གཅོད་ཀྱི་ཉམས་ཁྲིད་ཞག་བདུན་མ།
༈ ཟབ་དོན་གཅོད་ཀྱི་མན་ངག་ལས། ཉམས་ཁྲིད་ཞག་བདུན་བཞུགས་སོ། ཆོས་ཉིད་སྤྲོས་བྲལ་ཕ་རོལ་ཕྱིན་པ་དང་། །དེ་དག་སྟོན་མཛད་རྒྱལ་ཡུལ་སྒྲོལ་མ་དང་། །ལམ་མཆོག་ཁྱད་འཕགས་མན་ངག་གཅོད་ཡུལ་དང་། །ཡེ་ཤེས་མཁའ་འགྲོ་མ་ཅིག་ཞབས་ལ་འདུད། །ཉམས་ཁྲིད་གདམས་པ་གུས་པས་བསྐུལ་བའི་ངོར། །ཡི་གེ་འབྲི་བ་གནང་བར་གསོལ་བ་འདེབས། །བྱིན་རླབས་ཐུགས་
མཆོག་ཚིག་གི་དོན་རྟོགས་ནས། སྨོན་ལམ་དབང་གིས་འགྲོ་ཀུན་རྒྱལ་གྱུར་ཅིག །དེ་ལ་དང་པོ་དབང་དང་ངོ་སྤྲོད་ལེགས་པར་ཐོབ་པའི་གང་ཟག་དེས། དངོས་གཞི་ལམ་ཉམས་སུ་བླང་བར་བྱ་སྟེ། དེ་ལ་གསུམ། སྤྱིའི་ཁྲིད་དུ་བཤད་པ། ཉམས་ཁྲིད་དུ་སྐྱོང་བ། ཞལ་གདམས་སུ་བསྟན་པའོ། །སྤྱིར་སྔར་བསྟན་ནས་འདིར་ཉམས་ཁྲིད་དེ། དེ་ལ་གཅོད་འདི་སྤྱིའི་ཤན་འབྱེད་ཡིན། རྟོགས་པའི་བོགས་འདོན་ཡིན། ལྷ་འདྲེ་དབང་སྡུད་ཡིན། དངོས་གྲུབ་རྣམ་གཉིས་འབྱུང་བ་ཡིན། སྐམ་ཐག་ཆུ་ནང་དུ་བཅད་པ་ཡིན་པས། སྙིང་ནས་རི་ཁྲོད་འགྲིམས་ཤིང་ཉམས་རྟོགས་རྒྱུད་ལ་སྐྱེ་བར་འདོད་ན། གཉན་ཁྲོད་མི་འགྲིམས་པ་དང་གཅོད་མི་བྱ་བའི་ཐབས་མེད། དེ་ལ་ཁྱད་པར་བཞི་དང་ལྡན་པས་འགྲོ་བ་བྱ་སྟེ། གང་དུ་འགྲོ་བ་གནས་ཀྱི་ཁྱད་པར། ནམ་འགྲོ་བ་དུས་ཀྱི་ཁྱད་པར། གང་འགྲོ་བ་གང་ཟག་གི་ཁྱད་པར། ཕྱིན་ནས་གང་ཉམས་སུ་ལེན་པ་གདམས་ངག་གི་
ཁྱད་པར་རོ། །དང་པོ་གཅོད་པའི་གནས་དུར་ཁྲོད་གནས་ཁང་ལ་སོགས་པ་འཇིགས་ཤིང་སྐྱི་གཡའ་བ་དང་། བྲེད་ཅིང་ཉམ་ང་བ། ཐེ་ཚོམ་དང་རྣམ་རྟོག་སྐྱེ་ནུས་པ་ཞིག་དགོས་ཏེ། དེ་མེད་ན་གཅོད་རྒྱུ་གང་ཡང་མེད་དོ། །དེ་ཡང་གནས་དེ་རུ་ཕྱིན་ནས་ལྷ་འདྲེ་ལ་དོ་མི་བཟློ། སྙད་མི་འཚོལ། དངོས་གྲུབ་དང་བྱིན་རླབས་ལ་མི་རེ་སྟེ། ཕྱི་འཇིགས་པའི་གནས་འདིར་འཇིགས་ཡུལ་ལྷ་འདྲེ་ལ་བརྟེན་ནས། ནང་འཇིགས་མཁན་གྱི་རྟོག་པ་རྩད་བཅད་པ་དེ་སྔར་སྤྱི་ཁྲིད་སྐབས་སུ་བཤད་ཟིན་ཏོ། །ནམ་འགྲོ་བ་དུས་ཀྱི་ཁྱད་པར་ནི། སྤྱིར་འཇིགས་ཤིང་སྐྲག་པ་དང་། ཉམ་ང་བག་ཚ་བྱུང་བའི་དུས་སུ་བྱེད། ཁྱད་པར་དུ་མཚན་མོ་ལྟ་བུ་ལ་ཟླ་གྲོགས་མེད་པར་གཅིག་པུར་འགྲོ་སྟེ། །ཟླ་བ་དང་ལག་ཆ་སོགས་གང་ལ་ཡང་སྙེམས་མེད་པའི་སེམས་ཐག་ཆོད་པར་བྱའོ། །གང་འགྲོ་བ་གང་ཟག་གི་ཁྱད་པར་ནི། དབང་གིས་སྣོད་རུང་དུ་བྱས་ལ། ངོ་སྤྲོད་ཀྱིས་ཅིར་
སྣང་སེམས་སུ་ཐག་ཆོད་པ། གདམས་ངག་གིས་ཕྱི་ནང་གི་སྒྲོ་འདོགས་ཆོད་པ་འགྲོ་བར་བྱའོ། །དེ་ཡང་དང་པོ་གཅོད་ལ་འགྲོ་ནུས་བལྟ། བར་དུ་ཆོ་འཕྲུལ་བྱུང་ན་རོ་སྙོམས་བལྟ། ཐ་མར་སངས་རྒྱས་ཀྱི་ལམ་དུ་འགྲོ་མི་སོགས་ལེགས་པར་བལྟའོ། །དེས་ན་དང་པོ་ནི་གཅོད་ལ་འགྲོ་མི་ནུས་པ་ཐམས་ཅད་ཉམས་ལེན་གྱི་སྙིང་ཁམས་ཆུང་བས་ལན་པ་ཡིན་པས། སྙིང་ཁམས་བསྐྱེད་ནས་ཐོག་ཏུ་བཀལ་ན་མི་ནུས་པ་གང་ཡང་མེད་དེ། དཔེར་ན་རྨི་ལམ་དུ་ཆུ་དང་གཡང་ལ་སོགས་པའི་འཇིགས་སྣང་ཤར་བ་དང་འདྲ་སྟེ། སྣང་ཡང་བདེན་པར་འགྲུབ་པ་མེད་དོ། །གཉིས་པ་འཁོར་འདས་སེམས་སུ་མ་ཤེས་པས་ལན་པ་ཡིན་པས། ཐམས་ཅད་སེམས་ཀྱི་ཆོ་འཕྲུལ་དུ་ཤེས་པའི་སེམས་བདེན་རྫུན་དང་བྲལ་ཙ་ན། གང་ལ་ཡང་འཇིགས་རྒྱུ་མེད་དོ། །དཔེར་ན་སྔར་འབག་མ་མཐོང་བའི་མི་ཞིག་འབག་ལ་འཇིགས་ཀྱང་། ཡང་ཡང་མཐོང་ན་མི་འཇིགས་པ་དང་འདྲའོ། །
གསུམ་པ་གདམས་ངག་ཟབ་མོ་མ་ཐོབ་པས་ལན་པ་ཡིན་པས། གདམས་པ་ཟབ་མོ་ཐོབ་ནས་འཁོར་འདས་རིགས་དྲུག་གིས་བསྡུས་པའི་ཆོས་སྣ་ཚོགས་སུ་སྣང་ཡང་བདེན་པར་གྲུབ་པ་མེད་དོ། །དཔེར་ན་བོང་བུས་བརྡུངས་པ་དང་། རི་བོང་གིས་རྨུགས་པའི་ལོ་རྒྱུས་མེད་པ་བཞིན་ནོ། །བཞི་པ་སྙིང་རུས་མེད་པས་ལན་པ་ཡིན་པས། སྙིང་རུས་བསྐྱེད་ནས་ལུས་སྲོག་གཏོང་ནུས་ན་གང་ཡང་མི་ནུས་རྒྱུ་མེད་དེ། སྔོན་གྱི་གྲུབ་ཐོབ་རྣམས་ཀྱིས་ཆོས་ཚིག་རེའི་ཕྱིར་དུ་དཀའ་བ་སྤྱད་པ་ཡིན་ནོ། །བར་དུ་ཆོ་འཕྲུལ་རོ་སྙོམས་མི་སྙོམས་བལྟ་བ་ནི། བར་ཆད་དང་ཆོ་འཕྲུལ་བྱུང་ན་སེམས་ལ་འགྱོད་པ་སྐྱེའམ་མི་སྐྱེ་བལྟ། ན་ཚ་སྡུག་བསྔལ་བྱུང་ན་ལམ་དུ་ལོངས་སམ་མི་ལོངས་བལྟ། འགལ་རྐྱེན་དང་གདུག་རྩུབ་བྱུང་ན་རོ་སྙོམས་སམ་མི་སྙོམས་བལྟ་བའོ། །ཐ་མར་སངས་རྒྱས་ཀྱི་ལམ་དུ་འགྲོ་མི་འགྲོ་བལྟ་བ་ནི། ཡར་གོང་མའི་ཞབས་ཏོག་ཏུ་འགྲོ་འམ་མི་
