རྡོ་རྗེ་གྲོ་ལོད་ཀྱི་བླ་མའི་ནང་སྒྲུབ་དྲག་པོ་རྩལ་གྱི་ཟིན་བྲིས་དམིགས་ཐུན་གསལ་པོར་བཀོད་པ།
ལས་གཞུང་རྡོ་རྗེ་གྲོ་ལོད་ལས༔ བླ་མའི་ནང་སྒྲུབ་དྲག་པོ་རྩལ་གྱི་ཟིན་བྲིས་དམིགས་ཐུན་གསལ་པོར་བཞུགས་སོ།།
ན་མོ་གུ་རུ་པདྨ་ཀ་རཱ་ཡ། བླ་མའི་ནང་སྒྲུབ་དྲག་པོ་རྩལ་གྱི་ཐོག་མར། དེ་བཞིན་ཉིད་ཀྱི་ཏིང་ངེ་འཛིན་བསྒོམ་པ་ལ། ཨ་ཐུང་ངུ་གསུམ་ནི་ཤེར་ཕྱིན་འབུམ་པ་ལས། ཨ་ཞེས་བྱ་བ་ནི། གདོད་ནས་མ་སྐྱེས་པའི་ཕྱིར་ཆོས་ཐམས་ཅད་ཀྱི་སྒོའོ། །ཞེས་གསུངས་པ་ལྟར་སྐྱེ་འགགས་གནས་གསུམ་དང་བྲལ་བ་རྣམ་ཐར་སྒོ་གསུམ་གྱི་བདག་ཉིད་ཅན་ནོ། །དེ་ཡང་གསལ་སྒྲིབ་ཕྱོགས་ལྷུང་དང་བྲལ་བས་སྟོང་པ་ཉིད་བསྒོམ་ལ་ངོས་འཛིན་ནོ། །ཞེན་པའི་འཛིན་པ་མེད་པས་
མཚན་མ་མེད་པ། འབྲས་བུ་ཆོས་སྐུ་ཡེ་ནས་ལྷུན་གྱིས་གྲུབ་པས་སྐུ་དང་ཡེ་ཤེས་ལ་གཞན་དུ་ཚོལ་བའི་རེ་བ་མེད་པས་ན་སྨོན་པ་མེད་པའོ། །ཡང་དག་པ་ངེས་པའི་དོན་ལ་སྐྱེ་འཆི་འཕོ་འགྱུར་དང་བྲལ་བ་ནི། དཔེར་ན་ནམ་མཁའ་བཞིན་ནོ། །རང་རིག་པའི་ཡེ་ཤེས་ནི་བཟོ་བཅོས་དང་བྲལ་ཏེ། རང་གི་ངོ་བོས་སྟོང་ཞིང་བདག་མེད་པ་གང་ཤར་རིག་རྩལ་འགག་མེད་དུ་ཤར་བ་ནི། ནམ་མཁའ་ལ་སྤྲིན་དང་རྡུལ་ལ་སོགས་པས་གོས་པ་མེད་པ་བཞིན་དུ་རྣམ་པར་དག་
པ་ཉིད་དོ། ༈ །དོན་དམིགས་པ་མེད་ཅིང་བློ་ལས་འདས་པ་བརྗོད་དུ་མེད་པ་ཡེ་ནས་སྟོང་ཉིད་དུ་གནས་པས་ངོ་བོ་སྐྱེ་མེད་རྣམ་པར་རང་གསལ་དུ་ཤར་བས་རང་བཞིན་འགགས་མེད་རྩལ་མདངས་འཁོར་འདས་སུ་ཤར་བས་ཐུགས་རྗེ་ཀུན་ཁྱབ་ཏུ་ཤེས་པར་བྱའོ། །འདི་ལ་ངོ་བོ། ༡ ངེས་ཚིག ༢ དབྱེ་བ། ༣ བྱེད་ལས། ༤ མིང་གི་རྣམ་གྲངས། ༥ མ་བསྒོམ་པའི་སྐྱོན། ༦ བསྒོམ་པའི་ཕན་ཡོན་དང་བདུན་ནོ། ༧ །དང་པོ་ངོ་བོ་ནི། ཆོས་ཐམས་ཅད་ཀྱི་གནས་ལུགས་དེ་བཞིན་ཉིད་སྤྲོས་པ་ཐམས་ཅད་དང་བྲལ་བའོ། །གཉིས་པ་ངེས་ཚིག་ནི། ཡེ་གདོད་མ་ནས་ཆོས་ཐམས་ཅད་སྟོང་ཞིང་ཉིད་སྤྲོས་བྲལ་དུ་གནས་པ་ལས་སྒྲུབ་པ་པོས་དེ་བཞིན་ཉིད་དུ་རྟོགས་པས་ན་དེ་བཞིན་ཉིད་ཀྱི་ཏིང་ངེ་འཛིན་དང་ཅེས་བྱའོ། །དབྱེ་བ་ལ་གསུམ་ཏེ། སངས་རྒྱས་ཀྱི་ཐུགས་རྣམ་པར་མི་རྟོག་པའི་དེ་བཞིན་ཉིད་ཀྱི་ཏིང་ངེ་འཛིན་དང་། སེམས་ཅན་ཐམས་ཅད་ལ་རང་
ཆས་སུ་གནས་པའི་དེ་བཞིན་ཉིད་ཀྱི་ཏིང་ངེ་འཛིན་དང་། ལས་དང་པོ་པ་བསྒོམ་པའི་དེ་བཞིན་ཉིད་ཀྱི་ཏིང་ངེ་འཛིན་དང་གསུམ་མོ། ༈ །བཞི་པ་བྱེད་ལས་ནི། སྟོང་པ་དེས་མཚན་མའི་རྣམ་རྟོག་ཐམས་ཅད་འཇོམས་པར་བྱེད་པའོ། །ལྔ་པ་མིང་གི་རྣམ་གྲངས་ནི། དེ་བཞིན་ཉིད་ཀྱི་ཏིང་ངེ་འཛིན་དང་། སྟོང་པ་ཉིད་ཀྱི་ཏིང་ངེ་འཛིན་དང་། མཚན་མ་མེད་པའི་ཏིང་ངེ་འཛིན་དང་། སྨོན་པ་མེད་པའི་ཏིང་ངེ་འཛིན་དང་། སྤྲོས་པ་མེད་པའི་ཏིང་ངེ་འཛིན་དང་། སྐྱེ་བ་མེད་པའི་ཏིང་ངེ་འཛིན་རྣམས་སོ། །དྲུག་པ་མ་བསྒོམ་པའི་སྐྱོན་ནི། གནས་ལུགས་སྟོང་པ་ཉིད་ཀྱིས་མ་ཟིན་ནས་ལྷ་སྐུ་རང་རྒྱུད་པ་བསྒོམས་ན་འདོད་ཁམས་གྱི་ལྷར་སྐྱེ། ཁྲོ་ཚུལ་གྱི་ཆ་ལུགས་དང་ཕྱག་མཚན་རང་རྒྱུད་པར་བསྒོམས་ན་བདུད་དང་སྲིན་པོར་སྐྱེ། མགོ་བརྙན་རང་རྒྱུད་པར་བསྒོམས་ན་དུར་ཁྲོད་ཀྱི་ཝ་སྤྱང་དུ་སྐྱེ། སྦྱོར་བ་རང་རྒྱུད་པར་བསྒོམས་ན་མངལ་གྱི་སྲིན་བུར་སྐྱེ། སྒྲོལ་
བ་རང་རྒྱུད་པར་བསྒོམས་ན་སེམས་ཅན་དམྱལ་བར་སྐྱེའོ། །བདུན་པ་ཕན་ཡོན་ནི། དཔེར་ན་མཆན་ལ་ཕབ་ཐེབས་ན་གླུམ་དུ་འགྱུར་ལ། མ་ཐེབས་ན་མི་འགྱུར་བ་བཞིན་ཆོས་ཐམས་ཅད་ལ་སྟོང་ཉིད་ཀྱིས་རྩིས་ཟིན་ན་གདབ་ལས་དང་མནན་བསྲེགས་འཕང་གསུམ་བྱས་ཚད་ཡེ་ཤེས་ཀྱི་ཚོགས་སུ་འགྱུར་ལ། མ་ཐེབས་ན་མི་འགྱུར་རོ། །དྷརྨཱ་དྷ་ཏུ་སོགས་ཀྱི་སྔགས་དོན་ནི། ཆོས་དབྱིངས་ཡེ་ཤེས་སྙིང་པོ་སྐྱེ་འགག་གནས་གསུམ་དང་བྲལ་བའོ། །ཀུན་སྣང་སྙིང་རྗེའི་ཏིང་ངེ་འཛིན་ནི་ཤུགས་ལ་ཚང་སྟེ། སྟོང་ཉིད་སྙིང་རྗེའི་སྙིང་པོ་ཅན་ཡིན་པའི་ཕྱིར་རོ། །དེ་ལྟར་སྟོང་ཉིད་སྙིང་རྗེ་ཟུང་དུ་འཇུག་པའི་རྩལ་ལས་ཧྲཱིཿཞེས་གཞོམ་མེད་རང་སྒྲས་བསྐུལ་བ་ཙམ་གྱིས། དམིགས་མེད་ནམ་མཁའ་ལྟར་དག་ཅིང་ཁྱབ་པའི་དབྱིངས་རིག་པའི་ཡེ་ཤེས་རྣམ་པར་གྲོལ་བའི་ཀློང་ཡངས་ཆེན་པོར་གཞི་སྟོང་ཉིད་ཀྱི་རིག་རྩལ་འགགས་མེད་ཐོལ་སྐྱེས་སམ་སྐད་ཅིག་གིས་བརྫུས་ཏེ་སྐྱེ་
བ་ཞེས་དེར་རྫུ་འཕྲུལ་གྱིས་སྐད་ཅིག་དྲན་པ་ཙམ་གྱིས་སྣང་བས་དྲན་རྫོགས་ཞེས་ཀྱང་བྱའི། མེ་ཏོག་པདྨ་ལས་སྐྱེས་པའམ་འཁྲུངས་པ་ལྟ་བུའི་དོན་མིན་ནོ། །ད་ལྟ་ནས་གདན་པདྨ་ཉི་ཟླ་བརྩེགས་པའི་སེང་གེའི་ཁྲི་ལ་བཞུགས་པ་བསྒོམ་དགོས་མ་གཏོགས་བཞུགས་གསོལ་སྐབས་སུ་ཁྱེད་ཡར་བཞེངས་ངས་སེང་ཁྲི་འབུལ་དགོས་ཟེར་བ་རྙིང་ལུགས་སུ་རྟེན་བརྟེན་པར་བཅས་སྤྱན་འདྲེན་དགོས་པས། མཆན། མ་ཡིན་པར་ཤེས་དགོས་སོ། །ཇི་ལྟར་བསྒོམ་པའི་ཚུལ་བླ་མ་རིག་འཛིན་གསང་མཚན་རྡོ་རྗེ་དྲག་པོ་རྩལ་དེ་ནི་སྣང་ལ་རང་བཞིན་མེད་པ་ནམ་མཁའི་འཇའ་ཚོན་ལྟ་བུ། སྐུ་ཡི་སྤྲུལ་པས་ཞིང་ཁམས་ཡོངས་ལ་ཁྱབ་ཏེ་འགྲོ་དྲུག་མ་རེའི་དྲུང་དུ་པད་འབྱུང་གི་སྤྲུལ་པ་རེ་བཞུགས་པ་སྟེ། སྣང་སྲིད་འཁོར་འདས་ལ་ཁྱབ་པ་ཞིང་ཁམས་རབ་འབྱམས་སྐུ་ཡི་དབྱིངས་སུ་རྫོགས་ཏེ་རྣམ་སྣང་གངས་ཅན་མཚོ་ལྟར་བ་སྤུའི་ཁུང་བུ་རེར་ཡང་རྡུལ་སྙེད་ཀྱི་ཞིང་ཁམས་གདོད་ནས་
