ཟབ་གསང་དོན་བསྡུས་ཚེ་སྒྲུབ་ཀྱི་དམིགས་རིམ།
ཟབ་གསང་དོན་བསྡུས་ཚེ་སྒྲུབ་ཀྱི་དམིགས་རིམ་བཞུགས་སོ། །
ཨོཾ་སྭསྟི། སྦས་གསང་དོན་བསྡུས་ཚེ་སྒྲུབ་ཀྱི་དམིགས་རིམ་ལ། ཤྲཱི་མ་ཧཱ་གུ་རུ་པདྨ་བཛྲ་ཡེ༔ ཞེས་བསྐྱེད་པ་རྐྱེན་གྱིས་སྔགས་བཟླས་པ་ཙམ་གྱིས་ཆུ་ལ་ཉ་ལྡང་བ་ལྟར་ཐབས་བདེ་བ་ཆེན་པོ་ཡབ་ཀྱི་རྣམ་པར་གསལ་བ་ལ། ཤེས་རབ་སྟོང་པ་ཉིད་ཡུམ་ཡེ་ཤེས་མཚོ་རྒྱལ་གྱི་རྣམ་པར་ཤར་བ་སྐུ་མདོག་དཀར་གསལ་མདའ་དར་ཚེ་བུམ་འཛིན་པ་ལོངས་སྐུའི་རྒྱན་རྫོགས་པ། ཡབ་རྡོ་རྗེ་དྲག་པོ་རྩལ་གཞུང་གསལ་ལྟར་ལ་འཁྲིལ་སྦྱོར་བདེ་སྟོང་ལྷན་ཅིག་སྐྱེས་པའི་དགའ་
བས་ཐུགས་རྒྱུད་ཡོངས་སུ་གང་བར་དམིགས་པ་ནི་འོད་ཟེར་སྤྲོ་བསྡུའི་གཞི་འགོད་པའོ། །གོང་གི་སྔགས་དོན་ཡོངས་དགེ་ཉིད་ཀྱིས་ཕྱག་མཆན་གནང་བ་ལྟར་ན། དཔལ་ཆེན་པོ་བླ་མ་འགྱུར་མེད་རྡོ་རྗེ་ཞེས་དོན་འགྱུར་མཛད་པའོ། །ཤྲཱིན། ཤྲཱིཀ྄་བརྟན་པའི་དབྱིངས་སམ་ཁམས་ལས་གཉིས་སུ་མེད་པའི་ཡེ་ཤེས་ཆེན་པོས་སྲིད་ཞིའི་མཐའ་ལ་མི་གནས་པ། མ་ཧཱ་ཆེན་པོ། གུ་རུ་བླ་མ། པདྨ་བཛྲ་ཡེ། ཐབས་དང་ཤེས་རབ་ཟུང་དུ་འཇུག་པའི་དོན་ཏེ། ཆོས་ཉིད་རིས་མེད་
སྲིད་ཞི་ཀུན་ཁྱབ་ཀྱི་ཡེ་ཤེས་སམ། འཁོར་འདས་ཀུན་ལ་ཁྱབ་པའི་ཡེ་ཤེས་ཀྱི་རང་རྩལ་ལམ་རང་སྣང་ལས། སྐད་ཅིག་དྲན་རྫོགས་སྣང་སྟོང་ཟུང་འཇུག་ལྷ་སྐུ་ཞལ་སྦྱོར་གྱི་རྣམ་པར་གསལ་གནས་གསུམ་འབྲུ་གསུམ་གྱིས་མཚན་པ་ལས། པདྨ་ཉི་ཟླ་རྡོ་རྗེ་ཧཱུྃ་དང་སྔགས་ཕྲེང་གསལ་མ་ཐེབས་ཀྱང་མི་འགལ་ལ། བསྐྱེད་རྫོགས་བྱང་ཞིང་དམིགས་པ་གསལ་བས་དྲག་རྩལ་གཞུང་ལྟར་གྱི་ཐུགས་སྨད་དུ་གནས་གསུམ་བྱིན་གྱིས་བརླབ་ཀྱི་ཧཱུྃ་ཡིག་དང་ཐུགས་དབུས་སུ་པད་དཀར་འདབ་བརྒྱད་ཀྱི་ཉི་ཟླའི་སྟེང་དུ་ཡེ་ཤེས་སེམས་དཔའི་ངོ་བོ་རྡོ་རྗེ་དམར་པོ་རྩེ་ལྔ་པའི་ལྟེ་བར་ཏིང་ངེ་འཛིན་སེམས་དཔའ་རྒྱལ་བ་ཐམས་ཅད་ཀྱི་ཐུགས་རྡོ་རྗེའི་ངོ་བོའམ་དྭངས་མའི་ཐུགས་སྲོག་ཧཱུྃ་ཡིག་མཐིང་གསལ་གནམ་སྔོན་ཞུན་མའམ་བཻ་ཌཱུརྱ་སྔོན་པོ་ལས་གྲུབ་པ་ལྟ་བུ། ཧ་ཡིག །འ་ཆུང་། ཞབས་ཀྱུ། ཟླ་ཚེས། ཐིག་ལེ་ནཱ་ད་དང་བཅས་པ་གཟབ་ཡིག་འབྲུ་ཚུགས་ལེགས་པ་གདོང་
མདུན་བསྟན་ནམ། ལེབ་ཞལ་གྲུབ་དབང་ཆགས་མེད་ཞབས་ཀྱིས་ཡིག་མགོའི་ཐད་དེ་མདུན་དུ་བསྟན་དགོས་གསུངས། མཆན། གང་བདེ་གསལ་བ་དེ་ལས་འོད་ཟེར་སྤྲོ་བསྡུ་བྱ་བ་ཡིན། བསྡུ་ན་གནས་གསུམ་བྱིན་བརླབས་ཀྱི་ཐུགས་ཀའི་ཧཱུྃ་ཡིག་ལས་སྤྲོ་བསྡུ་བྱས་ཀྱང་ཆོག་སྟེ། རྒྱལ་བ་ཐམས་ཅད་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ་ཡིན་པའི་ཕྱིར་རྒྱས་བསྡུས་གང་ལྟར་ཡང་ཐུགས་སྲོག་ཧཱུྃ་ལས་འོད་ཟེར་དཀར་པོ་འཕྲོས། རྩ་གསུམ་རྒྱལ་བ་རབ་འབྱམས་རྒྱ་མཚོར་སྐུ་མཉེས་པའི་མཆོད་པ་ཕུལ། སྐུ་ཡི་བྱིན་རླབས་དངོས་གྲུབ་ཐམས་ཅད་འཆི་མེད་ཚེ་ཡི་བདུད་རྩི་འོ་མའི་རྒྱུན་ལྟ་བུས་རང་གཞན་སེམས་ཅན་ཀུན་གྱི་ལུས་ལ་ཕོག་པས་འཆི་མེད་འཇའ་ལུས་རྡོ་རྗེའི་སྐུ་འགྲུབ། འགྱུར་མེད་ཡེ་ཤེས་དྭངས་མའི་ལུས་ཐོབ་སྐྱེ་འཆི་འཕོ་འགྱུར་བགྲེས་རྒུད་དང་བྲལ་བར་དམིགས། རྒྱས་སྐབས་ཐུགས་ཀར་སྔགས་ཕྲེང་དཀར་པོ་གཡས་སུ་འཁོར་བར་བསྒོམ་ཞིང་བཟླས་པ་བྱ།
བསྡུ་ན་འོད་ཟེར་སྤྲོ་བསྡུ་ཁོ་ན་དམིགས་ཞིང་བཟླ། དེ་བཞིན་ཐུགས་སྲོག་ལས་འོད་ཟེར་དམར་པོ་ལྕགས་ཀྱུའི་དབྱིབས་ཞེས་འོད་ཟེར་གྱི་སྣེ་ལྕགས་ཀྱུ་ལྟར་འགུགས་པ་གྲངས་མེད་པ་སྤྲོས་ནས་རྩ་གསུམ་རྒྱལ་བ་རབ་འབྱམས་ཐམས་ཅད་དང་། ཁྱད་པར་དུ་ཡི་དམ་ཞི་ཁྲོའི་ལྷ་ཚོགས་ལ་གསུང་མཉེས་པའི་མཆོད་པ་འབུལ། དེ་རྣམས་ཀྱི་ཐུགས་རྗེ་ནུས་རྩལ་གྱི་བྱིན་རླབས་བདུད་རྩི་དམར་པོའི་རྣམ་པར་སྤྱན་དྲངས་ནས་རང་གཞན་སེམས་ཅན་ཐམས་ཅད་ཀྱི་ངག་དང