འགྲོ་བལྟ། མར་འོག་མའི་སྐྱོང་བྲན་དུ་འགྲོ་འམ་མི་འགྲོ་བལྟ། བར་དུ་རང་གི་ལྟ་བ་དང་རྟོགས་པའི་བོགས་ཐོན་ནམ་མི་ཐོན་བལྟ། སྟོང་ཉིད་སྙིང་རྗེའི་གྲོགས་སུ་འགྲོ་འམ་མི་འགྲོ་བ་ལྟ། དེ་རྣམས་དང་ལྡན་ན་གཅོད་ལ་འགྲོ། མི་ལྡན་ན་མི་འགྲོ །འགྲན་སེམས་དང་ཕོ་རུས་ཀྱི་སྒོ་ནས་མི་འགྲོ། ཁེ་གྲགས་དང་ལོ་འདོད་ཀྱི་ཕྱིར་མི་འགྲོ། རྙེད་པ་དང་བཀུར་སྟིའི་ཆེ་དུ་མི་འགྲོ། ཕོ་ཚོད་དང་རྒན་ཉམས་ལ་བརྟེན་ནས་མི་འགྲོ། འོ་ན་གང་གི་སྒོ་ནས་འགྲོ་ན། གཅོད་ཀྱི་གདམས་པ་ཚིག་གིས་མཐའ་ཆོད་པ། ཁྲིད་ཀྱི་ངོ་སྤྲོད་ཐོབ་པས་འཁོར་འདས་གཏན་ལ་ཕེབས་པ། སེམས་ཀྱི་དེ་ཉིད་མཐོང་བས་ཕྱི་ནང་གི་སྒྲོ་འདོགས་ཆོད་པ། ལུས་ཀྱི་བདག་འཛིན་ཐོངས་པས་འགལ་རྐྱེན་ལམ་དུ་ལོངས་པ་ཞིག་འགྲོ་བར་བྱའོ། །ཕྱིན་ནས་གང་ཉམས་སུ་བླང་བ་གདམས་པའི་ཁྱད་པར་ནི། བཀའ་ཤེས་རབ་ཀྱི་ཕ་རོལ་ཏུ་ཕྱིན་པ་གདམས་པའི་དོན་ཉམས་ལེན་བདུད་ཀྱི་གཅོད་
ཡུལ། མལ་ས་གཉན་ས་རི་ཁྲོད། ལྟ་བ་ལྷ་མེད་འདྲེ་མེད། སྒོམ་པ་ཡེངས་མེད་སྒོམ་མེད། སྤྱོད་པ་རོ་སྙོམས་ཐོག་བརྫིས། རིམ་གྲོ་ཤ་ཁྱེར་ཁྲག་ཁྱེར། ཉམས་ལེན་ན་དགའ་ཤི་སྐྱིད། དམ་ཚིག་དགེ་མེད་སྡིག་མེད། འབྲས་བུ་གཉིས་མེད་ལྷུན་གྲུབ་སོགས་ལ་ཉམས་སུ་བླང་བར་བྱའོ། །དེ་ལ་ནུབ་དང་པོའི་ཉམས་ལེན་ནི། ལུས་པོ་སྦྱིན་པ་བཏང་བ། བདག་འཛིན་ཡུལ་ནས་འདོན་པ། ཕུང་པོ་གཟན་དུ་བསྐྱུར་བ་དང་གསུམ་ལས། དང་པོ་ལུས་སྦྱིན་བཏང་བ་ནི། རང་གི་ལུས་འདི་གཞོན་ཞིང་དར་ལ་བབ་པ། མཛེས་ཤིང་ཡིད་དུ་འོང་བ་ཞིག་ཏུ་གྱུར་བར་བསམ་ལ། རང་གི་སེམས་ཉིད་རྡོ་རྗེ་རྣལ་འབྱོར་མར་བསྐྱེད་དེ། དེ་མདུན་གྱི་ནམ་མཁར་བྱོན་ནས། གྲི་གུག་གིས་ལུས་ཀྱི་སྟོད་སྨད་མགོ་དང་ཡན་ལག་ཉིང་ལག་རྣམས་སོ་སོར་ཕྲལ་ཞིང་། ལྷུ་དང་དུམ་བུར་གཏུབས་ཏེ། ནང་ཁྲོལ་སྙིང་སོགས་ཕྱིར་བཏོན་ནས། མདུན་དུ་ཤའི་ཕུང་པོ་ཚངས་པའི་
འཇིག་རྟེན་དུ་སླེབ་པ་ཙམ་སྤུང་། ཁྲག་ཕྱིའི་རྒྱ་མཚོ་ཙམ་བསྐྱིལ་ཏེ། དེ་རྗེ་བཙུན་མས་གང་ལ་གང་འདོད་དུ་བྱིན་གྱིས་བརླབ་ནས། རང་ལ་གནོད་པ་བྱེད་ཅིང་བར་ཆད་རྩོམ་པའི་ལྷ་འདྲེ་རྣམས་མདུན་དུ་བོས་པས། ནམ་མཁའི་ཁམས་གང་བ་ཙམ་དུ་བྱུང་བར་བསྒོམ་ཞིང་། དེ་རྣམས་ལ་བདག་གི་ལུས་འདིར་ཞེན་ཆགས་རྡུལ་རྩམ་ཡང་མེད་ཅིང་། དབང་ཆ་སྤུ་ཉག་མ་ཙམ་ཡང་མེད་པས། ལྷ་འདྲེ་རྣམས་རིངས་ན་གྲང་མོར་ཟོ། མི་རིངས་ན་ཚོས་ལ་ཟོ་བྱས་ཏེ། བློས་ལིང་གིས་བྱིན་ནས། ངག་ཏུ་ཡང་བརྗོད་པས། དེ་དག་དགྱེས་བཞིན་ཤ་ཁྲག་མ་ལུས་པ་ཧབ་དི་རི་རིར་ཟོས་པར་བསམ་ལ། སྟོས་མེད་ཀྱི་ངང་དུ་ཉོད་དེར་གློད། ཁྲེས་ཀྱིས་བོར་ལ་བཞག་སྟེ། ཉམ་ང་དང་འཇིགས་པ་བྱུང་རིམ་བཞིན་ལ་དེ་ལྟར་བྱ། དེ་ནས་སེམས་འདི་ནི་ཁྱེད་པས། ང་བདག་པོས་ཀྱང་མ་མཐོང་། ལུས་འདི་ནི་སྣང་སྲིད་ཀྱི་ལྷ་འདྲེ་ཐམས་ཅད་ལ་སྦྱིན་པར་བཏང་ནས་མེད། ད་ང་ལ་ནི་
ལུས་ཀྱི་ཁ་ཏ་དང་། གཉེར་ཁ་ཉ་ར་བདག་འཛིན་བྱ་དགོས་པ་མི་འདུག་སྙམ་པའི་ངང་ལ་བཞག་གོ །གཉིས་པ་བདག་འཛིན་ཡུལ་ནས་འདོན་པ་ནི། དེ་ལྟར་སྦྱིན་པར་བཏང་བའི་སྣང་ཙམ་གྱི་ལུས་འདི་འགྲོ་རུང་། སྡོད་རུང་། ཉལ་རུང་། བདག་པོ་མེད་པའི་ཁང་སྟོང་ངམ། དུར་ཁྲོད་དུ་བོར་བའི་མི་རོའམ། ལམ་ཁར་བོར་བའི་ས་རྡོ་བཞིན་དུ་སྣང་མེད། ཞེན་མེད། འཛིན་མེད། ལྟོས་མེད། བདག་མེད། དགོས་མེད། བདེན་མེད་ཀྱི་ངང་དུ་བཞག་གོ །གསུམ་པ་ཕུང་པོ་གཟན་དུ་བསྐྱུར་བ་ནི། ལུས་འདི་ལ་ན་ཚ་དང་གནོད་པ་བརྡུངས་བརྡེགས་སོགས་ཅི་བྱས་ཀྱང་འཛིན་པ་མེད། ལུས་འདི་ངའི་མིན། ང་ལ་མི་དབང་། ངས་བདག་ཏུ་མི་བཟུང་། ཁྱོད་རང་ལ་དབང་བ་ཡིན་པས། ཅི་དགའ་བར་ལོངས་སྤྱོད་ཅིག །དམྱལ་བར་བསྐྱུར་ནའང་བསྐྱུར་སྙམ་པ་བྱས་ལ། རེ་དོགས་གང་ཡང་མི་བྱའོ། །རྗེས་ལ་བདག་དང་ལྷ་འདྲེ་གཅོད་བྱེད་དང་གསུམ་ཡིད་ལ་
