བརྒྱུད་འདེབས།
ཨོཾ་ཨཱཿཧཱུྃ། །སྲིད་ཞི་ལས་འདས་བདེ་སྟོང་སྒྱུ་འཕྲུལ་གར། །ཆོས་སྐུ་ཀུན་བཟང་ཡབ་ཡུམ་རྡོ་རྗེ་འཆང་། །ཡེ་ཤེས་རོལ་པ་རིགས་ལྔའི་སངས་རྒྱས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །བདེ་ཆེན་སྣང་བ་མཐའ་ཡས་སྒྱུ་མའི་གར། །སྤྱན་རས་གཟིགས་དབང་པདྨ་ཐོད་ཕྲེང་མཆོག །རིག་འཛིན་འཆི་མེད་རྡོ་རྗེ་དྲག་པོ་རྩལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །མ་རུངས་ཚར་གཅོད་སྣང་སྲིད་ཟིལ་གྱིས་གནོན། །ཡེ་ཤེས་ཁྲོ་རྒྱལ་རྡོ་རྗེ་གྲོ་བོ་ལོད། །པདྨ་དབང་ཆེན་རྟ་མཆོག་རྒྱལ་པོ་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོོལ། །རྒྱལ་བ་ཀུན་ཡུམ་རྡོ་རྗེ་རྣལ་འབྱོར་མ། །མནྡཱ་ར་བ་བདེ་ཆེན་དབང་གི་རྒྱལ། །རྡོ་རྗེ་དྲག་མོ་ཌཱ་ཀཱིའི་ཚོགས་བཅས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཆོས་རྒྱལ་ལྷ་སྲས་མུ་ཁྲི་གསང་བའི་བདག །རིག་འཛིན་མི་འགྱུར་རྡོ་རྗེ་ནུས་ལྡན་རྩལ། །
བཀའ་བབས་ཆོས་བདག་བརྒྱུད་འཛིན་བཅས་རྣམས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །ཁམས་གསུམ་ཟ་བྱེད་མ་ནིང་སྲོག་གི་བདག །མ་ཧཱ་ཀཱ་ལ་ཏྲཀྴད་དྲེགས་པའི་རྒྱལ། །བཀའ་དང་གཏེར་སྲུང་ནོར་ལྷའི་ཚོགས་བཅས་ལ། །གསོལ་བ་འདེབས་སོ་མཆོག་ཐུན་དངོས་གྲུབ་སྩོལ། །དེ་ལྟར་གསོལ་བ་བཏབ་པའི་བྱིན་རླབས་ཀྱིས། །བར་ཆད་བདུད་ཀྱི་གཡུལ་ལས་རྣམ་རྒྱལ་ཞིང་། །དབང་བཞིའི་ཡེ་ཤེས་གདོད་མའི་ཀུན་ཏུ་བཟང་། །ཆོས་དབྱིངས་མཆོག་གི་ངོ་བོར་རོ་གཅིག་ཤོག །ཅེས་པའང་མཐིང་དམར་ཅོད་པན་འཆང་བ་ཟུང་གིས་སྣིལ་མོ་བླ་མ་བསྟན་འཕེལ་གྱིས་བསྐུལ་བའི་ངོར་སྤེལ་བ་ཛ་ཡནྟུ།། ཧྲཱིཿ ཡང་དག་རྫོགས་སངས་རྒྱས་དང་དེ་ཡི་སྲས། །རྒྱལ་བ་རྒྱལ་བའི་མྱུ་གུའི་འཁོར་ལོ་ནི། །ཀུན་འདུས་རྗེ་བཙུན་པདྨ་ཐོད་ཕྲེང་རྩལ། །གསོལ་བ་འདེབས་སོ་བདག་གཞན་སེམས་ཅན་རྣམས། །ཚེ་གཅིག་སངས་རྒྱས་འགྲུབ་པར་གྱིན་གྱིས་རློབས། །སྐུ་མཆོག་འཇམ་
དཔལ་གསུང་མཆོག་སྤྱན་རས་གཟིགས། །ཐུགས་མཆོག་ཕྱག་ན་རྡོ་རྗེའི་ལྷ་ཚོགས་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །སྐུ་གསུམ་མྱུར་དུ་འགྲུབ་པར་བྱིན་གྱིས་རློབས། །རྣམ་པར་སྣང་མཛད་མི་བསྐྱོད་རིན་ཆེན་འབྱུང་། །འོད་དཔག་མེད་དང་དོན་ཡོད་གྲུབ་སོགས་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །སྐུ་ལྔ་ཡེ་ཤེས་འགྲུབ་པར་བྱིན་གྱིས་རློབས། །རྡོ་རྗེ་ཕག་མོ་སྤྱན་མ་མཱ་མ་