ཡེ་གསང་ཐུགས་ཀྱི་གཏེར་ཁ་ལས་རྒྱལ་བ་རིགས་ལྔའི་ཟབ་ཁྲིད།
ཡེ་གསང་ཐུགས་ཀྱི་གཏེར་ཁ་ལས། རྒྱལ་བ་རིགས་ལྔའི་ཟབ་ཁྲིད་བཞུགས་སོ། །
ན་མོ་གུ་རུ་པདྨ་བཛྲཱ་ཡ། །རིགས་བརྒྱའི་ཁྱབ་བདག་རྡོ་རྗེ་འཆང་། །རིགས་ལྔ་སྒྱུ་འཕྲུལ་དྲྭ་བའི་ལྷ། །རིགས་ཀྱི་བདག་པོར་འབྲལ་མེད་བཞུགས། །རིགས་ལྔའི་ཟབ་ཁྲིད་འདི་ན་དབྱེ། །འདི་ལ་བཞི། རྨི་ལམ་འཁྲུལ་པ་ངོས་བཟུང་བ། བསྲེ་བ་ཆོས་སྐུ་མཛུབ་ཚུགས། འཕོ་བ་བཙན་ཐབས་སངས་རྒྱས། བར་དོ་འཁྲུལ་པ་རང་གྲོལ་ལོ། །དེ་ལ་དང་པོ་རྨི་ལམ་འཁྲུལ་པ་ངོས་བཟུང་བ་ནི། གཞུང་ལས། རང་ཞལ་མ་མཐོང་རང་སེམས་འདི༔ མ་འཁྲུལ་སྐྱེ་མེད་སངས་རྒྱས་
ཐུགས༔ འཁྲུལ་པས་ལས་ངན་འཁོར་བའི་སེམས༔ འཁྲུལ་པ་རང་ཞལ་འདི་ལྟར་བལྟ༔ ཞེས་གསུངས་པས། སྤྱིར་སེམས་ཅན་ཐམས་ཅད་མ་འཁྲུལ་ན་སངས་རྒྱས་ཡིན་ཀྱང་། མ་རིག་འཁྲུལ་པའི་དབང་གིས་ལས་ངན་སྣ་ཚོགས་ལ་སྤྱོད་ཅིང་འཁོར་བ་ངན་སོང་གསུམ་སོགས་སུ་སྡུག་བསྔལ་དཔག་མེད་མྱོང་བ་ཡིན་ཏེ། དེ་ཡང་གཞི་ཅི་ལས་འཁྲུལ་ན། སེམས་སྟོང་ཉིད་ལས་འཁྲུལ། རྒྱུ་ཅི་ལས་འཁྲུལ་ན་མ་རིག་པ་ལས་འཁྲུལ། འཁྲུལ་ཚུལ་ཇི་ལྟར་ན་འགྲོ་བ་རིགས་དྲུག་
གིས་སྤྱོད་ཡུལ་དུ་འཁྲུལ། དཔེ་ཇི་ལྟར་འཁྲུལ་ན་གཉིད་ཀྱི་རྨི་ལམ་ལྟར་འཁྲུལ། འཁྲུལ་པ་ལ་སྐྱོན་ཅི་ཡོད་ན། སྡུག་བསྔལ་ཤ་སྟག་ལ་སྤྱོད་པ་སྟེ། རྗེ་རིག་འཛིན་ཉིད་ཀྱི་ཞལ་ནས། བྱ་བྱེད་སྣང་བའི་ཡུལ་འདི་རྨི་ལམ་མཚུངས། །རྨི་ལམ་བག་ཆགས་འཁྲུལ་པར་ཤེས་པར་མཛོད། །ཤེས་ན་འོད་གསལ་འཁོར་ཡུག་ཤར་བར་གདའ། །མ་ཤེས་འཁྲུལ་སྣང་བག་ཆགས་ལུ་གུ་རྒྱུད། །ཅེས་གསུངས་པ་ལྟར་རྨི་ལམ་འཁྲུལ་པ་ངོས་ཟིན་ན་གཉིས་འཛིན་མེད་པ་འོད་གསལ་འཁོར་མོ་ཡུག་ཏུ་འགྲོ་ཞིང་། མ་ཟིན་པས་གཏི་མུག་མ་རིག་བག་ཆགས་ཀྱི་ངང་ལས་འཁྲུལ་སྣང་ལུ་གུ་རྒྱུད་དུ་ཉིན་མོ་བྱ་བའི་ལས་ཀྱིས་འཁྲུལ། མཚན་མོ་གཏི་མུག་གཉིད་ཀྱི་འཁྲུལ་པ་བར་མེད་མུ་མེད་མཐའ་མེད་ལ་འགྲོ་བ་ཡིན་ཏེ། འཁྲུལ་པ་དེ་ངོས་བཟུང་བར་བྱ་བ་ལ། དང་པོ་ཉིན་པར་གྱི་ལས་དང་བྱ་བ་ཅི་བྱེད་ཐམས་ཅད་དང་། ཕྱིའི་ཡུལ་སྣང་། ནང་དགྲ་གཉེན་གྱི་སྡུག་བསྔལ་བཟང་ངན་གང་
སྣང་བ་ཐམས་ཅད་རྨི་ལམ་ལྟ་བུའི་འཁྲུལ་པ། སྒྱུ་མ་ལྟ་བུར་བདེན་མེད་དུ་བློ་སྦྱོང་དགོས་ཏེ། ཤེར་ཕྱིན་སུམ་བརྒྱ་པ་ལས། སྐར་མ་རབ་རིབ་མར་མེ་དང་། །སྒྱུ་མ་ཟིལ་པ་ཆུ་བུར་དང་། །རྨི་ལམ་གློག་དང་སྤྲིན་ལྟ་བུར། །འདུས་བྱས་ཆོས་རྣམས་དེ་ལྟར་བལྟ། །ཞེས་སོ། །དེ་ཡང་མི་བདེན་པ་ལ་བདེན་པར་བཟུང་བས་སྡུག་ཏུ་བཅུག་ནས་འཁོར་བར་འཁྱམས་པའི་སྐྱོན་མཚང་ཤེས་པར་བྱའོ། །དེ་ལྟར་བསྒོམས་པས་མཚན་མོའི་རྨི་ལམ་ཡུལ་གྱི་འཁྲུལ་སྣང་བཟང་ངན་ཐམས་ཅད་དྲན་པས་ཟིན་ཅིང་སྔོན་ནས་ཉམས་ལེན་ཡོད་ན་འོད་གསལ་ཐོག་ཏུ་གནས་སོ། །ཉམས་ལེན་མེད་པ་ཞིག་ཡིན་ཀྱང་ཉིན་མོའི་འཁྲུལ་སྣང་བདེན་མེད་ལ་གོམས་པས། རྨི་ལམ་ཟིན་པར་འགྱུར་ཏེ། རྩ་ཚིག་ལས། ཀྱེ་མ་བདག་ལ་རྨི་ལམ་བར་དོ་འཆར་དུས་དེར༔ གཏི་མུག་རོ་ཉལ་བག་མེད་སྤངས་བྱས་ནས༔ དྲན་པ་ཡེངས་མེད་གནས་ལུགས་ངང་ལ་བཞག༔ རྨི་ལམ་བཟུང་
