི་ཞལ་ཞུགས་སྐུ་ལུས་གང་། །བདེ་བས་ཐུགས་རྗེས་བདེ་སྟོང་ཡེ་ཤེས་འབར། །སྔོན་ལས་བཀྲག་མདངས་གཟི་བརྗིད་རྒྱས་པར་བསྒོམ། །ཡིག་བཅུའམ་ཡིག་དྲུག་བཟླས་པ་བསྙེན་པ་ཡིན། །དེ་ནས་ཡབ་ཡུམ་སྔགས་འཁོར་བཅུ་པོ་ལས། །འོད་ཟེར་སྣ་ཚོགས་ནམ་མཁའ་ཁྱབ་པར་འཕྲོས། །ཕྱོགས་བཅུའི་སངས་རྒྱས་བྱང་སེམས་ཐམས་ཅད་དང་། །བླ་མ་ཡི་དམ་མཁའ་འགྲོ་ཐམས་
ཅད་ལ། །འོད་དེས་མཆོད་པའི་སྤྲིན་དུ་གྱུར་པས་མཉེས། །ཐམས་ཅད་ཐུགས་རྗེ་ཆེན་པོ་ཡབ་ཡུམ་སྐུར། གནས་རྒྱུར་ཁ་བ་བུ་ཡུག་འཚུབ་བཞིན་བྱོན། །མཚོ་ལ་ཆར་བཞིན་བདག་ལ་སིབ་སིབ་ཐིམ། །དབང་དང་བྱིན་རླབས་དངོས་གྲུབ་ཐོབ་པར་བསྒོམ། །དེ་ནི་ཉེ་བར་བསྙེན་པའི་དམིགས་པ་ཡིན། །དེ་ནས་སྔགས་འཁོར་བཅུ་པོ་འཁོར་བཞིན་ལས། །སྤྱི་བོའི་ཡབ་ཡུམ་སྔགས་ཕྲེང་དྲག་ཏུ་འཁོར། །དེ་ལས་འོད་ཟེར་དཀར་པོ་ཕྱོགས་བཅུར་འཕྲོས། །བདེ་གཤེགས་རིགས་ཀྱི་སངས་རྒྱས་བྱང་སེམས་དང་། །སྐུ་ཡི་རིགས་ཀྱི་ལྷ་ཚོགས་ཐམས་ཅད་མཆོད། །དེ་ཀུན་སྤྱན་གཟིགས་ཡབ་ཡུམ་དཀར་པོའི་སྐུར། །གནས་གྱུར་ཆར་བཞིན་བབ་ནས་བདག་ལ་ཐིམ། །འགྱུར་མེད་སྐུ་ཡི་དངོས་གྲུབ་ཐོབ་པ་དང་། །རང་གི་གཟུགས་ཀྱི་ཕུང་པོ་འདི་ཉིད་ནི། །བདེ་གཤེགས་སྤྱན་གཟིགས་ཡབ་ཡུམ་ངོ་བོར་གྱུར། །ཆོས་དབྱིང་ཡེ་ཤེས་མངོན་དུ་བྱས་པར་
བསྒོམ། །མགྲིན་པའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་དམར་པོ་ཕྱོགས་བཅུར་ཁྱབ་པར་འཕྲོས། །པདྨ་རིགས་ཀྱི་སངས་རྒྱས་བྱང་སེམས་དང་། །གསུང་གི་ལྷ་ཚོགས་ཐམས་ཅད་མཆོད་པས་མཉེས། །ཐམས་ཅད་སྤྱན་གཟིགས་ཡབ་ཡུམ་དམར་པོར་གྱུར། །གནས་གྱུར་ཆར་བཞིན་བབ་ནས་བདག་ལ་ཐིམ། །འགགས་མེད་གསུང་གི་དངོས་གྲུབ་ཐོབ་པ་དང་། །འདུ་ཤེས་པདྨ་སྤྱན་གཟིགས་ངོ་བོ་གྱུར། །སོར་རྟོག་ཡེ་ཤེས་མངོན་དུ་བྱས་པར་བསྒོམ། །ཐུགས་ཀའི་ཡབ་ཡུམ་སྔགས་ཕྲེང་དྲག་ཏུ་འཁོར། །དེ་ལས་འོད་ཟེར་མཐིང་མདོག་ཕྱོགས་བཅུར་འཕྲོས། །རྡོ་རྗེ་རིགས་ཀྱི་སངས་རྒྱས་བྱང་སེམས་དང་། །ཐུགས་ཀྱི་ལྷ་ཚོགས་ཐམས་ཅད་མཆོད་པས་མཉེས། །ཐམས་ཅད་སྤྱན་གཟིགས་ཡབ་ཡུམ་མཐིང་ཀའི་སྐུར། །གནས་གྱུར་བུ་ཡུག་འཚུབ་བཞིན་བདག་ལ་ཐིམ། །འཁྲུལ་མེད་ཐུགས་ཀྱི་དངོས་གྲུབ་ཐོབ་པ་དང་། །རྣམ་ཤེས་རྡོ་རྗེ་
