དཔེ་ཐོག་བྲོ་བརྡུང་གོ་སྐམ་གྱི་སྣང་ཚུལ་སོགས་གང་དྲན་ཡི་གེར་བཏབ་པ་དང་མཚངས་སྟོན་པའི་གླུ་ཆུང་ནམ་མཁའི་མེ་ཏོག་གཞོན་ནུའི་ལྡིང་ཁང་།
དཔེ་ཐོག་བྲོ་བརྡུང་གོ་སྐམ་གྱི་སྣང་ཚུལ་སོགས་གང་དྲན་ཡི་གེར་བཏབ་པ་དང་མཚངས་སྟོན་པའི་གླུ་ཆུང་ནམ་མཁའི་མེ་ཏོག་གཞོན་ནུའི་ལྡིང་ཁང་ཞེས་བྱ་བ་བཞུགས་སོ། །
ན་མོ་གུ་རུ་བཛྲ་དྷཱ་ར་བྷྱཿ མི་འགྱུར་བདེ་སྟོང་ཕྱག་རྒྱ་ཆེན་པོའི་དབྱིངས། །སྲིད་ཞི་མཉམ་སྦྱོར་ཡེ་ཤེས་རྡོ་རྗེའི་གར། །དུ་མར་བསྒྱུར་བས་འགྲོ་རྒྱུད་སྨིན་གྲོལ་ཆེར། །འགོད་མཛད་རྡོ་རྗེ་ཅན་ཞབས་པདྨོར་འདུད། །དེ་ཡང་སྐལ་བཟང་རྣམ་འདྲེན་བཞི་པ་རྒྱལ་བ་ཉི་མའི་གཉེན་མཆོག་གི་དཔལ་གྱི་མགུར་ནས་སེང་གེའི་སྒྲ་ཆེན་པོས། མདོ་སྡེ་རྣམས་སུ་ལན་གཅིག་མ་ཡིན་པར་བསྔགས་པའི་དྲིལ་བསྒྲགས་ཤིང་། དཔའ་བོ་ཆེན་པོར་ལུང་བསྟན་པ། དུས་གསུམ་དུ་མ་བྱུང་། མི་འབྱུང་། འབྱུང་བར་མི་འགྱུར་བའི་སྐྱེས་བུ་ཁྱུ་མཆོག །མཁས་པའི་གཙོ་བོ། གྲུབ་པའི་ཡང་རྩེ། བསྟན་པ་ཡོངས་རྫོགས་ཀྱི་མངའ་བདག་བཀའ་བརྒྱུད་རྡོ་རྗེ་འཆང་གི་རྒྱལ་སྲིད་དམ་པར་དབང་འབྱོར་བའི་རྗེ་
བཙུན་ཆེན་པོ། གང་གི་བཀའ་དྲིན་གྱི་མཐའ་གཞལ་དུ་མེད་ཅིང་། རྡོ་རྗེའི་མཚན་ནས་ཤིན་ཏུ་ཡང་བརྗོད་པར་དཀའ་བ་དེ་ཉིད་ཀྱིས་བརྩེ་བ་ཆེན་པོས་ཡུན་རིང་པོར་བསྐྱངས་པའི་འབངས། ངན་བུ་བདག་ལ་བཀའ་རྒྱུད་ཀྱི་བྲལ་མཐའ་ཟིན་པའི་ཡོན་ཏན་གྱི་དངོས་པོས་ཤིན་ཏུ་དབུལ་པོར་གྱུར་མོད་ཀྱང་། རང་གི་གོ་ཉམས་དང་བསྟན་པའི་རྟོགས་འབུལ་ཞུ་འཕྲིན་གྱི་གླུ་ཆུང་རྐང་དྲུག་གཞོན་ནུའི་ལྡིངས་དབྱངས་སུ་ཕུལ་བ་ནི། ན་མོ་གུ་རུ་གུ་ན་སཱ་ག་ར་ཡེ། གཞི་གདོད་མའི་སངས་རྒྱས་རྡོ་རྗེ་འཆང་། །གདངས་མ་འགག་སྙིང་རྗེ་ཆེན་པོའི་སྐུ། །སངས་རྒྱས་ལག་བཅངས་སུ་གཏོད་པའི་སྐུ་དྲིན་ཅན། །མི་
བདག་གི་སྤྱི་གཙུག་རྒྱན་དུ་རོལ། །དུས་ལན་གཅིག་མི་ལུས་ཐོབ་པ་བདག །ཐུགས་བརྩེ་བ་ཆེན་པོས་རྗེས་བཟུངས་ཏེ། །དལ་འབྱོར་དོན་ལྡན་དུ་མཛད་པའི་རྗེ་བཙུན་ཁྱེད། །འབྲལ་མེད་དུ་སྙིང་དབུས་ཐིག་ལེར་བཞུགས། །བུས་མོས་ཤིང་གདུང་བས་གསོལ་བ་འདེབས། །ཕས་ཐུགས་རྗེས་གཟིགས་ཤིག་རིན་པོ་ཆེ། །རྗེ་ཁྱེད་ཀྱི་ཐུགས་རྗེའི་འོད་ཟེར་གྱིས། །བདག་ངར་འཛིན་འཁྲུལ་པའི་མུན་བསལ་ནས། །དོན་ཡང་དག་གནས་ལུགས་རྟོགས་པའི་གླུ། །ཚིག་ཅོལ་ཆུང་སྦྲང་བུའི་རྗེས་འགྲོ་ཅན། །ཕ་རྗེ་བཙུན་སྙན་ལ་གཟན་ལགས་ཀྱང་། །བུ་མི་བཟོད་གདུང་བས་གྱ་གྱུའི་ཚིག །གླུ་མཆོད་པར་འབུལ་ལོ་བརྩེ་བས་དགོངས། །སྤྱིར་དལ་བརྒྱད་འབྱོར་བཅུ་ལྡན་པའི་ལུས། །ཡིད་བཞིན་གྱི་ནོར་བུ་ལས་ལྷག་པ། །འདི་ཐོབ་པ་ཕྱིན་ཅི་མ་ལོག་པའི། །བསོད་ནམས་ཀྱི་མཐུ་བཙན་ཡིན་པར་ཤེས། །དེ་ཐོབ་ཀྱང་རྟག་པ་མ་ཡིན་ཕྱིར། །དུས་འཆི་བ་ཟེར་བའི་བཟློག་
མེད་པ། །ཁོ་ནམ་འོང་ངེས་ཤེས་མ་རྙེད་པས། །འཆི་བ་དེ་བདག་ལ་ནམ་འོང་སྙམས། །ལས་རྒྱུ་འབྲས་བསླུ་མེད་སོ་སོར་སྨིན། །དཔེ་ས་བོན་བཏབ་པ་ཇི་བཞིན་ཏེ། །རང་གཞན་མགོ་བསྐོར་གྱི་བྱ་བ་འདིས། །དུས་ཐ་མའི་ཚེ་ན་ཅི་འདྲ་སྙམས། །ལར་མ་རིག་འཁོར་བའི་གྲོང་ཁྱེར་ཆེ། །མཐའ་མེད་དོས་དྲག་གི་སྡུག་བསྔལ་ཅན། །འདི་བསམ་ན་ཡིད་དབང་འཆོར་འདྲ་བའི། །འཇིགས་སྐྲག་གིས་གཟིར་ཏེ་ནམ་ཐར་སྙམས། །ལས་ངན་པའི་རླུང་གིས་བསྐྱོད་པའི་ལུས། །ལམ་ལོག་པའི་གཡང་ལས་བརྡེག་འཆོས་པས། །ད་འཁོར་བའི་འདམ་དུ་བྱིངས་དེར་གཟིགས། །རྗེ་དྲིན་ཅན་བླ་མ་རིན་པོ་ཆེས། །བདག་འཇིགས་པ་འདི་ལས་བསྐྱབ་ཏུ་གསོལ། །ལས་ངན་པའི་འཕྲོ་ནས་བཟང་པོ་རྙེད། །ཕ་རྗེ་བཙུན་དོན་གྱི་སངས་རྒྱས་མཆོག །དཔལ་འཁོར་ལོ་སྡོམ་པའི་ངོ་བོར་མཇལ། །བདག་མི་ཤེས་ངར་འཛིན་གྱི་ཤུན་པ་བུད། །ཆགས་སྡང་གིས་འཆིང་
བའི་རྒྱ་མདུད་གྲོལ། །དུག་གསུམ་གྱིས་བསྐྱེད་པའི་ཉོན་མོངས་པ། །འདི་སྐྱེ་ཡུལ་སྐྱེ་བྱ་སྐྱེད་མཁན་གསུམ། །ཐམས་ཅད་རང་སེམས་ཀྱི་སྣང་ཆ་སྟེ། །དཔེ་མེ་ལོང་ནང་གི་གཟུགས་བརྙན་བཞིན། །རང་ཉིད་ཀྱི་ངོ་བོ་སྟོང་པས་ན། །རྒྱ་མཚོལ་ཆུ་རླབས་ཐིམ་པ་བཞིན། །བརྗོད་མེད་སྟོང་པའི་དབྱིངས་སུ་ཡལ། །ཕྱི་ཡུལ་སྣང་གཟུགས་སྒྲ་དྲི་རོ་རེག །སྣང་བ་ཀུན་སེམས་ཀྱི་ཆོ་འཕྲུལ་ལས། །དོན་ལོགས་སུ་གྲུབ་པ་མ་མཆིས་པ། །དཔེ་བྱིས་པས་མཁར་ལས་བྱས་པ་བཞིན། །མིང་མཚན་མར་འཛིན་མཁན་རང་གི་སེམས། །དེ་བདེན་མེད་རྟོགས་པའང་རང་གི་སེམས། །དོན་དེ་ཕྱིར་ལོགས་སུ་གྲུབ་པ་དང་། །གཟུགས་མཚན་མར་གནས་པ་མ་དམིགས་ཏེ། །རང་སེམས་ཀྱི་རིག་རྩལ་ཡིན་པར་རྟོགས། །ལར་འཁོར་བ་དང་མྱ་ངན་འདས་པ་ཞེས། །གནས་སོ་སོ་དང་བཟང་ངན་མི་གདའ་བར། །སེམས་ཆོས་སྐུའི་རིག་རྩལ་ཉིད་དུ་རྟོགས། །དོན་རང་བྱུང་སེམས་ཀྱི་