མི་བྱེད་པར་སྟོང་པ་གསུམ་གྱི་ངང་ལ་གང་དགར་བཞག །དེ་ལྟར་བྱས་པས་ཚོགས་རྫོགས། སྒྲིབ་པ་དག །ལན་ཆགས་བྱང་། ལུས་ཀྱི་བདག་འཛིན་ཐོངས་ཏེ། སེམས་ཀྱི་དེ་ཉིད་རྟོགས་པར་འགྱུར་རོ། །ནུབ་གཉིས་པའི་ཉམས་ལེན་ནི། དང་པོ་གཅོད་པ་ལ་འགྲོ་ཙ་ན། ངོ་སྤྲོད་ལ་བརྟན་པ་ཐོབ་པ། ཉམས་ལེན་གྱིས་བློ་བསྐྱུར་ཆེ་བ། བདེ་སྡུག་ལ་ཐོག་བརྫིས་ནུས་པ་དང་གསུམ་ཚང་བ་ཞིག་དགོས་ཏེ། དང་པོ་ནི་སྔོན་འགྲོས་ངོ་སྤྲོད་ཀྱི་སེམས་ལེགས་པར་འཕྲོད་པར་བྱས་ལ། དོ་ནུབ་ཆོ་འཕྲུལ་དང་བར་གཅོད་ཅི་བྱུང་ཡང་སྐྱེ་མེད་སེམས་ཀྱི་ཆོ་འཕྲུལ་ཡིན། དེ་བས་འཁོར་འདས་རིགས་དྲུག་གིས་བསྡུས་པའི་ཆོས་ཐམས་ཅད་སྐྱེ་མེད་སེམས་ཀྱིཆོ་འཕྲུལ་ཡིན། དོན་ལ་བདེན་པར་གྲུབ་པ་གཅིག་ཀྱང་མེད་སྙམ་དུ་ཤེས་པར་བྱའོ། །གཉིས་པ་ནི་ཉམས་དང་རྟོགས་པའི་གདེང་བཟང་པོས་འགལ་རྐྱེན་དང་བར་ཆད་ཅི་བྱུང་ཡང་ཉམ་ང་བག་ཚ་མེད་པར་རྟོགས་པ་དང་
རྗེས་ཤེས་ཀྱིས་བདེན་མེད་དུ་རྟོགས་པའི་ཆུ་ལ་རལ་གྲི་བརྒྱབ་པ་ལྟར་གོ་བར་བྱའོ། །གསུམ་པ་ནི་བདེ་སྡུག་ཅི་བྱུང་ཡང་འདི་དག་ཐམས་ཅད་ཀུན་རྫོབ་ཡིན། བདེན་པར་གྲུབ་པ་རྡུལ་ཙམ་ཡང་མེད་ཅིང་། སྒྱུ་མའི་དཔེ་བཅུ་དྲུག་དང་འདྲ་བ་ཡིན་སྙམ་དུ་ཤེས་པར་བྱས་ལ་འགྲོ་བར་བྱའོ། །སླེབ་ནས་ཉམས་ལེན་ནི། ཕྱི་འཇིགས་ཡུལ་གྱི་ལྷ་འདྲེ་རྩད་བཅད་པ། ནང་འཇིགས་མཁན་གྱི་རྣམ་རྟོག་རྩད་བཅད་པ། བར་འཇིགས་པའི་ངོ་བོ་རྩད་བཅད་པ་དང་གསུམ་ལས། དང་པོ་ནི་འཇིགས་ཡུལ་གྱི་ལྷ་འདྲེ་དེ་དང་པོ་གང་ནས་འོངས། བར་དུ་གར་གནས། ཐ་མར་གར་འགྲོ་བལྟ། ལྷ་འདྲེ་དེའི་དབྱིབས་གྲུ་བཞིའམ། ཟླུམ་པོ་སོགས་ཅི་འདྲ་འདུག་བལྟ། ཁ་དོག་དཀར་དམར་སོགས་ཅི་འདྲ་འདུག་བལྟ། མིག་གིས་ལྷ་འདྲེའི་གཟུགས་ལ་བལྟ། རྣ་བས་སྒྲ་ལ་ཉན། སྣས་དྲི་ལ་བསྣོམ། ངག་ཏུ་གཏམ་སྨྲ། ལག་ཏུ་འདྲེ་བཟུང་ལ་ཅི་འདྲ་འདུག་བལྟ། དེ་ལྟར་
བལྟས་པས་མ་རྙེད་པ་དང་སྟོང་པའི་ངང་དུ་བཞག་གོ །གཉིས་པ་འཇིགས་མཁན་གྱི་རྣམ་རྟོག་དེ་ཡ་གི་སྤྱི་བོའི་གཙུག་ནས་མ་གི་རྐང་པའི་མཐིལ་ཡན་ཆད་ཕྱི་ནང་གསང་གསུམ་གང་དུ་འདུག །འཇིགས་མཁན་དེའི་དབྱིབས་དང་ཁ་དོག་སོགས་ཅི་འདྲ་འདུག་ལྟས་པས། མ་རྙེད་པ་དང་སྟོང་པའི་ངང་ལ་བཞག་གོ །བར་འཇིགས་པའི་ངོ་བོ་རྩད་བཅད་པ་ནི། འཇིགས་པ་ཞེས་བྱ་བའི་ངོ་བོ་དེ་འདྲ་ཅི་འདྲ་ཞིག་འདུག །གནས་གང་ན་འདུག །དབྱིབས་དང་ཁ་དོག་ཅི་འདྲ་འདུག་ལྟ། དེ་ལྟར་བལྟས་པས་ཕྱི་ནས་འཇིགས་ཡུལ་མ་རྙེད། ནང་ནས་འཇིགས་མཁན་མ་རྙེད། བར་ན་འཇིགས་པའི་ངོ་བོ་མ་རྙེད་པ་དེ། ཡོད་ན་རྙེད་འོངས་པ་ལ། མེད་ནས་མ་རྙེད་པ་ཡིན་པས། དེའི་ངང་ལ་འབོལ་ལེར་བཞག་གོ །ནུབ་གསུམ་པའི་ཉམས་ལེན་ནི། དང་པོར་གཅོད་ལ་འགྲོ་ཙ་ན། ལྟ་བའི་རྦད་ཁམས་ཆེ་བ། སྒོམ་པའི་ཉམས་དང་ལྡན་པ། སྤྱོད་པའི་སྙིང་ཁམས་ཆེ་བ་དང་
གསུམ་གྱི་ངང་ནས་འགྲོ་སྟེ། དེ་ལ་ལྟ་བའི་རྦད་ཁམས་ཆེ་བ་ནི། ཡར་སངས་རྒྱས་ཀྱི་སྐུ་དང་ཡེ་ཤེས་ཀྱང་དོན་དམ་པར་བདེན་པར་གྲུབ་པ་མེད། མར་དམྱལ་བའི་ཚེ་ཚད་དང་། ལུས་ཚ་གྲང་གི་སྡུག་བསྔལ་ཡང་དོན་དམ་པར་བདེན་པར་གྲུབ་པ་རྡུལ་ཙམ་ཡོད་མ་མྱོང་སྙམ་པ་བྱའོ། །སྒོམ་པའི་ཉམས་དང་ལྡན་པ་ནི། སྔར་ངོ་སྤྲོད་ཀྱི་སྐབས་སུ་ངོ་སྤྲད་པའི་ཉམས་ལེན་དང་མ་བྲལ་བར་བྱས་ལ། མཉམ་གཞག་ཏུ་ཆོས་ཐམས་ཅད་ནམ་དུ་ཡང་མེད་པ་སྟེ། སྣང་བ་ཙམ་ཡང་མེད་པ་ནམ་མཁའི་དཀྱིལ་ལྟ་བུ། རྗེས་ཐོབ་ཏུ་སྣང་བ་ཙམ་ཡོད་ཀྱང་། དེ་བདེན་པ་མེད་པ་རྨི་ལམ་སྒྱུ་མ་ལྟ་བུ་ཤེས་པར་བྱའོ། །སྤྱོད་པའི་སྙིང་ཁམས་ཆེ་བ་ནི། ན་ཚ་སྡུག་བསྔལ་འགལ་རྐྱེན་བར་ཆད་གདུག་རྩུབ་ལ་སོགས་ཅི་བྱུང་ཡང་ཉམ་ང་བག་ཚ་མེད་པ། ཐེ་ཚོམ་སོམ་ཉི་མེད་པ། སྤང་བླང་དགག་སྒྲུབ་མེད་པ། རེ་དོགས་ཚམ་ཚོམ་མེད་པར་ལུག་ཁྱུའི་ནང་དུ་སྤྱང་ཀི་རྒྱུག་པ་
བཞིན་ནམ། རི་དྭགས་དབུས་སུ་སེང་གེ་མཆོངས་པ་བཞིན་ཉམ་ང་བག་ཚ་མེད་པར་འགྲོ་བ་ཡིན་ནོ། །སླེབ་ནས་ཚིག་གསུམ་པོ་འདི་ཉམས་སུ་ལེན་པར་བྱ་སྟེ། དེ་ལ་ལྷ་འདྲེ་ལ་བརྟེན་ནས་རྣམ་རྟོག་རྩད་བཅད་པ། འཇིག་པ་ལ་བརྟེན་ནས་བདག་འཛིན་རྩད་བཅད་པ། བར་ཆད་ལ་བརྟེན་ནས་འཁོར་འདས་རྩད་བཅད་པ་དང་གསུམ་ལས། དང་པོ་ལྷ་འདྲེ་ལ་བརྟེན་ནས་རྣམ་རྟོག་རྩད་བཅད་པ་ནི། འདི་ལྟར་སེམས་ཉིད་ད་ལྟ་ཡང་དངོས་པོ་ཡོད་མ་མྱོང། ཕྱིས་ཀྱང་དངོས་པོ་སྐྱེ་མི་སྲིད་པས། དེས་ན་སེམས་ཉིད་འདི་འདྲ་ནི་ཁྱོད་བས་ང་བདག་པོས་ཀྱང་མ་ཤེས་ན། འདྲེ་ཁྱོད་ཀྱིས་རྙེད་ན་ཚོལ་ཞིག་བྱས་ལ། འདྲེ་དེ་ནག་པོ་ཆེན་པོ། ཡོར་ནག་པོ་ཆེན་པོ། ཡོར་ཡོར་པོ། འཇིགས་སུ་རུང་བ། རྐང་ལག་མང་པོ། མཚོན་ཆ་སྣ་ཚོགས་ཐོགས་པ་ཞིག་བསྐྱེད་ལ། དེས་རང་ལ་གནོད་པ་སྣ་ཚོགས་སྐྱེལ་པར་བསྒོམ། སེམས་དངོས་མེད་ལ་ཕན་གནོད་འདུག་
