འཁྲུལ་འཁོར་དཔེའུ་རིས།
ནཱ་རོ་ཆོས་དྲུག་ལས་གཏུམ་མོའི་བོགས་འདོན་ལུས་སྦྱོང་འཁྲུལ་འཁོར་གྱི་ཞལ་ཁྲིད་ཀུན་གསལ་མེ་ལོང་ཞེས་བྱ་བ་བཞུགས་སོ། །
ན་མོ་གུ་རུ་ཀརྨ་ཀཱ་ཡེ། འདིར་མྱུར་ལམ་ཟབ་མོ་ནཱ་རོ་ཆོས་དྲུག་གི་ལམ་གྱི་གཞུང་ཤིང་གཏུམ་མོ་ལ་བརྟེན་ནས་རྩ་རླུང་ཐིག་ལེ་གནད་དུ་བསྣུན་པས་ཟག་མེད་ཀྱི་ཡེ་ཤེས་དང་བདེ་དྲོད་རང་འབར་དུ་འགྱུར་བའི་ཐབས་དང་དམིགས་རིམ་གཙོ་བོར་གཞུང་ཁྲིད་ལ་ཉམས་མྱོང་གི་མན་ངག་ཞལ་རྒྱུན་གྱིས་བརྒྱན་པ་ཞུས་ཏེ་ཉམས་ལེན་བྱང་ཞིང་ཆུབ་པ་གལ་ཆེ་ཞིང་དེ་ཡི་བོགས་འདོན་ལུས་སྦྱོང་འཁྲུལ་འཁོར་གྱི་ཕྱག་ལེན་མཐོང་རྒྱུན་མ་ཆད་པ་བཞུགས་བཞིན་པ་འདི་ལྟར་ལ། དེ་ཡང་སོ་སོའི་ཞལ་རྒྱུན་སོགས་ཀྱི་ཕྲན་བུའི་འདྲ་མིན་འབྱུང་འདུག་པར་བརྟེན་དཔེའུ་རིས་ལ་འཕྱུག་མེད་ཀྱི་ལག་ལེན་ཡི་གེ་ཁ་གསལ་དུ་བཀོད་པ་ལ། ༼ཀ༽ ཐོག་མར་སྔོན་འགྲོ་རླུང་སྐྱོན་སེལ་བའི་འཁྲུལ་འཁོར་ནི། རླུང་བཟུང་
མ་ལ་འཕྱུག་མེད་ཀྱི་ལག་ལེན་ཡི་གེ་ཁ་གསལ་དུ་བཀོད་པ་ལ། ༼ཀ༽ ཐོག་མར་སྔོན་འགྲོ་རླུང་སྐྱོན་སེལ་བའི་འཁྲུལ་འཁོར་ནི། རླུང་བཟུང་མི་དགོས་ལུས་གནད་རྣམ་སྣང་ཆོས་བདུན་བཅས་ལ་ལག་མཐིལ་གཉིས་ཀྱིས་རྐང་མཐིལ་དུ་ཤེད་ཀྱིས་ལན་གསུམ་བརྡབ། དེ་འཕྲལ་ལག་གཉིས་སྙིང་ཁར་འཁྱུད་རྒྱ་བྱས་ལ་བཀྲོལ་བ་དང་ལྷན་དུ་རྡོར་སྐྱིལ་བཤིག་ནས། ༼ཁ༽ ཅུང་ཟད་ཡར་འཕགས་ཉམས་བཅས་རྐང་པ་གཡས་ཤེད་ཀྱིས་བརྐྱང་པའི་དཔྱི་མགོར་ལག་གཉིས་ཀྱི་ཐལ་རྡེབ་བཅས་བརླ་ཡི་ཕྱི་ཟུར་ནས་མར་བྱུག་ཞོར་སོར་
རྩེ་ནས་བསྐོར་མི་དགོས་ལོང་ཚིགས་བསྡམས་ཙམ་བྱས་ནས། ལག་པ་གཉིས་ཀས་ནང་ནས་ཡར་བྱུག་ཞོར་རྐང་པ་བསྐུམ་ཡང་རྐང་པ་མར་བརྐྱང་ལ་དཔྱི་མགོར་ཐལ་རྡེབ་སོགས་ལན་གསུམ་བྱས་ལ། དེ་ནས་རྐང་པ་གཡོན་ལ་ཡང་དེ་འདྲ་ལན་གསུམ་བྱ། དེ་འཕྲལ་རྡོར་སྐྱིལ་བཅས་ལ། ༼ག༽ དཔུང་བརྐྱངས་ལག་གཉིས་ཐལ་མོ་སྙིང་ཁའི་ཐད་དུ་བརྡབས་ནས་ལག་པ་བཀྲུ་བ་ལྟར་འཕུར་ཞིང་། མདུན་དུ་ཕྱིར་འཕེན་པའི་ཚུལ་བཅས་དེ་འདྲ་ལན་གསུམ་བྱ། ༼ང་༽ ལག་གཡས་ཀྱིས་ཕྲག་གོང་ནས་ཕྱིར་བྱུག་ལག་མགོ་ཁུ་ཚུར་རྩེ་ནས་ནང་ནས་མཆན་ཁུང་བར་དུ་བྱུགས་འཕྲལ། མཆན་རྡེབ་རྒྱབ་ལ། ཡང་ཕྲག་གོང་ནས་བྱུག་པ་བཅས་དེ་འདྲ་ལན་གསུམ་དང་། དེ་ནས་ལག་གཡས་ཤེད་ཀྱིས་བརྐྱང་ལ་གཡོན་ཀྱི་ཕྲག་གོང་ནས་བྱུགས་ཤིང་མཆན་རྡེབ་བཅས་གོང་ལྟར་ལན་གསུམ་བྱས་ནས། མགོ་འཕུར་ནི། ༼ཅ༽ ལག་གཉིས་
བསྒྲིག་ནས་ཐལ་མོ་ཕྱིར་བསྟན་རྡོར་སྐྱིལ་ཐད་ནས་ཡར་ཁྱེར། མཆན་རྡེབ་བཅས་མདུན་དུ་བརྐྱང་ཞིང་། ལག་གཡས་ཀྱིས་དཔྲལ་བ་དང་། གཡོན་པ་ལྟག་པར་བཞག་ནས། བྱུགས་ཤིང་འཕེན་པའི་ཚུལ་བྱ། སླར་ཡང་མཆན་རྡེབ་མདུན་བརྐྱང་གིས་གཡོན་ནང་གཡས་ཕྱི་བྱུག་དང་འཕེན་ཚུལ་དེ་ནས་མཆན་རྡེབ་བཅས་མདུན་བརྐྱང་གིས་གཡས་ནང་གཡོན་ཕྱི་བྱས་ལ་བྱུག་དང་འཕེན་པའི་ཚུལ་བཅས་གོང་གསལ་གཡས་གཡོན་བསྡོམས་པས་གསུམ་བྱ། ༼ཆ༽ དེ་ནས་གདོང་བྱུག་ནི་ལག་མཐིལ་གཉིས་ཀྱིས་དཔྲལ་བ་ནས་གདོང་པ་ཕྱིར་བྱུག། ལྐོག་མའི་ཐད་ནས་ཐལ་མོའི་མཛུབ་རྩེ་རྣམས་སྦྲེལ་ལ་ཕྱིར་བསྟན། དེ་འདྲ་ལན་གསུམ་སོང་ནས། ༼ཇ༽ ནུ་འཕུར་ནི་དང་པོ་ནུ་མ་གཡོན་ཕྱོགས་སུ་ལག་གཡས་སྟེང་གཡོན་འོག་གི་ཁུ་ཚུར་གྱིས་ཕྱིར་བྱུག །དེ་ནས་ནུ་མ་གཡས་ཐོག་ལག་གཡོན་སྟེང་གཡས་འོག་བྱས་ནས་བྱུག་པ་བཅས་རེས་མོས་ཀྱིས་གཡས་ལ་གསུམ་གཡོན་ལ་གསུམ་བཅས་ཁྱོན་བསྡོམས་དྲུག་ཚང་དགོས། འདི་སྐབས་
ལག་གཉིས་ཁུ་ཚུར་ནང་བསྟན་གྱིས་བྱུག་པ་ཡིན་ཀྱང་། དཔེ་རིས་སུ་ཐལ་མོ་བྲིས་པ་ཅུང་ནོར་སོང་འདུག་པ་དགོངས་འཇགས་ཞུ། ༼ཉ༽ ལག་གཉིས་ཁུ་ཚུར་གཡས་མདུན་སྙིང་ཁའི་སྟོད་བྲང་གཞུང་དང་། གཡོན་རྒྱབ་གཞུང་རྒལ་ཚིགས་སྟེང་དུ་བཞག་ནས། མཉམ་དུ་ཕྱིར་བྱུག་ཡང་གཡོན་མདུན། གཡས་རྒྱབ་ཏུ་བཞག་ནས་དེ་བཞིན་བྱུག །ཡང་གོང་བཞིན་གཡས་མདུན་གཡོན་རྒྱབ་བྱས་ནས་བྱུག་པ་བཅས་ཁྱོན་གསུམ། ༼ཏ༽ ལག་གཉིས་ཁུ་ཚུར་རྒྱུ་ཁུག་མཁལ་མའི་སྟེང་དུ་བཞག་ནས་བསྐོར་ཞིང་འཕུར་བ་ལན་གསུམ་བྱ། དེས་སྔོན་འགྲོ་རླུང་སྐྱོན་སེལ་བའི་འཁྲུལ་འཁོར་རྫོགས་སོ། །དམིགས་པའི་གནད་ནི་ལག་མཐིལ་གཉིས་སུ་རླུང་གི་དཀྱིལ་འཁོར་སྔོན་པོ་གཞུ་ཡི་དབྱིབས་ཅན་ཡྃ་ཡིག་ལྗང་ཁུས་མཚན་པ། རྐང་མཐིལ་གཉིས་སུ་མེ་ཡི་རང་བཞིན་ཆོས་འབྱུང་དམར་པོ་རྃ་གྱིས་མཚན་པ་བསྒོམ་ལ་ལག་མཐིལ་གྱིས་རྐང་མཐིལ་དུ་ལན་གསུམ་བརྡབ་པའི་ཚེ་རྐང་མཐའ་ཆོས་འབྱུང་ལས། དང་པོས་དུ་བ་འཐུལ། གཉིས་
པས་མེ་སྟག་འཚུབས། གསུམ་པས་མེ་ལྷབ་ཀྱིས་འབར་སྟེ་རང་ལུས་མེ་ཡི་གོང་བུར་ཚུད། རྩ་རླུང་གི་སྐྱོན་ཐམས་ཅད་འཚིགས་རྩ་མདུད་སོགས་གྲོལ་བར་སྒོམ་མོ། །དེ་ནས་རླུང་བྱང་བའི་ཕྱིར་རླུང་རོ་དགུ་ཕྲུག་འབུད་པ་ནི་ལུས་གནད་བསྲངས་ཁུ་ཚུར་གཉིས་བརླ་རྩར་སྦུབ་ཐོག་མར། ༡༽ ལག་གཡོན་ཁུ་ཚུར་པུས་སྟེང་ནས་ཡར་ཁྱེར་ནས་ནུ་མའི་སྟེང་དུ་སླེབས་ཚེ་མཆན་རྡེབ་ཀྱིས་མདུན་དུ་ཤེད་ཀྱིས་བརྐྱང་འཕྲལ་ཁུ་ཚུར་མཛུབ་སྐོར་བཅས་གྲུ་མོ་ཐད་ཀར་བརྐྱང་། མཛུབ་མོས་སྣ་བུག་གཡོན་པ་བཀག་རླུང་གཡས་ནས་རྔུབ་ཅིང་འབུད་པ་གསུམ་བྱས་ལ་མཆན་རྡེབ་ཀྱིས་མདུན་དུ་ཤེད་ཀྱིས་བརྐྱང་ལ་སྔར་བཞིན་བརླ་རྩར་སྦུབ་མར་བརྐྱང་དུས་མཛུབ་སྐོར་མེད། ༈ །དམིགས་པའི་གནད་ནི། རླུང་ཕར་འབུད་པའི་ཚེ། སྐྱེ་བ་ཐོག་མེད་ནས་བསགས་པའི་སྡིག་སྒྲིབ་ནད་གདོན་ཐམས་ཅད་དང་། ཁྱད་པར་རྩ་རླུང་ཐིག་གསུམ་གྱི་གེགས་དང་བར་ཆད་ཐམས་ཅད་དབང་པོའི་སྒོ་དགུ་དང་བ་སྤུའི་བུ་ག་ཐམས་ཅད་ནས་སྔོ་ཐར་རེ་སོང་བར་བསམ། ཚུར་རྔུབ་པའི་སྐབས། ཡེ་ཤེས་ལྔ་ཡི་རང་བཞིན་དཔའ་བོ་དང་མཁའ་འགྲོ་མ་ཐམས་ཅད་རྩ་རླུང་ཐིག་གསུམ་གྱི་གྲོགས་སུ་རླུང་འོད་ཟེར་
ཁ་དོག་སྣ་ལྔའི་རྣམ་པར་སྤྱན་དྲངས། རྩ་དམིགས་ཐམས་ཅད་དུ་མཚོ་ལ་ཆར་བབ་པ་ལྟར་སིབ་སིབ་ཐིམ་པར་སྒོམ་མོ། །དེ་ནས་ལག་གཡས་པུས་སྟེང་ནས་ཡར་ཁྱེར་མཆན་རྡེབ་མདུན་བརྐྱང་མཛུབ་མོས་སྣ་གཡས་བཀག་ལ་གཡོན་ནས་རྔུབ་ཅིང་འབུད་པ་གསུམ་བྱས་ལ་མཆན་རྡེབ་མདུན་བརྐྱངས་ཀྱིས་བརླར་སྦུབ། དེ་ཡི་ཚེ་དམིགས་པ་ནི་རླུང་ཕར་བཏང་བ་ན་སྐྱེ་བ་བར་མ་འདིའི་བསླབ་པ་གསུམ་ལ་ལྟུང་བས་གོས་པའི་སྡིག་སྒྲིབ་དང་། རྩ་རླུང་ཐིག་ལེའི་གེགས་དང་བར་ཆད་ཐམས་ཅད་སྔོ་ལྗང་གིས་ཕྱི་རོལ་དུ་སོང་བ་དང་། ཚུར་རྔུབ་ཚེ་བྱིན་རླབས་བསྡུ་བའི་དམིགས་པ་གོང་བཞིན་བྱའོ། ༢༽ །དེ་ནས་ལག་གཉིས་ཁུ་ཚུར་བརླ་རྩར་སྦུབ་བཞིན་སྣ་བུག་གཉིས་ནས་རྔུབ་དགང་། ཕྱིར་འབུད་དུས་ཁུ་ཚུར་པུས་སྟེང་དུ་སྦུབ། ཡང་ཁུ་ཚུར་བརླ་རྩར་ཡང་ཁྱེར། དེ་འདྲ་ལན་གསུམ་བྱ། དེ་ཡི་ཚེ་དམིགས་པ་ནི། རླུང་ཕྱིར་བཏང་དུས་སྐྱེ་བ་ཐོག་མཐའ་བར་གསུམ་གྱི་དམ་ཚིག་ཉམས་ཆག་སྡིག་སྒྲིབ་ནད་གདོན་སོགས། རྩ་རླུང་གི་བར་ཆད་ཐམས་ཅད་དབང་པོའི་སྒོ་དང་བ་སྤུའི་བུ་ག་བཅས། ལུས་ཁྲོལ་ཚག་ལྟར་ཡོད་པ་ནས་སྔོ་ལྗང་གིས་སོང་བ་དང་། ཚུར་རྔུབ་པའི་ཚེ་གོང་བཞིན་བྱིན་
རླབས་བསྡུ་བའི་དམིགས་པ་བཅས་བྱའོ། ༈ །རླུང་བུམ་ཅན་བཟུང་བ་ནི། ལུས་གནད་ཇི་སྐད་དུ། རྣམ་སྣང་ཆོས་བདུན་ཞེས་བྱ་བ། །རྐང་པ་རྡོ་རྗེ་སྐྱིལ་ཀྲུང་གིས། །དྲོད་ནི་ཤུགས་ལ་སྐྱེ་བ་ཡིན། །ལག་པ་ལྟེ་འོག་སོར་བཞིའི་མཚམས། །མཉམ་བཞག་ཕྱག་རྒྱ་དམ་པར་བྱ། །རྩ་ཁ་འབྱེད་ཅིང་བདེ་བ་སྐྱེ། །སྒལ་ཚིགས་མདའ་ལྟར་དྲང་པོར་བསྲངས། །རླུང་རྣམས་རང་སར་ཚུད་པ་ཡིན། །མགྲིན་པ་ལྕགས་ཀྱུ་ལྟར་བཀུག་པས། །སྙིང་རྩེ་གྱེན་ལྡོག་མི་རྟོག་སྐྱེ། །དཔུང་པ་རྒོད་གཤོག་ལྟར་བརྒྱངས་པས། །དགོས་པ་རླུང་ནད་ཆུང་བ་ཡིན། །མིག་གིས་སྣ་རྩེར་གཏད་པ་ཡིས། །དམིགས་པ་དག་ནི་གསལ་བ་ཡིན། །ལུས་སེམས་རིལ་བུ་ལྟར་དུ་སྒྲིམ། །བདེ་དྲོད་མྱུར་དུ་སྐྱེ་བ་ཡིན། །ཞེས་གསུངས་པ་ལྟར་བཅས་གཞི་དེ་དང་ལྡན་པས། རླུང་དངོས་བཟུང་བ་ནི། རྔུབ་དགང་བཞིལ་བ་མདའ་ལྟར་འཕང་། །སྦྱོར་བ་བཞི་ལྡན་མ་ཤེས་ན། །ཡོན་ཏན་སྐྱོན་དུ་འགྱུར་ཉན་ཡོད། །ཅེས་དང་། རྒྱ་རས་ཀྱིས། རླུང་སེམས་གཉིས་མེད་མི་ཤེས་པའི། །རླུང་ཀྱང་འབུད་པ་ཀྱི་སེར་ཡིན། །ཞེས་པ་ལྟར། དམིགས་པའི་གནད་སྟོང་ར་རྩ་གསུམ་འཁོར་ལོ་བཞི་བཅས་གསལ་ཞིང་རླུང་སེམས་གཉིས་མེད་