ལྷུན་གྲུབ་ཏུ་བཞུགས་པའོ། །རྒྱན་ཆ་ལུགས་གཞུང་གསལ་ལྟར་དང་བརྡ་དོན་གཏེར་སྟོན་ཉིད་ཀྱིས་ཕྱག་མཆན་གནང་བ་ལྟར་བསྒོམ། ཁ་ཊྭཱྃ་ག་ལ་ཐོད་མཁར་དགུ་བརྩེགས་ཅེས་པ་ཐོད་པ་སྐམ་པོ་གཡས་གཡོན་དབུས་གསུམ་དང་། དེ་འོག་རྙིང་པ་གཡས་གཡོན་དབུས་གསུམ། དེ་འོག་རློན་པ་གཡས་གཡོན་དབུས་གསུམ་ཐམས་ཅད་བགྲངས་པས་དགུ། རིམ་པ་གསུམ་གྱི་འོག་མ་རློན་པ་གསུམ་མཚན་ཉིད་རྒྱུ་ཡི་ཐེག་པ་གསུམ། ཉན་རང་བྱང་སེམས། བར་པ་རྙིང་པ་གསུམ་དཀའ་ཐུབ་རིག་བྱེད་ཀྱི་ཐེག་པ་གསུམ། བྱ་སྤྱོད་རྣལ་འབྱོར། སྟེང་མ་སྐམ་པོ་གསུམ་དབང་བསྒྱུར་ཐབས་ཀྱི་ཐེག་པ་གསུམ་ཕ་རྒྱུད་མ་རྒྱུད་གཉིས་མེད་རྒྱུད། སྟེ་དགུའོ། །ཡར་གྱི་རྩེ་གསུམ་ནི་ངོ་བོ་ཆོས་སྐུ་རང་བཞིན་ལོངས་སྐུ་ཐུགས་རྗེ་སྤྲུལ་སྐུ་གསུམ་ཏེ་སྐུ་གསུམ། ཚེ་བུམ་ནི་འཆི་བ་མེད་པའི་ཚེ་ལ་མངའ་བརྙེས་པ། རྒྱ་གྲམ་ནི་རྟེན་འབྲེལ་བཅུ་གཉིས་སྣ་ཚོགས་རྡོ་རྗེ་རྭ་བཅུ་གཉིས། མཆན། གནས་སུ་དག་ཅིང་ས་
ལམ་ཡོངས་སུ་རྫོགས་པ། ཡུ་བ་བརྒྱད་བཞོགས་དཀར་གསལ་ལྡེམ་པ་ནི་རྣམ་པར་ཐར་པ་བརྒྱད་དོ། རྣམ་ཐར་བརྒྱད་ནི། གཟུགས་ཅན་གཟུགས་ལ་བལྟ་བའི་རྣམ་ཐར། གཟུགས་གང་འདོད་དུ་སྤྲུལ་པའི་ཏིང་ངེ་འཛིན། གཟུགས་མེད་གཟུགས་ལ་བལྟ་བའི་རྣམ་ཐར། མིང་གཞིའི་ཕུང་པོ་ལ་བརྟེན་ནས་སྤྲུལ་པ་སྡུག་མི་སྡུག གེགས་སེལ་སྡུག་པའི་རྣམ་ཐར། ཐམས་ཅད་སྟོན་ནུས་པ། གཟུགས་མེད་པའི་རྣམ་ཐར་བཞི། འགོག་པའི་རྣམ་ཐར་དང་བརྒྱད་དོ། ཡང་ན་གཉན་པོའི་རྣམ་ཐར་སྒོ་གསུམ། སྟོང་སྨོན་མཚན། སྤྲུལ་པའི་རྣམ་ཐར་སྒོ་གསུམ། གཟུགས་སོགས་གསུམ། འཇིག་རྟེན་འདས་མ་འདས་ཀྱི་ལམ་གྱི་རྣམ་ཐར་གཉིས་དང་བརྒྱད་དོ། །ཆོས་རྣམས་ཡེ་ཤེས་ཀྱི་ཀློང་དུ་རོ་གཅིག་པའི་རྟགས་སུ་དར་དཔྱངས་ཌཱ་རུ་དྲིལ་ཆུང་གིས་བརྒྱན་པའོ། ༈ །རྒྱ་གར་དུ་གྲུབ་པའི་རིག་འཛིན་རྣམས་གྲུབ་པ་གང་ལ་བརྙེས་པ་ཡི་དམ་དེའི་ཕྱག་མཚན་འཆང་བ་ཡིན་ལ། ཨོ་རྒྱན་ཆེན་པོས་གདུལ་བྱ་གཞན་
སྣང་དུ་ཡང་དག་ཧེ་རུ་ཀ་ལས་གྲུབ་པ་བརྙེས་པ་ཡིན་པས་ཡང་དག་གི་ཕྱག་མཚན་རྡོ་རྗེ་ཐོད་པ། ཁ་ཊྭཱྃ་ག་དང་དེ་ལ་གསང་བའི་རྔེའུ་ཆུང་བཏགས་པ་དང་། དར་དཔྱངས་སུམ་ཁུག་དེ་རྒྱུ་ཞགས་ཀྱི་མཚོན་པ་ཡིན་ཅེས་བདག་ཅག་གི་འདྲེན་མཆོག་གཏེར་ཆེན་རིག་པ་འཛིན་པ་མཆོག་གི་ཞལ་སྔ་ནས་གསུངས་སོ། །སྐུ་ལ་རིན་ཆེན་དྲྭ་བས་བརྒྱན༔ ཅེས་པ་ནི་རིན་པོ་ཆེའི་མགུལ་རྒྱན་དང་། དོ་ཤལ་དང་། སེ་མོ་དོ། ཕྱག་ཞབས་ཀྱི་གདུ་གུ་རྣམས་ལ་རིན་པོ་ཆེའི་དྲྭ་བ་དང་དྲྭ་བ་ཕྱེད་པས་སྤྲས་པ་ནི་གསང་བ་སྔགས་ཀྱི་ཁྱད་ཆོས་འདོད་ཡོན་མ་སྤངས་ལམ་དུ་ཁྱེར་བའི་བརྡའོ། །ཕོད་ཀ་ནི་མཐིང་ནག་གར་གྱི་ཕུ་དུང་རྡོ་རྗེའི་ཁྱུང་གཤོག་ལྟ་བུ། ཐོང་ཀ་གནམ་སྒོ་ཡིན་པས་འཁོར་ལོ་རིས་ཀྱིས་བརྒྱན་པ། མཐའ་ཆགས་ས་གཞི་ཡིན་པས་པདྨ་རིས་སུ་བརྒྱན་པ། སྐེད་པ་ཕོ་བྲང་ཡིན་པས་རཏྣའི་ཟར་བུས་བརྒྱན་པ། ཕུ་དུང་ཕྱོགས་མཚམས་ཡིན་པས་རྡོ་རྗེའི་རིས་སུ་བརྒྱན་པ།
དབྱིབས་བྱ་ཁྱུང་གི་གཤོག་པ་ལྟ་བུའི་ཕུ་དུང་ཡོད་པས་གཟུགས་ཀྱིས་མགོ་མཇུག་ཁེབ་པའོ། ༈ །ཆོས་གོས་རྣམ་གསུམ་ནི། ཆོས་གོས་རྒྱལ་པོ་ལྟ་བུར་སྣམ་སྦྱར་དམར་སེར་སྣམ་ཕྲན་ཉེར་ལྔ་པ་གསེར་གྱི་པ་ཏྲ་ཅན། ཆོས་གོས་བློན་པོ་ལྟ་བུ་བླ་གོས་དམར་པོ་སྣམ་ཕྲན་བདུན་པ་ཅན། ལེའུ་གྲངས་འཕྲེང་དུ་བརྩིས་པ། མཆན། ཆོས་གོས་གཡོག་པོ་ལྟ་བུ་མཐང་གོས་སྣམ་ཕྲན་ལྔ་པ་ཅན། བཤང་ལྕི་འདོར་དུས་མནབ་ཆོག་པ། མཆན། ཡེ་ཤེས་གསང་བ་འདི་ཉིད་ལ་ཕྱིའི་ཟབ་བེར་མི་དགོས་པའི་བྲིས་རྒྱུན་ཕལ་ཆེར་འགའ་ལ་ཆག་ལྷམ་འབྱུང་ཡང་ཀུན་མཁྱེན་ཆོས་ཀྱི་འབྱུང་གནས་ཀྱིས་ཞལ་བཀོད་གནང་བ་ཕྱིན་ཆད་ཞབས་ཆག་མེད་དོ། །གཞན་རྣམས་གཞུང་གིས་གསལ། སྔགས་ཕྲེང་ལུ་གུ་རྒྱུད་ཅེས་པ་རྒྱ་གར་གྱི་སྐད་དུ་ཤྲཱི་ཁ་ལཱ། བོད་སྐད་དུ་ལུ་གུ་རྒྱུད་དང་ལྕགས་ཐག་དང་ལྕགས་སྐུད་སོགས་སུ་བསྒྱུར་ཡང་དོན་ལ་ཨ་ལོང་སྦྲེལ་བའི་ལྕགས་ཐག་ཡིན་ཏེ་སྔགས་ཕྲེང་ལ་འོད་
ཟེར་སྦྲེལ་བའི་དོན་ཏོ། །ཐུགས་རྗེ་ཆེན་པོ་དང་ཚེ་དཔག་མེད་གཞུང་ལྟར་བསྐྱེད། མཁའ་འགྲོ་སྡེ་ལྔ་ཕྱོགས་བཞི་དང་མདུན་ཤར་གྱི་ནང་དུ་བསྒོམ་རྒྱུ་ཡིན་ཀྱང་། ད་ལྟ་བྲི་བྱ་ལ་སྐུའི་ཟུར་བཞི་དང་མདུན་དུ་བྲིས་པ་ལྟར་བསྒོམ་ཀྱང་ཆོག་ལ། ཐམས་ཅད་ཀྱི་ཞལ་གཙོ་བོ་གུ་རུ་རིན་པོ་ཆེ་ཉིད་ལ་ཕྱོགས་པར་བསྒོམ། ཕྱག་མཚན་ཆོས་བདག་ཀརྨ་འགྱུར་མེད་ཀྱི་ཕྱག་བྲིས་ལྟར་ན་རྡོ་རྗེ་མཁའ་འགྲོ་ལྕགས་ཀྱུ་མདའ་དར་ཚེ་བུམ། རིན་ཆེན་མཁའ་འགྲོ་ཞགས་པ་མདའ་དར་ཚེ་བུམ། པདྨ་མཁའ་འགྲོ་ལྕགས་སྒྲོགས་མདའ་དར་ཚེ་བུམ། ལས་ཀྱི་མཁའ་འགྲོ་དྲིལ་བུ་མདའ་དར་ཚེ་བུམ། སངས་རྒྱས་མཁའ་འགྲོ་མདའ་དར་ཚེ་བུམ་རྐྱང་པ་དང་ན་བཟའ་ནང་གོས་དང་བེར་གསོལ་བ་བྲིས་འདུག་པ་གཏེར་ཆེན་ཡོངས་དགེའི་ཞལ་ཁྲིད་ཡིན་པར་ངེས། ཀུན་མཁྱེན་ཆོས་ཀྱི་འབྱུང་གནས་ཀྱི་ཞལ་བཀོད་ལུགས་སུ་རྡོ་རྗེ་མཁའ་འགྲོ་ལྕགས་ཀྱུ་ཚེ་བུམ། རིན་ཆེན་མཁའ་འགྲོ་ཞགས་པ་
ཚེ་བུམ། པདྨ་མཁའ་འགྲོ་ལྕགས་སྒྲོགས་ཚེ་བུམ། ལས་ཀྱི་མཁའ་འགྲོ་དྲིལ་བུ་ཚེ་བུམ། སངས་རྒྱས་མཁའ་འགྲོ་མདའ་དར་ཚེ་བུམ། བེར་དང་ནང་གོས་མེད་པ་ཐམས་ཅད་དར་ཕྱར་དང་སྨད་གཡོགས་སོགས་ལོངས་སྐུའི་ཆ་ལུགས་ཅན་བྲི་བསྒོམ་མཛད་པས་ལུགས་སྲོལ་དེ་གཉིས་གང་བདེ་བསྒོམ་པས་ཆོག །ལར་སྔ་འགྱུར་རྙིང་མའི་ཕྱོགས་སུ་བདག་མདུན་དབྱེར་མེད་དུ་བསྒྲུབ་པ་ཉིད་གཙོ་ཆེ་སྟེ། གསར་མའི་རྣལ་འབྱོར་བླ་མེད་ཀྱི་རྒྱུད་ཤིན་ཏུ་ཟབ་པའི་བསྐྱེད་ཚུལ་ལའང་དེ་ལྟར་ཡོད་པར་ཀུན་མཁྱེན་དྷརྨཱ་ཀཱ་རས་གསུངས། ༈ །ཡང་བརྗོད་པ་ཚིག་གཅིག་གིས་བདག་མདུན་སོ་སོར་མཉམ་བསྒྲུབ་བྱེད་པ་ཕྱེད་དུ་གྲགས་ཆེ་ཞིང་། དེ་ལྟར་མཛད་མཁན་ཡང་ཡོད་པར། ཆོ་ག་སོ་སོའི་ཚིག་རིས་དང་སྦྱར་བའི་ཚེ་དང་པོ་བདག་ལྷར་བསྐྱེད་ནས། དེ་ལས་ས་བོན་སྤྲོས་ཏེ་མདུན་བསྐྱེད་བསྒོམ་པ་དང་། དང་པོ་རྒྱུ་ཡི་ཏིང་ངེ་འཛིན་ས་བོན་གཉིས་བསྒོམ་