གམ་མི་འདུག་བལྟ། སེམས་དངོས་མེད་དེ་དངོས་པོར་འགྱུར་རམ་མི་འགྱུར་བལྟ། ལྷ་འདྲེ་བདེན་པར་འདུག་གམ་མི་འདུག་བསྟ་བར་བྱའོ། །གཉིས་པ་འཇིགས་པ་ལ་བརྟེན་ནས་བདག་འཛིན་རྩད་བཅད་པ་ནི། འཇིགས་པ་བྱུང་ན་དེ་བས་ཀྱང་འཇིགས་ཤིང་། ཉམ་ཇེ་ང་དང་བག་ཇེ་ཚ་ལ་བཏང་། དེ་ལ་བརྟེན་ནས་འགྱུ་བྱེད་ཀྱི་ཤེས་པ་དངོས་མེད་འདི་རྙེད་དམ་མི་རྙེད་བལྟ། འཇིགས་པའི་མཁན་པོ་དང་འཇིགས་པའི་རྒྱུ་ཅི་འདྲ་ཞིག་འདུག་ལྟ་བར་བྱའོ། །གསུམ་པ་བར་ཆད་ལ་བརྟེན་ནས་འཁོར་འདས་རྩད་བཅད་པ་ནི། བར་ཆད་ཡོང་གི་དོགས་པ་དང་། མི་ཡོང་དུ་རེ་བ་དང་། བྱུང་བའི་བར་ཆད་དངོས་དང་བཅས་པ་ཐམས་ཅད་སེམས་ཀྱི་ཆོ་འཕྲུལ་ཡིན། དེ་བས་འཁོར་འདས་གཉིས་ཀྱང་སེམས་ཀྱིས་བྱས་པ་ཡིན། འཁོར་བར་འཁྱམས་ཀྱི་དོགས་དང། སངས་རྒྱས་ཐོབ་ཏུ་རེ་བ་ལ་སོགས་པ་ཐམས་ཅད་སེམས་ཀྱི་ཆོ་འཕྲུལ་ཡིན། འཁོར་འདས་
གཉིས་ཀྱི་བར། བདེ་སྡུག་གཉིས་ཀྱི་བར། འཇིགས་མི་འཇིགས་གཉིས་ཀྱི་བར་ན་རེ་དོགས་ཀྱིས་རྟོག་འགྱུ་ཙམ་ལས་མེདཔས། དེ་གཏན་ལ་འབེབ་ཅི་ཐུབ་བྱ། གཉན་སར་ཉལ་དུ་འགྲོ་བ་དེ། འདྲེ་ཡོང་ནས་ཉལ་དུ་འགྲོ་བ་མིན། འདྲེ་ལ་དོ་བདེ་རུ་འགྲོ་བ་མིན། ཕྱི་འཇིགས་པའི་ཡུལ་ལ་བརྟེན་ནས། ནང་འཇིགས་མཁན་གྱི་རིག་པ་དེ་རྩད་བཅད་པ་ཡིན། སྙད་འདྲེ་ལ་བཏགས་ནས། ནང་འདྲེ་འཛིན་གྱི་ཤེས་པ་གཏན་ལ་འབེབ་པ་ཡིན་ནོ། །ནུབ་བཞི་པའི་ཉམས་ལེན་ནི། དང་པོ་གཅོད་ལ་འགྲོ་ཙ་ན། ཆེ་བ་གསུམ་དང་ལྡན་པས་འགྲོ་བ་བྱ་ཞེས། བྱིན་རླབས་ཀྱི་རྒྱབ་ཚན་ཆེ་བ། གདམས་པའི་ཆོས་རྒྱུས་ཆེ་བ། ལུས་སྲོག་གི་གཏོང་ཕོད་ཆེ་བ་དང་གསུམ་ལས། དང་པོ་བྱིན་རླབས་ཀྱི་རྒྱལ་མཚན་ཆེ་བ་ནི། སྤྱིར་བླ་མ་དཀོན་མཆོག་ལ་མོས་གུས་གདུང་བས་སྐྱབས་འོག་ཏུ་ཚུད་ཤིང་། བྱིན་རླབས་ཞུགས་པ་ཞིག་དགོས་ལ། ཁྱད་པར་དུ་གཅོད་ལ་འགྲོ་བའི་ཚེ།
བདག་གིས་ལྷ་འདྲེ་དང་བར་ཆད་ལམ་དུ་ལོངས་པར་བྱིན་གྱིས་བརླབ་ཏུ་གསོལ། འགལ་རྐྱེན་དང་བར་ཆད་བདེ་སྡུག་རོ་སྙོམས་ནུས་པར་བྱིན་གྱིས་བརླབ་ཏུ་གསོལ། ན་ཚ་དང་སྡུག་བསྔལ་དགེ་སྦྱོར་གྱི་གྲོགས་སུ་འཆར་བར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ་ནས། ལུས་ལོངས་སྤྱོད་ཁ་རྗེ་དབང་ཐང་བཅས་པ་ཐམས་ཅད་མཎྜལ་དུ་བློས་ལིང་གི་འབུལ་ཏེ། དུས་དོ་ནུབ་ནས་ལུས་ངག་ཡིད་གསུམ་བདག་ལ་མི་དབང་ཞིང་། བླ་མ་དཀོན་མཆོག་ལ་འབུལ་བ་ཡིན་པས། མཐོར་གཏོང་། དམར་གཏོང་། གང་ན་ཅི་བྱེད་བླ་མ་དཀོན་མཆོག་རང་མཁྱེན་སྙམ་པ་བྱའོ། །གཉིས་པ་གདམས་པའི་ཆོས་རྒྱུས་ཆེ་བ་ནི། སྤྱིར་ཐེག་པ་ཆེན་པོའི་ཆོས་ཐམས་ཅད་དང་། བྱེ་བྲག་བདེ་སྡུག་ལམ་ཁྱེར་གྱི་གདམས་པ། ཁྱད་པར་དུ་ཟབ་མོ་གཅོད་ཀྱི་མན་ངག་སོགས་ལ་ཐོས་པ་ཆེ་བ། ཐོས་དོན་ཁོང་དུ་ཆུབ་ཅིང་རྒྱུད་ལ་གོམས་པར་བྱས་ནས།
ཆོ་འཕྲུལ་དང་གདུག་རྩུབ་ཅི་བྱུང་ཡང་ནང་རིག་པ་སེམས་ཀྱི་ཆོ་འཕྲུལ་ཡིན། ཕྱི་ནང་གང་དུའང་བདེན་པར་གྲུབ་པ་སྐད་ཅིག་ཀྱང་མེད་སྙམ་པ་བྱའོ། །གསུམ་པ་ལུས་སྲོག་གི་གཏོང་ཕོད་ཆེ་བ་ནི། གཅོད་ལ་ཕྱིན་ན་ན་ཚ་དང་བར་ཆད་སྡུག་བསྔལ་འཇིགས་སྐྲག་སོགས་མི་འབྱུང་ངམ་སྙམ་པའི་སྔོན་དུ་རྣམ་རྟོག་གི་དོགས་པ་མི་བྱ་བར། གཅོད་འདི་ཡང་དག་པར་རྫོགས་པའི་སངས་རྒྱས་ཀྱི་བཀའ་ཤེས་རབ་ཀྱི་ཕ་རོལ་ཏུ་ཕྱིན་པ་ནས་གསུངས་པ་ཡིིན། ཨ་མ་ཇོ་མོ་ལ་སོགས་པའི་གྲུབ་ཐོབ་ཐམས་ཅད་ཀྱང་ལམ་འདི་ལ་བརྟེན་ནས་རྟོགས་པ་འཁྲུངས་ཤིང་ཡོན་ཏན་སྐྱེས་པ་ཡིན། ཀུན་རྫོབ་ཏུ་ལུས་བཞི་འདུས་ཀྱི་ཕུང་པོ་འདི་སྐྱེས་ནས་འཆི་བ་ལས་མ་འདས་པས་ན། འཆི་བའི་མཚོན་ཐོགས་པའི་སྐྱེས་བུ་སྟོང་གིས་བསྲུངས་ཀྱང་མི་ཐུབ། དོན་དམ་པ་ལ་ནི་བདུད་དམག་བྱེ་བ་དུང་ཕྱུར་གྱིས་བསྐོར་ཡང་བར་གཅོད་དང་གནོད་པ་སྐྱེལ་མི་ནུས། ལུས་མི་གཙང་བའི་
