རྡོ་རྗེ་གྲོ་ལོད་ཀྱི་ཟིན་བྲིས་གྱི་ཕྱི་སྒྲུབ་ཀུན་བཟང་གི་དམིགས་ཟིན་བསྒོམ་དོན་རབ་གསལ།
ཡོངས་དགེའི་གྲོ་ལོད་ཀྱི་ཟིན་བྲིས་ལས། ཕྱི་སྒྲུབ་ཀུན་བཟང་གི་དམིགས་ཟིན་བསྒོམ་དོན་རབ་གསལ་ཞེས་བྱ་བ་བཞུགས་སོ། །
ཨོཾ་སྭསྟི། །མི་འགྱུར་སྐུ་བཞིའི་བདག་ཉིད་རྡོ་རྗེ་འཆང་། །དྲག་པོའི་སྐུར་བཞེངས་བདུད་འདུལ་གྲོ་བོ་ལོད། །གུ་རུའི་ཞལ་ཚབ་ནུས་ལྡན་ཉེར་གཅིག་གཙོ། །རིག་འཛིན་རྩལ་འཆང་གྲུབ་པའི་དབང་པོར་འདུད། །གང་དེའི་ཟབ་གཏེར་གྲོ་ལོད་ཀྱི། །ཟིན་བྲིས་སྒོམ་དོན་རབ་གསལ་བ། །རང་ཞལ་བལྟ་བའི་མེ་ལོང་འབྲི། །རྩ་གསུམ་ལྷ་ཡིས་གནང་བ་རྩོལ། །དེ་ལ་འདིར་དབང་ཐོབ་ཅིང་དམ་ཚིག་དང་སྡོམ་པ་རྣམ་པར་དག་པའི་རྣལ་འབྱོར་པས་ཡོངས་དགེའི་ཟབ་གཏེར་
བླ་མ་དྲག་པོའི་སྙིང་ཐིག་ཉམས་སུ་ལེན་པ་ལ། ཐོག་མར་ཟབ་ཆོས་ལ་ཡིད་ཆེས་ཤིང་དད་པ་བརྟན་པོ་དང་ལྡན་པས་ཚིག་བདུན་གསོལ་འདེབས་འདོན་པའི་སྐབས་སུ་ཨོ་རྒྱན་ཆེན་པོ་མདུན་གྱི་ནམ་མཁར་བཞུགས་པར་བསམས་ལ། ཨོ་རྒྱན་སངས་རྒྱས་གཉིས་པ་གུ་རུ་པདྨ་འབྱུང་གནས་ཁྱེད་ཀྱི་རྗེས་སུ་བདག་ཉིད་ཞུགས་ཏེ་ལམ་བསྐྱེད་རྫོགས་རིམ་པ་གཉིས་ཀྱི་རྣལ་འབྱོར་ཟབ་མོ་བསྒྲུབ་པར་བགྱིའོ། །ཞེས་པ་སོགས་ཚིག་དོན་ཡ་བྲལ་དུ་མ་སོང་བར་འདོན།
གཏེར་སྟོན་གུ་རུ་ཆོས་དབང་གི་གཏེར་བྱོན་ལ་ཚིག་རྐང་བདུན་ཡོད་པས། ཚིག་བདུན་གསོལ་འདེབས་ཞེས་སུ་གྲགས་པ་བསྡུས་པ་ཡིན། ད་ལྟ་ཀཾ་ཚང་གི་གསུང་རྒྱུན་འདི་རོང་སྟོན་བདེ་ཆེན་གླིང་པའི་གཏེར་མ་རྒྱས་པ་ཡིན། རྒྱས་པའི་སྐབས་སུ་གུ་རུ་རིན་པོ་ཆེའི་སྐུ་ལས་དབང་བཞི་ལེན་ཅིང་རྒྱུད་བྱིན་གྱིས་བརླབ་པར་དམིགས། གཞན་ཡང་བསམ་པ་ལྷུན་གྲུབ་འདོན་ཚེ་ཡང་གུ་རུ་ཡིད་བཞིན་ནོར་བུ་ལ་གང་འདོད་ཀྱི་གསོལ་བ་ཚིག་དོན་ལྟར་བཏབ་པས་བསམ་དོན་ཆོས་བཞིན་དུ་འགྲུབ་པར་བསམ་མོ། །དཀྱིལ་འཁོར་ལྷ་ཚོགས་ལ་གསོལ་འདེབས་གཏེར་སྟོན་ཉིད་ཀྱི་ཞལ་གསུང་། ཧྲཱིཿ ཡང་དག་རྫོགས་སངས་རྒྱས་དང་སོགས་ཀྱི་ཚེ་རྩ་བ་གསུམ་གྱི་དཀྱིལ་འཁོར་ལྷ་ཚོགས་ལ་མི་ཕྱེད་པའི་དད་པ་དྲག་པོས་སེམས་གཞན་དུ་མ་ཡེངས་པར་འདོན། བརྒྱུད་འདེབས་དམར་ནག་ཅོད་པན་འཆང་བ་ཟུང་གིས་མཛད་པ་སྲིད་ཞི་ལས་འདས་ཀྱི་ཚེ་དམིགས་པ་གསལ་
ཞིང་སྤྲོ་ན། ཀུན་བཟང་རིགས་ལྔ་སོགས་རྒྱལ་བ་དགོངས་བརྒྱུད། ༡༽ རིགས་གསུམ་མགོན་པོ་སོགས་རིག་འཛིན་བརྡ་བརྒྱུད། ༢༽ ཨོ་རྒྱན་པདྨ་འབྱུང་གནས་ལྷ་སྲས་མུ་ཁྲི་སོགས་གང་ཟག་སྙན་བརྒྱུད། ༣༽ མནྡཱ་ར་བ་ཡེ་ཤེས་མཚོ་རྒྱལ་སོགས་མཁའ་འགྲོ་གཏད་རྒྱ་བརྒྱུད་པ། ༤༽ མི་འགྱུར་རྡོ་རྗེ་ཡབ་སྲས་སོགས་ཤོག་སེར་ཚིག་གི་བརྒྱུད་པ། ༥༽ སྨོན་ལམ་དབང་བསྐུར་བརྒྱུད་པ་སྟེ། ༦༽ དྲུག་ལྡན་བརྒྱུད་པའི་བླ་མ་ཐམས་ཅད་སྤྲིན་ཕུང་གཏིབས་པ་ལྟར་བཞུགས་པར་དམིགས། ཞར་བྱུང་འདི་སྐབས་བརྒྱུད་པ་དགུ་ལྡན་ཞེས་པ་གོང་གི་སྟེང་དེར་བཀའ་བབ་ལུང་བསྟན། ༧༽ དམ་རྫས་མྱོང་གྲོལ། ༨༽ གྲུབ་ཐོབ་རྣལ་འབྱོར་གྱི་བརྒྱུད་པའམ་བྱིན་རླབས་དོན་གྱི་བརྒྱུད་པ། ༩༽ གསུམ་འདྲེན་པ་ནི་གཏེར་ཆེན་རྡོ་རྗེ་གླིང་པའི་ལྟ་བ་ཀློང་ཡངས་ལས་གསུངས། སྨོན་ལམ་དབང་བསྐུར་ཞེས་པ་ནི་སྔོན་གྱི་དུས་སུ་སློབ་དཔོན་པདྨས་རྗེ་འབངས་རྣམས་ལ་
དབང་བསྐུར་ཞིང་སྨོན་ལམ་བཏབ་པ་སྟེ་འདི་ལ་གཏེར་ཆོས་སྨོན་ལམ་བརྒྱུད་པའང་ཟེར། མཁའ་འགྲོ་གཏད་རྒྱ་ནི་མཁའ་འགྲོས་གཏེར་ཁ་དངོས་སུ་གཏད་པ། ཤོག་སེར་ཚིག་བརྒྱུད་ནི་ཤོག་སེར་ཕབ་ནས་དབང་ལུང་ཁྲིད་སོགས་སྤེལ་བ། བཀའ་བབ་ལུང་བསྟན་ནི་མ་འོངས་པ་ཕྱོགས་གཏེར་ཁ་ལུང་བསྟན་པ། དམ་རྫས་མྱོང་གྲོལ་ནི་བདུད་རྩི་ཆོས་སྨན་དང་མྱོང་གྲོལ་ཨཱཿརྒྱ་ཅན་སོགས་སོ། །གྲུབ་ཐོབ་རྣལ་འབྱོར་གྱི་བརྒྱུད་པའམ་བྱིན་རླབས་དོན་གྱི་བརྒྱུད་པ་ནི། ཨོ་རྒྱན་རིན་པོ་ཆེས་གཏེར་སྟོན་བྱིན་གྱིས་བརླབས་ནས་དགོངས་པ་མཉམ་པ་དང་། གཏེར་སྟོན་གྱིས་སློབ་མ་བྱིན་གྱིས་བརླབས་ནས་དགོངས་པ་མཉམ་པའོ། །དེ་ཐམས་ཅད་ཀྱང་བརྒྱུད་པ་དྲུག་ཏུ་འདུས་སོ། །བརྒྱུད་པའི་བླ་མ་རྣམས་བསྡུ་ན་རྩ་བའི་བླ་མ་དང་ཨོ་རྒྱན་པདྨ་དབྱེར་མེད་པ་ལ་ཐམས་ཅད་འདུས་སོ། །གསོལ་འདེབས་གཉིས་འདོན་རེས་སྐབས་སྒོམ་དོན་ལྷ་ཚོགས་བརྒྱུད་རིམ་བཅས་
འདྲ། གཏེར་སྟོན་སྐྱེ་ཕྲེང་གསོལ་འདེབས་སྐབས་སུ་གསང་བདག་ཕྱག་ན་རྡོ་རྗེ་སོགས་རིག་འཛིན་དེ་རྣམས་ཀྱི་སྤྲུལ་པར་ཡིད་ཆེས་ཤིང་ཐེ་ཚོམ་དང་བྲལ་བའི་ངང་ནས་འབྲེལ་པ་ཐོགས་ཆོགས་སུ་ཤེས་པའི་གསོལ་འདེབས་རྩེ་གཅིག་ཏུ་བྱའོ། །དེ་ནས་རང་ཉིད་པདྨ་བཛྲ་ཡབ་ཡུམ་དུ་སྐད་གཅིག་གིས་གསལ་བས་སྔོན་གཏོར་བྱིན་གྱིས་བརླབས་ལ་གནས་བདག་ལྷ་ཀླུ་སྡེ་བརྒྱད་ལ་དཀར་གཏོར་གསེར་སྐྱེམས་འབུལ་ཞིང་ཕྲིན་ལས་བཅོལ། ཧཱུྃ་བྷྱོ་ཞེས་ཡབ་ཡུམ་ས་བོན་གྱིས་ཐོག་དྲངས་རང་ཉིད་པདྨ་བཛྲ་གྱི་ང་རྒྱལ་བརྟན་པོའི་ངང་ནས་གླུད་གཏོར་བྱིན་གྱིས་བརླབས་ཤིང་བསྔོས་ནས། ཕྱོགས་མེད་ཕྱོགས་བྲལ་གནས་སུ་ཕྱིར་དེངས་ཤིག༔ ཅེས་དམིགས་མེད་ཀྱི་ངང་དུ་མཁའ་ལ་སྤྲིན་དེངས་པ་ལྟར་སོང་བར་བསམ་མོ། །ལ་ལ་དག་གིས་པདྨ་བཛྲ་ཞེས་པ་རྡོ་རྗེ་གྲོ་ལོད་ཅེས་ཁ་བསྒྱུར་བར་ཐོས་ཏེ་དེ་འདྲ་མི་དགོས། བླ་མ་ལོངས་སྐུའི་སྔོན་འགྲོ་འདིར་
