རྡོ་རྗེ་གྲོ་ལོད་ཀྱི་གསང་བའི་སྒྲུབ་པ་མགོན་པོ་ཏྲཀྴད།
དཔེ་ཚན་བརྒྱད་པ་རྡོ་རྗེ་གྲོ་ལོད་ཀྱི་གསང་བའི་སྒྲུབ་པ་མགོན་པོ་ཏྲཀྴད་བཞུགས་སོ༔
༼ཨཱོཾ༽ ༔པདྨ་བཛྲ་ན་མ་ཡེ༔ སངས་རྒྱས་བསྟན་པ་བསྲུང་བའི་ཕྱིར༔ ཕྲིན་ལས་མགོན་པོའི་སྒྲུབ་ཐབས་བསྟན༔ དེ་ཡང་ཕྱི་ནང་གསང་གསུམ་གྱི༔ སྒྲུབ་ཐབས་རྒྱས་པར་བསྟན་པར་བྱ༔ ༼ཝ༽ ༔ཕྱི་ལྟར་གཏོར་མར་བསྟེན་པའི་ཐབས༔ རང་མདུན་ཨེ་ཡི་དཀྱིལ་འཁོར་དབུས༔ འབྲུ་ནག་དཔལ་བཤོས་ཟུར་གསུམ་རྣོ༔ མེ་ཕྲེང་མདུང་དང་བདུད་ཞགས་དང༔ རྡོ་རྗེའི་ལྕགས་ཀྱུ་སྙིང་གིས་བརྒྱན༔ དེ་ཕྱིར་དཔལ་བཤོས་ཟུར་གསུམ་རྣོ༔ ཡུམ་བཞིའི་གཏོར་མ་ལྕགས་ཀྱུས་བརྒྱན༔ དེ་ཕྱིར་དཔལ་བཤོས་ཟུར་གསུམ་བརྒྱད༔ བདུད་མགོན་བརྒྱད་ལ་དགྲ་སྟྭ་དང་༔ སྙིང་དང་ཞགས་པ་ལྕགས་ཀྱུས་བརྒྱན༔ དེ་ཕྱིར་བཟའ་བཅའ་རི་ལྟར་སྤུང་༔ དེ་ནི་ཕྱི་ཡི་བསྟེན་རྫས་
སོ༔ ༼ཞ༽ ༔བྱ་ནག་ཁྱི་ནག་ལུག་ནག་གི༔ སྙིང་གསུམ་རྩ་སྦུབས་རྩ་སྔགས་བཅུག༔ དཀར་དམར་མཐིང་གསུམ་དར་དུ་དྲིལ༔ མདུང་དར་བདུད་ཞགས་ལྕགས་ཀྱུ་རྣམས༔ དེ་ནི་ནང་གི་བསྟེན་རྫས་སོ༔ ༼ཟ༽ ༔གསང་བའི་གནད་ནི་དམ་ཚིག་སྟེ༔ མོས་གུས་བསྐྱེད་ཅིང་དམ་ཚིག་བཟུང་༔ ངོ་བོ་རྩ་བའི་བླ་མ་དང་༔ དབྱེར་མེད་བདག་མདུན་བསྒོམ་པ་ན༔ ཏིང་འཛིན་གསལ་ཞིང་བརྩོན་འགྲུས་ལྡན༔ ཐེ་ཚོམ་སོམ་ཉི་མི་རུང་ངོ་༔ དེ་ནི་གསང་བའི་སྒྲུབ་པ་ཡིན༔ ཉམས་དང་རྨི་ལམ་དངོས་ཀྱང་འོང་༔ དྲག་པོའི་སྐུ་འབག་མཐོང་བ་དང་༔ མཚོན་ཆའི་ཁང་པར་ཕྱིན་པ་དང་༔ གླང་པོ་ཆེ་དང་ཁྱེའུ་ཆུང་༔ རྟ་ནག་ཞོན་དང་རླུང་ནག་འཚུབས༔ དར་ནག་མ་རལ་གོ་བགོས་དང་༔ ལག་
ན་མཚོན་ཆ་ཐོགས་པ་དང་༔ མི་ནག་ཁྱི་ནག་བྱ་ནག་སོགས༔ འོད་དང་ཐོག་ཟེར་འདྲེས་པ་རྣམས༔ འདི་ཉིད་འགྲུབ་པའི་ཕྱི་རྟགས་ཡིན༔ ནང་རྟགས་ཕྱག་མཚན་བླ་མ་སོགས༔ གསང་རྟགས་དངོས་སུ་ཞལ་སྟོན་ཅིང་༔ མཆོག་དང་ཐུན་མོང་དངོས་གྲུབ་སྟེར༔ འབྱུང་བཞི་རང་དབང་སྒྱུར་བ་དང་༔ མདོར་ན་འཇིག་རྟེན་ཕུང་བ་དང་༔ གསོ་བ་ལ་སོགས་དབང་ཐོབ་འགྱུར༔ དེ་ནས་འབོད་པའི་སྔགས་བསྟན་པ༔ ཨཱོཾ་མ་ཧཱ་ཀཱ་ལ་ཏྲཀྴད་ཛཿ ཨཱོཾ་མ་ཧཱ་ཀཱ་ལ་སུ་ཏྲི་ཡ་མ་དུ་ཛཿ ཛཿཧཱུྃ༔ ཛཿཧཱུྃ༔ ཛཿཧཱུྃ༔ ཕེཾ་ཕེཾ་ཕེཾ༔ དེ་ཡི་རྩ་སྔགས་བསྟན་པར་བྱ༔ ཨཱོཾ་མ་ཧཱ་ཀཱ་ལ་ཏྲཀྴད་ཛཿ ཡིག་འབྲུ་དགུ་མ་བསྙེན་སྔགས་སོ༔ དེ་ནས་གཙོ་འཁོར་སྤྱི་དྲིལ་བསྟན༔ ཨཱོཾ་མ་ཧཱ་ཀཱ་ལ་སུ་ཏྲི་མ་དུ་ཛཿ ཡིག་འབྲུ་བཅུ་གཅིག་སྤྱི་སྔགས་སོ༔ དེ་ནས་དམ་བཞག་སྲོག་སྔགས་བསྟན༔ ཨཱོཾ་བཛྲ་མ་ཧཱ་ཀཱ་ཏྲཀྴད་དུ་ས་མ་ཡ་རཀྵ༔ དམ་ལ་གནས་པའི་སྲོག་སྔགས་ཡིན༔ འཁུ་ལྡོག་བྱུང་ན་འདི་ཡང་བཟླ༔ ཨཱོཾ་བཛྲ་མ་ཧཱ་ཀཱ་ལ་ཏྲཀྴད་དུ་ས་མ་ཡ་ཧ་ན་ཧ་ན་ཧཱུྃ་ཕཊ༔ དེ་ནས་རྦད་སྔགས་དྲག་པོ་བསྟན༔ ཨཱོཾ་མ་ཧཱ་ཀཱ་ལ་ཏྲཀྴད་མ་ཧཱ་ཀཱ་ལ་སུ་ཏྲི་མ་དུ༔ དགྲ་བོའི་སྲོག་རྩ་ལ་རྦད༔ སྙིང་ཁྲག་ལྗིབ་ལྗིབ༔ ཁྲག་རྩལ་རྦད༔ དུམ་བུར་གཏུབ་གཏུབ༔