གནས་ལུགས་དེ། །གཟུགས་དང་རྫས་སུ་མ་གྲུབ་ཅིང་། །དཔེ་ཡིས་མཚོན་པའང་ཡོངས་སུ་བྲལ། །སྟོང་ཞེས་མེད་པ་མ་ཡིན་ཏེ། །རང་བཞིན་གྱི་ནི་འོད་གསལ་བ། །ཀུན་ལ་ཁྱབ་པའི་ནམ་མཁའ་བཞིན། །ཡོད་ཅེས་དངོས་པོར་མ་གྲུབ་སྟེ། །ནམ་མཁའ་གཟུགས་སུ་ཇི་ལྟ་བར། །གྲུབ་པ་མེད་ལ་རབ་ཏུ་གསལ། །གསལ་བ་དེ་ལས་ཐམས་ཅད་སྐྱེས། །སྐྱེས་པའང་ལོགས་སུ་མ་གྲུབ་པར། །གསལ་བ་དེ་ཡི་ངོ་བོར་གྲོལ། །ནམ་མཁའ་ལ་ནི་སྤྲིན་ཇི་བཞིན། །ཀློང་ནས་ཤར་ཞིང་ཀློང་དུ་ཐིམ། །མདོར་ན་སྣང་སྲིད་རང་གི་སེམས་། །གསལ་བའི་ཆ་ལས་སྣང་བ་དང་། །ངོ་བོའི་ཆ་ལས་སྟོང་པ་སྟེ། །ལོགས་སུ་མཚན་མར་གྲུབ་པ་ཡི། །སངས་རྒྱས་མེད་ཅིང་སེམས་ཅན་མེད། །ལྷ་དང་འདྲེ་ཞེས་ཡོངས་མ་གྲུབ། །ཐམས་ཅད་རང་གི་སེམས་ཉིད་དེ། །དེ་ནི་རང་བྱུང་འོད་གསལ་བ། །སྐྱེ་འགགས་དམིགས་པ་ཀུན་ལས་འདས། །གང་དུ་གནས་དང་འགྲོ་
འོང་བྲལ། །བརྗོད་དུ་མེད་པའི་རང་གི་སེམས། །འདི་ལས་གཞན་པའི་རྡོ་རྗེ་འཆང་། །མ་གྲུབ་སེམས་ཉིད་འོད་གསལ་བ། །ཡིན་པར་རྟོགས་པའི་གདེངས་ཤིག་ཤར། །འདི་རྟོགས་པ་རྗེ་བཙུན་ཁྱེད་ཀྱི་དྲིན། །ད་བཀའ་དྲིན་དྲན་ནོ་རིན་པོ་ཆེ། །ལས་ངན་ཅན་བདག་ལ་ཐུགས་རྗེས་གཟིགས། །ཕ་རྗེ་བཙུན་དོན་གྱི་རྡོ་རྗེ་འཆང་། །དུས་ཡང་ཡང་དྲན་ཅིང་མོས་གུས་འབར། །ཡེངས་མེད་ཀྱི་གདུང་བས་གསོལ་བ་འདེབས། །ཕས་འདུ་འབྲལ་མེད་པར་བྱིན་གྱིས་རློབས། །དེ་སྐད་རང་ཉམས་སུ་ཤར་བའི་གླུ། །ཕ་རྗེ་བཙུན་ཁྱེད་ཀྱི་སྙན་ལ་འབུལ། །དོན་འཁྲུལ་པའི་དྲི་མ་མཆིས་གྱུར་ན། །ཐུགས་བྱམས་པའི་བདུད་རྩིས་བཀྲུ་བར་གསོལ། །བུས་རྩེ་གཅིག་གདུང་བས་གསོལ་འདེབས་ན། །ཕས་ཐུགས་རྗེའི་ལྕགས་ཀྱུས་བཟུང་དུ་གསོལ། །ཅེས་སངས་རྒྱས་ཀརྨ་པའི་ཆོས་ཀྱི་ཕོ་བྲང་ཆེན་པོ་འོག་མིན་ཀརྨའི་གཙུག་ལག་ཁང་ནས། རྣམ་འགྱུར་ཞེས་པ་ལྕགས་ཁམས་འཛུམ་དྲུག་བཀྲ་བའི་ལོར་ཀུན་མཁྱེན་རྗེ་བཙུན་ཆོས་ཀྱི་རྒྱལ་
པོའི་ཞབས་དྲུང་དུ་སྒོ་གསུམ་གུས་པ་ཆེན་པོས་ཕུལ་བའོ།། ༈ །།རང་ལ་གྲོས་འདེབས་པ་དང་། བླ་མའི་ཐུགས་རྗེ་བསྐུལ་བའི་གསོལ་འདེབས་མོས་གུས་གདུང་དབྱངས་ཅེས་བྱ་བ། ཀྱེ་ལགས། སྐྱབས་སངས་རྒྱས་ཀུན་འདུས་རྗེ་བཙུན་ཁྱེད། །སྔོན་གྲངས་མེད་གོང་ནས་སངས་རྒྱས་ཀྱང་། །མར་འཁོར་བར་འཁྱམས་རྣམས་འདྲེན་པའི་ཕྱིར། །མི་གཟུགས་སུ་བྱོན་པའི་བཀའ་དྲིན་ཅན། །ཕ་བླ་མ་ཐུགས་རྗེའི་གཏེར་ཆེན་མཁྱེན། །རྒྱུད་ཆོས་དང་འདྲེས་པར་བྱིན་གྱིས་རློབས། །དུས་སྙིགས་མ་ལྔ་བདོའི་མར་གཤམ་འདིར། །ཚེ་ལོང་མེད་བར་སྣང་གློག་དང་མཚུངས་། །ནོར་མི་རྟག་རྩྭ་ཁའི་ཟིལ་པ་འདྲ། །གྲོགས་ད་ནང་མཛའ་ཡང་དོ་ནུབ་མཁོན། །འདི་ཀུན་ཀྱང་མདང་གི་རྨི་ལམ་འདྲ། །ལར་ཅིས་ཀྱང་མི་རྟག་འཕོ་ཞིང་འགྱུར། །ད་རྟག་འཛིན་གྱི་ཞེན་པ་སྐྱུར་ལ་ཐོང་། །ཕ་བླ་མ་མཁྱེན་ནོ་ཐུགས་རྗེས་གཟིགས། །སྒྲུབ་བརྒྱུད་ཀྱི་བསྟན་པའི་སྒོར་ཞུགས་ཤིང་། །ཆོས་སྡོམ་པ་གསུམ་གྱིས་རྒྱུད་སྦྱངས་ཀྱང་། །རྒྱ་
མཚོ་ཡི་འགྲམ་ན་ཡི་དྭགས་བཞིན། རིས་ཆད་གྱི་བློ་རྒྱུད་དྲེད་པོ་འདི། །ཅི་བྱས་ཀྱང་ཆོས་བརྒྱད་ཀྱི་དབང་དུ་ཐལ། །མི་ཕུང་བདག་བརླག་གི་ཆོས་སྤྱོད་མཁན། །ཕྱིས་གོས་བཟང་གིས་གཡོགས་དང་མཚུངས། །ད་རང་མཚང་འབྱིན་པའི་དུས་ལ་བབ། །རྗེ་བླ་མ་མཁྱེན་ནོ་ཐུགས་རྗེས་གཟིགས། །ལུས་ངུར་སྨྲིག་གྱོན་ཀྱང་ཐ་མལ་པ། །མིང་བྱང་སེམས་བཏགས་ཀྱང་ཆགས་སྡང་ཅན། །སྔགས་ཟབ་མོར་ཞུགས་ཀྱང་ལྟ་སྤྱོད་ལོག །ངེས་འབྱུང་གི་བློ་རྒྱུད་མ་ཐུལ་ཞིང་། །ལས་འབྲས་ལ་ཡིད་ཆེས་མ་རྙེད་པས། །དམ་སྡོམ་རྣམས་གོ་བའི་ཡུལ་དུ་ལུས། །དགྲ་འདུལ་དང་གཉེན་སྐྱོང་གསོག་འཇོག་སོགས། །དོན་མེད་ཀྱི་འདུ་འཛིས་བྲན་དུ་བཀོལ། །བདེ་གཤེགས་ཀྱི་བཀའ་དང་འགལ་བཞིན་དུ། །སངས་རྒྱས་ཀྱི་རྗེས་འཇུག་ཏུ་རློམ་སེམས་ཅན། །བདུད་ཉོན་མོངས་ཀྱི་ཁོལ་པོར་གྱུར་པ་ཡི། །ཕ་བཀའ་བརྒྱུད་ཀྱི་བུ་རུལ་དྲེད་པོ་བདག །ད་རང་ཚུལ་མཐོང་ཚེ་སྙིང་རླུང་
ལྡང་། །ཕ་རྗེ་བཙུན་མཁྱེན་ནོ་ཐུགས་རྗེས་གཟིགས། །དུས་གསུམ་དུ་འབྱོན་དཀའི་རྗེ་བཙུན་མགོན། །བདག་དམུ་རྒོད་འདུལ་བའི་ཕྲིན་ལས་མཁན། །སངས་རྒྱས་ལས་ལྷག་པའི་བཀའ་དྲིན་ཅན། །དྲིན་ཅན་དུ་མ་ཤེས་ཨ་རེ་འཁྲུལ། །ཆོས་གདམས་ངག་བརྡའ་དང་ཐབས་ཀྱིས་སྟོན། །དེ་མ་ཤེས་ཆོས་ཤིག་ལོག་ནས་བཙལ། །ཡང་དག་པའི་ཆོས་སྐལ་དེ་རུ་བཅུད། །ད་ཅི་མཛད་ལེགས་པར་མཐོང་རེ་རན། །སྒོ་གསུམ་འདི་བླ་མའི་ཕྱོགས་སུ་བཀལ། །བསྐལ་མང་གི་ཚོགས་རྫོགས་སྒྲིབ་ཀུན་འབྱོངས། །འདི་རང་དོན་དུ་འགྱུར་བ་མ་ཤེས་ཏེ། །རང་དོན་གྱི་དགེ་སྦྱོར་འབུངས་བློ་ཡིས། །དངོས་གྲུབ་ཀྱི་འབྲས་བུ་སད་ལ་བསྐུར། །རྒྱུད་ལོག་ལྟས་བཅིངས་པ་ངོ་རེ་གནོངས། །ད་ཅི་གསུང་ཚད་མར་བཟུངས་རེ་རན། །བདག་མི་བཟོད་གདུང་བས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །རྗེ་སངས་རྒྱས་སུ་
འདུག་པ་མི་རུ་བཟུང་། །ཐབས་མཁས་ཀྱི་ཕྲིན་ལས་སྐྱོན་དུ་མཐོང་། དོན་ཆེན་གྱི་མཛད་པར་ལོག་ལྟ་སྐྱེས། །རང་ཁོང་ནས་རུལ་བ་མ་ཚོར་ཞིང་། །རི་མོ་ཡི་ནང་གི་མར་མེ་བཞིན། །བཅོས་མའི་དད་པ་ལ་རེ་བ་ཁྱོད། །ད་བཟོད་མེད་ཀྱི་མོས་གུས་ཤུགས་ཕྱུངས་ལ། །ལོག་ལྟ་ཡི་འདམ་ནས་ལ་འུར་ལོངས། །བཅོས་མིན་དད་པའི་རྩལ་ནུས་སྤྲུགས། །དག་སྣང་གི་སྨན་དཔྱད་བརྟེན་རེ་རན། །སྙིང་རུས་པའི་ཁུང་ནས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །དགྲ་འཆི་བདག་ཟེར་བའི་ཡེར་ཆེན་ཁོ། །དྲུང་འདི་ན་སླེབ་དུས་འགྱོད་པ་ཕྱིས། །ཆོས་པ་ཡི་མལ་ནས་ཐ་མལ་རོ། །མི་དྲག་ཞན་ཀུན་གྱིས་འཕྱ་ཞིང་ཁྲེལ། །རང་གཏད་མེད་འཁོར་བར་འཁྱམས་དུ་འབྱུང་། །འདི་བསམ་ཞིང་རིག་པའི་རྣོ་ངར་བསྐྱེད། །སྣང་སྲིད་ཀུན་བླ་མའི་རོལ་པར་ལྟོས། །རང་སེམས་འདི་རྗེ་ཡི་ཐུགས་དང་བསྲེས། །དབྱེར་མེད་ཀྱི་ངང་ནས་གསོལ་