ཕུང་པོ། རྣག་ཁྲག་གི་རྐྱལ་པ། ཆུ་སེར་གྱི་གོང་བུ། ངར་སྣབ་ཀྱི་སྡོང་པོ་འདིས་ཅི་བྱེད། འདྲེ་ཁྱོད་ལ་དགོས་ན་ད་ལྟ་ཉིད་དུ་ཁྱེར་ཅིག །སྤྱིར་འགྲོ་དྲུག་ཡོངས་ཀྱི་གླུད་དུ་བསྔོ། སྒོས་ལྷ་འདྲེ་ཁྱོད་ཀྱི་དོན་དུ་གཏོང་བ་ཡིན་པས། ལུས་འདིར་ཆགས་ཞེན་ཏིལ་འབྲུ་ཙམ་ཡང་མེད་སྙམ་པ་བྱ་སྟེ། སྙེམས་མེད་ཞེན་མེད་དུ་བསྐྱུར་ནས་འགྲོ་བར་བྱ། །སླེབ་ནས་ཉམས་ལེན་ནི། ལྟ་བ་སྟོང་ཉིད་དུ་ཐག་བཅད་པ། སྒོམ་པ་དྲན་མེད་ཀྱི་ངང་དུ་འཇོག་པ། སྤྱོད་པ་བདེ་སྡུག་ཐམས་ཅད་རོ་སྙོམས་པ་དང་གསུམ་ལས། དང་པོ་ལྟ་བ་ཞེས་བྱ་བ་ཡུལ་སྟོང་ཉིད་ལ་བལྟ། ལྟ་མཁན་སེམས་རིག་པ་དངོས་མེད་འདིས་བལྟ། ལྟ་ཡུལ་སྤྱིར་གང་ལའང་མི་དམིགས་པ་ལ། བློས་གང་དུའང་མི་འཛིན་པར་ཡུལ་ཅན་སྟོང་པའི་དབྱིངས་སུ་འཇོག་སྟེ། དེའི་ངང་ལ་ལྷ་འདྲེ་དང་བར་ཆད། གདུག་རྩུབ་དང་མཐོ་འཚམས་པ་སོགས་གང་བྱུང་ཡང་གནོད་པའི་འདྲེར་མི་བལྟ། མི་འཛིན།
མི་སྒོམ། ཕན་པའི་ཆོས་དང་གདམས་ངག །སྐྱོབ་པའི་ལྷ་དང་བླ་མ་སོགས་ལ་མི་བལྟ་བར། སྐྱེ་མེད་སྟོང་པ་དངོས་མེད་ཅི་ཡང་མ་གྲུབ་པའི་ངང་དུ་འཇོག་གོ །གཉིས་པ་སྒོམ་པ་དྲན་མེད་ཀྱི་ངང་དུ་འཇོག་པ་ནི། ཆོ་འཕྲུལ་ཅི་བྱུང་ཡང་འདྲེར་འཛིན་དང་འཇིགས་པའི་རྟོགས་པ་མི་བྱ། འགལ་རྐྱེན་དང་བར་ཆད་སོགས་མི་མཐུན་པ་ཅི་བྱུང་ཡང་། དེའི་རྗེས་སུ་མི་མནོ། མི་འགྱུ། མི་དྲན། མི་བསམ་པར་བརྗེད་དུ་བཅུག་སྟེ་རང་ཡལ་རང་གྲོལ་གྱི་ངང་དུ་བཞག །དེ་ལྟར་བྱས་ཀྱས་མ་ཕན་ན། དེའི་རྩད་བཅད་དེ་མཐར་ཐུག་རང་བཞིན་མེད་པའི་ངང་ལ་བཞག་གོ །གསུམ་པ་སྤྱོད་པ་བདེ་སྡུག་རོ་སྙོམས་པ་ནི། འཇིགས་ཤིང་ཡ་ང་བ་དང་། བྲེད་ཅིང་སྐྲག་པའི་ཉམ་ང་བག་ཚ་སོགས་བྱུང་ན། སྔར་ལས་བརྒྱ་འགྱུར་གྱི་འཇིགས་པ་ཆེ་བར་བསྒོམ་སྟེ། འཇིགས་པ་དང་གང་འཇིགས་པའི་ངོ་བོ་ལ་ཅེར་གྱིས་བལྟ་ལ། དེ་གང་ནས་བྱུང་། གང་ན་གནས། ཅི་འདྲ་འདུག་རྐྱང་
དེད་བྱེད་ནས་རྩད་བཅད་དེ། མ་རྙེད་ན་དེའི་ངང་ལ་བཞག་པས་འཇིགས་པ་རང་གྲོལ་དུ་འགྲོའོ། །ནུབ་ལྔ་པའི་ཉམས་ལེན་ནི། དང་པོ་གཅོད་ལ་འགྲོ་ཙ་ན། ཉམས་དང་ལྡན་པས་འགྲོ་བར་བྱ་སྟེ། ཕྱིའི་གཅོད་ཡུལ་སྟོང་པར་ཤེས་པ། ནང་གི་གཅོད་མཁན་སྟོང་པར་རྟོགས་པ། བར་གྱི་གཅོད་ཚུལ་བདེན་མེད་དུ་གོ་བ་དང་གསུམ་ལས། དང་པོ་ཕྱིའི་གཅོད་ཡུལ་འདྲེ་དང་བཙན། བདུད་དང་གདོན་བགེགས། ཀླུ་དང་ས་བདག །ཕོ་གདོན་མོ་གདོན། རྒྱལ་པོ་དཀོར་བདག །དྲི་བོ་དྲི་མོ་ལ་སོགས་པ་ཐམས་ཅད་སྟོང་པར་ཤེས་པར་བྱ། གཞན་ཡང་ཐབ་དང་གཞོག །འཁོན་དང་ཡུག །གྲིབ་དང་མནོལ། མཛེ་དང་ཕོལ་སྐྲན། རྨུ་ཆུ་དང་གག་ལྷོག །རིམ་དང་རྒྱུ་གཟེར། ན་ཚ་དང་སྡུག་བསྔལ་སོགས་ལ་བརྟེན་ནས་གནས་སྐབས་ལུས་དང་སྲོག་ལ་བར་དུ་གཅོད་པ། མཐར་ཐུག་མཐོ་རིས་དང་ཐར་པའི་གེགས་བྱད་པ། འཕགས་པའི་ནོར་འཕྲོག་
ཅིང་དགེ་བ་ལ་བར་དུ་གཅོད་པ། བསམ་གཏན་དང་ཏིང་ངེ་འཛིན་གྱི་སྲོག་འཕྲོག་པ་ཐམས་ཅད་སྟོང་པ་ཉིད་དུ་ཤེས་པར་བྱའོ། །གཉིས་པ་ནང་གཅོད་མཁན་གྱི་ལུས་ངག་ཡིད་གསུམ་དང།ཕུང་པོ་ཁམས་དང་སྐྱེ་མཆེད་རྣམས་ལས་དང་ཉོན་མོངས་པས་ཉེར་ལེན་བྱས་པའིབློ་དང་ཤེས་པ། གོ་ཆ་དང་གཉེན་པོ་ཐམས་ཅདགདོད་ནས་སྟོང་པར་ཤེས་པར་བྱའོ། །གསུམ་པ་བར་གྱི་གཅོད་ཚུལ་སྤྱིར་གྱི་བཀའ་མདོ་རྒྱུད། སྒོས་སུ་བླ་མ་བརྒྱུད་པའི་གསུང་བགྲོས། ཡང་སྒོས་རང་གིས་ཉམས་སུ་བླངས་པའི་ལྟ་སྒོམ་སྤྱོད་གསུམ་སོགས་ཐམས་ཅད་སྟོང་པར་རྟོགས་པར་བྱ། མདོར་ན་བར་དུ་གཅོད་པའི་གདོན་བགེགས། གཅོད་བྱའི་ཡུལ་གང་ཟག་བར་གཅོད་ཀྱི་ངོ་བོ། དེའི་གཉེན་པོ་གཅོད་བྱེད་ཀྱི་གདམས་པ་བཅས་པ་ཐམས་ཅད་སྟོང་ཉིད་དུ་ཤེས་པར་བྱས་ན། སྟོང་པ་ཉིད་ལ་སྟོང་པ་ཉིདཀྱིས་གླགས་མི་རྙེད། དངོས་པོ་མེད་པ་ལ་དངོས་པོ་མེད་པས་གླགས་མི་རྙེད།
མཚན་མ་མེད་པ་ལ་མཚན་མ་མེད་པས་གླགས་མི་རྙེད་པས། དེ་དག་ཐམས་ཅད་འཁོར་གསུམ་ཡོངས་སུ་དག་པས་སྟོང་པ་ཉིད་ཀྱི་ངང་ནས་འགྲོ་བར་བྱ། སླེབས་ནས་ཉམས་ལེན་ནི། ལྷ་འདྲེ་ལ་སྙིང་རྗེ་བསྒོམ་པ། འཇིགས་པ་ལ་སྟོང་ཉིད་བསྒོམ་པ། བདག་འཛིན་ལ་ཐོག་བརྫིས་བྱ་བ་དང་གསུམ་ལས། དང་པོ་ལྷ་འདྲེ་ལ་སྙིང་རྗེ་བསྒོམ་པ་ནི། གཉན་ས་དེའི་གཞི་བདག་གིས་གཙོ་བྱས་པའི་སྤྱིར་ནམ་མཁའ་དང་མཉམ་པའི་སེམས་ཅན་ཐམས་ཅད། སྒོས་སུ་བདག་ལ་བར་ཆད་རྩོམ་པའི་ལྷ་འདྲེ་རྣམས་ལ་ཚད་མེད་པའི་བྱམས་པ་དང་སྙིང་རྗེ་ཡང་ཡང་བསྒོམ་དགོས་ཏེ། འདི་དག་རྒྱུ་མ་རིག་པ་ལ་བརྟེན་ནས། རྐྱེན་ཞེ་སྡང་གདུག་རྩུབ་དང་མ་བྲལ་ནས། འབྲས་བུ་ངན་སོང་དང་ངན་འགྲོ་ཁོ་ནར་འཁྱམས་པ་དང་། བྱེད་པ་གཞན་ལ་གནོད་པ་བྱེད། ལས་སུ་སེམས་ཅན་ལ་འཚེ། འདོད་པ་བདེ་བ་འདོད། སྒྲུབ་པ་སྡུག་བསྔལ་འབའ་ཞིག་སྒྲུབ་
