དཔལ་འཁོར་ལོ་སྡོམ་པ་ལྷ་ལྔའི་དཀྱིལ་ཆོག་གི་རྣམ་པར་བཤད་པ་རྣལ་འབྱོར་དགྱེས་པའི་དགའ་སྟོན།
དཔལ་འཁོར་ལོ་སྡོམ་པ་ལྷ་ལྔའི་དཀྱིལ་ཆོག་གི་རྣམ་པར་བཤད་པ་རྣལ་འབྱོར་དགྱེས་པའི་དགའ་སྟོན་ཅེས་བྱ་བ་བཞུགས་སོ། །
ན་མཿཤྲཱི་ཛཱ་ལ་སམྦ་རཱ་ཡ། །རབ་འབྱམས་རྒྱལ་བའི་མི་ཟད་རྒྱན་འཁོར་ལྔ། །འཕོ་མེད་བདེ་ཆེན་ཀློང་དུ་སྡོམ་མཛད་པ། །བཅོམ་ལྡན་དཔའ་བོའི་དབང་ཕྱུག་གང་དེ་ལ། །གུས་པས་འདུད་དོ་བཀའ་གནང་བྱིན་གྱིས་རློབས། །ཟབ་གསང་རྒྱུད་རྒྱལ་དགོངས་དོན་པདྨོའི་ཚལ། །རྒྱུད་འགྲེལ་ཉི་མའི་སྣང་བས་འབྱེད་མཛད་ལ། །བརྟེན་ཏེ་རྣམ་འགྲེལ་ལེགས་བཤད་བདུད་རྩིའི་སྐྱེས། །རྣལ་འབྱོར་རོལ་པའི་དགའ་སྟོན་འདི་ན་སྤེལ། །དེ་ལ་འདིར་དཔལ་ལྡན་ནཱ་རོ་ཏ་པ་
ཡབ་སྲས་ཀྱི་གདམས་སྐོར་མ་རྒྱུད་སྐོར་དྲུག་ཏུ་གྲགས་པའི་ཡ་རྒྱལ་ཡང་སྙིང་འཁོར་ལོ་བདེ་མཆོག་ལྷ་ལྔའི་དཀྱིལ་འཁོར་གྱི་ཆོ་གའི་ཟིན་བྲིས་རྣམ་བཤད་མདོར་བསྡུས་ཙམ་བྲི་བ་ལ་བཞི་སྟེ། དང་པོ་སྟོན་པས་རྒྱུད་ཇི་ལྟར་གསུངས་པའི་ཚུལ། བྱེ་བྲག་ཏུ་རྒྱུད་འདི་གང་དུ་གཏོགས་ངོས་བཟུང་བ། སྦྱོར་བ་ཡོ་བྱད་ཀྱི་བཤམ། དངོས་གཞི་རིམ་པ་དང་པོའི་སྒོམ་རིམ་རྣམ་པར་བཤད་པའོ། །དང་པོ་ནི། དེ་ཡང་འཁོར་ལོ་བདེ་མཆོག་གི་རྒྱུད་རྣམས་སྔོན་གྱི་འདས་པའི་
སངས་རྒྱས་ཐམས་ཅད་ཀྱིས་རྒྱ་ཆེར་གསུངས་པ་ལ། སླར་ཡང་གཉིས་ལྡན་གྱི་དུས་སུ་འཛམ་གླིང་འདིར་སྟོན་པ་སྤྲུལ་པའི་སྐུ་ཉིད་འབྲས་བུ་ཧེ་རུ་ཀའི་རྣམ་པར་བཞེངས་ཏེ། རི་རབ་ཀྱི་བྱང་ཤར་དང་ལྷ་གནས་རྣམས་དང་མ་ག་དྷ་རུ་འཁོར་སངས་རྒྱས་དང་བྱང་སེམས་རིགས་ལྔའི་དཔའ་བོ་དང་རྣལ་འབྱོར་མ་རྣམས་ལ་རྒྱུད་ཐམས་ཅད་གསུངས་ཤིང་། སླར་ཡང་རྩོད་ལྡན་གྱི་དུས་སུ་དྲག་པོ་འཇིགས་བྱེད་ལྷ་དབང་ཕྱུག་ཆེན་པོ་ཆུང་མ་དང་བཅས་པས་ཡུལ་ཉེར་བཞི་དུར་ཁྲོད་བརྒྱད་ཐམས་ཅད་དབང་དུ་བསྡུས་ཏེ་ཐམས་ཅད་ལོག་པའི་ལམ་དུ་ཞུགས་པ་ལ་བརྟེན་ཏེ། སྟོན་པ་རྡོ་རྗེ་འཆང་ཉིད་བྱང་ཆུབ་ལྔས་མངོན་པར་རྫོགས་པར་སངས་རྒྱས་པའི་ཚུལ་བསྟན་ཏེ་འཁོར་སངས་རྒྱས་བྱང་སེམས་དཔག་མེད་ལ་འོད་གསལ་ལྷན་ཅིག་སྐྱེས་པའི་ཆོས་བསྟན། དྲག་པོ་དབང་ཕྱུག་འཁོར་བཅས་འདུལ་བའི་དུས་ལ་བབ་པར་མཁྱེན་ནས། སྤྲུལ་པ་འབྲས་བུའི་ཧེ་རུ་
ཀའི་སྐུར་བཞེངས་ཏེ་རི་རབ་ཀྱི་རྩེ་མོར་བྱོན་ཏེ། འཛམ་བུ་གླིང་འདིར་བདེ་མཆོག་ཞལ་བཞི་ཕྱག་བཅུ་དྲུག་པའི་སྐུར་སྤྲུལ་ཏེ། འཇིགས་བྱེད་དང་དུས་མཚན་གཉིས་ཞབས་འོག་ཏུ་མནན་ཞིང་བཏུལ། སྤྲུལ་པའི་འཁོར་རྣམས་ཀྱིས་ཀྱང་གནས་ཡུལ་དུར་ཁྲོད་བརྒྱད་ཀྱི་མ་རུང་པ་ཐམས་ཅད་ཚར་བཅད་དེ་རི་རབ་ཀྱི་རྩེ་མོར་བཅོམ་ལྡན་འདས་ཀྱི་གཞལ་ཡས་ཁང་དུ་འཁོད་དེ། དེའི་ཚེ་འཁོར་གྱི་དཀྱིལ་འཁོར་དང་། སངས་རྒྱས་བྱང་སེམས་རི་རབ་ཀྱི་རྡུལ་དང་མཉམ་པ་རྣམས་དང་། ཁྱད་པར་དུ་རྡོ་རྗེ་རྣལ་འབྱོར་མས་ཞུས་པ་བརྟེན་ཏེ་རྩ་བའི་རྒྱུད་འབུམ་པ་དང་དེའི་བསྡུས་རྒྱུད་ཨ་བྷི་དྷ་ན་དང་། རྡོ་རྗེ་མཁའ་འགྲོ་སོགས་གསུངས་ཤིང་། ཕྱག་རྡོར་གྱིས་ཞུས་ཏེ་བཤད་རྒྱུད་རྣལ་འབྱོར་མ་ཀུན་སྤྱོད་དང་། དཔལ་དྲྭ་བ་སྡོམ་པའི་རྒྱུད། བདེ་མཆོག་ཉུང་ངུའི་རྒྱུད་སོགས་བདེ་མཆོག་གི་རྒྱུད་མཐའ་དག་གསུངས་པ་ཡིན་ལ། དེ་དག་མི་ཡུལ་དུ་དར་ཚུལ་ནི།
དཔལ་སྡོམ་པའི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། །ལོ་ནི་བརྒྱ་དང་བཅུ་གཉིས་ན། །བསྟན་པའི་སྙིང་པོ་དམ་པ་ཞིག །ལྷ་གནས་གསུམ་དུ་གྲགས་པ་སྟེ། །རྒྱ་གར་ཤར་ལྷོའི་ཕྱོགས་མཚམས་སུ། །རྒྱལ་པོ་ཛ་ཞེས་བྱ་བ་ལ། །ལག་ན་རྡོ་རྗེས་སྣང་བར་བྱེད། །བྱང་ཆུབ་མཆོག་ཏུ་འགྲུབ་འགྱུར་བས། །དེ་ལ་རྟག་ཏུ་གུས་པར་གྱིས། ཅེས་གསུངས་པ་ལྟར་སྟོན་པ་མྱ་ངན་ལས་འདས་ནས་ལོ་བརྒྱ་དང་བཅུ་གཉིས་འདས་པ་ན་རྒྱ་གར་ཤར་ལྷོའི་ཕྱོགས་གྲོང་ཁྱེར་ས་ཏི་ཀཱི་རྟི་ཞེས་བྱ་བར་རྒྱལ་པོ་རབ་གསལ་ཟླ་བའི་རིག་འཛིན་རྒྱལ་པོ་ཛ་ཞེས་བྱ་བ་ལ་རྒྱུད་མཐའ་དག་ཕྱག་ན་རྡོ་རྗེས་སྩལ་ཏེ་རིམ་པར་འཕགས་ཡུལ་དུ་དར་བ་ལས། ཁྱད་པར་དུ་ལུགས་འདིའི་ཤིང་རྟའི་སྲོལ་འབྱེད་དང་པོ་ནི་དཔལ་ཤ་བ་རི་པའི་སློབ་མ་ལཱུ་ཡི་པ་སྟེ། རྒྱ་གར་ཤར་ཕྱོགས་བྷ་ག་ལར་ཉའི་རྒྱུ་ལྟོ་གསོལ་ཞིང་སྒྲུབ་པ་མཛད་པས་རྒྱ་སྐད་དུ་ལཱུ་ཡི་པ་སྟེ་བོད་སྐད་དུ་ཉ་ལྟོ་བར་གྲགས།
མཆོག་གི་གྲུབ་པ་བརྙེས་ནས་ཨུ་ཌ་བི་ཤའི་རྒྱལ་པོ་དང་བློན་པོ་རྫུ་འཕྲུལ་གྱིས་བཏུལ་ཏེ་རྗེས་སུ་བཟུང་བས། རྒྱལ་པོ་གྲུབ་པ་ཐོབ་པ་ལ་ད་རི་ཀ་པ་དང་། བློན་པོ་གྲུབ་པ་ཐོབ་པ་ཌིངྒི་པར་དཔལ་ཏཻ་ལོ་བས་ཀྱང་འདི་ལས་གསན་པའོ། །མཆན། གྲགས་ཏེ་འཁོར་ལྔ་བརྒྱ་དང་བཅས་པ་འཇའ་ལུས་སུ་བྱོན། སློབ་དཔོན་འདིས་ཨོ་རྒྱན་ནས་རྣལ་འབྱོར་མ་ཀུན་སྤྱོད་ཀྱི་རྒྱུད་སོགས་སྤྱན་དྲངས་ཤིང་འཁོར་ལོ་སྡོམ་པའི་མངོན་རྟོགས་ཀྱི་གཞུང་མཛད་པ་ལ་ལྭ་ཝ་པས་འགྲེལ་པ་མཛད་པར་བརྟེན་ཏེ་འཕགས་བོད་ཐམས་ཅད་དུ་ཤིན་ཏུ་དར་ཞིང་དཔལ་སྡོམ་པའི་ཆོས་ཚུལ་གྱི་ཆུ་མགོ་ལྟ་བུ་ཡིན་ནོ། །སྲོལ་འབྱེད་གཉིས་པ་ནི་གྲུབ་ཐོབ་ད་རི་ཀ་པའི་སློབ་མ་རྡོ་རྗེ་དྲིལ་བུ་པ་སྟེ། རྡོ་རྗེ་ཕག་མོས་དངོས་སུ་ལུང་བསྟན་ཏེ་ཨོ་ཌི་བི་ཤའི་ཡུལ་དུ་སྒྲུབ་པ་མཛད་ཚེ་དང་པོ་རྒྱལ་པོས་སྤྱན་དྲངས་པ་ལ། རིག་མ་དང་བཅས་ཏེ་བྱོན་པས་སྐྱེ་བོ་རྣམས་མ་དད་པས་དེ་རྣམས་འདུལ་བའི་དོན་
དུ་ཁྱེའུ་དང་བུ་མོ་གཉིས་སྤྲུལ་ཏེ་ཡུལ་དེར་བྱོན་པས་མ་དད་དེ་སྐུར་པ་བཏབ་པས། རྭའི་གསོལ་ཞལ་ས་ལ་བརྡབས་པས་ས་འོག་ནས་ཆུ་བྱུང་། ཁྱེའུ་དེ་རྡོ་རྗེར་བྱས། བུ་མོ་དྲིལ་བུར་སོང་བ་ཕྱག་ཏུ་བསྣམས་ཏེ་སློབ་དཔོན་ཡབ་ཡུམ་བདེ་མཆོག་ལྷན་སྐྱེས་ཀྱི་སྐུར་གྱུར་ནས་ནམ་མཁའ་ལ་གཤེགས་པས་མཚན་དུ་རྡོ་རྗེ་དྲིལ་བུར་པར་གྲགས། ཨོ་རྒྱན་ནས་བདེ་མཆོག་ཨ་བྷི་དྷཱ་ན་སྟེ་མངོན་བརྗོད་བླ་མའི་རྒྱུད་སྤྱན་དྲངས་ཏེ་བདེ་མཆོག་ལུས་དཀྱིལ་གྱི་སྒྲུབ་ཐབས་དང་། དབང་ཆོག་དང་། རྫོགས་རིམ་རིམ་ལྔ་སྟེ་དྲིལ་ལུགས་སྐོར་གསུམ་དུ་གྲགས་པ་མཛད་དེ། སློབ་མ་གྲུབ་པ་ཐོབ་པ་མང་དུ་བྱོན་པའི་གཙོ་བོ་རུ་སྦལ་ཞབས་ཡིན་ལ། དེས་ཛཱ་ལནྡྷ་རི་བ། དེས་ནག་པོ་པ་སོགས་རིམ་པར་གྲུབ་པའི་གནས་སུ་བཀོད་པ་ཡིན་ནོ། །སྲོལ་འབྱེད་གསུམ་པ་ནི་སློབ་དཔོན་ནག་པོ་སྤྱོད་པ་སྟེ། དུས་འཁོར་བསྡུས་རྒྱུད་ལས། ཁ་ཊྭཱཾ་ཅང་ཏེའུ་ཆང་སྣོད་ཐོགས་པ་ནག་པོའི་
མིང་ཅན་རྣལ་འབྱོར་འབྱུང་བར་འགྱུར། ཞེས་ལུང་བསྟན་པ་ལྟར་གྲུབ་ཐོབ་སྟོང་དང་བཞི་བརྒྱའི་འཁོར་གྱིས་བསྐོར་ཏེ་ཡུལ་ཆེན་བཅུ་གསུམ་གྱི་སྐྱེ་བོ་ཕལ་ཆེར་རྡོ་རྗེ་འཛིན་པའི་ས་ལ་བཀོད་ཅིང་། མཁའ་འགྲོ་མ་བསྐལ་པ་བཟང་པོའི་ཕྱག་ནས་དཔལ་སམྦུ་ཊིའི་རྒྱུད་དང་། སྡོམ་འབྱུང་དང་། རྡོ་རྗེ་མཁའ་འགྲོ་སོགས་ཀྱི་རྒྱུད་སྤྱན་དྲངས་ཏེ། དཔལ་ཧེ་རུ་ཀ་ཉིད་ཀྱིས་རྗེས་སུ་གནང་བ་བཞིན་སྡོམ་པའི་སྒྲུབ་ཐབས་དང་དབང་ཆོག །སྦྱིན་སྲེག་སྟེ་བསྐྱེད་རིམ་གྱི་གཞུང་གསུམ་དང་། དཔྱིད་ཐིག་དང་རིམ་པ་བཞི་པ་དང་། གསང་བའི་དེ་ཁོ་ན་ཉིད་དེ་རྫོགས་རིམ་གཞུང་གསུམ་སྟེ་ནག་པོ་པའི་གཞུང་དྲུག་ཏུ་གྲགས་པ་མཛད་པ་རྣམས་ནི་སྡོམ་པའི་བཀའ་སྲོལ་རྣམས་ལས་མཆོག་ཏུ་གྱུར་པ་ལཱུ་ནག་དྲིལ་གསུམ་གྱི་ལུགས་ཞེས་འཕགས་པའི་ཡུལ་དུ་ཉི་ཟླ་ལྟར་གྲགས་པའོ། །ཕྱིས་སུ་པཎ་ཆེན་ནཱ་རོ་པ་ཆེན་པོའི་ལུགས་ཀྱི་བདེ་མཆོག་ལྷ་ལྔ་འདི་ཡང་གཙོ་བོར་
གྲུབ་ཐོབ་ལཱུ་ཡི་པ་དང་ནག་པོ་པའི་གདམས་སྲོལ་ལས་བྱུང་བ་ལྟར་རོ། ༈ །གཉིས་པ་རྒྱུད་འདི་ཉིད་གང་དུ་གཏོགས་ངོས་བཟུང་བ་ནི། དེ་ཡང་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོས་ཆོས་ཀྱི་སྒོ་མོ་བསམ་གྱིས་མི་ཁྱབ་པར་གསུངས་པ་ཐམས་ཅད་མདོར་དྲིལ་ན་ཐེག་པ་ཆེ་ཆུང་གཉིས་སུ་འདུ་ལ། ཐེག་པ་ཆེན་པོ་དེ་ལའང་མཚན་ཉིད་རྒྱུའི་ཐེག་པ་དང་འབྲས་བུ་སྔགས་ཀྱི་ཐེག་པ་གཉིས་སུ་དབྱེར་ཡོད་པ་ལས་འདི་ནི་ཕྱི་མ་ཉིད་དོ། །དེ་ལའང་དབྱེ་ན་བྱ་སྤྱོད་རྣལ་འབྱོར་རྣལ་འབྱོར་བླ་ན་མེད་པ་དང་བཞིར་དབྱེ་བ་ལས། ཕྱི་མ་རྣལ་འབྱོར་བླ་མེད་ཀྱི་རྒྱུད་ལ་དབྱེ་ན་སྟོང་ཕྲག་མང་དུ་གསུངས་པ་ཉིད་མདོར་དྲིལ་ན། ཐབས་གཙོ་བོར་སྟོན་པ་ཕ་རྒྱུད་དང་། ཤེས་རབ་གཙོ་བོར་སྟོན་པ་མ་རྒྱུད། ཟུང་འཇུག་གཙོ་བོར་སྟོན་པ་གཉིས་མེད་ཀྱི་རྒྱུད་དང་གསུམ་ལས། མ་རྒྱུད་རིགས་དྲུག་གི་ནང་གསེས་དཔལ་ཧེ་རུ་ཀའི་རིགས་སུ་གཏོགས་པ་རྣལ་འབྱོར་མའི་
རྒྱུད་ལ་བརྟེན་པ་སྟེ། གུར་ལས། ཤེས་རབ་ཕ་རོལ་ཕྱིན་མའི་ཐབས། །འདི་ནི་རྣལ་འབྱོར་མར་བརྗོད་དོ། །ཕྱག་རྒྱ་ཆེན་པོར་རབ་སྦྱོར་བས། །གང་ཕྱིར་དེ་ཉིད་ལ་འཇུག་པ། །རྣལ་འབྱོར་མ་ཡི་རྒྱུད་བཞེད་དོ། །ཞེས་གསུངས་པ་ལྟར་ལྷ་འདི་ཉིད་ཀྱི་རྫོགས་རིམ་མཐར་ཐུག་ནི་འོད་གསལ་ཕྱག་རྒྱ་ཆེན་པོའི་གདམས་པ་ཉིད་ཡིན་པས་འདིའི་བསྐྱེད་རིམ་གྱི་རྩལ་འབྱོངས་ནས་གཟོད་ཕྱག་ཆེན་ལ་འཇུག་པ་གལ་ཆེ་ཞེས་གྲུབ་ཐོབ་གོང་མ་རྣམ་གསུམ་གྱིས་གསུངས་སོ། ༈ །གསུམ་པ་སྦྱོར་བ་ཡོ་བྱད་བཤམ་གྱི་ཐོག་མར་འཇུག་པ་པོའི་རྟེན་གྱི་གང་ཟག་ཀྱང་། རྒྱུད་ལས། ཡང་དག་ཡེ་ཤེས་རྒྱུད་ཤེས་ཤིང་། །ཧེ་རུ་ཀ་དཔལ་གསང་སྔགས་ཤེས། །ཁྲོ་མེད་གཙང་སྦྲ་བརྩོན་འགྲུས་ལྡན། །སྦྱོར་ཤེས་ཡེ་ཤེས་ཕ་རོལ་ཕྱིན། །ཅེས་གསུངས་པ་ལྟ་བུ་དང་ལྡན་པའི་གང་ཟག་གིས་དུས་ནམ་གྱི་ཚེ་བྱ་ན། རྒྱུད་ལས། དགུན་ཟླ་འབྲིང་པོ་ནས་བརྩམས་ཏེ། །ཟླ་
བ་རེ་རེ་བསྲུང་བར་ནི། །གཉིས་མེད་གཉིས་མེད་འཁོར་ལོར་གནས། །ཚེས་བཅུ་ལ་ནི་དེ་རབ་མཆོད། །ཅེས་དང་། ལཱུ་ཡི་པའི་མངོན་རྟོགས་འགྲེལ་པ་ལས། རྒྱལ་དང་ནག་པ་བྲ་ཉེ་བྱ་དབོའི་ཟླ་བ་མ་གཏོགས་པའི་ཟླ་བ་རྣམས་དང་། ཚེས་གཉིས་པ། གསུམ་པ། ལྔ་པ། བདུན་པ། བཅུ་པ། བཅུ་གསུམ་པ། ཉ་དང་། གཟའ་ཟླ་བ། ལྷག་པ། ཕུར་བུ། པ་སངས་རྣམས་སུའོ། །སྐར་མ་སྣར་མ། མགོ །ལག རྒྱལ། དབོ། མེ་བཞི། ལྷ་མཚམས། སྣྲོན། སྣུབ། གྲོ་བཞིན། ཆུ་སྟོད། ཆུ་སྨད། ཁྲུམས་སྟོད། ཁྲུམས་སྨད་རྣམས་སུའོ། །ཞེས་གསུངས་པ་ལྟར་དང་། གང་དུ་བྱ་བའི་གནས་ཀྱང་རྒྱུད་ལས། གང་དུ་ས་སྐྱོང་ཆོས་ལྡན་ཅིང་། །གང་ཞིག་ཁོ་ནར་སྐྱེ་དགུ་རྣམས། །བདེར་གནས་ས་འཛིན་རྩོད་མེད་པ། །དེར་ནི་རྣལ་འབྱོར་བརྩམ་པར་བྱ། །ཞེས་གསུངས་པ་ལྟ་བུའི་གནས་སུ་རང་མདུན་གྱི་གོ་སར་བདག་བསྐྱེད་བསྙེན་པའི་སྐབས་སུ་མཆོད་གཏོར་མཐོང་
བརྒྱུད་བཞིན་དང་ཆུ་བཞི་སྔོན་དུ་འགྲོ་བའི་མཆོད་པ་རྣམ་ལྔ་དང་མཚམས་འཛིན་བདུད་རྩིའི་ཐོད་པ་ཙམ་འདུ་བྱ། མདུན་བསྐྱེད་སྒྲུབ་པ་སོགས་དང་འབྲེལ་ཚེ་གཞུང་གསལ་ལྟར་རྡུལ་ཚོན་ནམ་རས་བྲིས་སྐུ་རྟེན། ཐུན་མོང་དང་ཐུན་མིན་གྱི་དབང་རྫས་སོགས་མཐོང་བརྒྱུད་ལྟར་ཚོགས་པར་བྱས་ཏེ་མཆོད་པ་རྣམས་གཡོན་སྐོར་དུ་བཀོད་པར་བྱ་སྟེ། རྒྱུད་ལས། གང་ཕྱིར་སྡོམ་པ་གཙོ་བོ་ཡི། །ངེས་པ་ཐམས་ཅད་གཡོན་ལས་འབྱུང་། །དེ་ཕྱིར་ཆོ་ག་ནུས་པ་ཀུན། །ལས་ནི་གཡོན་པས་རྟག་ཏུ་བྱ། །ཞེས་དང་། རྡོ་རྗེ་མཁའ་འགྲོ་ལས། གཡོན་གྱི་རྒྱུད་ནི་དམིགས་ནས་སུ། །སྐྱེ་བོ་གཡོན་གྱི་སྤྱོད་པར་བྱ། །ཐམས་ཅད་གཡོན་པས་བྱས་ན་ནི། །མྱུར་དུ་དངོས་གྲུབ་འགྲུབ་པར་འགྱུར། །ཞེས་གསུངས་པའི་ཕྱིར་དཀྱིལ་འཁོར་དང་མཆོད་པ་ལས་སུ་བྱ་བ་ཐམས་ཅད་གཡོན་པས་བགྱི་བ་ནི་གཞུང་འདིའི་ཁྱད་ཆོས་སོ། །དེ་ནས་སྒྲུབ་པོའི་གདན་གྱི་ཁྱད་
པར་ཡང་མིའི་སྲོག་སོང་དངོས་སམ་རི་མོར་བྲིས་པས་ཀྱང་རུང་སྟེ། བརྟག་གཉིས་ལས། རོ་ཡི་གཟུགས་ཅན་དགུ་དང་ནི། །ཡང་ན་སྟག་གི་པགས་པ་ཉིད། །དུར་ཁྲོད་རས་ནི་དེ་བཞིན་ནོ། །ཞེས་གསུངས་པ་ལྟར། རོ་གདན་གྱི་རྣམ་པ་གང་རུང་བྲིས་པའི་སྟེང་དུ་གདུལ་བྱ་དྲག་པོ་དབང་ཕྱུག་ཆེན་པོ་ལྷོ་ཕྱོགས་ལ་གནས་པ་དེར་ཁ་ཕྱོགས་པའམ། ཡང་ན་རྣམ་པར་རྟོག་པ་ཐམས་ཅད་ནུབ་པའི་བརྡ་དང་། འཛམ་གླིང་གི་དཔའ་བོ་མཁའ་འགྲོའི་གནས་ཀྱི་གཙོ་བོ་ཨོ་རྒྱན་ཡུལ་ཡིན་པས་དེར་ཁ་ཕྱོགས་པར་བྱའོ། །དེ་ནས་རང་གི་མདུན་དུ་གཡོན་ནས་བརྩམས་ཏེ་ཆུ་བཞི་མཆོད་པ་རྣམ་ལྔ་དང་། མི་བསྐྱོད་པའི་རང་བཞིན་བདུད་རྩིའི་ཐོད་པ། རིན་འབྱུང་གི་རང་བཞིན་ཅང་ཏེའུ་དར་དཔྱངས་ཅན། འོད་དཔག་མེད་ཀྱི་རང་བཞིན་རྡོ་རྗེ། དོན་གྲུབ་ཀྱི་རང་བཞིན་དྲིལ་བུ་རྣམས་ལེགས་པར་བཀོད་པར་བྱའོ། །དེ་ཡང་དཔའ་བོ་མཁའ་འགྲོ་རྣམས་དབང་དུ་བསྡུ་བའི་རྫས་ཌཱ་
མ་རུའམ་ཅང་ཏེའུ་ནི། ཕྱི་ལྟར་ན་ཙནྡན་དཀར་དམར་ལ་ཚད་དང་ལྡན་པར་བཟོས་པ་སྟེ། དཔལ་ཡང་དག་སྒྲུབ་པའི་རྒྱུད་ལས། བཛྲི་ཤིཪྴ་རྩ་བ་དང་། །ཙནྡན་དམར་པོ་ལས་བྱུང་དང་། །གཞན་རྣམས་གང་ལ་དེ་རྣམས་ནི། །ཡིད་ལ་འདོད་པ་རྣམས་ལ་བྱ། །ཞེས་དང་། ཚད་ཀྱང་རྒྱུད་དེ་ཉིད་ལས། བཅུ་གཉིས་པ་དང་བཅུ་པ་ཉིད། །ཁ་ལ་སོར་ནི་དྲུག་དང་ལྔ། །དགུ་པ་དང་ནི་བཅུ་གཅིག་པ། །ཁ་ལ་དེ་ཡི་ཕྱེད་ཉིད་དོ། །ཞེས་གསུངས་པ་ལྟར་ཆེ་ཚད་དཔངས་སུ་སོར་བཅུ་གཉིས་དང་། ཁ་རྒྱལ་སོར་དྲུག་ཡོད་པ་དང་། འབྲིང་ཚད་དཔངས་ལ་སོར་བཅུ་དང་ཁའི་ཞེང་ལ་སོར་ལྔ་དང་། ཆུང་ཚད་དཔངས་ལ་སོར་དགུ་ཁ་རྒྱ་ལ་དེའི་ཕྱེད་དེ་སོར་ཕྱེད་དྲུག་བྱ་བར་གསུངས་ལ། ནང་ལྟར་ན་སྐྱེས་པ་ལོ་བཅུ་དྲུག་པ་དང་བུད་མེད་ལོ་བཅུ་གཉིས་པའི་ཐོད་པ་ལྟག་པ་སྤྲད་པ་སྤྲེའུའི་པགས་པས་གཡོགས་པ་ཆུ་སྐྱལ་གྱི་རྐང་པས་བརྡུང་བར་གསུངས་ཏེ། གཞན་
པ་ཡི་ཡང་རྔེའུ་ཆུང་ནི། །ཐོད་པ་ལས་ནི་བསྐོར་བ་ཉིད། །སྤྲེའུ་པགས་པས་གཡོགས་པའོ། །དེ་ཡི་ཁ་སྦྱོར་གཉིས་ལ་ནི། །པདྨ་དག་ནི་བྲི་བར་བྱ། །བུད་མེད་ཁྲག་གིས་མཛེས་པར་བྱ། །དུར་ཁྲོད་སྐྱེས་པའི་སྐྲ་ལས་ནི། །བཀལ་ནས་རུས་པ་གཉིས་པོ་དྲིལ། །ཁྱིམ་གྱི་མེ་ཏོག་གཉིས་ཀྱིས་ནི། །པདྨའི་ཟེའུ་འབྲུ་གཉིས་པ་ལ། །དཀྱིལ་འཁོར་སྙིང་པོ་བྲི་བར་བྱ། །ཞེས་གསུངས་པ་ལྟར་དགའ་བ་བཅུ་དྲུག་དག་པའི་བརྡར་བུ་ག་བཅུ་དྲུག་ནས་རོ་སྐྲ་སུམ་སྒྲིལ་གྱི་སྐུད་བས་དྲྭ་བའི་ཚུལ་དུ་ཕྱི་ནས་བཅིངས། ནང་ངོས་སུ་ཁྱིམ་གྱི་མེ་ཏོག་སྟེ་བུ་མོའི་ཟླ་མཚན་དང་པོས་པདྨ་འདབ་བརྒྱད་ཀྱི་ལྟེ་བར་ལྷའམ། སྙིང་པོའམ། ས་བོན་གང་རུང་བཀོད་ལ་སྤྲེལ་གྱི་པགས་པས་གཡོགས་སྟེ་ཆུ་སྐྱལ་གྱི་རྐང་པའི་རུས་པས་བརྡུང་བར་བྱ་སྟེ། སམྦུ་ཊི་ལས། ཇི་ལྟར་དང་པོ་མིང་བཟུང་བ། །ཁཾ་ཧཱུྃ་ཞེས་ནི་བརྗོད་ནས་སུ། །ཆུ་སྐྱར་རྐང་པའི་རུས་པས་གདབ། །དེས་ནི་གཡོ་ལྡན་མ་ལ་སོགས། །
ཐམས་ཅད་འགུགས་པར་བྱེད་པར་འགྱུར། །གལ་ཏེ་འོངས་པར་མ་གྱུར་ན། །དེ་ཚེ་མཁའ་འགྲོ་མ་ཀུན་འཆི། །ངེས་པ་ཉིད་དུ་འགྲུབ་འགྱུར་བས། །ངས་གསུངས་པ་ལ་ཐེ་ཚོམ་མེད། །ཅེས་གསུངས་པ་ལྟར་རོ། །གསང་བ་ལྟར་ན་བུ་མོ་གྲོང་པའི་ཆོས་ཀྱིས་མ་གོས་པའི་གསང་བའི་རུས་པ་རྐང་པ་འབྲེལ་མཚམས་ནས་དྲལ་ཏེ་དབྱིབས་ལེགས་པར་བཅོས་པ་བུ་མོ་དེ་ཉིད་ཀྱི་ཀླད་རྒྱས་གཡོགས་ལ་སྐྱེས་པའི་སྲིན་མཛུབ་རྩེ་མོ་བཅད་པས་ཌཱ་རྡེལ་བྱས་པ་ལ་གསང་བའི་རྔེའུ་ཆུང་དུ་གསུངས་སོ། །དག་པ་ནི་ཌཱ་མ་རུའི་གཟུགས་ཀྱིས་ཐབས་བདེ་བ་ཆེན་པོ་དང་། དེ་ཡི་སྒྲས་སྟོང་ཉིད་ཀྱི་སྒྲ་སྒྲོགས་པའི་ཕྱིར་ན། བརྟག་གཉིས་ལས། ཐབས་ཀྱི་གཟུགས་ནི་ཅང་ཏེའུ་ཉིད། །ཤེས་རབ་ཌཱ་མ་རུ་ཡི་སྒྲ། །ཞེས་གསུངས་ཤིང་། དེ་ཡུལ་དང་ཡུལ་ཅན་གཉིས་སུ་མེད་པའི་ཆ་ནས་ཟུང་འཇུག་གི་དོན་ཡང་སྟོན་ནོ། །དེ་ནས་དམ་ཚིག་གི་ཕྱག་རྒྱ་རྡོ་རྗེ་དང་དྲིལ་
བུའི་དེ་ཉིད་མདོར་བསྡུས་ནི། དང་པོ་རྡོ་རྗེ་ལའང་གཉིས་ཏེ་མཚོན་བྱ་དོན་གྱི་རྡོ་རྗེ་ནི་རང་སེམས་གཉིས་མེད་ཀྱི་ཡེ་ཤེས་ཉིད་དེ། དཔལ་རྡོ་རྗེ་འཇིགས་བྱེད་རྣམ་པར་འཇོམས་པའི་རྒྱུད་ལས། དེ་ནས་དོན་གྱི་རྡོ་རྗེ་བཤད། །གཟུང་འཛིན་རྟོག་པས་མི་ཕྱེད་ཕྱིར། །དོན་གྱི་རྡོ་རྗེར་བཤད་པའོ། །ཞེས་གསུངས་པ་ལྟར་ལ། གཉིས་པ་རྟགས་ཀྱི་རྡོ་རྗེ་ནི། རྒྱུད་དེ་ཉིད་ལས། རྟགས་ཀྱི་རྡོ་རྗེ་གསུམ་ཡིན་ཏེ། །རྩེ་གསུམ་རྩེ་ལྔ་རྩེ་དགུ་པ། །རྩེ་གསུམ་སྐུ་གསུང་ཐུགས་ཀྱི་རྟགས། །རྩེ་ལྔ་ཡེ་ཤེས་ལྔ་ཡི་རྟགས། །རྩེ་དགུ་ཁམས་གསུམ་ས་དགུའི་རྟགས། །ཞེས་གསུངས་པ་ལྟར་ལ། ཚད་ནི་ཐོག་མར་སྲིད་ཀྱི་ཚད་དུ་ཇི་ཙམ་བྱ་བ་ཉིད་ཆ་གསུམ་དུ་མཉམ་པར་བྱ་སྟེ། སྟེང་འོག་གི་རྭ་གཉིས་ལ་སུམ་ཆ་རེ་རེ་དང་། འོད་ཕྲེང་སྟེ་མུ་ཏིག་གི་ཕྲེང་བ་ནི་ཆུ་སྲིན་གྱི་ལྐོག་མའི་འོག་ཟླ་དཀྱིལ་གྱི་སྟེང་ནས་མུ་ཏིག་གི་ཕྲེང་སྐོར་ཡོད་པ་དེ་ཡིན་པས། སྟེང་འོག་གི་འོད་ཕྲེང་གཉིས་ཀྱི་
བར་དེར་ཆ་གཅིག་སྟེ་ཆ་གསུམ་དུ་བྱའོ། །རྡོ་རྗེའི་ལྟེ་བ་ལ་རྡོ་རྗེ་སེམས་དཔའི་ཞལ་དངོས་སུ་མི་འགོད་པ་ནི་ཀཱ་ལི་གསལ་བྱེད་ཀྱི་ཕྲེང་བ་སྲོག་དང་བྲལ་བས་བརྗོད་དུ་མེད་པའི་ཕྱིར་རྡོ་རྗེའི་ལྟེ་བ་ལ་ཞལ་མེད་པ་དང་། ཨཱ་ལི་དབྱངས་ཀྱི་ཕྲེང་བ་སྲོག་གི་རང་བཞིན་བརྗོད་པར་བྱ་བ་ཡིན་པས་དྲིལ་བུ་ལ་སྙེམ་མའི་ཞལ་ཡོད་པའོ། །དག་པ་ནི། འོད་ཕྲེང་ནི་ཆོས་ཐམས་ཅད་ཆོས་ཉིད་ཀྱི་རོལ་པར་སྣང་བ། ཟླ་དཀྱིལ་ནི་གཟུང་འཛིན་གཉིས་དག་པ། པདྨའི་ཟེའུ་འབྲུ་ནི་བྱང་ཆུབ་ཀྱི་སེམས་མི་ཤིགས་པའི་ཐིག་ལེ་ཉིད་འཁོར་བར་གནས་ཀྱང་དེ་ཡི་སྐྱོན་གྱིས་མ་གོས་པ་དང་། དེའི་འོག་གི་པདྨ་འདབ་བརྒྱད་ནི་འཕགས་ལམ་བརྒྱད་མཚོན་པ་དང་། དེའི་འོག་མུ་ཏིག་གི་ཕྲེང་བ་ཕྲ་མོ་བཀོད་པ་ནི་རྣམ་པར་དག་པ་དེ་དག་འདུ་འབྲལ་མེད་པར་གནས་པ་མཚོན་པ་དང་། ལྟེ་བ་ནི་ཡེ་ནས་གནས་པའི་འཕོ་མེད་ལྷན་ཅིག་སྐྱེས་པའི་རྡོ་རྗེ་བདེ་བ་ཆེན་པོ་ཉིད་
སྤྲོས་པའི་ཡུལ་ལས་འདས་པ་མཚོན་པའི་ཕྱིར་ཀུན་ཟླུམ་ཐིག་ལེའི་རྣམ་པར་གནས་པའོ། །རྭ་ལྔ་ཡིས་ནི་རིགས་ལྔའི་བདག་ཉིད་མཚོན་པ་དང་དེ་རེ་རེ་བཞིན་གྲུ་བཞིར་བྱས་པ་ནི་གཙོ་བོའི་རིགས་ཆུང་བཞི་ཡི་ཁྱབ་བྱེད་མཚོན་པའོ། །རྭ་བཞི་ཆུ་སྲིན་གྱི་ཁ་ནས་ཐོན་པ་ནི་སྲིད་པའི་དབུས་ལས་རིང་དུ་སོང་སྟེ་མྱ་ངན་ལས་འདས་པའི་དབྱིངས་སུ་བགྲོད་པ་མཚོན་པའོ། །རྭ་དབུས་མ་ཆུ་སྲིན་ལས་མ་ཕྱུངས་པ་ནི། ཐོག་མ་མེད་པའི་བྱང་ཆུབ་ཀྱི་སེམས་ཉིད་འཁོར་འདས་གང་གི་ཕྱོགས་སུའང་མ་ལྷུང་བས་གང་དུའང་དམིགས་སུ་མེད་པ་མཚོན་པའོ། །དབྱེ་ན་རྒྱན་གྱི་རྡོ་རྗེ་དང་གསོར་བའི་རྡོ་རྗེ་གཉིས་ལས་འདི་ནི་ཕྱི་མ་ཉིད་དོ། །དེ་ནས་དྲིལ་བུ་ནི་མཚོན་བྱ་དོན་གྱི་དྲིལ་བུའི་དབང་དུ་བྱས་ན་ལམ་གྱི་སྐབས་སུ་ཤེས་རབ་ཀྱི་བདག་ཉིད་དུ་གྱུར་པའི་ཆོས་ཇི་སྙེད་པ་དག་མཚོན་པ་སྟེ། དཔལ་ཡང་དག་སྦྱོར་བ་ལས། ཤེས་རབ་དཀྲོལ་བའི་དེ་ཉིད་ནི། །ལྷ་རྣམས་
ཀུན་གྱིས་ཐོས་པར་འགྱུར། །ཞེས་གསུངས་པ་ལྟར་དང་། འབྲས་བུའི་སྐབས་སུ་གསུང་རྣམ་པ་ཐམས་ཅད་པ་ལོངས་སྤྱོད་རྫོགས་སྐུའི་རང་བཞིན་ནམ། རྒྱལ་བ་ཐམས་ཅད་སྐྱེད་པའི་ཡུམ་ཤེས་རབ་ཀྱི་ཕ་རོལ་ཏུ་ཕྱིན་མའི་ངོ་བོ་ཉིད་དེ། རྒྱུད་ལས། འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཅེས་གསུངས་སོ། །དེ་ནས་མཚོན་བྱེད་རྫས་ཀྱི་དྲིལ་བུའི་རྒྱུ་ནི་གསེར་དངུལ་ཛྷི་ཀྵིཾ་ལི་འཁར་སོགས་ལས་བྱས་པའི་ཚད་དབྱིབས་ནི། སམྦུ་ཊ་ལས། ཆ་གསུམ་གསལ་བར་གཟུང་བ་ལ། །སྐ་རགས་བྱས་པ་བཟང་པོ་ཉིད། །ཅེས་གསུངས་པ་ལྟར་དྲིལ་བུ་ཆེ་ཚད་སོར་བཅུ་གཉིས་ཀྱི་བར་ཇི་ཙམ་བྱ་བའི་དཔངས་ལ་ཆ་གསུམ་དུ་བྱ་སྟེ། དྲིལ་བུའི་གཞི་ཁོག་པ་ལ་ཆ་གཅིག །མགྲིན་པའི་རྩ་བ་ནས་ཞལ་གྱི་བར་ཆ་གཅིག །དེ་ནས་རྭའི་རྩེའི་བར་ལ་ཆ་གཅིག་སྟེ་ཆ་གསུམ་སྙོམས་པར་བྱའོ། །དེ་ནས་དབྱིབས་ཀྱི་ཁྱད་པར་
ནི། རྡོ་རྗེའི་རྩེ་མོའི་འོད་ཕྲེང་དང་ཟླ་གདན་གྱི་འོག་ཏུ་ཤེས་རབ་མའི་ངོ་བོ་རྡོ་རྗེ་སྙེམ་མའི་ཞལ་མཛེས་ཤིང་ཡིད་དུ་འོང་བ་ཞི་བའི་ཉམས་ཅན་རིན་པོ་ཆེའི་ཅོད་པན་གྱིས་མཛེས་པ། དེའི་འོག་ཏུ་བདུད་རྩིའི་བུམ་པ་ཞལ་གྱི་ཚད་དང་མཉམ་པར་བྱ་སྟེ། དཔལ་ཡང་དག་གྲུབ་པའི་རྒྱུད་ལས། ཆུ་སྲིན་ཁ་ནས་བྱུང་བ་ཡི། །རྩེ་མོ་འོད་ཟེར་ཟླ་བར་གནས། །གཟུགས་མེད་སྲིད་པའི་གནས་སུ་ནི། །ཤེས་རབ་བདུད་རྩིའི་བུམ་པ་ལྟར། །ཡེ་ཤེས་བདུད་རྩིའི་གནས་སུ་ནི། །དེ་ཡི་ཡང་ནི་དབུས་སུ་ཡིད། །ལྷ་མོ་ཤེས་རབ་ཕ་རོལ་ཕྱིན། །གཟུགས་ནི་མཛེས་ཤིང་ཡོན་ཏན་གནས། །ཞེས་གསུངས་པ་ལྟར་བུམ་པ་དེའི་འོག་ཏུ་བུམ་གདན་གྲུ་བཞི་འམ་ཟླུམ་པོ་གང་རུང་རྒྱ་བུམ་པའི་ལྟོ་བ་དང་མཉམ་པ། འཕངས་བུམ་པའི་བཞི་ཆའི་ཚད་དང་མཉམ་པ། དེའི་འོག་ཏུ་ཡུ་བ་ལ་སོར་མོ་གཅིག་གམ་ཞལ་ཚད་མཉམ་པའི་རྩ་བར་བང་རིམ་ལྟ་བུ་ཕྲ་མོ་གསུམ་གྱི་མཐར་ཨུཏྤལ་རྒྱས་པ་
པདྨའི་ཟེའུ་འབྲུའི་རྣམ་པ་བྱས་པ། དེའི་ཕྱི་ནས་པདྨ་འདབ་བརྒྱད་ཞལ་ཚད་དང་མཉམ་པ་རྩེ་མོ་ཐུར་དུ་ཕྱོགས་པའི་པད་འདབ་དེ་དག་གི་ཤར་ཏེ་ཤེས་རབ་སྙེམ་མ་གང་དུ་ཕྱོགས་པའི་འདབ་མའི་དབུས་སུ་སྒྲོལ་མའི་ས་བོན་ཏཾ། བྱང་དུ་སྤྱན་མའི་ས་བོན་ལཾ། ནུབ་ཏུ་མཱ་མ་ཀིའི་མཾ། ལྷོར་གོས་དཀར་གྱི་པཾ། མེར་ནོར་རྒྱུན་མའི་བཾ། སྲིན་པོར་ཙུནྡྷ་ལེའི་ཙུཾ། རླུང་དུ་ཁྲོ་གཉེར་ཅན་གྱི་བྷྲྀཾ། དབང་ལྡན་དུ་ཕྲེང་བ་མའི་མཱཾ་ཡིག་རིང་པོ་རྣམས་ཞལ་ནང་དུ་ཕྱོགས་པས་འཁོད་དེ། རྒྱུད་ལས། ཕྱོགས་ནི་བརྒྱད་ཅེས་བྱ་བར་ནི། །ལྷ་མོ་བརྒྱད་དུ་རབ་གྲགས་པའི། །ཡི་གེ་བརྒྱད་ཀྱི་ས་བོན་ནི། །ཕྱོགས་ནི་བརྒྱད་དུ་རྣམ་པར་དགོད། །ཅེས་གསུངས་པ་ལྟར་ལ། དེའི་འོག་ཏུ་མུ་ཏིག་གི་ཕྲེང་བ་གསེར་སྐུད་ལྟ་བུའི་སྐ་རགས་རིམ་པ་གཉིས་ཀྱི་བར་དུ་རྡོ་རྗེའི་དྲིལ་བུ་ལ་རྡོ་རྗེ་ཆུར་ཉལ་བ། རིན་ཆེན་དྲིལ་བུ་ལ་རིན་ཆེན། པད་དྲིལ་ལ་པདྨ། ལས་དྲིལ་ལ་སྣ་ཚོགས་རྡོ་
རྗེའམ་རལ་གྲི། དེ་བཞིན་གཤེགས་པའི་རིགས་ལ་འཁོར་ལོའི་ཕྲེང་བ་རྣམས་བྱའོ། །དེའི་འོག་ནས་ཙི་པ་ཊའི་ཁ་ནས་ཐུར་དུ་འཕྱང་བའི་རིན་པོ་ཆེའི་ཕྲེང་བ་དྲྭ་བ་དྲ་ཕྱེད་ཀྱི་རྣམ་པ་ཅན་བརྒྱད་བྱ་སྟེ། དེ་ཡི་ཤར་གྱི་དྲྭ་བའི་དབུས་སུ་འཁོར་ལོ། བྱང་དུ་རིན་པོ་ཆེ། ནུབ་ཏུ་པདྨ། ལྷོར་རལ་གྲི། མེར་ཆོས་འབྱུང་སྤྱན་མཚན། སྲིན་པོར་རྡོ་རྗེ། རླུང་དུ་པདྨ། དབང་ལྡན་དུ་ཨུཏྤལ་ཏེ་རིགས་བཞི་ཡུམ་བཞིའི་མཚན་མ་དགོད་ལ། གལ་ཏེ་དྲྭ་བ་བརྒྱད་ལས་མང་ན་བར་རྣམས་སུ་ཨུཏྤལ་པདྨ་སོགས་ཀྱིས་ཇི་ལྟར་མཛེས་པར་བྱ་སྟེ། རྒྱུད་ལས། སྐ་རགས་བྱས་པ་བཟང་པོ་ཉིད། །ཞི་བ་ཨུཏྤལ་ཀུ་མུ་ཏ། །རིན་ཆེན་པདྨ་རྣམ་པར་གནས། །ཕྱོགས་མཚམས་བརྒྱད་ཀྱི་དབུས་སུ་ནི། །དགུ་པ་ལ་ནི་སངས་རྒྱས་ཉིད། །ཅེས་གསུངས་པ་ལྟར་ལ། དེའི་འོག་ཏུ་དྲིལ་བུ་ཁའི་བ་གམ་གྱི་སྟེང་དུ་ཡང་སྐ་རགས་རིམ་པ་གཉིས་ཀྱི་བར་དུ་རིགས་སོ་སོའི་ལྷའི་ཕྱག་མཚན་རྡོ་རྗེའི་དྲིལ་བུ་ལ་
རྡོ་རྗེ་འགྲེང་ཐབས་སུ་བསྒྲིགས་པ་དང་། རིན་ཆེན་དྲིལ་བུ་ལ་རིན་ཆེན་སོགས་གོང་བཤད་ལྟར་དགོད་པར་བྱའོ། །དེ་ནས་དྲིལ་བུའི་ནང་གི་དབུས་སུ་ལྕེ་འཕྱང་བར་བྱེད་པའི་རྡོ་རྗེའི་ཆང་གཟུང་གི་བུག་པར་ལྕེ་གདག་པར་བྱ་ཞིང་། ནང་གི་ཕྱོགས་མཚམས་བརྒྱད་དུ་སྐུད་པ་དཔྱངས་པ་ལྟ་བུའི་མཚན་མ་བྱ་བར་རྡོ་རྗེ་མཁའ་འགྲོར་གསུངས་ཤིང་། མདུན་ཕྱོགས་ཤར་ངོས་སུ་འབྲུ་གསུམ་བཀོད་པ་ཡང་སྣང་ངོ་། །དེ་དག་གི་དག་པ་ནི། ཤེས་རབ་མའི་ཞལ་གྱིས་ཨཱ་ལི་དབྱངས་ཀྱི་རང་བཞིན་མཚོན་པ་དང་། བུམ་པ་ནི་ཤེས་རབ་མའི་ཐུགས་གཉིས་སུ་མེད་པའི་ཡེ་ཤེས་ཤེས་རབ་ཀྱི་ཕ་རོལ་ཏུ་ཕྱིན་མ་མཚོན་པ་དང་། བུམ་གདན་དང་ཡུ་བའི་རྩར་བང་རིམ་གསུམ་གྱི་རྣམ་པ་ནི་གཟུགས་མེད་ཀྱི་ཁམས་རྣམ་པར་དག་པ་དང་། ཨུཏྤལ་དང་པད་འདབ་བརྒྱད་ཀྱིས་གཟུགས་ཁམས་རྣམ་པར་དག་པ་དང་། དྲིལ་བུའི་ཁོག་པས་འདོད་པའི་ཁམས་རྣམ་པར་
དག་པ་དང་། མུ་ཏིག་གི་ཕྲེང་བ་ལྟ་བུའི་གསེར་སྐུད་ཀྱི་བར་རིགས་སོ་སོའི་ཕྱག་མཚན་བཀོད་པ་ནི་རིགས་ཀྱི་མཚན་མ་དང་པོའོ། །དེའི་འོག་ཏུ་དྲྭ་བ་དང་དྲ་ཕྱེད་འཕྱང་བ་ནི་ཁམས་གསུམ་པའི་རང་བཞིན་གྱི་གཞལ་ཡས་ཁང་མཚོན་པར་རྒྱུད་འགྲེལ་མན་ངག་སྙེ་མ་ལས་གསུངས་སོ། །དྲིལ་ཁའི་བ་གམ་གྱི་སྟེང་དུ་མུ་ཏིག་གི་ཕྲེང་བའི་སྐེ་རགས་རིམ་པ་གཉིས་ཀྱི་བར་དུ་རིགས་དང་མཐུན་པའི་ཕྱག་མཚན་བཀོད་པ་ནི་རིགས་ཀྱི་མཚན་མ་གཉིས་པའོ། །ལྕེ་འཕྱང་བའི་བུག་པ་ནི་རྡོ་རྗེ་བཙུན་མོའི་ཆོས་འབྱུང་ལ་ཉེ་བར་གནས་པའི་རྩ་ཁ་ཁ་མུ་ཁ་སྟེ་བྱ་གདོང་མ་མཚོན་པའོ། །དབྱེ་ན་རྡོ་རྗེ་འཆང་གི་དྲིལ་བུ་རྩེ་དགུ་པ་དྲྭ་བ་དང་དྲ་ཕྱེད་ཀྱིས་བརྒྱན་པ། ཡེ་ཤེས་ཀྱི་དྲིལ་བུ་ཕྱོགས་བཞིར་པདྨ་གསུམ་དང་ཨུཏྤལ་གྱིས་བརྒྱན་པ་ཁོག་པའི་སྟོད་སྨད་ལ་རྡོ་རྗེའི་ཕྲེང་བ་ཅན། དཔའ་བོའི་དྲིལ་བུ་རྩེ་ལྔ་པའམ་དགུ་པ། དྲྭ་བ་དང་དྲ་ཕྱེད་མེད་པ་དེའི་དོད་དུ་རིན་པོ་ཆེའམ་འཁོར་ལོས་
སྤྲས་པ། རྡོར་ཕྲེང་ཕྲེང་གཉིས་སྔ་མ་དང་འདྲ་བ། རིགས་སོ་སོའི་དྲིལ་བུ་ལ་རྩེ་མོ་ལྔ་པ་ཁོ་ན། དྲྭ་ཕྱེད་ཀྱི་བར་ལ་རིགས་སོ་སོའི་ཕྱག་མཚན་ཅན་སོགས་སུ་བཤད་པས་དེ་དག་སོ་སོའི་ཚད་སོགས་ཞིབ་པར་རྡོ་རྗེ་མཁའ་འགྲོར་གསུངས་པ་ལྟར་ཤེས་པར་བྱའོ། །དེ་ཡང་གསར་རྙིང་གི་དཀྱིལ་འཁོར་སྤྱི་དང་ཁྱད་པར་དུ་བླ་མེད་ཀྱི་རྒྱུད་སྡེ་ལ་འཇུག་པའི་སྐབས་སློབ་དཔོན་གྱི་བྱ་བ་མཐའ་དག་ལ་རྡོ་དྲིལ་འཛིན་པ་སྔོན་དུ་འགྲོ་དགོས་པའི་ཕྱིར་ཐོག་མར་རྡོ་དྲིལ་གྱི་དེ་ཉིད་ཤེས་པ་གལ་ཆེ་ལ། དེ་ཉིད་མི་ཤེས་པས་རྡོ་དྲིལ་འཛིན་པ་ནི་གླང་པོའི་མགུལ་དུ་དྲིལ་བུ་བཏགས་པ་དང་འདྲ་བར་གསུངས་ཏེ། རྡོ་རྗེ་གདན་བཞིའི་རྒྱུད་ལས། དེ་ཉིད་མི་ཤེས་རྣལ་འབྱོར་པ། །གླང་པོས་དྲིལ་བུ་འཁྲོལ་དང་མཚུངས། །ཞེས་གསུངས་ལ། ཇི་ལྟར་དཀྲོལ་བའི་ཚུལ་ཡང་། དཔལ་སམྦུ་ཊའི་རྒྱུད་ལས། དེ་ལ་ལག་གཉིས་རབ་ཏུ་བརྐྱང་། །རྣམ་ལྔ་འདོད་པའི་བསྐོར་
བ་བྱ། །གཡས་པར་ཉི་མ་ཡང་དག་བསམ། །གཡོན་པར་ཟླ་བསམ་གཡོན་པ་ཉིད། །ལུས་ཅན་རྣམས་ཀྱི་ཐབས་ཉིད་དེ། །རང་འདོད་ལྷར་ནི་བསམ་པར་བྱ། །ཞེས་གསུངས་པ་ལྟར་རྣམ་ལྔ་འདོད་སྐོར་དང་བཅས་ཏེ་ལག་མཐིལ་གཡས་སུ་ཉི་མའི་དཀྱིལ་འཁོར་དང་། གཡོན་དུ་ཟླ་དཀྱིལ་བསམས་ལ། རྡོ་རྗེ་ཧཱུྃ་ལས་རྡོ་རྗེ་སེམས་དཔའ་དང་། དྲིལ་བུ་ཧོཿཡིག་ལས་རྡོ་རྗེ་སྙེམ་མའི་སྐུར་བསྐྱེད་དེ། འགྲོ་བ་རྣམས་མ་རིག་གཏི་མུག་གི་གཉིད་ལས་སད་པར་བྱས་ཏེ་མཐར་ཐུག་སངས་རྒྱས་ཐོབ་པའི་དོན་དུ་དཀྲོལ་བར་བྱའོ་སྙམ་པས་དྷརྨ་ར་ཎི་སོགས་ཀྱི་སྔགས་བརྗོད་ཅིང་དྲིལ་བུའི་ལྕེ་ནང་གི་གནས་བརྒྱད་དུ་ཕོག་པར་བྱ་ཞིང་དཀྲོལ་དགོས་ཏེ། སམྦུ་ཊི་ལས། ཐབས་དང་ཤེས་རབ་ཆོས་ཀྱིས་ནི། །འགྲོ་བ་ཐམས་ཅད་སད་པར་བྱེད། །མི་ཤེས་འདམ་དུ་བྱིང་བ་ཡི། །སེམས་ཅན་སངས་རྒྱས་དོན་དུ་དཀྲོལ། །རྡོ་རྗེ་དེ་ཉིད་ཀྱིས་ནི་བཟུང་། །ཆོས་ཀྱི་དྲིལ་བུ་དཀྲོལ་
བར་བྱ། །ཐབས་དང་ཤེས་རབ་ཆོ་ག་ཡིས། །སེམས་ཅན་དོན་ནི་ཡོ་གས་བྱེད། །ཅེས་དང་། ཨཱ་ལི་ཀཱ་ལི་སྒོམ་པ་ནི། །གནས་ནི་བརྒྱད་དུ་དཀྲོལ་བར་བྱ། །ཨཱ་ལི་ཀཱ་ལི་རབ་སྦྱོར་བས། །འཁོར་བ་ཐམས་ཅད་གཅོད་པར་བྱེད། །ཅེས་གསུངས་པ་ལྟར་དང་། སླར་ཡང་དམ་ཚིག་དྲན་བཞིན་པས་རྡོ་རྗེ་ནང་དུ་འོང་བའི་པད་ཀོར་དང་བཅས་འཁྱུད་པའི་སྟངས་ཀ་བྱས་ལ་དེ་ནས་ཆོ་གའི་སྦྱོར་བ་གང་ཡིན་ལ་འཇུག་པར་བྱ་ཞིང་། ཕྱིས་རྡོ་དྲིལ་ལེན་དུས་ཀྱང་ལག་གཉིས་བསྣོལ་བས་འོག་ཏུ་ཕྱོགས་པས་རྡོ་རྗེ་ཁུ་ཚུར་ཅུང་ཟད་ཁ་བྱེ་བའི་ཕྱག་རྒྱས་བླངས་ལ་རྣམ་སྣང་དང་རྡོ་རྗེ་སྙེམ་མ་ཞལ་སྦྱོར་བའི་ཚུལ་དུ་ཧ་ཅང་ཐག་མི་རིང་བར་འཛིན་ཅིང་། འཇོག་པའི་ཚེ་ཡང་དྲིལ་བུ་གཡས་དང་རྡོ་རྗེ་གཡོན་གྱི་ཆར་བཞག་པར་བྱའོ། །བཞི་པ་དངོས་གཞི་དཀྱིལ་འཁོར་ལ་འཇུག་པའི་ཐོག་མར་བདུད་རྩི་བྱིན་རླབས་བྱ་བ་ནི། བདག་ཉིད་སྐད་ཅིག་གིས་ལྷན་སྐྱེས་ཡབ་ཡུམ་
གྱི་སྐུར་བསྐྱེད་པ་སྟེ། ལྷན་སྐྱེས་ཞེས་པའི་དོན་ནི། རང་བཞིན་སྟོང་པ་ཉིད་དང་མི་འགྱུར་བའི་བདེ་བ་ཆེན་པོ་ཟུང་དུ་འཇུག་པའི་རང་བཞིན་ལྷན་ཅིག་སྐྱེས་པའི་ཡེ་ཤེས་ཉིད་ཞལ་ཕྱག་གི་རྣམ་པར་བཞེངས་པའི་ལྷ་ཡིན་པས་ན་དེ་སྐད་ཅེས་བྱ་སྟེ། རྒྱུད་ལས། གང་དང་ལྷན་ཅིག་གང་སྐྱེས་པ། །དེས་ན་ལྷན་ཅིག་སྐྱེས་པར་བརྗོད། །ཅེས་པ་ལྟར་རོ། །དེ་ནས་ༀ་ཁཎྜ་རོ་ཧེ་སོགས་དུམ་སྐྱེས་མའི་སྔགས་ཀྱིས་བགེགས་བསལ། སྭ་བྷཱ་ཝ་སོགས་རང་བཞིན་རྣམ་དག་གི་སྔགས་ཀྱིས་དངོས་འཛིན་ཐམས་ཅད་སྟོང་པར་སྦྱང་། སྟོང་པ་དེའི་རང་རྩལ་མ་འགགས་པ་ལས་ཡཾ་ལས་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན། དེའི་སྟེང་དུ་རཾ་ལས་མེའི་དཀྱིལ་འཁོར་གྲུ་གསུམ་པ་དམར་པོའི་སྟེང་དུ་ཡི་གེ་ༀ་ཨཱཿཧཱུྃ་གསུམ་ཡོངས་སུ་གྱུར་པ་ལས། ཐོད་པ་དཀར་པོ་བུམ་རིལ་གྱི་སྒྱེད་བུ་གསུམ་ལ་གནས་པའི་ཨ་ཡིག་དཀར་པོ་ལས་བྱུང་བའི་ཐོད་སྣོད་ཕྱི་དཀར་ལ་
ནང་དམར་བ་ཡངས་ཤིང་རྒྱ་ཆེ་བའི་ནང་དུ། དབུས་སུ་ཧཱུྃ་ལས་མིའི་ཤ །ཤར་དུ་ༀ་ལས་བ་ལང་གི་ཤ །བྱང་དུ་ཁཾ་ལས་གླང་པོ་ཆེའི་ཤ །ནུབ་ཏུ་ཨཱཾ་ལས་རྟའི་ཤ །ལྷོར་ཏྲཱཾ་ལས་ཁྱིའི་ཤ་སྟེ་དེ་དག་ལ་ལྕགས་ཀྱུ་ལྔ་ཞེས་བྱ་བའི་དོན་ནི། མན་ངག་སྙེ་མ་ལས། འདི་རྣམས་ལྕགས་ཀྱུ་བཞིན་དུ་མངོན་པར་འདོད་པའི་དོན་ཉེ་བར་བྱེད་པའི་ཕྱིར་ལྕགས་ཀྱུ་རྣམས་སོ། །ཞེས་དང་སམྦུ་ཊི་ར། ཡེ་ཤེས་ལྕགས་ཀྱུས་རབ་དབྱེ་བས། །ཡིད་ཀྱིས་ཐམས་ཅད་འགུགས་པའོ། །ཞེས་གསུངས་པ་ལྟར། དང་པོ་ཡེ་ཤེས་འགུགས་པར་བྱེད་པའི་ལྕགས་ཀྱུ་ལྔ་ནི་ཤ་ལྔའོ། །དེ་དག་གི་སྟེང་དུ་རིམ་པ་བཞིན་དུ་དབུས་སུ་བཱཾ་ལས་རྡོ་རྗེའི་དྲི་ཆུ་བེ་ཌཱུར་ལྟ་བུ། ཤར་དུ་ལཱཾ་ལས་རྡོ་རྗེའི་དྲི་ཆེན་ཤེལ་ལྟ་བུ་དཀར་པོ། ལྷོར་མཱཾ་ལས་རྡོ་རྗེའི་རཀྟ་གསེར་བཙོ་མ་ལྟ་བུ། ནུབ་ཏུ་པཱཾ་ལས་རྡོ་རྗེའི་བྱང་སེམས་དཀར་པོ་དངུལ་ཆུ་ལྟ་བུ། བྱང་དུ་ཏཱཾ་ལས་རྡོ་རྗེའི་ཀླད་པ་དཀར་པོ་སྟེ་དེ་དག་ལ་
སྒྲོན་མ་ལྔ་ཞེས་བྱ་བའི་དོན་ནི། ལཱུ་ཡི་པའི་དཀའ་འགྲེལ་ལས། ཡི་གེ་ལྔ་པོ་ལས་བྱུང་བ་དང་དེའི་བྱིན་རླབས་ཀྱིས་བདུད་རྩི་ལྔ་སྒྲོན་མ་ལྔ་ཡི་ཚུལ་དུ་རྫོགས་པར་བྱ་བའོ། །ཞེས་གསུངས་པས་ས་བོན་ལྔ་དེས་བདུད་རྩི་ལྔ་པོ་ཡེ་ཤེས་ལྔར་སྦར་བར་བྱེད་པའི་ཕྱིར་ན་རྒྱུ་ཡི་འབྲས་བུ་ལ་བཏགས་ཏེ་སྒྲོན་མེ་ལྔ་ཞེས་གསུངས་སོ། །བདུད་རྩི་ལ་རྡོ་རྗེའི་སྒྲ་སྦྱར་བའི་དོན་ཡང་རྣལ་འབྱོར་མའི་ཀུན་སྤྱོད་ལས། བདུད་རྩི་ལྔ་ཡི་གོང་བུའི་དངོས། དེ་ཕྱིར་རྡོ་རྗེ་ཅན་དུ་བརྗོད། །ཅེས་གསུངས་སོ། །རྫས་བཅུ་དེ་དག་སླར་ཡང་རང་རང་གི་ས་བོན་གྱིས་མཚན་པར་བསྒོམ། དེ་ནས་འོག་གི་རླུང་གཡོས་མེ་སྦར་བསྐོལ་བས་རྫས་བཅུ་ས་བོན་དང་བཅས་པ་འོད་དུ་ཞུ་ནས་ཉི་མ་འཆར་ཁའི་ཁ་དོག་ལྟར་སེ ར་ལ་འོད་འབར་བར་གྱུར་པ་ནི་དང་པོ་བདུད་རྩིར་སྦྱང་བ་སྟེ། སམྦུ་ཊིར། འབུད་པ་སྦར་བ་ཉིད་དང་ནི། །ཁྱད་པར་དུ་ནི་བསྐོལ་བ་ཉིད། །ཤེལ་གྱི་གཟུགས་ཀྱིས་བསྐྱེད་བྱ་ཞིང་། །
ཞེས་གསུངས་སོ། །དེ་ནས་བདུད་རྩི་དེ་ཡི་རླངས་པ་ལས་དངུལ་ཆུའི་མདོག་དང་མཚུངས་པའི་ཁ་ཊྭཱྃ་ག་འོག་ཏུ་ཁ་བལྟ་སྟེ་རྩེ་མོ་ཐུར་དུ་བསྟན་པ་ཉིད་ཀྱང་ཞུ་སྟེ་བདུད་རྩིའི་བཅུད་དང་དབྱེར་མེད་དུ་འདྲེས་པར་བསམ་པ་ནི་གཉིས་པ་བདུད་རྩིར་རྟོགས་པར་བྱ་བ་སྟེ། འདུས་པའི་རྒྱུད་ཕྱི་མ་ལས། རང་བཞིན་གྱི་ལུས་ཆོས་རྣམས་ལ། །དྲི་མ་ལྔ་ཡིས་རྣམ་མཛེས་པ། །ཡེ་ཤེས་ལྔ་ཡིས་བྱིན་བརླབ་ཕྱིར། །བདུད་རྩི་ལྔ་རུ་རྟོགས་པར་བྱ། །ཞེས་གསུངས་སོ། །སླར་ཡང་བདུད་རྩི་དེ་ཡི་སྟེང་དུ་ཨཱ་ལི་སྟེ་དབྱངས་ཡིག་དཀར་པོ་དང་། ཀཱ་ལི་སྟེ་གསལ་བྱེད་དམར་པོ་གཉིས་ཡོངས་སུ་འདྲེས་ཏེ་ཞུ་བ་ལས་བྱུང་བ་དུས་གསུམ་རྒྱལ་བ་རྣམས་ཀྱི་སྐུ་རྡོ་རྗེའི་ངོ་བོ་ༀ་དཀར་པོ། གསུང་རྡོ་རྗེའི་ངོ་བོ་ཨཱཿདམར་པོ། ཐུགས་རྡོ་རྗེའི་ངོ་བོ་ཧཱུྃ་སྔོན་པོ་གསུམ་མས་རིམ་གྱིས་སྟེ་ཧཱུྃ་ཨཱཿༀ་གསུམ་མགོ་བོ་ཐུར་དུ་བལྟ་བར་གནས་པ་དེ་ལས། རྗེས་ནས་འབྱུང་བ་ལྟར་དཔའ་བོ་