ཀྱི་བསྐྱེད་རྫོགས་དང་མ་བྲལ་བས་ལྕགས་ཀྱུ་ལྟར་འགུགས། རྒྱ་མཚོ་ལྟར་དགང་། ཡུར་བ་ལྟར་གཞིལ། མདའ་ལྟར་འཕང་བ་སྟེ་སྦྱོར་བ་བཞིའི་ཚུལ་ལ་ནན་ཏན་དུ་བྱའོ། །འདི་ཕྱིན་དམིགས་བསལ་མ་གཏོགས་རླུང་བུམ་ཅན་བཟུང་བཞིན་དུ་རླུང་ཁུག་རེ་ལ་འཁྲུལ་འཁོར་རེ་རྫོགས་པར་བྱ་དགོས། རྩ་ཁྲུས་ཡན་ལག་ལྔ་སྦྱོང་ནི། ལུས་གནད་རྡོར་སྐྱིལ་དྲང་པོར་བསྲང་རླུང་བཟུང་འཕྲལ། ༼ཀ༽ ལག་གཉིས་ཁུ་ཚུར་སྦུབས་ལ་པུས་མོའི་སྟེང་ནས་ཡར་ཁྱེར་ནུ་སྟེང་སླེབས་འཕྲལ་མཆན་རྡེབ་བཅས་ཤེད་ཀྱིས་མདུན་དུ་བརྐྱང་སྐུམ་དུས་བྲང་སྟེང་ཤེད་ཀྱིས་བརྡེག་པ་དེ་འདྲ་ལན་གསུམ་བྱ། ༼ཁ༽ ལག་གཡོན་འཕྲོད་དུ་ཤེད་ཀྱིས་བརྐྱངས། ལག་གཡས་ཀྱིས་གཡོན་པའི་ཕྲག་མགོ་ནས་ཕྱིར་བྱུག་མཁྲིག་མའི་མཚམས་ནས་ནང་ལ་མཆན་ཁུང་བར་ཡར་བྱུག །ཡང་ལག་གཡོན་ཤེད་ཀྱིས་བརྐྱངས་པ་སོགས་གོང་ཀྱིས་གཡོན་པའི་ཕྲག་མགོ་ནས་ཕྱིར་བྱུག་མཁྲིག་མའི་མཚམས་ནས་ནང་ལ་མཆན་ཁུང་བར་ཡར་བྱུག ཡང་ལག་གཡོན་ཤེས་ཀྱིས་བརྐྱངས་
ཀྱིས་གཡོན་པའི་ཕྲག་མགོ་ནས་ཕྱིར་བྱུག་མཁྲིག་མའི་མཚམས་ནས་ནང་ལ་མཆན་ཁུང་བར་ཡར་བྱུག །ཡང་ལག་གཡོན་ཤེད་ཀྱིས་བརྐྱངས་པ་སོགས་གོང་བཞིན་བཅས་གསུམ་དང་། ལག་གཡས་བརྐྱངས་ཤིང་གཡོན་པས་བྱུག་ཚུལ་སོགས་གོང་དང་འདྲ་བ་གསུམ་བྱ། ༼ག༽ དེ་ནས་ཐལ་མོ་གཉིས་སྙིང་ཁའི་ཐད་དུ་རྡེབ་བྱུག་ཕྱིར་འཕེན་ཉམས་ཅན་གསུམ་བྱ། འདི་གོང་གི་རླུང་སྐྱོན་སེལ་དུས་ཀྱི་ལག་པ་བཀྲུ་བ་ལྟར་མིན། ༼ང་༽ ཐལ་མོ་གཉིས་ཕྱིར་བསྟན་པ་བཅས་པུས་མོའི་སྟེང་ནས་ཡར་ཁྱེར་མཆན་རྡེབ་ཀྱིས་མདུན་དུ་བརྐྱང་ལ་ལག་གཡས་དཔྲལ་བ་གཡོན་ལྟག་པ་ནས་བསྐོར། ཡང་མཆན་རྡེབ་བཅས་ལག་གཡས་གཡོན་ཕྱི་ནང་བརྗེ་རེས་ལན་གསུམ། གོང་གི་རླུང་སྐྱོན་སེལ་བའི་སྐབས་དང་འདྲ། ༼ཅ༽ ལག་གཡས་ཁུ་ཚུར་སྦུབས་ལ་འཆང་ཁ་ཕྱིར་བསྟན་གྱིས་དྲང་དང་། གཡོན་པ་ཁུ་ཚུར་
བཀན་ལ་འཆང་ཁ་ཕྱིར་བསྟན་གྱིས་རྒྱབ་གཞུང་དུ་བཞག་ལ་དབུ་མ་ཤད་པ་ལག་གཡས་གཡོན་ཕྱི་ནང་རྗེ་རེས་ཀྱིས་ཕྱིར་ཤད་གསུམ་བྱ། ༼ཆ༽ རྡོར་སྐྱིལ་བཤིག་ནས་རྐང་གཡས་བརྐྱངས་ལག་གཉིས་ཀྱིས་བརླ་གཡས་དཔྱི་མགོར་ཐལ་རྡེབ་དང་བཅས་ཕྱི་ནས་མར་བྱུག་པ་སོར་རྩེ་རྐང་མཐིལ་ནས་ཡར་བརླ་ནས་ཡར་བྱུག་པ་གསུམ་དང་། འདི་སྐབས་པདྨ་ཉིན་བྱེད་ཟིན་བྲིས་སུ་ལག་པས་ཕྱི་ནས་མར་བྱུག་པ་སྐོར་བ་བརྐྱང་ནང་ནས་ཡར་བྱུག་པ་དང་རྐང་པ་བསྐུམ་པར་གསུངས་ཀྱང། དེ་ནི་གོང་གི་རླུང་སྐྱོན་སེལ་བའི་སྐབས་ལས་འདིར་མི་མཛད། ༼ཇ༽ སེམས་སྐྱིལ་བྱས་ལ་ལག་གཡོན་རྐང་གཡས་མཐིལ་འགེབ་ནས་བཟུང་ལག་གཡས་ཁུ་ཚུར་པུས་མོ་གཡས་ཀྱི་ཐོག་སྦུབ་ཅིང་མནན་ལ་མིག་གིས་གཡས་གཡོན་དབུས་གསུམ་དུ་གྱེན་ལ་ལྟ་བ་རེ་བྱ། དེ་ནས་རྐང་གཡོན་
བརྐྱང་ལ་དཔྱི་མགོར་ཐལ་རྡེབ་ནས་ཕྱི་ནང་བྱུག་པ་གསུམ་དང་། སེམས་སྐྱིལ་རྐང་པ་གཡས་གཡོན་ཕྱི་ནང་གོ་བརྗེ་སྟེ་མིག་གིས་གྱེན་ལྟ་གསུམ་བཅས་གོང་བཞིན་སོང་ནས། རྡོར་སྐྱིལ་བཅས་ལ་ལག་གཉིས་ཁུ་ཚུར་མཐེ་བོང་སར་བཙུག་སྟེ། རྡོར་སྐྱིལ་གདན་ལས་འཕགས་ཁུ་ཚུར་ཡར་བཀྱག་པ་དང་། ལུས་ལྗིད་ཀྱིས་རྡོར་སྐྱིལ་འབེབས་གདན་ལ་བརྡབ་པའི་འབེབས་ཆུང་གསུམ་བརྒྱབས་ལ་རྡོར་སྐྱིལ་བཀྲོལ་སྟེ་རླུང་བཏང་། པུས་མོའི་འཕང་ལོའི་སྟེང་ལག་མཐིལ་གྱིས་མནན་ལ་རོ་སྟོད་སི་ལི་ལི་སྤྲུགས་ཤིང་ཧ་སྤྲུགས་བྱའོ། །དེ་དག་གི་ཚེ་དམིགས་པའི་གནད་ནི། རྩ་གསུམ་འཁོར་ལོ་བཞི་དང་ཡན་ལག་བཞི་ཡི་ཚིགས་ཆེན་ཚིགས་ཕྲན་རྣམས་ཀྱི་འཁོར་ལོ་རྣམས་གསལ་ལ། དེ་སྔ་ཕན་ཆད་ཉོན་མོངས་པའི་སྟོབས་ཀྱིས་ཡེ་ཤེས་ཀྱི་རྩ་རྣམས་གྲུ་གུ་བཞིན་ལྡོག་ཅིང་གྱོང་ནས་ཡོད་པ་རྩ་གནས་རྣམས་སུ་རླུང་གིས་ཁྱབ་སྟེ་འཕུར་སྲུབ་སོགས་བྱས་པས་དེ་རྣམས་མཉན་ཅིང་གཞུ་རྒྱུད་ལྟར་བརྐྱངས་པའི་དམིགས་པ་བྱའོ། །ནཱ་རོ་དྲུག་སྐོར་ནི་དམིགས་པ་སོགས་བྱང་ན་བོགས་འདོན་གྱི་དམིགས་པ་དང་སྦྲགས་ཚུལ་ནི། ༡༽ རྡོར་སྐྱིལ་བཅས་ལ་རྩ་གསུམ་འཁོར་ལོ་དྲུག་འཁོར་ཕྲན་དང་བཅས་
པར་གསལ་པའི་འདུས་མདོར་ཡེ་ཤེས་ཀྱི་གཏུམ་མོ་མཚན་ཉིད་བཞི་ལྡན་ཐིག་ལེའི་རྣམ་པ་སེམས་དང་དབྱེར་མེད་དུ་སྒོམ་ལ་རླུང་བཟུང་བས་གཏུམ་མོའི་མེ་ཡི་རྩེ་མོ་ངྷཱུ་ཏིའི་ནང་དུ་ཞུགས་མེ་ཤེད་ཇེ་ཆེར་འབར་སྟེ་ལྟེ་བའི་འཁོར་ལོ་མན་ཁྱབ་པར་བསྒོམ་ཞིང་ལག་གཉིས་ཁུ་ཚུར་ཁ་སྦུབས་པུས་སྟེང་དུ་བཞག་ནས་ཕོ་བ་གཡས་གསུམ་སྐོར་གཡོན་གསུམ་སྐོར་མེ་ཡིས་སྙིང་ག་མན་ཆད་ཁྱབ་པར་བསྒོམ་ལ། ༈ ༢༽ །ཁུ་ཚུར་པུས་སྟེང་དུ་སྦུབ་བཞིན་པ་ནས་དཔུང་པ་བརྐྱངས་ཤིང་རོ་སྟོད་གཡས་གཡོན་བཅུད་པ་རེས་མོས་ཀྱིས་ལན་དྲུག་བྱ་དེ་ནས་མེ་ཡིས་མགྲིན་པ་བར་ཁྱབ་པར་སྒོམ། ༣༽ ལག་གཉིས་ཁུ་ཚུར་གྱེན་བསྟན་བརླ་རྩར་བཞག་ལ་མགོ་གཡས་སྐོར་གསུམ་དང་གཡོན་སྐོར་གསུམ་བྱ་མེ་ཡིས་སྤྱི་བོ་མན་ཆད་ཁྱབ་པར་སྒོམ། ༈ ༤༽ །མགོ་བོ་དགུ་བའི་མདུན་འཕང་གསུམ་དང་།
༥༽ མགོ་བོ་དགྱེ་བའི་རྒྱབ་འཕང་གསུམ་བྱ་དེ་ནས་མེ་ཡིས་ཡན་ལག་གི་འཁོར་ལོ་རྣམས་ལ་ཁྱབ་པར་བསྒོམ། ༦༽ རྡོར་སྐྱིལ་བཤིག །གཞོགས་གཡོན་ས་ལ་ཕབ། གཡོན་ཁུ་ཚུར་ནུ་སྟེང་བཞག་ཅིང་གྲུ་མོ་གདན་ལ་གཙུག །རྐང་གཡོན་བསྐུམ་པའི་རྟིང་པས་འོག་སྒོ་མནན། ལུས་ཚུགས་མ་ཤོར་བར་ལག་གཡས་རྐང་གཡས་མཉམ་དུ་ཤེད་ཀྱིས་གྱེན་ལ་བརྐྱང་ཞིང་། ཕྱིར་ཤེད་ཀྱིས་བསྐུམ་དུས་ལག་པས་མཆན་རྡེབ་དང་རྐང་པས་འཕོངས་རྡེབ་ཕོག་པ་ལན་གསུམ་བྱ། དེ་ནས་གཞོགས་གཡས་ས་ལ་ཕབ་ནས་གོང་བཞིན་ལན་གསུམ་སོང་ནས་མེ་ཡིས་ལུས་ཀྱི་ནང་ཐམས་ཅད་ཁེངས་ནས་བ་སྤུའི་པར་ཁྱབ་པར་བསྒོམ་ལ། རྡོར་སྐྱིལ་བཅས་ལག་གཉིས་ཁུ་ཚུར་དང་པོ་གཡས་མདུན་གཡོན་རྒྱབ། དེ་ནས་གཡོན་མདུན་གཡས་རྒྱབ་བཅས་ཕྱི་ནང་རེས་མོས་ཀྱིས་རོ་སྟོད་ལ་ཡར་ཤད་གསུམ་ཁྱོག་སྨད་ལ་མར་ཤད་གསུམ་བྱ། དེ་ནས་ལུས་
ཀྱི་ཕྱི་ནས་ཀྱང་མེ་དམར་ཡོར་ཡོར་འབར་བར་སྒོམ་ལ་འབེབས་ཆུང་གསུམ་རྒྱབ། སླར་ཡང་མེ་རྣམས་གཏུམ་མོའི་འདུས་མདོར་ཐིམ་པར་བསམ་ཞིང་རྡོར་སྐྱིལ་བཤིག་ལ་རླུང་བཏང་ཧ་སྤྲུགས་འཕུར་འདར་བྱའོ། །འདི་སྐབས་དམིགས་པ་མི་གསལ་བའི་ལས་དང་པོ་དང་། དམིགས་པ་གསལ་ཀྱང་རོ་སྟོད་ན་བ་དང་རླུང་ཤེད་ཆེ་བ་སོགས་ལ་སྤྱིར་བཏང་དུ་དམིགས་གནད་རྩ་གསུམ་འཁོར་ལོ་བཞི་དང་བཅས་པའི་འདུས་མདོར་གཏུམ་མོའི་མེ་མཚན་ཉིད་བཞི་ལྡན་ཆེས་ཕྲ་བ་ནས་གསུམ་འཁྱོག་སོར་བཞི་པའི་བར་གསལ་བ་ལ་དམིགས་པ་གཏད་པར་བྱའོ། །རྩ་གསུམ་འཁོར་ལོ་སོགས་གྲུབ་ཆེན་ཀརྨ་པཀྴིས་མན་ངག་དུ་བཀྲལ་བའི་ལུས་སྦྱང་འཁྲུལ་འཁོར་སོ་བདུན་མར་གྲགས་པའི་གྲངས་ནི་ས་གནོན་བྱས་ལ་གཡས་གཡོན་སྐོར་བ་དྲུག །པུས་མོ་གཡས་འཇུས་གཡོན་སྐོར་བ་དྲུག །དེ་བཞིན་གཡོན་འཇུས་དྲུག་བཅས་བཅོ་བརྒྱད་ལ། གཡས་གཡོན་ཞགས་འཕེན་དྲུག་གིས་ཉེར་བཞི་སྟེ། །མདའ་འགེངས་གཡས་གཡོན་དྲུག་དང་སུམ་ཅུ་ལ། གཡས་གཡོན་ནང་བྱུག་
དྲུག་དང་སོ་དྲུག་སྟེ། ཧ་སྤྲུགས་བསྒྲང་བས་ལུས་སྦྱོང་སོ་བདུན་ནོ། །ཞེས་གསུངས་པའི་སོ་བདུན་མ་ནི་ལུས་གནད་རྡོར་སྐྱིལ་བཅས་ལ་རླུང་བཟུང་། ༼ཀ༽ ལག་གཉིས་ཁུ་ཚུར་ཁ་སྦུབ་པུས་མོའི་སྟེང་དུ་བཞག་ལ་ཕོ་བ་གཡས་སྐོར་གསུམ་གཡོན་སྐོར་གསུམ་བྱ། ༼ཁ༽ པུས་མོ་གཡས་ཀྱི་སྟེང་དུ་ལག་གཡས་ཁུ་ཚུར་སྦུབ་ཐོག་གཡོན་གྱི་ཁུ་ཚུར་སྦུབ་ལ་བརྩེགས་ཕོ་སྐོར་གཡས་གསུམ་གཡོན་གསུམ་བྱ། དེ་ནས་པུས་མོ་གཡོན་སྟེང་ཁུ་ཚུར་གཡོན་ཐོག་གཡས་བརྩེགས་ལ་ཕོ་སྐོར་གཡས་གསུམ་གཡོན་གསུམ་བྱ། དེ་ནས། ༼ག༽ ཁུ་ཚུར་ཞགས་འཕེན་ནི་ལག་གཡོན་ཁུ་ཚུར་པུས་གཡོན་སྟེང་སྦུབས་བཞིན་ལག་གཡས་མགོ་ཐོག་ནས་གཡོན་དུ་སྐོར་ལ་མཆན་རྡེབ་བཅས་མདུན་དུ་བརྐྱང་པ་ལན་གསུམ་བྱ། ལག་གཡས་ཁུ་ཚུར་པུས་གཡས་སྟེང་སྦུབ་ལ་གཡོན་གྱི་ཁུ་ཚུར་མགོ་ཐོག་ནས་གཡས་སྐོར་གྱི་
མཆན་རྡེབ་མདུན་བརྐྱང་གོང་བཞིན་ལན་གསུམ་རྗེས་མདུན་དུ་བརྐྱང་འཕྲལ་མདའ་འགེང་ནི། ༼ང་༽ ལག་གཉིས་མདུན་དུ་ཐལ་མོ་བརྡབ་ལ་གཡོན་པའི་ཁུ་ཚུར་ཤེད་ཀྱིས་བརྐྱང་ཞོར་གཡས་པའི་ཁུ་ཚུར་གཡོན་པའི་མཁྲིག་མ་ནས་བྲང་དཀྱིལ་བར་ཚུར་བྱུག་ལ་ནུ་སྟེང་མཆན་རྡེབ་བྱ་བ་དེ་འདྲ་གཡས་གཡོན་རེས་མོས་ཀྱིས་དྲུག་བྱ། ༼ཅ༽ དེ་ནས་ལག་གཡོན་མདུན་ཐད་དྲང་པོར་བརྐྱང་ལ་ལག་གཡས་ཁུ་ཚུར་གྱིས་འཆང་ཁས་དཔུང་པའི་ནང་མར་ཤད་མཁྲིག་མའི་མཚམས་ནས་ཡར་ཤད་མར་ཤད་ལན་གསུམ་དང་། གཡས་ལའང་གཡོན་གྱིས་ཤད་ཚུལ་དེ་བཞིན་ལན་གསུམ་བྱ། འབེབས་ཆུང་གསུམ་མཐར་རྡོར་སྐྱིལ་དཀྲོལ་ལ་རླུང་བཏང་ཧ་སྤྲུགས་འཕུར་འདོན་སྤྱི་ལྟར་བྱའོ། །དེ་ཡི་ཚེ་དམིགས་པའི་གནད་ནི་རྩ་གསུམ་འཁོར་ལོ་དྲུག་འཁོར་ཕྲན་དང་བཅས་པ་གསལ་བའི་འདུས་
