ཡེ་གསང་ཐུགས་གཏེར་ཟིན་བྲིས་ལས་ཛཾ་སེར་ནོར་སྒྲུབ་ཀྱི་སྒོམ་ཟིན་འདོད་རྒུའི་ཆར་འབེབས།
ཡེ་གསང་ཐུགས་གཏེར་ཟིན་བྲིས་ལས། ཛཾ་སེར་ནོར་སྒྲུབ་ཀྱི་སྒོམ་ཟིན་འདོད་རྒུའི་ཆར་འབེབས་ཞེས་བྱ་བ་བཞུགས་སོ། །
ན་མོ་གུ་རུ་རཏྣ་ཛཾ་བྷ་ལཱ་ཡ། གསང་རྒྱ་སྦས་རྒྱའི་ནོར་སྒྲུབ། ཛཾ་སེར་ཡིད་བཞིན་ནོར་བུ་བསམ་འཕེལ་གྱི་སྒོམ་རིམ་ལ། སྤྱིར་བཏང་ཡོངས་གྲགས་སུ་ཏྲཀྴད་ཀྱི་བསྐང་བ་གྲུབ་ཟིན་པའི་རྗེས་སུ་ཛཾ་སེར་འདོན་དགོས་པ་ཡིན་ཀྱང་། དཔལ་བྲོ་སྔགས་འཆང་གི་ལུགས་སུ་ཏྲཀྴད་གཏོར་འབུལ་རྗེས་བསྐང་བའི་སྔོན་དུ་ཛཾ་སེར་གསུངས་པ་ཡིན་གང་བྱས་ཁྱད་པར་ཆེར་མེད་ཀྱང་། བསྐང་བ་རྩ་གསུམ་སྤྱི་བསྐང་ཡིན་པས། དེའི་སྔོན་དུ་སོང་བའི་ལྷ་ཚོགས་ཐམས་ཅད་ཀྱི་ཐུགས་དམ་
བསྐང་ཕྱིར་ཛཾ་སེར་སྔོན་དང་། སྐོང་བ་རྗེས་ནས་འདོན་ན་ལེགས། ཛཾ་སེར་མི་འདོན་པའི་ལུགས་ཡོད་ཀྱང་ངེས་པར་འདོན་དགོས། སྐོང་བའི་སྔོན་རྗེས་གང་དུ་འདོན་ཀྱང་། བདག་བསྐྱེད་གསང་བདག་གནས་འགྱུར་གྱིས་ཚུལ་དུ་གུ་རུ་བླ་མ་ནོར་ལྷ་རྡོ་རྗེ་དྲག་པོ་རྩལ་ཡབ་ཡུམ་གཞུང་གསལ་ལྟར་སྒོམ། །འབྲུ་གསུམ་ནི་སྐུ་གསུམ་ཡེ་ནས་རང་ལ་གནས་པ་གཞི་རྫོགས་ལྷུན་གྲུབ་ཏུ་ཤེས་པས། མ་འཁྲུལ་པའི་ཤེས་པ་སྐད་ཅིག་མའི་རང་ངོ་ལ་དྲན་པ་ཙམ་གྱིས་རྫོགས་པའི་
ཚུལ་དུ། ཡོན་ཏན་ཐམས་ཅད་ཀྱི་འབྱུང་གནས་ཡིན་པས་གུ་རུ་སྟེ་བླ་མ། སྐུ་ལ་སྐྱེ་འཆི་བགྲེས་རྒུད་མེད་པས་རྡོ་རྗེའི་ཐུགས་རྒྱུད་སྙིང་རྗེ་ཆེན་པོས་ཡོངས་སུ་གང་ཡང་གདུལ་བྱ་གཞན་སྣང་དུ་ཕྲིན་ལས་དྲག་པོའི་རྩལ་ཏེ་ཨོ་རྒྱན་ཆེན་པོའི་གསང་བའི་མཚན་ནོ། །གཞན་རྒྱན་ཆ་ལུགས་དྲག་པོ་རྩལ་གཞུང་དང་འདྲ་ཞིང་འདི་སྐབས་ཁ་ཊྭཱྃ་མི་དགོས། གཡོན་ཐོད་པ་ལྷ་དང་མི་དང་ཀླུའི་ནོར་བུས་བཀང་བའི་དབུས་སུ་འདོད་པ་འཇོ་བའི་བུམ་པ་བཟང་པོ་ཡིད་བཞིན་གྱི་ནོར་བུ་བསམ་འཕེལ་དབང་གི་རྒྱལ་པོས་ཁ་བརྒྱན་པ། ཡུམ་ཡེ་ཤེས་མཚོ་རྒྱལ་དཀར་ལ་དམར་བའི་མདངས་ལྡན། ལོངས་སྤྱོད་རྫོགས་སྐུའི་ཆ་ལུགས་མདའ་དར་ཚེ་བུམ་འཛིན་ཅིང་འཁྲིལ་བ། པདྨ་ཉི་མ་ཟླ་བའི་གདན་ལ་དྭངས་གསལ་འོད་ཀྱི་རང་བཞིན་དུ་གསལ་བ་ནི། བདག་བསྐྱེད་བླ་མ་ནོར་ལྷའི་དཀྱིལ་འཁོར་རོ། །བླ་མ་གུ་རུ་པདྨ་འབྱུང་གནས་ཀྱི་ཡོན་ཏན་འདོད་རྒུ་ལྷུན་གྲུབ་ཀྱི་རང་རྩལ་ལས།
མདུན་བསྐྱེད་གྲོ་ལོད་ཀྱི་གཡས་སུ་པདྨ་ཉི་མ་ཟླ་བའི་གདན་ལ་ཡི་གེ་ཛཾ་དང་བྷྲཱུྃ་གསེར་གྱི་མདོག་ཅན་ཉི་མ་ལྟར་འབར་བ་ལས་འོད་འཕྲོས་འཕགས་པ་མཆོད་སེམས་ཅན་གྱི་དོན་བྱས་ཚུར་འདུས་ཛཾ་ལས་ཡབ་དང་བྷྲཱུྃ་ལས་ཡུམ་དུ་སྣང་བ་ནི། ཛཾ་བྷ་ལྷ་གཙོ་མའི་ཁ་དོག་ཅན་ཏེ་རབ་ཏུ་གསལ་ཞིང་འོད་ཟེར་འབར་བའོ། །མཚན་བོད་སྐད་དུ་བསྒྱུར་དུས་འཕགས་པ་རྨུག་འཛིན་ཅེས་བྱ་སྟེ། ཐུགས་སྙིང་རྗེ་ཆེན་པོས་སེམས་ཅན་ཐམས་ཅད་མི་འདོར་བར་འཛིན་པའི་དོན་ཏོ། །ཞི་འཛུམ་བརྗིད་པའི་ཉམས་ལྡན་དབུ་སྐྲ་རལ་པ་ཐོར་ཚུགས་སུ་བཅིངས་པའི་རྩེར་ཡིད་བཞིན་ནོར་བུ་དགོས་འདོད་ཀུན་འབྱུང་གིས་སྤྲས་པ། རིན་པོ་ཆེ་ཡི་དབུ་རྒྱན་སོགས་རིན་པོ་ཆེའི་རྒྱན་བརྒྱད་དང་ལྡན་པ། ཕྱག་གཡས་དཔག་བསམ་ཤིང་ཐོག་ལོ་འདབ་རྒྱས་པ་མཆོག་སྦྱིན་གྱི་ཕྱག་རྒྱས་པུས་མོ་གཡས་པའི་སྟེང་དུ་བསྣམས་པ། ཆོས་བདག་ཀརྨ་འགྱུར་མེད་ཀྱི་ཕྱག་བྲིས་ཆོས་
འཆད་ཕྱག་རྒྱས་ཐུགས་ཀར་བསྣམས་པ་བྲིས་འདུག་ཀྱང་སྔ་མ་ཡོངས་གྲགས་སོ། །ཤིང་ཐོག་བི་ཛ་པུ་ར་ཀ་ཞེས་ས་བོན་གྱིས་གང་བ་སྟེ། ལ་ལས་སེའུ་འབྲུ་ཡིན་ཟེར་བ་དང་། ལ་ལས་ཤིང་མ་རུ་ལུང་གའི་འབྲས་བུ་ཡིན་ཟེར་བ་དང་། བ་ལུང་ཁ་ལུང་ཏེ་ཡུལ་སྐང་བ་མར་ལུ་ལུ་སྟེ། འོལ་མོ་སེར་འདོད་པ་སོགས་ངོས་འཛིན་མི་འདྲ་བ་མང་དུ་འདུག་ཀྱང་འདིར་ནི་དཔག་བསམ་ཤིང་གི་ལྕུག་ཕྲན་ལོ་མ་འབྲས་བུ་དང་བཅས་པའོ། །ཕྱག་གཡོན་གཏེར་གྱི་ན་གུ་ལ་ཟུར་ཆག་པ་ནཻའུ་ལེ་སྟེ་ནོར་བུ་ཟད་མེད་དུ་སྐྱུགས་པས་ནོར་ཕྱུག་དང་ནོར་རྐྱལ་ཡང་ཟེར་བའོ། ཁ་དོག་ཀྱང་སྣ་ལྔ་ཡོད་པར་མངོན་ཀྱང་འདིར་ནི་སེར་སྐྱའོ། །འགའ་ཞིག་གིས་སྲེ་མང་དུ་འདོད་ཀྱང་བརྟགས་པའོ། །འདིའི་ཕྱེད་སྐྱིལ་ནི་གཡས་པ་ཕྱི་དང་གཡོན་པ་ནང་དུ་བྱས་པའོ། །དེའི་པང་དུ་ནོར་རྒྱུན་མ་སེར་མོ་གཡས་འབྲས་སྙི་གདེང་སྟབས་སུ་འཛིན་ཅིང་། གཡོན་གཏེར་གྱི་ནེའུ་ལེ་ཡབ་ཀྱི་མགུལ་དུ་
འཁྱུང་ནས་འཛིན་པ། ཞབས་གཉིས་ཡབ་ཀྱི་སྐེད་ལ་འཁྱུད་ཅིང་ལོང་བུ་གཡོན་སྟེང་གཡས་འོག་ཏུ་བྱས་ཤིང་བསྣོལ་བ། །ཡབ་ཡུམ་གཉིས་ཀ་ལོངས་སྤྱོད་རྫོགས་པའི་རྒྱན་བཅུ་གསུམ་དང་ལྡན་པའོ། །སྤྱི་གཙུག་རལ་པའི་ཐོར་ཚུག་གི་རྩེར་འོད་ཀྱི་ཐིག་ལེའི་ཀློང་དུ་རིགས་ཀྱི་བདག་པོ་རིན་ཆེན་འབྱུང་ལྡན་སེར་པོ་གཡས་མཆོག་སྦྱིན་ཕྱག་རྒྱ་གཡོན་མཉམ་བཞག་གི་རིན་པོ་ཆེ་འབར་བ་བསྣམས་པ། ཡུམ་མ་མཱ་ཀིཾ་སེར་མོ་གཡས་ཨུཏྤལ་སེར་པོ་དང་གཡོན་རིན་པོ་ཆེ་འཛིན་ཅིང་འཁྱུད་པ་གཉིས་ཀ་ལོངས་སྐུའི་རྒྱན་རྫོགས་སོ། །བྲིས་རྒྱུན་ལ་ལར་དབུ་སྐྲ་རལ་པའི་ཁྲོད་དུ་རིན་འབྱུང་བྲིས་པའང་མཐོང་ངོ་། །བཟླས་དམིགས་ནི། ཡབ་ཛཾ་བྷ་སེར་པོའི་ཐུགས་ཀར་ནོར་བུ་རིན་པོ་ཆེ་གསེར་མདོག་གཟི་འོད་འབར་བའི་ལྟེ་བར་བྷྲཱུཾ། དེའི་མཐར་མདུན་ནས་བརྩམས་ཏེ་ཞལ་ངོ་ཕྱི་ལ་བསྟན་ནས། ཨོཾ་ཛཾ་ལུཾ་སོགས་སྔགས་ཕྲེང་སེར་པོ་གཡོན་དུ་བཀོད་པ་གཡས་
སུ་འཁོར་བར་བསྒོམས་ལ་བཟླས་པ་བྱ། སྔགས་ཚན་དང་པོ་ཛཾ་ལྷ་ཡབ་ཀྱི་སྔགས། གཉིས་པ་ཡུམ་གྱི་སྔགས། གསུམ་པ་ལས་སྦྱོར་གྱི་སྔགས་ཡིན་ལ་ཛཾ་ལྷ་ཕོ་དགུ་མོ་དགུའི་སྔགས་ཀྱང་འདི་ལ་འདུས་སོ། །དང་པོ་ལྷ་སྐུ་དང་སྔགས་ཕྲེང་གསལ་བཏབ་ལ་བཟླས་པ་བྱ། །དེ་ནས་སྔགས་ཕྲེང་སྒྲ་དང་བཅས་པ་ལ་སེམས་གཏད་དེ་བཟླས་པ་བྱ། དེ་ནས་སྔགས་སྒྲ་བཅས་གཡས་སུ་དང་པོ་དལ་བུ་དང་དེ་ནས་མྱུར་བར་འཁོར་བ་ལ་དམིགས་ཏེ་བཟླས། དེ་ནས་བདག་བསྐྱེད་བླ་མ་ནོར་ལྷའི་ཐུགས་སྲོག་ལས་འོད་