སྦྱར་བ་ཡིན་པས་མ་བཅོས་སོར་བཞག་ལེགས། དེ་མཚམས་ཧཱུྃ་ཞེས་གཟུང་འཛིན་གཉིས་སྟོང་གི་ཡེ་ཤེས་ཐུགས་རྡོ་རྗེའི་ས་བོན་གྱིས་ཐོག་དྲངས་ཏེ། བྱིན་རླབས་ཀྱི་རྩ་བ་བཀའ་བརྒྱུད་བླ་མ། དངོས་གྲུབ་ཀྱི་རྩ་བ་ཡི་དམ་ལྷ་ཚོགས། རྟེན་འབྲེལ་གྱི་རྩ་བ་དཔའ་བོ་མཁའ་འགྲོ། ཕྲིན་ལས་ཀྱི་རྩ་བ་ཆོས་སྐྱོང་སྲུང་མ་རྣམས་ལ་བདེན་པ་བརྡར་ནས་བགེགས་ཚོགས་བསྐྲད་ལ་བརྗོད་པ་ཚིག་གིས་མཚམས་བཅད་དོ། །རང་བཞིན་ལྟ་བའི་ངང་ནས་ཆོས་ཉིད་རྟོག་མེད་ཀྱི་མཚམས་བཅད་པ་ནི། རྣམ་རྟོག་གཉིས་འཛིན་འཁྲུལ་སྣང་གི་བདུད་བགེགས་རྣམས་དམིགས་མེད་ངང་དུ་རང་ཞི་ཁྱབ་གདལ་ཀློང་དུ་རང་དག་བདེན་མེད་ངང་དུ་རང་ཡལ། རང་སེམས་རེ་དོགས་ཀྱི་བདུད་ཡེ་སྟོང་ཀློང་ཡངས་ཆེན་པོར་མཚམས་བཅད་པ་ནི། རྡོ་རྗེའི་ལས་རིམ་ལས། བསམ་བྱ་དམིགས་སུ་མེད་པས་ན། །གཟུང་འཛིན་བྲལ་བའི་རང་རིག་ཉིད། །དམིགས་མེད་ཚུལ་དུ་རང་ཤར་བ། །
མཚམས་ཀྱི་མཆོག་ཏུ་དེ་གསུངས་སོ། །ཅེས་གསུངས་པ་ལྟར་བཅད་བྱའི་བགེགས། བཅད་པའི་མཚམས། གཅོད་བྱེད་ཀྱི་གདམས་ངག་སོགས་གང་དུ་མ་གྲུབ་ཅིང་བློ་ལས་འདས་པ་ངོས་བཟུང་མེད་པའི་རྣམ་ཀུན་མཆོག་ལྡན་ལ་གནས་པས་བཟླས་པ་སྔགས་ཀྱིས་མཚམས་བཅད་པ་ནི། སརྦ་བིགྷྣཱན་སོགས་ཀྱི་སྔགས་འདོན། བགེགས་ཐམས་ཅད་ཞི་བར་གྱུར་ཅིག །ཆོས་དབྱིངས་སྐྱེ་མེད་ཀྱི་ཀློང་དུ་ཞི་བར་གྱུར་ཅིག །ཅེས་སྲུང་འཁོར་བསྒོམ་པ་ནི། ཡོངས་དགེ་ཉིད་ཀྱི་ཞལ་གསུང་ཟིན་བྲིས་ལས། རང་ཉིད་དྲག་རྩལ་ལེགས་གསལ་བའི། །ཐུགས་ཀའི་རྡོ་རྗེ་ཧཱུྃ་བཅས་ལས། །འོད་ཟེར་ཁྲོ་ཚོགས་མེ་དཔུང་དང་། །མཚོན་ཆའི་འདབ་ཆར་དྲག་འཕྲོས་པས། །གདོན་བགེགས་འབྱུང་པོ་བསྲེག་བརླག་བཅོམ། །མིང་མེད་ཐལ་བར་བརླག་པར་བསྒོམ། །མཁའ་དབྱིངས་ཁྱབ་གདལ་ཀློང་ཡངས་དང་། །ཁྲོ་ཚོགས་རྡོ་རྗེའི་གུར་ཁང་ཡངས་པའི་
ནང་། །ཞེས་གསུངས་པ་ལྟར། རང་ཉིད་བླ་མ་པདྨ་འབྱུང་གནས་ཀྱི་ཐུགས་གཉིས་མེད་རིག་པའི་རང་རྩལ་འཕྲོ་འདུའི་ཆོ་འཕྲུལ་ཁོ་ན་ལས་ཁྲོ་བོ་ཁྲོ་མོ་ཐིག་ལེ་ཐིག་ཕྲན་རྡོ་རྗེའི་གུར་ཁང་མེ་དཔུང་འབར་བ་དང་བཅས་སྣང་སྲིད་ལྷར་གསལ་བའི་སྲུང་འཁོར་བསྒོམ་མོ། །ཧྲཱིཿནི་བླ་མ་དྲག་པོ་རྩལ་གྱི་ས་བོན། ཧཱུྃ་ནི་སྣང་སྟོང་ཁྲོ་བོའི་ས་བོན། བྷྱོ་ནི་བདེ་སྟོང་ཁྲོ་མོའི་ས་བོན། ཧཾ་ཐབས། ཨེ་ཤེས་རབ། བཛྲ་རྡོ་རྗེ། རཀྵ་སྲུང་བ། ཛྭ་ལ་འབར་བ་སྟེ་མེ། བྷྲཱུཾ་ཞེས་པ་འབྱུང་བ་ལྔ་འདུས་པའི་ས་བོན་རྡོ་རྗེ་སྲུང་བའི་གུར་ཁང་བརྟན་པར་བྱེད་པ། ཨ་གསུམ་ནི་རྣམ་ཐར་སྒོ་གསུམ་གྱི་བདག་ཉིད་སྐྱེ་འགག་གནས་གསུམ་དང་བྲལ་བའི་རང་བཞིན་ཅན་ནོ། །རྣམ་ཐར་སྒོ་གསུམ་ནི་སྟོང་པ་ཉིད། རྣམ་རྟོག་འདས་པ་སྟོང་པ་ཉིད་དེ་འདས་པའི་རྗེས་མི་གཅོད། མཚན་མ་མེད་པའོ། །ད་ལྟ་བ་ལ་མཚན་མར་མི་འཛིན། འདི་སྨོན་པ་མེད་པའོ། །མ་འོངས་པའི་མདུན་མི་བསུ་བ། མཆན། འདི་སྐབས་སྣང་སྲིད་འཁོར་འདས་
ལྷ་དང་ལྷ་མོ་ཁྲོ་བོ་ཁྲོ་མོ། རྡོ་རྗེའི་གུར་ཁང་། དེ་རྒྱབ་མཚོན་ཆ། དེ་རྒྱབ་མེ་རིའི་གུར་ཁང་དུ་གྱུར་པར་བསྒོམ་ཞེས་མཁས་གྲུབ་འཇམ་དབྱངས་རྣམ་རྒྱལ་གྱི་ཟིན་བྲིས་སུ་འདུག་པ་རྡོ་རྗེའི་གུར་ཁང་གི་རྒྱབ་ཏུ་མཚོན་ཆའི་གུར་གསུངས་པ་ཞལ་རྒྱུན་འདྲ་ཡིན་ནམ་གཞུང་གི་སྲུང་བའི་སྔགས་ལ་རྡོ་རྗེ་མེ་རི་ལས་མཚོན་ཆའི་སྔགས་མི་འདུག་པས་མ་བསྒོམས་ཀྱང་ཆད་པའི་སྐྱོན་རང་ནི་མེད་འདྲ་སྙམ། ཟིན་བྲིས་རྣམས་སུ་རྡོ་རྗེའི་གུར་ཁང་ཙམ་ལས། སྒོང་ངའི་དབྱིབས་ཅན་དང་། གུར་གྱི་དབྱིབས་ཅན་གཉིས་ལས་གང་ཡིན་མི་གསལ་ཀྱང་། ཐུགས་སྒྲུབ་ཕལ་ཆེར་ལ་གུར་དབྱིབས་སུ་གསུངས་པས་གུར་དབྱིབས་འཐད་པར་སེམས་སོ། །སྲུང་བའི་འཁོར་ལོ་ནི་རྒྱ་ཆེ་བ་ཆོས་ཀྱི་དབྱིངས་དང་མཉམ་པར་བསྒོམ། སྲུང་འཁོར་གྱི་ནང་མདུན་གྱི་ནམ་མཁར་བླ་མ་སྐུ་གསུམ་ཐོ་བརྩེགས་དྲག་རྩལ་གྱི་གཞུང་ལྟར་མཁའ་ལ་ཉི་མ་ཤར་བ་ལྟར་གསལ་བའི་མཐར་སྐྱབས་
ཡུལ་ཕྱི་ནང་གསང་བའི་ཚོགས་རྣམས་ཏིལ་གྱི་གོང་བུ་ཁ་བྱེ་བ་ལྟར་བཞུགས་པའི་སྤྱན་སྔར། སྐུ་གསུམ་རྡོ་རྗེ་གསུམ་གྱི་ས་བོན་གྱིས་མགོ་དྲངས་ཏེ་སྐྱབས་འགྲོ་ལན་གསུམ་བྱ། སྐྱབས་ཡུལ་ཕྱིའི་དཀོན་མཆོག་སངས་རྒྱས་ཆོས་དང་དགེ་འདུན་གསུམ། ནང་གི་དཀོན་མཆོག་བླ་མ་ཡི་དམ་མཁའ་འགྲོ་གསུམ། གསང་བའི་དཀོན་མཆོག་ཆོས་སྐུ་ལོངས་སྐུ་སྤྲུལ་སྐུ་གསུམ། དེ་ཐམས་ཅད་ཀྱང་དྲིན་ཅན་རྩ་བའི་བླ་མ་དང་ཨོ་རྒྱན་པདྨ་དབྱེར་མེད་རང་གི་སེམས་དང་རོ་གཅིག་པར་ཤེས་པས་སྐྱབས་སུ་འགྲོའོ། །དེ་ཡང་སེམས་ཉིད་སྐྱེ་བ་མེད་པ་སངས་རྒྱས་དཀོན་མཆོག །གསལ་ལ་འགགས་པ་མེད་པ་དམ་ཆོས་དཀོན་མཆོག །གསལ་སྟོང་དབྱེར་མེད་པ་དེ་དགེ་འདུན་དཀོན་མཆོག །དེ་བཞིན་དུ་གསལ་བ་སེམས་ཀྱི་མཚན་ཉིད་བླ་མ། སྟོང་པ་སེམས་ཀྱི་རང་བཞིན་ཡི་དམ། ཟུང་འཇུག་སེམས་ཀྱི་ངོ་བོ་མཁའ་འགྲོ་དང་ཆོས་སྐྱོང་། སེམས་ས་ལེ་བའམ།
གསལ་ཧྲིག་གེ་བ་དེ་གསལ་བ་སེམས་ཀྱི་མཚན་ཉིད། དེ་ལ་བལྟས་པས་གཟུགས་དབྱིབས་ཁ་དོག་གང་ཡང་མ་གྲུབ་པ་དེ་སྟོང་པ་སེམས་ཀྱི་རང་བཞིན། གསལ་བཞིན་དུ་སྟོང་ཞིང་། སྟོང་བཞིན་དུ་གསལ་བའི་གསལ་སྟོང་ཟུང་དུ་འཇུག་པ་དེ་སེམས་ཀྱི་ངོ་བོའམ། དེ་བཞིན་དུ་སེམས་ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་སྣ་ཚོགས་སུ་ཤར་བ་སྤྲུལ་སྐུའོ། །མདུན་གྱི་སྐྱབས་ཡུལ་ཡེ་ཤེས་པ་རང་སེམས་སྐུ་གསུམ་དབྱེར་མེད་རང་ངོ་ཤེས་ཏེ་གཉིས་མེད་རོ་གཅིག་ཏུ་བཞག་ན་དེས་གོ་ཆོད་དོ། །འོ་ན་རང་ལ་སྐྱབས་ཡུལ་ཐམས་ཅད་ཚང་ཡོད་པས་མདུན་དུ་སྐྱབས་ཡུལ་བསྒོམས་ནས་སྐྱབས་འགྲོ་བྱ་མི་དགོས་སོ་ཞེ་ན། སྐྱབས་ཡུལ་བསྒོམས་ནས་སྐྱབས་སུ་ཤིན་ཏུ་ནས་ཀྱང་འགྲོ་དགོས་ཏེ། ད་ལྟ་རང་ལ་གནས་པའི་སེམས་ཉིད་སྐུ་གསུམ་གྱི་བདག་ཉིད་འདི་སྒྲིབ་པའི་དྲི་མ་ཐམས་ཅད་དང་བྲལ་ནས་མངོན་སུམ་དུ་རྟོགས་པ་ནི་བསོད་ནམས་དང་ཡེ་ཤེས་ཀྱི་ཚོགས་
