རྡོ་རྗེ་རྣལ་འབྱོར་མ་ལྷན་ཅིག་སྐྱེས་མའི་བསྐྱེད་རིམ་གྱི་ལྷ་ཁྲིད་རྣམ་བཤད་ཟབ་མོ་རྣམ་འབྱེད་ཀྱི་སྙིང་པོ་བསྡུས་པ།
རྡོ་རྗེ་རྣལ་འབྱོར་མ་ལྷན་ཅིག་སྐྱེས་མའི་བསྐྱེད་རིམ་གྱི་ལྷ་ཁྲིད་རྣམ་བཤད་ཟབ་མོ་རྣམ་འབྱེད་ཀྱི་སྙིང་པོ་བསྡུས་པ་བཞུགས་སོ། །
བླ་མ་དང་རྡོ་རྗེ་རྣལ་འབྱོར་མ་ཐ་མི་དད་པ་ལ་ཕྱག་འཚལ་ལོ། །དེའི་ལྷ་ཁྲིད་ཟིན་བྲིས་གསུམ་གྱི་དགོངས་པ་བཞིན་བཤད་པར་བྱའོ། །དེ་ལ་བརྒྱུད་པའི་ལོ་རྒྱུས་ནི། རྣལ་འབྱོར་གྱི་དབང་ཕྱུག་ཏཻ་ལོ་པས་རྡོ་རྗེ་ཐེག་པའི་རྒྱུད་སྡེ་མན་ངག་མཐའ་དག་རྡོ་རྗེ་རྣལ་འབྱོར་མ་དང་རྡོ་རྗེ་འཆང་དངོས་ལས་གསན་ཏེ་རྗེ་ནཱ་རོ་པར་གདམས་ཤིང་། དེས་ཀྱང་དཔལ་ལྡན་ལྷན་ཅིག་སྐྱེས་མ་དང་དངོས་སུ་མཇལ་ནས་བསྐྱེད་རིམ་ལྷན་ཅིག་སྐྱེས་མ་དང་རྫོགས་རིམ་རླུང་སེམས་
གཉིས་མེད་ཀྱི་མན་ངག་གསན་ནས་སྒྲུབ་ཐབས་ཀྱི་གཞུང་མཛད་དེ་སྲས་ཀྱི་ཐུ་བོ་རྗེ་མར་པ་ལ་གནང་ནས། ད་སྟེ་ཞག་བདུན་ན་དགུན་གྱི་ཉི་མ་ལྡོག །དེ་ནས་ནག་པོའི་ཚེས་བཅུ་ལ་དུར་ཁྲོད་སོ་ས་གླིང་དུ་སོང་དང་ལྷན་ཅིག་སྐྱེས་མས་རྗེས་སུ་འཛིན་པར་འགྱུར་རོ་གསུངས་ཏེ་དེར་བྱོན་པས་ལྷན་ཅིག་སྐྱེས་མ་མིའི་བུ་མོའི་རྣམ་པར་བསྟན་པ་དང་མཇལ། བསྐྱེད་རྫོགས་དང་བྱིན་རླབས་གནང་། ཤེལ་གྱི་གྲི་གུག་གིས་ཐུགས་ཀ་ཁ་ཕྱེ་ནས་སྔགས་འཁོར་བསྟན། ཁྱོད་རྡོ་
རྗེ་གདན་དུ་སྟོན་པའི་ཚེམས་མཆེ་བ་ལྟོས་ལ་བོད་དུ་སོང་། སྐལ་ལྡན་རྗེས་སུ་ཟུང་ཞིག་པར་ལུང་བསྟན། ཚེམས་མཆེ་བ་གཟིང་པས་ཏ་ལའི་ལོ་མ་ལ་ལི་ཁྲིས་སིང་ག་ལའི་ཡི་གེར་བྲིས་པའི་དཔེ་བྱང་བུ་ཞིག་རྙེད་དེ་སྤྱན་དྲངས་པས་བསྐྱེད་རྫོགས་གཉིས་ཀྱི་དཔེར་སྣང་། རྗེ་དེས་མི་ལ་མཐུ་ཆེན་ལ་བསྐྱེད་རྫོགས་ཀྱི་གཙོ་བོ་རྣམས་དངོས་སུ་གནང་། གནད་ཁ་ཅིག་ཤོག་དྲིལ་ལ་དམ་གྱིས་མནན་ཏེ། ཁྱོད་ལ་མ་འོངས་པ་ན་རྩ་རླུང་གི་གེགས་ཤིག་འབྱུང་བས་དེའི་ཚེ་ལྟོས་གསུངས་ནས། འཁྲུལ་འཁོར་གནད་ཀྱི་ཁ་བསྒྱུར་ལ། །འབྲས་རིན་ཆེན་སྐྱེ་བའི་སོ་ནམ་ཡོད། །ཅེས་ལུང་བསྟན་ཏེ་གནང་། རྗེ་མི་ལས་དེ་ལ་བརྟེན་ཏེ་གྲུབ་པ་བརྙེས་ནས། རྗེ་སྒམ་པོ་པ་ལ་བསྐྱེད་རིམ་དངོས་སུ་གནང་། རྫོགས་རིམ་ནི་ང་ལ་ཡང་བསྒོམ་སྐྱེ་དཀའ་བར་བྱུང་ཡང་འདི་ལ་བརྟེན་ནས་སྐྱེས། ཁྱོད་ལ་ཡང་རྟོགས་པ་ལ་འཕེལ་འགྲིབ་གཅིག་འབྱུང་། དེའི་ཚེ་འདི་དགོས་གསུངས་ནས་
སྐྱེལ་ཐུང་གི་སར་གནང་། རྗེ་སྒམ་པོ་པ་བཀའ་གདམས་ཀྱི་ཚོགས་སུ་བཞུགས་པས་ཉམས་མྱོང་འགྲིབ་པའི་ཚེ་ཉམས་སུ་བཞེས་པས་ཆོས་སྐུ་དངོས་སུ་གཟིགས་ཏེ་རྟོགས་པའི་མཐར་ཐུག །དེས་རྗེ་དུས་གསུམ་མཁྱེན་པ་ལ་ཀཾ་པོ་གངས་རར་སོང་ཞིག་པའི་འགྲོ་ཆོས་སུ་བསྐྱེད་རྫོགས་གཉིས་གནང་། དེ་ནས་འགྲོ་མགོན་སངས་རྒྱས་རས་ཆེན་ནས་དཔལ་མཁའ་སྤྱོད་དབང་པོའི་བར་དུ་སྐལ་ལྡན་རེ་རེ་ཙམ་ལས་མི་སྤེལ་བའི་གསང་ཆོས་སུ་བཞུགས་ལ། དཔལ་མཁའ་སྤྱོད་ཞབས་ཀྱིས་བླ་མ་དང་མཁའ་འགྲོ་ལས་རྒྱ་ཆེར་སྤེལ་ཞིག་པའི་གནང་བ་ཐོབ་ནས་གདུལ་བྱ་རིམ་འཇུག་དགོས་པ་རྣམས་བཀྲི་བའི་ཕྱིར་རྗེ་དུས་མཁྱེན་གྱི་བཀའ་བུམ་ན་བཞུགས་པའི་རྣལ་འབྱོར་མའི་ཆོས་སྐོར་རྣམས་ལས་བཾ་བསྐྱེད་མ་ཕྱི་སྒྲུབ་ཏུ་མཛད། གཞུང་ཞལ་གདམས་འདི་ཉིད་ནང་སྒྲུབ་ཏུ་མཛད། གསང་སྒྲུབ་ཞལ་གཉིས་མར་མཛད་དེ་སློབ་མ་རྣམས་རིག་སྤྱོད་
ནུས་ངེས་སུ་སྨིན་པར་མཛད་དེ་དེ་ཕྱིན་ལྷ་ཁྲིད་ཀྱི་མཚན་ཉི་ཟླ་ལྟར་གྲགས་ཤིང་། རྗེ་དེ་བཞིན་གཤེགས་པ་དང་། ཆོས་ཀྱི་མིང་ཅན་དང་། ལྷ་གཟིགས་པས་ཟིན་བྲིས་མཛད་པས་ཟིན་བྲིས་གསུམ་གཙོ་བོར་གྲགས་ཅིང་གཞན་ཡང་ཟིན་བྲིས་དུ་མ་བྱུང་བར་སྣང་ངོ་། །དེ་ཡང་གང་བསྒྲུབ་ན་སངས་རྒྱས་ཐམས་ཅད་སྐྱེད་པ་དང་གསོ་བ་དང་བཞེད་དོན་སྒྲུབ་པ་དང་བརྟེན་པའི་ཡུམ་རྡོ་རྗེ་ཤེས་རབ་ཀྱི་ཕ་རོལ་ཏུ་ཕྱིན་མ་ཕྱག་རྒྱ་ཆེན་མོ་མཆོག་ཏུ་མི་འགྱུར་བའི་ཡེ་ཤེས་རྣམ་ཀུན་མཆོག་ལྡན་གྱི་སྟོང་ཉིད་ཡོངས་སུ་རྫོགས་པ་རྡོ་རྗེ་བཙུན་མོ་དང་། སྣ་ཚོགས་ཡུམ་དང་། རྡོ་རྗེ་ཕག་མོ་ལ་སོགས་པའི་མཚན་མཐའ་ཡས་པས་འབོད་པ་དེ་བསྒྲུབ་པར་བྱའོ། །དེ་ལ་དབྱེ་ན་རྗེ་དོན་ལྡན་ཞབས་ཀྱིས་བརྡ་དོན་རྟགས་ཀྱི་ཕག་མོ་ཞེས་གསུངས་པ་ལྟར་གསུམ་ལས། དོན་གྱི་རྡོ་རྗེ་རྣལ་འབྱོར་མ་ནི། ཆོས་ཉིད་ཀྱི་སྐུ་མཆོག་ཏུ་མི་འགྱུར་བའི་ཡེ་ཤེས་དངོས་ཏེ་སྐྱེ་མེད་རླུང་སེམས་གཉིས་
མེད་ཀྱིས་བསྒྲུབ་ལ། བརྡའི་རྡོ་རྗེ་རྣལ་འབྱོར་མ་ནི། ལུས་ལ་ཡེ་ཤེས་ཆེན་པོ་གནས། ཞེས་སམ། ལྟེ་བའི་དབུས་གནས་འབྱུང་བཞི་འཕྲོ། །ཞེས་པ་ལྟར་རྡོ་རྗེའི་ལུས་ལ་དམ་ཚིག་པའི་ངོ་བོར་གནས་པའི་ཙཎྜ་ལཱི་སྟེ་གཙོ་བོ་བདེ་ཆེན་རླུང་སེེམས་གཉིས་མེད་ཀྱིས་བསྒྲུབ་བོ། །རྟགས་ཀྱི་རྡོ་རྗེ་རྣལ་འབྱོར་མ་ནི། བརྡ་དོན་གྱི་རྡོ་རྗེ་རྣལ་འབྱོར་མ་དབྱེར་མེད་པ་ཆོས་སྐུ་རྟགས་ཀྱི་རྡོ་རྗེ་རྣལ་འབྱོར་མ་དང་། དེ་ཉིད་དཀྱིལ་འཁོར་གྱི་གཙོ་བོའི་ཡུམ་དུ་སྣང་བ་ལོངས་སྐུ་རྟགས་ཀྱི་རྣལ་འབྱོར་མ་དང་། ཡུལ་ཉེར་བཞིའམ་ཞེ་བརྒྱད་ལ་སོགས་པར་གཙོ་མོ་རབ་གཏུམ་མ་ལ་སོགས་པའི་ཚུལ་དུ་བཞུགས་པ་སྤྲུལ་སྐུ་རྟགས་ཀྱི་རྣལ་འབྱོར་མ་དང་། ས་འོག་ས་སྟེང་ས་བླ་ཁྱབ་པར་རིགས་སོ་བདུན་སོགས་ཀྱི་སྐུ་ཡི་འགྱུར་བ་མཐའ་ཡས་པས་རོལ་པའི་གཙོ་མོ་རིགས་ལྡན་མའི་ཚུལ་དུ་བཞུགས་པ་སྟེ། འདི་རྣམས་ནི་གཙོ་བོར་བསྐྱེད་རིམ་གྱིས་བསྒྲུབ་ཅིང་ཤུགས་
ཀྱིས་བསྐྱེད་རྫོགས་རེ་རེས་ཀྱང་ཐམས་ཅད་དབྱེར་མེད་དུ་བསྒྲུབ་བོ། །སྒྲུབ་པ་དངོས་ལ་གདུལ་བྱ་རིམ་འཇུག་གི་དབང་དུ་བྱས་ན་གསུམ་སྟེ། ཕྱི་སྒྲུབ། ནང་སྒྲུབ། གསང་སྒྲུབ་བོ། །དང་པོ་ནི། དབང་དང་བྱིིན་རླབས་ཐོབ་པའི་རྣལ་འབྱོར་པས་སྟན་བདེ་བར་འདུག་སྟེ། སྐྱབས་སེམས་དང་། ཚད་མེད་པ་བཞི་དང་། ཡིག་བརྒྱའི་བསྒོམ་བཟླས་ཀྱིས་རྒྱུད་དག་པར་བྱས་ནས། རང་ཉིད་ལྷར་གསལ་བའི་ཐུགས་ཀའི་ས་བོན་གྱི་འོད་ཀྱིས་བླ་མ་དང་དཀྱིལ་འཁོར་གྱི་ལྷ་ཚོགས་སྤྱན་དྲངས་པ་ལ་ཕྱག་དང་མཆོད་པ་སོགས་ཡན་ལག་བདུན་པ་བྱས་ལ་ཚོགས་བསགས། ཚོགས་ཞིང་གཤེགས་པའམ་རང་ལ་བསྡུས་ཏེ། སྭ་བྷས་སྟོང་པར་སྦྱང་། སྟོང་པའི་ངང་ལས་པདྨ་རོ་གདན་ཉི་མའི་སྟེང་དུ་སེམས་ཉིད་བཾ་དམར་པོ། དེ་ལས་འོད་འཕྲོས་དོན་གཉིས་བྱས་ནས་ཚུར་འདུས་ཡོངས་སུ་གྱུར་པ་ལས། རང་ཉིད་རྡོ་རྗེ་རྣལ་འབྱོར་མ་སྐུ་མདོག་དམར་མོ་གཅེར་བུ་རུས་རྒྱན་
དང་གྲི་ཐོད་ཁ་ཊྭཱཾ་ག་འཛིན་པ། གར་སྟབས་ཀྱིས་བཞེངས་པ། ཐོད་སྐམ་གྱི་དབུ་རྒྱན་དང་ཐོད་རློན་གྱི་དོ་ཤལ་ཅན། ཁྲོ་མོ་སྤྱན་གསུམ་པ། དབུ་སྐྲ་གྱེན་དུ་བརྫེས་ཤིང་མེ་ཕུང་ནང་ན་བཞུགས་པར་བསམ། དེའི་ཐུགས་ཀར་པད་ཉི་ལ་བཾ་ཡིག་གི་མཐར་སྔགས་ཀྱིས་བསྐོར་བར་བསམ། དེའི་འོད་ཀྱིས་ཡེ་ཤེས་པ་སྤྱན་དྲངས་ཏེ་རང་ལ་བསྟིམ། ཡང་འོད་ཀྱིས་དབང་ལྷ་སྤྱན་དྲངས། དབང་བསྐུར་བས་བདུད་རྩིས་སྐུ་གང་། ཆུ་རྒྱུན་སྤྱི་བོར་འཁྱིལ་བས་རྣམ་སྣང་གིས་དབུ་བརྒྱན་པར་བསམ་མོ། །འདི་ཡི་ཡེ་ཤེས་པ་དང་དབང་ལྷ་ལྷན་ཅིག་པ་ནང་སྒྲུབ་ལྟར་བྱས་ཀྱང་རུང་ངོ་། །དེ་ནས་ལྷ་སྐུ་གསལ་ལ་རྟོག་པ་མེད་པ་ཅི་ནུས་སུ་བསྒོམ། སྐྱོ་ན་ས་བོན་ལས་འོད་དམར་པོ་འཕྲོས། ལུས་གང་ནད་གདོན་སྡིག་སྒྲིབ་དག །འོད་ཕྱིར་འཕྲོས། སྣོད་ཆོས་འབྱུང་གི་གཞལ་ཡས་ཁང་དང་བཅུད་ཡི་དམ་གྱི་སྐུར་གྱུར། སངས་རྒྱས་ཐམས་ཅད་ཡི་དམ་གྱི་རྣམ་པར་
སྤྱན་དྲངས་ས་བོན་ལ་བསྟིམ་ཞིང་། ༀ་ༀ་ༀ་སརྦ་བུདྡྷ་ཌཱ་ཀི་ནཱི་ཡཻ་བཛྲ་ཝརྞྞ་ནཱི་ཡཻ་བཛྲ་བཻ་རོ་ཙ་ནཱི་ཡེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། ཞེས་ༀ་གསུམ་མ་དང་། ཧ་རི་ནི་ས་སྤངས་པའི་སྙིང་པོ་ཅི་ནུས་བཟླའོ། །མཐར་ས་བོན་ལས་འཕྲོས་པའི་ལྷ་མོས་མཆོད་པར་བསམ་སྟེ་མཆོད་བསྟོད་མདོར་བསྡུས་བྱ། གཏོར་མགྲོན་སྤྱན་དྲངས་ཏེ་གཏོར་ཆོག་ལྟར་གཏོར་མ་འབུལ། བཟོད་གསོལ་བྱས་ནས་སྣོད་བཅུད་བདག་ཉིད་དང་། དེ་ས་བོན། དེ་ནཱ་ད་དང་། དེ་ཡང་མི་དམིགས་པར་བཞག །དེ་ནས་སྒྱུ་མའི་སྐུར་ལངས་ཏེ་རྗེས་ཐོབ་ལྷའི་ང་རྒྱལ་གྱིས་བྱའོ། །དེ་ལྟར་ཐུན་བཞི་སོགས་སུ་བཅད་དེ་འབུམ་ཕྲག་བཞི་བཟླ་བ་ནི་ཕྱི་སྒྲུབ་ཏེ་བསྙེན་པའི་དོད་བཾ་བསྐྱེད་མའི་ཉམས་ལེན་ཡིན་ནོ། ༈ །གཉིས་པ་སྒྲུབ་ཐབས་དངོས་ནི་སྐབས་འདིར་ནང་སྒྲུབ་ཅེས་བྱ་ལ། དེ་ཡང་དཔལ་ནཱ་རོ་པའི་གཞུང་ལས། མཆོག་དང་ཐུན་མོང་དངོས་གྲུབ་ནི། །ཡིད་བཞིན་ནོར་བུ་རིན་ཆེན་ལྟར། །གསོལ་
བ་གང་བཏབ་ཐོབ་འགྱུར་བ། །དེའི་སྒྲུབ་ཐབས་བཤད་པར་བྱ། །ཞེས་པས་དགོས་པ་ཕན་ཡོན་དང་བཅས་པའི་རྩོམ་པར་དམ་བཅའ་བ་བསྟན་ཏོ། །འདི་ཉམས་སུ་བླང་བ་ལ་བཞི། ཇི་ལྟར་སྒྲུབ་པའི་ཚུལ། གྲུབ་ནས་སྤྱོད་པ་བྱ་ཚུལ། བསྲུང་བྱའི་དམ་ཚིག །ཐོབ་བྱའི་འབྲས་བུའོ། །དང་པོ་ལ་གསུམ། བསྐྱེད་རིམ་གྱི་སྒྲུབ་པ། རྫོགས་རིམ་གྱི་སྒྲུབ་པ། ཡན་ལག་གི་དོན་ཏོ། །དང་པོ་བསྐྱེད་རིམ་ལ་བཞི། གང་དུ་སྒྲུབ་པའི་གནས། ནམ་སྒྲུབ་པའི་དུས། སྒྲུབ་པའི་བཀོད་པ་བཤམས་པ། སྒྲུབ་པ་དངོས་སོ། །དང་པོ་ནི། རི་བོའི་རྩེ་དང་དུར་ཁྲོད་དང་། །ཤིང་གཅིག་དྲུང་དང་ཕུག་སྟོང་དང་། །བས་མཐའ་དབེན་པའི་གནད་དག་ཏུ། །ཞེས་པས་གནས་དེ་དག་དང་། རྗེ་མར་པའི་ཞལ་གདམས་ལས། བྲག་དམར་པོ་ཁ་ནུབ་ཏུ་ལྟ་བ་བྱ་ཐལ་གྱིས་མ་གོས་པ། གྲུབ་ཐོབ་གོང་མས་ཞབས་ཀྱིས་བཅགས་པའི་གནས། ཞེས་གསུངས་པས་ཁྱད་པར་གྱི་