མདོར་ཆོས་འབྱུང་གི་དབུས་ཕག་མོའི་ངོ་བོ་གཏུམ་མོ་ཕྲ་ཞིང་ཕྲ་བ་གོང་བུའི་རྣམ་པར་གསལ་ཞིང་འབར་བའི་རྩེ་མོ་དྷཱུཏིའི་ནང་དུ་ཕྱིན་པ་ལ་སེམས་བཟུང་ཞིང་སྣ་བུག་རོ་རྐྱང་གཉིས་ནས་རྔུབ་པས་མགར་གྱིས་སྦུད་པ་བཏབ་པའི་མེ་བཞིན་གཞི་ཡི་ཙནྡ་ལཱི་ལས་མེ་དྲག་ཏུ་འབར། སྤྱི་བོ་བར་ཁྱབ་དེ་ནས་མེ་རྣམས་ཕྱིར་ལྡོག་འཕྲེད་དུ་འབར་བས་བ་སྤུའི་བར་ཁྱབ་ཅིང་རྩ་མདུད་རྟེན་བྱེད་དང་། འཁོར་བར་སྐྱེད་པའི་རྩ་རྣམས་དབུ་མ་ནས་འཁོར་ཕྲན་གྱི་རྩ་འདབ་རྣམས་ཀྱི་བར་ཐམས་ཅད་ལ། ཤིང་གི་ཤུན་པ་བཞིན་ཆགས་ནས་ཡོད་པ་ཐམས་ཅད་བསྲེག་ཡེ་ཤེས་ཀྱི་རྩ་འབའ་ཞིག་ཏུ་གྱུར་ཏེ་ཕྱི་ཡི་སྟོང་ར་ནང་མེ་བར་གྱི་རྩ་གསུམ་གཅིག་གིས་གཅིག་མ་བསྒྲིབ་པར་ཕྱི་ནང་ཟང་ཐལ་བདེ་བ་ཆེན་པོའི་ངང་ནས་མཐར་གཞིའི་གཏུམ་མོ་ལ་བསྡུའོ། །ཡང་གོང་བཞིན་སྦྱོར་བ་བཞིན་ལྡན་གྱི་རླུང་གིས་ཙནྡ་ལཱིའི་མེ་ཤེད་ཇེ་ཆེར་གྱིས་ལུས་ཀྱི་ནང་ཁྱབ་ཐམས་ཅད་མེ་ཡིས་ཁེངས། བ་སྦུའི་བུ་ག་རྣམས་ནས་མེ་ཡི་རྩེ་མོ་སྦྲུལ་གྱི་ལྕེ་བཞིན་ཕྱི་རོལ་དུ་ཉུག་ཉུག་མཆེད་པ་ལས་ཐོག་མར་གནས་ཁང་། དེ་ནས་ཇེ་ཆེར་གྱི་ཡུལ་ལུང་འཇིག་རྟེན་ཀུན་ཏུ་མེ་ཡིས་ཁེངས་པར་བསྒོམས་ཤིང་རླུང་ཁུག་གཅིག་ལ་འབེབས་ཆུང་ཅི་ནུས་རྒྱབ་ལ། མཐར་མེ་རྣམས་གཞིའི་གཏུམ་མོ་ལ་བསྡུ་ཞིང་རྟོག་མེད་ཀྱི་ངང་ལ་ནས་ཧ་སྤྲུགས་ཕུར་འདོན་སོགས་བྱའོ། །དེ་ཡན་གྱི་རླུང་སྐྱོན་སེལ་བ་གཅིག །
ཡན་ལག་ལྔ་སྦྱོང་གཉིས། ནཱ་རོ་དྲུག་སྐོར་སོ་བདུན་མ་བཅས་གཏུམ་མོའི་འཁྲུལ་འཁོར་རྩ་བ་བཞི་རྫོགས་སོ། །དེ་དག་གི་ཚེ་ཁམས་སྐྱོན་ཡིན་ན་མེ་ཁ་དོག་དཀར་པོ་སྒོམས། དེ་ཡང་དྲོད་དང་བདེ་བ་དུས་མཉམ་དུ་སྒོམས། བདེ་བ་ཆུང་ན་བདེ་བ་རྐྱང་པ་དང་། དྲོད་ཆུང་ན་དྲོད་རྐྱང་པ་དང་། རླུང་ཤས་ཆེ་ཞིང་སེམས་མི་གནས་ན་མིག་མི་གཡོ་ཞིང་བདེ་བ་དང་ལྡན་པ་དང་། བྱིང་རྨུགས་དང་ཏིང་ངེ་འཛིན་མི་གསལ་ན། མེ་རྩེ་མོ་གཡོ་ཞིང་ཚ་བ་ལ་སེམས་བཟུང་བ་དང་། དུས་ཀྱི་གནད་ཀྱང་། སྡུག་བསྔལ་གྱི་དུས་རྩེ་མོ་རིང་བ་དང་། བཏང་སྙོམས་ཀྱི་དུས་ཐུང་བ་དང་། བདེ་བའི་སྐབས་གོང་བུའི་རྣམ་པ་ལ་སེམས་བཟུང་བར་བྱ་བ་ནི་མན་ངག་གནད་དམ་པའོ། །ནཱ་རོའི་ཡན་ལག་ལྔ་སྦྱོང་ནི། ལུས་གནད་རླུང་བཟུང་སྐྱིལ་ཀྲུང་བཅས་ལ། ལག་གཉིས་ཁུ་ཚུར་ཁ་སྦུབས་པུས་མོའི་སྟེང་དུ་བཞག་ལ་ཕོ་བ་གཡས་སྐོར་གསུམ་དང་གཡོན་སྐོར་གསུམ་བྱ། ཁུ་ཚུར་གྱེན་བསྟན་བརླ་རྩར་བཞག་ལ་མགྲིན་པ་གཡས་སྐོར་གསུམ་གཡོན་སྐོར་གསུམ། མགོ་བོ་གཡས་ཀྱོག་རེས་མོས་ཀྱིས་ལན་
དྲུག་བྱ། མདུན་རྒྱབ་ཏུ་མགོ་བོ་དགྱེ་དགུ་རེས་མོས་ལན་དྲུག་བྱ། སླར་ཡང་ཁུ་ཚུར་མདུན་ནས་ཡར་གྱེན་དུ་གཞལ་དཔུང་པ་གཉིས་ཐད་དུ་རྒོད་གཤོག་ལྟར་བརྐྱང་ལ། དང་པོ་གཡས་ཀྱི་ཁུ་ཚུར་གྱིས་གཡས་ཀྱི་ཕྲག་པར་བརྡེག་ལ་བརྐྱང་། དེ་ནས་གཡོན་གྱི་ཕྲག་བརྡེག་དེ་བཞིན་དང་། ཡང་གཡས་ཀྱི་ཕྲག་བརྡེག་གཅིག་ནས་ལག་གཉིས་ཀྱི་མཆན་རྡེབ་ཀྱིས་མདུན་དུ་བརྐྱང་། ཕྲག་རྡེབ་བཅས་ཁུ་ཚུར་བསྐུམ་པ་དེ་འདྲ་ལན་གསུམ་བྱ། འཁྱུད་རྒྱ་བཅས་རྡོར་སྐྱིལ་བཀྲོལ་བ་འཕྲལ། ཙོག་པུར་ཁུ་ཚུར་གཡོན་དང་རྐང་གཡོན་གདན་ལ་གཙུག །ལག་གཡས་མཐེ་བོང་མཛུབ་མོ་གུང་མོ་གསུམ་གྱིས་རྐང་གཡས་མཐེ་བོང་བཟུང་ལ་མདུན་དུ་ཤེད་ཀྱིས་བརྐྱང་བསྐུམ་ལན་གསུམ་དང་། ཁུ་ཚུར་གཡས་དང་རྐང་གཡས་གདན་ལ་གཙུག་ནས་གོང་བཞིན་ལག་གཡོན་གྱིས་རྐང་གཡོན་མཐེ་བོང་བཟུང་ལ་མདུན་དུ་བརྐྱང་བ་ལན་གསུམ་བྱས་ལ། བར་འབེབས་ནི་སེམས་སྐྱིལ་ཡར་བཏེག་
ཞོར། ཙོག་པུར་རྐང་པ་གཉིས་བརྣོལ་ལག་གཉིས་འཁྱུད་རྒྱའི་ཚུལ་གྱིས་གྱེན་དུ་འཕགས་པ་དང་། ལག་གཉིས་ཐད་ཀར་བརྐྱངས་སེམས་སྐྱིལ་པུས་མོའི་ཕྱིའི་ཟུར་གྱི་འབེབས་གདན་ལ་བརྡབ་པ་ནི་བར་འབེབས་ཏེ། དེ་འདྲ་ལན་གསུམ་མཐར་ཧ་སྤྲུགས་ཕུར་དོན་བྱ། འདི་ཕྱིན་བར་འབེབས་ཐམས་ཅད་འདི་ཡིས་རིགས་འགྲེའོ། །དམིགས་པའི་གནད་ནི་སྟོང་ར་རྩ་འཁོར་སོགས་གོང་བཞིན་བསྒོམ་པ་ལ་རླུང་གི་སྦྱོར་བས་མེ་ཡི་ནུས་པ་རབ་ཏུ་རྒྱས་ཏེ་ལྟེ་བའི་རྩ་འདབ་རྣམས་མེ་ཡིས་ཁེངས། འཁོར་ལོའི་དབུས་སུ་རྩ་བའི་མེ་མར་མེའི་སྡོང་བུ་ལྟར་འབར་བས་སྙིང་ཁའི་དབུས་དང་རྩ་འདབ་རྣམས་སུ་འབར་ཞིང་། དེ་བཞིན་དུ་མགྲིན་པ་དང་སྤྱི་བོའི་འབར་ཁྱབ། སྤྱི་བོར་གདུགས་རྩིབས་ལྟར་མེའི་སྣེ་མོ་ཅུང་ཟད་ཐུར་དུ་གུག་སྟེ་འབར་བ་ལས་ལྟེ་འཁོར་གྱི་མེ་ཡི་ནུས་པ་རྒྱས་པས་རྐང་པའི་ཚིགས་ཆེན་ཚིགས་ཕྲན་ནས་སོར་རྩེའི་བར་དང་། སྙིང་གའི་མེའི་ནུས་པ་རྒྱས་པས་ལག་པའི་ཚིགས་ཆེན་ཚིགས་ཕྲན་སོར་རྩེའི་བར་ཡེ་ཤེས་ཀྱི་ངོ་བོའི་མེ་འབར་ཞིང་ཁྱབ་པར་བསྒོམ་ལ་མཐར་གཞིའི་གཏུམ་མོ་ལ་བསྡུ་གོང་བཞིན་བྱའོ། །མཻ་ཏྲིའི་ཡན་ལག་ལྔ་སྦྱོང་ནི་ལུས་གནད་རླུང་བཟུང་རྡོར་དཀྱིལ་བཅས་ལ། ༡༽ ཁུ་ཚུར་གཉིས་བརླ་རྩར་སྦུབས་ལ་
མགྲིན་པ་གཡས་བསྐོར་གསུམ། གཡོན་སྐོར་གསུམ། མགོ་བོ་གཡས་ཀྱོག་གསུམ། གཡོན་ཀྱོག་གསུམ། དེ་བཞིན་མགོ་བོ་རྒྱབ་ཏུ་དགྱེ་ཞིང་འཕང་གསུམ་དང་། མདུན་དུ་དགུ་བ་ལན་གསུམ་བྱས་ལ། ལག་གཉིས་འཁྱུད་རྒྱ་བཀྲོལ་བ་དང་རྡོར་སྐྱིལ་བཤིག ༢༽ །དེ་འཕྲལ་པུས་མོ་གཉིས་ས་ལ་གཙུགས། ལུས་དྲང་པོར་བསྲང་། གྲུ་མོ་གཡོན་བརྐྱངས་ཁུ་ཚུར་གྱིས་ནུ་མ་གཡོན་གྱི་སྟེང་ནས་མནན་ལ། ལག་གཡས་ཁུ་ཚུར་མགོ་ཐོག་ནས་བསྐོར་བའི་ཞགས་འཕེན་རེ་དང་མཆན་རྡེབ་རེ་སྦྲགས་པ་གསུམ། སླར་ཡང་གཡས་པའི་ཁུ་ཚུར་ནུ་གཡས་སྟེང་བཙུག་ལ་གཡོན་པ་ཞགས་འཕེན་མཆན་རྡེབ་བཅས་གསུམ། ཙོག་པུར་ལག་པ་གཉིས་ཀྱི་ཁུ་ཚུར་དང་། རྐང་པ་གཡོན་བཅས་གདན་ལ་བཙུག །རྐང་གཡས་མདུན་ཐད་དྲང་པོར་བརྐྱང་བསྐུམ་བརྐྱང་བཅས་གསུམ་དང་། སླར་ཡང་རྐང་གཡོན་དེ་བཞིན་བརྐྱང་བསྐུམ་གསུམ་མཐར་བར་འབེབས་གསུམ་རྒྱབ་རླུང་བཏང་ཧ་སྤྲུགས་འཕུར་འདོན་བྱའོ། །དམིགས་པའི་གནད་ནི་རོ་རྐྱང་ལས་རླུང་རྔུབ་པས་འདུས་མདོའི་གཏུམ་མོའི་མེ་ལ་མགར་གྱིས་སྦུད་
པ་རྒྱབ་པ་བཞིན་མེ་ཤེད་ཆེར་སྐྱེས་ཏེ་ལྟེ་བ་ཕྱིན་གྱི་སྟོང་ར་ཐམས་ཅད་མེ་མཚན་ཉིད་བཞི་ལྡན་གྱིས་གང་། དེ་བཞིན་དུ་རིམ་པས་སྙིང་ཁ། མགྲིན་པ། སྤྱི་བོ་ཕྱིན་གྱི་སྟོང་ར་ཐམས་ཅད་མེ་ཡིས་ཁེངས་པས་དར་དམར་གྱི་གུར་ནང་མར་མེ་བཞག་པ་བཞིན་རང་ལུས་དམར་ལ་སྨུག་པའི་མདངས་ཆགས་པ། སྣང་སྟོང་དབྱེར་མེད་འོད་ཀྱི་རང་བཞིན་དུ་བསམ་ལ། མཐར་ཧ་སྤྲུགས་སྐབས་བ་སྤུའི་བུ་ག་ནས་མེ་ལྕེ་དམར་ལྷབ་ལྷབ་བྱེད་པར་སྒོམ། འདི་སྐབས་ལུས་ཐམས་ཅད་དུ་ཁྱབ་པའི་དྲོད་མ་སྐྱེས་ན། གང་དུ་དྲོད་མ་སྐྱེས་པ་དེར་རཾ་ཡིག་དམར་པོ་ལས་བྱུང་བའི་མེ་མཚན་ཉིད་བཞི་ལྡན་འབར་བ་ལ་རླུང་སེམས་གཏད་ཅིང་ཚ་ཆི་ལེར་བསྒོམ། ཡང་རླུང་བཟུང་སྟེ་རླུང་ཁུག་གཅིག་ལ་བར་འབེབས་ཅི་ནུས་རྒྱབ། དེ་ཚེ་གོང་བཞིན་རང་ལུས་མེ་ཡིས་ཁེངས། ཕྱི་རོལ་དུ་མཆེད། སྟོང་གསུམ་ཐམས་ཅད་མེ་ཡིས་ཁེངས་པར་བསྒོམ། བདེ་སྟོང་དབྱེར་མེད་ཀྱི་ངང་ནས་མཐར་གཞིའི་གཏུམ་མོ་ལ་བསྡུའོ། །ཧ་སྤྲུགས་འཕུར་འདོན་བྱ། དེ་ཡན་གྱི་རྩ་བ་བཞི་དང་ཡན་ལག་གཉིས་བཅས་རྩ་བའི་ལུས་སྦྱོང་དྲུག་རྫོགས་སོ། །ཉི་མ་དྲུག་བསྐོར་ནི། ལུས་གནད་ཙོག་པུར་འདུག་ལ་རླུང་བཟུང་། རྐང་པ་གཉིས་བསྣོལ་བའི་པུས་མོའི་རྒྱབ་ནས་ལག་པ་བསྣོལ་སྟེ་
ཕྱིར་བརྐྱང་། རྐང་མཐིལ་འོག་ནས་ཡར་ལ་རྐང་ལག་མཐིལ་བཞི་སྤྲད་དེ། ལག་པའི་མཐེབ་མཛུབ་ཀྱིས་རྐང་པའི་མཐེ་བོང་བཟུང་ལ་ཕོ་བ་གཡས་སྐོར་གཡོན་སྐོར་དྲུག །རྟིང་པ་དང་འཕོངས་བཏེག་རེས་མོས་དྲུག་གྱེན་འཕགས་དྲུག་བཅས་སོང་ནས་རླུང་བཏང་། དེའི་ཚེ་དམིགས་པའི་གནད་ནི་རང་གི་སྟེང་འོག་མདུན་རྒྱབ་གཡས་གཡོན་བཅས་ལ་ཉི་མའི་དཀྱིལ་འཁོར་གསལ་ཞིང་དྲོད་འབར་བ་རེ་གསལ་བའི་དབུས་སུ། རང་ལུས་སྟོང་ར་ཡི་དམ་གྱི་སྐུ་དང་འདུས་མདོར་གཏུམ་མོ་བཅས་གསལ་ཞིང་རྙོག་པ་དང་བྲལ་བ་དམར་ལ་སྨུག་པའི་འོད་འབར་བར་བསྒོམ་མོ། །གཏུམ་མོ་ཞག་བདུན་མ་ནི། ལུས་གནད་གོང་བཞིན་ཙོག་པུར་རླུང་བཟུང་། རྐང་ལག་གོང་ལྟར་བསྣོལ་བའི་རྐང་སྟེང་ནས་ལག་པ་གཉིས་ཀྱིས་རྐང་པའི་མཐེ་བོང་དམ་དུ་བཟུང་ལ་ཕོ་བ་གཡས་གཡོན་སྐོར་གསུམ། རྟིང་པ་སར་བཙུག་འཕོངས་བཏེག །འཕོངས་སར་བཙུག་རྟིང་བཏེག །ཡང་རྟིང་པ་སར་བཙུག་འཕོངས་བཏེག་པ་བཅས་གསུམ་སོང་ནས་ཤེད་ཀྱིས་རྐང་པ་གཤིབས་ཏེ་ཡར་ལང་། ལག་གཉིས་ཐལ་མོ་པུས་སྟེང་ནས་གྱེན་དུ་གཞལ། ཐད་ཀར་བརྐྱང་ཞིང་ཕྲག་གོང་ནས་ཕྱིར་ཤད་ཁུ་ཚུར་གྱེན་སྟན་བརླ་རྩར་བཞག་འཕྲལ།