ནས་དེ་ལས་ས་བོན་སྤྲོས་ཏེ་བདག་མདུན་སོ་སོར་བསྒོམ་པ་གཉིས་ཀ་གཞུང་དོན་དང་འགལ་བས་འཐད་ལྡན་མ་ཡིན་པའི་ཕྱིར་ཐོག་མར་བདག་མདུན་དབྱེར་མེད་དུ་བསྐྱེད་ཟིན་ནས་མེ་ལོང་ལ་གཟུགས་བརྙན་ཤར་བ་བཞིན་དུ་ངོ་བོ་དབྱེར་མེད་ལ་རྣམ་པ་མདུན་བསྐྱེད་དུ་ལམ་མེར་སྣང་བ་གསལ་འདེབས་པར་མཛད་ན་ལེགས་ཞེས་ཀུན་མཁྱེན་སི་ཏུ་རིན་པོ་ཆེ་དྷརྨཱ་ཀཱ་རས་གསུངས། དེ་ནས་བདག་མདུན་ཐུགས་ཀའི་ཧཱུྃ་ཡིག་ལས་ཛཿ པདྨ་ཉིན་བྱེད་ཀྱི་ཟིན་བྲིས་ཕྲིན་ལས་ཧཱུྃ་དང་ཛཿཡིག་ཀྱང་སྤྲོ་བར་འདུག །མཆན། ཞེས་འགུགས་པའི་དོན་དང་འོད་ཟེར་སྣ་ལྔ་ལྕགས་ཀྱུའི་རྣམ་པ་གྲངས་མེད་པས་ཟངས་མདོག་དཔལ་རི་སོགས་དག་པ་སྐུ་གསུམ་གྱི་ཞིང་ཁམས་མེར་གྱིས་གང་ནས་སྐུ་གསུམ་བླ་མའི་ལྷ་ཚོགས་ཀྱི་ཡེ་ཤེས་པ་སྤྱན་དྲངས་ཏེ་བདག་མདུན་གྱི་བར་སྣང་དུ་བདག་མདུན་རང་རང་ལ་ཞལ་བསྟན་ནས་བཞུགས་པར་མོས་ལ་སྤྱན་འདྲེན་ཚིག་རྐང་བདུན་མ་གསུམ་ལྔ་བདུན་སོགས་
གདུང་བའི་དབྱངས་དང་བཅས་བྱ། དེ་དག་གི་སྐབས་སུ་ཨོ་རྒྱན་པདྨ་དངོས་སུ་འབྱོན་པར་ངེས་ཏེ། རྡོ་རྗེའི་གསུང་ལས། སྤྲེལ་ལོ་སྤྲེལ་ཟླའི་ཚེས་བཅུའི་ཉིན་ཞག་ལ༔ ཨོ་རྒྱན་བདག་ཉིད་བོད་ཡུལ་ཐམས་ཅད་དུ༔ ངེས་པར་འབྱོན་པ་ང་ཡི་ཐ་ཚིག་ཡིན༔ ཟླ་རེའི་ཚེས་བཅུ་བྱུང་ངོ་ཅོག་ལ་ཡང་༔ སྤྲུལ་པས་བོད་ཁམས་ཁྱབ་པར་མི་འབྱོན་རེ༔ དམ་ཚིག་ཡིན་ནོ་པད་འབྱུང་བསླུ་མི་སྲིད༔ བདག་ལ་བློ་གཏད་ངེས་འབྱུང་བྱེད་པ་རྣམས༔ དེ་དུས་འཇིག་རྟེན་བྱ་བ་ཐམས་ཅད་དོར༔ སྤོང་ལྡན་གཏོར་མ་རིན་ཆེན་འབར་བ་བཞེངས༔ ཐོད་པ་ལྟག་སྤྲོད་རོལ་མོའི་སྒྲས་བསྐུལ་ཞིང་༔ ཚིག་བདུན་གསོལ་འདེབས་གདུང་བའི་དབྱངས་ཀྱིས་བོས༔ ཨོ་རྒྱན་ང་ཉིད་རྔ་ཡབ་དཔལ་རི་ནས༔ གཅེས་པའི་བུ་ངུས་མ་ཡིས་མི་བཟོད་བཞིན༔ བྱིན་གྱིས་བརླབ་བྱོན་དམ་ཚིག་ན་ར་ཀན༔ ཅེས་ཚེས་བཅུའི་དུས་དང་མ་ཟད་ནམ་གསོལ་བ་བཏབ་ནའང་འབྱོན་ཏེ། ལུས་
སེམས་ང་དང་མི་འབྲལ་ཞིང་༔ གསོལ་འདེབས་སྨྲེ་སྔགས་ཚིག་གིས་བསྐུལ༔ མོས་པའི་སློབ་མ་རྗེས་སུ་བཟུང་༔ འགྲོ་དོན་རྗེས་སུ་མ་འདོར་ཞེས༔ བསྐུལ་བའི་དུས་སུ་ཨོ་རྒྱན་ང་༔ སྐད་ཅིག་ཙམ་གྱིས་འོང་བར་འགྱུར༔ ཅེས་རྡོ་རྗེའི་གསུང་ལ་བསླུ་བ་མེད་པས་ཡིད་ཆེས་པར་བྱའོ། །སྔོན་བསྐལ་མའི་དབུར་དཔེ་རྒྱུན་ལ་ལར་ཧཱུྃ་ཧྲཱིཿགཉིས་མེད། ལ་ལར་ཧྲཱིཿཡོད་པར་སྣང་ཡང་ཡོངས་དགེའི་ཕྱག་བྲིས་དང་དཔལ་སྤུངས་སྤར་མ་གཉིས་ཀར་ཧཱུྃ་ཡོད་པས་ཧཱུྃ་ནི་ཧ་ཨཱུ་མ་གསུམ་འདུས་པས་སྐུ་གསུམ་གྱི་ས་བོན་དུ་ཡང་འགྱུར་མོད། འདིར་ནི་གཉིས་སུ་མེད་པའི་ཡེ་ཤེས་རྡོ་རྗེ་ཐུགས་ཀྱི་ས་བོན་གྱིས་ཐུགས་རྒྱུད་བསྐུལ་བའི་དོན་ཡིན་ནོ། །ཚིག་དོན་སྐབས་ད་ལྟའི་བསྐལ་པ་འདིའི་སྔོན་དུ་བྱུང་པ་འདས་པའི་དུས་སུ་གསུངས་པ་ཡིན། སྔོན་བྱུང་འདས་པའི་བསྐལ་པ་གསུངས་པ་མིན་ནོ། །དྷ་ན་ནོར་དང་ཀོ་ཥ་མཛོད་ཀྱི་དོན་ཏེ་འོ་མ་ཅན་གྱི་རྒྱ་མཚོ་དེའི་མིང་ལ་ནོར་མཛོད་
ཅེས་པའོ། །ཤ་ཥ་ས་གསུམ་སྲོག་གཅིག་པའི་ཡི་གེ་ཡིན་པས་བཀླག་དུས་བརྩེགས་མའི་ཚེ་ཤ་ཥ་གཉིས་ས་རུ་བཀླག་པ་དང་རང་གི་སྒྲ་ཟུར་ཐོན་དགོས་པ་སོགས་བཞེད་ཚུལ་མང་བ་ལྟར་འདིར་བྲིས་བརྗོད་གཉིས་ཀར་འདྲ་མིན་འདུག་ཀྱང་། ཡོངས་དགེ་གཏེར་ཆེན་གྱི་ཕྱག་བྲིས་དང་དཔལ་སྤུངས་སྤར་མ་གཉིས་ཀར་ཤ་ཡིན་ནོ། །ཕྱོགས་བཞི་འཇིགས་རུང་དུར་ཁྲོད་དང་༔ ཞེས་པའི་ཚིག་མཐའ་ནས་དབུས་སུ་བཅོས་ཏེ། མཁའ་འགྲོ་སྡེ་ལྔ་གཤེགས་སུ་གསོལ། ཅེས་འཛུད་པར་སྣང་ཡང་ཡོངས་དགེའི་ཕྱག་བྲིས་དང་དཔལ་སྤུངས་སྤར་མ་གཉིས་ཀར་མེད་པས་ཚིག་མཐའ་དང་སྒྲ་སྡུད་པའི་དོན་བཅས་ཚིག་རྐང་འོག་མ་དང་སྦྲེལ་ལ། ཕྱོགས་བཞིའི་དུར་ཁྲོད་དང་ཨོ་རྒྱན་མཁའ་སྤྱོད་ཀྱི་ཞིང་ཁམས་ནས་མ་མོ་མཁའ་འགྲོའི་ཚོགས་ཐམས་ཅད་སྤྱན་འདྲེན་པའི་ཚེ་མཁའ་འགྲོ་སྡེ་ལྔ་ཡང་དེར་འདུས་སོ། །སྔགས་དོན། ཨོཾ་ཨཱཿཧཱུྃ་སྐུ་གསུམ། བཛྲ་རྡོ་
རྗེ། གུ་རུ་བླ་མ། པདྨ་རྒྱ་གར་སྐད་སོར་བཞག །ཐོད་ཕྲེང་རྩལ་གསང་མཚན། བཛྲ་རྡོ་རྗེ། ས་མ་ཡ་དམ་ཚིག །ཛཿཐུགས་རྒྱུད་བསྐུལ་བ། སིདྡྷི་དངོས་གྲུབ། ཕ་ལ་བཟང་པོའི་འབྲས་བུ། ཧཱུྃ་ཐུགས་རྒྱུད་བསྐུལ་བ། ཨཱཿདབྱེར་མེད་དུ་བསྟིམ་པ། ཧྲཱིཿབླ་མ་རིག་འཛིན་གྱི་རྒྱུའི་ས་བོན། ཧཱུྃ་སངས་རྒྱས་མཁའ་འགྲོ། ཧ་རྡོ་རྗེ་མཁའ་འགྲོ། རི་རིན་ཆེན་མཁའ་འགྲོ། ནི་པདྨ་མཁའ་འགྲོ། ས་ལས་ཀྱི་མཁའ་འགྲོ། བཛྲ་ས་མ་ཡ་ཛཿཛཿ རྡོ་རྗེའི་དམ་ཚིག་ལས་མ་འདའ་བར་བྱོན་བྱོན་ཅེས་པའོ། ༈ །དེ་ནས་བདག་བསྐྱེད་ཀྱི་ཐུགས་ཀ་ནས་སྤྲོས་པའི་ལས་ཀྱི་སེམས་དཔའ་དང་སེམས་མས་བདག་བསྐྱེད་ཀྱི་ཡེ་ཤེས་པ་ལ་བཞུགས་གསོལ་ཕྱག་འཚལ་མཆོད་སྐོང་བཤགས་བསྟོད་རྣམས་བྱ་ཞིང་མཆོད་ལྷ་རང་ལ་བསྡུ། དེ་བཞིན་དུ་ཚིག་རིས་འདོན་པ་གཅིག་གི་ཚེ་དེ་ཉིད་ལས་མདུན་བསྐྱེད་ཀྱི་ཐུགས་ཀ་ནས་སྤྲུལ་པའི་ལྷ་དང་ལྷ་མོས་མདུན་བསྐྱེད་ཀྱི་ཡེ་ཤེས་པ་ལ་