གནས་དེ་ལྟ་བུར་བསྒྲུབ་སྟེ་འདིས་ནི་ས་བརྟག་པའི་དོན་ཡང་ཚང་ངོ་། །གཉིས་པ་ནི། ཡར་གྱི་ངོ་ཡི་ཚེས་བཅུ་ལ། །ཞེས་པས་དགུ་ཡན་ལ་བཅའ་བ་ཚོགས་པར་བྱས་ཏེ་བཅུ་ལ་བསྒྲུབ་བོ། །གསུམ་པ་ནི། བསངས་ཆུའི་དོན་དུ་ཐོག་མར་ལག་མཆོད་བྱ་སྟེ། སྐྱེས་པའི་ཐོད་པ་ཆ་གཅིག་པའམ་ཆ་གསུམ་པར་འབྲས་སོགས་འབྲུ་དང་། རྒུན་འབྲུ་སོགས་ཤིང་ཐོག་དང་། བུ་རམ་སོགས་ཤིང་དང་། སྦྲང་རྩི་སོགས་མེ་ཏོག་ལས་བྱུང་བའི་མྱོས་བྱེད་དེ་ཆང་སྣ་བཞི་གང་རུང་ལ་བདུད་རྩི་རིལ་བུ་སྦྱར་བ་བཞག །རང་ཉིད་ལྷར་གསལ་བའི་སྲིན་ལག་གཡོན་གྱིས་བདུད་རྩི་བླངས་ཏེ་བིགྷྣན་བཟླ་བཞིན་འཐོར་ནས་བགེགས་བསངས། ལག་པ་སོ་སོའི་སོར་མོ་ལྔ་མཐེ་བོང་ས་ནས་མཐེའུ་ཆུང་ནམ་མཁའི་བར་འབྱུང་བ་ལྔར་ལྷུན་གྲུབ་དུ་གནས་པའི་གཡོན་གྱི་མཐེབ་སྲིན་ས་རླུང་ཐབས་ཤེས་སུ་སྦྱར་བ་ཆོས་འབྱུང་ལྷུན་གྲུབ་ཏུ་འབྱུང་བ་སྟེང་དུ་ལྟ་བས་བཅས་ཏེ་འོག་ཏུ་སྦུབ་ནས་
སྭ་བྷཱ་ཝ་བརྗོད་བཞིན་པས་ཆང་གི་ནང་དུ་མདུན་ནས་གཡོན་ངོས་སུ་ཟླུམ་པོར་བསྐོར་བས་བདུད་རྩིའི་རྒྱ་མཚོ་དཀར་མེར་བསམ་པ་ནི་བདེ་བའི་བརྡའོ། །དེ་ནས་མདུན་ནས་གཡོན་བསྐོར་དུ་ཆོས་འབྱུང་གྲུ་གསུམ་པ་བྲི་བཞིན་པས་ༀ་ཨཱཿཧཱུྃ་བརྗོད་པ་ནི་བདེ་བ་སྟོང་པར་རྟོགས་པའི་བརྡའོ། །དེའི་དབུས་སུ་ཧྲཱིཿཧ་རི་ནི་ས་ཞེས་ཐིག་ལེ་ལྔ་བྱས་པ་ནི་སྟོང་པ་རང་རིག་འོད་གསལ་དུ་རྟོགས་པའི་བརྡ་ཏེ་བརྡ་གསུམ་མོ། །དེ་ལས་ཆང་ནང་དུ་ལྷ་ལྔ་རྟེན་བརྟེན་པ་བསྐྱེད་པ་ནི་ཆང་ནང་གི་དཀྱིལ་འཁོར་རོ། །དེ་བཞིན་དུ་ལག་པ་ཕན་ཚུན་དུ་བསངས་ཏེ་གཡས་ཀྱི་མཐེབ་སྲིན་སྦྱར་བས་བདུད་རྩི་བླངས་ཏེ་ལག་མཐིལ་གཡོན་པར་བརྡ་གསུམ་གྱིས་དཀྱིལ་འཁོར་བྲིས་སྟེ་བསྐྱེད་པ་ནི་ལག་པའི་དཀྱིལ་འཁོར་རོ། །དེ་གཉིས་ཐུན་མོང་དུ་མཆོད་ཡོན་དང་ཉེར་སྤྱོད་ལྔ་རོལ་མོར་བཅས་པས་མཆོད་པ་ནི་ཕྱི་མཆོད། ཤ་ལྔ་བདུད་རྩི་ལྔས་མཆོད་པ་ནི་ནང་མཆོད།
བདེ་སྟོང་གི་མཆོད་པ་ནི་གསང་བ་སྟེ་མཆོད་པ་གསུམ་བྱ། བསྟོད་ནས་གཡས་འབར་བའི་ཕྱག་རྒྱ་ཕྱེད་པ་དཔྲལ་བར་བཞག་སྟེ། རང་བཞིན་གྱིས་གྲུབ་པའི་འཁོར་ལོ་སྡོམ་པའི་དཀྱིལ་འཁོར་རྟེན་བརྟེན་པར་བཅས་པ་མདུན་གྱི་ནམ་མཁར་སྤྱན་དྲངས་པར་མོས་ཏེ་ཕེཾ་ཡིག་བརྗོད། མཆོད་པ་གསུམ་གྱིས་མཆོད། ཡབ་ཡུམ་གྱི་རྐང་བརྒྱད་བོད་སྐད་མས་བསྟོད། འདི་ལ་རྒྱས་པར་ན་ཡབ་ཀྱི་དཀྱིལ་འཁོར་བསྐྱེད། དེའང་མངོན་བྱང་ལྔ་ལས་གཙོ་བོ་ཡབ་ཡུམ་དང་། ས་བོན་ལས་འཁོར་བསྐྱེད་དེ་ལྷ་ལྔའམ་བཅུ་གསུམ་མམ་དྲུག་ཅུ་རྩ་གཉིས་པ་ལྟ་བུ་གང་མོས་བསྐྱེད། གོ་ཆ་བཀོད། ཡེ་ཤེས་པ་གཞུག །དབང་བསྐུར། རིགས་བདག་གི་རྒྱས་གདབ། མཆོད་བསྟོད་དང་བཟླས་པ་བྱེད་དེ། །མདོར་ན་རྒྱས་བསྡུས་གང་བྱེད་ཀྱང་འདི་ནི་ནམ་མཁའི་དཀྱིལ་འཁོར་ཏེ་དཀྱིལ་འཁོར་གསུམ་ཞེས་བྱ་སྟེ། བརྡ་གསུམ། དཀྱིལ་འཁོར་གསུམ། མཆོད་པ་གསུམ་སྟེ་ལག་མཆོད་ཀྱི་
དོན་དགུ་ཡིག་རྙིང་རྣམས་ལས་བཤད་དོ། །དེ་ནས་ནམ་མཁའི་དཀྱིལ་འཁོར་ལག་པའི་དཀྱིལ་འཁོར་ལ་བསྟིམས་པས་ཡབ་ཡུམ་རྟེན་དང་བརྟེན་པར་བཅས་པ་དབྱེར་མེད་དུ་ཞུ། དེ་ཆང་ལ་བླུགས་པས་ཆང་གི་དཀྱིལ་འཁོར་ཀྱང་ཞུ་སྟེ། དབྱེར་མེད་པའི་ཡེ་ཤེས་ཀྱི་རང་བཞིན་སྐུའི་བདུད་རྩི་ཟླ་བ་ལྟར་དཀར། གསུང་གི་བདུད་རྩི་ཉི་མ་ལྟར་དམར། ཐུགས་ཀྱི་བདུད་རྩི་བཻ་ཌཱུརྻ་ལྟར་སྔོ་བར་མོས་ཏེ་རིམ་པས་ༀ་ཨཱཿཧཱུྃ་བརྗོད་བཞིན་པས་ཆོས་འབྱུང་སྐྱེ་གནས་ཀྱི་རྒྱ་གཡོན་དུ་ལན་གསུམ་བསྐོར་རོ། །ཁ་དོག་དྲི་རོ་ནུས་པ་སྦྱོང་བའི་ཕྱིར་སྡོམ་འབྱུང་ལས་བཤད་པའི་ཧ་ཧོཿཧྲཱིཿབརྗོད་ནའང་རུང་ངོ་། །ལག་མཆོད་ཀྱི་བྱ་བ་འདི་ནི་སྡོམ་འབྱུང་ལས། །ཞི་བའི་བཏུང་བའང་ལྷ་མོ་སྟེ། །རྡོ་རྗེ་རྣམ་སྣང་མཛད་གཟུགས་གནས། །རྣམ་སྣང་མཛད་མའི་སྐུ་དབུས་སུ། །ཧེ་རུ་ཀ་ནི་ཞུ་བར་གྱུར། །ཞེས་གསུངས་པའི་མན་ངག་སྟེ་ལག་མཆོད་གཞན་ལས་ཁྱད་པར་དུ་
འཕགས་ལ། འདིས་བགེགས་བསངས་པ་དང་རྫས་སྦྱོང་བ་སོགས་བྱ་བ་ཐམས་ཅད་བྱེད་དེ། །སྡོམ་འབྱུང་ལས། བདུད་དམ་དྲག་པོའི་གཟུགས་ཅན་མ། །འཕྲོག་དང་བྱ་བ་ལོངས་སྤྱོད་པས། །དེ་ཕྱིར་སྙིང་པོ་བདུད་རྩིར་འགྱུར། །ཞེས་སོ། །ཕན་ཡོན་ནི། རྣལ་འབྱོར་མ་ཀུན་སྤྱོད་ལས། །ལག་པའི་མཆོད་པ་རྣལ་འབྱོར་པས། །དབུལ་བས་འདོད་དོན་འགྲུབ་པར་འགྱུར། །སེམས་ནི་གཞན་དུ་འགྱུར་བ་དང་། །བཟའ་བཏུང་གོས་སོགས་ཐོབ་པར་འགྱུར། །ལྷ་ཡི་མཆོད་པ་བྱས་ན་ནི། །དེ་ལས་བསམ་པ་རྣམ་འགྲུབ་འགྱུར། །ཞེས་བཤད་དོ། །དེ་ནས་ས་བླང་བའི་དོན་དུ་གཏོར་མ་ཉེར་སྤྱོད་དང་བཅས་པ་བཤམ། ལག་མཆོད་དང་བིགྷྣན་གྱིས་བསངས་སྦྱངས་སྟེ་གཏོར་ཆོག་ལྟར་བྱིན་གྱིས་བརླབ། ཕག་མོ་མངོན་པར་བྱང་ཆུབ་པའི་རྒྱུད་སོགས་མ་རྒྱུད་མང་པོར། མཛུབ་མོ་མདུད་བྱས་གུང་མོ་ངེས་པར་སྦྱར། མཐེ་བོང་རྡོ་རྗེ་བརྟན་པར་སྦྱར་བྱས་ཏེ། དེ་ནི་དཔྲལ་
བའི་དབུས་སུ་རབ་སྦྱར་ནས། བསྐོར་ཞིང་བསྐོར་ཞིང་ཀུན་དུ་བསྐོར་བ་བྱ། །རྐང་པ་མནན་ཅིང་གྱེན་དུ་བལྟ། །གྱེན་དུ་ཕེཾ་གྱི་སྒྲ་སྒྲོགས་པས། །ཕྱོགས་བཅུའི་འཇིག་རྟེན་ཁམས་གནས་པའི། །དཔའ་བོ་རྣལ་འབྱོར་མ་རྣམས་འགུགས། །ཞེས་པ་ལྟར་ཙོག་པུ་རྐང་པ་གཡས་ཀྱི་དྲང་ནས་གཡོན་གྱི་བོལ་གང་མནན། ལག་པ་གཉིས་མཛུབ་མོ་ལྕགས་སྒྲོག་ལྟར་མདུད་ཅིང་མཐེ་བོང་གཉིས་དང་གུང་མོ་གཉིས་སོ་སོར་རྩེ་སྤྲད། ལྷག་མ་མ་རི་ལྟར་བརྐྱང་བ་འབར་བའི་ཕྱག་རྒྱའམ་དྲ་བའི་ཕྱག་རྒྱ་སྨིན་མཚམས་སུ་གཡོན་དུ་བསྐོར་ཞིང་གྱེན་དུ་ལྟ་བས་ཕེཾ་ཡིག་གསུམ་མམ་བདུན་བརྗོད་པས། འདས་མ་འདས་ཀྱི་གཏོར་མགྲོན་ཐམས་ཅད་རྣལ་འབྱོར་མའི་ལྷ་ཚོགས་ཀྱི་རྣམ་པར་སྤྱན་དྲངས་པར་མོས་ཏེ། བཛྲ་ཨཱ་རལླི་སོགས་ཀྱི་སྔགས་བརྗོད། མཆོད་ནས་གཏོར་སྔགས་ཀྱིས་འབུལ། གཏོར་མ་གཙང་སར་དོར་ཏེ་གཞི་བདག་ལ་བརྡ་བཀྲོལ་ཞིང་དཀར་
ཕྱོགས་ལ་གྲོགས་གཞོལ་བར་བྱའོ། །དེ་ནས་ས་སྲུང་བ་དང་བགེགས་སྦྱོང་བའི་ཕྱིར་རང་ཉིད་ཀྱི་སྐུ་ལས་མཁའ་འགྲོ་མའི་ཚོགས་དཔག་མེད་སྤྲོས་ཏེ་ནག་པོའི་ཕྱོགས་རྣམས་བཀའ་བསྒོས་ཏེ་བསྐྲད། མི་འགྲོ་བ་རྣམས་མེ་འོད་ཀྱིས་བསྲེགས་ཏེ་སླར་ཐུགས་ཀ་ནས་རྡོ་རྗེའི་ཚོགས་དཔག་མེད་སྤྲོས་ཏེ་འོག་ཏུ་སྤྲིན་ལྟར་འཁྲིགས་པས་རྡོ་རྗེའི་ས་གཞི། དེ་བཞིན་དུ་རྭ་བ་དྲྭ་བ་གུར་བླ་རེས། ཕྱི་མེ་ཕུང་དང་བཅས་པའི་སྲུང་འཁོར། ངོ་བོ་ཡེ་ཤེས་ཀྱི་རང་བཞིན། རྣམ་པ་སྲ་ཞིང་བརྟན་པར་བསམ་སྟེ། ༀ་བཛྲ་རཀྵ་རཀྵ་ཧཱུྃ་ཧཱུྃ་ཧཱུྃ་ཕཊ་སྭཱ་ཧཱ། །ཞེས་བྱིན་གྱིས་བརླབ། དེ་ནས་ལྟེ་བའི་ཧྲཱིཿལས་སེང་གདོང་མ་དཀར་མོ་གྲི་ཐོད་འཛིན་པ་དཔག་མེད་སྟེང་ཕྱོགས་སུ་སྤྲོ་ཞིང་མཐེབ་སྲིན་གྱིས་བདུད་རྩི་འཐོར་བཞིན་པས། ༀ་སིཾ་ཧ་མུ་ཁ་ཧཱུྃ་ཧཱུྃ་ཕཊ། ཅེས་བརྗོད། དེ་བཞིན་དུ་ཁྭ་གདོང་མ་ནག་མོ་ཤར་དུ། ༀ་ཀཱ་ཀ་སྱཻ་མུ་ཁ་ཧཱུྃ་ཧཱུྃ་ཕཊ། འུག་གདོང་མ་ལྗང་ཁུ་བྱང་དུ། ༀ་ཨཱུ་ལུ་ཀ་སྱཻ་མུ་
ཁ་ཧཱུྃ་ཧཱུྃ་ཕཊ། ཁྱི་གདོང་མ་དམར་མོ་ནུབ་དུ། ༀ་ཤྭ་ན་ཀ་སྱཻ་མུ་ཁ་ཧཱུྃ་ཧཱུྃ་ཕཊ། ཕག་གདོང་མ་སེར་མོ་ལྷོར། ༀ་སཱུ་ཀ་ར་སྱཻ་མུ་ཁ་ཧཱུྃ་ཧཱུྃ་ཕཊ། སྟག་གདོང་མ་ནག་མོ་འོག་ཏུ། ༀ་བྱཱ་གྷྲ་སྱཻ་མུ་ཁ་ཧཱུྃ་ཧཱུྃ་ཕཊ། གཤིན་རྗེ་བརྟན་མ་དང་། ཕོ་ཉ་མ་དང་། མཆེ་བ་མ་དང་། འཇོམས་མ་རྣམས་ཕྱེད་གཟུགས་ཅན་དཔག་མེད་མེ་ནས་གཡས་བསྐོར་དུ་མཚམས་སོ་སོར་སྤྲོ་ཞིང་བཻ་རོ་ཙ་ནཱིའམ། ཡང་ན། ༀ་ཡ་མ་དྲྀ་ཌྷ་ཧཱུྃ་ཧཱུྃ་ཕཊ། ཡམ་དཱུ་ཏཱི༴ ཡ་མ་དཾཥྚི་ཎཱི༴ ཡ་མ་མ་ཐ་ནཱི༴ ཞེས་བརྗོད། འདི་ལྟར་ལྷ་མོ་ཡ་མཚན་ཅན། །སོགས་ཀྱིས་བཀའ་བསྒོ། ཡང་ན་སྒོ་མཚམས་མ་ཐམས་ཅད་བཻ་རོ་ཙ་ནཱི་ཁོངས་སྤྲོས་ཀྱང་རུང་ངོ་། །ལྷ་མོ་དེ་དག་རེ་རེ་ཡང་དཔག་ཏུ་མེད་པས་སྲུང་འཁོར་གྱི་ཕྱི་ནང་གོ་མཚམས་མེད་པར་ཁྱབ་པ་ལ། ཐམས་ཅད་ཀྱང་ཉི་ཟེར་རྡུལ་ལྟར་འཁྲུགས་པས་བསྲུང་བཟློག་གི་ཕྲིན་ལས་མཛད། བགེགས་ཐམས་ཅད་ཕུར་བུས་བཏབ་པར་བསམ་ཞིང་གྷཱ་
ཏའི་སྔགས་བརྗོད་དོ། །སྲུང་འཁོར་རྒྱས་པར་སྤྲོ་ན་ལྟེ་བའི་ས་བོན་ལས་སྤྲོས་པའི་ཧྲཱིཿལས་གྲི་གུག་གི་རྭ་བ་གུར་བླ་རེ། ཧ་ལས་རྡོ་རྗེ། རི་ལས་རིན་ཆེན། ནི་ལས་པདྨ། ས་ལས་རལ་གྲི་སྟེ་ཕྱག་མཚན་ལྔ་དང་། ལཾ་ལས་ས་ཡི་རང་བཞིན་འཁོར་ལོ་སེར་པོ། བཾ་ལས་ཆུ། རཾ་ལས་མེ། ཡཾ་ལས་རླུང་གི་རང་བཞིན་མཚོན་ཆ་སྣ་ཚོགས་པའི་ས་གཞི་རྭ་བ་གུར་བླ་རེས་སོགས་བསམ་ཞིང་སྔར་ལྟར་སྒོ་མཚམས་མ་སྤྲོ་སྟེ་སྲུང་འཁོར་དགུ་རིམ་ཞེས་བྱའོ། །དེ་ནས་ས་བྱིན་གྱིས་བརླབ་པའི་ཕྱིར། །མཛེས་པའི་མཎྜལ་ཆག་ཆག་གདབ། །དྲི་དང་ཆང་གིས་བྱུག་པར་བྱ། །ཞེས་པས་མི་རྟ་ཁྱི་གསུམ་གྱི་ཁྲག་དང་དྲི་བཟང་པོ་དང་། རང་བྱུང་གི་མཚལ་དང་། ལག་མཆོད་ཀྱི་རྫས་བསྲེས་པས་ས་ཕྱོགས་ཐམས་ཅད་ལ་ཆག་ཆག་བྱ་ཞིང་ཡེ་ཤེས་ཀྱི་རང་བཞིན་དུ་བསམ། དབུས་སུ་སྟེགས་བུ་མཎྜལ་དབུས་མཐོ་ཞིང་ཤར་དང་བྱང་དུ་གཞོལ་ལ་འཇམ་ཞིང་བརྟན་པ་ཇི་ལྟར་
མཚམས་པ་བྱས་ཏེ། བ་བྱུང་ལྔ་དང་རྫས་དེ་དག་གིས་བའི་ཀོ་བ་ཙམ་དུ་བྱུག །དཀྱིལ་འཁོར་བྲི་ཚུལ་ནི། །ཆོས་འབྱུང་པདྨར་ལྡན་པ་བྲི། །རང་རང་ཕྱག་མཚན་སྟེང་དུ་དགོད། །མེ་ཏོག་དམར་པོའི་ཚོམ་བུ་དགྲམ། །ཞེས་པས་རྡུལ་ཚོན་དང་། མཚན་དང་ལྡན་པའི་ཀ་པཱ་ལ། །བཏུང་བ་བཟང་པོས་ལེགས་པར་དགང་། །བདུད་རྩི་ལྔ་དང་རྩ་བརྒྱད་སྟོང་། །རིན་ཆེན་འབྲུ་དང་སྙིང་པོ་ལྔ། །གང་འདོད་རྫས་རྣམས་གཞུག་པར་བྱ། །ཞེས་ཐོད་པའི་དཀྱིལ་འཁོར་དང་། མ་ཉམས་མེ་ལོང་གཙང་མ་ལ། །ཤེས་རབ་མཚལ་དང་། ཞེས་མཁའ་འགྲོ་དབང་སྡུད་ཀྱི་དཀྱིལ་འཁོར་དང་། སིནྡྷུ་རས། །ཆོས་འབྱུང་གྲུ་གསུམ་བསྣོལ་བར་བྲི། །ཞེས་དང་། ལེ་བརྒན་དམར་པོའི་སྟེང་དུ་བཞག །ཅེས་པས་སིནྡྷུ་རའི་དཀྱིལ་འཁོར་གསུངས་ཏེ། དང་པོ་རྡུལ་ཚོན་གྱི་དཀྱིལ་འཁོར་ལྷ་སྟ་གོན་གྱི་དོད་དུ་ནམ་མཁའི་དཀྱིལ་འཁོར་བྲི་བ་ནི། སྟེགས་བུའི་སྟེང་གི་ནམ་མཁའ་