སྤྱན་གཟིགས་ངོ་བོར་གྱུར། །མེ་ལོང་ཡེ་ཤེས་མངོན་དུ་བྱས་པར་བསྒོམ། །ལྟེ་བའི་ཡབ་ཡུམ་སྔགས་ཕྲེང་མྱུར་བར་འཁོར། །དེ་ལས་འོད་ཟེར་གསེར་མདོག་ཕྱོགས་བཅུར་འཕྲོས། །རིན་ཆེན་རིགས་ཀྱི་སངས་རྒྱས་བྱང་སེམས་དང་། །ཡོན་ཏན་ལྷ་ཚོགས་ཀུན་ལ་མཆོད་པས་མཉེས། །དེ་ཀུན་སྤྱན་གཟིགས་ཡབ་ཡུམ་གསེར་མདོག་སྐུར། །གནས་གྱུར་ཆར་བཞིན་བབ་ནས་བདག་ལ་ཐིམ། །ཡོན་ཏན་ལྷུན་གྱིས་གྲུབ་པའི་དངོས་གྲུབ་ཐོབ། །ཚོར་བ་རིན་ཆེན་སྤྱན་གཟིགས་ངོ་བོར་གྱུར། །མཉམ་ཉིད་ཡེ་ཤེས་མངོན་དུ་བྱས་པར་བསྒོམ། །གསང་གནས་ཡབ་ཡུམ་སྔགས་ཕྲེང་མྱུར་བར་འཁོར། །དེ་ལས་འོད་ཟེར་ལྗང་གུ་ཕྱོགས་བཅུར་འཕྲོས། །ལས་ཀྱི་རིགས་ཀྱི་སངས་རྒྱས་བྱང་སེམས་དང་། ཕྲིན་ལས་རིགས་ཀྱི་ལྷ་ཚོགས་ཐམས་ཅད་མཆོད། །དེ་ཀུན་སྤྱན་གཟིགས་ཡབ་ཡུམ་ལྗང་གུ་གྱུར། །བུན་ནེ་ཆེལ་ལེ་བྱོན་ནས་བདག་ལ་ཐིམ། །ཕྲིན་ལས་
འགྲོ་བ་འདུལ་བའི་དངོས་གྲུབ་ཐོབ། །འདུ་བྱེད་ཀརྨ་སྤྱན་གཟིགས་ངོ་བོར་གྱུར། །བྱ་གྲུབ་ཡེ་ཤེས་མངོན་དུ་བྱས་པར་བསྒོམ། །དེ་ལྟར་བསྒོམ་ཞིང་བཟླས་པ་སྒྲུབ་པ་ཡིན། །དེ་ནས་སྤྱི་བོ་ཡབ་ཡུམ་སྔགས་ཕྲེང་ལས། །འོད་ཟེར་དཀར་པོ་ཟླ་བ་ཤར་འདྲ་འཕྲོས། །རང་གི་ལུས་ཀྱི་ནང་ཀུན་དཀར་གསལ་ཁྱབ། །ནད་གདོན་གཏི་མུག་སྡིག་སྒྲིབ་སངས་སེ་དག །འོད་དེ་ཕྱིར་འཕྲོས་འོད་དཀར་འཇིག་རྟེན་ཁྱབ། །དུད་འགྲོ་ལ་སོགས་གཏི་མུག་ལྡན་རྣམས་ཀྱིས། གཏི་མུག་སྒོ་ནས་བསགས་པའི་སྡིག་སྒྲིབ་དང་། །བག་ཆགས་བཅས་པ་དག་ནས་ཐམས་ཅད་ཀྱང་། །སྤྱན་གཟིགས་ཡབ་ཡུམ་དཀར་པོའི་སྐུ་རུ་གྱུར། །དེ་བཞིན་མགྲིན་པའི་ཡབ་ཡུམ་སྔགས་འཁོར་ནི། །དྲག་ཏུ་འཁོར་བས་འོད་ཟེར་དམར་པོ་འཕྲོས། །ལུས་ཁྱབ་ནད་གདོན་འདོད་ཆགས་སྒྲིབ་པ་དག །ཕྱིར་འཕྲོས་ཉི་མ་འཆར་ཀའི་འོད་བཞིན་ཏུ། །ནམ་མཁའ་ཁྱབ་འཕྲོས་ཡི་དྭགས་ལ་སོགས་པ། །འདོད་
