རྫོགས་ཆེན་མཁའ་འགྲོ་སྙན་རྒྱུད་ཟངས་སྦུབ་མའི་ཟིན་བྲིས་ཟབ་དོན་གྱི་ཐིག་ལེ།
རྫོགས་ཆེན་མཁའ་འགྲོ་སྙན་རྒྱུད་ཟངས་སྦུབ་མའི་ཟིན་བྲིས་ཟབ་དོན་གྱི་ཐིག་ལེ་ཞེས་བྱ་བ་བཞུགས་སོ། །
ན་མོ་གུ་རུ་གུ་ཧྱ་ཛྙཱ་ན་པདྨ་སཾ་བྷ་ཝཱ་ཡ། ཡོངས་དགེ་གཏེར་ཆེན་མི་འགྱུར་རྡོ་རྗེའི་ཟབ་ཐིག་རྫོགས་ཆེན་སྙན་རྒྱུད་ཟངས་སྦུབ་མའི་ཟིན་བྲིས་ལ། ལུས་དཀྱིལ་བསྐྱེད་རིམ་བསྒོམ་པ། ལྷ་སྔགས་བཟླ་བ། རྫོགས་ཆེན་བསྒོམ་པ། དེའི་རྗེས་ཐོབ་ཏུ་དྲག་པོའི་སྐུར་བཞེངས་པའོ། །དེ་ཡང་རྫོགས་པ་ཆེན་པོ་ཨ་ཏི་ཡོ་ག་ལ། ཟུག་པ་རྩ་བའི་ཚུལ་དུ་ཕྱི་སེམས་སྡེ། གྱེས་པ་ཡལ་གའི་ཚུལ་དུ་ནང་ཀློང་སྡེ། འདྲིལ་བ་སྡོང་པོའི་ཚུལ་དུ་གསང་བ་མན་ངག་གི་སྡེ། གསལ་བ་མེ་ཏོག་གི་
ཚུལ་དུ་ཡང་གསང་བླ་མེད་གསང་སྔགས་མ་རྒྱུད་མཁའ་འགྲོའི་སྙིང་ཁྲག་ལས། སྨིན་པ་འབྲས་བུའི་ཚུལ་དུ་ཡང་ཏི་སྙན་རྒྱུད་ཟངས་ཀྱི་སྦུ་གུ་ཉམས་སུ་ལེན་པ་ལ། རྫོགས་ཆེན་སྤྱིའི་གཞུང་ལུགས་ལྟར་ན། སྔོན་འགྲོ་སེམས་ཀྱི་ཁང་བུ་བཤིག་པ། དངོས་གཞི་རིག་པ་རང་ངོ་སྤྲད་པ། རྗེས་སྣང་ཉམས་གྱི་སྐྱོང་ཐབས་བསྟན་པ་གསུམ་གྱིས་ཁོག་ཕུབ་པ་ཡིན་ཀྱང་འདིར་ནི་མན་ངག་བསྐྱེད་རྫོགས་ཟུང་འཇུག་གི་ཚུལ་དུ་ཉམས་སུ་ལེན་པ་ལ། ཧཱུྃ་གསུམ་གྱིས་སྒོ་གསུམ་རྡོ་རྗེ་
གསུམ་དུ་དཔའ་བས། ལྟ་སྒོམ་སྤྱོད་པའི་གདེངས་གསུམ་དང་ལྡན་པས་ཕྱི་གཟུང་འཛིནགྱི་དགྲ་བགེགས་འབིགས་པར་བྱེད་པ། ནང་ང་བདག་གི་ཀུན་རྟོག་འདུལ་བར་བྱེད་པ། གསང་བ་ཆགས་སྡང་གི་ཉོན་མོངས་གཅོད་པར་བྱེད་པས། ཕྱི་འབྱུང་བ་བཞི་ཡི་རྐྱེན་ལས་གྲུབ་པའི་ལུས་ནི་བདེན་པར་མ་གྲུབ་པས་སྟོང་པ་ཉིད་ཀྱི་ངང་དུ་ཡལ། ཆོས་ཀྱི་དབྱིངས་སུ་ཐིམ། ཞེས་དམིགས་མེད་དུ་རྒྱས་བཏབ་ལ། མེད་བཞིན་དུ་སྣང་བ་སྒྱུ་མ་མཁན་གྱིས་རྟ་དང་གླང་པོར་སྤྲུལ་པ་ལྟ་བུའི་གདོས་བཅས་ཤ་ཁྲག་ཟག་པ་དང་བཅས་པ་ཉེ་བར་ལེན་པའི་ཕུང་པོ་འདི་ལ་བརྟེན་ནས་ང་ཞེས་ངར་འཛིན་ལྷན་སྐྱེས་ལ་ཨ་འཐས་པའི་ཞེན་པ་ཞུགས་ནས་ཆགས་སྡང་གི་རྒྱུ་བྱེད་པ་འདི་ལ་བརྟགས་ཤིང་དཔྱད་ན། ཆགས་ཤིང་ཞེན་མཁན་ནམ་གནས་ཤིང་སྡོད་མཁན་ནི། རང་སེམས་དངོས་མེད་ཀུན་བྱེད་རྒྱལ་པོ་འདི་རང་ཡིན་པར་འདུག་སྟེ། འདི་ཉིད་ཀྱི་རིག་པའི་རང་རྩལ་རང་རིག་
རང་གསལ་ནི་ཡེ་གདོད་མ་ནས་ཡེ་ཤེས་ལྷ་ཡི་སྐུ་སྟེ་ཆོས་ཀྱི་སྐུ་ཡིན་པ་ངོ་མ་ཤེས་ཤིང་ངོས་མ་ཟིན་ནས་འཁྲུལ་པ་ཡིན་འདུག་པས། ད་རེས་ནི་སྐྱབས་གནས་བསླུ་བ་མེད་པ། ངོ་བོ་སྟོང་པ་ཆོས་སྐུ། རང་བཞིན་གསལ་བ་ལོངས་སྐུ། ཐུགས་རྗེ་སྣ་ཚོགས་སུ་འཆར་བ་སྤྲུལ་པའི་སྐུ་སྟེ་སྐུ་གསུམ་དབྱེར་མེད་རྡུལ་གཅིག་གི་གོ་ས་ན་སྟོང་གསུམ་དར་ཡུག་གི་དཔེ་ལྟར་རང་ལ་གནས་པའི་བཞུགས་པ་དེ་ཡིན་ལ་ཡིན་བཞིན་དུ། གདུལ་བྱ་གཞན་སྣང་གི་རོལ་གར་སྐུ་མདོག་ཕྱག་མཚན་རྒྱན་དང་ཆ་ལུགས་གཞུང་ལྟར་གསལ་བར་བསྒོམ་པར་བྱ་སྟེ།། ༈ །།ཕྱིའི་སྟོང་ར་རྡོ་རྗེ་གྲོ་ལོད་མཁའ་འགྲོ་སེང་གདོང་འཁྲིལ་སྦྱོར་ཡབ་ཀྱི་ཞབས་གཡས་བསྐུམ་ཞིང་གཡོན་བརྐྱང་བའི་འདོར་སྟབས་ཀྱིས་བམ་རོ་ཉི་ཟླ་པདྨའི་གདན་ལ་འགྱིང་བ། ཡུམ་གྱི་ཞབས་གཉིས་པདྨའི་སྐྱིལ་ཀྲུང་གིས་འཁྲིལ་བ། འདི་ལ་ཞབས་མཐིལ་ཁ་སྦྱར་བ་དང་སྟེང་འོག་བསྒོམ་པའི་ལུགས་གཉིས་ལས་འདིར་ཕྱི་མ་
དགོས། མཆན། ཡབ་ཀྱི་གསང་གནས་ཧཱུྃ་ཡིག་ལས་རྡོ་རྗེ་མཐིང་ནག་རྩེ་ལྔ་པ་ལྟེ་བར་ཟླ་བ་ལ་ཧཱུྃ་གིས་མཚན་པ། ཡུམ་གྱི་མཁའ་གསང་པྃ་ཡིག་ལས་པདྨ་དམར་པོ་འདབ་མ་གསུམ་པའི་ལྟེ་བར་ཉི་མ་ལ་ཨྃ་གིས་མཚན་པའི་ནཱ་ད་ཟུང་དུ་འབྲེལ་བ་ཆགས་མེད་ཆགས་བྲལ་བདེ་གསལ་མི་རྟོག་པའི་ངང་དུ་གནས་པ། ཕྱག་མཚན་རྡོ་རྗེ་དང་ཕུར་པ་ལས། སྨྱོ་ཆོས་སུ་གྲགས་པའི་ལས་མདོས་སུ། ཕྱག་མཚན་གྱི་སྒྲུབ་ཐབས་འདུག་པར་གསེར་གྱི་རྡོ་རྗེ་རྩེ་ལྔ་པའི་ཡར་གྱི་རྭ་ལྔ་ལ་རྒྱལ་བ་རིགས་ལྔ། མར་གྱི་རྭ་ལྔ་ལ་རིགས་ཀྱི་ཡུམ་ལྔ། ལྟེ་བར་ཁྲག་འཐུང་རིགས་ལྔ་དང་རྩེ་མོར་བྱ་ཁྱུང་དམར་པོ་བསྐྱེད་ཅིང་རིགས་ལྔའི་བསྙེན་པ་དང་ཁྲོཾ་ག་རུ་ཎ་སོགས་ཀྱིས་སྒྲུབ་པར་གསུངས། གཡོན་གྱི་ཕུར་པ་ལ་ཨ་སུ་རའི་བྲག་ཕུག་ན་ཐེའུ་རང་མགར་བས་བརྡུང་པའི་ཕུར་པ་ཟུར་གསུམ་པ་དབལ་དང་ལྡན་པ་ཁྲུ་གང་བ། སྐུ་སྟོད་རྡོ་རྗེ་གྲོ་ལོད་གསལ་བར་བསྐྱེད་པའི་རྒྱ་མདུད་སྟེང་ན་སྡིག་པ་
འགྱེད་པ། ཕུར་པའི་རྩེ་ནས་ཚྭ་ཚྭ་འཕྲོ་བ་ཡེ་ཤེས་ཀྱི་མེ་འབར་བ། དགྲ་བགེགས་ཀྱི་སྙིང་ལ་གཟིར་བ། དབལ་ན་དྲེགས་པ་སྡེ་བརྒྱད་ཀྱི་མགར་བྱེད་པ། ཟི་ར་ཁོལ་བ། སེར་བ་སེར་བདག་གི་སྲོག་འདྲེན་ཅིང་དགྲ་ཡུལ་རྡུལ་དུ་བརླག་པར་བསྐྱེད་ནས། ཨརྩིག་གི་མཐར་ཛྙཱ་ན་བཛྲ་ཀརྨ་ཀཱི་ལ་ཡ་ཧཱུྃ་ཧཱུྃ་ཕཊ་ཀྱིས་བསྒྲུབ་པར་བྱའོ་ཞེས་འདུག་ཀྱང་། ཟངས་སྦུབ་གཞུང་དང་མི་འདྲ་ཞིང་གྲུབ་སྨྱོན་གྱིས་གསུངས། གནམ་ལྕགས་དང་། ཡུགས་ས་མའི་གྲི་ལིང་། རབ་ཆད་རྒད་པོའི་རྨ་གྲི་དང་། ལྕགས་སྣ་གསུམ་ལ་མགར་བ་ཞེས་ཕུར་པའི་བསྐྱེད་ཆོག་ཏུ་བཞུགས་པ་ནི་ཚིག་ལ་མི་ཞེན་པར་དོན་ལ་སྟོན་དགོས་པའི་གནད་ཀ་ཡིན་པར་འདྲའོ།། ༈ །།ཟངས་སྦུབ་མའི་སྐབས་འདིར་རྟག་བརྟན་ཐེར་ཟུག་མ་ཡིན་པར་ཡེ་ཤེས་རང་སྣང་ལས་གྲུབ་པའི་རྡོ་རྗེ་ཡིག་རྙིང་འགའ་རེར་རྩེ་ལྔ་ཡོད་ཀྱང་། དཔལ་སྤུངས་སྤར་མར་རྩེ་དགུ་མཛད་འདུག་པ་ནི། ཇི་སྐད་དུ་
