རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་རང་བཟོ་མངོན་སྤྱོད་ཀྱི་ལས་བརྩམས་པ།
རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་རང་བཟོ་མངོན་སྤྱོད་ཀྱི་ལས་བརྩམས་པ་བཞུགས་སོ༔
ཧོཿཧོཿཧོཿ དགོངས་སུ་གསོལ་ལོ༔ གསན་དུ་གསོལ་ལོ༔ ལན་གསུམ་བྱས་ལ༔ ཟངས་མདོག་དཔལ་གྱི་རི་བོ་ནས༔ རྡོ་རྗེ་གྲོ་ལོད་སྐུ་བཞེངས་ཤིག༔ དེང་འདིར་ད་ལྟ་རྗེས་འཇུག་རྣམས༔ འཇིགས་པ་བརྒྱད་དང་བཅུ་དྲུག་སྡང་༔ བདག་ཅག་ཡིད་མུག་སེམས་ཕམ་ནས༔ ཁྱོད་ལ་རེ་ལྟོས་བཅས་པའི་མཐུས༔ བསླུ་མེད་གཏོར་མ་འདི་འཕེན་པས༔ བསྟན་དགྲ་རྩད་ནས་ཆོད་པར་ཤོག༔ ཅེས་གཏོར་མ་འཕེན་ནོ༔ ཧཱུྃ༑ སྔོན་ཚེ་ཤཱཀྱ་ཐུབ་པ་དང་༔ གསང་བདག་ཕྱག་རྡོར 
་པདྨ་འབྱུང་༔ དཔལ་གྱི་བསམ་ཡས་ཆེན་པོ་
རུ༔ དམ་ཚིག་སྨོན་ལམ་དབང་བསྡུས་ཏེ༔ ལྷན་ཅིག་འབྲེལ་པའི་གཏོར་མ་འདི༔ བོན་དང་ཉམས་པའི་སྙིང་ལ་རྒྱབ༔ ཕྱིན་ཆད་མི་ལྡང་ཕྲིན་ལས་མཛོད༔ ཅེས་གཏོར་མ་འཕེན༔ ཧཱུྃ༑ རྡོ་རྗེ་གྲོ་ལོད་དགོངས་སུ་གསོལ༔ ད་ལྟ་སྙིགས་དུས་བསྐལ་པ་ལ༔ བདག་ཅག་ཁྱོད་ཀྱི་རྗེས་འབྲང་ལ༔ འཇིགས་པ་བརྒྱད་ཀྱི་དགྲ་བྱུང་ན༔ དགྲ་འདི་སྒྲོལ་ཅིག་གྲོ་ལོད་རྩལ༔ ཕ་རོལ་བྱད་མ་ཟང་ཟིང་གི༔ བསྟན་དགྲ་མགོ་མཇུག་ལོག་པར་མཛོད༔ བདག་ཅག་དམ་ལྡན་སློབ་མ་སྟེ༔ ཁྱོད་ཀྱང་དམ་ལས་མི་འདའ་འཚལ༔
སྔོན་གྱི་དམ་ཚིག་མ་གཡེལ་བར༔ ཞལ་བཞེས་ལུང་བསྟན་དང་མཚུངས་པར༔ ཁྱོད་ལ་ཡོད་ན་ད་རེས་རན༔ དུས་ལས་མི་འདའ་དམ་ཚིག་ཅན༔ བསྟན་སྣུབ་ཐབ་བ་རྡུལ་དུ་རློག༔ ཅེས་གཏོར་མ་འཕེན༔ ཧཱུྃ༑ སྔོན་ཚེ་དུས་གསུམ་སངས་རྒྱས་དུས༔ དམ་ལོག་ལེགས་པའི་ཀརྨ་བྱུང་༔ རང་ལས་རང་སྨིན་རང་གིས་བསྒྲལ༔ ས་དེེ་རབ་གས་དམྱལ་བར་ལྷུང་༔ དེ་ལྟར་ད་ལྟའི་བསྟན་དགྲ་འདི༔ མྱུར་དུ་སྒྲོལ་ཅིག་གྲོ་ལོད་རྩལ༔ སེམས་འདི་བདག་འཛིན་མེད་པར་ཞོག༔ ཧཱུྃ་ཧཱུྃ་ཧཱུྃ༔ བྷྱོ་བྷྱོ་བྷྱོཿ ཕཊ་ཕཊ་ཕཊ༔ ངར་དང་ལྡན་པས་གཏོར་མ་འཕེན༔ ཧཱུྃ༑ གཏིང་ནས་ཟློག་ཅིག་ཀཱི་ལ་ཡ༔ སྐུ་གསུམ་ཡེ་ཤེས་ལྔ་ཡི་དངོས༔ རྡོ་རྗེ་གྲོ་ལོད་སྲོག་ཕུར་འདིི༔ བསྟན་དགྲ་དམ་ཉམས་སྙིང་ལ་རྒྱོབ༔ ལོ་ཟླ་ཞག་དུས་མ་འགྱངས་པར༔ སྐད་ཅིག་དགྲ་གཤེད་འདི་དང་སྤྲོད༔ ཐལ་བར་རློག་ཅིག་དུས་ལ་བབ༔ ཕྱིན་ཆད་རྨིང་ནས་མ་ལྡང་ཞིག༔ ཀྱེ་རྡོ་རྗེ་གྲོ་ལོད་ཆེ༔ ལན་གསུམ༔ བདག་ནི་ཁྱོད་ལ་རེའོ༔ ཁྱོད་ཀྱི་བདེན་ཚིག་ཤོག་སེར༔ འདི་ལ་གང་དགོས་ངས་