ཆགས་སེར་སྣ་ཅན་རྣམས་སྒྲིབ་པ་སྦྱངས། །ཐམས་ཅད་སྤྱན་གཟིགས་ཡབ་ཡུམ་དམར་པོར་གྱུར། །ཐུགས་ཀའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་མཐིང་མདོག་འཕྲོས་པས་བདག་ལུས་ཁྱབ། །ནད་གདོན་ཞེ་སྡང་སྡིག་སྒྲིབ་སངས་སེ་དག །འོད་ཟེར་ནམ་མཁའ་དྭངས་པའི་མདོག་ལྟ་བུ། །ཕྱོགས་ཀུན་ཁྱབ་པའི་དམྱལ་བ་ལ་སོགས་པ། །ཞེ་སྡང་ཅན་རྣམས་ཀུན་གྱི་སྡིག་སྒྲིབ་སྦྱངས། །ཐམས་ཅད་སྤྱན་གཟིགས་ཡབ་ཡུམ་མཐིང་ཀར་གྱུར། །ལྟེ་བའི་ཡབ་ཡུམ་སྔགས་ཕྲེང་དྲག་འཁོར་བས། །འོད་ཟེར་གསེར་མདོག་འཕྲོས་པས་བདག་ལུས་ཁྱབ། །ང་རྒྱལ་སྡིག་སྒྲིབ་དྲི་མ་སངས་སེ་དག །འོད་ཟེར་ཕྱིར་འཕྲོས་སྤྲིན་མེད་ཉི་ཤར་བཞིན། །འོད་ཀྱིས་ཕྱོགས་ཁྱབ་ལྷ་མི་ལ་སོགས་པ། །ང་རྒྱལ་ཅན་རྣམས་ཀུན་གྱི་སྒྲིབ་པ་སྦྱངས། །ཀུན་ཀྱང་སྤྱན་གཟིགས་སེར་པོ་ཡབ་ཡུམ་གྱུར། །གསང་གནས་ཡབ་ཡུམ་སྔགས་ཕྲེང་མྱུར་འཁོར་
བས། །འོད་ཟེར་ལྗང་གུ་འཕྲོས་པས་བདག་ལུས་ཁྱབ། །ནད་མདོན་ཕྲག་དོག་བག་ཆག་སྒྲིབ་པ་དག །འོད་ཟེར་ཕྱིར་འཕྲོས་འོད་ལྗང་འཇིག་རྟེན་ཁྱབ། །ལྷ་མི་ལ་སོགས་ཕྲག་དོག་ཅན་རྣམས་ཀྱི། །སྒྲིབ་སྦྱངས་སྤྱན་གཟིགས་ལྗང་གུ་ཡབ་ཡུམ་གྱུར། །དེ་ནས་གནས་ལྔའི་ཡབ་ཡུམ་སྔགས་ཕྲེང་ལས། །འོད་ཟེར་ཁ་དོག་སྣ་ཚོགས་བདག་ལུས་ཁྱབ། །ཐ་མལ་ལུས་ངག་ཡིད་ཀྱི་སྒྲིབ་པ་སྦྱངས། །འཕགས་པའི་སྐུ་གསུང་ཐུགས་ཀྱི་ངོ་བོར་གྱུར། །འོད་ཟེར་འཇའ་ཚོན་ལྟ་བུར་ཕྱིར་འཕྲོས་པས། །ཐ་མས་གདོས་བཅས་འབྱུང་བཞིར་འཛིན་པ་སྦྱང་། །ཡེ་ཤེས་གཞལ་ཡས་ཁང་གི་ངོ་བོ་གྱུར། །དེ་ལྟར་སྣོད་ཀྱི་འཇིག་རྟེན་གཞལ་ཡས་ཁང་། །བཅུད་ཀྱི་སེམས་ཅན་གཅིག་ཀྱང་མ་ལུས་པ། །རིགས་ལྔའི་སྤྱན་གཟིགས་ཡབ་ཡུམ་ཤ་སྟག་གྱུར། །ཀུན་ཀྱང་རང་གི་རམ་བུ་བཀྱག་པའི་ཚུལ། །སྔགས་སྒྲ་འུར་ཆོམ་འཇིག་རྟེན་གཡོ་བར་བསྒོམ། །དེ་ནི་སྒྲུབ་པ་ཆེན་པོའི་
དམིགས་པའོ། །ཡིག་དྲུག་ཡིག་བཅུ་གང་རུང་བཟླ་ཆོག་སྟེ། །སྔགས་རིང་བཟླས་ན་རྟགས་དང་བྱིན་རླབས་མྱུར། །དམིགས་པ་དེ་དག་ཐུན་རེ་རྫོགས་པའམ། །ཞག་པོ་རེ་ལ་རྫོགས་པར་བྱས་ཀྱང་རུང་། །གལ་ཏེ་མཚམས་བསྡམས་རྩེ་གཅིག་སྒྲུབ་ན་ནི། །ཐུན་བཞིར་ཐུན་མཚམས་གཏོར་བསྔོས་ཐུན་བསྡུ་བྱ། །དེ་མིན་དགོང་ཀའམ་ནམ་འདོད་གཏོར་བསྔོས་གཅིག །དེ་ཚེ་སྤྲོ་ན་མདུན་བསྐྱེད་འདོན་ཡང་རུང་། །དེ་མིན་སྐད་ཅིག་གཏོར་མགྲོན་སྤྱན་དྲངས་ལ། །གཏོར་མ་བསྔོས་རྗེས་གཏོར་མགྲོན་ཡེ་ཤེས་པ། །རྟེན་ལ་བསྟིམ་མམ་མེད་ན་རང་ལ་བསྟིམ། །འཇིག་རྟེན་པ་རྣམས་རང་གནས་སོང་བར་དམིགས། །ཉལ་ཁ་ཐུན་བསྡུ་བསྔོ་སྨོན་གང་འདོད་བྱ། །དེ་ལྟར་མཚམས་བསྡམས་གྲུབ་ན་ཞག་དྲུག་གམ། །རྒྱུན་བསྙེན་ཡིན་ན་ཟླ་གཅིག་སོགས་འགྲུབ་ནས། །ཚེས་གཅིག་ནམ་ལངས་ཤར་དུ་ཁ་གྱུ་ལ། །དང་པོ་མགོ་བཙུགས་དེ་ནས་ནམ་འདོད་
ཡིན། །སྤྱི་བོའི་ཡབ་ཡུམ་ཐུགས་ཀའི་སྔགས་འཁོར་ལས། །འོད་ཟེར་དཀར་པོ་ཕྱོགས་བཅུ་ཁྱབ་པར་འཕྲོས། །ཕྱོགས་བཅུར་བཞུགས་པའི་སངས་རྒྱས་བྱང་སེམས་དང་། །བླ་མ་ཡི་དམ་མཁའ་འགྲོ་ཐམས་ཅད་ལ། །དཀར་གསུམ་མངར་གསུམ་ལ་སོགས་ཞི་བ་ཡི། །འོད་དེ་མཆོད་རྫས་དཔག་མེད་གྱུར་པས་མཆོད། །ཞི་བ་ཆེན་པོའི་དངོས་གྲུབ་ཐམས་ཅད་ནི། །འོད་ཟེར་སྟོན་ཟླའི་མདོག་ཏུ་ཚུར་བསྡུས་ནས། །སྤྱི་བོའི་ཡབ་ཡུམ་སྐུ་ལ་ཐིམ་པ་ཡིས། །བདག་ཉིད་མཐོང་ཐོས་དྲན་རེག་འགྲོ་ཀུན་གྱི། །ནད་གདོན་སྡིག་སྒྲིབ་ཞི་ནུས་དངོས་གྲུབ་ཐོབ། །སླར་ཡང་སྤྱི་བོའི་ཡབ་ཡུམ་སྔགས་འཁོར་ལས། །འོད་ཟེར་དཀར་པོ་ཤི་སོས་བདུད་རྩི་བཞིན། །བདག་ལུས་གང་བས་ནད་གདོན་སྡིག་སྒྲིབ་རྣམས། །བ་སྤུའི་སྒོ་ནས་ནག་ཉིལ་ཕྱིར་ཐོན་ཏེ། །བདག་ལུས་བདེ་དྲོད་ཡེ་ཤེས་འབར་བར་གྱུར། །འོད་ཟེར་ཕྱིར་འཕྲོས་བསྲུང་བྱ་འབྲེལ་ཐོགས་ཀྱི། །ནད་གདོན་སྡིག་ལྟུང་