གཉིས་ལ་རག་ལས་པས་སོ། ཇི་སྐད་དུ་ཡང་། ཧེ་རུ་ཀ་གལ་པོ་ལས། །མཚན་ཉིད་རྒྱུ་ཡི་ཐེག་པས་ནི། །སེམས་ཉིད་སངས་རྒྱས་རྒྱུ་རུ་ཤེས། །འབྲས་བུ་སྔགས་ཀྱི་ཐེག་པས་ནི། །སེམས་ཉིད་སངས་རྒྱས་ཉིད་དུ་བསྒོམ། །ཞེས་གསུངས་པ་ལྟར་རོ། །ནམ་ཞིག་ན་བླ་མ་དང་རང་སེམས་སངས་རྒྱས་གསུམ་དབྱེར་མེད་དུ་རྟོགས་ན་འབྲས་བུ་མངོན་དུ་གྱུར་པ་ཡིན་ལ། ད་ལྟའང་དབྱེར་མེད་དུ་ཤེས་པའི་ངང་ནས་སྐྱབས་སུ་འགྲོ་བར་བྱའོ། །མདུན་གྱི་སྐྱབས་ཡུལ་དེ་དག་གི་སྤྱན་སྔར། ཧོཿ ཞེས་ངོ་མཚར་བའི་དོན་ནམ་རྨད་དུ་བྱུང་བའི་ཚུལ་གྱིས་ཡན་ལག་བདུན་པ་འབུལ་བ་ནི། སྡིག་པ་བཤགས་པ། ༡ དམ་བཅའ་བ། ༢ སེམས་བསྐྱེད་པ། ༣ ཕྱག་འཚལ་བ། ༤ ལུས་འབུལ་བ། ༥ སྨོན་ལམ་གདབ་པ། ༦ ཚོགས་མཆོད་འབུལ་བ། ༧ བསྟོད་པའི་ཡན་ལག ༨ དང་བརྒྱད་དོ། །གཏེར་མཆན་དུ་ཡན་ལག་བདུན་པ་གསུངས་ཤིང་གྲངས་བརྒྱད་དུ་གྱུར་པ་གང་ཞེ་ན།
ཚོགས་སོགས་འདོད་ཡོན་གྱིས་མཆོད་པ་འབུལ་བ་སྤྱི་དང་། ལུས་འབུལ་བ་བྱེ་བྲག་ཡིན་པས་སྤྱི་དང་བྱེ་བྲག་བསྡོམས་ནས་མཆོད་པའི་ཡན་ལག་ཏུ་བགྲངས་པའི་གྲངས་བདུན་དུ་ངེས་སོ། །ཡན་ལག་གཞན་རྣམས་ཤེས་པར་སླ་ལ། ལུས་འབུལ་བ་ལ་དགོས་པ་གསུམ་དང་ལྡན་ཏེ། རྡོ་རྗེའི་ལས་རིམ་ལས། །ཕྱོགས་བཅུའི་སངས་རྒྱས་སྲས་བཅས་དང་། །དབང་ཕྱུག་ད་ལྟའི་སངས་རྒྱས་བདག །མ་འོངས་རང་བཞིན་སེམས་ཅན་ལ། །དགོས་པ་གསུམ་ཕྱིར་ལུས་དབུལ་བྱ། །མཆོག་གི་ཡོད་ཕྱིར་སྣོད་དུ་འགྱུར། །ཅེས་གསུངས་པ་ལྟར། སངས་རྒྱས་ལ་ལུས་ཕུལ་བས་མཐར་ཐུག་འབྲས་བུ་དེ་འདྲ་ཐོབ་པའི་དགོས་པ། ༡ བླ་མ་ལ་ལུས་ཕུལ་བས་བྱིན་རླབས་འཇུག་པའི་དགོས་པ། ༢ སེམས་ཅན་ལ་ལུས་ཕུལ་བས་མ་འོངས་པ་ན་གདུལ་བྱར་འགྱུར་བའི་དགོས་པའོ། ༣ དེ་ཡང་སྔོན་གྱི་བདེར་གཤེགས་འདས་པའི་སངས་རྒྱས། མདོ་སྔགས་ལུང་
རྟོགས་ཀྱི་དབང་ཕྱུག །ད་ལྟའི་སངས་རྒྱས་དཔལ་ལྡན་བླ་མ་དམ་པ་རིགས་བརྒྱའི་ཁྱབ་བདག །ཁམས་བདེར་གཤེགས་སྙིང་པོའི་རང་བཞིན་ཅན་གྱི་སེམས་ཅན་ཐམས་ཅད་ནི་མ་འོངས་པའི་སངས་རྒྱས་ཏེ། ཡུལ་དེ་གསུམ་ཀ་ཚོགས་བསགས་པའི་ཞིང་དུ་སློབ་དཔོན་སངས་རྒྱས་གསང་བའི་རྡོ་རྗེའི་ལས་རིམ་ལས་གསུངས་སོ། ༈ །ཡན་ལག་བདུན་ཡང་སྔ་འགྱུར་བཀའ་མ་ལྟར་ན། ཕྱག་འཚལ་བ། ༡ སྐྱབས་སུ་འགྲོ་བ། ༢ མཆོད་པ་འབུལ་བ། ༣ སྡིག་པ་བཤགས་པ། ༤ རྗེས་སུ་ཡི་རང་བ། ༥ སེམས་བསྐྱེད་པ། ༦ ལུས་འབུལ་བ། ༧ བསྔོ་བའི་ཡན་ལག་གོ ༨ །ཕྱག་འཚལ་ཞིང་སྐྱབས་སུ་འགྲོ་བ་ཞེས་གཅིག་ཏུ་བརྩིས་པའི་ཡན་ལག་བདུན་དུ་བཞེད། ༈ །རྣལ་འབྱོར་རྒྱུད་རྣམ་སྣང་མངོན་བྱང་དང་། བླ་མེད་རྒྱུད་སམྦུ་ཊི་དང་། རྡོ་རྗེ་གུར་བཅས་ནས་ཚིག་མཐུན་པར་གསུངས་པའི་བྱང་སེམས་སྡོམ་བཟུང་ཡན་ལག་བདུན་ནི། དང་པོ་ཡན་ལག་བདུན་
པ་འབུལ་བའི་ཡུལ་དཀོན་མཆོག་གསུམ་ལ་སོགས་ཚིག་རྐང་གཅིག་སྡིག་པ་སོ་སོར་བཤགས་པའི་ཚིག་རྐང་། ༡ འགྲོ་བའི་དགེ་སོགས་རྗེས་སུ་ཡི་རང་། ༢ སངས་རྒྱས་བྱང་ཆུབ་སོགས་དོན་དམ་བྱང་ཆུབ་ཀྱི་སེམས་བཟུང་བ། ༣ སངས་རྒྱས་སོགས་ཚིག་རྐང་ཐེག་པ་ཆེན་པོའི་སྐྱབས་འགྲོ། ༤ རང་གཞན་སོགས་ཚིག་རྐང་གཉིས་སྨོན་པ་སེམས་བསྐྱེད། ༥ བྱང་ཆུབ་མཆོག་གི་སོགས་ཚིག་རྐང་གསུམ་འཇུག་པའི་སེམས་བསྐྱེད། ༦ འགྲོ་ལ་སོགས་བསྔོ་བའི་ཡན་ལག་དང་འདུན་ནོ། ༧ །ཡན་ལག་བདུན་ཡང་གྲངས་དང་སྦྱར་ན། །སྐྱབས་ཡུལ་སྐུ་གསུམ་བླ་མའི་སྤྱན་སྔར་སྡིག་པ་བཤགས་པ། ༡ དམ་བཅའ་ཞིང་སེམས་བསྐྱེད་ནས་ཆོས་འཁོར་བསྐོར་བར་བསྐུལ་བ། ༢ ལུས་ཞིང་གི་རྡུལ་སྙེད་དུ་སྤྲུལ་ནས་ཕྱག་འཚལ་བ། ༣ རང་ལུས་ལོངས་སྤྱོད་དགེ་རྩར་བཅས་མཎྜལ་དུ་ཕུལ་ནས་སྐུ་མྱ་ངན་ལས་མི་འདའ་བར་བཞུགས་པར་
གསོལ་བ་འདེབས་པ་དང་། ༤ བསྔོ་བ་སྨོན་ལམ་གྱིས་རྒྱས་གདབ་པ། ༥ འདོད་ཡོན་ལྔ་ཡི་ལྷ་མོ་སྤྲུལ་ནས་མཆོད་པ་འབུལ་བ། ༦ རྒྱལ་བའི་གསང་གསུམ་གྱི་ཡོན་ཏན་ལ་བསྟོད་ཅིང་རྗེས་སུ་ཡི་རང་བ་དང་བདུན་ནོ། ༧ །དཔེ་ལ་ལར་རང་ལུས་བཞུགས་པའི་གདན་དུ་འབུལ་ཞེས་པ་གདན་བྱས་འདུག་ཀྱང་ཡོངས་དགེ་གཏེར་ཆེན་ཉིད་ཀྱི་ཕྱག་བྲིས་སུ་ར་རྟེེན་འདུག་པས་བླ་མ་དཔོན་པོ་ལ་ཞུ་བའི་རྟེན་དུ་འབུལ་བ་ཡིན་ལ་དེ་དུས་བླ་མ་མི་དཔོན་ལ་མགོ་བཏགས་ནས་མགོ་འབུལ་ལུས་འབུལ་ཟེར་བ་བཞིན་ནོ། །གཏེར་མཆན་དུ་གདན་འབུལ་ཟེར་བ་ནི། བླ་མ་སྐུ་གསུམ་གདན་འཛོམ་པའི་སྤྱན་སྔར་ལུས་འབུལ་བ་ཡིན་ཏེ། བླ་མ་ཁྲི་འཁོད་དུས་ཁྲི་འབུལ་བཞག་པ་ནི། བླ་མ་ཁྲི་ལ་མངའ་གསོལ་བའི་ལེགས་འབུལ་ཡིན་གྱི་འབུལ་བ་དེ་ཁྲིར་བརྩེགས་ནས་བླ་མ་ལ་འབུལ་མི་དགོས་པ་བཞིན་འདིར་ཡང་རང་ལུས་བླ་མའི་བཞུགས་གདན་དུ་འབུལ་དགོས་
པ་མ་ཡིན་པར་ཤེས་དགོས་སོ། །མཐར་སྐྱབས་ཡུལ་རྣམས་རང་ལ་ཐིམ་པས་ལས་ཉོན་སྡིག་སྒྲིབ་ཐམས་ཅད་དག་ནས་སྤྲིན་མེད་པའི་ནམ་མཁའ་ལྟར་རང་ལུས་དྭངས་གསལ་འོད་ཀྱི་རང་བཞིན་ཅན་དུ་གྱུར་པར་བསམ། ༈ །འདིར་རང་ངོ་ལ་མཉམ་པར་བཞག་པ་པདྨ་ཉིན་བྱེད་དབང་པོའི་ཟིན་བྲིས་སུ་གསུངས་པ་ནི་མཆན་བུར་སེམས་རང་ཞལ་གཅེར་གྱིས་བལྟའོ། །ཞེས་པའི་དོན་ནི་བྱིན་འབེབས་སྐབས་རང་ཉིད་བླ་མ་དྲག་པོ་རྩལ་དུ་གསལ་བའི་ཐུགས་ཀ་ནས་འོད་ཟེར་འཕྲོས་པས་ཕྱོགས་བཅུའི་ཞིང་ཁམས་རབ་འབྱམས་ཏེ་མཐའ་ཀླས་པ་དང་། ཁྱད་པར་ལྷོ་ནུབ་རྔ་ཡབ་དཔལ་གྱི་རི་བོ་སོགས་ནས་རྩ་བ་གསུམ་གྱི་ལྷ་ཚོགས་ལྷ་སྐུ་ཕྱག་རྒྱའི་རྣམ་པ། གསུང་སྔགས་ཕྲེང་གི་རྣམ་པ། ཐུགས་ཕྱག་མཚན་གྱི་རྣམ་པ་ཁ་ཆར་བུ་ཡུག་འཚུབས་པ་ལྟར་སྤྱན་དྲངས་པར་དམིགས་ལ་དར་སྣ་ལྔ་ཡི་གཡབ་དར་རམ་མདའ་དརགཡབ་ཅིང་གདུང་བའི་