བགྱིས༔ ཁྱེད་ཀྱི་བཞེད་དོན་ངས་སྒྲུབ༔ འདི་ལ་བདེན་དོན་གང་མཆིས༔ འདི་ཡི་བཞེད་དོན་གང་དེས༔ བསྟན་དགྲ་ལོ་ཟླར་མ་འགྱངས༔ བསྟན་སྣུབ་རྨིང་ནས་སྐེམས་ཤིག༔ རྡོ་རྗེ་གྲོ་ལོད་དུས་ལ་བབ༔ ཐུགས་རྗེ་མ་གཡེལ་སྐྱབས་གནས༔ ཧཱུྃ་ཧཱུྃ་ཧཱུྃ༔ ཅེས་གཏོར་མ་འཕེན༔ དེ་ནས་རྟེན་གཏོར་ཐོགས་ལ༔ ཧཱུྃ༑ བཞེངས་ཤིག་དུས་གསུམ་སངས་རྒྱས་བཞེངས༔ བཞེངས་ཤིག་བླ་མ་ཡི་དམ་བཞེངས༔ དཔའ་བོ་མཁའ་འགྲོ་ཆོས་སྐྱོང་བཞེངས༔ བཀའ་བསྒོས་ལྷ་སྲིན་སྡེ་བརྒྱད་བཞེངས༔ དྭགས་བརྒྱུད་བསྟན་པའི་དོན་དུ་བཞེངས༔ བསྟན་སྣུབ་བཀའ་ཉམས་རྡུལ་དུ་རློག༔ བོན་དག་མུ་སྟེགས་ཐལ་བར་རློག༔ ཅེས་གཏོར་མ་འཕེན་ནོ༔ ཧོཿ དགོངས་སུ་གསོལ་ལོ༔ བདེན་དོན་གཉིས་ཀྱི་དབྱིངས་ནས་བཞེངས༔ ང་ཉིད་ཉེས་ན་ང་ཉིད་ཕམ༔ ཁྱོད་ཉིད་ཉེས་ན་ཁྱོད་ཉིད་ཕམ༔ དྭགས་བརྒྱུད་སྒྲུབ་བརྒྱུད་བསྟན་པ་ལ༔ གནོད་ཅིང་འཚེ་བའི་བསྟན་དགྲ་འདི༔ བཞེས་ཤིག་རོལ་ཅིག་ཁ་རཾ་ཁཱ་ཧི༔ དྭགས་བརྒྱུད་བསྟན་པ་དར་རྒྱས་
དངོས་གྲུབ་སྩོལ༔ དྭགས་བརྒྱུད་བསྟན་སྣུབ་ཞལ་དུ་བཞེས༔ ལོ་ཟླ་ཞག་དུས་མ་འགྱངས་པར༔ ད་ལྟ་ཉིད་ནས་ཐལ་བར་རློག༔ ༈ ༔རྡོ་རྗེ་གྲོ་ལོད༔ ལན་བཅུ་གསུམ་བརྗོད༔ ཧོཿ དགོངས་སུ་གསོལ་ལོ༔ བདག་ཅག་རྗེས་སུ་འཇུག་པ་ཐམས་ཅད་ཐུགས་རྗེས་མི་གཟིགས་ན་ཡེ་ཤེས་ཀྱི་སྤྱན་ཅི་ལ་མཁོ༔ སྤྱན་གསུམ་གྱིས་དུག་གསུམ་གྱི་དགྲ་བགེགས་ཐལ་བར་རློག་ཅིག༔ དུག་ལྔའི་དགྲ་བགེགས་ཐལ་བར་བརླགས་པའི་རྟགས་སུ༔ ཁྱོད་ལ་ཀུན་རྟོག་ཡེ་ནས་མེད་པས༔ ངེད་ཅག་གི་ཉོན་མོངས་དུག་ལྔ་འདི་གཏིང་ནས་མེད་པར་མཛོད་ཅིག༔ ཐམས་ཅད་ཡེ་ནས་མ་མཆིས་པས་ཁྱེད་ལ་བདག་འཛིན་གྱི་ངོ་བོ་གར་ཡོད་དེ༔ བློ་འདས་བརྗོད་མེད་ཀྱི་གཏོར་མ་འདི༔ འཁོར་འདས་སྣང་སྲིད་ཀྱི་སྟེང་དུ་རྒྱོབ་ཅིག༔ ཐམས་ཅད་སངས་རྒྱས་ཀྱི་ས་རུ་ཕྱིན་ན་དགའ་མོད༔ ཅེས་གཏོར་མ་འཕེན༔ དུག་ལྔ་འཇོམས་པའི་ཕྱིར་མདའ་དར་གཡུག་སྟེ༔ ཀྱེ༑ ང་བདག་ཡེ་ནས་མ་གྲུབ་ན༔ ང་བདག་གྲུབ་པ་མི་གདའོ༔ བདེན་པར་སྨྲས་ན་བདེན་པར་དོད༔ གཉིས་