ནས་སྤྲུལ་བསྒྱུར་འོད་གསལ་སྦྱངས༔ དུད་འགྲོ་བཞིན་དུ་ཉལ་བར་མ་བྱེད་པར༔ གཉིད་དང་འོད་གསལ་འདྲེས་པའི་ཉམས་ལེན་གཅེས༔ ཅེས་པ་ལྟར་གོམས་ཤིང་བརྟན་པ་ཐོབ་ན་རྨི་ལམ་སྤྲུལ་བསྒྱུར་ལ་རང་དབང་ཐོབ་བོ། །རྨི་ལམ་ངོས་བཟུང་བ་ནི། གཞུང་ལས། གཏི་མུག་ངང་དུ་གཉིད་ལོག་ཚེ༔ གཡང་ལ་ལྷུང་དང་ཆུ་ཡིས་ཁྱེར༔ ཐོག་སེར་འབེབས་དང་མེ་ཡིས་ཚིག༔ རླུང་གིས་ཁྱེར་དང་རྦབ་ཀྱིས་དེད༔ འཇིགས་རུང་གཟུགས་བརྙན་མཐོང་བ་དང་༔ རང་ལུས་མཚོན་གྱིས་གཟིར་བ་སོགས༔ འཁྲུལ་སྣང་དྲག་པོ་འཆར་བའི་ཚེ༔ རྨི་ལམ་ཡིན་པར་ཤེས་པར་བྱ༔ མ་ཡེངས་ངང་དུ་དྲན་རིག་བརྟན༔ རང་རིག་ཡི་དམ་ལྷ་རུ་སྒོམ༔ སྙིང་ཁར་པདྨ་འབྱུང་གནས་སྒོམ༔ སྤྱི་བོར་རྩ་བརྒྱུད་བླ་མ་སྒོམ༔ སྣང་སྟོང་སེམས་ལ་གཞོམ་གཞིག་མེད༔ འཁྲུལ་སྣང་བག་ཆགས་ཡིན་ནོ་བསམ༔ ཞེས་གསུངས་པས་རྨི་ལམ་ལ་བདེ་སྡུག་འཇིགས་སྐྲག་གང་བྱུང་བ་རྣམས་རྨི་
ལམ་གྱི་འཁྲུལ་པ་ཡིན། ཡང་དག་པར་བདེན་པ་མ་ཡིན་སྙམ་པའི་འདུན་པ་དྲག་པོ་བྱེད་ཅིང་དྲན་པ་མ་ཡེངས་པར་དྲན་རིག་བརྟན་པའི་ངང་ལས་རང་རིག་ཡི་དམ་གྱི་ལྷ་གང་མོས་སྒོམ། དེའི་ཐུགས་ཀར་པདྨ་འབྱུང་གནས་སྒོམ། རང་གི་སྤྱི་བོར་རྩ་བའི་བླ་མ་གང་ཡིན་དེ་སྒོམ། སྒོམ་མཁན་དང་། རྨི་ལམ་གྱི་སྣང་བ་དང་རྨི་ལམ་མྱོང་མཁན་གྱི་ཤེས་པ་ཐམས་ཅད་སྣང་སྟོང་དབྱེར་མེད་ཡིན། དོན་ལ་ནི་རང་སེམས་ལ་སྐྱེ་འཆི་དང་གཞོམ་གཞིག་ཅུང་ཟད་ཙམ་ཡང་མེད། འདི་རྣམས་འཁྲུལ་སྣང་བག་ཆགས་ཡིན་སྙམ་པའི་དྲན་ཤེས་བརྟན་པ་གལ་ཆེ། དེ་ལྟར་ཟིན་ན་རྨི་ལམ་འཁྲུལ་པ་ངོས་ཟིན། བདེན་འཛིན་དང་བྲལ། རྨི་ལམ་འོད་གསལ་དུ་འཆར། བར་དོ་ཆོས་ཉིད་དུ་འཆར། རང་སེམས་ལ་རང་དབང་ཐོབ་པའོ། །གཞུང་ལས། དེས་ནི་འཇིགས་སྐྲག་རང་སར་ཞི༔ འཁྲུལ་སྣང་རྨི་ལམ་འོད་གསལ་ཟིན༔ ཚེ་འདིར་རྨི་ལམ་མ་ཟིན་ན༔ བར་དོ་འཇིགས་
སྐྲག་ཟེར་འོད་རྣམས༔ ཡིད་སྨོན་བྱེད་ཙམ་མིན་ལགས་སོ༔ རྨི་ལམ་ངོས་ཟིན་འོད་གསལ་རྟོགས༔ འདི་ཕྱིར་བདེ་བ་ཐོབ་པར་འགྱུར༔ དེ་ཕྱིར་མ་འོངས་སེམས་ཅན་རྣམས༔ སྙིང་ལ་འཆང་ཞིག་ས་མ་ཡ༔ ཅེས་སོ། ༈ །གཉིས་པ་བསྲེ་བ་ཆོས་སྐུ་མཛུབ་ཚུགས་ནི། རྨི་ལམ་འོད་གསལ་ཚད་དུ་མ་ཕེབ་པའི་གང་ཟག་གིས། རང་སེམས་ཆོས་སྐུ་གཅེར་མཐོང་ལྟ་བར་བྱེད་པ་ལ། དང་པོ་ལུས་ཕུང་པོའི་བདག་འཛིན་གྱི་གདོས་ཐག་བྲལ་ནས། སེམས་སྐྱེ་མེད་ཟང་ཐལ་བལྟ་དགོས་ཏེ། མདོ་ལས། ངར་འཛིན་པ་དང་ང་ཡིས་འཛིན་པས། སེམས་ཅན་རྣམས་འཁོར་བ་ལ་འཁོར་རོ། །ཞེས་གསུངས་པས་ལུས་འདི་ལ་སྔར་ཡང་བདག་ཏུ་བཟུང་ཞིང་འཛིན་པས་གནས་ལུགས་ཀྱི་རང་ཞལ་མ་མཐོང་། བདག་འཛིན་སྒྲོག་གིས་བཅིངས། བདག་མེད་པ་ལ་བདག་ཏུ་བཟུང་། ང་མེད་པ་ལ་ང་རུ་འཛིན། ལུས་སྲོག་ལ་གཅེས་འཛིན་བྱས། ན་བ་ལ་ན་དོགས། འཆི་བ་ལ་འཆི་