བསངས་ཏེ། གཡོན་གྱི་མཐེབ་སྲིན་གྱིས་བདུད་རྩི་བླངས་པས་རང་གི་སྨིན་མཚམས་ནས་རྣ་བ་གཡོན་པའི་ཕྱོགས་སུ་བསྐོར་བས་སྭ་བྷཱ་ཝ་བརྗོད་བཞིན་དུ་ཟླུམ་བསྐོར་བྱ། ཡི་གེ་གསུམ་བརྗོད་བཞིན་པས་རྣ་བ་གཡོན་ནས་གཡས་ཀྱི་བར་དང་། དེ་ནས་ནུབ་དང་། སླར་རྣ་བ་གཡོན་དུ་འཐེན་ཏེ་གདན་ཐབས་ཀྱི་ཆོས་འབྱུང་བསམ། སྨིན་མཚམས་ནས་རླུང་དང་། དེ་ནས་བདེན་བྲལ་དང་། དེ་ནས་ཤར་སྨིན་མཚམས་སུ་འཐེན་ཏེ་ཁང་ཐབས་ཀྱི་ཆོས་འབྱུང་བྲི། སྙིང་པོ་བརྗོད་བཞིན་པས་དབུས་སུ་ཐིག་ལེ་དམར་པོ་བྱ། ༀ་བཛྲ་ཌཱ་ཀི་ནཱི་ཡཻ་ཧཱུྃ་ཧཱུྃ་ཕཊ་སྭཱ་ཧཱ། ཤར་དུ་ཐིག་ལེ་སྔོན་པོ། དེ་བཞིན་དུ། རཏྣ་ཌཱ་ཀི། པདྨ་ཌཱ་ཀི། ཀརྨ་ཌཱ་ཀི། ཞེས་ཕྱོགས་སོ་སོར་རང་མདོག་གི་ཐིག་ལེ་བྱ། དེ་རྣམས་ཀྱི་འཕྲོ་འདུས་དོན་གཉིས་བྱས། སླར་བདུད་རྩིའི་ཐིགས་པ་སོ་སོར་རེག་བཞིན་པས་ཧྲཱིཿཧ་རི་ནི་ས་བརྗོད་དེ་ཡི་གེ་ལྔར་གྱུར་པར་བསམ། དེ་ལས་ལྷ་ལྔ་བསྐྱེད། ས་བོན་བཀོད་
དེ་མདུན་བསྐྱེད་ལྟར་སྤྱན་འདྲེན། མཆོད་བསྟོད། དབང་བསྐུར། ཡེ་ཤེས་པ་བསྟིམ་པ་དང་། བཟླས་པ་ཅུང་ཟད་བྱས་ཏེ་མཆོད་ཅིང་བསྟོད་ནས་དཀྱིལ་འཁོར་བྲི་བའི་གནང་བ་སྩོལ་བར་གསོལ་བ་གདབ། ཕྱོགས་འདིར་དཀྱིལ་འཁོར་བྲིས་ལ་རང་གཞན་གྱི་དོན་གྱིས་ཤིག་པར་གནང་བར་བྱིན་པར་བསམ། དེ་ནས་སྲད་བུ་ཆལ་དུ་བཅལ་བས་ས་གཞི་ལ་ཐིག་བྱ་སྟེ། ཚངས་ཟུང་བཞི་པོ་ལེགས་པར་གདབ། །ཇི་ཙམ་འཚམས་པར་ཟླུམ་པོར་བསྐོར། དབུས་ནས་ཟླུམ་པོའི་བར་ཚད་དེ། །ཤར་གྱི་ཟླུམ་ཚངས་ཕྲད་པར་གཟུང་། །ལྷོ་བྱང་གཉིས་སུ་མཚན་མ་བྱ། །དེ་སྟེང་གདན་ཐབས་ཆོས་འབྱུང་གདབ། །ནུབ་ཀྱི་ཟླུམ་ཚངས་ཕྲད་པ་ནས། །སྔར་ལྟར་གཞལ་ཏེ་ཁང་ཐབས་གདབ། །ཆ་ཕྲན་ཕྲ་མོ་རེ་རེའི་ཚད། །གཉིས་ཀའི་ནང་ནས་སླར་ཡང་གདབ། །དབུས་ནས་ངོས་ཚན་མ་རེག་པར། །ཟླུམ་བསྐོར་སླར་ཡང་དེ་ཡི་ནང་། །སུམ་ཆ་ཕྱེད་གཉིས་
དོར་བར་བསྐོར། །སླར་ཡང་ཟླུམ་བསྐོར་གཉིས་ཀའི་ནང་། །ཆ་ཤས་ཕྲ་བ་རེ་རེས་བསྐོར། །ནང་ནས་རིམ་བཞིན་ཟེའུ་འབྲུ་དང་། །གེ་སར་འདབ་མ་མུ་ཁྱུད་ཡིན། །ཕོ་བྲང་ཁྱམས་ཀྱི་ཟླུམ་པོའི་ཕྱིར། །ཆ་ཕྲན་གཉིས་དང་གཅིག་དང་བཞིས། །ནང་ནས་རིམ་བཞིན་བསྐོར་བ་ཡིས། །ཐོད་ཕྲེང་རྡོ་རྭ་མེ་རིའོ། །ཞེས་པ་ལྟར་བཏབ་སྟེ་ཚོན་ཁ་དོག་སྣ་ལྔ་ཡེ་ཤེས་ལྔ་དང་མཁའ་འགྲོ་ལྔར་མོས་ལ་སྙིང་པོ་བརྗོད་བཞིན་པས། ཐོག་མར་ཁང་ཐབས་ཀྱི་ཆོས་འབྱུང་གི་རེ་ཁཱ་གཡོན་བསྐོར་དུ་བྲི་ཞིང་དེ་ནས་གཞན་རྣམས་ཀྱང་རིམ་པར་བྲི་ཞིང་དགྲམ་མོ། །ཁ་དོག་ཀྱང་ཆོས་འབྱུང་གི་རེ་ཁཱ་ཕྱི་དཀར་ནང་དམར། པདྨའི་ལྟེ་བ་དམར། གེ་སར་དམར་སེར། འདབ་བཞི་ཕྱོགས་མདོག །གོང་རས་མཛེས་ཚོན། མུ་ཁྱུད་དང་ཁྱམས་ལྗང་ཁུ། ཕྱི་རོལ་གཞི་ནག་པོ་ལ་ཐོད་ཕྲེང་གཡོན་དུ་ལྟ་བ་དཀར་པོ། རྡོ་རྗེ་སེར་པོ། གཞི་ཕྱོགས་ཚོན། མེ་རི་མདོག་སྣ་ཚོགས་གཡོན་དུ་འཁྱིལ་བ། ཟུར་
བཞིར་རྡོ་རྗེ་ཕྱེད་པ་བཞི་སེར་པོ། པདྨའི་ལྟེ་བ་ལ་གྲི་གུག་སྔོན་པོ། ཡུ་བ་རྡོ་རྗེ་ཕྱེད་པ་སེར་པོ། འདབ་མ་བཞི་ལ་ཤར་དུ་རྡོ་རྗེ་སྔོན་པོ། ལྷོར་རིན་ཆེན་སེར་པོ། ནུབ་ཏུ་པདྨ་དམར་པོ། བྱང་དུ་རལ་གྲི་ལྗང་གུ་སྟེ་ཕྱག་མཚན་ལྔ་བྲི། ཕྱག་མཚན་སོ་སོའི་ལྟེ་བར་མེ་ཏོག་དམར་པོའི་ཚོམ་བུ་དགོད། ཆོས་འབྱུང་གི་ཁུག་དྲུག་ཏུ་དགའ་འཁྱིལ་དཀར་པོ་གཡོན་དུ་འཁོར་བ་རེ་བྲིའོ། །དེ་ནས་དཀྱིལ་འཁོར་དེ་རྟེན་བརྟེན་པ་དང་བཅས་པ་གསལ་བཏབ་སྟེ་ནམ་མཁའི་དཀྱིལ་འཁོར་དེ་ཕབ་ནས་དབྱེར་མེད་དུ་བསྟིམ་མོ། །དེ་ནས་གཞུང་དུ་མ་གསུངས་ཀྱང་ཞལ་གདམས་བཅུ་གཉིས་པར་གསུངས་པ་ལྟར་བུམ་པའི་དཀྱིལ་འཁོར་ནི། བུམ་པ་གཙང་མ་གུ་གུལ་གྱིས་བདུག་སྟེ། སེ་བའི་མེ་ཏོག་ཨུཏྤལ་སྔོ། །ཀཎྜ་ཀ་རཱི་ཤུ་དག་དཀར། །ཅོ་ག་མགོ་སྨན་སྨན་ལྔའོ། །ནས་གྲོ་ཏིལ་དཀར་འབྲས་སོ་བ། །མོན་སྲན་བཅས་པ་འབྲུ་ལྔའོ། །གསེར་དངུལ་ཨིནྡྲ་ནཱི་ལ་དང་། །
པད་རཀ་མུ་ཏིག་མཆོག་ལྔ་སྟེ། །ཡང་ན། །གསེར་དངུལ་ཟངས་ལྕགས་གཤའ་ཚེ་སྟེ། །ལྕགས་རིགས་ཁོ་ནའི་རིན་ཆེན་ལྔའོ། །ག་བུར་ལི་ཤི་ཛཱ་ཏི་དང་། །གུར་གུམ་ཙན་དན་དྲི་ལྔའོ། །སྦྲང་རྩི་བུ་རམ་ལན་ཚྭ་མར། །ཨ་རུ་ར་སྟེ་སྙིང་པོ་ལྔའོ། །དེ་ལྟར་རྫས་ཉེར་ལྔ་པོ་ ཁྲོལ་བུར་བླུགས། བདུད་རྩི་རིལ་བུ 
་སྦྱར། ཆུ་གཙང་གིས་བཀང་། མགུལ་ཆིངས་ཁ་དོག་ལྔ་པས་བཅིང་། ཤིང་ལོས་ཁ་བརྒྱན་ཏེ་དཀྱིལ་འཁོར་གྱི་དབུས་སུ་ཁྲིའུའི་སྟེང་དུ་བཞག་གོ །དེ་ནས་རིམ་བཞིན་ཐོད་པ་མཚན་ལྡན་དང་། དར་དམར་དང་། ལིའི་མེ་ལོང་བུག་པ་མེད་པ་འབྲུག་ལོ་འབྲུག་ཟླ་འབྲུག་གི་ཉི་མ་ལ་མགར་བ་འབྲུག་ལོ་པས་ཉིན་གཅིག་གིས་ཚར་བར་བྱས་ཏེ། བུ་མོ་གྲོང་པའི་ཆོས་ཀྱིས་མ་གོས་པས་ཤ་དྲོད་ལ་ཞག་འགའ་བཅངས་པ་ཞིག་འབྱོར་ན་ལེགས། མ་འབྱོར་ནའང་མེ་ལོང་གཙང་མའི་དང་པོར་ནང་དང་དེ་ནས་ཕྱི་རྣམས་སོ་སོར་ལག་མཆོད་ཀྱིས་བགེགས་བསངས། པང་དུ་
བཞག་སྟེ་རང་རང་གི་ཚད་ཙམ་དུ་སྟེང་དུ་ནམ་མཁའི་དཀྱིལ་འཁོར་བྲི་ཞིང་བསྐྱེད་དེ་གནང་བ་གསོལ། སིཧླ་དང་གུར་གུམ་དང་བདུད་རྩི་སོགས་སྦྱར་བས་ཐོད་པའི་ནང་། དར་དམར་གྱི་ངོས། མེ་ལོང་གི་ནང་ངོས་རྣམས་ལ་ཟླུམ་བསྐོར་ཆོས་འབྱུང་པདྨ་ས་བོན་ལྔ་དགའ་འཁྱིལ་དྲུག་དང་བཅས་པ་དང་། མེ་ལོང་གི་ཕྱི་ངོས་ལ་ལག་མཆོད་ཀྱི་རྫས་བྱུག །རྒྱ་གར་གྱིའམ་བོད་ཀྱིའང་རུང་སྟེ་སིནྡྷུ་ར་བདལ་བའམ། དར་ཚགས་ཀྱིས་བཏབ་སྟེ་ཟླུམ་བསྐོར་སོགས་སྔར་དང་འདྲ་བས་ཧྲཱིཿཡི་མཐར། ༀ་བཛྲ་བཻ་རོ་ཙ་ནཱི་ཡཻ་ཧ་རི་ནི་ས་རི་ནི་ས་ཧ་ནི་རི་ཧ་ས་ས་ནི་རི་ཧ་ཨ་ཀཪྵ་ཡ་ཧྲཱིཿཛཿ ཞེས་པ་གཡོན་བསྐོར་དུ་བྲི། སོ་སོར་ནམ་མཁའི་དཀྱིལ་འཁོར་བསྟིམས་ཏེ་བུམ་པའི་ཁ་རྒྱན་གྱི་གསེབ་བམ། ཁྲིའུ་ཆེ་བའི་སྟེང་དུ་ཐོད་པ་བདུད་རྩི་རིལ་བུ་དང་བཅས་པའི་མ་ད་ན འམ། སྨན་བསྒྲུབ་ན་བཤལ་སྨན་དང་དུག་རིགས་མ་གཏོགས་རྩ་བརྒྱད་སྟོང་གི་སྨན་གང་འབྱོར།
བླ་མ་གོང་མའི་བྱིན་རླབས་དང་སྦྱར་བའི་ཕྱེ་མའམ་རིལ་བུས་བཀང་སྟེ་བཞག །དར་དམར་གྱིས་དགབ། སྟེང་དུ་མེ་ལོང་བཞག་སྟེ་དེ་ལྟར་རྡུལ་ཚོན། བུམ་པ། ཐོད་པ། དར་དམར། མཁའ་འགྲོ་དབང་སྡུད། སིནྡྷུ་ར་སྟེ་དཀྱིལ་འཁོར་དྲུག་པོ་མདུན་ནུབ་ནས་ཤར་དུ་ཕྱོགས་པ་བརྩེགས། སྟེང་དུ་དར་དམར་གྱི་གུར་ཕུབ། མཐའ་མཆོད་པ་དང་ཤ་སྣ་ཚོགས་ཀྱི་གཏོར་མས་བསྐོར་རོ། །འདི་ལ་དར་དམར་ལ་དཀྱིལ་འཁོར་མི་བྱེད་པའང་ཡོད་ཅིང་སྤྱིར་སྒྲུབ་པའི་དུས་དྲུག་བརྩེགས། དབང་བསྐུར་གྱི་དུས་མཁའ་འགྲོ་དབང་སྡུད་མ་གཏོགས་པའི་ལྔ་བརྩེགས། དུས་བཟང་གི་མཆོད་པ་སོགས་ལ་རྡུལ་ཚོན་ཐོད་པ་སིནྡྷུ་ར་སྟེ་སུམ་བརྩེགས་ཀྱིས་ཆོག་གོ །དེ་ལྟར་བཀོད་པ་ཚར་ནས་སྡོད་ཚུལ་ནི། བདེ་བའི་སྟན་ལ་འདུག་ནས་ནི། །ཨོ་རྒྱན་ཕྱོགས་སུ་ཁ་བལྟས་ལ། །ཞེས་པས་རྣལ་འབྱོར་སྟན་ཅི་བདེ་ལ་ཁ་དཀྱིལ་འཁོར་དུ་ཕྱོགས་པས་འཁོད། ལག་མཆོད་རྡོ་རྗེ་དྲིལ་བུ་
ཌཱ་མ་རུ་རྣམས་གཡོན་ནས་རིམ་གྱིས་བགོད་དེ། བཞི་པ་སྒྲུབ་པ་དངོས་ལ་གསུམ། བདག་བསྐྱེད། མདུན་བསྐྱེད། དཀྱིལ་འཁོར་བསྡུ་བའི་ཆོ་གའོ། །དང་པོ་ལ་མཉམ་བཞག་གི་བྱ་བ་དང་། རྗེས་ཐོབ་ཀྱི་བྱ་བ་གཉིས། དང་པོ་ལ་ཡང་སྔོན་འགྲོ་ཚོགས་བསགས་པ་དང་། དངོས་གཞི་བསྒོམ་བཟླས་གཉིས་ལས། དང་པོ་ནི། བྱང་ཆུབ་སེམས་བསྐྱེད་སྔོན་འགྲོ་བས། །དཀྱིལ་འཁོར་ཆོ་གས་མཉེས་པར་བྱ། །ཡི་གེ་གསུམ་གྱིས་རང་ལ་བསྡུ། །ཞེས་པས་ཐོག་མར་བདུད་རྩི་རིལ་བུའམ་ལག་མཆོད་ཀྱི་ཐིགས་པ་ལྕེ་ཐོག་དུ་བཞག་པས་བདུད་རྩི་མྱོང་། སྔོན་འགྲོ་གཏོར་མ་བཏང་། སྲུང་འཁོར་བསྒོམ། མཚམས་གཅད། མཆོད་པ་བྱིན་གྱིས་བརླབ། བླ་མ་དང་རྣལ་འབྱོར་མ་དབྱེར་མེད་པ་སངས་རྒྱས། དེའི་སྙིང་པོ་ལ་སོགས་པ་ཆོས། འཁོར་མཁའ་འགྲོ་མ་རྣམས་དགེ་འདུན་ཏེ་དཀོན་མཆོག་གསུམ་ལ་སྐྱབས་འགྲོ་བྱ། སེམས་བསྐྱེད་བསྒོམ་མོ། །
དེ་ནས་སྤྱི་བོར་པད་ཟླ་ལ་ཧཱུྃ་ལས་རྡོར་སེམས་ཧེ་རུ་ཀ་སྐུ་མདོག་དཀར་པོ། ཕྱག་གཡས་རྡོ་རྗེ་ཐུགས་ཀར་འཛིན་ཅིང་གཡོན་དྲིལ་བུ་སྙེམས་པ་དཀུར་བརྟེན་པ། དར་དང་རུས་པ་དང་རིན་པོ་ཆེས་བརྒྱན་པ། ཞབས་སེམས་སྐྱིལ་གྱིས་བཞུགས་པའི་པང་དུ་ཡུམ་རྡོ་རྗེ་སྙེམས་མ་དཀར་མོ་གྲི་ཐོད་ཅན་གྱིས་འཁྱུད་པ། གཉིས་ཀའི་གནས་གསུམ་དུ་ཡིག་འབྲུ་གསུམ་དང་ཁྱད་པར་ཡབ་ཀྱི་ཐུགས་ཀར་ཟླ་བ་ལ་ཧཱུྃ་གི་མཐར་ཡིག་བརྒྱ་དཀར་པོས་བསྐོར་བ། དེ་ལས་འོད་འཕྲོས་ཡེ་ཤེས་པ་བསྟིམ། ཡང་འོད་ཀྱིས་དབང་ལྷ་སྤྱན་དྲངས། དབང་བསྐུར། བདུད་རྩིས་སྐུ་གང་། དྲི་མ་དག །ཆུ་ལྷག་སྤྱི་བོར་འཁྱིལ་པས་མི་བསྐྱོད་པས་དབུ་བརྒྱན་པར་བསམ། བཅོམ་ལྡན་འདས་བདག་གི་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་མཛད་དུ་གསོལ། ཞེས་གསོལ་བ་བཏབ། སྟོབས་བཞི་དང་ལྡན་པས་ཐུགས་ཀའི་ས་བོན་སྔགས་ཕྲེང་ལ་དམིགས་ཏེ་ཡིག་བརྒྱ་བཟླས་
པས་ཡིག་བརྒྱ་ལས་བདུད་རྩི་བབ། རྡོར་སེམས་ཀྱི་སྐུ་གང་། སྦྱོར་མཚམས་ནས་ལུད་དེ་རང་གི་སྤྱི་བོ་ནས་ཞུགས་པས་སྡིག་སྒྲིབ་ཉེས་ལྟུང་རྣམ་སྨིན་གྱི་ཕུང་པོ་དང་བཅས་པ་དག་ནས་ལུས་འོད་གསལ་བར་བསམ་ཞིང་། མཐར་རྡོར་སེམས་འོད་དུ་ཞུ་ནས་རང་ལ་བསྟིམ་མོ། །འདི་ལྟར་ཡིག་བརྒྱ་འབུམ་བཟླས་པས་རྩ་ལྟུང་འདག་ཅིང་ཉེར་གཅིག་རེ་ཐུན་རེ་ལ་བཟླས་པས་ནི། སྔགས་ཀྱི་ལྟུང་བ་བྱིན་གྱིས་བརླབ་པའོ། །སྤྲོ་ན་ཕུང་ཁམས་སྐྱེ་མཆེད་བྱིན་གྱིས་བརླབ་པ་ནི། རང་ཉིད་རྡོ་རྗེ་རྣལ་འབྱོར་མར་གསལ་བའི་གཟུགས་ཕུང་རྣམ་པར་སྣང་མཛད། ཚོར་བ་རྡོ་རྗེ་ཉི་མ། འདུ་ཤེས་པདྨ་གར་དབང་། འདུ་བྱེད་རྡོ་རྗེ་རྒྱལ་པོ། རྣམ་པར་ཤེས་པ་རྡོ་རྗེ་སེམས་དཔའ། དེ་བཞིན་གཤེགས་པ་ཐམས་ཅད་དབྱེར་མེད་པ་དཔལ་ལྡན་ལྷན་ཅིག་སྐྱེས་མའོ། །མིག་གཏི་མུག་རྡོ་རྗེ། རྣ་བ་ཞེ་སྡང་རྡོ་རྗེ། སྣ་སེར་སྣ་རྡོ་རྗེ། ཁ་འདོད་ཆགས་རྡོ་རྗེ། སྐྱེ་མཆེད་དབང་