ཀཱི། །གོས་དཀར་སྒྲོལ་མ་རིགས་ལྔའི་མཁའ་འགྲོ་སོགས། །རྒྱལ་བའི་ཡུམ་མཆོག་དེ་དག་ཐམས་ཅད་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །སྐུ་བཞི་མངོན་དུ་འགྱུར་བར་བྱིན་གྱིས་རློབས། །ཡི་དམ་ཀུན་འདུས་རྡོ་རྗེ་གྲོ་ལོད་རྩལ། །ཁྲོ་བོ་བཞི་དང་མཁའ་འགྲོའི་གཙོ་མོ་བཞི། །གིང་བཞི་དཔའ་བོ་བཞི་དང་ཤུགས་འགྲོ་བཞི། །རྡོ་རྗེ་རིན་ཆེན་པདྨ་ལས་ཀྱི་རིགས། །མཁའ་འགྲོ་གིང་དང་ཆོས་
སྐྱོང་ཐམས་ཅད་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །མཆོག་ཐུན་ལས་བཞི་འགྲུབ་པར་བྱིན་གྱིས་རློབས། །ཨཱརྱ་ཛཾ་བྷ་དེ་ཝ་ཀཱ་ལ་དང་། །བསྐལ་བཟང་སངས་རྒྱས་རྒྱལ་པོ་རྣམ་ཐོས་སྲས། །ནོར་བདག་བརྒྱད་དང་ནོར་ལྷ་ཐམས་ཅད་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །བསོད་ནམས་མངའ་ཐང་རྒྱས་པར་བྱིན་གྱིས་རློབས། །མགོན་པོ་བཀའ་བརྒྱད་མ་ནིང་ཏྲཀྴད་དང་། །ཡེ་ཤེས་ཆོས་སྐྱོང་ཕོ་རྒྱུད་མོ་རྒྱུད་ལ། །གསོལ་བ་འདེབས་སོ་བདག་གཞན་སེམས་ཅན་རྣམས། །ས་ལམ་བར་ཆད་ཞི་བར་བྱིན་གྱིས་རློབས། །དེ་ལྟར་རྒྱལ་བ་རབ་འབྱམས་དཀྱིལ་འཁོར་ལ། །རྩེ་གཅིག་ཡིད་ཀྱིས་གསོལ་བ་བཏབ་པའི་མཐུས། །རང་ལུས་ཡི་དམ་ལྷ་རུ་གསལ་བར་ཤོག །ཨ་འཐས་འཆིང་བའི་དགྲ་དང་བྲལ་ནས་ཀྱང་། །གསལ་སྟོང་རིག་སྟོང་བདེ་སྟོང་འདྲེས་གྱུར་ཅིག །ངག་གི་བཟླས་པ་དབུགས་ཀྱི་འབྱུང་རྔུབས་
རླུང་། །འབྲུ་གསུམ་རྡོ་རྗེའི་བཟླས་པ་ལུ་གུ་རྒྱུད། །མ་ཡེངས་རང་བབ་ངང་དུ་འགྲུབ་གྱུར་ཅིག །གྲགས་སྟོང་རང་དབང་ཐོབ་པར་བྱིན་གྱིས་རློབས། །དྲན་རིག་མཁའ་ལྟར་དག་པའི་དབྱིངས་རུམ་དུ། །དྲན་ཤེས་ངོ་བོ་ཨོ་རྒྱན་དོན་རྟོགས་ནས། །སྤྲོས་བྲལ་ལྷན་སྐྱེས་རྫོགས་པ་ཆེ་འགྲུབ་ཤོག། ༈ །།ཧཱུྃ་ཧཱུྃ་ཧཱུྃ། །ལྕང་ལོ་ཅན་དུ་གསང་བའི་བདག །རྡོ་རྗེ་གདན་དུ་མ་འགགས་པ། །ཁ་བ་ཅན་གྱི་ཡུལ་ལྗོངས་སུ། །རིག་འཛིན་ལྷ་སྲས་མུ་ཁྲི་བཙན། །སློབ་དཔོན་པདྨའི་ཕོ་ཉ་བྲན། །རྒོད་ལྡེམ་རྡོ་རྗེ་གླིང་པ་དང་། །པདྨ་གླིང་པ་ཞིག་པོ་གླིང་། །རིན་ཆེན་ཕུན་ཚོགས་འཇའ་ཚོན་སྙིང་། །དེང་འདིར་ནུས་ལྡན་རྡོ་རྗེ་སོགས། །དྲིན་ཆེན་རྩ་བརྒྱུད་བླ་མ་ལ། །གསོལ་བ་འདེབས་སོ་བྱིན་གྱིས་རློབས། །གཞན་དོན་འཁོར་བ་དོང་སྤྲུག་ལ། །ཐམས་ཅད་མངོན་སངས་རྒྱས་གྱུར་ཅིག །ཅེས་གཏེར་ཆེན་རིན་པོ་ཆེ་ཉིད་ཀྱིས་མཛད་པའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་
ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།