འབེབས་ཆེན་བཅས་སེམས་སྐྱིལ་དང་སླར་ཡང་ཙོག་པུར་རྐང་མཐེབ་བཟུང་བ་ནས་ཕོ་སྐོར་འབེབས་སོགས་གོང་བཞིན་ལན་གསུམ་སོང་ནས་རླུང་བཏང་ཧ་སྤྲུགས་འཕུར་འདོན་བྱའོ། །དམིགས་པའི་གནད་ནི་སྟོང་ར་ཡི་དམ་དུ་གསལ་བའི་ལྟེ་འོག་གཏུམ་མོའི་མེ་མཚན་ཉིད་བཞི་ལྡན་འོད་ཀེམ་ཀེམ་གློག་ཁྱུག་ཁྱུག་བདེ་དྲོད་དང་ལྡན་པར་སེམས་བཟུང་ངོ་། །གཏུམ་མོ་གངས་སེང་མ་ནི་ལུས་གནད་ཙོག་པུར་རྐང་པ་གཡས་ཕྱི་གཡོན་ནང་དུ་བྱེད་ནས་བསྣོལ། ལྷམ་སྒྲོགས་བཅིང་པའི་ཐད་ནས་གྲུབ་མོས་འཁྱུད། ལག་གཉིས་དཔུང་བའི་གཞོག་འོག་ཏུ་འཇུ། སྐད་པ་གཡས་གསུམ་གཡོན་གསུམ་སྐོར་ཕྲག་དཔུང་ཕྱིར་ཕུར་ནང་འཐེན་གཡས་གསུམ་གཡོན་གསུམ། དགྱེ་རྒུ་རྐད་ཆུན་ཐོན་ངེས་ལན་གསུམ། ཕྱེད་ལང་ལན་གསུམ། བརྡེབ་སྤྲུག་བྱ། དམིགས་པའི་གནད་ནི། རྩ་གསུམ་འདུས་མདོའི་ལྟེ་བའི་གཏུམ་མོའི་ཨ་ཤད་ལས་མེ་དྲག་ཏུ་འབར་བས་རྩ་འཁོར་རྣམས་དང་སྤུས་པར་མེ་ཡི་རང་བཞིན་དུ་གྱུར་པར་བསྒོམ་མོ། ད་ནི་རྗེ་བརྒྱད་པ་མི་བསྐྱོད་ཞབས་ཀྱིས་མར་པའི་གཏུམ་མོ་གསང་ལྡན་གྱི་འཁྲུལ་འཁོར་ལ། དཔལ་རྒ་ལོའི་ལུགས་ཀྱི་དམིགས་གནད་དང་སྦྲགས་པ། དཔལ་ལྡན་དུས་གསུམ་མཁྱེན་པའི་ཐུགས་
དམ་རྩལ་འདོན་དུ་གནང་བ་གཏུམ་མོ་དྲག་རླུང་མའི་གདམས་པ་ལ། ལུས་སྦྱོང་འཁྲུལ་འཁོར་རྣམ་གྲངས་བཅོ་བརྒྱད་དུ་ཡོད་པས་གཏུམ་མོ་བཅོ་བརྒྱད་མ་ཞེས་གྲགས་པའི་གྲངས་ནི། རླུང་སྐྱོན་སེལ་བ། ལུས་སེམས་འཆིང་བྱེད་སྡོད་པའི་འཁྲུལ་འཁོར་བཞི། བདེ་དྲོད་འབེབས་པའི་འཁྲུལ་འཁོར་གཉིས། བྱིང་རྒོད་སེལ་བའི་འཁྲུལ་འཁོར་གཉིས། ཉལ་བའི་འཁྲུལ་འཁོར་གཅིག །འགྲོ་བའི་འཁྲུལ་འཁོར་གཉིས། བདེ་དྲོད་ལུས་སེམས་འདྲེན་པའི་འཁྲུལ་འཁོར་བཞི། གེགས་སེལ་གནད་ཀྱི་འཁྲུལ་འཁོར་གཉིས་བཅས་བཅོ་བརྒྱད་བཞུགས་པ་ལས། དང་པོ་རླུང་སྐྱོན་སེལ་བའི་འཁྲུལ་འཁོར་ནི། ལུས་གནད་རྐང་པ་རྡོར་སྐྱིལ། ལག་གཡོན་ཕྱི་གཡས་ནང་བྱས་ཏེ་བསྣོལ་ལ་མཐེ་བོང་གི་སྲིན་རྩ་མནན། སོར་མོ་བསྐུམ་པའི་ཁུ་ཚུར་རྐང་མཐིལ་སྟེང་དུ་སྦུབས། ཐོག་མར་ལག་གཡས་ཡར་ཁྱེར་མཆན་རྡེབ་མདུན་བརྐྱངས་མཛུབ་སྐོར་བཅས་གྲུ་མོ་བརྐྱངས། མཛུབ་མོས་སྣ་བུག་གཡས་བཀག་གཡོན་ནས་རྔུབ་བཅིང་འབུད་པ་གསུམ་མམ་གཅིག་བྱས་ལ། མཆན་རྡེབ་མདུན་བརྐྱང་བཅས་ལག་གཡོན་རྒྱབ་ནས་རྐང་གཡོན་མཐིལ་དུ་སྦུབས། དེ་ནས་ལག་གཡོན་གྱིས་གོང་བཞིན་སྣ་གཡོན་བཀག་ལ་གཡས་ནས་
འབུད། དེ་ནས་ཁུ་ཚུར་གཉིས་མི་བསྣོལ་བར་རང་ཕྱོགས་ཀྱི་པུས་མོའི་ཐོག་ཏུ་སྦུབས་ནས་སྣ་གཉིས་ནས་རླུང་སྔོན་བཞིན་འབུད། དེའང་དང་པོ་དལ་བུ། བར་དུ་ཅུང་བསྐྱེད། ཐ་མ་དྲག་ཏུ་བསྐྱེད་ལ་རྒྱ་མཚོ་རི་རབ་ལ་སྦྱར་སྟེ་འབུད། དེའི་ཚེ་དམིགས་པ་ནི། ཐོག་མེད་ནས་བསགས་པའི་སྡིག་སྒྲིབ་ནད་གདོན་ཐམས་ཅད་དང་། བག་ཆགས་ངན་པ་ཐམས་ཅད་སྦུར་མ་རླུང་གིས་ཁྱེར་བ་བཞིན་སྟོང་ཞིང་དག་པར་དམིགས། དེ་ནས་སྡོད་པའི་འཁྲུལ་འཁོར་བཞི་ལས། དང་པོ་མཉམ་བཞག་བུམ་ཅན་དམིགས་པ་བཟུང་བའི་འཁྲུལ་འཁོར་ནི། རླུང་བཅུ་དུས་གཅིག་ལ་ཟིན་པའི་གནད་སེམས་དམིགས་པ་ལ་ཟིན་པ། རླུང་དམིགས་པར་ཟིན་པའི་གནད་ཕྱི་འཛིན་འབྱོངས་པ། ཆུ་རླུང་སྟོབས་མི་འཕེལ་བའི་གནད་ལུས་གྲིམ་ཤ་ཐོན་པ། བདེ་དྲོད་མྱུར་དུ་བསྐྱེད་པའི་གནད་ཐུར་སེལ་གནད་དུ་བཟུང་བ། གེགས་སྐྱོན་རང་གྲོལ་དུ་བྱ་བའི་གནད་ལུས་ཀྱི་འཁྲུལ་འཁོར་བྱ་བའོ། །ཞེས་གསུངས་པ་ལྟར། ལུས་གནད་རྣམ་སྣང་གི་ཆོས་དང་ལྡན་པས་གོང་གི་རླུང་རོ་བསལ་འཕྲལ་ཁུ་ཚུར་གྱེན་བསྟན་བརླ་རྩར་བཞག་ལ། སྣ་བུག་གཉིས་ནས་དལ་བུས་རྔུབ་ཅིང་སྟེང་རླུང་མནན། འོག་རླུང་ཅུང་ཟད་འཐེན་པ་རླུང་ཁ་སྦྱོར་གྱིས་མཚན་ཉིད་ཀྱི་
ལྟེ་བའི་ཐད་དུ་དགང་། དམིགས་པའི་གནད་ནི། རང་ལུས་ཡི་དམ་ལྷན་ཅིག་སྐྱེས་མའི་སྐུ་དར་དམར་གྱི་གུར་ཕུབ་པ་ལ་ཉི་འོད་ཕོག་པ་བཞིན་ཇེ་གསལ་ཇེ་དྭངས་སུ་སོང་བར་བསྒོམ་མོ། །སྡོད་པའི་འཁྲུལ་འཁོར་གཉིས་པ་མེ་ཐབས་དྲུག་ཆིང་ནི། ལུས་གནད་རླུང་བཟུང་རྡོར་སྐྱིལ་བཤིག་ནས་ཙོག་པུར་རྐང་གཡས་ཕྱི་གཡོན་ནང་དུ་ཡོད་པར་བྱས་ནས་བསྣོལ། ལག་པ་གཉིས་ཀྱང་དེ་བཞིན་གཡས་ཕྱི་གཡོན་ནང་དུ་བྱས་ཏེ་བསྣོལ་བའི་གྲུ་མོ་པུས་སྟེང་བཙུག །ཐལ་མོ་གཉིས་ནས་ལག་པའི་དཔུང་པའི་རྒྱབ་འཇུ་བའི་ཉམས་ཀྱིས་སྦྱར་ལ་རླུང་ལྟེ་འོག་ཏུ་མར་ཕུལ་ཞིང་བུམ་ཅན་ཐུབ་ཚད་དམ་དམིགས་པ་མ་གསལ་བར་དུ་བཟུང་། དམིགས་པའི་གནད་ནི། ལྟེ་འོག་ཏུ་གཏུམ་མོའི་ངོ་བོ་འོད་ཁྱུག་ཁྱུག་གློག་ཀེམ་ཀེམ་ཡོད་པ་དེ་ཉིད་རླུང་གི་སྦྱོང་བས་མེ་ཡི་རེག་བྱ་ཚ་ལ་རྩུབ་པ་འབྱུང་བས་ཐ་མལ་གྱི་ལུས་སེམས་གཏན་མེད་དུ་བསྲེག །འོད་ཀྱི་ལུས་ལ་བདེ་དྲོད་མི་བཟོད་པ་ཙམ་དུ་བསྒོམ་མོ། །དེ་ནི་དྲོད་མྱུར་དུ་སྐྱེ་བའི་གནད་དོ། །སྡོད་པའི་འཁྲུལ་འཁོར་གསུམ་པ་ལྗོན་ཤིང་བསྣོལ་བའི་འཁྲུལ་འཁོར་ནི། ལུས་གནད་གོང་ལྟར་ཙོག་པུར་རྐང་པ་བསྣོལ་བའི་པུས་མོ་གཉིས་གཅིག་ཏུ་རུབ། ལག་པ་བསྣོལ་བའི་མཁྲིག་མ་ནས་བཟུང་
ལ་པུས་མོའི་འོག་ཏུ་ཡང་མི་འགྲོ་ཞིང་ཐོག་ཏུ་བཞག་པའང་མ་ཡིན་པར། པུས་མོ་ལ་ཚུར་མ་ཐུབ་ཙམ་གྱིས་པུས་རྩེ་ནས་བསྐོར་གྱིས་འཁོར་བར་བྱས་ལ་བུམ་ཅན་བཟུང་། འདི་ལ་ཐོག་མར་འོག་རླུང་འཐེན་ནས་ལྟེ་བར་འཕུལ། དེ་ནས་སྟེང་རླུང་ལྷོད་ཀྱིས་རྔུབ་ལ་མནན་ཏེ་དགང་བར་བྱའོ། །དམིགས་པའི་གནད་ནི། རང་ལུས་རྣམ་པར་དག་པའི་ལྟེ་འོག་ཏུ་གཏུམ་མོའི་འོད་གསལ་གྱི་ངོ་བོ་སྔོ་དྭངས་ཡུངས་འབྲུ་ཙམ་ཞིག་གི་དབུས་སུ། འོད་ཟེར་ཕྲ་མོ་བློས་མི་བཟོད་པ་མར་མེ་བཞིན་འབར་བ་དེས་རེག་མི་དགོས་པར་འཁོར་འདས་ཐམས་ཅད་རང་སྟོབས་ཀྱིས་བསྲེགས་ནུས་པར་བསྒོམ་མོ། །འདིས་ཆུ་རླུང་འཁྲུགས་པ་དང་གྲང་བའི་ནད་འཕྲལ་དུ་འཇོམས་པར་བྱེད་དོ། །སྡོད་པའི་འཁྲུལ་འཁོར་བཞི་པ་སྐུ་གསུམ་བསྣོལ་བའི་འཁྲུལ་འཁོར་ནི། ལུས་གནད་གཙོག་པུར་རྐང་བོལ་གཡོན་སྟེང་གཡས་པའི་མཐིལ་གྱིས་མནན་ལ་འཕོངས་གིས་གདན་ལ་མ་ཐུག་བར་ལུས་གནད་དྲང་པོར་བསྲངས། ལག་གཉིས་པུས་མོའི་ཐད་ནས་བསྣོལ་ལ་དཔུང་པར་འཇུས་སྟེ་རླུང་བུམ་ཅན་བཟུང་། དམིགས་
པའི་གནད་ནི་འདུས་མདོའི་གཏུམ་མོའི་མེ་མཆེད་དེ། ལྟེ་བའི་རྩ་འཁོར་གང་བས་མེ་ལྕེ་སྙིང་གར་སྤྲུལ་སྐུའི་ངོ་བོ་ཧཱུྃ་མཐིང་ག་ལ་ཕོག་པས་བདེ་དྲོད་བཟོད་མེད་སྐྱེས། ཡང་མེ་ཤེད་ཇེ་ཆེར་སོང་ནས་མེ་ལྕེ་མགྲིན་པའི་འཁོར་ལོའི་དབུས་སུ་ལོངས་སྐུའི་ངོ་བོ་ཨཱཿདམར་པོ་ལ་ཕོག་པས་མགྲིན་པར་བདེ་དྲོད་སྐྱེས་ནས་ངག་གིས་ནུས་མཐུ་སྐྱེད། ཡང་མེ་ལྕེ་ཆེར་སྐྱེས་པའི་སྤྱི་བོའི་རྩ་འཁོར་དབུས་སུ་ཆོས་སྐུའི་ངོ་བོ་ཨོཾ་དཀར་པོ་ལ་ཕོག་ནས་ལུས་སྟོད་སྨད་ཀུན་ཏུ་བདེ་དྲོད་བཟོད་མེད་དུ་སྐྱེས། བ་སྤུའི་མཐར་ཐུག་མེ་ཡིས་ཁྱབ་པར་བསྒོམ་ལ་རླུང་བཟུང་། རླུང་བཏང་བ་དང་མེས་སྟོང་གསུམ་ཁྱབ་པར་བསྒོམ། དེ་ནི་མེ་བཞིས་ཆུ་བཞི་བསྲོ་བ་ཞེས་རྩ་རྣམས་ཡོ་བ་བསྲང་ཞིང་རླུང་ནད་སྲོག་ཏུ་ཚུད། དྲོད་མྱུར་དུ་སྐྱེ་བའི་གནད་དོ། །དྲོད་འབེབས་གཉིས་ལས། དང་པོ་བཙན་ཐབས་དྲོད་འབེབས་སམ་རྗེ་མི་ལའི་རྩུབ་ཤིང་མར་གྲགས་པའི་འཁྲུལ་འཁོར་ནི། ལུས་གནད་རྣམ་སྣང་ཆོས་བདུན་བཅས། རླུང་མནན་མ་ཐག་རྡོར་སྐྱིལ་བཀྲོལ་ནས་ཙོག་པུར་རྐང་པ་གཉིས་བསྣོལ་བའི་མཐེ་བོང་ལག་གཉིས་བསྣོལ་སྟེ་བཟུང་ནས། ཕོ་བ་གཡས་སྐོར་གསུམ་གཡོན་སྐོར་གསུམ། རྐང་རྟིང་དང་འཕོངས་གཉིས་བཏེག་རེས་བྱས་ལ་རྐུབ་
རྡེབ་ཆུང་གསུམ་དང་། རྐང་རྟིང་ཐད་བརྐྱང་ཉམས་ཙམ་དང་འཕོངས་བཏེག་ཕྱེད་ལངས་ཉམས་ཙམ་ཐོན་པ་རེས་མོས་ཀྱིས་རྐུབ་རྡེབ་ཆེ་བ་གསུམ། མཐར་འབེབས་ཆེན་ནི་ལང་ཞོར་འཁྱུད་རྒྱ་བཅས་ཕྱིར་བརྡབ་པ་དང་། ལག་པ་ཐད་བརྐྱངས་སེམས་སྐྱིལ་གྱིས་འབེབས་གདན་ལ་ཅར་གྱིས་བརྡབ་པ་ཅི་ནུས་མཐར་ཧ་སྤྲུགས་འཕུར་འདོན་བྱའོ། །དམིགས་པའི་གནད་ནི་རང་ལུས་ཡི་དམ་དུ་གསལ་བའི་ལྟེ་བར་ཉི་མའི་གདན་ལ་རྩ་བའི་བླ་མའི་སྐུ་མགར་གྱི་སོལ་མེའི་དབུས་སུ་ལྕགས་ཚུད་པ་ལྟ་བུ་འོད་དང་འོད་ཟེར་འཕྲོ་ཞིང་། དེའི་འོད་ཀྱིས་ཕྱོགས་བཅུ་དུས་གསུམ་གྱི་སངས་རྒྱས་སྲས་དང་བཅས་པ་སྤྱན་དྲངས། བླ་མའི་སྐུ་ལ་ཐིམ་པས་མེ་རབ་ཏུ་འབར། ལུས་ཀྱི་ཕྱི་ནང་བརྟན་གཡོ་ཐམས་ཅད་བླ་མའི་ཐུགས་ཡེ་ཤེས་ཆེན་པོའི་མེ་འོད་ཀྱིས་གསལ་ལྷམ་མེར་ཁྱབ་པར་བསྒོམ། འདིས་ནི་དྲོད་ཆེན་མེ་ལྟར་འབར་བ་མ་ཞུ་བའི་སྐྲན་ནད་ཞི་ཆུ་འཁྱག་གཅེར་ཉལ་ཐུབ་པ་འོང་ངོ་། །དྲོད་འབེབས་གཉིས་པ་མཁའ་ལྡིང་སྦྲུལ་འཛིན་ནི། ལུས་གནད་རྡོར་སྐྱིལ་བཅས། རླུང་བཟུང་འཕྲལ་སྐྱིལ་ཀྲུང་བཤིག་ལ་རྐང་ལག་བཞི་མདུན་དུ་ཐད་ཀར་བརྐྱང་། ཁུ་ཚུར་གཉིས་པུས་མོའི་སྟེང་དུ་སྦུབ་བཞིན་ལངས་ལ། རྐང་