སྟོབས་པོ་ཆེ་སོགས་ས་འོག་སྐུའི་འཁོར་ལོའི་དཔའ་བོ་དང་དཔའ་མོ། དཔའ་བོ་མྱུ་གུ་ཅན་སོགས་ས་སྤྱོད་གསུང་གི་འཁོར་ལོའི་དཔའ་བོ་དང་དཔའ་མོ། དཔའ་བོ་ཐོད་པའི་དུམ་བུ་སོགས་མཁའ་སྤྱོད་ཐུགས་ཀྱི་འཁོར་ལོའི་དཔའ་བོ་དང་དཔའ་མོ་རྣམས་སྤྲོས་ལ། དེ་དག་གིས་སེམས་ཅན་ཐམས་ཅད་ཀྱི་དོན་བྱས། ཡུལ་ཉེར་བཞིའི་དཔའ་བོ་དང་དཔའ་མོའི་དབང་ཕྱུག་མ་རྣམས་ཀྱི་ཕྱག་གི་ཡེ་ཤེས་ཀྱི་བདུད་རྩི་བླངས་ཏེ་བྱོན། སླར་དཔའ་བོ་དཔའ་མོ་ཡབ་ཡུམ་ཐམས་ཅད་སྙོམས་པར་ཞུགས་པ་སྔོན་དུ་འགྲོ་བས་ཞུ་བར་གྱུར་ནས་ཡིག་འབྲུ་གསུམ་ལ་ཐིམ་པའི་མོད་ཡི་གེ་གསུམ་ཡང་རིམ་གྱིས་གཅིག་ལ་གཅིག་ཐིམ་ནས་མཐར་དམ་ཚིག་གི་བདུད་རྩི་ལ་ཐིམ་པས་ཁ་དོག་དྲི་རོ་རེག་བྱ་ཕུན་སུམ་ཚོགས་པ་ཟག་མེད་ཡེ་ཤེས་ཀྱི་བདུད་རྩིར་བསམ་པ་གསུམ་པ་བདུད་རྩིར་སྦར་བ་སྟེ། སམྦུ་ཊི་ལས། གང་དུ་བདུད་རྩི་དང་ནི་ཆུ། །ལྔ་ཡི་བདག་ཉིད་དུ་ནི་གསུངས། །ཞེས་
དང་། ཡེ་ཤེས་རྡོ་རྗེས་བྱིན་བརླབས་པས། །རྣམ་པ་ལྔར་ནི་རབ་ཏུ་བསྐྱེད། །ཅེས་གསུངས་སོ། །དེ་ནས་བདུད་རྩི་དང་པོ་རང་གིས་ཅུང་ཟད་མྱང་བར་བྱས་ནས་རྗེས་སུ་ཕྱི་རོལ་འབྱུང་གཏོར་ལ་མཐེབ་སྲིན་གྱིས་འཐོར་བར་བྱ་སྟེ། ཡང་དག་སྦྱོར་བ་ལས། དེ་ནས་བདུད་རྩི་མྱང་བར་བྱ། །ལྷག་མ་ལ་སོགས་དངོས་པོ་ཀུན། །ཕྱིར་རོལ་དཀྱིལ་འཁོར་ཚིམ་པར་བྱ། །ཞེས་གསུངས་སོ། །དེ་ནས་རང་གི་སྙིང་གའི་འོད་ཟེར་གྱིས་གཏོར་མགྲོན་སྲིད་གསུམ་གྱི་འབྱུང་པོའི་རིགས་ཆེ་ཕྲ་ཐམས་ཅད་བཀུག་སྟེ། དེ་དག་ཀྱང་སྐད་ཅིག་གིས་འོད་གསལ་དུ་ཞུགས་ཏེ་འཁོར་ལོ་གསུམ་གྱི་དཔའ་བོ་དང་དཔའ་མོའི་རང་བཞིན་དུ་གྱུར་བའི་ལྗགས་འོད་ཟེར་གྱི་སྦུ་གུས་གཏོར་མའི་བཅུད་དྲངས་ཏེ་གསོལ་བར་བསམས་ལ་པད་ཀོར་རྡོར་ཐལ་ཁ་ཕྱེ་བས་མཁའ་འགྲོ་སྤྱི་གཏོར་གྱི་སྔགས་བརྗོད་པར་བྱ་སྟེ། སྔགས་དོན་ནི། དང་པོ་ༀ་ནི་བཀྲ་ཤིས་པའིདོན་དུ་
སྔགས་ཀྱི་མགོ་འདྲེན། ཁ་ཁ། ཟོ་ཟོ། ཁཱ་ཧི་ཁཱ་ཧི། ཟོ་ཞིག་ཟོ་ཞིག །སརྦ་ཡཀྵ། གནོད་སྦྱིན་ཐམས་ཅད། རཀྵ་ས། སྲིན་པོ། བྷཱུ་ཏ། འབྱུང་པོ། པྲེ་ཏ། ཡི་དྭགས། པི་ཤཱ་ཙ། ཤ་ཟ། ཨུཏྨ་ད། སྨྱོ་བྱེད། ཨ་པ་སྨ་ར། བརྗེད་བྱེད། ཌཱ་ཀ། མཁའ་འགྲོ། ཌཱ་ཀི་ནཱི་དང་ཨཱ་ད་ཡ་སྦྱར་མཐར་མང་ཚིག་བྱིན་པས། ཌཱ་ཀི་ནྱ་ད་ཡཱ་ཱམཁའ་འགྲོ་མ་ལ་སོགས་པ་རྣམས། ཨི་མཾ་བ་ལིཾ། ཟན་འདི་ལ། གྲིཧྞནྟུ། ཟུངས་ཤིག །ས་མ་ཡ་རཀྵནྟུ ། དམ་ཚིག །མ་མ་སརྦ་སིདྡྷིམྨེ་པྲ་ཡཙྪནྟུ། དངོས་གྲུབ་ཐམས་ཅད་བདག་ལ་རབ་ཏུ་སྩོལ་ཅིག །ཡ་ཐཻ་བཾ། ཇི་ལྟ་བ། ཡ་ཐེཥྚཾ། ཇི་ལྟར་འདོད་པ། བྷུཉྫ་ཐ། ཟོ་ཞིག །པི་བ་ཐ། འཐུང་ཞིག །ཛི་གྷྲ་ཐ། དྲི་སྣོམ་ཞིག །མཱ་ཏི་ཀྲ་མ་ཐ། རིམ་པ་ལས་མ་འདས་ཤིག །མ་མ། བདག་གི །སརྦ་དང་། ཨཱ་ཀཱ་ར་ཏཱ་གཉིས་སྦྱར་མཐར་གསུམ་པ་བྱིན་པས། སརྦཱ་ཀཱ་ར་ཏཱ་ཡཱ། འདོད་པ་སྒྲུབ་པ་རྣམས་ཀྱིས། སཏྶུ་ཁཾ་བི་
ཤུདྡྷ་ལ་བཞི་པ་བྱིན་པས། སཏྶུ་ཁཾ་བི་ཤུདྡྷ་ཡཱ་སྟེ། མཆོག་གི་བདེ་བ་རྣམ་པར་དག་པའི་ཆེད་དུ། ས་ཧ་ཡི་ཀཱཾ། སྟོང་གྲོགས། བྷ་ཝནྟུ། མཛོད་ཅིག །ཧཱུྃ་ཧཱུྃ་ནི། སྔགས་ཀྱི་ཀླད་ནོན་གཙོ་བོའི་ས་བོན། ཕཊྲ་ཕཊྲ་ནི་ཚར་གཅོད་པ། སྭཱ་ཧཱ་གཞི་ཚུགས་ཞེས་པ་སྟེ་སྔགས་བརྟན་པར་བྱེད་པའོ། །དེ་ནས་ལྷ་ཀླུ་གནོད་སྦྱིན་སོགས་ཀྱིས་ཕྲིན་ལས་བཅོལ་ལོ། །འདིའི་སྔགས་ཀྱི་སྐབས་ཨུཏྨ་ད་དང་ཨཱ་པ་སྨ་ར་ཡང་མཚམས་སྦྱར་བས་དབྱངས་སྐུང་དུ་སོང་བ་ཡིན་པས་སྤྱི་ལྟར་དཔྲལ་ཏེ་བཀླག་པར་བྱའོ། །དེ་ནས་མཆོད་པ་བྱིན་རླབས་བྱ་ཞིང་སྔགས་དོན་དང་ཕྱག་རྒྱ་ནི་རྗེས་ནས་འཆད་ལ། སྔགས་མཐར་སེ་གོལ་མི་བྱ་སྟེ་སེ་གོལ་ཏོག་པ་ནི་གཤེགས་པའི་བརྡ་ཡིན་པས་སོ། །དེ་ནས་སྐྱབས་ཡུལ་དཔལ་འཁོར་ལོ་སྡོམ་པ་ལ་བླ་མ་སངས་རྒྱས་ཆོས་དང་དགེ་འདུན་སོགས་སྐྱབས་གནས་རྒྱ་མཚོ་ལྟ་བུས་བསྐོར་བར་དམིགས་ལ་སྐྱབས་འགྲོ་བདུན་ནམ་ཉེར་གཅིག་སོགས་བྱའོ། །ཚིག་དོན་ནི་བདག་སོགས་
སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་མ་ཐོབ་ཀྱི་བར་དུ། དུས་གསུམ་དུ་བླ་ན་མེད་པའི་བྱང་ཆུབ་སྙིང་པོར་གཤེགས་པའི་རྒྱལ་བ་རྣམས་ཀྱི་རྒྱན་འཁོར་ལྔ་སྟེ་སྐུ་མི་ཟད་པ་རྒྱན་གྱི་འཁོར་ལོ། གསུང་མི་ཟད་པ་རྒྱན་གྱི་འཁོར་ལོ། ཐུགས་མི་ཟད་པའི་རྒྱན་འཁོར། ཡོན་ཏན་མི་ཟད་པའི་རྒྱན་འཁོར། ཕྲིན་ལས་མི་ཟད་པའི་རྒྱན་འཁོར་རྣམས་གཅིག་ཏུ་བསྡུས་པ། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་འབྱུང་གནས། འཕགས་པའི་དགེ་འདུན་ཐམས་ཅད་ཀྱི་བདག་ཉིད་དེ་དཀོན་མཆོག་གསུམ་གྱི་ངོ་བོ་བླ་མ་རྣམས་དང་། སྐུ་བཞི་ཡེ་ཤེས་ལྔ་ལྡན་གྱི་སངས་རྒྱས། བདེན་གཉིས་ཟུང་འཇུག་གི་དམ་ཆོས། ལྡན་གྲོལ་གཉིས་ལྡན་གྱི་དགེ་འདུན་རྣམས་དང་། ཁྱད་པར་དུ་རྣལ་འབྱོར་ཏེ་དཔལ་འཁོར་ལོ་སྡོམ་པ་ནི་སངས་རྒྱས་དཀོན་མཆོག །གསང་སྔགས་ཏེ་ཐབས་དང་ཤེས་རབ་ཟུང་འཇུག་གི་དོན་སྟོན་པའི་གསང་རིག་གཟུངས་གསུམ་མམ་ལྷ་
རྣམས་ཀྱི་སྙིང་པོ་ཉེ་སྙིང་རྣམས་ནི་ཆོས་དཀོན་མཆོག །འཁོར་གྱི་མཁའ་འགྲོ་མ་བཞི་དང་། སྐུ་གསུང་ཐུགས་ཀྱི་འཁོར་ལོ་གསུམ་གྱི་བདག་ཉིད་ཅན་དཔའ་བོ་དང་དཔའ་མོ་རྣམས་ནི་དགེ་འདུན་དཀོན་མཆོག་སྟེ་ཐུན་མོང་མ་ཡིན་པའི་དཀོན་མཆོག་གསུམ་ལ་སྐྱབས་སུ་འགྲོ་བའོ། །དེ་ནས་ལུས་ངག་ཡིད་གསུམ་དག་པར་བྱེད་པའི་ཕྱིར། དང་པོ་ཤྲཱི་ནི་གཉིས་མེད་སོགས་ཀྱི་དོན་བསམ་པ་ནི་ཡིད་དག་པར་བྱེད་པ་སྟེ། ལཱུ་ཡི་པའི་རིགས་དྲུག་པ་ཧེ་རུ་ཀའི་སྒྲུབ་ཐབས་ལས། ཤྲཱི་ནི་གཟུང་འཛིན་གཉིས་དང་བྲལ་བའི་ཡེ་ཤེས་ཏེ། དེ་ལ་རྒྱུ་བདག་དང་གཞན་དང་གཉིས་ཀ་ལས་སྐྱེ་བ་དང་རྒྱུ་མེད་པ་ལས་སྐྱེ་བ་རྣམ་པར་སྤངས་པས་ཧེ་ནི་རྒྱུ་སོགས་སྟོང་པ་ཉིད་དོ། །དེ་ལ་སྐྱེ་འཇིག་གནས་པ་སོགས་དང་བྲལ་བས་ན་རུ་ནི་ཚོགས་དང་བྲལ་བའོ། །དེ་ལྟར་ཡོད་མེད་དངོས་པོའི་མཐའ་ཀུན་དང་བྲལ་བའི་ཕྱིར་ཀ་ནི་མཐའ་གང་དུའང་མི་གནས་པའོ། །ཞེས་
གསུངས་པ་ལྟར་རོ། །དེ་ནས་སེམས་ཅན་ཐམས་ཅད་ལ་ཕན་པ་དང་བདེ་བའི་སེམས་ཀྱིས། ཤྲཱི་ཧེ་རུ་ཀོ྅ཧཾ་གིས་དཔལ་ཧེ་རུ་ཀ་ཉིད་ངའོ་སྙམ་པའི་ང་རྒྱལ་བཟུང་སྟེ། བདག་ཉིད་སྐད་ཅིག་གིས་དཔལ་འཁོར་ལོ་སྡོམ་པ་ཡབ་ཡུམ་དུ་བསྐྱེད་པ་ནི་ལུས་དག་པར་བྱེད་པ་སྟེ་གར་ཉམས་ནི་རྗེས་ནས་འཆད་དོ། །དེ་ལྟར་བདག་ཉིད་ཧེ་རུ་ཀའི་ལྟེ་བར་ཐོག་མར་ༀ་དང་མཐར་ཧཱུྃ་ཧཱུྃ་ཕཊྲ་ཀྱིས་བརྒྱན་པའི་དབྱངས་གསལ་འོད་ཟེར་ཁ་དོག་ལྔ་པ་ཅན་དཀར་དམར་མཐིང་གསུམ་གཡོན་སྐོར་གྱིས་ལན་གསུམ་བསྐོར་བར་བསམ་པ་ནི་ངག་དག་པར་བྱེད་པ་སྟེ་ལཱུ་ཡི་པའི་མངོན་རྟོགས་ལས། ཨཱ་ལི་ཀཱ་ལི་སྒོམ་པ་ནི་ངག་དག་པའོ་ཞེས་གསུངས་སོ། །དེ་ནས་དབྱངས་གསལ་རིམ་པ་གསུམ་དེ་ལས་འཁོར་ལོ་གསུམ་གྱི་ལྷ་ཚོགས་སྤྲོ་བར་གསུངས་པ་ནི། དང་པོ་ས་འོག་ན་སྤྱོད་པ་སྐུའི་འཁོར་ལོའི་ལྷ། དཔའ་བོ་སྟོབས་པོ་ཆེ་དང་། དེ་བཞིན་རིན་ཆེན་རྡོ་རྗེ་དང་། རྟ་མགྲིན་དང་།
ནམ་མཁའི་སྙིང་པོ་དང་། ཧེ་རུ་ཀ་དང་། པདྨ་གར་དབང་དང་། རྣམ་པར་སྣང་མཛད་དང་། རྡོ་རྗེ་སེམས་དཔའ་དང་བརྒྱད། དཔའ་མོ་འཁོར་ལོའི་ཤུགས་ཅན་དང་། དུམ་སྐྱེས་མ་དང་། ཆང་འཚོང་མ། འཁོར་ལོའི་གོ་ཆ་མ། བཞིན་བཟང་མ། སྟོབས་ཆེན་མ། འཁོར་ལོས་སྒྱུར་མ། བརྩོན་འགྲུས་ཆེན་མོ་དང་བརྒྱད་དེ་ཐམས་ཅད་སྐུ་མདོག་དཀར་པོ་ལ། དཔའ་བོ་ཐམས་ཅད་ཞལ་གཅིག་ཕྱག་བཞི་དང་པོ་གཉིས་རྡོ་དྲིལ། འོག་མ་གཉིས་ཌཱ་རུ་དང་ཁ་ཊྭཱྃ་བསྣམས་པ། ཡུམ་དཔའ་མོ་རྣམས་ཞལ་གཅིག་ཕྱག་གཉིས་གྲི་ཐོད་འཛིན་པ་ཡབ་ལ་འཁྱུད་པའོ། །དཔའ་བོ་བརྒྱད་དེའི་ངོ་བོ་ནི། ཟླ་འོད་གཞོན་ནུ། རྡོ་རྗེ་འོད། ཉི་མའི་སྙིང་པོ། རྡོ་རྗེ་འོད་ཟེར། མཐུ་ཆེན་ཐོབ། ནོར་བཟང་། བཟང་སྐྱོང་། བློ་གྲོས་རྒྱ་མཚོའོ། །དཔའ་མོ་བརྒྱད་ཀྱི་ངོ་བོ་ནི། རྒྱལ་མཚན་རྩེ་མོ། སོ་སོར་འབྲང་མ། རྨ་བྱ་ཆེན་མོ། ལོ་མ་གྱོན། ལུ་གུ་རྒྱུད། ཕྱིར་ཟློག་ཆེན་མོ། གཙུག་
ཏོར་གདུགས་དཀར་མོ། རྡོ་རྗེ་འཇིགས་བྱེད་མ་དང་བརྒྱད་དོ། །ས་སྤྱོད་གསུང་གི་འཁོར་ལོའི་ལྷ་རྣམས་ནི། སོ་སོའི་མཚན་གྱི་ངེས་ཚིག་དཔྱིད་ཐིག་དུ་འབྱུང་ཡང་ཡི་གེས་འཇིགས་ཏེ་མ་བྲིས་སོ། །དཔའ་བོ་མྱུ་གུ་ཅན་དང་། རྡོ་རྗེའི་རལ་པ་ཅན་དང་། དཔའ་བོ་ཆེན་པོ། རྡོ་རྗེ་ཧཱུྃ་མཛད། རབ་ཏུ་བཟང་པོ། རྡོ་རྗེ་བཟང་པོ། འཇིགས་བྱེད། མིག་མི་བཟང་དང་བརྒྱད། དཔའ་མོ་ས་སྲུང་མ་དང་། འཇིགས་བྱེད་ཆེན་མོ། རླུང་གི་ཤུགས་ཅན་མ། ཆང་འཐུང་མ། སྔོ་བསངས་མོ། །ཤིན་ཏུ་བཟང་མོ། རྟ་རྣ་མ། བྱ་གདོང་མ་དང་བརྒྱད་དེ་ཡབ་ཡུམ་ཐམས་ཅད་སྐུ་མདོག་དམར་པོ་ལ་ཞལ་ཕྱག་གོང་དང་འདྲ། དཔའ་བོ་བརྒྱད་ཀྱི་ངོ་བོ་ནི། སྒྲིབ་སེལ། སྤོས་ཀྱི་གླང་པོ། བློ་གྲོས་མི་ཟད་པ། ཡེ་ཤེས་ཏོག །སྤོབས་པ་བརྩེགས་པ། མྱ་ངན་མེད། ངན་སོང་ཀུན་འདྲེན། དྲྭ་བ་ཅན་གྱི་འོད་དང་བརྒྱད་དོ། །དཔའ་མོ་བརྒྱད་ཀྱི་ངོ་བོ་ནི། ཡེ་ཤེས་སྒྲོན་མ། རྡོ་རྗེ་འཇིགས་མ། གནྡ་རི། རྒྱན་ལྡན་
མ། སྒྲོལ་མ། གོས་དཀར་མོ། ཉེ་བའི་སྤྱན། ཉེ་བའི་མཱ་མ་ཀི་དང་བརྒྱད་དོ། །མཁའ་སྤྱོད་ཐུགས་ཀྱི་འཁོར་ལོའི་ལྷ་ནི། དཔའ་བོ་ཐོད་པའི་དུམ་བུ། འདིའི་སྤྲུལ་པ་འཇམ་མགོན་ཀོང་སྤྲུལ་ལོ། །ཀེང་རུས་ཆེན་པོ། ཀེང་རུས། མཆེ་བ་རྣམ་པར་གཙིགས་པ། ལྷ་དགྲ། འོད་དཔག་མེད། རྡོ་རྗེའི་འོད། རྡོ་རྗེའི་ལུས་ཏེ་བརྒྱད། དཔའ་མོ་རབ་གཏུམ་མ། གཏུམ་པའི་མིག་ཅན་མ། འོད་ལྡན་མ། སྣ་ཆེན་མ། དཔའ་བོའི་བློ་གྲོས་མ། མིའུ་ཐུང་མ། ལངྐའི་དབང་ཕྱུག་མ། ཤིང་གི་གྲིབ་མ་དང་བརྒྱད་དེ་ཡབ་ཡུམ་ཐམས་ཅད་སྐུ་མདོག་སྔོན་པོ་ལ་ཞལ་ཕྱག་ནི་སྔར་བཤད་པ་དང་འདྲ། དཔའ་བོ་བརྒྱད་ཀྱི་ངོ་བོ་ནི། ཀུན་ཏུ་བཟང་། འཇམ་དཔལ་དབྱངས། སྤྱན་རས་གཟིགས། ས་སྙིང་། ཕྱག་རྡོར། བྱམས་པ། ནམ་སྙིང་། ནམ་མཁའ་མཛོད་དོ། །དཔའ་མོ་བརྒྱད་ཀྱི་ངོ་བོ་ནི། རྡོ་རྗེ་ཕོ་ཉ་མོ། སྐུལ་བྱེད་མ། རིན་ཆེན་སྒྲོན་མ། རྡོ་རྗེ་ཉི་མ། རོ་ལངས་མ། རྡོ་རྗེ་གཞོན་ནུ་མ།
སྐམྦུ་ཛི། སངས་རྒྱས་བྱང་ཆུབ་མ་དང་བརྒྱད་ཡིན་ནོ། །དེ་དག་ཕྱི་རོལ་དུ་ཡུལ་ཉེར་བཞིར་གནས་ཚུལ་དང་ནང་དུ་རྡོ་རྗེ་ལུས་ཀྱི་རྩ་ལ་གནས་ཚུལ་ནི་ཟབ་མོ་ནང་དོན་ལས་ཤེས་པར་བྱའོ། །དེ་ལྟར་འཁོར་ལོ་གསུམ་གྱི་ལྷ་རྣམས་རང་ཉིད་ཧེ་རུ་ཀའི་སྣ་བུག་གཡས་པའི་རླུང་དང་བཅས་སྤྲོས་པས་ས་འོག་ས་སྟེང་ས་བླ་སྟེ་བར་སྣང་ལ་གནས་པའི་བགེགས་ཐམས་ཅད་བསྐྲད་ཅིང་བཅོམ་ནས་འཇིག་རྟེན་ཐམས་ཅད་འཁོར་ལོ་གསུམ་གྱི་ལྷར་གྱུར་ཏེ། སླར་ཡང་དཔའ་བོ་དང་དཔའ་མོ་ཐམས་ཅད་སྣ་བུག་གཡོན་པའི་རླུང་དང་ལྷན་ཅིག་ཏུ་ཞུགས་ཏེ་ལྟེ་བའི་སྔགས་ཕྲེང་རིམ་པ་གསུམ་སོ་སོར་ཐིམ་པར་བསམ་སྟེ། དེ་བཞིན་གཤེགས་པའི་རྡོ་རྗེའི་རྒྱ་གཞུང་ལས། ཨཱ་ལི་ཀཱ་ལི་འོད་ཟེར་ལྔ་དང་ལྡན་པ་ནི། །ཡང་དག་བཀོད་ཅིང་འཁོར་ལོ་གསུམ་ནི་སྤྲོས་ནས་དེ། །སྣ་ཡི་བུ་ག་གཡས་པའི་རླུང་དང་བཅས་ནས་སུ། །བྱུང་ནས་འཇིག་རྟེན་ཐམས་ཅད་འཁོར་ལོ་གསུམ་གྱུར་
ཏེ། །དེ་ནས་སྣ་བུག་གཡོན་པའི་རླུང་གི་ཤུགས་ལས་དྲངས། །ཞེས་གསུངས་སོ། །དེ་ནས་ཚངས་གནས་བཞི་བསྒོམ་པ་ནི། ལཱུ་ཡི་པའི་ཁྱད་པར་གསལ་བྱེད་ལས། དེ་ལ་སེམས་ཅན་ཐམས་ཅད་ལ། །བུ་གཅིག་ལྟར་བརྩེ་བྱམས་པར་གསུངས། །སྡུག་བསྔལ་གསུམ་ལྡན་འཇིག་རྟེན་ལ། །འཁོར་བ་བསྒྲལ་འདོད་སྙིང་རྗེའོ། །རང་གི་བསོད་ནམས་གཞན་ཕན་ལ། །རངས་པའི་སེམས་ཉིད་དགའ་བ་སྟེ། །ཆགས་དང་སྡང་བ་དང་བྲལ་བས། །ཐམས་ཅད་དོན་བྱེད་བཏང་སྙོམས་སོ། །ཞེས་གསུངས་པ་ལྟར་བྱམས་དང་སྙིང་རྗེ་དགའ་བ་བཏང་སྙོམ་སྟེ་ཚད་མེད་བཞི་བསྒོམས་པའི་འབྲས་བུས་ཚངས་པའི་གནས་སུ་སྐྱེ་བས་ན་ཚངས་གནས་བཞི་ཞེས་བྱའོ། །རིམ་པ་དེ་དག་ཀྱང་ལཱུ་ཡི་པའི་དཀའ་འགྲེལ་སྡོམ་པ་འབྱུང་བ་ལས། ཤྲཱི་ཧེ་རུ་ཀ་ཡི་དོན། །བསམ་ཞིང་སྡོམ་པའི་ཚུལ་དུ་བསྒྱུར། །ཨཱ་ལི་ཀཱ་ལིའི་འོད་ཟེར་གྱིས། །བགེགས་བསྐྲད་ཚངས་པའི་གནས་
བཞི་བསྒོམ། །ཞེས་གསུངས་པའི་དོན་ནོ། །དེ་ནས་ཕུང་པོ་དྲུག་རིགས་དྲུག་གི་ལྷར་བྱིན་གྱིས་བརླབ་པ་ནི། མགོ་དབུས་བུམ་ལས་སོགས་ཏེ། དེ་ཡང་གཟུགས་ནི་གཟུགས་ཀྱི་ཕུང་པོ་སྐྱེ་བའི་ས་བོན་གྱི་རྟེན་ཡིན་པས་གཟུགས་ཀྱི་གནས་ཀྱི་གཙོ་བོ་མགོ་བོར་བུམ་དཀར་པོ་ལས་གཟུགས་ཕུང་རྣམ་པར་དག་པ་རྣམ་པར་སྣང་མཛད་དཀར་པོ་གཡས་འཁོར་ལོ་དང་། གཡོན་ཐལ་མོ་མེ་ཏོག་གི་སྙེམས་པ་ཁ་བྱེ་བའི་ཚུལ་གྱིས་དྲིལ་བུ་དྲིལ་བུ་རྣམས་ལ་རང་རང་གི་རིགས་ཀྱི་ཕྱག་མཚན་གྱི་རྩེ་མོ་ཅན་དུ་བཤད་ཀྱང་རྒྱ་འགྲེལ་ལ་མེད་པས་འདིར་མ་བཀོད་དོ། །མཆན། དཀུར་བརྟེན་པ། ཚོར་བའི་ཕུང་པོ་ནི་བདེ་སྡུག་བར་མ་གསུམ་སྟེ། དེ་ཡང་གཞི་དྲོད་ལ་བརྟེན་པས་དེའི་གནས་ཀྱི་གཙོ་བོ་ལྟེ་བ་ཡིན་པས་དེར་ཨཱཾ་སེར་པོ་ལས་ཚོར་བའི་ཕུང་པོ་རྣམ་པར་དག་པ་རྡོ་རྗེ་ཉི་མ་སྟེ་རིན་འབྱུང་སེར་པོ་གཡས་རིན་པོ་ཆེ་དང་གཡོན་དྲིལ་བུ་ཐུགས་ཀར་འཛིན་པ། འདུ་ཤེས་ཀྱི་ཕུང་པོ་ནི་ཡུལ་རྣམས་འཛིན་པའི་དབང་གིས་
སེམས་དང་སེམས་བྱུང་གི་འདུ་ཤེས་སྐྱེ་བས་ན། དབང་པོ་རྣམས་ཀྱི་ཕལ་ཆེར་གྱི་རྩ་བར་གྱུར་པའི་གནས་ནི་མགྲིན་པ་ཡིན་པས་དེར་ཧྲཱིཿདམར་པོ་ལས་འདུ་ཤེས་ཀྱི་ཕུང་པོ་རྣམ་པར་དག་པ་པདྨ་གར་དབང་སྟེ་འོད་དཔག་མེད་དམར་པོ་གཡས་པདྨ་དམར་པོ་དང་གཡོན་དྲིལ་བུ་ཐུགས་ཀར་འཛིན་པ། འདུ་བྱེད་ཀྱི་ཕུང་པོ་ནི་འདོད་ཆགས་ཞེ་སྡང་ང་རྒྱལ་ཕྲག་དོག་སེར་སྣ་ལ་སོགས་པ་ལ་འཇུག་སྟེ། དེ་རྣམས་ཀྱི་རྟེན་ནི་རླུང་སྟེ། དེའི་གནས་ནི་རྐང་པའི་ལོང་བུའི་འོག་གཉིས་ཡིན་པས་དེར་ཧོཿཡིག་ལྗང་གུ་ལས་འདུ་བྱེད་ཀྱི་ཕུང་པོ་རྣམ་པར་དག་པ་རྡོ་རྗེ་རྒྱལ་པོ་སྟེ་དོན་ཡོད་གྲུབ་པ་ལྗང་གུ་གཡས་སྣ་ཚོགས་རྡོ་རྗེ་དང་གཡོན་དྲིལ་བུ་ཐུགས་ཀར་འཛིན་པ། རྣམ་ཤེས་ཀྱི་ཕུང་པོ་ནི། རྣམ་པར་ཤེས་པ་ཐམས་ཅད་ཀྱི་རྩ་བ་ནི་ཀུན་གཞིའི་རྣམ་ཤེས་ཏེ། ཡིད་ཀྱི་དབང་པོའི་རྟེན་ནི་སྲོག་རླུང་ཡིན་པས་དེའི་གནས་ནི་སྙིང་ག་ཡིན་པས་དེར་ཧཱུྃ་དཀར་པོ་ལས་རྣམ་
ཤེས་ཀྱི་ཕུང་པོ་རྣམ་པར་དག་པ་རྡོ་རྗེ་སེམས་དཔའ་དཀར་པོ་གཡས་རྡོ་རྗེ་དང་གཡོན་དྲིལ་བུ་དཀུར་བརྟེན་པ། ཕུང་པོ་ལྔ་རྣམས་ཀྱི་དེ་བཞིན་ཉིད་ལ་སྤྱི་གཙུག་ཏུ་ཧིཿནག་པོ་ལས་དེ་བཞིན་གཤེགས་པ་ཐམས་ཅད་ཀྱི་བདག་ཉིད་དཔལ་ཧེ་རུ་ཀ་ནག་པོ་གཡས་ས་གནོན་གྱིས་རྡོ་རྗེ་དང་། གཡོན་དྲིལ་བུ་དཀུར་བརྟེན་པ་བསྒོམ་པ་ནི་ཕུང་པོ་དྲུག་རིགས་དྲུག་ཏུ་བྱིན་གྱིས་བརླབས་པ་སྟེ། ལཱུ་ཡི་པའི་མངོན་རྟོགས་འགྲེལ་པ་ལས། གཟུགས་ལ་རྒྱལ་བ་རྣམ་སྣང་མཛད། །ཚོར་བར་རྡོ་རྗེ་ཉི་མ་བསྒོམ། །འདུ་ཤེས་པདྨ་གར་དབང་ཕྱུག །འདུ་བྱེད་རྡོ་རྗེ་རྒྱལ་པོ་ལ། །རྣམ་ཤེས་ཕུང་པོ་རྡོ་རྗེ་ཅན། །ཐམས་ཅད་སྟོང་ཉིད་ཧེ་རུ་ཀའོ། །ཞེས་པའི་དོན་ནོ། །དེ་ནས་སྐྱེ་མཆེད་དྲུག་བྱིན་གྱིས་བརླབ་པ་ནི། མིག་གི་སྐྱེ་མཆེད་གཉིས་ལ། ༀ་དཀར་པོ་ལས་གཏི་མུག་རྡོ་རྗེ་སྟེ་སའི་སྙིང་པོ་དཀར་པོ་གཡས་འཁོར་ལོ་ཕྱར་ཞིང་གཡོན་དྲིལ་བུ་དཀུར་བརྟེན་པ། རྣ་བའི་སྐྱེ་མཆེད་གཉིས་
སུ་ཧཱུྃ་ནག་པོ་ལས་ཞེ་སྡང་རྡོ་རྗེ་སྟེ་ཕྱག་ན་རྡོ་རྗེ་ནག་པོ་གཡས་རྡོ་རྗེ་དང་གཡོན་དྲིལ་བུ་དཀུར་བརྟེན་པ། སྣའི་སྐྱེ་མཆེད་གཉིས་སུ་ཏྲཱཾ་ལས་ཕྲག་དོག་རྡོ་རྗེ་སེར་པོ་སྟེ་ནམ་མཁའི་སྙིང་པོ་གཡས་རིན་པོ་ཆེ་དང་གཡོན་དྲིལ་བུ་ཐུགས་ཀར་འཛིན་པ། ལྕེའི་སྐྱེ་མཆེད་ལ་ཨཱཾ་ལས་འདོད་ཆགས་རྡོ་རྗེ་སྟེ་སྤྱན་རས་གཟིགས་དམར་པོ་གཡས་པདྨ་དམར་པོ་དང་གཡོན་དྲིལ་བུ་ཐུགས་ཀར་འཛིན་པ། ལུས་ཀྱི་སྐྱེ་མཆེད་ཀྱི་གཙོ་བོ་དཔྲལ་བར་ཁཾ་ལས་སེར་སྣ་རྡོ་རྗེ་སྟེ་སྒྲིབ་པ་རྣམ་སེལ་ལྗང་གུ་གཡས་སྣ་ཚོགས་རྡོ་རྗེ་ཕྱར་ཞིང་གཡོན་དྲིལ་བུ་ཐུགས་ཀར་འཛིན་པ། ཡིད་ཀྱི་སྐྱེ་མཆེད་ཀྱི་གནས་སྙིང་གར་ཧཾ་ལས་དབང་ཕྱུག་རྡོ་རྗེ་སྟེ་ཀུན་བཟང་དཀར་པོ་གཡས་རྡོ་རྗེ་དང་གཡོན་དྲིལ་བུ་དཀུར་བརྟེན་པའོ། །དེ་དག་ལ་གཏི་མུག་རྡོ་རྗེ་སོགས་སུ་བརྗོད་པའི་དོན་ནི། ཉོན་དྲུག་མ་སྤངས་གནས་སུ་དག་པའི་ངོ་བོ་ནི་རིགས་དྲུག་པོ་འདི་དག་ཡིན་པས། དེ་དག་གིས་
གདུལ་བྱ་གཞན་རྒྱུད་ཀྱི་ཉོན་དྲུག་ཕར་འཇོམས་པའི་མཐུ་ཐོགས་པ་མེད་ཅིང་། ཚུར་ནམ་ཡང་མི་ཕམ་པ་རྫས་ཀྱི་དངོས་པོ་རྡོ་རྗེ་ལྟ་བུ་ཡིན་པས་ན་དེ་སྐད་ཅེས་བྱ་སྟེ། པྲཛྙ་རཀྵི་ཏའི་དཔའ་བོ་གཅིག་པའི་སྒྲུབ་ཐབས་ལས། གཏི་མུག་རྣམ་པར་འཇོམས་པས་ན་གཏི་མུག་རྡོ་རྗེའོ། །ཞེ་སྡང་རྣམ་པར་འཇོམས་པས་ན་ཞེ་སྡང་རྡོ་རྗེའོ། །ཕྲག་དོག་རྣམ་པར་འཇོམས་པས་ན་ཕྲག་དོག་རྡོ་རྗེའོ། །ཆགས་པ་ཐམས་ཅད་འཇོམས་པས་ན་འདོད་ཆགས་རྡོ་རྗེའོ། །སེར་སྣ་ཐམས་ཅད་འཇོམས་པས་ན་སེར་སྣ་རྡོ་རྗེའོ། །ཐམས་ཅད་ལ་དབང་ཕྱུག་སྟེར་བས་ན་དབང་ཕྱུག་རྡོ་རྗེའོ། །ཞེས་གསུངས་པ་ལྟར་ཏེ། དཔེར་ན་གནས་ཀྱི་མིང་གནས་ཅན་ལ་ཐོགས་པ་ལྟར་འཇོམས་བྱའི་མིང་འཇོམས་བྱེད་ལ་ཆགས་པའོ། །དེ་ལྟར་ལྷ་བཅུ་གཉིས་པོ་ཐམས་ཅད་ཞལ་གཅིག་ཕྱག་གཉིས་སྤྱན་གསུམ་པ། ཁྲོ་འཛུམ་རལ་པའི་ཅོད་པན་དང་། སྤྱི་བོའི་གཙུག་ཏུ་ནོར་བུ་རྣ་ཆ་མགུལ་རྒྱན་ཕྱག་
ཞབས་ཀྱི་གདུ་བུ་སྐ་རགས་བཅས་ཕྱག་རྒྱ་ལྔ་དང་། ཞབས་གཉིས་གཡས་བརྐྱང་གཡོན་བསྐུམ་སྟབས་ཀྱིས་བཞུགས་པར་བསྒོམ་མོ། །དེ་ནས་འབྱུང་བའི་ཁམས་ལྔ་བྱིན་གྱིས་བརླབ་པ་ནི། ལྟེ་བར་ས་དཀྱིལ་གྲུ་བཞི་སེར་པོ་ལ་ལཱཾ་ལས་ས་ཁམས་རྣམ་པར་དག་པ་ལྟུང་བྱེད་མ་སེར་མོ་ཞལ་གཅིག་ཕྱག་བཞི་མ་གཡས་དང་པོས་འཁོར་ལོ་འཛིན་པ། སྙིང་གར་ཆུ་དཀྱིལ་དཀར་ཟླུམ་ལ་མཱཾ་ལས་ཆུ་ཁམས་རྣམ་པར་དག་པ་གསོད་བྱེད་མ་ནག་མོ་ཞལ་གཅིག་ཕྱག་བཞི་མ་གཡས་དང་པོས་རྡོ་རྗེ་འཛིན་པ། མགྲིན་པར་མེ་དཀྱིལ་དམར་པོ་གྲུ་གསུམ་ལ་པཱཾ་ལས་མེ་ཁམས་རྣམ་པར་དག་པ་འགུགས་བྱེད་མ་དམར་མོ་ཞལ་གཅིག་ཕྱག་བཞི་གཡས་དང་པོས་པདྨ་འཛིན་པ། དཔྲལ་བར་རླུང་དཀྱིལ་ཟླ་གམ་ནག་པོ་ལ་ཏཱཾ་ལས་རླུང་ཁམས་རྣམ་པར་དག་པ་པདྨ་གར་གྱི་དབང་ཕྱུག་མ་ཞལ་གཅིག་ཕྱག་བཞི་མ་གཡས་དང་པོས་རལ་གྲི་འཛིན་པ། དེ་བཞི་ཀའི་
གཡས་ཀྱི་འོག་མ་རྣམས་ཀྱིས་གྲི་གུག་དང་། གཡོན་དང་པོས་ཐོད་པ་དང་། གཡོན་འོག་མས་ཁ་ཊྭཱཾ་འཛིན་པའོ། །གསང་བར་ནམ་མཁའི་དཀྱིལ་འཁོར་ལ་ཁཾ་ལས་ནམ་མཁའི་ཁམས་རྣམ་པར་དག་པ་པདྨའི་དྲྭ་བ་ཅན་དུད་ཁ་ཞལ་གསུམ་གཡས་དཀར་གཡོན་དམར་པོ། ཕྱག་དྲུག་པའི་གཡས་གསུམ་ལྕགས་ཀྱུ་གྲི་གུག་ཚངས་པའི་མགོ་དང་། གཡོན་གསུམ་གྱིས་ཁ་ཊྭཱཾ་ག་དང་ཞགས་པ་འཛིན་པ། ལྷ་མོ་ལྔ་ཀའང་གཅེ ར་མོ་སྐྲ་གྲོལ་སྤྱན་གསུམ་པ་ཁྲོས་པའི་ཉམས་ཅན། སྤྱི་བོར་རུས་པའི་འཁོར་ལོ་སྙན་རྒྱན་མགུལ་རྒྱན་གདུབ་བུ་སྐ་རགས་བཅས་རུས་པའི་ཕྱག་རྒྱ་ལྔས་བརྒྱན་ཅིང་ཞབས་གཡས་བརྐྱང་གཡོན་བསྐུམ་གྱིས་བཞུགས་པའོ། །དེ་དག་ཀྱང་ལས་དང་རྗེས་སུ་མཐུན་པའི་མིང་ཅན་ཏེ། བདུད་དང་ལོག་འདྲེན་ཐམས་ཅད་ལྟུང་བར་བྱེད་པས་ལྟུང་བྱེད་མ་དང་། དེ་བཞིན་གསོད་པར་བྱེད་པས་གསོད་བྱེད་མ་དང་། འགུགས་པར་བྱེད་པས་འགུགས་
བྱེད་མ་དང་། པདྨའི་རིགས་ཡིན་ལ་ལས་ཁ་ཚར་ཐམས་ཅད་སྒྲུབ་པར་བྱེད་པའི་གར་ལ་དབང་འབྱོར་བས་པདྨ་གར་དབང་མ་དང་། པདྨའི་རིགས་ཀྱི་ལྷ་ཐམས་ཅད་སྤྲོ་བར་བྱེད་པས་པདྨའི་དྲྭ་བ་ཅན་ཏེ། ངོ་བོ་ནི་རིམ་པ་ལྟར་སངས་རྒྱས་སྤྱན་མ། མཱ་མ་ཀི་གོས་དཀར་མོ་དམ་ཚིག་སྒྲོལ་མ་ཆོས་ཀྱི་དབྱིངས་ཀྱི་རྡོ་རྗེ་མའི་རང་བཞིན་ཡིན་པར་ལཱུ་ཡི་པའི་མངོན་རྟོགས་ཀྱི་དཀའ་འགྲེལ་ལས་གསུངས་སོ། །ལྷ་དེ་དག་བསྐྱེད་པའི་རིམ་པ་ཡང་། ལཱུ་ཡི་པའི་སྡོམ་པ་འབྱུང་བ་ལས། གཏི་མུག་རྡོ་རྗེ་མིག་དག་ལ། །ཞེ་སྡང་དག་བྱེད་སྙན་གཉིས་ལ། །སྣ་ལ་སེར་སྣ་གསོད་བྱེད་མ། །ཁ་ལ་འདོད་ཆགས་རྡོ་རྗེ་སྟེ། །ཕྲག་དོག་རྡོ་རྗེ་ལུས་དཔྲལ་ལ། །བྱང་ཆུབ་སེམས་དཔའ་དབང་ཕྱུག་སྦྱིན། །སྐྱེ་མཆེད་རྣམས་ཀྱི་རང་སྙིང་ལའོ། །ས་ཡི་ཁམས་ནི་ལྟུང་བྱེད་མ། །ཆུ་ཡི་ཁམས་ནི་གསོད་བྱེད་མ། །མེ་ཡི་ཁམས་ནི་འགུགས་བྱེད་མ། །རླུང་ཁམས་གར་གྱི་
དབང་ཕྱུག་མ། །ནམ་མཁའི་རང་བཞིན་པད་འབར་མ། །འདི་དག་རིམ་པར་ལྟེ་བ་སྙིང་། །མགྲིན་པ་དཔྲལ་བ་གསང་གནས་སུ། །ཞེས་གསུངས་པའི་དོན་ཏོ། །དེ་དག་ཀྱང་། ཡང་ནི་གཟུགས་ལ་སོགས་པ་རྣམས། །གཟུགས་བརྙན་ལ་སོགས་བཞིན་དུ་བསམ། །ཞེས་གསུངས་པ་ལྟར། དེ་ལྟར་ཕུང་ཁམས་སྐྱེ་མཆེད་ལྷར་བསྒོམས་པ་ཐམས་ཅད་རང་བཞིན་གྱིས་ཡོངས་སུ་དག་པ་སྣང་ལ་རང་བཞིན་མེད་པ་ཆུ་ཟླ་དང་མེ་ལོང་གི་གཟུགས་བརྙན་ལྟར་ངེས་པར་བྱས་ཏེ་དོན་གསལ་གདབ་པའི་སྔགས། ༀ་པྲ་ཀྲྀ་ཏི་པ་རི་ཤུདྡྷཱཿནི་རང་བཞིན་གྱིས་ཡོངས་སུ་དག་པ། སརྦ་དྷརྨཱཿནི་ཆོས་ཐམས་ཅད། པྲ་ཀྲྀ་ཏི་བ་རི་ཤུདྡྷོ྅ ཧཾ་ནི། རང་བཞིན་གྱིས་ཡོངས་སུ་དག་པ་ངའོ། །ཞེས་པ་སྟེ། རང་བཞིན་དང་པོ་ནི་བཟུང་བ་དང་། གཉིས་པ་ནི་འཛིན་པ་དག་པ་ཡིན་པར་གསུངས་སོ། །ཕྱག་རྒྱ་པད་སྐོར་དང་འཁྱུད་ཚུལ་བྱ་བ་ནི་རྣམ་པ་ལྷར་གསལ་བ་དང་རང་བཞིན་སྟོང་པ་ཉིད་དབྱེར་
མེད་པའི་བརྡའོ། །དེ་ནས་སྲུང་འཁོར་བསྒོམ་པ་ནི། ལཱུ་ཡི་པའི་མངོན་རྟོགས་ལས། དེ་ནས་གཡོན་པའི་མཐེབ་མཛུབ་ཀྱིས། །སེ་གོལ་གཏོགས་པ་སྔོན་བཏང་ནས། །ཞེས་དང་། དྲིལ་བུ་པའི་སྒྲུབ་ཐབས་ཡིད་བཞིན་ནོར་བུ་ལས། ཧཱུྃ་གྱུར་བདེ་ཆེན་ཕྱག་གཉིས་བསམ། །ཤར་སོགས་ལུགས་དང་མི་མཐུན་དང་། །ལུགས་མཐུན་གཡོན་མཛུབ་སེ་གོལ་གཏོགས། །ཞེས་གསུངས་པ་ལྟར། བདག་ཉིད་ཧེ་རུ་ཀའི་ཕུང་ཁམས་སྐྱེ་མཆེད་དང་བཅས་པ་ལྷར་བསྐྱེད་བཞིན་པའི་ངང་ནས་ལག་གཡོན་པའི་སེ་གོལ་ཤར་ཏེ་རང་གི་མདུན་ཕྱོགས་སུ་གཏོགས་ཏེ། ༀ་སུམྦྷ་ནི་སོགས་བརྗོད་པ་དང་རང་གི་ཞལ་ནས་འོད་ཟེར་ནག་པོ་ཤར་ཕྱོགས་སུ་འཕྲོས་པ་ཡོངས་སུ་གྱུར་པ་ལས་སུམྦྷ་ནའི་སྔགས་ཀྱི་ཡིག་འབྲུ་ནག་པོ་གཟུགས་ཤིན་ཏུ་ཆེ་བས་ཚངས་པའི་གནས་ནས་ས་འོག་གི་བར་ཁྱབ་པར་བསྒོམ། དེ་བཞིན་དུ་སེ་གོལ་བྱང་སྟེ་རང་གི་གཡོན་ཕྱོགས་སུ་
གཏོགས་ཏེ། ༀ་གྲྀཧྞ་སོགས་བརྗོད་པ་དང་ཞལ་ནས་འོད་ཟེར་ལྗང་གུ་བྱང་དུ་འཕྲོས་པ་ཡོངས་སུ་གྱུར་པ་ལས་གྲྀཧྞའི་སྔགས་ཀྱི་ཡིག་འབྲུ་ལྗང་གུ་ཤིན་ཏུ་ཆེ་བ་སྔར་ལྟར་བསྒོམ། ཡང་སེ་གོལ་ནུབ་ཏེ་རང་གི་རྒྱབ་ཏུ་གཏོགས་ཏེ། ༀ་གྲྀཧྞ་པ་ཡ་སོགས་བརྗོད་པ་དང་ཞལ་ནས་འོད་ཟེར་དམར་པོ་ནུབ་ཕྱོགས་སུ་འཕྲོས་པ་ཡོངས་སུ་གྱུར་པ་ལས། གྲྀ་ཧྞཱཔ་ཡའི་སྔགས་ཀྱི་ཡིག་འབྲུ་ཤིན་ཏུ་ཆེ་བ་དམར་པོ་སྔར་ལྟར་བསྒོམ། ཡང་སེ་གོལ་ལྷོ་སྟེ་རང་གི་གཡས་སུ་གཏོགས་ཏེ། ༀ་ཨཱ་ན་ཡ་ཧོ་སོགས་བརྗོད་པས་ཞལ་ནས་འོད་ཟེར་སེར་པོ་ལྷོར་འཕྲོས་པ་ཡོངས་སུ་གྱུར་པ་ལས་ཨཱ་ན་ཡ་ཧོའི་སྔགས་ཀྱི་ཡིག་འབྲུ་སེར་པོ་གཟུགས་ཤིན་ཏུ་ཆེ་བས་ཚངས་པའི་གནས་ནས་ས་འོག་གི་བར་ཁྱབ་པར་བསམ། དེ་ནས་སླར་ཡང་ཕྱོགས་བཞིའི་སྔགས་དེ་དག་ལས་རང་མདོག་གི་འོད་ཟེར་འཕྲོས། དེ་ཡོངས་སུ་གྱུར་པ་ལས་རྡོ་རྗེའི་ར་བ་གྲུ་བཞི་པ་ཕྱོགས་ཀྱི་མདོག་ཅན། འོག་ཏུ་ཧཱུྃ་ཡིག་
ལས་སྐྱེས་པའི་སྣ་ཚོགས་རྡོ་རྗེ་ལེབ་ཆགས་ཀྱི་ལྟེར་ཧཱུྃ་ཡིག་གིས་མཚན་པའི་འོད་ཟེར་སྟེང་འོག་ཏུ་འཕྲོས་པས་འོག་རྡོ་རྗེའི་ས་གཞི་སྟེ་རྡོ་རྗེའི་རྡུལ་ཕྲ་རབ་ཀྱིས་གཏམས་པ། རྡོ་རྗེའི་རྭ་བའི་སྟེང་དུ་རྡོ་རྗེའི་གུར་ཕུབ་པའི་སྟེང་དུ་སྣ་ཚོགས་རྡོ་རྗེའི་ལྟེ་བར་རྡོ་རྗེ་ཕྱེད་པའི་ཏོག་གིས་སྤྲས་པ། འདི་གུར་ཁང་སྒོང་དབྱིབས་ཏེ་སྟེང་གི་གུར་ལ་བང་རིམ་ཟླུམ་པོ་ཡོད་པའི་སྟེང་དུ་དྲིལ་བུ་སྦུབས་པ་ལྟ་བུ་ཡོད་པ་ལ་མཆོད་རྟེན་དབྱིབས་ཅན་དུ་ཡང་གསུངས་པ་ཡོད་དོ། །མཆན། རྡོ་རྗེའི་རྭ་བརྩིགས་ཚུལ་ལ་ཡང་གསུམ་སྟེ་ལོ་ཆེན་རིན་བཟང་ལུགས་ལ་ཆུར་ཉལ་དང་། རྭ་ལུགས་ལ་གྱེན་འགྲེང་དང་། ས་ལུགས་ལ་འབུམ་བརྩིགས་ཞེས་རྩེ་མོ་གཉིས་ཕྱི་ནང་དུ་བསྟན་པར་བཞེད་དོ། །གུར་གྱི་སྟེང་ནས་རྡོ་རྗེ་རྩེ་ལྔའི་མདེའུ་ཅན་གྱི་མདའ་བསྣོལ་མའི་དྲྭ་བ་དང་། ར་བ་དང་གུར་སྦྲེལ་བའི་མཚམས་ཀྱི་ནང་ནས་རྡོ་རྗེའི་བླ་རེ་དང་། དེ་དག་གི་ཕྱི་རོལ་ནས་རྡོ་རྗེའི་མེ་དཔུང་ཁ་དོག་ལྔ་པ་ཅན་གྱིས་བར་མེད་དུ་ཁྱབ་པར་
བསམས་ལ། སྤྱིར་བཏང་ལ་རྡོ་རྗེའི་དྲྭ་མིག་བསྣོལ་མཚམས་ནས་མདའ་བསྣོལ་བ་སྐྱེས་པ་ལྟ་བུ་དང་དེའི་མདིལ་རྩེ་བསྣོལ་མཚམས་རྣམས་ནས་མེ་འབར་བར་བཤད་ཀྱང་སྐབས་འདིར་རྡོ་རྗེའི་དྲྭ་བ་མ་བཤད་དོ། །མཆན། ༀ་མེ་དེ་ནི་སོགས་ནི་རྡོ་རྗེའི་ས་གཞི་བརྟན་པར་བྱེད་པའི་སྔགས་ཏེ། མེ་དེ་ནཱི་རྡོ་རྗེའི་ས་གཞི། བཛྲཱི་བྷ་བ་རྡོ་རྗེ་ཅན་དུ་བརྗོད། བཛྲ་བནྡྷ་ཧཱུྃ། རྡོ་རྗེས་ཆིངས་ཤིག་པའོ། །དེ་བཞིན་དུ་བཛྲ་པྲཱ་ཀཱ་ར་རྡོ་རྗེའི་རྭ་བ་བརྟན་བྱེད་ཀྱི་སྔགས་ཏེ། བཛྲ་རྡོ་རྗེ། པྲཱ་ཀཱ་ར་རྭ་བའོ། །ༀ་བཛྲ་པཉྫ་ར་རྡོ་རྗེའི་གུར་བརྟན་བྱེད་ཀྱི་སྔགས་ཏེ། བཛྲ་རྡོ་རྗེ་པཉྫ་ར་གུར་རོ། །ༀ་བཛྲ་ཤ་ར་སོགས་ནི་མདའི་དྲྭ་བ་བརྟན་པར་བྱེད་པའི་སྔགས་ཏེ། བཛྲ་རྡོ་རྗེ་ཤ་ར་མདའ། ཛཱ་ལ་དྲྭ་བའོ། །ༀ་བཛྲ་ཛྭ་ལ་སོགས་ནི་ཕྱིའི་མེ་དཔུང་བརྟན་པར་བྱེད་པའི་སྔགས་ཏེ། བཛྲ་རྡོ་རྗེ་ཛྭ་ལ་འབར་བ། ཨ་ན་ལ་དང་ཨཱརྐ་སྦྱར་བས། ཨ་ན་ལཱརྐ་སྟེ་མེ་དང་ཉི་མ། བཾ་ཁཾ་སཾ་ཧཱུྃ་རྣམས་ནི་འབྱུང་བ་བཞིའི་ས་བོན་ཏེ་དེ་དག་གིས་མི་འཇིག་པའི་ཆེད་དུ་ས་
བོན་ཧཱུྃ་ཡིག་གི་བར་དུ་བཅུག་སྟེ་རྒྱས་གདབ་པའོ། །དེ་དག་ཀྱང་ལཱུ་ཡི་པའི་གཞུང་ལས། སུམྦྷ་ལ་སོགས་སྔགས་བཞི་པོ། །རྩེ་གཅིག་རྣལ་འབྱོར་བརྗོད་པ་ཡིས། །ནག་པོ་ལྗང་གུ་དམར་སེར་པོ། །ཤར་ལ་སོགས་པའི་ཕྱོགས་སུ་འགོད། །ས་འོག་ཚངས་པའི་གནས་བར་དུ། །ཁྱབ་པའི་གཟུགས་ཆེན་འབར་བ་རྣམས། །སུམྦྷ་ལ་སོགས་འོད་ཟེར་གྱིས། །ར་བ་བཞི་པོ་དེ་བཞིན་བསམ། །ཞེས་གསུངས་པའི་དོན་ཏོ། །ཡང་རང་གི་ཞལ་ནས་ཧཱུྃ་བཞིའི་སྔགས་བརྗོད་པའི་རྐྱེན་གྱིས་རིམ་པ་ལྟར་སྔར་ཕྱོགས་བཞིར་བསྒོམས་པའི་སྔགས་ཚན་བཞི་ལས་འོད་ཟེར་རིམ་པ་ལྟར་འཕྲོས་པ་ཡོངས་སུ་གྱུར་པ་ལས་ར་བའི་ཕྱི་རོལ་གྱི་ཤར་དུ་ཁྭ་གདོང་ནག་མོ། བྱང་དུ་འུག་གདོང་ལྗང་གུ། ནུབ་ཏུ་ཁྱི་གདོང་དམར་མོ། ལྷོར་ཕག་གདོང་སེར་མོ་དང་བཅས་བཞི་ཀ་གཅེར་མོ་ཤིན་ཏུ་ཁྲོས་པའི་ཉམས་ཅན་སྐྲ་བརྫེས་སྦྲུལ་དང་རུས་པའི་རྒྱན་གྱིས་བརྒྱན་པ། ཕྱག་
གཡས་ན་རྡོ་རྗེའི་ཐོ་བ་དང་གཡོན་པ་ན་རང་འདྲའི་སྐུ་སྟོད་ཅན་གྱི་ཕུར་པ་བསྣམས་པ། ལྟེ་བ་མན་ཆད་སྐུ་སྨད་ཕུར་པའི་རྣམ་པ་ཅན་ཞལ་ནང་དུ་ཕྱོགས་པར་བསྒོམ། འདི་དག་ཀྱང་མིའམ་ཅི་འདུལ་བའི་དོན་དུ་མཁའ་ལྡིང་སོགས་ཀྱི་གདོང་དུ་བསྟན་པ་ལས་ངོ་བོ་ནི་གཽ་རཱི་དང་། ཙཽ་རི། པུཀྐ་སི། བེ་ཏཱ་ལི་དང་བཞི་ཡིན་ལ། ཞལ་བཞི་ལ་ཐབས་ཁམས་གསུམ་རྣམ་རྒྱལ་དང་། བདུད་རྩི་འཁྱིལ་པ་དང་། རྟ་མཆོག་དང་། གཤིན་རྗེའི་གཤེད་དང་བཞི་སྦས་པ་ཡིན་པར་མངོན་བརྗོད་བླ་མའི་འགྲེལ་པར་གསུངས་སོ། །དེ་དག་ནི་ལུགས་དང་མི་མཐུན་པར་ལྷ་སྔགས་གཡོན་སྐོར་དུ་འགོད་པའོ། །དེ་ནས་ལུགས་མཐུན་གྱིས་མཚམས་མ་རྣམས་ཤར་ལྷོ་ནས་གཡས་སྐོར་གྱིས་རང་གི་མཚམས་བཞིར་སེ་གོལ་རིམ་པར་གཏོགས་ཏེ་རང་གི་ཞལ་ནས་སྔགས་གཉིས་གཉིས་རེ་བརྗོད་པའི་རྐྱེན་གྱིས་སྔར་བསྒོམས་པའི་ཧཱུྃ་བཞིའི་སྔགས་ལས། ༀ་སུམྦྷ་ནི་ལས་འོད་ཟེར་
ནག་པོ་དང་། ༀ་ཨཱ་ན་ཡ་ལས་འོད་ཟེར་སེར་པོ་འཕྲོས་པ་གཉིས་གཅིག་ཏུ་འདྲེས་ཏེ་ཡོངས་སུ་གྱུར་པ་ལས། ཤར་ལྷོར་གཤིན་རྗེ་བརྟན་མ་ཕྱེད་གཟུགས་ཏེ་སྐུ་ཕྱེད་གཡས་སྔོ་གཡོན་སེར་པོ། དེ་བཞིན་དུ་སྔགས་གཉིས་བརྗོད་པའི་རྐྱེན་གྱིས། ༀ་ཨཱ་ན་ཡ་ལས་འོད་སེར་པོ་དང་། ༀ་གྲྀ་ཧྞཱ་པ་ཡ་ལས་འོད་དམར་པོ་འཕྲོས་པ་གཉིས་ཡོངས་སུ་གྱུར་པ་ལས་ལྷོ་ནུབ་ཏུ་གཤིན་རྗེ་ཕོ་ཉ་མོ་གཡས་སེར་གཡོན་དམར་བ། དེ་བཞིན་ༀ་གྲྀ་ཧྞཱ་པ་ཡ་ལས་འོད་དམར་པོ་དང་། ༀ་གྲྀ་ཧྞ་ལས་འོད་ཟེར་ལྗང་གུ་འཕྲོས་པ་གཉིས་ཡོངས་སུ་གྱུར་པ་ལས་ནུབ་བྱང་དུ་གཤིན་རྗེ་མཆེ་མ་གཡས་དམར་གཡོན་ལྗང་བ། ཡང་ༀ་གྲྀ ཧྞ་ལས་འོད་ཟེར་ལྗང་གུ་དང་། ༀ་སུམྦྷ་ལས་འོད་ཟེར་ནག་པོ་འཕྲོས་པ་གཉིས་ཡོངས་སུ་གྱུར་པ་ལས་བྱང་ཤར་དུ་གཤིན་རྗེ་འཇོམས་མ་ཕྱེད་གཟུགས་གཡས་ལྗང་གཡོན་སྔོ་བ་སྟེ་ཞལ་ཕྱག་དང་ཕྱག་མཚན་རྒྱན་ཆས་ཕུར་ཤམ་སོགས་ནི་སྒོ་མ་བཞི་
དང་འདྲ་ལ། ངོ་བོ་ནི་གྷ སྨ་རཱི་དང་། ཤ་བ་རཱི། ཙཎྜ་ལི། ཌོམྦི་ནི་དང་བཞི་ཡིན་ལ། ཐབས་སྦས་པའི་ལྷ་ནི་དབྱིག་སྔོན་དང་། འདོད་པའི་རྒྱལ་པོ། མི་གཡོ་བ། སྟོབས་པོ་ཆེ་དང་བཞི་ཡིན་པར་ཨ་བྷི་དྷཱ་ནའི་འགྲེལ་པར་གསུངས་སོ། །སྐུ་སྨད་ཀྱི་ཕུར་ཤམ་ལ་རྡོ་རྗེ་རྩེ་གཅིག་གི་རྣམ་པར་གསུངས་པ་དང་། ལ་ལར་མདུང་གི་ཚུལ་དུ་གསུངས་ཤིང་། མདུང་ཞེས་པའང་ཕྱེད་ཀྲུང་སྟེ་ཕག་མོའི་ཞབས་ཀྱི་གར་སྟབས་འདྲ་བ་ལ་རྡོ་རྗེ་མཁའ་འགྲོའི་འགྲེལ་བར་གསུངས་པའང་བབ་འཕྲོས་སོ། །སུམྦྷའི་སྔགས་དོན་ནི། ༀ་ནི་སྔགས་ཀྱི་མགོ་འདྲེན། སུམྦྷ་གནོད་མཛེས། ནི་སུམྦྷ་ངེས་པར་གནོད་མཛེས། གྲྀཧྞ་གྲྀཧྞ་ཟུང་ཟུང་། གྲྀ་ཧྞཱ་པ་ཡ་གྲྀ་ཧྞཱཔ་ཡ་འཛིན་པར་གྱིས་འཛིན་པར་གྱིས། ཨཱ་ན་ཡ་ཀུན་ནས་དྲོངས་ཤིག་གམ་ཁུག་ཅིག །ཧོཿབྷ་ག་ཝཱན་བ ཛྲ་ཀྱེ་བཅོམ་ལྡན་རྡོ་རྗེའོ། །ཧཱུྃ་གཉིས་ཀྱིས་སྔ་མས་ཀུན་རྫོབ་དང་འབྲེལ་བའི་བགེགས་གཞོམ་པ་དང་ཕྱི་མས་གནོད་བྱ་
གནོད་བྱེད་གཉིས་སུ་མ་གྲུབ་པར་ཤེས་པར་བྱེད་པ་དང་། ཕཊྲ་ཀྱིས་རྣམ་རྟོག་ཉོན་མོངས་ཐམས་ཅད་དབྱིངས་སུ་གཅོད་པའོ། །དེ་ནས་སྒོ་མཚམས་མ་བརྒྱད་ཀྱིས་རང་འདྲའི་སྤྲུལ་པ་དཔག་ཏུ་མེད་པ་ཕྱོགས་མཚམས་སྟེང་འོག་བཅུར་སྤྲོས་ཏེ་ཕྱོགས་བཅུའི་བགེགས་ཚོགས་མ་ལུས་པ་ཐམས་ཅད་བཀུག་སྟེ། ར་བའི་ཕྱིར་ཧཱུྃ་ཡིག་ལས་སྐྱེས་པའི་ཁྲོན་ཟབ་སྟེ་དོང་ཆུ་ཤིན་ཏུ་གཏིང་ཟབ་པ་བརྒྱད་ཀྱི་ནང་དུ་བགེགས་རྣམས་བཅུག་པ་དང་། བདག་ཉིད་བཅོམ་ལྡན་ཧེ་རུ་ཀའི་ཞལ་ནས་སྒོ་མཚམས་བརྒྱད་ཀྱི་ཁྲོ་མོ་རྣམས་ལ་ཕུར་པ་ཐོབ་ཅེས་བཀའ་བསྒོས་པས། ཁྲོ་མོ་ཕྱོགས་ན་གནས་པ་རྣམས་ཀྱིས་བགེགས་རྣམས་ཀྱི་སྤྱི་བོར་ཕུར་པ་གཡོན་སྐོར་དུ་གདབ་ཅིང་། མཚམས་མ་བཞིས་གཡས་སྐོར་དུ་གདབ་པའི་སྔགས་ནི། ༀ་གྷ་གྷ་ནི་གསོད་པའོ། །གྷཱ་ཏ་ཡ་གྷཱ་ཏ་ཡ་ནི་གསོད་པར་གྱིས་ཤིག་གསོད་པར་གྱིས་ཤིག་གོ །སུ་བསད་ཅེ་ན། སརྦ་དུཥྚཱན་བིགྷྣཱན་ཏེ་
གདུག་པའི་བགེགས་ཐམས་ཅད་དོ། །ཀཱི་ལ་ཡ་གཉིས་ནི་ཕུར་བུས་ཐོབ་ཕུར་བུས་ཐོབ་ཅེས་སོ། །སུ་ལ་ཞེ་ན། སརྦ་པཱ་པཾ་ན་ཏེ་སྡིག་པའི་ལས་བྱེད་པ་ཐམས་ཅད་ལའོ། །ཧཱུྃ་གསུམ་དང་བཛྲ་ཀཱི་ལ་ཡ་ནི་རྡོ་རྗེའི་ཕུར་བུ་བསྐྱེད་པའོ། །སུ་ཡིས་གདབ་ཅེ་ན། བཛྲ་དྷ་ར་ཨཱ་ཛྙཱ་པ་ཡ་ཏི་སྟེ་རྡོ་རྗེ་འཛིན་པའི་བཀའ་ཡིས་སོ། །གང་ལ་གདབ་ཅེ་ན། སརྦ་དུཥྚཱ ན་བིགྷྣཱན་ཏེ་གདུག་པ་ཅན་ཐམས་ཅད་ཀྱི། ཀཱ་ཡ་སྟེ་དཔྲལ་བ། ཝཱཀ་སྟེ་མགྲིན་པ། ཙིཏྟ་སྟེ་སྙིང་གར་རོ། །སུས་གདབ་ཅེ་ན། བཛྲ་ཀཱི་ལ་ཡ་ཧཱུྃ་ཕཊྲ་ཏེ། རྡོ་རྗེ་ཕུར་བུས་སོ། །དེ་ནས་ཁྲོ་མོ་ཐམས་ཅད་ཀྱི་ཕྱག་གཡས་པའི་རྡོ་རྗེའི་ཐོ་བས་ཕུར་བུ་རྣམས་བགེགས་རྣམས་ཀྱི་སྤྱི་བོར་བརྡུངས་པས་སྤྱི་བོ་ནས་རྐང་མཐིལ་གྱི་བར་ཕུག་སྟེ། དེ་ཚེ་བརྡུང་བའི་སྔགས་ཀྱང་། ༀ་བཛྲ་མུཏྒ་ར་ནི་རྡོ་རྗེའི་ཐོ་བའོ། །བཛྲ་ཀཱི་ལ་ཡ་ནི་རྡོ་རྗེའི་ཕུར་པའོ། །ཨཱ་ཀོ་ཊ་ཡ་ནི་རྡུངས་ཤིག་པ་སྟེ་ཀཱི་ལ་ཡ་དང་དབྱངས་སྦྱར་བའོ། །ཕུར་གདབ་ཀྱི་