དབྱངས་དང་བཅས་པས། ཧཱུྃ་སྐྱེ་མེད་སོགས་ཏེ་སྐྱེ་མེད་ཆོས་སྐུའི་དབྱིངས་ནས་བཀའ་བརྒྱུད་བླ་མ། འགགས་མེད་འོག་མིན་མཁའ་སྤྱོད་ལོངས་སྐུའི་ཞིང་ནས་ཡི་དམ་ལྷ་ཚོགས། འཁྲུལ་མེད་ཐུགས་རྗེའི་རང་རྩལ་གང་འདུལ་སྤྲུལ་སྐུའི་ཞིང་ནས་རིག་འཛིན་གྲུབ་ཐོབ་རྒྱ་མཚོ། ཕྱི་རོལ་དུ་ཡུལ་ཉེར་བཞི་ལ་སོགས་པའི་ཞིང་རང་ལུས་རྩ་རླུང་ཐིག་ལེ་རྣམ་དག་རྡོ་རྗེའི་ལུས་ཕྱི་ནང་གཞན་གསུམ་རྣམ་པར་དག་པའི་གནས་ནས་དཔའ་བོ་མཁའ་འགྲོ། རིག་པའི་རང་རྩལ་གང་འདུལ་སྒྱུ་འཕྲུལ་དྲྭ་བ་ལས་ཆོས་སྐྱོང་སྲུང་མ་སྟེ། རྩ་བ་གསུམ་གྱིས་ལྷ་ཚོགས་རྣམས་ཀྱིས་བྱིན་ཕབ་པའོ། ༈ །སྣང་ཡང་མ་གྲུབ་པའི་ཕྱི་སྒྱུ་མ་ནི་དོན་དམ། དེ་ལས་འཁོར་འདས་སྣ་ཚོགས་སུ་ཤར་བ་ནི་མེད་བཞིན་དུ་སྣང་བའི་ཕྱིར་འཁྲུལ་པ་སྟེ་ཀུན་རྫོབ། དེ་གཉིས་དབྱེར་མེད་འཁོར་འདས་ཀུན་ལ་ཁྱབ་ཅིང་འབྲེལ་བས་དྲྭ་བ་ཞེས་བྱ་སྟེ། སྒྱུ་འཕྲུལ་བླ་མ་ལས། སྟོང་ཞིང་དབེན་པའི་སེམས་ཉིད་
འདི། །རིགས་དང་ཁ་དོག་དབྱིབས་མེད་དེ། །ཅི་ཡང་མེད་ལས་ཅི་ཡང་སྣང་། །མ་སྐྱེས་སྒྱུ་འཕྲུལ་སྣ་ཚོགས་འབྱུང་། །རྒྱལ་བའི་དཀྱིལ་འཁོར་སྣ་ཚོགས་ཀྱང་། །སེམས་ཀྱི་སྒྱུ་འཕྲུལ་ཆེན་པོ་ཡིན། །ཅེས་སོ། །བྱིན་ཕབ་པའི་ཚུལ་ཡང་། ཕྱི་སྣོད་ལ་བྱིན་ཕབ་པས་ཐར་པ་ཆེན་པོའི་གཞལ་ཡས་ཁང་ཞིང་གི་བཀོད་པར་ཡེ་ནས་དག་པའི་རང་བཞིན་དུ་ཤེས་པ་ལས། ཆེད་དུ་གཞལ་ཡས་ཁང་བསྒོམ་མི་དགོས། ནང་བཅུད་ཀྱི་སེམས་ཅན་ཐམས་ཅད་ལྷ་དང་ལྷ་མོའི་རང་བཞིན་དུ་དག་པ་ཡེ་ཤེས་ཀྱི་འཁོར་ལོས་བསྒྱུར་བ་སྟེ་ཁ་ལོ་བསྒྱུར་བའམ་དབང་བསྒྱུར་བའོ། །དེ་ལྟར་ལན་གསུམ་བརྗོད་ཅིང་བྱིན་ཕབ་ལ། བྱིན་རླབས་བསྡུ་བ་ནི། ཨོཾ་སྤྲུལ་སྐུ། ཨཱཿལོངས་སྐུ། ཧཱུྃ་ཆོས་སྐུའི་ས་བོན་གསུམ་གྱིས་ཐོག་དྲངས་བླ་མ་སྐུ་གསུམ་རྒྱལ་བ་རབ་འབྱམས་ཀྱི་སྐུའི་བྱིན་རླབས་ལུས་ལ་ཞུགས་པས་ལུས་སྣང་སྟོང་འཇའ་ལུས་ཆོས་སྐུ། བླ་མ་ལོངས་སྐུ་ཞི་ཁྲོ་རབ་
འབྱམས་ཀྱི་བྱིན་རླབས་ངག་ལ་ཞུགས་པས་ངག་གྲགས་སྟོང་ཚངས་དབྱངས་ཀྱི་ལོངས་སྤྱོད་རྫོགས་སྐུ། བླ་མ་སྤྲུལ་སྐུ་དཔའ་བོ་མཁའ་འགྲོའི་བྱིན་རླབས་གཞི་ལུས་ལ་ཞུགས་པས་རྩ་དག །རླུང་ཐིམ། ཐིག་ལེ་བརྟེན་པས་རྣམ་སྨིན་གྱི་ལུས་དག་ནས་དྭངས་མའི་ལུས་བླ་མ་སྤྲུལ་པའི་སྐུར་གྱུར། ༈ །བླ་མ་སྐུ་གསུམ་གྱི་ཕྲིན་ལས་དྲག་པོའི་རོལ་པ་ཆོས་སྐྱོང་ཡེ་ཤེས་ཆོས་སྐྱོང་ཡིན་ཏེ་དྲེགས་པ་རང་རྒྱུད་པ་བསྟིམ་མི་དགོས། མཆན། སྲུང་མའི་བྱིན་རླབས་གནས་བཞིར་ཐིམ་པས་ཞི་རྒྱས་དབང་དྲག་གི་ལས་བཞི་ལྷུན་གྱིས་གྲུབ་ཅིང་རྟོག་ཚོགས་རང་གྲོལ་བླ་མ་སྒྱུ་འཕྲུལ་དྲྭ་བ་ཆེན་པོའི་གོ་འཕང་མངོན་དུ་བྱས་པར་དམིགས། བླ་མའི་བྱིན་འབེབས་ཀྱི་སྐབས་སུ་ལུས་འཇའ་ལུས་ཆོས་སྐུར་བྱིན་གྱིས་བརླབས་ཟིན་ན། སླར་མཁའ་འགྲོའི་བྱིན་འབེབས་ཀྱི་སྐབས་སུ་རྩ་རླུང་ཐིག་གསུམ་རྣམ་པར་དག་རྒྱུ་གང་ཡིན་ཞེ་ན་མི་འགལ་ཏེ། སྤྱི་དང་བྱེ་བྲག་གི་བྱིན་འབེབས་ཡིན་པའི་ཕྱིར་ཐོག་
མར་བླ་མའི་བྱིན་འབེབས་ལུས་ལྷ་སྐུར་སྨིན་པར་བྱེད་པ་སྤྱི་ཡིན་ལ། བྱེ་བྲག་ཟབ་མོ་སྔགས་ཀྱི་ཁྱད་ཆོས་མཆོག་དབང་གོང་མ་གསུམ་གྱི་ལམ་ལ་བརྟེན་ནས་རྩ་རླུང་ཐིག་ལེ་དག་དགོས་པའི་ཕྱིར། དབང་གི་སྐབས་སུའང་བུམ་དབང་ཁོ་ན་བསྐུར་ནས་དེའི་ལམ་ཁོ་ན་བསྒོམས་ནས་འབྲས་བུ་མི་ཐོབ་ལ། དབང་གོང་མ་གསུམ་བུམ་གསང་ཤེར་ཡེ་ཚིག་དབང་གིས་ལུས་ངག་ཡིད་གསུམ་ཆ་སྙོམ་དང་བཅས་པའི་སྒྲིབ་པ་དག །སྐུ་བཞིའི་འབྲས་བུ་གྲུབ་པའོ། །གྱི་ལམ་ལ་བརྟེན་ནས་མཐར་ཐུག་གི་འབྲས་བུ་མངོན་དུ་བྱེད་དགོས་པའི་ཕྱིར་རོ། །བྱིན་བསྡུ་བའི་ཚེ་ལྷ་སྐུ་རྣམས་རང་གི་ལུས་ལ་བསྟིམ། །སྔགས་ཕྲེང་རྣམས་རང་གི་མགྲིན་པ་དང་ངག་ལ་བསྟིམ། ཕྱག་མཚན་རྣམས་སྙིང་ག་དང་སེམས་ལ་བསྟིམ། ཆོས་སྐྱོང་སྐུའི་རིགས་རྣམས་དཔྲལ་བ། གསུང་གི་རིགས་རྣམས་མགྲིན་པ། ཐུགས་ཀྱི་རིགས་རྣམས་སྙིང་ག །ཡོན་ཏན་དང་ཕྲིན་ལས་ཀྱི་རིགས་རྣམས་ལྟེ་བ་དང་གསང་བར་བསྟིམ་པ་
ཡིན་ལ། ཡང་ན་ཆོས་སྐྱོང་ཡེ་ཤེས་ཀྱི་ཆོས་སྐྱོང་ཡིན། ཐམས་ཅད་ཕྲིན་ལས་ཀྱི་རོལ་པ་ཡིན་པས་གསང་བར་བསྟིམ་མོ། །སྔགས་དོན་ཨོཾ་ཨཱཿཧཱུྃ་སྐུ་གསུམ། ཧཾ་ཨེ་ཐབས་དང་ཤེས་རབ། དྷརྨཱ་དྷཱ་ཏུ་ཛྙཱ་ན་ཡེ་ཆོས་དབྱིངས་ཡེ་ཤེས། ཀཱ་ཡ་ཝཱཀྐ་ཙིཏྟ་སྐུ་གསུང་ཐུགས། སིདྡྷི་དངོས་གྲུབ། ཛཿའགུགས་པ་སྟེ་དབང་དུ་བསྡུ་བ། ཧཱུྃ་དབྱེར་མེད་དུ་བསྟིམ་པའོ། ༈ །མཆོད་པ་བྱིན་རླབས་ནི་སྐུ་གསུམ་གྱི་ས་བོན་འབྲུ་གསུམ་སྔོན་དུ་འགྲོ་བས་དངོས་སུ་བཤམས་པའི་མཆོད་རྫས་ཐམས་ཅད་ཟག་པ་སྟེ། ཉོན་མོངས་པ་མེད་པ་འཕགས་པ་ཀུན་ཏུ་བཟང་པོའི་མཆོད་པའི་སྤྲིན་ནི། ནམ་མཁའི་མཐའ་དང་མཉམ་པ་ཟད་མི་ཤེས་པ་ཕྱོགས་བཅུའི་ཞིང་རབ་འབྱམས་རྒྱ་མཚོ་དཔག་པར་དཀའ་བ་རྣམས་སུ་འདས་པ་དང་། ད་ལྟ་བ། མ་འོངས་པ། མ་ངེས་པ་སྟེ་དུས་བཞི་མཉམ་པ་ཉིད་དུ་རྒྱུན་མི་ཆད་པར་ནམ་མཁའ་མཛོད་ཀྱི་ཏིང་ངེ་འཛིན་གྱིས་བྱིན་བརླབས་པའོ། །དངོས་སུ་བཤམས་
པའི་མཆོད་པ་དེ་ལའང་། ཉོན་མོངས་པ་དང་མ་འདྲེས་པ་ནི། རྒྱུ་དུག་གསུམ་གྱི་ལྕགས་ཀྱུས་མ་བཟུང་བ། རྐྱེན་མི་དགེའི་ཞགས་པས་མ་བཅིངས་པ། བར་རྡོ་ཆགས་ཀྱིས་སེལ་མ་ཞུགས་པ། ཐ་མ་ཞེན་ཆགས་ཀྱི་གཡས་མ་གོས་པར་བཤམ། བྱིན་རླབས་སྐབས་འདིར། སྨན་རག་གཏོར་གསུམ་གྱི་བྱིན་རླབས་སྒོམ་དོན་གཞན་གསང་བ་སྤྱི་ལུགས་ནི་སྦྱར་མི་སྤོབས་ཏེ་ཞལ་རྒྱུན་ཡང་མི་འདུག་པས་བཅོས་བསླད་དུ་འགྲོ་བར་སེམས། སྔགས་ཀྱི་བྱིན་རླབས་ཁོ་ན་བྱ་བ་ནི་སྤྱིར་བསྡུས་པའི་ལུགས་ཡིན་པས་བདུད་རྩི་བཞུ་བཏུལ་སོགས་མི་དགོས་པར་མངོན་ནོ། །སྔགས་ཚན་དང་པོ་ཕྱི་མཆོད་འདོད་ཡོན་གཏོར་མ་བྱིན་རླབས། བར་པ་ནང་མཆོད་བདུད་རྩི་བྱིན་རླབས། ཕྱི་མ་གསང་མཆོད་རཀྟ་བྱིན་རླབས་ཡིན་ལ་གཏེར་མཆན་ལྟར་ན་སྔགས་ཚན་དང་པོ་དམ་ཚིག་གི་བདུད་རྩི་བསྐྱེད་སྔགས། གཉིས་པ་ཡེ་ཤེས་ཀྱི་བདུད་རྩི་སྤྱན་འདྲེན་པའི་སྔགས།
གསུམ་པ་དམ་ཡེ་དབྱེར་མེད་རོ་གཅིག་ཏུ་བསྲེ་བའི་སྔགས་སོ། །སྔགས་དོན་ཨོཾ་ཨཱཿཧཱུྃ་སྐུ་གསུམ་གྱི་ས་བོན། ས་མ་ཡ་དམ་ཚིག །ཨ་མྲྀ་ཏ་བདུད་རྩི། སཱ་ག་ར་རྒྱ་མཚོ། ཨོཾ་ཨཱཿཧཱུྃ་སྐུ་གསུང་ཐུགས་རྡོ་རྗེའི་བདག་ཉིད། འདི་སྐབས་སྔགས་དོན་ལྟར་མཆོད་རྫས་རྣམས་དམ་ཚིག་གི་བདུད་རྩིའི་རྒྱ་མཚོ་ཆེན་པོར་དམིགས་ལ་སྨན་གཏོར་ལ་བདུད་རྩི་དང་། རཀྟས་བྲན་ཡང་འབྲུ་གསུམ་སྔར་དང་འདྲ། ཛྙཱ་ན་ཡེ་ཤེས། པཉྩ་ལྔ། ཨ་མྲྀ་ཏ་བདུད་རྩི། སཱ་ག་ར་རྒྱ་མཚོ། འབྲུ་གསུམ་སྔར་བཞིན། སྔགས་བཟླ་ཚེ་བདུད་རྩི་གཡས་སྐོར་དུ་དཀྲུག །ཡང་ཐོག་མཐའི་འབྲུ་གསུམ་སྔར་བཞིན། ཛྙཱན་པཉྩ་ཡེ་ཤེས་ལྔ། ཨ་མྲྀ་ཏ་འཆི་མེད་སྟེ་བདུད་རྩིའོ། །སྔགས་ཀྱི་ཚེ་རཀྟ་གཡོན་སྐོར་དུ་དཀྲུག །ད་ལྟ་སྔགས་ཚན་རྣམས་སོ་སོར་གསུམ་རེ་བཟླ་བ་ཡིན། བསྙེན་བསྒྲུབ་སོགས་ཀྱི་ཚེ་སྔགས་རྣམས་སོ་སོར་ལན་བདུན་རེ་བཟླས་ན་ལེགས། དེ་ཚེ་མཆོད་རྫས་རྣམས་བྱིན་གྱིས་བརླབ་
པའི་དམིགས་པ་ནན་ཏན་བྱ། དམ་ཚིག་གི་བདུད་རྩི་བསྐྱེད་པའི་སྐབས་སུ་ཨོཾ་འོད་དུ་ཞུ་བ་ལས་གཏོར་མ། ཨཱཿའོད་དུ་ཞུ་བ་ལས་རཀྟ། ཧཱུྃ་འོད་དུ་ཞུ་བ་ལས་བདུད་རྩི་འབྲུ་གསུམ། རྗེས་མ་དེས་རྒྱས་བཏབ་ཏེ་སོ་སོས་མཚན་པར་བསྒོམ། ཡེ་ཤེས་ཀྱི་བདུད་རྩི་སྤྱན་འདྲེན་སྐབས་སྔགས་ཚན་བར་མའི་འབྲུ་གསུམ་ཐོག་མ་དེས་རྒྱལ་བའི་སྐུ་གསུང་ཐུགས་ཀྱི་ཡེ་ཤེས་ཀྱི་བདུད་རྩིའི་རྣམ་པར་སྤྱན་དྲངས། འབྲུ་གསུམ་རྗེས་མས་བྱིན་གྱིས་བརླབས། སྔགས་ཚན་རྗེས་མའི་འབྲུ་གསུམ་དང་པོས་དམ་ཡེ་དབྱེར་མེད་དུ་བསྲེས། འབྲུ་གསུམ་རྗེས་མས་ངོ་བོ་དབྱེར་མེད་རོ་གཅིག་པ་མར་ལ་མར་བཞག་པ་ལྟར་བསམ་མོ། །འདི་ཡན་ཕྲིན་ལས་སམ་ལས་བྱང་ཀུན་གྱི་སྔོན་དུ་འགྲོ་བའི་ཆོས་སོ། ༈ །དངོས་གཞི་ལ་དང་པོ་ཕྱི་སྒྲུབ་ཀུན་བཟང་གི་ལས་བྱང་ལ་ཐོག་མར་ཏིང་ངེ་འཛིན་གསུམ་གྱིས་ཁོག་དབུབ་པ་ནི། སེམས་ཉིད་སྐྱེ་འགག་གནས་གསུམ་དང་བྲལ་
བའི་བརྡར་ཧཱུྃ་ཡིག་གསུམ་བརྗོད་ལ་དུས་གསུམ་གྱི་རྟོག་པ་དང་བྲལ་བའི་ད་ལྟའི་ཤེས་པ་མ་བཅོས་མ་བསླད་གཉུག་མའི་རང་ངོ་ལ་ངོ་རང་ཐོག་ཏུ་སྤྲད་པ་དེ་ཉིད་ཆོས་སྐུ་བློ་འདས་ཀྱི་དགོངས་པ་ཐག་གཅིག་ཐོག་བཅད་དེ། གང་ཤར་གྱི་རང་ངོ་ལ་བཅོས་བསླད་མེད་པར་ཅེ་རེ་བལྟས་ཏེ་དེའི་ངང་ལ་གློད་པས་དྲན་རྟོག་རྗེས་མེད་དུ་ཡལ་བ་རྦ་རླབས་ཆུར་ཐིམ་པ་ལྟར་གང་ཤར་རང་གྲོལ་སྤངས་གཉེན་དང་བྲལ་བའི་ངང་ལ་གདེང་གྲོལ་ཐོག་ཏུ་བཅས་ཏེ། འཁོར་འདས་ཡེ་སྟོང་སོགས་ཚིག་རྐང་བཞི་དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་སྟེ། རྒྱུད་གསང་བ་སྙིང་པོའི་ལེའུ་ལྔ་པ་ལས། དངོས་རྣམས་ཉིད་ན་དངོས་མེད་པ། །རྟོགས་པས་དབང་བསྒྱུར་ཏིང་འཛིན་ཡིན། །ཞེས་དང་། གང་གི་གླང་ཆེན་མྱོས་འདྲའི་སེམས། །མཉམ་པར་བཞག་པས་བརྟུལ་ནས་སུ། །ཞེས་གསུངས་པ་ལྟར། སྣང་སྲིད་འཁོར་འདས་ཡེ་ནས་སྟོང་པའི་ཀློང་ཆེན་པོ་ནི་དབྱིངས་ཡེ་ཇི་བཞིན་པ་
ཡུམ་ཀུན་ཏུ་བཟང་མོའི་དཀྱིལ་འཁོར། ཡེ་ནས་འགྱུར་བ་མེད་པ་རིག་པ་ཡེ་ཤེས་ལྷུན་གྱིས་གྲུབ་པ་ཡབ་ཀུན་ཏུ་བཟང་པོའི་དཀྱིལ་འཁོར་ཡེ་ནས་སྟོང་ཞིང་སྐྱེ་འཆི་དང་བྲལ་བ་སྐྱེ་བ་མེད་པ་དོན་དམ་པའི་རིག་རྩལ་མ་འགགས་པར་ཤར་བ་ནི། སྲས་བདེ་བ་ཆེན་པོ་རྩ་བ་བྱང་ཆུབ་སེམས་ཀྱི་དཀྱིལ་འཁོར་ཞེས་ལུང་ཨ་ནུ་ཡོ་གའི་དགོངས་པ་ལྟར་ལྟ་བ་དཀྱིལ་འཁོར་གསུམ་དུ་གཏན་ལ་ཕབ་ཏེ་མ་ཡེངས་པར་བསྒོམ་པ་ནི། དེ་བཞིན་ཉིད་དང་། སྟོང་པ་ཆེན་པོ་དང་། ནམ་མཁའ་ལྟ་བུ་དང་། གཞི་རྣམ་དག་གི་ཏིང་ངེ་འཛིན་ཞེས་མིང་གི་རྣམ་གྲངས་སོ། །གཉིས་པ་ནི། ཡེ་ཤེས་རྔམ་པ་གློག་གི་འཁོར་ལོ་ལས། གཉིས་པ་ཀུན་སྣང་ནམ་མཁའི་ངང་། །སྙིང་རྗེ་གསུམ་གྱིས་ཁྱབ་པའི་ཕྱིར། །ཁྱབ་གདལ་ཆེན་པོའི་ཏིང་འཛིན་བསྒོམ། །ཞེས་པས་དེ་བཞིན་མ་རྟོགས་པའི་འགྲོ་བ་རྣམས་ལ་འཛིན་མེད་སྒྱུ་མ་ལྟ་བུའི་སྙིང་རྗེ་མཁའ་ཁྱབ་ཏུ་བསྒོམ་པ་ནི། འགགས་མེད་
འཁྲུལ་པའི་རང་མདངས་ལས༔ ཞེས་པ་ནས་བཟུང་། ད་ནི་དེ་ལས་སྒྲོལ་བར་བྱ༔ ཞེས་པའི་བར་ཚིག་རྐང་བཅུ་གཉིས་ཀྱིས་འཁོར་བའི་སེམས་ཅན་ལ་སྐྱོ་ཤས་ངེས་འབྱུང་ཞེན་ལོག་བསྐྱེད་དེ། དེ་རྣམས་བདག་གིས་འཁོར་བའི་གནས་ལས་སྒྲོལ་བར་བྱའོ་སྙམ་པའི་དམ་བཅའ་འདི་ལ་ཀུན་ཏུ་སྣང་བའི་ཏིང་ངེ་འཛིན་དང་། མཚམས་སྦྱོར་བའི་ཏིང་ངེ་འཛིན་དང་། སྙིང་རྗེ་ཆེན་པོའི་ཏིང་ངེ་འཛིན་དང་། ཁྱབ་གདལ་ཆེན་པོའི་ཏིང་ངེ་འཛིན་དང་། སྒྱུ་མ་ལྟ་བུའི་ཏིང་ངེ་འཛིན་ཞེས་བྱའོ། །དག་པ་གསུམ་གྱི་རང་བཞིན་ནམ་དཀྱིལ་འཁོར་གསུམ་དུ་ཐག་ཆོད་པ་ལ་ངོ་མཚར་བའི་དོན་གྱིས་ཧོཿགསུམ་སྔོན་དུ་འགྲོ་བས། ཕྱི་སྣོད་ཡེ་ནས་དག་པ་གཞལ་ཡས་ཁང་། ནང་བཅུད་ཡེ་ནས་དག་པ་ལྷ་དང་ལྷ་མོ། རྟོག་ཚོགས་ཡེ་ནས་དག་པ་འཁོར་འདས་ཟང་ཐལ་ཀུན་ཏུ་བཟང་པོའི་ཡེ་ཤེས་སུ་གཏན་ལ་ཕབ་པ། སྣང་སྲིད་གཞིར་བཞེངས་ཀྱི་དཀྱིལ་འཁོར་རམ་སྣང་སྲིད་གཞི་
