གུ་རུ་རྡོ་རྗེ་གྲོ་ལོད་ཀྱི་དྲག་པོའི་རྩང་གྱེར་བཟློག་ཐབས།
གུ་རུ་རྡོ་རྗེ་གྲོ་ལོད་ལས། དྲག་པོའི་རྩང་གྱེར་བཟློག་ཐབས་བཞུགས།
ཧཱུྃ་ཧཱུྃ་ཧཱུྃ༔ ཁྲོ་རྒྱལ་རྡོ་རྗེ་གྲོ་ལོད་ཀྱི། །གྲུ་གསུམ་མཐིང་ནག་འབར་བའི་དཀྱིལ་འཁོར་འདིར། །སྤྲུལ་པའི་ཕོ་ཉ་ལས་ལ་མངགས་པའི་ཕྱིར། །སྤྲུལ་པའི་ཕྱག་རྒྱ་རྟགས་ཀྱི་ཕྱག་མཚན་ཤར། །དམ་ཉམས་དགྲ་བགེགས་གདུག་པ་བསྒྲལ་བའི་ཕྱིར། །གདུག་པའི་རྩང་ཕུར་ཕྱག་རྟགས་ཉིད་དང་ལྡན། །ཡར་གྱི་རྩེ་མོ་ཆོས་ཉིད་དབྱིངས་སུ་སླེབ། །མར་གྱི་རྩེ་མོ་ངན་སོང་གསུམ་ལ་གཟིར། །སྐེད་པ་རྒྱ་མདུད་ཆོས་ཉིད་འབྱུང་བའི་གནས། །ནང་པ་ཆོས་ཀྱི་བྱད་ཁ་དགྲ་ལ་ཟློག །ཡར་གྱི་རྩེ་མོ་ལྷག་མཐོང་ཡུལ་
དུ་འཇུག །མར་གྱི་རྩེ་མོ་རྒྱུ་དྲུག་སྙིང་པོ་བསྒྲལ། །སྐེད་པ་རྒྱ་མདུད་ཁམས་གསུམ་སྟོང་གསུམ་མཉམ། །སྟོང་གསུམ་ལྷ་འདྲེའི་ཆོ་འཕྲུལ་དགྲ་ལ་ཟློག །ཡར་གྱི་རྩེ་ལ་གདུག་རྩུབ་མེ་ལྟར་འབར། །མར་གྱི་རྩེ་ལ་གདུག་པའི་འོད་ཟེར་འཕྲོ། །སྐེད་པ་རྒྱ་མདུད་མཚོན་ཆའི་གུར་ཁང་ཕུབ། །མཚོན་ཆ་འཁྲུག་པའི་ལྟས་ངན་དགྲ་ལ་ཟློག །ཡར་གྱི་རྩེ་ལ་རཾ་གྱི་ཁ་འཕང་འཕྲོ། །མར་གྱི་རྩེ་ལ་ཛཿཡི་བུ་ཡུག་འཚུབས། །སྐེད་པ་རྒྱ་མདུད་དམུ་ཡི་ཕོ་བྲང་བཅས། །དམུ་བདུད་ཁྲོས་པའི་ལྟས་ངན་དགྲ་ལ་ཟློག །
ཡར་གྱི་རྩེ་ལ་ཁྲག་གི་བྱ་རྒོད་ལྡིང་། །མར་གྱི་རྩེ་ལ་དུག་གི་ཆུ་བོ་ཁོལ། །སྐེད་པའི་དཀྱིལ་ན་ཟངས་ཀྱི་བྱ་རོག་འགྱིང་། །འདབ་ཆགས་ཡོངས་ཀྱི་ལྟས་ངན་དགྲ་ལ་ཟློག །ཡར་གྱི་རྩེ་ལ་ཁྲག་གི་སྦྲང་བུ་གྲགས། །མར་གྱི་རྩེ་ལ་ལྕགས་ཀྱི་སྦྲང་མ་གྲགས། །སྐེད་པའི་དཀྱིལ་ན་གཡུ་ཡི་ཁུ་བྱུག་གྲགས། །འབུ་སྲིན་གདུག་པའི་ཐན་ལྟས་དགྲ་ལ་ཟློག །ཡར་གྱི་རྩེ་ལ་ལྷ་སྲིན་དམར་ནག་འཁྲུགས། །མར་གྱི་རྩེ་ལ་རྒྱ་གྲོག་དམར་ནག་རྒྱུག །སྐེད་པའི་དཀྱིལ་ན་གསེར་གྱི་སྦལ་བ་འཁུན། །ཆུ་གནས་རྣམས་ཀྱི་ཐན་སྣ་དགྲ་ལ་ཟློག །ཡར་གྱི་རྩེ་ལ་ཁྲག་གི་ཐིག་པ་འཛག །མར་གྱི་རྩེ་ལ་ལྕགས་ཀྱི་འུག་པ་གྲགས། །སྐེད་པའི་དཀྱིལ་ན་ཟངས་ཀྱི་ཝ་མོ་བརྒྱལ། །ཝ་དང་འུག་པའི་ལྟས་ངན་དགྲ་ལ་ཟློག །ཡར་གྱི་རྩེ་ལ་ཟངས་ཀྱི་འཕར་བ་རྒྱུག །མར་གྱི་རྩེ་ལ་ལྕགས་ཀྱི་སྤྱང་མོ་རྔམ། །སྐེད་པའི་དཀྱིལ་ན་ཟངས་ཀྱི་ཁྱི་མོ་ཟུག །སྡེར་ཆགས་ཡོངས་ཀྱི་ལྟས་ངན་དེ་ལ་ཟློག །ཡར་གྱི་རྩེ་ལ་བདུད་བྱ་ཀང་ཀ་ལྡིང་། །མར་གྱི་རྩེ་
ལ་དོམ་དང་དྲེད་མོང་འཐབ། །སྐེད་པའི་དཀྱིལ་ན་སྟག་དང་སེང་གེ་འཐབ། །ཐན་རིགས་སུམ་བརྒྱ་དྲུག་ཅུ་དགྲ་ལ་ཟློག །ཁྲོ་རྒྱལ་སྤྲུལ་པའི་ཕོ་ཉ་དེ་རྣམས་ཀྱང་། །ཆེ་ཆུང་ཚད་ནི་རྒྱ་གྲོག་དམར་ནག་ཙམ། །གདུག་པའི་བརྟུལ་ཞུགས་ཆོ་འཕྲུལ་སྣ་ཚོགས་ཀྱིས། །རི་རབ་རྣམས་ཀྱང་ཚོགས་པོར་འཕེན། །འཇིགས་པའི་སྒྲ་སྐད་སྣ་ཚོགས་ཀྱིས། །ཁམས་གསུམ་ཐམས་ཅད་ཟིལ་གྱིས་གནོན། །མྱུར་མགྱོགས་དྲག་པོས་དབང་དུ་སྡུད། །ཡང་སྤྲུལ་མངགས་གཞུགས་དཀྱིལ་འཁོར་གང་། །འབར་བའི་ཡང་སྤྲུལ་མཐའ་དང་མཉམ། །རྡོ་རྗེ་ཁྲོ་བོའི་དཀྱིལ་འཁོར་མཐའ་དང་མཉམ། །སྤྲུལ་པ་ཀུན་འབྱུང་གདུག་པའི་རྩང་ཕུར་རྣམས། །གྲུ་གསུམ་གླིང་བཞི་དྲག་པོའི་དཀྱིལ་འཁོར་དུ། །ཆོས་ཉིད་དྲ་བ་ཡེ་ཤེས་མིག་མང་རིས། །འཁོར་བའི་དྲ་བ་སྐྲ་ཤད་འཛིངས་པ་འདྲ། །ཉོན་མོངས་དྲ་བ་སེམས་ཅན་བཅིངས་པའི་རྒྱུ། །ཤེས་རབ་དྲ་བ་མ་རིག་འགྱེད་པའི་སྒོ། །སྤྲུལ་པའི་དྲ་བ་ཅི་ཡང་སྒྱུར་བའི་ཐབས། །གདུག་
པའི་དྲ་བ་སེམས་ཅན་འཛུད་པའི་སྣོད། །སྤྲུལ་པའི་ཕོ་ཉ་མྱུར་མགྱོགས་རྒྱུག་པའི་སྲང་། །དམ་ཉམས་དགྲ་བགེགས་ཤོར་བའི་དུས་མཐའ་མེད། །གདུག་རྩུབ་སྤྲུལ་བའི་དྲ་བ་མིག་རེ་མང་། །གདུག་པའི་དགྲ་བགེགས་སྲོག་རྩ་གཅོད་པར་བྱེད། །དམ་ཉམས་དགྲ་བོའི་སྲོག་ལ་གཅོད་ཅིང་འཐབ། །གྲུ་གསུམ་མཐིང་ནག་འབར་བའི་དཀྱིལ་འཁོར་འདིར། །གདུག་རྩུབ་དབལ་དྲག་ལྡན་པའི་རྩང་ཕུར་བཞུགས། །དམ་ཉམས་དགྲ་བོའི་སྙིང་ལ་ཀཱི་ལ་ཡ། །ཀཱི་ལ་ཡ་ཡི་ཕྲིན་ལས་མཛོད། །བྷྱོ་ཛཿཛཿ དམ་ཉམས་དགྲ་བོ་འདུལ་བའི་ཕྱིར། །ཁྲོ་རྒྱལ་འབར་བའི་ལྷ་ཚོགས་དང་། །ལས་མགོན་ཏྲཀྴད་ལྷ་ཚོགས་རྣམས། །དྲག་པོ་སྟོབས་ཀྱི་རྩང་ཕུར་བཞེངས། །ཧཱུྃ༑ རྡོ་རྗེ་དྲེགས་འཇོམས་ཕུར་པའི་ལྷ་ཚོགས་དང་། །དྲག་པོ་སྟོབས་ཀྱི་རྩང་ཕུར་བཞེངས། །ཧཱུྃ༑ གྲུ་གསུམ་མཐིང་ནག་འབར་བའི་དཀྱིལ་འཁོར་འདིར། །དམ་ཉམས་དགྲ་བོ་འདུལ་བའི་ཕྱིར། །མཐིང་ནག་དབང་གྱི་གདན་སྟེང་དུ། །དབལ་དྲག་ལྡན་པའི་རྩང་ཕུར་
བཞེངས། །རྡོ་རྗེ་དྲེགས་འཇོམས་ལྷ་ཚོགས་ཀཱི་ལ་ཡ། །ཡེ་ཤེས་ཕུར་པའི་ལྷ་ཚོགས་ཀཱི་ལ་ཡ། །ལས་ཀྱི་མགོན་པོའི་ལྷ་ཚོགས་ཀཱི་ལ་ཡ། །རྫས་ཀྱི་ཕུར་པ་ཀཱི་ལ་ཡ། །མགོ་བོ་རྒྱ་མདུད་མངའ་ཡང་གསོལ། །ཡེ་ཤེས་ཐིག་ལེ་མངའ་ཡང་གསོལ། །རྩ་བརྒྱད་འབར་བའི་མངའ་ཡང་གསོལ། །ཕྱག་རྒྱ་སྦྱོར་བས་མངའ་ཡང་གསོལ། །སྐེད་པ་རྒྱ་མདུད་མངའ་གསོལ་ལ། །རིགས་གཞི་ཕྱག་རྒྱས་མངའ་ཡང་གསོལ། །གྲུ་གསུམ་འབར་བས་མངའ་གསོལ་ལོ། །ཛཿགསུམ་འབར་བས་མངའ་གསོལ་ལ། །ངོས་གསུམ་འབར་བས་མངའ་གསོལ་ལོ། །པདྨ་རཀྟས་མངའ་གསོལ་ལོ། །ཟུར་གསུམ་འབར་བས་མངའ་གསོལ་ལོ། །སྣ་ཚོགས་ཛཿཡིས་མངའ་གསོལ་ལོ། །རཀྟ་ཁྲག་གིས་ངར་བླུད་ནས། །སྲིན་པོའི་ཐོད་པ་འདི་ལ་བརྡར། །ཕུར་པའི་དབལ་ལ་སྲ་སྙི་མེད། །ཡུངས་ཀར་མདའ་ལ་ཉེ་རིང་མེད། །དམིགས་པའི་འབེན་ལ་ཆེ་ཆུང་མེད། །མ་མོའི་ཐུན་ལ་ཉེ་རིང་མེད། །ཡུངས་ཀར་རྦབ་ལ་གྱེན་མཐུར་
མེད། །ཕོ་ཉའི་ལས་ལ་དཀའ་སླ་མེད། །སྡང་དགྲ་གནོད་བྱེད་བྱད་མ་རྡུལ་དུ་རློག །མི་མཐུན་རྐྱེན་དང་བར་ཆད་ཟློག །དགྲ་དང་བགེགས་ལ་རྩང་ཕུར་བྷྱོ། །བྱ་བྱེད་མུ་སྟེགས་སྙིང་ལ་རྩང་ཕུར་བྷྱོ། །བྱད་མ་ལྷ་སྲུང་སྙིང་ལ་རྩང་ཕུར་བྷྱོ། །ཁྲོ་རྒྱལ་འབར་བའི་ལྷ་ཚོགས་དང་། །ལས་ཀྱི་མགོན་པོའི་ལྷ་ཚོགས་ཀྱིས། །གནོད་བྱེད་ཐམས་ཅད་བཟློག་པར་མཛོད། །བཅོལ་བའི་ཕྲིན་ལས་འགྲུབ་པར་མཛོད། །ས་མ་ཡ། །ཛཿཛཿབྷྱོ་བྷྱོ་ཟློག་ཟློག །རྩང་གྱེར་རྫོགས་སོ། །ངག་གིས་བཛྲ་གྱིས་བསྐུལ་བའི་ངོར། །རིག་འཛིན་མི་འགྱུར་རྡོ་རྗེ་བྲིས་པའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།