གསེར་སྐྱེམས་དགོས་འདོད་ཀུན་འབྱུང་དགྲ་བོ་ཆོམ་འབེབས།
གསེར་སྐྱེམས་དགོས་འདོད་ཀུན་འབྱུང་དགྲ་བོ་ཆོམ་འབེབས་ཞེས་བྱ་བ་བཞུགས་སོ། །གང་ཞིག་རྣལ་འབྱོར་པས་མངོན་སྤྱོད་དྲག་པོའི་ལས་བྱེད་ན། སྔོན་དུ་ལམ་སེལ་གྱི་གསེར་སྐྱེམས་བཏང་བ་ནི། རིན་ཆེན་སྣོད་དུ་དུག་ཅན་དང་རྩི་དན་མ་འདྲེས་པའི། སྨན་སྣ་འབྲུ་སྣ་རིན་ཆེན་ལྔ་བརྡར་བའི་ཇ་ཆང་ཕུད་བཤམས་ལ། ཨོཾ་ཨཱཿཧཱུྃ་རིན་ཆེན་སྣོད་མཆོག་རྒྱ་ཆེ་གཏིང་ཟབ་ནང་། །འབྲུ་མཆོག་རིན་ཆེན་ལྔ་ལས་ལེགས་གྲུབ་པའི། །ཟག་མེད་བདུད་རྩིའི་རྒྱ་མཚོ་ཆེན་པོར་གྱུར། །ཨོཾ་ཨཱཿཧཱུྃ་གིས་འདོད་ཡོན་དཔག་མེད་གྱུར། །ཨོཾ་ཨཱཿཧཱུྃ་ཧ་ཧོ་ཧྲཱིཿ ལན་གསུམ་བརྗོད། ཀྱེ་ཀུན་བཟང་རྡོ་རྗེ་འཆང་ཆེན་སྣང་མཐའ་ཡས། །སྤྱན་རས་གཟིགས་དབང་རིག་འཛིན་པདྨ་འབྱུང་། །ཡེ་ཤེས་མཚོ་རྒྱལ་མཁའ་འགྲོ་རྒྱ་མཚོའི་ཚོགས། །ཆོས་རྒྱལ་མུ་ཁྲི་རྗེ་འབངས་ཉི་ཤུ་ལྔ། །དྲིན་ཆེན་བླ་མ་ནུས་ལྡན་རྡོ་རྗེ་དང་། །ཆོས་བདག་སྐྱེས་མཆོག་གཏེར་ལུང་བརྒྱུད་པ་ལ། །གསེར་སྐྱེམས་ཕུད་ཀྱི་མཆོད་པ་འདི་འབུལ་ལོ། །རིགས་ལྔ་ཡབ་ཡུམ་ཡེ་ཤེས་ཁྲོ་བོ་བཅུ། །རྟ་ཕག་ཡབ་ཡུམ་ཁྲོ་མོ་ཆེན་མོ་བཅུ། །རྡོ་རྗེ་དྲེགས་འཇོམས་
མཁའ་འགྲོ་སེང་གདོང་མ། །དྲེགས་པ་སྡེ་བརྒྱད་སྤྲུལ་པའི་དམག་ཚོགས་ལ། །གསེར་སྐྱེམས་ཕུད་ཀྱི་མཆོད་པ་འདི་འབུལ་ལོ། །མ་མགོན་ལྕམ་དྲལ་ཆོས་སྐྱོང་སྲུང་མའི་ཚོགས། །ཁྱད་པར་བཀའ་ཡི་སྲུང་མ་དྲག་རྩལ་ཅན། །ཏྲཀྴད་ནག་པོ་གཟའ་བདུད་རཱ་ཧུ་ལ། །ཡེ་ཤེས་ཆོས་སྐྱོང་དམ་ཅན་རྒྱ་མཚོ་ལ། །གསེར་སྐྱེམས་ཕུད་ཀྱི་མཆོད་པ་འདི་འབུལ་ལོ། དེ་རིང་མ་གཡེལ་གཟུ་དང་དཔང་པོ་མཛོད། །བདག་ནི་ཉམ་ཆུང་དོན་གྱི་རྣལ་འབྱོར་པ། །དམ་ལོག་ལས་ངན་བསྟན་པའི་དགྲ་བོ་འདིས། །བླ་མ་ལྷ་དང་ཆོས་ལ་སྨད་པ་བུས། །བཀའ་སྲུང་སྨོས་ཅིང་རྣལ་འབྱོར་བདག་ལ་སྡང་། །ད་ནི་ཆོས་སྐྱོང་བཀའ་སྲུང་ར་ཟླར་བསྐུལ། །རྣོ་མྱུར་ཕོ་ཉའི་ཚོགས་ཀྱི་དུས་ལ་བབ། །མ་ཉེས་དཔང་དུ་རིག་འཛིན་ལྷ་ཚོགས་བཞུགས། །ལྷ་སྲིན་སྡེ་བརྒྱད་བདག་གི་སྡོང་གྲོགས་མཛོད། །ཀྱཻ་ཐེ་སེ་རྒྱལ་བློན་ལོ་ཟླ་ཞག་དུས་ལྷ། །ཁྲ་ཆ་ཧལ་ཁྱི་བྱི་ལམ་སྔོན་མོ་དང་། །ཟིན་ཕུང་ཉི་ནག་དབང་ཕྱུག་ཡབ་ཡུམ་རྣམས། །ཐེབ་ལྡོག་གང་ལ་