ཕྱུག་རྡོ་རྗེ། ས་ཁམས་ལྟུང་བྱེད་མ། ཆུ་ཁམས་གསོད་བྱེད་མ། མེ་ཁམས་འགུགས་བྱེད་མ། རླུང་ཁམས་གར་གྱི་དབང་ཕྱུག་མ། མཁའ་ཁམས་པདྨ་ཅན་གྱི་བདག་ཉིད་དུ་བྱིན་གྱིས་བརླབ་བོ། །དེ་ནས་སྐད་ཅིག་གིས་བཅོམ་ལྡན་འདས་མར་གསལ་བའི་དོན་ཀུན་སྒྲུབ་བྱེད་ཀྱི་འཁོར་ལོའི་ས་བོན་ལས་འོད་ཟེར་སྤྲོས་ཏེ་ཡེ་ཤེས་ཀྱི་འཁོར་ལོ་མདུན་གྱི་ནམ་མཁར་སྤྱན་དྲངས་པ་ལ་ཡན་ལག་བདུན་པས་བསོད་ནམས་ཀྱི་ཚོགས་བསག །མཎྜལ་བྱ། གསོལ་བ་བཏབ་སྟེ། ལྷ་ཚོགས་ཀྱི་ཐུགས་ཀ་ནས་ཡེ་ཤེས་ལྔའི་བདག་ཉིད་འོད་ཟེར་ཁ་དོག་ལྔ་བྱུང་སྟེ་བདག་ཉིད་ཀྱི་དཔྲལ་མགྲིན་སྙིང་ལྟེ་གསང་བ་དང་ལྔར་ཐིམ་པས་དུག་ལྔ་དག །ཡེ་ཤེས་ལྔ་མངོན་དུ་བྱས་ཏེ་མཁའ་འགྲོ་ལྔའི་གོ་འཕང་ཐོབ་པར་བསམ། ༀ་ཨཱཿཧཱུྃ་ཞེས་ཚོགས་ཞིང་རང་ལ་བསྡུ། སེམས་ཅན་ཐམས་ཅད་ལ་དམིགས་ཏེ་ཚད་མེད་པ་བཞི་བསྒོམ་མོ། །དངོས་གཞི་ལ་བསྒོམ་བཟླས་གཉིས་ལས། དང་
པོ་རྟེན་བརྟེན་པ་བསྒོམ་པ་ནི། །བརྟན་དང་གཡོ་བའི་དངོས་པོ་ཀུན། །སྐད་ཅིག་ཙམ་གྱིས་སྟོང་པར་བསྒོམ། །སྟོང་པའི་ངང་ལས་ཡི་གེ་ཧྲཱིཿ །བསྐལ་པའི་མེ་ལྟར་འབར་བའི་འོད། །ཁྲོ་མོ་ཞལ་གཅིག་ཕྱག་གཉིས་མ། །ཛཱ་བ་སིནྡྷུ་ར་དང་མཚུངས། །སྐུའི་འོད་ཟེར་སྟོང་གསུམ་ཁྱབ། །དབུ་སྐྲ་ཐོར་ཚུགས་ཚངས་པར་འཁྱིལ། །སངས་རྒྱས་ལྔ་མཚོན་ཐོད་པས་བརྒྱན། །རྡོ་རྗེ་ཐོད་ཁྲག་ཁ་ཊྭཱཾ་བཅས། །དར་དཔྱངས་ཅོད་པན་རྣམ་པར་འཕུར། །ཕྱག་རྒྱ་ལྔ་ཡི་རྣམ་པར་བརྒྱན། །མི་མགོ་རློན་པའི་དོ་ཤལ་ཅན། །མེ་ཏོག་ཕྲེང་བའི་རྒྱན་གྱིས་སྤྲས། །པདྨ་རོ་དང་ཉི་མའི་གདན། །གཡས་བསྐུམ་གཡོན་བརྐྱང་གར་གྱིས་བཞུགས། །ཆུ་ལས་ཉ་ལྡང་ཇི་བཞིན་དུ། །སྐད་ཅིག་ཙམ་གྱིས་རྫོགས་པར་བསྐྱེད། །ཅེས་པས་སྭ་བྷཱ་ཝའི་སྔགས་ཀྱིས་ཆོས་རྣམས་ཐམས་ཅད་སྟོང་པར་སྦྱང་། སྟོང་པའི་ངང་ལས་སྲུང་འཁོར་གྱི་དབུས་དུ་དུར་ཁྲོད་ཀྱི་ས་གཞི་ཕྱོགས་མཚམས་
བརྒྱད་དུ་ཕྱེ་བ། ཤིང་མེ་ཆུ་སྤྲིན་ཕྱོགས་སྐྱོང་ཞིང་སྐྱོང་སོགས་དུར་ཁྲོད་ཀྱི་མཚན་ཉིད་ཚང་བར་བསྒོམ་པ་ནི་གང་ཟག་ཐ་མ་ལ་མི་རྟག་པ་དང་། འབྲིང་ལ་བདག་མེད་དང་། རབ་ལ་འཁོར་འདས་རོ་སྙོམ་དུ་སྟོན་པའོ། །དེའི་དབུས་སུ་འཁོར་བ་དག་པར་གདན་ཐབས་ཀྱི་ཆོས་འབྱུང་བཏིང་བའི་སྟེང་དུ། མྱང་འདས་དག་པའི་ཁང་ཐབས་ཀྱི་ཆོས་འབྱུང་གཞལ་ཡས་ཁང་དངོས་ནི། སྲིད་པར་མི་གནས་ཤིང་སྲིད་པ་མི་འདོར་བས་རྩ་བ་ཕྲ་བ་ཐུར་དུ་ཟུག་པ། ཁ་གདེང་ཆེ་བ་གྱེན་དུ་བསྟན་པ། ཕྱི་དཀར་ལ་ནང་དམར་བ། ཆོས་ཀྱི་དབྱིངས་ཀྱི་ཁྱོན་དང་མཉམ་པའི་དབུས་སུ་སྣ་ཚོགས་དང་པདྨ་འདབ་མ་བཞི་པའི་ལྟེ་བར་སྐྱེས་པའི་རོ་སེར་པོ་ཚོ་ཞིང་སྣུམ་པ། དབང་པོའི་སྒོ་ནས་ཁྲག་རྒྱུན་འཛག་པ། དྲོད་མ་ཡལ་བ་ཞིག་མགོ་གཡོན་དུ་བསྟན་ཏེ་གན་རྐྱལ་དུ་འགྱེལ་བའི་སྙིང་གར་ཉི་མའི་དཀྱིལ་འཁོར་དམར་ཞིང་ཟླུམ་པའི་སྟེང་དུ། རང་སེམས་འོད་གསལ་བའི་ངོ་བོ་ཡི་གེ་
ཧྲཱིཿདམར་པོ་ར་བཏགས་སྟན་ལ་ཟུག་པ། གི་གུ་ནམ་མཁའ་ལ་ལྡིང་བ། ཚེགས་དྲག་གཉིས་ཀྱིས་བརྟེན་པ། དེ་ལས་འོད་འཕྲོས། སངས་རྒྱས་ཐམས་ཅད་མཆོད། སེམས་ཅན་ཐམས་ཅད་ལ་ཕོག་པས་དེ་ཐམས་ཅད་རྡོ་རྗེ་རྣལ་འབྱོར་མར་གྱུར། དེ་རྣམས་དང་བཅས་ཏེ་འོད་ཟེར་ཚུར་འདུས་ཧྲཱིཿལ་ཐིམ་པས་ཆུ་ལ་ཉ་ལྡང་བ་ལྟར་སྐད་ཅིག་གིས་སྐུར་གྱུར་ཏེ། དེ་ཡང་ཆོས་ཐམས་ཅད་ཆོས་ཀྱི་སྐུར་རོ་གཅིག་པའི་ཕྱིར་ཞལ་གཅིག་དང་ལྡན་པ་ཞེས་པ་ནས་བརྐྱང་བསྐུམ་གྱིས་གར་སྟབས་སུ་བཞུགས་པའོ། །ཞེས་པའི་བར་ཞལ་གདམས་ལྟར་རྣམ་དག་དྲན་པར་བསྒོམ་མོ། །དེ་ནས་ལུས་གནད་བཅས་ཏེ་སྟོང་ར་རྩ་གསུམ་འཁོར་ལོ་བཞི་རྣམས་ཆོས་དྲུག་ལྟར་བསྒོམ། འཁོར་བསྐྱེད་པ་ནི། དེ་ཡི་འཁོར་ལོ་རྣམ་བཞི་ལ། །མཁའ་འགྲོ་སྡེ་བཞི་འཁོར་བཅས་བསྐྱེད། །ཅེས་པས་ལྷ་ཡས་ནས་མར་གསལ་གདབ་པ་ནི། དབུ་མའི་ཡར་སྣེའི་རང་བཞིན་སྤྱི་བོར་
ཐོར་ཚུགས་ཀྱི་ནང་རྡོ་རྗེ་ཕྱེད་པའི་ལྟེ་བ་སྦུབ་སྟོང་གི་ནང་དུ་བླ་མ་རྣམ་སྣང་འཁོར་ལོས་སྒྱུར་བའམ། རྣམ་སྣང་ཧེ་རུ་ཀའི་རྣམ་པས་པད་ཉི་ལ་བཞུགས་པ། དེའི་འཁོར་དང་ཕྱི་རོལ་གྱི་རུས་པའི་འཁོར་ལོའི་སྟེང་དུ་ཡང་བརྒྱུད་པའི་བླ་མ་དང་གྲུབ་ཐོབ་ཀྱི་ཚོགས་སྤྲིན་ལྟར་གཏིབས་པ། འཁོར་ལོའི་དབུས་སོ་སོར་པད་ཉི་རེ་རེར་གནས་པའི་སྤྱི་བོར་བདེ་ཆེན་འཁོར་ལོའི་དབུས་ཀྱི་པད་ཉི་ལ་ཧ་ལས་རྡོ་རྗེ་མཁའ་འགྲོ་མ་སྔོན་མོ་རྡོ་རྗེ་གྲི་ཐོད་ཅན། རྩ་སྒོ་སོ་གཉིས་སུ་འཁོར་རང་འདྲ་རེ། དེ་བཞིན་དུ་ལྟེ་བ་ས་ལས་ལས་ཀྱི་མཁའ་འགྲོ་ལྗང་མོ་རལ་གྲི་གྲི་ཐོད་ཅན། འཁོར་དྲུག་ཅུ་རྩ་བཞིས་བསྐོར་བའི་བར་གཞུང་ལྟར་བསྒོམ། དེ་ནས་གཙོ་བོའི་ནང་གི་གསང་གནས་ཏེ་རྩ་གསུམ་འདུས་མདོར་ཡེ་ཤེས་ཀྱི་མེའི་རང་བཞིན་གྱི་ཆོས་འབྱུང་བསྣོལ་མ་གདན་ཐབས་ཀྱི་དབུས་སུ་པདྨ་འདབ་བཞིའི་ལྟེ་བར་ཉི་མའི་དཀྱིལ་འཁོར་བསམ་མོ། །དེ་ནས་ས་བོན་གྱི་ཡི་གེ་མས་ནས་
ཡར་དགོད་དེ། ཉི་མའི་ལྟེ་བར་ཧྲཱིཿདམར་པོ། དེའི་མཐར། ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཞེས་པའི་སྔགས་ཕྲེང་དམར་པོ་མེ་ལྟ་བུ་ༀ་ནས་གཡས་སུ་འཁོད་དེ་བསྐོར་བ། འདབ་མ་བཞི་ལ་ཧ་རི་ནི་ས། ཁུག་དྲུག་ཏུ་དགའ་འཁྱིལ་དཀར་པོ་གཡོན་དུ་འཁྱིལ་བ་རེ་བསམ། འཁོར་ལོ་བཞིའི་གཙོ་མོའི་ཐུགས་ཀར་པདྨ་རང་མདོག་ཅན་འདབ་བཞིའི་ལྟེ་བར་ཉི་མའི་དཀྱིལ་འཁོར་རེ་བསྒོམ། དེ་ལས་ལྟེ་བའི་ལས་ཀྱི་མཁའ་འགྲོའི་ཐུགས་ཀའི་དབུས་སུ་ས་ཡིག་ལྗང་གུ། འདབ་བཞི་ལ་མདུན་ནས་གཡས་བསྐོར་དུ་ཧྲཱིཿཧ་རི་ནི། འཁོར་རྣམས་ཀྱི་ཐུགས་ཀར་ས་ཡིག་རྐྱང་པ་རེ། སྙིང་གའི་པདྨ་མཁའ་འགྲོའི་ཐུགས་ཀར་ནི་དམར་པོ། འདབ་བཞི་ལ་ཧྲཱིཿཧ་རི་ས། འཁོར་ལ་ནི་རྐྱང་། མགྲིན་པར་རིན་ཆེན་མཁའ་འགྲོའི་ཐུགས་ཀར་རི་སེར་པོ། འདབ་མ་བཞི་ལ་ཧྲཱིཿཧ་ནི་ས། འཁོར་ལ་རི་ཡིག །སྤྱི་བོར་རྡོ་རྗེ་མཁའ་འགྲོ་མའི་ཐུགས་ཀར་ཧ་སྔོན་
པོ། འདབ་མ་བཞི་ལ་ཧྲཱིཿརི་ནི་ས། འཁོར་ལ་ཧ་ཡིག་རེ་བསམ་མོ། །དེ་ལྟར་ལྷ་བསྐྱེད་ཡི་གེ་བཀོད་ནས་ཡེ་ཤེས་པ་གཞུག་པ་དང་དབང་བསྐུར་བའི་ཕྱིར། རང་བཞིན་གནས་པའི་ཕོ་བྲང་ནས། །སྤྱན་དྲངས་གཉིས་སུ་མེད་པར་བསྟིམ། །ཞེས་པས་ས་བོན་གྱི་ཡི་གེ་ཐམས་ཅད་དང་ཁྱད་པར་དོན་ཀུན་སྒྲུབ་བྱེད་ཀྱི་འཁོར་ལོའི་ཡི་གེ་རྣམས་ལས་འོད་ཟེར་འཕྲོས། ཨོ་རྒྱན་གྱི་གནས་ནས་རྡོ་རྗེ་རྣལ་འབྱོར་མ་འཁོར་བཅས་སྤྱན་དྲངས། མདུན་གྱི་ནམ་མཁར་བཞུགས་པ་ལ་སྤྲོ་ན་མཆོད་པ་གསུམ་འབུལ། ཡེ་ཤེས་པའི་སྐུ་ལས་སྐུའི་ཚོགས་བྱོན། དམ་ཚིག་པ་ལ་ཐིམ། སྐུ་དབྱེར་མེད་དུ་བྱས་པ་བུམ་དབང་ངོ་། །ཡེ་ཤེས་པའི་མགྲིན་པ་ནས་ཨཱ་ལི་དཀར་པོ་དང་ཀཱ་ལི་དམར་པོའི་ཚོགས་བྱོན། མགྲིན་པར་ཐིམ། གསུང་དབྱེར་མེད་དུ་བྱས་པ་གསང་དབང་ངོ་། །ཐུགས་ཀ་ནས་ཡེ་ཤེས་ལྔའི་བདུད་རྩི་རྒྱུན་བྱུང་། ཐུགས་ཀར་ཞུགས། བདེ་སྟོང་གི་ཡེ་ཤེས་སྐྱེས་ཏེ་ཐུགས་དབྱེར་
མེད་དུ་བྱས་པ་དབང་གསུམ་པའོ། །དེ་ནས་ཡེ་ཤེས་པ་རྣམས་དམ་ཚིག་པ་ལ་དབྱེར་མེད་དུ་གྱུར་པ་ནི་དབང་བཞི་པའོ། །གཉིས་པ་བཟླས་པ་ནི། དེ་ཡང་རང་རང་ཐུགས་ཀར་ནི། །གསང་སྔགས་ཡི་གེ་བཀོད་བཟླས་བྱ། །ཞེས་པ་འདི་ལ་སྒོ་གསུམ་གྱི་བཟླས་པ་གསུམ་ལས་དང་པོ་ལུས་ཀྱི་བཟླས་པ་ནི། བོ་དྷི་ཙིའམ་ཙནྡན་དམར་པོ་ལ་སོགས་པའི་ཕྲེང་བ་ཕྲེང་ཐག་ཟུང་མ་ཡིན་པ། མདུད་འཛིན་གཉིས་བརྩེགས་ཅན། ལག་མཐིལ་གཡོན་པདྨ་འདབ་མ་གསུམ་པར་བསམ་པའི་དབུས་སུ་སྦྲུལ་འཁྱིལ་པ་ལྟར་བཞག །གཡས་རྡོ་རྗེ་རྩེ་ལྔ་པར་མོས་པས་སྟེང་ནས་བཀབ་སྟེ། ཕྲེང་ཐག་སྙིང་པོའི་སྔགས་ཕྲེང་། ཕྲེང་རྡོག་རྣམས་ས་བོན་སོ་སོའི་ཨཱ་ལི་ཀཱ་ལིའི་ཚོགས་ལས་འཁོར་མཁའ་འགྲོ་ལྔའི་ཚོགས་དང་། མདུད་འཛིན་འོག་མ་རྡོ་རྗེ་རྣལ་འབྱོར་མའི་རྣམ་པ་གཟུགས་སྐུའི་རང་བཞིན་དང་། སྟེང་མ་ཡན་འཁོར་ལོ་སྡོམ་པ་ཆོས་སྐུའི་བདག་ཉིད་དེ་ཁ་
སྦྱོར་གྱི་སྐུ་སངས་རྒྱས་དཀོན་མཆོག་གི་ངོ་བོར་མོས་ཏེ་ཡེ་ཤེས་པ་དཔག་མེད་བསྟིམ། མཆོད་ཅིང་བསྟོད་ནས་ཞུ་བ་ལས་རྣམ་པ་འདུ་བྱེད་དག་པའི་ཐོད་རློན་ལྔ་བཅུ་རྩ་གཅིག་གི་ཕྲེང་བ། ངོ་བོ་སྔགས་ཀྱི་དཀོན་མཆོག་གསུམ་གྱི་བདག་ཉིད་དུ་མོས་ཏེ་མཐེ་བོང་གཡོན་པ་རྡོ་རྗེ་ལྕགས་ཀྱུའི་རྣམ་པས་ཕྲེང་རྡོག་རེ་རེ་ཞིང་རྣལ་འབྱོར་མ་ལྷ་ལྔའི་ངོ་བོར་སྤྱན་དྲངས་ཏེ་ལྟེ་བའི་ཧྲཱིཿལ་ཐིམ་པས་ལྷ་དབང་དུ་གྱུར་པ་བསམ་སྟེ་སོར་མོ་བཞི་སྦྱར་བའི་མཛུབ་མོའི་སྟེང་བགྲང་བར་བྱའོ། །ངག་གི་བཟླས་པ་ནི། སྔགས་དག་ཅིང་གསལ་བས། ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ཧཱུྃ་ཧཱུྃ་ཕཊ་སྭཱ་ཧཱ། ཞེས་སྙིང་པོ་བཟླ་ཞིང་བརྟན་པ་ཐོབ་ནས་གཞུང་ནས་གསུངས་པའི་ལས་སྦྱོར་གྱི་སྔགས། ༀ་བཛྲ་བཻ་རོ་ཙ་ནཱི་ཡེ་ཧ་རི་ནི་ས་ནི་རི་ས་ཧ་ནི་རི་ཧ་ས་ས་ནི་རི་ཧ་ཨཱ་ཀཪྵ་ཡ་ཧྲཱིཿཛཿ ཞེས་བཟླའོ། །སྒོ་གསུམ་ཐུན་མོང་དུ་མི་སྡོད་པ་རྣམ་གསུམ་གྱི་བཟླས་པ་ནི། འོག་རླུང་ཅུང་ཟད་འཐེན་སྟེང་
རླུང་གློད་དེ་ལུས་མི་སྡོད་པ་གཡོ་འགུལ་དང་བཅས་ནས་བཟླ་བ་ནི་ཕྱི་མཁའ་འགྲོ་མའི་སྐུའི་སྲོག་དབང་དུ་བསྡུ་བའོ། །མི་ཚིག་གིས་བར་མ་ཆོད་པར་བཟླ་བ་ནི་ནང་མཁའ་འགྲོ་མའི་གསུང་གི་སྲོག་དབང་དུ་བསྡུ་བའོ། །དང་པོ་དམིགས་པ་ལ་སེམས་རྩེ་གཅིག་ཏུ་སྡུད་ཅིང་མཐར་རྣམ་པར་རྟོག་པ་གཅིག་གིས་ཀྱང་བར་མ་ཆོད་པར་བཟླ་བ་ནི་གསང་བ་མཁའ་འགྲོ་མའི་ཐུགས་ཀྱི་སྲོག་དབང་དུ་བསྡུ་བའོ། །སེམས་ཀྱི་བཟླས་པ་ལ་ཐུན་མོང་དང་ཐུན་མོང་མ་ཡིན་པ་གཉིས་ལས་ཐུན་མོང་གི་བཟླས་པ་ནི། དོན་ཀུན་སྒྲུབ་བྱེད་ཀྱི་འཁོར་ལོའི་དབུས་ཀྱི་ལྟེ་བའི་ཧྲཱིཿལས་འོད་ཟེར་དམར་པོ་སྤྲོས་ཏེ་སྣོད་བཅུད་སྦྱངས། སྐུ་གསུང་ཐུགས་ཀྱི་བྱིན་རླབས་བསྡུས་ནས་རང་དང་ས་བོན་ལ་བསྟིམ་ཞིང་ལུས་ངག་ཡིད་གསུམ་མི་སྡོད་པ་གསུམ་གྱིས་བཟླའོ། །ཐུན་མོང་མ་ཡིན་པའི་བཟླས་པ་ལྔ་སྟེ། སྐུ་གསལ་གདབ་ཀྱི་བཟླས་པ། འགོག་བཟླས་ཆུང་ངུ་། སྤྲོ་བསྡུའི་