དོགས། རྒས་པ་ལ་རྒས་དོགས། དགྲ་འདྲེས་ཁྱེར་དོགས། བདེ་བ་ལ་རེ། སྡུག་པ་ལ་དོགས། དགྲ་དང་འཐབ། གཉེན་དང་འགྲོགས། མི་དགེ་བསགས། དགེ་བ་བརླག །ཐར་ལམ་འགགས། འཁོར་བ་སྒྲུབ། མྱང་འདས་བོར། བདེ་བ་འཕྲོག །སྡུག་དང་སྤྲད། འཁོར་བར་འཁྱམས་པ་ཐམས་ཅད་ལུས་དང་སྲོག་ལ་གཅེས་འཛིན་དང་། བདག་འཛིན་བྱས་པ་ལས་བྱུང་འདུག་སྟེ། སྤྱོད་འཇུག་ལས། འཇིག་རྟེན་དག་ན་འཚེ་བ་གང་ཡོད་དང་། །འཇིགས་དང་སྡུག་བསྔལ་ཇི་སྙེད་ཡོད་གྱུར་པ། དེ་ཀུན་བདག་ཏུ་འཛིན་པ་ལས་བྱུང་ན། །འདྲེ་ཆེན་དེ་ཀོས་བདག་ལ་ཅི་ཞིག་བྱ། །ཞེས་གསུངས་པ་ལྟར་བདག་ཏུ་འཛིན་པའི་ལུས་སྲོག་ལ་ད་ནི་གཅེས་འཛིན་མི་བྱ། ཞེན་ཆགས་མི་བྱ། སྡུག་དོགས་མི་བྱ། བདེ་བ་ལ་མི་རེ། འཇིགས་པ་ལ་མི་སྐྲག །ཞེན་མེད། འཛིན་པ་མེད། ལྟོས་མེད། དགོས་མེད་ཡིན་སྙམ་པའི་ངང་ནས། རང་གི་རྩ་བའི་བླ་མ་པདྨ་འབྱུང་
གནས་ཡིད་ལ་དྲན་པའི་ངང་ནས་རང་ལུས་ས་ཆུ་མེ་རླུང་གཡང་ས་དང་། རི་རབ་ཀྱི་འོག །འཇིགས་སུ་རུང་བའི་གཅན་གཟན་དང་། སྲིན་པོ་ནམ་མཁའ་དང་ཉི་ཟེར་རྣམས་དང་བསྲེ་ཞིང་། དེའི་ཚེ་རང་སེམས་ཞེས་བྱ་བ་དེ་བལྟས་པས་མ་རིག །བཙལ་བས་མ་རྙེད། བཟུང་བས་མ་ཟིན། གར་གནས་མ་ཤེས། གར་འགྲོ་མ་ཚོར། ཁ་དོག་མ་མཐོང་། གཟུགས་བརྙན་མ་མཐོང་བའི་ང་བོ་ཆེ། སྟོབས་པོ་ཆེ། བག་ལ་ཉལ། ཀུན་བྱེད་པའི་མཁན་པོ་འཁོར་འདས་ཀུན་གྱི་རྩ་བ་ཡིན་ཟེར་བ་ཁྱོད་མཐོང་རྒྱུ་ཨི་འདུག །རིག་རྒྱུ་ཨི་འདུག །རྟོགས་རྒྱུ་ཨི་འདུག་བལྟ་བསམས་ལ། རང་ལུས་ལྟོས་མེད་དུ་བསྲེས་པས། ལུས་གདོས་བཅས་དང་བྲལ་ཡང་། སེམས་སྐྱེ་མེད་འཆི་མེད་ཡིན་པས་འཇིགས་སྐྲག་གིས་གཞོམ་པར་མི་ནུས་ཤིང་རང་སེམས་གཅེར་བུར་བུད་ནས་གཅེར་མཐོང་དུ་འགྱུར་ཏེ། དེ་ལ་ཇི་ལྟར་བསྲེ་བའི་ཚུལ་ནི། གཞུང་ལས། ཞལ་གདམས་བསྲེ་
བའི་གདམས་པ་ནི༔ གུ་རུ་ཡིད་ལ་དྲན་པའི་ངང་༔ རང་ལུས་འོད་དུ་ལྟེམ་གྱིས་ཞུ༔ ས་ཡི་ཁམས་གྱུར་སེར་ལྟེམ་ལྟེམ༔ ས་དེ་དུམ་བུར་གས་ཏེ་འཐོར༔ གནམ་ས་ཆ་ལང་བརྡབ་པར་བསམ༔ སེམས་ནི་འཆི་འམ་སྨས་སམ་བལྟ༔ རིག་རྩལ་འདི་ལ་འཆི་བ་མེད༔ དེ་བཞིན་རང་ལུས་འོད་དུ་ཞུ༔ འབྱུང་བ་ཆུ་ཡི་རྒྱ་མཚོ་སྔོ༔ མཐའ་ཡི་རྒྱ་མཚོ་ཙམ་དུ་བསྐྱེད༔ རྦ་རླབས་འཁྲུག་པས་སྲིད་གསུམ་ཁྱབ༔ རང་སེམས་ཁུར་རམ་འཐུམས་སམ་བལྟ༔ རིག་རྩལ་ཆུ་ཡི་གཞོམ་པ་མེད༔ དེ་བཞིན་རང་ལུས་འོད་དུ་ཞུ༔ རླུང་ནག་འཚུབས་མས་སྟོང་གསུམ་གང་༔ ས་གཡོ་རི་བསྒྱེལ་སྲིད་གསུམ་འདར༔ རང་ཉིད་དེ་ཡི་དཀྱིལ་དུ་འདུག༔ འཆི་འམ་ཁྱེར་རམ་འབོར་རམ་བལྟ༔ རིག་རྩལ་རླུང་གིས་གཞིག་ཏུ་མེད༔ དེ་བཞིན་གཡང་ལ་ལྷུང་བར་དམིགས༔ རིག་རྩལ་ཆག་དང་གྲུམ་པ་མེད༔ དེ་བཞིན་རི་བོ་འགྱེལ་བར་དམིགས༔ འོག་ཏུ་རང་ཉིད་ཡོད་པར་བསམ༔
མུན་ཏིབ་ནག་ཐིབ་སོང་བར་བསམ༔ རིག་རྩལ་ཟང་ཐལ་རིས་མི་ནོན༔ དེ་བཞིན་རི་ལ་རང་གི་ལུས༔ ཕར་ཐར་ཚུར་ཐར་འགྲོ་བར་དམིགས༔ རིག་རྩལ་འདི་ལ་ཐོགས་པ་མེད༔ དེ་བཞིན་འཇིགས་རུང་སྲིན་པོའི་ཁ༔ གནམ་ས་ཙམ་དུ་གདང་བར་དམིགས༔ རང་ལུས་ཀྲུམ་ཀྲུམ་ཟོས་པར་བསམ༔ རིག་རྩལ་སྲིན་པོས་ཟོས་པ་མེད༔ དེ་བཞིན་མེ་རི་འབར་བའི་ནང་༔ རང་ལུས་ཚིག་སྟེ་འབར་བར་དམིགས༔ ཐལ་བ་བུན་གྱིས་སོང་བར་བསམ༔ རིག་རྩལ་མེ་ཡིས་ཚིག་པ་མེད༔ དེ་བཞིན་ནམ་མཁར་འཕུར་བ་དང་། །ནམ་མཁའི་དཀྱིལ་དུ་རྒྱུག་པར་དམིགས༔ རིག་རྩལ་གཤོག་པས་འཕུར་བ་མེད༔ དེ་བཞིན་ནམ་མཁར་རང་གི་ལུས༔ མགོ་མཇུག་ལྡོག་ནས་སོང་བར་དམིགས༔ དེ་བཞིན་ཉི་ཟླའི་དཀྱིལ་དུ་བསྡད༔ རིག་རྩལ་ཟེར་གྱིས་གཞོམ་དུ་མེད༔ ཅེས་གསུངས་པ་ལྟར་རེ་རེ་བཞིན་བསྲེ་ཞིང་སྒོམ་པས། ལུས་ཞེན་མེད་བདག་འཛིན་གི་གདོས་ཐག་ཆོད།
གཅེས་འཛིན་གྱི་དོགས་པ་བྲལ། དངོས་འཛིན་གྱི་འཁྲུལ་པ་ཡལ། རང་ལུས་ཀྱི་ཕུང་པོ་བོར། འཆི་མེད་ཀྱི་ལུས་དང་ལྡན། དོན་ནི་རང་སེམས་སྐྱེ་འཆི་མེད་པའི་གནས་ལུགས་རྗེན་པར་འཆར་བ་མཐོང་སྟེ། ཕན་ཡོན་ནི། གཞུང་ལས། དོན་ནི་རང་ལུས་བོར་ནས་སུ༔ སྐྱེ་འཆི་མེད་པའི་སེམས་ལ་ལྟོས༔ འཆི་མེད་དོན་གྱི་རིག་འཛིན་འགྲུབ༔ ཆོས་སྐུ་མཛུབ་ཚུགས་ཞལ་གདམས་འདི༔ མ་འོངས་སེམས་ཅན་སྙིང་ལ་འཆང་༔ རང་དོན་ཡིན་ནོ་ས་མ་ཡ༔ ༈ །གསུམ་པ་བཙན་ཐབས་སུ་སངས་རྒྱས་པ་འཕོ་བའི་གདམས་ངག་སྒོམ་པ་ནི། གཞུང་ལས། ཞལ་གདམས་འཕོ་བའི་རིམ་པ་ནི༔ གློ་བུར་དགྲ་ཡིས་སྡང་བ་དང་༔ འཆི་ལ་ཐུག་ནས་ཐབས་ཟད་ནས༔ རང་ལུས་དྲང་སྲོང་རིག་པ་བརྟེན༔ ཕྱི་སྣང་བའི་ཡུལ་དུ་སེམས་མི་སྤྲོ༔ ནང་འཛིན་པའི་སེམས་འདི་ནང་དུ་བསྡུ༔ སེམས་མ་ཡེངས་ངང་དུ་བསྐྱེད་རིམ་སྒོམ༔ རིག་པ་འཕྲོ་འདུ་རྦད་ཀྱིས་བཅད༔
ཅེས་གསུངས་པའི་གདམས་ངག་སྒོམ་པ་ལ། སྔོན་ནས་སྦྱངས་པ་དང་། ལས་ལ་སྦྱར་བ་གཉིས་ཀྱི། དང་པོ་སྔོན་དུ་སྦྱངས་པ་ནི། འཆི་ལྟས་གསལ་བའི་མེ་ལོང་ལྟར་བརྟགས། འཆི་རྟགས་ལ་ངེས་པ་ཐོབ་ནས་ཟླ་བ་དྲུག་བདུན་གང་ཙམ་ནས་སྦྱངས། ཉེ་བའི་འཆི་རྟགས་རྩ་ནུས་ཉམས་རྟགས་སྤྱི་བོའི་རླངས་པ་ཡལ། རླུང་ནུས་ཉམས་རྟགས་རྣ་བའི་འུར་སྒྲ་ཆད། ཐིག་ལེའི་ནུས་པ་ཉམས་རྟགས་མིག་གི་འོད་དཀར་པོ་མེད་ན་ངེས་པའི་རྟགས་སོ། །ལར་ད་ལྟ་ནས་སྦྱངས་ན་ཤིན་ཏུ་བཟང་སྟེ། རིག་འཛིན་ཉིད་ཀྱི་ཞལ་སྔ་ནས། ལ་ཆེན་སྔོན་དུ་བསྐྱེད་རིམ་སྦྱངས་ནས་བརྟན་པ་ཐོབ་པར་གྱིས། གཞན་ལ་འཕོ་བ་འདེབས་དུས་ཁྱི་མཐོང་རྡོ་ལེན་བྱས་པས་གོ་སོ་གར་ཆོད། ཅེས་གསུངས་སོ། །ཁྱད་པར་གདམས་ངག་འདི་ནི་འཆི་ཁ་མའི་གདམས་ངག་གཙོ་ཆེར་བཤད་པས། དཔེར་ན་དཔའ་བོ་གཡུལ་དུ་ཞུགས་ཕྱིར་གོ་མཚོན་གྱི་གྲབ་བྱེད་པ་ལྟར། ད་ལྟ་ནས་
སྦྱངས་ནས་ནམ་འཆི་བའི་དུས་ལ་བབ་ཚེ་ཐོགས་མེད་དུ་འཕོ་དགོས། གང་དུ་འཕོ་ན་ཞིང་ཁམས་བདེ་བ་ཅན་དུ་འཕོ་དགོས་ཏེ། མདོ་ལས། ཀུན་དགའ་བོ་སེམས་ཅན་གང་དག་ཁ་ཅིག་དེ་བཞིན་གཤེགས་པ་དེའི་རྣམ་པ་ཡང་དང་ཡང་དུ་ཡིད་ལ་བྱེད་པ་དང་། དགེ་བའི་རྩ་བ་མང་པོ་དཔག་ཏུ་མེད་པ་བསྐྱེད་པ་དང་། བྱང་ཆུབ་ཏུ་སེམས་བསྐྱེད་པ་ཡོངས་སུ་བསྔོས་ཏེ། འཇིག་རྟེན་ཁམས་དེར་སྐྱེ་བར་སྨོན་ལམ་འདེབས་པ་དེ་དག་འཆི་བའི་དུས་ལ་ཉེ་བར་གནས་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འོད་དཔག་མེད་དེ་དགེ་སློང་གི་དགེ་འདུན་གྱི་ཚོགས་དུ་མས་བསྐོར་ཞིང་མདུན་གྱི་བལྟས་ནས་བཞུགས་པར་འགྱུར་ཏེ། དེ་དག་གིས་བཅོམ་ལྡན་འོད་དཔག་མེད་དེ་མཐོང་ནས་རབ་ཏུ་དྭངས་པའི་སེམས་ཀྱིས་ཤི་འཕོས་ཏེ། འཇིག་རྟེན་གྱི་ཁམས་བདེ་བ་ཅན་དེ་དག་ཏུ་སྐྱེ་བར་འགྱུར་རོ། །ཞེས་གསུངས་
པས་དེ་ལྟ་བུའི་ཞིང་ཁམས་བདེ་བ་ཅན་དེ་ན་འགྲོ་བའི་ཐབས་ནི། དད་གུས་འདུན་པ་དང་ལྡན་པས་ལམ་ཟབ་མོ་འཕོ་བའི་གདམས་ངག་ལ་བརྟེན་ནས་འགྲོ་དགོས། ཇི་ལྟར་འཕོ་བའི་ཚུལ་ནི། སྐྱབས་འགྲོ་སེམས་བསྐྱེད་སོགས་ཁྱད་པར་གྱི་སྔོན་འགྲོ་རྣམས་སོང་ནས། རང་ཡི་དམ་གྱི་ལྷ་རྡོ་རྗེ་གྲོ་ལོད་སོགས་ཀྱི་སྐུར་གསལ་བར་སྒོམ། རླུང་དྲག་པོ་ལན་གསུམ་སྣ་བུག་ནས་ཕྱིར་འབུད་ལ་སྡིག་སྒྲིབ་ཐམས་ཅད་ཐལ་བ་རླུང་གིས་གཏོར་བ་ལྟར་སོང་བར་བསྒོམ། གཏེར་གཞུང་ལས། ལུས་ནི་ཁང་པའི་ཚུལ་དུ་སྒོམ༔ སྤྱི་གཙུག་རྒྱ་མཐོང་ཡོད་པར་སྒོམ༔ རྩ་ནི་འོད་ཀྱི་སྦུ་གུར་སྒོམ༔ དེ་དབུས་རང་སེམས་བྱ་ཁྱུང་སྒོམ༔ དེ་སྟེང་པདྨ་འབྱུང་གནས་བསྒོམ༔ རང་རིག་ཁྱུང་ཆེན་རྩལ་བསྐྱེད་འཕུར༔ པད་འབྱུང་ཐུགས་ཀར་འོད་དུ་བསྟིམ༔ རང་དང་པད་འབྱུང་དབྱེར་མེད་པར༔ བདེ་བ་ཅན་དུ་མདའ་ལྟར་སོང་༔ སྣང་མཐའི་ཐུགས་ཀར་ཐིམ་པར་བསྒོམ༔ མྱུར་དུ་འཕོ་བར་
ཐེ་ཚོམ་མེད༔ ཅེས་གསུངས་པས། རང་ལུས་དྲང་པོར་བསྲང་ཕྱི་སྣང་ལ་སེམས་མི་སྤྲོ། རིག་པ་ནང་དུ་བསྡུ། དེ་ནས་རང་གི་ལུས་དར་དམར་གྱི་གུར་ལྟ་བུའི་ནང་དུ། རྩ་དབུ་མ་ཤེལ་གྱི་ཀ་བ་བཙུག་པ་ལྟ་བུའི་འོད་ཀྱི་སྦུ་གུ་མདའ་སྨྱུག་འབྲིང་པོ་ཙམ་མཚན་ཉིད་བཞི་ལྡན། ཕྱི་དཀར་ལ་ནང་དམར་བ། ཕྱི་གསལ་ནང་གསལ་སྒྲིབ་ཐོགས་མེད་པ། ཡར་སྣེ་སྤྱི་གཙུག་ཏུ་ཟངས་ཁ་ཟེད་པ་ལྟ་བུར་ཧད་པོར་སོང་བ། མར་སྣེ་ལྟེ་བའི་དཀྱིལ་དུ་ཟུག་ཅིང་། རང་གི་སྙིང་ཁར་པདྨ་འདབ་མ་ཁ་གྱེན་དུ་བྱེ་བའི་སྡོང་བུ་མཐིང་ག །འདབ་མ་དམར་པོ། ཟེའུ་འབྲུ་དཀར་པོའི་དབུས་སུ་ཕ་མ་གཉིས་ལས་ཐོབ་པའི་དྭངས་མ་དཀར་དམར་གཉིས་དེ་ཉི་མ་དང་ཟླ་བར་གྱུར་པའི་སྟེང་དུ་རང་གི་རྣམ་པར་ཤེས་པའི་ངོ་བོ། འོད་ཀྱི་བྱ་ཁྱུང་དཀར་ལ་དམར་བའི་མདངས་ཆགས་པ། གསལ་ཞིང་འོད་དུ་འབར་བ། འཕར་ཞིང་འཕུར་ལ་ཁད་པ་གཅིག་བསམ་སྟེ། དེ་ནས་རང་གི་
སྤྱི་བོར་དུས་གསུམ་སངས་རྒྱས་ཐམས་ཅད་འདུས་པའི་སྐུ་རྩ་བའི་བླ་མ་དང་དབྱེར་མེད་པདྨ་འབྱུང་གནས་ཞལ་གཅིག་ཕྱག་གཉིས་རྡོ་རྗེ་ཐོད་པ་འཛིན་པ། པད་ཞྭ་ཆོས་གོས་ཟ་འོག་གི་བེར་སྨུག་གསོལ་ཞིང་། གྲུ་མོར་སྦས་ཡུམ་ཚུལ་དུ་ཁ་ཊྭཱྃ་རྩེ་གསུམ་བཅུག་པ། འཁོར་དུ་རྩ་གསུམ་རབ་འབྱམས་སྤྲིན་ལྟར་གཏིབ་པས་བསྐོར་བར་བསམ་ལ། དད་གུས་དྲག་པོས། ཧྲཱི༔ ཆོས་སྐུ་སྣང་བ་མཐའ་ཡས་ལ༔ གསོལ་བ་འདེབས་སོ་བྱིན་གྱིས་རློབས༔ འཇའ་ལུས་མཁའ་སྤྱོད་འགྲུབ་པ་དང་༔ ཟབ་ལམ་འཕོ་བ་འབྱོངས་གྱུར་ཅིག༔ སོགས་ཧཱུྃ་དམར་མ་ལྟར་གསོལ་འདེབས་བྱ། ཧཱུྃ་རིང་པོ་གཅིག་བརྗོད་པའི་ཚེ་རང་སེམས་བྱ་ཁྱུང་དེ་འཕར་ཞིང་འཕུར་ལ་ཁད་པར་བསམ། དེ་ནས་ཕཊ་སྒྲ་ཐུང་ཞིང་དྲག་ཏུ་བརྗོད་པའི་ཚེ། བྱ་ཁྱུང་དེ་རྩ་དབུ་མའི་ལམ་ནས་ཡར་སྐད་ཅིག་ལ། སོག་སྦུབ་ནང་ནས་ཡུངས་དཀར་ཕུས་བཏབ་པ་བཞིན་དུ་སྤྱི་བོའི་ཚངས་པའི་བུ་གར་ཤར་གྱིས་ཐོན་ནས།
པདྨ་འབྱུང་གནས་ཀྱི་གདན་ལ་རེག་ཙམ་བྱས་པར་བསམ། ཡང་ཧཱུྃ་བརྗོད་ནས་བྱ་ཁྱུང་སྙིང་ཁར་པདྨའི་གདན་ལ་ཕབ། ཡང་ཕཊ་བརྗོད་ཚེ་ཡར་ལ་འཕོ། དེ་ལྟར་དབབ་ལྡོག་ཡང་ཡང་བསྒོམ་པས་རང་གི་སྤྱི་བོ་ཚ་བ་དང་། ཆུ་སེར་འབྱུང་བ་དང་། རྣ་བ་འུར་ཞིང་། མགོ་བོ་འཁོར་བར་འབྱུང་ཚེ་ལུས་སེམས་ཀློད་ལ། བྱ་ཁྱུང་སྙིང་གར་ཕབ་ལ་དམིགས་མེད་ཤེས་པ་རང་ལུགས་སུ་བཞག །པདྨ་འདབ་བརྒྱད་ཁ་ཟུམ་པར་རིག་པ་བྱ་ཁྱུང་བཞུགས་པར་བསམ་ལ་བདེ་བར་འདུག །སྤྱི་བོའི་པདྨ་འབྱུང་གནས་རང་ལ་བསྟིམ་མོ། །ཡང་ཁྲོམ་ཆོས་ལྟ་བུ་ལ། ཧཱུྃ་དང་ཕཊ་ཀྱི་སྒྲ་མང་སྦྱངས་ཚར་རྗེས་སུ་སྨོན་ལམ་འདི་ལྟར་བྱ། །བདག་དེ་ལྟར་རྩེ་གཅིག་གསོལ་བཏབ་པས། །ལུས་འབྱུང་བཞི་སྟོང་གསལ་ཁང་པ་རུ། །རྩ་དབུ་མ་འོད་ཀྱི་སྦུ་གུའི་ནང་། །སྙིང་པདྨ་འདབ་བརྒྱད་ཉི་ཟླའི་སྟེང་། །སེམས་སྐྱེ་མེད་བྱ་ཁྱུང་གཤོག་སྒྲོ་རྒྱས། །ཡིད་སྐད་ཅིག་གློག་འགྱུ་ཇི་བཞིན་
ཏུ། །གནས་སྤྱི་བོའི་གཙུག་གི་ནམ་མཁའ་ལ། །སྐྱབས་ཀུན་འདུས་པད་འབྱུང་ཐུགས་ཀ་རུ། །ཁྱུང་རང་སེམས་ཡར་ལ་རྒྱངས་ཀྱིས་འཕུར། །རྗེ་བླ་མའི་ཐུགས་དང་དབྱེར་མེད་འདྲེས། །རང་བྱ་ཁྱུང་པད་འབྱུང་དབྱེར་མེད་པར། །ནུབ་བདེ་བ་ཅན་དུ་མདའ་ལྟར་སོང་། །མགོན་སྣང་མཐའི་ཐུགས་ཀར་ཐིམ་པར་གྱུར། །འབྲས་ཕྱིར་མི་ལྡོག་པའི་ས་ཐོབ་ཤོག །གཞན་ཡང་སྨོན་ལམ་གང་ཤེས་བྱའོ། །དེ་ནས་ལས་ལ་སྦྱར་བ་ནི། འཕོ་བའི་དམིགས་པ་ཧཱུྃ་དམར་མ་ཞེས་བྱ་བ་ནུས་ལྡན་རྡོ་རྗེས་བརྩམས་པའི་ཆོས་ས་མ་ཡཿ རྒྱ་རྒྱ་རྒྱཿ འདི་ཡི་དམིགས་རིམ་ནི། རང་ཉིད་རྡོ་རྗེ་གྲོ་ལོད་དུ་བསྒོམ་ནས༔ དེའི་ཐུགས་ཀ་ནས་ཧཱུྃ་དམར་ནག་གཅིག་གི་ཞབས་ཀྱུ་ནར་གྱིས་བརྐྱངས་ཏེ༔ དམིགས་བྱ་རྡོ་རྗེ་ཕག་མོར་བསྐྱེད་ནས༔ དེ་ཡི་རྩ་དབུ་མའི་རྒྱུད་ནས་ཧཱུྃ་གིས་དྲངས་ཏེ་སྐད་ཅིག་གིས་རྩ་དབུ་མའི་ནང་ནས་ཐོན་སྟེ༔ སྤྱི་བོར་པདྨ་འབྱུང་གནས་གསལ་བར་སྒོམ་པའི་ཐུགས་
ཀར་སིབ་སིབ་ཐིམ་པར་བསྒོམ༔ བདག་མདུན་གྱི་བསྐྱེད་རིམ་གསལ་བ་གལ་ཆེ༔ ཧཱུྃ་གི་ལྕགས་ཀྱུས་སྐད་ཅིག་དྲན་རྫོགས་སུ་བར་མ་ཆད་པར་ནྲྀ་ཡིག་འདྲེན་པ་གལ་ཆེའོ༔ ཐེ་ཚོམ་མེད་པར་དམིགས་པ་བཅུས་དམིགས་བྱའི་རྣམ་ཤེས་འཕོ་བར་ཐེ་ཚོམ་མེད༔ ཨོ་རྒྱན་ཡང་བདེ་བ་ཅན་དུ་སྣང་མཐའི་ཐུགས་ཀར་ཐིམ་པ་ཡིན་ནོ༔ ཧཱུྃ་ཧཱུྃ་ཧཱུྃ༔ ལྕང་ལོ་ཅན་དུ་གསང་བའི་བདག༔ སོགས་བརྗོད། ཧྲཱིཿ ཆོས་སྐུ་སྣང་བ་མཐའ་ཡས་ལ༔ གསོལ་བ་འདེབས་སོ་བྱིན་གྱིས་རློབས༔ འཇའ་ལུས་མཁའ་སྤྱོད་འགྲུབ་པ་དང་༔ ཟབ་ལམ་འཕོ་བ་འབྱོང་གྱུར་ཅིག༔ ཧཱུྃ་ཕཊ༔ ཧྲཱིཿ ལོངས་སྐུ་ཐུགས་རྗེ་ཆེན་པོ་ལ༔ གསོལ་བ་འདེབས་སོ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱི༔ སྤྲུལ་སྐུ་པདྨ་འབྱུང་གནས་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱི༔ ལྷ་ལྕམ་མནྡཱ་ར་བ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱི༔ མཁའ་འགྲོ་ཡེ་ཤེས་མཚོ་རྒྱལ་
ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ ལྷ་སྲས་མུ་ཁྲི་བཙད་པོ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ རིག་འཛིན་རྗེ་འབངས་ཉེར་ལྔ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ ཡི་དམ་གུ་རུ་དྲག་པོ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ དབང་ཆེན་རྟ་ཕག་ཡབ་ཡུམ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ གུ་རུ་རྡོ་རྗེ་གྲོ་ལོད་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ རིག་འཛིན་མི་འགྱུར་རྡོ་རྗེ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ ཧྲཱིཿ དཔལ་མགོན་མ་ནིང་ནག་པོ་ལ༔ གསོལ་བ༴ འཇའ་ལུས༴ ཟབ་ལམ༴ ཧཱུྃ་ཕཊ༔ དེ་ལྟར་གསོལ་བ་བཏབ་པའི་མཐུས༔ སྣང་སྲིད་ཐམས་ཅད་བདེན་མེད་གྱུར༔ དངོས་སྣང་འཁྲུལ་པའི་ཡིད་འགགས་ཏེ༔ དངོས་མེད་རེ་དོགས་བླང་དོར་བྲལ༔ ཐམས་ཅད་ཆོས་དབྱིངས་ཀློང་ཐིམ་ཤོག༔ ༈ །བུ་མ་ཡེངས་མ་
ཡེངས་རིག་པ་གཏོད༔ ལུས་སྣང་སྟོང་རྡོ་རྗེ་ཕག་མོ་བསྒོམ༔ གནས་སྙིང་ཁ་ཆོས་ཀྱི་འཁོར་ལོ་ན༔ སྲོག་ནྲྀཿཡིག་སྔོན་པོ་གསལ་བ་དེ༔ ཧཱུྃ་དམར་པོའི་ཞབས་ཀྱུས་ཡར་བླངས་ཏེ༔ རྩ་དབུ་མའི་རྒྱུད་ནས་སྤྱི་བོར་ཐོན༔ རྗེ་པད་འབྱུང་ཐུགས་ཀར་སིབ་སིབ་ཐིམ༔ དབྱེར་མེད་པ་ཆུ་ལ་ཆུ་བཞག་ལྟར༔ སངས་རྒྱས་པའི་འབྲས་བུ་ཐོབ་པར་ཤོག༔ ཕཊ༔ ཅེས་ལས་སྦྱོར་དང་༔ ལ་ཆེན་སྔོན་དུ་བསྐྱེད་རིམ་སྦྱངས་ནས་བརྟན་པ་ཐོབ་པ་གྱིས༔ གཞན་ལ་འཕོ་བ་འདེབས་དུས་ཁྱི་མཐོང་རྡོ་ལེན་བྱས་པས་གར་ཡོང་༔ རང་རྒྱུད་སྨིན་འདུལ་བྱས་ན་གཞན་རྒྱུད་སྨིན་པ་འདུལ་བ་རྒྱུད་སྡེ་ཐམས་ཅད་ནས་གསུངས་པ་གདའོ༔ རིག་འཛིན་མི་འགྱུར་རྡོ་རྗེ་དྲག་པོ་ནུས་ལྡན་རྩལ་གྱི་ཁྱད་ཆོས་ཐུགས་ཏིག༔ རྡོ་རྗེ་གྲོ་ལོད་རྩལ་གྱི་ཞལ་གདམས་མན་ངག་ཤིན་ཏུ་རྣོ་བ༔ རོ་ཆོག་མཁན་ཚོས་གཤིན་པོ་རྣམས་ལ་ཕན་ཐོགས་པར་ཤོག༔ བྲན་གྱི་མཆོག་གྱུར་གཟའ་རཱ་ཧུ་ལས་ཆོས་
འདི་སྲུངས་ཤིག་ས་མ་ཡ༔ རྒྱ་རྒྱ་རྒྱ༔ ༈ །བཞི་པ་བར་དོ་འཁྲུལ་པ་རང་གྲོལ་ལས། སྤྱིར་བསྟན་པ་དང་། བྱེ་བྲག་སྒོམ་པའི་ཐབས་དང་གཉིས་ལས། དང་པོ་ལ། སྔ་འགྱུར་རྙིང་མའི་བཞེད་པ་བར་དོ་རྣམ་པ་དྲུག་སྟེ། སྐྱེ་གནས་བར་དོ་ནི་སྐྱེས་ནས་མ་ཤི་བར། ༡ རྨི་ལམ་བར་དོ་ནི་གཉིད་མ་སད་བར། ༢ བསམ་གཏན་བར་དོའམ་སྣང་བ་སྐྱེ་ཤིའི་བར་དོ་ནི། ལམ་བསྐྱེད་རྫོགས་རིམ་པ་གཉིས་དང་ཁྱད་པར་བར་དོའི་གདམས་ངག་སྒོམ་པ། ༣ འཆི་ཁ་བར་དོའམ་རང་བཞིན་ལམ་གྱི་བར་དོ་ནི་བར་དོ་དང་པོ་འོད་གསལ་འཆར་བའི་སྐབས། ༤ ཐ་མལ་སད་པའི་བར་དོའམ་ཆོས་ཉིད་བར་དོ་ནི་གཉིས་པ། ༥ སྲིད་པ་བར་དོའམ་སྐྱེ་གནས་བར་དོ་ནི་བར་དོ་གསུམ་པ་དྲུག་ཏུ་གསུངས་སོ། །དེ་ཐམས་ཅད་གསུམ་དུ་འདུ་བ་ཡིན་ཏེ། བླ་མ་ཞང་གིས། མིང་ནི་གསུམ་སྟེ། སྐྱེ་ཤི་བར་དོ། རྨི་ལམ་བར་དོ། སྲིད་པ་བར་དོ་དང་གསུམ་མོ། །འཁྲུལ་ལུགས་ནི་གསུམ་སྟེ།
དང་པོ་སྣང་བ་འཁྲུལ། གཉིས་པ་བག་ཆགས་འཁྲུལ། གསུམ་པ་ལས་ཀྱིས་འཁྲུལ་ལོ། །དུས་ནི་གསུམ་སྟེ། དང་པོ་སྐྱེས་ནས་མ་ཤིའི་བར། གཉིས་པ་གཉིད་ནས་མ་སད་པར། གསུམ་པ་ཤི་ནས་སྐྱེ་བ་མ་བླང་གི་བར་རོ། །ལུས་ནི་གསུམ་སྟེ། དང་པོ་རྣམ་སྨིན་གྱི་ལུས། གཉིས་པ་བག་ཆགས་ཀྱི་ལུས། གསུམ་པ་རླུང་སེམས་ཀྱི་ལུས་སོ། །སྦྱོང་བྱེད་ནི་གསུམ་སྟེ། རྣམ་སྨིན་གྱི་ལུས་དབང་དང་དམ་ཚིག་བསྐྱེད་རྫོགས་ཀྱིས་སྦྱོང་། བག་ཆགས་ཀྱི་ལུས་རྨི་ལམ་སྒྱུ་ལུས་འོད་གསལ་གྱིས་སྦྱོང་། རླུང་སེམས་ཀྱི་ལུས་རབ་འོད་གསལ། འབྲིང་རྨི་ལམ། ཐ་མ་སྒྱུ་ལུས་དང་བསྲེ་ཞིང་སྦྱོང་བར་བྱའོ།། ༈ །།གཉིས་པ་བྱེ་བྲག་སྒོམ་པའི་མན་ངག་ནི་ཆོས་ཉིད་བར་དོ་སྟེ། གཏེར་གཞུང་ལས། འདི་དང་ཕྱི་མའི་སོ་མཚམས་སུ༔ བར་དོའི་འཁྲུལ་སྣང་འཆར་བའི་ཚེ༔ འཇའ་འོད་མེ་དཔུང་བཟོད་དཀའི་ནང་༔ ཞི་ཁྲོ་རབ་འབྱམས་སྐུ་གཟུགས་འཆར༔ མ་དག་སྣང་བས་
བདུད་དུ་འཆར༔ དག་སྣང་གོམས་འདྲིས་ཡོད་པའི་མི༔ ལྷ་རུ་ཤེས་ནས་སངས་རྒྱས་ཐོབ༔ ཅེས་སོ། །དེ་ཡང་བར་དོ་དང་པོ་འོད་གསལ་ངོས་མ་ཟིན་ཞིང་འཁྲུལ་སྣང་འཆར་བའི་ཚེ་རིག་པ་རང་སོ་འཇུག་ཅིང་མ་འཁྲུལ་པར་རང་ལ་གནས་པའི་ཡེ་ཤེས་སུ་ངོ་ཤེས་པ་གལ་ཆེ། དེ་དག་གི་ཚེ་རང་ཉིད་པད་འབྱུང་དྲག་པོ་རྩལ་དུ་སྒོམ་ལ། ཞི་ཁྲོའི་ལྷ་ཚོགས་ཤར་བ་ཐམས་ཅད་རང་ལ་བསྡུ་ཞིང་རང་ཉིད་སྐུ་གསུམ་གྱི་ཞིང་གང་དུ་སྐྱེ་བར་འདོད་པ་དེར་མདའ་ལྟར་འཕོ་བའི་འདུན་པ་གཏད་པས་གྲོལ་བར་ངེས་སོ། །གཏེར་གཞུང་རྩ་བ་ལས། རྨོངས་པའི་རིགས་ལ་ངོ་སྤྲོད་པ༔ འདི་དང་ཕྱི་མའི་སོ་མཚམས་སུ༔ འཇིགས་སྐྲག་བཟོད་དཀའ་འཆར་བའི་ཚེ༔ རང་ཉིད་པདྨ་འབྱུང་གནས་སྐུ༔ འཇའ་ལུས་སྣང་སྟོང་གཟུགས་སུ་བསྒོམ༔ འཇིགས་སྐྲག་འདི་རྣམས་འཁྲུལ་སྣང་ཆ༔ གསོན་ཚེ་ལྷ་རྣམས་ལུས་ལ་ཚང་༔ ད་ལྟ་སྣང་བའི་ཆ་ལས་གྲུབ༔ སེམས་ནི་མར་མེའི་མདངས་
ལྟར་གདའ༔ རང་སེམས་འཁྲུལ་པས་གཉིས་སུ་མཐོང་༔ རང་ལ་རང་ཉིད་སྐྲག་པ་མེད༔ སྣང་བའི་ཡུལ་ལས་ཞི་ཁྲོའི་སྐུ༔ འདི་ནི་དམ་ཡེ་དབྱེར་མེད་ཡིན༔ རང་ཉིད་པད་འབྱུང་བསྒོམ་ནས་ནི༔ ཞི་ཁྲོའི་ལྷ་རྣམས་རང་ལ་བསྟིམ༔ རང་སེམས་དངོས་མེད་རིག་རྩལ་འདི༔ ཐོགས་པ་མེད་པ་འཕུར་རོ་བསམ༔ གང་མོས་ཞིང་དུ་རིག་པ་གཏད༔ ཐོགས་མེད་མདའ་ལྟར་སོང་བར་བསམ༔ བར་དོ་མེད་པར་སངས་རྒྱས་ཐོབ༔ ཚེ་འདིར་ཚིག་དོན་ཡིད་ལ་ཟུང་༔ དེ་ཕྱིར་མ་འོངས་ལས་ཅན་རྣམས༔ སྙིང་ལ་འཆང་ཞིག་ཨ་ཐམ་རྒྱ༔ ཅེས་སོ། །རྩ་ཚིག་ལས། ཀྱེ་མ༔ བདག་ལ་ཆོས་ཉིད་བར་དོ་འཆར་དུས་འདིར༔ ཀུན་ལ་སྔངས་སྐྲག་འཇིགས་སྣང་སྤང་བྱས་ནས༔ གང་ཤར་རང་སྣང་རིག་པ་ངོ་ཤེས་འཇུག༔ བར་དོའི་སྣང་ཚུལ་ཡིན་པར་ཤེས་པར་བྱ༔ དོན་ཆེན་འགག་ལ་ཐུག་པའི་དུས་ཞིག་འོང་༔ རང་སྣང་ཞི་ཁྲོའི་ཚོགས་ལ་མ་འཇིགས་ཤིག༔ ཅེས་
གསུངས་པ་ལྟར་རོ། །ལྷག་པའི་ལྷ་མཆོག་ཚེ་གཅིག་སྒྲུབ་པའི་ལྷ། །ཡེ་གསང་ཐུགས་གཏེར་རྡོ་རྗེ་གྲོ་ལོད་ཀྱི། །རྒྱལ་བ་རིགས་ལྔའི་ཟབ་ཁྲིད་ཟིན་ཏིག་འདི། །དགེ་བྱེད་ཆུ་སྟག་ལོ་རུ་རཏྣས་བྲིས། །ཉེས་འགལ་བཤགས་ཤིང་དགེ་ཚོགས་འགྲོ་ལ་བསྔོ། །དགེ་བས་རྒྱལ་བསྟན་དར་རྒྱས་ཡུན་གནས་ཤོག །ཧྲཱིཿད་ཡ་ཤཱ་ས་ན་ཝརྡྷནྟུ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།