ཡང་། ཕྱག་གཡས་རྡོ་རྗེ་རྩེ་དགུ་འཕྱར༔ རྩེ་མོར་ཡེ་ཤེས་ཁྱུང་ཆེན་འཕྱོ༔ ཞེས་གསང་སྒྲུབ་ལྟར་ཡིན་འདུག་པས་ཁྱད་པར་ཆེ་བ་རང་མེད་འདྲ། རྡོ་རྗེའི་ལྟེ་བ་ཟླུམ་པོ་སྦུབས་སྟོང་ཁོང་སེང་གི་ནང་དུ་མནྡཱ་ར་ཝ་གཞུང་ལྟར་བསྒོམ་པའི་ལྟོ་བར་དྲག་པོའི་གཞལ་ཡས་ཁང་མཚན་ཉིད་རྫོགས་པའི་དབུས་སུ། ཏྲཀྴད་ཀྱི་གོང་ནོན་གསང་བདག་རྡོ་རྗེ་གཏུམ་པོ་རྡོ་རྗེ་དང་ཞགས་པ་ཐོགས་པ་བསྒོམ་པའི་རྩེ་མོར་གནམ་ལྕགས་ཀྱི་བྱ་ཁྱུང་གཤོག་སྒྲ་དི་རི་རི་འཕྱོ་བའོ། །ཕྱག་གཡོན་དུག་ཟེར་རེག་ཕུང་གི་ཕུར་པའི་རྒྱ་མདུད་གོང་མའི་རྩེ་མོར་གནམ་ལྕགས་ཀྱི་སྡིག་པ་འཕྱོ་ཞིང་རྒྱ་མདུད་གོང་མའི་ནང་དུ། རྡོ་རྗེ་ཕུར་པ་ལྗང་ནག་ཡབ་རྐྱང་སྐུ་སྨད་ཕུར་པའི་དབལ་ལྡན་ཕྱག་གཉིས་ཀྱིས་སྲས་མཆོག་ཕུར་པ་འདྲིལ་ཞིང་འདེབས་པ་རྡོ་རྗེའི་གཤོག་པ་དང་དཔལ་དང་དུར་ཁྲོད་ཀྱི་ཆས་ཀུན་རྫོགས་པའི་ལྟེ་བར་མེ་རླུང་དམར་ནག་འཚུབས་མའི་ཀློང་དུ་སྲས་མཆོག་ཡཀྴ་མེ་དབལ་
སྨུག་ནག་དུར་ཁྲོད་ཆས་བརྒྱད་ལྡན་པ་གཡས་ཐོ་བ་དང་གཡོན་ལྕགས་ཀྱུ་འཛིན་པ་དམ་སྲི་ཉི་ཟླ་པདྨའི་ཀརྨ་དགོན་པས་ཚིག་གི་དངོས་བསྟན་ལྟར་ཁྱུང་གི་ཁོག་པར་གཞལ་ཡས་ཁང་དུ་ཕྱག་རྡོར་སྡིག་པའི་ཁོག་པར་མེ་རླུང་དབུས་སུ་ཡཀྴ་མེ་དབལ་སྒོམ་པ་ཡིན་པར་གསུངས། གདན་ལ་འགྱིང་བར་བསྒོམ།། ༈ །།འདི་སྐབས་སྐུ་ལ་རུས་ཆེན་གྱི་རྒྱན་དྲུག་དུར་ཁྲོད་ཆས་བརྒྱད་གསོལ༔ ཞེས་པ་ལས་ཆོས་གོས་དང་ཤམ་ཐབས་མེད་པ་འདྲ། ཡོད་ཀྱང་ན་བཟས་རྡོ་རྗེ་དང་པདྨ་ནི་སྒྲིབ་ཐོགས་མེད་པ། ཏཱ་ར་ནཱ་ཐའི་གསང་བའི་རྣམ་ཐར་གསལ་ལོ། །ཧ་ཧ། ཡུམ་སེང་གདོང་མ་ལ་རྙིང་མ་ལྟར་ན་གཟིག་ཤམ་དང་རུས་རྒྱན་ཅན་ཡིན་ཀྱང་། གསར་མ་ལྟར་ན་གཅེར་བུ་ཕྱག་རྒྱ་ལྔས་བརྒྱན་པ་ནི་སྟབས་བདེ་བ་འདྲའོ། །ཧ་ཧ། དེ་ནས་རྩ་བསྐྱེད་པ་ནི། ཧཱུྃ་གསུམ་གྱི་དོན་གོང་བཞིན་མི་འདའ་བའི་ངང་ནས།། ༈ །།རང་ཉིད་རྡོ་རྗེ་གྲོ་ལོད་དང་མཁའ་འགྲོ་སེང་གདོང་ཡབ་ཡུམ་འཁྲིལ་སྦྱོར་ཐབས་ཤེས་རབ་
གཉིས་སུ་མེད་པའི་ཡབ་ཀྱི་སྐུའི་ནང་དབུས་དབུ་མ་ཐུགས་ཀྱི་རང་བཞིན་སྔོན་པོ་གཡས་སུ་རོ་མ་ཤེས་རབ་ཀྱི་ངོ་བོ་ཡིན་ཀྱང་རྣམ་པ་སྐུའི་རང་བཞིན་ཐབས་བདེ་བ་ཆེན་པོ་མཚོན་པས་དཀར་པོ། གཡོན་དུ་རྐྱང་མ་ཐབས་ཀྱི་ངོ་བོ་ཡིན་ཀྱང་རྣམ་པ་ཤེས་རབ་ཀྱི་རང་བཞིན་དམར་པོ་བསྒོམ་དགོས་ཤིང་།། ༈ །།ཆོས་དྲུག་སོགས་གཞན་ལ་གཡས་སུ་རོ་མ་དམར་པོ་དང་། གཡོན་རྐྱང་མ་དཀར་པོ་ཡིན་ཀྱང་རོལ་པ་རྡོ་རྗེའི་དྲག་ཁྲོས་དང་སྙན་རྒྱུད་ཟངས་སྦུབ་འདི་གཉིས་དགོངས་པ་གཅིག་ཡིན་ཅིང་རྟེན་འབྲེལ་ལྟོས་ཆོས་ཐབས་ཤེས་ཀྱི་འབྲེལ་བ་ཡིན་པས་མི་འགལ་བའི་རྒྱུ་མཚན་ཀུན་མཁྱེན་རང་བྱུང་རྡོ་རྗེའི་ཟབ་མོ་ནང་དོན་དུ་གསལ་བས་དེར་བལྟ་བ་ལས་འདིར་ཡི་གེ་མང་དུ་དོགས་པས་མ་བྲིས་སོ།། ༈ །།དེ་གསུམ་གྱི་མར་སྣེ་ལྟེ་འོག་སོར་བཞིའི་མཚམས་སུ་འདུས་ཤིང་། དབུ་མའི་མར་སྣེ་གསང་བའི་རྩ་འཁོར་གྱི་དབུས་སུ་ཟུག་པ། དབུ་མའི་ཡར་སྣེ་གཙུག་
ཏོར་གྱི་རྩེ་མོར་རྡོ་རྗེ་ཕྱེད་པ་མཐིང་ཀ་དབུ་སྐྲ་རལ་པ་དམར་སེར་ཐོར་ཚུགས་བཅིང་བའི་རྩེར་ཏོག་གི་ཚུལ་དུ་མངོན་ལ་ལྟེ་བར་ཚེ་དཔག་མེད་དམར་པོ་ཡབ་ཡུམ་སྤྱི་འགྲོ་བསྒོམ་པ་ནི། རིགས་ཀྱི་བདག་པོ་སྟེ་རལ་པ་ཐོར་ཚུགས་བཅིངས་པའི་ལྷག་མ་རྣམས་གྱེན་དུ་བརྫེས་པ་ནི་གཞུང་ལས། དམར་སེར་རལ་པའི་གསེབ་ཏུ་ཚེ་དཔག་ཡབ་ཡུམ་བཞུགས༔ ཞེས་པ་དེའོ། །དྲག་པོ་རྩལ་གྱི་ཡིག་ཆུང་ལྟར་རླུང་བུམ་པ་ཅན་ཁྱད་དུ་བཟུང་ཞིང་སྦྱངས་པ་ཡིན་ན། གཡས་གཡོན་རོ་རྐྱང་གི་སྣེ་གཉིས་སྣ་བུག་གི་སྒོར་ཟུག་པ་བསྒོམ་དགོས་ཏེ། རླུང་རོ་ཧ་ཡི་འདོན་པའོ༔ སོགས་ཀྱིས་བསྟན་མོད། འདིར་ནི་བྱར་མེད་ཡང་ཏིའི་དགོངས་པ་བསྐྱེད་རྫོགས་དབྱེར་མེད་སྒོམ་པ་གཙོ་བོར་བསྟན་ནས་རླུང་དང་གཏུམ་མོ་སྔོན་དུ་གྲུབ་ཟིན་པའི་དབང་དུ་བཏང་བས། རོ་རྐྱང་སྣེ་ཡང་སྤྱི་བོ་གཙུག་ཏོར་ལ་རེག་པའོ། །ཀུན་བཟང་གི་སྐབས་སུ་རྩ་འཁོར་རྣམས་གདུགས་
ཀྱི་རྩིབས་མ་ལྟར་བསྒོམ་པ་ཡིན་ཀྱང་། འདི་སྐབས་རྩ་མདུད་འོད་ཀྱི་ཐིག་ལེ་དང་། འཇའ་འོད་ཐིག་ལེ་ཐིག་ཕྲན་རིག་གདངས་རྡོ་རྗེ་ལུ་གུ་རྒྱུད་བཅས་གསལ་འདེབས་དགོས་པས། རྩ་འདབ་ཀྱི་ཚུལ་ཐམས་ཅད་ལ། ཕྱོགས་བཞིར་རེ་རེ་དང་དེ་ལས་གྱེས་པ་སོགས་གཏེར་གསར་ཡང་དག་དང་འདྲ་བ་ལ་མི་འདྲ་བའི་ཁྱད་པར་བཅས་གཏེར་ཆེན་ཆོས་ཀྱི་རྒྱལ་པོ་མཆོག་གྱུར་གླིང་པའི་ཞལ་ཁྲིད་དཔེའུ་རིས་ལྟར་བསྒོམ་པར་བྱའོ།། ༈ །།ཀླད་པ་དུང་ཁང་ངམ་སྤྱི་བོ་བདེ་ཆེན་འཁོར་ལོའི་དབུས། དབུ་མའི་ནང་དུ་པདྨ་ཉི་ཟླའི་གདན་ལ་ཚེ་དཔག་མེད་ཡབ་ཡུམ་གཞུང་གསལ་ལྟར་དང་། ཕྱོགས་ཀྱི་རྩ་མདུད་འོད་ཀྱི་ཐིག་ལེ་བཞིར་ཚེ་ལྷ་རྒྱལ་བ་རིགས་བཞི། འོད་ཀྱི་ཐིག་ལེ་བརྒྱད་དུ་སེམས་དཔའ་ཡབ་ཡུམ་བརྒྱད་དང་བར་མཚམས་ཕྱི་རོལ་དུ་རྒྱལ་བ་རབ་འབྱམས་སྤྲིན་གཏིབས་པ་ལྟར་འཁྲིགས་ཀྱིས་ཁེང་བའམ། ཏིལ་གྱི་གོང་བུ་ཁ་བྱེ་བ་ལྟ་བུར་བསྒོམ། རྩ་སྦུབ་ཀྱི་