བཞུགས་གསོལ་ཕྱག་མཆོད་སྐོང་བཤགས་རྣམས་བྱ་ཞིང་མཆོད་ལྷ་མདུན་བསྐྱེད་ལ་བསྡུ་དགོས་སོ། །འདི་སྐབས་མཁས་གྲུབ་འཇམ་དབྱངས་རྣམ་རྒྱལ་གྱི་ཟིན་བྲིས་སུ་བདག་མདུན་ལྷ་ཚོགས་ཁྱབ་གཅིག་ཏུ་གདན་འབུལ་ཕྱག་འཚལ་མཆོད་བསྟོད་རྣམས་བྱེད་ཅེས་པ་ལས་གསར་མའི་ལུགས་སུ་སྣང་བས་ཁ་གསལ་གོ་བདེར་བཀོད་ན། སྔ་འགྱུར་རྙིང་མའི་ལུགས་སུ་རྟེན་དང་བརྟེན་པའི་དཀྱིལ་འཁོར་སྤྱན་འདྲེན་དགོས་ལ་འདི་ནི་གསང་ཆེན་ཨ་ཏི་ཡོ་གའི་མན་ངག་མཐར་ཐུག་སྣང་སྲིད་ཡེ་རྫོགས་ཀྱི་དཀྱིལ་འཁོར་ཞེས་ཕྱི་སྣོད་ཡེ་ནས་གཞལ་ཡས་ཁང་དུ་དག་ཅིང་གནས་པས་དཀྱིལ་འཁོར་ཕོ་བྲང་རྣམས་བསྒོམ་མི་དགོས་པ་ཡིན། དེ་མཚུངས་དཀོན་མཆོག་སྤྱི་འདུས་ལའང་གཞལ་ཡས་ཁང་མེད་ཀྱང་འགའ་ཞིག་གིས་པད་གདན་གཞལ་ཡས་ཁང་དུ་སྒྲུབ་པ་ཡང་མདོ་བསྐུལ་རིང་མོའི་དཔེ་ལྟར་དཀའ་ལ་ནོར་བ་ཆེན་པོ་རེད་ཅེས་གཏེར་ཆེན་རིག་པ་
འཛིན་པ་མཆོག་གི་ཞལ་སྔ་ནས་གསུངས་སོ། །འདིར་ནི་རྟེན་སེང་ཁྲི་པདྨ་ཉི་ཟླ་དང་བརྟེན་པའི་གུ་རུ་རིན་པོ་ཆེ་དང་དེ་མཚུངས་རིགས་བདག་འགྲོ་འདུལ་ཐུགས་རྗེ་ཆེན་པོ་མཁའ་འགྲོ་སྡེ་ལྔ་དང་བཅས་ལ་གདན་པདྨ་ཉི་ཟླ་ལས་གཞན་མེད། སྤྱན་འདྲེན་པའི་སྐབས་སུ་ཡང་ཆུ་ཟླ་བཞིན་དུ་གར་དམིགས་དེར་སྣང་བ་ཞེས་པ་ལྟར་ཉི་མ་དང་ཟླ་བ་ཤར་བ་ལྟར་བདག་མདུན་སོ་སོའི་ནམ་མཁར་སྐུ་གསུམ་བླ་མ་མཁའ་འགྲོའི་དཀྱིལ་འཁོར་ཝལ་གྱིས་གསལ་བར་བསྒོམ། དེ་རྣམས་ལ་འཁོར་དང་ཡང་འཁོར་སྤྲུལ་པ་དང་ཡང་སྤྲུལ་གྱི་ཚོགས་ནི་ཉི་ཟེར་ལ་རྡུལ་འཁྲིགས་པ་ལྟར་སྐུས་ཞིང་ཁམས་ཡོངས་ལ་ཁྱབ་པ་དང་། ཞིང་ཁམས་རབ་འབྱམས་སྐུ་ལ་རྫོགས་པའི་གོ་དོན་གྱིས་དཔའ་བོའི་བྲོ་བརྡུང་། དཔའ་མོས་གླུ་ལེན། སྐུ་སྒེག་པའི་གར་སྟབས། གསུང་ཧཱུྃ་ཕཊ་ཀྱི་ཛབ྄་བསྒྲ། ཐུགས་ཡེ་ཤེས་ཆེན་པོའི་བྱིན་རླབས། གདུགས་དང་བ་དན་དང་རོལ་མོའི་སྒྲ་ལ་
སོགས་པས་གནམ་ས་བར་སྣང་ཐམས་ཅད་ཡོམ་ཡོམ་ཤིག་ཤིག་འུར་འུར་ཐིབ་ཐིབས་སུ་བྱོན་པར་དམིགས། སངས་རྒྱས་རྣམས་ཀྱི་ཡོན་ཏན་དབང་ཕྱུག་བརྒྱད་ཀྱི་ནང་ཚན་གདུལ་བྱའི་སར་རྩོལ་མེད་དུ་གཤེགས་པ་ནི་ཀུན་ཏུ་འགྲོ་བའི་དབང་ཕྱུག་ཡིན་པས་ཕལ་པ་ལྟར་འགྲོ་དོན་གྱི་རྩོལ་བ་དཀའ་ལས་མི་དགོས་སོ། །དེ་ལྟ་བུའི་བདག་མདུན་དབྱེར་མེད་ཡེ་ཤེས་ཀྱི་དཀྱིལ་འཁོར་ལ་བཞུགས་སུ་གསོལ་བ་ནི། བླ་མ་དང་དཔོན་པོ་ཡུལ་དམ་པ་འགའ་ལ་ཐུགས་སློད་ཀྱིས་བཞུགས་དགོས་ཞུ་བ་བཞིན་དུ། ཤེས་རབ་ཀྱི་རང་བཞིན་ཉི་མ། ཐབས་ཀྱི་རང་བཞིན་ཟླ་བ། འཁོར་བའི་ཉེས་སྐྱོན་གྱིས་མ་གོས་པདྨ། མི་འཇིགས་བཞི་ལྡན་གྱི་སེང་ཁྲི་གཙོ་བོ་ལ་དང་། གཞན་རྣམས་ཉི་ཟླ་པདྨའི་གདན་ལ་ཐུགས་དགྱེས་པ་ཆེན་པོའི་ངང་ཚུལ་གྱིས་བཞུགས་སུ་གསོལ། ཞེས་ཞུ་ཞིང་སླར་ཡང་སྔགས་བརྗོད་པས་བརྟན་པར་དམིགས། སྔགས་དོན་གུ་རུ་དེཝ་ཌཱ་ཀི་
ནཱི་ཡེ༔ བླ་མ་ལྷ་དང་མཁའ་འགྲོ་རྣམས། པཾ་ས་བོན། པདྨ་མཎྜལ༔པདྨའི་དཀྱིལ་འཁོར། དེ་བཞིན་དུ་མ་ས་བོན། སཱུརྱ་མཎྜལ༔ཉི་མའི་དཀྱིལ་འཁོར། ཨ་ས་བོན། ཙནྡྲ་མཎྜལ༔ཟླ་བའི་དཀྱིལ་འཁོར། ཏིཥྛ་བྷྲཱུྃ་མི་འགྱུར་བབརྟན་པར་གྱུར་ཅིག་པའོ། །དེ་ནས་ལས་ཀྱི་སེམས་དཔའ་སེམས་མ་ཞིང་གི་རྡུལ་སྙེད་དུ་སྤྲུལ་ནས་སྒོ་གསུམ་གུས་པས་ཕྱག་འཚལ་ལོ། །སྔགས་དོན་གུ་རུ་བླ་མ། དེ་ཝ་ལྷ་སྟེ་ཡི་དམ། ཌཱ་ཀི་ནི་མཁའ་འགྲོ། ན་མོ༔ཕྱག་འཚལ་ལོ། ཕྱི་མཆོད་སྣང་སྲིད་ཀྱི་འཁོར་འདས་ཀྱིས་བསྡུས་པའི་མཆོད་པར་འོས་པ་ཐམས་ཅད་ཀྱིས་མཆོད་པ་ཡེ་སྟོང་ཀློང་ཡངས་ཆེན་པོར་བཞེས་སུ་གསོལ་ཞེས་སོ། །ཆོས་ཉིད་ལ་ཆོས་ཉིད་ཐིམ། ཡེ་ཤེས་ལ་ཡེ་ཤེས་རོལ། སྒྱུ་མ་ལ་སྒྱུ་མ་ལོངས་སྤྱོད་པའི་ཚུལ་དུ་དངོས་འཛིན་འཆིང་བའི་ཡུལ་ལས་འདས་པར་མཆོད་དོ། །སྐུ་ལྔ་ཡེ་ཤེས་ལྔ་ཡི་འབྲས་བུ་ད་ལྟ་ཉིད་དུ་ཐོབ་པར་མཛོད་ཅིག་པའོ། །སྔགས་གཞན་
རྣམས་སྔར་དང་འདྲ། སརྦ་པཱུ་ཛཿཧོ༔ ཞེས་པ་མཆོད་པ་ཐམས་ཅད་ཀྱིས་མཉེས་པར་མཛོད་ཅེས་པའོ། །བར་གྱི་ཧཱུྃ་ཐམས་ཅད་གཟུང་འཛིན་གཉིས་བསྡུས་ཀྱི་ཆོས་ཐམས་ཅད་སྟོང་པ་ཉིད་ཀྱི་སྐུར་ཡེ་ནས་དག་གོ་ཞེས་གསལ་གདབ་པའི་དོན་ཏོ། །གཟུགས་སྒྲ་དྲི་རོ་རེག་བྱ་འདོད་པའི་ཡོན་ཏན་ལྔ་མ་སྤངས་དག་པའི་ནང་མཆོད། མ་ཧཱ་པཱུ་ཛཿཧོཿ ཞེས་མཆོད་པ་ཆེན་པོས་མཉེས་པར་མཛོད། གཏེར་སྟོན་ཉིད་ཀྱི་ཕྱག་མཆན་ལྟར་རོ། །མཆན། བདུད་རྩི་དེ་ཁོ་ན་ཉིད་ཀྱི་མཆོད་པ་འབུལ་བ་ནི། བདུད་རྩི་ཡོན་ཏན་གྱི་རྒྱུད་ལས། །གཙོ་བོ་དམ་རྫས་བདུད་རྩི་ལྔ། །རྩ་བ་བརྒྱད་ལ་ཡན་ལག་སྟོང་། །དམ་རྫས་རྩི་བཅུད་སྨན་དུ་སྦྱར། །རཱ་ས་ཡ་ན་སྨན་ཆེན་པོ། །ཟོས་པས་མཆོག་ཐུན་དངོས་གྲུབ་ཐོབ། །ཞེས་གསུངས་པ་སྟེ། འདི་ལ་ངོ་བོ། ངེས་ཚིག །དབྱེ་བ་གསུམ་ལས། དང་པོ་ངོ་བོ་ནི། འཁོར་འདས་ཐམས་ཅད་ཡེ་ནས་བདུད་རྩིའི་རང་བཞིན་དུ་གནས་པའོ། །གཉིས་པ་
ངེས་ཚིག་ནི། མྲྀ་ཏ་སྲོག་གཏོང་བའི་ཁམས་ལས། རཀྟའི་རྐྱེན་བྱིན་ནས་སྔོན་དུ་དགའ་བའི་ན་ཀ་བཞག་ནས་སྒྲ་བསྒྲུབས་པས་ཨ་མྲྀ་ཏ་འཆི་བ་མེད་པའི་སྒྲ་ལས་བདུད་རྩི། ཇི་སྐད་དུ་ཡང་། །གཙང་དམེར་འཛིན་བདུད་དམ་རྫས་རྩིས། །ཡེ་ཤེས་ངང་དུ་རོ་གཅིག་པ། །ཅེས་སོ། །གསུམ་པ་དབྱེ་བ་ལ། སྔོན་བྱུང་གི་བདུད་རྩི། ཕྱིའི་བདུད་རྩི། ནང་གི་བདུད་རྩི། གསང་བའི་བདུད་རྩིའོ། །དང་པོ་ནི། སྔོན་དཔལ་ཆེན་པོས་རུ་ཏྲ་བསྒྲལ་བའི་ཟག་པ་རྒྱ་མཚོར་འཕང་བའི་རྒྱུ་ལས་བདུད་རྩི་ཐམས་ཅད་ཀྱི་ཕྱི་མོ་ཙནྡན་སྦྲུལ་གྱི་སྙིང་པོའི་སྡོང་པོ་གྲུབ་སྟེ། དེ་ཡང་སྡོང་པོ་ཙནྡན་སྨུག་པོ། རྩ་བ་མཱུ་ལ་པ་ཏི། ཡལ་ག་ལི་ཤི། ལོ་མ་གནྡྷ་བྷ་དྲ། མེ་ཏོག་གུར་གུམ། འབྲས་བུ་ཛ་ཏི། ཐང་ཆུ་ག་བུར། ཤུན་པ་ཤིང་ཚྭར་སྣང་བ་ནི་སྔོན་གྱི་བྱུང་བའོ། །གཉིས་པ་ཕྱིའི་བདུད་རྩི་ནི། ད་ལྟ་སྨན་རྣམས་དངོས་སུ་སྦྱར་བ་གཡས་ཀྱི་སྨན་མཆོད་དམིགས་རྟེན་དུ་བྱའོ། །འདི་སྐབས་ཀྱི་བཟང་