ཤ་རུས་ཕུང་ཁམས་རྡུལ་དུ་རློག་རློག༔ ཧཱུྃ་རྦད༔ དུ་རྦད༔ མ་རྦད༔ ༔ ཡ་རྦད༔ ཏྲི་རྦད༔ ཨ་ཡ་མ་དུ་རུ་ཙ་ཤ་ན༔ དགྲ་བགེགས་མཱ་ར་ཕཊ༔ རྦད་རྦད༔ མྱོགས་མྱོགས༔ ཡཾ་ཡཾ༔ ཟློག་ཟློག༔ དྲག་སྔགས་བདུན་ཅུ་རྩ་བཞི་པ༔ རྦད་སྔགས་བསད་སྔགས་ཐོག་ལྟར་མྱུར༔ བསྟན་དགྲ་འཇོམས་པའི་གཤེད་མ་ཡིན༔ ཆོས་སྐྱོང་གི་སྲོག་གནད་བསྟན་པའི་ལེའུ་སྟེ་བཅོ་བརྒྱད་པའོ༔ ས་མ་ཡ༔ ཐུགས་རྒྱ་བརྡའ་ཐིམ༔ བརྡའ་ཡིག ༼ཨཾ༽ ༔ཨཱོཾ་ཨཱཿཧཱུྃ༔ པདྨ་ཉི་ཟླའི་གདན་སྟེང་དུ༔ རང་རིག་གསང་བདག་རྡོ་རྗེ་འཛིན༔ མཐིང་ནག་ཞལ་གཅིག་ཕྱག་གཉིས་པ༔ ཞལ་བསྒྲད་མཆེ་གཙིགས་སྤྱན་གསུམ་དམར༔ གཡས་གཡོན་རྡོ་རྗེ་སྡིགས་མཛུབ་ཞགས༔ ཞབས་གཉིས་འདོར་སྟབས་ཁྲོ་ཆས་རྫོགས༔ གནས་གསུམ་ཨོཾ་ཨཱཿཧཱུྃ་གིས་མཚན༔ སྤྱི་བོར་པདྨ་བཛྲ་དཀར༔ སྤྲུལ་སྐུའི་ཆ་ལུགས་མཚན་དཔེས་སྤྲས༔ པད་ཞྭ་རྒོད་ལྡེམ་ཉི་ཟླས་བརྒྱན༔ རྡོ་རྗེ་ཐོད་པ་ཁ་ཊྲཱཾ་བསྣམས༔ སྐྱིལ་མོ་ཀྲུང་གིས་བཞུགས་པར་གྱུར༔ འཇའ་འོད་མེ་
དཔུང་ཀློང་དུ་གསལ༔ རང་གི་ཐུགས་ཀར་པད་ཟླའི་དབུས༔ རྡོ་རྗེ་རྩེ་ལྔའི་ལྟེ་བར་ཧཱུྃ༔ མཐིང་ནག་ཐ་མར་སྔགས་ཀྱིས་བསྐོར༔ སྣང་སྲིད་འཁོར་འདས་སྣོད་བཅུད་ཀྱི༔ མཐུ་སྟོབས་བསོད་ནམས་ཚེ་དཔལ་འབྱོར༔ སྙན་གྲགས་དབང་ཐང་རང་ལ་བསྟིམ༔ འཆི་མེད་ཆོས་སྐུ་མངོན་གྱུར་ཤོག༔ ཨཱོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ ཨཱ་ཡུཿཔུ་ཎྱ་ཛྙཱ་ན་སིདྡྷི་ཛཿ མ་ཡེངས་ངང་དུ་འཛབ་འདི་བཟླས༔ སྐུ་ཡིས་ཞིང་ཁམས་ཡོངས་ལ་ཁྱབ༔ ཞིང་ཁམས་རབ་འབྱམས་སྐུ་ལ་རྫོགས༔ སྔགས་ཀྱི་སྒྲ་ཡིས་སྲིད་གསུམ་འདར༔ སྣང་སྲིད་འཁོར་འདས་དབང་དུ་འདུས༔ ཡིད་ནི་གདོས་བཅས་ལུས་སྣང་བོར༔ ཡེ་སྟོང་ཁྱབ་གདལ་རིག་རྩལ་རྟོགས༔ བླ་མ་ཡི་དམ་འགྲུབ་གྱུར་ཅིག༔ སརྦ་སིདྡྷི་ཕ་ལ་ཧོ༔ ཚེ་དང་བསོད་ནམས་སྐྱེད་པའི་སྒྲུབ་ཐབས་གོང་ནོན་གྱི་ཤོག་དྲིལ་བསྟན་པའི་ལེའུ་སྟེ་བཅུ་དགུ་པའོ༔ ས་མ་ཡ༔ ཐུགས་རྒྱ་བརྡའ་ཐིམ༔ ༼ཨཱཿ༽ བརྡའ་ཡིག ༼འ༽ ༔ཨཱོཾ་ཨཱཿཧཱུྃ༔ ཨཱོཾ་སྭ་བྷཱ་ཝ་ཤུདྡྷཱཿསརྦ་དྷརྨཿསྭ་བྷཱ་ཝ་ཤུདྡྷོ྅ཧཾ༔
སྟོང་པ་ཉིད་དུ་གྱུར༔ སྟོང་པའི་ངང་ལས་རང་ཉིད་བཅོམ་ལྡན་འདས་དཔལ་གསང་བའི་བདག་པོར་གསལ་བའི་མདུན་དུ༔ སྐད་ཅིག་གིས་ཁཾ་ལས་རྡོ་རྗེའི་བྲག་རི་ལྷུན་ཆགས་པའི་སྟེང་དུ༔ ཡཾ་ལས་ལས་ཀྱི་རླུང་ནག་དྲག་ཏུ་འཚུབས་པའི་ཀློང་ཆེན་པོ༔ རི་རབ་ཡང་བསྐྱོད་པར་ནུས་པའི་དྲག་པོའི་ཤུགས་དང་ལྡན་པ༔ མེ་དུད་ཟེར་གསུམ་འཁྲུགས་ཤིང༔ ཐོག་སེར་དྲག་ཏུ་འབེབས་པའི་དབུས་སུ༔ པཾ་ལས་པདྨ༔ རཾ་ལས་ཉི་མ༔ ནྲྀ་ལས་དགྲ་བགེགས་བསྣོལ་བའི་གདན་གྱི་སྟེང་དུ༔ ཏི་ལས་བདུད་རྟ་བྲ་ནག་རྟིང་དཀར་དཔའ་རྩལ་ཤུགས་དང་ལྡན་ཞིང་༔ མྱུར་མགྱོགས་ཀྱིས་སྟོང་གསུམ་སྐོར་བ༔ གཡུ་མཐུར་གསེར་སྲབ་མཛེས་ཤིང་རྔམ་པ༔ མགུལ་རྒྱན་དྲིལ་བུ་སིལ་སིལ་འཁྲོལ་བ༔ ཞིང་ཆེན་སྟག་ལྤགས་གདན་དུ་བསྟད་པ༔ གོང་སྨད་གློ་ནན་སྦྲུལ་ལས་བྱས་པའི་བསེ་སྒ་དམར་པོ་འོད་ཟེར་འབར་བ༔ གཡས་གཡོན་གཉིས་སུ་གླང་ཆེན་རོལ་
དུ་ཁྲིད་པ༔ དེའི་སྟེང་དུ་ས་བོན་གྱི་ཡི་གེ་ཏི་དང་ཕཊ་དང་དུ་ལས་བྱུང་བའི་དཔལ་མ་ཧཱ་ཀཱ་ལ་ཏྲཀྴད་བདུད་ཀྱི་མགོན་པོ༔ ནག་པོ་ཐོད་པའི་ཕྲེང་བ་ཅན༔ དགྲ་བགེགས་ཀྱི་གཤེད་པོ༔ དམ་ཉམས་ཀྱི་སྙིང་འབྱིན༔ བསྟན་དགྲའི་སྲོག་གཅོད༔ དུག་གི་སྤུ་གྲི༔ ཤན་པ་ཆེན་པོ༔ ཁམས་གསུམ་ཟ་བྱེད༔ དྲེགས་པའི་གཙོ་བ་ནི༔ སྐུ་མདོག་མཐིང་ནག་ཆར་སྤྲིན་ལྟར་གནག་པ༔ ཞལ་གཅིག་ཕྱག་གཉིས་པ༔ སྤྱན་གསུམ་དམར་ལ་ཟླུམ་པ་ཉི་མ་ལྟར་བརྗིད་པ༔ ཞལ་གདངས་ཤིང་དུག་གི་རླངས་པ་སྤྲིན་ལྟར་གཡོ་བའི་ཀློང་དུ་ལྗགས་དམར་གློག་ལྟར་འཁྱུག་པ༔ མཆེ་བ་ཟླ་ཚེས་ལྟར་རྣོ་བ་ཁྲག་གིས་གོས་པ༔ སྨིན་མ་དང་སྨ་ར་ཨག་ཚོམ་མེ་ལྟར་འབར་བ༔ རལ་པ་དམར་ནག་གྱེན་མཐུར་བསྐྱོད་པ་ལ༔ ཐོད་སྐམ་ལྔ་ཡིས་སྐྲ་མཚམས་བཅིངས་པ༔ དབུ་གཙུག་དོན་ཡོད་གྲུབ་པས་བརྒྱན་པ༔ གསེར་གྱི་རྣ་ཆ་མཛེས་ཤིང་འཁྱིལ་པ༔ ཐོད་རློན་ལྔ་བཅུའི་དོ་ཤལ་འཕྱངས་
