ཆོས་དྲུག་གསོལ་འདེབས་བདེ་སྟོང་དབྱེར་མེད་ཀྱི་འགྲེལ་ཆུང་ཚིག་དོན་སྙིང་པོ་རབ་གསལ།
ཆོས་དྲུག་གསོལ་འདེབས་བདེ་སྟོང་དབྱེར་མེད་ཀྱི་འགྲེལ་ཆུང་ཚིག་དོན་སྙིང་པོ་རབ་གསལ་བཞུགས་སོ། །
མ་ཧཱ་གུ་རུ་སུ་ཙནྡྲ་རཏྣ་པཱ་དཱ་ཡ་ན་མཿ དོན་བརྒྱུད་སྙིང་པོའི་བསྟན་པ་སྤེལ་བའི་སླད། །མཉམ་མེད་དྭགས་པོ་སྤྲུལ་པའི་སྐུར་བཞེངས་པ། མཁན་ཆེན་རྡོ་རྗེ་འཆང་དབང་ཟླ་བ་བཟང་། །བྱང་ཆུབ་བར་དུ་རིགས་ཀྱི་བདག་པོར་བཞུགས། །མཉྫུ་ཤྲཱི་བྷ་དྲ་ཡིས། །མཛད་པའི་ཆོས་དྲུག་གསོལ་འདེབས་ཀྱི། །ཚིག་དོན་སྙིང་པོ་ཅུང་ཟད་དབྱེ། །དོན་ཚན་ལྔ་ཡིས་གཏན་ལ་དབབ། དེ་ཡང་དང་པོ་གསང་སྔགས་ཐམས་ཅད་ཀྱི་འཆར་གཞི་རྡོ་རྗེ་འཆང་ལ་བསྟོད་པ། མཆོག་གཟིགས་གཉིས་སོགས་མཚན་ནས་
བརྗོད་པ་དྲུག་ལ་བསྟོད་པ། བརྒྱུད་པ་སྤྱི་ལ་བསྟོད་པ། ཟབ་མོའི་ལམ་ལ་གོམས་པ་མཐར་ཕྱིན་པར་གསོལ་བ་འདེབས་པ། མཇུག་དགེ་བ་ཆོས་ཀྱི་སྐུར་བསྔོ་བའོ། །དང་པོ་ནི། བདེ་སྟོང་དབྱེར་མེད་སྲིད་དང་ཞི་བའི་དཔལ། །ཐབས་ཤེས་དབྱེར་མེད་རྡོ་རྗེ་དྲིལ་བུ་འཆང་། །སྒྱུ་མའི་གར་གྱི་རྣམ་རོལ་བཅོམ་ལྡན་འདས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཅེས་སོ། གཉིས་པ་མཆོག་གཟིགས་གཉིས་སོགས་ལ་བསྟོད་པ་ནི། ཤེས་རབ་ཆེན་པོས་གཉུག་མའི་གནས་ལུགས་རྟོགས། ཕྲིན་
ལས་བཟང་པོས་གདུལ་བྱ་ཐར་ལམ་འདྲེན། །འཁོར་ལོ་སྡོམ་པའི་རྣལ་འབྱོར་ཏཻ་ལོ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པའི་དོན། ངེས་པའི་དོན་ལ། ང་ལ་མི་ཡི་བླ་མ་མེད། ། ང་ཡི་བླ་མ་ཐམས་ཅད་མཁྱེན། །ཞེས་གསུངས་པ་ལྟར་རིགས་དྲུག་པའི་ཁྱབ་བདག་རྡོ་རྗེ་འཆང་ལས་ཤེས་རབ་ཀྱི་ཕུ་ཐག་ཆོད་ན་ཡང་། ཐུན་མོང་གདུལ་བྱའི་སྣང་ངོར། ཙཪྻཱ་ཀླུ་སྒྲུབ་ལྭ་བ་པ། །མ་ཏི་བསྐལ་པ་བཟང་མོ་སོགས། །བཀའ་བབས་བཞི་ཡི་བླ་མ་བསྟེན། །ཞེས་སོགས་གསུངས་པ་ལྟར་རོ། །མཛད་པ་ཕྲིན་ལས་བཟང་པོ་ནི་པཎ་ཆེན་ནཱ་རོ་ཏ་པ་སྟེ་མི་མཆོག་ཞབས་སོགས་པཎ་ཆེན་ལྔ་བརྒྱ། ལུང་རིགས་ཀྱིས་བརྟུལ་ཞིང་ཡང་དག་པའི་ལམ་ལ་བཀོད་ནས་གསང་སྔགས་རྡོ་རྗེ་ཐེག་པའི་བསྟན་པ་ཉི་མ་ལྟར་གསལ་བར་མཛད། དཔལ་འཁོར་ལོ་སྡོམ་པའི་རྣལ་འབྱོར་ལ་བརྟེན་ནས་གྲུབ་པ་བརྙེས་པའི་ཚུལ་བསྟན་པས་མཚན་དངོས་པྲཛྙཱ་བྷ་དྲ་སྟེ་ཤེས་རབ་བཟང་པོ། ཏིལླི་པ་ཞེས་ཏིལ་བརྡུང་ཞབས་ཟུར་ཆག་པས་ཏཻ་ལོ་པའོ། །
གཉིས་སུ་མེད་པའི་ཡེ་ཤེས་མཆོག་དང་ལྡན། །བཅུ་གཉིས་དཀའ་སྤྱད་དངོས་གྲུབ་རྣམ་གཉིས་བརྙེས། །གནས་སྔ་རིག་པའི་པཎ་ཆེན་ནཱ་རོ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ཡང་བདེ་སྟོང་གསལ་སྟོང་སྣང་སྟོང་རིག་སྟོང་སོགས་གཉིས་སུ་མེད་པའི་ཡེ་ཤེས་མཆོག་དང་ལྡན་ཞིང་། རྣལ་འབྱོར་གྱི་དབང་ཕྱུག་ཏཻ་ལོ་པས། ཞིང་དང་བསམ་པ་དངོས་པོ་གསུམ། །གཅིག་ཏུ་སྒྲིལ་ལ་གསོལ་བ་ཐོབ། །གང་འདོད་འབྲས་བུ་འབྱུང་བར་ངེས། །ལྟེམ་རྐྱང་མ་བྱེད་རྣལ་འབྱོར་པ། །ཞེས་གསུངས་པ་ལྟར་བཅུ་གཉིས་ཀྱི་དཀའ་བ་སྤྱད་དེ། དང་པོ་གསུམ་གྱིས་ལུས་སྒྲིབ་དག །བུམ་དབང་གི་དོན་རྒྱུད་ལ་སྐྱེས། དེ་ནས་གསུམ་གྱིས་ངག་སྒྲིབ་སྦྱངས། གསང་དབང་ཐོབ། དེ་ནས་གསུམ་གྱིས་ཡིད་སྒྲིབ་སྦྱངས། ཤེར་དབང་ཐོབ། དེ་ནས་གསུམ་གྱིས་ཆ་མཉམ་གྱི་དྲི་མ་སྦྱངས། བཞི་པ་ཐོབ། མཐར་མཚོན་བྱ་དོན་གྱི་ཡེ་ཤེས་མངོན་དུ་གྱུར་པས་དངོས་གྲུབ་རྣམ་པ་གཉིས་ཐོབ་བོ། །དཀའ་བ་བཅུ་གཉིས་ནི། བླ་མའི་བཀའ་
བཞིན་སྒྲུབ་སྟེ་སྲོག་ལ་ལྟོས་པ་མེད་པར་དང་དུ་བླང་བའི་ཚུལ་རྣམ་ཐར་རྒྱས་པ་ལས་འབྱུང་བ་བཞིན་ཏེ། རྗེ་བཅུ་གསུམ་པའི་བཀའ་འབུམ་ལས། སློབ་མའི་སྙིང་རུས་དཔེར་འཇོག་པ། །ནཱ་རོའི་དཀའ་ཆེན་བཅུ་གཉིས་ནི། །དང་པོ་མཁར་གྱི་རྩེ་ནས་མཆོངས ། །དམ་ཚིག་ཡིད་བཞིན་ནོར་བུ་གནང་། གཉིས་པ་མཁར་ཁུང་ཐུར་མ་བརྒྱབ། །སྒྱུ་ལུས་གནད་ཀྱི་གདམས་པ་གནང་། །གསུམ་པ་མེ་དཔུང་ནང་དུ་མཆོངས། །གཏུམ་མོ་སྐོར་གསུམ་གདམས་ངག་གནང་། །བཞི་པ་མི་གཙང་འདམ་རྫབ་ཟོས། །སྤྱད་པར་བྱ་བའི་དམ་ཚིག་བསྟན། །ལྔ་པ་འབྲས་ཆེན་སྟོན་མོ་བརྐུས། །རྨི་ལམ་འཛིན་པའི་གདམ་ངག་གནང་། །དྲུག་པ་རྒྱལ་པོའི་བག་མ་འཕྲོག །ཚེ་འདིར་མཆོག་འགྲོའི་གྲོང་འཇུག་གནང་། །བདུན་པ་བློན་པོའི་ཆུང་མ་བརྐུས། །མ་བསྒོམ་འཕོ་བའི་གདམས་ངག་གནང་། །བརྒྱད་པ་རང་གི་ཆུང་མ་བླང་། །རང་རིག་ཡེ་ཤེས་གསལ་བྱེད་གནང་། །དགུ་པ་རྡོ་རྗེ་ཐོ་བས་བརྡུངས། །འོག་སྒོ་བདེ་ཆེན་གདམས་པ་གནང་། །བཅུ་པ་ཆུང་མ་རྗེ་ལ་
ཕུལ། །བར་དོ་ངོ་སྤྲོད་གདམས་པ་གནང་། །བཅུ་གཅིག་པད་འདམ་ཟམ་པ་བྱས། །རང་ལུས་གཏུམ་མོའི་གདམས་པ་གནང་། །བཅུ་གཉིས་ཐང་ཆེན་མ ཎྜལ་ཕུལ། །ཉམས་དང་རྟོགས་པའི་འོད་གསལ་ཤར། །བླ་མས་གང་གསུངས་དེ་ལྟར་བསྒྲུབས། །ཚེ་གཅིག་མཆོག་གི་དངོས་གྲུབ་ཐོབ། །ཅེས་གསུངས་པ་ལྟར་རོ། །གནས་ལྔ་རིག་པའི་པཎ་ཆེན་ཡོངས་གྲགས་བྱང་སྒོ་སྲུང་བ་པོ་མཁས་པ་སྒོ་དྲུག་གི་ནང་ཚན་ནོ། །ཆོས་ཀྱི་སྙིང་པོ་རྡོ་རྗེ་ཐེག་པའི་བཅུད། །གང་གི་བློ་གྲོས་མཆོག་གིས་ཡོངས་སུ་འཛིན། །བསྟན་པའི་མངའ་བདག་ལྷོ་བྲག་མར་པའི་ཞབས། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་མངའ་བདག་མར་པ་ལོ་ཙཱ་ཞེས་གསང་སྔགས་རྡོ་རྗེ་ཐེག་པའི་འབྱུང་གནས་སམ་མངའ་བདག་ཆེན་པོ་ཞེས་ཡོངས་སུ་གྲགས་པའོ། །བདེ་སྟོང་ཏིང་འཛིན་གར་གྱིས་རྣམ་བཞད་པའི། །ཟབ་ལམ་རྡོ་རྗེ་ཐེག་པའི་མངའ་བདག་མཆོག །སྒྲུབ་བརྒྱུད་བསྟན་པའི་སྲོག་ཤིང་མི་ལ་རྗེ། །གསོལ་བ་འདེབས་སོ་བདག་
རྒྱུད་བྱིན་གྱིས་རློབས། །རྗེ་དེ་ཉིད་ཀྱི་བདེ་སྟོང་ཏིང་འཛིན་ལ་མངའ་བརྙེས་པའི་ཚུལ་ནི། རྡོ་རྗེའི་མགུར་ལས། སྟོད་བྱང་ཆུབ་སེམས་ཀྱི་རྒྱུན་འབབ་བདེ། །སྨད་དྭངས་མའི་ཐིག་ལེ་རྒྱས་པས་བདེ། །བར་དཀར་དམར་ཐུག་ཕྲད་བརྩེ་བས་བདེ། །ཞེས་གསུངས་པས་མཚོན། ཟབ་ལམ་རྡོ་རྗེ་ཐེག་པ་སྙིང་པོའི་མངའ་བདག་སྙན་བརྒྱུད་དམ་སྒྲུབ་བརྒྱུད་བསྟན་པའི་སྲོག་ཤིང་དམ་པའོ། །བསོད་ནམས་ཡེ་ཤེས་གྲངས་མེད་དུ་མར་བསགས། །གངས་ཅན་སྒྲུབ་བརྒྱུད་གཙུག་གི་རིན་པོ་ཆེ། །ཟླ་འོད་གཞོན་ནུ་དྭགས་པོ་ལྷ་རྗེ་