དྲུག་ནི། ཙནྡན། ལི་ཤི། གུར་གུམ། ཛ་ཏི། ག་བུར། ཤིང་ཚྭའོ། །གསུམ་པ་ནང་གི་བདུད་རྩི་ལྔ་ནི། མཆོག་ཆེན་མི་ལ་ཚང་སྟེ། སྲིད་པ་ཆགས་པའི་རྩ་བ་ལྟེ་བ། གཟུགས་ཕུང་ཕྱི་ནང་གི་ཤ་རུས་སྡོང་པོ། ཡལ་ག་ཡན་ལག་བཞི། ལོ་མ་སེན་མོ་སྐྲ་དང་བ་སྤུ། མེ་ཏོག་དབང་པོ་ལྔ། འབྲས་བུ་དོན་སྙིང་ལྔ། སྙིང་པོ་རྐང་མར་དང་སླ་བ་ཀླད་རྒྱུད། ཤུན་པ་ལྤགས་པའོ། །བཞི་པ་གསང་བའི་བདུད་རྩི་ནི། ཡབ་ཀྱི་རྒྱུ་དང་ཡུམ་གྱི་རྐྱེན་ནོ། །དམ་རྫས་བདུད་རྩིའི་ཆེ་བ་དང་ཕན་ཡོན་ནི། ཨོ་རྒྱན་ཆེན་པོས། །བདེ་གཤེགས་མ་ལུས་མཆོད་པའི་རྫས། །བླ་མ་ཡི་དམ་འདུ་བའི་རྩི། །མཁའ་འགྲོ་ཀུན་གྱི་སྙིང་ཁྲག་ཡིན། །ཟོས་པས་ཡོན་ཏན་བརྗོད་མི་ལོང་། །སངས་རྒྱས་སྐུ་ལྔའི་ཡོན་ཏན་ཐོབ། །ཕྱི་ལྟར་ལུས་ཀྱི་ནད་གདོན་འཇོམས། །ནང་དུ་ཉོན་མོངས་དུག་ལྔ་དག །གསང་བ་རང་བྱུང་ཡེ་ཤེས་རྟོགས། །ཅེས་སོ། །ཡི་གེ་ལ་ལར་མ་ཧཱ་ཨ་མྲྀ་ཏ་ཞེས་ཡོད་ཀྱང་།
གཏེར་ཆེན་ཉིད་ཀྱི་ཕྱག་བྲིས་དང་དཔལ་སྤུངས་ཀྱི་སྤར་གཉིས་ཀར་མི་འདུག་པས་མ་ཧཱ་མི་དགོས། སྔགས་དོན་གཞན་གོང་ལྟར་ལ་ཨ་མྲྀ་ཏ་པཱུ་ཛ་ཧོཿ ཞེས་པ་བདུད་རྩིས་མཉེས་པར་མཛོད་ཅེས་སོ། འདིར་སྨན་མཆོད་ལྡེབ་རྐྱང་ཡོད་པ་སྦྱར་ན་ལེགས། མ་སྦྱར་ཀྱང་ཆད་པའི་སྐྱོན་མེད་དོ། ༈ །གསང་བ་རཀྟའི་མཆོད་པ་འབུལ་བ་ནི། ཕྱི་ལྟར་ཤ་ཁྲག །ནང་ལྟར་ན་ཆོས་ཀྱི་དབྱིངས། གསང་བ་ལྟར་ན་ཡུམ་གྱི་པདྨ་རཀྟ་ཆོས་ཐམས་ཅད་འབྱུང་བའི་གནས། རཀྟ་ཚར་གསུམ་བསྐྱེད་ཅེས་པར། རཀྟའི་དྭངས་མ་འདོད་ཡོན་གྱི་ལྷ་མོ། ཁུ་བ་རཀྟའི་རྒྱ་མཚོ། སྙིགས་མ་དགྲ་བགེགས་བསྒྲལ་བའི་ཤ་ཁྲག་ཏུ་བསྐྱེད་པའང་ཡོད་ལ། འདི་ནི་ཉོན་མོངས་དུག་ལྔ་ཡེ་ཤེས་ལྔ་རུ་བསྒྲལ་བ་སྟེ་རིག་སྟོང་ཟུང་འཇུག་མ་སྤངས་རང་གྲོལ་སྒྲོལ་བའི་མཆོད་པ། སྣང་བ་ཡབ་དང་སྟོང་པ་ཡུམ་གྱི་རང་བཞིན་འདུ་འབྲལ་མེད་པའི་དུག་གསུམ་སྐུ་གསུམ་གྱི་ངོ་བོར་སྦྱངས་པ་བདེ་སྟོང་ཟུང་འཇུག་སྦྱོར་བའི་མཆོད་པ།
ཉོན་མོངས་པའི་ཆགས་པ་མེད་པ་ཆགས་པ་དང་བྲལ་བ་སྟེ། མི་ལྡན་པ་རཀྟའི་མཆོག །འདོད་ཆགས་རྣམ་དག་སོར་རྟོག་ཡེ་ཤེས་ཀྱི་ངོ་བོ་གསང་བ་སྙོམས་འཇུག་ཡེ་ཤེས་ཀྱི་བདུད་རྩི་འདི་ཉིད་སྐུ་གསུམ་བླ་མ་མཁའ་འགྲོའི་ཚོགས་ལ་འབུལ་ལོ། །གསང་གསུམ་དགྱེས་པ་ཆེན་པོས་བཞེས་ལ་དབང་དང་བྱིན་རླབས་མཆོག་དང་ཐུན་མོང་གི་དངོས་གྲུབ་ཐམས་ཅད་སྩོལ་ཅིག་པའོ། །མ་ཧཱ་རཀྟ་པཱུ་ཛ་ཧོཿ རཀྟ་ཆེན་པོས་མཉེས་པར་མཛོད། རཀྟ་ནི་དངོས་པོའི་སྐབས་སུ་ཁྲག །ཁ་དོག་གི་སྐབས་སུ་དམར་པོ། བྱེད་ལས་ཀྱི་སྐབས་སུ་ཆགས་པ་ལ་འཇུག་པས་ངོ་བོ་ལ་ཆགས་པ་མེད་ཅིང་འབྲས་བུ་ལ་ཆགས་པ་དང་བྲལ་བས་ན་ཆགས་པ་ཆེན་པོ་ཞེས་བྱའོ། །དམིགས་པའི་རྟེན་ནི་གཡོན་གྱི་རཀྟའོ། ཡང་གསང་ཤ་ལྔ་བདུད་རྩི་ལྔའི་རང་བཞིན་བཟའ་བཅའ་གཏོར་མའི་མཆོད་པ་ནི། སྨན་གཏོར་སྣོད་རང་བྱུང་གི་བྷནྡྷ་སྟོང་གསུམ་དང་མཉམ་པར་ཕྱི་དཀར་བ་ཐབས་
ཟླ་བའི་རང་བཞིན་གསལ་བ། ནང་དམར་བ་ཤེས་རབ་ཉི་མའི་རང་བཞིན་འཚེར་བ། འོད་ཟེར་མིག་གིས་མི་བཟོད་པར་འཆར་བ། མཆན།། ༈ བ་ལ་སྟོབས་ཀྱི་བྱིངས་སམ་ཁཾ་ལ་སྒྲ་སྒྲུབ་པས་སྟོབས་དང་གཟི་བརྗིད་བསྐྱེད་པར་བྱེད་པ་བ་ལིཾ་ཏེ་གཏོར་མ་ལྷུན་པོ་ལྟ་བུར་བརྗིད་པ་ངོ་བོ་ཤ་ལྔ་བདུད་རྩི་ལྔའི་རང་བཞིན་ནོ། །ཤ་ལྔ་གསར་རྙིང་གི་བཞེད་ཚུལ་ངོས་འཛིན་འདྲ་མིན་ཡོད་ཀྱང་། སྔ་འགྱུར་རྙིང་མའི་བཀའ་བརྒྱད་རང་ཤར་གྱི་རྒྱུད་ལེའུ་ཉེར་ལྔ་པ་ལས། །འཁོར་ལོ་རྩིབས་བཞི་མུ་ཁྱུད་བཅས༔ དྲི་ཆེན་གླང་ཤ་ཛ་ཏི་ཤར༔ བྱང་སེམས་སེང་ཤ་བཟང་དྲུག་དབུས༔ ཤ་ཆེན་རྟ་ཤ་ཀ་ཀོ་ལྷོ༔ པདྨ་རྨ་བྱ་ལི་ཤི་ནུབ༔ དྲི་ཆུ་ཁྱུང་ཤ་གུར་གུམ་བྱང་༔ ཞེས་གསུངས་པ་ལྟར་རོ། །རྡོ་རྗེ་གདན་བཞིའི་རྒྱུད་ལས་གསུངས་པའི་ཤ་ལྔའི་ངོས་འཛིན་ལུང་སྦྱོར་སོགས་ཡི་གེ་མང་དུ་དོགས་པས་མ་བྲིས་སོ། །བདུད་རྩི་ལྔ་ཡི་ངོས་འཛིན་ནི་གསར་རྙིང་ཐམས་ཅད་འདྲའོ། །ཚིག་དོན་གཞུང་
གསལ་ལྟར་ཤེས་པར་སླའོ། བ་ལིངྟ་པཱུ་ཛ་ཧོ༔ གཏོར་མས་མཉེས་པར་མཛོད། ཛྙཱ་ན་པཉྩ་ག་ཎ་ཙ་ཀྲ་ཁཱ་ཧི་ཁཱ་ཧི༔ ཡེ་ཤེས་ལྔའི་ཚོགས་ཀྱི་འཁོར་ལོ་བཞེས་ཤིག་བཞེས་ཤིག །འདིར་ཕྱི་ནང་གསང་མཆོད་ཀྱི་ངོས་འཛིན་རྒྱུད་མ་ཧཱ་ཡོ་ག་དང་ཅུང་ཟད་མཚུངས་མིན་འདུག་ཀྱང་ཡོངས་དགེ་གཏེར་ཆེན་ཉིད་ཀྱི་ཕྱག་མཆན་གནང་བ་ལྟར་ལས་བཅོས་བསྒྱུར་གང་ཡང་མ་བྱས་སོ། ༈ །ཐུགས་དམ་བསྐང་བ་ནི། སྐྱོན་དང་ཉེས་པ་དག་ཅིང་ཁ་སྐོང་བ་དང་སོར་ཆུད་པར་བྱེད་པའི་ཕྱིར་གསང་བ་སྔགས་ཀྱི་ལུགས་སུ་བསྐང་བ་དང་། འདུལ་བ་སོ་ཐར་གྱི་ལུགས་སུ་གསོ་སྦྱོང་གསུངས་པ་ཡིན་ཏེ། གྲུབ་དབང་ཀརྨ་ཆགས་མེད་ཀྱིས། །དམ་ཚིག་ཉམས་ཆག་ཕྲ་ཞིབ་བྱུང་བ་རྣམས། །བསྐང་བ་འདི་ཡིས་དག་པར་གསུངས་པ་ཡིན། །དམ་ཚིག་ས་ཡ་འབུམ་སྡེ་ཡོད་པའི་ཕྱིར། །ཕྲ་ཞིབ་རྣམས་ནི་རང་གིས་མི་ཤེས་པས། །དེ་ཉིད་དག་ཕྱིར་བསྐང་བ་ཆགས་མེད་བྱ། །
འདི་ནི་སྔགས་ཀྱི་གེགས་སེལ་གནད་ཆེན་ཡིན། ཅེས་གསུངས་པ་ལྟར་ལ་ཕྱི་ནང་། གསང་བ། ཡང་གསང་། དེ་ཁོ་ན་ཉིད་ཀྱིས་སྐོང་ཚུལ་མང་ཡང་། གཏེར་གཞུང་འདིར་ནི་དོན་དམ་དེ་ཁོ་ན་ཉིད་ཀྱི་ངང་དུ་བསྐང་བའོ། །དེ་ཡང་ཟུང་འཇུག་བཞིའི་བསྐང་བ་ཡིན་ཏེ། དང་པོ་དབྱིངས་རིག་ཟུང་འཇུག་གམ། རིག་སྟོང་ཟུང་འཇུག་གིས་བླ་མ་ཆོས་སྐུའི་ཐུགས་དམ་བསྐང་། བདེ་སྟོང་དབྱེར་མེད་དམ་ཟུང་དུ་འཇུག་པས་བླ་མ་ལོངས་སྐུ་སྣང་སྟོང་ཟུང་འཇུག་གིས་བླ་མ་སྤྲུལ་སྐུ། གསལ་སྟོང་ཟུང་འཇུག་གིས་ཡང་སྤྲུལ་མཁའ་འགྲོའི་ཚོགས་རྣམས་ཐུགས་དམ་བསྐང་བའོ། །དེ་ཡང་ཕྱི་ལྟར་ན་སྣོད་དང་བཅུད། ནང་ལྟར་ན་གཞལ་ཡས་ཁང་དང་ལྷ་ཚོགས། གསང་བ་ལྟར་ན་སྐུ་དང་ཞིང་ཁམས། དེ་ཁོ་ན་ཉིད་དུ་དབྱིངས་དང་ཡེ་ཤེས་དབྱེར་མེད་པར་མཉམ་པ་ཉིད་དུ་གདོད་ནས་འདུ་འབྲལ་མེད་པས་བསྐང་བྱ་སྐོང་བྱེད་གཉིས་སུ་མེད་དེ་ཆོས་དབྱིངས་ཡངས་པའི་ཀློང་དུ་