བ་ཐོབ། །མོས་གུས་ཀྱི་གདུངས་དབྱངས་ལྷང་ལྷང་གིས། །སྐྱབས་བསླུ་མེད་ཐུགས་རྗེའི་རྒྱུད་བསྐུལ་ནས། །རང་སེམས་ཀྱི་ངོ་བོ་སྐྱོང་རེ་རན། །བདག་བཟོད་མེད་སྙིང་ནས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །གཉིས་འཛིན་གྱི་རྟོག་པས་མ་བསླད་ན། །སངས་རྒྱས་སུ་གྲགས་པའི་གཡེར་པོ་ཆེ། །སེམས་རང་གསལ་འདི་ལས་གུད་ན་མེད། །བློས་བྱས་ཀྱི་རྫུན་བསྒོམ་བོར་ལ་ཞོག །བྱར་མེད་ཀྱི་རང་ཞལ་ལྟ་རེ་རན། །བདག་མོས་གུས་གདུང་བས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །ལར་འཁོར་འདས་དང་བདེ་སྡུག་སྣང་ཆ་འདི། །ཐམས་ཅད་ཀུན་བླ་མ་རྗེ་ཡི་དྲིན། །བདེ་བ་དང་དགེ་བ་ཇི་སྙེད་པ། །མགོན་རྡོ་རྗེ་སེམས་དཔའི་ཕ་འབབས་ལགས། །དེ་མ་རྒན་ཡོངས་ལ་བགོ་བཤར་བྱོས། །ཚོགས་གཉིས་ཀྱི་རྟེན་འབྲེལ་རྒྱན་དུ་ཆེ། །དགའ་བྲོད་ཀྱི་འཛིན་པས་མ་བཅིངས་པར། །
བདེ་སྟོང་ཟུང་འཇུག་གི་ཉམས་ལེན་ངང་། །ཡིད་མོས་གུས་གདུང་བས་གསོལ་བ་འདེབས། །ཕས་ཐུགས་རྗེ་གཟིགས་ལ་བྱིན་གྱི་རློབས། །སྡུག་བསྔལ་དང་མི་འདོད་ཇི་སྙེད་ཀུན། །རྗེ་བླ་མའི་ཐུགས་རྗེའི་ཕྲིན་ལས་ཏེ། །མ་འགྲོ་དྲུག་གི་སྡུག་བསྔལ་དང་དུ་ལོངས། །སྒྲིབ་སྦྱོང་གི་གདམས་ངག་ཡེ་ཤེས་མེ། །སྡུག་བསྔལ་གྱི་རང་བཞིན་མ་གྲུབ་པའི། །ཚོར་སྟོང་ཟུང་འཇུག་གི་ཉམས་ལེན་ངང་། །ཡིད་རྩེ་གཅིག་གདུངས་བས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །ལར་གང་ཤར་གྱི་འཁྲུལ་རྗེས་མི་འབྲེངས་པར། །སྣང་སྟོང་ཟུང་འཇུག་གི་ངང་ལ་ཞོགས། །གཞི་མེད་རྩ་བྲལ་གྱི་ངོ་བོར་ལྟོས། །བལྟ་བྱ་དང་ལྟ་བྱེེད་གཉིས་སྟོང་ཞིང་། །གཉིས་མེད་ཁ་སྦྱོར་གྱི་བར་ལག་ན། །ཡེ་གདོད་ཀྱི་གནས་ལུགས་ལྟད་མོ་ཆེ། །དོན་རང་རིག་བླ་མའི་རང་ཞལ་མཇལ། །བདེ་ཆེན་གྱི་རྒྱལ་ས་ཟིན་པར་ངེས། །དེའི་ཕྱིར་ན་དད་མེད་ཀྱི་སྙིང་སྲན་
ཅན། །ཁྱོད་མ་ཡེངས་རྒྱུན་དུ་གསོལ་བ་ཐོབ། །དགོས་མེད་ཀྱི་བྱ་བ་བོར་ལ་ཐོངས། །ཕ་མཁྱེན་ནོ་དེ་དུས་གསུམ་མཁྱེན་པ་མཁྱེན། །ཅི་མཛད་ཁྱེད་ཤེས་ཀྱི་བློ་གཏད་དང་། །ཉིན་མཚན་དུས་དྲུག་ཏུ་གདུངས་དབྱང་བཅས། །བུས་རྩེ་གཅིག་གདུང་བས་གསོལ་བ་འདེབས། །ཕས་ཐུགས་རྗེས་གཟིགས་ལ་བྱིན་གྱིས་རློབས། །བཅོས་མིན་གྱི་མོས་གུས་འབར་བ་དང་། །རྟོགས་གྲོལ་དུས་མཉམ་གྱི་ཡེ་ཤེས་སྤོར། །འགྲོ་དོན་ལྷུན་གྲུབ་ཀྱི་རྟེན་འབྲེལ་བསྒྲིག །རྗེ་ཁྱེད་དང་དབྱེར་མེད་མཛད་དུ་གསོལ། །ཞེས་པའང་སྒྲུབ་བརྩོན་བླ་མ་ཀརྨ་རྒྱལ་དབང་ནས། བཀྲ་ཤིས་པའི་དར་དང་། རིན་ཆེན་གཉིས་པའི་སྣང་གསལ་གྱི་ཀོང་བུ་བཅས། བཅོས་མིན་གྱི་མོས་གུས་སྐྱེ་བའི་གསོལ་འདེབས་ཤིག་བྲིས་ཤིག་པར་བསྐུལ་བ་ན། གྲུབ་ཐོབ་གོང་མའི་གསུང་ལས་ལྷག་པའི་གསོལ་འདེབས་མ་མཆིས་ཤིང་། དམན་པ་བདག་ལྟ་བུས་སྦྱར་བ་ངལ་བ་ཙམ་ལས་སྙིང་པོས་དབེན་ཀྱང་། བསྐུལ་བ་པོའི་ངོ་མི་ལྔོག་ཙམ་དུ་རང་ཉིད་ལ་གྲོས་འདེབས་པ་དང་། སྐལ་མཉམ་གཞན་ལའང་རྒྱུད་འཆོས་ཤིང་། མོས་གུས་འཕེལ་བའི་
རྐྱེན་དུ་གྱུར་ན་ཅི་མ་རུང་སྙམ་ནས། དུས་ཞབས་ཀྱི་སློབ་དཔོན་དུ་ཁས་འཆེ་བ་མཁའ་ཁྱབ་རྡོ་རྗེ་ཞེས་བྱ་བའི་སྙོམ་ལས་མཁན་དེས་གང་དྲན་ཡི་གེའི་ཕྲེང་བར་སྤེལ་བའོ། ༈ །རེ་ལྟོས་བླ་མ་ལས་མེད་པར་བློ་ཐག་ཆོད་ཅིང་སྙིགས་དུས་ཀྱི་སྤྱོད་འགྲོས་ལ་ཡིད་སྐྱོ་བའི་གདུང་ཤུགས་ཀྱིས་ཕྱུངས་པའི་དཔྱིད་ཀྱི་རྒྱལ་མོའི་གླུ་དབྱངས་བླང་དོར་གསལ་བའི་ལེ་ལོང་ཞེས་བྱ་བ་ནི། རྗེ་བཀའ་དྲིན་མཉམ་མེད་བླ་མ་རྗེ། །དཔལ་རྡོ་རྗེ་འཆང་ཆེན་གཡེར་པོ་ཆེ། །ཡོངས་རྒྱལ་བའི་ཕྲིན་ལས་ཀརྨ་པ། །དཔལ་མཁའ་ཁྱབ་རྡོ་རྗེ་མ་ལགས་སམ། །བུ་མོས་པའི་བློ་ཡིས་འོ་དོད་འབོད། །ཕ་རྗེ་བཙུན་སྙན་གྱིས་གསན་ལགས་སམ། །མཐོ་སྲིད་རྩེ་ནས་བཟུང་དམྱལ་ཁམས་བར། །སྡུག་བསྔལ་གྱིས་མནར་བའི་འགྲོ་ཚོགས་ལ། །ཐུགས་བརྩེ་བའི་སྤྱན་གྱིས་གཟིགས་སུ་གསོལ། །སྤྱིར་འཁོར་བའི་གནས་ལ་བདེ་བ་མེད། །དགོས་སྙིགས་མ་ལྔ་བདོའི་འགྲོ་བ་རྣམས། །ལས་ནག་པོ་སྡིག་ལ་ངོམ་མེད་སྤྱོད། །བློ་མི་མཐུན་གཅིག་སེམས་གཅིག་ལ་སྡང་། །བྱམས་ཕ་མ་ཡིན་ཀྱང་དམར་བསད་བྱེད། །
ལས་ངོ་ལྐོགས་མི་ཐུབ་རང་སྣང་མཐོ། །ཚེ་ཕྱི་མར་ཕན་པའི་ཤ་མར་ཅི། །འཕྲལ་བྱ་བའང་ཕུགས་འདུན་ཏིལ་ཙམ་མེད། །ཚུལ་གང་ལ་བསམས་ཀྱང་སྐྱོ་བ་སྐྱེས། །སྤྱིར་འཁོར་བའི་ཆོས་ལ་ཡིད་བརྟན་མེད། །དགོས་དེང་སང་ཚུལ་ལ་ཡིད་རེ་སྐྱོ། །ལུས་མི་རྟག་འབྱུང་བཞི་རྒུད་ཅིང་འགྲོ། །དགྲ་འཆི་བདག་ཞགས་པས་སྐེ་ལ་ཐེབས། །འཕྲལ་རྣམ་གཡེང་བྱ་བས་བློ་སྣ་ཁྲིད། །དུས་ལོ་ཟླ་ཞག་གིས་རྒྱབ་ནས་འཕུལ། །ལས་དཀར་ནག་བྱ་བས་མདུན་ནས་བསུས། །ད་ཅི་ལྟར་བྱས་ཀྱང་ཚེ་འདིས་གཡེང་། །བློ་ཆོས་སུ་མ་སོང་ཆོས་པའི་གསོབ། །མི་གཞན་གྱིས་སྐྱབས་གནས་མཆོག་ཏུ་རྩི། །དེ་སྐྱོབས་པའི་ནུས་པ་བདག་ལ་མེད། །གཤིན་གསོན་གྱི་དད་ཟས་བག་མེད་སྤྱོད། །འདུ་འགོད་ཀྱི་ཤོམ་རས་ཉིན་མཚན་འདའ། །ལས་བྱས་པ་དོན་ཡོད་གཅིག་ཀྱང་མེད། །ད་བསམ་བཞིན་རང་ལ་ཡི་མུག་སྐྱེ། །གཞོན་དབང་པོ་གསར་པའི་ལང་ཚོ་