དྲི་མ་དག་པར་བསྒོམ། །སྔགས་རིང་ཧ་རི་ནི་སའི་མཇུག་དེ་རུ། །ནད་གདོན་སརྦ་པཱ་པཾ་ཤནྟིཾ་ཀུ་རུ་སྭཱ་ཧཱ། །རྒྱུན་ཁྱེར་ཡིན་ན་བརྒྱ་སྟོང་ཅི་འགྲུབ་སྟེ། །རྟགས་ཐོན་བྱེད་ན་ཞག་བདུན་ཁྲི་འབུམ་སོགས། །གང་འདོད་རང་གི་ཉམས་དང་བསྟུན་པས་ཆོག །དེ་བཞིན་དང་པོ་རྒྱས་པའི་དབུ་འཛུག་ཚེ། །བཅོ་ལྔའི་ཉིན་ཕྱེད་ལྷོའམ་བྱང་དུ་ལྟས། །ལྟེ་བའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་སེར་པོ་ཕྱོགས་བཅུར་ཁྱབ་པར་འཕྲོས། །ཕྱོགས་བཅུའི་རྒྱལ་བ་སྲས་བཅས་ཐམས་ཅད་དང་། །བླ་མ་ཡི་དམ་མཁའ་འགྲོ་ནོར་ལྷའི་ཚོགས། །ཀུན་ལ་རྒྱལ་སྲིད་སྣ་བདུན་རིན་ཆེན་ལྔ། །རྒྱས་པའི་མཆོད་པ་རྒྱ་མཚོར་གུས་པས་མཆོད། །བསོད་ནམས་ཡེ་ཤེས་རྒྱས་པའི་དངོས་གྲུབ་ཀུན། །འོད་ཟེར་གཙོ་མ་གསེར་གྱི་མདོག་ལྟ་བུར། །བསྡུས་ནས་ལྟེ་བའི་ཡབ་ཡུམ་ཐུགས་ཀར་ཐིམ། །ཡོན་ཏན་ལྷུན་གྱིས་གྲུབ་པའི་དངོས་གྲུབ་ཐོབ། །སླར་ཡང་ཡབ་
ཡུམ་འཁོར་བཅས་སྐུ་ལུས་ལས། །འོད་ཟེར་ཛཾ་བུ་ཆུ་གསེར་མདོག་ཅན་འཕྲོས། །བདག་ལུས་ཁྱབ་པས་ཚེ་བསོད་ཉམས་རྟོགས་རྒྱས། །འོད་ཟེར་ཕྱིར་འཕྲོས་སྤྲིན་མེད་ཉི་འོད་བཞིན། །འོད་དེས་དམིགས་ཡུལ་རྣམས་ལ་རེག་ཙམ་གྱིས། །དཔལ་འབྱོར་བདེ་སྐྱིད་བསོད་ནམས་རྒྱས་པར་བསྒོམ། །སྔགས་རིང་བཻ་རོ་ཙ་ནཱི་ཡེ་ཡི་མཇུག །རི་ནི་ཧ་ས་མ་མ་ཨཱཿཡུཿཔུཎྱེ་ཛྙཱ་ན་པུ ཥྚིཾ་ཀུ་རུ་སྭཱ་ཧཱ། །ཞེས་པ་གོང་ལྟར་མང་ཉུང་ཅི་འགྲུབ་བཟླ། །ཉེར་གསུམ་དགོང་ཀ་ནུབ་ཏུ་ཁ་ཕྱོགས་ལ། །མགྲིན་པའི་ཡབ་ཡུམ་སྔགས་འཁོར་མྱུར་བར་འཁོར། །འོད་ཟེར་དམར་ཆེམ་ཕྱོགས་བཅུར་འཕྲོས་པ་ཡིས། །ཕྱོགས་བཅུའི་སངས་རྒྱས་རྩ་གསུམ་ལྷ་ཚོགས་ལ། །འདོད་ཡོན་ལྔ་དང་ཆང་སྣ་བཞི་ལ་སོགས། །དབང་གི་མཆོད་པ་རྒྱ་མཚོར་གྱུར་པས་མཆོད། །དབང་གི་དངོས་གྲུབ་བཅུད་རྣམས་འོད་ཟེར་ནི། །བྱེ་རུའི་མདོག་འདྲར་བསྡུས་ཏེ་མགྲིན་པར་ཐིམ། །བཀའ་བཙན་བདེན་ཚིག་