་མགྲིན་པར་ཐིམ་པས་ཚངས་དབྱངས་ཡན་ལག་དྲུག་ཅུའི་ཡོན་ཏན་མ་ལུས་པ་རྫོགས་ནས་འགགས་མེད་གྲགས་སྟོང་གི་ནུས་རྩལ་མ་ལུས་པ་ཡོངས་སུ་རྫོགས་པ་རྒྱལ་བའི་གསུང་གི་མི་ཟད་པ་རྒྱན་གྱི་འཁོར་ལོ་ལ་དབང་ཐོབ་པར་དམིགས། གསུང་དབྱངས་ཡན་ལག་དྲུག་ཅུ་ལ་དེ་བཞིན་གཤེགས་པའི་གསང་བ་བསམ་གྱིས་མི་ཁྱབ་པའི་མདོར་གསུང་དབྱངས་ཡན་ལག་དྲུག་ཅུ་རྩ་གཉིས་སུ་
གསུངས་པ་ཐུབ་པ་དགོངས་རྒྱན་སྡོམ་པར་བཀོད་པ་དང་། སྤྱི་མདོ་དགོངས་འདུས་ལས་གསུངས་པ་སོགས་ངོས་འཛིན་འདྲ་མིན་ཡོད་ཀྱང་ཡི་གེ་མང་དུ་དོགས་པས་ཤེས་པར་འདོད་ན་དེ་དང་དེ་ལྟར་རོ། །རྒྱས་སྐབས་སྔགས་ཕྲེང་ཁ་དོག་དམར་པོར་བསྒྱུར་ཞིང་བཟླས་པ་བྱ། བསྡུ་ན་འོད་ཟེར་སྤྲོ་བསྡུ་ཁོ་ནས་ཆོག །ཡང་བདག་བསྐྱེད་གུ་རུའི་ཐུགས་ཀ་ནས་འོད་ཟེར་མཐིང་གསལ་ནམ་མཁའ་དྭངས་བ་ལྟ་བུར་འཕྲོས། རྩ་གསུམ་རྒྱལ་བ་རབ་འབྱམས་དང་ཁྱད་པར་དཔའ་བོ་དང་མཁའ་འགྲོའི་ཚོགས་ལ་ཐུགས་མཉེས་པའི་མཆོད་པ་ཕུལ། དཔའ་བོ་དང་དཔའ་མོའི་ཚོགས་རྣམས་བདེ་སྟོང་དགྱེས་པ་ཆེན་པོའི་དབྱིངས་སུ་རྣམ་པར་རོལ་པ་ལས། བྱང་ཆུབ་སེམས་ཀྱི་བདུད་རྩི་བྱང་སེམས་དཀར་དམར་གྱི་རྒྱུན་ཆར་ལྟར་བབ་ནས་རང་གཞན་སེམས་ཅན་ཐམས་ཅད་ཀྱི་ཡིད་དང་ཐུགས་ཀར་ཐིམ་པས་བདེ་བ་དང་སྟོང་པ་དབྱེར་མི་ཕྱེད་པ་སྣང་བཞིན་དུ་
སྟོང་ལ་སྟོང་བཞིན་དུ་སྣང་བ་འདི་ཞེས་བློ་ཡི་རྟོག་པའི་ཡུལ་ལས་འདས་པ། འཆི་མེད་གཉུག་མ་ལྷན་ཅིག་སྐྱེས་པ་རིག་པའི་རང་རྩལ་ཀ་དག་ཆོས་སྐུའི་དོན་རྟོགས་པར་དམིགས། རྒྱས་སྐབས་སྔགས་ཕྲེང་མཐིང་གར་བསྒྱུར་ལ་བཟླས་པ་བྱ། བསྡུ་ན་སྤྲོ་བསྡུའི་དམིགས་པ་དང་བཅས་ཏེ་བཟླའོ། །ཡང་བདག་བསྐྱེད་ཐུགས་སྲོག་ལས་འོད་ཟེར་ལྗང་གུ་མ་རྒད་ཞུན་མའི་མདོག་ལྟ་བུ་སྣང་སྲིད་འཁོར་འདས་ཁྱབ་པར་འཕྲོས་རྩ་གསུམ་རྒྱལ་བ་རབ་འབྱམས་དང་ཁྱད་