རྫོགས་ཀྱི་དཀྱིལ་འཁོར་བསྒོམ་པ་ནི་འདིའི་ཁྱད་ཆོས་སོ། །སྣོད་འབྱུང་བ་ལྔ་ཡུམ་ལྔའི་མཁའ་ཀློང་རྣམ་པར་དག་པ་ཐར་པ་ཆེན་པོའི་གཞལ་མེད་ཁང་། བཅུད་ཕུང་པོ་ལྔ་ཡབ་ལྔར་རྣམ་པར་དག་པ་ཀུན་བཟང་རིགས་ལྔའི་ལྷ་ཚོགས། རྒྱུད་རྣམ་ཤེས་ཚོགས་བརྒྱད་རྣམ་པར་དག་པ་ཡེ་ཤེས་ལྔར་གདོད་ནས་ལྷུན་གྲུབ་ཏུ་ཤེས་པར་བྱ་བ་ལས། དཀྱིལ་འཁོར་གཞལ་ཡས་ཁང་སྒོ་རྫོགས་སོགས་སྒོམ་མི་དགོས་སོ། ༈ །སླར་ཡང་རྡོ་རྗེ་གསུམ་གྱི་ཡི་གེ་སྔོན་དུ་འགྲོ་བས་འཁོར་འདས་གཉིས་སུ་སྣང་བའི་གཉིས་འཛིན་གྱི་ཞེན་པ་དེ་གཉིས་སུ་མེད་པའི་ཡེ་ཤེས་རང་བཞིན་སྐྱེ་མེད། རོལ་པ་འགགས་མེད། ངོ་བོ་དབྱེར་མེད་མཚན་ཉིད་བློ་འདས་སུ་ངོ་ཤེས། ཐག་ཆོད་གདེངས་ཐོབ་པས། ཕྱི་སྣོད་སྣང་སྲིད་ཡེ་ནས་སྟོང་ཀུན་ཏུ་བཟང་མོ། ནང་བཅུད་སེམས་ཅན་ཡེ་ནས་སྟོང་ཀུན་ཏུ་བཟང་པོའི་ཀློང་དུ་མི་གནས་པའི་དབྱིངས་སུ་མྱ་ངན་ལས་འདས་མྱ་ངན་ལས་འདས་པ་
ཤི་བའི་དོན་མ་ཡིན། མཆན། པ་སྟེ་འཁོར་བ་ལས་འདས་ཏེ་གྲོལ་བའོ། །དོན་ནི་དབྱིངས་ཡེ་ཟུང་འཇུག །དེ་བཞིན་དུ་སྣང་སྟོང་། གསལ་སྟོང་། བདེ་སྟོང་། རིག་སྟོང་ཟུང་འཇུག་གི་བདག་ཉིད་ཅན་ནོ། །གསུམ་པ་རྒྱུ་ཡི་ཏིང་ངེ་འཛིན་བསྒོམ་པ་ནི། ཀུན་བཟང་ཡབ་ཀྱི་ས་བོན་ཧཱུྃ་ཞེས་བརྗོད་པས་འཁྲུལ་མེད་རིག་པའི་རང་མདངས་ཏེ་གསལ་ཆ་ལས་ཡབ་ཀྱི་ས་བོན་ཧཱུྃ་མཐིང་ག་དང་། ཆོས་དབྱིངས་ཡུམ་གྱི་སྙིང་པོ་ཨ་དཀར་པོ་གཉིས་མཁའ་ལ་ཟླ་བ་ཤར་བ་ལྟར་བསྒོམ་པ་ནི། རྒྱུའི་ཏིང་ངེ་འཛིན་དང་། སྙིང་པོའི་ཏིང་ངེ་འཛིན་དང་། འབྲས་བུའི་ཏིང་ངེ་འཛིན་དང་། ནོར་བུ་ལྟ་བུའི་ཏིང་ངེ་འཛིན་ཞེས་བྱའོ། །སྒོམ་པའི་ཚུལ་ནི་པཎ་ཆེན་བི་མ་ལས། དང་པོ་དམིགས་ཡུལ་ཡིག་འབྲུ་ལ་དམིགས། སྒོམ་ཐབས་འབུར་དུ་དོད་པ་ལྟར་བསྒོམ། ལམ་དུ་མཚན་བཅས་ཁྱེར། རྟགས་བསྐྱེད་རིམ་གསལ་བར་འོང་། ཉོན་མོངས་པ་ཆད་ལྟ་སྦྱངས། ལམ་ཚོགས་ལམ་བགྲོད། འབྲས་བུ་
སྤྲུལ་སྐུ་ཐོབ་པར་གསུངས་སོ། །ཞེས་གསུངས་པ་ལྟར་ལམ་ངེས་རྫོགས་ཀྱི་དབང་དུ་བྱས་ན་ཡིག་འབྲུ་དེ་གཉིས་རྫབ་ཡིག་འབྲུ་ཚུགས་ལེགས་པར་མཐིང་དང་དཀར་པོས་བྲིས་ལ་མིག་མ་སྦྲིད་ཀྱི་བར་དུ་བལྟ། དེ་ནས་མིག་བཙུམ་པ་ན་མིག་ལམ་ཡིད་ངོར་ཤར་ཞིང་བརྟན་པ་མ་ཐོབ་བར་སྦྱངས་ཞིང་། དེ་ནས་ལྷ་སྐུ་བསྒོམ་པ་ཡིན་ཀྱང་། དེང་སང་མོས་སྒོམ་བྱེད་པས་དེ་འདྲའི་རྩོལ་བ་མ་ཐུབ་ཀྱང་ཐུན་མཚམས་ལྟ་བུར་ཕྲ་བ་ཡིག་འབྲུའི་ཏིང་ངེ་འཛིན་ལ་རྩལ་སྦྱོང་གྲུབ་ན་ལེགས། གོང་བཤད་ལམ་ངེས་རྫོགས་ཀྱི་ཚེ་ཡང་ཐོག་མར་ཡིག་འབྲུ་ལ་སྦྱངས་ནས། དེ་མཚམས་ལས་བྱང་དབུ་ནས་བཟུང་འདོན་པ་ལས། བར་དེར་ལས་བྱང་བཅད་ནས་ཡིག་འབྲུ་ཁོ་ན་བསྒོམ་པ་མ་ཡིན་ནོ། །བསྐྱེད་རིམ་བསྒོམ་དོན་གཞུང་གསལ་ལྟར་ཡབ་ཡུམ་གཉིས་ཀ་ལ་ལོངས་སྤྱོད་རྫོགས་པའི་རྒྱན་བསྒོམ་དགོས། ཡབ་ཀྱི་ཕྱག་མཚན་དཔལ་བེའུ་ནི་ཆོས་ཉིད་ཀྱི་དྲྭ་བ་
ཆད་པ་མེད་པའི་བརྡར་བསླས་པ། རིགས་དྲུག་གི་ཁྱབ་བདག་ཡིན་པའི་བརྡར་ཟུར་དྲུག་དང་ལྡན་པ། ཕྲིན་ལས་ལྷུན་གྱིས་གྲུབ་པའི་བརྡར་ཁ་དོག་ལྗང་གུའོ། །ཡུམ་གྱི་ཕྱག་མཚན་རྡོར་དྲིལ་ནི་བདེ་སྟོང་ཟུང་འཇུག་གི་བརྡའོ། །ཞབས་གཉིས་ཕྱེད་པའི་སྐྱིལ་མོ་ཀྲུང་ཞེས་ཡབ་ཀྱི་སྐེད་དུ་འཁྲིལ་བས་ཞབས་གཡོན་པ་སྟེང་དང་གཡས་པ་འོག་ཏུ་བྱས་པའི་སེམས་མའི་སྐྱིལ་ཀྲུང་། མཆན། ལོང་བུ་བསྣོལ་བས་སློང་བོར་འཁྲིལ་པའོ། །ཐབས་ཤེས་ཟུང་འཇུག་བདེ་སྟོང་འབར༔ ཞེས་པ་ལྟར་སྐུའི་ཆ་གང་དུ་རེག་པ་ཐམས་ཅད་བདེ་སྟོང་ལས་མ་འདས་ཀྱང་ཡུམ་གྱི་མཁའ་པདྨ་དམར་པོ་འདབ་མ་བརྒྱད་པ་དང་། ཡབ་ཀྱི་རྡོ་རྗེ་སྔོན་པོ་རྩེ་ལྔ་པ་སྙོམས་པར་འཇུག་པར་བསྒོམ་ཞིང་བདེ་སྟོང་གི་རང་ངོ་མཉམ་པར་བཞག་པ་ནི་དབང་པོ་གཉིས་སྦྱོར་གྱི་སྒོ་ནས་ཆགས་པ་དེ་དག་པར་བྱེད་པ་བླ་མེད་རྒྱུད་ཀྱི་ཁྱད་ཆོས་ཡིན་པའི་ཕྱིར། འོ་ན་སྨད་གཡོགས་ན་བཟའ་དང་བཅས་པས་སོ་ཞེ་ན།
ཡེ་ཤེས་རང་སྣང་ལས་གྲུབ་པ་ནམ་མཁའི་འཇའ་ཚོན་ལྟ་བུ་ཡིན་པས་སྒྲིབ་ཐོགས་དང་བྲལ་བའི་རང་བཞིན་ཅན་ཡིན་ནོ། །ད་ལྟ་སྡུག་བསྔལ་བདེན་པ་སྡུག་བསྔལ་གྱིས་བདེན་པ་ལས་གྲུབ་པ་གདོས་བཅས། མཆན། བེམ་པོ་རྟག་བརྟན་ཐེར་ཟུག་གི་རྣམ་པ་དར་ཕྲུག་རས་སོགས་གྱོན་པ་ལྟ་བུར་མ་ཡིན་པར་ཤེས་དགོས་སོ། །བདེ་བ་ཆེན་པོ་དེ་ཡང་ཡན་ལག་བདུན་དང་ལྡན་པ་སྟེ། ཟག་པ་མེད་པའི་བདེ་བ། ༡ རང་དབང་ཅན་གྱི་བདེ་བ། ༢ འདུས་མ་བྱས་པའི་བདེ་བ། ༣ གཉིས་སུ་མེད་པའི་བདེ་བ། ༤ བསམ་གྱིས་མི་ཁྱབ་པའི་བདེ་བ། ༥ རང་བཞིན་མེད་པའི་བདེ་བ། ༦ ངོ་བོ་ཉིད་ཀྱི་བདེ་བའོ། ༧ །དེ་ལྟར་ཀུན་བཟང་ཡབ་ཡུམ་སྒོམ་པ་ནི། ཕྱག་རྒྱ་བཞི་ལས་ནང་ཡིད་ཀྱི་རིག་མ་བརྟེན་པ་ཆོས་ཀྱི་ཕྱག་རྒྱའོ། །སྤྱིར་ལྷ་ཁྲོ་བོར་བསྒོམ་པ་ཞེ་སྡང་དག་བྱེད། གདོང་ཅན་དུ་བསྒོམ་པ་གཏི་མུག་དག་བྱེད། ཡབ་ཡུམ་ཞལ་སྦྱོར་དུ་བསྒོམ་པ་འདོད་ཆགས་དག་བྱེད་ཡིན་
པའང་ཤེས་དགོས་སོ། །དགེ་སློང་གིས་དེ་ལྟ་བུར་བསྒོམས་ནས་རྣམ་སྨིན་རོ་མྱག་ཀྱི་འདམ་དང་། རྒྱུ་མཐུན་མངལ་གྱི་སྲིན་བུར་སྐྱེ་ཏེ་འདོད་ཆགས་བསྒོམ་པའི་ཕྱིར་ཞེ་ན་མ་ཡིན་ཏེ། ཆོས་ཐམས་ཅད་སེམས་ཉིད་དུ་རང་སྣང་བས་ཡུལ་སེམས་གཉིས་མེད་དུ་གསལ་བ་ལ། གཉིས་སུ་ཆགས་ཤིང་ཞེན་པའི་དུས་ན། སེམས་ཉིད་ཀྱི་ངོ་བོར་ཤེས་པའི་ལྟ་བ་དང་། འདུ་ཤེས་སུམ་ལྡན་གྱི་སྒོམ་པ་དང་། ཐབས་ཀྱི་སྤྱོད་པ་གསུམ་གྱིས་ཟིན་ནས་ཆགས་པའི་རོ་ཡེ་ཤེས་སུ་གསལ་བའི་ཕྱིར་དང་། ཕྱི་རོལ་ཡུལ་དུ་སྣང་བ་ཡབ་ཡུམ་དང་། དབང་པོ་ནང་ནས་འཆར་བ་ཡབ། དེས་ཐ་མལ་གྱི་རྟོག་ཚོགས་རང་སར་དག་པ་སྒྲོལ་བ་སྟེ། སྦྱོར་སྒྲོལ་སྔགས་ཀྱི་ཁྱད་ཆོས་སོ། ༈ །རྩ་འཁོར་གནས་ཀྱི་ལྷ་རྣམས་སྒོམ་ཚུལ་ནི། ཧྲཱིཿཞེས་རིགས་བརྒྱའི་ཁྱབ་བདག་པདྨ་བཛྲ་རྡོ་རྗེ་འཆང་གི་ས་བོན་གསུམ། སྐྱེ་འགག་གནས་གསུམ་དང་བྲལ་བ། དོན་དམ་པའི་ངོ་བོར་རྫོགས་པའི་བརྡར་