བསྐང་། གོང་བཤད་ཟུང་འཇུག་བཞི་ལྡན་དུ་སྦྱོར་བས་སྦྱར་བྱ་སྦྱོར་བྱེད་མེད་དེ་འདོད་ཁམས་བདེ་སྟོང་། གཟུགས་ཁམས་གསལ་སྟོང་། གཟུགས་མེད་ཁམས་རིག་སྟོང་དུ་སྦྱོར་བའམ་ཟུང་དུ་འཇུག་པའམ་དག་པ་སྟེ་གྲོལ་བའོ། །དོན་ཉམས་ལེན་དང་སྦྱར་ཚེ། སེམས་ཉིད་རིག་པ་རབ་གསལ། དེ་ཉིད་རིག་བཞིན་དུ་སྟོང་ཞིང་། སྟོང་བཞིན་དུ་རིག་པས་རིག་སྟོང་ཟུང་འཇུག་ཆོས་དབྱིངས་རྣམ་དག་གི་དཀྱིལ་འཁོར། དེ་བཞིན་དུ་བདེ་སྟོང་། སྣང་སྟོང་། གསལ་སྟོང་ཟུང་འཇུག་སེམས་ཉིད་གདོད་མའི་གཞི་ལ་རྫོགས་པས་བསྐང་བའོ། །དེ་དག་དབང་བཞི་དང་འབྲེལ་བའི་བསྐང་བ་ཡིན་ཏེ། སྣང་སྟོང་བུམ་དབང་། གསལ་སྟོང་གསང་དབང་། བདེ་སྟོང་ཤེར་དབང་། རིག་སྟོང་དབང་བཞི་པ། ཚིག་དབང་གི་ལམ་ཡིན་པའི་ཕྱིར་རོ། །རྡོ་རྗེའི་ཚེ་ནི་སྐྱེ་འཆི་འཕོ་འགྱུར་མེད་པ་འཆི་མེད་འཇའ་ལུས་པདྨ་འབྱུང་གནས་ལྟ་བུ། བདུད་རྩི་སྨན་ནི་ནད་རིགས་
བཞི་བརྒྱ་རྩ་བཞི་ཞི་བར་བྱེད་པ་སངས་རྒྱས་སྨན་བླའི་ཕྱག་གི་ཨ་རུ་ར་རྣམ་པར་རྒྱལ་བ་དང་ལྷུང་བཟེད་ཀྱི་བདུད་རྩི་ལྟ་བུ། གྲུབ་ཆེན་བརྒྱད་ནི། དགྱེས་རྡོར་ལས། དབང་དང་། མངོན་སྤྱོད་དང་། དགྲ་སྡེ་འཇིགས་པ་དང་། བསྐྲད་པ་དང་། བསད་པ་དང་། དབུག་པ་དང་། ཞི་བའི་ལས་དང་། རྒྱས་པ་སྟེ་ལས་ཆེན་བརྒྱད་དུ་གསུངས་སོ། །ཐུན་མོང་གི་དངོས་གྲུབ་གྲུབ་པ་བརྒྱད་ནི། གུར་ལས། མིག་སྨན་དང་། གཏེར་མཐོང་། རྐང་མགྱོགས་དང་། རྫས་རླུང་སོགས། རལ་གྲི་དང་། རོ་ལང་། ས་འོག་གྲུབ། ཚེ་དང་ལོངས་སྤྱོད། རིལ་བུ་དང་ནི་སྐྱེ་བདུན། མཁའ་སྤྱོད་ཉིད། རྫས། མི་སྣང་བ་དང་སྒྲིབ་ཤིང་། བཅུད་ཀྱིས་ལེན། ཚེ་དང་ལོངས་སྤྱོད། ཅེས་སོ། །མངོན་ཤེས་ལྔ་ནི་ལམ་ལྔ་དང་འབྲེལ་བའི་སྤྱན་ལྔ། ཤ་ཡི་སྤྱན། དཔག་ཚད་བརྒྱ་སྟོང་སོགས་ཀྱི་གཟུགས་ཕྲ་རག་མཐོང་། ལྷའི་སྤྱན། འཆི་འཕོ་དང་སྐྱེ་བ་ཤེས། ཤེས་རབ་ཀྱི་སྤྱན། བདག་མེད་གཉིས། ཆོས་ཀྱི་སྤྱན། རང་དང་སྤང་རྟོགས་མཉམ་པའི་རྒྱུད་ཚོད་རིག་པ་ཆོས་ཀྱི་སྤྱན་ཏེ་འཕགས་
པའི་གང་ཟག །སངས་རྒྱས་ཀྱི་སྤྱན། ཇི་ལྟ་ཇི་སྙེད། མངོན་ཤེས་དྲུག་ནི། རྫུ་འཕྲུལ་གྱིས་མངོན་ཤེས། གཅིག་དང་དུ་མར་སྤྲུལ་པ། ལྷའི་རྣ་བའི་མངོན་ཤེས། འཇིག་རྟེན་ཁམས་གྱི་སྒྲ་ཆེ་ཆུང་། གཞན་སེམས་ཤེས་པའི་མངོན་ཤེས། སྔོན་གྱི་གནས་རྗེས་སུ་དྲན་པའི་མངོན་ཤེས། རང་གཞན་གྱི་ཚེ་རབས། ལྷའི་མིག་གི་མངོན་ཤེས། གཟུགས་ཕྲ་རགས། ཟག་པ་ཟད་པའི་མངོན་ཤེས་སོ། །སྒྲིབ་གཉིས་སྤོང་བའི་ཐབས། འདི་རྣམས་བསྒོམ་རིམ་ལ་གལ་མི་ཆེ་ཡང་རྣམ་པ་རྐང་གྲངས་ཙམ་ཤེས་དགོས་པས་ཡིག་ཚོགས་ལ་མ་འཛེམ་བར་བྲིས་པའོ། །དམ་ཚིག་ཉམས་ཆག་བཤགས་པ་ལ་བཞི། རྟོགས་པ་ལྟ་བའི་སྒོ་ནས་བཤགས་པ། སྒོམ་པ་ཡུལ་དམ་པ་སྐུ་གསུམ་བླ་མ། བཤགས་རྒྱུའི་དམ་ཚིག་རྣམས་ཉམས་ཆག་འགལ་འཁྲུལ། ཁམས་གསུམ་གྱི་སྡིག་སྒྲིབ་ཐུན་མོང་དུ་བཤགས་པའོ། །མཆན། བསྐྱེད་རྫོགས་ཀྱི་སྒོ་ནས་བཤགས་པ། བསྲུང་བྱ་དམ་ཚིག་གི་སྒོ་ནས་བཤགས་པ། གདུང་བ་སྨྲེ་སྔགས་ཀྱི་སྒོ་ནས་བཤགས་པའོ། །དེ་ཡང་སྐུ་གསུམ་བླ་མའི་
དཀྱིལ་འཁོར་སྣང་ལ་རང་བཞིན་མ་གྲུབ་པར་བསྒོམ་པ་བསྐྱེད་རྫོགས་ཀྱི་བཤགས་པ་དང་། སྐུ་གསུང་ཐུགས་ཀྱི་དམ་ཚིག་གསུམ་དང་། ལྔ་ཚན་དུ་དབྱེ་བའི་ཡན་ལག་དམ་ཚིག་ཉེར་ལྔ་རྣམས་ལ་འགལ་ཉམས་འདས་རལ་བཤགས་པས་བསྲུང་བྱ་དམ་ཚིག་གི་སྒོ་ནས་བཤགས་པ། དུག་གསུམ་དུག་ལྔ་བག་ཆགས་འཁྲུལ་དབང་དུ་ཤོར་བ་རྣམས་ཞེ་གནོང་འགྱོད་དུ་བྱ་བ་གདུང་བ་སྨྲེ་སྔགས་ཀྱི་སྒོ་ནས་བཤགས་པ་དང་། བཤགས་བྱ་བཤགས་བྱེད་དམིགས་མེད་ཨ་ཏི་ཁྱབ་གདལ་གྱི་ཀློང་དུ་སྐྱེ་འཆི་འཕོ་འགྱུར་མེད་པའི་རིག་རྩལ་ཆོས་སྐུའི་རོལ་པ་ལ་བཟླ་བ་ཐག་གཅོད་པ། མཆན། ནི་རྟོགས་པ་ལྟ་བའི་སྒོ་ནས་བཤགས་པའོ། ༈ །བསྟོད་པ་ནི་སྐུ་གསུམ་བླ་མའི་ལྷ་ཚོགས་ལ་གསང་གསུམ་གྱི་ཡོན་ཏན་རྗེས་སུ་དྲན་པའི་སྒོ་ནས་བསྟོད་པ་སྟེ། ཤོ་ལོ་ཀ་དང་པོ་གཉིས་གནས་ལུགས་ངོ་བོ་རང་བཞིན་གྱི་ངང་ནས་བསྟོད་པ། ཧཱུྃ༔ དུས་མིན་འཆི་བ་འཇོམས་མཛད་པ༔ མན་
ཆད་སྣང་ཚུལ་སྤྲུལ་བསྒྱུར་གྱི་སྒོ་ནས་བསྟོད་པའོ། །མཆོད་འབུལ་བསྐང་བཤགས་བྱེད་པ་པོའི་སྤྲུལ་པའི་ལྷ་དང་ལྷ་མོ་རྣམས་བདག་མདུན་སོ་སོར་བསྟིམ་མོ། ༈ །བདག་མདུན་སོ་སོའི་ཡེ་ཤེས་པ་ནམ་མཁར་བཞུགས་པ་ལ། བདག་མདུན་སོ་སོའི་དབང་བཞི་ལེན་པ་ནི། རྡོ་རྗེ་གསུམ་གྱི་ཡི་གེ་སྔོན་དུ་འགྲོ་བས་ཡེ་ཤེས་ཀྱི་དཀྱིལ་འཁོར་ལས་འབྲུ་གསུམ་ཆར་ལྟར་བབས་ནས་བདག་མདུན་གྱི་དམ་ཚིག་པའི་གནས་གསུམ་ཐིམ་མེར་གྱིས་གང་བས་དབང་བཞིའི་བྱིན་རླབས་ཐོབ། སྐུ་བཞིའི་ས་བོན་རྒྱུད་ལ་བཞག་པར་བསམ། གོང་དུ་བསྐང་བཤགས་གྱི་སྐབས་སུ་སྡིག་སྒྲིབ་ཉེས་ལྟུང་ཐམས་ཅད་བྱང་ཞིང་དག་པར་གྲུབ་ཟིན་པས་འདིར་དབང་བཞིའི་བྱིན་རླབས་ཞུགས་པར་བསྒོམ་པ་ལས་སྡིག་སྒྲིབ་དག་པའི་དམིགས་པ་མི་དགོས་སོ། །དམ་ཚིག་པའང་ཡེ་ནས་དམ་ཡེ་དབྱེར་མེད་ཡིན་པས་དམ་ཚིག་པ་ལ་སྒྲིབ་པ་སྦྱང་བྱ་ཡོད་བསམ་པ་སོགས་