པ༔ ཡན་ལག་གི་ལྷུ་ཚིགས་ཐམས་ཅད་རིན་པོ་ཆེའི་གདུབ་བུས་བརྒྱན་པ༔ སྐུ་ལ་བདུད་བེར་ནག་པོ་གསོལ་བ༔ གསེར་གྱི་རྡོ་རྗེའི་སྐ་རགས་བཅིངས་པ༔ སྟག་དོང་གཟིག་ཤུབས་དཔའ་ཆས་རྫོགས་པ༔ བདུད་ཀྱི་ཁྲམ་ཤིང་སྐེད་ལ་བཅུག་པ༔ ཕྱག་གཡས་དུང་དར་དང་བདུད་ཞགས་སྲིད་རྩེར་ཕྱར་བ༔ ཕྱག་གཡོན་རྡོ་རྗེའི་ལྕགས་ཀྱུ་དང་དགྲ་སྙིང་འཛིན་པ༔ ཞབས་གཉིས་སག་ལྷྭམ་གསོལ་ཞིང་བརྐྱང་བསྐུམ་གྱིས་གནས་པ༔ བ་སྤུའི་བུ་ག་ཐམས་ཅད་ནས་སྤྲུལ་པའི་བདུད་དམག་ཆར་ལྟར་འབེབས་པ༔ དཔའ་རྩལ་སྟོབས་དང་ལྡན་ཞིང་སྐད་ཅིག་གཅིག་ལ་སྲིད་གསུམ་ཉུལ་བ༔ སངས་རྒྱས་ཀྱི་བསྟན་པ་སྲུང་བ་ལ་བརྩོན་པའོ༔ སྲིན་མོ་དུང་སྐྱོང་དགྲ་སྙིང་འདྲེན་མས་རྟ་མཐུར་ནས་ཁྲིད་ཅིང་ལྕགས་ཀྱུ་དང་དགྲ་སྙིང་འཛིན་པ༔ དེའི་འཁོར་དུ་སྦྱོར་ཡུམ༔ སྒྲོལ་ཡུམ༔ གསང་ཡུམ་རྣམས་ཀྱིས་ཀྱང་ལྕགས་ཀྱུ་དང་ནད་རྐྱལ་དགྲ་སྙིང་འཛིན་པ༔ རླུང་
བདུད་དང་༔ མེ་བདུད་དང་༔ ཆུ་བདུད་དང་༔ ས་བདུད་དང་༔ ཉི་བདུད་དང་༔ ཟླ་བདུད་དང་༔ སྐར་བདུད་དང་༔ འདྲེ་བདུད་དེ་བདུད་ཀྱི་དབང་པོ་བརྒྱད་ཀྱང་ནམ་མཁའི་མདོག་ཅན༔ ཁྲག་ལྟ་བུའི་མིག་དང་རལ་པ་འབར་བ༔ དར་ནག་གི་བེར་དང་མི་ལྤགས་ཀྱི་གཡང་གཞི་གསོལ་བ༔ ཕྱག་གཡས་པ་རྣམས་ཀྱིས་དགྲ་སྟྭ་དང་༔ གཡོན་པ་རྣམས་ཀྱིས་དགྲ་སྙིང་དང་ལྕགས་ཀྱུ་འཛིན་པ༔ རྒྱན་ཆ་ལུགས་ཞོན་པ་རྣམས་གཙོ་བོ་ལྟ་བུའོ༔ དེ་རྣམས་ཀྱི་འཁོར་དུ་སྤྲུལ་པ་ཡང་སྤྲུལ་ཉིང་སྤྲུལ་གྱི་ཚོགས༔ བདུད་དམག་ས་ཡ་དྲུག་འབུམ་རླུང་ལྟར་འཚུབས་པ༔ གཤིན་རྗེ་ས་ཡ་དྲུག་འབུམ་སྤྲིན་ལྟར་གཡོ་བ༔ མ་མོ་ས་ཡ་དྲུག་འབུམ་མེ་ལྟར་འབར་བ༔ བདུད་བྱ་ས་ཡ་དྲུག་འབུམ་གློག་ལྟར་འཁྱུག་པ༔ ཁྱི་ནག་དོམ་བུ་དྲུག་འབུམ་རྦབ་ལྟར་འདྲིལ་བ༔ ལས་མཁན་སྲོག་བདག་དྲུག་འབུམ་ཆུ་ལྟར་ཁོལ་བའོ༔ དེ་ལྟར་གཙོ་འཁོར་ཐམས་ཅད་ཀྱི་དཔྲལ་བར་ཨཱོཾ༔
མགྲིན་པར་ཨཱཿ ཐུགས་ཀར་ཧཱུྃ་དང་དུ་ལས་འོད་ཟེར་འཕྲོས་པས༔ དཔལ་མ་ཧཱ་ཀཱ་ལ་བདུད་རྒྱལ་ཏྲཀྴད་འཁོར་དང་བཅས་པ་མཐོ་སྲིད་རྩེ་མན་ཆད༔ དམའ་དམྱལ་ཁམས་ཡན་ཆད་གང་དུ་གནས་ཤིང་༔ གང་དུ་བཞུགས་ཀྱང་དམ་ཚིག་དབང་གིས་བདག་ཉིད་དཔལ་རྡོ་རྗེ་གཏུམ་པོའི་མདུན་དུ་སྐད་ཅིག་གིས་ལྷགས་པར་གྱུར༔ ཨཱོཾ་མ་ཧཱ་ཀཱ་ལ་ཏྲཀྴད་ཛཿ ཨཱོཾ་མ་ཧཱ་ཀཱ་ལ་སུ་ཏྲི་ཡ་མ་དུ་ཛཿ ཛཿཧཱུྃ༔ ཛཿཧཱུྃ༔ ཛཿཧཱུྃ༔ ཕེཾ་ཕེཾ་ཕེཾ༔ ༼ཡ༽ རྔ་རྡུང་སྤོས་སྲེག་དར་ནག་གཡབ༔ རང་ཉིད་ཡི་དམ་གྱི་ང་རྒྱལ་དང་ལྡན་པས་སྤྱན་འདྲེན་པ་ནི༔ ཧཱུྃ༑ བཞེངས་ཤིག་བླ་མ་རྣམས་བཞེངས་ཤིག༔ བཀའ་བརྒྱུད་བླ་མ་སྐུ་བསྐྱོད་འཚལ༔ གང་འདུལ་ཐབས་ཀྱིས་འགྲོ་བ་འདྲེན༔ བྱིན་གྱིས་བརླབ་ཕྱིར་གཤེགས་སུ་གསོལ༔ ཧཱུྃ༑ བཞེངས་ཤིག་ཡི་དམ་རྣམས་བཞེངས་ཤིག༔ ཞི་ཁྲོ་རབ་འབྱམས་སྐུ་བསྐྱོད་འཚལ༔ དཔའ་བོ་དཔའ་མོའི་འཁོར་གྱིས་བསྐོར༔ དངོས་གྲུབ་སྩོལ་ཕྱིར་གཤེགས་སུ་གསོལ༔
ཧཱུྃ༑ བཞེངས་ཤིག་ཆོས་སྐྱོང་རྣམས་བཞེངས་ཤིག༔ མ་མགོན་ལྕམ་དྲལ་སྐུ་བསྐྱོད་འཚལ༔ བསྟན་སྲུང་རྒྱ་མཚོའི་འཁོར་གྱིས་བསྐོར༔ བར་ཆད་བསལ་ཕྱིར་གཤེགས་སུ་གསོལ༔ ཧཱུྃ༑ བཞེངས་ཤིག་བསྟན་སྲུང་རྣམས་བཞེངས་ཤིག༔ བདུད་མགོན་ཏྲཀྴད་སྐུ་བསྐྱོད་འཚལ༔ ལས་བྱེད་ཤན་པའི་འཁོར་གྱིས་བསྐོར༔ དགྲ་བགེགས་བསྒྲལ་ཕྱིར་གཤེགས་སུ་གསོལ༔ ཧཱུྃ༑ བསྐུལ་ལོ་འབོད་དོ་ཏྲཀྴད་བདུད༔ ནག་པོ་ཐོད་ཕྲེང་འཁོར་བཅས་རྣམས༔ མུན་པའི་ཀློང་ནས་འདིར་གཤེགས་ཤིག༔ དམ་ལ་མ་འདའ་ད་ཚུལ་བྱོན་༔ ནག་པོ་རྒྱ་དང་བོད་ཡུལ་དབུས༔ ཁ་རག་མགོ་དགུའི་བདུད་མཚོ་ནས༔ བདུད་མགོན་ཏྲཀྴད་གནས་འདིར་བྱོན༔ བདུད་དམག་ས་ཡ་གནས་འདིར་བྱོན༔ མ་མོ་ས་ཡ་གནས་འདིར་བྱོན༔ གཤིན་རྗེ་ས་ཡ་གནས་འདིར་བྱོན༔ སྤྲུལ་པ་ཡང་སྤྲུལ་ཉིང་སྤྲུལ་ཚོགས༔ དམ་ཚིག་དབང་གིས་གནས་འདིར་བྱོན༔ རྒྱ་མཚོའི་གླིང་དང་དུར་ཁྲོད་
བརྒྱད༔ སྲིད་གསུམ་གནས་ཡུལ་གར་བཞུགས་ཀྱང་༔ མ་ཐོག་མྱུར་དུ་གནས་འདིར་བྱོན༔ དམ་སྲི་འདུལ་ཕྱིར་གཤེགས་སུ་གསོལ༔ མ་ཧཱ་ཀཱ་ལ་ས་མ་ཛཿ རང་ཉིད་ཡི་དམ་ཐུགས་ཀ་ནས༔ འོད་ཟེར་ལྕགས་ཀྱུ་ལྟ་བུ་འཕྲོས༔ ཁམས་གསུམ་སྲིད་གསུམ་ཀུན་གང་ནས༔ སྐད་ཅིག་ཉིད་ལ་སྤྱན་དྲངས་གྱུར༔ ༼ར༽ ༔གུས་པས་ཕྱག་འཚལ་གདན་མཆོག་འབུལ༔ མཉེས་ཤིང་དགའ་མགུར་ལྡན་པར་བསམ༔ ཧཱུྃ༑ ཆོས་སྐུ་ལོངས་སྐུ་སྤྲུལ་སྐུའི་ཚུལ༔ གང་ལ་གང་འདུལ་སྐུར་སྟོན་པའི༔ སྐུ་གསུམ་ཡེ་རྫོགས་བླ་མ་ལ༔ དད་མོས་གདུང་བས་གུས་ཕྱག་འཚལ༔ ཧཱུྃ༑ ཞི་དང་ཁྲོ་བོའི་སྐུར་བསྟན་ཀྱང་༔ ཀུན་བཟང་ཀློང་དུ་ངོ་བོ་གཅིག༔ ཡི་དམ་དཔའ་བོ་མཁའ་འགྲོ་ལ༔ ལུས་ངག་ཡིད་གསུམ་གུས་ཕྱག་འཚལ༔ ཧཱུྃ༑ ཆོས་ཀྱི་དབྱིངས་ཀྱི་དཀྱིལ་འཁོར་ནས༔ དྲག་པོའི་སྐུར་བཞེངས་བསྟན་དགྲ་བསྒྲལ༔ ཡེ་ཤེས་ཆོས་སྐྱོང་སྲུང་མ་ལ༔ ལུས་ངག་ཡིད་གསུམ་
གུས་ཕྱག་འཚལ༔ ཉི་ཟླ་པདྨ་གདན་ལ་བཞུགས༔ དངོས་འབྱོར་ཡིད་སྤྲུལ་འདུས་མ་བྱས༔ ཕྱི་ནང་གསང་གསུམ་མཆོད་པ་བཞེས༔ དབྱངས་ཀྱི་ཡན་ལག་རྒྱ་མཚོས་བསྟོད༔ ཧཱུྃ༑ འཇིག་རྟེན་ལ་གནས་གདུག་པ་འདུལ༔ གཏུམ་པོ་མཐུ་ཆེན་དགྲ་བོའི་གཤེད༔ ཏྲཀྴད་ནག་པོ་ཐོད་ཕྲེང་ཅན༔ བསྟན་སྲུང་རྒྱལ་པོ་ལ་ཕྱག་འཚལ༔ དམ་སྲི་འདུལ་བའི་མཐུ་བོ་ཆེ༔ འདྲེ་གདོན་དལ་ཡམས་ཟློག་མཛད་ཅིང་༔ ཕྱི་ནང་རྦད་གཏོང་ཐལ་བར་རླག༔ དུག་གི་སྤུ་གྲི་ལ་ཕྱག་འཚལ༔ སངས་རྒྱས་བསྟན་པའི་བྱ་ར་བ༔ བདུད་རྒྱལ་ཏྲཀྴད་མགོན་པོར་གྲགས༔ བསྟན་འཛིན་ཀུན་གྱི་སྟོང་གྲོགས་མཛད༔ ཕྲིན་ལས་མྱུར་འགྲུབ་ལ་ཕྱག་འཚལ༔ ཧཱུྃ༑ དགྲ་བགེགས་བསྒྲལ་བའི་བཾ་རོ་དང་༔ དམ་ཉམས་འོག་རྟ་བྲན་གཡོག་བཅས༔ ཁེངས་ལོག་ཉེར་འཚེ་བསྟན་བཤིག་རྣམས༔ ཁྲི་རུ་བརྩིགས་ཤིང་གདན་དུ་འབུལ༔ དམ་ཚིག་དབང་གིས་བཞུགས་ནས་ཀྱང་༔ བསྟན་དགྲ་དམ་
ཉམས་མ་ཤོར་ཅིག༔ མ་ཧཱ་ཀཱ་ལ་ཏིཥྛ་ལྷན༔ སླར་ཡང་དམ་ལས་མི་འདའ་ཕྱིར༔ མགོ་བོར་ཡེ་ཤེས་རྡོ་རྗེ་བཞག༔ ལྗགས་ལ་དམ་ཚིག་བདུད་རྩི་འཐོར༔ རང་སེམས་ཧཱུྃ་གི་འཕྲོ་འདུ་ལས༔ བསྟན་སྲུང་འཁོར་བཅས་ཐུགས་སྲོག་བླངས༔ རང་སེམས་ཧཱུྃ་ལ་ཚུར་བསྡུས་པས༔ ཐུགས་ཡིད་གཅིག་ཏུ་འདྲེས་པར་བསམ༔ ༼ལ༽ ཧཱུྃ། འདས་དང་མ་བྱོན་དུས་གསུམ་གྱི༔ རྒྱལ་བའི་ཕྲིན་ལས་སྒྲུབ་པ་པོ༔ དམ་བཞག་དབང་བསྐུར་རྒྱས་བཏབ་པའི༔ བདུད་མགོན་ཏྲཀྴད་དམ་ལ་འདུས༔ ཕྱི་རབས་སྒྲུབ་པའི་རིགས་འཛིན་རྣམས༔ བུ་བཞིན་སྐྱོང་བར་ཞལ་བཞེས་ཤིང་༔ བཀའ་བཞིན་སྒྲུབ་པར་དམ་བཅས་པའི༔ བདུད་མགོན་ཏྲཀྴད་དམ་ལ་འདུས༔ དཀོན་མཆོག་དབུ་འཕང་བསྟོད་པ་དང་༔ བླ་མའི་སྐུ་དགྲ་འདུལ་བ་དང་༔ རྗེས་འཇུག་བུ་སློབ་སྐྱོང་བ་དང་༔ དཀོར་དང་རྟེན་མཆོད་སྲུང་བ་ནི༔ སྔོན་ཚེ་དམ་བཅས་ཁས་བླངས་བཞིན༔ སྲོག་སྙིང་དམ་ལས་མ་འདའ་བར༔ ཐུགས་དམ་རྒྱུད་བསྐུལ་ཕྲིན་ལས་སྒྲུབས༔ མ་གཡེལ་མ་