པ་འདི་རྣམས་སྙིང་རེ་རྗེ་སྙམ་པའི་ཁ་ཙམ་ཚིག་ཙམ་མ་ཡིན་པར། སྙིང་གི་དཀྱིལ། རུས་པའི་གཏིང་། རྐང་གི་ཁོང་ནས་དྲན་པར་བྱས་ཏེ། སེམས་ཅན་འདི་རྣམས་བདེ་བ་དང་ལྡན། སྡུག་བསྔལ་དང་བྲལ་ནས་མྱུར་དུ་མངོན་པར་རྫོགས་པར་འཚང་རྒྱ་བར་གྱུར་ཅིག །ཅེས་བརྒྱ་རྩ་རེ་བརྗོད་དེ། ཚིག་དོན་གཉིས་སུ་མེད་པའི་འགྲོ་བ་སེམས་ཅན་ཀུན་གྱི་དོན་དུ་བདག་གི་ལུས་ངག་ཡིད་གསུམ་དགེ་ལ་བསྐུལ་ཞིང་། ཟབ་མོ་གཅོད་ཀྱི་གདམས་པ་ཉམས་སུ་ལེན་པར་བགྱིའོ་སྙམ་པ་བྱ། གཉིས་པ་འཇིགས་པ་ལ་སྟོང་ཉིད་བསྒོམ་པ་ནི། སྤྱིར་སྣང་སྲིད་འཁོར་འདས་ཀྱི་ཆོས་ཐམས་ཅད་སྟོང་པ་ཉིད་ཡིན་ལ། བྱེ་བྲག་ཏུ་བར་དུ་གཅོད་པའི་བདུད་དང་འབྱུང་པོ་རྣམས་ཀྱང་བདེན་པར་གྲུབ་པ་རྡུལ་ཙམ་ཡང་མེད། དེ་བཞིན་དུ་རང་གི་སྣང་ངོར་ལའང་རབ་རིབ་གྱ་གྱུ་སྣ་ཚོགས་སུ་སྣང་བ་ཐམས་ཅད་ཀྱང་རང་ཉིད་ལོག་རྟོག་འཁྲུལ་པའི་སྣང་བ་ཁོ་ན་ལས་བདེན་པར་གྲུབ་པ་
མེད། ཡོད་ན་གང་ཡོད་མངོན་སུམ་དུ་གསལ་དགོས་པ་ལ། རྒྱུ་མ་གྲུབ་ཅིང་རྟོག་བཏགས་དཔྱད་བཟོས་ཁོ་ན་ཡིན་པས། དེ་ལྟར་ལེགས་པར་བརྟགས་ཤིང་དཔྱད་ན་དངོས་མེད་རང་ཡལ་དུ་འགྲོ་བས་ཤེས་པར་བྱའོ། །གསུམ་པ་བདག་འཛིན་ལ་ཐོག་བརྫིས་བྱ་བ་ནི། ཕྱིའི་ཞེན་ཡུལ་ནོར་ལོངས་སྤྱོད། བཟའ་ཚོ་ཉེ་འབྲེལ་ཐམས་ཅད་ལ་མ་ཆགས་པར་བྱ། ནང་གི་ཞོན་པ་ལྟ་སྒོམ་སྤྱོད་གསུམ། ཐོས་བསམ་བསྒོམ་གསུམ། ཉམས་དང་རྟོགས་པ། མངོན་ཤེས་དང་གྲུབ་རྟགས་ལ་སོགས་རང་གི་རྒྱུད་ལ་ཡོན་ཏན་ཅི་ཡོད་ཀྱང་། དེ་ལ་ང་དང་བདག་ཏུ་མི་བཟུང་། ཆགས་ཞེན་དང་རློམ་སེམས་མི་བྱ། བར་གྱི་ཞེན་པ་ལུས་དང་སྲོག །ཚེ་དང་དབུགས། སྟོབས་དང་གཟི་བརྗིད། བཀྲག་དང་མདངས། ཤ་དང་ཁྲག་ལ་སོགས་གང་གཅེས་པ་དེ་བདག་ཏུ་མི་འཛིན་པར་ངན་སྐྱུགས་བཞིན་དུ་བོར། ཕྱི་ས་བཞིན་དུ་དོར། ངར་སྣབ་བཞིན་དུ་བསྐྱུར་ལ།
བདག་ལ་དགོས་པ་མེད་ཅིང་། ཞེན་ཆགས་རྡུལ་ཙམ་ཡང་མེད་པས། སུ་དགའ་བར་ཁྱེར་ཅིག་བྱས་ལ་བསྡད་དོ། །ནུབ་དྲུག་པའི་ཉམས་ལེན་ནི། དང་པོ་གཅོད་ལ་འགྲོ་བའི་དུས་སུ། སེང་གེ་ལྟར་ཉམ་ང་མེད་པར་འགྲོ་བ་དང་། སྟག་མོ་ལྟར་ངར་དང་བཅས་པར་འགྲོ་བ། རི་གཟར་གྱི་རྦབ་ལྟར་ཐོགས་རྡུག་མེད་པར་འགྲོ་བ་དང་གསུམ་ལས། དང་པོ་སེང་གེ་ལྟར་འགྲོ་བ་ནི། ཡ་གི་སྲིད་པའི་རྩེ་མོ་ནས། མ་གི་ན་རག་དམྱལ་བ་ཡན་ཆད་དགྲར་ལངས་ཀྱང་། རིག་པ་སེམས་ཀྱི་ཆོ་འཕྲུལ་ཡིན། བདེན་པར་གྲུབ་པ་སྐད་ཅིག་ཀྱང་མེད་སྙམ་པའི་ངང་ནས་ཉམ་ང་བག་ཚ་མེད་པར་འགྲོ་བར་བྱ། གཉིས་པ་སྟག་མོ་ལྟར་འགྲོ་བ་ནི། སྟོང་ཉིད་གོ་བའི་ཉམས་དང་ལྡན་ཞིང་། བདེན་མེད་ཤེས་པའི་བློ་དང་ལྡན་པའི་ངང་ནས་རིག་པ་ལ་ངར་འདོན། ཤེས་པ་ཧུར་ཕྱུང་། དབང་པོར་བཀྲག་བཏོན། སྤྱོད་པ་རྩུབ་སྟོན་ཅིང་། ཕཊཿབྱས་ལ་འགྲོ་བར་བྱ། གསུམ་པ་རི་གཟར་རྦབ་ལྟར་
འགྲོ་བ་ནི། ཉམ་ང་བག་ཚ་ཅི་བྱུང་ཡང་དེའི་ངང་དུ་མ་ཤོར་བའི་ཡིད་གཉིས་ཚམ་ཚོམ་མེད་པར་གླང་པོ་ཆེ་སྨྱོན་པའམ། ཐོག་བབ་པའམ། རི་གཟར་གྱི་རྦབ་ལྟར་ཐོགས་རྡུག་མེད་པར་འགྲོ་བར་བྱ། སླེབ་ནས་ཉམས་སུ་བླང་བ་ནི། ལྷ་འདྲེ་ཨར་ལ་མནན་པ། རྣམ་རྟོག་ཨར་ལ་གཏད་པ། བདག་འཛིན་ཡུལ་ནས་འདོན་པ་དང་གསུམ་ལས། དང་པོ་ལྷ་འདྲེ་ཨར་ལ་མནན་པ་ནི། གཉན་ཐོག་ཏུ་གཉན་དབབ་པ་ཡིན་པས། ཆུའམ། བྲག་གམ། ཤིང་ངམ། ལྷ་འདྲེ་གནས་པའི་རྟེན་གང་ཡིན་པ་དེའི་སྟེང་དུ་བསྡད་ན། དེས་ལྷ་འདྲེ་ཧར་ལ་ཐོན་ནས་འོང་བ་ཡིན། དཔེར་ན་སྒོ་ཁྱི་སྔར་མ་ཞིག་འཛིན་དུ་ཕྱིན་ན་བྲོས་ནས་འགྲོ་བ་དང་། ལར་ཡང་མན་ངག་ཟབ་མོའི་ཉམས་ལེན་ཅི་ཡང་མེད་པའི་སྐྱེ་བོ་ཕལ་པ་ཞིག་མཚན་མོ་གཉིད་དུ་ཉལ་ཙ་ན། ལྷ་འདྲེ་ཞིག་མི་དེ་ཉལ་བའི་ཁང་པའི་ནང་དུ་འོངས་པ་ཙམ་གྱིས་མི་དེ་ནི་ཤིན་ཏུ་འཇིགས་ཤིང་། ཤེས་པ་