ཡང་། །རྒས་མི་སྡུག་བ་མོའི་སད་ཀྱིས་བཅོམ། །ལུས་འདུ་བ་འཁྲུགས་པའི་ནད་ཀྱིས་མནར། །དུས་ཡུན་རིང་འདུག་བློའི་རྟག་འཛིན་མཁན། །མི་བདག་ལ་བླ་མས་ཐུགས་རྗེས་གཟིགས། །ཚུར་ཉོན་དང་རྒན་བུ་དཔལ་ལྡན་པ། །ད་བྱེད་ན་དགེ་བའི་བྱ་བ་གྱིས། །བློ་ཤམ་ན་ཕྱི་མའི་དོན་ལ་ཤོམས། །བཀའ་མདོ་རྒྱུད་རྒྱ་ཆེ་འབྱམས་ཀླས་པའི། །ཚུལ་ལེགས་པར་རྟོགས་པའི་ཡང་དག་ཆོས། །ལས་སྐལ་དམན་ཁྱོད་གྱི་སྤྱོད་ཡུལ་མིན། །བློ་ཕེར་ཡོངས་ལུགས་གཉིས་བསྟན་པའི་ཁུར། །ཁྱོད་འདྲ་བས་འགྲུབ་རྒྱུ་ག་ལ་ཡོད། །གནས་ངེས་མེད་དབེན་པའི་རི་ངོག་ཏུ། །བློ་གཏན་མེད་གུ་ཡངས་གྱིས་དང་ལེགས། །ནོར་འཛད་མེད་ཆོག་ཤེས་སྙིང་པོའི་དབྱིག །སྟོར་མེད་ཀྱི་བང་མཛོད་བཀང་དང་དགེ །དགྲ་དུག་ལྔ་ཡན་པར་མ་བཏར་ཞིག །ཕ་བླ་མས་གཙུག་ཏུ་རྒྱན་ན་མཛེས། །ལས་ཟིན་མེད་བྲེལ་དེས་མ་གཡེང་པར། །སོས་དལ་དུ་ཁྲིགས་སེ་བཞགས་ན་
དགའ། །དབུ་ཕྱག་དང་རྫོགས་ཆེན་གྲགས་པ་དེ། །སྡུག་ཁྱོད་ཀྱིས་གནད་གསང་ག་ལ་རྟོགས། །སྡུག་ཨུ་ཚུག་མ་བྱེད་ཉལ་ན་འཐད། །བོད་གངས་ལྗོངས་སྐལ་དམན་འགྲོ་བའི་སྐྱབས། །ལྷ་ཐུགས་རྗེ་ཆེན་པོར་གསོལ་བ་ཐོབ། །གསུང་ཡིག་དྲུག་སྐུར་པའི་གླུ་ཆུང་ལོངས། །ལུས་ཐ་མལ་མ་བཞག་ལྷ་རུ་སྒོམས། །ཡིད་འགྱུ་དྲན་རང་གྲོལ་གཏད་མེད་ཐོང་། །མ་འགྲོ་ལ་བརྩེ་བའི་བྱང་སེམས་སྒོམས། །རང་གཞན་གྱི་མགོ་སྐོར་འཆད་སྤེལ་སྐྱུར། །མི་གཞན་གྱི་ངོ་སྲུང་མི་རེ་བར། །གོང་དཔོན་མེད་བྱེད་ན་མི་ལེགས་སམ། །འགུ་མེད་ཀྱི་སྐྱོང་དྲན་སེམས་ལས་ཆེ། །འོག་འཁོར་གཡོག་སྤང་ན་ལེགས་སམ་སྙམ། །ཚུལ་ཇི་ལྟར་བྱས་ཀྱང་བདེ་བ་མེད། །ད་གང་བྱུང་དེས་ཆོག་ཡིད་ལ་ཞོགས། །སྐྱབས་བསླུ་བ་མེད་པའི་དཀོན་མཆོག་མཆོག །ཡོངས་གཅིག་འདུས་དཔལ་ལྡན་བླ་མ་ལ། །ཕུག་འཕྲལ་གང་གཉིས་ཀྱི་བློ་གཏད་ཞུ། །སྤྲང་སྐྱིད་སྡུག་ཅི་བྱུང་བླ་
མ་མཁྱེན། །འབངས་བདག་ལ་རེ་ས་གཞན་ན་མེད། །ཕ་ཐུགས་རྗེས་གཟིགས་ཤིག་ཀརྨ་པ། །ཅེས་འཇམ་མགོན་ཆོས་ཀྱི་རྒྱལ་པོའི་མཚན་ཀྱི་ཅོད་པཎ་འཆང་བ་ཀརྨ་དཔལ་ལྡན་མཁྱེན་བརྩེའི་འོད་ཟེར་དུ་འབོད་པའི་སྙོམ་ལས་པས་གང་དྲན་ཐོལ་བྱུང་དུ་བྲིས་པའོ། །རིགས་ཀུན་ཁྱབ་བདག་དང་པོའི་སངས་རྒྱས་མཆོག །དཔལ་ལྡན་བླ་མ་འབྲལ་མེད་སྙིང་དབུས་བསྙེན། །རྒྱལ་མཆོག་གང་གི་འབངས་མཐར་སྙེགས་པ་ཡི། །སྙོམ་ལས་ཆོས་གཟུགས་འདུ་ཤེས་གསུམ་པ་ལ། །བོང་བ་གསེར་གཟིགས་རྗེས་བརྩེས་རིགས་བདག་ཏུ། །བཞེས་པ་འདི་ཀོ་ཨེ་མ་སྔོན་སྨོན་མཐུ། །འབད་པ་མ་ཡིན་ལྷུན་འགྲུབ་རྟེན་འབྲེལ་རྨད། །གང་གི་བཀའ་བཟང་སྤྱི་གཙུག་རྒྱན་ཉིད་དུ། །བླངས་ནས་སེམས་དོན་རྟོགས་པའི་གླུ་ཆུང་འདི། །འཕགས་མཆོག་དགྱེས་པའི་རོལ་མོར་མཆོད་པ་འབུལ། །དང་པོར་མི་རྟག་སྡུག་བསྔལ་འདུས་བྱས་ཆོས། །སྙིང་པོ་མེད་པའི་བསམ་པ་ཁོང་ནས་ཤར། །བར་དུ་ཡང་དག་ལམ་དུ་རབ་ཞུགས་
ནས། །འཁོར་བ་སྤང་དང་མྱང་འདས་བླང་བྱར་གོ །ད་ལྟ་འཁོར་འདས་མཉམ་པའི་གདེང་ཞིག་རྙེད། །ཆོས་རྣམས་ཐམས་ཅད་ཡེ་ཤེས་ཆོས་སྐུའི་རྩལ། །རིག་དང་མ་རིག་སོ་མཚམས་སྐད་ཅིག་མ། །འཁྲུལ་གྲོལ་ཀུན་གྱི་རྩ་བ་རང་གི་སེམས། །ད་ལྟའི་ཤེས་པ་སྤང་བསྒྱུར་བཟོ་མ་བཅོས། །རང་བབས་རང་གནས་སྟོང་གསལ་མ་འགགས་པ། །ཕྱི་སྣང་མ་ལུས་ནང་དུ་འཛིན་སེམས་སྟོང་། །སྣང་དང་སྟོང་པ་གཉིས་སུ་དབྱེ་བ་བྲལ། །ཟུང་འཇུག་ཚིག་གིས་མི་མཚོན་བློ་ལས་འདས། །མཐའ་བྲལ་མིང་བརྒྱས་མཚོན་པའི་གནས་ལུགས་དོན། །བསྐྱེད་རྫོགས་མདོ་སྔགས་ཐབས་བརྒྱས་གཉེར་བྱ་ཡི། །སངས་རྒྱས་ད་ལྟའི་སེམས་ལས་མེད་པར་འཁུམས། །མགོན་ཁྱོད་ཡེ་གདོད་གོང་ནས་རྫོགས་སངས་རྒྱས། །ཉམས་ཐག་འགྲོ་བའི་དཔལ་དུ་མི་ཡི་ཟོལ། །རིམ་བགྲོད་ལམ་གྱི་ངལ་བར་མ་ལྟོས་ཀྱང་། །ཚུར་མཐོང་སྣང་ངོར་གདམས་ངག་རྣམ་
ཐར་དུ། །སྟོན་ཕྱིར་ཐུགས་དམ་རིམ་འཁྲུངས་ཚུལ་བསྟན་ཀྱང་། །རོ་གཅིག་ཆེན་པོ་སྒོམ་མེད་ཡར་ལྡན་ཉམས་། །ངེས་པར་གཟིགས་ལ་རྒན་བུ་ཡི་རངས་ཤིང་། །དད་གུས་སྤྲོ་བས་ཐལ་མོ་སྙིང་གར་ཟུམ། །ཉིན་མཚན་དུས་ཀུན་བཟོ་མེད་མོས་གུས་དང་། །ལུས་རྟེན་འདི་ཡིས་བསྟན་པའི་དོན་གྲུབ་སྙམ། །རྡོ་རྗེ་འཆང་དངོས་གང་གི་དགོངས་པའི་བཅུད། །ཕ་ནོར་བུ་ལ་ཕོག་པའི་ཉམས་བཟང་ལ། །བཀའ་བརྒྱུད་གསེར་གྱི་ཕྲེང་བའི་བཞུགས་གྲལ་དུ། །ར་གན་གསེར་དུ་བརྫུ་བའི་སེལ་མ་ཞུགས། །ཕྱོགས་དུས་རྒྱལ་བས་དབྱིངས་ནས་མཁྱེན་ནམ་སྙམ། །མཁའ་འགྲོ་ཆོས་སྐྱོངས་རྣམས་ཀྱི་སྤྱན་གྱིས་གཟིགས། །བདག་ཀྱང་སྒོམ་མེད་ཆོས་སྐུའི་རྒྱལ་ཐབས་ཆེར། །རང་བྱུང་ཁྱབ་བདག་རིག་པའི་རྡོ་རྗེའི་དང་། །དབྱེར་མེད་ཐུགས་ཡིད་འདྲེས་པར་ཐུགས་རྗེས་ཟུང་། །དགེ་བས་རྒྱལ་བསྟན་མཛེས་པའི་རྒྱན་དུ་ཤོག །ཅེས་པ་འདི་བཞིན་རྒྱལ་དབང་ཐམས་ཅད་མཁྱེན་གཟིགས་བཅུ་དྲུག་
