གུ་རུ་རྡོ་རྗེ་གྲོ་ལོད་ཀྱི་རྦོད་གཏོང་ཟློག་པའི་ཐབས་ཡང་ཟབ་སྲིད་གསུམ་གཏིང་ཟློག
གུ་རུ་རྡོ་རྗེ་གྲོ་ལོད་ལས༔ ཕ་རོལ་རྦོད་གཏོང་ཟློག་པའི་ཐབས༔ ཡང་ཟབ་སྲིད་གསུམ་གཏིང་ཟློག་བཞུགས༔
༼ཀ༽ ༔ཤྲཱི་མ་ཧཱ་གུ་རུ་པདྨ་སཾ་བྷ་ཝ་ཡེ་ན་མོ༔ ཕ་རོལ་རྦོད་གཏོང་ཟློག་པའི་ཐབས༔ ཡང་ཟབ་སྲིད་གསུམ་གཏིང་ཟློག་འདི༔ གསང་བ་ཡང་གསང་ཟབ་གནད་སྟེ༔ རང་ཉིད་བསྙེན་བསྒྲུབ་ཚད་དུ་བསྐྱལ༔ རྟེན་གཏོར་མཐའ་མར་རྩང་གིས་བསྐོར༔ རྩེ་མོར་ཤ་དང་ལིང་གས་བརྒྱན་༔ དུག་དང་ཁྲག་གིས་ལེགས་པར་བྱུགས༔ ལས་གཞུང་ཆ་ལག་མ་ཉམས་པ༔ སྔོན་དུ་སོང་ནས་འདི་ལྟར་བསྒོམ༔ ༼ཁ༽ ༔ཧཱུྃ་ཧཱུྃ་ཧཱུྃ༔ རང་མདུན་ཡཾ་ལས་རླུང་གི་དཀྱིལ་འཁོར་ལྗང་༔ དེ་སྟེང་རཾ་ལས་མེ་ཡི་མཎྜལ་དམར༔ དེ་སྟེང་པཾ་ལས་ཆུ་ཡི་གཞལ་ཡས་དཀར༔ དེ་སྟེང་ལཾ་ལས་ས་ཡི་ཕོ་བྲང་
སེར༔ དེ་སྟེང་ཀེཾ་ལས་དུར་ཁྲོད་འཇིགས་རུང་དབུས༔ མ་མོ་མཁའ་འགྲོ་ལྷ་སྲིན་སྡེ་བརྒྱད་ཚོགས༔ དྲག་གཏུམ་ཁྲོས་རྔམ་ཞེ་སྡང་དེ་ལྟར་འབར༔ མཚོན་ཆའི་བུ་ཡུག་གནམ་ལྕགས་ཐོག་སེར་འབེབས༔ འཇིགས་པའི་གཟུགས་འཆང་རྔམ་སྒྲས་སྲིད་གསུམ་གཡོ༔ སྲོག་གཅོད་ཤན་པའི་མདུན་ས་དེ་ཡི་དབུས༔ དྲེགས་པ་གཟའ་ཡི་ཐུགས་སྤྲུལ་རྒྱ་སྟག་དམར༔ ལས་ལ་ཆས་པའི་གསེར་འཛུམ་མཛེས་ཤིང་བཀྲ༔ ཁ་གདངས་མཆེ་གཙིགས་ལྗགས་དམར་གློག་ལྟར་འཁྱུག༔
དཔའ་རྩལ་སྟོབས་ལྡན་གནམ་ལྕགས་སྡེར་བཞི་བགྲད༔ དམ་ལོག་རུ་དྲའི་སྙིང་ལ་ཐམས་སེ་ཐམ༔ རྒྱ་སྟག་སྦྲུམ་མ་ཁྲོས་པའི་ལྟོ་བའི་ནང་༔ རཀྵའི་ཡི་གེས་གསལ་བར་མཚན་པར་གྱུར༔ ༼ཁ༽ དེ་སྟེང་ཧཱུྃ་ཧཱུྃ་ཧཱུྃ་ལས་ཁྲོ་བོའི་རྒྱལ༔ གུ་རུ་རྡོ་རྗེ་གྲོ་ལོད་དྲག་པོ་རྩལ༔ དམར་ནག་ཁྲོས་པ་སྲིན་པོའི་ཆ་བྱད་ཅན༔ ཞལ་གཅིག་ཕྱག་གཉིས་སྤྱན་གསུམ་མཆེ་བཞི་གཙིགས༔ ལྗགས་འདྲིལ་སྨ་ར་ཨག་ཚོམ་མེ་ལྟར་འབར༔ རལ་གཡེང་ཐོད་སྐམ་ཕྲེང་བས་སྐྲ་མཚམས་བཅིངས༔ ཕྱག་གཡས་རྡོ་རྗེ་རྩེ་དགུ་ནམ་མཁར་འཕྱར༔ རྩེ་མོར་ཁྲོ་རྒྱལ་བྱ་ཁྱུང་འབར་བ་ལྡིང་༔ ཕྱག་གཡོན་དུག་གི་ལྕགས་ཕུར་འདྲིལ་ཞིང་འདེབས༔ རྩེ་མོར་ཐུགས་སྤྲུལ་གནམ་ལྕགས་སྡིག་པ་རྔམ༔ སྐུ་ལ་ཆོས་གོས་དམར་པོ་འཆམས་སྟབས་གསོལ༔ དུར་ཁྲོད་ཆས་བརྒྱད་དཔལ་གྱི་ཁྲོ་ཆས་རྫོགས༔ ཞབས་གཉིས་འདོར་སྟབས་རྒྱ་སྟག་སྟེང་དུ་གནས༔ བཀའ་བརྒྱུད་བླ་མའི་ཚོགས་
རྣམས་སྤྲིན་ལྟར་གཏིབས༔ ཡི་དམ་ཞི་ཁྲོའི་ལྷ་ཚོགས་ཆར་ལྟར་འབབ༔ དཔའ་བོ་མཁའ་འགྲོའི་ལྷ་ཚོགས་ས་ལྟར་གཡོ༔ ཆོས་སྐྱོང་ཕོ་རྒྱུད་མོ་རྒྱུད་ཆུ་ལྟར་ཁོལ༔ དྲེགས་པའི་དམག་ཚོགས་ལས་ལ་ཐོག་ལྟར་རྒྱུག༔ བཟོད་དཀའི་གཟི་བྱིན་འབར་བའི་ལྷ་ཚོགས་རྣམས༔ བཀྲ་གསལ་མངོན་སུམ་གསལ་བའི་སྣང་བར་གྱུར༔ ༼ང༽ ༔ཧཱུྃ་ཧཱུྃ་ཧཱུྃ༔ ཟླ་གམ་དམར་ནག་དབང་དྲག་གཞལ་ཡས་ནས༔ ཆེ་བའི་ཆེ་མཆོག་པདྨ་ཧེ་རུ་ཀ༔ ཁྲོ་རྒྱལ་རིག་འཛིན་རྡོ་རྗེ་དྲག་པོ་རྩལ༔ འཁོར་འདས་སྣང་སྲིད་ཟ་བྱེད་སྐུ་བཞེངས་ཤིག༔ ༼ཅ༽ ༔ཧཱུྃ་ཧཱུྃ་ཧཱུྃ༔ སྤྲུལ་པའི་འཁོར་ལོ་འབར་བའི་གཞལ་ཡས་ནས༔ སྐུ་སྤྲུལ་ཁྲོ་བོའི་ལྷ་ཚོགས་སྐུ་བཞེངས་ཤིག༔ དམར་ནག་ཆོས་འབྱུང་བསྣོལ་མའི་གཞལ་ཡས་ནས༔ གསུང་སྤྲུལ་ཁྲོ་མོའི་ལྷ་ཚོགས་སྐུ་བཞེང་ཤིག༔ ༼ཆ༽ ༔ཧཱུྃ་ཧཱུྃ་ཧཱུྃ༔ རྡོ་རྗེ་རྩེ་ལྔ་འབར་བའི་གཞལ་ཡས་ནས༔ ཐུགས་སྤྲུལ་རིག་འཛིན་ལྷ་ཚོགས་སྐུ་
བཞེངས་ཤིག༔ སེར་གསལ་རིན་ཆེན་འབར་བའི་གཞལ་ཡས་ནས༔ ཡོན་ཏན་དཔའ་བོའི་ལྷ་ཚོགས་སྐུ་བཞེངས་ཤིག༔ ༼ཇ༽ ༔ཧཱུྃ་ཧཱུྃ་ཧཱུྃ༔ ལྗང་ནག་གྲུ་གསུམ་འབར་བའི་གཞལ་ཡས་ནས༔ ཕྲིན་ལས་མཁའ་འགྲོའི་ལྷ་ཚོགས་སྐུ་བཞེངས་ཤིག༔ རོ་དང་ཀེང་རུས་ཚང་ཚིང་དཀྱིལ་འཁོར་དང་༔ མཚོན་ཆ་བུ་ཡུག་འཚུབས་པའི་གཞལ་ཡས་ནས༔ ཆོས་སྐྱོང་ཕོ་རྒྱུད་མོ་རྒྱུད་སྐུ་གཞེངས་ཤིག༔ ༼ཉ༽ ༔ཧཱུྃ་ཧཱུྃ་ཧཱུྃ༔ སྲིད་གསུམ་རབ་འབྱམས་ཁམས་གསུམ་ཞིང་ཁམས་ནས༔ སྣང་སྲིད་ལྷ་སྲིན་སྡེ་བརྒྱད་སྐུ་བཞེངས་ཤིག༔ གླིང་བཞི་འཇིག་རྟེན་བཀོད་ལེགས་ཡུལ་གྲུ་ནས༔ དྲེགས་པའི་སྡེ་དཔོན་སུམ་ཅུ་སྐུ་བཞེངས་ཤིག༔ འཛམ་གླིང་དག་པའི་རྒྱ་བོད་ཡུལ་ལྗོངས་ནས༔ མ་སྲིང་བརྟན་མ་བཅུ་གཉིས་སྐུ་བཞེངས་ཤིག༔ སྟེང་ཕྱོགས་རྣམ་པར་རྒྱལ་བའི་ཁང་བཟང་ནས༔ ཡེ་ཤེས་ལྷ་ཡི་དམག་ཚོགས་སྐུ་བཞེངས་ཤིག༔ འོག་ཕྱོགས་ས་བླ་ས་འོག་ས་སྟེང་ནས༔ ས་
བདག་ཀླུ་གཉན་བཞི་བདག་སྐུ་བཞེངས་ཤིག༔ བཞེངས་ཤིག་བསྐུལ་ལོ་འབོད་དོ་མྱུར་དུ་བྱོན༔ ཆོས་ཤིག་དམ་ལོག་འདུལ་ཕྱིར་གནས་འདིར་བྱོན༔ མཛོད་ཅིག་མངོན་སྤྱོད་དྲག་པོའི་ཕྲིན་ལས་མཛོད༔ སྒྲུབས་ཤིག་རྣལ་འབྱོར་ཕྲིན་ལས་མྱུར་དུ་སྒྲུབས༔ སྲུངས་ཤིག་སྔོན་གྱི་དམ་ཚིག་གཉན་པོ་སྲུངས༔ དེ་རིང་དབང་དྲག་འབར་བའི་དམ་ལ་འདུས༔ དེ་རིང་ཐུགས་དམ་དུས་ལས་མ་འདའ་ཞིག༔ ཨཱོཾ་ཨཱཿཧཱུྃ་ཤྲཱི་ཧེ་རུ་ཀ་མ་ཧཱ་གུ་རུ་པདྨ་སཾ་བྷ་ཝ་བཛྲ་ཀྲོ་ངྷ་རཱ་ཛཿ ཙིཏྟ་བཛྲ་ས་མ་ཡ་ཛཿཛཿ ཕེཾ་ཕེཾ༔ ཧཱུྃ་ཧཱུྃ༔ ཨ་ཡ་མ་དུ་རུ་ཙ་ཤ་ན་ས་མ་ཡ་ལོ་ཀ་ན་ཐ་ཤཱ་ས་ན་རཀྵ་སཱ་ག་ར་ག་ཎ་བཛྲ་ས་མ་ཡ་ཛཿཛཿ ཨཾ་ཀུ་ཤ་ཛཿཧཱུྃ༔ ༼ཏ༽ ༔ཧཱུྃ་ཧཱུྃ་ཧཱུྃ༔ རཀྟ་བདུད་རྩི་རྣམས་འདིར་འབུལ་མཆན་ གསོལ་ལོ་མཆོད་དོ་རྡོ་རྗེ་དྲེགས་འཇོམ་རྩལ༔ སྣང་སྲིད་ཟིལ་གནོན་རྡོ་རྗེ་གྲོ་ལོད་རྩལ༔ ཁམས་གསུམ་དབང་སྡུད་རྡོ་རྗེ་དྲག་པོ་རྩལ༔ རྩལ་ལྡན་ཡེ་ཤེས་ཁྲོ་རྒྱལ་ལྷ་ཆེན་པོ༔ སྣང་སྲིད་འཁོར་
འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ འཆི་མེད་རྡོ་རྗེའི་ལྷ་ཁྱོད་མངའ་གསོལ་ལོ༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུག་གྲུབ་ཤོག༔ ༼ཐ༽ ༔ཧཱུྃ་ཧཱུྃ་ཧཱུྃ༔ གསོལ་ལོ་མཆོད་དོ་ཁྲོ་བོ་ཁྲོ་མོའི་ཚོགས༔ སྐུ་སྤྲུལ་ཡེ་ཤེས་ཁྲོ་བཅུའི་ལྷ་ཚོགས་དང་༔ གསུང་སྤྲུལ་དབང་ཕྱུག་ཕྲ་མེན་ཉེར་བརྒྱད་ཚོགས༔ སྤྲུལ་པ་ཡང་སྤྲུལ་ཉིང་སྤྲུལ་ཁྲོ་བོའི་ཚོགས༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ སྐུ་སྤྲུལ་ཁྲོ་བོ་ཁྲོ་མོ་མངའ་གསོལ་ལོ༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་
ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔ ༼ད༽ ༔ཧཱུྃ་ཧཱུྃ་ཧཱུྃ༔ གསོལ་ལོ་མཆོད་དོ་བླ་མ་རིག་འཛིན་ཚོགས༔ ཐུགས་རྗེའི་གཏེར་མངའ་རྡོ་རྗེ་ཐོད་ཕྲེང་རྩལ༔ ཀུན་བཟང་ཡབ་ཡུམ་རིགས་ལྔའི་སངས་རྒྱས་དང་༔ རིགས་གསུམ་མགོན་པོ་སྐུ་གསུམ་མཁའ་འགྲོའི་ཚོགས༔ སྤྲུལ་པ་ཡང་སྤྲུལ་རྗེ་འབངས་ཉེར་ལྔའི་ཚོགས༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ ཐུགས་མཆོག་བླ་མ་རིག་འཛིན་མངའ་གསོལ་ལོ༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔ ༼ན༽ ༔ཧཱུྃ་ཧཱུྃ་ཧཱུྃ༔ གསོལ་ལོ་
མཆོད་དོ་དཔའ་བོ་རྟ་མཆོག་དཔལ༔ ཐབས་ཀྱི་ཆོ་འཕྲུལ་དཔའ་བོ་ཧ་ཡ་གྲཱི༔ གིང་ཆེན་དཔའ་བོ་བྱེ་བ་ས་ཡའི་ཚོགས༔ འགྲོ་འདུལ་ཐབས་མཁས་ཐུགས་རྗེའི་སྐུར་སྟོན་རྣམས༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ ཐབས་ཀྱི་རང་བཞིན་དཔའ་བོ་མངའ་གསོལ་ལོ༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔ ༼པ༽ ༔ཧཱུྃ་ཧཱུྃ་ཧཱུྃ༔ གསོལ་ལོ་མཆོད་དོ་མ་མོ་མཁའ་འགྲོའི་ཚོགས༔ ཤེས་རབ་ཕར་ཕྱིན་རྡོ་རྗེ་ཕག་མོ་དང་༔ སྐུ་སྤྲུལ་མཁའ་འགྲོ་སེང་གེའི་གདོང་པ་ཅན༔ སྤྲུལ་པ་རྡོ་རྗེ་རིན་ཆེན་པདྨ་ལས༔ སངས་རྒྱས་མཁའ་འགྲོ་ལ་སོགས་བྱེ་བ་འབུམ༔ ཤེས་རབ་རང་བཞིན་ཤེས་
རབ་ཕར་ཕྱིན་ཚོགས༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ ཤེས་རབ་རང་བཞིན་མཁའ་འགྲོ་མངའ་གསོལ་ལོ༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱེད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔ ༼ཕ༽ ༔ཧཱུྃ་ཧཱུྃ་ཧཱུྃ༔ གསོལ་ལོ་མཆོད་དོ་བསྟན་སྲུང་རྒྱ་མཚོའི་ཚོགས༔ ཁྲོ་རྒྱལ་ཁྲག་འཐུང་མ་ནིང་ནག་པོ་ཆེ༔ ཆོས་སྐྱོང་ཕོ་རྒྱུད་མོ་རྒྱུད་ཡོངས་ཀྱི་རྗེ༔ བཀའ་སྲུང་དམ་ཅན་རྒྱ་མཚོའི་རྒྱལ་པོ་སྟེ༔ ཕྲིན་ལས་ཐོགས་མེད་ལས་ཀྱི་ཤན་པའི་ཚོགས༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོར་ད་རོལ་ཅིག༔ ཕྲིན་ལས་བསྟན་སྲུང་རྒྱ་མཚོ་མངའ་གསོལ་ལོ༔ གསང་རྫས་སྨན་
གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔ ༼བ༽ ༔ཧཱུྃ་ཧཱུྃ་ཧཱུྃ༔ གསོལ་ལོ་མཆོད་དོ་སྣང་སྲིད་ལྷ་འདྲེའི་ཚོགས༔ སྔོན་ཚེ་བར་དང་ཐ་དུས་བསྐལ་པའི་བར༔ ལྷ་སྲིན་སྡེ་བརྒྱད་གཙང་རིགས་མགོན་པོའི་ཚོགས༔ དྲེགས་པའི་སྡེ་དཔོན་སུམ་ཅུ་བརྟན་མ་དང་༔ གཞན་ཡང་ཡུལ་ལྷ་ཟོ་དོར་རིགས་དྲུག་མགྲོན༔ སྣང་སྲིད་འཁོར་འདས་འདི་དག་བཞེས་སུ་གསོལ༔ ཆོས་དབྱིངས་རྣམ་དག་ཆེན་པོ་ད་རོལ་ཅིག༔ གསང་རྫས་སྨན་གཏོར་རཀྟ་མཆོད་པར་འབུལ༔ མཐུན་རྫས་དུར་ཁྲོད་ཆས་བརྒྱད་ཡོ་བྱད་འདིས༔ ཐུགས་དམ་བསྐང་ངོ་ཉམས་ཆག་དག་གྱུར་ཅིག༔ ནོངས་པ་བཤགས་སོ་དག་གཙང་དངོས་གྲུབ་སྩོལ༔ ཕྲིན་ལས་རྣམ་བཞིའི་འགྲོ་དོན་ལྷུན་གྲུབ་ཤོག༔
༼མ༽ ༔ཧཱུྃ་ཧཱུྃ་ཧཱུྃ༔ ལིངྒ་ལྕགས་ཁང་རང་མདུན་ཨེ་ལས་ལྕགས་ཁང་གྲུ་གསུམ་འབར༔ སྐུ་གསུམ་ཡེ་ཤེས་ལྔ་ཡི་འོད་ཟེར་འཕྲོ༔ དེ་དབུས་ནྲྀ་ཏྲི་ལས་བྱུང་གདོན་བགེགས་གཟུགས༔ དབང་པོ་སྒོ་དྲུག་མ་ཉམས་ལེགས་གསལ་ཞིང་༔ རྣམ་ཤེས་ཚོགས་བརྒྱད་དྲན་རིག་རབ་གསལ་བའི༔ རྒྱན་སྤྲས་དམིགས་བྱའི་གཟུགས་སུ་གསལ་བར་གྱུར༔ ༼ཙ༽ ༔ན་མོ༔ འགུགས་གཞུག $དཀོན་མཆོག་གསུམ་དང་ཡི་དམ་ཞི་ཁྲོའི་ལྷ༔ དཔའ་བོ་མཁའ་འགྲོ་ཆོས་སྐྱོང་དམ་ཅན་ཚོགས༔ རྒྱལ་བ་རབ་འབྱམས་རྣམས་ཀྱི་བདེན་སྟོབས་ཀྱིས༔ བསྟན་དང་འགྲོ་ཀུན་བདག་ཅག་འཁོར་བཅས་ལ༔ གནོད་ཅིང་འཚེ་བའི་འདྲེ་གདོན་འབྱུང་པོ་དང་༔ གཟུགས་ཅན་གཟུགས་མེད་རུ་དྲ་དམ་ལོག་རྣམས༔ སྣང་སྲིད་འཁོར་འདས་རིགས་དྲུག་ལམ་རྒྱུད་ལྔ༔ སྐྱེ་བའི་གནས་བཞི་གར་ནས་གར་འདུག་ཀྱང་༔ སྐད་ཅིག་རང་དབང་མེད་པར་འདིར་ཁུག་ཅིག༔ དམིགས་པའི་རྟེན་ལ་སིབ་
སིབ་ཐིམ་པར་གྱུར༔ ནྲྀ་ཏྲི་ཨཱ་ཀཪྵ་ཡ་ཛཿཛཿ ཛཿཧཱུྃ་བཾ་ཧོཿ མཱ་ར་ཡ་ནན་ནན༔ བྷནྡྷ་བྷནྡྷ་ཧོཿ ༼ཚ༽ ༔ཧཱུྃ་ཧཱུྃ་ཧཱུྃ༔ ཕུར་བསྐྱེད་རང་ཉིད་སྐད་ཅིག་རྫུས་སྐྱེས་སུ༔ གུ་རུ་རྡོ་རྗེ་གྲོ་ལོད་རྩལ༔ དབྱེར་མེད་རྡོ་རྗེ་ཕུར་པ་ལྗང་༔ རལ་གཡེང་གཤོག་ལྡིང་མེ་དཔུང་འབར༔ ཞལ་བགྲད་མཆེ་གཙིགས་སྤྱན་གསུམ་གཡོ༔ ཁྲོས་རྔམ་ཕྱག་གཉིས་ཕུར་པ་འདྲིལ༔ སྐུ་སྨད་ཕུར་བུ་ཟུར་གསུམ་འབར༔ གནས་ལྔར་རྒྱལ་བ་རིགས་ལྔ་དང་༔ སྤྱི་བོར་ཀུན་བཟང་ཡབ་ཡུམ་བཞུགས༔ བཀྲག་མདགས་གཟི་བརྗིད་འོད་ཟེར་འབར༔ ཨཱོཾ་ཨཱཿཧཱུྃ༔ ཤྲཱི་ཧེ་རུ་ཀ་མ་ཧཱ་གུ་རུ་པདྨ་སཾ་བྷ་ཝ་བཛྲ་ཀྲོ་ངྷ་རཱ་ཛཿ ཛྙཱ་ན་བཛྲ་ཀརྨ་ཀཱི་ལ་ཡ་ཧཱུྃ་ཧཱུྃ་ཧཱུྃ༔ ༼ཛ༽ ལྷ་དབྱེ་༔འཻ་ལས་ངན་ཁྱོད་ཀྱི་དཔུང་དང་གྲོགས༔ ཕྱི་ནང་གསང་བ་ཡང་གསང་ལྷ༔ ལྷ་སྲུང་མགོན་བྱེད་ཕྲ་རགས་ཀུན༔ ཏིང་འཛིན་ལྷ་སྔགས་འཕྲོ་འདུ་ཡི༔ བདེན་སྟོབས་ནུས་པས་འུབ་ཀྱིས་བསྡུས་༔ རང་ཉིད་ལྷ་དང་དབྱེར་མེད་འདྲེས༔ ཕ་རོལ་རུ་དྲ་
དམ་ཉམས་ཀྱི༔ ཕུང་ཁམས་རླག་བྱེད་གཤེད་མར་གྱུར༔ ༼ཝ༽ ཕུར་གདབ་༔འཻ་དམ་ཉམས་རུ་དྲ་ལས་ངན་ཁྱོད༔ འཁོར་འདས་སྲིད་ནས་ད་ལྟའི་བར༔ ལས་ཉོན་འཁོར་བར་འཁོར་ཞིང་འཁྱམས༔ ད་ལན་དེ་ལས་སྒྲོལ་བའི་ཕྱིར༔ ཀུན་བཟང་ཡབ་ཡུམ་ཕུར་བུས་གདབ༔ དམ་ཉམས་རུ་དྲ་ལས་ངན་ཁྱོད༔ དུག་ལྔའི་ཕུང་ཁམས་བརླག་པའི་ཕྱིར༔ ཡེ་ཤེས་ལྔ་ཡི་ཕུར་བུས་གདབ༔ དམ་ཉམས་རུ་དྲ་ལས་ངན་ཁྱོད༔ དུག་གསུམ་ལུས་ངག་ཡིད་གསུམ་ལ༔ སྐུ་གསུམ་ལྷུན་གྲུབ་ཕུར་བུས་གདབ༔ རྣམ་ཤེས་རྟེན་དང་ཕྲལ་བར་གྱུར༔ ཕུང་ཁམས་སྐྱེ་མཆེད་རྡུལ་དུ་རློག༔ རྡོ་རྗེ་ཕུར་བུས་མཱ་ར་ཡ༔ བཛྲ་ཀཱི་ལ་ས་མ་ཡ༔ ཨཱོཾ་ཨཱཿཧཱུྃ་ཤྲཱི་ཧེ་རུ་ཀ་མ་ཧཱ་གུ་རུ་པདྨ་སཾ་བྷ་ཝ་བཛྲ་ཀྲོ་ངྷ་རཱ་ཛཿ ཛྙཱ་ན་ཀརྨ་ཀཱི་ལ་ཡ་ཧཱུྃ་ཧཱུྃ་ཧཱུྃ༔ རུ་དྲའི་ཙིཏྟ་ལ་མཱ་ར་ཡ་རྦད་རྦད༔ ༼ཞ༽ འཕོ་བ་འདེབས་པ་༔འཻ་ལས་ངན་ཁྱོད་ཀྱི་རྣམ་ཤེས་ནི༔ སྤྱི་བོའི་གཙུག་ཐོན་དམིགས་མེད་བསྟིམ༔ སྡང་སེམས་
དུག་ལྔ་རང་སར་ཡལ༔ སྙིང་རྗེ་བྱང་ཆུབ་སེམས་ལྡན་ཞིང་༔ དུག་གསུམ་གདུག་པའི་བསམ་སྦྱོར་ཞི༔ ལས་ངན་རྣམ་སྨིན་དག་གྱུར་ཏེ༔ འགྲོ་ལ་ཕན་པའི་སེམས་ལྡན་ཞིང་༔ སྐད་ཅིག་སངས་རྒྱས་སར་འགོད་ཤོག༔ ཨ་ཨ་ཨ༔ ཕཊ་ཕཊ་ཕཊ༔ ༼ཟ༽ ཧཱུྃ་ཧཱུྃ་ཧཱུྃ༔ ལིང་རོ་ཞལ་བསྟབ་དམ་ཉམས་ལས་ངན་རུ་དྲ་ཡི༔ ཕུང་ཁམས་བསྒྲལ་བའི་ཤ་ཁྲག་རུས༔ མི་གཙང་དངོས་པོ་རཾ་གྱིས་བསྲེགས༔ མ་དག་དྲི་མ་ཁཾ་གྱིས་བཀྲུས༔ ཉེས་སྐྱོན་རྟོག་ཚོགས་ཡཾ་གྱིས་གཏོར༔ དག་གཙང་དམ་ཚིག་བདུད་རྩི་འདི༔ ཨཱོཾ་ཨཱཿཧཱུྃ་གི་བྱིན་གྱིས་བརླབས༔ ཡེ་ཤེས་བདུད་རྩིའི་རྒྱ་མཚོར་གྱུར༔ ཧཱུྃ་ཧཱུྃ་ཧཱུྃ༔ ཀུན་བཟང་རིགས་ལྔའི་སངས་རྒྱས་དང་༔ རྒྱལ་བ་རབ་འབྱམས་ཞལ་དུ་བསྟབ༔ བླ་མ་ཡི་དམ་དཔའ་བོ་དང་༔ མཁའ་འགྲོ་ཆོས་སྐྱོང་ཞལ་དུ་བསྟབ༔ བཀའ་སྲུང་དམ་ཅན་རྒྱ་མཚོ་དང་༔ ལྷ་སྲིན་སྡེ་བརྒྱད་ཞལ་དུ་བསྟབ༔ དྲེགས་པའི་སྡེ་དཔོན་སུམ་ཅུ་དང་༔ བརྟན་མ་བཅུ་གཉིས་
ཞལ་དུ་བསྟབ༔ ཡུལ་ལྷ་ཟོ་དོར་གཉན་པོ་དང་༔ གཏེར་སྲུང་བདུད་མགོན་ཞལ་དུ་བསྟབ༔ སྣང་སྲིད་འཁོར་འདས་ལྷ་འདྲེ་དང་༔ རིགས་དྲུག་ལན་ཆགས་ཞལ་དུ་བསྟབ༔ ཞལ་དུ་བསྟབ་པོ་ཆེམ་ཆེམ་ཟོ༔ མགུལ་དུ་སྒྲིམས་ཤིག་ལྗིབ་ལྗིབ་རོལ༔ ལྷག་མ་མེད་པར་ཚིམ་པར་བཞེས༔ ཕྲིན་ལས་རྣམ་བཞི་མྱུར་འགྲུབ་ཤོག༔ ཨཱོཾ་ཨཱཿཧཱུྃ་ཤྲཱི་ཧེ་རུ་ཀ་མ་ཧཱ་གུ་རུ་པདྨ་སཾ་བྷ་ཝ་བཛྲ་ཀྲོ་ངྷ་རཱ་ཛཿ ཙིཏྟ་བཛྲ་ས་མ་ཡ་ཛཿཛཿ ཕེཾ་ཕེཾ༔ ཧཱུྃ་ཧཱུྃ༔ འདྲེ་གདོན་འབྱུང་པོ་རུ་དྲ་དམ་ལོག་གི་ཤ་ཁྲག་རུས་གསུམ་དོན་སྙིང་རྣམ་ལྔ་གཟུགས་དང་ཕུང་ཁམས་སྐྱེ་མཆེད་འདི་ལྷག་མ་མེད་པར་བཞེས་སུ་གསོལ་ཁཱ་ཧི༔ ༼འ༽ དྲག་པོའི་ལས་བསྐུལ༔ ༔ཧཱུྃ་ཧཱུྃ་ཧཱུྃ༔ ཆེ་བའི་ཆེ་མཆོག་པདྨ་ཧེ་རུ་ཀ༔ རྒྱལ་བ་རབ་འབྱམས་མཐུ་སྟོབས་གཅིག་བསྡུས་པ༔ རིག་འཛིན་ཁྲོ་རྒྱལ་རྡོ་རྗེ་དྲག་པོ་རྩལ༔ འཇིགས་རུང་དྲག་པོའི་སྐུར་སྟོན་ལས་ལ་ཆོས༔ མངོན་སྤྱོད་དྲག་པོའི་ཕྲིན་ལས་དུས་ལ་
བབ༔ ཧཱུྃ་ཧཱུྃ་ཧཱུྃ༔ སྦས་གསང་གབ་པའི་ཡེ་ཤེས་ཁྲོ་བོ་བཅུ༔ དགྱེས་པའི་གད་རྒྱངས་རྔམ་པའི་དྲག་ཤུལ་ལྡན༔ ཁྲོས་པའི་ཆ་བྱད་རྣོ་བའི་མཚོན་ཆ་འཛིན༔ ཡེ་ཤེས་ཁྲོ་བཅུ་ལྷ་ཚོགས་ལས་ལ་ཆོས༔ མངོན་སྤྱོད་དྲག་པོའི་ཕྲིན་ལས་དུས་ལ་བབ༔༼ཡ༽ ༔ཧཱུྃ་ཧཱུྃ་ཧཱུྃ༔ སྦས་གསང་གབ་པའི་འཇིགས་རུང་ཁྲོ་མོའི་ཚོགས༔ མ་གཅིག་སྲིད་པའི་རྒྱལ་མོ་མུ་ཁ་ལེ༔ སྤྲུལ་པའི་ཁྲོ་མོ་དབང་ཕྱུག་ཉེར་བརྒྱད་ཚོགས༔ བརྡའ་དོན་རྟགས་ཀྱི་མགོ་བརྙན་སྣ་ཚོགས་སྟོན༔ འཁོར་བའི་ཞེན་པ་ཟློག་པའི་ཕྱག་མཚན་བསྣམས༔ འཇིགས་རུང་ཁྲོ་མོའི་ལྷ་ཚོགས་ལས་ལ་ཆོས༔ མངོན་སྤྱོད་དྲག་པོའི་ཕྲིན་ལས་དུས་ལ་བབ༔ ༼ར༽ ༔ཧཱུྃ་ཧཱུྃ་ཧཱུྃ༔ སྦས་གསང་གབ་པའི་དྲག་པོ་ཐུགས་ཀྱི་ལྷ༔ ཁྲོ་རྒྱལ་རྡོ་རྗེ་གཏུམ་པོ་གྲོ་ལོད་རྩལ༔ ཀུན་བཟང་ཡབ་ཡུམ་རིགས་ལྔའི་སངས་རྒྱས་དང་༔ མཁའ་འགྲོ་སྡེ་ལྔ་རྗེ་འབངས་ཉེར་ལྔའི་ཚོགས༔ བླ་མ་རིག་འཛིན་ལྷ་ཚོགས་ལས་ལ་ཆོས༔
མངོན་སྤྱོད་དྲག་པོའི་ཕྲིན་ལས་དུས་ལ་བབ༔ ༼ལ༽ ༔ཧཱུྃ་ཧཱུྃ་ཧཱུྃ༔ སྦས་གསང་གབ་པའི་ཡོན་ཏན་ལྷ་ཚོགས་ནི༔ དཔལ་ཆེན་ཁྲག་ཐུང་རྟ་མཆོག་རྒྱལ་པོ་དང་༔ རྒྱལ་ཀུན་ཡུམ་ཆེན་རྡོ་རྗེ་ཕག་མོ་ཆེ༔ ཕྲིན་ལས་ཀུན་བདག་མཁའ་འགྲོ་སེང་གེའི་གདོང་༔ སྤྲུལ་པ་རྡོ་རྗེ་རིན་ཆེན་པདྨ་ལས༔ མ་མོ་མཁའ་འགྲོ་ཐེར་འབུམ་ཐེར་འབུམ་ཕྲག༔ ཡོན་ཏན་མཁའ་འགྲོ་མ་ཚོགས་ལས་ལ་ཆོས༔ མངོན་སྤྱོད་དྲག་པོའི་ཕྲིན་ལས་དུས་ལ་བབ༔ ༼ཤ༽ ༔ཧཱུྃ་ཧཱུྃ་ཧཱུྃ༔ སྦས་གསང་གབ་པའི་ཕྲིན་ལས་ལྷ་ཚོགས་ནི༔ རབ་འབྱམས་རྒྱལ་བའི་བསྟན་སྲུང་མཐུ་རྩལ་ལྡན༔ མ་ནིང་ནག་པོ་སྲོག་བདུད་དགྲ་བོའི་གཤེད༔ ལས་ཀྱི་དྲེགས་པ་ཏྲཀྴད་ནག་པོ་བདུད༔ བསྟན་སྲུང་དམ་ཅན་རྒྱ་མཚོའི་འཁོར་ཚོགས་བཅས༔ ཕྲིན་ལས་ཆོས་སྐྱོང་ལྷ་ཚོགས་ལས་ལ་ཆོས༔ སྣང་སྲིད་ལྷ་སྲིན་སྡེ་བརྒྱད་ལས་ལ་ཆོས༔ དྲེགས་པའི་སྡེ་དཔོན་སུམ་ཅུ་ལས་ལ་ཆོས༔ དགེ་བསྙེན་སུམ་བརྒྱ་དྲུག་ཅུ་
ལས་ལ་ཆོས༔ མ་སྲིང་བརྟན་མ་བཅུ་གཉིས་ལས་ལ་ཆོས༔ སྣང་སྲིད་འཁོར་འདས་ལྷ་འདྲེ་ལས་ལ་ཆོས༔ མངོན་སྤྱོད་དྲག་པོའི་ཕྲིན་ལས་དུས་ལ་བབ༔ ༼ས༽ ༔ཧཱུྃ་ཧཱུྃ་ཧཱུྃ༔ རིག་འཛིན་རྡོ་རྗེ་གྲོ་ལོད་སྤྱན་སྔ་རུ༔ སྔོན་ཚེ་ཞལ་བཞེས་དམ་བཅའ་ཇི་བཞིན་དུ༔ དམ་ཚིག་སྲུངས་ལ་ཕྲིན་ལས་མྱུར་འགྲུབ་མཛོད༔ མ་གཡེལ་མ་འདའ་དམ་ཅན་རྒྱ་མཚོའི་ཚོགས༔ དམ་ལས་འདས་ན་རྡོ་རྗེའི་དམྱལ་བར་ལྟུང་༔ དེ་བས་དུས་གསུམ་སངས་རྒྱས་བཀའ་བཞིན་སྒྲུབས༔ བཅོམ་ལྡན་གསང་བའི་བདག་པོའི་གསུང་བཞིན་སྒྲུབས༔ རྡོ་རྗེ་གྲོ་ལོད་རྩལ་གྱིས་དམ་བཞག་ལྟར༔ ཐ་ཚིག་སྨོན་ལམ་གཉེར་གཏད་དྲན་པ་གྱིས༔ ཐུགས་དམ་དུས་ལས་མ་འདའ་ས་མ་ཡ༔ ༼ཧ༽ ༔ཧཱུྃ་ཧཱུྃ་ཧཱུྃ༔ དུས་གསུམ་རྒྱལ་བའི་དཀྱིལ་འཁོར་རབ་འབྱམས་རྣམས༔ ཞལ་བཞེས་ཐུགས་དམ་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་
མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼ཨ༽ ༔ཧཱུྃ་ཧཱུྃ་ཧཱུྃ༔ ལྷག་པའི་ལྷ་མཆོག་དམར་ནག་མེ་ཕྲེང་ཅན༔ ཆེ་བའི་ཆེ་མཆོག་ཁྲོ་རྒྱལ་ཧེ་རུ་ཀ༔ ཡང་གསང་ཡེ་དག་སྐུ་ལྔ་ཡེ་རྫོགས་ཤིང་༔ ཆོས་དབྱིངས་ཁྱབ་གདལ་འདུས་མ་བྱས་པའི་སྐུ༔ ཐབས་ཀྱི་ཆོས་འཕྲུལ་རྡོ་རྗེ་དྲག་པོ་རྩལ༔ སྟོབས་ཀྱི་ཕར་ཕྱིན་རྡོ་རྗེ་གྲོ་ལོད་རྩལ༔ ཡེ་ཤེས་ལུས་ལྡན་རྡོ་རྗེ་དྲེགས་འཇོམས་རྩལ༔ སྣོན་ལམ་བདེན་སྟོབས་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼གུ༽ ༔ཧཱུྃ་ཧཱུྃ་ཧཱུྃ༔ སྤྲུལ་པའི་ཁྲོ་རྒྱལ་ཡེ་ཤེས་ཁྲོ་བོ་བཅུ༔ ས་བཅུ་ཡེ་རྫོགས་ལྷུན་གྲུབ་རོལ་རྩེད་ལས༔ ཐབས་ཀྱི་ཆོ་འཕྲུལ་ཁྲོ་གཏུམ་འབར་
བའི་སྐུ༔ སྡིགས་པའི་མཚོན་ཆས་རུ་དྲའི་སྙིང་ལ་གཟིར༔ རྔམ་པའི་ཧཱུྃ་སྒྲས་སྣང་སྲིད་འདར་ཞིང་སྡངས༔ གར་གྱི་ཉམས་དགུ་དཔལ་གྱི་ཆས་བརྒྱད་རྫོགས༔ སྤྲུལ་པའི་ཁྲོ་བོས་རབ་འབྱམས་ཞིང་ཀུན་ཁྱབ༔ ཡེ་ཤེས་ཁྲོ་བཅུའི་ལྷ་ཚོགས་འཁོར་བཅས་རྣམས༔ ཞལ་བཞེས་ཐུགས་དམ་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼རུ༽ ༔ཧཱུྃ་ཧཱུྃ་ཧཱུྃ༔ ལས་ཀྱི་ཁྲོ་མོ་སྲིད་རྒྱལ་ཕྲིན་ལས་བདག༔ མྱུར་མགྱོགས་རྫུ་འཕྲུལ་ནམ་མཁའི་གློག་ལྟར་འཁྱུག༔ ཁྲོ་གཏུམ་རྔམ་བརྗིད་དྲག་ཤུལ་སྟོབས་དང་ལྡན༔ སྤྲུལ་པའི་ཕྲ་མེན་དབང་ཕྱུག་ཉེར་བརྒྱད་ཚོགས༔ འཇིགས་རུང་གཟུགས་འཆང་མགོ་བརྙན་སྣ་ཚོགས་ཅན༔ རྣོ་དབལ་མཚོན་ཆས་གནོད་བྱེད་དུམ་བུར་གཏུབ༔ ཤ་ཁྲག་ནང་
རོལ་ངོམས་མེད་ཟས་སུ་ཟ༔ བགེགས་དཔུང་སྲེག་བྱེད་ཡེ་ཤེས་ཁྲོ་མོའི་ཚོགས༔ ཞལ་བཞེས་ཐུགས་དམ་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼པད༽ ༔ཧཱུྃ་ཧཱུྃ་ཧཱུྃ༔ སྣང་སྲིད་འཁོར་འདས་ཀུན་བདག་ཧེ་རུ་ཀ༔ ཐོག་མའི་སངས་རྒྱས་ཀུན་བཟང་ཡབ་ཡུམ་གྱི༔ སྤྲུལ་པའི་རོལ་རྩེད་རྒྱལ་བ་རབ་འབྱམས་ཤར༔ རྣམ་སྣང་མི་བསྐྱོད་རིན་འབྱུང་འོད་དཔག་མེད༔ དོན་གྲུབ་ལ་སོགས་བདེ་གཤེགས་ཕ་མཐའ་ཡས༔ སྤྲུལ་པའི་འཁོར་ལོས་སྣང་སྲིད་འཁོར་འདས་ཁྱབ༔ ཞི་རྒྱས་དབང་དྲག་ཕྲིན་ལས་སྣ་ཚོགས་སྟོན༔ རབ་འབྱམས་རྒྱལ་བའི་དཀྱིལ་འཁོར་དེ་དག་ཀྱང་༔ སོ་སོ་མ་ཡིན་པད་འབྱུང་སྐུ་ལ་རྫོགས༔ བརྡའ་དོན་རྟགས་ཀྱི་སྐུ་མདོག་ཕྱག་མཚན་ཡང་༔
གང་ལ་གང་འདུལ་དེ་ལ་དེར་སྟོན་པའི༔ འགྲོ་འདུལ་ཐབས་མཁས་རྡོ་རྗེ་དྲག་པོ་རྩལ༔ ཕྱི་ལྟར་མཚན་གསོལ་པདྨ་འབྱུང་གནས་ཞེས༔ ནང་ལྟར་མཚན་གསོལ་པདྨ་བཛྲར་གྲགས༔ གསང་མཚན་རིག་འཛིན་རྡོ་རྗེ་དྲག་པོ་རྩལ༔ ཡང་གསང་ཁྲོ་རྒྱལ་རྡོ་རྗེ་གྲོ་ལོད་རྩལ༔ སྦས་གསང་ཁྲག་འཐུང་རྡོ་རྗེ་དྲེགས་འཇོམས་རྩལ༔ ཐུགས་གསང་དབང་ཆེན་པདྨ་ཧེ་རུ་ཀ༔ སྦས་གསང་གབ་པའི་མཚན་གསོལ་འདི་ལྟ་སྟེ༔ ཧཱུྃ་ནག་མེ་འབར་པདྨ་དྲག་པོ་རྩལ༔ མ་རིག་རྟོག་ཚོགས་ཡེ་ཤེས་མེ་ཡིས་སྲེག༔ མ་དག་རྟོག་ཚོགས་སྐུ་གསུམ་རླུང་གིས་གཏོར༔ དག་གཙང་མཆོག་གི་དངོས་གྲུབ་སྟེར་མཛད་པའི༔ བླ་མ་རིག་འཛིན་ལྷ་ཚོགས་འཁོར་བཅས་རྣམས༔ ཞལ་བཞེས་ཐུགས་དམ་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་
རྦོད་གཏོང་ཟློག་པའི་ཕྲིན་ལས་མཛོད༔ ༼མ༽ ༔ཧཱུྃ་ཧཱུྃ་ཧཱུྃ༔ ཡོན་ཏན་དཔག་པར་དཀའ་བའི་ཕ་རོལ་སོན༔ ཡེ་ཤེས་སྐུ་ལ་སྐྱེ་འཆི་མི་མངའ་ཕྱིར༔ ཐབས་ཀྱི་ཆོ་འཕྲུལ་དབང་ཆེན་འབར་བའི་སྐུ༔ ཧ་ཡ་གྲཱི་ཝ་དམ་ཉམས་རུ་དྲའི་གཤེད༔ གསང་བའི་ཡུམ་མཆོག་རྡོ་རྗེ་ཕག་མོ་དང་༔ ཐབས་ཀྱི་སྤྲུལ་པ་དཔའ་བོ་གིང་གི་ཚོགས༔ ཤེས་རབ་གར་སྒྱུར་མཁའ་འགྲོ་བྱེ་བ་འབུམ༔ དག་པ་མཁའ་སྤྱོད་གནས་སུ་སྐུ་བཞུགས་ཀྱང་༔ འགྲོ་བའི་དོན་དུ་དུས་ཀུན་ས་ལེར་གཟིགས༔ སྐལ་ལྡན་བུ་སློབ་མིག་འབྲས་ལྟ་བུར་སྲུང་༔ དམ་ཚིག་ཅན་གྱི་དཔའ་བོ་མཁའ་འགྲོའི་ཚོགས༔ རྣོ་དབལ་ཕྱག་མཚན་རུ་དྲའི་སྙིང་ལ་གཟིར༔ རྣམ་རྟོག་ཕུང་ཁམས་རྡུལ་རློག་དུམ་བུར་གཏུབ་༔ ཤ་ཁྲག་རུས་ལ་ཧབ་ཧབ་ཟས་སུ་ཟོ༔ རྣམ་ཤེས་སྐྱེ་མཆེད་ཆོས་ཀྱི་དབྱིངས་སུ་སྤོར༔ རུ་དྲ་འཇོམས་བྱེད་དཔའ་བོ་མཁའ་འགྲོའི་ཚོགས༔ ཞལ་བཞེས་ཐུགས་དམ་དུས་ལས་མ་
འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔ བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼སིད༽ ༔ཧཱུྃ་ཧཱུྃ་ཧཱུྃ༔ བཅོམ་ལྡན་ཀུན་བཟང་ཆེ་མཆོག་ཧེ་རུ་ཀའི༔ ཐབས་ཀྱི་ཆོ་འཕྲུལ་མ་ནིང་ནག་པོའི་སྐུ༔ བསྟན་སྲུང་རྒྱལ་པོ་སྲོག་བདུད་རྟ་ནག་ཞོན༔ གསང་མཚན་ཏྲཀྴད་ཤན་པ་ལག་དམར་ཞེས༔ བསྟན་དགྲའི་སྲོག་གཅོད་དུག་གི་སྤུ་གྲི་བདུད༔ གསང་བའི་ཡུམ་བཞི་ཐུགས་སྤྲུལ་བདུད་མགོན་བརྒྱད༔ ཡང་སྤྲུལ་མ་མོ་གཤིན་རྗེ་བདུད་དམག་འབུམ༔ བྱ་ནག་ཁྱི་ནག་སྟོབས་ལྡན་གླང་ཆེན་འབུམ༔ ལས་ཀྱི་ཕོ་ཉ་ལྷ་སྲིན་སྡེ་བརྒྱད་དང་༔ དྲེགས་པའི་སྡེ་དཔོན་མ་སྲིང་བརྟན་མ་སོགས༔ ཕྲིན་ལས་མགོན་པོའི་ལྷ་ཚོགས་འཁོར་བཅས་རྣམས༔ ཞལ་བཞེས་ཐུགས་དམ་དུས་ལས་མ་འདའ་བར༔ བརྩེ་བ་ཆེན་པོས་བདག་ལ་དགོངས་སུ་གསོལ༔
བདག་ནི་ཁྱོད་ལས་སྐྱབས་གཞན་མ་མཆིས་པས༔ ཐུགས་རྗེས་བརྩེ་བར་དགོངས་ཤིག་ཐུགས་དམ་ཅན༔ ཕ་རོལ་རྦོད་གཏོང་ཟློག་པའི་ཕྲིན་ལས་མཛོད༔ ༼དྷི༽ ༔ཧཱུྃ་ཧཱུྃ་ཧཱུྃ༔ གཏོར་རྫོང་བསྐུལ་ལོ་རྦད་དོ་རབ་འབྱམས་ཞི་ཁྲོའི་ལྷ༔ འབོད་དོ་གཡབ་བོ་ཡི་དམ་མཁའ་འགྲོའི་ཚོགས༔ འགྱེད་དོ་ཆོས་ཤིག་ཆོས་སྐྱོང་དམ་ཅན་རྣམས༔ མ་གཡེལ་མ་འདའ་ཕྲིན་ལས་དུས་ལ་བབ༔ སྔོན་གྱིས་དམ་བཅའ་མ་བསྙེལ་དམ་ཚིག་ཅན༔ རང་དམ་རང་གིས་མ་བཀྲལ་བསྟན་སྲུང་ཚོགས༔ རང་སྲོག་རང་གིས་མ་གཅོད་ས་མ་ཡ༔ ཐུགས་རྗེའི་ཐུགས་དམ་གནད་ནས་ད་སྐུལ་ཅིག༔ མངོན་སྤྱོད་ཕྲིན་ལས་གནད་ནས་ད་སྐུལ་ཅིག༔ ནུས་རྩལ་རྫུ་འཕྲུལ་གནད་ནས་ད་སྐུལ་ཅིག༔ སྨོན་ལམ་བདེན་སྟོབས་གནད་ནས་ད་སྐུལ་ཅིག༔ ཁས་བླངས་དམ་བཅའ་གནད་ནས་ད་སྐུལ་ཅིག༔ མྱུར་མགྱོགས་དྲག་ཤུལ་གནད་ནས་ད་སྐུལ་ཅིག༔ ཀུན་གཞི་ཁྲོ་གཏུམ་གནད་ནས་ད་སྐུལ་ཅིག༔
དུག་ལྔའི་དབལ་ཟེར་གནད་ནས་ད་སྐུལ་ཅིག༔ དུག་གསུམ་གདུག་རྩུབ་གནད་ནས་ད་སྐུལ་ཅིག༔ ནུས་རྩལ་བདེན་སྟོབས་ཅི་འདུག་ད་ལེན་ལྟ༔ རང་གིས་རང་ཉིད་མ་སླུ་ས་མ་ཡ༔ ད་ལེན་ཕ་རོལ་བྱད་མ་མ་ཐུབ་ན༔ རང་རང་དམ་ཚིག་ཉམས་སོ་ན་ར་ཀན༔ དེ་བས་མངོན་སྤྱོད་དྲག་པོའི་ཕྲིན་ལས་མཛོད༔ ༼ཧཱུྃ༽ ༔ཧཱུྃ་ཧཱུྃ་ཧཱུྃ༔ རྡོ་རྗེ་དྲེགས་འཇོམས་ལྷ་ཚོགས་དགྲ་ལ་བྷྱོ༔ ཕ་རོལ་དགྲ་བགེགས་བྱད་མའི་སྲོག་ལ་རྦད༔ གཟུགས་ཕུང་ཐལ་བར་རློག་ཅིག་མཱ་ར་ཡ༔ རྣམ་ཤེས་རྟེན་དང་ཕྲོལ་ཅིག་ས་མ་ཡ༔ ཡེ་ཤེས་ཁྲོ་བཅུའི་ལྷ་ཚོགས་དགྲ་ལ་བྷྱོ༔ ཕ་རོལ་ལྷ་སྲུང་གཉན་པོ་རྡུལ་དུ་རློག༔ སྲུང་བའི་གུར་ཁང་རྡོ་རྗེའི་མཚོན་གྱིས་ཤིག༔ ཕ་རོལ་བྱད་མ་རང་གཤེད་སྟེང་དུ་ཕོབ༔ སྲིད་རྒྱལ་ཕྲ་མེན་ཉེར་བརྒྱད་དགྲ་ལ་བྷྱོ༔ ཕ་རོལ་ལྷ་སྲུང་མི་སྡུག་ཆོ་འཕྲུལ་ཚོགས༔ ལྟས་ངན་མགོ་བརྙན་ཕ་རོལ་གཤེན་དུ་ཕོབ༔ མི་རུང་སྣ་ཚོགས་ཐན་ལྟས་དགྲ་ལ་རྦད༔ བླ་མ་རིག་འཛིན་ལྷ་
ཚོགས་དགྲ་ལ་བྷྱོ༔ ཕ་རོལ་བྱད་མ་ལྷ་སྲུང་འཁོར་བཅས་ཀྱི༔ སྣང་སྲིད་དགྲར་ལངས་གདུག་པའི་དབལ་ཟོར་དང་༔ འཁོར་འདས་དགྲར་ལངས་གཏད་ཁྲམ་ཐུན་ཟོར་རྣམས༔ ཕ་རོལ་བྱེད་མའི་སྲོག་ལ་གཤེད་དུ་ཕོབ༔ ཕ་རོལ་བྱ་མ་ལྷ་སྲུང་འཁོར་བཅས་རྣམས༔ ཁ་ཕུང་རྗེས་མེད་རྨེང་ནས་སྐེམ་པར་གྱིས༔ ཕ་རོལ་བྱད་མའི་སེམས་ཉིད་རྟེན་དང་ཕྲོལ༔ ལྷག་མ་མིང་ཙམ་མེད་པར་རྡུལ་དུ་རློག༔ དཔའ་བོ་མཁའ་འགྲོའི་ལྷ་ཚོགས་དགྲ་ལ་བྷྱོ༔ ཕ་རོལ་བྱད་མ་ལྷ་སྲུང་འཁོར་བཅས་ཀྱི༔ དྲག་སྔགས་རྫས་བསྲེགས་མནན་གཏད་འཁོར་ལོ་དང་༔ ཏིང་འཛིན་ནུས་རྩལ་དུག་ལྔའི་འཕྲུལ་འཁོར་རྣམས༔ ཕ་རོལ་དགྲ་བགེགས་བྱེད་མའི་གཤེད་དུ་ཕོབ༔ ལོ་ཟླ་ཞག་དུས་སྐད་ཅིག་མ་འགྱངས་པར༔ ཕ་རོལ་བྱད་མའི་སེམས་ཉིད་མར་མེ་སྐེམ༔ དུག་ལྔའི་ཕུང་ཁམས་འབྱུང་ལྔའི་ནད་ཀྱིས་ཤིག༔ བསྟེན་པའི་ལྷ་སྲུང་སྲོག་གཅོད་གཤེད་དུ་ཕོབ༔
ཐུགས་དམ་དུས་ལས་མ་གཡེལ་རྟ་མཆོག་དཔལ༔ ནུས་རྩལ་གཏིང་སྤྲུག་རྡོ་རྗེ་ཕག་མོ་ཡུམ༔ སྤྲུལ་པའི་མཁའ་འགྲོ་གྲངས་མེད་དགྲ་ལ་རྦད༔ དགྲ་ཡུལ་དབེན་ཁང་ཡུལ་གྲུ་རྡུལ་དུ་རློག༔ ཆོས་སྐྱོང་སྲུང་མའི་ལྷ་ཚོགས་དགྲ་ལ་བྷྱོ༔ དམ་ཅན་ཕོ་རྒྱུད་མོ་རྒྱུད་དགྲ་ལ་བྷྱོ༔ དྲེག་པ་ཕོ་རྒྱུད་མོ་རྒྱུད་དགྲ་ལ་བྷྱོ༔ སྣང་སྲིད་འཁོར་འདས་ལྷ་འདྲེ་དགྲ་ལ་བྷྱོ༔ དྲེགས་པའི་སྡེ་དཔོན་སུམ་ཅུ་དགྲ་ལ་བྷྱོ༔ དགེ་བསྙེན་སུམ་བརྒྱ་དྲུག་ཅུ་དགྲ་ལ་བྷྱོ༔ མ་སྲིང་བརྟན་མ་བཅུ་གཉིས་དགྲ་ལ་བྷྱོ༔ གཏེར་སྲུང་བདུད་མགོན་འཁོར་བཅས་དགྲ་ལ་བྷྱོ༔ ཤན་པ་ལྷ་སྲིན་སྡེ་བརྒྱད་དགྲ་ལ་བྷྱོ༔ བྷྱོ་བྷྱོ་ཕ་རོལ་བྱད་མའི་ལུས་ལ་བྷྱོ༔ ཟོར་ཟོར་ཕ་རོལ་བྱད་མའི་ངག་ལ་ཟོར༔ ཐུན་ཐུན་ཕ་རོལ་བྱད་མའི་སེམས་ལ་ཐུན༔ གཏད་དོ་སྣང་སྲིད་ལྷ་འདྲེའི་ཚོགས་ལ་གཏད༔ སྒྲོལ་ཅིག་སྲུང་མ་དམ་ཅན་རྒྱ་མཚོའི་ཚོགས༔ སྔོན་ཚེ་རྡོ་རྗེ་དྲེགས་འཇོམས་སྤྱན་སྔ་རུ༔ ཁས་བླངས་དམ་བཅས་མནའ་བསྐྱལ་དཔང་
བཙུགས་ལྟར༔ མངོན་སྤྱོད་དྲག་པོས་དགྲ་བོ་རྡུལ་དུ་རློག༔ བཅོལ་བའི་ལས་ལ་ཐུགས་དམ་མ་གཡེལ་ཅིག༔ བསྒོས་པའི་དོན་འདི་མྱུར་དུ་སྒྲུབས་པར་མཛོད༔ སྡང་བའི་དགྲ་འདི་སྐད་ཅིག་སྲོག་རྩ་ཆོད༔ གནོད་པའི་བགེགས་ཚོགས་ཕྱེ་མར་ཐལ་བར་རློག༔ ཐུགས་རྗེའི་གཏུམ་རྔམ་དགྲ་ལ་མཱ་ར་ཡ་ཕཊ༔ $འདིར་གཏོར་མ་འཕེན༔ ཨཱོཾ་ཨཱཿཧཱུྃ་བོ་དྡྷི་ཙིཏྟ་མ་ཧཱ་སུ་ཁ་ཛྙཱ་ན་དྷཱ་ཏུ་ཨཱཿ ཨཱོཾ་རུ་ལུ་རུ་ལུ་ཧཱུྃ་བྷྱོ་ཧཱུྃ༔ ཕ་རོལ་བྱད་མ་མཱ་ར་ཡ་ཕཊ༔ ཕ་རོལ་བྱད་མའི་ཏིང་ངེ་འཛིན་གྱི་ནུས་རྩལ་བདེན་པའི་མཐུ་སྟོབས་ཐམས་ཅད་རྒྱལ་བ་རབ་འབྱམས་ཀྱི་ཐུགས་རྗེའི་ནུས་རྩལ་གྱིས་བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ ཆོས་དབྱིངས་ཨ་ཏི་ཁྱབ་གདལ་གྱི་ཀློང་དུ་དག་པར་གྱུར་ཅིག༔ ཏ་ཐཱ་ག་ཏ་སརྦ་བཛྲ་ས་མ་ཡ༔ ཕ་རོལ་བྱད་མ་མཱ་ར་ཡ་བྷྱོ་བྷྱོ༔ ཟློག་ཟློག༔ སྣང་སྲིད་འཁོར་འདས་དགྲར་ལྡངས་པའི་ཆོ་འཕྲུལ་ཐམས་ཅད༔ ཡེ་སྟོང་ཨ་ཏི་ཁྱབ་
གདལ་གྱི་ནུས་པས་བྱད་གཏད་ཐམས་ཅད་དབྱིངས་སུ་བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ རང་གསལ་རང་གྲོལ་དམིགས་མེད་བློ་འདས་ཆེན་པོའི་ཀློང་དུ་དག་པར་གྱུར་ཅིག༔ ཨཱོཾ་ཨཱཿཧཱུྃ་བྷ་ག་ཝཱན་བཻ་རོ་ཙ་ན་ཨཱོཾ༔ ཕ་རོལ་བྱད་མ་མཱ་ར་ཡ་བྷྱོ་བྷྱོ༔ ཟློག་ཟློག༔ གཏི་མུག་ས་ཡི་མནན་གཏད༔ ཨ་འཐས་དམིགས་གཏད་ཀྱི་ཐུན་ཟོར་ཐམས་ཅད༔ ཆོས་དབྱིངས་མི་རྟོག་པའི་ཨ་ཏི་ཞི་གནས་བདེ་སྟོང་གི་ནུས་པས་བྱད་གཏད་ཐམས་ཅད་བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ ཆོས་དབྱིངས་ཡེ་ཤེས་ཀྱི་ཀློང་དུ་དག་པར་གྱུར་ཅིག༔ ཨཱོཾ་ཨཱཿཧཱུྃ་ཨཱཀྵོ་བྷྱ་བཛྲ་ཧཱུྃ༔ ཕ་རོལ་བྱད་མ་མཱ་ར་ཡ་བྷྱོ་བྷྱོ༔ ཟློག་ཟློག༔ ཞེ་སྡང་གདུག་པའི་དུག་གཟེར༔ ཐུན་ཟོར་རྔམ་པའི་ཐོག་རྒོད་ཐམས་ཅད༔ མེ་ལོང་ལྟ་བུའི་ཡེ་ཤེས་རང་གསལ་གཉིས་འཛིན་དང་བྲལ་བའི་རིག་རྩལ་ཐོག་ལྟར་མྱུར་བའི་ནུས་པས་བྱད་གཏད་ཐུན་ཟོར་གཟིར་
རྦད་ཐམས་ཅད༔ བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ མེ་ལོང་ཡེ་ཤེས་ཀྱི་ཀློང་དུ་དག་པར་གྱུར་ཅིག༔ ཨཱོཾ་ཨཱཿཧཱུྃ་རཏྣ་སཾ་བྷ་ཝ་ཏྲཱྃ༔ ཕ་རོལ་བྱད་མ་མཱ་ར་ཡ་བྷྱོ་བྷྱོ༔ ཟློག་ཟློག༔ ང་རྒྱལ་ཆེ་བཙན་གྱི་འགྲན་སེམས༔ མ་ཉེས་ཉེས་བསྐལ༔ བསམ་ངན་མཐོ་ནོན་རྦབ་ལྟར་འདྲིལ་བ་ཐམས་ཅད༔ མཉམ་པ་ཉིད་ཀྱི་ཡེ་ཤེས་རྒྱ་མཚོ་ལྟ་བུའི་ནུས་རྩལ་གྱིས་འཇིགས་པ་བརྒྱད་དང་བཅུ་དྲུག་ཐམས་ཅད་བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ མཉམ་ཉིད་ཡེ་ཤེས་རེ་དོགས་མེད་པའི་ཀློང་དུ་དག་པར་གྱུར་ཅིག༔ ཨཱོཾ་ཨཱཿཧཱུྃ༔ ཨ་མི་ཏ་བྷ་ཧྲཱིཿ ཕ་རོལ་བྱད་མ་མཱ་ར་ཡ་བྷྱོ་བྷྱོ༔ ཟློག་ཟློག༔ ཞེ་འདོད་སྲིད་པའི་ཆགས་པ༔ ཚེ་ལ་རྐུ་བ༔ སྲོག་ལ་འཇབ་པ༔ བླ་ལ་ཁྱེར་བ༔ ཡིད་ལ་རློམ་པའི་འདྲེ་དོན་འབྱུང་པོ་ཐམས་ཅད༔ སོ་སོར་རྟོག་པའི་ཡེ་ཤེས་སྣ་ཚོགས་སུ་འཆར་བ༔ ཡེངས་མེད་རྗེན་པ་རླུང་ལྟར་རྒྱུ་བའི་ནུས་
པས་གཟུགས་ཅན་གཟུགས་མེད་ཐམས་ཅད་ཀྱིས་ཐོ་འཚམས་པ་ཐམས་ཅད༔ བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ སོ་སོར་རྟོག་པའི་ཡེ་ཤེས་ཡེངས་མེད་རིག་རྩལ་རི་དྭགས་རྫིས་ཐེབ་པ་འདྲ་བའི་ཀློང་དུ་དག་པར་གྱུར་ཅིག༔ ཨཱོཾ་ཨཱཿཧཱུྃ་ཨ་མོ་གྷ་སིདྡྷི་ཨཱ༔ ཕ་རོལ་བྱད་མ་མཱ་ར་ཡ་ཕཊ༔ ཕྲག་དོག་རབ་ཏུ་གཡོ་བའི་སྡང་བྱེད་ཀྱི་དགྲ་བོས་ཐོ་འཚམས་པ་ཐམས་ཅད་བྱ་བ་གྲུབ་པའི་ཡེ་ཤེས་ལེ་ལོ་སྙོམ་ལས་རང་སར་དག་པའི་དྲན་རིག་སོ་མ་ངར་དང་ལྡན་པ༔ བརྩོན་འགྲུས་ཀྱི་ཕ་རོལ་དུ་ཕྱིན་པ་འདིའི་ནུས་པས༔ ཕ་རོལ་གྱི་རྒོལ་བ༔ ནད་རིམས་དལ་ཡམས༔ ཐིའུ་རང་གི་སྟོང་འཁྲུགས༔ ཕྲག་དོག་གི་རླུང་དམར་ལྡངས་བའི་གཟེར་འདེབས་ཐམས་ཅད༔ བཟློག་པར་གྱུར་ཅིག༔ མེད་པར་གྱུར་ཅིག༔ ཞི་བར་གྱུར་ཅིག༔ བྱ་བ་གྲུབ་པའི་ཡེ་ཤེས༔ རིག་རྩལ་གྱི་འཁོར་ཡུག་ཆེན་པོ་འཁྲུལ་མེད་དུ་འཁོར་བ་འདི་ཡི་ཀློང་དུ་དག་པར་གྱུར་ཅིག༔
ཨཱོཾ་ཨཱཿཧཱུྃ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿ སིདྡྷི་ཕ་ལ་ཧཱུྃ་ཨཱཿ ཧྲཱིཿཧཱུྃ་ཧ་ཧ་རི་ནི་ས༔ ཕ་རོལ་བྱད་མ་མཱ་ར་ཡ་ཕཊ༔ དུག་གསུམ་དྲག་ཏུ་འཁྲུགས་པའི་གནོད་པ༔ སྲིད་གསུམ་དགྲར་ལྡངས་བ༔ ལྷ་འདྲེའི་ཆོ་འཕྲུལ༔ གཟུགས་ཅན་མིའི་གནོད་པ༔ དམག་དཔུང་འགྱེད་ཅིང་མཚོན་ཆའི་རྣོ་དབལ་གྱི་ཁ་འདེབས་པའི་གནོད་པ་ཐམས་ཅད༔ སྐུ་གསུམ་ཡེ་ནས་རྫོགས་པའི་ཨ་ཏི་ཐིག་ལེ་ཉག་གཅིག༔ སྐུ་ལྔ་རང་ཆས་སུ་གྲུབ་པའི་དྲན་རིག་རྗེན་པ་ས་ལེར་གནས་པ༔ གཉུག་མའི་ངོ་བོ་ཡེ་ནས་མ་བཅོས་པའི་འོད་སྐུ༔ སྐྱེ་འཆི་དང་བྲལ་བའི་ཡེ་ཤེས་བདེ་གསལ་མི་རྟོག་པ༔ ཡེ་ཤེས་ཀྱི་གཟུགས་ལ་གཞོམ་གཞིག་མེད་པ་འདིའི་ནུས་པས༔ སྣང་སྲིད་འཁོར་འདས་དགྲར་ལྡངས་པའི་གཟུགས་ཅན་གཟུགས་མེད་ཀྱིས་འགྲས་ཚོལ་ཞིང་ཡ་བོ་བཟུང་བའི༔ རྣོ་བ་མཚོན་ཆའི་གཟེར་འདེབས༔ དུག་ཆུའི་མགོ་བསྐོར༔ སྲོག་འཕྲོག་པ༔ ལྕགས་
སུ་བཅུག་ཅིང་༔ བཙོན་དུ་བཟུང་བ་ཐམས་ཅད་ཕ་རོལ་བྱད་མ་ཁོ་རང་གི་གཤེད་དུ་ཕོབ་ཅིག༔ སྟོང་གསལ་མ་འགགས་པ་ཡེ་ཤེས་ལྔའི་རང་འོད་འཕྲོ་བ༔ སྐུ་གསུམ་ལྷུན་གྲུབ་རོལ་པའི་ཁྱབ་གདལ་ཆེན་པོའི་ཀློང་དུ་ཞི་བར་གྱུར་ཅིག༔ དག་པར་གྱུར་ཅིག༔ བྱང་བར་གྱུར་ཅིག༔ གཏན་ནས་འཇོམས་པར་གྱུར་ཅིག༔ གཏིང་ནས་བཟློག་པར་གྱུར་ཅིག༔ བྷྱོ་བྷྱོ༔ ཟློག་ཟློག༔ ཕ་རོལ་བྱད་མ་ཁོ་རང་གི་གཤེད་དུ་མཱ་ར་ཡ་ཕཊ་ཕཊ༔ མཱ་ར་ཡ་རྦད་རྦད༔ ཅེས་པས་ཐལ་མོ་བརྡབ་ཅིང་འདོན་བསྒོམ་བསྒྲག༔ མ་ཡེངས་རྩེ་གཅིག་བསྒྲིམས་ནས་འདི་ལ་འབད༔ རྒྱལ་བ་རབ་འབྱམས་རྒྱ་མཚོའི་བཀའ་ཆད་དང་༔ ཧེ་རུ་ཀ་ཡི་གདུག་པའི་དབལ་ཐོར་ཡང་༔ སྐད་ཅིག་ཉིད་ལ་ཁོ་རང་གཤེད་དུ་འབབ༔ ཡི་དམ་ཆོས་སྐྱོང་གཞན་ལ་ལྟ་ཅི་སྨོས༔ ལྷ་སྲིན་སྡེ་བརྒྱད་གཞན་ལ་སྨོས་ཅི་དགོས༔ དེ་ཕྱིར་འདི་ལ་ནན་ཏན་བསྐྱེད་ཅིག་བུ༔ ཕ་ཡི་ཁ་ལ་ཉོན་ཅིག་གཅེས་པར་ཟུངས༔ དམ་མེད་ལག་ཏུ་མ་ཤོར་དམ་བཅས་སྲུངས༔ དམ་ལྡན་སློབ་མའི་དོན་དུ་མ་གསང་སྤེལ༔ ཡང་ཟབ་རི་རབ་གཏིང་ཟློག་ཟབ་གནན་འདི༔ བོད་ཡུལ་ཁ་བ་ཅན་དུ་འདི་ལས་མེད༔ གཏེར་གནས་
གཞན་དུ་ཀུན་རྫོབ་ཟློག་པ་སྦས༔ ཡེ་གསང་གྲོ་ལོད་སྐབས་འདིར་སྙིང་ཐིག་བསྡུས༔ ཐུགས་གསང་གསང་བའི་ཡང་གསང་ཡེ་བཟློག་འདི༔ དོན་དམ་ཆོས་རྣམས་དོན་བསྡུས་སྙིང་ཁྲག་ཐིག༔ ཡིད་གཉིས་ཐེ་ཚོམ་མ་ཟ་སྙིང་ལ་འཆང་༔ དོན་དམ་ཨ་ཏིའི་ཟློག་པ་སྦས་གསང་འདི༔ ནམ་མཁའི་རླུང་ལས་མྱུར་བར་ཐེ་ཚོམ་མེད༔ ཚེ་འདིར་གང་གནོད་མ་ལུས་རྡུལ་དུ་རླག༔ ཕྱི་མའི་མུ་མཐར་ས་ལམ་བར་ཆད་ཟློག༔ ཁ་བ་ཅན་འདིར་གཏེར་བུམ་བསམ་འདས་སྦས༔ བོད་ཁམས་ཡོངས་ལ་གུ་རུ་སྐུ་དྲིན་ཆེ༔ དྲིན་ལེན་ཆུང་དུ་མ་གསན་སེམས་ཅན་རྣམས༔ བཟང་ལེན་ངན་གྱི་མ་འཇལ་མ་འོངས་བུ༔ བློ་གཏད་སྙིང་རྐུ་མ་བྱེད་རྗེ་འབངས་རྣམས༔ རང་གིས་རང་ཉིད་མ་བསླུ་ས་མ་ཡ༔ དེ་ལྟར་མ་འོངས་དུས་ཀྱི་ཐ་མ་ལ༔ སངས་རྒྱས་བསྟན་པ་ནང་འཁྲུག་དམ་སེལ་ཞུགས༔ བླ་མ་ཡི་དམ་ཐ་དད་མེད་ན་ཡང་༔ ང་དང་བདག་ཏུ་བཟུང་ནས་སོ་སོར་རྩོད༔ བཀའ་སྲུང་ཆོས་སྐྱོང་གཞན་ལ་ལྟ་ཅི་སྨོས༔ རང་གིས་རང་ཉིད་དམྱལ་བར་ལྟུང་བའི་རྒྱུ༔ ལས་ངན་མ་བསགས་རྒྱལ་ཆེན་མུ་ཁྲི་བཙན༔ མ་འོངས་རྩོད་ལྡན་སྙིགས་མ་ལྔ་བདོའི་དུས༔ ཆོས་བདག་ཨ་མི་ཏ་ལ་སྔོན་དུ་གཏོད༔ དེ་ནས་མ་འགྱང་པརྞའི་མིང་ཅན་ལ༔ མ་གསང་གཏོད་དང་ང་བདག་རྩོད་པ་ཞི༔ དེ་ཚེ་ཕ་ངས་བུ་ཁྱོད་རྟག་ཏུ་སྐྱོབ༔ སྲོག་ལ་རྒོལ་བར་བྱུང་ན་ནུས་རྩལ་སྟོན༔ དེ་ལས་
གཞན་དུ་བསྟན་ན་དམ་ལས་འདས༔ དམ་ཚིག་སྲུངས་ཤིག་རྒྱལ་པོ་མུ་ཁྲི་བཙན༔ ཁྱོད་ཉིད་གསང་བའི་བདག་པོའི་རྣམ་འཕྲུལ་ཏེ༔ ང་ཉིད་དུས་གསུམ་སངས་རྒྱས་ཤཱཀྱ་ཐུབ༔ སྙིགས་དུས་འགྲོ་ལ་ཐུགས་རྗེས་ཟེར་གྱིས་སྐྱོང་༔ དུས་ལས་མི་འདའ་སྨོན་ལམ་བདེན་པའི་སྟོབས༔ སྐྱེ་ནས་སྐྱེ་བར་ཁྱོད་ལ་གུ་རུས་སྲུངས༔ དད་འདུན་མོས་གུས་མ་ཞེན་གསོལ་བ་ཐོབ༔ སྙིང་ལ་གཅེས་སོ་སྐལ་ལྡན་རིགས་ཀྱི་བུ༔ དམ་ཚིག་མཐའ་བཙན་རྒྱལ་པོ་ལྷ་ཡི་སྲས༔ སངས་རྒྱས་བསྟན་ལ་བྱ་བ་བྱེད་པར་འགྱུར༔ ས་མ་ཡ༔ རྒྱ་རྒྱ་རྒྱ༔ ཐུགས་རྒྱ༔ བརྡའ་ཐིམ༔ ཨྠྀི༔ རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་གཏེར་ནས་གདན་དྲངས་པའོ༔ ༔ ༈ མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།