ལག་བཞིའི་མཐེབ་སོར་རྩེ་སར་བཙུག །མགོ་ལག་པ་གཉིས་ཀྱི་བར་དུ་བཀུག་ལ་མིག་གྱེན་དུ་ལྡོག་བཞིན་དགོངས་འདྲེན་ཁོག་པ་བསྒྲིམ་ལ་གཡས་གསུམ་གཡོན་གསུམ། དབུས་སུ་དགྱེ་དགུ་གསུམ་བཅས་མཐར་འབེབས་ཆེན་གསུམ་སོགས་མཐར་ཧ་སྤྲུགས་རླུང་བཏང་། འདི་སྐབས་སུ་དབུས་སུ་དགྱེ་དགུ་གསུམ་བྱ་བ་པད་ཉིད་དང་འཇང་པའི་འཁྲུལ་འཁོར་ཟིན་བྲིས་སུ་མི་འདུག་ཀྱང་ཆད་པར་མངོན། དམིགས་པའི་གནད་ནི་སྤྱི་བོར་བྱང་སེམས་ཧཾ་ཡིག་ཟླ་གདན་བཅས་གསལ་བར་ལྟེ་བའི་ཙནྜ་ལཱིའི་མེ་སོར་བཞི་ཚད་ཙམ་འབར་བས་ཆབ་རོམ་ཞུ་བ་ལྟར། སྤྱི་བོའི་ཟླ་གདན་ལས་ཧཾ་ཡིག་མགོ་མཐུར་བསྟན་གྱི་མཐའ་བསྐོར་ཀུན་ནས་བྱང་སེམས་བདུད་རྩི་མུ་ཏིག་གི་རྡོག་ལྟ་བུ་སྣོད་ཀྱི་ཁ་ཁེབ་ལ་ཟིལ་པ་ཆགས་པ་བཞིན་འཛག་པར་བསྒོམ་པ་ནས། སླར་ཡང་མེ་སོར་གཅིག་ཙམ་དྷཱུ་ཏིའི་ནང་དུ་ཡར་འབར་བས་སྤྱི་བོའི་ཧཾ་ཡིག་ལས་བདུད་རྩི་ཞུ་བ་དྷཱུ་ཏིའི་ཕྱི་ནང་ཀུན་ནས་འོད་ཟེར་གྱི་རྣམ་པས་ཁྱབ་ཏེ། ལུས་ཐམས་ཅད་འོད་ཀྱིས་ཁེངས་བདེ་དྲོད་མི་བཟོད་པ་ཙམ་དུ་བསྒོམ་པར་བྱ་སྟེ། འདིས་ནི་ཆུ་ཁ་སྙིང་བའི་ནད་སེལ་ལོ། །བྱིང་རྒོད་སེལ་བའི་འཁྲུལ་འཁོར་གཉིས་ལས། དང་པོ་བྱིང་སེལ་བྱ་རྒོད་འཕུར་བ་ནི། ལུས་གནད་
རྡོར་སྐྱིལ། རླུང་བཟུང་སྔར་ལྟར་སྐྱིལ་ཀྲུང་བཀྲོལ་ནས་རྐང་ལག་ཤེད་ཀྱིས་མདུན་དུ་བརྐྱང་ལ། ཡར་ལངས་ཞོར་རྐང་པ་གཡོན་ས་ལ་བཙུག །རྐང་གཡས་བསྐུམ་པ་མཐིལ་རྐང་གཡོན་རླ་རྩར་བཞག་ལ། ལག་པ་གཉིས་གཤོག་པ་ལྟར་བརྐྱངས་ནས་ཁུ་ཚུར་འཆང་ཁས་དང་པོར་གཡས་བསྐུམ་གཡས་ཀྱིས་ཕྲག་གོང་ལ་བརྡེག་ཚེ་གཡོན་པ་རྐྱང་། དེ་ནས་གཡོན་པ་བསྐུམ་ལ་རྡེག་པ་བཅས་རེས་མོས་ཀྱིས་སོ་སོར་གསུམ་སྟེ་དྲུག །མདུན་དུ་ཤེད་ཀྱིས་བརྐྱང་ནས་བསྐུམ་དུས་འཆང་ཁས་ནུ་རྡེབ་དང་ཕར་རྐྱང་ཞོར་མཆན་རྡེབ་གསུམ་བཅས། ཡང་རྐང་གཡས་སར་བཙུག་གཡོན་མཐིལ་གཡས་ཀྱི་རླ་རྩར་གཏད་ནས་ལག་གཡོན་པས་ཕྲག་རྡེག་ཀྱིས་མགོ་བཟུང་སྟེ་སྔར་ལྟར་འབེབས་ཆེན་གསུམ་སོང་ནས་རླུང་བཏང་ཧ་སྤྲུགས་བྱ། དམིགས་པའི་གནད་ནི། སྟེང་རླུང་རྩོལ་བ་ཆེ་ཙམ་གྱིས་མནན། ལྟེ་བའི་གཏུམ་མོའི་མེ་སོར་བཞི་ཙམ་དུ་འབར་བའི་འོད་སྙིང་ཁའི་རྩ་འཁོར་དབུས་སུ་བླ་མའི་ངོ་བོ་ཧཱུྃ་ཐིང་ག་ཞིག་བསམ་པ་ལ་ཕོག་པས་དེ་ལས་འོད་ཟེར་དཀར་པོ་འཕྲོས་ལུས་ཕྱི་ནང་ཐམས་ཅད་ལ་ཁྱབ་པས་རྩ་རླུང་མི་གསལ་བར་བྱེད་པ་བྱིང་འཐིབས་ཀྱི་སྒྲིབ་པ་བསལ། ཕྱི་རོལ་གྱི་འོད་ཟེར་ཐམས་ཅད་ཚུར་འདུས་མདུན་གྱི་ནམ་མཁར་ཐིག་ལེ་དཀར་པོ་འོད་འཚེར་བ་སྐར་ཆེན་ཤར་བ་ལྟ་བུ་ལ་མིག་གི་ལྟ་སྟངས་དང་ཤེས་པ་གཏད། མཐར་སྙིང་གའི་ཧཱུྃ་ལ་བསྡུ།
དེས་ཤེས་པ་བྱིང་རྨུག་འཐིབ་པ་སེལ་ལོ། །གཉིས་པ་རྒོད་སེལ་ཤེས་པ་བུམ་འཇུག་འཁྲུལ་འཁོར་ནི། ལུས་གནད་རྡོར་སྐྱིལ་མདའ་ལྟར་བསྲངས། ལག་གཡས་ཕྱི་གཡོན་ནང་དུ་ཡོད་པར་བྱས་ལ་བསྣོལ་ཏེ་མཐེ་བོང་གིས་རྩ་མནན་བཞིན་ཐལ་མོས་རྐང་མཐིལ་བཀབ། སྟེང་རླུང་འཇམ་པོར་བཟུང་། འོག་རླུང་ཀློད། མིག་གི་ལྟ་སྟངས་གདན་ལ་ཕབ། རླུང་བཟུང་མི་ཐུབ་ན་ལག་གཉིས་ཁུ་ཚུར་བརླ་རྩར་སྦུབས་ལ་རླུང་བཏང་། དམིགས་པའི་གནད་ནི། ལྟེ་བའི་གཏུམ་མོ་ཚ་ཆི་ལེར་རང་བབས་སུ་གནས་པ་ལས་འོད་ཟེར་སྔོན་པོ་འཕྲོས། སྙིང་གའི་ཧཱུྃ་གི་འོག་སོར་བཞི་མན་སྔོ་ལྟེམ་གྱིས་དྷཱུ་ཏིའི་ནང་དུ་སྤྲིན་འཁྲིགས་པ་བཞིན་ཡོད་པ་ལ་སེམས་གཏད། རྐང་མཐིལ་གཉིས་སུ་འོད་ཀྱི་ཐིག་ལེ་ནག་པོ་ཡུངས་འབྲུ་ཙམ་ཡོད་པར་བསྒོམ་ལ་ལྟ་སྟངས་ཕབ། དེས་རྣམ་རྟོག་ཕྲོ་རྒོད་སེལ་མཐར་མི་དམིགས་པའི་ངང་དུ་འཇོག་གོ །ཉལ་བའི་འཁྲུལ་འཁོར་གཅིག་ནི་སྤྱང་མོ་ཉལ་བ་སྟེ། ལུས་གནད་རྡོར་སྐྱིལ་བཅས། རླུང་བཟུང་། རླུང་དང་དམིགས་པ་ཟིན་འཕྲལ་རྡོར་སྐྱིལ་བཤིག་ནས་གཞོགས་གཡས་ས་ལ་ཕབ། མིག་ཟིམ་བུར་བཙུམ། རྐང་
གཉིས་བསྐུམ་ལ་པུས་བྲང་སྤྲད། ལག་གཡས་གཡོན་གྱི་མཆན་ཁུང་ངམ་མཁལ་ཁུང་གང་བདེར་བཞག །ལག་གཡོན་གྱིས་པུས་མོ་གཉིས་དམ་དུ་འཁྱུད་ལ། རླུང་མི་ཐུབ་ཚེ་རྡོར་སྐྱིལ་བཅས་ལ་རླུང་བཏང་རྡོར་སྐྱིལ་ལྷོད་ནས་ཧ་སྤྲུགས་བྱ། དམིགས་པའི་གནད་ནི། གཏུམ་མོ་འབར་བའི་འོད་ཟེར་ཤེལ་བུམ་དུ་མར་མེ་བཞག་པ་ལྟར་ལུས་ཀྱི་སྟོད་སྨད་ཀུན་དང་། གནས་ཁང་བཅས་འོད་དེས་གསལ་བར་བསྒོམ་པའམ། མཚན་མོར་ལུས་གནད་མ་ཐུབ་ན་པུས་མོ་བསྐུམ་པ་པུས་འཁྱུད་ཀྱིས་བསྡམ། ལག་པ་གཡས་འགྲམ་འོག་དང་ལག་གཡོན་དཔྱི་ཐོག་ཏུ་བཞག །སྣ་ནས་རླུང་བཏང་། བར་རླུང་བཟུང་། ལྟེ་བའི་གཏུམ་མོ་མར་མེ་ལྟར་འབར་བའི་དྲོད་ཀྱིས་སྙིང་ཁ་བླ་མའི་ངོ་བོ་ཧཱུྃ་ཡིག་མཐིང་ག་བསམ་པས། དེ་ལས་འོད་འཕྲོས་ལུས་ཀྱི་ཕྱི་ནང་ཀུན་གསལ་ཞིང་བདེ་དྲོད་འབར་བར་བསྒོམ་ལ། བདེ་སྟོང་གི་ངང་སྐྱོང་བ་ནི་ཉལ་བ་ཆོས་སྐུ་འོད་གསལ་དུ་བློ་སྦྱོང་བ་སྟེ། འདིས་ནི་ནུབ་མོ་གོས་རས་ཀྱང་ཐུབ་པའི་གནད་དོ། །འདི་ལ་འབེབས་ཆེན་མེད། འགྲོ་བའི་འཁྲུལ་འཁོར་གཉིས་ལས། དང་པོ་མཁའ་ལ་དབབ་པ་ནི། ལུས་གནད་རྡོར་སྐྱིལ། རླུང་
བཟུང་ཟིན་འཕྲལ་སྐྱིལ་ཀྲུང་བཤིག །རྒལ་པ་གདན་ལ་གཏད། རྐང་ལག་བསྐུམ་ནས་གན་རྐྱལ་དུ་ཉལ་ལ་གྱེན་དུ་འཕགས་ཚེ་སྒལ་པ་གདན་ལས་དབྱེ་བ་དང་། རྐང་ལག་ཡར་བརྐྱང་དེའི་དུས་ལག་པའི་ཁུ་ཚུར་ཀྱང་ཁ་ཕྱེ། མར་བསྐུམ་དུས་ཁུ་ཚུར་བསྡམས་ལ་རྐང་རྟིང་གིས་འཕོངས་བརྡེག་སྒྲ་ཐོན་པ་བྱས་པ་དེ་འདྲ་རྐྱང་བསྐུམ་ལན་གསུམ་མཐར། ཧར་གྱིས་ལངས་ནས་འབེབས་ཆེན་ལན་གསུམ་སོགས་བརྒྱབ་ནས་ཧ་སྤྲུགས་འཕུར་འདོན་བྱ། དམིགས་པའི་གནད་ནི། ལྟེ་བའི་གཏུམ་མོ་ལས་བདེ་དྲོད་ཀྱི་རང་བཞིན་སྔོ་ལ་དྭངས་བའི་རླུང་། རྩ་གནས་ཐམས་ཅད་དུ་སྐད་ཅིག་ལ་ཁྱབ་པས་ལུས་ཤིང་བལ་བཞིན་ཡངས་ཤིང་གཡོ་བ་ས་ལ་མ་རེག་པར་བསྒོམ་པ་སྟེ། འདིས་ནི་ཆུ་སེར་གྱི་ནད་སེལ་ལོ། །འགྲོ་བའི་འཁྲུལ་འཁོར་གཉིས་པ། ནེ་ལེ་རེག་འཇོག་གི་འཁྲུལ་འཁོར་ནི། ལུས་གནད་རྡོར་སྐྱིལ་བཅས། རླུང་བཟུང་། སྐྱིལ་ཀྲུང་བཤིག་ནས་མཁའ་ལྡིང་སྦྲུལ་འཛིན་ལྟར་ཡར་ལངས་ནས་ལག་གཡོན་ཁུ་ཚུར་སྐེད་པར་བརྟེན། རྐང་གཡོན་སར་བཙུགས་། གཡས་ཀྱི་ལག་པར་ཕར་བརྐྱངས་པ་དང་ཁུ་ཚུར་བསྐུམ་ལ་མཆན་རྡེབ་བཅས་ཕར་བརྐྱངས། དེ་བཞིན་དུ་རྐང་པའང་ཚུར་བསྐུམ་དུས་འཕོངས་རྡེག་བཅས། དེ་བཞིན་མཉམ་
སྦྲགས་བྱ་བ་གཡས་ལ་གསུམ་གཡོན་ལ་གསུམ་སྟེ་ཁྱོན་བསྡོམས་དྲུག་དང་། མཐར་འབེབས་ཆེན་གསུམ་སོང་མཐར་ཧ་སྤྲུགས་འཕུར་འདོན་བཅས་བྱ། དམིགས་པའི་གནད་ནི། འོག་རླུང་རྩོལ་བཅས་ཀྱིས་ཡར་འཐེན་རླུང་གི་ལྷ་མོ་ལྗང་གུ་རླུང་གི་རང་བཞིན་གཤོག་པ་ཅན་གཉིས་ཀྱིས་མཆན་འོག་ནས་འདེགས་པར་བསམ། འདིས་ནི་ཉིན་བདུན་གྱི་ལམ་བར་ཉིན་གཅིག་གིས་ཆོད་པའི་གནད་དེ་རྐང་པ་ཡང་ཟོལ་དང་བཅས་ཏེ་འགྲོའོ། །བདེ་དྲོད་ལུས་སེམས་འདྲེན་པའི་འཁྲུལ་འཁོར་བཞིའི་དང་པོ་རི་རབ་འཕུར་བ་ནི། ལུས་གནད་རླུང་རང་བབ་རྡོར་སྐྱིལ་བཅས། ཁུ་ཚུར་གཉིས་བརླ་རྩར་སྦུབས། གྲུ་མོ་ཤུགས་ཀྱི་བརྐྱངས། རོ་སྟོད་སློད་ལ་མདུན་དུ་ཅུང་ཟད་རྒུར་ཉམས་ཀྱིས་དབུས་དང་། གཡས་གཡོན་གསུམ་དུ་དགོངས་འདྲེན་མགྲིན་སྣ་ནས་ཧཱུྃ་སྒྲས་རྔུབ་པ་ལན་གསུམ་བྱ། འདི་ལ་ཧཱུྃ་རིང་དལ་བ་བཅུ་ཧཱུྃ་ཐུང་དྲག་པོ་བཅུ་ཡིས་འདྲེན་ཞེས་གསུངས་ཀྱང་ལག་ལེན་གོང་ལྟར་ལ། འདིས་མཚོན་འདྲེན་རིགས་ཀུན་ལ་རྒྱ་མཚོ་རི་རབ་ལ་སྦྱར་ཞེས་ཕོ་བ་རྒལ་ཚིག་ལ་སྦྱར་བ་དང་། དར་ཆེན་ཕྱར་བ་སྟེ་ལྕེ་ཡ་རྐན་ལ་སྦྱར་བ་དང་། ཆུ་མིག་གྱེན་ལྡོག་ཅེས་མིག་འབྲས་གྱེན་ལ་ལྡོག་པ་ཐམས་
ཅད་ལ་འགྲེ། དམིགས་པའི་གནད་ནི་ཐོག་མར་རླུང་སྦྱོར་བཅས་ལྟེ་བའི་གཏུམ་མོའི་མེ་ཤེད་ཇེ་ཆེར་སྐྱེས་པས་བདེ་ཆེན་འཁོར་ལོའི་དྷཱུ་ཏིའི་ནང་དུ་བྱང་སེམས་ཟླ་བ་ཧཾ་ཡིག་བཅས་གསལ་ཅད་ལ་འགྲེ། དམིགས་པའི་གནད་ནི་ཐོག་མར་རླུང་སྦྱོར་བཅས་ལྟེ་བའི་གཏུམ་མོའི་མེ་ཤེད་ཇེ་ཆེར་སྐྱེས་པས་བདེ་ཆེན་འཁོར་ལོའི་དྷཱུ་ཏིའི་ནང་དུ་བྱང་སེམས་ཟླ་བ་ཧཾ་ཡིག་བཅས་གསལ་ཅད་ལ་འགྲེ། དམིགས་པའི་གནད་ནི་ཐོག་མར་རླུང་སྦྱོར་བཅས་ལྟེ་བའི་གཏུམ་མོའི་མེ་ཤེད་ཇེ་ཆེར་སྐྱེས་པས་བདེ་ཆེན་འཁོར་ལོའི་དྷཱུ་ཏིའི་ནང་དུ་བྱང་སེམས་ཟླ་བ་ཧཾ་ཡིག་བཅས་གསལ་བ་ལས། བདུད་རྩི་ཧྃ་ཡིག་མགོ་མཐུར་བསྟན་གྱི་རྣམ་པས་བར་མེད་དུ་འཛག་པས་རིམ་བཞིན་མགྲིན་པ་སོགས་འཁོར་ལོ་བཞི་གང་། གསང་གནས་བར་འབབས་པས་ལུགས་འབྱུང་གི་དགའ་བ་བཞི་རྒྱུད་ལ་སྐྱེས་པར་དམིགས་ཏེ། འོག་རླུང་རྩོལ་བཅས་ཀྱིས་འཐེན་ལ་བདེ་བའི་ངང་སྐྱོང་། བདེ་བ་ཅུང་སྐྱེས་པ་དང་རླུང་ལྷོད་ནས་འཁྲུལ་འཁོར་བཅས་བྱང་སེམས་བདུད་རྩི་དབུ་རྐྱང་རོ་གསུམ་ལས་ཡར་དྲངས་པས་ལུས་ཀུན་ཁྱབས་པར་བསྒོམ་མོ། །འདྲེན་འདི་རྣམས་ཀྱིས་སྐབས་རླུང་བུམ་ཅན་ཁུག་པ་རེ་ཐམས་ཅད་