བཟླས་པ། རྡོ་རྗེའི་བཟླས་པ། འགོག་བཟླས་ཆེན་པོའོ། །དང་པོ་ནི། དང་པོར་དོན་ཀུན་སྒྲུབ་བྱེད་ཀྱི་འཁོར་ལོའི་དབུས་ཀྱི་ཧྲཱིཿཡིག་ལ་རྩེ་གཅིག་ཏུ་དམིགས་ཏེ་བཟླ། དེ་ནས་རིམ་བཞིན་སྔགས་ཕྲེང་། ཉི་མའི་དཀྱིལ་འཁོར། ཟེའུ་འབྲུ་གེ་སར། ས་བོན་བཞི། འདབ་མ་བཞི། དགའ་འཁྱིལ་དྲུག །ཆོས་འབྱུང་བསྣོལ་མ་དམར་ལ་ཚ་བ། རོ་རྐྱང་གི་མར་སྣེ་དབུ་མར་ཆུད་པ། དབུ་མའི་མར་སྣེ་རག་དུང་གི་ཁ་ལྟར་ཡངས་པ། དབུ་མའི་ནང་ལྟེ་བའི་ལས་ཀྱི་མཁའ་འགྲོའི་ཐུགས་ཀའི་ས་ཡིག་ལྗང་གུ། ཉི་མ། ཟེའུ་འབྲུ་གེ་སར། ཤར་གྱི་ཧྲཱིཿ ལྷོའི་ཧ། ནུབ་ཀྱི་རི། བྱང་གི་ནི། འདབ་མ་བཞི། ལས་ཀྱི་མཁའ་འགྲོའི་སྤྱི་བོར་རྡོ་རྗེ་ཕྱེད་པ། ཐོར་ཚུགས། འཁོར་ལོ། ཐོད་ཕྲེང་གི་དབུ་རྒྱན། ཞལ་རས། ཕྱག་གཉིས། ཕྱག་མཚན། སྐུ་སྟོད། སྐུ་སྨད། ཞབས་བརྐྱང་བསྐུམ་གྱིས་བཞེངས་པ། རུས་པའི་རྒྱན་ལྔ། ཉི་གདན། རོ་སེར་པོ། པདྨ། འཁོར་རྣམས་ཀྱི་ཐུགས་ཀའི་
ས་ཡིག །འཁོར་སོ་སོ། ལྟེ་བའི་རྩ་འཁོར་འདབ་མ་རེ་བཞི་པ་གདུགས་འདེགས་སམ་པདྨ་ལྟར་ཁ་གྱེན་བསྟན་སོགས་རིམ་པ་བཞིན་སྤྱི་བོའི་རྡོ་རྗེ་མཁའ་འགྲོའི་བར་དང་། གཙུག་ཏོར་གྱི་ཐད་དུ་བླ་མ་རྣམ་སྣང་དུ་བཞུགས་པ། དེའི་འཁོར་གྲུབ་ཐོབ་ཀྱི་ཚོགས། གཙུག་ཏོར་གྱི་ཕྱི་དབྱིབས་རྡོ་རྗེ་རྩེ་ལྔ་པ་ཕྱེད་པའི་རྣམ་པ། དབུ་སྐྲ་ནག་ལ་སྣུམ་པ། ཕྱེད་གྱེན་དུ་བརྫེས་ཏེ་འཁོར་ལོའི་ལྟེ་བ་ནས་དྲངས་ཏེ་རལ་པའི་ཅོད་པན་དུ་བྱས་པ། ལྷག་མ་རྒྱབ་ཏུ་སིལ་བུར་གྲོལ་བ། མི་རུས་ཀྱི་འཁོར་ལོ་རྩིབས་དྲུག་པ་ཕྱི་མུ་ཁྱུད་མེད་པ། སྐྲ་མཚམས་སུ་རྡོ་རྗེ་ནག་པོ་ཆུར་ཉལ་བའི་ཕྲེང་བ་བསྒྲིགས་པ། དེའི་སྟེང་དུ་ཐོད་པ་སྐམ་པོ་དཀར་ལ་འཚེར་བ་ཕེཾ་གྱི་སྒྲ་སྒྲོགས་པ་ལྔས་དབུ་བརྒྱན་པ། དེའི་སྟེང་དུ་ལྷ་མིའི་རིན་པོ་ཆེ་སྣ་ཚོགས་ཀྱི་རྩེ་བྲན་ཅན། ཐོད་སྐམ་གྱི་ཁ་ནས་རུས་པའི་ཟ་ར་ཚགས་དྲྭ་བ་དྲྭ་ཕྱེད་དུ་འཕྱང་བ། འཁོར་ལོའི་རྩིབས་དང་དབུ་རྒྱན་གྱི་རྩེ་རུས་
པའི་ཕྲེང་བས་སྦྲེལ་བ། དབུ་སྐྲ་འཆིང་བའི་དར་དཔྱངས་ཕན་ཚུན་དུ་རླུང་གིས་བསྐྱོད་པ། སྐུ་མདོག་མེ་དང་སིནྡྷུ་ར་ལྟར་དམར་ཞིང་བསྐལ་པའི་མེ་འོད་འཕྲོ་བས་བརྟན་གཡོ་ཐམས་ཅད་རྡོ་ཁབ་ལེན་གྱིས་ལྕགས་ཕྱེ་དང་རྡུལ་འདྲེས་པ་ལ་བཏབ་པ་ལྟར་གཡོ་ཞིང་བཅུད་འཕྲོག་པ། ཞལ་རས་ཉི་མའི་དཀྱིལ་འཁོར་ལྟར་རྒྱས་ཤིང་དམར་བ། སྤྱན་གསུམ་དམར་ཞིང་གཡོ་བ། དཔྲལ་བའི་དབྱེས་ཡངས་པ། སྨིན་མ་ནག་ཅིང་འཁྱུག་པ། ཤངས་དཀྱུས་རིང་ཞིང་མཛེས་པ། མཁུར་ཚོས་རྒྱས་ཤིང་ཁྲག་གིས་ལྕི་བ། ཞལ་མཆུ་སྒྲོས་མཛེས་ཤིང་ཡིད་དུ་འོང་བ། ཚེམས་དཀར་ཞིང་ཐག་བཟང་བ་བཞི་བཅུ་ཚང་བ། ཁྱད་པར་མཆེ་བ་བཞི་དཀར་ཟླུམ་རྣོ་ལ་ཅུང་ཟད་གཙིགས་ཏེ་ཡས་ཀྱི་མཆེ་བས་མ་མཆུ་ནོན་ཙམ་པ། ལྗགས་དམར་ཞིང་སྲབ་ལ་ཡང་བ་ཡ་རྐན་ལ་དྲིལ་ཏེ་ཧྲཱིཿདང་ཕེཾ་གྱི་སྒྲ་འབྲུག་ལྟར་སྒྲོགས་པ། སྙན་གཉིས་སྙན་ཤལ་རིང་པོར་འཕྱང་ཞིང་སྙན་རྒྱན་གྱིས་མཛེས་
པ། མགུལ་པ་འཇམ་ཞིང་མགུལ་རྒྱན་གྱིས་བཀྲ་བ། སྐུ་སྟོད་སེང་གེའི་རྒྱལ་པོ་ལྟར་ཁོ་ལག་ཡངས་ཤིང་བརྟན་པ། ཟླུམ་ཞིང་འབུར་བའི་ནུ་འབུར་ཟུང་ཟླ་བ་ལྟར་རྒྱས་པ། པདྨའི་སྡོང་བུ་ལྟར་འཇམ་ཞིང་མཉེན་པའི་ཕྱག་གཉིས་ཀྱི་མཐིལ་དམར་ཞིང་འཇམ་ལ་སོར་མོ་དྲྭ་བས་འབྲེལ་བ་ཅན། ཕྱག་གདུབ་དང་དཔུང་གདུབ་དང་སོར་གདུབ་ཀྱིས་མཛེས་པའི་ཕྱག་གཡས་པས་རྡོ་རྗེའི་གྲི་གུག །ཕྱག་གཡོན་པས་སྐྱེས་པའི་ཐོད་ཆེན་ཆ་གཅིག་པ་ལྷ་མིན་གྱི་ཁྲག་གིས་བཀང་སྟེ་རྦ་རླབས་འཁྱིལ་པ་ཞལ་དུ་གསོལ་བཞིན་པ། གྲུ་མོ་གཡོན་གྱི་ནང་དུ་ཁ་ཊྭཱཾ་ག་རྩེར་རྡོ་རྗེ་ཕྱེད་པ་དང་བར་དུ་མི་མགོ་སྐམ་རྙིང་རློན་པ་བརྩེགས་པའི་འོག་ཏུ་བདུད་རྩིའི་བུམ་པ་དང་རྡོ་རྗེ་རྒྱ་གྲམ་ལས་དར་དཔྱངས་དང་དྲིལ་བུ་དང་ཌཱ་མ་རུ་འཕྱང་བ། ཡུ་བ་བརྒྱད་བཞོགས་སམ་འབྱུང་བ་རིམ་བརྩེགས་ཀྱི་ཚུལ་དུ་མར་སྣེར་རྡོ་རྗེ་ཕྱེད་པ་ཅན་རོའི་ལྟེ་བའི་ཁུང་བུར་ཟུག་ཅིང་སྐུ་ཚད་
དང་དཔངས་མཉམ་པ། སྐེད་པ་ཕྲ་ཤིང་ལྡེམ་པ་ལ་རུས་པ་དང་རིན་པོ་ཆེའི་སྐ་རགས་དྲིལ་བུ་གཡེར་ཁ་འཁྲོལ་བས་བརྒྱན་པ། སྐུ་སྨད་རྒྱས་ཤིང་སྒེག་པ་བཅུད་ཀྱིས་གང་བ། །བརླ་ཟུང་ཆུ་ཤིང་ལྟར་སྲ་ཞིང་ཟླུམ་ལ་འདྲིལ་བ། བྱིན་པ་རི་དྭགས་ཨཻ་ཎི་ཡཱི་བྱིན་པ་ལྟར་ཟླུམ་ཞིང་བྱིན་གྱིས་ཕྲ་བ། ཞབས་ལོང་བུ་མི་མངོན་ལ་མཐིལ་མཉམ་ཞིང་དམར་ལ་རྟིང་པ་ཡངས་ཤིང་ཞབས་སོར་རྣམས་དྲྭ་བས་འབྲེལ་བ་དང་ལྡན་པ། ཞབས་གདུབ་ཀྱིས་མཛེས་པའི་ཞབས་གཡས་བསྐུམ་སྟེ་ཁ་ཊྭཱཾ་ག་ལ་འཁྱུད་ནས་གཡོན་པའི་བརླ་ལ་ཞབས་སོར་གཏད་པ། གཡོན་བརྐྱང་པས་རོའི་སྙིང་གའི་ཉི་མའི་དཀྱིལ་འཁོར་ལ་ཞབས་ཀྱིས་བྲང་ལ་རེག་ཙམ་པས་གར་སྟབས་ལིང་ལིང་བྱེད་བཞིན་པ་ལྟ་བུ། སེམས་བྱུང་གི་རྟོག་པའི་རང་བཞིན་མི་མགོ་རློན་པ་ཁྲག་འཛག་བཞིན་པ་ལྔ་བཅུ་རྩ་གཅིག་གི་དོ་ཤལ་འཕྱང་བ། མེ་ཏོག་ཀ་ར་བཱི་ར་དམར་པོའི་ཕྲེང་བ་དང་རུས་པ་དང་རིན་པོ་ཆེའི་དོ་
ཤལ་གྱི་ཚོགས་དུ་མས་བརྒྱན་པ། གདན་ཉི་མའི་དཀྱིལ་འཁོར་དམར་ཟླུམ་ཚ་ཞིང་འོད་ཟེར་འཕྲོ་བ། དེའི་འོག་གི་སྐྱེས་པའི་རོ་སེར་པོ་ཚོ་ཞིང་སྣུམ་པ་གཞོན་ཤིང་ཡིད་དུ་འོང་བ། ཕྱི་དབུགས་ཆད་པ་ནང་དབུགས་མ་ཆད་པ་དྲོད་མ་ཡལ་བ་དབང་པོའི་སྒོ་ནས་ཁྲག་རྒྱུན་འཛག་པ་མགོ་བོ་གཡོན་དུ་བསྟན་པ་གན་རྐྱལ་དུ་བསྒྱེལ་བ། གདན་པདྨའི་ཟེའུ་འབྲུ་དམར་པོ་གེ་སར་དམར་སེར། འདབ་བཞི་ཕྱོགས་མདོག །སྡོང་བུ་འདབ་མ་དང་བཅས་པ། ཁང་ཐབས་ཀྱི་ཆོས་འབྱུང་ཟུར་གསུམ་པ་རྩ་བ་ཕྲ་བ་ཐུར་དུ་ཟུག་པ་གདེངས་ཀ་ཆེ་བ་གྱེན་དུ་བསྟན་པ་ཕྱི་དཀར་ཞིང་ནང་ཐམས་ཅད་འོད་ཀྱི་རང་བཞིན་དམར་བ་རྒྱ་ཚད་ཆོས་ཀྱི་དབྱིངས་དང་མཉམ་པ། འོག་ཏུ་གདན་ཐབས་ཀྱི་ཆོས་འབྱུང་པདྨ་རཱ་གའི་ས་གཞི་ལྟ་བུ་དམར་ཞིང་འོད་འཕྲོ་བ། ཕྱི་རོལ་གྱི་ཕྱོགས་མཚམས་བརྒྱད་དུ་ཤཱིཪྵ་ལ་སོགས་ཤིང་ཆེན་པོ་བརྒྱད། ཤིང་དེའི་རྩ་བར་བརྒྱ་བྱིན་སོགས་ཕྱོགས་
སྐྱོང་བརྒྱད། ཤིང་གི་ལོ་མའི་དབུས་ནས་ལུས་ཕྱེད་ཐོན་པའི་ཞིང་སྐྱོང་བརྒྱད། གྲུབ་པའི་རི་བརྒྱད། རྩེར་མཆོད་རྟེན་བརྒྱད། ལོགས་སུ་དངོས་གྲུབ་ཀྱི་ཕུག་ལ་བརྟེན་པའི་གྲུབ་པའི་རྣལ་འབྱོར་པ་བརྒྱད། ཆུ་བོ་ཆེན་པོ་བརྒྱད། དེ་ལ་བརྟེན་པའི་ཀླུ་ཆེན་པོ་བརྒྱད། སྟེང་དུ་འབྲུག་སྒྲོགས་ཤིང་ཆར་འབེབས་པའི་སྤྲིན་བརྒྱད། གཞན་ཡང་མེ་ཆེན་པོ་དང་ཤ་ཟ་དང་སྲིན་པོ་དང་འབྱུང་པོ་དང་རོ་ལངས་དང་རོ་གསར་རྙིང་གིས་ཁྱབ་པའི་དུར་ཁྲོད་ཆེན་པོ་བརྒྱད། དེ་ནས་འོག་རྡོ་རྗེའི་ས་གཞི་སྲ་ཞིང་ལྷུན་སྟུག་པ་རྒྱ་རྔམ་ཚད་མེད་པ། ལོགས་རྡོ་རྗེའི་དྲྭ་བ་འཐུག་ཅིང་སྲ་ལ་ཡངས་པ། སྟེང་རྡོ་རྗེའི་གུར་དང་བླ་རེས་སྲ་ཞིང་དཔངས་མཐོ་ལ་ནང་ཡངས་པ། ཕྱི་རོལ་ཐམས་ཅད་རྡོ་རྗེའི་འོད་ཟེར་མེ་ལྕེ་གཅིག་ཏུ་འཁྱིལ་བ། སྒོ་མཚམས་ཀྱི་ལྷ་མོ་ཉི་ཟེར་གྱི་རྡུལ་གྲངས་ལྟ་བུས་སྲུང་འཁོར་གྱི་ཕྱི་ནང་ཐམས་ཅད་ལང་ལོང་དུ་གོ་མཚམས་མེད་པར་ཁྱབ་པས་བསྲུང་བཟློག་གི་ལས་
ལ་བརྩོན་པའི་བར་དུ་རེ་རེ་ཞིང་གསལ་བཏབ་སྟེ་གསལ་ཞིང་དྲག་ལ་ཡུན་ཐུང་བར་བསྒོམ་ཞིང་བཟླ་བ་ནི་ནང་ནས་ཕྱིར་གསལ་གདབ་པའོ། །ཡང་སྒོ་མཚམས་ཀྱི་ལྷ་མོ་ནས་ལྟེ་བའི་ཧྲཱིཿའི་བར་སྔར་ལྟ་བུ་ལས་ཚུར་རིམ་གྱིས་གསལ་བཏབ་ཅིང་བཟླ་བ་ནི་ཕྱི་ནས་ནང་དུ་གསལ་གདབ་པའོ། །ལས་དང་པོ་སྐུ་སྤྱི་ལ་དམིགས་མི་ནུས་པ་ཡིན་ན། དང་པོ་ནང་གི་ཡི་གེ་རྣམས་ཁོ་ན་ལ་འོག་ནས་སྟེང་དང་སྟེང་ནས་འོག་ཏུ་གསལ་གཏབ་ཅིང་བཟླ་བ་ལ་ཡི་གེ་གསལ་གདབ་ཅེས་བྱ་ཞིང་། ཕྱིས་གོམས་ནས་སྔར་བསྟན་པ་ལྟར་བསྒོམ་པ་ལ་སྐུ་གསལ་གདབ་ཅེས་བྱ། དེ་རྣམས་ཀྱིས་དམིགས་པ་གསལ་ཞིང་ལས་སུ་རུང་ལ་རྣམ་རྟོག་གི་གཉེན་པོར་འགྱུར་རོ། །གཉིས་པ་འགོག་བཟླས་ཆུང་ངུ་ནི། དེས་དམིགས་པ་གར་གཏད་དུ་སེམས་ཟིན་པའི་ཚེ། དོན་ཀུན་སྒྲུབ་བྱེད་ཀྱི་འཁོར་ལོའི་ཧྲཱིཿལ་སེམས་རྩེ་གཅིག་དུ་ཀློད་དེ་བཟླ་ཞིང་། དེ་བཞིན་དུ་དོན་
སྒྲུབ་འཁོར་ལོ་ཚང་བ་དང་། འཁོར་ལོ་སོ་སོའི་ལྷ་འཁོར་བཅས་དང་། སྤྱི་བོའི་བླ་མ་དང་། སྐུ་ཡོངས་རྫོགས་དང་། རྟེན་བརྟེན་པའི་དཀྱིལ་འཁོར་ཚང་མའི་བར་གྱི་གང་གསལ་རེར་རྩེ་གཅིག་ཏུ་བཞག་སྟེ་བཟླ་ཞིང་། སྐབས་སུ་དམིགས་པ་སྤོ་ལ་བྱིང་རྒོད་སོགས་བྱུང་ན་སྐུ་གསལ་གདབ་ཀྱི་བཟླས་པ་བྱས་པས་སེལ་ལོ། །འདིས་ནི་རླུང་དང་རྟོག་པ་འགོག་ནུས་པའི་ཕྱིར་འགོག་བཟླས་ཡིན་ལ་རྟོག་པའི་སྒོམ་པ་དང་ཅུང་ཟད་འདྲེས་པའི་འགོག་བཟླས་ཆུང་ངུའོ། །འདི་གཉིས་ཀྱིས་ཡུལ་ཡུལ་ཅན་གྱི་གཡོ་བ་འཆིང་ཞིང་བསམ་གཏན་གྱི་ཡན་ལག་འགྲུབ་པ་སོ་སོར་བསམ་དང་ཆོས་མཚུངས་སོ། །གསུམ་པ་སྤྲོ་བསྡུའི་བཟླས་པ་ནི། དེ་ནས་རླུང་དང་རྟོག་པ་དབྱེར་མེད་པ་འཆིང་བའི་ཕྱིར་དང་པོར་འཁོར་ལོའི་དབུས་ཀྱི་སྔགས་ཕྲེང་ཧྲཱིཿལ་བསྐོར་བའི་ཚུལ་དུ་གཡོན་དུ་གུ་ལུ་ལུ་འགྲོ་བར་བསམ། དེ་ནས་རིམ་གྱིས་ཇེ་དམར་ཇེ་ཚ་ཇེ་མགྱོགས་སུ་སོང་སྟེ་མེ་འབར་
ལ་ཁད་པར་གཡོན་དུ་དྲག་ཏུ་འཁོར་ཞིང་སྔགས་དེ་རྣམས་ལས་དུ་བའི་ཚུལ་དུ་འོད་དཀར་པོ་སྤོས་རིང་ལས་དུ་བ་ཐོན་པ་ལྟར་སྐྱ་ཐོལ་ཐོལ་བྱུང་། སྔགས་ཕྲེང་གི་སྟེང་གི་ནམ་མཁར་འོད་དེ་རྣམས་ཕན་ཚུན་འབྲེལ་བས་དངུལ་གྱི་ཨ་ལོང་སྲུབས་མེད་པ་ལྟ་བུའི་འོད་ཀོར་དུ་གྱུར་ཏེ་སྔགས་ཕྲེང་དང་འོད་ཀོར་གཉིས་གཡོན་དུ་དྲག་ཏུ་འཁོར་བ་ལ་དམིགས་ཏེ་བཟླ་བ་ནི་སྤྲོ་བསྡུའི་གཞི་འཛིན་པའོ། །སྤྲོ་བསྡུ་དངོས་ལ་རྩ་གཡོན་ལམ་སྦྱོང་བ། གཡས་ལམ་སྦྱོང་བ། དབུ་མ་ནས་དྲང་བ་སྟེ་གསུམ། དེ་རེ་རེ་ལའང་སྟེང་སྤྲོ་སྟེང་སྡུད། སྟེང་སྤྲོ་འོག་སྡུད། འོག་སྤྲོ་སྟེང་སྡུད། འོག་སྤྲོ་འོག་སྡུད་དེ་བཞི་བཞི་ཡོད་པས་དམིགས་པ་བཅུ་གཉིས། དེ་རེ་རེ་ལ་འོད་དཀར་པོ་དང་། དཀར་དམར་དང་། དམར་པོ་དང་། སྔགས་ཕྲེང་སྟེ་བཞིར་བསྒྱུར་བས་དམིགས་པ་བཞི་བཅུ་རྩ་བརྒྱད་དུ་འགྱུར་རོ། །དེ་ཡང་འོད་ཀོར་དེའི་གཡོན་ངོ་ནས་གཡོན་རྐྱང་མ་ཟླ་བའི་