པ་ཆེན་པོའི་བཀའ་ལུང་གསེར་གྱི་ཅོད་པན་སྤྱི་བོར་བཅིངས་ཏེ་རང་གི་རྟོགས་ཚད་མཎྜལ་དུ་ཕུལ་ཞིང་མཆོག་གི་ཐུགས་དམ་ས་མཚམས་དང་གུས་འབངས་ཐ་ཤལ་པའང་། མགོན་པོ་མཆོག་གི་དགོངས་ཀློང་དང་དབྱེར་མེད་པའི་སྨོན་ཚིག་བཅས་བཅོམ་བསྒྱུར་མེད་པར་རྒྱལ་སྲས་འཇམ་མགོན་སྤྲུལ་སྐུར་འབོད་པས་ཤར་མར་བྲིས་ཏེ་ཕུལ་བ་དགྱེས་པའི་ཡེ་ཤེས་སྤྱན་གྱི་འབབས་སྟེགས་སུ་གྱུར་ཅིག། ༈ །།ན་མོ་གུ་རུ། སྐྱེས་བུ་ཆེན་པོའི་ཆེན་པོ། དམ་པའི་དམ་པར་གྱུར་ཅིང་གཟོད་ནས་དུས་གསུམ་རྒྱལ་བའི་ཡབ་ཉིད་དུ་གྱུར་ཅིང་མངོན་པར་སངས་རྒྱས་ཟིན་ནའང་། སྙིགས་མའི་རྨུ་རྒོད་གདུལ་དཀའ་བ་རྣམས་ཀྱི་དོན་དུ་མཆོག་གི་སྤྲུལ་པའི་སྐུ་རྡོ་རྗེ་སློབ་དཔོན་གྱི་གཟུགས་སུ་བཞེངས་ཤིང་བསྟན་དང་འགྲོ་བའི་དོན་རླབས་པོ་ཆེ་ཁུར་དུ་བཞེས་ཏེ། ཆོས་དང་ཆོས་མ་ཡིན་པའི་དོན་མ་ལུས་པ་མཁྱེན་ཅིང་གཟིགས་པ་སོགས་བསམ་གྱིས་མི་ཁྱབ་པའི་ཡོན་ཏན་གྱི་ཕུང་པོས་ལྕི་བའི་འགྲོ་བའི་མགོན་པོ་དཔལ་ལྡན་བླ་མ་དམ་པ་མཚན་ནས་བརྗོད་པར་དཀའ་བ། དཔལ་ལྡན་རང་བྱུང་རིག་པའི་ཡེ་ཤེས་ལུང་རྟོགས་ཆོས་ཀྱི་ཉི་མ་ཕྲིན་ལས་དོན་ཀུན་གྲུབ་པའི་སྡེ་ཞེས་བྱ་བས་རྡོ་རྗེའི་མགུར་གསུངས་པ་ནི། དེ་ཡང་ངན་བུ་བདག་ལ་བཀའ་བརྒྱུད་ཀྱི་བླ་མ་གོང་མ་རྣམས་དང་རྗེས་སུ་མཐུན་པའི་ཡོན་ཏན་ཆ་ཤས་ཙམ་ཡང་མ་མཐོང་མོད་འོན་ཀྱང་དཔལ་
ལྡན་བླ་མ་དམ་པའི་གདམས་ངག་གི་མཐུ་བཙན་པས་དེ་དག་ལ་ངེས་པ་ཅུང་ཟད་རེ་མི་རྙེད་པའི་ཐབས་དང་བྲལ་བའི་སྐབས་སུ་རྡོ་རྗེའི་གླུ་བླ་མ་དང་ཌཱ་ཀི་དགྱེས་པའི་སྙན་འགྱུར་འདི་ཕུལ་བའོ། །ན་མོ་གུ་རུ། ཕ་བླ་མ་རྩ་གསུམ་འདུས་པའི་སྐུ། །བདག་སྙིང་དབུས་ཙིཏྟའི་དབྱིངས་རོལ་ན། །དུས་འབྲལ་མེད་སྐུ་གསུམ་གྱི་ངོ་བོ་ལ། །དད་གསུམ་གྱི་མོས་གུས་སྐྱེས་ལགས་ཀྱང་། །རྟག་འཛིན་གྱི་འཁྲུལ་པའི་འཁོར་ལོ་འདིར། །འཁོར་གསུམ་གྱི་རྩ་བ་མ་ཆོད་གདའ། །རྒྱུ་དེར་བརྟེན་བདག་གཞན་འགྲོ་བ་རྣམས། །མ་རིག་གི་མུན་པ་ཆེན་པོར་འཐུམས། །དེ་སེལ་བའི་ཐབས་ཤིག་བླ་མས་རྩོལ། །དལ་འབྱོར་བཅོ་བརྒྱད་ཀྱི་རྟེན་བཟང་འདི། །ཆུ་བུར་བཞིན་མི་རྟག་ཆ་མེད་པར། །ཡིད་ཆེས་ཀྱང་རྨུ་རྒོད་ཇེ་ཆེར་གྱུར། །ཕ་བླ་མ་ཁྱེད་ཀྱི་ཐུགས་རྗེ་ཡིས། །བདག་སེམས་ཅན་མ་རིག་འཁྲུལ་པ་ཆོད། །ལས་རྒྱུ་འབྲས་བསླུ་མེད་མྱོང་འགྱུར་ཆོས། །དགེ་སྡིག་གི་བླང་དོར་སོ་སོར་སྨིན། །དེ་བསམ་ཞིང་ཕ་མ་སྙིང་རེ་རྗེ། །མ་རིག་གིས་
རྟག་འཛིན་ཐེར་གཟུགས་འདིར། །ངས་བྱས་དང་ཁོས་བྱས་འཆིང་བཞིན་དང་། །དཀར་ནག་གི་དབྱེ་འབྱེད་བཙོན་ར་ལ། །རང་བྱས་ཀུན་རང་ཐོག་སྨིན་པར་ངེས། །དེ་བསམ་ཞིང་མ་རྒན་སེམས་ཅན་རྣམས། །རྒྱུ་འབྲས་ཀྱི་དབྱེ་འབྱེད་གོ་མ་ལོག །དབེན་གསུམ་གྱིས་ཞིང་དུ་དལ་སྡོད་ནས། །ལུས་ངག་གི་དགེ་སྦྱོར་འབུང་བར་གྱིས། །དེ་བྱེད་ན་དཔལ་ལྡན་བླ་མ་ཡི། །ཐུགས་རྗེ་ལ་ཉེ་རིང་ཡོད་མ་ཡིན། །རྒྱུ་གཅིག་ལ་འབྲས་བུ་སོ་སོ་ཡི། །གནད་དོན་གཉིས་བདེན་པ་རྟོགས་དུས་སུ། །ཁམས་གསུམ་གྱི་སེམས་ཅན་ཀུན་གྱི་ངོ་། །དོན་དེ་ལས་འགྱུར་བ་ཡོད་མ་ཡིན། །རང་རིག་གི་མ་བཅོས་ལྷུན་རྫོགས་སུ། །རང་གསལ་གྱི་ཁམས་གསུམ་རྒྱ་དཀྲོལ་ཞིང་། །རང་བློ་ཡིས་མ་བསླད་གཉུག་མའི་གཤིས། །རང་བྱུང་གི་དབྱིངས་རོལ་བླ་མའི་སྐུ། །སྟོང་གསལ་གྱི་མཐའ་ལ་མ་ཞེན་པར། །སྐུ་བཞི་ཡི་ངོ་བོར་ལྷུན་གྲུབ་ནས། །བླ་མ་དང་རང་
སེམས་དེ་ལ་ཟེར། །གནད་དེ་ཡང་མིང་དུ་བཏགས་ཙམ་ལས། །མཐའ་གཅིག་ཏུ་མཚོན་པའི་གོ་སྐབས་བྲལ། །དོན་དེ་ལས་གདུང་བའི་སེམས་བསྐྱེད་གྱིས། །མ་ཁམས་གསུམ་འཁོར་བ་དོངས་ནས་དཀྲུག །དུས་གསུམ་གྱི་སངས་རྒྱས་སྟོང་རྩ་གཉིས། །ཐུགས་དམིགས་མེད་དམ་བཅའི་བདེན་མཐུ་ཡིས། །བློ་འདས་ཀྱི་ཆོས་སྐུའི་རྒྱལ་ས་འདི། །སྐད་ཅིག་གིས་མངོན་དུ་བྱེད་པ་དང་། །འགྲོ་བ་ཀུན་གནད་འདིར་སྒྲོལ་བར་ཤོག །ཞེས་དང་། ཡང་སྙིགས་མའི་སྐྱེ་བོ་མི་སྲུན་པའི་ལྟ་སྤྱོད་ལ་ཡིད་རབ་ཏུ་སྐྱོ་བ་དང་འབྲེལ་ཕ་གཅིག་བླ་མའི་ཐུགས་བསྐྱེད་རྗེས་སུ་བསྐུལ་པའི་གླུ་ཡིད་ཀྱི་གདུང་སེལ་ཞེས་བྱ་བ། ཨ་ཧོ། སྐྱབས་ཀུན་འདུས་ཆོས་སྐུ་རྡོ་རྗེ་འཆང་། །དོན་དབྱེར་མེད་དཔལ་ལྡན་བླ་མའི་སྐུ། །བདག་བཟོད་མེད་གདུང་བས་གླུ་དབྱངས་འདི། །སེམས་བཟོད་མེད་མོས་གུས་ཀྱི་ཤུགས་ལས་ཐལ། །གཤིས་ཡེ་བབས་གསལ་དྭངས་ཕྱེད་པ་འདི། །བབས་ཟང་ཐལ་ངང་དུ་མི་ཡན་པར། །བློ་འགྱུ་དྲན་གྱི་རྟོག་དཔྱོད་ཨ་རེ་
འཁྲུལ། །འདི་བསམ་བཞིན་ཀརྨའི་བཀའ་བརྒྱུད་དྲན། །གཞི་རིག་སྟོང་རང་གནས་ཐོག་ཏུ་བཟློ། །དུས་ད་ལྟའི་ཐ་མལ་ཤེས་པ་འདི། །སྐྱེ་གྲོལ་ཡིད་ལ་མི་བྱེད་པར། །གདངས་འགགས་མེད་ཡུལ་ཕྱིར་མི་དཔྱོད་ཀྱང་། །འཁོར་འདས་ཀྱི་གནས་སྣང་གཅིག་ཆར་སྣང་། །ལམ་རྩོལ་མེད་ཕྱག་ཆེན་རྨད་དུ་བྱུང་། །གཞི་རང་གནས་ཀྱི་རིག་པ་རང་ཞལ་མཇལ། །འཁོར་འདས་ཀྱི་འགྲོས་ལ་རང་བྱན་ཚུད། །ཁམས་གསུམ་གྱི་འཁྲུལ་སྣང་དབྱིངས་སུ་དིབས། །སྐུ་གསུམ་རང་གནས་ཀྱི་ཐོག་ཏུ་ཕེབས། །ཡིད་ཕྱི་སྨོན་གྱི་འབྲས་བུ་གང་དུ་བྱེད། །འདི་བཀའ་བརྒྱུད་རྣམས་ཀྱི་ཁྱད་ཆོས་ལགས། །དེར་བསམ་ནས་གོང་མའི་གཤེགས་ཤུལ་སྙེགས། །མི་བདག་ལ་ལྟོས་པའི་རྗེས་འཇུག་རྣམས། །ཚེ་འདི་ལ་མ་ཞེན་ཕྱི་མར་སོམས། །ཕྱི་ངུར་སྨྲིག་མཚམས་སྤྲིན་རྒྱན་གྱིས་སྤྲས། །ནང་སྡོམ་གསུམ་གནང་བཀག་རི་བོང་རྭ། །ལམ་རིམ་གཉིས་འདི་མི་བསྒོམ་ཡིད་
རེ་སྐྱོ། །སང་འཆི་བའི་དུས་ལ་བབས་པའི་ཚེ། །བློ་ཕྱི་འགྱོད་མུན་པས་ནོན་ཉེན་ཡོད། །དོན་དེ་ཕྱིར་ཐོས་བསམ་བསྒོམ་པར་དྲིལ། །སྒྲུབ་བསྟན་གྱི་རྒྱལ་མཚན་སྲིད་རྩེར་སྒྲེངས། །དོན་གཉིས་ལྡན་སྟན་ཐོག་འདི་རུ་མཛོད། །དེ་འགྲུབ་པའི་མཐུན་རྐྱེན་བླ་མ་དང་། །དཔལ་མ་མགོན་ལྕམ་དྲལ་ཚོགས་བཅས་ཀྱིས། །དུས་འབྲལ་མེད་རེ་བ་འགྲུབ་པར་མཛོད། །ཞེས་པ་འདི་ནི་སྤྱིར་བཀའ་བརྒྱུད་ཀྱི་ལྟ་སྒོམ་ལ་ཡིད་ཆེས་ཀྱི་ངེས་པ་ཅུང་ཟད་རྙེད་པ་དང་། ཆོས་གཟུགས་ཆོས་བཞིན་མི་བྱེད་པ་རྣམས་ཀྱི་སྤྱོད་པ་ལའང་ཡིད་སྐྱོ་བས་རྒྱུ་བྱས། རིང་མོ་ཞིག་ནས་ངོས་ཀྱི་རྗེ་དབོན་དང་། སྒྲུབ་དཔོན་བདེ་ཆེན་སོགས་ཀྱིས་འདི་ལྟ་བུའི་མགུར་ཞིག་དགོས་ཞེས་ཡང་ཡང་བསྐུལ་མ་བྱུང་བ་མ་ཟད། དེང་སྐབས་བཀའ་བརྒྱུད་གོང་མ་རྣམས་ཀྱི་མགུ་མཚོའི་སྤར་བསྐྲུན་གསར་དུ་བཀོད་པའི་རྒྱུ་རྐྱེན་ཕུན་ཚོགས་སྐབས་སླར་ཡང་ཆོས་ཁྲིམས་བླ་མ་སྒྲུབ་བརྒྱུད་བསྟན་དར་ནས་ནན་བསྐུལ་གྱི་ངོ་མ་ལྡོག་ཙམ་དུ། དཔལ་ཀརྨ་པའི་སྐྱེས་རབས་འཛིན་པ་བཅུ་དྲུག་པས་གང་ཤར་ཐོལ་བྱུང་དུ་སྨྲས་པའོ། །མངྒ་ལཾ།། ༈ །།བྱང་སེམས་བཀྲ་ཤིས་འོད་ཟེར་གྱི་རེ་ལྟོས་བླ་མ་ལས་མེད་པར་ཁོ་ཐག་ཆོད་པའི་རང་མཚངས་
སུན་འབྱིན་གྱི་ཚུལ་དུ་གདུང་གླུ་བཞེངས་པ་ནི། བདག་བློའི་སྙིང་གི་པདྨ་འདབ་བརྒྱད་ཟེའུ་འབྲུ་ཡི་གདན་གྱི། །དྭངས་མ་ལྔ་འདུས་ཐིག་ལེ་ཐབས་ཤེས་ཉི་ཟླ་ཡི་དཀྱིལ་ན། །སྐྱབས་གསུམ་ཀུན་འདུས་ངོ་བོ་བཀའ་དྲིན་མཚུངས་མེད་ཀྱི་འདྲེན་མཆོག །རྩ་བའི་བླ་མ་གང་དེ་འབྲལ་མེད་རྟག་པ་རུ་བཞུགས་ཤིག །ཕ་གཅིག་སངས་རྒྱས་ཀུན་འདུས་ཐུགས་མཆོག་དམིགས་མེད་ཀྱི་སྙིང་རྗེས། །བདེན་གཉིས་དམ་ཆོས་ཀུན་འདུས་ཟབ་མོ་གསུང་གསང་གི་བདུད་རྩི། །རིག་གྲོལ་དགེ་འདུན་ཀུན་འདུས་ཞི་སྐུ་ངུར་སྨྲིག་གི་རོལ་པས། །དངོས་སུ་བདག་ལ་སྩོལ་མཛད་རྩ་བའི་བླ་མ་དེ་མཁྱེན་ནོ། །ཡོན་ཏན་བཀོད་པ་ཕུན་ཚོགས་རྣམ་དག་རབ་འབྱམས་ཀྱི་ཞིང་ན། །སྟོབས་བཅུའི་ཡོན་ཏན་མངའ་བའི་སངས་རྒྱས་དུ་མ་ཞིག་བཞུགས་ཤིང་། །ཆོ་འཕྲུལ་རྣམ་པ་མང་པོས་ཆོས་སྒོ་མཐའ་ཡས་ཞིག་སྟོན་ཀྱང་། །མ་དག་ལས་ཀྱི་སྒྲིབ་པས་བདག་གིས་མཐོང་ཐོས་ཙམ་མི་
འདུག །གྲངས་མེད་རྒྱལ་བས་སྤངས་པའི་མི་མཇེད་འཇིག་རྟེན་གྱི་གནས་འདིར། །རྣམ་ལྔ་སྙིགས་མའི་ཡང་སྙིགས་ཉེས་པ་བརྒྱ་ཕྲག་གི་གོང་བུར། །དམན་པ་བདག་ལ་བརྩེ་བའི་སྙིང་སྟོབས་རྨད་བྱུང་གི་དཔའ་བོ། །སངས་རྒྱས་སྟོང་ལས་ལྷག་པའི་འདྲེན་མཆོག་བླ་མ་དེ་དྲན་ནོ། །དེ་ཡི་སྐུ་གསུང་ཐུགས་ཀྱི་ཐུན་མོང་རྣམ་ཐར་ཙམ་གཞིག་ཅིང་། །རང་གི་ལུས་ངག་ཡིད་ཀྱི་བསམ་སྤྱོད་མ་རུངས་པར་བརྟགས་ན། །དད་དང་སྐྱོ་བའི་དབང་གིས་མཆི་མ་དབང་མེད་དུ་འཁྲུགས་ཤིང་། །དབྱེར་མེད་གཅིག་ཏུ་ཐིམ་སྙམ་སྐབས་རེར་རྟོགས་པ་ཞིག་འཆར་རུང་། །ཀུན་དཀྲིས་ཉོན་མོངས་བཙན་པོས་ཤོག་དྲིལ་རང་ལམ་གྱི་དཔེ་ལྟར། །དུག་གསུམ་རྐྱེན་གྱིས་བཀར་བས་དམན་པ་རང་ས་རུ་ལུས་ཤིང་། །མི་དྲན་དགུ་དྲན་བསམ་པས་མི་བྱེད་དགུ་བྱེད་དུ་སྤྱོད་འདི། །དྲིན་ཅན་བླ་མས་དགོངས་ཏེ་བདག་ལ་ཆད་པ་ཞིག་ཐོང་མཛོད། །རྒྱུ་དང་མི་རྒྱུའི་ས་བཞིན་ཡོན་
ཏན་ཐམས་ཅད་ཀྱི་རྨང་གཞི། །གནང་བཀག་ཚུལ་བཞིན་སྤྱོད་པའི་ཚུལ་ཁྲིམས་ཁོ་ན་ལ་རག་ན། །སྣ་གཅིག་སྲུང་བ་མེད་པར་ཆོས་གོས་ལྷུང་བཟེད་ཅིག་བཟུང་ནས། །དགེ་སྦྱོང་ཡིན་མདོག་ཁ་ལ་བཀའ་བཀྱོན་མི་མཛད་པ་འདི་ཅི། །ཉན་ཐོས་སངས་རྒྱས་འབྲིང་རྣམས་ཐུབ་པའི་དབང་པོ་ལས་སྐྱེས་ཤིང་། །ཐུབ་མཆོག་ཟབ་རྒྱས་སྤྱོད་པའི་རྒྱལ་སྲས་སེམས་དཔའ་ལས་འཁྲུངས་ན། །རང་འདོད་ཁོང་ལ་བཅུག་ནས་གཞན་ཕན་བཤད་ཡམ་དུ་ལུས་པའི། །རྒྱུ་མེད་འབྲས་བུར་འདོད་ལ་ཕྱག་འབེབས་མི་གནང་བ་ཅིག་འདི་ཅི། །ཐབས་མང་དཀའ་བ་མེད་པར་གསང་སྔགས་དབང་རྣོན་གྱི་ཁྱད་ཆོས། །དམ་ཚིག་ངོ་ལྐོག་མེད་པར་རིམ་གཉིས་ཟབ་མོ་ལ་བརྩོན་ན། །ཚེ་གཅིག་བར་དོའམ་སྟེ་སྐྱེ་བ་བཅུ་དྲུག་ལས་མེ་འདའ། །རྡོ་རྗེ་འཆང་དངོས་འགྲུབ་རུང་ཉམས་ལེན་དྭངས་མ་ནི་མི་གདའ། །ཆོས་བརྒྱད་སྲོག་ལྟར་གཉེར་བའི་ཕྱི་ཚུལ་ངུར་སྨྲིག་ལ་བརྫུ་
ནས། །རང་རྒྱུད་གྱོང་རུང་ལུས་བཞིན་བླ་མའི་མིང་སྙན་དུ་རློམ་པ། །གཟིག་ལྤགས་བཀབ་པའི་བོང་ལྟར་ཐ་མ་རང་ཕུང་ལས་མེད་ན། །ད་ལྟ་ཉིད་དུ་བླ་མས་གནས་དབྱུང་མི་མཛད་པ་འདི་ཅི། །དལ་འབྱོར་ཐོབ་དཀའ་ཤེས་ཀྱང་དེ་ལས་སྙིང་པོ་ནི་མི་ལེན། །མི་རྟག་འཆི་བ་ཤེས་ཀྱང་ནམ་འཆི་ཆ་མེད་ནི་མི་དྲན། །བདེ་སྡུག་སྔོན་ལས་ཤེས་ཀྱང་དགེ་སྡིག་བླང་དོར་ནི་མི་བྱེད། །འཁོར་བ་སྡུག་བསྔལ་ངེས་ཀྱང་ངེས་འབྱུང་བསམ་པ་ནི་མི་འདུག །ཀྱི་ཧུད་བདག་འདྲའི་ཟོག་པོ་བཟང་མདོག་ཕྱི་ཚུལ་ཅན་འདི་ཡིས། །སྐལ་མཉམ་བསླུ་རེས་འདུག་གོ་ཤེས་ལྡན་སྐྱེ་བོ་དག་མཁྱེན་ལ། །ཁ་བཤད་མཁས་མཁས་ཚིག་དང་སྤྱོད་ལམ་མཛེས་མཛེས་ལ་མ་གཟིགས། །མི་བདེན་ངོ་མ་ཐག་ཆོད་ནང་མགོ་ཕྱིར་བཙོང་གི་སྙིང་གཏམ། །ཀྱེ་མ་བདག་གི་མགོན་གཅིག་མཁྱེན་བརྩེ་ནུས་གསུམ་ཀྱི་བདག་ཉིད། །མཁྱེན་པར་ཆགས་ཐོགས་མེད་ན་བདག་བློ་ལྐོག་གྱུར་འདི་མཁྱེན་