ཐུག་པར་གྱུར་ན་ཡང་། །གསེར་སྐྱེམས་ཕུད་ཀྱི་མཆོད་པ་འདི་འབུལ་ལོ། །ཀོ་ལོང་གདུག་རྩུབ་སྡང་བའི་དགྲ་ལ་མཛོད། །བརྟན་མ་བཅུ་གཉིས་མགུར་ལྷ་བཅུ་གསུམ་དང་། །གཟའ་དང་རྒྱུ་སྐར་ལོ་ལྷ་བཅུ་གཉིས་དང་། །སྤར་བརྒྱད་སྨེ་དགུ་ལོ་རྒན་དྲུག་ཅུའི་ལྷ། །རྒྱལ་ཆེན་སྡེ་བཞི་དཀར་ཕྱོགས་སྐྱོང་བའི་ཚོགས། །ཡུལ་ཕྱོགས་འདིར་གནས་གཞི་བདག་ཐམས་ཅད་ལ། །གསེར་སྐྱེམས་ཕུད་ཀྱི་མཆོད་པ་འདི་འབུལ་ལོ། །དགྱེས་བཞེས་བདག་གི་སྡོང་གྲོགས་མཉན་པོ་མཛོད། །ཐུན་དང་གཏོར་མའི་ཟོར་ལམ་ད་ཕྱེས་ཤིག །ཡུངས་ཀར་ཁྲོ་བོའི་ཐུན་འཕེན་ཤ་ར་ར། །རཀྟ་མཁའ་འགྲོའི་ཟོར་འཕེན་མེ་རེ་རེ། །མཚེ་ཐུན་དམར་ནག་དུག་རླངས་ཚུབས་སེ་ཚུབ། །བདག་གིས་དགྲ་ལ་ཐུན་དང་ཟོར་འཕེན་ན། །གདོང་དུ་གནས་པའི་ལྷ་ཀླུ་མཐུ་ཆེན་རྣམས། །བདག་ལ་གྲོགས་མཛོད་ཟོར་ལམ་དགྲ་ལ་སྟོན། མཐོ་བ་རྣམས་ཀྱིས་ཞབས་སྐུམས་ན་བཟའ་སྡུས། །དམའ་བ་རྣམས་ཀྱིས་དབུ་རྒུས་སྤྱན་གཡོར་
ཅིག །བར་དུ་གནས་པ་གཡས་གཡོན་སྐུ་བཟུར་ལ། །གཏོར་མའི་གདོང་དུ་སུ་ཡང་མ་འདུག་ཅིག །གཏོར་མའི་ལམ་བསྟན་དགྲ་ལ་བསྟན། །ཕ་རོལ་དགྲ་བགེགས་བྱད་མ་ཡི། །སྲུང་བའི་བན་བོན་གང་འདུག་ཀྱང་། །རྟེན་པའི་ལྷ་སྲུང་བདུད་དུ་ཕོབ། །བླ་ཚེ་གཤིན་རྗེའི་ལག་ཏུ་ཆུག །གཏོར་ཟོར་ཐུན་ཟོར་དགྲ་ལ་བྷྱོ། །དགྲ་བགེགས་བརླག་པའི་ཕྲིན་ལས་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ཅེས་གསེར་སྐྱེམས་དགྲ་ཕྱོགས་སུ་མཆོད། །དད་ལྡན་བློ་ཆུང་འགའ་ཡིས་བསྐུ་བའི་ངོར། །སྤྲང་བན་གུ་རུ་ཆོས་འཛིན་ངས། །རང་དང་རང་འདྲའི་ཉམ་ཅུང་འགའ་ཞིག་ལ། །ཕན་སེམས་བཟང་པོའི་སྟོབས་ཀྱིས་སྦྱར་བའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།