འགྲུབ་པའི་དངོས་གྲུབ་ཐོབ། །མགྲིན་པའི་གཙོ་འཁོར་ཀུན་གྱི་སྐུ་ལས་ནི། །འོད་ཟེར་པདྨ་རཱ་གའི་མདོག་འདྲ་འཕྲོས། །བདག་ལུས་ཁྱབ་པས་རླུང་སེམས་རང་དབང་ཐོབ། །འོད་ཟེར་ཕྱིར་འཕྲོས་གློག་སྟོང་འཁྱུགས་འདྲ་བས། །འཇིག་རྟེན་ཁམས་ཀྱི་ཚེ་བསོད་དཔལ་འབྱོར་དང་། །མཆོག་ཐུན་དངོས་གྲུབ་ཀུན་བསྡུས་བདག་ལ་ཐིམ། །སྔགས་རིང་བཻ་རོ་ཙ་ནཱི་ཡེ་ཡི་མཇུག །ནི་རི་ས་ཧ་བ་སུ་ན་ན་ཁ་དྷེ་སརྦ་སིདྡྷི་བ་ཤཾ་ཀུ་རུ་སྭཱ་ཧཱ། །ཅི་ལྕོགས་བཟླས་སོགས་གོང་དང་འདྲ་བ་ཡིན། །ཉེར་དགུའི་མུན་རུབ་ལྷོའམ་བྱང་བལྟས་ལ། །གསང་གནས་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་ལྗང་ནག་ཕྱོགས་བཅུར་ཁྱབ་པར་འཕྲོས། །ཕྱོགས་བཅུར་བཞུགས་པའི་རྩ་གསུམ་ལྷ་ཚོགས་ལ། །ཤ་ལྔ་ཤ་ཆེན་སྤོས་དག་ཚིལ་ཆེན་བསུར། །དྲག་པོའི་མཆོད་པ་དཔག་མེད་གྱུར་པས་མཆོད། །དེ་དག་ཀུན་གྱི་མཐུ་སྟོབས་ནུས་པ་ཀུན། །འོད་ཟེར་ལྗང་གུ་
བསྡུས་ཏེ་གསང་གནས་ཀྱི། །ལྷ་ལ་ཐིམ་པས་བཀྲག་མདངས་ཕུན་སུམ་ཚོགས། །ཕྲིན་ལས་གང་བརྩམ་ཐོག་མེད་དངོས་གྲུབ་ཐོབ། །གསང་གནས་ལྷ་ཚོགས་གཙོ་འཁོར་ཐམས་ཅད་ལས། །འོད་ཟེར་ལྗང་གུ་འཕྲོས་པས་བདག་ལུས་ཁྱབ། །ལུས་ཀྱི་ནད་གདོན་སེམས་ཀྱི་དུག་ལྔ་རྣམས། །འོད་དེས་བ་མོར་ཉི་ཟེར་ཕོག་ལྟར་བཅོམ། །འོད་ལྗང་ཕྱིར་འཕྲོས་མཚོན་ཆའི་དབྱིབས་འདྲ་བ། །དམྱལ་བའི་མེ་ལྟར་ཚ་ངར་ལྡན་པ་དེས། །གནོད་བྱེད་དགྲ་བགེགས་བདུད་བཞི་གཞོབ་ཐུལ་བསྲེགས། །རྩ་སྔགས་བཻ་རོ་ཙ་ནཱི་ཡེ་ཡི་མཇུག །ས་ནི་རི་ཧ་གནོད་བྱེད་སརྦ་ཤ་ཏྲུཾ་མཱ་ར་ཡ་ཧཱུྃ་ཕཊ། །ཞེས་པ་ཐུན་མོང་ཕྲིན་ལས་བཞི་སྒྲུབ་ཡིན། །མཆོག་སྒྲུབ་ཡར་མར་ཚེས་བཅུའི་ཉི་ཤར་དུ། །བྱང་ཤར་དབང་ལྡན་ཕྱོགས་སུ་ཁ་གྱུ་ལ། །ཐུགས་ཀའི་ཡབ་ཡུམ་སྔགས་འཁོར་དྲག་འཁོར་བས། །འོད་ཟེར་བཻ་ཌཱུའི་མདོག་ཅན་ཕྱོགས་བཅུར་འཕྲོས། །ཕྱོགས་བཅུའི་བཀའ་བརྒྱུད་གྲུབ་ཐོབ་