ཀྱི་སྔོན་དུ་འགྲོ་དགོས། གཉིས་པ་ཝ་ཡི་བཞད་ཚུལ་ནི། ལུས་གནད་རླུང་རང་བབས། རྐང་པ་རྡོར་སྐྱིལ་བཅས། ལག་གཉིས་ཁུ་ཚུར་འཆང་ཁ་ནུ་སྟེང་དུ་གཏད། གྲུ་མོ་བརྐྱང་། རོ་སྟོད་ལྷོད་ལ་ཧཱུྃ་སྒྲས་རླུང་རྔུབ་ཅིང་མགྲིན་པའི་ཨོལ་མདུད་མནན་ལ་གླིང་བཞི་སྒྲིམ་པ་གོང་ལྟར་བྱས་ལ་དགྱེ་དགུ་བཅས་འདྲེན་གསུམ་བྱ། དམིགས་པའི་གནད་ནི། གོང་བཞིན་རླུང་སྦྱོར་བཅས་གཏུམ་མོ་དང་སྤྱི་བོའི་བྱང་ཐིག་གསལ་བ་ལ་གཏུམ་མོ་འབར་བས་བྱང་ཐིག་ཞུ། མེ་ལ་ཕོག་པས་མེ་ཆེར་འབར་བས་ལུས་ཀུན་བདེ་བ་རྒྱས་པར་བསྒོམ་བཞིན་རླུང་བཏང་། འདྲེན་གསུམ་གྱིས་བདེ་དྲོད་སྤྱི་བོའི་བར་ཁྱབ་པར་བསྒོམ་མོ། །གསུམ་པ་ཡི་དྭགས་འདུག་སྟངས་ནི། ལུས་གནད་བར་རླུང་བཅས་རྡོར་སྐྱིལ་བཤིག་ནས། རྐང་རྩེ་སར་གཙུག །རྐང་མཐིལ་སྤྲད། ཁུ་ཚུར་པུས་སྟེང་སྦུབས། ཧི་ཀ་རིང་གིས་འདྲེན་པ་དང་། ཕྱེད་ལངས་ཙམ་བྱས་འཕྲལ་ཧི་ཀ་ཐུང་གིས་མནན་ཅིང་འཕོངས་རྐང་རྟིང་ལ་མནན་མནན་གསུམ་ལ། གདོང་གྱེན་དུ་ཕྱོགས། མིག་གྱེན་དུ་ལྡོག་སྟེ། དེ་འདྲ་ལན་གསུམ་མཐར་རླུང་བཟུང་ལ་འབེབས་ཆེན་ལན་གསུམ་སོགས་བྱ། དམིགས་པའི་གནད་ནི། གོང་བཞིན་རླུང་བཟུང་། འདུས་
མདོར་དང་སྤྱི་བོར་ཐབས་ཤེས་ཐིག་ལེའི་དམིགས་པ་ཟིན་ནས་ཙནྜ་ལཱིའི་བྱང་ཐིག་ཞུ་བ་འདུས་མདོར་སླེབ་པ་དང་བདེ་བ་རྒྱས་པར་བསྒོམ་ལ་རླུང་བཏང་། བར་རླུང་བཅས་ཧཱུྃ་རིང་གིས་འདྲེན་པ་ན། འདུས་མདོའི་བྱང་སེམས་དཀར་པོ་དངུལ་ཆུ་ལྟར་འཚེར་ཞིང་མེ་ལྟར་ཚ་བ་ཡུར་བ་ནས་ཆུ་དྲངས་པ་བཞིན་དབུ་རྐྱང་རོ་གསུམ་ནས་དྲངས། ཧཱུྃ་ཐུང་མནན་པ་ན་འཁོར་ལོ་བཞིའི་རྩ་འདབ་རྣམས་སུ་འདྲེན་པར་བསྒོམ་ལ་བདེ་སྟོང་གི་ངང་ལ་སྐྱོང་ཞིང་འོག་རླུང་འཐེན་འཕུལ་བྱ། བཞི་པ་སེངྒེ་གྱེན་ལོག་ནི། ལུས་གནད་རླུང་རང་བབས། རྐང་པ་རྡོར་སྐྱིལ་གྱིས་བརླ་བར་ནས་ལག་པའི་ཁུ་ཚུར་གདན་ལ་བཙུག་ཏེ། ཧི་ཞེས་རྔུབ་ཅིང་འདྲེན་བཞིན་དགྱེ་ལ་རྡོར་སྐྱིལ་མདུན་བཏེག་འཕོངས་ཚོས་གདན་ལ་རྡེབ། ཧ་ཞེས་རླུང་བཏང་། འཕོངས་བཏེག་རྡོར་སྐྱིལ་མདུན་རྡེབ་བཅས་གསུམ་བྱས་ལ་ཧ་སྤྲུགས་བྱའོ། །དམིགས་པའི་གནད་ནི། ཐོག་མར་རླུང་བཟུང་། དབུ་མའི་ཡར་སྣེ་སྨིན་མཚམས་སུ་བསྲིང་བའི་ནང་། བྱང་སེམས་ཐིག་ལེ་དཀར་པོ་འོད་འཚེར་བ་སྲན་མ་སྦོམ་པ་ཙམ་བདེ་བ་དང་ལྡན་པར་བསྒོམ་མོ། །རླུང་བཏང་། ཧི་ཞེས་རྔུབ་པའི་ཚེ་སེང་སྒྲ་དང་བཅས་འདུས་མདོའི་གཏུམ་མོ་ལ་བསྟིམ། ཧ་ཞེས་བཏང་བ་དང་
མཛོད་སྤུར་བསྟིམ། དེ་ལྟར་རེས་མོས་བདེ་བ་དང་ལྡན་པར་བསྒོམ་ཞིང་མཐར་སྨིན་མཚམས་སུ་བསྡུའོ། །ལུས་གནད་གེགས་སེལ་གནད་ཀྱི་འཁྲུལ་འཁོར་གཉིས་ལས་དང་པོ་སེང་གེ་རྩ་སྤྲུགས་ནི། ལུས་གནད་རྡོར་སྐྱིལ་བཅས་། རླུང་བཟུང་། སྐྱིལ་ཀྲུང་བཤིག །ལག་གཉིས་པུས་མོའི་ཕྱི་ནས་ཡར་ཁྱེར། གྲུ་མོ་བརྐྱང་ལ་ཁུ་ཚུར་ནུ་སྟེང་སླེབ་པ་དང་མཆན་རྡེབ་བར་འབེབས་དང་སྦྲགས་གཅིག་རྒྱབ་ནས་ལག་གཉིས་ཀྱི་སོར་མོ་གཡས་སུ་ལན་གསུམ་སྤྲུགས་ལ། ཁུ་ཚུར་པུས་རྒྱབ་ནས་ཡར་ཁྱེར་མཆན་རྡེབ་བར་འབེབས་གོང་བཞིན་ལག་གཉིས་སོར་མོ་རྣམས་གཡོན་དུ་གསུམ་བཀྲབ། ཡང་དེ་བཞིན་བར་འབེབས་གཅིག་ནས་མདུན་དུ་སོར་མོ་རྣས་སྤྲུགས་ནས་རླུང་བཏང་། ངག་ནས་ཕ་ཧ་ཧ་བརྗོད་པ་དང་བར་འབེབས་སྦྲགས་ལན་གསུམ་བྱ། དམིགས་པའི་གནད་ནི། རླུང་སྦྱོར་གྱི་ལྟེ་བའི་མེ་ཤེད་ཇེ་ཆེར་སྐྱེས་པའི་སྤྱི་བོའི་ཧཾ་ལ་རེག་འཕྲལ་ཐིག་ལེ་དཀར་པོ་གཡས་རོ་མ་ནས་བབ་ལུས་ཀྱི་གཡས་ཕྱོགས་བ་སྤུའི་བར་ཁྱ། དེ་ནས་རྐྱང་མ་ནས་བབ་ལུས་ཀྱི་གཡོན་བ་སྤུའི་བར་ཁྱབ། དེ་ནས་དབུ་མ་ནས་བབ་གསང་གནས་སུ་བདེ་ཧྲིལ་ལེར་བསྐྱིལ་བར་བསྒོམ་མོ། །གཉིས་པ་སེང་གེ་རྣམ་རོལ་ནི། ལུས་གནད་བསྲང་ལ་
རྡོར་སྐྱིལ་བཅས། རླུང་བཟུང་ལ་ལག་གཉིས་ཐལ་མོ་སྦུབས་པ་པུས་སྟེང་ནས་ཡར་ཁྱེར། ནུ་སྟེང་སླེབས་པ་དང་མཆན་རྡེབ་བཅས་ཤེད་ཀྱིས་ཐད་དཀར་བརྐྱང་། ཚུར་བསྐུམ་ལ་ཐེའུ་ཆུང་སྲིན་ལག་བཞིས་ཁ་བསྡམ། གུང་མོས་སྣ། མཛུབ་མོས་མིག །ཐེ་བོང་གིས་རྣ་བ་བཀག་ལ། ལུས་ཚུགས་མ་ཤོར་བར་རོ་སྟོད་འཁོར་ལོ་ལྟར་གཡས་སྐོར་གསུམ་གཡོན་སྐོར་གསུམ་བྱས་འཕྲལ། ཁ་སྣ་ཕྱིས་ལ་ལག་གཉིས་བཤིག །རླུང་བཏང་ལ་ངག་ནས། མ་ཧ་ཧ་བརྗོད་པ་དང་བར་འབེབས་སྦྲགས་ལ་ལན་གསུམ་ནས་ཧ་སྤྲུགས་བྱ། དམིགས་པའི་གནད་ནི། རླུང་གི་སྦྱོར་བས་གཏུམ་མོ་འབར། སྤྱི་བོའི་ཧྃ་ཡིག་བྱང་ཐིག་གི་རྒྱུན་དཀར་ནར་གྱིས་བབས། འཁོར་ལོ་བཞི་གང་། དགའ་བཞིའི་བདེ་བ་སྐྱེས། གཏུམ་མོ་དང་འདྲེས། བདེ་བ་ཆེན་པོའི་ངོ་བོ་སྣང་སྲིད་ཐམས་ཅད་ཡཾ་ཡཾ་དུ་གཡོས། མཐར་ཕྱི་ཡི་སྣང་བ་བར་གྱི་ལུས་ནང་གི་འཛིན་རྟོག་བཅས་བདེ་བ་ཆེན་པོའི་ངོ་བོར་ཞུ་སྟེ་ཐམས་ཅད་མི་དམིགས་པ་སྟོང་པའི་རང་ངོ་སྐྱོང་ངོ་། །སྙན་བརྒྱུད་རྩ་བའི་འཁྲུལ་འཁོར་དྲུག་ནི་ཐིག་ལེའི་འཁྲུལ་འཁོར་ཏེ། ཐིག་ལེ་འཛིན་པའི་འཁྲུལ་འཁོར་གཉིས། ཐིག་ལེ་འདྲེན་པའི་འཁྲུལ་འཁོར་གཉིས། ཐིག་ལེ་བཀྲམ་པའི་འཁྲུལ་འཁོར་
གཉིས་ཏེ་དྲུག་གོ །དང་པོ་ཐིག་ལེ་འཛིན་པའི་འཁྲུལ་འཁོར་གཉིས་ལས། དང་པོ་སེང་གེ་རྩེ་བ་ནི། ལུས་གནད་སེམས་སྐྱིལ། རླུང་རང་བབ་འོག་རླུང་འཐེན་ཅིང་སྲིན་ཞལ་བསྡམ། རྐང་གཡོན་བསྐུམ་པ་འོག་སྒོར་བཞག །རྐང་གཡས་སྟེང་ལག་པའི་འཁྲིག་མ་གཉིས་བསྣོལ་སྟེ་གཡས་ཕྱི་གཡོན་ནང་དུ་ཡོད་པར་བྱས་ལ། ལག་གཡོན་གྱིས་རྐང་གཡས་ལོང་བུ་བསྡམ་གཡས་པས་བོལ་མཐིལ་ནས་བཟུང་། རོ་སྟོད་དང་མགོ་བོ་གཡས་སུ་འཐེན་ཅིང་ཧ་འདྲེན་བཅས་གསུམ་ལ་མིག་གིས་བར་སྣང་དུ་ཅེར་གྱིས་ལྟ་སྟངས་བཅས་ལན་གསུམ་མཐར་། རྐང་གཡས་འོག་སྒོར་བཞག །རྐང་གཡོན་མདུན་དུ་བཞག །ལག་པ་ཕྱི་ནང་བསྣོལ་ཏེ་གཡོན་པས་བོལ་མཐིལ་གཡས་པས་ལོང་བུ་བསྡམ་ཞིང་གཡོན་ཕྱོགས་སུ་གོང་ལྟར་ཧ་འདྲེན་ལན་གསུམ་གྱིས་འཐེན་ལྷོད་བྱས་ལ་ཧ་སྤྲུགས་བྱ། དམིགས་པའི་གནད་ནི། སྤྱི་བོའི་ཧཾ་ལས་བྱང་ཐིག་དཀར་པོ་བབས། གསང་བའི་རྩེ་མོར་བདེ་བ་དང་ལྡན་པར་བསམ། གསང་གནས་ཀྱི་བུ་ག་ཕཊ་སེར་པོས་བཀག་པར་བསྒོམ། ཡར་འདྲེན་པ་དང་སྤྱི་བོའི་ཧཾ་ལ་ཐིམ། ཡང་མར་དབབ་པ་བཅས་རེས་མོས་མཐར་སྤྱི་བོར་བསྡུའོ། །གཉིས་པ་སྟག་མོ་སྐྱུག་པ་ནི། ལུས་གནད་རླུང་རང་བབས།
རྡོར་སྐྱིལ་བོལ་ཚིགས་གཉིས་ཀྱི་རྒྱབ་ལག་པ་གཉིས་ཀྱི་རྒྱབ་སྦྱོར་ལ་ཐལ་མོ་བཀན་པའི་སོར་ཙེ་གདན་ལ་བཙུག །ལུས་སྟོད་བསྲངས་ཤུགས་ཀྱིས་སྒྲིམས་ལ། མིག་འབུར་ཚུགས་བཅས་འཕོངས་བཀྱག །ཧ་གསུམ་གྱི་སྒྲས་སྐྱུག་འདྲེན་གྱིས་མདུན་དུ་རྒུར་བ་ལན་གསུམ་མཐར་ཧ་སྤྲུགས་རྡོར་སྐྱིལ་བཤིག །དམིགས་པའི་གནད་ནི། འདྲེན་དང་པོས་འཁོར་ལོ་བཞིར་གཏུམ་མོའི་དྲོད་ཀྱི་ཁྱབ་པར་བསྒོམ། གཉིས་པས་སྤྱི་བོའི་ཧཾ་ལས་བབ་པའི་བདུད་རྩི་འཁོར་ལོ་བཞི་གང་བས་བདེ་བ་སྐྱེས་པར་བསྒོམ། གསུམ་པས་བདེ་དྲོད་བཟོད་མེད་ཀྱིས་ལུས་ཀྱི་ཕྱི་ནང་ཀུན་ཁྱབ་པར་བསྒོམ་མོ། །གཉིས་པ་ཐིག་ལེ་འདྲེན་པའི་འཁྲུལ་འཁོར་གཉིས་ལས། དང་པོ་གླང་ཆེན་འགྱིང་བ་ནི། ལུས་གནད་རྡོར་སྐྱིལ་བཅས། རླུང་བཟུང་། སྐྱིལ་ཀྲུང་བཤིག་ནས་རྐང་ལག་བཞི་མདུན་དུ་བརྐྱང་། ལག་གཉིས་གན་རྐྱལ་པུས་མོའི་ཐད་ནས་ཡར་དྲངས་ཞོར་བཞེངས་ལ། ལག་པ་ནུ་སྟེང་སླེབ་པ་དང་མཆན་རྡེབ་བཅས་རྐང་གཉིས་བར་མཁྱིད་གང་ཙམ་ཕྱེ་བར་བྱས་ཏེ་མར་རྒུར། ཁུ་ཚུར་གཡོན་འོག་གཡས་སྟེང་དུ་བྱས་ལ་བརྩེགས། གྲུ་མོ་དང་སྒྱིད་ཁུག་བསྲང་། ལུས་པོ་ཅུང་ལྷོ། མགོ་བོ་བླ་བར་དུ་རྒུར་ནས་གཡས་གཡོན་དབུས་གསུམ་དུ་ཡར་འདྲེན་སྐབས་