སྔོན་དུ་འགྲོ་བས། ཀུན་བཟང་སྟོང་རའི་དབུས་སུ་རྩ་གསུམ་སྒོམ་ཚུལ་སྤྱིར་བཏང་ལ་གཡས་སུ་རོ་མ་དམར་པོ་དང་། གཡོན་དུ་རྐྱང་མ་དཀར་པོ་ཡིན་ཀྱང་ཡོངས་དགེའི་ལུགས་འདེར་ཟངས་སྦུབ་མ་ལྟར་གཡས་པ་རོ་མ་དཀར་པོ་དང་། གཡོན་པ་རྐྱང་མ་དམར་པོ། དབུས་སུ་དབུ་མ་མཐིང་གའོ། །ཀུན་བཟང་གི་གཞུང་འདི་ཉིད་ལས། གསལ་སྟོང་སྐུ་ཡི་རྩ་འཁོར་སྤོས་རིང་དུད་པ་ལྟར་རྩ་གསུམ་དཀར་མཐིང་དམར་བ་འོད་ཀྱི་སྦུ་གུར་སྒོམ༔ དེ་ཡང་འཁོར་འདས་ཐམས་ཅད་རང་གི་ལུས་ལ་རྫོགས༔ དེ་ཡང་གསལ་བ་བརྟན་པ་རང་དབང་ཐོབ་པར་བྱའོ༔ ཞེས་གསུངས་པ་ལྟར་འདིའི་རྩ་འཁོར་ནི་གདུགས་ཀྱི་རྩིབས་མ་གྱེས་པ་ལྟ་བུ་ཡིན་ལ། སྤྱིར་བཏང་རླུང་གི་སྐབས་རོ་རྐྱང་གཉིས་སྣ་སྒོར་ཟུག་པ་དང་། ཐིག་ལེའི་སྐབས་སུ་དབུ་མའི་སྣེ་སྨིན་མཚམས་སུ་བཀུག་པ་ལ་སོགས་དམིགས་གནད་སྣ་ཚོགས་ཡོད་མོད། ཟངས་སྦུབ་མར། རྩ་གསུམ་དཀར་
མཐིང་དམར་བའི་ཡར་སྣེ་སྤྱི་བོར་ཟུག༔ ཅེས་པ་ལས་མ་གསུངས་ཀྱང་། འདི་སྐབས་རོ་རྐྱང་གཉིས་ཀྱི་རླུང་དབུ་མར་དག་པའི་བརྡར་གཙུག་ཏོར་འཁོར་ལོའི་སྟེང་ནས་རོ་རྐྱང་གཉིས་དབུ་མར་ཐིམ་པ་སྟེ་ཟུག་པ། དབུ་མའི་ཡར་སྣེ་རྡོ་རྗེ་རྩེ་ལྔ་པ་བྱེད་པར་བསྒོམ་པའི་རྡོ་རྗེའི་ལྟེ་བར་བླ་མ་རིག་འཛིན་པདྨ་སཾ་བྷ་ཝ་ཡབ་ཡུམ་གཞུང་ལྟར་སྒོམ། དེ་འོག་གཙུག་ཏོར་གྱི་འཁོར་ལོ་རྩ་འདབ་དྲུག་པ་དཀར་པོ་དེ་ལ་དཔྲལ་བ་ཆོས་ཉིད་འཁོར་ལོ་ཞེས་གསུངས་ལ། དེའི་དབུས་སུ་རྡོར་སེམས་ཡབ་ཡུམ་གཞུང་ལྟར་བསྒོམ། མཆན། རྡོར་སེམས་རིགས་ལྔ་བཅས་ལ་རང་རང་ས་བོན་གསུམ་གསུམ་གྱིས་དབུ་བཟུང་བ་ནི་སྐྱེ་འགག་གནས་གསུམ་དང་བྲལ་བ་དོན་དམ་པའི་བདག་ཉིད་དུ་ཤེས་པའོ། །རྩ་འཁོར་གྱི་རྩ་འདབ་སྤྱི་བོར་བདེ་ཆེན་འཁོར་ལོ་སོ་གཉིས། མགྲིན་པར་བཅུ་དྲུག །སྙིང་གར་བརྒྱད། ལྟེ་བར་དྲུག་ཅུ་རྩ་བཞི། གསང་བར་སོ་གཉིས། ཁ་དོག་ལྷའི་སྐུ་མདོག་དང་མཐུན། གཙུག་ཏོར། ༡ སྤྱི་བོ། ༢ སྙིང་གའི་
༣ རྩ་འདབ་རྣམས་ཅུང་ཟད་སྦུབ་པའི་རྣམ་པ། མགྲིན་པ། ༡ ལྟེ་བ། ༢ གསང་གནས་༣ རྣམས་ཀྱི་རྩ་འཁོར་ཅུང་ཟད་བཀན་པའི་རྣམ་པར་བསྒོམ། ༈ །རྣམ་སྣང་གི་ཆོས་འཆད་ཕྱག་རྒྱས་འཁོར་ལོ་དཀར་པོ་རྩིབས་བརྒྱད་པ་ཐུགས་ཀར་བསྣམས་པ་ནི་དེང་སང་ཆོས་འཁོར་ཕྱག་རྒྱ་ཟེར་བ་དེ་ཡིན། གཞན་ཤེས་པར་སླ། དོན་གྲུབ་ཀྱི་སྐྱབས་སྦྱིན་ཕྱག་རྒྱ་ནི་ཐུགས་ཀར་དེང་སང་ཆོས་འཆད་ཕྱག་རྒྱར་གྲགས་པ་མཛུབ་མོ་མ་བཀུག་པའོ། །རྡོར་སེམས་གྱི་ཡུམ་སྙེམ་མའི་ཕྱག་མཚན་གྲི་ཐོད། རིགས་ཀྱི་ཡུམ་ལྔའི་ཕྱག་གཡས་པ་རྣམས་འཁོར་ལོ་སོགས་རང་རྟགས་དང་གཡོན་པ་རྣམས་དྲིལ་བུ་འཛིན་ཅིང་ཡབ་ལ་འཁྱུད་པའོ། །གཞུང་གསལ་ལྟར་ཡེ་ཤེས་པ་སྤྱན་འདྲེན་ལ་སྔགས་ཐོག་མའི་མཐའི་ཛཿཧཱུྃ་བཾ་ཧོཿདེ་བྱམས་སྙིང་རྗེ་དགའ་བ་བཏང་སྙོམས་བཞིའི་ཐུགས་རྒྱུད་བསྐུལ་བ་ཡིན་ལ་སྤྱན་འདྲེན་མཐའི་སྔགས་རྗེས་མའི་ཛཿཧཱུྃ་བཾ་ཧོཿདེས་དམ་ཡེ་དབྱེར་
མེད་ཆུ་ལ་ཆུ་བཞག་བ་ལྟར་བསྟིམ་པ་ཡིན། དེ་ནས་བདག་བསྐྱེད་རང་ཉིད་ལས། ལས་ཀྱི་སེམས་དཔའ་ཞེས་དོན་ཡོད་གྲུབ་པའི་རྣམ་པ་ཕྱིར་སྤྲོས་ལ་བཞུགས་སུ་གསོལ། ཕྱག་འཚལ་མཆོད་འབུལ་རྣམས་བྱ་བ་སྟེ། ཕྱི་མཆོད་ཉེར་སྤྱོད་དང་འདོད་ཡོན་རྣམ་ལྔ། ནང་མཆོད་སྨན་རག་གཏོར་གསུམ། གསང་མཆོད་སྦྱོར་སྒྲོལ་ཟབ་མོ་རྣམས་ཀྱིས་མཆོད་ཅིང་བསྐང་བ་བྱ་བ་ལ། སྤྱིར་ཕྱི་ཡོ་བྱད་དམ་ཚིག་རྫས་ཀྱིས་བསྐང་བ། ནང་ཏིང་ངེ་འཛིན་གྱིས་བསྐང་བ། གསང་བ་དེ་ཁོ་ན་ཉིད་ཀྱིས་བསྐང་བ་དང་གསུམ་ལས། འདིར་ཏིང་ངེ་འཛིན་དང་དེ་ཁོ་ནས་བསྐང་བ་ཡིན་ཏེ། བསྐང་བྱ་རིག་པ་རང་རིག་རང་གསལ། ཟང་ཐལ་སྒྲིབ་གཡོགས་དང་བྲལ་བའི་འོད་གསལ་ཡབ་ཀུན་ཏུ་བཟང་པོ། སྐོང་བྱེད་ཤེས་རབ་དབྱིངས་སྟོང་པ་ཉིད་ཡུམ་ཀུན་ཏུ་བཟང་མོ། དོན་མཁའ་དབྱིངས་དབྱེར་མེད། དབྱིངས་ཡེ་དབྱེར་མེད། བདེ་སྟོང་དབྱེར་མེད། གསལ་སྟོང་དབྱེར་མེད།
ཡེ་ཤེས་ལྔ་དང་སྐུ་གསུམ་རོ་གཅིག་པའི་ཀློང་དུ་བསྐང་བྱ་སྐོང་བྱེད་མི་དམིགས་པའི་ངང་ལ་མཉམ་པར་བཞག་པ་ནི་ཆོས་སྐུ་ཐིག་ལེ་ཉག་གཅིག་གི་ཀློང་དུ་འཁྲུལ་རྟོག་རྩད་ནས་གཅོད་པ་ཡེ་ནས་གསང་ཞིང་ཡེ་ནས་དག་པ་ཁམས་བདེ་བར་གཤེགས་པའི་སྙིང་པོ་ཀ་དག་གདོད་མའི་གནས་ལུགས་རང་ཞལ་མཇལ་བའི་ངང་དུ་བསྐང་བའོ། །དེ་ནས་བཤགས་པ་བྱ་བ་ལ། ཧོཿཞེས་དགོངས་གསོལ་གྱི་ཚིག་གསུམ་སྔོན་དུ་འགྲོ་བས། སྤྱིར་བཤགས་ཚུལ་ལ་རང་བཞིན་ལྟ་བའི་བཤགས་པ་ཁྱུང་ཆེན་ནམ་མཁའ་ལ་ལྡིང་བ་ལྟ་བུ། དགེ་སྡིག་རང་བཞིན་མེད་པར་ཤེས་པ་རང་བཞིན་གནས་དག་གི་བཤགས་པ་ཡང་ཟེར། བསྒོམ་པ་ཏིང་ངེ་འཛིན་གྱིས་བཤགས་པ་རྩྭ་སྦུར་མེས་བསྲེགས་པ་ལྟ་བུ། རང་རིག་པའི་ཡེ་ཤེས་མེ་ལྟ་བུས་མཚན་འཛིན་གྱི་བུད་ཤིང་བསྲེགས་པ། སྤྱོད་པ་ཐབས་ཀྱིས་བཤགས་པ་གླང་པོ་ཆེ་ཆུར་འཇུག་པ་ལྟ་བུ། ཐབས་གང་དྲག་མཛད་པ། མཆན། གནོང་འགྱོད་ཚིག་གིས་བཤགས་པ་རྒྱལ་