ཟེར་དམར་སེར་ཉི་མའི་འོད་ལྟར་གསལ་ཞིང་འཚེར་བ་འཕྲོས། མདུན་བསྐྱེད་ཛཾ་སེར་ཐུགས་ཀའི་སྲོག་ཡིག་དང་སྔགས་འཁོར་ལ་ཕོག་པས་སྔོན་གྱི་ཐུགས་དམ་རྒྱུད་བསྐུལ་ཞིང་དམ་ཚིག་རྗེས་སུ་དྲན་པའི་སྔགས་ཕྲེང་ལས་འོད་ཟེར་སེར་པོ་འཕྲོས་པས་ཕྱོགས་བཅུའི་ཞིང་ཁམས་རབ་འབྱམས་ཐམས་ཅད་དང་། བྱང་ཕྱོགས་ལྕང་ལོ་ཅན་ནས་ཛཾ་ལྷ་ཡབ་
ཡུམ་སྲས་འཁོར་གྱི་ཚོགས་ཐམས་ཅད་ཆར་བབ་པ་ལྟར་སྤྱན་དྲངས་ནས་མདུན་བསྐྱེད་ཛཾ་ལྷ་ཡབ་ཡུམ་ལ་ཡང་ཡང་བསྟིམས་པའི་སྔགས་བཟླས་པས། བདག་བསྐྱེད་ཐུགས་ཀའི་འོད་ཀྱི་མདུན་བསྐྱེད་ཐུགས་རྒྱུད་བསྐུལ། མདུན་བསྐྱེད་ཐུགས་ཀའི་འོད་ཀྱིས་ཞིང་ཁམས་རབ་འབྱམས་མཐའ་ཡས་པ་ནས་དངོས་གྲུབ་ཐམས་ཅད་བསྡུས་ནས། སྟེང་གི་ཕྱོགས་ནས་སངས་རྒྱས། བྱང་སེམས་ལྷ་ཀླུ་མི་ཡི་ནོར་བུ་རིན་པོ་ཆེའི་ཆར་བབས་པས་གནས་ཁང་བང་མཛོད་ཡུལ་ཁམས་ཐམས་ཅད་ཁེངས། བར་ནས་ཟས་གོས་ལོངས་སྤྱོད་སྤྲིན་ལྟར་གཏིབས་པས་གོ་མཚམས་མེད་པར་གཏམས། འོག་ནས་འདོད་རྒུའི་དཔལ་འབྱོར་གནས་མལ་ཁང་ཁྱིམ་འབྲུ་བཅུད་རྟ་ཕྱུགས་རྐང་འགྲོ་ནོར་ཕྱུགས་ཀྱི་ཚོགས་རྣམས་ས་རླངས་བཞིན་རྡོལ་ཞིང་། རྒྱ་མཚོ་བཞིན་དུ་འཁྱིལ་ནས་སེམས་ཅན་ཐམས་ཅད་དབུལ་ཕོངས་ཀྱི་སྡུག་བསྔལ་དང་བྲལ་ནས་ཟད་པ་མེད་པའི་
གཏེར་ལ་ལོངས་སྤྱོད་ཅིང་མངའ་བརྙེས་ནས། སྦྱིན་པའི་ཕར་ཕྱིན་རྫོགས་པར་དམིགས་ལ་བཟླས་པ་བྱ། དམིགས་པ་ཇི་ཙམ་དུ་རྒྱ་ཆེན་ཚོགས་གཉིས་རྫོགས་པས་ཕྲིན་ལས་ཤིན་ཏུ་མྱུར་རོ། །འདིའི་སྒྲུབ་རྟེན་དུ་སྲོག་འཁོར་ངེས་པར་དགོས་པ་རིག་འཛིན་རྣམ་རྒྱལ་རྡོ་རྗེའི་ཞལ་རྒྱུན་ལས་ཐོས་ཞེས་ཨོ་ཊཱི་ཡ་ན་ནཱ་ཐའི་ཞལ་ལས་ཐོས། ཙཀྲ་ནི་རླུང་འཁོར་བྲི་ཐབས་མི་འགྱུར་རྡོ་རྗེའི་ཞལ་ལུང་དང་དཔེའུ་རིས་ལྟར་རོ། །རྫས་ནི་རིན་པོ་ཆེ་སྣ་ལྔ། དར་སྣ། ཟས་སྣ། སྨན་སྣ། འབྲུ་སྣ། རྟ་ཕྱུགས་ཀྱི་སྤུ་སྣ་ཚོགས་གཡང་རྫས་ཀྱི་རིགས་རྣམས་གཞུག་ཅིང་། དར་སེར་པོས་དྲིལ་ལ་བཞུགས་སུ་གསོལ། སྐུ་བརྙན་སྐུ་གཟུགས་ཙཀླི། གསུང་རྟེན་ཙཀྲ། ཐུགས་རྟེན་ཕྱག་མཚན་བྲིས་འབུར་གང་འོས། ཡོན་ཏན་གྱི་རྟེན་གཏོར་མ། ཕྲིན་ལས་ཀྱི་རྟེན་གཏོར་གདན་དཀྱིལ་འཁོར་གུར་གུམ་གྱིས་བྲིས་པའམ། བྱུགས་པའོ། ཨཱཀྵ་རའི་ཞལ་ཤེས་གཅིག་བླ་མའི་ཐུགས་ལ་གབ་བོ། །
བསྙེན་པའི་མཐར་གཞུང་ལྟར་མཆོད་བསྟོད་བྱའོ། །ཡང་ལ་ལའི་ཕྱག་བཞེས་སུ། །བསྙེན་དམིགས་མཆོད་བསྟོད་ཀྱི་མཐར་ཕྱིར་འཐེན་པའི་ལུགས་ཡོད་ཀྱང་། ད་ལྟ་ཡོངས་གྲགས་སི་ཏུ་རིན་པོ་ཆེ་པདྨ་ཉིན་བྱེད་ཀྱིས་མཛད་པའི་ཟིན་བྲིས་ལྟར་རོ། །གཞུང་གི་ཡིག་ཆུང་དུ། དེ་ནས་གཏོར་མ་འབུལ་བ་ནི༔ མཆོད་པ་བྱིན་རླབས་གཞུང་དུ་གསལ༔ ཞེས་གསུངས་པ་ལྟར་གོང་དུ་བསྒོམས་པའི་བདག་མདུན་དམ་ཡེ་དབྱེར་མེད་དུ་ཤེས་པས་བཟླས་པ་བྱ་ཞིང་། བྱིན་རླབས་ནི། རྩ་ཆིངས་བྱིན་རླབས་ཀྱིས་འཐུས་པར་ཕྱག་བཞེས་སུ་མཛད་ཅིང་། གཏོར་མགྲོན་གསར་དུ་ཡང་སྤྱན་འདྲེན་ཅིང་། གཏོར་མ་འབུལ་བ་ནི་བསྙེན་མཐར་གཏོར་སྔགས་བཏགས་པས་གཏོར་མ་འབུལ་བ་ཡིན་ཏེ། ད་ལྟ་ལག་ལེན་དུ་གོང་གཏོར་ཛཾ་སེར་གཏོར་མའི་དྲུང་དུ་དཀར་གཏོར་རེ་འབུལ་བ་ཡིན་པས་བསྙེན་སྔགས་ལ་གཏོར་སྔགས་བཏགས་པ་ལན་བདུན་ལྔ་གསུམ་སོགས་ཀྱིས་
ཕུལ་ན་ལེགས་ཀྱང་། ད་ལྟར་གཅིག་ལས་གསུང་སྲོལ་མི་སྣང་། མཐར་ཨཱརྒྷཾ་སོགས་ཀྱིས་མཆོད་ལ། ཧཱུྃ། རྒྱལ་བ་རབ་འབྱམས་སོགས་ཀྱིས་བསྟོད་པ་བྱའོ། སརྦ་སིདྡྷི་ཛ་ཡནྟུ།། ༈ །།མཁོ་རྒུའི་ལོངས་སྤྱོད་འཛོམས་ཀྱང་མ་བསགས་ཤིང་། །འདོད་ཡོན་འཁོར་མང་ཚོགས་ཀྱང་མ་ཞེན་པར། །བསླབ་གསུམ་སྡེ་སྣོད་རིག་པའི་བང་མཛོད་དེ། །སྤོང་དང་ཀློག་པའི་སྙིང་གི་དབུས་སུ་བསྐྱིལ། །ཅེས་པ་འདིའང་རྫོགས་ཆེན་དཔོན་སློབ་ཀརྨ་ངེས་དོན་གསུང་རབ་བསྟན་པའི་རྒྱལ་མཚན་དུ་འབོད་པ་དེས་ཐུན་སེང་ཞིག་ལ་མཁའ་ལྡིང་ཕུག་ཏུ་བྲིས་པ་དགེ་ལེགས་འཕེལ།། །།སརྦ་མངྒ་ལཾ།། །།