མགོ་བོ་གྱེན་དུ་ཕྱོགས། མིག་ནམ་མཁར་ལྡོག །མར་རྒུར་དུས་མགོ་བོ་བླ་བར་དུ་རྒུར་འདྲེན་གསུམ་ཚར་ནས་གདོང་གྱེན་དུ་ཕྱོགས། མིག་བར་སྣང་ལ་ཧར་གྱིས་བལྟ་བཞིན་འཕོངས་རྟིང་རྡེབ་པ་དང་རྐང་རྟིང་ལག་རྟིང་བཞི་རྣམས་དུས་གཅིག་ལ་སར་རྡེབ། ཡར་དགྱེ་བ་དང་རྐང་རྩེ་ལག་རྩེ་བཙུག་པ་བཅས་དགྱེ་དགུ་ལན་གསུམ་ནས་ཡང་གོང་བཞིན་འདྲེན་སོགས་བྱ་བ་ཁྱོན་ལན་གསུམ་སོང་ནས་འབེབས་ཆེན་གསུམ་ནས་ཧ་སྤྲུགས་བྱ། དམིགས་པའི་གནད་ནི།་དབུ་མའི་ཡར་སྣེ་གཙུག་ཏོར་སར་ཧཾ་ཡིག་དཀར་པོ་མགོ་གྱེན་བསྟན་ཚངས་བུག་ནས་ཡི་གེ་མ་སེར་པོས་བཀག་པ། བདེ་ཆེན་འཁོར་ལོའི་ཧཾ་ཡིག་མགོ་མཐུར་བསྟན་ལྟེ་བར་གཏུམ་མོའི་ངོ་བོ་ཧཱུྃ་ཡིག་དམར་པོ་ཚ་ཞིང་བསྲེག་པ་མགོ་གྱེན་བསྟན། ཧཱུྃ་གི་འོད་ཀྱིས་བདེ་ཆེན་འཁོར་ལོའི་ཧཾ་བྱ་ལྡིང་བ་ལྟར་མར་འབབ། མགྲིན་པར་བསླེབ་པ་དང་ལྟེ་བའི་ཧཱུྃ་ཡིག་རིམ་གྱིས་ཇེ་མཐོར་གྱུར་པ་སྙིང་གའི་ཆ་སྨད་ཙམ་དུ་སླེབ་པ་དང་ཧཾ་རང་གནས་སུ་སོང་། ཧཱུྃ་ཡང་མར་བབས་ལུས་ཀུན་བདེ་དྲོད་ཀྱིས་ཁྱབ་པར་དམིགས། ལྟེ་འོག་ནས་མིག་གཅིག་གིས་དབུ་མ་བཀག་སྟེ་ཡར་ལྟ་བར་བསྒོམ་མོ། །གཉིས་པ་རུ་སྦལ་བསྐུམ་པ་ནི། ལུས་གནད་རྡོར་སྐྱིལ། རླུང་བཟུང་། སྐྱིལ་ཀྲུང་བཤིག་ནས་རྐང་པ་མདུན་དུ་བརྐྱང་། ལག་གཉིས་ཁུ་ཚུར་གྱེན་བསྟན་པུས་མགོར་ཡར་གཞལ་བཞེངས། ནུ་སྟེང་སླེབས་པ་
དང་མཆན་རྡེབ་བཅས་མར་རྒུར་ཞོར་རྐང་གཉིས་བར་ཁྲུ་གང་ཙམ་གྱིས་བར་བྱེ་བར་བྱས། ལག་གཉིས་བརླ་ནང་སྒྱིད་ཁུག་ནས་མར་རྐྱང་། རྐང་རྡེབ་གཉིས་ཀྱིས་ཕྱི་ནས་གཅུད། ལག་པའི་མཛུབ་མོ་གཉིས་ཀྱིས་རྐང་པའི་མཐེ་བོང་གཉིས་དམ་དུ་བཟུང་ནས་རླུང་གང་བའི་ཤུགས་ཀྱིས་གཡས་གཡོན་དབུས་གསུམ་ལ་དགང་འདྲེན་སྟེ་འཐེན་རྒུར་བྱ། ཁོག་སྟོད་སྒྲོ་སིག་ལྟར་འཕར་འདར་ལན་གསུམ་བྱ། ལག་དཔུང་རྐང་བརླ་བཅས་ཀྱིས་ཆག་སྒྲ་ཐོན་པར་བྱ། ཡང་དགང་འདྲེན་གཡོན་གཡས་དབུས་གསུམ་འཕར་འདར་གསུམ། ཡང་གཡས་གཡོན་དབུས་གསུམ་འཕར་འདར་གསུམ་བཅས་མཐར་འབེབས་ཆེན་གསུམ་རྒྱབ། རླུང་བཏང་ཧ་སྤྲུགས་བྱ། རོ་སྟོད་དགྱེ་དགུའི་སྐབས། མར་རྒུར་དུས་མགོ་བརླ་གཉིས་བར་བཀུག་ཡག་དང་། ཡར་དགྱེ་དུས་མིག་གྱེན་དུ་ལྡོག་པའི་བར་སྣང་ལ་བལྟ་བར་བྱའོ། དམིགས་པའི་གནད་ནི། རིག་པ་ཁོང་ལྷོད་ལ་རྩ་གསུམ་གསལ་བའི་དབུ་མའི་ཡར་སྣེ་ཧཱུྃ་མཐིང་ག །རོ་མའི་ཡར་སྣེ་ཨཱཿདམར་པོ། རྐྱང་མའི་ཡར་སྣེར་ཨོཾ་དཀར་པོ་སྟེ་རྡོ་རྗེ་གསུམ་གྱི་ངོ་བོར་གསལ་བའི་ལྟེ་བའི་མེས་སྤྱི་བོའི་ཧཾ་ཞུ། བྱང་སེམས་གསང་བའི་གནས་བར་ཁྱབ། དེ་ནས་གཡས་འདྲེན་སྐབས་རོ་
མ་ནས་ཨཱཿདང་། ཡོན་འདྲེན་སྐབས་རྐྱང་མ་ནས་ཨོཾ། དབུས་འདྲེན་སྐབས་ཧཱུྃ་ལ་ཐིམ་འབྲུ་གསུམ་འོད་ཟེར་འབར་བས་ཕྱོགས་དུས་ཀྱི་རྩ་གསུམ་མཆོད། བྱིན་རླབས་བསྡུས། རྒྱལ་བ་རྣམས་ཀྱི་སྐུ་གསུང་ཐུགས་དང་རོ་གཅིག་ཏུ་གྱུར་པར་དམིགས་ལ་རྟོག་མེད་ངང་དུ་ཧ་རེ་བཞག་གོ །གསུམ་པ་ཐིག་ལེ་བཀྲམ་པའི་འཁྲུལ་འཁོར་གཉིས་ཀྱི་དང་པོ། རྨ་བྱ་འཕུར་བ་ནི། ལུས་གནད་རྡོར་སྐྱིལ། ལུས་བསྲང་བུམ་ཅན་བཟུང་། སྐྱིལ་བཀྲུང་བཤིག །རྐང་ལག་བཞི་མདུན་དུ་བརྐྱང་། ཁུ་ཚུར་པུས་སྟེང་ནས་གཞལ་ལ་ཡར་བཞེངས། ཁུ་ཚུར་ནུ་སྟེང་སླེབ་པ་དང་། རྟིང་སྲིག་བཅས་ལག་གཉིས་མདུན་དུ་བརྐྱངས་ལ་རྒུར་རྐང་པའི་མཐེ་བོང་གཉིས་འཛུབ་མོས་དམ་དུ་བཟུངས། ཕྱི་རྟིང་གཉིས་ཀྱིས་གསང་བའི་དབུ་མའི་མར་སྣེ་མནན་ཅིང་གྲུ་གུ་ཆིང་བཞིན་རྒལ་པ་གདན་ལ་གཏད། ཡར་འགྲིལ་ལྟག་པ་གདན་ལ་སྦྱར། མགོ་མདུན་དུ་རྒུར་བཞིན་ལག་གཉིས་ནས་རྐང་མཐེབ་བཟུང་བཞིན་མ་ཤོར་བར་གནམ་དུ་བརྐྱངས་ལ། དཔུང་ཚིགས་ལག་ཚིགས་བསྲང་། མར་འགྲིལ་རྐང་ལག་སར་བཙུག་རྒུར་ཚུགས་སུ་ཡར་ལངས་བཅས། དེ་འདྲ་ལན་གསུམ་མཐར་རྐང་མཐེབ་བཏང་ནས་སྒྲེང་གིས་ལངས་ཏེ་འབེབས་
ཆེན་གསུམ་རྒྱབ། ཧ་སྤྲུགས་བྱ། དམིགས་པའི་གནད་ནི། ལྟེ་བའི་གཏུམ་མོ་ལས་མེ་སོར་བརྒྱད་ཙམ་དུ་འབར། སྤྱི་བོའི་ཧཾ་ལས་བྱང་སེམས་ཧཱུྃ་ཡིག་གི་རྣམ་པ་ཆད། གསང་གནས་སུ་སླེབས་པ་དང་ལུས་ཐམས་ཅད་ཐིག་ལེར་དཀར་པོས་རིམ་གྱིས་ཁེངས་ཏེ་བ་སྤུའི་བར་ཁྱབ་པར་བསྒོམ། ཡར་ལངས་མར་རྒུར་སྐབས་ཧཱུྃ་ཧཾ་ལ་ཐིམ་པར་དམིགས། ཡང་ཧཾ་ལས་ཧཱུྃ་ཆད་པ་སོགས་རེས་མོས་མཐར་ཧཱུྃ་ཧཾ་ལ་བསྡུ། ཐིག་ལེས་ལུས་ཀུན་ཁྱབ་པ་དེ་ཉིད་ལས་མི་བསྡུའོ། །གཉིས་པ་བྱ་རྒོད་འཕུར་བ་ནི། ལུས་གནད་རྡོར་སྐྱིལ་ངང་ནས་རླུང་བཟུང་། སྐྱིལ་བཀྲུང་བཤིག །རྐང་པ་མདུན་རྐྱང་། ཁུ་ཚུར་གྱེན་བསྟན་པུས་སྟེང་ནས་གཞལ་ལ་ཡར་ལངས། རྐང་གཡས་བསྐུམ་གཡོན་གྱི་བརླ་ལ་གཏད། གཡོན་པ་ས་ལ་བཙུག །ལག་གཉིས་ཐད་ཀར་ཤེད་ཀྱིས་བརྐྱང་། ཁུ་ཚུར་འཆང་ཁས་ཕྲག་གོང་དུ་གཡས་གཡོན་གཡས་བཅས་གསུམ་མཐར་ལག་གཉིས་ཁུ་ཚུར་མདུན་རྐྱང་གིས་ནུ་རྡེབ་གསུམ་རྒྱབ། ཡང་རྐང་མཐིལ་གཡོན་བརླ་གཡས་ལ་གཏད། ཕྲག་རྡེབ་གཡོན་ཙམ་གསུམ་དང་། ནུ་རྡེབ་མཆན་རྡེབ་གསུམ་རྒྱབ། མཐར་འབེབས་ཆེན་གསུམ་དང་ཧ་སྤྲུགས་འཕུར་འདོན་བྱ། དམིགས་པའི་གནད་ནི། ལྟེ་བའི་གཏུམ་མོའི་འོད་ཀྱིས་སྤྱི་བོའི་
ཧཾ་ལས་བྱང་སེམས་ཐིག་ལེ་ཡུངས་འབྲུ་ཙམ་གྲངས་མེད་པ་བབས་སྟེ། ལྟེ་བའི་གཞི་གནས་ཀྱི་མེ་ལ་རེག་མ་ཐག་ཐིག་ལེ་དཀར་ལ་དམར་བའི་མདངས་ཆགས་པའི་བདེ་དྲོད་དང་ལྡན་པས་རྩ་གནས་ཐམས་ཅད་མེར་གྱིས་ཁེངས། བ་སྤུའི་བུ་ག་ནས་མཆེད་པའི་ལུས་ཀྱི་ཕྱི་དྲོད་ཀྱིས་མེ་འབར། ལུས་ཀྱི་ནང་བདེ་བས་མྱོས་པ་བཞིན་ཟར་ཟིར་དུ་གྱུར་བདེ་དྲོད་ལུས་ལ་འབར་བས་སེམས་སྐྱེ་མེད་རྟོག་བྲལ་ནམ་མཁའ་གཡའ་དག་པ་ལྟར་ལྷན་ནེར་སོང་བར་དམིགས་ལ། ལུས་སེམས་ལྷོད་ཅིང་ངལ་གསོའི། དེ་ནས་འབེབས་ཆེན་ནི་ལུས་གནད་རྡོར་སྐྱིལ་བཅས། རླུང་བཟུང་། ལག་གཉིས་འཁྱུད་རྒྱ་བཀྲོལ་བ་དང་རྡོར་སྐྱིལ་བཤིག །ཡར་ལངས། རྐང་པ་གཤིབ། ལུས་དྲང་པོར་བསྲང་ཞིང་ལག་གཉིས་མྱུར་པོར་མདུན་ཕྱོགས་ཤེད་ཀྱིས་བརྐྱང་ནས། ཐུགས་ཀར་འཁྱུད་རྒྱ་བཀྲོལ་བའི་ཁུ་ཚུར་པུས་མོ་གཉིས་ཀྱི་ཕྱི་ཟུར་དུ་སྦུབས་པ་དང་མཉམ་དུ་རྐང་པ་གཉིས་སེམས་སྐྱིལ་ཚུལ་གྱིས་ལུས་ལྗིད་ཕབ་ཏེ་གདན་ལ་འཕངས་པ་དང་། བརླ་པུས་མགོའི་ཕྱི་བོལ་གོང་བཅས་ཐམས་ཅད་ལྷན་ཅིག་ཅལ་གྱིས་བརྡབ་པ་ནི་སྤྱིར་འབེབས་ཆེན་ཏེ་གོང་དུ་བཤད་པ་ལ། ནང་གསེས་རྐང་པ་གཡས་ཕྱི་གཡོན་ནང་བྱས་གོང་བཞིན་གདན་ལ་འབེབས་པ་བསྣོལ་འབེབས། ༡༽ ཡང་རྐང་པ་
གཉིས་བར་ཁྲུ་གང་ཙམ་བྱེ་བར་བྱས་ཏེ་གདན་ལ་འབེབས་པ་བསྒྲད་འབེབས་དང་། ༢༽ རྐང་པ་གཤིབས་ནས་ཡར་བཞེངས། ཅུང་ཟད་ཡར་འཕགས་ཉམས་ཀྱིས་ལག་པ་འཁྱུད་རྒྱ་རྐང་པ་གཉིས་རྡོར་སྐྱིལ་བཞིན་གདན་ལ་འབེབས་འཕྲལ་འཁྱུད་རྒྱ་རྡོར་སྐྱིལ་བཤིག་ཐུབ་ངེས་བྱ་བ་རྡོ་རྗེ་ཐོག་འབེབས་དང་། ༣༽ རྡོར་སྐྱིལ་བཤིག་འཕྲལ་ལག་རྒྱབ་གཉིས་པུས་མོའི་ཕྱི་ཟུར་གཉིས་དུས་མཉམ་དུ་གདན་ལ་ཤུགས་ཀྱིས་རྡེབ་མ་ཐག་རྐང་ལག་བཞི་མདུན་ཕྱོགས་སུ་ཤེད་ཀྱིས་བརྐྱང་། ལག་གཉིས་ཁུ་ཚུར་སྦུབས་པ་ངར་གདོང་སྟེང་དུ་བཞག་ཙམ་ནས་མྱུར་བར་ཙོག་པུར་མེ་ཐབས་དྲུག་ཆིངས་བཅའ། ཡར་ལངས་ཞོར་ལག་གཉིས་ནུ་མའི་སྟེང་ནས་ཡར་གཞལ་བའི་ཚུལ་གྱིས་དཔུང་པ་རྒོད་གཤོག་ལྟར་བརྐྱངས་ནས། ཚུར་བསྐུམ་པའི་ཕྲག་གོང་ནས་བཟུང་ཕྱིར་མཁལ་ཁུག་བར་ཁུ་ཚུར་གྱིས་གཞལ། ལུང་ལྗིད་ཕབས་ཏེ་རྐང་པ་སེམས་སྐྱིལ་གྱིས་འབེབས་གདན་ལ་བརྡབ་པ་ནི། བརྐྱངས་བསྐུམ་འབེབས་དང་། ཡང་རྐང་པ་གཤིབས་ནས་ཡར་ལངས། ལག་གཉིས་ཁུ་ཚུར་ཕྱིར་སྦུབས་
ལུས་རྒྱུད་དཔྱི་ཟུར་ནས་ཕྱིར་གཞལ་དང་། རྐང་ལག་བཞི་ཀ་མདུན་ཕྱོགས་སུ་འཕངས་པ་ལྟ་བུར་ལག་པའི་གྲུ་མོ་རྐང་པའི་སྒྱིད་ཁུག་རྣམས་ཐད་ཀར་བརྐྱངས་བཞིན་ལུས་ལྗིད་ཕབས་ཏེ་བྱིན་གཞུག །ཉ་སྙིང་། སྒྱིད་ཁུག །བརླ་དང་། འཕོངས་རྣམས་ལྷན་ཅིག་འབེབས་གདན་ལ་ཅར་གྱིས་རྡེབ་ཅིང་། དེ་ཡང་ལུས་ཚུགས་མ་ཤོར་བར་བསྲང་བ་ནི་བརྐྱང་འབེབས་ཏེ། དེ་ལྟར་འབེབས་ཆེན་རྣམ་ལྔར་གྲགས་པ་ཡང་ལོངས་སྐབས་ཡོད་ཚེ་རླུང་ཁུག་རེ་རེ་འབེབས་ཆེན་སྣ་རེ་ཅི་ནུས་སུ་རྒྱབ་པ་དང་། བསྡུ་ཚེ་རླུང་ཁུག་གཅིག་ལ་ཐམས་ཅད་ཚང་བར་བྱས་ཏེ་གོང་ལྟར་ཧ་སྤྲུགས་སོགས་བྱའོ། །དམིགས་པའི་གནད་ནི། འདི་དག་ས་བཅད་གཅིག་གི་ཁོངས་སུ་གཏོགས་པའི་ཕྱིར། རང་ཉིད་ཌཱ་ཀི་མ་གསེར་གྱི་མདོག་ཅན་གྲི་ཐོད་འཛིན་པ་རྩ་གསུམ་འཁོར་ལོ་བཞི་དང་བཅས་པ་གསལ་བའི་འདུས་མདོའི་གཏུམ་མོ་རྣོ་ལྡན་སྲན་མ་ཙམ་ལས་འོད་འཕྲོས། ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའ་འམ་དཔའ་བོ་རྣལ་འབྱོར་མའི་ཚོགས་དཔག་ཏུ་མེད་པ་སྤྱན་དྲངས། རང་ཉིད་ཀྱི་ལུས་ལ་ཐིམ། དེའི་