པོའི་བཀའ་ཆད་ཕོག་པ་ལྟ་བུ་ཉེས་སྤྱོད་ཀྱི་ཞུ་བ་ཕུལ་ནས་ཅི་དགྱེས་མཛད་པ་ལྟ་བུར། མཆན། ཏེ་རྣམ་པ་བཞི་ལས་འདིར་གནོང་འགྱོད་ཚིག་གིས་བཤགས་པ་ཕུལ་ནས་ལྟ་བའི་ཀློང་དུ་བཟོད་པར་གསོལ་བའོ། །བསྟོད་པ་ནི། གསང་གསུམ་རྡོ་རྗེ་གསུམ་གྱི་ཡི་གེས་དབུ་དྲངས་ཏེ། ཤློ་ཀ་གཉིས་ཀྱིས་ཀུན་བཟང་ཡབ་ཡུམ་ལ་གནས་ལུགས་གཞིའི་ངང་ནས་བསྟོད། དེ་ནས་ཤློ་ཀ་གཅིག་གིས་པད་འབྱུང་ལ་མཐར་ཐུག་འབྲས་བུའི་ངང་དུ་བསྟོད། དེ་ནས་རྡོར་སེམས་ཡབ་ཡུམ་ལ་རྣམ་པ་བྱེད་ལས་ཀྱི་སྒོ་ནས་བསྟོད། ཐབས་བདེ་བ་ཆེན་པོ་ཀུན་བཟང་ཡབ་ཀྱི་ཆ་ལས་གཟུགས་སོགས་ཕུང་པོ་ལྔ་མ་སྤངས་གནས་དག་ཏུ་ཤེས་པས་རྒྱལ་བ་རིགས་ལྔ་ལ་བསྟོད། ཤེས་རབ་སྟོང་པ་ཉིད་ཀུན་བཟང་ཡུམ་གྱི་ཆ་ལས་འབྱུང་བ་ལྔ་མ་སྤངས་གནས་དག་ཏུ་ཤེས་པས་ཡུམ་ལྔ་ལ་བསྟོད་པ། རྟོགས་ཚོགས་སྒྱུ་འཕྲུལ་དྲྭ་བ་མ་སྤངས་གནས་དག་གིས་དཔའ་བོ་མཁའ་འགྲོའི་ཚོགས་ལ་བསྟོད།
རིག་རྩལ་ཕྲིན་ལས་སྒྱུ་འཕྲུལ་དྲྭ་བ་མ་སྤངས་གནས་དག་གིས་ཆོས་སྐྱོང་སྲུང་མ་ལ་བསྟོད། དོན་དམ་དེ་ཁོ་ན་ཉིད་ཀྱི་ངང་དུ་བསྟོད་པ་ནི། བསྟོད་བྱའི་ལྷ། སྟོད་བྱེད་ཀྱི་ཚིག །བསྟོད་ཡུལ་གྱི་འབྲས་བུ་གསུམ་དམིགས་མེད་ཀུན་བཟང་ཡབ་ཡུམ་དུ་ཤེས་པ་སྟེ། དོན་གྲགས་སྟོང་བརྗོད་མེད་དོན་དམ་དེ་ཁོ་ན་ཉིད་ཀྱི་བསྟོད་པའོ། །བཞུགས་གསོལ་ཕྱག་འཚལ་བསྐང་བཤགས་བསྟོད་པ་རྣམས་གྲུབ་ནས་ལས་ཀྱི་སེམས་དཔའ་རང་ལ་བསྟིམ་པའོ། །གོང་བཤད་མ་སྤངས་གནས་དག་ནི། མ་སྤངས་ལ་ནི་མི་ལྡན་པ་སྟེ། དཔེར་ན་ཏིལ་མར་ལ། ཏིལ་གྱིས་རྫས་མ་སྤངས་ལ། ཏིལ་གྱི་གང་བུ་མི་ལྡན་པ་བཞིན་ནོ། །དེ་ཡང་གཉིད་འཐུག་པོའི་འོད་གསལ་ལ་མཚོན་ན་གཉིད་དངོས་མ་སྤངས་ལ་འོད་གསལ་ཟིན་པའི་རང་དོན་གཉིས་མི་ལྡན་པ་དེ་ལ་གནས་སུ་དག་པ་ཟེར་ཏེ། གནས་དག་པ་དང་གནས་འགྱུར་བ་གཉིས་ཀྱང་དོན་གཅིག་མིང་གི་རྣམ་གྲངས་
ཙམ་མོ། ༈ །བཟླས་པའི་ཐོག་མར་སྤྱན་འདྲེན་སྔགས་ཉེར་གཅིག་ཙམ་བཟླ། ཕྱི་སྒྲུབ་བསྙེན་པའི་སྐབས་སྤྱན་འདྲེན་སྔགས་བརྒྱ་རྩ་བརྒྱད་བཟླ་བ་ཡོངས་དགེའི་ཟིན་བསྡུས་སུ་གསུངས། དེ་སྐབས་འོག་མིན་སྟུག་པོ་བཀོད་སོགས་ཕྱོགས་བཅུའི་ཞིང་ཁམས་རབ་འབྱམས་ནས་རིགས་བརྒྱའི་ཁྱབ་བདག་པདྨ་འབྱུང་གནས། ཀུན་བཟང་ཡབ་ཡུམ། རྡོར་སེམས་ཡབ་ཡུམ་ཆར་ལྟར་བབ་པ་ལྟར་སྤྱན་དྲངས་ནས་རང་ལ་བསྟིམ་མོ། །ཕྱི་སྒྲུབ་ཀུན་བཟང་འདི་ལ་བདག་བསྐྱེད་ཁོ་ན་ལས། མདུན་བསྐྱེད་བསྒོམ་མི་དགོས་སོ། །རང་གཞུང་ལས། གྲགས་སྟོང་སྔགས་ཀྱི་འཁོར་ལོ་རྩ་འཁོར་དབུས་སུ་པདྨའི་ལྟེ་བར་བསྒོམ༔ དེ་ཡང་ནམ་མཁའི་འཇའ་ཚོན་ཡིག་འབྲུར་ཤར་བ་བཞིན༔ འབྲུ་ཚུགས་ལེགས་པར་གྲུབ་པ་སྟན་ལ་ཁབ་བཙུག་ལྟར༔ གསལ་བ་སྟོང་པ་འོད་ཟེར་འབར་བ་རང་དབང་ཐོབ་པར་བྱོས༔ ཅེས་གསུངས་པ་ལྟར། སྙིང་གའི་རྩ་འཁོར་གྱི་དབུས་སུ་མི་བསྐྱོད་
པའི་ཐུགས་དབུས་སུ། སྙིང་གི་རྩ་འཁོར་འདབ་མ་བརྒྱད་གནས་སུ་དག་པའི་པདྨ་དམར་པོ་འདབ་མ་བརྒྱད། དེའི་རླུང་གནས་སུ་དག་པའི་བརྡར་ཟླ་བའི་དཀྱིལ་འཁོར་ཉ་གང་བ། ཐིག་ལེ་གནས་སུ་དག་པའི་བརྡར་ཧཱུྃ་གི་ཡི་གེ་མཐིང་ག །དམ་ཚིག་སེམས་དཔའ་ཀུན་བཟང་ཡབ་ཡུམ། ཡེ་ཤེས་སེམས་དཔའ་མི་བསྐྱོད་ཡབ་ཡུམ། ཏིང་འཛིན་སེམས་དཔའ་ཧཱུྃ་ཡིག་མཐིང་གསལ་མཐར་བོ་དྷི་ཙིཏྟ་དང་རུ་ལུ་བཅས་ཨིནྡྲ་ནཱི་ལའི་ཕྲེང་བ་ལྟར་སྔོ་ཞིང་དྭངས་པ་སྔགས་ཀྱི་ཞལ་ངོ་ནང་བསྟན་མདུན་ཕྱོགས་ནས་གཡས་བསྐོར་དུ་བཀོད་པ་ཁོ་ན་ལས་འཁོར་མི་དགོས་ཏེ་ཡིག་འབྲུ་སྟན་ལ་ཁབ་བཙུག་པའི་དཔེས་བསྟན་པའོ། །སྔགས་དོན་ནི་འབྲུ་གསུམ། གཞིའི་སྐབས་སུ་ལུས་ངག་ཡིད་གསུམ། ལམ་གྱི་སྐབས་སུ་རྩ་རླུང་ཐིག་གསུམ། འབྲས་བུའི་སྐབས་སུ་སྐུ་གསུམ་མོ། །བོ་དྷི་ཙིཏྟ་བྱང་ཆུབ་སྙིང་པོ། དེ་ལའང་གནས་བྱང་ཆུབ་སྙིང་པོ་དང་། རྟོགས་པ་
བྱང་ཆུབ་སྙིང་པོ་གཉིས། དང་པོ་ནི་འོག་མིན་ལ་སོགས་པའི་ཞིང་ཁམས། གཉིས་པ་ནི་ཡེ་ཤེས་ཆོས་སྐུའོ། །མ་ཧཱ་སུ་ཁ་བདེ་བ་ཆེན་པོ། གོང་བཤད་ཟག་མེད་ཀྱི་བདེ་བ་བདུན་ལྡན། ཛྙཱ་ན་དྷཱ་ཏུ་དབྱིངས་དང་ཡེ་ཤེས་ཏེ་ཇི་ལྟ་ཆོས་ཉིད་དོན་དང་། ཇི་སྙེད་ཆོས་ཅན་ཀུན་རྫོབ། མཆན། ཀྱིས་བསྡུས་པའི་ཡེ་ཤེས་ལྔ། ཨཱཿརིང་པོ་རྣམ་བཅད་ཅན་ནི་གསུང་རྡོ་རྗེ་གཞོམ་མེད་ནཱ་དའི་སྒྲས་སྐུ་གསུང་ཐུགས་ཀྱི་རྒྱུད་བསྐུལ་བའོ། རུ་ལུའི་སྔགས་དོན་གཡུང་སྟོན་བཛྲ་ཤྲཱིས་ཡེ་ཤེས་ལྷ་ལ་སྙན་གསན་ཕབ་པའི་སྔགས་སུ་གསུངས། གཏེར་ཆེན་གུ་རུ་ཆོས་དབང་གིས། །ཡང་དག་སྙིང་པོའི་སྒྲུབ་ཐབས་ལས། །ཞི་བ་སངས་རྒྱས་བཞི་བཅུ་གཉིས༔ རུ་ལུ་འབྲུ་བརྒྱད་དག་ལ་འདུས༔ ཨོཾ་ནི་རིགས་ལྔ་ཡབ་ཡུམ་བཅུ༔ རུ་ལུ་གོང་མ་སེམས་དཔའ་བརྒྱད༔ རུ་ལུ་འོག་མ་སེམས་མ་བརྒྱད༔ ཧཱུྃ་ནི་སྒོ་བ་ཁྲོ་བོ་བཞི༔ བྷྱོ་ནི་སྒོ་མ་ཁྲོ་མོ་བཞི༔ ཧཱུྃ་ནི་སྤྲུལ་སྐུ་ཐུབ་པ་དྲུག༔ ཡིད་དང་ཆོས་ནི་རང་བྱུང་གནས༔
ཞེས་ཞི་བའི་དུས་དང་། ཁྲོ་བོ་གནས་འགྱུར་བའི་སྐབས་སུ། ཨོཾ་ནི་ཁྲག་འཐུང་ཡབ་ཡུམ་བཅུ༔ རུ་ལུ་གོང་མ་ཀཽ་རི་བརྒྱད༔ རུ་ལུ་འོག་མ་ཕྲ་མེན་བརྒྱད༔ ཧཱུྃ་ནི་གདོང་མོ་སྒོ་མ་བཞི༔ བྷྱོ་ནི་དབང་ཕྱུག་ཉི་ཤུ་བརྒྱད༔ ཧཱུྃ་ནི་སྐུ་ལྔ་འདུས་པའི་དཔལ༔ ཨོཾ་ནས་ཧཱུྃ་ལ་རྣམ་བསྡུས་པས༔ ཁྲག་འཐུང་ལྔ་བཅུ་རྩ་བརྒྱད་སྨིན༔ ཞེས་དོན་འགྱུར་དུ་གསུངས་པ་ལྟར་རོ། །སྔགས་གོང་འོག་གཉིས་སྦྲེལ་ཏེ་གང་འགྲུབ་བཟླའོ། །འདི་དག་ནི་བསྐྱེད་རིམ་ལྷ་ཁྲིད་གཙོར་སྟོན་གོ་སླ་ཉན་བདེར་བཀོད་པའོ། ༈ །རྫོགས་རིམ་རྫོགས་པ་ཆེན་པོའི་ལམ་གྱི་རིམ་པ་ནི། ཡིག་ཆུང་ལེའུ་བདུན་གྱིས་བསྟན་པ་ལྟར། གཞི་ཁྲེགས་ཆོད་ཀྱི་ལྟ་བ་ལ། ལམ་ཐོད་རྒལ་ཉི་ཁྲིད་ཀྱིས་བོགས་དབྱུང་ཞིང་། འབྲས་བུ་སྣང་བཞི་མཐར་ཕྱིན་གདོད་མའི་ཟད་ས་ཀ་དག་ཆེན་པོར་སངས་རྒྱས་པ་ཉིད་དོ། ཨེ་ཝཾ་ལ་ཧཱཾ་ཤྲཱི་བི་ཛ་ཡནྟུ། དགེའོ། །དགེའོ། །དགེའོ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་
བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།