སྔགས་དོན་འདི་ཡང་རྒྱུད་འགྲེལ་དུ་བཀྲལ་བ་ལྟར་རོ། །དེ་ནས་བགེགས་ཚོགས་དེ་དག་གི་ལུས་ངག་ཐམས་ཅད་རྡུལ་དུ་བརླག་སྟེ་སེམས་ཉིད་བདེ་ཆེན་འོད་གསལ་དེ་ཁོ་ན་ཉིད་དུ་རང་བཞིན་ཏེ་ངོ་བོ་གཅིག་ཏུ་བྱས། བགེགས་ལྷག་མ་རྣམས་ཀྱང་རྒྱང་རིང་དུ་བསྐྲད་ནས་སྒོ་མཚམས་ཀྱི་ཁྲོ་མོ་རྣམས་དང་ཧཱུྃ་བཞིའི་སྔགས་བཅས་རྡོ་རྗེའི་ར་བ་ལ་ཐིམ་སྟེ། དཔེར་ན་ཆུ་ལ་ཆུ་བརྡབས་པས་དབྱེར་མེད་དུ་འདྲེས་ཀྱང་ཆུ་ཡི་ཟེག་མ་འཐོར་བ་ལྟར་འོད་ཟེར་ཕྱིར་འཕྲོས་པས་སླར་ཡང་རྡོ་རྗེ་དང་། པདྨ་དང་། འཁོར་ལོའི་ར་བ་ཟླུམ་པོ་བར་མེད་དུམ་བུ་གཅིག་པས་བསྐོར་བར་བསྒོམས་ལ། ༀ་བཛྲ་པྲཱ་ཀཱ་ར་ཏེ་རྡོ་རྗེའི་རྭ་བ། པདྨ་པྲཱ་ཀཱ་ར་ཏེ་པདྨའི་རྭ་བ། ཙཀྲ་པྲཱ་ཀཱ་ར་ཏེ་འཁོར་ལོའི་རྭ་བའི་སྔགས་ཀྱིས་བརྟན་པར་བྱ་བའོ། །འདི་དག་ཀྱང་ལཱུ་ཡི་པའི་གཞུང་ལས། ཁ་གདོང་མ་ལ་སོགས་པ་བཞི། །གསང་སྔགས་བཞི་ལས་བྱུང་བ་དང་། །གཉིས་གཉིས་
ཕྱོགས་འོད་ལས་བྱུང་བ། །གཤིན་རྗེ་བརྟན་མ་ལ་སོགས་བཞི། །ཞལ་གཅིག་ཕྱག་གཉིས་དེ་རྣམས་བརྒྱད། །ལྟེ་བ་མན་ཆད་ཕུར་པའི་གཟུགས། །དེ་རྣམས་གཡོན་ན་ཕུར་བུ་ནི། །དེ་དང་དེ་ཡི་ངང་ཚུལ་ཅན། །གཡས་པའི་ལག་པ་རྣམས་ལ་ནི། །རྡོ་རྗེའི་ཐོ་བ་ཆེན་པོ་འཛིན། །འཕྲོས་ཏེ་སོང་བས་ཕྱོགས་བཅུ་ན། །གནས་པའི་བགེགས་རྣམས་རབ་བཀུག་ནས། །ཧཱུྃ་རིང་ལས་བྱུང་ཕྱོགས་བརྒྱད་ཀྱི། །ཁྲོན་པར་དེ་རྣམས་རབ་བཅུག་ནས། །གདབ་པའི་སྔགས་ཀྱིས་ཕུར་བུ་གདབ། །བརྡུང་བའི་སྔགས་ཀྱིས་བརྡུང་བྱ་སྟེ། །གདབ་དང་བརྡུང་བ་དག་གིས་ནི། །དེ་བཞིན་ཉིད་དུ་རོ་གཅིག་གྱུར། །བགེགས་ཀྱི་ལྷག་མ་རྣམས་བསྐྲད་ནས། །ར་བ་ལ་ཐིམ་ལྷ་མོ་རྣམས། །ཆུ་ལ་ཆུ་ནི་གདབ་པ་བཞིན། །མཚམས་ཀྱི་བཅིངས་པའི་ཕྱིར་བྱུང་བ། །རྡོ་རྗེ་པདྨ་འཁོར་ལོ་ཡི། །ར་བ་རྣམས་ཀྱང་བསམ་པར་བྱ། །ཞེས་གསུངས་པའི་དོན་ཇི་བཞིན་ཡིན་ནོ། །སྲུང་འཁོར་གྱི་སྐབས་
འདིར་ལྷ་སྔགས་འགོད་ཚུལ་གོ་ལྡོག་ཏུ་འགོད་དགོས་པའི་དོན་ཀྱང་། རྣལ་འབྱོར་མའི་ཀུན་སྤྱོད་ལས། ལྷ་སྔགས་བཟློག་ཏེ་བཀོད་པ་དང་། །སྔགས་ཀྱི་དབྱེ་བ་བཟློག་པ་དང་། །བསྒོམ་པའི་གསང་བ་བཟློག་པ་ནི། །དངོས་གྲུབ་ཐམས་ཅད་སྒྲུབ་བྱེད་པའོ། །ཞེས་གསུངས་པ་ལྟར་རོ། །ཧཱུྃ་བཞིའི་སྔགས་ལ་སེ་གོལ་གཏོགས་པ་ནི་བཀའ་བསྒོ་བ་དང་གནས་སྲུང་བའི་བརྡ་བྱེད་པ་ཡིན་ནོ། །དེ་ནས་ཚོགས་བསགས་པ་ནི། སྲུང་འཁོར་གྱི་དབུས་སུ་བདག་ཉིད་ཧེ་རུ་ཀའི་སྙིང་གར་ཨཾ་ལས་བྱུང་བའི་ཟླ་བའི་དཀྱིལ་འཁོར་གྱི་སྟེང་དུ་ཧཱུྃ་ཡིག་སྔོན་པོ་འོད་ཟེར་སྣ་ཚོགས་འཕྲོ་བས་མདུན་གྱི་ནམ་མཁར་བླ་མ་དང་དཔལ་འཁོར་ལོ་སྡོམ་པ་རྟེན་གཞལ་ཡས་ཁང་དང་བརྟེན་པ་ལྷ་དང་བཅས་པ་སྤྱན་དྲངས་ཏེ་སྙིང་གའི་འོད་ཟེར་སླར་རང་ལ་ཐིམ་པར་བསམ། དེ་ནས་བླ་མ་དང་དཀྱིལ་འཁོར་གྱི་གཙོ་བོ་ལ་ཕྱག་འཚལ་བ་ནི། རྣལ་འབྱོར་རོ་གཅིག་སོགས་ཏེ།
ཚིག་གི་སྦས་དོན་ནི། ཡེ་ནས་གནས་པའི་མ་བཅོས་ཆོས་ཉིད་རྣལ་མ་ལ། རང་གསལ་ཀ་དག་ལྷུན་གྲུབ་ཡེ་ཤེས་ཀྱི་དབང་འབྱོར་བས་ཆོས་ཉིད་ཆོས་ཅན་ཐམས་ཅད་བདེ་ཆེན་གཉུག་མའི་ཀློང་དུ་རོ་གཅིག་ཏུ་འདྲེས་པས། ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཟུང་དུ་འཇུག་པའི་བདུད་རྩི་གསོལ་བས་རྣམ་པར་དག་པའི་ཐུགས་འོད་གསལ་གྱི་ཡེ་ཤེས་མངོན་དུ་གྱུར་པ་དང་། ནང་རྡོ་རྗེའི་ལུས་ཀྱི་རྩ་རླུང་ཐིག་ལེའི་གནས་ཚུལ་ལ་སོགས་པ་ཐབས་ཀྱི་རྣམ་པ་ལ་བརྟེན་ཏེ། གཟུང་འཛིན་ཟླ་ཉིའི་རླུང་གི་འགྲོས་ཐམས་ཅད་དོན་དམ་འཕོ་མེད་དྷཱུ་ཏིའི་ཡུལ་དུ་བགྲོད་པས་རྣམ་པར་དག་པའི་ཡེ་ཤེས་ཀྱི་སྐུ་མངོན་དུ་གྱུར་པ་དང་། དཔལ་གྱི་གནས་ཀྱི་དབུས་མཆོག་སྟེ་སྙིང་ག་ཆོས་ཀྱི་འཁོར་ལོའི་དྭངས་མ་མི་ཤིགས་པའི་ཐིག་ལེ་ཉིད་འཕོ་མེད་དུ་བརྟེན་པའི་དཀྱིལ་འཁོར་གྱི་འཁོར་ལོའི་མགོན་པོ་སྟེ། གཙོ་བོ་དཔལ་ལྡན་བདེ་བ་མཆོག་དང་། རིགས་བརྒྱའི་
ཁྱབ་བདག་དཔལ་ལྡན་བླ་མ་མཆོག་ལ་སྤྱི་བོས་བཏུད་དེ་སྒོ་གསུམ་གུས་པས་རྟག་ཏུ་ཕྱག་འཚལ་ལོ་ཞེས་པའོ། །དེ་ནས་འཁོར་ལོ་གསུམ་གྱི་དཔའ་བོ་དང་རྣལ་འབྱོར་མ་ལ་ཕྱག་འཚལ་བ་ནི། ལྷ་མོའི་ཕྲེང་བ་ནི་རྩའི་མིང་ཡིན་པས་རྩའི་འཁོར་ལོའི་རང་བཞིན་རྣམས་གཙོ་བོའི་སྐུའི་དབྱིབས་སུ་གསལ་བ་སྟེ། ཕྱི་རོལ་གྱི་ཡུལ་ཉེར་བཞི་པོ་རྣམས་ནང་རྡོ་རྗེ་ལུས་ཀྱི་རྩའི་བཀོད་པ་ལ་རྫོགས་ཤིང་དེར་བཞུགས་པའི་དཔའ་བོ་ཡབ་ཡུམ་རྣམས་ལ་རིན་པོ་ཆེ་རྣམས་སུ་གསུངས་ཏེ་སྐུ་ཡི་རྒྱན་ལྟ་བུ་ཡིན་པས་སོ། །དེ་ལྟར་འཁོར་ལོ་གསུམ་གྱི་དཔའ་བོ་དང་དཔའ་མོ་རྣམས་ཀྱིས་རྟག་ཏུ་སྤྲས་པའི་སྐུ་རྣམས་ནི་དུས་ཀུན་ཏུ་འཕོ་མེད་དུ་བཞུགས་པ་ཡིན་པའི་ཕྱིར་ན་གཙོ་བོའི་ནང་གི་འཁོར་ལོ་གསུམ་ལ་གནས་པའི་མགོན་མཆོག་ལྷན་ཅིག་སྐྱེས་པའི་དཔའ་བོ་དང་རྣལ་འབྱོར་མའི་ཚོགས་ཉེས་པའི་སྐྱོན་གྱི་དྲི་མ་མེད་པ་དེ་དག་ལ་ཡང་། བདེ་བ་མཆོག་གི་རྣལ་འབྱོར་
སྙིང་པོར་བྱེད་པ་བདག་གིས་ནི་རྟག་ཏུ་གུས་པས་ཕྱག་འཚལ་ལོ། །ཞེས་པའོ། །འདི་ཡི་དོན་འགྲེལ་ས་བོན་ཙམ་ཞིག་དཀའ་འགྲེལ་པདྨ་ཅན་དུ་བཞུགས་པ་ལ་བརྟེན་ཏེ་སླར་གོ་གསལ་དུ་བཀོད་པ་ཡིན་ནོ། །སླར་ཡང་རང་གི་སྙིང་གའི་ས་བོན་ལས་བྱུང་བའི་ལྷ་མོ་པི་ཝཾ་མ་སོགས་པས་མཆོད། སྦེག་ལ་སྒེག་ཅིང་ཞེས་པའི་སྦེག་པ་ནི་སྐུའི་ཤ་སྐེམ་པའི་དོན་དང་སྒེག་པ་ནི་རྒྱན་གྱིས་མཛེས་པའོ། །སྔགས་དོན་ནི་རྗེས་ནས་འཆད། སླར་ཡང་སྙིང་གའི་ས་བོན་ལས་སྤྲོས་པའི་མཁའ་འགྲོ་མ་བཞི་མཆོད་ལ། སྔགས་དོན་ནི། པཉྩ་ཨ་མྲྀ་ཏ་བདུད་རྩི་ལྔ། པཱུ་ཛ་མེ་གྷ་ས་མུ་དྲ་མཆོད་པའི་སྤྲིན་རྒྱ་མཚོ། སྥ་ར་ཎ་འཕྲོ་བ། ས་མ་ཡ་ཧཱུྃ་ནི་མ་འདའ་ཞིག་ཅེས་པའོ། །དེ་ནས་མཆོད་ལྷ་དེ་རྣམས་ཡུམ་ལ་ཐིམ་པས་ཡབ་ཡུམ་བདེ་ཆེན་གྱི་ཡེ་ཤེས་མཆོག་ཏུ་འཕེལ་བར་བསམས་ལ་ཕྱག་རྒྱ་འཁྱུད་ཚུལ་དང་བཅས་ཏེ་སྔགས་ༀ་ཤྲཱི་མ་ཧཱ་སུ་ཁ་ནི་དཔལ་བདེ་བ་ཆེན་པོ། ཧེ་ཧེ་རུ་རུ་བཞི་ནི་
དགའ་བ་བཞི། ཀཾ་ནི་དངོས་འཛིན་བྲལ་བ། ཨཱ་ཧཱུྃ་ཧཱུྃ་ཕཊྲ་བཞི་ནི་དགའ་བཞི་འཕོ་མེད་དུ་བརྟན་པར་བྱེད་པ། སྭཱ་ཧཱ་ནི་དེ་དག་གི་གཞི་ཚུགས་ཞེས་པའོ། །དེ་ནས་འདོད་ཆགས་ཞེ་སྡང་སོགས་ཡན་ལག་རྣམ་པ་ལྔའི་ཚིག་དོན་ནི་གོ་སླའོ། །དེ་ནས་ཚོགས་ཞིང་རྣམས་རང་ལ་བསྟིམ་པའི་མཐར། རང་ཉིད་ཀྱི་སྤྱི་མགྲིན་སྙིང་ག་གསུམ་དུ་ཧེ་དཀར་པོ་དང་རུ་དམར་པོ་ཀ་སྔོན་པོ་གསུམ་བསྒོམས་ལ། ཧེ་ནི་རྒྱུ་སོགས་ཀྱི་དོན་སྔར་བཤད་པ་ལྟར་བསམ། ཆོས་ཀུན་ལ་རང་བཞིན་མེད་པ་དེ་ལྟར་མ་ཤེས་ནས་འགྲོ་ཀུན་བདག་ཏུ་འཛིན་པས་འཁོར་བར་གྱུར་བས་ན། བདག་ནི་ཧེ་རུ་ཀར་གྱུར་ཏེ་གཟུང་བ་དང་འཛིན་པ་གཉིས་དང་བྲལ་བའི་ཆོས་ཁོང་དུ་ཆུབ་པར་བྱ་སྟེ་དེ་དོན་བསྒྲུབ་པར་བྱའོ་སྙམ་མོ། །ཚུལ་དེ་དག་ཀྱང་ལཱུ་ཡི་པའི་གཞུང་ལས། དེ་ནས་སྙིང་གར་ཨཾ་ལས་ཟླ་བའི་དཀྱིལ་འཁོར་ཏེ། །དེ་ཡི་སྟེང་དུ་ཧཱུྃ་ཡིག་འོད་ཟེར་དང་ལྡན་བསམ་བྱས་ཏེ། །དེ་ཡི་
འོད་ཀྱིས་བཀུག་ནས་མདུན་དུ་དཀྱིལ་འཁོར་ལ། །ཕྱག་འཚལ་ལ་སོགས་བདུན་དང་བདག་ཉིད་འབུལ་བར་བྱ། །ཧེ་རུ་ཀ་ཡིག་སྤྱི་བོ་མགྲིན་པ་སྙིང་ག་རུ། །རིམ་པས་བལྟས་ཏེ་སྟོང་པ་ཉིད་བསྒོམ་གསང་སྔགས་བརྗོད། །ཅེས་གསུངས་པའི་དོན་ཏེ། དེ་ནས་དང་པོ་འཆི་སྲིད་སྦྱོང་བའི་ཕྱིར་བདག་དང་ཁམས་གསུམ་ཐམས་ཅད་རང་བཞིན་འོད་གསལ་སྟོང་ཉིད་དུ་ཐིམ་པར་བསམས་ལ། ༀ་སྭ་བྷཱ་བཱ་ཤུདྡྷཿསྟེ་རང་བཞིན་གྱིས་ཡོངས་སུ་དག་པའོ། །གང་དག་ཅེ་ན། སརྦ་དྷརྨཱཿསྟེ་ཆོས་ཐམས་ཅད་དོ། །ཅིའི་རང་བཞིན་དུ་དག་ཅེ་ན། རང་བཞིན་ནི་མ་བཅོས་པ་ཡིན་པའི་ཕྱིར། སྭ་བྷཱ་བ་ཤུདྡྷོ ྅ཧཾ་སྟེ་རང་བཞིན་གྱིས་དག་པ་ནི་ངའོ། །ཞེས་སོ། །དེ་ལྟར་ཁམས་གསུམ་པོ་ཐམས་ཅད་བློས་བྱས་ཀྱི་སྟོང་པ་ཙམ་མ་ཡིན་པར་རང་བཞིན་གྱིས་ཐམས་ཅད་སྟོང་པར་བསམ་མོ། །གཉིས་པ་བར་སྲིད་སྦྱོང་བའི་ཕྱིར་དུ་སླར་ཡང་སྔོན་གྱི་སྨོན་ལམ་གྱི་སྟོབས་ཀྱིས་རང་གི་
སེམས་ཉིད་སྟོང་པའི་རང་རྩལ་ལས་རྒྱལ་བ་རྣམས་ཀྱི་སྐུ་གསུང་ཐུགས་ཀྱི་རྡོ་རྗེའི་ངོ་བོ་ༀ་དཀར་ཨཱཿདམར་ཧཱུྃ་མཐིང་གསུམ་བརྩེགས་མར་གནས་པ་དེ་ལས་གོང་བཤད་ལྟར་སྐུ་གསུང་ཐུགས་ཀྱི་འཁོར་ལོའི་ལྷ་རྣམས་སྤྲོས་པས། འགྲོ་ཀུན་འཁོར་ལོ་གསུམ་གྱི་ལྷར་བྱས། དེ་ཐམས་ཅད་ཡབ་ཡུམ་སྙོམས་པར་ཞུགས་ཏེ་འོད་དུ་ཞུ་བ་ཡི་གེ་གསུམ་སོ་སོར་ཐིམ་པའི་མཐར་ༀ་ཨཱཿལ་ཐིམ། ཨཱཿཧཱུྃ་ལ་ཐིམ། ཧཱུྃ་དེ་ཡང་ཞབས་ཀྱུ་ཁོག་པ་ལ་ཐིམ། ཁོག་པ་མགོ་བོ་ལ། དེ་ཟླ་ཚེས་ལ། ཟླ་ཚེས་ཐིག་ལེ་ལ། ཐིག་ལེ་ནཱ་ད་ལ། ནཱ་ད་དེ་ཡང་སྐྲ་ཡི་རྩེ་མོ་སྟོང་དུ་གཏུབ་པའི་ཆ་ཙམ་དུ་གནས་པར་བསམ་པ་ནི་བར་དོའི་རྣམ་ཤེས་སྣང་བ་ལ་ཐིམ་པ་དང་། སྣང་བ་མཆེད་པ་ལ་ཐིམ་པ་དང་། མཆེད་པ་ཉེར་ཐོབ་ལ་ཐིམ་པ་རྣམས་སྦྱོང་བའོ། །དེ་ནས་འདི་ལྟར་མ་རིག་འཁྲུལ་པའི་སེམས་ཅན་ཐམས་ཅད་ཆོས་ཐམས་ཅད་ཀྱི་ཆོས་ཉིད་རང་བཞིན་འོད་གསལ་མ་རྟོགས་པས་
འཁོར་བ་ལ་གནས་སོ་སྙམ་པའི་སྙིང་རྗེ་བྱ་བ་ནི་སེམས་ཅན་ལ་དམིགས་པའི་སྙིང་རྗེ་དང་ཆོས་ལ་དམིགས་པའི་སྙིང་རྗེ་གཉིས་སོ། །བདག་གིས་ཆོས་ཉིད་ཟབ་མོའི་དོན་མངོན་དུ་བྱས་ནས་འགྲོ་བ་རྣམས་ཀྱིས་ཀྱང་ཟབ་མོ་ཆོས་ཉིད་དེ་བཞིན་རྟོགས་པར་བྱའོ་སྙམ་པ་ནི་དམིགས་པ་མེད་པའི་སྙིང་རྗེའོ། ། དེ་ནས་དངོས་གཞི་རྟེན་གཞལ་ཡས་ཁང་བསྐྱེད་པའི་ཐོག་མར་གཞི་སྟོང་ཉིད་ལ་མངོན་པར་བྱང་ཆུབ་པ་ནི། ༀ་ཤཱུནྱ་ཏཱ་སོགས་ཏེ། ༀ་ནི་སྔགས་ཀྱི་ནོར་བུ་འཛིན་པ། ཤཱུནྱ་ཏཱ་ནི་སྟོང་པ་ཉིད་དེ། རྡོ་རྗེ་མཁའ་འགྲོ་ལས། གཟུགས་ནི་ཐམས་ཅད་སྟོང་པ་ཉིད། །སྟོང་པའི་ཚུལ་གྱིས་མིག་གིས་ནི། །དོགས་པ་མེད་པར་བསྒོམ་པའི་མཆོག །རྣམ་པར་མི་རྟོག་པ་ཡིས་བལྟ། །ཞེས་གསུངས་པ་ལྟར་འདི་ལྟར་གཟུགས་སོགས་སྣང་བའི་ཆོས་ཐམས་ཅད་ངོ་བོས་མ་གྲུབ་པས་ན་གདོད་ནས་སྟོང་པའོ། །འོ་ན་ཆོས་ཉིད་དེ་བཞིན་ཉིད་ཀྱང་ཅི་ཡང་མེད་པའི་སྟོང་པ་ཕྱང་ཆད་
ཅིག་ཡིན་ནམ་སྙམ་ན། ཛྙཱ་ན་ནི་ཡེ་ཤེས་ཏེ། རྒྱུད་གསེར་ཕྲེང་ལས། ཡེ་ནས་གནས་པའི་དོན་གང་ཞིག །མངོན་པར་ཤེས་ཕྱིར་ཡེ་ཤེས་བརྗོད། །ཅེས་གསུངས་པ་ལྟར་རང་བྱུང་ཡེ་ཤེས་ཉིད་སྨྲ་རྟོག་དངོས་པོའི་མཚན་མ་ལས་འདས་ཀྱང་། རྣལ་འབྱོར་ཅན་གྱི་སོ་སོ་རང་རིག་ཡེ་ཤེས་ཀྱི་སྤྱོད་ཡུལ་ཅན་ནོ། །བཛྲ་ནི་རྡོ་རྗེ་སྟེ། མཁའ་འགྲོ་མ་གསང་བ་འབར་བའི་རྒྱུད་ལས། གཟུང་འཛིན་རྟོག་པས་མི་ཕྱེད་ཕྱིར། །དོན་གྱི་རྡོ་རྗེར་བཤད་པའོ། །ཞེས་གསུངས་པ་ལྟར་རྡོ་རྗེའི་ཡེ་ཤེས་དེ་ཉིད་གཟུང་འཛིན་དངོས་པོའི་མཚན་མ་གང་གིས་ཀྱང་གཞིག་ཏུ་མེད་པ་དང་། དེའི་ངོ་བོའམ་རང་བཞིན་ལ་ནམ་ཡང་འགྱུར་བ་མེད་པས་ན་རྡོ་རྗེའོ། །སྭ་བྷཱ་བ་ནི་རང་བཞིན་ཏེ། སློབ་དཔོན་ཆེན་པོ་ནཱ་གཱརྫུ་ནས། རང་བཞིན་དག་ནི་བཅོས་མིན་ཏེ། །གཞན་ལ་ལྟོས་པ་མེད་པའོ། །ཞེས་གསུངས་པ་ལྟར། མ་བཅོས་རང་བཞིན་གདོད་མའི་གནས་ལུགས་ནི་
རྐྱེན་གང་ལའང་མ་ལྟོས་པར་རང་བཞིན་གྱིས་དག་པའོ། །ཨཱཏྨ་ཀོ྅ཧཾ་ནི་བདག་ཉིད་ངའོ་སྟེ། གོང་གསལ་ཡེ་ཤེས་རྡོ་རྗེ་དེ་ཉིད་མངོན་དུ་གྱུར་པའི་བདག་ཉིད་ཅན་དེ་སུ་ཡིན་ཞེ་ན་བསྐལ་པ་དྲུག་དང་ལྡན་པའི་བཅོམ་ལྡན་འདས་ངའོ་ཞེས་གསུངས་ཏེ། དཔལ་སྡོམ་པའི་རྒྱུད་ལས། དབང་ཕྱུག་དང་ནི་གཟུགས་བཟང་དང་། །དཔལ་དང་གྲགས་དང་བསྐལ་པ་བཟང་། །ཡེ་ཤེས་ཕུན་སུམ་ཚོགས་པ་ནི། །དྲུག་པོ་དེ་ལ་ལྡན་ཅེས་གསུངས། །ཞེས་གསུངས་སོ། །དེ་དག་གི་ཕྱིར་ན་སྔགས་དོན་ལྟར་ཆོས་ཉིད་ཀྱི་དོན་ལ་མཉམ་པར་བཞག་པ་མ་གཏོགས་སྔགས་བརྗོད་པས་ཐམས་ཅད་སྟོང་པར་སོང་སྙམ་ན་ནི་སྟོང་ཉིད་རྒྱས་འདེབས་སུ་ཤོར་བ་ཡིན་པས་སྐབས་ཕྱེད་པ་གཅེས་སོ། །དེ་ལྟར་ཐམས་ཅད་སྟོང་པ་འོད་གསལ་བའི་རང་བཞིན་གྱི་ངང་ལས་སྲུང་འཁོར་གྱི་དབུས་སུ་ཡི་གེ་ཨེ་དཀར་པོ་ཡོངས་སུ་གྱུར་པ་ལས་ཆོས་ཀྱི་འབྱུང་གནས་གྲུ་གསུམ་པ་དཀར་པོ་ཤིན་ཏུ་
ཡངས་ཤིང་རྒྱ་ཆེ་བ་ཟུར་མདུན་བསྟན། སྟེང་ངོས་ཡངས་ལ་རྩ་བ་ཕྲ་བའི་རྣམ་པ་ཅན་དུ་བསྒོམ་པ་ནི་ཆོས་ཐམས་ཅད་ནམ་མཁའི་རང་བཞིན་རྣམ་པར་དག་པ་མཚོན་པ་དང་། ཟུར་གསུམ་གྱིས་སྐུ་གསུང་ཐུགས་རྣམ་པར་དག་པ་མཚོན་པའོ། །དེ་ཡང་ངོ་བོ་ནི་ཆོས་ཀྱི་དབྱིངས་ཀྱི་རང་བཞིན་ཐར་པ་ཆེན་པོའི་ཕོ་བྲང་ལ། དེ་རྟེན་དང་བརྟེན་པའི་དཀྱིལ་འཁོར་ཐམས་ཅད་ཀྱི་འབྱུང་གནས་ཡིན་པས་ན་ཆོས་འབྱུང་ཞེས་བྱའོ། །དེའི་ནང་དུ་ཡཾ་ཡིག་ལས་རླུང་དཀྱིལ་སྔོན་པོ་གཞུ་ཡི་དབྱིབས་ཅན་ལ་མཐའ་གཉིས་སུ་རྒྱལ་མཚན་སྔོན་པོ་གཉིས་ཀྱིས་བརྒྱན་པ་སྟེ། དེའང་རྒྱ་གར་ལུགས་ལ་དབྱུག་པ་ནོར་བུའི་ཏོག་གིས་མཚན་པའི་མགུལ་དུ་དར་བཏགས་པའི་སྣེ་འཕྱང་བ་ལ་རྒྱལ་མཚན་ནམ་བ་དན་ཅེས་མིང་འདོགས་སོ། །དེའི་སྟེང་དུ་རཾ་ལས་མེ་དཀྱིལ་མེའི་རྩེ་མོ་བདུན་ལྡན་དམར་པོ་གྲུ་གསུམ་རཾ་གྱིས་མཚན་པ། དེའི་སྟེང་དུ་བཾ་ཡིག་ལས་ཆུ་དཀྱིལ་
དཀར་པོ་ཟླུམ་པོ་བུམ་པས་མཚན་པ། དེའི་སྟེང་དུ་ལཾ་ཡིག་ལས་ས་དཀྱིལ་སེར་པོ་གྲུ་བཞི་པ་རྡོ་རྗེ་རྩེ་གསུམ་གྱིས་མཚན་པ། དེ་དག་གི་སྟེང་དུ་སླར་ཡང་སོ་སོའི་ས་བོན་གྱིས་མཚན་པ། དེ་ཡི་སྟེང་དུ་སུཾ་ལས་རིན་ཆེན་སྣ་བཞི་ལས་གྲུབ་པའི་ལྷུན་པོ་གྲུ་བཞི་པོ་ཤར་ཤེལ། ལྷོ་བཻ་ཌཱུཪྻ ། ནུབ་པདྨ་རཱ་ག །བྱང་གསེར་གྱི་ཁ་དོག་ཅན་ཕྱེད་མན་ཆད་ལ་བང་རིམ་བཞི་པ། སྟེང་ངོས་གྲུ་བཞིའི་ཟུར་བཞི་དང་ལོགས་བཞི་ལ་རྩེ་མོ་རེ་རེ་སྟེ་ལྕོག་བརྒྱད་ཀྱིས་མཛེས་པ་སྟེ། དེ་ལྟར་འབྱུང་བ་རིམ་བརྩེགས་སྒོམ་པ་ནི་འབྱུང་བ་ལྔ་རྣམ་པར་དག་པ་མཚོན་པའོ། །དེའི་སྟེང་དུ་པཾ་ལས་སྣ་ཚོགས་པདྨ་འདབ་མ་སྟོང་ལྡན་གྱི་སུམ་ཆ་གྱེན་དུ་ལངས་པའི་པདྨའི་ཟེའུ་འབྲུར་ཉི་མ་ལ་གནས་པའི་ཧཱུྃ་ལས་བྱུང་བའི་སྣ་ཚོགས་རྡོ་རྗེ་རྭ་ཉི་ཤུ་པའམ་བཅུ་གཉིས་གང་རུང་ལེབ་ཆགས་སུ་བསྒོམ་པ་སྟེ། སྔ་མས་འཇིགས་ཚོགས་ལ་ལྟ་བ་ཉི་ཤུ་འཇོམས་པ་དང་ཕྱི་མས་རྟེན་འབྲེལ་བཅུ་གཉིས་དག་པ་
དང་། རྭ་རྣམས་ཀྱང་གཞལ་ཡས་ཁང་གི་ཕྱོགས་མདོག་དང་ལྟེ་བ་ནི་མཐིང་གའོ། །དེའི་ལྟེ་བར་རྣམ་པར་སྣང་མཛད་ཀྱི་ངོ་བོ་ཡི་གེ་བུམ་ཡོངས་སུ་གྱུར་པ་ལས་གཞལ་ཡས་ཁང་ཚད་དང་མཚན་ཉིད་ཐམས་ཅད་རྫོགས་པ་བསྒོམ་པ་སྟེ། དང་པོ་ཚད་ཀྱི་ངེས་པ་ནི། གཞལ་ཡས་ཁང་དངོས་ཀྱི་རྒྱུ་ཁྱོན་ཇི་ཙམ་བྱེད་པའི་ས་ཁྱོན་གྱི་ལོགས་རེར་དུམ་བུ་བཅུ་གཉིས་མཉམ་པར་བགོས་པའི་ཆ་རེ་ལ་ཆ་ཆེན་དང་སྒོ་ཚད་དང་གཙོ་བོའི་འདོམ་གང་ཞེས་མིང་སོ་སོར་བཏགས་ཀྱང་དོན་འདྲ་བ་ཡིན་ལ། དེའི་བཞི་ཆ་རེ་ལ་ཁྲུ་དང་ཆ་ཕྲན་ཞེས་མིང་གི་བརྡ་བྱེད་དོ། །དེའང་ཇི་ལྟར་གཞལ་ན་འོག་གཞི་སྣ་ཚོགས་རྡོ་རྗེའི་ལྟེ་བ་གྲུ་བཞི་ལ་ཆ་ཆེན་བཅུ་གཉིས་ཡོད་པ་དེའི་ཕྱི་མཐའ་ནས་ཕྱོགས་སོ་སོར་ཆ་ཕྲན་བདུན་རེ་གཞལ་མཚམས་ན་རྩིགས་པ་རིམ་ལྔ་ཡོད་ལ། དེའང་ནང་ནས་རིམ་པ་ལྟར་བཻ་ཌཱུརྻ་སྔོན་པོ། པདྨ་རཱ་ག་དམར་པོ། གསེར་སེར་པོ། ཤེལ་དཀར་པོ། མ་ར་ཀ་
ཏ་ལྗང་གུ་རྣམས་ཤོག་ལྡེབ་བསྒྲིགས་པ་ལྟར་རེག་ལ་མ་འབྱར་བ། ལྔ་ཀ་བསྡོམས་པའི་རྩིགས་ཞེང་ལ་ཁྲུ་གང་བ། དཔངས་སུ་མཐོ་དམན་རྟ་བབས་དང་བསྟུན་དགོས་པས་རྟ་བབས་ཀྱི་ཚད་མི་འདྲ་བ་མང་ཡང་འདི་རྟ་བབས་བཅུ་གཅིག་པ་ཡིན་ཕྱིར་སྒོ་ཚད་གསུམ་མ་ཉིད་འཚམས་པས་རྩིགས་དཔངས་ལ་ཆ་ཆུང་བཅུ་གཉིས་དགོས་སོ། །རྩིགས་པའི་ཕྱི་ངོས་ཀྱི་རྩ་བར་གཞི་རིན་པོ་ཆེ་དམར་པོའི་རང་བཞིན་གྱི་འདོད་སྣམ་རྩིགས་ཞེང་དང་དཔངས་གཉིས་ཀར་ཆ་ཕྲན་གཉིས་རེ་ཅན་སྒོ་ཁྱུད་འཕྲད་པ་ནས་སྣེ་ཟད་པས་འདི་གཞུང་ནས་འདི་ལ་སྟེགས་བུ་བཞི་ཞེས་གསུངས་པ་དེའོ། །རྩིགས་པ་དེའི་རྩེ་ནས་ཕ་གུ་སེར་པོ་ལ་རིན་པོ་ཆེའི་ཕྲ་ཚོམ་བཏབ་པ་ཅན་གྱི་རྩིགས་ཞེང་དང་དཔངས་ལ་ཆ་ཕྲན་གཅིག་པ། དེའི་སྟེང་དུ་བྲེ་སྤུངས་ཏེ་ཀ་ཐུང་ཀ་ཞུ་དང་བཅས་པའི་དཔངས་སུ་ཆ་ཕྲན་གཉིས་ཡོད་པས་གསེར་གདུང་བཏེགས་པ། ཀ་ཐུང་དེ་རྣམས་ཀྱི་བར་སྟོང་ལ་མུན་སྣམ་
ཞེས་བྱ་ལ། ཀ་ཞུའི་ངོས་ལ་རིན་པོ་ཆེའི་གཟེར་བུ་གཅིག་དང་། ཀ་བའི་ངོས་ལ་གཟེར་བུ་བཞི་རེ་ཐམས་ཅད་ལ་བཏབ་པ་ལ་གསེར་གྱི་སྐུད་པ་བཞི་རེ་འཕྲེད་ལ་འཐེན་ཅིང་གཟེར་བུ་རེ་ལ་གཅུད་རེ་བོར་བ་དང་། ཀ་ཞུའི་སྟེང་གི་གཟེར་བུ་ལ་འདོགས་པའི་ཆུ་སྲིན་ཙི་པ་ཊ་སྟེ་ཆུ་སྲིན་ཉ་མིད་དུ་གྲགས་པའི་ཁ་ཁུག་ནས་རིན་པོ་ཆེའི་ཕྲེང་བ་རིང་ཐུང་གསུམ་སྦྲེལ་བ་ལ་དྲྭ་བ་ཞེས་བྱ་ལ། ཁའི་དབུས་ནས་མར་ཕྲེང་བའི་བཅུ་ཚར་འདྲ་བ་གསུམ་རེ་དཔྱངས་པ་ལ་དྲྭ་བ་ཕྱེད་པ་ཞེས་བྱ་ལ། དེའི་སྣེར་དྲིལ་ཆུང་དང་ཟླ་ཕྱེད་རྔ་ཡབ་ཀྱིས་བརྒྱན་པ་རླུང་གིས་བསྐྱོད་པ་དང་སྒྲ་འབྱིན་པའོ། །དེ་ནས་གཞལ་ཡས་ཀྱི་སྒོ་དང་རྟ་བབས་ཀྱི་ཚད་དང་མཚན་ཉིད་ནི། རྩིགས་པ་གྲུ་བཞི་པའི་ཕྱོགས་བཞིར་སྒོ་བཞི་ཡོད་པས་སོ་སོའི་མདུན་ཕྱོགས་སུ་ཆ་ཆེན་རེ་རེ་འཐེན་པ་ལ་སྒོ་ཁྱུད་དམ་སྒོ་ཕུག་ཟེར། དེ་ནས་ཆ་ཕྲན་གཉིས་རེ་གཡས་གཡོན་དུ་འཐེན་པ་ལ་སྒོ་འགྲམ་ཞེས་བྱ་སྟེ།
དེའི་སྣེ་ནས་མདུན་ཕྱོགས་སུ་ཆ་ཕྲན་བཞི་རེ་བཀུག་པ་ལ་སྒོ་ལོགས་ཏེ་དེ་ལ་སྒོ་གཡབ་ཀྱང་ཟེར། སྒོ་ལོགས་ཀྱི་རྩིགས་སྣ་གཉིས་ཀྱང་སླར་ནང་དུ་ཅུང་ཟད་བཀུག་སྟེ་རུབ་པའི་རྣམ་པར་ཡོད་དོ། །དེ་དག་གི་རྩིགས་པའི་མཐོ་དམན་དཔངས་ལ་ནི་འདི་སྐབས་རྟ་བབས་སྒོ་ཚད་གསུམ་མ་ཡིན་ཕྱིར་ཆ་ཆུང་བཅུ་གཅིག་གོ །གོང་བཤད་སྒོ་ལོགས་ཀྱི་རྩིགས་སྣ་ནང་དུ་བཀུག་པའི་སྣ་ནས་ཆ་ཕྲན་རེའི་མཚམས་སུ་ཀ་བ་རྩིགས་སྣའི་བཞི་ཆའི་སུམ་ཆ་ལ་སླེབ་པ་གཉིས་བསླང་བའི་སྟེང་དུ་གདུང་མ་བཀལ་བའི་སྣེ་སྒོ་ལོགས་ཀྱི་རྩིགས་སྣ་བཀུག་པ་ལ་གདུང་ཁུང་བྲུས་པར་བཅུག་པའི་སྟེང་ནས་རྩིགས་པ་མི་འཆད་པའི་ཕྱིར་ཕ་གུ་རིམ་གཅིག་བཏང་བའི་སྟེང་ནས་འོག་གི་ཀ་བ་དང་ཀ་ཐོག་ཀ་བཞག་གིས་ཀ་ཐུང་གཉིས་སྒོ་ལོགས་ཀྱི་རྩིགས་པའི་ཁ་དང་མཉམ་པ་བཙུག་པའི་སྟེང་དུའང་གདུང་མ་བཀལ་བ་ལ་སྒོ་ཁང་གི་ཐོག་འགེབ་པའི་བྱ་འདབ་ཀྱི་སྣེ་རྟ་བབ་ནང་དུ་འབྲེལ་
བའོ། །ཀ་ཐུང་གོང་མ་གཉིས་ཀྱི་གནས་སུ་ཤ་ལ་བྷཉྫ་ཀཱ་སྟེ་ལྷ་མོའི་གཟུགས་བརྙན་ལག་པ་གཉིས་ཀྱིས་ཀ་ཞུ་བཏེགས་པ་དང་ཀ་ཐུང་གི་ངོས་ནས་རྡོ་རྗེའི་གྲྭ་མིག་གསེག་འགྲོས་སུ་ཡོད་པར་བཤད་ཀྱང་གཞུང་འདིར་གསལ་ཀ་མེད་དོ། །དེ་ནས་རྟ་བབས་ངོས་ཀྱི་ཀ་བ་ནི། སྒོ་ལོགས་ཀྱི་ཕྱིའི་རྩིགས་སྣ་གཡས་གཡོན་གྱི་མཚམས་ནས་ཆ་ཆུང་རེ་གཞལ་བའི་ས་ན་སྒོ་ལོགས་ཀྱི་རྩིགས་སྣའི་རྩ་བར་རྟ་བབས་ནང་ཕྱོགས་འདེགས་པའི་ཕན་ཚུན་ཀ་བ་གཉིས་དང་། དེ་ཡི་ཀ་བའི་ཐད་སྣ་ཚོགས་རྡོ་རྗེའི་ཕྱི་མཐའ་ན་རྟ་བབས་ཕྱི་ངོས་འདེགས་པའི་ཀ་བ་གཉིས་བཅས་དོན་ཏུ་རྟ་བབས་རེ་རེ་བཞིན་དུ་ཀ་བ་བཞི་རེ་ཡོད་ལ། གོང་བཤད་སྒོའི་ཀ་བ་བཞི་དང་རྟ་བབས་འདེགས་བྱེད་ཀྱི་ཀ་བ་བཞི་བཅས་བརྒྱད་ཡོད་པས། དེ་ཉིད་བསྡུས་པ་ལས། ཀ་བ་བརྒྱད་ཀྱིས་ཉེ་བར་མཛེས། །ཞེས་གསུངས་སོ། །རྟ་བབས་འདེགས་བྱེད་ཀྱི་ཀ་བའི་རིང་ཐུང་ནི་སྒོ་ཁང་གི་རྩིགས་
པ་དང་དཔངས་མཉམ་ལ། ཀ་བའི་སྟེང་ནས་གདུང་ལེབ་སྲབ་མོ་བཏང་བའི་སྟེང་དུ་ཤར་བུ་སྔོན་པོ། རིན་ཆེན་དམར་པོ། རྟ་རྨིག་ལྗང་གུ། གསེར་སེར་པོ། ཆུ་སྲིན་དམར་སྐྱ། གསེར་སེར་པོ། རྨིག་པ་ལྗང་གུ། རིན་ཆེན་དམར་པོ། རྨིག་པ་ལྗང་གུ། གསེར་སེར་པོ། མདའ་ཡབ་དཀར་པོ་བཅས་སྣམ་བུ་བཅུ་གཅིག་པ་སྟེ་སྒོ་ཁང་གི་ཐོག་འགེབ་དང་རྟ་བབས་ལྔ་པ་ཆུ་སྲིན་གྱི་སྟེང་གཉིས་མཐོ་དམན་མཉམ་ཞིང་། རྟ་བབས་འོག་མ་རྣམས་དཀོར་ཁང་དང་སྟེང་མ་བསིལ་ཁང་གི་རྣམ་པ་དང་མཚུངས་ལ་རྟ་བབས་ཀྱི་སྣེ་གཡས་གཡོན་གྱི་རིང་ཐུང་གི་ཚད་འཆད་འགྱུར་ལྟར་ལ། ཕྱི་སོ་སོའི་རི་མོ་དང་ཁ་དོག་ཐ་དད་པ་ལས་ནང་ཐམས་ཅད་རྒྱུན་གཅིག་པ་ཤིང་སྒྲོམ་ནང་གཅིག་མ་ལྟ་བུའོ། །མདུན་དུ་གྷུཪྞ་ཧ་རི་སྟེ་གླང་རྒྱབ་མིག་གསུམ་དུ་གྲགས་པ་ཤིང་སྒྲོམ་ལ་ཧར་སྟོང་བྲུས་པ་ལྟ་བུ་ལ་ཕྱི་ཡི་ཁ་ཟུར་ལ་མུ་ཁྱུད་ཡོད་པ་སྟེ་དོན་དུ་སྒོ་དང་རྟ་བབས་ཀྱི་སྐར་ཁུང་ཡིན་
ནོ། །ལུགས་འདིའི་གླང་གུར་གྱི་གཟུགས་སྤྱི་དང་མི་འདྲ་བས་དེའི་དབྱིབས་ནི་དཔེ་རིས་ལྟར་རྟོགས་པར་བྱ་དགོས་སོ། །རྟ་བབས་རྣམས་ཀྱི་ཚད་ནི། རྟ་བབས་ཀྱི་དཔངས་ཀྱི་ཚད་ལ་སྒོ་ཚད་གསུམ་ཡོད་པ་དེ་ཆ་བརྒྱད་དུ་བགོས་པ་ལ། ཤར་བུ་དང་རིན་ཆེན་གཉིས་ལ་ཆ་རེ་རེ། རྟ་རྨིག་དང་གསེར་ཐུན་མོང་ལ་ཆ་གཅིག་བྱས་པའི་སུམ་ཆའི་ཕྱེ་མ་གསེར་རོ། །ཆུ་སྲིན་རང་ལ་ཆ་གཅིག །ཡང་གསེར་དང་རྨིག་པ་ཐུན་མོང་ལ་ཆ་གཅིག་བྱས་པའི་ནང་མཐའི་སུམ་ཆ་གཅིག་གསེར་རོ། །དེ་ནས་རིན་ཆེན་རང་ལ་ཆ་གཅིག །རྨིག་པ་གསེར་ཐུན་མོང་ལ་ཆ་གཅིག་བྱས་པའི་ཕྱི་མཐའི་སུམ་ཆ་གཅིག་གསེར་གྱི་ཚད་དོ། །དེ་ནས་མདའ་ཡབ་ལ་ཆ་གཅིག་བྱས་པས་གྲུབ་བོ། །རྟ་བབས་ཀྱི་རྒྱ་ཡི་ཚད་ནི་སྒོ་དབུས་ཚངས་ཐིག་ནས་གཡས་གཡོན་དུ་ཆ་ཆུང་བརྒྱད་དོར་བ་ཤར་བུའི་རྒྱ་དང་། དེ་བཞིན་དུ་རིན་ཆེན་དང་རྟ་རྨིག་ལ་ཆ་ཆུང་དགུ་དང་། གསེར་ལ་
ཆ་ཆུང་དགུ་དང་སུམ་ཆ་གཅིག །ཆུ་སྲིན་ལ་ཆ་ཆུང་ཕྱེད་བརྒྱད། གསེར་ལ་ཆ་ཆུང་བརྒྱད། དེ་ནས་བདུན་པ་བརྒྱད་པ་དགུ་པ་བཅུ་པ་བཞི་ལ་འདྲ་བར་ཆ་ཆུང་བདུན་རེ་དང་། བཅུ་གཅིག་པ་ལ་ཆ་ཆུང་ལྔ་སྟེ་སོ་སོའི་གཡས་གཡོན་གྱི་སྣ་རིང་ཐུང་གི་ཆ་རྟོགས་པར་འགྱུར་ལ། རྟ་བབས་འོག་མའི་སྨད་ཆའི་རྒྱབ་ངོས་ཀྱི་སྣ་གཡས་གཡོན་ནི་སྒོ་ལོགས་ཀྱི་རྩིགས་པ་ལ་བཙུགས་པ། ཐོག་སྟེང་མདའ་ཡབ་དབུས་སུ་པདྨ་དང་། དེ་དབུས་ཡུ་བ་གྱེན་བསླང་ངོས་སུ་གཟེར་བུ་ལ་བཀོན་པའི་ཆོས་འཁོར་སེར་པོ་གདུགས་དང་བཅས་པ། གཡས་གཡོན་དུ་རི་དྭགས་ཀྲྀཥྞ་ས་ར་ཕོ་ལ་རྭ་དང་མོ་ལ་རྭ་མེད་པ་གསེར་ལས་བྱས་པ། རྟ་བབས་ཀྱི་ཀ་བ་གཉིས་ཀྱི་བར་དུ་ཀ་རྒྱན་གླང་པོ་ཆེ་འགྱིངས་སྟེ་ལངས་པའི་སྟེང་དུ་སེང་གེ་གྱེན་འགྲེང་གྱི་ལག་པ་གཉིས་ཀྱིས་རྟ་བབས་ཀྱི་ཀ་ཞུ་གཉིས་ནས་བཏེགས་པ་དང་། རྟ་བབས་ཀྱི་ཀ་བའི་གཡས་གཡོན་དུ་བུམ་བཟང་ལས་སྐྱེས་པའི་དཔག་བསམ་
ལྗོན་ཤིང་དང་རྒྱལ་སྲིད་བདུན་དང་རྫས་རྟགས་སོགས་ཀྱིས་བརྒྱན་པ་དང་། ཀ་བ་ལའང་སྟེགས་བུའི་སྟེང་དུ་བུམ་པ་དང་དེ་སྟེང་ཀ་བ་དངོས་བརྒྱད་ཟུར་གྱི་རྣམ་པ་ལ་ཀ་སྐེ་ལ་པདྨ་དང་བྲེ་དང་པདྨ་བཅས་ཡོད་དོ། །གཞལ་ཡས་ཀྱི་སྒོ་འཛུག་པའི་གནས་ནི་གཞལ་ཡས་དངོས་ཀྱི་ནང་སྒོ་ལ་འཛུག་པ་དང་སྒོ་ཁྱུད་ཀྱི་སྒོ་འགྲམ་དུ་འཛུག་པའི་ལུགས་གཉིས་བཞེད་ལ། གང་ལྟར་ཡང་སྒོ་གཡས་གཡོན་གྱི་རུ་བཞིའི་ཞེང་དུ་ཆ་ཆུང་ཕྱེད་རེ་དང་། དཔངས་ལ་ཆ་ཆུང་བརྒྱད་རེ་ཡོད་ལ། ཡ་ཐེམ་དང་མ་ཐེམ་གྱི་དཔངས་ལ་ཆ་ཆུང་ཕྱེད་དང་། འཕྲེད་དུ་ཆ་ཆུང་བཞི་རེ་ཡོད་པ། སྟེང་དུ་ཆ་ཆུང་གཉིས་ཀྱི་བར་དུ་པོ་ལི་དང་སྤང་ལེབ་བཅས་རིམ་པ་གཉིས་བརྩེགས་ཀྱི་ཚུལ་དུ་གག་ཚང་གི་རྣམ་པར་བྱས་པ་དང་། སྒོ་ཀླེགས་དངོས་གཡས་གཡོན་དུ་ཆ་ཕྲན་གཉིས་རེ་ཡོད་པ་བཅས་ཐམས་ཅད་གཞི་རིན་པོ་ཆེ་གསེར་ཁོ་ན་ལ་བྱས་པ་དང་། འདོད་སྣམ་གྱི་སྟེང་གི་
རྩིག་ཟུར་དང་སྒོ་ཁྱུད་ཕུག་གི་རྩིག་རྩར་ཟླ་ཕྱེད་རྡོ་རྗེས་མཚན་པ་རྣམས་ནི་འོག་གཞིའི་ཚུལ་ལོ། །དེ་ནས་གཞལ་ཡས་དེ་ཡི་ཐོག་ཕུབ་ཚུལ་ནི། གཞལ་ཡས་ཁང་གི་དབུས་སུ་གར་བུ་སྟེ་ཤེལ་དཀར་པོ་ལས་གྲུབ་པའི་སྟེགས་བུ་རྐང་རུབ་ཟླུམ་པོ་དཔངས་སུ་ཆ་ཕྲན་ཕྱེད་ཡོད་པ། ཞེང་གདན་གྱིས་མ་བཀབ་པ་མཐོང་བའི་ཆ་ལ་ཆ་ཕྲན་གཉིས་ཡོད་པ། དེའི་སྟེང་དུ་པཾ་ལས་པདྨ་འདབ་མ་བརྒྱད་པ་མུ་ཁྱུད་ལ་གྲི་གུག་གི་ཕྲེང་བས་བསྐོར་བའི་མུ་ཁྱུད་སྟེང་པད་འདབ་གཉིས་ཀྱི་བར་རེ་ནས་ཀ་བ་ཞུ་དང་བཅས་པ་རེ་རེ་སྟེ། ཀ་བ་བརྒྱད་འཛུག་པའི་རིང་ཐུང་ནི་རྟ་བབས་སྒོ་ཚད་གསུམ་མ་ལ་ཆ་ཕྲན་ཕྱེད་དང་བཅུ་བཞི་ཙམ་བྱས་པའི་སྟེང་དུ་རིན་པོ་ཆེའི་གདུང་རྡོ་རྗེས་སྤྲས་པ་བརྒྱད་ཟླུམ་པོར་འཕང་བ་བཀལ་བ། ཤར་ནུབ་དང་ལྷོ་བྱང་གི་ཀ་བའི་སྟེང་དུ་གདུང་བཞི་རྒྱ་གྲམ་དུ་བཏང་བས་རེའུ་མིག་དགུ་ཡོད་པ་འབྱུང་ལ། བཤད་མ་ཐག་པའི་དབུས་ཀྱི་གདུང་ཟླུམ་ལ་ནང་
མཐའ་དང་། སྔར་བཤད་ཀྱི་གསེར་གདུང་ལ་ཕྱི་མཐའ་བཀལ་ཏེ་ཕྱམ་ཉེར་བརྒྱད་དམ་དེ་ལས་མང་ཙམ་བཏང་བས་ཟུར་རྣམས་རིང་ཞིང་ལོགས་རྣམས་ཐུང་བ་ཁོ་ནར་འབྱུང་ངོ་། །དེ་དག་གི་སྤྱི་སྣེར་བ་ཀུ་ལིའམ་ཤར་བུ་ཞེས་དབྱིབས་མཆོད་རྟེན་གྱི་བང་རིམ་ཐུར་སྦུབ་ལྟ་བུ་དང་། སྤྱི་བླུགས་མགོ་ཐུར་བསྟན་ལྟ་བུ་དང་། ནོར་བུ་མིག་གསུམ་ཐུར་བསྟན་ལྟ་བུ་མི་འདྲ་བ་གསུམ་ཙམ་མཆིས་པ་ལས། སྐབས་འདིར་སྤྱི་བླུགས་ལྟ་བུ་སྟེ་ཕྱམ་སྣེར་གཟེར་གྱིས་བཏབ་པ་གསེར་གདུང་ལས་ཆ་ཆུང་གཅིག་ཕྱིར་འཕགས་པ། ཕྱམ་རྣམས་ཀྱི་སྟེང་ནས་བྱི་ཚེ་སྟེ་གྲམ་ཚགས་རིམ་པ་མང་པོས་བཀབ་པའི་སྣེ་ནས་འདོད་སྣམ་གྱི་རྒྱ་ནོན་ཙམ་བྱས་པའི་རིན་པོ་ཆེའི་གཟུགས་ཀྱི་རྣམ་པའི་ཕྱི་ནས་སྒོ་ཁྱིམ་ལྟ་བུ་ཡོད་པ་ཐུར་དུ་འཕྱང་བ་ལ་བྱ་འདབ་ཞེས་བྱ་སྟེ། བྱི་ཚེའི་སྟེང་ནས་རིན་པོ་ཆེའི་ཐོག་སས་བཀབ་པར་ཡང་ཁ་གཅིག་གིས་བཞེད་དོ། །བྱ་འདབ་ཀྱི་སྟེང་ནས་
ཀྲ་མ་ཤིཪྴ་སྟེ་མགོ་བོའི་རིམ་ཟེར་བའི་རྡོ་དཀར་པོ་ལས་བྱས་པའི་མདའ་ཡབ་ལ་པུ་ཤུ་དང་ལན་ཀན་ཡང་ཟེར། དབྱིབས་ལའང་སོའི་ཕྲེང་བ་བསྒྲིགས་པ་ལྟ་བུ་ལ་རྟ་སོ་རིས་ཞེས་པ་དང་། མཆོད་རྟེན་གྱི་བང་རིམ་ལྟ་བུ་རིམ་པ་གསུམ་ཅན་ལ་མཆོད་རྟེན་གྱི་དབྱིབས་ཅན་ནམ་བཏགས་སོ་རིས་ཞེས་དང་། དེའི་ཟུར་སྤངས་པ་ཟླུམ་པོ་དང་བཅས་མང་དུ་བཤད་ཀྱང་སྐབས་འདིར་སྤྱི་འགྲོ་བཏགས་སོ་རིས་ཉིད་དེ། དེ་འདྲ་མང་པོ་གཅིག་ལ་གཅིག་མ་རེག་ཙམ་དུ་བསྒྲིགས་པའི་རྩེ་ནས་རིན་པོ་ཆེའི་སྤང་ལེབ་བམ་སྐུད་པས་སྦྲེལ་བའི་སྟེང་ནས་བུམ་བཟང་ལས་ཐོན་པའི་གདུགས་དང་རྒྱལ་མཚན་འཕེན་རྣམས་ཀྱིས་མཛེས་པ་ལན་ཀན་ཏེ་ར་བ་ལྟ་བུས་སྟེང་བསྐོར་བའོ། །དེ་ནས་དབུས་ཀྱི་མཐོང་ཀའི་ཐོག་ཕུབ་ཚུལ་ལ་བཞི་སྟེ། མཆོད་རྟེན་མཁར་ཐབས། རྒྱ་ཕུབ། རི་བོའི་གུར་ལྟར་ཕུབ་པ་རྣམས་སུ་ཡོད་པ་ལས། སྐབས་འདིར་རི་བོའི་གུར་ལྟར་ཕུབ་པ་ཉིད་ཡིན་པས།
དབུས་ཀྱི་མཐོང་ཀའི་གདོང་ཟླུམ་སྔར་བཤད་ཀྱི་སྟེང་ནས་ཕ་གུ་འཁོར་ལོ་ཆ་ཕྲན་གཅིག་ཡོད་པ། དེ་སྟེང་ཀ་ཐུང་བྲེ་ཕུལ་གྱིས་བཏེགས་པའི་གདུང་ཟླུམ་དང་གདུང་བཞི་རྒྱ་གྲམ་མིག་མང་རིས་སུ་བྲེས་པ་ལ་དྲྭ་བ་དང་དྲྭ་ཕྱེད་ཀྱིས་སྤྲས་པ། དེའི་རེའུ་མིག་དགུ་པའི་གདུང་བསྣོལ་མཚམས་བཞིའི་སྟེང་ནས་ཀ་ཐུང་དཔངས་སུ་ཆ་ཕྲན་གཉིས་ཡོད་པ་བཞི་བཙུགས་པའི་སྟེང་དུ་གདུང་བཞི་གྲུ་བཞིར་བཏང་། དེའི་སྟེང་དུ་གདུང་གཉིས་རྒྱ་གྲམ་རིས་སུ་བཏང་བས་ཟུར་བརྒྱད་འབྱུང་བ་ལ་ཡར་སྣེ་གཏད་ཅིང་། མར་སྣེ་གདུང་ཟླུམ་གོང་མ་ལ་གཟེར་གྱིས་བསྡམས་པའི་གསེག་ཐབས་ཀྱི་གདུང་ཐུར་རྒྱུག་བརྒྱད་ཀྱི་ཕྱི་ནས་གསེར་གྱི་རྒྱ་ཕིབ་ཀྱིས་གཡོགས་པའི་མར་སྣེར་བྱི་ཚེའི་སྣེ་བྱ་འདབ་དང་འབྲེལ་བའི་ཟུར་བརྒྱད་ལ་ཆུ་སྲིན་ནམ་ཁྱུང་མགོས་མཚན་པ་ལ་འོག་ཏུ་ཤར་བུ་དང་བཅས་པ། དབུས་ཀྱི་གདུང་རྒྱ་གྲམ་གྱི་ལྟེ་བར་དེང་སང་གཉྫི་རར་གྲགས་པ་
པད་སྤུང་བུམ་པ་རྡོ་རྗེ་ནོར་བུའི་ཏོག་གིས་མཚན་པ་ཉིད་བཙུགས་པའོ། །དེ་དག་གི་དག་པ་ནི། འཕགས་པའི་བདེན་པ་བཞི་རྣམ་པར་དག་པས་གཞལ་ཡས་ཁང་གྲུ་བཞི་པ། ཚངས་པའི་གནས་བཞི་རྣམ་པར་དག་པས་ཟུར་བཞི་པ། བསྡུ་བའི་དངོས་པོ་བཞི་རྣམ་པར་དག་པས་སྒོ་བཞི་པ། ཚད་མེད་བཞི་རྣམ་པར་དག་པས་སྒོ་ཡི་ཀ་བ་བཞི། ཡེ་ཤེས་ལྔ་རྣམ་པར་དག་པས་རྩིག་པ་རྣམ་པ་ལྔ། དཔའ་བར་འགྲོ་བ་ལ་སོགས་པའི་ཏིང་ངེ་འཛིན་བཞི་རྣམ་པར་དག་པས་སྟེགས་བུ་བཞི། བཟོད་པ་དང་ཆོས་དང་དོན་དང་སྔགས་ཀྱི་གཟུགས་རྣམ་པར་དག་པས་དེར་མཆོད་པའི་ལྷ་མོ་རྣམས་རྩེ་བ། འགྲོ་བའི་རེ་བ་སྣ་ཚོགས་རྫོགས་པར་བྱེད་པ་རྣམ་པར་དག་པས་གསེར་གྱི་ཕ་གུ་ལ་རིན་པོ་ཆེ་སྣ་ཚོགས་ཀྱིས་རྣམ་པར་སྤྲས་པ། དྲན་པ་ཉེ་བར་བཞག་པ་བཞི་རྣམ་པར་དག་པས་སྒོ་ཁྱུད་བཞི། ཡང་དག་པར་སྤོང་བ་བཞི་རྣམ་པར་དག་པས་སྒོ་ལོགས་བཞི། ས་བཅུ་གཅིག་རྣམ་
པར་བགྲོད་པས་རྟ་བབས་བཅུ་གཅིག །རྫུ་འཕྲུལ་གྱི་རྐང་པ་བཞི་རྣམ་པར་དག་པས་རྟ་བབས་ཀྱི་ཀ་བ་བཞི། གདུལ་བྱ་རྣམས་ལ་ཆོས་ཀྱི་འཁོར་ལོ་བསྐོར་བ་དང་མི་མཐུན་ཕྱོགས་གཅོད་པ་རྣམ་པར་དག་པས་ཆོས་ཀྱི་འཁོར་ལོ། ཡོངས་སུ་དག་པའི་ཆོས་བསྟན་པ་ལ་རབ་ཏུ་དྭང་བས་མགྲིན་པ་གྱེན་དུ་བཏེག་ཅིང་ཆོས་དང་དད་པའི་རྗེས་སུ་འབྲངས་པས་མུ་སྟེགས་ངན་པའི་རི་དྭགས་འཇོམས་པའི་རི་དྭགས་ཕོ་མོ། ངོ་ཚ་ཤེས་པ་དང་ཁྲེལ་ཡོད་པ་རྣམ་པར་དག་པས་རིན་པོ་ཆེའི་གདུགས་བཟང་། ཡང་དག་པའི་ཡེ་ཤེས་ཀྱི་སྣང་བ་རྣམ་པར་དག་པས་རིན་པོ་ཆེའི་ཏོག་འོད་ཟེར་འབར་བ། རྣམ་པར་ཐར་པ་བརྒྱད་རྣམ་པར་དག་པས་གཞལ་ཡས་ནང་གི་ཀ་བ་བརྒྱད། འཕགས་པའི་ལམ་ཡན་ལག་བརྒྱད་རྣམ་པར་དག་པས་རྡོ་རྗེའི་གདུང་ཟླུམ་བརྒྱད། ཉོན་མོངས་པའི་རྩ་བ་བཏོན་པས་འཇིག་རྟེན་ལས་འདས་པའི་སྒོམ་པའི་ལམ་རྣམ་པར་དག་པས་མུན་
ཁྱམ་རྣམས་སུ་དྲྭ་བ་དང་། ཉོན་མོངས་པ་གནོན་པའི་ཕྱིར་འཇིག་རྟེན་པའི་སྒོམ་པའི་ལམ་རྣམ་པར་དག་པས་དྲྭ་བ་ཕྱེད་པ། གསུང་རབ་ཡན་ལག་བཅུ་གཉིས་ཀྱི་ཆོས་སྒྲ་རྣམ་པར་དག་པས་དྲིལ་བུ། བྱང་ཆུབ་ཀྱི་སེམས་རྣམ་པར་དག་པས་ཟླ་བ། ཤེས་རབ་ཡེ་ཤེས་རྣམ་པར་དག་པས་ཉི་མ། དེ་བཞིན་གཤེགས་པའི་ལམ་གྱི་ཡེ་ཤེས་རྣམ་པར་དག་པས་རྔ་ཡབ་རྣམས་སོ། །རགས་པ་དང་ཕྲ་བ་དང་བར་མའི་བློ་ཅན་གྱི་གདུལ་བྱ་རྣམས་ལ་ཇི་ལྟར་འོས་པའི་ཆོས་སྟོན་པ་ལ་འབབ་པ་རྣམ་པར་དག་པས་རྩེ་མོ་དུད་པའི་བ་ཀུ་ལིའི་ཕྲེང་བ། འཇིག་རྟེན་ལས་འདས་པ་མཆོག་ཏུ་དཀར་བའི་ཆོས་བཙུགས་པ་རྣམ་པར་དག་པས་མདའ་ཡབ། རྣམ་པར་རྟོག་པ་མ་ལུས་པ་དབྱིངས་སུ་ནུབ་ཀྱང་གཞན་དོན་ཕུན་སུམ་ཚོགས་པ་སྒྲུབ་པ་དག་པས་རྟ་བབས་ཀྱི་ཀ་བའི་དྲུང་ན་བུམ་བཟང་ལས་ཐོན་པའི་དཔག་བསམ་གྱི་ཤིང་། ཐབས་དང་ཤེས་རབ་ཟུང་དུ་འཇུག་ཅིང་བྱང་ཆུབ་སེམས་
རྣམ་པར་དག་པས་ཟླ་ཕྱེད་རྡོ་རྗེ། ཡང་དག་པར་སྤོང་བ་བཞི་རྣམ་པར་དག་པས་མཐོང་ཀར་གདོང་བཞི་མིག་མང་རིས་སུ་བྲིས་པ། གཞན་དོན་ཕྲིན་ལས་རྣམ་བཞིའི་ཁུར་ཐེག་པ་རྣམ་པར་དག་པས་དབུས་ནས་ཀ་བ་བཞིས་བཏེགས་པ། ཇི་ལྟར་རིགས་པར་འགྲོ་བའི་འཁོར་བའི་གདུང་བ་ཞི་བ་དག་པས་རྒྱ་ཕིབས་ཀྱིས་སྟེང་གཡོགས་པ། སངས་རྒྱས་ཀྱི་ཡོན་ཏན་ཐམས་ཅད་ཀྱིས་ཉེ་བར་བསྟན་པའི་ཕྱིར་གཉྫི་རའི་ཏོག་གིས་མཛེས་པར་སྤྲས་པའོ། །འདི་རིགས་ཀྱི་དག་པ་ལའང་བཞེད་ཚུལ་མང་དག་ཅིག་སྣང་ནའང་འདིར་སམྦུ་ཊའི་རྒྱུད་འགྲེལ་མན་ངག་སྙེ་མ་ལས་གསུངས་པ་ཚིག་སྣ་ཅུང་བཟུང་བའོ། །དེ་ནས་རྡོ་རྗེའི་ར་བ་མེ་རི་དང་བཅས་པའི་ཕྱི་རོལ་དུ་རྣམ་ཤེས་ཚོགས་བརྒྱད་རྣམ་པར་དག་པ་མཚོན་པའི་དུར་ཁྲོད་ཆེན་པོ་བརྒྱད་ནི། འདི་ལ་བཤད་ཚུལ་མང་ཞིག་སྣང་ཡང་འདིར་དཔལ་འཁོར་ལོ་སྡོམ་པའི་རྒྱུད་ཀྱི་རྒྱལ་པོ་དུར་ཁྲོད་ཀྱི་རྒྱན་རྨད་
དུ་བྱུང་བར་གསུངས་པ་ལྟར་འགོད་པར་བྱ་སྟེ། རྒྱུད་དེ་ཉིད་ལས། རྡོ་རྗེ་ར་བའི་ཕྱི་རོལ་དུ། །ལུགས་འབྱུང་ལུགས་ལས་བཟློག་པ་ནི། །གཏུམ་དྲག་དང་ནི་ཚང་ཚིང་དང་། །འབར་བས་འཁྲུགས་པའི་ཀེང་རུས་དང་། །འཇིགས་རུང་རྣམས་ནི་ཤར་སོགས་ཀྱི། །ཕྱོགས་སུ་གཡོན་དུ་བསྐོར་ཏེ་གནས། །ཧར་ཧར་དགོད་པ་དབང་ལྡན་ཏེ། །དཔལ་གྱི་ནགས་ཚལ་བྱིན་ཟར་རོ། །འཇིགས་པའི་མུན་ནག་བདེན་བྲལ་དུ། །རླུང་མཚམས་ཀཱི་ལི་ཀཱི་ལར་སྒྲོགས། །ཞེས་དུར་ཁྲོད་བརྒྱད་ཀྱི་ངོ་བོ་ནི་བདེ་བར་གཤེགས་པའི་གནས་བརྒྱད་ཡིན་པར་གསུངས་སོ། །ཤིང་བརྒྱད་དང་ཞིང་སྐྱོང་བརྒྱད་ནི། ཤར་དུ་ཧ་རིའི་ཤིང་ཆེན་ལ། །གཏུམ་དྲག་དཀར་པོ་གླང་པོའི་གདོང་། །བྱང་དུ་བྱང་ཆུབ་ཤིང་བུ་ལ། །གྷ་ར་སེར་པོ་མི་ཡི་གདོང་། །ནུབ་ཏུ་མྱ་ངན་མེད་ཤིང་ལ། །འབར་འཁྲུགས་དམར་པོ་ཆུ་སྲིན་གདོང་། །ལྷོ་རུ་ཙཱུ་ཏའི་ཤིང་བུ་ལ། །འཇིགས་སྡེ་ནག་པོ་མ་ཧེའི་གདོང་། །མེ་རུ་ཀ་
རན་ཙ་ན་སྟེ། །དཔལ་གྱི་ནགས་ཚལ་ར་གདོང་དམར། །བདེན་བྲལ་ཨཱརྫུའི་ཤིང་བུ་ལ། །འཇིགས་པའི་མུན་པ་མ་ཧེའི་གདོང་། །རླུང་དུ་སྲིད་གྲུབ་ཤིང་བུ་ལ། །ཀཱི་ལིའི་སྒྲ་སྒྲོགས་ཤ་བའི་གདོང་། །དབང་ལྡན་ནྱ་གྲོ་དྷ་ཤིང་ལ། །ཧ་ཧར་དགོད་པ་བ་ལང་གདོང་། །གཡས་ན་གྲི་གུག་གཡོན་ཐོད་པ། །ཤིང་ལོའི་གསེབ་ནས་སྟོད་ཕྱུང་ངོ་། །ཞེས་གསུངས་པ་ལྟར་ལ། ཞིང་སྐྱོང་བརྒྱད་འདིའི་ངོ་བོ་ནི་སངས་རྒྱས་རབ་བདུན་བྱམས་པ་དང་བརྒྱད། ཤིང་བརྒྱད་ནི་བྱང་ཆུབ་ཀྱི་ཤིང་བརྒྱད་ཡིན་པར་བདེ་མཆོག་གི་འགྲེལ་པ་རྣམས་སུ་འབྱུང་ངོ་། །ཕྱོགས་སྐྱོང་བརྒྱད་ནི་ཤིང་དེ་དག་གི་དྲུང་དུ་གནས་པ་སྟེ། རྒྱུད་ལས། ཤར་དུ་བརྒྱ་བྱིན་དཀར་པོ་ལ། །རྡོ་རྗེ་སྡིགས་མཛུབ་གླང་པོ་ཞོན། །བྱང་དུ་ལུས་ངན་སེར་པོ་ལ། །དབྱུག་པ་འཛིན་ཅིང་རྟ་ལ་ཞོན། །ནུབ་ཏུ་ཆུ་བདག་དམར་པོ་ནི། །ཆུ་སྲིན་ཞོན་ནས་ཞགས་པ་ཐོགས། །ལྷོ་རུ་གཤིན་རྗེ་ནག་པོ་ལ། །མ་ཧེ་ཞོན་
ནས་བེ་ཅོན་ཐོགས། །ཤར་ལྷོ་མེ་ལྷ་དམར་སེར་ལ། །ར་ལ་ཞོན་ནས་མེ་ཐབ་འཛིན། །ལྷོ་ནུབ་སྲིན་པོ་སྨུག་ནག་ལ། །རལ་གྲི་ཐོགས་ནས་མི་ལ་ཞོན། །ནུབ་བྱང་རླུང་ལྷ་མདོག་སྔོན་པོ། །ཤ་བ་ཞོན་ནས་འཕེན་ནི་འཕྱར། །བྱང་ཤར་དབང་ལྡན་དཀར་པོ་ནི། །ཁྱུ་མཆོག་ཞོན་ནས་རྩེ་གསུམ་ཐོགས། །ཐམས་ཅད་རང་རང་རིག་མས་འཁྱུད། །ཅེས་པ་ལྟར་ངོ་བོ་ནི་ཉན་ཐོས་ཆེན་པོ་བརྒྱད་ཡིན་ནོ། །དུར་ཁྲོད་ཀྱི་མཚམས་ཀྱི་ཆུ་ལ་གནས་པའི་ཀླུ་བརྒྱད་ནི། ནོར་རྒྱས་དང་ནི་འཇོག་པོ་དང་། སྟོབས་ཀྱི་རྒྱུ་དང་པདྨ་དག །ཤར་ནས་བརྩམས་ཏེ་གཡོན་དུ་དགོད། །པདྨ་ཆེ་དང་མཐའ་ཡས་དང་། །རིགས་ལྡན་དང་ནི་དུང་སྐྱོང་ནི། །གཡས་ཀྱི་ཕྱོགས་སུ་དགོད་པའོ། །ཞེས་གསུངས་པ་ལྟར་ལ། ཀླུ་བརྒྱད་ཀྱི་ངོ་བོ་ནི་འཁོར་ལོས་སྒྱུར་བའི་ཡོན་བདག་བརྒྱད་ཡིན་ལ། སོ་སོའི་སྐུ་མདོག་ཀྱང་རིམ་པ་ལྟར་སེར་པོ་དམར་པོ་ལྗང་གུ་དཀར་པོ་སེར་པོ་སྔོན་པོ་ཁྲ་བོ་དཀར་པོ་ཅན་
ཀུན་ཀྱང་ཐལ་སྦྱར་ནོར་བུ་ཐོགས་པ་ལུས་ཕྱེད་ཆུ་སྟེང་དུ་ཐོན་པར་འགྲེལ་པ་རྣམས་སུ་འབྱུང་ངོ་། །སྤྲིན་བརྒྱད་ནི། སྒྲ་སྒྲོགས་པ་དང་རྨུགས་པ་དང་། །མུན་པ་ཅན་དང་ཀུན་ཏུ་འཁྱིལ། །ཤར་ནས་བྱང་གི་ཕྱོགས་སུ་འཁོད། །འཁྲིགས་པ་གང་བ་འབབ་པ་དང་། །དྲག་པོ་སྤྲིན་ཚོགས་མཚམས་ལ་དགོད། །ཅེས་གསུངས་ལ། སྤྲིན་བརྒྱད་ཀྱི་ངོ་བོ་ནི་རང་རྒྱལ་བརྒྱད་དེ་སོ་སོའི་མདོག་ཀྱང་རིམ་པ་ལྟར་སྔོན་པོ་དཀར་པོ་ནག་པོ་སེར་པོ་དམར་པོ་སེར་པོ་ལྗང་གུ་སྣ་ཚོགས་ཀྱི་མདོག་ཏུ་འགྲེལ་པར་བཤད་དོ། །རི་བརྒྱད་ཀྱང་། ཤར་གྱི་རི་སྣ་ཚོགས་མདོག །བྱང་གི་རི་སེར་པོ། ནུབ་ཀྱི་རི་ནག་པོ། ལྷོའི་རི་དཀར་པོ། ཤར་ལྷོའི་རི་དཀར་པོ། ལྷོ་ནུབ་ཀྱི་རི་ལྗང་གུ། ནུབ་བྱང་གི་རི་སེར་པོ། བྱང་ཤར་གྱི་རི་སྔོན་པོ་རྣམས་ལ་བརྟེན་པའི་མཆོད་རྟེན་བརྒྱད་དང་དེའི་དྲུང་དུ་གྲུབ་པའི་རྫས་བརྒྱད་ཀྱི་དངོས་གྲུབ་ཐོབ་པའི་གྲུབ་པའི་རིག་འཛིན་བརྒྱད་སོགས་དུར་
ཁྲོད་ཀྱི་བཀོད་པ་འཇིགས་སུ་རུང་བ་སྣ་ཚོགས་པ་དང་ལྡན་པ་སྟེ། རྒྱུད་ལས། སེང་གེ་ཅེ་སྤྱང་ཁྱི་སྒྲ་སྒྲོགས། །སྟག་དང་ཝ་དང་ཕག་རྣམས་དང་། །བྱི་ལ་རྐྱང་དང་གདུག་པའི་སྦྲུལ། །ཁྭ་དང་འུག་པ་ལ་སོགས་བྱ། །གསལ་ཤིང་བསྐྱོན་དང་མདུང་གིས་ཕུག །ཀེང་རུས་ཕྱེད་མགོ་རུས་པ་རྣམས། །ཐབ་ཏུ་ཚིག་དང་ཕྱེད་ཚིག་པ། །ཤ་ཟ་དང་ནི་རོ་སྒྲུབ་བྱེད། །གྲུབ་ཐོབ་གཏོར་མ་སྟེར་བ་དང་། །རྣལ་འབྱོར་མ་ཚོགས་མཆོད་པ་དང་། །གྲི་གུག་ཐོད་པ་ཁ་ཊྭཱཾ་ག །རྔེའུ་ཆུང་ཁ་ཟས་དཔག་མེད་སྣོད། །མཆོད་རྟེན་དཀར་པོའི་རི་ལ་གནས། །གྲུབ་ཆེན་བརྒྱད་ཀྱིས་བརྒྱན་པའོ། །རྣམ་ཤེས་བརྒྱད་ཀྱི་དག་པ་ཡང་། །སྟོན་པ་འདི་ཡི་དུར་ཁྲོད་དོ། །ཞེས་དང་། དུར་ཁྲོད་ཀྱི་དག་པ་ཡང་། རྒྱུད་ལས། ཆོས་ཀྱི་དབྱིངས་ཀྱི་དུར་དུ་མཆི། །གསང་བའི་རིག་པའི་ཡེ་ཤེས་ཁྲོད། །རྣམ་ཤེས་དག་པས་དུར་ཁྲོད་བརྒྱད། །ཕྱོགས་སྐྱོང་མི་དགེ་བཅུ་པོ་སྤོངས། །སངས་རྒྱས་བརྒྱད་ཀྱི་མཚན་
མ་ཤིང་། །ཞིང་སྐྱོང་སྔགས་ཀྱི་ཐེག་པ་སྲུང་། །གདུག་པ་འཇོམས་ཕྱིར་ཀླུ་བརྒྱད་འགོད། །མཆོད་རྟེན་རང་སངས་རྒྱས་ཀྱི་གནས། །རྣལ་འབྱོར་བརྟུལ་ཞུགས་སྤྱོད་པ་བྱེད། །ཆུ་ནི་བརྗོད་བྱ་ཟབ་པ་ལ། །མེ་སོགས་རྟོགས་པ་བྲལ་བའོ། །ཞེས་གསུངས་སོ། །དེ་དག་ནི་རྟེན་གཞལ་ཡས་ཁང་གི་བཀོད་པ་སྟེ། གཞལ་མེད་ཁང་ཞེས་པའི་སྒྲ་དོན་ནི། ཡཱ་ན་ཚད་ལ་གཞལ་བའི་སྐད་དོད་ཀྱི་སྔུན་དུ་དགག་ཚིག་ནི་བཞག་པས། ནི་ཡཱ་ན་ཞེས་པ་གཞལ་མེད་ཁང་ཏེ། དེའི་རྒྱན་དང་བཀོད་པའི་ཁྱད་པར་བསམ་ལས་འདས་ཕྱིར་གཞན་གང་གིས་ཀྱང་བསྒྲུན་ཅིང་གཞལ་དུ་མེད་པས་ན་གཞལ་མེད་ཁང་ཞེས་བྱ་ལ། དེའི་སྒོ་རྒྱན་ལ་རྟ་བབས་ཞེས་བྱ་བའི་དོན་ཡང་། ཏྭ་ར་མགྱོགས་པའི་དབྱིངས་ལ་བསྒྲུབས་པས་ཏྭ་ར་ཎ་ཕྱི་སྒོའམ་རྟ་བབས་ཏེ། རྒྱ་གར་པའི་གཙུག་ལག་ཐམས་ཅད་ཀྱི་ཕྱི་སྒོར་རྟ་བབས་ཡོད་པས་དེའི་དྲུང་དུ་སླེབ་པ་དང་ཐམས་ཅད་རྟ་ལས་བབ་པར་
བྱེད་པའི་མཚམས་ཡིན་ཕྱིར་རྟ་བབས་ཞེས་མིང་དུ་ཆགས་པར་འཆི་མེད་མཛོད་དུ་གསུངས་སོ། །དེ་བཞིན་རྟ་བབས་ཀྱི་སྐར་ཁུང་ལ་གླང་རྒྱབ་ཞེས་འདོགས་པའང་གླང་པོའི་རྒྱབ་ཏུ་བཀལ་བའི་ནོར་བུ་མིག་གསུམ་པའི་དབྱིབས་ལྟ་བུར་ཡོད་པའི་མིང་ཆགས་པར་བཤད་དོ། །དེ་ནས་སྐྱེ་སྲིད་སྦྱོང་བའི་ཕྱིར་དུ་བརྟེན་པ་ལྷ་བསྐྱེད་ཚུལ་ལའང་རྒྱས་པར་མངོན་བྱང་ལྔ་བསྐྱེད་དང་། འབྲིང་པོ་རྡོ་རྗེ་བཞི་བསྐྱེད་དང་། བསྡུས་པ་ཆོ་ག་གསུམ་བསྐྱེད་དང་རྣམ་པ་གསུམ་ལས་འདིར་ནི་རྡོ་རྗེ་བཞི་བསྐྱེད་དང་འབྲེལ་པ་སྟེ། བརྟག་གཉིས་དང་འདུས་པའི་རྒྱུད་ཕྱི་མ་ལས། དང་པོ་སྟོང་ཉིད་བྱང་ཆུབ་སྟེ། །གཉིས་པ་ས་བོན་བསྡུ་བ་ཡིན། །གསུམ་པ་གཟུགས་ནི་རྫོགས་པ་སྟེ། །བཞི་པ་ཡི་གེ་དགོད་པའོ། །རྡོ་རྗེ་རྣམ་བཞི་འདི་དག་གིས། །ཐ་མ ལ་སྒྲུབ་པ་བསྙེན་པར་བྱ། །ཞེས་གསུངས་པ་ལྟ་བུའི་བསྐྱེད་པའི་རིམ་པ་ལ་འཇུག་པའི་ཐོག་མར་སྦྱང་གཞི་སྦྱོང་བྱེད་ལ་ངེས་པ་ཅུང་ཟད་
འཆར་དགོས་པས་མངལ་དུ་ཕ་མའི་ཁམས་དཀར་དམར་དང་བར་དོའི་རྣམ་ཤེས་རླུང་དང་བཅས་པ་ཚོགས་པ་གཅིག་ཏུ་གྱུར་པ་ནི་རྒྱུད་སྡེ་སྤྱིར་གྲགས་པའི་རྒྱུའི་རྡོ་རྗེ་འཆང་ངམ་འཁོར་ལོ་བདེ་མཆོག་ཉིད་ཡིན་པས། དེ་ལྟར་གཞི་དུས་ཀྱི་ལྷར་རྫོགས་པའི་ཚུལ་ལམ་དུ་བྱེད་པ་ལ། དང་པོ་འཆི་སྲིད་བར་དོ་དང་བཅས་པ་སྦྱོང་བའི་ཕྱིར་སྟོང་ཉིད་བྱང་ཆུབ་བསྒོམ་པ་ནི་རྟེན་གཞལ་ཡས་བསྐྱེད་པའི་ཐོག་མར་སོང་ཟིན་ལ། གཉིས་པ་བར་དོའི་རྣམ་ཤེས་ཁམས་དཀར་དམར་གྱི་དབུས་སུ་ཞུགས་ཏེ་རྟེན་བརྟེན་པར་བཅས་པ་སྦྱང་བའི་ཕྱིར་ས་བོན་བསྡུ་བ་ནི། གཞལ་ཡས་ཁང་གི་དབུས་སུ་འཁོར་བའི་སྐྱོན་གྱིས་མ་གོས་པའི་ཕྱིར་པདྨ་དང་། མ་རིག་པའི་མུན་པ་སེལ་བའི་ཕྱིར་ཉི་མའི་དཀྱིལ་འཁོར་གྱི་སྟེང་དུ་རྣམ་པར་ཤེས་པའི་ངོ་བོ་ཧཱུྃ་ཡིག་མཐིང་ནག་འོད་ཟེར་འབར་བ་དེ་ལས་འོད་ཟེར་སྣ་ཚོགས་འཕྲོས། སངས་རྒྱས་དང་བྱང་སེམས་ཐམས་ཅད་
ཀྱི་བྱིན་རླབས་རྣམས་འོད་ཀྱི་རྣམ་པར་བསྡུས་ཏེ་ཧཱུྃ་ལ་ཐིམ་པས་རྡོ་རྗེ་སྔོན་པོ་རྩེ་ལྔ་པའི་ལྟེ་བར་ཧཱུྃ་གིས་མཚན་པར་བསྒོམ་པའོ། །གསུམ་པ་རྣམ་སྨིན་གྱིས་ལུས་ཡོངས་སུ་གྲུབ་པའི་བག་ཆགས་སྦྱོང་བའི་ཕྱིར་དུ་སྐུ་ཡོངས་རྫོགས་བསྒོམ་པ་ནི། སླར་ཡང་རྡོ་རྗེ་ཧཱུྃ་མཚན་གྱི་འོད་ཀྱིས་ཁམས་གསུམ་གྱི་སེམས་ཅན་ཐམས་ཅད་ཀྱི་རྒྱུད་ཀྱི་ཉོན་མོངས་པ་ཐམས་ཅད་སྦྱངས་ཏེ་ཀུན་ཀྱང་ཧེ་རུ་ཀའི་གོ་འཕང་ལ་བཀོད་ནས་འོད་ཟེར་སླར་འདུས་པ་དང་ས་བོན་ཕྱག་མཚན་དང་བཅས་པ་ཡོངས་སུ་གྱུར་པ་ལས་བདག་ཉིད་དཔལ་འཁོར་ལོ་སྡོམ་པའི་སྐུར་བསྒོམ་པའོ། །གཙོ་བོའི་མཚན་དུ་དཔལ་འཁོར་ལོ་སྡོམ་པ་ཞེས་པའི་དོན་ཀྱང་། དབྱིངས་དང་ཡེ་ཤེས་གཉིས་སུ་མེད་པའི་ཡེ་ཤེས་ཀྱི་དཔལ་དང་ལྡན་ཅིང་། འཁོར་ལོ་གསུམ་གྱི་དཔའ་བོ་དང་རྣལ་འབྱོར་མ་ཐམས་ཅད་དག་པ་ཡེ་ཤེས་ཀྱི་འཁོར་ལོར་སྡོམ་པས་ན་སྡོམ་པ་སྟེ། དེ་ལའང་རྒྱས་པར་ཕྱི་ནང་གསང་བ་དེ་ཁོ་ན་
ཉིད་བཞིར་རྒྱུད་ལས་གསུངས་ཏེ། དཔལ་ནི་གཉིས་མེད་ཡེ་ཤེས་ཏེ། །འཁོར་ལོ་རྣམ་པ་བཞི་རུ་བརྗོད། །ཕྱི་ནང་གསང་བ་དེ་ཉིད་དོ། །དང་པོ་ཕྱི་ཡི་འཁོར་ལོ་ནི། །སྐུ་མདོག་ཕྱག་མཚན་ལྷ་ཡི་སྐུ། །དྲུག་ཅུ་རྩ་གཉིས་རིམ་པ་སྟེ། །ཡེ་ཤེས་དམ་ཚིག་སྐུ་གསུང་ཐུགས། །དཀྱིལ་འཁོར་ཕྱོགས་མཚམས་རིམ་པ་བཞིན། །ལུགས་འབྱུང་ལུགས་ལས་བཟློག་པ་ནི། །ཐ་མལ་གཅོད་པས་ཕྱི་རུ་བཤད། །གཉིས་པ་ནང་གི་འཁོར་ལོ་ནི། །གནས་སོགས་ས་བཅུའི་རིམ་པ་རྣམས། །མཐོ་རིས་ས་སྟེང་ས་འོག་དང་། །འཁོར་ལོ་སྒོ་ལ་དགོད་པ་ནི། ཕྱི་རོལ་སྤྲོས་པ་གཅོད་པའོ། །གསུམ་པ་གསང་བའི་འཁོར་ལོ་ནི། །སྤྲུལ་པ་ཆོས་དང་ལོངས་སྤྱོད་དང་། །དེ་བཞིན་བདེ་བ་ཆེན་པོ་སྟེ། །རྩ་ཆེན་སུམ་ཅུ་རྩ་གཉིས་ཀྱི། །གནས་སུ་གྱུར་པས་སྡུག་བསྔལ་གཅོད། །དགའ་བ་དང་ནི་མཆོག་དགའ་དང་། །རྣམ་པར་དགའ་བའི་གཉེན་པོ་ནི། །བདེ་བ་སྟོང་པ་མི་རྟོག་གསུམ། །
དབྱེར་མེད་རྟོགས་པས་ལྷན་སྐྱེས་ལ། །དེ་ཁོ་ན་ཡི་འཁོར་ལོར་བརྗོད། །སྡོམ་པ་ཕྱི་ནང་གསང་བ་ཉིད། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ལ་སོགས་ཉོན་མོངས་པ། །གཉེན་པོ་ཡེ་ཤེས་ངང་དུ་སྡོམ། །བདག་དང་དངོས་པོར་ལྟ་བ་དང་། །ཐ་མལ་པ་ཡི་རྣམ་རྟོག་ཀྱང་། །དག་པ་ལྷ་ཡི་འཁོར་ལོར་སྡོམ། །གཟོད་ནས་ལུས་ལ་གྲུབ་པ་ཡི། །རྩ་དང་རླུང་དང་བྱང་སེམས་དང་། །ཨ་བ་དྷཱུ་ཏིའི་ནང་དུ་སྡོམ། །བདེ་དང་སྟོང་པ་མི་རྟོག་དང་། །དངོས་དང་དངོས་མེད་ཡེ་ཤེས་ཀྱང་། །དབྱེར་མེད་གཉུག་མའི་ངང་དུ་སྡོམ། །ཞེས་གསུངས་པ་ལྟར་ལ། མཚན་གྱི་རྣམ་གྲངས་ལ་བདེ་མཆོག་ཞེས་པའང་། བདེ་ཆེན་དགའ་བཞིའི་ཡེ་ཤེས་ལས་མཆོག་ཏུ་གྱུར་པ་འཕོ་མེད་དོན་དམ་ལྷན་ཅིག་སྐྱེས་དགའི་ཡེ་ཤེས་མཐར་ཐུག་བརྙེས་པས་དེ་སྐད་ཅེས་བྱའོ། །དེ་ཡང་བྱམས་པའི་ཐུགས་མངའ་ཆོས་ཉིད་མི་འགྱུར་བས་སྐུ་མདོག་སྔོ་སངས་ཟར་མའི་མེ་ཏོག་ལྟ་བུ། ཆོས་
ཐམས་ཅད་ཆོས་ཉིད་ཀྱི་ངང་དུ་རོ་གཅིག་པས་ཞལ་གཅིག་པ། དུས་གསུམ་སྒྲིབ་མེད་དུ་གཟིགས་པས་སྤྱན་གསུམ་པ། མ་རུངས་པ་དང་ཉོན་མོངས་པ་འཇོམས་པས་ཞལ་གྱི་མཆེ་བ་ཅུང་ཟད་གཙིགས་པ། འདོད་ཆགས་ལ་དགའ་བ་ཉིད་ཆོས་ལ་འཛུད་པའི་ཕྱིར་རལ་པའི་ཅོད་པན། དྲག་པོ་ལ་སོགས་པ་གཞན་གྱིས་མི་ཐུབ་པའི་ཕྱིར་རྩེ་མོར་ནོར་བུས་བརྒྱན་པ། བྱང་ཆུབ་ཀྱི་སེམས་དང་དེས་འཕགས་པའི་ལས་སྣ་ཚོགས་མཚོན་པའི་ཕྱིར་མདུན་དུ་སྣ་ཚོགས་རྡོ་རྗེ་དང་ཟླ་བ་ཕྱེད་པས་སྤྲས་པ། སྐུ་གསུམ་མཚོན་པའི་ཕྱིར་དར་སུམ་འཁྱོག་གི་དར་དཔྱང་། རིགས་ལྔའི་ཕྱག་རྒྱ་ལྔ་དང་ལྡན་པས་ཐོད་པ་སྐམ་པོ་ལྔའི་དབུ་རྒྱན་དང་རིན་པོ་ཆེའི་རྩེ་བྲན། འཇིག་རྟེན་པའི་སེམས་བྱུང་རྣམས་བཅོམ་པས་ཐོད་རློན་ལྔ་བཅུའི་དོ་ཤལ། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པས་ཕྱག་རྒྱ་དྲུག་གིས་བརྒྱན་པ་སྟེ། རྣལ་འབྱོར་མའི་ཀུན་སྤྱོད་ལས།
མགུར་ཆུ་དཔུང་རྒྱན་རྣ་ཆ་དང་། །ཐོད་པའི་ཕྲེང་བས་རྣམ་པར་བརྒྱན། །མཆོད་ཕྱིར་ཐོགས་དང་ཐལ་བ་ནི། །ཕྱག་རྒྱ་དྲུག་པར་རབ་ཏུ་བཤད། །ཕ་རོལ་ཕྱིན་དྲུག་རྣམ་དག་པས། །ཕྱག་རྒྱ་དྲུག་གིས་རྣམ་པར་བརྒྱན། །ཅེས་གསུངས་པ་ལྟར་རྣ་ཆ་ནི་བཟོད་པ། གདུབ་བུ་ནི་ཚུལ་ཁྲིམས། མགུལ་རྒྱན་ནི་བརྩོན་འགྲུས། སྤྱི་གཙུག་གི་ནོར་བུ་ནི་སྦྱིན་པ། མཆོད་ཕྱིར་ཐོགས་ཏེ་མིའི་རྒྱུས་པ་བསྒྲིལ་བའི་སེ་རལ་ཁ་ནི་བསམ་གཏན། ཐལ་བ་སྟེ་མིའི་ཐལ་ཆེན་ལུས་ལ་བྱུགས་པ་ནི་ཤེས་རབ་བོ། །སྒེག་པ་ལ་སོགས་པའི་གར་ཉམས་དགུ་ནི། གློག་གི་ཕྲེང་བ་ལས། སྒེག་པ་དཔའ་བ་མི་སྡུག་པ། །དགོད་དང་དྲག་ཤུལ་འཇིགས་སུ་རུང་། །སྙིང་རྗེ་རྔམ་དང་ཞི་བ་སྟེ། །གར་དགུའི་ཉམས་དང་ལྡན་པའོ། །ཞེས་པ་སྟེ། དེ་ཡང་ཕྱག་གཉིས་ཤེས་རབ་ཡུམ་ལ་འཁྲིལ་ཏེ་འགྱིང་བག་དང་ལྡན་པས་སྒེག་པ། བདུད་དང་སྒྲིབ་གཉིས་མྱང་འདས་དམན་པ་གཉིས་ལས་རྒྱལ་བས་
ན་དཔའ་བ། ལོག་པར་ལྟ་བ་རྣམས་ལ་མ་རངས་པས་བཞིན་དང་བཞུགས་སྟངས་མི་སྡུག་པ། རྔམ་པའི་སྒྲ་ཨཱ་རལླི་སོགས་ཀྱིས་འགྲོ་བ་འདུལ་བས་རྒོད་པ། སྨིན་མ་བསྡུས་པ་དང་མཆེ་བ་གཙིགས་པ་ལ་སོགས་པས་མ་རུང་བསྐྲག་པར་མཛད་པས་དྲག་ཤུལ། མ་རུངས་པའི་ཐོད་པའི་ཕྲེང་བ་དང་སྟག་གི་པགས་པ་ལ་སོགས་པ་དང་ལྡན་པས་འཇིགས་སུ་རུང་བ། །འཇིགས་བྱེད་དང་དུས་མཚན་ཞབས་ཀྱིས་མནན་ཀྱང་སྲོག་དང་མ་ཕྲལ་བས་སྙིང་རྗེ། འགལ་བའི་ཆོས་ཆགས་པ་མེད་ཀྱང་ཆགས་ཚུལ་གྱིས་ཡུམ་ལ་འཁྲིལ་བས་རྔམ་པ། སྐུ་དྲང་བ་དང་དྭང་བ་དང་སྣུམ་པ་དང་བརྟགས་ན་ངང་གིས་ཞི་བས་ན་ཞི་བ་སྟེ་གར་གྱི་ཉམས་དགུ་དང་ལྡན་ཅིང་། ཉོན་མོངས་དང་རྣམ་རྟོག་རྣམ་པར་བཅོམ་པས་སྟག་ལྤགས་ཀྱི་ཤམ་ཐབ་གྲོལ་བའི་ཚུལ་དུ་མནབ་པ། ཐབས་ཀྱིས་དགེ་བའི་ཆོས་མཐའ་དག་སྡུད་པས་རྡོ་རྗེ་དང་། ཤེས་རབ་ཀྱིས་དེའི་མི་མཐུན་
ཕྱོགས་གཅོད་པའི་དྲིལ་བུ་བཅས་འཛིན་པས་ཡུམ་ལ་འཁྱུད་པ། འཁོར་བ་དག་པས་ཞབས་གཡས་བརྐྱང་བ་དང་། མི་གནས་པའི་མྱ་ངན་ལས་འདས་པའི་ཕྱིར་ཞབས་གཡོན་ཅུང་ཟད་བསྐུམ་པ། རྟག་ཆད་གཉིས་ཀྱི་མཐའ་དང་བྲལ་བའི་ཕྱིར་རྟག་པའི་རྣམ་པར་རྟོག་པའི་རང་བཞིན་འཇིགས་བྱེད་དེ་དབང་ཕྱུག་ནག་པོ་མགོ་སྐེ་བལྟབས་པའི་དཔྲལ་བ་ན་ཞབས་གཡས་པས་མནན་པ། ཆད་པའི་རྣམ་པར་རྟོག་པའི་རང་བཞིན་དུས་མཚན་ཏེ་ཨུ་མ་དེ་བཱི་དམར་མོའི་ནུ་མའི་བར་དུ་གཡོན་བསྐུམ་པས་བརྫིས་པ། དེ་གཉིས་ཀས་ཀྱང་ལག་ན་གྲི་གུག་དང་ཐོད་པ་ཐོགས་པའོ། །གཙོ་བོའི་པང་དུ་སྦྱོར་བའི་ཡུམ་ནི་རྡོ་རྗེ་ཕག་མོ་སྟེ། དེའི་མཚན་གྱི་སྒྲ་དོན་ནི། རྣམ་པར་རྟོག་པའི་སྐྱོན་གྱིས་མ་གོས་པས་ཕག་དང་། ཆོས་ཀྱི་དབྱིངས་ལ་གཙང་རྨེའི་རྟོག་པའི་སྤྲོས་པ་བྲལ་བས་ན་མོ་ཞེས་བྱ་སྟེ། ཕག་མོ་མངོན་པར་འབྱུང་བའི་རྒྱུད་ལས། རྣམ་རྟོག་ཅིས་ཀྱང་མ་གོས་
པས། །ཕག་ཅེས་བྱ་བ་རྟོག་མེད་ཡིན། །དབྱིངས་ཉིད་རྟོག་པ་སྤྲོས་བྲལ་བས། །མོ་ཞེས་བྱ་བ་དབྱིངས་སུ་ཐིམ། །ཞེས་དང་། དེ་ལའང་དབྱེ་ན་དོན་དམ། བརྗོད་པ། དབྱིངས་ཀྱི་ཕག་མོ་གསུམ་དུ་གསུངས་ཏེ། དོན་དམ་སྐྱེ་མེད་ཕག་མོ་ནི། །སྐྱེ་འགག་མེད་པས་ཆོས་སྐུ་ཡིན། །བརྗོད་པ་སྒྲ་ཡི་ཕག་མོ་ནི། །ཕག་ནི་ཀཱ་ལི་ཐབས་ཡིན་ལ། །མོ་ནི་ཨཱ་ལི་ལོངས་སྐུར་འདོད། །མཚོན་པ་དབྱིངས་ཀྱི་ཕག་མོ་ནི། །སྟོང་ཉིད་མཚོན་པའི་སྐུ་མདོག་ལ། །རྟོག་མེད་སྙིང་རྗེ་ཕག་གི་གདོང་། །ཐབས་དང་ཤེས་རབ་ཕག་མོ་ལ། །བདེ་སྟོང་སྐྱོན་བྲལ་གཅེར་བུ་ནི། །རྟོག་པ་མེད་པས་སྤྲུལ་སྐུའོ། །ཞེས་གསུངས་པ་ལྟར་ལ། འགྱུར་མེད་བདེ་བ་ཆེན་པོའི་རང་མདངས་སྟོང་པ་ཉིད་ལ་ཡེ་ཤེས་སྐྱེར་འཇུག་པས་སྐུ་མདོག་དམར་མོ། ཆོས་ཐམས་ཅད་དོན་དམ་པའི་བདེན་པར་རོ་གཅིག་པས་ཞལ་གཅིག །ཤེས་རབ་ཀྱིས་ཐབས་དབང་དུ་བྱས་པས་ཕྱག་གཉིས་མ།
དུས་གསུམ་གཟིགས་ཕྱིར་སྤྱན་གསུམ་པ། ཆོས་དབྱིངས་ལ་ཡེ་ཤེས་སྐྱེར་འཇུག་པས་སྐྲ་གྲོལ་བ། རིགས་ལྔ་བདག་པོ་ལྔའི་རང་བཞིན་མཚོན་ཕྱིར་ཐོད་སྐམ་ལྔས་བརྒྱན་པ། འདུ་བྱེད་ལྔ་བཅུ་རྩ་གཅིག་དག་པའི་ཕྱིར་ཐོད་པ་སྐམ་པོ་ལྔ་བཅུ་རྩ་གཅིག་གི་དོ་ཤལ་བྱས་པ། ཕར་ཕྱིན་ལྔ་རྣམ་པར་དག་པའི་ཕྱིར་ཐལ་བ་སྤངས་པའི་ཕྱག་རྒྱ་ལྔས་བརྒྱན་པ་སྟེ། འདིར་ཤེས་རབ་མེད་པ་ནི་ལྷ་མོ་ཉིད་ཤེས་རབ་ཡིན་པས་སོ། །ཕྱག་གཡས་པ་བགེགས་ལ་བསྡིགས་པའི་སྡིགས་མཛུབ་ཀྱིས་གཟུང་འཛིན་གྱི་སྤྲོས་པ་གཅོད་པའི་གྲི་གུག་འཛིན་པ། ཕྱག་གཡོན་པས་སྟོང་པ་དང་སྙིང་རྗེ་མཚོན་པའི་ཕྱིར་ཐོད་པ་བདུད་རྩིས་བཀང་བ་དང་བཅས་ཏེ་ཡབ་ལ་འཁྱུད་པ། ཐབས་དང་ཤེས་རབ་མཉམ་པའི་བསམ་གཏན་དང་ལྡན་པས་ཞབས་གཡོན་བརྐྱང་གཡས་བསྐུམ་གྱིས་འཁྲིལ་བས་བདེ་ཆེན་གྱི་ཡེ་ཤེས་རྒྱས་པ། སྐུ་གཅེར་བུ་ནི་ཐབས་དང་ཤེས་རབ་གཉིས་མེད་དེ་སྒྲིབ་པ་ལ་
སོགས་པ་དང་ལྷན་ཅིག་མི་གནས་པའོ། །གར་ཉམས་དགུ་དང་། ཕྱག་རྒྱ་དྲུག་དང་། དག་དྲན་རྣམས་ལའང་བཤད་ཚུལ་མང་ཡང་འདིར་ནི་ལཱུ་ཡི་པའི་རིགས་དྲུག་གི་སྒྲུབ་ཐབས་མངོན་རྟོགས་རྣམ་འབྱེད་ལས་གསུངས་པ་ལྟར་བཀོད་པའོ། །དེ་ནས་ཕྱོགས་བཞིའི་པདྨ་འདབ་མ་བཞི་ལ་དབུགས་བྲལ་གྱི་སྙིང་གར་ཉི་མའི་གདན་ལ་མདུན་དུ་མཁའ་འགྲོ་མ་མཐིང་ག །གཡོན་ཕྱོགས་སུ་ལཱ་མ་ལྗང་གུ། རྒྱབ་ཕྱོགས་སུ་དུམ་སྐྱེས་མ་དམར་མོ། གཡས་སུ་གཟུགས་ཅན་མ་སེར་མོ། བཞི་ཀ་ཡང་ཞལ་གཅིག་ཕྱག་གཉིས་གཡས་ཀྱིས་གྲི་གུག་དང་། གཡོན་གྱིས་ཐོད་པ་ཁྲག་གིས་གང་བ་འཛིན་པ། གྲུ་མོར་ཁ་ཊྭཱཾ་ག་དང་། རུས་པའི་རྒྱན་ཆ་ལྔས་བརྒྱན་པ། གཅེར་མོ་སྤྱན་གསུམ་སྐྲ་གྲོལ་གཡས་བརྐྱང་གཡོན་བསྐུམ་སྟབས་ཀྱིས་བཞུགས་པ་སྟེ། ལྷ་མོ་བཞི་ཡི་མཚན་ནི། གཙོ་བོ་ཡབ་ཡུམ་གྱི་ཁམས་ཟླ་ཉི་ལྷུང་བ་ལས་སྐྱེས་པ་ཆོས་ཉིད་ཀྱི་མཁའ་ལ་
དགོངས་པའི་རྩལ་གྱིས་ལུས་མི་སྣང་བར་འགྲོ་བས་ན་མཁའ་འགྲོ་མ་སྟེ། ནག་པོ་པའི་བདེ་མཆོག་འཁོར་ལོའི་བཤད་པ་ལས། ཉི་ཟླ་རྣམ་དག་སྲིད་ལས་སྐྱེས། །རང་བཞིན་གྱིས་ནི་རོ་མཉམ་དེ། །པདྨ་མཆོག་གི་གནས་སུ་ལྷུང་། །དེ་སྐྱེས་རང་བྱུང་ཡང་དག་ལྡན། །ཌཱ་ནི་མཁའ་འགྲོ་མ་ཞེས་བྱ། །སངས་རྒྱས་ཁམས་སུ་རབ་ཏུ་བཏགས། །ནམ་མཁར་ཀུན་ཏུ་རྒྱུ་གྲུབ་པས། །མཁའ་འགྲོ་མ་ཞེས་བྱ་བར་བརྗོད། །ཅེས་དང་། དེ་ལས་སྐྱེས་པའི་མཁའ་འགྲོ་མའི་གཟུགས་ཀྱི་རྣམ་པའི་ཚུལ་ཇི་བཞིན་དུ་འཛིན་པས་ན་གཟུགས་ཅན་མ་སྟེ། དེ་ལས་སྐྱེས་པ་གཟུགས་ཇི་བཞིན། །གཟུགས་ཅན་མ་ཞེས་མངོན་པར་བརྗོད། །ཅེས་དང་། མཁའ་འགྲོ་མའི་སྐུའི་བཀོད་པའི་ཆ་ཤས་དུམ་བུ་ལས་སྐྱེས་པས་ན་དུམ་སྐྱེས་མ་སྟེ། །གཟུགས་ལས་རིམ་པར་སྐྱེས་པ་ཉིད། །མཚོན་པར་ཡང་ནི་དུམ་སྐྱེས་མ། །ཞེས་དང་། སྐྱེས་པ་དང་བུད་མེད་ཀྱི་མཛེས་པའི་ཆོས་ཐམས་ཅད་
ཡོངས་སུ་རྫོགས་པས་ན་ལཱ་མ་སྟེ། གང་ཡང་མཛེས་པས་ཡོངས་གང་ན། །སྐྱེས་པ་བུད་མེད་ལས་བྱུང་བ། །མཚན་མ་ཀུན་གྱི་ཡོངས་སུ་རྫོགས། །དེས་ན་ལཱ་མར་རབ་ཏུ་གྲགས། །ཞེས་གསུངས་ལ། ཡང་མཁའ་འགྲོ་རྒྱ་མཚོའི་དབང་གི་རབ་བྱེད་ལས། མཆོག་ཏུ་འགྲོ་བའི་ངང་ཚུལ་ཕྱིར། །མཁའ་འགྲོ་མ་ཞེས་རབ་ཏུ་གྲགས། །གང་ཞིག་རྟག་ཏུ་གདུག་ཟ་བ། །ལཱ་མ་ཞེས་བྱར་དེ་བཞིན་དྲན། །དེ་བཞིན་ཤེས་བྱ་གཞན་ཉིད་ཀྱང་། །དུམ་བུར་བྱེད་ཅིང་སྐྱེད་པས་ཀྱང་། །དུམ་སྐྱེས་མ་ཞེས་བྱ་བར་བརྗོད། །སྣ་ཚོགས་པ་ཡི་གཟུགས་འཛིན་ཕྱིར། །གཟུགས་ཅན་མ་ཞེས་རབ་ཏུ་བཤད། །ཅེས་གསུངས་སོ། །མཁའ་འགྲོ་མ་བཞིའི་ངོ་བོ་ནི་ཨིནྡྲ་བྷུ་ཏིའི་རྒྱ་གཞུང་ལས། རྡོ་རྗེ་མཁའ་འགྲོ་མ་ནི་ཉེ་བའི་མཱ་མ་ཀཱི་སྟེ་གྲི་གུག་དང་ཀ་པཱ་ལ་ཐོགས་པའི་སྔོན་མོའོ། །རྡོ་རྗེ་ལཱ་མ་ནི་ཉེ་བའི་སྒྲོལ་མ་སྟེ་གྲི་གུག་དང་ཀ་པཱ་ལ་བསྣམས་པའི་ལྗང་གུའོ། །དུམ་སྐྱེས་མ་ནི་ཉེ་
བའི་གོས་དཀར་མོ་སྟེ་གྲི་གུག་དང་ཀ་པཱ་ལ་ཐོགས་པ་དམར་མོའོ། །གཟུགས་ཅན་མ་ནི་ཉེ་བའི་སངས་རྒྱས་སྤྱན་མ་སྟེ་གྲི་གུག་དང་ཀ་པཱ་ལ་ཐོགས་པ་སེར་མོའོ། །ཞེས་གསུངས་སོ། །དེ་ནས་དག་པ་ནི། གཡས་ཀྱི་གྲི་གུག་ནི་ཡེ་ཤེས། གཡོན་གྱི་ཐོད་པ་ནི་སྙིང་རྗེ། ཁ་ཊྭཱཾ་ག་ནི་བསམ་གཏན་ཏེ་གཞན་རྣམས་སྔར་བཤད་པ་དང་འདྲའོ། །དེ་ནས་མཚམས་བཞིའི་པད་སྟེང་དུ་ཟླ་བའི་སྟེང་དུ་བུམ་པ་བདུད་རྩི་ལྔས་གང་བ་དང་ཐོད་པ་ཤ་ལྔས་གང་བ་བསྒོམ་པ་ནི། ཨིནྡྲ་བྷུ་ཏིའི་བདེ་མཆོག་ཉུང་ངུའི་རྣམ་བཤད་ལས། མཚམས་བཞིའི་བུམ་པ་ནི། རྣམ་སྣང་དང་། རིན་འབྱུང་དང་། སྣང་མཐའ་དང་། དོན་ཡོད་གྲུབ་པ་བཞི་ནང་དུ་བཞུགས་པའི་ཕྱི་རོལ་དུ་བུམ་པར་སྣང་བའོ། །བུམ་པའི་སྟེང་གི་ཐོད་པའི་ཤ་ལྔ་ནི་འཆི་བདག་གི་བདུད་འཇོམས་པའོ། །པདྨས་མཚན་པའི་གྲི་གུག་གི་ཕྲེང་བས་བསྐོར་བ་ནི་འགྲེལ་པས་ཁ་བསྐང་བའོ། །ཞེས་གསུངས་སོ། །དེ་ནས་བྱང་
ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའི་ངོ་བོ་ནི་དཀྱིལ་འཁོར་གྱི་འཁོར་ལོའི་དཔའ་མོ་སུམ་ཅུ་རྩ་བདུན་ཏེ། གཙང་བདེ་རྟག་བདག་བཞིར་ཞེན་པའི་གཉེན་པོ་ནི་དྲན་པ་ཉེར་བཞག་བཞི་སྟེ། དྲན་པ་ནི་ཉམས་སུ་མྱོང་བའི་དོན་མི་བརྗེད་པ། དེ་ལ་འཛིན་མེད་དུ་བློ་ཉེ་བར་འཇོག་པ་ནི་དྲན་པ་ཉེ་བར་འཇོག་པ་སྟེ། དེ་ཡང་འདི་ལྟར་འབྱུང་བ་དང་འབྱུང་བ་ལས་གྱུར་པའི་དབང་པོ་ལྔ་ཚོགས་པ་ནི་ལུས་ཏེ། དེ་ཉིད་ལ་སེམས་མ་ཡེངས་པར་དྲན་པ་ཉེ་བར་བཞག་པས་ལུས་ལ་ཐ་མལ་པའི་གཙང་འཛིན་གྱི་རྟོག་པ་དང་བྲལ་ཏེ་གཙང་མའི་ཕ་རོལ་ཏུ་སོན་པར་གྱུར་པ་ནི་ལུས་དྲན་ཉེར་བཞག་སྟེ་དེ་རྣམ་པར་དག་པའི་ངོ་བོ་ནི་མཁའ་འགྲོ་མའོ། །བདེ་སྡུག་ལ་སོགས་པ་ཉམས་སུ་མྱོང་བ་ནི་ཚོར་བ་སྟེ། དེ་ལ་སེམས་ཉེ་བར་བཞག་པས་བདེ་འདོད་ཀྱི་རྟོག་པ་རང་སར་གྲོལ་ཏེ་བདེ་བ་མཆོག་གི་ཕ་རོལ་ཏུ་སོན་པ་ནི་ཚོར་བ་དྲན་པ་ཉེ་བར་
བཞག་པ་སྟེ་དེ་རྣམ་པར་དག་པའི་ངོ་བོ་ནི་ལཱ་མའོ། །ཡང་དག་པའི་མཐའ་ནི་ཆོས་ཏེ་དེ་ལ་སེམས་ཉེ་བར་བཞག་པས་རྟག་ཆད་ཀྱི་མཐའ་ཐམས་ཅད་རང་སར་བྲལ་ཏེ་ཆོས་ཉིད་འགྱུར་མེད་རྟག་པ་དམ་པའི་ཕ་རོལ་ཏུ་ཕྱིན་པ་ནི་ཆོས་དྲན་ཉེར་བཞག་སྟེ་དེ་རྣམ་པར་དག་པ་ནི་དུམ་སྐྱེས་མའོ། །ཡུལ་སྣང་སོ་སོར་སྣང་བ་ཙམ་གྱི་རྣམ་ཤེས་ནི་སེམས་ཏེ། དེ་ལ་དྲན་པ་ཉེ་བར་བཞག་པས་བདག་ཏུ་འཛིན་པ་ཐམས་ཅད་རང་སར་གྲོལ་ཏེ་བདག་དམ་པའི་ཕ་རོལ་ཏུ་སོན་པ་ནི་སེམས་དྲན་པ་ཉེར་བཞག་སྟེ་དེ་རྣམ་པར་དག་པའི་ངོ་བོ་ནི་ལྷ་མོ་གཟུགས་ཅན་མའོ། །དེ་ཡང་ནང་ལྟར་ན་སྙིང་ག་ཆོས་ཀྱི་འཁོར་ལོའི་རྩ་བརྒྱད་ལས་ཕྱོགས་ཀྱི་འདབ་མ་བཞིའི་ངོ་བོ་ནི་མཁའ་འགྲོ་མ་བཞི་དང་། མཚམས་ཀྱི་རྩ་བདུད་རྩི་འབབ་པ་བཞི་ཡི་ངོ་བོ་ནི་བུམ་པ་བཞི་སྟེ། དཔྱིད་ཀྱི་ཐིག་ལེ་ལས། འདབ་མ་རྣམས་ན་བཞི་པོ་ཡང་། །ཕྱོགས་བཞིར་རྣམ་པར་གནས་པ་སྟེ། །འབྱུང་བ་བཞི་
ཡི་རྩ་རྣམས་ནི། །ཐུགས་ཀྱི་རྡོ་རྗེའི་གནས་སུ་གནས། །མཁའ་འགྲོ་དེ་བཞིན་ལཱ་མ་དང་། །དུམ་སྐྱེས་མ་དང་གཟུགས་ཅན་མ། །མཚམས་ན་གནས་པའི་རྩ་རྣམས་ནི། །བཞི་པོ་ཡང་དེ་རུ་སོན་པའོ། །བདུད་རྩི་ལྔ་འབབ་པ་དེ་ནི། །མཆོད་པའི་ངོ་བོར་གནས་པ་སྟེ། །དེ་ཡི་གཟུགས་ཉིད་དངོས་པོ་ཡི། །མཆོད་པ་བཞི་ཞེས་རྣམ་པར་བཤད། །ལུས་ཅན་སྙིང་གི་ནང་དུ་ནི། །རྩ་རྣམ་ལྔ་ནི་རྣམ་པར་གནས། །ཞེས་གསུངས་སོ། །དེ་བཞིན་རྫུ་འཕྲུལ་གྱི་རྐང་པ་བཞི་ནི་སྔར་བཤད་རབ་གཏུམ་མ་སོགས་མཁའ་འགྲོ་བཞི་དང་། དབང་པོ་ལྔ་ནི་དཔའ་མོ་བློ་གྲོས་མ་སོགས་ལྔ་དང་། སྟོབས་ལྔ་ནི་ལྷ་མོ་འཇིགས་བྱེད་མ་སོགས་ལྔ་དང་། བྱང་ཆུབ་ཀྱི་ཡན་ལག་བདུན་ནི་རྟ་རྣ་མ་སོགས་ལྷ་མོ་བདུན་དང་། འཕགས་པའི་ལམ་ཡན་ལག་བརྒྱད་ནི་ལྷ་མོ་སྟོབས་ཆེན་མ་སོགས་གསུམ་དང་། ཁྭ་གདོང་མ་བཞི་དང་། གཙོ་བོ་དཔལ་ཧེ་རུ་ཀ་དཔལ་ཉིད་དང་བརྒྱད་དོ། །
ཡང་དག་པར་སྤོང་བ་བཞི་ནི་གཤིན་རྗེ་བརྟན་མ་སོགས་མཚམས་མ་བཞི་སྟེ་བྱང་ཆུབ་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དག་པའི་ངོ་བོ་ལྷ་སོ་བདུན་ནི་དོན་གྱིས་དཀྱིལ་འཁོར་འདིར་ཚང་བ་ཡིན་ནོ། །ཚུལ་འདི་དག་ཀྱང་སློབ་དཔོན་མི་ཐུབ་ཟླ་བའི་བདུད་རྩི་འཛག་པ་དང་དཔྱིད་ཐིག་གི་དགོངས་པ་དང་མཐུན་པར་བཤད་པའོ། །འདིར་དངོས་བསྟན་དྲན་ཉེ་བཞི་ལས་བྱང་ཕྱོགས་གཞན་རྣམས་ཞིབ་པར་མ་བཤད་པས་གཞན་དུ་ཤེས་པར་བྱའོ། །དེ་ནས་ཕྱི་རོལ་དུ་བཅོས་ཏེ་དབང་པོ་ཡུལ་ལ་འཇུག་པའི་བག་ཆགས་སྦྱང་བའི་ཕྱིར་བཞི་པ་ཡི་གེ་དགོད་པ་ནི། གཙོ་འཁོར་ལྔ་པོ་ཀུན་གྱི་སྤྱི་བོར་ཟླ་བ་ལ་སྐུའི་ངོ་བོ་ༀ་དཀར་པོ། མགྲིན་པར་པདྨ་ལ་གསུང་གི་ངོ་བོ་ཨཱཿདམར་པོ། ཐུགས་ཀར་སྣ་ཚོགས་རྡོ་རྗེ་གདན་ཐབས་ཀྱི་ལྟེ་བར་ཐུགས་ཀྱི་ངོ་བོ་ཧཱུྃ་སྔོན་པོ་དང་། གཙོ་བོ་བཅོམ་ལྡན་འདས་ཀྱི་ཐུགས་ཀར་གོ་ཆའི་ལྷ་རྡོ་རྗེ་སེམས་དཔའི་ངོ་བོ་ༀ་ཧ་དཀར་པོ།
མགོ་བོར་རྣམ་པར་སྣང་མཛད་ཀྱི་ངོ་བོ་ན་མ་ཧི་སེར་པོ། སྤྱི་གཙུག་ཏུ་པདྨ་གར་དབང་གི་ངོ་བོ་སྭཱ་ཧཱ་ཧུ་དམར་པོ། ཕྲག་པ་གཉིས་ལ་དཔལ་ཧེ་རུ་ཀའི་ངོ་བོ་བཽ་ཥཊྲ་ཧེ་ནག་པོ། མིག་གཉིས་སུ་རྡོ་རྗེ་ཉི་མའི་ངོ་བོ་ཧཱུྃ་ཧཱུྃ་ཧོཿདམར་སེར། ཡན་ལག་ཐམས་ཅད་ལ་རྟ་མགྲིན་གྱི་ངོ་བོ་ཕཊྲ་ཧཾ་ལྗང་གུ་སྟེ་ཀུན་སྤྱོད་ཀྱི་རྒྱུད་འགྲེལ་ལས་མཛོད་སྤུ་དང་ལག་པའི་མཁྲིག་མ་གཉིས་དང་རྐང་པའི་ལོང་བུ་གཉིས་རྣམས་སུ་བསྐྱེད་པར་གསུངས་སོ། །དེ་ནས་ཡུམ་གྱི་གོ་ཆའི་ཡི་གེ་དགོད་པ་ནི། ལྟེ་བར་ཕག་མོའི་ངོ་བོ་ༀ་བཾ་དམར་པོ། སྙིང་གར་གཤིན་རྗེ་མའི་ངོ་བོ་ཧཾ་ཡོཾ་སྔོན་པོ། ཁ་ལ་རྨོངས་བྱེད་མའི་ངོ་བོ་ཧྲིཾ་མོཾ་དམར་མོ། མགོ་བོར་སྐྱོད་བྱེད་མའི་ངོ་བོ་ཧྲིཾ་ཧྲིཾ་སེར་པོ། སྤྱི་བོར་སྐྲག་བྱེད་མའི་ངོ་བོ་ཧཱུྃ་ཧཱུྃ་ལྗང་གུ། ཡན་ལག་ལྔར་གཏུམ་མོའི་ངོ་བོ་ཕཊ་ཕཊ་དུད་ཁ་རྣམས་ཀྱིས་མཚན་པར་བསམ་མོ། །འདི་དག་ཀྱང་སྐུའི་ཕྱི་ན་གོ་ཆ་བགོ་བའི་ཚུལ་ཡིན་པས་སྐུའི་ནང་དུ་མི་
བསྒོམ་སྟེ། སློབ་དཔོན་བཱི་ར་བཛྲ་གྱི་མངོན་རྟོགས་དཀའ་འགྲེལ་དུ། རྒྱ་དང་རྒྱ་ཡི་འབུར་བཞིན་དུ་ཤེས་པར་བྱའོ། །ཞེས་གསུངས་སོ། །འདོད་ཡོན་གྱི་སྣམ་བུ་རྣམས་ལ་གནས་པའི་རིག་མ་བཅུ་དྲུག་གི་འཁོད་ཚུལ་ནི། ཤར་གྱི་གཡོན་དུ་པི་ཝང་མ་སྔོན་མོ་དང་གླིང་བུ་མ་སེར་མོ། བྱང་གི་གཡས་སུ་རྔ་ཟླུམ་མ་དམར་མོ་དང་རྫ་རྔ་མ་ལྗང་མོ། བྱང་གི་གཡོན་དུ་བཞད་མ་དམར་མོ་དང་སྒེག་མོ་སྔོན་མོ། ནུབ་ཀྱི་གཡས་སུ་གླུ་མ་སེར་མོ་དང་གར་མ་ལྗང་མོ། ནུབ་ཀྱི་གཡོན་དུ་མེ་ཏོག་མ་སེར་མོ་དང་བདུག་སྤོས་མ་ནག་མོ། ལྷོའི་གཡས་སུ་མར་མེ་མ་དམར་མོ་དང་དྲི་ཆབ་མ་ལྗང་མོ་དྲིའི་དུང་ཆོས་འཛིན་པ། ལྷོའི་གཡས་སུ་གཟུགས་རྡོ་རྗེ་མ་དཀར་མོ་མེ་ལོང་དང་རོ་རྡོ་རྗེ་མ་དམར་མོ་ཞལ་ཟས་ཐོགས་པ། ཤར་གྱི་གཡས་སུ་རེག་བྱ་རྡོ་རྗེ་ལྗང་གུ་ན་བཟའ་དང་ཆོས་དབྱིངས་རྡོ་རྗེ་མ་དཀར་མོ་ཆོས་འབྱུང་སྤྱན་མཚན་འཛིན་པ་སྟེ་ཐམས་ཅད་ཀྱང་ཞི་མ་དར་དང་རིན་པོ་
ཆེས་བརྒྱན་པའོ། །དེ་ནས་ཡེ་ཤེས་པ་དགུག་ཅིང་བསྟིམ་པ་ནི། འབར་བའི་ཕྱག་རྒྱ་དང་ཕེཾ་གྱི་སྒྲས་བསྐུལ་བ་སྟེ། ཀུན་སྤྱོད་དང་མངོན་འབྱུང་གི་རྒྱུད་ལས། མཛུབ་མོ་མདུད་བྱ་གུང་མོ་ངེས་པར་སྦྱར། །མཐེ་བོང་རྡོ་རྗེ་བརྟན་པོར་རབ་སྦྱར་ཏེ། །དེ་ནི་དཔྲལ་བའི་དབུས་སུ་རབ་སྦྱར་ནས། །བསྐོར་ཞིང་བསྐོར་ཞིང་ཀུན་ཏུ་བསྐོར་བར་བྱ། །རྐང་པ་མནན་ཅིང་གྱེན་དུ་བལྟ། །རབ་ཏུ་ཕེཾ་གྱི་སྒྲ་སྒྲོགས་པས། །ཕྱོགས་བཅུའི་འཇིག་རྟེན་ཁམས་གནས་པའི། །དཔའ་བོ་རྣལ་འབྱོར་མ་རྣམས་འགུགས། །ཞེས་གསུངས་པ་ལྟར་འགྲེལ་པ་ལས་ཀྱང་རྐང་པ་གཡས་གཡོན་གྱིས་མནན་པ་ནི་རྐང་པའི་ཕྱག་རྒྱ། སྟེང་དུ་བལྟ་བ་ནི་མིག་གི་ཕྱག་རྒྱ། ཕེཾ་གྱི་སྒྲ་སྒྲོགས་པ་ནི་ངག་གི་ཕྱག་རྒྱ། མཛུབ་མོ་གཉིས་མདུད་པར་བྱས་པ་ལག་པའི་ཕྱག་རྒྱ་སྟེ་ཕྱག་རྒྱ་བཞིས་ཡེ་ཤེས་པ་སྤྱན་དྲངས་པ་སྟེ། ཕྱག་རྒྱ་བཞི་ཡི་མ་སྦས་བཤད་ཐབས་གྲོལ་གྱི་ལམ་ལ་སྦྱར་བ་རྒྱ་ཆེར་
རྒྱུད་འགྲེལ་དུ་འབྱུང་ཡང་བསྐྱེད་རིམ་སྐབས་མི་མཁོ་བས་མ་སྤྲོས་སོ། །ཕེཾ་གྱི་སྒྲ་ནི་མཁའ་འགྲོ་མའི་དམ་ཚིག་ཅེས་བརྗོད་པ་སྟེ་ཐུང་ངུ་མ་ཡིན་པར་ཡི་གེ་རིང་པོ་གསུམ་གྱི་གདངས་ཐོན་པ་ཕོ་ཉ་གསུམ་འདུས་པའི་ངོ་བོ་ཡིན་ཅེས་བཤད་རྒྱུད་སམྦུ་ཊ་ལས་གསུངས་སོ། །དེ་ནས་ཡིད་ཀྱི་ཏིང་ངེ་འཛིན་གྱིས་སྤྱན་དྲངས་པ་ནི། སྙིང་གར་ཉི་མ་ལ་གནས་པའི་ཧཱུྃ་གི་འོད་ཀྱིས་དཔལ་འཁོར་ལོ་སྡོམ་པ་ལྷ་ལྔའི་ཡེ་ཤེས་ཀྱི་དཀྱིལ་འཁོར་དང་། གཞན་ཡང་ཕྱོགས་བཅུར་བཞུགས་པའི་དཔའ་བོ་དང་རྣལ་འབྱོར་མ་རྣམས་དང་དབང་ལྷ་རྒྱལ་བ་སྲས་བཅས་ཐམས་ཅད་ལྷ་སོ་བདུན་གྱི་རྣམ་པར་མདུན་གྱི་ནམ་མཁར་སྤྱན་དྲངས་ནས་བཞུགས་པ་ལ། རང་གི་ཐུགས་ཀ་ནས་སྤྲོས་པའི་པི་ཝང་མ་སོགས་ལྷ་མོ་བཅུ་དྲུག་གིས་མཆོད། དེ་ནས་རྡོ་རྗེ་ལྕགས་ཀྱུ་ལ་སོགས་པའི་ཕྱག་རྒྱ་བཞི་འཆིང་བཞིན་པས། ཛཿཞེས་པས་ཡེ་ཤེས་པ་རྣམས་དམ་ཚིག་པ་དང་ཉེ་བར་དགུག །ཧཱུྃ་ཞེས་
པས་དམ་ཚིག་པ་ལ་གཞུག །བཾ་གྱིས་དམ་ཚིག་པ་ལ་འབྲལ་མེད་དུ་བཅིངས། ཧོཿཡིས་དགྱེས་ཤིང་རང་གི་དབང་དུ་བྱས་པར་མོས། དབང་གི་ལྷ་རྣམས་མ་གཏོགས་ཡེ་ཤེས་པ་རྣམས་དམ་ཚིག་པ་རྣམས་ལ་ཆུ་ལ་ཆུ་ཐིམ་པ་ལྟར་བསམས་ལ། ལག་གཉིས་རྣམ་ལྔ་འདོད་སྐོར་ཏེ། ཇི་སྐད་དུ། སྙིང་ག་ནུ་མ་གཡས་དང་ནི། །སྙིང་ག་ནུ་གཡོན་སྙིང་ག་རུ། རིམ་པར་ལག་གཉིས་པད་ཀོར་བཅས། ཞེས་གསུངས་པ་ལྟར་པད་ཀོར་དང་པོ་སྙིང་ག །གཉིས་པ་ནུ་གཡས་ཐད། གསུམ་པ་སྙིང་ག །བཞི་པ་ནུ་གཡོན་ཐད། ལྔ་པ་སྙིང་གར་བསྐོར་བ་སྟེ་འདོད་ཡོན་ལྔ་མཆོད་ཀྱི་ཕྱག་རྒྱ་པད་ཀོར་ལྔ་བྱ་བ་ལ་རྣམ་ལྔ་འདོད་སྐོར་ཞེས་གསང་སྔགས་ཕྱི་འགྱུར་གསར་མ་པ་ལ་ཡོངས་སུ་གྲགས་བ་ལྟར་སྔོན་དུ་འགྲོ་བས་འཁྱུད་རྒྱ་དང་བཅས་ཏེ་ༀ་སརྦ་ཡོ་ག་སོགས་བརྗོད་པར་བྱ་སྟེ། སྔགས་དོན། ༀ་ཡོ་ག་ཤུདྡྷཱཿནི་རྣལ་འབྱོར་དག་པའི་བདག་ཉིད་ཅན་ཏེ་ཀུན་
རྫོབ་སྒྱུ་མ་ལྟ་བུའི་ལྷར་དག་པ་དང་། དོན་དམ་པར་སྐྱེ་མེད་དུ་དག་པའོ། །གང་དག་ཅེ་ན་སརྦ་དྷརྨཱ ཿནི་ཆོས་ཐམས་ཅད་དེ་ཕུང་ཁམས་སྐྱེ་མཆེད་ཀྱིས་བསྡུས་པ་ཐམས་ཅད་དོ། །ཅིར་དག་ཅེ་ན་ཤུདྡྷོ྅ཧཾ་སྟེ་ཤེས་རབ་དང་སྙིང་རྗེ་དབྱེར་མེད་པའི་བྱང་ཆུབ་སེམས་ཀྱི་རང་བཞིན་དུ་དག་པའི་རྣལ་འབྱོར་ངའོ། །ཞེས་པ་སྟེ། དེ་དོན་གསལ་གདབ་པའི་ཕྱིར། ཆོས་རྣམས་ཐམས་ཅད་ཐབས་བདེ་བ་ཆེན་པོ་དང་ཤེས་རབ་སྟོང་པ་ཉིད་དབྱེར་མེད་པའི་ངང་དུ་དག་པས་ན། རྣལ་འབྱོར་ཟབ་མོ་ལ་འཇུག་པའི་རྣལ་འབྱོར་བདག་ཀྱང་དེ་ཡི་ངོ་བོར་རྣམ་པར་དག་གོ་ཞེས་ང་རྒྱལ་བཟུང་བའོ། །རིམ་པ་འདི་དག་ཀྱང་ལཱུ་ཡི་པའི་རྒྱ་གཞུང་ལས། རྐང་གཡས་གཡོན་གྱིས་མནན་ནས་ནི། །གཡོན་མིག་ཅུང་དམའ་གྱེན་དུ་བལྟ། །ལག་གཉིས་མཐེབ་རྩེ་ཐུར་བསྟན་ཏེ། །ཡང་དག་མནན་ནས་སྡིགས་མཛུབ་གཉིས། །ལུ་གུ་རྒྱུད་ཀྱིས་རྣམ་པར་བཅིངས། །གུང་མོ་གཉིས་ནི་སྤྲད་བྱས་
ཏེ། །ལྷག་མ་བརྐྱངས་ནས་མགོ་སྟེང་དུ། །གཡོན་དང་གཡས་སུ་བསྐོར་བར་བྱ། །ཕྱག་རྒྱ་དྲྭ་བ་ཞེས་པ་འདིས། ཕེཾ་ཡིག་བརྗོད་པ་དང་བཅས་པས། །སྙིང་གར་ཉི་གནས་ཏིང་འཛིན་སེམས། །ཧཱུྃ་ཡིག་འོད་ཟེར་གྱིས་བཀུག་པའི། །ཡེ་ཤེས་འཁོར་ལོ་པི་ཝང་སོགས། །མཆོད་ནས་བདག་ལ་གཞུག་པར་བྱ། །གསང་སྔགས་བརྗོད་ཅིང་པད་ཀོར་གྱིས། །འཁྱུད་པའི་སྟངས་ཀྱིས་མཉེས་པར་བྱ། །ཞེས་གསུངས་པ་ལྟར་རོ། །དེ་ནས་བདག་ཉིད་དམ་ཚིག་པའི་ལྷ་རྣམས་ཀྱིས་དེ་བཞིན་གཤེགས་པ་ཀུན་གྱིས་བདག་ལ་དབང་བསྐུར་བར་མཛད་དུ་གསོལ་ཞེས་གསོལ་བ་བཏབ་པའི་མོད་ཁྭ་གདོང་མ་སོགས་སྒོ་མ་བཞི་དང་གཤིན་རྗེ་བརྟན་མ་སོགས་མཚམས་མ་བཞི་དང་བརྒྱད་ཀྱིས་བགེགས་རྣམས་བསྐྲད། དཔའ་བོ་ཐོད་པའི་དུམ་བུ་སོགས་ཉེར་བཞིས་ཤིས་པ་བརྗོད། །དཔའ་མོ་རབ་གཏུམ་མ་སོགས་ཉེར་བཞིས་གླུ་བླངས། ཡུམ་མཁའ་འགྲོ་མ་བཞི་
དང་ཕག་མོར་བཅས་པས་རིན་པོ་ཆེའི་བུམ་པ་བདུད་རྩིས་གང་བ་བསྣམས་ནས། ཇི་ལྟར་བལྟམས་ཚེ་སོགས་དང་། ༀ་སརྦ་ཏ་ཐཱ་སོགས་ཀྱི་སྔགས་བརྗོད་བཞིན་ཡེ་ཤེས་བདུད་རྩིའི་རྒྱུན་གྱིས་དབང་བསྐུར་བས་གཞི་དུས་ཀྱི་དབང་ལ་ལམ་དབང་གིས་གསོས་བཏབ་པས་དབང་བཞི་ཅིག་ཆར་དུ་རྫོགས། དབང་བསྐུར་གྱི་ལྷ་རྣམས་ཀྱང་དཔལ་བདེ་བ་ཆེན་པོའི་བདག་ཉིད་རང་ལ་ཐིམ་པར་བསམ། སྔགས་དོན་ༀ་ནི་སྔགས་ཀྱི་མགོ་འདྲེན། སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད་ཨ་བྷི་ཥེ་ཀ་ཏ་མངོན་པར་དབང་བསྐུར་བ། ས་མ་ཡ་དམ་ཚིག །ཤྲཱི་ཡེ་དཔལ་ལ། ཧཱུྃ་ནི་སྔགས་ཀྱི་མཐའ་རྟེན་སྐབས་འདིར་སྐུལ་ཚིག་སྟེ་དེ་དག་དོན་འགྲེལ་ཚིག་གྲོགས་དང་སྦྱར་ན། དེ་བཞིན་གཤེགས་པ་ཐམས་ཅད་ཀྱིས་མངོན་པར་དབང་བསྐུར་བའི་དམ་ཚིག་གི་དཔལ་ལ་གནས་པར་མཛོད་ཅིག །ཅེས་སོ། །དེ་ལྟར་དབང་བསྐུར་བས་ཆུའི་ལྷག་མ་ཡར་ལུད་པ་
ལས། བཅོམ་ལྡན་འདས་ལ་མི་བསྐྱོད་པ། རྡོ་རྗེ་ཕག་མོ་ལ་རྣམ་པར་སྣང་མཛད། ཡུམ་བཞི་ལ་རིན་འབྱུང་གིས་དབུ་བརྒྱན་པར་བསམ་མོ། །དེ་ནས་རང་གི་ཐུགས་ཀའི་ས་བོན་ལས་བྱུང་བའི་ལྷ་མོའི་ཚོགས་མཆོད་རྫས་འཛིན་པ་ནམ་མཁའི་ཁམས་ཐམས་ཅད་གང་བས་བདག་ཉིད་དམ་ཚིག་པའི་དཀྱིལ་འཁོར་མཆོད་པར་བསམས་ལ། ཆུ་བཞི་སྔོན་དུ་འགྲོ་བའི་ཉེར་སྤྱོད་རྣམས་དང་། རིག་མ་བཅུ་གཅིག་གིས་མཆོད། མཆོད་པའི་སྔགས་དོན་དང་ཕྱག་རྒྱ་རྗེས་ནས་འཆད། དེ་ནས་ལཱུ་ཡི་པའི་རྒྱ་གཞུང་དུ། བདུད་རྩི་རོ་མས་དྲངས་གསོལ་ནས། །རབ་དགྱེས་རྐང་པ་བརྒྱད་པས་བསྟོད། །ཅེས་གསུངས་པ་ལྟར། སླར་ཡང་རང་གི་ཐུགས་ལས་སྤྲུལ་པའི་མཆོད་པའི་ལྷ་མོ་བདུད་རྩིས་གང་བའི་ཐོད་པ་ཐོགས་པ་རྣམས་ཀྱིས་བདུད་རྩི་ཕུལ་བས། ལྷ་རྣམས་ཀྱི་ལྗགས་ཧཱུྃ་ལས་གྲུབ་པའི་རྡོ་རྗེ་རྩེ་གསུམ་གྱི་རྣམ་པའི་དབུས་ཀྱི་སྦུ་གུས་བདུད་རྩི་དྲངས་ནས་གསོལ་
ཏེ་དགྱེས་པས་བདག་གིར་བཞེས་པར་བསམས་ལ། ༀ་ཨ་མྲྀ་ཏ་སོགས་ཀྱི་སྔགས་དོན་ནི། ༀ་ཨ་མྲྀ་ཏ་བདུད་རྩི། སྭཱ་ད་མྱོང་བའི། སྭ་བྷཱ་ཝ་རང་བཞིན་གྱིས། ཨཏྨ་ཀོ྅ཧཾ་བདག་ཉིད་ངའོ། །ཞེས་དགྱེས་པས་གསུང་སྩལ་བའོ། །དེ་ནས་ནང་མཆོད་ༀ་ཨཱཿཧཱུྃ་གིས་བྱིན་གྱིས་བརླབས་ཏེ། གཡོན་པའི་མཐེབ་སྲིན་ཉི་ཟླའི་གའུ་སྦྱར་བས་ནང་མཆོད་ནས་ཐིག་གཏོར་ཏེ་བརྒྱུད་པའི་བླ་མ་རྣམས་ཀྱང་སྤྱི་བོའི་ཐད་ཀྱི་ནམ་མཁར་བཞུགས་པར་བསམས་ལ་བླ་མ་དང་ཡི་དམ་གྱི་སྙིང་པོ་ལ་ༀ་ཨཱཿཧཱུྃ་བཏགས་པས་བདུད་རྩི་ཕུལ་མ་མཆོད་ལྷ་རྣམས་ཀྱང་རང་ལ་བསྟིམ། དེ་ནས་ཚིགས་སུ་བཅད་པ་རྐང་པ་བརྒྱད་ཀྱི་སྔགས་ཀྱིས་བསྟོད་པ་ནི། ༀ་ནི་སྔགས་ཀྱི་ནོར་བུ་འཛིན་པ། ན་མོ་ཕྱག་འཚལ་ལོ། །བྷ་ག་ཝ་ཏེ་བཅོམ་ལྡན་འདས་མ། བཱི་ར་དཔའ་བོ་དང་ཨི་ཤ་དབང་པོ་གཉིས་མཚམས་སྦྱར་ཏེ། ན་མས྄་གོང་དུ་ཡོད་པ་ལ་བཞི་པའི་ངོ་སྦྱར་བས་བཱི་རེ་ཤཱ་ཡ་དཔའ་བོའི་དབང་པོ་
ལའོ། །མཐའ་རྟེན་ཧཱུྃ་ཐུང་ངུ་ནི་ཆོས་སྐུ། ཧཱུྃ་རིང་པོ་ནི་ལོངས་སྐུ། ཕཊྲ་ནི་སྤྲུལ་སྐུ་སྟེ་དང་པོས་ཆོས་ཉིད་སྐྱེ་བ་མེད་པ་དང་། གཉིས་པས་ལོངས་སྐུ་འགགས་པ་མེད་པ་དང་། གསུམ་པས་སྤྲུལ་པ་སྣ་ཚོགས་པས་བདུད་དང་ལོག་འདྲེན་ཐམས་ཅད་འཇོམས་པར་བསྟན་པའོ། །རྣམ་དབྱེ་བཞི་པ་ཀུན་གྱི་མཐར་ཕྱིན་པ་དང་ཧཱུྃ་ཧཱུྃ་ཕཊྲ་ནི་ཕྱི་མ་ཀུན་ལ་འདྲའོ། །དོན་འགྱུར་ནི། ༀ་བཅོམ་ལྡན་དཔའ་བོའི་དབང་པོ་ལ་ཕྱག་འཚལ། །ཞེས་པའོ། །རྐང་པ་གཉིས་པའི་མ་ཧཱ་ནི་ཆེན་པོ། ཀལྤ་ནི་བསྐལ་པ། ཨགྣི་ནི་མེ། སནྣི་བྷཱ་ཡ་མཚུངས་པ་ལའོ། །ཀལྤ་དང་ཨགྣི་དབྱངས་སྦྱར་བས་ཀལྤཱགྣི་སྟེ་འདི་ལ་ཀ་ལ་པག་ནི་ཞེས་བཀླག་པ་ནི་རྣམ་པར་མ་དག་པ་སྟེ། རིང་པོ་མེད་པའི་ཀ་ལ་པགྣི་ནི་ཕོ་དབང་ལ་འཇུག་པའི་ཕྱིར་རོ། །དོན་འགྱུར་ཚིག་ཕྲད་དང་སྦྱར་བས། བསྐལ་པ་ཆེན་པོའི་མཐའ་ཡི་མེ་ལྟ་བུ། །ཞེས་པའོ། །རྐང་པ་གསུམ་པའི་ཛ་ཊཱ་རལ་པ། མུ་ཀུ་ཊ་ཅོད་
པན། ཨུརྐ་ཊ་བཅིངས་པ། དབྱངས་སྦྱར་བས་མུ་ཀུ་ཊོརྐ་ཊཱ་ཡ་ནི་ཅོད་པན་བཅིངས་པ་ལའོ། །འདི་ལ་མ་ཀུ་ཊ་ཞེས་སྣང་ཡང་བཀའ་བསྟན་གཉིས་ཀྱི་ཁྲོད་དུ་ཇི་སྙེད་གཅིག་བཞུགས་པ་རྣམས་ལའང་མུ་ཀུ་ཊ་ཞེས་ཡོད་དོ། །དོན་འགྱུར་ཚིག་ཕྲད་བཅུག་པས། བསྐལ་པ་ཆེན་པོའི་མཐའ་ཡི་མེ་ལྟ་བུ། ཞེས་པའོ། །རྐང་པ་གསུམ་པའི་ཛ་ཊཱ་རལ་བ། མུ་ཀུ་ཊ་ཅོདཔན། ཨུ་རྐ་ཊ་བཅིངས་པ། དབྱངས་སྦྱར་བས་མུ་ཀུ་ཊོརྐ་ཊཱ་ཡ་ནི་ཅོད་པན་བཅིངས་པ་ལའོ། །འདི་ལ་མ་ཀུ་ཊ་ཞེས་སྣང་ཡངབཀའ་བསྟན་གཉིས་ཀྱི་ཁྲོད་དུ་ཇི་སྙེད་གཅིག་བཞུགས་པ་རྣམས་ལའང་མུ་ཀུ་ཊ་ཞེས་ཡོད་དོ། །དོན་འགྱུར་ཚིག་ཕྲད་བཅུག་པས། རལ་པའི་ཚོགས་ཀྱི་ཅོད་པན་བཅིངས་པ་སྟེ། །ཞེས་པའོ། །རྐང་པ་བཞི་པའི་དཾཥྚ་ཀ་རཱ་མཆེ་བ་གཙིགས་བྱེད། མོ་གྲ་དྲག་པོ། བྷཱི་ཥ་ཎ་འཇིགས་སུ་རུང་བ། མུ་ཁཱ་ཡ་ཞལ་མའོ། །དོན་འགྱུར་མཆེ་གཙིགས་དྲག་པོ་འཇིགས་སུ་རུང་བའི་ཞལ། །ཅེས་
པའོ། །རྐང་པ་ལྔ་པའི་ས་ཧ་སྲ་སྟོང་ཕྲག །བྷུ་ཛ་ཕྱག །བྷཱ་འོད་ཟེར། སུ་རཱ་ཡ་འབར་བ་ལའོ་སྟེ་དོན་འགྱུར། ཕྱག་ནི་འོད་ཟེར་སྟོང་ཕྲག་འབར་བ་པོ། །ཞེས་སོ། །རྐང་པ་དྲུག་པའི་པར་ཤུ་དགྲ་སྟ། པ་ཤ་ཞགས་པ་དང་ཨུཏྟྱ་ཏ་འཕྱར་བ་གཉིས་སྦྱར་བས་པཱ་ཤོཏྟྱ་ཏ། ཤཱུ་ལ་མདུང་། ཁ་ཊྭཱཾ་ག ། ལོ་ཙཱ་སྔ་མས་ཁྲི་རྐང་དང་ཕྱིས་ནམ་མཁའི་དབྱུག་པ་ཞེས་པར་བསྒྱུར་རོ། །དྷཱ་རི་ཎི་འཛིན་པ་ལའོ་སྟེ། དོན་འགྱུར། དགྲ་སྟྭ་ཞགས་འཕྱར་མདུང་དང་ཁ་ཊྭཱཾ་འཛིན། །ཅེས་སོ། །རྐང་པ་བདུན་པའི་བྱཱ་གྷྲ་སྟག །ཛི་ན་པགས་པ་དང་། ཨཱམྦ་ར་ན་བཟའ་གཉིས། སྦྱར་བས་ཛི་ནཱམྦ་ར། དྷ་རཱ་ཡ་འཛིན་པ་ལའོ། །དོན་འགྱུར། སྟག་གི་པགས་པའི་ན་བཟའ་འཆང་བར་མཛད། །ཅེས་སོ། །རྐང་པ་བརྒྱད་པའི་མ་ཧཱ་ཆེན་པོ། དྷཱུ་མྲ་དུ་བ་དང་། ཨཱནྡྷ་ཀ་ར་མུན་པ་གཉིས་སྦྱར་བས། དྷཱུ་མྲཱནྡྷ་ཀ་ར། བ་སུ་ཥཱ་ཡ་མདོག་དང་མཚུངས་པ་ལའོ། །དོན་འགྱུར། དུ་བ་མུན་ཆེན་མདོག་མཚུངས་སྐུ་ལ་འདུད། །
ཅེས་སོ། །དེ་ནས་ཡུམ་གྱི་རྐང་བརྒྱད་ནི། ན་མོ་ཕྱག་འཚལ། བྷ་ག་ཝ་ཏཱེ། བཅོམ་ལྡན་འདས་མ། བཛྲ་བཱ་ར་ཧཱི་རྡོ་རྗེ་ཕག་མོ། བཾ་ནི་ས་བོན། ཧཱུྃ་ཧཱུྃ་ཕཊྲ་སྔར་དང་འདྲ། དོན་འགྱུར། ༀ་བཅོམ་ལྡན་འདས་མ་རྡོ་རྗེ་ཕག་མོ་ལ་ནི་ཕྱག་འཚལ་ལོ། །ཞེས་སོ། །ན་མ་ཕྱག་འཚལ་ལོ། ཨཱཪྱ་འཕགས་མ། ཨ་པ་རཱ་ཛི་ཏེ་གཞན་གྱིས་མི་ཐུབ་མ་ཀྱེ། ཏྲཻ་ལོ་ཀྱ་འཇིག་རྟེན་གསུམ། མཱ་ཏེ་ཡུམ། མ་ཧཱ་ཆེན་མོ། བིདྱ་དང་ཨི་ཤྭ་རཱི་གཉིས་སྦྱར་བས་བིདྱེ་ཤྭ་རཱི་རིག་པའི་དབང་ཕྱུག་མ་སྟེ་ཁྱད་པར་གྱི་ཚིག་རྣམས་སྔུན་དུ་བཞག་ལ་དོན་འགྱུར་བྱས་པས། འཕགས་མ་འཇིག་རྟེན་གསུམ་ཡུམ་གཞན་གྱིས་མི་ཐུབ་རིག་པའི་དབང་ཕྱུག་ཆེ། །ཅེས་སོ། །ན་མཿཕྱག་འཚལ་བ། སརྦ་བྷཱུ་ཏ་འབྱུང་པོ་ཐམས་ཅད། བྷ་ཡཱ་འཇིགས་པར་མཛད་མ། བ་ཧེ་ཀུན་ཏུ་འབེབས་མ། མ་ཧཱ་ཆེན་མོ། བཛྲཱི་རྡོ་རྗེ་ཅན། དོན་འགྱུར། འབྱུང་པོ་ཐམས་ཅད་འཇིགས་མཛད་ཀུན་ཏུ་འབེབས་མ་རྡོ་རྗེ་ཆེན་མོ་ཉིད། །
ཅེས་སོ། །ན་མོཿཕྱག་འཚལ་བ། བཛྲ་རྡོ་རྗེ་དང་ཨཱ་ས་ན་གདན་གཉིས་སྦྱར་མཐར་བོད་པའི་སི་བྱིན་པས་བཛྲཱ་པ་ནི་རྡོ་རྗེ་གདན་མ་ཀྱེ། ཨ་ཛི་ཏི་མི་ཕམ་མ། ཨ་པ་རཱ་ཛི་ཏེ་གཞན་ལས་རྒྱལ་མ་ཀྱེ། བ་ཤྱཾ་ཀ་རི་དབང་དུ་བྱེད་མ། ནེ་ཏྲ་སྤྱན། བྷྲཱ་མ་ཎི་གཡོ་བ་སྟེ། དོན་འགྱུར། རྡོ་རྗེ་གདན་མ་མི་ཕམ་གཞན་གྱིས་མི་ཐུབ་དབང་མཛད་གཡོ་བའི་སྤྱན། །ཞེས་སོ། །ན་མཿཕྱག་འཚལ་བ། བི་ཥ་ཎི་དུག་སྟེ་འདི་དཔེ་རྒྱུན་འདིར་མི་སྣང་རུང་བཀའ་བསྟན་གཉིས་ཀྱི་རྒྱ་དཔེ་རྣམས་ལས་འབྱུང་བར་མ་ཟད་འདིར་ཡང་དུག་ཀྱང་སྐེམ་མར་མཛད་མ་ཞེས་ཡོད་པས་ཆད་དམ་སྙམ། ཤོ་ཥ་ཎི། སྐེམ་བྱེད་མ། རོ་ཥ་ཎི་འཇིགས་རུང་མ། ཀྲོ་དྷ་ཁྲོ་མོ། ཀ་རཱུ་ལི་ནི་གཙིགས་བྱེད་མ་སྟེ། དོན་འགྱུར། དུག་ཀྱང་སྐེམ་པར་མཛད་མ་འཇིགས་སུ་རུང་བའི་ཁྲོ་མོ་གཙིགས་བྱེད་མ། །ཞེས་སོ། །ན་མས྄་ཕྱག་འཚལ་བ། ཏྲཱ་ས་ནི་སྐྲག་བྱེད་མ། མཱ་ར་ཎི་གསོད་བྱེད་མ། པྲ་བྷེ་
ད་ནི་རབ་ཏུ་འབྱེད་བྱེད་མ། ཨ་པ་རཱ་ཛ་ཡེ་གཞན་ལས་རྒྱལ་མ་ཀྱེ་ཞེས་པ་སྟེ། དོན་འགྱུར་ནི། སྐྲག་བྱེད་གསོད་བྱེད་རབ་ཏུ་འབྱེད་པར་བྱེད་ཅིང་ཕ་རོལ་ལས་རྒྱལ་མ། །ཅེས་སོ། །ན་མོ་ཕྱག་འཚལ་བ། བི་ཛ་ཡེ་རྣམ་པར་རྒྱལ་མ་ཀྱེ། ཛམྦྷ་ནི་རྨུགས་བྱེད་མ། སྟམྦྷ་ནི་རེངས་བྱེད་མ། མོ་ཧ་ནི་རྨོངས་བྱེད་མ་སྟེ། དོན་འགྱུར། རྣམ་པར་རྒྱལ་མ་རྨུགས་པར་བྱེད་ཅིང་རེངས་དང་རྨོངས་པར་མཛད་པ་མོ། །ཞེས་སོ། །ན་མོ་སྔར་ལྟར། བཛྲ་བཱ་རཱ་ཧི་རྡོ་རྗེ་ཕག་མོ། མ་ཧཱ་ཡོ་གི་ནི་རྣལ་འབྱོར་ཆེན་མོ། ཀཱ་མ་འདོད་པ། ཨི་ཤཱ་རི་དབང་ཕྱུག་དང་སྦྱར་བ། ཁ་ག་མཁའ་འགྲོ་མ། བོད་པའི་དོན་གྱིས་ཁ་གེ་སྟེ། དོན་འགྱུར། རྡོ་རྗེ་ཕག་མོ་རྣལ་འབྱོར་ཆེན་མོ་འདོད་པའི་དབང་ཕྱུག་མ་ལ་འདུད། །ཅེས་པའོ། །ཚིག་དོན་གཞན་རྣམས་གོ་སླ་ལ་རྡོ་རྗེ་གདན་མ་ཞེས་བྱ་བའི་དོན་ནི་ཁམས་དཀར་ཆ་ཧཾ་ལས་བདེ་བ་འཇོ་བས་དཔྱིད་དང་། དམར་ཆ་ཨ་ཐུང་ལ་བདེ་བ་བརྟན་པས་ཐིག་ལེར་
གསུངས་པས་ན་དེ་ཉིད་བདེ་ཆེན་འགྱུར་བ་མེད་པ་འཕོ་མེད་རྡོ་རྗེའི་ཡེ་ཤེས་མངོན་དུ་བྱེད་པའི་གནས་སུ་གྱུར་པས་ན་དེའི་ངོ་བོ་རྡོ་རྗེ་ཕག་མོ་ཉིད་ལ་རྡོ་རྗེ་གདན་མ་ཞེས་གསུངས་ཏེ། དཔེར་ན་སྟོན་པ་བྱང་ཆུབ་བརྙེས་པའི་གནས་རྡོ་རྗེ་གདན་ཡིན་པས་རྡོ་རྗེ་གདན་པ་ཞེས་གྲགས་པ་ལྟར་རོ། །དེ་ནས་བདེ་བ་ཆེན་པོ་ཉམས་སུ་མྱོང་བའི་ཕྱིར། བདག་ཉིད་ཧེ་རུ་ཀའི་སྐུ་ཡི་ནང་དུ་རྩ་དབུ་མ་ཆུ་ཤིང་གི་སྡོང་པོ་ལྟར་དྲང་བ། ཟར་མའི་མེ་ཏོག་ལྟར་སྔོ་བ། ཏིལ་གྱི་མར་མེ་ལྟར་གསལ་བ། པདྨའི་སྣར་མ་ལྟར་ཕྲ་བ་སྟེ་མཚན་ཉིད་བཞི་དང་ལྡན་པ། ཡར་སྣ་རྡོ་རྗེ་ཕྱེད་པ་དང་མར་སྣ་ལྟེ་འོག་སོར་བཞིའི་མཚམས་སུ་སླེབ་པ་སྣེ་ཕུག་རྡུག་དུ་ཡོད་པ། གཡས་སུ་རོ་མ་དཀར་མོ། གཡོན་དུ་རྐྱང་མ་དམར་མོ་གཉིས་ཀྱི་ཡར་སྣེ་སྤྱི་བོའི་ཐོད་པ་ལ་སོར་གང་ཙམ་གྱིས་མ་རེག་པར་མདུན་དུ་སྣ་སྒོར་ཟུག་པ། མར་སྣེ་དབུ་མའི་མཇུག་གི་སོར་བཞིའི་མཚམས་
ནས་དབུ་མར་ཟུག་པ། སྤྱི་བོར་རྩ་འདབ་དཀར་པོ་སོ་གཉིས། མགྲིན་པར་དམར་པོ་བཅུ་དྲུག །སྙིང་གར་སྔོན་པོ་བརྒྱད། ལྟེ་བར་སེར་པོ་དྲུག་ཅུ་རྩ་བཞི་སྟེ་དེ་དག་གི་རྩ་འདབ་གྱེས་ཚུལ་བླ་མེད་རྒྱུད་སྡེའི་དགོངས་པ་རྩལ་དུ་བཏོན་པ་ཀུན་མཁྱེན་རང་བྱུང་བའི་ཟབ་མོ་ནང་དོན་ལྟར་རོ། །དེ་ནས་སྤྱི་བོའི་འཁོར་ལོར་དཔལ་ཧེ་རུ་ཀའི་ངོ་བོ་ཧཾ་ཡིག་དཀར་པོ་མགོ་བོ་ཐུར་བསྟན་དུ་བསྒོམ་པ་ནི་དཔྱིད་ཀྱི་ཡི་གེ་སྟེ། གྲུབ་ཆེན་ནག་པོ་པས། གཞོམ་མེད་ཧཾ་སྟེ་ས་བོན་ནི། །བ་མོ་ལྟ་བུར་འཛག་པ་ཉིད། །ལུས་ཅན་རྣམས་ཀྱི་སྙིང་དགའ་བ། །དཔྱིད་ཅེས་བྱ་བར་རྣམ་པར་བཤད། །ཅེས་གསུངས་ལ། ལྟེ་འོག་རྩ་གསུམ་འདུས་མདོར་བཅོམ་ལྡན་འདས་མའི་ངོ་བོ་ཨ་ཐུང་དམར་པོ་མེའི་རང་བཞིན་དུ་བསྒོམ་པ་ནི་ཐིག་ལེ་ཞེས་བྱ་སྟེ། ནག་པོ་པའི་ཞལ་ནས། མེ་ནི་ཆུང་ངུའི་གཟུགས་ཀྱིས་ནི། །ཕག་མོའི་ཐིག་ལེ་རུ་ནི་བརྗོད། །ཅེས་གསུངས་པ་ལྟར་ལ། སྐབས་འདིར་ནི་
དགའ་བ་བཞི་ཡི་ངོ་བོ་དཔྱིད་ཀྱི་ཡི་གེ་བཞི་སྟེ། སྤྱི་བོ་བདེ་ཆེན་འཁོར་ལོའི་རྩ་འདབ་དབུས་སུ་དཔྱིད་ཀྱི་ཡི་གེ་ཧཾ་ཡིག་དཀར་པོ་མགོ་བོ་ཐུར་དུ་བལྟ་བ། མགྲིན་པ་ལོངས་སྤྱོད་འཁོར་ལོའི་དབུས་སུ་ༀ་ཡིག་དཀར་པོ། སྙིང་ག་ཆོས་ཀྱི་འཁོར་ལོའི་དབུས་སུ་ཧཱུྃ་ཡིག་སྔོན་པོ་མགོ་ཐུར་དུ་བལྟ་བ། ལྟེ་བ་སྤྲུལ་པའི་འཁོར་ལོའི་རྩ་འདབ་དབུས་སུ་ཨཱཿཡིག་དམར་པོ་དང་བཞི་གསལ་བཏབ་ལ། བསྙེན་སྒྲུབ་ཀྱི་སྐབས་སྤྲོ་ན་དཔལ་ཏཻ་ལོ་པའི་སྙན་བརྒྱུད་ལས། ལྕགས་ཀྱུ་བཞིན་དུ་འགུགས་པ་དང་། །བུམ་པ་བཞིན་དུ་དགང་བ་དང་། །རྒྱ་མདུད་བཞིན་དུ་བསྡམས་ནས་སུ། །མདའ་ལྟར་གྱེན་དུ་འཕང་བར་བྱ། །ཞེས་གསུངས་པ་ལྟར་སྦྱོར་བ་བཞི་ལྡན་ནམ་དཀྱུས་ལ་བར་རླུང་ཅུང་ཟད་བཟུང་བས་རོ་རྐྱང་ནས་རླུང་བརྒྱུད་དེ་ལྟེ་བའི་སུམ་མདོའི་ཨ་ཐུང་མེ་ལྟེ་བའི་ཨཱཿལས་འབར་བར་ཡང་བཤད། ལ་རླུང་ཕོག་པས་གཏུམ་མོའི་མེ་འབར། ལྟེ་བའི་ཨཱཿ སྙིང་གའི་ཧཱུྃ།
མགྲིན་པའི་ༀ་དང་གསུམ་བསྲེགས་ཏེ་མེ་ལྕེ་ཧཾ་ཡིག་ལ་རེག་པས་དེ་ལས་དཀར་ཆའི་རྒྱུན་རིམ་པར་བབས་པས་ཡི་གེ་གསུམ་སྔར་ལྟར་གསོས་པས་བདེ་བ་སྐྱེས་པར་བསམ། སླར་ཡང་ལྟེ་བའི་ཨ་ཐུང་ལས་འོད་འཕྲོས་རྒྱལ་བ་སྲས་དང་བཅས་པ་ཐམས་ཅད་དང་ཁྱད་པར་དུ་རྡོ་རྗེ་རྣལ་འབྱོར་མའི་བྱིན་རླབས་ཐམས་ཅད་ཡེ་ཤེས་མེ་ཡི་རྣམ་པར་བསྡུས་ཏེ་ཨ་ཐུང་ལ་ཐིམ། ཡང་སྤྱི་བོའི་ཧཾ་ཡིག་ལས་འོད་ཟེར་འཕྲོས་པས་རྒྱལ་བ་སྲས་དང་བཅས་པ་ཐམས་ཅད་དང་། ཁྱད་པར་དུ་དཔལ་ཧེ་རུ་ཀའི་བྱིན་རླབས་ཐམས་ཅད་བྱང་ཆུབ་སེམས་ཀྱི་ཐིག་ལེའི་རྣམ་པར་བསྡུས་ཏེ་སྤྱི་བོའི་ཧཾ་ལ་ཐིམ་པར་བསམས་ལ་འབར་འཛག་གོང་བཞིན་བསྒོམས་པས། ཐིག་ལེ་སྤྱི་བོར་བབས་པས་དགའ་བ། མགྲིན་པར་བབས་པས་མཆོག་དགའ། སྙིང་གར་བབས་པས་ཁྱད་དགའ། ལྟེ་བར་བབས་པས་ལྷན་ཅིག་སྐྱེས་དགའི་བདེ་ཆེན་ཡེ་ཤེས་སྐྱེས་པར་བསམས་པ་སྟེ། རྡོ་རྗེ་ཕྲེང་བའི་
རྒྱུད་ལས། བདེ་ཆེན་འཁོར་ལོ་སྤྱི་བོ་ལ། །དེ་ནི་དགའ་བར་བཤད་པ་ཡིན། །ལོངས་སྤྱོད་འཁོར་ལོ་མཆོག་དགའ་དང་། །དགའ་བྲལ་ཆོས་ཀྱི་འཁོར་ལོར་གནས། །སྤྲུལ་པའི་འཁོར་ལོར་ལྷན་ཅིག་སྐྱེས། །དགའ་བ་ཉམས་སུ་མྱོང་བར་བྱེད། །ཅེས་གསུངས་པ་ལྟར་ཡང་ཡང་བསྒོམས་པས་རླུང་ཅུང་ཟད་འགག་པ་ཕྲ་མོའི་རྣལ་འབྱོར་དང་། དེ་ལས་བདེ་བ་སྐྱེ་བ་ཐིག་ལེའི་རྣལ་འབྱོར་གྱི་རྩ ལ་འབྱོངས་ནས་དུ་བ་སོགས་རྟགས་ལྔ་འཆར་ཏེ། འདུས་པའི་རྒྱུད་ཕྱི་མ་ལས། དུ་བ་ལྟ་བུ་དང་པོ་ཡི། །སྨིག་རྒྱུ་འདྲ་བ་གཉིས་པ་སྟེ། །མཁའ་སྣང་འདྲ་བ་གསུམ་པ་ཡིན། །མར་མེ་ལྟར་འབར་བཞི་པའོ། །སྤྲིན་མེད་ནམ་མཁའ་ལྟ་བུ་ནི། །རྟག་ཏུ་སྣང་བ་ལྔ་པའོ། །ཞེས་སོ། །དེ་ནས་བཟླས་པ་བྱ་བའི་ཐོག་མར་བགྲང་ཕྲེང་བྱིན་རླབས་བྱ་བ་ནི། མངོན་བརྗོད་ལས། དུང་ཆེན་ཕྲེང་བ་བླངས་ནས་ནི། །ཞེས་གསུངས་པ་ལྟར་ལ། མ་རྒྱུད་རྣམས་ལས་སྐྱེས་པ་
གྲིར་ཤི་བའི་ཐོད་པའི་ཕྲེང་བ་ལ་དུང་ཆེན་གྱི་ཕྲེང་བ་ཞེས་བསྔགས་པས་དེ་ཉིད་གཞོན་ནུ་མས་བཀལ་པའི་སྲེད་བུས་བརྒྱུས་པ་མདོ་འཛིན་སྟེང་དུ་ཡོད་པར་བྱས་ལ་ལག་པ་གཡོན་པའི་སྙིམ་པར་བཅུག་ལ་བདུད་རྩིས་བསང་སྦྱང་། སྟོང་ལས་པད་ཉིའི་སྟེང་དུ་བགྲང་ཕྲེང་ཧྲཱིཿལས་པདྨ་གར་དབང་སྟེ་ངོ་བོ་གསུང་རྡོ་རྗེ་སྣང་བ་མཐའ་ཡས་སྐུ་མདོག་དམར་པོ་ཞལ་གཅིག་ཕྱག་བཞི་སོགས་གཞུང་གསལ་ལྟར་བསྐྱེད་ལ་ཡེ་ཤེས་པ་བསྟིམ། ལག་གཡས་པས་རྒྱ་དང་ཤབྡ་ལ་དྲིལ་གསིལ་བཅས་སྔགས་ཀྱིས་མཆོད། ༀ་པདྨ་ནརྟི་ཤྭ་ར་སོགས་བརྒྱ་རྩ་བརྒྱད་བརྗོད། སྔགས་དོན་ནི། པདྨ་ནརྟ་དང་ཨཱི་ཤྭ་ར་དབྱངས་སྦྱར་བས་པདྨ་གར་གྱི་དབང་ཕྱུག་གོ །དེ་ནས་པདྨ་གར་དབང་ཡོངས་སུ་གྱུར་པས་ཕྲེང་བར་གྱུར་པར་བསམས་ལ་ཕྲེང་བ་ནར་གྱིས་བཏང་ལ་འཛིན་པ་ནི་ཕྱག་བཞེས་སོ། །དེ་ནས་ལག་གཡོན་པའི་མཐེ་བོང་རྡོ་རྗེ་ལྕགས་ཀྱུས་ལྷ་རྣམས་འགུགས་པའི་བློས་
བགྲང་བར་བྱ་སྟེ། རྡོ་རྗེ་མཁའ་འགྲོ་ལས། མཐེ་བོང་ལྕགས་ཀྱུར་བྱས་ནས་ནི། །ལྷ་རྣམས་ཐམས་ཅད་འགུགས་པར་བསམ། །ཞེས་གསུངས་སོ། །སྤྱིར་ཞི་བ་ལ་མཛུབ་མོ། རྒྱས་པར་གུང་མོ། དབང་ལ་སྲིན་ལག །མངོན་སྤྱོད་ལ་མཐེའུ་ཆུང་གི་སྟེང་དུ་བཞག་ཅིང་མདོ་འཛིན་མི་འགོམ་ཕྲེང་བའི་མདོ་འཛིན་མི་འགོམས་གསུངས་པ་ལ་རྗེ་དཔའ་བོའི་ཕག་མོའི་རྣམ་བཤད་དུ་དགག་བཞག་ཆེ་བར་མཛད་ལ་ཕྱིས་འཇམ་མགོན་ཀོང་སྤྲུལ་རིན་པོ་ཆེའི་བཞེད་པ་ལྟར་འདིར་བཀོད་པའོ། །མཆན། པར་དེ་ལ་བསྐོར་བ་བྱེད་ཚུལ་གྱིས་མཐེ་བོང་གིས་བགྲང་བར་བཤད་དོ། །དེ་ནས་བཟླས་པ་དངོས་ཀྱི་རྣམ་གཞག་ལ་གསུམ་སྟེ། དང་པོ་བཟླས་པའི་ངོ་བོ་ནི། གཙོ་བོར་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་ནི་བཟླས་པའི་ངོ་བོར་བཞེད་པ་དང་། ཡང་ན་ཡི་གེ་འདུས་པ་གང་ཞིག་ཡང་ཡང་བཟླས་པས་དངོས་གྲུབ་འགྲུབ་པ་ནི་བརྡར་བཏགས་སྔགས་ཀྱི་ངོ་བོའོ། །གཉིས་པ་སྒྲ་དོན་ནི། ལྷ་རྣམས་སྤྱན་
འདྲེན་པ་དང་ཐུགས་དམ་བསྐུལ་བ་དང་མཚན་ནས་བོད་པ་དང་གདུག་པ་སྐྲོད་ཅིང་ཉོན་མོངས་འཇོམས་པས་ན་སྔགས་ཞེས་བྱ་སྟེ། རྡོ་རྗེ་རྩེ་མོ་ལས། ཅི་ཕྱིར་སྔགས་སུ་བརྗོད་པར་བྱ། །གསང་སྔགས་རྣམས་ནི་བདེ་སྤྱོད་ཅིང་། གདུག་པ་ཐམས་ཅད་སྐྲོད་པར་བྱེད། །ཉོན་མོངས་ལ་སོགས་འཇོམས་བྱེད་ཅིང་། །སངས་རྒྱས་ཆོས་ནི་སྤྱན་འདྲེན་ཡིན། །ཞེས་གསུངས་པ་ལྟར་རོ། །གསུམ་པ་དབྱེ་བ་ནི། གསང་སྔགས་དང་། །རིག་སྔགས་དང་། གཟུངས་སྔགས་དང་གསུམ་སྟེ། ལྷ་ཕོའི་སྔགས་ནི་གསང་སྔགས། མོའི་སྔགས་ནི་རིག་སྔགས། གཉིས་ཀའི་ཕྱོགས་སུ་མ་ལྷུང་བ་ལས་ཚོགས་ཀྱི་སྔགས་ལ་གཟུངས་སྔགས་སུ་བཞེད་པ་དང་། ཡང་འཇིག་རྟེན་པའི་ཉོན་མོངས་པའི་ཡིད་ལས་སྐྱོབ་པས་གསང་སྔགས་དང་། ཡང་ཡང་བཟླས་པས་ཤེས་རབ་ཁྱད་པར་ཅན་སྐྱེད་པས་རིག་སྔགས་དང་། བྱང་ཆུབ་ཀྱི་སེམས་མི་བརྗེད་པའི་དྲན་པ་བསྐྱེད་པས་གཟུངས་སྔགས་
སུ་བཤད་པ་དང་། གཞན་ཡང་རྩ་སྔགས་སྐུ། སྙིང་པོ་གསུང་། ཉེ་སྙིང་ཐུགས་བསྐུལ་བར་བྱེད་པའི་སྔགས་སུ་བཤད་དོ། །དེ་ཡང་བཟླས་པ་ཞེས་བྱ་བ་ནི་ལེགས་སྦྱར་གྱི་ཛབ྄་ཞེས་པ་བོད་སྐད་དུ་བཟླས་པ་ལ་འཇུག་པས་ཡང་ཡང་བསྐྱར་ཞིང་བཟླས་པས་ན་བཟླས་པ་སྟེ། དེ་ཡང་ལུས་ཀྱི་ལས། ངག་གི་བརྗོད་པ། ཡིད་ཀྱི་ཏིང་ངེ་འཛིན་གསུམ་ཡང་ཡང་བསྐྱར་བལྡབ་བྱེད་པའི་དོན་ནོ། །ཇི་ལྟར་བཟླ་ཚུལ་ལའང་། སྲོག་རྩོལ་གྱི་རླུང་བསྡམས་ཏེ་བཟླས་པ་འགོག་བཟླས། སྔགས་ཉིད་རླུང་འབྱུང་འཇུག་གནས་གསུམ་དང་སྦྱར་བ་རྡོར་བཟླས། ལྕེ་མི་བསྐྱོད་པར་ཡིད་ཀྱིས་བཟླས་པ་ཡིད་བཟླས། སྔགས་གོང་བས་ཐོས་ཙམ་བརྗོད་པ་ངག་བཟླས་སམ་ཤུབ་བུའི་བཟླས་པ། རང་གཞན་གཉིས་ཀས་ཐོས་པར་དྲག་ཏུ་བརྗོད་པ་ཁྲོ་བོའི་བཟླས་པ། ཞི་ལྷག་དང་འབྲེལ་བ་བསམ་གཏན་གྱི་བཟླས་པའམ་ཡེ་ཤེས་ཀྱི་བཟླས་པ་སྟེ། དེའང་ཞི་རྒྱས་དབང་
གསུམ་ཕལ་མོ་ཆེར་ཤུབ་བུའི་བཟླས་པ་གཙོ་$རྒྱུད་རྣམས་ལས་བདེ་མཆོག་ལ་ཁྲོ་བཟླས་བྱ་བར་གསུངས་འདུག་གོ། མཆན། བོར་བྱེད་ཅིང་། སྣོད་མིན་སྐྱེ་བོས་དབེན་པའི་སར་སྒྲུབ་པ་དང་། བྱིང་བ་སེལ་བ་དང་། གནོད་པ་བཟློག་པ་སོགས་ལ་རིག་བྱེད་འདོན་པ་ལྟར་དབྱངས་ཀྱིས་བཟླས་པ་བྱ་བ་དང་། ཁྲོ་བོའི་བཟླས་རྒྱུད་རྣམས་ལས་བདེ་མཆོག་ལ་ཁྲོ་བཟླས་བྱ་བར་གསུངས་འདུག་གོ །མཆན། པ་ལའང་མཉམ་སྦྱོར་གྱི་རྒྱུད་ལས་འཁུན་པ་དབུགས་ཀྱི་རླུང་འབྱིན་སྲིན་པོའི་ངར་སྐད་ལྟ་བུ།དེ་ཉིད་བསྡུས་པ་ལས་ཁྲོ་བོའི་འབྲུག་སྒྲ་ལྟ་བུ། ཧེ་རུ་ཀ་འབྱུང་བ་ལས་རིགས་བཞིའི་གླུས་བཟླས་པ་དང་གསུམ་དུ་གསུངས་པ་དང་སོགས་སྐབས་དང་འབྲེལ་བར་བྱའོ། །གཞན་ཡང་ལྷ་སྐུའི་རྣམ་པ་ཙམ་རྗེས་སུ་དྲན་ནས་བཟླ་བ་ནི་གཟུགས་ཀྱི་བཟླས་པ། ལྷ་གཙོ་འཁོར་ཐམས་ཅད་ཀྱིས་སྔགས་དེ་ཉིད་མགྲིན་གཅིག་ཏུ་བཟླ་བར་མོས་ཏེ་དེའི་རམ་འདེགས་ཀྱི་ཚུལ་དུ་བཟླ་བ་ནི་ཕྱིའི་བཟླས་པ་ཞེས་གསུངས་སོ། །དེ་
ནས་ནང་གི་བཟླས་པ་སྟེ། ཡིད་ཀྱི་ཏིང་ངེ་འཛིན་ཇི་ལྟར་བསྒོམ་པའི་ཚུལ་ནི། མངོན་བརྗོད་བླ་མ་ལས། སྲོག་རྩོལ་ལས་དང་ཆོ་ག་བཞིན། །ཡེ་ཤེས་ཀྱི་ནི་བཟླས་པ་བྱ། །སྤྲོ་དང་བསྡུ་བའི་སྦྱོར་བ་ཡིས། །མྱུར་དུ་དངོས་གྲུབ་ཐོབ་པར་འགྱུར། །ཞེས་དང་། འཁོར་ལོ་དམ་ཚིག་བཟླས་པ་ནི། །ཁྲོ་བོའི་དམ་ཚིག་བཟླས་བྱས་ན། །དངོས་གྲུབ་ཐམས་ཅད་བདེ་བར་ཐོབ། །ཅེས་གསུངས་པ་ལྟར། སྤྱིར་བཏང་ལྟར་ན་བདག་མདུན་གཉིས་ཀའི་ཐུགས་ཀར་པདྨ་དང་ཟླ་ཉི་གང་རུང་གི་གདན་གྱི་དབུས་སུ་རང་ལྷའི་ས་བོན་ལ་སྔགས་ཕྲེང་ལྷའི་རང་མདོག་ཀྱིས་བསྐོར་ཏེ་རིམ་པར་ཇེ་མགྱོགས་ཀྱིས་མི་མངོན་པར་འཁོར་བར་བསམས་ཏེ། དེ་ནས་མདུན་བསྐྱེད་ཀྱི་ཐུགས་ཀའི་སྔགས་ཕྲེང་ལས་སྔགས་ཕྲེང་གཉིས་པ་འཕྲོས་ཏེ་རང་གི་ཞལ་དུ་ཞུགས་ཤིང་ཐུགས་ཀ་ནས་འཐོན་ཏེ་ཞལ་དང་ཐུགས་ཀར་འཁོར་བར་བསམས་པ་བདག་མདུན་གཉིས་ཆར་ཅན་
དང་། བདག་བསྐྱེད་ཁོ་ན་ལ་ཞལ་ནས་ཐུགས་ཀ་དང་ཐུགས་ཀ་ནས་ཞལ་དུ་འཁོར་བར་བསམ་པ་ནི་འཁོར་ལོའི་བཟླས་པའོ། །ཁྱད་པར་གྱི་བཟླས་པའམ་གསང་བའི་བཟླས་པ་ནི། ཨ་ཧཾ་གཉིས་བསམ་ཞིང་དེའི་རང་སྒྲ་ལ་སེམས་གཏད་ནས་བཟླ་བའོ། །བཀོད་པའི་བཟླས་པ་ནི། བདག་བསྐྱེད་དམ་མདུན་བསྐྱེད་ཀྱི་ཐུགས་ཀར་ཉི་མའམ་ཟླ་བ་ལ་ས་བོན་མཐར་སྔགས་ཕྲེང་མགོ་གྱེན་བསྟན་མར་མེ་ལྟར་འབར་བ་ཡིད་ཀྱིས་བཀོད་པ་ལ་དམིགས་ནས་བཟླ་བ་དང་། སྤྲོ་བསྡུས་བཟླས་པ་ནི་སྔགས་ཀྱི་ཡིག་འབྲུ་ལས་འོད་འཕྲོས་སངས་རྒྱས་ཐམས་ཅད་ཀྱི་ཐུགས་རྒྱུད་བསྐུལ་ཞིང་བྱིན་རླབས་བསྡུས། སེམས་ཅན་གྱི་དོན་བྱས་ཚུར་འདུས་རང་གི་སྙིང་གར་ཐིམ་པར་བསམས་པ་སྟེ་དེ་དག་སྤྱིར་བཏང་ཙམ་དུ་བཤད་པ་དེ། སྐབས་འདིར་དངོས་སུ་འབྲེལ་བ་ནི། འཁོར་ལོའི་བཟླས་པའི་ཁྱད་པར་བདེ་དགྱེས་སོགས་རྣལ་འབྱོར་མ་རྒྱུད་ཡོངས་ཀྱི་བཟླས་
དམིགས་ཁྱད་པར་ཁྱོགས་ཀྱི་བཟླས་པ་དང་། ཕྲིན་ལས་བཞིའི་བཟླས་དམིགས་དང་། སྤྲོ་བསྡུ་དམ་ཚིག་གི་བཟླས་པ་དང་གསུམ་དུ་བསྟན་པས། དང་པོ་འདོ་ལིའམ་ཁྱོགས་ཀྱི་བཟླས་པ་དང་། གཙོ་བོའི་ཐུགས་ཀར་སྣ་ཚོགས་རྡོ་རྗེའི་ལྟེ་བར་ཉི་མ་ལ་གནས་པའི་ཧཱུྃ་འདི་ལ་སྔགས་འཁོར་མེད། མཆན།ཡིག་ལས་འོད་ཟེར་གྱི་མདོག་རྒྱུན་གྱི་བཟླས་པའི་ཚེ་སྔོན་པོ་བྱུང་། ཡབ་ཀྱི་ཞལ་ནས་ཐོན་ཡུམ་གྱི་ཞལ་དུ་ཞུགས། སྐུའི་དབྱིབས་བརྒྱུད་དེ་ཡུམ་གྱི་མཁའ་ནས་ཡབ་ཀྱི་རྡོ་རྗེར་ཞུགས། སྐུའི་དབྱིབས་བརྒྱུད་ཐུགས་ཀའི་ས་བོན་ལ་ཐིམ་པར་བསམས་ལ་སྔགས་བཟླ། ཡང་ལཱུ་ཡི་པའི་གཞུང་ལས། ཆོས་རྣམས་མཉམ་ཉིད་ང་རྒྱལ་གྱིས། །ཕྲེང་སྔགས་ས་བོན་ལས་ཐོན་ཏེ། །རྡོ་རྗེའི་ལམ་ནས་བྷ་གར་ཞུགས། །དབུ་མར་ཞུགས་ནས་ཁ་རུ་ཐོན། །ལྷ་མོ་ལས་བྱུང་ཁ་རུ་ཞུགས། །བསྐོར་སྦྱོར་འདོ་ལིའི་བཟླས་པའོ། །ཞེས་པ་ལྟར། ཧཱུྃ་ལས་སྔགས་ཕྲེང་སྔར་ལྟར་བྱུང་སྐུའི་
དབྱིབས་བརྒྱུད་དེ་རྡོ་རྗེའི་ལམ་ནས་ཐོན་ཡུམ་གྱི་པདྨར་ཞུགས། སྐུའི་དབྱིབས་བརྒྱུད་ཡུམ་གྱི་ཞལ་ནས་ཐོན་རང་གི་ཞལ་དུ་ཞུགས་ཐུགས་ཀའི་ཧཱུྃ་ལ་ཐིམ་པར་བསམས་ལ་སྔགས་བཟླས་པས་སྔ་མས་ཐིག་ལེའི་གེགས་སེལ། ཕྱི་མས་བདེ་སྟོང་འཆར་བར་གསུངས་སོ། །དེ་ནས་ཕྲིན་ལས་བཞིའི་བཟླས་པ་བྱ་བ་ནི། ཡང་འོད་ཟེར་དཀར་པོ་གོང་གསལ་ལྟར་འཕྲོས་པས་ནད་གདོན་བར་ཆད་ཐམས་ཅད་ཞི། སེར་པོས་ཚེ་བསོད་དཔལ་འབྱོར་རྒྱས། དམར་པོས་ལོངས་སྤྱོད་བསྡུས། མཐིང་གས་གནོད་བྱེད་ཐམས་ཅད་ཚར་གཅོད་པར་བསམས་ལ་བཟླས་པ་བྱ། དེ་དག་གང་ཡང་དང་པོ་འོད་ཟེར་དང་། རྗེས་ནས་སྔགས་ཀྱི་ཕྲེང་བར་བསྒྱུར་བར་བྱ་སྟེ། དེ་ཡང་ཡིག་འབྲུ་སྔ་མའི་ཞབས་ཀྱི་ཕྱོགས་ལ་ཕྱི་མའི་མགོ་མཐུད་དེ་ཡིག་འབྲུ་རྣམས་ཕན་ཚུན་མ་རེག་པར་འོད་ཟེར་འཕྲོ་བ་དལ་གྱིས་འགྲོ་བར་བསྒོམ། ཞིབ་པར་ལས་བཞི་སྒྲུབ་པའི་སྐབས་སྡོམ་འབྱུང་གི་
དགོངས་པ་ལྟར་ཞི་བ་ལ་སྔགས་ཕྲེང་རྣམས་རིམ་པར་དལ་གྱིས་འགྲོ་བ་འོད་ཟེར་ཀྱི་ལི་ལི་བྱེད་པ་སྟེ་འགལ་མེའི་འཁོར་ལོ་ལྟ་བུ་ཞེས་པའང་འདི་ཡིན། རྒྱས་པ་ལ་སྔགས་ཕྲེང་ཡི་གེ་རེ་རེ་བཞིན་སེར་པོ་གཙོ་ཆེ་བའི་འོད་ཟེར་ལྔ་ལྡན་མང་པོ་སྨད་ཀྱི་ཕྱོགས་སུ་ཇེ་སྦོམ་དུ་འཁྱིལ་ཞིང་འགྲོ་བ་རྨ་བྱའི་སྒྲོ་ཆུན་གྱི་སྣེ་ལྟ་བུ་དང་། དབང་ལ་ཡི་གེ་སྔ་མ་རྣམས་ཀྱི་ཞབས་སུ་འོད་ཟེར་ལྕགས་ཀྱུའི་དབྱིབས་ཅན་གྱིས། ཕྱི་མའི་ཡི་གེ་རྣམས་ཀྱི་མགོར་འོད་ཟེར་ཞགས་པའི་དབྱིབས་ཅན་གྱི་མིག་མ་བལྟས་ཏེ་འོད་ཟེར་ཐམས་ཅད་སྦྲེལ་བ་དང་གུག་པའི་རྣམ་པར་འགྲོ་བ་དང་། དྲག་པོ་ལ་ཐག་མདུང་འཕེན་པའི་ཐི་གུ་བསྒྲིལ་བ་ལྟ་བུར་ཕྱི་མ་རྣམས་ཀྱིས་སྔ་མ་འཕུལ་བའི་ཚུལ་གྱིས་མདའི་འགྲོས་ལྟར་དྲག་ཅིང་རྩུབ་པར་འཕྲོ་བར་གསུངས་སོ། །ཐམས་ཅད་ཀྱང་འོད་ཟེར་རེག་ལ་ཡིག་འབྲུ་ཕན་ཚུན་མ་རེག་པའོ། །སྤྱི་ཙམ་དུ་ཕ་རྒྱུད་ལ་སྤྲོ་བསྡུའི་བཟླས་པ་དང་།
མ་རྒྱུད་ལ་ཁྱོགས་ཀྱི་བཟླས་པ་གཙོ་བོར་བྱ་ཞིང་ཏིང་ངེ་འཛིན་སྐྱེ་བ་ལ་ནི། ཡིད་བཟླས་དང་། འགོག་བཟླས། རྡོར་བཟླས་རྣམས་གཙོ་བོར་བྱའོ། །བཟླ་བྱའི་སྔགས་ཀྱི་ཐོག་མ་ཡི་གེ་ༀ་ནི། རྡོ་རྗེ་རྩེ་མོ་ལས། ༀ་ནི་ཅི་ཞིག་ཡིན་པར་བརྗོད། །མཆོག་དང་ནོར་སྟེར་དཔལ་དང་གཡང་། །སྐལ་བཟང་རྣམ་པ་དང་ལྡན་ཅིང་། །དམ་བཅའ་བ་དང་བཀྲ་ཤིས་དོན། །ནོར་བུ་འཛིན་པའི་སྙིང་པོ་ཡིན། །ཞེས་དོན་བརྒྱད་ལ་འཇུག་པར་གསུངས་པ་ལས་སྐབས་འདིར་དཔལ་སྡོམ་པའི་སྙིང་པོའི་སྔགས་ཀྱི་ནོར་བུ་འཛིན་པའོ། །ཤྲཱི་ནི་དཔལ་ཏེ། དཔལ་དྲྭ་བ་སྡོམ་པའི་རྒྱུད་ལས། དཔལ་ནི་གཉིས་མེད་ཡེ་ཤེས་ཏེ། །དེ་ཉིད་མཆོད་པའི་འོས་ཡིན་ལ། །གཉིས་མེད་བདེ་བས་མཆོད་པར་བྱ། །ཞེས་དང་། བདེ་མཆོག་ཉུང་ངུའི་བཀའ་འགྲེལ་ལས། གཉིས་སུ་མེད་པའི་ཡེ་ཤེས་ནི་ཤྲཱི་སྟེ། མི་འགྱུར་བདེ་བ་ཆེན་པོའི་ཡེ་ཤེས་ནི་བདེ་སྟོང་གཉིས་སུ་མེད་པའི་དཔལ་ཕུན་སུམ་ཚོགས་
པ་དང་ལྡན་པའོ། །ཞེས་གསུངས་པ་ལྟར་རོ། །བཛྲ་ནི་རྡོ་རྗེ་སྟེ་རྒྱུད་ལས། རྡོ་རྗེ་མི་ཕྱེད་ཅེས་བྱར་བརྗོད། །ཅེས་གསུངས་པ་ལྟར། འཕོ་མེད་རྡོ་རྗེའི་ཡེ་ཤེས་ཉིད་གཟུང་འཛིན་གྱི་རྟོག་པས་མི་ཕྱེད་པའི་དོན་ཏོ། །ཧེ་ནི་འཐུང་བའམ་རོལ་པ། རུ་ཀཾ་ནི་ཁྲག་ལ་འཇུག་པས་ཁྲག་འཐུང་ཞེས་བྱ་སྟེ། དོན་གྱིས་ན་དབྱིངས་ཡེ་གཉིས་སུ་མེད་པའི་དོན་དམ་འཕོ་མེད་ལྷན་ཅིག་སྐྱེས་པའི་བདེ་བ་མཆོག་ལ་དགྱེས་པས་རྟག་པར་རོལ་པའི་དོན་ཏེ་མཚན་དོན་དང་འབྲེལ་བའོ། །ཧཱུྃ་ཡིག་གི་དོན་ནི་བཤད་རྒྱུད་རྡོ་རྗེ་རྩེ་མོ་ལས། ཧཱུྃ་གི་ཡི་གེ་ཅི་ཞིག་བརྗོད། །སྡུག་བསྔལ་འཆོས་ཤིང་འཇོམས་པར་བྱེད། །སྲིད་པའི་ཞགས་པ་གཅོད་བྱེད་ཅིང་། །གདུག་པ་སྡང་གསོད་བྱེད་པ་ཡི། །ཧཱུྃ་ཡིག་མཆོག་ཏུ་དྲན་པར་བྱ། །ཞེས་དང་། ཕཊྲ་ཀྱང་དེ་ཉིད་ལས། ཡི་གེ་ཕཊྲ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་དེ། །བདེ་བ་དག་ནི་འགུགས་པར་བྱེད། །ཅེས་
གསུངས་སོ། །དེ་ལའང་རྣམ་པ་བརྡར་གྱུར་ལྟར་ན། ༀ་ནི་དཔལ་འཁོར་ལོ་སྡོམ་པའི་སྐུའི་ངོ་བོ། ཧེ་ཡིག་དང་པོ་དགའ་བ། གཉིས་པ་མཆོག་ཏུ་དགའ་བ། རུ་སྔོན་མ་ཁྱད་དགའ། རུ་རྗེས་མ་ལྷན་ཅིག་སྐྱེས་པའི་དགའ་བ། ཀཾ་ནི་བདེ་བ་དང་སྟོང་པ་དབྱེར་མེད་པ། ཧཱུྃ་ཡིག་གཉིས་ནི་སྐུ་གཉིས་ཟུང་དུ་འཇུག་པ། ཕཊྲ་ནི་འཇོམས་པ་སྟེ་གཟུང་འཛིན་གྱི་རྣམ་རྟོག་ཐམས་ཅད་ཆོས་ཀྱི་དབྱིངས་སུ་སྐྱེལ་བར་བྱེད་པའོ། །དོན་འགྱུར་ཧེ་ནི་རྒྱུ་སོགས་ཀྱི་དོན་སྔར་བཤད་པ་དང་འདྲའོ། །ཌཱ་ཀི་ནཱི་མཁའ་འགྲོ་མ་སྟེ། རྒྱུད་ལས། ཌཱ་ནི་ནམ་མཁར་འགྲོ་མ་ཞེས། །མཁའ་ལ་མངོན་དུ་བཏགས་པ་སྟེ། །ནམ་མཁར་ཀུན་ཏུ་སྤྱོད་གྲུབ་པས། །མཁའ་འགྲོ་མ་ཞེས་བརྡར་བཏགས་སོ། །ཞེས་གསུངས་པ་ལྟར་དང་། ཛཱ་ལ་ནི་དྲྭ་བ། སམྦ་རཾ་སྡོམ་པ་སྟེ། བདེ་མཆོག་ཉུང་ངུའི་རྒྱུད་ལས། འདི་ནི་རང་བྱུང་བཅོམ་ལྡན་འདས། །མཁའ་འགྲོ་དྲྭ་བའི་སྡོམ་པ་ཡིན། །ཞེས་དང་།
མཁའ་འགྲོ་རྒྱ་མཚོ་ལས། མཁའ་འགྲོ་མ་ཡི་དྲྭ་བ་སྡོམ། །ཞེས་གསུངས་པ་ལྟར། དགོངས་འགྲེལ་གྲུ་གཟིངས་མ་ལས། མཁའ་འགྲོ་མ་རྣམས་ནི་རྩ་སྟོང་ཕྲག་བདུན་ཅུ་དེ་རྣམས་ཀྱི་དྲྭ་བ་སྟེ་ཚོགས་སོ། །དེ་དག་བཅོམ་ལྡན་འདས་ཀྱི་ཡེ་ཤེས་ཀྱི་སྐུའི་བདག་ཉིད་ཀྱི་ནང་དུ་སོན་པའི་ཕྱིར་དེའི་རང་བཞིན་དུ་སྡོམ་པས་སྡོམ་པའོ། །ཞེས་དང་། བདེ་མཆོག་ཉུང་ངུའི་བཀའ་འགྲེལ་ལས། མཁའ་འགྲོ་མ་ནི་རྡོ་རྗེ་ཌཱ་ཀི་ལ་སོགས་པ་གནས་གསུམ་གྱིས་བསྡུས་པའི་མཁའ་འགྲོ་ཐམས་ཅད་ཆོས་ཉིད་ཀྱི་ངང་ལས་ཡེ་ཤེས་ཀྱིས་འགྲོ་བའོ། །དེའི་དྲྭ་བ་སྡོམ་ཞེས་ལུས་སེམས་ཀྱི་དེ་ཁོ་ན་ཉིད་ཀྱི་ངང་དུ་ཐབས་ཤེས་རབ་དབྱེར་མེད་སྙིང་པོ་རྡོ་རྗེའི་གནས་སུ་སྡོམ་པ་ཉིད་དོ། །ཞེས་དང་། དོན་འགྱུར་ཡང་རྒྱུད་འགྲེལ་དེ་ཉིད་ལས། ཌཱ་ཀི་ནི་འོད་གསལ་བའོ། །དྲྭ་བ་ནི་རང་གི་རྟོགས་པ་ལས་འདས་པ། སྡོམ་པ་ནི་ཟུང་འཇུག་སྤྲོས་བྲལ་དུ་སྡོམ་པ་སྟེ་འཁོར་འདས་ཀྱི་
ཆོས་ཐམས་ཅད་གཉིས་མེད་ཐ་དད་མེད་པའི་རང་བཞིན་དུ་གྱུར་པའོ། །ཞེས་གསུངས་པ་ལྟར་དཔལ་རྡོ་རྗེ་གྲུབ་པ་དྲྭ་བ་སྡོམ་པའི་རྒྱུད་ལས་ཀྱང་། དྲྭ་བ་ཞེས་བྱ་མང་པོའི་དོན། །ཀུན་རྫོབ་གཞན་རིག་ཏུ་བསྟན་པས། །གྲངས་མང་རྒྱ་ཆེ་བསྟན་པ་ནི། །ནམ་མཁའ་དང་མཚུངས་སྡོམ་པའི་དོན། །ཞེས་གསུངས་སོ། །སྭཱ་ཧཱ་ནི་རྡོ་རྗེ་རྩེ་མོ་ལས། སྭཱ་ཧཱ་ཞེས་པ་ཅི་ཡིན་བརྗོད། །སྡིག་པ་ཐམས་ཅད་ཞི་བྱེད་ཅིང་། །དགེ་བའི་ཚོགས་ནི་འཕེལ་བར་བྱེད། །ཅེས་གསུངས་ལ། ཡང་ན། སྭཱ་ཧཱ་ནི་གཞི་ཚུགས་ཞེས་པ་སྟེ། ཕྱི་ལྟར་ན་ཉོན་མོངས་དང་རྣམ་རྟོག་ཐམས་ཅད་དག་པ་ལྷ་ཡི་འཁོར་ལོར་སྡོམ་པ་དང་། ནང་ལྟར་ན་རྩ་རླུང་ཐིག་ལེ་བྱང་སེམས་ཐམས་ཅད་ཨ་བ་དྷཱུ་ཏིའི་ནང་དུ་སྡོམ་པ་དང་། གསང་བ་ལྟར་ན་བདེ་གསལ་མི་རྟོག་པའི་ཉམས་ཐམས་ཅད་དབྱེར་མེད་གཉུག་མའི་ངང་དུ་སྡོམ་པའི་གཞི་ཚུགས་ཞེས་པའོ། །འདིར་ནི་ལྷའི་མཚན་དངོས་སུ་བརྗོད་པས་ན་སྙིང་པོའི་
སྔགས་ཅེས་བྱ་སྟེ་སྙིང་པོ་ཉི་ཤུ་རྩ་གཉིས་པའོ། །དེང་སང་ཐམས་ཅད་ཀྱིས་ཛྭཱ་ལ་སམྦ་ར་ཞེས་བཀླག་ཅིང་སྤར་གསར་བརྐོས་རྣམས་ལའང་དེ་བཞིན་སྣང་ཡང་། ཛྭཱ་ལ་འབར་བའི་དོན་ལ་འཇུག་པ་ལས་དྲྭ་བ་ལ་ནམ་ཡང་མི་འཇུག་པར་མ་ཟད། བདེ་མཆོག་སྤར་རྙིང་དང་བཀའ་བསྟན་གཉིས་ཀྱི་ཁྲོད་དུ་རྒྱུད་དང་རྒྱ་གཞུང་གི་དཔེ་ཇི་སྙེད་ཅིག་བཞུགས་པ་རྣམས་སུའང་ཛྭཱ་ལ་ཁོ་ནར་ཡོད་པས་ཤེས་ནུས་ལ། ཚིག་དོན་གྱི་དབང་དུ་བྱས་ནའང་གོང་དུ་ལུང་རྒྱས་པར་དྲངས་པ་ལྟར་དྲྭ་བ་སྡོམ་པ་ལས། འབར་བ་སྡོམ་པ་ཞེས་མ་གསུངས་པའི་ཕྱིར་རོ། །སྤྱིར་སྔགས་ཀྱི་བཀླག་ཐབས་ཚུལ་ལྡན་འབྱུང་བ་དཀའ་ཡང་སྙིང་པོ་ཙམ་ནི་དག་པར་ཀློག་དགོས་པར་གྲུབ་ལ། དེ་ལའང་གཉིས་ཏེ་ཅི་ཡང་མི་ཤེས་པའི་མི་སྐྱ་ཕོ་མོ་ཙམ་ལ་ནི་ཁྱོད་ཀྱི་བཟླས་བརྗོད་དང་ཁ་ཏོན་མི་དག་ཅེས་མི་བརྗོད་དེ། ཚུལ་ལྡན་དུ་མི་འབྱུང་བའི་ཁར་ཐེ་ཚོམ་གྱི་རྒྱུར་འགྲོ་བས་སྔར་གྱི་དགེ་བ་
ཕྲ་མོ་དེ་ཡང་ཆུད་འཛའ་བས་སྨྲ་བར་མི་བྱ་ལ། ཆོས་ཀྱི་གནད་དོན་ཤེས་པ་རྣམས་ཀྱིས་ནི་རྣམ་དག་ཏུ་ཀློག་པ་གལ་ཆེ་སྟེ། དཔུང་བཟང་གིས་ཞུས་པ་ལས། གསང་ཚིག་སྒྲ་དང་ཚིག་འབྲུ་ཉམས་གྱུར་ན། །ལོག་པར་སྦྱོར་བས་དེ་ཡི་དོན་མི་སྟོན། །རྡོ་རྗེའི་ཚིག་དེས་མཆོག་སྦྱིན་བྱེད་མིན་ཏེ། །དབང་པོའི་བདག་པོ་དགྲ་ཡིས་བརླག་པ་བཞིན། །ཞེས་དང་། དགེ་སློང་ཀརྨ་ལུང་བསྟན་པའི་མདོ་ལས། དགེ་སློང་སྔགས་ཀྱི་ཡི་གེ་རྣམས་དག་པར་གདོན་པར་བྱ་སྟེ། མ་དག་པར་བཀླགས་ན་བསྐལ་པ་བརྒྱར་ལྕེ་དཔག་ཚད་བརྒྱད་ཁྲིར་འགྱུར་ཏེ། ཐོང་གཤོལ་ལྔ་བརྒྱས་རྨོ་ཞིང་འཚེད་དེ། སྡུག་བསྔལ་བསམ་གྱིས་མི་ཁྱབ་མྱོང་བར་འགྱུར་རོ། །ཞེས་གསུངས་པས་སོ། །དེ་ནས་སྤྲོ་བསྡུ་དམ་ཚིག་གི་བཟླས་པ་བྱ་བ་ནི། ལཱུ་ཡི་པའི་གཞུང་ལས། ནཱ་ད་འཁོར་ལོའི་ལྷ་ཚོགས་ཀྱི། །སྤྲོ་དང་བསྡུ་བ་དག་གིས་ནི། །དེ་བཞིན་བློ་ལྡན་དམ་ཚིག་བཟླས། །ཞེས་གསུངས་པ་ལྟར།
རང་ཉིད་ཀྱི་ལྟེ་བ་སྤྲུལ་པའི་འཁོར་ལོར་པདྨའི་ལྟེ་བར་འདི་ལ་ལཱུ་ཡི་པའི་མངོན་རྟོགས་ཀྱི་དཀའ་འགྲེལ་དང་། དེ་བཞིན་གཤེགས་པའི་རྡོ་རྗེའི་རྒྱ་གཞུང་ལས་ཧཱུྃ་ཡིག་དམར་པོའམ་ནཱ་ད་ཞེས་གསུངས་སོ། །མཆན། ནཱ་ད་དམར་པོ་གནས་པ་ལས་གང་ཟློ་བའི་སྔགས་ཀྱི་ཕྲེང་བ་འཕྲོས། ལུས་ཀྱི་ནང་བརྒྱུད་སྣ་བུག་གཡས་ནས་ཐོན། དཀྱིལ་འཁོར་པ་སྟེ་གཙོ་བོ་ཡབ་ཡུམ་དང་མཁའ་འགྲོ་མ་བཞི་དཔའ་བོ་དང་རྣལ་འབྱོར་མ་རྣམས་སུ་གྱུར་ཏེ་འགྲོ་བའི་དོན་དཔག་ཏུ་མེད་པ་མཛད་ནས། མཐར་ལྷ་ཚོགས་དེ་དག་ཐམས་ཅད་ཀྱང་སྔར་ལྟར་སྔགས་ཕྲེང་གི་གཟུགས་སུ་གྱུར་ཏེ་རང་གི་སྣ་བུག་གཡོན་པ་ནས་ཞུགས་ཏེ་ནཱ་ད་ལ་ཐིམ་པར་བསམས་ཏེ་སྔགས་བཟླའོ། །ཉེ་བའི་སྙིང་པོ་ཡི་གེ་བདུན་པ་ནི་ཡན་ལག་གི་སྒོ་ནས་བརྗོད་པ་འདུས་པའི་ཡི་གེ་སྟེ། ༀ་ནི་བཅོམ་ལྡན་འཁོར་ལོ་སྡོམ་པ། ཧྲཱིཿནི་བཅོམ་ལྡན་རྡོ་རྗེ་རྣལ་འབྱོར་མ། ཧ་ཡིག་དང་པོ་རྣལ་འབྱོར་མ་བཞི། གཉིས་པ་ས་འོག་སྐུའི་འཁོར་ལོའི་
དཔའ་བོ་དང་དཔའ་མོ་ཡབ་ཡུམ་བཅུ་དྲུག །ཧཱུྃ་ཡིག་དང་པོ་ས་སྤྱོད་གསུང་གི་འཁོར་ལོའི་དཔའ་བོ་དང་དཔའ་མོ་ཡབ་ཡུམ་བཅུ་དྲུག །ཧཱུྃ་ཡིག་གཉིས་པ་མཁའ་སྤྱོད་ཐུགས་ཀྱི་འཁོར་ལོའི་དཔའ་བོ་དང་དཔའ་མོ་ཡབ་ཡུམ་བཅུ་དྲུག ། ཕཊྲ་ནི་སྒོ་མཚམས་ཀྱི་ལྷ་མོ་བརྒྱད་ཡིན་ནོ། །དེ་ནས་ཡུམ་གྱི་སྙིང་པོ། བཛྲ་ནི་རྡོ་རྗེ། བཻ་རོ་ཙ་ནཱི་ནི་རྣམ་པར་སྣང་མཛད་མ་སྟེ། འཕོ་མེད་བདེ་ཆེན་ཡེ་ཤེས་རྡོ་རྗེ་ཉིད་མཁའ་འགྲོ་མའི་རྣམ་པར་སྣང་བར་མཛད་མ་ཡིན་པས་ན་དེ་སྐད་ཅེས་བྱའོ། །ཉེ་སྙིང་སརྦ་བུདྡྷ་སོགས་ནི། སརྦ་ནི་ཀུན། བུདྡྷ་ནི་སངས་རྒྱས། ཌཱ་ཀི་ནཱི་ཡེ་མཁའ་འགྲོ་མ། བཛྲ་རྡོ་རྗེ། བརྞ་ནཱི་ཡེ་རིགས་ལྡན་མ་སྟེ། ངོ་བོ་སངས་རྒྱས་མཁའ་འགྲོ་ཡིན་པས་སངས་རྒྱས་ཀུན་གྱི་མཁའ་འགྲོ་མ་དང་། དེ་ལ་རྡོ་རྗེ་རིན་ཆེན་པདྨ་ལས་ཀྱི་རིགས་ཀྱི་མཁའ་འགྲོ་ཐམས་ཅད་ཀྱང་འདུས་པས་ན་རིགས་ལྡན་མ་ཞེས་བྱའོ། །འཁོར་སྔགས་ཌཱ་ཀི་ནཱི་ཡེ་མཁའ་འགྲོ་མ། ལཱ་མེ་མཛེས་མ།
ཁཎྜ་རོ་ཧེ་དུམ་སྐྱེས་མ། རཱུ་པི་ཎཱི་ཡེ་གཟུགས་ཅན་མ། དེ་དག་ཐམས་ཅད་ཀྱི་མཐར་བོད་པའི་དོན་དུ་རྟགས་མཐའ་ཨེར་བསྒྱུར་བའོ། །ཐམས་ཅད་ཀྱི་མགོར་ༀ་དང་མཐར་ཧཱུྃ་ཧཱུྃ་ཕཊ་སྦྱར་བའི་དོན་ནི། ཁྲག་འཐུང་མངོན་པར་འབྱུང་བའི་རྒྱུད་ལས། རང་མིང་བརྗོད་པའི་སྔགས་དག་ལ། །དང་པོ་ༀ་གྱི་ཡི་གེ་དང་། །ཧཱུྃ་ཧཱུྃ་ཕཊ་ཀྱིས་མཐའ་ལ་བརྒྱན། །ཞེས་གསུངས་པ་ལྟར་རོ། །སྔགས་དེ་དག་གི་བྱེད་ལས་ཀྱང་། ངེས་བརྗོད་བླ་མའི་དཀའ་འགྲེལ་ལས། དཔའ་བོའི་སྙིང་པོས་ནི་ཆོས་ཀྱི་སྐུའི་ཡེ་ཤེས་སྟོན། ཉེ་བའི་སྙིང་པོས་ནི་ལོངས་སྐུའི་གཟུགས་སྟོན། ཡུམ་གྱི་སྙིང་པོས་ནི་ཆོས་ཀྱི་སྐུའི་འདུས་མ་བྱས་སྟོན། ཡུམ་གྱི་ཉེ་སྙིང་གིས་ནི་ལོངས་སྐུ་ལས་སྤྲུལ་སྐུ་འགྱེད་པ་སྟོན། ཡུམ་བཞིའི་སྔགས་ཀྱིས་ནི་ཕྲིན་ལས་བཞི་མཛད་དོ། །ཞེས་གསུངས་སོ། །མཐར་ཧཱུྃ་ཡིག་རིང་པོ་དང་ཐུང་དུ་གཉིས་སུ་འབྱུང་བ་ནི། འདྲ་བའི་ཡི་གེ་ལ་སྔ་མ་ཐུང་ངུ་དང་ཕྱི་མ་
རིང་པོར་བཤད་པ་ལྟར་རོ། །སྔགས་ཀྱི་བཟླས་ཚད་ཀྱང་གཙོ་བོ་ལ་འབུམ། ཡུམ་དང་འཁོར་ལ་ཁྲི་བཟླ་བ་གྲངས་བསྙེན་དང་། གྲངས་མེད་དུ་བཟླ་བ་གཉིས་སུ་གསུངས་ཏེ། སྡོམ་འབྱུང་ལས། བརྒྱ་དང་སྟོང་དང་འབུམ་གྱི་བར། དེར་ནི་གྲངས་ཉིད་མཚོན་པར་བྱ། །གྲངས་མེད་སྔགས་ནི་བཟླས་པ་ཡིས། །བླ་ན་མེད་པའི་དགེ་བ་འབྱུང་། །ཞེས་དང་། རྫོགས་ལྡན་དུས་སུ་གཅིག་བཟླས་པ། །གསུམ་ལྡན་དུས་སུ་ཉིས་འགྱུར་དང་། །གཉིས་ལྡན་དུས་སུ་སུམ་འགྱུར་བཤད། །རྩོད་དུས་བཞི་འགྱུར་དུ་ནི་བཟླ། །ཞེས་གསུངས་པ་ལ་དེང་སང་རྩོད་དུས་བཞི་འགྱུར་དུ་བཟླ་དགོས་ཞེས་བོད་རྣམས་བཞེད་ཀྱང་། རྗེ་བདུན་པའི་ཞལ་སློབ་ཀརྨ་ཕྲིན་ལས་པ་ཆེན་པོ་དང་བོ་དོང་བ་སོགས་ཀྱིས། རྫོགས་ལྡན་ལ་གཅིག་བཟླས་པ་དེ་སུམ་ལྡན་སོགས་ལ་བཟླས་ན་ཉིས་འགྱུར་གྱི་ཕན་ཡོན་སྟོན་པ་ཡིན་ཞེས་གསུངས་པ་མ་ཟད། དགེ་བ་མཐའ་དག་སྙིགས་དུས་སུ་འགྱུར་
ཁྱད་ཆེ་བར་གསུངས་པ་དང་། ཁྱད་པར་དུ་སྔགས་རྣམས་དུས་ཀྱི་ཐ་མར་འགྲུབ་པར་འཇམ་དཔལ་རྩ་རྒྱུད་དུ་གསུངས་ཏེ། དུས་ཀྱི་ཐ་མ་དག་ལ་ནི། །སྔགས་རྣམས་གྲུབ་པ་ངེས་པ་ཡིན། །ཞེས་དང་། ཁྲག་འཐུང་མངོན་པར་འབྱུང་བའི་རྒྱུད་ལས། རྩོད་ལྡན་དུས་སུ་དངོས་གྲུབ་འགྱུར། །རྫོགས་ལྡན་ཡོན་ཏན་གཅིག་འགྲུབ་སྟེ། །དེ་བཞིན་གསུམ་ལྡན་ཡོན་ཏན་གཉིས། །གཉིས་ལྡན་ཡོན་ཏན་གསུམ་དུ་གསུངས། །རྩོད་ལྡན་ཡོན་ཏན་བཞི་ཉིད་དེ། །དངོས་གྲུབ་ཉིད་དུ་ཐེ་ཚོམ་མེད། །ཅེས་གསུངས་པ་ལྟར་ལ། འོ་ན་དེང་སང་གསང་སྔགས་ཀྱི་ལྷ་གྲུབ་པ་ཉིན་སྐར་ལས་དཀོན་པ་ཅི་ཞེ་ན། ཆོས་ཀྱི་ཕན་ཡོན་དང་ནུས་པ་ཆུང་བ་མིན་ཏེ་ཆོས་དང་གང་ཟག་གཉིས་རྒྱབ་འགལ་དུ་སོང་བའི་དབང་གིས་སྟེ། དཔུང་བཟང་ལས། ཆོ་ག་ཉམས་ཤིང་ཡི་གེ་གུག་སྐྱེད་མེད། །མཆོད་པ་མེད་ཅིང་མི་གཙང་བཟླས་བརྗོད་བྱེད། །གུག་སྐྱེད་ཡི་གེ་ལྷག་པར་གྱུར་བ་ན། །
གསང་སྔགས་དངོས་གྲུབ་རྒྱ་ཆེར་མི་སྟེར་རོ། །ཞེས་གསུངས་པ་ལྟར་བཟླས་པ་ལ་ཡང་དེང་སང་རང་གཞན་ཐམས་ཅད་ཀྱིས་ལོངས་སྤྱོད་འཕྲོས་ལྟར་ཏིང་འཛིན་མེད་པའི་བཟླས་བརྗོད་འབག་འབུག་ཙམ་གྱིས་ནི་གར་ཡང་མི་ཕྱིན་པས་བཟླས་པའི་སྐྱོན་ལྔ་སྤང་བར་གསུངས་ཏེ། མྱུར་དྲགས་ན་སྒྲ་ཟུར་ཆག །བུལ་དྲགས་ན་གྲངས་མི་འགྲོ། སྒྲ་ཆེ་ན་བར་ཆད་འབྱུང་། ཆུང་ན་དངོས་གྲུབ་བུལ། ནོར་བ་དང་ཆད་ན་དངོས་གྲུབ་ལོག་པར་འགྱུར་བར་གསུངས་པས་སྤང་བླང་གལ་ཆེ་ལ། བཟླས་པའི་ལྷག་ཆད་སྐོང་བ་ལ་ནི་ཇི་ཙམ་བཟླས་པའི་བཅུ་ཆའི་སྦྱིན་སྲེག་བྱ་བར་གསུངས་ཏེ། རྡོ་རྗེ་སྙིང་རྒྱན་ལས། གསང་སྔགས་ལྷག་ཆད་གང་ཡིན་པ། །ཐམས་ཅད་སྦྱིན་སྲེག་དག་གིས་སྐོང་། །ཞེས་གསུངས་སོ། །སྔགས་བཟླས་པའི་ཕན་ཡོན་ཀྱང་། ནམ་མཁའ་དང་མཉམ་པའི་རྒྱུད་ལས། སྙིང་པོ་དང་ནི་ཉེ་སྙིང་གི །གསང་སྔགས་རྒྱལ་པོ་འདི་དག་ནི། །བསྐལ་པ་སྟོང་
ལ་སོགས་པ་ཡི། །སྡིག་པ་མ་ལུས་དག་བྱེད་ཆུ། །ཞེས་དང་། ངེས་བརྗོད་བླ་མ་ལས། གསང་སྔགས་འདི་ནི་གསང་སྔགས་ཆེ། །ལས་རྣམས་ཐམས་ཅད་བྱེད་པའི་མཆོག །འདི་ནི་བཀླག་པ་ཙམ་གྱིས་འགྲུབ། །ཅེས་དང་། ཀུན་སྤྱོད་ལས། གང་ཞིག་འདི་སྒོམ་རྣལ་འབྱོར་པ། །འདོད་པའི་བདེ་བ་ཐམས་ཅད་སྟེར། །ཧེ་རུ་ཀ་དཔལ་མཚན་བརྗོད་པས། །ལྷ་སོགས་ཀུན་གྱི་གསང་གང་དང་། །མི་ལ་སོགས་པར་གང་ཞིག་ཡོད། །དེ་ཡི་བསོད་ནམས་དེས་འཐོབ་བོ། །ཞེས་སོགས་དང་། གང་ཞིག་མོས་པའི་བློས་འདིའི་དཀྱིལ་འཁོར་མཐོང་བ་ཙམ་གྱིས་ཀྱང་སྡིག་པ་ཀུན་བྱང་བར་གསུངས་ཏེ། ཁྲག་འཐུང་མངོན་འབྱུང་གི་རྒྱུད་ལས། དཀྱིལ་འཁོར་མཐོང་བ་ཉིད་ཀྱིས་རྟེན། །དངོས་གྲུབ་ཅི་སྟེ་སྐྱེ་མི་འགྱུར། །སྡིག་པ་ཀུན་ལས་རྣམ་པར་གྲོལ། །ཅེས་དང་། ལམ་འདིར་ཞུགས་པའི་གང་ཟག་དེ་ཉིད་འཕོས་མ་ཐག་དཔའ་བོ་དང་རྣལ་འབྱོར་མ་རྣམས་
ཀྱིས་མཁའ་སྤྱོད་དུ་བསུ་བར་གསུངས་ཏེ། ཀུན་སྤྱོད་ཀྱི་རྒྱུད་ལས། རྣལ་འབྱོར་པ་ནི་འཕོ་བའི་ཚེ། །དཔལ་ལྡན་ཧེ་རུ་ཀ་ལ་སོགས། །དཔའ་བོ་དག་ནི་ཐམས་ཅད་དང་། །རྣལ་འབྱོར་མ་ནི་ཇི་སྙེད་པས། །ལག་ན་སྣ་ཚོགས་མེ་ཏོག་བསྣམས། །བ་དན་རྒྱལ་མཚན་སྣ་ཚོགས་དང་། །རོལ་མོའི་སྒྲ་ནི་སྣ་ཚོགས་དང་། །སྣ་ཚོགས་གླུས་ནི་ཉེ་བར་མཆོད། །འཆི་བ་ཞེས་བྱ་རྣམ་རྟོག་སྟེ། །མཁའ་ལ་སྤྱོད་པའི་གནས་སུ་འཁྱེར། །དེ་ལྟའི་དཔའ་བོ་ཆེན་པོ་དང་། །རྣལ་འབྱོར་མ་ནི་ས་སྟེང་དཀོན། །ཞེས་གསུངས་སོ། །དེ་ནས་ཐུན་བསྡུ་བ་ནི། ཧཱུྃ་གི་འོད་ཀྱིས་སྣོད་བཅུད་ཐམས་ཅད་ལྷའི་རྣམ་པར་བྱས། དེ་དག་ཀྱང་གཞལ་ཡས་ཁང་ལ་ཐིམ། དེ་འོད་དུ་ཞུ་སྟེ་འཁོར་རྣམས་ལ་ཐིམ། འཁོར་རྣམས་ཡུམ་ལ་ཐིམ། ཡུམ་ཡབ་ལ་ཐིམ། ཡབ་ཀྱང་ཐུགས་ཀའི་ཧཱུྃ་ལ་ཐིམ། ཧཱུྃ་དེ་ཡང་གྱེན་རྫོགས་སུ་ཞབས་ཀྱུ་ཁོག་པ་ལ། ཁོག་པ་མགོ་བོ་ལ། མགོ་ཟླ་ཚེས། ཟླ་ཚེས་ཐིག་
ལེ། ཐིག་ལེ་ཡང་ནཱ་ད། དེ་ཡང་མི་དམིགས་པར་བཞག་པ་ནི་རྟག་པའི་མཐའ་བསལ་བ་དང་། སླར་ཡང་ལྷན་སྐྱེས་དཔའ་གཅིག་གི་རྣམ་པར་གསལ་བ་ནི་ཆད་པའི་མཐའ་བསལ་བའོ། ༈ །དེ་ནས་བུམ་བསྐྱེད་ལ་འཇུག་པའི་ཐོག་མར་བུམ་པ་ལའང་། ཇི་སྐད་དུ། རྒྱུ་ཚད་ནང་བཅུད་ཕྱི་ཡི་རྒྱན། །མཚོན་བྱེད་སྒྲུབ་ཚུལ་རྣམ་པ་ལྔ། །ཞེས་འབྱུང་བ་ལྟར། དང་པོ་རྒྱུ་ནི་རབ་གསེར་དངུལ། འབྲིང་ཟངས་དང་ལི་འཁར་སོགས་ནས་ཐ་མ་རྫའི་བར་གྱིས་རུང་བར་གསུངས་ཏེ། རྒྱུད་ལས། གསེར་རམ་དངུལ་ལས་བྱས་པ་ཡི། །ཟངས་སམ་ས་ལས་བྱས་ཀྱང་རུང་། །ཞེས་སོ། །གཉིས་པ་ཚད་ནི། སློབ་དཔོན་འཇིགས་མེད་སྦས་པའི་བདེ་མཆོག་དབང་གི་རབ་བྱེད་ལས། ཞི་བ་དང་རྒྱས་པའི་བུམ་པ་ལ་ལྟོ་བའི་རྒྱར་སོར་བཅུ་དྲུག་དང་། ལྟེ་བའི་འོག་ནས་ཁ་དང་མཆུའི་བར་གྱི་དཔངས་ལ་སོར་ཉི་ཤུ། ཁའི་མཚམས་ནས་མཆུ་འཕྱང་བའི་བར་ལ་སོར་
གཉིས། མགྲིན་པར་སོར་བརྒྱད། བུམ་གཟུགས་ལ་སོར་དྲུག །སྦུབས་ལ་སོར་གཉིས། ཁ་གཡེར་བ་དང་ཕྱིར་འཕྱང་བ་ལ་སོར་བརྒྱད། ཞབས་ནང་དུ་ཅུང་ཟད་ཞུམ་པ་ལ་སོར་མོ་གཅིག་གོ །སྤྱིར་བཏང་གི་མཚན་ཉིད་རྒྱུད་ལས། རྩ་བ་ནག་པོ་ར་རི་མེད། །མཆུ་འཕྱང་མགྲིན་རིང་ལྟོ་བ་ཆེ། །ཞེས་དང་། རྒྱུད་ལ་ལར། བུམ་པ་ཞབས་མེད་ལྟོ་བ་ཟླུམ། །ཞེས་གསུངས་པ་ལྟར། ཕྱི་རོལ་པའི་བུམ་པ་ལས་ཁྱད་འབྱེད་པའི་ཕྱིར་རྩ་བ་མེད་པ་སྟེ་ཞབས་ར་མ་སྦྱར་བར་ནང་དུ་མཆོད་བདུན་གྱི་ཞབས་ལྟར་ཅུང་ཟད་ཞུམ་པར་བྱ་བ་དང་། ནག་པོ་སོགས་ཀྱི་ར་རི་མེད་པ་དང་། ཆུང་ཚད་ལའང་བྲེ་རེ་ཤོང་བར་བཤད་དོ། །དེ་བཞིན་དབང་དང་དགུག་པ་དབྱེ་བསྐྲད་རེངས་པ་སོགས་ཀྱི་བུམ་པའི་ཚད་སོ་སོར་གསུངས་ཀྱང་འདིར་མ་སྤྲོས་སོ། །གསུམ་པ་ནང་བཅུད་ལ། རིན་ཆེན་ལྔ་ནི། བྱི་རུ་དངུལ་དང་གསེར་དང་ནི། །པདྨ་རཱ་ག་མུ་ཏིག་གོ། །ཞེས་དང་། འབྲུ་ལྔ་ནི། ནས་གྲོ་
སུན་ཆུང་ནག་པོ་དང་། །ཏིལ་དང་དཀར་པོ། འབྲས་ནི་སོ་བའོ། །འབྲས་ཤུབ་ལྡན། ཞེས་དང་། སྨན་ལྔ་ནི། སྟག་ཚེར་ཏེ་སེ་འབྲུའི་མེ་ཏོག་སེ་བའི་མེ་ཏོག བྲི་ཧ་ཏི་ཀཎྜ་ཀ་ར་དང་། སེང་ཚེར་ཏེ་ཡོངས་གྲགས། ལྟར་སྩས་ཏེ་ཅོ་ག་གླད་སྨན། ས་ཧ་དེ་བ་གཞན་མི་ཐུབ། ཤུ་དག་དཀར་པོ། །དཎྜོཏྤ་ལའི་རྩ་བ་སྟེ། དབྱུག་པའི་ཨུཏྤལ་ཏེ་ཨུཏྤལ་སྔོན་པོ། །སྨན་ནི་རྣམ་པ་ལྔ་གཞུག་བྱ། །ཞེས་ལཱུ་ཡི་པའི་རྒྱ་གཞུང་ལས་གསུངས་སོ། །སྙིང་པོ་ལྔ་ནི། ལན་ཚ། བུ་རམ། མར། འོ་མ། སྦྲང་རྩིའོ། །དྲི་ལྔ་ནི་ཙནྡན་དཀར་པོ། དམར་པོ། གུར་གུམ། ག་པུར། ཛཱ་ཏིའོ། །དགོས་པའང་དགོས་འདོད་རེ་བ་སྐོང་ཕྱིར་རིན་ཆེན་ལྔ་དང་། མུ་གེའི་བསྐལ་པ་ཞི་ཕྱིར་འབྲུ་སྣ་ལྔ་དང་། །ནད་ཀྱི་བསྐལ་པ་ཞི་ཕྱིར་སྨན་སྣ་ལྔ། ཚུལ་ཁྲིམས་རྣམ་པར་དག་ཕྱིར་དྲི་ལྔ། དགོས་འདོད་རེ་བ་སྐོང་ཕྱིར་སྙིང་པོ་ལྔ་བླུགས་པར་སྤྱི་རྒྱུད་ནས་གསུངས་སོ། །བཞི་པ་ཕྱིའི་རྒྱན་ནི། རྣམ་རྒྱལ་བུམ་པར་ཆོས་འབྱུང་གི་དབུས་སུ་སྣ་ཚོགས་པད་
ཉིར་རྡོ་རྗེ་སྔོན་པོ་རྩེ་ལྔ་པ་དང་། ལས་བུམ་ལ་པད་ཉིར་གྲི་གུག་ཡོད་པ་བུམ་པའི་ལོགས་སུ་དགོད་པར་བྱ་སྟེ། ལཱུ་ཡི་པའི་རྒྱ་གཞུང་ལས། དཀྱིལ་འཁོར་པ་ནི་ཐམས་ཅད་ཀྱི། །ས་བོན་ཡང་ན་ཕྱག་མཚན་ནི། །གུར་གུམ་ལ་སོགས་འདུ་བྱས་ལ། །མཁས་པས་བུམ་པའི་ལོགས་ལ་དགོད། །ཅེས་གསུངས་པ་ལྟར་བུམ་མཚན་ལྷ་སོ་སོའི་གཙོ་བོའི་ཕྱག་མཚན་འགོད་པར་བྱའོ། །བུམ་པའི་མགུལ་ཆིངས་ཀྱང་ཀླུ་བྱང་ཞབས་ཀྱིས་དཀར་པོ་གསུངས་པ་དང་། ནག་པོ་པས་ཁ་དོག་སྣ་ཚོགས་པར་གསུངས་ཀྱང་། ལཱུ་ཡི་པས་རས་ནི་དཀར་པོ་མ་ཉམས་པས། །བུམ་པའི་མགུལ་པ་དཀྲི་བར་བྱ། །ཞེས་དང་། དེ་ཉིད་འཆིང་བའི་སྐུད་པ་ཡང་། རྡོ་རྗེ་མཁའ་འགྲོ་ལས་སེར་པོར་གསུངས་ཀྱང་། ལཱུ་ཡི་པས། ཆོ་ག་མཁས་པས་སྲད་བུ་ནི། །དཀར་པོས་རས་ཀྱི་སྟེང་ནས་འཆིང་། །ཞེས་དང་། བུམ་པའི་ཁ་རྒྱན་ཀྱང་། ཨ་མྲ་ཨུ་དུམ་ཝཱ་ར་དང་། །མྱ་ངན་མེད་དང་བྱང་ཆུབ་
ཤིང་། །ཀླུ་ཤིང་ཡལ་ག་ལྔ་བཟུང་ནས། །བུམ་པ་རྣམས་ཀྱི་ཁ་རྒྱན་བྱ། །ཞེས་གསུངས་པ་ལྟར། རྒྱ་གར་དུ་ཤིང་ལོའི་ཡལ་འདབ་ཀྱིས་ཁ་བརྒྱན་པར་བྱེད་པ་ནི་གདུལ་བྱའི་རེ་འདོད་ཡིད་བཞིན་དུ་སྐོང་བའི་རྟགས་སུ་བྱང་ཆུབ་ཤིང་གི་ཡལ་འདབ་ཀྱིས་ཁ་བརྒྱན་པ་ཡིན་ཀྱང་། ངེད་རང་བོད་རྣམས་ཀྱིས་ཀུ་ཤ་ལ་རྨ་བྱའི་སྒྲོ་ཆུན་མཛེས་བྱེད་དུ་སྦྱར་བ་ཡང་། རྒྱ་གར་དུ་ཀུ་ཤ་ནི་བྲམ་ཟེ་སོགས་ཀྱིས་གཙང་བྱེད་ཀྱི་རྫས་སུ་འདོད་པ་དང་། བུམ་པ་ཀུ་ཤ་བཏིང་བའི་སྟེང་དུ་བཞག་པར་གསུངས་པ་དང་སྒོ་བསྟུན། རྨ་བྱའི་མདོངས་ཀྱང་རྨ་བྱས་དུག་ཟོས་ཀྱང་མི་གོས་པར་ལྟར། སྔགས་བླ་མེད་ཉམས་སུ་ལེན་པའི་གང་ཟག་ཉོན་མོངས་མ་སྤངས་ལམ་དུ་སློང་བའི་བརྡ་ཡིན་ཞེས་འབྲེལ་འགྲིགས་བཤད་དོ། གཟུངས་ཐག་ཀྱང་རྒྱ་གར་ནས་མེ་ཏོག་སྐུད་པ་ལ་བརྒྱུས་པའི་ཕྲེང་བ་ལ་བྱེད་པའི་ཕྱིར་བོད་སྔ་རབས་རྣམས་མེ་ཏོག་གོས་དར་ལ་བཅོས་པའི་ཕྲེང་
བ་བྱེད་ཀྱང་། ད་ལྟ་སྐུད་པ་ཁྲ་བོ་ལ་མཛད་པའང་། ཐུགས་རྗེའི་གཟུངས་ཐག་ཡེ་ཤེས་ལྔ། །ཞེས་པ་དང་འབྲེལ་བར་འཆད་དོ། །ལྔ་པ་མཚོན་དོན་ནི། སྤྱིར་བུམ་པས་ས་བཅུ་གཅིག་པའི་གཉིས་སུ་མེད་པའི་ཡེ་ཤེས་མཚོན་པས། རྩ་བ་མེད་པས་ཆོས་ཉིད་སྐྱེ་བ་མེད་པ་དང་། མི་རྟག་པས་དབྱིངས་རང་བཞིན་གྱིས་རྣམ་པར་དག་ཅིང་གློ་བུར་གྱི་དྲི་མས་མ་གོས་པ་མཚོན། ལྟོ་བ་ལྡིར་ལ་རྒྱ་ཆེ་བས་ཡེ་ཤེས་ཟབ་ཅིང་རྒྱ་ཆེ་བ་མཚོན། མགྲིན་པ་རིང་བས་ཡེ་ཤེས་གཏིང་དཔག་དཀའ་བ་མཚོན། མཆུ་འཕྱང་བས་ཐུགས་རྗེས་སེམས་ཅན་འཁོར་བ་ནས་འདྲེན་པ་མཚོན། ཞབས་ཞུམ་སྲིད་པ་འཁོར་བའི་མཐའ་ལ་མི་གནས་པ་མཚོན། ཁ་གཡེལ་བས་སེམས་ཅན་གྱི་དོན་གཉིས་སྒྲུབ་པ་མཚོན། རིན་ཆེན་ལྔས་ཡེ་ཤེས་དེས་སེམས་ཅན་གྱི་རེ་བ་སྐོང་བ་དང་། སྨན་ལྔས་སེམས་ཅན་གྱི་ཉོན་མོངས་པའི་ནད་ཞི་བར་བྱེད་པ་དང་། དྲི་ལྔས་ཡེ་ཤེས་ལྔས་སེམས་ཅན་གྱིས་འཆལ་
པའི་དྲི་མ་སེལ་བ་མཚོན། སྙིང་པོ་ལྔས་ཡེ་ཤེས་དེས་སེམས་ཅན་ཐམས་ཅད་ཟག་མེད་ཀྱི་བདེ་བ་ལ་འཁོད་པ་མཚོན། འབྲུ་ལྔས་སེམས་ཅན་གྱི་རྒྱུད་ལ་དགེ་བའི་ལོ་ཏོག་སྐྱེད་པར་བྱེད་པ་མཚོན། འབྲས་བུ་བཅས་པའི་ཤིང་ལོས་ཁ་བརྒྱན་པ་ནི་རྒྱུ་དགེ་བ་ལ་སྤྱད་པས་འབྲས་བུ་ཐར་པ་ཐོབ་པ་མཚོན། རས་དཀར་པོ་ཁ་ཚར་མ་ཉམས་པ་སྲད་བུས་ཟེ་སྲོག་ལྔ་པའི་ཚུལ་དུ་བཅིངས་པ་ནི་ཡེ་ཤེས་ལྔ་མཚོན། གཟུངས་ཐག་ནི་བླས་པའི་སྔགས་ཀྱི་ཕྲེང་བས་ཐུགས་ཀྱི་སྙིང་པོ་ཡེ་ཤེས་བསྐུལ་བ་ཉིད་མཚོན་བྱེད་ཡིན་ནོ། །མདོར་ན་བསྒྲུབ་བྱ་ནི་སྐུ་བཞི་དང་སྐུ་གསུམ་ཡིན་པས། སྒྲུབ་བྱེད་བུམ་པས་ཀྱང་དེ་ཉིད་མཚོན་ཏེ། ཕྱིའི་རྒྱན་སྣ་ཚོགས་ནི་སྤྲུལ་སྐུ། ནང་གི་རྫས་ཉེར་ལྔ་ནི་ལོངས་སྐུ། ཆུས་སུམ་གཉིས་བཀང་བ་ནི་ཆོས་སྐུ། རྡོ་རྗེའི་ལྟེ་བ་དུང་ཆོས་ཀྱི་ཆུར་ཤར་བ་ནི་ངོ་བོ་ཉིད་སྐུ་དང་། ཡང་ན་སྐུ་གསུམ་ནི། རྒྱུད་ལས། བུམ་པ་ཆུས་ནི་སུམ་གཉིས་
བཀང་། །སུམ་གཉིས་གཟུགས་སྐུ་གཉིས་པོ་མཚོན། །སུམ་ཆས་ཆོས་སྐུ་སྐྱེ་མེད་མཚོན། །ཞེས་གསུངས་པ་ལྟར་རོ། །དེ་ནས་སྒྲུབ་ཚུལ་དངོས་ནི། རྒྱུད་ལས། གུ་གུལ་དང་ནི་ཨ་ག་རུས། །བདུག་ཅིང་དྲི་ལྔའི་ཆུ་ཡིས་དགང་། །ཞེས་གསུངས་པ་ལྟར། གུ་གུལ་བདུག་ཅིང་། ༀ་སུམྦྷ་སོགས་ལན་གསུམ་གྱིས་བགེགས་བསྐྲད། བུམ་མཚན་གོང་གསལ་ལྟར་དགོད། མགུལ་ཆིངས་སྲད་བུ་དཀར་པོས་བཅིངས་ཏེ། ༀ་བཛྲ་ཤི་ཁ་སོགས་ལན་གསུམ་བརྗོད། སྔགས་དོན་ནི། ༀ་རབ་བསྔགས། བཛྲ་རྡོ་རྗེ། ཤི་ཁ་རེ་རྩེ་མོ། རུ་ཊ་མ་ཊ་གླགས་ལྟ། དི་ཤཱཾ་ཕྱོགས། བནྡྷ་བནྡྷ་ཆིངས་ཆིངས། ཧཱུྃ་ནི་སྐུལ་ཚིག་སྟེ། རབ་བསྔགས་རྡོ་རྗེ་རྩེ་མོས་གླགས་ལྟའི་ཕྱོགས་ཐམས་ཅད་ཆིངས་ཤིག་ཆིངས་ཤིག་ཅེས་པའོ། །དེ་ནས་ༀ་ཏཔྟེ་སོགས་ལན་གསུམ་བརྗོད་པས། ལྷ་ཡུལ་གྱི་ཆུ་བོ་ཡན་ལག་བརྒྱད་དང་ལྡན་པ་རྣམས། དལ་འགྲོ་སྟེ་མི་ཡུལ་གྱི་ཆུ་བོ་དལ་འབབ་རྣམས་སུ་བཀུག་སྟེ་
བུམ་པའི་ཆུ་དང་དབྱེར་མེད་དུ་གྱུར་པར་བསམ་མོ། །སྔགས་དོན་ནི། ༀ་མཆོག་ཏུ། ཏཔྟེ་ཏཔྟེ་གདུང་མ་གདུང་མ། མ་ཧཱ་ཏཔྟེ་གདུང་མ་ཆེན་མོ། སྭཱ་ཧཱ་གཞི་ཚུགས་ཞེས་པ་སྟེ། མཆོག་ཏུ་གདུང་མ་བརྩེ་བས་གདུང་མ་རབ་ཏུ་གདུང་མ་ཆེན་མོས་ཉོན་མོངས་པའི་གདུང་བ་སེལ་བའི་གཞི་ཚུགས་ཞེས་པའོ། །ཞེས་པའི་སྔགས་བརྗོད་བཞིན་ལས་ཆུ་གཙང་བདུད་རྩི་ལྔ་ཡི་དྲིས་བགོས་པས་བུམ་པའི་སུམ་གཉིས་དགང་། ལྔ་ཚན་ལྔ་ཡི་རྫས་རྣམས་གཞུག་སྟེ་དེའི་མཎྜལ་ལམ་ཀུ་ཤའི་གདན་ལ་བཀོད། དེ་ནས་དུང་ཆུས་སམ་པདྨའི་སྣོད་གང་རུང་བདུད་རྩི་ལྔ་དང་ལྡན་པའི་དྲི་བཟང་གི་ཆུས་དགང་སྟེ། ༀ་བཛྲ་ཨ་མྲྀ་ཏ་སོགས་ལན་བདུན་བཟླས་ཏེ་རྣམ་རྒྱལ་གྱི་སྟེང་དུ་བཀོད། དེའི་སྟེང་དུ་རྡོ་རྗེ་མེ་ཏོག་གི་ཕྲེང་བས་བཅིངས་པ་བཞག་སྟེ་ཆུའི་ནང་དུ་འཆར་བར་བྱ། སྔགས་དོན་ནི། ༀ་མཆོག་སྦྱིན། བཛྲ་ཨ་མྲྀ་ཏ་རྡོ་རྗེ་བདུད་རྩི། ཨུ་ད་ཀ་ཆུ་སྟེ་དབྱངས་སྦྱར་
བ། ཧཱུྃ་ནི་སྐབས་འདིར་སྐུལ་ཚིག་སྟེ། མཆོག་སྦྱིན་རྡོ་རྗེ་བདུད་རྩིའི་ཆུར་གྱུར་ཅིག །ཅེས་པའོ། །ༀ་ཨཱཿཧཱུྃ་ནི་རྡོ་རྗེ་གསུམ་གྱིས་བདུད་རྩིར་བྱིན་གྱིས་བརླབ་པའོ། །དེ་ནས་དེར་བརྟེན་པ་ལྷ་བསྐྱེད་ཚུལ་ལ། ཨཱརྱ་དེ་ཝས་ཆུ་ཉིད་ལྷར་བསྐྱེད་པར་གསུངས་པ་དང་། སློབ་དཔོན་ཨ་བྷ་ཡས་ཆུའི་ནང་དུ་པདྨའི་སྟེང་དུ་ལྷ་བསྐྱེད་པར་གསུངས་པས། འདིར་ཡང་ཕྱི་མ་ལྟར་ལཱུ་ཡི་པའི་ཁྱད་པར་གསལ་བྱེད་དུ་གསུངས་སོ། །དེ་ནས་བུམ་པ་བསང་སྦྱང་། སྟོང་པའི་ངང་ལས་བུམ་དཀར་པོ་ལས་བྱུང་བའི་བུམ་པ་ལྟོ་བ་ཡངས་ཤིང་མཆུ་འཕྱང་མགྲིན་རིང་སོགས་མཚན་ཉིད་ཐམས་ཅད་རྫོགས་པའི་རྣམ་རྒྱལ་བུམ་པའི་ནང་ཆུའི་སྟེང་དུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་བུམ་པའི་མཚན་མ་དང་བཅས་པའི་སྟེང་དུ་པདྨའི་ལྟེ་བར་ཉི་མ་དང་འཇིགས་བྱེད་དུས་མཚན་དང་བཅས་པ། ཕྱོགས་ཀྱི་འདབ་མ་ལ་དབུགས་བྲལ་གྱི་གདན་དང་བཅས་པ་སོགས་སྔར་ལྟར་
བསྒོམ། ལས་བུམ་གྱི་ནང་དུའང་དབུས་སུ་བུམ་མཚན་པད་ཉི་རོའི་གདན་ལ་པཾ་ལས་གྲི་གུག་པཾ་གྱིས་མཚན་པ་ཡོངས་སུ་གྱུར་པ་ལས་དུམ་སྐྱེས་མ་དམར་མོ་གཞུང་གསལ་ལྟར་བསྐྱེད་པས་གྲུབ་བོ། །ལས་བུམ་གྱི་བསྟོད་པ་དབང་གི་ལས་དང་སོགས་ཀྱི་དོན་ནི། ལྷ་མོ་ཉིད་ལས་གཞི་ལས་དབང་གི་ལས་དང་། དགའ་བ་བཞི་ལས་དགའ་བྲལ་ལྷན་ཅིག་སྐྱེས་པ་དང་། རྗེས་དྲན་བཞི་ལས་ཆོས་རྗེས་སུ་དྲན་པའི་ངོ་བོ་ཡིན་པས་ན་དེ་སྐད་བྱའོ། །དེ་ནས་བདག་བསྐྱེད་ཀྱི་ཐུགས་ཀའི་འོད་ཟེར་སྔོན་པོ་སྤོས་རེང་གི་དུད་པ་ལྟ་བུ་གཟུངས་ཐག་ལ་འཁྲིལ་ཏེ་སོང་། རྩེ་མོ་མང་དུ་གྱེས་ཏེ་བུམ་ལྷ་གཙོ་འཁོར་སོ་སོའི་ཐུགས་ཀར་ཐིམ་པའི་མོད། ཡབ་ཡུམ་ཐམས་ཅད་སྙོམ་པར་ཞུགས་པའི་བྱང་སེམས་དཀར་དམར་ལས་འོད་ཟེར་རང་མདོག་འཕྲོས་པའི་མཐུས། ཡེ་ཤེས་ཀྱི་བདུད་རྩིས་བུམ་པ་ཁེངས་པར་བསམས་ལ་ཧཱུྃ་ཞེས་བརྗོད་ཅིང་ལག་གཡོན་པའི་
མཐེབ་སྲིན་གྱིས་གཟུངས་ཐག་འཛིན་ལ་བསྙེན་པ་ཚང་བར་བཏང་བའི་མཐར་མེ་ཏོག་དཀར་པོ་གསུམ་དུང་ཆུས་སུ་གཞུག་སྟེ། ༀ་ཤྲཱི་ཙཀྲ་སོགས་ཀྱིས་དུང་ཆོས་ཀྱི་ཆུ་མཆོད་ཡོན་ཕུལ་བས་ལྷ་རྣམས་དངོས་འཛིན་གྱི་འདོད་ཆགས་དང་བྲལ་ཡང་འདོད་ཆགས་ཆེན་པོའི་རྣམ་པས་ཞུ་བ་ལས། བྱང་ཆུབ་སེམས་ཀྱི་ངོ་བོ་བླུགས་པའི་བུམ་ཆུ་དང་རོ་གཅིག་ཏུ་གྱུར་པར་བསམས་ལ། ༀ་བཛྲ་པུཥྤེ་སོགས་རྣམ་ལྔས་མཆོད་ལ་ཕྲིན་ལས་བཅོལ་ལོ།། ༈ །།དེ་ནས་མདུན་བསྐྱེད་ཀྱི་བསྐྱེད་རིམ་དབང་བསྐུར་རྒྱས་གདབ་སོགས་ཀྱི་བསྒོམ་རིམ་དང་གོ་དོན་རྣམས་སྔར་བཤད་པ་ལྟར་ལ། སྤྱིར་བཏང་དུ་མཆོད་པའི་རིམ་པ་མདོར་བསྡུས་ཙམ་བཤད་པ་ལ་གསུམ་སྟེ། མཆོད་པའི་རྣམ་པའི་ཁྱད་པར་བསྟན་པ་དང་། ཇི་ལྟར་འབུལ་ཚུལ་དང་། དབྱེ་བ་བསྟན་པའོ། །དང་པོ་ནི་དེ་བཞིན་གཤེགས་པའི་རྡོ་རྗེའི་རྒྱ་གཞུང་ལས། དུང་དང་། འདབ་མའི་ཀོང་བུ་དང་། ཟངས་ལ་སོགས་
པ་ལས་བྱས་པའི་ཞལ་བསིལ་དང་། བསང་གཏོར་དང་། ཞབས་བསིལ་དང་། མཆོད་ཡོན་གྱི་སྣོད་རྣམས་སུ་ནས་དང་། འོ་མ་དང་། མེ་ཏོག་དཀར་པོ། རྩ་ཀུ་ཤ་དང་ཏིལ་དཀར་པོ་དང་། བདུད་རྩི་ལྔ་ལ་སོགས་པ་བླུགས་ཏེ་ཡི་གེ་གསུམ་དང་རང་རང་གི་བདག་པོ་དང་ལས་ཐམས་ཅད་པའི་སྔགས་ཀྱིས་བརྒྱ་རྩ་བརྒྱད་དམ་ལན་བདུན་དུ་བསྔགས་ལ་སྣོད་རྣམས་རང་གི་གཡོན་དུ་མཉྫིའི་སྟེང་དུ་བཞག །དེའི་མདུན་དུ་བཟེད་ཞལ་ཡང་མཉྫིའི་སྟེང་དུའོ། །ཞེས་གསུངས་ལ། དེ་ཡང་སྤྱིར་བཏང་མཆོད་ཡོན་ནི་ཀ་ར་དང་། དྲི་བཟང་སོགས་བཏབ་པའི་ཆུ་བཞེས་རྒྱུ་ཡིན་ལ། ཨཱ་ཙ་མཱ་ནཾ་ནི་ཙ་མུ་ཟ་བའི་བྱིངས་ལ་སྒྲུབ་སྐབས་ཞལ་ལ་བསིལ་བ་སྐྱེད་བྱེད་ཀྱི་ཆུ་ཕལ་པ་བཞེས་རྒྱུ་ཡིན་པས་ན་ཞལ་བསིལ་ཞེས་བྱ་སྟེ། ཁ་ཅིག་ཞལ་བཤལ་བྱེད་ཡིན་པར་ཡང་འདོད་དོ། །པྲོཀྵ་ཎཾ་ནི་ལོ་ཙཱ་སྔ་མས་འཐོར་འཐུང་དུ་བསྒྱུར་ཡང་འཐུང་བའི་སྐད་དོད་མེད་པས་
བསངས་གཏོར་ཏེ། སྐུ་ལ་ཉེས་གྲིབ་མི་མངའ་ཡང་མཆོད་པ་པོའི་ཉེས་གྲིབ་སེལ་ཕྱིར་སྐུ་ལ་ཆུ་གཙང་གིས་བསངས་གཏོར་འབུལ་བ་དང་། སྐུ་ལ་བསིལ་བ་སྐྱེད་ཕྱིར་ཆུས་བྲན་པའོ། །པཱ་དྱཾ་ནི་ཞབས་བསིལ་ཏེ་ཞབས་གཉིས་བཀྲུ་བྱེད་ཡིན་ལ། པུཥྤཾ་སྟེ་ཆུ་དང་ཐང་ལས་སྐྱེས་པའི་མེ་ཏོག་སྣ་ཚོགས། དྷཱུ་པཾ་སྟེ་དུ་རུཥྐ་དང་ཙནྡན་སོགས་དྲི་བཟང་པོ་ཅན་གྱི་བདུག་སྤོས། ཨ་ལོ་ཀཾ་སྟེ་འབྲུ་མར་རྩི་མར་ལས་བྱུང་བའི་སྣང་གསལ། གནྡཾ་སྟེ་ག་པུར་དང་ཙནྡན་དྲི་བཟང་སོགས་བཏབ་པའི་སྤོས་ཆུ་ཐུགས་ཀར་བྱུགས་པའི་དྲི་ཆབ། ནཻ་ཝི་དྱཾ་སྟེ་དཀར་གསུམ་མངར་གསུམ་སོགས་ཁ་ཟས་སྣ་ཚོགས་པ་སྤུངས་པའམ་ཡོངས་གྲགས་ལྟར་བཅོས་པའི་ཞལ་ཟས། ཤཔྡཾ་སྟེ་ཌཱ་དྲིལ་སིལ་ཁྲོལ་པི་ཝང་གླིང་བུ་སོགས་རོལ་མོའི་རྣམ་པ་མང་པོའི་སྒྲ་རྣམས་འབུལ་བའོ། །གཉིས་པ་འབུལ་ཚུལ་ལའང་། མཆོད་ཡོན་དང་ཞལ་བསིལ་ཞལ། བསངས་གཏོར་སྐུ་ལུས་ལ། ཞབས་བསིལ་
ཞབས་ལ། མེ་ཏོག་དབུ་ལ། བདུག་སྤོས་ཤངས། མར་མེ་སྤྱན། ཞལ་ཟས་ལྗགས། དྲི་ཆབ་ནི་ཐུགས་ཀར། རོལ་མོ་སྙན་ལ་འབུལ་བའོ། །གསུམ་པ་དབྱེ་བ་ནི། ཐུན་མོང་ཕྱིའི་མཆོད་པ། ཁྱད་པར་ནང་གི་མཆོད་པ། གསང་བ་བླ་མེད་ཀྱི་མཆོད་པ། ཡང་གསང་དེ་ཁོ་ན་ཉིད་ཀྱི་མཆོད་པ་དང་བཞི་སྟེ། མདོར་དྲིལ་ན་ཀུན་རྫོབ་བརྡའི་མཆོད་པ་དང་། དོན་དམ་རྣམ་པར་མི་རྟོག་པའི་མཆོད་པ་དང་གཉིས་སུ་དེ་དག་འདུས་པ་ཡིན་ནོ། །དེ་ནས་མཆོད་པ་དངོས་འབུལ་བ་ལ། དང་པོ་མཆོད་པ་བྱིན་རླབས་བྱ་བ་ནི། བསང་སྦྱང་སྔོན་དུ་འགྲོ་བས། མཆོད་པའི་དངོས་འཛིན་གྱི་དྲི་མ་ཐམས་ཅད་སྟོང་པར་སྦྱང་། སྟོང་པ་དེའི་ངང་ལས་ཨ་ལས་ཐོད་སྣོད་ཡངས་ཤིང་རྒྱ་ཆེ་བའི་ནང་དུ་མཆོད་ཡོན་ཞལ་བསིལ་སོགས་མཆོད་པའི་བྱེ་བྲག་ཐམས་ཅད་རྒྱུ་དྭངས་ཤིང་ཡིད་དུ་འོང་བ། ཡིད་ལ་ཇི་ལྟར་བསམས་པ་བཞིན་སྐད་ཅིག་ཙམ་གྱིས་ཐོགས་པ་མེད་པར་
འབྱུང་བ། བྱང་ཆུབ་སེམས་དཔའ་ཀུན་ཏུ་བཟང་པོའི་སྨོན་ལམ་དང་རྣམ་ཐར་ལས་བྱུང་བ་ཇི་བཞིན་དུ་མཆོད་པའི་སྤྲིན་རབ་འབྱམས་ནམ་མཁའི་མཐའ་དང་མཉམ་པ་དཔའ་བོ་དང་རྣལ་འབྱོར་མ་རྣམས་དགྱེས་པ་སྐྱེད་པའི་རང་བཞིན་དུ་གྱུར་པར་བསམས་ལ། ༀ་བཛྲ་ཨཱརྒྷཾ་སོགས་ཀྱིས་བྱིན་གྱིས་བརླབ་པར་བྱ་སྟེ། ཐམས་ཅད་ཀྱི་མགོར་ༀ་དང་། མཐར་ཨཱཿཧཱུྃ་སྦྱར་བ་ནི་མཆོད་པ་རྣམས་རྒྱལ་བ་ཐམས་ཅད་ཀྱི་རྡོ་རྗེ་གསུམ་གྱིས་བླ་ན་མེད་པའི་མཆོད་པར་བྱིན་གྱིས་བརླབ་པ་སྟེ། ཚིག་གྲོགས་ལ་ལྟོས་ན་ཐམས་ཅད་ཀྱི་མཐར་རྣམ་དབྱེ་གཉིས་པའི་ཨཾ་བྱིན་ཏེ་སྔགས་ཀྱི་མཐའ་རྟེན་སྐུལ་ཚིག་དང་འབྲེལ་ཚེ། མཆོད་ཡོན་དུ་གྱུར་ཅིག་ཅེས་པ་སྟེ་གཞན་ལའང་འགྲེའོ། །བྱིན་རླབས་ཀྱི་སྐབས་སུ་ནི་མཐར་སེ་གོལ་མི་བྱ་སྟེ། སེ་གོལ་ཏོག་པ་ནི་ཕྱག་རྒྱ་བཅིངས་པ་སླར་བཀྲོལ་བ་ཡིན་པས་སོ། །དེ་ནས་དང་པོ་ཕྱི་མཆོད་ལ་ཆུ་བཞི་སྔོན་དུ་འགྲོ་བའི་ཉེར་སྤྱོད་ལྔ་རོལ་མོ་དང་
བཅས་འབུལ་བ་ནི། མཆོག་ཏུ་གཙང་ཞིང་སོགས་ཏེ། ཡན་ལག་བརྒྱད་ལྡན་ནི། འདུལ་བ་ལུང་ལས། བསིལ་དང་ཞིམ་དང་ཡངས་དང་འཇམ། །དྭངས་ལ་དྲི་མ་མེད་པ་དང་། །འཐུང་ན་ལྟོ་བར་བྱམས་པ་དང་། །མགྲིན་པར་མི་གནོད་བདེ་བ་སྟེ། །ཆུ་བོ་ཡན་ལག་བརྒྱད་ལྡན་ནོ། །ཞེས་སོ། །དེ་ནས་རྣམ་ལྔ་འདོད་སྐོར་སྔོན་དུ་འགྲོ་བས་རྡོར་ཐལ་ཁ་ཕྱེ་བས། འབུལ་སྔགས་ༀ་ཤྲཱི་ཙཀྲ་སམྦ་ར། དཔལ་འཁོར་ལོ་སྡོམ་པ། སརྦ་བཱི་ར་ཡོ་གི་ནི། དཔའ་བོ་དང་རྣལ་འབྱོར་མ་རྣམས། བཛྲ་ཨཱརྒྷཾ་རྡོ་རྗེའི་མཆོད་ཡོན། པྲ་ཏཱིཙྪ་སོ་སོར་བཞེས་ཤིག །པཱུ་ཛ་མེ་གྷ་མཆོད་པའི་སྤྲིན། ས་མུ་དྲ་རྒྱ་མཚོ། སྥ་ར་ཎ་འཕྲོ་བ། ས་མ་ཡེ་ཧཱུྃ་མ་འདའ་ཞིག །སྭཱ་ཧཱ་གཞི་ཚུགས་ཞེས་པའོ། །དེ་ནས་ཨཱ་ཙ་མ་ནཾ་ཏེ་ཞལ་བསིལ་དང་། པྲོཀྵ་ཎཾ་སྟེ་བསང་གཏོར་གཉིས་ཀྱི་སྔགས་རྒྱ་ལ་ཕལ་ཆེར་གྱིས་སྦར་སྟངས་འདྲ་བ་གཉིས་བྱ་བ་ལས་ཚད་ལྡན་གྱི་གནད་སློང་བ་ཉུང་སྟེ། དེ་བཞིན་
གཤེགས་པའི་རྡོ་རྗེའི་རྒྱ་གཞུང་ལས། དང་པོ་གཡོན་པའི་ཞལ་བསིལ་གྱི་ཆུ་གཡས་པའི་ཁུ་ཚུར་གྱི་མཐེ་བོ་དང་མཛུབ་མོའི་སྐམ་པས་མེ་ཏོག་བཟུང་ལ། དེའི་བཟེད་ཞལ་དུ་ཁ་ཐུར་དུ་བསྟན་པའི་ཁུ་ཚུར་གྱིས་ཞལ་བསིལ་བའི་ཆེད་དུ་མཆོད་བྱའི་ཕྱག་ཏུ་མཐེའུ་ཆུང་ལ་སོགས་པ་རིམ་གྱིས་བརྐྱང་ཞིང་དབུལ་ལོ། །ཞེས་དང་། དེ་ཉིད་ཀྱི་ཆུ་གཡས་པའི་ཁུ་ཚུར་གྱི་མཐེ་བོ་དང་མཛུབ་མོའི་སྐམ་པས་མེ་ཏོག་བཟུང་ལ་རོལ་པས་སོར་མོ་རྣམས་བསྐོར་ཞིང་མཛུབ་མོ་ལ་སོགས་པའི་སོར་མོ་རྣམས་རིམ་གྱིས་བསྐྱངས་ཏེ་འབུལ་ལོ། །ཞེས་གསུངས་པ་ལྟར་དང་པོ་ལག་གཡོན་པའི་ཞལ་བསིལ་གྱི་ཆུ་སྣོད་སྟེང་། གཡས་པའི་ཐལ་མོ་གཡོན་སྐོར་གྱིས་ཁུ་ཚུར་མཐེབ་མཛུབ་སྦྱར་བས་མེ་ཏོག་སྟེ་ཆུ་ཐིག་བླངས་ཏེ་ཁུ་ཚུར་ཐུར་བསྟན་གྱིས་མཐེའུ་ཆུང་སྲིན་ལག་གུང་མོ་རྣམས་རིམ་པར་བརྐྱངས་ཏེ་འབུལ་ཚུལ་དང་། གཉིས་པ་ལ་ཆུ་སྣོད་ཀྱི་སྟེང་དུ་ཐལ་མོ་གཡས་སྐོར་གྱིས་ཁུ་
ཚུར་མཐེབ་མཛུབ་སྦྱར་བས་ཆུ་ཐིག་བླངས་ཏེ་ཁུ་ཚུར་གྱེན་བསྟན་གྱིས་གུང་མོ་སྲིན་ལག་མཐེའུ་ཆུང་རྣམས་རིམ་པར་བསྐྱངས་ཏེ་བསང་གཏོར་གྱི་ཚུལ་བྱའོ། །རྣམ་པ་ཙམ་དུ་འདིའི་རྒྱ་ཡོངས་གྲགས་ལ་མཚུངས་ཀྱང་ཞིབ་པར་མཛུབ་མོ་བརྐྱང་ཚུལ་དང་ཁུ་ཚུར་སྦུབ་བཀན་གྱི་གནད་ཕྲའུ་ཙམ་གྱིས་ཁྱད་པར་ཆེའོ། །དེ་ནས་པཱ་དྱཾ་ནི་ཞབས་བསིལ་ཏེ་དེ་དག་ལ་ཆུ་བཞི་ཞེས་བྱའོ། །དེ་ནས་ཉེར་སྤྱོད་ལྔ་དང་རོལ་མོ་འབུལ་བ་བཅས་ཀྱི་སྔགས་རྒྱ་ཡོངས་གྲགས་ལྟར་ལ་འབུལ་ཚིག་རྣམས་ཀྱང་གོ་སླའོ། །དེ་ནས་ནང་གི་ཉེར་སྤྱོད་ལྔ་རོལ་མོ་དང་བཅས་འབུལ་བའི་གོ་དོན་ཅུང་ཟད་སྤྲོ་ན། ཡང་དག་དགའ་བའི་མེ་ཏོག་ནི་རིགས་ལྡན་མའི་པདྨ་སྟེ། སམྦུ་ཊ་ལས། བུ་མོ་གསང་བའི་མཁའ་ཡི་ཁམས། །མེ་ཏོག་ཅེས་པར་མངོན་བརྗོད་བྱ། །ཞེས་དང་། རྡོ་རྗེ་ཉི་མ་ནི་བྱང་སེམས་སྟེ། རྡོ་རྗེ་མཁའ་འགྲོ་ལས། ཉི་མ་བྱང་ཆུབ་ཀྱི་སེམས་ཏེ། །གསལ་བར་བྱང་
ཆུབ་སེམས་ལ་ནི། །རྡོ་རྗེ་ཉི་མ་ཞེས་བྱར་བརྗོད། །ཅེས་གསུངས་པ་ལྟར། དང་པོ་མེ་ཏོག་འབུལ་བ་ནི། ཡང་དག་བདེ་ཆེན་དགའ་བ་བཞི་འབྱུང་བའི་རྐྱེན་རིགས་ལྡན་མའི་པདྨའི་ཟེའུ་འབྲུའི་མེ་ཏོག་གིས། རྡོ་རྗེ་ཉི་མ་སྟེ་བྱང་སེམས་པདྨོར་བྱུང་བའི་བདེ་ཆེན་མཆོག་གི་མེ་ཏོག་གི་མཆོད་པ་ཡང་། མི་འགྱུར་བདེ་བ་ཆེན་པོའི་གནས་བརྙེས་པས་མེ་ཏོག་གི་བདག་ཉིད་དེ་ཤེས་རབ་སྙེམ་མའི་དབང་ཕྱུག་ཏུ་གྱུར་པ་བཅོམ་ལྡན་དཔའ་བོའི་དབང་ཕྱུག་ལ་མཆོད་པ་ནི། རྡོ་རྗེ་གསུམ་གྱི་དགྱེས་པ་སྐྱེད་པར་བྱེད་པ་དམ་ཚིག་མཆོག་གི་མཆོད་པ་བླ་ན་མེད་པའོ། །གཉིས་པ་བདུག་སྤོས་ནི། དེའང་ཀུན་རྫོབ་བརྡའི་མཆོད་པ་གཟུང་འཛིན་རྣམ་པར་རྟོག་པའི་ཚོགས་ཀྱི་སྤྱོད་ཡུལ་ཙམ་མིན་ཅིང་། ལྟེ་བར་གཏུམ་མོའི་ངོ་བོ་ཨ་ཐུང་གི་མེ་རབ་ཏུ་སྦར་བ་ཡིས་ནི། ཐ་མལ་པའི་རྩ་ཁམས་སྙིགས་མ་ཐམས་ཅད་དང་། གསང་བའི་ཕྲག་དོག་གི་ངོ་བོ་ཨཱཿ ལྟེ་བའི་ང་རྒྱལ་གྱི་ངོ་བོ་ཏྲཱཾ།
སྙིང་གའི་ཞེ་སྡང་གི་ངོ་བོ་ཧཱུྃ། མགྲིན་པའི་འདོད་ཆགས་ཀྱི་ངོ་བོ་ཧྲཱིཿ སྤྱི་བོའི་གཏི་མུག་གི་ངོ་བོ་ༀ་ཡིག་རྣམས་ངེས་པར་བསྲེགས་ཏེ། ཐབས་ཀྱི་ངོ་བོ་ཧཾ་ཡིག་བཞུས་པས་བསྲེག་བཞུའི་ལམ་ནས་འཕོ་མེད་ལྷན་ཅིག་སྐྱེས་དགའི་ཡེ་ཤེས་ཉམས་སུ་མྱོང་བ་དེ་ནི་འཕོ་མེད་རྡོ་རྗེའི་བདུག་སྤོས་ཡིན་པས། རྒྱལ་བ་ཀུན་གྱི་ཐུགས་ཀྱི་རྡོ་རྗེའི་ངོ་བོ་བཅོམ་ལྡན་འདས་ལ་དབུལ་བར་བྱའོ། །གསུམ་པ་མར་མེ་ནི། ཐབས་ཡབ་ཀྱི་རྡོ་རྗེ་ཡི་གེ་ཧཱུྃ་ལས་ཡང་དག་པར་སྐྱེས་པའི་ནོར་བུའི་བུ་གར་སྔགས་ཀྱི་ཡི་གེ་བྱ་སེར་པོ་དང་ཤེས་རབ་ཡུམ་གྱི་མཁར་རྒྱ་ཡིག་དམར་པོ་འོད་ཟེར་འབར་བ་ཤིན་ཏུ་གསལ་བར་བསྒོམས་པས་ཐ་མལ་པའི་དབང་པོའི་སྒོ་བཀག་ཏེ། རྟོག་པ་མེད་པའི་ཚུལ་གྱིས་འཕོ་མེད་ལྷན་ཅིག་སྐྱེས་པའི་དགའ་བ་ཉམས་སུ་མྱོང་བས། མཚོན་བྱེད་དཔེའི་ཡེ་ཤེས་ལ་བརྟེན་ཏེ་མཚོན་བྱ་དོན་གྱི་འོད་གསལ་གྱི་མར་མེ་རྒྱུན་ཆད་མེད་པར་འབར་བ་ནི་ཡང་
དག་བདེ་ཆེན་གྱི་འོད་གསལ་ཡིན་པས། བཅོམ་ལྡན་ཐུགས་ཀྱི་རྡོ་རྗེ་ལ་དབུལ་བར་བྱའོ། །ཞེས་པ་སྟེ་ཤེར་དབང་དུ་འབྱུང་བ་ལྟར་རོ། །བཞི་པ་དྲི་ཆབ་ནི། རང་བྱུང་ལྷན་སྐྱེས་བདེ་བ་ཆེན་པོའི་གཞི་ལ་གནས་པ་ཤེས་རབ་མའི་པདྨར། ཐབས་ཀུནྡ་བྱང་ཆུབ་ཀྱི་སེམས་ནི་དབབ་ཏེ་བདེ་བ་སད་པར་གྱུར་པ་དང་། སླར་རྡོ་རྗེའི་ལམ་ནས་གྱེན་དུ་དྲངས་ཏེ་ཐིག་ལེ་དབབ་ལྡོག་གི་རྣལ་འབྱོར་དེ་ཁོ་ན་ཉིད་ཀྱིས་ཀྱང་བྱང་སེམས་རྩའི་གནས་ཐམས་ཅད་དུ་དགྲམ་པར་བྱས་པའི་བྱུགས་པའི་ཁྱད་པར་དག་ཀྱང་ཐུགས་ཀྱི་རྡོ་རྗེ་དཔལ་འཁོར་ལོ་སྡོམ་པ་ལ་དབུལ་བར་བྱའོ། །ལྔ་པ་ཞལ་ཟས་ནི། འདིར་ནི་ཡུལ་འདོད་པའི་ཡོན་ཏན་ལྔ་གང་དང་གང་ལོངས་སྤྱོད་པ་ཐམས་ཅད། བདག་རྐྱེན་དབང་པོ་ལྔ་པོ་ཐམས་ཅད་ལ་ཡང་དག་པར་བརྟེན་པས། དེ་དག་གིས་སྤྱོད་ཡུལ་དུ་གྱུར་པ་ཐམས་ཅད་ཀྱང་ཐུགས་ཀྱི་རྡོ་རྗེ་བཅོམ་ལྡན་འདས་ལ་བཟའ་བའི་སྣོད་དུ་ལེགས་པར་བཤམས་
ཏེ་མཆོད་པར་བྱའོ། །དྲུག་པ་སྒྲའི་མཆོད་པ་ནི། རྣམ་པ་ལྷ་ཡབ་ཡུམ་དུ་གསལ་བ་ལྷའི་འདུ་ཤེས། མཁའ་གསང་གཉིས་པདྨ་དང་རྡོ་རྗེ་སྔགས་ཀྱི་ཡི་གེ་དང་བཅས་པར་ཤེས་པ་སྔགས་ཀྱི་འདུ་ཤེས། ཐབས་འདིས་བདེ་བ་ཆེན་པོའི་ཡེ་ཤེས་བསྒྲུབ་པར་བྱའོ་སྙམ་པ་ཆོས་ཀྱི་འདུ་ཤེས་ཏེ་འདུ་ཤེས་གསུམ་དང་མ་བྲལ་བར་རྡོ་རྗེ་དང་པདྨ་ཡང་དག་སྦྱར་ཏེ་སྙོམས་པར་ཞུགས་པ་ལ་སོགས་པའི་རིམ་པ་ལས་བྱུང་བའི་རྣལ་འབྱོར་པ་ཡི་མི་ཤིགས་ཟག་མེད་བདེ་བའི་སྒྲ་ཡི་མཆོད་པ་ཡང་བཅོམ་ལྡན་ཐུགས་ཀྱི་རྡོ་རྗེ་ལ་དབུལ་བར་བྱའོ། །ཞེས་པའོ། །དེ་ནས་ཕྱི་མཆོད་རིག་མ་བཅུ་དྲུག་པོ་ཐམས་ཅད་ཞལ་གཅིག་ཕྱག་བཞི་མ་ཁོ་ན་ཡིན་ལ། སོ་སོའི་ཁ་དོག་དང་ཕྱག་མཚན་ནི་གཞུང་དུ་གསལ་བར་འབྱུང་བས་སྨོས་མ་དགོས་སོ། །མཆོད་སྔགས་རྣམས་ཀྱང་རིམ་པ་ལྟར་བཛྲ་བཱི་ནི་སྟེ་རྡོ་རྗེ་པི་ཝང་མ། དེ་བཞིན་ཝཾ་ཤེ་གླིང་བུ་མ། མྲྀ་དཾ་གེ་རྔ་ཟླུམ་མ། མུ་ར་ཛེ་རྫ་
རྔ་མ། ཧ་སྱེ་བཞད་པ་མ། ལཱ་སྱེ་སྒེག་མོ་མ། གཱི་ཏེ་གླུ་མ། ནྲྀ་ཏྱེ་གར་མ། པུཥྤེ་མེ་ཏོག་མ། དྷཱུ་པེ་བདུག་སྤོས་མ། དཱི་པེ་མར་མེ་མ། གནྡྷེ་དྲི་ཆབ་མ་སྟེ་དེ་དག་གི་དབྱངས་མཐའ་ཐམས་ཅད་ཨེར་འགྱུར་བའི་དོན་ནི་བོད་པའི་དོན་དུ་སི་བྱིན་པ་སྟེ། ཧཱུྃ་ཧཱུྃ་ཕཊ་རྣམས་སྐབས་འདིར་སྨོན་པ་སྤྲིང་སྐུལ་གྱི་ཚིག་དང་འབྲེལ་བས་རབ་བསྔགས་རྡོ་རྗེ་པི་ཝང་མ་ཀྱེ་མཆོད་པར་མཛོད་ཅིག་སྟེ་ཕྱི་མ་ཀུན་ལའང་དེས་བསྒྲེའོ། །རཱུ་པ་བཛྲཱི་ནི་གཟུགས་ཀྱི་རྡོ་རྗེ་མ། དེ་བཞིན་ཏུ་ར་ས་རོ། །སྤཪྴེ་རེག་བྱ། དྷརྨ་དྷ་ཏུ་ཆོས་དབྱིངས་རྡོ་རྗེ་མ་སྟེ་དེ་དག་གི་མཐར་བཛྲཱི་ཞེས་འབྱུང་བ་ནི་དེ་ཕན་གྱི་ལྡན་རྐྱེན་ཨཱནྡ་བྱིན་པ་ཡིན་པས་ན་གཟུགས་ཀྱི་རྡོ་རྗེ་ཅན་དུ་གྱིས་ཤིག་ཅེས་པ་སྟེ་ཕྱི་མ་གསུམ་ལའང་དེ་ལྟར་རོ། །དེ་ནས་ཕྱི་མཆོད་འདོད་ཡོན་ལྔ་འབུལ་བ་ནི། ཚིག་དོན་གཞན་གོ་སླ། སྒྲའི་དབྱེ་བ་ལ་ཟིན་དང་མ་ཟིན་ཅེས་པ་ནི། ཇི་སྐད་དུ། སྒྲ་ལ་ཟིན་དང་མ་ཟིན་དང་། ལུང་དུ་སྟོན་དང་མི་
སྟོན་དང་། ཡིད་མི་འོང་ལྔས་དབྱེ་བས་བརྒྱད། ཅེས་པ་ལྟར། ཟིན་པ་སེམས་ལྡན་གྱི་སྒྲ་དང་། མ་ཟིན་པ་འབྱུང་བའི་སྒྲ་དང་གཉིས། དེ་གཉིས་ཀ་ལའང་ལུང་དུ་སྟོན་པ་དོན་གོ་བྱ་ཡོད་པ་དང་མི་སྟོན་པ་དོན་གོ་བྱ་མེད་པ་སྟེ་དབྱེ་བ་བཞིའོ། །ཟིན་པའི་སྒྲ་ལའང་། ཡིད་དུ་འོང་བ་ཆོས་བཤད་པ་ལྟ་བུ། མི་འོང་བ་ངུ་བ་ལྟ་བུ། སྙན་པ་གླུ་ལེན་པ་ལྟ་བུ། མ་སྙན་པ་བསྡིགས་བསྡུང་བྱེད་པ་ལྟ་བུ། དེ་བཞིན་མ་ཟིན་པ་ལའང་། སྤྲུལ་པས་ལུང་སྟོན་པ་ལྟ་བུ་ཡིད་དུ་འོང་བ། མི་འོང་བ་དེ་ངུ་བ་ལྟ་བུ། སྙན་པའི་སྒྲ་རླུང་གིས་བསྐྱོད་པའི་དྲིལ་སྒྲ་ལྟ་བུ། མི་སྙན་པ་བྲག་རལ་བ་ལྟ་བུ་དང་བརྒྱད་ཡོད་པ་ལས་བླ་མེད་ཀྱི་སྐབས་འདིར་ཟིན་དང་མ་ཟིན་གཉིས་ཀའི་སྒྲའི་ཁྱད་པར་སྙན་དང་མི་སྙན་སྣ་ཚོགས་པའི་སྒྲའོ། །དྲི་ཡི་རྣམ་པ་ལའང་དྲི་ཞིམ་པ་དང་ང་བ་གཉིས། དེ་ལའང་ལྷན་སྐྱེས་ཀྱི་དྲི་ག་པུར་ལྟ་བུ། ཡོངས་སུ་གྱུར་པ་ཆང་གི་དྲི་ལྟ་བུ། སྦྱར་བ་སྤོས་ཀྱི་རེང་བུ་ལྟ་
བུའོ། །རོའི་ཁྱད་པར་རྣམ་པ་དྲུག་ཅེས་པ་ནི། མངར་བ་ཀ་ར་ལྟ་བུ། སྐྱུར་བ་སྟར་བུ་ལྟ་བུ། ལན་ཚྭ་ཚྭ་རིགས་ལྟ་བུ། ཁ་བ་ཏིཀྟ་ལྟ་བུ། ཚ་བ་པི་ལིང་ལྟ་བུ། བསྐ་བ་ཨ་རུ་ར་ལྟ་བུ་དང་གྲོང་ཚིག་ལ་ཁ་དབྲི་ཟེར། དྲུག་གོ །སོ་སོའི་འབུལ་སྔགས་ༀ་ཤྲཱི་ཙཀྲ་སོགས་སྔར་དང་འདྲ་ལ། ཀཱ་མ་གུ་ཎ་ནི་འདོད་པའི་ཡོན་ཏན། བཛྲ་པཱུ་ཛི་ཏི་ནི་རྡོ་རྗེའི་མཆོད་པ། ཨཱཿཧཱུྃ་ནི་བྱིན་གྱིས་བརླབ་པ་དང་། སྭཱ་ཧཱ་ནི་གཞི་ཚུགས་ཞེས་པའོ། །འདོད་པའི་ཡོན་ཏན་ཞེས་པ་ནི། འགྲོ་བ་ཐམས་ཅད་ཀྱིས་འདོད་ཅིང་དོན་དུ་གཉེར་བྱའི་གཙོ་བོ་ཡིན་པས་འདོད་པ་དང་། དེའི་སྒོ་ནས་ཚོགས་བསགས་ན་ཐར་པའི་ས་བོན་ཡང་སྟེར་པའི་ཡོན་ཏན་དང་ལྡན་པས་ན་ཡོན་ཏན་ནོ། །དེ་ནས་ནང་མཆོད་འབུལ་བ་གོ་སླ་ལ། གསང་མཆོད་འབུལ་བ་ནི། གཞན་འཕྲུལ་དབང་བྱེད་དུ་ལྟ་བ། འཕྲུལ་དགར་དགོད་པ། དགའ་ལྡན་དུ་ལག་བཅངས་དང་། སུམ་ཅུ་རྩ་གསུམ་པ་མན་ཆད་འཁྱུད་པ་དང་གཉིས་
སྤྲོད་སོགས་ཐ་མལ་པའི་འདོད་ཆགས་དག་པའི་ཕྱིར་རྒྱུད་སྡེ་བཞིར་སློབ་དཔོན་གསང་བ་ཤེས་རབ་ཡེ་ཤེས་བཞི་ཡི་དབང་བསྐུར་གསུངས་པ་སྟེ། བརྟག་གཉིས་ལས། དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ། །དགོད་པ་དག་པ་སློབ་དཔོན་ཉིད། །ལྟ་བ་གསང་བ་དེ་བཞིན་ནོ། །ལག་བཅངས་པ་ཡིས་ཤེས་རབ་ཉིད། །གཉིས་གཉིས་འཁྱུད་པ་དེ་བཞིན་ནོ། །སེམས་ཅན་རྣམས་ཀྱི་དངོས་གྲུབ་ཕྱིར། །དབང་ནི་རྣམ་པ་བཞི་རུ་བཤད། །ཅེས་གསུངས་པ་ལྟར་དབང་བཞི་ལ་བརྟེན་པའི་དགའ་བཞིའི་གསང་མཆོད་ཕུལ་བས། ཡང་དག་ལྷན་སྐྱེས་བདེ་ཆེན་ཡེ་ཤེས་ཀྱི་དབང་བསྐུར་བར་ནི་འགྱུར་བ་དང་། རྒྱུད་རྣམས་ཀུན་གྱི་དོན་ཕྱིན་ཅི་མ་ལོག་པར་རྟོགས་པར་ཤོག་ཅིག །ཅེས་སོ། །སྔགས་ༀ་སརྦ་ཏ་ཐཱ་ག་ཏ། དེ་བཞིན་གཤེགས་པ་ཐམས་ཅད་ཀྱི་ཨ་ནུ་རཱ་ག་ཎ་རྗེས་སུ་ཆགས་པའི་བཛྲ་སྭ་བྷ་བ་རྡོ་རྗེའི་རང་བཞིན་དུ་
གྱུར་པའི་ཨཱཏྨ་ཀོ྅ཧཾ་བདག་ཉིད་ངའོ། །ཞེས་སོ། །དེ་ཁོ་ན་ཉིད་ཀྱི་མཆོད་པ་ནི། འདི་ལྟར་སྣང་བའི་ཆོས་ཀུན་གདོད་ནས་རང་བཞིན་མེད་པར་ཤེས་པའི་གནས་ལ་གོམ་པས། ལྷ་ཡི་སྙིང་པོ་སྟེ་ཆོས་སྐུ་སྐྱེ་བ་མེད་པའི་དོན་རྩེ་གཅིག་ཏུ་སྒོམ་པར་བྱེད་པ་དེ་ནི། རྒྱལ་བ་སྲས་བཅས་མཆོག་ཏུ་དགྱེས་པར་བྱེད་པའི་མཆོད་པ་ཆེན་པོར་འདོད་པའི་ཕྱིར་ན། སངས་རྒྱས་ཐམས་ཅད་ཀྱི་དགོངས་པའི་མཐར་ཐུག་རང་བཞིན་འོད་གསལ་ཆོས་ཀྱི་སྐུ་ཉིད་བདག་གིས་རྟོགས་པར་བྱེད་པའོ། །ཞེས་སོ། །དེ་ནས་རྟགས་ཀྱི་བསྟོད་པ་ཆོས་ཀྱི་སྐུ་ལ་སོགས་བསྟོད་པ་རྣམས་ཀྱི་དོན་ནི་གོ་སླ་བས་མ་སྤྲོས་ལ། ཛཔ་བཟླས་ཀྱི་རིམ་པ་སོགས་གོང་དུ་ཇི་སྐད་བཤད་པ་ལྟར་ལ་སླར་ཟློས་མ་དགོས་སོ། །དེ་ནས་ཕྱི་རོལ་དུ་གཏོར་མ་གཏོང་བའི་དོན་ནི། ཕྱོགས་སྐྱོང་རྣམས་གདོན་གྱི་གཙོ་བོ་ཡིན་པས་དེ་དག་གི་འཁོར་དུ་དཔེར་ན་སྟོན་ཆེན་མོ་ཁྲོམ་འཚོགས་པ་ལྟར་འབྱུང་པོ་ཡི་དྭགས་མི་
མ་ཡིན་པ་སོགས་མང་དུ་ཡོད་པས། དམན་པའི་རིགས་ནང་དུ་འོང་བར་མི་ནུས་པ་དང་། འོངས་ཀྱང་གསང་སྤྱོད་ལ་ལྟ་བར་མི་དབང་བས་ཕྱི་རོལ་དུ་བྱ་བར་གསུངས་པས་ན་འདི་ཁོ་ནར་མ་ཟད་རྒྱུད་སྡེ་གཞན་ལའང་འདི་བཞིན་བྱ་བར་གསུངས་པས། གལ་ཏེ་ནང་དུ་བྱ་ནའང་དཀྱིལ་འཁོར་ཐམས་ཅད་ཡོལ་བས་གཡོགས་པར་བྱའོ། །སྔགས་དོན་རྣམས་ཨིནྡྲ་དབང་པོ། ས་པ་རི་བཱ་རཱ་ན་འཁོར་དང་བཅས་པ་རྣམས། ཨ་ཀཪྵ་ཡ་ཛཿ ཁུག་ཅིག །དེ་བཞིན་དུ། ཡ་མ་གཤིན་རྗེ། བཱ་རུ་ཎ་ཆུ་ལྷ། ཀུ་བེ་ར་ལུས་ངན། མ་ཧཱ་བྷུ་ཏ་འབྱུང་པོ་ཆེན་པོ། ཨཱགྣི་མེ་ལྷ། རཱཀྵ་སྲིན་པོ། བཱ་ཡུ་དེ་བ་ཏཱ་རླུང་ལྷ། ཙནྡྲ་ཟླ་བ། སཱུརྱ་ཉི་མ། བྲ་ཧྨ་ཚངས་པ། ཨ་དེ་བ་ལྷ་མིན། བེ་མ་ཙི་ཏྲི་ཐགས་བཟང་རིས། པྲྀ་ཐི་ཝཱི་དེ་བ་ཏཱ་སའི་ལྷ་མོ། འབྲུ་བཞིས་དགུག་གཞུག་བཅིངས་ཏེ་དབང་དུ་བྱས་ལ། སཾ་ཏྲི་སྟཱཿཡང་དག་པར་ཚིམས་པར། སརྦ་དེ་བ་ཏཱ་ལྷ་ཐམས་ཅད་ཉིད་དེ་
གཙོ་བོའི་སྐད་དོད་སྔོན་དུ་བཞག་པས། ལྷ་ཐམས་ཅད་ཡང་དག་པར་ཚིམས་པར་མཛོད། ཅེས་སོ། །སཱ་དྷ་ཀ་སྱ་སྒྲུབ་པ་པོའི། ཤཱནྟིཾ་ཞི་བའི་ལས་མཛོད། པུཥྚིཾ་ཀུ་རུ་རྒྱས་པའི་ལས་མཛོད། སརྦ་ཀརྻ་ནྟུ་ཕྲིན་ལས་ཐམས་ཅད་མཛོད། སིདྡྷིཪྦྷ་བ་ཏུ་དངོས་གྲུབ་ཐམས་ཅད་མཛོད། ཡ་ཐཱ་ཇི་ལྟར། སུ་ཁཾ་བདེ་བ་དང་། སུ་ཁཻཿབདེ་བས་སྟེ་དོན་འགྱུར་ལྟར་ན་བདེ་བ་དང་བདེ་བས་འཚོ་བའི་དངོས་གྲུབ་ཇི་ལྟར་བསམ་པ་ལྟར་གྱུར་ཅིག་ཅེས་པ་སྟེ་བདེ་བ་དང་པོ་ནི་མངོན་མཐོ་ལྷ་མིའི་བདེ་བ་དང་གཉིས་པ་ནི་ངེས་ལེགས་ཐར་པའི་བདེ་བའོ། །དེ་དག་ནི་སྤྱན་འདྲེན་དང་འདོད་གསོལ་གྱི་སྔགས་སོ། །ༀ་ད་ཤ་དིག་ཕྱོགས་བཅུའི། ལོ་ཀ་པཱ་ལ་འཇིག་རྟེན་སྐྱོང་བ། ས་པ་རི་བཱ་ར་འཁོར་དང་བཅས་པ། ཨཱརྒྷཾ་སོགས་དང་། ༀ་ཁ་ཁ་སོགས་སྔར་ལྟར་ལ། འཇིག་རྟེན་པ་རྣམས་གཤེགས་ཟིན་པ་དང་ཙོག་པུར་བསྡད་ལ་ལག་པ་གཉིས་པུས་མོའི་ནང་དུ་སོན་པར་བྱས་ལ། གཡོན་པས་
དྲི་བཟང་གི་ཆུ་ཐོགས་ཏེ། ལག་གཡས་པའི་གུང་མོ་དང་མིང་མེད་ཅུང་ཟད་བསྐུམས་པས་ཆུ་ལ་རེག་སྟེ་དེས་མཆུ་ལ་བྱབས་པའི་ཚུལ་ལན་གསུམ་བྱས་ཏེ། རྣ་བའི་བུག་པ་གཉིས། མིག་གཉིས། སྣ་བུག་གཉིས། ལག་པ། ལྟོ་བ། མགོ་བོ་བཅས་ལ་ལན་གསུམ་དུ་ཉེ་རེག་བྱའོ། །འདིར་མཛུབ་མོ་ལ་མིང་མེད་ཅེས་བརྗོད་པ་ནི་སོར་མོ་གཞན་རྣམས་ལ་མཐེ་བོང་གུང་མོ་སྲིན་ལག་མཐེའུ་ཆུང་ཞེས་མིང་སོ་སོར་ཡོད་ཀྱང་མཛུབ་མོ་ལ་མིང་དེ་ཀ་ལས་མེད་པས་སོ། །ཉེ་རེག་ཅེས་པ་ནི་དོན་དུ་ཁྲུས་བྱ་བའི་མིང་ངོ་། །དེ་ནས་སུམྦྷ་ནི་བརྗོད་བཞིན་སློབ་དཔོན་གྱིས་སྲུང་དམིགས་དང་བཅས་རྟིང་མནན་ཏེ་ནང་དུ་བྱོན་ལ་དཀྱིལ་འཁོར་ལ་བསྐོར་བ་དངོས་སམ་ཡིད་ཀྱིས་བྱས་ནུབ་ཀྱི་སྒོར་གཡས་བརྐྱང་གི་སྟབས་ཀྱིས་ལག་པ་གཉིས་ཁུ་ཚུར་བཀན་ལ་གུང་མཛུབ་བརྐྱང་པ་བསྣོལ་ཐབས་སུ་བཞག་པ་སོ་སོར་བསྐྱེད་དེ་དཀྱིལ་འཁོར་གྱི་སྒོ་དབྱེ་བར་བསམས་
ལ། ༀ་བཛྲ་རྡོ་རྗེ། ཨུདྒྷ་ཊ་དབྱེ་བའི། ས་མ་ཡ་དམ་ཚིག །པྲ་བེ་ཤ་ཡ་ཧཱུྃ་རབ་ཏུ་འབེབས་པར་མཛོད་ཅིག །ཅེས་པའི་སྔགས་ཚར་བཞི་བརྗོད་རིམ་ལྟར། ལྷོ་ནས་བྱང་། བྱང་ནས་ལྷོ། ཤར་ནས་ནུབ་ཀྱི་སྒོ་ཕྱེས་ལ། དེ་ནས་མེ་ཏོག་གི་ཕྲེང་བ་ཐོགས་སྟེ། སྔགས་ༀ་པ་ར་མ་སུ་ཁ་མཆོག་གི་བདེ་བ། ཨཱ་ཤ་ཡ་བསམ་པ་ལ། སུ་ལ་ལིས་ལེགས་པར་རོལ་པ། བི་ལཱ་ས་ནཱ་རྣམ་པར་སྒེག་པས། ན་མ་ཏི་ཕྱག་བྱེད་དོ། །ན་མ་ཏེ་ཕྱག་བྱ་བ། ན་མཱ་མི་ཕྱག་བགྱིའོ་སྟེ་ལུས་ངག་ཡིད་གསུམ་གྱིས་ཕྱག་བགྱི་བའི་དོན་ཏོ། །བྷ་ག་ཝནྟཾ་བཅོམ་ལྡན་འདས། ཛཿཧཱུྃ་བཾ་ཧོཿབཞིས་དབྱེར་མེད་དུ་བསྟིམ་པ། ཧི་ཐུང་ངུ་ནི་ངེས་པར་ལ་འཇུག་པས་དེ་ཉིད་ཡང་ཡང་བརྣན་པའི་དོན་དང་། ཧྲཱི་རིང་པོ་ནི་སྐྱོ་བའི་དོན་ལ་འཇུག་པས་གདུང་བས་གསོལ་བ་གདབ་པ། པྲ་ཏཱིཙྪ་སོ་སོར། ཀུ་སུ་མ་མེ་ཏོག །ཨཱཉྫ་ལི་ཐལ་མོའམ་སྙིམས་པ། ནཱ་ཐ་མགོན་པོ། ཧོཿདགྱེས་པ་སྟེ་སྙིམས་པའི་མེ་ཏོག་མགོན་
པོས་སོ་སོར་དགྱེས་པར་བཞེས་ཤིག །ཅེས་བརྗོད་ལ་མེ་ཏོག་དཀྱིལ་འཁོར་དུ་དོར། སླར་ཡང་མེ་ཏོག་གི་ཕྲེང་བས་དབང་བསྐུར་བར་མོས་ལ། མེ་ཏོག་དངོས་སམ་འབྲུ་སྤྱི་བོར་བཞག་ལ་དེ་རིང་འགྲོ་བ་ཀུན་ལ་སོགས་ཀྱིས་གསོལ་བ་གདབ་ལ་གདན་དུ་བཞུགས་པར་བྱའོ།། ༈ །།དེ་ནས་བདག་ཉིད་དཀྱིལ་འཁོར་དུ་འཇུག་ཅིང་དབང་བླང་བ་ནི་རྡོ་རྗེ་ཐེག་པའི་ལམ་གྱི་གཞི་རྟེན་ནམ་རྨངས་ལྟ་བུ་ཡིན་པས། དེ་ལའང་ལྔ་སྟེ། དབང་གི་ངོ་བོ། སྒྲ་དོན། དབྱེ་བ། མ་བསྐུར་བའི་ཉེས་དམིགས། བསྐུར་བའི་ཕན་ཡོན་དང་ལྔ་སྟེ། དང་པོ་ནི། གསང་སྔགས་ཀྱི་ཆོ་ག་རྣམ་པར་དག་པ་ལ་བརྟེན་ཏེ་གཞི་དུས་ཀྱི་ཕུང་ཁམས་སྐྱེ་མཆེད་ལ་འབྲས་བུ་སྐུ་བཞིའི་ས་བོན་ཁྱད་པར་ཅན་གདབ་པའི་སྒོ་ནས་རྒྱུད་ཡོངས་སུ་སྨིན་པར་བྱེད་པའོ། །གཉིས་པ་ངེས་ཚིག་ནི། ཨ་བྷི་ཥིཉྩ་ནི་མངོན་པར་དབང་བར་བྱེད་པ་སྟེ། དབང་བཞིས་རིམ་པ་བཞིན་དུ། བསྐྱེད་
རིམ། གཏུམ་མོ། ཤེར་ཡེ། ཕྱག་རྒྱ་ཆེན་པོ་རྣམས་བསྒོམ་པ་ལ་དབང་བར་བྱེད་པས་ན་དབང་སྟེ། དཔེར་ན་རྒྱལ་པོའི་གོ་སར་དབང་བསྐུར་བས་རྒྱལ་པོའི་བྱ་བ་ལ་དབང་བ་ལྟར་ཏེ། ཟུང་འཇུག་གསལ་བ་ལས། དབང་བསྐུར་བ་དེ་དག་གིས་སྔགས་དང་རྒྱུད་ཉན་པ་དང་སྔགས་སྒྲུབ་པ་དབང་བར་འགྱུར་རོ། །ཞེས་གསུངས་པ་ལྟར་དང་། ཡང་ན་ཨ་བྷི་ཥིཉྩའི་སྒྲ་གཏོར་བླུགས་ལ་འཇུག་པས། གནས་སྐབས་བཞིའི་སྒྲིབ་པ་གཏོར་ཏེ། ཡེ་ཤེས་ཀྱི་ནུས་པ་རྒྱུད་ལ་འཇོག་པར་བྱེད་པའི་ཕྱིར་བླུགས་པ་སྟེ། བརྟག་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེས་བརྗོད་པར་བྱ། །ཞེས་གསུངས་པ་ལྟར་རོ། །གསུམ་པ་དབྱེ་བ་ནི། དང་པོ་རྒྱུད་མ་སྨིན་པ་སྨིན་པར་བྱེད་པ་རྒྱུའི་དབང་། བར་དུ་སྨིན་པ་ཉམས་སུ་ལེན་པ་ལམ་གྱི་དབང་། མཐར་བླངས་པའི་འབྲས་བུ་མཆོག་ཐོབ་པ་འབྲས་བུའི་དབང་དང་གསུམ་སྟེ། རིན་ཆེན་ཕྲེང་བའི་རྒྱུད་ལས། རྒྱུ་
ཡི་དབང་ནི་བླ་མས་བསྐུར། །ལམ་གྱི་དབང་ནི་རང་གིས་ལེན། །འབྲས་བུའི་དབང་ནི་མཐར་ཐུག་ཐོབ། །ཅེས་གསུངས་པ་ལྟར་རོ། །བཞི་པ་དབང་མ་ཐོབ་པའི་ཉེས་དམིགས་ནི། ཕྱག་ཆེན་ཐིག་ལེ་ལས། དབང་མ་ཐོབ་པར་དངོས་གྲུབ་མེད། །བྱེ་མ་བཙིར་ན་མར་མི་འབྱུང་། །མཁའ་ལ་ཁུ་ཚུར་གྱིས་བརྟེན་དང་། །སྨིག་རྒྱུའི་ཆུ་ལ་བཏུང་དང་མཚུངས། །ཞེས་གསུངས་སོ། །དྲུག་པ་ཐོབ་པའི་ཕན་ཡོན་ནི། སློབ་དཔོན་ནག་པོ་པས། དབང་བསྐུར་འདི་དག་ཐོབ་ནས་ནི། །སློབ་མ་ཡོན་ཏན་བདག་པོར་འགྱུར། །སངས་རྒྱས་ཀུན་གྱིས་རབ་ཏུ་མཆོད། །མཚམས་མེད་པ་དང་སྡིག་ཅན་ཡང་། །ཚོན་རྩི་མཐོང་བས་གྲོལ་བར་འགྱུར། །ཞེས་གསུངས་སོ། །དེ་ནས་དཀྱིལ་འཁོར་བཞི་ལ་བརྟེན་ཏེ་དབང་དངོས་ལ་འཇུག་པའི་ཐོག་མར་ཁྲུས་དང་མཎྜལ་དྲི་བ་དྲིས་ལན་རྣམས་ཀྱི་ཚིག་དོན་གོ་སླ་ལ། མིག་དར་འཆིང་སྔགས་ཙཀྵུཪྦནྡ་ཝ་ར་མཱ་ན་ཡེ་ཧཱུྃ། མིག་
བཅིངས་བར་བགྱིའོ། །ཞེས་དང་། ཨཱ་ཁཾ་བཱི་ར་ཧཱུྃ་ནི། ཀུན་ཏུ་ནམ་མཁའི་མེ་ཏོག་སྩོལ། །ཅེས་པའོ། །དེ་ནས་གསོལ་གདབ་དང་ཡན་ལག་ལྔ་པ་བྱ། བདག་ཉིད་ཧེ་རུ་ཀར་གསལ་སོགས་ཀྱིས་ལག་གཡས་རྡོ་རྗེ་མེ་ཏོག་དང་བཅས་སྙིང་གར་བཞག་ལ། ༀ་སརྦ་ཐམས་ཅད། ཡོ་ག་རྣལ་འབྱོར་དུ། ཙིཏྟཾ་སེམས། ཨུཏྤ་དཱ་ཡཱ་མི། བསྐྱེད་པར་བགྱིའོ། །ༀ་སུ་ར་ཏེ་རབ་ཏུ་དགའ་བའི། ས་མ་ཡ་སྟྭཾ་དམ་ཚིག་ལ་སྤྱོད། ཧོཿདགྱེས་པར་བཞུགས་ཤིག །སིདྡྷི་བཛྲ། གྲུབ་པའི་རྡོ་རྗེ། ཡ་ཐ་ཇི་ལྟ་བ། སུ་ནི་བདེ་བ། ཁཾ་ནི་སྟོང་པ་སྟེ་བདེ་སྟོང་གཉིས་སུ་མེད་པར་བརྟན་པར་བྱ་བའོ། །དེ་ནས་རིགས་ལྔའི་སྡོམ་བཟུང་། སངས་རྒྱས་སྲས་བཅས་སོགས་གཞན་གོ་སླ་ལ། སངས་རྒྱས་ཀྱི་རིགས་རྣམ་པར་སྣང་མཛད་ཀྱི་དམ་ཚིག་ཏུ། རྒྱུ་མི་དགེ་བ་ལས་ལྡོག་པ་ཉེས་སྤྱོད་སྡོམ་པའི་ཚུལ་ཁྲིམས། ལམ་དགེ་བ་ལ་འཇུག་པ་དགེ་བའི་ཆོས་མཐའ་དག་སྡུད་པའི་ཚུལ་ཁྲིམས། འབྲས་བུ་
གཞན་དོན་བྱེད་པ་སེམས་ཅན་དོན་བྱེད་ཀྱི་ཚུལ་ཁྲིམས་གསུམ་བཟུང་བ་དང་། བླ་ན་མེད་པའི་དཀོན་མཆོག་གསུམ་ནམ་དུ་ཡང་མི་སྤོང་བའོ། །རྡོ་རྗེའི་རིགས་མི་བསྐྱོད་པའི་དམ་ཚིག་ཏུ། རྡོ་རྗེའི་དེ་ཉིད་བྱང་ཆུབ་ཀྱི་སེམས་དང་། དྲིལ་བུའི་དེ་ཉིད་ཤེས་རབ་ཀྱི་ཆོས་སྟོན་པ་དང་། ཕྱག་རྒྱའི་དེ་ཁོ་ན་ཉིད་ལྷའི་རང་བཞིན་བསྟན་པ་དང་གསུམ་མི་འབྲལ་བ་དང་། དེ་བཞིན་སློབ་དཔོན་གྱི་བྱ་བ་དབང་བསྐུར་བ་ཡང་བཟུང་བར་བྱའོ། །རིན་ཆེན་རིགས་རིན་ཆེན་འབྱུང་ལྡན་གྱི་དམ་ཚིག་ཏུ། ཉིན་རེ་བཞིན་དུ་དུས་དྲུག་ཏུ་སྦྱིན་པ་རྣམ་བཞི་སྟེ། ཟང་ཟིང་ནོར་གྱི་སྦྱིན་པ་དང་། ཆོས་ཀྱི་སྦྱིན་པ་དང་། མི་འཇིགས་པ་སྐྱབས་ཀྱི་སྦྱིན་པ་དང་། སེམས་ཅན་དམན་ལ་བྱམས་པའི་སྦྱིན་པ་རྣམས་རྟག་པར་སྦྱིན་པར་བྱའོ། །བྱང་ཆུབ་ཆེན་པོ་ནི་སོ་སོར་རྟོགས་པའི་ཡེ་ཤེས་ཡིན་ལ། དེ་ལས་བྱུང་བའི་པདྨའི་རིགས་ཆེན་དག་པ་སྟེ་སྣང་བ་མཐའ་ཡས་ཀྱི་དམ་ཚིག་ཏུ། ཕྱི་
ཉན་ཐོས་རང་རྒྱལ་བྱང་ཆུབ་སེམས་དཔའི་ཐེག་པ་དང་། ནང་བྱ་སྤྱོད་རྣལ་འབྱོར་གྱི་ཐེག་པ་དང་། གསང་བ་རྣལ་འབྱོར་ཆེན་པོ་བླ་ན་མེད་པའི་ཐེག་པ་སྟེ། དེ་དག་ལས་གསུང་པའི་དམ་པའི་ཆོས་མཐའ་དག་བཟུང་བའོ། །ལས་ཀྱི་རིགས་དོན་ཡོད་གྲུབ་པའི་དམ་ཚིག་ཏུ། ཕྱི་ནང་གི་སྡོམ་པ་ཐམས་ཅད་དང་ལྡན་པར་བྱ་བ་དང་། ཕྱི་ནང་གསང་བའི་མཆོད་པའི་ལས་ཀྱང་ཅི་ནུས་སུ་བྱ་བ་དང་། ཁྱད་པར་དུ་བླ་ན་མེད་པའི་བྱང་ཆུབ་ཀྱི་སེམས་དམ་པ་བདག་གིས་བསྐྱེད་ནས། སེམས་ཅན་ཀུན་གྱི་དོན་གྱི་ཕྱིར་དུ་བདག་གིས་སྡོམ་པ་མ་ལུས་པ་བཟུང་སྟེ། མ་རྒལ་བ་སྟེ་ཉན་ཐོས་ནི་ཉོན་མོངས་དང་ཤེས་བྱའི་སྒྲིབ་པ་དང་ལྡན་པས་དེ་ལས་བསྒྲལ་བར་བགྱིའོ། །མ་གྲོལ་པ་སྟེ་ཚངས་པ་དང་དབང་ཕྱུག་ལ་སོགས་པ་རྟག་ཆད་ཀྱི་ལམ་ལས་བདག་གིས་དགྲོལ་བར་བྱའོ། །དབུགས་མ་ཕྱིན་པ་སྟེ་དམྱལ་སོགས་ངན་སོང་གི་འགྲོ་བ་རྣམས་སྡུག་བསྔལ་ལས་བདག་གིས་
དབུགས་དབྱུང་ཞིང་། མདོར་ན་སེམས་ཅན་ཐམས་ཅད་མི་གནས་པའི་མྱ་ངན་ལས་འདས་པ་འགོད་པར་བྱའོ་ཞེས་ལན་གསུམ་གྱིས་ཐེག་ཆེན་གྱི་སྡོམ་པ་བཟུང་བའོ། །དེ་ནས་གནས་གསུམ་དུ་དྲིའི་ཐིག་ལེ་བྱ་ཞིང་། སྤྱི་བོར་ཟླ་སྟེང་སོགས་ཀྱི་ཚིག་དོན་གཉིས་ཀ་གོ་སླ་ལ། ཕྱག་བྱ་བའི་སྔགས། ༀ་ན་མ་ཏེ་ཧཱུྃ། ཁྱོད་ལ་ཕྱག་འཚལ་ལོ། །ན་མ་མི་ཧཱུྃ་ཕྱག་བགྱིའོ། །ན་མོ་ན་མ་ཧཱུྃ་ཕྱག་འཚལ་ཞིང་འདུད་དོ། །ཞེས་སོ། །དེ་ནས་སྐྱབས་འགྲོ་དང་སེམས་བསྐྱེད་པ་དམ་ཚིག་བསྒྲགས་པ་དམ་ཆུ་སྦྱིན་པ་རྣམས་དཀྱུས་ལྟར་གོ་དོན་སླ་བས་མ་སྤྲོས། བཛྲ་ཨུ་ད་ཀ་ཋཿནི་རྡོ་རྗེའི་ཆུའོ། །དེ་ནས་ཡེ་ཤེས་པ་དབབ་པའི་ཆེད་དུ་གསོལ་གདབ་ལན་གསུམ་གྱི་མཐར། བདག་ཉིད་སྐད་ཅིག་གིས་དཔལ་འཁོར་ལོ་སྡོམ་པའི་སྐུ་རྩ་གསུམ་འཁོར་ལོ་བཞི་དང་བཅས་པ་གསལ་གདབ་ལ། སྤྱི་བོའི་རྩ་འཁོར་དབུས་སུ་ཧཾ་དཀར་པོ། མགྲིན་པའི་རྩ་འཁོར་དབུས་སུ་
ༀ་དཀར་པོ། སྙིང་གའི་རྩ་འཁོར་དབུས་སུ་ཧཱུྃ་སྔོན་པོ། ལྟེ་བའི་རྩ་འཁོར་དབུས་སུ་ཨཾ་དམར་པོ་གསུམ་གསལ་བར་བསྒོམ། དེ་ནས་སྲོག་རྩོལ་གྱི་སྦྱོར་བས་ཨཾ་ལས་ཡེ་ཤེས་ཀྱི་མེ་འབར་སྙིང་གའི་ཧཱུྃ་དང་མགྲིན་པའི་ༀ་བསྲེགས་ཏེ་སྤྱི་བོའི་ཧཾ་ཡིག་ལ་རེག་པས་བདུད་རྩིའི་རྒྱུན་བབས་པས་ལུས་ལ་ཟག་མེད་ཀྱི་བདེ་བ་རབ་ཏུ་སྐྱེས་པར་བསམས་ལ། ཡི་གེ་བདུན་པའི་མཐར། འབེབས་སྔགས་ཛྙཱ་ན་ཡེ་ཤེས། ཨཱ་བེ་ཤ་ཡ་ཕོབ་ཅིག །ཨ་དང་པོས་དམ་ཚིག་པ། གཉིས་པས་ཡེ་ཤེས་པ། གསུམ་པས་དབྱེར་མེད་དུ་བསྟིམ་པ། ཧྲཱིཿཡིས་བྱིན་གྱིས་བརླབ་པ། བཾ་གྱིས་མི་ཉམས་པར་བཅིངས་པའོ། །ཏིཥྛ་མ་ཧཱ་ཀྲོ་དྷ་རབ་ཏུ་བརྟན་པའི་ཁྲོ་བོ་ཆེན་པོ། ཨ་བེ་ཤ་ཡ་ཧཱུྃ་ཕོབ་ཅིག །ཤྲཱི་ཧེ་རུ་ཀཱ་ཡ། དཔལ་ཁྲག་འཐུང་གི་ཆེད་དུ། བིདྨ་ཧེ་གཟིགས་པ་ཆེན་པོ། བིདྱཱ་རཱ་ཛ་ཡ་རིག་པའི་རྒྱལ་པོ། དྷཱི་མ་ཧེ་བློ་གྲོས་ཆེན་པོ། སྭཱ་ཧཱ་སྦྱིན་པར་མཛོད། ཅེས་ལན་མང་དུ་བརྗོད་ལ་རོལ་མོ་འཁྲོལ།
ཡེ་ཤེས་དབབ་པའི་བདུག་རྫས་ཀྱང་། རྒྱུད་ལས། བདུད་རྩི་ལྔ་དང་བྱི་ལའི་བྲུན། །གུ་གུལ་བུད་མེད་གོས་ཀྱི་མཐའ། །པདྨའི་སྣོད་དུ་བཞག་ནས་སུ། །དུར་ཁྲོད་མེ་ལ་བདུག་ནས་སུ། །རྐང་པ་གཡོན་བརྐྱང་ལ་གནས་པས། །གཉིས་མེད་གསང་སྔགས་བཟླས་བྱས་ན། །སྐད་ཅིག་ཉིད་ལ་ཡང་དག་འཇུག །ཅེས་གསུངས་སོ། །ཕེབས་ནས་རྡོ་རྗེ་མགོར་བཞག་སྟེ། ཏིཥྛ་བཛྲ་སྟེ་རབ་ཏུ་བརྟན་པའི་རྡོ་རྗེ་དང་། པྲ་ཏཱིཙྪ་བཛྲ་ཧོཿ བཞེས་ཤིག་དགྱེས་པའི་རྡོ་རྗེའོ། །དེ་ནས་མིག་དར་བཀྲོལ་བའི་སྔགས། བཛྲ་ནེ་ཏྲ་རྡོ་རྗེའི་མིག །ཨ་བ་ཧཱ་ར་སྒྲིབ་པས་འཕྲོག་པ། པ་ཊ་སོལ་ཅིག །ལམ་ནི་སྤྱན་མའི་ས་བོན་དང་ཧྲཱིཿནི་སྤྱན་གཟིགས་སོ། །དེ་ནས་དབང་བསྐུར་བ་དངོས་ལ་འཇུག་པའི་ཐོག་མར་མཎྜལ་ཕུལ་ཏེ་གསོལ་བ་གདབ་པ་ནི། ཇི་ལྟར་སྔོན་གྱི་འདས་པའི་སངས་རྒྱས་འཁོར་བ་འཇིགས་ལ་སོགས་པའི་རྒྱལ་བ་རྣམས་ཀྱིས་བླ་ན་མེད་པའི་བྱང་ཆུབ་
མཆོག་བརྙེས་ཏེ། རྡོ་རྗེ་ལྟ་བུའི་ཏིང་ངེ་འཛིན་མངོན་དུ་གྱུར་པས་ན་བྱང་ཆུབ་རྡོ་རྗེ་སྟེ། དེ་དག་གིས་ད་ལྟར་བྱུང་བའི་སངས་རྒྱས་ཤཱཀྱ་ཐུབ་པ་ལ་མཆོད་ཆེན་ཏེ་མཆོག་ཏུ་དགྱེས་པ་སྐྱེད་པར་བྱེད་པའི་འཕོ་མེད་དོན་གྱི་ཡེ་ཤེས་ཀྱི་དབང་མཆོག་བསྐུར་བའི་མཆོད་པ་ཆེན་པོ་ཇི་ལྟར་སྩལ་བ་ལྟར། ལམ་ཟབ་མོར་འཇུག་འདོད་ཀྱི་བློ་ཅན་བདག་ཀྱང་འཁོར་བའི་འཇིགས་པ་ལས་སྐྱོབ་པའི་དོན་གྱི་ཕྱིར་དུ་བརྩེ་བས་རྗེས་སུ་དགོངས་ཏེ། ནམ་མཁའི་རྡོ་རྗེ་སྟེ་ཁྱབ་བདག་རྡོ་རྗེ་འཆང་ཆེན་པོའི་གཉིས་སུ་མེད་པའི་ཡེ་ཤེས་ཀྱི་དབང་བསྐུར་མཆོག་དེ་དེང་འདིར་བདག་ལ་སྩོལ་ཅིག །ཅེས་སོ། །དེ་ནས་དང་པོ་རིག་པའི་དབང་ལྔ་བསྐུར་བ་ལ། མ་རིག་པའི་དྲི་མ་འཁྲུད་པའི་ཕྱིར་དུ་མི་བསྐྱོད་པའི་ངོ་བོ་ཆུའི་དབང་ནི། བསང་སྦྱང་སྔོན་དུ་འགྲོ་བས། སྟོང་པའི་ངང་ལས་སོགས་གཞུང་གསལ་གྱི་ཚིག་རིས་རྣམས་ནི་གོ་སླ་ལ། ༀ་བཛྲ་ཨ་བྷི་ཥིཉྩ་ཧཱུྃ། རྡོ་རྗེས་མངོན་པར་དབང་
བསྐུར་དུ་གསོལ་ཞེས་པ་སྟེ། དེ་བཞིན་དུ་རཏྣ་རིན་ཆེན། པདྨ་ཆུ་སྐྱེས། ཀརྨ་ལས། བུདྡྷ་སངས་རྒྱས། བཛྲ་རྡོ་རྗེ། ཨུ་ད་ཀ་ཆུ་ཡིས། ཨ་བྷི་ཥིཉྩི་ཧཱུྃ་མངོན་པར་དབང་བསྐུར་དུ་གསོལ། སུ་ར་ཏ་སྟྭཾ་རབ་ཏུ་དགའ་བར་བཞུགས་པ། ཨ་ཧཾ་ངའོ། །དབང་ལྷ་སློབ་མ་ལ་ཐིམ་སོགས་གོ་སླའོ། །དེ་ནས་གཉིས་པ་སངས་རྒྱས་ལྔ་རིགས་བདག་གི་ཚུལ་དུ་རྒྱས་འདེབས་པའི་ཕྱིར་དང་གཙུག་ཏོར་གྱི་མཚན་སྐྱེད་ནུས་པའི་ཆེད་དུ་རིན་ཆེན་འབྱུང་ལྡན་ཅོད་པན་གྱི་དབང་ནི། དབང་ཚིག་གཞུང་གསལ་ལྟར། སྔགས་ལས་མུ་ཀུ་ཊ་ཅོད་པན་ཏེ་གཞན་རྣམས་སྔར་དང་འདྲ། གསུམ་པ་དེ་ཁོ་ན་ཉིད་དང་དབྱེར་མེད་པའི་ཡེ་ཤེས་སྐྱེ་བའི་ནུས་པ་ཅན་དུ་སྒྲུབ་པའི་ཆེད་དུ་སྣང་བ་མཐའ་ཡས་རྡོ་རྗེའི་དབང་བསྐུར་བའི་སྔགས་དོན་གོང་གསལ་ལྟར་རོ། །བཞི་པ་སྟོང་པ་ཉིད་དང་སྙིང་རྗེ་དབྱེར་མེད་པའི་ཡེ་ཤེས་འབྱུང་བའི་བདག་པོ་ཆོས་ཀྱི་དོན་རྟོགས་པར་བྱ་བའི་ཆེད་དུ་
དོན་ཡོད་གྲུབ་པའི་ངོ་བོ་དྲིལ་བུའི་དབང་བསྐུར་བའི་སྔགས་དོན། ༀ་བཛྲ་རྡོ་རྗེའི། ཨ་དྷི་པ་ཏི་སྟྭཾ་བདག་ཉིད་ཀྱིས། ཨ་བྷི་ཥིཉྩ་མཾ་ནི་མངོན་པར་དབང་བསྐུར་བགྱིའོ། །ཏིཥྛ་བཛྲ་བརྟན་པའི་རྡོ་རྗེ། ས་མ་ཡ་སྟྭཾ་དམ་ཚིག་ལ་ཞུགས། གཞན་གོང་དང་འདྲའོ། །ལྔ་པ་མ་འོངས་པར་འཚང་རྒྱ་བའི་མཚན་གྱི་ས་བོན་འགོད་པའི་ཆེད་དུ་རྣམ་པར་སྣང་མཛད་ཀྱི་ངོ་བོ་མིང་གི་དབང་བསྐུར་བའི་སྔགས་དོན། ༀ་བཛྲ་ས ཏྭ་སྟྭཾ་རྡོ་རྗེ་སེམས་དཔའ་ཉིད་ཀྱིས། ཨ་བྷི་ཥིཉྩ་མི་ནི་གོང་དང་འདྲ་ལ། བཛྲ་ནཱ་མ་རྡོ་རྗེའི་མིང་དབང་། ཨ་བྷི་ཥེ་ཀ་ཏ་མངོན་པར་བསྐུར་བའོ། །དེ་དག་གི་བྱེད་ལས་ནི་གཞུང་གསལ་ལྟར། ཆུའི་དབང་གིས་ཉོན་མོངས་པ་ཞེ་སྡང་དག །རྣམ་ཤེས་ཀྱི་ཕུང་པོ་གནས་འགྱུར་བས་མེ་ལོང་ཡེ་ཤེས་མངོན་དུ་བྱེད་པའི་ས་བོན་རྒྱུད་ལ་བཞག །ཅོད་པན་གྱི་དབང་གིས་ཉོན་མོངས་ང་རྒྱལ་དང་སེར་སྣ་དག །ཚོར་ཕུང་གནས་གྱུར་མཉམ་ཉིད་ཡེ་ཤེས་མངོན་དུ་བྱེད་པའི་
ས་བོན་བཞག །རྡོ་རྗེའི་དབང་གིས་ཉོན་མོངས་འདོད་ཆགས་དག །འདུ་ཤེས་ཀྱི་ཕུང་པོ་གནས་གྱུར་སོར་རྟོགས་ཡེ་ཤེས་མངོན་དུ་བྱེད་པའི་ས་བོན་རྒྱུད་ལ་བཞག །དྲིལ་བུའི་དབང་གིས་ཉོན་མོངས་ཕྲག་དོག་དག །འདུ་བྱེད་ཀྱི་ཕུང་པོ་གནས་གྱུར་བྱ་གྲུབ་ཡེ་ཤེས་མངོན་དུ་བྱེད་པའི་ས་བོན་རྒྱུད་ལ་བཞག །མིང་དབང་གིས་ཉོན་མོངས་གཏི་མུག་དག །གཟུགས་ཕུང་གནས་གྱུར་ཆོས་དབྱིངས་ཡེ་ཤེས་མངོན་དུ་བྱེད་པའི་ས་བོན་རྒྱུད་ལ་བཞག་པའོ། །མདོར་ན་དབང་འདི་དག་གིས་སྤང་བྱ་མ་རིག་པའི་ཉོན་མོངས་པ་ལྔ་དག་ནས། ཐོབ་བྱ་རིག་པ་ཡེ་ཤེས་ལྔ་ཐོབ་པར་བྱེད་པས་ན་རིག་པའི་དབང་ལྔ་ཞེས་བྱའོ། །དེ་ནས་ཕྱི་རོལ་གྱི་བརྟུལ་ཞུགས་སྤང་བའི་ཕྱིར་བརྟུལ་ཞུགས་སྦྱིན་པ་ལ་གཉིས་སྟེ། རྟག་ཏུ་བྱང་ཆུབ་ཀྱི་སེམས་དང་མི་འབྲལ་བའི། དང་པོ་རྡོ་རྗེའི་བརྟུལ་ཞུགས་སྦྱིན་པ་ནི། པད་ཟླའི་གདན་ལ་སོགས་ཀྱི་སྔགས་བརྗོད་བཞིན་རྡོ་རྗེ་
ལན་གསུམ་གསོར་ཏེ་སྙིང་གར་བཟུང་། སྔགས་དོན་ༀ་སརྦ་ཏ་ཐཱ་ག་ཏ་དེ་བཞིན་གཤེགས་པ་ཐམས་ཅད་ཀྱི། སིདྡྷི་དངོས་གྲུབ། བཛྲ་ས་མ་ཡ་རྡོ་རྗེའི་དམ་ཚིག་ལ། ཏིཥྛ་གནས་པ། ཨེ་ཥ་སྟྭཾ་འདི་ཉིད། དྷཱ་ར་ཡ་མི་ཧཱི་བཟུང་བར་བགྱིའོ། །ཧི་ཡིག་ནི་ངེས་བཟུང་ལ་འཇུག་པས་ལན་བཞིར་འབྱུང་བ་ནི་ཡང་ནས་ཡང་དུ་ངེས་པར་བཟུང་བའི་དོན་ཏོ། །ཧཱུྃ་ཡིག་ནི་རྡོ་རྗེ་སེམས་དཔའི་ས་བོན་ནོ། །གཉིས་པ་སྔགས་ཀྱི་སྤྱོད་པ་སྤྱད་པའི་ཕྱིར་བརྟུལ་ཞུགས་སྦྱིན་པ་ནི། བསང་སྦྱང་སྔོན་དུ་འགྲོ་བས། སློབ་མ་དབང་རྫས་སོགས་བརྗོད་ལ། ལག་གཡས་སུ་ཅང་ཏེའུ་གཡོན་དུ་ཐོད་པ་གྲུ་མོར་ཁ་ཊྭཱཾ་ག་ཚངས་སྐུད་སེ་རལ་ཁར་བྱིན་ནོ། །དེ་ལྟར་དཔལ་ཧེ་རུ་ཀའི་ཕྱག་རྒྱ་དེ་དག་ལའང་ཕྱི་ནང་གཉིས་ཏེ། ཕྱི་ལྟར་ན་ཁ་ཊྭཱཾ་ག་སྟེ་དབང་པོའི་དབྱུག་པ་དང་ནང་ལྟར་ན་ལྷའི་སྐུ་ཐབས་བདེ་བ་ཆེན་པོའོ། །ཕྱི་ལྟར་ན་ཌཱ་མ་རུ་སྟེ་ནང་ལྟར་ན་ཤེས་རབ་སྟོང་པ་ཉིད་དོ། །ཕྱི་ལྟར་ན་
ཐོད་པ་སྟེ་ནང་ལྟར་ན་གོང་གི་བདེ་བ་དང་སྟོང་པ་གཉིས་གཅིག་ཏུ་འདུས་པའི་ཟག་མེད་ཀྱི་བདེ་བ་སྐྱོང་བའོ། །ཕྱི་ལྟར་ན་ཚངས་སྐུད་དེ་ཕྱི་རོལ་པའི་བྲམ་ཟེ་རྣམས་ཀྱིས་ཚངས་པ་མཆོད་པའི་ཚེ་སེ་རལ་ཁར་ཐོགས་པས་ན་མཆོད་ཕྱིར་ཐོགས་སམ་ཚངས་སྐུད་ཅེས་གྲགས་པས་མིའི་རྒྱུས་པ་བསྒྲིལ་བའི་སྐུད་པ། ནང་ལྟར་ན་རྣམ་པར་མི་རྟོག་པའི་ཡེ་ཤེས་ཀྱི་དོན་མཚོན་པའོ། །དེ་ནས་སངས་རྒྱས་ཀྱི་མཚན་གྱི་ནུས་པ་རྒྱུད་ལ་བཞག་པ་ལས་མི་འདའ་བར་ས་འོག་ས་སྟེང་མཐོ་རིས་ཏེ་ལྷའི་གནས་རྣམས་སུ་རྣམ་པར་རྒྱལ་བར་འགྱུར་ཞེས་གཟེངས་བསྟོད་པའི་ཕྱིར་དང་པོ་ལུང་བསྟན་པ་ནི། ཨ་བ་དྷཱུ་ཏིའི་དབང་གི་བྱ་བ་མདོར་བསྡུས་ལས། ལག་པ་གཡོན་པས་ཆོས་གོས་ཀྱི་གྲྭ་སྙིང་གར་བཟུང་ལ། གཡས་པས་མི་འཇིགས་པའི་ཕྱག་རྒྱ་བཅིངས། སློབ་མ་གང་གི་རིགས་དེའི་གཟུགས་དམིགས་པ་དེ་ལ་ལུང་བསྟན་པར་བྱ། ཞེས་དང་། ནག་པོ་པའི་
སྒྲུབ་ཐབས་ལས། གཡོན་པ་ཡིས་ནི་ཆོས་གོས་བཟུང་། །གཡས་ཀྱིས་མི་འཇིགས་དབུགས་འབྱིན་པ། །ཧེ་རུ་ཀ་དཔལ་རྣལ་འབྱོར་ཆེ། །ཞེས་གསུངས་པ་ལྟར་ཀུན་མཁྱེན་དྷརྨཱ་ཀ་རའི་ཞལ་ནས། ཆོས་གོས་ཀྱི་གྲྭ་རི་དྭགས་ཀྱི་རྣ་བ་ལྟར་འཛིན་ཞེས་པ་ལ། ད་ལྟ་རྣ་བ་གཉིས་ཀྱི་གཟུགས་ལྟར་འཛིན་པར་འདུག་ཀྱང་། དེ་ལྟར་མི་དགོས་ཏེ་སྔོན་བཅོམ་ལྡན་འདས་ཀྱིས་ལུང་བསྟན་མཛད་པའི་སྐབས་ཆོས་གོས་ཀྱི་གྲྭ་གཡོན་པའི་ཕྱག་གིས་གདེང་སྟབས་སུ་འཛིན་ཅིང་། གཡས་མི་འཇིགས་པའི་ཕྱག་རྒྱ་མཛད་དེ་ལུང་བསྟན་མཛད་པ་དཔེར་བཞག་པ་ཡིན་ལ། ཁ་ཅིག་སེང་གེའི་རྣ་བ་ཡིན་ཟེར་བའི་དག་སྦྱོར་ཡང་དོན་ཆུང་ཞེས་གསུངས་སོ། །བདེ་མཆོག་གི་རྒྱ་གཞུང་རྣམས་སུའང་དེ་བཞིན་གཤེགས་པའི་སྤྱོད་ལམ་གྱི་ཚུལ་བྱས་ཏེ་སོགས་གོང་དང་འདྲ་བར་གསུངས་པ་ལས་རྡོ་དྲིལ་འཛིན་དགོས་པ་གང་དུ་མི་འབྱུང་བའི་ཕྱིར། གནད་དོན་མཁྱེན་པའི་བླ་མ་འགས་
དབང་བསྐུར་སྐབས་སུའང་འདི་དུས་ཞྭ་བཞེས་པར་མི་མཛད་པ་ནི་དེ་བཞིན་གཤེགས་པ་དབུ་ཞྭ་དང་རྡོ་དྲིལ་ཅན་མེད་པའི་ཕྱིར་རོ། །དེ་ནས་འདི་ལྟར་ངས་ནི་སོགས་ཀྱིས་ལུང་སྟོན་པ་སྟེ། ཤྲཱི་ཧེ་རུ་ཀ་ཏེ་དཔལ་ཁྲག་འཐུང་། ནཱ་མ་ཞེས་བྱ་བ། ཏ་ཐཱ་ག་ཏ་སིདྡྷི་དེ་བཞིན་གཤེགས་པ་གྲུབ་པའི། ས་མ་ཡ་སྟྭཾ་དམ་ཚིག་ལ་བཞུགས་ཤིག །བྷུར་ཏེ་ས་སྟེང་། བྷུ་ཝཿསྟེ་ས་འོག །སྭཿནི་མཐོ་རིས་ཏེ་དེ་གསུམ་ལས་རྣམ་པར་རྒྱལ་བར་གཟེངས་བསྟོད་པའོ། །དེ་ནས་སངས་རྒྱས་ཐོབ་པའི་ནུས་པ་བཞག་པ་ལ་སྤྲོ་བ་བསྐྱེད་དེ་དབུགས་དབྱུང་བ་ནི། ཁམས་གསུམ་ཀུན་གྱི་རྒྱལ་སྲིད་ཆེ་ལ་མངའ་དབང་སྒྱུར་བའི་དཔལ་དང་ལྡན་པའི་ཡོན་ཏན་མཐའ་དག་འབྱུང་བའི་གནས། ལོག་འདྲེན་བདུད་ཚོགས་ཀུན་ལས་རྣམ་པར་རྒྱལ་ཞིང་། ཡང་དག་ཐར་པ་མཆོག་གི་གྲོང་ཁྱེར་མཆོག་ཏུ་དེང་ནས་ཁྱོད་བཞུགས་པ་ཡིན་ནོ་ཞེས་དབུགས་དབྱུང་བའོ། །དེ་འདྲར་ཆོས་ཀྱི་
རྒྱལ་སྲིད་ལ་སྦྱོར་བ་ལས་ཕྱིར་མི་ལྡོག་པའི་ཆེད་དུ་རྡོ་རྗེ་སློབ་དཔོན་གྱི་དབང་སྟེ་བུམ་དབང་དངོས་གཞི་བསྐུར་བ་སྟེ། འདུས་པའི་རྒྱུད་ཕྱི་མ་ལས། བུམ་པའི་དབང་ནི་དང་པོ་སྟེ། གཉིས་པ་གསང་བའི་དབང་ཡིན་ནོ། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་བཞིན་ཉིད་ཡིན་ནོ། །ཞེས་གསུངས་པ་ལྟར་དང་པོ་བུམ་དབང་གི་གསོལ་གདབ་ནི། ཁམས་གསུམ་གྱི་འཁོར་བ་ལས་ཕྱིར་མི་ལྡོག་པའི་དབང་བསྐུར་ཆེན་པོ་ནི་དཔའ་བོ་ཆེན་པོས་དེང་འདིར་བདག་ལ་སྩོལ་ཅིག །འགྲོ་བ་ཀུན་གྱིས་བདག་ཏུ་བཏགས་ཤིང་ཞེན་པའི་ཐ་མལ་པའི་ཕུང་ཁམས་ཐམས་ཅད་ལྷར་བསྒྱུར་ཏེ་གཟུང་འཛིན་དངོས་པོའི་མཚན་མར་ཞེན་པ་མེད་པར་བྱེད་པའི་སྨིན་གྲོལ་གྱི་ལམ་ཟབ་མོ་དེ་ནི་དེང་འདིར་བདག་ལ་སྩལ་དུ་གསོལ། །ཞེས་སོ། །དེ་ནས་དབང་དངོས་བསྐུར་བ་ཧཱུྃ་བྱུང་རྡོ་རྗེ་སོགས་ནས། སློབ་མའི་ཚོགས་རྣམས་བསྡུ་བར་གྱིས་ཞེས་པའི་སྐབས་དྲིལ་གསིལ་པད་ཀོར་འཁྱུད་
རྒྱ་བཅས་བྱ་བ་ནི་ཕྱག་བཞེས་སོ། །དེ་ལྟར་དམ་ཚིག་གསུམ་པོ་ཞེས་པ་ནི། ཐབས་ཡབ་རྡོ་རྗེ་སེམས་དཔའ་དང་ཡུམ་ཤེས་རབ་རྡོ་རྗེ་སྙེམས་མར་གསལ་བ་ཕན་ཚུན་ཡབ་ཡུམ་སྙོམས་པར་ཞུགས་པ་ཁ་སྦྱོར་སྐུའི་དམ་ཚིག་དང་། རྡོ་རྗེ་ཐབས་ཀྱི་དེ་ཁོ་ན་ཉིད་ཐུགས་ཀྱི་དམ་ཚིག་གཡས་སུ་འཆང་བ་དང་། དྲིལ་བུ་ཤེས་རབ་ཀྱི་དེ་ཁོ་ན་ཉིད་གསུང་གི་དམ་ཚིག་གཡོན་དུ་འཆང་བ་དང་གསུམ་མོ། །ཇི་ལྟར་བལྟམས་པ་སོགས་དང་སྔགས་ཀྱིས་བུམ་པའི་དབང་བསྐུར་བའི་སྔགས་དོན་གོང་དུ་སོང་། དེ་ལྟར་དབང་བསྐུར་བས་སྒོ་གསུམ་གྱི་དྲི་མ་དག །མི་བསྐྱོད་པས་དབུ་བརྒྱན། མཐར་དབང་ལྷ་རྣམས་སློབ་མ་ལ་ཐིམ་པར་བསམས་ལ་ཉེར་སྤྱོད་ལྔས་མཆོད། གཟུགས་སྒྲ་སོགས་འདོད་ཡོན་ལྔ་ལ་སྤྱོད་པར་རྗེས་སུ་གནང་། རྟེན་ཅིང་འབྲེལ་བར་འབྱུང་བའི་ཆོས་ཀྱི་སྒོ་ནས་འགྲོ་དོན་དཔག་མེད་བྱོས་ཤིག་ཅེས་བཀའ་བསྒོའོ། །དབང་འདིས་ཆོས་ཀྱི་རྒྱལ་
སྲིད་ལ་སྦྱོར་བར་བྱེད་ཅིང་སློབ་དཔོན་ནུས་པའི་གོ་འཕང་ཐོབ་པའི་དབང་བསྐུར་སྦྱིན་པར་བྱེད་པས་ན་སློབ་དཔོན་གྱི་དབང་ངམ་ཕྱིར་མི་ལྡོག་པའི་ས་བོན་བསྐྲུན་པར་བྱེད་པས་ན་ཕྱིར་མི་ལྡོག་པའི་དབང་ཞེས་བྱའོ། །དབང་འདི་བསྐུར་བའི་དཀྱིལ་འཁོར་ནི་ཕྱི་བཏགས་པའི་དཀྱིལ་འཁོར་རྡུལ་ཚོན་ནམ་རས་བྲིས་དང་ནང་ལུས་དཀྱིལ་སོགས་ལྷ་རྟེན་དང་བརྟེན་པར་བཅས་པ་ལ་བརྟེན་པ་ཡིན་ཅིང་། བསྐུར་གཞི་གཙོ་བོ་ལུས་ལ་བསྐུར་ཞིང་ལུས་ཀྱི་དྲི་མ་སྦྱངས་ནས་ལུས་དག་པར་བྱེད། བསྒྲུབ་བྱ་སངས་རྒྱས་སྤྲུལ་པའི་སྐུ་མཛད་པ་དང་བཅས་པ་འགྲུབ་པའི་ནུས་པ་ཁྱད་པར་ཅན་འཇོག་ཅིང་ལུས་སྐུ་རྡོ་རྗེའི་རང་བཞིན་དུ་བྱེད་པའོ། །དེ་ནས་ལྷ་དང་དཀྱིལ་འཁོར་གྱི་དེ་ཁོ་ན་ཉིད་བསྟན་པ། ཐར་པ་ཆེན་པོའི་ཕོ་བྲང་རྣམ་སྣང་གི །སོགས་དེ་དག་སོ་སོའི་དག་པ་བྱང་ཆུབ་ཕྱོགས་ཀྱི་ཆོས་སོ་བདུན་དང་སྦྱར་བ་སྔར་དཀྱིལ་འཁོར་དང་བསྐྱེད་རིམ་གྱི་སྐབས་སུ་བཤད་
པ་ལྟར་རོ། །དེ་ནས་མཆོག་དབང་གོང་མ་གསུམ་བསྐུར་བ་ལ་གསང་བ་ཤེས་རབ་ཡེ་ཤེས་དང་གསུམ་རིམ་པ་ལྟར། དང་པོ་ནི་རྡོ་རྗེ་སློབ་དཔོན་ཡབ་ཡུམ་གྱི་སྐུའི་དཀྱིལ་འཁོར་རམ་ལུས་དཀྱིལ། གཉིས་པ་རིག་མའི་བྷ་གའམ་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར། གསུམ་པ་ནི་རང་རིག་སྤྲོས་བྲལ་ལམ་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ཏེ་བསྐུར་བ་ཡིན་ནོ། །གཉིས་པ་དད་པ་དང་ཤེས་རབ་ཀྱི་སྣོད་དུ་བྱ་བའི་ཕྱིར་གསང་དབང་བསྐུར་བ་ནི། དེའང་དད་པའི་ཞིང་དུ་བྱ་བ་ནི་བླ་མ་ཡབ་ཡུམ་ལྷར་གསལ་བ་སྙོམས་པར་ཞུགས་པའི་བྱང་སེམས་ཀྱི་བདུད་རྩི་མྱོང་བས་ལྷའི་བྱིན་རླབས་ཀྱི་མཐུས་བདེ་བ་ཁྱད་པར་ཅན་སྐྱེད་པ་དང་སྔགས་ཀྱི་ཀུན་སྤྱོད་ལ་ཐེ་ཚོམ་དང་ལོག་ལྟ་ཟློག་པ་དང་། ཤེས་རབ་ཀྱི་ཞིང་དུ་བྱ་བ་ནི་སངས་རྒྱས་ཐམས་ཅད་ཀྱི་ངོ་བོ་གསང་བའི་རྫས་ཁར་བྱིན་པས་སྙིང་གའི་པདྨར་ཞུགས་པས་སྒྱུ་མའི་དཔེ་བཅུ་
གཉིས་ཀྱིས་མཚོན་པའི་སྒྱུ་ལུས་རྟོགས་པར་བྱེད་པའོ། །གསང་དབང་གི་ངོ་བོ་ནི་བྱང་སེམས་མྱོང་བ་ལས་བྱུང་བའི་ཏིང་ངེ་འཛིན་བདེ་བ་དང་བཅས་པ། སྒྲ་དོན་ནི་བླ་མ་ཡབ་ཡུམ་གྱི་བྱང་སེམས་གསང་བའི་རྫས་ཀྱིས་དབང་བསྐུར་བ་ཡིན་པས་ན་གསང་བའི་དབང་ཞེས་བྱའོ། །དེ་ནས་དབང་ཚིག་ནི་གཞུང་གསལ་ལྟར་གོ་སླ་ལ། ཨ་ཧོ་མ་ཧཱ་སུ་ཁ་ནི་ངོ་མཚར་རྨད་དུ་བྱུང་བའི་བདེ་བ་ཆེན་པོའོ། །ཞེས་སོ། །དེ་ལྟར་བླ་མ་ཡབ་ཡུམ་གྱི་བྱང་སེམས་བདུད་རྩི་མྱང་བས་ལུས་ལ་ཟག་མེད་ཀྱི་བདེ་ཆེན་ཁྱད་པར་ཅན་སྐྱེས། དཀྱིལ་འཁོར་གྱི་གཙོ་བོ་དང་དབྱེར་མེད་པ་བླ་མ་ཡབ་ཡུམ་གྱི་སྐུ་ལས་སྤྲོས་པའི་ངོ་བོ་ལྷན་སྐྱེས་ཡབ་ཡུམ་ལ། རྣམ་པ་བཅོམ་ལྡན་སྣང་བ་མཐའ་ཡས་སུ་གྱུར་ནས་རང་གི་མགྲིན་པར་ཐིམ་པས་རང་བཞིན་བརྒྱད་ཅུའི་རྟོག་པ་འགག་པར་བསམ་མོ། །དེའང་རང་བཞིན་གྱི་རྟོག་པ་བརྒྱད་ཅུ་སྟེ། དང་པོ་ཞེ་སྡང་གི་རྟོག་པ་སོ་གསུམ་ནི། འདོད་ཆགས་
དང་བྲལ་བ་དང་། ངོ་བོ་ཞེ་སྡང་སྟེ་ཡུལ་ལ་མི་སྡུག་པར་འཛིན་པ། དེ་དང་བྲལ་བ་བར་མ་དང་། ཤིན་ཏུ་བྲལ་བ་ཆེན་པོ་དང་། ཡིད་ཀྱིས་འོང་བ་དག་དང་། གནོད་སེམས་ནང་དུ་སེམས་པ། ཡིད་ཀྱིས་འགྲོ་བ་དང་། ཡུལ་ལ་གནོད་སེམས་ཕར་སྐྱེ་བ། མྱ་ངན་དང་། མྱ་ངན་བར་མ་དང་། ཤིན་ཏུ་མྱ་ངན་དང་། ཞི་བ་དང་། ངལ་ཞིང་ཧད་དེ་གདུག་པ། རྣམ་པར་རྟོག་པ་དང་། འཇིགས་པ་དང་། འཇིགས་པ་བར་མ་དང་། ཤིན་ཏུ་འཇིགས་པ་དང་། སྲེད་པ་དང་། སྲེད་པ་བར་མ་དང་། ཤིན་ཏུ་སྲེད་པ་དང་། ཉེ་བར་ལེན་པ་དང་། མི་དགེ་བ་དང་། བཀྲེས་སྐོམ་པ་དང་། ཚོར་བ་དང་། ཚོར་བ་བར་མ་དང་། ཤིན་ཏུ་ཚོར་བ་དང་། རིག་པ་དང་། རིག་པ་འཛིན་པའི་གཞི་དང་། སོ་སོར་རྟོག་པ་དང་། ངོ་ཚ་ཤེས་པ་དང་། གཞན་གྱིས་ཁྲེལ་གྱིས་དོགས་ནས། སྙིང་རྗེ་བ་དང་། བརྩེ་བ་དང་། བརྩེ་བ་བར་མ་དང་། ཤིན་ཏུ་བརྩེ་བ་དང་། དགྱེས་པ་དང་བཅས་པ་དང་། སྡུད་པ་དང་། ནོར་སོགས། སེར་སྣ་
རྣམས་སོ། །འདོད་ཆགས་ཀྱི་རྟོག་པ་བཞི་བཅུ་ནི། འདོད་ཆགས་ཅན་དང་། ཆགས་པ་དང་། དེ་ལ་ཞེན་པ། དགའ་བ་དང་། དགའ་བ་བར་མ་དང་། ཤིན་ཏུ་དགའ་བ་དང་། རངས་པ་དང་། རབ་ཏུ་མགུ་བ་དང་། ངོ་མཚར་བ་དང་། དགོད་པ་དང་། ཚིམས་པ་དང་། འཁྱུད་པ་དང་། འོ་བྱེད་པ་དང་། འཇིབས་པ་དང་། བརྟན་པ་དང་། བརྩོན་པ་དང་། ཁེངས་པ་དང་། བྱེད་པ་དང་། འཕྲོག་པ་དང་། སྟོབས་བྱེད་པ་དང་། སྤྲོ་བ་དང་། ཚམ་ཚོམ་མེད་པ་དང་། ཚམ་ཚོམ་མེད་པ་བར་མ་དང་། ཤིན་ཏུ་ཚམ་ཚོམ་མེད་པ་དང་། དྲེགས་པ་དང་། རྣམ་པར་སྒེག་པ་དང་། འགྲས་པ་དང་། དགེ་བ་དང་། ཚིག་གསལ་བ་དང་། བདེན་པ་དང་། མི་བདེན་པ་དང་། དེས་པ་དང་། ཉེ་བར་ལེན་པ་དང་། སྦྱིན་པ་པོ་ཉིད་དང་། བརྟུལ་བ་དང་། དཔའ་བ་དང་། ངོ་ཚ་མེད་པ་དང་། གཡོ་ཅན་དང་། གདུག་པ་ཅན་དང་། མི་སྲུན་པ་དང་། གྱ་གྱུ་ཆེ་བ་རྣམས་སོ། །གཏི་མུག་གི་རྟོག་
པ་བདུན་ནི། འདོད་ཆགས་བར་མ། བརྗེད་ངས། འཁྲུལ་པ། མི་སྨྲ་བ། སྐྱོ་བ། ལེ་ལོ། ཐེ་ཚོམ་རྣམས་སོ། །དེ་དག་ཡོངས་དྲིལ་རྟོག་པ་བརྒྱད་ཅུའོ། །འདིར་ནི་རྣམ་གྲངས་ཙམ་ལས་མ་སྤྲོས་པས་ཞིབ་པར་ཡེ་ཤེས་རྡོ་རྗེ་ཀུན་བཏུས་དང་འཕགས་པ་ཀླུ་ཡི་རིམ་ལྔ་སོགས་ལས་ཤེས་པར་བྱའོ། །དེ་ལྟར་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ཏེ་ངག་ལ་གསང་བའི་དབང་བསྐུར་བས་ངག་གི་དྲི་མ་དག་ནས། བསྒྲུབ་བྱ་ལོངས་སྤྱོད་རྫོགས་པའི་སྐུ་འགྲུབ་པའི་ནུས་པ་ཁྱད་པར་ཅན་རྒྱུད་ལ་བཞག་ཅིང་ངག་གསུང་རྡོ་རྗེའི་རང་བཞིན་དུ་བྱེད་པའོ། །གསུམ་པ་ཤེས་རབ་ཡེ་ཤེས་ཀྱི་དབང་བསྐུར་བ་ལ་གསོལ་གདབ་ཀྱི་གོ་དོན་ནི། བཞི་བཅོམ་དྲུག་ལྡན་གྱི་དཔལ་དགྱེས་པ་རྡོ་རྗེའི་ངོ་བོ་ཉིད་དུ་གྲུབ་པས་ན་བཅོམ་ལྡན། གཉིས་སུ་མེད་པའི་རྣལ་འབྱོར་ལ་གནས་ཤིང་ཉོན་མོངས་པའི་སྤྲོས་ཚོགས་ཐམས་ཅད་ཉེ་བར་ཞི་བས་ཞི་བ། དེ་
ཉིད་ཀྱི་ཕ་རོལ་ཏུ་སོན་པས་ན་ཆེན་པོ་སྟེ་དང་པོ་ཆེ་བའི་ཡོན་ཏན་ལ་བསྔགས་པ་དང་། ཀྱེ་ཞེས་པ་ནི་སྙན་གཏོད་པའི་ཆེད་དུ་དང་པོ་བོད་པའོ། །རྡོ་རྗེ་སྟེ་གཉིས་སུ་མེད་པའི་ཡེ་ཤེས་དེ་དང་ཐ་མི་དད་པའི་རྡོ་རྗེའི་རྣལ་འབྱོར་གྱིས་རྒྱུ་དང་འབྲས་བུ་གཅིག་ཏུ་འགྲུབ་པར་བཞེད་པ་ཆོས་ཉིད་སྟོང་པ་ཉིད་ཀྱི་རང་བཞིན་གཟུང་འཛིན་གྱི་རྟོག་པས་མི་ཕྱེད་པའི་དོན་རྟོགས་ཤིང་། དངོས་ཆོས་ལྷ་སྐུ་དམ་ཚིག་སྟེ་ཕྱག་རྒྱ་བཞི་ལ་བརྟེན་ནས་མཆོག་གི་དངོས་གྲུབ་སྒྲུབ་པ་པོ་ནི་སངས་རྒྱས་ཀུན་གྱི་སྐུ་གསུང་ཐུགས་ཀྱི་རྡོ་རྗེ་མི་ཕྱེད་པའི་ཏིང་ངེ་འཛིན་གྱི་རྣལ་འབྱོར་ལས་བྱུང་བ་ཡིན་པས་ན། ཇི་ལྟར་རྡོ་རྗེ་སློབ་དཔོན་ཁྱོད་ནི་སྲིད་ཞི་ཀུན་གྱི་བདག་ཉིད་ཆེན་པོ་ཡིན་པའི་ཕྱིར་རིགས་ཐམས་ཅད་ཀྱི་གཙོ་བོ་ཡིན་པ་དང་། བདེ་ཆེན་ཡེ་ཤེས་མཆོག་གི་མངའ་བདག་ཡིན་པའི་ཕྱིར། སྐལ་ལྡན་སློབ་མ་བདག་ལའང་ཁྱོད་ཀྱི་ཡོན་ཏན་དང་མཚུངས་པ་དེ་ལྟར་དུ་མཛོད་ཅིག །དེ་ལྟར་
མཛད་དགོས་པའི་རྒྱུ་མཚན་ཡང་། འཁོར་བ་བརྒལ་བར་དཀའ་བ་དང་ནུབ་པར་སླ་བའི་འདམ་གྱི་ཚོགས་ནང་དུ་བྱིང་བ་ལས་འདོན་པའི་སྐྱབས་བྱེད་པ་གང་ཡང་མེད་པ་བདག་ལ་སྐྱོབས་ཤིག །ཅེས་པ་སྟེ། འདི་ཉིད་བརྟག་གཉིས་ཀྱི་རྒྱུད་ཚིག་ཡིན་ནོ། །དེ་ནས་ཤེར་དབང་སྦྱིན་པའི་ཚིགས་བཅད་གྱི་དོན་གཞན་གོ་སླ་ལ། ཕྱག་རྒྱ་བཅོམ་ལྡན་མར་བསྐྱེད་པའི་ལྷ་མོས་དགའ་བཞིའི་ཡེ་ཤེས་སྟེར་བར་བྱེད་པས་ན་དགའ་སྟེར་དང་། རྟོགས་མ་རྟོགས་ཀྱི་བྱེ་བྲག་གིས་འཆིང་བ་དང་གྲོལ་བའི་ཚུལ་གཉིས་ལས་ཕྱིན་ཅི་མ་ལོག་པར་མི་གནས་པའི་མྱ་ངན་ལས་འདས་པ་སྟེར་བར་བྱེད་པས་ན་གནས་སྟེར་ཏེ། ལྷ་མོ་དེ་ནི་རྡོ་རྗེ་ཕག་མོ་དང་ཡུམ་བཞི་ལ་སོགས་པ་སྣ་ཚོགས་པའི་གཟུགས་འཛིན་པའི་རིག་མ་ཡིད་དུ་འོང་བ་མ་འདི་དབང་གི་ཡེ་ཤེས་སྐྱེད་པའི་དོན་དུ་ཁྱེར་ཅིག་ཁྱེར་ཅིག་ཅེས་ནན་ཏན་ངེས་བཟུང་གིས་ལན་གཉིས་སུ་ཟློས་ཏེ། སློབ་མ་བྱང་
ཆུབ་སེམས་དཔའ་ཆེན་པོ་ཞེས་བོས་པའི་རྣམ་པས། ལྷ་མོ་འདི་ཁྱེར་ལ་བདེ་བ་ཆེན་པོ་སྙོམས་འཇུག་གི་མཆོད་པ་རྟག་ཏུ་གྱིས་ལ་བདེ་ཆེན་ལྷན་ཅིག་སྐྱེས་པའི་ཡེ་ཤེས་ངོས་བཟུང་བར་གྱིས་ཤིག །ཅེས་པའོ། །དེ་ནས་སློབ་མ་ལྷན་སྐྱེས་ཡབ་ཡུམ་དུ་གསལ་བའི། ཡབ་ཀྱི་གསང་བ་མི་དམིགས་པ་ལས་ཧཱུྃ་ཡིག་དཀར་པོ་ལས་བྱུང་བའི་རྡོ་རྗེ་ནག་པོ་དང་། བྱཱ་ཡིག་དམར་པོ་སྔགས་ལ་རིང་ཆ་བཀའ་བསྟན་གཉིས་ཀར་ཡོད། ལས་བྱུང་བའི་རྡོ་རྗེའི་ནོར་བུ་ཅུང་ཟད་དམར་བའི་རྩེ་མོའི་བུ་ག་བྱཱ་ཡིག་སེར་པོ་མགོ་ཐུར་བསྟན་གྱིས་བཀག་པ། ཡུམ་གྱི་གསང་བ་མི་དམིགས་པར་ཨ་ལས་བྱུང་བའི་པདྨ་དམར་པོ་འདབ་མ་གསུམ་པའི་དབུས་སུ་རྒྱཱ་ལས་བྱུང་བའི་དཔའ་བོའི་བྱང་ཆུབ་སེམས་མཚོན་པའི་པདྨའི་ཟེའུ་འབྲུ་དཀར་པོ་ཡི་གེ་རྒྱ་སེར་པོ་མགོ་གྱེན་བསྟན་གྱིས་བྱིན་གྱིས་བརླབ་པའོ། །ཞེས་ལྭ་ཝ་པའི་བཀའ་འགྲེལ་ལས་གསུངས་སོ། །དེ་ནས་ཡབ་ཀྱི་ལྟེ་བར་ༀ་བཛྲ་བཻ་རོ་ཙ་ནི་སེར་པོ་
དང་། སྙིང་གར་ༀ་སརྦ་བུདྡྷ་སྔོན་པོ་དང་། མགྲིན་པར་ༀ་ཤྲཱི་དམར་པོ་དང་། དཔྲལ་བར་ༀ་ཧྲཱིཿདཀར་པོ་རྣམས་ཀྱིས་མཚན་པ་དང་། ལྷ་མོའི་ལྟེ་བར་ནི་ༀ་ཤྲཱི་སེར་པོ་དང་། སྙིང་གར་ༀ་ཧྲཱིཿསྔོན་པོ་དང་། མགྲིན་པར་ༀ་བཛྲ་དམར་པོ་དང་། །དཔྲལ་བར་ༀ་སརྦ་ཞེས་པའི་ཡི་གེ་དཀར་པོ་གསལ་བར་བསྐྱེད་པ་སྟེ། འདི་རིགས་ལ་ཚིག་གཅོད་མཚམས་མགོ་མཇུག་སྦྲེལ་བའི་ཞལ་རྒྱུན་ཞིག་སྣང་ཡང་དོན་དང་འབྲེལ་བ་མ་བྱུང་ལ། ཚིག་རྐང་ཕྱི་མའི་ༀ་དང་བཛྲ་གཉིས་སྦྲེལ་འདོན་དགོས་ངེས་སུ་འདུག་པ་ཤེས་པར་བྱ། དེ་ལྟར་ཡབ་ཡུམ་སྙོམས་པར་ཞུགས་པས་བྱང་སེམས་སྤྱི་བོ་ནས་མགྲིན་པར་བབས་པས་དགའ་བ། སྙིང་གའི་བར་དུ་བབས་པས་མཆོག་དགའ། ལྟེ་བའི་བར་དུ་བབས་པས་ཁྱད་དགའ། ནོར་བུའི་རྩེ་མོར་སླེབ་པ་དང་འཕོ་མེད་ལྷན་ཅིག་སྐྱེས་པའི་དགའ་བ་ཉམས་སུ་མྱོང་བར་གྱུར་པར་བསམ་མོ། །དེ་ལྟར་སློབ་མ་དང་ཕྱག་རྒྱ་ཡབ་
ཡུམ་སྙོམས་པར་ཞུགས་པའི་རྗེས་ཆགས་གཏུམ་མོའི་དྲོད་ཀྱིས་བྱང་སེམས་ཞུ་བ་གནས་རྣམས་སུ་བབས་པས་ཡས་བབ་ཀྱི་དགའ་བ་བཞི་དང་དེ་ཉིད་གྱེན་དུ་ལྡོག་པ་མས་བརྟན་གྱི་དགའ་བ་བཞི་སྐྱེ་ལ། སློབ་མ་སྡོམ་བརྩོན་ལ་ནི་ཡེ་ཤེས་ཀྱི་ཕྱག་རྒྱར་བསྐྱེད་ལ་ལྷ་ཡབ་ཡུམ་སྙོམས་པར་ཞུགས་པར་མོས་ནས་དངོས་སུ་རླུང་གི་སྦྱོར་བས་གཏུམ་མོ་སྦར་བའི་དྲོད་ཀྱིས་བྱང་སེམས་བཞུས་ནས་དགའ་བཞི་འདྲེན་པའོ། །དབང་གསུམ་པའི་ངོ་བོ་ནི། བྱང་སེམས་ནོར་བུའི་ནང་དུ་སླེབ་པའི་ཚེ་ཉམས་སུ་མྱོང་བའི་ལྷན་སྐྱེས་ཡེ་ཤེས་ལ་བྱེད་དོ། །དབང་འདིས་ལས་ཀྱི་ཕྱག་རྒྱ་ཤེས་རབ་མ་ལ་བརྟེན་ནས་སེམས་རྣམ་རྟོག་དང་བྲལ་བ་ལྷན་སྐྱེས་ཡེ་ཤེས་བརྟེན་པ་ལ་དབང་བ་ཡིན་པས་ན་ཤེས་རབ་ཡེ་ཤེས་ཀྱི་དབང་ཞེས་བྱ་ལ། དཀྱིལ་འཁོར་ནི་ཕྱག་རྒྱའི་བྷ་གའི་དཀྱིལ་འཁོར་ལ་བརྟེན་ཏེ་ཀུན་རྫོབ་བྱང་ཆུབ་སེམས་ཀྱི་དཀྱིལ་འཁོར་མཐོང་། ཤེས་རབ་ཡེ་ཤེས་ཀྱི་དབང་
ཐོབ་ཡིད་ཀྱི་དྲི་མ་དག །རྣམ་དག་རང་འོད་རིག་མ་བརྟེན་པ་ལ་དབང་། བསྒྲུབ་བྱ་ཆོས་ཀྱི་སྐུ་འགྲུབ་པའི་ནུས་པ་ཁྱད་པར་ཅན་འཇོག་ཅིང་ཡིད་ཐུགས་རྗེའི་རང་བཞིན་དུ་བྱེད་པའོ། །བཞི་པ་ཚིག་དབང་བསྐུར་བ་ནི། རིགས་བརྒྱའི་ཁྱབ་བདག་དཔལ་ལྡན་བླ་མ་ཁྱོད་ཀྱི་ཞབས་ཀྱི་པདྨོར་འཁོད་པའི་ཡུམ་དང་བཅས་པའི་བཀའ་དྲིན་གྱིས། གཙོ་བོའི་དབང་བསྐུར་རྣམ་གསུམ་སྟེ་བུམ་གསང་ཤེས་རབ་གསུམ་ཐོབ་ཀྱང་། ད་དུང་ཡང་དེ་རིང་ཉིད་དུ་རིན་ཆེན་བཞི་པ་སྟེ་དབང་བཞི་པ་ཚིག་དབང་རིན་པོ་ཆེ་ཡང་བཀའ་དྲིན་གྱིས་སྩལ་དུ་གསོལ། ཞེས་སོ། །དེ་ནས་བླ་མ་དང་དཀྱིལ་འཁོར་གྱི་གཙོ་བོ་དབྱེར་མེད་པའི་སྐུ་ལས་སྤྲོས་པའི་བཅོམ་ལྡན་ལྷན་སྐྱེས་ཡབ་ཡུམ་རང་ངམ་སློབ་མའི་སྨིན་མཚམས་སུ་ཐིམ་པས་བདེ་སྟོང་ཡེ་ཤེས་ཁྱད་པར་ཅན་སྐྱེས་པར་བསམས་ལ། དེ་དོན་ངོ་སྤྲོད་པའི་ཚིག་བརྟག་གཉིས་སུ་འབྱུང་བ་ནི། མཚོན་བྱེད་དཔེ་དང་མཚོན་
བྱ་དོན་གྱི་ཡེ་ཤེས་ཉམས་སུ་མྱོང་བའི་ངོར་གྲུབ་པ་འདི་ནི་ཆེས་ཕྲ་སྟེ་དབང་པོ་ལྔའི་སྤྱོད་ཡུལ་ལས་འདས་ཤིང་ཡིད་ཀྱིས་ཀྱང་འདི་ཞེས་ངོས་བཟུང་དཀའ་བས་བློ་གྲོས་དམན་པ་ལ་ངེས་པར་བརྗོད་ཀྱང་མཚོན་དུ་མེད་པ་ཡིན་ཞིང་། རྡོ་རྗེ་སྟེ་དེ་བཞིན་གཤེགས་པའི་སྙིང་པོ་རང་བྱུང་གི་ཡེ་ཤེས་ཉིད་མཚན་འཛིན་གྱི་རྟོག་པས་མི་ཕྱེད་པ་སྟེ། དེའི་ངོ་བོ་ནི་གདོད་ནས་དག་པས་ནམ་མཁའི་དཀྱིལ་དུ་བལྟས་པ་ལྟ་བུར་སྤྲོས་པའི་མཚན་མ་ཀུན་གྱིས་སྟོངས་པས་མཐའ་དང་དབུས་འདི་ཞེས་མི་རྟོགས་པ་དང་། ནམ་མཁའ་རྡུལ་དང་བྲལ་བ་ལྟར་ཀུན་ནས་ཉོན་མོངས་པ་དང་རྣམ་རྟོག་གི་རྡུལ་དང་ཡེ་ནས་བྲལ་བས་རང་བཞིན་གྱིས་དག་པ་མཐར་ཕྱིན་པ་མ་བཅོས་རང་བྱུང་གདོད་མའི་གནས་ལུགས་ཞི་བ་ཆེན་པོ་དེ་ཉིད་ཀྱིས་སློབ་མ་ཁྱོད་རང་གི་རང་རིག་ཡེ་ཤེས་ཡང་ནི་སྐྱེད་པར་བྱེད་པས་ན་དེ་ཡི་ཕ་ཡང་དོན་གྱི་ཡེ་ཤེས་དེ་ཉིད་ཡིན་ཅིང་། དེ་ལྟར་སངས་རྒྱས་ཐམས་ཅད་ཀྱི་
ཡེ་ཤེས་ཀུན་ནས་འབྱུང་བའི་རྟེན་ནི་ཡང་ཁྱོད་རང་གིས་སྐྱེད་པར་བྱེད་པའི་ཕྱིར་སློབ་མ་ཁྱོད་ནི་ཡང་དེའི་ཕ་དང་འདྲ་བ་ཡིན་ལ། དེ་བཞིན་ཏུ་སྐྱེད་བྱེད་དབང་གསུམ་པའི་རྒྱུ་ལས་བསྐྱེད་བྱ་བཞི་པའང་འབྱུང་བ་ཡིན་པ་ལྟར་སྣང་ཡང་དོན་དུ་དེ་གཉིས་ལ་བསྐྱེད་བྱ་དང་སྐྱེད་བྱེད་ཅེས་ཕན་ཚུན་ལྟོས་གྲུབ་ཀྱིས་བཏགས་པ་ཙམ་ལས། རང་བྱུང་ཡེ་ཤེས་རང་གིས་རང་རིག་པ་ཙམ་ལས་གཞན་དུ་མེད་པའི་ཕྱིར་ན། སློབ་དཔོན་ནག་པོ་པས། རྒྱུ་དང་འབྲས་བུ་དབྱེར་མེད་པའི་ཕྱིར་རོ། །ཞེས་གསུངས་སོ། །དེ་ལྟར་དབང་བཞི་པ་བསྐུར་བས་དོན་དམ་བྱང་ཆུབ་སེམས་ཀྱི་དཀྱིལ་འཁོར་མཐོང་ཞིང་། ཕྱག་ཆེན་བསམ་གྱིས་མི་ཁྱབ་པ་བསྒོམ་པ་ལ་དབང་། སྒོ་གསུམ་གྱི་དྲི་མ་བག་ཆགས་དང་བཅས་པ་སྦྱངས། བསྒྲུབ་བྱ་རྡོ་རྗེ་གསུམ་དབྱེར་མེད་པ་ངོ་བོ་ཉིད་ཀྱི་སྐུ་འགྲུབ་པའི་ནུས་པ་ཁྱད་པར་ཅན་འཇོག་པ་ཡིན་ནོ། །ངོ་བོ་ནི་བདེ་སྟོང་དབྱེར་མེད་ལྷན་
ཅིག་སྐྱེས་པའི་ཆོས་སྐུ་ཡིན་ལ། དབང་འདི་ཟབ་ཅིང་རྒྱ་ཆེ་བ་ལ་མོས་པ་དག་ལ་ཚིག་ཙམ་གྱི་སྒོ་ནས་བསྐུར་བའི་དབང་ཡིན་པས་ན་ཚིག་དབང་དང་། ཀུན་རྫོབ་ཀྱི་དབང་ལས་ཁྱད་པར་ཅན་དུ་གྱུར་པས་ན་རིན་པོ་ཆེ་ཞེས་བྱ་ལ། དཀྱིལ་འཁོར་ནི་དོན་དམ་བྱང་ཆུབ་སེམས་ཀྱི་དཀྱིལ་འཁོར་ལ་བརྟེན་ནས་བསྐུར་བ་ཡིན་ནོ། །དེ་ནས་བདེན་པའི་ཚིག་བརྗོད་པ་ནི། སེམས་ཅན་ཀུན་གྱི་སྙིང་ལ་རྟག་ཏུ་གནས་པའི་དྭང་མ་མི་ཤིགས་པའི་ཐིག་ལེ་ཧཱུྃ་གི་རྣམ་པར་གནས་པ་ལ་བརྟེན་ཏེ་འཁོར་འདས་ཀྱི་སྣང་བ་ཐམས་ཅད་འབྱུང་སྟེ། རྒྱུད་ལས། རྟག་ཏུ་སྙིང་ལ་གནས་པ་ཡི། །ཐིག་ལེ་གཅིག་སྟེ་འགྱུར་བ་མེད། །ཅེས་གསུངས་པ་ལྟར། རྩ་བ་སྤྲོས་བྲལ་གྱི་ཐིག་ལེ་དེའི་དོན་མ་རྟོགས་པར་འཁྲུལ་པ་མ་རིག་པའི་ཐིག་ལེས་རྒྱུ་བྱས་ཏེ་འཁོར་བའི་འཁྲུལ་སྣང་ཐམས་ཅད་འབྱུང་བས་ན། སེམས་ཅན་ཀུན་གྱིའང་ཡབ་ཏུ་གྱུར་པ་ཉིད་དེ། དེ་ཉིད་ལམ་གནད་ཀྱིས་ཟིན་ན་སྤྲོས་
བྲལ་གྱི་ཐིག་ལེ་འདོད་མཆོག་སངས་རྒྱས་བསྒྲུབ་པའི་ཐབས་བླ་ན་མེད་པ་ཡན་ལག་བདུན་ལྡན་གྱི་རྡོ་རྗེ་འཆང་གི་དམ་ཚིག་གི་ཕྱག་རྒྱ་མཆོག་ཏུ་གྱུར་པའི་བདག་ཉིད་རང་བཞིན་འོད་གསལ་དོན་དམ་གྱི་བདེན་པ་ཉིད་ཡིན་པས། གང་དག་གིས་ཡེ་ཤེས་མཆོག་དེ་རྟོགས་པ་ན་ཤེས་རབ་སྟོང་པ་ཉིད་དང་ཐབས་བདེ་བ་ཆེན་པོའི་བདག་ཉིད་ཟུང་དུ་འཇུག་པའི་ལྷའི་དཀྱིལ་འཁོར་ཡིན་པས། ཆོས་ཉིད་ཀྱི་བདེན་པ་ཟབ་མོ་དེ་ཡི་མཐུས། མགོན་པོ་ཁྱོད་ཀྱིས་ཀྱང་བདག་གི་འདོད་པ་རབ་ཏུ་རྫོགས་པར་མཛོད་ཅིག་གོ །སློབ་པ་གཞུག་པ་དང་འབྲེལ་ཚེ་སླར་ཡང་སྨོན་ལམ་བྱ་བ་ནི། ཀུན་རྫོབ་ཀྱིས་བསྡུས་པའི་ཆོས་རྣམས་ཐམས་ཅད་སྒྱུ་མ་དང་གཟུགས་བརྙན་ལྟ་བུར་དག་པ་སྟེ། དེ་དག་གི་རང་བཞིན་སྐྱེ་མེད་དུ་དག་པས་ན་ཡེ་ནས་དག་ཅིང་གསལ་ལ་རྙོགས་པ་མེད་པས། དངོས་པོ་འདི་ཞེས་བཟུང་དུ་མེད་ཅིང་། ཐ་སྙད་ཀྱི་ཚིག་གིས་བརྗོད་དུ་
མེད་ཀྱང་། རང་བཞིན་རྒྱུའི་རྒྱུད་བདེ་གཤེགས་སྙིང་པོ་ལ་བརྟེན་ཏེ། རྐྱེན་བླ་མ་དམ་པ་དང་། ཐབས་དེའི་གདམས་པ་དང་། བདག་རྐྱེན་དགེ་བའི་ལས་བསགས་པ་ལས་ཀུན་ཏུ་བྱང་བའི་མ་བཅོས་གདོད་མའི་གནས་ལུགས་ཆོས་ཉིད་དེ་བཞིན་ཉིད་ལ་ངེས་པ་ནང་ནས་སྐྱེས་ཏེ་ཕྱིན་ཅི་མ་ལོག་པར་རྟོགས་པའི་བདེན་པ་མཆོག་དེ་ཡིས། དབང་བཞི་པ་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་སོ་སོ་རང་གིས་རིག་པའི་ཡེ་ཤེས་པྲ་ཕབ་ཀྱི་གཟུགས་བརྙན་ལྟ་བུར་གསལ་བར་ངོས་སྤྲད་པ་བཞིན་དུ་སློབ་མ་རྣམས་ཀྱིས་ནི་ཆོས་ཉིད་ཀྱི་ངོ་བོ་སྟོང་ལ་རང་བཞིན་གསལ་ཞིང་། ཡེ་ནས་དག་པ་དྲི་མ་མེད་པ་ཉིད་མངོན་སུམ་མཐོང་བར་ཤོག་ཅིག་ཅེས་པ་སྟེ། འཕགས་པ་ཀླུ་ཡི་རིགས་པ་དྲུག་ཅུ་པ་ལས། དངོས་པོ་གཟུགས་བརྙན་ལྟ་བུར་ནི། །ཡེ་ཤེས་མིག་གིས་རབ་མཐོང་བ། །བདག་ཉིད་ཆེན་པོ་དེ་དག་ནི། །འཁོར་བའི་འདམ་ལ་ཆགས་མི་འགྱུར། །ཞེས་
གསུངས་པ་བཞིན་ནོ། །དེ་ནས་བཟའ་བཏུང་གི་ལག་མཆོད་བྱ་བ་ནི། ལག་གཡོན་པའི་མཐིལ་དུ་མེ་ཏོག་ལྔ་འཁོད་ལ་བསང་སྦྱང་བྱས་ཏེ། ལག་པའི་མཐིལ་དུ་སྐད་ཅིག་གིས་གྲུབ་པའི་པདྨ་དམར་པོ་འདབ་མ་ལྔ་པ་བསྒོམས་ལ། དེའིཔདྨའི་ཟེའུ་འབྲུའི་དབུས་སུ་ཕག་མོའི་ངོ་བོ་ༀ་བཾ་དམར་པོ། དེ་ནས་ཤར་ནས་བརྩམས་ཏེ་རིམ་པ་ལྟར་གཡོན་སྐོར་གྱིས་འདབ་མ་དང་པོར་གཤིན་རྗེ་མའི་ངོ་བོ་ཧཾ་ཡོཾ་སྔོན་པོ། གཉིས་པར་རྨོངས་བྱེད་མའི་ངོ་བོ་ཧྲཱི་མོཾ་དཀར་པོ། གསུམ་པར་བསྐྱོད་བྱེད་མའི་ངོ་བོ་ཧྲིཾ་ཧྲིཾ་སེར་པོ། བཞི་པར་སྐྲག་བྱེད་མའི་ངོ་བོ་ཧཱུྃ་ཧཱུྃ་ལྗང་གུ། ལྔ་པར་གཏུམ་མོའི་ངོ་བོ་ཕ྄ཊ་ཕ྄ཊ་དུད་ཁས་མཚན་པར་བསམ། དེ་ལྟར་ཡང་ཨ་ཝ་དྷུ་ཏིའི་གཞུང་ལས། གཡོན་པ་ཡི་ནི་ལག་མཐིལ་ལ། །པདྨ་དམར་པོ་འདབ་ལྔ་བསྒོམ། །དབུས་སུ་ༀ་བཾ་རྡོ་རྗེ་ཕག ། ཧཾ་ཡོ་དག་ནི་གཤིན་རྗེ་མོ། །ཧྲིཾ་མོཾ་དག་ནི་རྨོངས་བྱེད་མ། །ཧྲིཾ་ཧྲིཾ་དག་ནི་སྐྱོད་བྱེད་མ། །ཧཱུྃ་ཧཱུྃ་
སྐྲག་བྱེད་མ་རུ་ཤེས། །ཕ྄ཊ་ཕ྄ཊ་དག་ནི་ཙཎྜི་ཀ །ཞེས་གསུངས་པ་ལྟར་ཡུམ་གྱི་གོ་ཆའི་ལྷ་མོ་རྣམས་དང་། དེ་ནས་ཡབ་ཀྱི་གོ་ཆའི་ལྷ་རྣམས་ནི། ཨ་བ་དྷུ་ཏིའི་གཞུང་ལས། རྒན་པོ་ལ་ནི་རྡོ་རྗེ་སེམས། །མཛུབ་མོ་ལ་ནི་རྣམ་སྣང་མཛད། །པདྨ་གར་དབང་གུང་མོ་ལ། །ཧེ་རུ་ཀ་དཔལ་སྲིན་ལག་ལ། །རྡོ་རྗེ་ཉི་མ་མ ཐེའུ་ཆུང་ལ། །རྟ་མཆོག་རྡོ་རྗེ་སེན་མོ་ལའོ། །ཞེས་པ་ལྟར་མཐེ་བོང་ལ་རྡོ་རྗེ་སེམས་དཔའི་ངོ་བོ་ༀ་ཧ་དཀར་པོ། མཛུབ་མོ་ལ་རྣམ་པར་སྣང་མཛད་ཀྱི་ངོ་བོ་ན་མ་ཧི་སེར་པོ། གུང་མོ་ལ་འོད་དཔག་མེད་ཀྱི་ངོ་བོ་སྭཱ་ཧཱ་ཧུ་དམར་པོ། སྲིན་ལག་ལ་མི་བསྐྱོད་པའི་ངོ་བོ་བཽ་ཥཊྲ་ཧེ་ནག་པོ། མཐེའུ་ཆུང་ལ་རྡོ་རྗེ་ཉི་མའི་ངོ་བོ་ཧཱུྃ་ཧཱུྃ་ཧོཿདམར་སེར། དེའི་སེན་མོ་ལ་རྟ་མཆོག་གི་ངོ་བོ་ཕཊྲ་ཧཾ་ལྗང་གུ་རྣམས་གསལ་བར་བསྒོམས། དེ་ནས་ལག་པའི་སྦོ་ལ་ཡང་གཙོ་བོའི་དཀྱིལ་འཁོར་གྱི་འཁོར་ལོའི་ལྷ་རྣམས་མེ་ལོང་ལ་གཟུགས་བརྙན་ཤར་བ་ལྟར་གསལ་བར་བསྒོམས་
ལ། དེ་ནས་ལག་པ་ལ་གནས་པའི་འབྱུང་བ་ས་ཆུ་མེ་རླུང་ནམ་མཁའ་ལྔ་པོ་ཡང་རྣམ་པར་དག་པའི་ངོ་བོ་ལྟུང་བྱེད་མ་དང་། གསོད་བྱེད་མ་དང་། འགུགས་བྱེད་མ་དང་། གར་གྱི་དབང་ཕྱུག་མ་དང་། པདྨའི་དྲྭ་བ་ཅན་ཏེ་ལྷ་མོ་ལྔ་རུ་གྱུར་པར་བསམས། གོ་ཆའི་ལྷ་རྣམས་ཀྱི་སྔགས་ལ་ཉེར་སྤྱོད་ལྔ་བཏགས་པས་མཆོད། རྐང་བརྒྱད་ཀྱིས་བསྟོད། དེ་ནས་ༀ་ཨཱཿཧཱུྃ་གིས་ནང་མཆོད་དང་བཟའ་བཏུང་གི་ཕུད་ཀྱིས་མཆོད་པར་བྱ་སྟེ། ཨ་ཝ་དྷཱུ་ཏིའི་གཞུང་ལས། དེ་ལ་མེ་ཏོག་སྤོས་ཀྱིས་མཆོད། །ཆང་གིས་ཀྱང་ནི་ཚིམ་པར་བྱ། །ཞེས་གསུངས་པའི་དོན་ཏོ། །འདི་སྐབས་ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་གདབ་བྱ་བར་གསུངས་ཀྱང་ཕྱག་རྒྱུན་ལ་མི་སྣང་ངོ་། །དེ་ནས་བདུད་རྩི་ལག་པ་ལ་འཐོར་ཞིང་ལག་མཐིལ་གྱི་རྫས་སྲིན་ལག་གིས་བླངས་པའི་ཕྱག་རྒྱུན་ལ་ལག་མཐིལ་གྱི་ཚོམ་བུ་མགོར་བླུགས་པར་མཛད་དོ། །མཆན། ཚུལ་བྱས་ཏེ་རང་གི་སྙིང་ག་
མགྲིན་པ་མགོ་བོ་རྣམས་སུ་བདུད་རྩིའི་ཐིག་བླངས་པས་རེག་བཞིན་པས་ཧཱུྃ་དང་ཨཱཿདང་ༀ་བརྗོད་པས་ལག་པའི་ལྷ་ཚོགས་དེ་དག་རྣམས་བདག་ཉིད་ཀྱི་གནས་གསུམ་ལ་ཐིམ་པར་གྱུར་པར་བསམ་མོ།། ༈ །།དེ་ནས་ཚོགས་ཀྱི་འཁོར་ལོའི་རིམ་པའི་གོ་དོན་ནི་ཁོ་བོས་བྲིས་པའི་ཚོགས་མཆོད་ཀྱི་གཏོང་ཐུན་ཟབ་གསང་སྔགས་ཀྱི་མཛེས་རྒྱན་དུ་བལྟ་བར་བྱའོ། །ཚོགས་སྤྱན་འདྲེན་ནང་། གནས་རྡོ་རྗེ་བཙུན་མོའི་གསང་བ་ནས། །ཞེས་པ་ནི་ཕྱི་ལྟར་ན་ཆོས་ཀྱི་འབྱུང་གནས་ཐར་པ་ཆེན་པོའི་གཞལ་མེད་ཁང་། ནང་ལྟར་ན་ཤེས་རབ་རྡོ་རྗེ་ཕག་མོ་དང་དགྱེས་པས་རོལ་པའི་མཁའ་དབྱིངས་བདེ་བ་ཆེན་པོའི་ཀློང་། གསང་བ་ལྟར་ན་རླུང་སེམས་དྷཱུ་ཏིའི་ཀློང་དུ་ཐིམ་པའི་འོད་གསལ་ཆོས་ཀྱི་དབྱིངས་ལ་རྡོ་རྗེ་བཙུན་མོའི་གསང་བ་ཞེས་གསུངས་སོ། །གཞན་རྣམས་ནི་གོ་སླ་བས་མ་སྤྲོས་ལ། དེ་ནས་ཚོགས་འབུལ་ལེན་བྱ་བ་ནི། རྡོ་རྗེ་མཁའ་འགྲོའི་རྒྱུད་ལས། སྒྲུབ་
པ་པོ་ཡི་ལག་གཡོན་གྱིས། །པདྨའི་སྣོད་ནི་བཟུང་ནས་སུ། །ལག་པ་གཡས་པ་བ་དན་ནི། །གསུམ་པར་བྱས་ཏེ་དེ་ཡིས་བསྒོས། །ཞེས་གསུངས་པ་ལྟར་ལས་ཀྱི་རྡོ་རྗེས་ལག་གཡོན་པས་ཐོད་པ་མ་ད་ནས་བཀང་བ་སོགས་ཚོགས་ཀྱི་ཡོ་བྱད་ཐོགས། གཡས་པས་བ་དན་གསུམ་པ་སྟེ་རྩེ་གསུམ་གྱི་ཕྱག་རྒྱ་བསྟན་ལ། འབུལ་ཚིག་གི་གོ་དོན་ནི། འདི་ལྟར་ཕྱི་རོལ་གྱི་གཟུགས་སོགས་མཐོང་བའི་ཆོས་རྣམས་ནི་རང་བཞིན་གྱིས་རྣམ་པར་དག་པ་ཡིན་ལ། དེ་ཕྱིར་སྤང་བླང་དངོས་པོའི་འཛིན་རྟོག་གང་ཡང་མེད་དོ་སྙམ་པའི་རྟོག་པ་སྔོན་དུ་ཐོང་ལ། རིགས་མཐོ་ཞིང་གཙང་བ་བྲམ་ཟེ་དང་དམན་པ་ཁྱི་དང་གདོལ་པ་ལྟ་བུ་རྣམས་ཀྱང་། རང་བཞིན་ལྷན་ཅིག་སྐྱེས་པའི་ཡེ་ཤེས་ཀྱི་ངོར་བཟང་ངན་རོ་གཅིག་པའི་ཕྱིར། དེ་ཁོ་ན་ཉིད་ཀྱི་ངང་དུ་དགྱེས་པས་གསོལ་བར་མཛོད་ཅིག །ཅེས་སོ། །དེ་ནས་ཚོགས་ལེན་པ་པོས་ཀྱང་གཡོན་པས་ཕྱག་རྒྱ་སྔར་ལྟར་དང་གཡས་
པས་ཚོགས་བླངས་ལ། བདེ་གཤེགས་ཆོས་ལ་སོགས་ཀྱི་གོ་དོན་ནི། ཐབས་མཁས་དང་ཐུགས་རྗེ་བསམ་གྱིས་མི་ཁྱབ་པའི་མངའ་བདག་བདེ་བར་གཤེགས་པས་རྗེས་སུ་བསྟན་པའི་ཁྱད་ཆོས་བླ་ན་མེད་པ་དམིགས་བཅས་བསོད་ནམས་ཀྱི་ཚོགས་དང་དམིགས་མེད་ཡེ་ཤེས་ཀྱི་ཚོགས་གཉིས་རྫོགས་པར་བྱེད་པའི་ཐབས་ཟབ་མོ་འདོད་རྒུ་འབྱུང་བའི་ནོར་བུ་ལྟ་བུ་འདི་ལ་ནི་དངོས་པོས་གཞལ་ན་རིན་ཐང་མེད་ཅིང་། དེ་ལའང་བརྣབ་སེམས་སོགས་འདོད་ཆགས་ཀྱི་དྲི་མ་ཐམས་ཅད་དང་རིང་དུ་བྲལ་ཞིང་། བདག་ཏུ་བཟུང་བ་དང་དངོས་པོར་འཛིན་པའི་འཆིང་བ་ཐམས་ཅད་དང་བྲལ་བའི་རང་བཞིན་རྒྱལ་བ་ཐམས་ཅད་མཁྱེན་པའི་སྤྱོད་ཡུལ་ཟབ་མོ་དེ་ཁོ་ན་ཉིད་ལ་བདག་ནི་གུས་པས་འདུད་དོ། །ཞེས་སོ། །དེ་ནས་སྤྱོད་པའི་ཉམས་སྐྱོང་བའི་ཕྱིར་དུ་རྡོ་རྗེའི་གླུ་བླངས་པ་ནི། སྡོམ་འབྱུང་ལས། ཆང་གི་སྟོན་མོས་དགའ་བྱས་ལ། །རྡོ་རྗེའི་གླུ་ནི་རྫོགས་པ་དང་། །
གར་བྱ་མཆོག་ཏུ་དགའ་བ་དང་། །ཕྱག་རྒྱ་སྔགས་ཀྱིས་གར་བྱའོ། །ཞེས་གསུངས་པ་ལྟར་དཔྱིད་ཀྱི་རྒྱལ་མོའི་གླུ་མངོན་བརྗོད་ཟླ་མའི་རྒྱུད་ལས་འབྱུང་བའི་གོ་དོན་ནི། དང་པོ་ཐུགས་ཀྱི་འཁོར་ལོའི་ལྷ་མོ་བརྒྱད་ཀྱི་གླུ་ཡིས་དཔལ་ཧེ་རུ་ཀ་ཉིད་ལ་བསྟོད་པའི་སྒོ་ནས་མངོན་བྱང་ལྔར་བཞེངས་པར་བསྐུལ་བ་སྟེ། མི་འགྱུར་བདེ་བ་ཆེན་པོའི་ཡེ་ཤེས་གཅིག་པུའི་ཉམས་ཀྱིས་དུ་མའི་རྣམ་པར་འཆར་བའི་བདེ་བ་ཆེན་པོའི་གར་གྱིས་བདེ་སྟོང་ཡེ་ཤེས་ལ་རྟག་པར་རོལ་པར་མཛད་པའི་དཔའ་བོ་ཆེན་པོ་སྟེ། ཛཱ་ལེནྡྷ་རའི་ཞལ་ནས། བདེ་ཆེན་ཡེ་ཤེས་ཞེས་བྱ་གཅིག་པུ་པ། །གཅིག་པུའི་ཉམས་ཀྱིས་དུ་མའི་གར་མཛད་དོ། །ཞེས་གསུངས་པ་ལྟ་བུའི་བདེ་ཆེན་ཧེ་རུ་ཀ་དཔལ་ཉིད་རྣལ་འབྱོར་མ་རྣམས་ཀྱི་གཙོ་མོ་མཆོག་ཐུགས་ཀྱི་འཁོར་ལོའི་ལྷ་མོ་བརྒྱད་ཀྱི་པདྨའི་བདེ་བ་ལ་འཕོ་མེད་དགའ་བཞིའི་ཉམས་ཀྱིས་དགྱེས་པས་རོལ་པར་མཛོད་ཅིག་སྟེ། དེ་ཉིད་
ཀྱི་དོན་བརྡའི་སྒོ་ནས་བསྟན་ཏེ་ངོ་མཚར་ཆེད་དུ་བརྗོད་པ་ནི། ཨ་ནི་བདེ་ཆེན་འགྱུར་བ་མེད་པ། ལ་དང་པོ་ནི་དོན་དམ་བྱང་ཆུབ་སེམས་ཀྱི་ཐིག་ལེ། ལ་ཡིག་ལྷག་མ་བཞི་ནི་རིམ་པ་ལྟར་དགའ་བ། མཆོག་དགའ། ཁྱད་དགའ། ལྷན་ཅིག་སྐྱེས་པའི་དགའ་བ་དང་བཞིའོ། །ཧོཿནི་དགྱེས་པ་དང་ངོ་མཚར་བ་ལ་འཇུག་པས་བདེ་ཆེན་དགའ་བ་བཞི་ལ་དགྱེས་པའི་ཉམས་ཀྱིས་རོལ་པ་ལ་ངོ་མཚར་བའི་དོན་ཏོ། །དེ་ལྟར་བདེ་ཆེན་དགའ་བ་བཞི་ཡི་ཡེ་ཤེས་ལ་མཆོག་ཏུ་དགྱེས་པ་རྣམས་ཀྱི་བདེ་བའི་མཆོག་སྟེ་བདེ་སྟོང་གཉིས་སུ་མེད་པའི་ངོ་བོ་ཧེ་རུ་ཀ་དཔལ་ཉིད་ལ། རྣལ་འབྱོར་མ་ཚོགས་ཏེ་ཐུགས་ཀྱི་ལྷ་མོ་བརྒྱད་ཀྱི་ཟག་མེད་བདེ་སྟོང་གིས་མཆོད་པར་བརྗོད་པ་ནི། ཨ་ནི་ཤེས་རབ་སྟོང་པ་ཉིད། ཨི་ནི་ཐབས་བདེ་བ་ཆེན་པོ། ཨཱ་ནི་ཐབས་དང་ཤེས་རབ་ཟུང་དུ་འཇུག་པ། ཨཱ་རཱལླི་ནི་དེ་ལ་བརྟུལ་ཞུགས་ཀྱི་སྤྱོད་པས་ཐོགས་པ་མེད་པར་རོལ་ཅིག་ཅེས་དང་། ཧོཿནི་དེ་ལ་
ངོ་མཚར་བའི་དོན་ཏོ། །ཡང་ན་ཨཱ་རཱལླི་ཡི་དོན་རྡོ་རྗེ་ཨཱ་རཱལླིའི་རྒྱུད་ལས། ཨ་ནི་ཨ་བ་དྷཱུ་ཏཱི་སྟེ་དབུ་མ། རཱ་ནི་རཱ་ས་ནཱ་ཏེ་རོ་མ། ལ་ནི་ལ་ལ་ནཱ་ཏེ་རྐྱང་མ་ཡིན་པར་གསུངས་པས་ན་རྩ་གསུམ་གཅིག་ཏུ་དག་པའི་དབུ་མའི་མར་སྣ་དུང་ཅན་མའི་ནང་དུ་མས་བརྟན་དགའ་བ་བཞི་ཡི་ཡེ་ཤེས་ལ་ཐོགས་མེད་དུ་དགྱེས་པས་རོལ་བར་མཛོད་ཅིག་ཅེས་པའི་དོན་ཏོ། །གཉིས་པ་གསུང་གི་འཁོར་ལོའི་དཔའ་མོ་བརྒྱད་ཀྱི་གླུ་ནི། བདེ་ཆེན་དགའ་བཞིའི་ཡེ་ཤེས་ལ་རབ་ཏུ་དགྱེས་པའི་མགོན་པོ་ཧེ་རུ་ཀ་དཔལ་ཉིད་བདེ་ཆེན་གསང་བ་མཆོག་གི་དགྱེས་པ་ན་རྟག་པར་བཞུགས་མཛོད་ལ། མཁའ་འགྲོ་མ་ཡི་དྲྭ་བ་སྟེ་ཇི་སྐད་དུ། མང་ལ་འབྲེལ་བ་དྲྭ་བའི་དོན། །ཅེས་གསུངས་པ་ལྟར་ནང་གི་རྩ་སྟོང་ཕྲག་བཅུ་གཉིས་ཀྱི་གྲངས་དང་མཉམ་པའི་མཁའ་འགྲོ་མ་རྣམས་ཀྱི་ཟག་མེད་ཀྱི་བདེ་བ་སྐྱེད་པར་གསོལ་ན་ཐུགས་རབ་ཏུ་དགྱེས་པའི་སྒོ་ནས་ཟག་མེད་ཀྱི་བདེ་བ་དམ་
པ་གསོལ་བར་མཛོད་ལ། དེ་ཡང་ཐ་མལ་པའི་འཛིན་རྟོག་དབྱིངས་སུ་ནུབ་པའི་བདེ་ཆེན་ཞི་བའི་གར་གྱིས་བདེ་བ་ཆེན་པོར་རོལ་པའི་གར་ཅིར་ཡང་སྒྱུར་བར་མཛད་པའི་དཔལ་ཆེན་ཧེ་རུ་ཀ་ཡིས་བདག་ཅག་གསུང་གི་འཁོར་ལོའི་མཁའ་འགྲོ་མ་བརྒྱད་ལ་འཕོ་མེད་བདེ་ཆེན་ཡེ་ཤེས་ཀྱི་བདེ་བ་དམ་པ་སྩོལ་ཅིག །དེ་ཡང་མཚོན་བྱེད་དཔེའི་ལྷན་ཅིག་སྐྱེས་པ་ཉམས་སུ་མྱོང་བས་མཚོན་བྱ་དོན་གྱི་ཡེ་ཤེས་ལ་སྦྱོར་བར་མཛད་པས་ན་མཐར་ཕྱིན་ཐར་པ་མྱ་ངན་ལས་འདས་པའི་གོ་འཕང་མཆོག་ལ་འགོད་པར་མཛད་པའི་ཐབས་མཁས་ཐུགས་རྗེའི་མཚན་ཉིད་ཐམས་ཅད་དང་ལྡན་པ་ནི་དཔའ་བོ་ཆེན་པོ་ཁྱོད་ཉིད་ལགས་པས་དེ་ལ་ངོ་མཚར་ཆེད་དུ་བརྗོད་པའི་བརྡའི་ཚིག་ཨ་ལ་ལ་སོགས་ཀྱི་དོན་གོང་དང་འདྲའོ། །གསུམ་པ་སྐུའི་འཁོར་ལོའི་ལྷ་མོ་བརྒྱད་ཀྱི་གླུ་ནི། དེ་ཡང་འགྲོ་བ་སྤངས་པའི་ཕ་རོལ་ན་བདེ་ཆེན་ལྷན་ཅིག་སྐྱེས་པ་རྙེད་པར་མི་འགྱུར་ཏེ། དེ་ཁོ་ན་ཉིད་ལ་
འཇུག་པ་ལས། འཁོར་བ་སྤངས་ནས་གཞན་དུ་ནི། །མྱ་ངན་འདས་པ་ཐོབ་མི་འགྱུར། །ཞེས་གསུངས་པ་ལྟར། འགྲོ་བའི་རང་བཞིན་ནི་ལྷན་ཅིག་སྐྱེས་དགའི་ཡེ་ཤེས་ཡིན་པའི་ཕྱིར་དེའི་ཐབས་བདེ་བ་སྤངས་པས་ནམ་ཡང་གྲོལ་བར་མི་འགྱུར་ཏེ། རྒྱུ་བདེ་བ་མེད་ན་སྡུག་བསྔལ་གྱི་རང་བཞིན་ཁོ་ན་ལས་མ་འདས་པས་ན་བདེ་མེད་སྡུག་བསྔལ་གྱིས་ནམ་ཡང་མི་གྲོལ་ཏེ་དཔེར་ན་ངན་སོང་གི་འགྲོ་བ་བཞིན་ནོ། །དེས་ན་དཔེའི་ཡེ་ཤེས་ལ་བརྟེན་ཏེ་དོན་གྱི་ཡེ་ཤེས་མངོན་དུ་བྱེད་པའི་བདེ་ཆེན་ཡེ་ཤེས་དེ་གང་དུ་གནས་ན་སྐུའི་འཁོར་ལོའི་ལྷ་མོ་བརྒྱད་ཀྱི་བདེ་ཆེན་ཆུ་སྐྱེས་ཀྱི་དབུས་སུ་གནས་པས་ན། དེ་ལའང་ཐ་མལ་འཛིན་རྟོག་གིས་བཅིངས་པའི་ཆགས་པའི་དངོས་པོ་ལ་ཁྱོད་ཀྱིས་མ་བསྒྱུར་བར། ཆགས་མེད་རང་གྲོལ་བདེ་བ་ཆེན་པོ་ཡིས་ཡོངས་སུ་གྲོལ་བར་མཛོད་ཅིག །དཔེ་ཇི་ལྟར་ན་ཤེས་རབ་མའི་པདྨ་ཟག་མེད་བདེ་བས་རྒྱས་པའི་རོ་
ཉིད་ཀྱིས་ཚིམས་པའི་ཚུལ་བུང་བ་ཡིས་མེ་ཏོག་གི་བཅུད་ལ་རོལ་པ་ལྟ་བུར་ཕྱི་མེ་ཏོག་གི་མདངས་ལ་མ་གནོད་པར་ནང་སྦྲང་རྩིའི་བཅུད་ཀྱིས་ལུས་ཁམས་མཆོག་ཏུ་བརྟས་པ་ལྟར་ཟག་མེད་བདེ་སྟོང་གི་རོ་ཡིས་ཚིམས་པར་མཛོད་ཅིག །ཅེས་སོ། །དེ་དག་གི་དོན་ཡང་ནང་ལྟར་ན། མཁའ་འགྲོ་ནི་རྩ་ཡི་གཙོ་མོ་གསུམ་ལ་བརྟེན་པའི་རྩ་སྟོང་ཕྲག་བཅུ་གཉིས། པདྨ་ནི་སྤྱི་མགྲིན་སྙིང་ལྟེའི་རྩ་འཁོར་ལོ་བཞི། དེའི་བདེ་བ་ནི་གཏུམ་མོ་འབར་འཛག་གི་ཞུ་བདེ་ལྷན་ཅིག་སྐྱེས་དགའི་ཡེ་ཤེས། དགྱེས་པས་རོལ་བ་ནི། གནས་པ་རྩ། གཡོ་བ་རླུང་། བཀོད་པ་བྱང་ཆུབ་སེམས་ཀྱི་ཐིག་ལེ་གསུམ་གྱི་གནད་དང་འབྲལ་བ་མེད་པ། ཨ་ལ་ལ་སོགས་ནི་ཐབས་ཟབ་མོ་ནང་གི་དོན་དེ་ལ་ངོ་མཚར་བའོ། །གསང་བ་ལྟར་ན་མཁའ་འགྲོ་མ་ནི་ཤེས་རབ་ཀྱི་ཕ་རོལ་ཏུ་ཕྱིན་མ། པདྨ་ནི་རང་བཞིན་འོད་གསལ་སྟོང་པ་ཉིད་ཀྱི་ཡེ་ཤེས། དགྱེས་པས་རོལ་པ་ནི་དེའི་དོན་དང་མི་འབྲལ་
བའོ། །ཨ་ལ་ལ་སོགས་ནི་མ་བཅོས་རང་བྱུང་གདོད་མའི་གནས་ལུགས་ལ་ངོ་མཚར་བའི་དོན་ཏོ། །འདིའི་འགྲེལ་པ་རྒྱུད་འགྲེལ་རྣམས་སུ་མི་བཞུགས་པས་རང་བློས་གང་དཔོགས་ཀྱི་འགྲེལ་བ་བགྱིས་པ་ལ་ནོངས་པ་གང་མཆིས་དཔའ་བོ་མཁའ་འགྲོ་རྣམས་ལ་བཤགས་སོ། །དེ་ནས་སྨོན་ལམ་གདབ་པ་ནི། སྡོམ་འབྱུང་ལས་སོ། །དེ་ལྟར་ཟབ་མོ་ཚོགས་ཀྱི་འཁོར་ལོ་བསྐོར་བའི་མཐུས་གནས་སྐབས་དང་མཐར་ཐུག་གི་བདེ་བ་ཕུན་སུམ་ཚོགས་པ་ཡང་དག་པ་དང་ལྡན་ཏེ། དེ་ལའང་ནད་མེད་དེ་འགལ་རྐྱེན་བར་ཆད་ཀྱི་ཆོས་དང་བྲལ་ཏེ། མཐུན་རྐྱེན་ཆོས་མཐུན་གྱི་བསམ་སྦྱོར་རབ་ཏུ་དགེ་བའི་སེམས་དང་ནི་ལྡན་ཏེ། ནོར་གྱི་སྡེ་དང་། འདོད་པའི་སྡེ་དང་། ཆོས་ཀྱི་སྡེ་དང་། ཐར་པའི་སྡེ་སྟེ་སྡེ་བཞིའི་དཔལ་ཡང་དག་པ་ཐོབ་ཅིང་། མདོར་ན་བདེ་ལེགས་ཕུན་སུམ་ཚོགས་པ་ཐམས་ཅད་ཡིད་ལ་ཇི་ལྟར་བསམ་པ་ལྟར་འགྲུབ་པར་གྱུར་ཅིག །ཅེས་སོ། །
དེ་ནས་ལྷག་མ་བཏང་བ་ནི། སམྦུ་ཊ་ལས། ལྷག་མ་ལ་སོགས་དངོས་པོ་ཀུན། །ཕྱི་རོལ་དཀྱིལ་འཁོར་ཚིམས་པར་བྱ། །ཞེས་གསུངས་པས་སློབ་དཔོན་གྱི་ལག་གཉིས་མཐེ་བོང་དང་མཛུབ་མོ་རྩེ་སྤྲད། ལྷག་མ་རྣམས་བརྐྱངས་པ་ཁའི་ཐད་དུ་བཞག་ལ། ཆང་གི་ཁ་སྤྲུ་དེའི་དབུས་ནས་ལྷག་མའི་སྟེང་དུ་གདབ་སྟེ། དམ་ཚིག་ལྔ་པ་ལས། ཁ་ནི་མྱོས་བྱེད་ཀྱིས་བཀང་སྟེ། །འབར་བའི་ཕྱག་རྒྱ་བཅིངས་བྱས་ལ། །ཧཱུྃ་གི་སྒྲ་ནི་དྲག་པོ་ཡིས། །ལྷག་མའི་སྣོད་དུ་སྦྱིན་པར་བྱ། །ཞེས་གསུངས་པ་ལྟར་རོ། །འབུལ་སྔགས་ༀ་སརྦ་ཐམས་ཅད། ཁ་ཁ་ཟོ་ཟོ། ཁཱ་ཧི་ཁཱ་ཧི་ཟོ་ཤིག་ཟོ་ཤིག །ཨུཙྪིཥྚ་བ་ལིཾ་ལྷག་མའི་གཏོར་མ། ཨུཙྪིཥྚ་བྷཀྵེ་བྷྱཿལྷག་སྡུད་རྣམས་ཀྱི་ཆེད་དུ། སྭཱ་ཧཱ་ནི་སྦྱིན་པའོ། །འདི་སྐབས་ལྷག་སྐྱེལ་མ་སླེབ་བར་རོལ་འོག་སློབ་དཔོན་གྱིས་མཚམས་གཅོད་ཀྱི་དམིགས་པ་བྱ་སྟེ། འཁོར་དུ་ཤ་ཟའི་རིགས་གདུག་ཅན་མང་དུ་ཡོད་པའི་ཕྱིར་རོ། །དེ་ནས་རྗེས་བཟོད་
གསོལ་གོ་སླ་ལ། སྨོན་ལམ་གྱི་སྐབས། རིགས་སུ་སྐྱེ་དང་སོགས་ཀྱི་དོན། དེང་ནས་བཟུང་སྟེ་སྐྱེ་བ་ཀུན་ཏུ་ཡང་དག་པར་རྫོགས་པའི་སངས་རྒྱས་ཀྱི་རྗེས་སུ་བསྟན་པའི་ཆོས་ལ་དད་ཅིང་ཁྱད་པར་དུ་རྡོ་རྗེ་ཐེག་པ་བླ་ན་མེད་པ་ལ་འཇུག་པའི་རིགས་སུ་སྐྱེ་བ་དང་། དེ་ལ་ཞུགས་ནས་སྐུ་གསུང་ཐུགས་ཀྱི་དམ་ཚིག་རྩ་བ་དང་ཡན་ལག་བཅས་པ་མ་ལུས་པ་ཉམས་པ་མེད་པའི་སྐལ་པ་ཅན་དུ་འགྱུར་བ་དང་། སྒོ་གསུམ་གྱི་སྤྱོད་ལམ་མ་བསྡམས་པའི་སྨྱོ་སྤྱོད་ཁ་ན་མ་ཐོ་བའི་བརྟུལ་ཞུགས་མེད་པ་དང་། བདེན་གཉིས་དབྱེར་མེད་བསྐྱེད་རྫོགས་ཟུང་འཇུག་སྟོན་པའི་རྒྱུད་དཔལ་ལྡན་འཁོར་ལོ་སྡོམ་པ་སྟོན་པའི་བླ་མ་དམ་པ་དང་འཕྲད་ཅིང་དེ་ལ་མཆོག་ཏུ་གུས་པ་དང་། སེམས་ཅན་དང་ཆོས་དང་དམིགས་པ་མེད་པའི་སྙིང་རྗེར་ལྡན་པ་སྟེ་སྙིང་རྗེ་གསུམ་དང་མི་འབྲལ་བར་སྐྱེ་ཞིང་། དེ་བཞིན་དུ་སྐྱེ་བ་ཕྱི་མར་ཡང་ཡང་ནས་ཡང་དུ་ཆོས་འདིའི་བདག་པོར་
འགྱུར་བར་ཤོག་ཅིག །ལག་པས་རྡོ་རྗེ་དང་དྲིལ་བུ་འཁྲོལ་བའི་དོན་ནི་ཕྱི་ལྟར་ན་རྟགས་ཀྱི་རྡོ་རྗེ་དང་དྲིལ་བུ་འཁྲོལ་ཅིང་། ནང་ལྟར་ན་འདྲ་ཟབ་མོའི་ཆོས་ནི་དཔལ་ལྡན་སྡོམ་པའི་རྒྱུད་དེ། དེ་ཉིད་ཀློག་པ་དང་ཉན་པ་དང་དོན་ཚུལ་བཞིན་དུ་ཡིད་ལ་བྱེད་པ་དང་གཞན་ལ་འཆད་པར་སྨོན་པའོ། །གསང་བ་ལྟར་ན་ལག་པ་ནི་དེ་ཁོ་ན་ཉིད་ཀྱི་དོན་ཤེས་པ། རྡོ་རྗེ་ནི་བྱང་ཆུབ་སེམས་ཀྱི་བརྡ་དང་། དྲིལ་བུ་འཁྲོལ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་མ་སྟེ། དེའི་དོན་ཟབ་མོ་ཡིད་ལ་བྱེད་པར་སྨོན་པའོ། །བཙུན་མོ་ནི་ཕྱི་ལྟར་ན་གཞན་ལུས་ཞིང་སྔགས་ལྷན་ཅིག་སྐྱེས་པའི་མཁའ་འགྲོ་མ། དེའི་ཤུ་ཀྲ་སྟེ་བྱང་ཆུབ་སེམས་ཀྱི་ཐིག་ལེ་དཀར་དམར། མཉམ་ཟས་ཅན་ཏེ་རླུང་གི་སྟོབས་ཀྱིས་དྭངས་མ་བདེ་ཆེན་དུ་འདྲེན་པའོ། །ནང་ལྟར་ན་རང་ལུས་ཐབས་ལྡན་གྱི་བཙུན་མོ་ནི་རྩ་ཨ་ཝ་དྷཱུ་ཏི་སྟེ། ཤུ་ཀྲ་ནི་ཨ་ཧཾ་འབར་འཛག་གིས་དགའ་བཞིའི་ཡེ་ཤེས་ཉམས་སུ་མྱོང་བའོ། །
གསང་བ་ལྟར་ན་དོན་དམ་པའི་བཙུན་མོ་ནི་ཤེས་རབ་སྟོང་པ་ཉིད། དེའི་ཤུ་ཀྲ་ནི་སྟོང་པ་ཉིད་ཀྱི་དོན་ཕྱིན་ཅི་མ་ལོག་པར་རྟོགས་པ་སྟེ། དེ་ལྟར་སྟོང་ཉིད་ཀྱི་བདུད་རྩི་ལ་རང་གཞན་ཐམས་ཅད་མཉམ་པར་ཟས་སུ་ཟ་ཞིང་ལོངས་སྤྱོད་པའི་སྐལ་པ་ཅན་དུ་སྐྱེ་ཞིང་སྐྱེ་བར་འགྱུར་བར་ཤོག་ཅིག་ཅེས་སོ། །སེམས་ཅན་ཐམས་ཅད་ལ་སྡུག་བསྔལ་གྱི་རྒྱུ་སྡིག་པ་མི་དགེ་བའི་ལས་ནམ་ཡང་མེད་ཅིང་། སེམས་ཅན་ཐམས་ཅད་རྟག་ཏུ་བདེ་བ་ཕུན་སུམ་ཚོགས་པའི་དཔལ་དང་ལྡན་པར་གྱུར་ཅིག །སྐྱེ་བ་ཀུན་ཏུ་དལ་འབྱོར་བཅོ་བརྒྱད་དང་ལྡན་པའི་ལུས་མཆོག་ཐོབ་ཅིང་། བླ་ན་མེད་པའི་བྱང་ཆུབ་མཆོག་གང་གི་ལམ་ནས་ཡང་དག་པར་འགྲོ་བའི་སངས་རྒྱས་ཉིད་དང་རྟག་ཏུ་ཕྲད་པར་ཤོག་ཅིག །འགྲོ་བ་གང་དག་སྲིད་པའི་ཆུ་བོ་ལས་མ་རྒལ་བ་རྣམས་བདག་གིས་བསྒྲལ་བ་དང་། ཉན་ཐོས་ཞི་བའི་མཐའ་ལ་ཞེན་པས་མ་གྲོལ་བ་རྣམས་བདག་གིས་དགྲོལ་
ཏེ། ད་ལྟ་ཉིད་དུ་དེ་དག་ལ་རྗེས་སུ་བརྩེ་བས་རྣལ་འབྱོར་གྱི་ལམ་ཟབ་མོ་འདི་ཉིད་རྗེས་སུ་བསྟན་ཏེ་རྒྱུད་ཡོངས་སུ་བཅོས་ནས་ཡང་དག་པའི་གནས་ལ་འགོད་པར་བྱའོ་སྙམ་པ་ནི་ཐེག་ཆེན་བླ་ན་མེད་པའི་སྨོན་ལམ་དང་སེམས་བསྐྱེད་དོ། །དེ་ནས་བརྟན་བཞུགས་བྱས་ལ་སླར་ཡང་ལུས་གནས་ཡིད་གསུམ་སྲུང་བ་ནི། དང་པོ་རང་གི་སྙིང་གར་ༀ་ཧ་དཀར་པོ་སོགས་སྔར་བཤད་པ་ལྟར་ལ། འདིའི་ཚིག་གཅོད་མཚམས་མི་བདེ་བའི་དབང་གིས་ཚིག་ལྷུག་པར་འདོན་པའི་ཞལ་རྒྱུན་སྣང་ཡང་གནད་སློང་བ་ཉུང་ཕྱིར་གཅོད་མཚམས་འདི་ལྟར་བྱ་སྟེ། རང་གི་སྙིང་གར་ༀ་ཧ་དཀར། མགོ་བོར་ན་མ་ཧི་སེར། གཙུག་ཏུ་སྭཱ་ཧཱ་ཧུ་དམར། ཕྲག་གཉིས་སུ་བཽ་ཥཊ྄་ཧེ་ནག །མིག་གཉིས་སུ་ཧཱུྃ་ཧཱུྃ་ཧོཿདམར་སེར། ཡན་ལག་ཐམས་ཅད་ཕཊ྄་ཧཾ་ལྗང་གུས་ཁྱབ་པར་གྱུར། ཅེས་བརྗོད་པ་ནི་ལུས་སྲུང་བ་སྟེ་འདི་སྐབས་སྔར་བདག་གིས་དཔལ་སྤུངས་ཀྱི་བྱང་འདྲེན་བརྩོན་འགྲུས་
མདུན་ནས་དབྱངས་རོལ་འདོན་འགྲིགས་བསླབ་སྐབས། གོ་ཆའི་སྔགས་བརྗོད་རིམ་བཞིན་ལག་གཡས་པས་རྡོ་རྗེས་གནས་སོ་སོར་རེག་ཚུལ་མཛད་ཀྱང་དེང་སང་ནི་དེ་འདྲ་མི་དགོས་ཞེས་ཟེར་སྣང་། དེ་ནས་སྔར་ལྟར་སེ་གོལ་གཡོན་སྐོར་དུ་གཏོགས་ཏེ་ཧཱུྃ་བཞིའི་སྔགས་བརྗོད་པ་ནི་གནས་སྲུང་བའོ། །སྣང་བ་ལྷ། གྲགས་པ་སྔགས། དྲན་རྟོག་བདེ་ཆེན་དེ་དག་པ་གསུམ་དྲན་པ་ནི་ཡིད་སྲུང་བའོ། །དེ་ནས་རྡོ་རྗེ་འཆང་ཆེན་སོགས་ཀྱི་བཀྲ་ཤིས་བརྗོད་ལ་མེ་ཏོག་གི་ཆར་བསྙིལ་ཏེ་དགེ་ལེགས་སུ་བྱའོ། །འདི་ལ་ཕྱི་ནང་གསང་སྒྲུབ་ཀྱི་བསྙེན་པ་བྱ་བའི་ཚུལ་སྤྲོ་ན་གྲུབ་དབང་ཆགས་མེད་ཞབས་ཀྱི་ཟིན་བྲིས་ལྟར་ཤེས་པར་བྱའོ། །སླར་སྨྲས་པ། དཔལ་ལྡན་སྡོམ་པའི་རྒྱུད་གཞུང་ཆུ་གཏེར་ཆེ། །གྲུབ་པའི་རྡོ་རྗེའི་གསུང་གིས་བསྲུབས་པ་ལས། །ལེགས་འོང་རྣམ་བཤད་ཟླ་བ་གསར་པའི་དཔལ། །དཔྱོད་ལྡན་ཀུ་མུ་ཏ་ཡི་དཔྱིད་དུ་ལོངས། ༡༽ །འདི་རུ་
འབྲེལ་མེད་ངག་རྒྱུན་སྦུ་བའི་ཕྲེང་། །ལེགས་བཤད་བདུད་རྩིར་སེམས་པ་མ་བྱས་པར། །རྣམ་དག་རྒྱུད་དང་གྲུབ་པའི་གསུང་བཞིན་དུ། །བཀོད་པས་ནོངས་པའི་དྲི་མ་མེད་སྙམ་བདོག ༢༽ །འོན་ཀྱང་རྒྱུད་དོན་མཐའ་དྲུག་ཚུལ་བཞིའི་སྒོ། །ཇི་བཞིན་འབྱེད་པ་ས་མཐར་མ་ཕྱིན་པར། །ཉི་ཚེའི་བློ་ཡིས་རྟོགས་པར་མིན་གསུངས་ཕྱིར། །ནོངས་གྱུར་ཡེ་ཤེས་སྤྱན་ལྡན་རྣམས་ལ་བཤགས། ༣༽ །འདི་ལས་བྱུང་བའི་ལེགས་བྱས་དགེ་བའི་མཐུ། །རབ་དཀར་གངས་རི་ལས་སྐྱེས་ཆུ་བོའི་རྒྱུན། །ངེས་དོན་སྙིང་པོའི་རྒྱ་མཚོར་ཉེར་ཞུགས་ཏེ། །སྒྲུབ་བརྒྱུད་མ་དྲོའི་བདག་པོའི་དཔལ་གྱུར་ཅིག ༤༽ །འདིར་འབྲེལ་པོ་ཡང་སྐྱེ་དང་ཚེ་རབས་སུ། །མཐིང་དབང་ཅོད་པན་འཛིན་དང་འབྲལ་མེད་ཅིང་། །ཡི་དམ་སྙིང་པོ་དཔལ་ལྡན་བདེ་བ་མཆོག །འཁོར་ལོ་སྡོམ་པས་རྗེས་སུ་འཛིན་གྱུར་ཅིག ༥༽ །ཅེས་དཔལ་འཁོར་ལོ་སྡོམ་པའི་ལྷ་ལྔའི་དཀྱིལ་ཆོག་གི་རྣམ་བཤད་ཉུང་ངུར་བསྡུས་པ་འདི་ཡང་། སྐྱེས་སྦྱང་ཡོན་ཏན་
གྱི་དཔལ་གྱིས་མངོན་པར་མཐོ་བ་དགེ་བཤེས་ཀརྨ་འཇིགས་བྲལ་ནས་ཚུལ་འདི་ལྟ་བུ་ཞིག་བྲི་དགོས་ཞེས། ལྷ་རྫས་དྲི་མེད་དང་སིངྒའི་ཡུལ་ནས་བྱུང་བའི་དབང་མདོག་གི་བྱི་རིལ་དང་བཟང་གོས་སྐྱེམས་འགེབ་ཀྱི་རྟེན་དང་བཅས་ཡི་གེའི་ལམ་ནས་ནན་ཆེར་གསུང་བསྐུལ་མཛད་ཀྱང་། སྤྱིར་ཡང་རྣམ་བཤད་ཟེར་བ་ཤིན་ཏུ་དཀའ་ཞིང་། ཁྱད་པར་དུ་བདེ་མཆོག་གི་རྣམ་བཤད་ནི་ཤིན་ཏུ་ནས་ཀྱང་དཀའ་བས་བདག་ལྟ་བུའི་སྤྱོད་ཡུལ་དུ་མ་གྱུར་ཀྱང་། གང་གི་བཀའ་མ་ལྡོག་ཙམ་དུ་བར་སྐབས་ཀྱི་ཚིག་འགྲེལ་ཁ་ཤས་འགའ་ཙམ་མ་གཏོགས་གཞུང་དོན་ལུང་ཁུངས་སོ་སོར་གསལ་བ་ལྟར་རྒྱ་འགྲེལ་གྱི་དགོངས་པ་ཁོ་ན་བླངས་པ་ལས་རང་རྟོག་གི་དྲི་མས་མ་བསླད་པར་སྒྲུབ་བརྒྱུད་སྙིང་པོའི་བསྟན་ལ་ཞུགས་པའི་རྟགས་ཙམ་འཆང་བ་དཀོན་མཆོག་བསྟན་འཛིན་གྱིས་བྲིས་པ་སྙིང་པོའི་བསྟན་པས་ས་གསུམ་ཁྱབ་པའི་རྒྱུར་གྱུར་ཅིག །དགེ་ལེགས་འཕེལ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།