འཛིན་དགྲ་དཔུང་ངར་འཛིན་འདི༔ ཀློང་དུ་གྲོལ་ན་བདེ་བ་ཆེ༔ བདག་འཛིན་སྟེང་དུ་མདའ་འདི་འཕེན༔ མཉམ་ཉིད་ཀློང་ཡངས་ཆེན་པོར་གྱུར༔ ཐམས་ཅད་ཡེ་དག་སྤྲོས་བྲལ་གྱུར༔ ཐམས་ཅད་སྤྲོས་བྲལ་ཀློང་དུ་བཞུགས༔ མི་འགྱུར་རྡོ་རྗེའི་སྨྱོ་གཏམ་གྱིས༔ ཕྱི་རབས་གཏེར་སྟོན་ཞེན་ཆེ་བའི་སྟབས་སུ་སྨྲས་པས་རྗེས་འཇུག་རྣམས་ཀྱི་སྤྱན་ལམ་དུ་མ་འཕྲོད་ཀྱང་༔ རེ་ཞིག་དགོངས་པས་བརྟགས་ཏེ་ཚིག་འདི་མི་བཅོས་པར་ཞུ༔ དེ་ནས་གཏོར་གཞོང་སྦུབ་ལ་འགུགས་བཞུག་བྱས་ནས་བྲོས་མནན་པ་ནི༔ ཧཱུྃ། དངོས་སྣང་སེམས་སུ་མ་འདུས་ན༔ འཁྲུལ་སྣང་སེམས་སུ་འདུས་པ་མེད༔ བྲོ་ཡང་དངོས་སྣང་སྟེང་དུ་བརྡུང་༔ བདག་འཛིན་མེད་པར་ཤིགས་སེ་ཞོག༔ ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ ཧཱུྃ་ཧཱུྃ་ཧཱུྃ༔ དེའི་ཚེ་བྲོ་ལུ་གུ་རྒྱུད་དུ་བརྡུང་༔ བཀྲ་ཤིས་སྨོན་རྣམས་བྱའོ༔ ཞེས་ལྷ་ཐོག་དཔོན་ཀརྨ་ཚེ་བརྟན་གྱིས་ཟོར་འཕེན་དགོས་ཞེས་ཡང་ཡང་བསྐུལ་ནས་ཞུས་པས༔ ཟོར་འཕེན་པའི་ཐབས་གཏེར་སྟོན་ལ་གནང་དགོས་ཞེས་བླ་མ་བློ་གྲོས་བཟང་པོས་བཀའི་བསྐུལ་པ་ཤིན་ཏུ་བསྐུལ་བས༔ རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱིས་གང་ཤར་བཟོ་མེད་དུ་སྨྲས་པའོ༔ ས་མ་ཡ༔ ༔ཧོཿ དགོངས་སུ་གསོལ་ལོ༔ ལན་གསུམ༔ ཧཱུྃ་ཧཱུྃ་ཧཱུྃ༔ སྣང་སྲིད་འཁོར་
འདས་དཀྱིལ་འཁོར་འདིར༔ བསྟན་དགྲ་རུ་དྲ་གང་མཆིས་རྣམས༔ དྲེགས་བྱེད་ཁྲོ་བོ་འཁོར་བཅས་ཀྱིས༔ བསྟན་བཤིག་རྨིང་ནས་སྐེམ་པར་བྱས༔ ད་ནི་དགྲ་ཡི་གཡུལ་ངོ་ལས༔ རྒྱལ་ལོ་དཀོན་མཆོག་རྣམ་པར་རྒྱལ༔ སངས་རྒྱས་ཆོས་ཀྱི་ཆབ་སྲིད་ཀྱང་༔ ནམ་མཁས་གར་ཁྱབ་དེར་གནས་ཤིང་༔ འཕོ་འགྱུར་མེད་པར་བརྟན་གྱུར་ཅིག༔ འགྱུར་མེད་རྡོ་རྗེའི་བཀྲ་ཤིས་ཤོག༔ ཅེས་དབྱངས་དང་བཅས་ཏེ་ལན་གསུམ་བརྗོད་ལ་བསྒྲུབ་ཁང་དུ་ཕྱིན༔ ༈ མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།