འདའ་གཞུང་མ་ངན༔ འབོད་དུས་བདུད་མགོན་སྙན་མ་སྲ༔ བསྟེན་དུས་ཏྲཀྴད་གཞུང་མ་ངན༔ སྒྲུབ་དུས་ཏྲཀྴད་རྒྱང་མ་རིང་༔ རྦད་དུས་བདུད་རྒྱལ་རྩལ་མ་ཞན༔ གཡབ་པོ་བདུད་རྒྱལ་ཕྲག་མ་དོག༔ དམ་ཚིག་གཉན་པོ་དྲན་མཛོད་ལ༔ ལུས་དང་གྲིབ་མ་འགྲོགས་བཞིན་དུ༔ མི་འབྲལ་ཐུགས་ཡིད་གཅིག་ཏུ་བསྲེ༔ ཕ་རོལ་འཇིགས་པའི་དམག་དཔུང་དང་༔ ཇག་རྐུན་གློ་བུར་སྡང་བའི་དགྲ༔ སྐད་ཅིག་ཉིད་ལ་སྲོག་དང་ཕྲོལ༔ ཤན་པ་བདུད་རྒྱལ་དམ་ལ་འདུས༔ ཨཱོཾ་བཛྲ་མ་ཧཱ་ཀཱ་ལ་ས་མ་ཡ་ཧ་ན་ཧ་ན་ཧཱུྃ་ཕཊ༔ ༼ཤ༽ ༔ཕྱི་ནང་གསང་གསུམ་མཆོད་པས་མཆོད༔ ཧཱུྃ༑ བདུད་མགོན་ཏྲཀྴད་འཁོར་བཅས་ལ༔ ཕྱི་ཡི་མཆོད་པ་འབུལ་བ་ནི༔ མཆོད་ཡོན་ཞབས་བསིལ་མེ་ཏོག་དང་༔ བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་སྙན་པའི་དབྱངས༔ བདུད་མགོན་འཁོར་དང་བཅས་ལ་འབུལ༔ ཧཱུྃ༑ བདུད་མགོན་ཏྲཀྴད་འཁོར་བཅས་ལ༔ ནང་གི་མཆོད་པ་འབུལ་བ་ནི༔ དམ་
རྫས་སྨན་མཚོ་ཨ་མྲྀ་ཏ༔ དམ་ཉམས་སྙིང་ཁྲག་མཚོ་ལྟར་བསྐྱིལ༔ བ་ལིཾ་ཟུར་གསུམ་དམར་གྱིས་བརྒྱན༔ འདི་དག་ནང་གི་མཆོད་པར་འབུལ༔ ཧཱུྃ༑ བདུད་མགོན་ཏྲཀྴད་འཁོར་བཅས་ལ༔ གསང་བའི་མཆོད་པ་འབུལ་བ་ནི༔ གཟུགས་སྒྲ་དྲི་རོ་རེག་བྱ་དང་༔ བསྟེན་རྫས་བསྐང་རྫས་སྒྲུབ་རྫས་དང་༔ འབྲུ་སྣ་སྨན་སྣ་རིན་ཆེན་ལྔ༔ ཤ་སྣ་སྙིང་སྣ་ཁྲག་སྣའི་ཚོགས༔ དངོས་འབྱོར་ཡིད་སྤྲུལ་བསམ་ལས་འདས༔ འདི་དག་གསང་བའི་མཆོད་པར་འབུལ༔ ཧཱུྃ༑ བདུད་མགོན་ཏྲཀྴད་འཁོར་བཅས་ལ༔ ཡང་གསང་མཆོད་པ་འབུལ་བ་ནི༔ བདེ་དང་དགའ་དང་རོལ་རྩེད་དང་༔ ཆགས་བྲལ་ཟུང་འཇུག་ཨེ་ཝཾ་ཀློང་༔ ཆགས་མེད་སྐྱོན་བྲལ་བདེ་སྟོང་ཉམས༔ དབྱིངས་རིག་གསལ་བ་མ་བཅོས་ངང་༔ གང་ཤར་ཤར་གྲོལ་ངོས་འཛིན་བྲལ༔ མཆོད་བྱ་མཆོད་བྱེད་མེད་པར་འབུལ༔ མ་ཧཱ་ཀཱ་ལ་པཱུ་ཛ་ཧོཿ ༼ས༽ ༔རྟགས་ཀྱི་ཆ་ལུགས་མཐུན་པས་བསྟོད༔ ཧཱུྃ༑
ཏྲཀྴད་བདུད་ཀྱི་མགོན་པོ་ནི༔ ནག་པོ་ཐོད་ཕྲེང་དྲེགས་པའི་རྒྱལ༔ གཏུམ་པོ་མཐུ་ཆེན་འཇིགས་རུང་གཟུགས༔ དགྲ་གཤེད་བདུད་རྒྱལ་ཁྱོད་ལ་བསྟོད༔ ཧཱུྃ༑ མངོན་ཤེས་རྫུ་འཕྲུལ་བྱིན་རླབས་ཅན༔ མྱུར་མགྱོགས་རྩལ་ལྡན་སྲིད་གསུམ་གཡོ༔ བསྟན་དགྲ་སྒོས་དགྲ་ཟས་སུ་ཟ༔ དགྲ་སྙིང་དམར་འདྲེན་ཁྱོད་ལ་བསྟོད༔ ཧཱུྃ༑ སངས་རྒྱས་བསྟན་དང་བསྟན་འཛིན་ལ༔ གནོད་བྱེད་ཉེར་འཚེ་ཕྲ་རགས་བཅས༔ མྱུར་དུ་སྒྲོལ་བྱེད་དམ་ཚིག་ཅན༔ ཤན་པ་ནག་པོར་ཕྱག་འཚལ་བསྟོད༔ ཧཱུྃ༑ སྟོང་གསུམ་སྐོར་ཞིང་བསྟན་པ་སྲུང་༔ ཉིན་གྱི་བྱ་རས་དགྲ་བགེགས་འདུལ༔ མཚན་གྱི་མེལ་ཚེས་གདོན་བགེགས་བསྒྲལ༔ དམ་སྲི་འདུལ་མཛད་ཁྱོད་ལ་བསྟོད༔ ཧཱུྃ༑ དུས་དྲུག་སྒྲུབ་པའི་ཚོགས་ཁང་འགྲིམ༔ ལུས་དང་གྲིབ་མ་འགྲོགས་བཞིན་དུ༔ སྒྲུབ་པའི་རྣལ་འབྱོར་མིག་ལྟར་གཅེས༔ རིག་འཛིན་སྲོག་ཤིང་ཁྱོད་ལ་བསྟོད༔ ཧཱུྃ༑ འབྲལ་མེད་བུ་གཅིག་མ་བཞིན་དུ༔ སྲུང་དང་སྐྱོབ་