དམ་ཡེ་གཉིས་ལ་བཟང་ངན་གྱི་འཛིན་པ་མི་རུང་ངོ་། །སྔགས་ཀྱི་དབང་བཞི་ལེན་པའི་དོན་ནི། ཨོཾ་སྤྲུལ་སྐུ། ཨཱཿལོངས་སྐུ། ཧཱུྃ་ཆོས་སྐུ། བཛྲ་རྡོ་རྗེ་སྟེ་མི་ཆོད་པ་སོགས་རྡོ་རྗེའི་ཆོས་བདུན་ལྡན། གུ་རུ་ཡོན་ཏན་ཀུན་གྱི་འབྱུང་གནས་བླ་མ། པདྨ་རྒྱ་གར་གྱི་སྐད་སོར་བཞག་དོན་ལ་མ་ཆགས་དྲི་བྲལ། ཐོད་ཕྲེང་རྩལ་གསང་མཚན། བཛྲ་ས་མ་ཡ་ཛཿརྡོ་རྗེའི་དམ་ཚིག་ལས་མ་འདའ། སིདྡྷི་ཕ་ལ་ཧཱུྃ་ཨཱཿདངོས་གྲུབ་བཟང་པོ་ཧཱུྃ་གིས་བསྐུལ་བ་ཨཱཿཞེས་བསྟིམ་པའོ། ཧྲཱིཿཧཱུྃ་ཧ་རི་ནི་ས་ཞེས་པ་བླ་མ་དང་མཁའ་འགྲོ་སྡེ་ལྔའི་རྒྱུ་མ་ནོར་བ་རྩ་བའི་སྔགས་ཏེ་ས་བོན་ཨཱཿཡུ་སིདྡྷིཿཚེ་ཡི་དངོས་གྲུབ། ཀཱ་ཡ་ཨ་བྷི་ཥིཉྩ་ཨཱོཾ༔ སྐུ་ཡི་མངོན་པར་དབང་བསྐུར་ཅིག །ཝཱཀྐ་ཨ་བྷི་ཥིཉྩ་ཨཱཿ གསུང་གི་མངོན་པར་དབང་བསྐུར་ཅིག །ཙིཏྟ་ཨ་བྷི་ཥིཉྩ་ཧཱུྃ༔ ཐུགས་ཀྱི་མངོན་པར་དབང་བསྐུར་ཅིག །སརྦ་དྷརྨཱ་ཆོས་ཐམས་ཅད། དྷཱ་ཏུ་དབྱིངས་སམ་ཁམས། ཛྙཱ་ན་པཉྩ་ཡེ་ཤེས་ལྔ། ཨ་བྷི་ཥིཉྩ་
མངོན་པར་དབང་བསྐུར་བ། ཆོས་དབྱིངས་ཡེ་ཤེས་ལྔ་ཡི་དབང་ཐམས་ཅད་མངོན་པར་བསྐུར་དུ་གསོལ་ཞེས་པའོ། །ཨེ་ཤེས་རབ་སྟོང་པ་ཉིད། ཧཾཿཐབས་བདེ་བ་ཆེན་པོ། ཨཱཿདབྱེར་མེད་དུ་བསྟིམ་པ། ཨོཾ་ཧཱུྃ་ཏྲཱྃ་ཧྲཱིཿཨཱཿསྐུ་ལྔ་ཡེ་ཤེས་ལྔ། ཀཱ་ཡ་བཛྲ་སྐུ་རྡོ་རྗེ། ཝཱཀྐ་བཛྲ་གསུང་རྡོ་རྗེ། ཙིཏྟ་བཛྲ་ཐུགས་རྡོ་རྗེ། ཛྙཱ་ན་བཛྲ་ཡེ་ཤེས་རྡོ་རྗེ། སརྦ་བཛྲ་ཐམས་ཅད་རྡོ་རྗེ། དཔེ་རྒྱུན་ལ་ལར་སྭ་བྷ་ཝ་བཛྲ་ཞེས་རང་བཞིན་རྡོ་རྗེ་ཞེས་ཡོད་ཀྱང་ཡོངས་དགེའི་ཕྱག་བྲིས་དང་དཔལ་སྤུངས་སྤར་མ་ལ་མེད་པས་མི་དགོས་སོ། །ཀརྨ་སཱ་ག་རཱ་བཛྲ་ཕྲིན་ལས་རྒྱ་མཚོའི་རྡོ་རྗེ། ཨ་བྷི་ཥིཉྩ་མངོན་པར་དབང་བསྐུར་བ། ཏིཥྛ་གསུམ་ནི་སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབས་ནས་མི་འགྱུར་བརྟན་པར་གྱུར་ཅིག་ཅེས་པའོ། །འདི་ཡན་བླ་མ་སྐུ་གསུམ་གྱི་དབང་ལེན་ནོ། །ཨོཾ་ནི་སྔགས་ཀྱི་མགོ་འདྲེན། ཨ། འ་ཆུང་། ན་རོ། ཟླ་ཚེས། ཐིག་ལེ་ལྔ་སྐུ་ལྔ་ཡེ་ཤེས་ལྔ། ཤྲཱི་
དཔལ་སྟེ་གཉིས་སུ་མེད་པའི་ཡེ་ཤེས། མ་ཧཱ་ཆེན་པོ། གུ་རུ་བླ་མ། པདྨ་ཧེ་རུ་ཀ་པདྨ་ཁྲག་འཐུང་། ཀྲོ་དྷ་རཱ་ཛ་ཁྲོ་བོའི་རྒྱལ་པོ། ཨོཾ་ཨཱཿཧཱུྃ་སྐུ་གསུང་ཐུགས། ཨ་བྷི་ཥིཉྩ་མངོན་པར་དབང་བསྐུར་བ། དེ་ལྟར་ཁྲོ་བོའི་རྒྱལ་པོ་པདྨ་ཧེ་རུ་ཀས་སྐུ་གསུང་ཐུགས་ཀྱི་དབང་བསྐུར་བས་ཧཱུྃ་གསུམ་གྱིས་བཅུད་ཁམས་གསུམ་གྱི་སེམས་ཅན་ཐམས་ཅད་ཡི་དམ་ཁྲོ་བོའི་ལྷ་སྐུ། བྷྲཱུྃ་གསུམ་གྱིས་ཕྱི་སྣོད་ཁམས་གསུམ་པོ་གཞལ་ཡས་ཁང་གི་རང་བཞིན། རཀྵ་གསུམ་གྱིས་མཚན་འཛིན་འཁྲུལ་པའི་གདོན་བགེགས་ཐམས་ཅད་བསྲུང་བྱ་སྲུང་བྱེད་འཁོར་གསུམ་དམིགས་མེད་ཀྱི་ཀློང་དུ་རྒྱས་གདབ་པ། སྭཱ་ཧཱ་ནི་གཞི་ཚུགས་ཅིག་ཅེས་འགྲིབ་པ་མེད་པར་འཕེལ་བའི་དོན། མངྒ་ལཾ་ཤྲཱི་ཛྭ་ལ་སཱུརྱ་ཙནྡྲ་ཙཀྲ་མཎྜལ་ཏིཥྛ་བཀྲ་ཤིས་དཔལ་འབར་ཉི་ཟླའི་འཁོར་ལོའི་དཀྱིལ་འཁོར་འགྱུར་མེད་དུ་བརྟན་པ། འདི་ཡན་ཡི་དམ་ལྷ་ཡི་དབང་ལེན་ནོ། །ཧཱུྃ་ཡེ་ཤེས་ལྷ་ཡི་ས་བོན་དུ་བདུད་ཀྱི་ས་བོན་ཏེ།
འཇིག་རྟེན་དང་འཇིག་རྟེན་ལས་འདས་པའི་ཆོས་སྐྱོང་ཕྲིན་ལས་མགོན་པོའི་སྲོག་ཡིག་ནས་བསྐུལ་ཏེ་ཨ་བྷི་ཥིཉྩ་མངོན་པར་དབང་བསྐུར་བ། ཧཱུྃ་དུ་ལས་མགོན་ཐུགས་སྲོག །ཙཀྲ་འཁོར་ལོ། ཀརྨ་ཙཀྲ་ཕྲིན་ལས་འཁོར་ལོ། ཧཱུྃ་དུ་ལས་མགོན་སྲོག་སྔགས། རཀྵ་སྲུང་བ། བྷྲཱུྃ་མི་འགྱུར་བརྟན་པ། སྭཱ་ཧཱ་གཞི་ཚུགས་ཞེས་རབ་ཏུ་བརྟན་པ། ས་མ་ཡ་རཀྵ་ཡང་དམ་ལས་མ་འདས་སྲུང་ཅིག་ཅེས་དོན་ཕྲིན་ལས་ཀྱི་འཁོར་ལོ་རབ་ཏུ་བསྐོར་བ་སྟེ་ཕྲིན་ལས་སྒྲུབས་ཤིག་སྲུང་ཞིག་དམ་ལ་མ་འདའ་ཞིག་ཅེས་ཆོས་སྐྱོང་སྲུང་མའི་དབང་བླངས་ནས་ཕྲིན་ལས་རབ་འབྱམས་ཀྱི་འཁོར་ལོ་བསྒྱུར་བ་སྟེ་ཁ་ལོ་བསྒྱུར་བའོ། །སྔགས་གཅོད་མཚམས་ཡོངས་དགེའི་ཕྱག་བྲིས་དང་དཔལ་སྤུངས་སྤར་མ་གཉིས་ཀར་འདི་ལྟར་ཡོད་པས་ཤིན་ཏུ་དག་པས་འདི་ལྟར་དགོས། དཔེ་ལ་ལར་ཆོས་སྐྱོང་གི་སྲོག་ཡིག་ཡི་དམ་གྱི་མཐར་སྦྱར་ནས་གཏེར་ཚག་བྱས་པ་དང་། ཨ་བྷི་ཥིཉྩ་ཧཱུྃ་དུ་
ཞེས་སྦྲེལ་ཞིང་ཙཀྲ་ཀརྨ་ཙཀྲ་སོགས་སྦྲེལ་བ་ནི་མ་དག་པ་ཁོ་ནའོ། །སྐུ་གསུམ་བླ་མ་མཁའ་འགྲོའི་ཚོགས་སོགས་ཀྱི་ཚེ་བདག་མདུན་གྱི་ཡེ་ཤེས་པ་ལྷ་ཚོགས་སོ་སོར་བསྟིམ་མོ། ༈ །བསྙེན་དམིགས་ནི། ཧཱུྃ༔ རང་རིག་བླ་མར་གསལ་བ་ཡི༔ སོགས་ཀྱི་བསྙེན་དམིགས་གཞུང་གསལ་ལྟར་ལ་པདྨ་དང་རྡོ་རྗེའི་ཁ་དོག་ཡོངས་དགེ་ཉིད་ཀྱིས་ཞལ་གསུང་ཟིན་བྲིས་ཉུང་ངུ་རྣམས་སུ་གསལ་ཁ་མི་འདུག །སི་ཏུ་པདྨ་ཉིན་བྱེད་དང་མཁས་གྲུབ་བསྟན་འཕེལ་གྱི་ཟིན་བྲིས་སུ་པདྨའི་ཁ་དོག་མི་གསལ་ཞིང་རྡོ་རྗེ་གསེར་གྱི་རྡོ་རྗེར་གསུངས་འདུག་པ་ཞལ་རྒྱུན་འདྲ་ཡིན་ནམ། མཁས་གྲུབ་དམ་པ་དེ་གཉིས་ལ་ནོར་འཁྲུལ་མེད་པར་གོར་མ་ཆག །རང་རེས་ནི་དབུས་ཡིག་ཆུང་གཏོར་གདན་དཀྱིལ་འཁོར་བྲི་བྱར་དུ་དེ་སྟེང་པདྨ་འདབ་བརྒྱད་དཀར༔ དབུས་སུ་རྡོ་རྗེ་རྩེ་ལྔ་དམར༔ ཞེས་ལུང་གྲངས་སུ་བྱས་ནས། བླ་མ་དྲག་པོ་རྩལ་གྱི་ཐུགས་ཀར་པདྨ་དཀར་པོ་འདབ་མ་