ནང་ཐམས་ཅད་ཡེ་ཤེས་སྒྲོན་མེའི་ཐིག་ལེ། རྡོ་རྗེ་ལུ་གུ་རྒྱུད་རྟ་རྔ་ལ་མུ་ཏིག་བརྒྱུས་པ་འདྲ་བ་ཐོད་རྒལ་གྱི་འཆར་སྣང་རྣམས་ཕྱི་རོལ་མིག་གི་འཁྲུལ་སྣང་ཙམ་མ་ཡིན་པར། རང་ལུས་ལ་འཇའ་འོད་ཐིག་ལེ་ལྷ་སྐུ་ཞི་ཁྲོ་རང་ལ་ཡོད་བཞིན་པ་མིག་གིས་བལྟ་མི་བཟོད་པར་རྩ་འདབ་ཐམས་ཅད་དུ་བསྒོམ་པ་ནི།། ༈ །།དུས་འཁོར་ལས་སྤྲིན་མེད་ནམ་མཁའི་རྣལ་འབྱོར་ལ་གནད་དུ་བསྣུན་པས་སྟོང་གཟུགས་རེ་ཁཱ་ནག་པོར་སྲིད་པ་གསུམ་གྱི་གཟུགས་བརྙན་ཤར་བ་དང་། རྫོགས་ཆེན་ལས། ཐོད་རྒལ་ཟེར་ཁྲིད་ཀྱི་འཆར་སྣང་ཐམས་ཅད་ནང་དུ་གནས་པའི་རྟགས་ཕྱི་རོལ་དུ་འཆར་བ་ཡིན་ཀྱང་། ངེས་པའི་དོན་ལ་རྩ་འཁོར་སོ་སོའི་ལྟེ་བར་འོད་གསལ་རྟགས་བཅུ་འཆར་ཞིང་། ཁྱད་པར་རིག་པ་ལུ་གུ་རྒྱུད་མིག་དང་སྙིང་གི་དབུས་སུ་གདོད་ནས་འཆར་བ་སྟེ། དུས་འཁོར་བ་ཕྱི་མ་འགའ་ཞིག་གིས་ཕྱི་རོལ་གྱི་ནམ་མཁའ་ལ་མ་ཡིན་ཅིང་ནང་དབུ་མའི་
ནམ་མཁའ་ཁོ་ནའོ། །ཞེས་དགག་པ་མཛད་ཀྱང་ཕྱི་ནང་གཉིས་ཀ་ཡིན་ཀྱང་འདི་སྐབས་ནང་བསྒོམ་པ་གནད་ཟབ་པའི་མཐར་ཐུག་ཡིན་ཅེས་གཏེར་ཆེན་རིག་པ་འཛིན་པ་མཆོག་གི་ཞལ་སྔ་ནས་གསུངས་སོ།། ༈ །།རྩ་འཁོར་ལྷ་ཡི་ཁ་དོག་ལྟར་བསྒོམ་ན་སྤྱི་བོ་དམར་པོ་དང་། མགྲིན་པ་དཀར་པོ་ཡིན་ཀྱང་དེ་གོ་ལྡོག་ཟེར་བ་སྒོམ་མི་རུང་བས། སྤྱི་བོར་དཀར་པོ་རྩ་འདབ་སུམ་ཅུ་རྩ་གཉིས། མགྲིན་པར་དམར་པོ་བཅུ་དྲུག །སྙིང་ཁར་སྔོན་པོ་བརྒྱད། ལྟེ་བར་སེར་པོ་དྲུག་ཅུ་རྩ་བཞི། གསང་བར་ལྗང་གུ་སུམ་ཅུ་རྩ་གཉིས་རྣམས་གསལ་བའི་དབུས་སུ་གནས་ལྷ་རྣམས་གཞུང་ལྟར་ལ། སྣང་བ་མཐའ་ཡས་ཀྱི་ཡུམ་གོས་དཀར་མོ་དམར་མོ་མདའ་དར་ཚེ་བུམ། འཇིག་རྟེན་དབང་ཕྱུག་གི་ཡུམ་གསང་ཡེ་དཀར་མོ་པད་ཕྲེང་བུམ་པ། པདྨ་འབྱུང་གནས་ཀྱི་ཡུམ་མནྡཱ་ར་བ་དཀར་གསལ་མདའ་དར་བུམ་པ། ཡེ་ཤེས་མཚོ་རྒྱལ་གསེར་མདོག་གཡས་རྡོ་རྗེ་དང་མདའ་
དར་རྔ་ཡབ་གཡོན་ཐོད་པ་ཚེ་བུམ་གྱིས་བརྒྱན་པ། ཡབ་པདྨ་བཛྲ་རྩལ་ལམ་པདྨ་འབྱུང་གནས་སངས་རྒྱས་ཐོད་པ་སེར་པོ་རྡོ་རྗེ་དྲིལ་བུ་འཛིན་པ་ཡུམ་ལ་ཡབ་འཁྲིལ་བ་སྟེ་གོ་ལྡོག་ཞེས་བྱ། གསང་བའི་ཏྲཀྴད་ལྷ་བསྐྱེད་སྐབས་ཡབ་རྐྱང་ལས་ཡུམ་གྱི་གསལ་ཁ་མེད་ཀྱང་བསྙེན་སྐབས་གསལ་བར་སྒོམ་དགོས། ཕྱག་མཚན་མདུང་དར་བདུད་ཞགས་ལྕགས་ཀྱུ་དགྲ་སྙིང་བཅས་གསལ་གདབ་བོ།། ༈ །།དེ་ལྟར་གཞི་ལུས་ཀྱི་ལྷ་དང་རྩ་གནས་ཀྱི་ལྷ་རྣམས་སྐད་ཅིག་དྲན་རྫོགས་སུ་གསལ་བཏབ་ནས། སླར་ཡང་ཕྱི་སྟོང་ར་རྡོ་རྗེ་གྲོ་ལོད་ཡབ་ཡུམ་གྱི་རྒྱན་ཆ་ལུགས་ཕྱག་མཚན་སྤྱན་གྱི་དཀར་ནག་ཚུན་རྣམ་པ་གསལ་བར་བསྐྱེད་ཅིང་། ཡབ་སྔགས་ཤྲཱི་ཧེ་རུ་ཀ་དང་། ཡུམ་སྔགས་དྷཱ་ཀི་ཛྙཱ་ན་སྦྲེལ་ཏེ་བཟླ་བ་ནི་ལྷར་གསལ་བ་སྐུའི་བསྙེན་པའོ།། ༈ །།དེ་ནས་གསུང་བཟླས་པ་སྔགས་ཀྱི་བསྙེན་པ་ནི། མཁས་གྲུབ་རྡོ་བསྟན་འཕེལ་ཀརྨ་འཇམ་དབྱངས་རྣམ་
རྒྱལ་གྱི་ཟིན་བྲིས་སུ། ཐུགས་ཀའི་གུ་རུ་པདྨ་འབྱུང་གནས་ཀྱི་ཐུགས་ཀའི་ཆ་སྨད་དུ་ཉི་མ་ལ་གནས་པའི་ཧཱུྃ་གི་མཐར་ཤྲཱི་ཧེ་རུ་ཀ་དང་དྷཱ་ཀི་ཛྙཱ་ནས་བསྐོར་བ་དང་། པད་འབྱུང་ཐུགས་དབུས་ཟླ་བའི་གདན་ལ་ཧཱུྃ་གི་མཐར་ཐོད་ཕྲེང་རྩལ་གྱིས་བསྐོར་བ་དང་། ཤྲཱི་ཧེ་རུ་ཀའི་སྔགས་ཕྲེང་ལས་འོད་ཟེར་སྤོས་རིང་ཀྱི་དུད་པ་ལྟ་བུ་བྱུང་། གུ་རུའི་ཐུགས་དབུས་ཐོད་ཕྲེང་རྩལ་གྱི་སྔགས་འཁོར་དང་ལྷན་ཅིག་ལན་གསུམ་གཡས་སུ་བསྐོར། གུ་རུ་ཞི་བའི་ཐོད་ཕྲེང་རྩལ་གྱི་འོད་ཟེར་དང་ལྷན་ཅིག་གུ་རུའི་སྤྱི་བོ་ནས་ཐོན། མགྲིན་པའི་འཇིག་རྟེན་དབང་ཕྱུག་གི་སྔགས་འཁོར་ལ་བསྟིམ་ཞིང་རིམ་པར་སྤྱི་བོ་དང་སྟོང་རའི་སྣ་བུག་གཡས་ནས་ཐོན། སྤྱི་བོའི་ཚེ་དཔག་མེད་ལ་བསྐོར་བ་སོགས་འདུག་པ། བསྐྱེད་པ་མ་ཧཱ་ཡོ་ག་དང་མཐུན་ཅིང་སྡོམ་རེ་མདོའི་སྔགས་འཆང་རྣམས་ཀྱི་ཞལ་རྒྱུན་ཡིན་པར་གྲགས་པས་སྤྲོ་ན་ཟིན་བྲིས་ཉེར་མཁོའི་གསང་ཚིག་ལ་གཟིགས་པར་ཞུ། པདྨ་
ཉིན་བྱེད་ཀྱི་ཟིན་བྲིས་སུ་ཐུགས་སྨད་དུ་ཤྲཱི་ཧེ་རུ་ཀའི་སྔགས་ཕྲེང་བསྒོམ་རྒྱུ་མི་འདུག །དང་པོ་ཐུགས་ཀའི་གུ་རུ་ཡབ་ཡུམ་གྱི་ས་བོན་ཧཱུྃ་མཐར་སྔགས་ཕྲེང་གཡས་སུ་འཁོར་བར་དམིགས་ལ། དེ་ལས་འོད་འཕྲོས་རྒྱལ་བ་མཆོད་སོགས་དང་། དུང་ཁང་སྣང་བ་མཐའ་ཡས་ཀྱི་ས་བོན་ཧྲཱིཿདང་སྔགས་ཕྲེང་སོགས་དང་གཞན་རྣམས་ལའང་རིགས་འགྲེའི་དམིགས་པས་ཁྱབ་གསུངས་འདུག་པས་གནས་ལྷ་རྣམས་ལའང་ས་བོན་སྔགས་ཕྲེང་བསྐོར་བ་གསལ་གདབ་ནས་བཟླས་པ་བྱ་བའི་ལུགས་སྲོལ་དུ་འདུག། ༈ །།བདག་ཅག་གི་འདྲེན་མཆོག་གཏེར་ཆེན་ཆོས་ཀྱི་རྒྱལ་པོ་མཆོག་གྱུར་གླིང་པ་ལ་རང་རེས་ཟངས་སྦུབ་མའི་ཁྲིད་ཞུས་ཤིང་རྡོ་བསྟན་འཕེལ་གྱི་ཟིན་བྲིས་སུ་སྔགས་འཁོར་གནས་རྣམས་ནས་འགྲོ་ཚུལ་དེ་འདྲ་འདུག་ཞུས་པས། མི་ཤེས་ཨང་ཀཾ་ཚང་གི་ཕག་མོ་ལ་དེ་འདྲ་ཡོད་ཨི་དར་གསུངས། པདྨ་ཉིན་བྱེད་ཀྱི་ཟིན་བྲིས་སུ་གནས་ལྷ་སོ་སོར་
བཀོད་ཚུལ་འདུག་ཞུས་པས། དེ་སྤྱི་ཁྱབ་ཅིག་རེད་ལེ།། ༈ །།འདིའི་དགོངས་པ་དངོས་ནི། ཕྱི་སྟོང་ར་གསལ་འདེབས་ཚེ་བཟླ་བ་ནི་སྐུ་ཡི་བསྙེན་པ་དང་། གསུང་སྔགས་བཟླས་ལ་ཐུག་ཚེ། ཐུགས་ཀའི་གུ་རུ་པདྨའི་ཐུགས་ཀར་ཟླ་བ་ལ་ཧཱུྃ་མཐིང་ཀའི་མཐར་ཤྲཱི་ཧེ་རུ་ཀ་དང་དྷཱ་ཀི་ཛྙཱ་ནའི་སྔགས་སྦྲེལ་མ་གཡོན་དུ་བཀོད་ནས་གཡས་སུ་འཁོར་བ་བསྒོམ། དྲག་སྒྲུབ་སྐབས་ཟླ་དཀྱིལ་དེ་ཉི་དཀྱིལ་དང་སྔགས་དེ་ཨརྩིག་དང་ཨཿཀཿསཿམཿརཿདགོས། སྔགས་རིང་པོ་བསྐོར་ཚེ་སྦྲུལ་འཁྱིལ་བ་ལྟ་བུ་ཞེས་སྦྲུལ་གྱི་མགོ་དཀྱིལ་དུ་ཡོད་ལིས་རེད། སྔགས་ཀྱི་མཇུག་ཕྱི་ན་ཡོད་དགོས། གཏེར་གཞུང་དུ་གསང་སྔགས་ཐུགས་ཀའི་གུ་རུ་ཡབ་ཡུམ་ལ་བཀོད་པ་གནད་ཡིན་གསུངས་པ་འདི་ལས་ཅི་ཡང་མི་དགོས། གནས་ལྷ་རྣམས་ཀྱི་རྒྱན་ཆ་ལུགས་རྩ་འཁོར་ཐིག་ལེ་ཐིག་ཕྲན་འཁོར་དང་བཅས་པ་གསལ་འདེབས་ཤིང་བཟླས་པ་འདི་ལྷ་དང་རང་སེམས་རོ་མཉམ་རླུང་སྔགས་
སེམས་གསུམ་གཅིག་ཏུ་དག་པའི་གནད། མ་རྒྱུད་ལུང་ཨ་ནུ་ཡོ་གའི་དགོངས་པ་འཁྲུལ་མེད་ཡིན། རྫོགས་ཆེན་དཀོན་མཆོག་སྤྱི་འདུས་ལ་སྔ་རབས་པས་སྔགས་ཕྲེང་གསལ་འདེབས་སོགས་མི་གསུངས་པར་བསྐྱེད་རྫོགས་དབྱེར་མེད་ཀྱི་ངང་ནས་བཟླས་པ་གཙོ་བོར་མཛད། ཕྱིས་སུ་མ་ཧཱ་ཡོ་གའི་དགོངས་པ་བསྐྱེད་རིམ་གཙོར་བཏོན་ནས་བསྙེན་དམིགས་ཐམས་ཅད་ཀྱིས་སྦྱར་བ་རེད་གསུངས་པ་ལྟར་བདག་ཅག་གིས་བྱ་སླ་ཞིང་བྱིན་རླབས་དང་ལྡན་པ་ཕྱི་མ་འདི་ལྟར་མོས་པ་ལམ་དུ་བྱེད་པ་ལགས། དེ་ཡང་ཕྱི་སྣོད་ནང་བཅུད་འཁོར་འདས་སྣང་སྲིད་རིགས་དྲུག་གི་གནས་ཐམས་ཅད་ནས་རྡོ་རྗེ་གྲོ་ལོད་ཀྱི་རང་བཞིན་དུ་དམིགས་ཏེ་སྔགས་བཟླ་བ་ནི་སྣོད་བཅུད་བྱིན་རླབས་འཁོར་འདས་ཟིལ་གནོན། རིགས་དྲུག་གནས་སྟོང་གི་དམིགས་བཟླས་ཞེས་བྱའོ།། ༈ །།དངོས་གཞི་རྫོགས་པ་ཆེན་པོའི་དོན་བསྒོམ་པ་ལ། ཀུན་བཟང་ཡིག་ཆུང་ལེའུ་
གསུམ་གྱིས་གཞི་ལམ་འབྲས་བུའི་རྣམ་བཞག་ཁོང་དུ་ཆུད་པར་བྱ་ཞིང་། ལེའུ་བཞི་པས་འཆི་བ་མི་རྟག་པ་བསྒོམ་ཞིང་འཁོར་བ་ལས་ངེས་པར་འབྱུང་བའི་བློས་སེམས་རྒྱུད་བསྐུལ་ཞིང་འཁོར་བ་ལ་སྙིང་པོ་མེད་པ་ནི། ཕྱུགས་པོ་འཚོ་སྐྱོང་གི་སྡུག་བསྔལ། སྤྲང་པོས་མི་རྙེད་པའི་སྡུག་བསྔལ་གཉིས་ཆ་མཚུངས། འཆི་ཁ་རྒྱལ་པོ་བང་མཛོད་ལ་ཆགས་པ་དང་། སྤྲང་པོ་བེར་ཀ་ལ་ཆགས་པ་གཉིས་ཁྱད་པར་མེད་པས་ཅིས་ཀྱང་དགོས་མེད་ཀྱི་ཞེན་པ་གཏིང་ནས་ལོག་པ་དང་། ལེའུ་ལྔ་པས་གསང་སྔགས་ཀྱི་རྩ་བ་དམ་ཚིག་ཕྱི་ནང་གསང་བ་ཡང་གསང་ཡེ་ནས་ཐུགས་གསང་སྦས་གསང་གི་དོན་ལས་ནམ་ཡང་མི་འདའ་བ་དང་། ལེའུ་དྲུག་པས་གཉེན་པོ་སྟོབས་བཞིའི་སྒོ་ནས་སྡིག་ལྟུང་བཤགས་ཤིང་། གསང་སྔགས་རྡོ་རྗེ་ཐེག་པ་ཚེ་གཅིག་གིས་གྲོལ་བའི་ཆོས་ལ་ཡིད་ཆེས་བསྐྱེད། ལེའུ་བདུན་པ་ལྷ་སྔགས་ཏིང་ངེ་འཛིན་གསུམ་གྱིས་རྫོགས་པ་ཆེན་པོའི་དོན་གཏན་ལ་
དབབ་ཅིང་། བོགས་འདོན་ཐོད་བརྒལ་ཟེར་ཁྲིད་ལ་བསྟེན་ནས་ལམ་གྱིས་རྩལ་སྦྱངས་པ་རྣམས་གྲུབ་པས་དོན་གྱི་སྙིང་པོ་འདི་ཉིད་ཉམས་སུ་ལེན་པ་ཡིན་ཏེ། དེ་ཡང་སློབ་དཔོན་ཤྲཱི་སེང་ཧས། དང་པོ་ཐུག་སར་གཏུག །བར་དུ་བཞག་སར་ཞོག །ཐ་མ་འགྲོ་སར་ཐོང་། ཞེས་སྙན་རྒྱུད་རྡོ་རྗེའི་ཚིག་རྐང་གསུམ་གསུངས་པ་ལྟར། དང་པོ་ཐུག་སར་གཏུགས་པ་ནི། ཁྲིད་སྟོན་ཤེས་པའི་བླ་མ་མཚན་ཉིད་དང་ལྡན་པ་གཅིག་ལ་གཏུགས་ནས་སེམས་ཀྱི་བྱུང་གནས་འགྲོ་གསུམ་གྱི་གདར་ཤ་ལེགས་པར་བཅད་དེ་ཞུ་གཏུགས་བྱེད། བར་དུ་བཞག་སར་བཞག་པ་ནི། སེམས་གང་ཤར་ལ་སྤངས་བླངས་བཟོ་བཅོས་མེད་པར་འཇོག་པའོ། ཐ་མ་འགྲོ་སར་གཏོང་བ་ནི། ཉམས་སུ་མྱོང་རྗེས་ཏིང་ངེ་འཛིན་གྱི་རོ་ལ་ཞེན་པ་མེད་པར་འཛིན་མེད་དུ་གཏོང་བའོ།། ༈ །།འདི་ཉིད་ཀྱི་སྙན་བརྒྱུད་ཚིག་རྐང་རྩ་བ་དངོས་ནི། ཡེ་གདོད་མ་ནས་བཞུགས་པའི་ལྷན་སྐྱེས་ཀུན་ཏུ་
བཟང་མོ་འདི་ཉིད་ཀྱི་ངང་དུ་ཡེངས་མེད་དུ་དྲན་པས་ཟིན་བཞིན་ནམ་མཁའ་ལ་རླུང་རྒྱུ་བ་ལྟར་བལྟ་བར་བྱའོ༔ ཞེས་པ་འདིའི་དོན་མཇུབ་ཚུགས་སུ་ངོ་སྤྲད་ན་མི་འོང་སྟེ། རྗེ་མཆོག་གྱུར་གླིང་པས། ཕྱག་རྫོགས་དབྱེར་མེད་ཀྱི་ལྟ་བ་འདི། །བཤད་མཁན་མང་སྟེ་ཤེས་མཁན་ཉུང་། །ཞེས་གསུངས་པ་ལྟར། དང་པོ་གནས་འགྱུ་ངོས་བཟུང་ཞིང་། ལོག་ནས་བལྟ་བ་དང་། བལྟ་མཁན་ཡོད་པ་མ་ཡིན་པའི་གནས་པའི་ངོ་བོ་སེམས་བསྡད་ཡོད་པ་དེ་གར་ཡོད་མ་རིག་པ་ལྟ་བུའི་ཡེངས་པ་མ་ཡིན་པར་གནས་ན་གནས་ཡོད། འགྱུ་ན་འགྱུ་ཡོད་བསམ་པ་དེ་མ་བརྗེད་པར་སྐྱོང་བ་ཡིན་ཏེ། དེ་ཡང་གནས་པ་སེམས་ཀྱི་ངོ་བོ། འགྱུ་བ་སེམས་ཀྱི་རང་མདངས་ཡིན་ཏེ། ནམ་མཁའ་ལ་རླུང་རྒྱུ་བའི་དཔེ་ནི། འགྱུ་བ་དངོས་མེད་སིལ་བུ་འདྲ། །འཛིན་པ་མ་ཞུགས་འགྱུས་པས་ཆོག །ཅེས་གསུངས་པ་ལྟར། རྫོགས་པ་ཆེན་པོ་ལྟ་བ་ལ་ཀ་དག་ཡེ་གྲོལ་ཆེན་པོ་ཞེས་བྱ་སྟེ། སེམས་ལ་བློས་
བྱས་ཀྱི་བསྒྱུར་བཀོད་སྤུ་རྩེ་ཙམ་ཡང་མ་སོང་དེ། ངོ་བོ་ཀ་ནས་དག་པའི་གདོད་ནས་དག་པ་ཆོས་ཀྱི་སྐུ་རང་ཡིན་ཀྱང་། སྒོམ་ཚུལ་གྲིམ་ལྷོད་རན་པ་གལ་ཆེ་བ་སྟེ། སྔོན་འཕགས་པ་ཀུན་དགའ་བོས་གྲོ་བཞིན་སྐྱེས་ལ་བསམ་གཏན་བསླབས་པས། དེ་ཉིད་རེས་འགའ་ནི་གྲིམ། རེས་འགའ་ནི་ལྷོད་པས་བྱ་དཀའ་བར་གྱུར་པ་ན། སྟོན་བའི་དྲུང་དུ་ཞུས་པས། བཀའ་སྩལ་པ། ཚེ་དང་ལྡན་པ་ཁྱོད་ཁྱིམ་ན་གནས་ཚེ་པི་ཝང་བསྒྲེང་ཤེས་སམ། གསོལ་པ། དེ་ནི་ཤིན་ཏུ་མཁས་པ་ལགས་སོ། །འོ་ན་པི་ཝང་གི་རྒྱུད་ཧ་ཅང་སྡོམ་པ་ལས་སྒྲ་སྙན་པ་འབྱུང་ངམ། བཅོམ་ལྡན་འདས་དེ་ནི་མ་ལགས་སོ། །འོ་ན་ཧ་ཅང་ལྷོད་པ་ལས་བྱུང་ངམ། དེ་ཡང་མ་ལགས་སོ། །འོ་ན་ཐང་ལྷོད་རན་པ་ལས་བྱུང་ངམ། བཅོམ་ལྡན་འདས་དེ་བཞིན་ལགས་སོ། །འོ་ན་ཚེ་དང་ལྡན་པ་ཁྱོད་ཀྱི་སེམས་ཀྱང་དེ་བཞིན་ཏེ། ཧ་ཅང་གྲིམ་པ་ཡང་མ་ཡིན། ཧ་ཅང་ལྷོད་པ་ཡང་མ་ཡིན་པར་སྒོམས་
ཤིག །ཅེས་གསུངས་པ་བཞིན་ནོ། །ཕྱག་རྫོགས་དབྱེར་མེད་དུ་བསྒོམ་པ་ཤིན་ཏུ་ཟབ་ཤིང་། རྒྱལ་བ་ཡང་དགོན་པས་ཀྱང་ཕྱག་རྫོགས་དབྱེར་མེད་དུ་བསྒོམས་པ་ཡིན་ཏེ། ཉིད་ཀྱི་གསུང་ལས། ཆོས་རྫོགས་ཆེན་ཞེས་པའི་སྒྲ་བོ་ཆེ། །སྤྲང་གོ་བའི་ལེན་ཕྱོགས་དེ་ལ་བྱས། །སྒོམ་ཅིག་ཆར་གྱི་རྟོགས་པའང་དེ་ལས་འཁྲུངས། །ཞེས་དང་། ཆོས་རྗེ་རང་བྱུང་རྡོ་རྗེ་ལའང་ས་སྤྱོད་འོག་མིན་ཀརྨའི་གདན་སར་བི་མ་མི་ཏྲ་ཞལ་གཟིགས་ནས། རྫོགས་པ་ཆེན་པོའི་རྟོགས་པ་མངོན་དུ་གྱུར་པ་ན་ཀརྨ་སྙིང་ཐིག་དགོངས་པའི་གཏེར་ལས་ཕབ་པ་ཡིན་ཏེ། ཇི་སྐད་དུ་ཡང་། བདག་ནི་བི་མ་ལ་ཡིས་བྱིན་གྱིས་བརླབས། །ཀརྨའི་ཡང་དགོན་དབེན་པར་འདུག་པའི་ཚེ། །ནམ་ལང་དུས་མཐར་ཤར་གྱི་ཕྱོགས་རོལ་ནས། །བལྟ་བས་མི་ངོམ་འོད་ཀྱི་མཛེས་པ་ཞིག །མངོན་སུམ་ལྟར་སྣང་བདག་གི་མཛོད་སྤུར་ཐིམ། །དེ་ནས་འབད་མེད་གནད་འདི་ཐམས་ཅད་གོ །ཞེས་
གསུངས་པ་ལྟར་དང་། ཆོས་རྗེ་རོལ་པའི་རྡོ་རྗེ་འོག་མིན་ཀརྨར་བཞུགས་དུས་ཀུན་ཏུ་བཟང་པོའི་དགོངས་པ་མཐར་ཐུག་རྫོགས་ཆེན་ཐོད་རྒལ་གྱི་རྟོགས་པ་མངོན་དུ་གྱུར་པའི་ཚུལ་ཡང་། རྡོ་རྗེའི་མགུར་ལས། རང་གསལ་སྙིང་པོ་སྟོང་གསལ་ཀུན་ཏུ་བཟང་། །གདོད་ནས་དག་པ་རྫོགས་པ་ཆེན་པོའི་དབྱིངས། །གཞི་ལྔའི་གདངས་ལ་རང་གསལ་ཀུན་ཏུ་ཁྱབ། །འོད་ལྔའི་གདངས་ལ་མ་བཅོས་མཉམ་པར་བཞག །ཅེས་དང་། བདག་ཅག་གི་འདྲེན་མཆོག་གཏེར་ཆེན་ཆོས་ཀྱི་རྒྱལ་པོ་མཆོག་གྱུར་གླིང་པས་ཐུན་མོང་གདུལ་བྱའི་སྣང་ངོར་ཀརྨའི་གདན་སར་རྟོགས་པ་མངོན་དུ་གྱུར་ཅིང་རྩལ་བསམ་ཡས་མཆིམས་ཕུར་རྫོགས་པ་ཡིན། བསམ་ཡས་མཆིམས་ཕུ་དེ་བྱིན་ཆེ་བར་འདུག །ང་མཆིམས་ཕུར་སྡོད་ཚེ་རྨི་ལམ་དུ། ཁྱེད་རང་གིས་རྟ་དཀར་པོ་ཞིག་ཆིབས་ནས་མཁར་བསིལ་ཀྱང་སེང་ཧྲལ་ལེ་རྟ་རྒྱུག་བྱེད་གི་འདུག་པ་ཅི་རེད་བྱས་པས། ཕ་ཝང་ཞིག་གི་
ནང་དུ་ཨ་དཀར་པོ་ཞིག་ཡོད་པ་དེ་བསྐོར་བ་རེད་ཟེར་པ་རྨིས་མི་ཤེས་ཨང་གསུངས་ཀྱང་། གནས་བསྐོར་བ་ལས་སྐྱེ་མེད་ཀྱི་དོན་སྒོམ་པར་ཟབ་ཅིང་སྲ་མཁྲེགས་པ་ཝང་ལྟ་བུའི་རྟོགས་པར་དཀའ་བའི་བརྡ་ཡིན་ནམ་ཞུས་པས་རིན་པོ་ཆེ་ཨཏྨ་གརྦྷ་དྷོ་ཡི་སྙིང་པོ་ནི་མཆོག་གི་རིན་པོ་ཆེ་རེད་པས་དེ་འདྲ་ཡིན་ལེ་མི་གདའ་བསམ་ཡས་མཆིམས་ཕུར་སྒྲུབ་པ་གྱིས་གསུངས་པའང་རང་བཞིན་གྱི་འཕྲོས་དོན་ནོ། །གོང་བཤད་དབྱིངས་སྟོང་པ་ལྷན་སྐྱེས་ཀུན་ཏུ་བཟང་མོའམ། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་མ་ཇི་ལྟར་བསྒོམ་པའི་ཚུལ་ཡང་། རྒྱལ་བ་ཡང་དགོན་པས། །ཡེ་སྒོམ་ལ་བློ་ཡིས་མ་སྒོམ་མཛོད། །རང་བབས་ལ་བཟོ་ཡིས་མ་བཅོས་མཛོད། །བློ་རྟོག་པ་ལ་རྐྱེན་དུ་མ་བལྟ་ཞིག །མི་རྟོག་པ་ཁྱད་དུ་མི་སྒོམ་པར། །སེམས་རང་ལུགས་སུ་ཞོག་ལ་རྒྱངས་སོ་ཚུགས། །སྒོམ་ཞི་གནས་ཀྱི་མཐིལ་དུ་ཕེབ་པ་ཅིག་འོང་གིས། །ཞེས་དང་། །བློ་རྟོག་པ་འགྱུ་བ་གནས་
ལུགས་ཀྱི་སྒོ། །རང་ངོ་ཤེས་པ་ཉམས་ལེན་གྱི་གནད། །སེམས་ངོས་བཟུང་མེད་པ་རྟོགས་པའི་དབྱིངས། །སྣ་ཚོགས་སུ་འཆར་བ་རིག་པའི་སྒོ། །བློ་བྲལ་གྱི་གསལ་སྟོང་རྗེན་པ་འདི་ལ། །ངང་ལ་བཞག་གིན་དབྱིངས་ལ་ལྟོས་དང་། །སྒོམ་ལྷག་མཐོང་གི་མཐིལ་དུ་ཕབ་པ་ཅིག་དྲོང་གིས། །ཞེས་པའི་དོན་ཡང་བསྐྱར་ཟློས་པ་ལ་མ་འཛེམ་པར་ཞུ་ན། སེམས་མ་བཅོས་རང་བབས་སུ་བཞག་ཚུལ་ལ། སྔོན་དུ་འདི་བྱ་འདི་བྱེད་མི་བསམ། རྗེས་ཀྱི་འདི་བྱ་འདི་བྱེད་མི་དྲན་པར་ཤེས་པ་སོ་མ་ཞེས་པ་ད་ལྟའི་སེམས་དེ་ཅི་གནས་སུ་བཞག །བཟང་རྟོག་ངན་རྟོག་ཅི་བྱུང་ཡང་འདྲ་བས་དེ་ཉིད་མ་བཅོས་པའི་ངང་ནས་ངོ་བོ་ལ་བལྟས་པས་སྟོང་ཆམ་གྱི་འགྲོ་བ་དེ་ཞི་གནས་ཡིན་ཏེ། རྣམ་རྟོག་རགས་པ་འགགས་ཀྱང་ད་དུང་ཕྲ་བ་ནི་འགགས་པ་མེད་པ་མང་དུ་ཡོད་པ་དེ་ཡང་རིག་ཤིན་ཏུ་དཀའ། དང་པོ་རྣམ་རྟོག་མང་བ་འདྲ་ཞིག་འབྱུང་སྟེ་རྣམ་རྟོག་རིག་པའི་དོན་
ཡིན་པས་སྐྱོན་མེད། འཕྲོ་རྒོད་ཤིན་ཏུ་ཆེ་ཞིང་ཡེ་ནས་མི་གནས་ན། ཐོལ་གྱིས་སྐྱེས་པ་རྦད་ཀྱིས་བཅད་པ་སོགས་གང་བདེར་བྱའོ། །འགྱུ་བ་ཤིན་ཏུ་ཕྲ་བ་དེ་ཡང་དག་ནས་གནས་འགྱུའི་བར་ལག་འགྱེལ་བ་ཞེས་རིག་པའི་ངོ་བོ་ལྷག་གེར་མཐོང་བ་ལས་ལྷག་མཐོང་ཞེས་བྱ། དེ་ལྟར་ཡུན་བསྲིང་ཞིང་སྒོམ་པས་ཉམས་ལ་མཐོ་དམན་སྣ་ཚོགས་པ་འཆར་བ་སྟེ། རེས་འགའ་བདེ་གསལ་མི་རྟོག་པའི་ཉམས་དགའ་ཡལ་ལེ་བ། རེས་འགའ་སེམས་བཞག་ཀྱང་མི་སྡོད་པར་འཚུབས་ལོང་ངེ་བ། གསལ་ཡང་མི་གསལ་ནག་ཐོམ་མེ་བ། རིག་ཀྱང་མ་རིག་གར་སོང་འདིར་སོང་མེད་འདྲ་འབྱུང་ཡང་། ཡི་མ་ཆད་པར་སེམས་ལ་གཟེངས་བསྟོད་དེ། སེམས་འདི་ལ་བལྟས་པས་སངས་རྒྱས་ཐམས་ཅད་ཀྱི་བྱིན་རླབས་འཇུག །རང་གི་རྒྱུད་ལ་ཕན། ཚོགས་ཐམས་ཅད་ཆིག་རྫོགས། ལམ་ཐམས་ཅད་ཆིག་ཆོད། འབྲས་བུ་ཐམས་ཅད་ཡེ་རྫོགས་གཞན་སུ་ལས་ཀྱང་སེམས་ཀྱི་ངོ་
བོ་སྐྱོང་བ་འདི་ལས་ཟབ་པ་མེད་པར་ཐག་བཅད། ཡང་དག་རྫོགས་པའི་སངས་རྒྱས་ཀྱིས་ཆུ་བོ་ནཻ་ར་ཛ་ནའི་འགྲམ་དུ་ལོ་དྲུག་ལ་སྐྱིལ་མོ་ཀྲུང་གཅིག་གི་ངང་དུ་ཏིང་ངེ་འཛིན་ལ་བཞུགས་པ་ཡིན་ན། དེང་སང་གི་ཆོས་པས་ཁོམ་དུས་བསྒོམ། མ་བྱུང་དུ་སྐྱུར་བས་ལེན་པ་ཡིན་པས་བརྩོན་འགྲུས་བྱའོ་བསམ་པའི་སྙིང་སྟོབས་བསྐྱེད། ཆོས་དང་པོ་ཐོས། བར་དུ་ཐོས་དོན་བསམ། ཐ་མར་བསམ་དོན་སྒོམ་དགོས་པ་ཡིན་ཅིང་། མ་སྒོམ་བར་ཆོས་ལ་ཞུགས་པས་མི་ཕན་པ་ནི། སྡོང་པོ་བཀོད་པ་ལས། ཡང་དག་སངས་རྒྱས་བསྟན་པ་འདི། །ཐོས་པ་ཙམ་གྱིས་མི་འགྲུབ་བོ། །དཔེར་ན་གངྒཱའི་ཆུ་ཀླུང་གིས། །སྟོབས་མེད་ནན་གྱིས་ཁྱེར་བ་ལྟར། །སྐམ་ནས་ཤི་བར་གྱུར་པ་བཞིན། །མ་སྒོམ་ཆོས་ཀྱང་དེ་བཞིན་ནོ། །ཇི་ལྟར་འགྲོ་བ་མང་པོ་ལ། །ཟས་དང་སྐོམ་དག་བྱིན་གྱུར་ཀྱང་། །བདག་ནི་བཀྲེས་པས་ཤི་བ་ལྟར། །མ་སྒོམ་ཆོས་ཀྱང་དེ་བཞིན་ནོ། །ཞེས་
སོགས་མང་དུ་གསུངས་པ་བཞིན་ནོ། །སྒོམ་པའི་ཕན་ཡོན་ནི། །དེ་ཁོ་ན་ཉིད་བསྟན་པའི་མདོ་ལས། ཤཱ་རིའི་བུ། གང་གིས་བསྐལ་གཅིག་བར་དུ་ཉན་པ་བས། གང་གིས་སེ་གོལ་གཅིག་གཏོགས་པ་ཙམ་གཅིག་ཏུ་དེ་ཁོ་ན་ཉིད་སྒོམ་པ་བསོད་ནམས་ཆེའོ། །ཞེས་དང་། སློབ་དཔོན་ཤྲཱི་སེང་ཧས། །གལ་ཏེ་གངྒཱའི་བྱེ་སྙེད་ཀྱི། །སེམས་ཅན་ཀུན་ལ་ལུས་སྦྱིན་པས། །བསོད་ནམས་རྒྱ་ཆེན་གང་ཡིན་པ། །སྐད་ཅིག་སྒོམ་པའི་ཆར་མི་ཉེ། །གལ་ཏེ་གང་གཱའི་བྱེ་སྙེད་ཀྱི། །སེམས་ཅན་ཀུན་གྱི་སྲོག་བསྐྱབས་པས། །རྩེ་གཅིག་བསྒོམ་པ་འབུམ་ཆར་མིན། །སྟོང་གསུམ་རིན་ཆེན་མཆོད་རྟེན་གྱིས། །ཁེངས་བྱས་བསོད་ནམས་གང་ཡིན་པ། །དེས་ཀྱང་སྒོམ་པའི་ཆར་མི་ཉེ། །སེམས་ཅན་ཀུན་ལ་རིན་ཆེན་ནོར། །ཕུང་པོ་མང་པོ་སྦྱིན་པ་ཡི། །དགེ་རྩ་ཏིང་འཛིན་ཆར་མི་ཉེ། །སྒོམ་པའི་བསོད་ནམས་ཚད་ལས་འདས། །ཞེས་གསུངས་པ་ལྟར་སྒོམ་པས་ཉམས་སུ་བླངས་པས།
ཉམས་དང་པོ་རྩེ་གཅིག་སྒྱུ་མ་ལྟ་བུའི་ཉམས་ནགས་ལ་མེ་ཆེན་མཆེད་པ་ལྟ་བུ། ཉམས་གཉིས་པ་དུ་མ་རོ་གཅིག་སྟོང་པ་ཉིད་ཀྱི་ཉམས་མཚོ་ལ་ཁ་བ་བབས་པ་ལྟ་བུ། ཉམས་གསུམ་པ་སྤྲོས་བྲལ་ནམ་མཁའ་ལྟ་བུའི་ཉམས་འཆར་ཏེ། ནམ་མཁའ་ལ་ཉི་མ་ཤར་བ་ལྟ་བུའོ།། ༈ །།དེ་ནས་དུག་གསུམ་ལམ་དུ་ཁྱེར་ཚུལ་ནི། སྙན་རྒྱུད་རྩ་བར། ཞེ་སྡང་གི་ངོ་བོ་གསལ་བའི་རང་མདངས་ལ་གཅེར་གྱིས་བལྟས་ཤིང་དེའི་ངང་དུ་མ་ཡེངས་པར་ཀློད་ལ་བཞག་པའོ༔ ཞེས་པ། དོན་ལ་བལྟ་བྱ་ལྟ་བྱེད་མེད་ཀྱང་། ལས་དང་པོ་པས་བལྟ་བྱ་ལྟ་བྱེད་གཉིས་སུ་ཡོད་པ་འདྲ་བ་འབྱུང་ཡང་། དོན་ལ་སེམས་ཀྱི་རང་མདངས་ལས་གཞན་མེད། དཔེར་ན་མི་གཞན་ཞིག་གིས་ཚིག་ངན་དྲག་པོ་བརྗོད་བྱུང་བའི་ཚེ་དེའི་ངོ་བོ་ལ་བལྟས་པས་ཀྱང་རེ་ཞིག་སེམས་ལ་ན་ཀ་རེ་འདུག་ཀྱང་མཐར་སྟོང་ཆོབ་ཀྱི་འགྲོ་བ་དེ་ཀའོ།། ༈ །།གཏི་མུག་གི་ངོ་བོ་གང་ཤར་གྱི་སྣང་བའི་
ཡུལ་ལ་བག་ཆགས་སུ་ཞེན་པ་དེའི་ངོ་བོ་ལ་མ་ཡེངས་པར་རང་སེམས་དྲན་རྫི་དང་མ་བྲལ་བར་ཤར་གྲོལ་གྱི་ངང་དུ་ཀློད་ལ་བཞག་པའོ༔ གཏི་མུག་ཞེས་པ་ནི་མ་རིག་པ་སྟེ་དོན་སེམས་ངོ་མ་ཤེས་ནས་འཁྲུལ་པ་དེ་ཡིན། འདི་གཞིའམ་རྩ་བ་ནས་བཤད་ན། སེམས་ཀུན་གཞི་བདེ་གཤེགས་སྙིང་པོ་གློ་བུར་དྲི་མས་སྒྲིབ་པ་མ་རིག་པའི་དབང་གིས། ང་མེད་པ་ལ་ང་དང་། བདག་མེད་པ་ལ་བདག་ཏུ་འཛིན་པས། ཕྱི་ནང་སྣོད་བཅུད་ཀྱང་འཁྲུལ་སྣང་ལ་ཨ་འཐས་པ་ཙམ་ལས་དངོས་པོར་མ་གྲུབ། སྐྱིད་སྡུག་ལེགས་ཉེས་ཐམས་ཅད་སེམས་ཀྱི་འཁྲུལ་སྣང་ཁོ་ན་ཡིན་པས། སྒྱུ་མའི་འཁྲུལ་འཁོར་སྒྱུ་མ་མཁན་རང་གིས་ཤེས་ཤིང་། །གཞན་གྱིས་དངོས་པོར་ཞེན་ནས་ལོངས་སྤྱོད་ནས་འཁྲུལ་པ་སྟེ། བལྟ་ཚུལ་ནི་ཡུལ་དུ་སྣང་བའི་བག་ཆགས་དེ་ལ་དྲན་པས་བཟུང་ཏེ་ཞེན་པ་མེད་པར་རང་བབས་སུ་སྐྱོང་བ་ལས་གཞན་མེད་དེ། །སྣང་བས་མི་འཆིང་ཞེན་པས་འཆིང་། །ཞེན་
པ་ཆོད་ཅིག་རྣལ་འབྱོར་པ། །ཞེས་པ་དེའོ། །འདོད་ཆགས་ཀྱི་ངོ་བོ་ཞེ་འདོད་ཀྱིས་ཀུན་ནས་སློང་བའི་ནོར་རྫས་དང་ཡོ་བྱདཿ གཉེན་འདུན་དང་ཟླ་གྲོགས་ལ་སེམས་ཨ་འཐས་སུ་སོང་ཞིང་༔ རེ་དོགས་ཀྱིས་རློམ་པའི་བློ་ཐམས་ཅདཿ དམིགས་གཏད་དང་མཚན་འཛིན་མེད་པར༔ རང་གྲོལ་འཛིན་མེད་གང་ཤར་ངོས་ཟིན་པའི་ངང་དུ་ཤར་གྲོལ་དུས་མཉམ་དུ་བཞག་པར་བྱའོ༔ ཞེས་པ་གོང་བཤད་མ་རིག་པ་གཏི་མུག་གི་དབང་ལས། ཡུལ་ཡིད་དུ་མི་འོང་བ་ལ་ཞེ་སྡང་། ཡུལ་ཡིད་དུ་འོང་བ་ལ་འདོད་ཆགས་སྐྱེ་བ་ཡིན་ཏེ། དཔེར་ན་སྒྱུ་མ་མཁན་གྱིས་རྟ་དང་གླང་པོ་བཟང་ངན་གཉིས་སུ་སྤྲུལ་ནས་སེམས་ངོ་མི་ཤེས་པའི་བྱིས་པའི་བློ་ཅན་སྐྱེ་བོའི་ཚོགས་རྣམས་བཟང་པོ་ལ་ཆགས་པས་འདོད་ཆགས་སྐྱེ། ངན་པ་ལ་སྡང་བས་ཞེ་སྡང་སྐྱེ། བར་མ་བག་ཆགས་ལ་མཚན་འཛིན་ཞུགས་པས་གཏི་མུག་སྐྱེས་ཏེ་འཁྲུལ་པ་ཡིན་པས། ངོ་བོ་ནི་རང་གི་ཡིད་དུ་འོང་
བ་ལ་འཛིན་པ་ཞུགས་ནས་ཨ་འཐས་ཞེས་ཤིན་ཏུ་ཞེན་ནས། གཞན་ལ་ཡོད་པ་རང་གིས་ཐོབ་ཏུ་རེ་བ་རང་ལ་ཡོད་པ་གཞན་ལ་ཤོར་གྱི་དོགས་པའི་བློ་མི་བདེ་ལིང་ངེ་བ་ལ་དམིགས་གཏད་མཚན་འཛིན་མེད་པར་བཞག་པ་རང་སར་གྲོལ་བ་ལ་འཛིན་པ་མེད་པར་གང་ཤར་ངོས་ཟིན་ཤར་གྲོལ་དུས་མཉམ་ཆུ་ལ་རི་མོ་བྲིས་པ་ལྟར་རང་བཞིན་རང་ཐིམ་གཞི་མེད་རྩ་བྲལ་དུ་བཞག་པའོ། །དེ་བཞིན་དུ་དུག་ལྔའི་རྟོག་ཚོགས་ལམ་དུ་ཁྱེར་ཚུལ་ནི། རྣ་བའི་རྣམ་ཤེས་ཀྱིས་སྒྲ་ལྷང་ལྷང་ཐོས་པའི་ཚེ་སྒྲ་དེ་ལ་བརྟག་དཔྱད་དང་བསམ་གཞིག་གང་ཡང་མི་བྱེད་པར། སྒྲ་ཐོས་མཁན་གྱི་རང་རིག་གི་ངོ་བོ་བསྐྱངས་ནས་ལམ་དུ་ཁྱེར་བ་ཡིན་པས། དེ་བཞིན་དུ་མིག །རྣ་བ། སྣ། ལྕེ། ལུས། ཡིད་རྣམས་ལ་འགྲེས་ཚུལ་ཨོ་རྒྱན་རིན་པོ་ཆེའི་གསུང་། འདི་ལྟར་མིག་གི་ཡུལ་དུ་སྣང་བ་ཡི༔ སོགས་ཀྱི་དོན་ལ་གཞོལ་བས་ཤེས་སོ། །ད་དུང་ངོ་སྤྲོད་འདི་གལ་ཆེ་བས་ཞུ་ན། ཕྱག་རྒྱ་ཆེན་
པོ་ལས། སྟོང་ཐོག་ཏུ་ངོ་སྤྲད། སྣང་ཐོག་ཏུ་རྩལ་སྦྱངས། སྣང་སྟོང་ཟུང་འཇུག་ཏུ་ཉམས་སུ་བླངས་པས། རྗེས་ཤེས་ཨ་འཐས་སུ་ཤར་བ་རྩེ་གཅིག །རྗེས་ཤེས་སྒྱུ་མར་འཆར་བ་སྤྲོས་བྲལ། རྗེས་ཤེས་སྟོང་པར་འཆར་བ་རོ་གཅིག །མཉམ་རྗེས་འདྲེས་པའམ་བྲལ་བ་སྒོམ་མེད་དུ་གསུངས་པ་ལགས་ཤིང་། རྫོགས་པ་ཆེན་པོའི་ལུགས་སུ་ངོ་རང་ཐོག་ཏུ་སྤྲད། ཐག་གཅིག་ཐོག་ཏུ་བཅད། གདེངས་གྲོལ་ཐོག་ཏུ་བཅའ་བ་ཞེས་གསུངས་ཏེ། དེ་ཡང་དུས་གསུམ་གྱི་རྟོག་པ་དང་བྲལ་བའི་ད་ལྟར་གྱི་ཤེས་པ་ལ་བཅོས་བསླད་མ་བྱས་པར་གཉུག་མ་ལྷན་སྐྱེས་ཀུན་ཏུ་བཟང་མོའི་རང་ངོ་སྐྱོང་བ་ནི་ངོ་རང་ཐོག་ཏུ་སྤྲད་པའོ།། ༈ །།བཞི་ཆ་གསུམ་བྲལ་ཆོས་སྐུ་བློ་འདས་ཀྱི་དགོངས་པ་ནི། ཐག་གཅིག་ཐོག་ཏུ་བཅད་པའོ། དེ་གང་ཡིན་ན་དུས་གསུམ་གྱི་རྟོག་པ་དང་བྲལ་བས་གསུམ་བྲལ། ད་ལྟའི་རིག་པ་སོ་མ་ལ་བཞི་ཆ་ཞེས་བྱ་སྟེ། དྲན་པས་མ་བཅོས་སླད་མེད་པ་
དེའོ། །དུག་གསུམ་དུག་ལྔ་གང་ཤར་གྱི་ངོ་བོ་ལ་བཅོས་བསླད་མི་བྱ་བར་བཟུང་། ཅེ་རེ་བལྟས་ཏེ་དེའི་ངང་ལ་ཀློད་པས་དྲན་རྟོག་རྗེས་མེད་དུ་ཡལ་བས་རྦ་རླབས་ཆུར་ཐིམ་པ་ལྟར་གང་ཤར་རང་གྲོལ་སྤངས་གཉེན་དང་བྲལ་བའི་ངང་ལ་གདེངས་ཆོས་པའོ། །རང་གྲོལ་འཛིན་མེད་ཤར་གྲོལ་དུས་མཉམ་ལ་གྲོལ་ལུགས་རྣམ་པ་དྲུག་སྟེ། རང་གྲོལ་ལ་གཉེན་པོ་མེད་དེ་སྦྲུལ་མདུད་རང་སར་གྲོལ་བ་ལྟ་བུ། ༡༽ ཡེ་གྲོལ་ལ་བསྐྱར་གཞི་མེད་དེ་ནམ་མཁའི་མདུད་པ་ལྟར་གྲོལ་བ། ༢༽ གཅེར་གྲོལ་ལ་ངོ་བོ་མེད་པའི་གནད་གཅེར་གྱིས་མཐོང་བས་ངོ་ཤེས་པའི་མི་དང་འཕྲད་པ་ལྟར་གྲོལ་བ། ༣༽ རང་གྲོལ་ལ་སྙིང་པོ་མེད་དེ་ཁང་སྟོང་དུ་རྐུན་མ་ཞུགས་པ་ལྟར་གྲོལ་བས་རང་བཞག་ལ་ཐོབ་ཤོར་མེད་པ། ༤༽ འགྱུ་གྲོལ་རང་སར་དག་པས་ཆུ་ལ་རི་མོ་བྲིས་པ་ལྟ་བུ། ༥༽ ཤར་གྲོལ་དུས་མཉམ་ཡིན་པས་ཆུ་ལ་རལ་གྲི་བསྣུན་པ་ལྟར་གྲོལ་བའོ། ༦༽ ཐེག་པ་ཀུན་གྱི་ཡང་
རྩེ་ཨ་ཏི་ཡོ་ག་ལ་ཕྱི་སེམས་སྡེེ། ནང་ཀློང་སྡེ། གསང་བ་མན་ངག་སྡེའི་དགོངས་དོན་ཀུན་མཁྱེན་ཀློང་ཆེན་རབ་འབྱམས་དྲི་མེད་འོད་ཟེར་གྱི་མཛོད་བདུན་དང་སྙིང་ཐིག་རྣམས་ལས་ཞིབ་རྒྱས་ཤེས་པར་བྱ་ཞིང་། མདོར་བསྡུས་འབྲི་གུང་རིན་ཆེན་ཕུན་ཚོགས་ཀྱི་ཞལ་སློབ་༧རྗེ་ཤེས་རབ་འོད་ཟེར་གྱི་གསང་བ་སྔགས་ཀྱི་སྨོན་ལམ་འདོད་འཇོའི་དགའ་སྟོན་ལྟར་ཤེས་པར་བྱ་ཞིང་གཅིག་ཤེས་ཀུན་གྲོལ་ཕྱག་རྫོགས་དབུ་གསུམ་དབྱེར་མེད་ཀྱི་ཉམས་ལེན་ལ་ཆུ་བོའི་རྒྱུན་ལྟར་བརྩོན་པར་ཞུ།། ༈ །།གཞི་གནས་ཀྱི་ཡེ་ཤེས་ལ་ངེས་ཤེས་བསྐྱེད་པ་ནི། སྙན་རྒྱུད་རྩ་བ་ལས། འཁོར་འདས་ཀུན་ལ་ཁྱབ་པའི་ཡེ་ཤེས་ནི༔ སངས་རྒྱས་ཀྱིས་མ་བསྒྲུབ༔ སེམས་ཅན་གྱིས་མ་བསླད༔ མངོན་དུ་གྱུར་པའི་རང་རིག་ཡེ་ཤེས་འདི་ཁོ་ནའོ༔ དེ་ཡང་འཁོར་འདས་ཀུན་ལ་ཁྱབ་པའི་ཡེ་ཤེས་ནི་སངས་རྒྱས་ཀྱི་སྒོམ་པས་མ་མཛད། སེམས་ཅན་སྒྲིབ་པས་མ་བཅོས་པ་