འཐིབ། གྲང་རྡུལ་འཐབ་པ་སོགས་འོངས་པས། དེ་ལྷ་འདྲེའི་ཟིལ་ཡིན། གཅོད་མཁན་ནི་ལྷ་འདྲེ་གནས་པའི་རྟེན་གང་ཡོད་པ་དེར་ཕྱིན་པ་དང་གདོན་བགེགས་རྣམས་ཀྱི་མཐུ་ནུས་གཟི་བརྗིད་སྟོར། རྫུ་འཕྲུལ་ཐམས་ཅད་ཞི་ནས་འགྲོ་བ་ཡིན། དཔེར་ན་དུག་སྦྲུལ་གྱི་ཚང་སྒོར་གླ་རྩི་བཞག་ན། སྦྲུལ་གྱི་དུག་ཞི་ཞིང་ནུས་པ་སྟོང་པ་དང་མཚུངས་སོ། །གཉིས་པ་རྣམ་རྟོག་ཨར་ལ་གཏད་པ་ནི། དང་པོ་གཉན་སར་འགྲོ་མི་ནུས། བར་དུ་ཉལ་མི་ནུས། ཐ་མར་རང་ལུས་སྟེར་མི་ནུས་པ་སོགས་བྱུང་ན། གང་མི་ནུས་པ་དེར་ཡ་ང་ན་ང་ཐོག་ཏུ་བཏང་། འཇིགས་ན་འཇིགས་ཐོག་ཏུ་འགྲོ། བྲེད་ན་བྲེད་ཐོག་ཏུ་ཉལ་ནས་བསྡད་ན་རིག་པའི་སྙེམས་ཐག་ཆོད། བདག་འཛིན་གྱི་སྒྲོག་ལས་གྲོལ། འཇིགས་པའི་རྫུན་ཕུག་རྡིབ། བྲེད་པ་དང་སྐྲག་པའི་ཚོར་བ་སྟོར་ནས་འགྲོ་སྟེ། དཔེར་ན་རྟ་བོང་ངམ། མཛོ་གཡག་འདྲ་ཞིག་ཟམ་པའམ། ལམ་འཕྲང་ཤིན་ཏུ་དོག་པོར་
འགྲོར་མི་ཉན་པ་དེ། དེར་ནན་དུ་ཕུལ་ནས་བཏང་ན། ཕྱིས་ཚམ་ཚོམ་མེད་པར་འགྲོ་བ་བཞིན་ནོ། །གསུམ་པ་བདག་འཛིན་ཡུལ་ནས་འདོན་པ་ནི། ཡ་ང་མཁན། བག་ཚ་མཁན་མི་ནུས་མཁན། མི་ཕོད་མཁན་སོགས་དེ་རྣམས་གང་ན་འདུག །ངོ་བོ་ཅི་འདྲ་འདུག་སོགས་ཞིབ་པར་བལྟས་ཏེ། རིག་པ་རྐྱང་དེད། རྒན་མོ་མཛུབ་ཚུགས་བྱས་ལ། དེའི་རྩད་ལེགས་པར་ཆོད་པར་བྱ། དེ་ལྟར་བྱས་པས་བདག་འཛིན་དེ་གཏད་མེད་དུ་ཡལ་ནས། བདེན་མེད་དུ་འགྲོ་བ་ཡིན་པས། དེའི་ངང་ལ་ཉལ་ནས་བསྡད་དོ། །ནུབ་བདུན་པའི་ཉམས་ལེན་ནི། དང་པོ་གཉན་ཁྲོད་དུ་འགྲོ་བའི་ཚེ། ཚུལ་བཞིའི་སྒོ་ནས་འགྲོ་བར་བྱ་སྟེ། དེ་ལ་ལུས་པོ་རོ་ཡི་ཚུལ་དུ་བྱ། གཉན་ས་དུར་ཁྲོད་ཀྱི་ཚུལ་དུ་བྱ། ལྷ་འདྲེ་ཅེ་སྤྱང་གི་ཚུལ་དུ་བྱ་ཞིང་། ཕུང་པོ་གོག་པོ་འདི་སུས་འདོད་པ་དེས་ཁྱེར་ཅིག་སྙམ་དུ་བསམ་ལ་འགྲོ་བར་བྱའོ། །སླེབ་ནས་ཉམས་ལེན་ནི། ལྟ་བ་བདག་
འཛིན་མེད་པ། སྒོམ་པ་ཡིད་ལ་མི་བྱེད་པ། སྤྱོད་པ་བླང་དོར་མེད་པ། དམ་ཚིག་བསྲུང་མཚམས་མེད་པ། འབྲས་བུ་སྒྲུབ་ཏུ་མེད་པ་དང་ལྔ་ལས། དང་པོ་ལྟ་བ་ནི་རྟག་ཆད་མེད་པ། སྐྱེ་འགགས་མེད་པ། མཐའ་དབུས་མེད་པའི་ཕྱིར། ཕན་པའི་ལྷ་རུ་འཛིན་ཏེ་གསོལ་མཆོད་བྱ་བ་དང་། དངོས་གྲུབ་ལ་རེ་བའང་མི་བྱ། གནོད་པའི་འདྲེ་རུ་བཟུང་སྟེ་ཕྱིར་བསྐྲད་པ་དང་། འོངས་ཀྱི་དོགས་པ་ཡང་མི་བྱ་བར་བླང་དོར་རེ་དོགས་ཅི་ཡང་མེད་པའི་ངང་དུ་བཞག་གོ །གཉིས་པ་སྒོམ་པ་ནི་ཡེ་ནས་སྟོང་ཉིད་ཡིན་ལ། འཁོར་གསུམ་ཡེ་སྟོང་ཡེ་གྲོལ་ཡེ་དག་ཆེན་པོ་དེའི་ངང་དུ་བཅས་བཅོས་མེད་པར་བཞག་པ་ལས། གློ་བུར་དུ་ལྷ་འདྲེའི་གནོད་པ་དང་། བར་ཆད་འོངས་ཀྱི་དོགས་པ་སོགས་མི་བྱའོ། །གསུམ་པ་སྤྱོད་པ་ནི་དགེ་བཅུ་སྒྲུབ་ཏུ་མེད། སྡིག་པ་སྤང་དུ་མེད་པས། དགེ་སྡིག་བླང་དོར་གང་ཡང་མེད་པར་གཞི་མ་བཅོས་པའི་ངང་དུ་བཞག་གོ །བཞི་པ་དམ་ཚིག་ནི་ཉན་
ཐོས་ཀྱི་བསྲུང་སྡོམ། བྱང་སེམས་ཀྱི་བསླབ་བྱ། གསང་སྔགས་ཀྱི་དམ་ཚིག་སོགས་དགེ་སྡིག་དགག་སྒྲུབ་བསྲུང་མཚམས་དང་བྲལ་བ་སྟེ། ཐ་ན་གཅོད་བྱ་གཅོད་བྱེད་ཅོད་མཁན་དང་བཅས་པར་འཁོར་གསུམ་ཡོངས་དག་ཡིན། སེམས་ཉིད་ཆོས་སྐུ་ཡེ་ཤེས་ཡིན་པས། ཡེ་དག་ཡེ་གྲོལ་དེའི་ངང་ལ་བཅས་བཅོས་མེད་པར་བྱའོ། །ལྔ་པ་འབྲས་བུ་ནི་ཡར་སངས་རྒྱས་ཐོབ་ཏུ་རེ་བ་དང་། མར་དམྱལ་བར་ལྷུང་དུ་དོགས་པའང་བདེན་པར་མ་གྲུབ་པས། རེ་དོགས་སྤང་བླང་མེད། ལྷ་འདྲེ་དང་གདོན་བགེགས་ཀྱང་བདེན་པར་མ་གྲུབ་པས། ན་ཚ་འགལ་རྐྱེན་དང་བར་ཆད་བསྲུང་དུ་མེད། བསྒྲུབ་བྱའི་སེམས་ཅན་བདེན་པར་མ་གྲུབ་པས། །འགྲོ་བའི་དོན་ཡང་བྱ་རྒྱུ་མེད་པས་ན། དེ་ལྟར་རྟོགས་པའི་ངང་དུ་ཉལ་ལོ། །དེ་རྣམས་ཀུན་རྫོབ་རྫུན་ཕུག་རྡིབ་པའི་མན་ངག །རྣམ་རྟོག་རྩ་བར་གཅོད་པའི་ཉམས་ལེན། འཁོར་འདས་རུ་ཤན་འབྱེད་པའི་ཆོས་ཡིན་
པས། ཞག་བདུན་རིང་ཉམས་ཁྲིད་བྱེད་དེ་ཉམས་སུ་བླང་བར་བྱའོ། །སྤྱིར་གཅོད་བྱེད་པ་ལ་དཀའ་སླའི་བྱེ་བྲག་ཀྱང་། གཉན་ས་ནི་རོ་དང་དུར་ཁྲོད། ལྷ་ཁང་གོག་པོ་དང་། མི་མང་པོ་ཤི་བའི་ཤུལ་རྣམས་འཕྲལ་དུ་འཇིགས་པ་ལྟར་ལ་ཕུག་ཆུང་། འདྲིས་སླ། མཇུག་ཐུང་བ་ཡིན། གད་ཕུག །གྲོག་ཕུག །བྲག་ཕུག །ཐང་ཆེན་པོ་རྣམས་ལ་ནི་འཕྲལ་ཕུག་གཉིས་ཀར་མི་འཇིགས་པ་ཡིན། ཤིང་གཅིག །ཆུ་མིག །རྒྱ་མཚོ། ཕ་བོང་རྣམས་ལ་འཕྲལ་དུ་མི་འཇིགས་པ་ལྟར་ཡང་། མཇུག་ཏུ་བྱིང་ཆེ་ཞིང་འདྲིས་དཀའ་བ་ཡིན། ལྷ་འདྲེ་ནི་པེ་དཀར་དང་། རྒྱལ་པོ། དྲི་བོ་དྲི་མོ་རྣམས་ཀྱིས་ཤེས་པའི་འཚུབས་པ་དང་། རིག་པ་མཐོ་དམན་བྱེད་ཅིང་། འཕྲལ་དུ་གདུག་རྩུབ་ཆེ་ཡང་ལྷོངས་པ་སླ། བྱིང་ཆུང་། ནོན་པ་སླའོ། །དམ་སྲི། བསེན་མོ། མ་མོ་རྣམས་ཀྱིས་ཆགས་པ་ཆེ་ཞིང་། ཐིག་ལེ་འཕྲོག །འགྲོ་སྙིང་འདོད། སེམས་མི་གནས་པ་སོགས་འོངས་ཀྱང་ལྷོངས་པ་དང་ནོན་པ་