དང་ཝ་བར་མཛད༔ དཔུང་དང་རྒྱབ་རྟེན་སྟོང་འགྲོགས་མཁན༔ ཐུགས་རྗེས་རྟག་གཟིགས་ཁྱོད་ལ་བསྟོད༔ ཧཱུྃ༑ མི་འདའ་ཐུགས་རྗེས་རྩེ་གཅིག་གིས༔ གློ་བུར་སྡང་བའི་དགྲ་བགེགས་རྣམས༔ སྐད་ཅིག་གཅིག་ལ་སྲོག་གཅོད་མཁན༔ བཀའ་ཡི་གཏོར་ལེན་ཁྱོད་ལ་བསྟོད༔ ཧཱུྃ༑ བསྟོད་བྱ་བསྟོད་བྱེད་བསམ་པའི་ཡུལ༔ བརྗོད་བྱ་བརྗོད་བྱེད་ཚིག་ལས་འདས༔ འཁོར་འདས་གཉིས་མེད་དྲན་རིག་ཀློང་༔ སྐྱེ་འཆི་བྲལ་བའི་ངང་དུ་བསྟོད༔ མ་ཧཱ་ཀཱ་ལ་ན་མོ་ཡེ༔ ༼ཧ༽ ༔གཏོར་མ་ལེགས་བྱིན་ཕྲིན་ལས་བཅོལ༔ ཧཱུྃ༑ འཁོར་འདས་རང་གྲོལ་གཏོར་གཞོང་དུ༔ མཉམ་ཉིད་འཛིན་མེད་གཏོར་མ་མཛེས༔ ཆགས་མེད་སྐྱོན་བྲལ་བདེ་སྟོང་བརྒྱན༔ སྣང་བ་དཀར་དམར་གཏོར་འདབ་ལྡན༔ སྣང་མེད་ཆེན་པོའི་བདུད་རྩིས་བྲན༔ འདོད་ཡོན་ལོངས་སྤྱོད་སྤྲིན་ལྟར་འཁྲིགས༔ སྨན་སྤོས་ངད་པ་ཆི་ལི་ལི༔ ཤ་ཆེན་ལྔ་ནི་རི་ལྟར་སྤུངས༔ བདུད་རྩི་ལྔ་ནི་མཚོ་ལྟར་བསྐྱིལ༔
རཀྟའི་ཨཱརྒྷཾ་ཆུ་ལྟར་འབྲུབ༔ འཇའ་འོད་རླངས་པ་ཡ་ལ་ལ༔ བདུད་མགོན་ཏྲཀྴད་ཁྱོད་ལ་འབུལ༔ འཁོར་དང་བཅས་པས་བཞེས་སུ་གསོལ༔ ཨཱོཾ་ཤྲཱི་མ་ཧཱ་ཀཱ་ལ་དུ༔ ཏྲཀྴད་སུ་ཏྲི་ཡ་མ་དུ་ཛ༔ ཁ་ཁ་ཁཱ་ཧི་ཁཱ་ཧི༔ བ་ལིཾ་ཏ་པཱུ་ཛ་ཧོཿ ཨཱོཾ་ཨཱ་ཀ་རོ་མུ་ཁཾ་སོགས༔ ཁྱོད་ལ་གཏོར་མ་ཕུལ་བའི་མཐུས༔ བདག་ཅག་སྒྲུབ་པའི་རྣལ་འབྱོར་ལ༔ མཆོག་དང་ཐུན་མོང་དངོས་གྲུབ་ཀུན༔ རྒྱུན་མི་ཆད་པར་སྩལ་དུ་གསོལ༔ ནོར་དང་རིགས་རྒྱུད་འཕེལ་བ་དང་༔ མི་དང་རྟ་རྣམས་དཔའ་ལ་མགྱོགས༔ མཐུ་དང་རྫུ་འཕྲུལ་ཆེ་བར་མཛོད༔ རྣལ་འབྱོར་བདག་ལ་ཚེ་བྱེད་པའི༔ འདྲེ་གདོན་དགྲ་བགེགས་རྡུལ་དུ་རློག༔ ཇག་ཀུན་གློ་བུར་སྡང་བའི་དགྲ༔ སྐད་ཅིག་གཅིག་ལ་དོན་སྙིང་ལོངས༔ མིང་མེད་སྲོག་དང་བྲལ་བར་གྱིས༔ རྡོ་རྗེ་འཛིན་པས་བཀའ་བསྒོས་ལྟར༔ དམ་ཚིག་སྲུངས་ལ་ཕྲིན་ལས་སྒྲུབས༔ མ་གཡེལ་མ་འདའ་ས་མ་ཡ༔ ཨཱོཾ་བཛྲ་མ་ཧཱ་ཀཱ་ལ་ཏྲཀྴད་དུ་ས་མ་ཡ་ཧ་ན་ཧ་ན་
ཧཱུྃ་ཕཊ༔ འདི་ཉིད་མང་དུ་བཟླས་གྱུར་ན༔ དུས་ཀུན་དམ་ལ་གནས་པའོ༔ ༼ཨ༽ ༔ཐུགས་དམ་བསྐང་བའི་ཆོ་ག་ནི༔ བསྐང་གཏོར་རི་རབ་གླིང་བཞིའི་ཚུལ༔ སྐྱེ་འགྲོ་ལྷ་མིའི་བཀོད་པས་བརྒྱན༔ དེ་སྟེང་དཔལ་བཤོས་ཟུར་གསུམ་དགུ༔ དེ་ཕྱིར་མ་གཤིན་གཏོར་མས་བསྐོར༔ སྟེང་དུ་མཐིང་ནག་དར་གདུགས་ཕུབ༔ དེ་སྟེང་བླ་མ་སྐུ་གསུམ་དང་༔ མཁའ་འགྲོ་སྡེ་ལྔའི་སྐུ་གཟུགས་བཤམ༔ དེ་སྟེང་དར་དམར་གུར་གདུགས་ཕུབ༔ དེ་སྟེང་རྒྱལ་བ་རིགས་ལྔ་དང་༔ རིགས་གསུམ་མགོན་པོའི་སྐུ་བཟུགས་བཤམ༔ དེ་སྟེང་དར་དམར་གུར་གདུགས་ཕུབ༔ རྩེ་མོར་རིན་ཆེན་རྟོག་གིས་སྤྲས༔ ཐ་མར་གཟུགས་འགྲོས་སྣ་ཚོགས་དང་༔ བཀྲིས་རྫས་རྟགས་རྒྱལ་སྲིད་བདུན༔ གཞན་ཡང་མཆོད་རྫས་དཔག་མེད་བཤམ༔ ཐ་མར་དྲག་པོའི་རྩང་གིས་བརྒྱན༔ བསྐྱེད་རྫོགས་ལྡན་པས་འདི་སྐད་དོ༔ ཧཱུྃ༑ སྟོང་གསལ་མཁའ་དབྱིངས་སྣོད་ཡངས་པར༔ དངོས་འབྱོར་ཡིད་སྤྲུལ་བསྐང་རྫས་རྣམས༔ རྒྱུ་ནི་ཐབས་ཤེས་ཟུང་འཇུག་ལ༔ རྐྱེན་ནི་མ་འགགས་འདོད་དགུའི་གཏེར༔ འབྱུང་བཞི་རི་རབ་གླིང་བཞིར་བཅས༔ གླིང་གཡོག་ཉི་ཟླ་མཚོ་བདུན་དང་༔ ལྷ་མི་སྐྱེ་འགྲོའི་བཀོད་པར་གསལ༔ བཀྲ་ཤིས་
རྒྱན་ལྡན་བྱིན་ཆགས་གྱུར༔ བསྐང་རྫས་མཆོད་རྫས་བསྒྲུབ་རྫས་རྣམས༔ བཀྲ་ཤིས་རྫས་རྟགས་ལྷ་མོར་གྱུར༔ སྨན་གཏོར་རཀྟ་དུར་ཁྲོད་ཆས༔ འདོད་དགུའི་སྤྲིན་བཏིབས་ཆར་འབེབས་གྱུར༔ ཨཱོཾ་ཨཱཿཧཱུྃ་ཨེ་ཝྃ་རྃ་བྃ་ལྃ་བྷྲཱུྃ༔ ཧཱུྃ༑ སྐྱེ་འགགས་གནས་གསུམ་བྲལ་བའི་ཀློང་༔ ཀུན་བཟང་ཁྱབ་གདལ་ཕོ་བྲང་ནས༔ རིག་འཛིན་རྩ་བརྒྱུད་བླ་མ་རྣམས༔ ཐུགས་དམ་བསྐང་ངོ་བྱིན་གྱིས་རློབས༔ ཧཱུྃ༑ སྣང་སྟོང་སྒྱུ་མའི་རོལ་རྩེད་ལས༔ ཐབས་ཤེས་དབྱེར་མེད་ཕོ་བྲང་ནས༔ ཡི་དམ་ཞི་ཁྲོ་རབ་འབྱམས་རྣམས༔ ཐུགས་དམ་བསྐང་ངོ་ལམ་སྣ་དྲོངས༔ ཧཱུྃ༑ གསང་བའི་རིག་འཛིན་བྱེ་བ་འབུམ༔ རང་སེམས་དབང་ཐོབ་གཞན་སེམས་གྲོལ༔ དཔའ་བོ་མཁའ་འགྲོའི་ལྷ་ཚོགས་རྣམས༔ ཐུགས་དམ་བསྐང་ངོ་བར་ཆད་སོལ༔ ཧཱུྃ༑ དུག་ལྔ་རྣམ་དག་ཧེ་རུ་ཀ༔ མ་རུངས་འདུལ་ཕྱིར་དྲག་པོའི་སྐུ༔ མ་མགོན་ལྕམ་དྲལ་སྲུང་མའི་ཚོགས༔ ཐུགས་དམ་བསྐང་ངོ་རྐྱེན་ངན་ཟློག༔ ཧཱུྃ༑
དུག་གསུམ་རྣམ་དག་སྐུ་གསུམ་ཀློང་༔ རིག་རྩལ་ཕྲིན་ལས་གཏུམ་པོའི་སྐུ༔ མ་ཧཱ་ཀཱ་ལ་ཏྲཀྴད་བདུད༔ ཐུགས་དམ་བསྐང་ངོ་དགྲ་བགེགས་སྒྲོལ༔ ཧཱུྃ༑ ནག་པོ་ཐོད་ཕྲེང་དགྲ་བགེགས་གཤེད༔ དམ་ཉམས་བསྟན་དགྲ་འཇོམས་བྱེད་པ༔ དུག་གི་སྤུ་གྲི་དྲེགས་པའི་གཙོ༔ ཐུགས་དམ་བསྐང་ངོ་ཕྲིན་ལས་སྒྲུབས༔ ཤན་པ་བདུད་རྒྱལ་སྲོག་གི་བདག༔ ཁམས་གསུམ་ཟ་བྱེད་འཇིག་རྟེན་མགོན༔ དགྲ་སྙིང་དམར་འདྲེན་རྫུ་འཕྲུལ་ཅན༔ ཐུགས་དམ་བསྐང་ངོ་དགྲ་སྲོག་ཆོད༔ བྷྱོ༔ མ་མོའི་ཚོགས་དང་བདུད་མགོན་བརྒྱད༔ གཤིན་རྗེ་སྲོག་བདག་བདུད་དམག་འབུམ༔ སྡེ་བརྒྱད་བྱ་ནག་ཁྱི་ནག་འབུམ༔ ཐུགས་དམ་བསྐང་ངོ་དགྲ་དབུགས་སྡུས༔ ཐུགས་དམ་བསྐང་ངོ་ཕྲིན་ལས་སྒྲུབས༔ ཐུགས་དམ་བསྐང་ངོ་དགྲ་བགེགས་སྒྲོལ༔ ཐུགས་དམ་བསྐང་ངོ་རྦོད་གཏོང་ཟློག༔ ཐུགས་དམ་བསྐང་ངོ་བྱད་མ་སོད༔ ཐུགས་དམ་བསྐང་ངོ་བྱིན་རླབས་
ཀྱིས༔ ཕྱི་སྣོད་འཇིག་རྟེན་དབང་དུ་སྡུས༔ ཁམས་གསུམ་བདག་གི་བྲན་དུ་བཀོལ༔ སྣང་བཅུད་སེམས་ཅན་གྲོགས་སུ་ཁུག༔ འདོད་དགུ་ཆར་ལྟར་འབེབས་པར་མཛོད༔ ལ་ཆུ་འཕྲང་ལ་བདེ་བར་སྐྱོལ༔ གསང་བ་རིག་འཛིན་ཚེ་སྲོག་སྲིངས༔ བཅོལ་བའི་ལས་ལ་དམ་མ་གཡེལ༔ སྔོན་ཚེ་དུས་གསུམ་སངས་རྒྱས་བཀའ༔ བར་དུ་གསང་བའི་བདག་པོའི་ལུང་༔ རིག་འཛིན་པདྨ་བདག་གི་དམ༔ སྲུངས་ཤིང་ཕྲིན་ལས་མྱུར་དུ་སྒྲུབས༔ དམ་ཚིག་ཆེན་པོའི་གཉེར་གཏད་དོ༔ བསྐང་གཏོར་བཏེགས་ལ་ཕུད་ཀྱིས་བྲན༔ ཏིང་འཛིན་དང་ལྡན་འབུལ་བར་བྱ༔ ཧཱུྃ༑ བསྐུལ་ལོ་ཐུགས་དམ་གནད་ནས་སྐུལ༔ དགོངས་ཤིག་དུས་གསུམ་བདེ་གཤེགས་ཚོགས༔ བདེ་བ་ཆེན་པོའི་ཀློང་ནས་བཞེངས༔ མཉམ་པ་ཉིད་ཀྱི་ངང་དུ་བཞུགས༔ བརྩེ་བ་ཆེན་པོས་བདག་ལ་དགོངས༔ ཐུགས་རྗེས་འགྲོ་དྲུག་ལམ་སྣ་དྲོངས༔ ནུས་པས་ནད་གདོན་བར་ཆད་སོལ༔ ལས་བཞིའི་ཕྲིན་ལས་དུས་ལ་བབ༔
ཧཱུྃ༑ བསྐང་རྫས་གཏོར་ཆེན་འབར་བ་འདི༔ འབྲུ་བཅུད་སྨན་སྤོས་རིན་ཆེན་ལས༔ ཐབས་ཤེས་དབྱེར་མེད་ངང་དུ་གྲུབ༔ སྔགས་དང་ཕྱག་རྒྱས་བྱིན་གྱིས་བརླབས༔ སྣང་བའི་ཡུལ་དུ་དང་རེ་སྤྲོ༔ རི་རབ་ལས་ཀྱང་འཕང་རེ་མཐོ༔ འཛིན་པའི་སེམས་ལ་མཛེས་ཤིང་སྡུག༔ ཉི་ཟླ་ལས་ཀྱང་བཀྲག་མདངས་གསལ༔ བདེ་བའི་ངང་དུ་ལྷུན་གྱིས་གྲུབ༔ རྒྱ་མཚོ་ལས་ཀྱང་གཏིང་རེ་ཟབ༔ གསལ་འཚེར་ཡེ་ཤེས་ལྔ་ཡི་འོད༔ སྤྲིན་ཕུང་ལས་ཀྱང་གཏིབས་རེ་ཆེ༔ དུག་གསུམ་རྣམ་དག་གསང་བའི་འབྲུ༔ སྐུ་གསུམ་ཡི་གེས་བྱིན་གྱིས་བརླབས༔ ཕར་ཕྱིན་དྲུག་གི་རྒྱས་བཏབ་ནས༔ མ་རིག་མུན་སེལ་མར་མེས་བསྐོར༔ བག་ཆགས་དྲི་མ་དག་པའི་ཕྱིར༔ ཡེ་ཤེས་བདུད་རྩིར་བྱིན་གྱིས་བརླབས༔ ཐབས་ཤེས་ཟུང་དུ་འཇུག་པའི་ཕྱིར༔ དམ་ཚིག་བདུད་རྩིར་བྱིན་གྱིས་བརླབས༔ ཧཱུྃ༑ ཆགས་མེད་རང་གྲོལ་གཏོར་ཆེན་འདི༔ བཀའ་བརྒྱུད་བླ་མའི་ཚོགས་
རྣམས་ལ༔ མཆོད་དོ་འབུལ་ལོ་དགྱེས་པར་བཞེས༔ འཇའ་ལུས་འཁའ་སྤྱོད་དངོས་གྲུབ་སྩོལ༔ ཧཱུྃ༑ ཞེན་མེད་སྤྲོས་བྲལ་གཏོར་ཆེན་འདི༔ ཡི་དམ་ཞི་ཁྲོ་རབ་འབྱམས་ལ༔ མཆོད་དོ་འབུལ་ལོ་དགྱེས་པར་བཞེས༔ དུག་ལྔ་རང་གྲོལ་དངོས་གྲུབ་སྩོལ༔ ཧཱུྃ༑ འཛིན་མེད་ཀ་དག་གཏོར་ཆེན་འདི༔ དཔའ་བོ་མཁའ་འགྲོའི་ཚོགས་རྣམས་ལ༔ མཆོད་དོ་འབུལ་ལོ་དགྱེས་པར་བཞེས༔ སྐུ་གསུམ་ལྷུན་གྲུབ་དངོས་གྲུབ་སྩོལ༔ ཧཱུྃ༑ རིག་རྩལ་སྒྱུ་འཕྲུལ་གཏོར་ཆེན་འདི༔ ཆོས་སྐྱོང་སྲུང་མའི་ཚོགས་རྣམས་ལ༔ མཆོད་དོ་འབུལ་ལོ་དགྱེས་པར་བཞེས༔ ལས་བཞིའི་ཕྲིན་ལས་མྱུར་དུ་སྒྲུབས༔ འདི་ཡི་སྐབས་བཀྲ་ཤིས་རྟགས་བརྒྱད་རྒྱལ་སྲིད་སྣ་བདུན་ཙཀླི་སོགས་རང་གིས་བླང་འོས་རྣམས་བླང་མཆན། ཧཱུྃ༑ སྟོང་གསུམ་འཇིག་རྟེན་བཀོད་པ་འདི༔ བདུད་རྒྱལ་ཏྲཀྴད་ཁྱོད་ལ་འབུལ༔ མཆོད་དོ་འབུལ་ལོ་དགྱེས་པར་བཞེས༔ བསྟན་པ་རྒྱས་པའི་ཕྲིན་ལས་མཛོད༔ ཧཱུྃ༑ དུར་ཁྲོད་བཀོད་པ་འཇིགས་སུ་
རུང་༔ ནག་པོ་ཐོད་ཕྲེང་ཁྱོད་ལ་འབུལ༔ མཆོད་དོ་འབུལ་ལོ་དགྱེས་པར་བཞེས༔ བསྟན་པ་སྲུངས་ལ་ཕྲིན་ལས་སྒྲུབས༔ ཧཱུྃ༑ དགྲ་བགེགས་བསྒྲལ་བའི་ཤ་ཁྲག་རུས༔ ནག་པོ་བཀྲག་མེད་ཁྱོད་ལ་འབུལ༔ མཆོད་དོ་འབུལ་ལོ་དགྱེས་པར་བཞེས༔ བསྟན་དགྲ་མྱུར་སྒྲོལ་ཕྲིན་ལས་སྒྲུབས༔ ཧཱུྃ༑ གདུག་པའི་དགྲ་བགེགས་འཁོར་དང་བཅས༔ ཤན་པ་ལག་དམར་ཁྱོད་ལ་འབུལ༔ མཆོད་དོ་འབུལ་ལོ་དགྱེས་པར་བཞེས༔ སྐད་ཅིག་ཉིད་ལ་སྲོག་རྩ་ཆོད༔ ཧཱུྃ་བྷྱོ༔ ལས་ངན་བསྟན་བཤིག་རུ་དྲ་རྣམས༔ མ་མོ་རྣམས་ལ་གཉེར་དུ་གཏད༔ མིང་ཡང་མེད་པར་རྡུལ་དུ་རློག༔ ཁྲག་ནད་རྒྱུ་གཟེར་དགྲ་ལ་ཕོབ༔ ལས་ངན་སྒོས་དགྲ་འཁོར་དང་བཅས༔ བདུད་མགོན་བརྒྱད་ལ་གཉེར་དུ་གཏད༔ ཧུར་ཐུམ་སྙིང་གཟེར་དགྲ་ལ་ཕོབ༔ དམ་ཉམས་དགྲ་བོ་ལས་ངན་འདི༔ གཞན་ཡང་མ་གཤིན་གདུག་པའི་ཚོགས༔ ལས་བྱེད་རྣམས་ལ་རྫོངས་སུ་
འདེབས༔ རྗེས་ཤུལ་ཙམ་ཡང་མེད་པར་གྱིས༔ ཨཱོཾ་མ་ཧཱ་ཀ་ལཱ་ཏྲཀྴད་ཛཿ ཨཱོཾ་མ་ཧཱ་ཀཱ་ལ་སུ་ཏྲི་ཡ་མ་དུ་ཛ༔ དགྲ་བོའི་སྲོག་རྩ་ལ་རྦད༔ སྙིང་ཁྲག་ལྗིབ་ལྗིབ༔ ཁྲག་རྩ་ལ་རྦད༔ དུམ་བུར་གཏུབ་གཏུབ༔ ཤ་རུས་ཕུང་ཁམས་རྡུལ་དུ་རློག་རློག༔ ཧཱུྃ་རྦད༔ དུ་རྦད༔ མ་རྦད༔ ཡ་རྦད༔ ཏྲི་རྦད༔ ཨ་ཡ་མ་དུ་རུ་ཙ་ཤ་ན༔ དགྲ་བགེགས་བྱད་མ་མཱ་ར་ཡ་ཕཊ༔ རྦད་རྦད༔ མྱོགས་མྱོགས༔ ཡཾ་ཡཾ༔ ཟློག་ཟློག༔ ཨཱོཾ་བཛྲ་མ་ཧཱ་ཀཱ་ལ་ཏྲཀྴད་དུ་ས་མ་ཡ་ཧ་ན་ཧ་ན་ཧཱུྃ་ཕཊ༔ རྩ་སྔགས་སྤྱི་དྲིལ་དྲག་སྔགས་བདུན་བཅུ་པ་དམ་བཞག་རྣམས་བརྗོད་ལ༔ གཏོར་མ་དགྲ་ཕྱོགས་སུ་སམ་ཡང་ན་གཙང་སར་བསྐྱལ་ལོ༔ འདི་ནི་དགྲ་གཤེད་དུག་གི་སྤུ་གྲི་སྟེ༔ གཏེར་ཁ་གཞན་དུའང་འདི་ཉིད་མང་དུ་མེད༔ སྲིད་གསུམ་འཁོར་འདས་བདག་པོ་ཏྲཀྴད་བདུད༔ པདྨའི་རིག་རྩལ་སྟོབས་ལས་གྲུབ་པའོ༔ ཙིཏྟ་བཛྲ་ས་མ་ཡ༔ ཐུགས་རྒྱ་བརྡ་ཐིམ༔ ཐིལ་ནག་མཆན་ བླ་མ་སྐུ་གསུམ་སྐུ་ལྔའི་ལས་མཐའ་ཡོངས་སུ་རྫོགས་པར་བྱའོ༔ ལེའུ་ཉི་ཤུ་པའོ༔ ཨྠྀི༔ རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་གཏེར་མ་བསླད་མེད་པའོ༔ ཨྠྀི༔ ༈ མཁོ་
རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།