རྒྱ་མཚོའི་ཚོགས། །ཡི་དམ་སངས་རྒྱས་བྱང་སེམས་ཐམས་ཅད་ལ། །རིག་མ་བཅུ་དྲུག་བྱང་སེམས་དཀར་དམར་སོགས། །བདེ་སྟོང་མཆོད་པར་གྱུར་པས་ཐུགས་རྒྱུད་མཉེས། །ཐུགས་ཀྱི་ཡེ་ཤེས་ཉམས་རྟོགས་དངོས་གྲུབ་ཀུན། །འོད་ཟེར་ནམ་མཁའ་དྭངས་བའི་མདོག་ལྟ་བུར། །ཚུར་བསྡུས་ཐུགས་ཀའི་སྔགས་འཁོར་ཧྲཱིཿལ་ཐིམ། །དགོངས་པ་རྒྱལ་བ་ཀུན་དང་མཉམ་པ་དང་། །གཞན་བརྒྱུད་བྱིན་གྱིས་རློབས་ནུས་དངོས་གྲུབ་ཐོབ། །སླར་ཡང་ཐུགས་ཀའི་གཙོ་འཁོར་ཐམས་ཅད་ལས། །འོད་ཟེར་ནམ་མཁའ་དྭངས་པ་ལྟར་འཕྲོས་པས། །བདག་དང་འབྲེལ་ཐོག་འགྲོ་བ་ཐམས་ཅད་ལ། །ཉམས་རྟོགས་ཕུན་སུམ་ཚོགས་པ་སྐྱེ་བར་གྱུར། །སྔགས་རིང་ཧ་རི་ནཱིི་སའི་མཇུག་དེ་རུ། རི་ནི་ཧ་ས། ནི་རི་ས་ཧ། ས་ནི་རི་ཧ་ཨཱ་ཝེ་ཤ་ཡ་ཨཱ་ཝེ་ཤ་ཡ་ཨཱཿ ཨཱཿ །ཉམས་རྟོགས་སྐྱེ་འདོད་འདི་ཉིད་ཅི་མང་བཟླ། །ཞག་དང་དུས་ཚོད་ཁ་ཡི་གྱུ་ཕྱོགས་
སོགས། །དབུ་འཛུགས་དུས་ཡིན་རྒྱུན་དུ་མི་དགོས་སོ། །ཞག་ལས་བཞི་རྣམས་སོ་སོར་ཞག་བདུན་ནམ་དྲུག་ལ་སྒྲུབ་གསུངས། མཆན། དྲུག་སྒྲུབ་པའི་མཇུག་ཏུ་ཡིན་ན་ནི། །ཞག་གཅིག་དུས་ཚོད་ཁ་ཡི་གྱུ་ཕྱོགས་རྩམས། །ཚེས་ཀྱི་གྲངས་ཀ་དེ་ལ་རྩི་རྒྱུ་མེད། །ཡུན་རིང་རྟགས་ཐོན་སྒྲུབ་ན་སོ་སོའི་མཚམས། །ལས་བཞི་སོ་སོའི་སྦྱིན་སྲེག་གྲུབ་ན་ལེགས། །སྦྱིན་སྲེག་མ་གྲུབ་མ་ཚང་སྐྱོན་ནི་མེད། །དེ་ལྟར་ཡང་གསང་སྒྲུབ་པའི་སྙན་བརྒྱུད་འདི། །གཉན་རས་ཡན་ལ་ཡི་གེར་བཀོད་པ་མེད། །རང་བྱུང་རྡོ་རྗེས་རྩ་ཚིག་ཡི་གེར་བཀོད། །འདི་ཡི་རྒྱས་བཤད་གྲུབ་ཆེན་པཀྴིའི་གསུང་། །གདམས་ངག་རྒྱ་མཚོ་མཐའ་ཡས་གཞུང་ཆེན་དང་། །ཟབ་ཆོས་རྒྱ་མཚོ་མཐའ་ཡས་རྒྱས་པ་དང་། འཁོར་ལོ་ལྔ་ཡི་མན་ངག་མ་བུའི་སྐོར། །དེ་དག་རྣམས་སུ་འཐོར་ནས་སྦས་ཏེ་བཞུགས། །ལུང་འདྲེན་བྲིས་ན་པོ་ཏི་ལོངས་པ་ཙམ། །གཙོ་ཆེར་རྩ་རླུང་ཁོ་ན་ཡིན་ན་ཡང་། །རླུང་བཟུང་སྔགས་བཟླས་གང་