རླུང་སེམས་ཀྱི་ངོ་བོ་འོད་སྐུད་དཀར་པོ་དངུལ་གྱི་སྐུད་པ་ལྟ་བུ་ནར་གྱིས་བྱུང་། ཐུར་དུ་ལྷུང་། རྐྱང་མའི་མར་སྣེ་ནས་ཞུགས་གྱེན་དུ་སོང་། སྤྱི་བོའི་ཐད་ནས་ཐུར་དུ་བྱུང་སྟེ་སྣ་བུག་གཡོན་ནས་ཐོན། སྨིན་མཚམས་ཀྱི་ནམ་མཁའ་སོར་བཅུ་དྲུག་གི་སར་དགའ་འཁྱིལ་དཀར་པོ་ཡོལ་ཐབས་སུ་གཡོན་དུ་འཁོར་བར་གྱུར། དེ་ལས་འོད་འཕྲོས་སེམས་ཅན་ཐམས་ཅད་ཀྱི་ལུས་དག་པར་བྱས། སངས་རྒྱས་ཐམས་ཅད་ཀྱི་སྐུའི་བྱིན་རླབས་འོད་དཀར་པོར་བསྡུས། དགའ་འཁྱིལ་ལ་ཐིམ་པས་འོད་སྐུད་དུ་གྱུར་ཏེ་སྣ་བུག་གཡོན་ནས་ཞུགས། རྐྱང་མ་བརྒྱུད་དེ་འོད་ཀོར་རིམ་བཞིན་སྔགས་ཕྲེང་ཧྲཱིཿབཅས་ལ་ཐིམ། སྐུའི་བྱིན་རླབས་ཞུགས་པར་བསམ་ཞིང་བཟླ་བ་ནི་སྟེང་སྤྲོ་སྟེང་སྡུད་དོ། །གཞན་དེ་ལྟ་བུ་ལས་དགའ་འཁྱིལ་འོད་སྐུད་དུ་གྱུར་པའི་ཚེ་འོད་སྐུད་ཐུར་དུ་སོང་། གསང་བའི་སྒོ་ནས་ཞུགས། སྔགས་ཕྲེང་དང་ཧྲཱིཿལ་ཐིམ་པ་ནི་སྟེང་སྤྲོ་འོག་སྡུད་དོ། །ཡང་ནང་གི་འོད་
ཀོར་གྱི་གཡོན་ངོས་ནས་འོད་སྐུད་ཐུར་དུ་ལྷུང་། དབུ་མའི་མར་སྣ་ནས་ཐོན། གསང་གནས་ཀྱི་སྒོ་ནས་ཕྱིར་བྱུང་། ཞབས་གཡས་ཀྱི་རྟིང་པའི་ཐད་སོར་བཅུ་དྲུག་གི་ནམ་མཁར་དགའ་འཁྱིལ་དཀར་པོ་གདན་ཐབས་སུ་གཡོན་དུ་འཁོར་བར་གྱུར། འོད་སྤྲོ་བསྡུ་སྔར་བཞིན་ལ། དགའ་འཁྱིལ་འོད་སྐུད་དུ་གྱུར་པའི་ཚེ་འོད་སྐུད་གྱེན་དུ་བྱུང་སྟེ་སྣ་གཡོན་ནས་འཇུག་ཅིང་ཐིམ་པ་ནི་འོག་སྤྲོ་སྟེང་སྡུད་དང་། འོད་སྐུད་གསང་གནས་ཉིད་ནས་ཞུགས་སྟེ་ཐིམ་པ་ནི་འོག་སྤྲོ་འོག་སྡུད་ཅེས་བྱའོ། །དེ་བཞིན་དུ་འོད་ཀོར་གྱི་གཡས་ངོས་ནས་རོ་མ་ཉི་མའི་རླུང་སེམས་ཀྱི་རང་བཞིན་འོད་སྐུད་ལྷུང་། རོ་མའི་མར་སྣ་ནས་ཞུགས་ཤིང་སྣ་བུག་གཡས་ནས་སྤྲོས་ཏེ་དགའ་འཁྱིལ་དུ་གྱུར་ཅིང་སེམས་ཅན་གྱི་ངག་སྦྱངས། གསུང་གི་བྱིན་རླབས་བསྡུས་ཏེ་སླར་ཐིམ་པ་སོགས་ཀྱིས་གཡས་ལམ་སྦྱོང་བའི་དམིགས་པ་བཞིའོ། །འོད་ཀོར་དེའི་ཆ་ཐམས་ཅད་ནས་སྤོས་རེང་
ལས་དུ་བ་ཐོན་པ་ལྟར་དབུ་མ་སྒྲ་གཅན་གྱི་རླུང་སེམས་ཀྱི་རང་བཞིན་འོད་སྐུད་གྱེན་དུ་དབུ་མའི་ཡངས་པ་ལ་བྱ་མཁར་བརྩེགས་པ་ལྟར་འཁྱིལ་ཞིང་འཁོར། ཕྲ་ས་ནས་མདའ་འཕངས་པ་ལྟར་གྱེན་དུ་ཕྱུར་གྱིས་བྱུང་། ལས་ཀྱི་མཁའ་འགྲོའི་གཙོ་མོའི་གསང་བ་ནས་ཞུགས། ས་ཡིག་ལ་གཡོན་སྐོར་ལན་གསུམ་བྱས་པས་ལས་ཀྱི་མཁའ་འགྲོའི་ལྷ་ཚོགས་ཐམས་ཅད་མཉེས་ཏེ་བདེ་སྟོང་དུ་འུར་འུར་འདུག །སྔགས་ཀྱི་སྒྲ་འབྲུག་ལྟར་སྒྲོགས་པར་བསམ་ཞིང་བཟླ། ལས་ཀྱི་མཁའ་འགྲོའི་སྤྱི་བོ་ནས་ཐོན་ཏེ། སྙིང་ག །མགྲིན་པ། སྤྱི་བོའི་ལྷ་ལ་ཡང་དེ་ལྟར་བྱ། དེ་ནས་གྱེན་དུ་སོང་། དབུ་མ་ནས་ཐོན་ཏེ་རྡོ་རྗེ་ཕྱེད་པའི་ནང་གི་བླ་མ་ལ་གཡོན་བསྐོར་ལན་གསུམ་བྱས་པས་དམ་ཚིག་ཉམས་ཆགས་དག །བདེ་སྟེང་གིས་མཉེས་ཏེ་བྱིན་གྱིས་བརླབས་པར་བསམ། སླར་འཐུར་དུ་བྱུང་སྟེ་སྨིན་མཚམས་ནས་ཐོན་ཏེ་སོར་བཅུ་དྲུག་གི་སར་དགའ་འཁྱིལ་དུ་གྱུར། དེ་ལས་
འོད་འཕྲོས་སེམས་ཅན་གྱི་སེམས་སྦྱངས། སངས་རྒྱས་ཐམས་ཅད་ཀྱི་ཐུགས་ཀྱི་བྱིན་རླབས་བསྡུས་ཏེ་བསྟིམ། དགའ་འཁྱིལ་འོད་སྐུད་དུ་གྱུར། སྨིན་མཚམས་ནས་ཞུགས། གྱེན་དུ་སོང་ནས་བླ་མའི་སྐུ་ལ་གཡོན་བསྐོར་ལན་གསུམ་སོགས་སྔ་མ་གོ་ལྡོག་པས་མར་ལོག །གཞིའི་རླུང་སེམས་དབྱེར་མེད་པའི་སྔགས་ཕྲེང་ས་བོན་ནམ་འོད་ཀོར་ལ་བསྟིམ་ཞིང་ཐུགས་ཀྱི་བྱིན་རླབས་ཞུགས་པར་བསམས་ཏེ་བཟླ། དེ་བཞིན་དུ་གཞན་འདྲ་བ་ལ། དགའ་འཁྱིལ་འོད་སྐུད་དུ་གྱུར་ཚེ་གསང་གནས་ནས་ཞུགས་ཏེ་ཐིམ་པས་དབུ་མའི་སྟེང་སྤྲོ་འོག་སྡུད་དང་། འོད་ཀོར་གྱི་ཆ་ཐམས་ཅད་ནས་སྤྲོས་ཏེ་འོད་སྐུད་ཐུར་དུ་ལྷུང་། དབུ་མའི་མར་སྣ་དང་གསང་གནས་ནས་ཕྱུང་སྟེ་སོར་བཅུ་དྲུག་གི་སར་དགའ་འཁྱིལ་གདན་ཐབས་སུ་འཁོར་བར་གྱུར། འོད་སྤྲོ་བསྡུ་བྱས། འོད་སྐུད་དུ་གྱུར་ཚེ་གྱེན་དུ་སོང་། སྨིན་མཚམས་ནས་ཞུགས་པ་སོགས་སྔར་ལྟར་བྱས་པས་དབུ་
མའི་འོག་སྤྲོ་སྟེང་སྡུད་དང་། གསང་གནས་ཉིད་ནས་ཞུགས་ནས་ཐིམ་པས་དབུ་མའི་འོག་སྤྲོ་འོག་སྡུད་དོ། །དེ་ལྟར་འོད་ཀོར་འོད་སྐུད་དགའ་འཁྱིལ་འོད་ཟེར་རྣམས་དཀར་པོ་ལ་བརྟེན་ནས་དམིགས་པ་བཅུ་གཉིས་སོ། །དེ་ནས་བརྟན་པ་ཅུང་ཟད་ཐོབ་པ་ན་དེ་ཐམས་ཅད་དཀར་ལ་དམར་བའི་མདངས་ཆགས་པར་བསྒྱུར་ནས་དམིགས་པ་བཅུ་གཉིས་སོ། །དེ་ནས་བརྟན་པ་ཅུང་ཟད་ཐོབ་ནས་དེ་ཐམས་ཅད་ལ་དམར་བའི་མདངས་ཆགས་པར་བསྒྱུར་ནས་དམིགས་པ་བཅུ་གཉིས་བྱའོ། །བརྟན་པ་དེ་བས་ཆེར་ཐོབ་ནས་དེ་ཐམས་ཅད་མེ་འོད་ལྟ་བུ་དམར་ཞིང་ཚ་ལ་འབར་བར་བསྒྱུར་ནས་དམིགས་པ་བཅུ་གཉིས་བྱའོ། །མཚན་མ་ལེགས་པར་རྙེད་ཅིང་བརྟན་པ་ཆེར་ཐོབ་ནས་འོད་ཀོར་གྱི་འོད་སྐུད་དགའ་འཁྱིལ་འོད་ཟེར་བཞི་ཀའང་འོད་དུ་མི་བྱེད་པར་སྔགས་ཕྲེང་གི་འཁོར་ལོ། སྔགས་ཕྲེང་མདའ་ཡི་ཤུགས་ལྟ་བུ། སྔགས་ཕྲེང་ཚར་བཞིའམ་གཉིས་སམ་མང་པོ་
ལས་གྲུབ་པའི་དགའ་འཁྱིལ། སྔགས་ཀྱི་ཡིག་འབྲུ་བྱེ་མ་གཏོར་བ་ལྟ་བུ་སྟེ་བཞི་ཀའང་ངོ་བོ་རླུང་དང་སེམས་ཐ་མི་དད་པ། རྣམ་པ་སྔགས་ཁ་དོག་དམར་བ་རེག་བྱ་ཚ་བ་འོད་གསལ་བ་མེ་ལྟ་བུ་ཤ་སྟག་ཏུ་བྱས་པའི་དམིགས་པ་བཅུ་གཉིས་བསྒོམ་མོ། །འདི་རྣམས་ཀྱིས་རླུང་སེམས་ཅུང་ཟད་ལས་སུ་རུང་སྟེ་སྲོག་རྩོལ་དབུ་མར་ཚུད་པས་བདེ་སྟོང་གི་མྱོང་བ་ཅི་རིགས་སྐྱེ་བར་འགྱུར་རོ། །བཞི་པ་རྡོ་རྗེའི་བཟླས་པ་ནི། རླུང་རོ་ལེགས་པར་བསལ། འཇམ་རླུང་ཁ་སྦྱོར་དུ་བཟུང་། ལྟོ་བར་དགང་། དབུ་མར་གཞིལ། མི་ཐུབ་ན་མདའ་ལྟར་འཕངས་པའི་སྦྱོར་བ་བཞི་དང་ལྡན་པས་བུམ་པ་ཅན་དུ་འཆིང་། སྔར་གྱི་གཞིའི་སྔགས་ཕྲེང་འཁོར་བ་ལ་དམིགས་པའི་བུམ་ཅན་བདུན། སྟེང་དུ་སྔར་གོང་དུ་སྤྲོས་པའི་འོད་ཀོར་དཀར་པོ་གསལ་བཏབ་ནས། དེ་གཡོན་དུ་དྲག་ཏུ་འཁོར་བཞིན་པས་བུམ་ཅན་བདུན། དགའ་འཁྱིལ་དྲུག་པོ་རང་གནས་སུ་གཡོན་དུ་
འཁོར་བ་ལ་དམིགས་ནས་བུམ་ཅན་བདུན། ཆོས་འབྱུང་བསྣོལ་མ་ཡང་གཡོན་དུ་འཁོར་ཞིང་དེ་ལས་དགའ་འཁྱིལ་དྲུག་མགྱོགས་པར་འཁོར། དེ་ལས་སྔགས་ཕྲེང་མགྱོགས། དེ་ལས་འོད་ཀོར་མགྱོགས་པར་གཡོན་དུ་དྲག་ཏུ་འཁོར་བར་དམིགས་ཏེ་ཡིད་ཀྱིས་བཟླ་ནུས་ན་ལེགས། མ་ནུས་ཀྱང་རླུང་སྲོག་རྩོལ་བཅིང་སྟེ་སྔགས་ཕྲེང་སོགས་བསྐོར་བ་འདི་ཉིད་བཟླས་པ་ཡིན་ནོ། །དེ་ལྟར་བུམ་ཅན་ཉི་ཤུ་རྩ་བརྒྱད་ཀྱིས་རྡོར་བཟླས་ཚར་གཅིག་སྟེ་ཡང་སྔར་བཞིན་བྱའོ། །འདི་ནི་འོད་ཀོར་ཐབས་ཧཾ་ཡིག་གི་ངོ་བོ། སྔགས་ཕྲེང་གཏུམ་མོ་ཨ་ཐུང་གི་ངོ་བོ་དང་། དགའ་འཁྱིལ་དྲུག་ཐབས་དཀར་ཆ། ཆོས་འབྱུང་ཤེས་རབ་དམར་ཆ་སྟེ་ཐབས་ཤེས་སུ་གནས་ལ་འབར་ཞུའི་རྣལ་འབྱོར་རྣམ་པ་གཞན་དུ་བསྒྱུར་བ་སྟེ་བྱང་ཆུབ་ཀྱི་སེམས་མི་འཕོ་བར་བརྟན་པ་འཛིན་པའི་ཡན་ལག་ཡིན་ནོ། །ལྔ་པ་འགོག་བཟླས་ཆེན་པོ་ནི། ཞལ་གདམས་ལས། སེམས་རྣམ་པར་མི་རྟོག་པར་
ཆོས་ཉིད་ཀྱི་དོན་ལ་མཉམ་པར་བཞག་པ་ནི། ནང་ཐུགས་ཀྱི་སྲོག་དབང་དུ་བསྡུ་བའོ། །ཞེས་གསུངས་པའི་མི་སྡོད་པ་གསུམ་གྱི་བཟླས་རིམ་དང་པོ། ལུས་སྣང་ལྷ་སྐུ་སྣང་སྟོང་དབྱེར་མེད་ཕྱག་རྒྱ་ཆེན་པོ། ངག་གྲགས་སྟོང་སྔགས་ཀྱི་སྒྲ་དབྱངས་བྲག་ཆ་ལྟ་བུ། སེམས་རིག་སྟོང་འོད་གསལ་གཞི་རྩ་དང་བྲལ་བ་ཆོས་ཉིད་ཕྱག་རྒྱ་ཆེན་པོ་ལས་གཡོ་བ་མེད་པར་བཞག་ནས་བཟླ་བ་སྟེ། དབང་པོ་ཡང་རབ་ཡིན་ན་བཟླས་རིམ་འདི་ཁོ་ན་ལ་དང་པོ་ཉིད་ནས་འཇུག་ནུས་པས་དེ་ལྟར་འཇུག་པ་གཞུང་ཞལ་གདམས་ཀྱི་དགོངས་པ་དངོས་ཡིན་ལ། དེ་ལྟར་མི་ནུས་པའི་ལས་དང་པོ་ལ་བཟླས་རིམ་སྔ་མ་བཞིས་རིམ་གྱིས་དཀྲི་དགོས་པ་ཡིན་ནོ། །དེ་ནས་ཐུན་གྱི་མཐར་ལག་མཆོད་བྱས་ཏེ། བདུད་རྩིའི་ཐིགས་པ་ཕྱི་རོལ་དུ་འཐོར་བས་བགེགས་དང་མ་དག་པ་ཚར་བཅད་ནས་མཁའ་འགྲོ་མའི་དྲྭ་གུར་དུ་བསམ་པ་ནི་གནས་སྲུང་བའོ། །བདག་ཉིད་ལ་
འཐོར་བས་བ་སྤུའི་ཁུང་བུ་ཐམས་ཅད་མཁའ་འགྲོ་མས་གང་བར་བསམ་པ་ནི་བདག་སྲུང་བའོ། །མཆོད་རྫས་ལ་གཏོར་བས་བདུད་རྩིར་བསམ་པ་ནི་རྣལ་འབྱོར་སྲུང་བ་སྟེ་སྲུང་བ་རྣམ་པ་གསུམ་མོ། །དེ་ནས་མཐེབ་སྲིན་གྱིས་བདུད་རྩི་བླངས་ཏེ་སྨིན་མཚམས་ནས་རྩ་བརྒྱུད་ཀྱི་བླ་མ་དང་། སྙིང་ག་ནས་ཡི་དམ་ཆོས་སྐྱོང་། པུས་མོ་གཡོན་གྱི་ཐད་ནས་གཞི་བདག་དང་རིགས་དྲུག་ལྷར་གསལ་བ་ལ་ཡི་གེ་གསུམ་གྱིས་འབུལ་ཞིང་མཐར་ཐིགས་པ་ལྕེ་ཐོག་ཏུ་མྱོང་བས་ལུས་དཀྱིལ་གྱི་ལྷ་མཉེས་པར་བྱའོ། །དེ་ནས་མཆོད་བཞི་བསྟོད་བཞིས་མཆོད་བསྟོད་ཅི་རིགས་བྱ། གཏོར་མ་བྱིན་གྱིས་བརླབས་ཏེ་མདུན་བསྐྱེད་ཡོད་ན་དེ་ལ་འབུལ་ཞིང་། མེད་ན་གཏོར་མགྲོན་སྔགས་དང་འབར་བའི་ཕྱག་རྒྱས་སྤྱན་དྲངས་པ་ལ་གཏོར་ཆོག་ལྟར་འབུལ་ཞིང་། ཁ་ཁ་ཁཱ་ཧི་སོགས་དང་། ༀ་ཧྲིཾ་ཧྲིཾ་སོགས་དང་། ཞིང་སྐྱོང་ཆེན་པོ་བརྒྱད་རྣམས་དང་། །སོགས་ཀྱིས་མཁའ་འགྲོ་སྤྱི་
གཏོར་བཏང་། མགྲོན་བསྡུ་བའམ་གཤེགས་རྗེས་གཏང་རག་གི་མཆོད་བསྟོད་ཅུང་ཟད་བྱ། ཡིག་བརྒྱ་བརྗོད། མ་འབྱོར་པ་དང་སོགས་ཀྱིས་ནོངས་པ་བཟོད་པར་གསོལ་ཏེ་སྒྲུབ་པའི་དུས་སྲུང་འཁོར་མ་གཏོགས་སྣོད་བཅུད་སྐད་ཅིག་གིས་བསྡུས་ནས་བདག་ཉིད་དང་། དེ་འདུས་མདོའི་ཧྲཱིཿདང་། དེ་ཡང་ནཱ་ད་དང་། དེ་སྟོང་ཉིད་དུ་ཡལ་བ་ལ་བཞག །སྐད་ཅིག་གིས་སྒྱུ་མ་ལྟ་བུའི་སྐུ་རྟེན་དང་བརྟེན་པར་བཅས་པར་ལྡང་ངོ་། །གཉིས་པ་རྗེས་ཐོབ་ཀྱི་བྱ་བ་ནི། སྣོད་ནུབ་ཕྱོགས་ཨོ་རྒྱན་གྱི་ཡུལ་ཆོས་འབྱུང་གི་གཞལ་ཡས་ཁང་དང་བཅས་པར་བསམ། བཅུད་ཀྱི་སེམས་ཅན་ཐམས་ཅད་རྡོ་རྗེ་རྣལ་འབྱོར་མ་རིགས་ལྔར་བསམ། སྒྲ་ཐམས་ཅད་བཻ་རོ་ཙ་ནཱིའི་སྔགས་སུ་མོས། རང་ཉིད་ལྷའི་ང་རྒྱལ་དང་མ་བྲལ་བས་བཟའ་བཏུང་རྣམས་བདུད་རྩིར་བྱིན་གྱིས་བརླབས་ཏེ་ཚོགས་འཁོར་དུ་ལོངས་སྤྱོད། གོས་ཞིང་ཆེན་གྱི་པགས་པ་དང་། རྒྱན་རུས་རྒྱན།