སླ། ཕྱིར་འབྲང་འོངས། ཀླུ་བདུད། ཀླུ་གཉན། ས་བདག་རྣམས་ཀྱིས་གཉིད་ཆེ་ཞིང་། ཤེས་པ་ལྕི། རིག་པ་མི་གསལ། བྱིང་རྨུག་ཆེ། འཕྲལ་དུ་ཆོ་འཕྲུལ་ཆུང་། གདུག་རྩུབ་མི་སྟོན་པས་མི་འཇིགས་པ་ལྟར་ཡང་། ལྷོངས་པ་དང་ནོན་པ་དཀའ། བྱིང་ཆེ། མཇུག་ཏུ་ཞེ་གནག་པ་ཡིན། བཙན། ཐེའུ་རང་། ཡུལ་མ་སངས་རྣམས་ཀྱིས་ཟང་ཟིང་མང་ཞིང་། རྨི་ལམ་གཏད་མེད་མང་པོར་སྟོན། མིང་ནས་འབོད། ཤུགས་གླུ་འདེབས་པ། འོ་དོད་འབོད་པ། རྒྱུ་འགྲུལ་མང་བ་སོགས་འོངས་ཀྱང་གནོད་པ་དང་བྱིང་ཆུང་། ལྷོངས་དང་ནོན་སླ་བ་ཡིན་ནོ། །མ་ལྷོངས་པ་དང་མ་ནོན་པ་རྣམས་ལ་ཡུན་བསྲིང་བ་གལ་ཆེ། དེ་ལྟར་རོ་དང་འདྲེ་ལ་གཅོད་པ་བས། ན་ཚ་དང་སྡུག་བསྔལ་ལ་གཅོད་པ་དཀའ། དེ་བས་ཀྱང་ཆགས་སྡང་ཆོས་བརྒྱད་ལ་གཅོད་པ་དཀའ་བས། དེས་ན་ཕྱི་གཅོད་པ་བས་ནང་གཅོད་པས་བོགས་དང་ཡོན་ཏན་ཆེ་ཞིང་། དངོས་གྲུབ་མྱུར་བ་
ཡིན་ནོ། །རྒྱལ་ཡུམ་དྲི་མེད་ཕ་རོལ་ཕྱིན་པའི་ཡུམ། ཕྱིན་ཅི་མ་ལོག་ཡུམ་སྲས་གཉིས་ཀྱིས་མཁྱེན། དེ་ཉིད་ཇི་བཞིན་བླ་མས་ལེགས་པར་བཀོད། ཀུན་གྱིས་དོན་རྟོགས་སངས་རྒྱས་ཐོབ་པར་ཤོག །བཀའ་ཤེས་རབ་ཀྱི་ཕ་རོལ་ཏུ་ཕྱིན་པའི་སྙིང་པོ་གཅིག་ཏུ་བསྡུས་པ་གཉིས་སུ་མེད་པའི་ཡེ་ཤེས། དུས་གསུམ་སངས་རྒྱས་ཐམས་ཅད་ཀྱི་བགྲོད་པ་གཅིག་པའི་ལམ། གྲུབ་ཐོབ་རྟོགས་ལྡན་ཐམས་ཅད་ཀྱི་དངོས་གྲུབ་འབྱུང་བའི་གནས། ཡུམ་སྲས་གཉིས་ཀྱིས་གདམས་པ་ཕྱིན་ཅི་མ་ལོག་པ་ཕ་རོལ་ཏུ་ཕྱིན་པ་མན་ངག་བདུད་ཀྱི་གཅོད་ཡུལ་ལས། ལག་ལེན་ཉམས་ཁྲིད་ཀྱི་སྐོར་རྫོགས་སོ། །པཎྜི་ཏ་དོན་ཡོད་རྡོ་རྗེས་སྦྱར་བའོ། །དགེའོ། །ཞུས་དག་གོ། ༈ །།སྭསྟི་བི་ཛ་ཡནྟུ། རྒྱལ་ཡུམ་ཤེས་རབ་ཕ་རོལ་ཕྱིན་མའི་དོན། །ཟབ་ལམ་ཀུན་གྱི་མཆོག་གྱུར་ལབ་སྒྲོན་གྱི། །དམ་ཆོས་བདུད་ཀྱི་གཅོད་ཡུལ་ཞེས་གྲགས་པ། །རྒྱ་གཞུང་གསུམ་དང་ཤེར་ཕྱིན་དགོངས་པའི་གནད། །བཀའ་ཚོམས་གསུམ་དང་དམ་པའི་ཞལ་གདམས་རྣམས། །བསྟན་དང་འགྲོ་བའི་དཔལ་དུ་ཡོངས་སྨིན་པའི། །ལྷག་
བསམ་དག་པས་བརྩམས་དང་པར་བཀོད་ཀྱང་། །རོ་མཉེ་དང་ནི་མ་གི་ཏ་བཞིན་དུ། །དུག་ཆུས་མྱོས་པའི་སྙིགས་དུས་འགྲོ་བ་ཕལ། །ལོག་ལྟའི་གཡང་སར་རྒྱུག་པ་རྒྱལ་བས་ཀྱང་། །ཚད་མེད་ཐུགས་རྗེས་རྣམ་གྲོལ་ལམ་འཇུག་དཀའ། །ཐུབ་མཆོག་དྲུང་དུ་དྲུག་སྡེ་ལེགས་སྐར་ལྟར། །ཆེར་སྙིགས་འགྲོ་བའི་ཤེས་རྒྱུད་ལོག་རྟོག་སྨག །སེལ་བ་ལྟ་ཞོག་ཕྲག་པ་དོག་པའི་རྒྱུར། །བསྐལ་ཆེན་དུ་མར་སེམས་ཅན་གཅིག་ཕྱིར་དུ། །མེ་ནང་བསྐལ་པ་རྒྱ་མཚོར་བཞུགས་པ་ལ། །མི་དགྱེས་མེད་ན་ལོག་སྒྲུབ་བཟོད་འོས་པས། །འགྲོ་ལ་ཕན་དང་བདེ་བའི་ཆེད་དུ་བསྐྲུན། །བདེ་བར་གཤེགས་པའི་བསྟན་པ་འཇིག་པའི་ཚེ། །ཚིགས་སུ་བཅད་པ་གཅིག་ཙམ་སྦྱིན་དང་བཟུང་། །ཡི་གེ་འབྲི་བའི་བསོད་ནམས་བདེ་གཤེགས་དང་། །མཚུངས་ཞེས་གསུངས་ཕྱིར་མ་ཕོད་འདུ་བྱས་བསྒྲུབས། །སྔོན་གོམས་ཐུགས་བསྐྱེད་བཟང་པོས་མདུན་བསུས་པའི། །མཆོད་སྦྱིན་སྒོ་འཕར་ཡངས་པའི་སྙིང་སྟོབས་ཅན། །དུ་མས་དངོས་རྫས་ཕུལ་བའི་རྣམ་གྲངས་ནི། །ཟུར་བཀོད་ལྟར་ལས་འདི་ན་མ་སྨོས་སོ། །འབྱོར་པའི་དཔུང་ཚོགས་དགེ་བའི་ཚེས་གསུམ་ཟླར། །སྟོང་དང་སྙིང་རྗེའི་བགྲང་བྱའི་ན་འཕར་ཏེ། །སྟོབས་བཅུ་མི་འཇིགས་བཞི་ཡི་ཉ་གང་བས། །ཁམས་གསུམ་མུན་པའི་དགྲ་ལས་རྒྱལ་ཕྱིར་བསྔོ། །ཚོགས་གཉིས་ཟབ་མོའི་ཆབ་ལ་རྐང་པས་འཐུང་། །ལམ་ལྔ་ས་
བཅུའི་ཁོ་ལག་ཡོངས་རྫོགས་རྩེར། །སྨིན་གྲོལ་ཟབ་ཡངས་འཛུམ་པའི་ཆུ་སྐྱེས་ལས། །སྐུ་གསུམ་འབྲས་བུ་ལྷུན་གྱིས་གྲུབ་པར་ཤོག །དེ་མ་གྱུར་གྱི་བར་དུ་ཟབ་པ་དང་། །རྒྱ་ཆེའི་སྣོད་གྱུར་སྲིད་མཚོ་ལས་བརྒལ་ཏེ། །མཐའ་ཀླས་བསྟན་དང་འགྲོ་བའི་དཔུང་དང་བླར། །མངོན་གྱུར་བདེ་གཤེགས་དགོངས་དོན་ལྷུན་གྲུབ་ཤོག །ཅེས་པའང་བཙུན་གཟུགས་རྨོངས་པ་དྷརྨཱ་སེང་གེས་སོ། །དགེའོ། །དགེའོ། །དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །