གུ་རུ་རྡོ་རྗེ་གྲོ་ལོད་ཀྱི་ཚེ་སྒྲུབ་འཁོར་འདས་རོ་གཅིག
གུ་རུ་རྡོ་རྗེ་གྲོ་ལོད་ལས༔ ཚེ་སྒྲུབ་འཁོར་འདས་རོ་གཅིག་བཞུགས༔
ཧྲཱི༔ དཀོན་གསུམ་དང་ཡི་དམ་ལྷ༔ དབྱེར་མེད་རྡོ་རྗེ་གྲོ་ལོད་ལ༔ ཕྱག་འཚལ་སྐྱབས་མཆི་སྡིག་སྒྲིབ་བཤགས༔ ཕྱི་ནང་སྣོད་བཅུད་མཆོད་པར་འབུལ༔ ཁྱོད་ཀྱི་ཐུགས་དམ་མ་གཡེལ་བར༔ བདག་ལ་བྱིན་ཕོབ་ཚེ་དབང་སྩོལ༔ རང་རིག་ཡེངས་མེད་ཏིང་འཛིན་གསལ༔ བྱེད་ལས་རིག་པའི་རང་མདངས་ལས༔ ཧྲཱིཿ བདག་ཉིད་སྣང་སྲིད་ཟིལ་གནོན་སྐུ༔ རྡོ་རྗེ་གྲོ་ལོད་རྩལ་དམར་ནག༔ ཟུར་ཞལ་གཡོན་གཟིགས་ཞལ་ཨམ་གཙིགས༔ དམར་ཟླུམ་སྤྱན་གསུམ་ཁྲོ་
གཉེར་གཡོ༔ ཐོད་སྐམ་དབུ་རྒྱན་ཐོར་ཚུགས་བཅིངས༔ སྐྲ་གསེབ་ཚེ་དཔག་ཡབ་ཡུམ་མཐིང་༔ ཕྱག་གཡས་རྡོ་རྗེ་བྱ་ཁྱུང་འཕྱོ༔ གཡོན་པས་ཕུར་གཟིར་ལྕགས་སྡིག་འགྱེད༔ ཆོས་གོས་རྣམ་གསུམ་མགོ་ཕྲེང་སྤྲུལ༔ རུས་རྒྱན་དྲུག་དང་རིན་ཆེན་བརྒྱན༔ མི་ལྤགས་སྟག་ལྤགས་གླང་ཀོ་རློན༔ བསྣོལ་མར་གསོལ་ཞིང་ཞབས་འདོར་སྟབས༔ རྒྱ་སྟག་གསེར་མིག་རང་ཞལ་ལྟ༔ བརྗིད་རྔམ་རྩལ་ལྡན་སྡེར་མོས་དགྲའི༔ སྙིང་འདྲེན་ཁྲག་ཏུ་སྐྱུགས་པར་གཟིར༔ སྤུ་ཞོལ་
མཚོན་ཆའི་ཆར་ཆེན་འབེབས༔ རང་བཞིན་མེ་རླུང་ཐོག་སེར་གྱི༔ དབུས་སུ་འགྱིང་རྔམ་རྩལ་ལྡན་བསྐྱེད༔ རང་ཉིད་རྡོ་རྗེ་གྲོ་ལོད་ཀྱི༔ དཔྲལ་བར་ཨཱོཾ་དཀར་ཚེ་དཔག་དཀར༔ མགྲིན་པར་ཨཱཿདམར་ཚེ་དཔག་དམར༔ སྙིང་གར་ཧཱུྃ་མཐིང་ཚེ་དཔག་མཐིང་༔ ལྟེ་བར་བྷྲཱུྃ་སེར་ཚེ་དཔག་སེར༔ གསང་བར་ཕཊ་ལྗང་ཚེ་དཔག་ལྗང་༔ ཀུན་ཀྱང་ཞི་ཞལ་ཕྱག་མཉམ་བཞག༔ དེ་དབུས་ཚེ་བུམ་ཤིང་ལོས་བརྒྱན༔ ལོངས་སྤྱོད་རྫོགས་སྐུ་ཞབས་རྡོར་སྐྱིལ༔ རང་འདྲའི་ཡུམ་དང་དབྱེར་མེད་འཁྲིལ༔ འོད་འབར་བརྗིད་རྔམ་སྐུ་རུ་བསྐྱེད༔ པད་ཟླ་རྒྱ་གྲམ་གདན་སྟེང་གསལ༔ དམ་ཡེ་དབྱེར་མེད་ཐུགས་སྲོག་སྔགས༔ དེ་ལས་འོད་ཟེར་རྣོ་མྱུར་འཕྲོས༔ རྣམ་དག་ཕྱོགས་བཅུའི་དག་ཞིང་དང་༔ ཨོ་རྒྱན་ཡུལ་དང་རྔ་ཡབ་གླིང་༔ ཟངས་མདོག་པདྨ་འོད་ཀྱི་ཞིང་༔ མཁའ་སྤྱོད་གནས་དང་འོག་མིན་ཡུལ༔ དག་པ་རྒྱལ་བའི་དཀྱིལ་འཁོར་ནས༔ རྡོ་རྗེ་གྲོ་ལོད་སྤྱན་དྲངས་གྱུར༔ ཨཱོཾ་བཛྲ་གྲོ་
ལོད་བཛྲ་ས་མ་ཡ་ཛཿཛཿ སླར་ཡང་ཚེ་ལྷ་གྲོ་ལོད་དང་༔ རིགས་ལྔ་ཡབ་ཡུམ་འདིར་གཤེགས་ཏེ༔ དབང་བཞི་བསྐུར་སྟེ་སྒྲིབ་བཞི་དག༔ བུམ་པས་དབང་བསྐུར་ལས་ཉོན་དག༔ བདུད་རྩིས་ལུས་ཁེངས་གྱེན་དུ་ལྷུད༔ རིགས་བདག་རྡོ་རྗེ་འཆང་ཡབ་ཡུམ༔ སྤྱི་བོར་གསལ་བར་བསྒོམ་པར་བྱ༔ དབང་ལྷ་རྣམས་ལ་ལྷ་མོས་མཆོད༔ ཨཱརྒྷཾ་སོགས་ནས་ཤབྡ་པཱུ་ཛ་ཧོཿ རྡོ་རྗེ་དཔའ་བོས་གླུ་བླངས་ཏེ༔ རྡོ་རྗེ་དཔའ་མོས་བསྟོད་པས་བསྟོད༔ ལྷ་དང་ལྷ་མོས་མཆོད་པས་མཆོད༔ དབང་ལྷ་དགྱེས་ཚིམ་རང་སྙིང་ཐིམ༔ དམ་ཡེ་དབྱེར་མེད་གཅིག་འདྲེས་གྱུར༔ ཐུགས་ཀར་ཚེ་དཔག་སྙིང་གར་ཧཱུྃ༔ མཐའ་མར་སྔགས་ཕྲེང་གསལ་བར་བསྐྱེད༔ ཚེ་བརྟན་འགྱུར་མེད་དངོས་གྲུབ་ཐོབ༔ ཨཱོཾ་བཛྲ་གྲོ་ལོད་ཨཱ་ཡུཿཛྙཱ་ན་སིདྡྷི་ཧཱུྃ༔ ཨཱོཾ་ཨཱཿཧཱུྃ་གུ་རུ་པདྨ་སཾ་བྷ་ཝ་བཛྲ་གྲོ་ལོད་ཨཱ་ཡུཿཛྙཱ་ན་སིདྡྷི་ཧཱུྃ༔ སྤྱི་དྲིལ་གལ་ཆེ་བའི་བསྙེན་སྔགས་སོ༔ ས་མ་ཡ་ཐུགས་རྒྱ་བརྡའ་ཐིམ༔ རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་མཚོ་
གཏེར་འདི་ལ་བཅོས་བསླད་མ་བསྲེ་ཞིག༔ རྒྱ་རྒྱ་རྒྱ༔ ༈ མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།