བརྒྱད་པའི་སྟེང་དུ་ཉི་མ་དམར་པོ། ཟླ་བ་དཀར་པོ། པདྨའི་རིགས་སོ་སོར་རྟོགས་པའི་རང་རྩལ་རྡོ་རྗེ་དམར་པོ་རྩེ་ལྔ་པའི་ལྟེ་བར་ཧཱུྃ་མཐིང་གི་མཐར་སྔགས་ཕྲེང་ཞལ་ངོ་ཕྱི་ལ་བསྟན་པ་གཡོན་དུ་བཀོད་ལ། འཁོར་དུས་གཡས་སུ་འཁོར་བར་བསྒོམ་དགོས། མཁས་གྲུབ་འཇམ་དབྱངས་རྣམ་རྒྱལ་གྱིས་ཟིན་བྲིས་སུ་སྔགས་ཕྲེང་ཁ་དོག་གསལ་ཆ་མི་འདུག་གཏེར་སྨྱོན་ཞལ་གསུངས་ལ་ཡང་གསལ་ཁ་མི་འདུག་པདྨ་ཉིན་བྱེད་དབང་པོའི་ཟིན་བྲིས་སུ་ཐོད་ཕྲེང་རྩལ་གྱི་སྔགས་ཕྲེང་མཐིང་ཁ། མཆན། གསུངས་འདུག །ཡོངས་དགེའི་ཞལ་གསུངས་ལས། །དང་པོ་བླ་མ་བསྒྲུབས་པའི་ཚེ༔ ལས་བྱང་གཞུང་བཞིན་དབང་བཞི་བླངས༔ བསྙེན་མཚམས་ཐུན་བར་རྩེ་གཅིག་ཏུ༔ དང་པོ་སྤྱན་འདྲེན་སྔགས་བྱང་ནི༔ བརྒྱ་འམ་ཉེར་ལྔ་དག་པར་བསྒྲངས༔ དེ་ཚེ་སྤྱན་འདྲེན་དམིགས་པ་བྱེད༔ གཉིས་པ་རྩ་སྔགས་གང་འགྲུབ་བཟླས༔ དེ་ཚེ་རང་ཉིད་བླ་མ་བསྐྱེད༔ སྐུ་གསུམ་བླ་མ་ཐོ་བརྩེགས་བསྒོམ༔ རིགས་ལྔ་མཁའ་
འགྲོ་ཁྲོམ་ཚོགས་བསྐྱེད༔ དེ་ཚེ་ཚེ་སྒྲུབ་དམིགས་པ་སྔགས་ཕྲེང་དཀར་པོ་དང་ཚེ་བཅུད་བསྡུ་བསྟིམ། མཆན། བཅས༔ དེ་ནི་བླ་མའི་བསྙེན་ཐེམ་ཡིན༔ ཅེས་སོ། །དང་པོ་སྤྱན་འདྲེན་གྱི་སྔགས་བཟླ་ཚེ། ཟངས་མདོག་དཔལ་རི་སོགས་ཕྱོགས་བཅུའི་ཞིང་ཁམས་མཐའ་ཡས་ནས་རྩ་གསུམ་རྒྱལ་བ་རབ་འབྱམས་རྒྱ་མཚོའི་ལྷ་ཚོགས་རྣམས་སྐུ་པད་འབྱུང་། གསུང་སྔགས་ཕྲེང་དབྱངས་གསལ། ཐུགས་ཕྱག་མཚན་རྡོ་རྗེ་ཐོད་པ་ཁ་ཊྭཱཾ་རྣམས་ཆར་ལྟར་བབ་ནས་རང་ལ་ཐིམ་པས། རང་གི་ལུས་ངག་ཡིད་གསུམ་ཨོ་རྒྱན་ཆེན་པོའི་སྐུ་གསུང་ཐུགས་སུ་དབྱེར་མེད་དུ་བྱིན་གྱིས་བརླབས་པར་བསམ། ༈ །རྒྱུན་བསྙེན་བཟླས་པའི་ཚེ་སྔགས་ཕྲེང་དང་པོས་མི་འཁོར་བར་གསལ་བཏབ། གསལ་ཐེབས་པ་དང་དང་པོ་དལ་བུས་གཡས་སུ་འཁོར། དེ་ནས་ཇེ་མྱུར་དུ་འཁོར་བར་དམིགས། དང་པོ་སྔགས་ཕྲེང་བཀོད་པའི་ཚེ་ཐོད་ཕྲེང་རྩལ་གྱི་སྔགས་སྒྲ་ལྷང་ལྷང་སྒྲོགས་པར་བསམ།
འཁོར་ཚེའང་སྔགས་མགྱོགས་བུལ་སྔགས་འཁོར་དང་མཐུན་པར་དི་རི་རི་སྒྲོགས་པར་བསྒོམ། དེ་ནས་བདག་མདུན་གྱི་སྔགས་འཁོར་ལས་འོད་ཟེར་འཕྲོས་པས་ཕྱི་སྣོད་ལ་ཕོག་པས་གཞལ་ཡས་ཁང་། ནང་བཅུད་འགྲོ་བ་རིགས་དྲུག་གཟུགས་ཅན་གཟུགས་མེད་རྣམས་ཀྱང་བླ་མ་ཨོ་རྒྱན་ཆེན་པོ་རྩ་བ་གསུམ་གྱི་དཀྱིལ་འཁོར་དུ་དམིགས། དེ་དག་ཐམས་ཅད་ཀྱི་སྔགས་སྒྲས་སྣོད་བཅུད་འཇིག་རྟེན་ཐམས་ཅད་འུར་འུར་ཆེམ་ཆེམ། ཤིག་ཤིག །ཡོམ་ཡོམ་དུ་གཡོ་ཞིང་། འགྲོ་བ་རིགས་དྲུག་གི་སྡུག་བསྔལ་རྒྱུ་ས་བོན་བག་ཆགས་བཅས་པ་དག་ནས་དག་པའི་ཞིང་འབའ་ཞིག་ཏུ་གྱུར། དྲེགས་པ་སྡེ་བརྒྱད་གདུག་པ་ཅན་རྣམས་ཀྱི་སྡང་སེམས་ཞི། རྒྱལ་བ་རབ་འབྱམས། ཡི་དམ་ལྷ་ཚོགས། དཔའ་བོ་མཁའ་འགྲོ། ཆོས་སྐྱོང་སྲུང་མ་རྣམས་ཀྱི་ཐུགས་དམ་གྱི་རྒྱུད་བསྐུལ་བ་སྟེ། སྔགས་ཀྱི་འོད་ཟེར་དེ་འཕྲོ་ཞིང་ཕོག་པ་ཙམ་གྱིས་ཐུགས་བརྩེ་བ་ཆེན་
པོས་རྗེས་སུ་བཟུང་སྟེ་མཆོག་དང་ཐུན་མོང་གི་དངོས་གྲུབ་གསང་བ་གསུམ་གྱི་བྱིན་རླབས་ཐམས་ཅད་འོད་ཟེར་འཇའ་ཚོན་སྣ་ལྔའི་རྣམ་པར་སྤྱན་དྲངས་ནས་བདག་མདུན་སོ་སོར་བསྟིམ། དེ་བཞིན་དུ་སྣང་སྲིད་འཁོར་འདས་ཀྱི་ཚེ་དཔལ་མཐུ་སྟོབས་གཟི་བརྗིད་རྣམས་ཀྱང་འོད་ཀྱི་རྣམ་པར་བསྡུས་ནས་རང་གི་སྒོ་གསུམ་ལ་མཚོ་ལ་ཆར་པ་བབ་པ་ལྟར་སིབ་སིབ་ཐིམ་པར་བསྒོམ། བསྙེན་དམིགས་སྔགས་འཁོར་མདུན་བསྐྱེད་ལའང་བདག་བསྐྱེད་ལྟར་བསྒོམ་དགོས། བསྙེན་སྒྲུབ་སྐབས་སུ་བདག་བསྐྱེད་གཙོ་ཆེ་ལས་སྦྱོར་ཟློག་སྒྲུབ་སོགས་ལ་མདུན་བསྐྱེད་གཙོ་ཆེ། ལར་གསང་བ་སྤྱི་ལུགས་སུ་སྲོག་ཡིག་སྔགས་ཕྲེང་རྣམས་ལྷ་རང་མདོག་བསྒོམ་པ་གཙོ་ཆེ། འདི་ལའང་སྔ་དྲོ་ཕྱི་དྲོ་སོགས་ལས་བཞིའི་དམིགས་པའི་ཁ་བསྒྱུར་སྦྱར་ཆོག་གོ ༈ །ཟིན་བྲིས་དམིགས་ཐུན་ལས། ལས་གཞུང་བཞིན་དུ་དྲག་པོ་རྩལ་གསལ་བའི། །ཐུགས་ཀའི་ཧཱུྃ་ལས་འོད་ཟེར་དཔག་
མེད་འཕྲོས། །འཕགས་མཆོད་སེམས་ཅན་སྡིག་སྒྲིབ་ལེགས་སྦྱངས་ནས། །ཞིང་ཁམས་རབ་འབྱམས་སངས་རྒྱས་བྱང་སེམས་དང་། །ཡི་དམ་མཁའ་འགྲོ་ཆོས་སྐྱོང་གཏེར་བདག་ཚོགས། །སྐུ་ནི་པད་འབྱུང་སྐུ་དང་གསུང་དབྱངས་ཚིག །ཨཱ་ལི་ཀཱ་ལི་དཀར་དམར་ཐུགས་རྡོ་རྗེ། །ཆར་བཞིན་བབ་ནས་རང་ལ་སིབ་སིབ་ཐིམ། །སྐུ་གསུང་ཐུགས་ཡོན་ཕྲིན་ལས་བྱིན་གྱིས་བརླབས་པར་བསམ། །རང་ཉིད་བླ་མ་དྲག་རྩལ་གསལ་བ་ཡི། །ཐུགས་ཀར་པད་ཟླའི་སྟེང་དུ་རྡོ་རྗེ་ཧཱུྃ། །རྡོ་རྗེའི་དཀྱིལ་དབུས་ཧཱུྃ་མཐར་སྔགས་གཡས་སུ། །འཁོར་བའི་རང་སྒྲས་ཕྱི་སྣོད་ནང་བཅུད་སོགས། །གཟུགས་ཅན་གཟུགས་མེད་པད་འབྱུང་སྐུར་གྱུར་ནས། །རང་ཉིད་རམ་འདེགས་ཚུལ་དུ་སྔགས་རམ་འཇོག །འཇིག་རྟེན་ཁམས་ཀུན་ཤིག་ཤིགས་ཡོམ་ཡོམ་གཡོ། །མ་ཡེངས་ཁྱབ་གདལ་ངང་དུ་བརྩོན་ལ་བཟླ། །ཅེས་པའོ། །ལས་གཞུང་རྡོ་རྗེ་གྲོ་ལོད་ལས། ཟིན་བྲིས་
དམིགས་ཐུན་ཕྲན་བུ་འདི༔ མ་བཅོས་ལེགས་པར་བཞུགས་སུ་ཆུག༔ ཅེས་གསུངས་པའི་ཟིན་བྲིས་ལས་བཅོས་བསྒྱུར་མེད་པར་ཡིད་ཆེས་པའི་ཕྱིར་རྒྱབ་སྐྱོར་ལུང་འདྲེན་དུ་བྲིས་པའོ། ༈ །ཡང་དམིགས་ཐུན་ཟིན་བྲིས་ལས། ཕྲིན་ལས་བཞི་བསྒྲུབ་དམིགས་པ་ཕྲན་བུ་ནི༔ སྔ་དྲོ་ལྷ་གཟུགས་སྔགས་ཕྲེང་དཀར་པོ་བསྒོམ༔ འཆི་མེད་ཚེ་དབང་རིག་འཛིན་རྩལ་རྫོགས་བསམ༔ ཉིན་གུང་ལྷ་གཟུགས་སྔགས་ཕྲེང་སེར་པོ་བསྒོམ༔ དབང་ཐང་ལོངས་སྤྱོད་འབྱོར་དྲུག་འབྱོར་པ་དྲུག་ནི། ཚེ། བསོད་ནམས། དཔལ། གཟི་བརྗིད། འཁོར་སློབ། ལོངས་སྤྱོད་འབྱོར་པའོ། རྒྱས་པར་བསམ༔ དགོང་མོ་ལྷ་གཟུགས་སྔགས་ཕྲེང་དམར་པོ་བསྒོམ༔ སྣོད་བཅུད་སྣང་སྲིད་འཁོར་འདས་དབང་སྡུད་བསམ༔ སྲོད་ལ་ལྷ་གཟུགས་སྔགས་ཕྲེང་མཐིང་གར་བསྒྱུར༔ བསྟན་དགྲ་གདོན་བགེགས་ཐལ་བར་བརླག་པར་བསམ༔ ཉིན་བསྐོར་ཕྲིན་ལས་བཞི་བསྒྲུབ་དམིགས་པ་ལགས༔ གུ་རུ་ས་དྷ་ན་ཝརྡྷནྟུ། བླ་སྒྲུབ་འཕེལ་བར་
གྱུར་ཅིག། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།