སྟེ། ཇི་སྐད་དུ་ཡང་། གང་ལ་སྲིད་དང་མྱ་ངན་འདས་འཕྲོ་བ༔ ཡིད་བཞིན་ནོར་འདྲའི་སེམས་ལ་ཕྱག་འཚལ་ལོ༔ ཞེས་དང་། རྡོ་རྗེ་གུར་ལས། རིན་ཆེན་སེམས་ལས་ཕྱིར་གྱུར་པའི༔ སེམས་ཅན་མེད་ཅིང་སངས་རྒྱས་མེད༔ ཅེས་གསུངས། སམྦུ་ཊི་ལས། ཕྱི་དང་ནང་གི་བདག་ཉིད་ཅན༔ འདི་དག་ཐམས་ཅད་སེམས་ཀྱིས་བཏགས༔ སེམས་ལས་མ་གཏོགས་པ་ཉིད་ནི༔ གཞན་དུ་ཡོད་པ་མ་ཡིན་ནོ༔ ཞེས་གསུངས་པ་ལྟར་རོ། །སེམས་དེ་ལ་གང་འདྲ་ཡོད་ཅེ་ན་ངོ་བོ་ཉིད་ལ་རྣམ་རྟོག་གསལ་ཙམ་རིག་ཙམ་རྒྱུན་མི་འཆད་པ་སྟེ། དེ་ཡང་ཡུམ་བར་པ་ལས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་སེམས་ནི་ཕྱི་ན་ཡང་མེད། ནང་ན་ཡང་མེད། གང་དུའང་གནས་པ་མ་ཡིན་ནོ། །ཞེས་དང་། འདས་རྗེས་ལས། དང་པོ་སེམས་ཀྱི་བྱུང་བ་བཙལ། །མ་རྙེད་ཆོས་ཀྱི་སྐུ་དང་མཇལ། །བར་དུ་སེམས་ཀྱི་གནས་ས་བཙལ། །མ་རྙེད་ལོངས་སྤྱོད་རྫོགས་སྐུར་
འཕྲད། །ཐ་མ་སེམས་ཀྱི་འགྲོ་ས་བཙལ། །མ་རྙེད་སྤྲུལ་པའི་སྐུ་དང་འཕྲད། །དེ་ལྟར་སེམས་དེ་གློ་བུར་གྱི་དྲི་མས་བསྒྲིབས་པ་མ་གཏོགས་ཡེ་གདོད་མ་ནས་སངས་རྒྱས་པ་ཡིན་ཏེ། ཡེ་སངས་རྒྱས་གཅིག་ཡིན་པ་ལས། །ཡང་སངས་རྒྱས་གཅིག་འདོད་པ་འཁྲུལ། །ཞེས་སོ། །དེ་ཡང་སངས་རྒྱས་ཆོས་ཀྱི་སྐུ་དེ་སྟོང་པ་ཅང་མེད་རི་བོང་གི་རྭ་ལྟ་བུའམ། མུ་སྟེགས་ཆད་ལྟ་ལྟ་བུ་ནི་མ་ཡིན་ཏེ། རྫོགས་ཆེན་ལས། ཆོས་སྐུ་ཅི་ཡི་ངོ་བོར་མ་གྲུབ་པ། །སེམས་ཅན་ཤེས་རབ་ཆུང་བས་མེད་པར་གོ །ཞེས་གསུངས་པ་ལྟར། དངོས་པོ་གདོས་བཅས་སུ་མ་གྲུབ་ཀྱང་སྟོང་པའི་མདངས་མ་འགགས་པ་ལས་ངོ་བོ་སྐུ་རུ་བཞུགས། རང་བཞིན་འོད་དུ་བཞུགས། ཐུགས་རྗེ་ཟེར་གྱི་ཚུལ་དུ་བཞུགས། དེའི་རྩལ་ལས་ལོངས་སྤྱོད་རྫོགས་སྐུར་ཤར་ཏེ། སར་གནས་བྱང་སེམས་འཕགས་པའི་དོན་མཛད། སྤྲུལ་པའི་སྐུས་སེམས་ཅན་གྱི་དོན་མཛད་པ་འདི་ལ་
རྫོགས་ཆེན་ཡེ་གྲོལ་ཀློང་ཡངས་དགོངས་པ་ཞེས་བྱའོ། །སྐུ་གསུང་ཐུགས་ཀྱི་རྒྱ་དང་སྐལ་མེད་ལ་གསང་བས་དྷ་ཐིམ༔ ཞེས་སོ། །དབལ་བྲོ་སྔགས་འཆང་གི་ལུགས་སུ་ཟློག་སྒྲུབ་ཀྱི་སྐབས་སུ། །འདིར་གསོལ་ཀ་བསྐང་བ་རྒྱུན་གསོལ་གྱི་རིགས་ཐམས་ཅད་གསུང་པ་ལགས།། ༈ །།རྫོགས་པ་ཆེན་པོའི་རྗེས་ཐོབ་ཏུ་དྲག་པོའི་སྐུར་བཞེངས་པ་ནི། ཕྱིའི་སྟོང་ར་དེ་གྲོ་ལོད་སེང་གདོང་འཁྲིལ་སྦྱོར་ལ་དམིགས་ཏེ་དྲག་སྔགས་འདུས་པ་གཉིས་སྦྲེལ་བཟླས་ཤིང་གྲགས་སྟོང་སྔགས་ཀྱི་རང་སྒྲས། སྣང་བ་སྣོད་ཀྱི་འཇིག་རྟེན། སྲིད་པ་བཅུད་ཀྱི་སེམས་ཅན། འགྲོ་བ་རིགས་དྲུག་གི་དཀྱིལ་འཁོར། འདས་པ་དག་པའི་ཞིང་ཁམས་ཀྱི་གཟུགས་ཅན་གཟུགས་མེད་ཐམས་ཅད་མཚོ་ལ་ཁ་བ་བབས་པ་ལྟར་རང་ལ་བསྡུ་ཞིང་སྟོབས་བཅུའི་རྩལ་རྫོགས་པར་དམིགས། དེ་ནས་དྲག་པོར་གནས་བསྒྱུར་ལ། སྤྱི་བོའི་སྣང་མཐའ་གུར་དྲག་མེ་འཁྱིལ་སྤྱི་ལྟར་ལ་ཡུམ་ཕག་མོ་དམར་མོ་གྲི་
ཐོད་ཅན། མགྲིན་པའི་ཐུགས་རྗེ་ཆེན་པོ་རྟ་ཕག་འཁྲིལ་སྦྱོར་ཡབ་ཡུམ་གཉིས་ཀ་དམར་པོ། སྙིང་ཁའི་གུ་རུ་རྡོ་རྗེ་གྲོ་ལོད་ཡབ་ཡུམ་སྨུག་ནག །ལྟེ་བའི་ཡེ་ཤེས་མཚོ་རྒྱལ་རྡོ་རྗེ་དྲེགས་འཇོམས་དཔལ་འོག་མིན་ཀརྨའི་བླ་མ་སློབ་དཔོན་གྱི་ཞལ་རྒྱུན་ལ་རྡོ་རྗེ་གྲོོ་ལོད་སྤྱི་ལྟར་ལ་སྐུ་མདོག་ལྗང་ནག་སྒོམ་པ་ཡིན་གསུངས། འགའ་རེས་པདྨ་བཛྲ་དྲག་སྒྲུབ་མཐིང་ནག་ཞལ་གཅིག་ཕྱག་གཉིས་རྡོ་རྗེ་དང་དྲིལ་བུ་འཛིན་ཅིང་། རྡོ་རྗེ་རྩེ་མོ་ལས་མེ་ཕུང་བྱ་ཁྱུང་འཕྲོ་བ་ཡུམ་མཐིང་ནག་གྲི་ཐོད་ཅན་དང་འཁྲིལ་བ་དེ་བསྒོམ་པར་གསུངས། གསང་བའི་ཕྲིན་ལས་ཀྱི་ཞི་བསྙེན་སྐབས་ལྗང་གུ་དང་། དྲག་བསྙེན་སྐབས་མཐིང་ནག་ཏུ་བསྒྱུར་དགོས། མཆན། མགོན་པོ་ཏྲཀྴད་མཐིང་ནག་ཤིན་ཏུ་ཁྲོས་པ་ལས་ཀྱི་མཁའ་འགྲོ་ནག་མོ་གྲི་ཐོད་འཛིན་པ་དང་འཁྲིལ་བར་དམིགས་ལ་སྔགས་བཟླ། སྡེ་བརྒྱད་དམ་བཞག་གི་དམིགས་པ་གཞུང་ལྟར་སྐུ་ལས་ཡེ་ཤེས་ལྔའི་རང་བཞིན་འོད་ཟེར་ཁ་དོག་
ལྔའི་རྩེ་མོར་ཡེ་ཤེས་ཀྱི་མེ་རླུང་དམར་ནག་འཚུབས་མ་འུ་རུ་རུ་འབར་བའི་ཀློང་ནས་ཕྱག་མཚན་རྣམ་བཞི་གྲངས་མེད་པ་སེར་བ་ལྟར་འཁྲིགས་ཤིང་ཐོག་ལྟར་འབེབས་པས་སྡེ་བརྒྱད་སྤྱི་དང་། ཁྱད་པར་གང་གནོད་ལ་བསྡིག་པ་ཙམ་གྱིས་སྲོག་སྙིང་ཕུལ་ནས་དམ་ལ་གནས་པ་དང་། བཀའ་ལ་མི་ཉན་པར་ཐམས་ཅད་རྗེས་ཤུལ་མེད་པར་རྩྭ་སྦུར་མེས་བསྲེགས་པ་ལྟར་ཐལ་བ་བུན་གྱིས་སོང་བར་བསྒོམ། དེ་ཡང་སྐུ་ལས་མེ་དཔུང་ཕྱག་མཚན་སྤྲོས་པ་ཙམ་གྱིས་དབང་དུ་བསྡུས་ནས་དམ་ལ་བཞག་པར་བསྒོམས་པས། གཟུགས་ཅན་མི་དང་གཟུགས་མེད་ལྷ་འདྲེ་ཐམས་ཅད་དམ་པའི་ཆོས་སྒོར་ཞུགས་ནས་གྲོལ་བར་ཐེ་ཚོམ་མེད་དོ། །རྫོགས་ཆེན་ཐམས་ཅད་ཀྱི་སྙིང་པོ་གསང་བ་གནད་ཀྱི་ཞལ་གདམས་ཤོག་དྲིལ་ཟངས་ཀྱི་སྦུ་གུར་གཞུག་ནས་གོང་བའི་ཁུག་མར་སྦས་དགོས་ཞེས་ཤིན་ཏུ་བཀའ་རྒྱ་དམ་ཞིང་ཐུགས་རྩིས་ཆེ་བས་འབྲལ་སྤང་བྱའོ། བི་ཛ་ཡནྟུ། ཤུ་
བྷཾ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།