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པ་ཨོ་རྒྱན་སངས་རྒྱས་གཉིས་པ། རིགས་ལྡན་པདྨ་དཀར་པོ། ཆོས་རྒྱལ་སྲོང་བཙན་སྒམ་པོ་སོགས་ཀྱི་སྐྱེ་བ་བཞེས་ཏེ་བསོད་ནམས་དང་ཡེ་ཤེས་ཀྱི་ཚོགས་གཉིས་ཡོངས་སུ་རྫོགས་པར་མཛད་ནས་གངས་ཅན་སྒྲུབ་བརྒྱུད་ཡོངས་ཀྱི་གཙུག་རྒྱན་དྭགས་པོ་ཟླ་འོད་གཞོན་ནུའོ། །ཐུབ་དབང་བསྟན་པའི་མངའ་བདག་ཆོས་ཀྱི་མཛོད། །སྙན་གྲགས་ཐུགས་
རྗེའི་འོད་ཀྱིས་འཛམ་གླིང་ཁྱབ། །ས་ར་ཧ་ཡི་རྣམ་འཕྲུལ་ཀརྨ་པ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །དེ་ཡང་ཤཱཀྱ་ལི་ཙཱ་བི་དྲི་མེད་གྲགས་པ། བྲམ་ཟེ་མདའ་བསྣུན་ཞབས། ངན་ལམ་རྒྱལ་བ་མཆོག་དབྱངས་སོགས་སྤྱན་རས་གཟིགས་དངོས་དཔལ་དུས་གསུམ་མཁྱེན་པའམ་དུས་གསུམ་རྒྱལ་བ་ཀུན་གྱི་ཕྲིན་ལས་པ་དཔལ་ཀརྨ་པའོ། །གསུམ་པ་དེ་ཉིད་སོགས་བརྒྱུད་པ་སྤྱི་ལ་བསྟོད་པའམ་གསོལ་བ་འདེབས་པ་ནི། གསོལ་བ་བཏབ་ན་དངོས་གྲུབ་རྣམ་གཉིས་སྩོལ། །སྒྲུབ་བརྒྱུད་བསྟན་པའི་རྒྱལ་མཚན་ཡོངས་ཀྱི་ཏོག །ཡིད་བཞིན་ནོར་བུ་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཅེས་ཡིད་བཞིན་གྱི་ནོར་བུ་རིན་པོ་ཆེ་དང་། དེ་བཞིན་དུ། བྱམས་དང་སྙིང་རྗེའི་རྩ་བ་རབ་ཏུ་བརྟན། །བདེ་སྟོང་ཡལ་གའི་ཁྱོན་ནི་ཤིན་ཏུ་ཡངས། །དཔག་བསམ་ལྗོན་ཤིང་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་དཔག་བསམ་གྱི་
ཤིང་དང་། །མཁྱེན་པའི་མཁའ་ལ་ཐུགས་རྗེའི་ཉི་མ་ཤར། །སངས་རྒྱས་བསྟན་པའི་པད་ཚལ་མཐའ་དག་བཞད། །མ་རིག་མུན་སེལ་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་ཉི་མ་དང་། སྐྱེ་མེད་སྤྲུལ་སྐུ་འགག་མེད་ལོངས་སྤྱོད་རྫོགས། །གནས་མེད་ཆོས་སྐུ་དབྱེར་མེད་ངོ་བོ་ཉིད། །སྐུ་བཞིའི་དབང་ཕྱུག་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་སྐུ་བཞིའི་དབང་ཕྱུག་དང་། གང་ལ་བརྟེན་ན་ཉེས་པའི་ཚོགས་ཀྱིས་དབེན། །ཡོན་ཏན་ཡར་ངོའི་ཟླ་ལྟར་འཕེལ་བ་ཡི། །དགོས་འདོད་ཀུན་འབྱུང་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་པ་གང་ལ་བརྟེན་ན་མི་མཐུན་ཉེས་ལྟུང་གནས་ངན་ལེན་གྱི་ཉེས་པ་ཕྲ་མོས་ཀྱང་གོས་པ་མེད་པ་དང་། ལེགས་ཚོགས་ཡོན་ཏན་ཐམས་ཅད་ཡར་ངོའི་ཟླ་བ་ལྟར་གོང་ནས་གོང་འཕེལ་དང་། དགོས་འདོད་ཀུན་གྱི་འབྱུང་གནས་ཡིད་བཞིན་གྱི་ནོར་བུའི་གཏེར་ཁ་ལྟ་
བུའོ། །གནས་ལུགས་གཉུག་མའི་དོན་གྱི་ལྡེའུ་མིག་དང་། །ཞི་ལྷག་སྒྲོན་མེས་རྒྱལ་བའི་དགོངས་པ་མཆོག །ཐར་པའི་ལམ་སྟོན་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །གནས་ལུགས་གཉུག་མ་ཆོས་སྐུའི་རང་ཞལ་མངོན་དུ་བྱེད་པའི་ཐབས་ཀྱི་ལྡེའུ་མིག་བླ་མའི་མན་ངག་ཅལ་ཕོག་གིས་གཏན་ལ་ཕབས་ཏེ། ཞི་ལྷག་གི་སྒྲོན་མེས་མུན་པ་བསལ་ནས་ཐར་པའི་ལམ་སྟོན་པའོ། །ཐབས་ཤེས་སྐྱ་བས་བརྩོན་པའི་ཤུགས་བསྐྱེད་ནས། །ཕྲིན་ལས་གྲུ་ཡིས་འགྲོ་ཀུན་སྒྲོལ་བ་ཡི། །འགྲོ་བའི་དེད་དཔོན་དྭགས་པོ་བཀའ་བརྒྱུད་ལ། །གསོལ་བ་འདེབས་སོ་བདག་རྒྱུད་བྱིན་གྱིས་རློབས། །ཞེས་འཁོར་བའི་རྒྱ་མཚོ་ལས་སྒྲོལ་བའི་དེད་དཔོན་དང་། བཞི་པ་ཟབ་མོའི་ལམ་ལ་གོམས་པ་མཐར་ཕྱིན་པར་གསོལ་བ་འདེབས་པ་ལ་ཚིགས་བཅད་དྲུག་སྟེ། གཏུམ་མོ། སྒྱུ་ལུས། རྨི་ལམ། འོད་གསལ། འཕོ་བ། བར་དོའི་སྨོན་ལམ་མོ། །དང་པོ་ནི། སྤྲུལ་པའི་གནས་སུ་འབར་བའི་ཙཎྜ་ལཱིས། །
བདེ་ཆེན་ཟླ་བའི་དཀྱིལ་འཁོར་ཡོངས་སུ་བཞུས། །ཕུང་ཁམས་རབ་བསྲེགས་ཆོས་ཀྱི་འཁོར་ལོ་ནི། །ལྷན་སྐྱེས་བདེ་བ་མྱོང་བར་བྱིན་གྱིས་རླབས། །ཞེས་པ་ནི། ཇི་སྐད་དུ་ཡང་། ལྟེ་བའི་གཏུམ་མོ་འབར་བ་ཡིས། །དེ་བཞིན་གཤེགས་པ་ལྔ་བསྲེག་ཅིང་། །སྤྱན་མ་སོགས་པ་ཡང་བསྲེགས་ཏེ། །བསྲེགས་པས་རི་བོང་ཅན་ཡང་འཛག །ཞེས་པ་ལྟར་གཏུམ་མོ་འབར་འཛག་གིས་ལམ་མོ། །གཉིས་པ་ནི། བཅུ་གཉིས་དཔེ་ཡིས་ཁྱད་པར་བྱས་པ་ལས། །ཕྱིན་ནང་ཆོས་ཀུན་བདེན་པས་རྣམ་པར་དབེན། །རང་ལུས་རྡོར་སེམས་མེ་ལོང་གཟུགས་བརྙན་བཞིན། །གདོད་ནས་ལྷ་སྐུར་འཆར་བར་བྱིན་གྱིས་རློབས། །ཅེས་པ་སྒྱུ་མའི་དཔེ་བཅུ་གཉིས་ནི། མེ་ལོང་ནང་གི་གཟུགས་བརྙན། ནམ་མཁའི་འཇའ་ཚོན། ཆུ་ནང་གི་ཟླ་གཟུགས་གསུམ་གཙོ་བོ་དང་། མིག་ཡོར། མེད་བཞིན་སྣང་བ། གློག གསལ་ཡང་ཡུན་མི་ཐུབ་པ། སྨིག་སྒྱུ། གཡོ་ཞིང་མི་བདེན་པ། བྲག་ཆ། བདག་གི་ཡིན་ཀྱང་གཞན་དུ་སྣང་བ། དྲི་ཟའི་གྲོང་ཁྱེར། མ་འགག་སྣང་བས། རྨི་ལམ། སེམས་དང་བཅས་པས། སྒྱུ་
མ། རྒྱུ་རྐྱེན་ལས་སྐྱེས་པ། ཆུ་བུར། འཇིགས་ཤིང་འབྱུང་བས། མིག་འཕྲུལ་གཅིག་དུ་མར་སྣང་བས་ཆོ་འཕྲུལ་ལོ། བཅས་བཅུ་གཉིས་སོ། །ཡེ་ཤེས་རྡོ་རྗེ་ཀུན་ལས་བཏུས་པར། བཅུ་གཉིས་དཔེ་ཡི་ཁྱད་པར་ཕྱི་ནང་ཆོས་ཀུན་བདེན་མེད་དུ་གཏན་ལ་དབབ་པར། སྒྱུ་མ། ཆུ་ཟླ། མིག་ཡོར། སྨིག་སྒྱུ། རྨི་ལམ། བྲག་ཆ། དྲི་ཟའི་གྲོང་ཁྱེར། མིག་འཁྲུལ། འཇའ་ཚོན། གློག །ཆུའི་ཆུ་བུར། མེ་ལོང་ནང་གི་གཟུགས་བརྙན་ཏེ་སྒྱུ་མས་མགོ་དྲངས་པའི་དཔེ་བཅུ་གཉིས་རིམ་པར། རླུང་སེམས་ཙམ་ལས་གྲུབ་པའི་ཡེ་ཤེས་སྒྱུ་མའི་ལྷ་སྐུ་རྡོར་སེམས་སམ། རྡོ་རྗེ་འཆང་དེ་སྣང་ལ་མ་གྲུབ་པས་སྒྱུ་མ་ལྟ་བུ། གར་ཡང་ཁྱབ་པས་ཆུ་ཟླ། གདོས་བཅས་ཤ་རུས་སོགས་དང་བྲལ་བས་མིག་ཡོར་ཏེ་མིའི་གྲིབ་མའི་ལུས་ལྟ་བུ། སྐད་ཅིག་གིས་གཡོ་ཞིང་མ་གྲུབ་པས་སྨིག་སྒྱུ། སྣང་ཡང་བདེན་མེད་རྨི་ལམ། རྣམ་སྨིན་གྱི་ལུས་དང་རྒྱུད་གཅིག་ཏུ་རྟོག་དང་གཞན་དུ་སྣང་བས་བྲག་ཆ། རྟེན་དང་བརྟེན་པའི་དཀྱིལ་འཁོར་དུ་སྣང་ཡང་བདེན་པས་སྟོང་པའི་དྲི་ཟའི་གྲོང་
ཁྱེར། གཅིག་ཉིད་དུ་མར་སྣང་བས་མིག་འཕྲུལ། སྐུའི་ཁ་དོག་ལྔ་མ་འདྲེས་པར་སྣང་བས་འཇའ་ཚོན་ལྟར་གསལ་བ། རྒྱུ་རྐྱེན་རྣམ་སྨིན་གྱི་ཕུང་པོ་ལ་བརྟེན་ཏེ་གནས་པས་སྤྲིན་གྱི་གསེབ་ནས་གློག་འགྱུ་བ་ལྟ་བུ། སྟོང་པའི་ངང་ལས་ཐོལ་གྱིས་བཞེངས་པས་ཆུ་ལས་ཆུ་བུར་རྡོལ་བ་ལྟ་བུ། ཡན་ལག་ཉིང་ལག་ཐམས་ཅད་ཡོངས་སུ་རྫོགས་པས་མེ་ལོང་ལ་རྡོ་རྗེ་འཆང་གི་གཟུགས་བརྙན་འཆར་བ་ལྟ་བུའོ། །དེ་ཡང་དངོས་འཛིན་དང་བྲལ་བས་ཡོད་པ་མ་ཡིན། མེད་བཞིན་དུ་སྣང་བས་སྒྱུ་མའི་དཔེར་བསྟན། ལྷ་སྐུ་གསལ་སྟོང་སྣང་ལ་རང་བཞིན་མེད་པ་དེ་ཡེ་ཤེས་སྒྱུ་མའི་ལུས་ཞེས་བྱ། སྒོམ་པས་ཉམས་སུ་ལེན་སྐབས་རང་ལུས་གཟུགས་བརྙན་དུ་བསམ་སྟེ་དགའ་སྡུག་གི་རྟོག་པ་རོ་སྙོམ་མ་དག་པའི་སྒྱུ་ལུས། ལྷ་སྐུ་སྒྱུ་མ་ལྟར་དམིགས་པ་དག་པའི་སྒྱུ་ལུས་མིང་བཏགས་པའོ། །དེ་ཡང་གང་སྣང་ལྷ་སྐུ། ལྷ་སྐུ་སྒྱུ་མ། སྒྱུ་མ་བདེ་ཆེན་དུ་འཆར་བ་ཞིག་དགོས་སོ། །ད་ལྟ་མ་དག་པའི་སྒྱུ་ལུས་དག་པ་ཡེ་ཤེས་ཀྱི་སྒྱུ་ལུས་སུ་བསྒྱུར་ཞིང་དག་པའོ། །
གསུམ་པ་ནི། ཉིན་སྣང་སྒྱུ་མའི་འདུན་པ་རབ་བརྟན་ནས། །མགྲིན་པར་རླུང་སེམས་བརྟན་པ་ཐོབ་པའི་མཐུས། །རྨི་ལམ་ན་ཡང་ཆོས་ཀུན་རྨི་ལམ་ལྟར་། །མཐོང་ནས་ངེས་པ་རྙེད་པར་བྱིན་གྱིས་རློབས། །ཅེས་པ་ཆོས་ཐམས་ཅད་རྨི་ལམ་ལྟར་མཐོང་ཞིང་རྟོགས་ཏེ་འཁྲུལ་སྣང་གི་རྨི་ལམ་དག་ནས་སྣང་བ་ཐམས་ཅད་ལྷ་དང་ལྷ་མོའི་རང་བཞིན་དུ་མཐོང་ནས་ཡང་དག་པའི་ལམ་ལ་ངེས་པ་རྙེད་པའོ། །བཞི་པ་ནི། ཀུན་རྟོག་རླུང་སེམས་དྷཱུ་ཏིར་དག་པའི་མཐུས། །ཆོས་ཀུན་ནམ་མཁའི་དཀྱིལ་ལྟར་ཡོངས་སུ་དག །གཏི་མུག་མ་སྤང་ཆོས་དབྱིངས་ངོ་བོར་གྲོལ། །འོད་གསལ་ཕྱག་ཆེན་རྟོགས་པར་བྱིན་གྱིས་རློབས། །ཞེས་པ། ཨ་ཀལྤ་ཞེས་རྣམ་རྟོག་དང་། བི་ཀལྤ་ཞེས་ཀུན་རྟོག་ལ་འཇུག་པས་ན་ཀུན་རྟོག་གི་རླུང་སེམས་དབུ་མར་དག་ཅིང་འོད་གསལ་འཆར་བའི་སྨོན་ལམ་མོ། ཇི་སྐད་དུ་ཡང་། འཆི་བའི་དུས་དང་གཉིད་ལོག་དང་། །མཉམ་པར་བཞག་དང་དབུ་མར་གནས་། །མཉམ་རྗེས་རོ་གཅིག་གྱུར་ན་ཡིན། །ཅེས་
གསུངས་པ་ལྟར་རོ། ལྔ་པ་ནི། གང་དུ་འཕོ་བའི་ཡུལ་སོགས་མ་དམིགས་ཤིང་། །སྲོག་རྩོལ་རླུང་གི་རྒྱུ་བ་བརྟན་ཐོབ་ནས། །ནམ་ཞིག་འཁྲུལ་པའི་སྣང་བ་འཆར་བའི་ཚེ། །ཚངས་ནས་མདའ་ལྟར་འཕོ་བར་བྱིན་གྱིས་རློབས། །ཞེས་པ་རྣལ་འབྱོར་པ་རབ་རང་སྣང་བདེན་མེད་དུ་སྟོན་ནས་སྣང་སྲིད་དག་པ་རབ་འབྱམས་སུ་ཤར་བ་ལ་འཕོ་བྱ་འཕོ་བྱེད་ལས་འདས་ཀྱང་། འབྲིང་རང་ཐ་མ་འཕོ་མེད་གཉུག་མའི་དོན་ཁོང་དུ་ཆུད་པ་ལ་རླུང་གིས་འཕོ་བར་སྨོན་པའོ། དྲུག་པ་ནི། འཆི་བའི་རང་བཞིན་དོན་དམ་བདེན་པར་རྟོགས། །ཆོས་སྐུའི་ངང་ནས་འོད་གསལ་མ་བུ་འཕྲད། །དེ་ཡི་ངང་ནས་བར་དོ་སྒྱུ་མའི་གཟུགས། །མཚན་དཔེའི་རྒྱན་ལྡན་ཐོབ་པར་བྱིན་གྱིས་རློབས། །ཞེས་པ་བར་དོའི་འོད་གསལ་ལ་གཞིའམ་མ། ལམ་སྒོམ་པའི་འོད་གསལ་ལ་བུ་ཞེས་མིང་བཏགས་ཏེ། འཆི་བ་ཆོས་སྐུ། བར་དོ་ལོངས་སྐུ། སྐྱེ་བ་སྤྲུལ་སྐུར་གྲོལ་བའི་ལམ་ལས་བར་དོ་ལོངས་སྐུར་སྨིན་པའི་སྨོན་ལམ་མོ། །ལྔ་པ་མཇུག་དགེ་བ་ཆོས་ཀྱི་སྐུར་བསྔོ་བ་ཚིགས་བཅད་
བཞི་ནི། མདོར་ན་བདག་སོགས་སྐྱེ་བ་ཐམས་ཅད་དུ། །དལ་འབྱོར་མཆོག་ཐོབ་ཐེག་ཆེན་ལམ་ལ་ཞུགས། །རྡོ་རྗེ་ཐེག་པ་སྟོན་པའི་བླ་མ་དང་། །ནམ་ཡང་འབྲལ་བ་མེད་པར་བྱིན་གྱིས་རློབས། །ཞེས་ལམ་གྱི་རྩ་བ་དགེ་བའི་བཤེས་གཉེན་དང་མི་འབྲལ་བའི་དོན་དང་། ཐོག་མར་སྨིན་བྱེད་དབང་གིས་རྒྱུད་སྦྱངས་ནས། །གྲོལ་བྱེད་རིམ་གཉིས་ཟབ་མོའི་ལམ་མཆོག་གིས། །སྐུ་བཞིའི་དབང་ཕྱུག་ཁྱབ་བདག་རྡོ་རྗེ་འཆང་། །གོ་འཕང་བདེ་བླག་འགྲུབ་པར་བྱིན་གྱིས་རློབས། །ཞེས་པ་རྩ་བའི་བླ་མས་སྨིན་གྲོལ་གྱི་ལམ་བསྟན་པ་ཉམས་སུ་མྱོང་བ་དང་། གནས་སྐབས་སུ་ཡང་འགལ་རྐྱེན་མཐའ་དག་ཞི། །མཐུན་རྐྱེན་ཚེ་དང་དཔལ་འབྱོར་རྒྱས་པ་དང་། །ཆོས་བཞིན་སྤྱོད་པའི་གྲོགས་དང་ལྷན་ཅིག་ཏུ། །བསམ་པའི་དོན་ཀུན་འགྲུབ་པར་བྱིན་གྱིས་རློབས། །ཞེས་ལམ་བསྒོམ་པ་ལ་བར་ཆད་མེད་པ་དང་། འཁྲུལ་པའི་དེ་ཉིད་ཤེས་པའི་རྣམ་དཔྱོད་ཀྱིས། །ཐ་མལ་ཤེས་པ་རང་ངོ་མཐོང་བའི་ཚེ། །གསལ་སྟོང་འཛིན་མེད་སེམས་སུ་
ཐག་ཆོད་ནས། །ཅིང་སྣང་ཆོས་སྐུར་འཆར་བར་བྱིན་གྱིས་རློབས། །ཞེས་གནས་ལུགས་ཆོས་སྐུའི་རང་ཞལ་མཇལ་བའི་སྨོན་ལམ་མཐར་ཐུག་པའོ། །རང་གི་ཡིད་ལ་ངེས་པའི་ཕྱིར། །ཤཱ་ས་དྷྭ་ཛའི་ཡིག་རྙིང་ལས། །མཁན་པོ་རཏྣས་བསྡུས་ཏེ་བྲིས། །ཚིག་དོན་ཁོང་དུ་ཆུད་པ་དང་། །ལུང་རྟོགས་བསྟན་པ་འཕེལ་གྱུར་ཅིག །དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།