མཛོད། །བརྩེ་བར་ཉེ་རིང་མེད་ན་སྐྱོན་ཅན་བཏང་སྙོམས་སུ་མ་བཞག །ནུས་པ་དྲག་པོ་ཡོད་ན་མྱུར་བར་རྒྱུད་ངན་འདི་བརླག་མཛོད། །འདི་མུས་ངན་ལམ་བཏང་ན་སེམས་དཔའ་ཆེན་པོ་ནི་མཆོག་གིས། །འགྲོ་ཀུན་ཐར་པར་དྲངས་ཀྱང་མ་རུངས་ཁོ་བོ་ཅག་གཅིག་པུར། །ཆེད་དུ་འོ་བརྒྱལ་མཛད་དགོས་གཏིང་ཟབ་དམྱལ་བ་ཡི་དོང་ནས། །གདོན་དཀའ་འབྱུང་ངེས་འདུག་གོ་ལ་འུར་ཐུགས་རྗེ་འདིར་མ་ཆུང་། །རེ་ས་ཁྱེད་ལས་མེད་ན་གདུང་ཡུལ་མི་འབོད་ནི་ཀ་མེད། །བདག་ནི་དབང་མེད་ལགས་ན་ཉམས་ལེན་རྩལ་ཤེད་ནི་མ་རྫོགས། །ཉོན་མོངས་དབང་བཙན་འདི་ནི་ཡུལ་ལྔར་ཞེན་སྤྱོད་ཀྱི་བཏུང་བས། །ལུས་སྟོབས་རབ་ཏུ་བརྟས་ཏེ་བདག་ཉིད་བྲན་གཡོག་ལ་བཀོལ་འདུག །འདུལ་སྐྱོང་ཉིད་ཀྱིས་མཛད་པའི་ལང་ཚོ་དར་བ་ཞིག་བྱུང་ཞིང་། །དཔའ་བོ་འཐབ་པའི་ལག་ཆ་ཤེས་རབ་རལ་གྲི་ཞིག་གནང་ན། །ཕོ་ངན་སྟོང་བཤད་མིན་པའི་ཁ་
བཤད་ལག་ལེན་དུ་ཐེབས་ངེས། །འདི་བྱས་སྣེ་གཅིག་ཡོད་པའི་དམ་བཅའ་ད་ལྟ་ནས་འབུལ་ལོ། །ཞེས་པ་འདི་ནི་རང་གི་བསམ་སྦྱོར་ལ་ཡིད་མ་ཆེས་པའི་སྨྱོ་གླུ་དུ་ཚབ་ཏུ་བནྡེ་མངྒ་ལར་སྨིས་བྲིས་པ་དགེ། ༈ མཁན་ཆེན་བླ་མ་རིན་པོ་ཆེས་སྙིགས་དུས་ཀྱི་སྤྱོད་པ་ལ་ཡིད་སྐྱོ་ཞིང་གོང་མའི་རྣམ་ཐར་ངོ་མཚར་བའི་མགུར་གླུ་བཞེངས་པ་ནི། ན་མོ་གུ་རུ། གནས་རང་སྣང་རྣམ་དག་གི་ཞིང་ཁམས་སུ། །ཕ་རང་རིག་དོན་གྱི་བླ་མ་ལ། །བདག་འཁོར་འདས་རོ་སྙོམས་སུ་གསོལ་བ་འདེབས། །དོན་འཁོར་བ་དོང་སྤྲུགས་སུ་བྱིན་གྱིས་རློབས། །རྗེ་གསང་ཆེན་རིགས་གཅིག་དང་པོའི་མགོན། །དཔལ་དྲུག་པ་རྡོ་རྗེ་འཆང་ཆེན་ནས། །ཕ་བཀའ་བརྒྱུད་ཀྱི་རྣམ་ཐར་དྲན་ཙ་ན། །ཡིད་ངན་རྟོག་གི་རྒྱུ་བ་རང་སར་འགག །མཚན་སྙན་པའི་བ་དན་སྲིད་གསུམ་ཁྱབ། །མགོན་བཀའ་བརྒྱུད་གོང་མའི་ཞེན་ལོག་གིས། །རྟེན་དལ་འབྱོར་ཉིན་མོའི་སྐར་མ་འདིའི། །གནས་ལུས་དང་ལོངས་སྤྱོད་འབྱོར་པ་ཀུན། །སང་འཆི་བ་སྲོག་དང་བྲལ་བའི་ཚེ། །དཔེ་རྨི་
ལམ་སད་པའི་ནངས་མོ་ལྟར་། །ཀུན་སློག་རུལ་བཞིན་དུ་བོར་ནས་སུ། །རང་གཅིག་པུར་གཤིན་རྗེའི་གྲོང་ཡུལ་དུ། །འཇིགས་ཉམ་ཐག་གི་སྡུག་བསྔལ་འབྱུང་གཟིགས་ནས། །དཔེ་རི་དྭགས་དགྲ་ལ་འཇིགས་པ་ལྟར། །དོན་ཆོས་བརྒྱད་ཀྱི་ཐལ་བ་རླུང་ལ་བསྐུར། །ཚེ་འདི་ལ་ཞེན་པའི་གདོས་ཐག་བཅད། །དེ་ཨེ་མ་ངོ་མཚར་མི་ཆེ་འམ། །དུས་དེང་སང་སྙིགས་མའི་སྐྱེ་བོ་ཀུན། །ཚེ་འདིར་སྣང་གི་ཞེན་པ་མེ་ལྟར་འབར། །ཆོས་གང་བྱས་ཆོས་བརྒྱད་ཀྱི་ཐོབ་ཤོར་བཀྱེ། །འཆི་བ་མི་རྟག་དེ་མ་དྲན་ཡིད་རེ་སྐྱོ། །དུས་སྐད་ཅིག་བསགས་པའི་ལས་ངན་གྱིས། །འབྲས་མནར་མེད་དམྱལ་བའི་སྡུག་བསྔལ་སོགས། །ལོ་སྟོང་ཕྲག་དུ་མར་མྱང་གཟིགས་ནས། །དཔེ་དུག་དང་འདྲེས་པའི་ཁ་ཟས་ལྟར། །གནས་ཕུན་ཚོགས་སྲིད་པའི་བདེ་འབྱོར་དང་། །ལས་འདོད་ཡོན་ལ་ཞེན་པའི་གདོས་ཐག་བཅད། །དེ་ཨེ་མ་ངོ་མཚར༴ དུས་དེང་སང་བདག་འདྲའི་ལས་
ངན་རྣམས། །གྲོགས་འདོད་ཡོན་སྤུ་གྲིའི་སྦྲང་རྩིར་ཆགས། །སྡིག་མི་དགེའི་དུག་ཆུ་སྨན་ལྟར་འཐུངས། །ལས་རྒྱུ་འབྲས་འདི་མི་སྲུང་ཡིད་རེ་སྐྱོ། །སྤྱིར་རིགས་དྲུག་འཁོར་བའི་རྒྱ་མཚོ་རུ། །སྡུག་བསྔལ་བའི་རྦ་ཀློང་རབ་ཏུ་འཁྲུགས། །ལས་མཐའ་མེད་ཀྱི་ཉེས་ཆེན་འདི་གཟིགས་ནས། །དཔེ་བྱ་རྒོད་རྒྱ་ལས་ཤོར་བ་ལྟར། །གནས་འཁོར་བ་ལ་ཞེན་པའི་གདོས་ཐག་བཅད། །དེ་ཨེ་མ་ངོ་མཚར༴ དུས་དེང་སང་བདག་འདྲའི་ཟོལ་པོ་ཀུན། །གཞི་འཁོར་བ་ལ་ཞེན་པ་མ་ལོགས་པས། །ཆོས་བྱས་ཚད་སྡུག་བསྔལ་གྱི་འབྲས་བུ་ཅན། །དོན་བསམ་ཚད་ཆགས་སྡང་འཕེལ་བའི་རྒྱུ། །བློ་ངེས་འབྱུང་འདི་མ་གོམས་ཡིད་རེ་སྐྱོ། །རྗེ་བཀའ་བརྒྱུད་གོང་མའི་གཞན་ཕན་གྱིས། །མཐའ་ནམ་མཁས་ཁྱབ་པའི་སེམས་ཅན་རྣམས། །དྲིན་ཕ་མར་མ་གྱུར་གཅིག་ཀྱང་མེད། །དེས་ཚབས་ཆེན་གྱི་སྡུག་བསྔལ་མྱོང་གཟིགས་ནས། །དཔེ་དགྲ་སྟབས་མཁས་པའི་དཔའ་བོ་ཡི། །བུ་
སྙིང་སྡུག་གཡུལ་དུ་ལུས་པ་འདྲའི། །བྱམས་སྙིང་རྗེ་བྱང་ཆུབ་སེམས་འབྱོངས་ནས། །མ་འགྲོ་བ་ཡོངས་ཀྱི་གཏན་དོན་མཛད། །རང་ཞི་བདེར་ཞེན་པའི་གདོས་ཐག་བཅད། །འདི་ཞེན་ལོག་སྒོམ་གྱི་རྐང་པར་བཞེད། །དེ་ཨེ་མ་ངོ་མཚར༴ དུས་དེང་སང་ཚུལ་འཆོས་བདག་འདྲ་རྣམས། །གདོན་བདག་འཛིན་གྱི་མགོ་འཕང་དགུང་བས་མཐོ། །ཆོས་ཁ་བཤད་ཀྱི་ལྷག་བསམ་འཇའ་ལྟར་ཡལ། །དོན་རང་རྒྱུད་དུལ་བ་བོང་བུའི་རྭ། །ཕྱོགས་དགྲ་གཉེན་ཆགས་སྡང་གི་འཁྲུལ་འཁོར་གྱིས། །ཁེ་གསོག་འཇོག་བུན་སྐྱེད་ཀྱི་མགོ་བསྐོར་སོགས། །བྱམས་སྙིང་རྗེའི་དྲི་ཙམ་རིང་དུ་བརླག །ལམ་བྱང་སེམས་འདི་མ་གོམས་ཡིད་རེ་སྐྱོ། །ཕ་བཀའ་བརྒྱུད་གོང་མའི་དག་སྣང་གིས། །རྗེ་བླ་མ་སངས་རྒྱས་དངོས་སུ་བལྟ། །བཀའ་གང་སྩལ་སྲོག་ལ་ཐུག་ཀྱང་སྒྲུབ། །རེས་འབྱོར་རྒུད་ཀྱི་སྐྱིད་སྡུག་ཅི་བྱུང་ཡང་། །བློ་གཅིག་ཆོད་ཀྱི་འདུན་པ་ལིང་གིས་བཀལ། །ལམ་