པར་བཀའ་སྲུང་དམ་ཅན་རྒྱ་མཚོ་ལ་ཕོག་པས་ཐུགས་དམ་བསྐང་ཞིང་དེ་རྣམས་ཀྱིས་ཞི་རྒྱས་དབང་དྲག་གི་ཕྲིན་ལས་བཞི་ཐོགས་མེད་དུ་བསྒྲུབས་པའི་ཡོན་ཏན་དང་དངོས་གྲུབ་ཐམས་ཅད་འོད་ཟེར་འོད་ཟེར་སྣ་བཞི་དཀར་སེར་དམར་སྔོ། འདྲེས་པ་ལས་ཁ་དོག་ལྗང་གུ་འབྱུང་བ་དུས་འཁོར་ལས་བཤད། ད་ལྟ་སྣ་ཚོགས་མདོག་ལ་ལྗང་གུ་བྱེད་པ་དེ་དོན་ཡིན། མཆན། སྣ་ལྔ་འདྲེས་པས་ཁ་དོག་ལྗང་ནག་སྟེ་དྲག་པོའི་ཕྲིན་ལས་སྒྲུབ་པ་ལྟར། ལྗང་སྨུག་གི་རྣམ་པ་རང་
གཞན་སེམས་ཅན་ཀུན་གྱི་ལུས་ངག་ཡིད་གསུམ་ལ་སིབ་སིབ་ཐིམ་པར་དམིགས། རབ་འབྱམས་རྒྱལ་བ་ཀུན་གྱི་ཡོན་ཏན་དང་ཕྲིན་ལས་ལ་དབང་འབྱོར་ཏེ་རང་དབང་ཐོབ་ནས་ཐབས་མཁས་པའི་མཛད་པ་ཕྲིན་ལས་མཐའ་ཡས་པས་མཁའ་མཉམ་འགྲོ་བའི་རེ་བ་སྐོང་བར་དམིགས། རྒྱས་སྐབས་སྔགས་ཕྲེང་ལྗང་གུར་བསྒྱུར་ཞིང་བཟླས་པ་བྱ། བསྡུ་ན་འོད་ཟེར་སྤྲོ་བསྡུ་ཁོ་ནས་འཐུས་ཞིང་དམིགས་པ་གསལ་བར་བསྒོམས་ལ་བཟླའོ། །དེ་དག་ནི་བསྐྱེད་རིམ་དམིགས་བཅས་ལྷའི་རྣལ་འབྱོར་ཟབ་མོ་ལ་བརྟེན་ནས་ཚེ་དང་ཡེ་ཤེས་སྤེལ་བའོ། །གཉིས་པ་ཀ་དག་རྫོགས་པ་ཆེན་པོའི་ངང་ལ་མཉམ་པར་བཞག་ནས་ཚེ་དང་ཡེ་ཤེས་སྤེལ་བ་ནི། ཚེ་སྒྲུབ་འདི་བདག་བསྐྱེད་ཁོ་ན་མ་གཏོགས་མདུན་བསྐྱེད་ལ་བསྒོམ་མི་དགོས་སོ། །བདག་བསྐྱེད་གུ་རུ་ཡབ་ཡུམ་དམ་ཡེ་དབྱེར་མེད་ནམ་མཁའ་ལ་འཇའ་ཡལ་བ་ལྟར་དབྱིངས་སྟོང་པ་ཉིད་ཀྱི་ངང་དུ་བསྡུ། དེ་
ཡང་དམིགས་གཏད་མཚན་འཛིན་ཐམས་ཅད་དང་བྲལ་བ་ཀ་དག་གདོད་མའི་གནས་ལུགས་སམ། ཡེ་དག་གམ། ཡེ་སྟོང་དེ་བཞིན་ཉིད་ཀྱི་ཀློང་དུ་ཐིམ་པས། ཕུང་པོ་གདོས་བཅས་མཚན་མར་འཛིན་པ་རགས་པའི་ལུས་སྣང་ཡང་དབྱིངས་སྟོང་པ་ཉིད་ཀྱི་ངང་དུ་ཡལ་ཞིང་འཆི་མེད་གཉུག་མ་ཆོས་སྐུའི་རང་ཞལ་མངོན་སུམ་དུ་རྟོགས་པས་རིག་རྩལ་མ་འགགས་འཁོར་ཡུག་འབྱམས་སུ་ཀླས་པས་སྐྱེ་འཆིའི་འཇིགས་པ་དང་བྲལ་བས། ཡེ་ནས་རང་ལ་རང་ཆས་སུ་གནས་པའི་སོ་སོ་རང་རིག་པའི་ཀུན་བཟང་མངོན་དུ་གྱུར་པས་མ་གྱུར་ཡིད་ཅན་འགྲོ་བ་འདི་རྣམས་ཀྱང་མཐར་ཐུག་གི་འབྲས་བུ་ཀུན་ཏུ་བཟང་པོའི་ས་ལ་གནས་པར་གྱུར་ཅིག་ཅེས་པའོ། །དེ་ཉིད་བསྒོམས་པས་ཉམས་སུ་ལེན་པ་ནི་བདག་བསྐྱེད་དམིགས་གཏད་མཚན་འཛིན་དང་བྲལ་བའི་ཀློང་དུ་ཐིམ་མོ་སྙམ་པའི་བློ་དེ་གའི་རང་ངོ་ལ་ཅེ་རེ་བལྟས་པས་སྣང་བ་མ་འགགས་ལ་དེར་འཛིན་བློའི་དྲི་མ་དང་
བྲལ་བའི་གསལ་སྟོང་འཛིན་མེད་དུ་རྗེན་སོང་གིས་འཆར་བས་གང་ཤར་དེ་ལ་བཅས་བཅོས་མི་བྱ་བར་དེ་ཀའི་ངང་ལ་ལྷོད་ཀྱིས་ཀློད་ནས་མཉམ་པར་འཇོག་པ་གནད་ཀྱི་དམ་པའོ། །དེ་ལ་ཡུན་བསྐྱངས་སྟེེ་བལྟས་པས་བལྟ་བྱ་ལྟ་བྱེད། མྱོང་བྱ་མྱོང་བྱེད། ཡུལ་དང་ཡུལ་ཅན་སོགས་གཟུང་འཛིན་ཐམས་ཅད་དང་བྲལ་བའི་ཡུལ་མེད་པར་རང་གསལ་སྤྲོས་པའི་མཐའ་ཐམས་ཅད་དང་བྲལ་བ་ཞིག་འཆར་བས། དེ་གའི་སྟེང་དུ་མ་བཅོས་མ་བསླད་མ་བསྒྱུར་བར་བཞག་པ་ནི་རྫོགས་པ་ཆེན་པོའི་ལམ་དབང་པོ་རབ་ཀྱི་བསྒོམ་ཚུལ་རིག་པ་གཤིས་ལུགས་སུ་བཞག་པ་ཞེས་བྱ་ལ། རྫོགས་ཆེན་གྱི་ཆོས་སྐད་དུ་རིག་པ་སྤྱི་བླུགས་སུ་འཇོག་པ་ཡང་ཟེར་རོ། །འདི་སྐབས་ལས་དང་པོ་པ་ལྟ་བུས་བསྙེན་པ་བཟླ་ཚེ་སེམས་ངོ་བལྟ་རྒྱུ་ལ་གནོད་ན་མི་བཟླ་བར་རང་ངོ་སྐྱོང། གོམས་པ་ནས་རྩལ་སྦྱོང་བའི་ཕྱིར་བསྙེན་པ་ཤུབ་བུར་བཟླ་ཞིང་སེམས་མི་ཡེངས་པར་བྱ། དེ་
དག་གིས་མི་གནོད་པར་ཆེར་གོམས་ན་བསྙེན་པ་སྐད་འཕང་མཐོ་བར་འདོན་ཅིང་། རིག་པ་གཤིས་ལུགས་ཀྱི་མཉམ་བཞག་དེ་ལས་མ་གཡོས་པར་བྱའོ། །དེ་དག་ལ་གོམས་པར་བྱས་པས་ཐུན་མཚམས་རྗེས་ཐོབ་ཀྱི་སྐབས་སུ་སྤྱོད་ལམ་ཐམས་ཅད་ལ་བསྲེ་ནུས་ཤིང་བསྐྱེད་རྫོགས་ཟུང་འཇུག་གི་བོགས་ཐོན་པར་འགྱུར་རོ། །དེ་ཡང་ངོ་སྤྲད་ཅིང་རྩལ་སྦྱངས་པ་གལ་ཆེ་བ་སྟེ། སློབ་དཔོན་དགའ་རབ་རྡོ་རྗེའི་ཞལ་ནས། སེམས་ཀྱི་རང་བཞིན་ཡེ་ནས་བུདྡྷ་སྟེ༔ སེམས་ལ་སྐྱེ་འགགས་མེད་པས་ནམ་མཁའ་འདྲ༔ ཆོས་ཀུན་མཉམ་ཉིད་ཡང་དག་དོན་རྟོགས་ནས༔ དེ་ཉིད་མ་བཙལ་བཞག་ན་བསྒོམ་པ་ཡིན༔ ཞེས་གསུངས་པ་ལྟར། མཉམ་བཞག་ཏུ་རིག་སྟོང་རྗེན་པའི་ཡེ་ཤེས་ལ་ཞེན་འཛིན་གྱིས་མ་བསླད་པར་རང་གསལ་རྒྱ་ཡན་དུ་ཀློད་ཅིང་། རྗེས་ཐོབ་ཏུ་གང་སྣང་ཐམས་ཅད་སྒྱུ་མའི་འཁྲུལ་འཁོར་རམ། རྨི་ལམ་གྱི་སྣང་བ་ལྟར་གསལ་སྟོང་འཛིན་མེད་དུ་ཐག་
བཅད་པ་དེ་ལམ་དུ་ཁྱེར་པས་མཉམ་བཞག་སྤྲོས་བྲལ་གྱི་ཡེ་ཤེས་དེ་ཀ་རྩལ་སྣང་མ་འགགས་པའི་རོལ་པར་ཤར་ནས་ཡུལ་སྣང་ཐམས་ཅད་མེད་བཞིན་སྣང་བར་ཐག་ཆོད། དེ་ཀ་མཉམ་རྗེས་དབྱེར་མེད་དམ་བདེན་གཉིས་ཟུང་འཇུག་གི་ཡེ་ཤེས་ཆོས་ཐམས་ཅད་ཀྱི་གཤིས་ལུགས་སོ། །གནས་ལུགས་དབུ་མ་ཆེན་པོའམ། ཕྱག་རྒྱ་ཆེན་པོའམ། རྫོགས་པ་ཆེན་པོ་ཡིན་པས། སེམས་ཅན་ཐམས་ཅད་ལ་ཡེ་ནས་རང་བཞིན་དུ་བཞུགས་ཀྱང་། དེ་ལྟར་ངོ་མ་ཤེས་ཤིང་མ་རྟོགས་པ་ལ་སྙིང་རྗེ་ཆེན་པོས་དྲངས་པའི་བྱང་ཆུབ་ཀྱི་སེམས་མ་འགགས་པར་འཆར་ཏེ་སྟོང་ཉིད་སྙིང་རྗེའི་སྙིང་པོ་ཅན་ཡིན་པའི་ཕྱིར་རོ། །ཤར་ཙམ་ནས་གཤིས་འཛིན་མེད་དུ་ཁྲོལ་ལེ་སྐྱུར་རེ་བསྐྱང་ངོ་། །དེ་ལྟར་མཉམ་རྗེས་དབྱེར་མེད་དུ་བསྲེས་ཏེ། ལམ་དུ་ཁྱེར་བ་གང་ཤར་རང་གྲོལ་མངོན་དུ་གྱུར་ནས་རྣམ་རྟོག་བསྒོམ་གྱི་གྲོགས་སུ་འཆར་རོ། །གལ་ཏེ་རྣམ་རྟོག་གིས་གནོད་ན་འགྱུ་
དྲན་གྱི་རྟོག་པ་གང་ཤར་ལ་དེ་ཀར་ཅེ་རེ་བལྟས་པས་རྦ་རླབས་ཆུར་ཐིམ་པ་ལྟར་དྲན་རྟོག་རྗེས་མེད་དུ་ཡལ་ཏེ། རྣམ་རྟོག་གཞི་མེད་རྩ་བྲལ་དུ་ཤེས་ཤིང་ཐག་ཆོད་པས་དགེ་སྦྱོར་རྐྱེན་ཐུབ་ཉམས་ལེན་སྐྱོང་བདེར་འགྲོ་བ་ཡིན་ཅེས་མཁས་གྲུབ་དམ་པ་གོང་མ་རྣམས་ཀྱི་ཞལ་སྔ་ནས་གསུངས་སོ། །འདི་དག་བསྒོམ་ཚུལ་ཞིབ་རྒྱས་ཕྱི་སྒྲུབ་ཀུན་བཟང་གི་ཡིག་ཆུང་གཞི་ལྟ་བས་གཏན་ལ་འབེབས་ཚུལ་ལམ་བསྒོམ་པ་ཉམས་སུ་ལེན་ཚུལ་རྫོགས་པ་ཆེན་པོ་ཁྲེགས་ཆོད་ཀྱི་ངོ་སྤྲོད་གསལ་བར་གསུངས་པ་ཉིད་དོ། །འོ་ན་ཕྱི་སྒྲུབ་རྫོགས་པ་ཆེན་པོ་བསྟན་པ་མི་འཐད་དོ་ཞེ་ན། སྤྱིར་རྒྱུད་དཀྲུག་ལུང་དཀྱུས་མན་ངག་གབ་པ་རྣམས་གཏེར་ཆེན་ཉིད་ཀྱི་ཞལ་ལུང་ལ་བརྟེན་ནས་ཁྲིད་དགོས་ཤིང་། འདིར་ནི་དེ་ལྟར་གབ་སྦས་ཀྱང་མ་ཡིན་ལ། གུ་རུ་རྡོ་རྗེ་གྲོ་ལོད་ཀྱི་སྒྲུབ་ཐབས་འདི་ནི་ཨ་ཏི་ཡོ་ག་ཐེག་ཀུན་རྩེ་མོ་ཤིན་ཏུ་རྣལ་འབྱོར་གྱི་ལམ་ཟབ་མོ་ཡིན་ལ། དེ་དག་ལ་ནང་གསེས་ཕྱི་
ནང་གསང་བ་གསུམ་དུ་གསུངས་པའི་ཕྱི་བསྐྱེད་རིམ་གཙོ་བོར་སྟོན་པ་ཀུན་བཟང་དང་རིགས་ལྔ། ནང་རྩ་རླུང་ཐིག་ལེའི་ལམ་དང་འབྲེལ་བ་ནང་སྒྲུབ་ཡེ་ཤེས་གསང་བ་དང་སྦས་གསང་ཚེ་སྒྲུབ། གསང་བ་ལྷ་ཞི་བ་སྒྲུབ་པ་ལ་ཁྲོ་བོའི་དཀྱིལ་འཁོར་སྒྲུབ་པས་བྱིན་རླབས་མྱུར་བ་རྒྱུད་མ་ཧཱ་ཡོ་ག་གསང་བ་སྙིང་པོ་ལས་གསུངས་པ་ལྟར། སྙིགས་དུས་དྲེགས་པ་སྡེ་བརྒྱད་མ་རུངས་པའི་གཉེན་པོ་རྡོ་རྗེ་གྲོ་ལོད། དེ་ལའང་བསྟོད་པའི་སྐབས་སུ་གསལ་བ་ལྟར་ཕྱི་སྒྲུབ་གུར་དྲག །ནང་སྒྲུབ་རྟ་མགྲིན་དུ་གསུངས་པས་མཚོན། གསང་བའི་ཟབ་གནད་བསམ་གྱིས་མི་ཁྱབ་པ་ཉིད་དོ། ༈ །ཏིང་ངེ་འཛིན་གྱི་དཀྱིལ་འཁོར་སྦས་གསང་ཚེ་སྒྲུབ། གྱི། །འཆི་མེད་གཉུག་མའི་ཚེ་དབང་བའཆི་མེད་གཉུག་མའི་ཚེ། མཆན། ཐོབ། །འཕོ་བཅས་ཐིག་ལེ་འཕོ་བ་དང་བཅས་པའི་ཐིག་ལེའི་ཚེ། འཕོ་མེད་བརྟན། །གློ་བུར་ལྟར་སྣང་རིང་པོར་འཚོ་བ། སྲོག་གི་ཚེ། །འགྱུར་མེད་རྡོ་རྗེར་འགྱུར་བ་མེད་པ་རྡོ་རྗེའི་སྐུ་ཐོབ་པ་
དང་། པདྨ་འབྱུང་གནས་དང་མི་འགྱུར་རྡོ་རྗེས་སྦྱར་བ། མཆན། ཡོངས་འགྲུབ་ཤོག །ཨེ་ཀ་ཤརྡྷཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།