གདན་པདྨ་རོ་དང་ཉི་མ། གནས་ཁང་ཆོས་འབྱུང་གི་ཁང་པ་བྱས་ཏེ་ལོངས་སྤྱོད། ཉལ་བའི་ཚེ་སྣོད་བཅུད་ཧྲཱིཿལ་བསྡུས་ཏེ་ཉལ་བའམ་ཧྲཱིཿཡལ་བར་བྱས་ཏེ་ཉལ། ལྡང་བའི་ཚེ་ནམ་མཁའ་ནས་རྡོ་རྗེ་རྣལ་འབྱོར་མའི་ཚོགས་ཀྱིས་ཌཱ་མ་རུ་དང་སྔགས་ཀྱི་སྒྲས་བསླངས་པར་བསམ་ལ་ལྡང་ཞིང་སླར་ཡང་ཐུན་གྱི་བྱ་བ་ལ་འཇུག་པ་སྟེ། འདི་ལྟར་དབང་རྣོན་གྱིས་ཐུན་གཉིས། འབྲིང་གིས་ཐུན་བཞི། ཐ་མས་ཐུན་དྲུག་ཏུ་ཉམས་སུ་བླང་ཞིང་རེ་རེའི་མཐའ་འམ་ཡང་ན་ཕྱི་མའི་མཐར་འོག་ནས་འབྱུང་བའི་མདུན་བསྐྱེད་བུམ་བསྐྱེད་ཀྱང་ཅི་རིགས་བྱའོ། །སྔགས་ཀྱི་ཕན་ཡོན་ནི། །འབྱུང་བཞི་དབང་སྡུད་ཡི་གེ་བཞི། །སྡེ་བཞི་མཁའ་འགྲོ་གསང་བའི་གནད། །འདོད་དགུ་འབྱུང་བའི་སྔགས་སུ་བཤད། །ཅེས་སྙིང་པོ་སྤྱི་དང་ཁྱད་པར་ཧ་རི་ནི་ས་ནི་དངོས་གྲུབ་མཐའ་དག་འབྱུང་བའི་སྔགས་ཡིན་ནོ། །བསྙེན་ཚད་ནི། །གྲངས་ཀྱི་བསྙེན་པ་འབུམ་ཕྲག་ལྔས། །ཐ་མལ་ཤེས་པ་སྒྱུར་བར་
ནུས། །ཟླ་བ་དྲུག་ཏུ་བཟླས་པ་ཡིས། །འཁྲུལ་པའི་རྟོག་པ་ཟད་པར་འགྱུར། །ཞེས་གྲངས་བསྙེན་དང་དུས་བསྙེན་གསུངས་ཤིང་། འོག་ནས། འབར་བ་གསུམ་དང་ཚུགས་པ་གསུམ། །འདུ་བ་གསུམ་དང་དྲོད་གསུམ་ཐོབ། །ཤེས་པ་གཏིང་ནས་ལྷོངས་པ་དང་། །ཡུལ་སེམས་གཉིས་འཛིན་མེད་པ་དང་། །ཞེས་པ་སྐབས་འདིར་མཚན་མའི་བསྙེན་པར་ལེན་པ་ཞལ་གདམས་ཀྱི་དགོངས་པའོ། །བསྙེན་ཚད་དེ་རྣམས་ཀྱང་གང་ཟག་གི་དབང་པོའི་རིམ་པར་ཞལ་གདམས་ལས་གསུངས་ཏེ། ཇི་སྐད་དུ། དེ་ལ་དུས་ཀྱི་བསྙེན་པ་ནི་རབ་ཟླ་བ་གསུམ། འབྲིང་ལྔ། ཐ་མ་ཡང་བདུན་གྱིས་འགྲུབ་པར་འགྱུར་རོ། །གྲངས་ནི་རབ་འབུམ་ཚོ་ལྔ ། འབྲིང་བཅུ། ཐ་མ་ཡང་བཅོ་ལྔས་འགྲུབ་པར་འགྱུར་རོ། །ཞེས་གསུངས་སོ། །མཚན་མ་ལ་གཉིས་ལས། ལས་དང་པོ་པའི་མཚན་མ་ནི། ཞལ་གདམས་དང་པོར། མ་དང་སྲིང་མོ་ལ་སོགས་པའམ། བུ་མོ་དང་བུད་
མེད་ཆས་བཟང་པོ་དང་ལྡན་པ་རྣམས་ཀྱིས་གླུ་ལེན་པ་དང་ཤོན་རྩེ་བ་དང་། ཕྱག་དང་བསྐོར་བ་བྱེད་པ་དང་བཟའ་བཏུང་འདྲེན་པ་དང་བག་ཕེབས་པ་ནི་ཉེ་བའི་རྟགས་ཡིན་ནོ། །ཕོ་མོ་འདྲེས་མར་བྱུང་ན་ཆོ་འཕྲུལ་སྟོན་པ་ཡིན་པས་ཏིང་ངེ་འཛིན་སྤར་རོ། །ཕོ་ཉི་ཚེ་བྱུང་ན་རྒྱལ་པོའི་བར་ཆད་ཡིན་པས་བདུད་རྩི་ལྔའི་སྦྱིན་སྲེག་བྱ་ཞིང་དགེ་སྦྱོར་དྲག་ཏུ་བྱའོ། །ཞེས་སོགས་གསུངས་པས། བུ་མོ་རྒྱན་ཅན་གྱིས་བཟའ་བཏུང་སྟེར་བ་སོགས་དངོས་ཉམས་རྨི་ལམ་དུ་སྣང་ན་དངོས་གྲུབ་ཉེ་བའི་རྟགས་ཡིན་ལ། ཕོ་མོ་འདྲེས་མར་བྱུང་ན་རིག་པ་ངར་བསྐྱེད། བསྒོམ་བཟླས་ལ་འབད། ཕོ་འབའ་ཞིག་བྱུང་ན་བདུད་རྩི་ལྔའི་སྦྱིན་སྲེག་དངོས་སམ། མ་འབྱོར་ན་ཡང་བསྲེག་རྫས་རྣམས་བདུད་རྩི་ལྔས་སྦགས་པས་སྦྱིན་སྲེག་བྱ། སྤྲང་མོར་བྱུང་ན་ཚོགས་གཏོར་ལ་འབད། ཡུག་ས་མོར་བྱུང་ན་རྐྱེན་ཟློག་དང་རིམ་གྲོ་བྱ། མཛེ་མོར་བྱུང་ན་དམ་ཚིག་བཤགས་པ་དང་ཚོགས་འཁོར་བྱ།
ཕྱིར་བསྐྱེད་ནས་འདུག་ན་སྒྲུབ་པ་ལ་བརྩོན་འགྲུས་བསྐྱེད། ཤོ་རེ་མར་བྱུང་ན་ཕྱིས་གསང་བ་མི་བསྒྲག་ཅིང་བསྒྲགས་པར་བཤགས་པ་བྱའོ། །ཁྱད་པར་གྱི་ལྟས་ནི། ཞལ་གདམས་ལས། མཁའ་འགྲོ་མ་རྣམས་ཀྱིས་ཆོས་གསུངས་པ་དང་། ལུང་སྟོན་པ་དང་། སྐུ་མཐོང་བ་དང་། ཌཱ་མ་རུའི་སྒྲ་གྲགས་པ་དང་། ཆང་གི་རྒྱུན་འབབས་པ་དང་། ཉིན་མོ་མིའི་འདུ་བ་དང་། མཚན་མོ་མཁའ་འགྲོ་འདུ་བ་དང་། ནང་ནུབ་ཟས་འདུ་བ་དང་། ལུས་ལ་བདེ་བ་འབར་བ་དང་། ངག་ལ་ནུས་པ་འབར་བ་དང་། སེམས་ལ་རྟོགས་པ་འབར་བས་རང་གཞན་གྱི་ལུས་ངག་ཡིད་གསུམ་བྱིན་གྱིས་རློབས་ནུས་པ་དང་། སྡུག་བསྔལ་ལ་བསྲན་ཚུགས་པ་དང་། ཉམས་ལ་ཡན་ཚུགས་པ་དང་། གདམས་ངག་ལ་རང་བྱན་ཚུགས་པ་འོང་། ཕྱིའི་དྲོད་ལུས་ཡོད་དུ་མི་ཚོར་བ་དང་། ནང་གི་དྲོད་དབུགས་རྒྱུ་བ་མི་ཚོར་བ་དང་། གསང་བའི་དྲོད་རྟོགས་པ་ལ་གསལ་འགྲིབ་མེད་པ་
སོགས་འབྱུང་བར་འགྱུར་རོ། །དེ་དག་ནི་ཁྱད་པར་གྱི་རྟགས་ཐོབ་པའོ། །ཞེས་གསུངས་པ་ཉིད་དོ། །གཉིས་པ་མདུན་བསྐྱེད་བསྒྲུབ་པ་ནི། ཞལ་གདམས་ཀྱི་དགོངས་པས། དེ་དབུས་ཧྲཱིཿལས་གྱུར་པ་ཡི། །བདུད་བཞི་ལས་རྒྱལ་ཁྲོ་མོར་བསྐྱེད། །ཕྱོགས་ཀྱི་པདྨ་འདབ་བཞི་ལ། །འབྱུང་བཞི་བསྐྱེད་པའི་ས་བོན་ལས། །མཁའ་འགྲོ་སྡེ་བཞི་འཁོར་བཅས་བསྐྱེད། །ཅེས་གོང་དུ་གསུངས་པ་འདིར་བླངས་ནས་བདུད་རྩི་དང་བིགྷྣཱན་གྱིས་རྡུལ་ཚོན་གྱི་དཀྱིལ་འཁོར་གྱི་བགེགས་བསངས། སྭ་བྷཱ་ཝས་སྦྱང་། སྟོང་པའི་ངང་ལས་མདུན་གྱི་ནམ་མཁར་སྲུང་བའི་འཁོར་ལོ་དུར་ཁྲོད་དང་བཅས་པའི་དབུས་སུ་ཨེ་ལས་གདན་ཐབས་དང་ཁང་ཐབས་ཀྱི་ཆོས་འབྱུང་གདན་པད་རོ་ཉི་མའི་བར་སྔར་དང་འདྲ་བ་ལས། ཉི་མའི་སྟེང་དུ་ས་བོན་ཧྲཱིཿདམར་པོ་བསམ་སྟེ་འཕྲོ་འདུ་ལས་གཙོ་མོའི་སྐུ་རྫོགས་པར་བསྒོམ། འདབ་མ་བཞི་ལ་ཧ་རི་ནི་ས་སོ་སོ་ལས་འཁོར་ལོ་སོ་སོ་བསྒོམ།
གཙོ་མོ་ལ་དོན་ཀུན་སྒྲུབ་བྱེད་ཀྱི་འཁོར་ལོ་དང་འཁོར་བཞིའི་ཐུགས་ཀར་ཧ་རི་ནི་ས་བཀོད། དེའི་འོད་ཀྱིས་ཡེ་ཤེས་པ་སྤྱན་དྲངས་ཏེ་བྱོན་ལེགས་དང་གདན་ཕུལ་ནས་ཕྱི་ནང་གསང་བས་མཆོད། ཅུང་ཟད་བསྟོད་ནས་དེ་རྣམས་ཀྱི་ལས་ཞེས་སོགས་ཀྱིས་དབང་བསྐུར་ནས་མཐར་དམ་ཡེ་དབྱེར་མེད་དུ་བསྟིམ་མོ། །དེ་ནས་སྐུ་གསུང་ཐུགས་ཡོན་ཏན་ཕྲིན་ལས་གསུམ་བརྒྱུད་ཀྱི་བཟླས་པ་ནི། བདག་བསྐྱེད་ཀྱི་སྐུའི་དཔྲལ་བ་ནས་སྐུའི་འོད་ཟེར་དཀར་པོ་འཕྲོས། མདུན་བསྐྱེད་ཀྱི་དཔྲལ་བར་ཐིམ། མདུན་བསྐྱེད་གཙོ་འཁོར་ཀྱི་དཔྲལ་བ་ནས་སྐུའི་འོད་ཟེར་དཀར་པོ་འཕྲོས། ཕྱོགས་བཅུའི་སངས་རྒྱས་བྱང་སེམས་ཐམས་ཅད་ཀྱི་དཔྲལ་བར་ཐིམ་པས་དེ་རྣམས་ཀྱི་སྐུའི་ཡོན་ཏན་དང་ནུས་མཐུ་དང་བྱིན་རླབས་ཐམས་ཅད་འོད་ཟེར་དཀར་པོའི་རྣམ་པར་བྱོན། མདུན་བསྐྱེད་གཙོ་འཁོར་གྱི་དཔྲལ་བར་ཐིམ་པས་མདུན་བསྐྱེད་གཙོ་འཁོར་གྱི་སྐུའི་བྱིན་
རླབས་ཐམས་ཅད་བསྡུས་ཏེ་དཔྲལ་བ་ནས་འོད་དཀར་པོའི་རྣམ་པར་ཚུར་བྱོན། རང་གི་དཔྲལ་བར་ཐིམ་པས་སྐུའི་བྱིན་རླབས་ཐམས་ཅད་ཐོབ་སྟེ་སངས་རྒྱས་ཐམས་ཅད་ཀྱི་སྐུའི་བདག་ཉིད་ངའོ་ཞེས་ང་རྒྱལ་བརྟན་པས་སྔགས་བཟླའོ། །དེ་བཞིན་དུ་མགྲིན་པ་ནས་འོད་ཟེར་དམར་པོས་གསུང་སུམ་བརྒྱུད། ཐུགས་ཀ་ནས་སྔོན་པོས་ཐུགས་སུམ་བརྒྱུད། ལྟེ་བ་ནས་སེར་པོས་ཡོན་ཏན་སུམ་བརྒྱུད། གསང་བ་ནས་ལྗང་གུས་ཕྲིན་ལས་སུམ་བརྒྱུད་ཀྱི་བཟླས་པ་བྱའོ། །དེ་ནས་མཆོད་བཞི་བསྟོད་བཞི་དང་ཚོགས་གཏོར་འབུལ་བ་སོགས་བྱའོ། །སྤྱིར་སྒྲུབ་ཚུལ་གསུམ་ལས་བདག་བསྐྱེད་གཙོ་བོར་བསྒྲུབ་ན། བདག་བསྐྱེད་ཀྱི་ཐུན་རེ་རེའི་མཐའ་འམ། ཐུན་གཉིས་ཀྱི་མཐའ་འམ། ཡང་ན་ཐུན་ཕྱི་མའི་མཐར་མདུན་བསྐྱེད་ཀྱི་བསྒོམ་བཟླས་བྱེད་ཅིང་བདག་བསྐྱེད་ཀྱི་གཞལ་ཡས་ཁང་གི་ནང་དུ་མདུན་བསྐྱེད་ཀྱི་སྲུང་འཁོར་སོགས་ཚུད་པར་བསྒོམ་ལ། མདུན་བསྐྱེད་
གཙོ་བོར་བསྒྲུབ་པའི་ཚེ་ཐུན་རེ་རེའི་མགོའམ། ཐུན་དང་པོའི་མགོར་བདག་བསྐྱེད་ཀྱི་བསྒོམ་བཟླས་བྱེད་ལ་བདག་བསྐྱེད་ཀྱི་སྲུང་འཁོར་སོགས་ཀྱང་མདུན་བསྐྱེད་ཀྱི་ཆོས་འབྱུང་གི་ནང་དུ་ཚུད་པར་བྱས་ནས་ཕལ་ཆེར་མདུན་བསྐྱེད་ཉིད་བསྒྲུབ་བོ། །ཆ་མཉམ་དུ་བསྒྲུབ་པའི་ཚེ་གཞལ་ཡས་ཁང་ཐ་དད་པའམ། ཡང་ན་བདག་བསྐྱེད་བསྡུས་ནས་མདུན་བསྐྱེད་དུ་ན་འཕོ་བས་ཐུན་རེ་བཞིན་ཐུན་སྟོད་བདག་བསྐྱེད་ཐུན་སྨད་མདུན་བསྐྱེད་དུ་བསྒྲུབ་པར་གསུངས་ལ། སྤྱིར་དང་པོ་བདག་བསྐྱེད་གཙོ་བོར་བསྒྲུབ། གྲངས་བསྙེན་ཙམ་ཐེམས་ནས་ཆ་མཉམ་དང་བདུད་རྩི་བསྒྲུབ་པ་སོགས་ལ་མདུན་བསྐྱེད་གཙོ་ཆེ་བར་བསྒྲུབ་ཅིང་། བརྟན་པ་ལེགས་པར་ཐོབ་ནས་བདག་མདུན་དང་མཉམ་རྗེས་སོགས་ཐ་དད་པ་མེད་པར་བསྐྱེད་རྫོགས་དབྱེར་མེད་ཀྱིས་བསྒྲུབ་པའོ། །གསུམ་པ་བུམ་སོགས་བསྒྲུབ་པ་ནི། བཅུ་གཉིས་པ་དབང་བསྐུར་གྱི་ཞལ་གདམས་ལས་
གསུངས་པ་ལྟར་བྱ་སྟེ། བུམ་སོགས་བསངས་སྦྱངས་བྱས་ནས། བྷྲཱུྃ་ལས་བྱུང་བའི་བུམ་པ་དམར་པོ་མཚན་ཉིད་དང་ལྡན་པའི་དབུས་སུ་ཆོས་འབྱུང་གི་གཞལ་ཡས་ཁང་དང་བརྟེན་པ་ལྷ་ལྔ་བསྐྱེད་ལ་ས་བོན་རྣམས་དགོད། སིནྡྷུ་རའི་མཎྜལ་གྱི་སྟེང་དུ་ཧྲཱིཿཡིག་དམར་པོ་ཚོན་གང་བ་བསམ། ས་བོན་རྣམས་ཀྱི་འོད་ཀྱིས་དཀྱིལ་འཁོར་གྱི་ལྷ་ཚོགས་ཐམས་ཅད་འཁོར་ལོ་སྡོམ་པ་ཡབ་ཡུམ་གྱི་རྣམ་པས་སྟེང་གི་ནམ་མཁའ་ཁྱབ་པར་སྤྱན་དྲངས་ཏེ་སྦྱོར་མཚམས་ནས་བདུད་རྩིའི་རྒྱུན་བབ་པས་ཧྲཱིཿཡིག་ལ་རྒྱུན་མི་འཆད་པར་ཐིམ་ཞིང་ཧྲཱིཿཡིག་དེ་ལྕི་ཞིང་སྣུམ་པས་བདུད་རྩིའི་རྒྱུན་བབ་སྟེ་སིནྡྷུ་རའི་མཎྜལ་གང་། ཕྱིར་ལུད་པས་མཁའ་འགྲོ་དབང་སྡུད་ཀྱི་འཁོར་ལོ་གང་། སླར་ཡང་ལུད་པས་དར་དམར་གྱི་དཀྱིལ་འཁོར་གང་། དེ་ནས་ཀྱང་ལུད་པས་ཐོད་པ་གང་། སླར་ལུད་པས་བུམ་པ་གང་ཞིང་མཐར་བུམ་ཐོད་ཀྱི་རྟེན་བརྟེན་པ་ཡང་བདུད་རྩི་ཞུ་བར་བསམ་ཞིང་སིནྡྷུ་
རའི་མཎྜལ་གྱི་སྟེང་དུ་གཟུངས་ཐག་རྡོ་རྗེ་བཞག་ལ་གཟུངས་ཐག་བཟུང་ནས་བཟླས་པ་བྱའོ། །བདུད་རྩི་རིལ་བུའམ་སྨན་དུ་བསྒྲུབ་ན་འདི་ཁོ་ན་གཙོ་བོར་བྱེད་ལ། ཐོད་པའི་རྫས་ཁོལ་ཞིང་ཕྱུར་བ་དང་དྲི་བཟང་པོ་བྲོ་བ་དང་མང་དུ་འཕེལ་བ་སོགས་ནི་དངོས་གྲུབ་ཀྱི་ལྟས་ཡིན་ལ། དྲོ་བ་དང་དུ་བ་དང་འབར་བ་གསུམ་ནི་དངོས་གྲུབ་ཐ་མ་དང་འབྲིང་དང་མཆོག་གི་མཚན་མའོ། །སྤྱིར་ལས་དང་པོ་པ་ཅུང་ཟད་དབང་པོ་བརྟུལ་བ་ཡིན་ན་དང་པོར་བསྙེན་པའི་དོད་དུ་དཀྱིལ་འཁོར་མ་བྱས་པར་བདག་བསྐྱེད་རྐྱང་པ་བསྒྲུབས་ནས་ཕྱིས་དཀྱིལ་འཁོར་དང་བཅས་པའི་བསྒྲུབ་པ་བྱ་ལ། དཀྱིལ་འཁོར་དང་བཅས་པའི་སྒྲུབ་པའི་ཚེ་ནི་མཐར་སྒྲུབ་པ་གྲོལ་ཁར་བདག་འཇུག་བརྒྱ་སྟོང་སོགས་བླང་ངོ་། །བཞི་པ་དཀྱིལ་འཁོར་བསྡུ་བ་ནི། བུམ་ཆུ་དབང་གི་དུས་སུ་དངོས་གྲུབ་དུ་བླང་། སིནྡྷུ་རའི་མེ་ལོང་ཕྱི་ནང་གི་མཎྜལ་མཐའ་ནས་བསྡུས་ཏེ་ལྟེ་བ་དང་སྙིང་
གར་བྱུག །ལྷག་མ་ཟ་མ་ཏོག་ཏུ་བཅང་། ཐོད་པའི་བཅུད་ནང་མཆོད་ཡིན་ན་དངོས་གྲུབ་ཏུ་བཏུང་ཞིང་སྨན་ནམ་རིལ་བུ་ཡིན་ན་གྲུབ་ནས་ཕུད་བླ་མ་ལ་འབུལ་ཞིང་ཆ་གཅིག་སྒྲུབ་པའི་གྲོགས་ལ་སྦྱིན། ལྷག་མ་རིལ་བུ་ཡུངས་ཀར་གྱི་འབྲུ་ཙམ་བྱས་པ་ནང་རེ་བཞིན་མྱོང་། ཐོད་པར་སིནྡྷུ་རའི་མེ་ལོང་དང་བཅས་པ་དར་དམར་དཀྱིལ་འཁོར་ཅན་དེས་དྲིལ་ཏེ་འགྲོ་ན་མཆན་འོག་གམ་སྡོད་ན་དབེན་པར་བཅང་། རྡུལ་ཚོན་གྱི་དཀྱིལ་འཁོར་མཐའ་ནས་འོད་དུ་ཞུ་བར་བསམ་སྟེ་ཁྱམས་ཀྱི་བར་ཕྱི་ནས་ནང་དུ་ཕྱགས་ནས་ཁང་ཐབས་ཀྱི་ཆོས་འབྱུང་གི་སྟེང་དུ་དྲི་ཞིམ་པའི་ཤིང་དམར་པོས་ཆོས་འབྱུང་གི་དབྱིབས་རྒྱའི་ཕྱེད་ཀྱི་དཔངས་སུ་བརྩིགས། ལྷ་མཚན་སོགས་ལ་མ་གནོད་པར་ཤིང་དྲི་ཞིམ་པོས་ཅུང་ཟད་བཀང་། དགེ་འདུན་གྱི་ཚང་མང་གི་མེའམ། རྒྱལ་པོའི་མེ་སོགས་ཀྱིས་སྦར་ཏེ་དབུས་སུ་གཞག །དཀྱིལ་འཁོར་གྱི་ལྷ་ཡེ་ཤེས་ཀྱི་མེ་ལྷར་བཞུགས་པ་ལ་སྨན་སྣ་འབྲུ་
སྣ་རིན་པོ་ཆེ་སྣ་ཚོགས་དྲི་སྣ་ཚོགས་སོགས་བདུད་རྩིས་སྦགས་པ་ཡེ་ཤེས་ཀྱི་བདུད་རྩིར་བསམ་ནས་ཞལ་དང་ཕྱག་ཏུ་ཕུལ་བར་བསམ་སྟེ། གཡོན་གྱི་མཐེབ་སྲིན་ནམ་བླུགས་གཟར་གྱིས་འབུལ་ཞིང་སྙིང་པོའི་སྔགས་ལ་འབྲུ་གསུམ་བཏགས་པ་བརྗོད། དེ་བཞིན་དུ་མར་ཁུ་དང་ཞལ་ཟས་སྣ་ཚོགས་དང་བཏུང་བ་སྣ་ཚོགས་དང་གཏོར་མ་ཡང་ཐབ་ཏུ་དབུལ། མཆོད་བཞི་བསྟོད་བཞི་བྱ། འདོད་དོན་ལ་གསོལ་བ་གདབ། འདི་ནི་སྒྲུབ་པའི་མཐའ་བསྡུ་བའི་སྦྱིན་སྲེག་བྱ་སླ་ཞིང་ཚེགས་ཆུང་བ་སྟེ། གལ་ཏེ་སྤྲོས་པ་ལ་དགའ་ན་ནི་བྲི་ཐབ་བམ་བྲུ་ཐབ་བམ་བརྩིགས་ཐབ་གང་ཡང་རུང་བས་ཐབ་ཟུར་དུ་བྱས་ཏེ་འཇིག་རྟེན་པ་དང་འཇིག་རྟེན་ལས་འདས་པའི་སྦྱིན་སྲེག་བསྲེག་རྫས་སྔགས་སོ་སོས་འབུལ་བ་ཡང་བྱ་རུང་ངོ་། །དེ་ནས་མཆོད་པ་ཅི་འབྱོར་བཤམས་ཏེ་གཏང་རག་གི་མཆོད་བསྟོད་རྒྱས་པར་བྱ། ཡིག་བརྒྱ་བརྒྱ་རྩ་སོགས་བཟླ་ཞིང་ནོངས་པ་
བཟོད་གསོལ་བྱ། །མདུན་བསྐྱེད་ཀྱི་སྣོད་བཅུད་རྟེན་བརྟེན་པ་དང་བཅས་པ་འོད་དུ་ཞུ་ནས་གཙོ་མོ་ལ་ཐིམ། དེ་ས་བོན་ཧྲཱིཿཡིག་ལ་ཐིམ། དེ་རང་ཉིད་ལ་བསྡུས་ཏེ་བདག་བསྐྱེད་ཀྱང་བསྡུས་ནས་འོད་གསལ་བར་བཞག །སླར་སྒྱུ་མའི་སྐུར་ལངས་ཏེ་དགེ་བ་བྱང་ཆུབ་ཏུ་བསྔོ་ཞིང་ཐལ་བ་དང་རྡུལ་ཚོན་ཕྱགས་ཏེ་རྒྱ་མཚོར་འབབ་པའི་ཆུའམ་རི་བོ་ཆེན་པོའི་རྩེར་དོར། ལས་ཀྱི་རྗེས་མི་མངོན་པར་བྱས་ཏེ་ཤིས་པ་བརྗོད་དོ། །འདི་ནི་གཞུང་ཉིད་ལས་གསང་སྒྲུབ་ཀྱི་མཚན་དུ་གསུངས་ཤིང་ཟིན་བྲིས་རྣམས་ལས་ནང་སྒྲུབ་ཅེས་བཤད་པ་ཉམས་སུ་བླང་བའི་དངོས་གཞི་ཡིན་ནོ། ༈ །གསུམ་པ་གསང་བའི་སྒྲུབ་པ་ཞལ་གཉིས་མར་བསྒྱུར་བ་ནི། སྤྱིར་ཞལ་གཉིས་མའི་ཡིག་སྣ་མང་བར་བཞུགས་ཀྱང་འདི་ནི་གཙོ་བོར་གཞུང་ཞལ་གདམས་ཀྱི་ཡན་ལག་ཏུ་རྗེ་མར་པས་མི་ལ་ལ་གནང་བའི་ཞལ་གདམས་ཤོག་གཅིག་མ་ཞིག་ཡོད་པ་དེ་ལྟར་དུ་བསྒོམ་པ་སྟེ། གནས་དུས་
བཀོད་པ་བཤམས་པ་སྒྲུབ་པ་དངོས་རྣམས་གཞན་སྔ་མ་ཞལ་གཅིག་མ་དང་ཁྱད་མེད་ལ། བདག་མདུན་གཙོ་འཁོར་ཐམས་ཅད་ཀྱི་སྤྱི་བོ་ཚངས་བུག་ནས་ཐོན་པའི་ཕག་ཞལ་རང་མདོག་ཅན། སྤྱན་གསུམ་ནམ་མཁའ་ལ་ལྟ་བ། ཟེ་བ་མདུན་ཕྱོགས་སུ་ལངས་ཤིང་རྒྱབ་ཏུ་ཞལ་ལྟ་བ། མཆེ་བ་གཙིགས་ཤིང་ངུར་སྒྲ་དྲག་ཏུ་སྒྲོགས་པ་རེ་རེ་ཐོན་པར་བསམ་ཞིང་ཐུན་མོང་མ་ཡིན་པའི་བཟླས་རིམ་ལྔ་པོ་སྔར་ལྟར་བྱ་ཞིང་། སྤྲོ་བསྡུའི་བཟླས་པའི་དབུ་མའི་སྟེང་སྤྲོ་དང་སྟེང་སྡུད་ཀྱི་ཚེ་འོད་ཁ་དོག་དམར་པོ་དང་སྔགས་ཕྲེང་ཕག་ཞལ་གྱི་སྤྱན་དབུས་མའམ་ཚངས་བུག་ནས་སྤྲོ་བ་ནི་ཁྱད་པར་ཡིན་ནོ། །མཐར་ཧཱུྃ་གིས་མཁའ་འགྲོ་གནད་ནས་བསྐུལ། ཞེས་པའི་ཞལ་གདམས་གཙོ་བོར་བསྒོམ་ཞིང་འདི་ལ་ཡང་གྲི་གུག་ལ་བརྟེན་ནས་ཕཊ་ཡིག་དང་། ཐོད་ཁྲག་ལ་བརྟེན་ནས་ཧྲཱིཿཡིག་བརྗོད་པའི་ཁྱད་པར་གསུམ་དུ་ཕྱེ་བས་ཞལ་གདམས་ཧཱུྃ་ཧྲཱིཿཕཊ་གསུམ་ཞེས་
ཟིན་བྲིས་སུ་གསུངས་སོ། །མཐར་སྐད་ཅིག་གིས་རང་ཉིད་དཔལ་འཁོར་ལོ་སྡོམ་པའི་ང་རྒྱལ་དུ་འཕོས་ཏེ་ཐུགས་ཀའི་ཧཱུྃ་ལ་སྔགས་ཕྲེང་གིས་བསྐོར་བ་ལས་སྔགས་ཕྲེང་གཉིས་པ་བྱུང་། དབུ་མའི་ནང་བརྒྱུད། རྡོ་རྗེ་ནོར་བུའི་སྒོ་ནས་ཐོན། ཡུམ་གྱི་སྐུའི་དབྱིབས་བརྒྱུད། སྐུ་གསུང་ཐུགས་ཀྱི་ཡོན་ཏན་ཐམས་ཅད་སྔགས་ཕྲེང་དང་དབྱེར་མེད་དུ་སྤྱན་དྲངས་ཞལ་ནས་ཞལ་དུ་ཞུགས་ཏེ་ཐུགས་ཀའི་ཧཱུྃ་ལ་ཐིམ་པར་བསམ་ཞིང་། ༀ་ཧྲཱིཿཧ་ཧ་ཧུཾ་ཧཱུྃ་ཕཊ། ཅེས་ཡིག་བདུན་འབུམ་ཕྲག་བཞི་བཟླའོ། །མདོར་ན་ཕྱི་སྒྲུབ་མཚམས་དམ་ལྷོད་ཅི་རིགས་པས་འབུམ་ཕྲག་བཞི། ནང་སྒྲུབ་དང་གསང་སྒྲུབ་མཚམས་དམ་ཞིང་སྐྱེ་བོའི་ཚིག་དང་མི་བསྲེ་བར་བརྩོན་འགྲུས་ཆེན་པོས་བཅུ་དྲུག་རེ། མཐར་ཡབ་ཀྱི་ང་རྒྱལ་དུ་འཕོས་ནས་ཡིག་བདུན་འབུམ་ཕྲག་བཞི་སྟེ། བཞི་བཅུས་གྲངས་བསྙེན་ཚར་ཕྱིན་པར་འགྱུར་ལ། དེ་ཐམས་ཅད་ཀྱི་དུས་སུ་སྙེམས་ཐག་ཇི་ལྟར་བཅད་པ་ནི།
ཡ་ང་མེད་ཅིང་ཚད་གཟུང་མེད། །རིག་པ་ངར་དང་བཅས་པ་ཡིས། །མི་ཕོད་བརྫི་ཞིང་ཞེན་པ་ལྡོག །འཁྲི་བ་བཙན་ཐབས་དག་ཏུ་བཅད། །རང་བྱུང་ཡེ་ཤེས་ཡི་གེ་བཞི། །དབྱིངས་སུ་ཤར་ནས་དབྱིངས་སུ་རོལ། །གཟུང་བའི་ཡུལ་དང་འཛིན་པའི་སེམས། །ཡང་དག་དོན་ལ་གྲུབ་པ་མེད། །ཅེས་དང་། ཞལ་གདམས་དྲུག་པར། ཚོགས་དྲུག་གི་སྣང་བ་ཐམས་ཅད་སྐྱེ་མེད་ཆོས་ཀྱི་སྐུར་རྟོགས་པའི་གདེང་དང་ལྡན་པས་དཔའ་རྩལ་ཆེ་བ་སྟག་ལྟ་བུ་དང་། གང་ལའང་ཉམ་ང་དང་བག་ཚ་བ་མེད་པ་སེང་གེ་ལྟ་བུ་དང་། དམིགས་པ་རྣོ་ཞིང་རིག་པ་མྱུར་ལ་འཁྱུག་པ་གློག་ལྟ་བུ་དང་། རིག་པ་ངར་དང་བཅས་ཤིང་རྩལ་དྲག་པོ་ཐོག་ལྟ་བུ་དང་། སྔགས་ཀྱི་སྒྲ་གྲགས་ཤིང་དཔའ་བ་འབྲུག་ལྟ་བུ་དང་། གང་ལའང་གཟའ་གཏད་མེད་པ་སྨྱོན་པ་ལྟ་བུ་དང་། ཆགས་ཞེན་དང་གཟུང་འཛིན་གྱི་མདུད་པ་གྲོལ་བ་ནམ་མཁའ་ལྟ་བུའི་རྟོགས་པ་དང་ལྡན་པས་ཤེས་པ་ཀག་
ལངས་སུ་ཧུར་བསླང་ལ་བརྟུལ་ཞུགས་ཐུགས་ཕྲད་དུ་བརྡེག །ནད་ལ་གཟིར་གདོན་ལ་གཟིར་ཉོན་མོངས་པ་ལ་གཟིར་བར་བྱའོ། །ཞེས་གསུངས་པ་ལྟར་རྣམ་པ་བསྐྱེད་རིམ་ངོ་བོ་ཆོས་ཉིད་གཞི་རྩ་དང་བྲལ་བ་དབྱེར་མེད་དུ་ཤེས་པས་སྣང་གྲགས་རྟོགས་གསུམ་གྱི་ཚོགས་ཟིལ་གྱིས་མནན་ལ་ཐད་ཀར་གཅད་པར་བྱའོ། །གཉིས་པ་རྫོགས་རིམ་གྱི་སྒྲུབ་པ་ནི། འོག་ནས་འབྱུང་བའི་རླུང་དང་མེ་དང་སོགས་ཚིགས་རྐང་དྲུག་གིས་བདེ་ཆེན་རླུང་སེམས་གཉིས་མེད་དང་། སྔར་བསྟན་པ་གཟུང་བའི་ཡུལ་དང་ཞེས་པའི་རྐང་པ་གཉིས་ཀྱིས་སྐྱེ་མེད་རླུང་སེམས་གཉིས་མེད་གསུངས་ཏེ་མན་ངག་ལས་རིག་པར་བྱའོ། །གསུམ་པ་ཡན་ལག་གི་དོན་ནི། །ནད་ལ་སྨན་དང་འདྲ་བར་སྤྱད། །ལྟོགས་ན་ཟས་དང་འདྲ་བར་སྤྱད། །འཁྱགས་ན་གོས་དང་འདྲ་བར་སྤྱད། །འཇིགས་ན་སྐྱབས་དང་འདྲ་བར་སྤྱད། །གནོད་སྦྱིན་ཕོ་མོའི་གནོད་པ་ལ། །བརྟུལ་ཞུགས་ཐུགས་ཕྲད་ལམ་དུ་
ཁྱེར། །ཧཱུྃ་གིས་མཁའ་འགྲོ་གནད་ནས་བསྐུལ། །ལམ་དུ་རྟེན་འབྲེལ་གང་འཕྲད་བསྒྲིག །ཞེས་དོན་ཚན་བདུན་གསུངས་པ་ཞལ་གདམས་གཉིས་པ་ནས་བརྒྱད་པའི་བར་སོ་སོར་སྟོན་ཏོ། །གཉིས་པ་གྲུབ་ནས་སྤྱོད་པ་བྱ་ཚུལ་ནི། །ནང་གི་གདེངས་དང་ལྡན་ནས་ནི། །རིག་པ་བརྟུལ་ཞུགས་སྤྱོད་པ་བྱ། །གཅེར་བུ་སྟག་གི་ཤམ་ཐབས་བྱ། །ཕྱག་རྒྱ་ལྔས་བརྒྱན་ཅང་ཏེའུ་དང་། །དྲིལ་བུ་སིལ་སིལ་ཚངས་སྐུད་དང་། །ཐོད་པ་དང་ནི་ཁ་ཊྭཱཾ་ཐོགས། །དུར་ཁྲོད་ཀུན་ཏུ་རྒྱུ་བར་བྱ། །རིགས་ལྔའི་མཁའ་འགྲོ་མ་དག་ཀྱང་། །རྣལ་འབྱོར་དབང་དུ་བསྡུས་ལ་སྤྱད། །རླུང་དང་མེ་དང་བདེ་བའི་ཁམས། །བཅུ་དྲུག་ཕྱེད་ཕྱེད་ཐིག་ལེ་ཅན། །བསྐྱིལ་དང་བཟློག་དང་དགྲམ་ཞིང་བསྟིམ། །དགའ་བཞིའི་ཡེ་ཤེས་རང་ངོས་བཟུང་། །ཞེས་པ་སྟེ་དངོས་གྲུབ་ཀྱི་ཐོད་པ་མཆན་ཁུང་དུ་བཅུག་སྟེ་སིནྡྷུ་རས་སྨིན་མཚམས་སུ་ཐིག་ལེ་བྱས་ནས་གཟའ་གཏད་མེད་པར་གྲོང་
དང་གྲོང་ཁྱེར་སོགས་སུ་སྤྱད་པས་རང་བཞིན་གྱི་རྣལ་འབྱོར་མས་རྗེས་སུ་བཟུང་སྟེ་སྤྱོད་པ་མཐར་ཕྱིན་པར་འགྱུར་རོ། །གསུམ་པ་བསྲུང་བྱའི་དམ་ཚིག་ལ་གཉིས་ལས་དམ་ཚིག་དངོས་བཤད་པ་དང་། ཉམས་པ་སྐོང་བའོ། །དང་པོ་ནི། །རིགས་ལྔའི་མཁའ་འགྲོ་མ་རྣམས་ཀྱི། །སོ་སོའི་དམ་ཚིག་བསྲུང་ཚུལ་ནི། །སངས་རྒྱས་མཁའ་འགྲོའི་དམ་ཚིག་ཏུ། །བླ་མ་ལ་གུས་སྤྱི་བོར་བཀུར། །སེམས་ཅན་རྣམས་ལ་བྱམས་པ་བསྒོམ། །རྡོ་རྗེ་མཁའ་འགྲོའི་དམ་ཚིག་ཏུ། །ཤ་ལྔ་བདུད་རྩི་ལྔ་ལ་སྤྱད། །རྣམ་པར་མི་རྟོག་སྟོང་ཉིད་བསྒོམ། །རིན་ཆེན་མཁའ་འགྲོའི་དམ་ཚིག་ཏུ། །ཚོགས་དང་གཏོར་མ་རྒྱ་ཆེན་བཤམ། །ཆགས་ཞེན་སྤངས་ལ་རི་ཁྲོད་འགྲིམ། །པདྨ་མཁའ་འགྲོའི་དམ་ཚིག་ཏུ། །ཕྱག་རྒྱ་བསྟེན་ཞིང་བདེ་བ་བསྒོམ། །མེ་མཆོད་འབུལ་ཞིང་གླུ་གར་བྱ། །ལས་ཀྱི་མཁའ་འགྲོའི་དམ་ཚིག་ཏུ། །རྒྱུད་ལ་གང་སྐྱེས་ཤེས་པ་རྣམས། །མི་དགག་ཐད་ཀར་སྤྱོད་པར་
བྱ། །ཞེས་གསུངས་ཤིང་ཉམས་ན་སྐོང་བའི་ཚུལ་ཡང་། ཉམས་ན་ཚོགས་ཀྱི་འཁོར་ལོ་དང་། །ཡི་གེ་བརྒྱ་པས་བཤགས་པར་བྱ། །ཞེས་པས་ཚོགས་འཁོར་དང་དུས་བཟང་གི་མཆོད་པ་བྱའོ། །བཞི་པ་མཐར་ཐུག་གི་འབྲས་བུ་ནི། ངོ་བོ་འགྱུར་བ་མེད་པ་དང་། །ཞེས་པས་ལྷན་ཅིག་སྐྱེས་པའི་སྐུ་དང་། །རང་བཞིན་སྐྱེ་བ་མེད་པ་དང་། །ཞེས་པས་ཆོས་སྐུ། མཚན་ཉིད་གཉིས་སུ་མེད་པ་དང་། །ཞེས་པས་ལོངས་སྐུ། ཐུགས་རྗེ་འགག་པ་མེད་པར་འཆར། །ཞེས་པས་སྤྲུལ་སྐུ་སྟེ། འཁོར་ལོ་བཞིར་སྐུ་བཞི་མངོན་པར་རྫོགས་པར་འཚང་རྒྱ་བ་ཡིན་ནོ། །དཔལ་རྡོ་རྗེ་རྣལ་འབྱོར་མའི་གསང་སྒྲུབ་སློབ་དཔོན་ཆེན་པོ་ནཱ་རོ་པས་མཛད་པ་རྫོགས་སོ། །རྒྱ་གར་གྱི་མཁན་པོ་ཆེན་པོ་ནཱ་རོ་པཎྜི་ཏའི་ཞལ་སྔ་ནས་དང་ལོ་ཙཱ་བ་མར་པ་ཆོས་ཀྱི་བློ་གྲོས་ཀྱིས་པུཥྤ་ཧ་རིའི་བྱང་ཕྱོགས་སེང་ལྡེང་སྟུག་པོའི་ནགས་གསེབ་ཏུ་བསྒྱུར་ཅིང་ཞུས་ཏེ་གཏན་ལ་ཕབ་པའོ། །
ཞེས་ལོ་ཙཱ་བས་མཛད་བྱང་དང་འགྱུར་བྱང་འགོད་པར་མཛད་དོ། །བསྐྱེད་རིམ་ལྷན་ཅིག་སྐྱེས་མའི་ལྷ་ཁྲིད་ཇི་ལྟར་ཉམས་སུ་ལེན་ཚུལ་འདི་ནི། བསྐྱེད་རིམ་གསང་སྒྲུབ་ཀྱི་རྣམ་བཤད་ཟབ་མོ་རྣམ་འབྱེད་ཀྱི་སྙིང་པོ་བསྡུས་སྟེ་ཟིན་བྲིས་གསུམ་གྱི་དགོངས་པ་བཞིན་དཔལ་གཙུག་ལག་ཕྲེང་བས་བཤད་པ་ལེགས་པར་གྲུབ་པའོ། །དགེ་ལེགས་འཕེལ།། །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།