མོས་གུས་བླ་མའི་རྣལ་འབྱོར་གྱིས། །དག་སྣང་གི་རྟོག་པ་ལམ་དུ་ཁྱེར། །ཆོས་ཕྱག་རྒྱ་ཆེན་པོ་འབད་མེད་རྟོགས། །འདི་མོས་གུས་སྒོམ་གྱི་མགོ་བོར་བཞེད། །དེ་ཨེ་མ་ངོ་མཚར༴ དུས་དེང་སང་བདག་འདྲའི་དྲེད་པོ་རྣམས། །ཆོས་ཟབ་དགུ་སྟོན་པའི་བླ་མ་ཡང་། །མི་ཕལ་པ་སོ་སོའི་སྐྱེ་བོར་བཟུང་། །ལས་དང་པོའི་དད་མོས་ཚབ་ཚུབ་ཀྱང་། །བློ་རང་མཚངས་ཐེ་ཚོམ་གྱི་ལིང་ཐོག་གིས། །ཡིད་མོས་གུས་ཀྱི་མིག་བཟང་རིམ་གྱིས་འགྲིབ། །སྒོམ་ལོ་ཟླ་བཞིན་རང་རྒྱུད་ཕྱི་ཕྱིར་གྱོང་། །ལས་དམུ་རྒོད་ཀྱི་ངན་སྤྱོད་ཡི་རེ་སྐྱོ། །རྗེ་གྲུབ་ཐོབ་ཡོངས་ཀྱི་ཟབ་ལམ་གྱིས། །ཆོས་འཁོར་འདས་ལམ་གྱི་སྣང་ལུགས་ཀུན། །གཤིས་ཡེ་བབས་ཀྱི་ཀློང་དུ་ཡིན་ལུགས་གཅིག །གཞི་མཐའ་བྲལ་ལྟ་བའི་སྒྲོ་འདོགས་བཅད། །དེ་ཨེ་མ་ངོ་མཚར༴ ཆོས་གང་ཤར་མི་འགོག་ཐབས་ཀྱི་ལམ། །དོན་སྟོང་ཆེན་ཤེར་ཕྱིན་ཡུམ་གྱི་ཀློང་། །ལམ་ཟུང་འཇུག་མཉམ་ཉིད་ཆེན་པོར་གདལ། །དེ་
ཨེ་མ༴ བཟང་སྟོང་གསལ་བདེ་ཆེན་ཉམས་ཀྱི་འགྱུར། །གདངས་འགག་མེད་ཀྱི་ཆགས་ཞེན་རས་སུ་བོར། །གཤིས་བྱར་མེད་ཀྱི་རོ་སྙོམས་ཐང་དུ་ལྷུང་། །དེ་ཨེ་མ༴ ངན་ཚོགས་དྲུག་འཁྲུལ་རྟོག་གི་ཡོ་ལང་སོགས། །རྩལ་སྣ་ཚོགས་རིག་སྟོང་ཆོས་སྐུའི་འོད། །ལ་གཞི་གནས་ཟང་ཐལ་གྱི་ཀློང་དུ་ཟློ། །དེ་ཨེ་མ༴ ཡིད་ཉོན་མོངས་དུག་ལྔའི་སྐྱེས་བུ་དེ། །ལམ་གཏུམ་མོ་འབར་འཛག་གི་རྟ་ལ་དྲངས། །བབས་བདེ་ཆེན་གྱི་ཐང་དུ་ཁ་ཡན་གློད། །དེ་ཨེ་མ༴ སེམས་སྣང་གསུམ་དཀར་དམར་རླུང་གི་མགྲོན། །གནད་སྦྱོང་བ་བཞི་ལྡན་གྱི་རྟ་ལ་དྲངས། །རྩ་དབུ་མའི་ཐང་དུ་ཁ་ཡན་གློད། །དེ་ཨེ་མ༴ བཙན་འཁྲུལ་སྣང་ལས་ཀྱི་རྒྱལ་པོ་དེ། །སྐབས་གཏི་མུག་གཉིད་ཀྱི་རྟ་ལ་དྲངས། །གཤིས་འོད་གསལ་གྱི་ཐང་ལ་ཁ་ཡན་གློད། །དེ་ཨེ་མ༴ ལར་སྣང་གྲགས་རྟོག་ཚོགས་ཀྱི་རོལ་པ་ཀུན། །ལམ་སྨིན་གྲོལ་མགྱོགས་པའི་རྟ་ལ་དྲངས། །ཞིང་སྣང་སྲིད་དག་
མཉམ་ཆེན་པོར་གློད། །དེ་ཨེ་མ༴ ཡུལ་འཁོར་འདས་སེམས་ཀྱི་རོལ་པར་ཤར། །སེམས་དམིགས་གཏད་ཀྱི་མཚན་མ་དབྱིངས་སུ་ཡལ། །དབྱིངས་ཟུང་འཇུག་གི་ཀློང་དུ་རྒྱ་ཡན་འབྱམས། །སྒོམ་མི་སྒོམ་བྱ་རྩོལ་བློ་ལས་འདས། །ལམ་གོལ་ཤོར་དང་བྲལ་བའི་ཕྱག་རྒྱ་ཆེ། །འདི་ཡེངས་མེད་སྒོམ་གྱི་དངོས་གཞིར་མཛད། །དེ་ཨེ་མ༴ ཕ་བཀའ་བརྒྱུད་གོང་མའི་སྤྱོད་ལམ་དུ། །གནས་གཡའ་བྲག་གངས་ཀྱི་ལྡིང་གུར་འགྲིམ། །གོས་རེག་འཇམ་གཏུམ་མོའི་བདེ་དྲོད་སྦར། །ཚོགས་ཟག་མེད་ཏིང་འཛིན་གྱི་ཟས་ལ་རོལ། །དེ་ཨེ་མ༴ རྫུན་ཀུན་རྫོབ་སྒྱུ་མའི་གྲོང་ཁྱེར་དུ། །ཡིད་རེ་དོགས་བདུད་ཀྱི་ཆོ་འཕྲུལ་ལ། །རིག་པ་རོ་སྙོམས་ཀྱི་བརྟུལ་ཞུགས་སྤྱོད། །དེ་ཨེ་མ༴ ཕྱི་འགལ་རྐྱེན་ཐོག་བབས་ཀྱི་ལྷོང་ཚད་དང་། །ནང་འཇིགས་སྐྲག་ཉམ་ངའི་འཕྲང་ཆེན་ལ། །སེམས་འཇིགས་བྲལ་ཐོག་རྫིས་ཀྱི་བརྟུལ་ཞུགས་སྤྱོད། །དེ་ཨེ་མ༴ ཡུལ་འཁྲུལ་སྣང་རྨི་ལམ་གྱི་རྒྱལ་ཁམས་
སུ། །བློ་གཟའ་གཏད་དང་བྲལ་བའི་རྣལ་འབྱོར་གྱིས། །ཉམས་ཐུག་ཕྲད་ཀྱི་སྣང་བ་ལམ་དུ་ཁྱེར། །སྐྱོ་དགའ་བྲོད་སྙེམས་བྱེད་ཀྱི་ཁུ་འཕྲིགས་དང་། །བདག་མཆོག་འཛིན་གྱི་རློམ་སེམས་ཨར་ལ་གཏད། །འདི་དགག་སྒྲུབ་དང་བྲལ་བའི་སྤྱོད་པར་བཞེད། །དེ་ཨེ་མ༴ ནང་འཁྲུལ་པའི་མཚངས་ཆེན་དབྱིངས་སུ་དིབ། །སེམས་ཆོས་སྐུའི་རྒྱལ་ས་ཟིན་པའི་རྟགས། །ཕྱི་སྣང་སྲིད་འཁོར་འདས་རང་དབང་སྒྱུར། །གསུང་མདོ་རྒྱུད་མན་ངག་གི་མགུར་དབྱངས་འཐེན། །སྐུ་རྫུ་འཕྲུལ་ཡ་མ་ཟུང་དུ་སྟོན། །དམའ་དལ་འབབ་ཀྱི་ཆུ་ལ་ཉ་ལྟར་འཕྱོ། །བར་སྲ་མཁྲེགས་ཀྱི་རི་བྲག་ཟང་ཐལ་སྤྱོད། །མཐོ་དགུང་སྔོན་གྱི་དབྱིངས་སུ་བྱ་ལྟར་སྡིང་། །ཡ་མཚན་གྱི་གྲུབ་རྟགས་བསམ་ལས་འདས། །དེ་ཨེ་མ༴ མཆོག་གསང་ཆེན་ཐེག་པའི་མྱུར་ལམ་གྱིས། །གཤིས་འོད་གསལ་ཆོས་སྐུའི་སྒྲིབ་གཡོག་བྲལ། །ཚེ་གཅིག་ལ་ཟུང་འཇུག་གི་གཏན་སྲིད་བཟུང་། །ཕྲིན་
ལས་ཀྱིས་འགྲོ་ཁམས་ཡོངས་ལ་ཁྱབ། །བཀའ་བརྒྱུད་པ་ནོར་བུའི་ཕྲེང་ཚོམ་ལྟར། །འདི་སངས་རྒྱས་སེམས་ལས་རྙེད་པར་བཞེད། །དེ་ཨེ་མ་ངོ་མཚར་མི་ཆེའམ། །ཆོས་ཟབ་དགུའི་ཁྱད་ཆོས་དེ་ལྟར་ཡང་། །ཀྱེ་མ་ལ་བདག་འདྲའི་ལས་ངན་རྣམས། །ཉིན་འཁྲུལ་སྣང་ཐོབ་ཤོར་གྱི་བྱ་བས་བྲེལ། །མཚན་གཏི་མུག་རོ་ཉལ་གྱི་དབང་དུ་སོང་། །སང་ཧུར་ཐག་དབུགས་ཀྱིས་བསྟུང་བའི་ཚེ། །དོན་འདི་གྲུབ་ཀྱི་འཛིན་མཚམས་གཅིག་ཀྱང་མེད། །ལས་ངན་གྱི་རྣམ་སྨིན་རི་བས་ལྗི། །བློ་ཕྱི་འགྱོད་ཀྱི་མྱ་ངན་མེ་ལྟར་འབར། །ལམ་ཕྱག་ཆེན་འདི་མ་བསྒོམས་ཡིད་རེ་སྐྱོ། །ད་ཚེ་འདིའི་ལྷག་མ་ཅུང་ཟད་འདི། །གནས་ཉམས་དགའ་དབེན་པའི་རི་ཀླུང་དུ། །ཕ་བཀའ་བརྒྱུད་གོང་མའི་རྣམ་ཐར་བཞིན། །བདག་སྙིང་པོའི་དོན་ལ་འདྲིལ་བར་ཤོག །ཅེས་པ་འདི་ནི་ཁྱུང་པོ་བ་མཁྱེན་རབ་ཕུན་ཚོགས་ཀྱི་ངོར་ཕྱོགས་མེད་ཀྱི་རྒྱལ་ཁམས་ཉུལ་བའི་དུས་སུ་བནྡེ་མངྒ་ལས་ཉམས་མཚར་གྱི་ཚུལ་དུ་སྨྲས་པ་དགེ། ༈ །།མཁོ་
རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །