བར་དོ་དྲུག་གི་སྨོན་ལམ་རྗེ་རས་པ་ཆེན་པོའི་ཞལ་ལུང་།
བར་དོ་དྲུག་གི་སྨོན་ལམ་རྗེ་རས་པ་ཆེན་པོའི་ཞལ་ལུང་བཞུགས་སོ། །རྗེ་བཙུན་བླ་མ་རྣམས་ལ་ཕྱག་འཚལ་ལོ། །སྨོན་ལམབདེན་ཚིག་འགྲུབ་པར་བྱིན་གྱིས་རློབས། །འཁོར་འདས་སྐྱེ་ཤི་གཉིས་ཀྱི་བར་དོ་འདིར། །མཚན་ལྡན་བླ་མ་ཚུལ་བཞིན་བསྟེན་ནས་སུ། །ཚུལ་གནས་ཐོས་བསམ་སྒོམ་གསུམ་མཐར་ཕྱིན་ནས། །ལྟ་སྒོམ་སྤྱོད་པ་མཐའ་རུ་ཕྱིན་པར་ཤོག ༼༡༽ །སྣང་བ་སྐྱེ་ཤི་བསམ་གཏན་བར་དོ་རུ། །དབང་གིས་རྒྱུད་སྨིན་དམ་ཚིག་རྣམ་དག་པས། །རིག་པ་ཡེ་ཤེས་སེམས་ཀྱི་རྩལ་རྫོགས་ཕྱིར། །བསྐྱེད་རྫོགས་རིམ་གཉིས་བརྟན་པ་མཐར་ཕྱིན་ཤོག ༼༢༽ །འཆི་ཁ་རང་བཞིན་ལམ་གྱི་བར་དོ་རུ། །སྙན་བརྒྱུད་གདམས་ངག་ཟབ་མོ་སྒོམ་པའི་མཐུས། །གཞི་དང་ལམ་གྱི་འོད་གསལ་མ་བུ་འཕྲད། །དོན་དམ་ཆོས་སྐུའི་རང་ཞལ་མཐོང་བར་ཤོག ༼༣༽ །རྨི་ལམ་ཉིང་འཁྲུལ་གཉིད་ཀྱི་བར་དོ་རུ། །འཁྲུལ་སྣང་བག་ཆགས་ལམ་དུ་བསླང་
པའི་ཕྱིར། །རྨི་ལམ་སྒྱུ་ལུས་སྤྲུལ་བསྒྱུར་མཐར་ཕྱིན་ནས། །ལོངས་སྤྱོད་རྫོགས་སྐུ་མངོན་དུ་འགྱུར་བར་ཤོག ༼༤༽ །ཐ་མ་ཆོས་ཉིད་སྲིད་པ་བར་དོ་རུ། །ཡེ་ཤེས་ལྔ་ཡི་རང་རྩལ་ཞི་ཁྲོའི་ལྷ། །སྐུ་གསུམ་ལྷུན་གྲུབ་བཞུགས་པ་ངོ་འཕྲོད་ནས། །ཡི་དམ་ལྷ་དང་དབྱེར་མེད་སངས་རྒྱས་ཤོག ༼༥༽ །སྐྱེ་གནས་བརྒྱུད་པའི་བར་དོ་གསུམ་པ་རུ། །འཕོ་བ་འམ་ནི་བསམ་བཞིན་ལུས་བླངས་ཏེ། །རྒྱུ་འབྲས་བསླུ་བ་མེད་པའི་རྟེན་འབྲེལ་གྱིས། །ལམ་གྱི་འཕྲོ་མཐུད་འབྲས་བུ་མངོན་གྱུར་ཤོག ༼༦༽ །བར་དོ་དྲུག་གི་གདམས་ངག་ལ་བརྟེན་ཏེ། །རབ་འབྲིང་ཐ་མའི་ཉམས་ལེན་མཐར་ཕྱིན་ནས། །རང་དོན་མངོན་གྱུར་གཞན་དོན་ལྷུན་གྲུབ་པ། །སྐུ་གསུམ་དབྱེར་མེད་རྡོ་རྗེ་འཆང་འགྲུབ་ཤོག །ཅེས་རྗེ་བཙུན་བཞད་པ་རྡོ་རྗེའི་ཞལ་གདམས་ལྟར་བར་དོ་དྲུག་གི་སྨོན་ལམ་འདི་ཡང་རང་གི་ཡིད་ལ་གོམས་ཤིང་འདྲིས་པའི་ཆེད་དང་། ཆོས་དྲུག་ཉམས་སུ་ལེན་པའི་ལས་དང་པོ་
རྣམས་ལ་ཕན་པའི་བློས་གཏེར་སློབ་མཁན་པོ་ཀརྨ་རིན་ཆེན་དར་རྒྱས་དཔལ་བཟང་པོས་ཤུ་བྷ་ཀྲི་ཏ་དགེ་བྱེད་ཆུ་སྟག་གི་ལོ་གྲོ་ཞུན་ཟླ་བའི་ཡར་ཚེས་༡༣ ལ། འོག་མིན་ཀརྨའི་སྒྲུབ་ཁང་བྱམས་པ་ཆོས་གླིང་དབྱངས་ཅན་དགའ་བའི་ཚལ་ནས་ཐུན་བར་དུ་བྲིས་པ་འགྲོ་རྣམས་བར་དོ་ཆོས་ཉིད་དུ་གྲོལ་བར་གྱུར་ཅིག །ཤུ་བྷཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།