འདོད་བྱ་གསུངས་ཕྱིར། །འདིར་ནི་བསྐྱེད་རིམ་སྔགས་བཟླས་གཙོ་བོར་བྱས། །འདི་ལ་ཡུན་རིང་འབད་ཅིང་རྟགས་ཐོན་ན། །ཕྱི་ཡི་དཀྱིལ་མཁོར་སྒྲུབ་རྫས་སྦྱིན་སྲེག་སོགས། །ཅི་ཡང་མི་དགོས་མཆོག་ཐུན་དངོས་གྲུབ་རྣམས། །འདི་ཉིད་ཁོ་ནས་འགྲུབ་པར་པཀྴིས་གསུངས། །ཚེ་འདིར་མཆོག་ཐུན་དངོས་གྲུབ་ཀུན་ཐོབ་སྟེ། །འོད་གསལ་ཆེན་པོ་མངོན་དུ་གྱུར་ནས་ཀྱང་། །མཁའ་སྤྱོད་འགྲུབ་པ་རང་བྱུང་རྡོ་རྗེས་གསུངས། །བདག་ཀྱང་ཡུན་རིང་འདི་ལ་ཉམས་ལེན་བྱས། །རྗེས་མཇུག་རྣམས་ཀྱང་དེ་བཞིན་ཉམས་སུ་ལོངས། །མཐར་ཕྱིན་ཐབས་མཁས་གཉིས་ཀྱིས་བསྐུལ་བའི་ཕྱིར། །དྲིན་ཅན་སྤྲུལ་སྐུའི་དགོངས་རྫོགས་ལ་དམིགས་ཏེ། མེ་ལུགས་ས་གའི་བཅུ་གཅིག་སྔ་དྲོའི་ཐུན། །རཱ་ག་ཨ་སྱས་ཇི་ལྟར་གདམས་པ་ལྟར། ཧོར་གྱི་བཙུན་པ་མཐར་ཕྱིན་ཞེས་བྱས་བྲིས། །འདི་ལ་འགལ་འཁྲུལ་ཉེས་པའི་ཆ་མཆིས་ན། །ཡི་དམ་ལྷ་དང་སྲུང་མའི་
ཚོགས་ལ་བཤགས། །དགེ་བས་སྤྲུལ་སྐུའི་ཟག་མེད་ཐུགས་དགོངས་རྫོགས། །འགྲེལ་ཐོགས་འགྲོ་ཀུན་བདེ་ཆེན་ཞིང་བགྲོད་ཤོག །མངྒ་ལཾ་བྷ་བནྟུ། ཤུ་བྷཾ། །རྒྱལ་རྒྱམ་ལྷ་དགུའི་ཡང་གསང་ཟིན་འདི་དང་། །ལྷ་ལྔའི་ཡང་གསང་སེམས་ལ་བཀོད་པ་གཉིས། །སྙན་བརྒྱུད་དངོས་ཡིན་གྲུབ་ཆེན་ཀརྨ་པའི། །གདམས་ངག་ཀུན་བཅུད་ཟབ་ཆོས་བླ་ན་མེད། །ཟིན་བྲིས་ཚན་གྲངས་མང་པོའི་བཅུད་ཀྱང་འདི། །འདི་ནི་གྲུབ་བརྙེས་ཀརྨ་ཆགས་མེད་ཀྱིས། །རྗེས་འཇུག་ཡོངས་ལ་བཀའ་དྲིན་ཆེན་པོར་མཛད། །གཞན་རྣམས་སྙན་བརྒྱུད་ཁོ་ན་ངེས་མེད་ཀྱང་། རྒྱུད་དང་རྒྱ་གཞུང་གཏེར་མ་རྟོགས་ཆོས་སོགས། །ཀུན་ཀྱང་བྱིན་རླབས་རྒྱུན་བཟང་ལྡན་པ་ཉིད། །དེས་ན་གཞན་རྣམས་འབྲེལ་པ་འཇོག་ཙམ་དང་། །རྩ་བའི་ཉམས་ལེན་འདི་དག་ལ་འབད་ན། །དངོས་གྲུབ་རྣམ་གཉིས་ཐེ་ཚོམ་མེད་པར་འཐོབ། །ཀཾ་ཚང་བསྟན་འཛིན་མཆོག་ཏུ་དོན་གྱིས་འགྱུར། །ཞེས་པའང་ཞུ་དག་ཞར་བྱུང་བློ་གྲོས་མཐའ་ཡས་ཀྱིས་སྨྲས་པའོ། །བཀྲ་ཤིས།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་
འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།