མཐུས་ལུས་ཕྱི་ནང་ཐམས་ཅད་ཡེ་ཤེས་ཀྱི་མེ་རི་མེ་དཔུང་དུ་གྱུར། སླར་ཡང་བྱང་ཆུབ་སེམས་དཔའ་དཔའ་བོ་དཔའ་མོ་བསམ་གྱིས་མི་ཁྱབ་པ་རང་གི་ལུས་ལ་ཐིམ་པས་མེ་ཆེར་འབར། སྟོང་གསུམ་འཇིག་རྟེན་ཐམས་ཅད་མེའི་ཕུང་པོ་ཆེན་པོ་གཅིག་ཏུ་གྱུར་པ་ཟད་པར་མེའི་ཏིང་ངེ་འཛིན་ལ་སེམས་རྩེ་གཅིག་ཏུ་གཏད་དོ། །གཞན་དུ་འབེབས་ཆེན་རེ་ལ་དམིགས་པ་རེ་སྦྲག་རྒྱུ་མཆིས་མོད། ལུགས་འདིར་འབེབས་ཆེན་ཀུན་ལ་དམིགས་པ་འདི་གཅིག་པུས་ཁྱབ་པའོ། །གེགས་སེལ་ནི། ལུས་གནད་རྡོར་སྐྱིལ། ལག་གཉིས་ཁུ་ཚུར་བརླ་རྩར་སྦུབས། རླུང་བཟུང་ལ་ཐོག་མར་མདུན་མཁར་ཧར་གྱིས་གཅིག་བལྟ། ལུས་གནད་བསྲང་བཞིན་གདོང་གཡས་སུ་ཕྱོགས་པས་མིག་གིས་ཕྲག་གོང་གཡས་སུ་བལྟ། དེ་བཞིན་དུ་གཡོན་དུ་བལྟ། དེ་ནས་གཡས་སུ་བལྟས་ལ་ཧ་བརྗོད། ཡང་གཡས་སུ་གཅིག་གཡོན་དུ་གཅིག །ཡང་གཡས་གཡོན་ལ་ལན་རེ་བལྟས་ཏེ་ཧ་རེ་བརྗོད། རྡོར་སྐྱིལ་བཤིག་ལ་ལག་གཉིས་རྡོ་རྗེ་རྩེ་གཅིག་རྒྱ་ནམ་མཁར་བཏེག་ཅིང་མིག་བར་སྣང་ལ་བལྟ། སེམས་སྐྱིལ་བཅའ། བར་
འབེབས་རེ་དང་ངག་གིས་ཧ་རེ་བརྗོད། རྡོ་རྗེ་རྩེ་གཅིག་རྒྱས་བྲང་ལ་ཤེད་ཀྱིས་རྒྱབ་པ་རྣམས་སྦྲགས་ལ་ལན་གསུམ་བདུན་བརྒྱད་སོགས་བྱ། དམིགས་པའི་གནད་ནི་ཐོག་མར་མདུན་དུ་བལྟ་བའི་ཚེ་མདུན་མཁར་ཡི་གེ་ཧ་ལྗང་གུ་ཆེ་བ་གཅིག །གཡས་གཡོན་དུ་བལྟ་ཚེ་ཕྲག་གོང་གཉིས་སུ་ཧ་ལྗང་གུ་དེ་ལས་ཆུང་བ་རེ་གསལ་བཏབ། དེ་ནས་ཧ་བརྗོད་བཞིན་གཡས་སུ་བལྟ་བའི་ཚེ་ཐོག་མེད་ནས་བསགས་པའི་སྡིག་སྒྲིབ་ལུས་ཀྱི་བག་ཆགས། རྩ་ཡི་སྒྲིབ་པ་གེགས་དང་བར་ཆད་ཐམས་ཅད་ནག་ཐིབས་སེ་གཡས་ཀྱི་ཧ་ལ་ཐིམ་པ་དང་། གཡོན་དུ་བལྟ་ཚེ་ཕྱི་མ་མྱོང་འགྱུར་གྱི་ལས་ངན་འབྲས་བུ་བག་ཆགས་དང་བཅས། ངག་གི་སྡིག་སྒྲིབ་རླུང་གེགས་དང་བར་ཆད་ཐམས་ཅད་གཡོན་གྱི་ཧ་ལ་ཐིམ་པ་བཅས་ཡང་ཡང་བསྒོམ། མཐར་བར་འབེབས་སྐབས་སུ་འདུས་མདོའི་གཏུམ་མོ་ལས་རླུང་གཡོས། ཀུན་གཞིའི་བག་ཆགས་ཚེ་འདིར་བྱས་བསགས་ཀྱི་སྡིག་སྒྲིབ་མདོར་ན་གཉིས་སྣང་འཛིན་རྟོག་དང་བཅས་པ། རོ་རྐྱང་ལས་རླུང་ཟག་བཅས་ལུས་ཀྱི་ཤ་ཁྲག་གི་ཐིག་ལེ་བསྒོམ་པའི་གེགས་དང་བར་ཆད་ཐམས་ཅད་སྦུར་མ་རླུང་གིས་ཁྱེར་བ་ལྟར་དབང་པོའི་སྒོ་དགུ་དང་། བ་སྤུའི་བུ་ག་རྣམས་ནས་ཕྱིར་དེད། ཁུག་རླུང་གི་རྣམ་པ་ནག་སིབ་སིབ་མདུན་གྱི་ཧ་ལ་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་ཐིམ། ཕྲག་གོང་གཉིས་ཀྱི་ཧ་ཡང་དེ་དང་ལྷན་ཅིག་མདུན་གྱི་
ཧ་ལ་ཐིམ། སླར་སྒོ་གསུམ་གྱི་སྒྲིབ་པ་དྲི་མ་ཙམ་མ་ལུས་པའང་གཏུམ་མོའི་མེས་བསྲེགས་ཏེ་རྣམ་སྨིན་གྱི་ཕུང་པོ་སྦྲུལ་གྱི་ཤུན་པ་བརྗེས་པ་བཞིན་དག་སྟེ། གསལ་སྟོང་དབྱེར་མེད་འཇའ་ཚོན་ལྟ་བུའི་ཡི་དམ་ལྷའི་སྐུ། གྲགས་སྟོང་ལྷུན་གྲུབ་བྲག་ཆ་ལྟ་བུ་ཨ་ཧཾ་སྔགས་ཀྱི་སྒྲ། བདེ་སྟོང་ཟུང་འཇུག་འདུས་མ་བྱས་པའི་རིག་པ་བཟུང་འཛིན་གྱི་ཕྱོགས་སུ་མ་ལྷུང་བར་གང་ཤར་ཡེ་ཤེས་ཆེན་པོར་འབྱམས་ཀླས་པ་འདིའི་རང་ངོ་སྐྱོང་ངོ་། །རྗེས་རིམ་ནི་ལུས་གནད་རྡོར་སྐྱིལ་བཅས། རླུང་བཟུང་ལ། སྔོན་འགྲོ་རྩ་འཁྲུས་ལྟར་བྲང་རྡེབ་མཆན་རྡེབ་སོགས་གསུམ་དགོས་པ་རྣམས་རེ་རེ་བྱས་ལ་རྡོར་སྐྱིལ་བཤིག །སེམས་སྐྱིལ་ངང་ནས་ཁུ་ཚུར་པུས་མོར་སྦུབས་ལ་པུས་བྲང་འཕྲོད་ངེས་ཀྱིས་གཡས་བཅད་གསུམ། གཡོན་བཅད་གསུམ་བྱས་ལ་རླུང་བཏང་། འདི་ལ་སྔར་ལྟར་རྐང་བྱུག་སོགས་མི་དགོས། དཔེ་ཉིད་ཟིན་བྲིས་སུ་བགེགས་སེལ་ལུགས་གཅིག་གསུངས་པ་དང་། འཇང་པ་སྐུ་སྐྱེའི་རྗེས་ཆོག་ཡན་ལག་ལྔ་སྦྱོང་བསྡུས་པ་ཚར་གཅིག་གསུངས་པ་བཅས་གཉིས་ཀར་ཆད་ལྷག་གི་སྐྱོན་ཅུང་ཟད་ཀྱིས་རྗེས་འཇུག་རྣམས་གོ་བ་འཁྲུལ་བར་མངོན་ནོ། །དམིགས་པའི་གནད་ནི་གོང་གི་གེགས་སེལ་གྱི་ཁྱེར་སོ་དང་མ་བྲལ་བར། ལྟེ་བའི་གཏུམ་མོའི་མེས་དབུ་མ་ནས་རྩ་ཕྲན་རྣམས་སུ་ཁྱབ། ཡན་ལག་ཉིང་ལག་དང་བཅས་པ་དྲོ་ཞིང་མཉན་ལ་ཡང་པ་རྩ་
རླུང་གི་གེགས་དང་གོལ་ས་ལས་གྲོལ་བར་བསམ་མོ། །མཐའ་རྟེན་བཀྲ་ཤིས་ནི། ལུས་གནད་རྡོར་སྐྱིལ་བཅས། རླུང་བཟུང་། སྐྱིལ་ཀྲུང་བཤིག་ནས་སེམས་སྐྱིལ་ངང་ལག་གཉིས་མཆན་རྡེབ་བཅས་རྐང་པའི་བོལ་ཚིགས་རྩར་ཁུ་ཚུར་གཡོན་འོག་གཡས་སྟེང་མ་བྱས་ལ་བརྩེགས། མགོ་བོ་གདན་ལ་ཕྱོགས། ཧཱུྃ་གིས་འདྲེན་པ་དང་དུས་ཅིག་མགོ་བོ་བཏེག །མིག་གྱེན་དུ་ལྡོག །ལྕེ་ཡ་རྐན་ལ་སྦྱར། རྒྱུ་ཞབས་གྱེན་ལྡོག །རྒྱུ་སྟོད་གཟེར་ཐམ་ཐམ་བྱེད་པ་རྒྱ་མཚོ་རི་རབ་ལ་སྦྱར་བའི་བུམ་ཅན་སྟོད་ལ་བཟུང་བ་སྟེ། དེ་ལྟ་བུའི་གཡས་གཡོན་དབུས་གསུམ་འདྲེན་ཅིང་དགྱེ་དགུ་གསུམ་བྱ། མར་རྒུར་དུས་མཆན་རྡེབ་རེ་དང་སྦྲགས་ཁུ་ཚུར་སྔར་བཞིན་བརྩེགས། དེ་ནས་རྡོར་སྐྱིལ་བཅའ། ལག་པ་གཉིས་མདུན་དུ་བརྐྱང་ནས་བརྡབ་འཕུར་གསུམ་དང་། ལུས་ཀྱི་སྟོད་སྨད་ཀུན་ལ་ཤུགས་ཀྱིས་འཕུར་བྱུག་གསུམ་གསུམ་ཡང་ཡང་བྱས་ལ་རླུང་བཏང་། གཡས་གཡོན་དབུས་གསུམ་དུ་ཧ་སྤྲུགས་ཡང་ཡང་བྱའོ། །དམིགས་པའི་གནད་ནི་འདུས་མདོའི་མེ་འོད་ཀྱིས་སྤྱིར་བོའི་ཧཾ་ཡིག་ཞུ། དབུ་མ་ནས་རྩ་འཁོར་རྣམས་རྒྱུད་ཡན་ལག་གི་མཐའ་བར་རྩ་ཕྲན་ཀུན་ལ་མེ་ཏོག་ཆབ་ཀྱིས་བྲན་པ་ལྟ་བུའི་བདུད་རྩིས་ཁྱབ། རྩ་ཐམས་ཅད་གནས་དང་
ཐིག་ལེ་ཐམས་ཅད་དཔའ་བོ་དཔའ་མོའི་རང་བཞི་རང་ལུས་ཡི་དམ་ལྷའི་དཀྱིལ་འཁོར་དུ་གྱུར། དེ་ནས་བུམ་ཅན་སྨད་ལ་བཟུང་ནས་གཏུམ་མོའི་མེ་རྩ་གནས་རྣམས་སུ་ཁྱབ་ཅིང་བསོས་པས་ལྷ་ཚོགས་རྣམས་ལ་དགྱེས་ཤིང་མཉེས་པའི་མཆོད་པར་གྱུར། མཐར་དབང་པོའི་སྒོ་དང་བ་སྤུའི་བུ་ག་ཐམས་ཅད་ནས་མེ་སྟག་གློག་ལྟར་འཚུབས་པའི་རང་ལུས་ཡེ་ཤེས་མེའི་གུར་ཁང་དཔག་ཚད་ཙམ་དུ་ཁྱབ་ཅིང་བར་མེད་དུ་འབར་བར་ཚུད་པས་གདོན་བགེགས་སོགས་གང་གིས་གླགས་མི་རྙེད་པར་གྱུར། ལག་མཐིལ་གཡས་སུ་རླུང་གི་འཁོར་ལོ་ལྗང་གུ་ཟླ་གམ། གཡོན་དུ་མེ་ཡི་ཆོས་འབྱུང་དམར་པོ་གྲུ་གསུམ་པ་བསྒོམ་ལ་བརྡབ་ཅིང་འཕུར་བས། ལག་མཐིལ་གཉིས་མེ་ལ་གསོས་པ་ལྟར་ཚ་ཆི་ལེར་རེག་བྱ་མི་བཟོད་པ་ཙམ་དུ་བསྒོམ་ལ་ལུས་ཀྱི་སྟོད་སྨད་ཀུན་ཏུ་འཕུར་སྲུབ་བྱའོ། །ཡང་ན་རླུང་རང་བབས། སེམས་སྐྱིལ་བཅས། རྐང་གཡས་ལོང་བུའི་སྟེང་མཆན་རྡེབ་མེད་པའི་ཁུ་ཚུར་གཉིས་བརྩེགས་ཧཱུྃ་སྒྲས་གཡས་གཡོན་དབུས་གསུམ་གྱེན་དུ་འདྲེན་ལ། མཐར་ཧ་སྤྲུགས་འཕུར་འདོན་བྱ་ཞིང་། དམིགས་པ་ནི་ལོགས་སུ་མེད་དོ། །མཐར་རྡོར་སྐྱིལ་རྣམ་སྣང་ཆོས་བདུན་བཅས་བླ་མའི་སྐུ་གསུང་ཐུགས་དང་རང་གི་སྒོ་གསུམ་དབྱེར་མེད་དུ་ལྟས་ལ་མ་བཅོས་པ་ཕྱག་རྒྱ་ཆེན་པོའི་ངང་དུ་ལྷོད་ཅིང་ངལ་གསོའོ། །དགེ་ཚོགས་བྱང་ཆུབ་ཆེན་པོར་བསྔོ་བས་
རྒྱས་འདེབས་ཀྱང་བྱའོ། །རྟོགས་མེད་རླུང་གིས་མེ་ཆུའི་རྒྱུན་ཡང་གཡོ། །རྟོག་བཅས་རླུང་གིས་སྐྱེ་ཀུན་འགྲོ་འོང་བྱེད། །རྟོག་དང་མི་རྟོག་དབྱེར་མེད་ཐབས་གྲོལ་གྱི། །རླུང་གིས་རྡོ་རྗེ་འཆང་གི་ས་རུ་སྐྱལ། །རླུང་དང་རྟོག་པ་བསྲེས་པས་ཉོན་མོངས་བསྐྱེད། །རླུང་དང་འཛིན་པ་བསྲེས་པས་བདུད་བཞི་འཇོམས། །རླུང་སེམས་དབྱེར་མེད་ཕྱག་རྒྱ་ཆེན་པོ་དང་། །བསྲེ་བ་མཆོག་གི་གཏུམ་མོའི་མྱུར་ལམ་སྟེ། །དེ་ཡི་གཞུང་ཁྲིད་རྫོགས་ཤིང་ཉམས་ལེན་ལ། །གེགས་སེལ་བོག་འདོན་ལུས་སྦྱོང་འཁྲུལ་འཁོར་གྱི། །ཚུལ་འདིས་ཚེ་འདིར་རྡོ་རྗེ་འཆང་ཆེན་པོར། །གྲུབ་པའི་སྒྲུབ་བརྒྱུད་ཡུན་དུ་གསལ་གྱུར་ཅིག །ཅེས་པའང་རང་གི་རིམ་འགྲོ་པ་ཀརྨ་རིན་ཆེན་ནས་སྐུལ་བ་ལ་སླར་ཡང་བསྟན་པ་དང་ཆོས་རྒྱུད་ལ་རྒྱུ་མཚན་མཁྱེན་པ་སྒྲུབ་དཔོན་བླ་མ་བཀྲ་ཤིས་ཚེ་རིང་དང་ཞེ་འཇང་རྣམ་དག་སྤྲུལ་སྐུ་ནས་ཚོགས་དང་མར་མེ་སྟོང་མཆོད་བཅས་ནན་ཏན་དུ་བསྐུལ་བ་ལ་དོན་ཡོད་པའི་སླད་དུ། འཁྲུལ་འཁོར་རྩ་ཚིག་སྐྱབས་རྗེ་པདྨ་ཉིན་བྱེད་དང་། འཇང་སྤྲུལ་སྐུ་སྐྱེ་དབང་རྒྱལ་གཉིས་ཀྱི་ཟིན་བྲིས་ཕྱིས་འདིར་དར་རྒྱས་ཆེ་བར་གཞིར་བཟུང་། དམིགས་རིམ་རྣམས་རྗེ་བརྒྱད་པ་དང་དགུ་པའི་གསུང་ལ་ཉམས་ཁྲིད་ཀྱི་རྒྱུན་ཕྲན་བུའི་ནོར་འཁྲུལ་སོགས་འཁྲུགས་པ་སྡེབས་ཤིང་གསལ་ཁ་བཅས་ལག་ལེན་དམིགས་རིམ་སྦྲེལ་བ་ལྟས་ཆོགས་ཏུ་བཀོད་པ་འདི་བཞིན། བསྙེན་བརྒྱུད་
ཡི་གེར་སྤེལ་བར་ཤིན་ཏུ་འཇིགས་ཀྱང་ལྷ་དང་བླ་མར་ནོངས་པ་བཤགས་ཤིང་བྲིས་པ་འདིའང་སྙིང་ནས་ཆོས་འདིར་མོས་ཤིང་ཡི་དམ་གྱི་བསྙེན་སྒྲུབ་ཚད་དུ་འཁྱོལ་བ་ཆོས་དྲུག་གི་ཉམས་ཁྲིད་རྫོགས་པར་ཐོབ་པ་རྣམས་ལས་གཞན་དུ་མི་སྤེལ་བར་གསང་རྒྱས་གདབ་པར་བྱའོ། །ཞེས་རང་གནས་བསམ་གཏན་གྱི་ཁང་བུར། མཁྱེན་སྤྲུལ་པས་ཟིན་བྲིས་གཙོར་གདོན་བྱས་པ་བཀྲ་ཤིས་དཔལ་སྤུངས་སྒྲུབ་བརྒྱུད་བསྟན་པ་རྒྱན་དུ་གྱུར་ཅིག མངྒ་ལཾ་བྷ་ཝནྟུ་དགེའོ།། །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །